№ 46. 1666 г., сентября 18. Соборное послание участвовавших в соборе 1666 г. к Александрийскому патриарху Паисию, едущему в Москву

Всесвятейший господине, отче патриархо александрийский, отче наш премилостивый и пастырю преблагий.

Не тако светлыми звездами твердь Богом лепоупещренная солнцу восиявающу лучи облистания своего появствует, якоже всесвященный собор наш, благодатию Божьей собранный, твоему архиерейству горизонт страны нашея не точию пресветлого твоего лица пастырского пришествием, но и богодухновенного учения светлоозарением облиставающу светолитно ликовствует. Ибо Фиву, источнику светолития нашего или ἡμισφαριου область приемлющу меншая светила света своего оскудение страдати долженствуют: тебе же великому церковного небесе светилу, в пределы великороссийского царства входящу, мы всесвященный российский собор, и астроуподобленный православный христианороссийский народ вящшего света сподобляемся. Занеже бо не толико числом степеней шествия путного полагаеши, елико пастырского учения от мудрости издаеши твоея, еяже слухом аки зарями денници светло възрадовався благочестивый и богохранимый православный великий государь царь и великий князь Алексий Михайлович, всея Великой и Малой и Белой Росии самодержец, сие ны целование наше поостри предварителне написати и послати честным и благоговейным мужем Павлом, архимандритом монастыря Пантократорова, Суждаля града к архиерейству твоему, имже мы целующе многотрудный приход твой, приветно глаголем: благословен еси грядый во имя Господне, благословенно есть исхождение твое из предел отческих, и благословен вход твой в Российскую землю, благоговенно и все путешествие твое, занеже бо ревностию по Богу начася, любовию же совершается. Господь убо да поспешил шествию и пришествию к нам твоему, еже да лепоподобне видети сподобимся, сыновне отческого просим благословения. Писася в царствующем граде Москве, в лето 7175, месяца Септемвриа 18 дне.

Всесвятительства твоего смиреннейшие богомольцы.

Надпись: Всесвятейшему и всеблаженнейшему господину кир Паисию, милостию Божьей папе и патриарху великого Божиего града Александрии, Ливии, Пентаполя, Ефиопии и всея земли Египетския отца отцев и судии селенный, пастырю блажайшему, всесмиренно и пречестно да вручится.