№ 73. 1666 г., декабрь (после 12). Список послания восточных патриархов Паисия и Макария и всего освященного собора к вселенскому, т. е. к константинопольскому, патриарху с извещением о низложении патриарха Никона, и о том, что того патриарха в Москву ожидали, но за неприездом принуждены были и без него приступить к осуждению Никона

Пресвятейший, премудрейший и богоизбраннейший¹²⁰ господине вселенский патриарх.

Твою пресвятость мы, во Святом Дусе братия и сослужителие твои, единодушно лобзаем, всех душеспасителных желающе твоей пресвятости, купно со всем прочиим освященным собором премудрейших архиереев, тамо обретающихся во царствующем граде.

Вестно убо да будет вашему о Господе братолюбию (ибо ничтоже есть тайно, еже не в явление приидет, и никтоже делаяй нечто втайне, ищет сам да яве то будет, по глаголу Господню в главе 7-й святого Иоанна евангелиста), яко пресветлейший и Богом венчанный государь царь и великий князь Алексей Михайлович, всея Великой и Малой и Белой Росии самодержец, писа не единой, но и дважды, якоже уведехом, яко писа и до прочих святейших восточных престолов. Паче же яко и человека посыла тоя ради вины верного, призывая нас, да рассудим некое церковное его предложение, деемое в православном его царстве, утверждая нас к тому, яко имел быти прислан от вашея пресвятости муж вместо лица вашего патриаршего. И яко болшия ради верности безбедства и души утешения имело быти некое чаственное¹²¹ снисхождение и устроение, воеже бы двум царствующим странам приити во едино, тако воеже бы смятениам сущим между има престати, яже тщету творят, никоея же ползы приносят, яже нецыи злыи людие творят, возмущающе царствия своего ради прибытка. Преуведехом же, яко и блаженнейший Иерусалимский патриарх от многа времене бяше на половине пути, воеже бы и самому присутствовати лично на освященном соборе московском, того деля мы, два патриарси, да не явимся быти разгласни толикому единству патриаршескому, и дабы не явитися нам непослушливым быти толикому праведнейшему царскому повелению, изыдохом и преидохом стропотные пути, проходяще места студеная, и верхи гор непроходимых, единого точно насмотряюще конца, дабы нам праотческое благоговейнство и истинную правду сохранити. И сия вся неудобная ни во что же вменихом, аще и ветхостию дней отягощени есмы и долгим путем весма неприобычни, изыдохом убо. Но едва приидохом во преславнейший град Москву, обаче не обретохом твоего братолюбия присутствия, якоже надеяхомся, по обещанию, и того деля зело и от усердия опечалихомся, яко надеждой нашею прелщени и доброго общества лишены быхом. Но занеже, якоже глаголется; яже сотворишася, несотворенна быти не могут, ко другому приидохом разсуждению, и начахом разсмотряти церковное оно предложение, еже и прежде бяше прилежно взыскано, и от поместного разсуждено собора. Обретохом же бывшего патриарха Никона премногим винам должна и повинна¹²²; яко досади своими писанми крепчайшему царю нашему, такожде яко соблазни пресветлый синклит, укоряя его и именуя еретичествующим и латинствующим быти, но и церковь держаше во вдовстве чрез девять лет весма лишенную всякого церковного благолепия, и патриаршия красоты, своими коварствы и хитростми всячески томя ю. Паче же по совершенном престола отречении от его сотвореном народне в соборном храме, паки литургиса и хиротониса, действуя вся приличная архиерейскому достоинству свободно и кроме всякого препятия, ругаяся купно священным некими своими новыми и суетными именованми нарицая себе самого аки сам ся хиротонисая Нового Иерусалима патриархом. Но Вскую имамы считати премногая его преступления, яже едва сочестися могут? Паки обретохом, пресвятейший владыко, патриарший престол царствующего града Москвы зело оскорблен, и из лиха обесчествован, и великое сие стадо без бодрого пастыря, тако даже истинно познати нам, яко призвание наше, еже бысть от пресветлейшего государя царя; сего ради дело зело бысть нуждное, праведное и правилное. И суд, егоже изнесл бяше поместный собор московский, бе совершенно чист, и всячески праведен, по святым правилам составленный, и по наших патриарших томах утверженный.

Темже всеми силами потщахомся (вся обаче сотворихом с велиим рассуждением, и с премногим взысканием многих лет достойнейшего царя и защитника нашего, и со истинным пред Богом судом поместного собора архиереев), и когда вникнухом в дела Никоновы, обретохом неправедно ходившего, но мимо царского пути средняго, семо и овамо¹²³ и совершенно низложихом народне в церкви, и соборне судихом, еже жителствовати ему во едином от древних доволно обилном монастыре, дабы плакатися ему о своих гресех. Темже ныне пребывает престол патриарший во вдовстве донележе свыше Высочайший обрящет преизбранного от него достойного жениха Церкви Своей. Просихом же многих лет достойнейшего царя, дабы быти особному некоему извещению и изъявлению чрез свои ему грамотоносцы о всех зде бывших вашей пресвятости, и убо приемше от него соизволение, се мы радостне извествуем, кроме всякого лицаприятия, всю истинну сказующе воеже бы будущему патриарху имети и в диптихах своё воспоминание, якоже и прежде бывшии патриарси имеша купно с нами присное поминание. Обаче и обычной милостыни великому престолу и прочим убогим престолом даянной надеемся обновитися, паче же болшой и доволнейшей быти; и о том всеми силами тщимся, Дóндеже совершится, сиречь воеже бы исполнитися оной притче: Яко брат братом пособствован спасается, и да друзи будут в нуждах полезни. Прилагаем же нечто ино, нашего ради общего утешения, яко с нашим пришествием средостение вражды разрешися и повседневнаго плена извет погибе тако, воежебы паки надеятися нам приити ко прежней нашей свободе, чести и славе, юже древле имехом. Понеже зде нецыи со своими буйствы и неистовствы обесчестиша рода нашего преизящную светлость, того ради сотворишася у велмож достойни презрения и отвержения. Обаче тщахомся и по вся дни молим, да извергутся от среды, и весма отложатся уметы, чести ради общия и лепоты рода нашего.

Уповаем же, якоже вашими святыми молитвами. Бога умилостивляющими, внегда совершити нам сие боголюбезное дело, еже от всея души начахом кафолическия ради церкве возвратитися тамо: сиречь еже нам друг со другом целоватися всею душею и сердцем и собеседовати; обаче со должной честию и приличным говением. По сих же еже нам шествовати к убогим престолом нашим и видети врученное нам стадо, якоже должни есмы вси именуемыи пастырие стрещи его бодрественно сице, воеже бы нам прияти достойное возмездие от Христа, пастыреначалника нашего, такожде ежебы гонзнути нам страшных оных мест мучения, яже воздаются комуждо по делом его, яже ожидают злых делателей и пастырей непоистинне бывших епископами, но мрачными мужами, долга своего не творившими совершенного делателства.

Здравствуй по обоему человеку, внешнему же и внутреннему, от Бога посажденный и Богом почтенный владыко на премногая спасенная лета, во утвержение церковныя тверди.

Твоея пресвятости братия, и ваши во всем и о всех.