№ 72. 1666 г., декабрь (после 12). Список послания восточных патриархов, Паисия и Макария, из Москвы, к Иерусалимскому патриарху Нектарию о соборном низложении патриарха Никона

Пресвятейший, блаженнейший и премудростью преукрашеннейший патриархо святого града Иерусалима и всея Палестины, господине, господине Нектарие, во Святем Дусе брате любезнейший, и сослужитель пречестнейший, пресвятейшее блаженство твое братолюбием и рачителством истинным целуем, моляще чистой совесию и праведным умом всемогущую свыше божественную силу, да дарует мир, от всех долгов свобождение, здравие, крепость, возвышение же Святого и Животворящего Гроба нам в духовную радость и веселие.

Вестно да будет, яко отидохом от наших престолов, узревше писанейце твое, извещающее, яко твое блаженство име умышление в сиа страны путьшествовати. Паче же грамотоносец устне извеща нам, яко вселенский патриарх хотяше послати своего эксарха тако, якоже наипаче подвигнутися нам сими семо шествовати, дабы не прилучитися и не быти коему изменению во всех главах, яже мы вси четыре патриарси судихом. Обаче же и по кодикелле твоего блаженства, сиречь по кратном оном назнаменовании (еже особно состави в Волосех¹¹⁸ во всех наших подписаниих, аки на обрану Никонову) нечто увестившеся им, тако сотворихом. Ибо на собор его не единожды, но дважды призвахом, иже убо и прииде, еже бы дати ответ совершенный о всех оглаголаниих на него многими сотворенных. Единаче, блаженнейший брате, обретошася и иные вящшия вины, ихже не подобает предавати писанию, занеже епистолия не имеет в себе что-либо тайно. Едино се довлеет, яко многая и превеликая бяше внутрная болезнь многих лет достойнейшему царю, иже аки от источника изливаше слезы от своих очес, даже земле полаты омочитися ими. Паки познахом, яко глаголанная не по страсти, ниже по ненависти глаголана Быша. Ибо в такое прииде напыщение гордостный Никон, якоже сам ся хиротониса патриархом Нового-Иерусалима, монастырь бо, егоже созда с хищничеством¹¹⁹, нарече Новым Иерусалимом, со всеми окрест лежащими: именуя Святый Гроб, Голгофу, Вифлеем, Назарет, Иордан. Еще же и пришествие наше бяше свобождение некое грамотоносца твоего Савастьяна, егоже едва могохом многими прошении и моленми от царского гнева и заключения свободна сотворити. И оттуду познахом дерзновение во истинну быти, еже кому либо судити кроме многого взыскания, и прилежного испытания, в деле, егоже не весть совершенно; того ради, яко мы, семо пришедшии, очима видехом, и подробну взыскующе всю истинну, обретохом Никона не точию недостойна бывша еже престол патриарший держати, но к тому ниже архиерейского сана достойного. Того ради, по божественным святым правилом и по нашим патриаршим томом, обнажихом его всего Священного действа. Послан же есть во един монастырь изрядный, да плачется о гресех своих. Творим же сие извещение к особному ведению твоей пресвятости, якоже и подобает да друг другу возвещаем, яже приличствуют Святой Христове Церкви уставы.

Мы убо, Божьей милостию и благодатию, тщанием же и добродеянием многих лет достойнейшего царя нашего, надеемся, по совершении сего божественного дела, такожде и по хиротонисании нового патриарха, иже имать быти избран соборне, еже возвратитися к нашим убожайшим престолом. Да благоволит же Бог еже снитися нам во едино, и еже помолитися оным святым местом, Христа Господа ногама топтаным, и еже возвеселитися всем телесно же и духовно. Здравствуй, брате любезнейшей, по обоему человеку.

Твоего блаженства братия твои же во всем и о всех.