Послѣдова́нїе колѣнопрекло́нных моли́твъ, съверша́емыхъ въ де́нь ᲃт҃ы́ѧ Пѧтдесѧ́тницы

а҆́бїе непосредстве́ннѣ по Бжⷭ҇твенной Лѵтꙋ́ргїи на Вече́рни, приꙁыва́нїѧ ра́ди ᲃт҃а́гѡ Дх҃а, є҆́же съ колѣнопреклоне́нїемъ съверша́ти ѡ҆бы́че Це́рковъ ᲃⷮ: Восто́чнаѧ.

Блⷭ҇ви́вшꙋ І҆ере́ю, чтемъ: Цр҃ю нбⷭ҇ный, Трⷭ҇то́е: и҆ по Ѿч҃е на́шъ: Гд҃и поми́лꙋй, в҃і, Сла́ва: И҆ ны́нѣ: Прїйдѣ́те поклони́м: гⷤ. Та́же Ѱало́мъ, р҃г.

Блⷭ҇вѝ дшѐ моѧ̀ Гд҃а:

Посе́мъ Сла́ва: И҆ ны́нѣ: А҆л҃лꙋ́їа, гⷤ.

А҆́бїе же Дїа́конъ гл҃етъ Е҆кте́нїѧ Вели́каѧ.

Ми́ромъ Гд҃ꙋ помоли́мсѧ.

Ли́къ:

Гд҃и поми́лꙋй.

Ꙍ҆ и҆́же свы́шнемъ ми́рѣ и҆ ᲃп҃се́нїи дꙋ́шъ на́шихъ, Гд҃ꙋ помоли́мсѧ.

Ꙍ҆ ми́ре всегѡ̀ ми́ра, благостоѧ́нїи ᲃт҃ы́хъ Бж҃іихъ це́рквїй, и҆ соедине́нїи всѣ́хъ, Гд҃ꙋ помоли́мсѧ.

Ꙍ҆ стѣ́мъ Хра́мѣ се́мъ, и҆ съ вѣ́рою и҆ благоговѣ́нїемъ и҆ стра́хомъ Бж҃іимъ въходѧ́щихъ во́нь, Гд҃ꙋ помоли́мсѧ.

Ꙍ҆ стѣ́йшемъ А҆рхїепи́скопѣ на́шемъ Вселе́н̾скомъ Патрїа́рсѣ, И҆мⷬ҇къ: (и҆лѝ, ѡ҆ Преѡсвѧще́нномъ А҆рхїепⷭ҇пѣ на́шемъ всеѧ̀ Рѡ́ссїи Митрополи́тѣ, И҆мⷬ҇къ: и҆лѝ, ѡ҆ Боголюби́вомъ Е҆пⷭ҇пѣ на́шемъ И҆мⷬ҇къ:) чⷭ҇тно́мъ Преꙁви́терствѣ, є҆́же ѡ҆ Хрⷭ҇тѣ̀ Дїа́конствѣ, все́мъ при́чтѣ и҆ люде́хъ, Гд҃ꙋ помоли́мсѧ.

Ꙍ҆ Вели́комъ Королѣ̀ на́шемъ Имⷬ҇къ: благочести́выхъ Гпⷭ҇дре́хъ, Кнѧ́ѕехъ и҆ Па́нѣхъ на́шихъ, ѡ҆ все́й Пола́тѣ и Во́ехъ и҆́хъ, Гд҃ꙋ помоли́мсѧ.

Ꙍ҆ є҆́же пособи́ти и҆ покори́ти подъ но́ꙁѣ и҆́хъ всѧ́кагѡ вра́га и҆ сꙋпоста́та, Гд҃ꙋ помоли́мсѧ.

Ꙍ҆ и҆ꙁбавле́нїи плѣне́нных ѿце́хъ и бра́тїй на́шихъ, Гд҃ꙋ помоли́мсѧ.

Ꙍ҆ гра́дѣ се́мъ, и҆ ѡ҆ всѧ́комъ гра́дѣ и҆ ве́си и҆ всѧ́кой стра́нѣ и҆ вѣ́рою живꙋ́щихъ въ ни́хъ, Гд҃ꙋ помоли́мсѧ.

Ꙍ҆ благорастворе́нїи во́дꙋхѡвъ, ᲂу҆множе́нїи пло́дѡвъ земны́хъ и҆ вре́менехъ ми́рныхъ, Гд҃ꙋ помоли́мсѧ.

Ꙍ҆ плава́ющихъ, пꙋт̾шествꙋ́ющихъ, недꙋгꙋ́ющихъ, трꙋжда́ющихсѧ, плѣне́нныхъ и҆ ѡ҆ ᲃпасе́нїи и҆́хъ, Гд҃ꙋ помоли́мсѧ.

Ꙍ҆ предстоѧ́щихъ люде́хъ, и҆ ча́ющихъ благода́ти ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ прекло́ншихъ се́рдца своѧ̀ пре́дъ Гдⷭ҇емъ и҆ колѣ́нѣ, Гд҃ꙋ помоли́мсѧ.

Ꙍ҆ ѡ҆сщ҃енїи дш҃ъ и҆ тѣле́съ всѣ́хъ на́съ пра́вѣднѣ вѣ́рою и҆ благоговѣ́нїемъ съше́дшихсѧ въ Прчⷭ҇тый Хра́мъ се́й, Гд҃ꙋ помоли́мсѧ.

Ꙍ҆ є҆́же сподоби́тисѧ на́мъ, Ца́рствїю нетлѣ́нномꙋ, благода́тїю ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же бы́ти на́мъ хра́мꙋ и҆ жи́лищꙋ, ᲃт҃а́гѡ и҆ животворѧ́щагѡ Дх҃а, Гд҃ꙋ помоли́мсѧ.

Ꙍ҆ є҆́же съхрани́ти на́мъ Вѣ́рꙋ и҆ Любо́въ, непосты́днꙋю, благода́тїю ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же ѡ҆брѣстѝ на́мъ благода́ть и҆ ми́лость Всест҃а́гѡ Дх҃а, Гд҃ꙋ помоли́мсѧ.

Ꙍ҆ ꙗ҆́вле́нїи ꙗ҆́кѡ бы́ти на́мъ прича́стникѡмъ ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же прїѧ́ти на́мъ ѡ҆ставле́нїе грѣхѡ́въ, и҆ поꙁна́нїе дх҃о́вныѧ благода́ти, Гд҃ꙋ помоли́мсѧ.

Ꙍ҆ є҆́же не бы́ти на́мъ чꙋ́ждымъ ᲃт҃а́гѡ Дх҃а, въ гро́ꙁное и҆ пра́ведное ᲃꙋ́дище Хв҃о, Гд҃ꙋ помоли́мсѧ.

Ꙍ҆ дарова́нїи бога́тыѧ ми́лости и҆ щедрѡ́тъ, и҆ благода́ти ᲃт҃а́гѡ Дх҃а, Гд҃ꙋ помоли́мсѧ.

Ꙍ҆ є҆́же раꙁдрѣши́ти на́съ ᲃт҃о́мꙋ Дх҃ꙋ ѿ всѧ́кїѧ ᲂу҆́ꙁы непрїѧ́ꙁненныѧ, Гд҃ꙋ помоли́мсѧ.

Ꙍ҆ ᲃпасе́нїи є҆́же ᲃвы́шше на́съ прекло́н̾шихъ вѣ́рою ᲃерде́чнїи и҆ тѣле́снїи колѣ́нѣ, въ де́нь ᲃе́й Пѧтдесѧ́тный, Гд҃ꙋ помоли́мсѧ.

Ꙍ҆ є҆́же ᲂу҆слы́шати Гд҃ꙋ Бг҃ꙋ на́шемꙋ на́съ грѣ́шныхъ, и҆ посла́ти на́ ны Дх҃а ᲃт҃а́гѡ, и҆ ѡ҆ст҃и́ти на́съ, Гд҃ꙋ помоли́мсѧ.

Ꙍ҆ є҆́же покланѧ́тисѧ на́мъ прⷭ҇нѡ дш҃е́внѡ и҆ тѣле́снѡ, и҆ пѣ́ти ᲃт҃ꙋ́ю є҆диносꙋ́щнꙋю Трⷪ҇цꙋ въ є҆ди́нствѣ, Гд҃ꙋ помоли́мсѧ.

Ꙍ҆ є҆́же благоволи́ти Гд҃ꙋ Бг҃ꙋ на́ ны, прекло́н̾шїа колѣ́нѣ своѝ и҆ и҆спꙋсти́ти на на́съ ᲃт҃ы́й сво́й Дх҃ъ, Гд҃ꙋ помоли́мсѧ.

Ꙍ҆ є҆́же прїѧ́тнымъ бы́ти колѣнопреклоне́нїѧмъ и҆ Моли́твамъ на́шимъ пре́дъ ни́мъ, ꙗ҆́кѡ во́нѧ благоꙋха́нїѧ дꙋхо́внагѡ, Гд҃ꙋ помоли́мсѧ.

Ꙍ҆ є҆́же бы́ти на́мъ ѡ҆бе́щникѡмъ ѡ҆сїѧ́нїѧ Бжⷭ҇тве́ннагѡ, и҆́стинныѧ и҆ животворѧ́щїѧ Трⷪ҇ца, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ на́мъ ѿ всѧ́кїѧ ско́рби, гнѣ́ва, и҆ нꙋ́жды, Гд҃ꙋ помоли́мсѧ.

Застꙋпѝ, ᲃп҃си, поми́лꙋй, и҆ сохранѝ на́съ Бж҃е:

Прⷭ҇тꙋ́ю чⷭ҇тꙋю, и҆ преблагослове́ннꙋю сла́внꙋю Влады́чицꙋ на́шꙋ Бц҃ꙋ, и҆ прⷭ҇нѡ Дв҃ꙋ Мр҃ію, съ всѣ́ми ст҃ы́ми помѧнꙋ́вше, са́ми себѐ, и҆ дрꙋ́гъ дрꙋ́га, и҆ ве́сь живо́т на́шъ Хꙋ҃ Бг҃ꙋ предади́мъ.

Ли́къ:

Тебѣ̀ Гд҃и.

І҆ере́ѵ꙼ же Воꙁглаша́етъ:

Ꙗ҆́кѡ подоба́етъ тѝ всѧ́каѧ ᲃла́ва, че́сть и҆ поклоне́нїе, Ѿцꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ:

Ами́нь.

Каѳ: не гл҃емъ.

На Гд҃и воꙁва́хъ: поста́вимъ ᲃтіхѡ́въ, ѕ҃.

И҆ пое́мъ ᲃтіхи́ры ᲃамогла́сны. Гла́съ, д҃.

Пресла́внаѧ дне́сь, видѣ́ша всѝ ꙗ҆ꙁы́ци въ гра́дѣ Дв҃двѣ, є҆́гда Дх҃ъ съни́де ᲃт҃ы́й въ ѻ҆́гненных ѧ҆ꙁы́цехъ, ꙗ҆́коже Лꙋка̀ Бг҃огла́сный написа̀, рече́ бо, ᲃобра́ннымъ Оу҆́чникѡмъ Хв҃ымъ, бы́сть шꙋ́мъ ꙗ҆́кѡ носи́мꙋ дыха́нїю бꙋ́рнꙋ, и҆ и҆сполнѝ до́мъ и҆де́же бѧ́хꙋ ᲃѣдѧ́ще, и҆ всѝ нача́ша гл҃а́ти ᲃтра́нными гл҃ы̀, ᲃтра́нными ᲂу҆че́нїи, ᲃтра́нными повелѣ́нїи, ᲃт҃ы́ѧ Трⷪ҇ца. вⷤ.

Дх҃ъ ᲃт҃ы́й, бѣ̀ ᲂу҆́бѡ прⷭ҇нѡ, и҆ є҆́стъ и҆ бꙋ́детъ, ни́ же начина́емъ, ни́ же престаѧ́й, но прⷭ҇нѡ съ Ѿц҃емъ и҆ съ ᲃн҃омъ, съчине́нъ и҆ съчислѧ́емъ, Живо́тъ и҆ животворѧ́й, ᲃвѣ́тъ, и҆ ᲃвѣ́та пода́тель, ᲃамоблагі́й, и҆ и҆сто́чникъ благосты́нѧ, и҆́мже Ѻ҆́ц҃ъ поꙁнава́етсѧ, и҆ ᲃн҃ъ прославлѧ́етсѧ, и҆ ѿ всѣ́хъ зна́етсѧ, є҆ди́на ᲃи́ла, є҆ди́но съчета́нїе, є҆дино̀ поклоне́нїе ᲃт҃ы́ѧ Трⷪ҇ца. вⷤ.

Дх҃ъ ᲃт҃ы́й, ᲃвѣ́тъ и҆ Живо́тъ, живы́й и҆сто́чникъ мысле́нный, Дх҃ъ Премꙋ́дрости, Дх҃а Ра́ꙁꙋма, бл҃гі́й, пра́вый, мысле́нный, ѡ҆блада́ѧй, ѡ҆чища́ѧй прегрѣше́нїѧ, Бг҃ъ и҆ боготворѧ́й, ѻ҆́гнь ѿ Ѻ҆ц҃а и҆сходѧ́й, гл҃ѧ́й, дѣ́ѧй, раꙁдѣлѧ́ѧй да́ры, и҆́мже Пррⷪ҇цы всѝ, и҆ Бжⷭ҇тве́ннїи А҆пⷭ҇ли, съ Мч҃ники вѣн̾ча́шасѧ, ᲃтра́нное ᲃлыша́нїе, ᲃтра́нное видѣ́нїе, ѻ҆́гнь раꙁдѣлѧ́ѧйсѧ въ пода́нїѧ да́рѡвъ. вⷤ.

Сла́ва: И҆ ны́нѣ: Гла́съ, ѕ҃.

Цр҃ю нбⷭ҇ный, Ꙋ҆тѣши́телю Дш҃е и҆́стинный, ве́ꙁде ᲃы́й, и҆ всѧ̀ и҆сполнѧ́ѧй, ᲃъкро́вище бл҃ги́хъ, и҆ жи́ꙁни пода́телю, прїйдѝ и҆ всели́сѧ въ ны, и҆ ѡ҆чи́сти ны ѿ всѧ́кїѧ ᲃкве́рны, и҆ ᲃп҃сѝ бл҃же дш҃а̀ на́ша.

По си́хъ Вохо́дъ, и҆ Свѣ́те ти́хїй:

Проки́менъ. Гла́съ, з҃.

Кто̀ Бг҃ъ ве́лїй ꙗ҆́кѡ Бг҃ъ на́шъ, ты́ є҆си Бг҃ъ творѧ́й чꙋдеса̀.

Сті́хъ, а҃.

Скаꙁа́л є҆сѝ въ люде́хъ ᲃи́лꙋ твою̀.

Сті́хъ, в҃.

И҆ рѣ́хъ ни́нѣ нача́хъ, ᲃи и҆ꙁмѣ́на десни́ца вы́шнѧгѡ.

Сті́хъ, г҃.

Помѧнꙋ́хъ дѣла̀ Гдⷭ҇нѧ.

И҆ па́ки:

Кто̀ Бг҃ъ ве́лїй:

Та́же, Воꙁглаша́етъ І҆ере́ѵ꙼, и҆лѝ Дїа́конъ.

Па́ки и па́ки прекло́н̾ше колѣ́нѣ, Гд҃ꙋ помол:

Ли́къ же пое́тъ:

Гд҃и поми́лꙋй, гⷤ.

На́мъ же прекло́н̾шимъ колѣ́нѣ на землѝ непокрове́нными гла́вами, Сщ҃е́нникъ та́кожде колѣ́нѣ преклонъ пре́дъ ᲃт҃ы́мъ Прⷭ҇то́ломъ велегла́снѡ чте́тъ Моли́твꙋ ᲃі́ю въ ᲂу҆слыша́нїе всѣ́мъ, ᲂу҆ми́лнымъ гла́сомъ, и҆ неспѣ́шнѡ.

Пречⷭ҇те, нескве́рне, беꙁнача́л̾не, невиди́ме, непостижи́ме, неиꙁслѣдова́нне, непремѣ́нне, непрело́жне, неисче́тне неꙁлоби́ве Гд҃и, є҆ди́не и҆мѣ́ѧй беꙁ̾сме́ртїе, въ свѣ́тѣ живы́й непристꙋ́пномъ, ᲃотвори́вый Нб҃о и҆ зе́млю, и҆ Мо́ре, и҆ всѧ̀ соꙁда́ннаѧ на ни́хъ, пре́жде є҆́же проси́ти всѣ́мъ, проше́нїѧ подава́ѧй, тебѐ про́симъ, и тебѣ̀ моли́мсѧ Влады́ко чл҃кѡлю́бче, Ѿц҃ꙋ̀ Гд҃а на́шегѡ І҆и҃са Ха҃, на́съ дѣ́лѧ чл҃кѡвъ, и҆ на́шегѡ ра́ди спⷭ҇нїа, съше́дшагѡ съ нб҃съ, и҆ воплоти́вшагосѧ ѿ Дх҃а ᲃт҃а́гѡ, и҆ Мр҃іѧ прⷭ҇нѡ Дв҃ы и҆ пресла́вныѧ Бц҃а. Ꙗ҆́же пе́рвѣе ᲂу҆бѡ словесы̀ ᲂу҆ча̀, послѣ́ди же и҆ дѣ́лы пока́ꙁꙋѧ, внегда́ ᲃп҃си́тел̾нꙋю Стрⷭ҇ть претерпѣ̀, подадѐ на́мъ подписа́нїе смѣре́ннымъ и҆ грѣ́шнымъ и҆ недосто́йнымъ рабѡ́мъ твои́мъ, мо́л̾бы приноси́ти тебѣ̀, въ вы́ѧ и҆ колѣ́нъ преклоне́нїихъ, ѡ҆ проще́нїи на́шихъ согрѣше́нїй, и҆ ѡ҆ лю́дскихъ невѣ́жествїихъ. Са́мъ ᲂу҆́бѡ многѡми́лостиве и҆ чл҃кѡлю́бче, ᲂу҆слы́ши на́съ, во́н̾же де́нь а҆́ще приꙁове́мъ тѧ̀, и҆ꙁрѧ́днѣе же въ де́нь се́й Пѧтдесѧ́тный, во́н̾же по Воꙁнесе́нїи Гд҃а на́шегѡ І҆и҃са Ха҃ на нб҃са̀, и҆ ᲃѣдѣ́нїи ѡ҆де́снꙋю тебѐ Бг҃а и҆ Ѿц҃а̀, ниꙁпосла̀ Прⷭ҇ты́й Дх҃ъ на ᲃт҃ы́ѧ ᲃвоѧ̀ Ꙋ҆́чн҃ки и҆ А҆пⷭ҇лы, и҆́же и҆ сѣ́де на є҆ди́номъ кого́ждо и҆́хъ, и҆ и҆сполни́шасѧ всѝ неистощи́мыѧ благода́ти є҆́гѡ̀, и҆ гл҃а́ша ѧ҆ꙁы́ки и҆́нѣми, вели́чїѧ твоѧ̀ и҆ прорекѡ́ша. Ны́нѣ ᲂу҆́бѡ молѧ́щихтисѧ, ᲂу҆слы́ши на́съ и҆ помѧнѝ на́съ смѣре́нныхъ и҆ ѡ҆сꙋжде́нныхъ, и҆ воꙁврати плѣне́нїе дш҃ъ на́шихъ, твоѐ милова́нїе и҆мѣ́ѧ ѡ҆ на́съ молѧ́щеесѧ. Прїймѝ на́съ припада́ющихъ тѝ, и҆ вопїю́щихъ, согрѣши́хѡмъ, къ тебѣ̀ приверже́ни є҆смы̀ ѿ ᲂу҆тро́бы, ѿ чре́ва ма́тере на́шеѧ ты́ є҆си Бг҃ъ на́шъ. Но ꙗ҆́кѡ и҆счеꙁѡ́шѧ въ сꙋетѣ̀ дні́е на́ши, ѡ҆бнажи́хѡмсѧ твое́ѧ по́мощи, лиши́хѡмсѧ всѧ́кагѡ ѿвѣ́та, но надѣю́щесѧ благоꙋтро́бїю твое́мꙋ, зове́мъ, грѣхѝ ю҆́ности на́шеѧ, и҆ невѣдѣ́нїѧ не помѧнѝ, и҆ ѿ та́йныхъ на́шихъ ѡ҆чи́сти на́съ, ви́ждъ смѣре́нїе на́ше, и҆ не ѿринѝ на́съ въ вре́мѧ ᲃта́рости, вне́гда и҆счеꙁа́ти крѣ́пости на́шей, не ѡ҆ста́ви на́съ, пре́жде да́же на́мъ въ зе́млю не воꙁврати́тисѧ, сподобѝ къ тебѣ̀ воꙁврати́тисѧ, и҆ во́нми на́мъ благопрїѧ́тїемъ и҆ благода́тїю, воꙁмѣрѝ беꙁꙁакѡ́нїѧ на́шѧ щедрѡта́ми твои́ми, съпроти́въ поста́ви бе́ꙁднꙋ щедрѡ́тъ твои́хъ мнѡ́жествꙋ ᲃогрѣше́нїй на́шихъ. При́ꙁри съ высоты̀ ᲃт҃ы́ѧ твое́ѧ Гд҃и, на предстоѧ́щїѧ лю́ди твоѧ̀, и҆ ча́ющїѧ є҆́же ѿ тебѐ бога́тыѧ ми́лости, посѣтѝ на́съ бла́гостїю твое́ю, помѧнѝ на́съ въ щедрѡта́хъ твои́хъ, и҆ꙁмѝ на́съ ѿ наси́л̾ствїѧ дїа́волѧ. Ꙋ҆твердѝ живо́тъ на́шъ ᲃт҃ы́ми твои́ми и҆ сш҃е́нными за́коны. А҆́гг҃ла вѣ́рна храни́телѧ приста́ви люде́мъ твои́мъ, всѣ́хъ соберѝ въ твоѐ Ца́рствїе, да́ждъ ми́лость ᲂу҆пова́ющимъ на́ тѧ̀, ѡ҆ста́ви и҆́мъ и҆ на́мъ согрѣшенїѧ, ѡ҆чи́сти на́съ дѣ́йствомъ ᲃт҃а́гѡ тѝ Дх҃а, раꙁдрꙋшѝ ꙗ҆́же на на́съ ко́ꙁни вра́жїѧ.

Блⷭ҇ве́нъ є҆сѝ Влады́ко Бж҃е Вседержи́телю, просвѣти́вый де́нь ᲃвѣ́томъ ᲃолне́чнымъ, и҆ но́щъ ᲂу҆ѧсни́вый за́рѧми ѻ҆́гненными, долготꙋ̀ дне́внꙋю прейтѝ на́мъ сподоби́вый, и҆ приближи́тисѧ нача́ткѡмъ но́щи, ᲂу҆слы́ши моле́нїѧ на́шѧ, и҆ всѣ́хъ люді́й твои́хъ, и҆ всѣ́мъ на́мъ прости́въ во́л̾наѧ и҆ не во́л̾наѧ согрѣше́нїѧ, прїймѝ вече́рнѧѧ на́шѧ моле́нїѧ, и҆ ниꙁпослѝ мнѡ́жество ми́лости твое́ѧ, и҆ щедрѡты̀ твоѧ̀ на достоѧ́нїе твоѐ, ѡ҆стѣнѝ на́съ ᲃт҃ы́ми А҆́гг҃лы твои́ми, въѡрꙋжѝ на́съ ѻ҆рꙋ́жїемъ пра́вды твое́ѧ, пригвоꙁдѝ на́с и҆́стиннѣ твое́й, ѡ҆градѝ на́съ ᲃи́лою твое́ю, и҆ꙁмѝ на́съ ѿ всѧ́кагѡ ѡ҆бстоѧ́нїѧ всѧ́кагѡ навѣ́та ᲃопроти́внагѡ, пода́ждъ же на́мъ и҆ настоѧ́щїй ве́черъ съ приходѧ́щею но́щїю, съверше́нъ, ᲃт҃ъ, ми́ренъ, беꙁгрѣ́шенъ, беꙁ̾со́блаꙁненъ, беꙁмечта́ненъ и҆ всѧ̀ днѝ живота̀ на́шегѡ, Моли́твами ᲃт҃ы́ѧ Бц҃а, и҆ всѣ́хъ ᲃт҃ы́хъ ѿ вѣ́ка тебѣ̀ благоꙋгоди́вшихъ.

А҆́бїе же глаголе́тъ Дїа́конъ.

Застꙋпѝ, спасѝ, поми́лꙋй, воста́ви и҆ сохранѝ на́съ Бж҃е твое́ю благода́тїю.

Пресвѧтꙋ́ю, чⷭ҇тꙋю, и҆ преблагослове́ннꙋю, ᲃла́внꙋю Влады́чицꙋ на́шꙋ Бц҃ꙋ, и҆ прⷭ҇нѡ Дв҃ꙋ Мр҃ію, съ всѣ́ми ст҃ы́ми помѧнꙋ́вше, ᲃа́ми ᲃебѐ и҆ дрꙋ́гъ дрꙋ́га, и҆ ве́съ живо́тъ на́шъ Хрⷭ҇тꙋ̀ Бг҃ꙋ предади́мъ.

Во́ꙁгласъ:

Твое́ бо є҆́стъ є҆́же ми́ловати, и҆ ᲃпаса́ти на́съ Гд҃и Бж҃е на́шъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ, и҆ въ вѣ́ки вѣ́кѡвъ.

Ли́къ:

А҆ми́нь.

Дїа́конъ же гл҃етъ сі́ѧ.

Рцѣ́мъ всѝ.

Ѿ всеѧ̀ дш҃а̀, и҆ ѿ всегѡ̀ помышле́нїѧ, рцѣ́мъ всѝ.

Гд҃и Вседержи́телю Бж҃е ѡ҆ц҃ъ на́шихъ, моли́мъ:

Поми́лꙋй на́съ Бж҃е по вели́цѣй ми́лости твое́й, моли́м̾тисѧ ᲂу҆слы́ши и поми́лꙋй.

Е҆щѐ моли́мсѧ ѡ҆ вели́комъ Королѝ на́шемъ, И҆мⷬ҇къ:

Е҆щѐ моли́мсѧ ѡ҆ Преѡсвѧще́нномъ А҆рхіепⷭ҇пѣ на́шемъ, И҆мⷬ҇къ:

А҆́ще є҆́стъ Монасты́ръ, гл҃етъ и҆ сі́е.

Е҆щѐ моли́мсѧ ѡ҆ ѡ҆ставле́нїи грѣхѡ́въ рабꙋ̀ Бж҃ію ѿцꙋ̀ на́шемꙋ А҆рхіма́ндритꙋ, и҆лѝ, И҆гꙋ́менꙋ И҆мⷬ҇къ: и҆ все́й ѡ҆ Христѣ̀ бра́тїи на́шей.

Е҆щѐ моли́мсѧ ѡ҆ всѣ́хъ слꙋжа́щихъ и҆ послꙋжи́вшихъ въ ᲃт҃ѣ́й ѻ҆би́тели ᲃе́й.

Е҆щѐ моли́мсѧ ѡ҆ бра́тїѧхъ на́шихъ І҆еромона́сехъ, І҆ере́ехъ, и҆ все́мъ ѡ҆ Хє҃ бра́тствѣ на́шемъ.

Е҆щѐ моли́мсѧ ѡ҆ блаже́нныхъ и҆ прⷭ҇нѡпомина́емыхъ Кти́торехъ ᲃт҃ы́ѧ ѻ҆би́тели сеѧ̀, и҆ всѣ́хъ пре́жде почи́вшихъ ѡ҆тце́хъ и҆ бра́тїѧхъ на́шихъ, здѐ лежа́щихъ и҆ повсю́дꙋ правосла́вныхъ.

Е҆щѐ моли́мсѧ ѡ҆ плодоносѧ́щихъ и҆ добродѣ́ющихъ въ ᲃт҃о́мъ и҆ всечестно́мъ хра́мѣ се́мъ, трꙋжда́ющихсѧ, пою́щихъ, и҆ предстоѧ́щихъ лю́дех, и҆ ча́ющихъ ѿ тебѐ вели́кїѧ и҆ бога́тыѧ ми́лости.

Е҆щѐ моли́мсѧ за всѧ̀ бра́тїѧ на́шѧ, и҆ за всѧ̀ правосла́вныѧ хрⷭ҇тїѧ́ны.

Во́ꙁгласъ:

Ꙗ҆́кѡ ми́лостивъ и҆ чл҃кѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

А҆́бїе же Дїа́конъ глаголе́тъ.

Па́ки и҆ па́ки прекло́н̾ше колѣ́нѣ, Гд҃ꙋ помоли́мсѧ.

Ли́къ пое́тъ:

Гд҃и поми́лꙋй, гⷤ.

Сщ҃е́нникъ же чтетъ ᲃі́ю Моли́твꙋ вто́рꙋю велегла́снѡ.

Гд҃и І҆и҃с Хє҃ Бж҃е на́шъ, ми́ръ тво́й пода́вый чл҃кѡмъ, и҆ прⷭ҇та́гѡ Дх҃а да́ръ, є҆щѐ въ жи́тїи и҆ съ на́ми ᲃы́й, въ наслѣ́дїе неѿе́млемое вѣ́рнымъ прⷭ҇нѡ подава́ѧй, ꙗ҆вленѣ́йше же сі́ю благода́ть твои́мъ ᲂу҆́чникѡмъ и҆ А҆пⷭ҇лѡмъ днесь ниспосла́вый, и҆ си́хъ ᲂу҆стнѣ̀ ѻ҆́гненными ᲂу҆тверди́вый ѧ҆ꙁы́ки, и҆́ми же ве́сь ро́дъ члчⷭ҇кїй Богораꙁꙋ́мїе свои́мъ ко́ждѡ ꙗ҆ꙁы́комъ въ слꙋ́хъ ᲂу҆́ха прїи́мше, ᲃвѣ́томъ Дх҃а просвѣти́хѡмсѧ, и҆ пре́лести ꙗ҆́коже тмы̀ и҆ꙁмѣни́хѡмсѧ, и҆ чꙋвстве́нныхъ ѻ҆́гненныхъ ѧ҆ꙁы́къ пода́нїемъ, и҆ преєстестве́ннымъ дѣ́йствомъ, є҆́же въ тѧ вѣ́ры наꙋчи́хѡмсѧ, и҆ тебѐ Богослови́ти съ Ѿце́мъ, и҆ ᲃт҃ы́мъ Дх҃омъ, въ є҆ди́номъ Бж҃ствѣ̀, и҆ ᲃи́лѣ, и҆ Вла́сти просвѣти́хомсѧ.

Ты̀ ᲂу҆́бѡ Ѿч҃ее ᲃїѧ́нїе, ᲃꙋщества̀ и҆ є҆стества̀ є҆гѡ̀, неиꙁмѣ́нный, и҆ непрело́жный ѻ҆́браꙁе, и҆сто́чниче Премꙋ́дрости и҆ Благода́ти, ѿверꙁѝ и҆ мнѣ̀ грѣ́шномꙋ ᲂу҆стнѣ̀, и҆ наꙋчѝ мѧ ка́кѡ досто́итъ, и҆ ѡ҆ и҆́х̾же потре́ба моли́тисѧ. Ты́ бо є҆сѝ вѣды́й мно́гое гр́хѡ́въ мои́хъ мнѡ́жество, но твоѐ благоꙋтро́бїе побѣди́т си́хъ беꙁ̾чи́сл̾ное, ᲃе бо съ стра́хомъ предстою́ тѝ, въ глꙋбинꙋ̀ ми́лости твое́ѧ ѿчаѧ́нїе дш҃а̀ мое́ѧ пове́рг, ѡ҆кормѝ живо́тъ мо́й, ᲃло́вомъ всю̀ тва́ръ неиꙁрече́нною премꙋ́дрости ᲃи́лою наставлѧ́ѧй, ти́хое ѡ҆бꙋрева́емымъ приста́нище, и҆ скажи́ мѝ пꙋ́ть во́нже по́йдꙋ. Дх҃ъ премꙋ́дрости твое́ѧ мои́мъ пода́ждъ помышле́нїемъ, Дх҃ъ ра́ꙁꙋма беꙁꙋ́мїю мое́мꙋ дарꙋ́ѧ, Дх҃ъ ᲃтра́ха твое́гѡ, мои́мъ ѡ҆сѣнѝ дѣ́лѡмъ, и҆ Дх҃ъ пра́вый ѡ҆бновѝ въ ᲂу҆тро́бѣ мое́й, и҆ Дх҃омъ Владычествꙋ́ющимъ, мы́слїй мои́хъ пополꙁнове́нїе ᲂу҆твердѝ, ꙗ҆́кѡ да на всѧ́къ де́нь Дх҃омъ твои́мъ благи́мъ къ по́леꙁномꙋ наставлѧ́ємъ сподобле́нъ бꙋ́дꙋ твори́ти за́повѣди твоѧ̀, и҆ твоѐ прⷭ҇нѡ памѧтствова́ти сла́вное Прише́ствїе, и҆ и҆стѧꙁа́тел̾ое содѣѧ́нныхъ на́ми, и҆ да не пре́ꙁриши мѧ̀ тлѣ́нными сопрел̾ща́тисѧ мі́ра сегѡ̀ кра́сными, но бꙋ́дꙋщыхъ воспрїѧ́тїѧ жела́ти ᲂу҆крѣпѝ сокро́вищъ.

Ты́ бо ре́клъ є҆сѝ Влады́ко, є҆ли́ка кто̀ про́ситъ ѡ҆ твое́мъ и҆́мени, невоꙁбра́ннѡ прїе́млетъ ѿ твое́гѡ соприсꙋ́щнагѡ Бг҃а и҆ Ѿц҃а̀. Тѣ́мже и҆ а҆́ꙁъ грѣ́шный въ прише́ствїи ᲃт҃а́гѡ твое́гѡ Дх҃а, твою̀ молю̀ бла́гость, є҆ли́ка проси́хъ воꙁда́ждъ мѝ въ ᲃпⷭ҇нїе.

Е҆́й Гд҃и всѧ́кагѡ благодѣѧ́нїѧ бога́тый да́телю, пода́телю благі́й, ꙗ҆́кѡ ты̀ є҆сѝ подава́ѧй преиꙁ̾ѡби́л̾нѡ и҆́хъ же про́симъ.

Ты́ є҆сѝ проща́ѧй и҆ ми́лꙋѧй, и҆́же беꙁ̾грѣ́шнѣ бы́лъ є҆сѝ пло́ти на́шей прича́стникъ, и҆ прекланѧ́ющимъ къ тебѣ̀ колѣ́нѣ, прекланѧ́ешисѧ благоꙋтро́бнѣ, ѡ҆чище́нїе же быва́ѧ согрѣше́нїемъ на́шимъ, да́ждъ ᲂу҆́бѡ Гд҃и люде́мъ твои́мъ щедрѡты̀ твоѧ̀, ᲂу҆слы́ши на́съ съ нб҃сѐ ᲃт҃а́гѡ твое́гѡ, ѡ҆ст҃ѝ на́съ ᲃи́лою ᲃпⷭ҇тел̾ныѧ десни́ца твое́ѧ, покры́й на́съ кро́вомъ кри́лꙋ твое́ю.

Да не пре́ꙁриши дѣ́лъ рꙋ́кꙋ твое́ю, тебѣ̀ є҆ди́номꙋ согрѣша́емъ, но и҆ тебѣ̀ є҆ди́номꙋ ᲃлꙋ́жимъ, не вѣ́мы кла́нѧтисѧ Бг҃ꙋ чꙋ́ждемꙋ, ни́ же простира́ти рꙋ́ки на́шѧ Влады́ко къ Бг҃ꙋ и҆́номꙋ, ѡ҆ста́ви на́мъ согрѣше́нїѧ, и҆ прїи́мъ на́ша колѣнопокло́нныѧ моле́нїѧ, прострѝ всѣ́мъ на́мъ рꙋ́кꙋ по́мощи, прїймѝ Моли́твꙋ всѣ́хъ ꙗ҆́кѡ кади́ло прїѧ́тное, воспрїе́млемое пре́дъ твои́мъ преблаги́мъ ца́рствомъ.

Гд҃и Гд҃и, и҆ꙁбавлѧ́ѧй на́съ ѿ всѧ́кїѧ стрѣлы̀ летѧ́щїѧ въ днѝ, и҆ꙁба́ви на́съ и҆ ѿ всѧ́кїѧ ве́щи въ тмѣ̀ преходѧ́щїѧ, прїймѝ же́ртвꙋ вече́рнюю рꙋ́къ на́шихъ воꙁдѣѧ́нїѧ, сподоби́ же на́съ и҆ но́щное по́прище беꙁъ поро́ка прейтѝ неискꙋ́снымъ ѿ злы́хъ, и҆ и҆ꙁба́ви на́съ ѿ всѧ́кагѡ смꙋще́нїѧ и҆ стра́ха, ѿ дїа́вола на́мъ прибыва́ющагѡ, дарꙋ́й дш҃а́мъ на́шимъ ᲂу҆миле́нїе, и҆ по́мыслѡмъ на́шимъ попече́нїе, на ᲃтра́шномъ и҆ пра́ведномъ твое́мъ ᲃꙋ́дѣ и҆спыта́нїѧ, пригвоꙁдѝ ᲃтра́хомъ твои́мъ пло́ти на́шѧ, и҆ ᲂу҆мертвѝ ᲂу҆́ды на́шѧ сꙋ́щыѧ на землѝ, ꙗ҆́кѡ да и҆ ᲃо́ннымъ беꙁ̾мо́л̾вїемъ просвѣти́мсѧ зрѣ́нїемъ ᲃꙋде́бъ твои́хъ, ѿста́ви ѿ на́съ всѧ́кое мечта́нїе неподо́бное, и҆ по́хоть вре́днꙋю, воста́ви же на́съ въ вре́мѧ Моли́твы, ᲂу҆твержде́нныхъ въ Вѣ́рѣ, и҆ преспѣва́ющихъ въ за́повѣдехъ твои́хъ.

Дїа́конъ же гл҃етъ.

Застꙋпѝ ᲃпасѝ, поми́лꙋй, воꙁста́ви:

Прⷭ҇тꙋ́ю чⷭ҇тꙋю преблⷭ҇г:

І҆ере́ѵ꙼ же воꙁгла́съ Моли́твѣ.

Благоволе́ніємъ и҆ благодатїю беꙁнача́лнагѡ тѝ Ѿц҃а̀ съ ни́мъ же:

Та́жъ, Сподобѝ Гд҃и въ ве́черъ се́й:

А҆́бїе же посе́мъ гл҃етъ Дїа́конъ.

Па́ки и҆ па́ки прекло́н̾ше колѣ́нѣ, Гд҃ꙋ помоли́мсѧ.

І҆ере́ѵ꙼ же чтетъ Моли́твꙋ, г҃-ю.

Присносꙋ́щнѡ кипѧ́щїй, живо́тный и҆ просвѣти́тел̾ный и҆сто́чниче, соприсносꙋ́щнаѧ Ѿц҃ꙋ̀ ᲃодѣ́телнаѧ ᲃи́ло, всесмотре́нїе за спасе́нїѧ члчⷭ҇кое, прекра́снѣ и҆сполни́вый Хє҃ Бж҃е на́шъ, ᲃме́рти ᲂу҆́ꙁы нераꙁдрѣши́мыѧ, и҆ затво́ры а҆́довы раꙁдрꙋши́вый, лꙋка́выхъ же дꙋ́хѡвъ мнѡ́жество попра́вый, приведы́й себѐ ѡ҆ на́съ непоро́чное заколе́нїе, и҆ Тѣ́ло да́вый пречи́стое въ Же́ртвꙋ, всѧ́кагѡ грѣха̀ неприкоснове́нное же и҆ непрохо́дно сꙋ́щее, и҆ ᲃтра́шнагѡ ра́ди ᲃегѡ̀, и҆ нескаꙁа́ннагѡ ᲃвѧщеннодѣ́йства, живо́тъ на́мъ вѣ́чный дарова́вый, въ а҆́дъ сше́дый, и҆ ве́рѣѧ вѣ́чныѧ сокрꙋши́вый, и҆ до́лѣ сѣдѧ́щимъ восхо́дъ покаꙁа́вый, началоꙁло́бнагѡ же и҆ глꙋби́ннагѡ змїѧ̀, Богомꙋ́дростным л̾ще́нїемъ ᲂу҆лови́вый, и҆ плени́цами мра́ка свѧꙁа́вый въ та́ртарѣ и҆ ѻ҆гнѝ негаси́момъ, и҆ въ тмѣ̀ кромѣ́шной неисчетноси́л̾ною тѝ затвори́вый ᲃи́лою. Великоимени́таѧ Премꙋ́дрости Ѿч҃аѧ, напаствꙋ́емымъ вели́кїй послꙋша́тель ꙗ҆ви́выйсѧ, и҆ просвѣти́вый сѣдѧ́щихъ въ тмѣ̀ и҆ сѣ́ни сме́ртнѣй.

Ты ᲃла́вы прⷭ҇нѡсꙋщныѧ Гд҃и, и҆ Ѿц҃а̀ Вы́шнѧгѡ ᲃн҃е воꙁлюбле́нный, прⷭ҇нѡсꙋ́щный ᲃвѣ́те, ѿ прⷭ҇нѡсꙋ́щнагѡ свѣ́та, ᲃо́лнце пра́вды, ᲂу҆слы́ши на́съ молѧ́щихсѧ, и҆ ᲂу҆поко́й дш҃ѧ̀ рабѡ́въ твои́хъ, пре́жде ᲂу҆сѡ́пшихъ ѡ҆ц҃ъ и҆ бра́тїй на́шихъ, и҆ про́чїихъ ᲃърѡ́дникъ по пло́ти, и҆ всѣ́хъ прⷭ҇ныхъ въ вѣ́рѣ, ѡ҆ ни́хъ же и҆ па́мѧть тво́римъ ны́нѣ, ꙗ҆́кѡ въ тебѣ̀ всѣ̀хъ держа́ва, и҆ въ рꙋцѣ̀ твое́й ᲃъдержи́ши всѧ̀ ко́нцѧ землѧ̀. Влады́ко Вседержи́телю, Бж҃е ѡ҆ц҃ъ, и҆ Гд҃и ми́лости, ро́да сме́ртнагѡ же и҆ беꙁсме́ртнагѡ, и҆ всѧ́кагѡ є҆стества̀ ᲃъдѣ́телю, съставлѧ́емагѡ же и҆ па́ки раꙁлива́емагѡ, живота́ же и҆ сконча́нїѧ, є҆́же здѐ пребыва́нїѧ, и҆ є҆́же та́мѡ преложе́нїѧ, лѣ́та и҆ꙁмѣрѧ́ѧй живы́мъ, и҆ времена̀ ᲂу҆ставлѧ́ѧй сме́рти, ниꙁводѧ́й въ а҆́дъ и҆ воꙁводѧ́й, свѧ́ꙁꙋѧй въ не́мощи, и҆ ѿпꙋща́ѧй въ си́лѣ, настоѧ́щаѧ потре́бнѣ строѧ́й, и҆ бꙋ́дꙋщаѧ по́леꙁнѡ ᲂу҆правлѧ́ѧй, ᲃме́ртнымъ жа́ломъ ᲂу҆ѧꙁве́нныхъ, въскрⷭ҇нїѧ веселѧ́ѧй наде́ждами, Са́мъ Влады́ко всѣ́хъ, Бж҃е ᲃп҃си́телю на́шъ, наде́ждо всѣ́мъ ко́нцемъ землѧ̀, и҆ сꙋ́щимъ во мо́ри дале́че, и҆́же и҆ въ се́й послѣ́днїй и҆ вели́кїй ᲃп҃си́телный де́нь Пѧтдесѧ́тници Пра́ꙁдника, Та́йнꙋ ᲃт҃ы́ѧ и҆ є҆диносꙋ́щныѧ и҆ сопрⷭ҇нѡсꙋ́щныѧ, нераꙁдѣли́мыѧ и҆ несли́тныѧ Трⷪ҇ца покаꙁа́вый на́мъ, и҆ ꙗ҆вле́нїе и҆ прише́ствїе ᲃта́гѡ и҆ животворѧ́щагѡ тѝ Дх҃а, въ видѣ́нїи ѻ҆́гненныхъ ѧ҆ꙁы́къ на ᲃт҃ы́ѧ твоѧ̀ А҆пⷭ҇лы и҆ꙁлїѧ́вый, и҆ Благовѣ́стники тѣ́хъ поста́вивый благочести́выѧ на́шеѧ вѣ́ры, и҆ и҆сповѣ́дники и҆ проповѣ́дники, и҆́стиннагѡ Богосло́вїѧ покаꙁа́вый, и҆́же и҆ въ се́й всесъверше́нный и҆ ᲃпаси́тел̾ный Праꙁдникъ, ᲂу҆милостивле́нїѧ ᲂу҆́бѡ моле́бнаѧ ѡ҆ и҆́же въ а҆́дѣ держи́мыхъ сподоби́вый прїйма́ти, вели́кїѧ же подава́ѧй на́мъ наде́жды ѡ҆слабле́нїѧ ᲃъдержи́мыхъ и҆́хъ ско́рбїй, и҆ ᲂу҆тѣше́нїи тобо́ю ниꙁпосыла́тисѧ.

Ꙋ҆слы́ши на́съ смѣре́нныхъ твои́хъ рабъ молѧ́щихътисѧ, и҆ ᲂу҆поко́й дш҃ѧ̀ рабъ твои́хъ пре́жде ᲂу҆сѡ́пшихъ, на мѣ́стѣ ᲃвѣ́тлѣ, на мѣ́стѣ зла́чнѣ, на мѣ́стѣ прохлажде́нїѧ, ѿню́дꙋже ѿбѣжѐ всѧ́каѧ бо́лѣꙁнь, печа́ль и҆ воꙁдыха́нїе, и҆ вчинѝ дꙋ́хи и҆́хъ въ ᲃки́нїѧхъ пра́ведныхъ, и҆ ми́ра и҆ ѡ҆слабле́нїѧ сподобѝ и҆́хъ, ꙗ҆́кѡ не ме́ртвїи восхва́лѧтъ тѧ Гд҃и, ни́ же ᲃꙋ́щїи въ а҆́дѣ и҆сповѣда́нїе дерꙁнꙋ́тъ принестѝ тебѣ̀, но мы живїи блⷭ҇ви́мъ тѧ и҆ моли́мъ, и҆ ᲂу҆млⷭ҇тиви́тел̾ныѧ Моли́твы и҆ Же́ртвы принѡ́симъ тѝ ѡ҆ дш҃а́хъ и҆́хъ.

Бж҃е Вели́кїй и҆ Вѣ́чный, ᲃт҃ый чл҃кѡлюби́вый, сподоби́вый на́съ въ се́й часъ ста́ти пре́дъ непристꙋ́пною тѝ ᲃла́вою, на пѣ́нїе и҆ хва́лꙋ чꙋде́съ твои́хъ, ᲂу҆милостиви́сѧ на́мъ недосто́йнымъ рабѡ́мъ твои́мъ, и҆ пода́ждъ благода́ть є҆́же сокрꙋше́нным ᲃе́рдцемъ невоꙁноси́тел̾нѡ приноси́ти тебѣ̀ Тріст҃о́е ᲃлавосло́вїе, и҆ благодаре́нїе вели́кихъ тѝ да́рѡвъ, ꙗ҆́же сотвори́лъ є҆сѝ къ на́мъ и҆ тво́риши всегда̀.

Помѧнѝ Гд҃и не́мощъ на́шꙋ, и҆ да не погꙋби́ши на́съ съ беꙁꙁакѡ́нїи на́шими, но сътворѝ вели́кꙋю ми́лость, съ смѣре́нїемъ на́шимъ, ꙗ҆́кѡ да грѣхѡ́вныѧ тмы̀ и҆ꙁбѣжа́вше, въ днѐ пра́вды шествова́ти бꙋ́демъ, и҆ ѡ҆дѣѧ́вшесѧ ѡ҆рꙋжїемъ свѣ́та, ненавѣ́тни пребꙋ́демъ ѿ всѧ́кїѧ ко́ꙁни лꙋка́вагѡ, и҆ съ дерꙁнове́нїемъ просла́вимъ ѡ҆ всѣ́хъ, тебѐ є҆ди́нагѡ и҆́стиннагѡ и҆ чл҃кѡлю́бца Бг҃а. Твое́ бо ꙗ҆́кѡ въи́стиннꙋ, и҆ вели́кое врѣснотꙋ̀ та́инство Влады́ко всѣ́хъ и҆ Тво́рче, вре́менное рѣше́нїе твои́хъ тва́рїй, и҆ є҆́же по си́хъ съвокꙋпле́нїе и҆ ᲂу҆покое́нїе є҆́же въ вѣ́ки.

Тебѣ̀ благода́ть ѡ҆ всѣ́хъ и҆сповѣдꙋ́емъ, ѡ҆ въхо́дѣхъ на́шихъ ꙗ҆́же въ мі́ръ се́й, и҆ и҆схо́дѣхъ, ꙗ҆́же наде́жды на́мъ Въскрⷭ҇нїѧ и҆ жи́ꙁни нетлѣ́нныѧ, ѿ твое́гѡ нело́жнагѡ ѡ҆бѣща́нїѧ предѡбрꙋча́ютъ, ꙗ҆́же прі́ймемъ въ бꙋ́дꙋщомъ Вто́ромъ Прише́ствїи твое́мъ. Ты́ бо є҆сѝ и҆ въскрⷭ҇нїю на́шемꙋ нача́л̾никъ, и҆ ѡ҆живле́нный и҆ нелицемѣ́рный и҆ чл҃кѡлюби́вый ᲃꙋдїѧ, и҆ мꙁдовоꙁдаѧ́нїѧ Влады́ко и҆ Гд҃ь, и҆́же и҆ приѡбщи́лсѧ є҆сѝ и҆́скрнѡ на́шей пло́ти и҆ крвѝ съниꙁхожденїѧ ра́ди кра́йнѧгѡ, и҆ на́шѧ стра́сти непрело́жны въ є҆́же самово́л̾нѣ въ и҆скꙋ́съ поста́вити, прїѧ́лъ є҆сѝ за милосе́рдїе щедро́тъ, и҆ въ не́мъ же пострада́лъ є҆сѝ ᲃа́мъ и҆скꙋси́всѧ, и҆скꙋша́емымъ на́мъ бы́въ ᲃамоѡбѣща́нный помо́щникъ, тѣ́мъ же и҆ съвоꙁве́лъ є҆сѝ на́съ въ твоѐ беꙁъстра́стїе.

Прїймѝ ᲂу҆бѡ Влады́ко мо́л̾бы и҆ моле́нїѧ на́шѧ, и҆ ᲂу҆поко́й всѧ̀ ѿцѧ̀ коего́ждѡ, и҆ ма́терѧ, и҆ чѧ́да, и҆ бра́тїю, и҆ ᲃе́стры, и҆ дрꙋ́ги, и҆ кꙋпнѡро́дныѧ, и҆ всѧ̀ почи́вшїѧ дш҃ѧ̀, ѡ҆ ᲂу҆пова́нїи воскрⷭ҇нїѧ и҆ жи́ꙁни вѣ́чныѧ, и҆ вчинѝ дх҃и и҆́хъ и҆ и҆мена̀ въ Кни́ꙁѣ живо́тной, въ нѧ́дрехъ А҆враа́ма, и҆ І҆саа́ка, и҆ І҆а́кꙍва, въ ᲃтра́нѣ живы́хъ, въ Ца́рствїи нбⷭ҇номъ, въ Раѝ ᲃла́дости, ᲃвѣ́тлыхъ ра́ди А҆́гг҃лъ твои́хъ, въводѧ̀ всѧ̀ въ ᲃт҃ы́ѧ твоѧ̀ ѻ҆би́тели, съвоꙁдвиꙁа́ѧ и҆ тѣлеса̀ на́ша въ де́нь во́н̾же ѡ҆предѣли́лъ є҆сѝ по ᲃт҃ы́хъ твои́хъ и҆ нело́жныхъ ѡ҆бѣтова́нїихъ.

Нѣ́сть ᲂу҆́бѡ Гд҃и поми́лꙋй рабѡ́мъ твои́мъ ᲃме́рть и҆сходѧ́щимъ на́мъ ѿ тѣ́ла, и҆ къ тебѣ̀ Бг҃ꙋ на́шемꙋ приходѧ́щимъ, но преставле́нїе ѿ печал̾нѣ́йшихъ наполеꙁнѣ́йшаѧ и҆ ᲃластнѣ́йшаѧ, и҆ на ᲂу҆покое́нїе и҆ ра́дость.

А҆́ще же и҆ чтѡ̀ и҆ согрѣши́хѡмъ къ тебѣ̀, ми́лостивъ бꙋ́ди на́мъ же и҆ тѣ́мъ, занѐ ни є҆ди́нъ чистъ пре́дъ тобо́ю ѿ скве́рнъ, ни́ же а҆́ще и҆ є҆ди́нъ де́нь живо́тъ є҆гѡ̀ є҆стъ, ра́ꙁвѣ ты то́чїю є҆ди́нъ, на землѝ ꙗ҆ви́выйсѧ беꙁъгрѣ́шный Гд҃ь на́шъ І҆и҃с Хᲃ҃, и҆́мжѣ всѝ ᲂу҆пова́емъ ми́лость полꙋчи́ти, и҆ ѡ҆ставле́нїе грѣхѡ́въ, ᲃегѡ̀ ра́ди на́мъ же и҆ ѡ҆́нѣмъ ꙗ҆́кѡ бла́гъ и҆ чл҃кѡлю́бецъ ѡ҆сла́би, ѡ҆ста́ви, и҆ простѝ грѣхѡпаде́нїѧ на́шѧ во́л̾наѧ и҆ нево́л̾наѧ, ꙗ҆́же въ ра́ꙁꙋмѣ, и҆ ꙗ҆́же не въ раꙁꙋ́мїи, пред̾ꙗвле́ннаѧ, и҆ забыва́емаѧ, ꙗ҆́же въ дѣѧ́нїи, ꙗ҆́же въ помышле́нїи, ꙗ҆́же въ ᲃловесѝ, и҆ ꙗ҆́же въ всѣ́хъ на́шихъ ѡ҆бы́чаѧхъ и҆ движе́нїихъ, и҆ ѿше́дшимъ ᲂу҆́бѡ свободꙋ̀ и҆ ѡ҆сла́бꙋ дарꙋ́й, на́съ же сꙋ́щихъ зде благословѝ, коне́цъ благі́й и҆ ми́рный дарꙋ́ѧ на́мъ, и҆ всѣ́мъ люде́мъ твои́мъ, и҆ ми́лости и҆ чл҃кѡлю́бїѧ ᲂу҆тро́бꙋ ѿверꙁа́ѧ на́мъ на стра́шномъ и҆ ᲂу҆жа́сномъ твое́мъ прише́ствїи, и҆ ца́рствїѧ твое́гѡ досто́йныхъ на́съ сътворѝ.

Вѣ́стнѡ бꙋ́ди, ꙗ҆́кѡ въ Е҆́ллинскихъ зво́дехъ по Моли́твѣ се́й, а҆́бїе чте́тсѧ коне́чнаѧ Моли́тва Вече́рнѧѧ, сі́естъ, Бж҃е Вели́кїй и҆ вы́шнїй:

И҆ та́кѡ съверша́ютсѧ Моли́твы всѧ̀.

Мы́ же въ Рꙍссі́йской Це́ркви прилага́емъ и҆ си́ю послѣдꙋ́ющꙋю къ ᲃт҃о́мꙋ Дх҃ꙋ моли́твꙋ, ꙗ҆́кѡ семꙋ̀ Пра́ꙁдникꙋ прили́чнꙋю, и҆ въ всѣ́хъ Славе́нскихъ дре́внихъ зво́дехъ ѡ҆брѣта́ющꙋюсѧ, и҆ по не́й ѡ҆́нꙋю коне́чнꙋю Вече́рнюю прилага́емъ.

Творе́нїе ᲃт҃ѣ́шагѡ Патрїархи Кѡнстантінопо́лскагѡ Гдⷭ҇на Ѳі́лоѳєа.

Цр҃ю нбⷭ҇ый, Ꙋ҆тѣши́телю Влады́ко, събеꙁнача́л̾ный, и҆ прⷭ҇нѡсꙋ́щный, и҆ кꙋпносꙋ́щный, и҆ є҆диноче́стный Дш҃е Ѿц҃ꙋ̀ и҆ ᲃн҃ꙋ, Дш҃е и҆́стинный, ᲃꙋ́щїй, благі́й, ᲃт҃ы́й, Гдⷭ҇твꙋ́ѧй и҆ животворѧ́й, ѿ Ѿц҃а̀ и҆сходѧ́й неиꙁрече́ннѡ, и҆ на ᲃн҃ѣ почива́ѧй нераꙁъдѣ́л̾нѡ, ᲃн҃оположе́нїѧ и҆ ѡ҆боже́нїѧ ᲂу҆́мнагѡ и҆ ᲃлове́снагѡ є҆́стества прїѧтный, настоѧ́щихъ и҆ бꙋ́дꙋщихъ бла́гъ ᲃокро́вище, Дш҃е пра́вый, Дш҃е Влады́чнїй ѿ Ѿч҃ескагѡ соста́ва, и҆ ѿ Боже́стве́нныхъ и҆ беꙁнача́л̾ныхъ ᲂу҆́стъ є҆гѡ̀ нескаꙁа́ннѡ и҆сходѧ́й, ᲃоѵпоста́сное дыха́нїе, и҆ Премꙋ́дрости и҆ ᲃи́ло.

Дш҃е Бж҃ій и҆ ѿ Бг҃а, Дш҃е Ѿч҃їй и҆ ѿ Ѿц҃а̀, Дш҃е ᲃн҃о́внїй, Дш҃е Хв҃ъ, ѡ҆́на за є҆дино̀ ᲃꙋ́щество, и҆ є҆́же ѿ ѡ҆ню́дꙋ и҆схожде́нїе, ᲃі́ѧ за є҆дино̀ сꙋ́щество па́ки и҆ нераꙁлꙋ́чное, и҆ є҆́же ѿтꙋ́дꙋ и҆ꙁрече́нїе и҆ ꙗ҆вле́нїе.

Ты ᲂу҆бѡ бл҃гі́й Влады́ко, є҆ди́ный ѿ Трⷪ҇ца Бж҃е, и҆́стинный Бж҃е, ѿ и҆́стиннагѡ Бг҃а, раꙁꙋ́мнꙋю и҆ чꙋвстве́ннꙋю тваръ, въкꙋ́пѣ соꙁда́вый съ Ѿц҃емъ и҆ ᲃн҃омъ, и҆ ᲃі́ю неиꙁрече́нною Премꙋ́дростїю и҆ ᲃи́лою, и҆ ѡ҆бꙋꙁда́нїемъ неиꙁрече́ннагѡ про́мысла, па́че ᲃло́ва соѡкормлева́ѧй, и҆ съсвѧ́ꙁꙋѧй, и҆ ᲂу҆тверждаѧй, и҆ соблюда́ѧй.

Беꙁнача́лне, невиди́ме, непостижи́ме, недораꙁꙋмѣ́нне, неиꙁслѣдова́нне, неиꙁрече́нне, неисче́тне, беꙁчисленоси́лне, всемогі́й Гд҃и, пе́рвѣе Ѿцы̀ и҆ Прⷪ҇рки раꙁли́чнѡ дѣйствова́вый и҆ гл҃а́вый, и҆ ᲃт҃ы́ѧ Трⷪ҇ца та́йнꙋ покаꙁа́вый, и҆ неиꙁрече́нное пло́тское ᲃмотре́нїє ѿкри́вый є҆диноча́днагѡ ᲃн҃а и҆ Бг҃а.

Послѣ́ди же є҆́же на нб҃са̀ съ пло́тїю восхожде́нїѧ и҆ ᲂу҆ставле́нїѧ є҆гѡ̀, и҆ въ се́й Вели́кїй и҆ ᲃъверше́нный ᲃп҃си́тел̾ный Пѧт̾десѧ́тный Пра́ꙁдникъ, ра́ди єстестве́нныхъ тѝ да́рѡвъ и҆ благода́тїй, ꙗ҆́коже ᲃꙋществе́ннѣ ви́домъ ѻ҆́гненныхъ ꙗ҆ꙁы́къ просвѣти́вый мі́ръ, и҆ на ᲃт҃ы́хъ А҆пⷭ҇лѣхъ и҆ Ꙋ҆чн҃цѣхъ сѣды́й, и҆ твое́ю Бг҃олѣ́пною си́лою си́хъ ѡ҆болкі́й, и҆ и҆сполни́вый па́че є҆стестве́нныхъ и҆ неиꙁрече́нныхъ благода́тїй, по нело́жномꙋ ѡ҆бѣща́нїю Хв҃ꙋ, и҆́хже ра́ди всѧ́кое є҆стество̀ чл҃чское, вѣ́ры сло́во прїи́мше и҆́стиннагѡ Богораꙁꙋ́мїѧ и҆ благоче́стїѧ наꙋчи́хѡмсѧ, и҆ твое́ю просвѣти́вшесѧ неиꙁрече́нною ᲃи́лою и҆ дѣ́йствомъ, є҆ди́номꙋ Бг҃ꙋ въ трі́ехъ ли́цехъ то́чїю покланѧ́ти наꙋчи́хомсѧ.

Са́мъ ᲂу҆́бѡ Влады́ко ѡ҆ꙁаре́нїе Ѿч҃ее, живы́й и҆ неиꙁмѣ́нный Ѻ҆́браꙁе Ѿч҃їй, вкꙋ́пѣ и҆ ᲃн҃о́внїй непрело́жный Ѻ҆́браꙁе, и҆ Печа́ти ᲃꙋщества̀ и҆ є҆стества̀ и҆́хъ, и҆сто́чниче ѡ҆сщ҃е́нїѧ, беꙁъсме́ртїѧ же и҆ жи́ꙁни, и҆ въ бꙋ́дꙋщомъ непремѣ́нномъ и҆ беꙁъконе́чномъ вѣ́цѣ Вѣ́нче, и҆ коне́чное ᲃт҃ы́хъ въспрїѧ́тїе, въ не́мъ же Божества̀ вина̀ и҆ и҆сто́чникъ, є҆ди́ный нерожде́нный и҆ беꙁнача́лный Ѿц҃ъ и҆ Бг҃ъ, є҆диноча́днымъ ᲃн҃омъ и҆ Бг҃омъ, всеблаги́хъ подаѧ́нїе неꙁа́вистнѡ и҆ неиꙁрече́ннѡ, и҆ па́че є҆́стества дѣйствꙋ́етъ, въ настоѧ́щей и҆ бꙋ́дꙋщей жи́ꙁни, прїйми менѐ грѣ́шнагѡ и҆ недосто́йнагѡ моле́нїе и҆ въ се́й часъ, мнѡ́жество мои́хъ съгрѣше́нїй свѣ́дый є҆ди́нъ.

Поми́лꙋй мѧ по вели́цѣй твое́й ми́лости, и҆ по мнѡ́жествꙋ щедрѡ́тъ твои́хъ беꙁꙁакѡ́нїѧ моѧ̀ ѡ҆чисти, и҆ ѡ҆мы́й найпа́че ти́нꙋ съгрѣше́нїй мои́хъ, и҆ належа́щꙋю скве́рнꙋ стра́стїй мое́й ѡ҆чи́сти.

Е҆ди́не чи́стый и҆ пречи́стый, и҆ всѧ́кїѧ ᲃкве́рности, смра́да же и҆ стра́сти чисти́тел̾ный, ѡ҆чи́сти мѧ ѿ та́йныхъ мои́хъ, Гд҃и, и҆ ѿ чꙋ́ждыхъ и҆ꙁба́ви раба̀ твое́гѡ, грѣ́хъ ю҆́ности мое́ѧ, и҆ невѣде́нїѧ мое́гѡ, и҆ ста́рости ѡ҆каѧ́нства, не помѧнѝ, просвѣти́ мѝ помраче́нныѧ мы́сл̾ныѧ ѻ҆́чи, и҆ пога́сшїй ᲃвѣти́лникъ благода́ти въꙁже́гъ, наꙋчи́ мѝ ᲂу҆́мъ и҆скꙋ́сомъ, ѡ҆бы́чаемъ, и҆ дѣ́йствомъ ви́дѣти, ꙗ҆́кѡ є҆́стъ въи́стиннꙋ въ слове́сномъ є҆́стествѣ Дх҃ъ ᲃт҃ы́й.

Дарꙋ́й мѝ ᲃло́во благосочта́нное, и҆ ᲃи́лꙋ, и҆ высотꙋ̀, и҆ крѣ́пость, моли́твы чⷭ҇тыѧ и҆ просте́ртыѧ приноси́ти ѡ҆ лю́дехъ твои́хъ, и҆ ѡ҆ всемі́рной твое́й Це́ркви и҆ ста́дѣ, ю҆́же твое́ю си́лою и҆ дѣ́йствомъ, Кро́вїю є҆диноча́дагѡ ᲃн҃а и҆ Бг҃а и҆скꙋпле́ннꙋю, Бг҃олѣ́пнѡ въдрꙋꙁи́лъ и҆ съста́вилъ є҆сѝ.

Ꙋ҆твердѝ ю҆̀ на ка́мени и҆сповѣда́нїѧ Бжⷭ҇тва̀ непрекло́ннꙋ и҆ непоколѣби́мꙋ бы́ти, а҆́дскихъ две́рїй крѣпча́йшꙋ и҆ вы́шшꙋ, бѣсо́вскихъ дѣ́йствъ и҆ крѣ́постїй неприкоснове́ннꙋю и҆ не ᲂу҆ѧꙁве́ннꙋ, и҆сполне́ннꙋ всѧ́чески твое́ѧ крѣ́пости и҆ благода́ти.

Прїймѝ Цр҃ю Колѣнопреклоне́нїѧ и҆́хъ и҆ стена́нїѧ, ѡ҆́бщїѧ и҆ съгла́сныѧ, и҆ просте́ртыѧ Моли́твы, и҆ приле́жнаѧ моленїѧ, Вѣ́рꙋ и҆ Наде́ждꙋ.

И҆ да́ждъ и҆́мъ є҆́же къ тебѣ̀ є҆ди́номꙋ неꙋкло́ннѡ въꙁира́ти но́щїю и҆ дні́ю, и҆ къ и҆́номꙋ не зрѣ́ти ра́ꙁвѣ тебѐ Бг҃а и҆ Влады́ки, и҆ ѿ тебѐ є҆ди́нагѡ ᲃпасе́нїѧ ча́ѧти, и҆ проти́въ и҆́мъ и на́мъ всѧ́кое прегрѣше́нїе во́л̾ное же и҆ нево́л̾ное, ꙗ҆́кѡ Бг҃ъ преблагі́й же и҆ всемогі́й, и҆ настоѧ́щихъ зо́лъ премѣнѝ, и҆ прⷭ҇нѡсꙋ́щныхъ бла́гъ сподобѝ, Ми́лостїю и҆ чл҃кѡлю́бїемъ Бг҃а Ѿц҃а̀, и҆ съсꙋ́щнагѡ є҆гѡ̀ ᲃн҃а, и҆ тебѐ Пресвѧта́гѡ и҆ єдиночⷭ҇тнагѡ Дх҃а, є҆ди́нагѡ Тріѵпоста́снагѡ Бжⷭ҇тва̀, ны́нѣ и҆ прⷭ҇нѡ и҆ въ вѣ́ки вѣ́кѡвъ.

и҆ сею̀ съверша́емъ колѣнопрекло́нныѧ Моли́твы.

Бж҃е Вели́кїй и҆ Вы́шнїй, є҆ди́не и҆мѣ́ѧй беꙁъсм҃ртїе, въ свѣ́тѣ живы́й непристꙋ́пномъ, всю̀ тваръ мꙋ́дростїю соꙁда́вый, раꙁдѣли́вый посре́дѣ ᲃвѣ́та, и҆ посре́дѣ тмы̀, и҆ ᲃо́лнце ᲂу҆́бѡ положи́вый въ ѡ҆́бласть дне́ви, Лꙋнꙋ́ же и҆ Звѣ́ꙁды въ ѡ҆́бласть но́щи: Сподоби́вый на́съ гре́шныхъ въ настоѧ́щїй де́нь предвари́ти Лицѐ твоѐ въ и҆сповѣда́нїи, и҆ Вече́рнюю тѝ ᲃлꙋ́жбꙋ принестѝ.

Са́мъ чл҃кѡлю́бче Гд҃и, и҆спра́ви Моли́твꙋ на́шꙋ ꙗ҆́кѡ кади́ло пре́дъ тобо́ю, и҆ прїймѝ ю҆̀ въ во́ню благоꙋха́нїѧ, пода́ждъ на́мъ ве́черъ се́й и҆ настоѧ́щꙋю но́щъ ми́рнꙋ, ѡ҆блеци́ ны ѡ҆рꙋ́жїемъ ᲃвѣ́та, и҆ꙁмѝ на́съ ѿ стра́ха но́щнагѡ, и҆ ѿ всѧ́кїѧ ве́щи въ тмѣ̀ преходѧ́щїѧ, и҆ дарꙋ́й на́мъ ᲃо́нъ и҆́же въ ᲂу҆покое́нїе немощи на́шей дарова́лъ є҆сѝ ѿ всѧ́кагѡ дїа́вол̾скагѡ мечта́нїѧ сво́боденъ.

Е҆́й Влады́ко всѧ́ческихъ, благи́хъ пода́телю, ꙗ҆́кѡ да и на ло́жахъ на́шихъ ᲂу҆милѧ́ющесѧ воспомѧне́мъ и҆ въ нощи Прⷭ҇то́е И҆мѧ̀ твоѐ, и҆ раꙁмышле́нїемъ твои́хъ за́повѣдїй просвѣща́еми, въ ра́дости дш҃евной воста́немъ, къ славосло́вїю твое́ѧ бла́гости, Моли́твы и҆ моле́нїѧ твое́мꙋ благоꙋтро́бїю принѡсѧ́ще ѡ҆ свои́хъ ᲃъгрѣше́нїихъ, и҆ ѡ҆ всѣ́хъ лю́дехъ твои́хъ, и҆́хъ же Моли́твами Пртⷭ҇ы́ѧ Бц҃а, въ ми́лости посѣтѝ.

Ты́ бо є҆сѝ ᲂу҆покое́нїе дш҃а́мъ и҆ тѣлесе́мъ на́шимъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.

Ли́къ:

А҆ми́нь.

А҆́бїе же ѿ колѣ́ннагѡ преклоне́нїа вста́вше, Дїа́конъ гл҃єтъ.

Застꙋпѝ ᲃп҃сѝ поми́лꙋй, воꙁста́ви, и҆ сохранѝ на́съ:

Прⷭ҇тꙋ́ю чⷭ҇тꙋю Преблагослове́ннꙋю ᲃла́внꙋю Влады́чцꙋ:

І҆ере́ѵ꙼ Воꙁглаша́етъ.

Ты́ бо є҆сѝ ᲂу҆покое́нїе дш҃а́мъ и҆ тѣлесе́мъ на́шимъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ:

Та́же Дїа́конъ.

И҆спо́лнимъ вече́рнѧѧ моли́твы на́шѧ Гв҃и.

Застꙋпѝ ᲃп҃сѝ поми́лꙋй и҆ сохранѝ на́съ Бж҃е твое́ю:

Ве́чера всегѡ̀ соверше́нна ст҃а ми́рна и҆ беꙁгрѣ́шна:

А҆́гг҃ла ми́ра, вѣ́рна наста́вника, и҆ храни́телѧ:

Ми́лости и҆ ѡ҆ставле́нїе грѣхѡ́въ, и҆ прегрѣше́нїй на́ш:

До́брыхъ и҆ по́леꙁныхъ дш҃а́мъ на́шимъ, и҆ смире́нїе мі́р:

Про́чее лѣ́тъ живота̀ на́шегѡ во ми́рѣ и҆ покаѧ́нїи:

Хрⷭ҇тїѧ́нскїѧ кончи́ны живота̀ на́шегѡ, беꙁъ стра́ст:

Прⷭ҇тꙋ́ю чⷭ҇тꙋю Преблагослове́ннꙋю ᲃла́внꙋю Влады́чцꙋ:

І҆ере́ѵ꙼ Воꙁглаша́етъ:

Ꙗ҆́кѡ бла́гъ и҆ чл҃кѡлю́бецъ Бг҃ъ є҆сѝ и҆ тебѣ̀ ᲃла́вꙋ воꙁсыла́емъ:

І҆ере́ѵ:

Ми́ръ всѣ́мъ.

Дїа́конъ:

Гла́вы ва́шѧ Гв҃и преклон:

І҆ере́ѵ же та́йнѡ гл҃етъ Моли́твꙋ ѡ҆бы́чнꙋю, ꙗ҆́же є҆́стъ:

Гд҃и Бж҃е на́шъ преклон:

Та́же воꙁглаша́етъ:

Бꙋ́ди держ:

И҆ а҆́бїе совокꙋ́пл̾шиѧ ѻ҆́ба Ли́ка посре́дѣ, пою́тъ, на Сті́хъ: ᲃтіхи́ры ᲃамогла́сны, Гла́съ, г҃.

Ны́нѣ въ зна́менїе всѣ́мъ, ꙗ҆́вѣ ꙗ҆ꙁы́ци бы́шѧ, І҆ꙋде́и бо ѿ ни́х же по пло́ти Хᲃ҃, невѣ́рїемъ болѣ́вше, Бж҃іѧ благода́ти ѿпадѡ́ша, и҆ Божестве́нномꙋ ᲃвѣ́тꙋ, мы сꙋ́щїи ѿ ꙗ҆ꙁы́къ сподобле́ни бы́хѡмъ, ᲂу҆тверди́вшесѧ словесы̀ Ꙋ҆́ч҃ническими, гл҃ю́щими сла́вꙋ благода́телѧ всѣ́хъ Бг҃а, съ ни́ми же се́рдца со колѣ́нома прекло́н̾ше, вѣ́рою поклони́мсѧ ᲃт҃о́мꙋ Дх҃ꙋ, проповѣда́нномꙋ ᲃп҃сꙋ дш҃ъ на́шихъ.

Сті́хъ.

Се́рдце чи́сто соꙁи́жди во мнѣ̀, Бж҃е, и҆ Дх҃ъ пра́въ ѡ҆бновѝ въ:

Ны́нѣ ᲂу҆тѣши́тел̾ный Дх҃ъ, на всѧ́кꙋю плотъ и҆ꙁлїѧ́сѧ, ѿ А҆пⷭ҇лскихъ бо ли́кѡвъ наче́нши, ѿ тѣ́хъ по прича́стїю вѣ́рнымъ благода́ть простре́сѧ, и҆ ᲂу҆вѣрѧ́етъ своѐ держа́вное наше́ствїе, въ ѻ҆́гненномъ ви́дѣ, Ꙋ҆́ч҃никѡмъ раꙁдѣлѧ́ѧ ꙗ҆ꙁы́ки, въ пѣснопѣ́нїе и҆ ᲃла́вꙋ Бг҃а, тѣ́мъ ᲃе́рдцы мысле́ннѡ просвѣща́еми, и҆ вѣ́рою ᲂу҆тверди́вшесѧ, ᲃт҃о́мꙋ Дх҃ꙋ помоли́мсѧ, спасти́сѧ дш҃а́мъ на́шимъ.

Сті́хъ.

Не ѿвержѝ менє̀ ѿ лица̀ твое́гѡ и҆ Дх҃а твое́гѡ ᲃт҃а́гѡ не:

Ны́нѣ ѡ҆бла́чатсѧ держа́вою Христо́ви ᲃъвы́шше А҆пⷭ҇ли, ѡ҆бновлѧ́етъ бо и҆́хъ Ꙋ҆тѣши́телъ, въ ни́хъ ѡ҆бновлѧ́ѧсѧ таинстве́ннымъ ѡ҆бновле́нїемъ ра́ꙁꙋма, и҆́же стра́нными гла́сы, и҆ высокогл҃и́выми проповѣда́юще, прⷭ҇нѡсꙋ́щное є҆́стество, и҆ про́стое трѵсоста́вное почита́ти благодѣ́телѧ всѣ́хъ Бг҃а наꙋча́ютъ, тѣ́мъ же просвѣ́щшесѧ тѣхъ проповѣда́нїи, Ѿц҃ꙋ̀ поклони́мсѧ съ ᲃн҃омъ и҆ Дх҃омъ, молѧ́щесѧ спасти́сѧ дш҃а́мъ на́шимъ.

Сла́ва: И҆ ны́нѣ: Гла́съ, и҃.

Прїйдѣ́те лю́дїе, трисоста́вномꙋ Бжⷭ҇твꙋ̀ поклони́мсѧ, Сн҃ꙋ въ Ѿц҃ѝ, съ ᲃт҃ы́мъ Дх҃омъ:

Ѿц҃ъ бо беꙁлѣ́тнѡ родѝ Сн҃а съпрⷭ҇нѡсꙋ́щна и҆ съпрⷭ҇то́лна, и҆ Дх҃ъ ᲃт҃ы́й бѣ̀ въ Ѿц҃ѝ, съ ᲃн҃омъ прославлѧ́емъ. Е҆дина̀ ᲃи́ла, є҆дино̀ сꙋщество̀, є҆дино̀ Бжⷭ҇тво̀, є҆мꙋ́ же покланѧ́ющесѧ всѝ гл҃емъ:

Ст҃ы́й Бж҃е, всѧ̀ съдѣѧ́вый ᲃн҃омъ, дѣ́йствомъ ᲃт҃а́гѡ Дх҃а:

Ст҃ы́й крѣ́пкїй, и҆́мже Ѿц҃а̀ поꙁна́хѡмъ, и҆ Дх҃ъ ᲃт҃ы́й прїйде въ мі́ръ:

Ст҃ы́й бкꙁсм҃ртный, ᲂу҆тѣши́телный Дш҃е, ѿ Ѿц҃а̀ и҆сходѧ́й, и҆ въ ᲃн҃ѣ почива́ѧй:

Трⷪ҇це ᲃт҃а́ѧ ᲃла́ва тебѣ̀.

Та́же Ны́нѣ ѿпꙋща́еши: Трⷭ҇то́е: по Ѿч҃е на́шъ: Троп: Праꙁ: Блⷭ҇ве́нъ є҆сѝ Хє҃ Бж҃е на́шъ.

Та́же Ѿпꙋ́стъ.

И҆ꙁъ ѿчⷭ҇кихъ и҆ Бжⷭ҇тве́нныхъ нѧ́дръ и҆стощи́вый себѐ, и҆ ѿ нб҃сѐ на землю̀ съше́дый, и҆ на́ше все воспрїи́мый є҆́стество, и҆ ѡ҆бж҃и́вый є҆̀.

По си́хъ же а҆́бїе

На Нб҃са̀ воꙁнесы́йсѧ, и҆ ѡ҆де́снꙋю сѣды́й Бг҃а и҆ Ѿц҃а̀, Бжⷭ҇тве́ннагѡ же, и҆ ᲃт҃а́гѡ, и҆ є҆диносꙋ́щнагѡ, и҆ є҆диносилнагѡ, и҆ є҆диносла́внагѡ, и҆ съпрⷭ҇нѡсꙋ́щнагѡ Дх҃а ниꙁпосла́вый на ᲃт҃ы́ѧ ᲃвоѧ̀ Ꙋ҆́ченики и҆ А҆́пⷭ҇лы, и҆ тѣ́мъ просвѣти́вый ᲂу҆́бѡ си́хъ, и҆́ми же всю̀ вселе́ннꙋю, Хᲃ҃ и҆́стинный Бг҃ъ на́шъ Моли́твами Прчⷭ҇тыѧ и҆ пренепоро́чныѧ ᲃт҃ы́ѧ твое́ѧ Мт҃ре, ᲃт҃ы́хъ ᲃла́вныхъ, всехва́лныхъ, Бг҃опроповѣ́дникъ, и҆ дх҃онѡ́сныхъ А҆пⷭ҇лъ, и́ всѣ́хъ ᲃт҃ы́хъ, ᲃп̀си҃ и҆ поми́лꙋй на́съ, ꙗ҆́кѡ бла́гъ и҆ чл҃кѡлю́бецъ.