Апокрифические сказания Эсхатологического характера. Вопросы Иоанна Богослова Аврааму на горе Елеонской

(Из Сборника XVII в. Солов. библ. № 889)⁵¹⁴

Слово отца нашего Иоанна Теолога о кончине лет и живота. Благослови отче.

И егда взыде Иисус на гору Елеонскую и рече учеником своим глаголя: се аз возхожду от вас на небо, и Адама возвожу с собою, и вся, иже с ним во адских – и рече Аврааму: тебе предаю ныне душу (и). на двое разлучити. едини праведныя на небеса: а грешнии во ад. Глагола ему Петр, Господи повеждь нам, егда будет кончина веку, пришествия твоего на землю. вокресити умершия от гроба. И рече ему Иисус: тогда будет кончина века, пришествия моего на землю: во человецех ненависть, безстудие в роде своем, ревность, потрясение на земли, глад, рать многа, брат брата возненавидит, царь на царя станет, туга языком, печаль многа, воздыхание. Вознесен бысть Иоанн Теолог ко Аврааму глаголя: отче Аврааме: или имети место жидом, или пищу райскую. – И рече Авраам, то не слышал еси пророка Аввакума глаголюща: оскуде овца от пищи, и не будет волов при яслех; овцы быша жидове, ереи их волове: а ясли райская пища. – Воспроси Иоанн, глаголя ко Аврааму: отче. стати ли, на вокресение Господне: мертвым поганым со христианы; и рече Авраам, чадо, не слышиши ли Давида глаголюща: не тако, нечестивии не тако: но яко прах, егоже возметает ветр, от лица земли, сего ради не воcкреснут нечестивии на суд, ни грешницы в совет праведных: и путь нечестивых погибнет; паки пророк тойже глаголет: овцы во аде положени суть, смерть упасет я. чадо, нет им ответа, зане Бога не познаша. Глаголя Иоанн Теолог: отче, знают ли ся на оном свете души: те со отцем, или с матерью, и с братьею и с сестрами, и с други своими. И отвещав Авраам, рече: – чадо, егда Адама воскреси. и многи чада с ним. тако те радощами познавахуся, и веселяхуся с чады своими. познатися чадо велми; Иоанн Теолог рече. очует ли человек, егда умрет. – и отвеща Авраам рече. чадо не слышал ли еси Давида, глаголюща: не умру, но жив буду; паки душа моя восхвалит тя. – чадо, како ей быти живой без тела; и рече Иоанн, глаголя. – отче знаютлися тамо души: яже суть; знаются велми якоже знаемся мы зде; Иоанн рече Теолог. – отче: а яже зде младенцы мрут, помнятлися тамо: и отвеща Авраам рече: чадо яко ему быти расти на земли, и мыслити: тако тамо душа его растет, и мыслит. – Иоанн рече. – отче, приходит ли душа к телу⁵¹⁵; отвещав Авраам рече. – чадо, иже невернии не чтят поповский чин попирают: не слышал ли еси, что Богу жидове сотворили. таци человецы, тако творяще; – укажи ми чин чернеческий. – и отвеща Авраам, рече: како рыба на сусе умирает без вод, тако чернец преступает стрижения, игумени ркуще, сласти, пианства, крадения, непослушания. – Игумен же пастырь чернеческому чину: или быти чернецу, кроме игумена единаго. – чадо егда отлучится овца от пастыря своего, что ей бывает. не пришед ли волк, восхитит ю: или тать украдет, тако чернцу кроме игумена и монастыря житью, беси украдут душу его; и совокупитися имаже на оном свете. – чадо от Авраама разумей, како от единоя плоти, иже есть; чадо с женою своею первою, а не с другою, ни с третьею, прелюбодеи человецы христиане суще; и паки скотски живут. – ядят и пиют. а лица своего не крестяще: креста на себе не носяще; чадо, Исаиа пророк глаголет: возмутся нечестивии, и да не внидут во славу господню. ти такоже, яко не христиане нарекутся, ти такоже погибнут: Иван рече Теолог ко Аврааму; а иже клевещут, или крадут, отче, что тем будет; отвеща Авраам рече, еже Апостол рече. не слышал ли еси, пророка Давида, глаголюща: человек яко трава, дние его, яко цвет сельный, тако отцветет: яко дух пройдет в нем, и не будет, и не познает ктому места своего; чадо не приидет душа к телу; Иоанн Теолог рече ко Аврааму; отче: укажи ми, чин поповский. и како Мелхиседик: Захариа. Симеон. – како те суть, святи сущи: очищахуся от жен своих, всеа злобы. постом и молитвою сласти не знаша, вина не пиюще. – ни варена кваса. – И единою летом входяще во святая святых: и то. слепии прозирают на (по)молитве их: людие очищаются; и отвеща Авраам ко Иванну рече: чадо, велик чин поповский. – И клятва его не отдаст. – аще кого гневом покленет, из всего сердца, то случится ему умрети; или не слышал еси, что Бог рек Апостолом своим: егоже аще свяжете на земли: и будет связан на небесех: егоже аще разрешите на земли, и будет разрешен на небеси. – и Авраам рече. – чадо: Бог разрешит и опустит грехи человеком. аще небрежет. то аз вас небрегу: Авраам рече. – чадо того ради Бог постави пастыря человеком. аще добре строят, то с радостию приведут пред Богом. – и мзду имать от Бога: аще ли зле строят, то сами пойдут на осуждение⁵¹⁶; паки рече старейший сын ко отцу своему: мне ни козлища не дал еси: дабы со други своими возвеселилбыхся; (т) козлище есть грешницы, иже гонят праведници. – и не попущает Бог зле, погибнути им, да обвеселятся об них; козлище бо бе Саул: гоняше кроткаго Давида. – И Ахав искаше пророка; и рече отец старейшему сыну: чадо, вся моя, твоя суть, и моя; (т) рекше закон, пророцы, небесное царство; и рече же отец старейшему сыну: брат же твой, мертв бе. – и оживе. изгибл и обретеся; (т) мертва глаголет: работающа диаволу. языки поганы: не ведуща Бога: погибоша. – иже бе крещени, во многи грехи впадошася, не могу(т) тацыи непокаявшиися без злыя муки быти, и во тму кромешную, и во скрежет зубный осудятся; волхвом вперед ити, во дно адово. – И приходящими к ним, во след их ити: волхвы суть сынове неприязнени, и наследницы вечной муце; Потом рече Господь в евангелии. о дни том и о године той, никтоже невесть: ни ангели Божии сведать: егда разлучится душа от тела: то как спадый с небесе может уведати, душевный исход невесть, сам своей погибели: како может человек уведати смерть. или живот поведати, един имея ведати власть живота и смерти. умерщвляя и оживляя Бог; – аще ин человек грех сотворит, зол велми, но от Бога не отступит; – И рече(т), Господи согреших, но тебе не отступих; а к волхву ходь, к дьяволу угоднику (стр. 159–160).

Взыде Господь на гору Елионскую; и со ученики своими, и рече им, глаголя: се аз от вас отхожду на небо. – и Адама, с собою возвожду, и яже суть с ним; Аврааму: Аврааме, тебе предаю души разлучити на двое, един праведныя, а грешныя во ад. – И глагола ему Петр, Господи: когда кончина века сего. и пришествие твое на землю: и воскресение умершим от века: отвеща ему Иисус: тогда будет кончина века, и пришествие мое на землю, егда узрите мерзость: во человецех ненависть, и безстудие в роде своем. – и ненавидение, и ревнование, и стрясение земли, погибели многи; брат брата возненавидит и предаст на смерть, царь на царя станет, и туга языком, и печаль и воздыхание, а иже крещения отвергнутся и святых книг, церкви. – и се все сказа Бог: множество человек измерли. – И вознесен бысть Иван Теолог на небо вопрошаше Авраама, глаголя: отче Аврааме, есть ли милость, пища жидом. и рече ему Авраам: то не слышал ли пророка Аввакума глаголюща: оскудеет овца от пищи, и не будет волов при яслех; чадо, овча беаше жидове, а ясли райская пища; (в) стати ли поганым на воскресение со христианы; (т) чадо не слышати ли пророка глаголюща. не тако, нечестивии. не тако. – но яко прах, егоже, возметает ветр от лица земли, сего ради не воскреснут нечестивии на суд, ни грешницы в совет праведных. – паки тойже глаголет. – яко овча, во аде положеныя суть, смерть упасет я. – чадо несть им ответа, яко не познаша Бога. – (в) знатилися на оном свете со отцом: или с сыном: и с матерью и со ближними своими; (о) чадо, егда Бог воскреси Адама, и иныя многи с ним: то ти тако радощами познавахуся. и лобзающеся со своими чады; чадо, знатися велми, то како хощет утаитися вражник, или должник, или любодей, влачитися имут за гортань емлющеся друг другу: на судище приведутся. и вринет обе вместо в муку вечную; (в) чуетлися человек умерл; (т) чадо, не слышиши ли пророка Давида глаголюща: не умру, но жив буду. – и паки глаголет: жива будет душа моя, и восхвалит тя: како живу быти, без тела; (в) знатился душам: яже суть тамо; (т) чадо, знаются, яко же мы знаемся; (в) а иже зде младенцы мрут: помнят ли, или несть; (т) чадо, яко же было ему рости на земли. и мыслити: тако тамо растет, и мыслит душа; (в) приходит ли душа к телу своему. – (о) чадо, се глаголет святый Петр: к телу своему: то не слышиши ли Давида глаголюща. – человек яко трава, дние его, яко цвет селный: тако отцветет. – яко дух пройде в нем: и не будет, и не познает ктому места своего. – (от) чадо, не приходит; (в) укажи ми чин попов; (от) от Адама, 1: поп бысть Мелхиседек: и Захариа, и Симеон: как тии, чисто живуще. и суще очищахуся от жен, и от всеа злобы, постом, и молитвою: сласти не знающе, ни вина, ни печена, ни варена, ни кваса. – единою же летом влезше во святая святых. – слепии прозираху на молитве их, люди очищахуся. – чадо, велик чин попов: клятва его не отдастся; даже, кого со гневом, и всем сердцем, кленет, то случится ему умрети; чадо, то не слышиши ли, Петр Апостол глаголет: еже аще свяжет на земли, и будет связан на небеси пред Богом; еже аще разрешит на земли: и будет разрешен на небеси пред Богом; чадо, рече Бог: аще поп отпущает грехи человеком. – то и аз отпущу ему: аще ли поп не отпустит и небрежет. – то и аз небрегу его. – чадо, Бог постави пастыря человеком: да аще добре строит, то с радостию приидут пред Бога и мзду приимут у Бога: аще ли зли суть учители, то сами будут на осуждение. – (в) а иже сами себе беззаконницы не чтут попов: и чин их попирают: (от) чадо, не слышиши ли, что жидове Богу сотворили, не слышиши ли ответа: тако рече. – да быша ти ся человецы не разсужали, тако сотворяюще; (в) укажи ми чин игуменов и чернцев; (от) чадо: како рыба на сусе умирает без вод, тако и чернец преступает: егда игумена, и монастыря вне бывает. – ибо пострижеся от руки игуменовы. и венец приимет нетленный пред истинными послухи. – архангелы; сластьми и пианством, леностию, и непокорением: игумен же пастырь; чернеческаго чина; (а) несть ползы, пребывати чернцу единому, кроме игумена; (от) чадо егда отлучится овца, то и волк распудит ю, или тать украдет ю; (в) а иже мал женама совокупится на оном свете (?) (от) чадо от Адама разумей, како ти есть, от единой плоти, с женою спервою, и второю, и третиею: прелюбодеяния ради, тойже блуд творить. – прелюбодеяния ради, 2я жена, и третиа жена: посягати. – и таже есть, прелюбодеяния ради; (в) а иже человеки крестьшеся, и плотски живут: и ядят, и пиют. а лица своего не крестяще. – (от) чадо, Исаиа пророк, глаголет. – возмутся нечестивии, и да не видят славы божиа. и тако творящии погибают; (в) а иже так, клеветник зде: что ему будет тамо; (от) чадо, Давид глаголет: скончаются грешницы от земли, и беззаконницы, яко не быти им, и погибнут без ответа; – (в) грех ли мужеви: жена блуд творит. – (от) чадо, велик грех мужеви: Ева Адама из рая изведе: сочетал же ея Бог и венчал есть; (в) что есть мало женам венчание; (от) чадо, венчание есть обручание Богови: да егда будет, на страшнем суде, то и с радостию, и дети своя сведет в жизнь вечную: яко Адам станет со детми своими. – (в) чадо, не слышиши ли Давида глаголюща: души их во благих водворятся, и семя их наследит землю. – (в) чадо, на лоне Авраамли, поспевши душа праведная идет.⁵¹⁷ (от) чадо, не слышиши ли Давида глаголюща. – возвратятся грешницы во ад: забывающии Бога. – чадо, грешную душу держит 9 дней у себе: и негли кто помянет ю в молитвах, ащели не будет помяновения: то паки 40 дней держит ю у себе. и негли кого будет насытила, или одела, или напоила, ни поп ея в молитвах не помянет: и несть милостыни, и ни откудуже, изыдоша 40 дней, и рекут ей, и пойдет убогая душа во тьму; (в) доколе же, ей быти во тме; (от) чадо, от великого четвертка; да до пентикостиа. – да во свете их, пребывают. – (в) что ядят души праведныя. – (от) чадо, не слышиши ли Давида глаголюща. хлеб ангельский яст человек, и пищею небесною питается: а грешная во тме суть⁵¹⁸... (в) не имать пребыти дух мой в человецех сих, зане плоть суть;⁵¹⁹ (т) сии пребывают во злых делех, осквернившеся нечистотами плотскими; (в) яко плоть (и) кровь царствия не причастится; (т) се си плоти глаголет: но иже рече, не любодей, не резоимец, ни грабители, ни корчмиты, ни пианицы: тии царствия Божиа непричастни; (в) яко годная нами ведома. – (т) угодие целомудрие, и мудроумие, добрый иже не преступит от веры на ересь: угодная бы Богу: не была ведома жиды, и еретики: (в) якоже, носихом образ перстнаго; (т) образ преступление на грех; (в) но да носим образ и небеснаго, (т) образ есть небеснаго: кротость, истина, правда и мир; (в) яко светилу светящу, в темне месте; (т) посту и молитве: светящимся в телеси и во души грешной. – Потом покаявшися, и приимши эпитемию; (в) дóндеже день озарит; (т) дóндеже будет прощение; (в) денница возсияет в сердцах ваших; (т) возсияет в верных: тело и кровь Христова; (в) идеже помышляют: ангели приникнути: (т) сеже глаголют: о святом⁵²⁰... (т) И аще от богоразумных мужей приложить что угодная: на успех душеполезный. еда будет благословен; аще уймет Павлова учения (?). да будет проклят; (в) Бога исповедуют ведением: а делы отмещут; (т) иже неверны христианин будет, задоведи Христовы преступают и Бога отметаются; (в) егда не имам власти: ясти и пити: (т) не имам ли вещати: или ясти от учимых мною. тако бо Христос (и) Павел; (в) не востязаяй языка твоего: сего суетна вера; (т) сице прится с тобою о книжном словеси, аще будеши горазд глаголя, – И он не горазд: то ты премолкни, да буде он тя препре(т) пред человеки: а ты его пред Богом уприши; (в) брашно нас не поставит пред Богом; (т) идолослужение, или безмеры ядуще, не по закону: то не поставит нас пред Богом. – но в муце; а чисто живущих, и по закону ядущих, то поставить пред Богом: (в) иная слава солнцу; иная слава месяцу. – иная земли; (т) Матфан же имеяше три дщери: Мария же роди Саломию бабу господню; 2. Софиа же роди Елисавет: матерь Иоанна Крестителя: 3-ия же. Анна роди святую Богородицу. хотяй же искусити, да пришед почтет дщерь его. и посади меншую, а болшую особь: некоторые же люди всех равно почтиша, и угодиша церкви: и нецыи же зле сотворше, меншую же почтиша велми: о прочих же точию целовающи их. и видев же царь разгневався, и повеле слугам своим изгнати о лица своего, но не токмо се, но и мучителем предаст их, да их мучать. – (т) царь Бог: отец вседержитель.– и сын слово Божие: а седмь дщерий, седмь недель святаго честнаго поста: яже повеле нам чтити, паче всего лета, дни те. – Постом, и молитвою, и милостынею: да аще первую почтихом. добре почтихом токмо меншую. яже подле отца: а иных всех минувше. прочто нечтихом, за нашу слабость, и леность нечестни суть. а у Бога вси честни, даже и до вокресения Христова; притчею глаголет. некто господин имеяше у себе должна: бе ему должен 100 пенязь, и рече господин рабу тому. – дай ми весь долг той, он же умоляше его. потерпи ми господине мой. дóндеже воздамь ти весь долг: раб той шед, и обрете единаго от клеврет своих, иже бе должен ему 50 пенязь. и мучаше его, и давляше глаголя: дай же ми весь долг: клеврет же его моляше глаголя: господи потерпи ми, дóндеже воздам ти весь долг, он же немилосердова о нем, и ем и, и давляше его, и мучаше его. и поведаша раби господину своему, господин же призва его, глаголя. рабе злый, и лукавый, и немилостивый, аз ти отдах весь долг: а ты не помилуеши клеврета своего, якоже аз тя помиловах. – тогда разгневався господин: и предаст его мучителем и повеле его мучити, дóндеже долг отдаст. – и тако же и ты не помилуеши нищаго и убогаго, то и ты не помилован будеши; (в) что есть, человек изыде утре, ная делати виноград свой; (т) человек есть Бог: а виноград есть мир весь, а делатели суть апостоли: а пороптавый есть Иуда; 11 час. (в) что есть светилник: что есть неприкосновение; (г) неприкосновение врачевство: а светильник есть Христос. – (в) уподобися царство небесное человеку царю, иже сотвори брак сынови своему; и посла рабы своя, и призвати на брак, и не хотящи приити; (от) человек есть царь: воплотивыйся Сын Божий: а раби суть святии апостоли: а не хотяху приити отрекше жидове. а пришедшии люди от язык; (в) что уподобися царство небесное сокровищу, сокровену на селе. – Человек некий, продаст все имение свое, и купи село. – (т) сокровище есть Иисус Христос: а село есть святая Богородица: а человек купи село, Иосиф древодела; (в) подобно есть царство небесное купцу, ищущу добраго бисера. – иже обрете бисер той, продаст все имение свое, и последова вослед бисер той. (т) продавый имение свое святый Павел Апостол. – а бисер Христос: И пойде во след творца своего, Господа Бога; (в) человек насади виноград свой, и оплотом его согради: ископа в нем точило. – и созда в нем столп; (т) человек есть Господь Бог: а виноград есть святая вера: а столп есть крест святый: а раби суть пророцы святии, а человек есть Христос; – рече Господь учеником своим притчу сию: человек некто, хождаше на страну далече: призва своя рабы: и даст им имение свое. – овому даст 5 талант, – а овому даст 2 таланта, а овому един; (т) человек есть, изыде на страну далече, Господь наш, Иисус Христос. плоть прият, на небеса взыдет, ибо рабом своим предаст имение свое, и рече, верным раздели дховныя дары. – талант, дар святый наречется, телесне разумевше: видение, и слышание, и внушение, и обоняние, казни, касание; 2-ий, талант. умение книгам святым: без добрых дел; – приим 5 талант, приобрете или другия 5; (т) село наричется мир: а доброе семя: учение приим. – и соблюдоша. сии суть сынове царствия: а сеяв диавол плевел: а жатва кончина. а жатели суть ангели, родь ею, из бразды человеческия души наричется. емуже лопату приим в руце его: Господь наш на суд приидет, (в) зберет пшеницу в житницу свою, а плевел сожжет огнем негасимым; (т) пшеница наричется праведных души: а житница, небесное царство: а плевел, грешных души. – сослет бо сын человечь. ангели своя, а зберут от царствиа его вся соблазны, творящия беззаконие, и ввергут во огнь, и свяжут я во снопы, якоже сущия снопы, мнит. – сущия во злых делех, имже уготована мука вечная, коемуждо по делом его. Рече Господь учеником своим, подобно есть царство небесное: егоже злато сокровено в ниву; иже обрет, и скрыет радостию, идет, и продаст вся: яже имать, купити ниву ту; (т) сокровище наричется небесное царство: село, внемже злато сокровенно, есть учение святое: небеснаго царствиа и подвига: есть село. – распродаст вся, иже купити ниву; (в) не дадите святаго псом, ни помещите пред свиниами бисеров ваших, да не попрут ногами своими; обрящешися расторгнувыи; (т) псы нарекутся еретики, имже не велит даяти святаго: крови Господни: а свинии же нарекутся работающии сласти, и скверне, сиречь блуд; (в) посла Иисус своя ученики, с высоким проповеданием, два ученика, идите во весь, и обрящете осля привязано и жребя с ним. отрешивше приведите, тако. – (т) два посылаются, отрешающии: Петр и Павел. Петр в Июдею, а Павел во языки. – иже доныне, нас решающе, от страсти греховныя, овоже апостолом, овоже святым евангелием; – да збудется реченное пророком, глаголющим. рцыте дщери сионове, се царь ваш приидет, кроток. сед на осля жребя. – сын яремничь, на осля худо всяде. исполняя пророчество в первыя дни. иде на осляти, и потом на жребяти всед, новым и неученым людем, и непокаряющимся. вязаша осле пленицы своих грехов: вшедша ученика, сотвориста, якоже повеле им Иисус: и приведя осля, и жребя, и возложиша на верху ея ризы своя. и всед на верху их; (т) Лука бо, и Марко реста⁵²¹... а Матфей, осля, и жребя: ведомы по жребцу, и следома мати, и седе верху их, не на обою подъяремник, но нарицу (?). первое бо сед на осля, а потом на жребя, первое предста иудейский собор: такоже, от язык люди приидоша; входя во град, взалка: видев смоковницу на пути. – и прииде к ней, ища плода в ней. и не обрете, но токмо листвие единова. глагола к ней, и ктому на ней не будет плод во век. – (т) знаменается же иудейский собор, смоковию. листвие токмо имуще, се же есть из писма токмо почитаху, а плод духовных дел не имуще. – Приведоша ему должника единаго, тмою талант, и не имущу ему, что отдати, и повеле сын его продати, и жену, и дети: (т) жена убо плоть супружница, сущи души. – чада же дела делают зле: от души и тела, или сотворив дуб добр, и плод его зол; от плода бо древо познавается; (т) дуб добр наричется Дух святый. – а зол дуб, диавол есть. – а древо человецы, а плод дела добрая. от нихже кождо приимет. иже будет сотворит; слепец аще водит слепца, оба впадают в яму; (т) слепых зовет сих, иже писанаго не разсмотрят, и вперивше ум в писмо, тако сущи мнят; – идеже еста два или три совокуплени о имени Иисусове. – (т) плоть, душу. егоже плоть будет чиста, душа: то и святый Дух ту живет, царство небесное; почто 5 девы. – 5 дев мудры: два вера: упование. – и смирение. кротость. милостыни; а буи дев пять; неверство. гордость. немилосердие. нестроение. – Кто жених. – Христос; кто невеста; (т) церкви; – кто суть дремлющий. – (т) не творящий добрых дел, и непекущийся о своих душах; рече Господь: аще кто хощет зван быти на обед. – во царство небесное. то тех зови, от нихже ти не чаяти звания; (т) велит звати нищия, и странныя, и убогия. накормити, напоити: странныя. – и слепыя вести в дом свой; что есть овчая купель; – (т) овчая купель образуется: святое крещение; что есть разслабленный; – (т) разслабленый всяк неверуя во святую троицу. – что се притвор. – (т) пять чувств душевных грех во человецех. – 1: мысли злыя: 2: зависть, 3: ненависть, 4: осуждение, 5: хула, наричемая ересь; рече Господь: подобно есть царство небесное жене: иже имея 10 мер: погуби един от них: поскорбе о них. – (т) жена есть, премудрость. еже нарицается сила Божиа. – а мир ангели, херувими, и серафими, погибший Адам: о немже поскорбе Господь; что есть вдовица, ввергши две медни(цы) в газофилакию⁵²². – (т) вдовица есть душа, а медница плоть целомудреная, а газофилакие святый храм церковный; что есть самаряныни: и 5 ей мужей, и шестый. – и кладязь Иаковль, и сынове Иаковли; и скоти его; (т) самаряныня есть душа: 5 ея мужей, 5 чувств: а шестый муж ум. – а кладязь запинатель. а скоти, блазнении помысли; что есть, в дому вдовица, имя ей Сарефа. – а сыну ея имя Иона: а дом ея образует святую церковь: а горсть муки святое⁵²³... а масло и вода, святое крещение: а два полена, святый крест; (т) что есть в дому вдовица: у нея же святый Илиа обита. – горсть муки и масло, и вода, а два полена, воскресение сыну ея. – Человек некто созда себе храмину на камени. – (т) человек Петр: а камень Христос. а ветри диавол, а на песце созда храмину Иуда скариотский. – а песок убо безплодная душа его; Господь наш Иисус Христос: своима рукама крестил: 1: е, святаго апостола Петра: а святый апостол Петр крестил святаго апостола Андрея: Андрей крестил Иоанна Богослова. – И Петр крестил вся апостолы: и святую Богородицу; Кто крестил Захарию, и Иоанна: и в кое время и где; (т) Господь пришед из Египта: с четырми ангелы, егда убиен бысть Захариа в церкви святая святых: ту крести Захарию, и воскреси же Иоанна, из горы принесе. от матери ангели и опять в гору принесе ко матери: и опять Захариа умре. и погребе его под святою трапезою: а сам Господь пойде во Египет, тоже все содея; единыя полунощи; – при ком поят Иосиф Марию из церкви; (т) писание глаголет: свидетеля ми постави Урию иерея, сына Варахиина: притчею поят; притча евангельская с толком. – о блудном сыне; человек некто, имеяше два сна. – кто ли есть человек. кто ли два сына: (т) человек есть человеколюбец бог: а два сына, праведницы и грешницы, а старейший сын праведницы: а юный сын грешницы. – И рече юный сын, отче дай ми часть достойную имения; (т) вопроси, самовластие, и невоздержание и зле погуби душу свою; имение, еже есть небо и земля: море и реки, и всяку тварь, на работу дал есть: сын же приим от отца часть. иде на страну далече. во ино стране, и сотвори себе от твари; (т) идут грешницы далече от Бога: и сотворше себе идолы; (в) и бысть глад на стране той, и шед юный сын, прилепися единому от граждан страны тоя: и посла его на село, пасти свиний; – (т) иже рече, глад на стране той, глад непринять святаго Писания и святаго⁵²⁴... начаша лишатися Бога: а иже рече, шед прилепися единому от граждан страны тоя. – се суть демони: посла его свиний пасти. рече учити юных злым делом. якоже бо свиния не может зрети горе. – и тако согрешая, не может мыслити небесная. – разбойницы и блудницы, и лихоимцы: сии суть свинии, и пастуси, иже иных на зло учат; хотяше насытитися от рожец. – (т) рожцы суть греси не имут сытости, и мало сладит, и в век мучим будет; И рече юный сын, колико наимник у отца моего, избывают хлебы: аз же гладом гиблю. и востав, иду ко отцу моему, и реку ему, отче согреших пред тобою, ни есмь достоин нарещися сын твой, и сотвори мя, яки единого от наимник твоих; (т) наемницы суть иереи церковныя: егда кто, грехи объят, и невидех бо ны, божественных тайн наслаждающися. се же бе вне церкви стоящий, то в покаянии, умилився мыслит быти; еще же ли сыну далечу сущу. и срете его отец: и охапив выю его, и облобыза его. и повеле рабом облещи его в первую одежду, и перстень дати на руку его: а сапози на нози его. И повеле заклати телец. – упитаный; ядше возвеселимся; (т) како есть Божие милосердие, но ожидает кающагося. и трудов. – но стретает грешныя и прощение дает. – Что суть раввий, иереи служат Богу. – а одежда первое оцыщение грехов; (от) чадо Давид глаголет: егда возстужиша к Богу. – от бед их избавит я Господь. – И паки согрешшим, несть им милости, грехи творящим: аще ли, творяще грех, покаются. – то милость велика, и отпустятся им грехи; (в) а иже человек исповесть грехи своя попови: занеже ему поститися, против своих грехов, еже есть сотворил. – отпустятся ему, или несть; (от) опустятся ему грехи: тоиже и честь приимет ли исповедник поп: своего греха; (от) чадо, Давид глаголет. – со избранными избран будеши, и со строптивыми развратишися, на земли живущих. – аще ти у отца с сыном: и приведутся оба, и оба ти тати, уплатити; чадо, то есть грех попови: иже исповеднику обема: обаче есть, того бо дела: поручается за ны, и приемлет грех; (в) аще исповедник начнет грех творити: и паки отпустятся ли ему грехи. (от) чадо, Бог есть уставил 40 дней великого поста, отпустятся ему, толи сам си Бог сильнее греха, всякому человеку, аще постится; (в) или епископу: или попови, грех сотворше. каютлися, или несть; (от) чадо, Давид глаголет: благо есть исповедатися Господеви: паки глаголет. – надеющийся на Господа, яко гора Сион, не подвижится в веки: и вси нисходящии во ад, но мы живии, благословим Господа отныне и до века. – (в) чадо, достоитлися каятся грехов своих, и венец пречистый приимет; (от) чадо, каются о своих гресех, да пред Богом честни будут; – (в) Епископу ли отвещати, на страшнем суде пред Богом; за людския грехи. Или попови, или несть; – (от) чадо, Епископу: за попы, а попом за люди отвещати: игумену за чернцы отвещати: а рекут стояще, се аз и дети, яже ми дал Бог; (в) а еже и епископи и попы величави, несмиренни, в жизни сей живут: что тем будет, пред Богом; (от) чадо, не слышиши ли Луки евангелиста, глаголюща: два внидоста в церковь. – един фарисей, а другий мытарь. – которого убо помилова Бог: не мытаря ли, иже смирен, а не якоже фарисей: Давид бо глаголет. – уста мужа язычен(а)⁵²⁵ не исправится; (в) ныне отче: душа на двое ли суть, еже умирают за грехи своя; (от) чадо, Давид глаголет: аще взыду на небо. ту есть ты, аще низ: чадо душа видит, еже сотворила, добро или зло: И видевши на земли, поведает о нем: да и то душа видит, что сотворила на земли: како слыша, во аде сидит преисподних; (в) како есть стати на воскресение, а будут детище измерли. детски ли им стати; (от) чадо, апостол Павел глаголет: всем изменится на воскресение, стати им всем человеком 30 лет: воедин Адам, ... и едино обличие, и во одежди нетленней облекутся; (в) а еже отче сказа, всего много; еще скажи ми, еже есть мертвым воскресение, како ся телесем родити, ангели суть, или тем, тацы можно быти оста...; (от) чадо, пророка послушай глаголюща. послеши дух свой, и созиждутся, обновиши лице и землю: труба же вострубит от полунощи, и телеса во гробе оснуются: и будут яко паючина зародится, и паки труба вострубит пред куры⁵²⁶, и телеса зиждутся. нетленна будут. уже душа, видит в теле своем. какоже труба вострубит пред зарями. – мертвии во Христе воскреснут: и потекут по земли, радощами, познавахуся. род с родом своим, отец с сыном, и мать со дщерию, и со всем родом своим; (стр. 160 наоб. – 165 наобор.).