Библиотеке требуются волонтёры

святитель Кирилл Туровский

Молитвы в понедельник

Молитва в понедельник по Заутрени преподобнаго Кирилла.1

К Вам, яко заступником и хранителем живота моего, аз окаянный и многогрешный (имя рек) припадаю, моляся и прося Вашей милости: видци Божия величества, святии Ангели,2 престол честный Пресвятыя Троица страшно обьстояще и не изреченною светлостию Божественныа славы облистаеми! Молите всемилостиваго и всещедраго человеколюбца Бога избавити мя от всякаго зла, приходящаго на мя.3 Михáиле святый и великый Архистратиже, первый поклонниче4 Святыя Троица, приставниче и хранителю роду человеческому, осиявый чюдесы вселеную! И мне подай дневное пребывание преити богоугодно, не искусно5 от злых помысл и дел злокозненых; отверзи ушию моего слуха, да слышю и разумею Божия словеса благая и душеполезная и да прозрю внутренима очима и еще тме сущи греховной обдержащи мя, в ней же проходя во вся дни живота моего, прогневах благаго и незлобиваго и длъготерпеливаго Творца моего и Владыку. Ему же предстояще со страхом, небесныа Силы не вещественными усты трисвятую всылающе песнь, молите за мя, по вся часы съгрешающаго. Да не поясть мене мечь ярости Господня: зело бо превьзыдоша безакония моя главу мою,6 яко бремя тяжко отяготеша выи моей.7 И еще помяну минувшее время живота моего, убо преступника себе сведаю: разумею бо ся паче всякаго человека злая и не подобная и не милая Богу съделах дела, и боюся, егда како огнь с небесе съшед, сожжет мя или преисподняя пропасть жива пожрет мя. Съведый же долготерпение и пучину человеколюбия Божия, не отчаю себе, яко не наводит казни на достойнаго мучения, но ожидаеть моего покаяния. Святый Гаврииле, радости ходатаю и спасению благовестниче, скорби пременителю и всякаго зла погубителю! Буди мне помощник в год, егда побежаемь буду от страсти, посети святым ти посещением, освети ми душю, омеркъшую многыми грехы, укрепи мя творити добрая дела. Вопию к Тебе воплем великым и, моляся, припадаю Ти: не презри мене раба Твоего, но скоро потщися, даже не постыгнеть мене конець, даже смерть не варить и не въсхытит окаянныа ми душа, и еще зле стражющу в скверных обычаех, и поимеши мя не готова от жития и поставиши мя без ответа пред Судящимь по делом комуждо.8 Но, яко имеа к Богу дерзновение о всех молитися, и мне отпуст прегрешением испроси. Святый Уриле! Виждь беду мою и брань вражию, ею же побежаемь есмь присно, на помощь Тя призываю: вари 9 в заступление мое, да ся ощутить мой ум от сна греховнаго. Дивлю бо ся себе, како окрадень10 есмь плотскыми похотьми11 и обретаюся в делех, их же ненавижу, и, не подобная мысля, акы рукама разоряю благодать Божию,12 ожидающу моего обращения. Увы мне, како не имам твердо основание покаянию! Да кто даст очима моима слезы, да ся плачю к милостивому Богу, да послеть Свою милость и исторгнеть мя из моря житийскаго, волнующагося волнами греховными,13 в нем же погружаемь есмь, не приемлю обязания и исцеления скорым покаянием.14 Сведый узы моа, и не хощу изрешитися из них, запинающи ми телесной слабости. 15 Святый Рафаиле! Подвигни легеона16 святых Ангел, да помолять Владыку и Господа за убогую и смиренную ми душю, кающася о прежь содеянных ми зол. Веде бо свое естество, тленно суще17 и скоро погыбающее: да како не постигну вечера, и порадуется враг мой о мне, глаголя: се человек суете уподобися и дние его, яко сень преидоша. Но, Господи Iсусе Христе, Сыне Божий! Припадая, молю Ти ся: призри на мя и помилуй мя, изведи душю мою из темници беззаконныа, преже даже18 не отъиду отселе и прииду на суд страшный. Приими Господи молящих Тя19 за ны, святыа Ангелы и Архангелы, Херувимы и Серафимы, Силы и Власти, Престоли и Господьства, Начала высокая, обонадесять легеона20 иже окрест престола Твоего предстояще, за весь мир молять Тя: тех молитвами и Пречистыа Матере Твоея Владычиця нашея Богородиця, избави мя студа21 онаго и тмы кромешняя и не усыпающаго червия ядовитаго, и не угасающаго пламени. Ты бо еси Агнець Божий, вземляй грехы всего мира, распныйся на кресте нашего ради спасения и принесыйся на жерътву за ны грешныя.22 Вонми молитву мою и посли Ангела свята, хранителя душам и телом: да тем наставляемь, избавлюся от всех видимых и не видимых враг и сподоблюся получити Твою славу23 со всеми угодившими Тебе от века. Яко Ты еси Бог нашь и к Тебе прибегаю и на Тя надеюся. Аще бо и съгреших много паче всех человек,24 но от Тебе не отступих, ни руку моею к иному Богу воздех; но Тебе молюся, Господи Iсусе Христе, и Тя благословлю и Тебе кланяюся в Троици Единому Богу Отцу и Сыну и Святому Духу и ныне и присно и в веки веком. Аминь.

Молитва в понедельник по часех, преподобнаго Кирила.

К Тебе, Вседержителю, Пресвятый Царю припадая, молюся и тружаюся душею, милости прошю! Руце Твои сотвориста мя и живот даровал ми еси; злокозненный же враг, безстудием нашед на мя, въскрежета на мя зубы25 своими, и стрелою безаконною устрели мя, греховным же мечем зле порази мя: много же брався со мною, и преможе мя.26 Впадох в сети прегрешения, аки зверь на уловление, и уловиша мя.27 Ощутих язву не исцельну, взысках врача на земли, и не обретох. Но к Тебе возпущаю глаголы молебныя от душа: Владыко Господи Творче всех, Боже Отче Правителю душ наших! Съгреших на небо и пред Тобою: не посли гнева, достойнаго по делом моим, да не буду, яко риза, молем изьядена, или яко железо ржею скончеваемо. Се бо беззакония моа нападоша на мя, и греси мои покрыша главу мою, и бысть ми полудне, акы полунощи. Первие брашна въздыхание ми прииде, и все житие мое печалию въсхыщено бысть, и страх же в сердци ми вселися, яко взыскал еси28 беззаконие мое, и вся грехы моя изследил еси, наведе на мя искушение, и гнев велик възложи на мя. И того ради не могу возникнути29 к Тебе, ни руку въздети на высоту. Но моляся непрестанно, день дне избавления прошу: послух30 бо ми есть на небесех верен, единочадный Твой Сын Господь наш Iсус Христос, Его же посла спасти грешных. Той бо рече: просите и дасться вам. Господи Боже мой!31 Да внидет пред Тя молитва моя; приклони ухо твое к молению моему.32 Помяни Господи, яко персть есмь; измерен ми живот, положена же лета и изочтени месяци; в преполовении 33 дний моих не погуби мене, да не возвращуся в землю тмы вечныа, идеже несть света, ни жизни34 вечныя человеком; да не изсушит геена крови моей, но дай же ми время покаянию. Яко не требуеши смерти грешника; милостив бо еси человеколюбец, имеяй пучину щедрот и обретаяся близь скорбящих, дая должьная35 прошения рабом своим. Iсусе Благодетелю, заре Отча, свете не прекосновенный! Просвети омраченнеи ми очи и дай же прощение многих ми грехов: молитвами святых Твоих небесных сил36 Ангел, Архангел, Начал, Престол и Господьств, Херувим, Серафим и Пречистыя Твоеа Матере Госпожи нашеа Богородица и всех Святых Твоих, их же молитвами помилуй Отче и Сыне и Святый Ду́ше. Яко Ты еси Бог мой и аз раб Твой, 37 у Тебе милости прошю, всегда ныне и присно и в веки веком. Аминь.

Молитва в понедельник по Вечерни преподобнаго Кирила.38

Владыко Господи, всеа видимыа и не видимыа твари Содетелю, Боже сил, веком Творче, сътворивый времена и лета, измеривый день и нощь часами, разлучивый свет от тмы, и видев яко добро и бысть вечер, его же и мене смиреннаго сподобил еси достигнути и до последняго часа дне сего, в онь же вечернюю службу всылаю Ти! Исправи молитву мою, яко кадило пред Тобою; утверди нозе мои в заповедех Твоих и руку моею въздеяние освяти; очисти уста моа словес Твоих чистотою и вложи страх Твой в сердце мое; покрый душю мою сению Святаго Духа; утверди уды моа, на зло подвизающаяся, и не остави мене без Твоего заступлениа. Ты бо съвеси немощь естества моего, яко хуже паучины39 обретаюся к Твоему угожению. Господи Исусе Христе Сыне Божий, преблагий Господи! Помози моеи худости. Рекый благословесными усты Своими: воззови Мя, избавлю тя, и ныне зову и вопию не престая: не предажь мене желанию сатанину, да не буду причастник пагубе, да не съвратит40 уст моих от славословиа Твоего и да не стану41 в радость врагу, и похвалится о мне глаголя: где есть Бог твой. Ты еси Бог мой, имея пучину человеколюбиа и не отлучаяся42 николиже от Своих раб, по даруа прошения любящим Тя: приими мое сего часа моление, да на всяк день и час приношу Ти пение43, каяся о прежь мимошедших днех живота моего, в ня же уподобихся не разумным скотом ядением и питием и всеми похотьми скверными, ими же далече бых от Тебе 44. Създание руку Твоею есмь и тварь, врагу поработихся, иже и доныне злохытрием крадеть мя, хотя мя потопити в глубине греховней. Вари45 в заступление мое и рци души моей: спасение твое есмь Аз. Да исповедят уста моа множество милости Твоеа, яко помилова и спасе мя грешника, и въсхвалю има Твое в векы. И тако мя отпусти от телесе моего, ангельскым огражая заступлениемь душю мою, и препроводи не искусну от злых мытарь, приседящих у врат небесных: да и десныя Ти страны причастник буду46, со всеми угожьшими Ти: молитвами и молением Пречистыа Богородиця и Святаго Пророка Предотечи Крестителя Твоего Иоанна и всех святых. Яко благословен еси и прославлен с Отцем и с Святым Духом и ныне и присно и в веки веком. Аминь.

Молитва в понедельник по Вечерни святому Предотечи. 47

От пустаго житиа исходящи, к Тебе прибегаю, раб Твой (имя рек) и Твоея милости прошю: не презри мене, Пророче и Предотече, осквернена. Простираю руце мои: не отрини мене страстнаго, но тихою си милостию на мя человеколюбне призри. Се бо сластьми осквернихся и, помыслив прежняя владычества, врага совещавающаго послушах и гласа Бога моего ослушахся, образа доброту омрачих и персть нань воставих. Сего ради, молю ти ся Предотече: молебник ми тепл явися к Христу Спасу Зижителю; достойными плоды покаяниа покажи умиленныа ми молитвы; малое воздыхание мое приими и руку моею воздеяние исправи; в день осужениа избави мя и Судию милостива сотвори. Тебе бо имам заступника и молю, яко помощника и надеждю к Богу: постри ми рабу твоему рубу, крестившую Христа Бога моего. Ужасаюся и трепещю будущаго судища, но под Твою милость прибегаю и простираю к Тебе очи мои: не отрини мене раба твоего, Предотече! Всенощными си молитвами избави мя присно от злых грехов, держащих мя; песньми бдяща сотвори славити Христа, Его же крестил еси. Тому подобает всяка слава, честь и поклонение Отцу и Сыну и Святому Духу и ныне и присно и в векы. Аминь.

Примечания:

При издании молитв св. Кирилла, были использованы:

Три рукописи Соловецкой библиотеки

а) сборник под № 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;

б) Большой Требник дачи Новгор. Митроп. Макария под № 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;

в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;

Две рукописи Волоколамскаго Монастыря

г) Сборник под № 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;

д) Сборник под № 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. № 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. № 109.

* * *

1

В рукоп. Вол. № 413: преподобнаго Кирила священноинока; в других рукоп. молитва не означена именем св. Кирилла.

2

В печатн. изд.: престоли честнии Пресвятыя Троица страшно обстоящии

3

В печатн. издании слов: приходящаго на мя, – нет.

4

В печатн. изд.: предстателю.

5

В рук. Вол. № 109: не искусну.

6

В печатн. издан.: на главу мою.

7

В печатн. издании вместо: выи моейна мне

8

В печатн. изд.: пред судом воздающаго комуждо по делом.

9

В печатн. изд.: приди.

10

В рук. Вол. № 413: окрадаемь.

11

В рук. Вол. № 413: помысла.

12

В печатн. изд.: лишаюся благодати Божией.

13

В печатн. изд.: житейскими

14

Так в рук. Вол. № 109; в другой Вол. рук. № 413: не приемлю покаяния; в печатн. изд.: не приемлю беззаконием исцеления.

15

В рук. Волок. № 109 и печатн. издании: сласти.

16

В печатн. издании: множество.

17

В рукоп. Волок. № 413: тлеюще.

18

Преже даже – прежде нежели.

19

В рук. Вол. № 413: молящихся.

20

В рук. Солов. № 1085 и печатн. издании слов: высокая обанадесять легеона, – нет.

21

В печатн. изд.: суда

22

В печатн. изд. слов: и принесыйся на жертву за ны грешныя, – нет.

23

В печатн. издании: милость.

24

Так в рук. Волок. № 109; в рукоп. Солов.: паче человека.

25

В рукоп. Волокол. № 109 и печатн. издании вместо: своими – завистию…

26

В печатн. издании слова: много же брався со мною, и преможе мя, – пропущены.

27

В печатн. изд.: яко зверие на убиение уловиша мя

28

В печатн. издании: изыскал еси.

29

Возникнути – показаться.

30

Послух – свидетель (ср. Пс. 88: 38 – прим. А. К.).

31

В печатн. издании после этого прибавлено: кровь Твоя цена души моея да внидет пред Тя

32

Вместо слов: приклони ухо Твое к молению моему – в рукоп. Волокол. № 109 и в печатн. издании: по словеси Твоему избави мя.

33

Преполовение – половина.

34

В рук. Вол. № 109: радости.

35

В печатн. изд. и рук. Сол. № 1085: довольная.

36

В печатн. изд. и друг. рукоп.: слуг твоих.

37

В печатн. издании слов: аз раб Твой – нет.

38

В ркп. Волок. № 109: Кирила мниха грешнаго.

39

Паучина – паутина.

40

В печатн. изд.: да не затворю уст моих. В рук. Солов. № 1085 и Волок. № 109: да не затворит уст моих.

41

В печатном издании и друг. ркп: да не отстану...

42

В печатн. издании: не отлучайся.

43

В печатн. изд.: пение и молитву.

44

В ркп. Волок. № 109: ими же удален бых от Тебе.

45

Вари – поспеши.

46

В ркп. Солов. № 1085 вместо слов: да и десныя Ти страны причастник буду, написано: и сподоби мя света сияния лица Твоего.

47

Молитва эта отпечатана по ркп. Волокол. № 109; она не означена именем св. Кирилла.

Комментарии для сайта Cackle