Акафист святому праведному Иоанну Кормянскому

Празднование с собором Белорусских святых – в 3-ю Неделю по Пятидесятнице

Кондак 1

Избра́нный угодниче Христов, свя́те праведне Иоанне, от чрева матере на служение Богу избра́нне и юродивым старцем служителем Це́ркве Господней предрече́нне, житием твоим праведником Божиим уподо́бивыйся, темже и Господь обогати тя даром прозрения и исцеления. Мы же, чада Це́ркве Православныя, с любовию да зовем ти: Радуйся, Иоанне пресви́тере, чудотворче и целителю.

Икос 1

Ангельския силы на небеси́ возрадовашася, егда предрече́но еще во чреве матере быти тебе служителем Це́ркве Божия, отче праведне Иоанне. Темже просла́ви тя Господь в житии твоем сла́вне, даром прозрения обогати тя, источник исцелений соде́ла мощи твоя нетленныя. Мы же, ве́дуще славу Божию, в тебе нам я́вльшуюся, да зовем ти с радостию ве́лией: Радуйся, Це́ркве Православныя новая похвало́; радуйся, Царствия Божия небожителю. Радуйся, даром прозрения одаре́нный; радуйся, даром исцеления обогащенный. Радуйся дальняя аки ближняя предви́девый; радуйся, волю Божию людем веща́вый. Радуйся, служителем Це́ркве предрече́нный; радуйся, Богородицею прославле́нный. Радуйся, Иоанне пресви́тере, чудотворче и целителю.

Кондак 2

Ви́де отец твой пресви́тер зна́мение Божие в рождестве твоем, креща́я тя Иоанном нарече́ в честь апостола любве́, Господу же возгласи́ хвалебную песнь со ангелы: Аллилуиа.

Икос 2

Бысть о́трочество твое в храме Покрова́ Богородицы прохожда́емо, Ея же теплым заступничеством и води́тельством охраняемо, аки птенец Богу в жертву непорочну принесе́нный, та́ко и ты, Господом возлюбленный, измла́да служити Ему избра́нне; похвальную песнь прино́сим и мы тебе таковую: Радуйся, Богом измла́да избра́нне; радуйся, старцу родителю послушен бы́вый. Радуйся, молитвы матере твоея́ плод добрый яви́вый; радуйся, житие богоугодное родителей твоих возлюбивый. Радуйся, плод молитвы их, аки цвет расцветший; радуйся, надеждо их и веселие. Радуйся, труды старческия им облегчи́вый; радуйся, старость их упоко́ивый. Радуйся, Иоанне пресви́тере, чудотворче и целителю.

Кондак 3

Избра́ тя Господь на служение славное, видя души́ твоея́ чистоту, поста́ви тя пастырем Це́ркве Божией и стадо словесных овец тебе вручи́, да пасе́ши его со усердием, поя́ Господу песнь: Аллилуиа.

Икос 3

Божественная благодать, немощны́я врачующая и оскудева́ющия восполняющая, воспо́лнися в тебе, сосуде избра́нный Духа Святаго, праведне отче наш Иоанне. Постави тя светильника верху́ горы высокия, мы же, видяще дивная дела́ Божия, во умилении зовем ти та́ко: Радуйся, пресви́тере Богом избра́нный; радуйся, светильниче, во тме ве́ка возсиявший. Радуйся, стадо Христово от волков хищных упасший; радуйся, чада духовная ко Христу приведы́й. Радуйся, пастырю неле́ностный; радуйся, праведному Иоанну Кронштадтскому подражавый. Радуйся, духа злобы от стада Христова отгна́вый; радуйся, заблуждшия о́вцы взыска́вый. Радуйся, Иоанне пресви́тере, чудотворче и целителю.

Кондак 4

Дивный молитвенник яви́лся еси, отче праведне Иоанне: не то́кмо во дни, но и в нощи́ предавался еси Го́сподеви в молитве, воспевая со ангелы Ему хвалебную песнь: Аллилуиа.

Икос 4

Видяще тя щедрода́теля ве́лия, си́рии и вдовицы притека́ху к тебе, отче, ты же одарил еси их дарами коему́ждо на потребу, смерти гла́дныя их избавляя, темже и мы молим тя: Изба́ви и нас от глада и нестрое́ния в бытии́ земне́м сем, мы же благодарно тебе воспое́м: Радуйся, к земным благам пристрастия не име́вый; радуйся, вдови́цу со чады ея от гла́дныя смерти препита́вый. Радуйся, нищих одари́вый; радуйся, си́рых защити́вый. Радуйся, странников прия́вый; радуйся, нагих оде́явый. Радуйся, алчущих и жаждущих уте́шивый; радуйся, яко в темницах и больницах отверженных посетивый. Радуйся, Иоанне пресви́тере, чудотворче и целителю.

Кондак 5

Боготочный источник яви́лся еси, отче Иоанне, силою молитвы твоея́ бесы отгоняя, боля́щия исцеляя, от греха на путь правый заблуждшия наставляя, не остави и нас си́рых и убогих, но твоими молитвами спасаеми, и мы воспои́м хвалебную песнь в Троице славимому Богу: Аллиуиа.

Икос 5

Видяще подвиги твоя земныя, пресви́тере сла́вне Иоанне, Христос даром исцелений тя одари́, да и мы, ве́дуще тя, яко сосуд силы Божией, преисполненый всякия цельбы́ и благосты́ни, зовем ти си́це: Радуйся, источниче исцелений; радуйся, сосуде, Богом избра́нный. Радуйся, враче́м безмездным уподо́бивыйся; радуйся, болезни неисце́льныя исцели́вый. Радуйся, врачи́ оста́вленных не оста́вивый; радуйся, телу моему здравие дарова́вый. Радуйся, прощение грехов моих у Господа испроси́вый; радуйся, душу мою от сна лености воздви́гнувый. Радуйся, Иоанне пресви́тере, чудотворче и целителю.

Кондак 6

Хотя уподо́битися странником мира сего, в Лавру Киевскую последовал еси, тамо благословение от старцев ея прия́л еси, и житием своим преподобным поревновал еси. Ныне же воспеваеши со Печерскими святыми: Аллилуиа.

Икос 6

Новаго неба и новыя земли́ в обетовании Христове ожидал еси, да и нас подражати тебе научил еси: на всяк день Господу угождати, в молитве неле́ностно пребывати, в посте не ослабевати, в труде́х плоть умерщвля́ти и тебе воспевати: Радуйся, молитвою небо и землю соединивый; радуйся, в виде́нии ру́це ко Господу простира́вый. Радуйся, пришествие Богородицы в храме предви́девый; радуйся, храм в честь Покрова Ея стро́ити благословивый. Радуйся, место строительства его указа́вый; радуйся, со пресви́теры его освяти́вый. Радуйся, в немже место славно себе угото́вавый; радуйся, яко и ныне телом нетленным в нем почиваеши. Радуйся, Иоанне пресви́тере, чудотворче и целителю.

Кондак 7

Провозвестник грядущаго испытания яви́лся еси, земли́ Российстей слеза́ми и кровию омытися возвеща́л еси, сле́зы теплыя пред лице́м Божиим проливал еси, да премени́т Господь гнев Свой на милость над нами, воспевая Ему вечную песнь: Аллилуиа.

Икос 7

Егда прии́де скорбь на землю нашу, изба́ви тя Господь сего страшнаго виде́ния, призва́ тя в райския обители, ты же завещал еси нам, яко к живому, к тебе приходи́ти и мольбы своя изливати пред тобою. Мы же, исполняя заповедь твою, во умилении сердца зовем ти та́ко: Радуйся, яко нетлением Господь тя просла́ви; радуйся, яко душе́ю пред Творцом предстои́ши. Радуйся, яко телом с нами пребываеши; радуйся, яко ско́рбем и печа́лем нашим вне́млеши. Радуйся, яко отраду Божественную нам подае́ши; радуйся, яко и воздыхание наше слышиши. Радуйся, яко радование нашему сорадуешися; радуйся, яко чад своих не оставляеши. Радуйся, Иоанне пресви́тере, чудотворче и целителю.

Кондак 8

Дивно просла́ви Господь тело твое, праведне отче наш Иоанне. Гроб твой тлению земли́ не предаде́ся и тело твое, яко адама́нт драгоценный, в нем сохрани́ся. Многая ле́та память твоя забве́на бысть, но Христос тя яко светильник на све́щницу поста́ви, да мрак мира сего озариши. Мы же Господа прославим песнию: Аллилуиа.

Икос 8

Всяк возраст, стар и млад, просла́ви тя, отче Иоанне, егда обре́теся нетленное тело твое и многая зна́мения и чудеса соверша́хуся, боля́щии исцеля́хуся, слепии прозрева́ху, хромии хожда́ху. Мы же, видяще в тебе источник исцелений, со слеза́ми воспеваем ти си́це: Радуйся, пресви́терами славно обрете́нный; радуйся, народом православным почитаемый. Радуйся, слепым прозрение подающий; радуйся, хромых исцели́вый. Радуйся, разслабленных жилами укрепи́вый; радуйся, то́ки крове останови́вый. Радуйся, отчаянных во врачева́нии не оставивый; радуйся, в ско́рбех душу мою уте́шивый. Радуйся, Иоанне пресви́тере, чудотворче и целителю.

Кондак 9

Всех приходя́щих ко гробу твоему не оставляеши, коему́ждо на пользу души́ подае́ши и Господа умоляеши: Да пришедшии к тебе в ско́рбех и печалех неуслы́шани не оты́дут, но источник утешения в тебе обрету́т, Спасу душ наших воззовут: Аллилуиа.

Икос 9

Вити́и богохвальнии не возмо́гут достойно восхвали́ти пучину чудес, чрез тя Богом явле́нную. В виде́ниих со́нних явля́ешися и веру слабоверных укрепляеши, да с радостию и надеждою ко гробу твоему притекают и сердцем чистым тебе зовут: Радуйся, яко вера православная тобою укрепи́ся; радуйся, яко любы́ тобою умно́жися. Радуйся, яко надежда наша оправда́ся; радуйся, кри́не райскаго прозябе́ния. Радуйся, кимва́ле восклицания; радуйся, гусли сладкозвучнии. Радуйся, ковче́же позлаще́нный; радуйся, ка́меню драгоценный. Радуйся, Иоанне пресви́тере, чудотворче и целителю.

Кондак 10

Свет чудес новых излия́ Господь Вседержи́тель, егда бысть обре́тение нетленнаго тела твоего. Дивный огнь от иконы Царицы Небесныя на гроб твой изы́де, мы же, видевше славная чудеса сия́, верою окрепшею Отца Небеснаго прославиша: Аллилуиа.

Икос 10

Светопода́тель Господь, желая спасения всякой плоти человечестей, пророки и апостолы на проповедь посылая, мученики и святители венце́м нетленным венчая, та́ко и тя, отче наш Иоанне, с преподобными в лике праведных просла́ви, а нас научи тебе воспевати: Радуйся, добрая ветвь винограда Христова; радуйся, лозо́ многоплодовитая. Радуйся, верныя ко Христу приведы́й; радуйся, заблуждшия неотри́нувый. Радуйся, мног плод духовный о Христе сотворивый; радуйся, путь спасения нам указа́вый. Радуйся, якоже и сам ко Христу путе́м тесным сле́довавый; радуйся, яко и нас на стезю правды наста́вивый. Радуйся, Иоанне пресви́тере, чудотворче и целителю.

Кондак 11

Пение хвалебное приносят ти, отче праведне Иоанне, обре́тшии спасение твоими молитвами от бед и скорбе́й и всяких напастей, да ку́пно с тобою радостно пою́т Богу: Аллилуиа.

Икос 11

Светозарным светом бысть житие твое, отче праведне Иоанне. Да и нам грешным путь ко спасению указу́я, зарю общаго воскресения предвозвещая, маловерныя уверяя, верныя подкрепляя, темже ку́пно да зовем ти та́ко: Радуйся, пастырю наш вселюбимый; радуйся, защитниче наш от врагов спасения непреоборимый. Радуйся, козни диа́вольския молитвою победивый; радуйся, Христа житием твоим прославивый. Радуйся, Богородицы избра́нниче нело́жный; радуйся, сослуже́ния ангельскаго удосто́ивыйся. Радуйся, в со́ниих на молитву к хода́тайству твоему призва́вый; радуйся, яко и мене́ грешнаго благодати Божия не лишивый. Радуйся, Иоанне пресви́тере, чудотворче и целителю.

Кондак 12

Благодать свыше низпосли всем нам, притекающим с любовию к ра́це моще́й твоих, и испроси у Господа прощение согрешений наших, боля́щим же и стра́ждущим исцеление да́руй, да благодарственно вси вопием дивному во святых Богу: Аллилуиа.

Икос 12

Житие́ твое славно Господь прослави, человека небеснаго и ангела земнаго нам показа́вый. Мы же, ве́дуще многая зна́мения у гроба твоего происходя́ща, молим тя, отче наш Иоанне, да твоими молитвами укрепи́тся в нас вера православная, в нейже наше спасение, и тебе мы пое́м восхваление: Радуйся, фимиам кадильный Богу принесший; радуйся, во иереех Ему послужи́вый. Радуйся, тайнозрителю Божия благодати; радуйся, покровителю си́рых и вдови́ц. Радуйся, ересе́й искоренителю; радуйся, правыя веры насади́телю. Радуйся, яко тобою Господь прославися; радуйся, яко тобою вера православная утвердится. Радуйся, Иоанне пресви́тере, чудотворче и целителю.

Кондак 13

О преблаги́й угодниче Божий, святы́й праведный отче наш Иоанне, приими́ сие́ ма́лое моление наше, аще недостойне тебе приноси́мое, но с любовию сыно́внею припа́дающе вопием ти: Изба́ви нас от неду́га душевнаго и болезни телесныя, да и мы в покаянии плод добр Го́сподеви принесе́м и с тобою в Царствии Небеснем Ему воззовем: Аллилуиа.

Этот кондак читается трижды, затем 1-й икос «Ангельския силы...» и 1-й кондак «Избранный угодниче Христов...».

Молитва

О преславный угодниче Божий, святы́й праведный отче наш Иоанне! Ныне припа́дая к ра́це с цельбоносными моща́ми твоими, из глубины души тебе зовем: о свя́тче Божий, не отри́ни нас, си́рых и убогих, во гресе́х рожде́нных и плод достойный покаяния не принесших. Тебе, яко иму́щему дерзновение пред Господем, со слеза́ми взываем: Исцели болезни наша телесныя, укрепи ду́ши наша маловерныя. Умоли Господа дарова́ти нам радость покаяния и жития нашего исправление. Испроси у Бога земли́ нашей плодородие, дожди́ ми́рны и возду́хи благорастворе́нны. Церковь нашу твоими молитвами незыблемо огради от ересе́й и расколов. Обитель сию́ и храм сей до скончания века сохрани, и по кончине жития нашего во обители Отца Небеснаго нас водвори, да и мы тамо ку́пно с тобою и всеми святыми прославим в Троице Единаго Бога Отца и Сына и Святаго Духа. Аминь.