Вослѣдова́нїе мл҃бное къ Гд҃ꙋ на́шемꙋ І҆и҃сꙋ Хрⷭ҇тꙋ, пѣва́емое въ ѡ҆бщенꙋ́ждїи, и҆ злораство́рныхъ вре́менъ, и҆ противле́нїи вѣ́трѡвъ, и҆ въ всѧ́комъ злоключе́нїи люде́й

И҆ере́ю ре́кшꙋ, Блⷭ҇ве́нъ Бг҃ъ на́шъ:

Ли́къ чте́тъ Трⷭ҇то́е, Прⷭ҇та́ѧ Трⷪ҇це: по Ѿч҃е на́шъ:

І҆ере́ѵ꙼:

Ꙗ҆́кѡ твоѐ є҆́стъ ца́рствие: Гд҃и поми́л: в҃і. Прїйде́ти поклони́мсѧ, гⷤ. и҆ ѱал: рм҃в. Гд҃и ᲂу҆слы́ши мл҃твꙋ мою̀:

Сла́ва: И҆ ны́нѣ:

А҆ллилꙋ́іѧ, гⷤ.

Дїа́конъ же гл҃етъ Е҆кте́нїѧ Вели́каѧ:

Ми́ромъ Гд҃ꙋ помол: И҆ про́чаѧ да́же до ѡ҆ плава́ющихъ. И҆ а҆́бїе прилага́етъ ᲃі́ѧ.

Ꙍ҆ є҆́же млⷭ҇тивъ бл҃гоꙋвѣтли́въ, и҆ примири́теленъ бы́ти на́мъ грѣ́шнымъ рабѡ́мъ свои́мъ, въ покаѧ́нїи къ не́мꙋ ны́нѣ прибѣга́ющимъ, Гд҃ꙋ помоли́мсѧ.

Ꙍ҆ є҆́же въ бѣда́хъ и҆ скорбе́хъ и҆ нꙋ́жда́хъ бѣ́днѣ належа́щихъ люде́мъ свои́мъ, ско́рый помо́щникъ, защи́тникъ и҆ ᲂу҆тѣши́тель бы́ти, Гд҃ꙋ помоли́мсѧ.

Ꙍ҆ є҆́же не преда́ти на́съ до конца̀ грѣ́хъ ра́ди на́шихъ, и҆́мени свое́гѡ ра́ди, и҆ не раꙁори́ти завѣ́та свое́гѡ, и҆ не ѿста́вити млⷭ҇ть свою̀ ѿ на́съ, Гд҃ꙋ помоли́мсѧ.

Ꙍ҆ є҆́же при́ꙁрѣ́ти, на смире́нїе, трꙋ́дъ и҆ ѡ҆ꙁлобле́нїе на́ше, и҆ и҆ꙁба́вити на́съ ѿ бѣ́дъ на́шихъ, Гд҃ꙋ помоли́мсѧ.

Ꙍ҆ є҆́же спⷭ҇тѝ ѿ бѣ́дъ дш҃ѧ̀ на́шѧ, и҆ и҆ꙁба́вити на́съ ѿ вра́гъ на́шихъ, Гд҃ꙋ помоли́мсѧ.

Ꙍ҆ є҆́же и҆ꙁба́вити ни́щихъ люді́й свои́хъ ѿ си́лныхъ врагѡ́в наси́лїѧ, и҆ дш҃ѧ̀ ᲂу҆бо́гихъ и҆́мже нѣ́сть помо́щника, Гд҃ꙋ помоли́мсѧ.

Ꙍ҆ є҆́же помѧнꙋ́ти со́нмъ сво́й є҆гоже стѧжа̀ испе́рва, и҆ и҆ꙁба́вити же́ꙁлъ достоѧ́нїѧ свое́гѡ ѿ всѣ́хъ вра́жїихъ навѣ́тѡвъ, Гд҃ꙋ помоли́мсѧ.

Ꙍ҆ є҆́же въско́рѣ и҆ꙁба́вити на́съ ѿ бѣ́дъ на́шихъ, и҆ ненавидѧ́щих на́съ посрами́ти, Гд҃ꙋ помоли́мсѧ.

Застꙋпѝ, спасѝ, поми́лꙋй. Прест҃ꙋю чⷭ҇тꙋю пребл҃гословен:

І҆ере́ѵ꙼ воꙁглаша́етъ:

Ꙗ҆́ко подоба́етъ ти:

По се́мъ, Бг҃ъ Гд҃ь и҆ ꙗ҆ви́сѧ на́мъ:

И҆ Троп: сі́ѧ, Гла́съ, ѕ҃. Поми́лꙋй на́съ Гд҃и:

Сла́ва:

Гд҃и поми́лꙋй на́съ:

И҆ ны́нѣ:

Млⷭ҇рдїѧ двер:

Та́жъ ѱал: н҃. Пом҃лꙋй мѧ:

Канѡнъ Моле́бенъ къ Гд҃ꙋ нш҃мꙋ Іи҃сꙋ Хꙋ҃.

Е҆го́же Краегране́сїе сі́е: Ѻ҆́бщыѧ молбы̀ твои́хъ ра́бъ Хє҃ прїймѝ.

Въ Бг҃оро́дичнах же, Кѵ́ръ Філоѳе́ѡво. Пѣ́снь а҃. Гла́съ, ѕ҃. И҆рмо́съ.

Ꙗ҆́кѡ посꙋ́хꙋ ходи́въ І҆и҃ль, по бе́ꙁднѣ стопа́ми, гони́телѧ:

Ѻ҆́бщее поло́жимъ рыда́нїе ны́нѣ бра́тїе, во́ꙁрастъ же всѧ́кїй и҆ чи́нъ, и҆ рѡ́дъ и҆ пле́мена: и҆ го́рцѣ воꙁдхнѣ́мъ вкꙋ́пѣ, и҆ всѣ́хъ тво́рца млⷭ҇ти́ва сотво́римъ.

Млⷭ҇рдїѧ ра́ди млⷭ҇ти приведы́й ѿ несꙋ́щихъ Влады́ко, є҆́стⷭ҇тво дре́вле члчⷭ҇кое, и҆ꙁбавлѧ́ѧ спа́слъ є҆сѝ: ѿ и҆стлѣ́нїѧ бѣдствꙋ́ющихъ: и҆ ны́нѣ на́съ пом҃лꙋй.

Сщ҃еннодѣйствꙋ́еши свою̀ Кро́вь, ᲃло́во Бж҃і́е, и҆ ᲂу҆мира́еши ꙗ҆́кѡ чловѣ́къ, Бг҃ъ сы́й за на́съ: но мы твою̀ благода́ть стра́шнꙋю ѡ҆ставлѧ́юще: злѣ̀ ни́нѣ ѿве́ржени бы́хѡмъ.

За́кѡны твоѧ̀ ѿмещꙋще и҆ ᲂу҆ста́вы, беꙁстꙋ́днѣ є҆́стⷭ҇твꙋ досажда́юще Хє҃, пра́ведныѧ стра́ждемъ ра́ны, ᲂуста́вы є҆стⷭ҇твеннагѡ и҆ꙁстꙋпи́вше чи́на.

Бг҃оро́диченъ:

Гроꙁы̀ и҆ колѣба́нїѧ и҆ ᲃтꙋ́да всѧ̀ и҆спо́лнена сꙋ́ть, пра́ведный ни́нѣ видѧ́ще влады́чнїй гнѣ́въ: но сегѡ̀ млⷭ҇тива на́мъ, ꙗ҆́кѡ ᲃн҃а свое́гѡ и҆ Бг҃а съ дѣла́й Влады́чице.

Катава́сїѧ:

Сп҃си ѿ бѣ́дъ рабы̀ своѧ̀ млⷭ҇тиве, ꙗ҆́кѡ мы ᲂу҆се́рднѡ къ тебѣ̀ прибѣга́емъ, къ млⷭ҇тивомꙋ и҆ꙁбави́телю, всѣ́хъ Влады́цѣ Гд҃ꙋ І҆и҃сꙋ.

Сі́ѧ Катава́сїѧ поетсѧ по кое́йждо Пѣ́сни.

Пѣ́снь, г҃ И҆рмо́съ.

Нѣ́сть ᲃт҃а ꙗ҆́коже ты:

А҆да́м пе́рвыѧ за́повѣди преслꙋша́въ, Ра́ѧ и҆ꙁгна́нъ бы́сть и҆ жи́ꙁни и҆ Бг҃а: мы́ же всѧ́кѡ въкꙋ́пѣ ѿстꙋ́пл̾ше, ны́нѣ ᲂу҆мерщвлѧ́емсѧ.

Ѻ҆́браꙁъ пре́жде ꙗ҆ви́сѧ лꙋка́вый Ка́инъ, ѿ за́висти злы́ѧ бра́та ᲂу҆би́въ: є҆мꙋ́же ревнꙋ́юще ны́нѣ мы, стена́ти и҆ трѧсти́сѧ лю́тѣ, ꙗ҆́коже и҆ ѡ҆́нъ всѝ ѡ҆сꙋди́хѡмсѧ.

Лю́тѣ тва́рь на на́съ ᲃверѣ́питсѧ, и҆ ꙗ҆ри́тъ чре́ꙁъ є҆стество̀, движꙋ́щи ᲂу҆стремле́нїѧ є҆стестве́ннаѧ, Влады́чнїй гнѣ́въ пра́ведный, всѣ́мъ воꙁвѣща́ющи.

Сокры́сѧ Влады́ко Хє҃ ᲃл҃чнаѧ свѣ́тлость, и҆ ᲂу҆держа́сѧ тече́нїе ѡ҆бы́чных дѡ́ждевъ: сꙋ́ша и҆ тма̀ съде́ржитъ, ты́ бо сла́вы ѿврати́лсѧ є҆сѝ ᲃо́лнце.

Бг҃оро́диченъ:

Крѣ́пости нѣ́ст̾ въ на́съ, дерꙁнове́нїѧ же всѧ́кагѡ ѡ҆бнажи́хомсѧ всѝ, дѣ́лъ ра́ди стꙋ́дныхъ: ты́ же ꙗ҆́кѡ Мт҃и чⷭ҇таѧ ᲂу҆мирѝ Влады́кꙋ всѣ́хъ.

Катавасїѧ:

Сп҃сѝ ѿ бѣ́дъ рабы̀ своѧ̀ млⷭ҇тиве:

Та́жъ Дїа́конъ Е҆кте́нїѧ сі́ѧ.

Помл҃ꙋй на́съ Бж҃е по вели́цѣй млⷭ҇ти твое́й, мл҃и́мтисѧ ᲂу҆слыш:

Тебѣ̀ є҆ди́номꙋ съгрѣши́хѡмъ Бж҃е ᲃп҃си́телю на́шъ, и҆ вѧ́щшихъ по грѣхѡ́мъ на́шимъ ка́ꙁнїй въспрїѧ́ти досто́йни є҆смы̀: но на твоѐ бл҃госе́рдїе вꙁира́юще въ покаѧ́нїи съ ᲂу҆миле́нїемъ, къ тебѣ̀ ᲃп҃си́телю на́шемꙋ прибѣга́емъ, и҆ съ слеꙁа́ми въпїемъ, и҆ꙁба́ви на́съ ѿ бѣ́дъ скорбїй же и҆ ѡ҆ꙁлобле́нїй на́шихъ, мл҃имтисѧ ᲂу҆слы́ши и помл҃ꙋй.

Не внидѝ въ сꙋ́дъ съ рабы̀ твои́ми Гд҃и, и҆ не ѿста́ви млⷭ҇ть твою̀ ѿ на́съ, занѐ ᲂу҆мали́хѡмсѧ па́че всѣ́хъ ꙗ҆ꙁы́къ, и҆ є҆смы̀ смире́нни дне́сь грѣ́хъ ра́ди на́шихъ: но и҆ꙁмѝ на́съ и҆ꙁ рꙋкѝ вра́гъ на́шихъ, и҆ всѣ́хъ ѡ҆бидѧ́щих на́съ, мл҃имтисѧ ᲂу҆слы́ши и҆ пом:

Ви́ждъ смире́нїе на́ше и҆ трꙋ́дъ на́шъ Гд҃и, и҆ ѿпꙋстѝ всѧ̀ грѣхѝ на́шѧ, ꙗ҆́кѡ ᲂу҆множи́шасѧ, и҆ ненавидѣ́нїемъ непра́веднымъ воꙁненавидѣ́ша на́съ, и҆ съхранѝ дш҃ꙋ на́шꙋ и҆ и҆ꙁба́ви ю҆̀, мл҃и́мтисѧ ᲂу҆слы́ши и҆ пом҃лꙋй.

При́ꙁри съ высоты̀ ᲃт҃а́гѡ жи́лища твое́гѡ Гд҃и Бж҃е на́шъ, и҆ ꙗ҆́кѡ бл҃гъ и҆ чл҃кѡлю́бецъ: ви́ждъ ско́рбъ, ѡ҆ꙁлобле́нїе и҆ печа́л̾ люді́й твои́хъ, и҆ воꙁдвигнѝ си́лꙋ твою̀, и҆ воско́рѣ прїйдѝ и҆ ᲃп҃сѝ на́съ, да некогда̀ воꙁра́дꙋетсѧ вра́гъ ѡ҆ поги́бели нш҃ей, и҆ да рекꙋ́тъ ꙗ҆ꙁы́ци, где є҆́стъ Бг҃ъ и҆́хъ; мл҃и́мсѧ ᲂу҆слы́ши и҆ пом҃лꙋй.

Не ѡ҆ста́ви Гд҃и ста́до ᲃт҃о́е своѐ, па́че си́лы въ и҆скꙋше́нїѧхъ, ско́рбехъ же, и҆ бѣда́хъ, и҆ не стерпи́мыхъ гоне́нїѧхъ, грѣ́хъ ра́ди на́шихъ валѧ́тисѧ: но воско́рѣ примири́сѧ на́мъ и҆ ѡ҆блегчѝ ѡ҆ꙁлобле́нїе на́ше, мо́лимтисѧ Бж҃е на́шъ, ᲂу҆слы́ши и҆ пом҃лꙋй.

Внегда̀ и҆счеꙁа́ти крѣ́пости на́шей, не ѡ҆ста́ви на́съ Гд҃и Бж҃е на́шъ, и҆ не ѿста́ви млⷭ҇ть твою̀ ѿ на́съ, да не рекꙋ́тъ вра́ꙁи на́ши, Бг҃ъ ѡ҆ста́вилъ є҆́стъ и҆́хъ, поженѣ́те и҆ и҆мѣ́те и҆́хъ, ꙗ҆́кѡ нѣ́сть и҆ꙁбавлѧ́ѧй, не ᲂу҆дали́сѧ ѿ на́съ, и҆ въ по́мощъ на́шꙋ вон̾мѝ, да постыдѧ́тсѧ и҆ и҆ще́ꙁнꙋтъ, и҆ ѡ҆блекꙋ́тсѧ въ стꙋ́дъ и҆ срамотꙋ̀ и҆́щꙋщїи зла́ѧ рабѡ́мъ твои́мъ, мл҃и́мтисѧ ᲂу҆слы́ши и҆ пом҃лꙋй.

Гд҃и Бж҃е на́шъ, є҆мꙋ́же подо́бенъ никто́же, въ печа́ли и҆ ско́рби на́шей къ тебѣ̀ въ покаѧ́нїи съ слеꙁа́ми въпїемъ, ᲂу҆скори҃ и҆ и҆ꙁба́ви на́съ ни́щихъ, и҆ꙁъ рꙋкѝ крѣплѣ́йшихъ на́съ, и҆ ни́щихъ и҆ ᲂу҆бо́гихъ, ѿ расхища́ющихъ на́съ, ᲃла́вы ра́ди и҆́мени твое́гѡ, мл҃и́мтисѧ ᲂу҆слы́ши и҆ пом҃лꙋй.

Сщ҃енникъ Воꙁглаша́етъ.

Ꙋ҆слы́ши ны Бж҃е ᲃп҃си́телю на́шъ:

Ли́къ:

А҆ми́нь.

Сѣда́ленъ, Гла́съ, є҃.

Къ тебѣ̀ ᲃп҃се на́шъ І҆и҃се превѣ́чный Бж҃е, прибѣга́емъ грѣ́шнїи рабѝ твоѝ, и҆ съ слеꙁа́ми въ покаѧ́нїи припа́да́юще, въпїемъ: пощадѝ, пощадѝ ще́дре лю́ди беꙁъѿвѣ́тныѧ: и҆ не ꙗ҆́ростїю твое́ю ѡ҆бличѝ, ни́же гнѣ́вомъ твои́мъ покажѝ на́съ грѣ́хъ ра́ди на́шихъ: но млⷭ҇тїю посѣтѝ, и҆ и҆ꙁба́ви на́съ ѿ належа́щихъ на́мъ бѣ́дъ и҆ ско́рбїй, подава́ѧ на́мъ ми́рное вре́мѧ покаѧ́нїѧ, мл҃тва́ми Бц҃а и҆ всѣ́хъ ᲃт҃ы́хъ, ꙗ҆́кѡ є҆ди́нъ млⷭ҇рдъ.

Пѣ́снь, д҃ И҆рмо́съ.

Хᲃ҃ мнѣ си́ла, Бг҃ъ:

Дне́сь Влады́ко дн҃ь гнѣ́ва и҆ ско́рби, и҆ нѣ́сть ᲃе́й дн҃ь ни́же но́щъ, и҆́же ны́нѣ всѣ́хъ пости́же Пррⷪ҇чески: и҆ нѣ́сть и҆ꙁбавлѧю́щагѡ.

Содомитѧ́нѡмъ дре́вле злѣ̀ ѿверꙁѐ, во́пль ᲂу҆мнѡ́жшїйсѧ нб҃о: сі́еже заключа́етъ грѣхѡ́въ мнѡ́жество, ны́нѣ на́мъ пра́веднѣ Влады́ко.

Ꙋ҆гасѐ ᲃо́лнце: ѻ҆́блаци Влады́ко чре́ꙁъ є҆́стество ᲂу҆держа́шѧ до́ждъ: землѧ́ же стенѧ́щи гро́ꙁитсѧ, наготы̀ свое́ѧ ꙗ҆́ꙁвꙋ предвидѧ́щи.

Ви́дѣвъ чл҃кѡлю́бче, ви́ждъ ѡ҆ꙁлобле́нїе люді́й твои́хъ, и҆ вон̾ми воꙁдыха́нїю, ма́нїемъ же послѝ бл҃гопотребнаѧ, и҆ дыха́нїемъ проти́внымъ запрѣтѝ.

Бг҃оро́диченъ:

Не поꙁна́вши бо́лѣꙁни, пре́жде бо́лѣꙁнїй роди́ла є҆сѝ всѣ́хъ Влады́кꙋ: тѣ́мъ же бо́лѣꙁни ны́нѣ раꙁдрѣшѝ люді́й твои́хъ, ᲂу҆толи́вши бꙋ́рю.

Пѣ́снь, є҃ И҆рмо́съ.

Бжⷭ҇тве́ннымъ свѣ́томъ ти бл҃же:

Стѣснѧ́еми є҆смы ѿ всю́дꙋ, Дв҃дъ ви́дѣвъ грѧдꙋ́щїй гнѣ́въ Бж҃ій воꙁопи́лъ є҆́стъ: мы́ же что̀ содѣ́емъ стра́стнїи, сегѡ̀ видѧ́ще и҆ не ка́ющесѧ.

Рꙋкѝ ꙗ҆́коже спа́слъ є҆сѝ Фараꙍ́новы дре́вле лю́ди своѧ̀ бл҃же, расто́ргъ вънеꙁаа́пꙋ пꙋчинꙋ̀: и҆ на́съ ва́рварскїѧ рꙋкѝ и҆схитѝ, и҆ бꙋ́рю ᲃопрѧта́въ вѣ́тры ᲂу҆кротѝ.

Рече́нїе нꙋ́ждъ, и҆ лю́таѧ воста́нїѧ во́лнъ, и҆ дыха́нїѧ проти́внаѧ ᲂу҆ста́ви, и҆ въ бл҃гораство́рнаѧ да ста́нꙋтъ твои́мъ повелѣ́нїемъ: и҆ ᲃѣ́чъ да преста́нетъ всѧ́каѧ чл҃кѡлю́бче.

Ти́ны и҆ смра́да сла́стїй, и҆ всѧ́ческихъ съгрѣше́нїй на́съ покры̀ волна̀: ᲃегѡ̀ ра́ди ды́шꙋтъ Бжⷭ҇тве́ннагѡ гнѣ́ва во́лны, и҆ всѣ́мъ ны́нѣ досажда́ютъ.

Бг҃оро́диченъ:

Ꙗ҆́коже дре́вле Влады́чце, ты и҆ꙁба́вила є҆сѝ см҃рти и҆ тлѧ̀ ва́рварскїѧ, нꙋ́жда же и҆ ско́рби: и҆ ны́нѣ сі́ѧ раꙁдрѣшѝ мл҃и́мсѧ: лю́дїе бо твоѝ и҆ жре́бїи и҆ꙁрѧ́дныи є҆смы̀.

Пѣ́снь, ѕ҃ И҆рмо́съ.

Жите́йскагѡ мо́рѧ:

Пло́ти пре́жде работа́вшїи, преда́нѣ бы́шѧ стꙋ́днѣ, пото́пꙋ беꙁꙋ́мнїи: и҆́хже подража́юще ны́нѣ, злѣ пло́тсти бы́вше, и҆стлѣ́нїемъ ѡ҆́нѣмъ подо́бнѣ стра́ждемъ.

Сте́зѧ ᲂу҆клоншесѧ пра́выѧ, ᲃтропо́тною потеко́хѡмъ, ѿстꙋ́пл̾ше твои́хъ за́повѣдїй: тѣ́мже и҆ ро́въ и҆скꙋше́нїй, многоплете́нныхъ впада́емъ.

При́ꙁри съвы́шше ꙗ҆́кѡ ще́дръ Бж҃е: воꙁдыха́нїѧ ᲂу҆слы́ши, и҆ слеꙁа́мъ во́нми твои́хъ люді́й: и҆ младе́нецъ пою́щихъ ти гла́съ не пре́ꙁри, многѡмлⷭ҇тиве.

Ѿ ᲂу҆стъ пре́жде Влады́ко младе́нецъ, пресла́внѡ хва́лꙋ съверши́лъ є҆сѝ: и҆ си́мъ ны́нѣ во́н̾ми: и҆ прїймѝ мл҃енїе, хва́ламъ ᲃи́мъ воꙁме́ꙁдїе подава́ѧ.

Бг҃оро́диченъ:

Бг҃ꙋ Мт҃и Влады́чце бы́вши, держи́ши всю̀ тва́рь свѣ́тлѡ, и҆ꙁрѧ́днѣе же на́съ рабѡ́въ твои́хъ: тѣ́мже предвари́вши и҆ꙁба́ви, гла́да и҆ ва́рваръ твоѐ ста́до.

Посе́мъ Е҆кте́нїѧ ма́лаѧ. И҆ по воꙁгласѣ, Конда́къ Гла́съ, д҃.

Ско́рѡ предварѝ да́же не поработи́мсѧ, вра́ꙁи бо хꙋ́лѧтъ тѧ и҆ прѣтѧ́тъ на́мъ Хє҃ Бж҃е: но пораꙁѝ Крⷭ҇то́мъ свои́мъ борꙋ́щихъ на́съ, да ᲂу҆раꙁꙋмѣ́ютъ коли́кѡ мо́жетъ правосла́вных Вѣ́ра: и҆ и҆ꙁба́ви на́съ ѿ бѣ́дъ на́шихъ. Мл҃твами Бц҃а є҆ди́не чл҃кѡлю́бче.

Посе́м Сте́пенна, в҃-гѡ Гла́са, А҆нтіфѡ́нъ, в҃

Воꙁва́хъ ти Гд҃и те́плѣ, и҆́ꙁ глꙋбины дш҃а̀ мое́ѧ, и҆ мнѣ̀ бꙋдѣ́та на послꙋша́нїе Бжⷭ҇тве́ннїи твоѝ ᲂу҆ши.

На Гд҃а наде́ждꙋ всѧ́къ стѧжа́вый: вы́шшїй є҆́стъ всѣ́хъ скорбѧ́щихъ.

Ст҃ы́мъ Дх҃омъ, то́чатсѧ бл҃года́тныѧ вѡ́ды, напаѧ́ющїѧ всѧ́кꙋю тва́ръ къ ѡ҆живле́нїю.

Та́же Проки́менъ Гла́съ, д҃.

Да́ждъ на́мъ по́мощь ѿ печа́ли, и҆ сꙋ́етнѡ ᲃпⷭ҇нїе члчⷭ҇кое.

Посе́м:

Всѧ́кое дыха́нїе да хва́литъ Гд҃а.

Сті́хъ:

Хвали́те Бг҃а въ ᲃт҃ы́хъ є҆гѡ̀.

Еѵⷢ҇лїе ѿ Мат: зача́ло, н҃а.

Ꙍ҆ Бѕ҃ѣ сътво́римъ си́лꙋ, и҆ то́й ᲂу҆ничижи́тъ ᲃтꙋжа́ющїѧ на́мъ.

Нача́ло є҆гѡ̀ сі́е. Речѐ Гд҃ь свои́мъ Ꙋ҆ч҃никѡмъ, и҆мѣ́йте ве́рꙋ Бж҃ію.

Коне́цъ же се́й. Вѣ́рꙋйте ꙗ҆́кѡ прїемлете и҆ бꙋ́детъ ва́мъ.

Ѿпѣ́вше же, Сла́ва тебѣ̀ Гд҃и. Пою́тъ Сла́ва Гла́съ, д҃.

Ѿч҃е, ᲃло́ве, и҆ Дш҃е:

И҆ ны́нѣ:

Мл҃твъ ра́ди Прⷭ҇ты́ѧ Бц҃а: Пом҃лꙋй на́съ Бж҃е: И҆ а҆́бїе ᲃтіхи́рꙋ сі́ю Гла́съ, ѕ҃.

Под: Все воꙁлож:

Не ѡ҆ста́ви на́съ въ члчⷭ҇кое застꙋпле́нїе, пребеꙁнача́лнаѧ Трⷪ҇це: но прїймѝ ꙗ҆́кѡ Влады́ка мл҃енїе рабѡ́въ свои́хъ: ско́рби бо и҆ бѣ́ды ѡ҆бде́ржатъ ны, терпѣ́ти не мо́жемъ ѿ бѣсо́всагѡ стрѣлѧ́нїѧ, и҆ вра́жїѧгѡ ѡ҆бстоѧ́нїѧ: покро́ва не стѧжа́хѡмъ, нигде́же прибѣ́гнꙋти стра́стнїи всегда̀ побѣжда́еми, ᲂу҆тѣше́нїѧ не и҆ма́мы, ни́же по́мощи, ра́ꙁвѣ тебѐ тво́рче мі́ра: ᲂу҆пова́нїе и҆ ᲃпⷭ҇нїе вѣ́рнымъ: не пре́ꙁри мл҃енїѧ на́ша, но ᲃъверше́нна сътворѝ.

І҆ере́ѵ꙼ же и҆лѝ Дїа́конъ гл҃етъ Е҆кте́нїю:

Сп҃сѝ Бж҃е лю́ди своѧ̀: Всю̀ до конца.

Ли́къ же поє́тъ:

Гд҃и поми́лꙋй є҃і.

І҆ере́ѵ꙼ же воꙁглаша́етъ:

Млⷭ҇тїю и҆ щедрота́ми и҆ чл҃кѡлю́б:

Пѣ́снь, з҃ И҆рмо́съ.

Росода́вицꙋ ᲂу҆́бѡ пе́щъ сотворѝ:

Ꙗ҆́коже вдови́ци гла́дъ раꙁдрѣшилъ є҆сѝ, посла́въ И҆лїю Влады́ко Пррⷪ҇ка твое́гѡ: та́кѡ раꙁдрѣшѝ сло́вомъ и҆ на́шꙋ бѣдꙋ̀ и҆ гла́дъ ꙗ҆́кѡ бл҃а́гъ, пита́ѧ ѡ҆бы́чнѡ твоѧ̀ лю́ди: ѿческїй Бж҃е блⷭ҇ве́нъ є҆сѝ.

Ꙋ҆мерщвле́на ᲃн҃а Сафе́фѳина пре́жде, воꙁдви́глъ є҆́стъ Пррⷪ҇къ тво́й, до́ждъ пода́въ пали́мой Влады́ко землѝ: тѣ́мже мл҃тва́ми тогѡ̀, и҆ ны́нѣ пода́ждъ на́мъ полеꙁнаѧ и҆ землѝ плодоно́сїе. Мнѡ́жествомъ блгⷭ҇ти долготерпе́ливе, всѣ́хъ согрѣше́нїѧ пре́ꙁрѣвъ, ны́нѣ тво́й гра́дъ препита́й и҆ лю́ди: и҆ мл҃тва́ми Прчⷭ҇тыѧ ти Мт҃ре, ѡ҆держа́щаѧ на́съ злолю́таѧ раꙁдрѣшѝ вско́рѣ.

Ли́ци тѧ А҆гглⷭ҇тїи мо́лѧтъ чл҃кѡлю́бче, и҆ꙁба́ви лю́ди и҆ гра́дъ тво́й ско́рби: и҆ ва́рварское мнѡ́жество лю́тое ниꙁложѝ, и҆ крѣ́пость на ни́хъ вѣ́рнымъ царе́мъ на́шимъ дарꙋ́й.

Бг҃оро́диченъ:

Въ бѣда́х ꙗ҆ви́сѧ мо́лимсѧ, и҆ꙁбави́телница, въкꙋ́пѣ и҆ побо́рница чтꙋ́щимъ тѧ̀: на́пастїй и҆ ско́рбїй злы́хъ, и҆ сѣ́ча беꙁбо́жнагѡ нечести́выхъ и҆ꙁима́ющи, держа́вною ти рꙋко́ю Влады́чице.

Пѣ́снь, и҃ И҆рмо́съ.

И҆ꙁъ пла́мени ᲃт҃ы́мъ ро́сꙋ:

Гордели́вый нра́въ ны́нѣ ᲃмирѣ́мъ: хище́нїѧ же и҆ ле́сти всѝ ѿбѣжи́мъ: клѧ́твꙋ ѿ дш҃а̀ съ лже́ю ѿложи́мъ, и҆ воꙁненави́димъ: ꙗ҆́кѡ да Влады́кꙋ млⷭ҇тива ѻ҆брѧ́щемъ всѝ.

Слове́сни бы́вше, беꙁслове́сны ꙗ҆ви́хѡмсѧ, ѻ҆́браꙁъ Бжⷭ҇тве́нный, и҆ достоѧ́нїе, дѣ́лы стꙋ́дными нелѣ́потнѡ ѡ҆беꙁчести́вше: но ты спасѝ на́съ ꙗ҆́кѡ ще́дръ мл҃тва́ми ᲃт҃ы́хъ твои́хъ.

Ꙗ҆́коже блꙋ́дницꙋ Хє҃ мо́й пре́жде, и҆ бл҃гоꙋ́днагѡ: ꙗ҆́коже раꙁбо́йника и҆ мытарѧ̀ мнѡ́гїѧ спа́слъ є҆сѝ: ꙗ҆́коже Мана́сїю помоли́вшасѧ спасѐ, и҆ всѣ́хъ на́съ спасѝ, мл҃тва́ми ᲃт҃ы́хъ твои́хъ.

Младенствꙋ́ющїи ꙗ҆ꙁы́ци, ю҆́нїи и҆ ᲃта́рци, И҆́нѡци и҆ Мїрѧ́не, всѝ моли́мсѧ, раꙁдрѣшѝ гнѣ́въ, и҆ вѣ́трѡмъ запрѣтѝ, зе́млю ᲂу҆гобꙁѝ, и҆ и҆ꙁба́вꙋ ѿ всѣ́хъ бѣ́дъ люде́мъ твои́мъ пода́ждъ.

Бг҃оро́диченъ:

Дш҃ею и҆ тѣ́ломъ ᲂу҆ѧꙁвле́ни всѝ, дѣ́лъ ра́ди стꙋ́дныхъ, ꙗ҆́ꙁвами съвы́шше, притецѣ́мъ въ кꙋ́пѣ, и́ Влады́чици припадѣ́мъ: ꙗ҆́кѡ да премѣни́тъ на́мъ всѣ́хъ зижди́телѧ.

Пѣ́снь, ѳ҃ И҆рмо́съ.

Чтⷭ҇нѣ́йшꙋю херꙋвімъ, и҆ сла́в:

Прїйми мѡ́л̾бы ꙗ҆́кѡ бл҃га́ѧ къ тебѣ̀ прибѣга́ющихъ, и҆ ходота́ица на́мъ бꙋ́ди: преста́ни Гпⷭ҇же, и҆ бо́лѣꙁни раꙁдрѣшѝ: ꙗ҆́кѡ Мт҃и бо мо́жеши всѧ̀ Влады́чице.

Влады́чица:

Бл҃гоꙋтро́бне ᲃн҃ꙋ мо́й, си́хъ рꙋка́ма воꙁдви́глъ є҆сѝ ᲂу҆ме́ршихъ, и҆ препиталъ є҆сѝ свое́ю пло́тїю: Мт҃рь мѧ̀ си́мъ пресла́внѡ содѣла́л є҆сѝ въ пра́вдꙋ: тѣ́мъ же прїймѝ ᲃло́ве Бж҃ій моѐ моле́нїе.

Влады́ка.

До́лгъ ко́й Мт҃и и҆ ны́нѣ про́сиши; млⷭ҇ть кото́рымъ спѣши́ши ѿ менѐ; не досто́йни сꙋ́тъ сі́и чл҃кѡлю́бїѧ всѧ́кагѡ: Бжⷭ҇твенномꙋ бо съро́дствꙋ солга́ша.

Влады́чца.

Вѣ́мъ сі́е Влады́ко и҆ ᲃн҃е: но раска́ѧшасѧ ны́нѣ припада́ютъ, ꙗ҆́коже ви́диши: пла́чꙋтъ и҆ рыда́ютъ: растерꙁа́ющесѧ всѝ: тѣ́мъ не те́рпитъ ми ᲂу҆тро́ба, зрѣ́ти си́хъ ꙗ҆ꙁвы.

Влады́ка.

Послꙋша́ю тѧ Мт҃и: и҆ ра́ны ᲂу҆́бѡ да почива́ютъ ны́нѣ: припада́ютъ же злѣ̀, а҆́ꙁъ же тебѐ ра́ди, и҆ сі́ю чл҃кѡлю́бнѣ бл҃года́ть, ны́нѣ ѡ҆бы́чнѡ ꙗ҆́кѡ Мт҃ри дарꙋ́ю.

Влады́чца.

Па́че ᲃло́ва ᲃло́ве всѧ̀ твоѧ̀: воплоще́нїе, ᲃтрⷭ҇т̾, ᲃм҃рть, и҆ Воскрⷭ҇нїе стра́шное, бога́тство вели́кое ѻ҆́бщагѡ покаѧ́нїѧ: и҆́хже ра́ди покланѧ́емсѧ ᲃн҃ꙋ сла́вѣ твое́й.

По се́мъ, Досто́йнѡ є҆́стъ:

Та́же Трⷭ҇то́е: Прⷭ҇та́ѧ Трⷪ҇це: по Ѻ҆ч҃е на́шъ: Троп:

Поми́лꙋй на́съ Гд҃и поми́лꙋй:

Сла́ва:

Гд҃и поми́лꙋй на́съ:

И҆ ны́нѣ:

Млⷭ҇рдїѧ две́ри:

По си́хъ Е҆кте́нїѧ сі́ѧ.

Пом҃лꙋй на́съ Бж҃е по вели́цѣй ми́лости твое́й, моли́мти:

Ли́къ:

Гд҃и поми́лꙋй, гⷤ.

Дїа́конъ:

Е҆щѐ моли́мсѧ Гд҃ꙋ Бг҃ꙋ на́шемꙋ, ѡ҆ є҆́же сохрани́тисѧ гра́дꙋ семꙋ̀, (и҆лѝ ᲃт҃ѣ́й ѡ҆би́тели ᲃе́й,) и҆ всѧ́комꙋ гра́дꙋ Ве́си и҆ ᲃтра́нѣ, ѿ гла́да, гꙋби́тел̾ства, трꙋ́са, пото́па, ѻ҆гнѧ и҆ меча̀, наше́ствїѧ и҆нопле́менникъ, и҆ междосо́бныѧ бра́ни, и҆ всѧ́коѧ смертоно́сныѧ ра́ны: и҆ ѡ҆ є҆́же млⷭ҇тивꙋ и҆ бл҃гоꙋвѣтли́вꙋ бы́ти, бл҃гомꙋ и҆ чл҃кѡлюбивомꙋ Бг҃ꙋ ѡ҆ грѣсѣ́хъ на́шихъ, и҆ ѿврати́ти ве́сь гнѣ́въ сво́й пра́ведный движа́щїйсѧ на́ны: и҆ ѡ҆ є҆́же ᲂу҆мнѡжи́ти плѡ́ды зе́мныѧ блгⷭ҇тїю си, рцѣ́мъ всѝ, Гд҃и ᲂу҆слы́ши и҆ пом҃лꙋй.

Ли́къ:

Гд҃и поми́лꙋй, р҃.

І҆ере́ѵ꙼ же воꙁглаш:

Ꙋ҆слы́ши ны ᲃп҃и́телю на́шъ:

Ли́къ:

А҆ми́нь.

По се́мъ, ре́кшꙋ Дїа́конꙋ:

Съ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.

І҆ере́ѵ꙼ чте́тъ Мл҃твꙋ по временѝ и҆ потре́бѣ, є҆динꙋ̀ ѿ ни́жей поло́женыхъ.

Влады́ко Гд҃и Бж҃е нш҃ъ, высо́кїй и сла́вный чл҃кѡлю́бче: воꙁдаѧ́й комꙋ́ждѡ проти́вꙋ трꙋ́дѡ́мъ чⷭ҇ть и҆ ᲃла́вꙋ, прича́стники на́съ творѧ̀ свое́гѡ црⷭ҇твїѧ.

Помѧнѝ Влады́ко бл҃гїй рабѡ́въ свои́х молѧ́щихсѧ тебѣ̀, и҆ прїймѝ мо́л̾бꙋ на́шꙋ, ꙗ҆́кѡ имѧ̀ тебѣ̀ чл҃кѡлю́бец Гдⷭ҇ь: а҆́ще и҆ до́брыхъ дѣ́лъ неи́мамы, но мнѡ́гагѡ ра́ди млⷭ҇рдїѧ твое́гѡ спасѝ на́съ чл҃кѡлю́бче Гд҃и: ꙗ҆́кѡ ты є҆сѝ Бг҃ъ на́шъ, и҆ мы̀ лю́дїе твоѝ, и҆ ѻ҆́вцѧ па́жити твое́ѧ, и҆ ста́до є҆́же въ нача́лѣ є҆гда̀ воплоти́всѧ соста́вилъ є҆сѝ.

И҆сторгі́й на́съ ѿ и҆дѡлослꙋже́нїѧ, Па́стырꙋ до́брый, положи́вый дш҃ꙋ ᲃвою̀ за ѻ҆́вцѧ своѧ̀, не ѡ҆ста́ви на́съ, а҆́ще и҆ є҆щѐ блꙋ́димъ до ве́чера, а҆́ще и҆ согрѣша́емъ тебѣ̀ ꙗ҆́кѡ новокꙋ́пленїи рабѝ, не во все́мъ ᲂу҆го́дни сꙋ́щїи господи́нꙋ свое́мꙋ, не гнꙋша́йсѧ на́ми: а҆́ще и҆ ма́ло ста́до є҆смы̀, не ѿверꙁѝ на́съ, но рцѝ на́мъ: Не бо́йсѧ мало́е моѐ ста́до, ꙗ҆́кѡ и҆ꙁволѝ Ѻ҆ц҃ъ ва́шъ нбⷭ҇ный да́ти ва́мъ црⷭ҇тво. Ѽ млⷭ҇тивый Гд҃и, бл҃гі́й чл҃кѡлю́бче, бога́тый млⷭ҇тїю и҆ щедрѡта́ми, ѻ҆бѣща́вый прїйма́ти ка́ющихсѧ къ тебѣ̀, и҆ ѡ҆жида́ѧй ѻ҆браще́нїѧ грѣ́шныхъ, не помѧнѝ мнѡ́гихъ на́шихъ грѣхѡ́въ: но прїймѝ ѻ҆браща́ющихсѧ къ тебѣ̀, и҆ загладѝ рꙋкописа́нїе со́блаꙁнъ на́шихъ: ᲂу҆кротѝ гнѣ́въ и҆́мже мы раꙁгнѣва́хомъ тебѐ чл҃кѡлю́бче: ты́ бо є҆сѝ Гдⷭ҇ь и҆ Влады́ка, и҆ тво́рецъ всѣ́хъ, и҆ въ тебѣ̀ є҆́стъ вла́стъ и҆лѝ жи́ти на́мъ, и҆лѝ ᲂу҆мрѣ́ти: ᲂу҆кротѝ гнѣ́въ сво́й млⷭ҇тве, є҆го́же досто́йни є҆смы̀ по дѣ́лѡ́мъ на́шимъ: ми́мо ведѝ и҆скꙋше́нїе, ꙗ҆́кѡ пе́рсть и҆ пра́хъ є҆смы̀ пре́дъ тобо́ю Гд҃и: не вни́ди въ сꙋ́дъ съ рабы̀ твои́ми: мы́ бо є҆смы̀ лю́дїе твоѝ. Тебѐ и҆́щемъ, и҆ къ тебѣ̀ припада́емъ: тебѣ́сѧ мл҃и́мъ: съгрѣши́хѡмъ пре́д тобо́ю, и҆ зла́ѧ сотвори́хѡмъ: не съблюдо́хѡмъ, ни съхрани́хѡмъ ꙗ҆́коже заповѣда́лъ є҆сѝ на́мъ: зе́мни бо сꙋ́ще, зе́мнымъ преклони́хѡмсѧ, и҆ лꙋка́ваѧ ᲃъдѣѧ́хѡмъ пре́дъ лице́мъ твоимъ.

Ѿ сла́вы твое́ѧ и҆ любвѐ, на по́хоть пло́т̾скꙋю ᲂу҆стреми́хѡмсѧ: и҆ поработи́хѡмсѧ грѣхꙋ̀, и҆ печа́лемъ жите́йскимъ, и҆ бы́хѡмъ бѣгꙋны̀ ᲃвое́гѡ Влады́ки, и҆ ᲂу҆бѡ́ꙁи ѿ до́брых дѣ́лъ, ѡ҆каѧ́ннїи зла́гѡ ра́ди жи́тїѧ: но ка́емсѧ, и҆ про́симъ, и҆ мл҃и́мсѧ млⷭ҇тиве чл҃кѡлю́бче Гд҃и, приꙁыва́ѧй грѣ́шныѧ на покаѧ́нїе, ꙗ҆́кѡ да стра́хъ тво́й после́ши въ се́рдца на́ша: мл҃и́мътисѧ цр҃ю нбⷭ҇ный, да на стра́шнѣмъ ᲃꙋ́дѣ пом҃лꙋеши на́съ: ᲃп҃сѝ, и҆ ᲂу҆щедрѝ, при́ꙁри и҆ посѣтѝ, ᲂу҆млⷭ҇рди́сѧ и҆ пом҃лꙋй: твои́ бо є҆смы̀ рабѝ, и҆ дѣ́ло рꙋ́кꙋ твое́ю: а҆́ще на беꙁꙁакѡ́нїѧ на́шѧ при́ꙁриши Гд҃и, Гд҃и кто посто́итъ; а҆́ще ли воꙁдасѝ комꙋ́ждѡ по дѣ́лѡмъ є҆гѡ̀, кто̀ ᲃп҃сетсѧ; ꙗ҆́кѡ ѿ тебѐ ѡ҆чище́нїе и҆ млⷭ҇ть, и҆ мно́гое и҆ꙁбавле́нїе: дш҃а̀ на́ша въ рꙋ́кꙋ твое́ю: дыха́нїе на́ше въ во́ли твое́й.

Доне́лѣже бо бл҃гоприꙁира́нїе твоѐ на на́съ, бл҃годенствꙋ́ємъ: а҆́ще ли съ ꙗ҆́ростїю при́ꙁриши, мы поги́бнемъ ꙗ҆́кѡ ᲂу҆́трнѧѧ роса̀: не посто́итъ бо пра́хъ проти́вꙋ вѣ́трꙋ, та́кѡ и҆ мы проти́вꙋ гнѣ́вꙋ твое́мꙋ не мо́жемъ постоѧ́ти: но ꙗ҆́кѡ тва́рь ѿ сътво́ршагѡ ны млⷭ҇ти про́симъ: пом҃лꙋй на́съ Гд҃и грѣ́шныхъ, пом҃лꙋй на́съ по вели́цѣй млⷭ҇ти твое́й, и҆ по мнѡ́гимъ щедрѡта́мъ твои́мъ ѡ҆чи́сти беꙁꙁакѡ́нїѧ на́шѧ.

Все́ бо бл҃го́е ѿ тебѐ на на́с, все́же непра́ведное ѿ на́съ къ тебѣ̀: всѝ ᲂу҆клони́хѡмсѧ въ кꙋ́пѣ, и҆ непотре́бни бы́хѡмъ: нѣ́сть ни є҆ди́нагѡ ѿ на́съ тща́щагосѧ ѡ҆ нбⷭ҇ныхъ, но всѝ ѡ҆ зе́мныхъ, и҆ всѝ ѡ҆ печа́лехъ жите́йскихъ приле́жнимъ, ѡ҆ Црⷭ҇твїи Бж҃їи не пекꙋ́щесѧ, ꙗ҆́кѡ ѡ҆скꙋдѣ̀ Преподо́бный на землѝ: не тебѣ̀ Гд҃и ѡ҆ставлѧ́ющꙋ на́съ, но на́мъ тебѐ не воꙁыска́ющимъ, ви́димымъ ᲃи́мъ прилежа́ще.

Тѣ́мже бои́мсѧ да некогда̀ ᲃътвори́ши на́мъ ꙗ҆́коже сътвори́лъ І҆ерꙋсали́мꙋ, ѡ҆ста́вл̾шомꙋ тѧ, и҆ не ходи́вшомꙋ въ пꙋ́ти твоѧ̀: но не сотворѝ на́мъ ꙗ҆́коже ѡ҆́нѣмъ по дѣ́лѡмъ и҆́хъ, ни по грѣхѡ́мъ на́шимъ воꙁда́ждъ на́мъ: но потерпѝ на на́съ и҆ є҆щѐ долготерпе́ливе Гд҃и: ᲂу҆ста́ви гнѣ́вный сво́й пла́менъ простира́ющїйсѧ на рабы̀ твоѧ̀: са́мъ наста́ви на́съ на и҆́стиннꙋ твою̀, и҆ наꙋчѝ на́съ твори́ти во́лю твою̀, ꙗ҆́кѡ ты́ є҆сѝ Бг҃ъ на́шъ, и҆ мы лю́дїе твоѝ: твоѧ̀ ча́ст̾, твоѐ достоѧ́нїе, и҆ твоѐ съꙁда́нїе є҆смы̀: не воꙁдѣ́хѡмъ рꙋ́ки на́шѧ къ Бг҃ꙋ чꙋ́ждемꙋ: ни послѣдова́хѡмъ лжи́вымъ Проро́кѡмъ, ни ᲂу҆че́нїѧ є҆рети́ческагѡ держи́мсѧ: но тебѐ приꙁыва́емъ и҆́стиннагѡ Бг҃а, и҆ къ тебѣ̀ живꙋ́щомꙋ на нб҃сѝ ѻ҆́чи на́ши воꙁво́димъ, и҆ къ тебѣ̀ рꙋ́цѣ на́ши воꙁдѣва́емъ, и҆ мл҃и́мсѧ тебѣ̀: ѿ да́ждъ на́мъ бл҃гостїю и҆ млⷭ҇рдїемъ си, ꙗ҆́кѡ бл҃гъ и҆ чл҃кѡлю́бецъ:

Пом҃лꙋй на́съ приꙁыва́ѧй грѣ́шныѧ на покаѧ́нїе, и҆ на ᲃтра́шномъ ᲃꙋ́дѣ де́снагѡ ти стоѧ́нїѧ не ѿлꙋчѝ на́съ: но бл҃гⷭ҇ве́нїѧ пра́ведныхъ сподобѝ: доне́лѣже мі́ръ се́й стои́тъ, ненаведѝ на на́съ на́пастїй и҆ и҆скꙋше́нїй, и҆ непреда́ждъ на́съ въ рꙋ́ки тꙋ́ждихъ: да не проꙁове́тсѧ гра́дъ тво́й, гра́дъ плене́ный, и҆ лю́дїе твоѝ въ землѝ не свое́й: да не рекꙋ́тъ стра́ны, гдѐ є҆́стъ Бг҃ъ и҆́хъ;

Не попꙋща́й на на́съ ни ско́рби, ни гла́да, ни междосо́бныѧ ра́ти, ни напра́сныѧ ᲃм҃рти, ни ѻ҆гнѧ̀, ни пото́па, да не ѿпа́демъ ѿ вѣ́ры, не тве́рди бо є҆смы̀ вѣ́рою: ма́лѡ покаꙁнѝ, по мнѡ́гꙋ же пом҃лꙋй: въ ма́лѣ ᲂу҆ѧꙁвѝ, ми́лостивнѡ же и҆сцѣлѝ: въ ма́лѣ ѡ҆скорбѝ, вско́рѣ же ѡ҆бъвеселѝ, ꙗ҆́кѡ не терпи́тъ є҆́стество на́ше до́лгїй гнѣ́въ тво́й носи́ти, ꙗ҆́коже сте́блїе ѻ҆гнѧ̀: но въско́рѣ ᲂу҆милосерди́сѧ, тебѣ́ бо є҆́стъ є҆́же ми́ловати и҆ спаса́ти.

Тѣ́мъ же Влады́ко, продолжѝ млⷭ҇ть свою̀ на лю́дехъ твои́хъ: ра́тныѧ прогонѝ: ми́ръ ᲂу҆твердѝ: стра́ны ᲂу҆кротѝ: гра́дъ ᲂу҆гобꙁѝ: вѣ́рныѧ Царѧ и҆ Кнѧ́ꙁѧ на́шѧ ѡ҆гроꙁѝ стра́намъ: болѧ́ри ᲂу҆мꙋдрѝ: гра́дъ си́ленъ сотворѝ: цр҃квы твоѧ̀ воꙁрастѝ: достоѧ́нїе твоѐ соблюдѝ: мꙋ́жѧ, и҆ же́ны, и҆ младе́нцѧ спасѝ: ᲃꙋ́щїѧ въ работѣ̀ и҆ плѣне́нїи, заточе́нїи же и҆ темни́цахъ и҆ꙁба́ви и҆ свободѝ: въ а҆́лчбѣ и҆ въ жа́ждѣ, и҆ наготѣ̀ пребыва́ющихъ, всѣ́хъ пом҃лꙋй, всѣ́хъ ᲂу҆тишѝ, всѣ́хъ ѡ҆бра́дꙋй, и҆ ра́достъ сотворѝ и҆́мъ дш҃евнꙋю и҆ тѣлеснꙋю.

Мл҃тва́ми Прчⷭ҇тыѧ Бц҃а, ᲃт҃ыхъ нбⷭ҇ныхъ ᲃи́лъ, Предте́ча твое́гѡ Крⷭ҇тлѧ І҆ѡа́нна, ᲃт҃ы́хъ А҆пⷭ҇лъ, ᲃт҃ы́хъ Пррⷪ҇къ, ᲃт҃ы́хъ Мчн҃къ, ᲃт҃ы́хъ Преподо́бныхъ и҆ Бг҃оносныхъ ѡ҆ц҃ъ, и҆ всѣ́хъ ᲃт҃ы́хъ ᲂу҆млⷭ҇ди́сѧ на́ны, ꙗ҆́кѡ да млⷭ҇тїю твое́ю пасо́ми, въ соедине́нїи вѣ́ры, ве́селѡ и҆ ра́достнѡ ᲃла́вимъ тѧ въ вѣ́ки ве́кѡвъ, А҆ми́нь.

Влады́ко Гд҃и Бж҃е на́шъ, и҆́же соста́внымъ и҆ беꙁнача́лным свои́мъ ᲃло́вомъ, и҆ животво́рнымъ, и҆ є҆диночⷭ҇тнымъ Дх҃омъ ѿ несꙋ́щихъ, въе́же бы́ти всѧ́ческаѧ приве́лъ є҆сѝ: положи́вый мо́рю предѣ́лъ пѣсо́къ: и҆ поста́вивый гѡ́ры и҆ про́пасти пра́вилѡмъ: пѧ́дїю и҆ꙁмѣри́вый нб҃о, и го́рстїю ᲃодержа́й зе́мли: мѣ́ры и҆ пра́вила, предѣ́лы и҆ составле́нїѧ, и҆ чи́ны чꙋвстве́ннѣй се́й да́вый тва́ри, и҆ вре́менъ и҆ꙁмѣне́нїѧ, и҆ воꙁвра́ты ᲃлн҃чныѧ и҆ растворе́нїѧ ᲃтихі́й, ма́нїемъ свои́мъ всесодержа́й неиꙁрече́ннѡ, къ нестра́стномꙋ и҆ нерꙋши́момꙋ ѡ҆кормлѧ́ѧй.

Са́мъ всебл҃гі́й Цр҃ю, є҆стестве́нное и҆ ѡ҆бы́чное чл҃кѡлю́бїе и҆ блгⷭ҇тыни, и҆ па́ки прїи́мъ къ на́мъ, посѣтѝ твое́ю рꙋ́кꙋ дѣ́ло, и҆ не ѿнимѝ ѿ на́съ млⷭ҇тїй твои́хъ, и҆ щедрѡ́тъ твои́хъ, ни́же раꙁорѝ завѣ́тъ тво́й. По ѻ҆́браꙁꙋ ᲃвое́мꙋ ᲃоꙁда́вый недовѣдо́мѣ на́съ: є҆диноро́днагѡ ᲃн҃а твое́гѡ и҆ꙁбавле́нїе за́ ны да́вый: и҆ Дх҃а неиꙁрече́ннымъ приѡбще́нїемъ свое́гѡ Бжⷭ҇тва̀ препода́вый на́мъ.

Ѡ҆ста́ви прегрѣше́нїй на́шихъ мнѡ́жество, превосхожде́нїемъ мнѡ́жества щедрѡ́тъ твои́хъ: Крⷭ҇томъ и҆ Кро́вїю ᲃн҃а твое́гѡ грѣ́хъ ѡ҆мы́вый ро́да нш҃гѡ, въꙁведѝ свою̀ тва́рь къ є҆стестве́нномꙋ подо́бїю, и҆ чи́нꙋ, ѿ є҆́же чре́ꙁъ є҆стⷭ҇теннагѡ и҆ зла́гѡ жи́тїѧ на́шегѡ: покажѝ на́мъ ѡ҆бы́чнꙋю вели́кагѡ ᲃегѡ̀ свѣти́ла свѣ́тлостъ, ᲃлн҃чными лꙋ́чами належа́щїй мра́къ раꙁсѣ́къ мглꙋ̀, заповѣждъ ѻ҆́блакѡмъ въ вре́мѧ до́ждъ да́ти землѝ: пи́щꙋ є҆стⷭ҇тве́ннꙋю и҆ подо́бнꙋю, ꙗ҆́же въ то́й всѧ́ческим ᲃѣ́менемъ, и҆ ᲃа́довѡмъ: запрѣтѝ волне́нїю мо́рскомꙋ, и҆ чре́ꙁъ є҆стестве́ннымъ вѣ́трѡвъ движе́нїѧмъ: да ста́нетъ дꙋ́хъ бꙋ́рный, и҆ къ тишинѣ̀ мѧте́жнаѧ да прело́жатсѧ: ꙗ҆́кѡ да твоѧ̀ дѣ́ла и҆ чꙋдеса̀, и҆ па́ки ви́дѧтъ съходѧ́щїи на мо́ре въ кора́блехъ, и҆ творѧ́щїи дѣла́нїѧ въ вода́х мнѡ́гихъ.

Е҆́й чл҃кѡлю́бче Влады́ко, твоѐ подража́етъ чл҃кѡлю́бїе, и҆ тва́рь смирѧ́ѧсѧ на́ны, сверѣпѣ́етъ же сѧ па́ки, и҆ воꙁдыма́етсѧ за на́ше беꙁчи́нїе, и҆ преѡбидѣ́нїе твои́хъ за́повѣдїй, за сі́ѧ воꙁдава́ѧ на́мъ.

Ꙗ҆́кѡ да ᲂу҆́бѡ препита́ютсѧ лю́дїе мнѡ́ꙁи въ дн҃ь се́й, твоѐ є҆дино̀ мы свѣдꙋ́щїи И҆мѧ̀, и҆ неꙁна́ющїи кро́мѣ тебѐ Бо́га и҆́нагѡ, къ є҆ди́ной твое́й рꙋцѣ̀ вы́нꙋ вꙁира́емъ, ѿверꙁа́ющомꙋ сі́ю, и҆ и҆сполнѧ́ющомꙋ всѧ́кое живо́тно бл҃говоле́нїѧ.

Съхранѝ ᲂу҆́бѡ Гд҃и гра́дъ тво́й се́й, и҆ всѧ́къ гра́дъ, и҆ ᲃтра́нꙋ, и҆ вѣ́рою живꙋ́щихъ въ ни́хъ, ѿ гла́да, гꙋби́телства, трꙋ́са, пото́па, ѻ҆гнѧ̀, меча̀, и҆ наше́ствїѧ и҆ноплеменникъ, и҆ междосо́бныѧ бра́ни, и҆ всѧ́коѧ тꙋ́ждыѧ и҆ дꙋшевре́дныѧ є҆́реси, и҆ пре́лести, и҆ всѧ́кагѡ зла̀.

Мл҃тва́ми и҆ мл҃енїемъ преблⷭ҇ве́нныѧ Влады́чица на́шаѧ Бц҃а: и҆ Бгови́дныхъ А҆́гг҃лъ, и҆ всѣ́хъ ᲃт҃ы́хъ.

Бл҃говоле́нїемъ и҆ блгⷭ҇тїю є҆диноро́днагѡ ᲃн҃а твое́гѡ, съ ни́м же блⷭ҇ве́нъ є҆сѝ, съ прⷭ҇ты́мъ и҆ бл҃ги́мъ и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ:

А҆ми́нь.

Гд҃и Бж҃е на́шъ, ви́димꙋю сі́ю тва́ръ, съ дѣ́телнымъ твои́мъ повелѣ́нїемъ ѿ несꙋ́щихъ, въ бы́тїе приведы́й: та́же и҆ чл҃ка свои́ма рꙋка́ма съꙁда́вый кра́йнею твое́ю блгⷭ҇тїю: и҆ пе́рвѣе ᲂу҆́бѡ всѐ є҆мꙋ̀ приꙋготовле́нїе неиꙁнꙋрѧ́емое и҆ ѿра́дное съверши́въ на пи́щꙋ и҆ пи́тїе: въкꙋ́пѣ же престꙋпле́нїемъ за́повѣди лиши́въ и҆̀ нетлѣ́нныѧ пи́ща ѡ҆́ныѧ, и҆ дрꙋ́гое препровожде́нїе є҆мꙋ̀ притрꙋ́дное пода́лъ є҆сѝ по́леꙁнѡ, є҆́же плѡ́ды и҆ꙁноси́ти повелѣ́въ землѝ, на пи́щꙋ на́шꙋ, и҆ самы́мъ беꙁслове́снымъ живо́тнымъ мнѡгови́днымъ и҆ раꙁли́чнымъ, и҆ ѡ҆́вѣмъ ᲂу҆́бѡ ѿ самѣ́хъ сѣ́менъ зе́мныхъ подаѧ́й ꙗ҆́же на потре́бꙋ, ѡ҆́вѣм же и҆́накѡ, по промы́сл̾ной твое́й ᲃи́лѣ, є҆ю́же на ри́бы мо́рскїѧ приꙁира́еши твое́ю блгⷭ҇тїю, ѿверꙁа́ющейсѧ десни́ци твое́й, и҆ и҆сполнѧ́ющей всѧ́кое живо́тно бл҃говоле́нїѧ.

Вели́каѧ и чꙋ́днаѧ зна́менїѧ ᲃъдѣла́вый въ ве́тсѣмъ же и҆ Но́вѣмъ. Ꙋ҆слы́ши мѧ̀ грѣ́шнагѡ и҆ недосто́йнагѡ раба̀ твое́гѡ: и҆ ꙗ҆́коже и҆́ногда І҆ѡ́сифомъ ѡ҆́нѣмъ носѧ́щимъ Ѻ҆́браꙁъ є҆диноча́днагѡ ᲃн҃а твое́гѡ, всѧ̀ І҆и҃льскїѧ ѡ҆́ны и҆ꙁъѡби́лнѡ препита́лъ є҆сѝ лю́ди, си́це и҆ ны́нѣ є҆диноро́днымъ твои́мъ ᲃн҃омъ и҆́стиннымъ Бг҃омъ на́шимъ, пода́ждъ ꙗ҆́же на пи́щꙋ и҆ ᲂу҆покое́нїе на́ше, и҆ печа́лныхъ всѣ́хъ и҆ꙁмѣне́нїе на́мъ дарꙋ́й: гла́да и҆ па́гꙋбы ча́емые нꙋ́жда и҆ бѣды̀ и҆ꙁба́ви на́съ: да просла́витсѧ Прⷭ҇то́е И҆мѧ̀ твоѐ беꙁнача́лнагѡ Ѿц҃а̀, и҆ є҆диноро́днагѡ твое́гѡ Сн҃а, и҆ Прⷭ҇та́гѡ и҆ животворѧ́щагѡ твое́гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ, А҆ми́нь.

Бж҃е чꙋде́сныхъ, вели́каѧ и҆ чꙋ́днаѧ съдѣла́вый: дре́внѧгѡ І҆и҃лѧ Мѡѵ꙼се́ѡмъ свободи́вый го́ркїѧ работы̀ фараѡ́новы, рꙋко́ю твое́ю де́сною ᲃегѡ̀ наста́вивъ, и҆ невреди́ма съблю́дъ къ землѝ ѡ҆бѣтова́нной: и҆ пе́рвѣе ᲂу҆́бѡ пти́цами ѡ҆́нѣми въ сы́тост̾ напита́вый многочисле́нныѧ лю́ди въ пꙋсты́ни ѕѣ́лѡ сꙋхо́й, пото́мъ одожди́вый Ма́ннꙋ ꙗ҆́коже до́ждъ ѿ и҆сто́чники вѡ́дъ ѡ҆дожди́ти ᲂу҆строи́вый, и҆ всѣ́хъ ᲂу҆доволи́вый проли́тїемъ воды̀, жа́ждею дрꙋчи́мыхъ: ᲃи́це и҆ ны́нѣ на́съ напита́й ѡ҆бы́чнымъ твои́мъ чл҃кѡлю́бїемъ и҆ бл҃гостїю. пода́ждъ на́мъ потре́бнаѧ, и҆ ᲂу҆довлѝ къ слꙋже́нїю и҆ пи́щи на́шей: покажѝ и҆ въ на́съ вели́каѧ твоѧ̀ и҆ чꙋ́днаѧ, и҆ напита́й на́съ в сы́тость блгⷭ҇ве́нїемъ твое́ѧ бл҃гости: всѧ́ бо воꙁмо́жна тебѣ̀, не невоꙁмо́жно же ти ничто́же. Е҆й Гд҃и Бж҃е на́шъ, напита́вый тма́ми лю́ди малѣ́ми хлѣ́бы в пꙋсты́ни, напита́й и҆ на́съ ны́нѣ, неиꙁрече́нным твои́мъ бл҃гоꙋтро́біємъ, и҆ не пре́ꙁри моле́нїѧ на́съ грѣ́шных и҆ недосто́йныхъ ра́бъ твои́хъ, да просла́витсѧ прест҃о́е и҆мѧ̀ твоѐ: Ѿц҃а, и҆ ᲃн҃а, и҆ ᲃт҃гѡ Дх҃а, ны́нѣ и҆ прⷭ҇нѡ, и҆ въ вѣ́ки вѣ́кѡвъ. А҆минь.