Чи́нъ бж҃е́ствнныѧ лїтꙋргі́и преждеѡсвѧще́нныхъ: ка́кѡ подоба́етъ слꙋжи́ти а҆рхїере́ємъ

Во Святую и Великую Четыредеся́тницу, егда бывает праздник и и́мать архиерей священноде́йствовати Преждеосвященную литурги́ю, прежде начатия часо́в и́дет архиерей ко храму, и предходят ему сановнии, таже диакони, священницы и кли́рицы. Протодиакон же близ архиереа позади́ со страны́. Таже последуют архиерею архимандрити, игумени, священномонаси, два два.

Егда же прибли́жится архиерей и и́мать вни́ти во врата́ храма, срета́ют его два диакони с кадильницами и примики́рий, нося лампаду вели́ку возжену, и поклоняется архиерею. И начинают певцы мети: Достойно есть: до конца. Аще же есть Владычний праздник, поют ирмос 9-я пссни. Архиерей же, входя во храм, глаголет тихим гласом: Вни́ду в дом Твой: и прочая.

Приходя́й же станет пред святыми две́рьми олтаря у амво́на, на орлеце́, архимандрити, игумени, протопресвитери и иерее станут позади́ архиереа по чину на о́бе страны́.

Архиерей же, сотворив три поклоны, и́дет ко Владычней святей иконе Господа нашего Иисуса Христа, яже на десне́й стране, и, сотворив поклон, глаголет тропарь: Пречи́стому Твоему́ о́бразу покланя́емся, Благи́й: и целует святую икону.

Таже и́дет на левую страну, пред икону Богоматере, и, сотворив поклон, глаголет тропарь: Милосе́рдия су́щи исто́чник: и целует святую икону.

Таже идет ко иконе храма и праздника, глаголя тропарь. И целует икону, творя поклоны по чину и по обычаю. Певцы же поют безпрестанно: Досто́йно есть:

Приходит же архиерей посреди́ пред святыя двери олтаря, на преждереченное место и, сотворив три поклоны, обращается к народу, и осеняет обе́ма рука́ма, держа пастырский жезл. Тогда певцы поют со сладкопением: Тон дэспо́тин кэ архиере́а имо́н, Ки́рие, фи́латтэ. Ис полла́ э́ти, дэ́спота. Трижды.

И, отшед, станет на уготованном месте, и начинают часы, и поют по Уставу.

И по отпетии часов архиерей восходит на угото́ванное место, иде́же облачитися, после́дующе ему и иму́щии сослужи́ти, по два, архимандрити, и прочии, сотворяюще поклон архиерею, седя́щу ему на месте, держа́щу и пастырский жезл в левой руце́. И целуют святую его десницу и, отшедше, паки сотворяют поклон архиерею. Он же, седя́, осеняет я́ рукою крестовидно, и входят во святый олтарь северными и южными две́рьми по чину, и облачаются во священныя одежды.

Уготовляют же кли́рицы архиерейския одежды.

Хотящии же облачати архиереа, протодиакон и вто́рствуяй диаконов, с прочими диаконы, восходят на месго: ов убо от десны́х, ов же от ле́вых, ини́и же диакони стоят ни́зу пред местом проти́ву архиереа, держаще оба кадильницы. Архиерей востаст от места и дает пастырский жезл единому чтецу, иже и де́ржит и́ обе́ма рука́ма, мало подъе́м, ви́сящу на нем и плату златошвенному, и стоит созади́ архиереа. Приемлют же протодиакон и вторствуяй диаконов клобу́к архисрейский, ма́ндию (мантию) и енко́лпий (панагию) и ра́су и полагают на ми́су (блюдо). И певцы начинают пети: Свы́ше проро́цы: или́: Царь Небе́сный: или и́но что, дне или праздника. Прочии же клириков е́млют от угото́вленых священных одежд, и со благочинием приносят, и приемлют протодиакон и вторствуяй диаконов, и облачают архиереа. Приемше стихарь, приносят архиерею. Архиерей же зна́менуяй и целуяй то́кмо: протодиакон же над ко́еждою одеждою токмо приглаго́ля: Го́споду помо́лимся, и́но ничто́же глаголет. И диакони облачают его.

Приносят же и епитрахи́лий и приемлют. И протодиакон глаголет [кадя]: Го́споду помо́лимся. И архиерей, благословив и целовав епитрахилий, возлагает на вы́ю. И на пояс подобне творят: архиерей благословляет крестовидно и целует и́, и опоясу́ют его, глаголющу протодиакону токмо: Го́споду помо́лимся. Подобне творят и на прочыя одежды: на десну́ю нарука́вницу (поруч), и на левую, на са́ккос, на наколе́нник (палицу), на омофо́рий на нане́дреник, [на вторы́й нанедреник, на крест,] на шапку (митру).

И сходят протодиакон и вто́рствуяй диаконов ни́зу, и приемлют у клириков трисве́щие и двосве́щие, и подносят архиерею. Протодиакон глаголет: Та́ко да просвети́тся свет твой пред челове́ки: и про́чая. Та́же певцы поют: Тон дэспо́тин: до конца. И архиерей благословляет крестовидно с трисве́щием и двосв́ещием, к востоку, к западу, к полудню и к северу. И, отдав трикирий и дикирий протодиакону и вторствующему диаконов, сядет. Протодиакон же и диакони целуют святую десницу его.

Тогда держа́й пастырский жезл и примикирий с лампадою поклоняются архиерею и отходят. И с жезло́м у́бо стои́т пред святою иконою Владыки нашего Господа Иисуса Христа, примикирий же с лампадою стоит на левой стране, близ великих лампад.

Таже приходят протодиакон со диаконы к архиерею, целуют святую его десницу и, отшедше, поклоняются.

Та́же первый архимандрит или игумен, или протопресвитер поклоняется архиерею и и́дет во святый олтарь южною дверию. И, вшед, повели́т диакону ца́рская врата́ отве́рсти. Протодиакон же и́дет ко святым две́рем и начинаст велегласно: Благослови́, Влады́ко. Архимандрит же или игумен, или протопресвитер, взем священное Евангелие обе́ма рука́ма и мало воздвиг е́, творит крест, глаголя: Благослове́но Ца́рство Отца́ и Сы́на, и Свята́го Ду́ха, ны́не и при́сно, и во ве́ки веко́в. (Ца́рская врата́ затвори́ти.) И полагает Святое Евангелие на святей трапе́зе. Сотворяет же и архиерей поклон, и глаголет: Ами́нь. Прии́дите, поклони́мся: трижды, и предначина́тельный псало́м. Архимандрит начина́яй, стоя́ пред престолом, глаголет молитвы свети́льничныя, си́речь вечерния, с 4-я молитвы.

По исполнении же псалма́ протодиакон, держа́ треми́ пе́рсты ора́рий, глаголет ми́рная благоговейно и косно, мерным гласом: Ми́ром Го́споду помо́лимся: и прочая. (Царская врата отве́рсти.)

Возглашение глаголет начина́яй: Яко подоба́ет Тебе́ вся́кая сла́ва:

Лик: Ами́нь. (Царская врата́ затворити.) И по возгла́се стихосло́вится кафи́сма по Уставу.

И архиерей глаголет молитву перваго антифо́на:

Гдⷵи ще́дрый и҆ млⷵтивый, долготерпѣли́ве и҆ многоми́лостиве, внꙋшѝ моли́твꙋ на́шꙋ и҆ вонмѝ гла́сꙋ моле́нїѧ на́шегѡ, сотворѝ съ на́ми зна́менїе во бл҃го, наста́ви на́съ на пꙋ́тв тво́й, єже ходи́ти во истинѣ твое́й: возвеселѝ срⷣца̀ на̑ша, во єже боѧ́тисѧ имене твоегѡ̀ ст҃а́гѡ, занѐ ве́лїй є҆сѝ ты̀ и҆ творѧ́й чꙋдеса̀, ты́ є҆сѝ бг҃ъ є҆ди́нъ, и҆ нѣ́сть подо́бенъ тебѣ̀ въ бозѣ́хъ гдⷵи: си́ленъ въ млⷵти и҆ бл҃гъ въ крѣ́пости, во єже помога́ти, и҆ ѹ҆тѣша́ти, и҆ спаса́ти всѧ̑ ѹ҆пова́ющыѧ во имѧ ст҃о́е твоѐ.

По первом антифоне иный диакон поклоняется архиерею и, став на обычном месте, глаголет ектению́ (Царская вра́та отве́рсти): Па́ки и па́ки ми́ром Го́споду помо́лимся. Заступи́, спаси́, поми́луй: Пресвяту́ю, Пречи́стую:

Та́же вторы́й архимандрит или игумен, или протопресвитер. или священник поклоняется архиерею и и́дет во святый олтарь северною дверию, и глаголет возглашение: Яко Твоя́ держа́ва и Твое́ есть Ца́рство:

Лик: Ами́нь. (Царская врата затворити.)

И глаголет архиерей молитву втораго антифона:

Гдⷵи, да не ꙗростїю твое́ю ѡ҆бличи́ши на́съ, нижѐ гнѣ́вомъ твои́мъ нака́жеши на́съ, но сотворѝ съ на́мн по ми́лости твое́й, врачꙋ̀ и҆ и҆сцѣли́телю дꙋ́шъ на́шихъ, наставлѧ́ѧ на́съ ко приста́нищꙋ хотѣ́нїѧ твоегѡ̀: просвѣтѝ ѻчи серде́цъ на́шихъ въ позна́нїе твоеѧ̀ истины и҆ да́рꙋй на́мъ про́чее настоѧ́щагѡ днѐ ми́рное и҆ безгрѣ́шное, и҆ всѐ вре́мѧ живота̀ на́шегѡ, моли́твами ст҃ы́ѧ бцⷣы и҆ всѣ́хъ ст҃ы́хъ твои́хъ.

Паки иный диакон поклоняется архиерею и глаголет ектению́ (Царская врата отверсти): Па́ки и па́ки ми́ром Го́споду помо́лимся. Заступи́, спаси́, поми́луй: Пресвяту́ю, Пречи́стую:

И третий архимандрит или священник поклоняется архиерею и и́дет во святый олтарь южною дверию, и глаголет возглашение: Яко благ и Человеколю́бец:

Лик: Ами́нь. (Царская врата́ затворити.)

И глаголет архиерей молитву тре́тияго антифона:

Гдⷵи бж҃е на́шъ, помѧнѝ на́съ грѣ́шныхъ и҆ непотре́бныхъ ра̑бъ твои́хъ, внегда̀ призыва́ти на́мъ ст҃о́е и҆ поклонѧ́емое имѧ твоѐ, и҆ непосрамѝ на́съ ѿ ча́ѧнїѧ млⷵти твоеѧ̀: но да́рꙋй на́мъ гдⷵи, всѧ̑ ꙗже ко спасе́нїю прошє́нїѧ и҆ сподо́би на́съ люби́ти и҆ боѧ́тисѧ тебѐ ѿ всегѡ̀ се́рдца на́шегѡ и҆ твори́ти во всѣ́хъ во́лю твою̀.

Таже и́ный диакон покланяется архиерею и глаголет ектению (Царская врата отверсти): Паки и паки: и прочая.

Таже четвертый архимандрит или игумен поклоняется архиерею и и́дет во святый олтарь северною дверию и глаголет возгла́с: Яко Ты еси́ бог наш: Лик: Ами́нь. (Царская врата затворити.)

Таже поется: Го́споди, воззва́х к Тебе́: во глас самогла́сна дне, и поются стихиры по Уставу. Егда же поют: Хвали́те Го́спода вси язы́цы: приходят протодиакон со диаконы и поклоняются архиерею ку́пно. Та́же архимандрити, игумени и протопресви́тери предстоя́щии, еди́ни от десны́я, втори́и от ле́выя страны́, и творят мета́ние (поклон) архиерею, и входят во святый олтарь, едини десно́ю, друзи́и левою дверию. [Архимандрити же не входят во святый олтарь, но стоя́т на ме́стех своих, дóндеже внидут купно с архиереом.]

Егда же поется последний стих (стихира) (Царская врата́ отве́рсти), первый архимандрит дает протодиакону Святое Евангелие, и архиерей востает, и исходят от святаго олтаря, предходит чтец с жезло́м, и примикирий с лампадою, после́дующе диакони, держаще треми́ пе́рсты орарий, ини́и же диакони с кадильницами, иподиакони предходят с трикирием и дикирием, чтецы́ же со двема́ подсвещники. Протодиакон же носит священное Евангелие благоговейно обе́ма рука́ма, архимандри́ти, игумени и протопресвитери, и священницы и́дут за ним и станут по чину о десну́ю и о левую страну и, прикло́ньше главы́ вси, подобне и архиерей приклоняет. Глаголет протодиакон: Го́споду помо́лимся, тихим гласом, ели́ко слышати то́чию архиерею.

И архиерей глаголет молитву входа, тихим же гласом:

Ве́черъ и҆ заꙋ́тра и҆ полꙋ́дне хва́лимъ, бл҃гослови́мъ, бл҃годари́мъ и҆ мо́лимсѧ тебѣ̀ влⷣко всѣ́хъ, и҆спра́ви моли́твꙋ на́шꙋ ꙗкѡ кади́ло пред̾ тобо́ю и҆ не ѹ҆клонѝ серде́цъ на́шихъ въ словеса̀ и҆лѝ въ помышлє́нїѧ лꙋка́вствїѧ: но и҆зба́ви на́съ ѿ всѣ́хъ ловѧ́щихъ дꙋ́шы на́шѧ, ꙗкѡ къ тебѣ̀ гдⷵи, гдⷵи, ѻчи на́ши, и҆ на тѧ̀ ѹ҆пова́хомъ, да не посрами́ши на́съ бж҃е на́шъ. ꙗкѡ подоба́етъ те́бѣ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Та́же воздвигнут главы́. И протодиакон, держа орарий десно́ю рукою, показу́ет на восток, глаголя тихим же гласом: Благослови́, Преосвяще́ннейший Влады́ко, святы́й вход. И архиерей благословляет единою рукою на восток, глаголя: Бл҃гословенъ входъ ст҃ыхъ твоихъ: Таже архиерей сходит на край степе́не рундука́ и целует священное Евангелие. Протодиакон же целует святую десницу его, придержа́щуюся священнаго Евангелиа, и возвра́щься, зря́ на восток, воздвиза́ет Святое Евангелие мало, кре́ствуя и глаголя: Прему́дрость, про́сти. Приносят же иподиакони трикирий, и приемлет архиерей десно́ю рукою, ю́же и целует иподиакон: дикирий же приемлет левою рукою, и целует ю́ иподиакон.

Архиерей же поет со сослужа́щими архимандриты, игумены, протопресвитеры, иереи и диаконы, косно и со сладкопением: Све́те ти́хий святы́я сла́вы: Егда́ же реку́т: Ви́девше свет вече́рний, пое́м Отца́, Сы́на и Свята́го Ду́ха, Бо́га: и про́чая, тогда приклоняет архиерей, и прочии, главы́, благоговейно допевающе стих. И благословляет архиерей обе́ма рука́ма, держа́ трикирий и дикирий, к востоку, та́же к западу, полудню и северу.

Архиерей, входя во олтарь косно и тихо [держи́мь под ру́ки двема́ архимандриты или игумены, до царских врат], благословляет народ о десну́ю и о ле́вую страну́. Предъиду́щии же диакони кадя́т Святое Евангелие. И егда́ внидет архиерей во святыя двери святаго олтаря́, отдает трикирий протодиакону, дикирий же держит левою рукою и целует святыя двери на де́сно и на ле́во, и глаголет, входя: Вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀ въ стра́сѣ тбое́мъ.

И, вшед во олтарь, архиерей целует святый престол.

Таже певцы поют: Ис полла́ э́ти, дэ́спота.

Архиерей же, прии́м кадильницу, кадит святую трапезу окру́г, и предложение, и весь олтарь. Таже исходит пред святыя двери и кадит Владыки Христа образ, и Пресвятыя Богородицы: и народ, и сущыя во олтари кадит стоя́ пред святою трапе́зою.

И посем прии́дет учине́нный чтец среди церкве пред амвон и творит поклон, держа и книгу согбе́нну. Протодиакон же среди двере́й, зря́ к чтецу и держа орарий, и к нему показу́я, глаголет: Во́нмем.

Архиерей: Ми́ръ всѣ́мъ.

Чтец: И ду́хови твоему́. Протодиакон: Прему́дрость. чтец: Проки́мен, псало́м Дави́дов. И сказу́ет прокимен прилучи́вшагосся дне, на глас. Таже протодиакон: Прему́дрость. (Ца́рская врата́ затвори́ти.) Чтец: надписание Бытия.

Протодиакон: Во́нмем. И по Бытии́ вторый прокимен. [Ца́рская врата́ отве́рсти.) И посем возглашаст протодиакон: Повели́те. И архиерей приемлет обе́ма рука́ма кадильницу и трикирий, стои́т пред святою трапезою, зря к восто́ком и назна́менуя крест, глаголет:

Премꙋ́дрость, про́сти. Таже, обратя́ся на запад, к народу, глаголет: Свѣ́тъ хрⷵто́въ просвѣща́етъ всѣ́хъ.

И отдает кадильницу и трикирий. [Ца́рская врата́ затвори́ти.]

Чтец: При́тчей чте́ние. Протодиакон: Во́нмем. И Притча.

И по исполнении глаголет архиерей: Ми́ръ ти́.

Протодиакон: Прему́дрость.

Певцы: Да испра́вится моли́тва моя́: Тогда праваго и леваго кли́росов, и предстоящий народ о́бе страны во всей церкви стоя́т на коле́нех моля́щеся. И по пении певцев 1-й лик поет то́жде: Да испра́вится моли́тва моя: И певцы, и другая страна́ ли́ка, и предстоящий народ стоя́т на коле́нех, до́ндеже пропоют. Таже певцы поют 1-й стих: Го́споди, воззва́х к Тебе́, услы́ши мя: И по пропетии стиха поет 2-й лик: Да испра́вится моли́тва моя: Тогда певцы и 1-й лик, и тоя́ страны́ предстоящий народ припа́дают на коле́на. Таже певцы поют 2-й стих: Положи́, Го́споди, хране́ние: и 1-й лик паки поет: Да испра́вится моли́тва: и певцы, и 2-й лик, и предстоящий народ паки преклоня́ют коле́на. И паки певцы поют 3-й стих: Не уклони́ се́рдце мое́: И 2-й лик поет: Да испра́вится моли́тва моя: И приклоняют колена певцы и 1-й лик, и народ. И паки певцы поют: Да испра́вится моли́тва моя, я́ко кади́ло пред Тобо́ю. И тогда оба лика и во церкви предстоящий весь народ припа́дают на колена и стоя́т, до́ндеже певцы поют. И, воставше, допевают на клиросе: Воздея́ние руку́ мое́ю, же́ртва вече́рняя. И по исполнении творим поклоны 3.

И аще есть праздник, чтец сказу́ет проки́мен святаго. Тогда архиерей и́дет на горнее место и отдает омофорий, изоблачают его диакони, и держи́т един диакон обе́ма рука́ма, и сядет архиерей на горнем месте. И бывает чтение Апостола, и пева́ема Аллилу́иа, бывает каждение.

Таже чтение Евангелиа, та́кожде, я́коже в литургии Златоустаго, выше сего. И по исполнении Евангелиа поют певцы: Сла́ва Тебе́, Го́споди, сла́ва Те́бе.

И архиерей сходит с горняго места, держи́мь под ру́ки двема́ архимандриты или игумены, провождаемь до царских врат, и благословляет я́ рукою, и, изшед пред святыя двери, приемлет трикирий и дикирий и благословляет народ по обычаю. Певцы поют косно: Ис полла́ э́ти, дэ́спота. Таже и́дет архиерей во олтарь, оссняя сущыя во олтари́ и, отдав трикирий и дикирий, целует Святое Евангелие.

И глаголет архиерей:

Ми́ръ тѝ бл҃говѣствꙋ́ющемꙋ.

Протодиакон же целует десницу его. И прии́м архиерей священное Евангелие из рук протодиакона, полагает на учине́нном месте святыя трапе́зы, на горней стране выше антими́нсиа. Прочии же сослужа́щии в то время Евангелиа не целуют.

И изшед из северных двере́й вто́рствуяй или́ ин диакон станет на обычном месте амвона и глаголет ектению́: Рцем вси от все́я души́: и прочее по чину, я́коже предписа́ся в литурги́и Иоанна Златоустаго, даже до Помоли́теся, оглаше́ннии, Го́сподеви.

Таже ин диакон глаголет: Помоли́теся, оглаше́ннии, Го́сподеви.

Архиерей же молитву о оглашенных прежде святаго возношения:

Бж҃е бж҃е на́шъ, созда́телю и҆ содѣ́телю всѣ́хъ, иже всѣ̑мъ хотѧ́й сп҃сти́сѧ, и҆ въ ра́зꙋмъ истины прїитѝ: при́зри на рабы̑ твоѧ̑ ѡ҆глашє́нныѧ, и҆ и҆зба́ви их̾ дре́внїѧ пре́лести и҆ ко́зни сопроти́внагѡ. и҆ призовѝ ихъ въ жи́знь вѣ́чнꙋю, просвѣща́ѧ ихъ дꙋ́шы и҆ тѣлеса̀ и҆ сопричита́ѧ ихъ слове́сномꙋ твоемꙋ̀ ста́дꙋ, на не́мже имѧ твоѐ ст҃о́е нарица́етсѧ.

Возгла́с же глаголет архимандрит: Да и ти́и с нами сла́вят: По возгла́се лик: Ами́нь. Внегда глаго́лется сей возгла́с, простира́ют антими́нсий сослужа́щии, касается же и архиерей десною рукою, и приемлет му́су, си́речь гу́бу, и творит ею крест на антими́нсии и, целовав, полагает в десно́м краи́ антнми́нсиа горе́.

Таже протодиакон, внутрь сый святаго олтаря, глаголет: Ели́цы оглаше́ннии, изыди́те. Ин диакон вне сый отвещает, глаголя: Оглашеннии, изыди́те. Внутрь паки глаголет ин диакон: Ели́цы оглаше́ннии, изыди́те. Вне паки: Да никто́ от оглаше́нных:

Лик: Го́споди, поми́луй.

Сия́ точию глаголется даже до тре́тия и четвертыя седми́цы поста.

От среды́ же средопо́стныя, по е́же рещи́ архимандриту: Да и ти́и с на́ми сла́вят: глаголются и сия́ диа́конства (ектения), от диаконов: Ели́цы оглаше́ннии, изыди́те. Оглаше́ннии, изыди́те. Ели́цы к просвеще́нию, изыди́те [приступи́те]. Помоли́теся, и́же ко просвеще́нию. Лик : Го́споди, поми́луй.

Ве́рнии, о и́же ко свято́му просвеще́нию гото́вящихся бра́тиях, и спасе́нии их Го́споду помо́лимся. Лик: Го́споди, поми́луй.

Диакон: Яко да Госпо́дь Бог наш утверди́т их и укрепи́т. Лик: Го́споди, поми́луй.

Диакон: Просвети́т их просвеще́нием ра́зума и благоче́стия. Лик: Го́споди, поми́луй.

Диакон: Сподобит их во вре́мя благопотре́бно ба́ни пакибытия́, оставле́ния грехо́в и оде́жди нетле́ния. Лик: Го́споди, поми́луй.

Диакон: Породи́т их водо́ю и Ду́хом. Лик: Го́споди, поми́луй.

Диакон: Да́рует им соверше́ние ве́ры. Лик: Го́споди, поми́луй.

Диакон: Сопричте́т их свято́му Своему́ и избра́нному ста́ду. Лик: Го́споди, поми́луй.

Диакон: Спаси́, поми́луй, заступи́ и сохрани́ их, Бо́же, Твое́ю благода́тию. Лик: Го́споди, поми́луй.

Диакон: Иже ко просвеще́нию, главы ва́шя Го́сподеви приклони́те. Лик: Го́споди, поми́луй.

Ве́дательно же да есть, яко в субботу и Неделю не глаголется сия́ ектениа́, то́чию на Преждеосвященной литургии глаголется, аще и празднуемый святаго ко́его день.

И по ектении глаголет архиерей молитву о иже ко святому просвещению готовящихся:

Ꙗ҆ви влⷣко, лицѐ твоѐ на иже ко ст҃омꙋ просвѣще́нїю гото́вѧщихсѧ и҆ жела́ющихъ грѣхо́внꙋю скве́рнꙋ ѿтрѧстѝ: ѡ҆зарѝ ихъ помышле́нїе, и҆звѣстѝ ѧ въ вѣ́рѣ, ѹ҆твердѝ въ наде́жди, совершѝ въ любвѝ, ѹды честны хрⷵта̀ твоегѡ̀ покажѝ, да́вшагѡ себѐ избавле́нїе ѡ҆ дꙋша́хъ на́шихъ.

Возгла́с глаголет ин архимандрит: Яко Ты еси́ Просвеще́ние на́ше, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́нс и при́сно, и во ве́ки веко́в.

Лик: Ами́нь.

Диакон: Ели́цы ко просвеще́нию, изыди́те. Иже ко просвеще́нию, изыди́те. Ели́цы оглаше́ннии, изыди́те. Да никто́ от оглаше́нных, ели́цы ве́рнии, па́ки и па́ки ми́ром Го́споду помо́лимся.

Лик: Го́споди, поми́луй.

Даже до зде я́же от среды́ средопостныя.

Молитва вермых первая:

Бж҃е вели́кїй и҆ хва́льный, иже животворѧ́щею хрⷵта̀ твоегѡ̀ сме́ртїю въ нетлѣ́нїе на́съ ѿ тлѣ́нїѧ преста́вивый: ты̀ всѧ̑ на̑ша чꙋ̑вства стра́стнагѡ ѹ҆мерщвле́нїѧ свободѝ, бл҃га́го тѣ̑мъ влⷣкꙋ внꙋ́треннїй по́мыслъ приста́вивъ: и҆ ѻко ѹбѡ да не прїѻ́бщно бꙋ́детъ всѧ́кагѡ лꙋка́вагѡ зрѣ́нїѧ, слꙋ́хъ же словесє́мъ пра́зднымъ невхо́денъ, ѧ҆зы́къ же да ѡ҆чи́ститсѧ ѿ глагѡ́лъ неподо́бныхъ: ѡ҆чи́сти же на́шѧ ѹ҆стнѣ̀, хва́лѧщыѧ тѧ̀ гдⷵи: рꙋ́ки на́шѧ сотворѝ ѕлы́хъ ѹбѡ ѡ҆ша́ѧтисѧ дѣѧ́нїй, дѣ́йствовати же то́чїю ꙗже тебѣ̀ бл҃гоꙋгѡ́днаѧ, всѧ̑ на́шѧ ѹды и҆ мы́сль твое́ю ѹ҆твержда́ѧ блгⷣтїю.

По молитве глаголет диакон: Заступи́, спаси́, поми́луй:

Лик: Го́споди, поми́луй.

Диакон: Прему́дрость.

Таже ин архимандрит глаголет возгла́с: Яко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну, и Свято́му Ду́ху, ны́не и при́сно, и во ве́ки веков.

Лик: Ами́нь.

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Диакон: О свышнем мире: Лик: Господи, помилуй.

Диакон: О мире всего мира: Лик: Господи, помилуй.

Диакон: О святем храме сем: Лик: Господи, помилуй.

Диакон: О изба́витися нам: Лик: Го́споди, поми́луй.

Архиерей глаголет вторую молитву верных:

Влⷣко ст҃ы́й пребл҃гі́й, мо́лимъ тѧ̀, в̾ ми́лости бога́таго, ми́лостива бы́ти на́мъ грѣ́шнымъ и҆ досто́йны на́съ сотвори́ти под̾ѧ́тїѧ є҆диноро́днагѡ твоегѡ̀ сн҃а и҆ бг҃а на́шегѡ, цр҃ѧ̀ сла́вы. се́ бо пречⷵтое є҆гѡ̀ тѣ́ло и҆ животворѧ́щаѧ кро́вь, въ настоѧ́щїй ча́съ входѧ́щыѧ, на та́йнѣй се́й предложи́тисѧ имꙋтъ трапе́зѣ, ѿ мно́жества во́инства небе́снагѡ неви́димѡ дорѷноси̑мыѧ. ихже прича́стїе неѡсꙋде́ннѡ на́мъ да́рꙋй, да, тѣ́ми мы́сленное ѻко ѡ҆зарѧ́юще, сы́нове свѣ́та и҆ днѐ бꙋ́демъ

Диакон: Заступи́, сласи́, поми́луй: Прему́дрость.

Возгла́с, егоже глаголет архиерей:

По да́рꙋ хрⷵта̀ твоегѡ̀, съ ни́мже благослове́нъ є҆сѝ, со прест҃ы́мъ и҆ бл҃гимъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. Лик: Ами́нь.

И поет первый лик косно и со сладкопением: Ны́не си́лы небе́сныя: Сему́ же певаему, вто́рствуяй диаконов приемлет кадило и, прие́м благословение от архиереа, кади́т святую трапе́зу то́чию сопреди́, трижды, таже святое предложение. В то время приносится архиерею пред царския двери иподиаконами лаха́нь с рукоумывалом.

И архиерей, умывая руки, глаголет молитву:

Гдⷵи бж҃е на́шъ, ѡ҆ст҃и́вый стрꙋи̑ і҆ѻрда̑нскїѧ спаси́тельнымъ твои́мъ ꙗ҆вле́нїемъ, са́мъ и҆ ны́нѣ низпослѝ бл҃года́ть ст҃а́гѡ твоегѡ̀ дх҃а и҆ бл҃гословѝ во́дꙋ сїю̀, ко ѡ҆свѧще́нїю всѣ́хъ люде́й твои́хъ, ꙗкѡ блгⷵве́нъ є҆сѝ во вѣ́ки вѣкѡ́въ. А҆ми́нь.

И совершившу архиерею молитву, приносит протодиакон омофорий и полагает на ра́мех архиерейских.

И покланяется архиерей пред святою трапе́зою, трижды, глаголя:

Ны́нѣ си̑лы нбⷵныѧ съ на́ми неви́димѡ слꙋ́жатъ: се́ бо вхо́дитъ цр҃ь сла́вы, сѐ же́ртва та́йнаѧ соверше́на дорѷноситсѧ. вѣ́рою и҆ любо́вїю притꙋ́пимъ, да прича́стницы жи́зни вѣ́чныѧ бꙋ́демъ. А҆ллилꙋ́їа, а҆ллилꙋ́їа, а҆ллилꙋ́їа.

Подобне и прочии сослужа́щии творят. И приходит архиерей ко святому предложению, поклонився трижды, глаголет: Бо́же, очи́сти мя, гре́шнаго. Таже отлагает шапку и отдает омофорий единому диаконов, и кадит архиерей предложение, трижды, и отдает кадильницу протодиакону. И протодиакон сотворяет метание. И взем архисрей обе́ма рука́ма ае́р, полагает на ра́мо его. И отшедшу мало протодиакону, приходит архимандрит первый или ин предстоятель священников ко архиерею и поклон сотворяет. И архиерей, взе́м обе́ма рука́ма ди́скос и целу́я, полагает на главу архимандрита, ничтоже глаголя. И архимандрит целует архиереову руку, поддержи́мь диаконы. Таже приходит другий архимандрит или́ игумен, или́ протопресвитер, или́ иерей и, поклон сотворив, приемлет от архнере́а святый потир и целует его и руку архиереову. Прочии же носят крест, лжи́цу, копие́, гу́бу и и́но что священных сосудов и целуют архиере́ову руку. И исходит архимандрит северною дверию, последующым ему двум диаконом, нося́щым коему́ждо рипи́ду над святым дискосом вы́шше, и ве́ющым ими. Таже последует другий архимандрит со святым потиром, без рипи́дий. Прочии же диакони предходят с шапкою и со омофорием. Протодиакон и вторствуяй диаконов с кадильницами. Вне же пред северною дверию угото́влени суть два подсвещники с лампадами, яже и предходят. Подобне предходит и нося́й пастырский жезл, примикирию со возжже́нною лампадою пред всеми иду́щу. Протодиакон и архимандрити, иду́ще в церкви, ничто́же глаголют. И приходят чтец, нося́й жезл, и примикирий с лампадою пред ца́рская врата́, и Преосвященнейшему архиерею поклоня́ются, и станут по о́бе страны царских врат. Таже приходят диакони, носяще шапку, и архиерей целует ю́, и входят во олтарь левою страною: ини́и же диакони со омофорием, и архиерей целует омофорий, и входят во олтарь десно́ю страною. [Прочих же сослужа́щих архимандритов диакони входят во олтарь десно́ю и левою страною по чину.] Пришед же протодиакон проти́во архиереа, кади́т архиереа. И архиерей исходит пред ца́рская врата́ и, прии́м кадило, кади́т Святыя Тайны три́щи, со многим страхом и благоговением и, сотворив метание, приемлет дискос от главы архимандрита, и целует и́, и показу́ет к народу, ничтоже глаголя. И вшед во святый олтарь, поставляет и́ на святе́й трапе́зе сам, ничтоже глаголя. Вторы́й же архимандрит или игумен, или протопресвитер с поти́ром входит во олтарь, ничтоже глаголя, и поставляет архиерей сам на святей трапе́зе по обычаю. Прочии же архимандрити и игумени, и протопресвитери, и иерее входят во святый олтарь, ничтоже глаголюще. И архиерей от мсста, иде́же стои́т, благословляет я́, коего́ждо входяща во святый олтарь, и е́млет покро́вы от святаго дискоса, и от святаго потира и полагает я́ на место по обычаю.

И, взем ае́р от ра́ма протодиаконова, надно́сит на кади́льницу, и со благоуха́нием покрывает Свята́я, ничтоже глаголя.

И приемлет архиерей на себе́ шапку и, взем кадильницу, кадйт то́кмо Святая, и поклоня́яся трижды, и а́бие отдает кадильницу, никого́же кадя.

И бывает по обычаю осенение.

Диакон же, изшел из олтаря́ и стаи на обычном месте. глаголет: Испо́лним вече́рнюю молитву: и прочая.

Архисрей молится:

Иже неизрече́нныхъ и҆ неви́димыхъ та̑инъ бж҃е, ѹ҆ негѡ́же сꙋ́ть сокрѡ́вища прмꙋ́дрости и҆ ра́зꙋма ѹ҆тає́на, иже слꙋже́нїе слꙋ́жбы сеѧ̀ ѿкры́вый на́мъ и҆ положи́вый на́съ грѣ́шныхъ, за мно́гое твоѐ чл҃вѣколю́бїе, во єже приноси́ти тебѣ̀ да́ры же и҆ жє́ртвы ѡ҆ на́шихъ грѣсѣ́хъ и҆ ѡ҆ людски́хъ невѣ́дѣнїихъ: са́мъ неви́димый цр҃ю̀, творѧ́й вели̑каѧ и҆ неизслѣ́дѡваннаѧ, сла̑внаѧ же и҆ и҆зрѧ̑днаѧ, имже нѣ́сть числа̀, при́зри на ны̀ недостѡ́йныѧ рабы̑ твоѧ̑, иже ст҃о́мꙋ семꙋ̀ же́ртвенникꙋ, аки херꙋві́мскомꙋ твоемꙋ̀ предстоѧ́щыѧ прⷵто́лꙋ, на не́мже є҆диноро́дный тво́й сн҃ъ и҆ бг҃ъ на́шъ предлежа́щими стра́шными почива́етъ та́инствы, и҆ всѧкїѧ на́съ и҆ вѣ̑рныѧ лю́ди твоѧ̑ свободи́въ нечистоты̀, ѡ҆ст҃ѝ всѣ́хъ на́съ дꙋ́шы и҆ тѣлеса̀ ѡ҆сщ҃е́нїемъ неѿе́млемымъ: да, чи́стою со́вѣстїю, непосра́мленымъ лице́мъ, просвѣще́нным се́рдцемъ бж҃е́ственныхъ си́хъ причаща́ющесѧ ст҃ы́нь и҆ ѿ ни́хъ ѡ҆животворѧ́еми, соедини́мсѧ самомꙋ̀ хрⷵтꙋ̀ твоемꙋ̀, истинномꙋ бг҃ꙋ на́шемꙋ, ре́кшемꙋ: ꙗ҆ды́й пло́ть мою и҆ пїѧ́й кро́вь мою̀ во мнѣ̀ пребыва́етъ, и҆ азъ въ не́мъ, ꙗкѡ да, все́льшꙋсѧ въ на́съ и҆ ходѧ́щꙋ сло́вꙋ твоемꙋ̀ гдⷵи, бꙋ́демъ хра́мъ прест҃а́гѡ и҆ покланѧ́емагѡ твоегѡ̀ дх҃а, и҆зба́влени всѧ́кїѧ дїа́вольскїѧ ко́зни, дѣѧ́нїемъ, и҆лѝ сло́вомъ, и҆лѝ мы́слїю дѣ́йствꙋемыѧ, и҆ полꙋчи́мъ ѡ҆бѣтова̑ннаѧ на́мъ бл҃га̑ѧ со всѣ́ми ст҃ы́ми твои́ми, ѿ вѣ́ка тебѣ̀ благоꙋгоди́вшими.

По молитве глаголет диакон: Заступи́, спаси́, поми́луй: Ве́чера всего́ соверше́на, свя́та, ми́рна: и прочая.

По ектении же архиерей возглашение:

И҆ сподо́би на́съ влⷣко, со дерзнове́нїемъ, неѡсꙋжде́ннѡ смѣ́ти призыва́ти тебѐ, нбⷵнаго бг҃а ѻ҆ц҃а̀, и҆ гл҃ати:

Людие: Отче наш, Иже еси́ на небесе́х:

Подобне глаголет и архиерей тайно.

Таже возгла́с:

Ꙗкѡ твоѐ єсть црⷵтво, и҆ си́ла, и҆ сла́ва, ѻ҆ц҃а и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ ко вѣ́ки вѣкѡ́въ.

Лик: Ами́нь.

Архиерей: Ми́ръ всѣ̑мъ.

И осеняет архиерей обе́ма рука́ма народ.

Лик: И ду́хови твоему́.

Диакон: Главы́ на́шя Го́сподеви прикло́ним.

Архисрсй. прсклоняси, молится:

Бж҃е є҆ди́ный бл҃гі́й и҆ бл҃гоꙋтробный, иже въ высо́кихъ живы́й и҆ на смирє́нныѧ призира́ѧй: при́зри бл҃гоꙋтро́бнымъ ѻкомъ на всѧ̑ лю́ди твоѧ̑, и҆ сохранѝ ихъ, и҆ сподо́би всѧ̑ ны̀ неѡсꙋжде́ннѡ причасти́тисѧ животворѧ́щихⸯ твои́хⸯ си́хъ та̑инъ, тебѣ́ бо своѧ̑ подклони́хомъ главы̑, ча́юще ѿ тебѐ бога́тыѧ ми́лости.

Возглас:

Бл҃года́тїю, и҆ щедро́тами, и҆ чл҃вѣколю́бїемъ є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. Лик: Ами́нь.

И паки архиерей молитву:

Вонмѝ гдⷵи і҆и҃се хрⷵтѐ бж҃е на́шъ, ѿ ст҃а́гѡ жили́ща твоегѡ̀ и҆ ѿ прⷵто́ла сла́вы црⷵтвїѧ твоегѡ̀ и҆ прїидѝ во єже ѡ҆ст҃и́ти на́съ, иже горѣ̀ со ѻ҆ц҃е́мъ сѣдѧ́й и҆ здѣ̀ на́мъ неви́димѡ спребыва́ѧй, и҆ сподо́би держа́вною твое́ю рꙋко́ю препода́ти на́мъ пречⷵтое тѣ́ло твоѐ и҆ чⷵтнꙋ́ю кро́вь, и҆ на́ми всѣ҆мъ лю́демъ.

Таже прие́м архиерей омофорий, и отлагает шапку, и покланяется архиерей, и прочии, глаголюще тайно:

Бж҃е, ѡ҆чи́сти мѧ̀ грѣ́шнаго.

Полобне и диакон вне, иде́же стои́т.

Архиерей же, покровенным сущым Божественным Даро́м, вложив руку, касается Животворящаго Хлеба, со благоговением и страхом многим.

И диакон, прспоя́сався ора́рием крестовидно и приклони́в главу́, глаголет: Во́нмем. [И затворяются ца́рская врата́.]

И архиерей возглашает:

Преждеѡсщ҃є́ннаѧ ст҃а̑ѧ ст҃ы̑мъ.

Лик: Еди́н Свят, Еди́н Господь:

Архиерей же отлагает святый возду́х. И внидет диакон во святый олтарь. Протодиакон же, став близ архиереа, глаголет: Раздроби́, Владыко, Святы́й А́гнец.

Архиерей раздробляет его со многим вниманием, на четыри части, глаголя:

Раздроблѧ́етсѧ и҆ раздѣлѧ́етсѧ агнецъ бж҃їй, раздроблѧ́емый и҆ нераздѣлѧ́емый, всегда̀ ꙗ҆до́мый и҆ никогда́же и҆ждива́емый, но причаща́ющыѧсѧ ѡ҆свѧща́ѧй.

И влагает ча́стицу в поти́рий, ничтоже глаголя. И протодиакон вливает теплоту́ в потирий, ничтоже глаголя. Таже архиерей творит прощение со сослужители. И взем Святых Таин еди́ну ча́стицу в десну́ю руку, и приклонив главу́, молится по обычаю, глаголя:

Вѣ́рꙋю гдⷵи, и҆ и҆сповѣ́дꙋю, ꙗкѡ ты̀ єсѝ вои́стиннꙋ хрⷵто́съ, сн҃ъ бг҃а жива́гѡ, прише́дый въ мі́ръ грѣ҆шныѧ спастѝ, ѿ ни́хже пе́рвый єсмь азъ. Е҆щѐ вѣ́рꙋю, ꙗкѡ сїѐ са́мое єсть пречⷵтое тѣ́ло твоѐ и҆ сїѧ̀ са́маѧ єсть честна́ѧ кро́вь твоѧ̀. молю́сѧ ѹбѡ тебѣ̀, поми́лꙋй мѧ̀ и҆ прости́ ми прегрѣшє́нїѧ моѧ, вѡ́льнаѧ и҆ невѡ́льнаѧ, ꙗже сло́вомъ, ꙗже дѣ́ломъ, ꙗже вѣ́дѣнїемъ и҆ невѣ́дѣнїемъ, и҆ сподо́би мѧ̀ неѡсꙋжде́ннѡ причасти́тисѧ пречⷵтыхъ твои́хъ та́инствъ, во ѡ҆ставле́нїе грѣхѡ́въ и҆ въ жи́знь вѣ́чнꙋю. Таже:

Ве́чери твоеѧ̀ та́йныѧ дне́сь сн҃е бж҃їй, прича́стника мѧ̀ прїимѝ, не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗкѡ і҆ꙋ́да, но ꙗкѡ разбо́йникъ и҆сповѣ́даю тѧ̀: помѧнѝ мѧ̀ гдⷵи, во црⷵтвїи твое́мъ.

Да не въ сꙋ́дъ и҆лѝ во ѡ҆сꙋжде́нїе бꙋ́детъ мнѣ̀ причаще́нїе ст҃ы́хъ твои́хъ та̑инъ гдⷵи, но во и҆сцѣле́нїе дꙋшѝ и҆ тѣ́ла.

Таже востав и пришед близ святаго дискоса и разгну́в руку, причащается Святаго Тела и Кро́ве Господни со умилением и благоговением, глаголя:

Чтⷵно́е и҆ всест҃о́е и҆ пречⷵтое тѣ́ло и҆ кро́вь гдⷵа бг҃а и҆ сп҃са на́шегѡ і҆и҃са хрⷵта̀ преподае́тсѧ мнѣ̀ недосто́йномꙋ имⷬ҇къ, а҆рхїере́ю, во ѡ҆ставле́нїе мои́хъ грѣхѡ́въ и҆ въ жи́знь вѣ́чнꙋю. Во имѧ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь

Таже, взем гу́бу, отирает ру́ку, глаголя:

Сла́ва тебѣ̀ бж҃е. Три́щи.

И, целовав гу́бу, положи́т на место.

Таже, взем святый поти́рий обе́ма рука́ма, с покровцем, пиет из него, ничтоже глаголя. И тако устне́ и святый потир отирает покровцем, и́же в руках, и поставляет его на святую трапе́зу. Таже архиерей возлагает шапку на главу́ свою.

Протодиакон же призывает еди́наго коего́ждо архимандритов, глаголя: Приступи́те.

И присту́пит един архимандрит левыя страны́ архиереа, приклони́в главу и положи́в дла́ни крестовидно, десни́це су́щей горе́, глаголет: Се прихожду́ к Безсме́ртному Царю́ и Бо́гу на́шему. И: Препода́ждь ми, Преосвяще́ннейший Влады́ко, Честно́е и Веесвято́е, и Пречи́стое Те́ло и Кровь Го́спода и Бо́га, и Спа́са на́шего Иису́са Христа́.

Архиерей же, взем десно́ю руко́ю, треми́ персты́, ча́стицу Честна́го Тела и Крове Христовы, полагает в руки приходящаго архимандрита или иереа, глаголя:

Преподае́тсѧ тебѣ̀, имⷬ҇къ, а҆рхїмандрі́тꙋ, и҆ли: і҆ере́ю, чⷵтно́е и҆ пречⷵтое и҆ безсме́ртное тѣ́ло и҆ кро́вь гдⷵа бг҃а и҆ сп҃са на́шегѡ і҆и҃са хрⷵта̀, во ѡ҆ставле́нїе грѣхѡ́въ твои́хъ и҆ въ жи́знь вѣ́чнꙋю. Во имѧ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.

И, целовав руку и ра́мо архиереа, отходит на еди́ну страну́ и, приклонив главу́ над ру́ки, молится, я́коже сотвори́ и архиерей.

Таже паки протодиакон призывает, я́коже и прежде. Ко иере́ем же глаго́лет си́це: Иере́е, приступи́те. Ко диаконом же: Иеродиа́кони, приступи́те.

И творят вси подобне, якоже предрече́ся.

Диаконы причащати Честна́го Тела и Крове Христовы и преподавати им повелевает архимандриту. От святаго же потира преподает сам архиерей архимандритом, игуменом, протопресвитером и иереем, ничтоже глаголя. Диаконом же от потира преподавати архимандриту, кому архиерей повели́т, ничтоже глаголя.

И по причащении архиерей, прием ана́фору, умывает руки и устне́ и, став мало ко стране́ святаго престола, глаголет молитву благодарения:

Бл҃годари́мъ тѧ̀, сп҃са всѣ́хъ бг҃а, ѡ҆ всѣ́хъ, ихже по́далъ є҆сѝ на́мъ бл҃ги́хъ, и҆ ѡ҆ прича́стїи ст҃а́гѡ тѣ́ла и҆ кро́ве хрⷵта̀ твоегѡ̀. и҆ мо́лимъ ти сѧ влⷣко чл҃кѣколю́бче, сохранѝ на́съ под̾ кро́вомъ крилꙋ҆ твое́ю и҆ да́ждь на́мъ да́же до послѣ́днѧгѡ на́шегѡ и҆здыха́нїѧ досто́йнѣ причаща́тисѧ ст҃ы́нь твои́хъ, въ просвѣще́нїе дꙋшѝ и҆ тѣ́ла, въ црⷵтва нбⷵнагѡ наслѣ́дїе.

Диакон же [ему́же потребля́ти Свята́я] тогда из Чаши не пиет, но по заамвонной молитве, и по потребле́нии оставшихся ча́стиц Святых Та́ин.

Протодиакон же, взем святый дискос, надно́сит верху́ святаго потира и отирает гу́бою с великим вниманием, влагая Святыя Тайны внутрь святаго потира, и, целовав святый дискос, полагает близ святаго потира. Таже, взем и покровец, покрывает святый потир, на святый же дискос полагает звезди́цу и покровцы, и ае́р, ничтоже глаголя, и покланяется три́щи. И отверзаются ца́рская врата́.

И взем архиерей святый потир и целовав его, отдает протодиакону. И, прии́м обе́ма рука́ма, целует руку архиереову, и приходит во святыя двери, и, вознося святый потир, глаголет: Со стра́хом Бо́жиим и ве́рою приступите.

Лик же пост: Благословлю́ Го́спода на вся́кое вре́мя, хвала́ Его во усте́х моих. Хлеб Небе́сный и Ча́шу Жи́зни вкуси́те и ви́дите, яко благ Госпо́дь. Аллилу́иа, аллилу́иа, аллилу́иа.

Посем архиерей, изшед из царских врат, благословляет народ со трикирием и дикирием и глаголет велегласно:

Спасѝ бж҃е, лю́ди твоѧ̑ и҆ бл҃гословѝ достоѧ́нїе твоѐ.

Певцы: Ис полла́ э́ти, дэ́спота. Косно и со сладкопением.

И обращается паки ко святей трапе́зе, и осеняет сослужа́щия, и отдает трикирий и дикирий. Прие́м же архиерей святый потир от рук протодиакона, поставляет на святей трапе́зе. Таже прие́м кадильницу, кадит то́чию Святая три́щи и а́бие отдает кадильницу, никогоже кадя́. Таже прием архиерей святый дискос, возлагает на главу протодиакона. Протодиакон же прие́млет и́ обе́ма рука́ма и отходит в предложение, ничтоже глаголя, и поставляет и́ тамо.

Святый же потир, прие́м и целовав, архиерей отдает первому архимандриту или игумену, глаголя тихо:

Бл҃гослове́нъ бг҃ъ на́шъ:

И приемлет архимандрит обе́ма рука́ма, и целовав и́, и архиереову руку, обращается ко святым две́рем, зря к народу, глаголет велегласно: Всегда́, ны́не и при́сно, и во ве́ки веко́в.

И отходит ко святому предложению, поддержи́мь двема́ диаконами, и поставляет его тамо.

Лик: Ами́нь. Да испо́лнятся уста́ на́ша хвале́ния Твоего́, Го́споди, я́ко да пое́м сла́ву Твою́, я́ко сподо́бил еси́ нас причасти́тися Святы́м Твои́м, Боже́ственный, Безсме́ртным и Животворя́щым Та́йнам. Соблюди́ нас во Твое́й святы́ни, весь день поуча́тися пра́вде Твое́й, Аллилу́иа, аллилу́иа, аллилу́иа.

Таже протодиакон исходит северными две́рьми и, став на обычном месте, глаголет: Про́сти, прии́мше Боже́ственных, Святы́х, Пречи́стых, Безсме́ртных, Небе́сных и Животворя́щих, Стра́шных Христо́вых Та́ин, досто́йно благодари́м Го́спода.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию. Лик: Го́споди, поми́луй.

Вечера всего́ соверше́нна, свя́та, ми́рна и безгре́шна испроси́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Архиерей, кре́ствуя Евангелием над антиминсом, возглашает:

Ꙗкѡ ты̀ є҆си҆ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. Лик: Ами́нь.

Таже глаголет: Съ ми́ромъ и҆з̾и́демъ.

Лик: О и́мени Госпо́дни.

Протодиакон: Го́споду помо́лимся.

Лик: Го́споди, поми́луй.

Иерей исходит и, став на обычном месте, глаголет заамвонную молитву:

Влады́ко Вседержи́телю, Иже всю тварь прему́дростию соде́лавый и неизрече́нным Твои́м Про́мыслом и мно́гою бла́гостию введы́й нас в пречестны́я дни сия́, ко очище́нию душа́м и те́лом, к воздержа́нию страсте́й, к надежди Воскресе́ния: Иже четы́редесятьми де́ньми скрижа́ли вручи́в, Богоначерта́нная пи́смена, уго́днику Твоему́ Моисе́ови, пода́ждь и нам, Бла́же, по́двигом до́брым подвиза́тися, тече́ние поста̀ соверши́ти, ве́ру неразде́льну соблюсти́, главы́ неви́димых змие́в сокруши́ти, победи́телем же греха́ яви́тися и неосужде́нно дости́гнути поклони́тися и Свято́му Воскресе́нию. Яко благослови́ся и просла́вися пречестно́е и великоле́пое Имя Твое́, Отца́ и Сы́на, и Свята́го Ду́ха, ны́не и при́сно, и во ве́ки веко́в.

Архиерей же глаголет конечную молитву:

Гдⷵи бж҃е на́шъ, введы́й на́съ во всечестны̑ѧ дни̑ сїѧ̑ и҆ ѻбщники на́съ сотвори́въ стра́шныхъ твои́хъ та̑инъ, совокꙋпѝ на́съ слове́сномꙋ твоемꙋ̀ ста́дꙋ и҆ наслѣ́дники покажѝ црⷵтвїѧ твоегѡ̀, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

И прочее по чину, я́ко писа́ся в литургии Златоустаго: то́чию отпу́ст си́це глаголется:

Хрⷵто́съ, истинный бг҃ъ на́шъ, моли́твами пречⷵтыѧ своеѧ̀ мт҃ре, и҆ прѡ́чаѧ по дню̀, и҆ ст҃а́го, имⷬ҇къ, є҆гѡ́же єсть де́нь, и҆ иже во ст҃ы́хъ ѻ҆ц҃а̀ на́шегѡ григо́рїѧ двоесло́ва, и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗкѡ бл҃гі́й и҆ чл҃вѣколю́бецъ.

Си́це же творит отпу́ст до Страстны́я седми́цы: во Страстну́ю бо седми́цу свой отпу́ст глаголется.

Тропарь, глас 4: Иже от Бога свыше Божественную благодать восприем, славне Григорие, и Того силою укреиляемь, евангельски шествовати изволил еси, отонудуже у Христа возмездие трудов приял еси, всеблаженне, егоже моли, да спасет душы нашя.

Слава, кондак, глас 3: Подобонача́льник показа́лся еси́ Нача́льника па́стырем Христа́, и́ноков чреды́, о́тче Григо́рие, ко огра́де небе́сней наставля́я, и отту́ду научи́л еси́ ста́до Христо́во за́поведем Его. Ны́не же с ни́ми ра́дуешися и лику́еши в небе́сных кро́вех.

И ныне, Богородичен, глас 6:

Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щнх Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.

Конец Божественныя литурги́и Преждеосвященных.


Комментарии для сайта Cackle