Акафист преподобному Сампсону Странноприимцу
Празднование 27 июня/10 июля
Кондак 1
Избра́нна тя от Господа врача благодатна и странноприи́мца милостива почитающе и образу честно́му твоему с любовию молитвенно ныне предстоя́ще, ублажаем тя по достоянию, преподобне отче наш Сампсо́не. Ты же, яко име́яй дерзновение ко Господу, от всяких нас бед свободи́, зовущих: Радуйся, Сампсо́не, отче милостивый и врачу́ предивный.
Икос 1
Ангелом на небеси́, непрестанно славящим Творца и Владыку всех Бога, уподо́бился еси на земли́, богодухнове́нне Сампсо́не, дивными бо де́лы добрыми твоими и труды многими прославил еси Отца, И́же есть на небесе́х, благость и милосердие неизрече́нное Того людем явля́я. Ныне же в небесных селениих славы водворяяся, не забу́ди нас, любовию тебе зовущих: Радуйся, преизрядный ангелов подражателю; радуйся, благи́й и верный Царя Славы служителю. Радуйся, достойный избра́нниче Божий; радуйся, слуго́ милосердия Отча. Радуйся, священная главо́, богомудрием просвеще́нная; радуйся, недоуме́нная высото́ в молитвах непреста́нных терпения. Радуйся, благо́е иго Христово на ра́мена твоя взе́мый; радуйся, в радость Господа твоего вшедый и венец нетленный от Него прие́мый. Радуйся, Сампсо́не, отче милостивый и врачу́ предивный.
Кондак 2
Видяще веры очи́ма, яко богоподражательнаго ра́ди жития твоего во обители преподобных, иде́же пребывает свет незаходи́мый, вселился еси и просла́вленным от Бога достойно соприче́лся еси, да наследник вечнаго Царствия Христова будеши, вопием та́ко изволившему о тебе Господу: Аллилуиа.
Икос 2
Разум в добродетели яви́л еси, богомудре Сампсо́не, в разуме же воздержа́ние, в воздержа́нии же терпение, в терпении же благочестие, в благочестии же братолюбие: всем же сим нача́ток пламень веры в тебе бысть. Темже от начала восхваляем добродетельное житие твое и течение, преподобне, и ублажаем тя си́це: Радуйся, ветхаго Рима славнаго преизя́щное прозябе́ние; радуйся, родителей честны́х и великородных отрасле благородная. Радуйся, от юности твоея́ веры и благочестия усердный ревнителю; радуйся, ле́ствицы добродетелей духовных внутрь тебе мудрый строителю. Радуйся, во учениих человеческия мудрости изощре́нный; радуйся, служения ра́ди нищим враче́вскую мудрость восприе́мый. Радуйся, Господа Христа измла́да ра́бе искренний; радуйся, Его ра́ди всех отщети́выйся. Радуйся, Сампсо́не, отче милостивый и врачу́ предивный.
Кондак 3
Силою Вышняго осеня́ем, в вере, надежде, любви и разуме благодатно возрастал еси, преблаже́нне, ко учением человеческим Божественных Писаний разумение приложил еси и, человеческое врачева́ния искусство разумев, благодатную силу целительну от Господа добродетельми твоими стяжа́л еси, со дерзновением Ему предстоя́й и верою и любовию всегда вопия́: Аллилуиа.
Икос 3
Име́я ревность многу о Господе, да послу́жиши Ему всем сердцем и всею жизнию твое́ю, отверглся еси себе, дивный подвижниче Сампсо́не, и имения оставль и взем крест твой, последовал еси Христу; преста́вльшим бо ся родителем твоим и стяжа́ния многа оставльшим, богатство тленное расточил еси нищим и, рабом твоим свободу дарова́в, яви́лся еси яко странник. Сего ра́ди умильно зовем ти: Радуйся, евангельскому словеси́ после́довавый; радуйся, подобающая тебе творити не закосни́вый. Радуйся, в жизни земне́й единаго Христа всем сердцем возлюби́вый; радуйся, Того единаго всем разумением взыска́вый. Радуйся, любве́ ра́ди Его привре́менная в мыслех твоих во уме́ты вмени́вый; радуйся, Его ра́ди красная мира презре́вый. Радуйся, скорогиблющая богатства на негиблющая и вечная премени́вый; радуйся, на небеси́, а не на земли́ сокровище сердцу твоему обреты́й. Радуйся, Сампсо́не, отче милостивый и врачу́ предивный.
Кондак 4
Бурею помыслов стяжа́тельных смущаем юноша, якоже рече́ Евангелие, егда услыша глагол Господень: «Иди, прода́ждь имение твое и даждь нищим и гряди вслед Мене́», оты́де скорбя́. Ты же, отче, радостно по благому глаголу Христову сотворил еси и, уз богатства отрешився, единою оде́ждею прикрове́н и ве́рвием о чре́слех препоя́сан, рече́нное совершенство стяжа́л еси, да, ничимже запина́ем, вопиеши Богу: Аллилуиа.
Икос 4
Слыша глас Господа, тя в ду́се зову́ща, богоносне отче наш Сампсо́не, ветхий Рим оставль, в пустыню вселился еси, якоже Илия́ дре́вле, да, на высоту добродетели возшед, послу́жиши верующим в новом Риме, Константина Царя граде, в немже хра́мину обре́т, в той вселился еси, странныя и нищия упокоева́я, немощны́я прие́мля, всякое удовле́ние тем Христа ра́ди творя и исцеления неду́жным скоро подавая. Мы же, ве́дуще сия́, восхваляем тя та́ко: Радуйся, кри́не пустынный, от Бога во град ве́лий восхище́нный, да сей тобою укра́сиши; радуйся, Константи́ню граду красоту милосердия твоего наипаче яви́вый, да прославится в нем вера святая. Радуйся, Христа а́лчуща тамо напита́вый и жаждуща напои́вый; радуйся, Сего стра́нна прие́мый и на́га оде́явый. Радуйся, Сего больна́ посети́вый и не иму́щу, где главы́ подклонити, вита́лище бы́вый; радуйся, Господу сия́ сотворивый, поне́же братиям Его меньшим сия́ сотворил еси. Радуйся, преблаже́нне, в нищих, больных и странных Самому Христу послужи́вый; радуйся, блаженный Его глас име́яй услышати: «Прииди́, благословенный Отца Моего, и наследуй угото́ванное ти Царство». Радуйся, Сампсо́не, отче милостивый и врачу́ предивный.
Кондак 5
Божественную чудотворения силу покрывал еси, преподобне, образом человеческаго врачева́ния, великаго ра́ди твоего смирения, да не будеши, яко чудотворец, славим и почитаем от человек. Оба́че не может светильник на све́щнице укрытися, ниже́ град верху́ горы́ стоя́. Сего ра́ди, узре́в Божию силу, тобою целения творя́щу, патриарх тя радостно во пресвитера рукоположи́, да в сонме иерей вопие́ши Богу: Аллилуиа.
Икос 5
Видя себе в неду́г неисце́льный впа́дша, Иустиниан царь многи врачи иску́снейшия призва́: не возмо́гшим же им уврачева́ти его, возопи́ со слеза́ми к Богу, прося́ прилежно исцеления. Темже у́бо, умилосердився, Господь в виде́нии нощне́м показа́ ему тя, отче, яко врача благодатна, могу́ща его исцелити; и призвав тя теплый верою царь, умильно лобыза́ и со слеза́ми моли, да тобою исцеле́ет, и посе́м здрав бысть. Сие́ ве́дуще, зовем ти, преподобне: Радуйся, ра́бе Царя Вышняго, земному царю посланниче Его благопоспе́шный; радуйся, врачу́ всеизрядный, неду́г царя боля́щаго благодатию врачующею чудно исцели́вый. Радуйся, уте́шителю скорбным, исполня́яй радости к тебе притекающия; радуйся, радосте верных, веселие о Господе царю и людем его целением сотворивый. Радуйся, безсре́бренниче дивный, богатых тебе даров царских, злата и сребра отреки́йся; радуйся, странноприи́мче милосердный, к созиданию странноприи́мницы и враче́бницы сердце царе́во подвигнувый. Радуйся, строителю чудный, не име́я злата и сребра, обитель преудобре́нную больным и бедным созда́вый. Радуйся, нищия возлюбивый и во обители твоей тем даже до конца наипаче послужи́вый. Радуйся, Сампсо́не, отче милостивый и врачу́ предивный.
Кондак 6
Проповедует память твою, свя́те Сампсо́не, честна́я Церковь, яко старости добрыя в труде́х странноприи́мства и врачевания достигл еси, при скончании же жития твоего чужд был еси страха смертнаго, но све́тел лице́м яви́лся еси, егда разлуча́шеся душа блаженная твоя от телесе́, и радуяся преста́вился еси Господу, да пребудеши всегда с Ним, ку́пно со ангельскими лики вопия́: Аллилуиа.
Икос 6
Возсия́ благодатная любы́ твоя к нищим и странным в земне́м житии твоем, отче Сампсо́не, ея́же ра́ди созда́на бысть странноприи́мница и враче́бница твоя, но и по скончании земнаго жития твоего не оскуде́ша страннолюбная попечения твоя: оградил бо еси дивным явле́нием твоим странноприи́мную обитель от запале́ния огненнаго. Сего ра́ди дивя́щеся, благоговейно ти глаго́лем: Радуйся, в жизни твоей странноприи́мче благодатный; радуйся, и по преставле́нии твоем покровителю странным благонадежный. Радуйся, в земне́м житии нищим прибежище и избавление; радуйся, в небеснем водворе́нии достоянию твоему помоще и заступление. Радуйся, обитель твою, огне́м бурным обложе́ну, с небесе́ посетивый; радуйся, пламени запретивый и от дому твоего ину́ду его устремивый. Радуйся, яко твоими молитвами дождь ве́лий пролия́ся и пламень угаси́ся; радуйся, яко тобою пристанище странным и больным от сожжения спасе́ся. Радуйся, Сампсо́не, отче милостивый и врачу́ предивный.
Кондак 7
Хотя Человеколюбец Господь яви́ти в тебе, отче, неизрече́нное о людех милосердие, показа́ тя и по успении твоем целителя всеизрядна: Феодори́ту бо славну, лю́те стра́ждущу, во сне я́влься, целение сотворил еси, та́кожде и боля́рину Льву, неисце́льне неду́говавшу, ку́пно со святыми врачи Космо́ю и Дамиа́ном исцеление возвестил еси, и здрав бысть. Темже подвигл еси благородныя и славныя ку́пно с нищими и убогими благодарне вопия́ти Богу: Аллилуиа.
Икос 7
Новый по отшествии твоем яви́ся источник исцелений от тебе, чудотворче Сампсо́не, во храме плотска́го и духовнаго ю́жика твоего, мученика Мо́киа, иде́же положе́нный гроб твой нача́т источа́ти целебное ми́ро, имже всякими неду́ги боля́щии, с верою помазу́ющеся, здравие получа́ху и прославля́ху тя си́це: Радуйся, глубино́ смиренномудрия, от Бога превознесе́нная; радуйся, по успении твоем чудесы́ многими просла́вленный. Радуйся, реко́ чудоточная силы цельбоносныя; радуйся, яко просла́ви Бог гроб твой целе́нии дивными. Радуйся, высокороднаго Льва, разсла́блена су́ща, миром гроба твоего укрепи́вый; радуйся, к вя́щшему попечению о странноприи́мнице твоей, во е́же не оскуде́ти ей, того воодушевивый. Радуйся, пома́занием мира от честна́го гроба твоего Георгиа раба от труда водна́го свободи́вый; радуйся, изоби́луяй чудесы́ толи́кими, яко недоста́нет нам вре́мене повествовати о них. Радуйся, Сампсо́не, отче милостивый и врачу́ предивный.
Кондак 8
Страннолюбныя подвиги твоя почитающе и от тебе сотворе́нным чудесе́м дивя́щеся, благоговейнии лю́дие ин дом и врачебницу близ созда́ша, странноприи́мную же обитель твою, иде́же подвиза́лся еси, умоли́ша патриарха в храм освятити, да в нем прославят чудеса твоя и милосердие и в пениих церковных воспоют Богу: Аллилуиа.
Икос 8
Всею мыслию у Господа водворя́яся и зрением нетленныя славы Его наслаждаяся, не небрегл еси, отче, о тесноте и оби́дех, я́же прия́ша от домоправителей нерадивых страннии и больнии во обители твоей, и скорым заступлением оградил еси их. Темже и мы молим тя, преподобне, от злобы человеческия и от обиды творящих огради нас немощны́х твоим предста́тельством, да с любовию вопием ти си́це: Радуйся, под кров твой все́льшимся покрове небесный; радуйся, оби́димым заступниче скорый. Радуйся, оби́дящих наказателю неподкупный; радуйся, Энесиа строителя, су́ща нерадива и ле́ностна, вразуми́вый. Радуйся, неду́гом и немото́ю того порази́вый, да ко спасению его приведе́ши; радуйся, преще́нием твоим сего до́бре испра́вивый. Радуйся, яко Евстра́тиа строителя, о больных и странных твоих нерадя́ща, я́же подоба́ша ему творити, научил еси; радуйся, яко гневным явле́нием твоим и целением неду́га его к доброму служению сего подвигл еси. Радуйся, Сампсо́не, отче милостивый и врачу́ предивный.
Кондак 9
Всякий человеческаго естества́ чин: ца́рие и раби, нищии же и богатии, худоро́днии и высокороднии, почита́ху тя, преподобне, во граде и царстве равноапостольнаго царя Константина, отню́дуже возсия́ во Отечестве нашем святая вера православная, с неюже ку́пно слава и память твоя, и поклони́шася тебе, отче, во стране нашей чтущии тя но́вии сы́нове и дщери от убогих и даже до царей, по вере вопиюще Богу: Аллилуиа.
Икос 9
Вити́и многовеща́ннии не возмо́гут по достоянию восхвали́ти силы, тобою бывшия во Отечестве нашем, побора́ния же и заступле́ния, я́же яви́л еси во́инству и народу нашему во дни, в няже творя́ху память честну́ю твою. Темже припа́дающе молимся тебе, преподобне: Бу́ди всегда заступник и поборник наш проти́ву супоста́тов, соблюдая в мире и безмятежии Церковь Святую нашу и осеня́я молитвами твоими верныя, си́це зовущия: Радуйся, землю Российскую, ко Христу пришедшую, возлюбивый; радуйся, добропобедный во обстоя́ниих поборник тоя́ бы́вый. Радуйся, воинов наших силу мно́гажды на сопроти́вныя укрепи́вый; радуйся, тем, яко верным, победы на мятежныя дарова́вый. Радуйся, христолюбиваго князя Всеволода мы́шцу кре́пку на супоста́ты сотворивый; радуйся, непокоривыя и клятвопреступныя, аще и единоверныя, враги его поражением вразуми́вый. Радуйся, люди со князем благоверным, моли́вшияся тебе и Богородице Деве, услышавый; радуйся, в день памяти твоея́ радость тем победою на враги и пресече́нием междоусобныя брани сотворивый. Радуйся, Сампсо́не, отче милостивый и врачу́ предивный.
Кондак 10
Спасти хотя от отчаяния и па́губы верою притекающия к тебе и помощи твоея́ прося́щия, приклонил еси им милосердие Всеблагаго Владыки; темже восхваляти тя и почитати яко заступника в беда́х и покровителя страны нашея издревле научил еси отцы наша, да воспевают дарова́вшему нам тя яко молитвенника и скоропослушника Богу: Аллилуиа.
Икос 10
Стена крепкая был еси царству нашему, егда ополчи́шася на ны врази тмочи́сленнии, да силу нашу сокруша́т и игу своему тяжкому покорят. Ты же, отче и заступниче наш Сампсо́не, предста́тельством твоим пред единым сильным во бране́х Господем благовернаго царя нашего Петра укрепил еси и победу на враги ве́лию на по́ли Полтавстем дарова́л еси. Сего ра́ди благодарим тя и со умилением вопием ти: Радуйся, от покорения и рабства страну нашу огради́вый; радуйся, врагов наших силу предста́тельством твоим за ны сокрушивый. Радуйся, царя нашего победителя славна сотворивый; радуйся, сего во брани неврежде́нна сохранивый. Радуйся, славу страны нашея православныя утверди́вый; радуйся, дерзновенную гордыню возставшаго на ны иноплеме́ннаго воИ́теля низложи́вый. Радуйся, рог пле́мене нашего посреде́ народов победно вознесы́й; радуйся, поборниче за ны, хвало́ и славо наша. Радуйся, Сампсо́не, отче милостивый и врачу́ предивный.
Кондак 11
Пение всеумиле́нное принося́ще ти, преподобне, яко заступнику скорому, защитнику крепкому, предста́телю непостыдному, благодателю милосердному, научаемся житием твоим многотрудным, чудесы́ преесте́ственными, предста́тельствы дерзновенными, воспевати дивному во святых Своих Богу: Аллилуиа.
Икос 11
Светозарное светило возшед дре́вле на восто́це, возсия́л еси, яко солнце благодатное Российской земли́, мрак бо уныния и скорбе́й отгоняеши, просвещая упованием сердца́ твоея́ помощи во обстоя́нии прося́щих и согревая теплотою благости твоея́ охладевающия души коле́блемых ветром неверия. Сего ра́ди сы́нове российстии вопию́т ти си́це: Радуйся, яко тя славят Российстии собори; радуйся, яко тя превозно́сит Полтавская земля. Радуйся, град наш стольный победою Петра утверди́вый; радуйся, волею тя чтущаго царя храм тебе в нем водрузи́вый. Радуйся, яко во храме твоем лю́дие ве́рнии благоговейно лику твоему покланяются; радуйся, яко не всу́е сле́зы умиления, скорбе́й же и болезней пред иконою твое́ю проливаются. Радуйся, яко тобою бездомнии и си́рии пристанище себе и ныне обретают; радуйся, яко лю́дие наши, богатии и убозии, отца своего тя любовию те́пле именуют. Радуйся, Сампсо́не, отче милостивый и врачу́ предивный.
Кондак 12
Благодать и ве́лию милость испроси нам с небесе́, преподобне отче наш Сампсо́не, и молися ко Господу, да хранит державу Российскую це́лу и тве́рду, Церковь Святую Свою от неверия и отсту́пства и е́ресей непреобори́му, нас же, прибегающи́х к тебе с верою, да избавит от напастей и болезней, яко да воспоем благоде́ющему нам тобою Богу: Аллилуиа.
Икос 12
Пою́ще твое в Церкви Православней, во отечестве же и стольнем граде нашем прославле́ние, ублажаем тя, преподобне отче наш Сампсо́не, зову́ще: Не остави твоим предста́тельством и помощию нас, сущих маловерных, немощны́х, малодушных же и скорбных, и укрепи нас на пути многотруднем в Царство Небесное, иде́же со святыми блаженне водворяешися, да любовию от души вопием ти: Радуйся, дру́же Христов, ели́ка Христос запове́да сотворивый; радуйся, ближния, якоже и Христос верныя Своя, паче себе возлюбивый. Радуйся, врачебнице благодатная безмездных боля́щим целений; радуйся, широто́ необъя́тная любве́ и в ско́рбех утешений. Радуйся, отра́до сокровенная милостыни тайно творя́щим; Радуйся, древо сеннолиственное в зно́и трудов сущим. Радуйся, послу́шателю воздыханий тайных, благодея́ния твоя невидимо творя́й на земли́; радуйся, яко зна́ем добрая дела́ твоя и прославляем Отца нашего, И́же есть на небесе́х. Радуйся, Сампсо́не, отче милостивый и врачу́ предивный.
Кондак 13
О преподобне отче наш Сампсо́не, предивный чудотворче и целителю, бла́гостный уте́шителю, милостивый странноприи́мче и скорый заступниче! Приими́ сия́ ма́лыя приноси́мыя тебе хвалы и, предстоя́й всегда Престолу Живоначальныя Троицы, молися о всех нас, чтущих память твою, яко да милосердие Божие неизрече́нное, спасающее верныя от бед в земне́м житии и от гибели горькия в жизни вечней, излие́тся и на ны, пою́щия со упованием и верою Богу: Аллилуиа.
Этот кондак читается трижды, затем 1-й икос «Ангелом на небеси.» и 1-й кондак «Избранна тя от Господа...».
Молитвы
О предста́телю наш пред Господем и теплый молитвенниче, преподобне отче Сампсо́не! Зри́ши с небесе́, яко погибаем во обстоя́ниих и ско́рбех: прилагается бо посреде́ нас неверие ко отсту́пству и разделению, оскудева́ет любы́, умножаются же беззакония и соблазны, болезни и скорби множества бездомных, гла́дных и си́рых. Отку́ду, отче, прии́мем силы, да устоим проти́ву соблазнов мира, сохраним в сердцах наших любовь и веру Христову и упование православных и приложим попечение о больных и бедных, аще не ты заступиши нас твоим предста́тельством теплым, прося́ нам помощи от Бога в не́мощех наших? Сохрани мир и безмятежие Святы́я Це́ркве, всех же нас огради и сохрани непоколебимы посреде́ неверных, понося́щих веру нашу хули́телей, огради от соблазнов, возбуди́ сердца́ иму́щих к милованию нищих, согре́янию хла́дных, напита́нию а́лчущих и призрению бездомных, уголи умно́жение скорбе́й и болезней, глада и прочих уязвля́ющих ны бед, да́руй осла́бу стра́ждущим младенцем, низпосли́ от Господа укрепление, утешение и отраду жена́м, в муках деторождения сущим, и всем, в тяжких работах, в больницах, заточениих и темницах унывающим, да вси прославим в Троице славимаго Бога, Отца и Сына и Святаго Духа. Аминь.
О теплый молитвенниче, благостный отче, преподобне Сампсо́не! Моли Бога о мне грешнем и низпосли́ от Всеблагаго Владыки помощь ми и избавление: привре́менна бо есть жизнь моя и испо́лнена труда, скорбе́й и болезней. Укрепи сердце мое, да возмогу́ понести́ тяготу́ мою, и не попусти́, да превозмо́гут искушения многая моя ма́лыя силы, но споспе́шествуй мне заступлением твоим и посреде́ обстоя́ний и бед упра́ви путь мой в Царство Небесное, да славлю прославльшагося в тебе Господа во веки. Аминь.