№ 49. 1666 г., в конце октября. Проект приветственной речи восточным патриархам, едущим в Москву

Днесь светлыя радости вся Российская исполнися земля, святейшии патриарси, господие, отцы и пастыри наши. Днесь яко солнце лучи вселенней, ваше святительское пришествие всей российстей Церкви веселие приносит. Днесь волнующемуся кораблю Церкве нашея тишинороднии возвевают ветри: когда превожделенный вашего приход святительства Богом нам даровася. Целую лет седмицу и годищное поприще ожидахом мы сего ведра, еже ныне благодатию всяких благ нескудно дарователя Бога приемлюще, уповаем еже от всяких нам бедств и трудных противностей оуже савватствовати. Чуждо есть всякого ласкательства сие слово наше, повествующее то, приход вашего святительства Великороссийстей стране быти, еже светородного солнца по темно безведрной нощи всему миру возсияние: тако бо светом премудрого учения пастырского и лучми добродетелей нам сияета, якоже чувственное солнце безпрестанным светолитием во поднебесной блистает. Довлекрасна и пресветла суть небеса солнцем и луной, но многокрасншее и многосветлшее есть ныне наше мысленное Российския Церкве небо, зане имать вас в себе два светила велия, оба подобная солнцу, луны же непостоянству непричастна. Свет поистинне вас еста мира и светилника селенныя, не под спудом сокровенная, но на свещницех престолов высочайших поставленная, да светита всем людем. Темже будита во светлостех добродетелей ваших долголетственна, равне тысящолетну Мафусаилу во разширение славы имене Божиего, во украшение и велелепие всея православнокафолическая Церкве, во благоупасение стад вама врученных, и во полезное назидание всего православнохристиянского рода. Сих мы благ вашему святительству усердно от Бога моляще, самем нам от святительства вашего прилежно желати дерзаем, да речета мир нам и благословенье: вемы бо, яко идеже достойным речета, тамо мир ваш приидет, по истинному словеси оному, истинного Бога слова; входяще в дом целуйте его, глаголюще: мир дому сему; и аще убо будет дом достоин, приидет мир ваш нань. Мы убо да будем достойни мира и благословения вашего, се вселюбезно пришествие ваше приемлюще и целующе, прекланяем главы нашя ко приятию благословения, а не точию деснице ваше благословяще ны лобзаем, но и стопы вашя, глаголюще, коль красны нозе благовествующих мир, благовествующих нам благая, целуем. Сие же творяще уповаем нарещи изволившего: аминь, глаголю вам, яко аще два от вас совещаета на земли о всякой вещи, юже аще просита, будет има от Отца Моего, иже на небесех: идеже бо два еста или три во имя Мое собрани, тамо есмь посреде их, яко Он ваших ради святых молитв пастырских, даст вся желаемая Церкви, дарует мир мирови своему. А благоверному и христолюбивому великому государю царю и великому князю Алексию Михайловичю, всея Великой и Малой и Белой Росии самодержцу, послет на враги и супостаты победу и одоленье, даст здравие и долгоденствие и вся благая души и телеси ключимая преумножит. Еже буди, буди, буди.