Приложения

Марие, Дево Чистая, Пресвятая Богородице,

Царице, Мати Дево, Руно, всех покрывающее,

Превысшая Небесных Сил, нетварное сияние,

Ликов девичьих Радосте и Ангелов Превысшая,

Небес Честная Сило и Свете, паче всех светов,

Честнейшая Владычице всех Небесных Воинств,

Всех праотцев Надеждо, пророков Исполнение,

В подвизех Ты помоще, Кивоте Бога Слова,

И девам Ликование, и матерем Отрадо,

Целомудрия Наставнице, душ наших Очищение,

Покрове ширший облака и страждущих Пристанище,

Немощных Покров и Заступнице, Надеждо ненадежных,

Марие, Мати Христа, Истинного Бога,

Ааронов Жезле прозябший, Сосуде тихой радости,

Всех сирых и вдов Утешение, в бедах и скорбех Помоще,

Священная и Непорочная Владычице Всепетая,

Приклони ко мне милосердие Божественного Сына,

Ходатайце спасения, припадая, взываю Ти:

Радуйся, Невесто Неневестная.

ВЕЧЕР

На Господи, воззвах: стихиры, глас 6.

Подобен: Тридневен:

Троицы служитель истиннейший,/ заветов богомудрых отец ревнитель,/ Православия страж неусыпный явился еси,/ достоблаженне отче Нектарие;/ моли убо ныне,/ в небесных кровех водворяяся,// о иже на земли верно чтущих память твою.

Велия скорби и напасти,/ клеветы и озлобления/ в земнем житии твоем претерпел еси,/ отче Нектарие преподобне;/ темже и ныне, праведне,/ Троице Единосущней на небеси предстоя,/ можеши и нам, напаствуемым,// от бед и обстояний лютых избавление испросити.

В тяжцем недузе и мучительнем,/ Христу спострадати вожделев,/ течение твое скончал еси, святителю славне;/ темже и ныне благодать имаши,/ от болезней и язв телесных// страждущим и недугующим исцеление подавати.

Слава, глас и подобен тойже:

В преставлении твоем, отче Нектарие,/ скорбь велия и печаль горькая/ сердца и души чад твоих объят./ Обаче ныне, иерарше приснопамятный,/ молитвою твоею благодерзновенною/ всякия неуте́шимыя скорби и печали// всех любящих тя верно избавляеши.

На стиховне стихиры, глас 6:

Архиереев доброе правило,/ добродетели преизящный наставниче,/ монашествующих утверждение, славо и похвало,/ Нектарие блаженнейший,/ Христов друже искреннейший,/ к Тому же верный предстатель буди// о верою и любовию совершающих память твою.

Любве Божественныя источник явился еси,/ пастырю кроткий и добрый,/ нектар словес богоглаголивых источил еси,/ Э́гины пресветлое украшение,/ Пента́поля светильниче превеликий,/ моли Господа Премилосердаго/ о всех, с благоговением, усердием и верою// чтущих славную память твою.

Благодати Божия приятелище,/ сокровище даров духовных,/ чудес пучино неисчерпаемая,/ ангельски на земли пожил еси,/ Нектарие, архиерею досточудный,/ Христу во смирении подражателю,/ Того моли со умилением/ о всех выну почитающих// преславную память твою.

Слава, глас тойже:

Божия Матере чтитель всеусерднейший/ и Тоя угодник изряднейший,/ святителю Христов Нектарие,/ от юности твоея пребыл еси./ Кто моления твоя к Той исчислит?/ Кто воздыхания и слезы изочтет?/ О Невесто Неневестная!/ – непрестанно к Ней взывал еси./ Темже и ныне молитв твоих Скоропослушницу// моли спастися душам нашим.

Тропарь, глас 1:

Сили́врии отрасль и Э́гины хранителя,/ в последняя лета явльшагося,/ добродетели друга искренняго,/ Нектария почтим, вернии,/ яко Божественнаго служителя Христова:/ точит бо цельбы многоразличныя благочестно вопиющим:/ слава прославльшему тя Христу,/ слава Давшему ти чудес благодать,// слава Действующему тобою всем исцеления.

По первой стихологии седален, глас 6:

Егда Божественное желание найде на тя, отче Нектарие,/ мир и яже в нем сущая нивочтоже вменил еси,/ образ терпения, смирения и послушания всем показал еси,/ выну в молитве сокрушенней Господеви предстоя,/ егоже ныне о мире всего мира моли// и о еже любовию почитающих тя.

По второй стихологии седален, глас 6:

Чистоты сердечныя усердно возжелев,/ Богу в жертву угодную сам себе принесл еси, святителю,/ яко злато в горниле злостраданий искушен был еси,/ очистити тако Господу тя изволившу;/ предстоя и ныне Владыце всех,// руце преподобнеи к Нему о людех твоих воздеваеши.

По полиелеи седален, глас 4:

Премудрости Божественныя любитель истинный показался еси,/ от юности вышних взыскав и горняя мудрствовати вожделев,/ отче святителю Нектарие,/ сего ради велиих даров от Господа славы сподобился еси:/ таин сердечных прозрения, чудес дивных творения,/ душ же и телес врачевания./ Темже, архиерею Божий, молися присно ко Владыце Христу/ сподобитися грехов оставления// верою и любовию благочестно тя славящим.

Стихира по 50-м псалме, глас 6:

Архиереев Богодухновенное украшение,/ богословия приснотекущий источник явился еси,/ образ смирения и кротости в житии твоем показал еси,/ себе яко персть от земли выну вменяя,/ темже от Христа, смиреннаго и кроткаго сердцем,/ чудотворений неисчетных дарования сподобивыйся,/ отче Нектарие преподобне,/ источаеши всем в болезнех и недузех сущим// исцелений токи неоскудевающия.

Канон святителя, глас 2, егоже краегранесие:

О Нектарие, дивно прославился еси.

Песнь 1

Ирмос: Во глубине постла иногда/ фараонитское всевоинство преоруженная сила,/ воплощшееся же Слово всезлобный грех потребило есть:/ препрославленный Господь// славно бо прославися.

От юности весь Богу возложен, отрасль рода благочестиваго, Нектарие, иерарше блаженнейший, чтитель Премудрости Божественныя и познания Ея рачитель явился еси, учением неленостным сердце и ум просветив.

Наук духовных, еже по благочестию, взыскуя, Царьграда достигнути потщился еси, добрейший во отроцех. Сего ради дом отца твоего оставивый, ярем трудов тяжких понесл еси, Нектарие, и нищету, и глад, и скорби терпя, и все упование на Господа возлагая.

Егда же скудость во всем тя стесни, ниоткудуже помощи человеческия обретая, рекл еси в сердце своем, отроча смиреннейшее: Господу о скорбех моих письмо напишу, и Той, призрев на смиренныя глаголы, избавит раба Своего от всякия печали.

Како люблю Его, весть мой Господь, – тако в сердце своем помышляя, Нектарие, дитя по всему быв души простотою, Господу Иисусу, Сладчайшему Христу, на Небеса письмо посла и абие помощь обрете от Него и ну́жды всякия избавление.

Богородичен: Воспоим, вернии, песненно Деву Пречистую Богородицу, Превысшую небес и Ангельских Сил Преславнейшую, Божественными лучами Сына Своего светозарно осиянную, радостными гласы Той взывающе: молитвами предивнаго угодника Твоего Нектария помилуй нас и спаси души наша, предстательствующи присно, Богородице, о рабех Твоих.

Песнь 3

Ирмос: Процвела есть пустыня, яко крин, Господи,/ языческая неплодящая Церковь,/ пришествием Твоим,// в нейже утвердися мое сердце.

Таково от юности житие твое бысть, Нектарие, якоже ни единыя сласти мирския возлюбил еси, но все сердце твое яко жертву чистую и благоугодную Христу Господу принесл еси, Того заповедей и речений послушатель и исполнитель пребыв всеобразно.

Ангельскаго жития всею душею и сердцем возжелев, во обитель Не́а Мони́ достигл еси, святе, и тамо образ монашеский восприяв, иго послушания благое на рамена возложил еси, хотения своего оттоле отнюд не обретая.

Радости весь исполняяся, праведне, троицу добродетелей стяжав, в молитве, бдении и пощении Троицы добрый служитель пребыл еси; житие во дворех Господних всею душею возлюбив, сердцем выну Создателю Богу песнь воспевал еси.

Богородичен: Пречистая Дево, Ангельских Сил Превысшая, всех Небесных Воинств Честнейшая Владычице, Тя едину имамы Заступницу и Ходатаицу спасения нашего, се и ныне предстани, Всесвятая, и спаси души наша.

Седален, глас 4:

Исцелений обильно токи источающа, в скорбех помощника предивнаго, Нектария присноблаженнаго, вернии, восхвалим и к нему духовно празднующе возопиим: молися о нас прилежно, святителю, ко Владычице, Юже в житии твоем всеусердно возлюбил еси.

Песнь 4

Ирмос: Пришел еси от Девы не ходатай, ни Ангел,/ но Сам, Господи, воплощся,/ и спасл еси всего мя, человека./ Тем зову Tu:// слава силе Твоей, Господи.

Истиннейший богослов, ум и сердце очистив, был еси, Нектарие, словес духовных нектаром сладчайшим наслаждаяся, темже и пастырь добрый и архипастырь предивный явился еси, отче святый.

Егда ты, иерарше пречудный, великаго во святителех Николая храм во граде Каире боголепно обновил еси, той сам тебе в видении сна представ, целование братолюбное преподаде и благодарения слово теплое рече, о немже ты велию радость возымев, в ликовании Бога прославил еси.

Душею убо выну Престолу горнему предстоя, разумом же во глубину смирения нисходя, на престол святительства возведен был еси, Нектарие, митрополии Пента́польския украшение и чад Христовых пастырю истиннейший.

Богородичен: Величаем Тя, Надежду праотцев, пророков Исполнение, Матерь Божию, всяческих Господа неизреченно рождшую: радуйся, ликов девичьих Радосте, радость подаждь нам страстей лютых избавления.

Песнь 5

Ирмос: Посвещение во тьме лежащих,/ спасение отчаянных, Христе, Спасе мой,/ к Тебе утренюю, Царю мира,/ просвети мя сиянием Твоим,// иного бо, разве Тебе, бога не знаю.

Изрядно любосмиренным нравом украшен, глаголал еси в сердце своем, отче Нектарие: кто есмь аз, саном почтен святительским? Во смирении и кротости по долгу первым ми подобает быти, отонудуже последнейший есмь.

Во иерарсех славнейший, исполнь благодати и любве Христовы, паствы любовь стяжал еси, отче праведный, свет быв для нас житием и учением, мрак страстей далече отгоняющий.

Небесному Владыце и Господу во всем послушлив был еси, святителю, Тому Единому работати пламенно вожделев, хотения же своего всецело совлекшеся, стяжал еси жизнь нестареемую, всеблаженне.

Богородичен: Радуйся, Мати Чистая, страждущих Пристанище, радуйся, Боготканный Покрове, ширший облака, и Горних Сил Радосте неисчерпаемая, к Тебе, яко утешению спасительному, прибегаем: О Всепетая Владычице, изми рабов Твоих от бед и лютых обстояний.

Песнь 6

Ирмос: В бездне греховней валяяся,/ неизследную милосердия Твоего призываю бездну:// от тли, Боже, мя возведи.

Отче блаженне, апостольских речений истина в житии твоем верно оправдася: вси бо, хотящии благочестно жити о Христе Иисусе, гоними будут, темже и ты, гонения скорбь терпя, святе, неослабне на небо очи своего сердца возводил еси.

Пламенем жегомый молитв твоих, отче, враг наш и лжец искони́ и завистник, клевет во́лны и укоров тягчайших противу тебе искаше воздвигнути. Ты же, кротчайший, благодушественно поношения терпя, точию на небесное воздаяние взираше радуяся.

Ради любве Христовы и ревности божественныя, любоболезненно гонений, Нектарие, скорбь претерпев, Богу безумия в сердце не дал еси, но выну Того единого благодарственно славляше.

Богородичен: Немощных Покров и Заступницу восхвалим днесь, вернии, поющии величия Тоя любовию: о Дево Всенепорочная, мольбами Твоими да улучим, Пречистая, Божественную милость из Тебе неизреченно воплощеннаго Сына Божия.

Кондак, глас 4:

От юности игу благому Христову подклонивыйся,/ житием воистину добродетельным просиял еси,/ Силам Небесным в молитве непрестанней подражателю,/ ищущим спасения пастырю и споборниче добрый;/ в Божественных учениих свыше наставленный,/ во святителех богомудрейший явился еси,/ темже с любовию тебе вопием:/ радуйся, Нектарие,// Э́гины велия похвало и украшение.

Икос:

Радости духовныя днесь исполняется людей благочестивых собрание в памяти угодника Христова предивнаго Нектария, митрополии Пента́польския вернаго предстоятеля, всего мира концы чудесы своими просветившаго и доселе токи исцелений недужным присно источающаго, воистину бо всем, имя его в молитве призывающим, помощник скорый и в скорбех сущим утешитель теплейший является. Темже и мы со умилением зовем: радуйся, Нектарие, Э́гины велия похвало и украшение.

Песнь 7

Ирмос: Образу златому на поле Деире служиму,/ трие Твои отроцы небрегоша безбожнаго веления,/ посреде же огня ввержени, орошаеми, пояху :// благословен еси, Боже отец паших.

Отче Нектарие досточудне, благодать Божественная излияся во устнах твоих, темже и юным наставник премудрейший явился еси, богословию истинному тех тайнонаучая, от благаго сокровища сердца своего благая износя.

Слава твоя, таинника Божия, дивно умножися, угодниче Христов Нектарие, темже и всем познати Того ищущим добрый путеводитель обрелся еси, святе, путем превосходнейшим ходити заповедей Божественных верно наставляющий.

Любитель безмолвия и жития уединеннаго быв, боголюбиве отче Нектарие, лик дев честных в словесное стадо свое собра и тех яко пастырь добрый премудре упасл еси, Триединому истинному Богу работати научая.

Афины богоначертанно оставив, святителю, на острове Э́гине вселяешися, и тамо обитель в честь Пресвятыя Троицы устроив и благолепно тую украсив, лик пресветлый дев невестоводительствуеши ко Христу, путь ко спасению тем верно показуя.

Богородичен: Воспеваем Тя, Священную и Непорочную Владычицу, яко Покров боготканный сущим в скорбех явилася еси и светом девства Твоего, Нескверная, просветила еси вся зовущия: благословен еси, Боже отец наших.

Песнь 8

Ирмос: В пещь огненную ко отроком еврейским снизшедшаго/ и пламенъ в росу преложшаго Бога/ пойте, дела, яко Господа// и превозносите во вся веки.

Воистину и отец добрейший, и учитель молитвы изряднейший явился еси, святителю, чадом твоим, во обитель Святыя Троицы собра́нным, ихже видя добродетельми облекшихся, благодарно Богу всем сердцем взывал еси: благословите, вся дела Господня, Господа.

Имея смирение неложное, в трудах неленостных, отче, пребывал еси. Темже и людие тя зряще посреде всех яко служащаго, недоумевахуся, глаголюще: кто есть сей? Но абие познав тя, истиннаго архиерея Божия, верою воспеваху: благословите, вся дела Господня, Господа.

Людем утешитель и помощник добрейший показался еси, отче Нектарие, и в чудотворцех изряднейший, яко землю безводную молитвою твоею одожди и сети рыбарей в ловлении чудно исполни, пищу же во обители своей умножи неоскудно, предивне, о всех сих непрестанно воспевая: благословите, вся дела Господня, Господа.

Силам Небесным в чистоте поревновал еси, отче Нектарие, темже и в молении, аще и плоть носяй, со Ангелы возносился еси, на воздусе стоя́, отонудуже паче смирения исполняяся, воспевал еси: благословите, вся дела Господня, Господа.

Богородичен: Ходатаица буди нам, человеков спасение, с сокрушенным сердцем Тебе припадающим, Мати Божия: Тя бо всему роду нашему Божественную показа Предстательницу Сын Твой, Дево, егоже превозносим во вся веки.

Песнь 9

Ирмос: Безначальна Родителя Сын, Бог и Господъ,/ воплощся от Девы, нам явися,/ омраченная просветити, собрати расточенная.// Тем Всепетую Богородицу величаем.

Якоже страдалец мужественнейший, отче Нектарие, огнь Божественныя любве в души нося, тяжкую болезнь благопокорливо претерпевал еси, никомуже о сем открывая, час же исхода своего предзрев, слезно воздыхал еси: Господи, да будет о мне воля Твоя!

Егда кончина твоя приспе, святителю праведнейший, в руце Божии душу кротко предал еси, но абие прослави тя Господь, Его в житии прославльшаго, и мужа разслаблена, внезапу одежд твоих коснувшася, здрава и цела востави.

Скорбь и печаль по преставлении твоем, иерарше, души исполниша любящих тя, обаче рыдающим им в видениих дивных являяся, яко наследник беспечальныя жизни, на веселие горе и плач преложил еси.

Исцеления присно совершает гроб твой, благоухания мира источающий, отче Нектарие блаженнейший, темже по всей вселенней людем присно скорый помощник и врач преискусный являешися, Божественных чудес сияньми просвещая мира концы.

Богородичен: Блажим Тя вси роди, Дево Чистая, радость всему миру присно подающая: виновница вечныя радости буди нам, Владычице, яко да в тишине сердца с лики Ангельскими песнословим Тя: радуйся, Невесто Неневестная.

Светилен:

Прославлено на Э́гине прешед житие, в небесных чертозех вселился еси, святе, Царя Славы, обаче духом любве твоея от нас не отступивый, и ныне наставник добрый пути ко спасению нам являешися, недуги исцеляеши, в скорбех утешаеши: темже вси молим тя, отче Нектарие, уврачуй ны благоприятными твоими молитвами, верою почитающих память твою.

На хвалитех стихиры, глас 1.

Подобен: Небесных чинов:

Духовных добродетелей вместилище пречудное,/ отче Нектарие преблаженне,/ небесныя красоты любитель явился еси,/ молитвы непрестанной рачитель пребыв,/ и ныне смиренно молим тя:// тебе припадающих тепле в молитвах помяни.

Помощника во всем мире превелика/ Творец тя показа, Нектарие,/ святая хотения Божия исполнившаго,/ темже и благодать врачевания приявшаго;/ и нас достигни, милостиве,// усердным твоим ходатайством.

Наставниче предобрый Нектарие,/ якоже твердое кормило Церкве,/ пути спасительному наставил еси/ взыскующих спасения истиннаго,/ и ныне Царствию Славы приобщивыйся,// управи ко спасению живот наш.

Слава, глас и подобен тойже:

О иерарше праведный!/ Та́инственно извести тя Господь,/ яко день отшествия твоего наста/ и время преселения приближися,/ обаче слезно припа́дал еси ко Владычице,/ скорбя о чадех своих оставляемых:/ не остави их, Пречистая.

На литургии вся служба святителю.

Молитва

О великий угодниче Христов, святителю отче Нектарие, митрополии Пента́польския похвало и украшение, Э́гины предивный чудотворче! От юности Божественною любовию уязвився, все желание твое ко единому Владыце Христу простре, темже и благодать Святаго Духа всякую страсть в сердце твоем попали и душу твою храм чист и совершен Святыя Троицы содела, уста же твоя сладчайшаго нектара словес Божиих исполни неоскудно. Обаче яко служитель истиннейший Христов, скорбь и гонения претерпел еси, клеветою и злобою человеческою, якоже многоценное злато в горниле, искушен и очищен быв, светлейше всякаго злата ныне Престолу Всецаря и Господа предстоиши, моляся со умилением о всяцей души христианстей, в болезни и печали тя призывающей.

Услыши убо и нас, недостойных чад твоих, с сокрушением сердечным ко благости твоей припадающих, помощи и заступления от тебе присно взыскующих. Призри, угодниче предивный Христов, на нужды наша и Твоим благоприятным ходатайством скоро посети и умоли Пресвятую Троицу мир вселенней даровати, от глада и пагубы люди христоименитыя благосердно избавити, страждущих язвы и недузи тяжкия милостивно исцелити, в нечестии погибающия к познанию истины и покаянию обратити, верныя же в вере утвердити и укрепити и вся, яже ко спасению потребная, всем даровати.

Наипаче же, святителю отче Нектарие, потщися умолити Владыку Христа, да не лишит нас милости Своея богатыя в день Страшнаго Суда Своего, части шуия всяко да избавит, части же десныя и Царствия Небеснаго милостивно да сподобит, идеже в радости неизреченней немолчными гласы да славим Его со Безначальным Его Отцем, и Пресвятым и Благим и Животворящим Его Духом, Троицу Единосущную и Нераздельную, во веки веков. Аминь.

Кондак 1

Православия звезду новосветлую и Церкве новозда́нное ограждение воспои́м в веселии сердечнем Нектария богомудраго. Просла́влен бо Духа действом, исцелений то́чит благодать незави́стную вопию́щим: Радуйся, Нектарие, Э́гинский чудотворче.

Икос 1

Человек небому́дренный явился еси в мире, Нектарие, святителю Христов: житие бо преподобное исправив непорочно, свят и богоприятен во всем наре́клся еси; сего ради слы́шиши от нас: Радуйся, от юности Бога возлюби́вый; радуйся, во юдо́ли плачевней светлое восхождение положи́вый. Радуйся, мудрости сосуде златозда́нный; радуйся, проповедниче благодати невозбра́нный. Радуйся, доме святейший действа Божественнаго; радуйся, книго богоизвая́нная жития новаго. Радуйся, яко ныне поревновал еси святым; радуйся, яко Ангелов исполнил еси веселия. Радуйся, преподобных отцев прекрасная добро́то; радуйся, иерархов Христовых благое украшение. Радуйся, и́мже Церковь Христова ликовству́ет; радуйся, и́мже остров Э́гинский радуется. Радуйся, Нектарие, Э́гинский чудотворче.

Кондак 2

Взором духовным, еще сый юноша, прозрел еси Божественную благодать, еюже объят в души, свету заповедей Господних, преподобне, избрал еси последовати от юности, Христу поя́: Аллилуиа.

Икос 2

Прите́кше во град Константина, Нектарие, Божественным направляемь страхом, в нем лучшим поуча́шеся. Темже Божественнаго разумения преиспо́лнен явился еси, возвеселяя во уче́ниих твоих вопиющия ти таковая: Радуйся, Солнца мысленнаго палато благоукраше́нная; радуйся, рая́ словеснаго древо досточу́дное. Радуйся, Христа Спасителя служителю богоприятный; радуйся, отцем древним единонравный. Радуйся, ка́меню новосе́чный умнаго наздания; радуйся, ве́нче новоплете́нный Святыя Церкве. Радуйся, непостыдное наше упование; радуйся, светлая наша надеждо. Радуйся, яко безплотный бывый в телеси́; радуйся, даром богомудрия просветивыйся в ду́се. Радуйся, о́бразов небесных сокровище; радуйся, добродетелей ангелоподо́бных озарение. Радуйся, Нектарие, Э́гинский чудотворче.

Кондак 3

Славной Божественной мудрости всеобра́зно возжеле́в и тоя́ измла́да взыска́в, Христа моля́ше теплыми слезами улучи́ти краснейшаго желания и, достигнув о́наго, верно вопия́ше: Аллилуиа.

Икос З

Веселил еси душу твою, якоже древле отцы Василий со Григорием, стяжа́нием наук, во Афинах учився, Нектарие; темже твоими богоблагодатными даровании наслаждающееся, тебе вопием: Радуйся, верное послушания чадо; радуйся, твердое благочестия основание. Радуйся, мира суетнаго превысший; радуйся, миру неложному приложивыйся. Радуйся, ум богоносный, исполнь Божественных разумений; радуйся, угль, воспламеня́яй Божественнаго Духа огнь умный. Радуйся, началосве́тлыя образы воистинну прозре́вый; радуйся, плоды учения земнаго Богу Небесному вознесы́й. Радуйся, любовь Христову испо́лнивый житием; радуйся, добродетелей цветение возобрази́вый духом. Радуйся, верных новоутвержде́нная оградо; радуйся, врагов смертоносное поражение. Радуйся, Нектарие, Э́гинский чудотворче.

Кондак 4

Ревностию испо́лненный ко Господу Богу нашему, блаженне Нектарие, преподобных отцев равноа́нгельнаго жития вожделе́в, на Хи́осе облече́ся благочестно во иноческий образ небесный и врага низложи́, во еже пети присно Го́сподеви: Аллилуиа.

Икос 4

Услыша твою молитву Владыка небесе́ и земли́, егда́ взыва́ше к Нему из сердца, и повеле́ морю, и преложи́ся в тишину морское волнение, преподобне: дивя́щеся же вси спасе́ннии, верно вопия́ху: Радуйся, источниче чудес неисчерпаемый; радуйся, исцелений реко́ приснотекущая. Радуйся, света духовнаго преозарение; радуйся, благодати Божественныя доброзрачное сияние. Радуйся, сосуде многочестный даро́в небесных; радуйся, са́де новосажде́нный добродетелей райских. Радуйся, яко морское треволнение утишаеши; радуйся, яко словом любве всякое зло изоблича́еши. Радуйся, Христов новый избранниче; радуйся, благодати усердный провозве́стниче. Радуйся, Духа Истины обреты́й познание; радуйся, Источника Жизни напое́нный струями. Радуйся, Нектарие, Э́гинский чудотворче.

Кондак 5

Дивен явился еси в последния дни, святителю Христов, отче Нектарие, в житии праведнем изобрази́в я́вственнейше нравы твоими житие древних богоносных святых, и, прославлен чудесы́, от напастей спаса́еши всех, вопиющих Богу: Аллилуиа.

Икос 5

Избранием богоразсудным иерарх богомудрый воистину показался еси во Египте и Пента́поля пастырь явился еси Божественный, аки Павел великий; темже убо житию твоему дивляхуся вернии людие, вопиюще: Радуйся, за законы отеческия твердо подвизавыйся; радуйся, на камени заповедей Господних стопы́ твоя утвердивый. Радуйся, во Египте учение истинное возвестивый; радуйся, паству твою от Египта мысленнаго спасый. Радуйся, палато кротости и любве сокровище; радуйся, просвещение разума и мудрости вместилище. Радуйся, яко явился еси Церкве земныя украшение; радуйся, яко показался еси верных благое утверждение. Радуйся, правило изряднаго жития; радуйся, образе благочестия и мудрости. Радуйся, иерарше, веру православную возвысивый; радуйся, писаньми твоими зловерие обличивый. Радуйся, Нектарие, Э́гинский чудотворче.

Кондак 6

Украшение Христовы Церкве во Египте явился еси, Нектарие, яко Евангелия делатель истинный; сего ради стяжавше тя водителя Божественнаго, отче, верных ли́цы лучшему поуча́хуся, вопиюще с тобою Господеви: Аллилуиа.

Икос 6

Возсиявый яко Апостол иный во стране Эллинской, озаряеши благочестивых сердца сиянием Божественных учений и светом жития твоего, преподобне; темже убо светлостию твоею световоди́мии верно вопием: Радуйся, та́инство Триипоста́снаго Божества прославивый; радуйся, апостольскую ревность стяжавый. Радуйся, силу Божию в немощи явивый; радуйся, исцелений благодать показавый. Радуйся, вити́е Боговеща́нный глаголов жизни; радуйся, водителю премудрый сло́ва благодати. Радуйся, яко очищаеши душевная расположения; радуйся, яко сообразуеши сердечная смотрения. Радуйся, верных учителю великий; радуйся, Христа таи́нниче преизрядный. Радуйся, тайноводи́телю во Обители Небесныя; радуйся, стяжавый в мире обогащающую нищету. Радуйся, Нектарие, Э́гинский чудотворче.

Кондак 7

Ве́лий во иерарсех и премудрых учи́телех яко таи́нник смирения явился еси, Нектарие: твоя богомудрая писания оставил еси Церкви, святе, имиже верно услаждающеся, прославльшему тя Богу вопием: Аллилуиа.

Икос 7

Нектар праведности и благодати Божия ро́су, чудотворче святый Нектарие, аки о́блак духовный во время бездо́ждия нам даровал еси, веселя души наша и подвизая вопити тебе: Радуйся, росо́ утешения; радуйся, дыхание нетления. Радуйся, воду благодати нам истощи́вый; радуйся, исцелений струи́ отверзый. Радуйся, весно святости в зиме духовней; радуйся, сияние новопросвещенное во мраце ветсем. Радуйся, даром чудес обогащенный; радуйся, духом разсуждения преосененный. Радуйся, исцелителю недугов всехвальный; радуйся, наставниче во благодати преизрядный. Радуйся, демоны аки пламень пожига́яй; радуйся, страстей душепагубных свобожда́яй. Радуйся, Нектарие, Э́гинский чудотворче.

Кондак 8

Дивная чудеса, отче, рака твоих мощей источает и спасает яже в труде́х скончава́ющих житие свое: сего ради во обитель твою святую отвсю́ду стекаются лю́дие, цельбы и избавления многоразличныя от тебе получающе и вопиюще Богу: Аллилуиа.

Икос 8

Пристанище необурева́емое, блаженне, на острове Э́гинстем явил еси обитель твою Божественную, в нейже и́нокинь честны́х окормитель мудрый соделался еси, о Христе сия, преподобне, мудро наставляя, вопиющия: Радуйся, похвало́ девства; радуйся, образе монашескаго жития. Радуйся, смиренномудрия гро́здие преукраше́нное; радуйся, долготерпения сокровище Божественное. Радуйся, священнаго безмолвия преосене́ние; радуйся, трезве́ния духовнаго благорастворе́ние. Радуйся, воздержания святилище чистое; радуйся, богоподобия одушевленное изображение. Радуйся, светолепное осияние целомудрия; радуйся, богоизбра́нное изваяние чистоты. Радуйся, ороси́вый душу твою слезами покаяния; радуйся, тех стру́ями обновивый зрение духовное. Радуйся, Нектарие, Э́гинский чудотворче.

Кондак 9

Исполнена есть благодати Божественныя и обоняния небеснаго ра́ка мощей твоих, Нектарие, угодниче Христов: имже не то́кмо обитель твоя, но и весь остров Э́гинский радуется, и вси освящаются сих благодатию, вопиюще Богу: Аллилуиа.

Икос 9

Струи́ Божественныя источают многоцелебныя мощи твоя, чудотворче святый Нектарие, богатым даром небесным исцеления многим подают и недугов скверну омывают: темже дивя́щеся славе твоей, юже стяжал еси, усердно вопием: Радуйся, проповедниче благодати невозбра́нный; радуйся, возвестителю истины нелицемерный. Радуйся, скорый помощниче в беда́х; радуйся, ве́лие утешение в напастех. Радуйся, источник многотекущий милосердия Отчаго; радуйся, гро́здие сладчайшее веселия духовнаго. Радуйся, яко раковаго мучительства прекращаеши недуг; радуйся, яко демонскую разрушаеши дерзость. Радуйся, мудрецов суетных смущение; радуйся, верных неруши́мое единение. Радуйся, щи́те веры, имже вернии ограждаются; радуйся, веща́ние истины, имже буесловы обращаются. Радуйся, Нектарие, Э́гинский чудотворче.

Кондак 10

Покров тя и предстателя всяк верный именует, улуча́я от тебе помощь: кто бо, призвав тя с верою, не получил есть твоея́, отче, благодати? Всем бо скоро просимое подае́ши, внегда́ звати: Аллилуиа.

Икос 10

Многих твоих чудес во вся концы изы́де вещание, богоносне и всеблаженне Нектарие, ты бо ближним и дальним поспеша́еши на помощь, святе, и спасаеши бе́дствующия, и предста́тельствуеши вопиющим: Радуйся, чудотворя́й предивно велия и преславная; радуйся, подава́яй всем яже ко спасению благопотребная. Радуйся, древняя исполнивый во дни наша; радуйся, пророчески предреченная показавый ныне. Радуйся, истинныя веры торжество; радуйся, спасительное христиан прибежище. Радуйся, яко являеши истины славу; радуйся, яко заграждаеши беззакония уста. Радуйся, радосте верных и утверждение; радуйся, душ смятенных веселие и крепосте. Радуйся, имже Христос прославися; радуйся, имже сатана посрамися. Радуйся, Нектарие, Э́гинский чудотворче.

Кондак 11

Песнь благодарственную тебе воспеваем, блаженне Нектарие, угодниче Христов, спаса́емии твоими предста́тельствы, во всякой бо нас ну́жде от наше́дших свобожда́еши скорбе́й: темже твое заступление проповедуем, Христу поюще: Аллилуиа.

Икос 11

Попаля́еши демонское лютое неистовство огнем священных чудес твоих, чудотворче Нектарие, и скоро помогая верным, тяжких болезней угашаеши зной, исцеляя страждущия, вопиющия ти во умилении: Радуйся, пучи́но щедрот неистощимых; радуйся, море чудес недомыслимых. Радуйся, болящих исцеление; радуйся, разслабленных скорое исправление. Радуйся, унынием плененных основание; радуйся, отчаянных прибежище. Радуйся, востание падших и вразумление; радуйся, заблуждающихся наставление. Радуйся, источниче, благодарова́ния источа́яй; радуйся, светильниче, омраченныя просвеща́яй. Радуйся, благочестия богодарова́нная сило; радуйся, уте́шителю всех, приходящих к тебе. Радуйся, Нектарие, Э́гинский чудотворче.

Кондак 12

Благодать Уте́шителя бога́тно излия́ся от раки честны́х мощей твоих: гроб бо твой святый, Нектарие, яко приснотеку́щий источник то́чит непрестанно исцеления и напоя́ет Божественными струя́ми благодати всех, вопиющих Господеви: Аллилуиа.

Икос 12

Воспевая всесоверше́нно трисвятую песнь Богови с лики Ангельскими, Нектарие, воззри́ свыше на нас и даруй, всесвя́те, вся потребная верою к тебе притекающим и не престающим вопияти: Радуйся, о́трасле Силиври́и благословенная; радуйся, Э́гины известная похвало. Радуйся, Эллады велие украшение; радуйся, чудотворче, во всем мире прославивыйся. Радуйся, образе иерархов честны́х; радуйся, монашествующих покрове и спасение. Радуйся, Церкве светило новосветлое; радуйся, Православия неколе́блемое утверждение. Радуйся, имже страстей очищение прии́мем; радуйся, имже к Богу восхождения улучи́м. Радуйся, возсиява́яй в сердцах наших свет Господень; радуйся, и о мне ходатаю ко Творцу. Радуйся, Нектарие, Э́гинский чудотворче.

Кондак 13

О Божественный отче, православных христиан верное упование, Нектарие, святителю Христов, Престолу Господню предстоя ныне, испроси нам у Христа Бога прегрешений оставления и всемилостиваго снизхождения, яко да возопием Ему всече́стно: Аллилуиа.

Сей кондак глаголется трижды.

И паки первый икос и кондак:

Икос 1

Человек небому́дренный явился еси в мире, Нектарие, святителю Христов: житие бо преподобное исправив непорочно, свят и богоприятен во всем наре́клся еси; сего ради слы́шиши от нас: Радуйся, от юности Бога возлюби́вый; радуйся, во юдо́ли плачевней светлое восхождение положи́вый. Радуйся, мудрости сосуде златозда́нный; радуйся, проповедниче благодати невозбра́нный. Радуйся, доме святейший действа Божественнаго; радуйся, книго богоизвая́нная жития новаго. Радуйся, яко ныне поревновал еси святым; радуйся, яко Ангелов исполнил еси веселия. Радуйся, преподобных отцев прекрасная добро́то; радуйся, иерархов Христовых благое украшение. Радуйся, и́мже Церковь Христова ликовству́ет; радуйся, и́мже остров Э́гинский радуется. Радуйся, Нектарие, Э́гинский чудотворче.

Кондак 1

Православия звезду новосветлую и Церкве новозда́нное ограждение воспои́м в веселии сердечнем Нектария богомудраго. Просла́влен бо Духа действом, исцелений то́чит благодать незави́стную вопию́щим: Радуйся, Нектарие, Э́гинский чудотворче.

Молитва святителю Нектарию

О Богомудрый и всесвятый отче Нектарие, святителю Христов, чудотворче великий и преславный! К тебе ныне прибегаем, верою и любовию чтущии тя, похвалы сия приносяще от всего сердца и помышления. Ты, угодниче Божий, явился еси ныне яко звезда утренняя, озаряющая мира сего помраченныя концы светом благодати Христовой, юже стяжал еси неложно смиренным житием твоим и кроткими нравы, нетленных и премирных обетований сподобльшеся. Сего ради мы, недостойнии раби твои, молим тя прилежно: отче святый Нектарие, не забуди нас, к тебе усердно притекающих. Свет сый ныне, просвети наша души, помраченныя страстьми, озари наш ум и обнови помышления во еже поучатися нам Божественным и священным образам и нектому о суетных пещися. Утверди нас, преподобне отче, в вере, надежде и любви ко Господу Богу нашему, исцели болезни душевныя и телесныя, буди нам покров и прибежище в скорбех и напастех, вразумление и исправление во гресех, благодать независтную подающе всегда, яко да прославим Единаго Истиннаго Бога, дивнаго во святых Своих, Отца и Сына и Святаго Духа, ныне и присно и во веки веков. Аминь.

Тропарь святому, глас 4:

Подобен: Вознесыйся на Крест:

Иера́рху Христову Нектарию,/ украше́нному дарова́ньми Небе́сными,/ припа́даем проси́тельне,/ зову́ще из глубины́ души́:/ о́тче святы́й Нектарие,/ вся́ких нас изба́ви искуше́ний и бед,/ я́ко прия́л еси́ от Бога чуде́с Благода́ть/ неду́ги исцеля́ти душ и теле́с,// к Боже́ственным моще́м твои́м, отче, прибегающих.

Кондак, глас 2:

Те́плый Засту́пник и Предста́тель си́льный бу́ди, Нектарие,/ всем ве́рою притека́ющим к тебе́/ и Боже́ственныя твоя́ мо́щи любоче́стно лобыза́ющим,/ я́же Христос Бог просла́ви/ чуде́с источа́ющимися дарова́ньми,/ и ми́ром ду́ши на́ша обогати́./ Его́же приле́жно моли́/ пода́ти нам прегреше́ний свы́ше оставле́ние// и ве́лию ми́лость.