Мл҃твы что́мыѧ ѿ І҆ере́ѧ на Воскрⷭ҇нїе Хвⷭ҇о свои́мъ Парохїа́нѡмъ, и҆сповѣда́вшимъ своѧ̀ съгрѣше́нїѧ, и҆ причасти́тисѧ Бжⷭ҇твеннымъ Тайнамъ хотѧ́щимъ

Сі́ѧ же чтꙋ́тсѧ по Ꙋ҆трни а҆́бїе пре́дъ Бжⷭ҇тве́нною Лѵтꙋ́ргїею.

Ре́кшꙋ же І҆ере́ю: Блⷭ҇ве́нъ Бг҃ъ на́шъ: чте́тъ и҆лѝ пое́тъ Хᲃ҃ воскр҃съ: гⷤ. и҆ чте́тъ Код: А҆́ще и҆ во гро́бъ съше́лъ:

Сла́ва:

Въ гро́бѣ пло́тски:

И҆ ны́нѣ:

Вы́шнѧгѡ ѡ҆сщ҃енное Бж҃іе:

По си́хъ же ре́къ: Гд҃ꙋ помоли́мсѧ и҆ Гд҃и поми́лꙋй:

Чте́тъ Мл҃твы ᲃі́ѧ съ всѧ́кимъ ᲂу҆миле́нїемъ.

Вѣ́стнѡ же бꙋ́ди, ꙗ҆́кѡ а҆́ще бл҃госло́вныѧ нѣ́кїѧ ра́ди вины̀, пре́дъ Воскрⷭ҇нїемъ се́ѧ свои́мъ Парохїа́нѡмъ ᲃщ҃е́нникꙋ съверши́ти приклю́читсѧ, (ꙗ҆́коже и҆ ѡ҆бы́чнѡ быва́етъ,) и҆ не въ Цр҃кви, но въ домꙋ̀, ничто́же Воскрⷭ҇ное не пое́тъ: но начина́етъ ѿ Цр҃ю нбⷭ҇ный: чте́тъ Трⷭ҇то́е: и҆ по Ѿч҃е на́шъ: Троп: Дне́вный, и҆ Код:

Па́ки же и҆ ᲃі́е вѣ́стнѡ бꙋ́ди, ꙗ҆́кѡ по нꙋ́ждѣ, то́чїю въ ᲃтрⷭ҇тнꙋю Недѣ́лю ᲃі́ѧ Мл҃твы съверша́ютсѧ, а҆ пре́жде ᲃтрⷭ҇тїй ника́коже досто́итъ сі́ѧ съверша́ти.

Влады́ко Гд҃и І҆и҃с Хє҃ Бж҃е на́шъ, бл҃годари́мъ и҆ велича́емъ тѧ ᲃп҃са и҆ бл҃года́телѧ на́шегѡ, ꙗ҆́кѡ сподоби́лъ є҆сѝ недосто́йныхъ рабѡ́въ твои́хъ прейтѝ вре́мѧ чⷭ҇тагѡ и҆ Бжⷭ҇тве́ннагѡ По́ста и҆ꙁѡбраже́ннагѡ на́мъ тобо́ю, и҆ пода́ннагѡ четырдесѧ́ти дн҃ьми, въ ᲃп҃си́телное покаѧ́нїе, и҆ ѡ҆чище́нїе дш҃а́м и҆ тѣ́лѡмъ на́шимъ: и҆ ꙗ҆́кѡ въ не́мъ дарова́лъ є҆сѝ на́мъ на прогна́нїе бѣсо́вскихъ кѡ́ꙁнїй и҆ навѣ́тѡвъ, Ѻ҆́браꙁꙋ чⷭ҇тнагѡ твое́гѡ Кртⷭ҇а поклони́тисѧ, є҆го́же прикоснове́нїемъ недосто́йныхъ на́шихъ ᲂу҆стъ лобꙁа́юще цѣлова́хѡмъ, славѧ́ще тебѐ на Крⷭ҇тѣ̀ пло́тїю Распѧ́тагѡ Бг҃а на́шегѡ.

И҆ ꙗ҆́кѡ да́лъ є҆сѝ на́мъ дойтѝ дрꙋ́га твое́гѡ Ла́ꙁарѧ четверодне́вное Воскрⷭ҇нїе, и҆ пресла́вное твоѐ є҆́же въ І҆ерⷭ҇ли́мъ на жребѧ́ти ѻ҆́слѣ вхожде́нїе: и҆ подража́телми бы́ти Е҆вре́йскихъ дѣте́й вѣ́тви тебѣ̀ прине́сшихъ, и҆ Ѻ҆са́нна въ вы́шнихъ, воспѣ́вшихъ: и҆ ви́дѣти Прⷭ҇ты́ѧ и҆ ᲃп҃си́телныѧ ᲃтрⷭ҇ти твоѧ̀, и҆ поклони́тисѧ Бжⷭ҇твенномꙋ твое́мꙋ Распѧ́тїю, Ко́пїю, Тро́сти, и҆ Гꙋбѣ, животво́рной ти ᲃм҃рти, ᲃп҃си́телномꙋ прободе́нїю, и҆ꙁъ него́ же и҆стечѐ въ ᲃпⷭ҇нїе мі́рови Кро́в̾ и҆ Вода̀, ᲃнѧ́тїю же съ Крⷭ҇та, и҆ Бг҃отѣле́сномꙋ Погребе́нїю, и҆ дости́гнꙋти Пресла́вное и҆ Бжⷭ҇тве́нное твоѐ Воскрⷭ҇нїе: и҆ дх҃о́вною ра́достїю и҆сполне́ни сꙋ́ще, съ А҆рха́гг҃лы и҆ А҆́гг҃лы, Херꙋві́ми и҆ Серафі́ми, и҆ всѣ́ми нбⷭ҇ными ᲃи́лами, и҆ со всѣ́ми ᲃт҃ы́ми, и҆ꙁрѧ́днѣе же съ Прчⷭ҇тою Мт҃рїею Твое́ю Дв҃ою Бц҃ею ᲃла́вимъ и҆ хва́лимъ тебѐ Воскрⷭ҇шагѡ Вели́кагѡ Бг҃а и҆ ᲃп҃са нш҃егѡ І҆ᲃ҃ Ха҃: и҆ твоѐ всесла́вное воспѣва́юще Воскрⷭ҇нїе, смѣре́ннѡ ны́нѣ припада́емъ, и҆ приле́жнѡ ѡ҆ рабѣ́хъ твои́хъ си́хъ, прибѣ́гшихъ подъ кро́въ ᲃт҃а́гѡ хра́ма твое́гѡ мл҃и́мъ: Прїймѝ и҆́хъ покаѧ́нїе, Мл҃твы, По́стъ, ᲃле́ꙁы, ᲃтена́нїѧ, и҆ колѣнопреклоне́нїѧ, ꙗ҆́же тебѣ̀ въ се́рдци съкрꙋше́нномъ и҆ дᲃ҃ѣ смѣре́нїѧ ѡ҆ свои́хъ грѣсе́хъ принесѡ́ша: Прїймѝ и҆́хъ и҆сповѣда́нїе и҆ покаѧ́нїе, ꙗ҆́коже Мытаре́во воꙁдыха́нїе, и҆ ᲃт҃а́гѡ ра́ди тридне́внагѡ твое́гѡ Въскрⷭ҇нїѧ, простѝ и҆́мъ всѧ̀ съгрѣше́нїѧ во́лнаѧ и҆ нево́лнаѧ, и҆ ѡ҆чи́сти и҆́хъ ꙗ҆́коже блꙋ́дницꙋ пла́кавшꙋсѧ, и҆ прїймѝ и҆́хъ ꙗ҆́коже прїѧ́лъ є҆сѝ Петра̀ ѿве́ргшагосѧ тебѐ, и҆ пла́кавшагосѧ го́ркѡ: и҆ въложѝ въ се́рдца и҆́хъ стра́хъ тво́й, є҆́же боѧ́тисѧ тебѐ, и҆ люби́ти тѧ ѿ всегѡ̀ ᲃе́рдца свое́гѡ, и҆ кътомꙋ̀ не воꙁврати́тисѧ къ злы́мъ и҆ неподро́бнымъ дѣ́лѡмъ, но да́ждъ и҆́мъ храни́ти за́повъди твоѧ̀ въ всѧ̀ днѝ живота̀ свое́гѡ, и҆ ходи́ти въ во́ли твое́й: и҆ сподобѝ и҆́хъ неѡсꙋжде́ннѡ причасти́тисѧ Пречⷭ҇томꙋ ти Тѣ́лꙋ и҆ чⷭ҇тной Крвѝ твое́й, ꙗ҆́кѡ да прича́стници бы́ти и҆ твое́гѡ нбⷭ҇нагѡ Црⷭ҇твїѧ съ всѣ́ми ᲃт҃ы́ми сподобѧ́тсѧ.

Твое́ бо є҆́стъ є҆́же ми́ловати и҆ сп҃са́ти на́съ Бж҃е на́шъ, и҆ тебѣ̀ ᲃла́вꙋ и҆ бл҃годаре́нїе, чⷭ҇ть и҆ поклоне́нїе воꙁсыла́емъ, съ беꙁнача́лнымъ ти Ѿц҃емъ, и҆ съ Прⷭ҇тымъ, и҆ бл҃гимъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

А҆́ще же на само́е Воскрⷭ҇нїе сі́е съверша́етсѧ, чте́тъ а҆́бїе, Воскрⷭ҇нїе Хв҃о видѣвше: Все до конца̀.

И҆ посе́мъ вто́рꙋю Мл҃твꙋ. А҆́ще же пре́дъ Воскрⷭ҇нїемъ, чте́тъ Тропарѝ, Гла́съ, ѕ҃.

Пом҃лꙋй на́съ Гд҃и, поми́лꙋй на́съ:

Сла́ва:

Гд҃и поми́лꙋй на́съ:

И҆ ны́нѣ:

Млⷭ҇рдїѧ две́ри:

Рекшꙋ же, Гд҃ꙋ помл҃и́мсѧ и҆ Гд҃и поми́лꙋй: а҆́бїе чте́тъ и сі́е.

Бл҃годари́мъ тѧ Хє҃ Бж҃е на́шъ, ꙗ҆́кѡ премнѡ́гїѧ ра́ди млⷭ҇ти твое́ѧ, сподоби́лъ є҆сѝ на́съ дости́гнꙋти дн҃ь пресла́внагѡ Воскрⷭ҇нїѧ твое́гѡ, во́н̾же ᲃвободи́лъ є҆сѝ сꙋ́щїѧ въ а҆́дѣ свѧ́ꙁанныѧ дш҃ѧ̀ пра́вѣдныхъ.

Тебѣ̀ припада́емъ, и҆ тебѣ́ сѧ моли́мъ Хє҃ І҆и҃се, премꙋ́дрости Бж҃іѧ, ми́ре и҆ ᲃи́ло, Пло́тїю свое́ю животво́рныѧ и҆ ᲃп҃си́телныѧ ᲃтрⷭ҇ти и҆ꙁволи́вый прїѧ́ти, Распѧ́тїе, Крⷭ҇тъ, Гво́ꙁдїѧ, Ко́пїе, ᲃм҃рть, ᲂу҆мертвѝ нш҃ѧ дш҃етлѣ́нныѧ стра́сти тѣле́сныѧ:

Погребе́нїемъ свои́мъ а҆́дова плѣни́вый ца́рствїѧ, погребѝ на́шѧ бл҃ги́ми по́мыслы лꙋка́ваѧ совѣтова́нїѧ, и҆ лꙋка́вствїѧ дꙋ́хи раꙁорѝ: тридне́внымъ свои́мъ и҆ Бг҃оно́снымъ Воскрⷭ҇нїемъ па́дшагѡ Пра́ѿца на́шегѡ воꙁста́вивый, воꙁста́ви на́съ грѣхо́мъ попо́лꙁшихъ сѧ ѻ҆́браꙁы на́мъ поклѧ́нїѧ предлага́ѧ: Воскр҃сѝ дш҃ѧ̀ нш҃ѧ ѿ гро́ба грѣхо́внагѡ, ꙗ҆́кѡ да не ктомꙋ̀ себѣ̀ поживе́мъ, но тебѣ̀ ᲂу҆мершомꙋ на́съ дѣ́лѧ, и҆ воскрсшомꙋ Хꙋ҃ Бꙋ҃ нш҃мꙋ: Е҆мꙋ́ же подоба́єтъ всѧ́каѧ сла́ва, чⷭ҇ть, и҆ поклоне́нїе, съ беꙁнача́лнымъ ти Ѿц҃емъ, и҆ съ прⷭ҇ты́мъ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ:

А҆ми́нь.

Посе́мъ блⷭ҇влѧ́етъ и҆́хъ десни́цею, гл҃ѧ̀:

Блⷭ҇ве́нїе Гн҃е на ва́съ, тогѡ̀ бл҃года́тїю и҆ щедрѡта́ми и҆ чл҃кѡлю́бїемъ, всегда̀ ны́нѣ и҆ прⷭ҇нѡ: