Архиерейский чиновник. Книга 1

См. также Книгу 2

Чиновник архиерейского служения

Книга 1

Содержание

На вечерни
На литии
На утрени
Чин священныя и божественная литургии во святых отца нашего Иоанна Златоустаго: како подобает служити архиереем Божественная литургия во святых отца нашего Василиа Великаго, архиепископа Кесарии Каппадокийския Чин божественная литургии преждеосвященных: како подобает служити архиереем Чин на поставление чтеца и певца бывает сице Чин, бываемый на хиротонию в иподиакона Чин, бываемый на хиротонию диакона Чин, бываемый на произведение архидиакона и протодиакона Чин, бываемый на хиротонию пресвитера Чин последования во еже сотворити протопресвитера Чин, бываемый на произведение игумена Чин, бываемый на произведение архимандрита Отпусты владычних праздников, глаголемые в вечерню, в утреню и в литургию по чину Соборник двенадесяти месяцев Последование, како освящати антиминсы архиерею, на нихже священодействовати священнику во церкви, идеже не имать святая трапеза мощей Чин Воздвижения Честнаго и Животворящаго Креста Чин великаго освящения воды святых богоявлений Молитвы в начале поста святыя Четыредесятницы Чин благословения колива сиреч кутии, или вареныя пшеницы с медом смешанныя и различными сладкими овощьми украшенныя, и в честь и память Господских праздников, кои святых Божии в церковь приносимыя Последование Недели Православия Молитва на освящение ваий Чин умовения ног в великий четверток Иже во святых отца нашего Иоанна, архиепископа Константинопо́льскаго, Златоустаго, слово огласительное во святую и великую Неделю Пасхи Молитва на благословение артоса во святую Неделю Пасхи Молитва на раздробление артоса в субботу Светлыя Недели Молитва вечерни святыя Пятидесятницы коленопреклонныя Молитва на освящение винограда Молитва на освящение плодов Чин освящения храма от архиерея творимаго  

 
На вече́рни

Откровенною главою, глатолет молитвы светильничныя:

Моли́тва а҃

Гдⷵи ще́дрый и҆ ми́лостивый, долготерпѣли́ве и҆ многоми́лостиве, внꙋшѝ моли́твꙋ на́шꙋ и҆ вонмѝ гла́сꙋ моле́нїѧ на́шегѡ, сотворѝ съ на́ми зна́менїе во бла́го: наста́ви на́съ на пꙋ́ть тво́й, єже ходи́ти во истинѣ твое́й: возвеселѝ сердца̀ на̑ша, во єже боѧ́тиса имене твоегѡ̀ свѧта́гѡ: занѐ ве́лїй є҆сѝ ты̀ и҆ творѧ́й чꙋдеса̀, ты̀ є҆сѝ бг҃ъ є҆ди́нъ, и҆ нѣ́сть подо́бенъ тебѣ̀ въ бозѣ́хъ, гдⷵи: си́ленъ въ ми́лости и҆ бла́гъ въ крѣ́пости, во єже помога́ти, и҆ ѹ҆тѣша́ти, и҆ спаса́ти всѧ̑ ѹ҆пова́ющыѧ во имѧ ст҃о́е твоѐ.
Ꙗкѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва в҃

Гдⷵи, да не ꙗростїю твое́ю ѡ҆бличи́ши на́съ, нижѐ гнѣ́вомъ твои́мъ нака́жеши на́съ, но сотворѝ съ на́ми по ми́лости твое́й, врачꙋ̀ и҆ и҆сцѣли́телю дꙋ́шъ на́шихъ: наста́ви насъ ко приста́нищꙋ хотѣ́нїѧ твоегѡ̀: просвѣтѝ ѻчи серде́цъ на́шихъ въ позна́нїе твоеѧ̀ истины: и҆ да́рꙋй на́мъ про́чее настоѧ́щагѡ днѐ ми́рное и҆ без­грѣ́шное, и҆ всѐ вре́мѧ живота̀ на́шегѡ, моли́твами ст҃ы́ѧ бцⷣы и҆ всѣ́хъ ст҃ы́хъ.
кѡ твоѧ̀ держа́ва и҆ твоѐ єсть ца́рство, и҆ си́ла, и҆ сла́ва, ѻц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва г҃

Гдⷵи бж҃е на́шъ, помѧнѝ на́съ грѣ́шныхъ и҆ непотре́бныхъ ра̑бъ твои́хъ, внегда̀ призыва́ти на́мъ ст҃о́е покланѧ́емое имѧ твое, и҆ не посрамѝ на́съ ѿ ча́ѧнїѧ ми́лости твоеѧ̀: но да́рꙋй на́мъ, гдⷵи, всѧ̑ ꙗже ко спасе́нїю прошє́нїѧ, и҆ сподо́би на́съ люби́ти и҆ боѧ́тисѧ тебѐ ѿ всегѡ̀ се́рдца на́шегш и҆ твори́ти во всѣ́хъ во́лю твою̀.
Ꙗко бла́гъ и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва д҃

Немо́лчными пѣ́сньмн и҆ непреста́нными славословле́ньми ѿ ст҃ы́хъ си́лъ воспѣва́емый, и҆сполни ѹ҆ста̀ на̑ша хвале́нїѧ твоегѡ̀, єже пода́ти вели́чествїе имени твоемꙋ̀ ст҃о́мꙋ: и҆ да́ждь на́мъ ѹ҆ча́стїе и҆ наслѣ́дїе со всѣ́ми боѧ́щимисѧ тебѐ истиною и҆ хранѧ́щими за́повѣди твоѧ̑, моли́твами ст҃ы́ѧ бцⷣы и҆ всѣ́хъ ст҃ы́хъ твои́хъ.
кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва є҃

Гдⷵи, гдⷵи, пречи́стою твое́ю дла́нїю содерж́ай всѧ́чєскаѧ, долготерпѧ́й на всѣ́хъ на́съ и҆ ка́ѧйсѧ ѡ҆ ѕло́бахъ на́шихъ, помѧнѝ щедрѡ́ты твоѧ̑ и҆ ми́лость твою̀, посѣти́ ны твое́ю бла́гостїю и҆ да́ждь на́мъ и҆збѣжа́ти и҆ про́чее настоѧ́щагѡ днѐ, твое́ю благода́тїю, ѿ разли́чныхъ ко́зней лꙋка́вагѡ, и҆ ненавѣ́тнꙋ жи́знь на́шꙋ соблюдѝ благода́тїю всест҃а́гѡ твоегѡ̀ дх҃а.
Ми́лостїю и҆ человѣколю́бїемъ є҆диноро́днагѡ твоегѡ̀ сн҃а, съ ни́мже благослове́нъ є҆сѝ, со всест҃ы́мъ и҆ благи́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва ѕ҃

Бж҃е вели́кій и҆ ди́вный, неи҆сповѣди́мою бла́гостїю и҆ бога́тымъ про́мысломъ ѹ҆правлѧ́ѧй всѧ́чєскаѧ и҆ мїрска̑ѧ на́мъ блага̑ѧ дарова́вый, и҆ спорꙋчи́вый на́мъ ѡ҆бѣща́нное ца́рство, дарова́нными благи́ми, пꙋтесотвори́вый на́мъ и҆ днѐ преше́дшꙋю ча́сть ѿ всѧ́кагѡ ѹ҆клони́тисѧ ѕла̀: да́рꙋй на́мъ и҆ про́чее непоро́чнѡ соверши́ти предъ ст҃о́ю сла́вою твое́ю, пѣ́ти тѧ̀ є҆ди́наго блага́го и҆ человѣколюби́ваго бг҃а на́шего.
Ꙗкѡ ты̀ є҆сѝ бг҃ъ на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва з҃

Бж҃е вели́кій и҆ вы́шнїй, є҆ди́нъ и҆мѣ́ѧй безсме́ртїе, во свѣ́тѣ живы́й непристꙋ́пнѣмъ, всю̀ тва́рь премꙋ́дростїю созда́вый, раздѣли́вый междꙋ̀ свѣ́томъ и҆ междꙋ̀ тьмо́ю, и҆ со́лнце положи́вый во ѻбласть днѐ, лꙋнꙋ́ же и҆ ѕвѣ́зды во ѻбласть но́щи, сподо́бивый на́съ грѣ́шныхъ и҆ въ настоѧ́щїй ча́съ предвари́тн лицѐ твоѐ и҆сповѣ́данїемъ и҆ вече́рнее тебѣ̀ славосло́вїе принестѝ: са́мъ, человѣколю́бче, и҆спра́ви моли́твꙋ на́шꙋ ꙗкѡ кади́ло предъ тобо́ю и҆ прїимѝ ю въ воню̀ благоꙋха́нїѧ: пода́ждь же на́мъ настоѧ́щїй ве́черъ и҆ приходѧ́щꙋю но́щь ми́рнꙋ, ѡ҆блецы́ ны̀ во ѻ҆рꙋ́жїе свѣ́та, и҆зба́ви ны̀ ѿ стра́ха нощна́гѡ и҆ всѧ́кїѧ ве́щи, во тьмѣ̀ преходѧ́щїѧ, и҆ да́ждь со́нъ, є҆го́же во ѹ҆покое́нїе не́мощи на́шей дарова́лъ є҆сѝ, всѧ́кагѡ мечта́нїѧ дїа́волѧ ѿчꙋжде́нный. Ей, влⷣко, благи́хъ пода́телю, да и҆ на ло́жахъ на́шихъ ѹ҆милѧ́ющесѧ, помина́емъ въ нощѝ имѧ твоѐ и҆, поꙋче́нїемъ твои́хъ за́повѣдей просвѣща́еми, въ ра́дости дꙋше́внѣй воста́немъ ко славосло́вїю твоеѧ̀ бла́гости, молє́нїѧ и҆ моли̑твы твоемꙋ̀ благоꙋтро́бїю приносѧ́ще ѡ҆ свои́хъ согрѣше́нїихъ и҆ всѣ́хъ люде́й твои́хъ, ꙗже, моли́твами ст҃ы́ѧ бцⷣы, ми́лостїю посѣтѝ.
Ꙗкѡ бла́гъ и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Исполншуся же предначинательному псалму, глаголет священник или диакон, аще есть, исшед северною страною, и став на обычном месте амвона, ектению сию: Миром Господу помолимся.

Моли́тва вхо́да

Ве́черъ, и҆ заꙋ́тра, и҆ полꙋ́дне, хва́лимъ, благослови́мъ, благодари́мъ и҆ мо́лимсѧ тебѣ̀, влⷣко всѣ́хъ: и҆спра́ви моли́твꙋ на́шꙋ, ꙗкѡ кади́ло предъ тобо́ю, и҆ не ѹ҆клонѝ серде́цъ на́шихъ въ словеса̀ и҆лѝ въ помышлє́нїѧ лꙋка́вствїѧ: но и҆зба́ви на́съ ѿ всѣ́хъ ловѧ́щихъ дꙋ́шы на́шѧ, ꙗкѡ къ тебѣ̀, гдⷵи, гдⷵи, ѻчи на́ши, и҆ на тѧ̀ ѹ҆пова́хомъ, да не посрами́ши на́съ, бж҃е на́шъ.
Ꙗкѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва главоприклоне́нїа

Гдⷵи бж҃е на́шъ, приклони́вый небеса̀ и҆ соше́дый на спасе́нїе ро́да человѣ́ческагѡ, при́зри на рабы̑ твоѧ̑ и҆ на достоѧ́нїе твоѐ: тебѣ́ бо стра́шномꙋ и҆ человѣколю́бцꙋ сꙋдїѝ твоѝ рабѝ подклони́ша главы̑, своѧ̑ же покори́ша вы̑ѧ, не ѿ человѣ̑къ ѡ҆жида́юще по́мощи, но твоеѧ̀ ѡ҆жида́юще ми́лости и҆ твоегѡ̀ ча́юще спасе́нїѧ, ꙗже сохранѝ на всѧ́кое вре́мѧ, и҆ по настоѧ́щемъ ве́черѣ, и҆ въ приходѧ́щꙋю но́щь, ѿ всѧ́кагѡ врага̀, ѿ всѧ́кагѡ проти́внаго дѣ́йства дїа́вольскагѡ, и҆ ѿ помышле́нїй сꙋ́етныхъ, и҆ воспомина́нїй лꙋка́выхъ.
На лїті́и
По скончании молитв, глаголемых диаконом, архиерей возглас:
Ѹ҆слы́ши ны̀, бж҃е, спаси́телю на́шъ, ѹ҆пова́нїе всѣ́хъ концє́въ землѝ и҆ сꙋ́щихъ въ мо́ри дале́че, и҆ ми́лостивъ, ми́лостивъ бꙋ́ди, влⷣко, ѡ҆ грѣсѣ́хъ на́шихъ и҆ поми́лꙋй ны̀. Ми́лостивъ бо и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсылаѐмъ, ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Лик: Аминь.
Таже архиерей: Ми́ръ всѣ̑мъ.
Лик: И духови твоему.
Диакон: Главы наша господеви приклоним. И всем приклоньшым главы, молится архиерей велегласно:
Влⷣко многоми́лостиве, гдⷵи і҆и҃се хрⷵте бж҃е на́шъ, моли́твами всепречи́стыѧ влⷣчцы на́шеѧ бцⷣы и҆ приснодѣ́вы марі́и, си́лою честна́гѡ и҆ животворѧ́щагѡ креста̀, предста́тельствы честны́хъ небе́сныхъ си́лъ безпло́тныхъ, честна́гѡ сла́внагѡ проро́ка, предте́чи и҆ крести́телѧ і҆ѡа́нна, ст҃ы́хъ сла́вныхъ и҆ всехва́льныхъ а҆по́стѡлъ, ст҃ы́хъ сла́вныхъ и҆ добропобѣ́дныхъ мꙋ́ченикѡвъ, преподо́бныхъ и҆ бг҃оно́сныхъ ѻ҆тє́цъ на́шихъ, иже во ст҃ы́хъ ѻ҆тє́цъ на́шихъ и҆ вселе́нскихъ вели́кихъ ѹ҆чи́телей и҆ ст҃и́телей васі́лїѧ вели́кагѡ, григо́рїѧ бг҃ослова и҆ і҆ѡа́нна златоꙋ́стагѡ, иже во ст҃ы́хъ ѻ҆тца̀ на́шегѡ нїкола́ѧ, а҆рхїепі́скопа мѵ́ръ лѷкі́йскихъ, чꙋдотво́рца, ст҃ы́хъ равноапо́стольныхъ меѳо́дїѧ и҆ кѷрі́лла, ѹ҆чи́телей слове́нскихъ, свѧта́гѡ равноапо́стольнагѡ вели́кагѡ кнѧ́зѧ влади́мїра и҆ свѧты́ѧ равноапо́стольныѧ вели́кїѧ кнѧги́ни рѡссі́йскїѧ ѻльги, иже во ст҃ы́хъ ѻ҆тє́цъ на́ших̾, всеѧ̀ рѡссі́и чꙋдотво́рцєвъ мїхаи́ла, петра̀, а҆леѯі́ѧ, і҆ѡ́ны, фїлі́ппа, є҆рмоге́на, і҆нноке́нтїѧ, мака́рїѧ, дими́трїа, митрофа́на, тѵ́хѡна, ѳеодо́сїѧ, і҆ѡаса́фа, пїтѵрі́ма, і҆ѡа́нна, і҆нноке́нтїѧ и҆ сѡфро́нїа, ст҃ы́хъ сла́вныхъ и҆ добропобѣ́дныхъ мꙋ́ченикѡвъ: ст҃а́гѡ сла́внагѡ великомч҃нка, побѣдоно́сца и҆ чꙋдотво́рца геѡ́ргїѧ, ст҃а́гѡ великомч҃нка и҆ цѣли́телѧ пантелеи́мѡна, ст҃ы́ѧ великомч҃нцы варва́ры и҆ ст҃ы́хъ благовѣ́рныхъ рѡссі́йскихъ кнѧзе́й и҆ страстоте́рпцєвъ бори́са, глѣ́ба и҆ игорѧ, преподо́бныхъ и҆ бг҃оно́сныхъ ѻ҆тє́цъ на́шихⸯ а҆нтѡ́нїа и҆ ѳеодо́сїа и҆ про́чихъ чꙋдотво́рцєвⸯ пече́рскихъ, и҆ преподо́бныхъ и҆ бг҃оно́сныхъ ѻ҆тє́цъ на́шихъ се́ргїѧ, и҆гꙋ́мена ра́донежскагѡ, чꙋдотво́рца, и҆ серафі́ма саро́вскагѡ, чꙋдотво́рца, и҆ преподо́бнагѡ и҆ бг҃оно́снагѡ ѻтца̀ на́шегѡ іѡва, и҆гꙋ́мена поча́евскагѡ, чꙋдотво́рца, и҆ ст҃а́гѡ, имⷬ҇къ, єгѡ́же єсть хра́мъ и҆ є҆гѡже єсть де́нь, ст҃ы́хъ и҆ пра́ведныхъ бг҃оѻтє́цъ і҆ѡакі́ма и҆ анны и҆ всѣ́хъ ст҃ы́хъ твои́хъ, благопрїѧ́тнꙋ сотворѝ моли́твꙋ на́шꙋ, да́рꙋй на́мъ ѡ҆ставле́нїе прегрѣше́нїй на́шихъ, покры́й на́съ кро́вомъ крилꙋ̑ твоє́ю, ѿженѝ ѿ на́съ всѧ́каго врага̀ и҆ сꙋпоста́та, ѹ҆мирѝ на́шꙋ жи́знь, гдⷵи, поми́лꙋй на́съ и҆ мі́ръ тво́й и҆ спасѝ дꙋ́шы на́шѧ, ꙗкѡ бла́гъ и҆ человѣколю́бецъ.
Таже начинаем стихиры стиховны̀, и поюще, входим во храм. Слава, и ныне: богородичен. Таже: Ныне отпущаеши: Трисвятое. По Отче наш: Возглашение:
Ꙗкѡ твоѐ єсть ца́рство, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.
Лик: Аминь.
И мы тропарь праздника глаголем трижды. Предлагаются же на уготованнем столе ради благословения пять хлебов, пшеницам, и два сосуда на сие устроенныя, един исполнен вина от плода лознаго, другий же елея. Диакон же кадит окрест стола и архиерея. Архиерей же, взем един хлеб, знаменует им прочыя хлебы и глаголет молитву сию велегласно: Егда же глаголет: Сам благослови: тогда десницею указует на предложенныя хлебы, пшеницу, вино и елей.
Гдⷵи і҆и҃се хрⷵтѐ бж҃е на́шъ, благослови́вый пѧ́ть хлѣ́бѡвъ и҆ пѧ́ть ты́сѧщъ насы́тивый, са́мъ благословѝ и҆ хлѣ́бы сїѧ̑, пшени́цꙋ, вїно̀ и҆ є҆ле́й, и҆ ѹ҆мно́жи сїѧ̑ во гра́дѣ се́мъ и҆лѝ: въ ве́си се́й, ил҆ѝ: во ст҃ѣ́й ѻ҆бители се́й и҆ во все́мъ мі́рѣ твое́мъ, и҆ вкꙋша́ющыѧ ѿ ни́хъ вѣ̑рныѧ ѡ҆свѧтѝ. Ꙗкѡ ты̀ є҆сѝ благословлѧ́ѧй и҆ ѡ҆свѧща́ѧй всѧ́чєскаѧ, хрⷵтѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ и҆ всест҃ы́мъ и҆ благи́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.
Лик: Аминь. И по Амине, абие:
Буди имя Господне благословенно от ныне и до века. трижды.
И глаголем: Благословлю Господа на всякое время: даже до: Не лишатся всякаго блага. Архиерей же отшед стоит пред святыми дверьми.
По исполнении же псалма архиерей к народу глаголет:
Благослове́нїе гдⷵне на ва́съ, тогѡ̀ благода́тїю и҆ человѣколю́бїемъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
Лик: Аминь.
И абие полагается чтение. Слава в вышних Богу, трижды, и Господи, устне мои отверзеши, дважды, и шестопсалмие.
На ѹтрени

Моли́тва а҃

Благодари́мъ тѧ̀, гдⷵи бж҃е на́шъ, возставившаго на́съ ѿ ло́жей на́шихъ и҆ вложи́вшаго во ѹ҆ста̀ на̑ша сло́во хвале́нїѧ, єже покланѧ́тисѧ и҆ призыва́ти имѧ твоѐ ст҃о́е, и҆ мо́лимсѧ твои̑мъ щедро́тамъ, ихже всегда̀ ѹ҆потреблѧ́лъ єсѝ ѡ҆ на́шей жи́знн: и҆ ны́нѣ послѝ по́мощь твою̀ на предсто́щыѧ предъ лице́мъ ст҃ы́ѧ сла́вы твоеѧ̀ и҆ ѡ҆жида́ющыѧ ѿ тебѐ бога́тыѧ ми́лѡсти, и҆ да́ждь имъ, со стра́хомъ и҆ любо́вїю всегда̀ тебѣ̀ слꙋжа́щымъ, хвали́ти неисповѣди́мꙋю твою̀ бла́гость.
Ꙗкѡ подоба́етъ тебѣ̀ всѧ́каѧ сла́ва, че́сть и҆ поклоне́ніе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆минь.

Моли́тва в҃

Ѿ но́щи ѹтренюетъ дꙋ́хъ на́шъ къ тебѣ̀, бж҃е на́шъ, занѐ свѣ́тъ повелѣ̑нїѧ твоѧ на землѝ. Пра́вдꙋ и҆ ст҃ы́ню соверша́ти во стра́сѣ твое́мъ вразꙋми́ ны, тебе́ бо сла́вимъ, вои́стиннꙋ сꙋ́щаго бг҃а на́шего. Приклонѝ ѹхо твоѐ и҆ ѹ҆слы́ши ны̀, и҆ помѧнѝ, гдⷵи, сꙋ́щыѧ и҆ молѧ́щыѧсѧ съ на́ми всѧ̑ по имени и҆ спаси҆ ѧ си́лою твое́ю. Благословѝ лю́ди твоѧ̑ и҆ ѡ҆свѧтѝ достоѧ́нїе твоѐ. Ми́ръ мі́рови твоемꙋ̀ да́рꙋй, це́рквамъ твои̑мъ, свѧще́нникѡмъ и҆ всѣ̑мъ лю́демъ твои̑мъ.
Ꙗкѡ благослови́сѧ и҆ просла́висѧ всечестно́е и҆ великолѣ́пое имѧ твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆минь.

Моли́тва г҃

Ѿ но́щи ѹтренюетъ дꙋ́хъ на́шъ къ тебѣ̀, бж҃е, занѐ свѣ́тъ повелѣ̑нїѧ твоѧ̑. Наꙋчѝ на́съ, бж҃е, пра́вдѣ тбое́й, за́повѣдємъ твои̑мъ и҆ ѡ҆правда́нїємъ твои̑мъ, просвѣтѝ ѻчи мы́слей на́шихъ, да не когда̀ ѹснемъ во грѣсѣ́хъ въ сме́рть. Ѿженѝ всѧ́кїй мра́къ ѿ серде́цъ на́шихъ. Да́рꙋй на́мъ со́лнце пра́вды и҆ ненавѣ́тнꙋ жи́знь на́шꙋ соблюдѝ печа́тїю ст҃а́гѡ твоегѡ̀ дх҃а. И҆спра́ви стопы̑ на́шѧ на пꙋ́ь ми́ра. Да́ждь на́мъ ви́дѣти ѹтро и҆ де́нь въ ра́дованїи, да тебѣ̀ ѹтреннїѧ возсыла́емъ моли̑твы.
Ꙗкѡ твоѧ̀ держа́вл и҆ твоѐ єсть ца́рство, и҆ си́ла, и҆ сла́ва, ѻ҆ц҃а̀ и҆ сн҃а и҆ ста́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва д҃

Влко бж҃е, ст҃ы́й и҆ непостижи́мый, рекі́й и҆зъ тьмы̀ свѣ́тꙋ возсїѧ́ти, ѹ҆поко́ивый на́съ въ нощнѣ́мъ снѣ̀ и҆ возста́вивый ко славосло́вїю и҆ мольбѣ̀ твоеѧ̀ бла́гости, ѹ҆молѧ́емь ѿ своегѡ̀ тѝ бллгоꙋтро́бїѧ, прїимѝ на́съ и҆ ны́нѣ, покланѧ́ющихсѧ тебѣ̀ и҆ по си́лѣ благодарѧ́щнхъ тѧ̀, и҆ да́рꙋй на́мъ всѧ̑ ꙗже ко спасе́ниїю прошє́нїѧ. Покажи́ ны сы́ны свѣ́та и҆ днѐ и҆ наслѣ́дники вѣ́чныхъ твои́хъ бла̑гъ. Помѧнѝ, гдⷵи, во мно́жествѣ ще́дротъ твои́хъ и҆ всѧ̑ лю́ди твоѧ̑, сꙋ́щыѧ и҆ молѧ́щыѧсѧ съ на́ми, и҆ всю̀ бра́тїю на́шꙋ, ꙗже на землѝ, на мо́ри, на всѧ́комъ мѣ́стѣ влады́чествїѧ твоегѡ̀, тре́бꙋющиxъ твоегѡ̀ человѣколю́бїѧ и҆ по́мощи, и҆ всѣ̑мъ пода́й вели́кꙋю твою̀ ми́лость, да, спасе́ни дꙋше́ю же и҆ тѣ́ломъ всегда̀ пребыва́юще, со дерзнове́нїемъ сла́вимъ чꙋ́дное и҆ благослове́нное имѧ твоѐ.
Ꙗкѡ бг҃ъ ми́лости, щедро́тъ и҆ человѣколю́бїѧ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ
и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва є҃

Благи́хъ сокро́вище, и҆сто́чниче приснотекꙋ́щїй, ѻч҃е ст҃ы́й, чꙋдотво́рче, всеси́льне и҆ вседержи́телю, веѝ тебѣ̀ покланѧ́емсѧ и҆ тебѣ̀ мо́лимсѧ, твоѧ̑ ми́лѡсти и҆ твоѧ̑ щедрѡ́ты призыва́юще на по́мощь и҆ застꙋпле́нїе на́шегѡ сми́ренїѧ: помѧнѝ, гдⷵи, твоѧ̑ рабы̑, прїимѝ всѣ́хъ на́съ ѹтрєннѧѧ молє́нїѧ, ꙗкѡ кади́ло предъ тобо́ю, и҆ да ни є҆ди́наго ѿ на́съ неискꙋ́сна сотбори́ши, но всѧ̑ ны̀ снабдѝ щедро́тами твои́ми. Помѧнѝ, гдⷵи, бдѧ́щыѧ и҆ пою́щыѧ во сла́вꙋ твою̀ и҆ є҆диноро́днагѡ твоегѡ̀ сн҃а и҆ бг҃а на́шегѡ и҆ ст҃а́гѡ твоегѡ̀ дх҃а: бꙋ́ди тѣ̑мъ помо́щникъ и҆ застꙋ́пникъ, прїимѝ ихъ мольбы̑ въ пренебе́сный и҆ мы́сленный тво́й же́ртвенинкъ.
Ꙗкѡ ты̀ є҆сѝ бг҃ъ на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва ѕ҃

Благодари́мх тѧ̀, гдⷵи бж҃е спасе́нїй на́шихъ, ꙗкѡ всѧ̑ твори́ши во благодѣ́тельство жи́зни на́шеѧ, да всегда̀ къ тебѣ̀ взира́емъ, спа́сꙋ и҆ благодѣ́телю дꙋ́шъ на́шихъ, ꙗкѡ препоко́илъ є҆сѝ на́съ въ мимоше́дшее но́щи число̀ и҆ воздви́глъ є҆сѝ ны̀ ѿ лѡ́жей на́шихъ и҆ поста́вилъ є҆сѝ въ поклоне́нїе честна́гѡ имене твоегѡ̀. Тѣ́мже мо́лимъ тѧ̀, гдⷵи, да́ждь на́мъ благода́ть и҆ си́лꙋ, да сподо́бимсѧ пѣ́ти тебѣ̀ разꙋ́мнѡ и҆ моли́тисѧ непреста́ннѡ, во стра́сѣ и҆ тре́петѣ своѐ спасе́нїе содѣ́ловающе застꙋпле́нїемъ хрⷵта̀ твоегѡ̀: помѧнѝ, гдⷵи, и҆ въ нощѝ къ тебѣ̀ вопїю́щыѧ, ѹ҆слы́ши ѧ и҆ поми́лꙋй, и҆ сокрꙋшѝ подъ но́зѣ ихъ неви́димыѧ и҆ бори́тєльныѧ врагѝ.
Ты́ бо є҆сѝ ца́рь мира и҆ спа́съ дꙋ́шъ на́шихъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва з҃

Бж҃е и҆ ѻч҃е гдⷵа на́шегѡ і҆и҃са хрⷵта̀, возста́вивый ны̀ ѿ ло́жей на́шихъ и҆ собра́вый ны̀ въ ча́съ моли́твы, да́ждь на́мъ благода́ть во ѿверзе́нїе ѹстъ на́шихъ и҆ прїимѝ на̑ша по си́лѣ благодарє́нїѧ, и҆ наꙋчи́ ны ѡ҆правда́нїємъ твои̑мъ, занѐ помоли́тисѧ, ꙗкоже подоба́етъ, не вѣ́мы, аще не ты̀, гдⷵи, ст҃ы́мъ твои́мъ дх҃омъ наста́виши ны̀. Тѣ́мже мо́лимсѧ тебѣ̀: аще что̀ согрѣши́хомъ да́же до настоѧ́щагѡ часа̀ сло́вомъ, и҆лѝ дѣ́ломъ, и҆лѝ помышле́нїемъ, во́лею и҆лѝ нево́лею, ѡ҆сла́би, ѡ҆ста́ви, простѝ: аще бо беззакѡ́нїѧ назри́ши, гдⷵи, гдⷵи, кто̀ постои́тъ; ꙗкѡ ѹ҆ тебѐ и҆збавле́нїе єсть: ты̀ є҆сѝ є҆ди́нъ ст҃ы́й, помо́щникъ держа́вный, защи́титель жи́зни на́шеѧ, и҆ ҆ѡ тебѣ̀ пѣ́нїе на́ше всегда̀.
Бꙋ́ди держа́ва ца́рствїѧ твоегѡ̀ благослове́на и҆ препросла́влена, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва и҃

Гдⷵи бж҃е на́шъ, со́нное ѹ҆ны́нїе ѿгна́вый ѿ на́съ и҆ сопризва́вый ны̀ зва́нїемъ ст҃ы́мъ, єже и҆ въ нощѝ воздѣва́ти рꙋ́ки на́шѧ и҆ и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀, прїимѝ мольбы̑ на́шѧ, молє́нїѧ, и҆сповѣ̑данїѧ, нощны̑ѧ слꙋ́жбы и҆ да́рꙋй на́мъ, бж҃е, вѣ́рꙋ непосты́днꙋ, наде́ждꙋ и҆звѣ́стнꙋ, любо́вь нелицемѣ́рнꙋ, благословѝ на́шѧ вхо́ды и҆ и҆схо́ды, дѣѧ̑нїѧ, дѣла̀, словеса̀, помышлє́нїѧ и҆ да́ждь на́мъ пости́гнꙋти въ нача́ло днѐ, хва́лѧщымъ, пою́щымъ, благословѧ́щымъ твоеѧ̀ неизрече́нныѧ благосты́ни бла́гость.
кѡ благоглови́сѧ всест҃о́е имѧ твоѐ и҆ просла́висѧ ца́рство твоѐ, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва ѳ҃

Возсїѧ́й въ сердца́хъ на́шихъ, чл҃вѣколю́бче влⷣко твоегѡ̀ бг҃оразꙋ́мїѧ нетлѣ́нный свѣ́тъ и҆ мы́слєнныѧ на̑ша ѿве́рзи ѻчи во є҆ѵа́нгельскихъ твои́хъ проповѣ́данїй разꙋмѣ́нїе, вложѝ въ на́съ и҆ стра́хъ блаже́нныхъ твои́хъ за́повѣдей, да, плотскі҆ѧ по́хѡти всѧ̑ попра́вше, дꙋхо́вное жи́тельстбо про́йдемъ, всѧ̑, ꙗже ко благоꙋгожде́нїю твоемꙋ̀, и҆ мꙋ́дрствꙋюще, и҆ дѣ́юще.
Ты́ бо є҆сѝ ѡ҆свѧще́нїе и҆ просвѣще́нїе дꙋ́шъ и҆ тѣле́съ на́шихъ, хрⷵтѐ бж҃е, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ и҆ всест҃ы́мъ и҆ благи́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва і҃

Гдⷵи бж҃е на́шъ, покаѧ́нїемъ ѡ҆ставле́нїе человѣ́кѡмъ дарова́вый и҆ во ѻбразъ на́мъ позна́нїѧ грѣхѡ́въ и҆ и҆сповѣ́данїѧ проро́ка даві́да покаѧ́нїе къ проще́нїю показа́вый: са́мъ, влⷣко, во мнѡ́гаѧ ны̀ и҆ вели̑каѧ па́дшыѧ согрѣшє́нїѧ поми́лꙋй по вели́цѣй ми́лости твое́й, и҆ по мно́жествꙋ щедро́тъ твои́хъ ѡ҆чи́сти беззакѡ́нїѧ на̑ша, ꙗкѡ тебѣ̀ согрѣши́хомъ, гдⷵи, и҆ безвѣ̑стнаѧ и҆ та̑йнаѧ се́рдца человѣ́ческагѡ вѣ́дꙋщему и҆ є҆ди́ному и҆мꙋ́щему вла́сть ѡ҆ставлѧ́ти грѣхѝ: се́рдце же чи́сто созда́въ въ на́съ, и҆ дх҃омъ влады́чнимъ ѹ҆тверди́въ на́съ, и҆ ра́дость спасе́нїѧ твоегѡ̀ сказа́въ на́мъ, не ѿри́ни на́съ ѿ лица̀ твоегѡ̀, но благоволѝ, ꙗкѡ бла́гъ и҆ человѣколю́бецъ, да́же до послѣ́днѧгѡ на́шегѡ и҆здыха́нїѧ приноси́ти тебѣ̀ же́ртвꙋ пра́вды и҆ возноше́нїе во ст҃ы́хъ твои́хъ же́ртвенницѣхъ.
Ми́лостїю и҆ щедро́тами и҆ человѣколю́бїемъ є҆диноро́днагѡ твоегѡ̀ сн҃а, съ ни́мже благослове́нъ є҆сѝ, со всест҃ы́мъ и҆ благи́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва а҃і

Бж҃е, бж҃е на́шъ, ѹмныѧ и҆ словє́сныѧ соста́вивый си̑лы твое́ю во́лею, тѧ̀ мо́лимъ и҆ тебѣ̀ ми́ли дѣ́емсѧ: прїимѝ на́ше по си́лѣ славосло́вїе, со всѣ́ми созда̑нїи твои́ми, и҆ бога́тыми твоеѧ̀ бла́гости возда́ждь дарова́ньми, ꙗкш тебѣ̀ преклонѧ́етсѧ всѧ́кое колѣ́но небе́сныхъ и҆ земны́хъ и҆ преиспо́днихъ, и҆ всѧ́кое дыха́нїе и҆ созда́нїе пое́тъ непостижи́мꙋю твою̀ сла́вꙋ, є҆динъ бо є҆сѝ бг҃ъ истинный и҆ многоми́лостивый.
Ꙗкѡ тѧ̀ хва́лѧтъ всѧ̑ си̑лы небє́сныѧ, и҆ тебѣ̀ сла́вꙋ возсыла́емъ, ѻ҆цꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣ́кѡ́въ. А҆ми́нь.

Моли́тва в҃і

Хва́лимъ, пое́мъ, благослови́мъ и҆ благодари́мъ тѧ̀, бж҃е ѻ҆тє́цъ на́шихъ, ꙗкш преве́лъ є҆сѝ сѣ́нь нощнꙋ́ю и҆ показа́лъ є҆сѝ на́мъ па́ки свѣ́тъ дневны́й. Но мо́лимъ твою̀ бла́гость: ѡ҆чи́сти грѣхѝ на́шѧ и҆ прїими моле́нїе на́ше, вели́кимъ твои́мъ благоꙋтро́бїемъ, ꙗкѡ къ тебѣ̀ прибѣга́емъ ми́лостивомꙋ и҆ всеси́льномꙋ бг҃ꙋ: возсїѧ́й въ сердца́хъ на́шихъ истинное со́лнце пра́вды твоеѧ̀, просвѣтѝ ѹмъ на́шъ и҆ чꙋ҆вства всѧ̀ соблюдѝ, да, ꙗкѡ во днѝ благоѻбра́знѡ ходѧ́ще пꙋте́мъ за́повѣдей твои́хъ дости́гнемъ въ жи́знь вѣ́чнꙋю, ꙗкѡ ѹ҆ тебѐ єсть и҆сто́чникъ жи́зни, и҆ въ наслджде́нїи бы́ти сподо́бимсѧ непристꙋ́пнагѡ твоегѡ̀ свѣ́та.
Ꙗкѡ ты̀ є҆сѝ бг҃ъ на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Моли́тва главоприклоне́нїа

Гдⷵи ст҃ы́й, въ вы́шнихъ живы́й и҆ на смирє́нныѧ призира́ѧй и҆ всеви́дѧщимъ ѻкомъ твои́мъ призира́ѧй на всю̀ тва́рь: тебѣ̀ приклони́хомъ вы́ю се́рдца и҆ тѣлесѐ и҆ мо́лимсѧ тебѣ̀: прострѝ рꙋ́кꙋ твою̀ неви́димꙋю ѿ ст҃а́гѡ жили́ща твоегѡ̀ и҆ благословѝ всѧ̑ ны̀: и҆ аще что̀ согрѣши́хомъ, во́лею и҆лѝ нево́лею, ꙗкѡ бла́гъ и҆ человѣколю́бецъ бг҃ъ, простѝ, да́рꙋѧ на́мъ мі̑рнаѧ и҆ премі̑рнаѧ блага̑ѧ твоѧ̑.
Твое́ бо єсть, єже ми́ловати и҆ спаса́ти ны̀, бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ̀ и҆ ст҃о́мꙋ дх҃ꙋ ны́нѣ и҆ при́снѡ и҆ во вѣ́ки вѣкѡ́въ.

Требуется программист