святитель Кирилл Туровский

Молитвы в четверг

Молитва в четверг по Утрени преподобнаго Кирила

Душе моя! съгрещающи по вся дни, почто невъстягнешися 1, преступающи заповеди преданныя ти. Кою от Бога приимеши милость, аще не преже конца останешися сластолюбия, удаляющаго тя от пути, ведущаго тя в жизнь 2. Въспряни, убогая душе, от сна греховнаго и въсплачися о злых своих гресех, имиже прогнева Творца своего и Владыку, живодавца и благодателя, ожидающа моего покаяния, егоже не съхраних всепагубный3 аз. Отъныне останися несытих похотей и горкых тлетворных уклонись скверн. Припадиж вопиющи к божественным Апостолом, да помолятся вопиющи Христу подати ми отпуст и оставление грехов. Святый Петре, Богоизбранный Апостоле, твердый камень вере, недвижимое основание Церкви, пастуше словеснаго стада Христова, ключарь царства небеснаго 4: Тя молю, всечестне, да обоймет мя божественная твоя мрежа, да мя извлечеши из глубины погыбелныя. Вем бо тя от Бога область приимша вязати и решити грехы: разреши мя, молю ти ся, связана узами греховными; покажи на мне милость твою, убозем рабе твоем (имя рек). Оживи смиреную ми душю, яко и преже Тавифу въскреси от мертвых; на течение благо въстави мя, якоже в Красных вратех словом хромаго с одра въстави, и стенем своим5 всякы недуги и болезни прогониши. Да осенит мя твоя благодать, исцеляющи душевныя ми болезни и прогонящи телесныя недуги: все бо можеши, пресвяте, твоими молитвами, Христовою силою, егоже ради все оставивь и Того возлюбивь, въследовал еси Его стопам пречистым и, за имя Его святое узы поносив, радостию неизглаголанною6, ныне на небесех у престола славы Святыя Троица веселишися, к Нейже молися за мя, да избавлюся от всякаго зла твоими молитвами. Святый Павле, възлюбленниче Христов, небесный человече, земный Ангеле, проповедниче святыа вере, всех язык учителю, церковная богогласная труба, высоколетаючый орле, небесных таин сказателю преславующий ветие, вместилище духовное, въсхыщен быв до третьяго небеси7 и многыя беды пострадав за имя Христово, некыйся всеми Християны, да быша спасени были, забывая раны на телеси, небо8 промеривый и землю обшед нас избави идольскаго гнева. Тя молю и тебе въпию: не гнушайся мене сквернаго, непрезри ослепша душевными очима, но буди ми вождь9, възвращая мя от пропасти погыбельныя. Аз бо, аки берние10 грехы люблю; но ты яко преблагь Спасов ученик, избави мя, даже не погыбну до конца и да неречеть враг мой: укрепихся нань. Въстави мя убогаго, разслаблена суща душевною немощью11; ибо ты в Листрех от чрева роженнаго хромца с Варнавою въставил еси и Евтиха мертва оживил еси: въскреси и мене от мертвых дел, надежа моя и прибежище 12: избави мя от всех плотскых и душевных скверн. Приими мольбу окаяныя ми душа, юже Ти приношю от страстнаго ми сердца. Не имам бо добрых дел, спасающих мя, ни слез, ни покаяния нестяжах, беззлобия, кротости удалихся, чужь бых всякаго добра, зверообразен видящим мя, от всех человек окаян, от бесов поруган; яко беззакониа моя познах и греха моего непокрых, егоже помысля, весь в глубину нечаяния погружаюся и к тебе руце простираю: вся бо можеши от Бога данною ти властию. Верою прошу: посети мене, Святе, твоею милостью13, укрепи мя творити добрая дела, яко сый Христов Апостол. Святый Иоанне Богослове, наперстниче Христов, девьственный сосуде, душевная14 святая Церкви, медоточный язык, громогласная духовная уста възгремевый нам Сына Божия въчеловечение15, Ефесьская похвала, церковный светильниче, надежа моя и прибежище, услыши молитву мою вонми моление мое; неотстави мене от твоея помощи, непрогневайся на мя много съгрешившаго, яко имея утробу щедрот. Подайже ми16 Владычне человеколюбие, яко то нерадуется о погибели грешничи; тыж и беды от беззаконник приемля и до крови стража, за всех Богу молишися, помолися и за мя убогаго; непомяни злобы беззаконий моих; но, якоже Домна в бани въскресив и жива отцу его дарова, тако, Святе, и мене многыми грехы умерша твоим посещением оживи и чиста Отцу Небесному представи. Надеюбося на тя и приношу ти молбу от уст сквернен и от сердца нечиста и колени преклоняю душевнии и телеснии. Помощник ми буди на супротивника моего: да неодержить мене злокозненный змий. И дайже ми руку помощи и презри моя грехы, да неотвратить моя злоба твоего благодеяния. Ты бо и узами древле обложен, воина в море утопшаго во мнозех часех, из глубины волнами жива приверже к кораблю, плачющих утеши, неверных в веру обрати: и мене такоже, Блаженне, усилена врагом утеши и от неверия в веру претвори, твоим посещениемь спаси, Святе, от всякаго душегубнаго разорения и от страстных помысл, иже по вся дни стужают окаянной ми души, яко Проклианию от похотения неприязненна избави и Сосипатра спасе, и мене избави от всякаго греха твоими молитвами. Святый Луко, божественный Евангелисте, духовный скорописець, богопустъный17 врачю! Призри на мя18 твоею милостию и, юже веси, тайную болезнь греховную, давну сущу в сердце моем, даром божественным уврачюй. К тебе бо прибегаю, одержим душевною немощью, все тело язвено имея; но обяжи, Святе, неисцельныя струпы моя, не мини от детска уязвена вражьими стрелами: можеши бо мя исцелити и от сего часа здрава сътворити от Бога данною ти благодатью. Се бо въсмердиша и съгниша раны моя, от лица безумия моего; но тебе молю: покаяниа масло възлей на мя, могущее мя от тех избавити и очистити, яко на тя упование възложих. Святый Марко, Господень честный арган19, ибо в всю землю изыде вещание твоего сладкаго гласа, украсивый Церковь святымя ти словесы, Христовых таин списателю и всех чюдесь Его благовестниче, работавый Евангелию Христову! Моли за мя человеколюбца Бога, да порабощу тело божественным Его заповедем и да свобожю си душю от работы лукаваго твоими молитвами. Святый Матфею, оставивый мытницу и все греховное имение20 разсыпавь, въсприял еси на небесах неизготоваемо жилище 21 и сказавый нам второе Христово пришествие, егда явится с небесе во множестве Ангел, врагы страша и верных веселя: тогда и вы сядете на престолех, судяще языком. Увы мне! Како явлюся тогда аз акаянный, всякаго зла исполнень? Но буди22 ми помощник и укрепи мя на течениа благая, да избавиши мя от вечныя горкыа мукы. И вси прочии избраннии Апостоли Андрее, Якове, Фомо, Варфоломию, Симоне, Филиппе, Христови угодницы, льсти искоренители, вере насадители! Услыште мя грешнаго, на вы надеющася. Уже бо от дел несть ми спасения, аще непокрыете мя от всякаго кова льстиваго змиа безстуднаго. Се бо яко лев рыкая ходить, хотя мя пожрети; но съкрушите ему лукавую главу, расторгните челюсти его и мене избавите Вашими молитвами, да бых еще да семь свете моих грехов покаялся, еликоже сътворих на убогую мою душю. Ей, Владыко мой Господи Исусе Христе! Умилосердися на мя окаяннаго: Молитвами Апостол Твоих от тайных моих очисти, даждь благодать разума моему недостоинству. Ты бо еси Христос Сын Божий, дая молитву молящемуся, приемля покаяние кающихся. Приими Владыко мое покаяние и отпусти нечестие сердца моего. Спаси мя по милости Твоей, яко аз раб Твой Владыко, и Сын рабы Твоея. Не дажь, Господи, в смятение ногы моея, ни да въздремлеть храняй меня Ангел; но вразуми мя, Боже, очисти и освяти смиреную ми душу: да не възвращуся уничижен, скорбен, посрамлен, но да получу, их же желаю безконечных Твоих благ. Не сниди с мною в суд23: аз бо ведаю своя безакония, глаголющая на мя; того ради, молю Ти ся, Владыко, от сердца и от души: не остави, Господи, до конца погыбнути в тине дел моих, но дайждь ми руку помощи. Съведый немощь мою, презря грехы моя и ожидая покаяния, яко благь и долготерпелив, нас ради на землю съшед и Апостолы избрав и теми призываеши вся языкы в вечную жизнь. Тех молитвами, Христе Боже, посли нам Твою милость и волны укроти нестройных ми помысл, и падшую душу мою вьстави и от всякаго зла избави и настоящаго суда свободи: Яко Ты еси Бог мой и Тебе славу въсылаю со Отцем и Святым Духом и ныне и присно, и в векы веком. Аминь.

Молитва святаго Кирила в четверг по часех.

Владыко Господи! Твой есть день и Твоя есть нощь, Тебе вся тварь работает и всяко дыхание славить Тя: аз же окаянный все житье мое сконцав блудно, страхом одержимь есмь, яко помянух дни первыя24, в няже вся злая не чувъственно створих. И того ради не имею дерзновения к Тебе, яко безакония моя велика и пристрашни греси мои; врази же мои тружають мя25. Но Ты, Господи мой Господи, отверзый уста немому, отверзи уста моя, да глаголю в молитве угодная Тебе. Се бо душа моя, яко земля несеянна26, не может о себе принести плода; но дайжь ми от семяни святаго Твоего, и напой росою благодати Твоея, да принесу Ти плод покаяния. Господи Исусе Христе! Хотяй всем человеком спастися, услыши молитву мою молитвами Святых Апостол Твоих, яко тии молят за ны. – И аз теми у Тебе прошения прошу, яко тех молитвы присно послушаеши, и молениемь их спаси мя грешнаго, исцели болезнь сердца моего; уврачуй струпы душа моея; просвети очи ума моего; очисти помыслы чувьства моего; разжи утробу мою пламенемь страха Твоего, да пояст терние грехов моих и душю мою прохлади любовию. К Тебе бо желаю истинному свету и подателю света и у Тебе единаго спасения прошю27, насыти алчьбу мою от милости Твоея, напой жажю28 мою от безчисленнаго человеколюбия Твоего. И да покрыеть мя благодать Твоя от всякаго зла, да Тобою хранимь избавляюся многых сетей лукаваго, по вся дни препинаемых29, и да не похвалятся врази мои на раба Твоего, уповающаго на Тя; но спаси мя по милости Твоей: да воздам Ти обеты моих молитв, и до последняго издыхания каяся о моих прегрешениих, прославляю Пресвятое имя Твое, Отца и Сына и Святаго Духа, ныне и присно и в векы веком, Аминь.

Молитва в четверг по Вечерни преподобнаго Кирила 30.

Крест души возстание и живот вечный: свет Сын Божий 31: крест слава Господня: крест супостатом победитель и избавитель человеком. Господи Христе Боже нашь, Иже, нашего ради спасения, от безначальнаго Ти Отца пришед от вышняго круга горняго небеси в нижная страны земля, Бог сый непременен, в наше естество оболкся и весь бысть человек за многое и неисповедимое Твое милосердие, да данное Ти достояние языкы к себе приведеши, изем от стараго врага мучителя диявола, емуже поработихомся грехом, часть32 Твоя сущи и жребий вожделенный 33, о них же рече: иныя овцы имам. И ныне непопусти Господи сконцатимися во гресех, яко к Тебе прибегох34 от юности моея и от утробы матере моея. Бог мой еси Ты: недайжь о мне радостнику35 быти бесу: ты съвеси удобь прелстимое человеческое естество; но, ими же веси, судьбами спаси мя. Несть бо во мне ни единаго нрава, спасающаго мя, но весь нищь, весь убог без Твоея помощи, напраснив36 родом и свиреп естеством, похотник греху, злу волю имый, поминатель злу, забытник добру, преступник клятве, обидлив паче всех, скор на сварь и на смирение разслаблен, ревнивь на блуд и на молитву ленив, изообилуяй в ядении и питии, и несытый немилосердием, все благодеяние отверг от себе и вся неподобная вселишася в мя. Но ты, Господи Господи, туне милуяй37 человеческый род, туне спаси мя. Вемь бо Тя решаго: приидете ко Мне вси тружающиися и обременении, Аз покою вы. Не презри мене, Господи, утружшася в делех неподобных, поревающагося тяготою безакония, но возьми бремя греховное от мене, яко имея множество щедрот и сподобивый мя недостойваго раба Твоего варити пределы дне сего и в последний час поклонитися славе Твоей и вечернюю молитву приносити, юже приим, Милостиве, от уст грешен, не раскайся о дарех38, яже обеща рабом Твоим, в молитве просящим у Тебе. Ты съвеси, Владыко, тайная сердец наших, егоже наиболе требуемь. Даждь ми, Господи, убежати всякаго дияволя искушения и прости мя от преж сътворенных многых ми грехов. Събери мой ум от плотьскых похотей; уклони сердце мое от тщая льсти человеческыя похвалы: да о съгрешениихь моих покаюся и о падениих моих умилюся и о безакониих прослезю; да и н приидущую нощь необъят буду греховным мраком и тяжкым сном, но укрепи мя на полунощное 39 пение, силою Твоего неизреченнаго Божества. И дажь очима моима легок сон, без мечтания, без смущения и к утреннему въстави мя хвалению, светом заповедей Твоих просвещая разумнеи мои очи; отврати нозе мои от всякаго пути зла и постави мя в след заповедей Твоих ходити и предзрети40 Тебе в душевней ми церкви и в словесней храмине тела моего: да и прочее время непорочно скончав десныя Ти страны причястник буду со всеми от века угождшими Ти, с ними же и введи мя в духовный он41 двор и причти мя избраннем твоем стаде словесных Твоих овець, ихъже ради кровь пролиа. Ты бо еси Бог мой и аз раб Твой и Тебе славу всылаем Отцу и Сыну и Святому Духу, ныне и присно, в векы веком. Аминь.

Примечания:

При издании молитв св. Кирилла, были использованы:

Три рукописи Соловецкой библиотеки

а) сборник под № 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;

б) Большой Требник дачи Новгор. Митроп. Макария под № 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;

в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;

Две рукописи Волоколамскаго Монастыря

г) Сборник под № 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;

д) Сборник под № 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. № 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. № 109.

* * *

1

Въстягнуться – удержаться, воздержаться.

2

В печатном издании: сластолюбиваго хотения, удаляющаго тя от жизни.

3

В рукописи Волоколамской № 109 и 413: погыбельный.

4

В печатном издании рукописи Соловецкой № 1085 после этого прибавлено: ловче глубины неразумия.

5

Тению своею.

6

В печатном издании начиная с слов: радостию неизглаголанною до слов: помолися за мя, пропущено.

7

Слов: въсхищен быв до третьяго небеси, в печатном издании нет.

8

В печатном издании и рукописи Волок. № 109: море.

9

В печатн. издании начиная с слов: но буди ми вождь, до слов: въстави мя убогаго... пропущено.

10

Берние – брение, тина.

11

В печатном издании: греховною леностию.

12

В печатном издании начиная со слов: надежа моя, до слов: вся бо можеши данною ти властию, пропущено.

13

В печатном издании вместо: посети мя твоею милостию, поставлено: исторгни мя от сети вражия...

14

В печатном издании: одушевленная.

15

В печатн. изд. слов: възгремевый нам Сына Божия в человечение, нет...

16

В печатном издании это воззвание к Евангелисту Иоанну: подайже ми, до слов: Святый Луко, пропущено, а вместо его напечатано совершенно другое.

17

В печатном издании: Богомудрый...

18

В печатн. издании все это воззвание к Евангелисту Луке, начиная с слов: призри на мя, до слов: Святый Марко, Господень честный арган, пропущено, а вместо его напечатано: услыши молитву мою, уврачуй страсти душа моея и непрезри меня уязвленнаго вражьими стрелами: можеши бо исцелити меня и от сего часа здрава сотворити.

19

В печатном издании вместо: Господень честный арган напечатано: Александрийский и Египетский светильниче, а дальнейшия слова до слов: Христовых тайн списателю, пропущены.

20

В печат. и рукоп. Вол. № 413: собрание. В рукописи Солов. № 1085: бремя.

21

В печатном издании и рукоп. Волок. № 413: неиждиваемое богатство.

22

В печат. изд. это слово поставлено во множественном числе: будите, и отнесено уже к следующему далее воззванию ко всем Апостолам.

23

В печатном вздании начиная со слов: не вниди со мною в суд и до конца молитвы напечатано совершенно иное.

24

В печатном издании прибавлено: и доныне...

25

В печатном издании и рукоп. Волок. № 109: стужают ми.

26

В печатном издании: земля безводна оста, не может...

27

В печатном издании: у Тебе единаго прошу милости и спаси мя, а дальнейшия слова: насыти алчьбу мою от милости Твоея, пропущены.

28

В печатном издании: жаждушую душу мою...

29

Вероятно – препинающих.

30

Похвала Святому кресту, которою начинается эта молитва, находится только в печатном издании и Волоколамском списке под № 109; в других же списках она начинается уже следующими за нею словами: Господи Боже наш, иже от безначальнаго Ти Отца... Впрочем в Волоколамском списке эта похвала написана в виде отдельной молитвы и с особым заглавием: »Молитва в четверг по Вечерни«. В таком же виде, может быть, находилась она и в других списках, послуживших основанием для печатнаго издания молитв; но древние издатели соединили ее с следующею за ней вечернею молитвою, вероятно по причине ея краткости.

31

Так и в печатном издании.

32

В печатном издании: чада Твоя суще...

33

В печатн. изд. желанный...

34

В печатн. изд. и рукоп. Солов. № 1085: привержен.

35

В печатном издании: радости.

36

В Словаре Миклошича: Напрасьнив, напрасьлив, iracundus, severus, гневный, жестокий.

37

В печатном издании: поминаяй человеки.

38

Слов: юже приим, Милостиве, от уст грешен нераскайся о дарех, в печатном изданин нет.

39

В печатном издании: всенощное...

40

В печатн. издан.: поминати...

41

В печатном издании: Твой...

Комментарии для сайта Cackle