Мл҃твы вече́рни ст҃ы́ѧ пѧтидесѧ́тницы коленопрекло́нныѧ

Моли́тва а҃

Пречи́сте, нескве́рне, безнача́льне, неви́диме, непостижи́ме, неизслѣ́диме, неизмѣ́нне, непобѣди́ме, неисче́тне, неѕло́биве гдⷵи, є҆ди́не и҆мѣ́ѧй безсме́ртїе, во свѣ́тѣ живы́й непристꙋ́пнѣмъ: сотвори́вый нб҃о и҆ зе́млю и҆ мо́ре, и҆ всѧ̑ созда̑ннаѧ въ ни́хъ: пре́жде не́же проси́ти, всѣ̑мъ прошє́нїѧ подава́ѧй! Тебѣ мо́лимсѧ и҆ тебѐ про́симъ, влⷣко чл҃вѣколюбче, ѻ҆ц҃а̀ гдⷵа и҆ бг҃а и҆ сп҃са на́шегѡ і҆и҃са хрⷵта̀, на́съ ра́ди человѣ́кѡвъ и҆ на́шегѡ ра́ди сп́се́нїѧ сше́дшагѡ съ нб҃съ, и҆ воплоти́вшагѡсѧ ѿ дх҃а ст҃а́гѡ и҆ мр҃і́и приснодв҃ы и҆ пресла́вныѧ бцⷣы: иже пе́рвѣе ѹбѡ словесы̀ ѹ҆чѧ̀, послѣди́ же и҆ дѣ́лы показꙋ́ѧ, є҆гда̀ сп҃си́тельнꙋю стрⷵть претерпѣ̀, дадѐ на́мъ, смирє́ннымъ и грѣ̑шнымъ и҆ недостѡ́йнымъ рабѡ́мъ твои̑мъ, ѡбразъ приноси́ти тебѣ̀ мѡльбы̀ въ вы́и и҆ колѣ́нъ преклоне́нїихъ ѡ҆ свои́хъ грѣсѣ́хъ и ѡ҆ людски́хъ невѣ́дѣнїихъ: са́мъ, многомлⷵтиве и҆ чл҃вѣколюбче, ѹ҆слы́ши на́съ, в о́ньже аще де́нь призове́мъ тѧ̀, и҆зрѧ́днѣе же въ се́й де́нь пѧтдесѧ́тницы, во́ньже гдⷵь на́шъ і҆и҃съ хрⷵто́съ, по вознесе́нїи на нб҃са̀ и҆ сѣдѣ́нїи ѡ҆деснꙋ́ю тебє̀ бг҃а и҆ ѻ҆ц҃а̀, низиосла̀ ст҃а́го дх҃а на ст҃ы̑ѧ своѧ̑ ѹ҆ч҃нкѝ и҆ а҆пⷵлы, иже и҆ сѣ́де на є҆ди́номъ коегѡ́ждо ихъ, и҆ и҆спо́лнишасѧ веѝ неистощи́мыѧ бл҃года́ти є҆гѡ̀, и҆ глаго́лаша ѧ҆зы̑ки и҆ны́ми вели̑чїѧ твоѧ̑, и҆ прореко́ша. Ны́нѣ ѹбо ѹ҆слы́ши ны̀ молѧ́щыѧсѧ тебѣ̀, помѧни́ ны смирє́нныѧ и҆ ѡ҆сꙋждє́нныѧ, и҆ возвратѝ плѣне́нїе дꙋ́шъ на́шихъ, твоѐ сострада́нїе и҆мѣ́ѧ ѡ҆ на́съ молѧ́щеесѧ. Прїимѝ ны̀ припа́дающыѧ тебѣ̀ и҆ попїю́щыѧ: согрѣши́хомъ! Къ тебѣ̀ приве́ржени є҆смы ѿ ѹ҆тро́бы, ѿ чре́ва ма́тере на́шеѧ ты̀ є҆сѝ бг҃ъ на́шъ: но ꙗкѡ и҆счезо́ша въ сꙋетѣ̀ дні́е на́ши, ѡ҆бнажи́хомсѧ твоеѧ̀ по́мощи, лиши́хомсѧ всѧ́кагѡ ѿвѣ́та. Но дерза́юще на щедро́ты твоѧ̑, зове́мъ: грѣхѡ́въ юности на́шеѧ и҆ невѣ́дѣнїѧ не помѧнѝ, и҆ ѿ та́йныхъ на́шихъ ѡ҆чи́сти на́съ, и҆ не ѿрини на́съ во вре́мѧ ста́рости: внегда̀ ѡ҆скꙋдѣ́ти крѣ́пости на́шей, не ѡ҆ста́ви на́съ: пре́жде не́же въ зе́млю возврати́мсѧ, сподо́би на́съ къ тебѣ̀ ѡ҆брати́тисѧ, и҆ вонмѝ на́мъ бл҃гопрїѧ́тїемъ и҆ бл҃года́тїю: возмѣ́ри беззакѡ́нїѧ на̑ша щедро́тами твои́ми: мно́жествꙋ согрѣше́нїй на́шихъ сопроти́въ поста́ви бе́зднѣ щедро́тъ твои́хъ. При́зри съ высоты̀ ст҃ыѧ ткоеѧ̀, гдⷵи, на предстоѧ́щыѧ лю́ди твоѧ̑ и҆ ча́ющыѧ ѿ тебє̀ бога́тыѧ млⷵти: посѣтѝ насъ бл҃гостїю твое́ю, и҆зба́ви на́съ ѿ наси́льства дїа́волѧ: ѹ҆твердѝ жи́знь на́шꙋ ст҃ы́ми твои́ми и҆ сщ҃е́нными закѡ́ны. Агг҃ла вѣ́рна храни́телѧ приста́ви лю́демъ твои̑мъ, всѧ̑ ны̀ соберѝ въ твоѐ црⷵтвїе: да́ждь проще́нїе ѹ҆пова́ющымъ на тѧ̀, ѡ҆ста́ви имъ и҆ на́мъ грѣхѝ: ѡ҆чи́сти на́съ дѣ́йствомъ ст҃а́гѡ твоегѡ̀ дх҃а: разрꙋшѝ вра̑жїѧ на на́съ кѡ́зни.

Присовокупляет же и сию молитву:

Бл҃гослове́нъ є҆сѝ, гдⷵи влⷣко вседержи́телю, просвѣти́вый де́нь свѣ́томъ со́лнечнымъ и҆ но́щь ѹ҆ѧсни́вый зарѧ́ми ѻгненными, долготꙋ̀ дневнꙋ́ю прейтѝ на́мъ сподо́бивый и҆ прибли́житисѧ нача́лѡмъ но́щи! Ѹ҆слы́ши моле́нїе на́ше и҆ всѣ́хъ люде́й твои́хъ, и҆, всѣ̑мъ на́мъ прости́въ вѡ́льныѧ и҆ невѡ́льныѧ грѣхѝ,

прїимѝ вечє́рнѧѧ на̑ша молє́нїѧ, и҆ низпослѝ мно́жество млⷵти твоеѧ̀ и҆ щедро́тъ твои́хъ на достоѧ́нїе твоѐ: ѡ҆стѣнѝ на́съ ст҃ы́ми агг҃лы твои́ми, воѡрꙋжѝ на́съ ѡ҆рꙋ́жїемъ пра́вды твоеѧ̀, ѡ҆градѝ на́съ истиною твое́ю, соблюдѝ на́съ си́лою твое́ю, и҆зба́ви на́съ ѿ всѧ́кагѡ ѡ҆бстоѧнїѧ и҆ всѧ́кагѡ навѣ́та сопроти́вника: пода́ждь же на́мъ и҆ настоѧ́щїй ве́черъ съ приходѧ́щею но́щїю соверше́нъ, ст҃ъ, ми́ренъ, безгрѣ́шенъ, безсобла́зненъ, безмечт́аненъ, и҆ всѧ̑ дни̑ жи́зни на́шеѧ, мл҃твами ст҃ы́ѧ бцⷣы и҆ всѣ́хъ ст҃ы́хъ, ѿ вѣ́ка тебѣ̀ бл҃гоꙋгоди́вшихъ.

По скончании ектении возглас:

Твое́ бо єсть єже ми́ловати и҆ сп҃са́ти ны̀, бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Моли́тва в҃

Гди і҆и҃се хрⷵтѐ, бж҃е на́шъ, ми́ръ твой пода́вый человѣ́кѡмъ, є҆щѐ и҆ са́мъ въ житїѝ съ на́ми сы́й, прест҃а́гѡ дх҃а да́ръ въ наслѣ́дїе неѿе́млемое вѣ̑рнымъ при́снѡ подава́ѧй: ꙗ҆вле́ннѣйше же дне́сь сїю̀ бл҃года́ть твои̑мъ ѹ҆ч҃нкѡ́мъ и҆ а҆пⷵлѡмъ низпосла́вый и҆ си́хъ ѹ҆тнѣ̀ ѹ҆тверди́вый ѻгненными ѧ҆зы̑ки, имиже ве́сь ро́дъ человѣ́ческїй бг҃овѣ́дѣнїе свои́мъ ѧ҆зы́комъ въ слꙋ́хъ ѹха прїи́мше, свѣ́томъ дх҃а просвѣти́хомсѧ, и҆ ѿ пре́лести ꙗкоже ѿ тьмы̀ и҆зба́вихомсѧ, и҆ раздаѧ́нїемъ чꙋ́вственныхъ и҆ ѻгненныхъ ѧ҆зы̑къ и҆ преесте́ственнымъ дѣ́йствомъ вѣ́рѣ къ тѧ̀ наꙋчи́хомсѧ, и҆ тѧ̀ со ѻ҆ц҃е́мъ и҆ ст҃ы́мъ дх҃омъ во є҆ди́номъ бж҃ествѣ̀ и҆ си́лѣ и҆ вла́сти бг҃осло́вити ѡ҆зари́хомсѧ! Ты̀ ѹбо, ѻтчее сїѧ́нїе, сꙋщества̀ и҆ є҆стества̀ є҆гѡ неизмѣ́нное и҆ недви́жимое начерта́нїе, и҆сточниче премꙋ́дрости и҆ бл҃года́ти, ѿтве́рзи и҆ мнѣ̀ грѣ́шномꙋ ѹ҆стнѣ̀ и҆ наꙋчи́ мѧ, ка́кѡ досто́итъ и҆ ѡ҆ чесо́мъ потре́ба моли́тнсѧ: ты́ бо є҆сѝ вѣ́дый мно́гое грѣхѡ́въ мои́хъ мно́жество, но твоѐ бл҃госе́рдїе побѣди́тъ си́хъ безмѣ́рїе: се́ бо со стра́хомъ предстою́ ти, въ пꙋчи́нꙋ; млⷵти твоеѧ̀ ѿча́ѧнїе дꙋшѝ моеѧ̀ повергъ. Ѹ҆пра́ви жи́знь мою̀, ѹ҆правлѧ́ѧй сло́вомъ всю̀ тва́рь неизрече́нною премꙋ́дрости си́лою, ти́хое ѡ҆бꙋрева́емыхъ приста́нище, и҆ скажи́ ми пꙋ́ть, во́ньже пойдꙋ̀. Дх҃ъ премꙋ́дрости твоеѧ̀ мои̑мъ пода́ждь помышле́нїємъ, дх҃ъ ра́зꙋма безꙋ́мїю моемꙋ да́рꙋѧй: дх҃омъ стра́ха твоегѡ̀ моѧ̑ ѡ҆сѣнѝ дѣла̀, и҆ дх҃ъ пра́вый ѡ҆бновѝ во ѹ҆тро́бѣ мое́й, и҆ дх҃омъ влⷣчнимъ мы́слей мои́хъ поползнове́нїе ѹ҆твердѝ: да на всѧ́къ де́нь дх҃омъ твои́мъ бл҃ги́мъ къ поле́зномꙋ наставлѧ́емь, сподо́блюсѧ твори́ти за́пѡвѣди твоѧ̑ и҆ при́снѡ па́мѧтствовати твоѐ сла́вное прише́ствїе, є҆гда̀ и҆стѧ́жеши содѣ̑ѧннаѧ на́ми. Не пре́зри мѧ̀ прельща́тисѧ тлѣ́нными мі́ра сегѡ̀ кра́сными, но воспрїѧ́тїѧ бꙋ́дꙋщихъ сокро́вищъ жела́ти ѹ҆крѣпѝ. Ты бо ре́клъ є҆сѝ, влⷣко, ꙗкѡ, є҆ли̑ка кто̀ про́ситъ ѡ҆ твое́мъ имени, невозбра́ннѡ прїе́млетъ ѿ твоегѡ̀ соприсносꙋ́щнагѡ бг҃а и҆ ѻ҆ц҃а̀. Тѣ́мже и҆ азъ грѣ́шный, въ прише́ствїи ст҃а́гѡ твоегѡ̀ дх҃а, молю̀ твою̀ бл҃гость: є҆ли̑ка проси́хъ, возда́ждь мѝ во сп҃се́нїе. Ей, гдⷵи, всѧ́кагѡ бл҃годѣѧ́нїѧ бога́тый да́телю и҆ пода́телю бл҃гі́й, ꙗкѡ ты̀ преи́злиха подае́ши, ихже про́симъ! ты̀ є҆сѝ сострада́теленъ и҆ млⷵтивъ, бы́вый безгрѣ́шнѡ пло́ти на́шеѧ ѻбщникъ и҆ преклонѧ́ющымъ пред̾ тобо́ю колѣ́на приклонѧ́ѧйсѧ любобл҃госе́рднѣ, бы́вый и҆ ѡ҆чище́нїе грѣхѡ́въ на́шихъ. Да́ждь ѹбо, гдⷵи, лю́демъ твои̑мъ щедрѡ́ты твоѧ̑: ѹ҆слыши на́съ съ нб҃сѐ ст҃а́гѡ твоегѡ̀: ѡ҆ст҃ѝ на́съ си́лою сп҃си́тельныѧ десни́цы твоеѧ̀: покры́й на́съ кро́вомъ крилꙋ̑ твоє́ю: не пре́зри дѣ́лъ рꙋкꙋ̀ твоє́ю. Тебѣ̀ є҆ди́номꙋ согрѣша́емъ, но и҆ тебѣ̀ є҆ди́номꙋ слꙋ́жимъ: не вѣ́мы кла́нѧтисѧ богꙋ чꙋжде́мꙋ, нижѐ простира́ти рꙋ́ки на́шѧ, влⷣко, къ бо́гꙋ и҆но́мꙋ. Ѡ҆ста́ви на́мъ согрѣшє́нїѧ и҆, прїи́мъ на̑ша колѣнопреклѡ́ннаѧ молє́нїѧ, прострѝ всѣ̑мъ на́мъ рꙋ́кꙋ по́мощи: прїимѝ моли́твꙋ всѣ́хъ ꙗкѡ ѳѷмїа́мъ прїѧ́тный, возносѧ́щїйсѧ пред̾ твоѐ пребл҃го́е црⷵтво.

Присовокупляет же и сию:

Гдⷵи, гдⷵи, и҆збавивый на́съ ѿ всѧ́кїѧ стрѣлы̀, летѧ́щїѧ во днѝ, и҆зба́ви на́съ и҆ ѿ всѧ́кїѧ ве́щи, во тьмѣ̀ преходѧ́щїѧ. Прїимѝ же́ртвꙋ вече́рнюю, рꙋ́къ на́шихъ воздѣѧ̑нїе. Сподоби же на́съ и҆ нощно́е по́прище без̾ поро́ка прейтѝ, неискꙋшє́ны ѿ ѕлы́хъ: и҆ и҆зба́ви на́съ ѿ всѧ́кагѡ смꙋще́нїѧ и҆ боѧ́зни, ѿ дїа́вола на́мъ прибыва́ющїѧ. Да́рꙋй дꙋша́мъ на́шымъ ѹ҆миле́нїе и҆ помыслѡ́мъ на́шымъ попече́нїе ѡ҆ и҆спыта́нїи на стра́шнѣмъ и҆ пра́веднѣмъ твое́мъ сꙋдѣ̀. Пригвоздѝ стра́хомъ твои́мъ плѡ́ти на́шѧ и҆ ѹ҆мертвѝ ѹды на́шѧ, сꙋ́щыѧ на землѝ, да и҆ въ со́ннѣмъ безмо́лвїи просвѣти́мсѧ зрѣ́нїемъ сꙋде́бъ твои́хъ. Ѿими́ же ѿ на́съ всѧ́кое мечта́нїе неподо́бное и҆ по́хоть вре́днꙋю: возста́ви же на́съ во вре́мѧ мл҃твы ѹ҆тверждє́ны въ вѣ́рѣ и҆ преспѣва́ющѧ въ за́повѣдехъ твои́хъ.

По скончании ектении возглас:

Бл҃говоле́нїемъ и҆ бл҃гостїю є҆дино́роднагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Моли́тва г҃

Приснотекꙋ́щїй, животво́рный и҆ просвѣти́тельный и҆сто̀чниче, соприсносꙋ́щнаѧ ѻ҆ц҃ꙋ̀ содѣ́тельнаѧ си́ло, всѐ смотре́нїе ѡ҆ сп҃се́нїи человѣ́честѣмъ прекра́снѣ и҆спо́лнивый, хрⷵтѐ бж҃е на̀шъ, сме́рти ѹзы неразрѣши̑мыѧ и҆ закле́ы адѡвы расто́ргнꙋвый и҆ лꙋка́выхъ дꙋхѡ́въ мно́жєства попра́вый: приведы́йсѧ за на́съ непоро́чное заколе́нїе и҆ да́вый въ же́ртвꙋ тѣ́ло пречⷵтое, всѧ́комꙋ грѣхꙋ̀ неприкоснове́нное и҆ непристꙋ́пное, и҆ стра́шнымъ си́мъ и҆ неисповѣди́мымъ сщ҃еннодѣ́йствїемъ жи́знь на́мъ вѣ́чнꙋю дарова́вый: во адъ соше́дый и҆ верєѝ вѣ̑чныѧ сокрꙋши́вый и҆ во тьмѣ̀ сѣдѧ́щымъ восхо́дъ показа́вый: ѕлонача́льника же и҆ глꙋби́ннагѡ ѕмі́ѧ бг҃омꙋ́дростнымъ льще́нїемъ ѹ҆лови́вый, и҆ свѧза́вый вери́гами мра́ка въ та́ртарѣ и҆ ѻ҆гнѝ негаси́мѣмъ, и҆ во тьмѣ̀ кромѣ́шней затверди́вый неисчетноси́льною твое́ю крѣ́постїю, великоимени́таѧ премꙋ́дросте ѻч҃аѧ, напа́ствꙋємымъ велѝкїй помо́щникъ ꙗ҆ви́выйсѧ и҆ просвѣти́вый сѣдѧ́щыѧ во тьмѣ̀ и҆ сѣ́ни сме́ртнѣй! Ты̀, сла́вы вѣ́чныѧ гдⷵи и҆ ѻ҆ц҃а̀ вы́шнѧгѡ сн҃е возлю́бленный, прнсносꙋ́щный свѣ́те ѿ присносꙋ́щнагѡ свѣ́та, сл҃нце пра́вды, ѹ҆слы́ши ны̀, молѧ́щыѧсѧ тебѣ̀, и҆ ѹ҆поко́й дꙋ́шы рабѡ́въ твои́х, пре́жде ѹ҆спо́шихъ ѻ҆тє́цъ и҆ бра́тїй на́шихъ и҆ про́чихъ срѡ́дникъ по пло́ти, и҆ всѣхъ с вои́хъ въ вѣ́рѣ, ѡ҆ ни́хже и҆ па́мѧть твори́мъ ны́нѣ: ꙗкѡ ѹ҆ тебє̀ всѣ́хъ держа́ва, и҆ въ рꙋцѣ̀ твое́й содержи́ши всѧ̑ концы̀ землѝ. Влⷣко вседержи́телю, бж҃е ѻ҆тє́цъ и҆ гдⷵи млⷵти, содѣ́телю ро́да сме́ртнагѡ и҆ безсме́ртнагѡ и҆ всегѡ̀ є҆стества̀ человѣ́ческагѡ, составлѧ́емагѡ и҆ па́ки разрѣша́емагѡ, жи́зни и҆ сконча́нїѧ, здѣ̀ пребыва́нїѧ и҆ та́мѡ преставле́нїѧ: лѣ̑та и҆змѣрѧ́ѧй живы̑мъ и҆ времена̀ ѹ҆ставлѧ́ѧй сме́рти, низводѧ́й во адъ и҆ возводѧ́й, свѧзꙋ́ѧй въ не́мощи и҆ ѿпꙋща́ѧй въ си́лѣ, настоѧ̑щаѧ потре́бнѣ стро́ѧй и҆ бꙋ̑дꙋщаѧ поле́знѡ ѹ҆правлѧ́ѧй, сме́рти жа́ломъ ѹ҆ѧзвлєнныѧ ѡ҆живлѧ́ѧй воскрⷵнїѧ наде́ждами! Са́мъ, влⷣко всѣ́хъ, бж҃е сп҃си́телю на́шъ, наде́ждо всѣ́хъ концє́въ землѝ и҆ сꙋ́щихъ въ мо́ри дале́че, показа́вый на̀мъ и҆ въ се́й послѣ́днїй и҆ вели́кїй сп҃сительный де́нь пѧтьдесѧ́тницы та́йнꙋ ст҃ы́ѧ и҆ є҆диносꙋ́щныѧ и҆ соприсносꙋ́щныѧ и҆ нераздѣли́мыѧ и҆ неслїѧ́нныѧ трⷪ҇цы, и҆ наи́тїе и҆ прише́ствїе ст҃а́гѡ и҆ животворѧ́щагѡ твоегѡ̀ дх҃а въ ви́дѣ ѻгненныхъ ѧ҆зы́кѡвъ на ст҃ы̑ѧ твоѧ̑ а҆пⷵлы и҆злїѧ́вый, и҆ поста́вивый тѣ́хъ бл҃гобѣ́стники бл҃гочести́выѧ на́шеѧ вѣ́ры и҆ показа́вый и҆сповѣ́дники и҆ проповѣ́дники истиннагѡ бг҃осло́вїѧ: сподо́бивый и҆ въ се́й всесоверше́нный и҆ сп҃си́тельный пра́здникъ ѹ҆миилостивлє́нїѧ моли́твєннаѧ ѡ҆ держи́мыхъ во адѣ прїима́ти и҆ подава́ѧй на́мъ вели̑кїѧ надє́жды, ꙗкѡ ты̀ низпо́слеши ѿше́дшымъ ѡ҆слабле́нїе ѿ содержа́щихъ ѧ скве́рнъ и҆ ѹ҆тѣше́нїе: ѹ҆слы́ши ны смирє́нныѧ и҆ недостѡ́йныѧ, молѧ́щыѧсѧ тебѣ̀, и҆ ѹ҆поко́й дꙋ́шы рабѡ́въ твои́хъ, пре́жде ѹ҆о́пшихъ, въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ прохлажде́нїѧ, ѿѻнꙋ́дꙋже ѿбѣжѐ всѧ́каѧ болѣ́знь, печа́ль и҆ воздыха́нїе, и҆ ѹ҆чинѝ дꙋ́хи ихъ въ селе́нїихъ пра́ведныхъ и҆ ми́ра и҆ ѡ҆слабле́нїѧ сподо́би ихъ: ꙗкѡ не ме́ртвїи восхва́лѧтъ тѧ̀, гдⷵи, нижѐ сꙋ́щїи во адѣ и҆сповѣ́данїе дерзнꙋ́тъ принестѝ тебѣ̀: но мы̀ живі́и бл҃гослови́мъ тѧ̀ и҆ мо́лимъ и҆ ѹ҆милостиви́тєльныѧ моли̑твы и҆ жє́ртвы прино́симъ тебѣ̀ ѡ҆ дꙋша́хъ ихъ.

Присовокупляет же и сию:

Бж҃е вели́кїй и҆ вѣ́чный, ст҃ы́й и҆ чл҃вѣколюби́вый, сподо́бивый на́съ и҆ въ се́й ча́съ ста́ти пред̾ непристꙋ́пною твое́ю сла́вою на пѣ́нїе и҆ хвалꙋ̀ чꙋде́съ твои́хъ! Млⷵтивъ бꙋ́ди на́мъ недостѡ́йнымъ рабѡ́мъ твои̑мъ и҆ пода́ждь бл҃годать сокрꙋше́ннымъ се́рдцемъ невозноси́тельнѡ приноси́ти тебѣ̀ трист҃о́е славосло́вїе и҆ бл҃года́ренїе ѡ҆ вели́кихъ твои́хъ дарѣ́хъ, ꙗже сотвори́лъ є҆сѝ и҆ всегда̀ твори́ши на́мъ. Помѧнѝ, гдⷵи, не́мощь на́шꙋ, и҆ не погꙋбѝ на́съ со беззакѡ́нїи на́шими: но сотворѝ вели́кꙋю млⷵть со смире́нїемъ на́шимъ, да грѣхо́вныѧ тьмы̀ и҆збѣжа́вше, во дни пра́вды ходи́ти бꙋ́демъ и҆, ѡ҆дѣ́ѧвшесѧ ѡ҆рꙋ́жїемъ свѣ́та, ненавѣ́тнѡ пребꙋ́демъ ѿ всѧ́кїѧ ко́зни лꙋка́вагѡ и҆ со дерзнове́нїемъ за всѧ̑ просла́вимъ тѧ̀, є҆ди́наго истиннаго и҆ чл҃вѣколю́цца бг҃а. Твое́ бо вои́стиннꙋ єсть, влⷣко всѣ́хъ и҆ тво́рче, и҆ истиннѡ вели́кое та́инство – вре́менное разрѣше́нїе твои́хъ тва́рей, и҆ по сихъ соедине́нїе, и҆ ѹ҆покое́нїе во вѣ́ки. Твою̀ бл҃года́ть во всѣ́хъ и҆сповѣ́дꙋемъ, во вхо́дѣхъ на́шихъ въ мі́ръ се́й и҆ и҆схо́дѣхъ, иже пред̾ѡбрꙋча́ютъ на́мъ наде́ждꙋ воскрⷵнїѧ и҆ жи́зни нетлѣ́нныѧ, юже по твоемꙋ̀ нело́жномꙋ ѡ҆бѣща́нїю воспрїи́мемъ въ бꙋ́дꙋщемъ второ́мъ прише́ствїи твое́мъ: ты́ бо є҆сѝ и҆ воскрⷵнїѧ на́шегѡ нача́льникъ, и҆ пожи́вшихъ неподкꙋ́пный и҆ чл҃вѣколюби́вый сꙋдїѧ̀, и҆ мздовоздаѧ́нїѧ влⷣка и҆ гдⷵь: ты̀ и҆ прїѻбщи́лсѧ є҆сѝ на́мъ прїи́скреннѡ пло́ти и҆ кро́ве, сниздожде́нїѧ ра́ди кра́йнѧгѡ: и҆ на́шѧ стра̑сти неѿмє́тныѧ прїѧ́лъ є҆сѝ по милосе́рдїю щедро́тъ, внегда̀ во́лею и҆скꙋше́нъ бы́лъ є҆сѝ, и҆ въ не́мже, са́мъ и҆скꙋси́всѧ, пострада́лъ є҆сѝ, и҆скꙋша́ємымъ на́мъ бы́лъ є҆сѝ самоѡбѣща́нный помо́щникъ: тѣ́мже и҆ совозве́лъ є҆сѝ на́съ во твоѐ безстра́стїе. Прїимѝ ѹбо, влⷣко, мѡльбы̀ и҆ молє́нїѧ на̑ша и҆ ѹ҆поко́й всѧ̑ ѻ҆тцы̀ коегѡ́ждо, и҆ ма́тєри, и҆ бра́тїю, и҆ сестры̀, и҆ ча̑да, и҆ и҆ны̑ѧ сро́дники и҆ соплеме́нники, ҆ всѧ дꙋ́шы, въ наде́ждѣ воскрⷵнїѧ жи́зни вѣ́чныѧ пр́ежде почи́вшыѧ: и҆ ѹ҆чинѝ дꙋ́хи ихъ и҆ и҆мена̀ въ кни́зѣ жи́зни, въ нѣ́дрѣхъ а҆враа́ма и҆ і҆саа́ка и҆ і҆а́кѡва, во странѣ̀ живы́хъ, во црⷵтвїи нбⷵнѣмъ, въ раѝ сла́дости, свѣ́тлыми агг҃лы твои́ми вводѧ̀ всѧ̑ во ст҃ыѧ̑ твоѧ̑ ѡ҆би́тєли: совоздви́гни и҆ тѣлеса̀ на̑ша въ де́нь, во́ньже ѡ҆предѣли́лъ є҆сѝ по ст҃ы̑мъ твои̑мъ и҆ нелѡ́жнымъ ѡ҆бѣтова́нїємъ. Нѣ́сть ѹбо, гдⷵи, рабѡ́мъ твои̑мъ сме́рть, внегда̀ и҆сходи́ти на́мъ ѿ тѣ́ла и҆ къ тебѣ̀ бг҃ꙋ на́шемꙋ приходи́ти, но преставле́нїе ѿ печа́льнѣйшихъ на полє́знѣйшаѧ и҆ на сла́дотстнѣйшаѧ, и҆ ѹ҆покое́нїе, и҆ ра́дость. Аще же и҆ что̀ согрѣши́хомъ пред̾ тобо́ю, млⷵтивъ бꙋ́ди и҆ на́мъ и҆ тѣ̑мъ, занѐ ни є҆ди́нъ єсть чи́стъ пред̾ тобо́ю ѿ скве́рнъ, нижѐ аще є҆ди́нъ де́нь житїѧ̀ є҆гѡ̀ єсть, ра́звѣ ты̀ то́чїію є҆ди́нъ, на землѝ ꙗ҆ви́выйсѧ безгрѣ́шенъ гдⷵь на́шъ і҆и҃съ хрⷵтосъ, имже всѝ ѹ҆пова́емъ млⷵть полꙋчи́ти и҆ ѡ҆ставле́нїе грѣхѡ́въ. Сегѡ̀ ра́ди и҆ на́мъ и҆ ѻнѣмъ, ꙗкѡ бл҃гъ и҆ чл҃вѣколю́бецъ бг҃ъ, ѡ҆сла́би, ѡ҆ста́ви, простѝ грѣхопадє́нїѧ на̑ша, вѡ́льнаѧ и҆ невѡ́льнаѧ, въ вѣ́дѣнїи и҆ не въ вѣ́дѣнїи, ꙗвнаѧ и҆ сокровє́ннаѧ, въ дѣѧ́нїи, въ помышле́нїи, въ словесѝ, во всѣ́хъ на́шихъ ѡ҆браще́нїихъ и҆ движе́нїихъ. И҆ ѿшѐдшымъ ѹбѡ свобо́дꙋ и҆ ѡ҆са́бꙋ да́рꙋй, на́съ же сꙋ́щихъ здѣ̀ бл҃гословѝ, коне́цъ бл҃гі́й и҆ ми́рный да́рꙋѧ на́мъ и҆ всѣ̑мъ лю́демъ твои̑мъ, и҆ млⷵти и҆ чл҃вѣколю́бїѧ ѹ҆тробꙋ ѿверза́ѧй на́мъ на стра́шнѣмъ и҆ ѹ҆жа́снѣмъ твое́мъ прише́ствїи, и҆ црⷵтвїѧ твоегѡ̀ досто́йныхъ на́съ сотворѝ.

Присовокупляет же и сию молитву:

Бж҃е вели́кїй и҆ вы́шнїй, є҆ди́не и҆мѣ́ѧй безсме́ртїе, во свѣ́тѣ живы́й непристꙋ́пнѣмъ, всю̀ тва́рь премꙋ́дростїю созда́вый, раздѣли́вый посредѣ̀ свѣ́та и҆ посредѣ̀ тьмы̀ и҆ со́лнце положи́вый во ѡбласть днѐ, лꙋнꙋ́ же и҆ ѕвѣ́зды во ѡбласть но́щи, сподо́бивый на́съ грѣ́шныхъ и҆ въ настоѧщїй де́нь предвари́ти лицѐ твоѐ во и҆сповѣ́данїи и҆ вече́рнюю тебѣ̀ слꙋ́жбꙋ принестѝ! Са́мъ, чл҃вѣ́колюбче гдⷵи, и҆спра́ви мл҃твꙋ на́шꙋ, ꙗкот ѳѷмїа́мъ, пред̾ тобо́ю и҆ прїими ю въ воню̀ бл҃гоꙋха́нїѧ. Пода́ждь же на́мъ настоѧ́щїй ве́черъ и҆ приходѧ́щꙋю но́щь ми́рнꙋ: ѡ҆лецы́ ны ѡ҆рꙋ́жїемъ свѣ́та, и҆зба́ви на́съ ѿ стра́ха нощна́гѡ и҆ ѿ всѧ́кїѧ ве́щи, во тьмѣ̀ преходѧ́щїѧ: и҆ да́рꙋй на́мъ со́нъ, є҆го́же во ѹ҆покое́нїе не́мощи на́шей да́ровалъ є҆сѝ, ѿ всѧ́кагѡ дїа́вольскагѡ мечта́нїѧ и҆зба́вленъ. Ей, влⷣко, всѣ́хъ бл҃ги́хъ пода́телю, ꙗкѡ да и҆ на ло́жахъ на́шихъ ѹ҆милѧ́ющесѧ, воспомѧ́немъ и҆ въ нощѝ прест҃о́е имѧ твоѐ: и҆ поꙋче́нїемъ твои́хъ за́повѣдей ѡ҆зарѧ́еми, въ ра́дости дꙋше́внѣй воста́немъ ко славосло́вїю твоеѧ̀ бл҃гости, мл҃твы и҆ молє́нїѧ твоемꙋ̀ бл҃госе́рдїю приносѧ́ще ѡ҆ свои́хъ грѣсѣ́хъ и҆ ѡ҆ всѣ́хъ

лю́дехъ твои́хъ, ꙗже мл҃твами прест҃ыѧ бцⷣы въ млⷵти посѣтѝ.

По скончании ектении возглас:

Ты́ бо є҆сѝ ѹ҆покое́нїе дꙋ́шъ и҆ тѣле́съ на́шихъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.


Комментарии для сайта Cackle