Кондаки из Акафистов

Все кондаки поются на 8 глас

Предвечный Царю веков и Господи, | всея твари видимыя и невидимыя Содетелю, | Ему же, в Троице Святей славимому Богу, | всяко колено покланяется небесных, земных и преисподних; | тем же и мы, яко крещеннии в Трисвятое имя Твое, | аще и недостойнии, | хвалебное сие дерзаем принести Тебе пение: | Ты же яко Творец, Промыслитель и Судия наш, | вонми гласу раб Твоих, | и не отстави милости Твоея от нас, | да из глубины души выну зовем Ти: ||

Свят, Свят, Свят еси. Господи, Боже наш, | помилуй ны падшее создание Твое, имене ради Святаго Твоего.

Возбранный Воеводо и Господи, | ада победителю, | яко избавлься от вечныя смерти, | похвальная восписую Ти, создание и раб Твой: | но яко имеяй милосердие неизреченное, | от всяких мя бед свободи зовуща: ||

Иисусе Сыне Божий, помилуй мя.

Взбранный Воеводо и Господи небесе и земли, | Тебе Царя бессмертнаго, зрящи на кресте висяща, | вся тварь изменися, | небо ужасеся, основания земли всколебашеся: | мы же недостойнии, благодарственное поклонение Твоему нас ради страданию приносяще, | с разбойником вопием Ти: ||

Иисусе Сыне Божий, помяни нас, | егда приидеши во Царствии Твоем.

Взбранной Воеводе победительная, | яко избавльшеся от злых, | благодарственная восписуем Ти раби Твои Богородице; | но яко имущая державу непобедимую, | от всяких нас бед свободи, да зовем Ти: ||

Радуйся, Невесто неневестная.

Избранной от всех родов Божией Матери и Царице, | восходящей от земли к небеси, | благоговейная пения о пречестнем Твоем успении | приносим раби Твои, Богородице: | Ты же яко имущая победу над смертию, | от всяких нас смертоносных бед свободи, да зовем Ти: ||

Радуйся, обрадованная, во успении Твоем нас не оставляющая.

Избранней Предвечным Царем, | превышней всякаго создания, небесе и земли Царице, | пришедшей иногда во Влахернскую церковь на молитву, | достойное поклонение с благодарением приносите, | яко во тьме сущий, | под Твой светящийся омофор с верою и умилением прибегаем; | Ты же, яко имущи державу непобедимую, | от всяких нас бед свобождай, да зовем Ти: ||

Радуйся, Радосте наша, покрый нас от всякаго зла честным Твоим омофором.

Взбранное нам и дивное избавление даровася, | Твой образ честный. Преблагословенная Дево Владычице Богородице, | яко избавльшеся от злых явлением его | и к нему взирающе, | восписуем Ти благодарственная раби Твои, Богородице: | но яко имущая державу не непобедимую, | от всяких нас бед свободи, да зовем Ти: ||

Радуйся, Радосте наша, избави нас от всякаго зла, и утоли наши печали.

Избранный небесных Сил воеводо | и рода человеческаго заступниче, | сие тебе, иже тобою от скорбных избавляеми, | благодарственное приносим пение: | ты же, яко предстояв престолу Царя славы, | от всяких нас бед свобождай, | да с верою и любовию в похвалу тебе зовем: || Радуйся, Михаиле, великий Архистратиже, со всеми небесными Силами.

Избранный от лет древних | быти Предтечею и Крестителем Спасителя мира Христа Бога, | Иоаине Богохвальне, | прославляя прославльнаго тя Господа, похвальная восписуем ти, яко большему всех рожденных женами, | по плоти ангелу, покаяния проповеднику; | ты же, яко имея велие дерзновение ко Господу, от всяких бед свобождай и к покаянию воздвизай нас, | любовию тебя зовущих: || Радуйся, великий Иоанне пророча, Предтече и Крестителю Господень.

Возбранный чудотворче, и изрядный угодннче Христов, | миру всему источаяй многоценное милости миро, | и неисчерпаемое чудес море, | восхваляю тя любовию, святителю Николае; | ты же яко имеяй дерзновение ко Господу, | от всяких мя бед свободи, да зову ти: || Радуйся, Николае, великий чудотворче.

Возбранный от Царя сил Господа Иисуса, | данный России воеводо и чудотворче предивный, | преподобне отче Сергие, | прославляюще мы прославльшаго тя славы Господа, | благодарственное пение воспеваем ти: | ибо молитвами твоими от нашествия иноплеменных | и скорбных обстояний нас присно избавлявши, | яко имея дерзновение ко Господу, | от всяких нас бед свободи, да зовем ти: || Радуйся, Сергие, скорый помощниче и преславный чудотворче.

Избранному воеводе земли Российския, светлому украшению церкве Православныя, | святому благоверному великому князю Александру Невскому, | похвальная восписующе, | яко верою враги, видимыя же и невидимыя, победившему, | и в вере своей, по речению Апостолову, добродетель, в добродетели же разум, | в разуме же воздержание, | в воздержании же терпение, | в терпении же благочестие, братолюбие и любовь явившему, | со умилением и радостию возопиим: || Радуйся, святый благоверный великий княже Александре.

Избранной Богом от идолослужительнаго рода, | и призванной в язык свят, | в люди обновления, невесте Христове, | яко избавляющийся тобою от различных зол и обстояния, | благодарственная пения и хваления восписуем ти молитвенницы твои, | святая и всехвальная Великомученице; | ты же, имуще дерзновение ко Господу, | от всяких нас бед свободи, да с радостию зовем Ти: || Радуйся, Варваро, невесто Христова прекрасная.

Возбранному воеводе и Победоносцу Георгию составим похвалу, | яко ходатаю нашему и скорому помощнику; | ты же святый Великомучениче, | яко имеяй дерзновение ко Господу, | от всяких нас бед свободи, да зовем ти: || Радуйся, Георгие, великий Победоносче.