Акафист преподобным Кириллу и Марии
Празднование 18 января/31 января и 28 сентября/11 октября
Кондак 1
Избра́ннии чудотворцы и предивнии угодницы Господни, Се́ргия великаго Церкви Российстей дарова́вшии, преподобнии Кирилле и Марие, обители Хотько́вския заступницы! Пение похвальное вам принося́ще, молим вы усердно: Яко иму́щии дерзновение ко Господу, предста́тельством вашим от всяких бед нас свободи́те и наследники Царствия Небеснаго соделайте, да зовем вси радостно: Радуйтеся, преподобнии Кирилле и Марие, усерднии о нас пред Богом молитвенницы.
Икос 1
Ангели земнии и человецы небеснии воистину яви́стеся, преподобнии Кирилле и Марие, от юности вашея чистую совесть пред Богом име́вшии и до́бре во благочестии вку́пе пожившии. Мы же, таковое богоугодное житие ваше прославляюще, гласы хвалебными взываем си́це: Радуйтеся, от юности вашея Христа возлюбившии и Тому Единому порабо́тавшии; радуйтеся, целомудрия хранителие и душевныя и телесныя чистоты рачи́телие. Радуйтеся, ду́ши и телеса́ ваша в обиталище Духа Святаго угото́вавшии; радуйтеся, испо́лненнии премудрости и разума божественнаго. Радуйтеся, яко от земли́ на небо преидо́сте и тамо со ангелы Троице предстои́те; радуйтеся, яко со безплотными лики Трисвятую песнь ей воспеваете. Радуйтеся, на небеси́ и на земли́ от Господа просла́вленнии; радуйтеся, обре́тшии место вечнаго всесве́тлаго упокоения. Радуйтеся, преподобнии Кирилле и Марие, усерднии о нас пред Богом молитвенницы.
Кондак 2
Видя Отец Све́тов богоугодное житие ваше, благоволи́ избра́ти вас, блаженнии, да яви́те ми́рови светильник пресветлый – Се́ргия преподобнаго, егоже ра́ди и ваша имена прославляются и вси ве́рнии воспевают Господу: Аллилуиа.
Икос 2
Разумом божественным просвещеннии, Кирилле и Марие, непрестанно поуча́сте чада своя послушанию и кротости. Умудри́те убо и нас, преподобнии, заповедем Господним следовати нело́жно, да обря́щем, якоже и вы, спасение вечное и принесе́м вам благохваления таковая: Радуйтеся, блаженнии, в боголюбии пожившии и благоверие сохраншии; радуйтеся, милости и сострадания преиспо́лненнии. Радуйтеся, милостынею и молитвами Небесное Царствие стяжа́вшии; радуйтеся, смирением и поще́нием вечное блаженство улучи́вшии. Радуйтеся, яко мзда ваша многа на небесе́х; радуйтеся, яко молитвами вашими и мы надежды Царствия Христова не лишаемся. Радуйтеся, яко радость ваша вечна во све́тлостех святых; радуйтеся, яко тоя́жде радости вашим предста́тельством и мы сподобля́емся. Радуйтеся, преподобнии Кирилле и Марие, усерднии о нас пред Богом молитвенницы.
Кондак 3
Силою Божиею ограждаемь, преподобный Кирилл князю Ростовскому со всяким усердием служа́ше и вку́пе с ним во орду Ага́рянскую мира ра́ди хожда́ше, да лю́дие российстии осла́бу от ига нечестивых и́мут и Богу непрестанно пою́т: Аллилуиа.
Икос 3
Иму́ще помышле́ние и уди́вльшеся моля́щиися в церкви лю́дие о трикратнем во чреве Мари́ином плода́ глаше́нии, разуме́ша нечто преславное и чудное быти: и по сих уве́девше радостное сына рождение, радовахуся. С нимиже и мы радостная вам, преподобнии, приносим глаго́люще: Радуйтеся, дво́ице святая, Богом благословенная; радуйтеся, зве́зды пресветлыя, богоугодный путь супружескаго жития верно указу́ющии. Радуйтеся, родителие блази́и добраго и избра́ннаго плода́; радуйтеся, благодати Божия испо́лненнии. Радуйтеся, супругов в православней вере и благочестии наставляющии; радуйтеся, богобоязненному воспитанию чад нас научающии. Радуйтеся, целомудрия супружескаго о́брази преизящнии; радуйтеся, хотя́щих богоугодно жити изряднии учителие. Радуйтеся, преподобнии Кирилле и Марие, усерднии о нас пред Богом молитвенницы.
Кондак 4
Буря скорбе́й и напастей житейских не осла́би крепкия любве́ вашея к Богу, Кирилле и Марие, блаженнии, но паче научи вас изряднее отражати разжженныя стре́лы лукаваго. Научите убо и нас вся скорби мира сего с кротостию претерпева́ти, пою́ще Богу: Аллилуиа.
Икос 4
Слышавше Варфоломея, грамоте неискусна, чтуща же богодухнове́нная пи́смена, удиви́стеся зело́, блаженнии, и благодарение Богу принесóсте, премудрость о́троку чрез ангела дарова́вшему, егоже в дом свой, яко старца-схи́мника прия́сте, заповедь апостола Павла соблюдающе: страннолюбия не забывайте. Мы же, таковую благодать Божию вам явле́нную видяще, вопием си́це: Радуйтеся, заповедей Христовых ве́рнии исполни́телие; радуйтеся, учения евангельскаго истиннии после́дователие. Радуйтеся, угодницы и дру́зи Божии; радуйтеся, странноприи́мства древняго пра́отца Авраама подражателие. Радуйтеся, светом благочести́ваго жития вашего просиявшии; радуйтеся, любовь и милосердие к нищим и си́рым яви́вшии. Радуйтеся, безпомощным скории помощницы; радуйтеся, яко и нам при́сно помогаете и к Небесному Отечеству нас руководствуете. Радуйтеся, преподобнии Кирилле и Марие, усерднии о нас пред Богом молитвенницы.
Кондак 5
Боготечным звезда́м подобни бы́сте, преблаже́ннии Кирилле и Марие, егда, пришедше от страны Ростовския в пределы княжества Московскаго, во граде Ра́донеже вселистеся и тамо сущих людей благочестием своим удиви́сте, подвиза́юще тех пе́ти: Аллилуиа.
Икос 5
Видевше, святи́и, тщание сына вашего, Варфоломея, к и́ноческому житию, молили есте́ его, да пребудет с вами до кончины вашея. Он же, яко сын послуша́ния, изде́тска науче́нный вами заповеди Господни исполня́ти, покорися воле вашей, якоже Божией, Кирилле и Марие, научая всех воспевати та́ко: Радуйтеся, блаженств Христовых причастницы; радуйтеся честнаго супружества и попечения о чадех образ истинный. Радуйтеся, ангелонравнии человецы; радуйтеся, преподобных и праведных соприча́стницы. Радуйтеся, Пресвяты́я Троицы ве́рнии служителие; радуйтеся, и чад ваших почита́ти Ю научившии. Радуйтеся, яко сын ваш Триипоста́сному Божеству обитель дивную устро́и; радуйтеся, яко сего ра́ди и ваша святая имена прославлена суть по всей Руси. Радуйтеся, преподобнии Кирилле и Марие, усерднии о нас пред Богом молитвенницы.
Кондак 6
Ревнителие веры православныя и благочестия во граде Ра́донеже показа́стеся не словом то́кмо, но и житием вашим, прехвальнии Кирилле и Марие. Темже и Святая Церковь достойно почитает вас, немо́лчно воспевающи дивному во святых своих Богу: Аллилуиа.
Икос 6
Возсия́ яко свет благочести́вое в боярстве житие ваше, преблаже́ннии Кирилле и Марие, егда же достигосте возраста прекло́нна, образ и́ноческий на ся восприя́ли есте́ во обители Хотько́встей, высшее нам смирение показу́юща. Темже с любовию вопием вам таковая: Радуйтеся, любве́ ра́ди Господа славу мира сего оставльшии; радуйтеся, наипаче славу Божию возлюбившии. Радуйтеся, во обитель древнюю пришедшии и тамо покой себе обре́тшии; радуйтеся, святую схи́му яко броню́ спасения восприя́вшии. Радуйтеся, Покрову Богородицы ду́ши своя вве́рившии; радуйтеся, образ ангельский восприи́мшии. Радуйтеся, всем иноком и и́нокиням доброе правило; радуйтеся, прежде кончины вашея блаженства от Бога удосто́ившиися. Радуйтеся, преподобнии Кирилле и Марие, усерднии о нас пред Богом молитвенницы.
Кондак 7
Хотя Человеколюбец Господь яви́ти в житии вашем, преподобнии Кирилле и Марие, образ назидания, не то́кмо людем мирски́м, но и и́ноческому лику, внуши вам в старости маститей оставити всякое попечение земное и восприя́ти образ ангельский, во е́же воспевати Триединому Богу хвалебную песнь: Аллилуиа.
Икос 7
Новую благодать показа́ всех Творец и Владыка чрез вас, преподобнии, егда прешли есте́ от вре́менныя сея́ юдо́ли плачевныя во обители вечныя. Святы́я бо мо́щи ваша, аще и под спу́дом сокровенны, чудеса источают и многим боля́щим, наипаче же приноси́мым к вам младенцем, исцеления подаю́т. Сего ра́ди приими́те, вра́чеве наши блаженнии, от нас похвалы сицевы́я: Радуйтеся, смертию вре́менною прешедшии к жизни вечней; радуйтеся, от Господа нетлением и чудесы́ просла́вленнии. Радуйтеся, яко память ваша с похвалами и успение со святыми; радуйтеся, яко имена ваша написана суть на небесе́х и благословенна во Отечестве вашем. Радуйтеся, боля́щим младенцем исцеление подающии; радуйтеся, деви́цу немощну́ю, с верою и любовию к вам притекшую, от неду́га тяжкаго избавившии. Радуйтеся, о любящих и чтущих вас небеснии предста́телие; радуйтеся, от Господа да́ры благости Его нам при́сно испроша́ющии. Радуйтеся, преподобнии Кирилле и Марие, усерднии о нас пред Богом молитвенницы.
Кондак 8
Страшное и великое бедствие прии́де на землю Московскую, егда язвою морово́ю уя́звлени бы́ша лю́дие мно́зи во гра́дех и ве́сех. Тогда собор освященный со и́нокинями Хотько́вския обители молебная пения вам принесо́ша и предста́тельством вашим избавление от смертоносныя беды́ получи́ша, вопиюще благоде́ющему чрез вас Богу: Аллилуиа.
Икос 8
Вси боголюбцы скорбию ве́лиею объяты бы́ша, егда во дни гонений и лихолетий, на землю Российскую нашедших, обитель Покрова Пречистыя Девы в Хотько́ве разорению и запустению богоборцы преда́ша. Память же ваша, преподобнии, в благочестивых людех незабвенна бя́ше и прославляема си́це: Радуйтеся, чудотворцы наши предивнии; радуйтеся, града Хотько́ва ограждение. Радуйтеся, обители вашея хранителие; радуйтеся, земли́ Ра́донежския покровителие. Радуйтеся, на враги видимыя и невидимыя кре́пцыи спобо́рницы; радуйтеся, благодея́ний множество источающия. Радуйтеся, состраданием вашим всех объе́млющии; радуйтеся, всем нам при́снии хода́таи спасения. Радуйтеся, преподобнии Кирилле и Марие, усерднии о нас пред Богом молитвенницы.
Кондак 9
Вся Церковь Божия радовашеся, егда обитель ваша, преподобнии Кирилле и Марие, возсозда́ся и мощи ваша честны́я, от лет древних Богом хранимыя, обре́тены и в храме соборнем положе́ны бы́ша. Сего ра́ди лю́дие к вам в напастех прибегают и помощь от вас получают, благодарне вопиюще Богу: Аллилуиа.
Икос 9
Вити́йство человеческое не довлеет к достойному прославлению чудес, от моще́й ваших и ныне совершающихся, преблаже́ннии Кирилле и Марие. Некая монахиня, ста́рица не́мощная, костное сокрушение име́вшая и от врачей исцеления не обре́тшая, к вам, преподобнии, притекши, со слеза́ми моля́шеся. Здравие же получивши, во умилении сердца воспева́ше вам: Радуйтеся, благодати Святаго Духа сосуди избра́ннии; радуйтеся, радости нам вечныя благоприятнии хода́таи. Радуйтеся, немощны́х от неду́гов скоро исцеляющии; радуйтеся, благодатными исцелении изрядных врачей удивляющии. Радуйтеся, нетленнии благоухающии цве́ти; радуйтеся, путь к безсмертию указу́ющии лучи. Радуйтеся, на земли́ величием чудес блистающии; радуйтеся, на небеси́ со ангелы Бога славящии. Радуйтеся, преподобнии Кирилле и Марие, усерднии о нас пред Богом молитвенницы.
Кондак 10
Спасение вечное наследовавше, богоблаже́ннии Кирилле и Марие, душа́ми вашими во обителех горних неразлучно в Бозе пребываете, честны́ми же моща́ми вашими во обители Пресвяты́я Девы нетленно вку́пе почиваете и обильная исцеления источаете, нас же в горний Иерусалим руководствуете, вопиющих Богу: Аллилуиа.
Икос 10
Стена и прибежище вы есте́, преподобнии, всем к вам притекающим. Ибо всех с верою приходя́щих от искушений и соблазнов мира сего сохраняете, во обители же вашей живущих монашескому деланию научаете. Сего ра́ди вам сицево́е благодарение прино́сим: Радуйтеся, руково́дствующии нас ко спасению; радуйтеся, наставля́ющии шествовати по заповедем Господним. Радуйтеся, научающии терпеливо нести крест свой; радуйтеся, яко вашими молитвами невреди́мы от бесо́в и человеков злых пребываем. Радуйтеся, яко вы есте́ хода́таи о святе́й обители вашей; радуйтеся, яко Богом собра́нным в ней се́страм вы есте́ помощницы. Радуйтеся, чадолюбивии наши заступницы; радуйтеся, яко с преподобным Се́ргием Престолу Божию предстои́те. Радуйтеся, преподобнии Кирилле и Марие, усерднии о нас пред Богом молитвенницы.
Кондак 11
Пение молебное приносят вам, преблаже́ннии Кирилле и Марие, не во обители Хотько́встей то́кмо живущии, но и вси чтущии сына вашего, преподобнаго Се́ргия. И прежде нежели поклонитися честны́м моще́м его, по завету древнему, вам благодарение возносят: честь бо сына на родители преходит. Сего ра́ди мы, прославляюще род праведных, пое́м Богу: Аллилуиа.
Икос 11
Светом трисия́нным осиява́еми, всеблаже́ннии Кирилле и Марие, со всеми святыми предстои́те ныне Небесному Царю и, яко светила светозарная, при́сно просвещаете души притекающих к ра́це моще́й ваших. Сего ра́ди, прославляюще вас, глаго́лем: Радуйтеся, яко сконча́ли есте́ жизнь свою телом, духом же не отступаете от нас; радуйтеся, с верою приходя́щих к ра́це моще́й ваших благодатно освящающии. Радуйтеся, бисери сияющии и благодатно люди просвещающии; радуйтеся, свети умнии, зарею Святаго Духа верных облиста́ющии. Радуйтеся, умилостиви́телие известнии Царя Небеснаго; радуйтеся, заступницы скории призывающих молитвенно честна́я имена ваша. Радуйтеся, помощницы дивнии, упование на вас по Бозе возлагающих; радуйтеся, всем православным всякое проше́ние во их пользу исполняющии. Радуйтеся, преподобнии Кирилле и Марие, усерднии о нас пред Богом молитвенницы.
Кондак 12
Благодать от Бога вам данную ве́дяще, прилежно молим вы ныне, прехвальнии схимона́си: Пролейте теплую молитву ко Господу, да сохранит обитель вашу неврежде́нну от напастей и нестрое́ний и нас да помилует и спасет, вопиющих Ему: Аллилуиа.
Икос 12
Пою́ще ваше богоугодное житие, преподобнии, и на небесе́х от Бога прославле́ние, ублажаем праведное преставле́ние ваше, величаем чудеса, от святых моще́й ваших истекающая, и на неусыпныя молитвы ваша уповающе, взываем вам си́це: Радуйтеся, житие ваше земное благочестне скончавшии; радуйтеся, от Царя Небеснаго венцы́ славы прии́мшии. Радуйтеся, облече́ннии в ризу благодатнаго нетления; радуйтеся, во благоухании святыни почивающии. Радуйтеся, препоя́саннии силою многих чудес; радуйтеся, яко честны́я мощи ваша врачуют неду́ги человеческия. Радуйтеся, яко от них всяк, с верою приходя́й, исцеление прие́млет; радуйтеся, яко обитель ваша по всей земли́ Российстей прославляется. Радуйтеся, преподобнии Кирилле и Марие, усерднии о нас пред Богом молитвенницы.
Кондак 13
О преславнии чудотворцы и угодницы Господни, преподобнии Кирилле и Марие! Приими́те сия́ моления наша, от всея́ души вам ныне возноси́мая, и сподо́бите нас предста́тельством вашим достигнути Небеснаго Царствия, иде́же ангели и вси святи́и воспевают непрестанными гласы хвалу Пресвяте́й Троице: Аллилуиа.
Этот кондак читается трижды, затем 1-й икос «Ангели земнии…» и 1-й кондак «Избраннии чудотворцы...».
Молитва
О рабй Божии, преподобнии Кирилле и Марие! Аще и сконча́ли есте́ вре́менную жизнь свою телом, но духом не отступаете от нас, руководствуете же ны ко Христу Богу, наставляете шествовати по заповедем Господним, и носи́ти крест свой, и последовати Владыце нашему. Вы, преподобнии, вку́пе с преподобным и богоносным отце́м нашим Се́ргием, вашим возлюбленным сыном, имеете дерзновение ко Христу Богу нашему и ко Святе́й Его Богоматери. Бу́дите молитвенницы и хода́таи о нас, недостойных, жительствующих во святе́й обители вашей, ейже вы и начальницы. Бу́дите помощницы и заступницы Богом собра́нней дружине сей, да жительствующии на месте сем и приходя́щии с верою, вашими молитвами сохраняеми, невреди́ми от бесо́в и от человеков злых пребудем, славяще Святую Троицу, Отца и Сына и Святаго Духа, ныне и при́сно и во веки веков. Аминь.