Акафист Пресвятой Богородице в честь иконы Ее Косинской (Моденской)

Празднование 20 июня/3 июля

Кондак 1

Избра́нней от всех родо́в Пресвятей Госпоже́ Деве Богородице, благодарственная пения приносим Ти, раби́ Твои, яко прославила еси Божественный образ Твой чудодействием. Ты же, Всемилостивая Владычице, яко имущая державу непобедимую, от всяких нас бед свободи́, да зовем Ти: Радуйся, Владычице, иконою Твое́ю благодать и милость нам явля́ющая.

Икос 1

Ангел множество и вся небесная во́инства славят Тебе, Царицу всех, Богородицу. Ты же исполнила еси радости ду́ши наша милостивным пришествием к нам образа Твоего святаго, в немже залог несуме́нный Божия благоволе́ния и Твоего небеснаго заступления нам ниспосла́ся. Темже радующеся, славословим Твое милосердие и песненно Тебе вопием: Радуйся, Благословенная Дево, от всех родов Богом избра́нная и паче всех возвеличенная; радуйся, Небесная Царице, Господа Бога Мати и Творца всяческих. Радуйся, яко Тебе вся небесная во́инства величают; радуйся, яко Тебе вся колена земная Матерь Божию исповедуют. Радуйся, яко предстоя́ще сла́вней иконе Твоей, Самей Тебе истинней Матери Божией покланя́емся; радуйся, яко силу Твою благодатную сей иконе обильно дарова́ла еси. Радуйся, Отрадо наша и дивное о нас попечение; радуйся, от нужд, печалей и бед непреложное избавление. Радуйся, любве́ Божественныя явле́ние; радуйся, чудес преславных совершение. Радуйся, духа уныния и боя́зни отгнание; радуйся, духа радости и крепости стяжа́ние. Радуйся, Владычице, иконою Твое́ю благодать и милость нам явля́ющая.

Кондак 2

Видящи Премилосердная Мати Божия скорбное житие наше, не́мощи и болезни, благоизво́ли дати нам в радость и спасение и от всяких бед и напастей ограждение икону Свою святую. Не умолчи́м никогда, Заступнице наша Преславная, о всех Твоих благодея́ниих, да не будет под спу́дом свет чудес Твоих. Сего ра́ди величаем Тя, возвеличившую род наш Твоим благоволе́нием, прославляем благоче́стным пред святым образом поклонением и благодарственне вопием о Тебе Богу: Аллилуиа.

Икос 2

Разум недоразумевает достойно песньми духовными восхваля́ти Тя, Небесная Царице. Ты бо восхотела еси зна́мение Твоея́ благодати яви́ти людем во иконе Твоей, в нощном бо виде́нии мнозим боля́щим я́вльшися, Пресвятая Дево, повелела молебная пения совершати пред святою иконою Моде́нскою и омы́тися в находя́щемся близ це́ркве е́зере. Боля́щии же де́яху с верою повеле́нная, чудесно исцеля́хуся. Мы же, с любовию прославля́юще Тя, Помощницу нашу Всеизрядную, немо́лчными гла́сы вопием: Радуйся, Своим пришествием нас обогащающая; радуйся, всех прибегающих под кров Твой прие́млющая. Радуйся, раны греховныя благоутробно врачующая; радуйся, праведный гнев Божий на нас Твоим молением скоро утоляющая. Радуйся, терпеливых страдальцев дара́ми благодатными ущедря́ющая; радуйся, к покая́нию нас призывающая. Радуйся, грешных молений не отвергающая; радуйся, желания богоугодная исполняющая. Радуйся, радость скорую подающая; радуйся, на смиренныя призирающая. Радуйся, врагов наших видимых и невидимых побеждающая; радуйся, лю́бящия и чтущия Тя от всяких бед избавляющая. Радуйся, Владычице, иконою Твое́ю благодать и милость нам явля́ющая.

Кондак 3

Силою свыше обогатившеся цельбоно́сною иконою Богоматере, прииди́те и ви́дите Божественное сокровище, всем прибегающим дары чудес обильно подающее. Что убо воздади́м Го́сподеви, сицево́е человеколюбие нам яви́вшему, чудотворный образ сей, яко небесный дар, нам низпосла́вшему и верных просветившему, вопиюще Ему хвалебную песнь: Аллилуиа.

Икос 3

Иму́щи богатство милосердия неоску́дное, от пречистыя Твоея́ иконы токи чудес источила еси, Владычице, боля́щим исцеление, стра́ждущим осла́бу и всем вся полезная подавающи. Мы же, па́мятуя вы́ну покров Твой, молим Тя: Всемилостивая Госпоже́, Дево Богородице, одержи́мих печальми не остави до конца погибнути рабо́м Твоим, но ускори́ изъя́ти от настоя́щия скорби и печали вопиющих к Тебе: Радуйся, принесе́нием честны́я Твоея́ иконы тьму лютых обстояний от нас отгоняющая; радуйся, пораже́нных различными неду́ги чудесно исцеляющая. Радуйся, от врат смертных неисцельно боля́щих к жизни возвращающая; радуйся, го́рестию телесных страданий вечных мук избавляющая. Радуйся, скорбьми́ грехи́ наша очищающая. Радуйся, печалию не́мощи душевныя врачующая. Радуйся, ожесточенно враждующих примиряющая; радуйся, прило́ги врага отражающая. Радуйся, во всяких ско́рбех и печалех небесную отраду в сердца́ наша изливающая; радуйся, от разорения, плена и лю́тыя смерти всех уповающих на Тя свобождающая. Радуйся, злосмрадие страстей и похотей наших всемо́щным манове́нием укрощающая; радуйся, самых отчаянных грешников из рова погибели исхища́ющая. Радуйся, Владычице, иконою Твое́ю благодать и милость нам явля́ющая.

Кондак 4

Бурю смятений и раздоров, врагами воздвигнутую в стране нашей, умири́, Владычице, да не погибнем в беззакониих наших. Огради нас иконою Твое́ю от враг видимых и невидимых, и та́ко, укрепляеми Тобою, до конца живота своего вопием Создателю нашему: Аллилуиа.

Икос 4

Слышавше ближнии и дальнии о дивнем чудеси́ святы́я ико́ны Твоея́, Пречистая Владычице, со усердием многим притека́ху к цельбоно́сному Твоему образу, приемлюще от него дары неисче́тных Твоих благодея́ний. Темже и мы, аще и не достойнии су́ще, со благогове́нием и радостию покланя́емся сему́ чудному образу Твоему и достодо́лжно Тя песньми ублажаем: Радуйся, свитче Божественный, в немже пе́рстом Божиим написа́ся Слово; радуйся, от начала веков во глави́зну нашего спасения предъизбра́нная. Радуйся, ски́ние, Духом Святым осене́нная; радуйся, Благодатная, всеми добродетельми преукраше́нная. Радуйся, вся ангельския чи́ны превосходя́щая; радуйся, Блаженное Чре́во, невместимаго всеми Бога вместившее. Радуйся, яко млеко́м Твоим питала еси Питателя вселенныя; радуйся, Мати Преблагословенная. Радуйся, от небесных славимая и от земны́х хвали́мая; радуйся, мира горняго пе́рвейшее украшение. Радуйся, масли́но, еле́ем милосердия нас умащающая; радуйся, чудо чудес Одиги́трие, на путь спасения нас наставля́ющая. Радуйся, Владычице, иконою Твое́ю благодать и милость нам явля́ющая.

Кондак 5

Яко лучезарную звезду, чудотворную икону Ма́тере Твоея́ показал еси нам, Господи: ибо, взирающе на образ Ея теле́сныма очи́ма, умом и сердцем к Первообра́зней возвышаемся. О Пречудная Мати Света! Огне́м небесным коснися смуще́нных душ наших и исполни я веры непостыдныя, надежды известныя и любве́ нелицемерныя. Да всегда пое́м и славим Тя, Святейшую Матерь Всесильнаго Бога, вопиюще Ему: Аллилуиа.

Икос 5

Видевше преславную икону Твою, Пречистая, со умилением уразумеша вси неотступный покров Твой и милостивое о нас промышле́ние. Тебе, Благу́ю Заступницу нашу, прилежно молим: заступи, покрый и соблюди нас от бед, озлоблений и падений греховных, осени́ благодатию Твое́ю, да отвергше горечь греха́, сладость благочестия обря́щем и, на истинную стезю́ добродетели и спасения наставля́емии, зовем Ти: Радуйся, чудес и целеб Пода́тельнице; радуйся, у Господа спасения нашего Хода́таице. Радуйся, иноков благоподвиза́ющихся Всемо́щная Покровительнице; радуйся, всех христиан вожделенная Помощнице. Радуйся, неразумных премудрая Вразумительнице; радуйся, целомудрия и воздержа́ния незримая Охранительнице. Радуйся, скорая в беда́х и печалех Уте́шительнице; радуйся, заблуждших Наставнице. Радуйся, всех немощны́х Целительнице; радуйся, грешных Спору́чнице, Радуйся, погибших Взыскание; радуйся, нечаянная грешных Радосте. Радуйся, Владычице, иконою Твое́ю благодать и милость нам явля́ющая.

Кондак 6

Проповедуют милости Твоя́, Богомати, вси концы вселенныя, ибо честны́м покро́вом Твоим покрываеши и защищаеши весь род христианский, и, ве́дуще Тя вои́стину Помощницу сильну и непобедиму; со слеза́ми приносят Ти молитвы, да простре́ши к Сы́ну Твоему богоно́снеи ру́це за люди Твоя, во е́же избавити нас от всех бед и напастей, да благодарне вопием Богу, Тобою нас спасающему: Аллилуиа.

Икос 6

Возсия́ неизрече́нная благодать от цельбоно́сныя Твоея́ иконы, Пресвятая Дево, пред неюже со слеза́ми припа́дающе, молим: Всесильная рода нашего Заступнице и Помощнице, отжени́ о́блак нашедших на ны искушений и всяких злоко́зненных действий врагов наших видимых и невидимых и мирное устрое́ние обуреваемым напа́стьми да́руй, на Тя бо все упование возлагаем и умиле́нно Тебе зовем: Радуйся, образ Твой чудотворный в утешение и исцеление дати нам изволившая; радуйся, всемо́щным Твоим заступлением от бед нас избавляющая, Радуйся, искушаемым руку помощи простирающая; радуйся, во дни уныния надеждою вечных благ воодушевляющая. Радуйся, от треволнения мо́ря житейскаго кающихся спасающая; радуйся, всем потребным ко благочестию снабдевающая. Радуйся, зависть и коварство на нас злых человек премудро разрушающая; радуйся, лживых прови́дцев и су́етная гадания посрамля́ющая; Радуйся, чистотою Твое́ю чистому житию нас научающая; радуйся, окаменение сердечное умягчающая. Радуйся, хла́дность душевную благодатно согревающая; радуйся, верных пастырей Святы́я Церкве укрепляющая и вразумляющая. Радуйся, Владычице, иконою Твое́ю благодать и милость нам явля́ющая.

Кондак 7

Хотя яви́ти ве́лию любовь Свою к людем, Человеколюбец Господь Тебе, Матерь Свою Пренепорочную, покров и защиту роду христианскому дарова́, да бу́деши печальным Утеше́ние, скорбя́щим Радование, отчаянным Надежда, вечныя муки Своим хода́тайством избавляющая и к небесному веселию всех приводя́щая, вопиющих непрестанно гласом хвале́ния Сыну Твоему и Богу нашему: Аллилуиа.

Икос 7

Проповедник неизрече́нных чудес Твоих, Владычице, яви́ся храм сей, святою иконою Твое́ю украше́нный. Попуще́нием бо Божиим, грех ра́ди человеческих, все благоле́пие его некогда поги́бе, икона чудотворная руками безбожных изъята бысть, но милостию Божиею уцеле́ и паки возвраще́на в храм, иде́же ныне честно пребывает. Мы же, неизрече́нному смотрению Твоему дивя́щеся, радостно взываем Ти: Радуйся, в годину напастей и испытаний чудотворную икону Свою́ во утешение нам сохранившая; радуйся, скорбная сердца́ наша вторым обре́тением образа Твоего возвеселившая. Радуйся, новую милость и новую благодать сим в Церкви явля́ющая и тем путь спасения показу́ющая; радуйся, осене́нием святы́я Твоея́ иконы злых духов мечтания от нас удаляющая. Радуйся, непочитающих иконы Твоея́ святы́я яко прах от лица́ земли́ развевающая; радуйся, юро́дивую мудрость века сего посрами́вшая и ослепле́нных ею на путь правый наставля́ющая. Радуйся, светом Христова учения тьму неверия прогоняющая; радуйся, временным наказанием невежд умудряющая. Радуйся, прославля́ющих Тя прославля́ющая; радуйся, Твоим хода́тайством грехи́ наша прощающая. Радуйся, Твоим молением печали наша утоляющая; радуйся, Тя на помощь призывающих и имя Твое славящих спасающая. Радуйся, Владычице, иконою Твое́ю благодать и милость нам явля́ющая.

Кондак 8

Дивное чудо, егда чудотворная икона Твоя, Владычице, с песньми духовными прино́сится в храм Госпо́день. Торжествуйте вси, зряще несо́мую икону Царицы Небесныя, от нея́же то́ки чудес с верою приходя́щим источаются, неду́зи врачуются и скорби утоляются. Сего ра́ди прославля́юще Бога, давшаго нам благодать таковую, вотем Ему: Аллилуиа.

Икос 8

Всем вся блага́я и спасительная да́руеши от святы́я чудотворныя иконы Твоея́, Богомати Пречистая, ю́же яко сокровище многоценное зряще, со гласом радования и благодаре́ния взываем: Кто не ублажи́т Тя! О Мати наша Милосердная! Кто не воспое́т Твоя славная чудеса! И мы, гре́шнии, любовию к Тебе побеждаеми, отверзаем недостойныя уста́ своя на похвалу́ Тебе сицеву́ю: Радуйся, всежелательное всего мира зрение; радуйся, неподви́жимое веры и благочестия основание. Радуйся, всесветлое благодати познание; радуйся, же́зле Ааро́нов, прозя́бший нетление. Радуйся, светильниче, на све́щнице превы́шнем поставленный; радуйся, ле́ствице небесная, Иа́ковом предвидимая. Радуйся, благородная о́тpaслe богоизбра́ннаго рода Дави́дова; радуйся, пала́то Духа Пресвятаго. Радуйся, огненный престоле Невидимаго Царя́; радуйся, Честнейшая и Сла́внейшая без сравнения всех небесных сил. Радуйся, Прекраснейшая всех дще́рей человеческих; радуйся, воистину Присноблаже́нная и Пренепорочная. Радуйся, Владычице, иконою Твое́ю благодать и милость нам явля́ющая.

Кондак 9

Всякое естество́ удивися неизрече́нному действу силы Твоея́, Дево Пренепоро́чная, егда многомо́щно свирепствовавшей холере в Ко́сине и окрестных селениих ея́ приноси́ма бысть сия́ чудотворная икона. Заступлением Твоим, Всемилостивая Владычице, неду́ги отступа́ша, лю́дие же, исцеление получа́ша, вопияша Богу: Аллилуиа.

Икос 9

Вити́и многовеща́ннии недоуме́ют воспети по достоя́нию силу благодати, Тобою иконе сей дарова́нную. Ка́я ли песнь сладкопе́вца достойна будет восхвали́ти вся чудеса Твоя, – яко принесе́нием иконы Твоея́ во всяко место благодея́ния различная источаются, долгонеду́жныя и разслабленныя исцеляются. Человецы же, Тобою та́ко помилованнии, из глубины́ души́ взывают Ти: Радуйся, Предста́тельнице к Богу, мир от бед спасающая; радуйся, милости сокровище многоценное нам открывающая. Радуйся, безчи́сленныя щедроты всем подавающая; радуйся, почита́ти Тя нас научающая. Радуйся, ко спасению и восприятию благ вечных наставля́ющая; радуйся, нераскаянных грешников к покая́нию обращающая. Радуйся, хули́телей святы́я православныя веры невидимо карающая; радуйся, иконою Твое́ю, яко столпо́м огненным, мрак греха́ отгоняющая. Радуйся, от междоусобныя брани охраняющая; радуйся, вра́жия ко́зни расторгающая. Радуйся, Русь православную возлюбившая; радуйся, веру исинную в ней утвердившая. Радуйся, Владычице, иконою Твое́ю благодать и милость нам явля́ющая.

Кондак 10

Спасения ищуще, к Тебе прибегаем, Милосердная Мати, и чудотворную Твою икону ныне обстоя́ще, со благогове́нием и верою чествуем, ибо всем покланя́ющимся Тебе скорое вспоможе́ние подаваеши и во иных гра́дех и ве́сех чтущих Тя полезное проше́ние исполняеши. Темже, воспоминающе неисчетная чудотворения Твоя, вопием Всемогущему Богу: Аллилуиа.

Икос 10

Стена еси Ты, ограждающая нас от всяких болезней, всем с верою призывающим Тя в помощь, Пресвятая Дево Богородице. Ты бо, Владычице, младенцу, зело́ стра́ждущу, исцеление дарова́ла еси. Сего ра́ди, прославля́юще Твое Ма́тернее милосердие, благодарственными усты́ вопием Ти вси из глубины́ души́: Радуйся, яко принесе́нием иконы Твоея́ болезни лютыя прекращаются; радуйся, всем во всякой потребе вся полезная и блага́я подавающая. Радуйся, добрыя обе́ты приемлющая; радуйся, призыва́ющих Тя заступающая. Радуйся, сумня́щихся утверждающая; радуйся, супругом любовь и согласие подавающая. Радуйся, ма́терей детородя́щих скоро и безболезненно разрешающая; радуйся, чад их благодатно охраня́ющая. Радуйся, скорбным вдови́цам и си́рым помогающая; радуйся, па́губныя удары грома и молнии от нас отводя́щая. Радуйся, огнь, пояда́ющий до́мы и па́жити людския, росою молитв Твоих угашающая; радуйся, блага́я Домострои́тельнице, житие наше до́бре устроя́ющая. Радуйся, Владычице, иконою Твое́ю благодать и милость нам явля́ющая.

Кондак 11

Пение наше, аще было бы и тмочи́сленное, не довле́ло бы к достойному прославле́нию милостей Твоих, Всехвальная Владычице, я́же непрестанно изливаеши роду человеческому Мольбу безча́дных супругов, пришедших к чудотворней иконе Твоей, не оставила тщетно, но дарова́ла еси им милость деторождения. Оба́че, да не неблагодарни яви́мся пред Тобою, по силе нашей похвальная воспису́ем Ти с любовию, вопиюще Богу: Аллилуиа.

Икос 11

Яко светоприе́мную свещу́, зрим Твою честну́ю икону, Пречистая и Преблагослове́нная Дево Богородице. Невеще́ственный же в душа́х наших возжигающи огнь любве́ к Тебе, Всебла́гая, приими́ веру и усердие наше, напра́ви на стези́ истины путь наш, умоли́ Господа и Сына Твоего, да спасет нас, имиже весть судьба́ми, да не погибнем в нераскаянии о греха́х наших, и услыши моление к Тебе взывающих: Радуйся, иконою Твое́ю нам благоде́ющая; радуйся, Ма́терния щедроты Твоя на нас изливающая. Радуйся, греховныя помыслы властно отгоняющая; радуйся, маловерных вразумляющая. Радуйся, неверных смыслы просвещающая; радуйся, милосердие Божие разумети нам помогающая. Радуйся, страх Божий в сердца́ верных влагающая; радуйся, о храмах Божиих попечение иму́щих духовною радостию утешающая. Радуйся, от сна ле́ности нас возставля́ющая; радуйся, омраче́нных светом богопознания и благочестия озаряющая. Радуйся, блага земна́я, су́етная и скоропреходя́щая презирати нас научающая; радуйся, к небесным и вечным сокровищем умы и сердца́ наша возводя́щая. Радуйся, Владычице, иконою Твое́ю благодать и милость нам явля́ющая.

Кондак 12

Благодать Божия, присущая святе́й иконе Твоей, Пречудная Царице Богородице, влече́т к ней всех скорбя́щих и обремене́нных, и радость си́и получи́вше от сего источника Твоих милостей и щедрот, благодарно вопиют благи́х Пода́телю Богу: Аллилуиа.

Икос 12

Пою́ще Твоя чудеса, бывшая в древняя и на стоящая времена́, хвалим Тя, Богородице, яко неисчерпа́емый источник милости, яко неистощимую реку чудес и, прибегающе к Твоему всесильному заступлению, взываем, помощи Твоея́ прося́ще: Буди нам, Всеблага́я Влады́чице, покров и защищение и в день кончины нашея, и егда и́мамы предста́ти на Суд Страшному Престолу Сына Твоего, да не постыдимся во уповании нашем, е́же по Бозе крепко на Тя возлагаем, вопиюще: Радуйся, любовь к Тебе иму́щим врата́ райская отверзающая; радуйся, на милость к нам грешным Господа преклоня́ющая. Радуйся, на путь исправления заблуждающихся направляющая; радуйся, согрешающих покая́ние милостиво прие́млющая. Радуйся, в дни скорби люди Твоя укрепляющая; радуйся, в час смертный тьму вра́жию от нас отгоняющая. Радуйся, безболезненную и мирную кончину устроя́ющая; радуйся, вечнаго Царствия у Сына Твоего и Бога нашего всем нам прося́щая. Радуйся, Тобою нисходит к нам Божие благоволе́ние; радуйся, грехов наших непоминове́ние. Радуйся, от власти князя воздушнаго освобождение; радуйся, гее́нны вечныя избавление. Радуйся, Владычице, иконою Твое́ю благодать и милость нам явля́ющая.

Кондак 13–

О Всепетая и Всемилостивая Мати, приими́ ныне молебное пение наше, пред чудотворною иконою Твое́ю с верою и благогове́нием Тебе возноси́мое. При́зри милостивно на веру и упование наше и всесильными Твоими молитвами изба́ви нас от всякия напасти, болезни, внезапныя смерти, и сподо́би в блаженстве вечном со всеми святыми хвалу́ Богу воспевати: Аллилуиа.

Этот кондак читаемся трижды, затем 1-й икос «Ангел множество...» и 1-й кондак «Избранней от всех родов...».

Молитва

О Премилостивая и Пречудная Света умнаго Царице! Достойно славимая и праведно от всех горних чино́в ублажаемая, яко без сравнения их превосходя́щая, Бога и Творца всяческих рождшая. Благодарим Тя о всех благодея́ниих Твоих, я́же благоволи́ла еси яви́ти нам преславным принесе́нием чудотворныя Твоея́ иконы. Кое благохвале́ние приществию Твоему сотвори́м, недоумеваем, точию удивляемся, величающе Твое милосердие, е́же на нас показала еси. Темже мы, гре́шнии, со страхом и радостию припа́дающе к цельбоно́сней иконе Твоей, благодарственно вопием Ти: О Всесильная рода нашего Помощнице! Услыши нас, моля́щихся Тебе, и яви́ милость Твою; се бо, на пречистый образ Твой взирающе, яко живе́й Ти с нами сущей, молим Тя усердно: Не помяни́ мно́жества грехо́в наших, но исполни во благи́х проше́ния, да́руй нам вся потребная к животу и благочестию, изба́ви нас от скорбе́й, бед и всяких болезней, наипаче же от смертоносныя язвы и па́губы, от навета злых человек и всякаго обстоя́ния. Соблюдай и спасай нас благодатию Свое́ю, Владычице, от тлетво́рных учений неверия и суеве́рия, от лукавых совращений. Сохрани нас и Отечество наше от всяких крамо́л, нестрое́ний и злых развращений, врагами веры православныя воздвизаемых. Сподо́би же нас, Всеблага́я Заступнице наша, благочестно житие сие́ земное совершити, христианскую безболезненную, непостыдную, мирную кончину получити и Небесное Царствие наследовати. Да всегда пое́м, величаем и славим Тя, яко Благу́ю Заступницу рода христианскаго, со всеми угодившими Богу. Аминь.