Акафист святым благоверным князьям страстотерпцам Борису и Глебу
Празднование 2/15 мая и 24 июля/6 августа
Кондак 1
Избра́ннии и всехвальнии страстотерпцы Христовы Борисе и Глебе, благословеннии чада просветителя нашего равноапостольнаго Владимира, от и́дольскаго нече́стия в чудный свет веры Христовы пришедшии и кровь пролия́вшии за веру во Христа Бога нашего, похвальная пения вам принося́ще, мы, недостойнии, во гресе́х и ско́рбех наших прибегаем к вашему заступлению, вы же, яко дерзновение иму́щии ко Господу, моли́те Его, Всеблагаго Царя Славы, дарова́ти милость почита́ющим святую вашу память и во умилении се́рдца пою́щим вам: Радуйтеся, Борисе и Глебе, великии и славнии страстотерпцы.
Икос 1
Ангельски поживше на земли́, венец мученический улучи́ли есте́, святая братия по плоти Борисе и Глебе, все бо упование свое возложи́вше на Господа, от руки́ братния, яко овча́ти незло́бивая, закл́ани бывше, всех себе, своя ду́ши и юная телеса́ Господу преда́ли есте́; сего ра́ди, ублажающе всечестну́ю вашу память, от всея́ души нашея воспеваем вам: Радуйтеся, незло́бивии агнцы, Господу, яко овча́ти на заколение веде́нному, подражавшии; радуйтеся, кро́тцыи го́лубие, заповедь Христову в кротости сохраншии. Радуйтеся, от руки брата по плоти смерть без ропота прия́вшии; радуйтеся, Авелю ветхозаветному, рукою брата убие́нному, уподо́бившиися. Радуйтеся, венце́м небесныя славы увенча́ннии; радуйтеся, онаго венца́ небеснаго муче́ньми достигшии. Радуйтеся, Борисе и Глебе, великии и славнии страстотерпцы.
Кондак 2
Весть о кончине отца своего великаго Владимира слышав, святы́й князь Борис много пла́кашеся, глаго́ля: «Увы мне, отче мой, све́те очию мое́ю, сияние и заре лица моего, увы мне, ка́ко заше́л еси, све́те мой, не бывшу мне при твоем сконча́нии, дабы сам честно́е твое погребл тело, почто не сподо́бихся лобызати честны́я седи́ны твоя, отче мой». Таковым рыданием много тужа́ше на бре́зе реки Альты, иде́же стоя́ше с во́инством; во время же сие́ Святополк, Ка́ину подобный, брат сый, умышля́ше: «Погублю братию мою всю и единовластвовати буду». Собра́ же убийцы, повеле́ им убити тебе, святы́й Борисе; ты же сего лукаваго брата своего почитал еси, воздавая честь ему, яко старе́йшему, и смерть от него прия́в, Богу за вся воспевал еси: Аллилуиа.
Икос 2
Разум божественный испроси нам, святы́й Борисе, е́же подражати, якоже и ты, Господу ре́кшему: «Не убо́йтеся убивающих тело, души́ же не могу́щих убити», и в саду Гефсима́нстем волею в ру́ки мучителей вдавшемуся; ты бо, всеблаже́нне страстотерпче, не сопротив стал еси врагу, су́щу брату твоему, и по услышании, яко хо́щет тя убити, стоя́щу бо ти на Альте реце́ реко́ша киевскии боя́ре: «Гряди в Киев и ся́ди на престоле отчем, се бо и вои́ отчии с тобою суть», ты же рекл еси им: «На старе́йшаго брата не и́ду, егоже яко отца и́мам». Слышавше убо сия́, разыдо́шася вси, то́чию ближнии слу́ги оста́шася с тобою, с нимиже и шел еси ко брату твоему Святополку, е́же поклонитися яко старе́йшему князю; срет же тя на сем пути твоем, вестник некий глаго́лаше ти о злом умышле́нии Святополковом, – сему та́кожде не ял еси веры, ве́дущ себе ни в чесомже согрешивша проти́ву брата твоего. Ве́дуще убо сия́ добрая нрава твоего, вку́пе с блаженным братом твоим Глебом вопием вам: Радуйтеся, кро́тцыи агнцы, проти́ву ве́пря, брата, ничимже противуста́вшии; радуйтеся, чистии сердцем праведницы, ничтоже злое о нем помышлявшии. Радуйтеся, вели́ции исповедницы имене Христова даже до крове вашея; радуйтеся, земнии ангели, чистотою душ ваших небесных чертогов достигшии. Радуйтеся, мира сего мученицы, горних же высот блаженнии насельницы; радуйтеся, мира дольняго странницы, горняго же блаженства вечнии наследницы. Радуйтеся, Борисе и Глебе, великии и славнии страстотерпцы.
Кондак 3
Силою Вышняго укрепляем, небоязненно прия́л еси смерть, блаженне Борисе, молитвою и верою в Создателя своего быв укрепле́н, аще же яко человек и тужи́л еси, оба́че и Сам Господь Иисус Христос в нощь лютых страданий в Гефсима́нии моля́шеся со сле́зами до пота крова́ва; своему убо Владыце уподобля́яся, и ты печалию одержи́м быв, но возложи́в все упование свое на Господа, в день той же бя́ше суббота, вшед в шатер свой, молился еси с плачем Христу Богу и Пречистей Богоматери; во у́трии же недели, пева́емей у́трени, весть прии́м, яко убийцы твои близ есть, жду́ще молитвы твоея́ сконча́ния, прилежне молился еси и, егда совершися служба Божественная, всего себе преда́в воле Творца всяческих, Емуже за вся воспел еси: Аллилуиа.
Икос 3
Иму́щ душу твою устремле́нную в горняя в чаянии смерти, ты, святы́й Борисе, прилежне убо наче́н молитися, глаго́ля: «Господи, что ся умно́жиша стужа́ющии ми, мно́зи востают на мя», – и прочее псалма́ того и, паки чтущ псалтырь со многим умилением, глаго́лаше псалом оный, в немже суть словеса́ сия́: «К Тебе приве́ржен есмь от ложе́сн, от чрева матере моея́ Бог мой еси Ты, да не отступи́ши от мене́, яко скорбь близ, яко несть помогаяй ми; Ты же, Господи, не удали помощь Твою от мене́, на заступление мое вонми́», – и прочая псалтыри Давидовы, от нея́ утешение почерпа́я и подавая образ терпения во злостраданиих и е́же вя́щше поучатися в законе Господни день и нощь. Сего ра́ди тебе и святому брату твоему Глебу во умилении сердца глаго́лем: Радуйтеся, яко кри́ни се́льнии, во у́трии дне жития дерзновенно уре́заннии; радуйтеся, красотою чистых душ ваших паче оных украше́ннии. Радуйтеся, гро́здие винограда Божественнаго, кровь вашу, аки вино, в жертву Го́сподеви источи́вшии; радуйтеся, древа светлоплодовитая, рая́ всечестна́го шумом ли́ствий своих Содетеля всех отве́рзти врата́ моля́щая. Радуйтеся, древа, Псалмопевцем воспетая, плодами духовными любве́ и веры Церковь возвеселившая; радуйтеся, дво́ице святая, во псалме́х воспита́нная и сладчайшими псало́мскими словесы́ в час смертный укрепле́нная. Радуйтеся, Борисе и Глебе, великии и славнии страстотерпцы.
Кондак 4
Бурею скорбных помышле́ний одержи́м бе святы́й Борис по скончании утренняго пения и, взира́я на икону Христову, с плачем глаго́лаше: «Господи Иисусе Христе, сим человеческим образом явле́йся на земли́ спасения ра́ди нашего и изво́ливый на Кресте пригвозди́тися грехов ра́ди наших, Ты и мене́ сподо́би о имени Твоем претерпети страдание сие́, е́же не от сопротивных, но от брата моего приемлю неповинно, и не постави ему, Господи, в грех сего». Таковей молитве, великий страдальче Борисе, дивя́щеся, да сподо́бимся и мы грешнии подражати тебе, якоже ты Господу, на Кресте возноси́мому, глаго́лавшему: «Отче, отпусти им, не ве́дят бо, что творят», и первомученику архидиакону Стефану, ка́мением побиваему бывшу и вопия́вшему: «Господи, не постави им греха сего», и подражающе тебе, воспеваем при́сно песнь хваления за вся Господу: Аллилуиа.
Икос 4
Слышавше сия́ молитвенныя и кроткия о мучителех своих глаго́лы святаго Бориса, жестокосердии убийцы ника́коже умягчи́шася, но паче исполня́хуся злобою и, яко зве́рие лютии, внеза́пу нападо́ша на тя, святы́й страдальче, со оружием, обнаже́нными мечи́ и ко́пии, и ударивше тя, прободо́ша и поверго́ша на землю. Сие́ убо воспоминающе, содрогаемся и тебе и блаженному Глебу похвальная воспису́ем сия́: Радуйтеся, ве́лиею любовию пламеневшии даже до крове; радуйтеся, веру до лютаго скончания жития вашего непорочно сохраншии. Радуйтеся, словом и житием своим А́гнца Христа велегла́сно проповедавшии; радуйтеся, и сами за Него закла́ни бывше, якоже агнцы. Радуйтеся, от вре́менныя жизни сея́ преста́вившиися к жизни нестаре́емей; радуйтеся, от су́етныя скорогибнущия славы преселившиися ко славе вечней. Радуйтеся, Борисе и Глебе, великии и славнии страстотерпцы.
Кондак 5
Чу́жде убийцам милосердие воистину, егда закла́вше тя, свя́те Борисе, нечести́вии, зря́ще тя пове́ржена на земли́, а́бие взя́ша и, обвивше в шатер якоже плащани́цею, возложи́ша на колесницу и везо́ша с собою и срето́ша дву варя́гу, по́сланную от Святополка, и та прини́кша ви́деста еще дышуща тя, оба́че сие́ подви́же их паче на ярость, и извле́к един от них меч свой, вонзе́ в сердце твое, и та́ко скончался еси, о великий мучениче, от зверонравных людей лю́те терза́емый, Господу же Мздовоздая́телю воспевший немо́лчно: Аллилуиа.
Икос 5
Узре́ смерть святаго Бориса, верный слуга его Георгий паде́ на тело господина своего и си́це глаго́лаше: «Не оставлю тебе, господине мой любимый, но иде́же красота телесе́ твоего увядает, тамо и аз скончаю живот мой». И сия́ убо любовь слуги ника́коже косну́ся злых сердец: взе́мше убо ко́пия, прободо́ша и Георгия, якоже и Бориса, таже Иу́дину нраву поревнова́ша, прельще́ни бывше златою гривною на вы́и Георгиевой, даром Бориса верному рабу своему, и́же сняти ника́коже бе мо́щно, отсеко́ша того ра́ди главу́ Георгиеву; и мно́зи о́троцы Борисовы таможде побие́ни бывше, сострадальцы господину своему яви́шася. Сие́ лютое дело чад сатанинских умными очесы́ нашими созерцающе, благоговейне пое́м мученицем: Радуйтеся, Борисе и Глебе, Святы́я Руси новии страстотерпцы; радуйтеся, просла́вленнии в ли́це святых мученик. Радуйтеся, и с собою приведшии лик сострадальцев; радуйтеся, увенча́ннии нетленною славою мученических венце́в в горних обителех. Радуйтеся, земную плачевную юдо́ль пренебре́гшии, зря́ще умными очесы́ славу небеснаго чертога; радуйтеся, онаго чертога достигшии и венец победы от Христа прия́вшии. Радуйтеся, Борисе и Глебе, великии и славнии страстотерпцы.
Кондак 6
Проповедует мир христианский величие страданий святых мучеников Бориса и Глеба, имы́й их, яко путеводи́телей своих к горним селением, глаго́лет бо святы́й Симеон Метафра́ст, списатель дея́ний святых Божиих, яко «жития и подвиги святых подо́бятся светлости звезд, якоже бо зве́зды положе́нием на небеси́ утвержде́ни суть, всю же поднебесную просвещают, ты́яжде и от индиа́н зря́тся, не сокрываются и от скифов, землю озаряют и морю светят, и плавающими корабли управляют, ихже имен аще и не ве́мы множества ра́ди, оба́че све́тлей добро́те их чуди́мся, си́це светлость святых, аще и затворе́ны суть мощи их во гробе́х, но силы их в поднебесней земными пределы не суть определе́ны». Чуди́мся тех житию и удивляемся славе, е́юже Бог угодившия Ему прославляет, воздвига́я и нас хла́дных ко славословию имени Его пети со умилением: Аллилуиа.
Икос 6
Светом Тро́ическим просвещаемии в горних обителех мученики, вы́ну предстоя́щии Престолу Того, за Негоже лютыя муки претерпе́ша на земли́, свыше от оных горних чертогов молитвами своими ниспосыла́ют нам от Творца всяческих мир и благоденствие, аще то́кмо память их чтим и просим помощи их усердно, не усты́ то́кмо, но и паче сердцем; почита́юще та́ко и память святых страстотерпцев Бориса и Глеба, во умилении сердечнем глаго́лем: Радуйтеся, доблестнаго лика мученическаго светлое сияние; радуйтеся, всего рода христианскаго славо и украшение. Радуйтеся, добродетелей евангельских честна́я вместилища; радуйтеся, взыскателие небеснаго вечнаго сокровища. Радуйтеся, венце́м вечнаго веселия на небеси́ увенча́ннии; радуйтеся, и нас, сущих на земли́, помощию свое́ю не оставляющии. Радуйтеся, Борисе и Глебе, великии и славнии страстотерпцы.
Кондак 7
Мира су́етнаго сладости не удержа́ша вас на земли́, мученицы святи́и Борисе и Глебе, от княжеския славы ко славе вечней прешедше, оную бо вечную святую красоту небес умными очесы́ зре́ли есте́. Сея́ сладости лютым путе́м муче́ния достиго́сте и тамо во храме небесныя дивныя Божия Славы у Престола Вседержи́теля Бога воспеваете вы́ну: Аллилуиа.
Икос 7
Егда прободе́н бе святы́й Борис и тайно без единыя почести погребе́н в Вышгороде, Святополк зверонравный помышля́ше в себе, ка́ко и Глеба убити; сей же убо Глеб от единыя со святым Борисом матере сын бе Владимиру, юн сый, нравом кро́ток, тих и незло́бив. Сему убо кня́жащу в Муроме, посла́ Святополк, ле́стно глаго́люще: «Отец вельми́ болит и зовет тя к себе, хотя ви́дети тебе, гряди́ убо, борзя́ся в ма́лей дружине». Вняв убо сим глаго́лам, Глеб святы́й скоро потщи́ся и́де в Киев, не испыту́я вести сея́, любя́ше бо отца своего и крепким желанием горя облобызати его честны́я седи́ны. Мысленне воспоминающе сие́ скорое твое течение ко смерти, тебе и брату твоему Борису уми́льно зовем: Радуйтеся, лестию уловле́ннии и к смертному пределу земныя жизни вашея скоро текшии; радуйтеся, лютыми страда́ньми небеснаго покоя достигшии. Радуйтеся, о телесе́х своих всячески небре́гшии; радуйтеся, ду́ши ваша Го́сподеви приобре́тшии. Радуйтеся, земную плачевную юдо́ль без сожаления оставльшии; радуйтеся, небесную славу улучи́ти сподо́бльшиися. Радуйтеся, Борисе и Глебе, великии и славнии страстотерпцы.
Кондак 8
Странно есть людем христолюбивым ви́дети, ка́ко брат окаянный избива́ше братию за почести великаго на Руси князя и богатство многих градо́в и областе́й, но таковы́ убо мысли людей нечести́ваго века сего и таковы́ козни людей, я́же не Богу слу́жат, не о Бозе помышля́ют, но по́хотем своим и миру погибельному усердно работают, в помраче́нии ума и сердца своего дерзкия ху́лы изрыга́юще на Господа Творца всяческих; мы же, благоговейно почита́юще память мучеников, Богу Благодетелю нашему вопием вы́ну песнь хвалы: Аллилуиа.
Икос 8
Весть прие́м от сестры́ своея́ Предисла́вы из Киева, брат святых мученик Ярослав, князь Но́вгорода, возвести́ святому Глебу о лука́вствии Святополка, теку́щу же скоро в Киев Глебу и пришедшу ему на у́стие Волги, но́щию потче́ся под ним конь в ро́ве и вреди́ ему ма́ло но́гу, того ра́ди се́де в ладию́, плыв до Смоленска и в уро́чище, Смя́день глаго́лемое, приста́вшу ему ко бре́гу, дости́же та́я весть Ярославова: «Не и́ди в Киев ко Святополку, поне́же отец наш у́мре, Святополк же уби́ Бориса и тебе хо́щет убити». Сию́ весть слышав, святы́й Глеб много пла́кася по отце и убие́ннем брате, мы же, вне́млюще сему благосердому плачу, от глубины души́ взываем святым страстотерпцем си́це: Радуйтеся, земному отцу послу́шествоваша и любве́ Отца Небеснаго сподо́бистеся; радуйтеся, яко от отца земнаго Небесному Отцу сопричто́стеся. Радуйтеся, ве́лию любовь ко отцу своему земному даже до смерти своея́ неосла́бно име́вшии; радуйтеся, любовию небесною, аки огне́м, пламене́вшии и ею в чертоги Отца Небеснаго притекшии. Радуйтеся, небеснаго утешения паче земнаго во псалме́х Давидовых взыскавшии; радуйтеся, всякую земную радость презре́вшии. Радуйтеся, Борисе и Глебе, великии и славнии страстотерпцы.
Кондак 9
Ве́сти о убие́нии брата Бориса пришедшей, и са́ми убийцы от Святополка достиго́ша тебе, Глебе святы́й, и нападо́ша на ладию́ твою; ты же, узре́в разбойники ты́я, возде́в ру́це своя, со слеза́ми моля́шеся псаломскими словесы́, якоже и Борис, сими спасительными словесы́ Давида Псалмопевца, егоже во святе́й купе́ли Крещения нарече́н был еси: «Суди́, Господи, оби́дящия мя, побори́ борю́щия мя, приими́ оружие и щит и воста́ни в помощь мою; изсу́ни меч и заключи́ сопроти́в гоня́щих мя, рцы души́ моей: Спасение твое есмь Аз». Посреде́ тоя́ молитвы трапеза́рь твой, имы́й вражду на тя, ем тя соза́ди за главу́, вонзе́ нож в гортань, и, аки агнца непорочна, закла́нием предаде́ смерти. Да умягчи́т жестокая сердца́ наша Господь и наставит посреде́ се́ни смертныя воспевати, якоже и ти́и страстотерпцы, песнь хваления: Аллилуиа.
Икос 9
Вити́йство всякое су́етных мудреце́в века сего окаяннаго не постигнет и не разуме́ет доблественнаго страдания страстотерпец святых Бориса и Глеба, ка́ко сия́ юная ле́та победиша страх смертный, ка́ко не прилежа́ли миру, но Бога возлюбивше, Ему Единому всех себе преда́ли суть, смерть прии́мше, хвалу воспевающе Го́сподеви; сего су́етнии люди постигнути не могут, и врази́ Креста Христова су́щи, Христа Бога уничижа́ют, хулы́ глаго́лют и на святых Его, оба́че не ве́дят Писания, яко Бог поруга́ем не бывает. Мы же, ублажающе житие и кончину страстотерпец святых Бориса и Глеба, усердно им вопием: Радуйтеся, юро́дивую мудрость мира презревшии и горния мудрости взыскавшии; радуйтеся, в ско́рбех земных небре́гшии и радость небесную обре́тшии. Радуйтеся, Агнца ра́ди Христа, и сами в подобии агнцев закла́ние претерпевшии; радуйтеся, от мра́ка земнаго к небесному свету устреми́вшиися. Радуйтеся, горняго мира святи́и наследницы; радуйтеся, дольняго мира, по слову апостола, мудрии странницы. Радуйтеся, Борисе и Глебе, великии и славнии страстотерпцы.
Кондак 10
Спасению душ наших послужи́ша, мученицы святи́и, показа́ша бо нам, яко болезни телесе́ Христа ра́ди душу спасают и очищают от грехов. Темже молим вас, мученицы Христовы Борисе и Глебе, моли́теся за ны ко Господу, спасите ду́ши наша предста́тельством своим, правди́вии страстотерпцы и истиннии Евангелия Христова послуша́тели, да молитвами вашими управля́еми, достигнем Небеснаго Царствия и та́ко воспое́м Господу, Победителю смерти и ада: Аллилуиа.
Икос 10
Свет чудес и исцелений возсия́ от телес ваших, святи́и страстотерпцы, поло́женным бывшим моще́м вашим в Вышгороде, пе́рвее под спу́дом, таже изнесе́нным от земли́ во храм, от брата вашего Ярослава сози́жденный; по мно́зех же ле́тех князь Мономах Владимир, храму ка́менну созда́нну бывшу, внесе́ в онь святая телеса́ ваша, чудесы́ сияющая. Сия́ благоговейне воспоминающе, умиле́нно глаго́лем вам, святи́и: Радуйтеся, вместилища благодатных дарова́ний Духа Божественнаго, егоже храмы нерукотворе́ннии телеса́ ваша суть; радуйтеся, сокровища благодати, немощна́я врачу́ющия, в телесе́х ваших пребывающия. Радуйтеся, даром благодати сия́ о́троку, ско́рчену иму́ще ногу, исцеление явле́нием своим пода́вшии; радуйтеся, сле́пцу прозрение дарова́вшии и хромому, отсе́чену ногу иму́щу и принесе́ну бывшу к ра́це моще́й ваших, ногу во единем часе́ во удивление всех зря́щих возрасти́вшии. Радуйтеся, жену некую, не поче́тшую дне святителя Николая, усуше́нием руки́ вразумившии и по слезном покаянии у моще́й ваших исцели́вшии; радуйтеся, тому же святителю Николаю поревновавшии, оклеве́танных князю Михаилу неправедно мужей от темницы свободи́вшии. Радуйтеся, Борисе и Глебе, великии и славнии страстотерпцы.
Кондак 11
Пения похвальная прино́сит вам, святи́и страстотерпцы, земля ваша от дней преставле́ния вашего страдальческаго и до днесь, воздвигает храмы имени вашему, почита́ет дни страданий ваших, величается о имени вашем. Переясла́в, древний град отца вашего Владимира, совершая во вся ле́та в память вашу кре́стная хожде́ния по бре́гу реки Альты, на нейже святый Борис закла́н бысть, радуется. Радуется и весь Бори́спольская, яко весь Бори́сова нарече́нная воспоминанием страсте́й ваших. Сего ра́ди в радости духовней вопие́м: Возсия́ днесь преславная память ваша, страстотерпцы Христовы Романе и Давиде, созыва́ющи нас к похвалению Христа Бога нашего; тем притекающе к вам, исцеления дар прие́млем, вы же, с лики ангельскими предстоя́ще Святе́й Троице, моли́теся спастися нам, пою́щим во умилении сердца Богу: Аллилуиа.
Икос 11
Страшную казнь прия́ от правосуднаго Господа новый Ка́ин – Святополк, и́же прозва́ние окаяннаго от потомства ему даде́ся, по убие́нии бо страстотерпцев святых Бориса и Глеба и тре́тияго брата Святослава умертви́л есть, а́бие же по сих Ярослав собра́ во́и, подви́жеся ратию на Святополка и победи его на месте убие́ния Бориса святаго по мно́зей молитве сицево́й: «Кровь братий моих вопиет от земли́ к Тебе, Владыко, Господи Боже мой, но молю Тя, Всеблаги́й Творче, Судие́ Праведный, отмсти́ кровь праведных сих, якоже кровь А́велеву на Ка́ине, положи́в на него трясе́ние, та́ко положи́ трясе́ние и на сем окаяннем Святополке, яко да не возмо́жет проливати бо́ле крове братния и христианския». И бысть та́ко по молитве сей: стеня́ и трясы́йся, якоже Ка́ин, бежа́ Святополк чрез всю землю Ля́шскую, вопия́: «Се жену́т нас, бежи́те, бежи́те», и в пустынях Ля́хии и Че́хии сконча́ живот свой. Ужасом одержи́мии, зря́ще лютую кончину окаяннаго, вопием вам, мученицы святи́и: Радуйтеся, незло́биво смерть при́явшии, научите смирению и нас, гордостию вознося́щихся; радуйтеся, от властолюбия му́ченнии, свободи́те ны от духа любоначалия. Радуйтеся, не сопротивоста́вшии врагу, су́щу брату вашему, дади́те и нам крепость в несе́нии скорбе́й; радуйтеся, не проти́вльшиися злому ухищре́нию, ниспошли́те и нам дивный дар терпения. Радуйтеся, крепости божественныя испо́лненнии, укрепи́те ны на пути спасения; радуйтеся, от соблазнов су́етнаго мира отве́ргшиися, молитвами вашими нас вечнаго плача исхи́тите. Радуйтеся, Борисе и Глебе, великии и славнии страстотерпцы.
Кондак 12
Благодатию, данною вам от Бога, во е́же помогати скорбя́щим и озло́бленным, помощь дарова́ли есте, святи́и, князю Александру на реце́ Неве́ проти́ву све́ев, ви́де бо вас при захожде́нии солнечном воевода Филипп, на реце́ посреде́ корабля стоя́щих и плывущих: «Гребцы же седя́ху, аки мглою одея́ни», и слыша глаго́лание сие́: «Брате Глебе, по́йдем скоро да поможем сро́днику нашему», и во у́трий день Александр победи враги и государя́ их уязви́ мече́м в лице́. Такожде и Димитрию во одоле́ние Мама́я яви́ли есте́ помощь, воздвиза́юще пети Богу, сицева́я благоде́ющему: Аллилуиа.
Икос 12
Пою́ще ваша, святи́и страстотерпцы Борисе и Глебе, страдания, ублажаем ваше дивное непостижимое терпение и, почита́юще святую память вашу, молимся вам: Сохрани́те ми́рну страну нашу, великим отце́м вашим святым Владимиром во Святе́м Крещении просвеще́нную, укрепи́те дух православных, бо́рющихся со мглою неправды, да́руйте совершенную победу истины и света над тьмою неверия и безбожия и приими́те похвальная сия́: Радуйтеся, истиннии Евангелия послуша́телие, да́руйте и нам оное разумение Евангелия; радуйтеся, закона Христова богопи́санныя скрижа́ли, дади́те и нам сего закона разумное ве́дение. Радуйтеся, целомудрия хранителие от мла́дости, научи́те и нас воздержа́нию плоти в ве́це сем прелюбоде́йнем и грешнем; радуйтеся, незло́бия учителие, покажи́те и нам незло́бия путь к Царствию Небесному. Радуйтеся, о убие́нии телесе́ небре́гшии, дади́те и нам мужество сопроти́в убивающих тело, души́ же немогу́щих убити; радуйтеся, правую веру до конца сохраншии, обличите ты́я, я́же от веры отеческия правыя отпада́ют. Радуйтеся, Борисе и Глебе, великии и славнии страстотерпцы.
Кондак 13
О всехвальнии страстотерпцы Христовы Борисе и Глебе, во святе́й купе́ли Крещения Романе и Давиде нарече́ннии, при́зрите с высоты небесныя на нас грешных, скорбя́щих и озло́бленных, милости Божия и помощи требующих, услышите глас моления нашего, те́пле вам возноси́мый, и от всяких зол, болезней и бед свободи́те ны. В час же кончины нашея укрепи́те слабеющий дух наш, да во исходе нашем от бреннаго сего телесе́, таможде, у дивнаго Престола Царя Славы, с лики ангельскими воспоем: Аллилуиа.
Этот кондак читается трижды, затем 1-й икос «Ангельски поживше на земли...» и 1-й кондак «Избраннии и всехвальнии страстотерпцы Христовы...».
Молитва
О дво́ице священная, братие прекрасная, до́блии страстотерпцы Борисе и Глебе, от юности Христу верою, чистотою и любовию послужи́вшии и кро́вьми своими, яко багряни́цею, укра́сившиися и ныне со Христом царствующии, не забу́дите и нас, сущих на земли́, но яко те́плии заступницы, вашим сильным хода́тайством пред Христом Богом сохраните юных во святе́й вере и чистоте неврежде́нными от всякаго прило́га неверия и нечистоты́, оградите всех нас от всякия скорби, озлобле́ний и напрасныя смерти, укротите всякую вражду и злобу, де́йством воздвиза́емую от ближних и чуждых. Молим вас, христолюбивии страстотерпцы, испроси́те у Великодарови́таго Владыки всем нам оставле́ние прегрешений наших, единомыслие и здравие, избавление от нашествия иноплеме́нных, междоусобныя брани, язвы и глада. Снабдева́йте своим заступлением всех, чтущих святую память вашу во веки веков. Аминь.