Андрей Борисов

Не мни, благоразумный читателю, яко безсловесно суть наше состояние и по порицанию нынешних новых учителей пребываем мы в крайнем невежестве и неразумии о истинней православней вере. Не тако, не тако суть, яко они пишют и глаголют и нарицают нас неправо противниками святей апостольстей Церкви, раздорниками и расколниками. Не суть бо мы раздорници и расколници православныя веры, но есть сущия тоя чада и истиннии послушницы. И не от невежества огражены мы в вере, но от премудрых учителей укреплены, и не простых, но освященных, яковы Быша Павел, святый епископ Коломенский,[2322] Афоний, митрополит Новгородский,[2323] Никанорь, архимандрит Соловецкий,[2324] и премудрый Герасим, зовомый Фирсов, Соловецкий, о егоже разуме доволно видети и разумети всякому можно из справедливаго его сложения о древнем перстосложении в крестнем знаменовании.[2325] Такожде множество протопопов и честных иереов, диаконов и благоговейных иноков не точию наше древнее святое содержание словами и единым писанием утвердиша, но и кровми своими страдалчески оное запечатлеша.

Последи же сих не неразумии Быша и премудрии древняго благочестия наши учителие, преславнии самобратия Андрей и Симеон Дионисиевичи, о ихже премудрости и разуме засвидетельствует неложно сочиненная ими во оправдание древлецерковнаго содержания противу вопросов иеромонаха Неофита премудрая книга, нарицаемая Поморския ответы.[2326] Мнози же и способствующии им единосогласныя, ови их ученици, ови с ними бывшие единоместные жители, такожде неоскудни Быша, яко во внешнем, тако и в духовней наказании. Каковый быль и любомудрый он книгочитатель Леонтий Федосеевичь,[2327] и многолетно поживший в духовном детельном и в внешнем умозрителном наказании старейший Трифон Петровичь[2328] (засвидетельствуемы некоим ученым человеком Кондратовичем подписанием своеручным), и ведущий обширность Святаго Писания честнейший изограф Даниил Матфеевичь.[2329] Были же и есть и инные ученые в семь учением просиявшем святом месте многие изрядные люди, и неложно во искусности наук, яко грамматикии, риторики, поэтики, логики, диалектики, пения, арефметики, геометрии, медикии, философии и отчасти богословии, непостыдными по нашему убожеству и тесноте жития нарещися могут. Егда бо аз многия разных оных ученых мужей увидел и получил разные ученые и духовныя сложения,[2330] тогда при удивлении гласно нарек сие место староверческия Афины.[2331] Ибо непогрешно: елико преславны суть противу прочих стран за учение славные в поднебесней Афины, толико не менше противу всех староверческих мест преславно есть за разные ручьные и разумные художества сие славное в России староверческое место.

А особливо за непременное имение древлецерковнаго благочестия, колико оно есть преславно, яко не точию всей России ведомо, но во многих и иностранных землях знаемо суть, и многия от удивления принуждаемы глаголати про сие сияющее благочестием святое место, что оно не иным ким в последнее сие горкоплачевное время основано и утверждено, как точию всевышнею Божескою властию. Ибо колики на сей древлецерковный благочестивый корабль воздвизалися от бесов и новолюбителей превеликия волны,[2332] но точию потопити его никако не возмогоша, но яко приражаемы²⁸⁵⁰ Быша к твердому камени и в великом шуме по подобию водяные пены в ничтожество претворяхуся. И от сего непогрешно дознаваемо есть, яко место сие имеет некий невидимый о себе всесилный промысл.

Что же, благочестивый читателю, не возможеши ты отискати в сем пространнейшей премудростию, святостию и благочестием честнейшем вертограде, в богооснованнем и им соблюдаемем сем благочестивем месте! Аще восхощеши ведети или и видети в деятелней святей философии искусных мужей, то премного обрящеши. Знатнейшия же во оном любомудрии первии места сего блаженныя памяти настоятели колико провозсияша всеми законными имствы²⁸⁵¹: отец Даниил Викуличь коль облагодатствован был законною верховнейшею из добродетелей – любовию, свидетель сему неложный – многолюдное им (привлецающее их к себе оною любовию) собрание. Или восхощеши поискати вышеестественнаго предрагаго девства красоту, увидиши и сию во многих светлеющуся и непогрешно оную до конца исправно соблюдших. Торжествуют бо оною достохвално и вси онии первоначалныя честнейшия отци, да и прочий мнози во оныя дражайших венцах весело ликовствуют. Еда хощеши буйством прикрытую мудрость уведети, веждь, яко и сих доволно суть Быша в сем пребогатом добродетелми месте, да и толико инные из сих провозсияша, яко и тайны человеческия ведаша и многия многим оные предрицаша. Но аще всех разными преблагодатными дарованиями обогащенных достохвалных преблаженных мужей описывати восхощу, постигнет мя лето²⁸⁵² повести деющи о них.

Но ныне еще о честнейших творителех догматическия книги сея мало нечто имею в достоблаженную им честь и безсмертную память предъявити вашему любомудрию: блаженныя памяти премудрыя и искусныя в внешнем и духовнем наказании отцы Андрей Дионисиевичь и единородный его брать Симеон Дионисиевичь, такожде и прочий диспутствующии с ними Трифон Петрович, Леонтий Федосеевичь[2333] не точию в зрителном едином любомудрии достаточество имели, но множае и детелным обогащены были, свойственныя же главныя дарования весма в них порознь сии процветали.

Андрей Дионисиевичь яко от природы зело естественно был остроумен, тако и от учебнаго художества еще наипаче остроумия силу учинил просвещеннейшую и дарование великое имел в нравоучении и пронзителной догадке. Знал он непогрешно, что по какому нраву како и поступати и чим оны утешити или оскорбити, и мог дознавати и в количестве мерности²⁸⁵³, елико утешения ли оскорбления чий нрав снести может и х каковому концу оный привести.

Симеон Дионисиевичь дарование имел немалое в памятствовании вещей и от сего мог на час или на два часа или хоша и более изоустно поучати.[2334] Еще же и в посте был немалодушен, такожде и во бденном пред Богом предстоянии зело тверд, целомудрие же толико во всем всегда наблюдайте, елико дыхаше. И вся его блаженная жизнь в воздержании и честнем любомудрии, в плаче и многоскорбнем страдании происхождаше. Ибо не точию он единым словесным наказанием благочестие удостоверяше, но егда прииде случай напастный во время поимки его в Новеграде,[2335] такожде и во время бывшей в семь месте каммисии по важному и зело страшному доносу,[2336] тогда он толь мужествен показовашеся в своем учении при самом лютом страдании, что «аще бы, – глаголаше, – и смертию мене казнили, никогдаже святаго благочестия отвратити возмогли».

Трифон Петровичь ведением Писания, крепким житием и мужеством яко в посте, молитве и уединении и во тщании внешняго наказания неоскуден познавашеся.

Леонтий же Федосеевичь при внешнем наказании и разуме Божественнаго Писания такожде достаточно ведаше и зело в догадках затейливых каких подлогов прозорлив бяше. Сего пронзителством разсмотреся лукавое злохитрство Питирима Нижегородскаго в подлоге аки бы древлеписаннаго деяния соборнаго, о чесом доволно писано в 9-м ответе.[2337] И елико сия пречестнейшия мужи, паки о авторах сея книги глаголю, тщателно великия обыскания во учении имеяху, толико оныя и словесно повсегда со обыскателным благим любопрением светлейше изъясняху, а инныя любомудрый свои диспутации и писменно произвождаху, ис коих в незабытную их память и собрана сия любопремудрая (нареченная догматическая) книга. Ибо о самых первейших догматах православныя нашея христианския веры имеются в ней диспутателная и показателная сочинения: о превысочайшей святей богословии, о кресте, о крещении, о крестном знаменовании и благословении и прочих церковных таинствах и преданиах.

Еще аще с люботщателным любомудрием потщится кто из любителей древняго святаго благочестия тонкочастне испытати и неленостно оную прочитати, той, надеюсь, попремногу возблагодарит всевышняго Бога, яко в последнее такое горкоплачевное время не оставил нас презреных быти премудрыми учители, кои не невежеством утвержали древнее святое благочестие, но истинным ведением святаго яко Ветхаго, тако и Новаго закона писанием, о чесом неложно видети можно из нижеследующаго творения их премудраго – сего богодухновеннаго собрания. Буди же все сие в честь премудрому нашему Богу, всегда нами славимому в триех его святых Божественных ипостасех ныне и присно и во вся безконечныя веки. Аминь.

Честнейшая невеста Христова!

Колико пристойно есть девическому вашему полу упражнятися во учении премудрости, и колико свято и честно, почти и сказать не можно, ибо самая премудрость, по грамматике, в роде женском состоит, да и на святых иконах пишется святая Софиа (оное по-гречески, а по-руски будет Премудрость) девическим видом, аки бы вас, девиц суще, привлекая к себе в горячую любовь. Да и святая дева Екатерина великомученица колико в премудрости преуспела, яко многия философы посрамила верою возлюбленнаго своего Жениха.[2338] Такожде и святая девица Евгения, зело же к премудрости тщание великое имела.[2339] А и здешняя вашя святая бывшая игумения Соломониа Дионисиевна,[2340] яко знаменованием имени уподобляется всепремудрому Соломону,[2341] тако и в мудрости непременная бысть ему подражателница и из онаго в веце своем не преминула себе исплести неоцененно дражайший венец, который и поныне безсмертный пребывает. Буди и ты всем оным неотложною подражателницею и увенчай свое девичество неоцененною премудростию. Что онаго в жизни сей может быть приятнейши и дражайши: мудрость бо и по Священному Писанию самыя очи просвещает разумных,[2342] да еще ей и злоба никакая николиже одолети возможет.[2343] А премудрый Соломон толико ю возлюбил, яко предпочел высочайши несравненно паче злата и сребра и не просил у Бога ни царства, ни богатства, но точию пожелал мудрости. За что ему Господь Бог с премудростию дарствовал и царство, и богатство, да еще наградил его и безсмертною славою.[2344]

И от сего надобно думать, что всеконечно премудрость всепремудрому Богу есть угодна, за что он награждает любящих ю и в здешней веце предражайшим награждением. Колико же наградит в будущем и совершенно вас предпоставит пред святою Софиею, еще и ныне вами благоговейно покланяемою. Дружитеся с нею, дружитеся, глаголю, со святою Премудростию, лутчее всех суетных дружеств, почти и ныне всуе пред очима погибающих.

Егда же имамы дружитися с честною Премудростию, то она нас научит, как совершенно боятися Бога: начало бо ея есть страх Божий.[2345] Потом научит познанию всех сотворенных Богом вещей, для того чтобы мы, познавши совершенно Божие творение, познали от онаго совершенно и самого Творца. Все бо он из небытия всепремудро в бытие привел, то праведно и от всего нашего научения долженствует, точию ему единому честь и слава.

А мы и сим будем доволни, что пребывали на сем свете во участи благости его.

Что же касается до чтения книг, то духовнопремудростное и внешнее учение безпрекословно есть оному вседобрый ключь, ибо сим всякое писание отпереть возможно, а без него како возможно кому дерзостно войти внутрь храма Священнаго Писания, ибо естества, существа, случаи, свойства, качества, количества никогдаже таковаго допустят наслаждатися совершенно пресладчайшия доброты Священнаго Писания. Но аще и натуралним разумом несколко восприимет благорачителствующий в чтении книг разумение, однако не столь справедливо и достоверно, наподобие как бы художник что зделал тупым ножем, а не весма преостро наточеным.

От учения же еще немалая полза есть и в сем, что где бы когда ученый не случился, везде он всякому будет с рукоделием своим (а наипаче умным) приятным, а притом где бы ученый не случился быть и в какое время, везде он находится з делным рукоделием. Ибо премудрость и в самом сне мало любителя своего оставляет. Всегда бо ищущий ю о всем разсуждает и всякой вещи сущую истинну находит. Егда же и печалныя приключения таковому когда случатся, то никогдаже от них при полезной мудрости бывый озлобитися может. Она любящаго ю поучает в печалех быть мужественну и крайне не сокрушатися. Такожде и в радостех чрезмерно не возноситися, но быти всегда и во всем умеренну. И такую учиняет человеку в жизни сей ползу и красоту, каковыя отинуды²⁸⁵⁴ и получить <не>возможно.

И сие то есть едино самое наше человеческое свойство, еже быть премудру: прочее же общественно²⁸⁵⁵ з животными вся имеем. И тако естьли желаем совершенным быти человеком, то непременно долженствует нам учитися премудрости. И с сею далеко превзыдем родов неразумных, да и вмале умалены будем (по апостолу) от ангел.[2346] Еже о, даждь, даждь нам, предвечная святая Премудрость, оную паче всего видимаго мира возлюбити и о ней неусыпное всегда рачение имети, и денно и нощно ею услаждатися, и всю ее на истинное тебе благоугождение производити, да и вечно с нею пред святым твоим престолом предстояти. Аминь.

Прискорбное поведание

Соглашаясь²⁸⁵⁶ из давных времен, вси мои несчастия, ныне совокупись, пресилным образом вкупе на мя вооружишася. О, коль есть преболезненно по пожарном еще случае[2347] почти на всяк день новыми оскорблениями уранятися! Что згорело, что пропало, что переломано и испорчено, бутто уже миновалось. Да еще не миновались вси болезни и печали. Было то вчера, да бутто и прошло, хотя и во весь наш век не пройдет память онаго.

Сидя мы при реце аще и Выговской, а не Вавилонской, но столко же плакахом, внегда помянути нам бывшую красоту нашего Сиона.[2348] И еще не могли отереть своих слез и промыть очи от курящагося окрест нас дыму, вдруг еще пахнул во очеса наши новый дым с преболезненным прахом ис пожару лексинскаго.[2349] Тогда, помутясь мысльми, аки б младенствовали, и точию друг друга вопрошали: что се? Что се над нами творится? Еда еще аггел, мучивый праведнаго Иова, испросил от Создателя существ новыми мучениями мучити нас[2350]? Еда еще новыя грозныя тучи подходят на нас? Потом, воздевая руки на небо, восклицали: о, премилостивый Боже, «буди имя твое благословено до века».[2351] Но что же по сем?

Часто на всякий день приходят вестники новыя и возвещают все преболезненное же и препечальное. Ин глаголет: пролияшася великия дожди на нивах наших и брегах, и тако кошеное сено инное унесло по рекам, а лежащее в стогах или зородах²⁸⁵⁷ много подмочило, которое замер<з>ши, все имать пропасти. А пожатый же или еще и растущий хлеб в полях то свалился на землю, согнивает, то, прорастая, паки сокрушается и в горесть прелагается. И тако пропадает вся наша о хлебе надежда: и чим весенное время питатися можем, чим поплатимся работникам, сугубую²⁸⁵⁸ против прочиих годов мзду требующим? Что же ни возработаша, все пропадает, и уже многое пропало!

Ин же возвещает, яко морския волны возсвирепеша и судно со всемь прибытком²⁸⁵⁹ в море погрузиша. Другий же, пришед, поведает: нашед превеликий медведь на стадо наше, идеже многия наши доилицы пасутся, многих поранил смертелно.

Ин же возвещает, что едет к нам со множеством народа капитан-исправник пролагати мимо обоих наших монастырей Выго-Лексинских почтовую дорогу ис Повенца города в город Архангельский,[2352] идеже от множества проезжающих всякаго чина многий случатся имать мятежь.

Паки ин взывает: вот скоро будут землемеры, нарочно посланныя из губернии размеривать наши монастыри и учинить новоманерный им немецкий план, по коему непременно строить надлежит, хотя и нисколько нам не сообразно ни по месту, ни по званию нашему и всем обстоятельствам нашим. Что уже все и содевается, но, сколко можно, от того отбиваемся.

Паки другий провозвещает, что скоро прегромкий указ воспоследует к нам, цепныя претяжкия нам за множество их деньги с нас брать за землю, вси реки, и вси же озера, и премножайшия пустыя топучия болота, которыми изобилуется весма наша пустыня несравненно паче всех прочиих потребных к житию человеческому изобилиев.

Вдруг по сем грянул престрашный еще гром, хотя и не от небеси, но з земли, но нам не менее онаго явился страшным и ужасным: требуют с нас по указу натурально двух салдатов и чтоб оныя неотменно со всем потребным обстоятелством были отправлены, хотя у нас точию развее и есть в годных к тому человека з два, кои великому больничных собранию услугуют²⁸⁶⁰ и древности всего общества спомоществуют, но и тех хотят обрать, невзирая на многих дряхлости сущую нищету.

Немощныя вопиют, что стужа и дожди последнюю их крепость измождают и сим ко гробам путь являют. Коснемся ли сечения дерев для возграждения им покоев, и тут воли несть. Аще и за землю ту довольныя деньги даются, на ней же ростет наш собственный лес, но да возмем во граде билет и да заплатим попенныя деньги – со всякаго древа денежную десятину. Получа ли сие с великою горестию, успокоимся ли? Несть еще, несть. Ныне повелевают да не рубить, а с декабря и до марта месяца в том трудитесь, да еще дайте и подписку, что, срубя древо, обрать вам вси щепы и вынести из лесу на пустое куда место, хотя б весма было далеко. Все ли сии противности преодолеем, почти состоящий премного выше наших сил, но за что ни хватимся потребное к строению, всего того несть: инное згорело, другое повредилось и испортилось.

Мелницы на Выгу от потопления речнаго сташа недействительны. На Лексе же и конечно обои погорели, пильная и хлебная. На их же основание понудихся аз туда прибыти и хождах тамо в печальных и многоскорбных мыслях по заваленых всяким погорелым дрязгом²⁸⁶¹ уских стезях, внезаапу левая моя нога бысть неподвижима с места и очютих в ней велию болезнь. От чего же? Усмотрел преболезненно очима, что она стоит на превеликом гвозде люто уже пронзенною и никакоже с него подвигнутися могущею, которой, лежа в траве остротою своею выспрь, якобы нарочно жадая крови моей. Да еще к вящшей болезни бысть он подобием жала или рыбной аки б уды²⁸⁶²: самой конец несколько призагбен книзу, то едва-едва во многое время с претяжкою болезнию мог с него ногу мою сняти и тут, облиясь кровию, пасти. Потом привлачен²⁸⁶³ бых в келию, сущу бо поздну уже того дня времени, где болезнь пресилно над всеми чювствами моими возторжествовала! Особливо же во всей нощи нудила мя от нестерпимости превеликаго лому забавлятся наедине едиными моими прегорчайшими слезами и приводить совершенно к тому же смертному отчаянию (по причине всех предписанных горкобедственных обстоятельств), якоже предлагала многотерпеливому Иову жена его, да возглаголю пред Богом глагол и лутчее умру.[2353]

Аз же, яко от сна, уныния онаго воспрянух и, знаменуясь крестным знамением, громко воскричах: «Аще Господу угодно, тако надо мною и да будет. Буди имя его святое благословено до века».[2354] Долго же от того и по се время изнемогаю, чего во отраду, уединяясь, и восписах вам се. И вы хотя не телесно, а духовно прийдите ко мне, болезненному всеми чювствами, и навестите мя аще и не телесно, но писменно, только не так яро, как друзья Иовлевы,[2355] ибо он был мужествен, не яко аз, малодушный, но и тут не устыдился проклинати в превеликой и нестерпимой горести своей день и нощь ту, в коих зачался и родился.[2356] Ныне-το аз знаю горести случай и каков он есть в качестве своем. О, Боже, сохрани! Не мене точию, но и всякаго, и чтоб миновать сего в вечности, весь бы надлежало наш век в слезах лежать пред престолом Божия славы. В сей жизни еще чаем и утешаемся надеждою, что негли будет и премена случаев, во оном же веце уже сицевой надежды нисколько имети не будем. И тако от сего наиболее родитися имать скорбь, и толь велика, что поистинне ныне нами и изрещися не может, еяже избежати потщимся творением добродетелей и омерзением греха и непрестанным словословием пресущественнаго Божияго существа.

Но коль мое несчастие и злополучие умножительно есть! В болезнях сущаго душевных и телесных, при великой воздушной ныне слякости, стужи и дождях всесоборно братьским великим притужением²⁸⁶⁴ понужден есмь по свирепым волнам Онежскаго езера ехать в Петрозаводский град для многих и зело обществу нашему нужных дел, в чем и по совести, и по делам никак отрещися не мог, предпочитая общество всему своему единственному благополучию и здравию. Хотя и с велиим нарушением собственнаго своего покоя, еже бы покой всему обществу доставить, великое благожелательство возымел, да и преслушать желающих покоя не похотел. Пусть мои скорби еще преумножат во мне болезни, да толко б Бог помог всем у нас скорбящим и болезнующим учинить отраду и умалить их скорбь. Все едина будет смерть, аще точию радя о едином себе или и о многих. Но как мы, живучи во обществах, многажды требуем и сами от общества жизненых спомоществовательств, следователно, должни и сами обществам возможным нам спомоществованием платить долг. Сие-то и будет согласно з законом священным и гражданским: с священным – по слову сему: Возлюбити ближняго своего, яко сам себе;[2357] з гражданским же – по сему: есть ли хощеш, чтоб творили тебе люди добро, то и ты всегда твори людям добро же. Кое взято совершенно из сего же: Аще хощете, да творят вам человецы, и вы творите им такожде.[2358] Великий и пренебесный наш Законодатель всем нам, верующим в него, премудро сие провозгласил, что и весь свет принимает за необходимый себе закон.

Тако аз, в болезнях и превеликих горестях моих размышляя и ободрясь, вдаюсь малому древу, которое мене понесет по водам чрез пучины и волны. Егда же вниду в желаемое пристанище, тогда учиню и новый прибавок поведанию сему.

Благодарное возответствиеза произносимыя приветствия

Весма должно бы мне в сие время или отсюль отлучиться, или, пребывши здесь, заткнуть воском от похвал ваших ушеси мои и сомжить очи мои от сияющагося во оных злата вашего,[2359] ибо происходимой²⁸⁶⁵ случай не соответствует нисколко ни делам, ни словесам, ни помышлениям моим. И естьли б я не уверен был в истинной простоте вашей, то б совершенно все производимое от вас в похвалу ныне мне по вас зачел за сущую риторскую иронию, то есть за ласкательное ми ваше посмеяние. Ибо «аз есмь, – по Псалмографу, – червь, а не человек», и точию состою в поношение прочиим человекам и уничижение всем людем,[2360] то мне ли приличествуют толь ваши превысокия и обширныя златыя похвалы сущему, поистинне сказать, земному праху и ничтожному червю.

Аще и возвеселяет и удивляет вас нечаянное по великой всеобщей нашей бывшей огненной скорби,[2361] верно самое истинное Божие благословение в являющихся чювственных вещах, за то сие не мне, смертному человеку, подобает вам приписывать толь приличьныя благодарности и нисколько не свойственныя почтительности, но надлежит всю честь и славу производить и произносить единому безсмертному и человеколюбивому преблагому Богу и им вдухновенным и подвижемым к милости нам милостивым нашим благодетелем.[2362] Видите вы сами, что все действуется наше возстановление единым точию его преестественным Божеским содействием, ибо он един в таковых великих печалех и несносных скорбех, каковы являлись нам, сущим есть помощником и утешителем. И ему мы единому по святому пророку Давыду, особливо по нашей настоящей бедности оставлены суть нищий:да един он нам, сирым, был и есть и будет праведно всегда совершенным помощником.[2363]

К нему же аз, грешный, состоя ныне в неначаемом²⁸⁶⁶ похвал ваших искушении, душевно сице о себе и о вас вопию: «О, всемогущий триипостасный Боже! Ты вся веси дела и словеса и помышления наша. Соблюди мя в час сей от неприятнаго благости твоей пустаго тщеславия и гордостнаго безумия. Произносящим же в простоте сердечьной мне, смертному, излишныя сии похвалы почти²⁸⁶⁷ в едино сие твое завещание: «Еже приемляй во имя праведниче мзду праведничю приемлет».[2364] На мне, на мне, Господи, буди вина, понеже несмь праведен, они же да не лишатся мзды своея, восприемлющи мя аки за созданнаго Тобою в преподобии и правде истиннаго человека».

Прочее же, аще ми являются труды ваши в произглашаемых ми похвал ваших златых блази²⁸⁶⁸ или ни, сие едино ведает мое сердце и душя. Но точию зря ваше благоговейное предстояние, учтивое ми общее ваше приветствие, умиляюсь духовно и радуюсь душевно, что не втуне аз посильныя мои труды о вас производил и произвожду, аще точию они могут нарещися трудами дельными, а не поделием²⁸⁶⁹. Сие да будет в пресущественном пресущественнаго существа праведном суде. И тако благодарю его, моего Создателя, что определена им жизнь моя посреде людей благоразумных, ученых и благодарных. А посем предъявляю и вам всем должную мою благодарность за вси ваши мне произведенныя в витийственном красотословии и в златых написаниих пребогатыя почтительности.

В конец же сего извещаю вам и о сем, что справедливо еще тяжких ми ваших похвал отревати не попускает врожденная почти сказать моя любовь к словесному любомудрию, которое весма желательно мне здесь распространить в жительствующих умах и устах, то сего-то ради много весма и претерпеваю разных противностей, происходящих от разных голов и умов.

Но что же вы все ныне ми воздаете, сие верно самем вам все воздатися имать, по словеси сему Спасителя нашего Исуса Христа: «Еже хощете, да творят вам человецы, и вы творите им такожде».[2365] Когда же вы самем Богом уставленное²⁸⁷⁰ в человецех чиноначалие тако предпочитаете и чествуете, убо и начальнии и подначальнии ваши самех вас равно толико же имут предпочитати и чествовати в славу и честь всепремудраго сего Законоположителя. Аминь.

Слово на память премудраго отца нашег киновиарха Андрея Дионисиевича

«Братие, поминайте наставники ваша, иже глаголаша вам слово Божие, ихже взирающе на скончание жительства, подражайте веру их».[2366] Словеса сия святаго апостола Павла, писанная ко Евреом в зачале 334-м.

Воспомянем ныне вкратце, о, боголюбивии слышателие, весь приснопамятный нам боголюбивейший собор, главных наших боголюбивейших пастырей и наставников. Во-первых, высокоосвященнаго пастыря Павла епископа Коломеньскаго,[2367] иже учение свое многимь страданиемь запечатле. По нем же и прочиих архиереов, иже в неприятии новых в Церковь узаконениев от Никона патриарха с прочиими изгнания, наругания и поносную²⁸⁷¹ смерть претерпеша, якоже и освященный Никанор архимандрит с соловецкою о Христе многочисленною братиею пострадаша.[2368] И инии мнозии протоиереи и иереи, архидиакони и диакони, четцы и певцы, иноки же и инокини, киих за множество постигнет мя в подробном исчислении целое лето²⁸⁷².

Но оставя грады и веси, ихже они обагриша своею за благоверие кровию, прейдем во едину нарицаемую Выгорецкую сию пустыню и воспомянем святонаселивших оную вместо зверей человеками Божиих человеков – прежних наших, глаголю, наставников и учителей, якоже великаго во отцех авву Корнилия с спостникомь его отцемь Виталиемь,[2369] иже вместо царьственнаго града Москвы дикую и неплодную сию пустыню возлюбиша, в ней до конца жизни своея пребыша. Но Кирила ли игумена[2370] прейдем²⁸⁷³, благочестия ради свой монастырь оставившаго и близ Выга реки поселившагося и в благоверии скончавшагося? Генадия ли отца Кочанова[2371] господина и пустыннаго нашего инока преминути можем? Или Антония и Епифания не воспомянем[2372] с прочиими многочисленными отцы, святопочившими в сей нашей, глаголю, пустыни? Киих такожде во многом исчислении многия надлежит препроводить нощеденства²⁸⁷⁴.

Поступим уже во глубину настоящаго нашего общежительства и узрим великое же и зде сочисление²⁸⁷⁵великих нашых отцев, священноиноков и иноков и простых подвижников. Отец Пафнутий, отец Феодосий, отец Серапион, отец Пахомий, ученик великаго отца Корнилия,[2373] и прочих множество. Не сии ли вси святопожиша во общебратском сем святом нашем киновийском великом доме и святопреставишася, ихже телеса благочестно положени суть во общей нашей Усповосприемной нарицаемой горе.

Еда же забудем свою киновию, тогда забудем благосердаго милостиваго и прекроткаго нашего Аарона, глаголю, киновиарха Даниила,[2374] иже собра вначале общебратство сие? Не воспомянем ли же и подобных Финеесам ревностию Исаакиев[2375] с прочиими? Или мимотещи можем подобных каменю веры слезоточащих присно наших Петров и Иоаннов?[2376] Еда же ли забвенна учиним и великаго подражателя во всем житии своем святому Предотечи, постника и исповедника нашего премудраго Симеона, единоутробнаго и возлюбленнаго брата виновному сего словосочинения?

Сии вси есть наши наставники и вси равно глаголаша нам слово Божие, вси единственно поучаху нас пребывати во истинной святой христианстей вере. Вси согласно заповедаша нам во всех святых таинствах веровати освящающий святый трисоставный крест Христов. Вси они непременяемо повелеша нам знаменатися десницею, якоже и Христос Спаситель благослови святыя апостолы при вознесении своем на небо; учаху благоверно слагати первый перст со двема последними в символе Святыя Троицы, указательный же перст и средний – в символ дву естеств во Христе. Вси единако²⁸⁷⁶ завещаша устами и рукописаниемь своимь в книгах и святых иконах вси сии святыя древности неизменно содержати и оным святое благоверие сочленневати, якоже Спасителево Исусово святое имя веровати и почитати за Спасителя и Исцелителя нашего, а не за равноухаго (по новым учителем),[2377] и святую аллилуйю сугубую воспевати, такожде крещение святое трипогружательное, седмипросфирное в литургии священнодействие и прочее все, иже старопечатныя книги в себе содержат.

Вси они помянутии пастыри и наставники наши во оном святодревнем благоверии свято и праведно пожиша и благочестиво во оном скончашася: овии естественною смертию, друзии же великими мучениями и огнем испечени Быша за неотменное святаго благоверия всеверное свое содержание. Убо довлеет нам повсегда взирати на толь превеликий облежащий нас облак премудрых и святых учителей и святое их жительство, гордость же всякую, по апостолу, отложьше, неизменно и несомненно подражати и святую веру их.[2378] Но где же наш Моисей, виновник словоглаголанию сему[2379]? Почто его не зрим во облаце сем? Почто не видим посреде толь светлаго и святаго святых собора? Почто благословеннаго от всех оных преблагословенных отец и премудрых учителей премудраго нашего отца и учителя Андрея Дионисьевича не слышим и не познаваем? Где он есть и куда отлучился? Или он отошел на Сионскую небесную гору по взятие вечных скрижалей[2380]? Или тамо в незнание всем погребен бысть ангелом? Или мы сами позабыли его вспомнить между воспоминаемыми нами незабвенными нашими учители и наставники?

О, пресладчайшиий наш Иерусалиме! Дражайший премудрый наставшие Андрее! Где еси ты и почто забвен еси от нас? Еда можем тя забыти незабвеннаго и не воспомянути ныне присно воспоминаемаго? Аще же забудем тебе вправду, то сами мы праведно за оное да забвени будем пред Господем Богом нашим.[2381] Ты собрал еси предсказанных²⁸⁷⁷ учителей многая о древнем святом благочестии учения воедино. Ты собрал со отцемь Данииломь и братство сие во единожителство. Ты оное укреплял и укрепил яко во святем благоверии, тако и в благом житии. Ты словеснейший²⁸⁷⁸ и словеснейшее искусство зде в безсловесной пустыни возрастил еси. Ты всякую благочинность и всякое вежество²⁸⁷⁹ в дикости и тернии преждебывшей на месте сем посеял еси. Мы же оное повсегда рукоятствуем²⁸⁸⁰. То возможно ли нам позабыть вси для всех благия труды твои, возможно ли учинить невоспомяновенным тя, зря обитель сию и услаждаясь премудрымь и благимь учениемь твоимь? Можно ли, глаголю, погребсти нам память твою в землю забвения, когда ты во устех всюду по России у многих обносишися? Несть можно, да и нелзя, да и никогда сего не будет! Ибо аще не похощем мы сами забвени быть пред Господем, то не имамы и тебе забыти никогдаже.

Но паки обращаю мое слово к вам, боголюбивии слышателие, и хощу воспоминаемаго ныне наставника нашего отца Андреа благое жителство и святое учение и христианское скончание вкратце, елико можно, предъявить, дабы мы, по завещанию апостольскому, взирающе присно на оное, подражали непременно и веру его.[2382]

Сей присновоспоминаемый нами преблаженный наш отец Андрей прирождения быв не простаго поселянскаго, но поколения преславнаго, из российских князей Мышецких, родися и воспитася близ Онега езера в жителстве²⁸⁸¹ Повенецком. Зело же естественною добротою одарен был от Создателя естеств, а наипаче умною остротою, которое все, благоразсуждением побеждаем, не восхоте преподати во услужение тленному сему миру, но вся отдаде тому же Единому, от негоже и начално взя. Предав вси свои телесныя и душевныя дарования в конечное услужение единому всепремудрому Богу. И тако миру сему во инных радоватися рек, сам отиде в Выгорецкую сию пустыню, прежде бе весма еще неплодна и телесными и душевными гобзованиями²⁸⁸², и в ней многолетно подвизаяся, присно всякое терние чюветвенное и разумное вычищая и вместо того насаждаше всякое душевное и телесное благопотребство: поля хлебом усыпаше, а в души человеческий из слова Божия семена полагаше, да во сто наипачее²⁸⁸³ плодоносие будет, сего желаше и о сем присно печашеся.

Еще же и грамматическим осмочастием,[2383] риторическим златословием и философистическим любомудрием всех всегда напаяше и сим нравы человеческий углаждаше²⁸⁸⁴. О, коликия труды преблаженный он пустыннолюбитель в пустынных сих чащах произвождаше! Толь мягкаго воспитания и почтеннаго прирождения и благосмышленнаго во всякия дела естества, вдав себе с младых лет на добровольное страдание, не на год или два или десять, но на весь свой век, каков бы он велик ни был, не чая уже во оный весь ничто себе получить из мирских наслаждениев, яко богатства, славы, пространнейших трапез и великих достоинств. Аще бе и зело к сему всеми жизненными своими свойствы пресвойствен обреташеся, но, яко единою²⁸⁸⁵ оплевав вся оная, даже до конца пребысть неподвижим в пустынных подвизех. Нежными руками лес сечаше, палы пряташе²⁸⁸⁶, нивы разчищаше, траву косою побиваше, класы серпом пожинаше. Да еще и вящьше десятилетнаго времене от недородов хлебных глад велий терпяше[2384] и хотящую разойтись от онаго братию укрепляше.

И якоже малая естеством птица славий²⁸⁸⁷ имеет в себе преестественно почти, а не по естеству своему крепкий и мужественный дух, которым она в свистании и разноличьном своем пении немалое увеселение чинит всем человеком, тако, ношаше и имя, знаменитое мужеству,[2385] мужественный отец Андрей аще и мягкаго воспитания по естеству бе, но преестественно душю мужественную в себе имяше, которою аки пресладчайший разумнословесный славий всех живущих в пустыни сей разными пении своими присно услаждаше, на егоже глас и из многих российских градов и весей премножество жителей сюда стекошася и насадиша разныя вертограды, скитожительная и пустынная своя поселения, между коими две превеликия киновии, аки между звезд два великия светила, солнце и луна, присно днем и нощию благочестивым своим светом всем непременяемо светят. Но без труда ли они создашася и возрастоша и толико, Божиим благословением озаряеми, укрепишася? Яко до сих времен колико пламенных огней, колико свирепых волн, колико престрашных бурь, колико ужасных наводнениев и раззорениев разных на искоренение их от рыкающаго левски не воздвизашеся, но за молитв насадивших и поныне Божиею, паки реку, благодатию укрепляеми суть.

Сей есть знак добрый и верный святаго богоугождения их. Не от себе же вымышляю се, но из многих житиев подобных им ктиторов святых довожду²⁸⁸⁸, иже засвидетельствовани суть всею христианскою Церковию, котории братию свою при конце своем увещаваху, глаголюще: «Се вам, братке, знамение·оставляем нашего богоугождения: аще по нас ничим не имать оскудевати обитель сия, то Господь Бог восприял ны есть в немерцающий свой свет».

Пусть из завидующих рекут о сучках слабости, да не силно оно будет для того, что у самех их целыя бревна вращаются во очесах.[2386] Чего же ради в польских странах распространяющаяся была обитель, в подобие нашей, но не пребывает до сих времен?[2387] Хотя бы и из суковатаго слабосилием древа устроилась, однако бы в вихрях, бурях и великих непогодах да пребывала. ²⁸⁸⁹Воспротивуречат пограничеством²⁸⁸⁹, но можно бы места изобрести по указам и в России и пресадить виноград на земли своей от чюждыя, но несть судеб таких. Уже бо «пяти Быша²⁸⁹⁰ и падоша»,[2388] и прочия со оною вси. Наша же, аще и многажды ко оному же низлагашеся, но за смирение и благоразумие свое паки помилована бысть от Бога: паки воставаше и исправляшеся и поныне востает и в благое присно исправляется. Сие же глаголю не уничижая тех и не радуясь падению ближняго, чего не даждь, Боже, и помыслити, но точию из действ оных праведныя доводы чиню и самую истинну разсуждаю и возвещаю.

Возглаголют ли еще против нашей великия их искушения, склонивший в падение, несть и се правда. Тии ли их искушения против здешних бурь тмочисленных сравнити возможно: полуденный или северный воздух, веющий часто от близ льдистаго окиана и познобляющий²⁸⁹¹ многолетно собою и мразомь всякое засеяние на полях и во городах. Се ли несть искушение? И многолетный ли оный глад несть искушение? Халтуриных ли и Круглых и прочих с ними преважныя и великия смутительныя доносы в Синод и к самем царским лицам[2389] несть искушение? Неофитовы ли приезды и каммисийския самыя разорительныя[2390] несть искушение? Пожары ли первоначальныя многия и нынеш<ния> великия[2391] несть искушение? Работы ли рудокопныя, на всех наложенныя,[2392] несть искушение? Злость ли огнедышущая во многих властех на сие место несть искушение? Про кого в самом важном и сильном месте изречены были словеса сия от сильных устен: «Надобно де для искоренения раскола в России непременно сперва искоренити и разорити самое их первоначальное змийское собрание». Александру диакону нижеградскому за что главу отсекли? Не за отвещания ли против Питирима?[2393] Почто же нашим наставникам не пресекли глав за толь пространныя отвещания против всего Синода? Почюдитеся вси скрегчющии²⁸⁹² зубами на сие святое место и уведите, что оно уже совершенно прошло сквозь огнь и воду и на самый конец света предопределено от судеб вышних войти в покой превожденною силою неограниченнаго существа. И когда сам есть Бог первоначальною виною месту сему, то престань всякое создание против Создателевой воли учинять противности: он всех сильных может низложить, смиренным же своим дать благодать.[2394]

Но камо аз от венечьника моего удалихся, иже верно за богоугодныя своя труды во оном торжествует? Камо устранихся от повести виновнаго удивлению? Почто еще не поведаю долго от премудрости премудраго и о вящьшем мужестве мужественнаго и о великом терпении вся Бога ради терпящаго? Кто из пустынножителей толико поверг себе во глубину чтения и ведения Священнаго Писания, аще не Андрей? Кто не удовляся²⁸⁹³ единем оным, но еще возжела и взыска и получи внешнюю премудрость, аще не Андрей? Кто в далечайшия малороссийския край для оной трудолюбне ездя и благопотщательне оную сюда привезе, аще не Андрей?[2395] Кто, привезя тую, разсеял зде по умам человеческим, аще не Андрей? Кто добре семена премудрости возделовая и рукояти²⁸⁹⁴ собирая, аще не Андрей? Всиего старанием умудришася зде, вси и венец учительства ему соплетоша и на верх блаженьства его возложиша.

Прехожду поведать о великодушии и знаменитом мужестве во многих действиях его. Еда²⁸⁹⁵ се не мужество, когда для нужд братских со многим народом чрез езеро на плоту пловяше и среди онаго превеликая буря воздвижеся, конец же еще вящшее трех верст бяше. А уже вода покры много и ²⁸⁹⁶все подлежащее древо²⁸⁹⁶, ветром же среваше²⁸⁹⁷ стоящих во глубину езера, да еще и сами от малодушия вси прочии зелно восколебашася и хотяху плот сим опровергнути, ибо случай учинися престрашный, являющий всем смерть. Но мужественный Андрей премужественно колебание глаголом уст своих в них останови и повеле друг о друга твердо держатися и молитву творити. Сам же, аки на кафедре, глубоко на мосту²⁸⁹⁸ в воде стояше в великом воздушном оном обуревании и прочиих мужеству и терпению учаше и на Бога всю надежду имети завещаваше. Людие же чювства свои обратиша вси на его вид и поучение и тако позабыта все страхование обстоящее²⁸⁹⁹, Дóндеже ветр сильно уже почти истопающих принесе их ко брегу, и спасошася от потопления.[2396] Не глаголю о таковом же мужестве во время бесовскаго явно на младых нахождения, иже за труды своя и вышеестественное награждение тогда получи – глас от образа Пресвятыя Богородицы.[2397] Оставляю великия досады и поругания от злобратии в братстве своем без всякаго личнаго смущения при многих терпящаго.[2398] Не поведаю и в разных тайных от братства поведаниях ему про великую крепость, яко бы в пучине было то великаго окиана. Премолчю и обуздание самое философистическое, в ярости яв<ляемое>, ибо никогдаже со гневом и зело достойным гнева возглагола. Мимоиду²⁹⁰⁰ препохвальнаго о нем сказания, еже благоразумием своим мог сюда, в пустыню, не точию все свое сродство, но и посторонных премногое множество знаменитых мужей на жестокое постничество привести и елико показывайте к самым немилостивым великия милости и творящим злое беззлобивое по праведном суде прощение.

Едино точию повем велие искушение, в Каргополе случившееся ему и добре терпением же оное позлатившаго. Зависть от препрения²⁹⁰¹ в вере им, наусти некоих восприяти Каиново безумие, кии нощию, яко новаго Авеля, аще и не постороннею, но естественноручною костию своею толико преблаженнаго отца главу пробиша, яко от сея болезни и во гроб затворися.[2399] Ибо по болезни великих трудов ответосочинения[2400] зело оное оскорби терпящаго присно ради спасения своего всякия скорби и печали от самыя юности даже до смертныя своея старости. С седмонадесятолетнаго бо времене возраста своего всегда тыя лобызаше и в пустыни сей и прочиих странах, егда ради общебратства сего странствуя бяше. Тридесять бо седмь лет препроводи во многих бедах и напастех, точию единымь именемь Божиимь услаждался и благовериемь в него утешаяся.

Егда же прехождаше от сотворения мира седмь тысящь двести тридесять осмое лето, тогда целомудрием, мудростию и мужеством позлащенный он наш преблагий наставник Андрей Дионисьевичь нача крепко главою изнемогати и толико болезнь превозможе²⁹⁰², яко помале и язык, точащий не пустыне сей токмо, но и всей России и прочим странам зарубежным златыя словеса, изсуши и связа немотованием²⁹⁰³. Но аще и не можаше уже устнами своими славити возжделенное имя Божие, то непременно всегда во слезах знаменашеся рукою пред образом Божиим, исповедая себе быти до последняго издыхания своего сущим служителем и поклонником Святей Единосущней и Неразделимей Троице и воплотившемуся от тоя неизреченно Христу Сыну Божию, прославляемому нами неслитно и неразделно во двух совершенных естествах. И в самый первый день перваго марта месяца, от негоже леточисленныя крузи исчитаются,[2401] в третий час с миром преставися, предав беспорочную свою душю в руце Божии. Чистое же его тело, сошедшеся изо всей пустыни и окрестных жилищь, премногое множество народа погребоша многоплачевно со псалмы и песньми во Усповосприемной прекрасней горе, верующе истинно вси, яко угодил есть он преподобием и правдою Господеви своему. Ибо совершенно, по святому апостолу, во всей своей жизни подвигом добрым подвизася, течение скончал и веру истинную православную соблюл. [2402] Прочее убо соблюлся ему непогрешимо, да и соблюдается еще совершеннейше в день он от Судии праведнаго венец правды.

Кто же нам помогает и ныне заграждати зломысленныя нам уста умносвирепых лвов, аще не они с мужественым Даниилом, распространившии в непроходимей сей пустыни посреде лютых зверей толь преславную и великую нашю киновию? Кто нам и от новых Халтуриных и Круглых разорителей присно помогает и от всех злостей их защищает, аще не они, богоугодная и святая двоица?

Кто и в настоящее сие пребедственное наше пожарное время паки нам помоществует богонасажденный их сий благочестивый виноград возращати и оплотом вновь ограждати, аще не они, сущия первоначалныя сего возделателие? Кто же на оное все и всякия потребности довольно нам в сущих наших нуждах промышляет и доставляет, аще не они, присныя наши попечителие и истиннии богодухновеннии наставницы?[2403]

Сего-то ради, братия, и должни есмы присно поминати оных благих наставников наших, по завещанию апостольскому: яко тии неложно и по успении своем бдят о душах и телесах наших. Аще же бы престали они нам помотати и нас на благое вразумляти, поистинне не возмогли бы мы собою здесь общежително года единаго препроводити. Чему уже был вам предложен светлый образец полския обители. Да и кто бы, паки реку, из адскаго и змийскаго именования освобождати нас мог, аще бы не их святое заступление и помощь? Кто же нас всех – не точию пребывающих во обителех наших или во всей пустыни сей, или во Олонецкой и Поморской области всей, но и по всей России и Малороссии и прочиих далечайших сибирских странах, – кто, глаголю, кто премудро и храбро огради непозыблемою ответною стеною, аще не тезоименитый мужеству с прочиими помощники своими, толико нас благоразумно оною сохрани и поныне сохраняет от всех рыкающих на нас разумных зверей.

Не могу аз о сем кратко рещи, колико нам Ответныя его книги в древлеправославии помогают и от противовоюющих нас защищают. Да и якоже по предсказанию в стоянии неразрушимом до сих времен созданныя ими святыя обители сея явно показуется быти не человеческое, а Божие благоволение, тако и в сочинении наших Ответов поистинне Божие же благоволение присудствует, ибо по единой просто человеческой силе и человеческому единому разуму праведно обоим оным вещем, то есть неразрушимому по сие время стоянию Выгорецких наших общежителств и неразрушимой быти мудрыми доводами от толиких новых мудрецов Ответной нашей книге, никак невозможно. О обителех ныне оставляю за долготу слова, а о Ответах еще желание влечет мя достойное великому удивлению нижеследующее проглаголати.

Сколько есть много у многих новых авторов писменных тетратей на нашю Ответную книгу написано и к напечатанию припасено, однако многое время точию пользуют они единую из червиннаго рода подлую моль, а не словесных человеков. Особливо же премного онаго валяется уже и не в лепых чюланах у прежде бывшаго здешняго простаго жителя, ныне же в некоем древнем граде у почтеннаго протоиерея,[2404] которой от древния своея на нас злобы толико в ярости своей писа много, яко ныне каятися ему приходит не точию о праздных трудах во оном, но и о самой бумаге, веря стоическому философу Сократу,[2405] которой часто провещевал таковый яростный ум имущим своим учеником, что обыкновенно в торговых местах белая бумага продается несравненно дороже замаранной какими ни есть черными буквами, преподавая им от сего нравоучителное знание, чтоб лучшее бумагу белую оставлять для нужных самых дел и хороших умов, нежели, мараючи несмысленно, делать тую толко на подлыя завер<т>ки²⁹⁰⁴ и гнусных вещей отирания годною. А кажется бы автор оный против прочиих отменное и в сем имел преимущество, что он здесь многое время жил и художество словесное получил, аще бе и не гораздо словесен.

Речет ли кто о Феофилактовом печатном обличении,[2406] сицевый прежде да увесть и синодалное о оном запрещение и после печати и переплетов порочное некиих мест выдирание и простыми бумаги тая места худое заклеивание, и прочая безобразия в слоге и площадных речениях, яже всякому чтущему глумление точию наводящее, а не пользу. Еще же и соборно почти вси – не точию древности любителие, но и новии авторы – одобрительно за добросочиненное тое не ставят, а точию во многом за погрешное и погрешительно выпущенное приглаголуют, ибо не со святыми токмо великими отцы и с нами, древняго благочестия содержатели, имеет оное великия прекословия и противности, но и со своими преждебывшими по Никоне патриархе новыми многими учители, иже писаша Скрижали, Уветы, Пращицы, Жезлы, Розыски и нынешния Увещания,[2407] немалыя содержит в себе противоречия и неустройности, за что и почитается от всех <не> несовершенным точию, но и погрешителным, и аки праведно от них наказано бе за сие и штрафовано резанием или вырыванием из листов некиих мест.

И тако о непреоборимости великомужественнаго нашего наставника ответных трудов доволно есть. Реку ли еще и о великой их для всех повсюду живущих староверцев ползе, но время не дает все ведомое зде описати, развее да предложится вам сие едино.

В прешедших летах, егда по указам бысть из полских мест силное россиан вывождение,[2408] да и егда на турецкую брань российское войско мимо россиан, живущих в Полше, идяше,[2409] тогда коликое стеснение и разорение бедным оным жителем бываше, где некий весма преяросный полководец с силою многою многих древняго благочестия содержателей к крайнему бедствию привождаше, а более за сие, что для чего от российский Церкве отлучишася и ни с коими западными сектами пребывают несогласны, порицая в великой ярости и гневе зело согласие их хуждшее жидовскаго. Сам же он и зело бе ведущь всякаго писания, да и житие от прочиих отменное имяше и велий поборник по своей Церкви бяше. Что сотворити, бедные жители не знают. Беша же они вси согласия нарицаемаго Федосеева.[2410] И тако, собравше некия тетратки учителей своих, хотеша показати ему, что бы не весма им было полезно, аще бы по счастию их не прилучился тамо некий торговый человек, у негоже Быша наши нарицаемыя Поморския ответы, которыя он при учтивых словах и поклонениях вдаде оному преяростному полководцу. Он же по приятии многия нощеденства весма в них наиприлежнейше во чтении упражняшеся, в которое время жители, небесную почти ослабу приемлюще, Богу моляхуся о помиловании своем: бе бо при дверех уже обретахуся конечьнаго разорения. По времени же доволнем явися жителем, но не якоже прежде лицем свирепым, но зело приятным и всем видом смиренным, и аки бы прощашеся в неведении и дерзости прежней, глаголя, что ниже в помыслах своих имел о них, яко в таковых преданиях святых и мудрых пребывают, еже засвидетельствует премудрая Ответная их книга, которую толико похвалами и святостию превозношаше, яко всем скорому своему преложению дивитися сотвори. Наипаче же он дивляшеся небоязненному изданию оному против толь силных синодских лиц и приглаголуя часто из Библии Зоровавелево слово, что истинна побеждает все.[2411] И быв у них некое время, с великою милостию и о них пожалением милостиво отъеха в путь свой, присно благодаря их попремногу о показании драгоценный премудрыя и благая (нарицая) Ответныя оныя книги.

Да и повсюду хранителие древняго святаго благочестия чим присно со всеми противными ратоборствоваху и ныне ратоборствуют, аще не оными преславными ответными трудами преславнаго нашего храброборца. И не у всех ли единако вытвержено есть сицевое слово: аще когда будут от какия власти вопрошаеми о древности, то рещи кратко: якоже есть написано в Поморских ответах в Синод, тако пребываем и тако веруем.

Убо, боголюбивии слышателие, за толикия пренеоборимыя и столь всей христианстей Церкви преполезныя труды наставника нашего и отца Андрея Дионисьевича долженьствует нам неотменно его поминать, иже глагола нам слово Божие устнами и рукою своею еще и во инных множайших его книгах писанное и, аки райскими источники, повсегда душы наши напаяющее. Взирающе же, по Писанию, на скончание жительства, должни подражать и веру его,[2412] ибо нимало он по самую свою смерть ни в чем не отдалился от прежних отец своих и всех за древнее благоверие победоносных страдальцев яко во узаконениях, тако и во всех обычаех христианских. Аще и от многих презнатных персон пожалетельно многажды он отвлачаем²⁹⁰⁵ бываше, но никогдаже к тому преклоняшеся, присно бо мужественно во отеческих древних преданиях до конца своея жизни подвизашеся.

Имел он почтительность не точию сам писать писма к высоким весма персонам, но и от них саморучьныя взаимно получать. От государыни Парасковьи Феодоровны, родной матушки великой императрицы всероссийской Анны Ивановны, не едино получил и з денежным награждением, иногда же и хлебом, рожью и мукою довольно от нея жалован.[2413] Такожде и от преславнаго в его время ритора и богослова Феофана Прокоповича, епископа Новгородскаго, весма приятныя написания неоднократно же получал, имущия заглавия: «Возлюбленный во Христе брат Андрей Денисьевичь».[2414] И от прочиих многих господ оными же немало дарствован бысть. Но он все сие точию на пользу общебратскую употребляше, а никогдаже пристрастно к пустой славе прилепляшеся.

Подражаем же, братие, и живую веру его во всем неизменно, яко словом произносимую от него, тако и самым деянием засвидетельствуемую и конечьно²⁹⁰⁶ христианскою его смертию запечатлеемую.

В конец же нашего сего о нем воспоминания да незабвенно и мы вси каждый по вере и усердию своему воспомянем пред Господем Богом его псалмами и песньми духовными, милостию и любовию и прочиими христианскими добродеянии, да и он нас помянет пред престолом славы Божия (ибо, по Священному Писанию, неразлучни есмы с ними до страшнаго Втораго пришествия Христова) и подаст нам силу и бодрость такожде по примеру его до скончания нашей жизни пребывати неподвижимо во святей киновии его и непогрешимо во всех общебратских узаконениях, по смерти же нашей соводворитися с ним в вечных селениях неразлучьно, якоже чадом со отцем и учеником быти со учителем, с ним же купно славити и благодарити немолчно безначальнаго Отца со единородным его Сыном и с пресвятым и благим и животворящим Духом во вся безконечьныя веки. Аминь.