Акафист преподобной Марии Египетской

Празднование в 5-ю Неделю Великого поста и 1/14 апреля

Кондак 1

Избра́нней от Господа во образ спасения всем грешным и отчаянным, из глубины греха восте́кшей на высоту безстрастия, похвальная пения приносим ти, мати преподобная. Ты же, яко иму́щи дерзновение к Щедрому Богу, молитвами твоими настави на стезю твоего покаяния любовию зовущих ти: Радуйся, преподобная мати Марие, чудо Божия милосердия.

Икос 1

Ангел возбрани́ тебе, в тине блу́дней пребывающей, вни́ти в церковь с народом, текшим на поклонение Честно́му Кресту Господню. Егда же ты отступи́ в студе́ и неча́янии, косну́ся очесе́м сердца твоего свет разума спасительнаго. И нача́т убо плакати, и рыдати, и в пе́рси бити, воздыхания из глубины се́рдца износя́щи. Мы же таковое покаяние твое прославляюще, со благогове́нием и радостию глаголем ти си́це: Радуйся, мглы греха избежавшая; радуйся, тучами слез душу свою уясни́вшая. Радуйся, к ревности жития непорочнаго усердно себе воздвигшая; радуйся, покаяния светом сердце свое озарившая. Радуйся, целомудрия зерца́ло; радуйся, Духа Святаго жилище. Радуйся, горняго мира украшение; радуйся, ангелов и человеков радование. Радуйся, преподобная мати Марие, чудо Божия милосердия.

Кондак 2

Видящи, святая, в притво́ре храма икону Владычицы, рече́ к Ней: «О, Дево, рождшая плотию Бога Слова! Бу́ди ми Ты Пору́чница достовернейшая к Рожде́нному из Тебе, яко уже ктому́ телесе́ моего не и́мам оскверни́ти блуже́нием. Повели́, Владычице, да и мне, недостойней, невозбране́н вход будет в церковь, да у́зрю Честно́е Древо, на немже пригвозди́ся Сын Твой, и воспою́ Ему с благодарением: Аллилуиа».

Икос 2

Уразуме́ Мария тайны Божия, и ка́ко готов есть приима́ти кающихся, егда без труда вни́де внутрь це́ркве и Животворящаго Креста Древо видети сподо́бися. Сего ра́ди паки притекла́ еси к честно́му образу Пресвяты́я Богородицы и смиренно молила еси Владычицу, да будет ти спасения Учительница, руководствующи к покаянию, и да упра́вит путь твой. Мы же, видяще твое неотступное упование на милость Царицы Небесныя, радующеся, пое́м ти: Радуйся, яко Креста образ возжелавши видети, себе миру распя́ла еси; радуйся, яко Христа всем сердцем возлюбила еси. Радуйся, с верою и любовию поне́сшая крест свой и Христу последовавшая; радуйся, Пору́чницею Матерь Божию стяжа́вшая. Радуйся, яко сласти отбе́гши, чистоты́ возжелала еси; радуйся, яко показала еси нам стезю, веду́щую к жизни неги́блющей. Радуйся, и́щущим пути ко спасению наставнице благодатная; радуйся, крепостию произволе́ния твоего демоны посрами́вшая. Радуйся, преподобная мати Марие, чудо Божия милосердия.

Кондак 3

Силою любве́ утверждающися, день той в пути к реце́ Иордану ты, блаженная Марие, сконча́ по гла́су Владычицы: «Аще Иорда́н пре́йдеши, добр покой обря́щеши». Достигши же святы́я реки, от ея воды ру́це и лице́ умы́ и в церкви святаго Иоанна Крестителя причасти́ся Животворя́щих Та́ин Христо́вых. И посе́м воспела еси со умилением Богу: Аллилуиа.

Икос 3

Иму́щи полтре́тья² хлеба, не устраши́лася еси, яко го́рлица пустыннолюбивая и яко еле́нь, жаждущий на источники водны́я, устремитися, всеблаже́нная мати, в пустыню. Темже таковую твою ревность ублажа́юще, со умилением зовем ти: Радуйся, в церкви проповедника покаяния причасти́вшаяся; радуйся, в Крести́телеве обиталищи, пустыни, вселившаяся. Радуйся, прелести мира сего спасения ра́ди презре́вшая; радуйся, вре́менныя и земныя уме́ты быти вмени́вшая. Радуйся, яко равноангельскому житию подражала еси; радуйся, яко вся прило́ги мира, плоти и диа́вола победила еси. Радуйся, скорогибнущих благ мира сего отверже́ние; радуйся, пустынножителей красото́. Радуйся, преподобная мати Марие, чудо Божия милосердия.

Кондак 4

Бурю внутрь име́ла еси страсте́й губительных, яко со зверьми́ лютыми, с похотьми́ безумными борю́щися в пустыни. Огнь бо внутрь сердца стра́стнаго возгара́шеся и всю паля́ше тя. Ты же, слезя́щи и в пе́рси бию́щи, воспоминала еси обеты, я́же сотворила еси, исходя́щи в пустыню сию́, и молила Матерь Божию отгнати от тебе помышле́ния, си́це тя смущавшая. Темже мы, недостойнии, Богу, укреплявшему тя, пое́м: Аллилуиа.

Икос 4

Име́ла еси, Марие преславная, небо покровом и землю одром упокоения телу, зноем опаля́ему и мра́зом померза́ему, емуже ни ма́лаго угождения не попускала еси, да не возобладает плоть над духом твоим, любовию ко Господу пла́меневшим. Мы же, слышаще твое пачеесте́ственное терпение и многая злострадания, приносим ти от усердия нашего песноглаше́ния сия́: Радуйся, многия скорби и беды претерпевшая; радуйся, молитвою твое́ю вся побеждавшая. Радуйся, самоотверже́ние чудное показавшая; радуйся, сто́лпе терпения и утверждение добродетели. Радуйся, яко страсти плотски́я мече́м воздержа́ния посекла́ еси; радуйся, яко струя́ми слез твоих пустыню всю напои́ла еси. Радуйся, мученице безкровная, за Христа в пустыни страдавшая; радуйся, в же́нстем естестве́ крепость мужескую показавшая. Радуйся, преподобная мати Марие, чудо Божия милосердия.

Кондак 5

Боготечную звезду зря́щи пред собою, Пору́чницу твою, Матерь Божию, помышля́ла еси Ю преступление твое судя́щую и мучение за преступление грозно показу́ющую, поверга́ла себе на землю и не возставала еси день и нощь, непрестанно прося́щи помощи у Пречистья Богородицы, Ю́же и воистину Помощницу име́ла еси, вопию́щи Богу: Аллилуиа.

Икос 5

Видевше, блаженная мати, свет сладкий, тя осиява́ющий, от треволнения изыма́ющий и помыслы греховныя отгоняющий, удивлялася еси несказа́нному милосердию Божию, и яко вся возможна человеку о укрепляющем Бозе, егоже силою в не́мощней плоти великия подвиги совершила еси и многая страдания претерпела еси любве́ ра́ди Христовы. Мы же приносим ти многохвальное пение, с веселием зовуще: Радуйся, от Единаго Господа спасения искавшая; радуйся, к Матери Его со слеза́ми горькими припа́давшая. Радуйся, яко, на икону Владычицы мысленно взирающи, страсте́й наветы посрамля́ла еси; радуйся, яко болезньми многими здравие души́ стяжа́ла еси. Радуйся, телесная движения и разжже́ния воздержанием поистине изсуши́вшая; радуйся, страсте́й свирепство жительством своим угаси́вшая. Радуйся, высотою подвига твоего ангелы удивившая; радуйся, житием твоим духи тьмы посрами́вшая. Радуйся, преподобная мати Марие, чудо Божия милосердия.

Кондак 6

Проповедника дел твоих избра́ Господь Зоси́му и приведе́ его в пустыню. Он же надеяся обрести некоего от отец, тамо подвиза́ющагося, и́же бы могл пользовати его, и узрев тя, на́гу и че́рну телом, нача́т вслед тебе тещи́ и слезно вопи́ти: «Стани и пода́ждь ми молитву твою и благословение ра́ди Истиннаго Бога, егоже ра́ди в пустыни сей живеши и Емуже пое́ши непрестанно: Аллилуиа».

Икос 6

Возсия́ла еси в пустыни, яко свеща многосветлая, преподобная мати, подвиги твоими. Сего ра́ди узре́ тя Зоси́ма во время молитвы твоея́ возвы́шену яко на ла́коть един от земли́ и на возду́се стоящую. Страхом же множа́йшим содержи́мь, пове́рже себе на землю и глаго́ла: Радуйся, пустынное сокровище, от мира утае́нное; радуйся, прозрения даром украше́нная. Радуйся, наготу Христа ра́ди носи́вшая; радуйся, словом Божиим покрывавшаяся. Радуйся, научающая нас презира́ти плоть свою, преходит бо; радуйся, поучающая прилежа́ти о души́, ве́щи безсмертней. Радуйся, великая угодница Христова, в мире премирно пожившая; радуйся, первое блудница, ныне же невеста Христова, целомудрием блистающая. Радуйся, преподобная мати Марие, чудо Божия милосердия.

Кондак 7

Хотя Господь яви́ти дела́ твоя миру, да величия Божия явле́ны будут, внуши́ старцу Зоси́ме припа́дати к нога́ма твоима, умоля́я тя не скрыти от него жития твоего. Ты же, яко неиму́щая добродетелей, поведала еси пе́рвее старцу то́кмо о греховней жизни твоей, скрывающи подвиги и боре́ния в пустыни, всех нас научающи в смирении взывати Богу: Аллилуиа.

Икос 7

Новое чудо яви́л есть Господь, показав тя, книгам никогдаже учившуюся, словеса́ от Священнаго Писания произнося́щую. Ты же рече́ Зоси́ме, уди́вльшемуся о сем: «Слово Божие жи́во и действенно у́чит разуму человека». Мы же, прославляюще Бога, творя́щаго славная и неизрече́нная, дающаго великая лю́бящим Его, зовем ти си́це: Радуйся, воздержа́нием ум твой просвети́вшая; радуйся, добродетелей добро́тою душу твою облиста́вшая. Радуйся, смирением высокая стяжа́вшая; радуйся, нищетою богатство нетленное сниска́вшая. Радуйся, Божественными виде́нии и детельми душу свою укра́сившая; радуйся, честно́е прия́телище Духа Святаго. Радуйся, непостыдное христиан прибежище; радуйся, ангелов собеседнице и преподобных жен похвало́. Радуйся, преподобная мати Марие, чудо Божия милосердия.

Кондак 8

Странное и дивное смирение яви́ла еси, егда просила старца: «Заклина́ю тя воплощением Слова Божия моли́тися за мя, блудницу, и да никомуже рече́ши о мне, до́ндеже Бог от земли́ во́зьмет мя. В пост же грядущаго ле́та не преходи́ Иордан, но в день Та́инственныя Ве́чери возьми́ от Тела и Крове Христовы и пожди́ мя на оной Иордана стране́, да, пришедше, причащу́ся Пречистых Даров, ихже усердно желаю, и а́бие прославлю Всещедраго Бога, зовущи Ему: Аллилуиа».

Икос 8

Весь бе трепетом объят, Зоси́ма поклони́ся до земли́ и целова́ место, иде́же стоя́ху стопы́ ногу́ твое́ю, и возвратися, хваля́ и благословя́ Христа Бога нашего. Ле́ту прешедшу, сотвори Зоси́ма заве́щанное ему и се́де на бре́зе Иорданове, ждый тя, честна́я мати, слезя́ и помышля́я: «Увы мне, несть корабля, и ка́ко Иордан пре́йдет и прии́дет ко мне, недостойному». Мы же, благодать, данную ти свыше, познавше, ублажа́ем тя зва́нии си́ми: Радуйся, из глубины греха на высоту безстрастия востекшая; радуйся, в пустыни непроходней едина с Единым Богом пребы́вшая. Радуйся, яко душу твою к безстрастию возвысила еси; радуйся, яко чистоту душевную и телесную стя́жала еси. Радуйся, даров Святаго Духа вместилище; радуйся, Це́ркве Христовы божественное удобрение. Радуйся, яко ангели Божии дивя́тся чистоте твоей; ра́дуйся, по́стников высото́ и преподобных славо. Радуйся, преподобная мати Марие, чудо Божия милосердия.

Кондак 9

Всякое естество́ ангельское удиви́ся, егда ви́де тя зна́мением кре́стным Иордан зна́менавшую и ку́пно с тем взошедшую на воду и ходя́щую верх ея, яко посу́ху. Зоси́ма же в стра́се хоте поклонитися ти, но ты возбрани́ ему. Он же, послушав тя, то́кмо рече́ Богу: Аллилуиа.

Икос 9

Вити́и многовеща́ннии недоуме́ют, ка́ко восхвали́ти твою ангелоподобную чистоту, терпение и покаяние, имиже Богу угодила еси и яви́лася еси равноангельна на земли́. Зоси́ма, ужа́сом содержи́мь быв от предивнаго виде́ния на Иордане, рече́: «Воистину Бог нело́жен есть, обеща́вый уподо́бити Себе тех, и́же по силе своей очищают себе». Темже и мы, ублажающе тя, глаго́лем си́це: Радуйся, Иорданския во́ды немо́кренными ногами прешедшая; радуйся, на земли́ небесно пожившая. Радуйся, страсте́й твоих образы благочестно истребившая; радуйся, изображение добродетелей в души́ твоей написа́вшая. Радуйся, подвигом добрым подвиза́вшаяся; радуйся, плоть твою ду́хови поработи́вшая. Радуйся, мертвость Иисуса в теле нося́щая; радуйся, Воскресения Его славою сияющая. Радуйся, преподобная мати Марие, чудо Божия милосердия.

Кондак 10

Спасительных Та́ин Христовых причасти́вшися, рече́ преподобная: «Ныне отпуща́еши рабу Твою, Владыко, по глаго́лу Твоему с миром...» После сего проси́ Зоси́му в грядущее лето приити́ на оный поток, иде́же ему пе́рвее собеседова. Он же отвеща́ ти: «Хотел бы, аще бы мощно было, в след тебе ходи́ти и вы́ну зрети честно́е лице́ твое, поя́ ку́пно с тобою Богу: Аллилуиа».

Икос 10

«Стена есть мне и подкрепление глагол Божий, – рече́, мати, взе́мше у старца, прося́щаго тя подкрепи́тися, то́кмо три зерна́ со́чива. – Довле́ет сие́ благодати духовней, храня́щей естество́ души неоскверне́нное». Мы же о сем диви́мся и хвалебно зовем ти: Радуйся, озарившая ум свой сиянием добродетелей; радуйся, соделавшая душу твою Божественныя Троицы жилище. Радуйся, яко кова́рства вражия оскуде́ша вся крепким посто́м и молитвою твое́ю; радуйся, яко слеза́ми твоими ура́нила еси страстна́я взыграния. Радуйся, воздержа́нием тела своего плотска́я стремления истончи́вшая; радуйся, мольбами твоими пред Господем и нас от страсте́й избавляющая. Радуйся, долготерпеливно упованием на Господа укреплявшаяся; радуйся, и нам крепкую веру и надежду подающая. Радуйся, преподобная мати Марие, чудо Божия милосердия.

Кондак 11

Пение надгробное тебе сотвори Зоси́ма, достигнув, ле́ту мимоше́дшу, ме́ста, е́же поток зна́менав, и обре́т тя лежа́щую ме́ртву, лице на восток обраще́нно иму́щую. Позна́ же из надписи на земли́ при главе́ твоей имя твое и ужасе́ся, уразуме́в, яко ты, Божественных Та́ин причасти́вшися, во един час прешла еси путь, и́же сам он пре́йде, два́десять дний трудя́ся. Темже дивя́щеся сему, возопи́ Богу: Аллилуиа.

Икос 11

Видев Зоси́ма льва, телу твоему предстоя́ща и ли́жуща но́зе твои, трепетен быв. Зна́менався же кре́стным зна́мением, ве́рова, яко невредно будет сохране́н силою лежа́щия. Лев же, ископа́в ров, ели́ко довольно бе покрыти тело твое погребаемое, в пустыню, яко тихо овча́, удалися. Зоси́ма же во своя возврати́ся, хваля́ Бога и тебе взывая си́це: Радуйся, яко небесную достигла еси жизнь нескончаемую; радуйся, яко сподо́билася еси с девами вни́ти внутрь чертога Жениха твоего и Владыки. Радуйся, венце́м безсмертныя жизни от Господа увенча́нная; радуйся, во обители райския со славою восприя́тая. Радуйся, яко ныне со ангелы ликуеши; радуйся, яко ныне на небесе́х Владыце всех предстои́ши. Радуйся, молитвеннице о нас непостыдная; радуйся, заступнице наша непобедимая. Радуйся, преподобная мати Марие, чудо Божия милосердия.

Кондак 12

Благодать, данную ти от Бога, ве́дуще, восхваляем твое в подвизех изрядное житие и просим тя, мати блаженная, помози́ нам в чистоте и целомудрии пожити, укрепи́, богоблаже́нная, молитвами твоими и нас, да сподо́бимся вы́ну воспевати хвалебную песнь Бо́гови: Аллилуиа.

Икос 12

Пою́ще подвиги многострадальнаго и предивнаго жития твоего, славим и ублажаем тя, преподобная, яко многомощную молитвенницу о нас пред Господем. Не забу́ди нас, почитающих имя твое святое и взывающих ти: Радуйся, призывающим тя теплая молитвеннице; радуйся, от Господа всех благих нам пода́тельнице. Радуйся, изнемогающих в брани укрепляющая; радуйся, унывающих скоро ободря́ющая. Радуйся, в беда́х и ско́рбех помощнице нам благодатная; радуйся, стра́ждущих целительнице скорая и чудная. Радуйся, от плотски́я брани моля́щияся к тебе избавляющая; радуйся, яко твоим пособием сокрушаются козни вражия. Радуйся, преподобная мати Марие, чудо Божия милосердия.

Кондак 13

О преславная и предивная мати Марие! Молися при́сно Христу Богу нашему дарова́ти нам грехов оставле́ние и жития исправление, да та́ко Небеснаго Царствия наследницы будем, в радости пою́ще с тобою и со всеми святыми Спасителю нашему благодарственную песнь: Аллилуиа.

Этот кондак читается трижды, затем 1-й икос «Ангел возбрани тебе» и 1-й кондак «Избранней от Господа...».

Молитвы

О равноангельная и всесветлая Марие преподобная, убели́вшая ризу души своея́ в Крови Агнчей и зря́щая ныне на небеси́ невечерний свет Царствия Небеснаго Христова, помяни́ мя, грешнаго и убогаго раба твоего, в богоприя́тных твоих к Богу молитвах и защити мя от ловле́ния врага, ве́си бо его козни и лютую в сем житии на ны брань, да́руй ми сле́зы покаяния, омывающия душевную мою скве́рну, испроси ми оставле́ние грехов и жития исправление, изба́ви мя от злых моих обычаев, ле́ности и нераде́ния, научи мя постоянству и крепости в борьбе с моими греховными навыками, напечатле́й в сердце моем и уме пресветлый образ тобою любимаго Христа, уязви́ мою душу Его всепрощающею любовию, да не оскорблю милосердие Его новыми грехи. Умоли о мне и милостивую Пору́чницу твою, Пречистую Деву Богородицу, да и мне, недостойному, да́рует всесильную Свою помощь и наставит на стезю спасения. Во исходе же от сего мира, о мати преподобная, сподо́би мя Причаще́ния Святых Божественных Та́ин, в страшный час смерти помози́, на воздушных мыта́рствах заступи́ и предста́тельством твоим отве́рзи ми двери Небеснаго Царствия, иде́же по труде́х и подвизех ныне водворяешися, зрящи и прославля́ющи Пресладкаго Искупителя твоего, пришедшаго в мир грешныя спасти и Божественною Свое́ю Кровию омывающаго нас от всякаго греха. Емуже слава, честь и поклонение со Безначальным Его Отце́м и Пречистым и Животворящим Духом в безконечныя веки. Аминь.

О великая Христова угоднице, преподобная мати Марие! Услыши недостойную молитву мене́, грешнаго, изба́ви мя, преподобная мати, от страсте́й, вою́ющих на душу мою, от всякия печали и находя́щия напасти, от внезапныя смерти и от всякаго зла, в час же разлучения души от тела отжени́, святая угоднице, всякую лукавую мысль, яко да прии́мет душу мою с миром в место светло Христос Господь Бог наш, яко от Него очище́ние грехов, и Той есть спасение душ наших, Ему же подобает всякая слава, честь и поклонение со Отце́м и Святым Духом во веки веков. Аминь.