Духовные наставления христианину

Великий Государь Царь (л. 298 а) и Великий Князь Алексий Михайлович всеа великия и малыя и белыя Росии самодержец, изволь милостиво сие тетрати приняти Божия завета нужнейшиа заповеди, без них же невозможно всякому християнину спастися, и со вниманием вычести, всяко познаеши недостаточество свое пред Господом Богом и ближнему любовь паще почтеши. Надеюся на Господа, яко милостив будеши нам. Аминь.

(л. 299) Яко подобает веровавшим Богови первее каятися по проповеди Иоаннове и самого Господа нашего Иисуса Христа, горше бо от иже прежде благовестия осужденных иже ныне не кающийся.

Евангелие

Оттоле¹ начат Иисус проповедати и глаголати: Покайтеся, приближи бо ся Царство Небесное.

(л. 299 об.) Тогда² начат поносити градовом, в них же быша множайшая силы его; яко не покаяшася, горе тебе, Хоразин! горе тебе, Вивсаида! Аще в Тире и Сидоне быша были силы бывшая в вас, древле убо во вретищи и попеле седяще покаялися быша, обаче Тиру и Сидону отраднее будет в день судный, неже вам.

Приидоша³ же неции в то время, возвещающе Ему о галилеох, их же кровь Пилат смеси с жертвами их. И отвещав Иисус, рече им: Мните ли, яко галилеяне сии грешнейши (л. 300) паче всех галилеян бяху, яко сице пострадаша? Ни, глаголю вам, но аще не покаетеся, вси такожде погибнете. Или они осмьнадесяте, на них же паде столп Силоамский и поби их, мните ли, яко тии должнейшии бяху, паче всех человек живущих во Иерусалиме? Ни, глаголю вам, но аще не покаетеся, вси такожде погибнете.

Апостол

Ни⁴ же ропщите, яко же нецыи от них ропташа и погибоша от всегубителя. Сия же случишася о Нем, написа же ся в наше наказание, в них же кончина веков достиже.

(л. 301) Яко тех, иже во злых делех сущая, к мучению множицею предает ради предворшаго нечестия.

И яко⁵ не искусиша Бога имети в разуме, сего ради предаст их Бог в неискусен ум творити неподобная.

Елма⁶ любовь не прияша истиную, еже спастися им. Сего ради посла им Бог действо прелести во еже веровати им во лжу.

(л. 302) Яко всяко сопротивословие, аще и от любовнаго и благоговейнаго сложения будет, отчюждает от Господа сопротив глаголющаго. Всяк же глагол Господень со всяцем извещением приимати подобает.

Оттоле⁷ начат Иисус сказовати учеником Своим, яко подобает Ему ити во Иерусалим и много пострадати от старец и архиерей и книжник, и убиену быти, и в третий день воскреснути. И предварив Его, Петр начат претити Ему, глаголя: Милостив Ты, Господи, не имать Тебе быти се. И обращься Иисус рече Петрови: Иди за Мя, сатано, соблазн Ми еси, яко (л. 302 об.) не мыслиши, яже суть Божия, но яже человеческа.

И начат⁸ умывати ноги учеником и отирати лентием, имже бе препоясан. Прииде убо к Симону Петру, и глагола Ему он: Господи, Ты ли мои умыеши нозе? Отвещав Иисус, рече ему: Еже Аз творю, ты не веси ныне, разумееши же по сих. Глагола Ему Петр: Не умыеши нозе мои вовеки. Отвещав ему Иисус: Аще не умыю тебе, не имаши части со Мною.

(л. 303) Яко не достоит преданиом человеческим последовати и отметати заповеди Божия.

По сих вопросиша Его⁹ фарисее и книжницы: Почто ученицы Твои не ходят по преданию старец, но неумовенныма руками снедают хлеб? Он же отвещав, рече им: Яко добре пророчествова Исаиа о вас, лицемерех, яко ж есть писано: сии людие устнами чтут Мя, сердце ж далече отстоит от Мене. Сии же чтут Мя, учаще учения заповедий человеческих. Оставльше бо заповеди Божия, держите предания человеческа.

(л. 304) Яко подобает вся неприступно хранити, яже Евангелием и Апостолы от Господа преданая.

Шедше¹⁰ , научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам.

Бяху¹¹ бо праведни обои пред Богом, ходяща во всех заповедех и оправданиох Господних непорочно.

Слушаяй¹² вас Мене слушает, и отметаяйся вас Мене отметается, отметаяй же ся Мене отметается и пославшаго Мя¹³ .

(л. 305) Яко обличение еже не любити Бога и Христа Его, еже заповеди Его не творити, показание же еже любити творение заповедей Христовых и терпение во еже о Нем страданиох даже до смерти.

Имеяй¹⁴ заповеди Моя и творяй их, он есть любяй Мя. Не любяй Мя словес Моих не соблюдает.

Аще¹⁵ заповеди Моя соблюдете, пребудете в любви Моей. Яко ж Аз заповеди Моя моего соблюдох и пребываю в того любви.

Аще¹⁶ пребудете во Мне, и глаголи Мои в вас пребудут. Еще же, аще хощете просите, и будет вам.

(л. 306) Аще¹⁷ вы пребудете в словеси Моем, воистину ученицы Мои будете и разумеете истину, и истина свободит вы.

И¹⁸ аще кто услышит глаголы Моя и не верует, Аз не сужду ему. Не приидох бо да сужду мирови, но да спасу мир. Отметаяйся Мене и не приемля глагол Моих, имать судящаго ему, слово, еже глаголах, то судит ему в последний день. Прочая.

Апостол

Кто¹⁹ ны разлучит от любве Христовы, скорбь ли или теснота, или беда, или меч, яко же есть писано, яко тебе ради умерщвляемы есмы весь день (л. 306 об.) вменихомся, яко овца заколения. Но о всех сих препобеждаем за возлюбльшаго нас. И прочая.

(л. 307) Яко почитати и славити Бога, иже волю Его делаяй. Обезчещает же преступаяй того закон.

Аз²⁰ прославих тя на земли, дело соверших, еже дал еси мне, да сотворю.

Сице²¹ да возсияет свет ваш пред человеки, яко да видят ваша добрая дела, и прославят Отца вашего, иже на небесех.

Да²² будете светли чистотою и непорочни в день Христов, исполнени плоды правды Иисусом Христом в славу и похвалу Божию.

Иже в закон хвалишися, преступлением закона Богу досаждаеши.

(л. 308) Яко аще и мнит кто исповедати Господа и слышати слово Его, не покоряет же ся заповедем Его, осудися, аще и в дарованиих духовных некоего строения ради будет прощаем.

Не²³ всяк глаголяй Ми «Господи! Господи!», внидет во Царство Небесное, но творяй волю Отца Моего, иже на небесех. Мнози рекут Мне во он день: Господи, Господи, не Твоим ли именем пророчествовахом и Твоим именем бесы изгонихом, и Твоим именем силы многи сотворихом. И тогда исповем им, яко николи же знах вас, отыдете от Мене, делателие беззакониа. Всяк убо, иже слышит словеса (л. 308 об.) Моя сия и творит их, уподоблю его мужу мудру, иже созда храмину свою на камени, и сниде дождь, и приидоша реки, и возвеяша ветри, и оброшася храмине той, и не падеся, основана бо бе на камени. И всяк слышай словеса Моя сия и не творяй их подобен есть мужу бую, иже созда храмину свою на песце, и сниде дождь, и приидоша реки, и возвеяша ветри, и оброшася храмине той и паде, и бе падение ея велие.

Что²⁴ же Мя зовете «Господи! Господи!» и не творите, яже Аз глаголю. И прочая.

(л. 309) Бога²⁵ исповедают ведати, делы же Его отмещутся, мерзцы суще и непокоривии, и на всяко дело благо неискусни.

Ты²⁶ веруеши, яко Бог един есть, добро твориши, и беси веруют и трепещут. Хощеши ли разумети, о человече суетне, яко вера без дел мертва есть²⁷ .

И по мале: Яко ж бо тело без духа мертво есть, тако и вера без дел мертва есть.

(л. 310) Яко иже о малых не веруяй Богови явлен есть много первее о лучших не веровав.

Аще²⁸ земная рекох вам, и не веруете, како, аще реку вам небесная, веруете?

Верный²⁹ в мале и во мнозе верен есть, и неправеден в мале и во мнозе неправеден есть.

Кая³⁰ полза, братиа моя, аще веру глаголет кто имети, дел же не имать, егда может вера спасти его. И прочее.

(л. 311) Яко не подобает небрещи влагающих разум со вниманием Господняя словеса слышащему внимати и творити хотения Его.

Отвещав³¹ же Петр, рече Ему: Скажи нам притчю сию. Иисус же рече: Единаче ли и вы без разума есте, неужели разумеваете, яко всяко входящее во уста во утробу вмещается, и афедроном исходит, и сквернят человека.

Всякому³² слышащему слово царьствия и не внимающу, приходит лукавый и восхищает сеянное в сердцы его. Се есть иже при пути сеянное. И по мале: А иже на добрей земли сеянное, се есть слышай слово и разумевая, (л. 311 об.) иже плод приносит и творит, ово убо сто, ово ж шестьдесят, ово тридесят.

И³³ призвав народ, рече им: Слышите вси и разумейте. И проч.

Блюдите³⁴ убо како опасно ходите, не яко немудри, но яко премудри: искупующе время, яко дние зли суть. Сего ради не бывайте безумни, но разумевающе, что есть воля Божия святая и угодная.

(л. 312) Яко горше убо осуждение ведящих и не творящих, неже еже по неведению согрешати безбедно.

Он³⁵ же раб, ведый волю Господина своего и не сотворь, ниже уготовлься к хотению Его, биен будет много. Не будет много. Ни же достойная ранам, биен будет мало.

(л. 313) Яко кончина греху смерть.

Непокаряяй же ся³⁶ Сыну не узрит жизни, но гнев Божий пребывает на нем.

Егда³⁷ раби бесте греху, свободни бесте от правды, кий убо плод иместе тогда. Оних же ныне стыдитеся, кончина онем смерть. И по мале: Приобретение бо греха смерть, жало смерти грех.

(л. 314) Яко кончина заповеди Божия жизнь вечная.

Аминь³⁸ , аминь, глаголю вам, аще кто слово Мое соблюдет, смерти не узрит вовеки.

Но³⁹ пославый Мя Отец, Той мне заповедь даст, что реку или что возглаголю, и вем, яко заповедь Его живот вечный есть.

Ныне⁴⁰ же свобождшеся от греха, поработивше же ся Богови, имате плод ваш во святыню, кончина же жизнь вечная.

(л. 315) Яко не подобает преобидети судбы Божия, но боятися, аще и не абие воздаяние будет.

Убойте же ся⁴¹ паче могущаго и душу и тело погубити в геене.

Аще⁴² же речет раб он в сердцы своем: Укоснит Господин мой приити, начнет бити рабы и рабыня, ясти же и пити и упиватися; приидет Господин раба того в день, в онь же не чает, и в час, в онь же не весть, и разсечет его пол, и часть его с неверными положит.

Се⁴³ здрав бысть, к тому не согрешай, да не горее ти что будет.

(л. 315 об.) Блюдите⁴⁴ убо, да не приидет на вы реченное во пророце: Видите нерадивии и чюдитеся, и узрите, и исчезнете, понеже дело Аз соделаю во днех ваших, ему же не имате веровати, аще кто возвестит вам. Да никто ж вас льстит тщимы словесы, сих бо ради грядет гнев Божий на сыны непокоривыя.

(л. 316) Яко делание греха отчюждает от Бога и присвояет дияволу.

Аминь⁴⁵ , аминь, глаголю вам, яко всяк творяй грех раб есть греху.

Вы⁴⁶ отца вашего диявола и похоти отца вашего хощете творити.

Егда бо раби бесте греху, свободни бесте от правды.

(л. 317) Яко иже к Богу присвоение не во плоти сродства познавается, но в потщании хотениих Божиих исправляется.

Сый⁴⁷ от Бога глаголы Божия послушает. И⁴⁸ возвестиша ему, глаголюще: Мати Твоя и братия Твоя вне стоят, видети Тя хотяще. Он же отвещав, рече им: Мати Моя и братия Моя суть слышащии слово Божие и творящии его.

Он⁴⁹ же рече: Тем же убо блажени слышащии слово Божие и хранящии его.

Иже⁵⁰ несть со Мною, на Мя есть, иже не собирает со Мною, растачает.

Вы⁵¹ друзи Мои будете, аще творите, (л. 317 об.) елика Аз вам заповедаю.

Елицы⁵² духом Божиим водятся, сии суть сынове Божии.

(л. 318) Яко не достоит лгати, но истинствовати во всем.

Да⁵³ будет же слово ваше еже ей, ей, ни, ни, множайше же сего от лукаваго есть.

Отложивше⁵⁴ лжу, глаголите истину койждо ко искренему своему.

Не⁵⁵ лжите друг на друга.

(л. 318 об.) Яко подобает всякому глаголу или вещи верна приводити свидетелства от богодухновенных книг писаний во извещение убо благому, в постыжение ж лукавому.

И⁵⁶ пришед⁵⁷ к Нему искуситель, рече: Аще Сын еси Божий, рци камению сему, да хлеби будут. Он же отвещав, рече: Писано есть: не о хлебе едином жив будет человек, но о всяком глаголе, исходящем изо уст Божиих.

По⁵⁸ сих вопросиша Его фарисее и книжницы: Почто ученицы Твои не ходят по преданию старец, но неумовенныма рукама снедают хлеб? Он же отвещав, рече им: Яко добре пророчествова (л. 319) Исаия о вас, лицемерех, яко же есть писано: сии людие устнама чтут Мя, сердце же их далече отстоит от Мене. Сии же чтут Мя, учаще учения заповедей человеческих оставльше заповеди Божия.

Мужие⁵⁹ июдейстии и живущии во Иерусалиме вси, се вам разумно да будет, и внушите словеса Моя, не бо яко же вы мните, сии пияни суть, есть бо час третий дне, но се есть реченное пророком Иоилем: И будет в последняя дни, глаголет Господь: излию от Духа Моего на всяку плоть, и прорекут сынове ваши. И проч.

(л. 320) Яко не достоит просто, ниже неиспытателне от лицемерствующих истину совосхищатися, от данаго ж нам от писаний воображения познавати.

Внемлите⁶⁰ же, от ложных пророк, иже приходят к вам во одеждах овчих, внутрь же суть волцы хищницы, от плод их познаете их.

От⁶¹ сего уведят вси, яко Мои ученицы есте, аще любовь имате друг ко другу.

Ведети⁶² вам, яко никто же духом глаголяй речет анафема Иисуса.

(л. 321) Яко не подобает инако учащим внимати, аще и воображаются во еже прельстити на обличение неизвещенных.

Блюдитеся⁶³ , да не кто вас прельстит. Мнози бо приидут во имя Мое глаголюще, яко аз есмь Христос, и многи прельстят.

Внемлите⁶⁴ , от книжник, хотящих ходити во одеждах и любящих целования на торжищих и предвозлежания на вечерях, иже снедают домы вдовиц, виною далече молящеся, сии приимут множайший суд.

Но⁶⁵ аще мы или ангел с небесе благовестит вам паче, еже благове(л. 321 об.)стихом вам, анафема да будет. И яко же прежде рех, и ныне глаголю, аще кто вам благовестит паче, еже приясте, проклят да будет.

(л. 322) Яко достоит первее себе исправляти якове любого согрешения и потом иного обличати или судити.

Что⁶⁶ же видиши сучец во оце брата твоего, бердна ж в твоем оце не смотряеши, или како речеши брату своему: остави, да изму сучец изо ока твоего, и се бердно во оце твоем; лицемере, изми первее бердно из очесе твоего и тогда прозриши изъяти сучец изо очеса брата твоего.

Приведоша⁶⁷ же книжницы и фарисее к Нему жену, в прелюбодеянии яту, и поставиша ю посреде, глаголаша Ему: Учителю, сия (л. 322 об.) жена ята есть ныне в прелюбодеянии, в законе же нам Моисей повеле таковыя камением побивати, Ты же что глаголеши? Се же реша искушающе Его, да быша имели что глаголати нань. Иисус же долу преклонися, перстом писаше на земли, не слагая им, якоже прилежаху вопрошающе Его восклонься, рече к ним: Иже есть без греха в вас, прежде верзи камень на ню. И паки долу преклонься, писаше на земли. Они ж слышавше и совестию обличаеми, исхождаху един по единому, наченше от старец до последних. И оста един Иисус (л. 323) и жена посреди сущи. Восклоня же ся Иисус, ни единаго же виде точию жену, рече ей: Где суть, иже важдаху на тя, ни кий же ли тебе осуди? Она же рече: Никто же, Господи. Рече же ей Иисус: Ни Аз тебе осуждаю. Иди и отселе к тому не согрешай.

Не судите⁶⁸ , да не судими будете, им же бо судом судите, осудитеся.

Не судите⁶⁹ и не осудитеся, не осуждайте и не осуждени будете.

Тем⁷⁰ же безответен еси, о человече, всяк судяй, им же бо инаго судиши, себе осуждаеши, тая же де бо твориши судяй, (л. 323 об.) вемы, яко суд Божий есть на творящия таковая. Помышляеши же ли се, о человече, судяй таковая, яко ты убежиши суда Божия.

(л. 324) Яко не подобает судити кого от безвестных.

Тем⁷¹ же не прежде времене судите, дóндеже приидет Господь, иже просветит тайная тмы и объявит советы сердечныя, и тогда похвала будет коемуждо от Бога.

(л. 324 об.) Яко⁷² не подобает на лицеприятия судити, аще обрезание человек приимлет в субботу, да не разорится закон Моисеов. На Мя ли гневаетеся, яко сего человека здрава сотворих в субботу? Не судите на лица, но праведный суд судите. (л. 325) Яко не подобает осуждати кого, прежде даже увесть опасно яже о нем, аще и мнози суть оглаголующии.

Глагола⁷³ Никодим, пришедшый к Нему нощию един сый от них: еда закон наш судит человеку, аще не слышит прежде от него и разумеет, что творит.

Яко⁷⁴ мнози дни сотворшу ему тамо, Фист сказа цареви яже о Павле, глаголя: муж некий есть оставлен от Филикса узник, о нем же бывшу ми во Иерусалиме яви архиерей и старцы июдейстии, просяще нань пря. К ним же отвещав, яко несть обычай римляном даяти кого человека, прежде даже оклеветаный, пред лицем видит (л. 325 об.) клеветники, место ж приимет о согрешении.

(л. 326) Яко достоит вовремя удалятися наветующих, попустивый бо впасти во искушение извод створити, иже волю Божию молитвою просити.

Отшедшим⁷⁵ же им се ангел Господень во сне явися, Иосифу глаголя: Востав, поими Отроча и матерь Его, бежи во Египет и буди тамо, дóндеже реку ти. Хощет бо Ирод искати Отрочате, да погубит Е. Он же востав, поят Отроча и матерь Его нощию и отыде во Египет. Умершу же Ироду, се ангел Господень во сне явися Иосифу во Египте, глаголя: Востав, поими Отроча и матерь Его, иди в землю Исраилеву, изо(л. 326 об.)мроша бо ищущии душу Отрочате. Он же востав, поят Отроча и матерь Его и прииде в землю Исраилеву. Слышав же, яко Архелай царствует во Июдеи вместо Ирода, отца своего, убояся тамо ити. Весть же прием во сне, отыде в пределы Галилейския.

Слышав⁷⁶ же Иисус, яко Иоанн предан бысть, отыде в Галилею, оставль Назарет.

Блажени⁷⁷ есте, егда поносят вам и изжденут вы, и рекут всяк⁷⁸ зол глагол на вы, лжуще Мене ради.

И по мале: Тако бо и гнаша пророки, иже бе прежде вас.

(л. 327) Ни же⁷⁹ не приимет вас, ни же послушает словес ваших, исходяще из дому или из града того, отрясите прах ног ваших. И проч.

Исполнишася⁸⁰ вси ярости в сонмищи слышавшии сия и воставше, изгнаша Его вон из града, и ведоша Его до верху горы, на ней же град их создан бяше, да быша Его низринути. Он же, прошед посреди их, идяше.

Егда⁸¹ убо гонят вас во граде сем, бегайте во другий град. Фарисеи же, совет приемше, изыдоша, како да Его погубят. Иисус же, разуме, отлучися оттуду.

(л. 327 об.) От дне убо онаго совещашася убити Его, Иисус же не к тому дерзновением хождаше во Июдеох.

И преклонь колена моляшеся, глаголя: Отче, аще есть воля, да мимоидет чаша сия, обаче не Моя воля, но Твоя да будет.

Ведый⁸² же Иисус изыде со ученики Своими на он пол потоца Кедронска, иде же бе вертоград, в он же вниде Сам и ученицы Его.

Напасть⁸³ вас не прият разве человеческа, верен же Бог, иже не оставит вас искуситися паче, еже можете, но сотворит со искушением изводство, еже мощи вам претерпети.

Савл⁸⁴ же оскорбляше церковь по домох входя, и плача мужа и жены, предаяше в темницу, (л. 328) они же убо разсеявшеся.

Уведан⁸⁵ же бысть Савлу совет их, стрежаху же врата день и нощь, яко да того убиют, поемше же ученицы нощию свесиша по стене в кощноцы⁸⁶ .

Бог⁸⁷ и Отец Господа нашего Иисуса Христа весть, сый благословен во веки, яко не лжу. В Дамасце языческий князь Арефы царя, стрежаше Дамаск град, яти мя хотя, и оконцем в кошницы свешен бых по стене, и избегох от руку его.

Во⁸⁸ оно же время возложи Ирод руце озлобити некия иже от церкве, уби же Иякова, брата Иоаннова мечем. И виде, яко (л. 328 об.) годе бысть июдеом, приложи яти и Петра. Беху же дние опресночни. Его же и ем, всади в темницу, предав четырем четверицам воином стрещи его.

И по мале: Помаам же им рукою молчати, сказа им, како Господь его изведе ис темницы. Рече же возвестити Иякову и братиям сия. И изшед, иде во ино место. Бывшу же дни, бе молва немала в воинех, что убо Петру бысть. Ирод же поискав его и не обрет, и истяза стражи, повеле отвести их. Изшед от Июдеи в Кесарию, живяше.

Видевше⁸⁹ же господие ея, яко (л. 329) изыде надежда делания их, поемше Павла и Силу, привлекоша на торг ко князем и ведше их к воеводам, реша: Сии человецы возмущают наш град, июдее суще, и завещавают обычая, яже не достоит нам приимати, ни творити римляном сущим. И снидеся народ на них и воеводы, растерзавше им ризы, веляху палицами их бити. Многи же, давше им раны, всадиша в темницу.

И по мале: И убояшася слышавше, яко римлянина еста. И пришедше, умолиша их изведше моляху изыти из града. И изшедше ис темницы, приидоша к Лидии и ви(л. 329 об.)девше братию, утеша их и изыдоша.

Вам⁹⁰ бе нужда глаголати слово Божие, но понеже отреваете Его и недостойни, сами себе творите вечныя жизни, се обращаемся во языки, сице заповеда нам Господь.

И⁹¹ воздвигоша гонение велие на Павла и Варнаву и изгнаша их от предел своих. Они же, оттрясше прах от ног своих на них, приидоша во Иконию. И⁹² яко же снидоста от Македония. Сила же и Тимофей тужаше духом. Павел свидетелствуя июдеом Христа Иисуса, противящим же ся им и хулящим, отряс ризы своя, (л. 330) рече к ним: Кровь ваша на главах ваших. Чист аз отныне, иду во языки. И прочая.

Аще⁹³ кто инако⁹⁴ учит и не приходит ко здравым словесем Господа нашего Иисуса Христа. И еже по благочестию и учению разгорде ничесоже сведый, но болезнь о взысканиих и словопрениих, от них же бывает зависть, рвение, хулы, мнения лукава прихождения растленных человек умом и отчюжденных от истинны, мнящих приобретение быти благочестие, отступай от таковых.

В⁹⁵ последния дни настанут времена люта, будут человецы (л. 330 об.) самолюбцы, сребролюбцы, величави, горди, хулницы, родителем непокоривии, неблагодатни, непреподобни, нелюбовни, свадливи, диаволи, невоздержливи, некротцы, неблаголюбиви, предателе, продерзателе, горделиви, сластолюбцы паче неже боголюбцы, имуще образ благочестия, силы же его отметающеся, сих отвращайся.

Бес⁹⁶ правды епископ изгнан аще и в чюждем пределе пребывает, дóндеже досаждение мимоидет.

Толкование

От буести и горести возбраняюще святии отцы повелеша епископом в реченное время во инех епископиях пре(л. 331)бывати. Аще ж некий епископ исповеданиа ради чистыя нашея веры, или понеже бе поборник истине, рекше противяся властелем, не творящим истины, и того ради от своего града изгнан быв и во другий град приидет, не возбранится ту пребывати ему, дóндеже обрести возможет и пременение бывшаго на нем досаждения.

(л. 331 об.) Яко не подобает себе вменяти во искушения прежде времене от Бога прощенаго, но молитися не внити во искушение.

Сице⁹⁷ убо молитеся вы: Отче наш, иже еси на небесех, да святится имя Твое.

И по мале: И не введи нас во искушение, но избави нас от лукаваго.

И⁹⁸ хождаше Иисус по сих в Галилеи, не бо хотяше во Июдеи ходити, яко искаху убити июдее. Бе же близ празник июдейский сеннопотчение. Реша же к Нему братия Его: Преиди отсюду и иди во Июдею, да и ученицы Твои видят дела, яже твориши. Никто же бо сокровенне творит (л. 332) что, и ищет сам дерзновенен быти. Аще сия твориши, яви себе мирови, ни братии бо Его веровах в онь. Глагола им Иисус: Время Мое успе прииде, время ж ваше всегда готово, не может мир ненавидети вас, Меня ж ненавидит, яко Аз свидетелствую о нем, яко дела его зла суть. Вы взыдете в праздник сей, яко время Мое успе исполнися.

Сия ж рек им, оста в Галилеи. Егда же взыдоша братия Его, тогда и Сам взыде в празник не яве, но сокровенне.

Воставше⁹⁹ , молитеся, да не вни(л. 332 об.)дете в напасть.

(л. 333) Яко подобает христианину во искушениих от коегождо наводимых ему поминати, иже в Богодухновенном Писании к предлежащему реченное, сице неискушена себе блюсти и сопротивныя упражняти.

Тогда Иисус веден бысть в пустыню духом искуситися от диявола. И постився дний 40 и нощий 40, последи же взалка. И приступль к Нему искуситель, рече: Аще Сын еси Божий, рцы, да камение сии хлеби будут. Он же отвещав, рече: Писано есть, не о хлебе точию жив будет человек, но о всяком глаголе, исходящем (л. 333 об.) изо уст Божиих. И проч.

(л. 334) Яко подобает христианину не боятися и подвизатися во обстоянии, ниже возвышатися о еже на Бога уповании, дерзати ж, яко Господу предстоящу и яже о нем устрояющу и Святому Духу учащу и, даж и до ответа еже к сопротивным.

Не убойтеся¹⁰⁰ от убивающих тело, души же не могущих убити. Убойте же ся паче могущаго душю и тело погубити в геенне. Не две ли птицы ассарию продается¹⁰¹ и ни едина от них падется на земли без Отца вашего. Вам же и власи главнии вси изочтени суть, не убойтеся, убо мнозех птиц лучши есте вы.

(л. 334 об.) Егда¹⁰² же ведут вы на сонмища к началом и властем, не пецытеся, како или что отвещаете или что речете, Святый бо Дух научит вы в той час, яже подобает рещи.

И¹⁰³ бысть буря ветрена велия, волны же вливахуся в корабль, яко погружатися ему. И Той бе в корме на возглавнице спя, и возбуждше Его, глаголаху Ему: Учителю, не брежеши ли, яко погибаем. И востав, запрети ветру, и рече морю: Умолкни, улязи. И улеже ветр, и бысть тишина велия. И рече им: Что тако страшливи есте, како не имате веру?

(л. 335) Востав¹⁰⁴ же священноначалник и иже с ним сущая ересь саддукейская, исполнишася зависти, и возложиша руце свои на апостолы, и послаша их в соблюдение общее. Ангел же Господень отверзе нощию двери темницы, извед же их, рече: Идити и ставше глаголите в церкви к людем вся глаголы жизни сея. Слышавше же, внидоша от утра в церковь и учаху. Не¹⁰⁵ хощем вас не ведети, братие, о скорби нашей, бывшей нам во Асии. И по мале: Яко от толики смерти избави нас, и избавит.

(л. 335 об.) Яко подобает радоватися всякому спострадующему даже до смерти имени ради Божия и заповеди Его.

Блажени¹⁰⁶ изгнани правды ради, яко тех есть Царство Небесное. Блажени есте, егда поносят вам и ижденут вы, и рекут всяк зол глагол на вы лжуще Мене ради. Радуйтеся и веселитеся, яко мзда ваша многа на небесех.

Блажени¹⁰⁷ есте, егда возненавидят вас человецы и разлучат вас, и поносят, и пронесут имя ваше яко зло Сына Человеческаго ради. Возрадуйтеся в той день и взыграйте, се бо мзда ваша многа на небесех.

И¹⁰⁸ призвавше апостолы бывше, (л. 336) запретиша им не глаголати о имени Иисусове, и отпустиша их. Они же радующеся, идяху от лица собора, яко сподобишася о имени Его безчестени быти. Весь же день во святилищи и по домех не престаяху учаще и благовествующе Господа Иисуса.

Ему¹⁰⁹ же бых аз, Павел, служитель, ныне радуюся во страданиих моих о вас и исполняю лишение страданий Христовех в плоти моей о телеси Его, еже есть Церковь.

(л. 337) Яко не достоит оставляти о благочестии подвизающияся.

Отвеща¹¹⁰ же им Иисус: Ныне ли веруете, се грядет час, и ныне прииде, да разыдетеся кийждо во своя, Мене же единаго оставите. Веси¹¹¹ ли сие, яко отвратишася Мене вси иже от Асии, от них же есть Фигелл и Ермоген. Да даст же Господь милость Онисифорову дому, яко многажды мя упокои и вериг моих не постыдеся, но бывша мя в Риме, тощно взыскав обрете. Да даст ему Господь обрести милость от Господа в день он. И елика во Ефесе послужи, добрее ты веси.

(л. 337 об.) В¹¹² первем моем ответе никто же со мною прииде, но вси оставиша мя, да не вменится им.

(л. 338) Елика по общему возражаются и ответа приимут прещение.

От¹¹³ сердца бо исходят помышления лукавая, убийства, прелюбодейства, блудове, крадбы, лжесвидетелства, хулы. Сии суть сквернящая человека.

Отыдите¹¹⁴ от Мене, проклятии во огнь вечный, уготованный дияволу и аггелом его. Взалках бо ся, и не дасте Ми ясти. Возжадахся¹¹⁵ , и не напоисте Мя. Странен, и не введосте Мя. Наг, и не одеясте Мя. Болен и в темницы, и не посетисте Мене. Горе¹¹⁶ вам, богатым, яко восприемлете утешение ваше. Горе вам, на(л. 338 об.)сыщеным, яко взалчете. Горе вам, смеющимся, яко восплачете и возрыдаете. Горе, егда рекут вам добре вси человецы. Внемлите¹¹⁷ же себе, да некогда отягчают сердца ваша объядением и пиянством, и печалми житейскими, и внезапу найдет¹¹⁸ на вы день он. И¹¹⁹ яко же не искусиша Бога имети в разуме, предаст их Бог в неискусен ум творити неподобная, и исполнены всякия неправды, лукавства, и прочая.

Иже¹²⁰ бо не прелюбы¹²¹ сотвориши, не убиеши, не украдеши, не похощеши, и аще кая ина заповедь.

(л. 339) Не¹²² лститеся, ни блудницы, ни прелюбодее, ни малакия, ни мужеложницы, ни лихоимцы, ни пияницы, ни досадители, ни хищницы Царствия Божия не наследят. Да¹²³ некако рвения, зависть, гнев, свары, оклеветания, гордыни, нестроения. Всяка¹²⁴ горесть и ярость, гнев и вопль, и хула да возмется от вас со всякою злобою. Блуд же и всяка нечистота, и лихоимство, ниже да именуется в вас, яко ж подобает святым, и сквернословия, и буесловия, и блядословия, и яже неподобная.

Умертвите¹²⁵ убо уды ваша, (л. 339 об.) сущая на земли, блуд, нечистоту, страсть, похоть злую, и лихоимство, еже есть идолослужение. Их же ради грядет гнев Божий на сыны непокоривыя. Ныне же отвержите гнев, ярость, злобу, хулу, сквернословие от уст ваших, не лжите друг на друга.

Беззаконным¹²⁶ же и непокоряющимся, нечестивым и грешником, непреподобным и грешником, отцедосадителем и матередосадителем, мужеубийцам, блудником, мужеложником, лжем, клятвопреступником, и еже аще что ино, здравому учению (л. 340) противится, по благовествованию славы блаженнаго Бога, Ему же вверен бых аз.

В¹²⁷ последняя дни отступят нецыи от веры, внимающим духовом лестчим и учением бесовским, в лицемерии лжесловеснем созженым своею совестию, возбраняющим женитися, удалятися брашен, их же Бог созда в восприятие со благодарением верным и познавшим истину.

Аще¹²⁸ ли кто инако учит и не приходит к здравым словесем Господа нашего Иисуса Христа и еже по благочестию учения разгорде, ничесо же сведый, но болезнь (л. 340 об.) о взысканиих и словопрениих, от них же бывает зависть, рвение, хула, мнения лукава, сожителства растленных человек умом и отчюженных от истины, мнящих приобретение быти благочестие. Отступай от таковых.

В¹²⁹ последняя дни настанут времена люта, будут бо человецы самолюбцы, сребролюбцы, величави, горди, хулницы, родителем непокориви, неблагодатни, непреподобни, нелюбиви, свадливи, диаволи, невоздержливи, некротцы, неблаголюбиви, предателе, продерзателе, горделиви, сластолюбцы (л. 341) паче, неже боголюбцы, имуще образ благочестия, силы ж его отметающеся. И сих отвращайся.

Бехом¹³⁰ бо иногда и мы несмыслени, непокориви, заблужающе, работающе похотем и сластем различным, в злобе и зависти живуще, мерзцы, ненавидяще друг друга.

(л. 342) Елика по согласному судятся, и благословно обетование имут.

Блажени¹³¹ нищии духом, яко тех есть Царство Небесное. Блажени плачющии, яко тии утешатся. Блажени кротцыи, яко тии наследят землю. Блажени алчющии и жаждущии правды, яко тии насытятся. Блажени милостивии, яко тии помиловани будут. Блажени чистии сердцем, яко тии Бога узрят. Блажени миротворцы, яко тии сынове Божии нарекутся. Блажени изгнани правды ради, яко тех есть Царство Небесное. Блажени есте, егда поносят вам (л. 342 об.) и изжденут, и рекут всяк зол глагол на вы лжуще Мене ради. Радуйтеся и веселитися, яко мзда ваша многа на небесех.

Приидите¹³² благословеннии Отца Моего, наследуйте уготованное вам Царствие от сложения миру. Взалках бо ся, и дасте Ми ясти, возжадах, и напоисте Мене, странен, и введосте Мя, наг, и одеясте Мя, болен бех, и посетисте Мене, в темнице бех, и приидосте ко Мне.

Аще¹³³ же служай в служении, аще учай во учении, утешаяй во утешении и подаяй в простоте, предстояй со тщанием, милуяй с тихостию, любый (л. 343) нелицемерно, отметающеся злаго, прилепляюще же ся блазем, братолюбием к друг другу любезни, честию друг другу водящеся, тщанием неленностиви, духом горяще, Господиви работающе, упованием радующеся, скорби терпяще, в молитве пождавающе, потребам святых причащающеся, страннолюбие гоняще, благословите гонящая вы, благословите, а не клените. Радоватися с радующимися и плакати с плачющими. Тожде друг другу мудрствующе, невысокая мудрствующе, но смиреными со отводящеся, не бывайте мудри (л. 343 об.) от себе. Ни единому же зло за зло воздающе, промышляюще добрая пред всеми человеки, аще мощно от вас, со всеми человеки мирующе. Не себе отмщающе, возлюблении, но дадите место гневу, писано бо есть: Мне отмщение, Аз воздам, глаголет Господь. Но аще алчет враг твой, ухлеби его, аще ли жаждет, напои его, не побеждаяйся от зла, но побеждай благим злое.

Ни¹³⁴ едино ни в чем же дающе претыкание, да непорочно будет служение, но во всем составляюще себе, яко Божия слуги, в терпении мнозе, в скорбех, в нуждах, в теснотах, (л. 344) в ранах, в темницах, в нестроениих, в трудех, во бдениих, в пощениих, в чищениих, в разуме, в долготерпении, в благости, в Дусе Святе, в любви нелицемерне, в словеси истинне, в силе Божии, оружии правды десными и шуими. Славою и безчестием, гаждением и благохвалением, яко лестцы и истинни, яко неведоми и познаваеми, яко умирающе и се живи есмы, яко показаеми, а не умерщвляеми, яко озлобляеми, присно же радующеся. Яко нищии, мнози же богатяще, яко ничесо же имуще, и содержаще вся.

(л. 344 об.) Прочее¹³⁵ ж, братие, радуйтеся, утвержайтеся, утешайтеся, такожде мудрствующе мирствуйте. Плод¹³⁶ же духовный есть любы, радость, мир, долготерпение, благость, благостыня, вера, кротость, воздержание. Молю¹³⁷ убо вы аз, юзник о Господе, достойно ходити званию, в неже звани бысте, всяцем смиренномудрием и кротостию, с долготерпением, носяще друг друга любовию, тщашеся блюсти единение духа, яко же и звани бысте всяцем смиренномудрием и кротостию с долготерпением, носяще друг друга любовию, тщашеся блюсти единение духа, яко же и звани бысте во едином уповании звания вашего. Бывайте¹³⁸ убо друг другу блази, благоутробни, (л. 345) подающе себе, яко же и Бог о Христе дарова нам. Бывайте убо подобни Богу яко чада возлюбленая, и ходите в любви, яко ж и Христос возлюби нас и предаст Себе за ны прошение и жертву Богови в воню благоухания.

Аще¹³⁹ кое убо утешение о Христе, аще утешение любве, аще кое общение духа, аще кое милование и щедроты, исполните ми любовь, да тоже мудрствуете вси, ту же любовь имуще, единодушни, единомудренни, ничто ж по рвению или тщеславию. Прочее¹⁴⁰: Братие, елика суть истина, елика честна, елика праведна, елика чиста, елика любезна, елика (л. 345 об.) похвална. Аще что добродетель, аще что похвала. Сия помышляйте, яже и научистеся и приясте, и слыщасте, и видесте, во мне сия творите.

Аще¹⁴¹ совостасте со Христом, вышних ищите, идеже Христос есть, одесную Бога седяй. Вышняя мудрствуйте, а не земная. Умросте бо, и живот ваш сокровен есть со Христом в Бозе. Облецитеся¹⁴² убо яко избраннии Божии, святии и возлюбленнии, во утробу щедрот, и благость, и долготерпение. Наказуйте¹⁴³ безумныя, утешайте малодушныя, укрепляйте немощныя, долготерпение же ко всем (л. 346) блюдите, да не кто кому зло за зло воздаст, но всегда благое гоните к друг другу и ко всем, всегда радуйтеся, непрестанно молитеся, во всем благодарите. Се бо есть воля Божия о Христе Иисусе в вас. Духа не угашайте, пророчествия не уничижайте. Вся же искушающе, доброе содержите, от всякаго вида зла удаляйтеся. Старцем¹⁴⁴ трезвеном быти, честном, целомудреном, здравствующем верою, любовию, долготерпением, старицам такожде, в строении священнолепие, ненавидницам, не вину многу порабощеным, доброучителным, да уцелому(л. 346 об.)дряют юныя, мужелюбицам быти, любочадцам, целомудренным, чистым, домодержицам блазем, повинующеся своим мужем, да не слово Божие хулится. Воспоминай¹⁴⁵ тем, началом и властем повиноватися и покарятися, на всякое дело благо готовом быти, ни единаго же хулити, несварливому быти, кроткому, всяку показующе кротость ко всем человеком.

Братолюбие¹⁴⁶ да пребывает, страннолюбие не забывайте, тем бо не разумеша нецыи, прияша ангелы. Поминайте юзники, яко с ними связани, озлобленныя, яко и сами суще в теле. (л. 347) Честен брак во всем, и ложе нескверно. Блудником же и прелюбодеом судит Бог. Не сребролюбцы нравом, доволни сущими.

(л. 348) Яко подобает врученым проповеди евангельстей с молением и молитвою приседети, аще диаконом, аще презвитером, неповинным и искушенным перваго жития.

Тогда¹⁴⁷ глагола учеником Своим: Жатва убо многа, делателей же мало, молитеся убо Господину жатвы, да изведет делателие на жатву Свою. И¹⁴⁸ егда бысть день, пригласи ученики Своя и избра от них дванадесят, их же и апостолы именова, Симона, его же нарече Петра, и Андреа, брата его, Иякова и Иоанна, Филиппа и Варфоломеа, Фома и Матфеа, Иякова Алфеова (л. 348 об.) и Симона, нарицаемаго Зилота, Иуду Ияковля и Иуду Искариотскаго, иже и бысть предатель.

По¹⁴⁹ сих же яви Господь и инех 70 и посла их по два пред лицем Своим во всяк град и место, аможе хотяше Сам ити. И проч.

Первое¹⁵⁰ убо слово сотворих о всех, о Феофиле, их же начат Иисус творити же и учити, до него ж дне заповеда апостолом Духом Святым, их же избра, вознесеся. И¹⁵¹ поставиша два, Иосифа, нарицаемаго Варсаву, иже наречен бысть Иуст, и Матфеа, и помолившеся, реша: Ты, Господи, сердцеведче всех, покажи, его же избра от сих (л. 349) обоих единаго прияти причет служения сего и апостолства, от него же испаде Иуда, ити в место свое. И даша жребия има, и паде жребий на Матфеа, и причтен бысть ко единонадесятем апостолом. Аще¹⁵² кто епископства хощет, добру делу желает. Подобает убо епископу непорочну быти, единой жене муж, трезвену, целомудру, красну, страннолюбцу, учителну, не пианицы, не бийцы, не сварливу, но кротку, не мшелоимцу, не сребролюбцу, своего дома добре правящу, чада имуща в покорении со всякою чистотою. Аще ли кто своего дому не весть (л. 349 об.) правити, како о Церкви Божии прилежит. Не новокрещену¹⁵³ , да не в поношение впадет и сеть диаволю. Диаконом такожде честном, недвоесловцем, не вину многу внимающим, не скверностяжателном, имущим таинство веры в чистей совести. И таковии да искушаются прежде, потом же да служат непорочни суще.

Сего¹⁵⁴ ради оставих тя в Крите, да ненаконченная исправиши и поставиши по градох попы, яко же ти аз завещах, аще кто есть без вины единой жене муж, чада имея верна, не во укорении блуда или непоко(л. 350)рива. Подобает бо епископу без порока быти, яко Божию строителю, не напрасну, не гневливу, не пианицы, не бийце, не скверностяжателну, но страннолюбцу, боголюбцу, целомудрену, праведну, преподобну, воздержану, пособствующу по вернем словеси, да силен будет и утешати в здравом учении, и сопротивящаяся обличати.

(л. 351) Яко не достоит у рукоположениих благоудобном¹⁵⁵ быти, ниже непокровенне на та приходити, не бо безбедно есть неискусное, водящаго же ся о нечесом явлевати, да ниже той причастится греху, ниже прочии отсечени будут, но паче боятися навыкнут.

Руки¹⁵⁶ скоро ни на кого же возлагай, ниже¹⁵⁷ причащайся гресех чюжих. На¹⁵⁸ попа хулы не приемли, разве аще не при двою или триех свидетелех согрешающая же пред всеми обличай, да и прочии страх приимут.

(л. 352) Яко не подобает избранному о себе приходити на проповедь, пождавати же время Христова благоволения и начинати убо проповедание, егда повелен будет проповедати же о Нем, к ним же послан бысть.

Сия¹⁵⁹ обанадесяте посла Иисус, заповедав им, глаголя: На путь язык не идите и во град Самарянский не внидите. Идите ж паче ко овцам погибшим дому Израилева. Аз от Бога изыдох и приидох, не бо от себе приидох, но Он Мя посла. Ови¹⁶⁰ убо разсеяни бывша от скорби, (л. 352 об.) бывшая при Стефане, проидоша до Финикии и Кипра и Антиохии, никому же глаголюще слово, разве единем иудеом. Павел¹⁶¹ , раб Иисус Христов, зван апостол, отлучен во благовествование Христово. Како же услышат без проповедающаго, како же проповедят, аще не послани будут. Павел, апостол Иисус Христов, по повелению Бога и Спаса нашего.

(л. 353) Яко подобает званому в проповедь евангельскую абие послушати, а не отлагати.

Рече¹⁶² же к другому: Прииди, последуй Ми. Он же рече: Господи, повели ми первие ити и погребсти отца моего. Рече же ему Иисус: Остави мертвых погребсти свою мертвеца, ты же шед, проповедуй Царствие Божие.

Егда¹⁶³ же благоволи Бог, избравый мя от чрева матере моея и призвав благодатию своею открыти Сына Своего во мне, да благовествую Его во языцех, абие не приложихся плоти и крови, ни взыдох в Иерусалим, кои же пред ним мене апостолом, но идох во Аравию (л. 354) и паки возвратихся в Дамаск.

(л. 354 об.) Яко не достоит инако учити.

Аминь¹⁶⁴ , аминь, глаголю вам, не входяй дверми во двор овчий, но прелазя инуде, он тать есть и разбоиник, а входяй дверми пастырь есть овцам. И по мале. Аз есмь Пастырь добрый. Вси, елицы приидоша, татие бяху и разбойницы, но не послушаша их овцы.

Но¹⁶⁵ и аще мы вам или ангел с небесе благовестит паче, еже благовестихом вам, проклят да будет. Яко же преже рекох и ныне паки глаголю: Аще кто вам благовестит паче, еже приясте, проклят да будет.

Аще¹⁶⁶ кто инако учит и не при(л. 355)ходит к здравым словесем Господа нашего Иисуса Христа, ниже по благочестии учению разгорде ничтож сведый. И прочее.

(л. 355 об.) Яко подобает вся предвчиненная от Бога в Евангелии и от апостол учити веровавшая и елика сим последующая.

Шедше¹⁶⁷ , научите вся языки, крещающе их во имя Отца и Сына и Святаго Духа и учаще их блюсти вся, елика заповедах вам.

(л. 356) Яко ввереным словесем Господня учителства, аще умолчит что от нуждных, еже к Божию благоугождению, повинен есть крови, еже в беду впадающих.

Горе¹⁶⁸ вам, законником, яко взясте ключ разумения, сами не входите и хотящим внити возбраняете. И якож¹⁶⁹ снидоша от Македония Сила и Тимофей, тужаше духом Павел, засвидетелствуя иудеом Христа Иисуса, противящим же ся им и хулящим, отряс ризы, рече к ним: Кровь ваша на главах ваших, чист аз, отныне во языки иду. Тем же свидетелствую вам в днешний день, яко чист есмь (л. 356 об.) от крове всех, не бо обинухся возвестити вам весь совет Божий.

(л. 357) Яко не достоит иным нуждная возлагати, их же сам не исправи. И вам, законником, горе, яко связуете человеком бремена тяжка, неудобь носима, и сами единем перстом вашим не прикасаетеся бременем.

(л. 357 об.) Яко подобает предстоятелю Слова образ предлежати иным всякаго блага и исправлену прежде даже учити.

Приидите¹⁷⁰ ко Мне вси тружающиися и обременении, и Аз упокою вы. Возмите иго Мое на ся и научитеся от Мене, яко кроток есмь и смирен сердцем.

Егда¹⁷¹ убо умы ноги учеником, взях ризы и возлег паки, рече учеником: Весте ли, что сотворих вам? Вы глашатаете Мя, Учителя и Господа, и добре глаголете, есмь бо. Аще убо Аз омых вам ноги, Господь и Учитель, и вы должни есте друг друга умывати нозе, образ бо дах вам, (л. 358) да яко же Аз сотворих вам, и вы творите. Вся¹⁷² показах вам, яко тако тружающимся подобает заступати немощныя. Подобни¹⁷³ ми бывайте, яко же и аз Христу. Никто¹⁷⁴ же от юности своея да не нерадит, но образ буди верным в слове, в житии, в любви, в вере, в чистоте.

(л. 359) Яко не подобает предстоятелю Слова своими исправленми уверити веровавшая.

Вы¹⁷⁵ есте соль земли. Аще же соль обуяет, чим осолится? Ни во что же потребна есть, разве да иссыпана будет вне и попираема от человек.

Все¹⁷⁶ , еже даст Ми Отец, ко Мне приидет и грядущаго ко Мне не изждену вон, яко снидох с небесе, не да творю волю Мою, но волю пославшаго Мя Отца. Се же есть воля пославшаго Мя, да всяк видяй Сына и веруяй в Он, имать живот вечный.

Кто¹⁷⁷ бо наше упование или радость или венец похвале, (л. 359 об.) аще не вы пред Господем нашим Иисусом Христом в пришествие Его, вы бо есте слава наша и радость.

(л. 360) Яко подобает предстоятелю Слова проходити грады и веси вся врученыя ему.

И¹⁷⁸ прохождаше всю Галилею Иисус и уча на сонмищах, и проповедуя Евангелие Царствия, и исцеляя всяк недуг и всяку болезнь. И Сам хождаше во вся грады и веси, проповедая Царствие Божие и благовествуя, и дванадесяте с Ним.

(л. 361) Яко подобает вся призывати к послушанию Евангелия и со всяцем дерзновением возвещати слово и свидетелствовати истину, аще и нецыи возбраняют и гонят яковем годе нравом даже и до смерти.

Еже¹⁷⁹ , глаголю вам, во тме, рцыте во свете, и еже во уши слышите, проповедите на кровлех и не убойтеся от убивающих тело, души же не могущих убити. Брак¹⁸⁰ убо уготован, звании же не быша достойни, шедше убо на распутия, и еликих аще обрящете, призовите на брак. Отвеща¹⁸¹ им Иисус: (л. 361 об.) Аз со дерзновением глаголах миру, Аз всегда учих на сонмищи и в церкви, идеже людие сходятся, и особе не глаголах ничтоже.

Введше¹⁸² же их, поставиша на сонмищи, и вопроси их архиерей, глаголя: Не запрещением ли запретихом вам не учити о Имени сем? И се исполнисте Иерусалим учения вашего и хощете навести на ны кровь Человека сего. Отвещав же Петр и апостоли, реша: Повиноватися подобает Богу паче, нежели человеком. Обаче¹⁸³ Дух Святый во градех¹⁸⁴ свидетелствует ми, глаголя, яко узы мене и скорби ждут. Но ни единем же (л. 362) словом творю, ни имам душу мою честну себе, яко совершити течение мое с радостию и служение, еже приях от Господа Иисуса Христа, засвидетелствовати благовествование благодати Божия.

Сами¹⁸⁵ бо весте, братие, вход наш, иже к вам, яко не тощ бысть, но преже пострадавше с досаждением, яко же и сами весте, в Филиппех дерзнухом о Бозе нашем глаголати к вам Евангелие Бога нашего со многим подвигом.

(л. 363) Яко подобает приемших слово истинное утвержати посещением.

По¹⁸⁶ днех же неких рече Павел к Варнаве: Возвращшеся посети бе братию нашу по всех градох, в них же возвестихом слово Божие, како суть. Мы¹⁸⁷ бо, братие, осиревше от вас ко времени и часу лицем, а не сердцем, лишше же потщахомся лица вашего видети многим желанием, зане восхотехом приити к вам, аз убо, Павел, и единою и дващи, но возбрани нам сатана. И по мале. Тем же уже не терпяще благоволихом остати (л. 363 об.) во Афинех едини и послахом Тимофея, брата нашего и служителя Божия во благовествовании Христове, утвердити вас и утешити о вере вашей, еже ни едино смущение имети в скорбех сих, сами бо весте, яко вси и с тое лежим.

(л. 364) Яко свойственно есть любящему Христа, еже во мнозей твердости любве о учимых со всяцем прилежати тщанием и всяцем образом, аще и даже до смерти пождавати учителством и во общине и особь.

Пастырь¹⁸⁸ добрый душю свою полагает о овцах. Егда¹⁸⁹ ж обедоваша, глагола Симону Петру Иисус: Симоне Ионин, любиши ли Мя паче сих? Глагола ему: Ей, Господи, Ты веси, яко люблю Тя. Глагола ему: Паси агнца Моя. Глагола ему паки второе: Симоне Ионин, любиши ли Мя? Глагола Ему: Ей, Господи, Ты веси, яко люблю Тя. (л. 364 об.) Глагола ему третицею: Симоне Ионин, любиши ли Мя? И рече Ему: Господи, Ты вся веси, Ты веси, яко люблю Тя. Глагола ему Иисус: Паси овцы Моя. Во¹⁹⁰ едину ж от суббот собраным учеником преломити хлеб. Глаголаше им Павел, хотя изыти наутрия, прострех же слово даже до полунощи. И по мале. Шед же и преломив хлеб и вкусив, беседовав даже и до зореи, изыде. Яко¹⁹¹ ничто же обинухся от полезных, еже не сказати вам и научити вас пред людьми и по домех, (л. 365) засвидетелствую иудеом же и еллином, иже к Богу покаяние и веруя же в Господа нашего Иисуса Христа. Тем¹⁹² же бодрствуйте, поминающе, яко три лета нощь и день не престах со слезами наказуя единаго коегожде вас. Самимо¹⁹³ бо веста, братие, болезнь вашу и труд нощь и день делающе, за еже не отягчити никого же от вас, проповедахом слово Божие. И прочее.

(л. 366) Яко предстоятелю Слова милостиву и благоутробну быти подобает и паче же о озлобленных душах.

Видевше¹⁹⁴ же фарисеи, реша ко учеником Его: Почто с мытари и грешники яст Учитель ваш? Иисус же слышав, рече: Не требуют здравии врача, но болящии, шедше научитеся, что есть милости хощу, а не жертвы. Не приидох бо призвати праведных, но грешных на покаяние.

Видев¹⁹⁵ же народ милосердова о них, яко бяху смятени, аки овцы, не имуща Пастыря.

(л. 367) Яко подобает и в телесных потребах милосерду быти о веровавших и пещися ими.

Милосердую¹⁹⁶ о народе, яко уже три дни преседят Ми и не имут, что ясти, и отпустити их не ядшя не хощу, да не како изнемогут на пути. И¹⁹⁷ пришед к Нему прокажен, моля Его и кланяяся Ему, глаголя: Аще хощеши, можеши мя очистити. Иисус же милосердовав простер руку, косну и и глагола ему: Хощу, очистися. Во¹⁹⁸ дни же тыя множащимся учеником бысть в еллинех и ко иудеом, яко презираеми бяху в службе повседневней вдовицы их, (л. 367 об.) призваша же дванадесяте множество ученик, реша: Изберите, братие, мужи от вас свидетелствованы седмь, исполнени Духа Свята и премудрости, их же поставим над требованием сим.

(л. 368) Яко не подобает предстоятелю Слова и в малых сам действовати, любопочитаем должными, о лучшем же потщании остаяти.

Призвавше же дванадесяте множество ученик, реша: Не угодно есть нам, оставлшем слово Божие, служити трапезам, мы ж в молитве и служении Слова претерпим.

(л. 368 об.) Яко не подобает преходити останки словесныя учителством, в ласкании слышащих, во извет своих сластей или потреб, но таковем быти, яко пред Богом, в славу Его глаголющим. Вся же дела своя творят, воеже видетися от человек, разширяют богохранилища своя и величаются вскрилием риз своих, любят же предвозлежание на вечерях и председания на сонмищах и еже зватися от человек равви. Вы же не нарицайтеся учители, един бо есть Учитель ваш Христос, вси же вы братия есте. И не нарицайте себе отца на земли, един бо есть Отец ваш, иже на небесех, (л. 369) ниже нарицайтеся наставницы, един бо есть Наставник ваш Христос.

Мое¹⁹⁹ учение несть Мое, но пославшаго Мя, аще кто волю свою творит, познан будет от учения, аще от Бога есть или аз о себе глаголю, иже о себе глаголя и славу свою ищет. Ищай же славы Пославшаго его, сей истинен есть, и неправды в нем несть.

Несть²⁰⁰ мы бо, яко же нецыи, корчемствующе слово Божие, но от чистоты, яко от Бога, пред Богом о Христе глаголем.

Утешение²⁰¹ бо наше не от прелести, ни нечистоты, ниже лестию, но яко ж искусихомся от Бога верни быти, прияти благовествование, сице (л. 369 об.) глаголем, не яко человеком угождающе, но Богу искушающему сердца наша. Не бо в слове ласкания, когда быхом, яко ж весте, ниже виною лихоимания, Бог свидетель, ни ищуще от человек славу, ни от вас, ниже от инех, могуще в тяготе быти, яко Христови апостоли.

(л. 370) Яко не подобает предстоятелю Слова в подлежащих безчестие приимати властию, но ниже возвышатися на тех, но паче вину еже к тем смиреномудрия степень имети.

Кто²⁰² убо есть верный раб и мудрый, его же поставит Господь над рабы Своими, еже даяти им пищу вовремя. Блажен раб, его же пришед Господь его обрящет тако творяща. Аминь, глаголю вам, яко над всем имением Своим поставит его. Аще ли же речет злый раб он в сердцы своем: Укоснит Господин мой приити; а начнет бити срабныя своя, ясти же и пити с пияницами. (л. 370 об.) Приидет Господин раба онаго в день, в онь же не чает, и в час, в онь же не весть, и протешет его и часть его с лицемеры положит, ту будет плач и скрежет зубом.

Вы²⁰³ глашаете Мя Учителя и Господа и добре глаголете, есмь бо, аще убо Аз умых вам нозе, Господь и Учитель. И прочее.

Бысть²⁰⁴ же и любопрение в них, кто от них более мнится. Иисус же рече им: Царие земстии обладают ими и началствующим благодателе нарицаются. Вы ж не тако, но болий вас, да будет всех последнейший и вождь, яко раб, кто болий возлежай или служай, (л. 371) не возлежай ли.

От²⁰⁵ Милита ж посла во Ефес призвати попы церковныя, яко же приидоша к нему, рече к ним: Вы весте, яко от перваго дни, отнелиж приидох во Асию, како с вами все лето бых, работая Господеви со всяцем смиреномудрием и многими слезами и напастьми, прилучшимися от иудейских²⁰⁶ навет.

В²⁰⁷ сладость бо приемлете безумныя мудри суще, приемлете бо, аще кто вас порабощает, аще кто поядает, аще кто приемлет, аще кто величается, аще кто вы в лице биет. По досаждению глаголю, зане мы, яко изнемогохом в части сей.

(л. 372) Яко не подобает по зависти или рвению или любопрению, еже к неким, проповедати Евангелие.

Се²⁰⁸ отрок Мой, его же возлюбих, и возлюбленный Мой, нань же благоволи душа Моя. Положу дух Мой на нем и суд языком возвестит.

Нецыи²⁰⁹ убо завистию и рвением, нецыи же и благоволением Христа проповедают. Ови убо от любве ведяще, яко во ответе Евангелия лежу, ови же рвением Христа проповедают нечисте, мняще печаль навести узам моим.

(л. 373) Яко не подобает человеческими лихоимании приимати в проповедь евангельскую, да не скрыется от них Божественая благодать.

Исповедаю Ти ся, Отче Господи небеси и земли, яко утаил еси сия от премудрых и разумных и открыл еси та младенцем.

Не²¹⁰ посла бо мене Христос крестити, но благовестити не в премудрости слова, да не упразднится Крест Христов. И аз убо пришед к вам, братие, не по преодержиму словеси или премудрости, возвещая вам тайну Божию, не бо судих ведети, что в вас точию Иисуса Христа, и сего распята, и аз в немощи и страсе и тре(л. 373 об.)пете мнозе бых к вам. И слово мое и проповедь моя не по препрению человеческия мудрости, но в явлении духа и силы, да вера ваша не в премудрости человечестей, но в силе Божией.

(л. 374) Яко не подобает благоволение проповедания мнети своею силою содевати, но во всем на Бога уповати.

Упование же таково имамы Христом к Богу, не яко доволни есмы о себе помыслити, что яко от себе, но доволство наше от Бога, иже удоволи нас служителями быти Новому Завету.

(л. 375) Яко не подобает учиненному в проповедь евангелскую стяжавати множае, что от нуждных, яже о нем потреб.

Не²¹¹ стяжите злата, ни сребра, ни меди при поясех ваших, ниже сапоги, ни жезла, достоин бо есть пищи²¹² делатель мзды своея есть. Ничто же да возмете на путь, ни жезла, ни пиры, ни хлеба, ни сребра, ниж по двою ризу имети.

Никто²¹³ же, воин бывая, обязуется куплями житейскими, да воеводе угоден будет.

(л. 376) Яко не подобает влагатися бе в житейская попечения и пристрастием сих упражнятися.

Рече²¹⁴ же некий к Нему от народа: Учителю, рцы брату моему, да разделит со мною наследие. Он же рече: Человече, кто Мя постави судию или делителя над вами?

Никто²¹⁵ же воин бывая оплетается куплями житейскими. И прочее.

(л. 377) Яко иже ради угождения слышащих не брегущий дерзновение, еже о Божественных хотениох, о нем себе порабощают, им же угодити хотят, Господня владычествия отпадают.

Како²¹⁶ можете вы веровати, славу друг от друга приемлюще и славу от единаго Бога не ищущу.

Аще²¹⁷ и еще человеком угождал бых, Христов раб не бых был.

(л. 378) Яко подобает разум предлежати учащаго, всех убо в мужа совершена сочетати, в меру возраста исполнения Христова возводити коегождо во своем чину.

Будите²¹⁸ убо вы совершени, яко же Отец ваш небесный совершен есть.

Не²¹⁹ 542 о сих молю токмо, но и о верующих словесем их в Мя, да вси едино будет, яко же Ты, Отче, во Мне, и Аз в Тебе, да и ти в Нас едино будут.

Пастыря²²⁰ и учителя в сочетание святым в дело служения, в созидание тела Христова, дóндеже достигнем вси в единение веры (л. 378 об.) и в познание Сына Божия, в мужа совершена, в меру возраста исполнения Христова.

(л. 379) Яко подобает в незлобии и в кротости наказовати сопротивляющаяся, надеяти же ся тех покаяния, дóндеже аще исполнит меру, еже в них прилежания.

Не²²¹ преречет, ни возопиет, ниже услышит кто на разпутиих гласа Его, трости сокрушены не преломит и ленна внемшася не угасит, дóндеже изведет на победу суд.

Рабу²²² Господню не подобает сваритися, но тиху быти ко всем, учителну, незлобиву, в кротости наказующу сопротивныя, еда како даст им покаяние в познание истины, возникнути (л. 379 об.) от диаволския сети.

(л. 380) Яко подобает, иже страха ради и благоговейнства отрицающемуся пришествия, проповедающаго слово покарятися и нелюбопрепирателне належати.

И молиша Его все множество страны Гадаринския отыти от них, яко страхом велицем содержими бяху. Той же, сед в корабль, возвратися.

(л. 380 об.) Яко подобает, иже в разуме не приемлющаго проповедь евангелскую, удалятися, и ниже яже к нуждным телесе потребам от него благодеяния восприимати.

Ниже²²³ аще не приемлет вас, ниже услышит словес ваших, исходяще от дому онаго или града, отрясите и прах от ног ваших.

В²²⁴ онь же град аще внидете, и не приемлют вас, исходяще на распутия его, рцыте: И прах, прилепший от града вашего, отрясаем вам, обаче се ведите, яко приближися на вы Царствие Божие.

Яко²²⁵ же снидоша (л. 381) от Македония Сила же и Тимофей, тужаше духом Павел, свидетелствуя иудеом Христа Иисуса. Сопротивящим же ся им и хулящим, отряс ризы своя, рече к ним: Кровь ваша на главах ваших, чист аз, отныне во языки иду.

(л. 381 об.) Яко подобает по еже исполнити в них всяк образ прилежания, не повинующих же ся, далече удалятися от них.

Иерусалим²²⁶ , Иерусалим, избивый пророки и камением побивая посланыя к тебе, колижды восхотех собрати чада твоя, им же образом собирает кокошь птенцы своя под криле, и не восхотесте, се оставляется вам дом ваш пуст.

Вам²²⁷ бе нужда глаголати слово Божие, но понеже отреваете его и не достойни сами себе творите вечныя жизни, се обращаемся во языки. Сице бо заповеда нам Господь: Положих тя во свет (л. 382) языком, еже быти во спасение даже до последних земли.

(л. 382 об.) Яко ко всем во всякой вещи хранити подобает опаство Господних глагол и ничто же творити по умолению.

Засвидетелствую пред Богом и избранными ангелы, да сия сохраниши без всякия вины, ничтоже творя по умолению.

(л. 383) Яко подобает предстоятелю Слова с промышлением и искусом мнозем смотряти по еже к Богу благоугождению коегождо творити же и глаголати, яко должна суща, и от самых ввереных ему искушатися и свидетелствоватися.

Вы²²⁸ весте, яко от перваго дне, отнелиже приидох во Асию, како с вами все время бых, работая Господи со всяцем смиренномудрием и многими слезами и искушеньми.

И по мале. Сребру или злату, или одеянию никако ж вожделех. Сами бо весте, яко требованию моему и сущим со мною послужисте (л. 383 об.) руце сей. Вы²²⁹ свидетелие и Бог, яко преподобно и праведно и непорочно вам верующим бых, яко же весте.

(л. 384) Елика совокупно рекошася о епископех и презвитерех.

Аще²³⁰ кто епископства желает, добру делу желает, но подобает епископу непорочну быти. И прочая. Старцу²³¹ не твори пакости, но утешай, яко отца, юнейшая, яко братию, старицы, яко матери, юных, яко сестры со всякою чистотою. Юных²³² же помышлении бегай, гони же правду, веру, любовь, мир с призывающими Господа от чиста сердца. Буих же и ненаказанных стязаний отрицайся, ведый, яко рождают свары, рабу ж Господню не подобает сваритися, но тиху быти во всем. И проч.

(л. 384 об.) Ты²³³ же последовал ми еси вере, учению, образу, тщанию, терпению, гонениом, страданиом. Сего²³⁴ ради оставих тя в Крите, да ненакончанная исполниши и поставиши по градох презвитеры, яко же ти аз заповедах. И прочая.

О диаконох

И²³⁵ избраша Стефана, мужа исполнь веры и Духа Свята, и Филиппа, и Прохора, и Никанора и прочих, их же поставиша пред апостолы и помолишася, возложиша руце. Диаконом²³⁶ також честном, не двоесловцем, ни вину многу внимающем, (л. 385) не мшелоприбытком. И прочее.

(л. 385 об.) Яко подобает слышателем слова наученым писаниом искушати, яже от учителей глаголемая и убо соглашающая писаниом приимати: чюждая же отревати и в таковых пребывающаго учениих отвращатися зелнейше.

Горе²³⁷ человеку оному, им же соблазн приходит. И аще око твое соблажняет тя, изми его, подобно и о руце, и о нозе.

Аминь²³⁸ , аминь, глаголю вам, не входяй дверми во двор овчий, но влазя инуде, он тать есть и разбойник.

И по мале. Чюжему ж не последуют, но бежат от него, яко не ведят чюждаго гласа. Но²³⁹ и аще мы (л. 386) или ангел с небесе благовестит вам паче, еже приясте, проклят да будет. Пророчествиа²⁴⁰ не уничижайте. Вся искушающе, доброе содержите. От всякаго вида зла удаляйтеся.

(л. 386 об.) Яко подобает много имущих пророческий разум в духовных плодех познавати воображение святых и таковыя убо приимати, инако же имущих отвращатися.

Внемлите же от лживых пророк, иже приходят к вам во одеждах овчих, внутрь же суть волцы хищницы, от плод их познаете их. Подобни мне бывайте, братие, и блюдитеся, иже не тако ходящих, яко же имате образ нас.

(л. 387) Яко подобает правящих слово истинное сице восприимати, яко Богу тех в славу свою пославшу Иисусу Христу Богу нашему.

Приемляй²⁴¹ вас, Мене приемлет, слушаяй вас, Мене слушает, но яко ангела Божия приясте Мя, яко Христа Иисуса.

(л. 388) Яко иже не покаряются иже от Господа посланным, но досаждают, не даже до сего стают, но возводят на пославшаго их и суд себе горшии паче содомлян и гоморян содевают.

Иже²⁴² аще не приемлет вас, ниже послушает словес ваших, исходяще из дому или из града того, отрясите прах от ног ваших. Аминь, глаголю вам, отраднее будет земли Содомстей и Гоморстей в день судный, неже граду тому. Отметаяйся²⁴³ вас Мене ся отметает. Отметаяй²⁴⁴ бо ся не человека отмещется, но Бога, давшаго Дух Свой (л. 388 об.) Святый в нас.

(л. 389) Яко подобает учителство заповедей Господних сице приимати, яко живот вечный и Царствие Небесное, и усердно делати тыя, аще и болезнь быти мнится.

Аминь²⁴⁵ , аминь, глаголю вам, яко слушаяй словесе Моего и веруяй пославшему Мя имать живот вечный и на суд не приидет, но прейдет от смерти в живот.

Благовестивше²⁴⁶ же градом онем и научивше доволне, возвратишася в Листру и Иконию и Антиохию, утвержающе душы учеником, утешивше пребывати в вере, яко многими скорбми подобает (л. 389 об.) нам внити в Царствие Небесное.

(л. 390) Яко подобает обличение и запрещение сице приимати, яко лечбу чистителну страстем и здравие содевающу. Отонюду же яве есть, яко иже страстию человекоугодия доволне одержимыи и не обличающе согрешающих, всячески оттщетеваются и в самую истинную жизнь наветуют.

Аще²⁴⁷ согрешит в тя брат твой, шед, обличи его пред тобою и тем единем. И аще тебе послушает, приобрел еси брата твоего.

Сшедшемся²⁴⁸ вам и моему духу с силою Господа нашего Иисуса Христа, (л. 390 об.) предадите таковаго сатане во измождение плоти, да дух спасется в день Господа Иисуса.

Послание²⁴⁹ оно, аще и на время оскорби вас, ныне радуюся, не яко оскорбистеся, но яко оскорбесте в покаяние, оскорбисте бо ся по Бозе, да ни в чем же отщетитеся нас, яже бо по Бозе скорбь покаяние во спасение нераскаянно содевает.

(л. 391) Яко идеже Церковь под мирскую власть снидет, несть Церковь, но дом человеческий и вертеп разбойником.

И²⁵⁰ вниде в церковь Божию, и изгна вся продающыя и купующыя в церкви, и трапезы торжником испроверже и седалища продающих голуби, и глагола им: Писано есть: храм Мой, храм молитвы наречется; вы же сотвористе и вертеп разбойником.

И²⁵¹ приидоша паки во Иерусалим, и вшедше Иисус в церковь, начат изгонити продающия и купующия в церкви и трапезы торжником и седалища продающих голуби испроверже, и не даяше, (л. 392 а) да кто мимо несет сосуд сквозе церковь. И учаше, глаголя им: Несть ли писано, яко храм Мой храм молитвы наречется всем языком; вы же сотвористе его вертеп разбойником.

И²⁵² вшед в церковь и начат изгонити продающия в ней и купующия, глаголя им: Писано есть дом Мой дом молитвы есть; вы же сотвористе его пещеру разбойником.

И²⁵³ взыде во Иерусалим Иисус, и обрете во церкви продающия овцы и волы, и голуби и пеняжники седящия, и сотворив бич от вервий, и вся изгна из церкви, овцы и волы и торжником разсыпа (л. 392а об.) пенязи, и дски опроверже и продающим голуби рече: Возмите сия отсюду и не творите дому Отца Моего дому купленнаго. Помянуша²⁵⁴ же ученицы Его, яко писано есть: Жалость дому Твоего снесть Мя.

Веждь, яко не единою се сотвори от Матфея убо близ страсти се сотворит, ныне же от Иоанна знамения начиная.

Иерусалиме²⁵⁵ , Иерусалиме, избивый пророки и камением побивая посланныя к тебе, колькраты восхоте собрати чада твоя, яко ж кокошь гнездо свое под криле, и не возхотесте. Се оставляется вам дом ваш пуст. Глаголю же вам, (л. 393) яко не имате Мене видети, дóндеже приидет, егда речете: Благословен грядый во имя Господне.

Толкование

Ничто ж бо ино²⁵⁶ тако разделяет от Бога, яко ж грех, яко ж паки и благая совесть и дела сочетают, любоприятие ж показа Господь, кокошино приказание предложи. Тем же убо понеже не хощеши, рече, оставляется храм пуст. От сего убо разумеем, яко нас ради живет во храмех Бог. Егда ли мы отчаемся, тогда и храми оставляются. Глаголет же, яко: не имате Мене видети до втораго пришествия.

Толкование

Толма²⁵⁷ возненавидех лукавство ваше, яко ни Церкви, дому Моему, (л. 393 об.) глаголю быти, но дом ваш, донели ж бо живяше в нем добродетель, дом Мой бе. А понеже осквернисте, и торг и пещеру разбоиником соделасте.