Вослѣдова́нїе быва́емое на Ни́вахъ, виногра́дѣхъ, и҆лѝ вертогра́дѣхъ, є҆́гда приключа́етсѧ врежда́тисѧ и҆́мъ ѿ Прꙋ́гѡвъ, Че́рвїй, Гд҃ꙋсе́ницъ, Мꙋ́шицъ, Га́дѡвъ, и҆лѝ и҆́ныхъ ви́дѡвъ ко́ихъ живо́тныхъ, и҆лѝ Бж҃іимъ попꙋще́нїемъ грѣ́хъ ра́ди на́шихъ, и҆лѝ чародѣѧ́нїемъ лꙋка́выхъ чл҃ове́къ, дїа́волскою же хи́тростїю наве́деныхъ

Подоба́етъ соверша́ти пре́жде Бжⷭ҇т: Литꙋ́ргїю, и҆ вжига́ти Канди́ло ᲃт҃а́гѡ Трѵфꙍ́на, и҆лѝ ᲃт҃а́гѡ Е҆ѵстра́фїѧ, и҆лѝ І҆ꙋлїа́на Лѵві́йскагѡ, и҆лѝ ѡ҆бо́ихъ. А҆́ще же нѣ́сть И҆ко́нъ тѣ́хъ ᲃт҃ы́хъ, ᲃі́е тво́ритъ пре́дъ намѣ́стнымъ ѻ҆́браꙁомъ Хра́ма.

По Бжⷭ҇т: Лѵтꙋ́ргїи, вꙁѧ́ти є҆ле́й ѿ Канди́лы, и҆ смѣша́ти съ водо́ю Бг҃оѧвле́нскою, прише́дъ же на мѣ́сто, І҆ере́ѵ꙼ вꙁе́мъ Е҆пітра́хиль на себѐ, и҆ наче́нъ ѡ҆бы́чнѡ:

Блⷭ҇ве́нъ Бг҃ъ на́шъ: чте́тъ, Цр҃ю нбⷭ҇ный: Трⷭ҇то́е: Ѻ҆ч҃е на́шъ: Гд҃и поми́лꙋй, в҃і.

Сла́ва: И҆ ны́нѣ:

Прїйдѣ́те поклон: гⷤ. и҆ ѱало́мъ р҃д:

Исповѣда́йтесѧ Гв҃и, и҆ приꙁыва́йте:

И҆ дрꙋ́гїй ѱал: н҃з:

Къ тебѣ̀ Гд҃и воꙁꙁовꙋ, Бж҃е мо́й:

По ѱалмѣ́хъ же гл҃етъ Троп: сі́а, гла́съ, ѕ҃:

Пом҃лꙋй на́съ Гд҃и:

Сла́ва:

Гд҃и поми́лꙋй на́съ:

И҆ ны́нѣ:

Млⷭ҇рдїа две́рь:

И҆ а҆́бїе стоѧ̀ къ Восто́кѡмъ ре́къ:

Гд҃ꙋ помоли́мсѧ, и҆ Гд҃и поми́лꙋй.

Чте́тъ Моли́твꙋ ᲃі́ю.

Гд҃и Бж҃е на́шъ, въ нача́лѣ ᲃоꙁда́нїѧ Твое́гѡ сотвори́вый нб҃о и҆ зе́млю, и҆ ᲂу҆́бѡ нб҃о ᲂу҆краси́въ вели́кими ᲃвѣти́лы, є҆́же просвѣща́ти зе́млю, и҆ чꙋ́днꙋ бы́ти тѣ́ми тебѣ̀ є҆дино́мꙋ ᲃодѣ́телю и҆ Влады́цѣ, зе́млю ᲂу҆краси́лъ є҆сѝ зла́кѡмъ и҆ траво́ю, и҆ раꙁли́чїемъ ᲃѣ́менъ сѣ́емыхъ по ро́дꙋ: и҆ всю̀ цвѣ́ты въѡбраꙁи́въ въ бл҃гоꙋкраше́нїе, блⷭ҇ви́лъ є҆сѝ ю҆̀: ᲃа́мъ и҆ ны́нѣ Влады́ко, при́ꙁри ѿ ᲃт҃а́гѡ жи́лища твое́гѡ на стѧжа́нїе сїе, и҆ блⷭ҇вѝ є҆̀, и҆ сохранѝ є҆̀ неврежде́нно ѿ всѧ́кагѡ чарова́нїѧ, и҆ ѡ҆баѧ́нїѧ, и҆ всѧ́кагѡ зла̀: ѡ҆пла́ꙁства же лꙋка́вагѡ, и҆ кова́рства злы́хъ члове́къ: и҆ да́ждъ є҆мꙋ̀ приноси́ти плѡ́ды въ вре́мѧ, и҆спо́лнены блⷭ҇ве́нїѧ твое́гѡ, и҆ всѧ́кїй звѣ́ръ, и҆ га́дъ, че́рвъ же и҆ мꙋ́хи, и҆ ржꙋ̀, зно́й, и҆ ва́ръ, и҆ беꙁго́дныѧ вѣ́тры вре́дъ наносѧ́щїѧ ѿженѝ ѿ не́гѡ:

Ты́ бо є҆сѝ Бг҃ъ млⷭ҇тїй и҆ щедрѡ́тъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

По се́мъ а҆́бїе чте́тъ ѱало́мъ, ѯ҃з.

Да воскрⷭ҇нетъ Бг҃ъ, и҆ раꙁы́йдꙋтсѧ:

И҆ по ѱалмѣ́ чте́тъ Заклина́нїе Ст҃а́гѡ Мчн҃ка Трѵфꙍ́на.

Вѣ́ждъ же ѽ І҆ере́ю, ꙗ҆́кѡ не всѧ̀ живо́тнаѧ здѐ и҆менованнаѧ прочестѝ досто́итъ, но то́чїю тогда̀ врежда́ющїѧ.

Заклина́ю ва́съ многѡви́днїи звѣ́рїе, че́рвїе, гꙋсе́ницѧ, хрꙋщѝ, и҆ прꙋ́ꙁи, мы́ши, щꙋ́ры и҆ кри́тица, и҆ раꙁли́чныѧ рѡ́ды, мꙋ́хъ и҆ мꙋ́шицъ, и҆ мо́лїй, и҆ мра́вїй, и҆ ѡ҆́вадѡвъ же, и҆ ѻ҆́съ, и҆ многѡно́жницъ, и҆ мнѡгоѡ́браꙁныѧ рѡ́ды полꙁа́ющихсѧ по землѝ живо́тныхъ, и҆ лѣта́ющихъ пти́цъ вре́дъ и҆ тщетꙋ̀ ни́вамъ, виногра́дѡмъ, ᲃа́дѡмъ же и҆ вертогра́дѡмъ наносѧ́щїѧ Бг҃омъ Ѿц҃емъ беꙁнача́лным, и҆ ᲃн҃омъ є҆гѡ̀ съ беꙁнача́лнымъ и҆ є҆диносꙋ́щнымъ, и҆ Дх҃омъ є҆гѡ̀ прⷭ҇ты́мъ, Ѿц҃ꙋ и҆ ᲃн҃ꙋ є҆диносꙋ́щнымъ и҆ съ прⷭ҇ты́мъ животворѧ́щимъ.

Заклина́ю ва́съ вочл҃че́нїемъ є҆диноро́днагѡ Сн҃а Бж҃іѧ, Гд҃а на́шегѡ І҆и҃с Ха҃, и҆ пожи́тїемъ є҆гѡ̀ на землѝ съ чл҃ки, ᲃтрⷭ҇тїю же є҆гѡ̀ ᲃп҃си́телною, и҆ животво́рною є҆гѡ̀ ᲃмр҃тїю, и҆ тридне́внымъ є҆гѡ̀ Воскрⷭ҇нїемъ, и҆ на нб҃са Воꙁнесе́нїемъ, и҆ всѣ́м є҆гѡ̀ Бжⷭ҇тве́ннымъ ᲃп҃си́телнымъ смотре́нїемъ.

Заклина́ю ва́съ и҆ ᲃт҃ы́ми мнѡгоѡ҆чи́тыми Херꙋві́ми, шестокрила́тыми Серафі́ми, лѣта́ющими ѻ҆́крестъ Прⷭ҇тла, и҆ вопїю́щими ᲃⷮ: ᲃⷮ: ᲃт҃ъ Саваꙍ́ѳъ.

Заклина́ю ва́съ ᲃт҃ы́ми А҆гг҃лы, и҆ всѣ́ми ᲃи́лами нбⷭ҇ными, и҆ ти́сѧщами ти́сѧщами, и҆́же съ мнѡ́гимъ стра́хомъ предсто́ѧтъ ᲃла́вѣ Гдⷭ҇ней, да не ѡ҆би́дите виногра́ды, ни ни́вы, ни вертогра́ды ни древеса̀, ни зе́лїй раба̀ Бж҃іѧ И҆мⷬ҇къ: но ѿидѣ́те на ди́выѧ гѡ́ры, на непло́днаѧ древеса̀, нанѧ́же дарова́лъ є҆́стъ ва́мъ повседне́внꙋю пи́щꙋ.

Заклина́ю ва́съ и҆ чⷭ҇тнымъ Тѣ́ломъ и҆ Кро́вїю Гд҃а на́шегѡ І҆и҃с Ха҃, и҆́стиннагѡ Бг҃а и҆ ᲃп҃са на́шегѡ, и҆́мже и҆ ᲃпⷭ҇нїе даде́сѧ на́мъ и҆ и҆скꙋпле́нїе, ѡ҆ є҆гѡ́ же и҆́мени Мчн҃ци ᲃт҃ы́и ᲂу҆мрѡ́ша, да не ѡ҆би́дите ни ни́вы, ни виногра́ды, ни всѧ́кое дре́во плодови́тое, и҆ бе́ꙁпло́дное, и҆ ни́же ли́стъ зе́лїй да не ѡ҆би́дите ѿ ѡ҆крꙋже́нїѧ предѣ́ла, и҆ мѣ́ста раба̀ Бж҃іа И҆мⷬ҇къ: но ѿидѣ́те ско́рѡ ѿ мѣ́ста сегѡ̀, и҆щеꙁни́те и҆ поги́бните, ᲂу҆мали́тесѧ, и҆ ча́съ ѿ ча́са беꙁвѣ́стни бꙋ́дѣ́те, и҆щеꙁа́юще и҆ погиба́юще ѿ мѣ́стъ и҆ предѣ́лъ рабѡ́въ Бж҃іихъ, правовѣ́рнѡ приꙁыва́ющихъ и҆мѧ̀ и҆́стиннагѡ є҆ди́нагѡ Бг҃а въ Трⷪ҇ци ᲃт҃ѣ́й слави́магѡ Ѿц҃а, и҆ Сн҃а, и҆ ᲃт҃а́гѡ Дх҃а, блⷭ҇ве́но сꙋ́щее, ны́нѣ и҆ прⷭ҇нѡ, и҆ въ беꙁконе́чныѧ вѣ́ки вѣкѡ́въ:

Кли́ръ:

А҆ми́нь.

І҆ере́ѵ꙼:

Ми́ръ всѣ́мъ.

Кли́ръ:

И҆ дх҃ови твое́мꙋ.

І҆ере́ѵ꙼:

Гла́вы ва́ша Гв҃и преклони́те.

Ли́къ:

Тебѣ̀ Гд҃и.

І҆ере́ѵ꙼ же, чте́тъ Мл҃твꙋ ᲃі́ю велегла́снѡ.

Влады́ко Гд҃и Бж҃е на́шъ, пло́тскимъ твои́мъ прише́ствїемъ блгⷭ҇ви́вый Виѳле́емъ, и҆ Геѳсима́нїю, и҆ и҆́ногда до́мъ І҆а́кѡвл̾, и҆́же блгⷭ҇ве́нъ бы́въ, І҆и҃лемъ преименова́сѧ: и҆́же и҆ до́мъ А҆веда́рїинъ и҆ Дави́довъ блгⷭ҇ви́лъ є҆сѝ: ᲃа́мъ блгⷭ҇вѝ и҆ стѧжа́нїе сі́е, и҆ сотворѝ є҆̀ ѡ҆ блⷭ҇ве́нїи плодоноси́ти: и҆ пра́ведное грѣ́хъ ра́ди на́шихъ преще́нїе твоѐ сі́е на́ ны наноси́мое бл҃гоꙋтро́бїа ра́ди твое́гѡ ѿ на́съ ско́рѡ ѡѡвратѝ, Мл҃тва́ми Пречⷭ҇тыѧ Влады́чица на́шеѧ Бц҃а, и҆ прⷭ҇нѡ Дв҃ы Мр҃іѧ, ᲃи́лою чⷭ҇тнагѡ и҆ животворѧ́щагѡ Крⷭ҇та̀, чⷭ҇тнагѡ и҆ ᲃла́внагѡ Прⷪ҇рка Предте́ча и҆ Крⷭ҇тлѧ І҆ѡа́нна, ᲃт҃ы́хъ сла́вныхъ и҆ всехва́лныхъ А҆пⷭ҇лъ, ᲃт҃ы́хъ и҆ добропобѣ́дныхъ Мчн҃къ, ᲃт҃ы́хъ сла́вныхъ Великомч҃никъ Трѵфѡ́на, Е҆вста́фїѧ, и҆ І҆ꙋлїа́на, и҆ Ст҃а́гѡ И҆мⷬ҇къ: є҆го́же дне́сь па́мѧть съверша́емъ, и҆ всѣ́хъ ᲃт҃ы́хъ.

Ты́ бо є҆сѝ Бг҃ъ млⷭ҇тїй и҆ щедрѡ́тъ, и҆ тебѣ̀ сла́вꙋ воꙁсыла́емъ, съ беꙁнача́лнымъ ти Ѿц҃емъ и҆ съ прⷭ҇тымъ, и҆ бл҃ги́мъ, и҆ животворѧ́щимъ ти Дх҃омъ, ны́нѣ и҆ прⷭ҇нѡ и҆ въ вѣ́ки вѣ́кѡвъ, А҆ми́нь.

Вꙁе́мъ же І҆ере́ѵ꙼ ᲃщ҃еннꙋю во́дꙋ съ є҆ле́ѡмъ кро́питъ є҆ю̀ всѐ мѣ́сто, гл҃ѧ̀:

Да ѿстꙋ́пѧтъ и҆ и҆ще́ꙁнꙋтъ живо́тнаѧ сі́ѧ ѿ мѣ́ста сегѡ̀ ѡ҆кропле́нїемъ воды̀ сеѧ̀ ᲃщенныѧ, въ и҆мѧ̀ Ѿц҃а, и҆ ᲃн҃а, и ᲃт҃а́гѡ Дх҃а, А҆ми́нь.

Пѣвци́ же пою́тъ Догмати́къ д҃-гѡ Гла́са:

Пода́ждъ ᲂу҆тѣше́нїе:

И҆ быва́етъ ѡ҆бы́чный Ѿпꙋ́стъ, съ воспомина́ніемъ ᲃт҃ы́хъ Мч҃никъ, Трѵфѡ́на, Е҆ѵстра́фїѧ, І҆ꙋлїа́на. И҆ та́кѡ ѿхо́дѧтъ въ своѧ́ си.