Литургическое наследие Митрополита Иосифа

Твердая воля и благодать небесная!

Пропоем в радости и чистой совести!

Митрополит Иосиф известен как гимнограф. Он составлял молитвы, которые читал по окончании молебнов: в день 25-летия Патриаршества Святейшего Патриарха Алексия I в 1970 году, Всем русским святым в 1971 году. Владыка составил также Акафист преподобной Пелагии, святителю Павлу и мученику Иакову Персянину. Они были составлены в Азове в 1942 году. Иконы с частицами мощей этих святых находились в домовом храме Митрополита Иосифа в Алма-Ате. Икону мученика Иакова Персянина написала монахиня Агния, художница-иконописица из Караганды, с которой Владыка переписывался, а бывая в Караганде, старался ее навестить. Не сохранился Акафист святителю Филиппу, который Владыка составил, когда был еще послушником в Тверском Отроче монастыре. Он имел припев: «Радуйся, священномучениче Филиппе, Московский и всея России чудотворче».

О составлении Акафиста преподобной Пелагии Владыка рассказывает в одном из своих писем, ведя речь от третьего лица. Он говорит, как автор волновался, составив хвалу в честь Преподобной, будет ли принят его труд. В эту ночь он видит себя во сне «в очень большом красивом саду, красивее красивой и волшебной «Софиевки». Белая голубка бросила автору красивое яблоко.

Акафисты были переписаны в ученической тетрадке, к которой были приделаны корки, обтянутые потертым темно-вишневым бархатом. Этот бархат был взят со скрижалей архимандричьей мантии Владыки Арсения. Две записи в тетради дают новые сведения о жизни Владыки Иосифа того времени. В конце Акафиста преподобной Пелагии записано: «Икона освящ. для арх. ц. 29/XI-42 со влож. частицы св. мощей преп. Пелагеи». К 10 кондаку Акафиста святителю Павлу почерком переписчика написано такое примечание: «Отселе началась бомбежка, все засыпало стеклом и глиной. 23 июля с. г.». Слева же рукой владыки – «1942». На праздник Богоматери Знамения и память мученика Иакова Персянина была архиерейская хиротония Владыки Иосифа. Десятилетие архиерейства, можно сказать, Владыка почтил гимнографическим творчеством.

Владыка Иосиф написал Акафисты в тяжелое время Великой Отечественной войны. Некоторые выражения в Акафистах звучат весьма актуально. В 7 икосе Акафиста святителю Павлу Исповеднику читаем: «Новое знамение милости Божия яви и нам молитвами твоими, святителю Павле, ограждай нас от помраченных людей, несущих раскол и неверие, нападающих люте на нас, пребывающих в единении с Церковию Христовой, вселенстей». В икосе 4 Акафиста мученику Иакову Персянину читаем: «Радуйся, святыми мощами твоими нас освящали и сохраняли». Акафисты писались Владыкой Иосифом в тяжелый период его жизни, названные Акафисты свидетельствуют о его молитвенном горении и делании в жизненных обстоятельствах, когда ему угрожала постоянная опасность.

память 8 октября

Кондак 1

Избранней Богом от мрака языческого и дивными путями призванную к свету Невечернему в Иерусалим горний прекрасный, всеславную и преподобную матерь налгу Пелагию; Ты же, всечестная, голубице Христова, яко имущая велие дерзновение ко Господу, от всяких нас бедственных обстояний спасай зовущих:

Радуйся, Пелагие, голубице Христова предивная.

Икос 1

Ангельских чинов всещедрый Творец, Господь Бог наш, предуведевый благое произволение сердца твоего, всечестная Пелагие, приведе тя чудесне к церкви мученика своего Иулиана, идеже в той час блаженный Нонн Епископ, Божественных словес Христовых, антиохийским овцам словесным, трапезу предлагаше, тя голубицу черную, Евангельскою мрежею чудным образом улови. Мы же зряше всеслезное твое моление о крещении, во умилении тебе зовем:

Радуйся, голубице, из мрачной в светлую совершенная Духом Святым.

Радуйся, голубице Христова, на высоту добродетелей взлетевшая.

Радуйся, покаяние Христу принесшая всеусердно.

Радуйся, из черной в светлую содела тя Бог покаянием.

Радуйся, через дальнее покаяние к горней радости возлетевшая.

Радуйся, Пелагие, голубице Христова предивная.

Кондак 2

Видя себе Пелагие, глаголами Божественными из уст святителя Христова Нонна побежденною, абие, в себе прииде, к стопам сего святителя сердечне припаде, аки Евангельская жена, горце рыдающе, прося Божественнаго просвещения, взываше Богу: Аллилуиа.

Икос 2

Видевше велие благолепие лица твоего Пелагие и пребогатое одеяние телеси, великую славу и рабов – блазняхуся людие. И сего ради Епископ Нонн постави тя, украшенную рясно, в укор себе и причту, в нерадении к благоукрашению души своея. В нощной молитве всеусердной, коснувся сердца твоего, поведе его на покаяние. Мы же добре ведуще жития твоего деяния, вопием:

Радуйся, грехи оставившая в купели крещения.

Радуйся, вшедшая в радость Господа.

Радуйся, святыми твоими пресветлыми мощами нас освящающая.

Радуйся, к тебе притекающих усердная молитвеннице.

Радуйся, голубице, возлетевшая к Евангельскому совершенству.

Радуйся, обрученная краснейшему, паче сынов человеческих – Христу.

Радуйся, Пелагие, голубице Христова предивная.

Кондак 3

Силою Божественныя Благодати крещения, беспечально оставила вся уметы, мира сего грешнаго и развращеннаго. Все богатство твое земное яко сор среди града пожгла еси, попаляя тем терние своих прегрешений, поя Святых Святейшему Слову: Аллилуиа.

Икос З

Имущи велию благодать силы Божия, женское свое естество покорила еси мужеской крепости, прикровенно оставила Антиохию, взыскуя града вышняго. За таковое величие души твоея, мати, приими от нас похвалы сия:

Радуйся, жилище Духа Святаго была еси.

Радуйся, темже Духом Божиим на подвиги дивно наученная.

Радуйся, пути гибельнаго всеусердно убегла еси.

Радуйся, покаяния красото.

Радуйся святых радование. Радуйся, за нас земных, молитвенице. Радуйся, Пелагие, голубице Христова предивная.

Кондак 4

Буря велия бесовской ярости бе воздвижена на тя, славная мати Пелагие, егда святитель и чудотворец Илиопольския церкве Нонн, и тя, и седьм святителей, к трапезе, ради трудов понесших, вкусити пригласи, беси начаху слезу проливати. Ты же, знамением Креста Христова, хитрость диавола победи с собором святителей поюще: Аллилуиа.

Икос 4

Слыша иноцы града Божия Иерусалима, яко дарова Господь новаго подвижника, чеснаго инока Пелагия, иже от Антиохии. Егда же по успени твоем, славная тайна сия явлена бысть, похвалами ублажаше тя:

Радуйся, красоту земную презревшая.

Радуйся, красоту нетленную – небесную улучившая.

Радуйся, вседушно поискала еси небеснаго восхождения.

Радуйся, дивный Маргарит – Христа обрела еси.

Радуйся, все заповеди Того крепчайше возлюбила еси.

Радуйся, Пелагие, голубице Христова предивная.

Кондак 5

Боготечная звезда Божиим мановением водима была еси голубице Христова Пелагие, от Антиохии до града Иерусалима. Взошла еси на гору святую Елеонскую, гору милости Божия, идеже умилостивила еси Господа, три лета подвизался в подвизе велицем, денно и нощно поюще Богови: Аллилуиа.

Икос 5

Видевше блаженная, антиохийския Церкви диаконисса Романна, яко дщи ея духовная Пелагия тайно удалися, восплакавшеся зело, но абие утешена бысть прозорливым Нонном: яко та отыде на гору Елеонскую, спасатися конечне. Мы же, величая, мати, твое восхождение на гору добродетели поем ти:

Радуйся, обретшая ключ разумения духовнаго.

Радуйся, тем отверзшая двери райские.

Радуйся, со Христом вечно царствующая.

Радуйся, и нас молитвами своими привлекающая.

Радуйся, смиренная голубице Христова.

Радуйся, Пелагие, голубице Христова предивная.

Кондак 6

Проповедник твоего жития и блаженной кончины явися благоговейный во диаконех Иаков, егода послан бысть к тебе мати с молитвенным целованием о Христе от чудотворца равноапостольного Нонна; сего же честнаго диакона сподоби Бог видети тя, беседовати к тебе, и погребение сотворити святаго тела твоего с сонмом постников Палестины псалмы поюще: Аллилуиа.

Икос 6

Вышняго Царствия ища, страстей воды греха прелетела еси голубице Христова Пелагие, научи и нас, любовию тя почитающих и радостно память твою совершающих, усердно возлюбити образ покаяния, поющих с любовию тебе тако:

Радуйся, кроткая Христова агница.

Радуйся, усердно возлюбившая Агнца, вземшаго грехи мира.

Радуйся, Господа на милость к нам преклоняющая.

Радуйся, в мире подвизающимся поможение.

Радуйся, Церкви утверждение.

Радуйся, святителей радование.

Радуйся, Пелагие, голубице Христова предивная.

Кондак 7

Хотяще до конца дней своих земнаго пребывания во единем Христе пребыти, место святое избрала для подвигов святая голубице Пелагие, идеже пред Своим страданием за мир, Спаситель царски прехождаше: с детьми еврейскими носящими ваиа во время оно, поюще Богу: Аллилуиа.

Икос 7

Дивная среди жен святых поистине явилася еси святая Пелагие, егда стяжания своя ради Христовых нищих чрез руце церковнаго иконома отда и рабы своя свободи. Сими добрыми делами, воистину свободну себе сотвори от бремени тяжкого лихоимства. Помолися за ны, да сердце наше не прилепляется паче потребнаго, к земным вещем, губящих души наши, тебе поющих:

Радуйся, честных иноков и инокинь присное собеседование.

Радуйся, чистых дев доброе уневещение.

Радуйся, честная похвало благоговейных старцев.

Радуйся, прекрасно вошедшая в горний Иерусалим.

Радуйся, от козней диавольских нас охраняющая.

Радуйся, Пелагие, голубице Христова предивная.

Кондак 8

Странность некая, но Богу зело прелюбезная, како чадо греха, вспять не озираясь, яко жаждущий елень на водныя источники бегущий, к источнику покаяния, спешит честная Пелагия, сим научая нас вся красная источники оставити земная, ноюще с нею сладце: Аллилуиа.

Икос 8

Весь сладость, весь радость духовная, бысть тебе имя Христово, честная Пелагие. Егда молящуся ти в затворе, слезы проливающи. Сему душеполезному плачу нас научи, да вечнаго загробнаго избегнем плача, тебе нашей молитвеннице в радости поющи:

Радуйся, веры в пресладкаго Господа вкусившая.

Радуйся, радостию небесною почтенная.

Радуйся, омывшая грехопадения слезами.

Радуйся, научающая и нас молиться слезно.

Радуйся, слезами умиления радость вечную получившая.

Радуйся, Пелагие, голубице Христова предивная.

Кондак 9

Всяк ангельский чин удивися, како Пелагия – Маргарита, гордость на кротость преложи, и диавола посрами: угаси мати чудная пламень гордости сердца нашего, да благодарив чистым сердцем поем Богу Спасителю нашему: Аллилуиа.

Икос 9

Витии человечестии не возмогут достойно воспети величания в честь твоего честнаго жития мати преподобная, токмо Ангели Божии бысть свидетелие слез твоих и подвигов святая. Мы же, человецы, с Ангелы радующиеся о таковей подвижнице Божией, воспевающе ей:

Радуйся, течением слез твоих пламень мыслей бесовских угасившая.

Радуйся, исправления живой образе.

Радуйся, ныне в веселии живущая на небеси.

Радуйся, в венце Нонна святителя драгий Маргарит.

Радуйся, Пелагие, голубице Христова предивная.

Кондак 10

Спасти хотя вещь бессмертную – душу, плоть твою духови покорила еси, всехвальная голубице Пелагие: постом, бдением и беспрестанными молитвами, горняго мира достигла еси, предвкушая неизреченныя сладости райския, по слову небосшественнаго Павла, с ним же Богу поюще: Аллилуиа.

Икос 10

Стена яко каменная, бысь вера, любовь и надежда твоя, мати преподобная ко Христу, Его же ради двери затвора твоего камением утверди. На камени веры дерзновенная стала еси! И нас в таковей крепкой вере в Бога утверди, величающих тя приветствием сим:

Радуйся, чудно уловленная мрежею проповеди.

Радуйся, вечную радость на небеси обретшая.

Радуйся, цвете благоуханная земли палестинския.

Радуйся, добре утвержденная в обетех просвещения.

Радуйся, упованием не посрамленная.

Радуйся, жемчужина Церкви Христовой.

Радуйся, Пелагие, голубице Христова, предивная.

Кондак 11

Пение всякое побеждается, егда поем песни похвальныя в честь и память тя, преподобная мати Пелагие, како дивно вошла еси в храм святаго Христова мученика Иулиана и како срете тя, добрый пастырь стада Христова Божественный святитель Нонн: како воплем великим своим разстроила желание крайнее помилованной быти, поюще Богу: Аллилуиа.

Икос 11

Возсияла еси людем Боголюбивым новая звезда от святыя горы Елеонския, преподобная и всечестная мати Пелагия, на радость и веселие рода Христианскаго, приносящих тебе таковая:

Радуйся, воспеваемая сонмом иноков.

Радуйся, прославляемая Церковью вселенскою.

Радуйся, радосте скорбящих о спасении.

Радуйся, демонов рыдание.

Радуйся, увенчанная десницею Вседержителя.

Радуйся, Пелагие, голубице Христова, предивная.

Кондак 12

Благодать и велию милость испроси нам у подателя всякой благости – Господа, мати наша преподобная, моли милосердие Божие о милости Его к нам, в жизни сей временней, и будущей вечной жизни, твоим ходатайством нам испроси, тебе ублажающих и Богу поющих всегда: Аллилуиа.

Икос 12

Поюще светлуя память твою, воспоминаем дивное обращение твое к Господу Богу, ублажаем честныя подвиги твоя, воспеваем святое успение твое, прославляем и переселение твое в небесныя обители, дивная невеста Христова Пелагия, сия припевая тебе:

Радуйся, благую часть Христову избравшая.

Радуйся, иго Христово с любовью понесшая.

Радуйся, в час скорбей и напастей нам помогающая.

Радуйся, носящих имя твое святое всегда окрыляющая.

Радуйся, в Христовой радости пребывающая.

Радуйся, Пелагие, голубице Христова предивная.

Кодак 13

О святая и преподобная мати наша Пелагие! Приими сие малое наше молитвенно-хвалебное приношение, в честь и память святых подвигов твоих, от нашея любви тебе приносимые. Да молитвами твоими души наша убелим, белилом покаяния, вводящее в жизнь вечную, Богу поюще: Аллилуиа.

Молитва

преподобной матери нашей Пелагии

О святая и богомудрая матерь наша преподобная Пелагия! Ты во едином часе возлюбившая Господа Иисуса, все земное оставила еси невозвратно, устремилася еси к великим и спасительным подвигам, иже и совершила еси Евангельски во много крат! Сего ради, мы, в сей день, в день твоей светлой памяти, ублажающи тя, просим: пролей твою всесильную молитву о нас грешных пред престолом Сеяться Троицы, о милости Божией к нам, еже зде пребывающим в плачевной юдоли земной: О еже достигнути и нам твоими молитвами жизни в селениих праведных, идеже ты пребывавши, со всеми святыми, во веки веков. Аминь.

Родина пр. Пелагии – Антиохия. Кончина преподобной около 457 г. Епископ Нонн, св. был Епископом Илиопольским 451–458. Диакон Иаков, спутник еп. Нонна в Антиохию к Патриарху по церковным делам; в то время был съезд Епископов семи провинций Антиохийской Церкви.

Память преп. 8 октября.

Икона освящ. для Арх. Ц. 29/XI-42 со влож. частицы св. мощей преп. Пелагеи.

память 6 ноября

Кондак 1

Возбранный исповедниче Божий и угодниче Христов, миру всему возгласивый правыя веры исповедение. Восхваляем тя, святителю отче Павле: ты же яко имеяй дерзновение ко Господу, от всяких нас бедственных обстояний защищай зовущих:

Радуйся, святителю Павле, исповедниче Христов.

Икос 1

Ангелов Творец и всего мира Создатель, яви тебе святителю Павле, добраго исповедника православныя веры и поборника благочестия. Ты же велия труды подъял еси в прославлении Живоначальныя Пресвятыя Троицы. Мы же грешнии дивящеся таковей твоей ревности в посрамлении арианскаго злочестия, глаголем ти сицевая:

Радуйся, поборниче благочестия от Бога призванный.

Радуйся, служением своим Богови всеусердно послу живый.

Радуйся, разум свой Богови покоривый.

Радуйся, правды Христовой дивный ревнителю.

Радуйся, о нас пред Богом усердный молитвенниче и предстателю.

Радуйся, святителю Павле, исповедниче Христов.

Кондак 2

Видевше вси людие Цареградстии, мудрое твое правление Церкви, святителю Павле, и здравое богословие, призывающее покланятися Триипостасному Божеству: Сыну во Отце со Святым Духом, Духу от Отца исходящему и в Сыне почивающему, радовахуся зело и благодаряще Бога за ниспослание таковаго дара людям Своим, согласно вопиюще Троице Святейшей: Аллилуиа.

Икос 2

Разум Божественным учением обогатил еси, преподобие Павле, со тщанием проникнул еси во глубину учения непостижимости Святыя Троицы, отнюдуже и почерпал еси богатство Божественного знания. Равно бо и непременне благословил: Отца не рожденна, и рождение Сына, и Святаго исходительнаго Божественнаго Духа. Мы же дивящеся таковому твоему Богословию, тако тя песньми прославляем:

Радуйся, великий благочестия исповедниче.

Радуйся, утверждение веры православныя.

Радуйся, воистину добрый воитель на еретики явился еси.

Радуйся, сечение Святыя Троицы не потерпевый.

Радуйся, Тройческим светом осиянный до конца.

Радуйся, святителю Павле, исповедниче Христов.

Кондак 3

Силы, во еже словом и делом Христу работати, усердно стяжал еси, Павле достославне, темже и быв возненавиденный за правду Божию царем, якоже иногда Илия славный от Ахава пребеззаконнаго: такожде и изгнание претерпевый, всего себе предаде Богови, поюще: Аллилуиа.

Икос 3

Имеяше воистину, отче Павле, прославление на небеси, но и наши приими похвалы сия от земли, в честь и память твоих добродетелей, яже еси сотворил в житии твоем, сим и начертав нам путь Православия к торжеству веры Христовой, поющих тебе:

Радуйся, образе смирения и преданности воли Господней.

Радуйся, множество бед от лжебратий претерпевый.

Радуйся, за всех умильно Богу моливыйся.

Радуйся, терпеливо понесший крест Христов.

Радуйся, всем изгнанным за имя Христово, путь в Царство Небесное указующий.

Радуйся, за Троицу Единосущную сладце пострадавый.

Радуйся, святителю Павле, исповедниче Христов.

Кондак 4

Буря велия возшуме на тя, святителю, егда злодей венценосный, от семени арианскаго, изгна тя из града престола твоего, ты же Христу подражая, со всяким смирением отшел еси, моляся создателю Церкви: Аллилуиа.

Икос 4

Слышаще и видяще людие о радостном возвращении твоем, святителю Павле, во град свой престольный, радовахуся, Бога благодаряще и тя величаху гимны сия:

Радуйся, от изгнания возвративыйся, во еже паки семена сеяти веры.

Радуйся, всемирный светильник веры православныя.

Радуйся, святителей удобрение.

Радуйся, иереев благоговейных похвало.

Радуйся, всего клира церковного украшение.

Радуйся, святителю Павле, исповедниче Христов.

Кондак 5

Боготочною кровию искупленныя души сохраняя от всякого зла, егда же восприял еси великий сан первосвятителя Византии, дело благовестника Христова сладце восприим: обличая, запрещая и умоляя, со всяким долготерпением, Богу же сладце воспевая: Аллилуиа.

Икос 5

Видя велие в Церкви нестроение, яко риза Христова раздираемая арианским безбожием и македониевым вредословием: молитвами и слезами сей пламень злобный погашая, людие же наставляя ко исправлению: неверныя к вере оглашая, верныя же Таинствами питая и освящая, уча ходити достойно звания христианина. Мы же поставляеми тобою на сей спасительный путь в радости зовем:

Радуйся, Святейшия Трапезы предстоятелю умиленный.

Радуйся, пищею нетления чада твоя добре питавый.

Радуйся, добрых супружеств о Христе – святительское благословение.

Радуйся, девственного жития по Павлу апостолу велий ублажателю.

Радуйся, Слова Божия неложный истолкователю.

Радуйся, путевождь нас к жизни вечной.

Радуйся, святителю Павле, исповедниче Христов.

Кондак 6

Проповедника истины и Божественных догматов тя, Павле, святителю Христов, вторицею дух злобы от града изгоняет. Людие же, исполнишася скорби и плача, разлучаеми с святым отцом и Патриархом, все упование на Бога возложиша, Тому поя слезяще: Аллилуиа.

Икос 6

Возсия Цареград новою радостию, егда узреша тя, святителю и исповедниче Христов Павле, возвращена во своя си от изгнания втораго. Велиим ликованием объяти быша, сретая и лобызая тя, Христова страдальца, поюще песни духовныя сия:

Радуйся, радостию небесною осиянный.

Радуйся, радосте Церкви Христовой.

Радуйся, исповедникам веры Христовой молитвенно помогаяй.

Радуйся, терпение и любовь в сердце твоем стяжавый.

Радуйся, столпе Православия и истины поборниче.

Радуйся, святителю Павле, исповедниче Христов.

Кондак 7

Хотя Церковь Константинопольскую, аки невесту Христову, добре украсити, много потщася, святителю Павле, во благо ея: исторгая арианскую ересь, обличая неправомыслие, насаждая же веру истинную, Святей Троице покланяяся, сладце поюще: Аллилуиа.

Икос 7

Новое знамение милости Божия яви и нам молитвами твоими, святителю Павле, ограждай нас от помраченных людей, несущих раскол и неверие, нападающих люте на нас, пребывающих в единении с Церковию Христовой, вселенстей, взывающих тако тебе:

Радуйся, звездо ко Христу приводящая.

Радуйся, дивный иерарше Церкви Христовой.

Радуйся, кровь твоя, аки кровь Авеля праведнаго, вопиет ко Господу.

Радуйся, в храме убиенный, аки Захария священнейший.

Радуйся, аки Климент мученик великий, в минуты Божественныя Литургии, течение свое скончавый.

Радуйся, святителю Павле, исповедниче Христов.

Кондак 8

Странником и пришельцем во всем показавый себе в сей юдоли земной и многомятежной, Христов святителю Павле. Добре поработавый на ниве Христовой. Множество бед, скорбей и гонений претерпевый ради Святыя и Пребожественныя Троицы, Ей же и воспеваем непрестанно: Аллилуиа.

Икос 8

Всею душею Христови предался еси, святителю Павле, стоя на свещнице аки светильник. Воистинну показался святитель Христов многотрудный, сими славу стяжав безсмертия, венец неувядаемый, и наши дары словесныя сия приими:

Радуйся, превеликаго Мирликийскаго святителя Николая соревнователю.

Радуйся, Спиридона святителя подражателю.

Радуйся, друже Афанасия великаго.

Радуйся, купно с ним от ариан множество бед и гонений претерпевый.

Радуйся, аки зеницу ока веру православную соблюдый.

Радуйся, во Армении жизнь твою мученически скончавый.

Радуйся, святителю Павле, исповедниче Христов.

Кондак 9

Витии красноречия не возмогут достойно изобразити высоту духа, жития, трудов, страданий и кончины твоея, святителю преславный, Павле. Сего ради молим тя усердно, избави нас молитвами твоими от нападений змия древняго, змия великаго – диавола и клевретов его, ненавидящих Церковь Христову и нас, чад ея, победно поющую всегда: Аллилуиа.

Икос 9

Всякое душевредное учение и нестроение разруши в земли нашей святителю Божий Павле. Молися Пастыреначальнику Христу Богу нашему о умножении благочестия, мира и любви в многобедственной стране нашей. Да дарует Господь Бог пастырям нашим мудрость духовную, здравие с долгоденствием тебе величающих:

Радуйся, светило Православия.

Радуйся, добрый пастырю стада Христова.

Радуйся, служения Апостольскаго сопричастниче.

Радуйся, апостольски вручи ти Христос ключи дверей райских.

Радуйся, усердный прогонитель душевредных псов от словесных овец.

Радуйся, попечителю Богоизбраннаго стада Христова.

Радуйся, омофором своим руками ариан дерзких умерщвленный.

Радуйся, святителю Павле, исповедниче Христов.

Кондак 10

Спасению пастве твоей промышляти не преставая, отче Павле; во дни изгнания твоего в Риме пребывавый у святейшего Юлия, идеже сретил подобника себе в скорби, гонении и клевете от злочестивых⁵⁶ хулителей Сына Божия, святаго великаго Афанасия, идеже укрепился еси духом, и паки ко граду своему пришел, идеже от собора святых отгнав лжеименного Македония, ублажая память добре пострадавших за чистоту Православия единонравных мучеников Константинопольских: иподиакона Мартирия и чтеца Маркиана, честных нотариев, Богу поя победную песнь: Аллилуиа.

Икос 10

Стена крепкая явился еси, архипастырю Божественный Павле, всем угнетенным и гонимым за исповедание православныя веры Христовой. Буди и нам, исповедниче Христов, крепким забралом от всякого зла, воспевающим тя тако:

Радуйся, любовь дивную ко отечеству твоему показавый.

Радуйся, слово Писания, яко любы долготерпит, на тебе оправдася.

Радуйся, Троицу непременную от Рима до Кукуз проповедавый.

Радуйся, верныя чада Божии в вере утверждающий.

Радуйся, хитросплетенны сети ересей посекаяй.

Радуйся, святителю Павле, исповедниче Христов.

Кондак 11

Пение радости чад духовных Цареградския Церкви паки на плачь и скорбь приложися, егда Павел, святый архипастырь, се уже третие изгнание за тую же веру единства Пресвятыя Троицы терпит. Се воистину явился еси добрый святителю, яко же Павел великий, апостол Христов, с ним же и поеши согласно: Аллилуиа.

Икос 11

Светозарная свеща явился еси священнейший пастырю Павле. Освещай нас Божественным Светом веры Христовой, да воспоем вся беды и болезни твоя. Разум подаждь с небесе нам, сошедшемся зде, в летнем твоем торжестве:

Радуйся, красная гусль Духа Святаго.

Радуйся, чаша Божественныя мудрости и знаний.

Радуйся, реко Божественныя благодати.

Радуйся, цевнице Христовых учений.

Радуйся, веру соблюдый.

Радуйся, надежду сохранивый.

Радуйся, любовь всем дивно показавый.

Радуйся, святителю Павле, исповедниче Христов.

Кондак 12

Благодать и милость испроси нам на небеси, предстоя престолу Святыя нераздельныя Троицы, святителю Павле. Приими наши молитвы и песнопения в честь святыя памяти твоея, та бо источает нам радость и ликование, Богу же с тобою воспевающе: Аллилуиа.

Икос 12

Поюще многострадальное твое житие, ублажаем мученическую кончину, яже приял еси за чистоту веры во Святую и Единосущную Троицу, от злокозненных раздирателей Христова хитона. Помяни нас, ткущих тебе похвалы таковыя:

Радуйся, пославленный на и на земли.

Радуйся, цвете благоуханный рая Иисусова.

Радуйся, секира посецающая терния безбожных глаголов.

Радуйся, славный учителю юных богословов.

Радуйся, бодрый архипастырю пастырей стада Христова.

Радуйся, святителю Павле, исповедник Христов.

Кондак 13

О, великий и преславный исповедниче Христов, столпе непоколебимый, святителю Павле! Приими сие похвальное пение от нас недостойных тебе приносимое, и твоими Богоприятными молитвами у престола Божия, испроси нам утверждение в вере православней. И в будущей жизни сподобитися внити во славу небесную, купно с тобою поюще всегда: Аллилуиа.

Молитва

Святителю Павлу исповеднику

О, святителю Христов, преподобие, блаженне Павле, Архиерею Божий! Предстояй ныне неизреченней славе Святыя Троицы, молися за всех нас молящихся ныне к тебе, яко к великому молитвеннику за нас грешным пред престолом Вседержителя, о еже избавитися нам от всякаго злаго обстояния, враг видимых и невидимых. Вознеси молитвы твои святые за обитель, град и страну нашу и всяку страну идеже свет Евангельской истины сияет. Да тако совершивше земное течение, внидем в радость неизреченныя славы Творца и Промыслителя, и сподобимся купно с тобою прославления Божества Святыя Троицы во веки веков. Аминь.

* * *

Благословен Господь Бог мой,

научали руце мои на ополчение

и персты моя на брань!

память 27 ноября

Кондак 1

Избранный страстотерпче и предивный угодниче Христов, добропобедный великомученице Иакове, восхваляем тя, венчанного венцем нетления, ты же, ныне предстоя престолу Вседержителя, моли за град, обитель и люди совершающия святую память твою в радости зовуще:

Радуйся, Иакове, преславный страстотерпче.

Икос 1

Ангели Божии радуются, приемля в горния обители души праведных, наипаче же веселятся веселием великим, егда во вратех райских сретают души святых мучеников. Сего ради и мы, в юдоли сей плачевней, на земли пребывающии, в честь подвигов честных твоих возглашаем сице:

Радуйся, Ангелов веселие.

Радуйся, демонов рыдание.

Радуйся, мучеников радование.

Радуйся, язычников обличение.

Радуйся, Церкви красото.

Радуйся, спасающихся полков ликование.

Радуйся, Иакове, преславный страстотерпче.

Кондак 2

Сила Вышняго вразуми и укрепи тя, славне Иакове, егда зело прещаше ти царь-мучитель, смертию тяжкою и протяженною хотяще тя убити. Ты же сия ни во что вменил еси, словеса сия безумные осмеял и отдался еси яко древо сечению, посекая сим древняго мучителя – диавола, Богу же воспевая песнь немолчно: Аллилуиа.

Икос 2

Имея зловерием помраченныя души, огнепоклонницы персидстии не восхотеша разумом своим проникнуть во свет Троическаго Божества, но на мучение тя устремишася, да косно и протяженно тя истязуют по глаголу неправеднаго судии. Мы же сих ради твоих великих страданий умильно зовем:

Радуйся, древо, принесшее плоды веры.

Радуйся, верою твоею Христа всеискренне возлюбивый.

Радуйся, ласкания и угрозы презревый.

Радуйся, проповедниче всеобщего воскресения.

Радуйся, наследниче райскаго жилища. Радуйся, сладкий грозде веры Христовой. Радуйся, Иакове, преславный страстотерпче.

Кондак 3

Бурею злобы душащие врази Креста Христова, совет беззаконный сотворше, да киими бы лютейшими ранами уязвити тя, Иакове, ты же добльственно испив чашу мучений, воспевая благодарственныя гимны Спасителю Богу: Аллилуиа.

Икос 3

Слышаша мучителие твои словеса, мучениче Иакове, преисполнные хвалы и любви ко Господу распыхахуся омраченными сердцами своими на тя. Ты же всеусерднейше помолився о даровании свыше ти помощи тако: «Господи Боже мой, услыши мя раба Твоего, призри с высоты небесныя и даждь ми крепость и силу в час сей». Мы же прославляем таковую любовь твою ко Господу, тако поем тебе:

Радуйся, мужественно и терпеливо кровь твою пролиявый.

Радуйся, венца нетленного наследниче.

Радуйся, и нам, певцем твоим, венцы правды ходатайствуеши.

Радуйся, адаманте веры Христовой.

Радуйся, шипок облагоухавший Церковь святую.

Радуйся, Иакове, преславный страстотерпче.

Кондак 4

Богомудренно сродников своих послушатель быв добрый, егда сии, посланием тя увещеваше стояти всеусердно в надежде, вере и любви, не усумнился, ниже убоялся, егда тебе первый перст десницы твоея врази отсекоша. Но воспел гимн первый благодарственный Богу: «Господи, Боже, Ты отгонявши единым перстом Своим бесы, приими, яко ветвь от древа, моей десницы первый перст и милостив ко мне рабу Твоему буди и возрасти мя, яко лозу плодовиту в вертограде славы Твоея поющаго: Аллилуиа.

Икос 4

Мученическому лику сопричтен был еси, Иакове, по совершении страдания твоего. Да молитвами твоими сопричтемся и мы к лику святых небожителей, с любовию ныне воспевающих память твою песньми духовными тако:

Радуйся, быстре возревновавый о Господе.

Радуйся, воине Христов прекрасный.

Радуйся, и нам во брани с духом лукавым помогаяй.

Радуйся, святыми мощами твоими нас освящаяй и сохраняяй.

Радуйся, защитниче от бесовских наваждений.

Радуйся, Иакове, преславный страстотерпче.

Кондак 5

Проповедникам Христовой истины поревновал еси страстотерпче Иакове, к Богу паки и невозвратно прибегл еси, стрижен был еси незлобиве, яко овча, но не волну мягкую отдал еси, а персты на отсечение десницы и шуйцы твоея. В сей страшный час твоих страданий, Бога благословил поя: «На десятострунном псалтири воспеваю Тя, Боже и благодарение приношу Тебе поя: Аллилуиа.

Икос 5

Светлым лицем, возвышенным умом и радостным сердцем предстоял еси пред неразумными мучителями Иакове святе. Ты же молитвами своими молися ко Господу, да просветит и нас светом Своея Благодати и избавит от злых и неразумных людей, к тебе прибегающих тако:

Радуйся, скорый целителю болящих притекающих к тебе.

Радуйся, во страданиях своих седмины жизни твоея скончавый.

Радуйся, и осьмый день жизни вечныя получивый.

Радуйся, на водах покоя почиваяй.

Радуйся, пламенне Христа возлюбивый.

Радуйся, зрелый винограде райскаго прозябения.

Радуйся, Иакове, преславный страстотерпче.

Кондак 6

Хотяще всячески сердце твое уловити исконный тать душ человеческих – диавол, устами слуг своих паки и паки ищя тя уловити и отвратити, Иакове, от источника света – Христа. Ты же, Боголюбче, уразумел сие ловление коварнаго врага, с Давидом царственным воспел: «О Бозе спасение мое, о Бозе слава моя!» За таковое твое исповедание Бога Вышняго, поем песнь ангельскую: Аллилуиа.

Икос 6

Новаго тя мученика и страстотерпца Божия, Церковь Христова усердно прославляет, наипаче же в день святыя памяти твоея, имея тя молитвенника пред Богом, за люди, почитающия тя похвалами сими:

Радуйся, звездо от Персиды возсиявшая.

Радуйся, святых обителей и храмов Божиих украшение.

Радуйся, носящим имя твое святое освящение.

Радуйся, почитающих и украшающих святыя мощи твоя, благословение.

Радуйся, и нас, даром сим высоким, святых мощей твоих обогативый.

Радуйся, Иакове, преславный страстотерпче.

Кондак 7

Странность непонятная является страдание твое, мучениче Иакове, неверующим. Глаголют бо: како возможно человеку презреть богатство, здравие и честь, и шествовать путем Христа Распята? Мы же грешнии, вемы, колико есть пресладко Евангелие Христово, вемы, яко Бог уготова Царствие любящим Его. Вемы и твою любовь к нам, Иакове достославне, поющих Богу: Аллилуиа.

Икос 7

Всесладчайшего Господа Иисуса сладце возлюбил Иакове, любви Его последовал еси. Во страданиях твоих благодарил вседушнаго Бога. Мы же, поучающеся таковей любви твоей святей, усердно тебе вопием от земли:

Радуйся, верховному апостолу в любви и покаянии поревновал еси.

Радуйся, научающий нас ждати Христова судища Страшнаго.

Радуйся, друзей льстивых отвратился еси.

Радуйся, тобою избавляемся льстивых друзей мудрования.

Радуйся, память святая твоя, в день образа Знамения Мати Божия – Новгородския.

Радуйся, грозде виноградная, плод духовный принесшая.

Радуйся, Иакове, преславный страстотерпче.

Кондак 8

Вси Ангели Божии возрадовашеся и Господа восхвалиша, даровавшего тебе таковое терпение, Иакове премудре, яко и во страданиях твоих не преставал еси хвалу и благодарение Богу приносити, ибо Бог прославляющих Его, прославляяй. Таковому Божию Милосердию радующеся, победную песнь Богу поюще: Аллилуиа.

Икос 8

Суемудренно изрекает неплодящая языческая церковь. Премудренно витийствует Христова Церковь православная. В прославлении святых и мученический Христовый полк – от них же днесь святый Иаков прославляем:

Радуйся, лозо, отребленная мучением.

Радуйся, от крове твоея, истекшее вино райскаго аромата.

Радуйся, уста Церковныя славы.

Радуйся, дивное долготерпение показавый.

Радуйся, непрестанно в страданиях гимны Богу возсылавый.

Радуйся, Иакове, преславный страстотерпче.

Кондак 9

Спастися душам нашим потщися, великомучениче преславный, Иакове. Воистину вемы, яко много поможет молитва праведнаго, наипаче же мученика моление, яже речет Церковь нам. Сего ради тя усердно молим: Охраняй нас предстательством твоим от душевных и телесных болезней, да во вся дни до кончины живота нашего Богу усердно поем: Аллилуиа.

Икос 9

Стена любви ко Господу твердая, явился еси, Иакове, и по разрушении храма – тела твоего, аще бо и пострадал еси ужасне яко человек, обаче духом ликовал еси яко во цветнице, Бога благодаряще, Бога воспевающе – режим яко древо. Таковей красоте твоея души, тебе похвальная плетем:

Радуйся, и руце и нозе принесший в жертву Господеви.

Радуйся, преестественными страданиями вшедший в радость вечную.

Радуйся, лозы Христовой честная розга.

Радуйся, молитвами твоими вводящий нас в покой вечнаго с Богом пребывания.

Радуйся, страдавый от заутра даже до девятого часа.

Радуйся, Иакове, преславный страстотерпче.

Кондак 10

Песнь исходную приими от нас, Иакове, страдальче премудрый, совершающих днесь память святаго твоего торжества: сердец наших любовию горения, фимиама, свещей и цветов от земли приношение. Паче же Богу поющих псалом: Аллилуиа.

Икос 10

Светоносным и живительным Троическим светом за страдания твоя осиянный, Иакове, мучениче преизрядный, да светиши нам грешным во мраце седящим светом Христовым с горних высот Небеснаго Царствия, идеже ты ныне наслаждаешися неизреченных Божиих красот нам от земли тебе вопиющих:

Радуйся, мир и благословение нам с небес посылающий.

Радуйся, и нас к небеси привлекающий.

Радуйся, за вся персты твоя усеченныя Бог тя маслиной плодовитой показа.

Радуйся, наслаждающийся духом мира, веселия и любви во Христе.

Радуйся, хладную любовь нашу согревающий.

Радуйся, огнем веры нас воспламеняющий.

Радуйся, Иакове, преславный страстотерпче.

Кондак 11

«Страданием смертнаго тела моего, совлекаюся ветхаго, тлеющаго во мне человека. Смертию же моею облекаюся в безсмертия ризу». Сего ради мучителие, что стоите? Исторгайте персты, руце и нозе мои, – творите сечение древа! Аз бо иду ко Христу моему Царю и Богу, да и во Царствии Его безконечнем с ликом горних умов воспою: Аллилуиа.

Икос 11

Пение Святей Троице воспел еси, Иакове, принося благодарение за вся, яже дарова ти Господь: дар покаяния, терпение, любовь и надежду. За таковое твое признание воли небесной, приими и от нас, малых и грешных, по Бозе собратии твоей во Христе, припевы сия:

Радуйся, вся земная оставивый да Христа приобрящеши.

Радуйся, в час страданий твоих Христу Богу горевый аки свеща.

Радуйся, стебель страдальчества и плод благодатный.

Радуйся, персты своя усеченныя в жертву Богу принесл еси.

Радуйся, доброе семя Христово, в Перси-де посеянное, прозябшее же во вселенстей Церкви.

Радуйся, Иакове, преславный страстотерпче.

Кондак 12

Благодатных даров небесных ниспосли нам от святых мощей твоих, достославне великомучениче Иакове. Приими наше сие песнопение в честь и память страданий твоих приносящих. Да молитвами твоими оградиши нас от враг видимых и невидимых. Да тихое и безмолвное житие совершивше, внидем в чертоги небесныя славы Богу поюще во веки веков: Аллилуиа.

Икос 12

Поюще страдальческую твою кончину, воспеваем Господа Бога Христа, дивнаго во святых Своих, прославляем святыя страдания твоя, Иакове, – лозо добродетельная вертограда Христова, того ради приими от нас и малую молитву сию:

Радуйся, вшедший в вечную Божию радость.

Радуйся, торжествующим нам святую память твою помогаяй.

Радуйся, сохраняющий нас от бед и напастей.

Радуйся, тайный наш посетителю.

Радуйся, в святей малей части мощей твоих благодатных, духом пребывающе с нами.

Радуйся, наша небесная радость.

Радуйся, Иакове, преславный страстотерпче.

Кондак 13

О, предивный и многострадальный великомучениче Иакове, резанный яко древо! Приими от нас сие малое молитвенное песнопение тебе приносимое, в день святыя памяти твоея. Избавляй нас молитвами твоими от всякаго зла, да благодарно Богу поем: Аллилуиа.

Молитва

святому великомученику

Иакову Персиянину

О, Святый славный и добропобедный великий мучениче Христов, Иакове, предстоя ныне по святей мученической кончине твоей престолу Господа Славы и наслаждался неизреченной красоты небеснаго чертога Божия, не забуди и нас тамо в Богоприятных молитвах твоих, зде на земли молящихся тебе. Моли благость Божию, еже ущедрити храм сей (или обитель), град и всю страну нашу православную, исходатайствуй у Престола Господа Вседержителя, паче же всего, душам нашим спасение. Да тако святыми молитвами твоими спасение улучим, и сподобимся причастницами быти небесных селений, купнаго с тобою пребывания, прославляя Божественное имя Отца, Единородного Его Сына и Утешителя Святаго Духа во веки веков. Аминь.