Источник

Тропари, кондаки и величания (общие)

(Богородичны, Безплотным Силам и Святым)

Тропарь, гл. 4. К Богородице прилежно ныне притецем, | грешнии и смиреннии, | и припадем в покаянии зовуще из глубины души: | Владычице, помози, на ны милосердовавши, | потщися, погибаем от множества прегрешений, | не отврати Твоя рабы тщи, | Тя бо и едину надежду имамы.

– Гл. 4. Не умолчим никогда, Богородице, | силы Твоя глаголати недостойнии: | аще бо Ты не бы предстояла молящи, | кто бы нас избавил от толиких бед? | кто же бы сохранил до ныне свободны? | не отступим, Владычице, от Тебе, | Твоя бо рабы спасавши присно от всяких лютых.

Кондак, гл. 6. Не имамы иныя помощи, | не имамы иныя надежды. | разве Тебе, Владычице, | Ты нам помози, | на Тебе надеемся | и Тобою хвалимся: | Твои бо семи раби, | да не постыдимся.

Величание. Достойно есть.

Бесплотным Силам

Тропарь, кондак и величание.

Апостолу (общий)

Тропарь, гл. 3. Апостоле Святый (имя), | моли милостиваго Бога, | да прегрешений оставление | подаст душам нашим.

Кондак, гл. 3. Яко звезду пресветлую церковь всегда стяжа тя, | Апостоле (имя), | чудес твоих многоподаванием просвещаема. | Тем же зовем Христу: | спаси чтущих верою память Твоего Апостола, Многомилостиво.

Величание. Величаем тя, | Апостоле Христов (имя), | и чтем болезни и труды твоя, | ими же трудился еси | во благовестии Христове.

Пророку

Тропарь, гл. 2. Пророка Твоего (имя) | память, Господи, празднующе, | тем Тя молим, | спаси души наша.

Кондак, гл. 4. Просветившееся Духом чистое твое сердце, | пророчества бысть светлейшаго приятелище: зриши бо яко настоящая далече сущая: | сего ради тя почитаем, | Пророче блаженна, (имя), славне.

Величание. Величаем тя, | Пророче Божий (имя), | и чтем святую память твою; | ты бо молиши за нас Христа Бога нашего.

Святителю

Тропарь, гл. 4. Правило веры и образ кротости, | воздержания учителя | яви тя стаду твоему, | яже вещей истина. | Сего ради стяжал еси смирением высокая, | нищетою богатая, | отче (имя), | моли Христа Бога, | спастися душам нашим.

Кондак, гл. 2. Божественный гром, труба духовная, | веры насадителю и отсекателю ересей, | Троицы угодниче, | великий Святителю (имя), | со Ангелы предстоя присно, | моли непрестанно о всех нас.

Величание. Величаем тя | Святителю отче (имя), | и чтем святую память твою: | ты бо молиши за нас | Христа Бога нашего.

Святителем, преподобным, священномученикам и преподобномученикам

Тропарь, гл. 4. Боже отец наших, | творяй присно с нами по Твоей кротости, | не отстави милость Твою от нас: | но молитвами их | в мире управи живот наш.

Кондак, гл. 8. Яко добродетелей учители, | и иерархов украшение, | церковь поющи вас славит. | Молитвами вашими подайте чтущим вас любовию | добродетелей исправление, и соблазнов избавление | яко непобедимии.

Священномученику

Тропарь, гл. 4. И нравом причастник, | и престолом наместник Апостолом быв, | деяние обрел еси, Богодухновенне, | в видения восход: | сего ради слово истины исправляя, | и веры ради, пострадал еси даже до крове, | священномучениче (имя), | моли Христа Бога спастися душам нашим.

Кондак, гл. 4. Во святителях благочестно пожив, | и мучения путь прошед, | идольския угасил еси жертвы, и поборник быв твоему стаду, Богомудре. | Тем же тя почитающее, | тайно вопием ти: | от бед избави ны присно твоими мольбами, отче наш (имя).

Мученику

Тропарь, гл. 4. Мученик Твой, Господи (имя) | во страдании своем венец приять нетленный от Тебе, Бога нашего: | имеяй бо крепость Твою, | мучителей низложи, сокруши и демонов немощныя дерзости. | Того молитвами спаси души наша.

Кондак, гл. 2. Звезда светлая явилася еси, непрелестная мирови, | солнца Христа возвещающи зарями твоими, | страстотерпче (имя), | и прелесть погасил еси всю: | нам же подаеши свет, | моляся непрестанно о всех нас.

Величание. Величаем тя, | страстотерпче святый (имя), | и чтем честныя страдания твоя, | яже за Христа | претерпел еси.

Мученице

Тропарь, гл. 4. Агница Твоя, Иисусе, (имя) зовет велиим гласом: | Тебе, Женише мой, люблю, | и Тебе ищущи страдальчествую, | и сраспинаюся и спогребаюся крещению Твоему, | и стражду Тебе ради, яко да царствую в Тебе, | и умираю за Тя, | да и живу с Тобою: | но яко жертву непорочную приими мя, с любовию пожершуюся Тебе. | Тоя молитвами, яко Милостив, спаси души наша.

Кондак, гл. 2. Храм твой всечестный яко цельбу душевную обретше, | вси вернии велегласно вопием ти: дево мученице (имя), великоименитая, | Христа Бога моли непрестанно о всех нас.

Преподобному

Тропарь, гл. 8. В тебе. отче, известно, спасеся еже по образу: | приим бо крест последовал еси Христу, | и дея учил еси презирати убо плоть, преходит бо: | прилежати же о души, вещи безсмертней. | Тем же и со Ангелы срадуется, преподобне (имя), дух твой.

Кондак, гл. 2. Чистотою душевною Божественно вооружи вся, | и непрестанныя молитвы яко копие вручив крепко, | пробол еси бесовская ополчения, (имя) отче наш, | моли непрестанно о всех нас.

Величание. Ублажаем тя | преподобно отче (имя), | и чтем святую память твою, | наставниче монахов | и собеседниче Ангелов.

Преподобной

Тропарь, гл. 8. В тебе, мати, известно спасеся еже по образу: | приимши бо крест последовала еси Христу, | и деющи учила еси презирати убо плоть, преходит бо: | прилежати же о души, вещи бессмертней. | Тем же и со Ангелы срадуется, преподобная (имя), дух твой.

Кондак, гл. 2. За любовь Господню, преподобная, | покоя желание возненавидела еси, | мощением дух твой просветивши, | крепко бо звери победила еси. | Но молитвами твоими противных шатание разори.

Бессребреникам

Тропарь, гл. 8. Святии бессребреницы и чудотворцы, | посетите немощи наша: | туне приясте, туне дадите нам.

Кондак, гл. 2. Благодать приемше исцелений, | простираете здравие сущим в нуждах, | врачеве, чудотворцы преславнии: | но вашим посещением ратников дерзости низложите, | мир исцеляющи чудесы.

Христа ради юродивому

Тропарь, гл. 1. Глас Апостола Твоего Павла услышав, глаголют: мы юроди Христа ради, | раб Твой, Христе Боже, (имя), юрод бысть на земли Тебе ради. | Тем же память его почитаюше, | Тебе молим, Господи, спаси души наша.

Кондак, гл. 8. Вышния красоты желая, и нижния сласти телесныя тошно оставил еси, | нестяжанием суетнаго мира, | Ангельское житие преходя, | скончайся, (имя) блаженне; | с ними же Христа Бога моли непрестанно о всех нас.

Соборам Святых Отцов

Тропарь, гл. 8. Препрославлен еси Христе Боже наш, светила на земли отцы наши основавый, | и теми ко истинней вере вся ны наставивый. | Многоблагоутробне, слава Тебе.

Кондак, гл. 8. Апостол проповедание и отец догматы, | церкви едину веру запечатлеша: | яже и ризу носящи истины, | исткану от еже свыше богословия, | исправляет и славит благочестия великое таинство.


Источник: Для клира и народа / И.Г. Айвазов. – Изд. журн. "Мисс. обозр." - С.-Петербург : Тип. «Колокол», 1914. - V, 234, 168 с.

Комментарии для сайта Cackle