Часослов на церковнославянском языке гражданским шрифтом

Нача́ло полуно́щницы

Свяще́нник глаго́лет: Благослове́н Бог на́ш:

И мы: Сла́ва Тебе́, Бо́же на́ш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Три́жды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, три́жды.

Сла́ва, и ны́не: О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хле́б на́ш насу́щный да́ждь на́м днесь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

Свяще́нник: Я́ко Твое́ е́сть Ца́рство:

Та́же, Го́споди, поми́луй, 12.

Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему. Поклоны́ три́.

И а́бие псало́м 50: Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́; я́ко беззако́ние мое́ а́з зна́ю, и гре́х мо́й пре́до мно́ю е́сть вы́ну. Тебе́ Еди́ному согреши́х и лука́вое пре́д Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти́. Се бо в беззако́ниих зача́т е́смь, и во гресе́х роди́ мя́ ма́ти моя́. Се́ бо и́стину возлюби́л еси́; безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́; возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Тво́й тельцы́. Та́же, кафи́сма 17.

¹ Бла́жени непоро́чнии в пу́ть, ходя́щии в зако́не Госпо́дни. ²Блаже́ни испыта́ющии свиде́ния Его́, все́м се́рдцем взы́щут Его́. ³Не де́лающии бо беззако́ния, в путе́х Его́ ходи́ша. ⁴Ты́ запове́дал еси́ за́поведи Твоя́ сохрани́ти зело́. ⁵Дабы́ испра́вилися путие́ мои́, сохрани́ти оправда́ния Твоя́. ⁶Тогда́ не постыжу́ся, внегда́ призре́ти ми́ на вся́ за́поведи Твоя́. ⁷Испове́мся Тебе́ в пра́вости се́рдца, внегда́ научи́ти ми́ ся́ судьба́м пра́вды Твоея́. ⁸Оправда́ния Твоя́ сохраню́, не оста́ви мене́ до зела́. ⁹В чесо́м испра́вит юне́йший пу́ть сво́й; внегда́ сохрани́ти словеса́ Твоя́. ¹⁰Все́м се́рдцем мои́м взыска́х Тебе́, не отри́ни мене́ от за́поведей Твои́х. ¹¹В се́рдце мое́м скры́х словеса́ Твоя́, я́ко да не согрешу́ Тебе́. ¹²Благослове́н еси́, Го́споди: научи́ мя́ оправда́нием Твои́м. ¹³Устна́ма мои́ма возвести́х вся́ судьбы́ у́ст Твои́х. ¹⁴На пути́ свиде́ний Твои́х наслади́хся, я́ко о вся́ком бога́тстве. ¹⁵В за́поведех Твои́х поглумлю́ся и уразуме́ю пути́ Твоя́. ¹⁶Во оправда́ниих Твои́х поучу́ся, не забу́ду слове́с Твои́х. ¹⁷Возда́ждь рабу́ Твоему́, живи́ мя́, и сохраню́ словеса́ Твоя́. ¹⁸Откры́й о́чи мои́, и уразуме́ю чуде́са от зако́на Твоего́. ¹⁹Пришле́ц а́з е́смь на земли́: не скры́й от Мене́ за́поведи Твоя́. ²⁰Возлюби́ душа́ моя́ возжела́ти судьбы́ Твоя́ на вся́кое вре́мя. ²¹Запрети́л еси́ го́рдым: про́кляти уклоня́ющиися от за́поведей Твои́х. ²²Отьими́ от Мене́ поно́с и уничиже́ние, я́ко свиде́ний Твои́х взыска́х. ²³И́бо седо́ша кня́зи, и на мя́ клевета́ху, ра́б же Тво́й глумля́шеся во оправда́ниих Твои́х: ²⁴И́бо свиде́ния Твоя́ поуче́ние мое́ е́сть, и сове́ти мои́ оправда́ния Твоя́. ²⁵Прильпе́ земли́ душа́ моя́: живи́ мя́ по словеси́ Твоему́. ²⁶Пути́ моя́ возвести́х, и услы́шал мя́ еси́: научи́ мя́ оправда́нием Твои́м: ²⁷Пу́ть оправда́ний Твои́х вразуми́ ми́, и поглумлю́ся в чудесе́х Твои́х. ²⁸Воздрема́ душа́ моя́ от уны́ния: утверди́ мя́ в словесе́х Твои́х. ²⁹Пу́ть непра́вды отста́ви от Мене́, и зако́ном Твои́м поми́луй мя́. ³⁰Пу́ть и́стины изво́лих, и судьбы́ Твоя́ не забы́х. ³¹Прилепи́хся свиде́нием Твои́м, Го́споди, не посрами́ мене́. ³²Пу́ть за́поведей Твои́х теко́х, егда́ расшири́л еси́ се́рдце мое́. ³³Законоположи́ мне́, Го́споди, пу́ть оправда́ний Твои́х, и взыщу́ и́ вы́ну: ³⁴Вразуми́ мя́, и испыта́ю зако́н Тво́й, и сохраню́ и́ все́м се́рдцем мои́м. ³⁵Наста́ви мя́ на стезю́ за́поведей Твои́х, я́ко ту́ю восхоте́х. ³⁶Приклони́ се́рдце мое́ во свиде́ния Твоя́, а не в лихои́мство. ³⁷Отврати́ о́чи мои́, е́же не ви́дети суеты́, в пути́ Твое́м живи́ мя́. ³⁸Постави́ рабу́ Твоему́ сло́во Твое́ в стра́х Тво́й. ³⁹Отьими́ поноше́ние мое́, е́же непщева́х: я́ко судьбы́ Твоя́ бла́ги. ⁴⁰Се́ возжела́х за́поведи Твоя́, в пра́вде Твое́й живи́ мя́. ⁴¹И да прии́дет на мя́ ми́лость Твоя́, Го́споди, спасе́ние Твое́ по словеси́ Твоему́. ⁴²И отвеща́ю поноша́ющым ми́ сло́во: я́ко упова́х на словеса́ Твоя́. ⁴³И не отьими́ от у́ст мои́х словесе́ и́стинна до зела́, я́ко на судьбы́ Твоя́ упова́х. ⁴⁴И сохраню́ зако́н Тво́й вы́ну, в ве́к и в ве́к ве́ка. ⁴⁵И хожда́х в широ́те, я́ко за́поведи Твоя́ взыска́х. ⁴⁶И глаго́лах о свиде́ниих Твои́х пред цари́, и не стыдя́хся: ⁴⁷И поуча́хся в за́поведех Твои́х, я́же возлюби́х зело́: ⁴⁸И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х. ⁴⁹Помяни́ словеса́ Твоя́ рабу́ Твоему́, и́хже упова́ние да́л ми́ еси́. ⁵⁰То́ мя́ уте́ши во смире́нии мое́м, я́ко сло́во Твое́ живи́ мя́. ⁵¹ Го́рдии законопресту́поваху до зела́: от зако́на же Твоего́ не уклони́хся. ⁵²Помяну́х судьбы́ Твоя́ от ве́ка, Го́споди, и уте́шихся. ⁵³Печа́ль прия́т мя́ от гре́шник, оставля́ющих зако́н Тво́й. ⁵⁴Пе́та бя́ху мне́ оправда́ния Твоя́, на ме́сте прише́льствия моего́. ⁵⁵Помяну́х в нощи́ и́мя Твое́, Го́споди, и сохрани́х зако́н Тво́й. ⁵⁶Се́й бы́сть мне́, я́ко оправда́ний Твои́х взыска́х. ⁵⁷Ча́сть моя́ еси́, Го́споди, ре́х сохрани́ти зако́н Тво́й. ⁵⁸Помоли́хся лицу́ Твоему́ все́м се́рдцем мои́м: поми́луй мя́ по словеси́ Твоему́. ⁵⁹Помы́слих пути́ Твоя́, и возврати́х но́зе мои́ во свиде́ния Твоя́. ⁶⁰Угото́вихся и не смути́хся сохрани́ти за́поведи Твоя́. ⁶¹У́жя гре́шник обяза́шася мне́, и зако́на Твоего́ не забы́х. ⁶²Полу́нощи воста́х испове́датися Тебе́ о судьба́х пра́вды Твоея́. ⁶³Прича́стник а́з е́смь все́м боя́щымся Тебе́, и храня́щым за́поведи Твоя́. ⁶⁴Ми́лости Твоея́, Го́споди, испо́лнь земля́: оправда́нием Твои́м научи́ мя́. ⁶⁵Бла́гость сотвори́л еси́ с рабо́м Твои́м, Го́споди, по словеси́ Твоему́. ⁶⁶Бла́гости, и наказа́нию и ра́зуму научи́ мя́, я́ко за́поведем Твои́м ве́ровах. ⁶⁷Пре́жде да́же не смири́ти ми́ ся́, а́з прегреши́х: сего́ ра́ди сло́во Твое́ сохрани́х. ⁶⁸Бла́г еси́ Ты́, Го́споди, и бла́гостию Твое́ю научи́ мя́ оправда́нием Твои́м. ⁶⁹Умно́жися на мя́ непра́вда го́рдых, а́з же все́м се́рдцем мои́м испыта́ю за́поведи Твоя́. ⁷⁰Усыри́ся я́ко мле́ко се́рдце и́х, а́з же зако́ну Твоему́ поучи́хся. ⁷¹Бла́го мне́, я́ко смири́л мя́ еси́, я́ко да научу́ся оправда́нием Твои́м. ⁷²Бла́г мне зако́н у́ст Твои́х, па́че ты́сящ злата́ и сребра́.

Сла́ва:

⁷³Ру́це Твои́ сотвори́сте мя́, и созда́сте мя́: вразуми́ мя́, и научу́ся за́поведем Твои́м. ⁷⁴Боя́щиися Тебе́ у́зрят мя́ и возвеселя́тся, я́ко на словеса́ Твоя́ упова́х. ⁷⁵Разуме́х Го́споди, я́ко пра́вда судьбы́ Твоя́, и вои́стинну смири́л мя́ еси́. ⁷⁶Бу́ди же ми́лость Твоя́, да уте́шит мя́ по словеси́ Твоему́ рабу́ Твоему́. ⁷⁷Да прии́дут мне́ щедро́ты Твоя́, и жи́в бу́ду, я́ко зако́н Тво́й поуче́ние мое́ е́сть. ⁷⁸Да постыдя́тся го́рдии, я́ко непра́ведно беззако́нноваша на мя́, а́з же поглумлю́ся в за́поведех Твои́х. ⁷⁹Да обратя́т мя́ боя́щиися Тебе́, и ве́дящии свиде́ния Твоя́. ⁸⁰Бу́ди се́рдце мое́ непоро́чно во оправда́ниих Твои́х, я́ко да не постыжу́ся. ⁸¹Исчеза́ет во спасе́ние Твое́ душа́ моя́, на словеса́ Твоя́ упова́х. ⁸²Исчезо́ша о́чи мои́ в сло́во Твое́, глаго́люще: когда́ уте́шиши мя́? ⁸³Зане́ бы́х я́ко ме́х на сла́не: оправда́ний Твои́х не забы́х. ⁸⁴Коли́ко е́сть дне́й раба́ Твоего́? Когда́ сотвори́ши ми́ от гоня́щих мя́ су́д? ⁸⁵Пове́даша мне́ законопресту́пницы глумле́ния, но не я́ко зако́н Тво́й, Го́споди. ⁸⁶Вся́ за́поведи Твоя́ и́стина: непра́ведно погна́ша мя́, помози́ ми́. ⁸⁷Вма́ле не сконча́ша мене́ на земли́: а́з же не оста́вих за́поведей Твои́х. ⁸⁸По ми́лости Твое́й живи́ мя́, и сохраню́ сви́дения у́ст Твои́х. ⁸⁹Во ве́к, Го́споди, сло́во Твое́ пребыва́ет на небеси́. ⁹⁰В ро́д и ро́д и́стина Твоя́. Основа́л еси́ зе́млю, и пребыва́ет. ⁹¹Учине́нием Твои́м пребыва́ет де́нь, я́ко вся́ческая рабо́тна Тебе́. ⁹²Я́ко а́ще бы не зако́н Тво́й поуче́ние мое́ бы́л, тогда́ у́бо поги́бл бы́х во смире́нии мое́м. ⁹³Во ве́к не забу́ду оправда́ний Твои́х, я́ко в ни́х оживи́л мя́ еси́.

Среда́

⁹⁴Тво́й е́смь а́з, спаси́ мя́, я́ко оправда́ний Твои́х взыска́х. ⁹⁵Мене́ жда́ша гре́шницы погуби́ти мя́, свиде́ния Твоя́ разуме́х. ⁹⁶Вся́кия кончи́ны ви́дех коне́ц, широка́ за́поведь Твоя́ зело́. ⁹⁷Ко́ль возлюби́х зако́н Тво́й, Го́споди, ве́сь де́нь поуче́ние мое́ е́сть. ⁹⁸Па́че вра́г мои́х умудри́л мя́ еси́ за́поведию Твое́ю, я́ко в ве́к моя́ е́сть. ⁹⁹Па́че все́х уча́щих мя́ разуме́х, я́ко свиде́ния Твоя́ поуче́ние мое́ е́сть. ¹⁰⁰Па́че ста́рец разуме́х, я́ко за́поведи Твоя́ взыска́х. ¹⁰¹От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́. ¹⁰²От суде́б Твои́х не уклони́хся, я́ко Ты́ законоположи́л ми́ еси́. ¹⁰³Ко́ль сладка́ горта́ни моему́ словеса́ Твоя́, па́че ме́да усто́м мои́м. ¹⁰⁴От за́поведей Твои́х разуме́х, сего́ ра́ди возненави́дех вся́к пу́ть непра́вды. ¹⁰⁵Свети́льник нога́ма мои́ма зако́н Тво́й, и све́т стезя́м мои́м. ¹⁰⁶Кля́хся и поста́вих сохрани́ти судьбы́ пра́вды Твоея́. ¹⁰⁷Смири́хся до зела́, Го́споди, живи́ мя́ по словеси́ Твоему́. ¹⁰⁸Во́льная у́ст мои́х благоволи́ же, Го́споди, и судьба́м Твои́м научи́ мя́. ¹⁰⁹Душа́ моя́ в руку́ Твое́ю вы́ну, и зако́на Твоего́ не забы́х. ¹¹⁰Положи́ша гре́шницы се́ть мне́, и от за́поведей Твои́х не заблуди́х. ¹¹¹Насле́довах свиде́ния Твоя́ во ве́к, я́ко ра́дование се́рдца моего́ су́ть. ¹¹²Приклони́х се́рдце мое́ сотвори́ти оправда́ния Твоя́ в ве́к за воздая́ние. ¹¹³Законопресту́пныя возненави́дех, зако́н же Тво́й возлюби́х. ¹¹⁴Помо́щник мо́й и засту́пник мо́й еси́ Ты́, на словеса́ Твоя́ упова́х. ¹¹⁵Уклони́теся от Мене́ лука́внующии, и испыта́ю за́поведи Бо́га моего́. ¹¹⁶Заступи́ мя́ по словеси́ Твоему́, и жи́в бу́ду, и не посрами́ мене́ от ча́яния моего́. ¹¹⁷Помози́ ми́, и спасу́ся, и поучу́ся во оправда́ниих Твои́х вы́ну. ¹¹⁸Уничижи́л еси́ вся́ отступа́ющия от оправда́ний Твои́х, я́ко непра́ведно помышле́ние и́х. ¹¹⁹Преступа́ющия непщева́х вся́ гре́шныя земли́, сего́ ра́ди возлюби́х свиде́ния Твоя́. ¹²⁰Пригвозди́ стра́ху Твоему́ пло́ти моя́, от суде́б бо Твои́х убоя́хся. ¹²¹Сотвори́х су́д и пра́вду, не преда́ждь мене́ оби́дящым мя́. ¹²²Восприими́ раба́ Твоего́ во бла́го, да не оклевета́ют мене́ го́рдии. ¹²³О́чи мои́ исчезо́сте во спасе́ние Твое́, и в сло́во пра́вды Твоея́. ¹²⁴Сотвори́ с рабо́м Твои́м по ми́лости Твое́й, и оправда́нием Твои́м научи́ мя́. ¹²⁵Ра́б Тво́й е́смь а́з: вразуми́ мя́, и уве́м свиде́ния Твоя́. ¹²⁶Вре́мя сотвори́ти Го́сподеви: разори́ша зако́н Тво́й. ¹²⁷Сего́ ра́ди возлюби́х за́поведи Твоя́ па́че зла́та и топа́зия. ¹²⁸Сего́ ра́ди ко все́м за́поведем Твои́м направля́хся, вся́к пу́ть непра́вды возненави́дех. ¹²⁹Ди́вна свиде́ния Твоя́, сего́ ра́ди испыта́ я́ душа́ моя́. ¹³⁰Явле́ние слове́с Твои́х просвеща́ет и вразумля́ет младе́нцы. ¹³¹Уста́ моя́ отверзо́х, и привлеко́х ду́х, я́ко за́поведей Твои́х жела́х.

Сла́ва:

¹³²При́зри на мя́ и поми́луй мя́, по суду́ лю́бящих и́мя Твое́. ¹³³Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. ¹³⁴Изба́ви мя́ от клеветы́ челове́ческия, и сохраню́ за́поведи Твоя́. ¹³⁵Лице́ Твое́ просвети́ на раба́ Твоего́, и научи́ мя́ оправда́нием Твои́м. ¹³⁶Исхо́дища водна́я изведо́сте о́чи мои́, поне́же не сохрани́х зако́на Твоего́. ¹³⁷Пра́веден еси́, Го́споди, и пра́ви суди́ Твои́. ¹³⁸Запове́дал еси́ пра́вду свиде́ния Твоя́, и и́стину зело́. ¹³⁹Иста́яла мя́ е́сть ре́вность Твоя́, я́ко забы́ша словеса́ Твоя́ врази́ мои́. ¹⁴⁰Разжже́но сло́во Твое́ зело́, и ра́б Тво́й возлюби́ е́. ¹⁴¹Юне́йший а́з е́смь и уничиже́н, оправда́ний Твои́х не забы́х. ¹⁴²Пра́вда Твоя́ пра́вда во ве́к, и зако́н Тво́й и́стина. ¹⁴³Ско́рби и ну́жды обрето́ша мя́, за́поведи Твоя́ поуче́ние мое́. ¹⁴⁴Пра́вда свиде́ния Твоя́ в ве́к, вразуми́ мя́, и жи́в бу́ду. ¹⁴⁵Воззва́х все́м се́рдцем мои́м, услы́ши мя́, Го́споди, оправда́ния Твоя́ взыщу́. ¹⁴⁶Воззва́х Ти́, спаси́ мя́, и сохраню́ свиде́ния Твоя́. ¹⁴⁷Предвари́х в безго́дии и воззва́х, на словеса́ Твоя́ упова́х. ¹⁴⁸Предвари́сте о́чи мои́ ко у́тру, поучи́тися словесе́м Твои́м. ¹⁴⁹ Гла́с мо́й услы́ши, Го́споди, по ми́лости Твое́й: по судьбе́ Твое́й живи́ мя́. ¹⁵⁰Прибли́жишася гоня́щии мя́ беззако́нием, от зако́на же Твоего́ удали́шася. ¹⁵¹Бли́з еси́ Ты́, Го́споди, и вси́ путие́ Твои́ и́стина. ¹⁵²Испе́рва позна́х от свиде́ний Твои́х, я́ко в ве́к основа́л я́ еси́. ¹⁵³Ви́ждь смире́ние мое́ и изми́ мя́, я́ко зако́на Твоего́ не забы́х. ¹⁵⁴Суди́ су́д мо́й и изба́ви мя́, словесе́ ра́ди Твоего́ живи́ мя́. ¹⁵⁵Дале́че от гре́шник спасе́ние, я́ко оправда́ний Твои́х не взыска́ша. ¹⁵⁶Щедро́ты Твоя́ мно́ги, Го́споди, по судьбе́ Твое́й живи́ мя́. ¹⁵⁷Мно́зи изгоня́щии мя́ и стужа́ющии ми́, от свиде́ний Твои́х не уклони́хся. ¹⁵⁸Ви́дех неразумева́ющия и иста́ях, я́ко слове́с Твои́х не сохрани́ша. ¹⁵⁹Ви́ждь, я́ко за́поведи Твоя́ возлюби́х, Го́споди, по ми́лости Твое́й живи́ мя́. ¹⁶⁰Нача́ло слове́с Твои́х и́стина, и во ве́к вся́ судьбы́ пра́вды Твоея́. ¹⁶¹Кня́зи погна́ша мя́ ту́не, и от слове́с Твои́х убоя́ся се́рдце мое́. ¹⁶²Возра́дуюся а́з о словесе́х Твои́х, я́ко обрета́яй коры́сть мно́гу. ¹⁶³Непра́вду возненави́дех и омерзи́х, зако́н же Тво́й возлюби́х. ¹⁶⁴Седмери́цею дне́м хвали́х Тя́ о судьба́х пра́вды Твоея́. ¹⁶⁵Ми́р мно́г лю́бящым зако́н Тво́й, и не́сть и́м собла́зна. ¹⁶⁶Ча́ях спасе́ния Твоего́, Го́споди, и за́поведи Твоя́ возлюби́х. ¹⁶⁷Сохрани́ душа́ моя́ свиде́ния Твоя́ и возлюби́ я́ зело́. ¹⁶⁸Сохрани́х за́поведи Твоя́ и свиде́ния Твоя́, я́ко вси́ путие́ мои́ пред Тобо́ю, Го́споди. ¹⁶⁹Да прибли́жится моле́ние мое́ пред Тя́, Го́споди, по словеси́ Твоему́ вразуми́ мя́. ¹⁷⁰Да вни́дет проше́ние мое́ пред Тя́, Го́споди, по словеси́ Твоему́ изба́ви мя́. ¹⁷¹Отры́гнут устне́ мои́ пе́ние, егда́ научи́ши мя́ оправда́нием Твои́м. ¹⁷²Провеща́ет язы́к мо́й словеса́ Твоя́, я́ко вся́ за́поведи Твоя́ пра́вда. ¹⁷³Да бу́дет рука́ Твоя́ е́же спасти́ мя́, я́ко за́поведи Твоя́ изво́лих. ¹⁷⁴Возжела́х спасе́ние Твое́, Го́споди, и зако́н Тво́й поуче́ние мое́ е́сть. ¹⁷⁵Жива́ бу́дет душа́ моя́ и восхва́лит Тя́, и судьбы́ Твоя́ помо́гут мне́. ¹⁷⁶Заблуди́х, я́ко овча́ поги́бшее, взыщи́ раба́ Твоего́, я́ко за́поведей Твои́х не забы́х.

Сла́ва: Сла́ва, и ны́не: Аллилу́иа, три́жды.

И по конце́ ея́ а́бие: Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде все́х ве́к. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся́ бы́ша. На́с ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны́ при Понти́йстем Пила́те, и страда́вша, и погребе́нна. И воскре́сшаго в тре́тий де́нь по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.

Втора́го собо́ра: И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Трисвято́е. Поклоны 3. Пресвята́я Тро́ице: По О́тче наш:

И а́бие свяще́нник возглаша́ет: Я́ко Твое́ е́сть Ца́рство:

Та́же тропари́ сия́, во гла́се 8: Се Жени́х гряде́т в полу́нощи, / и блаже́н раб, его́же обря́щет бдя́ща: / недосто́ин же па́ки, его́же обря́щет уныва́юща. / Блюди́ у́бо душе́ моя́, / не сно́м отяготи́ся, / да не сме́рти предана́ бу́деши, / и Ца́рствия вне́ затвори́шися, / но воспряни́ зову́щи: / Свят, Свят, Свят еси́ Бо́же, / Богоро́дицею поми́луй на́с.

Сла́ва: День он стра́шный помышля́ющи, душе́ моя́, / побди́, вжига́ющи свещу́ свою́, еле́ем просвеща́ющи: / не ве́си бо когда́ прии́дет к тебе́ гла́с глаго́лющий: се Жени́х. / Блюди́ у́бо, душе́ моя́, да не воздре́млеши, / и пребу́деши вне́ толку́щи, я́ко пя́ть де́в, / но бо́дренно пожди́, да усря́щеши Христа́ еле́ем масти́тым, / и да́ст ти́ черто́г Боже́ственный сла́вы Своея́.

И ны́не, богоро́дичен: Тебе́ необори́мую сте́ну, спасе́ния утвержде́ние, Богоро́дице Де́во, мо́лим: / сопроти́вных сове́ты разори́, люде́й Твои́х печа́ль на ра́дость преложи́, / гра́д Тво́й огради́, о ми́ре ми́ра моли́, / я́ко Ты еси́, Богоро́дице, упова́ние на́ше.

Та́же, Го́споди поми́луй, 40.

И моли́тву сию́: И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г. Са́м, Го́споди, приими́ и на́шя в ча́с се́й моли́твы и испра́ви живо́т на́ш к за́поведем Твои́м, ду́шы на́шя освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней, огради́ на́с святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди поми́луй, три́жды.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Бо́же, уще́дри ны и благослови́ ны́, просвети́ лице́ Твое́ на ны́ и поми́луй ны́.

И а́ще е́сть Аллилу́иа, твори́м покло́ны три́ вели́кия, глаго́люще моли́тву сию́ та́йно свята́го Ефре́ма, разделя́юще ю́ на три́ ча́сти:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Покло́н.

Ду́х же целому́дрия, смиренному́дрия, терпе́ния, и любве́, да́руй ми ́рабу́ Твоему́. Покло́н.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Покло́н.

Та́же ма́лых 12, глаго́люще на ки́йждо покло́н: Бо́же, очи́сти мя́ гре́шнаго.

И па́ки последи́ моли́тву всю́: Го́споди и Влады́ко живота́ моего́: и покло́н еди́н вели́кий.

Та́же моли́тву сию́: Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, еди́но Божество́, еди́на Си́ла, поми́луй мя́ гре́шнаго, и и́миже ве́си судьба́ми, спаси́ мя́ недосто́йнаго раба́ Твоего́, я́ко благослове́н еси́ во ве́ки веко́в, ами́нь.

А́ще же не́сть Аллилу́иа, оставля́ется: Го́споди и Влады́ко живота́ моего́: и покло́ны, и глаго́лем то́кмо:

Влады́ко Бо́же О́тче Вседержи́телю:

И моли́твы сия́: Подоба́ет ве́дати, я́ко моли́твы сия́ глаго́лются от 22-го септе́мвриа ме́сяца (5 октября́), до Неде́ли Ва́ий.

Васи́лия Вели́каго: Го́споди Вседержи́телю, Бо́же си́л и вся́кия пло́ти, в вы́шних живы́й и на смире́нныя призира́яй, сердца́ же и утро́бы испыту́яй и сокрове́нная челове́ков я́ве предве́дый, Безнача́льный и Присносу́щный Све́те, у Него́ же не́сть премене́ния, или́ преложе́ния осене́ние; Са́м, Безсме́ртный Царю́, приими́ моле́ния на́ша, я́же в настоя́щее вре́мя, на мно́жество Твои́х щедро́т дерза́юще, от скве́рных к Тебе́ усте́н твори́м, и оста́ви на́м прегреше́ния на́ша, я́же де́лом, и сло́вом, и мы́слию, ве́дением, или́ неве́дением согреше́нная на́ми; и очи́сти ны́ от вся́кия скве́рны пло́ти и ду́ха. И да́руй на́м бо́дренным се́рдцем и тре́звенною мы́слию всю́ настоя́щаго жития́ но́щь прейти́, ожида́ющим прише́ствия све́тлаго и явле́ннаго дне́ Единоро́днаго Твоего́ Сы́на, Го́спода и Бо́га и Спа́са на́шего Иису́са Христа́, в о́ньже со сла́вою Судия́ все́х прии́дет, кому́ждо отда́ти по дело́м его́; да не па́дше и облени́вшеся, но бо́дрствующе и воздви́жени в де́лание обря́щемся гото́ви, в ра́дость и Боже́ственный черто́г сла́вы Его́ совни́дем, иде́же пра́зднующих гла́с непреста́нный, и неизрече́нная сла́дость зря́щих Твоего́ лица́ добро́ту неизрече́нную. Ты́ бо еси́ и́стинный Све́т, просвеща́яй и освяща́яй вся́ческая, и Тя́ пое́т вся́ тва́рь во ве́ки веко́в, ами́нь.

Та́же возвыша́ет свяще́нник ру́це, глаго́ля того́жде: Тя́ благослови́м, вы́шний Бо́же и Го́споди ми́лости, творя́щаго при́сно с на́ми вели́кая же и неизсле́дованная, сла́вная же и ужа́сная, и́хже не́сть числа́, пода́вшаго на́м со́н во упокое́ние не́мощи на́шея, и ослабле́ние трудо́в многотру́дныя пло́ти. Благодари́м Тя́, я́ко не погуби́л еси́ на́с со беззако́ньми на́шими, но человеколю́бствовал еси́ обы́чно, и в неча́янии лежа́щия ны́ воздви́гл еси́, во е́же славосло́вити держа́ву Твою́. Те́мже мо́лим безме́рную Твою́ бла́гость, просвети́ на́ша мы́сли, очеса́, и у́м на́ш от тя́жкаго сна́ ле́ности возста́ви: отве́рзи на́ша уста́, и испо́лни я́ Твоего́ хвале́ния, я́ко да возмо́жем непоколе́блемо пе́ти же и испове́датися Тебе́, во все́х, и от все́х сла́вимому Бо́гу, Безнача́льному Отцу́, со Единоро́дным Твои́м Сы́ном, и Всесвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в, ами́нь.

Та́же, Прииди́те, поклони́мся: три́жды.

И покло́ны три́, и псалмы́: Возведо́х о́чи мои́ в го́ры, отню́дуже прии́дет по́мощь моя́. По́мощь моя́ от Го́спода, сотво́ршаго не́бо и зе́млю. Не даждь во смяте́ние ноги́ твоея́, ниже́ воздре́млет храня́й тя́, се́ не воздре́млет, ниже́ у́снет храня́й Изра́иля. Госпо́дь сохрани́т тя́, Госпо́дь покро́в тво́й на ру́ку десну́ю твою́. Во дни́ со́лнце не ожже́т тебе́, ниже́ луна́ но́щию. Госпо́дь сохрани́т тя́ от вся́каго зла́, сохрани́т ду́шу твою́ Госпо́дь. Госпо́дь сохрани́т вхожде́ние твое́ и исхожде́ние твое́, отны́не и до ве́ка.

Се́ ны́не благослови́те Го́спода вси́ раби́ Госпо́дни, стоя́щии в хра́ме Госпо́дни, во дво́рех до́му Бо́га на́шего, В но́щех воздежи́те ру́ки ва́ша во свята́я, и благослови́те Го́спода. Благослови́т тя́ Госпо́дь от Сио́на, сотвори́вый не́бо и зе́млю.

Сла́ва, и ны́не: Трисвято́е. Покло́ны 3. Пресвята́я Тро́ица: О́тче на́ш:

Иерей: Я́ко Твое́ есть Ца́рство:

И тропари́ сия́, гла́с 2: Помяни́ Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты́, / моги́й и преста́вленным да́ти поко́й.

Глубино́ю му́дрости человеколю́бно вся́ стро́яй, / и поле́зное все́м подава́яй, / еди́не Соде́телю, упоко́й Го́споди, ду́ши ра́б Твои́х: / на Тя́ бо упова́ние возложи́ша, / Творца́ и Зижди́теля и Бо́га на́шего.

Сла́ва, конда́к: Со святы́ми упоко́й / Христе́, ду́ши ра́б Твои́х, / иде́же не́сть боле́знь, ни печа́ль, / ни воздыха́ние, / но жи́знь безконе́чная.

И ны́не, Богоро́дичен: Блажи́м Тя́ вси́ ро́ди, Богоро́дице Де́во, / в Тя́ бо невмести́мый Христо́с Бог на́ш, вмести́тися благоволи́. / Блаже́ни есмы́ и мы́, Предста́тельство Тя́ иму́ще: / де́нь бо и но́щь мо́лишися о на́с, / и вся́ страна́ на́ша Твои́ми моли́твами утвержда́ется. / Те́м воспева́юще вопие́м Ти́: / ра́дуйся, Благода́тная, Госпо́дь с Тобо́ю.

Го́споди поми́луй, 12.

И моли́тва сия́: Помяни́ Го́споди, в наде́жди Воскресе́ния, жи́зни ве́чныя, усо́пшия отцы́ и бра́тию на́шу, и вся́ во благоче́стии и ве́ре сконча́вшыяся, и прости́ и́м вся́кое согреше́ние, во́льное же и нево́льное, сло́вом, или́ де́лом, или́ помышле́нием согреше́нное и́ми, и всели́ я́ в ме́ста све́тла, в ме́ста прохла́дна, в ме́ста поко́йна, отню́дуже отбеже́ вся́кая боле́знь, печа́ль и воздыха́ние, иде́же присеща́ет све́т лица́ Твоего́, и весели́т вся́ от ве́ка святы́я Твоя́. Да́руй и́м и на́м Ца́рствие Твое́, и прича́стие неизрече́нных и ве́чных Твои́х бла́г, и Твоея́ безконе́чныя и блаже́нныя жи́зни наслажде́ние. Ты бо еси́ жи́знь, и воскресе́ние, и поко́й усо́пших рабо́в Твои́х, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в, ами́нь.

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́шы на́шя.

Упова́ние мое́ Оте́ц, прибе́жище мое́ Сын, покро́в мо́й Дух Святы́й, Тро́ице Свята́я, сла́ва Тебе́.

Сла́ва, и ны́не: Го́споди поми́луй, трижды. Благослови́.

И свяще́нник: Христо́с, и́стинный Бо́г на́ш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и все́х святы́х, поми́лует и спасе́т на́с, я́ко Бла́г и Человеколю́бец.

И мы: Ами́нь.

И быва́ет отпу́ст. И прие́млем проще́ние обы́чное. Свяще́нник глаго́лет: Помо́лимся о Вели́ком господи́не и Отце́ на́шем, Святе́йшем Патриа́рхе Моско́вском и всея́ Руси́ Кири́лле и о господи́не на́шем Преосвяще́ннейшем епи́скопе [или́ архиепи́скопе, или́ митрополи́те имяре́к].

И мы́: Го́споди поми́луй, ча́сто.

О Богохрани́мей стране́ на́шей, власте́х и во́инстве ея́.

О Отце́ на́шем, имяре́к, и все́й во Христе́ бра́тии на́шей.

О ненави́дящих и лю́бящих на́с.

О ми́лующих и служа́щих на́м.

О запове́давших на́м, недосто́йным, моли́тися о ни́х.

О избавле́нии плене́нных.

О отше́дших отце́х и бра́тиях на́ших.

О в мо́ри пла́вающих.

О в не́мощех лежа́щих.

Помо́лимся и о изоби́лии плодо́в земны́х,

И о вся́кой души́ христиа́н правосла́вных.

Ублажи́м правосла́вныя архиере́и, и кти́торы свята́го хра́ма сего́ [святы́я оби́тели сея́].

Роди́тели на́ша, и вся́ пре́жде отше́дшия отцы́ и бра́тию на́шу, зде́ лежа́щия, и повсю́ду правосла́вныя.

Предстоя́тель: Рце́м и о себе́ саме́х.¹

Го́споди поми́луй, три́жды.

Моли́твами святы́х оте́ц на́ших, Го́споди Иису́се Христе́, Бо́же на́ш, поми́луй на́с. Ами́нь.

Вонми́, я́ко си́це до́лжно пе́тися во всю́ седми́цу полу́нощнице.

Подоба́ет ве́дати, я́ко во святе́й горе́ Афо́нстей, по Помяни́ Го́споди: глаго́лют настоя́щия тропари́:

Поми́луй на́с, Го́споди, поми́луй на́с; / вся́каго бо отве́та недоуме́юще, / сию́ Ти́ моли́тву я́ко Влады́це, гре́шнии прино́сим: / поми́луй на́с.

Сла́ва: Го́споди, поми́луй на́с, / на Тя́ бо упова́хом; / не прогне́вайся на ны́ зело́, / ниже́ помяни́ беззако́ний на́ших, / но при́зри и ны́не я́ко благоутро́бен, / и изба́ви ны́ от враг на́ших; / Ты́ бо еси́ Бог наш, / и мы́ лю́дие Твои́, / вси́ дела́ руку́ Твое́ю, / и и́мя Твое́ призыва́ем.

И ны́не: Милосе́рдия две́ри отве́рзи на́м, / благослове́нная Богоро́дице, / наде́ющиися на Тя́ да не поги́бнем, / но да изба́вимся Тобо́ю от бе́д: / Ты́ бо еси́ спасе́ние ро́да христиа́нскаго.

И свяще́нник ектению́: Поми́луй нас, Бо́же:

Еще́ мо́лимся о е́же сохрани́тися гра́ду сему́, и свято́му хра́му сему́ [святе́й оби́тели се́й].

И про́чая. Го́споди, поми́луй, 40.

Возгла́с: Услы́ши ны́, Бо́же:

Посе́м, Сла́ва, и ны́не: и отпу́ст и про́чая, я́ко предпи́сана су́ть.

Нача́ло с Богом полу́нощницы суббо́тныя, твори́т свяще́нник:

Благослове́н Бог на́ш всегда́, ны́не и при́сно, и во ве́ки веко́в.

И мы́: Сла́ва Тебе́, Бо́же на́ш, сла́ва Тебе́.

Царю́ Небе́сный: Трисвятое. Пресвята́я Тро́ице: О́тче наш:

Иерей: Я́ко Твое́ есть Ца́рство:

Го́споди, поми́луй, 12.

Сла́ва, и ны́не: Прииди́те, поклони́мся: трижды.

Та́же псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

Таже, кафисма 9.

Тебе́ подоба́ет песнь, Бо́же, в Сио́не, и Тебе́ возда́стся моли́тва во Иерусали́ме. Услы́ши моли́тву мою́, к Тебе́ вся́ка плоть прии́дет. Словеса́ беззако́нник премого́ша нас, и нече́стия на́ша Ты очи́стиши. Блаже́н, его́же избра́л еси́ и прия́л, всели́тся во дво́рех Твои́х. Испо́лнимся во благи́х до́му Твоего́, свят храм Твой, ди́вен в пра́вде. Услы́ши ны, Бо́же, Спаси́телю наш, упова́ние всех конце́й земли́, и су́щих в мо́ри дале́че, уготовля́яй го́ры кре́постию Свое́ю, препоя́сан си́лою, смуща́яй глубину́ морску́ю, шу́му волн его́ кто постои́т? Смяту́тся язы́цы, и убоя́тся живу́щии в конца́х от зна́мений Твои́х, исхо́ды у́тра и ве́чера украси́ши. Посети́л еси́ зе́млю и упои́л еси́ ю́, умно́жил еси́ обогати́ти ю́. Река́ Бо́жия напо́лнися вод. Угото́вал еси́ пи́щу им, я́ко та́ко [есть] угото́вание. Бразды́ ея́ упо́й, умно́жи жи́та ея́, в ка́плях ея́ возвесели́тся возсия́ющи. Благослови́ши вене́ц ле́та бла́гости Твоея́, и поля́ Твоя́ испо́лнятся ту́ка, разботе́ют кра́сная пусты́ни, и ра́достию хо́лми препоя́шутся. Оде́яшася о́вни о́вчии, и удо́лия умно́жат пшени́цу, воззову́т, и́бо воспою́т.

Воскли́кните Го́сподеви, вся земля́, по́йте же и́мени Его́, дади́те сла́ву хвале́ Его́. Рцы́те Бо́гу: коль стра́шна дела́ Твоя́? Во мно́жестве си́лы Твоея́ со́лжут Тебе́ врази́ Твои́. Вся земля́ да покло́нится Тебе́ и пое́т Тебе́, да пое́т же и́мени Твоему́, Вы́шний. Прииди́те и ви́дите дела́ Бо́жия, коль стра́шен в сове́тех па́че сыно́в челове́ческих. Обраща́яй мо́ре в су́шу, в реце́ про́йдут нога́ми, та́мо возвесели́мся о Нем, Влады́чествующем си́лою Свое́ю ве́ком. О́чи Его́ на язы́ки призира́ете, преогорчева́ющии да не возно́сятся в себе́. Благослови́те, язы́цы, Бо́га на́шего и услы́шан сотвори́те глас хвалы́ Его́, поло́жшаго ду́шу мою́ в живо́т и не да́вшаго во смяте́ние ног мои́х. Я́ко искуси́л ны еси́, Бо́же, разже́гл ны еси́, я́коже разжиза́ется сребро́. Ввел ны еси́ в сеть, положи́л еси́ ско́рби на хребте́ на́шем. Возве́л еси́ челове́ки на главы́ на́ша, проидо́хом сквозе́ огнь и во́ду, и изве́л еси́ ны в поко́й. Вни́ду в дом Твой со всесожже́нием, возда́м Тебе́ моли́твы моя́, я́же изреко́сте устне́ мои́, и глаго́лаша уста́ моя́ в ско́рби мое́й, всесожже́ния ту́чна вознесу́ Тебе́ с кади́лом, и овны́, вознесу́ Тебе́ волы́ с козлы́. Прииди́те, услы́шите, и пове́м вам, вси боя́щиися Бо́га, ели́ка сотвори́ души́ мое́й. К Нему́ усты́ мои́ми воззва́х и вознесо́х под язы́ком мои́м. Непра́вду а́ще узре́х в се́рдце мое́м, да не услы́шит мене́ Госпо́дь. Сего́ ра́ди услы́ша мя Бог, внят гла́су моле́ния моего́. Благослове́н Бог, и́же не отста́ви моли́тву мою́ и ми́лость Свою́ от Мене́.

Бо́же, уще́дри ны и благослови́ ны, просвети́ лице́ Твое́ на ны и поми́луй ны. Позна́ти на земли́ путь Твой, во всех язы́цех спасе́ние Твое́. Да испове́дятся Тебе́ лю́дие, Бо́же, да испове́дятся Тебе́ лю́дие вси. Да возвеселя́тся и да возра́дуются язы́цы, я́ко су́диши лю́дем правото́ю и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси. Земля́ даде́ плод свой, благослови́ ны, Бо́же, Бо́же наш, благослови́ ны, Бо́же, и да убоя́тся Его́ вси концы́ земли́.

Сла́ва, и ны́не: Аллилу́иа, трижды. Го́споди, поми́луй, трижды. Сла́ва, и ны́не:

Да воскре́снет Бог, и расточа́тся врази́ Егó, и да бежа́т от лица́ Его́ ненави́дящии Его́. Я́ко исчеза́ет дым, да исче́знут, я́ко та́ет воск от лица́ огня́, та́ко да поги́бнут гре́шницы от лица́ Бо́жия, а пра́ведницы да возвеселя́тся, да возра́дуются пред Бо́гом, да насладя́тся в весе́лии. Воспо́йте Бо́гу, по́йте и́мени Его́, путесотвори́те возше́дшему на за́пады. Госпо́дь и́мя Ему́, и ра́дуйтеся пред Ним. Да смяту́тся от лица́ Его́, Отца́ си́рых и судии́ вдови́ц: Бог в ме́сте святе́м Свое́м. Бог вселя́ет единомы́сленныя в дом, изводя́ окова́нныя му́жеством, та́кожде преогорчева́ющыя живу́щыя во гробе́х. Бо́же, внегда́ исходи́ти Тебе́ пред людьми́ Твои́ми, внегда́ мимоходи́ти Тебе́ в пусты́ни, земля́ потрясе́ся, и́бо небеса́ ка́нуша от лица́ Бо́га Сина́ина, от лица́ Бо́га Изра́илева. Дождь во́лен отлучи́ши, Бо́же, достоя́нию Твоему́ и изнемо́же, Ты же соверши́л еси́ е́. Живо́тная Твоя́ живу́т на ней, угото́вал еси́ бла́гостию Твое́ю ни́щему, Бо́же. Госпо́дь даст глаго́л благовеству́ющым си́лою мно́гою. Царь сил возлю́бленнаго, красото́ю до́му раздели́ти коры́сти. А́ще поспите́ посреде́ преде́л, криле́ голуби́не посре́брене, и междора́мия ея́ в блеща́нии зла́та. Внегда́ ра́знствит Небе́сный цари́ на ней, оснежа́тся в Селмо́не. Гора́ Бо́жия, гора́ ту́чная, гора́ усыре́нная, гора́ ту́чная. Вску́ю непщу́ете го́ры усыре́нныя? Гора́, ю́же благоволи́ Бог жи́ти в ней, и́бо Госпо́дь всели́тся до конца́. Колесни́ца Бо́жия тма́ми тем, ты́сяща гобзу́ющих, Госпо́дь в них в Сина́и во святе́м. Возше́л еси́ на высоту́, плени́л еси́ плен, прия́л еси́ дая́ния в челове́цех, и́бо не покаря́ющыяся, е́же всели́тися. Госпо́дь Бог благослове́н, благослове́н Госпо́дь день дне, поспеши́т нам Бог спасе́ний на́ших. Бог наш, Бог е́же спаса́ти, и Госпо́дня, Госпо́дня исхо́дища сме́ртная. Оба́че Бог сокруши́т главы́ враго́в Свои́х, верх влас преходя́щих в прегреше́ниих свои́х. Рече́ Госпо́дь: от Васа́на обращу́, обращу́ во глубина́х морски́х. Я́ко да омо́чится нога́ Твоя́ в кро́ви, язы́к пес твои́х, от враг от него́. Ви́дена бы́ша ше́ствия Твоя́, Бо́же, ше́ствия Бо́га моего́ Царя́, и́же во святе́м, предвари́ша кня́зи близ пою́щих, посреде́ дев тимпа́нниц. В це́рквах благослови́те Бо́га, Го́спода от исто́чник Изра́илевых. Та́мо Вениами́н юне́йший во у́жасе, кня́зи Иу́довы влады́ки их, кня́зи Завуло́ни, кня́зи Неффали́мли. Запове́ждь, Бо́же, си́лою Твое́ю, укрепи́, Бо́же, сие́, е́же соде́лал еси́ в нас. От хра́ма Твоего́ во Иерусали́м Тебе́ принесу́т ца́рие да́ры. Запрети́ звере́м тро́стным, сонм юне́ц в ю́ницах людски́х, е́же затвори́ти искуше́нныя сребро́м, расточи́ язы́ки хотя́щыя бра́нем. Прии́дут моли́твенницы от Еги́пта, Ефио́пиа предвари́т ру́ку свою́ к Бо́гу. Ца́рства земна́я, по́йте Бо́гу, воспо́йте Го́сподеви, возше́дшему на Не́бо небесе́ на восто́ки, се даст гла́су Своему́ глас си́лы. Дади́те сла́ву Бо́гови, на Изра́или велеле́пота Его́, и си́ла Его́ на о́блацех. Ди́вен Бог во святы́х Свои́х, Бог Изра́илев: Той даст си́лу и держа́ву лю́дем Свои́м, благослове́н Бог.

Сла́ва, и ны́не: Аллилу́иа, трижды. Го́споди, поми́луй, трижды. Сла́ва, и ны́не:

Спаси́, мя, Бо́же, я́ко внидо́ша во́ды до души́ моея́. Углебо́х в тиме́нии глубины́, и несть постоя́ния. Приидо́х во глубины́ морски́я, и бу́ря потопи́ мя. Утруди́хся зовы́й, измолче́ горта́нь мой, исчезо́сте о́чи мои́, от е́же упова́ти ми на Бо́га моего́. Умно́жишася па́че влас главы́ моея́ ненави́дящии мя ту́не, укрепи́шася врази́ мои́, изгоня́щии мя непра́ведно: я́же не восхища́х, тогда́ воздая́х. Бо́же, Ты уве́дел еси́ безу́мие мое́, и прегреше́ния моя́ от Тебе́ не утаи́шася. Да не постыдя́тся о мне терпя́щии Тебе́, Го́споди, Го́споди сил, ниже́ да посра́мятся о мне и́щущии Тебе́, Бо́же Изра́илев. Я́ко Тебе́ ра́ди претерпе́х поноше́ние, покры́ срамота́ лице́ мое́. Чуждь бых бра́тии мое́й, и стра́нен сыново́м ма́тере моея́. Я́ко ре́вность до́му Твоего́ снеде́ мя, и поноше́ния понося́щих Ти нападо́ша на мя. И покры́х посто́м ду́шу мою́, и бысть в поноше́ние мне, и положи́х одея́ние мое́ вре́тище, и бых им в при́тчу. О мне глумля́хуся седя́щии во врате́х, и о мне поя́ху пию́щии вино́. Аз же моли́твою мое́ю к Тебе́, Бо́же, вре́мя благоволе́ния, Бо́же, во мно́жестве ми́лости Твоея́ услы́ши мя, во и́стине спасе́ния Твоего́. Спаси́ мя от бре́ния, да не угле́бну, да изба́влюся от ненави́дящих мя и от глубо́ких вод. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне рове́нник уст свои́х. Услы́ши мя, Го́споди, я́ко бла́га ми́лость Твоя́, по мно́жеству щедро́т Твои́х при́зри на мя. Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя. Вонми́ души́ мое́й, и изба́ви ю́, враг мои́х ра́ди изба́ви мя. Ты бо ве́си поноше́ние мое́ и студ мой, и срамоту́ мою́: пред Тобо́ю вси оскорбля́ющии мя. Поноше́ние ча́яше душа́ моя́, и страсть и ждах соскорбя́щаго, и не бе́, и утеша́ющих, и не обрето́х. И да́ша в снедь мою́ желчь, и в жа́жду мою́ напои́ша мя о́цта. Да бу́дет трапе́за их пред ни́ми в сеть, и в воздая́ние, и в собла́зн. Да помрача́тся о́чи их, е́же не ви́дети, и хребе́т их вы́ну сляцы́. Проле́й на ня гнев Твой, и я́рость гне́ва Твоего́ да пости́гнет их. Да бу́дет двор их пуст, и в жили́щах их да не бу́дет живы́й. Зане́ его́же Ты порази́л еси́, ти́и погна́ша, и к боле́зни язв мои́х приложи́ша. Приложи́ беззако́ние к беззако́нию их, и да не вни́дут в пра́вду Твою́. Да потребя́тся от кни́ги живы́х и с пра́ведными да не напи́шутся. Нищ и боля́й есмь аз: спасе́ние Твое́, Бо́же, да прии́мет мя. Восхвалю́ и́мя Бо́га моего́ с пе́снию, возвели́чу Его́ во хвале́нии: и уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щии и возвеселя́тся: взыщи́те Бо́га, и жива́ будет душа́ ва́ша. Я́ко услы́ша убо́гия Госпо́дь и окова́нныя Своя́ не уничижи́. Да восхва́лят Его́ небеса́ и земля́, мо́ре и вся живу́щая в нем. Я́ко Бог спасе́т Сио́на, и сози́ждутся гра́ди Иуде́йстии, и вселя́тся та́мо, и насле́дят и́, и се́мя рабо́в Твои́х удержи́т и́, и лю́бящии и́мя Твое́ вселя́тся в нем.

Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою́, да возвратя́тся вспять и постыдя́тся хотя́щии ми зла́я. Да возвратя́тся а́бие стыдя́щеся глаго́лющии ми: бла́гоже, бла́гоже. Да возра́дуются и возвеселя́тся о Тебе́ вси и́щущии Тебе́, Бо́же, и да глаго́лют вы́ну, да возвели́чится Госпо́дь, лю́бящии спасе́ние Твое́: аз же нищ есмь и убо́г, Бо́же, помози́ ми: Помо́щник мой и Изба́витель мой еси́ Ты, Го́споди, не закосни́.

Сла́ва, и ны́не: Аллилу́иа, трижды.

И по конце́ ея́ а́бие: Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Та́же, Трисвято́е. Пресвята́я Тро́ице: О́тче на́ш:

И тропари́ сия, гла́с 2:

Несозда́нное Естество́, все́х Зижди́телю, / устне́ на́ша отве́рзи, / я́ко да возвести́м хвалу́ Твою́, вопию́ще: / Свят, Свят, Свят еси́, Бо́же, Богоро́дицею поми́луй на́с.

Сла́ва: Вы́шния Си́лы подража́юще на земли́, / побе́дную пе́снь прино́сим Ти, Бла́же: / Свят, Свят, Свят еси́, Бо́же, Богоро́дицею поми́луй на́с.

И ны́не: От одра́ и сна́ воздви́гл мя еси́, Го́споди, / у́м мо́й просвети́ и се́рдце, / и устне́ мои́ отве́рзи, / во е́же пе́ти Тя, Свята́я Тро́ице: / Свят, Свят, Свят еси́, Бо́же, Богоро́дицею поми́луй на́с.

Го́споди поми́луй, 40.

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди поми́луй, трижды.

Сла́ва, и ны́не: Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, еди́на си́ла, поми́луй мя́ гре́шнаго и и́миже ве́си судьба́ми спаси́ мя́ недосто́йнаго раба́ Твоего́, я́ко благослове́н еси́ во ве́ки веко́в, ами́нь.

И настоя́щая моли́тва свята́го Евстра́тиа, в ке́ллиах:

Велича́я велича́ю Тя Го́споди, я́ко призре́л еси́ на смире́ние мое́, и не́си мене́ затвори́л в рука́х вра́жиих, но спа́сл еси́ от ну́жд ду́шу мою́. И ны́не Влады́ко, да покры́ет мя́ рука́ Твоя́, и да прии́дет на мя́ ми́лость Твоя́, я́ко смяте́ся душа́ моя́, и боле́зненна е́сть во исхожде́нии свое́м, от окая́ннаго моего́ и скве́рнаго телесе́ сего́. да не когда́ лука́вый сопоста́та сове́т сря́щет, и препне́т ю́ во тме́, за неве́домыя и ве́домыя в житии́ се́м бы́вшия ми́ грехи́. Ми́лостив бу́ди ми́, Влады́ко, и да не у́зрит душа́ моя́ мра́чнаго взо́ра лука́вых де́монов, но да прии́мут ю́ А́нгели Твои́ све́тлии и пресве́тлии. Д́аждь сла́ву и́мени Твоему́ свято́му, и Твое́ю си́лою возведи́ мя́ на Боже́ственное Твое́ суди́ще, внегда́ суди́тися ми, да не прии́мет мя́ рука́ кня́зя мира сего́, е́же исто́ргнути мя́, гре́шника, во глубину́ а́дову, но предста́ни ми́, и бу́ди ми́ Спас и Засту́пник: теле́сныя бо и сия́ муче́ния, весе́лия су́ть рабо́м Твои́м. Поми́луй, Го́споди, оскверни́вшуюся страстьми́ жития́ сего́ ду́шу мою́: и чи́сту ю́ покая́нием и испове́данием приими́, я́ко благослове́н еси́ во ве́ки веко́в, ами́нь.

Таже: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Возведо́х о́чи мои́ в го́ры, отню́дуже прии́дет по́мощь моя́. По́мощь моя́ от Го́спода, сотво́ршаго не́бо и зе́млю. Не да́ждь во смяте́ние ноги́ твоея́, ниже́ воздре́млет храня́й тя́, се не воздре́млет, ниже́ у́снет храня́й Изра́иля. Госпо́дь сохрани́т тя́, Госпо́дь покро́в твой на ру́ку десну́ю твою́. Во дни́ со́лнце не ожже́т тебе́, ниже́ луна́ но́щию. Госпо́дь сохрани́т тя́ от вся́каго зла́, сохрани́т ду́шу твою́ Госпо́дь. Госпо́дь сохрани́т вхожде́ние твое́ и исхожде́ние твое́, отны́не и до ве́ка.

Се́ ны́не благослови́те Го́спода вси́ раби́ Госпо́дни, стоя́щии в хра́ме Госпо́дни, во дво́рех до́му Бо́га на́шего, В но́щех воздежи́те ру́ки ва́ша во свята́я, и благослови́те Го́спода. Благослови́т тя́ Госпо́дь от Сио́на, сотвори́вый не́бо и зе́млю.

Сла́ва, и ны́не: Трисвято́е. Пресвята́я Тро́ице: и О́тче н́аш:

Свяще́нник: Я́ко Твое́ есть Ца́рство:

И тропари́:

Помяни́ Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты́, / моги́й и преста́вленным да́ти поко́й.

Глубино́ю му́дрости человеколю́бно вся́ стро́яй, / и поле́зное все́м подава́яй, / еди́не Соде́телю, упоко́й Го́споди, ду́ши ра́б Твои́х: / на Тя́ бо упова́ние возложи́ша, / Творца́ и Зижди́теля и Бо́га на́шего.

Слава: Со святы́ми упоко́й / Христе́, ду́ши раб Твои́х, / иде́же не́сть боле́знь, ни печа́ль, / ни воздыха́ние, / но жи́знь безконе́чная.

И ныне: Богоро́дичен: Блажи́м Тя́ вси́ ро́ди, Богоро́дице Де́во, / в Тя́ бо невмести́мый Христо́с Бо́г на́ш, вмести́тися благоволи́. / Блаже́ни есмы́ и мы́, Предста́тельство Тя́ иму́ще: / де́нь бо и но́щь мо́лишися о на́с, / и вся́ страна́ на́ша Твои́ми моли́твами утвержда́ется. / Те́м воспева́юще вопие́м Ти́: / ра́дуйся, Благода́тная, Госпо́дь с Тобо́ю.

Го́споди поми́луй, 12.

И моли́тву сию́:

Помяни́ Го́споди, в наде́жди Воскресе́ния, жи́зни ве́чныя, усо́пшия отцы́ и бра́тию на́шу, и вся́ во благоче́стии и ве́ре сконча́вшыяся, и прости́ им вся́кое согреше́ние, во́льное же и нево́льное, сло́вом, или́ де́лом, или́ помышле́нием согреше́нное и́ми, и всели́ я́ в ме́ста све́тла, в ме́ста прохла́дна, в ме́ста поко́йна, отню́дуже отбеже́ вся́кая боле́знь, печа́ль и воздыха́ние, иде́же присеща́ет све́т лица́ Твоего́, и весели́т вся́ от ве́ка святы́я Твоя́. Да́руй им и на́м Ца́рствие Твое́, и прича́стие неизрече́нных и ве́чных Твои́х бла́г, и Твоея́ безконе́чныя и блаже́нныя жи́зни наслажде́ние. Ты бо еси́ жи́знь, и воскресе́ние, и поко́й усо́пших рабо́в Твои́х, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в, ами́нь.

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Упова́ние мое́ Оте́ц, прибе́жище мое́ Сын, покро́в мой Дух Святы́й, Тро́ице Свята́я, сла́ва Тебе́.

Иерей: Сла́ва Тебе́, Христе́ Бо́же, упова́ние на́ше, сла́ва Тебе́.

Сла́ва, и ны́не: Го́споди поми́луй, трижды. Благослови́.

И свяще́нник: Христо́с, и́стинный Бо́г на́ш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и все́х святы́х, поми́лует и спасе́т на́с, я́ко Бла́г и Человеколю́бец.

И мы: Ами́нь.

Отпу́ст от свяще́нника, и проще́ние, и про́чая.

* * *

Священник: Благослове́н Бог наш всегда́, ны́не и при́сно, и во ве́ки веко́в.

И мы глаголем: Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный: Трисвятое. Пресвята́я Тро́ице: О́тче на́ш:

Священник: Я́ко Твое́ есть Ца́рство:

Го́споди, поми́луй, 12.

Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.

И а́бие глаго́лем троичный кано́н настоя́щего гла́са, и по не́м а́бие троичны сия́:

Досто́йно е́сть я́ко вои́стинну, / сла́вити Тя Бо́га Сло́ва, / Его́же трепе́щут и трясу́тся Херуви́ми, / и славосло́вят Си́лы Небе́сныя, / воскре́сшаго тридне́вно из гро́ба / Христа́ Жизнода́вца, стра́хом просла́вим.

Воспои́м вси́ боголе́пно пе́сньми Боже́ственными, / Отца́, и Сы́на, и Ду́ха Боже́ственнаго, / Триипоста́сную Держа́ву, еди́но Ца́рство и Госпо́дьство.

Ю́же пою́т вси земноро́днии, / и славосло́вят Си́лы Небе́сныя, / от все́х ве́рно покланя́емую, / Еди́ницу по существу́, Триипоста́сную.

Господонача́льную Херуви́м / и Богонача́льную без сравне́ния Серафи́м, / неразде́льную Тро́ицу во Еди́нице, / су́щее Богонача́лие, Тя́ велича́ем.

Отцу́ Безнача́льному и Бо́гу, / Собезнача́льному Сло́ву со Ду́хом покланя́юся: / неразлу́чное еди́но соединя́емое Существо́, / тричи́сленную Еди́ницу пе́сньми почти́м.

Лучеза́рная Твоя́ мо́лния возсия́й ми́, / Бо́же мо́й, Триипоста́сне Вседе́телю, / и до́м мя́ покажи́ Твоея́ непристу́пныя сла́вы, / све́тел и светоно́сен и неизме́нен.

Его́же трепе́щут и трясу́тся Херуви́ми, / и славосло́вят А́нгельская Во́инства, / от Де́вы неизрече́нно вопло́щшагося / Христа́ Жизнода́вца, стра́хом просла́вим.

Таже: Трисвято́е. Пресвята́я Тро́ице: О́тче на́ш:

Ипакои́ гла́са.

Глас 1: Разбо́йничо покая́ние рай окра́де, / пла́чь же мироно́сиц ра́дость возвести́, / я́ко воскре́сл еси́, Христе́ Бо́же, / подая́й ми́рови ве́лию ми́лость.

Глас 2: По стра́сти ше́дша во гроб жены́, / во е́же пома́зати те́ло Твое́, Христе́ Бо́же, / ви́деша А́нгелы во гро́бе, и ужасо́шася: / гла́с бо слы́шаху от ни́х, я́ко воскре́се Госпо́дь, / да́руя ми́рови ве́лию ми́лость.

Глас 3: Удивля́я виде́нием, / ороша́я глаго́лании, / блиста́яйся А́нгел мироно́сицам глаго́лаше: / что жива́го и́щете во гро́бе; / воста́ истощи́вый гро́бы. / Тли́ Премени́теля разуме́йте Непреме́ннаго. / Рцы́те Бо́гови: ко́ль стра́шна дела́ Твоя́, / я́ко ро́д спа́сл еси́ челове́ческий.

Глас 4: Я́же Твоего́ пресла́внаго воста́ния, предте́кша мироно́сицы, / апо́столом пропове́даху Христе́, / я́ко воскре́сл еси́ я́ко Бог, / подая́ ми́рови ве́лию ми́лость.

Глас 5: А́нгельским зра́ком ум смуща́юща, / и Боже́ственным воста́нием душе́ю просвеща́емы, / мироно́сицы апо́столом благовествова́ху: / возвести́те во язы́цех Воскресе́ние, / Го́споду соде́йствующу чудесы́, / подаю́щему на́м ве́лию ми́лость.

Глас 6: Во́льною и животворя́щею Твое́ю сме́ртию, Христе́, / врата́ а́дова сокруши́в, я́ко Бог, / отве́рзл еси́ нам дре́вний ра́й, и воскре́с из ме́ртвых, / изба́вил еси́ от тле́ния живо́т на́ш.

Глас 7: И́же на́ш зра́к восприе́мый, / и претерпе́вый Кре́ст пло́тски, / спаси́ мя́ воскресе́нием Твои́м Христе́ Бо́же, / я́ко человеколю́бец.

Глас 8: Мироно́сицы Жизнода́вца предстоя́ща гро́бу, / Влады́ку иска́ху в ме́ртвых, Безсме́ртнаго, / и ра́дость благове́щения от А́нгела прие́мша, апо́столом возвеща́ху: / я́ко воскре́се Христо́с Бог, / подая́й ми́рови ве́лию ми́лость.

Го́споди, поми́луй, 40.

Сла́ва, и ны́не: Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И возгла́с от свяще́нника: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

И моли́тва Пресвяте́й Тро́ице:

Всемогу́щая и Животворя́щая Свята́я Тро́ице и светонача́льная, я́же ми́рную вся́кую и преми́рную тварь, за еди́ну бла́гость от не су́щих приведы́й, и промышля́я и содержа́. И́же по про́чих Твои́х неизрече́нных о земно́м ро́де благодея́ниих, и покая́ние нам ра́ди плотска́го неможе́ния до сме́рти дарова́вый: не оста́ви нас окая́нных в лука́вых на́ших дея́ниих умре́ти, ниже́ злонача́льнику и зави́стцу, и губи́телю посме́шство бы́ти. Зри́ши бо Благосе́рде, ели́к у́бо о́наго на на́с наве́т и вражда́, ели́ко же и на́ше страстова́ние, и сла́бость, и небреже́ние. Но неоску́дныя Твоя́ бла́гости соде́лай на на́с, мо́лим на вся́кий де́нь и ча́с прогне́вающии Тя́ честны́х и животво́рных за́поведей преступле́нием. И вся́ у́бо всего́ преше́дшаго живота́ на́шего, и до ны́нешняго часа́ согреше́нная на́ми, в дея́ниих, или́ глаго́ланиих, или́ в помышле́ниих, оста́ви и прости́. Сподо́би же на́с, про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся, многообра́зне согреши́хом, или́ ме́рзкими похотьми́ неполе́зными и вре́дными обольсти́вшеся препроводи́хом: а́ще гне́вом и я́ростию подви́гшеся безслове́сною, кого́ бра́та на́шего оскорби́хом, а́ще язы́ком неизбе́жных и стро́потных и кре́пких сете́й объя́хомся: а́ще ко́им чувств на́ших, или́ все́ми, во́лею или́ нево́лею, ве́дуще или́ не ве́дуще, от восхище́ния, или́ поуче́ния безу́мно поползо́хомся: а́ще же лука́выми по́мыслы и су́етными со́весть оскверни́хом: а́ще ли ко́им други́м о́бразом прегреши́хом, от предприя́тия и обы́чая томи́ми зла́го: прости́ нам, и оста́ви вся Всеще́дре, Пребла́же и Многоми́лостиве: и да́руй на́м про́чее бо́дрость и си́лу, во е́же твори́ти во́лю Твою́ бла́гу, и благоуго́дну и соверше́нну: да нощна́го и мра́чнаго зла́, светови́дным покая́нием преме́ншеся, и я́ко во дни́ благообра́зно ходя́ще, и очище́ни объяви́мся человеколю́бию Твоему́ недосто́йнии, воспева́юще Тя́ и велича́юще во ве́ки, ами́нь.

И отпу́ст, и проще́ние обы́чное.

Та́же иере́й глаго́лет ектению́: Помо́лимся о Вели́ком господи́не:

Мы́ же: Го́споди поми́луй, кро́тким и ти́хим гла́сом.

И по исполне́нии тоя́, глаго́лет предстоя́тель: Моли́твами святы́х оте́ц на́ших, Го́споди Иису́се Христе́, Бо́же на́ш, поми́луй на́с.

Мы же: Ами́нь.

Коне́ц полу́нощниц.

* * *

Начало утрени

А́ще у́бо е́сть Вели́кая Четыредеся́тница, по е́же благослови́ти свяще́ннику, глаголем:

Трисвято́е. Пресвята́я Тро́ице: О́тче на́ш:

Го́споди поми́луй, 12.

Сла́ва, и ны́не: Прииди́те, поклони́мся: трижды, и два псалма.

А́ще же ни́, по благослове́нии:

Прииди́те, поклони́мся: три́жды, и псалмы́.

Си́и псалмы́ глаго́лются в монастыре́х ко́сно, за еже кади́ти свяще́ннику бра́тию всю́.

Услы́шит тя́ Госпо́дь в де́нь печа́ли, защи́тит тя́ и́мя Бо́га Иа́ковля. По́слет ти́ по́мощь от Свята́го и от Сио́на засту́пит тя́. Помяне́т вся́ку же́ртву твою́, и всесожже́ние твое́ ту́чно бу́ди. Даст ти Госпо́дь по се́рдцу твоему́ и весь сове́т тво́й испо́лнит. Возра́дуемся о спасе́нии твое́м и во и́мя Го́спода Бо́га на́шего возвели́чимся. Испо́лнит Госпо́дь вся́ проше́ния твоя́. Ны́не позна́х, я́ко спасе́ Госпо́дь христа́ Своего́, услы́шит его́ с Небесе́ Свята́го Своего́, в си́лах спасе́ние десни́цы Его́. Си́и на колесни́цах, и си́и на ко́нех, мы́ же во и́мя Го́спода Бо́га на́шего призове́м. Ти́и спя́ти бы́ша и падо́ша, мы́ же воста́хом и испра́вихомся. Го́споди, спаси́ царя́ и услы́ши ны́, во́ньже а́ще де́нь призове́м Тя́.

Го́споди, си́лою Твое́ю возвесели́тся ца́рь и о спасе́нии Твое́м возра́дуется зело́. Жела́ние се́рдца его́ да́л еси́ ему́, и хоте́ния устну́ его́ не́си лиши́л его́. Я́ко предвари́л еси́ его́ благослове́нием благосты́нным, положи́л еси́ на главе́ его́ вене́ц от ка́мене че́стна. Живота́ проси́л е́сть у тебе́, и да́л еси́ ему́ долготу́ дни́й во ве́к ве́ка. Ве́лия сла́ва его́ спасе́нием Твои́м, сла́ву и велеле́пие возложи́ши на него́. Я́ко да́си ему́ благослове́ние во ве́к ве́ка, возвесели́ши его́ ра́достию с лице́м Твои́м. Я́ко ца́рь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ все́м враго́м Твои́м, десни́ца Твоя́ да обря́щет вся́ ненави́дящыя Тебе́. Я́ко положи́ши их я́ко пе́щь о́гненную во вре́мя лица́ Твоего́, Госпо́дь гне́вом Свои́м смяте́т я́, и сне́сть их о́гнь. Пло́д их от земли́ погуби́ши, и се́мя их от сыно́в челове́ческих. Я́ко уклони́ша на Тя́ зла́я, помы́слиша сове́ты, и́хже не возмо́гут соста́вити. Я́ко положи́ши я́ хребе́т, во избы́тцех Твои́х угото́виши лице́ и́х. Вознеси́ся, Го́споди, си́лою Твое́ю, воспое́м и пое́м си́лы Твоя́.

Сла́ва, и ны́не: Трисвято́е. Пресвята́я Тро́ице: О́тче на́ш:

Свяще́нник: Я́ко Твое́ е́сть Ца́рство:

И тропари́ сия́:

Спаси́ Го́споди лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Сла́ва: Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ на́с си́лою Твое́ю, / побе́ды дая́ на́м на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

И ны́не: Предста́тельство стра́шное и непосты́дное, / не пре́зри Блага́я моли́тв на́ших, Всепе́тая Богоро́дице, / утверди́ правосла́вных жи́тельство: / спаси́ лю́ди Твоя́, и пода́ждь и́м с небесе́ побе́ду, / зане́ родила́ еси́ Бо́га, еди́на благослове́нная.

Свяще́нник: Поми́луй нас, Бо́же, по вели́цей ми́лости Твое́й, мо́лим Ти́ ся́, услы́ши и поми́луй.

Еще́ мо́лимся о Вели́ком господи́не и отце́ нашем, Святе́йшем Патриа́рхе Моско́вском и всея́ Руси́ Кири́лле и о господи́не на́шем преосвяще́ннейшем епи́скопе [или́ архиепи́скопе, или́ митрополи́те имярек].

Еще́ мо́лимся о богохрани́мей стране́ на́шей, власте́х и во́инстве ея́.

Еще́ мо́лимся за всю́ бра́тию и за вся́ христиа́ны.

Возгла́с: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лю́дие: И́менем Госпо́дним благослови́ о́тче.

Свяще́нник: Сла́ва святе́й, и единосу́щней, и животворя́щей, и неразде́льней Тро́ице, всегда́, ны́не и при́сно, и во ве́ки веко́в.

И начина́ем шестопса́лмие, со вся́ким молча́нием и умиле́нием слу́шающе: учине́нный же бра́т со благогове́нием и стра́хом Божиим глаго́лет:

Сла́ва в вы́шних Бо́гу, и на земли́ мир, в челове́цех благоволе́ние. Три́жды.

Го́споди, устне́ мои отве́рзеши, и уста́ моя́ возвестя́т хвалу́ Твою́. Дважды.

Го́споди, что́ ся умно́жиша стужа́ющии ми́? Мно́зи востаю́т на мя́, мно́зи глаго́лют души́ мое́й: не́сть спасе́ния eму́ в Бо́зе eго́. Ты́ же, Го́споди, Засту́пник мо́й еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя́ от горы́ святы́я Своея́. Аз усну́х, и спа́х, воста́х, я́ко Госпо́дь засту́пит мя́. Не убою́ся от те́м люде́й, о́крест напа́дающих на мя́. Воскресни́, Го́споди, спаси́ мя́, Бо́же мо́й, я́ко Ты́ порази́л еси́ вся́ вражду́ющыя ми́ всу́е: зу́бы гре́шников сокруши́л еси́. Госпо́дне е́сть спасе́ние, и на лю́дех Твои́х благослове́ние Твое́.

А́з усну́х, и спах, воста́х, я́ко Госпо́дь засту́пит мя.

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне́, и утверди́л еси́ на мне́ ру́ку Твою́. Не́сть исцеле́ния в пло́ти мое́й от лица́ гне́ва Твоего́, не́сть ми́ра в косте́х мои́х от лица́ гре́х мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне́. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, ве́сь де́нь се́туя хожда́х. Я́ко ля́двия моя́ напо́лнишася поруга́ний, и не́сть исцеле́ния в пло́ти мое́й. Озло́блен бы́х и смири́хся до зела́, рыка́х от воздыха́ния се́рдца моего́. Го́споди, пре́д Тобо́ю все́ жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя́ си́ла моя́, и све́т о́чию мое́ю, и то́й не́сть со мно́ю. Дру́зи мои́ и и́скреннии мои́ пря́мо мне́ прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне́ глаго́лаху су́етная и льсти́вным ве́сь де́нь поуча́хуся. А́з же я́ко глу́х не слы́шах и я́ко не́м не отверза́яй у́ст свои́х. И бы́х я́ко челове́к не слы́шай и не имы́й во усте́х свои́х обличе́ния. Я́ко на Тя́, Го́споди, упова́х, Ты́ услы́шиши, Го́споди Бо́же мой. Я́ко рех: да не когда́ пора́дуют ми́ ся врази́ мои́: и внегда́ подвижа́тися нога́м мои́м, на мя́ велере́чеваша. Я́ко аз на ра́ны гото́в, и боле́знь моя́ предо мно́ю е́сть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя́ бе́з пра́вды. Воздаю́щии ми́ зла́я возблага́я оболга́ху мя́, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Бо́же, Бо́же мой, к Тебе́ у́тренюю: возжада́ Тебе́ душа́ моя́, ко́ль мно́жицею Тебе́ пло́ть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя́. Та́ко благословлю́ Тя́ в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя́ уста́ моя́. А́ще помина́х Тя́ на посте́ли мое́й, на у́тренних поуча́хся в Тя́. Я́ко бы́л еси́ Помо́щник мо́й, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится вся́к клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя́. Я́ко бы́л еси́ Помо́щник мо́й, и в кро́ве крилу́ Твое́ю возра́дуюся.

Прильпе́ душа́ моя́ по Тебе́, мене́ же прия́т десни́ца Твоя́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды, без покло́нов.

Го́споди, поми́луй, трижды:

Сла́ва, и ны́не:

[Свяще́нник же глаго́лет молитвы у́тренния, стоя́ непокрове́н пре́д святы́ми две́рьми, та́йно].

Го́споди Бо́же спасе́ния моего́, во дни́ воззва́х, и в нощи́ пре́д Тобо́ю. Да вни́дет пре́д Тя́ моли́тва моя́: приклони́ у́хо Твое́ к моле́нию моему́, я́ко испо́лнися зо́л душа́ моя́, и живо́т мо́й аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя́ в ро́ве преиспо́днем, в те́мных и се́ни сме́ртней. На мне́ утверди́ся я́рость Твоя́, и вся́ во́лны Твоя́ наве́л еси́ на мя́. Уда́лил еси́ зна́емых мои́х от Мене́, положи́ша мя́ ме́рзость себе́: пре́дан бы́х и не исхожда́х. О́чи мои́ изнемого́сте от нищеты́, воззва́х к Тебе́, Го́споди, ве́сь де́нь, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто́ во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме́ чудеса́ Твоя́, и пра́вда Твоя́ в земли́ забве́нней? И а́з к Тебе́, Го́споди, воззва́х и у́тро моли́тва моя́ предвари́т Тя́. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Ни́щ е́смь а́з, и в труде́х от ю́ности моея́; возне́с же ся, смири́хся, и изнемого́х. На мне́ преидо́ша гне́ви Твои́, устраше́ния Твоя́ возмути́ша мя́, обыдо́ша мя́ я́ко вода́, ве́сь де́нь одержа́ша мя́ вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни́ воззва́х, и в нощи́ пре́д Тобо́ю.

Да вни́дет пре́д Тя́ моли́тва моя́: приклони́ у́хо Твое́ к моле́нию моему́.

Благослови́, душе́ моя́, Го́спода, и вся́ вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й все́х воздая́ний Его́, очища́ющаго вся́ беззако́ния твоя́, исцеля́ющаго вся́ неду́ги твоя́, избавля́ющаго от истле́ния живо́т тво́й, венча́ющаго тя́ ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ все́м оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Ще́др и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во ве́к вражду́ет, не по беззако́нием на́шим сотвори́л е́сть на́м, ниже́ по грехо́м на́шим возда́л е́сть на́м. Я́ко по высоте́ небе́сней от земли́, утверди́л е́сть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил е́сть от на́с беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко То́й позна́ созда́ние на́ше, помяну́, я́ко пе́рсть есмы́. Челове́к, я́ко трава́ дни́е его́, я́ко цве́т се́льный, та́ко оцвете́т, я́ко ду́х про́йде в не́м, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати гла́с слове́с Его́. Благослови́те Го́спода вся́ Си́лы Его́, слуги́ Его́, творя́щии во́лю Его́. Благослови́те Го́спода вся́ дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й и не вни́ди в су́д с рабо́м Твои́м, я́ко не оправди́тся пре́д Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя́, Го́споди, исчезе́ ду́х мо́й, не отврати́ лица́ Твоего́ от Мене́, и уподо́блюся низходя́щым в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя́ от вра́г мои́х, Го́споди, к Тебе́ прибего́х. Научи́ мя́ твори́ти во́лю Твою́, я́ко Ты́ еси́ Бог мо́й. Дух Твой Благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющия души́ мое́й, я́ко аз ра́б Тво́й е́смь.

Услы́ши мя́, Го́споди, в пра́вде Твое́й и не вни́ди в су́д с рабо́м Твои́м.

Услы́ши мя́, Го́споди, в пра́вде Твое́й и не вни́ди в су́д с рабо́м Твои́м.

Ду́х Тво́й Благи́й наста́вит мя́ на зе́млю пра́ву.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Та́же ектениа́ глаго́лется от свяще́нника.

И а́бие пое́тся во гла́с тропаря́, настоя́щаго дне́ свята́го:

Бог Госпо́дь, и яви́ся на́м, / благослове́н Гряды́й во И́мя Госпо́дне.

Стих 1: Испове́дайтеся Го́сподеви, я́ко бла́г, я́ко в ве́к ми́лость Его́.

Стих 2: Обыше́дше обыдо́ша мя́ и и́менем Госпо́дним противля́хся и́м.

Стих 3: Не умру́, но жи́в бу́ду и пове́м дела́ Госпо́дня.

Стих 4: Ка́мень, Его́же небрего́ша зи́ждущии, Се́й бы́сть во главу́ у́гла, от Го́спода бы́сть Се́й, и е́сть ди́вен во очесе́х на́ших.

Та́же глаго́лем тропа́рь прилучи́вшагося пра́здника, или́ свята́го, или́ воскре́сный прилучи́вшагося гла́са два́жды, и Богоро́дичен в то́йже гла́с. Пева́ему же Бог Госпо́дь: отхо́дит канона́рх, и стои́т посреде́ хра́ма открове́нною главо́ю и глаго́лет ти́хо вышепи́санныя стихи́: стои́т же та́мо, дóндеже начну́т певцы́ Богоро́дичен. Та́же покланя́ется на не́мже стои́т ме́сте, и обра́щься покланя́ется к лико́м, и отхо́дит: та́ко твори́т, и егда́ е́сть аллилу́иа. А́ще же е́сть аллилу́иа или́ вели́кая 40-ца, вме́сто Бог Госпо́дь, поем аллилу́иа, три́жды, во гла́с осмогла́сника.

Стихи́ же глаго́лются сия́:

Стих 1: От но́щи у́тренюет ду́х мо́й к Тебе́, Бо́же, зане́ све́т повеле́ния Твоя́ на земли́.

Стих 2: Пра́вде научи́теся живу́щии на земли́.

Стих 3: За́висть прии́мет лю́ди ненака́занныя.

Стих 4: Приложи́ и́м зла́, Го́споди, приложи́ зла́ сла́вным земли́.

И а́бие Трои́чны гла́са, ки́йждо по еди́нощи.

Песни троичны, глас 1:

Плотски́ми образова́нии Безпло́тных си́л / к мы́сленному и невеще́ственному возводи́ми уму́ / и Трисвято́ю пе́снию Триипоста́снаго Божества́ прие́млюще сия́ние, / херуви́мски возопии́м Еди́ному Бо́гу: / Свят, Свят, Свят еси́, Бо́же на́ш.

Сла́ва: Со все́ми Небе́сными си́лами / херуви́мски Су́щему в Вы́шних возопии́м, / трисвяту́ю возсыла́юще хвалу́: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: Воста́вше от сна́, припа́даем Ти́, Бла́же, / и а́нгельскую пе́снь вопие́м Ти́, Си́льне: / Свят, Свят, Свят еси́, Бо́же на́ш, Богоро́дицею поми́луй на́с.

Ве́домо бу́ди, ка́ко глаго́лати в конца́х во все́х пе́рвых трои́чнах осми́ гла́сов:

В понеде́льник пе́рваго трои́чна глаго́лати си́це: Предста́тельствы Безпло́тных Твои́х поми́луй нас.

Во вто́рник: Моли́твами Предте́чи Твоего́ поми́луй на́с.

В сре́ду: Си́лою Креста́ Твоего́ сохрани́ на́с, Го́споди.

Та́кожде и в пято́к.

В четверто́к: Моли́твами святы́х апо́стол Твои́х и святи́теля Никола́я поми́луй на́с.

А у про́чих двою трои́чнов глаго́лати, я́коже в конца́х и́х пи́сано е́сть.

Пе́сни Трои́чны, гла́с 2:

Вы́шния Си́лы подража́юще на земли́, / побе́дную пе́снь прино́сим Ти́, Бла́же: / Свят, Свят, Свят еси́, Бо́же на́ш.

Сла́ва: Несозда́нное Естество́, все́х Зижди́телю, / устне́ на́ша отве́рзи, / я́ко да возвести́м хвалу́ Твою́, вопию́ще: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: От одра́ и сна́ воздви́гл мя́ еси́, Го́споди, / у́м мо́й просвети́ и се́рдце, / и устне́ мои́ отве́рзи, / во е́же пе́ти Тя́, свята́я Тро́ице: / Свят, Свят, Свят еси́, Бо́же, Богоро́дицею поми́луй на́с.

Пе́сни Трои́чны, гла́с 3:

Тро́ице Единосу́щная и неразде́льная, / Еди́нице Триипоста́сная и Соприсносу́щная, / Тебе́, я́ко Бо́гу, а́нгельскую пе́снь вопие́м: / Свят, Свят, Свят еси́, Бо́же на́ш.

Сла́ва: Отца́ Безнача́льна, Сы́на Собезнача́льна, Ду́ха Соприсносу́щна, / Божество́ Еди́но, / херуви́мски славосло́вити дерза́юще, глаго́лем: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: Напра́сно Судия́ прии́дет, и коего́ждо дея́ния обнажа́тся, / но стра́хом зове́м в полу́нощи: / Свят, Свят, Свят еси́, Бо́же на́ш, Богоро́дицею поми́луй на́с.

Пе́сни Трои́чны, гла́с 4:

У́мных Твои́х слуг приноси́ти сме́ртнии, песнь дерза́юще, глаго́лем: / Свят, Свят, Свят еси́, Бо́же на́ш.

Сла́ва: Я́ко чи́ни ны́не А́нгельстии на Небеси́ / и стоя́ния стра́хом челове́ческая на земли́, / побе́дную пе́снь прино́сим Ти́, Бла́же: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: Безнача́льнаго Твоего́ Отца́ / и Тебе́, Христе́ Бо́же, / и Пресвята́го Твоего́ Ду́ха, / херуви́мски славосло́вити дерза́юще, глаго́лем: / Свят, Свят, Свят еси́, Бо́же на́ш, Богоро́дицею поми́луй на́с.

Пе́сни Трои́чны, гла́с 5:

Пе́нию вре́мя и моли́тве час, / приле́жно возопии́м Еди́ному Бо́гу: / Свят, Свят, Свят еси́, Бо́же на́ш.

Сла́ва: Образова́ти дерза́юще у́мная Твоя́ Во́инства, / Тро́ице Безнача́льная, / усты́ недосто́йными вопие́м: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: И́же в ложесна́ деви́ческая вмести́выйся / и не́др Оте́ческих не разлучи́выйся, / со А́нгелы и на́с, Христе́ Бо́же, приими́, вопию́щих Ти: / Свят, Свят, Свят еси́, Бо́же на́ш, Богоро́дицею поми́луй на́с.

Пе́сни Трои́чны, гла́с 6:

Предстоя́ще со стра́хом Херуви́ми, / ужаса́ющеся с тре́петом Серафи́ми, / трисвяту́ю пе́снь прино́сят немо́лчным гла́сом. / С ни́миже и мы́ вопие́м, гре́шнии: / Свят, Свят, Свят еси́, Бо́же на́ш.

Сла́ва: Безпло́тными усты́, немо́лчными славословле́ньми / шестокри́льнии вопию́т Ти трисвяту́ю пе́снь, Бо́же наш. / И мы́, и́же на земли́, / недосто́йными усты́ хвалу́ Ти возсыла́ем: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: Тро́ичныя Еди́ницы Божество́ неслия́нным соедине́нием сла́вим / и а́нгельскую пе́снь вопие́м: / Свят, Свят, Свят еси́, Бо́же на́ш, Богоро́дицею поми́луй на́с.

Пе́сни Трои́чны, гла́с 7:

Вы́шнею си́лою херуви́мски воспева́емый / и Боже́ственною сла́вою а́нгельски покланя́емый, / приими́ и на́с, су́щих на земли́, / недосто́йными устна́ми хвале́ние Тебе́ возсыла́ющих: / Свят, Свят, Свят еси́, Бо́же на́ш.

Сла́ва: Я́ко сон, ле́ность отложи́вши, душе́, / исправле́ние ко хвале́нию покажи́ Судии́ / и со стра́хом возопи́й: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: Непристу́пному Божеству́ во Еди́нице Тро́ице / серафи́мскую трисвяту́ю возсыла́юще хвалу́, / со стра́хом возопии́м: / Свят, Свят, Свят еси́, Бо́же на́ш, Богоро́дицею поми́луй на́с.

Пе́сни Трои́чны, гла́с 8:

На не́бо сердца́ иму́ще, а́нгельский подражи́м чи́н / и со стра́хом Судии́ припаде́м, побе́дную взыва́юще хвалу́: / Свят, Свят, Свят еси́, Бо́же на́ш.

Сла́ва: Зре́ти Тебе́ не сме́юще Херуви́ми, / летя́ще зову́т со восклица́нием Боже́ственную пе́снь трисвята́го гла́са, / с ни́миже и мы́ вопие́м Ти: / Свят, Свят, Свят еси́, Бо́же на́ш, моли́твами все́х святы́х Твои́х поми́луй на́с.

И ны́не: Сляца́еми мно́жеством прегреше́ний на́ших / и не сме́юще воззре́ти на высоту́ небе́сную, / ду́шу с те́лом прекло́ньше, / со А́нгелы пе́снь вопие́м Ти: / Свят, Свят, Свят еси́, Бо́же на́ш, Богоро́дицею поми́луй на́с.

А́ще же пое́м Аллилу́иа в суббо́ту вме́сто Бог Госпо́дь. Стихи́ же глаго́лим сия́:

Стих: Блаже́ни, я́же избра́л и прия́л еси́ Го́споди.

Стих: И па́мять их в ро́д и ро́д.

Стих: Ду́ши и́х во благи́х водворя́тся.

Тропарь: Глубино́ю му́дрости: Два́жды.

Сла́ва, и ны́не, Богоро́дичен.

Та́же стихосло́вим псалти́рь и седа́льны по чи́ну и́х: и пятьдеся́тый псало́м, кано́ны со стихосло́вием. На 8-й пе́сни пое́м Пе́снь Пресвяты́я Богоро́дицы:

Вели́чит душа́ Моя́ Го́спода и возра́довася ду́х Мо́й о Бо́зе Спа́се Мое́м.

Я́ко призре́ на смире́ние рабы́ Своея́, се бо, от ны́не ублажа́т Мя́ вси́ ро́ди.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца и́х.

Низложи́ си́льныя со престо́л, и вознесе́ смире́нныя: а́лчущыя испо́лни бла́г, и богатя́щыяся отпусти́ тщы́.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

К коему́ждо стиху́ припева́ем:

Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

Та́же 9-я пе́снь кано́на. А́ще у́бо не́сть неде́ля, по ирмосе́: Досто́йно е́сть: А́ще же е́сть не́деля, или́ полиеле́й пе́т, по катава́сии ектениа́:

Свят Госпо́дь Бог на́ш. Три́жды.

Сти́х: Я́ко свят Госпо́дь Бог на́ш.

Сти́х: Над все́ми людьми́ Бог на́ш. И у́тренний ексапостила́рий.

Аще же есть Четыредесятница, глаго́лем свети́льны в прилучи́вшийся гла́с. А́ще же ни́, ексапостила́рий дне́, и а́бие хвали́тны. А́ще у́бо е́сть неде́ля, или́ Влады́чний пра́здник, или́ святы́й, име́яй вели́кое славосло́вие, пое́тся си́це, Вся́кое дыха́ние, в прилучи́вшийся гла́с:

Вся́кое дыха́ние да хва́лит Го́спода.

Хвали́те Го́спода с небе́с, хвали́те Его́ в вы́шних.

Тебе́ подоба́ет песнь Бо́гу.

А́ще же ины́й де́нь, си́це:

Пе́рвый ли́к: Хвали́те Го́спода с небе́с.

Тебе́ подоба́ет пе́снь Бо́гу.

То́йже ли́к: Хвали́те Го́спода с небе́с, хвали́те Его́ в вы́шних.

Тебе́ подоба́ет пе́снь Бо́гу.

Вторы́й ли́к: Хвали́те Его́, вси́ А́нгели Его́, хвали́те Его́, вся́ Си́лы Его́.

Тебе́ подоба́ет пе́снь Бо́гу.

Хвали́те Его́, со́лнце и луна́, хвали́те Его́, вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко То́й рече́, и бы́ша, То́й повеле́, и созда́шася. Поста́ви я́ в ве́к и в ве́к ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся́ бе́здны: о́гнь, гра́д, сне́г, го́лоть, ду́х бу́рен, творя́щая сло́во Его́, го́ры и вси́ хо́лми, древа́ плодоно́сна и вси́ ке́дри, зве́рие и вси́ ско́ти, га́ди и пти́цы перна́ты. Ца́рие зе́мстии и вси́ лю́дие, кня́зи и вси́ судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне: я́ко вознесе́ся и́мя Того́ Еди́наго, испове́дание Его́ на земли́ и на небеси́. И вознесе́т ро́г люде́й Свои́х, пе́снь все́м преподо́бным Его́, сыново́м Изра́илевым, лю́дем, приближа́ющымся Ему́.

Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о Сотво́ршем eго́, и сы́нове Сио́ни возра́дуются о Царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни и́х, и мечи́ обою́ду остры́ в рука́х и́х: сотвори́ти отмще́ние во язы́цех, обличе́ния в лю́дех, связа́ти цари́ их пу́ты, и сла́вныя их ручны́ми око́вы желе́зными.

От зде́ начина́ем стихи́ры: На 6:

Сотвори́ти в ни́х суд напи́сан. Сла́ва сия́ бу́дет всем преподо́бным Его́.

Хвали́те Бо́га во святы́х Его́, / хвали́те Его́ во утверже́нии си́лы Его́.

На 4:

Хвали́те Его́ на си́лах Его́, / хвали́те Его́ по мно́жеству вели́чествия Его́.

Хвали́те Его́ во гла́се тру́бнем, / хвали́те Его́ во псалти́ри и гу́слех.

Хвали́те Его́ в тимпа́не и ли́це, / хвали́те Его́ во стру́нах и орга́не.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Аще есть неделя:

Стих: Воскресни́, Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Стих: Испове́мся Тебе́, Го́споди, всем се́рдцем мои́м, / пове́м вся чудеса́ Твоя́.

По стихи́рах, Сла́ва, стихи́ра ева́нгельская. И ны́не, настоя́щий Бого́родичен:

Преблагослове́на еси́, Богоро́дице Де́во, / Вопло́щшим бо ся из Тебе́ а́д плени́ся, / Ада́м воззва́ся, / кля́тва потреби́ся, / Е́ва свободи́ся, / сме́рть умертви́ся, и мы́ ожи́хом. / Тем воспева́юще вопие́м: / благослове́н Христо́с Бог, / благоволи́вый та́ко, сла́ва Тебе́.

Свяще́нник: Сла́ва Тебе́, показа́вшему на́м све́т.

Славосло́вие вели́кое.

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя́, благослови́м Тя́, кла́няем Ти ся, славосло́вим Тя́, благодари́м Тя́ вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй гре́х ми́ра, поми́луй на́с. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй на́с. Я́ко Ты́ еси́ Еди́н Свят; Ты́ еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.

На вся́к де́нь благословлю́ Тя́ и восхвалю́ и́мя Твое́ во ве́ки, и в ве́к ве́ка.

Сподо́би, Го́споди, в де́нь се́й без греха́ сохрани́тися на́м. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́.

Благослове́н еси́, Го́споди, научи́ мя́ оправда́нием Твои́м. Трижды.

Го́споди, прибе́жище был еси́ на́м в ро́д и ро́д. А́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́.

Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бог мой, я́ко у тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя́.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.

Святы́й Безсме́ртный, поми́луй на́с.

Та́же высоча́йшим гла́сом: Святы́й Бо́же, Святы́й Кре́пкий, Святы́й Безсме́ртный, поми́луй на́с.

И по сконча́нии славосло́вия, не глаго́лет свяще́нник: Я́ко Твое́ е́сть Ца́рство: я́коже мно́зи глаго́лют: но а́бие по конце́ трисвятаго, глаго́лем тропа́рь отпусти́тельный случи́вшийся и Богоро́дичен.

А́ще же е́сть неде́ля, глаго́лем тропа́рь воскре́сный. И в пе́рвый у́бо гла́с, 3, 5, 7, глаго́лем се́й:

Дне́сь спасе́ние ми́ру бы́сть, / пое́м Воскре́сшему из гро́ба, / и Нача́льнику жи́зни на́шея: / разруши́в бо сме́ртию сме́рть, / побе́ду даде́ нам и ве́лию ми́лость.

Во гла́с же 2, 4, 6, 8 глаго́лем се́й:

Воскре́с из гро́ба и у́зы растерза́л еси́ а́да, / разруши́л еси́ осужде́ние сме́рти, Го́споди, / вся́ от сете́й врага́ изба́вивый; / яви́вый же Себе́ апо́столом Твои́м, / посла́л еси́ я́ на про́поведь, / и те́ми ми́р Тво́й по́дал еси́ вселе́нней, / Еди́не Многоми́лостиве.

А́ще же е́сть Четыредеся́тница, или́ и́н де́нь, не име́яй славосло́вия вели́каго: по хвали́тех, Сла́ва, и ны́не, глаго́лет учине́нный бра́т:

Тебе́ сла́ва подоба́ет, Го́споди Бо́же на́ш, и Тебе́ сла́ву возсыла́ем, Отцу́, и Сы́ну, и Свято́му Духу́, ны́не и при́сно, и во ве́ки веко́в, ами́нь.

Сла́ва Тебе́, показа́вшему на́м све́т.

Славословие вседневное.

Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няем Ти ся, славосло́вим Тя́, благодари́м Тя́ вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй гре́х ми́ра, поми́луй на́с. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй на́с. Я́ко Ты́ еси́ Еди́н Свят; Ты́ еси́ Еди́н Госпо́дь, Иису́с Христо́с, во сла́ву Бо́га Отца́, ами́нь.

На вся́к де́нь благословлю́ Тя́ и восхвалю́ и́мя Твое́ во ве́ки, и в ве́к ве́ка.

Го́споди, прибе́жище бы́л еси́ на́м в ро́д и ро́д. А́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бог мо́й, я́ко у тебе́ исто́чник живота́, во све́те Твое́м у́зрим све́т. Проба́ви ми́лость Твою́ ве́дущим Тя́.

Таже: Сподо́би Го́споди, в де́нь се́й без греха́ сохрани́тися на́м. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во ве́к, де́л руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Свяще́нник: Испо́лним у́треннюю моли́тву на́шу Го́сподеви.

Та́же осмогла́сника стихи́ры, а́ще не́сть Влады́чний пра́здник.

Стих 1: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́ в ня́же смири́л ны́ еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, / и наста́ви сы́ны и́х.

Стих 2: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, / и де́ло ру́к на́ших испра́ви.

Сла́ва, и ны́не: а́ще и́мать.

Таже: Бла́го е́сть испове́датися Го́сподеви, и пе́ти И́мени Твоему́, Вы́шний: возвеща́ти зау́тра ми́лость Твою́, и и́стину Твою́ на вся́ку но́щь.

Трисвято́е. По О́тче на́ш:

Свяще́нник: Я́ко Твое́ е́сть Ца́рство:

И мы: Ами́нь.

Тропа́рь дне́. Сла́ва, и ны́не, Богоро́дичен.

Священник ектению: Поми́луй нас, Бо́же: И прочая.

А́ще е́сть Четыредеся́тница:

Бла́го е́сть испове́датися Го́сподеви, и пе́ти и́мени Твоему́, Вы́шний: возвеща́ти зау́тра ми́лость Твою́ и и́стину Твою́ на вся́ку но́щь. Два́жды.

Трисвято́е. По О́тче на́ш:

Свяще́нник: Я́ко Твое́ е́сть Ца́рство:

Мы́ же глаго́лем: В хра́ме стоя́ще сла́вы Твоея́, / на небеси́ стоя́ти мни́м, / Богоро́дице, две́рь небе́сная, / отве́рзи на́м две́ри ми́лости Твоея́.

Та́же, Го́споди поми́луй, 40.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Сы́й благослове́н Христо́с Бог на́ш, всегда́, ны́не и при́сно, и во ве́ки веко́в, ами́нь.

И мы́ глаго́лем: Небе́сный Царю́, ве́ру утверди́, язы́ки укроти́, ми́р умири́, святы́й хра́м се́й [святу́ю оби́тель сию́] до́бре сохрани́: пре́жде отше́дшыя отцы́ и бра́тию на́шу в селе́ниих пра́ведных учини́, и на́с в покая́нии и испове́дании приими́, я́ко Благи́й и Человеколю́бец.

Посе́м покло́ны вели́кия три́, глаго́люще в ни́х на ко́емждо покло́не моли́тву преподо́бнаго Ефре́ма:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Поклон.

Ду́х же целому́дрия, смиренному́дрия, терпе́ния, и любве́, да́руй ми́ рабу́ Твоему́. Поклон.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Поклон.

По си́х же и ины́х ма́лых, 12. Та́же па́ки и́н покло́н вели́кий еди́н, глаго́люще и в не́м предпи́санную моли́тву: и по е́же воста́ти на́м, начина́ет предстоя́тель пе́рвый ча́с.

* * *

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему. И покло́ны три́.

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мо́й и Бо́же мо́й, я́ко к Тебе́ помолю́ся, Го́споди. Зау́тра услы́ши гла́с мо́й, зау́тра предста́ну Ти, и у́зриши мя́. Я́ко Бог не хотя́й беззако́ния, Ты́ еси́: не присели́тся к Тебе́ лука́внуяй, ниже́ пребу́дут беззако́нницы пре́д очи́ма Твои́ма: возненави́дел еси́ вся́ де́лающыя беззако́ние. Погуби́ши вся́ глаго́лющыя лжу: му́жа крове́й и льсти́ва гнуша́ется Госпо́дь. А́з же мно́жеством ми́лости Твоея́, вни́ду в до́м Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя́ пра́вдою Твое́ю, вра́г мои́х ра́ди испра́ви пре́д Тобо́ю пу́ть мо́й. Я́ко не́сть во усте́х и́х и́стины, се́рдце и́х су́етно, гро́б отве́рст горта́нь и́х: язы́ки свои́ми льща́ху. Суди́ и́м, Бо́же, да отпаду́т от мы́слей свои́х, по мно́жеству нече́стия и́х изри́ни я́, я́ко преогорчи́ша Тя́, Го́споди. И да возвеселя́тся вси́ упова́ющии на Тя́, во ве́к возра́дуются, и всели́шися в ни́х, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ на́с.

Го́споди, прибе́жище был еси́ на́м в ро́д и ро́д. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты́ еси́. Не отврати́ челове́ка во смире́ние, и ре́кл еси́: обрати́теся, сы́нове челове́честии. Я́ко ты́сяща ле́т пре́д очи́ма Твои́ма, Го́споди, я́ко де́нь вчера́шний, и́же мимои́де, и стра́жа нощна́я. Уничиже́ния и́х ле́та бу́дут: у́тро я́ко трава́ мимои́дет. У́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исче́зохом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пре́д Тобо́ю: ве́к на́ш в просвеще́ние лица́ Твоего́. Я́ко вси́ дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е ле́т на́ших, в ни́хже се́дмьдесят ле́т, а́ще же в си́лах, о́смьдесят ле́т, и мно́жае их тру́д и боле́знь: я́ко прии́де кро́тость на ны́, и нака́жемся. Кто́ ве́сть держа́ву гне́ва Твоего́, и от стра́ха Твоего́, я́рость Твою́ исчести́? Десни́цу Твою́ та́ко скажи́ ми́, и окова́нныя се́рдцем в му́дрости. Обрати́ся, Го́споди, доко́ле? И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся́ дни́ на́ша возвесели́хомся, за дни́ в ня́же смири́л ны́ еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х. И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Ми́лость и су́д воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне́? Прехожда́х в незло́бии се́рдца моего́ посреде́ до́му моего́. Не предлага́х пре́д очи́ма мои́ма ве́щь законопресту́пную: творя́щыя преступле́ние возненави́дех. Не прильпе́ мне́ се́рдце стропти́во, уклоня́ющагося от Мене́ лука́ваго не позна́х. Оклевета́ющаго та́й и́скренняго своего́, сего́ изгоня́х: го́рдым о́ком, и несы́тым се́рдцем, с си́м не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, се́й ми́ служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пре́д очи́ма мои́ма. Во у́трия избива́х вся́ гре́шныя земли́, е́же потреби́ти от гра́да Госпо́дня вся́ де́лающыя беззако́ние.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды. Поклоны три.

Го́споди, поми́луй, трижды.

И а́ще у́бо Бог Госпо́дь пое́тся, глаго́лем: Сла́ва, тро́парь дне́. И ны́не: Что Тя нарече́м:

А́ще же Аллилу́иа, глаго́лем тропа́рь, гла́с 6: Зау́тра услы́ши гла́с мо́й, / Царю́ мо́й и Бо́же мо́й.

Стих 1: Глаго́лы моя́ внуши́, Го́споди, разуме́й зва́ние мое́.

Стих 2: Я́ко к Тебе́ помолю́ся, Го́споди.

Сла́ва, и ны́не, Богоро́дичен: Что́ Тя́ нарече́м, о Благода́тная? / Не́бо, я́ко возсия́ла еси́ Со́лнце Пра́вды. / Ра́й, я́ко прозябла́ еси́ цве́т нетле́ния: / Де́ву, я́ко пребыла́ еси́ нетле́нна: / Чи́стую Ма́терь, я́ко име́ла еси́ на святы́х Твои́х объя́тиях Сы́на, все́х Бо́га. / Того́ моли́ спасти́ся душа́м на́шим.

Стопы́ моя́ напра́ви по словеси́ Твоему́ / и да не облада́ет мно́ю вся́кое беззако́ние. / Изба́ви мя́ от клеветы́ челове́ческия, / и сохраню́ за́поведи Твоя́. / Лице́ Твое́ просвети́ на раба́ Твоего́ / и нау́чи мя́ оправда́нием Твои́м.

Да испо́лнятся уста́ моя́ хвале́ния Твоего́, Го́споди, / я́ко да воспою́ сла́ву Твою́, / ве́сь де́нь великоле́пие Твое́.

Сии́ стихи́ в Четыредеся́тнице ка́ко пою́тся, пи́сано е́сть в Трио́ди. Трисвято́е. По О́тче на́ш:

Свяще́нник: Я́ко Твое́ е́сть Ца́рство:

А́ще не́сть Четыредеся́тница, глаго́лем конда́к свята́го, или́ прилучи́вшагося пра́здника. А́ще же е́сть Четыредеся́тница, или́ кондака́ не́сть: В понеде́льник у́бо и во вто́рник, и в четверто́к глаго́ли настоя́щий Богоро́дичен:

Пресла́вную Бо́жию Ма́терь, и святы́х А́нгел Святе́йшую, / немо́лчно воспои́м се́рдцем и усты́, / Богоро́дицу сию́ испове́дающе, / я́ко вои́стинну ро́ждшую на́м Бо́га воплоще́нна, / и моля́щуюся непреста́нно о душа́х на́ших.

В сре́ду же и пято́к глаго́ли сие́: Ско́ро предвари́, пре́жде да́же не порабо́тимся враго́м / ху́лящым Тя́, и претя́щым на́м, Христе́ Бо́же на́ш, / погуби́ Кресто́м Твои́м борю́щия на́с, / да уразуме́ют, ка́ко мо́жет правосла́вных ве́ра, / моли́твами Богоро́дицы, Еди́не Человеколю́бче.

В суббо́ту се́й: Я́ко нача́тки естества́, Насади́телю тва́ри, / вселе́нная прино́сит Ти́, Го́споди, богоно́сныя му́ченики, / те́х моли́твами в ми́ре глубо́це / Це́рковь Твою́, жи́тельство Твое́, / Богоро́дицею соблюди́, Многоми́лостиве.

В неде́лю же глаго́лем ипокои́ приличи́вшагося гла́са. Го́споди, поми́луй, 40.

И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г. Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, ду́шы на́шя освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней, огради́ на́с святы́ми Твои́ми А́нгелы, да ополче́нием и́х соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй, три́жды.

Сла́ва, и ны́не: Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник возгла́с: Бо́же, уще́дри ны́ и благослови́ ны́, просвети́ лице́ Твое́ на ны́ и поми́луй ны́.

И а́ще е́сть Четыредеся́тница, твори́м три́ вели́кия покло́ны, глаго́люще предпи́санную моли́тву:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Покло́н.

Ду́х же целому́дрия, смиренному́дрия, терпе́ния, и любве́, да́руй ми́ рабу́ Твоему́. Покло́н.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Покло́н.

Подо́бне и други́х ма́лых, 12. Та́же и коне́чный. Быва́ют вку́пе, 16.

Та́же: Трисвято́е. Пресвята́я Тро́ице: О́тче на́ш: Го́споди, поми́луй, 12.

И настоя́щую моли́тву: Христе́, Све́те И́стинный, просвеща́яй и освяща́яй вся́каго челове́ка, гряду́щаго в ми́р, да зна́менается на на́с све́т лица́ Твоего́, да в не́м у́зрим Све́т Непристу́пный: и испра́ви стопы́ на́ша к де́ланию за́поведей Твои́х, моли́твами Пречи́стыя Твоея́ Ма́тере, и все́х Твои́х святы́х, ами́нь.

Сла́ва, и ны́не: Го́споди, поми́луй, трижды.

Благослови́. И быва́ет отпу́ст.

Коне́ц пе́рваго часа́.

* * *

Нача́ло часо́в

Ча́с тре́тий

По е́же благослови́ти свяще́ннику, глаго́лем: Ами́нь.

Сла́ва Тебе́, Бо́же на́ш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, три́жды.

Сла́ва, и ны́не:

О́тче на́ш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

Священник: Я́ко Твое́ есть Ца́рство:

Таже, Го́споди, поми́луй, 12.

Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Та́же псалмы́:

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, о́чи мои́ да ви́дита правоты́. Искуси́л еси́ се́рдце мое́, посети́л eси́ но́щию, искуси́л мя́ еси́, и не обре́теся во мне́ непра́вда. Я́ко да не возглаго́лют уста́ моя́ де́л челове́ческих, за словеса́ усте́н Твои́х а́з сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. А́з воззва́х, я́ко услы́шал мя́ еси́, Бо́же, приклони́ у́хо Твое́ мне́ и услы́ши глаго́лы моя́. Удиви́ ми́лости Твоя́, спаса́яй упова́ющыя на Тя́ от проти́вящихся десни́це Твое́й. Сохрани́ мя́, Го́споди, я́ко зе́ницу о́ка, в кро́ве крилу́ Твое́ю покры́еши мя́. От лица́ нечести́вых остра́стших мя́, врази́ мои́ ду́шу мою́ одержа́ша. Ту́к сво́й затвори́ша: уста́ и́х глаго́лаша горды́ню. Изгоня́щии мя́ ны́не обыдо́ша мя́, о́чи свои́ возложи́ша уклони́ти на зе́млю. Объя́ша мя́ я́ко ле́в гото́в на ло́в и я́ко ски́мен обита́яй в та́йных. Воскресни́, Го́споди, предвари́ я́ и запни́ и́м: изба́ви ду́шу мою́ от нечести́ваго, ору́жие Твое́ от вра́г руки́ Твоея́. Го́споди, от ма́лых от земли́, раздели́ я́ в животе́ и́х, и сокрове́нных Твои́х испо́лнися чре́во и́х Насы́тишася сыно́в, и оста́виша оста́нки младе́нцем свои́м. А́з же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.

К Тебе́, Го́споди, воздвиго́х ду́шу мою́, Бо́же мо́й, на Тя́ упова́х, да не постыжу́ся во ве́к, ниже́ да посмею́т ми ся врази́ мои́: И́бо вси́ терпя́щии Тя́ не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми́, и стезя́м Твои́м научи́ мя́. Наста́ви мя́ на и́стину Твою́, и научи́ мя́: я́ко Ты́ еси́ Бог Спа́с мо́й, и Тебе́ терпе́х ве́сь де́нь. Помяни́ щедро́ты Твоя́, Го́споди, и ми́лости Твоя́, я́ко от ве́ка су́ть. Гре́х ю́ности моея́, и неве́дения моего́ не помяни́, по ми́лости Твое́й помяни́ мя́ Ты́, ра́ди бла́гости Твоея́, Го́споди. Бла́г и пра́в Госпо́дь, сего́ ра́ди законоположи́т согреша́ющым на пути́. Наста́вит кро́ткия на су́д, научи́т кро́ткия путе́м Свои́м. Вси́ путие́ Госпо́дни ми́лость и и́стина, взыска́ющым заве́та Его́, и свиде́ния Его́. Ра́ди и́мене Твоего́, Го́споди, и очи́сти гре́х мой: мно́г бо е́сть. Кто́ е́сть челове́к боя́йся Го́спода? законоположи́т ему́ на пути́, его́же изво́ли. Душа́ его́ во благи́х водвори́тся, и се́мя его́ насле́дит зе́млю. Держа́ва Госпо́дь боя́щихся Его́, и заве́т Его́ яви́т и́м. О́чи мои́ вы́ну ко Го́споду, я́ко То́й исто́ргнет от се́ти но́зе мои́. При́зри на мя́ и поми́луй мя́, я́ко единоро́д и ни́щ е́смь а́з. Ско́рби се́рдца моего́ умно́жишася, от ну́жд мои́х изведи́ мя́. Ви́ждь смире́ние мое́, и тру́д мо́й, и оста́ви вся́ грехи́ моя́. Виждь враги́ моя́, я́ко умно́жишася, и ненавиде́нием непра́ведным возненави́деша мя́. Сохрани́ ду́шу мою́, и изба́ви мя́, да не постыжу́ся, я́ко упова́х на Тя́. Незло́бивии и пра́вии прилепля́хуся мне́, я́ко потерпе́х Тя́, Го́споди. Изба́ви, Бо́же, Изра́иля от все́х скорбе́й eго́.

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пре́д Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти́. Се бо, в беззако́ниих зача́т е́смь, и во гресе́х роди́ мя ма́ти моя́. Се́́ бо, и́стину возлюби́л еси́; безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от гре́х мои́х и вся беззако́ния моя́ очи́сти. Се́рдце чи́сто сози́жди во мне́, Бо́же, и ду́х прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́́ от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Тво́й тельцы́.

Сла́ва, и ны́не: Аллилу́иа, аллилу́иа, аллилу́иа, сла́ва Те́бе Бо́же. Три́жды.

Го́споди, поми́луй, три́жды.

И а́ще у́бо Бог Госпо́дь пое́тся, глаго́ли: Сла́ва, дне́ тропа́рь. И ны́не:

Богоро́дице, Ты́ еси́ Лоза́ И́стинная:

А́ще же Аллилу́иа, глаго́ли настоя́щий тропа́рь, во гла́с 6:

Го́споди, и́же Пресвята́го Твоего́ Ду́ха / в тре́тий ча́с Апо́столом Твои́м низпосла́вый: / Того́, Благи́й, не отыми́ от на́с, / но обнови́ на́с, моля́щих Ти ся.

Стих 1: Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й.

Стих 2: Не отве́ржи мене́ от лица́ Твоего́, и Ду́ха Твоего́ Свята́го не отыми́ от Мене́.

К сим же стихом припеваем: Го́споди, И́же Пресвята́го Твоего́ Ду́ха: ве́сь до конца́, и покланя́емся по еди́ножды.

Та́же, Сла́ва, и ны́не, Богоро́дичен:

Богоро́дице, Ты́ еси́ лоза́ и́стинная, / возрасти́вшая на́м Пло́д живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

Госпо́дь Бог благослове́н, / благослове́н Госпо́дь де́нь дне́, / поспеши́т на́м Бог спасе́ний на́ших, / Бог на́ш, Бог спаса́ти.

Трисвято́е. По О́тче на́ш: Конда́к дне́ свята́го, или́ пра́здника.

А́ще же по́ст, сия́ глаго́лем тропари́, глас 8:

Благослове́н еси́ Христе́ Бо́же на́ш, / И́же прему́дры ловцы́ явле́й, / низпосла́в и́м Ду́ха Свята́го, / и те́ми уловле́й вселе́нную, / Человеколю́бче, сла́ва Тебе́.

Сла́ва: Ско́рое и изве́стное да́ждь утеше́ние рабо́м Твои́м, Иису́се, / внегда́ уныва́ти духо́м на́шим, / не разлуча́йся от ду́ш на́ших в ско́рбех, / не удаля́йся от мы́слей на́ших во обстоя́ниих, но при́сно на́с предвари́. / Прибли́жися на́м, прибли́жися везде́ Сый, / я́коже со Апо́столы Твои́ми всегда́ еси́, / си́це и Тебе́ жела́ющым соедини́ Себе́, Ще́дре, да совоку́плени Тебе́ пое́м / и славосло́вим Всесвята́го Ду́ха Твоего́.

И ны́не: Наде́жда, и предста́тельство, и прибе́жище христиа́н, необори́мая стена́, / изнемога́ющим приста́нище небу́рное, Ты́ еси́ Богоро́дице Пречи́стая, / но я́ко ми́р Спаса́ющая непреста́нною Твое́ю моли́твою, / помяни́ и на́с, Де́во Всепе́тая.

Го́споди, поми́луй, 40.

И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г. Сам, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, ду́шы на́шя освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зо́л и боле́зней, огради́ на́с святы́ми Твои́ми А́нгелы, да ополче́нием и́х соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй, трижды.

Сла́ва, и ны́не: Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Моли́твами святы́х оте́ц на́ших, Го́споди, Иису́се Христе́, Бо́же на́ш, поми́луй нас.

И а́ще е́сть Четыредеся́тница, твори́м покло́ны, я́коже предписа́ся, глаго́люще моли́тву:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Покло́н.

Ду́х же целому́дрия, смиренному́дрия, терпе́ния, и любве́, да́руй ми́ рабу́ Твоему́. Покло́н.

Е́й, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Покло́н.

Та́же ма́лых 12, глаго́люще на ки́йждо покло́н: Бо́же, очи́сти мя ́гре́шнаго.

И па́ки последи́ моли́тву всю́:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Ду́х же целому́дрия, смиренному́дрия, терпе́ния, и любве́, да́руй ми́ рабу́ Твоему́. Е́й, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь.

И покло́н еди́н вели́кий.

По сконча́нии же покло́нов, глаго́лем моли́тву сию́, свята́го Марда́рия:

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Боже́ство, Еди́на Си́ла, поми́луй мя́, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.

Коне́ц тре́тьего часа́.

* * *

Ча́с шесты́й

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему. Покло́ны три́.

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя́ и кре́пцыи взыска́ша ду́шу мою́, и не предложи́ша Бо́га пре́д собо́ю. Се́ бо Бог помога́ет ми́, и Госпо́дь Засту́пник души́ мое́й. Отврати́т зла́я враго́м мои́м, и́стиною Твое́ю потреби́ и́х. Во́лею пожру́ Тебе́, испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя́ еси́, и на враги́ моя́ воззре́ о́ко мое́.

Внуши́, Бо́же, моли́тву мою́ и не пре́зри моле́ния моего́. Вонми́ ми и услы́ши мя́: возскорбе́х печа́лию мое́ю и смято́хся от гла́са вра́жия и от стуже́ния гре́шнича, я́ко уклони́ша на мя́́ беззако́ние и во гне́ве враждова́ху ми́. Се́рдце мое́ смяте́ся во мне́ и боя́знь сме́рти нападе́ на мя́. Страх и тре́пет прии́де на мя́ и покры́ мя тьма́. И ре́х: кто́ да́ст ми́ криле́, я́ко голуби́не, и полещу́, и почи́ю? Се удали́хся бе́гая и водвори́хся в пусты́ни. Ча́ях Бо́га, спаса́ющаго мя́ от малоду́шия и от бу́ри. Потопи́, Го́споди, и раздели́ язы́ки их: я́ко ви́дех беззако́ние и пререка́ние во гра́де. Днем и но́щию обы́дет и́ по стена́м его́. Беззако́ние и труд посреде́ его́ и непра́вда, и не оскуде́ от сто́гн его́ ли́хва и ле́сть. Я́ко а́ще бы враг поноси́л ми, претерпе́л бых у́бо, и а́ще бы ненави́дяй мя́ на мя́ велере́чевал, укры́л бых ся от него́. Ты́ же, челове́че равноду́шне, влады́ко мо́й и зна́емый мо́й, и́же ку́пно наслажда́лся еси́ со мно́ю бра́шен, в дому́ Бо́жии ходи́хом единомышле́нием. Да прии́дет же сме́рть на ня́, и да сни́дут во а́д жи́ви, я́ко лука́вство в жили́щах и́х, посреде́ их. А́з к Бо́гу воззва́х, и Госпо́дь услы́ша мя́. Ве́чер и зау́тра, и полу́дне пове́м, и возвещу́, и услы́шит гла́с мо́й. Изба́вит ми́ром ду́шу мою́ от приближа́ющихся мне́, я́ко во мно́зе бя́ху со мно́ю. Услы́шит Бог и смири́т я́, Сы́й пре́жде ве́к. Несть бо и́м измене́ния, я́ко не убоя́шася Бо́га. Простре́ ру́ку свою́ на воздая́ние, оскверни́ша заве́т Его́. Раздели́шася от гне́ва лица́ Его́, и прибли́жишася сердца́ их, умя́кнуша словеса́ и́х па́че еле́а, и та суть стре́лы. Возве́рзи на Го́спода печа́ль твою́, и То́й тя́ препита́ет, не да́ст в ве́к молвы́ пра́веднику. Ты́ же, Бо́же, низведе́ши их во студене́ц истле́ния, му́жие крове́й и льсти́ не преполовя́т дне́й свои́х. А́з же, Го́споди, упова́ю на Тя́.

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мо́й еси́ и Прибе́жище мое́, Бог мо́й, и упова́ю на Него́. Я́ко Той изба́вит тя́ от се́ти ло́вчи и от словесе́ мяте́жна, плещма́ Свои́ма осени́т тя́, и под криле́ Его́ наде́ешися. Ору́жием обы́дет тя и́стина Его́, не убои́шися от стра́ха нощна́го, от стрелы́ летя́щия во дни́, от ве́щи во тьме́ преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится. Оба́че очи́ма твои́ма смо́триши, и воздая́ние гре́шников у́зриши. Я́ко Ты́ Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло и ра́на не прибли́жится телеси́ твоему́. Я́ко А́нгелом Свои́м запове́сть о тебе́, сохрани́ти тя́ во все́х путе́х твои́х. На рука́х во́змут тя́, да не когда́ преткне́ши о ка́мень но́гу твою́. На а́спида и васили́ска насту́пиши, и попере́ши льва́ и зми́я. Я́ко на Мя́ упова́ и изба́влю и́, покры́ю и́, я́ко позна́ и́мя Мое́. Воззове́т ко Мне́ и услы́шу его́, с ни́м е́смь в ско́рби, изму́ его́ и просла́влю его́, долгото́ю дне́й испо́лню его́ и явлю́ ему́ спасе́ние Мое́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды.

Го́споди, поми́луй, три́жды.

И а́ще пое́тся Бог Госпо́дь, глаго́лем: Сла́ва, тропа́рь дне́. А́ще же Аллилу́иа, глаго́лем настоя́щий тропа́рь, во гла́с 2:

И́же в шесты́й де́нь же и ча́с, / на кресте́ Пригвожде́й / в раи́ дерзнове́нный Ада́мов гре́х, / и согреше́ний на́ших рукописа́ние раздери́, / Христе́ Бо́же, и спаси́ на́с.

Сти́х 1: Внуши́, Бо́же, моли́тву мою́, и не пре́зри моле́ния моего́.

Сти́х 2: Аз к Бо́гу воззва́х, и Госпо́дь услы́ша мя́.

Сла́ва, и ны́не, Богоро́дичен:

Я́ко не и́мамы дерзнове́ния за премно́гия грехи́ на́ша, / Ты́ и́же от Тебе́ Ро́ждшагося моли́, Богоро́дице Де́во, / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко ми́лостив е́сть и спасти́ моги́й, / И́же и страда́ти о на́с изво́ливый.

Ско́ро да предваря́т ны́ щедро́ты Твоя́, Го́споди, / я́ко обнища́хом зело́; / помози́ на́м, Бо́же, Спа́се на́ш, / сла́вы ра́ди И́мене Твоего́, Го́споди, изба́ви на́с / и очи́сти грехи́ на́ша, И́мене ра́ди Твоего́.

Трисвято́е. По О́тче на́ш: Конда́к дне́ свята́го. А́ще по́ст, глаго́лем тропари́ сия́, гла́с 2:

Спасе́ние соде́лал еси́ посреде́ земли́, Христе́ Бо́же, / на Кресте́ пречи́стеи ру́це Твои́ просте́рл еси́, / собира́я вся́ язы́ки, зову́щия: / Го́споди, сла́ва Тебе́.

Сла́ва: Пречи́стому о́бразу Твоему́ покланя́емся Благи́й, / прося́ще проще́ния прегреше́ний на́ших, Христе́ Бо́же, / во́лею бо благоволи́л еси́ пло́тию взы́ти на Крест, / да изба́виши, я́же созда́л еси́, от рабо́ты вра́жия; / те́м благода́рственно вопие́м Ти́: / ра́дости испо́лнил еси́ вся́, Спа́се на́ш, / прише́дый спасти́ ми́р.

И ны́не: Милосе́рдия су́щи исто́чник, / ми́лости сподо́би на́с, Богоро́дице, / при́зри на лю́ди согреши́вшия, / яви́ я́ко при́сно си́лу Твою́: / на Тя́ бо упова́юще, ра́дуйся вопие́м Ти́, / я́коже иногда́ Гаврии́л безпло́тных Архистрати́г.

Се́й глаго́лется в понеде́льник, во вто́рник и четверто́к. После́дущий же глаго́лется в сре́ду и пято́к, вместо: Милосе́рдия су́щи:

Гла́с 2, Крестобогоро́дичен:

Препросла́влена еси́, Богоро́дице Де́во, пое́м Тя́, / Кресто́м бо Сы́на Твоего́ низложи́ся а́д, и сме́рть умертви́ся, / умерщвле́ннии воста́хом, и живота́ сподо́бихомся, / ра́й восприя́хом, дре́внее наслажде́ние. / Те́м благодаря́ще, славосло́вим я́ко держа́внаго Христа́ Бо́га на́шего, / и еди́наго Многоми́лостиваго.

Го́споди, поми́луй, 40.

Моли́тва: И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г. Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней, огради́ на́с святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Посе́м: Го́споди поми́луй, три́жды.

Сла́ва, и ны́не: Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Моли́твами святы́х оте́ц на́ших, Го́споди, Иису́се Христе́, Бо́же на́ш, поми́луй на́с.

И покло́ны, я́ко рече́ся, а́ще е́сть по́ст:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Покло́н.

Ду́х же целому́дрия, смиренному́дрия, терпе́ния, и любве́, да́руй ми́ рабу́ Твоему́. Покло́н.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Покло́н.

Подо́бне и други́х ма́лых, 12.

Та́же моли́тва свята́го Вели́каго Васи́лия: Бо́же и Го́споди си́л и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый те́м нача́ла и вла́сти тьмы, Сам, Влады́ко Человеколю́бче, приими́ и на́с, гре́шных, благода́рственныя сия́ и моле́бныя моли́твы и изба́ви на́с от вся́каго всегуби́тельнаго и мра́чнаго прегреше́ния и все́х озло́бити на́с и́щущих ви́димых и неви́димых вра́г; пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.

И а́ще у́бо Бог Госпо́дь пе́то е́сть, изобрази́тельная глаго́лем зде́. А́ще же Аллилу́иа, глаго́ли я́ по девя́том часе, а девя́тый ча́с по шесто́м начина́ется си́це:

Святы́й Бо́же: По О́тче на́ш: Го́споди, поми́луй, 12.

Сла́ва, и ны́не: Прииди́те, поклони́мся: три́жды.

И псалмы́, и про́чая.

Ве́домо бу́ди, я́ко во святе́й горе́ Афо́нской, и в про́чих монастыре́х, в часе́х глаго́лют всегда́ вме́сто кондака́ предпи́санныя тропари́ на ряду́, си́речь:

Благослове́н еси́, Христе́ Бо́же на́ш: и про́чая.

А конда́к глаго́лют то́кмо на изобрази́тельных, кро́ме Влады́чних пра́здников и святы́х, егда́ пе́т полиеле́й и вели́кое славосло́вие: тогда́ бо глаго́лется везде́ конда́к.

* * *

Нача́ло изобрази́тельных глаго́ли си́це:

Благослови́, душе́ моя́, Го́спода, благослове́н еси́ Го́споди. Благослови́, душе́ моя́, Го́спода, и вся́ вну́тренняя моя́, и́мя свя́тое Его́. Благослови́, душе́ моя́, Го́спода и не забыва́й все́х воздая́ний Его́, очища́ющаго вся́ беззако́ния твоя́, исцеля́ющаго вся́ неду́ги твоя́, избавля́ющаго от истле́ния живо́т тво́й, венча́ющаго тя́ ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ все́м оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́. Ще́др и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во ве́к вражду́ет, не по беззако́нием на́шим сотвори́л е́сть на́м, ниже́ по грехо́м на́шим возда́л е́сть на́м. Я́ко по высоте́ небе́сней от земли́, утверди́л ес́ть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил е́сть от на́с беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко То́й позна́ созда́ние на́ше, помяну́, я́ко пе́рсть есмы́: челове́к, я́ко трава́ дни́е его́, я́ко цве́т се́льный, та́ко оцвете́т, я́ко ду́х про́йде в не́м, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Сво́й, и Ца́рство Его́ все́ми облада́ет. Благослови́те Го́спода вси́ А́нгели Его́, си́льнии кре́постию, творя́щии сло́во Его́, услы́шати гла́с слове́с Его́. Благослови́те Го́спода вся́ Си́лы Его́, слуги́ Его́, творя́щии во́лю Его́. Благослови́те Го́спода вся́ дела́ Его́, на вся́ком ме́сте влады́чества Его́.

Сла́ва, первый ли́к вы́шшим гла́сом. И ны́не, вторы́й ли́к.

Па́ки пе́рвый ли́к: Благослови́, душе́ моя́, Го́спода, и вся́ вну́тренняя моя́ и́мя свя́тое Его́.

Благослове́н еси́, Го́споди.

Сла́ва Отцу́ и Сы́ну и Свято́му Ду́ху.

Хвали́, душе́ моя́, Го́спода. Восхвалю́ Го́спода в животе́ мое́м, пою́ Бо́гу моему́, до́ндеже е́смь. Не наде́йтеся на кня́зи, на сы́ны челове́ческия, в ни́хже не́сть спасе́ния. Изы́дет ду́х eго́ и возврати́тся в зе́млю свою́: в то́й де́нь поги́бнут вся́ помышле́ния eго́. Блаже́н, eму́же Бог Иа́ковль Помо́щник его́, упова́ние eго́ на Го́спода Бо́га своего́, сотво́ршаго не́бо и зе́млю, мо́ре и вся́, я́же в ни́х, храня́щаго и́стину в ве́к, творя́щаго су́д оби́димым, даю́щаго пи́щу а́лчущим. Госпо́дь реши́т окова́нныя, Госпо́дь умудря́ет слепцы́, Госпо́дь возво́дит низве́рженныя, Госпо́дь лю́бит пра́ведники. Госпо́дь храни́т прише́льцы, си́ра и вдову́ прии́мет и пу́ть гре́шных погуби́т. Воцари́тся Госпо́дь во ве́к, Бог тво́й Сио́не, в ро́д и ро́д.

И ны́не и при́сно и во ве́ки веко́в. Ами́нь.

Единоро́дный Сы́не и Сло́ве Бо́жий, Безсме́ртен Сы́й / и изво́ливый спасе́ния на́шего ра́ди / воплоти́тися от Святы́я Богоро́дицы и Присноде́вы Мари́и, / непрело́жно вочелове́чивыйся; / распны́йся же, Христе́ Бо́же, сме́ртию сме́рть попра́вый, / Еди́н Сы́й Святы́я Тро́ицы, / спрославля́емый Отцу́ и Свято́му Ду́ху, спаси́ на́с.

Подоба́ет ве́дати, я́ко в Вели́кую Четыредеся́тницу не глаго́лем изобрази́тельныя псалмы́. Но по моли́тве я́же:

Влады́ко Го́споди Иису́се Христе́, Бо́же на́ш: начина́ет учине́нный ли́к си́це:

Помяни́ на́с, Го́споди: со сладкопе́нипем, во гла́с 8. И а́бие:

Блаже́ни ни́щии ду́хом:

По конце́ же стихо́в, соедини́вшимся дву́м лико́м, глаго́лют си́це:

Помяни́ на́с, Го́споди: Возгла́сно:

Во Ца́рствии Твое́м помяни́ на́с, Го́споди, егда́ прии́деши, во Ца́рствии Твое́м.

Блаже́ни ни́щии ду́хом, я́ко те́х е́сть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тции, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Блаже́ни чи́стии се́рдцем, я́ко ти́и Бо́га у́зрят.

Блаже́ни миротво́рцы, я́ко ти́и сы́нове Бо́жии нареку́тся.

Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́, лжу́ще Мене́ ра́ди.

Ра́дуйтеся и весели́теся, я́ко мзда́ ва́ша мно́га на Небесе́х.

И а́ще у́бо е́сть Четыредеся́тница, соединя́ема о́ба ли́ка пою́т со сладкопе́нием: Помяни́ на́с, Го́споди: И покло́н еди́н на еди́но ко́еждо. А́ще же ни́, ско́ро. Сла́ва, и ны́не:

Помяни́ на́с, Го́споди, егда́ прии́деши, во Ца́рствии Твое́м.

Помяни́ на́с, Влады́ко, егда́ прии́деши, во Ца́рствии Твое́м.

Помяни́ на́с, Святы́й, егда́ прии́деши, во Ца́рствии Твое́м.

Ли́к Небе́сный пое́т Тя́ и глаго́лет: Свя́т, Свя́т, Свя́т Госпо́дь Савао́ф, испо́лнь Не́бо и земля́ сла́вы Твоея́.

Стих: Приступи́те к Нему́ и просвети́теся, и ли́ца ва́ша не постыдя́тся.

Ли́к Небе́сный пое́т Тя́ и глаго́лет: Свя́т, Свя́т, Свя́т Госпо́дь Савао́ф, испо́лнь Не́бо и земля́ сла́вы Твоея́.

Сла́ва: Лик святы́х А́нгел и Арха́нгел со все́ми Небе́сными си́лами пое́т Тя́ и глаго́лет: Свя́т, Свя́т, Свя́т Госпо́дь Савао́ф, испо́лнь Не́бо и земля́ сла́вы Твоея́.

И ны́не: ¹Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. ²И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. ³Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. ⁴Распя́таго же за ны́ при Понти́йстем Пила́те, и страда́вша, и погребе́нна. ⁵И воскре́сшаго в тре́тий де́нь по Писа́нием. ⁶И возше́дшаго на Небеса́, и седя́ща одесну́ю Отца́. ⁷И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.

Втора́го собо́ра: ⁸И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. ⁹Во еди́ну Святу́ю, Собо́рную и Апо́стольскую Це́рковь. ¹⁰Испове́дую еди́но креще́ние во оставле́ние грехо́в. ¹¹Ча́ю воскресе́ния ме́ртвых; ¹²и жи́зни бу́дущаго ве́ка. Ами́нь.

Осла́би, оста́ви, прости́, Бо́же, прегреше́ния на́ша, во́льная и нево́льная, / я́же в сло́ве и в де́ле, / я́же в ве́дении и не в ве́дении, / я́же во дни́ и в нощи́, / я́же во уме́ и в помышле́нии: / вся́ на́м прости́, я́ко Благ и Человеколю́бец.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

И а́ще у́бо е́сть Влады́чний пра́здник, глаго́лем его́ конда́к.

А́ще же прилучи́тся и свята́го пра́зднуемаго в не́м, глаго́лется пе́рвее свята́го. Сла́ва, и ны́не, пра́здника. А́ще же Аллилу́иа пе́то, или́ не́сть Влады́чний пра́здник, ниже́ свята́го пра́зднуемаго, глаго́ли пе́рвее Преображе́ния, та́же дне́ и хра́ма; а́ще же е́сть хра́м Госпо́дский, глаго́ли пе́рвее хра́ма, та́же дне́, и свята́го рядова́го.

Сла́ва: Со святы́ми упо́кой:

И ны́не: Предста́тельство христиа́н: или́ хра́ма Богоро́дицы:

В понеде́льник, безпло́тных, та́кожде во вто́рник Предте́чи, и по чи́ну.

Преображе́ния:

На горе́ преобрази́лся еси́, / и я́коже вмеща́ху ученицы́ Твои́, / сла́ву Твою́, Христе́ Боже́, ви́деша, / да егда́ Тя у́зрят распина́ема, / страда́ние у́бо уразуме́ют во́льное, / ми́́рови же пропове́дят: / я́ко Ты́ еси́ вои́стинну О́тчее сия́ние.

В понеде́льник конда́к Безпло́тных, гла́с 2:

Архистрати́зи Бо́жии, служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Во вто́рник Предте́чи конда́к, гла́с 2. Подо́бен: Вы́шних ищя́:

Проро́че Бо́жий и Предте́че благода́ти, / главу́ твою́, я́ко ши́пок свяще́ннейший от земли́ обре́тше, / исцеле́ния всегда́ прие́млем, / и́бо па́ки, я́коже пре́жде / в ми́ре пропове́дуеши покая́ние.

В сре́ду и пято́к, гла́с 4:

Вознесы́йся на Кре́ст во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ на́м на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

В четверто́к святы́х Апо́столов, гла́с 2:

Тве́рдыя и Боговеща́нныя пропове́датели, / ве́рх учени́к Твои́х, Го́споди, / прия́л еси́ в наслажде́ние благи́х Твои́х и поко́й, / боле́зни бо о́нех и сме́рть прия́л еси́ па́че вся́каго всепло́дия, / Еди́не, све́дый серде́чная.

В то́йже де́нь свята́го Никола́я, гла́с 3:

В Ми́рех свя́те священноде́йствитель показа́лся еси́: / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спа́сл еси́ непови́нныя от сме́рти; / сего́ ра́ди освяти́лся еси́, / я́ко вели́кий таи́нник Бо́жия благода́ти.

В суббо́ту егда́ глаго́лем, Слава:

Со святы́ми упоко́й / Христе́, ду́ши ра́б Твои́х, / иде́же не́сть боле́знь, ни печа́ль, / ни воздыха́ние, / но жи́знь безконе́чная.

И ны́не, настоя́щий му́ченичен, гла́с 8:

Я́ко нача́тки естества́, Насади́телю тва́ри, / вселе́нная прино́сит Ти́, Го́споди, богоно́сныя му́ченики, / те́х моли́твами в ми́ре глубо́це / Це́рковь Твою́, жи́тельство Твое́, / Богоро́дицею соблюди́, Многоми́лостиве.

Сие́ же глаго́лется на ки́йждо де́нь, кро́ме суббо́ты:

Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь на́с, ве́рно зову́щих Ти: / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя́.

И а́ще е́сть Четыредеся́тница,

Го́споди, поми́луй, 40.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Священник: Бо́же, уще́дри ны́ и благослови́ ны́, просвети́ лице́ Твое́ на ны́ и поми́луй ны́.

И изображе́нныя покло́ны 16, с моли́твою свята́го Ефре́ма. И по е́же воста́ти на́м, начина́ет предстоя́тель вече́рню: Прииди́те, поклони́мся: три́жды. И предначина́тельный псало́м: Благослови́ душе́ моя́ Го́спода:

А́ще же не́сть Четыредеся́тница, по конда́ках: Го́споди, поми́луй, 12. И моли́тву:

Всесвята́я Тро́ице, / Единосу́щная Держа́во, / Неразде́льное Ца́рство, / все́х благи́х Вина́: / благоволи́ же и о мне́, гре́шнем, / утверди́, вразуми́ се́рдце мое́ / и всю́ мою́ отыми́ скве́рну. / Просвети́ мою́ мы́сль, / да вы́ну сла́влю, пою́, и покланя́юся, и глаго́лю: / Еди́н Свя́т, Еди́н Госпо́дь, Иису́с Христо́с / во сла́ву Бо́га Отца́, ами́нь.

А́ще же литурги́я, глаго́лем: Ами́нь.

Да испо́лнятся у́ста на́ша хвале́ния Твоего́, Го́споди, я́ко да пое́м сла́ву Твою́, я́ко сподо́бил еси́ на́с причасти́тися Святы́м Твои́м, Боже́ственным, Безсме́ртным и Животворя́щим Та́йнам, соблюди́ на́с во Твое́й святы́ни, ве́сь де́нь поуча́тися пра́вде Твое́й: аллилуиа, аллилуиа, аллилуиа.

Бу́ди и́мя Госпо́дне благослове́но от ны́не и до ве́ка. Три́жды.

Сла́ва, и ны́не: Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя́, и от все́х скорбе́й мои́х изба́ви мя́. Приступи́те к Нему́ и просвети́теся, и ли́ца ва́ша не постыдя́тся. Се́й ни́щий воззва́, и Госпо́дь услы́ша и́, и от все́х скорбе́й eго́ спасе́ и́. Ополчи́тся А́нгел Госпо́день о́крест боя́щихся Его́, и изба́вит и́х. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси́ святи́и Его́, я́ко не́сть лише́ния боя́щымся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ ва́с. Кто́ е́сть челове́к хотя́й живо́т, любя́й дни́ ви́дети бла́ги? Удержи́ язы́к тво́й от зла́, и устне́ твои́, е́же не глаго́лати льсти́. Уклони́ся от зла́ и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву и́х; Лице́ же Госпо́дне на творя́щыя зла́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х, и от всех скорбе́й и́х изба́ви и́х. Бли́з Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от все́х и́х изба́вит я́ Госпо́дь. Храни́т Госпо́дь вся́ ко́сти и́х, ни еди́на от ни́х сокруши́тся. Сме́рть гре́шников люта́, и ненави́дящии пра́веднаго прегре́шат. Изба́вит Госпо́дь ду́шы ра́б Свои́х, и не прегреша́т вси́, упова́ющии на Него́.

Сла́ва, и ны́не: и быва́ет отпу́ст.

* * *

Чи́н о панаги́и, быва́емый во оби́телех по вся́ дни́

По отпу́сте Боже́ственныя литурги́и, исхо́дит настоя́тель, и бра́тии после́дующим по не́м два́ два́, и глаголю́т псало́м 144:

Вознесу́ Тя, Бо́же мо́й, Царю́ мо́й, и благословлю́ и́мя Твое́ в ве́к и в ве́к ве́ка. На вся́к де́нь благословлю́ Тя и восхвалю́ и́мя Твое́ в ве́к и в ве́к ве́ка. Ве́лий Госпо́дь и хва́лен зело́, и вели́чию Его́ не́сть конца́. Ро́д и ро́д восхва́лят дела́ Твоя́ и си́лу Твою́ возвестя́т. Великоле́пие сла́вы святы́ни Твоея́ возглаго́лют и чудеса́ Твоя́ пове́дят. И си́лу стра́шных Твои́х реку́т и вели́чие Твое́ пове́дят. Па́мять мно́жества бла́гости Твоея́ отры́гнут и пра́вдою Твое́ю возра́дуются. Ще́др и Ми́лостив Госпо́дь, Долготерпели́в и Многоми́лостив. Бла́г Госпо́дь вся́ческим, и щедро́ты Его́ на все́х де́лех Его́. Да испове́дятся Тебе́, Го́споди, вся́ дела́ Твоя́, и преподо́бнии Твои́ да благословя́т Тя́. Сла́ву Ца́рствия Твоего́ реку́т, и сил́у Твою́ возглаго́лют, сказа́ти сыново́м челове́ческим си́лу Твою́, и сла́ву великоле́пия Ца́рствия Твоего́. Ца́рство Твое́, Ца́рство все́х веко́в, и влады́чество Твое́ во вся́ком ро́де и ро́де. Ве́рен Госпо́дь во все́х словесе́х Свои́х и Преподо́бен во все́х де́лех Свои́х. Утвержда́ет Госпо́дь вся́ низпа́дающыя и возставля́ет вся́ низве́рженныя. О́чи все́х на Тя́ упова́ют, и Ты́ дае́ши и́м пи́щу во благовре́мении. Отверза́еши Ты́ ру́ку Твою́ и исполня́еши вся́кое живо́тно благоволе́ния. Пра́веден Госпо́дь во все́х путе́х Свои́х и Преподо́бен во все́х де́лех Свои́х. Бли́з Госпо́дь все́м призыва́ющым Его́, все́м призыва́ющым Его́ во и́стине. Во́лю боя́щихся Его́ сотвори́т и моли́тву и́х услы́шит и спасе́т я́. Храни́т Госпо́дь вся́ лю́бящыя Его́ и вся́ гре́шники потреби́т. Хвалу́ Госпо́дню возглаго́лют уста́ моя́, и да благослови́т вся́ка пло́ть и́мя свято́е Его́ в ве́к и в ве́к ве́ка. И конча́ну бы́вшу псалму́, глаго́лем моли́тву трапе́зы: О́тче на́ш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь на́м днесь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго. Сла́ва, и ны́не: Го́споди, поми́луй, три́жды. Благослови́.

Настоя́тель или́ свяще́нник, держа́й чреду́, глаго́лет: Христе́ Бо́же, благослови́ я́стие и питие́ рабо́м Твои́м, я́ко свя́т еси́ всегда́, ны́не и при́сно, и во ве́ки веко́в, ами́нь.

И ча́сть, или́ просфора́, иму́щая возноше́на бы́ти, влага́ется в панагиа́р, и стои́т на устро́енном ме́сте. И по вкуше́нии, творя́й служе́ние глаго́лет сти́х: Моли́твами святы́х оте́ц на́ших, Го́споди Иису́се Христе́, Бо́же на́ш, поми́луй на́с.

И мы́: Ами́нь.

И воста́вше глаго́лем: Благослове́н Бог, ми́луяй и пита́яй на́с от ю́ности на́шея, дая́й пи́щу вся́кой пло́ти: испо́лни ра́дости и весе́лия сердца́ на́ша, да всегда́ вся́кое дово́льство иму́ще, преизоби́луем во вся́кое де́ло благо́е, во Христе́ Иису́се Го́споде на́шем: с Ни́мже Тебе́ сла́ва подоба́ет, держа́ва, честь и поклоне́ние со Святы́м Ду́хом, во ве́ки, ами́нь.

Сла́ва Тебе́ Го́споди, сла́ва Тебе́ Святы́й, сла́ва Тебе́ Царю́, я́ко да́л еси́ на́м бра́шна в весе́лие: испо́лни на́с и Ду́ха Свята́го, да обря́щемся пре́д Тобо́ю благоуго́дни и непосты́дни, егда́ возда́си кому́ждо по дело́м его́.

Сла́ва, и ны́не: Го́споди, поми́луй, трижды. Благослови́.

И положи́в покло́н, хотя́й возвы́сити Пресвяту́ю, глаго́лет си́це: Благослови́те мя́, отцы́ святи́и, прости́те ми́, гре́шному.

И мы́: Бог прости́т ти́, и поми́лует тя́.

И прие́м ча́сть кра́йними пе́рсты ру́к, возвыша́ет ю́ ма́ло над о́бразом Святы́я Тро́ицы, глаго́ля велегла́сно: Вели́ко И́мя.

Настоя́тель или́ иере́й чере́дный: Святы́я Тро́ицы.

И пренося́ над о́браз Богоро́дицы, крестови́дно зна́менует, глаго́ля: Пресвята́я Богоро́дице, помога́й на́м.

И мы: Тоя́ моли́твами, Бо́же, поми́луй, и спаси́ на́с.

И глаго́лем: Блажи́м Тя́, вси́ ро́ди, Богоро́дице Де́во, / в Тя́ бо Невмести́мый Христо́с Бог на́ш вмести́тися благоволи́; / блаже́ни есмы́ и мы́, предста́тельство Тя́ иму́ще: / де́нь бо и но́щь мо́лишися о на́с; / те́м, воспева́юще, вопие́м Ти́: / ра́дуйся, Благода́тная, Госпо́дь с Тобо́ю.

Та́же пое́м: Досто́йно есть я́ко вои́стинну блажи́ти Тя́, Богоро́дицу, / Присноблаже́нную и Пренепоро́чную и Ма́терь Бо́га на́шего.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И по е́же причастити́ся все́м, глаго́лет настоя́тель, или́ свяще́нник: Во мно́гия моли́твы Пречи́стыя Влады́чицы на́шея Богоро́дицы, и Присноде́вы Мари́и.

И мы́: Тоя́ моли́твами, Бо́же, поми́луй и спаси́ на́с.

Свяще́нник: Ми́лостив и ще́др Госпо́дь, пи́щу даде́ боя́щимся Его́, и пра́вда Его́ пребыва́ет в ве́к ве́ка.

Таже: Возвесели́хся о ре́кших мне́: в до́м Госпо́день по́йдем. Стоя́ще бя́ху но́ги на́ша во дво́рех твои́х, Иерусали́ме. Иерусали́м зи́ждемый я́ко гра́д, eму́же прича́стие eго́ вку́пе. Та́мо бо взыдо́ша коле́на, коле́на Госпо́дня, свиде́ние Изра́илево, испове́датися и́мени Госпо́дню, я́ко та́мо седо́ша престо́ли на су́д, престо́ли в дому́ Дави́дове. Вопроси́те же я́же о ми́ре Иерусали́ма, и оби́лие лю́бящым тя́. Бу́ди же ми́р в си́ле твое́й и оби́лие в столпостена́х твои́х. Ра́ди бра́тий мои́х и бли́жних мои́х глаго́лах у́бо ми́р о тебе́. До́му ра́ди Го́спода Бо́га на́шего взыска́х блага́я тебе́.

Трисвято́е. Пресвята́я Тро́ице: По О́тче наш:

Благодари́м Тя́, Христе́ Бо́же на́ш, я́ко насы́тил еси́ на́с земны́х Твои́х благ, не лиши́ на́с и небе́снаго Твоего́ Ца́рствия: но я́ко посреде́ ученико́в Твои́х прише́л еси́, Спа́се, ми́р дая́ и́м, прииди́ и к на́м, и спаси́ на́с.

И а́ще у́бо е́сть Влады́чний пра́здник, глаго́лется, Сла́ва, и ны́не, конда́к пра́зднику. А́ще же ни́, сия́.

Сла́ва: Бо́же оте́ц на́ших, / творя́й при́сно с на́ми по Твое́й кро́тости, / не оста́ви ми́лость Твою́ от на́с, / но моли́твами и́х / в ми́ре упра́ви живо́т.

И ны́не: Моли́твами, Го́споди, всех святы́х и Богоро́дицы, / Тво́й ми́р да́ждь на́м, / и поми́луй нас, я́ко Еди́н ще́др.

Го́споди, поми́луй, три́жды. Благослови́.

Свяще́нник глаго́лет: Благослове́н Бог, ми́луяй и пита́яй на́с от свои́х бога́тых даро́в, Свое́ю благода́тию и человеколю́бием, всегда́, ны́не и при́сно, и во ве́ки веко́в, ами́нь.

* * *

Ча́с девя́тый

По Благослове́н Бог на́ш: Сла́ва Тебе́, Бо́же наш, сла́ва Тебе́. Царю́ Небе́сный: Трисвято́е. Пресвята́я Тро́ице: О́тче на́ш. Возглас: Я́ко Твое́ есть Ца́рство: Го́споди, поми́луй, 12.

Сла́ва, и ны́не: Прииди́те, поклони́мся: три́жды.

Та́же псалмы́: Ко́ль возлю́бленна селе́ния Твоя́, Го́споди си́л! Жела́ет и скончава́ется душа́ моя́ во дворы́ Госпо́дни. Се́рдце мое́ и пло́ть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́: олтари́ Твоя́, Го́споди си́л, Царю́ мо́й и Бо́же мо́й. Блаже́ни живу́щии в дому́ Твое́м, в ве́ки веко́в восхва́лят Тя́. Блаже́н му́ж, eму́же е́сть заступле́ние его́ у тебе́, восхожде́ния в се́рдце свое́м положи́. Во юдо́ль плаче́вную, в ме́сто е́же положи́, и́бо благослове́ние да́ст законополага́яй. По́йдут от си́лы в си́лу, яви́тся Бог бого́в в Сио́не. Го́споди Бо́же си́л, услы́ши моли́тву мою́, внуши́, Бо́же Иа́ковль. Защи́тниче на́ш, ви́ждь, Бо́же, и при́зри на лице́ христа́ Твоего́. Я́ко лу́чше де́нь еди́н во дво́рех Твои́х па́че ты́сящ. Изво́лих примета́тися в дому́ Бо́га моего́ па́че, не́же жи́ти ми́ в селе́ниих гре́шничих. Я́ко ми́лость и и́стину лю́бит Госпо́дь, Бог благода́ть и сла́ву да́ст. Госпо́дь не лиши́т благи́х ходя́щих незло́бием. Го́споди Бо́же си́л, Блаже́н челове́к упова́яй на Тя́.

Благоволи́л еси́, Го́споди, зе́млю Твою́, возврати́л еси́ пле́н Иа́ковль. Оста́вил еси́ беззако́ния люде́й Твои́х, покры́л еси́ вся́ грехи́ и́х. Укроти́л еси́ ве́сь гне́в Твой, возврати́лся еси́ от гне́ва я́рости Твоея́. Возврати́ на́с, Бо́же спасе́ний на́ших, и отврати́ я́рость Твою́ от нас. Еда́ во ве́ки прогне́ваешися на ны́? Или́ простре́ши гнев Твой от ро́да в ро́д? Бо́же, Ты обра́щься оживи́ши ны, и лю́дие Твои́ возвеселя́тся о Тебе́. Яви́ на́м, Го́споди, ми́лость Твою́, и спасе́ние Твое́ да́ждь на́м. Услы́шу, что рече́т о мне́ Госпо́дь Бог: я́ко рече́т ми́р на лю́ди Своя́, и на преподо́бныя Своя́, и на обраща́ющыя сердца́ к Нему́. Оба́че бли́з боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и ми́р облобыза́стася. И́стина от земли́ возсия́, и пра́вда с Небесе́ прини́че. И́бо Госпо́дь да́ст бла́гость, и земля́ на́ша да́ст пло́д сво́й. Пра́вда пре́д Ни́м предъи́дет, и положи́т в пу́ть стопы́ своя́.

Приклони́, Го́споди, у́хо Твое́, и услы́ши мя́, я́ко ни́щ и убо́г е́смь а́з. Сохрани́ ду́шу мою́, я́ко преподо́бен е́смь: спаси́ раба́ Твоего́, Бо́же мо́й, упова́ющаго на Тя́. Поми́луй мя́, Го́споди, я́ко к Тебе́ воззову́ ве́сь де́нь. Возвесели́ ду́шу раба́ Твоего́, я́ко к Тебе́ взя́х ду́шу мою́. Я́ко Ты, Го́споди, Бла́г и Кро́ток, и Многоми́лостив все́м призыва́ющым Тя́. Внуши́, Го́споди, моли́тву мою́, и вонми́ гла́су моле́ния моего́. В де́нь ско́рби моея́ воззва́х к Тебе́, я́ко услы́шал мя́ еси́. Не́сть подо́бен Тебе́ в бозе́х, Го́споди, и не́сть по дело́м Твои́м. Вси́ язы́цы, ели́ки сотвори́л еси́, прии́дут и покло́нятся пре́д Тобо́ю, Го́споди, и просла́вят и́мя Твое́, я́ко Ве́лий еси́ Ты́, и творя́й чудеса́, Ты́ еси́ Бог еди́н. Наста́ви мя́, Го́споди, на пу́ть Тво́й, и пойду́ во и́стине Твое́й; да возвесели́тся се́рдце мое́ боя́тися и́мене Твоего́. Испове́мся Тебе́, Го́споди Бо́же мо́й, все́м се́рдцем мои́м, и просла́влю и́мя Твое́ в ве́к. Я́ко ми́лость Твоя́ ве́лия на мне, и изба́вил еси́ ду́шу мою́ от а́да преиспо́днейшаго. Бо́же, законопресту́пницы воста́ша на мя́, и со́нм держа́вных взыска́ша ду́шу мою́, и не предложи́ша Тебе́ пред собо́ю. И Ты, Го́споди Бо́же мо́й, Ще́дрый и Ми́лостивый, Долготерпели́вый, и Многоми́лостивый и и́стинный, при́зри на мя́ и поми́луй мя́, да́ждь держа́ву Твою́ о́троку Твоему́, и спаси́ сы́на рабы́ Твоея́. Сотвори́ со мно́ю зна́мение во бла́го; и да ви́дят ненави́дящии мя́, и постыдя́тся, я́ко Ты́, Го́споди, помо́гл ми́ и уте́шил мя́ еси́.

И па́ки: Сотвори́ со мно́ю зна́мение во бла́го; и да ви́дят ненави́дящии мя́, и постыдя́тся, я́ко Ты́, Го́споди, помо́гл ми́ и уте́шил мя́ еси́.

Сла́ва, и ны́не: Аллилу́иа, три́жды. Го́споди, поми́луй, три́жды.

И а́ще у́бо Бог Госпо́дь, пе́то, глаго́лем дне́, тропа́рь. А́ще же Аллилу́иа, настоя́щий, во гла́с 8:

И́же в девя́тый ча́с / нас ра́ди пло́тию смерть вкуси́вый, / умертви́ пло́ти на́шея мудрова́ние, / Христе́ Бо́же, и спаси́ на́с.

Стих 1: Да прибли́жится моли́тва моя́ пре́д Тя́ Го́споди, по словеси́ Твоему́ вразуми́ мя́.

Стих 2: Да вни́дет проше́ние мое́ пре́д Тя́, Го́споди, по словеси́ Твоему́ изба́ви мя́.

Слава, и ныне, Богоро́дичен:

И́же на́с ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве, / приими́ ро́ждшую Тя́ Богоро́дицу, моля́щуюся за ны, / и спаси́, Спа́се наш, лю́ди отча́янныя.

Не преда́ждь на́с до конца́ И́мене Твоего́ ра́ди, / и не разори́ заве́та Твоего́, / и не отста́ви ми́лости Твоея́ от на́с, / Авраа́ма ра́ди возлю́бленнаго от Тебе́, / и за Исаа́ка, раба́ Твоего́, / и Изра́иля, свята́го Твоего́.

Трисвято́е. По О́тче на́ш:

И а́ще у́бо е́сть пра́здник, глаго́ли конда́к его́. А́ще же ни́, сия́, гла́с 8:

Ви́дя разбо́йник / Нача́льника Жи́зни на Кресте́ ви́сяща, глаго́лаше: / а́ще не бы́ Бог бы́л вопло́щся, И́же с на́ми распны́йся, / не бы́ со́лнце лучи́ своя́ потаи́ло, / ниже́ бы́ земля́ трепе́щущи трясла́ся, / но вся́ терпя́й, помяни́ мя́, Го́споди, во Ца́рствии Твое́м.

Сла́ва: Посреде́ двою́ разбо́йнику, / ме́рило пра́ведное обре́теся кре́ст Твой: / о́вому у́бо низводи́му во а́д тягото́ю хуле́ния, / друго́му же легча́щуся от прегреше́ний к позна́нию Богосло́вия: / Христе́ Бо́же, сла́ва Тебе́.

И ны́не: А́гнца, и Па́стыря, и Спа́са ми́ра, / на кресте́ зря́щи Ро́ждшая Тя́, / глаго́лаше слезя́щи: / ми́р у́бо ра́дуется, прие́мля избавле́ние, / утро́ба же Моя́ гори́т, зря́щи Твое́ распя́тие, / е́же за все́х терпи́ши, / Сы́не и Бо́же мо́й.

Го́споди, поми́луй, 40.

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г: Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней, огради́ на́с святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй, три́жды.

Сла́ва, и ны́не: Честне́йшую Херуви́м / и сла́внейшую бе́з сравне́ния Серафи́м, / бе́з истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Священник: Бо́же, уще́дри ны́ и благослови́ ны́, просвети́ лице́ Твое́ на ны́ и поми́луй ны́.

И а́ще е́сть по́ст Христо́ва Рождества́, или́ святы́х Апо́стол, изображе́нныя 16 покло́ны за е́же пе́ти междоча́сие. Во святу́ю же и Вели́кую Четыредеся́тницу, то́кмо три́ вели́кия покло́ны подоба́ет твори́ти.

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Поклон.

Дух же целому́дрия, смиренному́дрия, терпе́ния, и любве́, да́руй ми́ рабу́ Твоему́. Поклон.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Поклон.

А́ще же ни́, по возгла́се моли́тву сию́ Вели́каго Васи́лия: Влады́ко Го́споди, Иису́се Христе́, Бо́же на́ш, долготерпе́вый о на́ших согреше́ниих и да́же до ны́нешняго часа́ приведы́й на́с, во́ньже, на Животворя́щем Дре́ве ви́ся, благоразу́мному разбо́йнику и́же в ра́й путесотвори́л еси́ вход и сме́ртию сме́рть разруши́л еси́, очи́сти на́с, гре́шных и недосто́йных ра́б Твои́х; согреши́хом бо и беззако́нновахом и не́смы досто́йни возвести́ очеса́ на́ша и воззре́ти на высоту́ Небе́сную: зане́ оста́вихом пу́ть пра́вды Твоея́ и ходи́хом в во́лях серде́ц на́ших; но мо́лим Твою́ безме́рную бла́гость: пощади́ на́с, Го́споди, по мно́жеству ми́лости Твоея́, и спаси́ на́с И́мене Твоего́ ра́ди свята́го, я́ко исчезо́ша в суете́ дни́е на́ши, изми́ на́с из руки́ сопроти́внаго, и оста́ви на́м грехи́ на́ша, и умертви́ плотско́е на́ше мудрова́ние, да, ве́тхаго отложи́вше челове́ка, в но́ваго облеце́мся: и Тебе́ поживе́м, на́шему Влады́це и Благоде́телю, и та́ко, Твои́м после́дующе повеле́нием, в ве́чный поко́й дости́гнем, иде́же е́сть все́х веселя́щихся жили́ще, Ты́ бо еси́ вои́стинну и́стинное весе́лие и ра́дость лю́бящих Тя́ Христе́ Бо́же на́ш, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в, ами́нь.

Сла́ва, и ны́не: Го́споди, поми́луй, три́жды.

Благослови́. И отпу́ст.

Ве́домо бу́ди, я́ко во Афо́нской горе́, и в про́чих монастыря́х, девя́тый ча́с в па́перти глаго́лют.

* * *

Нача́ло вече́рни.

Глаго́лет свяще́нник: Благослове́н Бог на́ш всегда́, ны́не и при́сно, и во ве́ки веко́в.

И начина́ет предстоя́тель, или́ учине́нный чте́ц:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Благослови́, душе́ моя́, Го́спода, Го́споди, Бо́же мо́й, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в ве́к ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ и́м. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ го́р про́йдут во́ды. Напая́ют вся́ зве́ри се́льныя, жду́т она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т гла́с. Напая́яй го́ры от превы́спренних Свои́х, от плода́ де́л Твои́х насы́тится земля́. Прозяба́яй траву́ ското́м, и зла́к на слу́жбу челове́ком, извести́ хле́б от земли́. И вино́ весели́т се́рдце челове́ка, ума́стити лице́ еле́ем, и хле́б се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л е́сть луну́ во времена́, со́лнце позна́ за́пад сво́й. Положи́л еси́ тму́, и бы́сть но́щь, в не́йже про́йдут вси́ зве́рие дубра́внии, ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся́ прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими. Та́мо корабли́ препла́вают, зми́й се́й, его́же созда́л еси́ руга́тися ему́. Вся́ к Тебе́ ча́ют, да́ти пи́щу и́м во бла́го вре́мя. Да́вшу Тебе́ и́м соберу́т, отве́рзшу Тебе́ ру́ку вся́ческая испо́лнятся бла́гости. Отвра́щшу же Тебе́ лице́, возмяту́тся, отъи́меши ду́х и́х, и исче́знут, и в пе́рсть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х: призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь. Да услади́тся Ему́ бесе́да моя́, а́з же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти и́м: благослови́, душе́ моя́, Го́спода.

Со́лнце позна́ за́пад свой: положи́л еси́ тму́, и бы́сть но́щь. Я́ко возвели́чишася дела́ Твоя́ Го́споди, вся́ прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды.

Та́же ектения́ Вели́кая.

Та́же стихосло́вие Псалти́ря, и по стихосло́вии ектения́ ма́лая.

И а́бие. Го́споди воззва́х, в прилучи́вшийся гла́с:

Го́споди, воззва́х к Тебе́, услы́ши мя́. / Услы́ши мя́, Го́споди.

Пе́рвый ли́к: Го́споди, воззва́х к Тебе́, услы́ши мя́: / вонми́ гла́су моле́ния моего́, / внегда́ воззва́ти ми́ к Тебе́. / Услы́ши мя́, Го́споди.

Вторы́й ли́к: Да испра́вится моли́тва моя́, / я́ко кади́ло пре́д Тобо́ю, / воздея́ние руку́ мое́ю, / же́ртва вече́рняя. / Услы́ши мя, Го́споди.

И по чи́ну стихи́:

Положи́, Го́споди, хране́ние усто́м мои́м, и две́рь огражде́ния о устна́х мои́х.

Не уклони́ се́рдце мое́ в словеса́ лука́вствия, непщева́ти вины́ о гресе́х.

С челове́ки де́лающими беззако́ние, и не сочту́ся со избра́нными и́х.

Нака́жет мя́ пра́ведник ми́лостию и обличи́т мя́: еле́й же гре́шнаго да не нама́стит главы́ моея́.

Я́ко еще́ и моли́тва моя́ во благоволе́ниих и́х. Поже́рты бы́ша при ка́мени судии́ и́х.

Услы́шатся глаго́ли мои́, я́ко возмого́ша: я́ко то́лща земли́ просе́деся на земли́, расточи́шася ко́сти и́х при а́де.

Я́ко к Тебе́, Го́споди, Го́споди, о́чи мои́: на Тя́ упова́х, не отыми́ ду́шу мою́.

Сохрани́ мя́ от се́ти, ю́же соста́виша ми́, и от собла́зн де́лающих беззако́ние.

Паду́т во мре́жу свою́ гре́шницы: еди́н е́смь а́з, до́ндеже прейду́.

Гла́сом мои́м ко Го́споду воззва́х, гла́сом мои́м ко Го́споду помоли́хся.

Пролию́ пре́д Ни́м моле́ние мое́, печа́ль мою́ пре́д Ним возвещу́.

Внегда́ исчеза́ти от Мене́ ду́ху моему́, и Ты позна́л еси́ стези́ моя́.

На пути́ се́м, по нему́же хожда́х, скры́ша се́ть мне́.

Смотря́х одесну́ю и возгля́дах, и не бе́ зна́яй мене́.

Поги́бе бе́гство от Мене́, и не́сть взыска́яй ду́шу мою́.

Воззва́х к Тебе́, Го́споди, ре́х: Ты́ еси́ упова́ние мое́, ча́сть моя́ еси́ на земли́ живы́х.

Вонми́ моле́нию моему́, я́ко смири́хся зело́, изба́ви мя́ от гоня́щих мя́, я́ко укрепи́шася па́че мене́.

На 10, стихиры:

Изведи́ из темни́цы ду́шу мою́, испове́датися и́мени Твоему́.

Мене́ ждут пра́ведницы, до́ндеже возда́си мне́.

На 8:

Из глубины́ воззва́х к Тебе́, Го́споди, Го́споди, услы́ши гла́с мо́й.

Да бу́дут у́ши Твои́ вне́млюще гла́су моле́ния моего́.

На 6:

А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

И́мене ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

На 4:

От стра́жи у́тренния до но́щи, от стра́жи у́тренния да упова́ет Изра́иль на Го́спода.

Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний eго́.

На 2:

Хвали́те Го́спода вси язы́цы, похвали́те Его́ вси́ лю́дие.

Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Сла́ва: Свята́го мине́и. И ны́не: Богоро́дичен.

А́ще не́сть свята́го: Сла́ва и ны́не: Богоро́дичен.

Творе́ние Софро́ния, патриа́рха Иерусали́мскаго.

Све́те ти́хий святы́я сла́вы, / Безсме́ртнаго, Отца́ Небе́снаго, / Свята́го Блаже́ннаго, Иису́се Христе́: / прише́дше на за́пад со́лнца, / ви́девше све́т вече́рний, / пое́м Отца́, Сы́на и Свята́го Ду́ха, Бо́га; / досто́ин еси́ во вся́ времена́ / пе́т бы́ти гла́сы преподо́бными, / Сы́не Бо́жий, живо́т дая́й: / те́мже ми́р Тя́ сла́вит.

Подоба́ет ве́дати, я́ко а́ще прилучи́тся Четыредеся́тница, или́ Аллилу́иа, вме́сто проки́менов седми́цы, пое́м си́я. В понеде́льник ве́чера: Аллилу́иа, три́жды, во гла́с 6.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Аллилу́иа.

Сти́х: И во ве́ки веко́в.

Мы́ же высоча́йшим гла́сом: Аллилу́иа.

Во вто́рник и в четверто́к ве́чера: Аллилу́иа.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть. Аллилу́иа.

Сти́х: И во ве́ки веко́в. Аллилу́иа.

В сре́ду ве́чера: Аллилу́иа.

Сти́х: Во всю зе́млю изы́де веща́ние их, и в концы́ вселе́нныя глаго́лы их. Аллилу́иа.

Сти́х: И во ве́ки веко́в. Аллилу́иа.

В неде́лю же и в пято́к ве́чера, никогда́же пое́тся А́ллилуиа. А́ще же е́сть Бог Госпо́дь, пою́тся проки́мены сия́.

В неде́лю ве́чера, глас 8:

Се ны́не благослови́те Го́спода / вси ́раби́ Госпо́дни.

Сти́х: Стоя́щии в хра́ме Госпо́дни, во дво́рех до́му Бо́га на́шего.

В понеде́льник ве́чера, гла́с 4:

Госпо́дь услы́шит мя́, / внегда́ воззва́ти ми́ к Нему́.

Сти́х: Внегда́ призва́ти ми́, услы́ша мя́ Бог пра́вды моея́.

Во вто́рник ве́чера, глас 1:

Ми́лость Твоя́, Го́споди, / пожене́т мя́ вся́ дни́ живота́ моего́.

Сти́х: Госпо́дь пасе́т мя́, и ничто́же мя́ лиши́т, на ме́сте зла́чне, та́мо всели́ мя́.

В сре́ду ве́чера, гла́с 5:

Бо́же, во и́мя Твое́ спаси́ мя́, / и в си́ле Твое́й суди́ ми́.

Сти́х: Бо́же, услы́ши моли́тву мою́, внуши́ глаго́лы у́ст мои́х.

В четверто́к ве́чера, гла́с 6:

По́мощь моя́ от Го́спода, / сотво́ршаго не́бо и зе́млю.

Сти́х: Возведо́х о́чи мои́ в го́ры, отню́дуже прии́дет по́мощь моя́.

В пято́к ве́чера, гла́с 7:

Бо́же, Засту́пник мой еси́ Ты́, / и ми́лость Твоя́ предвари́т мя́.

Сти́х: Изми́ мя́ от вра́г мои́х, Бо́же, и от востаю́щих на мя́ изба́ви мя́.

В суббо́ту ве́чера, гла́с 6:

Госпо́дь воцари́ся, / в ле́поту облече́ся.

Сти́х: Облече́ся Госпо́дь в си́лу и препоя́сася.

Сти́х: И́бо утверди́ вселе́нную, / я́же не подви́жется.

Сти́х: До́му Твоему́ подоба́ет святы́ня / Го́споди, в долготу́ дни́й.

И по проки́мене глаго́лет:

Сподо́би, Го́споди, в ве́чер се́й без греха́ сохрани́тися на́м; / благослове́н еси́, Го́споди Бо́же оте́ц на́ших, / и хва́льно и просла́влено и́мя Твое́ во ве́ки, ами́нь./

Бу́ди, Го́споди, ми́лость Твоя́ на на́с, я́коже упова́хом на Тя; / благослове́н еси́, Го́споди, научи́ мя́ оправда́нием Твои́м; / благослове́н еси́, Влады́ко, вразуми́ мя́ оправда́нием Твои́м; / благослове́н еси́, Святы́й, просвети́ мя́ оправда́нии Твои́ми. /

Го́споди, ми́лость Твоя́ во ве́к, де́л руку́ Твое́ю не пре́зри: / Тебе́ подоба́ет хвала́, Тебе́ подоба́ет пе́ние, / Тебе́ сла́ва подоба́ет, Отцу́ и Сы́ну и Свято́му Ду́ху, / ны́не и при́сно и во ве́ки веко́в, ами́нь.

Свяще́нник: Испо́лним вече́рнюю моли́тву на́шу:

И про́чая. И по возгла́се стихи́ры стихо́вны, в ни́хже глаго́лем настоя́щия стихи́:

Сти́х 1: К Тебе́ возведо́х о́чи мои́, живу́щему на небеси́; се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Сти́х 2: Поми́луй нас Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Сла́ва, и ны́не, Богоро́дичен.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко, / по глаго́лу Твоему́ с ми́ром: / я́ко ви́деста о́чи мои́ спасе́ние Твое́, / е́же еси́ угото́вал пред лице́м всех люде́й, / све́т во открове́ние язы́ков, / и сла́ву люде́й Твои́х Изра́иля.

Трисвято́е. По О́тче на́ш: тропа́рь прилучи́вшагося пра́здника, или́ свята́го, или́ дне́. Сла́ва, и ны́не, Богоро́дичен: и отпу́ст. А́ще же е́сть Четыредеся́тница или́ и́н по́ст, и Аллилу́иа пе́то, глаго́ли тропари́ сия́, во гла́с 4:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю: / Благослове́на Ты́ в жена́х, и Благослове́н Пло́д чре́ва Твоего́, / я́ко Спа́са родила́ еси́ ду́ш на́ших. Покло́н 1.

Сла́ва: Крести́телю Христо́в, все́х на́с помяни́, / да изба́вимся от беззако́ний на́ших: / тебе́ бо даде́ся благода́ть моли́тися за ны́. Покло́н 1.

И ны́не: Моли́те за ны́ святи́и Апо́столи, святи́и вси́, / да изба́вимся от бе́д и скорбе́й: / ва́с бо те́плыя предста́тели ко Спа́су стяжа́хом. Покло́н 1.

Под Твое́ благоутро́бие прибега́ем, Богоро́дице, / моле́ния на́ша не пре́зри во обстоя́нии, / но от бе́д изба́ви ны́, Еди́на Чи́стая, Еди́на Благослове́нная.

Без покло́на. Го́споди, поми́луй, 40.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Священник: Сый благослове́н Христо́с Бог на́ш, всегда́, ны́не и при́сно, и во ве́ки веко́в. Ами́нь.

Ве́домо бу́ди, я́ко у гре́ков сию́ моли́тву предстоя́тель глаго́лет:

Небе́сный Царю́, ве́ру утверди́, язы́ки укроти́, мир умири́, святы́й хра́м се́й [святу́ю оби́тель сию́] до́бре сохрани́: пре́жде отше́дшыя отцы́ и бра́тию на́шу в селе́ниих пра́ведных учини́, и на́с в покая́нии и испове́дании приими́, я́ко Благи́й и Человеколю́бец.

Посе́м покло́ны вели́кия три́, глаго́люще в себе́ на ко́емждо покло́не моли́тву преподо́бнаго Ефре́ма:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Покло́н вели́кий.

Дух же целому́дрия, смиренному́дрия, терпе́ния, и любве́, да́руй ми́ рабу́ Твоему́. Покло́н вели́кий.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Покло́н вели́кий.

Та́же ма́лых покло́нов 12, глаго́люще себе́ вта́й на ки́йждо покло́н: Бо́же, очи́сти мя́, гре́шнаго.

И па́ки, сконча́в покло́ны, глаго́лем моли́тву всю́ вышепи́санную: Го́споди и Влады́ко живота́ моего́: И покло́н еди́н вели́кий.

Та́же, Трисвято́е. И покло́ны три́. И по О́тче наш: Го́споди, поми́луй, 12.

Та́же моли́тву: Всесвята́я Тро́ице, Единосу́щная Держа́во, Неразде́льное Ца́рство, все́х благи́х Вина́: благоволи́ же и о мне́, гре́шнем, утверди́, вразуми́ се́рдце мое́ и всю́ мою́ отыми́ скве́рну; просвети́ мою́ мысль, да вы́ну сла́влю, пою́, и покланя́юся, и глаго́лю: Еди́н Свя́т, Еди́н Госпо́дь, Иису́с Христо́с во сла́ву Бо́га Отца́, ами́нь.

Посе́м: Бу́ди И́мя Госпо́дне благослове́но от ны́не и до ве́ка. Трижды.

И покло́ны 3. Сла́ва, и ны́не: Та́же псало́м 33:

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя, и от все́х скорбе́й мои́х изба́ви мя́. Приступи́те к Нему́ и просвети́теся, и ли́ца ва́ша не постыдя́тся. Се́й ни́щий воззва́, и Госпо́дь услы́ша и́, и от все́х скорбе́й его́ спасе́ и́. Ополчи́тся А́нгел Госпо́день о́крест боя́щихся Его́, и изба́вит и́х. Вкуси́те и ви́дите, я́ко благ Госпо́дь; блаже́н му́ж, и́же упова́ет На́нь. Бо́йтеся Го́спода, вси́ святи́и Его́, я́ко не́сть лише́ния боя́щымся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ ва́с. Кто́ есть челове́к хотя́й живо́т, любя́й дни ви́дети бла́ги? Удержи́ язы́к тво́й от зла́, и устне́ твои́, е́же не глаго́лати льсти́. Уклони́ся от зла́ и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву и́х. Лице́ же Госпо́дне на творя́щыя зла́я, е́же потреби́ти от земли́ па́мять и́х. Воззва́ша пра́веднии, и Госпо́дь услы́ша и́х, и от все́х скорбе́й и́х изба́ви и́х. Бли́з Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от все́х и́х изба́вит я́ Госпо́дь. Храни́т Госпо́дь вся́ ко́сти и́х, ни́ еди́на от ни́х сокруши́тся. Смерть гре́шников люта́, и ненави́дящии пра́веднаго прегре́шат. Изба́вит Госпо́дь ду́шы ра́б Свои́х, и не прегреша́т вси́, упова́ющии на Него́.

И псало́м 144:

Вознесу́ Тя, Бо́же мой, Царю́ мой, и благословлю́ и́мя Твое́ в ве́к и в ве́к ве́ка. На вся́к де́нь благословлю́ Тя́ и восхвалю́ и́мя Твое́ в ве́к и в ве́к ве́ка. Ве́лий Госпо́дь и хва́лен зело́, и вели́чию Его́ не́сть конца́. Ро́д и ро́д восхва́лят дела́ Твоя́ и си́лу Твою́ возвестя́т. Великоле́пие сла́вы святы́ни Твоея́ возглаго́лют и чудеса́ Твоя́ пове́дят. И си́лу стра́шных Твои́х реку́т и вели́чие Твое́ пове́дят. Па́мять мно́жества бла́гости Твоея́ отры́гнут и пра́вдою Твое́ю возра́дуются. Ще́др и Ми́лостив Госпо́дь, Долготерпели́в и Многоми́лостив. Бла́г Госпо́дь вся́ческим, и щедро́ты Его́ на все́х де́лех Его́. Да испове́дятся Тебе́, Го́споди, вся́ дела́ Твоя́, и преподо́бнии Твои́ да благословя́т Тя́. Сла́ву Ца́рствия Твоего́ реку́т, и си́лу Твою́ возглаго́лют, сказа́ти сыново́м челове́ческим си́лу Твою́, и сла́ву великоле́пия Ца́рствия Твоего́. Ца́рство Твое́, Ца́рство всех веко́в, и влады́чество Твое́ во вся́ком ро́де и ро́де. Ве́рен Госпо́дь во все́х словесе́х Свои́х и Преподо́бен во все́х де́лех Свои́х. Утвержда́ет Госпо́дь вся́ низпа́дающыя и возставля́ет вся́ низве́рженныя. О́чи все́х на Тя́ упова́ют, и Ты́ дае́ши и́м пи́щу во благовре́мении. Отверза́еши Ты́ ру́ку Твою́ и исполня́еши вся́кое живо́тно благоволе́ния. Пра́веден Госпо́дь во все́х путе́х Свои́х и Преподо́бен во все́х де́лех Свои́х. Бли́з Госпо́дь все́м призыва́ющым Его́, все́м призыва́ющым Его́ во и́стине. Во́лю боя́щихся Его́ сотвори́т и моли́тву и́х услы́шит и спасе́т я́. Храни́т Госпо́дь вся́ лю́бящыя Его́ и вся́ гре́шники потреби́т. Хвалу́ Госпо́дню возглаго́лют уста́ моя́, и да благослови́т вся́ка пло́ть и́мя свято́е Его́ в ве́к и в ве́к ве́ка.

И посе́м, Досто́йно е́сть я́ко вои́стинну блажи́ти Тя́, Богоро́дицу, / Присноблаже́нную и Пренепоро́чную и Ма́терь Бо́га на́шего.

Сла́ва, и ны́не, Го́споди, поми́луй, три́жды. Благослови́.

И быва́ет коне́чный отпу́ст. Сия́ же быва́ют, егда́ е́сть Вели́кий по́ст.

А́ще же е́сть и́н по́ст, и пе́то Аллилу́иа, по покло́нех, и трисвято́м, и по возгласе: Я́ко Твое́ есть Ца́рство: Го́споди, поми́луй, 12. Сла́ва, и ны́не: И па́ки, Го́споди, поми́луй, три́жды. Благослови́. И отпу́ст.

А́ще же е́сть Бог Госпо́дь, по Трисвято́м отпусти́тельный тропа́рь дне́, и отпу́ст. А́ще же хо́щеши, по конце́ вече́рни глаго́ли моли́тву сию́ Вели́каго Васи́лия:

Благослове́н еси́ Влады́ко Вседержи́телю, просвети́вый день све́том со́лнечным, и но́щь уясни́вый заря́ми о́гненными, е́же долготу́ дне́ прейти́ на́м сподо́бил еси́, и прибли́житися нача́лом но́щи: услы́ши моле́ние на́ше, и все́х люде́й Твои́х, и все́х на́с прости́ во́льная и нево́льная согреше́ния; приими́ вече́рняя на́ша моле́ния, и низпосли́ мно́жество ми́лости Твоя́, и щедро́т Твои́х на достоя́ние Твое́: остени́ на́с святы́ми Твои́ми А́нгелы, вооружи́ на́с ору́жием пра́вды, огради́ на́с и́стиною Твое́ю, соблюди́ на́с си́лою Твое́ю, изба́ви на́с от вся́каго обстоя́ния, вся́каго наве́та сопроти́внаго; пода́ждь же на́м и настоя́щий ве́чер, с приходя́щею но́щию соверше́н, свя́т, ми́рен, безгре́шен, безбла́знен, безмечта́нен, и вся́ дни́ живота́ на́шего, моли́твами святы́я Богоро́дицы, и все́х святы́х от ве́ка благоугоди́вших, ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И быва́ет отпу́ст.

* * *

Вше́дше же в трапе́зу, глаго́лем:

Ядя́т убо́зии, и насы́тятся, и восхва́лят Го́спода взыска́ющии Его́, жива́ бу́дут сердца́ их в ве́к ве́ка.

Сла́ва, и ны́не: Го́споди, поми́луй, три́жды. Благослови́.

И благословля́ет свяще́нник трапе́зу:

Христе́ Бо́же, благослови́ я́стие и питие́ рабо́м Твои́м, я́ко свят еси́ всегда́, ны́не и при́сно, и во ве́ки веко́в.

По яде́нии же, Сла́ва, и ны́не:

Бы́сть чре́во Твое́ свята́я трапе́за, иму́щая небе́снаго Хле́ба, Христа́ Бо́га на́шего, от Него́же вся́к яды́й не умира́ет, я́коже рече́ все́х, Богороди́тельнице, Пита́тель.

И по се́м: Честне́йшую Херуви́м:

Та́же: Возвесели́л ны́ еси́, Го́споди, в творе́ниих Твои́х, и в де́лех руку́ Твое́ю возра́дуемся; зна́менася на на́с све́т лица́ Твоего́, Го́споди, да́л еси́ весе́лие в се́рдце мое́м, от плода́ пшени́цы, вина́ и еле́а своего́́ умно́жишася; в ми́ре вку́пе усну́ и почи́ю, я́ко Ты́, Го́споди, еди́наго на упова́нии всели́л мя́ еси́.

Сла́ва, и ны́не: Го́споди, поми́луй, три́жды. Благослови́.

Священник: С на́ми Бог, Свое́ю благода́тию и человеколю́бием, всегда́, ны́не и при́сно, и во ве́ки веко́в, ами́нь.

* * *

Нача́ло с Богом вели́каго повече́рия

Глаго́лет свяще́нник: Благослове́н Бог на́ш всегда́, ны́не и при́сно, и во ве́ки веко́в.

И начина́ют бра́тия: Ами́нь.

Сла́ва Тебе́, Бо́же на́ш, сла́ва Тебе́.

Царю́ Небе́сный: Трисвято́е. Пресвята́я Тро́ице: О́тче на́ш: Го́споди, поми́луй, 12.

Прииди́те, поклони́мся: три́жды.

И а́бие, а́ще е́сть пе́рвая седми́ца Вели́кия Четыредеся́тницы, начина́ем: Бо́же, в по́мощь мою́ вонми́: И испо́лнившуся сему́, пое́м вели́кий кано́н.

А́ще же ни́, начина́ем си́це:

Внегда́ призва́ти ми́, услы́ша мя́ Бог пра́вды моея́: в ско́рби распространи́л мя́ еси́. Уще́дри мя́ и услы́ши моли́тву мою́. Сы́нове челове́честии, доко́ле тяжкосе́рдии? Вску́ю лю́бите суету́ и и́щете лжи́? И уве́дите, я́ко удиви́ Госпо́дь преподо́бнаго Своего́: Госпо́дь услы́шит мя́, внегда́ воззва́ти ми́ к Нему́. Гне́вайтеся, и не согреша́йте, я́же глаго́лете в сердца́х ва́ших, на ло́жах ва́ших умили́теся. Пожри́те же́ртву пра́вды и упова́йте на Го́спода. Мно́зи глаго́лют: кто́ яви́т на́м блага́я? Зна́менася на на́с све́т лица́ Твоего́, Го́споди. Да́л еси́ весе́лие в се́рдце мое́м, от плода́ пшени́цы, вина́ и еле́а своего́ умно́жишася. В ми́ре вку́пе усну́ и почи́ю, я́ко Ты́, Го́споди, еди́наго на упова́нии всели́л мя́ еси́.

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Поми́луй мя́, Го́споди, я́ко не́мощен есмь; исцели́ мя, Го́споди, я́ко смято́шася ко́сти моя́. И душа́ моя́ смяте́ся зело́: и Ты, Го́споди, доко́ле? Обрати́ся, Го́споди, изба́ви ду́шу мою́, спаси́ мя́ ра́ди ми́лости Твоея́: я́ко не́сть в сме́рти помина́яй Тебе́, во а́де же кто испове́стся Тебе́? Утруди́хся воздыха́нием мои́м, измы́ю на вся́ку но́щь ло́же мое́, слеза́ми мои́ми посте́лю мою́ омочу́. Смяте́ся от я́рости о́ко мое́, обетша́х во все́х вразе́х мои́х. Отступи́те от Мене́, вси́ де́лающии беззако́ние, я́ко услы́ша Госпо́дь гла́с пла́ча моего́. Услы́ша Госпо́дь моле́ние мое́, Госпо́дь моли́тву мою́ прия́т. Да постыдя́тся и смяту́тся вси́ врази́ мои́, да возвратя́тся и устыдя́тся зело́ вско́ре.

Доко́ле, Го́споди, забу́деши мя́ до конца́? Доко́ле отвраща́еши лице́ Твое́ от менé? Доко́ле положу́ сове́ты в души́ мое́й, боле́зни в се́рдце мое́м де́нь и но́щь? Доко́ле вознесе́тся вра́г мо́й на мя́? При́зри, услы́ши мя́, Го́споди Бо́же мо́й, просвети́ óчи мои́, да не когда́ усну́ в сме́рть. да не когда́ рече́т вра́г мо́й, укрепи́хся на него́. Стужа́ющии ми́ возра́дуются, а́ще подви́жуся. А́з же на ми́лость Твою́ упова́х, возра́дуется се́рдце мое́ о спасе́нии Твое́м. Воспою́ Го́сподеви благоде́явшему мне́, и пою́ и́мени Го́спода Вы́шняго. При́зри, услы́ши мя́, Го́споди Бо́же мо́й, просвети́ óчи мои́, да не когда́ усну́ в сме́рть; да не когда́ рече́т вра́г мо́й: укрепи́хся на него́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды. Покло́ны 3.

Го́споди, поми́луй, три́жды.

Сла́ва и ны́не: К Тебе́, Го́споди, воздвиго́х ду́шу мою́, Бо́же мо́й, на Тя́ упова́х, да не постыжу́ся во ве́к, ниже́ да посмею́т ми ся врази́ мои́: и́бо вси́ терпя́щии Тя́ не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми, и стезя́м Твои́м научи́ мя. Наста́ви мя́ на и́стину Твою́, и научи́ мя: я́ко Ты́ еси́ Бог Спа́с мо́й, и Тебе́ терпе́х ве́сь де́нь. Помяни́ щедро́ты Твоя́, Го́споди, и ми́лости Твоя́, я́ко от ве́ка су́ть. Грех ю́ности моея́, и неве́дения моего́ не помяни́, по ми́лости Твое́й помяни́ мя Ты́, ра́ди бла́гости Твоея́, Го́споди. Бла́г и пра́в Госпо́дь, сего́ ра́ди законоположи́т согреша́ющым на пути́. Наста́вит кро́ткия на су́д, научи́т кро́ткия путе́м Свои́м. Вси́ путие́ Госпо́дни ми́лость и и́стина, взыска́ющым заве́та Его́, и свиде́ния Его́. Ра́ди и́мене Твоего́, Го́споди, и очи́сти гре́х мо́й, мно́г бо е́сть. Кто есть челове́к, боя́йся Го́спода? Законоположи́т ему́ на пути́, его́же изво́ли. Душа́ его́ во благи́х водвори́тся, и се́мя его́ насле́дит зе́млю. Держа́ва Госпо́дь боя́щихся Его́, и заве́т Его́ яви́т и́м. О́чи мои́ вы́ну ко Го́споду, я́ко То́й исто́ргнет от се́ти но́зе мои́. При́зри на мя́ и поми́луй мя́, я́ко единоро́д и ни́щ е́смь а́з. Ско́рби се́рдца моего́ умно́жишася, от ну́жд мои́х изведи́ мя. Ви́ждь смире́ние мое́, и тру́д мо́й, и оста́ви вся́ грехи́ моя́. Ви́ждь враги́ моя́, я́ко умно́жишася, и ненавиде́нием непра́ведным возненави́деша мя́. Сохрани́ ду́шу мою́, и изба́ви мя́, да не постыжу́ся, я́ко упова́х на Тя́. Незло́бивии и пра́вии прилепля́хуся мне́, я́ко потерпе́х Тя́, Го́споди. Изба́ви, Бо́же, Изра́иля от все́х скорбе́й eго́.

На Тя, Го́споди, упова́х, да не постыжу́ся во ве́к, пра́вдою Твое́ю изба́ви мя́ и изми́ мя. Приклони́ ко мне́ у́хо Твое́, ускори́ изъя́ти мя́; бу́ди ми́ в Бо́га Защи́тителя, и в до́м прибе́жища, е́же спасти́ мя. Я́ко держа́ва моя́ и прибе́жище мое́ еси́ Ты́: и и́мене Твоего́ ра́ди наста́виши мя́, и препита́еши мя́. Изведе́ши мя́ от се́ти сея́, ю́же скры́ша ми́, я́ко Ты́ еси́ Защи́титель мо́й, Го́споди. В ру́це Твои́ предложу́ ду́х мо́й: изба́вил мя́ еси́, Го́споди Бо́же и́стины. Возненави́дел еси́ храня́щыя суеты́ вотще́: а́з же на Го́спода упова́х. Возра́дуюся и возвеселю́ся о ми́лости Твое́й, я́ко призре́л еси́ на смире́ние мое́, спасл еси́ от нужд ду́шу мою́. И не́си мене́ затвори́л в рука́х вра́жиих, поста́вил еси́ на простра́нне но́зе мои́. Поми́луй мя́, Го́споди, я́ко скорблю́: смяте́ся я́ростию о́ко мое́, душа́ моя́ и утро́ба моя́. Я́ко исчезе́ в боле́зни живо́т мо́й и ле́та моя́ в воздыха́ниих: изнемо́же нището́ю кре́пость моя́ и ко́сти моя́ смято́шася. От все́х вра́г мои́х бы́х поноше́ние, и сосе́дом мои́м зело́, и стра́х зна́емым мои́м: ви́дящии мя́ во́н бежа́ша от Мене́. Забве́н бы́х я́ко ме́ртв от се́рдца, бы́х я́ко сосу́д погубле́н. Я́ко слы́шах гажде́ние мно́гих, живу́щих о́крест: внегда́ собра́тися и́м вку́пе на мя́, прия́ти ду́шу мою́ совеща́ша. А́з же на Тя́, Го́споди, упова́х, ре́х: Ты́ еси́ Бог мо́й. В руку́ Твое́ю жре́бии мои́, изба́ви мя́ из руки́ вра́г мои́х и от гоня́щих мя́. Просвети́ лице́ Твое́ на раба́ Твоего́, спаси́ мя́ ми́лостию Твое́ю. Го́споди, да не постыжу́ся, я́ко призва́х Тя́: да постыдя́тся нечести́вии и сни́дут во а́д. Не́мы да бу́дут устны́ льсти́выя, глаго́лющыя на пра́веднаго беззако́ние, горды́нею и уничиже́нием. Ко́ль мно́гое мно́жество бла́гости Твоея́, Го́споди, ю́же скры́л еси́ боя́щымся Тебе́, соде́лал еси́ упова́ющым на Тя́ пре́д сы́ны челове́ческими. Скры́еши и́х в та́йне лица́ Твоего́ от мяте́жа челове́ческа, покры́еши их в кро́ве от пререка́ния язы́к. Благослове́н Госпо́дь, я́ко удиви́ ми́лость Свою́ во гра́де огражде́ния. А́з же ре́х во изступле́нии мое́м: отве́ржен е́смь от лица́ о́чию Твое́ю: сего́ ра́ди услы́шал еси́ гла́с моли́твы моея́, внегда́ воззва́х к Тебе́. Возлюби́те Го́спода, вси́ преподо́бнии Его́, я́ко и́стины взыска́ет Госпо́дь, и воздае́т изли́ше творя́щым горды́ню. Мужа́йтеся, и да крепи́тся се́рдце ва́ше, вси́ упова́ющии на Го́спода.

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мо́й еси́ и Прибе́жище мое́, Бог мо́й, и упова́ю на Него́. Я́ко То́й изба́вит тя́ от се́ти ло́вчи и от словесе́ мяте́жна. Плещма́ Свои́ма осени́т тя́, и по́д криле́ Его́ наде́ешися. Ору́жием обы́дет тя́ и́стина Его́, не убои́шися от стра́ха нощна́го, от стрелы́ летя́щия во дни́, от ве́щи во тме́ преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тма́ одесну́ю тебе́, к тебе́ же не прибли́жится. Оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло́ и ра́на не прибли́жится телеси́ твоему́. Я́ко А́нгелом Свои́м запове́сть о тебе́, сохрани́ти тя́ во все́́х путе́х твои́х. На рука́х во́змут тя́, да не когда́ преткне́ши о ка́мень но́гу твою́. На а́спида и васили́ска насту́пиши, и попере́ши льва́ и зми́я. Я́ко на Мя́ упова́ и изба́влю и́: покры́ю и́, я́ко позна́ и́мя Мое́. Воззове́т ко Мне́ и услы́шу eго́: с ни́м е́смь в ско́рби, изму́ eго́ и просла́влю eго́; долгото́ю дний испо́лню eго́ и явлю́ eму́ спасе́ние Мое́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Три́жды.

Го́споди, поми́луй, трижды.

Сла́ва и ны́не: А́ще е́сть по́ст, покло́ны три́. Та́же начина́ем глаго́лати стихи́ со сладкопе́нием, не ско́ро, и вели́ким гла́сом.

Пе́рвый ли́к: С на́ми Бог, разуме́йте язы́цы, / и покаря́йтеся: / Я́ко с на́ми Бог.

Вторы́й ли́к, то́жде. Та́же по чи́ну ки́йждо ли́к сво́й сти́х.

Пе́рвый ли́к: Услы́шите до после́дних земли́: / Я́ко с на́ми Бог.

Вторы́й ли́к: Могу́щии покаря́йтеся: / Я́ко с на́ми Бог.

А́ще бо па́ки возмо́жете, / и па́ки побежде́ни бу́дете: / Я́ко с на́ми Бог.

И и́же а́ще сове́т совещава́ете, / разори́т Госпо́дь: / Я́ко с на́ми Бог.

И сло́во, е́же а́ще возглаго́лете, / не пребу́дет в ва́с: / Я́ко с на́ми Бог.

Стра́ха же ва́шего не убои́мся, / ниже́ смути́мся: / Я́ко с на́ми Бог.

Го́спода же Бо́га на́шего Того́ освяти́м, / и Той бу́дет на́м в стра́х: / Я́ко с на́ми Бог.

И а́ще на Него́ наде́яся бу́ду, / бу́дет мне́ во освяще́ние: / Я́ко с на́ми Бог.

И упова́я бу́ду на Него́, / и спасу́ся И́м: / Я́ко с на́ми Бог.

Се́ а́з и де́ти, я́же ми́ даде́ Бог: / Я́ко с на́ми Бог.

Лю́дие ходя́щии во тьме́, / ви́деша све́т ве́лий: / Я́ко с на́ми Бог.

Живу́щии во стране́ и се́ни сме́ртней, / све́т возсия́ет на вы́: / Я́ко с на́ми Бог.

Я́ко Отроча́ роди́ся на́м, / Сын, и даде́ся на́м: / Я́ко с на́ми Бог.

Его́же нача́льство бы́сть на ра́ме Его́: / Я́ко с на́ми Бог.

И ми́ра Его́ не́сть преде́ла: / Я́ко с на́ми Бог.

И нарица́ется И́мя Его́, / Вели́ка Сове́та А́нгел: / Я́ко с на́ми Бог.

Чу́ден Сове́тник: / Я́ко с на́ми Бог.

Бог кре́пок, Власти́тель, / Нача́льник ми́ра: / Я́ко с на́ми Бог.

Оте́ц бу́дущаго ве́ка: / Я́ко с на́ми Бог.

Испо́лнившим же ся стихо́м, я́ко предрече́ся, пое́тся.

С на́ми Бог, разуме́йте язы́цы, / и покаря́йтеся: / Я́ко с на́ми Бог.

И па́ки еди́ницею от обою́ ли́ку.

Сла́ва: Пе́рвый ли́к: С на́ми Бог.

И ны́не: Вторы́й, то́жде.

Та́же два́ ли́ка вку́пе: Я́ко с на́ми Бог.

И а́бие настоя́щия тропари́.

Пе́рвый ли́к: Де́нь преше́д, благодарю́ Тя́, Го́споди, ве́чер, прошу́, с но́щию без греха́ пода́ждь ми́, Спа́се, и спаси́ мя.

Вторы́й ли́к. Сла́ва: День преше́д, славосло́влю Тя́, Влады́ко, ве́чер, прошу́, с но́щию безсобла́знство пода́ждь ми́, Спа́се, и спаси́ мя.

Два́ ли́ка. И ны́не: День преше́д, песносло́влю Тя́, Святы́й, ве́чер, прошу́, с но́щию ненаве́тен пода́ждь ми́, Спа́се, и спаси́ мя.

Вку́пе два́ ли́ка: Безпло́тное естество́ Херуви́мское, немо́лчными пе́сньми Тя́ славосло́вят. Шестокри́льная живо́тная серафи́ми, непреста́нными гла́сы Тя́ превозно́сят: А́нгелов же вся́ Во́инства трисвяты́ми пе́сньми Тя́ восхваля́ют. Пре́жде бо все́х еси́ Сы́й Оте́ц, и собезнача́льна и́маши Твоего́ Сы́на: и равноче́стна нося́й Ду́ха жи́зни, Тро́ицы явля́еши неразде́льное. Пресвята́я Де́во Ма́ти Бо́жия, и и́же Сло́ва самови́дцы и слуги́: проро́к же и му́ченик вси́ ли́цы, я́ко безсме́ртну иму́ще жизнь: о все́х моли́теся приле́жно, я́ко вси́ есмы́ в беда́х. Да пре́лести изба́вльшеся лука́ваго, а́нгельскую вопие́м пе́снь: Святы́й, Святы́й, Святы́й, Трисвяты́й Го́споди, поми́луй и спаси́ на́с, ами́нь.

И а́бие ни́зким гла́сом: ¹Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. ²И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. ³Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. ⁴Распя́таго же за ны́ при Понти́йстем Пила́те, и страда́вша, и погребе́нна. ⁵И воскре́сшаго в тре́тий де́нь по Писа́нием. ⁶И возше́дшаго на Небеса́, и седя́ща одесну́ю Отца́. ⁷И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.

⁸И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. ⁹Во еди́ну Святу́ю, Собо́рную и Апо́стольскую Це́рковь. ¹⁰Испове́дую еди́но креще́ние во оставле́ние грехо́в. ¹¹Ча́ю воскресе́ния ме́ртвых; ¹²и жи́зни бу́дущаго ве́ка. Ами́нь.

И а́бие, Пресвята́я: вся́ глаго́лются по два́жды, кроме́ Пресвята́я Влады́чице, е́же глаго́лется три́жды:

Пресвята́я Влады́чице Богоро́дице, моли́ о на́с гре́шных.

Вся́ Небе́сныя Си́лы Святы́х А́нгел и Арха́нгел, моли́те о на́с гре́шных.

Святы́й Иоа́нне проро́че, и Предте́че, и Крести́телю Го́спода на́шего Иису́са Христа́, моли́ о на́с гре́шных.

Святи́и сла́внии Апо́столи, проро́цы и му́ченицы, и вси́ святи́и, моли́те о на́с гре́шных.

Преподо́бнии и богоно́снии отцы́ на́ши, па́стырие и учи́телие вселе́нныя, моли́те о на́с гре́шных.

Зде́ же глаго́лется и святы́й хра́ма.

Непобеди́мая, и непостижи́мая, и Боже́ственная Си́ло Честна́го и Животворя́щаго Креста́, не оста́ви на́с гре́шных.

Бо́же, очи́сти на́с гре́шных.

Бо́же, очи́сти на́с гре́шных, и поми́луй на́с.

Та́же: Трисвято́е. Пресвята́я Тро́ице: О́тче на́ш:

И пое́м тропари́ сия́ в понеде́льник и в сре́ду ве́чера, во гла́с 2. [А́ще же прилучи́тся пра́здник, пое́м тропа́рь пра́здника.]

Просвети́ о́чи мои́ Христе́ Бо́же, / да не когда́ усну́ в смерть, / да не когда́ рече́т вра́г мо́й: / укрепи́хся на него́.

Сла́ва: Засту́пник души́ моея́ бу́ди Бо́же, / я́ко посреде́ хожду́ сете́й мно́гих, / изба́ви мя́ от ни́х и спаси́ мя, Бла́же, / я́ко Человеколю́бец.

И ны́не, Богоро́дичен: Я́ко не и́мамы дерзнове́ния за премно́гия грехи́ на́ша, / Ты́ и́же от Тебе́ Ро́ждшагося моли́, Богоро́дице Де́во: / мно́го бо мо́жет моле́ние Ма́тернее ко благосе́рдию Влады́ки; / не пре́зри гре́шных мольбы́, Всечи́стая, / я́ко ми́лостив е́сть и спасти́ моги́й, / И́же и страда́ти о на́с изво́ливый.

И́ны тропари́ во вто́рник и в четверто́к ве́чера, во гла́с 8:

Неви́димых вра́г мои́х неусыпа́ние ве́си Го́споди, / и окая́нныя пло́ти моея́ неможе́ние ве́си Созда́вый мя́; / те́мже в ру́це Твои́ предаю́ ду́х мо́й, / покры́й мя́ крило́ма Твоея́ бла́гости, / да не когда́ усну́ в сме́рть, / и у́мныя мои́ о́чи просвети́ / в наслажде́ние Боже́ственных слове́с Твои́х, / и воздви́гни мя́ во вре́мя благопотре́бно к Твоему́ славосло́вию, / я́ко еди́н Бла́г и Человеколю́бец.

Сти́х: При́зри, и услы́ши мя́, Го́споди Бо́же мо́й:

Я́ко стра́шен су́д Тво́й, Го́споди, А́нгелом предстоя́щим, / челове́ком вводи́мым, кни́гам разгиба́емым, / дело́м испыту́емым, помысло́м истязу́емым: / ки́й су́д бу́дет мне́, зача́тому во гресе́х? / Кто́ ми пла́мень угаси́т? Кто́ ми тьму́ просвети́т? / А́ще не Ты́, Го́споди, поми́луеши мя́, / я́ко Человеколю́бец.

Сла́ва: Сле́зы ми́ да́ждь, Бо́же, / я́коже иногда́ жене́ гре́шнице: / и сподо́би мя́ омочи́ти но́зе Твои́, / я́же мя́ от пути́ пре́лести свободи́вшия, / и ми́ро благоуха́ния Тебе́ приноси́ти, / житие́ чи́сто, покая́нием ми́ созда́нное, / да услы́шу и а́з жела́емый Тво́й гла́с: / ве́ра твоя́ спасе́ тя, иди́ в ми́ре.

И ны́не, Богоро́дичен: Непосты́дную, Богоро́дице, наде́жду Твою́ име́я, спасу́ся, / предста́тельство Твое́ стяжа́в, Пречи́стая, не убою́ся: / пожену́ враги́ моя́ и побежду́ я́, во еди́н оболки́йся, / я́ко в броня́ кро́в Тво́й, и всемогу́щую Твою́ по́мощь, / моля́ся вопию́ Ти: / Влады́чице, спаси́ мя моли́твами Твои́ми, / и возста́ви мя́ от мра́чнаго сна́ к Твоему́ славосло́вию, / си́лою из Тебе́ Воплоти́вшагося Сы́на Бо́жия.

Го́споди, поми́луй, 40.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Иерей: Моли́твами святы́х оте́ц на́ших, Го́споди, Иису́се Христе́, Бо́же на́ш, поми́луй на́с, ами́нь.

И моли́тву сию́ Вели́каго Васи́лиа: Го́споди Го́споди, избавле́й на́с от вся́кия стрелы́ летя́щия во дни́, изба́ви на́с и от вся́кия ве́щи во тьме́ преходя́щия. Приими́ же́ртву вече́рнюю ру́к на́ших воздея́ние. Сподо́би же на́с и нощно́е по́прище без поро́ка прейти́, неискуше́ны от злы́х. И изба́ви на́с от вся́каго смуще́ния и боя́зни, я́же от диа́вола на́м прибыва́ющия. Да́руй душа́м на́шим умиле́ние, и помысло́м на́шим попече́ние, е́же на стра́шнем и пра́веднем Твое́м суде́ испыта́ния. Пригвозди́ стра́ху Твоему́ пло́ти на́ша, и умертви́ у́ды на́ша су́щия на земли́: да и со́нным безмо́лвием просвети́мся зре́нием суде́б Твои́х. Отими́ же от на́с вся́кое мечта́ние неподо́бное, и по́хоть вре́дну. Возста́ви же на́с во вре́мя моли́твы, утвержде́ны в ве́ре, и преспева́ющия в за́поведех Твои́х, благоволе́нием, и бла́гостию Единоро́днаго Сы́на Твоего́: с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

И а́бие: Прииди́те, поклони́мся: три́жды. И по́клоны 3.

Та́же псало́м 50: Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю, и гре́х мо́й пре́до мно́ю е́сть вы́ну. Тебе́ Еди́ному согреши́х и лука́вое пре́д Тобо́ю сотвори́х. Я́ко да оправди́шися во словесе́х Твои́х, и победи́ши внегда́ суди́ти Ти́. Се́ бо, в беззако́ниих зача́т е́смь, и во гресе́х роди́ мя ма́ти моя́. Се бо, и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́, возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бых у́бо: всесожже́ния не благоволи́ши. Же́ртва Бо́гу ду́х сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Го́споди, услы́ши моли́тву мою́, и во́пль мо́й к Тебе́ да прии́дет. Не отврати́ лица́ Твоего́ от Мене́: во́ньже а́ще де́нь скорблю́, приклони́ ко мн́е у́хо Твое́: во́ньже а́ще день призову́ Тя, ско́ро услы́ши мя́. Я́ко исчезо́ша я́ко ды́м дни́е мои́, и ко́сти моя́ я́ко суши́ло сосхо́шася. Уя́звен бы́х я́ко трава́, и и́зсше се́рдце мое́, я́ко забы́х сне́сти хле́б мо́й. От гла́са воздыха́ния моего́ прильпе́ кость моя́ пло́ти мое́й. Уподо́бихся нея́сыти пусты́нней, бы́х я́ко нощны́й вран на ны́рищи. Бде́х, и бы́х я́ко пти́ца осо́бящаяся на зде́. Ве́сь де́нь поноша́ху ми́ врази́ мои́, и хва́лящии мя́ мно́ю кленя́хуся. Зане́ пе́пел я́ко хле́б ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́ргл мя́ еси́. Дни́е мои́ я́ко се́нь уклони́шася, и а́з я́ко се́но изсхо́х. Ты́ же Го́споди, во ве́к пребыва́еши, и па́мять Твоя́ в ро́д и ро́д. Ты́ воскре́с уще́дриши Сио́на, я́ко вре́мя уще́дрити его́, я́ко прии́де вре́мя. Я́ко благоволи́ша раби́ Твои́ ка́мение его́, и персть eго́ уще́дрят. И убоя́тся язы́цы и́мене Госпо́дня, и вси́ ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния и́х. Да напи́шется сие́ в ро́д и́н, и лю́дие зи́ждемии восхва́лят Го́спода. Я́ко прини́че с высоты́ святы́я Своея́, Госпо́дь с Небесе́ на зе́млю призре́: услы́шати воздыха́ние окова́нных, разреши́ти сы́ны умерщвле́нных; возвести́ти в Сио́не И́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и царе́м, е́же рабо́тати Го́сподеви. Отвеща́ eму́ на пути́ кре́пости eго́, умале́ние дне́й мои́х возвести́ ми. Не возведи́ мене́ в преполове́ние дне́й мои́х: в ро́де родо́в ле́та Твоя́. В нача́лех Ты́, Го́споди, зе́млю основа́л еси́, и дела́ руку́ Твое́ю су́ть небеса́. Та́ поги́бнут, Ты́ же пребыва́еши: и вся́, я́ко ри́за обетша́ют, и я́ко оде́жду свие́ши я́ и изменя́тся. Ты́ же то́йжде еси́, и ле́та Твоя́ не оскуде́ют. Сы́нове ра́б Твои́х вселя́тся, и се́мя их во ве́к испра́вится.

Моли́тва Манасси́и царя́ Иуде́йска: Го́споди Вседержи́телю, Бо́же оте́́ц на́ших, Авраа́мов, и Исаа́ков, и Иа́ковль, и се́мене и́х пра́веднаго: сотвори́вый не́бо и зе́млю со все́ю ле́потою и́х, связа́вый мо́ре сло́вом повеле́ния Твоего́, заключи́вый бе́здну, и запеча́тствовавый ю́ стра́шным и сла́вным и́менем Твои́м, его́же вся боя́тся, и трепе́щут от лица́ си́лы Твоея́, я́ко непостоя́нно великоле́пие сла́вы Твоея́², и нестерпи́мь гнев, е́же на гре́шники преще́ния Твоего́. Безме́рна же и неизсле́дованна ми́лость обеща́ния Твоего́: Ты́ бо еси́ Госпо́дь Вы́шний, благоутро́бен, долготерпели́в и многоми́лостив, и ка́яйся о зло́бах челове́ческих. Ты́ Го́споди, по мно́жеству бла́гости Твоея́, обеща́л еси́ покая́ние и оставле́ние согреши́вшим Тебе́, и мно́жеством щедро́т Твои́х, определи́л еси́ покая́ние гре́шником во спасе́ние. Ты у́бо Го́споди Бо́же си́л, не положи́л еси́ покая́ние пра́ведным, Авраа́му и Исаа́ку и Иа́кову, не согреши́вшим Тебе́. Но положи́л еси́ покая́ние на мне́, гре́шнем: зане́ согреши́х па́че числа́ песка́ морска́го. Умно́жишася беззако́ния моя́, Го́споди, умно́жишася беззако́ния моя́: и не́смь досто́ин воззре́ти, и ви́дети высоту́ небе́сную от мно́жества непра́вд мои́х. Сля́чен е́смь мно́гими у́зами желе́зными, во е́же не возвести́ главы́ моея́, и не́сть ми́ ослабле́ния: зане́ прогне́вах я́рость Твою́, и лука́вое пре́д Тобо́ю сотвори́х, не сотвори́вый во́ли Твоея́, и не сохрани́вый повеле́ний Твои́х. И ны́не приклоня́ю коле́на се́рдца, тре́буя от Тебе́ бла́гости: согреши́х, Го́споди, согреши́х, и беззако́ния моя́ а́з ве́м, но прошу́ моля́ся, осла́би ми́, Го́споди, осла́би ми́, и не погуби́ мене́ со беззако́ньми мои́ми. Ниже́ в ве́к враждова́в соблюде́ши зо́л мои́х, ниже́ осу́диши мя́ в преиспо́дних земли́. Зане́ Ты́ еси́ Бо́же, Бог ка́ющихся, и на мне́ яви́ши всю́ бла́гость Твою́, я́ко недосто́йна су́ща спасе́ши мя́, по мно́зей ми́лости Твое́й, и восхвалю́ Тя́ вы́ну во дне́х живота́ моего́: я́ко Тя́ пое́т вся́ си́ла небе́сная, и Твоя́ е́сть сла́ва во ве́ки веко́в, ами́нь.

Трисвято́е. Покло́ны три́. Пресвята́я Тро́ице: О́тче на́ш:

Возгла́с: Я́ко Твое́ е́сть Ца́рство:

И тропари́ сия́, во гла́с 6:

Поми́луй на́с, Го́споди, поми́луй на́с; / вся́каго бо отве́та недоуме́юще, / сию́ Ти моли́тву / я́ко Влады́це, гре́шнии прино́сим: поми́луй на́с.

Сла́ва: Го́споди, поми́луй на́с, / на Тя́ бо упова́хом; / не прогне́вайся на ны́ зело́, / ниже́ помяни́ беззако́ний на́ших, / но при́зри и ны́не я́ко благоутро́бен, / и изба́ви ны́ от вра́г на́ших; / Ты́ бо еси́ Бог на́ш, / и мы́ лю́дие Твои́, / вси́ дела́ руку́ Твое́ю, / и и́мя Твое́ призыва́ем.

И ны́не: Милосе́рдия две́ри отве́рзи на́м, / благослове́нная Богоро́дице, / наде́ющиися на Тя́ да не поги́бнем, / но да изба́вимся Тобо́ю от бе́д: / Ты́ бо еси́ спасе́ние ро́да христиа́нскаго.

Го́споди, поми́луй, 40.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Моли́твами святы́х оте́ц на́ших, Го́споди, Иису́се Христе́, Бо́же на́ш, поми́луй на́с, ами́нь.

И моли́тву: Влады́ко Бо́же О́тче Вседержи́телю, Го́споди, Сы́не Единоро́дный Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя́, гре́шнаго: и и́миже ве́си судьба́ми, спаси́ мя недосто́йнаго раба́ Твоего́, я́ко благослове́н еси́ во ве́ки веко́в, ами́нь.

Прииди́те, поклони́мся: трижды.

И а́бие: Бо́же, в по́мощь мою́ вонми́, Го́споди, помощи́ ми́ потщи́ся. Да постыдя́тся и посра́мятся и́щущии ду́шу мою́. Да возвратя́тся вспя́ть и постыдя́тся хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́гоже, бла́гоже. Да возра́дуются и возвеселя́тся о Тебе́ вси́ и́щущии Тебе́, Бо́же; и да глаго́лют вы́ну, да возвели́чится Госпо́дь, лю́бящии спасе́ние Твое́. А́з же ни́щ е́смь и убо́г, Бо́же, помози́ ми: Помо́щник мо́й и Изба́витель мо́й еси́ Ты́, Го́споди, не закосни́.

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й: и не вни́ди в су́д с рабо́м Твои́м, я́ко не оправди́тся пре́д Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́: душа́ моя́, я́ко земля́ безво́дная Тебе́. Ско́ро услы́ши мя́, Го́споди, исчезе́ ду́х мо́й: не отврати́ лица́ Твоего́ от Мене́, и уподо́блюся низходя́щым в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя от вра́г мои́х, Го́споди, к Тебе́ прибего́х, научи́ мя твори́ти во́лю Твою́, я́ко Ты́ еси́ Бо́г мо́й. Ду́х Тво́й Благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́: и ми́лостию Твое́ю потреби́ши враги́ моя́ и погуби́ши вся́ стужа́ющия души́ мое́й, я́ко а́з ра́б Тво́й е́смь.

Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няем Ти ся, славосло́вим Тя́, благодари́м Тя́, вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше: Го́споди Бо́же, А́гнче Бо́жий, Сы́не Оте́чь, взе́мляй гре́х ми́ра, поми́луй нас: взе́мляй грехи́ ми́ра, приими́ моли́тву на́шу, седя́й одесну́ю Отца́, поми́луй на́с; я́ко Ты́ еси́ Еди́н Свя́т; Ты́ еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.

На вся́ку но́щь благословлю́ Тя и восхвалю́ и́мя Твое́ во ве́ки, и в ве́к ве́ка.

Го́споди, прибе́жище бы́л еси́ на́м в ро́д и ро́д; а́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты́ еси́ Бог мой: я́ко у тебе́ исто́чник живота́, во све́те Твое́м у́зрим све́т. Проба́ви ми́лость Твою́ ве́дущим Тя́.

Таже: Сподо́би Го́споди, в но́щь сию́ без греха́ сохрани́тися на́м; благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́; благослове́н еси́, Го́споди, научи́ мя оправда́нием Твои́м; благослове́н еси́, Влады́ко, вразуми́ мя оправда́нием Твои́м; благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во ве́к, де́л руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Посе́м глаго́лем кано́н рядовы́й свято́му, или́ Богоро́дице. И по исполне́нии кано́на и тропаре́й: Трисвято́е. Пресвята́я Тро́ице: О́тче на́ш:

Та́же пое́м велегла́сно и ко́сно, на гла́с 6: Го́споди си́л, с на́ми бу́ди, / ино́го бо ра́зве Тебе́ / помо́щника в ско́рбех не и́мамы: / Го́споди си́л, поми́луй на́с.

И отвеща́ет то́жде други́й ли́к.

И пое́т наче́нший ли́к:

Стих 1: Хвали́те Бо́га во святы́х Его́, / хвали́те Его́ во утверже́нии си́лы Его́. Го́споди си́л, с на́ми бу́ди:

Вторы́й ли́к:

Стих 2: Хвали́те Его́ на си́лах Его́, / хвали́те Его́ по мно́жеству вели́чествия Его́. Го́споди си́л, с на́ми бу́ди:

Стих 3: Хвали́те Его́ во гла́се тру́бнем, / хвали́те Его́ во псалти́ри и гу́слех. Го́споди си́л, с на́ми бу́ди:

Стих 4: Хвали́те Его́ в тимпа́не и ли́це, / хвали́те Его́ во стру́нах и орга́не. Го́споди си́л, с на́ми бу́ди:

Стих 5: Хвали́те Его́ в кимва́лех доброгла́сных, хвали́те Его́ в кимва́лех восклица́ния: / вся́кое дыха́ние да хва́лит Го́спода. Го́споди си́л, с на́ми бу́ди:

Та́же о́ба ли́ка вку́пе: Хвали́те Бо́га во святы́х Его́, / хвали́те Его́ во утверже́нии си́лы Его́.

Го́споди си́л, с на́ми бу́ди, / ино́го бо ра́зве Тебе́ / помо́щника в ско́рбех не и́мамы: / Го́споди си́л, поми́луй на́с.

Сла́ва: Го́споди, а́ще не бы́хом святы́я Твоя́ име́ли моли́твенники, / и благосты́ню Твою́ ми́лующую на́с: / ка́ко сме́ли бы́хом Спа́се, пе́ти Тя́, / Его́же славосло́вят непреста́нно А́нгели? / Сердцеве́дче, пощади́ ду́ши на́ша.

И ны́не: Мно́гая мно́жества мои́х, Богоро́дице, прегреше́ний, / к Тебе́ прибего́х, Чи́стая, спасе́ния тре́буя; / посети́ немощству́ющую мою́ ду́шу, / и моли́ Сы́на Твоего́ и Бо́га на́шего, / да́ти ми оставле́ние, / я́же соде́ях лю́тых, / еди́на Благослове́нная.

Всесвята́я Богоро́дице, / во вре́мя живота́ моего́ не оста́ви мене́, / челове́ческому предста́тельству не вве́ри мя́: / но Сама́ заступи́, и поми́луй мя́.

Все́ упова́ние мое́ / на Тя́ возлага́ю, / Ма́ти Бо́жия, / сохрани́ мя под кро́вом Твои́м.

Го́споди, поми́луй, 40.

И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г; Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м: ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней; огради́ нас святы́ми Твои́ми А́нгелы, да ополче́нием и́х соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй, трижды.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Священник: Бо́же, уще́дри ны́ и благослови́ ны́, просвети́ лице́ Твое́ на ны́ и поми́луй ны́.

И твори́м три́ покло́ны вели́кия, с моли́твою свята́го Ефре́ма, и про́чих 12:

Го́споди и Влады́ко живота́ моего́, ду́х пра́здности, уны́ния, любонача́лия, и праздносло́вия не да́ждь ми́. Покло́н.

Дух же целому́дрия, смиренному́дрия, терпе́ния, и любве́, да́руй ми́ рабу́ Твоему́. Покло́н.

Ей, Го́споди Царю́, да́руй ми́ зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Покло́н.

Та́же: Трисвято́е. И покло́ны 3. Пресвята́я Тро́ице: О́тче наш: Го́споди поми́луй, 12.

И молитва молебная ко Пресвятей Богородице, Павла монаха обители Евергетиды, сиречь, Благодетельницы:

Нескве́рная, Небла́зная, Нетле́нная, Пречи́стая, Чи́стая Де́во, Богоневе́сто Влады́чице, я́же Бо́га Сло́ва челове́ком пресла́вным Твои́м Рождество́м соедини́вшая, и отри́нувшееся естество́ ро́да на́шего небе́сным совоку́пльшая: я́же ненаде́жных еди́на Наде́жда, и бори́мых по́моще, гото́вое заступле́ние к Тебе́ притека́ющих, и все́х христиа́н прибе́жище; не гнуша́йся мене́ гре́шнаго, скве́рнаго, скве́рными по́мыслы, и словесы́, и дея́ньми всего́ себе́ непотре́бна сотво́рша, и ра́зумом ле́ности сласте́й жития́ раба́ бы́вша; но я́ко человеколюби́ваго Бо́га Ма́ти, человеколю́бне умилосе́рдися о мне́ гре́шнем и блу́днем, и приими́ мое́, е́же от скве́рных усте́н приноси́мое Тебе́ моле́ние: и Твоего́ Сы́на, и на́шего Влады́ку и Го́спода, ма́тернее Твое́ дерзнове́ние употребля́ющи, моли́, да отве́рзет и мне́ человеколю́бныя утро́бы Своея́ бла́гости, и презре́в моя́ безчи́сленная прегреше́ния, обрати́т мя́ к покая́нию, и Свои́х за́поведей де́лателя иску́сна яви́т мя; и предста́ни мне́ при́сно, я́ко ми́лостивая, и милосе́рдая, и благолюби́вая, в настоя́щем у́бо житии́ те́плая Предста́тельнице и Помо́щнице, сопроти́вных наше́ствия отгоня́ющи, и ко спасе́нию наставля́ющи мя́: и во вре́мя исхо́да моего́ окая́нную мою́ ду́шу соблюда́ющи, и те́мныя зра́ки лука́вых бесо́в дале́че от нея́ отгоня́ющи: в стра́шный же де́нь суда́ ве́чныя мя́ избавля́ющи му́ки, и неизрече́нныя сла́вы Твоего́ Сы́на и Бо́га на́шего насле́дника мя́ показу́ющи; Ю́же и да улучу́, Влады́чице моя́, Пресвята́я Богоро́дице, Твои́м хода́тайством и заступле́нием, благода́тию и человеколю́бием Единоро́днаго Сы́на Твоего́, Го́спода и Бо́га и Спа́са на́шего Иису́са Христа́: Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в, ами́нь.

Моли́тва ина́я ко Го́споду на́шему Иису́су Христу́, Антио́ха мона́ха Панде́кта:

И да́ждь на́м, Влады́ко, на со́н гряду́щим поко́й те́ла и души́, и сохрани́ на́с от мра́чнаго сна́ грехо́внаго, и от вся́каго те́мнаго и нощна́го сладостра́стия: укроти́ стремле́ния страсте́й, угаси́ разжже́нныя стре́лы лука́ваго, я́же на ны́ льсти́вно дви́жимыя: пло́ти на́шея воста́ния утоли́, и вся́кое земно́е и веще́ственное на́ше мудрова́ние успи́; и да́руй на́м, Бо́же, бо́др у́м, целому́др по́мысл, се́рдце трезвя́щееся, со́н лего́к и вся́каго сатанина́ мечта́ния измене́н; возста́ви же на́с во вре́мя моли́твы утвержде́ны в за́поведех Твои́х, и па́мять суде́б Твои́х в себе́ тве́рду иму́ща: всено́щное славосло́вие на́м да́руй, во е́же пе́ти и благослови́ти и сла́вити пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Моли́тва ина́я свята́го Иоанни́киа:

Упова́ние мое́ Оте́ц, прибе́жище мое́ Сын, покро́в мо́й Ду́х Святы́й, Тро́ице Свята́я, сла́ва Тебе́.

Сла́ва, и ны́не: Го́споди поми́луй, три́жды. Благослови́.

И а́бие свяще́нник возглаша́ет, на́м на зе́млю прикло́ншимся: Влады́ко многоми́лостиве, Го́споди Иису́се Христе́ Бо́же на́ш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го сла́внаго проро́ка, Предте́чи и Крести́теля Иоа́нна, святы́х сла́вных и всехва́льных апо́стол, святы́х сла́вных и добропобе́дных му́чеников, преподо́бных и Богоно́сных оте́ц на́ших, святы́х и пра́ведных Богооте́ц Иоаки́ма и А́нны, и всех Твои́х святы́х, благоприя́тну сотвори́ моли́тву на́шу. Да́руй на́м оставле́ние прегреше́ний на́ших. Покры́й на́с кро́вом крилу́ Твое́ю. Отжени́ от на́с вся́каго врага́ и супоста́та. Умири́ на́шу жизнь. Го́споди, поми́луй на́с и ми́р Тво́й, и спаси́ ду́ши на́ша, я́ко бла́г и Человеколю́бец.

Та́же сотвори́в предстоя́тель покло́н на зе́млю, глаго́лет бра́тии: Благослови́те, отцы́ святи́и, прости́те ми, гре́шному.

И бра́тия: Бог прости́т ти́, о́тче святы́й.

Священник же глаголет: Помо́лимся о Вели́ком господи́не и Отце́ на́шем, Святе́йшем Патриа́рхе Моско́вском и всея́ Руси́ Кири́лле и о господи́не на́шем Преосвяще́ннейшем епи́скопе [или́ архиепи́скопе, или́ митрополи́те имяре́к].

И про́чая, я́коже предпи́сано в полу́нощнице.

И мы: Го́споди поми́луй, на вся́кий сти́х.

И последи́ предстоя́тель глаго́лет: Моли́твами святы́х оте́ц на́ших, Го́споди Иису́се Христе́, Бо́же на́ш, поми́луй на́с.

И начина́ют бра́тия от десна́го и ле́ваго ли́ка по чи́ну, еди́н по еди́ному, твори́ти покло́н, и проси́ти и прия́ти проще́ние от предстоя́теля, подо́бне глаго́люще: Благослови́, о́тче святы́й, и прости́ мя́, гре́шнаго. И прочая.

Стоя́щу предстоя́телю посреди́ це́ркве, дóндеже испо́лнятся вся́.

И прие́мше проще́ние от предстоя́теля, отхо́дим в ке́лии на́ша, глаго́люще моли́тву сию́, я́же и от вся́каго челове́ка глаго́лется:

Ненави́дящих и оби́дящих на́с прости́, Го́споди, Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жизнь ве́чную. В не́мощех су́щия посети́ и исцеле́ние да́руй. И́же в мо́ри упра́ви. С путеше́ствующими спутеше́ствуй. Служа́щим и ми́лующим на́с, грехо́в оставле́ние да́руй. Запове́давших на́м, недосто́йным, моли́тися о ни́х, поми́луй по вели́цей Твое́й ми́лости. Помяни́, Го́споди, пре́жде усо́пшия отцы́ и бра́тию на́шу, и упоко́й я́, иде́же присеща́ет све́т лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и даждь и́м я́же ко спасе́нию проше́ния и жи́знь ве́чную. Помяни́, Го́споди, и на́с, смире́нных и гре́шных и недосто́йных ра́б Твои́х: и просвети́ на́ш у́м све́том ра́зума Твоего́, и наста́ви на́с на стезю́ за́поведей Твои́х. Моли́твами Пречи́стыя Влады́чицы на́шея Богоро́дицы и Присноде́вы Мари́и и все́х Твои́х святы́х. Я́ко благослове́н еси́ во ве́ки веко́в, ами́нь.

Коне́ц вели́каго повече́рия.

Проще́ние си́це глаго́лется: Прости́ мя, о́тче святы́й, и благослови́, ели́ка согреши́х во вся́ дни́ живота́ моего́, и в си́й де́нь без числа́ согреши́х, душе́ю и те́лом, сно́м и ле́ностию, помраче́нием бесо́вским, в мы́слех нечи́стых, в забы́тии ума́, и во осужде́нии: согреши́х се́рдцем, и все́ми мои́ми чу́вствы, слу́хом и ви́дом, во́лею и нево́лею: и не́сть того́ греха́, его́же не сотвори́х, но о все́х ка́юся, прости́ мя́, о́тче святы́й, и благослови́, и помоли́ся о мне́, гре́шнем.

* * *

Нача́ло с Бо́гом ма́лаго повече́рия

Свяще́нник глаго́лет: Благослове́н Бог на́ш:

И мы: Сла́ва Тебе́, Бо́же на́ш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Три́жды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй на́с; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, три́жды.

Сла́ва, и ны́не: О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хле́б на́ш насу́щный да́ждь на́м днесь; и оста́ви на́м до́лги на́ша, я́коже и мы́ оставля́ем должнико́м на́шим; и не введи́ на́с во искуше́ние, но изба́ви на́с от лука́ваго.

Свяще́нник: Я́ко Твое́ е́сть Ца́рство:

Та́же, Го́споди, поми́луй, 12.

Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему. Поклоны́ три́.

И а́бие псало́м 50: Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́; я́ко беззако́ние мое́ а́з зна́ю, и гре́х мо́й пре́до мно́ю е́сть вы́ну. Тебе́ Еди́ному согреши́х и лука́вое пре́д Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти́. Се бо в беззако́ниих зача́т е́смь, и во гресе́х роди́ мя́ ма́ти моя́. Се́ бо и́стину возлюби́л еси́; безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся; омы́еши мя́, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от гре́х мои́х и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми́ ра́дость спасе́ния Твоего́ и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́; возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо: всесожже́ния не благоволи́ши. Же́ртва Бо́гу ду́х сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Тво́й тельцы́.

Бо́же, в по́мощь мою́ вонми́, Го́споди, помощи́ ми потщи́ся: да постыдя́тся и посра́мятся и́щущии ду́шу мою́. Да возвратя́тся вспять и постыдя́тся хотя́щии ми́ зла́я. Да возвратя́тся а́бие стыдя́щеся глаго́лющии ми́: бла́гоже, бла́гоже. Да возра́дуются и возвеселя́тся о Тебе́ вси́ и́щущии Тебе́ Бо́же; и да глаго́лют вы́ну, да возвели́чится Госпо́дь, лю́бящии спасе́ние Твое́. А́з же ни́щ е́смь и убо́г, Бо́же, помози́ ми: Помо́щник мой и Изба́витель мо́й еси́ Ты́, Го́споди, не закосни́.

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й: и не вни́ди в су́д с рабо́м Твои́м, я́ко не оправди́тся пре́д Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния, поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́: душа́ моя́, я́ко земля́ безво́дная Тебе́. Ско́ро услы́ши мя́, Го́споди, исчезе́ ду́х мо́й: не отврати́ лица́ Твоего́ от Мене́, и уподо́блюся низходя́щым в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х. Скажи́ мне́, Го́споди, пу́ть во́ньже пойду́, я́ко к Тебе́ взя́х ду́шу мою́. Изми́ мя от вра́г мои́х, Го́споди, к Тебе́ прибего́х, научи́ мя твори́ти во́лю Твою́, я́ко Ты́ еси́ Бо́г мо́й. Ду́х Тво́й Благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́, пра́вдою Твое́ю изведе́ши от печа́ли ду́шу мою́: и ми́лостию Твое́ю потреби́ши враги́ моя́ и погуби́ши вся́ стужа́ющия души́ мое́й, я́ко а́з ра́б Тво́й е́смь.

Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няем Ти ся, славосло́вим Тя́, благодари́м Тя́, вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше: Го́споди Бо́же, А́гнче Бо́жий, Сы́не Оте́чь, взе́мляй гре́х ми́ра, поми́луй нас: взе́мляй грехи́ ми́ра, приими́ моли́тву на́шу, седя́й одесну́ю Отца́, поми́луй на́с; я́ко Ты́ еси́ Еди́н Свя́т; Ты́ еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.

На вся́ку но́щь благословлю́ Тя и восхвалю́ и́мя Твое́ во ве́ки, и в ве́к ве́ка.

Го́споди, прибе́жище бы́л еси́ на́м в ро́д и ро́д; а́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты́ еси́ Бог мой: я́ко у тебе́ исто́чник живота́, во све́те Твое́м у́зрим све́т. Проба́ви ми́лость Твою́ ве́дущим Тя́.

Та́же: Сподо́би Го́споди, в но́щь сию́ без греха́ сохрани́тися на́м; благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на на́с, я́коже упова́хом на Тя́; благослове́н еси́, Го́споди, научи́ мя оправда́нием Твои́м; благослове́н еси́, Влады́ко, вразуми́ мя оправда́нием Твои́м; благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во ве́к, де́л руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И читаем исповедание православныя веры: Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же все́м и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде все́х ве́к. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся́ бы́ша. На́с ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны́ при Понти́йстем Пила́те, и страда́вша, и погребе́нна. И воскре́сшаго в тре́тий де́нь по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.

Втора́го собо́ра:

И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Посе́м глаго́лем: Досто́йно е́сть я́ко вои́стинну блажи́ти Тя́, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя́ велича́ем.

Трисвято́е. Пресвята́я Тро́ице: О́тче на́ш:

Тропа́рь по дню́ свята́го, и хра́му, и настоя́щия. [А́ще же е́сть пра́здник, глаго́ли то́кмо конда́к пра́зднику.]

Бо́же оте́ц на́ших, / творя́й при́сно с на́ми по Твое́й кро́тости: / не отста́ви ми́лость Твою́ от на́с, / но моли́твами и́х / в ми́ре упра́ви живо́т на́ш.

И́же во все́м ми́ре му́ченик Твои́х, / я́ко багряни́цею и ви́ссом, / кровьми́ Це́рковь Твоя́ украси́вшися, / те́ми вопие́т Ти́, Христе́ Бо́же: / лю́дем Твои́м щедро́ты Твоя́ низпосли́, / мир жи́тельству Твоему́ да́руй, / и душа́м на́шим ве́лию ми́лость.

Сла́ва: Со святы́ми упоко́й, / Христе́, / ду́ши ра́б Твои́х, / иде́же не́сть боле́знь, ни печа́ль, / ни воздыха́ние, / но жи́знь безконе́чная.

И ны́не: Моли́твами, Го́споди, всех святы́х, и Богоро́дицы, / Тво́й ми́р да́ждь на́м и поми́луй на́с, / я́ко Еди́н ще́др.

Го́споди, поми́луй, 40.

Та́же моли́тву: Го́споди, поми́луй, 40.

И́же на вся́кое вре́мя и на вся́кий ча́с, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся́ зовы́й ко спасе́нию обеща́ния ра́ди бу́дущих бла́г; Са́м, Го́споди, приими́ и на́ша в ча́с се́й моли́твы и испра́ви живо́т на́ш к за́поведем Твои́м: ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви на́с от вся́кия ско́рби, зо́л и боле́зней; огради́ нас святы́ми Твои́ми А́нгелы, да ополче́нием и́х соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй, трижды.

Сла́ва, и ны́не: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя́ велича́ем.

И́менем Госпо́дним благослови́, о́тче.

Свяще́нник: Моли́твами святы́х оте́ц на́ших, Го́споди, Иису́се Христе́, Бо́же на́ш, поми́луй на́с.

И молитва молебная ко Пресвятей Богородице, Павла монаха обители Евергетиды, сиречь, Благодетельницы:

Нескве́рная, Небла́зная, Нетле́нная, Пречи́стая, Чи́стая Де́во, Богоневе́сто Влады́чице, я́же Бо́га Сло́ва челове́ком пресла́вным Твои́м Рождество́м соедини́вшая, и отри́нувшееся естество́ ро́да на́шего небе́сным совоку́пльшая: я́же ненаде́жных еди́на Наде́жда, и бори́мых по́моще, гото́вое заступле́ние к Тебе́ притека́ющих, и все́х христиа́н прибе́жище; не гнуша́йся мене́ гре́шнаго, скве́рнаго, скве́рными по́мыслы, и словесы́, и дея́ньми всего́ себе́ непотре́бна сотво́рша, и ра́зумом ле́ности сласте́й жития́ раба́ бы́вша; но я́ко человеколюби́ваго Бо́га Ма́ти, человеколю́бне умилосе́рдися о мне́ гре́шнем и блу́днем, и приими́ мое́, е́же от скве́рных усте́н приноси́мое Тебе́ моле́ние: и Твоего́ Сы́на, и на́шего Влады́ку и Го́спода, ма́тернее Твое́ дерзнове́ние употребля́ющи, моли́, да отве́рзет и мне́ человеколю́бныя утро́бы Своея́ бла́гости, и презре́в моя́ безчи́сленная прегреше́ния, обрати́т мя́ к покая́нию, и Свои́х за́поведей де́лателя иску́сна яви́т мя; и предста́ни мне́ при́сно, я́ко ми́лостивая, и милосе́рдая, и благолюби́вая, в настоя́щем у́бо житии́ те́плая Предста́тельнице и Помо́щнице, сопроти́вных наше́ствия отгоня́ющи, и ко спасе́нию наставля́ющи мя́: и во вре́мя исхо́да моего́ окая́нную мою́ ду́шу соблюда́ющи, и те́мныя зра́ки лука́вых бесо́в дале́че от нея́ отгоня́ющи: в стра́шный же де́нь суда́ ве́чныя мя́ избавля́ющи му́ки, и неизрече́нныя сла́вы Твоего́ Сы́на и Бо́га на́шего насле́дника мя́ показу́ющи; Ю́же и да улучу́, Влады́чице моя́, Пресвята́я Богоро́дице, Твои́м хода́тайством и заступле́нием, благода́тию и человеколю́бием Единоро́днаго Сы́на Твоего́, Го́спода и Бо́га и Спа́са на́шего Иису́са Христа́: Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в, ами́нь.

Моли́тва ина́я ко Го́споду на́шему Иису́су Христу́, Антио́ха мона́ха Панде́кта:

И да́ждь на́м, Влады́ко, на со́н гряду́щим поко́й те́ла и души́, и сохрани́ на́с от мра́чнаго сна́ грехо́внаго, и от вся́каго те́мнаго и нощна́го сладостра́стия: укроти́ стремле́ния страсте́й, угаси́ разжже́нныя стре́лы лука́ваго, я́же на ны́ льсти́вно дви́жимыя: пло́ти на́шея воста́ния утоли́, и вся́кое земно́е и веще́ственное на́ше мудрова́ние успи́; и да́руй на́м, Бо́же, бо́др у́м, целому́др по́мысл, се́рдце трезвя́щееся, со́н лего́к и вся́каго сатанина́ мечта́ния измене́н; возста́ви же на́с во вре́мя моли́твы утвержде́ны в за́поведех Твои́х, и па́мять суде́б Твои́х в себе́ тве́рду иму́ща: всено́щное славосло́вие на́м да́руй, во е́же пе́ти и благослови́ти и сла́вити пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Моли́тва ина́я свята́го Иоанни́киа:

Упова́ние мое́ Оте́ц, прибе́жище мое́ Сын, покро́в мо́й Ду́х Святы́й, Тро́ице Свята́я, сла́ва Тебе́.

Сла́ва, и ны́не: Го́споди поми́луй, три́жды.

И быва́ет отпу́ст и проще́ние от свяще́нника: И а́бие свяще́нник возглаша́ет, на́м на зе́млю прикло́ншимся:

Влады́ко многоми́лостиве, Го́споди Иису́се Христе́ Бо́же на́ш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го сла́внаго проро́ка, Предте́чи и Крести́теля Иоа́нна, святы́х сла́вных и всехва́льных апо́стол, святы́х сла́вных и добропобе́дных му́чеников, преподо́бных и Богоно́сных оте́ц на́ших, святы́х и пра́ведных Богооте́ц Иоаки́ма и А́нны, и всех Твои́х святы́х, благоприя́тну сотвори́ моли́тву на́шу. Да́руй на́м оставле́ние прегреше́ний на́ших. Покры́й на́с кро́вом крилу́ Твое́ю. Отжени́ от на́с вся́каго врага́ и супоста́та. Умири́ на́шу жизнь. Го́споди, поми́луй на́с и ми́р Тво́й, и спаси́ ду́ши на́ша, я́ко бла́г и Человеколю́бец.

Та́же сотвори́в предстоя́тель покло́н на зе́млю, глаго́лет бра́тии: Благослови́те, отцы́ святи́и, прости́те ми, гре́шному.

И бра́тия: Бог прости́т ти́, о́тче святы́й.

Свяще́нник же глаго́лет: Помо́лимся о Вели́ком господи́не и Отце́ на́шем, Святе́йшем Патриа́рхе Моско́вском и всея́ Руси́ Кири́лле и о господи́не на́шем Преосвяще́ннейшем епи́скопе [или́ архиепи́скопе, или́ митрополи́те имяре́к].

И мы́: Го́споди поми́луй, ча́сто.

О Богохрани́мей стране́ на́шей, власте́х и во́инстве ея́.

О Отце́ на́шем, имяре́к, и все́й во Христе́ бра́тии на́шей.

О ненави́дящих и лю́бящих на́с.

О ми́лующих и служа́щих на́м.

О запове́давших на́м, недосто́йным, моли́тися о ни́х.

О избавле́нии плене́нных.

О отше́дших отце́х и бра́тиях на́ших.

О в мо́ри пла́вающих.

О в не́мощех лежа́щих.

Помо́лимся и о изоби́лии плодо́в земны́х,

И о вся́кой души́ христиа́н правосла́вных.

Ублажи́м правосла́вныя архиере́и, и кти́торы свята́го хра́ма сего́ [святы́я оби́тели сея́].

Роди́тели на́ша, и вся́ пре́жде отше́дшия отцы́ и бра́тию на́шу, зде́ лежа́щия, и повсю́ду правосла́вныя.

И мы: Го́споди поми́луй, на вся́кий сти́х.

И последи́ предстоя́тель глаго́лет:

Моли́твами святы́х оте́ц на́ших, Го́споди Иису́се Христе́, Бо́же на́ш, поми́луй на́с.

И начина́ют бра́тия от десна́го и ле́ваго ли́ка по чи́ну, еди́н по еди́ному, твори́ти покло́н, и проси́ти и прия́ти проще́ние от предстоя́теля, подо́бне глаго́люще: Благослови́, о́тче святы́й, и прости́ мя́, гре́шнаго. И про́чая.

Стоя́щу предстоя́телю посреди́ це́ркве, дóндеже испо́лнятся вся́.

И прие́мше проще́ние от предстоя́теля, отхо́дим в ке́лии на́ша, глаго́люще моли́тву сию́, я́же и от вся́каго челове́ка глаго́лется:

Ненави́дящих и оби́дящих на́с прости́, Го́споди, Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жизнь ве́чную. В не́мощех су́щия посети́ и исцеле́ние да́руй. И́же в мо́ри упра́ви. С путеше́ствующими спутеше́ствуй. Служа́щим и ми́лующим на́с, грехо́в оставле́ние да́руй. Запове́давших на́м, недосто́йным, моли́тися о ни́х, поми́луй по вели́цей Твое́й ми́лости. Помяни́, Го́споди, пре́жде усо́пшия отцы́ и бра́тию на́шу, и упоко́й я́, иде́же присеща́ет све́т лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и даждь и́м я́же ко спасе́нию проше́ния и жи́знь ве́чную. Помяни́, Го́споди, и на́с, смире́нных и гре́шных и недосто́йных ра́б Твои́х: и просвети́ на́ш у́м све́том ра́зума Твоего́, и наста́ви на́с на стезю́ за́поведей Твои́х. Моли́твами Пречи́стыя Влады́чицы на́шея Богоро́дицы и Присноде́вы Мари́и и все́х Твои́х святы́х. Я́ко благослове́н еси́ во ве́ки веко́в, ами́нь.

Проще́ние си́це глаго́лется: Прости́ мя, о́тче святы́й, и благослови́, ели́ка согреши́х во вся́ дни́ живота́ моего́, и в си́й де́нь без числа́ согреши́х, душе́ю и те́лом, сно́м и ле́ностию, помраче́нием бесо́вским, в мы́слех нечи́стых, в забы́тии ума́, и во осужде́нии: согреши́х се́рдцем, и все́ми мои́ми чу́вствы, слу́хом и ви́дом, во́лею и нево́лею: и не́сть того́ греха́, его́же не сотвори́х, но о все́х ка́юся, прости́ мя́, о́тче святы́й, и благослови́, и помоли́ся о мне́, гре́шнем.

* * *

Аллилу́ия, 118

¹ Бла́жени непоро́чнии в пу́ть, ходя́щии в зако́не Госпо́дни. ²Блаже́ни испыта́ющии свиде́ния Его́, все́м се́рдцем взы́щут Его́. ³Не де́лающии бо беззако́ния, в путе́х Его́ ходи́ша. ⁴Ты́ запове́дал еси́ за́поведи Твоя́ сохрани́ти зело́. ⁵Дабы́ испра́вилися путие́ мои́, сохрани́ти оправда́ния Твоя́. ⁶Тогда́ не постыжу́ся, внегда́ призре́ти ми́ на вся́ за́поведи Твоя́. ⁷Испове́мся Тебе́ в пра́вости се́рдца, внегда́ научи́ти ми́ ся́ судьба́м пра́вды Твоея́. ⁸Оправда́ния Твоя́ сохраню́, не оста́ви мене́ до зела́. ⁹В чесо́м испра́вит юне́йший пу́ть сво́й; внегда́ сохрани́ти словеса́ Твоя́. ¹⁰Все́м се́рдцем мои́м взыска́х Тебе́, не отри́ни мене́ от за́поведей Твои́х. ¹¹В се́рдце мое́м скры́х словеса́ Твоя́, я́ко да не согрешу́ Тебе́. ¹²Благослове́н еси́, Го́споди: научи́ мя́ оправда́нием Твои́м. ¹³Устна́ма мои́ма возвести́х вся́ судьбы́ у́ст Твои́х. ¹⁴На пути́ свиде́ний Твои́х наслади́хся, я́ко о вся́ком бога́тстве. ¹⁵В за́поведех Твои́х поглумлю́ся и уразуме́ю пути́ Твоя́. ¹⁶Во оправда́ниих Твои́х поучу́ся, не забу́ду слове́с Твои́х. ¹⁷Возда́ждь рабу́ Твоему́, живи́ мя́, и сохраню́ словеса́ Твоя́. ¹⁸Откры́й о́чи мои́, и уразуме́ю чуде́са от зако́на Твоего́. ¹⁹Пришле́ц а́з е́смь на земли́: не скры́й от Мене́ за́поведи Твоя́. ²⁰Возлюби́ душа́ моя́ возжела́ти судьбы́ Твоя́ на вся́кое вре́мя. ²¹Запрети́л еси́ го́рдым: про́кляти уклоня́ющиися от за́поведей Твои́х. ²²Отьими́ от Мене́ поно́с и уничиже́ние, я́ко свиде́ний Твои́х взыска́х. ²³И́бо седо́ша кня́зи, и на мя́ клевета́ху, ра́б же Тво́й глумля́шеся во оправда́ниих Твои́х: ²⁴И́бо свиде́ния Твоя́ поуче́ние мое́ е́сть, и сове́ти мои́ оправда́ния Твоя́. ²⁵Прильпе́ земли́ душа́ моя́: живи́ мя́ по словеси́ Твоему́. ²⁶Пути́ моя́ возвести́х, и услы́шал мя́ еси́: научи́ мя́ оправда́нием Твои́м: ²⁷Пу́ть оправда́ний Твои́х вразуми́ ми́, и поглумлю́ся в чудесе́х Твои́х. ²⁸Воздрема́ душа́ моя́ от уны́ния: утверди́ мя́ в словесе́х Твои́х. ²⁹Пу́ть непра́вды отста́ви от Мене́, и зако́ном Твои́м поми́луй мя́. ³⁰Пу́ть и́стины изво́лих, и судьбы́ Твоя́ не забы́х. ³¹Прилепи́хся свиде́нием Твои́м, Го́споди, не посрами́ мене́. ³²Пу́ть за́поведей Твои́х теко́х, егда́ расшири́л еси́ се́рдце мое́. ³³Законоположи́ мне́, Го́споди, пу́ть оправда́ний Твои́х, и взыщу́ и́ вы́ну: ³⁴Вразуми́ мя́, и испыта́ю зако́н Тво́й, и сохраню́ и́ все́м се́рдцем мои́м. ³⁵Наста́ви мя́ на стезю́ за́поведей Твои́х, я́ко ту́ю восхоте́х. ³⁶Приклони́ се́рдце мое́ во свиде́ния Твоя́, а не в лихои́мство. ³⁷Отврати́ о́чи мои́, е́же не ви́дети суеты́, в пути́ Твое́м живи́ мя́. ³⁸Постави́ рабу́ Твоему́ сло́во Твое́ в стра́х Тво́й. ³⁹Отьими́ поноше́ние мое́, е́же непщева́х: я́ко судьбы́ Твоя́ бла́ги. ⁴⁰Се́ возжела́х за́поведи Твоя́, в пра́вде Твое́й живи́ мя́. ⁴¹И да прии́дет на мя́ ми́лость Твоя́, Го́споди, спасе́ние Твое́ по словеси́ Твоему́. ⁴²И отвеща́ю поноша́ющым ми́ сло́во: я́ко упова́х на словеса́ Твоя́. ⁴³И не отьими́ от у́ст мои́х словесе́ и́стинна до зела́, я́ко на судьбы́ Твоя́ упова́х. ⁴⁴И сохраню́ зако́н Тво́й вы́ну, в ве́к и в ве́к ве́ка. ⁴⁵И хожда́х в широ́те, я́ко за́поведи Твоя́ взыска́х. ⁴⁶И глаго́лах о свиде́ниих Твои́х пред цари́, и не стыдя́хся: ⁴⁷И поуча́хся в за́поведех Твои́х, я́же возлюби́х зело́: ⁴⁸И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х. ⁴⁹Помяни́ словеса́ Твоя́ рабу́ Твоему́, и́хже упова́ние да́л ми́ еси́. ⁵⁰То́ мя́ уте́ши во смире́нии мое́м, я́ко сло́во Твое́ живи́ мя́. ⁵¹ Го́рдии законопресту́поваху до зела́: от зако́на же Твоего́ не уклони́хся. ⁵²Помяну́х судьбы́ Твоя́ от ве́ка, Го́споди, и уте́шихся. ⁵³Печа́ль прия́т мя́ от гре́шник, оставля́ющих зако́н Тво́й. ⁵⁴Пе́та бя́ху мне́ оправда́ния Твоя́, на ме́сте прише́льствия моего́. ⁵⁵Помяну́х в нощи́ и́мя Твое́, Го́споди, и сохрани́х зако́н Тво́й. ⁵⁶Се́й бы́сть мне́, я́ко оправда́ний Твои́х взыска́х. ⁵⁷Ча́сть моя́ еси́, Го́споди, ре́х сохрани́ти зако́н Тво́й. ⁵⁸Помоли́хся лицу́ Твоему́ все́м се́рдцем мои́м: поми́луй мя́ по словеси́ Твоему́. ⁵⁹Помы́слих пути́ Твоя́, и возврати́х но́зе мои́ во свиде́ния Твоя́. ⁶⁰Угото́вихся и не смути́хся сохрани́ти за́поведи Твоя́. ⁶¹У́жя гре́шник обяза́шася мне́, и зако́на Твоего́ не забы́х. ⁶²Полу́нощи воста́х испове́датися Тебе́ о судьба́х пра́вды Твоея́. ⁶³Прича́стник а́з е́смь все́м боя́щымся Тебе́, и храня́щым за́поведи Твоя́. ⁶⁴Ми́лости Твоея́, Го́споди, испо́лнь земля́: оправда́нием Твои́м научи́ мя́. ⁶⁵Бла́гость сотвори́л еси́ с рабо́м Твои́м, Го́споди, по словеси́ Твоему́. ⁶⁶Бла́гости, и наказа́нию и ра́зуму научи́ мя́, я́ко за́поведем Твои́м ве́ровах. ⁶⁷Пре́жде да́же не смири́ти ми́ ся́, а́з прегреши́х: сего́ ра́ди сло́во Твое́ сохрани́х. ⁶⁸Бла́г еси́ Ты́, Го́споди, и бла́гостию Твое́ю научи́ мя́ оправда́нием Твои́м. ⁶⁹Умно́жися на мя́ непра́вда го́рдых, а́з же все́м се́рдцем мои́м испыта́ю за́поведи Твоя́. ⁷⁰Усыри́ся я́ко мле́ко се́рдце и́х, а́з же зако́ну Твоему́ поучи́хся. ⁷¹Бла́го мне́, я́ко смири́л мя́ еси́, я́ко да научу́ся оправда́нием Твои́м. ⁷²Бла́г мне зако́н у́ст Твои́х, па́че ты́сящ злата́ и сребра́.

Сла́ва:

⁷³Ру́це Твои́ сотвори́сте мя́, и созда́сте мя́: вразуми́ мя́, и научу́ся за́поведем Твои́м. ⁷⁴Боя́щиися Тебе́ у́зрят мя́ и возвеселя́тся, я́ко на словеса́ Твоя́ упова́х. ⁷⁵Разуме́х Го́споди, я́ко пра́вда судьбы́ Твоя́, и вои́стинну смири́л мя́ еси́. ⁷⁶Бу́ди же ми́лость Твоя́, да уте́шит мя́ по словеси́ Твоему́ рабу́ Твоему́. ⁷⁷Да прии́дут мне́ щедро́ты Твоя́, и жи́в бу́ду, я́ко зако́н Тво́й поуче́ние мое́ е́сть. ⁷⁸Да постыдя́тся го́рдии, я́ко непра́ведно беззако́нноваша на мя́, а́з же поглумлю́ся в за́поведех Твои́х. ⁷⁹Да обратя́т мя́ боя́щиися Тебе́, и ве́дящии свиде́ния Твоя́. ⁸⁰Бу́ди се́рдце мое́ непоро́чно во оправда́ниих Твои́х, я́ко да не постыжу́ся. ⁸¹Исчеза́ет во спасе́ние Твое́ душа́ моя́, на словеса́ Твоя́ упова́х. ⁸²Исчезо́ша о́чи мои́ в сло́во Твое́, глаго́люще: когда́ уте́шиши мя́? ⁸³Зане́ бы́х я́ко ме́х на сла́не: оправда́ний Твои́х не забы́х. ⁸⁴Коли́ко е́сть дне́й раба́ Твоего́? Когда́ сотвори́ши ми́ от гоня́щих мя́ су́д? ⁸⁵Пове́даша мне́ законопресту́пницы глумле́ния, но не я́ко зако́н Тво́й, Го́споди. ⁸⁶Вся́ за́поведи Твоя́ и́стина: непра́ведно погна́ша мя́, помози́ ми́. ⁸⁷Вма́ле не сконча́ша мене́ на земли́: а́з же не оста́вих за́поведей Твои́х. ⁸⁸По ми́лости Твое́й живи́ мя́, и сохраню́ сви́дения у́ст Твои́х. ⁸⁹Во ве́к, Го́споди, сло́во Твое́ пребыва́ет на небеси́. ⁹⁰В ро́д и ро́д и́стина Твоя́. Основа́л еси́ зе́млю, и пребыва́ет. ⁹¹Учине́нием Твои́м пребыва́ет де́нь, я́ко вся́ческая рабо́тна Тебе́. ⁹²Я́ко а́ще бы не зако́н Тво́й поуче́ние мое́ бы́л, тогда́ у́бо поги́бл бы́х во смире́нии мое́м. ⁹³Во ве́к не забу́ду оправда́ний Твои́х, я́ко в ни́х оживи́л мя́ еси́.

Среда́

⁹⁴Тво́й е́смь а́з, спаси́ мя́, я́ко оправда́ний Твои́х взыска́х. ⁹⁵Мене́ жда́ша гре́шницы погуби́ти мя́, свиде́ния Твоя́ разуме́х. ⁹⁶Вся́кия кончи́ны ви́дех коне́ц, широка́ за́поведь Твоя́ зело́. ⁹⁷Ко́ль возлюби́х зако́н Тво́й, Го́споди, ве́сь де́нь поуче́ние мое́ е́сть. ⁹⁸Па́че вра́г мои́х умудри́л мя́ еси́ за́поведию Твое́ю, я́ко в ве́к моя́ е́сть. ⁹⁹Па́че все́х уча́щих мя́ разуме́х, я́ко свиде́ния Твоя́ поуче́ние мое́ е́сть. ¹⁰⁰Па́че ста́рец разуме́х, я́ко за́поведи Твоя́ взыска́х. ¹⁰¹От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́. ¹⁰²От суде́б Твои́х не уклони́хся, я́ко Ты́ законоположи́л ми́ еси́. ¹⁰³Ко́ль сладка́ горта́ни моему́ словеса́ Твоя́, па́че ме́да усто́м мои́м. ¹⁰⁴От за́поведей Твои́х разуме́х, сего́ ра́ди возненави́дех вся́к пу́ть непра́вды. ¹⁰⁵Свети́льник нога́ма мои́ма зако́н Тво́й, и све́т стезя́м мои́м. ¹⁰⁶Кля́хся и поста́вих сохрани́ти судьбы́ пра́вды Твоея́. ¹⁰⁷Смири́хся до зела́, Го́споди, живи́ мя́ по словеси́ Твоему́. ¹⁰⁸Во́льная у́ст мои́х благоволи́ же, Го́споди, и судьба́м Твои́м научи́ мя́. ¹⁰⁹Душа́ моя́ в руку́ Твое́ю вы́ну, и зако́на Твоего́ не забы́х. ¹¹⁰Положи́ша гре́шницы се́ть мне́, и от за́поведей Твои́х не заблуди́х. ¹¹¹Насле́довах свиде́ния Твоя́ во ве́к, я́ко ра́дование се́рдца моего́ су́ть. ¹¹²Приклони́х се́рдце мое́ сотвори́ти оправда́ния Твоя́ в ве́к за воздая́ние. ¹¹³Законопресту́пныя возненави́дех, зако́н же Тво́й возлюби́х. ¹¹⁴Помо́щник мо́й и засту́пник мо́й еси́ Ты́, на словеса́ Твоя́ упова́х. ¹¹⁵Уклони́теся от Мене́ лука́внующии, и испыта́ю за́поведи Бо́га моего́. ¹¹⁶Заступи́ мя́ по словеси́ Твоему́, и жи́в бу́ду, и не посрами́ мене́ от ча́яния моего́. ¹¹⁷Помози́ ми́, и спасу́ся, и поучу́ся во оправда́ниих Твои́х вы́ну. ¹¹⁸Уничижи́л еси́ вся́ отступа́ющия от оправда́ний Твои́х, я́ко непра́ведно помышле́ние и́х. ¹¹⁹Преступа́ющия непщева́х вся́ гре́шныя земли́, сего́ ра́ди возлюби́х свиде́ния Твоя́. ¹²⁰Пригвозди́ стра́ху Твоему́ пло́ти моя́, от суде́б бо Твои́х убоя́хся. ¹²¹Сотвори́х су́д и пра́вду, не преда́ждь мене́ оби́дящым мя́. ¹²²Восприими́ раба́ Твоего́ во бла́го, да не оклевета́ют мене́ го́рдии. ¹²³О́чи мои́ исчезо́сте во спасе́ние Твое́, и в сло́во пра́вды Твоея́. ¹²⁴Сотвори́ с рабо́м Твои́м по ми́лости Твое́й, и оправда́нием Твои́м научи́ мя́. ¹²⁵Ра́б Тво́й е́смь а́з: вразуми́ мя́, и уве́м свиде́ния Твоя́. ¹²⁶Вре́мя сотвори́ти Го́сподеви: разори́ша зако́н Тво́й. ¹²⁷Сего́ ра́ди возлюби́х за́поведи Твоя́ па́че зла́та и топа́зия. ¹²⁸Сего́ ра́ди ко все́м за́поведем Твои́м направля́хся, вся́к пу́ть непра́вды возненави́дех. ¹²⁹Ди́вна свиде́ния Твоя́, сего́ ра́ди испыта́ я́ душа́ моя́. ¹³⁰Явле́ние слове́с Твои́х просвеща́ет и вразумля́ет младе́нцы. ¹³¹Уста́ моя́ отверзо́х, и привлеко́х ду́х, я́ко за́поведей Твои́х жела́х.

Сла́ва:

¹³²При́зри на мя́ и поми́луй мя́, по суду́ лю́бящих и́мя Твое́. ¹³³Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. ¹³⁴Изба́ви мя́ от клеветы́ челове́ческия, и сохраню́ за́поведи Твоя́. ¹³⁵Лице́ Твое́ просвети́ на раба́ Твоего́, и научи́ мя́ оправда́нием Твои́м. ¹³⁶Исхо́дища водна́я изведо́сте о́чи мои́, поне́же не сохрани́х зако́на Твоего́. ¹³⁷Пра́веден еси́, Го́споди, и пра́ви суди́ Твои́. ¹³⁸Запове́дал еси́ пра́вду свиде́ния Твоя́, и и́стину зело́. ¹³⁹Иста́яла мя́ е́сть ре́вность Твоя́, я́ко забы́ша словеса́ Твоя́ врази́ мои́. ¹⁴⁰Разжже́но сло́во Твое́ зело́, и ра́б Тво́й возлюби́ е́. ¹⁴¹Юне́йший а́з е́смь и уничиже́н, оправда́ний Твои́х не забы́х. ¹⁴²Пра́вда Твоя́ пра́вда во ве́к, и зако́н Тво́й и́стина. ¹⁴³Ско́рби и ну́жды обрето́ша мя́, за́поведи Твоя́ поуче́ние мое́. ¹⁴⁴Пра́вда свиде́ния Твоя́ в ве́к, вразуми́ мя́, и жи́в бу́ду. ¹⁴⁵Воззва́х все́м се́рдцем мои́м, услы́ши мя́, Го́споди, оправда́ния Твоя́ взыщу́. ¹⁴⁶Воззва́х Ти́, спаси́ мя́, и сохраню́ свиде́ния Твоя́. ¹⁴⁷Предвари́х в безго́дии и воззва́х, на словеса́ Твоя́ упова́х. ¹⁴⁸Предвари́сте о́чи мои́ ко у́тру, поучи́тися словесе́м Твои́м. ¹⁴⁹ Гла́с мо́й услы́ши, Го́споди, по ми́лости Твое́й: по судьбе́ Твое́й живи́ мя́. ¹⁵⁰Прибли́жишася гоня́щии мя́ беззако́нием, от зако́на же Твоего́ удали́шася. ¹⁵¹Бли́з еси́ Ты́, Го́споди, и вси́ путие́ Твои́ и́стина. ¹⁵²Испе́рва позна́х от свиде́ний Твои́х, я́ко в ве́к основа́л я́ еси́. ¹⁵³Ви́ждь смире́ние мое́ и изми́ мя́, я́ко зако́на Твоего́ не забы́х. ¹⁵⁴Суди́ су́д мо́й и изба́ви мя́, словесе́ ра́ди Твоего́ живи́ мя́. ¹⁵⁵Дале́че от гре́шник спасе́ние, я́ко оправда́ний Твои́х не взыска́ша. ¹⁵⁶Щедро́ты Твоя́ мно́ги, Го́споди, по судьбе́ Твое́й живи́ мя́. ¹⁵⁷Мно́зи изгоня́щии мя́ и стужа́ющии ми́, от свиде́ний Твои́х не уклони́хся. ¹⁵⁸Ви́дех неразумева́ющия и иста́ях, я́ко слове́с Твои́х не сохрани́ша. ¹⁵⁹Ви́ждь, я́ко за́поведи Твоя́ возлюби́х, Го́споди, по ми́лости Твое́й живи́ мя́. ¹⁶⁰Нача́ло слове́с Твои́х и́стина, и во ве́к вся́ судьбы́ пра́вды Твоея́. ¹⁶¹Кня́зи погна́ша мя́ ту́не, и от слове́с Твои́х убоя́ся се́рдце мое́. ¹⁶²Возра́дуюся а́з о словесе́х Твои́х, я́ко обрета́яй коры́сть мно́гу. ¹⁶³Непра́вду возненави́дех и омерзи́х, зако́н же Тво́й возлюби́х. ¹⁶⁴Седмери́цею дне́м хвали́х Тя́ о судьба́х пра́вды Твоея́. ¹⁶⁵Ми́р мно́г лю́бящым зако́н Тво́й, и не́сть и́м собла́зна. ¹⁶⁶Ча́ях спасе́ния Твоего́, Го́споди, и за́поведи Твоя́ возлюби́х. ¹⁶⁷Сохрани́ душа́ моя́ свиде́ния Твоя́ и возлюби́ я́ зело́. ¹⁶⁸Сохрани́х за́поведи Твоя́ и свиде́ния Твоя́, я́ко вси́ путие́ мои́ пред Тобо́ю, Го́споди. ¹⁶⁹Да прибли́жится моле́ние мое́ пред Тя́, Го́споди, по словеси́ Твоему́ вразуми́ мя́. ¹⁷⁰Да вни́дет проше́ние мое́ пред Тя́, Го́споди, по словеси́ Твоему́ изба́ви мя́. ¹⁷¹Отры́гнут устне́ мои́ пе́ние, егда́ научи́ши мя́ оправда́нием Твои́м. ¹⁷²Провеща́ет язы́к мо́й словеса́ Твоя́, я́ко вся́ за́поведи Твоя́ пра́вда. ¹⁷³Да бу́дет рука́ Твоя́ е́же спасти́ мя́, я́ко за́поведи Твоя́ изво́лих. ¹⁷⁴Возжела́х спасе́ние Твое́, Го́споди, и зако́н Тво́й поуче́ние мое́ е́сть. ¹⁷⁵Жива́ бу́дет душа́ моя́ и восхва́лит Тя́, и судьбы́ Твоя́ помо́гут мне́. ¹⁷⁶Заблуди́х, я́ко овча́ поги́бшее, взыщи́ раба́ Твоего́, я́ко за́поведей Твои́х не забы́х.

Сла́ва:

* * *

Отпусти́тельнии воскре́сны осьми́ гласо́в, с Богоро́дичны и конда́ки.

Тропа́рь, гла́с 1:

Ка́мени запеча́тану от иуде́й и во́ином стрегу́щим Пречи́стое Те́ло Твое́, воскре́сл еси́ тридне́вный, Спа́се, да́руяй ми́рови жизнь; сего́ ра́ди си́лы Небе́сныя вопия́ху Ти́, Жизнода́вче: сла́ва воскресе́нию Твое́му́, Христе́, славава Ца́рствию Твое́му, сла́ва смотре́нию Твое́му, Еди́не Человеколю́бче.

Богоро́дичен:

Гаврии́лу веща́вшу Тебе́, Де́во, ра́дуйся! Со гла́сом воплоща́шеся всех Влады́ка в Тебе́, святе́м Киво́те, я́коже рече́ пра́ведный Дави́д: яви́лася еси́ ши́ршая небе́с, поноси́вши Зижди́теля Твоего́; сла́ва Все́льшемуся в Тя́, сла́ва Проше́дшему из Тебе́, сла́ва Свободи́вшему на́с рождество́м Твои́м.

Конда́к:

Воскре́сл еси́ я́ко Бог из гро́ба во сла́ве, и ми́р совоскреси́л еси́; и естество́ челове́ческое я́ко Бо́га воспева́ет Тя́, и смерть исчезе́; Ада́м же лику́ет, Влады́ко, Е́ва, ны́не от уз избавля́ема, ра́дуется, зову́щи: Ты́ еси́, И́же все́м подая́, Христе́, воскресе́ние.

Тропа́рь, гла́с 2:

Егда́ снизше́л еси́ к сме́рти, Животе́ безсме́ртный, тогда́ а́д умертви́л еси́ блиста́нием Божества́; егда́ же и уме́ршия от преиспо́дних воскреси́л еси́, вся си́лы Небе́сныя взыва́ху: Жизнода́вче Христе́ Бо́же на́ш, сла́ва Тебе́.

Богоро́дичен:

Вся па́че смы́сла, вся́ пресла́вная Твоя́, Богоро́дице, та́инства, чистоте́ запеча́танной и де́вству храни́му³, Ма́ти позна́лася еси́ нело́жна, Бо́га ро́ждши И́стиннаго: Того́ моли́ спасти́ся душа́м на́шим.

Конда́к:

Воскре́сл еси́ от гро́ба, всеси́льне Спа́се, и а́д, ви́дев чу́до, ужасе́ся, и ме́ртвии воста́ша; тва́рь же ви́дящи сра́дуется Тебе́, и Ада́м свесели́тся, и ми́р, Спа́се мо́й, воспева́ет Тя́ при́сно.

Тропа́рь, гла́с 3:

Да веселя́тся небе́сная, да ра́дуются земна́я, я́ко сотвори́ держа́ву мы́шцею Свое́ю Госпо́дь, попра́ сме́ртию смерть, пе́рвенец ме́ртвых бы́сть, из чре́ва а́дова изба́ви на́с и подаде́ ми́рови ве́лию ми́лость.

Богоро́дичен:

Тя́, хода́тайствовавшую спасе́ние ро́да на́шего, воспева́ем, Богоро́дице Де́во: пло́тию бо, от Тебе́ восприя́тою, Сы́н Тво́й и Бог на́ш, Кресто́м восприи́м стра́сть, изба́ви на́с от тли́, я́ко Человеколю́бец.

Конда́к:

Воскре́сл еси́ дне́сь и́з гро́ба, Ще́дре, и на́с возве́л еси́ от вра́т сме́ртных; днесь Ада́м лику́ет и ра́дуется Е́ва, вку́пе же и проро́цы с патриа́рхи воспева́ют непреста́нно Боже́ственную держа́ву вла́сти Твоея́.

Тропа́рь, гла́с 4:

Све́тлую воскресе́ния пр́оповедь от А́нгела уве́девша Госпо́дни учени́цы и пра́деднее осужде́ние отве́ргша, апо́столом хваля́щася глаго́лаху, испрове́ржеся сме́рть, воскре́се Христо́с Бог, да́руяй ми́рови ве́лию ми́лость.

Богоро́дичен:

Е́же от ве́ка утае́нное и А́нгелом несве́домое та́инство, Тобо́ю, Богоро́дице, су́щим на земли́ яви́ся Бог, в несли́тнем соедине́нии воплоща́емь, и Кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Конда́к:

Спа́с и Изба́витель мо́й, из гро́ба я́ко Бог, воскреси́ от у́з земноро́дныя, и врата́ а́дова сокруши́, и я́ко Влады́ка воскре́се тридне́вен.

Тропа́рь, гла́с 5:

Собезнача́льное Сло́во Отцу́ и Ду́хови, от Де́вы ро́ждшееся на спасе́ние на́ше, воспои́м ве́рнии и поклони́мся, я́ко благоволи́ пло́тию взы́ти на Кре́ст, и сме́рть претерпе́ти, и воскреси́ти уме́ршия сла́вным Воскресе́нием Свои́м.

Богоро́дичен:

Ра́дуйся, две́ре Госпо́дня непроходи́мая, ра́дуйся, стено́ и покро́ве притека́ющих к Тебе́; ра́дуйся, необурева́емое приста́нище и Неискусобра́чная, ро́ждшая пло́тию Творца́ Твоего́ и Бо́га, моля́щи не оскудева́й о воспева́ющих и кла́няющихся Рождеству́ Твоему́.

Конда́к:

Ко а́ду, Спа́се мо́й, соше́л еси́, и врата́ сокруши́вый я́ко Всеси́лен, уме́рших я́ко Созда́тель совоскреси́л еси́, и сме́рти жа́ло сокруши́л еси́, и Ада́м от кля́твы изба́влен бы́сть, Человеколю́бче; те́мже вси́ зове́м: спаси́ на́с, Го́споди.

Тропа́рь, гла́с 6:

А́нгельския си́лы на гро́бе Твое́м и стрегу́щия омертве́ша, и стоя́ше Мари́я во гро́бе, и́щущи Пречи́стаго Те́ла Твоего́; плени́л еси́ а́д, не искуси́вся от него́; сре́тил еси́ Де́ву, да́руяй живо́т, Воскресы́й из ме́ртвых, Го́споди, сла́ва Тебе́.

Богоро́дичен:

Благослове́нную нареки́й Твою́ Ма́терь, прише́л еси́ на стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля А́нгелом: сра́дуйтеся Мне́, я́ко обре́теся поги́бшая дра́хма; вся́ му́дре устро́ивый, Бо́же на́ш, сла́ва Тебе́.

Конда́к:

Живонача́льною дла́нию, уме́ршия от мра́чных удо́лий Жизнода́вец воскреси́в все́х Христо́с Бог, воскресе́ние подаде́ челове́ческому ро́ду: е́сть бо все́х Спаси́тель, Воскресе́ние и Живо́т, и Бог все́х.

Тропа́рь, гла́с 7:

Разруши́л еси́ Кресто́м Твои́м сме́рть, отве́рзл еси́ разбо́йнику ра́й, мироно́сицам пла́ч преложи́л еси́ и апо́столом пропове́дати повеле́л еси́, я́ко воскре́сл еси́, Христе́ Бо́же, да́руяй ми́рови ве́лию ми́лость.

Богоро́дичен:

Я́ко на́шего воскресе́ния сокро́вище, на Тя́ наде́ющияся, Всепе́тая, от ро́ва и глубины́ прегреше́ний возведи́; Ты бо пови́нныя греху́ спасла́ еси́, ро́ждшая Спасе́ние на́ше; Я́же пре́жде рождества́ Де́ва, и в рождестве́ Де́ва, и по рождестве́ па́ки пребыва́еши Де́ва.

Конда́к:

Не ктому́ держа́ва сме́ртная возмо́жет держа́ти челове́ки: Христо́с бо сни́де, сокруша́я и разоря́я си́лы ея́; связу́емь быва́ет а́д, проро́цы согла́сно ра́дуются, предста́, глаго́люще, Спас су́щим в ве́ре: изыди́те ве́рнии в воскресе́ние.

Тропа́рь, гла́с 8:

С высоты́ снизше́л еси́, Благоутро́бне, погребе́ние прия́л еси́ тридне́вное, да на́с свободи́ши страсте́й, Животе́ и Воскресе́ние на́ше, Го́споди, сла́ва Тебе́.

Богоро́дичен:

И́же на́с ра́ди рожде́йся от Де́вы и распя́тие претерпе́в, Благи́й, испрове́ргий сме́ртию сме́рть и воскресе́ние явле́й я́ко Бог, не пре́зри, я́же созда́л еси́ руко́ю Твое́ю: яви́ человеколю́бие Твое́, Ми́лостиве, приими́ ро́ждшую Тя́ Богоро́дицу, моля́щуюся за ны́, и спаси́, Спа́се на́ш, лю́ди отча́янныя.

Конда́к:

Воскре́с из гро́ба, уме́ршия воздви́гл еси́, и Ада́ма воскреси́л еси́, и Е́ва лику́ет во Твое́м воскресе́нии, и мирсти́и концы́ торжеству́ют, е́же из ме́ртвых воста́нием Твои́м, Многоми́лостиве.

* * *

Богоро́дичны отпусти́тельнии, пое́мии во все́ ле́то, в вече́рни,

и на Бо́г Госпо́дь, во у́трени, и па́ки в коне́ц у́трени.

В неде́лю ве́чера и в понеде́льник, на Бо́г Госпо́дь, гла́с 1:

Чу́до чуде́с, Благода́тная, в Тебе́ зря́щи, / тва́рь ра́дуется: / зачала́ бо еси́ безсе́менно / и родила́ еси́ неизрече́нно / Его́же чинонача́лия А́нгелов ви́дети не мо́гут, / Того́ моли́ о душа́х на́ших.

В коне́ц у́трени:

Пречи́стая Богоро́дице, / на Небесе́х благослове́нная и на земли́ славосло́вимая, / ра́дуйся, Неве́сто Неневе́стная.

В понеде́льник ве́чера и во вто́рник, на Бо́г Госпо́дь:

Заче́нши неопа́льно о́гнь Божества́, и ро́ждши безсе́менно исто́чника жизни, Го́спода, благода́тная Богоро́дице, спаса́й Тя́ велича́ющия.

В коне́ц у́трени:

Безма́терняго на Небеси́, па́че мы́сли и слу́ха, / на земли́ без отца́ родила́ еси́; / Того́, Богоро́дице, / моли́ о душа́х на́ших.

В вто́рник ве́чера и в сре́ду, на Бо́г Госпо́дь:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Твоего́ везде́ соблюда́еми, / по до́лгу Тя́ вси́ благоче́стно велича́ем.

В коне́ц у́трени:

Пречи́стая Богоро́дице, / на Небесе́х благослове́нная и на земли́ славосло́вимая, / ра́дуйся, Неве́сто Неневе́стная.

В сре́ду ве́чера и в четверто́к, на Бо́г Госпо́дь:

Заче́нши неопа́льно о́гнь Божества́, и ро́ждши безсе́менно исто́чника жизни, Го́спода, благода́тная Богоро́дице, спаса́й Тя́ велича́ющия.

В коне́ц у́трени:

Безма́терняго на Небеси́, па́че мы́сли и слу́ха, / на земли́ без отца́ родила́ еси́; / Того́, Богоро́дице, / моли́ о душа́х на́ших.

В четверто́к ве́чера и в пято́к, на Бо́г Госпо́дь:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Твоего́ везде́ соблюда́еми, / по до́лгу Тя́ вси́ благоче́стно велича́ем.

В коне́ц у́трени:

Пречи́стая Богоро́дице, / на Небесе́х благослове́нная и на земли́ славосло́вимая, / ра́дуйся, Неве́сто Неневе́стная.

В пято́к ве́чера и в суббо́ту, на Бо́г Госпо́дь:

Гаврии́лу веща́вшу Тебе́, Де́во, ра́дуйся, / со гла́сом воплоща́шеся все́х Влады́ка / в Тебе́, святе́м киво́те, / я́коже рече́ пра́ведный Дави́д, / яви́лася еси́ ши́ршая Небе́с, / поноси́вши Зижди́теля Твоего́: / сла́ва Все́льшемуся в Тя́; / сла́ва Проше́дшему из Тебе́; / сла́ва Свободи́вшему на́с Рождество́м Твои́м.

В коне́ц у́трени:

Безма́терняго на Небеси́, па́че мы́сли и слу́ха, / на земли́ без отца́ родила́ еси́; / Того́, Богоро́дице, / моли́ о душа́х на́ших.

В неде́лю ве́чера и в понеде́льник, на Бо́г Госпо́дь, гла́с 2:

Благоутро́бия су́щи исто́чник, / ми́лости сподо́би на́с, Богоро́дице, / при́зри на лю́ди согреши́вшия, / яви́, я́ко при́сно, си́лу Твою́: / на Тя́ бо упова́юще, / ра́дуйся, вопие́м Ти́, / я́коже иногда́ Гаврии́л, безпло́тных Архистрати́г.

В коне́ц у́трени:

Ма́ти Свята́я неизрече́ннаго Све́та, / а́нгельскими Тя́ пе́сньми почита́юще, / благоче́стно велича́ем.

В понеде́льник ве́чера и во вто́рник, на Бо́г Госпо́дь:

Боже́ственнаго бы́хом о́бщницы естества́ / Тобо́ю, Богоро́дице Присноде́во, / Бо́га бо на́м воплоти́вшагося родила́ еси́; / Те́мже по до́лгу Тя́ вси́ благоче́стно велича́ем.

В коне́ц у́трени:

Тя велича́ем, Богоро́дице, вопию́ще: / ра́дуйся, незаходи́маго Све́та о́блаче, / Того́ носи́вши в не́дрех Сла́вы Го́спода.

В вто́рник ве́чера и в сре́ду, на Бо́г Госпо́дь:

Препросла́вленна еси́, Богоро́дице Де́во, пое́м Тя́: / Кресто́м бо Сы́на Твоего́ низложи́ся а́д / и смерть умертви́ся, / умерщвле́ннии, воста́хом и живота́ сподо́бихомся, / ра́й восприя́хом, дре́внее наслажде́ние. / Те́м, благодаря́ще, славосло́вим, / я́ко держа́внаго Христа́ Бо́га на́шего / и Еди́наго Многоми́лостиваго.

В коне́ц у́трени:

Тя́ велича́ем, Богоро́дице, вопию́ще: / ра́дуйся, же́зле, / от него́же безсе́менно Бог прозябы́й / погуби́ на Дре́ве сме́рть.

В сре́ду ве́чера и в четверто́к, на Бо́г Госпо́дь:

Боже́ственнаго бы́хом о́бщницы естества́ / Тобо́ю, Богоро́дице Присноде́во, / Бо́га бо на́м воплоти́вшагося родила́ еси́; / Те́мже по до́лгу Тя́ вси́ благоче́стно велича́ем.

В коне́ц у́трени:

Тя́ велича́ем, Богоро́дице, вопию́ще: / ра́дуйся, же́зле, / от него́же безсе́менно Бог прозябы́й / погуби́ на Дре́ве сме́рть.

В четверто́к ве́чера и в пято́к, на Бо́г Госпо́дь:

Препросла́вленна еси́, Богоро́дице Де́во, пое́м Тя́: / Кресто́м бо Сы́на Твоего́ низложи́ся а́д / и смерть умертви́ся, / умерщвле́ннии, воста́хом и живота́ сподо́бихомся, / ра́й восприя́хом, дре́внее наслажде́ние. / Те́м, благодаря́ще, славосло́вим, / я́ко держа́внаго Христа́ Бо́га на́шего / и Еди́наго Многоми́лостиваго.

В коне́ц у́трени:

Тя́ велича́ем, Богоро́дице, вопию́ще: / ра́дуйся, же́зле, / от него́же безсе́менно Бог прозябы́й / погуби́ на Дре́ве сме́рть.

В пято́к ве́чера и в суббо́ту, на Бо́г Госпо́дь:

Вся па́че смы́сла, / вся́ пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго. / Того́ моли́ спасти́ся душа́м на́шим.

В коне́ц у́трени:

Ма́ти Свята́я неизрече́ннаго Све́та, / а́нгельскими Тя́ пе́сньми почита́юще, / благоче́стно велича́ем.

А́ще же прилучи́тся Аллилу́иа ко́ем-либо гла́се, глаго́лются сия́, гла́с 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о на́с Того́, я́ко Бла́га, моли́те, / спасти́ся, мо́лимся, душа́м на́шим.

Помяни́, Го́споди, я́ко Бла́г, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты́, / моги́й и преста́вленным да́ти поко́й.

Ма́ти Свята́я неизрече́ннаго Све́та, / а́нгельскими Тя́ пе́сньми почита́юще, / благоче́стно велича́ем.

В неде́лю ве́чера и в понеде́льник, на Бо́г Госпо́дь, гла́с 3:

Красоте́ де́вства Твоего́ и пресве́тлой чистоте́ Твое́й / Гаврии́л удиви́ся, вопия́ше Ти́, Богоро́дице: / ку́ю Ти́ похвалу́ принесу́ досто́йную? / Что же возимену́ю Тя? / Недоумева́ю и ужаса́юся; / Те́мже я́ко повеле́н бых, вопию́ Ти: / ра́дуйся, Благода́тная.

В коне́ц у́трени:

Ки́йждо, иде́же спаса́ется, / та́мо пра́ведно и притека́ет, / и ко́е ино́е таково́е прибе́жище, / я́ко Ты́, Богоро́дице, / покрыва́ющее ду́ши на́ша.

В понеде́льник ве́чера и во вто́рник, на Бо́г Госпо́дь:

Прибе́жище и си́ла на́ша, Богоро́дице, / держа́вная по́мощь ми́ра, / моли́твами Твои́ми покры́й рабы́ Твоя́ / от вся́кия ну́жды, / еди́на Благослове́нная.

В коне́ц у́трени:

Ки́йждо, иде́же спаса́ется, / та́мо пра́ведно и притека́ет, / и ко́е ино́е таково́е прибе́жище, / я́ко Ты́, Богоро́дице, / покрыва́ющее ду́ши на́ша.

В вто́рник ве́чера и в сре́ду, на Бо́г Госпо́дь:

Же́зл си́лы стяжа́вшии, / Крест Сы́на Твоего́, Богоро́дице, / те́м низлага́ем враго́в шата́ния, / любо́вию Тя́ непреста́нно велича́юще.

В коне́ц у́трени:

Прибе́жище и си́ла на́ша, Богоро́дице, / держа́вная по́мощь ми́ра, / моли́твами Твои́ми покры́й рабы́ Твоя́ / от вся́кия ну́жды, / еди́на Благослове́нная.

В сре́ду ве́чера и в четверто́к, на Бо́г Госпо́дь:

Проро́цы пропове́даша, / апо́столи научи́ша, / му́ченицы испове́даша / и мы ве́ровахом Богоро́дицу Тя́ вои́стину су́щую: / те́м и велича́ем Рождество́ Твое́ неизрече́нное.

В коне́ц у́трени:

Ки́йждо, иде́же спаса́ется, / та́мо пра́ведно и притека́ет, / и ко́е ино́е таково́е прибе́жище, / я́ко Ты, Богоро́дице, / покрыва́ющее ду́ши на́ша.

В четверто́к ве́чера и в пято́к, на Бо́г Госпо́дь:

Же́зл си́лы стяжа́вшии, / Крест Сы́на Твоего́, Богоро́дице, / те́м низлага́ем враго́в шата́ния, / любо́вию Тя́ непреста́нно велича́юще.

В коне́ц у́трени:

Прибе́жище и си́ла на́ша, Богоро́дице, / держа́вная по́мощь ми́ра, / моли́твами Твои́ми покры́й рабы́ Твоя́ / от вся́кия ну́жды, / еди́на Благослове́нная.

В пято́к ве́чера и в суббо́ту, на Бо́г Госпо́дь:

Тя, хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо, от Тебе́ восприя́тою, Сы́н Тво́й и Бо́г на́ш, / Кресто́м восприи́м Страсть, / изба́ви на́с от тли́, я́ко Человеколю́бец.

В коне́ц у́трени:

Проро́цы пропове́даша, / апо́столи научи́ша, / му́ченицы испове́даша / и мы ве́ровахом Богоро́дицу Тя́ вои́стину су́щую: / те́м и велича́ем Рождество́ Твое́ неизрече́нное.

В неде́лю ве́чера и в понеде́льник, на Бо́г Госпо́дь, гла́с 4:

Воспита́вшейся во хра́ме во свята́я святы́х, / оде́янней ве́рою и прему́дростию и безме́рным де́вством, / Архистрати́г Гаврии́л принесе́ с Небесе́ целова́ние / и е́же ра́дуйся: ра́дуйся, Благослове́нная, / ра́дуйся, Препросла́вленная, Госпо́дь с Тобо́ю.

В коне́ц у́трени:

Я́ко все́х еси́ творе́ний Вы́шшая, / воспева́ти Тя́ досто́йно недоумева́юще, Богоро́дице, / ту́не, мо́лим Тя́, поми́луй на́с.

В понеде́льник ве́чера и во вто́рник, на Бо́г Госпо́дь:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны́ милосе́рдовавши; / потщи́ся, погиба́ем от мно́жества прегреше́ний, / не отврати́ Твоя́ рабы́ тщи́, / Тя́ бо и еди́ну Наде́жду и́мамы.

В коне́ц у́трени:

Тя́ велича́ем, Богоро́дице, вопию́ще: / Ты́ еси́ купина́, в не́йже неопа́льно Моисе́й ви́де / я́ко пла́мень О́гнь Божества́.

В вто́рник ве́чера и в сре́ду, на Бо́г Госпо́дь:

Де́во Пренепоро́чная, Ма́ти Христа́ Бо́га, / ору́жие про́йде Твою́ пресвяту́ю ду́шу, / егда́ распина́ема ви́дела еси́ во́лею Сы́на и Бо́га Твоего́: / Его́же, Благослове́нная, моля́щи не преста́й / проще́ние прегреше́ний нам дарова́ти.

В коне́ц у́трени:

Тя велича́ем, Богоро́дице, вопию́ще: / Ты́ еси́ гора́, от нея́же неизглаго́ланно отсече́ся Ка́мень / и врата́ а́дова сокруши́.

В сре́ду ве́чера и в четверто́к, на Бо́г Госпо́дь:

Сло́во О́тчее, Христа́ Бо́га на́шего, / от Тебе́ воплоти́вшагося, позна́хом, Богоро́дице Де́во, / еди́на Чи́стая, / еди́на Благослове́нная: / те́м непреста́нно Тя́, воспева́юще, велича́ем.

В коне́ц у́трени:

Я́ко все́х еси́ творе́ний Вы́шшая, / воспева́ти Тя́ досто́йно недоумева́юще, Богоро́дице, / ту́не, мо́лим Тя́, поми́луй нас.

В четверто́к ве́чера и в пято́к, на Бо́г Госпо́дь:

Де́во Пренепоро́чная, Ма́ти Христа́ Бо́га, / ору́жие про́йде Твою́ пресвяту́ю ду́шу, / егда́ распина́ема ви́дела еси́ во́лею Сы́на и Бо́га Твоего́: / Его́же, Благослове́нная, моля́щи не преста́й / проще́ние прегреше́ний нам дарова́ти.

В коне́ц у́трени:

Тя́ велича́ем, Богоро́дице, вопию́ще: / Ты́ еси́ гора́, от нея́же неизглаго́ланно отсече́ся Ка́мень / и врата́ а́дова сокруши́.

В пято́к ве́чера и в суббо́ту, на Бо́г Госпо́дь:

Е́же от ве́ка утае́нное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем, / и, Кре́ст во́лею на́с ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

В коне́ц у́трени:

Тя́ велича́ем, Богоро́дице, вопию́ще: / Ты́ еси́ купина́, в не́йже неопа́льно Моисе́й ви́де / я́ко пла́мень О́гнь Божества́.

В неде́лю ве́чера и в понеде́льник, на Бо́г Госпо́дь, гла́с 5:

Со А́нгелы Небе́сная, с челове́ки земна́я, / гла́сом ра́дования, Богоро́дице, вопие́м Ти: / ра́дуйся, врата́, Небе́с ши́ршая; / ра́дуйся, еди́на земноро́дных спасе́ние; / ра́дуйся, Чи́стая Благода́тная, / ро́ждшая Бо́га воплоти́вшагося.

В коне́ц у́трени:

От Де́вы возсия́вый ми́ру, Христе́ Бо́же, / сы́ны Све́та То́ю показа́вый, поми́луй на́с.

В понеде́льник ве́чера и во вто́рник, на Бо́г Госпо́дь:

Ско́рый Твой покро́в, и по́мощь, / и ми́лость покажи́ на рабы́ Твоя́: / и во́лны, Чи́стая, укроти́ су́етных помысло́в, / и па́дшую мою́ ду́шу возста́ви, Богоро́дице: / вем бо, вем, Де́во, / я́ко мо́жеши, ели́ка и хо́щеши.

В коне́ц у́трени:

Ма́ти Бо́жия Пресвята́я, стено́ христиа́н, / изба́ви лю́ди Твоя́ обы́чно, зову́щия Ти́ приле́жно: / сопроти́вися сра́мным и го́рдым помысло́м, да вопие́м Ти́: / ра́дуйся, Присноде́во.

В вто́рник ве́чера и в сре́ду, на Бо́г Госпо́дь:

Кресто́м Сы́на Твоего́, Богоблагода́тная, / и́дольская пре́лесть вся́ упраздни́ся / и де́монская кре́пость попра́ся: / сего́ ра́ди, ве́рнии, по до́лгу Тя́ при́сно пое́м и благослови́м / и, Богоро́дицу вои́стинну испове́дующе Тя́, велича́ем.

В коне́ц у́трени:

От Де́вы возсия́вый ми́ру, Христе́ Бо́же, / сы́ны Све́та То́ю показа́вый, поми́луй на́с.

В сре́ду ве́чера и в четверто́к, на Бо́г Госпо́дь:

Стра́нное Де́вы та́инство ми́ру показа́ся спаси́тельное: / от Нея́ бо роди́лся еси́ бе́з се́мене / и пло́тию показа́лся еси́ бе́з истле́ния, / все́х ра́досте, Го́споди, сла́ва Тебе́.

В коне́ц у́трени:

Ма́ти Бо́жия Пресвята́я, стено́ христиа́н, / изба́ви лю́ди Твоя́ обы́чно, зову́щия Ти́ приле́жно: / сопроти́вися сра́мным и го́рдым помысло́м, да вопие́м Ти́: / ра́дуйся, Присноде́во.

В четверто́к ве́чера и в пято́к, на Бо́г Госпо́дь:

Кресто́м Сы́на Твоего́, Богоблагода́тная, / и́дольская пре́лесть вся́ упраздни́ся / и де́монская кре́пость попра́ся: / сего́ ра́ди, ве́рнии, по до́лгу Тя́ при́сно пое́м и благослови́м / и, Богоро́дицу вои́стинну испове́дующе Тя́, велича́ем.

В коне́ц у́трени:

От Де́вы возсия́вый ми́ру, Христе́ Бо́же, / сы́ны Све́та То́ю показа́вый, поми́луй на́с.

В пято́к ве́чера и в суббо́ту, на Бо́г Госпо́дь:

Ра́дуйся, две́ре Госпо́дня непроходи́мая; / ра́дуйся, стено́ и покро́ве притека́ющих к Тебе́; / ра́дуйся, необурева́емое приста́нище и неискусобра́чная, / ро́ждшая пло́тию Творца́ Твоего́ и Бо́га, / моля́щи не оскудева́й о воспева́ющих / и кла́няющихся Рождеству́ Твоему́.

В коне́ц у́трени:

От Де́вы возсия́вый ми́ру, Христе́ Бо́же, / сы́ны Све́та То́ю показа́вый, поми́луй на́с.

В неде́лю ве́чера и в понеде́льник, на Бо́г Госпо́дь, гла́с 6:

Нача́ло спасе́ния / Гаврии́лово провеща́ние к Де́ве бы́сть: / слы́ша бо, е́же ра́дуйся, и не убеже́ целова́ния, / не усумне́ся, я́ко Са́рра в се́ни, / но си́це глаго́лаше: / се раба́ Госпо́дня, / бу́ди Мне́ по глаго́лу твоему́.

В коне́ц у́трени:

Арха́нгельское сло́во прия́ла еси́, / и херуви́мский престо́л показа́лася еси́, / и на объя́тиих Твои́х носи́ла еси́, Богоро́дице, / Наде́жду ду́ш на́ших.

В понеде́льник ве́чера и во вто́рник, на Бо́г Госпо́дь:

Упова́ние ми́ра, / Блага́я Богоро́дице Де́во, / Твое́ и еди́но держа́вное предста́тельство про́сим: / умилосе́рдися на безпредста́тельственныя лю́ди, / моли́ Ми́лостиваго Бо́га / изба́витися душа́м на́шим от вся́каго преще́ния, / еди́на Благослове́нная.

В коне́ц у́трени:

Никто́же, притека́яй к Тебе́, / посра́млен от Тебе́ исхо́дит, / Пречи́стая Богоро́дице Де́во: / но про́сит благода́ти / и прие́млет дарова́ние к поле́зному проше́нию.

В вто́рник ве́чера и в сре́ду, на Бо́г Госпо́дь:

Богоро́дице Де́во, / моли́ Сы́на Твоего́, / во́лею пригвозди́вшагося на Кресте́ / и ми́р от пре́лести свобо́ждшаго, / Христа́ Бо́га на́шего, / поми́ловати ду́ши на́ша.

В коне́ц у́трени:

Пре́жде ве́к от Отца́ без ма́тере рожде́нна, / Сы́на и Сло́ва Бо́жия, / в после́дняя ле́та родила́ еси́, / воплоти́вшагося от чи́стых крове́й Твои́х, Богороди́тельнице, без му́жа: / Его́же моли́ / дарова́тися на́м грехо́в оставле́нию пре́жде конца́.

В сре́ду ве́чера и в четверто́к, на Бо́г Госпо́дь:

Свята́я Влады́чице, / Чи́стая Бо́га на́шего Ма́ти, / все́х Творца́ неизрече́нно ро́ждшая, / моли́ со апо́столы свяще́нными всегда́ бла́гость Его́, / страсте́й на́с изба́вити / и оставле́ние на́м да́ти грехо́в.

В коне́ц у́трени:

Вели́ких дарова́ний, / Чи́стая Де́во Богома́ти, / Ты́ сподо́билася еси́: / я́ко родила́ еси́ пло́тию / Еди́наго от Тро́ицы, Христа́ Жизнода́вца, / во спасе́ние ду́ш на́ших.

В четверто́к ве́чера и в пято́к, на Бо́г Госпо́дь:

Богоро́дице Де́во, / моли́ Сы́на Твоего́, / во́лею пригвозди́вшагося на Кресте́ / и ми́р от пре́лести свобо́ждшаго, / Христа́ Бо́га на́шего, / поми́ловати ду́ши на́ша.

В коне́ц у́трени:

Пре́жде ве́к от Отца́ без ма́тере рожде́нна, / Сы́на и Сло́ва Бо́жия, / в после́дняя ле́та родила́ еси́, / воплоти́вшагося от чи́стых крове́й Твои́х, Богороди́тельнице, без му́жа: / Его́же моли́ / дарова́тися на́м грехо́в оставле́нию пре́жде конца́.

В пято́к ве́чера и в суббо́ту, на Бо́г Госпо́дь:

Предповеству́ет Гедео́н зача́тие / и сказу́ет Дави́д Рождество́ Твое́, Богоро́дице: / сни́де бо, я́ко дождь на руно́, / Сло́во во чре́во Твое́, / и прозябла́ еси́ без се́мене, земле́ свята́я, / ми́ра Спасе́ние, Христа́ Бо́га на́шего, Благода́тная.

В коне́ц у́трени:

Пре́жде ве́к от Отца́ без ма́тере рожде́нна, / Сы́на и Сло́ва Бо́жия, / в после́дняя ле́та родила́ еси́, / воплоти́вшагося от чи́стых крове́й Твои́х, Богороди́тельнице, без му́жа: / Его́же моли́ / дарова́тися на́м грехо́в оставле́нию пре́жде конца́.

В неде́лю ве́чера и в понеде́льник, на Бо́г Госпо́дь, гла́с 7:

Богоро́дице Де́во Нескве́рная, / Сы́на Твоего́ моли́ / с Го́рними Си́лами / проще́нию прегреше́ний на́м пре́жде конца́ дарова́тися, / ве́рно Тя́ сла́вящим.

В коне́ц у́трени:

Превозшла́ еси́ Си́лы Небе́сныя, / зане́ хра́м показа́лася еси́ Боже́ственный, / Благослове́нная Богоро́дице, / я́ко ро́ждшая Христа́, / Спа́са ду́ш на́ших.

В понеде́льник ве́чера и во вто́рник, на Бо́г Госпо́дь:

Ра́дуйся, Тебе́ приво́дим, Богоро́дице: / А́нгелов бо вы́шшая показа́лася еси́, / Бо́га ро́ждшая.

В коне́ц у́трени:

Умири́ моли́твами Богоро́дицы жи́знь на́шу, / вопию́щих Ти́: / Ми́лостиве Го́споди, сла́ва Тебе́.

В вто́рник ве́чера и в сре́ду, на Бо́г Госпо́дь:

Распе́ншагося за ны́ Христа́ Бо́га / и разруши́вшаго сме́рти держа́ву / непреста́нно моли́, Богоро́дице Де́во, / да спасе́т ду́ши на́ша.

В коне́ц у́трени:

Изба́ви, Богоро́дице, от содержа́щих на́с грехо́в, / я́ко ина́го упова́ния, ве́рнии, не и́мамы, ра́зве Тебе́ / и от Тебе́ ро́ждшагося Бо́га.

В сре́ду ве́чера и в четверто́к, на Бо́г Госпо́дь:

Плод чре́ва Твоего́, Пречи́стая, / проро́ков е́сть и зако́на исполне́ние: / те́м Тя́, Богоро́дицу, / в ве́дении сла́вяще, / благоче́стно велича́ем.

В коне́ц у́трени:

Пло́д чре́ва Твоего́, Богоневе́сто, / челове́ком показа́ся спасе́ния хода́тайственный: / те́м Тя́, Богоро́дицу, / ра́зумом и язы́ком сла́вяще, / ве́рнии, велича́ем.

В четверто́к ве́чера и в пято́к, на Бо́г Госпо́дь:

Распе́ншагося за ны́ Христа́ Бо́га / и разруши́вшаго сме́рти держа́ву / непреста́нно моли́, Богоро́дице Де́во, / да спасе́т ду́ши на́ша.

В коне́ц у́трени:

Изба́ви, Богоро́дице, от содержа́щих на́с грехо́в, / я́ко ина́го упова́ния, ве́рнии, не и́мамы, ра́зве Тебе́ / и от Тебе́ ро́ждшагося Бо́га.

В пято́к ве́чера и в суббо́ту, на Бо́г Госпо́дь:

Я́ко на́шего воскресе́ния сокро́вище, / на Тя́ наде́ющияся, Всепе́тая, / от ро́ва и глубины́ прегреше́ний возведи́, / Ты́ бо пови́нныя греху́ спасла́ еси́, / ро́ждшая Спасе́ние на́ше: / Я́же пре́жде рождества́ Де́ва, и в рождестве́ Де́ва, / и по рождестве́ па́ки пребыва́еши Де́ва.

В коне́ц у́трени:

Ра́дуйся, Невмести́маго в Небесе́х / вмести́вшая во утро́бе Твое́й: / ра́дуйся, Де́во, проро́ков пропове́дание, / Е́юже возсия́ Емману́ил: / ра́дуйся, Ма́ти Христа́ Бо́га.

В неде́лю ве́чера и в понеде́льник, на Бо́г Госпо́дь, гла́с 8:

Ра́дуйся, А́нгелом Ра́дость ми́ра прие́мшая: / ра́дуйся, ро́ждшая Творца́ Твоего́ и Го́спода: / ра́дуйся, сподо́бльшаяся бы́ти Ма́ти Бо́жия.

В коне́ц у́трени:

Ра́дуйся, врата́ Царя́ Сла́вы, / я́же Вы́шний Еди́н про́йде / и Еди́ну запеча́тану сохрани́ / во спасе́ние ду́ш на́ших.

В понеде́льник ве́чера и во вто́рник, на Бо́г Госпо́дь:

Недви́жимое утвержде́ние ве́ры / и честны́й да́р ду́ш на́ших, / Богоро́дицу пе́сньми велича́ем, ве́рнии: / ра́дуйся, Ка́мень жи́зни во чре́ве Твое́м вмести́вшая; / ра́дуйся, конце́й наде́ждо, скорбя́щих заступле́ние; / ра́дуйся, Неве́сто Неневе́стная.

В коне́ц у́трени:

Де́во Пречи́стая, спаси́ ны́ моли́твами Твои́ми, / дви́жущи утро́бу ма́тернюю, / Сы́ну Твоему́ и Бо́гу на́шему.

В вто́рник ве́чера и в сре́ду, на Бо́г Госпо́дь:

А́гнца, и Па́стыря, и Спа́са ми́ра на Кресте́ зря́щи, / Ро́ждшая Тя́ глаго́лаше, слезя́щи: / ми́р у́бо ра́дуется, прие́мля избавле́ние, / утро́ба же Моя́ гори́т, зря́щи Твое́ распя́тие, / е́же за все́х терпи́ши, Сы́не и Бо́же Мо́й.

В коне́ц у́трени:

Плод чре́ва Твоего́, Пречи́стая, / проро́ков е́сть и зако́на исполне́ние: / те́м Тя́, Богоро́дицу, в ве́дении сла́вяще, / благоче́стно велича́ем.

В сре́ду ве́чера и в четверто́к, на Бо́г Госпо́дь:

Мы́сленная врата́ Жи́зни, Пречи́стая Богоро́дице, / притека́ющия к Тебе́ ве́рно изба́ви от бед, / да сла́вим пресвято́е Рождество́ Твое́ во спасе́ние ду́ш на́ших.

В коне́ц у́трени:

Де́во Пречи́стая, спаси́ ны́ моли́твами Твои́ми, / дви́жущи утро́бу ма́тернюю, / Сы́ну Твоему́ и Бо́гу на́шему.

В четверто́к ве́чера и в пято́к, на Бо́г Госпо́дь:

А́гнца, и Па́стыря, и Спа́са ми́ра на Кресте́ зря́щи, / Ро́ждшая Тя́ глаго́лаше, слезя́щи: / ми́р у́бо ра́дуется, прие́мля избавле́ние, / утро́ба же Моя́ гори́т, зря́щи Твое́ распя́тие, / е́же за все́х терпи́ши, Сы́не и Бо́же Мо́й.

В коне́ц у́трени:

Плод чре́ва Твоего́, Пречи́стая, / проро́ков е́сть и зако́на исполне́ние: / те́м Тя́, Богоро́дицу, в ве́дении сла́вяще, / благоче́стно велича́ем.

В пято́к ве́чера и в суббо́ту, на Бо́г Госпо́дь:

И́же на́с ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию сме́рть / и Воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве: / приими́ ро́ждшую Тя́ Богоро́дицу, моля́щуюся за ны́, / и спаси́, Спа́се на́ш, лю́ди отча́янныя.

В коне́ц у́трени:

Де́во Пречи́стая, спаси́ ны́ моли́твами Твои́ми, / дви́жущи утро́бу ма́тернюю, / Сы́ну Твоему́ и Бо́гу на́шему.

* * *

Отпусти́тельнии тропари́ всея́ седми́цы

В неде́лю ве́чера, тропа́рь, гла́с 4:

Небе́сных во́инств Архистрати́зи,/ мо́лим ва́с при́сно мы́ недосто́йнии,/ да ва́шими моли́твами огради́те на́с/ кро́вом кри́л невеще́ственныя ва́шея сла́вы,/ сохраня́юще на́с, припа́дающих приле́жно, и вопию́щих:/ от бе́д изба́вите на́с,// я́ко чинонача́льницы Вы́шних Си́л.

Богоро́дичен, гла́с то́йже:

Воспита́вшейся во хра́ме во свята́я святы́х, / оде́янней ве́рою и прему́дростию и безме́рным де́вством, / Архистрати́г Гаврии́л принесе́ с Небесе́ целова́ние / и е́же ра́дуйся: ра́дуйся Благослове́нная, / ра́дуйся Препросла́вленная, Госпо́дь с Тобо́ю.

В понеде́льник ве́чера, тропа́рь, гла́с 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго; / те́мже за и́стину пострада́в ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго гре́х ми́ра / и подаю́щаго на́м ве́лию ми́лость.

Богоро́дичен, гла́с то́йже:

Боже́ственнаго бы́хом о́бщницы естества́ / Тобо́ю, Богоро́дице Присноде́во, / Бо́га бо нам воплоти́вшагося родила́ еси́; / те́мже по до́лгу Тя́ вси́ благоче́стно велича́ем.

Во вто́рник ве́чера, тропа́рь, гла́с 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Крестобогоро́дичен:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Твоего́ везде́ соблюда́еми, / по до́лгу Тя́ вси́ благоче́стно велича́ем.

В сре́ду ве́чера, тропа́рь, гла́с 3:

Апо́столи святи́и, / моли́те Ми́лостиваго Бо́га, / да прегреше́ний оставле́ние / пода́ст душа́м на́шим.

Иный, глас 4:

Пра́вило ве́ры и о́браз кро́тости, / воздержа́ния учи́теля / яви́ тя́ ста́ду твоему́, / Я́же веще́й И́стина: / сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Богоро́дичен:

Сло́во О́тчее, Христа́ Бо́га на́шего, / от Тебе́ воплоти́вшагося, позна́хом, Богоро́дице Де́во, / еди́на Чи́стая, / еди́на Благослове́нная: / те́м непреста́нно Тя́, воспева́юще, велича́ем.

В четверто́к ве́чера, тропа́рь:

Спаси́, Го́споди, лю́ди Твоя́ / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Крестобогоро́дичен:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Твоего́ везде́ соблюда́еми, / по до́лгу Тя́ вси́ благоче́стно велича́ем.

В пято́к:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии, и ве́ру соблю́дшии, / дерзнове́ние иму́ще ко Спа́су, / о на́с Того́, я́ко Бла́га моли́те, / спасти́ся, мо́лимся, душа́м на́шим.

Помяни́, Го́споди, я́ко Бла́г, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты́ / моги́й и преста́вленным да́ти поко́й.

Богоро́дичен:

Ма́ти Свята́я неизрече́ннаго Све́та, / а́нгельскими Тя́ пе́сньми почита́юще, / благоче́стно велича́ем.

* * *

После́дование о́бщаго моле́бна

Благослови́вшу свяще́ннику, начина́ем:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Сла́ва, и ны́не:

Бог Госпо́дь и яви́ся нам, благослове́н Гряды́й во и́мя Госпо́дне, то же на ка́ждый сти́х:

Сти́х: Испове́дайтеся Го́сподеви, я́ко Благ, я́ко в век ми́лость Его́.

Сти́х: Обыше́дше обыдо́ша мя и и́менем Госпо́дним противля́хся им.

Сти́х: Не умру́, но жив бу́ду и пове́м дела́ Госпо́дня.

Сти́х: Ка́мень, его́же небрего́ша зи́ждущии, сей бысть во главу́ у́гла, от Го́спода бысть сей и есть ди́вен во очесе́х на́ших.

Та́же тропа́рь Богоро́дице,

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны́ милосе́рдовавши, / потщи́ся, погибáем от мно́жества прегреше́ний, / не отврати́ Твоя́ рабы́ тщи́, / Тя́ бо и еди́ну наде́жду и́мамы. Два́жды.

Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты́ не бы предстоя́ла моля́щи, / кто́ бы на́с избáвил от толи́ких бед? / кто́ же бы сохрани́л до ны́не свобо́дны? / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Та́же Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя́ от беззако́ния моего́, и от греха́ моего́ очи́сти мя́. Я́ко беззако́ние мое́ аз зна́ю и гре́х мо́й пре́до мно́ю есть вы́ну. Тебе́ Еди́ному согреши́х, и лука́вое пре́д Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти́. Се бо в беззако́ниих зача́т е́смь, и во гресе́х роди́ мя́ ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми́ еси́. Окропи́ши мя́ иссо́пом, и очи́щуся, омы́еши мя́, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от гре́х мои́х, и вся́ беззако́ния моя́ очи́сти. Се́рдце чи́сто сози́жди во мне́, Бо́же, и ду́х пра́в обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от Мене́. Возда́ждь ми́ ра́дость спасе́ния Твоего́, и Ду́хом Влады́чним утверди́ мя́. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя́ от крове́й, Бо́же, Бо́же спасе́ния моего́, возра́дуется язы́к мо́й пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, да́л бы́х у́бо, всесожже́ния не благоволи́ши. Же́ртва Бо́гу ду́х сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Тво́й тельцы́.

И по Псалме́ начина́ем кано́н Пресвяты́я Богоро́дицы, без ирмосо́в. Гла́с 8.

Пе́снь 1.

Ирмо́с: Во́ду проше́д, я́ко су́шу, / и еги́петскаго зла́ избежáв, / изрáильтянин вопия́ше: / Избáвителю и Бо́гу на́шему пои́м.

Припе́в: Пресвята́я Богоро́дице, спаси́ на́с.

Мно́гими содержи́мь напáстьми, / к Тебе́ прибега́ю, спасе́ния иски́й: / о, Мáти Сло́ва и Де́во, / от тя́жких и лю́тых мя́ спаси́!

Страсте́й мя́ смущáют прило́зи, / мно́гаго уны́ния испо́лнити мою́ ду́шу; / умири́, Отрокови́це, / тишино́ю Сы́на и Бо́га Твоего́, Всенепоро́чная.

Сла́ва:

Спáса ро́ждшую Тя́ и Бо́га, / молю́, Де́во, избáвитися ми лю́тых: / к Тебе́ бо ны́не прибегáя, / простирáю и ду́шу и помышле́ние.

И ны́не:

Неду́гующа те́лом и душе́ю, / посеще́ния Боже́ственнаго и промышле́ния от Тебе́ сподо́би, еди́на Богомáти, / я́ко блага́я, Благáго же Роди́тельница.

Пе́снь 3.

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты́ ме́не утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Припе́в: Пресвята́я Богоро́дице, спаси́ на́с.

Предстáтельство и покро́в жи́зни моея́ / полагáю Тя́, Богороди́тельнице Де́во, / Ты́ мя́ окорми́ ко пристáнищу Твоему́, благи́х вино́вна; / ве́рных утвержде́ние, еди́на Всепе́тая.

Молю́, Де́во, душе́вное смуще́ние и печа́ли моея́ бу́рю разори́ти: / Ты́ бо, Богоневе́стная, / нача́льника тишины́ Христа́ родилá еси́, еди́на Пречи́стая.

Сла́ва:

Благоде́теля ро́ждши до́брых вино́внаго, / благодея́ния бога́тство все́м источи́, / вся́ бо мо́жеши, / я́ко си́льнаго в кре́пости Христа́ ро́ждши, Богоблаже́нная.

И ны́не:

Лю́тыми неду́ги и боле́зненными страстьми́ истязáему, Де́во, Ты́ ми́ помози́; / исцеле́ний бо неоску́дное Тя́ зна́ю сокро́вище Пренепоро́чная, неиждивáемое.

Сие́ по 3-й и 6-й пе́сни то́кмо:

Спаси́ от бе́д рабы́ Твоя́, Богоро́дице, / я́ко вси́ по Бо́зе к Тебе́ прибегáем, / я́ко неруши́мей стене́ и предстáтельству.

При́зри благосе́рдием, всепе́тая Богоро́дице, / на мое́ лю́тое телесе́ озлобле́ние, / и исцели́ души́ моея́ боле́знь.

Та́же иере́й, или́ диа́кон:

Поми́луй на́с, Бо́же,/ по вели́цей ми́лости Твое́й,/ мо́лим Ти ся, услы́ши и поми́луй.

Ли́к: Го́споди, поми́луй, три́жды.

Е́ще мо́лимся о Вели́ком господи́не и Отце́ на́шем, Святе́йшем Патриа́рхе Моско́вском и всея́ Руси́ Кири́лле и о господи́не на́шем Преосвяще́ннейшем епи́скопе [или́ архиепи́скопе, или́ митрополи́те имяре́к].

Е́ще мо́лимся о богохрани́мой стране́ на́шей, властя́х и во́инстве ея́.

[Посе́м за ни́хже пое́тся моле́бен].

Е́ще мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и благопоспеше́нии раба́ Бо́жия, [или́ рабо́в Бо́жиих], имяре́к.

По си́хже:

Е́ще мо́лимся за всю́ бра́тию, и за вся́ христиа́ны.

Пото́м возгла́с:

Я́ко ми́лостив: и про́чая.

И а́бие глаго́лем тропа́рь, гла́с 2:

Моле́ние те́плое и стенá необори́мая, / ми́лости исто́чниче, ми́рови прибе́жище, / приле́жно вопие́м Ти́: / Богоро́дице Влады́чице, предвари́, / и от бе́д избáви на́с, / еди́на вско́ре предстáтельствующая.

Песнь 4.

Ирмо́с: Услы́шах, Го́споди, / смотре́ния Твоего́ тáинство, / разуме́х дела́ Твоя́ / и прослáвих Твое́ Божество́.

Припе́в: Пресвята́я Богоро́дице, спаси́ на́с.

Страсте́й мои́х смуще́ние, / ко́рмчию ро́ждшая Го́спода, / и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призывáющу подáждь ми́, / я́же Благосе́рдаго ро́ждшая и Спáса все́х пою́щих Тя́.

Наслаждáющеся, Пречи́стая, Твои́х даровáний, / благодáрственное воспевáем пе́ние, / ве́дуще Тя́ Богомáтерь.

Сла́ва:

На одре́ боле́зни моея́ и не́мощи низлежáщу ми́, / я́ко благолюби́ва, помози́, Богоро́дице, / еди́на Присноде́во.

И ны́не:

Наде́жду и утвержде́ние и спасе́ния сте́ну недви́жиму иму́ще Тя́, Всепе́тая, / неудо́бства вся́каго избавля́емся.

Песнь 5.

Ирмо́с: Просвети́ на́с повеле́нии Твои́ми, Го́споди, / и мы́шцею Твое́ю высо́кою / Тво́й ми́р подáждь на́м, Человеколю́бче.

Припе́в: Пресвята́я Богоро́дице, спаси́ на́с.

Испо́лни, Чи́стая, весе́лия се́рдце мое́, / Твою́ нетле́нную даю́щи ра́дость, / весе́лия ро́ждшая Вино́внаго.

Избáви на́с от бе́д, Богоро́дице Чи́стая, / ве́чное ро́ждши избавле́ние, / и ми́р, вся́к у́м преиму́щий.

Сла́ва:

Разреши́ мглу́ прегреше́ний мои́х, Богоневе́сто, / просвеще́нием Твоея́ све́тлости, / Све́т ро́ждшая Боже́ственный и преве́чный.

И ны́не:

Исцели́, Чи́стая, души́ моея́ неможе́ние, / посеще́ния Твоего́ сподо́бльшая, / и здрáвие моли́твами Твои́ми подáждь ми́.

Пе́снь 6.

Ирмо́с: Моли́тву пролию́ ко Го́споду, / и Тому́ возвещу́ печа́ли моя́, / я́ко зо́л душа́ моя́ испо́лнися, / и живо́т мо́й а́ду прибли́жися, / и молю́ся, я́ко Ио́на: / от тли́, Бо́же, возведи́ мя́.

Припе́в: Пресвята́я Богоро́дице, спаси́ на́с.

Сме́рти и тли я́ко спа́сл е́сть, / Са́м Ся́ издáв сме́рти, / тле́нием и сме́ртию мое́ естество́, я́то бы́вшее, Де́во, / моли́ Го́спода и Сы́на Твоего́, / враго́в злоде́йствия мя́ избáвити.

Предстáтельницу Тя́ живота́ ве́м и храни́тельницу тве́рду, Де́во, / и напáстей решáщу молвы́, и нало́ги бесо́в отгоня́ющу; / и молю́ся всегда́, от тли́ страсте́й мои́х избáвити мя́.

Сла́ва:

Я́ко сте́ну прибе́жища стяжáхом, / и ду́ш всесоверше́нное спасе́ние, / и прострáнство в ско́рбех, Отрокови́це, / и просвеще́нием Твои́м при́сно рáдуемся: / о, Влады́чице, и ны́не на́с от страсте́й и бе́д спаси́.

И ны́не:

На одре́ ны́не немощству́яй лежу́, / и не́сть исцеле́ния пло́ти мое́й: / но, Бо́га и Спáса ми́ру и Избáвителя неду́гов ро́ждшая, / Тебе́ молю́ся, Благо́й: / от тли́ неду́г возстáви мя́.

Спаси́ от бе́д рабы́ Твоя́, Богоро́дице, / я́ко вси́ по Бо́зе к Тебе́ прибегáем, / я́ко неруши́мей стене́ и предстáтельству.

При́зри благосе́рдием, всепе́тая Богоро́дице, / на мое́ лю́тое телесе́ озлобле́ние, / и исцели́ души́ моея́ боле́знь.

Ектения́ ма́лая.

И по возгла́се а́бие конда́к, гла́с 6.

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь на́с, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно Богоро́дице, чту́щих Тя́.

И а́бие проки́мен:

Припе́в: Помяну́ и́мя Твое́ / во вся́ком ро́де и ро́де.

Стих: Слы́ши, Дщи́, и ви́ждь, и приклони́ у́хо Твое́.

Свяще́нник:

И о сподо́битися на́м слы́шанию Свята́го Ева́нгелия Го́спода Бо́га мо́лим.

Прему́дрость, про́сти, услы́шим Свята́го Ева́нгелия.

Ми́р все́м.

От Луки́ Свята́го Ева́нгелия чте́ние:

Во дни́ о́ны, воста́вши Мариа́м, и́де в го́рняя со тща́нием, во гра́д Иу́дов. И вни́де в до́м Заха́риин, и целова́ Елисаве́т. И бы́сть, я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты́ в жена́х, и благослове́н пло́д чре́ва Твоего́. И отку́ду мне́ сие́, да прии́де Ма́ти Го́спода моего́ ко мне́? Се́ бо, я́ко бы́сть гла́с целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, яко бу́дет соверше́ние глаго́ланным Е́й от Го́спода. И рече́ Мариа́м: вели́чит душа́ Моя́ Го́спода, и возра́довася ду́х Мо́й о Бо́зе Спа́се Мое́м. Я́ко призре́ на смире́ние Рабы́ Своея́: се́ бо, отны́не ублажа́т Мя́ вси́ ро́ди. Я́ко сотвори́ Мне́ вели́чие Си́льный, и свя́то и́мя Его́. Пребы́сть же Мариа́мь с не́ю я́ко три́ ме́сяцы, и возврати́ся в до́м Сво́й.

И а́бие, Сла́ва, гла́с 6:

Моли́твами Богоро́дицы,/ Ми́лостиве, очи́сти// мно́жества согреше́ний на́ших.

И ны́не, то́йже. Та́же:

Поми́луй мя́, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Гла́с 6:

Не вве́ри мя́ челове́ческому предстáтельству, / Пресвята́я Влады́чице, / но приими́ моле́ние раба́ Твоего́: / ско́рбь бо обдержи́т мя́, / терпе́ти не могу́ де́монскаго стреля́ния, / покро́ва не и́мам, / ниже́ где прибе́гну, окая́нный, / всегда́ побеждáемь, / и утеше́ния не и́мам, ра́зве Тебе́, Влады́чице ми́ра: / уповáние и предстáтельство ве́рных, / не пре́зри моле́ние мое́, поле́зно сотвори́.

Свяще́нник: Спаси́, Бо́же, лю́ди Твоя́, и благослови́ достоя́ние Твое́:

Го́споди поми́луй, 12.

Ми́лостию и щедро́тами: И прочая.

Пе́снь 7.

Ирмо́с: От Иуде́и доше́дше о́троцы, / в Вавило́не иногдá, / ве́рою Тро́ическою плáмень пе́щный попрáша, пою́ще: / отце́в Бо́же, благослове́н еси́.

Припе́в: Пресвята́я Богоро́дице, спаси́ на́с.

На́ше спасе́ние я́коже восхоте́л еси́, Спáсе, устро́ити, / во утро́бу Де́выя всели́лся еси́, / Ю́же ми́ру предстáтельницу показа́л еси́: / оте́ц на́ших Бо́же, благослове́н еси́.

Воли́теля ми́лости, Его́же родилá еси́, Мáти чи́стая, / умоли́ избáвитися от прегреше́ний и душе́вных скве́рн ве́рою зову́щим: / оте́ц на́ших Бо́же, благослове́н еси́.

Сла́ва:

Сокро́вище спасе́ния и Исто́чник нетле́ния, Тя́ Ро́ждшую, / и сто́лп утвержде́ния, и две́рь покая́ния, зову́щим показа́л еси́: / оте́ц на́ших Бо́же, благослове́н еси́.

И ны́не:

Теле́сныя сла́бости и душе́вныя неду́ги, Богороди́тельнице, / любо́вию приступáющих к кро́ву Твоему́, Де́во, исцели́ти сподо́би, / Спáса Христа́ на́м ро́ждшая.

Пес́нь 8.

Ирмо́с: Царя́ Небе́снаго, / Его́же пою́т во́и А́нгельстии, / хвали́те и превозноси́те во вся́ ве́ки.

Припев: Пресвята́я Богоро́дице, спаси́ на́с.

По́мощи я́же от Тебе́ тре́бующия не пре́зри, Де́во, / пою́щия и превознося́щия Тя́ во ве́ки.

Неможе́ние души́ моея́ исцеля́еши и теле́сныя боле́зни, Де́во, / да Тя́ прослáвлю, Чи́стая, во ве́ки.

Сла́ва:

Исцеле́ний бога́тство изливáеши ве́рно пою́щим Тя́, Де́во, / и превознося́щим неизрече́нное Твое́ рождество́.

И ны́не:

Напáстей Ты́ прило́ги отгоня́еши и страсте́й нахо́ды, Де́во: / те́мже Тя́ пое́м во вся́ ве́ки.

Пе́снь 9.

Ирмо́с: Вои́стинну Богоро́дицу / Тя́ испове́дуем, / спасе́ннии Тобо́ю, Де́во чи́стая, / с безпло́тными ли́ки Тя́ величáюще.

Припе́в: Пресвята́я Богоро́дице, спаси́ на́с.

То́ка слез мои́х не отврати́ся, / Я́же от вся́каго лица́ вся́ку сле́зу отъе́мшаго, / Де́во, Христа́ ро́ждшая.

Ра́дости мое́ се́рдце испо́лни, Де́во, / Я́же ра́дости прие́мшая исполне́ние, / грехо́вную печа́ль потребля́ющи.

Пристáнище и предстáтельство к Тебе́ прибегáющих / бу́ди, Де́во, и стена́ неруши́мая, / прибе́жище же и покро́в и весе́лие.

Сла́ва:

Све́та Твоего́ заря́ми просвети́, Де́во, / мра́к неве́дения отгоня́ющи, / благове́рно Богоро́дицу Тя́ испове́дающих.

И ны́не:

На ме́сте озлобле́ния не́мощи смири́вшагося, Де́во, исцели́, / из нездрáвия во здрáвие претворя́ющи.

И а́бие:

Досто́йно есть я́ко вои́стинну блажи́ти Тя́, Богоро́дицу, / Присноблаже́нную и Пренепоро́чную и Ма́терь Бо́га на́шего.

И кади́т свяще́нник Же́ртвенник и лю́ди,

и мы́ пое́м настоя́щие Богоро́дичны:

Вы́шшую небе́с, / и чи́стшую све́тлостей со́лнечных, / изба́вльшую на́с от кля́твы, / Влады́чицу ми́ра / пе́сньми почти́м.

От мно́гих мои́х грехо́в / немощству́ет те́ло, / немощству́ет и душа́ моя́: / к Тебе́ прибега́ю Благода́тней, / наде́жде ненаде́жных, / Ты́ ми помози́.

Влады́чице и Ма́ти Изба́вителя, / приими́ моле́ние / недосто́йных ра́б Твои́х, / да хода́тайствуеши к Ро́ждшемуся от Тебе́: / о Влады́чице ми́ра, бу́ди Хода́таица!

Пое́м приле́жно Тебе́ пе́снь ны́не / всепе́той Богоро́дице ра́достно, / со Предте́чею, и все́ми святы́ми, / моли́ Богоро́дице, / е́же уще́дрити ны́.

Вся́ А́нгелов во́инства, / Предте́че Госпо́день, / апо́столов двоенадеся́тице, святи́и вси́ / с Богоро́дицею, сотвори́те моли́тву, / во е́же спасти́ся на́м.

Та́же, Трисвято́е. Пресвята́я Тро́ице: О́тче на́ш:

Свяще́нник: Я́ко Твое́ е́сть Ца́рство:

И тропари́ сия́, гла́с 6:

Поми́луй на́с, Го́споди, поми́луй на́с, вся́каго бо отве́та недоуме́юще, сию́ Ти́ моли́тву, я́ко Влады́це, гре́шнии прино́сим, поми́луй на́с.

Сла́ва:

Го́споди, поми́луй на́с, на Тя́ бо упова́хом, не прогне́вайся на ны́ зело́, ниже́ помяни́ беззако́ний на́ших, но при́зри и ны́не, я́ко Благоутро́бен, и изба́ви на́с от вра́г на́ших, Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.

И ны́не:

Милосе́рдия две́ри отве́рзи на́м, Благослове́нная Богоро́дице, наде́ющиеся на Тя́, да не поги́бнем, но да изба́вимся Тобо́ю от бе́д, Ты́ бо еси́ спасе́ние ро́да христиа́нскаго.

Иере́й, или́ диа́кон:

Поми́луй на́с, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Господи помилуй, трижды.

А пото́м и про́чая по ря́ду, я́коже указа́ся и по 3-й пе́сни.

Посе́м моли́тва Пресвяте́й Богоро́дице:

О, Пресвята́я Госпоже́ Влады́чице Богоро́дице! Вы́шши еси́ все́х А́нгел и Арха́нгел, и всея́ тва́ри честне́йши, помо́щнице еси́ оби́димых, ненаде́ющихся наде́яние, убо́гих засту́пнице, печа́льных утеше́ние, а́лчущих корми́тельнице, наги́х одея́ние, больны́х исцеле́ние, гре́шных спасе́ние, христиа́н все́х поможе́ние и заступле́ние! О, Всеми́лостивая Госпоже́, Де́во Богоро́дице Влады́чице, ми́лостию Твое́ю спаси́ и поми́луй Вели́каго господи́на и Отца́ на́шего, Святе́йшего Патриа́рха Моско́вскаго и всея́ Руси́ Кири́лла, преосвяще́нныя митрополи́ты, архиепи́скопы и епи́скопы и весь свяще́ннический и мона́шеский чи́н, Богохрани́мую страну́ на́шу, вла́сти и во́инства ея́, и вся́ правосла́вныя христиа́ны, ри́зою Твое́ю честно́ю защити́: и умоли́, Госпоже́, из Тебе́ без се́мене воплоти́вшагося Христа́ Бо́га на́шего, да препоя́шет на́с си́лою Свое́ю свы́ше, на неви́димыя и ви́димыя враги́ на́ша. О, Всеми́лостивая Госпоже́ Влады́чице Богоро́дице, воздви́гни на́с из глубины́ грехо́вныя и изба́ви на́с от гла́да, губи́тельства, от тру́са и пото́па, от огня́ и меча́, от нахожде́ния иноплеме́нных и междоусо́бныя бра́ни, и от напра́сныя сме́рти, и от нападе́ния вра́жия, и от тлетво́рных ветр, и от смертоно́сныя я́звы, и от вся́каго зла́; пода́ждь, Госпоже́, ми́р и здра́вие рабо́м Твои́м, все́м правосла́вным христиа́ном, и просвети́ им у́м, и о́чи серде́чныя, е́же ко спасе́нию: и сподо́би ны́, гре́шныя рабы́ Твоя́, Ца́рствия Сы́на Твоего́, Христа́ Бо́га на́шего; я́ко держа́ва Его́ благослове́на и препросла́влена, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в, ами́нь.

И про́чая, и отпу́ст.

* * *

Тропари́ воскре́сны, пое́мыя по Непоро́чнах,

в неде́лях всего́ ле́та, гла́с 5:

На еди́ном ко́емждо тропаре́ глаго́лем:

Благослове́н еси́, Го́споди, / научи́ мя оправда́нием Твои́м.

А́нгельский собо́р удиви́ся, / зря́ Тебе́ в ме́ртвых вмени́вшася, / сме́ртную же, Спа́се, кре́пость разори́вша, / и с Собо́ю Ада́ма воздви́гша, / и от а́да вся́ свобо́ждша.

Благослове́н еси́, Го́споди, / научи́ мя оправда́нием Твои́м.

Почто́ мира с ми́лостивными слеза́ми, / о учени́цы, растворя́ете? / Блиста́яйся во гро́бе А́нгел мироно́сицам веща́ше: / ви́дите вы́ гро́б и уразуме́йте, / Спас бо воскре́се от гро́ба.

Благослове́н еси́, Го́споди, / научи́ мя оправда́нием Твои́м.

Зело́ ра́но мироно́сицы теча́ху / ко гро́бу Твоему́ рыда́ющия, / но предста́ к ни́м А́нгел и рече́: / рыда́ния вре́мя преста́, не пла́чите, / воскресе́ние же апо́столом рцы́те.

Благослове́н еси́, Го́споди, / научи́ мя оправда́нием Твои́м.

Мироно́сицы жены́ с миры прише́дшия / ко гро́бу Твоему́, Спа́се, рыда́ху, / А́нгел же к ни́м рече́, глаго́ля: / что́ с ме́ртвыми жива́го помышля́ете? / Я́ко Бог бо, воскре́се от гро́ба.

Сла́ва:

Поклони́мся Отцу́ / и Его́ Сы́нови, и Свято́му Ду́ху, / Святе́й Тро́ице во еди́ном существе́, / с Серафи́мы зову́ще: / Свят, Свят, Свят еси́, Го́споди.

И ны́не:

Жизнода́вца ро́ждши, / греха́, Де́во, Ада́ма изба́вила еси́, / ра́дость же Е́ве / в печа́ли ме́сто подала́ еси́: / па́дшия же от жи́зни / к се́й напра́ви / из Тебе́ воплоти́выйся Бог и Челове́к.

Аллилу́иа, Аллилу́иа, Аллилу́иа, сла́ва Тебе́, Бо́же. Трижды.

* * *

Ины́е тропари́,

пое́мые по непоро́чнах в суббо́ту,

гла́с 5:

Глаго́лется на еди́ном ко́емждо и си́х:

Благослове́н еси́ Го́споди,/ научи́ мя оправда́нием Твои́м.

Святы́х ли́к обре́те исто́чник жи́зни и две́рь ра́йскую,/ да обря́щу и а́з пу́ть покая́нием:/ поги́бшее овча́ а́з е́смь,// воззови́ мя Спа́се, и спаси́ мя.

Благослове́н еси́ Го́споди,/ научи́ мя оправда́нием Твои́м.

А́гнца Бо́жия пропове́давше,/ и закла́ни бы́вше я́коже а́гнцы,/ и к жи́зни нестаре́емей святи́и,/ и присносу́щней преста́вльшеся,/ Того́ приле́жно му́ченицы моли́те,// долго́в разреше́ние на́м дарова́ти.

Благослове́н еси́ Го́споди,/ научи́ мя оправда́нием Твои́м.

В путь у́зкий хо́ждшии приско́рбный,/ вси́ в житии́ крест я́ко яре́м взе́мшии,/ и Мне́ после́довавшии ве́рою,/ прииди́те наслади́теся,/ и́хже угото́вах ва́м по́честей,// и венцо́в небе́сных.

Благослове́н еси́ Го́споди,/ научи́ мя оправда́нием Твои́м.

О́браз е́смь неизрече́нныя Твоея́ сла́вы,/ а́ще и я́звы ношу́ прегреше́ний:/ уще́дри Твое́ созда́ние Влады́ко,/ и очи́сти Твои́м благоутро́бием,/ и возжеле́нное оте́чество пода́ждь ми́,// рая́ па́ки жи́теля мя́ сотворя́я.

Благослове́н еси́ Го́споди,/ научи́ мя оправда́нием Твои́м.

Дре́вле у́бо от не су́щих созда́вый мя́,/ и о́бразом Твои́м Боже́ственным почты́й,/ преступле́нием же за́поведи/ па́ки мя́ возврати́вый в зе́млю, от нея́же взя́т бы́х,/ на е́же по подо́бию возведи́,// дре́внею добро́тою возобрази́тися.

Благослове́н еси́ Го́споди,/ научи́ мя оправда́нием Твои́м.

Упоко́й Бо́же рабы́ Твоя́,/ и учини́ я в раи́,/ иде́же ли́цы святы́х Го́споди,/ и пра́ведницы сия́ют я́ко свети́ла:/ усо́пшия рабы́ Твоя́ упоко́й,/ презира́я и́х вся́ согреше́ния.

Сла́ва:

Трисия́тельное еди́наго Божества́, благоче́стно пое́м вопию́ще:/ Свят еси́ О́тче Безнача́льный,/ Собезнача́льный Сы́не, и Боже́ственный Ду́ше,/ просвети́ на́с ве́рою Тебе́ служа́щих,// и ве́чнаго огня́ исхити́.

И ны́не:

Ра́дуйся Чи́стая, Бо́га пло́тию ро́ждшая во спасе́ние все́х,/ Е́юже ро́д челове́ческий обре́те спасе́ние,/ Тобо́ю да обря́щем ра́й,// Богоро́дице Чи́стая, благослове́нная.

Аллилу́ия, аллилу́ия, аллилу́ия,/ сла́ва Тебе́ Бо́же. Три́жды.

* * *

Господу Богу

Святой Троице, глас 8:

Благословен еси, Христе Боже наш, / Иже прему́дры ловцы́ явле́й, / низпослав им Духа Святаго, / и теми уловле́й вселенную, / Человеколюбче, слава Тебе.

Всемилостивому Спасу, глас 8:

С вышних призира́я, убогия приемля, / посети́ нас, озло́бленныя грехи́, Владыко Всемилостиве, / молитвами Богородицы, даруй душа́м нашим велию милость.

Нерукотворе́нному Образу, глас 2:

Пречистому Твоему Образу покланя́емся, Благи́й, / прося́ще прощения прегрешений наших, Христе Боже: / волею бо благоволи́л еси плотию взыти на Крест, / да избавиши яже созда́л еси от работы вражия. / Тем благодарственно вопием Ти: / радости исполнил еси вся, Спасе наш, / прише́дый спасти мир.

Благодарственный Спасителю, глас 4:

Благодарни суще недостойнии раби Твои, Господи, / о Твоих великих благодеяниях, на нас бывших, / сла́вяще Тя хва́лим, благослови́м, благодарим, поем и величаем Твое благоутробие / и рабски любовию вопием Ти: / Благодетелю Спасе наш, слава Тебе.

Божией Матери пред святыми Ея иконами:

Глас 4:

Не умолчим никогда, Богородице, / силы Твоя глаголати недостойнии, / аще бо Ты не бы́ предстояла молящи, / кто бы нас избавил от толи́ких бед? / Кто же бы сохранил до ныне свободны? / Не отсту́пим, Владычице, от Тебе: / Твоя бо рабы спасаеши присно от всяких лютых.

Глас 4:

Умолкает ныне всякое уныние / и страх отчаяния исчезает, / грешницы в ско́рбех сердца обретают утешения / и небесною любовию озаряются светло. / Днесь бо Мати Божия простирает к нам спасающую руку / и от пречистаго образа Своего вещает, глаголя: / Аз Споручница грешных к Моему Сыну, / Сей дал Мне за них ру́це слышати Мя выну. / Темже людие, обремене́ннии грехми́ и скорбьми́ многими, / припади́те к подножию Ея иконы со слезами, вопиюще: / Заступнице мира, грешных Споручнице! / Умоли Ма́терними Твоими молитвами Изба́вителя всех, / да Божественным всепрощением покры́ет грехи наша / и светлыя две́ри райския отве́рзет нам. / Ты бо еси предстательство и спасение рода христианскаго! Или иной тропарь Божией Матери (см. далее)

Боголюбской (18 июня), глас 1:

Боголюби́вая Царице, / неискусому́жная Дево Богородице Марие, / моли за ны Тебе Возлюбившаго / и ро́ждшагося от Тебе Сына Твоего, Христа Бога нашего, / подати нам оставление прегрешений, / ми́рови мир, / земле плодо́в изобилие, / пастырем святыню / и всему челове́чу роду спасение, / гра́ды наша и страны́ Российския от нахождения иноплеменных заступи / и от междуусо́бныя бра́ни сохрани. / О Мати Боголюбивая Дево, / о Царице Всепетая, / ризою Своею покры́й нас от всякаго зла, / от видимых и невидимых враг защити́/ и спаси ду́ши наша.

Взысканию погибших (5 февраля), глас 7:

Радуйся, Благодатная Богородице Дево, / во объятиях Своих Предвечнаго Младенца и Бога носившая, / проси Его дати миру умирение / и душа́м нашим спасение. / Сын бо Тебе, Богомати, вещает, / яко вся прошения Твоя во благое исполнит. / Сего ради и мы, припа́дающе, молим Тя / и, надеющиися на Тя, да не погибнем, / имя Твое именуем: / Ты бо еси, Владычице, / Взыскание погибших.

Владимирской (21 мая, 23 июня, 26 августа), глас 4:

Днесь све́тло красу́ется славне́йший град Москва, / яко зарю солнечную восприи́мши, Владычице, / чудотворную Твою икону, / к ней же ныне мы притека́юще и моля́щеся Тебе, взываем сице: / О Пречудная Владычице Богородице, / молися из Тебе Воплощенному Христу Богу нашему, / да избавит град сей / и вся гра́ды и страны́ христианская невреди́мы от всех наве́т вражиих / и спасет ду́ши наша, яко Милосерд.

Всех скорбящих Радости (24 октября), глас 2:

Всех скорбящих Радосте, / и обидимых Заступнице, / и алчущих Питательнице, / странных утешение, / обуреваемых пристанище, / больных посещение, / немощны́х покров и Заступнице, / жезл старости, / Мати Бога Вышняго Ты еси, Пречистая, / потщи́ся, молимся, спастися рабом Твоим.

Донской (19 августа), глас 4:

Заступнице верных Преблагая и скорая, / Пречистая Богородице Дево! / Молим Тя пред святым и чудотворным образом Твоим, / да я́коже древле от него заступление Твое граду Москве дарова́ла еси, / тако и ныне нас от всяких бед и напастей милостивно избави / и спаси ду́ши наша, / яко Милосердая.

Достойно есть – Милующей (11 июня), глас 4:

Притеце́м, вернии, со дерзновением / к Ми́лующей Царице Богородице / и умиленно воззовем к Ней: / ниспосли́ на ны милости Твоя богатыя: / град сей избави от всякаго обстоя́ния, / мир даруй ми́рови и спасение душа́м нашим.

Знамению (27 ноября), глас 4:

Яко необори́мую сте́ну и источник чудес / стяжа́вше Тя раби Твои, Богородице Пречистая, / сопротивных ополчения низлага́ем. / Темже молим Тя: / мир граду Твоему да́руй / и душа́м нашим велию милость.

Иверской (12 февраля, 13 октября), глас 4:

От святыя иконы Твоея, / о Владычице Богородице, / исцеления и цельбы́ подаются обильно / с верою и любовию приходя́щим к ней, / тако и мою немощь посети, / и душу мою помилуй, Благая, / и тело исцели благодатию Твоею, Пречистая.

Казанской (8 июля, 22 октября), глас 4:

Заступнице усердная, Мати Го́спода Вышняго! / За всех мо́лиши Сына Твоего, Христа Бога нашего, / и всем твори́ши спастися / в державный Твой покров прибега́ющим. / Всех нас заступи, о Госпоже Царице и Владычице, / иже в напа́стех и в ско́рбех и в болезнех, обремененных грехи́ многими, / предстоя́щих и моля́щихся Тебе умиленною душею / и сокрушенным сердцем, / пред пречистым Твоим образом со слезами, / и невозвратно надежду иму́щих на Тя, / избавления всех зол. / Всем полезная да́руй / и вся спаси, Богородице Дево: / Ты бо еси Божественный покров рабом Твоим.

Неопалимой Купине (4 сентября), глас 4:

Иже в купине́, огне́м горя́щей и несгора́емей, / показа́вый Моисе́ови Пречистую Твою Матерь, Христе Боже, / огнь Божества неопа́льне во чреве прии́мшую / и нетленну по рождестве пребывшую, / Тоя́ молитвами от пла́мене страстей избави нас / и от огненных запале́ний град Твой сохрани,/ яко Многомилостив.

Нечаянной Радости (1 мая, 9 декабря), глас 4:

Днесь, вернии лю́дие, / духовно торжествуем, / прославляюще Заступницу усердную рода христианскаго, / и, притекающе к пречистому Ея образу, взываем си́це: / О премилостивая Владычице Богородице, / подаждь нам нечаянную радость, / обремененным грехи́ и скорбьми́ многими, / и избави нас от всякаго зла, / моля́щи Сына Твоего, Христа Бога нашего, спасти ду́ши наша.

Покрову Пресвятой Богородицы (1 октября), глас 4:

Днесь, благовернии людие, / све́тло празднуем,/ осеня́еми Твоим, Богомати, пришествием, / и, к Твоему взирающе пречистому образу, умильно глаголем: / покры́й нас честны́м Твоим покровом / и избави нас от всякаго зла, / моля́щи Сына Твоего, Христа Бога нашего, спасти ду́ши наша.

Почаевской (23 июля), глас 5:

Пред святою Твоею иконою, Владычице, / моля́щиися исцелений сподобляются, / веры истинныя познание приемлют / и ага́рянская нашествия отражают. / Темже и нам, к Тебе припа́дающим, / грехов оставление испроси, / по́мыслы благочестия сердца́ наша просвети / и к Сыну Твоему молитву вознеси / о спасении душ наших.

Семистрельной, или Умягчению злых сердец (13 августа), глас 5:

Умягчи́ наша злая сердца́, Богородице, / и напа́сти ненави́дящих нас угаси / и всякую тесноту́ души́ нашея разреши, на Твой бо святы́й образ взирающе, / Твоим сострада́нием и милосердованием о нас умиляемся / и раны Твоя лобызаем, / стрел же наших, Тя терза́ющих, ужасаемся. / Не даждь нам, Мати Благосердая, / в жестосе́рдии нашем и от жестосердия ближних погибнути, / Ты бо еси воистину злых сердец Умягчение.

Скоропослушнице (9 ноября), глас 4:

К Богородице притеце́м, су́щии в беда́х, / и ко святей иконе Ея ныне припаде́м, / с верою зову́ще из глубины души: / скоро наше услыши моление, Дево, / яко Скоропослушница наре́кшаяся, / Тебе бо раби Твои в ну́ждах / готовую Помощницу и́мамы.

Смоленской (28 июля), глас 4:

К Богородице прилежно ныне притецем.

Споручнице грешных (7 марта, 29 мая), глас 4:

Умолкает ныне всякое уныние / и страх отчаяния исчезает, / грешницы в ско́рбех сердца обретают утешения / и небесною любовию озаряются светло. / Днесь бо Мати Божия простирает к нам спасающую руку / и от пречистаго образа Своего вещает, глаголя: / Аз Споручница грешных к Моему Сыну, / Сей дал Мне за них ру́це слышати Мя выну. / Темже людие, обремене́ннии грехми́ и скорбьми́ многими, / припади́те к подножию Ея иконы со слезами, вопиюще: / Заступнице мира, грешных Споручнице! / Умоли Ма́терними Твоими молитвами Изба́вителя всех, / да Божественным всепрощением покры́ет грехи наша / и светлыя две́ри райския отве́рзет нам. / Ты бо еси предстательство и спасение рода христианскаго!

Страстной (13 августа), глас 4:

Днесь возсия́ неизреченно граду нашему Москве икона Богома́тере / и, яко светозарным солнцем, пришествием Тоя́ озари́ся весь мир, /% Небесныя Силы и ду́ши праведных мысленно торжествуют, радующеся, / мы же на ню взирающе, / к Богородице со слезами вопием: / О Всемилостивая Госпоже, Владычице Богородице, / молися из Тебе Воплощенному Христу Богу нашему, / да подаст мир и здравие всем христиа́ном / по вели́цей и неизреченней Своей Милости.

Тихвинской (26 июня), глас 4:

Днесь, яко солнце пресветлое, возсия́ нам на возду́се / всечестна́я икона Твоя, Владычице, / луча́ми милости мир просвещающи, / юже великая Россия, / яко некий дар Божественный, / свыше благоговейне восприи́мши, / прославляет Тя, Богомати, всех Владычицу, / и от Тебе ро́ждшагося Христа Бога нашего величает радостно. / Ему же молися, о Госпоже Царице Богородице, / да сохранит вся гра́ды и страны́ христианския невредимы от всех наве́т вражиих / и спасет верою покланя́ющихся / Его Божественному и Твоему пречистому образу, / Дево Неискусобрачная.

Троеручице (28 июня, 12 июля), глас 4:

Днесь всемирная радость возсия́ нам ве́лия, / дарова́ся Святе́й Горе́ Афо́нстей / цельбоно́сная Твоя, Владычице Богородице, икона, / со изображением тричи́сленно и нераздельно Пречистых рук Твоих, / в прославление Святыя Троицы, / созываеши бо верных и моля́щихся Тебе о сем познати, / яко двема́ и́маши Сына и Го́спода держати, / тре́тию же яви́ на прибежище и покров чтущих Тя, / от всяких напа́стей и бед избавляти, / да вси, притека́ющий к Тебе верою, / приемлют неоскудно от всех зол свобождение, / от врагов защищение. / Сего ради и мы вкупе⁴ со Афоном вопием: / радуйся, Благодатная, Господь с Тобою.

Умилению (28 июля), глас 4:

К Богородице со умилением припаде́м, / вси грехми́ обремене́ннии, / чудотворную Ея икону Умиление облобыза́юще / и вопиюще со слезами: / Владычице, приими́ моление недостойных раб Твоих / и подаждь нам, прося́щим, / велию Твою милость.

Умягчению злых сердец (13 августа), глас 5:

Умягчи́ наша злая сердца́, Богородице, / и напа́сти ненави́дящих нас угаси / и всякую тесноту́ души́ нашея разреши, на Твой бо святы́й образ взирающе, / Твоим сострада́нием и милосердованием о нас умиляемся / и раны Твоя лобызаем, / стрел же наших, Тя терза́ющих, ужасаемся. / Не даждь нам, Мати Благосердая, / в жестосе́рдии нашем и от жестосердия ближних погибнути, / Ты бо еси воистину злых сердец Умягчение.

Утоли моя печали (25 января), глас 5:

Утоли болезни / многовоздыха́ющия души́ моея́, / Утолившая всяку слезу́ от лица земли́: / Ты бо человеком болезни отго́ниши / и грешных скорби разруша́еши, Тебе бо вси стяжа́хом надежду и утверждение, / Пресвятая Мати Дево.

Целительнице (18 сентября), глас 1:

Любовию, Чистая Дево, Твою святую икону почитающим / и Божию Тя истинную Матерь прославляющим / и верно покланя́ющимтися / Целительница явися, / всякое зло и болезни от сих удаляющая, яко Всемогу́щая.

Честно́му Кресту: глас 1:

Спаси, Господи, люди Твоя, / и благослови достояние Твое, / победы / на сопротивныя да́руя, / и Твое сохраняя Крестом Твоим жительство.

Тропари бесплотным силам и святым общие

Святым Бесплотным Силам: глас 4:

Небесных воинств Архистрати́зи, / молим вас присно мы, недостойнии, / да вашими молитвами оградите нас / кровом крил невещественныя вашея славы, / сохраняюще ны, припа́дающия прилежно и вопиющия: / от бед избавите ны, / яко чиноначальницы вышних сил.

Ангелу Хранителю: глас 6:

Ангеле Божий, / хранителю мой святый, / живот мой соблюди во стра́се Христа Бога, / ум мой утверди во истиннем пути, / и к любви горней уязви́ душу мою, / да тобою направляем, / получу от Христа Бога велию милость.

Пророку: глас 2:

Пророка Твоего (имярек) память, Господи, празднующе, / тем Тя молим: / спаси ду́ши наша.

Пророкам: глас 2:

Пророков Твоих (имярек) память, Господи, празднующе, / теми Тя молим: / спаси ду́ши наша.

Апостолу: глас 3:

Апостоле святый (имярек), / моли Милостиваго Бога, / да прегрешений оставление / подаст душа́м нашим.

Апостолам: глас 3:

Апостоли святии (имярек), / молите Милостиваго Бога, / да прегрешений оставление / подаст душа́м нашим.

Святителю: глас 4:

Правило веры и образ кротости, / воздержания учителя / яви́ тя стаду твоему / Яже вещей Истина: / сего ради стяжал еси смирением высокая, / нищетою богатая, / отче священноначальниче (имярек), / моли Христа Бога спастися душа́м нашим.

Святителям – см. священномученикам.

Священномученику: глас 4:

И нравом причастник, / и престолом наместник апостолом быв, / деяние обрел еси, богодухновенне, / в видения восход: / сего ради слово истины исправляя, / веры ради пострадал еси даже до кро́ве, / священномучениче (имярек), / моли Христа Бога, / спастися душа́м нашим.

Священномученикам, святителям, преподобным: глас 4:

Боже отец наших, / творяй присно с нами по Твоей кротости, / не отстави милость Твою от нас, / но молитвами их / в мире управи живот наш.

Мученику: глас 4:

Мученик Твой, Господи, (имярек), / во страдании своем венец прия́т нетленный от Тебе, Бога нашего: / име́яй бо крепость Твою, / мучителей низложи́, / сокруши и демонов немощны́я дерзости. / Того молитвами спаси ду́ши наша.

Мученикам: глас 4:

Мученицы Твои, Господи, / во страданиих своих венцы прия́ша нетленныя от Тебе, Бога нашего: / иму́ще бо крепость Твою, / мучителей низложи́ша, / сокруши́ша и демонов немощны́я дерзости. / Тех молитвами спаси ду́ши наша.

Мученице: глас 4:

Агница Твоя, Иисусе, (имярек) / зовет велиим гласом: / Тебе, Женише́ мой, люблю, / и Тебе и́щущи страдальчествую, / и сраспинаюся и спогреба́юся крещению Твоему, / и стражду́ Тебе ради, / яко да царствую в Тебе, и умираю за Тя, / да и живу с Тобою: / но яко жертву непорочную приими́ мя с любовию поже́ршуюся Тебе. / Тоя́ молитвами, яко Милостив, спаси ду́ши наша.

Мученицам: глас 1:

Агницы словесныя / Агнцу и Пастырю приведо́стеся мучением ко Христу, / течение скончавше, и веру соблюдше. / Темже днесь радостною душе́ю совершаем, досточу́дныя, / святую вашу память, / Христа величающе.

Исповеднику: глас 8:

Православия наставниче, / благочестия учителю и чистоты, / вселенныя светильниче, / архиереев богодухновенное удобрение, (имярек) премудре, / уче́ньми твоими вся просветил еси, / цевни́це духовная. / Моли Христа Бога спастися душа́м нашим.

Исповедникам: глас 8:

Православия наставницы, / благочестия учи́телие и чистоты, / вселенныя светильницы, архиереев богодухновенное удобрение, (имярек) премудрии, / уче́ньми вашими вся просветили есте́, / цевни́цы духовнии./ Молите Христа Бога спастися душа́м нашим.

Бессребреникам: глас 8:

Святии безсре́бреницы и чудотворцы, / посетите немощи наша: / ту́не прия́сте, туне дадите нам.

Преподобному: глас 8:

В тебе, отче, изве́стно спасе́ся еже по образу: / прии́м бо Крест, последовал еси Христу, / и де́я учил еси презирати у́бо плоть, преходит бо, / прилежа́ти же о души, вещи безсмертней. / Темже и со ангелы срадуется, преподобне (имярек), дух твой.

Преподобной: глас 8:

В тебе, мати, известно спасе́ся еже по образу: / прии́мши бо крест, последовала еси Христу, / и де́ющи учила еси презирати убо плоть, преходит бо, / прилежа́ти же о души́, вещи безсмертней. / Темже и со ангелы срадуется, преподобная (имярек) , дух твой.

Преподобным: глас 4:

Боже отец наших, / творяй присно с нами по Твоей кротости, / не отстави милость Твою от нас, / но молитвами их / в мире управи живот наш.

Христа ради юродивому: глас 1:

Глас апостола Твоего Павла услышав глаголющ: / мы юро́ди Христа ради, / раб Твой, Христе Боже, (имярек) / юро́д бысть на земли́ Тебе ради: / темже память его почитающе, / Тебе молим, Господи, / спаси ду́ши наша.

Святым праотцам: глас 2:

Верою пра́отцы оправдал еси, / от язык теми предобручивый Церковь: / хва́лятся в славе святии, / яко от се́мене их есть плод благослове́н, / без се́мене Рождшая Тя. / Тех молитвами, Христе Боже, помилуй нас.

Всем святым: глас 4:

Иже во всем мире мученик Твоих, / яко багряни́цею и ви́ссом, / кровьми́ Церковь Твоя украси́вшися, / теми вопиет Ти, Христе Боже: / лю́дем Твоим щедро́ты Твоя низпосли́, / мир жительству Твоему даруй / и душа́м нашим велию милость.

Глас 2:

Апостоли, мученицы и пророцы, / святи́телие, преподобнии и праведнии, / до́бре подвиг соверши́вшии и веру соблю́дшии, / дерзновение иму́ще ко Спасу, / о нас Того, яко Бла́га, моли́те, / спастися, молимся, душа́м нашим.

Тропари святым

Всем святым, в земли Российстей просиявшим, глас 8:

Якоже плод красный Твоего спасительного се́яния, / земля Российская приносит Ти, Господи, / вся святыя, в той просия́вшия. / Тех молитвами в мире глубо́це / Церковь и страну нашу Богородицею соблюди, Многомилостиве.

Святому благоверному князю Александру Невскому (30 августа), глас 4:

Познай свою братию, российский Иосифе, / не в Египте, но на небеси́ царствующий, / благоверный кня́же Александре, / и приими́ моления их, / умножая жи́та людем плодоно́сием земли́ твоея́, / гра́ды владычествия твоего ограждая молением, / православным людем на сопротивныя спобо́рствуя.

Мученице царице Александре (23 апреля), глас 4:

Царства земнаго славу презре́вши, / Единаго Христа, нас ради распя́таго, возлюбила еси́ / и Того мужественне испове́дающи, / венцем мученически увенчалася еси, / всеблаженная царице Александро, / темже и ныне престолу Царя Славы на небесе́х предстоя́щи, / молися о спасении душ наших.

Митрополиту Алексию, святителю Московскому и всея Руси (20 мая, 12 февраля), глас 8:

Яко апостолом сопрестольна, / и врача предо́бра, / и служителя благоприятна, / к ра́це твоеи честне́и притека́юще, святителю Алексие богомудре, чудотворче, / сошедшеся любовию в память твою, светло празднуем, / в песнех и пениих ра́дующеся и Христа славяще, / такову́ю благодать тебе даровавшаго исцелений, / и граду твоему великое утверждение.

Апостолу Андрею Первозванному (30 ноября), глас 4:

Яко апостолов первозванный и верховнаго сущий брат, / Влады́це всех, Андрее, молися, / мир вселеннеи даровати / и душа́м нашим велию милость.

Праведнои Анне (25 июля, 9 сентября), глас 4:

Жизнь рождшую во чреве носи́ла еси, / Чистую Богоматерь, богомудрая Анно: / темже к прия́тию Небесному, иде́же веселя́щихся жилище, / в славе ра́дующися, ныне преставилася еси, / чтущим тя любовию прегрешений прося́щи очищение, присноблаженная.

Мученикам Антонию, Иоанну и Евстафию, Виленским чудотворцам (14 апреля), глас 3:

Иже земных чести и славы отвергшеся, / до́блии и честни́и страдальцы, / веры ради крепко и мужественно му́ки претерпе́сте, / на смерть себе вда́вше за Живот всех, Владыку. / Темже и Христос преславно, / столпо́м о́блачным с небесе́ вас озари / и почестьми и венцы́ от престола славы венча́, / со ангелы Тому предстоя́ще, / моли́те спастися душа́м нашим.

Преподобному Афанасию Афонскому (5 июля), глас 3:

Еже во плоти житию твоему удивишася а́нгельстии чи́ни, / како с телом к невидимым сплете́нием изшел еси, приснославне, / и уязви́л еси де́монския полки́, / отону́дуже, Афанасие, Христос тебе воздаде́ богатыми дарова́ньми: / сего ради, отче, моли / спастися душа́м нашим.

Святым благоверным князьям Борису и Глебу (24 июля), глас 2:

Правди́вая страстотерпца и истинная Евангелия Христова послу́шателя, / целомудренныи Рома́не с незло́бивым Давидом, / не сопроти́в ста́ста врагу́ су́щу брату, / убивающему телеса́ ваша, / душа́м же косну́тися не могу́щу. / Да плачется убо злы́й властолюбец, / вы же ра́дующеся с ли́ки ангельскими, предстоя́ще Святеи Троице, / моли́теся о стране нашей, богоугодней быти, / и сыново́м Российским спастися.

Великомученице Варваре (4 декабря), глас 8:

Варвару святую почтим: / вра́жия бо се́ти сокруши / и, яко птица, избавися от них, / помощию и оружием Креста, всечестна́я.

Святителю Василию Великому (1 января), глас 1:

Во всю зе́млю изы́де вещание твое, / яко прие́мшую слово твое, / имже боголепно научил еси: / естество сущих уясни́л еси, / человеческия обычаи украси́л еси, / царское священие, отче преподобне: / моли Христа Бога / спастися душа́м нашим.

Святителям Василию Великому, Григорию Богослову и Иоанну Златоусту (30 января), глас 4:

Яко апостолов единонравнии / и вселенныя учи́телие, / Владыку всех моли́те, / мир вселенней даровати / и душа́м нашим велию милость.

Равноапостольному великому князю Владимиру (15 июля), глас 4:

Уподо́бился еси купцу, ищущему добраго би́сера, / славнодержавный Владимире, / на высоте́ стола́ седя́ ма́тере градов, / Богоспасаемаго Киева, / испыту́я же и посылая к Царскому граду / уве́дети православную веру, / обрел еси бесценныи бисер, Христа, / избравшаго тя, яко втора́го Павла, / и оттрясшаго слепоту́ во святеи купели, душевную вкупе и телесную. / Темже празднуем твое успение, людие твои су́ще: / моли спастися душа́м нашим.

Великомученику Георгию Победоносцу (23 апреля, 3 ноября), глас 4:

Яко пленных свободи́тель / и нищих защи́титель, / немощству́ющих врач, / Победоносче великомучениче Георгие, / моли Христа Бога спастися душа́м нашим.

Святителю Григорию Богослову (25 января), глас 1:

Пастырская свире́ль богословия твоего ри́торов победи́ трубы́, / якоже бо глуби́ны Духа изыска́вшу, / и добро́ты вещания приложи́шася тебе: / но моли Христа Бога, отче Григорие, спастися душа́м нашим.

Мученикам исповедникам Гурию, Самону и Авиву (15 ноября), глас 5:

Чудеса святых Твоих мученик / сте́ну необори́му нам даровавый, Христе Боже, / тех молитвами советы язы́ков разори́, / яко Един Благ и Человеколюбец.

Святому благоверному князю Даниилу Московскому (4 марта), глас 3:

Явился еси́ стране́ нашей, яко звезда пресветлая, / преподобие княже Дании́ле, / лучами света твоего озаряя град твои и обитель твою, / людем православным поборник, / пленным свободи́тель и нищим защи́титель, / моли Христа Бога / стране нашей даровати мир / и спасти ду́ши наша.

Великомученику Димитрию Солунскому (26 октября), глас 3:

Вели́ка обре́те в беда́х / тя поборника вселенная, страстотерпце, / язы́ки побеждающа: / якоже убо Ли́еву низложи́л еси гордыню, / и на по́двиг дерзновенна сотворив Нестора, тако, святе Димитрие, / Христу Богу молися / даровати нам велию милость.

Преподобномученице Евдокии (1 марта, 4 августа) глас 8:

Правостию умною душу твою привяза́вши в любовь Христову, тленных и красных и вре́менных забы́тием претекла́ еси, / яко Сло́ва ученица: / пощением страсти пе́рвее умертвивши, / страдальчески второе врага посрами́ла еси, / тем Христос сугу́бых венца́ сподоби тя, славная Евдокие, / преподобная страстоте́рпице, / моли Христа Бога спастися душа́м нашим.

Преподобнои Евфросинии Полоцкой (23 мая), глас 4:

Подражающи дванадесятоле́тна дванадесятоле́тну Христу / учившему во святилищи, Божию Слову / последовала еси, Евфросиние: / славу вре́менную и земнаго обручника оставльши / и вся мирская презре́вши, / красне́йшему паче всех Христу себе уневе́стила еси. / Крест взе́мши, / путем ангельскаго жития ше́ствующи и многия к нему наставляющи, / во благоухании мира в небесный чертог востекла́ еси, / иде́же моли егоже возлюбила еси / о чтущих благочестно память твою.

Великомученице Екатерине (24 ноября), глас4:

Добродетельми, яко лучами солнечными, / просветила еси неверныя мудрецы / и, якоже пресветлая луна, ходя́щим в нощи́ неверия тьму отгна́ла еси, / и царицу уверила еси, / вку́пе же и мучителя обличила еси, / богозванная невесто блаженная Екатерино, / желанием востекла́ еси в небесный чертог, / к прекрасному Жениху Христу, / и от Него царским венцем венчалася еси: / Емуже со ангелы предстоя́щи, / за ны молися, / творящия пречестну́ю память твою.

Пророку Божию Захарии и праведнои Елисавете (5 сентября), глас 2:

Праведных Твоих Захарии и Елисаветы, Господи, память празднующе, / теми молим Тя: / спаси ду́ши наша.

Пророку Божию Илии (20 июля), глас 4:

Во плоти ангел, / пророков основание, / вторы́й предтеча пришествия Христова, Илия славный, / свыше пославый Елисе́еви благодать / неду́ги отгоняти / и прокаже́нныя очищати: / темже и почита́ющим его то́чит исцеления.

Апостолу и евангелисту Иоанну Богослову (8 мая, 26 сентября), глас 2:

Апостоле Христу Богу возлюбленне, / ускори́ избавити люди безответны, / прие́млет тя припа́дающа же па́дша на пе́рси прие́мый. / егоже моли, Богослове, / и належа́щую мглу язы́ков разгнати, / прося нам мира и велия милости.

Мученику Иоанну Воину (30 июля), глас 4:

Всеблага́го Бога и Царя / благоверныи раб и воин явился еси, Иоанне чудоде́телю: / пострадав бо ради веры му́жески, / блаженно же скончав течение, / зриши Всетворца Го́спода в небесе́х светле́йше: / от Негоже прие́м дарование чудес, / страждущим человеком во всяких напа́стех помогавши: / укрепляеши воины в ра́тех, / от врагов пленения, / ран же и внезапных смерте́й / и от бед лютых изыма́еши. / Темже моли Владыку Христа, приснопамятне, / да во всяком обстоянии сотворит нам милость / и не введет нас во искушения, / но спасет ду́ши наша, яко Человеколюбец.

Святителю Иоанну Златоусту (13 ноября, 27 января), глас 8:

Уст твоих, якоже светлость огня, возсиявши благодать, / вселенную просвети: / не сребролюбия мирови сокровища сниска́, / высоту нам смиренномудрия показа: / но твоими словесы наказу́я, / отче Иоанне Златоусте, / моли Слова Христа Бога спастися душа́м нашим.

Предтече Иоанну (7 января, 29 августа), глас2:

Память праведнаго с похвалами, / тебе же довле́ет свидетельство Господне, Предтече: / показал бо ся еси воистину и пророков честне́йший, / яко и в струя́х крестити сподобился еси Проповеданнаго. / Темже за истину пострадав, радуяся, / благовести́л еси и сущим во аде Бога, я́вльшагося плотию, / вземлющаго грех мира / и подающаго нам велию милость.

Преподобному Иову, игумену Почаевскому, чудотворцу (28 октября, 6 мая), глас 4:

Многострадальнаго пра́отца долготерпение стяжав, / Крестителеву воздержанию уподоблялся, / божественныя же ревности обою́ приобща́яся, / тех имена достойно прияти сподобился еси / и истинныя веры был еси проповедник безбоя́знен. / Темже монахов множества ко Христу привел еси / и вся люди в православии утвердил еси, Иове преподобне отче наш, / моли спастися душа́м нашим.

Равноапостольным Кириллу и Мефодию, учителем Словенским (И мая), глас 4:

Яко апостолом единонра́внии / и Слове́нских стран учи́телие, / Кирилле и Мефодие богомудрии, / Владыку всех моли́те / вся язы́ки Словенския утвердити в православии и единомыслии, / умирити мир и спасти ду́ши наша.

Равноапостольным Константину и Елене (21 мая), глас 8:

Креста Твоего образ видев / и, якоже Павел, звание не от человек прие́м, / во царе́х апостол Твой, Господи, / царствующий град в руце́ Твоей положи́, / егоже спасай всегда в мире / молитвами Богородицы, Едине Человеколюбче.

Преподобномученику Корнилию, игумену Псково-Печерскому, чудотворцу (20 февраля), глас 6:

Псково-Печерская обитель, / издревле славная чудесы́ иконы Богоматерни, / многия иноки Бо́гови воспита́, / тамо и преподобный Корнилий подвигом добрым подвиза́ся, / чу́дную Богоматерь славя, / иноверныя просвещая, иноки и многия люди спасая, / обитель же свою дивно украшая и ограждая. / Тамо и мученичества венец / по многих ле́тех пастырства своего доблестне прия́т. / Темже воспои́м, людие, Христа Бога, / и Пречи́стую Его Матерь возблагодари́м, / яко дарова́ нам преподобномученика славна / и молитвенника о душа́х наших достоблаженна.

Мироносице равноапостольнои Марии Магдалине (22 июля), глас 1:

Христу, нас ради от Девы ро́ждшемуся, / честна́я Магдалина Мария последовала еси, / Того оправдания и законы хранящи: / темже, днесь всесвятую твою память празднующе, / грехов разрешение / молитвами твоими приемлем.

Святителю Николаю Чудотворцу (6 декабря), глас 4:

Правило веры и образ кротости, / воздержания учителя / яви́ тя стаду твоему Яже вещей Истина, / сего ради стяжал еси смирением высокая, / нищетою богатая, / отче священноначальниче Нико́лае, / моли Христа Бога спастися душа́м нашим.

(9 мая), глас 4:

Приспе́ день светлаго торжества, / град Барский радуется, / и с ним вселенная вся ликовству́ет / пе́сньми и пе́ньми духовными; / днесь бо священное торжество / в пренесение честны́х и многоцелебных мощей / Святителя и Чудотворца Николая, / якоже солнце незаходимое, возсия / светозарными лучами, / разгоняя тьму искушений же и бед от вопиющих верно: / спасай нас, яко предстатель наш, великий Нико́лае.

Равноапостольнои Нине, просветительнице Грузии (14 января), глас 4:

Слова Божия служительнице, / во апо́стольстей проповеди первозванному Андрею и прочим апостолом подражавшая, / просветительнице Иверии / и Духа Святаго цевни́це, / святая равноапостольная Нино, / моли Христа Бога / спастися душа́м нашим.

Равноапостольнои великои княгине Ольге (11 июля), глас 1:

Крила́ми богоразумия впери́вши твой ум, / возлетела еси превыше видимыя твари, / взыскавши Бога и Творца всяческих, / и, Того обре́тши, паки рождение крещением прияла еси; / дре́ва животнаго наслаждающися, / нетленна во веки пребываеши, Ольго приснославная.

Великомученику и целителю Пантелеимону (27 июля), глас 3:

Страстотерпче святый и целебниче Пантелеи́моне, / моли Милостиваго Бога, / да прегрешений оставление / подаст душа́м нашим.

Мученице Параскеве (Пятнице) (28 октября), глас 4:

Премудрая и всехвальная Христова мученица Параске́ва, / мужескую крепость приемши, женскую же немощь отвергши, / диавола победи и мучителя посрами, / вопиющи и глаголющи: / приидите, тело мое мечем ссецы́те и огнем сожгите: / аз бо радующися иду ко Христу, Жениху моему: / тоя́ молитвами, Христе Боже, / спаси ду́ши наша.

Преподобной Параскеве (14 октября), глас 4:

Пусты́нное и безмолвное житие возлюбивши / и во след Христа, Жениха твоего, усердно потекши / и Того благо́е иго во юности твоей вземши, / крестным зна́мением к мысленным врагом мужески вооружившися, / постническими подвиги, / постом и молитвами и слезными каплями у́глие страстей угасила еси, / достославная Параскево: / и ныне в небеснем черто́зе с мудрыми девами предстоя́щи Христу, / моли о нас, почитающих честну́ю память твою.

Первоверховным апостолам Петру и Павлу (29 июня), глас 4:

Апостолов первопрестольницы / и вселенныя учи́телие, / Владыку всех молите / мир вселенней даровати / и душа́м нашим велию милость.

Святителям Московским и всея Руси Петру, Алексию, Ионе, Филиппу и Ермогену (5 октября), глас 4:

Первопрестольницы Российстии, / истиннии хранителие апостольских преданий, / столпи́ непоколебимии, / православия наставницы, / Пе́тре, Алекси́е, Ионо, Филиппе и Ермогене, / Владыку всех молите / мир вселенней даровати / и душа́м нашим велию милость.

Преподобным отцам Печерским (28 сентября, 28 августа, Неделя 2-я Великого поста), глас 2:

Егда́ снидо́сте во гро́бы и саме́х себе́ заключи́сте, / тогда, страсти умертвивше плотски́я, / спогребо́стеся Христу, богоноснии, / и диавольския в подземных разруши́сте огра́ды, / сего ради ангели венцы́ с небесе́ вам подают.

Святителю Питириму, епископу Тамбовскому (28 июля), глас 4:

Веры и благочестия наставниче, / Це́ркве светильниче, / монашествующих о́бразе, / святителю Питириме премудре, / стадо твое благочестно упасл еси / и ко Христу привел еси. / Темже в вышних венцем славы украше́н, / с нами на земли́ духом пребываеши, сияя чудесы́. / Моли Христа Бога спастися душа́м нашим.

Преподобному Серафиму Саровскому, чудотворцу (2 января, 19 июля), глас 4:

От юности Христа возлюбил еси, блаженне, / и Тому Единому рабо́тати пламенне вожделев, / непрестанною молитвою и трудом в пусты́ни подвизался еси, / умиленным же сердцем любовь Христову стяжав, / избранник возлюблен Божия Ма́тере явился еси. / Сего ради вопием ти: / спасай нас молитвами твоими, Серафиме преподобие, отче наш.

Преподобному Сергию, игумену Радонежскому, чудотворцу (25 сентября), глас 4:

Иже добродетелей подвижник, / яко истинный воин Христа Бога, / на страсти вельми́ подвизался еси в жизни вре́менней, / в пениих, бдениих же и пощениих образ быв твоим учеником; / темже и всели́ся в тя Пресвятый Дух, / егоже деиствием све́тло укра́шен еси, / но, яко имея дерзновение ко Святей Троице, / поминай стадо, еже собра́л еси мудре, / и не забуди, якоже обещался еси, посещая чад твоих, / Сергие преподобне, отче наш.

Святой благовернои Тамаре (1 мая), глас 4:

Вышния красоты́ желая, / нижния сласти телесныя дале́че от себе отгна́ла еси / и, в чертозе царском пребыва́ющи, / ангельское житие препровожда́ла еси, / царице Тамаро, блаженная, / моли Христа Бога / спастися душа́м нашим.

Мученикам Флору и Лавру (18 августа), глас4:

Преудо́бренную и богомудрую дво́ицу пресветлую / восхва́лим, вернии, по достоянию, / Фло́ра преблаженнаго / и Ла́вра всечестна́го, / иже усердно Троицу Несозда́нную ясно пропове́даста всем;/ темже, пострадавше до кро́ве, / и венцы пресветлыми увязо́стеся, / моли́теся Христу Богу, / да спасет ду́ши наша.

* * *

Благодарение о всяком благодеянии Божии

Тропарь, глас 4:

Благодарни суще недостойнии раби Твои, Господи, / о Твоих великих благодея́ниих, на нас бывших, / сла́вяще Тя хва́лим, благослови́м, благодарим, поем и величаем Твое благоутробие / и рабски любовию вопием Ти: / Благодетелю, Спасе наш, слава Тебе.

Кондак, глас 3:

Твоих благодеяний и даро́в ту́не, / яко раби непотребнии, сподобльшеся, Владыко, / к Тебе усердно притека́юще, благодарение по силе приносим / и, Тебе, яко Благодетеля и Творца, сла́вяще, вопием: / слава Тебе, Боже Всещедрый.

Слава и ныне: Богородичен, глас 3:

Богородице, христианом Помощнице, / Твое предстательство стяжа́вше раби Твои, благодарно Тебе вопием: / радуйся, Пречистая Богородице Дево, / и от всех нас бед Твоими молитвами всегда избави, / Едина вскоре предста́тельствующая.

Прокимен, глас 4:

Воспою Го́сподеви, благоде́явшему мне, и пою имени Го́спода Вышняго.

Стих: Возрадуется сердце мое о спасении Твоем.

Евангелие, Лк. 85 зач. (12,12–12,20).

Ектения: Помилуй нас, Боже...

Благодаря́ще со страхом и трепетом, яко раби непотребнии, Твоему благоутробию, Спа́се и Владыко наш Господи, о Твоих благодея́ниях, яже излиял еси изобильно на рабех Твоих, и припа́даем, и славословие Тебе, яко Богу, приносим и умиленно вопием: избави от всех бед рабы Твоя и всегда, яко Милостив, исполни во благи́х желание всех нас, прилежно молимся Ти, услыши и помилуй.

Якоже ныне милостивно услышал еси молитвы рабов Твоих, Господи, и явил еси на них благоутробие человеколюбия Твоего, си́це и в пре́дняя, не презира́я, исполни во славу Твою вся блага́я хотения верных Твоих и яви всем нам богатую милость Твою, вся нам согрешения презирая, молимся Ти, услыши и помилуй.

Благоприятно, яко кадило благово́нное и яко ту́чная всесожжения, да будет, Всеблаги́й Владыко, благодарение сие наше пред величеством славы Твоея́, и низпосли́ всегда, яко Щедр, рабом Твоим богатыя милости и щедро́ты Твоя, и от всех сопротивлений видимых и невидимых врагов Церковь Твою Святую, град сей (или: весь сию), храм сей (или: оби́тель сию́, или: дом сей) избави, людем же Твоим, всем безгрешное со здравием долгоденствие и во всех добродетелех преспе́яние да́руй, молим Ти ся, Всещедрый Царю, милостивно услыши и скоро помилуй.

Молитва

Господи Иисусе Христе, Боже наш, Боже всякаго милосердия и щедрот, егоже милость безмерна и человеколюбия неизсле́димая пучина! Ко Твоему величеству припа́дающе, со страхом и трепетом, яко раби недостойнии, благодарение Твоему благоутробию о Твоих благодея́ниях, на рабех Твоих (или: на рабе Твоем, на рабе Твоей) бывших, ныне смиренно приносяще, яко Господа, Владыку и Благодетеля, славим, хва́лим, поем и величаем и, припа́дающе, паки благодарим, Твое безмерное и неизреченное милосердие смиренно моля́ще. Да я́коже ныне моления рабов Твоих прия́ти и милостивно исполнити сподобил еси, и во пре́дняя в Твоей и и́скренняго любви и во всех добродетелех преспевающих Твоя благодеяния всех верных Твоих получити, Церковь Твою Святую и град сей [или: весь сию, или: обитель сию], от всякаго злаго обстояния избавляя и мир и безмятежие тем да́руя, Тебе со Безначальным Твоим Отце́м, и Пресвяты́м, и Благи́м, и Единосу́щным Твоим Духом во Единем Существе́ славимому Богу, всегда благодарение приносити и преблага́я глаголати и воспети сподо́биши:

Слава Тебе, Богу, Благода́телю нашему, во веки веков⁵.

О недужных

Тропарь, глас 4:

Скорый в заступлении Един сый, Христе, / скорое свыше покажи посещение стра́ждущим рабом Твоим / (или: стра́ждущему рабу Твоему, стра́ждущей рабе Твоей), избави от недугов и горьких болезней, / воздвигни во еже пети Тя и славити непрестанно, / молитвами Богородицы, Едине Человеколюбче.

Прокимен, глас 7:

Помилуй мя, Господи, яко не́мощен есмь, исцели мя, яко смято́шася кости моя.

Стих: Яко несть в смерти поминаяй Тебе.

Евангелие: Мф. 25 зач. (8,5–8,13).

Кондак, глас 2:

На одре́ болезни лежащих (или лежащаго, лежащую) и смертною раною уя́звленных (или: уя́звленнаго, уя́звленную), якоже иногда воздвигл еси, Спа́се, Петрову тещу / и разслабленнаго, на одре́ носимаго, / сице и ныне, Милосерде, стра́ждущих (или: стра́ждущаго, стра́ждущую) посети и исцели: / Ты бо Един еси неду́ги и болезни рода нашего понесы́й / и вся моги́й, яко Многомилостив.

Ектения: Помилуй нас, Боже...

Врачу душ и телес, со умилением в сердце сокрушенном к Тебе припа́даем, и стеня́ще вопием Ти: исцели болезни, уврачуй страсти душ и телес рабов Твоих (или: раба Твоего, рабы Твоея), имярек, и прости им (ему, ей), яко Благосерд, вся прегрешения вольная и невольная, и скоро воздвигни от одра́ болезни, молим Ти ся, уелыши и помилуй.

Не хотяй смерти грешных, но еже обратитися и живым им быти, пощади и помилуй рабов Твоих (или: раба Твоего, рабу Твою), Милостиве: запрети болезни, отстави всю страсть и весь неду́г, и простри крепкую Твою руку, и, якоже Иаи́рову дщерь, от одра́ болезни воздвигни и здравых (или: здрава, здраву) сотвори, молим Ти ся, услыши и помилуй.

Огненную болезнь Петровой тещи прикосновением Твоим исцеливый, и ныне лю́те страждущих рабов Твоих (или: люте страждущаго раба Твоего, страждущия рабы Твоея), имярек, болезнь благосердием Твоим исцели, здравие им (или: ему, ей) скоро подавая, прилежно молим Ти ся, Источниче цельба́м, услыши и помилуй.

Молитва

Владыко Вседержителю, Святый Царю, наказу́яй и не умерщвляяй, утверждаяй ниспа́дающия и возводяй низве́рженныя, телесныя человеков ско́рби исправляяй, молимся Тебе, Боже наш, рабов Твоих (или: раба Твоего, рабу Твою) имярек, немощству́ющих (немощству́юща, немощству́ющу) посети́ милостию Твоею, прости им (ему, ей) всякое согрешение вольное и невольное. Ей, Господи, врачебную Твою силу с небесе́ ниспосли́, прикосни́ся телеси́, угаси огне́вицу, укроти страсть и всякую немощь тая́щуюся: буди Врач рабов Твоих (раба Твоего, рабы Твоея), имярек, воздвигни их (его, ю) от одра́ болезненнаго и от ло́жа озлобле́ния це́лых и всесовершенных (це́ла и всесовершенна, це́лу и всесовершенну), даруй их (его, ю) Церкви Твоей благоугожда́ющих и творящих (благоугожда́юща и творяща, благоугожда́ющу и творящу) волю Твою. Твое бо есть, е́же ми́ловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

О путешествующих

Тропарь, глас 2:

Путь и Истина сый, Христе, / спутника ангела Твоего рабом Твоим (рабу Твоему, рабе Твоей) ныне, / якоже Тови́и иногда, / посли́ сохраняюща и невреди́мых (невреди́ма, невреди́му) к славе Своей от всякаго зла, / во всяком благополучии соблюдающа, / молитвами Богородицы, Едине Человеколюбие.

Прокимен, глас 4:

Скажи́ ми, Господ и, путь, во́ньже пойду́, яко к Тебе взях душу мою.

Стих: Изми мя от враг моих, Господи, к Тебе прибегох.

Евангелие: Ин. 47 зач. (14,1–14,10) или Мф. 34 зач. (10,7–10,15).

Кондак, глас 2:

Луце́ и Клео́пе во Еммау́с спутеше́ствовавый, Спа́се, /сше́ствуй и ныне рабом Твоим (рабу Твоему, рабе Твоей), путешествовати хотя́щим (хотящу, хотящей), / от всякаго избавляя их (его, ю) злаго обстояния: / вся бо Ты, яко Человеколюбец, можеши хотя́й.

Ектения: Помилуй нас, Боже...

Стопы́ человеческия исправля́яй, Господи, при́зри милостивно на рабы Твоя (или: на раба Твоего, рабу Твою) имярек, и, простив им (ему, ей) всякое прегрешение, вольное и невольное, благослови благое намерение сове́та их (его, ея) и исходы и входы со путешествием исправи, прилежно молим Ти ся, услыши и помилуй.

Иосифа от озлобления братий его преславно свободи́вый, Господи, и во Египет того наста́вивый, и благословением Твоея́ благости во всем благополучна сотворивый, и сих рабов Твоих (сего раба Твоего, сию рабу Твою) путешествовати хотящих (хотяща, хотящу) благослови и шествие их безмятежно и благополучно сотвори, молим Ти ся, услыши и помилуй.

Луце́ и Клео́пе во Еммау́с спутеше́ствовавый и весело во Иерусалим возвратитися Твоим преславным познанием сотворивый, спутешествуй Твоею благодатию и Божественным благословением и ныне рабом Твоим сим (рабу Твоему сему, рабе Твоей сей), нами Тебе прилежно моля́щимся (моля́щемуся, моля́щейся), и во всяком деле бла́зе, к славе Пресвятаго Твоего имени благопоспеши́, во здравии и благополучии соблюдая и возвращая во время благоподобно, яко Всещедрому Благоде́телю, молим Ти ся, скоро услыши и милостивно помилуй.

Молитва

Господи Иисусе Христе, Боже наш, Истинный и Живы́й Путю́, состра́нствовати Иосифу и Пречи́стей Ти Деве Матери во Египет изволивый и Луце́ и Клеопе во Еммаус спутеше́ствовавый! И ныне смиренно молим Тя, Владыко Пресвятый, и рабом Твоим сим (рабу Твоему сему, рабе Твоей сей) Твоею благодатию спутешествуй. И якоже рабу Твоему Тови́и ангела хранителя и наставника посли́, сохраняюща и избавляюща их (его, ю) от всякаго злаго обстояния видимых и невидимых врагов и ко исполнению заповедей Твоих наставляюща, мирно же и благополучно и здраво препровожда́юща, и паки це́ло и безмятежно возвращающа: и даждь им (ему, ей) все благое свое наме́рение ко благоугождению Твоему благополучно в славу Твою исполнити. Твое бо есть еже ми́ловати и спасати нас, и Тебе славу возсылаем, со Безначальным Твоим Отцем, и со Пресвятым и Благи́м и Животворящим Твоим Духом, ныне и присно и во веки веков. Аминь.

В начале всякого доброго дела

Тропарь, глас 2:

Тво́рче и Создателю всяческих, Боже, / дела́ рук наших, к славе Твоей начинаемая, / Твоим благословением спешно исправи / и нас от всякаго зла избави, / яко Един Всесилен и Человеколюбец.

Прокимен, глас 4:

Буди светлость Го́спода Бога нашего на нас, и дела́ рук наших исправи.

Стих: И прйзри на рабы Твоя и на дела Твоя.

Евангелие: Мф. 20 зач. (7,7–7,11) или Ин. 48 зач. (14,10–14,15 и 14,21).

Кондак, глас 6:

Скорый в заступление и крепкий в помощь, / предстани благодатию силы Твоея́ ныне / и, благословив, укрепи / и в совершение намерения благаго дела рабов Твоих произведи: / вся бо, ели́ка хо́щеши, / яко Сильный Бог, творити можеши.

Ектения: Помилуй нас, Боже...

При́зри, Человеколюбие, милостивным Твоим оком на рабы Твоя (или: на раба Твоего, на рабу Твою), имярек, к Твоему благоутробию верою припа́дающия (припа́дающаго, припа́дающую) и, услышав моления их (его, ея), благое намерение и дело их (его, ея) благослови, и благополучно начати и спешно, кроме́ всякаго препятствия, в славу Твою совершити, яко Всесильному Царю, молим Ти ся, услыши и помилуй.

Во всем поспешеству́яй всем во благое, Господи, милостивно, и рабом Твоим (или: рабу Твоему, рабе Твоей), нами Тебе молящимся (молящемуся, молящейся), поспешествуй, Спа́се, и в благополучное совершение делу их (его, ея) спешно произвести́ся благослови, молим Ти ся, Всемоги́й Владыко, услыши и помилуй.

Ангела Твоего хранителя пристави делу сему, Благоуве́тливе Господи, и еже отвратити вся препятствия видимых и невидимых врагов, поспешство же во всем ко благополучному совершению делателям сотворити, молим Ти ся, Преблаги́й Спасе, услыши и помилуй.

В славу Твою вся творити повелева́яй, Господи, рабом Твоим (или: рабу Твоему, рабе Твоей), к Твоей славе дело свое начинающим (начинающему, начинающей), благословением Твоим поспе́шство благополучное с довольством к совершению подаждь, здравие им (ему, ей) со благоденствием да́руя, молим Ти ся, Вседарови́тый Творче, услыши и милостивно помилуй.

Молитва

Господи Иисусе Христе, Боже наш, благослови благое намерение рабов Твоих (или: раба Твоего, рабы Твоея), имярек, и дело их (его, ея) еже благополучно начати и без всякаго преткновения к славе Твоей совершити: де́лателем же благопоспеши́ и дела́ рук исправи, и в совершение силою Пресвятаго Твоего Духа спешно произвести́ сотвори, яко Ты еси Творец и Создатель всяческих, и Тебе славу возсылаем, со Безначальным Твоим Отцем, и с Пресвятым, Благи́м и Животворящим Твоим Духом, ныне и присно, и во веки веков. Аминь.

На благословение нового дома

Тропарь, глас 8:

Якоже Закхе́еву до́му Твоим, Христе, входом спасение бысть, / си́це и ныне входом священных служителей Твоих и с ними святых Твоих ангел / мир твой подаждь до́му сему и милостивно благослови его, / спасая и просвещая всех жити хотящих в нем.

Прокимен, глас 4:

Ви́деша вси концы́ земли́ спасение Бога нашего.

Стих: Воспойте Го́сподеви песнь но́ву, яко ди́вна сотвори Господь.

Евангелие: Лк. 94 зач. (19,1–19,10).

По Евангелии стихира, глас 5:

Благослови, Господи, дом сей / и исполни его земных Твоих благ / и в нем благочестно жити хотящих от всякаго злаго обстояния неврежденных / и всякое изобилие небеснаго и земнаго Твоего благословения тем даруй / и, яко Щедр, помилуй / по велицей Твоей милости.

Ектения: Помилуй нас, Боже...

Еще молимся о еже ниспосла́ти благословение Свое на дом сей и на рабов Своих, имярек, и на всех в нем благочестно жити хотящих и послати им ангела Своего милостива, соблюдающа и сохраняюща их от всякаго зла и наставляюща к деланию всех добродетелей и ко исполнению Святых Христовых заповедей, и о еже сохранити их от глада, губительства, труса, потопа, огня, меча, нашествия иноплеменник и всякия смертоносныя раны и даровати им здравие, и долгоденствием оградити их, рцем вси: Господи, услыши и помилуй.

Молитва

Боже, Спасителю наш, изволивый под сень Закхе́еву вни́ти и спасение тому и всему дому того́ бывый, Сам и ныне зде (в новем доме) жити восхотевшыя и нами недостойными мольбы Тебе и моления приносящия от всякаго вре́да соблюди́ невредимы, благословляя тех зде жилище и ненаве́тен тех живот сохраняяй. Яко подобает Тебе всякая слава, честь и поклонение, со Безначальным Твоим Отцем, и с Пресвятым и Благи́м и Животворящим Твоим Духом, ныне и присно и во веки веков. Аминь.

Молитва иная

Господи Боже, Владыко Вседержителю, благослови, молим Ти ся, жилище сие и вся рабы Твоя, живущия в нем, яко да, охраняеми Тобою, пребудут в мире, любви и согласии: благослови их, яко да, исполняюще волю Твою святую, обитают зде до старости своея́ и у́зрят сы́ны сынов своих: благослови их ра́достьми, веселием и изобилием, яко да утешают неиму́щих: благослови их долголетием, яко да, угождающе Тебе, Владыце, Создателю и Спасителю, по милости Твоей вни́дут живущии в сем жилище и во Царствие Твое Небесное, угото́ванное всем творящим повеления Твоя. Услыши нас, Всемилостиве, и благослови жилище сие и живущих в нем: яко да всегда хва́лят Тя, Бога нашего, Отца и Сына и Святаго Духа, ныне и присно и во веки веков. Аминь.

* * *

На пути в церковь есть обычай читать молитву:

Вниду в дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой: яко несть в усте́х их истины, сердце их суетно, гроб отверст горта́нь их, язы́ки своими льщаху. Суди им, Боже, да отпадут от мыслей своих, по множеству нечестия их изри́ни я, яко преогорчиша Тя, Господи. И да возвеселятся вси, уповающии на Тя, во веки возрадуются, и вселишися в них, и похва́лятся о Тебе любящии Имя Твое. Яко Ты благословиши праведника, Господи, яко оружием благоволения венчал еси нас.

Кроме этой молитвы, можно читать тропарь, кондак и другие песнопения службы данного дня, 50-й и 90-й псалмы, воспоминать священные события, которые празднует Церковь в данный день.

Входить в церковь надлежит тихо и благоговейно, как в дом Божий, в таинственное жилище Царя Небесного. Шум, разговоры, а тем более смех, при вступлении в церковь и пребывании в ней оскорбляют святость храма Божия и величие обитающего в нем Бога.

Войдя в храм, следует остановиться близ дверей и сотворить три поклона (земных в простые дни, а в субботы, воскресенья и праздники – поясных) с молитвами: Боже, милостив буди мне, грешному. – Поклон. Боже, очисти мя, грешнаго, и помилуй мя. – Поклон. Создавый мя, Господи, прости мя! – Поклон.

На следующих молитвословиях поклоны обычно полагаются поясные: Кресту Твоему / покланяемся, Владыко, и Святое Воскресение Твое славим.

Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и Славнейшую без сравнения Серафим, без истления Бога Слова рождшую, сущую Богородицу Тя величаем!

Слава Отцу и Сыну и Святому Духу, и ныне и присно и во веки веков. Аминь.

Господи, помилуй! (Трижды.) Благослови.

Молитвами святых отец наших, Господи, Иисусе Христе, Боже наш, помилуй нас.

После этого, по обычаю поклонясь на обе стороны прежде вошедшим людям и сотворив три поясных поклона с молитвой Иисусовой: Господи, Иисусе Христе, Сыне Божий, помилуй мя, грешнаго, – внимай начавшемуся Богослужению с благоговением и страхом Божиим.

Мужчинам положено, по древнему обычаю, становиться в храме на правой стороне, а женщинам – на левой.

По отпусте службы то же должно читать, что и при входе в церковь, и с такими же поклонами и отпустом.

Служба церковная совершается со многими великими и малыми поклонами. Святая Церковь требует совершать поклоны с внутренним благоговением и внешним благообразием, не спеша, и, по возможности, единовременно с другими молящимися в храме. Пред совершением поклона нужно осенить себя крестным знамением и потом делать поклон, – если малый, то нужно наклонить главу так, чтобы рукой можно было достать до земли, при великом же нужно оба колена преклонить вместе и главою достигнуть земли. Крестное знамение должно изображать на себе правильно, с благоговением, не спеша, соединив вместе три первых перста правой руки в знак того, что Бог есть Троица Единая и Равночестная, а остальные два перста сложив и пригнув к ладони в ознаменование того, что Иисус Христос есть Бог и Человек, сошедший на землю нашего ради спасения. Сложенную таким образом десницу (правую руку) следует полагать сначала на чело, чтобы просветил Господь ум наш, затем на чрево, дабы укротил воюющую на дух плоть, а после на правое и на левое плечи – для освящения нашей деятельности. Церковный Устав строго требует, чтобы мы совершали поклоны в храме Божием не только истово, чинно и все одновременно, но и неторопливо («не борзяся»), и своевременно, то есть именно тогда, когда это указано. Поклоны и коленопреклонения следует совершать по окончании каждого краткого прошения или молитвословия, а не во время его исполнения. О неблагочинно совершающих поклоны Устав церковный произносит строгий суд (Типикон, понедельник первой седмицы Святого Великого поста).

Пред началом всякого Богослужения нужно полагать по три поясных поклона. Затем, при всех службах, на всяком Приидите, поклонимся, на Святый Боже, на троекратном Аллилуия и на Буди Имя Господне полагаются по три поясных поклона, только на Аллилуия среди шестопсалмия, ради глубокой тишины, по Уставу поклонов не полагается, но совершается крестное знамение. На Сподоби, Господи как на вечерни, так и на утрени (в славословии великом, поемом или читаемом), полагаются по три поясных поклона. На всех ектениях церковных служб внимательно вслушивайся в каждое прошение, мысленно вознося молитву к Богу и, осеняя себя крестным знамением при возглашениях: Господи, помилуй или Подай, Господи, твори поясной поклон. При пении и чтении стихир и других молитвословий тогда только полагается поклон, когда слова молитвословий побуждают к этому; например: «припадем», «поклонимся», «молимся».

После Честнейшую Херувим и пред Именем Господним благослови, отче (или: Владыко) всегда полагается глубокий поясной поклон.

При чтении акафистов на каждом кондаке и икосе полагается поясной поклон; при троекратном произнесении или пении тринадцатого кондака полагаются поклоны земные или поясные (по дню); такие же поклоны полагаются по прочтении молитвы акафиста.

Помянник читается с поклонами после каждой статии (причем в некоторых монастырях поклоны полагаются земные или поясные, по дню, в иных же всегда поясные).

По Достойно на повечерии и утрени, также и во время пения Честнейшую на 9-й песни канона – поклон по дню; после стиха Хвалим, благословим полагается поясной поклон.

Пред и по прочтении Евангелия (на Слава Тебе, Господи) всегда полагается один поясной поклон; на полиелее после каждого величания – по одному поясному поклону.

При начале чтения или пения Символа веры, при произнесении слов: Силою Честнаго и Животворящаго Креста, при начале чтения Апостола, Евангелия и паримий положено осенять себя крестным знамением без поклона.

Когда священнослужитель, преподавая мир, произносит: Мир всем или возглашает: Благодать Господа нашего Иисуса Христа, и любы (любовь) Бога и Отца, и причастие (общение) Святаго Духа буди со всеми вами и лик (хор), отвечая, поет: И духови твоему или И со духом твоим, следует делать поясной поклон, без крестного знамения. Поклон полагается при всяком благословении священнослужителем всех молящихся, а также при отпусте, если он совершается без Креста. Когда же отпуст произносится священнослужителем с Крестом, которым он осеняет молящихся, то поклон следует творить с крестным знамением. Неблагочестивым самочинием является то, когда миряне при общем благословении священнослужителя складывают свои ладони, а затем иногда еще и целуют их. При возглашении Главы ваша Господеви приклоните следует наклонять главу и стоять до окончания молитвы, произносимой священником: в это время священник молится Богу о всех, преклонивших свои главы.

Когда в церкви осеняют народ Крестом, Святым Евангелием, образом или Святой Чашей, то все должны креститься, преклоняя главу. А когда осеняют свечами или благословляют рукой, или кадят народ, то не должно креститься, а только поклониться. Лишь в Светлую седмицу Святой Пасхи, когда кадит священник с Крестом в руке, то все крестятся и, отвечая на его приветствие Христос воскресе, говорят: Воистину воскресе.

Так должно различать поклонение пред святыней и пред людьми, хотя и священными. Принимая благословение священника или епископа, христиане складывают ладони крестообразно, полагая правую на левую, и целуют десницу благословляющего, но не крестятся перед этим.

При прикладывании (лобызании) ко Святому Евангелию, Кресту, честны́м мощам и иконам следует подходить, в должном порядке, не спеша и не теснясь, полагать два поклона пред целованием и один после целования святыни; поклоны творить по дню – земные или глубокие поясные, досязая рукой до земли. Прикладываясь к иконам Спасителя, Божией Матери и святых, не следует целовать их в лик.

В Патриаршем чиновнике середины XVII века указывалось, что, прикладываясь к иконам Спасителя, следует целовать в ножку (при поясном изображении в ручку); к иконам Божией Матери и святых – в ручку; к иконе Нерукотворенного образа Спасителя и к иконе Усекновения главы святого Иоанна Крестителя – в косу власов (А. Горский, К. Невоструев. Описание славянских рукописей Московской Синодальной библиотеки. Отдел третий. Книги Богослужебные. Часть вторая. М., 1917, с. 511).

На иконе может быть изображено несколько священных лиц, но целовать икону полагается один раз, дабы при стечении молящихся не задерживать других и тем не нарушать благочиния в храме.

От Святой Пасхи до праздника Святой Троицы, от праздника Рождества Христова до праздника Крещения Господня (Святки), вообще во все Господни великие праздники поклоны земные при храмовых Богослужениях отменяются.

Всенощное бдение

Первое отверстие царских врат и каждение алтаря изображает явление славы Божией в сотворении мира и человека и блаженное состояние прародителей в раю Божием после их сотворения.

Пение 103-го псалма (предначинательного): Благослови, душе моя, Господа изображает величественную картину мироздания. Каждение священника во время пения этого псалма изображает действие Духа Божия, носившегося при сотворении мира над водами. Возжженный светильник, предносимый диаконом во время каждения, знаменует тот свет, который по Творческому гласу явился после первого вечера бытия.

Затворение царских врат после пения псалма и каждения означает, что вскоре по сотворении мира и человека врата рая были заключены вследствие преступления праотца Адама. Чтение священником светильничных (вечерних) молитв пред царскими вратами знаменует раскаяние праотца Адама и его потомков, которые в лице священника пред заключенными царскими вратами, как пред заключенными дверями рая, молят Творца своего о помиловании.

Пение псалма Блажен муж со стихами из трех первых псалмов и чтение 1-й кафизмы изображает частью блаженное состояние прародителей в раю, частью – раскаяние согрешивших и их надежду на обетованного Богом Искупителя.

Пение Господи, воззвах со стихами знаменует скорбь падшего прародителя и его молитвенные воздыхания пред заключенными вратами рая, а вместе с тем и твердое упование, что Господь по вере в обещанного Искупителя очистит и избавит род человеческий от падений греховных. Это пение изображает также хвалу Богу за Его великие милости к нам.

Отверзание царских врат при пении Догматика (Богородична) означает то, что чрез воплощение Сына Божия от Пресвятой Девы Марии и сошествие Его на землю отверзлись для нас двери рая.

Исхождение священника из алтаря на солею и тайное моление его знаменует сошествие Сына Божия на землю для нашего искупления. Диакон, предшествующий священнику, представляет образ святого Иоанна Предтечи, приготовлявшего людей к принятию Спасителя мира. Каждение, совершавмое диаконом, указывает, что вместе с пришествием на землю Сына Божия, Искупителя мира, Дух Святой исполнил весь мир Своею благодатию. Вхождение священника в алтарь знаменует Вознесение Спасителя на Небо, а приближение священника к Горнему месту означает седение Сына Божия одесную Отца и ходатайство пред Отцом Своим за род человеческий. Возглашением диакона Премудрость, прости! Святая Церковь научает нас с благоговением внимать вечернему входу. Песнопение Свете Тихий содержит прославление Христа Спасителя за сошествие Его на землю и совершение нашего искупления.

Лития (общее исхождение и общее моление) содержит сугубые моления о наших телесных и духовных нуждах и, прежде всего, о прощении согрешений наших Божиим милосердием.

Молитва Ныне отпущаеши повествует о сретении праведным старцем Симеоном Господа Иисуса Христа в храме Иерусалимском и указывает на необходимость постоянного памятования о часе смертном.

Молитва Богородице Дево, радуйся напоминает о благовещении Архангела Гавриила Пресвятой Деве Богородице.

Благословение хлебов, пшеницы, вина и елея, исполняющее их различных благодатных дарований, напоминает о тех пяти хлебах, которыми Христос, чудесно умножив их, насытил пять тысяч народа.

Шестопсалмие – плач кающагося грешника пред Христом Спасителем, пришедшим на землю.

Неполное освещение в храме при чтении шестопсалмия напоминает о состоянии души во грехе. Мерцание светильников (лампад) изображает ночь Рождества Христова, которая оглашена была радостным славословием Ангелов: Слава в Вышних Богу, и на земли мир в человецех благоволение.

Чтение первой половины шестопсалмия выражает скорбь души, удалившейся от Бога и ищущей Его.

Священник, во время чтения шестопсалмия читающий пред царскими вратами молитвы утрени, напоминает о Вечном Ходатае Нового Завета пред Богом Отцом – Господе Иисусе Христе.

Чтение второй половины шестопсалмия раскрывает состояние раскаявшейся души, примиренной с Богом.

Пение Бог – Господь, и явися нам напоминает о спасении, совершенном явившимся в мир Спасителем.

Пение воскресного тропаря изображает славу и величие Воскресшего Христа.

Чтение кафизм напоминает о тяжких скорбях Господа Иисуса Христа.

Пением стихов Хвалите Имя Господне Святая Церковь прославляет Господа за многие благодеяния и милости Его к роду человеческому.

Тропари Ангельский собор напоминают о благовестии Ангела женам-мироносицам о Воскресении Спасителя.

Во время воскресного всенощного бдения Святое Евангелие, благовествующее об одном из явлений Воскресшего Господа женам-мироносицам или апостолам, по Уставу положено читать в алтаре на престоле, как на месте, знаменующем Живоносный Гроб, из которого восстал Христос Спаситель.

По прочтении Евангелие износится на средину храма для поклонения и лобызания верующими. При изнесении Евангелия из алтаря молящиеся взирают на него с особым благоговением, как на Самого Воскресшего Господа, поклонясь и взывая: Воскресение Христово видевше, поклони́мся Святому Господу Иисусу. Это пение должно быть общенародным.

В канонах утрени прославляются Воскресение Христово (или другие священные события из жизни Господа), Пресвятая Богородица, святые Ангелы и угодники Божии, чествуемые в данный день. При пении Величит душа Моя Господа каждый раз после припева Честнейшую полагается поклон земной или поясной – по дню.

В хвалитных стихирах и в великом славословии возносится особое благодарение и прославление Господа Иисуса Христа.

Божественная литургия

На Божественной литургии, или Евхаристии, воспоминается вся земная жизнь Господа Иисуса Христа. Литургия условно разделяется на три части: проскомидия, литургия оглашенных и литургия верных.

На проскомидии, совершаемой обычно во время чтения 3-го и 6-го часов, воспоминается Рождество Спасителя. В это же время воспоминаются и ветхозаветные пророчества о Его страданиях и смерти. На проскомидии приуготовляются вещества для совершения Евхаристии и поминаются живые и почившие члены Церкви. Великая отрада бывает душам усопших от поминовения их на Божественной литургии. Поэтому спеши в храм Божий для присутствия на проскомидии, поминая о здравии и об упокоении сродников, и знаемых, и всех православных христиан. Молиться за усопших можно так: Помяни, Господи, души усопших раб Твоих (имена) и прости их согрешения, вольная и невольная, даруя им Царствие и причастие вечных Твоих благ и Твоея безконечныя и блаженныя жизни наслаждение.

На литургии оглашенных песнью Единородный Сыне изображается пришествие на землю Господа Иисуса Христа.

Во время малого входа с Евангелием, изображающим исшествие Господа Иисуса Христа на проповедь, при пении стиха: Приидите, поклонимся и припадем ко Христу совершается поясной поклон. При пении Трисвятого – три поясных поклона.

При чтении Апостола на каждение диакона надлежит ответствовать наклонением главы. Чтение Апостола и каждение означают проповедь апостолов всему миру.

Во время чтения Евангелия, как бы внимая Самому Господу Иисусу Христу, следует стоять с преклоненной главой.

Поминовение членов Церкви показывает, за кого приносится Жертва Евхаристии.

На литургии верных великий вход символизирует исшествие Господа Иисуса Христа на вольные страдания для спасения мира.

Пение Херувимской песни при открытых царских вратах бывает в подражание Ангелам, непрестанно славословящим Небесного Царя и невидимо торжественно сопровождающим Его в преуготовленных и переносимых Святых Дарах.

Поставление Святых Даров на престоле, закрытие царских врат и задергивание завесы означают погребение Господа Иисуса Христа, приваление камня и приложение печати ко Гробу Его.

Во время пения Херувимской песни следует со вниманием читать про себя покаянный 50-й псалом: Помилуй мя, Боже. По окончании первой половины Херувимской песни полагается поясной поклон. Во время поминовения Святейшего Патриарха, местного епископа и других полагается стоять благоговейно, с преклоненной главой и при словах: И всех вас, православных христиан говорить про себя: Архиерейство твое да помянет Господь Бог во Царствии Своем. Так говорится при служении епископа. При служении же других священнослужителей следует говорить про себя: Священство твое да помяне́т Господь Бог во Царствии Своем. В конце поминовения надлежит говорить по себя: Помяни мя, Господи, егда (когда) приидеши во Царствии Твоем.

Слова: Двери, двери пред пением Символа веры в древности относились к привратникам, дабы они не впускали в храм оглашенных или язычников при совершении таинства Святой Евхаристии. Ныне эти слова напоминают верным, чтобы они не дозволяли входить в двери своего сердца помыслам греха. Слова: Премудростию вонмем (будем внимать) призывают внимание верующих к спасительному учению Православной Церкви, изложенному в Символе веры (догматы). Пение Символа веры общенародно. В начале Символа веры следует совершить крестное знамение.

При возглашениях священника: Приимите, ядите... Пийте от нея вси следует полагать поясные поклоны. В это время воспоминается Тайная вечеря Господа Иисуса Христа с апостолами.

Во время совершения самого таинства Святой Евхаристии – преложения хлеба и вина в Тело и Кровь Христовы и приношения Бескровной Жертвы за живых и усопших надлежит молиться с особым вниманием, и по окончании пения Тебе поем при словах: И молим Ти ся (молимся Тебе), Боже наш, надо поклониться до земли Телу и Крови Христовым. Важность этой минуты так велика, что с ней не может сравниться ни одна минута нашей жизни. В этой священной минуте заключаются все наше спасение и любовь Божия к роду человеческому, ибо Бог явился во плоти.

Во время пения Достойно есть (или другой священной песни в честь Богородицы – задостойника) священник молится о живых и усопших, поминая их по именам, в особенности тех, за которых совершается Божественная литургия. И присутствующие в храме должны в это время помянуть поименно своих близких, живых и умерших.

После Достойно есть или заменяющего его задостойника – земной поклон. При словах: И всех, и вся – совершается поясной поклон.

В начале общенародного пения Молитвы Господней – Отче наш – следует изобразить на себе крестное знамение и положить земной поклон.

При возгласе священника: Святая – святым земной поклон полагается ради возношения Святого Агнца пред Его раздроблением. В это время надлежит воспоминать Тайную вечерю и последнюю беседу Господа Иисуса Христа с учениками, Его крестные страдания, смерть и погребение.

По отверстии царских врат и вынесении Святых Даров, означающем явление Господа Иисуса Христа по Воскресении, при возглашении: Со страхом Божиим и верою приступите! – полагается земной поклон.

Приступая к принятию Святых Таин Тела и Крови Христовых после того, как священник прочитает молитвы пред причащением, надлежит положить земной поклон, сложить руки на груди крестообразно (ни в коем случае не креститься, дабы не толкнуть нечаянно и не пролить Святую Чашу, – крестообразно сложенные руки заменяют в это время крестное знамение) и не спеша, благоговейно, со страхом Божиим подходить к Святой Чаше, назвав свое имя, а по принятии Святых Таин облобызать нижнюю часть Чаши, как само пречистое ребро Христово, и затем отойти в сторону спокойно, не творя крестного знамения и поклонов до принятия теплоты. Надлежит особенно возблагодарить Господа за Его великую милость, за благодатный дар Святого Причащения: Слава Тебе, Боже! Слава Тебе, Боже! Слава Тебе, Боже! Земные поклоны в этот день не совершаются причастниками до вечера. Те, кто не причащается за Божественной литургией, в святые минуты причастия должны стоять в храме с благоговейной молитвой, не помышляя о земном, не выходя в это время из храма, дабы не оскорбить Святыни Господней и не нарушить благочиния.

При последнем явлении Святых Даров, изображающем Вознесение Господа Иисуса Христа на Небо, при словах священника: Всегда, ныне и присно и во веки веков полагается земной поклон с крестным знамением для тех, кто не сподобился Святых Таин, а для причастников – поясной поклон с крестным знамением. Кто не успел еще к этому времени принять теплоты, должен обратиться лицом к Святой Чаше, выражая этим благоговение к великой Святыне.

Святой антидор (с греч. – вместо дара) раздается присутствующим за Божественной литургией для благословения и освящения души и тела, дабы те, кто не приобщались Святых Таин, вкусили освященного хлеба. Церковный Устав указывает, что антидор можно принимать лишь натощак – ничего не евшим и не пившим.

Антидор так же, как и хлеб, благословленный на литии, должно принимать благоговейно, сложив ладони крестообразно, правую на левую, и целуя подающую этот дар руку священника.

В дни Святой Четыредесятницы полагаются еще следующие земные и поясные поклоны.

При произнесении молитвы святого Ефрема Сирина: Господи и Владыко живота моего (моей жизни) полагаются 16 поклонов, из них 4 земных (в Уставе они называются великими) и 12 поясных (метаний). Устав церковный заповедует читать эту молитву с умилением и страхом Божиим, стоя прямо и возводя ум и сердце к Богу. Совершив первую часть молитвы – Господи и Владыко живота моего,– полагается положить великий поклон. Затем, став прямо, по-прежнему обратив мысль и чувства к Богу, следует произносить вторую часть молитвы – Дух же целомудрия – и, окончив ее, снова сотворить поклон великий. После произнесения третьей части молитвы – Ей, Господи Царю – полагается третий земной поклон. Затем полагаются 12 поклонов поясных («излегка, утомления ради» – Типикон, понедельник первой седмицы Великого поста) со словами: Боже, очисти мя (меня), грешнаго. Совершив малые поклоны, снова читают молитву святого Ефрема Сирина, но не разделяя на части, а всю целиком, и в конце ее полагают земной поклон (четвертый). Эта святая молитва произносится на всех седмичных великопостных службах, то есть за исключением суббот и воскресений.

На вечерне полагается по одному земному поклону после песнопений; Богородице Дево, радуйся,… Крестителю Христов и Молите за ны, святии апостоли.

На великом повечерии должно внимательно слушать чтение церковных молитв. После Символа веры, при пении Пресвятая Владычице Богородице, моли о нас, грешных и прочих молитвенных стихов, по окончании каждого стиха полагается земной поклон, в полиелейные празднования – поясной.

О поклонах при чтении Великого покаянного канона преподобного Андрея Критского в Уставе сказано: «Творим же на кийждо (каждый) тропарь метания три, глаголюще настоящий припев: Помилуй мя, Боже, помилуй мя».

На Господи сил, с нами буди и прочих стихах полагается по одному поясному поклону.

При произнесении священником великого отпуста – молитвы Владыко, Многомилостиве необходимо преклониться до земли, с сердечным умилением испрашивая у Господа прощения согрешений.

После тропарей часов с их стихами (1-го часа: Заутра услыши глас мой; 3-го часа: Господи, Иже

Пресвятаго Твоего Духа; 6-го часа: Иже в шестый день же и час; 9-го часа: Иже в девятый час)

полагается по три земных поклона; на тропаре Пречистому образу Твоему – один поклон до земли; на всех часах по окончании Богородичнов (на 1-м часе; Что Тя наречем, о Благодатная; на 3-м часе: Богородице, Ты еси лоза истинная; на 6-м часе: Яко не имамы дерзновения; на 9-м часе: Иже нас ради рождейся) совершаются три малых поклона («и метания три» – говорится в Уставе). В чине изобразительных, во время пения Блаженн: Во Царствии Твоем помяни нас, Господи, после каждого стиха с припевом полагается делать малый поклон, а при последнем трехкратном пении Помяни нас полагаются три поклона до земли; по молитве Ослаби, остави, хотя и нет указания в Уставе, но древним обычаем принято всегда полагать поклон (земной или поясной – по дню).

На литургии Преждеосвященных Даров на вечерне, во время чтения третьего антифона 18-й кафизмы, когда Святые Дары переносятся с престола на жертвенник, а также при появлении священника со свечой и кадильницей в отверстых царских вратах, произносящего перед чтением второй паримии: Свет Христов просвещает всех! полагается припадать ниц до земли. Во время пения: Да исправится молитва моя моление всего народа совершается с преклонением колен; певцы и чтец встают на колени поочередно по исполнении положенного стиха; по окончании пения всех стихов молитвы положены три поклона до земли (по обычаю с молитвой святого Ефрема Сирина). Во время великого входа, при перенесении Преждеосвященных Даров с жертвенника на престол, народу и певцам следует припадать ниц до земли из благоговения к Святым Тайнам Тела и Крови Христовых. По окончании пения Ныне Силы Небесныя полагаются три поклона до земли, по обычаю, так же с молитвой святого Ефрема Сирина. Заамвонную молитву священника надлежит слушать со вниманием, прилагая ее смысл к сердцу, и по окончании ее совершить поклон поясной.

В Страстную седмицу земные поклоны прекращаются с Великой Среды. В Уставе об этом говорится так: «На Буди Имя Господне: поклоны три, и абие (тотчас) упраздняются совершенно в церкви бываемыя поклоны; в келлиях же даже и до Великаго Пятка совершаются». Поклонение Святой Плащанице в Великую Пятницу и Великую Субботу, подобно как и Святому Кресту, сопровождается тремя земными поклонами.

Поклоны входные и исходные, а также о которых сказано, что они полагаются в зависимости от дня («по дню») – в дни суббот, воскресений, праздников, предпразднств и попразднств, полиелея и великого славословия совершаются поясные, в простые же дни полагаются земные. В седмичные дни поклоны земные прекращаются с вечерни в пятницу от Сподоби, Господи, и начинаются от вечерни в воскресенье, также от Сподоби, Господи.

Накануне однодневных праздников, полиелея и великого славословия земные поклоны прекращаются также с вечерни и начинаются с вечерни же от Сподоби, Господи, в самый праздник.

Пред великими праздниками земные поклоны прекращаются накануне предпразднства. Поклонение Святому Кресту в праздник Воздвижения всегда совершается с земными поклонами, хотя бы он пришелся и в воскресный день.

Во время чтения паримий и кафизм с седальнами принято сидеть. Полезно помнить, что по Уставу сидеть разрешается не во время самих кафизм, а во время чтения житий и святоотеческих поучений, положенных между кафизмами с седальнами.

Попечение Святой Церкви о нас продолжается и после службы, чтобы мы не лишились благодатного настроения, которого по милости Божией удостоились в храме. Церковь заповедует нам и расходиться из храма в благоговейном молчании, с благодарением Господу, сподобившему нас присутствовать в храме, с молитвой, чтобы Господь даровал до конца нашей жизни всегда посещать Его святой храм.

В Уставе об этом говорится так: «По отпущении же, исходяще из церкве, и́дем со всяким безмолвием в келлии своя, или на службу. И не подобает нам беседы творити друг со другом на монастыре в пути, удержано бо сие от святых отец».

Бывая в храме Божием, будем помнить, что мы находимся в присутствии Господа Бога, Божией Матери, святых ангелов и Церкви первородных, то есть всех святых. «В храме стоя́ще (стоя, находясь) славы Твоея, на Небеси стояти мним (мыслим)».

Спасительная сила церковных молитв, песнопений и чтений зависит от того, с каким чувством принимают их наши сердце и ум. Поэтому, если невозможно положить поклон по той или иной причине, то лучше со смирением испросить мысленно у Господа прощения, чем нарушать церковное благочиние. Но совершенно необходимо вникать во все, совершающееся за церковным Богослужением, чтобы питаться им. Тогда только за церковной службой каждый согреет свое сердце, возбудит совесть, оживит иссохшую душу и просветит свой ум.

Будем твердо памятовать слова святого апостола Павла: «Стойте и держите предания, имже научистеся или словом, или посланием нашим» (2Сол.2:15).