Акафист преподобным Зосиме, Савватию и Герману Соловецким
Празднование 8/21 августа
Кондак 1
Избра́ннии угодницы Господни и вели́цыи чудотворцы, светильницы Христовы Це́ркве пресветлии, облиста́вшии благочестия светлостьми́ пустыни Севернаго Помория, и всей стране Российстей сияющии вы́ну чудес множеством, преподобнии отцы наши Зоси́мо, Савва́тие и Ге́рмане, яко иму́щии дерзновение ко Господу, благоприятными своими к Тому мольбами от всяких нас бед и зол сохраняйте, да радующеся зовем вам: Радуйтеся, преподобнии отцы наши Зоси́мо, Савва́тие и Ге́рмане.
Икос 1
Ангели воистину яви́стеся земнии и человецы небеснии житием вашим, преблаже́ннии отцы наши Зоси́мо, Савва́тие и Ге́рмане, во плоти бо, яко безплотнии, ангельское совершисте жительство на земли́, вся красо́ты мира и наслаждения вре́менная яко уме́ты вменя́юще, чистотою же и поще́нием вы́ну к Богу приближающеся. Емуже ныне достойно со безплотными предстоя́ще, приими́те от любве́ нашея приноси́мая вам хваления сицева́я: Радуйтеся, Единаго Бога от всея́ души своея́ возлюбившии; радуйтеся, от юности Тому преподобием и правдою послужи́вшии. Радуйтеся, возненави́девшии мира сего тленныя красоты; радуйтеся, избежавшии му́дре житейских соблазнов и суеты́. Радуйтеся, к деланию заповедей Господних всею любовию прилепи́вшиися; радуйтеся, мира сего и всякаго пристрастия к оному удалившиися. Радуйтеся, и́ноческое житие богоугождения ра́ди себе предызбра́вшии; радуйтеся, тесный и прискорбный путь всею душе́ю возлюбившии. Радуйтеся, мудрии взыска́телие Христа, бисера вожделеннаго и драга́го; радуйтеся, люботруднии носителие Христова бремене, легкаго и блага́го. Радуйтеся, ангелом безплотным во плоти бре́нней подражавшии; радуйтеся, на земли́ жительство небесное нам показа́вшии. Радуйтеся, преподобнии отцы наши Зоси́мо, Савва́тие и Ге́рмане.
Кондак 2
Видя себе, свя́те Савва́тие, ра́ди многих своих добродетельных исправлений, всюду в сопребываниих и́ноческих почита́ема и ублажаема, и бегая су́етныя мира сего славы, взыску́я же вечнаго воздая́ния на небесе́х, устремился еси ко ото́ку Солове́цкому, да тамо втайне и никимже видимый поработаеши невидимому и вся видящему Богу. Темже и улучи́в желаемое, блаженным Германом к сему наставля́емь, радостно возопил еси Богу: Аллилуиа.
Икос 2
Разум неуклонно впери́в от утробы ма́терни к Богу, и горняя вы́ну мудрствуя и взыску́я, дольних же всецело отвергаяся, богомудре Зоси́мо, поревновал еси житию преподобнаго Савва́тия, и во ото́це пу́сте, иде́же сей богоугодне соверши подвиги своя, вселился еси, да с ним наследуеши жительство горняго Иерусалима. Темже во обою́ восхваляюще пустынножития рачи́тельство, зовем вам: Радуйтеся, любве́ ра́ди Христовы, любовь в себе к миру попра́вшии; радуйтеся, всякую греховную сладость века сего презре́вшии. Радуйтеся, подо́бницы Авраа́му не то́чию верою и упованием, но и добровольным от рода своего и дома отеческаго преселением; радуйтеся, пустыни всекрасная и благозла́чная насажде́ния. Радуйтеся, безмолвия тщали́вейшии рачи́телие; радуйтеся, трудных подвигов пустынных искреннии любителие. Радуйтеся, в дебрех и го́рах паче, неже в се́лех мира, изво́лившии примета́тися; радуйтеся, в пустынях непроходимых, едини во труде́х и соблюдении заповедей Господних возлюбившии подвиза́тися. Радуйтеся, яко злато, искуси́вшиися в горни́ле пустыннаго озлобле́ния; радуйтеся, до́блественне претерпевшии от бесо́в же и от людей многая искушения. Радуйтеся, пророку Божию Илии́ и Крестителю Господню Иоанну нравом пустыннолюбия подражателие; радуйтеся, доблему Ге́рману единомысленнии сподви́жницы и любобезмо́лвнии купножителие. Радуйтеся, преподобнии отцы наши Зоси́мо, Савва́тие и Ге́рмане.
Кондак 3
Силы небесныя, в служе́ние посылаемыя хотя́щим наследовати спасение, дивно послужи́ша вам, о дво́ице боголюбивая. Егда бо насе́льницы мирсти́и, стужа́юще безмолвию твоему, отче Савва́тие, жити хотя́ху во острове близ тебе с жена́ми и чады, ангели грозным преще́нием и наказанием жены ры́баревы воспяти́ша сих от начинания богопротивнаго; тебе же, отче Зоси́мо, во озиме́нии пребывавшему кроме́ бра́шна, ангельским служением препода́шася потребная ко препита́нию. Сего ра́ди Богу, спасающему угодники Своя, пои́м: Аллилуиа.
Икос 3
Иму́ще ото́к морски́й во оби́телище себе, никимже населяемый, и в нем пребывающе, аки в раи́ богозда́ннем, вне мяте́жей и волнений житейских, и, кроме́ су́етных попечений, благочестно и богоугодно подвиза́стеся, о богоблаже́ннии, во дни и нощи́ поучающеся в законе Господни, и на всякий час умом несмуще́нным и сердцем чистым вознося́ще усердныя к Богу молитвы и моления. Сего ра́ди радостию вопием вам: Радуйтеся, в законе Господни непорочно ходи́ти всегда восхоте́вшии; радуйтеся, Господа своего пред очи́ма своима при́сно име́вшии. Радуйтеся, страхом Господним вся пути своя ограждавшии; радуйтеся, в трезве́нии умнем все житие свое провожда́вшии. Радуйтеся, вся помыслы ума в послуша́ние Христово всецело плени́вшии; радуйтеся, чистая ваша сердца в жилище Святому Духу предста́вившии. Радуйтеся, не давшии сна очи́ма во всено́щных Го́сподеви предстоя́ниих; радуйтеся, вы́ну претерпевшии скорби в поучении смертнем и в сердечных ко Господу воздыханиих. Радуйтеся, с искреннею любовию подвиза́вшиися на славословие Божие и псалмопения; радуйтеся, сердцем и усты́ непрестанная возсылавшии к Богу моления. Радуйтеся, внутрь сердца своего сокровенное Царствие Божие обре́тшии; радуйтеся, восхождении умными к небесным виде́нием востекшии. Радуйтеся, преподобнии отцы наши Зоси́мо, Савва́тие и Ге́рмане.
Кондак 4
Бурю жития сего многомятежнаго безбедно премину́сте, отцы преподобнии, и свирепыя волны страсте́й же и искушений, от мира и плоти и от духов злобы воздвиза́емыя, не погрузи́ша и не поколеба́ша корабля душ ваших, ве́трилы молитвы непрестанныя окриля́емаго, и нестяжа́нием облегчава́емаго, благодатию же Божиею управляемаго. Те́мже и достиго́сте к безмятежному пристанищу живота вечнаго, вопиюще Богу: Аллилуиа.
Икос 4
Слышаще и ве́дуще от Писаний Божественных, яко вси подвиза́вшиися во благочестии распина́ху плоть со страстьми́ и похотьми́, благочестному́дренно, о преподобнии, сих подвигом после́дствующе, подвиза́стеся умертви́ти у́ды своя сущия на земли́, в поще́ниих, бдениих и во всяких труде́х и́ноческаго жития мужески претерпевающе скорби. Сего ра́ди, яко до́блия подвижники благочестия, венчаем вы хвалении сицевы́ми: Радуйтеся, телеса́ своя труды и болезньми воздержа́ния увяди́вшии; радуйтеся, вся плотска́я мудрова́ния, на дух вою́ющая, духу покорившии. Радуйтеся, покая́нными слеза́ми пламень страсте́й угаси́вшии; радуйтеся, в пещи́ воздержа́ния ду́ши своя яко злато очистившии. Радуйтеся, ветхаго человека со страстьми́ его совле́кшиися; радуйтеся, оде́ждею безстрастия и славою нетления достойно обле́кшиися. Радуйтеся, возненавидевшии вре́менную греха́ сладость; радуйтеся, наследовавшии на небеси́ нескончаемую радость. Радуйтеся, прежде смерти, миру и сласте́м его плоть свою распе́ншии; радуйтеся, прежде воскресения, славу будущия жизни в себе прояви́вшии. Радуйтеся, стезе́ю поста к наследию рая́, потеряннаго невоздержа́нием, путь нам указа́вшии; радуйтеся, в телеси́ ме́ртвеннем и тленнем безсмертие и нетление будущаго века всем предъяви́вшии. Радуйтеся, преподобнии отцы наши Зоси́мо, Савва́тие и Ге́рмане.
Кондак 5
Боготечныя и многосветлыя зве́зды яви́лися есте́, преподобнии отцы Зоси́мо, Савва́тие и Ге́рмане, светозарными исправле́нии заповедей Господних озаряющии души и сердца́ верных, и препла́вающим в нощи́ греховнаго омраче́ния пучину житейскаго моря указу́ющии благонадежный путь ко блаженному пристанищу Небеснаго Царствия. Темже яви́вшему вы, яко руководи́тели и наставники ко спасению, Благодетелю Богу пои́м: Аллилуиа.
Икос 5
Видевше злоко́зненнии ненавистницы спасения человеческаго, нечистии ду́си тьмы, богоугодное житие ваше, отцы преблаже́ннии, многообра́зная воздвига́ху на вы искушения и страхования, овогда́ в мысли и сердце всева́юще боя́знь и смущение, овогда́ же преобразу́ющеся в различная привиде́ния ди́виих зверей и гад, с яростию устремляхуся на вы, чающе отврати́ти от подвига богоугоднаго и изгнати от пребывания пустыннаго; вы же, твердою верою в Бога Промыслителя возмога́юще и оружием молитвы и воздержа́ния проти́ву врагов ваших ополчающеся, до конца победи́сте и низложи́сте их державу. Сего ра́ди, победительную песнь пою́ще, взываем к вам: Радуйтеся, во́ини духовнии непобедимии; радуйтеся, ору́жницы Христовы добропобеднии. Радуйтеся, подвижницы, проти́ву козней лукаваго мужески ополчившиися; радуйтеся, столпи́ кре́пцыи, от нападений вражиих не поколебавшиися. Радуйтеся, вся стре́лы диа́воли аки хвра́стие сокрушившии; радуйтеся, вся стуже́ния того и страхования ни во чтоже вмени́вшии. Радуйтеся, яко во плоти су́ще победи́сте враги безплотныя и невидимыя; радуйтеся, яко и во гробе́х лежа́ще, низлага́ете вражия ополче́ния. Радуйтеся, победоносцы славнии, венча́ннии от Небеснаго Венцеда́теля; радуйтеся, споборницы до́блии ра́тующим на миродержи́теля тьмы века сего. Радуйтеся, яко подвигом вашим ангели удивишася; радуйтеся, яко о славе вашей собори верных возвесели́шася. Радуйтеся, преподобнии отцы наши Зоси́мо, Савва́тие и Ге́рмане.
Кондак 6
Проповеданное от ангел изволе́ние Божие о населении и́ночествующими ото́ка Солове́цкаго испо́лнися вами, отцы преблаже́ннии Зоси́мо, Савва́тие и Ге́рмане; се бо пустыня неплодная и ненаселенная, по́ты же и слеза́ми вашими обильно напое́нная, показа́ся яко вертоград благоцветущий и рай словесный, иде́же ли́цы и́ночестии, вами благонауче́ннии, плоды богоугодныя принося́ще, пою́т ангельскую Богу песнь: Аллилуиа.
Икос 6
Возсия́сте, отцы богоноснии, светом благочестия, яко светила богосветлая, светоносными лучами ваших подвигов и добродетелей просвещающии всюду. Отоню́дуже мы, грешнии и тмою страсте́й помраче́ннии, во свете ваших богоугодных дея́ний теку́ще ко дню света и спасения, восхваляем вы, пою́ще си́це: Радуйтеся, ученицы́ Христовы благопослушнии; радуйтеся, Владыки своего раби́ блази́и и ве́рнии. Радуйтеся, трудолю́бнейшии винограда Христова делателие; радуйтеся, тщали́вейшии заповедей Христовых исполнителие. Радуйтеся, игу Христова смирения и кротости благопокорне ра́мо свое подклонившии; радуйтеся, во след Христа Господа, учи́вшаго о нищете, усердно в нищете и нестяжа́нии последовавшии. Радуйтеся, по словеси́ Господа, прешедшии путь вре́меннаго жития сего стезя́ми прискорбными и тесными; радуйтеся, аки дожде́м, измывшии ду́ши своя то́ки сле́зными. Радуйтеся, Красне́йшему душ Жениху красоту девства своего сохранившии; радуйтеся, во всякой святыни, всеми добрыми де́лы Тому благоугодившии. Радуйтеся, Господа своего прославившии в душа́х ваших и телесе́х; радуйтеся, от Господа по достоянию просла́вленнии на земли́ и на небесе́х. Радуйтеся, преподобнии отцы наши Зоси́мо, Савва́тие и Ге́рмане.
Кондак 7
Хотя́й спасти вами многия, Премилосердый Бог яви́ вас быти не то́чию наставники сонма и́ночествующих, но якоже боговеща́нныя проповедники, возвести́вшия имя Божие в страна́х Лапландии. Лю́дие бо, во о́нех ме́стех обитающии, и не ве́девшии дото́ле Бога, но прилежа́вшии весьма идолопоклонению и нече́стию, во светлости вашего, о преподобнии, жития, зна́мений же и чудес, узре́ша первую зарю спасительнаго богове́дения и благочестия, и от вас научи́шася воспевати Истинному Богу: Аллилуиа.
Икос 7
Дивно и преславно совершивше путь своего спасения, чу́дную же и боголе́пную основавше обитель во спасение и́ночествующим, блаженную восприя́сте живота своего кончину, приснопамятнии отцы наши, Зоси́мо, Савва́тие и Ге́рмане; оба́че, и по смерти вашей, при́сно жи́ви су́ще, нас чад своих, никогдаже оставляете, не духом то́чию нам при́сно спребывающе, но и мо́щи своя цельбоносныя нам преда́вше, яко сокровище безценное. Сего ра́ди с радостию ублажаем вы, зовуще: Радуйтеся, добрым подвигом во всем житии своем подвиза́вшиися; радуйтеся, славою и честию от Владыки своего Христа увенча́вшиися. Радуйтеся, яко привре́менно потрудившеся, в вечный покой внидо́сте; радуйтеся, яко тесным шествовавше путе́м, к блаженству Царства Небеснаго достиго́сте. Радуйтеся, аще и не единоку́пно, но в равных подвизех подвиза́вшиися на земли́; радуйтеся, за равноподвижное житие, радостию и веселием вку́пе наслаждающиися на небеси́. Радуйтеся, во ото́це пу́сте, яко град, обитель иноком основавшии; радуйтеся, сонмы иноков о Христе Бозе во оней собравшии. Радуйтеся, стра́жи стаду своему приснобо́дреннии, и по днех вре́менныя жизни от дел благотворений не почивающии; радуйтеся, сы́нове Царствия, на небесе́х живущии и земных не оставляющии. Радуйтеся, духом вашим горе́ со ангелы святыми, и долу с нами грешными при́сно пребывающии; радуйтеся, от честны́х моще́й ваших струи́ милости на всех источающии. Радуйтеся, преподобнии отцы наши Зоси́мо, Савва́тие и Ге́рмане.
Кондак 8
Странную и пречудную, ве́лию же и прекрасную узре́в на возду́се я́вльшуюся церковь, все же место о́но, на немже имя́ше возгради́тися обитель иноков, ви́дя неизрече́нным светом осиява́емо, ужасом испо́лнился еси, отче Зоси́мо, от предивнаго виде́ния. Оба́че, Божие в оном откровение поразуме́в, на созидание обители тебе поощряющее, ку́пно же грядущую славу места сего прозря́, умиле́нным сердцем и усты́ воспел еси Богу: Аллилуиа.
Икос 8
Вси правовернии российстии лю́дие, прославляюще ваше святое и равноангельное житие, во всяких ну́ждах и ско́рбех притекают к вашей помощи и заступлению, отцы досточуднии: дана́ бо есть вам от Бога благодать, е́же моли́тися за ны, избавляти же и спасати от всяких бед и зол притекающия к ра́кам честны́х моще́й ваших, и на всяком месте призывающия святое ваше имя. Темже, исповедающе чудная ваша благодея́ния, благодарственная воспису́ем вам, зовуще: Радуйтеся, исто́чницы Божественных дарова́ний неисчерпа́емии; радуйтеся, ми́лования и любве́ к людем сосуди неиждива́емии. Радуйтеся, яко кадило благовонное, о мире молитвы к Богу вознося́щии; радуйтеся, немо́лчными вашими хода́тайствы всякое благословение от десни́цы Божия на ны низводя́щии. Радуйтеся, сущим в ско́рбех и ну́ждах известнии помощницы; радуйтеся, во обстоя́ниих и напастех скории посо́бницы. Радуйтеся, в неду́зех целители, и в бу́ри стра́ждущим благонадежнии кормчии и изба́вители; радуйтеся, во всяких беда́х и искушениих теплии предста́тели и уте́шители. Радуйтеся, верным, благочестно чтущим вас, на сопротивныя споборницы; радуйтеся, всея́ земли́ Российския избра́ннии молебницы и заступницы. Радуйтеся, на земли́ и на мори чудеса преславная содева́ющии; радуйтеся, во вся концы призывающим вы скорую помощь незави́стно простира́ющии. Радуйтеся, преподобнии отцы наши Зоси́мо, Савва́тие и Ге́рмане.
Кондак 9
Всеми богокрасными ле́потами добродетелей украси́в себе, прехвальне Зоси́мо, наипаче яви́лся еси красне́йший душе́ю же и телом, достойно пома́зався священства божественною ма́стию. Темже, егда во святе́м храме совершал еси пред престолом Господним первую Божественную службу, ви́деша вси лице́ твое, облиста́нное светом благодати, яко лице́ ангелово; весь же храм, во известное свидетельство достоинства твоего, испо́лнися ве́лия благоухания. Сего ра́ди вси, благодаря́ще Бога о своем пастыре, радостным сердцем взываху: Аллилуиа.
Икос 9
Вити́йственными добровеща́ньми несть возможно по достоянию воспети и прославити многая и неисче́тная, ве́лия же и преславная, и всякое разумение земное превосходя́щая, совершаемая вами, отцы преподобнии, на всякое время чудотворения. Оба́че, да не яви́мся чрез немотствова́ние подобни рабу, сокрывшему сокровище своего владыки, от уст, аще и не обуче́нных и слова премудрости отню́д не иму́щих, любовию же то́чию и благодарением дви́жимых, дерза́ем простира́ти песнь благодарения в память и прославле́ние чудес ваших, зовуще си́це: Радуйтеся, чудотворцы великоимени́тии и благосла́внии; радуйтеся, душ и телес вра́чеве немздоприе́мнии. Радуйтеся, очеса́ слепых благодатию Божиею просвещающии; радуйтеся, немото́ю свя́занная уста́ ко благоглаго́ланию разрешающии. Радуйтеся, разсла́бленных удесы́ исправляющии неможе́ние; радуйтеся, хромым да́рующии правохождение. Радуйтеся, плене́нных предста́тельством своим от уз и пленения свобождающии; радуйтеся, мертвых силою Божиею, вашим же умоле́нием воскрешающии. Радуйтеся, от обладания и мучи́тельства бесо́вскаго одержи́мым подающии свобожде́ние; радуйтеся, во всяких страсте́х и неду́зех совершающии дивное поможе́ние и исцеление. Радуйтеся, преподобнии отцы наши Зоси́мо, Савва́тие и Ге́рмане.
Кондак 10
Спасения подвиг до́бре совершив, жития же сего вре́меннаго отреша́яся и отходя́ к животу вечному и блаженному, Зоси́мо богоблаже́нне, утеша́л еси ученики твоя, глаголя, яко разлучаяся с ними теле́сне, неотступен будеши от них и обители твоея́ твоим духом. Отоню́дуже и саме́ми де́лы слово твое исполня́яй явля́ешися, не то́чию невидимо сопрису́тствуя нам и назирая вся, но и видимо многажды, вку́пе со блаженным Савва́тием, явля́яся во время благопотребно призывающим вас в помощь и вопиющим Богу: Аллилуиа.
Икос 10
Стена необоримая и покров твердый, спасения забра́ло и оружие победы бы́ша нам, отцы преподобнии, теплыя ваша к Богу молитвы, в день брани оныя лютыя, егда по грехо́м и беззаконием нашим, врази́ кре́пцыи и бранноискуснии со огне́м и мече́м нападо́ша на ны в достоянии вашем, во е́же сокруши́ти святыни ваша и положи́ти я в разорение и попра́ние, духовная же чада ваша победити и погубити смертию безгодною; оба́че, нико́еже зло возмо́гше сотворити, сами наипаче тии испо́лнишася студа́ и безчестия, уповающии же на помощь вашу препоя́сашася радостию и веселием о своем спасении. Благодаря́ще убо о сем Бога, исповедуем ку́пно ваше хода́тайство и заступление, и вопием вам те́пле из глубины души: Радуйтеся, па́стырие до́брии, от врагов губительных стадо свое защищающии; радуйтеся, яко орли́ под крило́ма своима птенцы своя покрывающии. Радуйтеся, покровом моли́тв свои́х в день брани нас осени́вшии; радуйтеся, гнев Божий, пра́ведно на ны дви́жимый, хода́тайством свои́м утоли́вшии. Радуйтеся, не давшии своего достоя́ния в попра́ние и расхище́ние; радуйтеся, паче надежды сохранившии е от огненнаго запале́ния. Радуйтеся, уповающия на вы от губительства смертнаго свободи́вшии; радуйтеся, от раны и язвы, от уз и пленения дивно тех сохранившии. Радуйтеся, врагов гордыню и дерзновение обратившии в студ им и безчестие; радуйтеся, ны жительствующия во обители вашей, неискусобра́нныя и безоружныя, оде́явшии в радость и веселие. Радуйтеся, веры и благочестия отеческаго неусыпнии охранители; радуйтеся, за царя и Отечество я́вльшиися и по смерти мужественнии вои́тели. Радуйтеся, преподобнии отцы наши Зоси́мо, Савва́тие и Ге́рмане.
Кондак 11
Песни хвалебныя и моления всеумиле́нная принося́ще, долготу́ же путную и опасности моря ни во чтоже вменя́юще, притекают к цельбоносным моще́м вашим ца́рие и князи, святители и вельможи, богатии и убозии, ближнии и дальнии, всяк возраст и пол, и всякое верных совокупление, и яко от неистощимаго источника, по коегождо своей потребе, прие́млюще обильная врачева́ния душевная же и телесная, прославляют и величают Бога, таковую благодать вам дарова́вшаго, поюще: Аллилуиа.
Икос 11
Светом Божественныя благодати, в недрех земли́, в предивных зна́мениих и чудесе́х, от первых дней упокое́ния, возблиста́вшия ваша мощи, достодолжно и праведно ли́цы и́ночестии, от многолетнаго покровения изне́сше, поста́виша со благогове́нием на све́щнице церковнем, во храме, имени вашему созда́ннем, благочестием великаго и святаго подражателя ваших подвигов, исповедника и мученика, святителя и первопрестольника Российскаго Филиппа. И мы ныне, благоче́стно о славе вашей веселящеся, обстоя́ще честны́я ра́ки моще́й ваших и любезно ты́я облобызающе, велегла́сно зовем вам: Радуйтеся, светильницы пресветлии, на све́щнице церковнем преславно поста́вленнии; радуйтеся, киво́ти честни́и, не ка́мением и зла́том, но благодати дарова́ньми украше́ннии. Радуйтеся, яко три звезды, озаряющии тьму полунощную; радуйтеся, яко три столпи́, в пределех Севернаго Помория утверждающии веру православную. Радуйтеся, исто́чницы райстии, моря́ чудес изливающии; радуйтеся, бисерие дражайшии, Церковь Христову украшающии. Радуйтеся, благочестия и добродетели светле́йшая зерца́ла; радуйтеся, Це́ркве и Отечества необоримая забра́ла. Радуйтеся, райскаго исполне́ния кри́ни благово́ннейшии; радуйтеся, лозы Божественныя ро́зги благоплоднейшии. Радуйтеся, отцы всеблаже́ннии, прославляемии горе́ от Бога и ангел, и до́лу ублажаемии от человек; радуйтеся, яко радость ваша, святая и совершенная, пребывает во век. Радуйтеся, преподобнии отцы наши Зоси́мо, Савва́тие и Ге́рмане.
Кондак 12
Благодать Свою Божественную, в телесе́х ваших обитающую, яви́ иногда Преблаги́й Бог благоговейному иноку Иосифу во образе двух столпо́в огнезра́чных, от земли́ до небес над гробы́ вашими вознося́щихся и сияющих светом неизрече́нным: воистину бо вы есте́, отцы преподобнии, духовнии светозарнии столпи́, светлостию высоких добродетелей и светом богозна́ния, зна́мений же и чудес озарившии пресветло духовную тьму в страна́х полунощных. Сего ра́ди Богу, прославляющему святы́я Своя, пои́м: Аллилуиа.
Икос 12
Пою́ще в песнех подвиги и труды вашего богоугоднаго жития, преславная же соде́янная и содева́емая во всяком роде благотворения и чудотворения восхваляюще и прославляюще, недоуме́ем, отцы досточуднии, ка́ко вас по долгу возымену́ем: мно́ги бо суть ваша добродетели и дарова́ния, сего ра́ди многая приличествуют вам и именования. Оба́че, во многих малыми удовля́ющеся, сия́ вам с любовию воспису́ем: Радуйтеся, ангели земнии, яко ангельским жительством на земли́ пожи́сте; радуйтеся, человецы небеснии, яко земнородни су́ще, возненави́десте земная, небесная же возлюби́сте. Радуйтеся, по́стницы терпели́вейшии, в при́снем поще́нии все житие свое проводи́вшии; радуйтеся, пустынницы достохвальнии, в пустынях незаходи́мых Го́сподеви послужившии. Радуйтеся, учителие и наставницы, руководя́щии своими де́лы на пути спасения; радуйтеся, вожди духовнии, многих души возводя́щии в небесная селения. Радуйтеся, мучеником единонравнии, яко мужески бравшиися со страстьми́; радуйтеся, апостолом подражателие, просветившии тьму неверия богове́дения светлостьми́. Радуйтеся, пророком подо́бницы, тайных и будущих прове́дением и прорече́нием; радуйтеся, всем святым единоче́стнии, подвигов ра́ди и богоугождения. Радуйтеся, таи́нницы благодати и чудес соверши́телие предивнии; радуйтеся, граждане небеснии и дру́зи Богу и святым Его при́снии. Радуйтеся, преподобнии отцы наши Зоси́мо, Савва́тие и Ге́рмане.
Кондак 13
О преподобнии отцы наши, Зоси́мо, Савва́тие и Ге́рмане! Приими́те благоутробно от нас, смиренных и недостойных, сия́ возноси́мая вам хваления, и благоприятными вашими к Богу мольбами оградите ны от всякия беды́ и напасти, от неду́га и гла́да, от огня и меча, и нашествия иноплеме́нных. Наипаче же сохраните ны вашим заступлением крепким от врагов невидимых, и́щущих ны погубити, да избы́вше их многоко́зненных сетей, праведно и богоугодно поживе́м в нынешнем ве́це, и сподобимся в Небеснем Царствии ку́пно с вами воспевати Христу Богу: Аллилуиа.
Этот кондак читается трижды, затем 1-й икос «Ангели воистину явистеся...» и 1-й кондак «Избраннии угодницы Господни...».
Молитва
О преподобнии и богоноснии отцы наши Зоси́мо, Савва́тие и Ге́рмане, земнии ангели и небеснии человецы, ближнии друзи Христовы и угодницы Божии, обители вашея славо и украшение, всея́ же северныя стра́ны, паче и всего православнаго Отечества нашего необоримая стено́ и великое заступление! Се мы, недостойнии и многогрешнии, с благоговейною любовию к ра́кам че́стных моще́й ваших припа́дающе, духом сокруше́нным и смиренным прилежно молим вас: Молите непрестанно благосердаго Владыку и Господа нашего Иисуса Христа, яко дерзновение ве́лие к Тому иму́щии, да не отсту́пит от нас Его вседействующая благодать, покров же и заступление Пресвяты́я Владычицы нашея Богородицы на месте сем да пребудет, и да не оскуде́ют никогдаже истиннии ревнители ангельскаго жития во святе́й обители сей, иде́же вы, богоноснии отцы и начальницы, безмерными труды и поще́ньми, то́ки же сле́зными и всенощными бдении, непрестанными молитвами и мо́леньми начало и́ноческому житию положи́сте. Ей, угодницы святи́и, молитвенницы к Богу благоприятнейшии, теплыми вашими к Нему мольбами оградите и сохраните ны и святое селение сие́ ваше от труса, потопа, огня и меча, нашествия иноплеме́нных и смертоносныя язвы, от вражды и всяких нестрое́ний, от всякия беды́ и скорби и от всякаго зла; да непрестанно на месте сем, в мире и безмолвии, благочестно славится Пресвятое Имя Господа и Бога, и обретают вечное спасение и́щущии Его. О преблаже́ннии отцы наши, Зоси́мо, Савва́тие и Ге́рмане! Услышите ны грешныя, во святе́й обители вашей и под кровом вашего защищения недостойно жительствующия, и благомощными вашими к Богу хода́тайствы испросите душа́м нашим грехов оставле́ние, жития исправление и вечных благ восприятие в Небеснем Царствии; всем же верующим, и́же на всяком месте и во всякой ну́жде призывают вас в помощь и заступление, и и́же с благоговейною любовию во обитель вашу притекают, не преста́ните излива́ти всякую благодать и милость, сохраняюще их от всякия сопротивныя силы, от всякия напасти и от всякаго злаго обстоя́ния, и подающе им вся потребная к душевней и телесней пользе. Наипаче же молите Премилосердаго Бога, да утвердит и укрепи́т Церковь Свою Святую и все наше православное Отечество в мире и тишине, в любви и единомыслии, в правоверии и благочестии да сохранит и соблюде́т во веки веков! Аминь.