Чи́нъ на поставле́ніе чтеца̀ и҆ пѣвца̀ быва́етъ си́це:

Име́яй быти свещеносец, приводи́мь бывает двема́ иподиаконы среди церкве и творит три поклоны. И, обратяся, покланяется архиерею три́щи, и, пришед ко архиерею, приклоняет главу, и зна́менает его архиерей крестовидно рукою по главе, трищи. И посем, руку возложа́ на главу́ его, глаголет молитву си́ю:

Иже всю̀ тва́рь свѣ́томъ просвѣти́вый чꙋде́съ твои́хъ гдⷵи, пре́жде єже бы́ти, коегѡ́ждо предложє́нїѧ предвѣ́даѧй и҆ слꙋжи́ти тебѣ̀ хотѧ́щыѧ ѹ҆крѣплѧ́ѧй, са́мъ и҆ раба̀ твоего̀, имⷬ҇къ, предходи́ти свѣщено́сца ст҃ы̑мъ твои̑мъ та́инстбѡмъ и҆зво́лившаго, ѹ҆красѝ нескве́рными твои́ми и҆ непоро́чными ѻ҆де́ждами: да, просвѣще́нъ, и҆ въ бꙋ́дꙋщемъ срѣ́тивъ вѣ́цѣ, прїи́метъ жи́зни нетлѣ́нный вѣне́цъ, со и҆збра́нными твои́ми веселѧ́сѧ во присносꙋ́щномъ бл҃же́нствѣ.

Возгла́с:

Ꙗкѡ ст҃и́сѧ твоѐ имѧ, просла́висѧ твоѐ црⷵтво, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ве́дательно же, яко, егда́ не есть литурги́а, творит архиерей начало: Благослове́н Бог: и поется: Царю́ Небе́сный: Трисвятое. Пресвята́я Тро́ице: Отче наш: Яко Твое́ есть: И глаголется тропарь дне.

Аще же есть литургиа, Царю́ Небе́сный: Трисвятое: и Отче наш: не поется, то́кмо глаголются тропари:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шым.

Уст твоих, я́коже све́тлость огня́, возсия́вши благода́ть, вселе́нную просвети́: не сребролюбия ми́рови сокро́вища сниска́, высоту́ нам смиренному́дрия показа. Но твои́ми словесы́ наказу́я, о́тче Иоа́нне Златоу́сте, моли́ Сло́ва Христа́ Бо́га спасти́ся душа́м на́шым.

Во всю землю изыде вещание твое, яко приемшую слово твое, и́мже боголе́пно научи́л еси́, естество́ су́щих уясни́л еси́, челове́ческия обы́чаи украси́л еси́, ца́рское свяще́ние, о́тче преподо́бне, моли́ Христа́ Бо́га спасти́ся душа́м на́шым.

Па́стырская свире́ль богосло́вия твоего́ ри́торов победи́ трубы́, я́коже бо глубины́ Ду́ха изыска́вшу, и добро́ты веща́ния приложи́шася тебе́. Но моли́ Христа́ Бо́га, о́тче Григо́рие, спасти́ся душа́м на́шым.

Слава, и ныне:

Моли́твами, Го́споди, всех святы́х и Богоро́дицы, Твой мир даждь нам и поми́луй нас, яко еди́н Щедр.

Таже постригает главу архиерей крестовидно, глаголя:

Во имѧ ѻ҆ц҃а̀:

Протодиакон и чтец или певец глаголют: Ами́нь.

Архиерей: и҆ сн҃а: Протодиакон: Ами́нь.

Архиерей: и҆ ст҃а́гѡ дх҃а. Протодиакон: Ами́нь.

Таже возлагает архиерей на него краткий фело́нь и па́ки три́щи рукою главу́ его крестовидно зна́менает, и возлагает на него руку и молится сице:

Гдⷵи бж҃е вседержи́телю, и҆зберѝ раба̀ твоего̀ сего̀ и҆ ѡст҃ѝ є҆го̀: и҆ да́ждь є҆мꙋ̀ со всѧ́кою мрⷣстїю и҆ ра́зꙋмомъ бжⷵтвенныхъ твои́хъ слове́съ поꙋче́нїе и҆ прочита́нїе твори́ти, сохранѧ́ѧ є҆го во непоро́чномъ жи́тельствѣ.

Возгла́с:

Млⷵтїю и҆ щедро́тами, и҆ чл҃колю́бїемъ є҆диноро́днагѡ твоегѡ̀ сн҃а, съ ни́мже благослове́нъ є҆сѝ, со всест҃ы́мъ, и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

И по молитве над главо́ю чтеца разгибает архиерей книгу Апостол. Иподиакони же отводят его от архиереа и поставляют его среди церкве, к востоку лицем, и вдается ему книга Апостол, он же чтет си́це: К Ри́мляном [или́ ко ины́м] Посла́ния свята́го апо́стола Па́вла чте́ние. И, мало проче́т Апостола, и́же случи́тся, начало и конец, обращается и покланяется архиерею три́щи, по чину. Иподиакони же снемлют с него фело́ний и приводят его ко архиерею. И архиерей паки три́щи рукою главу́ его зна́менает.

И подносят архиерею стиха́рий, он же осени́в рукою стихарь над крестом: поставляемый же зна́менався рукою, целует крест на стихаре́ и архиереову руку, иподиакони же облачают его в стихарий.

Архиерей же поучает его сице:

Ча́до, пе́рвый степе́нь сщ҃е́нства-чтеца̀ єсть. подоба́етъ ѹбѡ тебѣ̀ на всѧ́къ де́нь бж҃е́ствєннаѧ писа̑нїѧ прочи́товати, да слꙋ́шающїи, зрѧ́ще тѧ̀, ̆созда́нїӗ прїи́мꙋтъ, и҆ тебѣ̀ самомꙋ̀ вѧ́щшїй степе́нь притвори́ши, ника́коже постыжда́ѧ ѡ҆ тебѣ̀ и҆збра́нїе. цѣломꙋ́дреннѡ бо и҆ ст҃ѡ и҆ пра́веднѡ жи́тельствꙋѧ, и҆ человѣколю́бца бг҃а млⷵтива воз̾и́маши, и҆ вѧ́щшагѡ сподо́бишисѧ слꙋже́нїѧ, во хрⷵтѣ̀ і҆и҃сѣ гдⷵѣ на́шемъ, є҆мꙋ́же сла́ва во вѣ́ки вѣкѡ́въ. А҆ми́нь.

Таже глаголет архиерей сице:

Бл҃гослове́нъ гдⷵь! сѐ бы́сть ра́бъ бж҃їй, имⷬ҇къ, чте́цъ ст҃ѣ́йшїѧ цр҃кве, имⷬ҇къ, во имѧ ѻ҆ц҃а̀ и҆ сн҃а и҆ ст҃а́гѡ дх҃а.

И вдает ему архиерей лампаду, и стои́т пред архиереом с лампадою на урече́нном месте.

Аще же суть и множа́йшии хиротонису́емии чтецы, хиротонису́ются ку́пно, и глаголется молитва множественно.