Акафист Пресвятой Богородице в честь иконы Ее Киево-Печерской

Празднование 3/16 мая и 15/28 августа

Кондак 1

Избра́нной от всех родо́в Пресвяте́й Деве Марии Богородице, яко воистину пло́тию рождшей Иисуса Христа, Спа́са и Бога нашего, Владычице всея́ вселенныя, избравшей вторым земным жребием Своим гору Печерскую и обитель иноком на ней создавшую, похвальная приносим пения. Ты же, о Всечестна́я наша Мати и Заступнице, храни и спаси обитель Твою и всех нас от враг видимых и невидимых, да зовем Ти: Радуйся, Пресвятая Богородице Дево, печерская похвало́ и наше утешение.

Икос 1

Ангел земны́й и человек небесный преподобный Антоний прии́де в земны́й жребий Твой на Гору Афо́нскую, спасти хотя душу свою от суеты мира сего и сконча́ти тамо житие свое земное. Ты же, Пресвятая Дево, избравши вторым жребием Своим гору Печерскую в новопросвеще́нной стране Русстей, послала его яко апостола, да устро́ит обитель в ней во славу Твою и соберет иноков, и да воспевают Тебе та́ко: Радуйся, Всечестна́я наша Мати; радуйся, дивная наша Игу́мение. Радуйся, надеждо нашего спасения; радуйся, горы́ Пече́рския Хранительнице. Радуйся, живущих на ней иноков Руководительнице; радуйся, приходя́щих к ней на поклонение православных христиан Покровительнице. Радуйся, Пресвятая Богородице Дево, печерская похвало́ и наше утешение.

Кондак 2

Ве́дый скорбный путь спасения для всех и́ночествовати хотя́щих Господь наш Иисус Христос, повеле́ Матери Своей, да простре́т Свой божественный покров над горою Печерскою, да вси спасающиися на ней, видяще сие́, с преподобными Антонием и Феодосием вку́пе взывают непрестанно Спасителю Богу: Аллилуиа.

Икос 2

Разум имея божественный преподобный Феодосий, от души́ возлюби́в славу небесную, мир со всеми его пре́пестьми возненавидев, прии́де в Киев ко преподобному Антонию, тому́ в пещере су́щу, в ню́же всели́ся, и вку́пе со всеми отцы́, подвизающимися тамо, воспеваше Тя, честнейшую всех ангел, та́ко: Радуйся, нашего спасения глави́зно; радуйся, радосте наша в сей и будущей жизни. Радуйся, отра́до божественная Христовых подвижников; радуйся, яко Тобою вси святи́и спасаются. Радуйся, яко вся вселенная Тобою украшается; радуйся, яко имя Твое от всех небесных чино́в прославляется. Радуйся, Пресвятая Богородице Дево, печерская похвало́ и наше утешение.

Кондак 3

Сила Вышняго осени́ подвижников пещерных, егда первый игу́мен, преподобный Варлаа́м, устро́и храм во имя славнаго Твоего Успения на верху́ пещеры, в нем прославляя Тебе, Честнейшую херувим и Славнейшую без сравнения серафим, и Сыну Твоему вопия: Аллилуиа.

Икос 3

Имы́й пламенное желание спасения преподобный Антоний, егда устро́ися обитель на холме, в немже суть пещеры, нарицаемыя Дальния, иски́й безмолвия, пресели́ся на холм, в немже раскопа́ пещеры Ближния, и тамо собра́ последователей себе, хотя́щих совершеннаго безмолвия, прославляя Тебе, свою Уте́шительницу, та́ко: Радуйся, вселения райскаго Руководи́тельнице; радуйся, в по́двизех пещерных Укрепительнице. Радуйся, благо́е начало и славный конец всех святых жития; радуйся, святы́я радости божественная струе́. Радуйся, цвете божественнаго прозябе́ния; радуйся, православнаго монашества украшение. Радуйся, Пресвятая Богородице Дево, печерская похвало́ и наше утешение.

Кондак 4

Бурю сомнений грехолюбивых оста́вльше и возлюби́вше тернистый путь спасения, стеко́шася и́ноцы в пещеру ко преподобному Феодосию. Он же, ви́дя в ней тесноту, устро́и на верху́ горы Печерския храм, и ке́ллии сооруди́ и оградой огради, и та́ко устро́ися обитель во имя Твое, Владычице, в нейже мона́си и ве́рнии лю́дие воспеша о Тебе Богу: Аллилуиа.

Икос 4

Слышаша и́ноцы пече́рстии, яко разбойницы окра́сти храм Твой, Пречистая, хо́щут, моля́ху Тя о спасении его. Ты же, Всемилостивая, чудо сотворила еси: храм Твой показала еси на возду́се ви́сящ, егоже видяще, разбойницы в ужасе разбего́шася, и́ноцы же Ти воспеша та́ко: Радуйся, яко на горе Ки́евстей духовный сад насади́ла еси; радуйся, яко тамо живущим вся потребная подала́ еси. Радуйся, собравшая нас от мира греховнаго; радуйся, приведшая нас во ограду обители Печерския. Радуйся, защищающая нас от врагов видимых; радуйся, охраняющая нас от супоста́т невидимых. Радуйся, Пресвятая Богородице Дево, печерская похвало́ и наше утешение.

Кондак 5

Боготе́чная звезда мира яви́лася еси, Владычице, егда восхотела устро́ити себе в Руси обитель Печерскую. Место, иде́же и́мать храм во имя Твое созда́тися, указала еси огненною дугою, протяже́нною от ветхаго монастыря, и ангелы, во образе иноков на возду́се тамо грядущих, е́же видяще и́ноцы пече́рстии, воспеша радостную песнь: Аллилуиа.

Икос 5

Видевше гре́честии каменозда́телие в Царьграде юношей, повелевающих им ити́ во Влахе́рнский храм к Царице, приидо́ша в онь и узреша тамо Тя седящую во славе, предстоя́щим Тебе ликом во́ев и преподобным Антонию и Феодосию. Ты же, о Владычице, повелела еси им ити́ в землю Русскую во град Киев и устро́ити храм во имя Твое, предавши им икону славнаго Твоего Успения и мо́щи святых мучеников. Они же, повеле́нное слышавше, воспеша Тебе та́ко: Радуйся, Царице небесе́ и земли́; радуйся, истинная Мати нашего Спасителя. Радуйся, спасшая весь род Адама падшаго; радуйся, веры православныя Воеводо непобедимая. Радуйся, Покровительнице Царьграда непостыдная; радуйся, и страны русския Заступнице усердная. Радуйся, Пресвятая богородице Дево, печерская похвало́ и наше утешение.

Кондак 6

Проповедницы Тво́его чудеснаго явле́ния во Влахе́рнстей церкви, гре́честии каменозда́телие, приидо́ша в Киев ко преподобным Антонию и Феодосию, преда́ша им икону Твоего Успения и мо́щи святых мучеников и поведаша им Твою волю о созидании храма во имя Твое; ти́и же, слышавше глаголы их, образу Твоему, на иконе изобрже́нну, поклони́шася, Богу вопиюще: Аллилуиа.

Икос 6

Возсия́, яко солнце, икона Твоего Успения, Пресвятая Дево, ю́же принесо́ша из Царьграда гре́честии каменозда́телие во обитель Печерскую, в нейже и до ныне пребывает, подаю́щи исцеления вопиющим к Тебе та́ко: Радуйся, во успении Твоем нас не оставляющая; радуйся, чрез икону Твою нам помогающая. Радуйся, иконою Твое́ю обитель Печерскую прославившая; радуйся, иконою Твое́ю гору Печерскую просветившая. Радуйся, иконою Твое́ю град Киев спасающая; радуйся, то́юже иконою всю Русскую землю охраняющая. Радуйся, Пресвятая Богородице Дево, печерская похвало́ и наше утешение.

Кондак 7

Хотя́ще устро́ити новую обитель и в ней храм во имя Твое, Преблагословенная Дево, преподобнии Антоний и Феодосий моли́ша Сына Твоего Христа Бога нашего и Тебе, да познают место, на немже созда́н и́мать храм быти, и указа́ Господь место то, якоже быти по всей земли́ росе́, а тамо су́ше; и паки повсюду су́ше, на месте же храма росе́, и посла́ огнь с небесе́, и пожже́ вся хвра́стия и pócy полиза́ и долину устро́и. Преподобнии же вку́пе с верными людьми, тамо сущими, падо́ша на земли́, со страхом возопивше: Аллилуиа.

Икос 7

Новый храм, небеси́ подобный, нача́ша созидати богоно́снии отцы́ Антоний и Феодосий, по смертнем же успении их преподобный Стефан сконча́ и пресели́ бра́тию из ветхаго монастыря в новый, блаженный же Никон иконами, златом и сребром чудно украси́; в сем же храме собравшеся ве́рнии, прославля́ху Тя, Богородице, си́це: Радуйся, яко варяга Си́мона во обитель Твою чудно призвала еси; радуйся, яко принесе́нным им поясом размер храма Твоего указала еси. Радуйся, злато на устроение храма Твоего чрез греки пода́вшая; радуйся, в созидании храма Твоего невидимо посо́бствовавшая. Радуйся, Лавры Печерския Строительнице; радуйся, храмов ея Украсительнице. Радуйся, Пресвятая Богородице Дево, печерская похвало́ и наше утешение.

Кондак 8

Странное чудо показа́ся, егда украша́ху храм Твой, Пречистая, муси́ею²; тогда во алтаре на стене сам изобрази́ся образ Твой, преподобному Али́пию со иконописцы тамо сущими, и просвети́ся паче солнца. И се из уст образа Твоего, Пресвятая, излете́ голубь бел, и летя́ше ко образу Спасителеву, и ко другим образо́м, написа́нным во храме, и паки лете́ ко образу Спасителеву и влете́ во уста́ Его и тамо скры́ся. Е́же видяще гре́честии иконописцы, во обители Твоей и живот свой сконча́ша, мо́щи же их в пещерах положе́ни бы́ша, душа́ми же на небеса ти́и пресели́шася, иде́же прославляют Тя со ангелы, Сыну же Твоему зовут: Аллилуиа.

Икос 8

Весь храм, небеси́ подобный, сияющий от Твоея́ иконы Печерския, Богоизбра́нная Дево, блаженный Заха́рия ви́де, прии́де к нему, защище́ние у Тебе прося́, егда заимода́вец его Се́ргий не хотя́ше отда́ти ему злато и сребро, оставленное отце́м сего. Ты же, Владычице, послала еси ангела наказати клятвопреступника, е́же, видя Заха́рия, оста́ви мир, прии́де во обитель Печерскую и поживе́ в ней до конца дней своих, воспевая Тебе си́це: Радуйся, Честнейшая всея́ твари вселе́нныя; радуйся, Сладчайшаго Иисуса селение. Радуйся, святы́й покрове жизни нашея; радуйся, благодатное утешение скорби нашея. Радуйся, вся наша надеждо и покой; радуйся, по Бозе наше упование в жизни земной. Радуйся, Пресвятая Богородице Дево, печерская похвало́ и наше утешение.

Кондак 9

Всякое мудрова́ние отвергше, удивимся чудесе́м Твоим, Богородице; егда бо приспе́ время освящению храма Твоего, дска ка́менна на престол невидимо принесе́на бысть ангелы, имиже, во образе юношей, созва́ни бы́ша святители на освящение, якоже апостоли Христовы со́брани бы́ша на погребение Твое. Святитель Иоанн, и́ноцы пече́рстии и вси лю́дие, зряще сия́, прославиша Тебе, Пречистая, и, радостно праздновавше праздник освящения, Богу воспеша песнь: Аллилуиа.

Икос 9

Вити́и многовеща́ннии не могут восхвали́ти Твоя чудеса, Богородице, соделанная во обители Печерстей, наипаче при основании, создании и освящении храма в честь славнаго Успения Твоего; и ныне не оставля́й нас, недостойных чад Твоих, сохраня́й обитель Твою, да вопием ти та́ко: Радуйся, яко сам Бог Отец назна́мена су́шею место храма; радуйся, яко Сын Твой, И́же сни́де, яко роса на руно́, во Твое чрево, на то́жде место pócy испусти́. Радуйся, яко Дух Святы́й огнь с неба низпосла́ на попале́ние ме́ста для храма; радуйся, яко Бог Отец образ Твой во алтаре́ невидимо изобрази́. Радуйся, яко Бог Сын, Солнце правды, сиянием Церковь Твою исполни; радуйся, яко Святы́й Дух виде́нием голубя, излете́вшаго из уст образа, в храме Твоем показа́ся. Радуйся, Пресвятая Богородице Дево, печерская похвало́ и наше утешение.

Кондак 10

Спасти хотя душу свою, преподобный Али́пий прии́де во Твою обитель, Богородице, и бысть тамо искусен иконописец, чрез негоже прославлялася еси, Богоневе́сто; иконы бо, им пи́санныя, быша чудоде́йны, просия́ша бо паче солнца. Некия же иконы ангели писа́ша, и иными многими чудесы́ сия́ прославишася. От ни́хже и до ныне некия сохрани́шася, источающе чудеса прославляющим Тя и Богу вопиющим: Аллилуиа.

Икос 10

Стена крепкая и заступление яви́лася еси, Владычице, новой обители Твоей Све́нстей, егда князь Роман проси́ иноков печерских отпусти́ти икону чудотворную, писанную преподобным Али́пием, для исцеления от слепоты. Егда́же плову́щии с Твоею иконою приста́ша ко брегу, обре́теся икона Твоя невидимо на горе на древе, ю́же обрето́ша, и князь Роман получи́ прозрение очесе́м своим, созда́ тамо обитель, собра́ иноки и вку́пе с ними возопи к Тебе та́ко: Радуйся, иконы Твоя чудесы́ прославившая; радуйся, яко Лавру Печерскую имиже прославила еси. Радуйся, яко и новую обитель Све́нскую возлюби́ла еси; радуйся, яко и в ней икону Твою чудотворную показала еси. Радуйся, яко дивна и вели́ка чудеса от нея́ яви́ла еси; радуйся, яко всем прося́щим у Тебе чрез икону Твою исцеления источила еси. Радуйся, Пресвятая Богородице Дево, печерская похвало́ и наше утешение.

Кондак 11

Пение умиле́нное приносят пред иконою Твое́ю Печерскою не то́кмо во граде Киеве, но и в Све́нске, в Москве и Ярославле и в других граде́х и ве́сех правовернии лю́дие, призывающе Тебе на помощь вку́пе с преподобными Антонием и Феодосием, и, получивше от Тебе, Богородице, помощь и заступление, вопиют Сыну Твоему и Богу: Аллилуиа.

Икос 11

Светоприе́мную свещу́, просвещающую всех, Тебе призывающих, имея мир христианский, Тебе, Дево Богородице, наипаче же Лавра Печерская, прославляет Тя, свою Покровительницу, храниши бо ю мно́га ле́та от нахождения ага́рян и всяких враг, и от еретико́в и междоусобныя брани, и от нападения иноплеме́нников. Аще же иногда и попускала ей разоре́нней быти грех ра́ди наших, но паки благолепнейшу воздвиза́ла еси ю, и дары́ земными снабдева́ла насе́льников ея, и дары́ благодати обогащала вопиющих Ти си́це: Радуйся, иконою Успения Твоего нас защищающая; радуйся, нерукотворе́нным образом Твоим нас покрывающая. Радуйся, Печерскою иконою Твое́ю исцеления нам подающая; радуйся, Све́нским образом Твоим нас покрывающая. Радуйся, стольный град Москву Печерскою иконою посетившая; радуйся, и град Ярославль Твое́ю иконою озарившая. Радуйся, Пресвятая Богородице Дево, печерская похвало́ и наше утешение.

Кондак 12

Благодать Божественную, покров и заступление пода́ждь нам, Владычице наша и Мати, припа́дающим пред иконою Твое́ю Печерскою. Воздвигни нас от греховнаго сна, сохрани Лавру Твою и нас, недостойных чад Твоих, сподо́би нас жи́тельствовати во ограде обители Печерския до конца дней наших и прославля́ти Тя и Сына Твоего, Христа Бога нашего, пою́ще Ему: Аллилуиа.

Икос 12

Пою́ще Твоя милости и чудеса, явле́нная во обители Печерстей от лет древних и до ныне, покланя́емся пред образом Твоим, имже спасаеши нас и всех призывающих Тебе на по мощь и вопиющих Ти та́ко: Радуйся, торжество веры православныя в Лавре Печерстей явля́ющая; радуйся, сердца́ человеческая любовию о Бозе распаля́ющая. Радуйся, гору Печерскую, яко вто́рый Сина́й, прославившая; радуйся, иконы Твоя проповедницы спасения показавшая. Радуйся, с небесных высот на нас призирающая; радуйся, на блага́я дея́ния нас наставля́ющая. Радуйся, Пресвятая Богородице Дево, печерская похвало́ и наше утешение.

Кондак 13

О Всепетая Мати, Преславная Владычице Богородице! Приими́ сия́ похвалы́ и моления, от скверных усте́н и нечистаго сердца возносимая; сохрани обитель Твою, нашими грехи́ оскверне́нную; собери нас, расточе́нных, и сподо́би в чине ангельстем достигнути Небеснаго Царствия и вку́пе с преподобными Антонием и Феодосием и всеми угодники печерскими прославляти вечно Тебе, нашу Матерь, и Сына Твоего и Бога и пети песнь: Аллилуиа.

Этот кондак читается трижды, затем 1-й икос «Ангел земный...» и 1-й кондак «Избранной от всех родов...».

Молитвы Антония и Феодосия и всех преподобных

О Пресвятая и Пренепорочная Дево Богородице, наша печерская похвало́ и украшение, покрове и заступление, истинная Владычице избра́ннаго удела Твоего; приими́ нас, недостойных рабов Твоих, убогое моление с верою и любовию принося́щих пред чудным образом Твоим; посети милостивно греховное житие наше, просвещающи светом покая́ния, осени́ нас, обремене́нных скорбьми́ многими, Твое́ю небесною радостию и сподо́би нас при́сно славити Тя в мире и благочестии во обители Печерстей, да без порока преше́дше зде путь жития нашего, помощию Твое́ю достигнем вечнаго веселия во све́тлостех святых и богоносных Печерских и едиными усты́ и сердцем воспоем Тя и Предвечнаго Сына Твоего, со Безначальным Его Отце́м и Пресвятым, Всеблаги́м, Животворя́щим и Единосущным Его Духом во веки веков. Аминь.

О Пресвятая и Преблагословенная Мати Господа и Спаса нашего Иисуса Христа, Пречистая Присноде́во Богородице Марие! Припа́даем и покланя́емся Тебе пред святою и чудотворною иконою Твоею, ю́же от лет древних чудесы́ многими и исцеле́ньми просла́вити благоизволила еси. Смиренно молимся Тебе, благо́й и милосердой Заступнице нашей: Предста́тельством угодников Твоих, преподобных Антония и Феодосия Печерских, вонми́ гласу грешных молений наших, не пре́зри воздыханий от души; виждь скорби и беды́, нас обыше́дшия и, яко любве обильная воистину Мати, потщи́ся на помощь нам безпомощным, унылым, во многия и тяжкия грехи впадшим и при́сно прогневля́ющим Господа и Создателя нашего, егоже умоли, Предста́тельнице наша, да не погуби́т нас со беззаконьми нашими, но да яви́т нам человеколюбивую Свою милость. Испроси́, Владычице, у благости Его всем православным христианом здравие и душевное спасение, благочестное и мирное житие, земли́ плодоносие, возду́ха благорастворение, дожди́ благовре́менныя и благословение свыше на вся блага́я дела́ и начинания наша; боля́щия исцели, скорбя́щия уте́ши, бедствующим помози́; споспеши́ всем нам носи́ти иго Христово в терпении и смиренномудрии и сподо́би нас благочестно житие земное сконча́ти, христианскую же непостыдную кончину получи́ти и Небесное Царствие унасле́дити. О Царице Всепетая, Мати Божия Всеблага́я! Простри́ богоно́снеи ру́це Твои к возлю́бленному Сыну Твоему и Богу нашему, умоли Его спасти и изба́вити от погибели вечныя всех иноков оби́тели Твоея́ Пече́рския. Якоже дре́вле на горе Печерстей милость явля́ла еси, Владычице, си́це и ныне яви, Богородице, Твоя щедроты над обителию Твое́ю и над нами, недостойными чады Твоими; да и зде, в земне́м странствовании нашем, и по кончине живота нашего прославим Безначальнаго Отца, Единороднаго Его Сына и Единосущнаго и Святаго Его Духа и Твое ми́лостивное предста́тельство во веки веков. Аминь.