Требуются волонтёры

Ирмологий. Богородичны всего лета

Содержание

Ирмологий часть 1 Ирмосы́ 1-го гла́са Ирмосы 2-го гласа Ирмосы 3-го гласа Ирмосы 4-го гласа Ирмосы 5-го гласа Ирмосы 6-го гласа Ирмосы 7-го гласа Ирмосы 8-го гласа Ирмосы в предпразднство Рождества Христова Ирмосы в предпразднство Святых Богоявлений После́дование церко́вных сочине́ний, Боже́ственныя и свяще́нныя Литурги́и Прича́стны седми́цы А́ще же е́сть Вели́кая Четыредеся́тница Степе́нны на о́смь гласо́в На утрени по шестопсалмии Пе́сни Тро́ичны Песни Священного Писания вседневии Песни Священного Писания на праздничнии Песни Священного Писания во Святую Четыредесятницу Тропари́ воскре́сны, пое́мии по Непоро́чнах в неде́лях всего́ ле́та, гла́с 5 Проки́мны воскре́сны Воскресение Христово видевше По 50-м псалме́ Тропари́, пое́мии по непоро́чнах в суббо́ту, гла́с 5 Кано́н во Святу́ю Неде́лю Па́схи, и во всю́ Све́тлую седми́цу Часы по Святую Неделю Пасхи Псалми́ избра́ннии Припе́вы на 9-й пе́сни, на Госпо́дския, Богоро́дичныя и вели́ких свя́ты пра́здники Богородичны всего лета Богородичны воскресны на осмь гласов Богородичны осми гласов поемыя, егда есть Сла́ва: святому в Минеи Богородичны отпустительныя воскресны осми гласов Богородичны опустительныя по тропарех святых поемыя во все лето  

 

Ирмоло́гий, с Бо́гом Святы́м, обдержа́й вся́ ирмосы́ осмогла́сника, Влады́чних же и Богома́тере пра́здников и всего́ ле́та

Ирмологий часть 1

Ирмосы́ 1-го гла́са

Песнь 1

Твоя́ победи́тельная десни́ца / Боголе́пно в кре́пости просла́вися: / та бо, Безсме́ртне, / я́ко всемогу́щая проти́вныя сотре́, / изра́ильтяном путь глубины́ новосоде́лавшая.

Христо́с во гра́де Вифлее́мсте младе́нствует, / на́ше, я́ко Благоутро́бен, обновля́я естество́. / Усе́рдно прииди́те, земноро́днии, / се́рдцем песнь сладкопе́сненную воспои́м Влады́це во ве́ки: / сла́вно бо просла́вися.

В Рождество Христово:

Христо́с ражда́ется – сла́вите! / Христо́с с Небе́с – сря́щите! / Христо́с на земли́ – возноси́теся! / По́йте Го́сподеви, вся земля́, / и весе́лием воспо́йте, лю́дие, / я́ко просла́вися.

Спасе́ лю́ди чудоде́йствуяй Влады́ка, / мо́крую мо́ря во́лну оземлени́в дре́вле; / во́лею же ро́ждься от Де́вы, / стезю́ прохо́дну Небесе́ полага́ет нам. / Его́же, по Существу́ ра́вна же Отцу́ и челове́ком, сла́вим.

В поклонение Честнаго Креста:

Боже́ственнейший прообрази́ дре́вле Моисе́й, / в Чермне́м мо́ри прове́д Изра́иля Кресто́м Твои́м, / во́ду жезло́м пресе́к, / песнь Тебе́ исхо́дную / воспева́я, Христе́ Бо́же.

Во Святую Пасху:

Воскресе́ния день, / просвети́мся, лю́дие, / Па́сха, Госпо́дня Па́сха: / от сме́рти бо к Жи́зни / и от земли́ к Небеси́ / Христо́с Бог нас преведе́, / побе́дную пою́щия.

В неделю Фомы:

Пои́м, вси лю́дие, / от го́рькия рабо́ты фарао́ни Изра́иля Изме́ншему / и во глубине́ морсте́й нога́ми немо́крыми Наста́вльшему / песнь побе́дную, / я́ко просла́вися.

Во Успение Богородицы:

Преукраше́нная Боже́ственною сла́вою, / свяще́нная и сла́вная, Де́во, па́мять Твоя́ / вся собра́ к весе́лию ве́рныя, / начина́ющей Мариа́ме с ли́ки и тимпа́ны / Твоему́ пою́щия Единоро́дному: / сла́вно я́ко просла́вися.

Осмогла́сника и Введе́ния:

Песнь побе́дную пои́м вси Бо́гу, / сотво́ршему ди́вная чудеса́ мы́шцею высо́кою / и спа́сшему Изра́иля, / я́ко просла́вися.

Пои́м Го́сподеви песнь но́вую, / непроходи́мое бо оземлени́в Чермно́е, / пешеше́ствовати сотвори́ сыно́м Изра́илевым, / и сопроти́вныя враги́ покры́ мо́ре.

Похвалу́ Богови́дец Моисе́й Изра́илю предвозглаша́ет, / начина́ет же Мариа́м прему́дрым же на́м, / песнь побе́дную Изба́вителю Бо́гу вси воспои́м.

Столпо́м о́гненным и о́блачным Изра́иля наставле́й я́ко Бог / мо́ре разве́рже, / колесни́цы же фарао́новы глубино́ю покры́, / пои́м песнь побе́дную, / я́ко Еди́н просла́вися.

Го́рькия рабо́ты изба́влься Изра́иль, / непроходи́мое про́йде, я́ко су́шу, / врага́ зря потопля́ема, / песнь я́ко Благоде́телю пое́т Бо́гу, / чудоде́ющему мы́шцею высо́кою, / я́ко просла́вися.

Пои́м песнь но́вую Бо́гу, / от рабо́ты фарао́новы / изба́вльшему сы́ны Изра́илевы / и в пусты́ни ты́я препита́вшему, / я́ко сла́вно просла́вися.

Фарао́на с колесни́цами / в мо́ри Христо́с потопи́ / и наста́ви лю́ди, пою́щия и глаго́лющия: / пои́м Го́сподеви, / сла́вно бо просла́вися.

Вознесу́ Тя, Бо́же, Спа́се мой, / я́ко воскре́сл еси́ от ме́ртвых, / попра́в смерть.

Го́сподеви пои́м побе́дную песнь, / во исхо́де Изра́илеве из Еги́пта / Чермна́го мо́ря и Иорда́на струи́ огусти́вшему, / Еди́ному пресла́вно, / лю́дем, пешеше́ствующим посреде́ его́, / сла́вно бо просла́вися.

Помо́гшему Бо́гу во Еги́пте Моисе́ови / и тем фарао́на со всево́инством погрузи́вшему, / побе́дную песнь пои́м, я́ко просла́вися.

Песнь 2

Вонми́, Не́бо, и возглаго́лю, / я́ко Сло́во О́тчее во́лею сни́де на зе́млю, / приклони́в Небеса́, и бысть Челове́к, / да челове́ка спасе́т, / я́ко Человеколю́бец.

Вонми́ гла́су моему́, от Де́вы Рожде́йся, / и глаго́лы моя́ внуши́, / я́ко И́мя Твое́ ди́вное, Го́споди, призва́х.

Вонми́, Не́бо, и слы́ши, земле́, / и Христа́ воспо́й, пелена́ми обви́таго / и вери́ги прегреше́ний мои́х разреши́вшаго.

Вонми́ Не́бо, и возглаго́лю, / и да слы́шит земля́ глаго́лы уст мои́х: / я́ко И́мя Твое́, Го́споди, призва́х.

Вонми́, Не́бо, и возглаго́лю, / и воспою́ Христа́, Спа́са ми́рови, / еди́наго Человеколю́бца.

Вонми́ гла́су моле́ния моего́, / Царю́ мой и Бо́же мой, / пе́сненно Тебе́ вопию́, / я́ко к Тебе́ помолю́ся, Го́споди, / и спаси́ мя.

Ви́дите, ви́дите, я́ко Бог Аз есмь, / порабоще́нныя лю́ди Изра́илевы / Моисе́ю народоводи́ти в пусты́ ни повеле́вый / и спасы́й, я́ко си́лен, / вла́стию Мое́ю.

Ви́дите, ви́дите, я́ко Аз есмь Спас ми́ра, / Свет И́стинный, Исто́чник жи́зни, / Сын Бо́жий.

Песнь 3

Еди́не, ве́дый челове́ческаго существа́ не́мощь / и ми́лостивно в не вообра́жся, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме неизрече́нныя сла́вы Твоея́, Человеколю́бче.

Высокоца́рствуяй Безнача́льне, / ми́лостиве Сло́ве, / при́зри, вонми́ ми,– / слезоточа́щая приле́жно вопия́ше Ти дре́вле А́нна; / но я́ко о́ную услы́шал еси́ рыда́ющую, / и на́ша утверди́ мы́сли, Царю́, / досто́йно пе́ти Твое́ Рождество́.

В Рождество Христово:

Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / Свят еси́, Го́споди.

При́зри на пе́ния рабо́в, Благоде́телю, / врага́ смиря́я вознесе́нную горды́ню, / нося́й же, Всеви́дче, греха́ превы́шше / непоколе́блемо утвержде́ныя, Бла́же, певцы́ / основа́нием ве́ры.

Честнаго Креста:

Утверди́, Влады́ко Христе́, Кресто́м на ка́мени мя ве́ры, / не поколеба́тися уму́ прило́ги врага́ зла́го, / Еди́н бо еси́ Свят.

Пасхи:

Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник, / из гро́ба одожди́вша Христа́, / в Не́мже утвержда́емся.

Фомы:

Утверди́ мене́, Христе́, / на недви́жимом ка́мени за́поведей Твои́х / и просвети́ мя све́том лица́ Твоего́: / несть бо свят, па́че Тебе́, / Человеколю́бче.

Успения Богородицы:

Соде́тельная и содержи́тельная всех / Бо́жия му́дросте и си́ло, / непрекло́нну, недви́жиму Це́рковь утверди́, Христе́, / Еди́н бо еси́ Свят, / во святы́х почива́яй.

Осмогла́сника:

Ка́мень, его́же небрего́ша зи́ждущии,/ сей бысть во главу́ у́гла:/ той есть Ка́мень,/ на не́мже утверди́ Це́рковь Христо́с,/ ю́же от язы́к искупи́.

Утвержде́й сло́вом Небеса́ и зе́млю основа́вый, Бо́же, / и мене́ утверди́, вопию́ща Тебе́ песнь: / Свят еси́, Го́споди.

Пре́жде зача́тия честна́го Саму́ила несумне́н но Бо́гу обеща́вши, / священнома́ти А́нна ны́не, ра́дующися, пое́т с на́ми: / утверди́ся в Го́споде се́рдце мое́.

Не му́дростию и бога́тством да хва́лится сме́ртный свои́м, / но ве́рою Госпо́днею, / правосла́вно взыва́я Христу́ Бо́гу и поя́ при́сно: / на ка́мени Твои́х за́поведей / утверди́ мя, Влады́ко.

Введения:

Да утверди́тся се́рдце мое́ в во́ли Твое́й, Христе́ Бо́же, / И́же над вода́ми не́бо утвержде́й второ́е / и основа́вый на вода́х зе́млю, Всеси́льне.

Утверди́, Го́споди, Це́рковь Твою́, / ю́же стяжа́л еси́ / си́лою Креста́ Твоего́, / и́мже врага́ победи́л еси́ / и просвети́л еси́ вселе́нную.

Утвержде́ние ми бу́ди, / основа́вый зе́млю на вода́х, / я́ко несть свят, па́че Тебе́, Го́споди.

Утвержде́й сло́вом Твои́м вселе́нную, / я́же не подви́жится, / утверди́ и на́шу мысль в страх Твой, Влады́ко Го́споди.

Да утверди́тся се́рдце мое́ наде́ждею, Христе́, благ Твои́х, / да непреста́нно с пе́снию пе́ние взыва́ю Ти, / и́бо несть свят, па́че Тебе́, Человеколю́бче.

Песнь 4

Го́ру Тя, благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву / провозглаша́ше Свято́му / во спасе́ние на́ше и обновле́ние.

Услы́шав проро́к, Христе́, слух Твой, убоя́ся, / я́ко и́маши от Де́вы пройти́, / и возопи́ тре́петом: сла́ва си́ле Твое́й, Го́споди.

В Рождество Христово:

Жезл из ко́рене Иессе́ова / и цвет от него́, Христе́, / от Де́вы прозя́бл еси́, / из горы́, Хва́льный, / приосене́нныя ча́щи / прише́л еси́, вопло́щся / от Неискусому́жныя, Невеще́ственный и Бо́же. / Сла́ва си́ле Твое́й, Го́споди.

Ро́да челове́ча обновле́ние / дре́вле, поя́, проро́к Авваку́м предвозвеща́ет, / ви́дети неизрече́нно сподо́бився о́браз: / млады́й Младе́нец бо из горы́ – Де́вы, изы́де / люде́й во обновле́ние, Сло́во.

Честнаго Креста:

На Кресте́ Тя, Си́льне, / свети́ло вели́кое ви́дев, тре́петом взя́тся, / лучи́ сопря́тав, скры. / Вся же тварь воспе́ со стра́хом Твое́ долготерпе́ние, / и́бо испо́лнися земля́ Твоего́ хвале́ния.

Пасхи:

На Боже́ственней стра́жи / Богоглаго́ливый Авваку́м / да ста́нет с на́ми и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Фомы:

Ве́лия та́йна / Твоего́, Христе́, смотре́ния: / сию́ бо свы́ше прови́дя Богозри́тельно, Авваку́м, / изше́л еси́, вопия́ше Тебе́, / во спасе́ние люде́й Твои́х, /Человеколю́бче.

Успения Богородицы:

Ре́чи проро́ков и гада́ния / воплоще́ние прояви́ша от Де́вы Твое́, Христе́, / сия́ние блиста́ния Твоего́ во свет язы́ков изы́дет, / и возгласи́т Тебе́ бе́здна с весе́лием: / си́ле Твое́й сла́ва, Человеколю́бче.

Осмогласника и Введения:

Ду́хом прови́дя, проро́че Авваку́ме, Словесе́ воплоще́ние, / пропове́дал еси́, вопия́: / внегда́ прибли́житися ле́том – позна́ешися, / внегда́ приити́ вре́мени – пока́жешися. / Сла́ва си́ле Твое́й, Го́споди.

Слы́ша дре́вле Авваку́м, Христе́, чу́дный Твой слух / и стра́хом взыва́ше: / от ю́га Бог прии́дет и Святы́й от горы́ приосене́нныя ча́щи / спасти́ пома́занныя. / Сла́ва си́ле Твое́й, Го́споди.

Авваку́м, сла́вное Твое́ прише́ствие а́бие, Сло́ве, прови́дя, вопия́ше: / услы́шах, Го́споди, я́ко от горы́ святы́я прии́деши / во спасе́ние челове́ков, / и, стра́ха испо́лнь быв, взыва́ет: / я́ко ве́лия дела́, Христе́ мой, Твоея́ сла́вы.

Слух Твой, Го́споди, услы́шах и убоя́хся, / дела́ Твоя́ разуме́х и ужасо́хся, / я́ко Бог, пре́жде век Сый, от Де́вы рожде́йся, бысть Челове́к.

С чу́дным ста Авваку́мом / на Боже́ственней твое́й стра́жи, Григо́рие, / и, Су́щаго на ра́му Херуви́мску позна́вый, / всеми́рнаго был еси́ возвести́тель спасе́ния, при́сно зовы́й: / сла́ва си́ле Твое́й, Го́споди.

Взя́тся со́лнце, и луна́ ста в чи́не свое́м, / возне́слся еси́, Долготерпели́ве, на Дре́во / и водрузи́л еси́ на нем Це́рковь Твою́.

Что вопие́ши ду́хом, рцы, проро́че, / прови́дев, ужасну́лся еси́, / Бо́га разуме́в от Де́вы, / соедине́на мне пло́тию, / те́мже ужаса́юся.

Я́ко Бог воплоща́ется, не пострада́в преложе́ния, / Боже́ственный ужасе́ся, услы́шав, Авваку́м / и, е́же в Богове́дение от идолонеи́стовства / разуме́в ве́рных спасе́ние, взыва́ше: / Го́споди, сла́ва си́ле Твое́й.

Услы́шах, Го́споди, слух Твой и убоя́хся, / разуме́х дела́ Твоя́, – проро́к глаго́лаше, – / и просла́вих си́лу Твою́.

Возсия́ благода́ть Твоя́ язы́ком, / и ви́деша концы́ сла́ву Твою́, / я́ко Кресто́м Твои́м мир весь спасл еси́.

Разуме́х, Всеси́льне, / Твое́ смотре́ние / и со стра́хом просла́вих Тя, Спа́се.

Услы́шах, Го́споди, слух Твой и убоя́хся, / я́ко Кресто́м Твои́м мир просвети́л еси́ / и нам дарова́л еси́ Твое́ Воскресе́ние.

Слух си́лы Твоея́ проро́к Авваку́м услы́шав, убоя́ся, / дела́ Твоя́, Бо́же, разуме́в, ужасе́ся и вопия́ше: / сла́ва си́ле Твое́й, Го́споди.

Песнь 5

Просвети́вый сия́нием / прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ Богоразу́мия / правосла́вно пою́щих Тя.

О Всеви́дче, царе́й сла́во, / кто Твоему́ человеколю́бию земноро́дных не удиви́тся? / на земли́ бо яви́лся еси́, не оста́вль Оте́ческих, / днесь всю обновля́яй тварь / и мир, я́ко еди́н Миронача́льник, подая́й.

В Рождество Христово:

Бог Сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам; / тем, Богоразу́мия к све́ту наста́вльшеся, / от но́щи у́тренююще, / славосло́вим Тя, Человеколю́бче.

Из но́щи дел омраче́нныя пре́лести / очище́ние нам, Христе́, / бо́дренно ны́не соверша́ющим песнь, я́ко Благоде́телю, / прииди́, подава́яй удо́бну стезю́, / по не́йже востека́юще, обря́щем сла́ву.

Честнаго Креста:

У́тренююще, Тя воспева́ем, / Спа́се Ще́дре, / мир обре́тше Кресто́м Твои́м, / и́мже обнови́л еси́ род челове́ческий, / к Све́ту Невече́рнему вводя́ нас.

Пасхи:

У́тренюем у́тренюю глубоку́, / и вме́сто ми́ра песнь принесе́м Влады́це, / и Христа́ у́зрим, / Пра́вды Со́лнце, / всем жизнь возсия́юща.

Успения Богородицы:

Бо́жию и неизрече́нную добро́ту / доброде́телей Твои́х, Христе́, испове́м: / от Присносу́щныя бо Сла́вы / Соприсносу́щное и Ипоста́сное возсия́вый Сия́ние, / из де́вственныя утро́бы / су́щим во тьме и се́ни вопло́щся, / возсия́л еси́, Со́лнце.

Осмогласника:

Твой мир даждь нам, / Сы́не Бо́жий: / ино́го бо, ра́зве Тебе́ бо́га не зна́ем, / И́мя Твое́ имену́ем, / я́ко Бог живы́х и ме́ртвых еси́.

Фомы:

От но́щи у́тренююще, пое́м Тя, Христе́, / Отцу́ Собезнача́льна и Спа́са душ на́ших, / мир ми́рови пода́ждь, Человеколю́бче.

Угль горя́щий, и́же до Иса́ииных усте́н / Серафи́м приложи́ не́когда, / клеща́ми взем и приложе́н; / он же, очище́н быв, /– пра́вде научи́теся, – всем пропове́даше.

Свет Твой, Го́споди, и и́стину Твою́ низпосли́, / е́же наста́вити нас на повеле́ния Твоя́, / и да́руй нам мир Твой, Человеколю́бче.

Введения:

Све́тлый нам возсия́й Свет Присносу́щный, / у́тренюющим о судьба́х за́поведей Твои́х, / Влады́ко Человеколю́бче, Христе́, Бо́же наш.

От но́щи у́тренююще, Тебе́ сла́ву возсыла́ем, Го́споди Бо́же наш, / Твой мир даждь нам, / я́ко, ра́зве Тебе́, бо́га ино́го не ве́мы.

Озари́ наш ум, Бо́же, / све́том за́поведей Твои́х / и све́тлостию благода́ти Твоея́, / да́руя нам, Бла́же, Твоя́ ми́лости, / зане́ свет и мир повеле́ния Твоя́.

От но́щи у́тренююще, воспева́ем Тя, Христе́ Бо́же, / обнища́вшаго нас ра́ди / и Крест и смерть пло́тию претерпе́вшаго.

Свет Твой незаходи́мый возсия́й, Христе́, / в сердца́ ве́рно пою́щих Тя, / мир подава́яй нам па́че ума́; / тем, от но́щи неве́дения ко дню Све́том Твои́м теку́ще, / славосло́вим Тя, Человеколю́бче.

От но́щи неве́дения просвеще́й концы́, / просвети́ мя у́тром / человеколю́бия Твоего́, Го́споди.

Я́ко просвеще́ние на́ше сый, Христе́, / просвети́ нас, Защи́тителю жи́зни на́шея, / сохрани́ ны, наде́ющияся на Тя.

Песнь 6

Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и ис правле́ние.

Во глубину́ поги́бели / окая́нное естество́, Христе́ мой Спа́се, дости́гшее дре́вле / лежа́ше, – увы́ мне! – в те́мных глубо́ких, / поне́же Твое́ю Боже́ственною си́лою к Небеси́ взы́де, / красне́йшим добро́там, / пожру́ Тебе́, Спа́се, вопие́т, / же́ртву хвале́ния.

В Рождество Христово:

Из утро́бы Ио́ну младе́нца изблева́ морски́й зверь, / якова́ прия́т; / в Де́ву же все́льшееся Сло́во / и плоть при е́мшее про́йде, сохра́ншее нетле́нну: / Его́же бо не по страда́ истле́ния, / Ро́ждшую сохрани́ неврежде́нну.

Обита́я Ио́на в преиспо́дних морски́х, / приити́ моля́шеся и бу́рю утоли́ти; / унзе́н же аз муча́щаго стрело́ю, / Христу́ воспева́ю, зол губи́телю, / ско́ро приити́ Тебе́ к мое́й ле́ности.

Креста:

О́браз Боже́ственнаго Креста́ / Ио́на во чре́ве ки́тове / просте́ртыма дла́нма проначерта́ / и взира́ше, спасе́н от зве́ря / си́лою Твое́ю, Сло́ве.

Пасхи:

Снизше́л еси́ в преиспо́дняя земли́ / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от Гро́ба.

Фомы:

Проро́ка спасл еси́ от ки́та, Человеколю́бче, / и мене́ из глубины́ прегреше́ний / возведи́, молю́ся.

Успения Богородицы:

Морски́й пучиноро́дный ки́тов вну́тренний огнь – / тридне́внаго Твоего́ погребе́ния проображе́ние, / его́же Ио́на проро́к показа́ся. / Спасе́н бо, я́ко и предпосла́ся, неврежде́н, вопия́ше: / пожру́ Ти со гла́сом хвале́ния, Го́споди.

Осмогласника и Введения:

Проро́ка Ио́ну подража́я, вопию́: / живо́т мой, Бла́же, свободи́ из тли / и спаси́ мя, Спа́се ми́ра, зову́ща: сла́ва Тебе́.

Из глубины́ в ско́рби вопия́ше: / возведи́ от тли живо́т мой,– / проро́к Ио́на к Тебе́, Человеколю́бцу.

И́же в по́нте подъе́мый злоключе́ние / убеже́нием бу́ри и метне́нием жре́бия / и усты́ ят быв морска́го зве́ря, невреди́мь пребы́в, / но вопия́ше Ио́на к Тебе́: / живо́т мой да взы́дет, Христе́.

Отве́ргл мя еси́ во глубины́ се́рдца морска́го, / и спасл еси́ мя, Спа́се, от рабо́ты сме́ртныя, / и разреши́л еси́ у́зы беззако́ний мои́х.

Я́ко Ио́ну проро́ка, / возведи́, Христе́ Бо́же, живо́т мой от тли, / вопию́ Ти, Человеколю́бче, / я́ко жизнь у тебе́ есть, / и нетле́ние, и си́ла.

Со Ио́ною вопие́м Ти, Го́споди, / со гла́сом хвале́ния моля́щеся: / возведи́ от тли живо́т наш.

Весь от страсте́й безме́рных содержу́ся / и ки́том зол снизпадо́х, / но возведи́ из истле́ния мя, Бо́же, / я́ко же пре́жде Ио́ну, / и ве́рою безстра́стие ми да́руй, / я́ко да во гла́се хвале́ния и спасе́ния / ду́хом пожру́ Ти.

Я́ко во глубины́ морски́я отве́ргся / и углебо́х1 в тиме́нии2 глубины́, / от отча́яния у́мныя зимы́3, / ле́ности моея́, Христе́, изми́ мя, / я́ко Ио́ну от зве́ря.

Песнь 7

Тебе́, у́мную, Богоро́дице, пещь, / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, во чре́ве Твое́м всеце́л, / хва́льный отце́в Бог и препросла́влен.

Я́ко о́троцы дре́вле, зове́м Тебе́, Сло́ве: / бу́ди Твои́х рабо́в, Спа́се, храни́тель и покро́в / и спаси́ вся от прило́га сопроти́внаго, / я́ко да, пою́ще Твое́ Рождество́, / во ве́ки, глаго́лем, благослове́н еси́.

В Рождество Христово:

О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреди́ пла́мене стоя́ще, поя́ху: / отце́в Бо́же, благослове́н еси́.

Всецаря́ любо́вию уловле́ннии, о́троцы / укори́ша безчи́сленно яря́щася мучи́теля злобо́жное языковре́дие, / и́мже повину́ся огнь мно́гий, / Влады́це глаго́лющим: / во ве́ки благослове́н еси́.

Креста:

Из пла́мене о́троки избавле́й, / плоть прии́м, прише́л еси́ на зе́млю / и, на Кресте́ пригвожде́н, спасе́ние нам дарова́л еси́, Христе́, / еди́н благослове́н, отце́в Бо́же, / и препросла́влен.

Пасхи:

О́троки от пе́щи изба́вивый, / быв Челове́к, /стра́ждет, я́ко сме́ртен, / и стра́стию сме́ртное / в нетле́ния облачи́т благоле́пие, / еди́н благослове́н / отце́в Бог и препросла́влен.

Фомы:

О́бразу служи́ти / мусики́йскому согла́сию созыва́ющу лю́ди, / от пе́сней сио́нских пою́ще оте́чески, о́троцы Дави́довы / мучи́телево разори́ша злочести́вое веле́ние / и пла́мень в ро́су преложи́ша, / песнь воспева́юще: / превозноси́мый отце́в и наш Бо́же, благослове́н еси́.

Успения Богородицы:

Безсту́дней я́рости же и огню́ / Боже́ственное жела́ние сопротивля́яся, / огнь у́бо ороша́ше, / я́рости же смея́шеся, / Богодохнове́нною слове́с ною преподо́бных тривеща́нною цевни́цею / противовеща́я мусики́йским орга́ном посреди́ пла́мене: / препросла́вленный отце́в и наш Бо́же, благо слове́н еси́.

Осмогласника:

Су́щим в пещи́ отроко́м Твои́м, Спа́се, / не прикосну́ся, ниже́ стужи́, огнь. / Тогда́ трие́, я́ко еди́неми усты́, поя́ху / и благословля́ху, глаго́люще: / благослове́н Бог оте́ц на́ших.

Проидо́ша, я́ко черто́г, пе́щный пла́мень нестерпи́мый / и́же за благоче́стие иногда́ / о́троцы святи́и, показа́вшеся я́ве, / и, согла́сно воспева́юще, песнь поя́ху: / отце́в Бо́же, благослове́н еси́.

Авраа́мстии о́троцы в пещи́, / Тро́ицу прообрази́вше, / оѓненный пла́мень на ро́су преложи́ша / и, пою́ще, вопия́ху: / благослове́н еси́, Бо́же оте́ц на́ших.

Введения:

Пещь, Спа́се, ороша́шеся, / о́троцы же, лику́юще, поя́ху: / отце́в Бо́же, благослове́н еси́.

В гремя́щую пещь сни́де А́нгел Госпо́день / к су́щим о Аза́рии отроко́м, / и не прикосну́ся их отню́д огнь. / Тогда́ трие́, воспева́юще, глаго́лаху: / благослове́н еси́, Бо́же оте́ц на́ших.

Явле́йся в купине́ законополо́жнику огне́м / и рождество́ Де́вы проображе́й в ней, / благослове́н еси́, Го́споди, Бо́же оте́ц на́ших.

Вся дела́ Твоя́ и́стинна / и пра́ви путие́ Твои́, / Бо́же оте́ц на́ших.

По мно́жеству ми́лости Твоея́, / Человеколю́бче, сотвори́ с на́ми, / да Тебе́ ве́рно вси, воспева́юще, пои́м, / я́коже о́троцы: / благослове́н еси́, Бо́же оте́ц на́ших.

Песнь 8

В пещи́ о́троцы Изра́илевы, / я́коже в горни́ле, / добро́ тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки.

Новоде́телю всего́ ми́ра и Спаси́телю, / пое́т Тя вся со А́нгелы тварь, / игра́ет, лику́ет и ра́дуется тре́петом: / благослови́те, глаго́лющи, / вся дела́, честно́е рождество́ Изба́вителя моего́, / со мно́ю во ве́ки / любо́вию превознося́щая.

В Рождество Христово:

Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем, воспева́юще, воспое́м: / да благослови́т тварь вся Го́спода / и превозно́сит во вся ве́ки.

Утро́бу неопа́льно образу́ют Отрокови́цы / и́же в Ве́тсем опаляя́емии ю́ноши, / преесте́ственно ражда́ющую запечатле́нну. / Обоя́ же, содева́ющи чудо де́йство еди́но, / лю́ди к пе́нию возставля́ет благода́ть.

Креста:

Ру́це, в ров ве́рженный львов, / иногда́ вели́кий во проро́цех / крестообра́зно просте́р Дании́л, / неврежде́н от сих сне́ди спасе́ся, / благословя́ Христа́ Бо́га во ве́ки.

Пасхи:

Сей нарече́нный и Святы́й День – / еди́н суббо́т царь и госпо́дь, / пра́здников пра́здник / и торжество́ есть торже́ств, / в о́ньже благослови́м Христа́ во ве́ки.

Фомы:

В пла́мени о́гненне горя́щия пе́щи / сохра́ншаго де́ти / и во зра́це А́нгела снизше́дшаго к ним, / по́йте Го́спода / и превозноси́те Его́ во ве́ки.

Успения Богородицы:

Пла́мень ороша́ющ преподо́бныя, / злочести́выя же попаля́ющ, / А́нгел Бо́жий всемо́щный показа́ отроко́м, / живонача́льный же исто́чник соде́ла Богоро́дицу, / тлю сме́рти и живо́т точа́щу пою́щим: / Соде́теля еди́наго пои́м, изба́вленнии, / и превозно́сим во вся ве́ки.

Осмогласника:

Песносло́вцы в пещи́ спа́сшаго де́ти / и громопла́менную прело́жшаго на ро́су, / Христа́ Бо́га по́йте и превозноси́те во вся ве́ки.

Песнь Тебе́ прино́сим Безпло́тных, / я́коже о́троцы в пещи́, и, пою́ще, глаго́лем: / благослови́те, вся дела́ Госпо́дня, Го́спода.

Песнопе́вцы пещь дре́вле о́троки прие́мши, неопа́льны сохрани́, / посреде́ же пла́мене стоя́щия согла́сно пе́ти научи́: / благослови́те, вся дела́ Госпо́дня, Го́спода.

И́же пи́щею не оскве́рншиися о́троцы от ца́рския трапе́зы, / во огнь, ра́дующеся, внидо́ша не́когда / и, в пла́мени прохлажда́еми, / усе́рдно поя́ху: /благослови́те, дела́ Госпо́дня, Го́спода.

Небеса́ небе́с и вода́, я́же превы́ше небе́с, / благослови́те, по́йте Го́спода / и превозноси́те Его́ во ве́ки.

Введения:

Его́же ужаса́ются А́нгели и вся во́инства, / я́ко Творца́ и Го́спода, / по́йте, свяще́нницы, просла́ви те, о́троцы, / благослови́те, лю́дие, / и превозноси́те во вся ве́ки.

Пою́т Тя во́и А́нгельстии, сла́вит Тя род челове́ческий, / свяще́нницы, раби́ и ду́ши пра́ведных, / я́ко Творца́ и Го́спода всех во ве́ки.

Трисве́тлое Существо́ и Трисо́лнечная сла́ва / сни́де отроко́м посреде́ огня́, / сия́ невреди́мы соблюда́ющи / и Воскресе́ние нам предвозвеща́ющи / Христа́ Бо́га на́шего, / Его́же пою́т Ангели и мно́жества, / я́ко Победи́теля сме́рти во ве́ки.

Прему́дростию и Сло́вом вся соста́вльшаго Бо́га, / от язы́ков и ва́рваров изба́вльшаго нас, / о́троцы, по́йте, / свяще́н ницы, просла́вите, / лю́дие, превозноси́те во вся ве́ки.

На Сина́и купину́ горя́щу / неопа́льну сохра́ншаго / и о́троки посреде́ горя́щаго пла́мене изба́вльшаго Бога, / по́йте, благослови́те / и превозноси́те Его́ во ве́ки.

Прему́дростию Небеса́ утверди́вшаго, / и на вода́х зе́млю основа́вшаго, / и тварь всю созда́вшаго, / благослови́те, по́йте, свяще́нницы, Го́спода, / лю́дие, превозноси́те Его́ во вся ве́ки.

Царя́ сла́вы и Победи́теля сме́рти, / Иису́са Назоре́я, / Того́ превозноси́те во вся ве́ки.

Песнь Ана́ниеву Безнача́льному вси Отцу́ и Бо́гу, / моли́тву Аза́риеву Собезнача́льному Сло́ву, Сы́ну О́тчу, / и Мисаи́лову песнь Боже́ственному Ду́ху и Соприсносу́щному / правосла́вною ве́рою принесе́м, лю́дие, / во спасе́ние на́ше.

Чу́да преесте́ственнаго / показа́ о́браз огнеро́сная пещь дре́вле, / огнь бо не опали́ ю́ныя де́ти, / Христо́во явля́я безсе́менное от Де́вы Боже́ствен ное рождество́. / Тем, воспева́юще, воспои́м: / да благослови́т тварь вся Го́спода / и превозно́сит во вся ве́ки.

Песнь 9

О́браз чи́стаго рождества́ Твоего́ / огнепали́мая купина́ показа́ неопа́льная; / и ны́не на нас напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

Ра́дуйся, Пресвята́я Богоприе́мная Мари́е, / ра́дуйся, Пречи́стая, па́дших основа́ние: / в Тебе́ бо яви́ся днесь Влады́ка, / о, чудесе́! Обновля́яй истле́вшия / и к Све́ту возводя́ невече́рнему, Отрокови́це.

В Рождество Христово:

Та́инство стра́нное ви́жу и пресла́вное: / Не́бо – верте́п, Престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем.

Люби́ти у́бо нам я́ко безбе́дное стра́хом / удо́бее молча́ние, / любо́вию же, Де́во, / пе́сни тка́ти, спротяже́н но сложе́нныя, / неудо́бно есть; / но и, Ма́ти, си́лу, / ели́ко есть произволе́ние, даждь.

Креста:

О Ма́ти, Де́во / и Богоро́дице нело́жная, / ро́ждшая безсе́менно Христа́ Бо́га на́шего, / на Крест возне́сшагося пло́тию. / Тя, ве́рнии вси, досто́йно с Ним ны́не велича́ем.

Пасхи:

Свети́ся, свети́ся, / Но́вый Иерусали́ме, / сла́ва бо Госпо́дня / на тебе́ возсия́, / лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Фомы:

Тебе́, све́тлую свещу́ и Ма́терь Бо́жию, / пречу́дную сла́ву и вы́шшую всех тва́рей, / пе́сньми велича́ем.

Успения Богородицы:

Побежда́ются естества́ уста́вы / в Тебе́, Де́во Чи́стая, / де́вствует бо рождество́ и живо́т предобруча́ет смерть: / по рождестве́ Де́ва и по сме́рти жива́, / спаса́еши при́сно, Богоро́дице, насле́дие Твое́.

Осмогласника и Введения:

Светоно́сный о́блак, в о́ньже всех Влады́ка, / я́ко дождь с небесе́ на руно́, сни́де / и воплоти́ся нас ра́ди, / быв Челове́к, Безнача́льный, / велича́ем вси я́ко Ма́терь Бо́га на́шего Чи́стую.

Неизглаго́ланное Де́вы та́инство: / Не́бо бо Сия́, и Престо́л Херуви́мский / и светоно́сный черто́г показа́ся / Христа́ Бо́га Вседержи́теля. / Сию́ благоче́стно я́ко Богоро́дицу велича́ем.

Тя, ю́же ви́де Моисе́й, неопали́мую купину́, / и ле́ствицу одушевле́нную, / ю́же Иа́ков ви́де, / и дверь Небе́сную, е́юже про́йде Христо́с Бог наш, / пе́сньми, Ма́ти Чи́стая, велича́ем.

И́же вы́шнюю глубину́ Боже́ственнаго непостиже́ния / благоче́стно отве́рз, / ум, я́ко из ка́мене необъе́млемыя / Богонача́льныя возвы́сил еси́ Тро́ицы, всеблаже́нне о́тче, / тя велича́ем.

Ра́дуйся, Богоро́дице Де́во, Ма́ти благослове́нная, / из Тебе́ бо про́йде Бог воплоще́нный, / Сего́, сла́вяще и воспева́юще, велича́ем.

Ты вмести́лище, Чи́стая, Боже́ственнаго непостиже́ния / па́че естества́ была́ еси́, я́ко Бо́гу плоть взаимода́вшая / и Твою́ де́вственную не растерза́вшая утро́бу, / внегда́ роди́ти безсе́менно: / Тя велича́ем.

Сотвори́ держа́ву мы́шцею Свое́ю, / низложи́ бо си́льныя со престо́л / и вознесе́ смире́нныя Бог Изра́илев, / в ни́хже посети́ нас Восто́к с высоты́ / и напра́вил ны есть на путь ми́ра.

Тя, без ма́тере пе́рвее / и без отца́ второ́е, я́ко Бо́га и Челове́ка / пе́сньми велича́ем.

Живоприе́мный исто́чник приснотеку́щий, / светоно́сный свети́льник благода́ти, / храм одушевле́нный, сень пречи́стую, / Небесе́ и земли́ простра́ннейшую, / Богоро́дицу, ве́рнии, вели ча́ем.

Тебе́, ви́денную дверь Иезекии́лем проро́ком, / е́юже никто́же про́йде, то́кмо Бог еди́н, / Богоро́дице Де́во, пе́сньми почита́ем.

Ра́дуйся, де́вственная похвало́, / ра́дуйся, Ма́ти Пречи́стая, / Ю́же, вся тварь, Боже́ственными пе́сньми велича́ем.

Служи́тель безпло́тный предста́, глаго́ля Благода́тней: / Госпо́дь с Тобо́ю! / Ю́же велича́ем.

Тя, в ря́сны златы́я оде́янную, / укра́шенную Богоро́дицу, голуби́цу посре́бренную / и позлаще́нную блеща́нием зла́та, велича́ем.

Тя, го́ру Бо́жию усыре́нную, / в не́йже благоволи́ Бог пло́тию всели́тися, / Богоро́дице Мари́е, велича́ем.

Тебе́, Небе́с вы́шшую / и на земли́ Не́бо и Престо́л бы́вшую, Ма́терь Бо́жию, / вси ро́ди, велича́ем.

Серафи́мски, приглаша́юще, вопие́м Ти, Богоро́дице, ве́рнии: / Тобо́ю возвели́чи Госпо́дь, / е́же сотвори́ти с на́ми. / Тем Тя, Чи́стая, / и от Тебе́ неискусому́жно воплоще́ннаго Спа́са, / я́ко Бо́га всех, пе́сньми велича́ем.

Неизглаго́ланна Де́вы та́йна: / Его́же бо не вмести́ша горе́ Небе́сная вели́чествия, / вмеща́ется во утро́бу. / Те́мже, соше́дшеся, ублажа́ем Ю / и с ве́рою и весе́лием велича́ем.

Ирмосы 2-го гласа

Песнь 1

Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть: / препросла́вленный Госпо́дь сла́вно бо просла́вися.

Святых Богоявлений:

Глубины́ откры́л есть дно / и су́шею Своя́ влече́т, / в ней покры́в проти́вныя, / кре́пкий во бране́х Госпо́дь, / я́ко просла́вися.

Ше́ствует морску́ю волня́щуюся бу́рю, / су́шу а́бие Изра́иль я́вльшуюся, / Че́рмный же понт триста́ты еги́петския / покры́ ку́пно, водостла́нен гроб, / си́лою кре́пкою десни́цы Влады́чни.

Осмогласника и на Рождество Богородицы:

Гряди́те, лю́дие, пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

Нетре́ну, необы́чну, / немо́кренно морску́ю ше́ствовав стезю́, / избра́нный вопия́ше Изра́иль: / Го́сподеви пои́м, я́ко просла́вися.

Пои́м Го́сподеви, / в мо́ри дре́вле лю́ди наста́вльшему / и в нем фарао́на со всево́инством погрузи́вшему, / песнь побе́дную, я́ко просла́вися.

Непроходи́мое волня́щееся мо́ре / Бо́жиим Свои́м веле́нием изсуши́вшему / и пешеше́ствовати сквозе́ е́ изра́ильтеския лю́ди наста́вльшему, / Го́сподеви пои́м, сла́вно бо просла́вися.

Пои́м Го́сподеви песнь но́вую, / я́ко пресла́вно Изра́иля спасе́, / рабо́ты изба́вив, / и му́чащия враги́ покры́ло есть мо́ре.

В неделю жен мироносиц:

Моисе́йскую песнь восприи́мши, возопи́й, душе́: / Помо́щник и Покрови́тель бысть мне во спасе́ние, / сей мой Бог, и просла́влю Его́.

Обрати́вшему мо́ре в су́шу / и прове́дшему Изра́иля сквозе́ е́, / пои́м Го́сподеви Бо́гу, / я́ко просла́вися.

Высоковы́йный в колесни́цах и в кре́пких триста́тах фарао́н / в Чермне́м потопи́ся со всево́инством. / Мои се́й же Изра́иля, я́ко по су́ху, прове́д / Боже́ственным веле́нием, поя́ше: / пои́м Го́сподеви, сла́вно бо просла́вися.

Бе́здны дре́вле безме́рное / Моисе́й крестообра́зно пресече́ жезло́м / и фарао́ново всево́инство в нем потопи́. / Изра́ильтяне же, на он пол мо́ря преходя́ще, / песнь воспева́ху: / пои́м Го́сподеви, сла́вно бо просла́вися.

По бе́здне ходя́ще, изра́ильтеския лю́ди воспева́ху / руко́ю кре́пкою Си́льному, / сокруши́вшему бра́ни фарао́на мучи́теля: / пои́м Го́сподеви, сла́вно бо просла́вися.

Во́ды дре́вле Чермна́го растерза́л еси́ жезло́м законоположи́теля, / и лю́ди избра́нныя немо́кренно спасы́й, / побе́дную пою́щия песнь / победи́тель ней Твое́й, Христе́, десни́це.

Стопа́ми невла́жными Изра́иль прохожда́ше, / сече́нием вод проявля́ше Крест, / вхо́дом – погребе́ние, / исхо́дом – честно́е и Боже́ственное Воскресе́ние, / поя́ в похвале́нии Изба́вителю по бе́дную.

Пои́м Го́сподеви песнь но́вую: / стра́шно бо чу́до, / я́ко Де́ва породи́ Бо́га вочелове́чшася / и по рождестве́ па́ки Де́ва пребы́сть.

Песнь 2

Не́бо и земля́ да во́нмет / и Христу́ да воспою́т, / во Иорда́не челове́ческий возсозда́вшему днесь род, / истле́вший от преступле́ния.

Не́бо, вонми́ ми, / земле́, внуши́ глаго́лы моя́, / я́ко из глубины́ се́рдца моего́ отры́гнух, / Бо́жие великоле́пие днесь, / па́мять прему́дрых апо́стол Его́.

Ви́дите, ви́дите, я́ко Аз есмь в мо́ри спасы́й, /и в пусты́ни насы́тивый изра́ильтеския лю́ди, / и во́ду из ка́мене источи́вый челове́ком, / да дре́вле па́дшаго, поне́с, / привлеку́ ко Мне за неизрече́нную ми́лость.

Внемли́те, лю́дие Мои́, зако́ну Моему́, / приклони́те у́хо ва́ше во глаго́лы уст Мои́х, / я́ко И́мя Твое́, Го́споди, призва́х.

Внемли́те, лю́дие, / зна́мением дел Боже́ственныя Моея́ си́лы / и о сем уразуме́йте, / я́ко Еди́н Аз Бог есмь всех.

Бог, и́стинна дела́ Его́ / и вси путие́ Его́ судьбы́.

Песнь 3

Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.

Богоявлений:

Кре́пость дая́й царе́м на́шим Госпо́дь / и рог пома́занных Свои́х вознося́й / от Де́вы ражда́ется, гряде́т же ко Креще́нию. / Тому́, ве́рнии, возопие́м: / несть свят, я́ко Бог наш.

Ели́цы дре́вних изреши́хомся се́тей, / бра́шен львов сотре́нных члено́вными, / ра́дуимся и разшири́м уста́, / сло́во плету́ще от слове́с сладкопе́ния. / И́мже к нам наслажда́ется дарова́ний.

Осмогласника:

Лук сокруши́ся си́льных / держа́вою Твое́ю, Христе́, / и си́лою немощству́ющии / препоя́сашася.

На ка́мени мя ве́ры утверди́в, / разшири́л еси́ уста́ моя́ на враги́ моя́, / возвесели́ бо ся дух мой, внегда́ пе́ти: / несть свят, я́коже Бог наш, / и несть пра́веден, па́че Тебе́, Го́споди.

На Рождество Богородицы:

Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Мироносиц:

Непло́дствовавший мой ум / плодоно́сен, Бо́же, покажи́ ми, / Де́лателю до́брых, Насади́телю благи́х, / благоутро́бием Твои́м.

Утверди́ мя, Го́споди, Бо́же мой, / да не похва́лится враг мой о мне: / Ты бо еси́, Го́споди, утвержде́ние мое́, / и прибе́жище, и си́ла.

Храни́тель тве́рдый / и незы́блемое утвержде́ние Ты еси́, Христе́, / наде́ющияся на Тя, неукло́нны утвержда́я нас, / извести́ в тве́рдом Твое́м основа́нии наде́жды и ве́ры.

Утверди́ся се́рдце мое́ в Го́споде, / вознесе́ся рог мой в Бо́зе мое́м, / я́ко роди́лся еси́ на земли́ / и спасл еси́ заблу́ждшаго.

Ты сло́вом Твои́м, Го́споди, / Небеса́ утверди́л еси́, / Ты и се́рдце мое́ / в ве́ре утверди́.

Не́бо простры́й, я́ко ко́жу, и су́шу основа́вый на вода́х / Боже́ственным Твои́м ма́нием, Христе́ Бо ́же, / и мене́ утверди́ в Правосла́вней ве́ре, взыва́юща: / свят несть, па́че Тебе́.

Утверди́ мя, Го́споди, утверди́вый си́лою Небеса́, / и утверди́ се́рдце мое́ во стра́се Твое́м, / да А́ннину песнь принесу́ Ти, Сло́ву: / несть свят, я́ко Бог наш, / вознесы́й рог пома́занных Свои́х.

Небеса́ небе́с, сла́ву Твою́, Спа́се, пове́дающая, / на похвалу́ воздвиза́ют А́нгелов мно́жества, / и челове́цы воспева́ют: / несть, па́че Тебе́, Бог и Госпо́дь, / от не су́щих во е́же бы́ти приведы́й вся́ческая.

И́же в нача́ле прему́дростию Твое́ю, Христе́, / Небеса́ утвержде́й ра́зумом, / основа́вый же зе́млю Боголе́пно на вода́х безме́рных, / держа́вою Твое́ю утверди́ мя, молю́ся, / в тве́рдом основа́нии ве́ры.

Утверди́вый в нача́ле Прему́дростию и Сло́вом Небеса́ в ра́зуме / и зе́млю Основа́вый на вода́х, / воскресни́ от Гро́ба, / дая́й нам рог спасе́ния.

Песнь 4

Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: / сла́ва си́ле Твое́й, Го́споди.

Богоявлений:

Услы́шах, Го́споди, глас Твой, его́же рекл еси́, глас вопию́щаго в пусты́ни, / я́ко возгреме́л еси над вода́ ми мно́гими, / Твоему́ свиде́тельствуяй Сы́ну, / весь быв соше́дшаго Ду́ха, возопи́: / Ты еси́ Хри сто́с, Бо́ жия му́дрость и си́ла.

Огне́м очи́щся та́йнаго зре́ния, / поя́ проро́к челове́ков новоде́йство, / возглаша́ет глас, ду́хом пле́щущ, / воплоще́ние явля́ющ неизрече́нна Сло́ва, / И́м же си́льных держа́вы сотро́шася

Осмогласника:

Услы́шах, Го́споди, / сла́вное Твое́ смотре́ние / и просла́вих, Человеколю́бче, / непостижи́мую Твою́ си́лу.

На Рождество Богородицы:

Услы́шах, Го́споди, / слух Твоего́ смотре́ния, / и просла́вих Тя, / Еди́не Человеколю́бче.

Пою́ Тя, слу́хом бо, Го́споди, услы́шах и ужасо́хся: / до мене́ бо и́деши, мене́ ища́, заблу́ждшаго. / Тем мно́гое Твое́ снизхожде́ние, е́же на мя, / прославля́ю, Многоми́лостиве.

Услы́шах, Го́споди, слух Твой и убоя́хся, / разуме́х дела́ Твоя́, и диви́хся, и возопи́х: / сла́ва си́ле Твое́й, Го́споди.

Из горы́ ка́мень кроме́ руки́ отсе́клся еси́, Христе́, / от Де́вы Ма́тере. / Те́мже проро́к, прови́дя, вопия́ше: / во спасе́ние люде́й Твои́х прише́л еси́, / сла́ва си́ле Твое́й, Го́споди.

Прозорли́ве проро́к тайноводи́мый / Твоему́, Христе́, прише́ствию ужаса́ется, / е́же предреки́й вопия́ше: / хвале́ния Твоего́ испо́лнися земля́, / Боголе́пно бо на́шу нищету́ не презре́л еси́, / но прише́л и спасл еси́.

Услы́шах слух Боже́ственныя си́лы Твоея́, Христе́, / я́ко безсе́менно во чре́ве Де́вы зача́лся еси́, / и возопи́х: сла́ва си́ле Твое́й, Го́споди.

Мироносиц:

Е́же от Де́вы Твое́ рождество́ проро́к предзря́, / возпропове́даше, вопия́: / слух Твой услы́шах и убоя́хся, / я́ко от ю́га и из горы́ святы́я приосене́нныя / прише́л еси́, Христе́.

Внегда́ прибли́житися ле́том, позна́ешися, / положи́л бо еси́ любо́вь тве́рду / кре́пости Твоея́, Го́споди.

Неизрече́нное та́инство вочелове́чения Твоего́, Христе́ Бо́же, / та́йно прови́дев, Авваку́м вопия́ше: / услы́шах слух Твой и убоя́хся, / разуме́х дела́ Твоя́ / и просла́влю си́лу Твою́.

Чу́ду стра́шному научи́вся чу́дный Авваку́м, / неизрече́нному Твоему́, Сло́ве Бо́жий, прише́ствию, / я́ко от приосене́нныя ча́щи, Неизме́нне, воплоща́емь, проше́л еси́, / и, я́ко во у́жасе быв, взыва́ше: / сла́ва си́ле Твое́й, Го́споди.

Свеще́ю пре́жде Авваку́м просвеща́емь, Го́споди, / и Твое́ вочелове́чение предвозвеща́я, вопия́ше, / от Святы́я Де́вы проити́, Неизме́нне, / в возсозда́ние дре́вняго Ада́ма.

От Де́вы безсе́менно яви́лся еси́ ми́рови, я́ко со́лнце, / нетле́ния сла́ву озаря́я нам, / от Ада́ма преступле́нием осуди́вшимся, Го́споди. / Те́мже дохнове́нием Ду́ха проро́к Авваку́м взыва́ше: / сла́ва, Христе́, си́ле Твое́й.

Посреде́ двою́ разбо́йнику Живо́т на Дре́ве ви́сяше, / совокупи́ти бо пре́жде разстоя́щее / дла́ни простре́ Свое́ю во́лею, / и воскре́с тридне́вный, совоскреси́в естество́ челове́ческое, / сла́вящее Его́ Боже́ст венное снизхожде́ние.

Песнь 5

Хода́тай Бо́гу и челове́ком был еси́, Христе́ Бо́ же: / Тобо́ю бо, Влады́ко, к Светонача́льнику, Отцу́ Твоему́, / от но́щи неве́дения / приведе́ние и́мамы.

Богоявления:

Иису́с, живота́ нача́льник, / разреши́ти осужде́ние гряде́т Ада́ма первозда́ннаго, / очище́ний же я́ко Бог не тре́буя, / па́дшаго очища́ет во Иорда́не, в не́мже вражду́ уби́в, / преиму́щ всяк ум мир да́рует.

Врага́ те́мнаго и оскверне́ннаго я́да / очище́ни ем Ду́ха измове́ни, / к но́вой приста́хом небла́зненной стези́, / водя́щей в непристу́пную ра́дость, Еди́нем присту́пну, / и́мже Бог примири́ся.

Осмогласника:

Све́та Пода́телю / и веко́в Тво́рче, Го́споди, / во све́те Твои́х повеле́ний наста́ви нас: / ра́зве бо Тебе́, ино́го бо́га не зна́ем.

Мироносиц:

Мглу души́ моея́, Спа́се мой, / разгна́в све́том за́поведей Твои́х, озари́ мя, / я́ко Еди́н Царь ми́ра.

Угль Иса́ии проявле́йся, / Со́лнце из де́вственныя утро́бы / возсия́ во тьме заблу́ждшим, / Богоразу́мия просвеще́ние да́руя.

Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ ми́ра, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

От но́щи пое́м Тя, Христе́ Бо́же, / я́ко благоволе́нием О́тчим / Себе́ во истоща́ние положи́л еси́ / на́шего ра́ди спасе́ния.

Стяжи́ ны, Го́споди, плене́нныя от греха́, и просвети́, Спа́се, / во е́же пе́ти и сла́вити Тя, / Еди́наго Изба́вителя / и Просвети́теля душ на́ших.

Живо́т сый и Свет, Христе́ Бо́же, / мра́чнаго неве́дения разори́в мглу, / просвети́ на́ша мы́сли, / у́мная чу́вства незаходи́мым Све́том Твоего́ ра́зума.

Но́щи преше́дшей, прибли́жися день, / и Свет ми́ру возсия́, / сего́ ра́ди хва́лят Тя А́нгельстии чи́ни / и славосло́вят Тя вся́ческая.

На Рождество Богородицы:

Сеннопи́санный мрак гада́ний разори́в / и ве́рных прибы́тием И́стины, / Богоотрокови́цею, озари́в сердца́, / и нас Све́том Твои́м, Христе́, наста́ви.

Невече́рний Свет Твой, Христе́, / возсия́й в нас, Светода́вче, / и мрак прегреше́ний на́ших разори́, / ми́ра Царю́.

Тебе́, сла́вы Со́лнце незаходи́мое, / Христе́, от се́рдца молю́: / просвети́ души́ моея́ ослепле́ннии зе́ницы, / от но́щи греха́ к де́ланию за́поведей Твои́х.

Просвеще́нием за́поведей Твои́х, Еди́не Ще́дре, / озари́ ду́шу мою́, молю́ся, / ю́же из глубины́ сна ле́ности / ко у́тру возста́ви составле́ние пе́рстное, / я́ко да пою́ Тя, Христе́, Све́та невече́рняго.

У́тро све́тлое возсия́ от Гро́ба, / Его́ бо схожде́нием Све́та испо́лнишася преиспо́дняя, / пра́ведных ду́ши воста́ша во сла́ве, / славосло́вящия стра́шное и Боже́ственное Воскресе́ние: / Ты бо Еди́н Царь, и Держа́вный, и Си́льный, / и ми́ра Пода́тель.

Песнь 6

В бе́здне грехо́вней валя́яся, / неизсле́дную милосе́рдия Твоего́ призы́ваю бе́здну: / от тли, Бо́же, мя возведи́.

Богоявлений:

Глас Словесе́, свети́льник Све́та, / денни́ца Со́лнца, Предте́ча в пусты́ни, /– пока́йтеся,– всем вопие́т лю́дем,– и предочи́ститеся: / се бо предстои́т Христо́с, / от тли мир избавля́яй.

Вожделе́ннаго я́вствова со всеблаже́нным гла́сом Оте́ц, / Его́же из чре́ва отры́гну. / Ей,– глаго́лет, – Сей Соесте́ствен Сын, Сый светоза́рен, / произни́че из челове́ча ро́да: / Сло́во же мое́ жи́во и Челове́к промышле́нием.

Осмогласника:

Глас глаго́л моле́бных / от боле́зненныя, Влады́ко, души́ услы́шав, / от лю́тых мя изба́ви: / Еди́н бо еси́ на́шего спасе́ния вино́вен.

Мироносиц:

Во глубине́ грехо́вней содержи́мь есмь, Спа́се, / и в пучи́не жите́йстей обурева́емь, / но, я́коже Ио́ну от зве́ря, / и мене́ от страсте́й возведи́ и спаси́ мя.

На Рождество Богородицы:

Ко Го́споду от ки́та Ио́на возопи́: / Ты мя возведи́ из глубины́ а́да, молю́ся, / да я́ко Изба́вителю во гла́се хвале́ния / и́стины же Ду́хом пожру́ Тебе́.

Возопи́х в ско́рби мое́й / ко Го́споду Бо́гу моему́, / и посла́ Спа́са ми́ра, / и изба́ви от тли живо́т мой.

Бе́здна мя мно́га грехо́вная окружа́ет, / и вопию́ Ти, проро́ка подража́яй: / от тли мя, Го́споди, возведи́.

Е́же из глубины́ се́рдца, / не пре́зри моле́ние рабо́в Твои́х, Го́споди: / но я́ко проро́ка Ио́ну от ки́това чре́ва изве́л еси́, / и нас от у́мнаго6 зве́ря и душетли́тельнаго спаси́.

Из глубины́ возведи́ мя, / Ио́на к Тебе́ возопи́, / о́браз погребе́ния и воскресе́ния сый, / е́же нам дарова́л еси́, Всеси́льне Спа́се.

Бе́здна согреше́ний обы́де мя после́дняя, / но, я́ко проро́ка Ио́ну, Го́споди, / Го́споди, возведи́ / из нетле́ния живо́т мой.

Морско́му зве́рю впад, Ио́на здрав спасе́ся, / аз же, содержи́мь мно́гими мои́ми лю́тыми, в про́пасть отве́ржен бых, / но молю́ Тя, Иису́се, Бо́же мой, / предвари́в, уще́дри мя / и от тьмы возведи́ живо́т мой, и от тли.

Во глубины́ дости́гша морски́я, / и тридне́вствовавша в ки́товех пе́рсех морска́го зве́ря, / дре́вле Ио́ну подража́яй, зову́ Ти: Спа́се мой, / вопию́ща, возведи́ мя из а́да преиспо́дняго, / я́ко да пожру́ Ти со гла́сом хвале́ния.

Из чре́ва бе́здны долго́в мои́х, Спа́се, изведи́ дух мой, / я́ко дре́вле Ио́ну от ки́това чре́ва возве́л еси́, / да во хра́ме святы́я сла́вы Твоея́ / Твою́ похвалю́ благосты́ню.

Прообразу́яй Твое́ погребе́ние, Крест и страсть Ио́на, / во чре́ве ки́тове, Спа́се, тридне́вновав, от внутрь взыва́ше: / да взы́дет живо́т мой, / и прии́дет моли́тва моя́ в храм Твой Боже́ственный, / о Го́споди ми́лости.

Песнь 7

Богопроти́вное веле́ние беззако́ннующаго мучи́теля / высо́к пла́мень вознесло́ есть. / Христо́с же простре́ Богочести́вым отроко́м ро́су духо́вную, / Сый благослове́н и препросла́влен.

Богоявлений:

Ю́ноши благочести́выя, пе́щи оѓненней приобщи́вшияся, / шумя́щ дух ро́сный невреди́мы сохрани́ / и Бо́жия А́нгела снизхожде́ние. / Те́мже, в пла́мени ороша́еми, благода́рственно воспева́ху: / препе́тый оте́ц Го́споди и Бо́же, благослове́н еси́.

Опали́ струе́ю зми́евы главы́ пе́щный высо́кий пла́мень, / ю́ноши нося́щ благочести́выя, / ути́шивый неудободержи́мую мглу из греха́, / всю же омыва́ет росо́ю Ду́ха.

Осмогласника:

О́бразу злато́му, на по́ле Деи́ре служи́му, / трие́ Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми, поя́ху: / благослове́н еси́, Бо́же оте́ц на́ших.

Вети́и яви́шася о́троцы любому́дрейшии дре́вле, / от Богоприя́тныя бо души́, Богосло́вяще устна́ми, поя́ху: / Пребоже́ственный отце́в и наш Бо́же, / благослове́н еси́.

Мироносиц:

Херуви́мы подража́юще, о́троцы / в пещи́ ликовствова́ху, вопию́ще: / благослове́н еси́, Бо́же, / я́ко и́стиною и судо́м наве́л еси́ сия́ вся грех ра́ди на́ших, / препе́тый и препросла́вленный во вся ве́ки.

Да пресла́вное рождество́ Твое́, Христе́, е́же от Де́вы, / прообрази́ши я́ве, / неопали́мы в пещи́ о́троки сохрани́л еси́, / пе́сньми пою́щия Тебе́: / отце́в Бо́же, благослове́н еси́.

На Рождество Богородицы:

Купина́ в горе́ огненеопа́льная / и росоно́сная пещь халде́йская / я́ве предписа́ Тя, Богоневе́сто: / Боже́ственный бо Невеще́ственный / в веще́ственнем чре́ве Огнь неопа́льно прия́ла еси́. / Те́мже из Тебе́ Ро́ждшемуся пое́м: / благослове́н еси́, Бо́же оте́ц на́ших.

Трие́ о́троцы в пещи́ Тро́ицу прообрази́вше, / Царя́ Го́спода пропове́даша / и пре́лесть и́дольскую упраздни́ша, вопию́ще: / благослове́н еси́, Бо́же оте́ц на́ших.

Пещь дре́вле всегремя́щую угаси́вый / и о́троки ту́чею духо́вною ороси́вый, / благослове́н еси́, Бо́же оте́ц на́ших.

Трисве́тлыя Тро́ицы равночи́сленнии о́троцы, и́же от Иерусали́ма, / в Вавило́не царя́ нечести́ваго попра́ша веле́ние / и, во огнь вве́ржени, ликовствова́ху, глаго́люще: / благослове́н еси́, Бо́же оте́ц на́ших.

Богочести́вии о́троцы Сио́нстии, / плене́ннии в Вавило́не, предразсуди́вше, / и, посреде́ пе́щи вве́рже ни, / всеми́рное ликова́ние воздвиго́ша, пою́ще: / оте́ц на́ших Бо́же, благослове́н еси́.

Благоче́стия рачи́телие, о́троцы, в Вавило́не о́бразу злато́му не послужи́вше, / в пещь о́гненную, ра́дующеся, самово́льне идо́ша / и пла́мень в ро́су преведо́ша, / сия́нию Бо́жию пою́ще: / отце́в Бо́же, в хра́ме Твое́м благослове́н еси́.

В пещь пла́менную ю́ноши три вве́ржени, / ликова́ние спле́тше, я́ко в нетле́ннем травнице́, / Христу́, снаслажда́ющеся, вопия́ху, пою́ще: / отце́в Бо́же, во хра́ме Твое́м благослове́н еси́.

Те́лу злато́му прему́дрыя де́ти не послужи́ша, / и в пла́мень са́ми поидо́ша, / и бо́ги их обруга́ша, / среди́ пла́мене возопи́ша, и ороси́ я́ А́нгел: / услы́шася уже́ уст ва́ших моли́тва.

Песнь 8

Пещь иногда́ о́гненная в Вавило́не де́йства разделя́ше, / Бо́жиим веле́нием халде́и опаля́ющая, / ве́рныя же ороша́ющая, пою́щия: / благослови́те, вся дела́ Госпо́дня, Го́спода.

Богоявлений:

Та́йну пресла́вную вавило́нская показа́ пещь, источи́вшая ро́су, / я́ко струя́ми имя́ше невеще́ственный Огнь восприя́ти Иорда́н / и объя́ти пло́тию креща́ема Зижди́теля, / Его́же благословя́т лю́дие / и превозно́сят во вся ве́ки.

Свобо́дна у́бо тварь познава́ется / и сы́нове све́та, пре́жде омраче́ннии, / еди́н сте́нет тьмы предста́тель. / Ны́не да благослови́т усе́рдно Вино́внаго / пре́жде окая́нное язы́ков всенасле́дие.

Осмогласника:

В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.

О подо́бии зла́те небре́гше треблаже́ннии ю́ноши, / неизме́нный и живы́й Бо́жий о́браз ви́девше, / среди́ огня́ воспева́ху: / осуществова́нная да пое́т Го́спода вся тварь / и превозно́сит во вся ве́ки.

Мироносиц:

В купине́ Моисе́ю Де́вы чу́до / на Сина́йстей горе́ Прообрази́вшаго иногда́, / по́йте, благослови́те / и превозноси́те во вся ве́ки.

Неизрече́нною му́дростию соста́вльшаго вся́ческая Бо́га Сло́ва / и от не су́щих во е́же бы́ти приве́дшаго, / благослови́те, дела́, я́ко Го́спода / и превозноси́те во вся ве́ки.

Свещено́сцы душе́ю, / све́тлии, па́че сне́га пресия́юще, / преподо́бнии о́троцы посреде́ пла́мене не опали́шася: / вся бо вку́пе, ели́ка под тва́рию, / к Бо́жии пе́сни себе́ созыва́юще, с ра́достию поя́ху: / по́йте, дела́ Госпо́дня, Го́спода.

Веле́нию мучи́телеву / преподо́бнии трие́ о́троцы не повину́вшеся, / в пещь вве́ржени, Бо́га испове́даху, пою́ще: / благослови́те, дела́ Госпо́д ня, Го́спода.

Устраши́ся отроко́в благочести́вых сообра́знаго души́ нескве́рнаго те́ла / и устрани́ся воспита́нный в безме́рном веществе́ неутружде́н огнь, / присноживу́щу же, изувя́дшу пла́меню, ве́чнующая песнь воспева́шеся: / Го́спода, вся дела́, по́йте / и превозноси́те во вся ве́ки.

Глаго́л мучи́телев поне́же превозмо́же, / седмери́цею пещь разжже́на бысть иногда́, / в не́йже о́троцы не опали́шася, / царе́во попра́вше веле́ние, / но вопия́ху: вся дела́ Госпо́дня, Го́спода по́йте / и превозноси́те во вся ве́ки.

На Рождество Богородицы:

В пещи́ о́трочестей прообрази́л еси́ иногда́ Твою́ Ма́терь, Го́споди: / о́браз же Сия́ из огня́ изыма́ше неопа́льно входя́щия. / Ю́же пое́м, я́вльшуюся Тобо́ю конце́м днесь, / и превозно́сим во вся ве́ки.

Дре́вле ороси́вшаго евре́йския о́троки в пла́мени / и опали́вшаго Го́спода халде́и пресла́вно в нем / воспое́м, глаго́люще: / благослови́те и превозноси́те Его́ во ве́ки.

От не су́щих во е́же бы́ти Приве́дшаго Сло́вом вся, / по́йте и превозноси́те во вся ве́ки.

Гла́сы А́нгельскими / на Небесе́х сла́вимаго Бо́га / восхва́лим, глаго́люще, земноро́днии, / во вся ве́ки.

Истука́ну златосоде́ланному, / на по́ли Деи́ре орга́ны мусики́йскими служи́му, / Бо́гу же, всех Созда́телю, презре́ну, / сио́нстии о́троцы не послу́шаша веле́ния беззако́ннаго, / но показа́ша тва́ри пещь росо да́тельну мучи́теля, / благословя́ща лю́ди, / пре воз нося́щия Еди́наго Бо́га всех во вся ве́ки.

Веле́ние беззако́нное до́блии о́троцы небрего́ша / и мусики́йских орга́нов гла́са не послу́шаша, / но, в пещи́ ороша́еми, благода́рно поя́ху: / благослови́те, дела́ Госпо́дня, Го́спода.

Красноду́шнии от́роцы, в пещь вве́ржени, / Держа́ву взя́ша Ве́чную, Бо́га испове́дающе Небе́снаго, / и мучи́теля посрами́ша, до́гму предпросте́рше сладко пе́ние: / благослови́те, вся́кое дыха́ние и тварь, / Су́щаго над все́ми Царя́ во вся ве́ки.

Неразде́льнии Тро́ицы о́троцы бы́ша, / добро́ты о́браза не жела́вше, / душепа́губную пре́лесть отри́нувше, / с Небесе́ ороше́ни, вопия́ху Христу́ песнь: / благослови́те, вся дела́ Госпо́дня, Го́спода.

Ороси́ А́нгел пещь отроко́в, отвали́ ка́мень от две́ри Гро́ба / и жена́м мироно́сицам благовеща́ше, глаго́ля: / воскре́се Госпо́дь, я́коже прорече́ вам. / Потщи́теся, Песнь 8 пт36 возопи́йте Боже́ственным ученико́м Его́, / я́ко предваря́ет вы в Галиле́и / Ца́рствуяй во вся ве́ки.

В нача́ле, Го́споди, зе́млю основа́л еси́, / и дела́ рук Твои́х суть Небеса́; / воспева́ет вся тварь / и славосло́вит де́йства сло́вом во ве́ки.

Хва́лим, благослови́м, превозно́сим, / пое́м И́мя Твое́, Христе́: / Ты бо Царь во вся ве́ки.

А́нгели непреста́нно воспева́ют, / челове́цы при́сно славосло́вят, / и вся тварь / да благослови́т Го́спода.

Песнь 9

Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.

Богоявлений:

Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице: / оба́че Блага́я су́щи, ве́ру приими́, / и́бо любо́вь ве́си Боже́ственную на́шу, / Ты бо христиа́н еси́ Предста́тельница, Тя велича́ем.

О, па́че ума́ Рождества́ Твоего́ чуде́с, / Неве́сто Все чи́стая, Ма́ти Благослове́нная, / Е́юже получи́вше все соверше́нное спасе́ние, / досто́йно хва́лим, я́ко Благоде́теля, / дар нося́ще – песнь благодаре́ния.

Осмогласника:

Весь еси́ жела́ние, весь сла́дость, / Сло́ве Бо́жий, Де́вы Сы́не, / Бо́же бого́в, Го́споди, святы́х Пресвяты́й, / тем Тя вси с Ро́ждшею велича́ем.

От земноро́дных кто слы́ша таково́е / или́ кто ви́де когда́, я́ко Де́ва обре́теся, во чре́ве иму́щая / и безболе́зненно Младе́нца поро́ждшая? / Таково́е Твое́ чу́до, и Тя, Чи́стая Богоро́дице, велича́ем.

Мироносиц:

Преесте́ственно пло́тию Заче́ншую во чре́ве / от Отца́ безле́тно предвозсия́вшее Сло́во / в пе́снех немо́лчных / велича́ем, ве́рнии.

На Рождество Богородицы:

Я́же пре́жде со́лнца свети́льника Бо́га возсия́вшаго, / пло́тски к нам прише́дшаго из боку́ Деви́чу, / неизрече́нно воплоти́вшая, Благослове́нная Всечи́стая, / Тя, Богоро́дице, велича́ем.

От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося нас ра́ди, / ве́рнии, единому́дренно пе́сньми велича́ем.

Возвели́чися ве́рных люде́й Це́рковь, / я́ко Созда́тель всех, / в ней обита́яй, / новотвори́т к жи́зни.

Что о Тебе́ ве́лия и пресла́вная та́йна, / Ада́мова Дщи и Вы́шняго Ма́ти? / Еди́ный к Бо́гу небла́зненный ве́рных мост, / Тя немо́лчными пе́сньми, ве́рнии, Богоро́дицу велича́ем.

Возвели́чил еси́, Христе́, ро́ждшую Тя Богоро́дицу, / от Нея́же, Созда́телю наш, в подобостра́стное нам обле́клся еси́ те́ло, / на́ших прегреше́ний реши́тельное: / Сию́ ублажа́юще, вси ро́ди, / Тебе́ велича́ем.

Душа́ми чи́стыми и нескве́рными устна́ми, / прииди́те, возвели́чим Нескве́рную и Пречи́стую Ма́терь Емману́илеву, / Е́юже, из Нея́ к Рожде́нному принося́ще моли́тву: / пощади́ ду́ши на́ша, Христе́ Бо́же, и спаси́ нас.

Невмести́маго Бо́га / во чре́ве вмести́вшая / и Ра́дость ми́ру роди́вшая, / Тя пое́м, Богоро́дице Де́во.

Сотвори́ с Тобо́ю вели́чия, Чи́стая, / всех Творе́ц, роди́выйся от Тебе́, / па́ки це́ло показа́ Твое́ чре́во, Всепе́тая, / тем непреста́нно Тя, Богоро́дице, / челове́ческий род, велича́ем.

Чи́стую и Пречи́стую / Ма́терь и Де́ву / пе́сньми пе́с ней, вси ве́рнии, / благоче́стно я́ко Богоро́дицу велича́ем.

На Небесе́х Благослове́нная / и на земли́ славосло́вимая, / ра́дуйся, Неве́сто / Неневе́стная.

Де́вство Твое́, Богоро́дице нескве́рная, / е́же не опали́ Огнь Боже́ственный, / велича́ем.

Велича́ем вси страстоте́рпцев па́мять, / водо́ю и огне́м проше́дших и Христа́ моля́щих / спасти́ ду́ши на́ша.

Пресла́вное слы́шание и та́инство стра́нное / в Тебе́ соверши́ся, Пречи́стая Де́во: / зача́тие без се́мене и де́вство по рождестве́; / но я́ко Влады́чица Всеца́рица спаси́ ны, я́ко Блага́, / ве́рою несумне́нною покланя́ющимся Рождеству́ Твоему́ и велича́ющия.

Тебе́, мы́сленную и одушевле́нную ле́ствицу, / на не́йже Бог наш утверди́ся, / е́юже к Небеси́ обрето́хом восхожде́ние, / пе́сньми, Богоро́дице, велича́ем.

Ра́дуйся, Всецари́це, земноро́дных похвало́, / в после́дняя дни Спасе́ние на́ше ро́ждшая, / да от дре́вния кля́твы челове́ческий род свободи́ши, / те́мже вси немо́лчно Тя велича́ем.

Утро́ба Твоя́ чи́стая, Богоро́дице Де́во, / Небе́сную ту́чу ми́рови ука́ну, Живо́т возсия́ющую Ве́чный, / и Ада́ма со Е́вою в па́жить ра́йскую всели́. / Те́мже Тя, еди́ну в жена́х, Ма́терь бы́вшую Емману́илеву, / вси ро́ди, велича́ем.

Велича́ем Твое́ Рождество́, Отрокови́це нескве́рная, / Тобо́ю Бо́гу соедини́вшеся, / и вопие́м Ти, Мари́е Богоневе́сто: / ра́дуйся, всех воззва́ние, от дре́вния кля́твы умерщвле́нных, / Твои́м невозде́ланным чрево ноше́нием.

Чу́до пресла́вное и та́инство стра́нное, / зача́тие преесте́ственное, рождество́ несказа́нное, / А́нгелов во́инства и челове́ков мно́жества, / пе́сньми непреста́нными велича́ем.

Ирмосы 3-го гласа

Песнь 1

Во́ды дре́вле ма́нием Боже́ственным / во еди́но со́нмище совокупи́вый / и раздели́вый мо́ре изра́ильтеским лю́дем, / Сей Бог наш препросла́влен есть, / Тому́ еди́ному пои́м, я́ко просла́вися.

Сретения:

Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́ / лю́дем пешемореходя́щим и Богоуго́дно пою́щим: / пои́м Го́сподеви, сла́вно бо просла́вися.

Оземлени́вый мо́ре жезло́м Моисе́ем Чермно́е, / рука́ма старца днесь объе́млется Бог, / И́же без ма́тере от Отца́, / в после́дняя же во́лею Ма́терию но́сится.

Осмогласника:

Фарао́ни колесни́цы глубино́ю покры́в, Го́споди, / мо́ре разве́ргл еси́ / и спасл еси́ пе́сньми пою́щия Тя / лю́ди изра́ильтеския.

В неделю о разслабленном:

Ди́вно, сла́вно творя́й чудеса́ / Ты еси́, Бо́же, / бе́здну оземлени́вый, и колесни́цы потопи́вый, / и лю́ди спасы́й, пою́щия Тебе́, / я́ко Царю́ на́шему и Бо́гу.

Изба́вльшему Изра́иля от рабо́ты / и фарао́на погрузи́вшему в мо́ри, / пои́м Спа́су Христу́, / я́ко просла́вися во ве́ки.

Пои́м Го́сподеви, / сотво́ршему ди́вная чудеса́ в Чермне́м мо́ри, / по́нтом бо покры́ проти́вныя и спасе́ Изра́иля, / Тому́ Еди́ному пои́м, я́ко просла́вися.

Пресека́емое мо́ре жезло́м дре́вле / Изра́иль про́йде, я́ко по пусты́ни, / и крестообра́зно я́ве предуготовля́ет стези́. / Сего́ ра́ди пои́м во хвале́нии Чу́дному Бо́гу на́шему, / я́ко просла́вися.

Песнь но́вую пои́м, лю́дие, / от Де́вы Ро́ждшемуся во спасе́ние на́ше / и еди́но Сотво́ршему с Небе́сными земна́я, / я́ко просла́вися.

Спа́сшему Бо́гу в мо́ри лю́ди / и погрузи́вшему проти́вныя, / Тому́ Еди́ному пои́м, я́ко просла́вися.

Песнь 2

Ви́дите, ви́дите, я́ко Аз есмь Спас ми́ра, / Свет и́стинный, Исто́чник жи́зни, / Сын Бо́жий.

Вонми́, земле́ и не́бо, / и внуши́ глаго́лы моя́, / возглаго́лю бо на земли́ Бо́жия чудеса́.

Я́ко ту́ча на тро́скот / и я́коже и́ней на се́но, / да сни́дут на зе́млю глаго́ли Мои́.

Песнь 3

И́же от не су́щих вся Приведы́й, / сло́вом созида́емая, / соверша́емая Ду́хом, / Вседержи́телю Вы́шний, / в любви́ Твое́й утверди́ мене́.

Сретения:

Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ / Честно́ю Твое́ю Кро́вию.

Осмогласника:

Утвержда́йся, душе́, в Го́споде Бо́зе / и возопи́й, хваля́щися: / несть свят, па́че Тебе́, Го́споди.

Разслабленнаго:

Непло́дная душе́ и безча́дная, / стяжи́ плод благосла́вный, / веселя́щися, возопи́й: / утверди́хся Тобо́ю, Бо́же, / несть свят, несть пра́веден, / па́че Тебе́, Го́споди.

Утверди́, Го́споди, сердца́ на́ша / и просвети́ к Твоему́ песнопе́нию, / е́же сла́вити Тя, Спа́се, во век ве́ка.

Утверди́ся се́рдце мое́ в Го́споде, / вознесе́ся рог мой в Бо́зе мое́м, / я́ко несть свят, па́че Тебе́, Го́споди.

Лук сокруши́л еси́ вра́жий / и щиты́ стерл еси́ кре́постию, Влады́ко Христе́, / утвержде́ние на́ше, / Свят еси́, Го́споди.

Утвержде́ние и очище́ние / пода́ждь нам, Сы́не Бо́жий, / и спаси́ ны, я́ко Человеколю́бец.

Утверди́ мене́, Го́споди, / Еди́не Многоми́лостиве, / и простри́ ми ру́ку, я́ко Петро́ви, и спаси́ мя.

Основа́вый зе́млю на тве́рди ея́ / и Небеса́ утвержде́й кре́постию, / утверди́ вся ны, хва́лящия Тя ве́рно.

Песнь 4

Положи́л еси́ к нам тве́рдую любо́вь, Го́споди: / Единоро́днаго бо Твоего́ Сы́на / за ны на смерть дал еси́. / Те́мже Ти зове́м, благодаря́ще: / сла́ва си́ле Твое́й, Го́споди.

Сретения:

Покры́ла есть Небеса́ доброде́тель Твоя́, Христе́, / из Киво́та бо проше́д святы́ни, Твоея́ Нетле́нныя Ма́тере, / в хра́ме Сла́вы Твоея́ яви́лся еси́, / я́ко Младе́нец руконоси́мь, / и испо́лнишася вся Твоего́ хвале́ния.

Гора́ приосене́нная яви́ся утро́ба Де́вы, / Ру́чка и Трапе́за есть Ма́ти Госпо́дня: / из Нея́ бо про́йде я́ве, / и Симео́н объя́тьми подъя́т. / Сла́ва си́ле Твое́й, Го́споди.

Осмогласника:

Еда́ в река́х прогне́ваешися, Го́споди, / еда́ в река́х я́рость Твоя́ / или́ в мо́ри устремле́ние Твое́?

Стра́нна и неизрече́нна Рождества́ Твоего́ та́йна! / услы́шах слух Твой, и убоя́хся, / и, веселя́ся, вопию́ Ти: / си́ле Твое́й сла́ва, Человеколю́бче.

Разслабленнаго:

Приосене́нную го́ру Авваку́м прозря́ше, / пречи́стую Твою́ утро́бу, Чи́стая. / Тем взыва́ше: от ю́га прии́дет Бог / и Святы́й от горы́ приосене́нныя ча́щи.

Что ужа́слся еси́, Авваку́ме? / Кому́ зове́ши и вопие́ши: от ю́га прии́дет Бог? / Сло́во Плоть бысть и всели́ся в ны, и ви́дехом, / во хвале́нии пою́ще ди́вному Бо́гу на́шему, / я́ко просла́вися.

Песнь 5

К Тебе́ у́тренюю, всех Творцу́, / преиму́щему всяк ум ми́рови, / зане́ свет повеле́ния Твоя́, / в ни́хже наста́ви мя.

Сретения:

Я́ко ви́де Иса́ия обра́зно / на Престо́ле превознесе́на Бо́га, / от А́нгел Сла́вы дориноси́ма, / о, окая́нный, – вопия́ше, – аз! / прови́дех бо воплоща́ема Бо́га, / Све́та Невече́рня, / и ми́ром вла́дычествующа.

Во тьме пою́ща возста́ви, Благода́телю, / и души́ моея́ мглу́ просвети́ Све́том Лица́ Твоего́, / Человеколю́бче, / и Твой мир пода́ждь ми, / я́ко иногда́ ста́рцу, Неизме́нне.

Осмогласника и Разслабленнаго:

Све́том Твои́м Невече́рним, Христе́, / озари́, Бо́же, смире́нную мою ду́шу / и наста́ви на страх Твой, / зане́ свет повеле́ния Твоя́.

На земли́ Неви́димый яви́лся еси́ / и челове́ком во́лею сожи́л еси́, Непостижи́мый, / и, к Тебе́ у́тренююще, / воспева́ем Тя, Человеколю́бче.

У́тренююще, воспева́ем Тя, Сло́ве, / Сы́не Бо́жий Единоро́дне: / Твой мир даждь нам и поми́луй ны, / пою́щия Тя и ве́рно покланя́ющияся.

Твой мир даждь нам, Сы́не Бо́жий, / ино́го бо, ра́зве Тебе́, Бо́га не ве́мы, / в Вы́шних со Отце́м и Ду́хом сла́вимаго.

К Тебе́ у́тренюем, Христе́ Бо́же, / у́треннюю и́стину, / возсия́вшу нам от Де́вы / и Богоразу́мием озари́вшу, / су́щим во мра́це неве́дения.

Души́ моея́ мглу разори́в Све́том Твои́м, Христе́, / приими́ мя, Еди́не Благоутро́бне, / от но́щи Тебе́ зову́: / озари́ мою́ мысль.

Вопие́т Ти, Христе́, песнь немо́лчную, / от но́щи у́тренюя, дух мой, / Ты бо Свет и́стинный и незаходя́й, / просвеща́яй вся́каго челове́ка, / в мир гряду́ща.

К Тебе́ у́тренюю, / от Отца́ пре́жде денни́цы9 возсия́вшему, У́тро ми́рови, / помраче́нна согреше́нь ми, Спа́се, / предвари́в, озари́, Бо́же.

Началобы́тную тьму Све́том разруши́в, / мрак се́рдца моего́ заре́ю повеле́ний Твои́х отжени́ Христе́, / да у́тренюю Ти све́тло, / Неприкоснове́нному Све́ту.

Песнь 6

Бе́здна после́дняя грехо́в обы́де мя, / и исчеза́ет дух мой; / но простры́й, Влады́ко, высо́кую Твою́ мы́шцу, / я́ко Петра́, мя, Упра́вителю, спаси́.

Сретения:

Возопи́ к Тебе́, ви́дев ста́рец очи́ма спасе́ние, / е́же лю́дем прии́де от Бо́га: / Христе́, Ты – Бог мой.

Глубина́ грехо́в воста́ на мя, Спа́се, / и бу́ря отча́яния. / Те́мже ве́рно вопию́ Ти, / я́ко от ки́та Ио́на: / возведи́ живо́т мой от тли, / мене́ ра́ди младе́нствовавый / и во объя́тиих Симео́на днесь / в храм приведы́йся.

Осмогласника:

И́же в концы́ веко́в доше́дшия, Человеколю́бче, / и треволне́ньми напа́стей поги́бнути бе́дствующия, / вопию́щия не пре́зри: / спаси́, Спа́се, / я́коже спасл еси́ от зве́ря проро́ка.

Разслабленнаго:

Глубина́ страсте́й воста́ на мя / и бу́ря проти́вных ве́тров, / но, предвари́в, мя Ты спаси́, Спа́се, / и изба́ви от тли, / я́ко спасл еси́ от зве́ря проро́ка.

Возведи́ от тли мя, Го́споди Бо́же мой, / Ио́на вопия́ше, / и аз вопию́ Ти: / из глубины́ изба́ви мя, Спа́се, мно́гих мои́х зол / и к Све́ту Твоему́, молю́ся, наста́ви.

Селе́ния Ио́на е́же в преиспо́днем а́де / есте́ственный о́браз быв, вопия́ше: / возведи́ от тли живо́т мой, / Чело веколю́бче.

Воззва́х воздыха́нии немо́лчными к Ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

Во глубину́ се́рдца морска́го беззако́ний отве́ржен бых, / я́ко Ио́на, вопию́ Ти: / возведи́ мя от тли, / да воз да́м Ти моли́твы моя́, Го́споди.

Песнь 7

Я́коже дре́вле благочести́выя три о́троки / ороси́л еси́ в пла́мени халде́йстем, / све́тлым Божества́ огне́м и нас озари́, / благослове́н еси́, взыва́ющия, / Бо́же оте́ц на́ших.

Сретения:

Тебе́, во огни́ ороси́вшаго о́троки Богосло́вившия / и в Де́ву нетле́нну все́льшагося, /Бо́га Сло́ва пои́м, / благоче́стно пою́ще: / благослове́н Бог оте́ц на́ших.

Пещь горя́щая не обре́теся ороша́ющая, / то́кмо вавило́нская; / безму́жная ина́я ма́ти и де́ва не яви́ся. / О́ва у́бо о́троки сохрани́ неопали́мы, / Сия́ же носи́ во объя́тиих, / Его́же воспева́юще, глаго́лем: / благослове́н еси́, Бо́же оте́ц на́ших.

Осмогласника:

Трие́ о́троцы в пещи́, Тро́ицу прообрази́вше, / преще́ние о́гненное попра́ша / и, пою́ще, вопия́ху: / благослове́н еси́, Бо́же оте́ц на́ших.

Го́рдый мучи́тель, но дете́й бысть игра́лище, / я́ко же бо пе́рсть, попра́вше седмери́чный пла́мень, поя́ху: / благослове́н еси́, Го́споди, / Бо́же оте́ц на́ших.

Разслабленнаго:

Пла́мень ороси́вый пе́щный / и о́троки неопали́мы спасы́й, / благослове́н еси́ во ве́ки, / Го́споди, Бо́же оте́ц на́ших.

Пре́жде о́бразу злато́му, перси́дскому чти́лищу, / о́троцы не поклони́шася, / трие́ пою́ще посреде́ пе́щи: / отце́в Бо́же, благослове́н еси́.

Я́ко зла́то в горни́ле, / о́троки искуша́хуся в пещи́ / и показа́шася све́тли, / не внегда́ слия́тися, / но внегда́ храни́тися, / не внегда́ горе́ти, / но внегда́ пе́ти непреста́нно: / благослове́н еси́, Бо́же оте́ц на́ших.

В пещи́ пла́мень угаси́ша о́троцы / и Небе́сную ро́су прия́ша ве́рою: / благослове́н еси́, Бо́же оте́ц на́ших.

Прохлажде́й пла́мень пе́щный / и Де́ву сохрани́ ро́ждшую Тя, Богоро́дицу: / благослове́н еси́, Го́споди, / Бо́же оте́ц на́ших.

Песнь 8

Сей и Сретения:

Нестерпи́мому огню́ соедини́вшеся, / Богоче́стия пред стоя́ще, ю́ноши, / пла́менем же неврежде́ни, Боже́ственную песнь поя́ху: / благослови́те, вся дела́ Госпо́д ня, Го́спода / и превозноси́те во вся ве́ки.

Я́ко пещь дре́вле, прие́мшая, о́троки не опали́, / та́ко и Де́ва, заче́нши Зижди́теля, не опали́ся Утро́бою. / О́ле чудесе́! Неизме́нный ви́дится пло́тию и во храм приво́дится. / Сего́ ра́ди, ве́рою пою́ще, глаго́лем: / благослови́те, дела́, Го́спода.

Осмогласника:

В пла́мень ко отроко́м евре́йским / снизше́дшаго Бо́жиею си́лою и я́вльшагося Го́спода, / свяще́нницы, благослови́те / и превозноси́те во вся ве́ки.

Веще́ственнаго огня́ пла́мень / Невеще́ственным увяди́ша Богозри́мии о́троцы и поя́ху: / благослови́те, вся дела́ Госпо́дня, Го́спода.

Разслабленнаго:

А́нгельми немо́лчно в Вы́шних сла́вимаго Бо́га, / Небеса́ небе́с, земля́, и го́ры, и хо́лми, и глубина́, / и весь род челове́ческий, / пе́сньми Того́, я́ко Созда́теля и Изба́вителя, благослови́те / и превозноси́те во вся ве́ки.

Вавило́нская пещь о́троки не опали́, / ниже́ Божества́ огнь Де́ву растли́. / Тем со о́троки, ве́рнии, возопие́м: / благослови́те, дела́ Госпо́дня, Го́спода.

Служи́ти Живо́му Бо́гу / в Вавило́не о́троцы претерпе́вше, / о мусики́йских орга́нех неради́ша / и, посреде́ пла́мене стоя́ще, Боголе́пную песнь воспева́ху, глаго́люще: / благослови́те, вся дела́ Госпо́дня, Го́спода.

Покланя́емаго от святы́х А́нгел / и Сла́вимаго непреста́нно, / свяще́нницы, по́йте, / лю́дие, превозноси́те во вся ве́ки.

На Престо́ле Херуви́мсте Носи́маго, / свяще́нницы, по́йте, / лю́дие, превозноси́те во вся ве́ки.

Из Безнача́льнаго Отца́ рожде́ннаго пре́жде век Бо́га / и в после́дняя от Богоро́дицы в плоть обле́кшася, / я́ко соверше́нна Челове́ка и Бо́га и́стинна, / по́йте, благослови́те / и превозноси́те во вся ве́ки.

Благоде́теля, и Бо́га, и Изба́вителя всех, / и Творца́ всего́ ми́ра, / свяще́нницы, по́йте, / лю́дие, превозноси́те во вся ве́ки.

Обра́зно во А́нгельстем я́вльшася зра́це / и де́ти прохла́ждша посреде́ горя́щия пе́щи, / благослови ́те, дела́ Госпо́дня, Го́спода.

Песнь 9

Но́вое чу́до и Боголе́пное: / деви́ческую бо дверь затворе́нную / я́ве прохо́дит Госпо́дь, / наг во вхо́де, / и плотоно́сец яви́ся во исхо́де Бог, / и пребыва́ет Дверь затворе́на; / Сию́ неизрече́нно / я́ко Богома́терь велича́ем.

Сретения:

В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, / свят Бо́гу. / Тем Перворожде́нное Сло́во / Отца́ Безнача́льна, / Сы́на, первородя́щася Ма́терию неискусому́жно, / велича́ем.

Пречи́стая Богоро́дице, Ма́ти Безневе́стная, / пра́ведно Тя пою́т Чи́нове А́нгелов, / и ста́рец Симео́н, Рождество́ Твое́ зря, взыва́ше: / Ны́не отпуща́еши раба́ Твоего́, Влады́ко, / по глаго́лу Твоему́, / я́ко да спасе́ши, Христе́, / Тя с Ро́ждшею велича́ющия.

Тя живопису́ющий ассири́йский пла́мень, / Де́во Ма́ти Мари́е: / Огнь бо Божества́, во утро́бу Твою́ всели́вся, Чи́стая, / неопа́льно соблюде́ пречи́стая ложесна́ Твоя́. / Те́мже и Христо́с, Тобо́ю в храм святы́й / объя́тьми приведы́йся, / нас обнови́, велича́ющия Твое́ Рождество́.

Осмогласника и Разслабленнаго:

На Сина́йстей горе́ ви́де Тя в купине́ Моисе́й, / неопа́льно Огнь Божества́ заче́ншую во чре́ве; / Дании́л же Тя ви́де Го́ру несеко́мую; / Жезл прозя́бший, Иса́ия взыва́ше, / от ко́рене Дави́дова.

Сла́дкою Пречи́стаго Твоего́ Рождества́ / стрело́ю уязвле́ни, Чи́стая, / Твое́й достожела́нней добро́те дивя́щеся, / пе́сньми А́нгельскими / досто́йно Тя я́ко Ма́терь Бо́жию велича́ем.

Купино́ю и огне́м пропи́санную в Сина́и / законополо́жнику Моисе́ю / и Бо́жий во чре́ве неопа́льно заче́ншую Огнь, / Всесве́тлую и Негаси́мую Свещу́, / су́щую Богоро́дицу пе́сньми, чту́ще, велича́ем.

Тебе́, Неопали́мую Купину́ и Святу́ю Де́ву, / Ма́терь Све́та и Богоро́дицу, / Наде́жду всех нас, велича́ем.

Благослове́н Госпо́дь, Бог Изра́илев, / воздви́гнувый рог спасе́ния нам / в дому́ Дави́да, о́трока Своего́, / милосе́рдия ра́ди ми́лости, / в ни́хже посети́ нас Восто́к с высоты́ / и напра́вил ны есть на путь ми́ра.

Несеко́мую Го́ру, Краесеко́мый Ка́мень, / его́же ви́де Дании́л проро́к, / Богоро́дицу Мари́ю пе́сньми велича́ем.

Тя, Неискусобра́чную Богоро́дицу, / в па́мяти святы́х велича́ем, / я́ко ро́ждшую Спасе́ние душ на́ших.

Тебе́, Безсме́ртный Исто́чник, / и святы́х исцеле́ния челове́чу ро́ду подаю́щу, / при́сно велича́ем, / я́ко спаса́еши ду́ши на́ша.

Благода́тная, ра́дуйся, Госпо́дь с Тобо́ю, / благослове́на Ты в жена́х, / и Тя велича́ем.

Ма́терь Све́та, и по Рождестве́ Де́ву, / и душ на́ших спасе́ния Приста́нище, / ве́рнии, единому́дренно пе́снь ми велича́ем.

Ирмосы 4-го гласа

Песнь 1

Мо́ря чермну́ю пучи́ну / невла́жными стопа́ми / дре́вний пешеше́ствовав, Изра́иль / крестообра́зныма Моисе́овыма рука́ма / Амали́кову си́лу в пусты́ни победи́л есть.

Благовещения и Вознесения:

Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ *чудеса́*.

Успению ирмос той же: *успе́ние*.

Введению ирмос той же: *вхожде́ние*.

В неделю Ваий:

Яви́шася исто́чницы бе́здны / вла́ги неприча́стны, / и откры́шася мо́ря / волну́ющася основа́ния бу́рею: / ма́нием бо запрети́л еси́ ему́, / изря́дныя же лю́ди спасл еси́, / пою́щия побе́дную песнь Тебе́, Го́споди.

В неделю 8-ю:

Боже́ственным покрове́н / медленноязы́чный мра́ком, / извити́йствова Богопи́санный зако́н: / ти́ну бо оттря́с очесе́ у́мнаго, / ви́дит Су́щаго / и науча́ется Ду́ха ра́зуму, / хваля́ Боже́ственными пе́сньми.

На Преображение:

Ли́цы изра́ильтестии, / невла́жными стопа́ми / понт Чермны́й и вла́жную глубину́ прогна́вше, / вса́дники триста́ты, враги́, ви́дяще в ней погруже́ны, / с весе́лием поя́ху: / пои́м Бо́гу на́шему, / я́ко просла́вися.

Осмогласника:

Триста́ты кре́пкия, / Рожде́йся от Де́вы, / без стра́стия во глубине́ / души́ трича́стное потопи́, молю́ ся, / да Тебе́, я́ко в тимпа́не, / во умерщвле́нии телесе́ / побе́дное воспою́ пе́ние.

Порази́вый Еги́пта / и фарао́на мучи́теля погрузи́вый в мо́ри, / лю́ди спасл еси́ из рабо́ты, / Моисе́йски пою́щия песнь побе́дную, / я́ко просла́вися.

Пои́м Го́сподеви, / пресла́вно погрузи́вшему фарао́на в мо́ри, / песнь побе́дную, я́ко просла́вися.

Воспою́ Тебе́, Го́споди Бо́же мой, / я́ко изве́л еси́ лю́ди из рабо́ты еги́петския, / покры́л же еси́ колесни́цы фарао́новы и си́лу.

Несть Тебе́ подо́бен, / Препросла́вленный Го́споди: / руко́ю бо кре́пкою изба́вил еси́ лю́ди, / я́же стяжа́л еси́, / Человеколю́бче.

Пои́м песнь но́вую / Царю́ веко́в, / я́ко просла́вися.

Пои́м, лю́дие, ди́вно чудоде́йствовавшему / в Чермне́м мо́ри Христу́ Бо́гу: / я́ко дре́вле Изра́иля всевооруже́на / стопа́ми пешеше́ствовати непрохо́дную сотвори́ / и зло́бы делода́теля фарао́на во глубине́ потопи́.

Под о́блаком све́тлым / и столпо́м о́гненным наставля́емый, / проше́д мо́ре су́шею / и сие́ пешеше́ствуяй, я́ко в пусты́ни, / избра́нный Твой Изра́иль, Христе́, / побе́дную песнь пое́т Тебе́, Го́споди.

Колесни́цы фарао́новы и си́лу его́ / вве́рже в мо́ре Кре́пкий в бра́нех, / воспое́м песнь но́вую, я́ко просла́вися.

Пое́м песнь побе́дную / Еди́ному Бо́гу, / сотво́ршему пресла́вная: / дре́вле бо фарао́на / со всево́инством в мо́ри погрузи́.

Предели́в пучи́ну чермну́ю Бог, / фарао́на погрузи́вый в ней, / прове́д Моисе́я немо́кренно в пусты́ню / и одожди́в ма́нну в снедь лю́дем Изра́илевым, / я́ко си́лен.

Наста́вльшему дре́вле Изра́иля, / бежа́щаго от рабо́ты фарао́новы, / и в пусты́ни пита́вшему, / пои́м Изба́вителю, Бо́гу на́шему, / я́ко просла́вися.

Пресла́вная сотвори́вый чудеса́ Госпо́дь руко́ю Моисе́овою, / рука́ма ста́рца днесь объе́млется / я́ко Младе́нец во хра́ме. / Тому́ ве́рно возопии́м, лю́дие, песнь побе́дную: / сла́вно бо просла́вися.

Чудоде́йствовавшему высо́кою мы́шцею Бо́гу / в мо́ри Чермне́м А́нгельским предпутетворе́нием, / и спа́сшему Изра́иля в конце́ бе́здны, / и конегони́телей связа́вшему о́си, / побе́дную песнь пои́м Тому́, я́ко просла́вися.

Песнь 2

Дади́те, лю́дие, вели́чие Христу́ Бо́гу на́шему, / от Де́вы ро́ждшемуся / во спасе́ние челове́ком.

Ви́дите, ви́дите, я́ко Аз есмь Сло́во, / во утро́бу Ма́тере неопи́санно вшед, / не разлучи́вся от Отца́ я́ко Бог же, / соисполня́я с Го́рними ни́жняя / и подава́я ве́лию ми́лость.

Дади́м вели́чие Христу́ Бо́гу на́шему, / воздви́женому на Крест / на спасе́ние всего́ ми́ра.

Ви́дите, ви́дите, я́ко Аз есмь Бог, / умерщвля́я и животворя́й, / дарова́вый во́ду из ка́мене несеко́ма / и одожди́вый ма́нну на пи́щу лю́дем Изра́илевым, / я́ко си́лен.

Песнь 3

Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище, и утвержде́ние.

Благовещения и Вознесения:

Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшыя, духо́вно утверди́, / в Боже́ственней Твое́й сла́ве / венце́в сла́вы сподо́би.

Успению:

Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшыя, духо́вно утверди́, / *в Боже́ственней па́мяти Твое́й / венце́в сла́вы сподо́би *.

Введению ирмос той же:

*в честне́м вхожде́нии Твое́м / венце́в сла́вы сподо́би *.

В неделю Ваий:

Точа́щий, краесеко́мый повеле́нием Твои́м, / тве́рдый сса́ша Ка́мень изра́ильтестии лю́дие, / Ка́мень же Ты еси́, Христе́, и Жизнь, / на не́мже утверди́ся Це́рковь, зову́щая: / Оса́нна, благослове́н еси́, гряды́й.

В неделю 8-ю:

Разве́рзе утро́бы неча́дствовавшия у́зы, / доса́ду же неудоботерпи́му благоча́дствующия, / еди́на моли́тва проро́чицы дре́вле А́нны, / нося́щия дух сокруше́н, / к Си́льному и Бо́гу ра́зумов.

Осмогласника:

С высоты́ снизше́л еси́ во́лею на зе́млю / превы́шше вся́каго нача́ла / и смире́нное возне́сл еси́ / из а́да преиспо́дняго / естество́ челове́ческое, / несть бо свят, па́че Тебе́, / Человеколю́бче.

Утвержда́яй гром и созида́яй дух, / утверди́ мене́, Го́споди, / да Тя пою́ и́стинно / и творю́ во́лю Твою́, / я́ко несть свят, я́ко Ты, Бо́же наш.

На Преображение:

Лук си́льных изнемо́же, / и немощству́ющии препоя́сашася си́лою, / сего́ ра́ди утверди́ся в Го́споде се́рдце мое́.

Не му́дростию, и си́лою, / и бога́тством хва́лим ся, / но Тобо́ю, О́тчею Ипоста́сною Му́дростию, Христе́, / несть бо свят, па́че Тебе́, / Человеколю́бче.

Свят еси́, Го́споди Бо́же наш, / утверди́ и на́ша сердца́ непреста́нно вопи́ти Тебе́: / пра́веден несть, па́че Тебе́, Го́споди.

Утвержде́ние на Тя наде́ющихся, / утверди́, Го́споди, в ве́ре Правосла́вней Твое́й, / утверди́ нас, я́ко Человеколю́бец.

Я́ко непло́ды роди́ от язы́к Це́рковь, / и мно́гое в ча́дех / изнемо́же со́нмище, / чу́дному Бо́гу на́шему возопии́м: / Свят еси́, Го́споди.

Утвержде́ние ве́рных, и похвало́, / и нетле́ния исто́чниче, / и благи́х прошениода́вче Христе́, / в любви́ Твое́й утверди́ мя.

Утверди́ся се́рдце мое в Го́споде, / вознесе́ся рог мой в Бо́зе мое́м, / я́ко несть свят, па́че Тебе́, Го́споди.

Да не хва́лится мудр, хваля́йся, / но о сем, е́же разумева́ти, / я́ко несть свят, я́ко Бог наш, / вознося́й рог наш, / дая́й кре́пость царе́м на́шим.

Утверди́ся се́рдце мое́ в Го́споде, / даю́щем моли́тву моля́щемуся, / я́ко лук си́льных изнемо́же / и немощству́ющии препоя́сашася си́лою.

Вы́шний Спа́се сил, / коле́блемую ду́шу мою́ / утверди́ в во́ли Твое́й, / да и аз сла́влю Твое́ / со Безпло́тными Боже́ственное благоле́пие.

В Го́споде Бо́зе мое́м / се́рдце мое́ утверди́ся, / тем немощству́ющии препоя́сашася си́лою.

А́нна, пре́жде безча́дная и непло́дная, / обеща́ния имя́ше плод – Саму́ила; / ны́не же А́нна проро́чица, в храм прише́дши, / благодаря́ше нас ра́ди младе́нствовавшаго Бо́га / и ста́рческими объя́тии прие́млемаго.

Песнь 4

Вознесе́на Тя ви́девши Це́рковь на Кресте́, / Со́лнце Пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди.

Благовещения, Вознесения:

Седя́й в Сла́ве на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Успения и Введения:

Неизсле́дный Бо́жий Сове́т, / е́же от Де́вы, воплоще́ния / Тебе́, Вы́шняго, / проро́к Авваку́м усмотря́я, зовя́ше: / сла́ва си́ле Твое́й, Го́споди.

В неделю Ваий:

Христо́с гряды́й – я́вственно Бог наш, /прии́дет и не закосни́т / от горы́ приосене́нныя ча́щи, / Отрокови́цы ражда́ющия, Неискусому́жныя, / проро́к дре́вле глаго́лет. / Тем вси вопие́м: / сла́ва си́ле Твое́й, Го́споди.

В неделю 8-ю:

Царю́ царе́й, / Яковы́й от Якова́го, / Еди́н, Сло́ве, произше́дый, / от Отца́ Безви́новнаго Равномо́щнаго Твоего́ Ду́ха / апо́столом и́стинно посла́л еси́ / я́ко Благо де́теля, пою́щим: / сла́ва держа́ве Твое́й, Го́споди.

Осмогласника:

Услы́шах слух Твой и убоя́хся, / разуме́х дела́ Твоя́ / и ужасо́хся, Го́споди.

Любве́ ра́ди, Ще́дре, Твоего́ о́браза / на Кресте́ Твое́м стал еси́, / и раста́яшася язы́цы: / Ты бо еси́, Человеколю́бче, / кре́пость моя́ и хвале́ние.

Сей Бог наш, / от Де́вы вопло́щся / и естество́ обожи́в, / Его́же воспева́юще, вопие́м: / сла́ва си́ле Твое́й, Го́споди.

Услы́шах слух Твой, Го́споди, / я́ко яви́лся еси́ на земли́, / и просла́вих Твою́ си́лу.

Ве́лие и Боголе́пное, Спа́се, слы́шах, / я́ко Безсме́ртен сый и Бог, / уподо́бился еси́ челове́ком / и пребы́́́́л еси́, е́же был еси́, / и сего́ ра́ди Твою́ сла́влю си́лу.

Преображения:

Услы́шах сла́вное смотре́ние Твое́, / Христе́ Бо́же, / я́ко роди́лся еси́ от Де́вы, / да от ле́сти изба́виши зову́щия: / сла́ва си́ле Твое́й, Го́споди.

Слух услы́шах, глаго́лет Авваку́м, / я́ко Бог из горы́, / из чре́ва де́вственнаго про́йде неизрече́нно, / и, ужа́сся, взыва́ше: / сла́ва си́ле Твое́й, Го́споди.

Среде́ двою́ разбо́йнику / позна́лся еси́ на Кресте́, Христе́ Бо́же, / взя́тся со́лнце стра́хом, / и луна́ ста в чи́не свое́м: / сла́ва си́ле Твое́й, Го́споди.

Приклони́л еси́, Христе́, снизхожде́нием Твои́м / Небеса́ в ра́зуме / и яви́лся еси́, воплоще́н на земли́. / Тем вси вопие́м: / си́ле Твое́й сла́ва, Человеколю́бче.

Услы́шах слух Твоего́ смотре́ния, / я́ко от Де́вы роди́лся еси́, ро́ждшую не опали́в, / и прославих, Спа́се, снизхожде́ние Твое́.

Внегда́ прибли́житися ле́том – позна́ешися; / внегда́ приити́ вре́мени – яви́шися, / внегда́ смути́тися души́ мое́й – / во гне́ве ми́лости помяне́ши: / Го́споди, сла́ва Тебе́.

Услы́шах, Бо́же, слух Твой и убоя́хся, / разуме́х дела́ Твоя́ и ужасо́хся, Го́споди, / я́ко Твоего́ хвале́ния испо́лнь земля́.

Гла́сом Богоглаго́ливым предразуме́в, Авваку́м / зря́ще Сло́ва воплоще́ние и взыва́ше я́ве: / слух услы́шах Бо́жия Сове́та, / Бог бо непрело́жно челове́ком возбесе́дует, / из горы́ гряды́й, де́вственнаго чре́ва, / и мир избавля́я / началоро́дныя кля́твы.

Его́же проро́к Авваку́м предзри́тельныма очи́ма усмотря́, / пропове́даше Бо́га, / ста́рец днесь во хра́ме прие́млет, вопия́: / ны́не отпуща́еши раба́ Твоего́, Влады́ко, в ми́ре, / по глаго́лу Твоему́.

Тя, возсия́вша от Неискусому́жныя Ма́тере, / проро́к Авваку́м, прови́дя, вопия́ше: / в после́дняя времена́ / спасти́ пома́занныя Твоя́ прише́л еси́, / сла́ва си́ле Твое́й, Го́споди.

Твоего́ на земли́ явле́ния, / Христе́ Бо́же, / пропове́дая проро́к прише́ствие, / с весе́лием вопия́ше: / сла́ва си́ле Твое́й, Го́споди.

Небеса́ доброде́тель Твоя́ покры́ла есть, / и земля́ испо́лнися / сла́вы Твоея́, Христе́. / Те́мже ве́рно вопие́м: / сла́ва си́ле Твое́й, Го́споди.

Услы́шах Твое́, Христе́, вои́стинну пресла́вное, / я́ко безсме́ртен сый Бог / уподо́бися сме́ртным челове́ком / и пребы́сть, е́же бе, / и того́ ра́ди Твою́ сла́влю си́лу.

Песнь 5

Ты, Го́споди, мой Свет, / в мир прише́л еси́, / Свет Святы́й, обраща́яй / из мра́чна неве́дения / ве́рою воспева́ющия Тя.

Благовещения, Вознесения:

Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

В неделю Ваий:

На го́ру Сио́н взы́ди, благовеству́яй / и Иерусали́му пропове́дуяй, / в кре́пости вознести́ глас: / пресла́вная глаго́лашася о Тебе́, Гра́де Бо́жий, / мир на Изра́иля и спасе́ние язы́ков.

В неделю 8-ю:

Реши́тельное очище́ние грехо́в, / огнедохнове́нную приими́те Ду́ха ро́су, / о ча́да светообра́зная церко́вная! / Ны́не от Сио́на бо изы́де Зако́н, / языкоогнеобра́зная Ду́ха благода́ть.

Осмогласника:

Ны́не воста́ну, проро́чески рече́ Бог, / ны́не просла́влюся, ны́не вознесу́ся, / па́дшаго прие́м от Де́вы / и к све́ту у́мному / вознося́й Моего́ Божества́.

Возсия́й ми, Го́споди, / свет повеле́ний Твои́х, / я́ко к Тебе́ дух мой у́тренюет и пое́т Тя: / Ты бо еси́ Бог наш, / и к Тебе́ прибега́ю, Царю́ ми́ра.

Просвеще́ние Твое́, Го́споди, низпосли́ нам / и от мглы прегреше́ний разреши́ ны, Бла́же, / Твой мир да́руяй.

Нечести́вии не у́зрят сла́вы Твоея́, Христе́, / но мы Тя, Единоро́дне, / Оте́ческия Сла́вы Сия́ние Божества́, / от но́щи у́тренююще, / воспева́ем Тя, Человеколю́бче.

Зако́ном за́поведей Твои́х, Еди́не Человеколю́бче, / просвети́ се́рдце мое́, / молю́ся, Го́споди, и поми́луй мя.

Стяжа́вый ны, избра́нныя лю́ди, Кро́вию Твое́ю, Го́споди, / Твой мир даждь нам, / во единомы́слии сохраня́я ста́до Твое́.

Преображения:

От све́та пресеки́й перворо́дный свет, / я́ко во све́те дела́ пою́т Тя, Христе́, Соде́теля, / во Све́те Твое́м пути́ на́ша напра́ви.

Ре́вность прии́мет лю́ди ненака́занныя, / законопресту́пныя евре́и, / и огнь поя́ст супоста́ты Твоя́, / я́ко Тя, Распя́таго, / лестца́ именова́ша.

От но́щи у́тренююще, / вси немо́лчно Тя, Непристу́пный – мо́лим – Свет: / Бо́же ще́дрый, мир Твой, Христе́, да́руй нам.

У́тро све́тлое / нам посли́, я́ко Благ, / и наста́ви ны в страх Твой, Влады́ко.

Нощебори́мых страсте́й тиме́нием / к Тебе́ у́тренюю, / Еди́ному Благоутро́бному: / души́ моея́ мглу просвети́ / и ю́зы пресеки́ долго́в мои́х, / я́ко да Твои́м Со присносу́щным Ду́хом просвеща́емь, / пра́вды путь нетле́нный обря́щу повеле́ний Твои́х.

Угль о́гненный клеща́ми прие́млет Иса́ия иногда́, / устна́ма очища́яйся; / ны́не же Де́ва во хра́ме, / нося́щи Бо́га, воплоще́нна нас ра́ди, / рука́ма, а́ки клеща́ми, ста́рцу дае́т, / ми́ра Вино́внаго / и всех Пода́теля.

Мрак разреши́ греха́ моего́, / внегда́ возсия́ти Ти, / у́тро све́тлое / за́поведей Твои́х, Го́споди, / Непристу́пный Све́те.

Возсия́вый Свет, / и просвети́вый у́тро, / и показа́вый день, / сла́ва Тебе́, сла́ва Тебе́, / Иису́се, Сы́не Бо́жий.

Све́те и́стинный, / просвеща́яй вся́каго челове́ка, / возсия́й в нас заре́ю за́поведей Твои́х / и отжени́ от нас нощь страсте́й, / я́ко, ра́зве Тебе́, ино́го бо́га не ве́мы.

Успения:

Ужасо́шася вся́ческая / о честне́м Успе́нии Твое́м: / Ты бо, Неискусобра́чная Де́во, / от земли́ преста́вилася еси́ к Ве́чным Оби́телем / и к Безконе́чней Жи́зни, / всем воспева́ющим Тя / спасе́ние подава́ющая.

Введения:

Ужасо́шася вся́ческая / в честне́м вхожде́нии Твое́м: / Ты бо, Неискусобра́чная Де́во, / внутрь вошла́ еси́ в храм Бо́жий, / я́коже чисте́йший храм, / всем воспева́ющим Тя / мир подава́ющая.

Из но́щи у́тренююще, / просвети́ нас, Животво́рче Кре́сте Христо́в, / со стра́хом покланя́ющияся тебе́, / и день спаси́тельный / при́сно возсия́й нам.

Часть моя́ еси́, Го́споди, / и сла́ва лица́ моего́: / Ты бо мя из тьмы неве́дения / еди́н изба́вил еси́ Богоразу́мием, / и Тебе́ молю́ся, Христе́: / да́руй рабу́ Твоему́ мир, / я́ко Человеколю́бец.

Песнь 6

Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися / ра́ди ми́лости от ребр Твои́х / исте́кшею Кро́вию.

Благовещения:

Возопи́, прообразу́я погребе́ние тридне́вное, / проро́к Ио́на, в ки́те моля́ся: / от тли изба́ви мя, Иису́се, Царю́ сил.

Успения, Введения, Вознесения:

Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

В неделю Ваий:

Возопи́ша с весе́лием пра́ведных ду́си: / ны́не ми́ру Заве́т Но́вый завеща́ется, / и кропле́нием да обновя́тся лю́дие Бо́жия Кро́ве.

В неделю 8-ю:

Очище́ние нам, Христе́, / и спасе́ние, Влады́ко, / воз сия́л еси́ от Де́вы, / да, я́ко проро́ка от зве́ря морска́го пе́рсей Ио́ну, / от тли исхити́ши всего́ Ада́ма всеро́дна па́дшаго.

Осмогласника:

Приидо́х во глубины́ морски́я, / и потопи́ла мя есть бу́ря мно́гих грехо́в, / но, я́ко Бог, из глубины́ / возведи́ живо́т мой, / Многоми́лостиве.

Пучи́ною жите́йскою / дея́ньми мои́ми снидо́х во ад, / но, я́ко от ки́та Ио́на, та́ко вопию́: / из глубины́ зол возведи́, молю́ся, / Сы́не Бо́жий и Сло́ве.

Ве́чер, и у́тро, и полу́дне / хва́лим Тя, Го́споди Бо́же наш, / услы́ши глас наш.

Бу́рею содержи́мь прегреше́ний, / человеколю́бия сподобля́яйся, не разуме́ю, / я́ко Ио́ну проро́ка, и мене́ спаси́, Спа́се.

В ки́те, Христе́, тридне́вновав, Ио́на / прописа́ Тя, Безсме́ртнаго, я́ко ме́ртва во́лею / в се́рдце земне́м тридне́вновавша.

Я́ко проро́ка из глубины́ и тли возве́л еси́, / живо́т мой, Бла́же, от прегреше́ний изба́ви / благоутро́бием Твои́м.

На Преображение:

Внегда́ скорбе́ти ми, / возопи́х ко Го́споду, / и услы́ша мя Бог спасе́ния моего́.

Твоего́ Ио́на погребе́ния о́браз / предписа́в я́ве, / и сего́ вои́стинну извле́кл от зве́ря, / и мене́, Спа́се, из глубины́ греха́ возведи́ / и к животу́ я́ве, молю́ся, наста́ви.

Да не погрузи́т мене́ бу́ря водна́я, / ниже́ пожре́т мене́ глубина́, / отве́ржен бо есмь / во глубины́ се́рдца морска́го зол мои́х. / Тем зову́, я́ко Ио́на: / да взы́дет от тли зол живо́т мой / к Тебе́, Бо́же.

Я́коже проро́ка Ио́ну / от ки́та изба́вил еси́, Христе́ Бо́же, / и мене́ из глубины́ прегреше́ний / возведи́ и спаси́ мя, / Еди́не Человеколю́бче.

Из чре́ва а́дова во́пля моего́ / услы́шал еси́ глас мой / и возве́л еси́ от тли бу́ри прегреше́ний, / обдержи́т бо, Спа́се, / и погружа́ти искуша́ет, Бла́же, / но, я́коже пре́жде Ио́ну возве́л еси́ от тли, / и мене́, молю́ся, Го́споди, предвари́в, спаси́.

Бу́ря мя помышле́ний, пости́гши, / во глубину́ низвлачи́т мя безме́рных грехо́в, / но Ты, Упра́вителю Благи́й, / предвари́в, упра́ви, / я́ко проро́ка, и спаси́ мя.

Бу́ря мя мно́гих согреше́ний мои́х потопля́ет, / и изнемога́ет дух мой; / но Ты, Го́споди, / я́ко ми́лостив, сшед, / возведи́ живо́т мой.

Обурева́ему мне, Ще́дре, / бу́рею волн мои́х, молю́ся: / воззови́ мя и спаси́, Го́споди, / я́ко Ио́ну / от зве́ря у́мнаго.

Бу́рею грехо́вною погружа́емь, / я́ко во чре́ве ки́тове содержи́мь, / с проро́ком зову́ Ти: / возведи́ от тли живо́т мой, / Го́споди, и спаси́ мя.

Ио́на проро́к во чре́ве ки́тове / от ско́рби возопи́: / глава́ моя́ понре́10 в разсе́лины гор, Го́споди. / Симео́н же, подъе́м Тя, ра́достно взыва́ше: / ны́не отпуща́еши раба́ Твоего́ по глаго́лу Твоему́.

Морско́е рыда́ние, Христе́, Ио́нино / подража́яй, зову́ Ти: / живо́т мой от а́да прегреше́ний возведи́, / да во хра́ме сла́вы Твоея́ / со гла́сом хвале́ния пожру́ Ти.

Проро́ка во чре́ве ки́тове сохрани́вый, / Святы́й Го́споди, / помози́ ми.

Песнь 7

В пещи́ авраа́мстии / о́троцы перси́дстей, / любо́вию благоче́стия па́че, / не́жели пла́менем, опаля́еми, взыва́ху: / благослове́н еси́ в хра́ме сла́вы Твоея́, Го́споди.

Благовещения, Успения, Введения и Вознесения:

Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

В неделю Ваий:

Спасы́й во огни́ авраа́мския Твоя́ о́троки / и халде́и уби́в, / я́же Пра́вда пра́ведно уловля́ше, / препе́тый Го́споди, Бо́же оте́ц на́ших, / благослове́н еси́.

В неделю 8-ю:

Согла́сная возшуме́ орга́нская песнь / почита́ти златосотворе́нный безду́шный истука́н; / Уте́шителева же Светоно́сная Благода́ть почеству́ет, / е́же вопи́ти: / Тро́ице Еди́ная, Равноси́льная, Безнача́льная, благослове́на еси́.

Осмогласника:

Ю́ноши три в Вавило́не, / веле́ние мучи́телево на бу́йство прело́жше, / посреде́ пла́мене вопия́ху: / благослове́н еси́, Го́споди, / Бо́же оте́ц на́ших.

О́бразу злато́му не поклони́вшеся, о́троцы авраа́мстии / искуша́хуся, я́ко зла́то в горни́ле, / в пещи́ о́гненней, я́ко в черто́зе све́тлем, / ликова́ху, пою́ще: / благослове́н еси́, Бо́же оте́ц на́ших.

Преображения:

Авраа́мстии иногда́ в Вавило́не о́троцы / пе́щный пла́мень попра́ша, / пе́сньми взыва́юще: / оте́ц на́ших Бо́же, / благослове́н еси́.

В пещи́ о́троки неопа́льны соблю́дшаго / и огнь угаси́вшаго, воспое́м, глаго́люще: / благослове́н еси́, Бо́же оте́ц на́ших.

Халде́йскую пещь дре́вле А́нгел, снизше́д, ороси́, / в Вавило́не о́троцы сего́ ра́ди поя́ху: / оте́ц на́ших Бо́же, благослове́н еси́.

В нача́ле Безнача́льное Сло́во, / со Отце́м и Ду́хом / Сын Единоро́дный, / благослове́н еси́, / и превозноси́мый Бо́же оте́ц на́ших.

Заве́т Твой помяну́вый, / Христе́ Бо́же, / о́троки из пла́мене изба́вил еси́ / А́нгеловым снизхожде́нием, /Еди́не и́стинно Препросла́вленный.

Халде́йския пе́щи о́троцы небрего́ша, / И́мене ра́ди Твоего́, Спа́се, / и, игра́юще, взыва́ху: / благо слове́н еси́, / Бо́же оте́ц на́ших.

Огнь, паля́ в пещи́, истряса́шеся, / о́троцы ороша́хуся / и, пою́ще, глаго́лаху: / благослове́н еси́, Еди́н Сый / Бо́же оте́ц на́ших.

Оте́ц на́ших Бо́же, не посрами́ нас, / но да́руй нам со дерзнове́нием вопи́ти Тебе́: / благослове́н еси́, Бо́же оте́ц на́ших.

Благослове́н еси́, Бо́же, / в пещи́ о́троцы испове́даху, / А́нгела же слы́шаху, / вопию́ща к ним: / се услы́шася моле́ние ва́ше.

Не преда́ждь нас до конца́ И́мене Твоего́ ра́ди, / и не разори́ Заве́та Твоего́, / и не отста́ви ми́лости Твоея́ от нас, / Го́споди Бо́же оте́ц на́ших, / препе́тый во ве́ки.

Авраа́мстии о́троцы вавило́нский пла́мень попра́ша, / прообразу́юще в нем Де́вы чу́до, / Его́же Симео́н прие́м, возра́довася, вопия́: / ны́не отпуща́еши раба́ Твоего́, / отце́в Бо́же.

Тя, живопису́ющий ассири́йский пла́мень / ю́ноши три спасе́, Го́споди, / я́коже и Де́ву не опали́, Отрокови́цу, / в Боже́ственном Рождестве́ Твое́м Боже́ственная Искра́, / препе́тый отце́в Бо́же, благослове́н еси́.

Глаго́лавый на горе́ с Моисе́ом / и о́браз де́вства явле́й в купине́, / благослове́н еси́, Бо́же оте́ц на́ших.

Песнь 8

Ру́це распросте́р, Дании́л / львов зия́ния в ро́ве затче́; / о́гненную же си́лу угаси́ша, / доброде́телию препоя́савшеся, / благоче́стия рачи́тели, / о́троцы, взыва́юще: / благослови́те, вся дела́ Госпо́дня, Го́спода.

Благовещения, Успения и Вознесения:

О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Введения:

Слы́ши, Отрокови́це, Де́во Чи́стая, / да рече́т у́бо Гаврии́л / сове́т Вы́шняго дре́вний, и́стинный: / бу́ди к прия́тию гото́ва Бо́жию, / Тобо́ю бо Невмести́мый с челове́ки поживе́. / Тем и, ра́дуяся, вопию́: / благослови́те, вся дела́ Госпо́дня, Го́спода.

В неделю Ваий:

Весели́ся, Иерусали́ме, / торжеству́йте, лю́бящии Сио́на: / ца́рствуяй бо во ве́ки Госпо́дь Сил прии́де. / Да благогове́ет вся земля́ от лица́ Его́ и да вопие́т: / благослови́те, вся дела́ Госпо́дня, Го́спода.

В неделю 8-ю:

Разреша́ет у́зы и ороша́ет пла́мень / Трисве́тлый Богонача́лия о́браз, пою́т о́троцы, / благослови́т же еди́наго Спа́са и Вседе́теля / я́ко Благоде́теля / сотворе́нная вся́ческая тварь.

Осмогласника:

Изба́вителю всех, Всеси́льне, / посреде́ пла́мене благоче́ствовавшия, / снизше́д, ороси́л еси́ / и на учи́л еси́ пе́ти: / вся дела́, благослови́те, по́йте Го́спода.

Во огни́ пла́меннем предстоя́т Тебе́ / Херуви́ми, Серафи́ми, Го́споди, / и вся тварь песнь Тебе́ пое́т кра́сную: / по́йте, благослови́те, лю́дие, превозноси́те Христа́, / Еди́наго Соде́теля, во вся ве́ки.

На Кресте́ пло́тию пригвожде́ннаго / и показа́вшаго нам ору́жие во спасе́ние, / о́троцы, превозноси́те Христа́, Бо́га на́шего, во ве́ки.

Вся́ческая нося́й непристу́пною Твое́ю си́лою, Христе́, / преподо́бныя Твоя́ о́троки в пла́мени ороси́л еси́, зову́щия: / благослови́те, вся дела́ Госпо́дня, Го́спода.

Во о́бразе А́нгела, / я́вльшагося в пещи́ о́гненней песносло́вцем, / Христа́ Бо́га по́йте, о́троцы, / свяще́н ницы, благослови́те, / лю́дие, превозноси́те во вся ве́ки.

Песнь но́вую пои́м, лю́дие, / соше́дшему на зе́млю спасти́ ны, / во́лею бо на Кресте́ пригвозди́ся Госпо́дь, / показа́вый язы́ком, / я́ко Ада́ма ра́ди / в ра́бий о́браз облече́ся / в Вы́шних Живы́й во ве́ки.

Ра́дующеся по осужде́нии мучи́тельском о́троцы, / я́ко да не бого́м скве́рным послу́жат всем, / но живо́му Бо́гу, / на огнь дерзну́ша, / от А́нгела же ороша́еми, песнь поя́ху: / дела́ Госпо́дня, Го́спода по́йте / и превозноси́те во вся ве́ки.

Преображения:

В Вавило́не о́троцы, / Боже́ственною распала́еми ре́вностию, / мучи́теля и пла́мене преще́ние му́жески попра́ша / и, посреде́ огня́ вве́ржени, ороша́еми, поя́ху: / благослови́те, вся дела́ Госпо́дня, Го́спода.

Вся́ческая, Влады́ко, прему́дростию соста́вил еси́, / земли́ же па́ки утверди́л еси́, я́коже ве́си, дно, / основа́нием водрузи́вый на вода́х безме́рных. / Тем вси вопие́м, воспева́юще: / благослови́те, дела́ Госпо́дня, непреста́нно Го́спода.

Царя́ Христа́, Его́же испове́даша плене́ннии о́троцы, / в пещи́ глаго́люще ве́лиим гла́сом: / вся дела́, по́йте Го́спода.

Просте́ршаго Бо́га Не́бо, я́ко ко́жу, / и основа́вшаго зе́млю на утвержде́нии ея́, / свяще́нницы Госпо́дни и раби́ Госпо́дни, / Го́спода по́йте / и превозноси́те во вся ве́ки.

Земля́, и вся, я́же на ней, / мо́ре и вси исто́чницы, / Небеса́ небе́с, / свет и тьма, мраз и зной, / сы́нове челове́честии, / свяще́нницы, благослови́ те Го́спода / и превозноси́те Его́ во ве́ки.

Вся дела́ Бо́жия и вся тварь, благослови́те Го́спода, / преподо́бнии и смире́ннии се́рдцем, по́й те Его́ / и превозноси́те во вся ве́ки.

Вся дела́ Бо́жия и вся тварь, / благослови́те Го́спода, / я́ко челове́ком от земли́ возсия́ Свет, / и вселе́нную всю просвети́, / и жизнь ве́чную ми́ру дарова́, / по́йте, лю́дие, / и превозноси́те Его́ во ве́ки.

Великоимени́тый пла́мень, / плене́нных чи́стым соедини́вшийся телесе́м, / росода́тельный показа́ся, / мучи́тельнаго злохуле́ния сопротивобо́жный истука́н указа́вше, / Боже́ственным снизхожде́нием / ю́ношам пою́щим: / созда́нная, созда́вшаго Бо́га благослови́те, / я́ко Зижди́теля всех, / непреста́нно во ве́ки.

На Престо́ле Херуви́мстем носи́маго Бо́га / и призира́ющаго на смире́нныя / Симео́н я́ко Младе́нца / во объя́тиих но́сит во хра́ме; / Его́же благословя́т творе́ния вся во ве́ки.

Находя́щия в пла́мени / беззако́ннаго мучи́теля веле́нием о́троки подража́юще, / немо́лчными устна́ми / в Вы́шних похва́льно возопии́м: / Бла́же, преесте́ственно сый Пресвяты́й, / пою́щия Тя / све́том у́мным Твои́м озари́.

В пещи́ о́гненней в Вавило́не / о́троки евре́йския спа́сшаго Бо́га, свяще́нницы, благослови́те, / лю́дие, превозноси́те Его́ во ве́ки.

В пла́мень снизше́дшаго / песносло́вцем Сио́нским зра́ком а́нгельским, / о́троцы, превозноси́те Христа́ Бо́га на́шего во ве́ки.

Песнь 9

Ка́мень нерукосе́чный / от несеко́мыя горы́, Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем, веселя́щеся, Тя, Богоро́дице, велича́ем.

На праздники Богородичны и Вознесения:

Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное *торжество́* Богома́тере, / и да вопие́т: / ра́дуйся, Всеблаже́нная, Богоро́дице, / Чи́стая Присноде́во.

Успения ирмос тойже: *преставле́ние*

Благовещения:

Я́ко одушевле́нному Бо́жию Киво́ту, / да ника́коже ко́снется рука́ скве́рных, / устне́ же ве́рных Богоро́дице немо́лчно, / глас А́нгела воспева́юще, с ра́достию да вопию́т: / *ра́дуйся, Благода́тная, Госпо́дь с Тобо́ю *.

Введения ирмос тойже: *и́стинно вы́шши всех еси́, Де́во Чи́стая *.

В неделю Ваий:

Бог Госпо́дь и яви́ся нам, / соста́вите пра́здник / и, веселя́щеся, прииди́те, возвели́чим Христа́, / с ва́иами и ве́твьми пе́сньми зову́ще: / благослове́н гряды́й во И́мя Го́спода, Спа́са на́шего.

В неделю 8-ю:

Ра́дуйся, Цари́це, / матероде́вственная Сла́во, / вся́ка бо удобообраща́тельная благоглаго́ливая уста́ / вити́йствовати не мо́гут, / Тебе́ пе́ти досто́йно, / изумева́ет же ум всяк Твое́ Рождество́ разуме́ти. / Те́мже Тя согла́сно сла́вим.

Осмогласника:

Е́ва у́бо неду́гом преслуша́ния / кля́тву всели́ла есть; / Ты же, Де́во Богоро́дице, / прозябе́нием чревоноше́ния ми́рови Благослове́ние процвела́ еси́. / Тем Тя вси велича́ем.

Сокрове́нное Бо́жие неизрече́нное / в Тебе́ соверша́ется я́вственное та́инство, / Де́во Пречи́стая, / и́бо Бог из Тебе́ воплоти́ся за милосе́рдие. / Те́мже Тя я́ко Богоро́дицу велича́ем.

Сотвори́ держа́ву мы́шцею Свое́ю, / низложи́ бо си́льныя со престо́л / и вознесе́ смире́нныя Бог Изра́илев. / В ни́хже посети́ нас Восто́к с высоты́ / и напра́вил ны есть на путь ми́ра.

Тя, Невмести́мое Сло́во во утро́бу вмести́вшую, / Небе́с простра́ннейшую / и Херуви́мов сла́внейшую, / Богоро́дице Чи́стая, / пе́сньми велича́ем.

Тя, Пресла́вную Неве́сту / и Всесвяту́ю Богоро́дицу, / Зижди́теля ро́ждшую / неви́димых же и всех ви́димых, / пе́сньми велича́ем.

Тя, Неискусобра́чную Богоро́дицу, Небе́сный черто́г, / ро́ждшую Нача́льника спасе́ния на́шего, / пе́снь ми велича́ем.

Го́рнейшая преми́рных умо́в / и многообра́зных Херуви́мов вы́шшая, / Пречи́стая Ма́ти Бо́жия, / Созда́теля зачала́ еси́, / Ты бо во тва́ри влады́чествуеши все́ми. / Те́мже пе́сньми Богоро́дицу, / ве́рнии, Тя велича́ем.

Преображения:

Рождество́ Твое́ нетле́нно яви́ся: / Бог из боку́ Твое́ю про́йде, / я́ко Плотоно́сец яви́ся на земли́ / и с челове́ки поживе́. / Тя, Богоро́дице, тем вси велича́ем.

От земноро́дных ро́ждшися и Творца́ ро́ждшая, / на́ша похвало́, Богоро́дице Чи́стая: / Тя я́ко влады́чествующую тва́рьми, велича́ем.

Велича́ем вси человеколю́бие Твое́, / Христе́, Спа́се наш, / Сла́во раб Твои́х / и Ве́нче ве́рных, / возвели́чивый па́мять Ро́ждшия Тя.

Безсе́менное Рождество́ Твое́, Богоро́дице Чи́стая, / Христа́ Бо́га на́шего / пе́сньми немо́лчными велича́ем.

Тя, я́ко село́ Пречи́стаго Сло́ва, / и прия́телище Ду́ха, / и Благоволе́ния де́лателище пое́м, / в Тебе́ бо соизмене́ние / спасе́ния на́шего соде́лася.

Огнеро́сную дре́вле пещь халде́йскую / и огне́м неопа́льным купину́ в Сина́и, / Богоро́дицу вси пе́сньми велича́ем.

Я́ко сотвори́ мне вели́чия Си́льный, / и свя́то И́мя Его́, / и ми́лость Его́ в род и род боя́щимся Его́.

Де́ва, му́ченица многострада́льческая, / де́вы Ма́терь многопе́тую, / днесь в Ея́ черто́г приходя́щую, учрежда́ет: / невестокраси́тели вси, лику́им оте́ческая, / благоче́стно Цари́цу велича́юще.

Тя, па́че вся́кия мы́сли / Ма́терь, Де́ву, Отрокови́цу, Безневе́стная, / Спа́са и Бо́га неизрече́нным сло́вом ро́ждшую, / по до́лгу, ве́рнии вси, / благоче́стно велича́ем.

Непостижи́мое Рождество́ рожде́ния Твоего́, / несказа́нное бога́тство чистоты́ Твоея́, / по Рождестве́ бо де́вствуеши еди́на от жен, / я́ко ро́ждшая Творца́ Своего́ / и рог спаси́тельный ве́рным возвы́сившаго – честны́й Крест, / в Не́мже спа́сшеся Тобо́ю, / Богоро́дицу вои́стинну велича́ем.

Твою́ пречи́стую и нетле́нную утро́бу, / Де́во Богоро́дице, / Бо́жие Бог Сло́во / освяти́вый це́лу со блюде́, / из нея́же, проше́д, четыредесятодне́вный Младе́нец яви́ся, / И́же прино́сится я́ко Зако́на Творе́ц и Законода́тель, / Его́же велича́ем.

В Тебе́, Богоро́дице, на́ше умале́ние преста́, / неви́димое бо Сло́во / во утро́бе Твое́й прие́мшая, / сугу́ба Того́ родила́ еси́, / Бо́га вку́пе и Челове́ка, / на Него́же Херуви́ми воззре́ти не дерза́ют; / те́мже Тя велича́ем, Пречи́стая.

По Рождестве́ Тя, Чи́стая, / и пре́жде Рождества́, /и в Рождестве́ пречи́стая, / вся тварь, пропове́дающи, / я́ко Богоро́дицу и́стинную велича́ем.

Пое́м Тя, Пресвята́я Де́во / Ма́ти сла́вная, / я́ко прозябла́ еси́ Небе́сный Клас – Христа́ Бо́га / па́че вся́кия мы́сли, / от Тебе́ Хлеб бысть Живоно́сный ве́рным. / Тем Ти зове́м: ра́дуйся, Непоро́чная, / пребы́вшая Де́ва по Рождестве́ Чи́стая.

Моисе́й на горе́ неопали́мую купину́ ви́де, / Ио́сиф в верте́пе неизрече́нное Рождество́ слы́ша, / Нескве́рная Де́во, / Безму́жная Ма́ти, / пе́снь ми Тя, Богоро́дице, велича́ем.

Ирмосы 5-го гласа

Песнь 1

Коня́ и вса́дника в мо́ре Чермно́е / сокруша́яй бра́ни мы́шцею высо́кою / Христо́с истрясе́, Изра́иля же спасе́, / побе́дную песнь пою́ща.

Вознесения:

Спаси́телю Бо́гу, / в мо́ри лю́ди немо́крыми нога́ ми наста́вльшему / и фарао́на со всево́инством пото́пльшему, / Тому́ Еди́ному пои́м, я́ко просла́вися.

Осмогласника:

Пои́м Го́сподеви, / сотво́ршему ди́вная чудеса́ в Чермне́м мо́ри, / песнь побе́дную, / я́ко просла́вися.

Зе́млю, на ню́же не возсия́, ни ви́де со́лнце когда́, / бе́здну, ю́же не ви́де на́гу широта́ Небе́сная, / Изра́иль про́йде невла́жно, Го́споди, / и ввел еси́ его́ в го́ру святы́ни Твоея́, / хва́ляща и пою́ща побе́дную песнь.

Песнь побе́дную принесе́м, лю́дие, / изба́вльшему Бо́гу / из рабо́ты фарао́новы Моисе́йския лю́ди, / сла́вно бо просла́вися.

Пои́м Спаси́телю всех, / во́льным хоте́нием / на Дре́ве пригвозди́вшемуся / и мир просвети́вшему.

Христо́с яви́ся на земли́, / изба́вивый род наш от идоло неи́стовства: / Тому́ Еди́ному пои́м, / я́ко просла́вися.

Пои́м Го́сподеви ди́вному, / я́ко от го́рькия / свободи́вый рабо́ты Изра́иля, / фарао́на со всево́инством погрузи́.

Пешеше́ствуяй Изра́иль непроходи́мую стезю́ / повеле́нием Влады́чним, / ра́дуяся, поя́ше: / Го́сподеви пои́м, сла́вно бо просла́вися.

Велича́ваго фарао́на в мо́ри потопи́вша / со ору́жием и вса́дники, / Изра́иля же пресла́вно спа́сша и по су́ху прове́дша, / пое́м Христа́, я́ко просла́вися.

Песнь 2

Вонми́, не́бо, и возглаго́лю, / и воспою́ Христа́, / нас ра́ди от Де́вы воплоти́вшагося / и тлю и смерть стра́стию разори́вшаго.

Во вторник 6-я седмицы Поста:

Ви́дите, ви́дите, я́ко Аз есмь Бог, / в плоть облеки́йся во́лею Свое́ю, / да спасу́ Ада́ма, / от ле́сти па́дшаго в преступле́ние зми́ем.

Ви́дите, ви́дите, я́ко Аз есмь Бог ваш, / в мо́ри спасы́й лю́ди и в пусты́ни препита́вый я́, / и Челове́к быв, / да спасу́ род челове́ческий.

Ви́дите, ви́дите, я́ко Аз есмь Бог, / об он пол Иорда́на обходя́й, / услы́шав, я́ко Ла́зарь боли́т, и рек: / я́ко не умира́ет, но есть сие́ о сла́ве Мое́й.

Песнь 3

Водрузи́вый на ничесо́мже зе́млю повеле́нием Твои́м / и пове́сивый неодержи́мо тяготе́ющую / на недви́жимем, Христе́, ка́мени за́поведей Твои́х, / Це́рковь Твою́ утверди́, Еди́не Бла́же и Человеколю́бче.

Вознесения:

Си́лою Креста́ Твоего́, Христе́, / утверди́ мое́ помышле́ние, / во е́же пе́ти и сла́вити / спаси́тельное Твое́ Вознесе́ние.

Осмогласника:

Утверди́ ны, Бо́же, / Твое́ю си́лою, / и низложи́ ерети́ческая шата́ния, / и вознеси́ рог наш.

Над язы́ки Бог воцари́ся, / Бог седи́т на Престо́ле Святе́м Свое́м, / и пое́м Ему́ разу́мно / я́ко Царю́ и Бо́гу.

Утверди́ мя, Го́споди, / в житии́ обурева́ема, / и ру́ку мне простри́, / я́ко Всеси́лен.

Дви́жимое се́рдце мое́, Го́споди, / волна́ми жите́йскими, / утверди́ в приста́нище ти́хое, / наставля́я я́ко Бог.

На ка́мени за́поведей Твои́х коле́блющагося мя утверди́, / вознеси́ рог мой в ра́зуме повеле́ний Твои́х, / да, хваля́ся, вопию́ Тебе́: / несть свят, па́че Тебе́, Го́споди Сил.

Несть свят, я́ко Госпо́дь, / и несть пра́веден, я́ко Бог мой, / вознесы́й рог наш / и дая́й кре́пость царе́м на́шим.

Утверди́ мя, Еди́не Ще́дре, / си́лою Креста́ Твоего́, им бо хвалю́ся, / я́ко несть свят, па́че Тебе́, Го́споди.

Утвержде́ние мое́ бу́ди и прибе́жище, Спа́се, / и Ца́рствия Твоего́ сподо́би, Сло́ве, / и́стинным се́рдцем испове́дающия, Влады́ко, / Боже́ственное Твое́ воплоще́ние.

Утвержде́ние притека́ющих к Тебе́, Христе́ Бо ́же, / мою́ мысль утверди́ / Твои́м человеколю́бием / и к позна́нию возведи́ за́поведей Твои́х, Всеси́льне.

Утверди́ ны, Бо́же Спа́се, / Твое́ю си́лою / и воздви́г ни рог Твоея́ Це́ркве, / правове́рно хва́лящих Тя.

Держа́вною руко́ю и си́льным сло́вом / Не́бо и зе́млю сотвори́л еси́, / ю́же Твое́ю Кро́вию искупи́л еси́, Це́рковь Твою́, / я́же о Тебе́ утвержда́ется, зову́щи: / я́ко несть свят, ра́зве Тебе́, Го́споди.

Песнь 4

Боже́ственное Твое́ разуме́в истоща́ние прозорли́во, / Авваку́м, Христе́, со тре́петом вопия́ше Тебе́: / во спасе́ние люде́й Твои́х / спасти́ пома́занныя Твоя́ прише́л еси́.

Вознесения:

Услы́шах слух си́лы Креста́, / я́ко рай отве́рзеся им, / и возопи́х: / сла́ва си́ле Твое́й, Го́споди.

Осмогласника:

Дела́ смотре́ния Твоего́, Го́споди, / ужаси́ша проро́ка Авваку́ма, / изше́л бо еси́ на спасе́ние люде́й Твои́х, / спасти́ пома́занныя Твоя́ прише́л еси́.

Услы́шах, Го́споди, / слух Твой и убоя́хся; / разуме́х смотре́ние Твое́ / и просла́вих Тя, / Еди́не Человеколю́бче.

Услы́шах слух / си́лы Госпо́дни / и просла́вих, Чело веколю́бче, / непостижи́мую Твою́ си́лу.

Услы́шах, Го́споди, / из Гро́ба Твое́ воста́ние / и просла́вих Твою́ непобеди́мую си́лу.

Боже́ственную явле́ния Твоего́ добро́ту проро́к прови́дя / и снизхожде́нию ужаса́яся воплоще́ния, Христе́, предвозгласи́: / от ю́га прии́дет Госпо́дь, / очище́ние ми́рови да́руяй.

От горы́ ча́щныя прише́ствие Твое́ услы́шав, / проро́к вопия́ше: / сла́ва неизрече́нному воплоще́нию Твоему́.

Проро́к Авваку́м, прови́дя Тя, Христе́, / благода́рным гла́сом воспропове́даше, вопия́: / слух Твой услы́шах и убоя́хся, / дела́ Твоя́ вся разуме́х и ужасо́хся, Го́споди.

Смотре́ния Твоего́ та́инство разуме́в Авваку́м, / та́йно схожде́ние прише́ствия Твоего́ напису́яй, взыва́ше: / внегда́ прии́дет вре́мя, Го́споди, яви́шися.

Услы́шах слух Твой и убоя́хся; / разуме́х дела́ Твоя́ / и диви́хся, Го́споди.

Ду́хом Бо́жиим очи́щся проро́к, / дыха́ющим в нем, Авваку́м Боже́ственный, боя́ся, глаго́лаше: / внегда́ прибли́жатся ле́та, позна́н бу́деши, Бо́же, / на спасе́ние челове́ков.

Песнь 5

Одея́йся Све́том, я́ко ри́зою, / к Тебе́ у́тренюю и Тебе́ зову́: / ду́шу мою́ просвети́ омраче́нную, Христе́, / я́ко Еди́н Благоутро́бен.

Вознесения:

У́тренююще, вопие́м Ти: / Го́споди, спаси́ ны, / Ты бо еси́ Бог наш, / ра́зве бо Тебе́, ино́го не зна́ем.

Осмогласника:

От но́щи покланя́ющияся Тебе́, Христе́, / поми́луй и мир да́руй, / зане́, свет, повеле́ния Твоя́ / бы́ша исцеле́ния рабо́м Твои́м, Человеколю́бче.

Све́те И́стинный, Христе́ Бо́же, / к Тебе́ у́тренюет дух мой от но́щи, / яви́ на мя лице́ Твое́.

Окая́нную ду́шу мою́, нощеборю́щуюся со тьмо́ю страсте́й, / предвари́в, уще́дри / и возсия́й мы́сленное со́лнце днесве́тлыя звезды́ во мне, / во е́же раздели́ти нощь от све́та.

Пра́вды Со́лнце У́мное, просвети́ мя, / но́щию страсте́й содержи́маго, / и наста́ви к Боже́ственней стези́, / я́ко Еди́н еси́ ми́ра Царь.

Не паде́м, но паду́т в паде́нии о́браза Твоего́, Богоро́дице, укори́телие, / да во́змутся от среды́ нас, / да не ви́дят сла́ву Твою́ неразуме́ющии, / зане́ свет и мир Твоего́ Сы́на повеле́ния.

Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем, / возсия́й на вся Свет.

Пра́вде научи́теся, живу́щии на земли́, / и ум очи́стим, воздви́женным се́рдцем / к ще́дрому Бо́гу / от но́щи у́тренююще.

Све́та Непристу́пнаго, Христе́, Живота́ Ве́чнаго, / от но́щи у́тренююще, / пое́м Тя, еди́наго Светода́вца Бо́га.

Возсия́й, Христе́ Бо́же, / свет ра́зума Твоего́, / и просвети́ сердца́ на́ша, / и спаси́ ду́ши на́ша.

Сло́во Бо́жие Всеси́льное, / мир всему́ ми́ру посли́ / и све́том и́стинным освеща́я и просвеща́я вся, / из но́щи Тя сла́вящия.

Песнь 6

Неи́стовствующееся бу́рею душетле́нною, / Влады́ко Христе́, страсте́й мо́ре укроти́ / и от тли возведи́ мя, / я́ко Благоутро́бен.

Вознесения:

Обы́де мя бе́здна, / гроб мне кит бысть, / аз же возопи́х к Тебе́, Человеколю́бцу, / и спасе́ мя десни́ца Твоя́, Го́споди.

Осмогласника:

От ки́та проро́ка изба́вил еси́, / мене́ же из глубины́ грехо́в / возведи́, Го́споди, и спаси́ мя.

Я́коже проро́ка от зве́ря изба́вил еси́, Го́споди, / и мене́ из глубины́ несодержи́мых страсте́й / возведи́, молю́ся, / да приложу́ призре́ти ми ко хра́му свято́му Твоему́.

Бу́ря содержа́ мя, Спа́се, грехо́вная, / и ду́шу мою́ низво́дит в душетли́тельную глубину́, / но, я́ко дре́вле Ио́ну, Христе́, возведи́, / я́ко да пожру́ Ти и аз со гла́сом хвале́ния.

От чре́ва а́дова / во́пля моего́ услы́шал еси́ глас мой / и изба́вил еси́ от тли живо́т мой, / Многоми́лостиве.

Возопи́ от после́дних Ада́м: / Бо́же мой, изба́ви мя, па́дшаго, / и, уподо́бився, прииди́, / во е́же спасти́ ны.

Во глубины́ отве́ргся морски́я, / от нужд мои́х изба́ви мя, / я́коже от ки́та возве́л еси́ проро́ка Ио́ну, / та́ко и мене́, молю́ся, / предвар́ив, спаси́ от жите́йских зол.

В ки́тово чре́во подше́дый, Ио́на / не растле́ся, Влады́ко, Твои́м повеле́нием, / но проображе́ние бысть тридне́внаго Твоего́ погребе́ния, / тем Ти взыва́ше: / да взы́дет от тли живо́т мой к Тебе́, Го́споди.

Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой.

Возопи́х в печа́ли мое́й, Спа́се мой, молю́ся: / изба́ви мя от обдержа́щия мя боле́зни и озлобле́ния, / я́ко Ми́лостив, / помяну́в Твою́ ми́лость.

В Це́рковь Небе́сную Святу́ю Твою́ да прии́дет моли́тва моя́, / вопию́ Ти, я́ко Ио́на, из глубины́ се́рдца морска́го: / от грех мои́х возведи́ мя, / молю́ся Тебе́, Го́споди.

Песнь 7

Превозноси́мый отце́в Госпо́дь / пла́мень угаси́, о́троки ороси́, / согла́сно пою́щия: / Бо́же, благослове́н еси́.

Вознесения:

В пещи́ о́гненней / песносло́вцы спасы́й о́троки, / благослове́н Бог оте́ц на́ших.

Осмогласника:

Огня́ гаси́лище – отроко́в моли́тва, / ороша́ющая пещь, пропове́дница чудесе́, / не опаля́ющи, ниже́ сожига́ющи / песносло́вцы Бо́га оте́ц на́ших.

Благослове́н еси́, Бо́же, / ви́дяй бе́здны / и на Престо́ле Сла́вы седя́й, / препе́тый и пресла́вный.

Пещь угаси́вый в Вавило́не о́гненную /и о́троки в ней, я́ко в черто́зе, сохрани́вый, / благослове́н еси́, Бо́же оте́ц на́ших.

Прехва́льно есть и препросла́влено И́мя Твое́, / Го́споди, Бо́же оте́ц на́ших, во вся ве́ки, / и препросла́влен, я́ко пра́веден еси́ о всех, / я́же сотвори́л еси́ нам.

О́троки в пещи́ А́нгелом сохрани́вый, / провозвеща́я и́ми ро́ждшую Тя / нетле́нную Де́ву, / благослове́н еси́, Бо́же оте́ц на́ших.

Ороша́емая пещь и я́рость мучи́тельная / благо чести́выя не устраши́ о́троки, / де́рзостно вопию́щия: / благослове́н еси́, Бо́же оте́ц на́ших.

А́нгелом о́троки спасы́й / и гремя́щую пещь преложи́вый в ро́су, / благослове́н еси́, Го́споди.

Тро́ицы сла́ву Богочести́вии изобрази́вше, / о́троцы пещь, дре́вле огне́м пали́мую, в ро́су преложи́ша / и, пою́ще, поя́ху: / благослове́н еси́, Бо́же оте́ц на́ших.

Пла́мень пе́щный порабо́тиша благочести́вии о́троцы, / тем свы́ше ороси́ я́, гото́вы пали́мы по естеству́, / но па́че естества́ му́жески поя́ху: / благослове́н еси́, Го́споди, / на Престо́ле Сла́вы Ца́рствия Твоего́.

Песнь 8

Тебе́, Вседе́телю, / в пещи́ о́троцы, всеми́рный лик спле́тше, поя́ху: / дела́ вся́кая, Го́спода по́йте / и превозноси́те во вся ве́ки.

Вознесения:

Из Отца́ пре́жде век рожде́ннаго Сы́на и Бо́га / и в после́дняя ле́та воплоще́ннаго от Де́вы Ма́тере, / свяще́нницы, по́йте, / лю́дие, превозноси́те во вся ве́ки.

Осмогласника:

Творца́ тва́ри, / Его́же ужаса́ются А́нгели, / по́йте, лю́дие, / и превозноси́те во вся ве́ки.

А́нгелов сонм, челове́ков собо́р, / Царя́ и Зижди́теля всех, / свяще́нницы, по́йте, благослови́те, леви́ти, / лю́дие, превозноси́те во вся ве́ки.

Всех Соде́теля / и Спа́са душ на́ших, / свяще́н ницы, благослови́те, / лю́дие, превозноси́те Его́ во ве́ки.

Преподо́бнии Твои о́троцы в пещи́, Христе́, / воспева́юще, глаго́лаху: / благослови́те, вся дела́ Госпо́дня, Го́спода.

Оте́ческое веле́ние му́дрствующе ю́ноши три в Вавило́не, / безбо́жному веле́нию благоче́стно не покаря́ющеся, / посреде́ осужде́ния о́гненнаго стоя́ще, вопия́ху: / благослови́те, вся дела́ Госпо́дня, Го́спода.

Зижди́телю всех Богоно́снии о́троцы / в пещи́ песнь приноша́ху / и, пою́ще, вопия́ху: / благослови́те, вся дела́ Госпо́дня, Го́спода.

Ороси́вшаго пещь и о́троки Сохра́ншаго посреде́ горя́щаго пла́мене, / о́троцы, славосло́вите, / свяще́нницы, благослови́те, / лю́дие, превозноси́те во вся ве́ки.

От Отца́ рожде́ннаго пре́жде век / Бо́га Сло́ва / по́йте, свяще́нницы, / лю́дие, превозноси́те во вся ве́ки.

Царя́ Христа́, Его́же пою́т Херуви́ми / и сла́вят Серафи́ми, / по́йте, лю́дие, / и превозноси́те во вся ве́ки.

Кре́пции о́троцы трие́ су́ще, / си́лою обо́лкшеся Святы́я Тро́ицы, / улови́ша и победи́ша халде́и, / и ди́вно измени́ся естество́: / ка́ко огнь в ро́су прелага́шеся? / Без туги́ я сохрани́, я́ко пелена́ми, / о пролия́вый му́дрость на всех де́лех Твои́х, Бо́же, / Тя превозно́сим во ве́ки.

Песнь 9

Иса́ие, лику́й, Де́ва име́ во чре́ве / и роди́ Сы́на Емману́ила, / Бо́га же и Челове́ка, Восто́к и́мя Ему́, / Его́же велича́юще, Де́ву ублажа́ем.

Вознесения:

Тя, па́че ума́ и словесе́ Ма́терь Бо́жию, / в ле́то Безле́тнаго / неизрече́нно ро́ждшую, / ве́рнии, единому́дренно велича́ем.

Осмогласника:

Тя, блаже́нную в жена́х / и благослове́нную Бо́гом, / челове́ческий род, / пе́сньми велича́ем.

Я́ко сотвори́ Тебе́ вели́чия Си́льный, / Де́ву явль Тя чи́сту по рождестве́, / я́ко ро́ждшую без се́мене Своего́ Творца́, / тем Тя, Богоро́дице, велича́ем.

Велича́ем, Христе́, / Твою́ Всенепоро́чную Ма́терь Чи́стую, / я́ко роди́ Тя преесте́ственно пло́тию, / от вся́кия льсти и тли нас избавля́яй.

Чре́во Твое́ яви́ся ши́ршее Небе́с, / и сла́вншая еди́на яви́лася еси́, / чуде́с превы́шшая еди́на показа́лася еси́, Богоро́дице, / ро́ждшая Невмести́маго и Присносу́щнаго Бо́га, / по до́лгу Тя, челове́ческий род, / непреста́нно велича́ем.

О, чу́до! / и́бо чу́до, соверша́емое в Тебе́, Богоро́дице: / обновля́ется естество́, и Бог Челове́к быва́ет, / и во дву естеству́, Богосло́вяще, велича́ем.

Тя, Бо́жию Ма́терь, и Де́ву Чи́стую, / и Херуви́мов сла́вншую, / во гла́сех пе́сней велича́ем.

Жезл, прозя́бший от ко́рене Дави́дова, Богоро́дице Всепе́тая, / Цвет красне́йший нам возсия́ла еси́, / дре́вняго вино́вный блаже́нства. / Тем Тя вси пе́сньми велича́ем.

Тя, рабу́ и Ма́терь / Христа́ Бо́га на́шего, / Богоро́дице, / досто́йно велича́ем.

Тя, неизрече́нным сло́вом / Созда́теля заче́ншую во чре́ве, велича́ем, / Ра́дость бо ро́ждшая, / Живо́т всем дарова́ла еси́, Всеблаже́нная.

Тя, Неискусому́жную Неве́сту, / Ма́терь Сло́ва, / Святу́ю Де́ву, велича́ем.

Из Еде́ма изы́де род наш пра́бабы ради Е́вы, / при́зван же Тобо́ю, ро́ждшею нам но́ваго Ада́ма – Христа́, / во двою́ естеству́, Де́во Чи́стая. / Взыгра́ся Ада́м пра́дед, / я́ко избы́в пе́рвыя кля́твы, / мы же, Тобо́ю хва́лящеся, / я́ко Тебе́ ра́ди Бо́га позна́хом, / и Тебе́ велича́ем.

Ирмосы 6-го гласа

Песнь 1

Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на ви́дя потопля́ема, / Бо́гу побе́дную песнь пои́м, вопия́ше.

В Великий Четверток:

Се́ченное, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно безору́жным бы́вши проходи́ма и всеору́жным гроб. / Песнь же Богокра́сная воспева́шеся: / сла́вно просла́вися Христо́с, Бог наш.

В Великую Субботу:

Волно́ю морско́ю / Скры́вшаго дре́вле / гони́теля мучи́теля – / под земле́ю скры́ша спасе́нных о́троцы; / но мы, я́ко отрокови́цы, / Го́сподеви пои́м, сла́вно бо просла́вися.

Осмогласника:

Чу́вственный фарао́н потопле́н бысть со всево́инством, / Изра́иль же, проше́д посреде́ мо́ря, вопия́ше: / Го́сподеви Бо́гу на́шему / пои́м, я́ко просла́вися.

Помо́щник и Покрови́тель / бысть мне во спасе́ние, / Сей мой Бог, / и просла́влю Его́, Бог отца́ моего́, / и вознесу́ Его́, / сла́вно бо просла́вися.

Пои́м Го́сподеви, / от рабо́ты Изра́иля свободи́вшему еги́петския Моисее́м, / песнь непреста́нно, / Христу́, Царю́ и Бо́гу на́шему.

Проше́дше мо́ре сы́нове Изра́илевы / и ви́дяще фарао́на, погруже́на в нем, / благода́рно поя́ху: / Го́сподеви пои́м, сла́вно бо просла́вися.

Воздвиза́емое мо́ре / немо́крыми нога́ми проходя́ дре́вле Изра́иль, / егда́ ви́дяше погружа́ема го́рдаго фарао́на, / ра́достно взыва́ше: / пои́м Го́сподеви, / сотво́ршему сла́вная чудеса́.

Колесни́цы фарао́новы и си́лу его́ / высо́кою мы́шцею Христо́с потопи́, / Изра́иля же спасе́, воспева́юща: / ди́вному Бо́гу на́шему пои́м.

Песнь 2

Вонми́, не́бо, / и возглаго́лю, / и воспою́ Христа́, / от Де́вы пло́тию прише́дшаго.

Ви́дите, ви́дите, я́ко Аз есмь Бог, / ма́нну одожди́вый / и во́ду из ка́мене источи́вый / дре́вле в пусты́ни лю́дем Мои́м / десни́цею еди́ною / и кре́постию Мое́ю.

Вонми́, не́бо, / и возглаго́лю, / и восхвалю́ Христа́, / Еди́наго Человеколю́бца.

Ви́дите, ви́дите, / я́ко Аз есмь Бог ваш, / Кресто́м ад разори́вый, я́ко си́лен, / и безстра́стия стра́стию пло́ти Свое́й источи́вый земны́м.

Песнь 3

Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

В Великий Четверток:

Госпо́дь, Сый, всех и Зижди́тель Бог, / созда́н ное, Безстра́стный, обнища́в, Себе́ соедини́, / и Па́сха, за я́же хотя́ше умре́ти, / Сам, Сый, Себе́ предпожре́: / яди́те,– вопия́,– Те́ло Мое́ / и ве́рою утверди́теся.

В Великую Субботу:

Тебе́, на вода́х / пове́сившаго всю зе́млю неодержи́мо, / тварь, ви́девши на ло́бнем ви́сима, / у́жасом мно́гим содрога́шеся, / несть свят, / ра́зве Тебе́, Го́споди, взыва́ющи.

Осмогласника:

На тве́рдем ве́ры Твоея́ ка́мени / помышле́ние утверди́в души́ моея́, / утверди́, Го́споди, Тя бо и́мам, Бла́же, / прибе́жище и утвержде́ние.

Утверди́, Го́споди, / на ка́мени за́поведей Твои́х / подви́гшееся се́рдце мое́, / я́ко Еди́н Свят еси́ и Госпо́дь.

На недвижи́мом, Христе́, ка́мени за́поведей Твои́х / утверди́ мое́ помышле́ние.

Утверди́, Го́споди, Це́рковь Твою́, / ра́зумом возвы́сивый Небеса́, / во е́же пе́ти пречи́стое Твое́ смотре́ние, / Еди́не Человеколю́бче.

Го́споди, Спа́се мой и Зижди́телю, Бо́же всех, / зе́млю на ничесо́м повеле́нием в нача́ле тя́жестну утверди́вый, / утверди́ и мене́ в ве́ре, / е́же вопи́ти Тебе́ в весе́лии: / Ты моя́ кре́пость и си́ла, / ору́жие и прибе́жище.

Утверди́ мене́, Христе́, / и извести́ мя к Тебе́, / и просвеще́нием ра́зума Твоего́ / научи́ мя.

Разшири́шася на враги́ моя́ уста́ моя́, / я́ко утверди́ся о Го́споде се́рдце мое́.

Тобо́ю, Христе́, Небеса́ утвержда́ема вся, / Сло́во Бо́жие и Си́ла, / испове́дуют сла́ву неизрече́нну / и вседе́тельныя руки́ Твоея́ сотворе́ния, / несть бо пресвя́т, ра́зве Тебе́, Го́споди.

В пе́рсех се́рдца и души́ моея́ зову́ Тебе́, / я́ко проро́чица А́нна, / я́коже о́ной дал еси́ моли́твою Саму́ила, / и мне да́руй, Го́споди, плод покая́ния.

Возвесели́ся непло́ды неражда́ющая, / я́ко прии́де / Изба́витель мой и Бог, / от де́монския пре́лести избавля́яй.

Неизрече́нныя Твоея́ си́лы / и содержи́тельныя всех прему́дрости Твоея́ / устраша́юся, помышля́яй, и вопию́ Ти, Бла́же: / на враги́ да вознесе́тся, Христе́, рог мой.

Песнь 4

Христо́с моя́ си́ла, / Бог и Госпо́дь, / честна́я Це́рковь / Боголе́пно пое́т, взыва́ющи, / от смы́сла чи́ста о Го́споде пра́зднующи.

В Великий Четверток:

Прови́дев проро́к / та́йну Твою́ неизрече́нную, Христе́, провозгласи́: / положи́л еси́ тве́рдую любо́вь кре́пости, / О́тче Ще́дрый, / Единоро́днаго бо Сы́на, Благи́й, / очище́ние в мир посла́л еси́.

В Великую Субботу:

На Кресте́ Твое́ Боже́ственное истоща́ние / прови́дя, Авваку́м, ужа́сся, вопия́ше: / Ты си́льных пресе́кл еси́ держа́ву, Бла́же, / приобща́яся су́щим во а́де, я́ко Всеси́лен.

Осмогласника:

Покры́ла есть Небеса́ / доброде́тель Твоя́, Христе́, / и Твоего́ хвале́ния, Го́споди, / вся испо́лнишася.

Удиви́ся Твой ра́зум от Мене́, / услы́шавшу пресла́вная веле́ния смотре́ния Твоего́, / укрепи́ся же воз любле́нием Твоего́ схожде́ния, / Ты бо моея́ нищеты́ не отве́рглся еси́.

Услы́шах повеле́ния, / презре́х, Го́споди, и, пути́ Твоего́ не сохрани́в, умертви́хся: / Ты мя возста́ви, / Спа́се, наде́ждо моя́, / мене́ ра́ди обнища́вый, / плоть челове́ческую прии́м.

Услы́шах слух Твой / и убоя́хся, / разуме́х дела́ Твоя́ / и ужасо́хся, Го́споди.

Услы́шах слух Твой / и убоя́хся, / разуме́х дела́ Твоя́ и ужасо́хся: / сла́ва си́ле Твое́й, Го́споди.

Услы́ша проро́к прише́ствие Твое́, Го́споди, / и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся; / сла́ва си́ле Твое́й, Го́споди.

Обнови́л еси́ добро́ту Твоего́ о́браза, / к сему́ бо от Оте́ческих соше́л еси́ не́др, / и вопие́м Ти: / сла́ва си́ле Твое́й, Человеколю́бче.

Твоего́ неизрече́ннаго воплоще́ния, Изба́вителю всех, / проро́к Авваку́м очи́стився Ду́хом, / та́инству ужа́с ся, вопия́ше: / внегда́ прибли́жатся ле́та, позна́н бу́деши, / безма́терен от Отца́ / в после́дняя времена́ воплоща́яйся.

Взы́ду на высоту́ хвале́ния Твоего́ / и лю́дем избра́нным благовещу́ упокое́ние от осужде́ния сне́ди, – / проро́к глаго́лаше, / Сло́во бо одебеле́вшее от Де́вы нам яви́ся.

Песнь 5

Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, и́стиннаго Бо́га, / от мра́ка грехо́внаго взыва́юща.

В Великий Четверток:

Сою́зом любве́ связу́еми, апо́столи, / влады́чествующему все́ми себе́ Христу́ возло́жше, / кра́сны но́ги очища́ху, / благовеству́юще всем мир.

В Великий Пяток:

К Тебе́ у́тренюю, / милосе́рдия ра́ди Себе́ истощи́вшему непрело́жно / и до страсте́й безстра́стно прекло́ншемуся, / Сло́ве Бо́жий: / мир пода́ждь ми, па́дшему, / Человеколю́бче.

В Великую Субботу:

Богоявле́ния Твоего́, Христе́, / к нам ми́лостивно бы́вшаго, / Иса́ия, Свет ви́дев Невече́рний, / из но́щи у́треневав, взыва́ше: / воскре́снут ме́ртвии, и воста́нут су́щии во гробе́х, / и вси земноро́днии возра́дуются.

Осмогласника:

Свет возсия́й ми́ру, Христе́, / просвети́ се́рдце мое́, / от но́щи Тебе́ зову́ща, / и спаси́ мя.

На Тя упова́х, Го́споди, / и к Тебе́ у́тренюю, Пребоже́ственней Добро́те, / ду́шу мою́ возвесели́ / во све́те Богове́дения Твоего́ и спаси́ мя.

Прозорли́вый Иса́ия, / разуме́яй безсе́менное рожде́ние Твое́, Де́во, вопия́ше: / се во чре́ве прии́мет Де́ва, / ро́ждшая Сло́ва Единоро́днаго, / Сы́на же О́тча, / со Ду́хом Боже́ственным славосло́вима.

От но́щи песнь возсыла́ем Тебе́: / возниспосли́ нам ми́лость Твою́, Го́споди, / Ты бо еси́ Бог наш, / ра́зве Тебе́, ино́го не ве́мы.

От но́щи у́тренююща, Человеколю́бче, / просвети́, молю́ся, / и наста́ви и мене́ на повеле́ния Твоя́, / и научи́ мя, Спа́се, твори́ти во́лю Твою́.

Свет и мир Твой, Христе́, / рабо́м Твои́м пода́ждь, Бла́же: / Ты бо еси́ всех мир / и сою́з любве́, Человеколю́бче, / Тя позна́вшим, у́тро све́тлое, / и Влады́ку вои́стинну, и Го́спода.

Мрак тя, душе́ моя́, / поя́т беззако́нных дея́ний, / я́же соде́лала еси́ в житии́ сем, / но не преста́ни, зову́щи: / Наста́вниче Све́та и Изба́вителю всех, / омраче́нную ду́шу мою́ светово́дствуй к Све́ту Невече́рнему.

Положи́ на стопы́ моя́ мглу / всезле́йший враг, Го́споди, / но Ты озари́, Светода́вче Сло́ве, / и сего́ мя изба́ви осужде́ния.

Мир мног лю́бящим Тя, Христе́, / и нощь просвеще́ния в пи́щи слове́с Твои́х, / сего́ ра́ди, от но́щи у́тренююще, / про́сим ми́лости от Тебе́, Человеколю́бче.

Песнь 6

Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, Многоми́лостиве.

В Великий Четверток:

Бе́здна после́дняя грехо́в обы́де мя, / и, волне́ния не ктому́ терпя́, / я́ко Ио́на Влады́це, вопию́ Ти: / от тли мя возведи́.

В Великую Субботу:

Ят бысть, / но не удержа́н в пе́рсех ки́товых Ио́на: / Твой бо о́браз нося́, / Страда́вшаго и погребе́нию да́вшагося, / я́ко от черто́га, от зве́ря изы́де. / Приглаша́ше же кустоди́и: / храня́щии су́етная и ло́жная, / ми́лость сию́ оста́вили есте́.

Осмогласника:

Ки́том пожре́н грехо́вным, / вопию́ Тебе́, Христе́: / я́ко проро́ка, / из нетле́ния мя свободи́.

Обы́де мя бе́здна после́дняя грехо́вная, / пожре́ мя мно́жество зол мои́х, / и, стеня́, вопию́ Ти, Бо́же мой: / я́ко проро́ка Ио́ну, изба́ви, Многоми́лостиве.

Ки́том содержи́мь прегреше́ний, / вопию́ Ти, Христе́ мой, со проро́ком: / возведи́ от тли живо́т мой / и спаси́ мя.

Возопи́х всем се́рдцем мои́м / к ще́дрому Бо́гу, / и услы́ша мя от а́да преиспо́дняго, / и возведе́ от тли живо́т мой

Зве́рю бе́здны предае́тся проро́к Ио́на, / глубине́ морско́й, / прообразу́я Твое́, Сло́ве, тридне́вное воста́ние. / Тем и взыва́ше: / из глубины́ преиспо́дния возведи́ живо́т мой, / Благоутро́бне.

Возопи́х всем се́рдцем, Го́споди, / злы́ми де́лы одержи́мь, / возведи́, молю́ся, / изринове́на от тли, / Тя бо помяну́х, Спа́се, / и возвесели́ся се́рдце мое́.

Песнь 7

Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

В Великий Четверток:

О́троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, ороша́еми, поя́ху: / благослове́н еси́, Го́споди, Бо́же оте́ц на́ших.

В Великую Субботу:

Неизрече́нное чу́до: / в пещи́ Изба́вивый преподо́бныя о́троки из пла́мене / во Гро́бе мертв, бездыха́нен полага́ется / во спасе́ние нас, пою́щих: / Изба́вителю Бо́же, / благослове́н еси́.

Осмогласника:

Преподо́бных Твои́х отроко́в песнь услы́шавый / и пещь горя́щую ороси́вый, / благослове́н еси́, Го́споди, / Бо́же оте́ц на́ших.

Преподо́бных Твои́х отроко́в моли́тву услы́шавый / и пещь горя́щую ороси́вый, / благослове́н еси́, Го́споди, / Бо́же оте́ц на́ших.

Ты о́троки в пещи́, Жизнода́вче, / А́нгелом ороси́л еси́, глаго́лющия: / благослове́н еси́, Го́споди, / Бо́же оте́ц на́ших.

Яви́ся на ны благода́ть Твоя́, Спа́се, / и свет Креста́ Твоего́ возсия́ ми́рови: / благослове́н еси́, Го́споди, / Бо́же оте́ц на́ших.

Согреши́хом, беззако́нновахом, / непра́вдовахом пред Тобо́ю, / ниже́ соблюдо́хом, ниже́ сотвори́хом, / я́коже запове́дал еси́ нам, / но не преда́ждь нас до конца́, / отце́в Бо́же.

Три ю́ноши / не опали́ дре́вле возвыша́емый пла́мень, / неща́дно мя зной к тле́нию положи́. / Но, я́ко о́ныя изба́вил еси́ сия́нием Твои́м, / пою́щаго с ни́ми спаси́ мя: / благослове́н еси́, Бо́же оте́ц на́ших.

В Вавило́не плене́ннии тричи́сленнии / числе́нием царю́ беззако́нному проти́вишася, / поклоне́нию о́браза душетли́тельнаго позлаще́ннаго. / Те́мже, не покори́вшеся, / в пещь о́гненную вве́ржени бы́ша и, пою́ще, поя́ху: / оте́ц Бо́же, благослове́н еси́.

В пусты́ни купину́, неопа́льно горя́щую, / обра́зно евре́йскую пещь пропису́ющу показа́, / и Де́вы о́браз явля́яй, / чуде́с Бо́же и Препросла́вленный.

Песнь 8

Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

В Великий Четверток:

За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́ние безу́мное / и, совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, и превозноси́те во вся ве́ки.

В Великий Пяток:

Столп зло́бы богопроти́вныя / Боже́ственнии о́троцы обличи́ша, / на Христа́ же шата́ющееся беззако́нных собо́рище / сове́тует тще́тная, / уби́ти поуча́ется / Живо́т держа́щаго дла́нию. / Его́же вся тварь благослови́т, / сла́вящи во ве́ки.

В Великую Субботу:

Ужасни́ся, боя́йся, Не́бо, / и да подви́жатся основа́ния земли́: / се бо в мертвеце́х вменя́ется в Вы́шних Живы́й / и во Гроб мал странноприе́млется. / Его́же, о́троцы благослови́те, свяще́нницы, воспо́йте, / лю́дие, превозноси́те во вся ве́ки.

Осмогласника:

Преподо́бнии Твои́ о́троцы / в пещи́ Херуви́мы подража́ху, / Трисвяту́ю песнь воспева́юще: / благослови́те, по́йте и превозноси́те во вся ве́ки.

Отроко́в песнь воспои́м Христу́, / пою́ще с ни́ми: / да благослови́т вся тварь Го́спода / и превозно́сит во вся ве́ки.

Его́же во́инства Небе́сная сла́вят, / и трепе́щут Херуви́ми и Серафи́ми, / вся́ко дыха́ние и тварь, / по́йте, благослови́те и превозноси́те во вся ве́ки.

Мусики́йскаго согла́сия небре́гше, о́троцы / песнь Боже́ственную из пла́мене воспева́ху, глаго́люще: / свяще́нницы, благослови́те, лю́дие, коле́на и язы́цы, / превозноси́те Го́спода.

Бо́га Отца́ Соде́теля, / Единосу́щна Сы́на и Бо́жия Ду́ха / в пла́мени ю́ноши / пе́ти повелева́ются: / да благослови́т Го́спода вся тварь / и превозно́сит во вся ве́ки.

Мучи́телеву златослия́нному столпу́, я́ко сопротивобо́жному истука́ну, / не поклони́шася о́троцы Сио́нстии, / но, Богохрани́ми, перси́йскую пещь я́ко травни́к, непщева́ху / и пла́мень, я́ко ороша́ющий о́блак, / и, лику́юще, поя́ху: / благослови́те, творе́ния вся, Го́спода.

Угрожа́яй царь иногда́ ю́ношам / пещь угото́ва / и непови́нным повеле́ вве́рженным бы́ти, / испове́дающим Бо́га препросла́вленнаго, / Его́же благословя́т творе́ния / всея́ тва́ри во ве́ки.

Си́ла та́инственная / в Вавило́не явля́ется, / о́троки в пла́мени Боже́ственным Ду́хом ороша́ющи / и мучи́телеву горды́ню попаля́ющи. / Те́мже вопия́ху благоче́стно: / благослови́те, дела́ Госпо́дня, Го́спода.

Царю́ веко́в, Христу́, / песнь рцем отроко́в, ве́рнии: / благослови́те, / вся дела́ Госпо́дня, Го́спода.

Прохлажде́й горя́щую пещь, Бо́же, / и о́троки же невреди́мы сохрани́в, / Тебе́ воспева́ющия: / свяще́нницы, по́йте и превозноси́те Его́ во ве́ки.

Песнь 9

Бо́га челове́ком невозмо́жно ви́дети, / на Него ́же не сме́ют чи́ни А́нгельстии взира́ти; / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

В Великий Четверток:

Стра́нствия Влады́чня / и Безсме́ртныя Трапе́зы / на Го́рнем ме́сте высо́кими умы́, / ве́рнии, прииди́те, наслади́мся, / возше́дша Сло́ва, от Сло́ва научи́вшеся, / Его́же велича́ем.

В Великий Пяток:

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

В Великую Субботу:

Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́, Сы́на: / воста́ну бо, и просла́влюся, / и вознесу́ со сла́вою непреста́нно я́ко Бог, / ве́рою и любо́вию Тя велича́ющия.

Осмогласника:

Е́же ра́дуйся / от А́нгела прии́мшая / и ро́ждшая Созда́теля Своего́, / Де́во, спаси́ Тя велича́ющия.

Ве́чное обре́тше избавле́ние, / от пра́отца Ада́ма свы́ше рожде́нное, / ро́ду стра́шнаго изрече́ния, / рождество́ со Безпло́тными / непостижи́мое славосло́вим, / Богоро́дицу Тя пе́сньми велича́юще.

Ра́дуйся, Честна́я Всесвята́я Ма́ти Де́во, / Еди́ на Всепе́тая, / Тя сла́вит вся тварь, / Ма́терь Све́та.

Безсе́меннаго зача́тия рождество́ несказа́нное, / Ма́тере безму́жныя Нетле́нен Плод, / Бо́жие бо рожде́ние обновля́ет естества́. / Те́мже Тя, вси ро́ди, / я́ко Богоневе́стную Ма́терь, / правосла́вно велича́ем.

Сло́вом Сло́во Еди́на ро́ждшая / ерети́ческая уста́ загради́ злоре́чивая: / и́но но́во Не́бо, неокра́домый рай, Пречи́стая, / Тя велича́ем.

Велича́ем Тя, вси ро́ди, / Богоро́дице Де́во, / исто́чник живота́ на́шего.

Се врата́, / се гора́ свята́я, / се де́вствующая Ма́ти, / Ю́же велича́ем.

Слы́ши, Дщи, и виждь, и приклони́ у́хо Твое́, / и возжела́ет Царь добро́ты Твое́й: / и́бо вся сла́ва Твоя́, Де́во, отвну́трь, / я́ко заче́нши Созда́теля Твоего́. / Те́мже, бога́тии лю́дстии, лицу́ Твоему́ моля́щеся, / Тя велича́ем.

Ма́терними объя́тии, Честна́я, / носи́ла еси́ Седя́щаго на Херуви́мех / и Сего́ сосцепита́еши, / за кра́йнюю вся́кую бла́гость во Ада́мов о́браз вообразу́ющася. / Те́мже, соше́дшеся, челове́ческое собра́ние, / и Тя, ро́ждшую Свет ми́ра, велича́ем.

Безсе́менно ро́ждшую Еди́наго от Тро́ицы, / на́ше все без нетле́ния взе́мша, / Ему́же оте́чества язы́ков покланя́ются, / Де́во, Тя велича́ем.

Купину́ у́мную, / дре́вле на горе́ я́вльшуюся Моисе́ю, неопа́льно горя́щу, / Пречи́стую и Святу́ю Де́ву / согла́сно пе́сньми велича́ем.

Ирмосы 7-го гласа

Песнь 1

Ма́нием Твои́м на земны́й о́браз преложи́ся / пре́жде удоборазлива́емое водно́е естество́, Го́споди. / Те́мже, немо́кренно пешеше́ствовав, Изра́иль / пое́т Тебе́ песнь побе́дную.

В неделю 8-ю:

По́нтом покры́ фарао́на с колесни́цами / Сокруша́яй бра́ни мы́шцею высо́кою, / пои́м Ему́, я́ко просла́вися.

Осмогласника:

Поспе́шествовавшему Бо́гу во Еги́пте Моисе́ови, / извести́ Изра́иля, / Тому́ Еди́ному пои́м, / я́ко просла́вися.

Сокруши́вшему бра́ни мы́шцею Свое́ю / и вса́дники триста́ты погрузи́вшему, / пои́м Ему́, я́ко Изба́вителю на́шему Бо́гу, / я́ко просла́вися.

Истря́сшему Бо́гу / фарао́на в мо́ри Чермне́м / песнь побе́дную пои́м, / я́ко просла́вися.

От струй Чермна́го / сте́ну сотво́ршему лю́дем / и покры́вшему глубино́ю фарао́на со всево́инством, / пои́м Го́сподеви, сла́вно бо просла́вися.

Погрузи́вшему фарао́на / в Чермне́м мо́ри / побе́дную песнь пои́м, / я́ко просла́вися.

Моисе́йский жезл Боже́ственною си́лою / Чермно́е про́йде мо́ре / и проведе́ лю́ди, пою́щия и глаго́лющия: / пои́м Ди́вному Бо́гу на́шему побе́дную песнь, / я́ко просла́вися.

Пои́м Го́сподеви, / погрузи́вшему всю си́лу фарао́нову в мо́ри, / побе́дную песнь, / я́ко просла́вися.

Изме́ншему Бо́гу Изра́иля / от мо́ря Чермна́го / побе́дную песнь пои́м, / я́ко просла́вися.

Песнь 2

Лю́дие, внемли́те Бо́жию снизхожде́нию, / я́ко от Де́вы Святы́я роди́ся, я́ко благоволи́, / Тому́ дади́м сла́ву и хвале́ние.

Ви́дите, ви́дите, я́ко Аз есмь Бог ваш, / две́ри Небе́сныя отверзы́й / и одожди́вый ма́нну лю́дем избра́нным, / я́ко возмо́жна Мне вся: / творю́ бо, ели́ка хощу́.

Вонми́, Не́бо, и возглаго́лю, / и воспою́ Христа́, / Спа́са ми́ра, Еди́наго Человеколю́бца.

Песнь 3

В нача́ле Небеса́ всеси́льным сло́вом Твои́м / утвержде́й, Го́споди Спа́се, / и Вседе́тельным и Бо́жиим Ду́хом всю си́лу их, / на недви́жимем мя ка́мени испове́дания Твоего́ утверди́.

В неделю 8-ю:

С высоты́ Си́лою, ученико́м, Христе́, / до́ндеже облеце́теся, рекл еси́, / седи́те во Иерусали́ме: / Аз же я́ко Мене́, Уте́шителя ино́го, / Ду́ха Моего́ же и О́тча послю́, / в Не́мже утвердите́ся.

Осмогласника:

Утверди́ся се́рдце мое́ в Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Утверди́ся ве́рою Христо́ва Це́рковь, / и́бо непреста́нно пе́сньми вопие́т, пою́щи: / Свят еси́, Го́споди, / и Тя пое́т дух мой.

Небеса́ утверди́вый сло́вом / и земно́е основа́ние укрепи́вый на вода́х мно́гих, / утверди́ мой ум в во́лю Твою́, / Человеколю́бче.

На вода́х зе́млю основа́вый, / Сло́ве, Христе́ Бо́же, / и на́ша сердца́ сла́вити Тя утверди́.

Утверди́ мя, Христе́, к Твоему́ славосло́вию / и укрепи́ пе́ти А́ннину песнь Тебе́, поя́ во всех: / Свят еси́, Го́споди, содержа́й вся.

В Правосла́вной ве́ре испове́дания / утверди́ мя, Го́споди, / да не подви́гнет мя враг до конца́.

И́же от Безнача́льнаго Отца́, Сло́ве, / Сы́не Единоро́дный, / просвети́ сердца́ на́ша.

Утвержде́ние мне бу́ди, / сло́вом утверди́вый Небеса́ / и укрепи́вый зе́млю на вода́х, / и изба́ви, я́ко Бог, от вся́каго обстоя́ния.

В мокрота́х тя́жестну зе́млю укрепи́вый, Всеси́льне, водны́х / и Небеса́ на ничесо́м сло́вом воздрузи́вый, / вну́тренняго сляче́наго моего́ страстьми́ челове́ка возвлеки́й, Христе́, / на недви́жимом Твоея́ ве́ры ка́мени утверди́.

Песнь 4

О́тча не́дра не оста́вль / и соше́д на зе́млю, Христе́ Бо́же, / та́йну услы́шах смотре́ния Твоего́ / и просла́вих Тя, Еди́не Человеколю́бче.

В неделю Пятидесятницы:

Смотря́яй проро́к в после́дняя / Твое́, Христе́, прише́ствие, вопия́ше: / Твою́ услы́шах, Го́споди, си́лу, / я́ко вся спасти́ пома́занныя Твоя́ прише́л еси́.

Осмогласника:

Покры́ла есть Небеса́, Христе́ Бо́же, / смотре́нием Твои́м доброде́тель неизрече́нныя му́дрости Твоея́, / Человеколю́бче.

Услы́шах слух Твой / и убоя́хся, / разуме́х дела́ Твоя́ / и ужасо́хся, Го́споди.

Плотско́е прише́ствие Твое́, Христе́, уверя́я, / проро́к Авваку́м взыва́ше: / сла́ва си́ле Твое́й, Го́споди.

Услы́шах слух Твой, Го́споди, / я́ко яви́лся еси́ на земли́, / за е́же спасти́ ны, / тем вопие́м: сла́ва си́ле Твое́й, Го́споди.

Услы́шах слух Твой и убоя́хся, Го́споди, / разуме́х дела́ Твоя́ и ужасо́хся, / я́ко Кресто́м Твои́м разруши́л еси́ смерть, / Живо́т нам дарова́вый.

Небеса́ покры́ла есть / доброде́тель Твоя́, Го́споди, / и Твоего́ хвале́ния вся испо́лнил еси́: / сла́ва си́ле Твое́й, Человеколю́бче.

Боже́ственным предъявле́нне Авваку́м очи́стився Ду́хом, / между́ двою́ живо́тну прише́ствие Твое́ пропове́да; / тре́петом же содержи́мь, Христе́ мой, / слух ди́вных Твои́х услы́шав, / взыва́ше, убоя́хся.

Песнь 5

Нощь не светла́ неве́рным, Христе́, / ве́рным же просвеще́ние в сла́дости слове́с Твои́х. / Сего́ ра́ди к Тебе́ у́тренюю / и воспева́ю Твое́ Божество́.

В неделю Пятидесятницы:

Стра́ха ра́ди Твоего́ зача́тый, Го́споди, / во чре́ве проро́ков / и рожде́нный на земли́ Дух спасе́ния / апо́стольская сердца́ созида́ет чи́ста, /и в ве́рных пра́вый обновля́ется, / свет бо и мир зане́ Твоя́ повеле́ния.

Осмогласника:

У́тренююще, Сло́ве, в сла́ву Твою́ и хвалу́, / восхваля́ем непреста́нно о́браз Креста́ Твоего́, / его́же дал еси́ нам / ору́жие в по́мощь.

Разгна́вый нощь страстну́ю, / возсия́й ми Свет у́мный, / началоро́дную тьму отгна́в бе́здны / и первозда́нный Свет возсия́вый ми́ру, Соде́телю всех.

Го́споди Бо́же мой, / от но́щи у́треневав, Тебе́ молю́ся: / пода́ждь ми оставле́ние прегреше́ний мои́х / и к све́ту Твои́х повеле́ний / пути́ моя́ напра́ви, молю́ся.

У́тренюет дух мой к Тебе́, Бо́же, / зане́ Свет еси́ и Твоя́ повеле́ния бы́ша / исцеле́ния рабо́м Твои́м, / Человеколю́бче.

Све́та мне́нием / ко тьме низри́нувшая помрачи́ся пре́лесть: / Свет бо, вои́стинну Непристу́пный и И́стинный, Богоявле́ния возсия́. / Те́мже Боже́ствен не, от но́щи у́тренююще, / песнь воспева́ем.

Роса́, я́же от Тебе́, Христе́ Бо́же, / исцеле́ние ве́рным нам яви́ся: / земли́ же нече́ствующих злочести́во паде́ние обеща́ется, / те́мже, от но́щи у́тренююще, / песнь Ти прино́сим.

Но́щию мя страсте́й помраче́ннаго, / озари́, Све́те Непристу́пный, воздви́жима, / да, у́тренюя, зову́ Ти: / свет и мир повеле́ния Твоя́.

К Тебе́ у́тренюю / и Тебе́ вопию́, Благоутро́бне Го́споди: / омраче́нную грехми́ ду́шу мою́, / све́том озари́в за́поведей Твои́х, наста́ви.

Песнь 6

Ио́на из чре́ва а́дова вопия́ше: / возведи́ от тли живо́т мой. / Мы же Тебе́ вопие́м: / Всеси́льне Спа́се, поми́луй нас.

В неделю 8-ю и в воскресение:

Пла́вающаго в молве́ жите́йских попече́ний, / с корабле́м потопля́ема грехи́ / и душетле́нному зве́рю примета́ема, / я́ко Ио́на, Христе́, вопию́ Ти: / из смертоно́сныя глубины́ возведи́ мя.

Осмогласника:

Во глубину́ грехо́вную впа́дся, Бла́же, / я́ко Ио́на от ки́та, вопию́ Ти: / возведи́ от тли живо́т мой / и спаси́ мя, Человеколю́бче.

Из глубины́ возве́л еси́ Ио́ну, проро́ка Твоего́, Го́споди, / и мене́, вопию́ща / из глубины́ безме́рных мои́х прегреше́ний, / возведи́, Ми́лостиве, я́ко Человеколю́бец.

Возопи́х, Го́споди, / внегда́ скорбе́ти ми к Тебе́, / и возве́л еси́ живо́т мой, / Многоми́лостиве.

Возопи́х, Го́споди, / внегда́ скорбе́ти ми к Тебе́, / углебо́х бо в тиме́нии / глубины́ прегреше́ний мно́гих, / и, я́влься, возведи́ мя от тли.

Возопи́х, Го́споди, / внегда́ скорбе́ти ми, / и спасо́хся, и воспою́ Тя, / Спа́са моего́.

От мно́жества прегреше́ний мои́х, / я́ко Ио́ну от ки́та, изба́ви мя, / Еди́не Человеколю́бче.

Песнь 7

Пещь о́троцы огнепа́льну, / дре́вле росоточа́щу, показа́ша, / Еди́наго Бо́га воспева́юще и глаго́люще: / превозноси́мый отце́в Бог и препросла́влен.

В неделю 8-ю:

В пещь о́гненную вве́ржени, преподо́бнии о́троцы / огнь в ро́су преложи́ша, / воспева́нием си́це вопию́ще: / благослове́н еси́, Го́споди / Бо́же оте́ц на́ших.

Осмогласника:

Пещь горя́щую ороси́л еси́, Спа́се, / о́троки спасл еси́, пою́щия и глаго́лющия: / благослове́н еси́ во ве́ки, Го́споди, / Бо́же оте́ц на́ших.

Су́щим в пещи́ отроко́м Твои́м, Спа́се, / не прикосну́ся, ниже́ стужи́ огнь, / тогда́ трие́, я́ко еди́неми усты́, поя́ху / и благословля́ху, глаго́люще: / благослове́н еси́, Бо́же оте́ц на́ших.

В пещи́ обличи́л еси́, я́влься, / перси́йское безу́мное златотво́рное игра́ние. / Те́мже о́троцы, позна́вше Тя, неизме́ннаго о́браза О́тча, / благослове́н еси́, зовя́ху, / Бо́же оте́ц на́ших.

А́нгелом о́троки в пещи́ спасы́й / и пла́мень в ро́су им преложи́вый, / благослове́н еси́, Го́споди, / Бо́же оте́ц на́ших.

Херуви́мов Обузда́телю и Созда́телю всех, / о́троки в пещи́ спасы́й, / благослове́н еси́ во ве́ки, Го́споди, / Бо́же оте́ц на́ших.

Мучи́телева повеле́ния о́троцы не послу́шаша, / пе́щи не убоя́шася, Бо́гу же воспева́ху: / отце́в Бо́же, благослове́н еси́.

В пещи́ су́ще халде́йстей / авраа́мстии о́троцы / ликова́ху со А́нгелом, глаго́люще: / оте́ц на́ших Бо́же, благо слове́н еси́.

Песнь 8

В пещи́ о́троки подража́юще, / духо́вную ро́су прие́мшии, ве́рою зове́м: / благослови́те, дела́ Госпо́д ня, Го́спода.

В неделю 8-ю и в воскресение:

Неопа́льная огню́ в Сина́и / прича́щшаяся купи на́ Бо́га яви́ / медленноязы́чному и гугни́вому Моисе́ови, / и о́троки ре́вность Бо́жия три непребори́мыя во огни́ певцы́ показа́: / вся дела́ Госпо́дня, Го́спода по́йте / и превозноси́те во вся ве́ки.

Осмогласника:

Еди́наго Безнача́льнаго Царя́ Сла́вы, / Его́же благословя́т Небе́сныя Си́лы / и трепе́щут Чи́ни А́нгельстии, / по́йте, свяще́нницы, / лю́дие, превозноси́те Его́ во ве́ки.

А́нгельми немо́лчно в Вы́шних сла́вимаго Бо́га, / Небеса́ небе́с, земля́, и го́ры, и хо́лми, и глубина́, / и весь род челове́ческий, / пе́сньми Того́, я́ко Созда ́теля и Изба́вителя, благослови́те.

Всех Зижди́теля / и Спа́са душ на́ших, / по́йте, лю́дие, Христа́ Бо́га на́шего / и превозноси́те Его́ во ве́ки.

Го́спода, вся дела́, благослови́те, / я́ко Зижди́те ля и Творца́ всех.

О́троцы зовя́ху, в пещи́ ороше́ни: / тварь да благослови́т вся́ческая / сло́вом Созда́вшаго / и превозно́сит Его́ во ве́ки.

Вои́стинну Су́щаго Бо́га / и всех существа́ Вино́в на го, / Христа́ превозно́сим / и славосло́вим во вся ве́ки.

Пещь, дре́вле огне́м опаля́емую, / Богочести́вии попра́ша о́троцы, / не бо стра́ху мучи́телеву покори́шася, / но, любо́вию же, па́че Богоче́стия, пали́ми, глаго́лаху: / благослови́те, вся дела́ Госпо́дня, Го́спода.

Стра́шнаго Херуви́мом, / и чу́днаго Серафи́мом, и ми́ру Творца́, / свяще́нницы, и раби́, и ду́си пра́ведных, / по́йте, благослови́те / и превозноси́те Его́ во ве́ки.

Песнь 9

Па́че естества́ Ма́терь и по естеству́ Де́ву, / Еди́ну в жена́х Благослове́нную, / пе́сньми, ве́рнии, Богоро́дицу велича́ем.

В неделю 8-ю и воскресение:

Нетле́ния искуше́нием ро́ждшая / и всехитрецу́ Сло́ву плоть взаимода́вшая, / Ма́ти Неискусому́жная, Де́во Богоро́дице, / Прия́телище Нестерпи́маго, / Село́ Невмести́маго Зижди́теля Твоего́, / Тя велича́ем.

Осмогласника:

Всепе́тая, Небе́с превы́шшая, / Безнача́льное Сло́во безсе́менно заче́ншая / и Воплоще́ннаго Бо́га ро́ждшая челове́ком, / тем Тя вси велича́ем.

Ма́ти Бо́жия и Де́ва, / ро́ждшая и де́вствующая па́ки, / не естества́ де́ло, но Бо́жия снизхожде́ния: / тем, я́ко Еди́ну, Бо́жиих чуде́с сподо́бльшуюся, / Тя при́сно велича́ем.

Воплоще́ннаго Сло́ва безсе́менно от Тебе́ / Боголе́пно родила́ еси́, / Де́во Богоро́дице, / и Тя велича́ем.

Безсе́менно Рождества́ зача́тие кто ска́жет от челове́к? / Нетле́ннаго Рождества́ рожде́нию кто не почуди́тся от земноро́дных? / Тем Тя, племена́ земна́я, / Богоро́дице, велича́ем.

Тя, Ски́нию Святу́ю, Одушевле́нный Ковче́г, / Ю́же Прему́дрость Бо́жия созда́, / И́стинную Богоро́дицу, / пе́сньми велича́ем.

Тя, Пречи́стую Ма́терь и Де́ву, / Невмести́мое Сло́во во утро́бу вмести́вшую / и Роди́вшую пло́тию, / пе́сньми велича́ем.

Ра́дуйся, Неве́сто све́тлая, / Ма́ти Светода́вца; / ра́дуйся, вмести́вшая Невмести́маго во утро́бе Твое́й; / ра́дуйся, саме́х Херуви́мов Честне́йшая, / ро́ждшая Спа́са душ на́ших.

Ирмосы 8-го гласа

Песнь 1

Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.

В Воздвижение Честнаго Креста:

Крест начерта́в, Моисе́й / впря́мо жезло́м Чермно́е пресече́ / Изра́илю пешеходя́щу; / то́же обра́тно фарао́новым колесни́цам, уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Осмогласника и Преображения:

Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Посече́нный несеко́маго пресече́, / и ви́де со́лнце зе́млю, ю́же не ви́де; / лю́таго врага́ вода́ потопи́, / и не проходи́мое про́йде Изра́иль. / Песнь же воспева́шеся: / Го́сподеви пои́м, сла́вно бо просла́вися.

Проро́чески Богови́дец Богоро́дицы о́браз зряй, / немо́кренными нога́ми Чермну́ю про́йде пучи́ну / и, игра́я, вопия́ше: / пои́м побе́дную песнь Го́сподеви, я́ко просла́вися.

Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко Еди́н сла́вно просла́вися.

Пои́м Го́сподеви, вси лю́дие, / в мо́ри Чермне́м фарао́на погрузи́вшему, / побе́дную песнь пою́ще, я́ко просла́вися.

Изра́иля от рабо́ты изба́вил еси́, Го́споди, / десни́цею Твое́ю держа́вною, / я́ко о́наго спасл еси́, / ны́не нас спаси́.

Песнь возсле́м, лю́дие, / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще, / пои́м Тебе́, Еди́ному Влады́це.

Истря́сшему в мо́ри мучи́тельство фарао́не / и Изра́иля су́шею наста́вльшему, / пои́м Христу́, я́ко просла́вися во ве́ки.

На Рождество Богородицы:

Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре, / пои́м Ему́, я́ко Изба́вителю на́шему Бо́гу, / я́ко просла́вися.

Пои́м Бо́гу, от го́рькия рабо́ты фарао́новы изба́вльшему Изра́иля / и о́гненным столпо́м и све́тлым о́блаком наста́вльшему, / я́ко просла́вися.

В среду Преполовения:

Мо́ре огусти́л еси́, / погрузи́вый со ору́жием го́рдаго фарао́на, / и лю́ди спасл еси́ немо́кренно, Го́споди, / и ввел еси́ я́ в Го́ру Святы́ни, вопию́щия: / пои́м Тебе́, Бо́гу на́шему, / песнь побе́дную, я́ко просла́вися.

В Чермне́м фарао́на с колесни́цами погрузи́л еси́ / и лю́ди Моисе́ом спасл еси́, / пою́щия Тебе́, Го́споди, песнь побе́дную, / я́ко Изба́вителю на́шему Бо́гу.

Пресла́вный в мо́ри устро́ивый лю́дем путь, / Небе́с ное нам ше́ствие проходи́мо сотвори́, / да но́вую песнь пои́м Тебе́, Го́споди.

Внеза́пу дре́вле мо́ре Изра́иль, / я́ко в пусты́ни, ного́ю пра́шною13 проше́д, вопия́ше: / Го́сподеви Бо́гу на́шему, кре́пкому в бра́нех, / пои́м песнь но́вую.

Ди́вному Бо́гу вели́чия принесе́м, / и великоле́пно с на́ми / да воспое́т земля́ и не́бо я́сно сла́ву Его́.

Песнь 2

Вонми́, Не́бо, и возглаго́лю, / и воспою́ Христа́, / от Де́вы ро́ждшагося во спасе́ние на́ше.

Ви́дите, ви́дите, / я́ко Аз есмь Бог ваш, / пре́жде век рожде́нный от Отца́, / и от Де́вы в после́дняя без му́жа заче́ншийся, / и разруши́вый грех пра́отца Ада́ма, / я́ко Человеколю́бец.

Ви́дите, ви́дите, / я́ко Аз есмь Бог, / расто́ргнувый Чермно́е мо́ре жезло́м Моисе́овым, / и проведы́й лю́ди, и наста́вивый я́, / и пита́вый в пусты́ни Сина́йстей, / и введы́й в Го́ру Святы́ни.

Па́че ме́да и со́та / сла́ждшая словеса́ уст Мои́х, / научи́теся вопи́ти, глаго́лет Госпо́дь.

Во вторник 4-я Недели Великаго поста:

Ви́дите, ви́дите, / я́ко Аз есмь Бог, / дре́вле Изра́иля сквозе́ Чермно́е мо́ре проведы́й, / и пита́вый, и спасы́й, / и от го́рькия рабо́ты свободи́вый фарао́новы.

Ви́дите, ви́дите, / я́ко Аз есмь Бог ваш, / в ми́лости Бога́тый / и Благи́й в щедро́тах, / изба́вивый лю́ди от пре́лести / и рабо́ты безбо́жных враго́в.

Небеса́ простры́й и зе́млю основа́вый, Христе́, / вонми́ моле́нию моему́, / я́ко И́мя Твое́ ди́вное призва́х, / Человеколю́бче.

Во вторник 2-я Недели Великаго поста:

Ви́дите, ви́дите, / я́ко Аз есмь Бог ваш, / освяти́вый нача́ток вам прия́тен, / от дней всего́ ле́та одеся́тствование, / и сие́ дав лю́дем Мои́м во избавле́ние страсте́й, / во спасе́ния нача́ло.

В понедельник Страстныя недели, на повечерии:

Вонми́, Не́бо, и возглаго́лю, / и воспою́ Христа́, / от Де́вы пло́тию прише́дшаго.

Вонми́, Не́бо, и возглаго́лю, / и воспою́ Христа́, / Еди́наго Человеколю́бца.

Песнь 3

Утвержде́й в нача́ле Небеса́ ра́зумом / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят, па́че Тебе́, / Еди́не Человеколю́бче.

Честнаго Креста:

Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви ны́не процвете́ / Дре́во Креста́ / в держа́ву и утвержде́ние.

Осмогласника и Преображения:

Небе́снаго кру́га / Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

На Рождество Богородицы и в Преполовение:

Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́ / возвесели́хся о спасе́нии Твое́м.

Утверди́ наш ум и сердца́, / Небеса́ сло́вом утвержде́й, / во е́же пе́ти и сла́вити Тя / во спасе́ние душ на́ших.

Ты еси́ утвержде́ние / притека́ющих к Тебе́, Го́споди, / Ты еси́ Свет омраче́нных, / и пое́т Тя дух мой.

Утвержде́й руко́ю Твое́ю, Сло́ве Бо́жий, Небеса́ / просвеще́нием Твоего́ и́стиннаго позна́ния, / утверди́ и нас, на Тя наде́ющихся сердца́.

Утвержде́й, Сло́ве, Небеса́ сло́вом, / утверди́ наш ум и се́рдце, / во е́же сла́вити Тя, Спа́са душ на́ших.

Утвержде́й сло́вом Небеса́ / и зе́млю основа́вый на вода́х мно́гих, / утверди́ мя к пе́нию славосло́вия Твоего́, Го́споди.

Несть свят, я́ко Госпо́дь, / и несть пра́веден, я́ко Бог наш, / Его́же пое́т вся тварь: / несть пра́веден, па́че Тебе́, Го́споди.

Лук си́льных изнемо́же, / и немощству́ющии препоя́сашася си́лою, / сего́ ра́ди утверди́ся в Го́споде се́рдце мое́.

Сочини́ мя, Го́споди, / си́льным люде́й Твои́х, / опоясу́я си́лою, / и лу́ки ра́тников сокруши́, / и нищеты́ мое́й рог возвы́си.

Страх Твой, Го́споди, / всади́ в сердца́ раб Твои́х / и бу́ди нам утвержде́ние, / Тя во и́стине призыва́ющим.

Утверди́ мя, Го́споди, си́лою Кре́стною / и да́руй мне се́рдце чи́стое, / да о Тебе́ хвалю́ся, Бла́же.

Утвержде́ние мое́, Спа́се, еси́, / прибе́жище мое́ и си́ла, / поколеба́вшееся се́рдце мое́ утверди́ в стра́се Твое́м, / я́ко несть свят, я́коже Ты, Бог наш.

В Го́споде Бо́зе мое́м утверди́ся душа́ моя́ / и да хва́лится, глаго́лющи: / несть свят, несть пра́веден, / па́че Тебе́, Го́споди.

Уподо́би мя, Христе́, у́мно горе́ Сио́нстей, / возвы́сивый и утверди́вый в наде́жди о Тебе́ / и иска́павый ро́су благода́ти, / Человеколю́бче.

Утвержде́й на ка́мени ве́ры, / на сем сози́жду Мою́ Це́рковь, реки́й, Го́споди, / спаси́ мя, вопию́ща: / Ты еси́, Христе́, Сын Бо́га Жива́го, / и в Тебе́ утверди́ся дух мой.

Утверди́ мя, Го́споди, / не́мощь мою́ ве́дый, / и ру́ку мне простри́, я́ко Всеси́лен.

Песнь 4

Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Честнаго Креста:

Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Осмогласника и Преображения:

Из пло́ти Твоея́ лучи́ Божества́ / исхожда́ху проро́ком и апо́столом. / Тем нача́льницы, пою́ще, взыва́ху: / сла́ва си́ле Твое́й, Го́споди.

Из горы́ приосене́нныя, Сло́ве, проро́к, / еди́ныя Богоро́дицы, / хотя́ща воплоти́тися Богови́дно усмотри́ / и со стра́хом славосло́вяше си́лу Твою́.

Услы́шах, Го́споди, слух Твой и убоя́хся, / я́ко неизрече́нным Сове́том, / Бог сый Присносу́щный, / от Де́вы проше́л еси́, вопло́щся. / Сла́ва снизхожде́нию Твоему́, Христе́, / сла́ва си́ле Твое́й.

Всел еси́ на кони́, апо́столы Твоя́, Го́споди, / и прия́л еси́ рука́ма Твои́ма узды́ их, / и спасе́ние бысть ежде́ние Твое́ / ве́рно пою́щим: / сла́ва си́ле Твое́й, Го́споди.

Богоно́сный Ду́хом Святы́м просвети́вся проро́к Авваку́м, / в после́дняя Твое́ прише́ствие прови́дев, вопия́ше: / внегда́ прибли́житися ле́том, позна́ешися, / внегда́ приити́ вре́мени, яви́шися. / Сла́ва си́ле Твое́й, Го́споди.

Та́йно проро́к предзря́ от Де́вы Тя, Сло́ве, во площа́ема, / пе́сненно вопия́ше: / сла́ва си́ле Твое́й, Го́споди.

На Рождество Богородицы и Преполовение:

Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: / от ю́га при и́дет Бог. / Сла́ва си́ле Твое́й, / сла́ва снизхожде́нию Твоему́.

Услы́шах, Го́споди, слух Твой и убоя́хся, / разуме́х дела́ Твоя́ / и просла́вих держа́ву Твою́, Го́споди.

Услы́шах, Го́споди, слух Твой и убоя́хся, / разуме́х неизрече́нное Твое́ смотре́ние / и просла́вих, Сло́ве, снизхожде́ние Твое́.

Твое́ вочелове́чение, / е́же пре́жде век предо предели́л еси́, / в после́дняя благоволи́л еси́ соверши́ти, Го́споди, / услы́шах и стра́хом воспева́х.

Твое́ пречи́стое прише́ствие, Христе́, / прови́дяй проро́к Авваку́м / вопия́ше Тебе́ с тре́петом: / услы́шах слух Твой и убоя́хся, / разуме́х дела́ Твоя́ и ужасо́хся, Го́споди.

Услы́шах слух Твой, Го́споди, и убоя́хся, /разуме́х дела́ Твоя́ и ужасо́хся, / я́ко посреде́ двою́ живо́тну позна́ешися / во спасе́ние душ на́ших.

Покры́ Небеса́ доброде́тель Твоя́, Го́споди, / и вся́ческая, Спа́се, / хвале́ния Твоего́ испо́лнишася.

Я́ко Петру́, ру́ку простры́й в по́мощь, / и мене́ поми́луй / и спаси́, я́ко Человеколю́бец.

Авваку́ме проро́че, что зове́ши? / Что ви́дев, ужа́слся еси́? / От ю́га Тя, гряду́ща Бо́га, ви́дя, убоя́хся.

Услы́шах слух си́лы Твоея́, / и возвесели́ся се́рдце мое́ о Го́споде.

Песнь 5

Сей и Преображения:

Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, / но обрати мя́ и к све́ту за́поведей Твои́х / пути́ моя́ напра́ви, молю́ся.

Честнаго Креста:

О треблаже́нное Дре́во, / на не́мже распя́ся Христо́с, Царь и Госпо́дь! / и́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

Осмогласника:

Просвети́ нас повеле́нии Твои́ми, Го́споди, / и мы́шцею Твое́ю высо́кою / Твой мир пода́ждь нам, Человеколю́бче.

Мрак души́ моея́ разжени́, Светода́вче Христе́ Бо́же, / началоро́дную тьму изгна́в бе́здны, / и да́руй ми Свет повеле́ний Твои́х, Сло́ве, / да, у́тренюя, сла́влю Тя.

У́тренююще, вопие́м Ти: / Го́споди, спаси́ ны, / Ты бо еси́ Бог наш, / ра́зве Тебе́, ино́го не ве́мы.

Страсте́й мя мглы, / я́ко от глубо́кия но́щи, избавля́яй, / у́треневати сподо́би дух мой, молю́ся, / во све́те дне повеле́ний Твои́х, Христе́.

Твои́м Све́том озари́ мой ум, Бо́же, молю́ся, / да мно́гую Твою́ воспою́, / от но́щи у́тренюя, бла́гость.

От но́щи неве́дения / по душелови́тельному пути́ при́сно блудя́щаго, / Све́том ра́зума Твоего́, Го́споди, преднаставля́я мя, / на стезю́ за́поведей Твои́х напра́ви.

Я́ко Бо́га ино́го, Бла́же, / па́че Тебе́, не зна́ем, / к Тебе́, Све́ту Незаходи́мому, от но́щи у́тренююще, / воспева́ем Тя, Человеколю́бче.

У́тренюет дух мой к Тебе́, Бо́же, / от Отца́ рожде́нному неизрече́нно / и воздви́гнувшему рог спасе́ния нам.

У́тренюет дух мой к Тебе́, Бо́же, / зане́ свет повеле́ния прише́ствия Твоего́, / и́миже у́бо озари́ ум наш, Влады́ко, / и наста́ви на стезю́ жи́зни.

От но́щи неве́дения / Богове́дением просвети́вый концы́, / просвети́ мя у́тром человеколю́бия Твоего́, Го́споди.

От но́щи у́тренюет дух мой / к Тебе́, Бо́же, / ми́лость пода́ждь ми.

На Рождество Богородицы и Преполовение:

Го́споди Бо́же наш, мир даждь нам, / Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем.

У́тренююще к Тебе́, Человеколю́бцу, / воспева́ем Тя, Христе́ Бо́же, / да́руй нам ми́лости Твоя́.

От но́щи у́тренюет дух мой / к Твоему́ песнопе́нию, / зане́ свет и мир повеле́ния Твоя́.

Бла́же, Све́та и Ми́ра Пода́телю, / от тьмы мя и бра́ни страсте́й изба́ви, у́тренююща, Христе́, / к Твоему́ хвале́нию.

Повеле́ния Твоя́ просвеще́нием, Христе́ Бо́же, / я́ко Благ, показа́л еси́, / зане́, Светода́вче, / от но́щи у́тренююще, сла́ву возсыла́ем.

Твои́м Све́том озари́ мой ум, / Бо́же, молю́ся Тебе́, / да мно́гую Твою́ воспою́, / от но́щи у́треневав, благосты́ню.

От но́щи неве́дения / Богове́дения день во Све́те Лица́ Твоего́, Христе́, да возсия́ет, / ко у́тру хвале́ние Твое́ в сердца́х на́ших.

Песнь 6

Сей и Преображения:

Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Честнаго Креста

Во́днаго зве́ря во утро́бе / дла́ни Ио́на крестови́дно распросте́р, / спаси́тельную страсть прообража́ше я́ве; / тем, тридне́вен изше́д, / преми́рное Воскресе́ние прописа́ше / пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Осмогласника:

Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиями, / я́ко от тли о́наго спаси́.

Я́коже проро́ка изба́вил еси́ / из глубины́ преиспо́дняя, Христе́ Бо́же, / и мене́ от грехо́в мои́х изба́ви, я́ко Человеколю́бец, / и упра́ви живо́т мой, молю́ся.

Ри́зу мне пода́ждь све́тлу, / одея́йся све́том, я́ко ри́зою, / Многоми́лостиве Христе́ Бо́же наш.

Бе́здна грехо́в и прегреше́ний бу́ря мя смуща́ет / и во глубину́ ну́жднаго ре́ет мя отча́яния, / но Твою́ кре́пкую ру́ку мне простри́, я́ко Петро́ви, / о Упра́вителю! и спаси́.

Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Во Исаа́це страсть прописа́вый, / и во Ио́не погребе́ние прообразова́вый, / и Воскресе́ние всем подая́й, / Тебе́ вопие́м с проро́ком: / от тли нас возведи́, Благоутро́бне Го́споди.

К могу́щему мя спасти́ Го́споду / из глубины́ грехо́вныя возопи́х, / и от тли возведе́ живо́т мой, / я́ко Человеколю́бец.

Отве́ргл мя еси́ / во глубины́ се́рдца морска́го, / и ви́дех чудеса́ Твоя́, Го́споди.

Содержи́ма мя, приими́, Человеколю́бче, / грехи́ мно́гими, / и припа́дающа щедро́там Твои́м, / я́ко проро́ка, Го́споди, и спаси́ мя.

На Рождество Богородицы и Преполовение:

Я́ко во́ды морски́я, Человеколю́бче, / волна́ми жите́йскими обурева́юся. / Те́мже, я́ко Ио́на, та́ко вопию́ Ти: / возведи́ от тли живо́т мой, / Благоутро́бне Го́споди.

Я́ко Ио́ну проро́ка от ки́та возве́л еси́, Го́споди, / из ба́ви мя от лови́твы чужда́го / и спаси́ мя, Ще́дре, я́ко Многоми́лостив.

Я́ко от ки́та изба́вил еси́ проро́ка Твоего́, / и мене́, Спа́се наш, / от мно́жества прегреше́ний мои́х изба́ви.

Превзыдо́ша главу́ мою́ беззако́ния моя́, / я́ко тя́жкое бре́мя на мя обремени́вшаяся, / во отча́яния глубины́ низвлача́т мя, / но пре́жде да́же погря́знути ми, Го́споди, спаси́ мя.

Из чре́ва а́дова / во́пля моего́ услы́шал еси́ глас мой / и изба́вил еси́ от тли живо́т мой, Многоми́лостиве.

Песнь 7

Бо́жия снизхожде́ния / огнь устыде́ся в Вавило́не иногда́. / Сего́ ра́ди о́троцы в пещи́, ра́дованною ного́ю, / я́ко во цве́тнице, лику́юще, поя́ху: / благо слове́н еси́, Бо́же оте́ц на́ших.

Честнаго Креста:

Безу́мное веле́ние / мучи́теля злочести́ваго лю́ди поколеба́, / ды́шущее преще́ние и злохуле́ние богоме́рзкое, / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному ду́ху, / со огне́м су́ще, поя́ху: / препе́тый отце́в и нас Бо́же, благослове́н еси́.

Осмогласника и Преображения:

О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Халде́йския пе́щи / всепа́губную си́лу угаси́вше / о́бразом А́нгела снизше́дшаго, / Зижди́телю ю́ноши взыва́ху: / благослове́н еси́ и хва́льный, Бо́же отец на́ших.

На по́ле Деи́ре / иногда́ мучи́тель пещь поста́ви на муче́ние Богоно́сных, / в не́йже три о́троки песносло́вяху Еди́наго Бо́га, / тро́ично воспева́ху, глаго́люще: / отце́в Бо́же, благослове́н еси́.

От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

О́троцы Богочести́вии в Вавило́не / о́бразу злато́му не поклони́шася, / но посреде́ пе́щи о́гненныя, ороша́еми, / песнь воспева́ху, глаго́люще: / превозноси́мый отце́в и нас Бо́же, благослове́н еси́.

А́нгелом о́троки из огня́ спасы́й / и гремя́щую пещь преложи́вый на ро́су, / благослове́н еси́, Бо́же оте́ц на́ших.

В нача́ле зе́млю основа́вый / и Небеса́ сло́вом утверди́вый, / благослове́н еси́ во ве́ки, / Го́споди, Бо́же оте́ц на́ших.

О́троки ороси́вый в пещи́ / и Де́ву сохрани́вый ро́ждшую Тя по Рождестве́, / благослове́н еси́, Бо́же оте́ц на́ших.

На Рождество Богородицы и Преполовение:

Халде́йская пещь, огне́м распала́емая, / ороша́шеся Ду́хом, / Бо́жиим предстоя́нием, от́роцы поя́ху: / благослове́н еси́, Бо́же оте́ц на́ших.

В пещи́ о́гненней о́троки спасы́й, / благослове́н еси́ во ве́ки, / Го́споди, Бо́же оте́ц на́ших.

Подража́тели трие́х Твои́х, Го́споди, отроко́в сотвори́ ны, / сопротивля́ющияся греху́, /и огнь страсте́й попира́ющия, и пою́щия: / благослове́н еси́, Бо́же оте́ц на́ших.

Ви́дев мучи́тель Четве́ртаго зрак, / глаго́лаше су́щим с ним: / три вверго́хом в пла́мень, / ны́не же четы́ре ви́жу, / Еди́наго зрак ужаса́ет мой ум, / удивля́ет мое́ помышле́ние. / Трие́х лик пое́т Тя во ве́ки.

Отроко́м, в пещь вве́рженным, / ви́дев мучи́тель Четве́ртаго зрак / в ви́де Сы́на Бо́жия, / с ни́ми зовя́ше: / благослове́н еси́, Бо́же во ве́ки.

Песнь 8

Сей и Преображения:

Седмери́цею пещь / халде́йский мучитель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Честнаго Креста:

Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во / и огнь в ро́су претво́ршее / и превозноси́те всем жизнь подава́ющаго / Ду́ха Всесвята́го во ве́ки.

Осмогласника:

Мусики́йским орга́ном согласу́ющим / и лю́дем безчи́сленным, покланя́ющимся о́бразу в Деи́ре, / три о́троцы не повину́вшеся, / Го́спода воспева́ху / и славосло́вяху во вся ве́ки.

Победи́тели мучи́теля и пла́мене / благода́тию Твое́ю бы́вше, / за́поведем Твои́м зело́ прилежа́ще, / о́троцы вопия́ху: / благослови́те, вся дела́ Госпо́дня, Го́спода.

Отрица́ющеся златослуже́ния о́троцы, / царя́ небрего́ша, / яви́ бо я́ огнь преложе́нный рабы́ Бо́жия, вопию́щия: / да пое́т тварь Го́спода / и превозно́сит во вся ве́ки.

Нече́стия орга́ны ину́ю песнь, / благоче́стия же благовеща́ннии поя́ху гу́сли: / благослови́те, дела́ Госпо́дня, Христа́ во ве́ки.

Богоглаго́ливии о́троцы, в пещи́ / со огне́м пла́мень попира́юще, поя́ху: / благослови́те, дела́ Госпо́дня, Го́спода.

От Отца́ пре́жде век рожде́ннаго / и от Ма́тере в после́дняя воплоще́ннаго, / свяще́нницы, благослови́те, / лю́дие, превозноси́те во вся ве́ки.

На горе́ святе́й просла́вльшася / и в купине́ огне́м Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

Безнача́льнаго Царя́ Сла́вы, / Его́же трепе́щут Небе́с ныя Си́лы, / по́йте, свяще́нницы, / лю́дие, превозноси́те во вся ве́ки.

На Рождество Богородицы:

Покрыва́яй вода́ми превы́спренняя Своя́, / полага́яй мо́рю преде́л песо́к / и содержа́й вся, / Тя пое́т со́лнце, Тя сла́вит луна́, / Тебе́ прино́сит песнь вся тварь, / я́ко Соде́телю всех во ве́ки.

Преполовения:

А́нгели и Небеса́, на Престо́ле Сла́вы Седя́щаго / и я́ко Бо́га непреста́нно Сла́вимаго, / благослови́те, по́йте / и превозноси́те Его́ во ве́ки.

В пещи́ ликова́ние поста́виша о́троцы, / сочине́нный чин прии́мше, / тва́ри повелева́юще сла́ви ти Вседе́тельную Прему́дрость, / Христа́ воспева́юще: / благослови́те, вся дела́ Госпо́дня, Го́спода.

Иерусали́ме освяще́нный, / благоро́днии су́ще о́троцы яви́шася, / в нем Боже́ственных зако́ нов не прие́мше забве́ния всегуби́тельнаго, / но вавило́нский огнь в себе́ благоче́ствующих ходата́йствовавше, / в нем ороше́ни, поя́ху: / благослови́те творе́ния, Го́спода.

Разжжи́те пещь седмери́цею, / до́ндеже до конца́ разгори́тся, / мучи́тель рече́ халде́ом, / Ана́нию, Аза́рию и Мисаи́ла, вложи́те я́ в ню, / и́же о́бразу зла то́му не поклони́шася, но глаго́лаху: / мы Бо́га и́мамы на Небесе́х, / Ему́же слу́жим и покланя́емся во ве́ки.

Благослови́т Тя вся тварь, Го́споди, / славосло́виша Тя Небе́сныя Си́лы со о́троки, / и мы воспева́ем и превозно́сим во вся ве́ки.

Безнача́льный Бог Сло́во, / прише́дый на Креще́ние, / соверша́ше та́инство смотре́ния во Иорда́не / и Предте́чи глаго́лаше: / ты Мя креща́еши водо́ю, / Аз же тя Ду́хом / с вопию́щими Мне ве́рою: / благослови́те, дела́ Госпо́дня, Го́спода.

Царя́ Небе́снаго, / Его́же пою́т во́и А́нгельстии, / хвали́те и превозноси́те во вся ве́ки.

Преподо́бнии Твои́ о́троцы, / в пещь вве́ржени, поя́ху: / благослови́те, дела́ Госпо́дня, Го́спода.

Песнь 9

Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинона́чалия велича́ют.

Честнаго Креста:

Та́ин еси́, Богоро́дице, рай, / невозде́ланно возрасти́вший Христа́, / И́мже Кре́стное Живоно́сное на земли́ насади́ся Дре́во; / тем, ны́не возноси́му, / покланя́ющеся Ему́, Тя велича́ем.

Сне́дию дре́ва ро́ду прибы́вшая смерть / Кресто́м упраздни́ся днесь, / и́бо прама́терняя всеро́дная кля́тва разруши́ся прозябе́нием / Чи́стыя Богома́тере, / Ю́же вся си́лы Небе́сный велича́ют.

Осмогласника и Преображения:

Устраши́ся всяк слух / неизрече́нна Бо́жия снизхожде́ния, / я́ко Вы́шний во́лею сни́де да́же и до пло́ти, / от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

Благослове́н Госпо́дь, Бог Изра́илев, / воздви́гнувый рог спасе́ния нам / в дому́ Дави́дове, о́трока Своего́, / в ни́хже посети́ нас Восто́к с высоты́ / и напра́вил ны есть на путь ми́ра.

Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

Тя, Неискусобра́чную Ма́терь Бо́га Вы́шняго, / Тя, па́че ума́ ро́ждшую сло́вом вои́стинну Бо́га, / вы́шшую пречи́стых Сил, / немо́лчными славословле́нии велича́ем.

О, де́вства край, Богоро́дице! / пе́сньми же сла́вными / пра́здники возвыша́ющая благода́тей Твои́х / и ны́не де́вственною Сло́ва Твоего́ па́мятию / наи́тием та́йным украша́ющая в ней Тя велича́ющия.

Уста́вы прешла́ еси́ естества́, / Соде́теля заче́нши и Го́спода, / и дверь спасе́ния ми́рови была́ еси́. / Тем Тя, Богоро́дице, / непреста́нно велича́ем.

Велича́ем Тя, Ма́терь Бо́жию, / и сла́вим Тя, Богоро́дице Де́во, / я́ко Спа́са ро́ждшую душ на́ших.

Неви́димаго зра́ком Боже́ственным прие́мшая, / Неискусобра́чная Де́во и Ма́ти, / пе́сньми Рождество́ Твое́ велича́ем.

Велича́ем Тя, Всенепоро́чную / Ма́терь Христа́ Бо́га на́шего, / Ю́же осени́ Дух Святы́й.

Проявле́нное на горе́ законополо́жнику во огни́ и купине́ / Рождество́ Присноде́вы / в на́ше, ве́рных, спасе́ние / пе́сньми немо́лчными велича́ем.

Воспита́нная во свята́я святы́х / и ро́ждшая Свет вселе́нныя, / Благода́тная, ра́дуйся, / пе́сньми Рождество́ Твое́ велича́ем.

Тя, Небесе́ и земли́ Хода́таицу, / вси ро́ди, ублажа́ем, / пло́тски бо всели́ся / в Тя исполне́ние, Де́во, Божества́.

На Рождество Богородицы и в Преполовение:

Чу́жде ма́терем де́вство, / и стра́нно де́вам деторожде́ние: / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

Тя, Неопа́льную, / Ю́же прови́дяше Моисе́й, / неопа́льно горя́щу иногда́ огне́м Божества́, / я́ко неопа́льно ро́ждшую Го́спода, / Воплоще́ннаго Бо́га, / пе́сньми немо́лчными велича́ем.

Весе́лием вси Де́ве, е́же ра́дуйся, возопии́м, / Благода́тная Мари́е, Богоневе́сто, / Тя, я́ко Ма́терь Бо́жию, / ве́рнии, единому́дренно велича́ем.

Да умолча́т еретико́в собра́ния, / не и́стинно Богоро́дицу испове́дающих Тя, / и́бо свы́ше Тя проро́цы препропове́даша / Ма́терь бы́ти Бо́жию / и Хода́таицу ро́да на́шего. / Тем Тя, Де́во, велича́ем.

Разбо́йника подража́яй, окая́нный аз, / испове́даяй Тя, зову́ Тебе́, / Еди́наго от Отца́, и от Де́вы неизрече́нно воплоще́нна, / и мене́ ра́ди бы́вша по мне, / но я́ко Свет у́мный, Со́лнце, / не воспомяну́в зол, во Ца́рствии Твое́м помяни́ мя, / егда́ Судия́, Го́споди, ся́деши на Престо́ле.

Воплоще́ния Бо́жия Орга́н, Де́во, была́ еси́, / и смеше́ния Сло́ва в пло́ти е́же от Тебе́ Черто́г, / соедине́нома бо Существо́ма, / сугу́быма де́йствома и хоте́ньма показу́ема, / Его́же пою́ще, Тя, Богоро́дице, велича́ем.

Чи́стую сла́вно почти́м, / лю́дие, Богоро́дицу, / огнь Божества́ прии́мшую во чре́ве неопа́льно, / пе́сньми велича́ем.

Тя, ши́ршую Небе́с, Богоро́дице, / и све́тльшую со́лнца, / пе́сньми велича́ем.

Тя, Богоро́дицу, / Ма́терь Све́та, / в пе́снех велича́ем.

Ирмосы в предпразднство Рождества Христова

Месяца декабря в 22-й день на повечерии канон, глас 6.

Песнь 1: Се́ченное, сече́тся:

Песнь 3: Госпо́дь, Сый, всех и Зижди́тель Бог, / созда́нное, Безстра́стный, обнища́в, Себе́ соедини́ / и я́ко Младе́нец, носи́мь пло́тию, / в я́слех убо́гих покланя́емь быва́ет: / яди́те,– вопия́,– Те́ло Мое́ / и ве́рою утверди́теся.

Песнь 4: Прови́дев проро́к:

Песнь 5: Сою́зом любве́ связу́еми, я́ко братолю́бцы, / Владу́щему все́ми, мир зело́ Возлюби́вшему / и да́вшему избавле́ние Сы́на Возлю́бленнаго, / дади́м сла́ву Даю́щему всем мир.

Песнь 6: Бе́здна после́дняя:

Песнь 7: О́троцы в Вавило́не:

Песнь 8: За зако́ны оте́ческия:

Песнь 9: Стра́нствия Влады́чня / и Безсме́ртныя Трапе́зы / во убо́зем верте́пе высо́кими умы́, / ве́рнии, прииди́ те, наслади́мся, / воплоти́вшееся Сло́во неизрече́нно уве́девше, / Его́же велича́ем.

В 23-й день на повечерии трипеснец, глас 6.

Песнь 5: К Тебе́ у́тренюю, / благоутро́бия ра́ди Себе́ истощи́вшему непрело́жно / и зрак раба́ от Де́вы носи́вшему, / Сло́ве Бо́жий, / мир пода́ждь ми, па́дшему, / Человеколю́бче.

Песнь 8: Столп зло́бы противобо́жныя / о́троцы Боже́ственнии обличи́ша, / на Христа́ же, шата́яся, И́род свире́пеет, / сове́тует тще́тная, / уби́ти поучава́ется Живота́, держа́щаго дла́нию, / Его́же вся тварь благослови́т, сла́вящи во ве́ки.

Песнь 9: Честне́йшую Херуви́м:

В 24-й день на повечерии канон, глас 6.

Песнь 1: Волно́ю морско́ю / Скры́вшаго дре́вле / гони́теля мучи́теля, / в я́слех Сокрыва́емого, уби́ти и́щет И́род. / Но мы с волхвы́ пои́м: / Го́сподеви воспои́м, сла́вно бо просла́вися.

Песнь 3: Тебе́, на вода́х / пове́сившаго всю зе́млю неодержи́мо, / тварь, ви́девши в верте́пе ражда́ющася, / ужа́сно содрага́шеся, / несть свят, / па́че Тебе́, Го́споди, зову́щи.

Песнь 4: От Де́вы прише́ствие Твое́ / прови́дя, Авваку́м, ужа́сся, вопия́ше: / Ты, от ю́га воплоща́яся, при ше́л еси́, Изба́вителю, / Ада́ма отринове́ннаго воззва́ти.

Песнь 5: Богоявле́ния Твоего́, Христе́, / е́же к нам ми́лостивно бы́вшаго, / Иса́ия, Свет ви́дев Невече́рний, / от но́щи у́треневав, взыва́ше: / се Де́ва во чре́ве прии́мет и породи́т воплоща́емое Сло́во, / и вси земноро́днии возра́дуются.

Песнь 6: Ят бысть, / но не удержа́н в пе́рсех ки́товых Ио́на: / Твой бо о́браз нося́, / ро́ждшагося и пло́тию я́вльшагося, / я́ко от черто́га, от зве́ря изы́де. / Рожде́нный бо ны́не пло́тию / во гроб и смерть хоте́л еси́ вни́ти / и па́ки воскре́снути тридне́вен.

Песнь 7: Неизрече́нное чу́до: / в пещи́ Изба́вивый преподо́бныя о́троки из пла́мене, / в я́слех убо́гих Младе́нец возлежа́ / во спасе́ние нас, пою́щих: / Изба́вителю Бо́же, / благослове́н еси́.

Песнь 8: Ужасни́ся, боя́йся, Не́бо, / и да подви́жатся основа́ния земли́: / се бо пелена́ми повива́ется вся нося́й дла́нию / и во я́слех ма́лех странноприе́млется. / Его́же, о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Песнь 9: Не диви́ся ны́не, о Ма́ти! / ви́дящи я́ко Младе́нца, / Его́же из чре́ва пре́жде денни́цы роди́ Оте́ц, / возста́вити бо и сопросла́вити / челове́ческое па́дшее естество́ приидо́х я́вственно, / ве́рою и любо́вию Тя велича́ющее.

Ирмосы в предпразднство Святых Богоявлений

Месяца января в 3-й день на повечерии трипеснец, глас 6.

Песнь 5: К Тебе́ у́тренюю, / благоутро́бия ра́ди Себе́ истощи́вшему непрело́жно / и раба́ руко́ю крести́тися восхоте́вшему, / Сло́ве Бо́жий, / мир пода́ждь ми, па́дшему, / Человеколю́бче.

Песнь 8: С толпу́ зло́бы лю́таго И́рода вси поруга́вшеся, / на Иорда́н прииди́те. / И́дем, ве́рнии, да у́зрим Христа́ Изба́вителя, / от Предте́чи креща́емаго пло́тию во струя́х, / Его́же вся тварь благослови́т, / сла́вящи во ве́ки.

Песнь 9: Честне́йшую Херуви́м:

В 4-й день на повечерии канон, глас 6.

Песнь 1: Се́ченное, сече́тся:

Песнь 3: Госпо́дь, Сый, всех и Зижди́тель Бог, / созда́нное Безстра́стный, обнища́в, Себе́ соедини́л еси́ / и струя́ми, и́миже хоте́л еси́ приити́, / Сам, Сый, лю́дем провозглаша́л еси́: / во́ду Жи́зни почерпи́те / и ве́рою утверди́теся.

Песнь 4: Прови́дя проро́к / та́йны Твоея́ неизрече́нное, Христе́, провозгласи́: / положи́л еси́ кре́пкую Креще́ния благода́ть / ве́рою сие́ прие́млющим всем во избавле́ние грехо́в.

Песнь 5: Сою́зом боя́зни содержи́мь, ны́не Предте́ча / отрица́ется крести́ти, / благогове́йно Христа́ ви́дев, на́га стоя́ща на воде́, / водо́ю покрыва́юща превы́спренняя.

Песнь 6: Бе́здна после́дняя:

Песнь 7: О́троцы в Вавило́н:

Песнь 8: За зако́ны оте́ческия:

Песнь 9: Стра́нствия Влады́чня / и Безсме́ртныя Трапе́зы / во убо́зем верте́пе пре́жде наслади́вшеся, / ны́не на Иорда́н теце́м, / та́йну зря́ще стра́нну, / Го́рния све́тлости хода́тайственну.

В 5-й день на повечерии канон, глас 6.

Песнь 1: Волно́ю морско́ю / Покры́вшаго дре́вле / гони́теля мучи́теля – / Иорда́нския струи́ спря́товают и кры́ют, / мое́ ны́не очища́я челове́ческим очище́нием, / сла́вно бо просла́вися.

Песнь 3: Тебе́, на вода́х / основа́вшаго всю зе́млю неодержи́мо, / тварь, ви́девши пло́тию кры́емаго в вода́х, / у́жасом мно́гим содержа́шеся, / несть свят, / па́че Тебе́, Го́споди, взыва́ющи.

Песнь 4: Е́же ко Креще́нию Твое́ прише́ствие / прови́дя, Авваку́м, ужа́сся, вопия́ше: / на мо́ре ко́ни Твоя́, / во́ды мно́ги наве́л еси́, Спа́се, смуща́ющия.

Песнь 5: Богоявле́ния Твоего́, Христе́, / к нам ми́лостивно бы́вшаго, / Иса́ия, Свет ви́дев Невече́рний, / из но́щи у́треневав, взыва́ше: / просвеще́ннии, прииди́те, омы́йтеся водо́ю Боже́ственною / и Ду́хом я́ве и ду́шу и те́ло очи́стите.

Песнь 6: Ят бысть, / но не удержа́н стра́хом Боже́ственный Крести́тель. / А́ще бо и спря́товается / прибли́житися огню́ се́но, / но, слы́шав: оста́ви ны́ не,– / тече́, повеле́ние исполня́я я́ко раб, / Боже́ственному же, свы́ше свиде́тельствующему гла́су, / услы́ша Сы́на Преве́чнаго.

Песнь 7: Неизрече́нное чу́до: / в пещи́ Изба́вивый преподо́бныя о́троки из пла́мене преклоня́ет верх / и про́сит креще́ния от раба́, / очища́я вопию́щия: / Изба́вителю Бо́же, / благослове́н еси́.

Песнь 8: Ужасни́ся, боя́йся, Не́бо, / и да подви́жатся основа́ния земли́: / се бо водо́ю облачи́тся / Опали́вый водо́ю пре́жде пра́веднаго же́ртву пресла́вно. / Его́же, о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Песнь 9: Не рыда́йте всу́е, / отча́яния тенета́ми удавля́еми челове́цы, пови́ннии злых, / но во умиле́нии души́ / присту́пим Очища́ющему вся, / я́ко Еди́ному чи́стому / и даю́щему проще́ние Креще́нием.

После́дование церко́вных сочине́ний, Боже́ственныя и свяще́нныя Литурги́и

По пе́рвом проше́нии глаго́лет пе́рвый лик, глас 8:

1: Благослови́ душе́ моя́ Го́спода. Благослове́н еси́ Го́споди. Благослови́ душе́ моя́ Го́спода, и вся вну́тренняя моя́ и́мя свято́е его́.

Вторы́й лик:

2: Благослови́ душе́ моя́ Го́спода и не забыва́й всех воздая́ний Его́.

1: Очища́ющаго вся беззако́ния твоя́, исцеля́ющаго вся неду́ги твоя́:

2: Избавля́ющаго от истле́ния живо́т твой, венча́ющаго тя ми́лостию и щедро́тами:

1: Исполня́ющаго во благи́х жела́ние твое́, обнови́тся я́ко о́рля ю́ность твоя́.

2: Творя́й ми́лостыни Госпо́дь, и судьбу́ всем оби́димым, сказа́ пути́ своя́ Моисе́ови, сыново́м изра́илевым хоте́ния своя́.

1: Щедр и ми́лостив Госпо́дь, долготерпели́в и многоми́лостив.

2: Не до конца́ прогне́вается, ниже́ в век вражду́ет: не по беззако́нием на́шым сотвори́л е́сть нам, ниже́ но грехо́м на́шым возда́л е́сть нам.

1: Я́ко по высоте́ небе́сней от земли́, утверди́л е́сть Госпо́дь ми́лость Свою́ на боя́щихся Его́.

2: Ели́ко отстоя́т восто́цы от за́пад, уда́лил е́сть от нас беззако́ния на́ша.

1: Я́коже ще́дрит оте́ц сы́ны, уще́дри Госпо́дь боя́щихся Его́.

2: Я́ко той позна́ созда́ние на́ше, помяну́, я́ко пе́рсть есмы́.

1: Челове́к, я́ко трава́ дни́е его́, я́ко цвет се́льный, та́ко оцвете́т.

2: Я́ко дух про́йде в нем, и не бу́дет, и не позна́ет ктому́ ме́ста своего́.

1: Ми́лость же Госпо́дня от ве́ка и до ве́ка на боя́щихся Его́.

2: И пра́вда Его́ на сыне́х сыно́в храня́щих заве́т Его́, и по́мнящих за́поведи Его́, твори́ти я.

1: Госпо́дь на Небеси́ угото́ва Престо́л свой и Ца́рство его́ все́ми облада́ет.

2: Благослови́те Го́спода вси А́нгели его́, си́льнии кре́постию, творя́щии сло́во Его́, услы́шати глас слове́с Его́.

1: Благослови́те Го́спода вся си́лы Его́, слуги́ Его́ творя́щии во́лю Его́.

2: Благослови́те Го́спода вся дела́ Его́, на вся́ком ме́сте влады́чества Его́.

Пе́рвый лик вы́шшим гла́сом:

1: Сла́ва отцу́, и Сы́ну, и Свято́му Ду́ху.

Вторы́й лик:

2: И ны́не, и при́сно, и во ве́ки веко́в, ами́нь.

Па́ки пе́рвый лик:

1: Благослови́ душе́ моя́ Го́спода, и вся вну́тренняя моя́ и́мя свято́е Его́: Благослове́н еси́ Го́споди.

По ектении́ вторы́й лик:

2: Сла́ва отцу́, и Сы́ну, и Свято́му Ду́ху.

Хвали́ душе́ моя́ Го́спода, восхвалю́ Го́спода в животе́ мое́м, пою́ Бо́гу моему́, до́ндеже е́смь.

Пе́рвый лик:

1: Не наде́йтеся на кня́зи, на сы́ны челове́ческия, в ни́хже не́сть спасе́ния.

2: Изы́дет дух его́, и возврати́тся в зе́млю свою́, в той де́нь поги́бнут вся помышле́ния его́.

1: Блаже́н, ему́же Бог Иа́ковль помо́щник его́, упова́ние его́ на Го́спода Бо́га своего́.

2: Сотво́ршаго не́бо и зе́млю, мо́ре, и вся я́же в них.

1: Храня́щаго и́стину в век, творя́щаго суд оби́димым, даю́щаго пи́щу а́лчущым.

2: Госпо́дь реши́т окова́нныя, Госпо́дь умудря́ет слепцы́, Госпо́дь возво́дит низве́рженныя, Госпо́дь лю́бит пра́ведники.

1: Госпо́дь храни́т прише́льцы, си́ра и вдову́ прии́мет, и пу́ть гре́шных погуби́т.

2: Воцари́тся Госпо́дь во век, Бог твой Сио́не, в род и род.

И ны́не, глас 6.

Единоро́дный Сы́не и Сло́ве Бо́жий, безсме́ртен сый, и изво́ливый спасе́ния на́шего ра́ди воплоти́тися от Святы́я Богоро́дицы, и Присноде́вы Мари́и, непрело́жно вочелове́чивыйся: распны́йся же, Христе́ Бо́же, сме́ртию сме́рть попра́вый, еди́н сый Святы́я Тро́ицы, спрославля́емый Отцу́, и Свято́му Ду́ху, спаси́ нас.

Та́же блаже́нны:

На 12:

1: Во Ца́рствии Твое́м помяни́ нас Го́споди. Блаже́ни ни́щии ду́хом, я́ко тех е́сть Ца́рство Небе́сное.

2: Блаже́ни пла́чущии я́ко ти́и уте́шатся.

На де́сять:

1: Блаже́ни кро́тцыи, я́ко ти́и насле́дят зе́млю.

2: Блаже́ни а́лчущии и жа́ждущии пра́вды, я́ко ти́и насы́тятся.

На о́смь:

1: Блаже́ни ми́лостивии, я́ко ти́и поми́ловани бу́дут.

2: Блаже́ни чи́стии се́рдцем, я́ко ти́и Бо́га у́зрят.

На ше́сть:

1: Блаже́ни миротво́рцы, я́ко ти́и сы́нове Бо́жии нареку́тся.

2: Блаже́ни изгна́ни пра́вды ра́ди, я́ко тех е́сть Ца́рство Небе́сное.

На четы́ре:

1: Блаже́ни есте́, егда́ поно́сят вам, и изжену́т, и реку́т всяк зол глаго́л, на вы лжу́ще Мене́ ра́ди.

2: Ра́дуйтеся и весели́теся, я́ко мзда ва́ша мно́га на Небесе́х.

1: Сла́ва отцу́, и Сы́ну, и Свято́му Ду́ху.

2: И ны́не и при́сно и во ве́ки веко́в, ами́нь.

Во ины́я же дни, я́коже уста́в изъявля́ет, пою́тся антифо́ны си́и:

Антифо́н 1:

Бла́го е́сть испове́датися Го́сподеви.

Припе́в: Моли́твами Богоро́дицы Спа́се спаси́ нас.

Стих: Бла́го е́сть испове́датися Го́сподеви, и пе́ти и́мени Твоему́ Вы́шний. Припе́в.

Стих: Возвеща́ти зау́тра ми́лость Твою́ и и́стину Твою́ на вся́ку но́щь. Припе́в.

Стих: Я́ко прав Госпо́дь Бог наш, и не́сть непра́вды в Нем. Припе́в.

Сла́ва Отцу́, и Сы́ну, и Свято́му Ду́ху. Припе́в.

И ны́не и при́сно и во ве́ки веко́в, ами́нь. Припе́в.

Антифо́н 2:

Госпо́дь воцари́ся, в ле́поту облече́ся.

Припе́в: Моли́твами святы́х твои́х, Спа́се спаси́ нас.

Стих: Госпо́дь воцари́ся, в ле́поту облече́ся, облече́ся Госпо́дь в си́лу, и препоя́сася. Припе́в.

Стих: И́бо утверди́ вселе́нную, я́же не подви́жится. Припе́в.

Стих: Свиде́ния твоя́ уве́ришася зело́: до́му твоему́ подоба́ет святы́ня Го́споди, в долготу́ дний. Припе́в.

Сла́ва отцу́, и Сы́ну, и свято́му ду́ху. Припе́в.

И ны́не и при́сно и во ве́ки веко́в, ами́нь. Припе́в.

Единоро́дный Сы́не и сло́ве Бо́жий, безсме́ртен сый, и изво́ливый спасе́ния на́шего ра́ди воплоти́тися от святы́я Богоро́дицы, и присноде́вы мари́и, непрело́жно вочелове́чивыйся: распны́йся же, Христе́ Бо́же, сме́ртию сме́рть попра́вый, еди́н сый святы́я Тро́ицы, спрославля́емый отцу́, и свято́му ду́ху, спаси́ нас.

Антифо́н 3:

Прииди́те возра́дуемся Го́сподеви, воскли́кнем бо́гу спаси́телю на́шему.

Припе́в: Спаси́ ны Сы́не Бо́жий, во святы́х ди́вен сый, пою́щыя ти: аллилу́иа.

Стих: Предвари́м лице́ его́ во испове́дании, и во псалме́х воскли́кнем ему́: Припе́в.

Стих: Я́ко Бог ве́лий Госпо́дь, и Ца́рь ве́лий по всей земли́. Припе́в.

Стих: Я́ко в руце́ его́ вси концы́ земли́, и высоты́ гор того́ су́ть. Припе́в.

Стих: Я́ко того́ е́сть мо́ре, и той сотвори́ е, и су́шу ру́це его́ созда́сте. Припе́в.

По вхо́де же Ева́нглиа:

Прииди́те, поклони́мся и припаде́м ко Христу́. Припе́в.

А́ще же неде́ля, припе́в:

Спаси́ ны Сы́не Бо́жий, воскресы́й из ме́ртвых пою́щыя Ти: аллилу́иа.

Посе́м тропари́ по чи́ну.

Та́же трисвято́е. Пе́рвый лик:

Святы́й Бо́же, Святы́й Кре́пкий, Святы́й Безсме́ртный поми́луй нас. О́ба ли́ка, три́жды.

Сла́ва, и ны́не:

Святы́й Безсме́ртный поми́луй нас.

Пе́рвый лик вы́шшим гла́сом:

Святы́й Бо́же, святы́й кре́пкий, святы́й безсме́ртный поми́луй нас.

Проки́мен, Апо́стол, аллилу́иа, Ева́нглие.

Сла́ва Тебе́ Го́споди, сла́ва Тебе́.

Та́же ектении́, и Херуви́мская пе́снь:

И́же Херуви́мы та́йно образу́юще, и Животворя́щей Тро́ице трисвяту́ю пе́снь припева́юще, вся́кое ны́не жите́йское отложи́м попече́ние.

Я́ко да Царя́ всех подымем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

А сие́ в вели́кий четверто́к то́чию пое́тся:

Ве́чери Твоея́ Та́йныя, дне́сь Сы́не Бо́жий, прича́стника мя приими́, не бо́ враго́м Твои́м та́йну пове́м, ни лобза́ния ти дам я́ко Иу́да, но я́ко разбо́йник испове́даю Тя: помяни́ мя Го́споди во Ца́рствии Твое́м. Аллилу́иа, аллилу́иа, аллилу́иа.

В вели́кую же суббо́ту пою́т сие́:

Да молчи́т вся́кая пло́ть челове́ча, и да стои́т со стра́хом и тре́петом, и ничто́же земно́е в себе́ да помышля́ет: Ца́рь бо ца́рствующих, и Госпо́дь госпо́дствующих прихо́дит закла́тися, и да́тися в сне́дь ве́рным. Предхо́дят же сему́ ли́цы А́нгельстии, со вся́ким Нача́лом и Вла́стию: многоочи́тии Херуви́ми, и шестокрила́тии Серафи́ми, ли́ца закрыва́юще, и вопию́ще пе́снь: аллилу́иа, аллилу́иа, аллилу́иа.

Свяще́нник, ектении́.

Лю́дие: Го́споди поми́луй.

И: Пода́й Го́споди: По обы́чаю.

По ектениа́х, свяще́нник:

Мир всем.

Лю́дие: И ду́хови твоему́.

Свяще́нник: Возлю́бим друг дру́га, да единомы́слием испове́мы.

Лю́дие: Отца́, и Сы́на, и Свята́го Ду́ха, Тро́ицу Единосу́щную и Неразде́льную.

Святы́й симво́л:

Ве́рую во Еди́наго Бо́га Отца́ Вседержи́теля, Творца́ Не́бу и земли́, ви́димым же всем и неви́димым. И во Еди́наго Го́спода Иису́са Христа́ Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га И́стинна от Бо́га И́стинна, рожде́нна, не сотворе́нна, Единосу́щна Отцу́, И́мже вся бы́ша. Нас ра́ди Челове́к, и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны при Понти́йстем Пила́те, и страда́вша, и погребе́на, и воскре́сшаго в тре́тий де́нь по писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою, суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю Собо́рную и Апо́стольскую Це́рковь. Испове́дую еди́но Креще́ние во оставле́ние грехо́в. Ча́ю воскре́сния ме́ртвых: И жи́зни бу́дущаго ве́ка. Ами́нь.

Свяще́нник: Ста́нем до́бре:

Лю́дие: Ми́лость ми́ра, же́ртву хвале́ния.

Свяще́нник: Благода́ть Го́спода:

Лю́дие: И со ду́хом твои́м.

Свяще́нник: Горе́ име́им сердца́.

Лю́дие: И́мамы ко Го́споду.

Свяще́нник: Благодари́м Го́спода.

Лю́дие: Досто́йно и пра́ведно е́сть покланя́тися отцу́, и Сы́ну, и свято́му ду́ху: Тро́ице единосу́щней и неразде́льней.

Свяще́нник: Побе́дную пе́снь:

Лю́дие: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́: оса́нна в Вы́шних, благослове́н Гряды́й во И́мя Госпо́дне, оса́нна в вы́шних.

Свяще́нник: Приими́те, яди́те:

Лю́дие: Ами́нь.

Свяще́нник: Пи́йте от нея́ вси:

Лю́дие: Ами́нь.

Свяще́нник: Твоя́ от Твои́х:

Лю́дие: Тебе́ пое́м, Тебе́ благослови́м, Тебе́ благодари́м Го́споди, и мо́лим Ти ся Бо́же наш.

Свяще́нник: Изря́дно о пресвяте́й:

Лю́дие, глас 8-й: Досто́йно е́сть я́ко вои́стинну блажи́ти Тя Богоро́дицу: Присноблаже́нную, и Пренепоро́чную, и Ма́терь Бо́га на́шего. Честне́йшую Херуви́м, и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу тя велича́ем.

А́ще же литурги́я вели́каго васи́лиа, глас 8-й:

О Тебе́ ра́дуется, Благода́тная, вся́кая тва́рь, А́нгельский собо́р и челове́ческий род, освяще́нный Хра́ме и Раю́ слове́сный, Де́вственная похвало́, из Нея́же Бог воплоти́ся, и Младе́нец бы́сть, пре́жде век сый Бог наш: ложесна́ бо Твоя́ престо́л сотвори́, и чре́во Твое́ простра́ннее Небе́с соде́ла. О тебе́ ра́дуется, Благода́тная, вся́кая тва́рь, сла́ва Тебе́.

Свяще́нник, ектении́.

Лю́дие: Го́споди поми́луй, по обы́чаю.

Свяще́нник: И сподо́би нас Влады́ко:

Лю́дие: О́тче наш, И́же еси́ на Небесе́х, да святи́тся И́мя Твое́: да прии́дет Ца́рствие Твое́: да бу́дет во́ля Твоя́, я́ко на Небеси́ и на земли́: хлеб наш насу́щный да́ждь нам дне́сь: и оста́ви нам до́лги на́ша, я́коже и мы оставля́ем должнико́м на́шим: и не введи́ нас во искуше́ние: но изба́ви нас от лука́ваго.

И про́чее по обы́чаю, до:

Во́нмем. Свята́я святы́м.

Лю́дие: Еди́н Свят, Еди́н Госпо́дь, Иису́с Христо́с, в сла́ву Бо́га Отца́, ами́нь.

Прича́стны седми́цы

Прича́стный в неде́лю, глас 8:

Хвали́те Го́спода с небе́с: Аллилу́иа, три́жды.

В понеде́льник, глас 1:

Творя́й А́нгелы Своя́ ду́хи, и слуги́ Своя́ пла́мень о́гненный. Аллилу́иа, три́жды.

Во вто́рник, глас 8:

В па́мять ве́чную бу́дет пра́ведник: Аллилу́иа, три́жды.

В сре́ду, глас 6:

Ча́шу спасе́ния прииму́, и И́мя Госпо́дне призову́. Аллилу́иа, три́жды.

В четверто́к, глас 6:

Во всю зе́млю изы́де веща́ние их и в концы́ вселе́нныя глаго́лы их. Аллилу́иа, три́жды.

В пято́к, глас 6:

Спасе́ние соде́лал еси́ посреде́ земли́, Бо́же. Аллилу́иа, три́жды.

В суббо́ту, глас 5:

Блаже́ни я́же избра́л и прия́л еси́ Го́споди, и па́мять их в род и род. Аллилу́иа, три́жды.

В явле́ние святы́х даро́в, свяще́нник рече́т:

Со стра́хом Бо́жиим, и ве́рою приступи́те.

Лю́дие: Благослове́н Гряды́й во и́мя Госпо́дне, Бог Госпо́дь, и яви́ся нам.

Свяще́нник: Спаси́ Бо́же лю́ди твоя́:

Лю́дие: Ви́дехом Свет И́стинный, прия́хом Ду́ха Небе́снаго, обрето́хом ве́ру и́стинную, Неразде́льней Тро́ице покланя́емся, Та бо нас спасла́ е́сть.

Свяще́нник: Всегда́, ны́не и при́сно:

Лю́дие: Ами́нь. Да испо́лнятся уста́ на́ша хвале́ния Твоего́ Го́споди, я́ко да пое́м сла́ву Твою́: я́ко сподо́бил еси́ нас причасти́тися Святы́м Твои́м, Боже́ственным, Безсме́ртным, и Животворя́щым Та́йнам: соблюди́ нас во Твое́й святы́ни, ве́сь де́нь поуча́тися пра́вде Твое́й. Аллилу́иа, три́жды.

Свяще́нник ектению́ и заамво́нную моли́тву, и раздае́т анти́дор лю́дем.

Лик: Бу́ди И́мя Госпо́дне благослове́нно от ны́не и до ве́ка. Три́жды.

Псало́м 23

:Благословлю́ Го́спода на вся́кое вре́мя, вы́ну хвала́ Его́ во усте́х мои́х.

О Го́споде похва́лится душа́ моя́: да услы́шат кро́тцыи и возвеселя́тся.

Возвели́чите Го́спода со мно́ю, и вознесе́м и́мя Его́ вку́пе.

Взыска́х Го́спода, и услы́ша мя и от всех скорбе́й мои́х изба́ви мя.

Приступи́те к нему́ и просвети́теся, и ли́ца ва́ша не постыдя́тся.

Сей ни́щий воззва́, и Госпо́дь услы́ша и́, и от всех скорбе́й его́ спасе́ и́.

Ополчи́тся А́нгел Госпо́день о́крест боя́щихся Его́ и изба́вит их.

Вкуси́те и ви́дите, я́ко благ Госпо́дь: блаже́н муж, и́же упова́ет На́нь.

Бо́йтеся Го́спода, вси святи́и Его́, я́ко не́сть лише́ния боя́щымся Его́.

Бога́тии обнища́ша и взалка́ша: взыска́ющии же Го́спода не лиша́тся вся́каго бла́га.

Прииди́те, ча́да, послу́шайте мене́, стра́ху Госпо́дню научу́ вас.

Кто есть челове́к хотя́й живо́т, любя́й дни ви́дети бла́ги?

Удержи́ язы́к твой от зла и устне́ твои́, е́же не глаго́лати льсти́.

Уклони́ся от зла и сотвори́ бла́го: взыщи́ ми́ра и пожени́ и́.

О́чи Госпо́дни на пра́ведныя, и у́ши его́ в моли́тву их.

Лице́ же Госпо́дне на творя́щыя зла́я, е́же потреби́ти от земли́ па́мять их.

Воззва́ша пра́веднии, и Госпо́дь услы́ша их и от всех скорбе́й их изба́ви их.

Близ Госпо́дь сокруше́нных се́рдцем, и смире́нныя ду́хом спасе́т.

Мно́ги ско́рби пра́ведным, и от всех их изба́вит я Госпо́дь.

Храни́т Госпо́дь вся ко́сти их, ни еди́на от них сокруши́тся.

Сме́рть гре́шников люта́, и ненави́дящии пра́веднаго прегреша́т.

Изба́вит Госпо́дь ду́шы раб Свои́х, и не прегреша́т вси упова́ющии на Него́.

Свяще́нник: Благослове́ние Госпо́дне на вас:

Сла́ва Тебе́ Христе́ Бо́же, Упова́ние на́ше, сла́ва Тебе́.

Лю́дие: Сла́ва, и ны́не:

Го́споди поми́луй, три́жды.

Благослови́.

Свяще́нник отпу́ст.

Лю́дие многоле́тствуют по обы́чаю.

А́ще же е́сть Вели́кая Четыредеся́тница

А́ще же е́сть Вели́кая Четыредеся́тница, по стихосло́вии: Ко Го́споду внегда́ скорбе́ти ми: А́бие, Го́споди воззва́х в прилучи́вшийся глас.

Пе́рвый лик:

1: Го́споди воззва́х Тебе́, услы́ши мя: услы́ши мя Го́споди. Го́споди воззва́х к Тебе́, услы́ши мя, вонми́ гла́су моле́ния моего́, внегда́ воззва́ти ми к Тебе́. Услы́ши мя Го́споди.

Вторы́й лик:

2: Да испра́вится моли́тва моя́, я́ко кади́ло пред тобо́ю: воздея́ние руку́ мое́ю, же́ртва вече́рняя. услы́ши мя Го́споди.

И по чи́ну стихи́:

1: Положи́ Го́споди хране́ние усто́м мои́м, и две́рь огражде́ния о устна́х мои́х.

2: Не уклони́ се́рдце мое́ в словеса́ лука́вствия, непщева́ти вины́ о гресе́х:

1: С челове́ки де́лающими беззако́ние, и не сочту́ся со избра́нными их.

2: Нака́жет мя пра́ведник ми́лостию, и обличи́т мя: еле́й же гре́шнаго да не нама́стит главы́ моея́.

1: Я́ко еще́ и моли́тва моя́ во благоволе́ниих их, поже́рты бы́ша при ка́мени судии́ их.

2: Услы́шатся глаго́ли мои́, я́ко возмого́ша, я́ко то́лща земли́ просе́деся на земли́, расточи́шася ко́сти их при а́де.

1: Я́ко к Тебе́, Го́споди Го́споди, о́чи мои́, на Тя упова́х, не отими́ ду́шу мою́.

2: Сохрани́ мя от се́ти, ю́же соста́виша ми, и от собла́зн де́лающих беззако́ние.

1: Паду́т во мре́жу свою́ гре́шницы: еди́н е́смь аз, до́ндеже прейду́.

2: Гла́сом мои́м ко Го́споду воззва́х, гла́сом мои́м ко Го́споду помоли́хся.

1: Пролию́ пред Ним моле́ние мое́, печа́ль мою́ пред Ним возвещу́.

2: Внегда́ исчеза́ти от Мене́ ду́ху моему́, и Ты позна́л еси́ стези́ моя́.

1: На пути́ сем, по нему́же хожда́х, скры́ша се́ть мне.

2: Смотря́х одесну́ю, и возгля́дах, и не бе зна́яй мене́.

1: Поги́бе бе́гство от Мене́, и не́сть взыска́яй ду́шу мою́.

2: Воззва́х к тебе́ Го́споди, рех: Ты еси́ упова́ние мое́, ча́сть моя́ еси́ на земли́ живы́х.

1: Вонми́ моле́нию моему́, я́ко смири́хся зело́.

2: Изба́ви мя от гоня́щих мя, я́ко укрепи́шася па́че мене́.

На де́сять:

1: Изведи́ из темни́цы ду́шу мою́, испове́датися и́мени Твоему́.

2: Мене́ ждут пра́ведницы, до́ндеже возда́си мне.

На о́смь:

1: Из глубины́ воззва́х к Тебе́ Го́споди, Го́споди услы́ши глас мой.

2: Да бу́дут у́ши Твои́ вне́млюще гла́су моле́ния моего́.

На ше́сть:

1: А́ще беззако́ния на́зриши Го́споди, Го́споди кто постои́т? я́ко у тебе́ очище́ние е́сть.

2: И́мене ра́ди Твоего́ потерпе́х Тя Го́споди. Потерпе́ душа́ моя́ в Сло́во Твое́, упова́ душа́ моя́ на Го́спода.

На четы́ре:

1: От стра́жи у́тренния до но́щи, от стра́жи у́тренния да упова́ет Изра́иль на Го́спода.

2: Я́ко у Го́спода ми́лость, и мно́гое у Него́ избавле́ние: и Той изба́вит Изра́иля от всех беззако́ний его́.

1: Хвали́те Го́спода вси язы́цы, похвали́те Его́ вси лю́дие.

2: Я́ко утверди́ся ми́лость Его́ на нас, и и́стина Госпо́дня пребыва́ет во век.

Сла́ва, и ны́не: Вход.

Све́те Ти́хий, Святы́я Сла́вы, Безсме́ртнаго Отца́ Небе́снаго, Свята́го Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га, досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й: те́мже мир Тя сла́вит.

Проки́мен. Бытие́. И при́тча.

И по исполне́нии сих, свяще́нник пое́т:

Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю, же́ртва вече́рняя.

И лик пое́т то́жде:

Да испра́вится моли́тва моя́:

Свяще́нник, стих: Го́споди воззва́х к Тебе́, услы́ши мя, вонми́ гла́су моле́ния моего́, внегда́ воззва́ти ми к Тебе́.

Лик: Да испра́вится моли́тва моя́:

Свяще́нник, стих: Положи́ Го́споди, хране́ние усто́м мои́м, и две́рь огражде́ния о устна́х мои́х.

Лик: Да испра́вится моли́тва моя́:

Свяще́нник, стих: Не уклони́ се́рдце мое́ в словеса́ лука́вствия непщева́ти вины́ о гресе́х.

Лик: Да испра́вится моли́тва моя́:

И па́ки свяще́нник: Да испра́вится моли́тва моя́, я́ко кади́ло пред Тобо́ю.

Лик: Воздея́ние руку́ мое́ю, же́ртва вече́рняя.

Вме́сто херуви́мския пе́сни, глаго́лется сие́.

Глас 6.

Ны́не Си́лы Небе́сныя с на́ми неви́димо слу́жат, се бо вхо́дит Ца́рь Сла́вы: се Же́ртва Та́йная соверше́на дорино́сится. Ве́рою и любо́вию присту́пим, да прича́стницы Жи́зни ве́чныя бу́дем. Аллилу́иа, аллилу́иа, аллилу́иа.

Прича́стен во глас 8:

Вкуси́те и ви́дите, я́ко благ Госпо́дь. Аллилу́иа, аллилу́иа, аллилу́иа.

По явле́нии же святы́х даро́в, ко́сно и со сладкопе́нием, во глас 8:

Благословлю́ Го́спода на вся́кое вре́мя, хвала́ его́ во усте́х мои́х. Хлеб небе́сный, и ча́шу жи́зни вкуси́те, и ви́дите, я́ко благ Госпо́дь. Аллилу́иа, аллилу́иа, аллилу́иа.

По е́же сохрани́ти свята́я:

Да испо́лнятся уста́ на́ша хвале́ния Твоего́ Го́споди, я́ко да пое́м сла́ву Твою́: я́ко сподо́бил еси́ нас причасти́тися Святы́м Твои́м, Боже́ственным, Безсме́ртным, и Животворя́щым Та́йнам: соблюди́ нас во Твое́й Святы́ни, ве́сь де́нь поуча́тися пра́вде Твое́й. Аллилу́иа, аллилу́иа, аллилу́иа.

Та́же: Бу́ди и́мя Госпо́дне благослове́но: три́жды.

И псало́м: Благословлю́ Го́спода на вся́кое вре́мя (зри ***)

Степе́нны на о́смь гласо́в

Ки́йждо стих повторя́ем.

Глас 1.

Антифо́н 1:

Внегда́ скорбе́ти ми, услы́ши моя́ боле́зни: Го́споди, Тебе́ зову́.

Пусты́нным непреста́нное Боже́ственное жела́ние быва́ет, ми́ра су́щым су́етнаго кроме́.

Сла́ва: Свято́му Ду́ху, че́сть и сла́ва, я́коже Отцу́ подоба́ет, ку́пно же и Сы́ну: сего́ ра́ди да пои́м Тро́ице Единодержа́вие.

И ны́не, тойже.

Антифо́н 2:

На го́ры Твои́х возне́сл еси́ мя зако́нов, доброде́тельми просвети́ Бо́же, да пою́ Тя.

Десно́ю Твое́ю руко́ю прии́м Ты Сло́ве, сохрани́ мя, соблюди́, да не о́гнь мене́ опали́т грехо́вный.

Сла́ва: Святы́м Ду́хом вся́кая тва́рь обновля́ется, па́ки теку́щи на пе́рвое: Равномо́щен бо е́сть Отцу́ и Сло́ву.

И ны́не, тойже.

Антифо́н 3:

О ре́кших мне, вни́дем во дворы́ Госпо́дни, возвесели́ся мой дух, сра́дуется се́рдце.

В дому́ Дави́дове страх вели́к: та́мо бо Престо́лом поста́вленным, су́дятся вся племена́ земна́я и язы́цы.

Сла́ва: Свято́му Ду́ху че́сть, поклоне́ние, сла́ва и держа́ва, я́коже Отцу́ досто́ит, и Сы́нови подоба́ет приноси́ти: Еди́ница бо е́сть Тро́ица естество́м, но не ли́цы.

И ны́не, тойже.

Глас 2.

Антифо́н 1:

На не́бо о́чи пуща́ю моего́ се́рдца, к Тебе́ Спа́се. Спаси́ мя Твои́м осия́нием.

Поми́луй нас согреша́ющих Тебе́ мно́го на вся́кий час, о Христе́ мой, и да́ждь о́браз пре́жде конца́ пока́ятися Тебе́.

Сла́ва: Свято́му Ду́ху, е́же Ца́рствовати подоба́ет, освяща́ти, подвиза́ти тва́рь: Бог бо е́сть, Единосу́щен Отцу́ и Сло́ву.

И ны́не, тойже.

Антифо́н 2:

А́ще не Госпо́дь бы был в нас, кто дово́лен цел сохране́н бы́ти от врага́ ку́пно и человекоуби́йцы?

Зубо́м их не преда́ждь Спа́се Твоего́ раба́: и́бо льво́вым о́бразом на мя подвиза́ются врази́ мои́.

Сла́ва: Свято́му Ду́ху живонача́лие и че́сть: вся бо созда́нная, я́ко Бог Сый: си́лою соблюда́ет во Отце́, Сы́ном же.

И ны́не, тойже.

Антифо́н 3:

Наде́ющиися на Го́спода уподо́бишася горе́ святе́й, и́же ника́коже дви́жутся прило́ги вра́жиими.

В беззако́нии рук свои́х да не простру́т Боже́ственне живу́щии: не оставля́ет бо Христо́с жезла́ на жре́бии свое́м.

Сла́ва: Святы́м Ду́хом то́чится вся́ка прему́дрость, отсю́ду благода́ть апо́столом, и страда́льчествы венча́ются му́ченицы, и проро́цы зрят.

И ны́не, тойже.

Глас 3.

Антифо́н 1:

Плен Сио́нь Ты изъя́л еси́ от Вавило́на, и мене́ от страсте́й к животу́ привлецы́ Сло́ве.

В юг се́ющии слеза́ми Боже́ственными, жнут кла́сы ра́достию присноживо́тия.

Сла́ва: Свято́му Ду́ху вся́кое благода́рие, я́коже Отцу́ и Сы́ну сооблиста́ет, в Не́мже вся живу́т и дви́жутся.

И ны́не, тойже.

Антифо́н 2:

А́ще не Госпо́дь сози́ждет дом доброде́телей, всу́е тружда́емся: ду́шу же покрыва́ющу, никто́же наш разори́т град.

Плода́ чре́вна Ду́хом сынотворе́нное Тебе́ Христу́, я́коже и Отцу́, святи́и всегда́ су́ть.

Сла́ва: Святы́м Ду́хом прозри́тся вся́кая святы́ня, прему́дрость, осуществу́ет бо вся́кую тва́рь: Тому́ послу́жим, Бог бо, я́ко Отцу́ же и Сло́ву.

И ны́не, тойже.

Антифо́н 3:

Боя́щиися Го́спода блаже́ни, в пути́ ходя́ще за́поведей, снедя́т бо живо́тное всепло́дие.

О́крест трапе́зы Твоея́ возвесели́ся, Твоя́ пастыренача́льниче исча́дия, нося́ща ве́тви благоде́лания.

Сла́ва: Святы́м Ду́хом вся́кое бога́тство сла́вы, от Него́же благода́ть и живо́т вся́кой тва́ри: со Отце́м бо воспева́емь е́сть и с Сло́вом.

И ны́не, тойже.

Глас 4.

Антифо́н 1:

От ю́ности моея́ мно́зи бо́рют мя стра́сти: но Сам мя заступи́, и спаси́ Спа́се мой.

Ненави́дящии Сио́на, посрами́теся от Го́спода: я́ко трава́ бо огне́м бу́дете изсо́хше.

Сла́ва: Святы́м Ду́хом вся́ка душа́ живи́тся, и чистото́ю возвыша́ется, светле́ется Тро́ическим Еди́нством священнота́йне.

И ны́не, тойже.

Антифо́н 2:

Воззва́х тебе́ Го́споди, те́пле из глубины́ души́ моея́, и мне да бу́дут на послуша́ние Боже́ственная Твоя́ ушеса́.

На Го́спода наде́жду всяк кто стяжа́в, Вы́шший е́сть всех скорбя́щих.

Сла́ва: Святы́м Ду́хом то́чатся благода́тныя струи́, напая́ющя вся́ку тва́рь ко оживле́нию.

И ны́не, тойже.

Антифо́н 3:

Се́рдце мое́ к Тебе́ Сло́ве да возвы́сится, и да ничто́же услади́т мя от мирски́х красо́т на сла́бость.

К ма́тери свое́й я́коже и́мать кто любо́вь, ко Го́споду те́пльше любле́нием до́лжни есмы́.

Сла́ва: Святы́м Ду́хом Богове́дения бога́тство, зре́ния и прему́дрости: вся бо в сем оте́ческая веле́ния сло́во открыва́ет.

И ны́не, тойже.

Глас 5.

Антифо́н 1:

Внегда́ скорбе́ти мне Дави́дски пою́ Тебе́, Спа́се мой: изба́ви ду́шу мою́ от язы́ка льсти́ваго.

Пусты́нным живо́т блаже́н е́сть, Боже́ственным раче́нием воскриля́ющымся.

Сла́ва: Святы́м Ду́хом одержа́тся вся, ви́димая же с неви́димыми, самодержа́вен бо сый Тро́ицы Еди́н е́сть нело́жно.

И ны́не, тойже.

Антифо́н 2:

На го́ры, душе́, воздви́гнемся, гряди́ та́мо, отню́дуже по́мощь и́дет.

Десна́я Твоя́ рука́, и мене́, Христе́, каса́ющаяся, от ле́сти вся́кия да сохрани́т.

Сла́ва: Свято́му Ду́ху богосло́вяще рцем: Ты еси́ Бог, Живо́т, Раче́ние, Свет, Ум: Ты Благосты́ня, Ты ца́рствуеши во ве́ки.

И ны́не, тойже.

Антифо́н 3:

О ре́кших мне, во дворы́ вни́дем Госпо́дня, ра́дости мно́гия испо́лнен быв, моли́твы возсыла́ю.

В дому́ Дави́дове стра́шная соверша́ются: о́гнь бо та́мо паля́ всяк сра́мный ум.

Сла́ва: Свято́му Ду́ху живонача́льное досто́инство, от Него́же вся́кое живо́тно одушевля́ется: я́ко во Отце́, ку́пно же и Сло́ве.

И ны́не, тойже.

Глас 6.

Антифо́н 1:

На не́бо о́чи мои́ возвожу́ к Тебе́, Сло́ве: уще́дри мя, да живу́ Тебе́.

Поми́луй нас уничиже́нных, устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху, вся́кая всеспаси́тельная вина́, а́ще ко́ему Сей по достоя́нию дхнет, ско́ро взе́млет от земны́х, восперя́ет, возраща́ет, устроя́ет горе́.

И ны́не, тойже.

Антифо́н 2:

А́ще не Госпо́дь бы был в нас, никто́же от нас проти́ву возмо́гл бы вра́жиим бра́нем одоле́ти: побежда́ющии бо от зде возно́сятся.

Зубы́ их да не я́та бу́дет душа́ моя́, я́ко птене́ц, Сло́ве: увы́ мне, ка́ко и́мам от врага́ избы́ти, грехолюби́в сый?

Сла́ва: Святы́м Ду́хом обоже́ние всем, благоволе́ние, ра́зум, мир и благослове́ние: Равноде́тельный бо е́сть Отцу́ и Сло́ву.

И ны́не, тойже.

Антифо́н 3:

Наде́ющиися на Го́спода враго́м стра́шни, и всем ди́вни, горе́ бо зрят.

В беззако́ния рук свои́х пра́ведных жре́бий, помо́щника Тя име́я, Спа́се, не простира́ет.

Сла́ва: Свята́го Ду́ха держа́ва на всех: Ему́же вы́шняя во́инства покланя́ются, со вся́ким дыха́нием до́льным.

И ны́не, тойже.

Глас 7.

Антифо́н 1:

Плен Сио́нь от ле́сти обрати́в, и мене́, Спа́се, оживи́, изыма́я рабо́тныя стра́сти.

В юг се́яй ско́рби по́стныя со слеза́ми, сей ра́достныя по́жнет рукоя́ти присноживопита́ния.

Сла́ва: Святы́м Ду́хом исто́чник Боже́ственных сокро́вищ от Него́же Прему́дрость, ра́зум, страх: Тому́ хвала́ и сла́ва, че́сть и держа́ва.

И ны́не, тойже.

Антифо́н 2:

А́ще не Госпо́дь сози́ждет дом душе́вный, всу́е тружда́емся: ра́зве бо Того́ ни дея́ние, ни сло́во соверша́ется.

Плода́ чре́внаго, святи́и духодви́жно прозяба́ют оте́ческая преда́ния, сыноположе́ния.

Сла́ва: Святы́м Ду́хом, вся́ческая е́же бы́ти и́мут, пре́жде бо всех Бог, всех Госпо́дство, Свет Непристу́пен, Живо́т всех.

И ны́не, тойже.

Антифо́н 3:

Боя́щиися Го́спода, пути́ живота́ обре́тше, ны́не и при́сно ублажа́ются сла́вою нетле́нною.

О́крест трапе́зы Твоея́, я́ко сте́блие ви́дя исча́дия Твоя́, ра́дуйся и весели́ся, приводя́ сия́ Христо́ви Пастыренача́льнику.

Сла́ва: Святы́м Ду́хом глубина́ дарова́ний, бога́тство сла́вы, суде́б глубина́ ве́лия, Единосла́вен Отцу́, и Сы́ну, служи́м бо.

И ны́не, тойже.

Глас 8.

Антифо́н 1:

От ю́ности моея́ враг мя искуша́ет, сластьми́ пали́т мя: аз же наде́яся на Тя, Го́споди, побежда́ю сего́.

Ненави́дящии Сио́на, да бу́дут у́бо пре́жде исторже́ния я́ко трава́: ссече́т бо Христо́с вы́я их, усече́нием мук.

Сла́ва: Святы́м Ду́хом, е́же жи́ти вся́ческим: Свет от Све́та, Бог Вели́к, со Отце́м пое́м Ему́, и Сло́вом.

И ны́не, тойже.

Антифо́н 2:

Се́рдце мое́ стра́хом Твои́м да покры́ется, смиренному́дрствующее: да не возне́сшееся отпаде́т от Тебе́, Всеще́дре.

На Го́спода име́вый наде́жду, не устраши́тся тогда́, егда́ огне́м вся суди́ти и́мать и му́кою.

Сла́ва: Святы́м Ду́хом, всяк кто Боже́ственный ви́дит, и предглаго́лет: чудоде́йствует Вы́шняя, в Трие́х Еди́наго Бо́га поя́: а́ще бо и трисия́ет, единонача́льствует Божество́.

И ны́не, тойже.

Антифо́н 3:

Воззва́х Тебе́, Го́споди, вонми́, приклони́ ми у́хо Твое́ вопию́щу: и очи́сти, пре́жде да́же не во́змеши мене́ отсю́ду.

К ма́тери свое́й земли́ отходя́й всяк, па́ки разреша́ется, прия́ти му́ки, или́ по́чести пожи́вших.

Сла́ва: Святы́м Ду́хом, Богосло́вие, Еди́ница Трисвята́я: Оте́ц бо Безнача́лен, от Него́же роди́ся Сын безле́тно, и Дух Сопресто́лен, Сообра́зен, от Отца́ спросия́вший.

И ны́не, тойже.

Антифо́н 4:

Се ны́не что добро́, или́ что красно́, но е́же жи́ти бра́тии вку́пе? В сем бо Госпо́дь обеща́ живо́т ве́чный.

О ри́зе свое́й, И́же кри́ны се́льныя украша́яй повелева́ет, я́ко не подоба́ет пещи́ся.

Сла́ва: Святы́м Ду́хом, единови́дною вино́ю, вся содержа́тся миропода́тельне: Бог бо сей е́сть, Отцу́ же и Сы́нови Единосу́щен Госпо́дьственне.

И ны́не, тойже.

На утрени по шестопсалмии

На у́трени по шестопса́лмии быва́ет ектениа́ вели́кая. Та́же пое́тся:

Бог Госпо́дь, и яви́ся нам, благослове́н Гряды́й во И́мя Госпо́дне. По гла́су дне тропаря́.

Стих: Испове́дайтеся Го́сподеви я́ко благ я́ко в век ми́лость Его́.

Стих: Обыше́дше обыдо́ша мя, и и́менем Госпо́дним противля́хся им.

Стих: Не умру́, но жив бу́ду, и пове́м дела́ Госпо́дня.

Стих: Ка́мень, Его́же небрего́ша зи́ждущии, Сей бы́сть во главу́ у́гла: от Го́спода бы́сть Сей, и е́сть ди́вен во очесе́х на́ших.

Пое́тся же Бог Госпо́дь: четы́режды. Та́же глаго́лется тропа́рь случи́вшийся два́жды, и Богоро́дичен в то́йже глас. И а́ще случа́тся два тропаря́, всегда́ пе́рвый глаго́лется два́жды. Та́же вторы́й, пото́м Богоро́дичен. Пое́му же Бог Госпо́дь, отхо́дит канона́рх, и стои́т посреде́ хра́ма открове́н, и глаго́лет ти́хо вышепи́санныя стихи́. Стои́т же та́мо, до́ндеже начну́т Богоро́дичен. Та́же покланя́ется на не́мже стои́т ме́сте, и обрати́вся покланя́ется лико́м, и отхо́дит. Си́це твори́т, и егда́ е́сть аллилу́иа. А́ще е́сть аллилу́иа, или́ вели́кая четыредеся́тница, по ектении́ пое́м аллилу́иа, четы́режды, в случи́вшийся глас осмогла́сника: Стихи́ же глаго́лет сия́:

Стих 1: От но́щи у́тренюет дух мой к Тебе́ Бо́же, зане́ свет повеле́ния Твоя́ на земли́.

Стих 2: Пра́вде научи́теся живу́щии на земли́.

Стих 3: За́висть прии́мет лю́ди ненака́занныя.

Стих 4: Приложи́ им зла Го́споди, приложи́ зла сла́вным земли́.

И а́бие Тро́ичны гла́са.

Ве́домо бу́ди, я́ко в Тро́ичных, глаго́лем в понеде́льник я́ко в конце́ сих, си́це:

Предста́тельствы безпло́тных Твои́х поми́луй нас. Во вто́рник: Моли́твами Предте́чи Твоего́ поми́луй нас. В сре́ду: Си́лою Креста́ Твоего́ сохрани́ нас Го́споди. Та́кожде и в пято́к. В четверто́к: Моли́твами святы́х апо́стол твои́х, и святи́теля Никола́я поми́луй нас. А у про́чих двою́ Тро́ичнов глаго́лати, я́коже в конца́х их пи́сано е́сть.

Пе́сни Тро́ичны

Глас 1:

Плотски́ми образова́нии безпло́тных сил к мы́сленному и невеще́ственному возводи́ми уму́, и Трисвято́ю пе́снию Триипоста́снаго Божества́ прие́млюще сия́ние, херуви́мски возопии́м Еди́ному Бо́гу: Свят, Свят, Свят еси́ Бо́же наш:

Сла́ва: Со все́ми Небе́сными си́лами: Херуви́мски су́щему в вы́шних возопии́м, трисвяту́ю возсыла́юще хвалу́: Свят, Свят, Свят еси́ Бо́же наш, моли́твами всех святы́х Твои́х поми́луй нас:

И ны́не: Воста́вше от сна, припа́даем Ти, Бла́же, и а́нгельскую пе́снь вопие́м Ти, си́льне: Свят, Свят, Свят еси́ Бо́же, Богоро́дицею поми́луй нас:

Глас 2:

Вы́шния си́лы подража́юще на земли́, побе́дную пе́снь прино́сим Ти, Бла́же: Свят, Свят, Свят еси́ Бо́же наш:

Сла́ва: Несозда́нное Естество́, всех Зижди́телю, устне́ на́ша отве́рзи, я́ко да возвести́м хвалу́ Твою́ вопию́ще: Свят, Свят, Свят еси́ Бо́же наш, моли́твами всех святы́х Твои́х поми́луй нас.

И ны́не: От одра́ и сна воздви́гл мя еси́, Го́споди, ум мой просвети́ и се́рдце, и устне́ мои́ отве́рзи, во е́же пе́ти Тя Свята́я Тро́ице: Свят, Свят, Свят еси́ Бо́же, Богоро́дицею поми́луй нас.

Глас 3:

Тро́ице Единосу́щная и Неразде́льная, Еди́нице Триипоста́сная и Соприсносу́щная, Тебе́ я́ко Бо́гу а́нгельскую пе́снь вопие́м: Свят, Свят, Свят еси́ Бо́же наш:

Сла́ва: Отца́ безнача́льна, Сы́на собезнача́льна, Ду́ха соприсносу́щна, Божество́ Еди́но, херуви́мски славосло́вити дерза́юще, глаго́лем: Свят, Свят, Свят еси́ Бо́же наш, моли́твами всех святы́х Твои́х поми́луй нас.

И ны́не: Напра́сно судия́ прии́дет, и коего́ждо дея́ния обнажа́тся, но стра́хом зове́м в полу́нощи: Свят, Свят, Свят еси́ Бо́же наш, Богоро́дицею поми́луй нас.

Глас 4:

У́мных твои́х слуг, приноси́ти сме́ртнии пе́снь дерза́юще, глаго́лем: Свят, Свят, Свят еси́ Бо́же наш:

Сла́ва: Я́ко чи́ни ны́не А́нгельстии на Небеси́, и стоя́ния стра́хом челове́ческая и земли́, побе́дную пе́снь прино́сим Ти, Бла́же Свят, Свят, Свят еси́ Бо́же наш, моли́твами всех святы́х Твои́х поми́луй нас.

И ны́не: Безнача́льнаго Твоего́ Отца́ и тебе́ Христе́ Бо́же, и Пресвята́го Твоего́ Ду́ха херуви́мски славосло́вити дерза́юще глаго́лем: Свят, Свят, Свят, еси́ Бо́же наш, Богоро́дицею поми́луй нас.

Глас 5:

Пе́нию вре́мя и моли́тве час, приле́жно возопии́м Еди́ному Бо́гу: Свят, Свят, Свят еси́ Бо́же наш:

Сла́ва: Образова́ти дерза́юще у́мная Твоя́ во́инства, Тро́ице Безнача́льная, усты́ недосто́йными вопие́м: Свят, Свят, Свят еси́ Бо́же наш, моли́твами всех святы́х Твои́х поми́луй нас.

И ны́не: И́же в ложесна́ деви́ческая вмести́выйся и недр Оте́чских не разлучи́выйся, со А́нгелы и нас Христе́ Бо́же, приими́ вопию́щих Ти: Свят, Свят, Свят еси́ Бо́же наш, Богоро́дицею поми́луй нас.

Глас 6:

Предстоя́ще со стра́хом Херуви́ми ужаса́ющеся с тре́петом Серафи́ми, Трисвяту́ю пе́снь прино́сят немо́лчным гла́сом. С ни́миже и мы вопие́м гре́шнии: Свят, Свят, Свят еси́ Бо́же наш:

Сла́ва: Безпло́тными усты́, немо́лчными славослове́ньми, шестокри́льнии вопию́т Ти Трисвяту́ю пе́снь Бо́же наш. И мы и́же на земли́, недосто́йными усты́ хвалу́ Ти возсыла́ем: Свят, Свят, Свят еси́ Бо́же наш моли́твами всех святы́х Твои́х поми́луй нас.

И ны́не: Тро́ичныя Еди́ницы Божество́ неслия́нным соедине́нием сла́вим, и а́нгельскую пе́снь вопие́м: Свят, Свят, Свят еси́ Бо́же наш, Богоро́дицею поми́луй нас.

Глас 7:

Вы́шнею си́лою херуви́мски воспева́емый, и Боже́ственною сла́вою а́нгельски покланя́емый, приими́ и нас су́щих на земли́, недосто́йными устна́ми хвале́ние Тебе́ возсыла́ющих: Свят, Свят Свят еси́ Бо́же наш.

Сла́ва: Я́ко сон ле́ность отложи́вши, душе́, исправле́ние к хвале́нию покажи́ судии́, и со стра́хом возопи́й: Свят, Свят, Свят еси́ Бо́же наш, моли́твами всех святы́х Твои́х поми́луй нас.

И ны́не: Непристу́пному Божеству́, во еди́нице Тро́ице, серафи́мскую Трисвяту́ю возсыла́юще хвалу́, со стра́хом возопии́м: Свят, Бог, Свят еси́ Бо́же наш, Богоро́дицею поми́луй нас.

Глас 8:

На не́бо сердца́ иму́ще, А́нгельский подража́им чин, и со стра́хом судии́ припаде́м, побе́дную взыва́юще хвалу́: Свят, Свят, Свят еси́ Бо́же наш.

Сла́ва: Зре́ти Тебе́ не сме́юще Херуви́ми, летя́ще зову́т со восклица́нием, Боже́ственную пе́снь Трисвята́го гла́са, с ни́миже и мы вопие́м Ти: Свят, Свят, Свят еси́ Бо́же наш, моли́твами всех святы́х Твои́х поми́луй нас.

И ны́не: Сляца́еми мно́жеством прегреше́ний на́ших, и не сме́юще воззре́ти на высоту́ Небе́сную, ду́шу с те́лом прекло́ньше, со А́нгелы пе́снь вопие́м Ти: Свят, Свят, Свят еси́ Бо́же, Богоро́дицею поми́луй нас.

Та́же стихосло́вие Псалти́ра, и седа́льны по чи́ну их.

И по сих глаго́лем:

Го́споди поми́луй, три́жды.

Сла́ва, и ны́не:

Поми́луй мя Бо́же:

Песни Священного Писания вседневии

И а́бие начина́ет пе́сни.

Подоба́ет ве́дати, а́ще не́сть неде́ля, ниже́ Влады́чний ни Богоро́дичный пра́здник, ни предпра́зднство или́ попра́зднство их, или́ пра́зднуемаго свята́го, стихосло́вятся пе́сни ско́ро си́це.

Пе́рвый лик глаго́лет:

Го́сподеви пое́м, сла́вно бо просла́вися. Коня́ и вса́дника ве́рже в мо́ре.

Та́же вторы́й лик:

Помо́щник и покрови́тель бы́сть мне во спасе́ние, сей мой Бог, и просла́влю Его́, Бог отца́ моего́, и вознесу́ Его́.

И па́ки пе́рвый лик:

Госпо́дь сокруша́яй бра́ни, Госпо́дь и́мя Ему́: колесни́цы фарао́новы и си́лу его́ ве́рже в мо́ре.

Вторы́й лик:

Пучи́ною покры́ я, погрязо́ша во глубине́ я́ко ка́мень.

От зде начина́й стихи́, в случи́вшийся глас кано́на, и глаго́ли ирмо́с со стихо́м, и по чи́ну тропари́:

Огусте́ша я́ко стена́ во́ды, огусте́ша и во́лны посреде́ мо́ря.

Глаго́ли ирмо́с.

Рече́ враг: гнав пости́гну, разделю́ коры́сть, испо́лню ду́шу мою́, убию́ мече́м мои́м, госпо́дствовати бу́дет рука́ моя́.

Глаго́ли тропа́рь.

Посла́л еси́ Дух Твой, покры́ я мо́ре, погрязо́ша я́ко о́лово в воде́ зе́льней.

Кто подо́бен Тебе́ в бозе́х Го́споди? Кто подо́бен Тебе́, просла́влен во святы́х, ди́вен сла́вно творя́й чудеса́?

Просте́рл еси́ десни́цу Твою́, пожре́ я земля́: наста́вил еси́ пра́вдою Твое́ю лю́ди Твоя́ сия́, я́же изба́вил еси́.

Уте́шил еси́ кре́постию Твое́ю во оби́тель святу́ю Твою́. Слы́шаша язы́цы, и прогне́вашася, боле́зни прия́ша живу́щии в Филисти́ме.

На 8: Тогда́ потща́шася влады́ки Едо́мстии и князе́й Моави́тских, прия́т я тре́пет, раста́яша вси живу́щии в Ханаа́не.

Нападе́т на ня страх и тре́пет, вели́чием мы́шцы Твоея́ да окаменя́тся.

На 6: До́ндеже про́йдут лю́дие Твои́, Го́споди, до́ндеже про́йдут лю́дие Твои́ си́и, я́же стяжа́л еси́.

Соде́лал еси́, Го́споди, святы́ню, ю́же угото́васте ру́це Твои́.

На 4: Госпо́дь Ца́рствуяй ве́ки и на век, и еще́: егда́ вни́де ко́нь фарао́нов с колесни́цами и вса́дники в мо́ре.

Сы́нове же Изра́илевы проидо́ша су́шею посреде́ мо́ря.

Сла́ва, и ны́не:

Подоба́ет ве́дати, я́ко втора́я пе́снь никогда́же стихосло́вится, то́кмо в Вели́кой Четыредеся́тнице во вто́рники.

Пе́снь тре́тия:

Утверди́ся се́рдце мое́ в Го́споде, вознесе́ся рог мой о Бо́зе мое́м, разшири́шася уста́ моя́ на враги́ моя́, возвесели́хся о спасе́нии Твое́м.

Я́ко не́сть свят, я́ко Госпо́дь, и не́сть пра́веден, я́ко Бог наш, и не́сть свят, па́че Тебе́.

Не хвали́теся и не глаго́лите высо́кая в горды́ни, ниже́ да изы́дет велере́чие из уст ва́ших.

Я́ко Бог ра́зумов Госпо́дь, и Бог уготовля́яй начина́ния своя́.

Начина́й: Лук си́льных изнемо́же, и немощству́ющии препоя́сашася си́лою.

Испо́лненнии хле́бов лиши́шася и а́лчущии прише́льствоваша зе́млю.

Я́ко непло́ды роди́ се́дмь, и мно́гая в ча́дех изнемо́же.

Госпо́дь мертви́т и живи́т, низво́дит во ад, и возво́дит.

Госпо́дь убо́жит и богати́т, смиря́ет и вы́сит: возставля́ет от земли́ убо́га, и от гно́ища воздвиза́ет ни́ща.

Посади́ти его́ с могу́щими люде́й, и престо́л сла́вы насле́дуя ему́.

На 8: Дая́й моли́тву моля́щемуся, и благослови́ ле́та пра́веднаго.

Госпо́дь не́мощна сотвори́ супоста́та Его́, Госпо́дь свят.

На 6: Да не хва́лится прему́дрый прему́дростию свое́ю, и да не хва́лится си́льный си́лою свое́ю, и да не хва́лится бога́тый бога́тством свои́м.

И твори́ти суд и пра́вду посреде́ земли́.

На 4: Госпо́дь взы́де на Небеса́, и возгреме́, Той су́дит конце́м земли́ пра́веден Сый.

И даст кре́пость царю́ на́шему и вознесе́т рог Христа́ Своего́.

Сла́ва, и ны́не:

Та́же пое́м ирмо́с тре́тия пе́сни, после́дняго кано́на, в кото́рый лю́бо де́нь случи́тся: подо́бне и в седму́ю шесты́я пе́сни ирмо́с, и в девя́тую осмы́я, и по девя́той девя́тыя. По про́чих же днех, ре́кше по пе́рвой, по четве́ртой, по пя́той, по седмо́й, егда́ пое́тся осмогла́сник с мине́ею, во все ле́то не глаго́лется ирмо́с от мине́и, кроме́ сих, я́же зде указа́шася.

Пе́снь четве́ртая.

Го́споди, услы́шах слух Твой и убоя́хся, Го́споди, разуме́х дела́ Твоя́, и ужасо́хся.

Внегда́ смути́тися души́ мое́й во гне́ве, ми́лость Твою́ помяне́ши.

Бог от ю́га прии́дет, и Святы́й из горы́ приосене́нныя ча́щи.

Покры́ Небеса́ доброде́тель Его́, и хвалы́ Его́ испо́лнь земля́.

Начина́й: Вложи́л еси́ во главы́ беззако́нных сме́рть, воздви́гл еси́ у́зы да́же до вы́и в коне́ц.

Разсе́кл еси́ во изступле́нии главы́ си́льных. Стрясу́тся в ней, разве́рзут узды́ своя́, я́ко снеда́яй ни́щий тай.

Изве́л еси́ на мо́ре ко́ни Твои́, смуща́ющыя во́ды мно́ги.

Сохрани́хся, и убоя́ся се́рдце мое́, от гла́са моли́твы усте́н мои́х.

И вни́де тре́пет в ко́сти моя́, и во мне смяте́ся кре́пость моя́.

Почи́ю в де́нь ско́рби моея́, да взы́ду в лю́ди прише́льствия моего́.

На 8: Зане́ смокв не плодопринесе́т, и не бу́дет ро́да в лоза́х.

Солже́т де́ло ма́слинное, и поля́ не сотворя́т я́ди.

На 6: Оскуде́ша о́вцы от пи́щи, и не бу́дет воло́в при я́слех.

Аз же о Го́споде возра́дуюся, возвеселю́ся о Бо́зе Спа́се мое́м.

На 4: Госпо́дь Бог мой си́ла моя́, и учини́т но́зе мои́ на соверше́ние.

И на высо́кая возво́дит мя, победи́ти ми в пе́сни Его́.

Сла́ва, и ны́не:

Пе́снь пя́тая.

От но́щи у́тренюет дух мой к Тебе́, Бо́же, зане́ свет повеле́ния Твоя́ на земли́.

Пра́вде научи́теся живу́щии на земли́.

Начина́й: Го́споди, высока́ Твоя́ мы́шца, и не ве́деша, разуме́вше же постыдя́тся.

За́висть прии́мет лю́ди ненака́занныя, и ны́не о́гнь супоста́ты поя́ст.

Го́споди Бо́же наш, мир да́ждь нам, вся бо возда́л еси́ нам.

Го́споди Бо́же наш, стяжи́ ны: Го́споди, ра́зве Тебе́ ино́го не ве́мы, и́мя Твое́ имену́ем.

Ме́ртвии же живота́ не и́мут ви́дети, ниже́ вра́чеве воскреся́т.

Сего́ ра́ди наве́л еси́ и погуби́л, и взял еси́ всяк му́жеск пол их.

На 8: Приложи́ им зла Го́споди, приложи́ зла сла́вным земли́.

Го́споди, в ско́рби помяну́хом тя, в ско́рби ма́ле наказа́ние Твое́ нам.

На 6: И я́ко боля́щая приближа́ется роди́ти, и в боле́зни свое́й вопия́ше: та́ко бы́хом возлю́бленному Твоему́.

Не паде́м, но паду́т живу́щии на земли́.

На 4: Воскре́снут ме́ртвии, и воста́нут и́же во гробе́х, и возвеселя́тся и́же на земли́.

Роса́ бо я́же от Тебе́, исцеле́ние им е́сть, земля́ же нечести́вых паде́т.

Сла́ва, и ны́не:

Подоба́ет ве́дати, я́ко шеста́я пе́снь не стихосло́вится, но глаго́лем ирмо́с, и еди́н тропа́рь без стиха́, зане́ не и́мать шеста́я пе́снь мно́жайшыя стихи́, я́ко про́чыя: подо́бне же и седма́я, и девя́тая пе́сни.

Седма́я же стихосло́вится вся в суббо́тах Святы́я Четыредеся́тницы.

Пе́снь шеста́я.

Возопи́х в ско́рби мое́й ко Го́споду Бо́гу моему́, и услы́ша мя.

Отве́ргл мя еси́ во глубины́ се́рдца морска́го, и ре́ки обыдо́ша мя.

Вся высоты́ Твоя́, и во́лны Твоя́ на мне преидо́ша.

Еда́ приложу́ призре́ти ми к хра́му свято́му Твоему́?

На 8: Возлия́ся вода́ до души́ моея́, бе́здна обы́де мя после́дняя.

Понре́ глава́ моя́ в разсе́ли гор: снидо́х в зе́млю, ея́же вереи́ ея́ закле́пи ве́чнии.

На 6: И да взы́дет из истле́ния живо́т мой, к Тебе́ Го́споди Бо́же мой.

И да прии́дет к Тебе́ моли́тва моя́, к хра́му свято́му Твоему́.

На 4: Храня́щии су́етная и ло́жная, ми́лость свою́ оста́виша.

Ели́ка обеща́х, возда́м Тебе́ во спасе́ние мое́ Го́сподеви.

Сла́ва, и ны́не:

Пе́снь седма́я.

Благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки.

И вся дела́ твоя́ и́стинна, и пра́ви путие́ Твои́.

И вси суди́ Твои́ и́стинни, и судьбы́ и́стинны сотвори́л еси́.

И на град святы́й оте́ц на́ших иерусали́м.

На 8: Благослове́н еси́ Го́споди Бо́же оте́ц на́ших, и препе́тый и превозноси́мый во ве́ки.

И благослове́но и́мя сла́вы твоея́ свято́е, препе́тое и превозноси́мое во ве́ки.

На 6: Благослове́н еси́ в хра́ме святы́я сла́вы твоея́, препе́тый и превозноси́мый во ве́ки.

Благослове́н еси́ ви́дяй бе́здны, седя́й на Херуви́мех, препе́тый и превозноси́мый во ве́ки.

На 4: Благослове́н еси́ на Престо́ле сла́вы Ца́рствия Твоего́, препе́тый и превозноси́мый во ве́ки.

Благослове́н еси́ на тве́рди небе́сней, препе́тый и превозноси́мый во ве́ки.

Сла́ва, и ны́не:

Пе́снь осма́я.

Благослови́те вся дела́ Госпо́дня Го́спода, по́йте и превозноси́те Его́ во ве́ки.

Благослови́те А́нгели Госпо́дни, Небеса́ Госпо́дня Го́спода по́йте и превозноси́те Его́ во ве́ки.

Благослови́те во́ды вся, я́же превы́ше небе́с, вся си́лы Госпо́дни Го́спода, по́йте и превозноси́те Его́ во ве́ки.

Благослови́те со́лнце и ме́сяц, зве́зды небе́сныя Го́спода, по́йте и превозноси́те Его́ во ве́ки.

Начина́й: Благослови́те всяк до́ждь и роса́, вси ду́си Го́спода, по́йте и превозноси́те Его́ во ве́ки.

Благослови́те о́гнь и вар, сту́дь и зной Го́спода, по́йте и превозноси́те Его́ во ве́ки.

Благослови́те сла́ны и сне́зи, но́щи и дни́е Го́спода, по́йте и превозноси́те Его́ во ве́ки.

Благослови́те свет и тьма́, мо́лния и о́блацы Го́спода, по́йте и превозноси́те Его́ во ве́ки.

Благослови́те земля́, го́ры и хо́лмы, и вся прозяба́ющая на ней Го́спода, по́йте и превозноси́те Его́ во ве́ки.

Благослови́те исто́чницы, моря́ и ре́ки, ки́ти, и вся дви́жущаяся в вода́х Го́спода, по́йте и превозноси́те Его́ во ве́ки.

На 8: Благослови́те вся пти́цы небе́сныя, зве́рие и вси ско́ти Го́спода, по́йте и превозноси́те Его́ во ве́ки.

Благослови́те сы́нове челове́честии, да благослови́т изра́иль Го́спода, по́йте и превозноси́те Его́ во ве́ки.

На 6: Благослови́те свяще́нницы Госпо́дни, раби́ Госпо́дни Го́спода, по́йте и превозноси́те Его́ во ве́ки.

Благослови́те ду́си и ду́шы пра́ведных преподо́бнии и смире́ннии се́рдцем Го́спода, по́йте и превозноси́те Его́ во ве́ки.

На 4: Благослови́те ана́ниа, аза́риа, мисаи́л Го́спода, по́йте и превозноси́те Его́ во ве́ки.

Благослови́те апо́столи, проро́цы и му́ченицы Госпо́дни Го́спода, по́йте и превозноси́те Его́ во ве́ки.

Благослови́м отца́, и Сы́на, и Свята́го Ду́ха, Го́спода.

И ны́не и при́сно, и во ве́ки веко́в, ами́нь.

Та́же глаго́лем:

Хва́лим, благослови́м покланя́емся Го́сподеви, пою́ще и превознося́ще во вся ве́ки.

И покло́н. И пое́м ирмо́с осмы́я пе́сни после́дняго кано́на.

Пе́снь девя́тая.

Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.

Я́ко призре́ на смире́ние Рабы́ Своея́, се бо от ны́не ублажа́т Мя вси ро́ди.

Я́ко сотвори́ Мне вели́чие си́льный, и Свя́то И́мя Его́, и ми́лость Его́ в ро́ды родо́в боя́щымся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущыя испо́лни благ, и богатя́щыяся отпусти́ тщы.

Восприя́т изра́иля о́трока Своего́, помяну́ти ми́лости, я́коже глаго́ла ко отце́м на́шым, Авраа́му и се́мени его́, да́же до ве́ка.

Пе́снь свята́го проро́ка Заха́рии, отца́ Предте́чева:

Благослове́н Госпо́дь Бог изра́илев, я́ко посети́ и сотвори́ избавле́ние лю́дем Свои́м.

И воздви́же рог спасе́ния нам, в дому́ Дави́дове о́трока своего́.

Я́коже глаго́ла усты́ святы́х, су́щих от ве́ка проро́к Его́, спасе́ние от враг на́ших, и из руки́ всех ненави́дящих нас.

Сотвори́ти ми́лость со отцы́ на́шими, и помяну́ти заве́т святы́й Свой.

На 8: Кля́тву, е́юже кля́тся ко Авраа́му отцу́ на́шему, да́ти нам без стра́ха из руки́ враг на́ших изба́вльшымся.

Служи́ти Ему́ преподо́бием и пра́вдою пред ним, вся дни живота́ на́шего.

На 6: И ты отроча́, Проро́к Вы́шняго нарече́шися: предыдеши бо пред лице́м Госпо́дним, угото́вати пути́ Его́.

Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

На 4: В ни́хже посети́ нас восто́к с высоты́, яви́тися во тьме́ и се́ни сме́ртней седя́щих.

Напра́вити но́ги на́шя на пу́ть ми́рен.

Сла́ва, и ны́не:

И по ирмосе́:

Досто́йно е́сть:

И ектениа́.

А́ще е́сть Четыредесятница, или́ аллилу́иа, глаго́лем свети́льны в случи́вшийся глас, по три́жды. Во исполне́ния же свети́льнов, глаго́лем си́це:

В понеде́льник у́бо к пе́рвому:

Предста́тельствы Безпло́тных Твои́х, и спаси́ мя.

Во вто́рник же:

Моли́твами Го́споди Предте́чи Твоего́, и спаси́ мя.

В сре́ду и пято́к:

Си́лою Го́споди Креста́ Твоего́, и спаси́ мя.

В четверто́к:

Моли́твами Го́споди Апо́стол твои́х и святи́теля Никола́я, и спаси́ мя.

Во второ́е на Сла́ва: глаго́лати внегда́ в конца́х:

Моли́твами Го́споди святы́х Твои́х, и спаси́ мя.

В тре́тие же на И ны́не: в конца́х глаго́лати:

Моли́твами Го́споди Богоро́дицы, и спаси́ мя.

Песни Священного Писания на праздничнии

В неде́лю же, и во Влады́чни, и Богоро́дичны пра́здники, и в предпра́зднства, и попра́зднства их, и в пра́здник свята́го, иму́щаго полиеле́й, или́ славосло́вие вели́кое, и во всю пятьдеся́тницу, и егда́ указу́ет, Го́сподеви пое́м, не стихосло́вим, пое́м пе́сни си́це.

В неде́лю у́бо по возгла́се свяще́нника:

Ми́лостию и щедро́тами:

Начина́ем ирмо́с кано́на.

Глаго́лем же и еди́н тропа́рь без стиха́, глаго́люще:

Сла́ва Го́споди, свято́му Воскре́снию Твоему́.

А́ще же Влады́чний пра́здник, или́ пра́зднуемаго свята́го е́сть, глаго́лем ирмо́с два́жды.

Та́же начина́ет пе́рвый лик стих пе́сни:

Пое́м Го́сподеви, сла́вно бо просла́вися. Коня́ и вса́дника ве́рже в мо́ре.

И тропа́рь.

Та́же вторы́й лик:

Помо́щник и покрови́тель бы́сть мне во спасе́ние, сей мой Бог, и просла́влю Его́, Бог отца́ моего́, и вознесу́ Его́.

И тропа́рь.

Госпо́дь сокруша́я бра́ни, Госпо́дь и́мя ему́: колесни́цы фарао́новы и си́лу его́ ве́рже в мо́ре.

Пучи́ною покры́ я, погрязо́ша во глубине́ я́ко ка́мень.

На 8: Тогда́ потща́шася влады́ки едо́мстии, и князе́й Моави́тских, прия́т я тре́пет, раста́яша вси живу́щии в Ханаа́не.

Нападе́т на ня страх и тре́пет, вели́чием мы́шцы Твоея́ да окаменя́тся.

На 6: До́ндеже про́йдут лю́дие Твои́ Го́споди, до́ндеже про́йдут лю́дие Твои́ си́и, я́же стяжа́л еси́.

Соде́лал еси́ Го́споди святы́ню, ю́же угото́васте, ру́це Твои́.

На 4: Госпо́дь ца́рствуяй ве́ки, и на век и еще́, егда́ вни́де ко́нь фарао́нов с колесни́цами и вса́дники в мо́ре.

Сы́нове же Изра́илевы проидо́ша су́шею посреде́ мо́ря.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

И катава́сиа по ко́ейждо пе́сни.

Пе́снь тре́тия.

Утверди́ся се́рдце мое́ во Го́споде, вознесе́ся рог мой о Бо́зе мое́м, разшири́шася уста́ моя́ на враги́ моя́, возвесели́хся о спасе́нии Твое́м.

Я́ко не́сть Свят, я́ко Госпо́дь, и не́сть Пра́ведн, я́ко Бог наш, и не́сть Свят па́че Тебе́.

Не хвали́теся и не глаго́лите высо́кая в горды́ни, ниже́ да изы́дет велере́чие из уст ва́ших.

Я́ко Бог ра́зумов Госпо́дь, и Бог уготовля́яй начина́ния Своя́.

На 8: Дая́й моли́тву моля́щемуся, и благослови́ ле́та пра́веднаго.

Госпо́дь не́мощна сотвори́ супоста́та его́, Госпо́дь свят.

На 6: Да не хва́лится прему́дрый прему́дростию свое́ю, и да не хва́лится си́льный си́лою свое́ю, и да не хва́лится бога́тый бога́тством свои́м.

Но о сем да хва́лится хваля́йся, е́же разуме́ти и зна́ти Го́спода, и твори́ти суд и пра́вду посреде́ земли́.

На 4: Госпо́дь взы́де на Небеса́ и возгреме́, Той су́дит конце́м земли́, пра́веден Сый.

И даст кре́пость Царю́ на́шему, и вознесе́т рог Христа́ Своего́.

Сла́ва отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Катава́сиа. И ектениа́.

Пе́снь четве́ртая.

Го́споди, услы́шах слух Твой и убоя́хся: Го́споди, разуме́х дела́ Твоя́ и ужасо́хся.

Внегда́ смути́тися души́ мое́й во гне́ве, ми́лость Твою́ помяне́ши.

Бог от ю́га прии́дет, и Святы́й из горы́ приосене́нныя ча́щи.

Покры́ небеса́ доброде́тель Его́, и хвалы́ Его́ испо́лнь земля́.

На 8: Зане́ смокв не плодопринесе́т, и не бу́дет ро́да в лоза́х.

Солже́т де́ло ма́слинное, и поля́ не сотворя́т я́ди.

На 6: Оскуде́ша о́вцы от пи́щи, и не бу́дет воло́в при я́слех.

Аз же о Го́споде возра́дуюся, возвеселю́ся о Бо́зе Спа́се мое́м.

На 4: Госпо́дь Бог мой, си́ла моя́, и учини́т но́зе мои́ на соверше́ние.

И на высо́кая возво́дит мя, победи́ти ми в пе́сни Его́.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Катава́сиа.

Пе́снь пя́тая.

От но́щи у́тренюет дух мой к Тебе́ Бо́же, зане́ свет повеле́ния Твоя́ на земли́.

Пра́вде научи́теся живу́щии на земли́.

Да во́змется нечести́вый, да не ви́дит сла́вы Госпо́дни. Го́споди, высока́ Твоя́ мы́шца, и не ве́деша, разуме́вше же постыдя́тся.

За́висть прии́мет лю́ди ненака́занныя, и ны́не о́гнь супоста́ты поя́ст.

На 8: Приложи́ им зла Го́споди, приложи́ зла сла́вным земли́.

Го́споди, в ско́рби помяну́хом Тя, в ско́рби ма́ле наказа́ние Твое́ нам.

На 6: И я́ко боля́щая приближа́ется роди́ти и в боле́зни свое́й вопия́ше, та́ко бы́хом возлю́бленному Твоему́.

Не паде́м, но паду́т живу́щии на земли́.

На 4: Воскре́снут ме́ртвии, и воста́нут и́же во гробе́х, и возвеселя́тся и́же на земли́.

Роса́ бо, я́же от Тебе́, исцеле́ние им е́сть: земля́ же нечести́вых паде́т.

Сла́ва отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Катава́сиа.

Пе́снь шеста́я.

Возопи́х в ско́рби мое́й ко Го́споду Бо́гу моему́, и услы́ша мя.

Отве́ргл мя еси́ во глубины́ се́рдца морска́го, и ре́ки обыдо́ша мя.

Вся высоты́ твоя́, и во́лны Твоя́ на мне приидо́ша.

Еда́ приложу́ призре́ти ми к хра́му Свято́му Твоему́?

На 8: Возлия́ся вода́ до души́ моея́, бе́здна обы́де мя после́дняя.

Понре́ глава́ моя́ в разсе́ли гор, снидо́х в зе́млю, ея́же вереи́ ея́ закле́пи ве́чнии.

На 6: И да взы́дет из истле́ния живо́т мой, к Тебе́ Го́споди Бо́же мой.

И да прии́дет к Тебе́ моли́тва моя́, к хра́му Свято́му Твоему́.

На 4: Храня́щии су́етная и ло́жная, ми́лость свою́ оста́виша.

Ели́ка обеща́х, возда́м тебе́ во спасе́ние мое́ Го́сподеви.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Катава́сиа.

Пе́снь седма́я.

Благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки.

И вся дела́ Твоя́ и́стинна, и пра́ви путие́ Твои́.

И вси суди́ Твои́ и́стинни, и судьбы́ и́стинны сотвори́л еси́.

И на град святы́й оте́ц на́ших Иерусали́м.

На 8: Благослове́н еси́ Го́споди Бо́же оте́ц на́ших, и препе́тый и превозноси́мый во ве́ки.

И благослове́но И́мя сла́вы Твоея́ свято́е, препе́тое и превозноси́мое во ве́ки.

На 6: Благослове́н еси́ в хра́ме святы́я сла́вы Твоея́, препе́тый и превозноси́мый во ве́ки.

Благослове́н еси́ ви́дяй бе́здны, седя́й на Херуви́мех, препе́тый и превозноси́мый во ве́ки.

На 4: Благослове́н еси́ на Престо́ле сла́вы Ца́рствия Твоего́ препе́тый и превозноси́мый во ве́ки.

Благослове́н еси́ на тве́рди небе́сней, препе́тый и превозноси́мый во ве́ки.

Сла́ва отцу́ и Сы́ну, и свято́му ду́ху.

И ны́не и при́сно, и во ве́ки веко́в, ами́нь.

И катава́сиа.

Пе́снь осма́я.

Благослови́те вся дела́ Госпо́дня Го́спода, по́йте и превозноси́те Его́ во ве́ки.

Благослови́те А́нгели Госпо́дни, Небеса́ Госпо́дня Го́спода, по́йте и превозноси́те Его́ во ве́ки.

Благослови́те во́ды вся, я́же превы́ше небе́с, вся Си́лы Госпо́дни Го́спода, по́йте и превозноси́те Его́ во ве́ки.

Благослови́те со́лнце и ме́сяц, зве́зды небе́сныя Го́спода, по́йте и превозноси́те Его́ во ве́ки.

На 8: Благослови́те вся пти́цы небе́сныя, зве́рие, и вси ско́ти Го́спода, по́йте и превозноси́те Его́ во ве́ки.

Благослови́те сы́нове челове́честии, да благослови́т изра́иль Го́спода, по́йте и превозноси́те Его́ во ве́ки.

На 6: Благослови́те свяще́нницы Госпо́дни, раби́ Госпо́дни Го́спода, по́йте и превозноси́те Его́ во ве́ки.

Благослови́те ду́си и ду́шы пра́ведных, преподо́бнии смире́нии се́рдцем Го́спода, по́йте и превозноси́те Его́ во ве́ки.

На 4: Благослови́те Ана́ниа, Аза́риа, Мисаи́л Го́спода, по́йте и превозноси́те Его́ во ве́ки.

Благослови́те апо́столи, проро́цы и му́ченицы Госпо́дни Го́спода, по́йте и превозноси́те Его́ во ве́ки.

Благослови́м Отца́, и Сы́на, и Свята́го Ду́ха, Го́спода.

И ны́не и при́сно, и во ве́ки веко́в, ами́нь.

Та́же глаго́лем: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Покло́н и катава́сиа.

Пе́снь пресвяты́я Богоро́дицы:

Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.

Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.

Я́ко сотвори́ мне вели́чие си́льный, и Свя́то И́мя Его́, и ми́лость Его́ в ро́ды родо́в боя́щымся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л и вознесе́ смире́нныя, а́лчущыя испо́лни благ, и богатя́щыяся отпусти́ тщы.

Восприя́т изра́иля о́трока Своего́, помяну́ти ми́лости, я́коже глаго́ла ко отце́м на́шым, Авраа́му и се́мени его́, да́же до ве́ка.

Пе́снь свята́го проро́ка Заха́рии, отца́ Предте́чева:

Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м.

И воздви́же рог спасе́ния нам, в дому́ Дави́дове о́трока Своего́.

Я́коже глаго́ла усты́ святы́х, су́щих от ве́ка проро́к Его́, спасе́ние от враг на́ших, и из руки́ всех ненави́дящих нас.

Сотвори́ти ми́лость со отцы́ на́шими, и помяну́ти заве́т святы́й Свой.

На 8: Кля́тву, е́юже кля́тся ко Авраа́му отцу́ на́шему, да́ти нам без стра́ха из руки́ враг на́ших изба́вльшымся.

Служи́ти Ему́ преподо́бием и пра́вдою пред Ним, вся дни живота́ на́шего.

На 6: И ты, отроча́, проро́к Вы́шняго нарече́шися, предыдеши бо пред лице́м Госпо́дним, угото́вати пути́ Его́.

Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

На 4: В ни́хже посети́ нас восто́к в высоты́, яви́тися во тьме́ и се́ни сме́ртней седя́щым.

Напра́ви но́ги на́шя на пу́ть ми́рен.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Катава́сиа. Ектениа́: зане́ в сицевы́я дни, досто́йно, не пое́тся. Та́же ексапостила́рий.

Песни Священного Писания во Святую Четыредесятницу

Во святу́ю и вели́кую Четыредеся́тницу стихосло́вятся пе́сни си́це.

По возгла́се свяще́нника: Ми́лостию и щедро́тами: Начина́ем Го́сподеви пое́м на глас кано́на мине́и дне свята́го:: И глаго́лют стихи́ пе́сней ско́ро, ки́йждо лик свой стих, до́ндеже дости́гнут до Огусте́ша: и от того́ начина́ют стихи́ держа́ти на 14. И пое́м мине́и, со ирмосо́м на 6: пое́м же си́це. Пе́рвый лик глаго́лет стих: Огусте́ша: и пое́т ирмо́с. Вторы́й же лик глаго́лет вторы́й стих: Рече́ враг: и по нем тропа́рь кано́на. И поря́ду стихи́, по лико́м, до Тогда́ потща́шася: От стиха́ же, Тогда́ потща́шася: начина́ем трипе́снец господи́на Ио́сифа, на 4. На Госпо́дь Ца́рствуяй: же пое́м други́й трипе́снец, господи́на Фео́дора Студи́та. И пое́т еди́н лик тропа́рь. Други́й же лик вторы́й стих, и тропа́рь. Посе́м соедини́вшымся двум лико́м, пою́т, Сла́ва: Тро́ичен, вы́шшим гла́сом: И ны́не: Богоро́дичен. Та́же глаго́лем высоча́йшим гла́сом: Сла́ва Тебе́ Бо́же наш, сла́ва Тебе́. И пое́м ины́й тропа́рь господи́на Фео́дора. Поне́же бо по пяти́ тропаре́й и́мать пе́снь. Последи́ же глаго́лем катава́сию, ирмо́с втора́го кано́на. Си́це пое́тся 8-я и 9-я пе́сни. Тре́тию же пе́снь пое́м си́це. Глаго́лет пе́рвый лик стих: Госпо́дь взы́де на Небеса́: и тропа́рь кано́на мине́и. Вторы́й лик, стих: И даст кре́пость царю́: и вторы́й тропа́рь кано́на мине́и. Та́же, Сла́ва, и ны́не: с тропари́ кано́на. И пое́т пе́рвый лик ирмо́с мине́и тре́тия пе́сни, последи́ кано́на. Сим о́бразом пое́м и 6-ю пе́снь. Четве́ртую же и пя́тую, и седму́ю пе́сни си́це пое́м: Глаго́ли пе́рвее ирмо́с кано́на мине́и. Та́же коне́чныя два стиха́ пе́сни пое́м к тропаре́м кано́на. И Сла́ва, и ны́не: Ирмосо́м же не покрыва́ем пе́сни, зане́ ирмо́с глаго́лется пре́жде пе́сни. Пою́тся же ирмосы́ мине́и по кано́не, то́кмо по 3-й и 6-й пе́снех. Зане́же у тех пе́сней пе́рвее ирмо́с не пое́тся. В про́чыя же дни седми́цы, кроме́ понеде́льника, та́ко пое́тся и пе́рвая пе́снь, я́коже указа́ся о 4-й и 5-й пе́снех. А в ни́хже пе́снех бу́дет трипе́снец, пое́тся последи́ кано́на катава́сиа, ирмо́с трипе́снца, я́коже вы́ше изъяви́ся.

Ве́домо же бу́ди, я́ко осмогла́сник не пое́тся во всю святу́ю Четыредеся́тницу, кроме́ неде́ль. Пое́тся же то́чию мине́а, и трипе́снец. А в ни́хже пе́снех не́сть трипе́снца, пое́тся то́кмо мине́я.

Пе́снь пе́рвая:

1: Пое́м Го́сподеви, сла́вно бо просла́вися: коня́ и вса́дника ве́рже в мо́ре.

2: Помо́щник и покрови́тель бы́сть мне во спасе́ние: сей мой Бог, и просла́влю Его́: Бог Отца́ моего́, и вознесу́ Его́:

3: Госпо́дь сокруша́яй бра́ни, Госпо́дь и́мя Ему́, колесни́цы фарао́новы и си́лу Его́ ве́рже в мо́ре.

4: Избра́нныя вса́дники триста́ты потопи́ в чермне́м мо́ри.

5: Пучи́ною покры́ их, погрязо́ша во глубине́ я́ко ка́мень.

6: Десни́ца твоя́ Го́споди, просла́вися в кре́пости, десна́я Твоя́ рука́ Го́споди сокруши́ враги́: и мно́жеством сла́вы Твоея́ стерл еси́ сопроти́вных.

7: Посла́л еси́ гнев Твой, пояде́ я я́ко сте́блие, и ду́хом я́рости Твоея́ разступи́ся вода́.

На 14:

8: Огусте́ша я́ко стена́ во́ды, огусте́ша и во́лны посреде́ мо́ря.

9: Рече́ враг: гнав пости́гну, разделю́ коры́сть, испо́лню ду́шу мою́, убию́ мече́м мои́м, госпо́дствовати бу́дет рука́ моя́.

10: Посла́л еси́ дух Твой, покры́ я мо́ре, погрязо́ша я́ко о́лово в воде́ зе́льне.

11: Кто подо́бен Тебе́ в бозе́х Го́споди, кто подо́бен Тебе́? Просла́влен во святы́х, ди́вен сла́вно творя́й чудеса́.

12: Просте́рл еси́ десни́цу Твою́, пожре́ я земля́. Наста́вил еси́ пра́вдою Твое́ю лю́ди Твоя́ сия́, я́же изба́вил еси́.

13: Уте́шил еси́ кре́постию Твое́ю во оби́тель святу́ю Твою́. Слы́шаша язы́цы, и прогне́вашася, боле́зни прия́ша живу́щии в Филисти́ме.

На 8:

14: Тогда́ потща́шася влады́ки Едо́мстии, и князе́й Моави́тских, прия́т я тре́пет, раста́яша вси живу́щии в Ханаа́не.

15: Нападе́т на ня страх и тре́пет, вели́чием мы́шцы твоея́ да окаменя́тся.

16: До́ндеже про́йдут лю́дие Твои́ Го́споди, до́ндеже про́йдут лю́дие Твои́ си́и, я́же стяжа́л еси́.

17: Введ насади́ я в го́ру достоя́ния Твоего́, в гото́вое жили́ще Твое́, е́же соде́лал еси́ Го́споди, святы́ню, ю́же угото́васте ру́це Твои́.

На 4:

18: Госпо́дь Ца́рствуяй ве́ки, и на век, и еще́, егда́ вни́де ко́нь фарао́нов с колесни́цами и вса́дники в мо́ре.

19: И наведе́ на ня Госпо́дь во́ду морску́ю, сы́нове же Изра́илевы проидо́ша су́шею посреде́ мо́ря.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Подоба́ет ве́дати, я́ко втора́я пе́снь никогда́же стихосло́вится, то́кмо во еди́ной Вели́кой Четыредеся́тнице, во вто́рник, стихосло́вим же ю да́же до конца́, к тропаре́м же глаго́лем припе́в:

Сла́ва Тебе́ Бо́же наш, сла́ва Тебе́: Еди́ному коему́ждо.

Пе́снь втора́я.

1: Вонми́ не́бо, и возглаго́лю, и да слы́шит земля́ глаго́лы уст мои́х.

2: Да ча́ет я́ко до́ждь веща́ние мое́, да сни́дут я́ко роса́ глаго́ли мои́.

3: Я́ко ту́ча на тро́скот, и я́ко и́ней на се́но: я́ко и́мя Госпо́дне призва́х, дади́те вели́чие Бо́гу на́шему.

4: Бог, и́стинна дела́ Его́, и вси путие́ Его́ суд:

5: Бог ве́рен, и не́сть непра́вды в нем, пра́ведн и преподо́бен Госпо́дь.

6: Согреши́ша, не того́ ча́да поро́чная: ро́де стропти́вый и развраще́нный, сия́ ли Го́сподеви воздаете́:

7: Си́и лю́дие бу́и и не му́дри: не сам ли сей оте́ц твой стяжа́ тя, и сотвори́ тя, и созда́ тя?

8: Помяни́те дни ве́чныя, разуме́йте ле́та ро́да родо́в.

9: Вопроси́ отца́ твоего́, и возвести́т тебе́: ста́рцы твоя́, и реку́т ти.

10: Егда́ разделя́ше вы́шний язы́ки, я́коже разсе́я сы́ны Ада́мовы:

11: Поста́ви преде́лы язы́ков по числу́ А́нгел Бо́жиих. И бы́сть ча́сть Госпо́дня, лю́дие его́ Иа́ков, у́же насле́дия его́ Изра́иль.

12: Удовли́ его́ в пусты́ни в жа́жди зно́я в безво́дне.

13. Обы́де его́, и наказа́ его́, и сохрани́ его́ я́ко зе́ницу о́ка.

14: Я́ко оре́л покры́ гнездо́ свое́, и на птенцы́ своя́ возжеле́.

15. Просте́р криле́ свои́, и прия́т я, и подъя́т я на ра́му свое́ю.

16: Госпо́дь еди́н вожда́ше я, и не бе с ни́ми Бог чу́ждь.

17: Возведе́ я на си́лу земли́, насы́ти я жит се́льных.

18: Сса́ша мед из ка́мене, и еле́й от тве́рда ка́мене.

19: Ма́сло кра́вие, и млеко́ о́вчее с ту́ком а́гнчим и о́вним, сыно́в ю́нчих и ко́злих, с ту́ком пшени́чным, и кро́вь гро́здову пия́ху вино́.

20: И яде́ Иа́ков и насы́тися, и отве́ржеся возлю́бленный.

21: Уты́, утолсте́, разшире́, и оста́ви Бо́га сотво́ршаго его́, отступи́ от Бо́га Спа́са своего́.

22: Прогне́ваша мя о чужи́х, и в ме́рзостех свои́х преогорчи́ша Мя.

23: Пожро́ша бесово́м, а не Бо́гу, Бого́м, и́хже не ве́деша: но́ви и секра́ти приидо́ша, и́хже не ве́деша отцы́ их.

24: Бо́га ро́ждшаго тя оста́вил еси́ и забы́л еси́ Бо́га пита́ющаго тя.

25: И ви́де Госпо́дь, и возревнова́, и раздражи́ся за гнев сыно́в их и дще́рей.

26: И рече́: отвращу́ лице́ Мое́ от них, и покажу́, что бу́дет им напосле́док.

27: Я́ко род развраще́н е́сть сы́нове, и́мже не́сть ве́ры в них.

28: Ти́и раздражи́ша мя не о Бо́зе прогне́ваша мя во и́долех свои́х.

29: И аз раздражу́ я не о язы́це, о язы́це же неразу́мливе прогне́ваю я.

30: Я́ко о́гнь возгори́тся от я́рости моея́, разжже́тся до а́да преиспо́дняго.

31: Сне́сть зе́млю и жи́та ея́, попали́т основа́ния гор.

32: Соберу́ на них зла́я, и стре́лы моя́ сконча́ю в них.

33: Та́юще гла́дом, и сне́дь птиц и го́рб неисце́лен.

34: Зу́бы звере́й послю́ в ня, с я́ростию пресмыка́ющихся по земли́.

35: Отвне́ безча́дит я ме́чь, и от хра́мов их страх: ю́ноша с де́вою, ссу́щее с соверше́нным ста́рцем.

36: Рех: разсе́ю я, уста́влю же от челове́к па́мять их.

37: А́ще не за гнев враго́в, да не долголе́тствуют, и да не наля́гут супоста́ти.

38: Да не реку́т: рука́ на́ша высока́, и не Госпо́дь сотвори́ сия́ вся.

39: Я́ко язы́к погуби́вый сове́т е́сть, и не́сть в них худо́жества.

40: Не смы́слиша разуме́ти сия́ вся, да прии́мут во гряду́щее ле́то.

41: Ка́ко пожене́т еди́н ты́сящы, и два дви́гнета тьмы́:

42: А́ще не Бог отда́ст тя, и Госпо́дь преда́ст я?

43: Не су́ть бо бо́зи их, я́ко Бог наш: врази́ же на́ши неразу́мливи.

44: От виногра́дов бо Содо́мских виногра́д их и розга́ их от Гомо́рры.

45: Грозд их, грозд же́лчи, грозд го́рести их.

46: Я́рость змие́в вино́ их: и я́рость а́спидов неисце́льна.

47: Не сия́ ли вся собра́шася у мене́, и запечатле́шася в сокро́вищах мои́х?

48: В де́нь отмще́ния возда́м,

49: Во вре́мя, внегда́ соблазни́тся нога́ их.

50: Я́ко близ де́нь поги́бели их, и предстоя́т гото́вая вам.

51: Я́ко су́дит Госпо́дь лю́дем свои́м, и о рабе́х свои́х умоле́н бу́дет.

52: Ви́де бо я разсла́блены, и иста́явшя во вре́мя, и изнемо́гшя.

53: И рече́ Госпо́дь: где су́ть бо́зи их, и́хже упова́ша на ня? И́хже тук жертв и́хже ядя́сте, и пия́сте вино́ треб их?

54: Да воскре́снут, помо́гут вам, и бу́дут вам покрови́тели.

55: Ви́дите, ви́дите, я́ко Аз е́смь, и не́сть Бог ра́зве Мене́.

56: Аз убию́, и жи́ти сотворю́: поражу́, и Аз исцелю́: и не́сть, и́же и́змет от руку́ Мое́ю.

57: Я́ко воздви́гну на не́бо ру́ку Мою́, и клену́ся десни́цею Мое́ю, и реку́: жив Аз во ве́ки.

58: Я́ко поострю́ я́ко мо́лнию ме́чь Мой, и прии́мет суд рука́ Моя́.

59: И возда́м ме́сть враго́м, и ненави́дящым Мя возда́м.

60: Упою́ стре́лы моя́ от кро́ве, и ме́чь Мой сне́сть мяса́:

61: От кро́ве я́звенных и плене́ния, от глав князе́й язы́ческих.

62: Возвесели́теся небеса́ ку́пно с ним, и да покло́нятся Ему́ вси А́нгели Бо́жии.

63: Возвесели́теся язы́цы с людьми́ Его́, и да укрепя́тся Ему́ вси сы́нове Бо́жии.

64: Я́ко кро́вь сыно́в свои́х отмща́ет, и отмсти́т и возда́ст ме́сть враго́м, и ненави́дящым Его́ возда́ст.

65: И очи́стит Госпо́дь зе́млю люде́й свои́х.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Пе́снь тре́тия.

1: Утверди́ся се́рдце мое́ во Го́споде, вознесе́ся рог мой о Бо́зе мое́м: разшири́шася уста́ моя́ на враги́ моя́, возвесели́хся о спасе́нии Твое́м.

2: Я́ко не́сть свят, я́ко Госпо́дь, и не́сть пра́ведн, я́ко Бог наш: и не́сть свят па́че Тебе́.

3: Не хвали́теся и не глаго́лите высо́кая в горды́ни: ниже́ да изы́дет велере́чие из уст ва́ших.

4: Я́ко Бог ра́зумов Госпо́дь, и Бог уготовля́яй начина́ния своя́.

На 14:

5: Лук си́льных изнемо́же и немощству́ющии препоя́сашася си́лою.

6: Испо́лненнии хле́бов, лиши́шася, и а́лчущии прише́льствоваша зе́млю.

7: Я́ко непло́ды роди́ се́дмь, и мно́гая в ча́дех изнемо́же.

8: Госпо́дь мертви́т и живи́т, низво́дит во ад, и возво́дит.

9: Госпо́дь убо́жит, и богати́т, смиря́ет и вы́сит: возставля́ет от земли́ убо́га, и от гно́ища воздвиза́ет ни́ща.

10: Посади́те его́ с могу́щими люде́й и Престо́л сла́вы насле́дуя ему́.

На 8:

11: Дая́й моли́тву моля́щемуся, и благослови́ ле́та пра́веднаго.

12: Я́ко не укрепля́ется и си́лен муж кре́постию свое́ю, Госпо́дь не́мощна сотвори́ супоста́та его́, Госпо́дь свят.

13: Да не хва́лится прему́дрый прему́дростию свое́ю, и да не хва́лится си́льный си́лою свое́ю, и да не хва́лится бога́тый бога́тством свои́м.

14: Но о сем да хва́лится хваля́йся, е́же разуме́ти и зна́ти Го́спода, и твори́ти суд и пра́вду посреде́ земли́.

На 4:

15: Госпо́дь взы́де на Небеса́, и возгреме́, Той су́дит конце́м земли́ пра́ведн Сый.

16: И даст кре́пость царю́ на́шему, и вознесе́т рог Христа́ Своего́.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Пе́снь четве́ртая.

1: Го́споди, услы́шах слух твой, и убоя́ся: Го́споди, разуме́х дела́ твоя́, и ужасо́хся.

2: Посреде́ двою́ живо́тну позна́н бу́деши. Внегда́ прибли́житися ле́том, позна́ешися. Внегда́ приити́ вре́мени, яви́шися, внегда́ смути́тися души́ мое́й во гне́ве, ми́лость Твою́ помяне́ши.

3: Бог от ю́га прии́дет, и Святы́й из горы́ приосене́нныя ча́щи.

4: Покры́ Небеса́ доброде́тель его́, и хвалы́ его́ испо́лнь земля́.

5: И сия́ние Его́, я́ко свет бу́дет ро́зи в рука́х его́, и положи́ любо́вь держа́вну кре́пости Свое́й.

6: Пред лице́м Его́ предъи́дет сло́во, и изы́дет на по́ле за пя́ту Его́.

7: Ста, и подви́жеся земля́: призре́ и раста́яша язы́цы.

8: Стры́шася и го́ры ну́ждею, раста́яша хо́лми ве́чнии, ше́ствия ве́чная их за труд ви́деша.

9: Селе́ния Ефио́пская убоя́тся, и кро́вы земли́ мадиа́мския.

10: Еда́ в река́х прогне́ваешися Го́споди? еда́ в река́х я́рость Твоя́? или́ в мо́ри устремле́ние Твое́?

11: Я́ко вся́деши на ко́ни Твоя́, и ежде́ние Твое́ спасе́ние.

12: Наляца́я наляче́ши лук Твой на ски́птры, глаго́лет Госпо́дь.

13: Река́ми разся́дется земля́, у́зрят Тя и поболя́т лю́дие.

14: Расточа́я во́ды ше́ствия, даде́ бе́здна глас свой, высота́ привиде́ния своя́.

15: Воздви́жеся со́лнце, и луна́ ста в чи́не свое́м.

16: Во свет стре́лы твоя́ по́йдут, в блиста́нии мо́лнии ору́жий Твои́х.

17: Преще́нием ума́лиши зе́млю и я́ростию низложи́ши язы́ки.

18. Изше́л еси́ на спасе́ние люде́й Твои́х, спасти́ пома́занныя Твоя́ прише́л еси́.

На 14:

19: Вложи́л еси́ во главы́ беззако́нных сме́рть, воздви́гл еси́ у́за да́же до вы́и в коне́ц.

20: Разсе́кл еси́ во изступле́нии главы́ си́льных, стрясу́тся в ней: разве́рзут узды́ своя́, я́ко снеда́яй ни́щий тай.

21: И возве́л еси́ на мо́ре ко́ни Твои́, смуща́ющыя во́ды мно́ги.

22: Сохрани́хся, и убоя́ся се́рдце мое́ от гла́са моли́твы усте́н мои́х.

23: И вни́де тре́пет в ко́сти моя́, и во мне смяте́ся кре́пость моя́.

24: Почи́ю в де́нь ско́рби моея́, да взы́ду в лю́ди прише́льствия моего́.

На 8:

25: Зане́ смо́ковь не плодопринесе́т, и не бу́дет ро́да в лоза́х.

26: Солже́т де́ло ма́слинное, и поля́ не сотворя́т я́ди.

27: Оскуде́ша о́вцы от пи́щи, и не бу́дет воло́в при я́слех.

28: Аз же о Го́споде возра́дуюся, возвеселю́ся о Бо́зе Спа́се мое́м.

На 4:

29: Госпо́дь Бог мой, си́ла моя́, и учини́т но́зе мои́ на соверше́ние. И на высо́кая возво́дит мя, победи́ти ми в пе́сни Его́.

Сла́ва Отцу́ и Сы́ну, и Свято́му ду́ху.

И ны́не и при́сно, и во ве́ки веко́в, ами́нь.

Пе́снь пя́тая.

1: От но́щи у́тренюет дух мой к Тебе́ Бо́же, зане́ свет повеле́ния Твоя́ на земли́.

2: Пра́вде научи́теся живу́щии на земли́: преста́ бо нечести́вый, не научи́тся пра́вде, на земли́ и́стины не сотвори́т.

3: Да во́змется нечести́вый, да не ви́дит сла́вы Госпо́дни. Го́споди высока́ твоя́ мы́шца, и не ве́деша, разуме́вше же постыдя́тся.

На 14:

4: За́висть прии́мет лю́ди ненака́занныя, и ны́не о́гнь супоста́ты поя́ст.

5: Го́споди Бо́же наш, мир да́ждь нам, вся бо возда́л еси́ нам.

6: Го́споди Бо́же наш, стяжи́ ны: Го́споди ра́зве тебе́ ино́го не ве́мы, и́мя твое́ имену́ем.

7: Ме́ртвии же живота́ не и́мут ви́дети, ниже́ вра́чеве воскреся́т.

8: Сего́ ра́ди наве́л еси́, и погуби́л, и взял еси́ всяк му́жеск пол их.

9: Приложи́ им зла Го́споди, приложи́ зла сла́вным земли́.

На 8:

10: Го́споди, в ско́рби помяну́хом Тя, в ско́рби ма́ле наказа́ние Твое́ нам.

11: И я́ко боля́щая приближа́ется роди́ти, и в боле́зни свое́й вопия́ше: та́ко бы́хом Возлю́бленному Твоему́.

12: Стра́ха ра́ди Твоего́, Го́споди, во чре́ве прия́хом, и поболе́хом, и роди́хом дух спасе́ния, его́же сотвори́хом на земли́.

13: Не паде́м, но паду́т живу́щии на земли́.

На 4:

14: Воскре́снут ме́ртвии, и воста́нут и́же во гробе́х, и возвеселя́тся и́же на зелми́.

15: Роса́ бо, я́же от Тебе́, исцеле́ние им е́сть: земля́ же нечести́вых паде́т.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Пе́снь шеста́я.

1: Возопи́х ско́рби мое́й ко Го́споду Бо́гу моему́, и услы́ша мя.

2: Из чре́ва а́дова во́пль мой, услы́шал еси́ глас мой: отве́ргл мя еси́ во глубины́ се́рдца морска́го, и ре́ки обыдо́ша мя.

3: Вся высоты́ Твоя́, и во́лны Твоя́ на мне преидо́ша.

4: И аз рех: отри́нухся от о́чию Твое́ю, еда́ приложу́ призре́ти ми к хра́му свято́му Твоему́?

5: Возлия́ся вода́ до души́ моея́, бе́здна обы́де мя после́дняя.

На 8:

6: Понре́ глава́ моя́ в разсе́ли гор: снидо́х в зе́млю, ея́же вереи́ ея́ закле́пи ве́чнии.

7: И да взы́дет из истле́ния живо́т мой к Тебе́, Го́споди Бо́же мой.

8: Внегда́ скончава́тися от Мене́ души́ мое́й, Го́спода помяну́х.

9: И да прии́дет к Тебе́ моли́тва моя́, к хра́му свято́му Твоему́.

На 4:

10: Храня́щии су́етная и ло́жная, ми́лость свою́ оста́виша.

11: Аз же со гла́сом хвале́ния и испове́дания пожру́ Тебе́: ели́ка обеща́х возда́м Тебе́ во спасе́ние мое́ Го́сподеви.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Пе́снь седма́я.

1: Благослове́н еси́ Го́споди Бо́же оте́ц на́ших, и хва́льно и просла́влено и́мя Твое́ во ве́ки.

2: Я́ко пра́веден еси́ о всех, я́же сотвори́л еси́ нам:

3: И вся дела́ Твоя́ и́стинна, и пра́ви путие́ Твои́, и вси суди́ Твои́ и́стинни:

4: И судьбы́ и́стинны сотвори́л еси́ по всем, я́же наве́л еси́ на ны, и на град святы́й оте́ц на́ших Иерусали́м.

5: Я́ко и́стиною и судо́м наве́л еси́ сия́ вся на ны, грех ра́ди на́ших.

6: Я́ко согреши́хом и беззако́нновахом отступи́ти от Тебе́, и прегреши́хом во всех.

7: И за́поведей твои́х не послу́шахом, ниже́ соблюдо́хом, ниже́ сотвори́хом, я́коже запове́дал еси́ нам, да бла́го нам бу́дет.

8: И вся я́же сотвори́л еси́ нам, и вся ели́ка наве́л еси́ нам, и́стинным судо́м сотвори́л еси́.

9: И преда́л еси́ нас в ру́ки враго́в беззако́нных, ме́рзких отсту́пников, и царе́ви непра́ведну и лука́внейшу па́че всея́ земли́.

10: И ны́не не́сть нам отве́рсти уст, студ и поноше́ние бы́хом рабо́м Твои́м, и чту́щым Тя.

11: Не преда́ждь же нас до конца́ и́мене Твоего́ ра́ди, и не разори́ заве́та Твоего́, и не отста́ви ми́лости Твоея́ от нас, Авраа́ма ра́ди возлю́бленнаго от Тебе́, и за Исаа́ка раба́ Твоего́, и Изра́иля свята́го Твоего́:

12: И́мже глаго́лал еси́ умно́жити се́мя их, я́ко зве́зды небе́сныя, и я́ко песо́к при краи́ мо́ря.

13: Я́ко Влады́ко, ума́лихомся па́че всех язы́к, и есмы́ смире́ни по всей земли́ дне́сь, грех ра́ди на́ших.

14: И не́сть во вре́мя сие́ нача́льника и проро́ка и вожда́, ниже́ всесожже́ния, ниже́ же́ртвы, ниже́ приноше́ния, ниже́ кади́ла, ни ме́ста, е́же пожре́ти пред тобо́ю, и обрести́ ми́лость.

15: Но душе́ю сокруше́нною, и ду́хом смире́нным, да прия́ти бу́дем.

16: Я́ко во всесожже́ниих о́вних и ю́нчих, и я́ко во тьма́х а́гнец ту́чных, та́ко да бу́дет же́ртва на́ша пред Тобо́ю дне́сь, и да соверши́тся по Тебе́, я́ко не́сть студа́ упова́ющым на Тя.

17: И ны́не возсле́дуем всем се́рдцем. И бои́мся Тебе́, и и́щем лица́ Твоего́.

18: Не посрами́ нас, но сотвори́ с на́ми по кро́тости Твое́й, и по мно́жеству ми́лости Твоея́:

19: И изми́ нас по чудесе́м Твои́м, и да́ждь сла́ву и́мени Твоему́ Го́споди.

20: И да посра́мятся вси явля́ющии рабо́м твои́м зла́я, и да постыдя́тся от вся́кия си́лы, и кре́пость их да сокруши́тся.

21: И да разуме́ют, я́ко Ты еси́ Госпо́дь Бог еди́н, и сла́вен по всей вселе́нней.

22: И не преста́ша влага́ющии я слуги́ царе́вы, жгу́ще пе́щь на́ффою, и смоло́ю, и изгре́бьми, и ро́ждием.

На 14:

23: И разлива́шеся пла́мень над пе́щию, на ла́кти четы́редесять де́вять:

24: И обы́де и пожже́, я́же обре́те о пе́щи халде́йстей.

25: А́нгел же Госпо́день сни́де ку́пно с су́щими о Аза́рии в пе́щь:

26: И оттрясе́ пла́мень о́гненный от пе́щи.

27: И сотвори́ сре́днее пе́щи, я́ко дух росы́ шумя́щ, и не прикосну́ся их отню́дь о́гнь, ни оскорби́, ниже́ стужи́ их.

28: Тогда́ трие́ я́ко еди́неми усты́ поя́ху, и благословля́ху, и сла́вляху Бо́га в пещи́, глаго́люще:

На 8:

29: Благослове́н еси́ Го́споди Бо́же оте́ц на́ших, и препе́тый и превозноси́мый во ве́ки.

30: И благослове́но И́мя сла́вы Твоея́ Свято́е, препе́тое и превозноси́мое во ве́ки.

31: Благослове́н еси́ в хра́ме святы́я сла́вы Твоея́, препе́тый и превозноси́мый во ве́ки.

32: Благослове́н еси́ ви́дяй бе́здны, седя́й на Херуви́мех, препе́тый и превозноси́мый во ве́ки.

На 4:

33: Благослове́н еси́ на Престо́ле сла́вы Ца́рствия Твоего́, препе́тый и превозноси́мый во ве́ки.

34: Благослове́н еси́ на тве́рди небе́сней, препе́тый и превозноси́мый во ве́ки.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Пе́снь осма́я.

1: Благослови́те вся дела́ Госпо́дня Го́спода, по́йте превозноси́те Его́ во ве́ки.

2: Благослови́те А́нгели Госпо́дни, Небеса́ Госпо́дня Го́спода, по́йте и превозноси́те Его́ во ве́ки.

3: Благослови́те во́ды вся, я́же превы́ше небе́с, вся си́лы Госпо́дни Го́спода, по́йте и превозноси́те Его́ во ве́ки.

4: Благослови́те со́лнце и ме́сяц, зве́зды небе́сныя Го́спода, по́йте и превозноси́те Его́ во ве́ки.

5: Благослови́те всяк до́ждь и роса́, вси ду́си Го́спода, по́йте и превозноси́те Его́ во ве́ки.

На 14:

6: Благослови́те о́гнь и вар, сту́дь и зной Го́спода, по́йте и превозноси́те Его́ во ве́ки.

7: Благослови́те ро́сы и и́ней, ле́ди и мраз Го́спода, и по́йте и превозноси́те Его́ во ве́ки.

8: Благослови́те сла́ны и сне́зи, но́щи и дни́е Го́спода, по́йте и превозноси́те Его́ во ве́ки.

9: Благослови́те свет и тьма́, мо́лния и о́блацы Го́спода, по́йте и превозноси́те Его́ во ве́ки.

10: Благослови́те земля́, го́ры и хо́лми, и вся прозяба́ющая на ней Го́спода, по́йте и превозноси́те Его́ во ве́ки.

11: Благослови́те исто́чницы, моря́ и ре́ки, ки́ти и вся дви́жущаяся в вода́х Го́спода, по́йте и превозноси́те Его́ во ве́ки.

На 8:

12: Благослови́те вся пти́цы небе́сныя, зве́рие и вси ско́ти Го́спода, по́йте и превозноси́те Его́ во ве́ки.

13: Благослови́те сы́нове челове́честии, да благослови́т Изра́иль Го́спода, по́йте и превозноси́те Его́ во ве́ки.

14: Благослови́те свяще́нницы Госпо́дни, раби́ Госпо́дни Го́спода, по́йте и превозноси́те Его́ во ве́ки.

15: Благослови́те ду́си и ду́ши пра́ведных, преподо́бнии и смире́ннии се́рдцем ум Го́спода, по́йте и превозноси́те Его́ во ве́ки.

На 4:

16: Благослови́те Ана́ниа, Аза́риа, Мисаи́л по́йте и превозноси́те Его́ во ве́ки.

17: Благослови́те апо́столи, проро́цы и му́ченицы Госпо́дни Го́спода, по́йте и превозноси́те Его́ во ве́ки.

18: Благослови́м Отца́, и Сы́на, и Свята́го Ду́ха Го́спода.

19: Ны́не и при́сно, и во ве́ки веко́в, ами́нь.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Пе́снь Пресвяты́я Богоро́дицы:

1: Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.

2: Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.

3: Я́ко сотвори́ Мне вели́чие Си́льный и свя́то И́мя Его́, и ми́лость Его́ в ро́ды родо́в боя́щымся Его́.

4: Сотвори́ держа́ву мы́шцею Свое́ю, расточи́ го́рдыя мы́слию се́рдца их.

5: Низложи́ си́льныя со престо́л, и вознесе́ смире́нныя, а́лчущыя испо́лни благ, и богатя́щыяся отпусти́ тщы.

6: Восприя́т Изра́иля о́трока своего́, помяну́ти ми́лости, я́коже глаго́ла ко отце́м на́шим Авраа́му и се́мени его́ да́же до ве́ка.

Пе́снь девя́тая.

1: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем свои́м.

2: И воздви́же рог спасе́ния нам, в дому́ Дави́дове о́трока Своего́.

3: Я́коже глаго́ла усты́ святы́х су́щих от ве́ка проро́к Его́.

4: Спасе́ние от враг на́ших, и из руки́ всех ненави́дящих нас.

5: Сотвори́ти ми́лость со отцы́ на́шими, и помяну́ти заве́т святы́й Свой.

На 8:

6: Кля́тву, е́юже кля́тся ко Авраа́му отцу́ на́шему, да́ти нам без стра́ха из руки́ враг на́ших изба́вльшымся.

7: Служи́ти ему́ преподо́бием и пра́вдою пред ним вся дни живота́ на́шего.

8: И ты, отроча́, проро́к Вы́шняго нарече́шися: предыдеши бо пред лице́м Госпо́дним, угото́вати пути́ Его́.

9: Да́ти ра́зум спасе́ния лю́дем его́, во оставле́ние грех их, милосе́рдия ра́ди ми́лости Бо́га на́шего.

На 4:

10: В ни́хже посети́ нас восто́к с высоты́, яви́тися во тьме́ и се́ни сме́ртней седя́щым.

11: Напра́вити но́ги на́ша на пу́ть ми́рен.

Сла́ва Отцу́ и Сы́ну, и Свято́му Ду́ху.

И ны́не и при́сно, и во ве́ки веко́в, ами́нь.

Тропари́ воскре́сны, пое́мии по Непоро́чнах в неде́лях всего́ ле́та, гла́с 5

На еди́ном ко́емждо тропаре́ глаго́лем:

Благослове́н еси́ Го́споди, научи́ мя оправда́нием Твои́м.

А́нгельский собо́р удиви́ся, зря́ Тебе́ в ме́ртвых вмени́вшася, сме́ртную же, Спа́се, кре́пость разори́вша, и с Собо́ю Ада́ма воздви́гша, и от а́да вся́ свобо́ждша.

Благослове́н еси́ Го́споди, научи́ мя оправда́нием Твои́м.

Почто́ ми́ра с ми́лостивными слеза́ми, о ученицы́, растворя́ете? Блиста́яйся во гро́бе А́нгел мироно́сицам веща́ше: ви́дите вы́ гро́б и уразуме́йте, Спа́с бо Воскре́се от Гро́ба.

Благослове́н еси́ Го́споди, научи́ мя оправда́нием Твои́м.

Зело́ ра́но мироно́сицы теча́ху ко гро́бу Твоему́ рыда́ющыя: но предста́ к ни́м А́нгел, и рече́: рыда́ния вре́мя преста́, не пла́чите: воскре́сние же апо́столом рцы́те.

Благослове́н еси́ Го́споди, научи́ мя оправда́нием Твои́м.

Мироно́сицы жены́, с ми́ры прише́дшыя ко Гро́бу Твоему́ Спа́се, рыда́ху: А́нгел же к ни́м рече́, глаго́ля: что́ с ме́ртвыми Жива́го помышля́ете? я́ко Бо́г бо воскре́се от Гро́ба.

Сла́ва, Тро́ичен:

Поклони́мся Отцу́, и Его́ Сы́нови, и Свято́му Ду́ху, Святе́й Тро́ице во Еди́ном Существе́, с Серафи́мы зову́ще: Свя́т, Свя́т еси́ Го́споди.

И ны́не, Богоро́дичен:

Жизнода́вца ро́ждши, греха́, Де́во, Ада́ма изба́вила еси́, ра́дость же Е́ве в печа́ли ме́сто подала́ еси́. Па́дшыя же от жи́зни к се́й напра́ви, из Тебе́ воплоти́выйся Бо́г и Челове́к.

Аллилу́иа, аллилу́иа, аллилу́иа, сла́ва Тебе́ Бо́же. Три́жды.

А́ще пра́здник Влады́чний, или́ пра́зднуемаго свята́го, пое́м степе́нну 4-го гла́са:

От ю́ности моея́ мно́зи бо́рют мя́ стра́сти: но са́м мя́ заступи́, и спаси́ Спа́се мо́й.

Ненави́дящии сио́на, посрами́теся от Го́спода: я́ко трава́ бо огне́м бу́дете изсо́хше.

Сла́ва: Святы́м Ду́хом вся́ка душа́ живи́тся, и чистото́ю возвыша́ется, светле́ется Тро́ическим Еди́нством Священнота́йне.

И ны́не, то́йже.

Проки́мны воскре́сны

Проки́мен, гла́с 1:

Ны́не воскресну́, глаго́лет Госпо́дь, положу́ся во спасе́ние, не обиню́ся о не́м. Сти́х: Словеса́ Госпо́дня, словеса́ чи́ста.

Проки́мен, гла́с 2:

Воста́ни Го́споди Бо́же мо́й повеле́нием, и́мже запове́дал еси́, и со́нм люде́й обы́дет Тя́. Сти́х: Го́споди Бо́же мо́й, на Тя́ упова́х, спаси́ мя.

Проки́мен, гла́с 3:

Рцы́те во язы́цех, я́ко Госпо́дь воцари́ся: и́бо испра́ви вселе́нную, я́же не подви́жится. Сти́х: Воспо́йте Го́сподеви пе́снь но́ву.

Проки́мен, гла́с 4:

Воскресни́ Го́споди, помози́ на́м, и изба́ви на́с и́мене Твоего́ ра́ди. Сти́х: Бо́же, уши́ма на́шима услы́шахом.

Проки́мен, гла́с 5:

Воскресни́ Го́споди Бо́же мо́й, да вознесе́тся рука́ Твоя́, я́ко ты́ Ца́рствуеши во ве́ки. Сти́х: Испове́мся Тебе́ Го́споди, все́м се́рдцем мои́м.

Проки́мен, гла́с 6:

Го́споди, воздви́гни си́лу Твою́, и прииди́ во е́же спасти́ на́с. Сти́х: Пасы́й Изра́иля вонми́, наставля́яй я́ко овча́ Ио́сифа.

Проки́мен, гла́с 7:

Воскресни́ Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Сти́х: Испове́мся Тебе́, Го́споди, все́м се́рдцем мои́м.

Проки́мен, гла́с 8:

Воцари́тся Госпо́дь во ве́к, Бо́г тво́й, Сио́не, в ро́д и ро́д. Сти́х: Хвали́ душе́ моя́ Го́спода, восхвалю́ Го́спода в животе́ мое́м.

Воскресение Христово видевше

По Ева́нглии, а́ще е́сть неде́ля, глаго́лем се́й тропа́рь:

Воскре́сние Христо́во ви́девше, поклони́мся Свято́му Го́споду Иису́су, Еди́ному Безгре́шному, Кресту́ Твоему́ покланя́емся, Христе́, и свято́е Воскре́сние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не зна́ем, И́мя Твое́ имену́ем. Прииди́те вси́ ве́рнии, поклони́мся свято́му Христо́ву Воскре́снию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м воскре́сние Его́: распя́тие бо претерпе́в, сме́ртию сме́рть разруши́.

По 50-м псалме́

Сла́ва: Моли́твами апо́столов, Ми́лостиве, очи́сти мно́жества согреше́ний на́ших.

И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших.

Та́же, гла́с 6:

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х, очи́сти беззако́ние мое́.

Та́же: Воскре́с Иису́с от Гро́ба, я́коже прорече́, даде́ на́м живо́т ве́чный, и ве́лию ми́лость.

А́ще ли неде́ля мытаря́, или́ блу́днаго, или́ мясопу́стная, и сыропу́стная, и в про́чыя неде́ли Вели́каго поста́, вме́сто, Моли́твами апо́стол:

Гла́с 8:

Сла́ва, Покая́ния отве́рзи ми́ две́ри Жизнода́вче: у́тренюет бо ду́х мо́й ко хра́му свято́му Твоему́, хра́м нося́й теле́сный ве́сь оскверне́н: но я́ко Ще́др очи́сти благоутро́бною Твое́ю ми́лостию.

И ны́не, Богоро́дичен:

На спасе́ния стези́ наста́ви мя́, Богоро́дице, сту́дными бо окаля́х ду́шу грехми́, и в ле́ности все́ житие́ мое́ ижди́х: но Твои́ми моли́твами изба́ви мя́ от вся́кия нечистоты́.

Та́же, гла́с 6:

Поми́луй мя́ Бо́же, по вели́цей ми́лости Твое́й, и по мно́жеству щедро́т Твои́х, очи́сти беззако́ние мое́.

Посе́м: Мно́жества соде́янных мно́ю лю́тых, помышля́я окая́нный, трепе́щу стра́шнаго дне́ су́днаго: но наде́яся на ми́лость благоутро́бия Твоего́, я́ко Дави́д вопию́ Ти́: поми́луй мя́, Бо́же, по вели́цей Твое́й ми́лости.

На введе́ние пресвяты́я Богоро́дицы, вме́сто, Моли́твами Богоро́дицы:

Гла́с 2:

Сла́ва: Дне́сь хра́м одушевле́нный, и вели́каго Царя́, в хра́м вхо́дит Тому́ угото́ватися в Боже́ственное жили́ще: лю́дие весели́теся.

И ны́не, то́йже.

На Рождество́ Христо́во.

Гла́с 2:

Сла́ва: Вся́ческая дне́сь ра́дости исполня́ются, Христо́с роди́ся от Де́вы.

И ны́не: Вся́ческая дне́сь ра́дости исполня́ются, Христо́с роди́ся в Вифлее́ме.

На Богоявле́ние.

Гла́с 2:

Сла́ва: Вся́ческая дне́сь да возра́дуются Христу́ я́вльшуся во Иорда́не.

И ны́не, то́йже.

В неде́лю Ва́ий.

Гла́с 2:

Сла́ва: Дне́сь Христо́с вхо́дит во гра́д Вифа́нию, на жребя́ти седя́й, безслове́сие разреша́я язы́к зле́йшее, дре́вле свире́пеющее.

И ны́не, па́ки то́йже.

На Преображе́ние Госпо́дне.

Сла́ва: Вся́ческая дне́сь ра́дости испо́лнишася, Христо́с преобрази́ся пред ученики́.

И ны́не, то́йже.

По кано́не, а́ще е́сть неде́ля:

Свя́т Госпо́дь: и у́тренний ексапостила́рий.

А́ще же е́сть четыредеся́тница, глаго́лем свети́льны в прилучи́вшийся гла́с. И а́бие хвали́тны.

А́ще у́бо е́сть неде́ля, или́ Влады́чний пра́здник или́ святы́й име́яй вели́кое славосло́вие, пое́тся си́це Вся́кое дыха́ние в прилучи́вшийся гла́с.

Вся́кое дыха́ние да хва́лит Го́спода.

Хвали́те Го́спода с небе́с, хвали́те Его́ в вы́шних.

Тебе́ подоба́ет пе́снь Бо́гу.

А́ще же ины́й де́нь, си́це:

Пе́рвый ли́к: Хвали́те Го́спода с Небе́с. Тебе́ подоба́ет пе́снь Бо́гу.

Па́ки пе́рвый ли́к: Хвали́те Го́спода с Небе́с, хвали́те Его́ в Вы́шних. Тебе́ подоба́ет пе́снь Бо́гу.

Вторы́й ли́к: Хвали́те Его́ вси́ А́нгели Его́, хвали́те Его́ вся́ Си́лы Его́. Тебе́ подоба́ет пе́снь Бо́гу.

Стихи: Хвали́те Его́ со́лнце и луна́, хвали́те Его́ вся́ зве́зды и све́т.

Хвали́те Его́ небеса́ небе́с, и вода́, я́же превы́ше небе́с, да восхва́лят и́мя Госпо́дне.

Я́ко То́й рече́, и бы́ша: То́й повеле́, и созда́шася.

Поста́ви я́ в ве́к, и в ве́к ве́ка: повеле́ние положи́, и не ми́мо и́дет.

Хвали́те Го́спода от земли́ зми́еве, и вся́ бе́здны:

О́гнь, гра́д, сне́г, го́лоть, ду́х бу́рен, творя́щая сло́во Его́.

Го́ры и вси́ хо́лми, древа́ плодоно́сна и вси́ ке́дри.

Зве́рие и вси́ ско́ти, га́ди и пти́цы перна́ты.

Ца́рие зе́мстии и вси́ лю́дие, кня́зи и вси́ судии́ зе́мстии,

Ю́ноши и де́вы, ста́рцы с ю́нотами, да восхва́лят и́мя Госпо́дне, я́ко вознесе́ся и́мя Того́ Еди́наго.

Испове́дание Его́ на земли́ и на небеси́, и вознесе́т ро́г люде́й Свои́х.

Пе́снь все́м преподо́бным Его́, сыново́м Изра́илевым, лю́дем, приближа́ющымся Ему́.

Воспо́йте Го́сподеви пе́снь но́ву, хвале́ние в Це́ркви преподо́бных.

Да возвесели́тся Изра́иль о сотво́ршем его́, и сы́нове Сио́ни возра́дуются о Царе́ свое́м.

Да восхва́лят и́мя Его́ в ли́це, в тимпа́не и псалти́ри пою́т Ему́.

Я́ко благоволи́т Госпо́дь в лю́дех свои́х, и вознесе́т кро́ткия во спасе́ние.

Восхва́лятся преподо́бнии во сла́ве, и возра́дуются на ло́жах свои́х.

Возноше́ния Бо́жия в горта́ни и́х, и мечи́ обою́ду остры́ в рука́х и́х:

Сотвори́ти отмще́ние во язы́цех, обличе́ния в лю́дех.

Связа́ти цари́ и́х пу́ты, и сла́вныя и́х ручны́ми око́вы желе́зными.

От зде́ начина́ем стихи́ры на 6:

1: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

2: Хвали́те Бо́га во святы́х Его́, хвали́те Его́ во утверже́нии си́лы Его́.

На 4:

3: Хвали́те Его́ на си́лах Его́, хвали́те Его́ по мно́жеству вели́чествия Его́.

4: Хвали́те Его́ во гла́се тру́бнем, хвали́те Его́ во псалти́ри и гу́слех.

5: Хвали́те Его́ в тимпа́не и ли́це, хвали́те Его́ во стру́нах и орга́не.

6: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

А́ще е́сть неде́ля, по стихи́рах:

Сла́ва, стихи́ра Ева́нгльская.

И ны́не, настоя́щий Богоро́дичен:

Преблагослове́нна еси́ Богоро́дице Де́во, вопло́щьшим бо ся из тебе́ а́д плени́ся, Ада́м воззва́ся, кля́тва потреби́ся, Е́ва свободи́ся, сме́рть умертви́ся, и мы́ ожи́хом. Те́м воспева́юще вопие́м: благослове́н Христо́с Бо́г благоволи́вый та́ко, сла́ва Тебе́.

Сла́ва Тебе́ показа́вшему на́м све́т.

Сла́ва в Вы́шних Бо́гу, и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няем Ти ся, славосло́вим Тя́, благодари́м Тя́, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю. Го́споди Сы́не Единоро́дный Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй гре́х ми́ра, поми́луй на́с. Взе́мляй грехи́ ми́ра приими́ моли́тву на́шу. Седя́й одесну́ю Отца́ поми́луй на́с. Я́ко ты́ еси́ Еди́н Свя́т, Ты́ еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.

На вся́к де́нь благословлю́ Тя, и восхвалю́ и́мя Твое́ во ве́ки, и в ве́к ве́ка.

Сподо́би Го́споди в де́нь се́й без греха́ сохрани́тися на́м. Благослове́н еси́ Го́споди Бо́же оте́ц на́ших, и хва́льно, и просла́влено и́мя Твое́ во ве́ки, ами́нь. Бу́ди Го́споди ми́лость Твоя́ на на́с, я́коже упова́хом на Тя́.

Благослове́н еси́ Го́споди, научи́ мя оправда́нием Твои́м. Три́жды.

Го́споди, прибе́жище бы́л еси́ на́м в ро́д и ро́д. А́з ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты́ еси́ Бо́г мо́й: я́ко у тебе́ исто́чник живота́, во све́те Твое́м у́зрим све́т. Проба́ви ми́лость Твою́ ве́дущым тя́.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Три́жды.

Сла́ва и ны́не:

Святы́й Безсме́ртный, поми́луй на́с.

Та́же вы́шшим гла́сом:

Святы́й Бо́же, Святы́й Кре́пкий, Святы́й Безсме́ртный, поми́луй на́с.

Тропари́, пое́мии по непоро́чнах в суббо́ту, гла́с 5

Благослове́н еси́ Го́споди, научи́ мя оправда́нием Твои́м.

Святы́х ли́к обре́те исто́чник жи́зни, и две́рь ра́йскую, да обря́щу и а́з пу́ть покая́нием: поги́бшее овча́ а́з е́смь, воззови́ мя, Спа́се, и спаси́ мя.

Благослове́н еси́ Го́споди, научи́ мя оправда́нием Твои́м.

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и и присносу́щней преста́вльшеся, Того́ приле́жно му́ченицы моли́те, долго́в разреше́ние на́м дарова́ти.

Благослове́н еси́ Го́споди, научи́ мя оправда́нием Твои́м.

В пу́ть у́зкий хо́ждшии приско́рбный вси́ в житии́ кре́ст я́ко яре́м взе́мшии, и Мне́ после́довавшии ве́рою, прииди́те наслади́теся, и́хже угото́вах ва́м по́честей и венцо́в небе́сных.

Благослове́н еси́ Го́споди, научи́ мя оправда́нием твои́м.

О́браз е́смь неизрече́нныя твоея́ сла́вы, а́ще и я́звы ношу́ прегреше́ний: уще́дри Твое́ созда́ние Влады́ко, и очи́сти твои́м благоутро́бием, и возжеле́нное оте́чество пода́ждь ми́, рая́ па́ки жи́теля мя́ сотворя́я.

Благослове́н еси́ Го́споди, научи́ мя оправда́нием твои́м.

Дре́вле у́бо от несу́щих созда́вый мя́, и о́бразом твои́м Боже́ственным почты́й, преступле́нием же за́поведи па́ки мя́ возврати́вый в зе́млю, от нея́же взя́т бы́х, на е́же по подо́бию возведи́, дре́внею добро́тою возобрази́тися.

Благослове́н еси́ Го́споди, научи́ мя оправда́нием твои́м.

Упоко́й Бо́же рабы́ твоя́, и учини́ я́ в раи́, иде́же ли́цы святы́х Го́споди, и пра́ведницы сия́ют я́ко свети́ла, усо́пшыя рабы́ Твоя́ упоко́й, презира́я и́х вся́ согреше́ния.

Сла́ва: Трисия́тельное Еди́наго Божества́ благоле́пно пое́м вопию́ще: Свя́т еси́ О́тче Безнача́льный, Собезнача́льный Сы́не и Боже́ственый Ду́ше, просвети́ на́с ве́рою Тебе́ служа́щих, и ве́чнаго огня́ исхити́.

И ны́не: Ра́дуйся Чи́стая, Бо́га пло́тию ро́ждшая во спасе́ние все́х, Е́юже ро́д челове́ческий обре́те спасе́ние, Тобо́ю да обря́щем ра́й Богоро́дице Чи́стая, Благослове́нная.

Аллилу́иа, три́жды.

Кано́н во Святу́ю Неде́лю Па́схи, и во всю́ Све́тлую седми́цу

Тропа́рь: Христо́с воскре́се из ме́ртвых, сме́ртию сме́рть попра́в, и су́щым во гробе́х живо́т дарова́в.

И про́чее по уста́ву.

И начина́ет предстоя́тель кано́н, творе́ние господи́на Иоа́нна Дамаски́на. Ирмосы́ на 4, и тропари́ на 12. И па́ки последи́ ки́йждо ли́к пое́т ирмо́с. Последи́ же на схо́де, катава́сиа, ирмо́с то́йже: Воскре́сния де́нь: И по не́м: Христо́с воскре́се: весь три́жды.

В про́чыя же дни́ по уста́ву.

Кано́н. Гла́с 1. Пе́снь 1.

Ирмо́с: Воскре́сния де́нь, просвети́мся лю́дие, Па́сха Госпо́дня Па́сха: от сме́рти бо к жи́зни, и от земли́ к Небеси́, Христо́с Бо́г на́с преведе́, побе́дную пою́щыя.

Припе́в: Христо́с воскре́се из ме́ртвых:

Очи́стим чу́вствия, и у́зрим непристу́пным све́том воскре́сния Христа́ блиста́ющася, и ра́дуйтеся реку́ща, я́сно да услы́шим, побе́дную пою́ще.

Небеса́ у́бо досто́йно да веселя́тся, земля́ же да ра́дуется, да пра́зднует же ми́р, ви́димый же ве́сь и неви́димый: Христо́с бо воста́, весе́лие ве́чное.

И́ный кано́н Богоро́дичен, подо́бен. Творе́ние господи́на Феофа́на, и господи́на Ио́сифа, его́же краестро́чие на пе́рвых тропаре́х: Феофа́нус. Гла́с то́йже. Глаго́лется же се́й кроме́ пе́рваго дне́.

Феофа́н: Умерщвле́ния преде́л сломи́ла еси́, ве́чную Жи́знь ро́ждшая Христа́, из Гро́ба возсия́вшаго дне́сь, Де́во Всенепоро́чная и ми́р просвети́вшаго.

Ио́сиф: Воскре́сшаго ви́девши Сы́на Твоего́ и Бо́га, ра́дуйся со апо́столы Богоблагода́тная Чи́стая, и е́же ра́дуйся пе́рвее, я́ко все́х ра́дости вина́ восприя́ла еси́, Богома́ти всенепоро́чная.

На вся́кую же пе́снь по тропаре́ быва́ет ектениа́ ма́лая в 1-й де́нь.

Пе́снь тре́тия

Ирмо́с: Прииди́те пи́во пие́м но́вое, не от ка́мене непло́дна чудоде́емое, но нетле́ния исто́чник из гро́ба одожди́вша Христа́, в Не́мже утвержда́емся.

Ны́не вся́ испо́лнишася све́та, не́бо же и земля́ и преиспо́дняя: да пра́зднует у́бо вся́ тва́рь воста́ние Христо́во, в не́мже утвержда́ется.

Вчера́ спогребо́хся Тебе́ Христе́, совостаю́ дне́сь воскре́сшу Тебе́, сраспина́хся Тебе́ вчера́, са́м мя́ спросла́ви Спа́се во Ца́рствии Твое́м.

Феофа́н: На нетле́нную жи́знь прихожду́ дне́сь, бла́гостию Ро́ждшагося из Тебе́ чи́стая, и все́м конце́м Све́т облиста́вшаго.

Ио́сиф: Бо́га, Его́же родила́ еси́ пло́тию, из ме́ртвых, я́коже рече́, воста́вша ви́девши Чи́стая, лику́й: и Сего́ я́ко Бо́га Пречи́стая возвелича́й.

Ектениа́

Ипакои́, гла́с 4:

Предвари́вшая у́тро я́же о Мари́и, и обре́тшыя ка́мень отвале́н от гро́ба, слы́шаху от А́нгела во Све́те Присносу́щнем су́щаго, с ме́ртвыми что́ и́щете я́ко челове́ка? Ви́дите гро́бныя пелены́, тецы́те и ми́ру пропове́дите, я́ко воста́ Госпо́дь, умертви́вый сме́рть: я́ко е́сть Сы́н Бо́га, спаса́ющаго ро́д челове́ческий.

Пе́снь четве́ртая.

Ирмо́с: На Боже́ственней стра́жи, богоглаго́ливый Авваку́м да ста́нет с на́ми, и пока́жет светоно́сна А́нгела, я́сно глаго́люща: дне́сь спасе́ние ми́ру, я́ко воскре́се Христо́с, я́ко всеси́лен.

Му́жеский у́бо по́л, я́ко разве́рзый Де́вственную утро́бу, яви́ся Христо́с я́ко Челове́к же А́гнец нарече́ся. Непоро́чен же, я́ко невку́сен скве́рны, на́ша Па́сха, и я́ко Бо́г и́стинен, соверше́н рече́ся.

Я́ко Единоле́тный А́гнец, благослове́нный на́м вене́ц Христо́с, во́лею за все́х закла́н бы́сть, Па́сха чисти́тельная, и па́ки из Гро́ба кра́сное пра́вды на́м возсия́ Со́лнце.

Богооте́ц у́бо Дави́д, пред се́нным ковче́гом скака́ше игра́я: лю́дие же Бо́жии святи́и о́бразов сбытие́ зря́ще, весели́мся Боже́ственне, я́ко воскре́се Христо́с, я́ко всеси́лен.

Феофа́н: Созда́вый Ада́ма твоего́ пра́отца Чи́стая, зи́ждется от Тебе́, и сме́ртное жили́ще разори́ свое́ю сме́ртию дне́сь, и озари́ вся́ Боже́ственными блиста́ньми воскре́сния.

Ио́сиф: Его́же родила́ еси́ Христа́, прекра́сно из ме́ртвых возсия́вша Чи́стая зря́щи, до́брая и непоро́чная в жена́х и кра́сная, дне́сь во спасе́ние все́х со апо́столы ра́дующися, Того́ прославля́й.

Пе́снь пя́тая.

Ирмо́с: У́тренюем у́треннюю глубоку́ и вме́сто ми́ра пе́снь принесе́м Влады́це, и Христа́ у́зрим Пра́вды Со́лнце, все́м Жи́знь возсия́юща.

Безме́рное Твое́ благоутро́бие, а́довыми у́зами содержи́мии зря́ще, к све́ту идя́ху, Христе́, весе́лыми нога́ми, Па́сху хва́ляще ве́чную.

Присту́пим свещено́снии, исходя́щу Христу́ из гро́ба я́ко Жениху́, и спра́зднуим любопра́зднственными чи́нми Па́сху Бо́жию спаси́тельную.

Феофа́н: Просвеща́ется Боже́ственными луча́ми и живоно́сными воскре́сния Сы́на Твоего́, Богома́ти Пречи́стая, и ра́дости исполня́ется благочести́вых собра́ние.

Ио́сиф: Не разве́рзл еси́ врата́ Де́вства в воплоще́нии, гро́ба не разруши́л еси́ печа́тей Царю́ созда́ния, отону́дуже воскре́сшаго Тя́ зря́щи Ма́ти ра́довашеся.

Пе́снь шеста́я

Ирмо́с: Снизше́л еси́ в преиспо́дняя земли́, и сокруши́л еси́ вереи́ ве́чныя, содержа́щыя свя́занныя, Христе́, и тридне́вен я́ко от ки́та Ио́на, воскре́сл еси́ от Гро́ба.

Сохрани́в це́ла зна́мения, Христе́, воскре́сл еси́ от Гро́ба, ключи́ Де́вы не вреди́вый в Рождестве́ твое́м, и отве́рзл еси́ на́м ра́йския две́ри.

Спа́се мо́й, живо́е же и неже́ртвенное заколе́ние, я́ко Бо́г Са́м Себе́ во́лею приве́д Отцу́, совоскреси́л еси́ всеро́днаго Ада́ма, воскре́с от Гро́ба.

Феофа́н: Возведе́ся дре́вле держи́мое сме́ртию и тле́нием, воплоти́вшимся от Твоего́ пречи́стаго чре́ва, к нетле́нней и присносу́щней жи́зни Богоро́дице Де́во.

Ио́сиф: Сни́де в преиспо́дняя земли́ в ложесна́ Твоя́, Чи́стая, Сше́дый, и Всели́выйся и Воплоти́выйся па́че ума́, и воздви́же с собо́ю Ада́ма, воскре́с от Гро́ба.

Ектениа́

Конда́к, гла́с 8:

А́ще и во Гро́б снизше́л еси́, безсме́ртне, но а́дову разруши́л еси́ си́лу, и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом ми́р да́руяй, па́дшым подая́й воскре́сние.

И́кос: Е́же пре́жде со́лнца Со́лнце заше́дшее иногда́ во гро́б, предвари́ша ко у́тру, и́щущыя я́ко дне́ мироно́сицы де́вы, и друга́ ко друзе́й вопия́ху: о други́ни! Прииди́те, воня́ми пома́жем те́ло живоно́сное и погребе́ное, пло́ть воскреси́вшаго па́дшаго Ада́ма лежа́щую во Гро́бе: и́дем, потщи́мся я́коже волсви́, и поклони́мся, и принесе́м ми́ра я́ко да́ры, не в пелена́х, но в плащани́це обви́тому, и пла́чим, и возопии́м: о, Влады́ко воста́ни, па́дшым подая́й воскре́сние.

Та́же чте́ние.

Посе́м: Воскре́сние Христо́во: три́жды.

Воскре́с Иису́с от Гро́ба, я́коже прорече́, даде́ на́м живо́т ве́чный, и ве́лию ми́лость. Три́жды.

Пе́снь седма́я.

Ирмо́с: О́троки от пе́щи изба́вивый, бы́в Челове́к, стра́ждет я́ко сме́ртен, и стра́стию сме́ртное в нетле́ния облачи́т благоле́пие, Еди́н благослове́н отце́в Бо́г и препросла́влен.

Жены́ с ми́ры богому́дрыя в сле́д Тебе́ теча́ху: Его́же я́ко ме́ртва со слеза́ми иска́ху, поклони́шася ра́дующыяся Живо́му Бо́гу, и Па́сху та́йную Твои́м, Христе́ ученико́м благовести́ша.

Сме́рти пра́зднуем умерщвле́ние, а́дово разруше́ние, ино́го жития́ ве́чнаго нача́ло, и игра́юще пое́м Вино́внаго, Еди́наго Благослове́ннаго, отце́в Бо́га, и Препросла́вленнаго.

Я́ко вои́стинну свяще́нная и всепра́зднственная сия́ спаси́тельная но́щь, и светоза́рная, светоно́снаго Дне́, воста́ния су́щи провозве́стница, в не́йже Безле́тный Све́т из Гро́ба пло́тски все́м возсия́.

Феофа́н: Умертви́в Сы́н Тво́й сме́рть, Всенепоро́чная, дне́сь, все́м сме́ртным пребыва́ющий живо́т во ве́ки веко́в дарова́, Еди́н Благослове́нный отце́в Бо́г и препросла́вленный.

Ио́сиф: Все́м Ца́рствуяй созда́нием, бы́в челове́к, всели́ся в твою́ Богоблагода́тная утро́бу, и распя́тие претерпе́в и сме́рть, воскре́се боголе́пно, совозста́вив на́с я́ко всеси́лен.

Пе́снь осма́я

Ирмо́с: Се́й нарече́нный и святы́й де́нь, еди́н суббо́т Ца́рь и Госпо́дь, пра́здников пра́здник, и торжество́ е́сть торже́ств: во́ньже благослови́м Христа́ во ве́ки.

Прииди́те но́ваго виногра́да рожде́ния, Боже́ственнаго весе́лия, в наро́читом дни́ воскресе́ния, Ца́рствия Христо́ва приобщи́мся, пою́ще Его́ я́ко Бо́га во ве́ки.

Возведи́ о́крест о́чи твои́, Сио́не, и ви́ждь: се́ бо приидо́ша к тебе́, я́ко Богосве́тлая свети́ла, от за́пада и се́вера и мо́ря и восто́ка ча́да Твоя́, в тебе́ благословя́щая Христа́ во ве́ки.

Тро́ичен: О́тче Вседержи́телю, и Сло́ве и Ду́ше, треми́ соединя́емое во Ипоста́сех естество́ Пресу́щественне, и Пребоже́ственне, в Тя́ крести́хомся и Тя́ благослови́м во вся́ ве́ки.

Феофа́н: Прии́де Тобо́ю в ми́р Госпо́дь Де́во Богоро́дице, и чре́во а́дово расто́рг, сме́ртным на́м воскре́сние дарова́. Те́мже благослови́м Его́ во ве́ки.

Ио́сиф: Всю́ низложи́в сме́рти держа́ву Сы́н Тво́й, Де́во, свои́м воскре́снием, я́ко Бо́г кре́пкий совознесе́ на́с, и обожи́. Те́мже воспева́ем Его́ во ве́ки.

Припе́вы на 9-й пе́сни:

Вели́чит душа́ моя́ воскре́сшаго тридне́вно от Гро́ба Христа́ Жизнода́вца.

И ирмо́с: Свети́ся, свети́ся:

И вторы́й ли́к пое́т то́йже припе́в, и ирмо́с: Та́же пе́рвый ли́к пое́т вторы́й припе́в.

Вели́чит душа́ моя́ во́лею страда́вша, и погребе́на, и воскре́сшаго тридне́вно от Гро́ба.

И ирмо́с: Свети́ся:

И вторы́й ли́к пое́т то́йже припе́в и ирмо́с. Та́же пе́рвый ли́к пое́т тре́тий припе́в:

Христо́с но́вая Па́сха, Же́ртва жива́я, А́гнец Бо́жий, взе́мляй грехи́ ми́ра.

И сти́х.

И вторы́й ли́к пое́т то́йже припе́в и сти́х. Та́же пе́рвый ли́к пое́т четве́ртый припе́в:

А́нгел вопия́ше благода́тней: чи́стая Де́во ра́дуйся, и па́ки реку́, ра́дуйся, тво́й Сы́н воскре́се, тридне́вен от Гро́ба, и ме́ртвыя воздви́гнувый, лю́дие весели́теся.

И сти́х:

И вторы́й ли́к пое́т то́йже припе́в, и сти́х. И про́чих о́смь припе́вов припева́ют по еди́ножды, ко стихо́м:

Возбуди́л еси́, усну́в, ме́ртвыя от ве́ка, ца́рски рыка́вый, я́ко от Иу́ды ле́в.

Магдали́на Мари́а притече́ ко Гро́бу, и Христа́ ви́девши, я́ко вертогра́даря вопроша́ше.

А́нгел облиста́яй жена́м вопия́ше: преста́ните от сле́з, я́ко Христо́с воскре́се.

Христо́с воскре́се, сме́рть попра́вый, и ме́ртвыя воздви́гнувый, лю́дие весели́теся.

Дне́сь вся́ка тва́рь весели́тся и ра́дуется: я́ко Христо́с воскре́се и а́д плени́ся.

Дне́сь Влады́ка плени́ а́да, воздви́гнувый ю́зники, я́же от ве́ка имя́ше, лю́те одержи́мыя.

Вели́чит душа́ моя́ Триипоста́снаго, и Неразде́льнаго Божества́ держа́ву.

Ра́дуйся Де́во, ра́дуйся, ра́дуйся Благослове́нная, ра́дуйся Препросла́вленная: Тво́й бо Сы́н воскре́се, тридне́вен от Гро́ба.

Последи́ же пе́рвый ли́к пое́т па́ки пе́рвый припе́в и ирмо́с. Посе́м вторы́й ли́к пое́т вторы́й припе́в и ирмо́с. Та́же о́ба ли́ка соше́дшеся вку́пе, пою́т ирмо́с и тропа́рь:

Христо́с воскре́се: три́жды.

Пе́снь девя́тая

Ирмо́с: Свети́ся свети́ся Но́вый Иерусали́ме, сла́ва бо Госпо́дня на тебе́ возсия́, лику́й ны́не, и весели́ся Сио́не: ты́ же Чи́стая красу́йся Богоро́дице, о воста́нии Рождества́ Твоего́.

О Боже́ственнаго, о любе́знаго, о сладча́йшаго Твоего́ гла́са! С на́ми бо нело́жно обеща́лся еси́ бы́ти до сконча́ния ве́ка, Христе́: Его́же ве́рнии утвержде́ние наде́жди иму́ще, ра́дуемся.

О Па́сха ве́лия, и свяще́ннейшая Христе́! О му́дросте, и сло́ве Бо́жий, и Си́ло! Подава́й на́м и́стее Тебе́ причаща́тися, в невече́рнем дни́ Ца́рствия Твоего́.

Феофа́н: Согла́сно Де́во Тебе́ блажи́м ве́рнии: ра́дуйся две́ре Госпо́дня, ра́дуйся гра́де одушевле́нный: ра́дуйся, Ея́же ра́ди на́м ны́не возсия́ Све́т, из Тебе́ рожде́ннаго из ме́ртвых Воскре́сния.

Ио́сиф: Весели́ся и ра́дуйся Боже́ственная две́ре Све́та: заше́дый бо Иису́с во гро́б, возсия́ просия́в со́лнца светле́е, и ве́рныя вся́ озари́в, Богора́дованная Влады́чице.

Ексапостила́рий. Самогла́сен:

Пло́тию усну́в я́ко ме́ртв, Царю́ и Го́споди, тридне́вен воскре́сл еси́, Ада́ма воздви́гл от тли́, и упраздни́в сме́рть, Па́сха нетле́ния ми́ра спасе́ние. Три́жды.

И по стихи́рах хвали́тных воскре́сных пое́м стихи́ры па́схи, гла́с 5.

Сти́х: Да воскре́снет Бо́г, и расточа́тся врази́ Его́.

Па́сха свяще́нная на́м дне́сь показа́ся, Па́сха но́ва свята́я, Па́сха та́инственная, Па́сха всечестна́я, Па́сха Христо́с Изба́витель: Па́сха непоро́чная, Па́сха вели́кая, Па́сха ве́рных: Па́сха две́ри ра́йския на́м отверза́ющая: Па́сха все́х освяща́ющая ве́рных.

Сти́х: Я́ко исчеза́ет ды́м, да исче́знут.

Прииди́те от виде́ния жены́ благове́стницы, и Сио́ну рцы́те: приими́ от на́с ра́дости благове́щения, Воскре́сния Христо́ва: красу́йся, лику́й, и ра́дуйся Иерусали́ме, Царя́ Христа́ узре́в из Гро́ба, я́ко Жениха́ происходя́ща.

Сти́х: Та́ко да поги́бнут гре́шницы от лица́ Бо́жия, а пра́ведницы да возвеселя́тся.

Мироно́сицы жены́, у́тру глубоку́, предста́вшя Гро́бу Живода́вца, обрето́ша А́нгела на ка́мени седя́ща, и то́й провеща́в и́м, си́це глаго́лаше: что́ и́щете Жива́го с ме́ртвыми? что́ пла́чете Нетле́ннаго во тли́? ше́дше пропове́дите ученико́м Его́.

Сти́х: Се́й де́нь, его́же сотвори́ Госпо́дь, возра́дуемся и возвесели́мся во́нь.

Па́сха кра́сная, Па́сха, Госпо́дня Па́сха, Па́сха всечестна́я на́м возсия́: Па́сха, ра́достию дру́г дру́га обымем. О Па́сха, избавле́ние ско́рби! И́бо из гро́ба дне́сь, я́ко от черто́га возсия́в Христо́с, жены́ ра́дости испо́лни, глаго́ля: пропове́дите апо́столом.

Сла́ва, и ны́не:

Воскре́сния де́нь, и просвети́мся торжество́м, и дру́г дру́га обымем. Рце́м, бра́тие! И ненави́дящым на́с, прости́м вся́ Воскре́снием, и та́ко возопии́м: Христо́с воскре́се из ме́ртвых, сме́ртию сме́рть попра́в и су́щым во гробе́х живо́т дарова́в.

Та́же: Христо́с воскре́се: три́жды.

И пое́м, до́ндеже бра́тия целу́ют дру́г дру́га.

Пото́м чте́тся сло́во огласи́тельное свята́го Иоа́нна Златоу́стаго.

Та́же тропа́рь, гла́с 8:

У́ст твои́х я́коже све́тлость огня́: возсиявши, благодать,/ вселенную просвети;/ не сребролюбия мирови сокровища сниска,/ высоту им смиренномудрия показа,/ но твоими словесы наказуя, отче Иоанне Златоусте,/ моли Слова Христа Бога спаситися дущам нашим.

Посе́м ектениа́, и возгла́с, и про́чее.

Та́же: утверди́, Бо́же:

И вме́сто, Сла́ва тебе́ Христе́ Бо́же, пое́т иере́й:

Христо́с воскре́се:

Мы́ же: И су́щым во гробе́х живо́т дарова́в.

И а́бие отпу́ст.

Та́же Кре́ст возвыша́я, глаго́лет:

Христо́с воскре́се. Три́жды.

И мы́ отвеща́ем: Вои́стинну воскре́се: три́жды.

Та́же пое́м: Христо́с воскре́се: три́жды, ве́сь тропа́рь.

И пое́м: И на́м дарова́ живо́т ве́чный, покланя́емся Его́ тридне́вному Воскре́снию.

Часы по Святую Неделю Пасхи

И ча́с пе́рвый.

Пое́тся же си́це:

Христо́с воскре́се: три́жды.

Воскре́сние Христо́во ви́девше, поклони́мся свято́му Го́споду Иису́су, Еди́ному Безгре́шному. Кресту́ Твоему́ покланя́емся, Христе́, и свято́е Воскре́сние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не зна́ем, И́мя твое́ имену́ем. Прииди́те вси́ ве́рнии, поклони́мся свято́му Христо́ву Воскре́снию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскре́сние Его́: распя́тие бо претерпе́в, сме́ртию сме́рть разруши́. Три́жды.

Предвари́вшыя у́тро я́же о Мари́и, и обре́тшыя ка́мень отвале́н от Гро́ба, слы́шаху от А́нгела: во Све́те Присносу́щнем Су́щаго, с ме́ртвыми что́ и́щете я́ко челове́ка: ви́дите гро́бныя пелены́: тецы́те и ми́ру пропове́дите, я́ко воста́ Госпо́дь, умертви́вый сме́рть, я́ко е́сть Сы́н Бо́га, спаса́ющаго ро́д челове́ческий. Еди́ножды.

А́ще и во Гро́б снизше́л еси́ Безсме́ртне, но а́дову разруши́л еси́ си́лу, и воскре́сл еси́ я́ко Победи́тель, Христе́ Бо́же, жена́м мироно́сицам веща́вый: ра́дуйтеся, и Твои́м апо́столом ми́р да́руяй, па́дшым подая́й воскре́сние.

Во гро́бе пло́тски, во а́де же с душе́ю я́ко Бо́г, в раи́ же с разбо́йником, и на Престо́ле бы́л еси́, Христе́, со Отце́м и Ду́хом, вся́ исполня́яй неопи́санный.

Сла́ва: Я́ко живоно́сец, я́ко рая́ красне́йший, вои́стинну и черто́га вся́каго Ца́рскаго показа́ся светле́йший, Христе́, Гро́б Тво́й, исто́чник на́шего воскре́сния.

И ны́не: Вы́шняго освяще́нное Боже́ственное селе́ние ра́дуйся, Тобо́ю бо даде́ся ра́дость Богоро́дице, зову́щым: благослове́нна Ты́ в жена́х еси́ Всенепоро́чная Влады́чице.

Го́споди поми́луй, 40. Сла́ва, и ны́не: Честне́йшую Херуви́м: Иере́й: Моли́твами святы́х оте́ц: Мы́ же: Ами́нь. И Христо́с воскре́се: три́жды. Посе́м, Сла́ва, и ны́не: Го́споди поми́луй, три́жды. Благослови́.

И отпу́ст 1-го часа́.

Си́це же пое́тся и 3-й ча́с, и 6-й и 9-й, кроме́ отпу́ста, зане́ быва́ет вку́пе.

Та́кожде пое́м за повече́рие, и за полу́нощницу. То́чию по Честне́йшую: и по Моли́твами святы́х оте́ц: на ки́йждо отпу́ст глаго́лем: Христо́с воскре́се: три́жды. Та́ко твори́м до неде́ли свята́го Фомы́. А́ще ли не бу́дет когда́ по ну́жде литурги́и и за Благослови́ душе́ моя́ Го́спода: Христо́с воскре́се: три́жды. Воскре́сние Христо́во: еди́ножды. Предвари́вшыя у́тро: Сла́ва: А́ще и во гро́б: И ны́не: Единоро́дный Сы́не: И блаже́нна от кано́на, апо́стол и Ева́нглие дне́. Та́же, Помяни́ на́с Го́споди: Ли́к небе́сный: Ве́рую во Еди́наго Бо́га: Осла́би, оста́ви: И по О́тче на́ш: Конда́к: А́ще и во Гро́б: Сла́ва, и ны́не: Вы́шняго освяще́нное: Го́споди поми́луй, 40. И Еди́н свя́т: Вме́сто, Бу́ди и́мя Госпо́дне: Христо́с воскре́се: три́жды. И псало́м: Благословлю́ Го́спода: коне́ц: не лиша́тся вся́каго бла́га:

И отпу́ст.

Псалми́ избра́ннии

Ве́домо бу́ди, я́ко егда́ случи́тся в неде́лю Госпо́дский пра́здник, или́ Богоро́дичен, или́ свята́го вели́каго, в ни́хже пое́тся полиеле́й: по обы́чною двою́ кафи́сму, не глаго́лем, Блаже́ни непоро́чнии: но а́бие полиеле́й. Хвали́те и́мя Госпо́дне: и Испове́дайтеся Го́сподеви: Та́кожде и в неде́лю мясопу́стия и сыропу́стия, оставля́ем: Блаже́ни непоро́чнии: и пое́м полиеле́й, припева́юще и 3-й псало́м: На река́х Вавило́нских: Та́же, а́ще пра́здник, пое́м велича́ние со избра́нными стихи́ псалмо́в. И посе́м, а́ще не́сть Влады́чний пра́здник, тропари́ воскре́сны, Благослове́н еси́ Го́споди: Та́же степе́нна, и про́чее.

В пра́здники Госпо́дския,

и во дни́ наро́читых святы́х, внегда́ уста́в указу́ет полиеле́й, псало́м 134: Хвали́те и́мя Госпо́дне, хвали́те раби́ Го́спода: псало́м 135: Испове́дайтеся Го́сподеви, я́ко бла́г. Си́и избра́нныя от псалмо́в стихи́ пою́тся по полиеле́и во Влады́чныя пра́здники, и во вся́ святы́я иму́щыя полиеле́й.

На Рождество́ Богоро́дицы.

Ме́сяца септе́мвриа во 8 де́нь.

Начина́ет пе́рвый ли́к, поя́:

Велича́ем Тя́, пресвята́я Де́во, и чти́м святы́х Твои́х роди́телей, и всесла́вное сла́вим рождество́ Твое́.

Та́же па́ки то́йже наче́нший ли́к пое́т:

1. Помяни́ Го́споди Дави́да, и всю́ кро́тость его́.

2. Я́ко кля́тся Го́сподеви, обеща́ся Бо́гу Иа́ковлю.

1. Се́ слы́шахом я́ во Евфра́фе, обрето́хом я́ в поля́х дубра́вы.

2. Пресла́вная глаго́лашася о тебе́ гра́де Бо́жий.

1. Бо́г посреде́ его́, и не подви́жится.

2. Кля́тся Госпо́дь Дави́ду и́стиною, и не отве́ржется ея́:

1. От пло́да чре́ва Твоего́ посажду́ на Престо́ле Твое́м.

2. Я́ко избра́ Госпо́дь Сио́на, изво́ли его́ в жили́ще Себе́.

1. Освяти́л е́сть селе́ние Свое́ Вы́шний.

2. Святы́ня и велеле́пота во святи́ле Его́.

1. Свя́т хра́м Тво́й, ди́вен в пра́вде.

2. До́му Твоему́ подоба́ет святы́ня Го́споди в долготу́ дни́й.

1. Помяну́ и́мя Твое́ во вся́ком ро́де и ро́де.

2. Благослове́н Госпо́дь во ве́к, и в ве́к ве́ка.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

В воздви́жение Честна́го Креста́.

Ме́сяца септе́мвриа в 14 де́нь.

Начина́ет пе́рвый ли́к, поя́:

Велича́ем Тя́, Живода́вче, Христе́, и чти́м Кре́ст Тво́й Святы́й, и́мже на́с спа́сл еси́ от рабо́ты вра́жия.

Та́же па́ки то́йже ли́к пое́т:

1: Суди́ Го́споди оби́дящыя мя́, побори́ борю́щыя мя́.

2: Приими́ ору́жие и щи́т, и воста́ни в по́мощь мою́.

1: Зна́менася на на́с све́т лица́ Твоего́ Го́споди.

2: Я́ко ору́жием благоволе́ния венча́л еси́ на́с.

1: Да́л еси́ зна́мение боя́щымся Тебе́, е́же убежа́ти от лица́ лу́ка.

2: Позна́ти на земли́ пу́ть Тво́й, во все́х язы́цех спасе́ние Твое́.

1: Ви́деша вси́ концы́ земли́ спасе́ние Бо́га на́шего.

2: Поклони́мся на ме́сто, иде́же стоя́сте но́зе Его́.

1: Тогда́ возра́дуются вся́ древа́ дубра́вная.

2: Бо́г же Ца́рь на́ш пре́жде ве́ка, соде́ла спасе́ние посреде́ земли́.

1: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

2: Благослови́ ны Бо́же, Бо́же на́ш, благослови́ ны Бо́же.

1: Спаси́ лю́ди Твоя́, и благослови́ достоя́ние Твое́. И упаси́ я́, и возми́ я́ до ве́ка.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

Покров Пресвятые Владычицы нашея Богородицы и Приснодевы Марии

Месяца октября в 1-й день

Начинает первый лик, поя:

Величаем тя,/ Пресвятая Дево,/ и чтим Покров Твой святый:/ Тя бо виде святый Андрей на воздусе,/ за ны Христу молящуюся.

Инны величания

Величаем тя,/ Пресвятая Дево,/ Мати Христа, Бога нашего,/ и всеславный славим Покров твой.

Величаем тя,/ Пресвятая Дево,/ Мати Христа, Бога нашего,/ Иже к Сыну свои руце простирающи, и о мире молящися,/ и честным Своим омофором защищающи / град и люди от врагов наших.

Также паки тойже лик поет псалом избранный, Афонский:

1. Велий Господь и хвален зело, во граде Бога нашего, в горе святей Его.

2. Свят храм Твой, дивен в правде.

1. Святыня и великолепие во святителе Его.

2. Лицу Твоему помолятся богати людстии.

1. Сынове человечестии в крове крилу Твоею надеятися имут.

2. Распростре облак в покров им.

1. Покрыю и, яко позна имя Мое.

2. В крове крилу Твоею покрыеши мя.

1. Бог в месте святем Своем, и в храме Его всякий глаголет славу.

2. Предста Царица одесную Тебе.

1. Призре на молитву смиренных и не уничижи моления их.

2. И молитву их услышит и спасет я.

1. За то помолится к Тебе всяк преподобный.

2. Помолихся лицу Твоему всем сердцем моим.

1. Ты еси прибежище от скорби, одержащия мя.

2. Покрый мя от сонма лукавнующих.

1. В день зол моих покры мя.

2. Покрыеши мя от враг, озлобляющих мя.

1. Помяну имя Твое во всяком роде и роде.

2. Сего ради людие исповедятся Тебе в век и век века.

1. Слава, и ныне: Аллилуия: Трижды.

На Ведение (Вхо́д) Богоро́дицы.

Ме́сяца ное́мвриа в 21 де́нь.

Пе́рвый ли́к пое́т:

Велича́ем Тя́, Пресвята́я Де́во, Богоизбра́нная Отрокови́це, и чти́м е́же в хра́м Госпо́день вхожде́ние Твое́.

Та́же па́ки то́йже ли́к:

1: Ве́лий Госпо́дь, и хва́лен зело́ во гра́де Бо́га на́шего, в горе́ святе́й Его́.

2: Благокоре́нным ра́дованием всея́ земли́.

1: Пресла́вная глаго́лашася о Тебе́ гра́де Бо́жий.

2: Гра́д Царя́ Вели́каго:

1: Я́коже слы́шахом, та́ко и ви́дехом.

2: Во гра́де Го́спода си́л, во гра́де Бо́га на́шего.

1: Бо́г основа́ и́ в ве́к.

2: Освяти́л е́сть селе́ние Свое́ вы́шний.

1: Святы́ня и великоле́пие во святи́ле Его́.

2: Свя́т хра́м Тво́й, ди́вен в пра́вде.

1: Сия́ врата́ Госпо́дня, пра́веднии вни́дут в ня́.

2: Предста́ Цари́ца одесну́ю Тебе́.

1: В ри́зах позлаще́нных оде́яна, преиспещре́на.

2: Лицу́ Твоему́ помо́лятся бога́тии лю́дстии.

1: Дще́ри царе́й в че́сти Твое́й.

2: Вся́ сла́ва Дще́ре Царе́вы вну́трь.

1: Ря́сны златы́ми оде́яна, и преиспещре́на.

2: Приведу́тся Царю́ де́вы в сле́д Ея́.

1: Бли́жняя Ея́ приведу́тся Тебе́.

2: Приведу́тся в весе́лии и ра́довании, введу́тся в хра́м Царе́в.

1: Слы́ши Дщи́ и ви́ждь, и приклони́ у́хо Твое́:

2: И забу́ди лю́ди Твоя́, и до́м отца́ Твоего́.

1: И возжела́ет Ца́рь добро́ты Твоея́.

2: Помяну́ и́мя Твое́ во вся́ком ро́де и ро́де.

1: Восприя́хом Бо́же ми́лость Твою́, посреде́ люде́й Твои́х.

2: Сего́ ра́ди лю́дие испове́дятся Тебе́ в ве́к, и в ве́к ве́ка.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

На рождество́ Го́спода Бо́га на́шего Иису́са Христа́.

Ме́сяца деке́мвриа в 25 де́нь.

Пе́рвый ли́к пое́т:

Велича́ем Тя́, Живода́вче Христе́, на́с ра́ди ны́не пло́тию ро́ждшагося от Безневе́стныя и Пречи́стыя Де́вы Мари́и.

Та́же па́ки то́йже ли́к:

1: Воскли́кните Го́сподеви вся́ земля́.

2: По́йте же и́мени Его́.

1: Дади́те сла́ву хвале́ Его́.

2: Пове́дите вся́ чудеса́ Его́.

1: Рцы́те Бо́гу: ко́ль стра́шна дела́ Твоя́.

2: Да возвеселя́тся Небеса́, и возра́дуется земля́.

1: Воспо́йте Го́сподеви, по́йте И́мени Его́.

2: Испове́дание и великоле́пие де́ло Его́.

1: Избавле́ние посла́ лю́дем Свои́м.

2: Свя́то и стра́шно И́мя Его́.

1: От Сио́на благоле́пие красоты́ Его́.

2: Бо́г же на́ш на Небеси́ и на земли́, вся́ ели́ка восхоте́, сотвори́.

1: Ми́лости Твоя́ Го́споди во ве́к воспою́.

2: То́й воззове́т мя́: Оте́ц мо́й еси́ Ты́.

1: И А́з пе́рвенца положу́ Его́,

2: Высока́ па́че царе́й земны́х.

1: И покло́нятся Ему́ вси́ ца́рие зе́мстии.

2: Кто́ Бо́г Ве́лий, я́ко Бо́г на́ш, Ты́ еси́ Бо́г творя́й чудеса́.

1: Мы́шцею си́лы Твоея́ разгна́л еси́ враги́ Твоя́.

2: Из чре́ва пре́жде денни́цы роди́х Тя́.

1: Кля́тся Госпо́дь, и не раска́ется.

2: Ты́ Иере́й во ве́к по чи́ну Мелхиседе́кову.

1: Госпо́дь рече́ ко Мне́: Сы́н Мо́й еси́ Ты́.

2: А́з дне́сь роди́х Тя́.

1: Проси́ от Мене́, и да́м Ти́ язы́ки достоя́ние Твое́.

2: И одержа́ние Твое́ концы́ земли́.

1: В глави́зне кни́жней писа́ся о Мне́.

2: Престо́л Тво́й Бо́же в ве́к ве́ка.

1: Же́зл пра́вости, же́зл Ца́рствия Твоего́.

2: Сего́ ра́ди пома́за Тя́ Бо́же, Бо́г Тво́й еле́ем ра́дости.

1: Я́ко Ты́ насле́диши во все́х язы́цех.

2: Благослове́н Госпо́дь во ве́к, бу́ди, бу́ди.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

На Обрезание Господа Бога нашего Иисуса Христа

Месяца января в 1-й день

Величаем тя, / Живодавче Христе,/ и почитаем и пречистыя плоти Твоея / законное обрезание.

Величание святителю

Величаем тя,/ святителю Христов Василие,/ благочестно Церковь Христову / сохраншаго.

На Святое Богоявление Го́спода Бо́га на́шего Иису́са Христа́.

Ме́сяца ианнуа́риа в 6-й де́нь.

Пе́рвый ли́к пое́т:

Велича́ем Тя́, Живода́вче Христе́, на́с ра́ди ны́не пло́тию крести́вшагося от Иоа́нна в вода́х Иорда́нских.

Та́же па́ки то́йже ли́к:

1: Бо́же, уще́дри ны́, и благослови́ ны.

2: Просвети́ лице́ Твое́ на ны́ и поми́луй ны́.

1: Приступи́те к Нему́, и просвети́теся.

2: И ли́ца ва́ша не постыдя́тся.

1: Ре́чная устремле́ния веселя́т гра́д Бо́жий.

2: Гла́с Госпо́день на вода́х:

1: Госпо́дь на вода́х мно́гих.

2: Взя́ша ре́ки Го́споди, взя́ша ре́ки гла́сы своя́.

1: От гла́сов во́д мно́гих.

2: Сего́ ра́ди помяну́х Тя́ от земли́ Иорда́нски и Ермонии́мски.

1: Я́ко у тебе́ исто́чник живота́, во Све́те Твое́м у́зрим Све́т.

2: Мо́ре ви́де и побеже́, Иорда́н возврати́ся вспя́ть.

1: Ты́ утверди́л еси́ си́лою Твое́ю мо́ре.

2: Ты́ сте́рл еси́ главы́ змие́в в воде́.

1: Ты́ расто́ргл еси́ исто́чники и пото́ки.

2: Ви́деша тя́ во́ды Бо́же, ви́деша тя́ во́ды, и убоя́шася.

1: В мо́ри путие́ Твои́, и стези́ Твоя́ в вода́х мно́гих.

2: Я́ко возвели́чишася дела́ Твоя́ Го́споди, вся́ Прему́дростию сотвори́л еси́.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

На Сре́тение Го́спода на́шего Иису́са Христа́.

Ме́сяца февруа́риа во 2 де́нь.

Пе́рвый ли́к пое́т:

Велича́ем тя́, живода́вче Христе́, и чти́м пречи́стую Ма́терь Твою́, Е́юже по зако́ну ны́не прине́слся еси́ в хра́м Госпо́день.

Па́ки то́йже ли́к:

1: Отры́гну се́рдце мое́ сло́во бла́го.

2: Глаго́лю а́з дела́ моя́ Царе́ви.

1: Язы́к мо́й тро́сть кни́жника скоропи́сца.

2: Красе́н добро́тою па́че сыно́в челове́ческих.

1: Препоя́ши ме́чь тво́й по бедре́ Твое́й Си́льне.

2: И наляцы́, и успева́й, и Ца́рствуй.

1: И́стины ра́ди, и кро́тости, и пра́вды.

2: Возлюби́л еси́ пра́вду, и возненави́дел еси́ беззако́ние.

1: Слы́ши Дщи́ и ви́ждь, и приклони́ у́хо Твое́.

2: И забу́ди лю́ди Твоя́, и до́м отца́ Твоего́.

1: И возжела́ет Ца́рь добро́ты Твоея́.

2: Я́ко то́й е́сть Госпо́дь Тво́й, и поклони́шися Ему́.

1: Лицу́ Твоему́ помо́лятся бога́тии лю́дстии.

2: Госпо́дь во хра́ме святе́м свое́м, Госпо́дь на небеси́ Престо́л Его́.

1: Ви́дена бы́ша ше́ствия Твоя́ Бо́же.

2: Ше́ствия Бо́га моего́ Царя́, И́же во святе́м.

1: Свя́т хра́м Тво́й, ди́вен в пра́вде.

2: До́му Твоему́ подоба́ет святы́ня Го́споди, в долготу́ дни́й.

1: Помяну́ и́мя Твое́ во вся́ком ро́де и ро́де:

2: Я́ко бла́го пред преподо́бными Твои́ми.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

На Благове́щение Пресвяты́я Богоро́дицы.

Ме́сяца ма́рта в 25 де́нь.

Пе́рвый ли́к пое́т:

Арха́нгельский гла́с вопие́м Ти́, Чи́стая: ра́дуйся Благода́тная, Госпо́дь с Тобо́ю.

Па́ки то́йже ли́к:

1: Бо́же, су́д Тво́й Царе́ви да́ждь.

2: И пра́вду Твою́ Сы́ну Царе́ву:

1: Суди́ти лю́дем Твои́м в пра́вде.

2: И ни́щым Твои́м в суде́.

1: Су́дит ни́щым людски́м, и спасе́т сы́ны убо́гих.

2: Благовести́те де́нь от дне́ спасе́ние Бо́га на́шего.

1: Госпо́дь да́ст глаго́л благовеству́ющым си́лою мно́гою.

2: Кля́тся Госпо́дь Дави́ду и́стиною, и не отве́ржется ея́:

1: От плода́ чре́ва Твоего́ посажду́ на Престо́ле Твое́м.

2: Сни́дет я́ко до́ждь на руно́:

1: И я́ко ка́пля ка́плющая на зе́млю,

2: И приклони́ Небеса́, и сни́де, и мра́к под нога́ма Его́.

1: Я́ко избра́ Госпо́дь Сио́на, изво́ли его́ в жили́ще Себе́.

2: Освяти́л е́сть селе́ние Свое́ вы́шний.

1: Бо́г посреде́ Его́, и не подви́жится.

2: Пощади́т ни́ща и убо́га, и ду́шы убо́гих спасе́т.

1: Вси́ язы́цы порабо́тают Ему́.

2: Ве́сь де́нь благословя́т Его́.

1: Бу́дет утверже́ние на земли́ на версе́х го́р.

2: Бу́дет и́мя Его́ благослове́но во ве́ки.

1: И благословя́тся в Не́м вся́ коле́на земна́я.

2: Благослове́н Госпо́дь Бо́г Изра́илев, творя́й чудеса́ Еди́н.

1: И благослове́но и́мя сла́вы Его́ в ве́к, и в ве́к ве́ка.

2: И испо́лнится сла́вы Его́ вся́ земля́, бу́ди, бу́ди.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

В неде́лю цветну́ю.

Пе́рвый ли́к пое́т:

Велича́ем Тя́, Живода́вче Христе́, оса́нна в Вы́шних, и мы́ Тебе́ вопие́м: Благослове́н Гряды́й во И́мя Госпо́дне.

Па́ки то́йже ли́к:

1: Го́споди Госпо́дь на́ш, я́ко чу́дно И́мя Твое́ по все́й земли́.

2: Я́ко взя́тся великоле́пие Твое́ превы́ше Небе́с.

1: Из у́ст младе́нец и ссу́щих соверши́л еси́ хвалу́.

2: Враго́в Твои́х ра́ди разруши́ши врага́ и ме́стника.

1: Запрети́л еси́ язы́ком, и поги́бе нечести́вый.

2: Ка́мень, Его́же небрего́ша зи́ждущии, Се́й бы́сть во главу́ у́гла.

1: От Го́спода бы́сть Се́й, и е́сть ди́вен во очесе́х на́ших.

2: Госпо́дь в Сио́не вели́к, и высо́к е́сть над все́ми людьми́.

1: Та́мо сокруши́ кре́пости луко́в.

2: Слы́ша, и возвесели́ся Сио́н, и возра́довашася дще́ри иуде́йския.

1: Возвести́те в Сио́не И́мя Госпо́дне: и хвалу́ Его́ во Иерусали́ме.

2: Я́ко Бо́г спасе́т Сио́на, и сози́ждутся гра́ди иуде́йстии.

1: Тебе́ подоба́ет пе́снь Бо́же в Сио́не, и Тебе́ возда́стся моли́тва во Иерусали́ме.

2: Благослове́н гряды́й во и́мя Госпо́дне: Бо́г Госпо́дь, и яви́ся на́м.

1: Соста́вите пра́здник во учаща́ющих до ро́г олтаре́вых:

2: Во дво́рех до́му Госпо́дня, посреде́ Тебе́ Иерусали́ме.

1: Воцари́тся Госпо́дь во ве́к, Бо́г Тво́й Сио́не в ро́д и ро́д.

2: Хвала́ Его́ пребыва́ет в ве́к, и в ве́к ве́ка.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

В но́вую неде́лю, я́же е́сть Фомина́.

Пе́рвый ли́к пое́т:

Велича́ем тя́ Живода́вче Христе́, на́с ра́ди во а́д сше́дшаго, и с Собо́ю вся́ воскреси́вшаго.

Па́ки то́йже ли́к пое́т:

1: Госпо́дь воцари́ся, в ле́поту облече́ся:

2: Облече́ся Госпо́дь в си́лу, и препоя́сася.

1: И́бо утверди́ вселе́нную, я́же не подви́жится.

2: Кто́ возглаго́лет си́лы Госпо́дни, слы́шаны сотвори́т вся́ хвалы́ Его́?

1: Да испове́дятся Го́сподеви ми́лости Его́, и чудеса́ Его́ сыново́м челове́ческим.

2: И изве́л еси́ ны́ от тьмы́, и се́ни сме́ртныя.

1: Я́ко сокруши́ врата́ ме́дная, и вереи́ желе́зныя сломи́.

2: И изба́ви я́ от растле́ний и́х, и у́зы и́х растерза́.

1: Я́ко услы́ша убо́гия Госпо́дь,

2: И окова́нныя Своя́ не уничижи́.

1: Воста́ я́ко спя́ Госпо́дь, и порази́ враги́ своя́.

2: Я́ко о́чи Госпо́дни на упова́ющыя на ми́лость Его́:

1: Услы́шати воздыха́ние окова́нных.

2: Разреши́ти сы́ны умерщвле́нных.

1: Да воскре́снет Бо́г, и расточа́тся врази́ Его́, и да бежа́т от лица́ Его́.

2: Се́й де́нь, его́же сотвори́ Госпо́дь, возра́дуемся и возвесели́мся во́нь.

1: Воскресни́ Го́споди Бо́же мо́й, да вознесе́тся рука́ Твоя́, не забу́ди убо́гих твои́х до конца́.

2: Го́споди Бо́же мо́й, в ве́к испове́мся Тебе́.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

На вознесе́ние Го́спода на́шего Иису́са Христа́.

Пе́рвый ли́к пое́т:

Велича́ем тя́, Живода́вче Христе́, и почита́ем е́же на Небеса́ с пречи́стою Твое́ю пло́тию, Боже́ственное вознесе́ние.

Па́ки то́йже ли́к пое́т:

1: Вси́ язы́цы восплещи́те рука́ми, воскли́кните Бо́гу во гла́се ра́дования.

2: Я́ко Госпо́дь Вы́шний стра́шен, Ца́рь Ве́лий по все́й земли́.

1: Покори́ лю́ди на́м, и язы́ки под но́ги на́шя.

2: Взы́де Бо́г в воскликнове́нии, Госпо́дь во гла́се тру́бне.

1: И взы́де на херуви́мы, и лете́:

2: И возлете́ на крилу́ ве́треню.

1: Возми́те врата́ кня́зи ва́шя, и возми́теся врата́ ве́чная, и вни́дет Ца́рь сла́вы.

2: Госпо́дь на Небеси́ угото́ва Престо́л Сво́й, и Ца́рство Его́ все́ми облада́ет.

1: Рече́ Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя́ подно́жие но́г Твои́х.

2: Поклони́теся ему́ вси́ А́нгели Его́.

1: Бо́г седи́т на Престо́ле святе́м Свое́м.

2: И то́й су́дит вселе́нней в пра́вду.

1: Престо́л Тво́й Бо́же в ве́к ве́ка.

2: Я́ко взя́тся великоле́пие Твое́ превы́ше Небе́с.

1: Вознесе́ся на Небеса́ Бо́же, и по все́й земли́ сла́ва Твоя́.

2: Кто́ я́ко Госпо́дь Бо́г на́ш, на высо́ких живы́й?

1: Вознеси́ся Го́споди, си́лою Твое́ю, воспое́м и пое́м си́лы Твоя́.

2: По́йте Бо́гу на́шему, по́йте, по́йте Царе́ви на́шему, по́йте.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

В неде́лю 8-ю.

Пе́рвый ли́к пое́т:

Велича́ем тя́, Живода́вче Христе́, и чти́м Всесвята́го Ду́ха Твоего́, Его́же от Отца́ посла́л еси́ Боже́ственным ученико́м Твои́м.

Па́ки то́йже ли́к:

1: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

2: Ду́хом у́ст Его́ вся́ си́ла и́х.

1: С Небесе́ призре́ Госпо́дь, ви́де вся́ сы́ны челове́ческия.

2: О́гнь пред Ни́м предъи́дет, и о́крест Его́ бу́ря зе́льна.

1: У́глие возгоре́ся от Него́, и приклони́ Небеса́, и сни́де.

2: От облиста́ния пред Ни́м о́блацы проидо́ша.

1: Помяну́тся, и обратя́тся ко Го́споду вси́ концы́ земли́:

2: И покло́нятся пред ни́м вся́ оте́чествия язы́к.

1: Свиде́тельство Госпо́дне ве́рно, умудря́ющее младе́нцы.

2: Земля́ потрясе́ся, и́бо Небеса́ ка́нуша от лица́ Бо́га Сина́ина.

1: До́ждь во́лен отлучи́ши Бо́же достоя́нию Твоему́.

2: Поста́виши и́х кня́зи по все́й земли́.

1: Во всю́ зе́млю изы́де веща́ние и́х, и в концы́ вселе́нныя глаго́лы и́х.

2: По́слеши Ду́ха Твоего́, и сози́ждутся, и обнови́ши лице́ земли́.

1: Ду́х Тво́й благи́й наста́вит мя́ на зе́млю пра́ву.

2: Се́рдце чи́сто сози́жди во мне́ Бо́же, и ду́х пра́в обнови́ во утро́бе мое́й.

1: Не отве́ржи мене́ от лица́ Твоего́ и Ду́ха Твоего́ Свята́го не отими́ от Мене́.

2: Возда́ждь ми́ ра́дость спасе́ния Твоего́, и Ду́хом Влады́чним утверди́ мя.

1: Госпо́дь да́ст глаго́л благовеству́ющым си́лою мно́гою.

2: Госпо́дь кре́пость лю́дем Свои́м да́ст: Госпо́дь благослови́т лю́ди Своя́ ми́ром.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

На рождество́ предте́чево. Ме́сяца июня в 24 де́нь.

Пе́рвый ли́к пое́т:

Велича́ем тя́, Предте́че Спа́сов Иоа́нне, и чти́м е́же от непло́дове, пресла́вное рождество́ твое́.

Па́ки то́йже ли́к:

1: Благослове́н Госпо́дь Бо́г Изра́илев, я́ко посети́ и сотвори́ избавле́ние лю́дем Свои́м.

2: И воздви́же ро́г спасе́ния на́м в дому́ Дави́дове, о́трока Своего́.

1: Кля́тся Госпо́дь Дави́ду и́стиною, и не отве́ржется ея́.

2: Та́мо возращу́ ро́г Дави́ду, угото́вах свети́льник пома́занному Моему́.

1: Си́льно на земли́ бу́дет се́мя его́.

2: Ро́д пра́вых благослови́тся.

1: Служи́ти Ему́ в преподо́бии и пра́вде пред Ни́м, вся́ дни́ живота́ на́шего.

2: И ты́ отроча́, проро́к Вы́шняго нарече́шися.

1: Предыдеши бо пред лице́м Госпо́дним угото́вати пути́ Его́:

2: Да́ти ра́зум спасе́ния лю́дем Его́:

1: Во оставле́ние грехо́в и́х, милосе́рдия ра́ди ми́лости Бо́га на́шего.

2: Напра́вити но́ги на́шя на пу́ть ми́ра.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

На преображе́ние Го́спода Бо́га и Спа́са на́шего Иису́са Христа́.

Ме́сяца а́вгуста в 6 де́нь.

Пе́рвый ли́к пое́т:

Велича́ем тя́, Живода́вче Христе́, и почита́ем пречи́стыя пло́ти Твоея́ пресла́вное преображе́ние.

То́йже ли́к пое́т:

1: Ве́лий Госпо́дь, и хва́лен зело́, во гра́де Бо́га на́шего, в горе́ святе́й Его́.

2: Прие́мля кро́ткия Госпо́дь, смире́нныя же возно́сит.

1: Кто́ взы́дет на го́ру Госпо́дню? или́ кто́ ста́нет на ме́сте святе́м Его́?

2: Го́споди, кто́ обита́ет в жили́щи Твое́м?

1: Или́ кто́ всели́тся в горе́ святе́й Твое́й?

2: Посли́ све́т Тво́й, и и́стину Твою́.

1: Просвеща́еши Ты́ ди́вно от го́р ве́чных.

2: Вселе́нную, и исполне́ние ея́, Ты́ основа́л еси́.

1: Фаво́р и Ермо́н о и́мени Твое́м возра́дуетася.

2: Го́споди, во све́те лица́ Твоего́ по́йдут,

1: И о и́мени Твое́м возра́дуются ве́сь де́нь.

2: И бу́ди све́тлость Го́спода Бо́га на́шего на на́с, от ны́не и до ве́ка.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

На Успе́ние Пресвяты́я Богоро́дицы.

Ме́сяца а́вгуста в 15 де́нь.

Пе́рвый ли́к пое́т:

Велича́ем Тя́ Пренепоро́чная Ма́ти Христа́ Бо́га на́шего, и всесла́вное сла́вим успе́ние Твое́.

Па́ки то́йже ли́к пое́т:

1: Воскли́кните Го́сподеви вся́ земля́.

2: По́йте же И́мени Его́.

1: Воскли́кните пред Царе́м Го́сподем:

2: Испове́дайтеся Ему́, хвали́те И́мя Его́.

1: Во гра́де Го́спода си́л, во гра́де Бо́га на́шего.

2: Бы́сть в ми́ре ме́сто Его́, и жили́ще Его́ в Сио́не.

1: Пресла́вная глаго́лашася о Тебе́, гра́де Бо́жий.

2: Бо́г основа́ и́ в ве́к.

1: Освяти́л е́сть селе́ние Свое́ Вы́шний.

2: Святы́ня и великоле́пие во святи́ле Его́.

1: Воспою́ и пою́ во сла́ве мое́й.

2: Ча́шу спасе́ния прииму́, и И́мя Госпо́дне призову́.

1: В ми́ре вку́пе усну́ и почи́ю.

2: Обрати́ся душе́ моя́ в поко́й Тво́й, я́ко Госпо́дь благоде́йствова тя́.

1: Госпо́дь пра́ведн, ссече́ вы́и гре́шников.

2: Воскресни́ Го́споди в поко́й Тво́й, Ты́, и киво́т святы́ни Твоея́.

1: До́му Твоему́ подоба́ет святы́ня Го́споди, в долготу́ дни́й.

2: Помяну́ И́мя Твое́ во вся́ком ро́де и ро́де.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

На Усекнове́ние главы́ Иоа́нна Предте́чи.

Ме́сяца а́вгуста в 29 де́нь.

Пе́рвый ли́к пое́т:

Велича́ем тя́, Крести́телю Спа́сов Иоа́нне, и почита́ем вси́ честны́я Твоея́ главы́ усекнове́ние.

Па́ки то́йже ли́к пое́т:

1: Блаже́н му́ж боя́йся Го́спода:

2: В за́поведех Его́ восхо́щет зело́.

1: Сла́ва и бога́тство в дому́ Его́.

2: И пра́вда Его́ пребыва́ет в ве́к ве́ка.

1: В па́мять ве́чную бу́дет пра́ведник.

2: Пра́ведник я́ко фи́никс процвете́т, я́ко ке́др, и́же в лива́не, умно́жится.

1: Возвесели́тся пра́ведник о Го́споде, и упова́ет на Него́.

2: Се́ устна́м мои́м не возбраню́, Го́споди.

1: Ты́ разуме́л еси́ пра́вду мою́ и и́стину мою́:

2: И язы́к мо́й поучи́тся пра́вде Твое́й, ве́сь де́нь хвале́ Твое́й.

1: Све́т возсия́ пра́веднику, и пра́вым се́рдцем весе́лие.

2: Ро́д пра́вых благослови́тся.

1: Сла́вою и че́стию венча́л еси́ Его́.

2: Я́ко ты́ благослови́ши пра́ведника Го́споди.

1: Я́ко ору́жием благоволе́ния венча́л еси́ на́с.

2: В ни́хже посети́ на́с восто́к с высоты́:

1: Яви́тися во тьме́ и се́ни сме́ртней седя́щым:

2: Напра́вити но́ги на́шя на пу́ть ми́рен.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

Святы́м апо́столом Петру́ и Па́влу.

Ме́сяца иу́ниа в 29 де́нь.

Пе́рвый ли́к пое́т:

Велича́ем ва́с, апо́столи Христо́вы, ве́сь ми́р уче́ньми свои́ми просвети́вшыя, и вся́ концы́ ко Христу́ приве́дшыя.

О́бщий апо́столом:

Велича́ем тя́, апо́столе Христо́в, и́мярек, и чти́м боле́зни и труды́ твоя́, и́миже труди́лся еси́ во благове́стии Христо́ве.

Па́ки то́йже ли́к пое́т:

1: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

2: Испове́дят Небеса́ чудеса́ Твоя́, Го́споди.

1: Вме́сто оте́ц Твои́х бы́ша сы́нове Твои́.

2: Поста́виши я́ кня́зи по все́й земли́.

1: Бо́г бого́в Госпо́дь глаго́ла, и призва́ зе́млю.

2: От восто́к со́лнца до за́пад хва́льно И́мя Госпо́дне.

1: Освети́ша мо́лния Его́ вселе́нную:

2: Возвести́ша Небеса́ пра́вду Его́:

1: И ви́деша вси́ лю́дие сла́ву Его́.

2: Кня́зи Иу́довы влады́ки и́х:

1: Воцари́ся Бо́г над язы́ки.

2: Бо́г прославля́емь в сове́те святы́х.

1: Ве́лий и стра́шен е́сть над все́ми окре́стными Его́.

2: Рцы́те во язы́цех, я́ко Госпо́дь воцари́ся.

1: Возвести́те во язы́цех сла́ву Его́, во все́х лю́дех чудеса́ Его́.

2: Во всю́ зе́млю изы́де веща́ние и́х:

1: И в концы́ вселе́нныя глаго́лы и́х.

2: Покори́ лю́ди на́м, и язы́ки под но́ги на́шя.

1: Ве́лий Госпо́дь на́ш, и ве́лия кре́пость Его́.

2: То́й да́ст си́лу и держа́ву лю́дем Свои́м: благослове́н Бо́г.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

На па́мяти святы́х му́ченик о́бщий.

Пе́рвый ли́к пое́т:

Велича́ем тя́, страстоте́рпче святы́й, и́мярек, и чти́м честна́я страда́ния твоя́, я́же за Христа́ претерпе́л еси́.

Па́ки то́йже ли́к пое́т:

1: Бо́г на́м прибе́жище и си́ла.

2: Помо́щник в ско́рбех обре́тших ны́ зело́:

1: Сего́ ра́ди не убои́мся, внегда́ смуща́ется земля́.

2: Бо́же, кто́ уподо́бится Тебе́: да не премолчи́ши, ниже́ укроти́ши Бо́же.

1: Я́ко се́ врази́ Твои́ возшуме́ша, и ненави́дящии Тя́ воздвиго́ша главу́:

2: На лю́ди Твоя́ лука́вноваша во́лею, и совеща́ша на святы́я Твоя́.

1: Положи́ша тру́пия рабо́в Твои́х бра́шно пти́цам небе́сным:

2: Пло́ти преподо́бных Твои́х звере́м земны́м.

1: Пролия́ша кро́вь и́х я́ко во́ду.

2: Я́ко Тебе́ ра́ди умерщвля́еми есмы́ ве́сь де́нь.

1: Вмени́хомся я́ко о́вцы заколе́ния.

2: Положи́л еси́ на́с в при́тчу во язы́цех.

1: И бы́х я́звен ве́сь де́нь.

2: Разже́гл еси́ ны́, я́коже разжиза́ется сребро́.

1: Проидо́хом сквозе́ о́гнь и во́ду, и изве́л еси́ на́с в поко́й.

2: Весели́теся о Го́споде, и ра́дуйтеся пра́веднии.

1: Я́ко Госпо́дь в ро́де пра́ведных:

2: И насле́дие и́х в ве́к бу́дет.

1: Воззва́ша пра́веднии, и Госпо́дь услы́ша и́х.

2: Све́т возсия́ пра́веднику, и пра́вым се́рдцем весе́лие.

1: В па́мять ве́чную бу́дет пра́ведник.

2: Святы́м, и́же су́ть на земли́ Его́, удиви́ Госпо́дь вся́ хоте́ния Своя́ в ни́х.

1: Ди́вен Бо́г во святы́х Свои́х.

2: Пра́ведник я́ко фи́никс процвете́т, я́ко ке́др и́же в Лива́не, умно́жится.

1: Возвесели́тся пра́ведник о Го́споде, и упова́ет на Него́.

2: И похва́лятся вси́ пра́вии се́рдцем.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

Святи́телем о́бщий.

Пе́рвый ли́к пое́т:

Велича́ем тя́, святи́телю о́тче, и́мярек, и чти́м святу́ю па́мять твою́: ты́ бо мо́лиши за на́с Христа́ Бо́га на́шего.

Па́ки то́йже ли́к пое́т:

1: Услы́шите сия́ вси́ язы́цы, внуши́те вси́ живу́щии по вселе́нней.

2: Уста́ моя́ возглаго́лют прему́дрость, и поуче́ние се́рдца моего́ ра́зум.

1: Прииди́те ча́да, послу́шайте мене́, стра́ху Госпо́дню научу́ ва́с.

2: Благовести́х пра́вду в це́ркви вели́цей.

1: И́стину Твою́ и спасе́ние Твое́ ре́х.

2: Пове́м и́мя Твое́ бра́тии мое́й, посреде́ це́ркве воспою́ Тя.

1: Услы́шати ми́ гла́с хвалы́ Твоея́, и пове́дати вся́ чудеса́ Твоя́.

2: Го́споди, возлюби́х благоле́пие дому́ Твоего́, и ме́сто селе́ния сла́вы Твоея́.

1: Возненави́дех це́рковь лука́внующих и с нечести́выми не ся́ду.

2: Я́ко сохрани́х пути́ Госпо́дни, и не нече́ствовах от Бо́га моего́.

1: Уста́ пра́веднаго поуча́тся прему́дрости, и язы́к его́ возглаго́лет су́д.

2: Пра́вда Его́ пребыва́ет в ве́к ве́ка.

1: Свяще́нницы Твои́ облеку́тся пра́вдою, и преподо́бнии Твои́ возра́дуются.

2: Блаже́ни живу́щии в дому́ Твое́м, в ве́ки веко́в восхва́лят Тя́.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

На па́мяти преподо́бных о́бщий.

Пе́рвый ли́к пое́т:

Ублажа́ем тя́, преподо́бне о́тче, и́мярек, и чти́м святу́ю па́мять твою́, наста́вниче мона́хов и собесе́дниче а́нгелов.

Па́ки то́йже ли́к пое́т:

1: Терпя́ потерпе́х Го́спода, и вня́т ми́, и услы́ша моли́тву мою́:

2: Поста́ви на ка́мени но́зе мои́, и испра́ви стопы́ моя́.

1: Се́ удали́хся бе́гая, и водвори́хся в пусты́ни.

2: Уподо́бихся нея́сыти пусты́нней.

1: Бде́х, и бы́х я́ко пти́ца осо́бящаяся на зде́.

2: Коле́на моя́ изнемого́ста от поста́:

1: И пло́ть моя́ измени́ся еле́а ра́ди.

2: Слеза́ми мои́ми посте́лю мою́ омочу́.

1: Я́ко обыдо́ша мя́ пси́ мно́зи, со́нм лука́вых одержа́ша мя́.

2: Напряго́ша лу́к сво́й ве́щь го́рьку:

1: Состреля́ти в та́йных непоро́чнаго.

2: Предзре́х Го́спода предо мно́ю вы́ну, я́ко одесну́ю мене́ е́сть, да не подви́жуся.

1: Вси́ язы́цы обыдо́ша мя́, и И́менем Госпо́дним противля́хся и́м.

2: Благослове́н Госпо́дь, и́же не даде́ на́с в лови́тву зубо́м и́х:

1: Да испове́дятся Тебе́, Го́споди, вся́ дела́ Твоя́:

2: И преподо́бнии Твои́ да благословя́т Тя́.

1: И уве́дите, я́ко удиви́ Госпо́дь преподо́бнаго Своего́.

2: И утруди́ся во ве́к, и жи́в бу́дет до конца́.

1: Храни́т Госпо́дь ду́шы преподо́бных Свои́х.

2: Восхва́лятся преподо́бнии во сла́ве, и возра́дуются на ло́жах свои́х.

1: Честна́ пред Го́сподем сме́рть преподо́бных Его́.

2: По́йте Го́сподеви преподо́бнии Его́, и испове́дайте па́мять святы́ни Его́, во все́х лю́дех чудеса́ Его́.

Сла́ва, и ны́не:

Аллилу́иа, аллилу́иа, аллилу́иа, сла́ва тебе́, Бо́же. Три́жды.

Святы́м безпло́тным о́бщий.

Пе́рвый ли́к пое́т:

Велича́ем ва́с, Арха́нгели и А́нгели, и вся́ во́инства, Херуви́ми и Серафи́ми, сла́вящыя Го́спода.

Ино величание

Велича́ем ва́с, Арха́нгели, А́нгели, Нача́ла, Вла́сти, Престо́ли, Госпо́дьствия, Си́лы и Херуви́ми, стра́шныя Серафи́ми, прославля́ющыя Го́спода.

Па́ки то́йже ли́к пое́т:

1: Испове́мся тебе́, Го́споди, все́м се́рдцем мои́м:

2: И пред А́нгелы воспою́ Тебе́.

1: Творя́й А́нгелы Своя́ ду́хи, и слуги́ Своя́ пла́мень о́гненный.

2: Благослови́те Го́спода вси́ А́нгели Его́:

1: Благослови́те Го́спода вся́ Си́лы Его́:

2: Поклони́теся Ему́ вси́ А́нгели Его́.

1: Седя́й на Херуви́мех яви́ся.

2: Ополчи́тся А́нгел Госпо́день о́крест боя́щихся Его́.

1: Сло́вом Госпо́дним Небеса́ утверди́шася:

2: И Ду́хом у́ст Его́ вся́ си́ла и́х.

1: И се́де на Херуви́мы, и лете́.

2: Сла́вою и че́стию венча́л еси́ Его́.

1: Хвали́те Го́спода с Небе́с, хвали́те Его́ в вы́шних.

2: Хвали́те Его́ вси́ А́нгели Его́.

1: Хвали́те Его́ вся́ Си́лы Его́.

2: Вся́кое дыха́ние да хва́лит Го́спода.

Сла́ва, и ны́не:

Аллилу́иа, аллилу́иа, аллилу́иа, сла́ва Тебе́, Бо́же. Три́жды.

Припе́вы на 9-й пе́сни, на Госпо́дския, Богоро́дичныя и вели́ких свя́ты пра́здники

Рождеству́ Богоро́дицы.

На 9-й пе́сни, Честне́йшую не пое́м, но пое́м припе́в пра́здника:

Велича́й, душе́ моя́, пресла́вное рождество́ Бо́жия Ма́тере.

Посе́м ирмо́с: Я́же пре́жде со́лнца: Та́же вторы́й ли́к пое́т то́йже припе́в и ирмо́с. И на ки́йждо тропа́рь пою́т то́йже припе́в пра́здника шестью́, на о́ба ли́ка.

Та́же пе́рвый ли́к пое́т втора́го кано́на припе́в: Велича́й, душе́ моя́, от непло́дове ро́ждшуюся Де́ву Мари́ю.

Посе́м ирмо́с: Чу́жде ма́терем де́вство: И вторы́й ли́к пое́т то́йже припе́в и ирмо́с. И на ки́йждо тропа́рь пою́т то́йже припе́в 6-ю. Та́же о́ба ли́ка, соше́дшеся вку́пе, пою́т пе́рваго кано́на припе́в и ирмо́с: Та́ин еси́ Богоро́дице ра́й: Та́же втора́го кано́на припе́в и ирмо́с: Сне́дию дре́ва: И покло́н.

На Воздви́жение Честна́го Креста́:

Велича́й, душе́ моя́, Пречестны́й Кре́ст Госпо́день.

Посе́м ирмо́с: Та́ин еси́ Богоро́дице ра́й: Та́же вторы́й ли́к пое́т то́йже припе́в и ирмо́с. И на ки́йждо тропа́рь пою́т то́йже припе́в пра́здника 6-ю на о́ба ли́ка.

Та́же пе́рвый ли́к пое́т втора́го кано́на припе́в: Велича́й, душе́ моя́, животворя́щаго креста́ Госпо́дня воздви́жение.

Посе́м ирмо́с: Сне́дию дре́ва:

И вторы́й ли́к пое́т то́йже припе́в и ирмо́с. И на ки́йждо тропа́рь пою́т то́йже припе́в 6-ю. Та́же о́ба ли́ка, соше́дшеся вку́пе, пою́т пе́рваго кано́на припе́в и ирмо́с:

Та́ин еси́ Богоро́дице ра́й, невозде́ланно возрасти́вший Христа́: И́мже Кре́стное живоно́сное на земли́ насади́ся Дре́во. Те́м ны́не возноси́му, покланя́ющеся ему́, тя́ велича́ем.

Та́же втора́го кано́на припе́в.

И ирмо́с: Сне́дию дре́ва, ро́ду прибы́вшая сме́рть, кресто́м упраздни́ся дне́сь, и́бо прама́терняя всеро́дная кля́тва разруши́ся, прозябе́нием чи́стыя Богома́тере: ю́же вся́ си́лы небе́сныя велича́ют. И покло́н.

На Покров Пресвятыя Богородицы

Сии припевы поются на 9-й песни и на Святой Афонской Горе:

Ангели, Покров Пречистыя зрящее, удивишася,/ како покры в церкви молящияся люди.

Ангели, окружающие Деву, удивишася,/ како омофором во Влахерне покры благоверныя люди.

Ангели, с лики святых предстоящее Деве, удивишася,/ како молящеся с ними прилежно о мире.

Ангели Богородицу песньми величают,/ како присно покрывает с верою к Ней прибегающих.

Ангели и вси святии Тя, Богомати, славословят,/ како покрываеши от зол имя Твое призывающих.

Ангели и человецы Покров чтут Владычицы,/ заступает бо всегда требующих Ея помощи.

С Небесными, земнии, Тя, Госпоже, воспеваем,/ покрываеши бо от бед на Тя уповающих.

Величай, душе моя,/ пречистый Покров Божия Матере.

Величай, душе моя,/ Божественный Покров Богоблагодатныя Приснодевы.

Величай, душе моя,/ державный Покров Преславныя Владычицы.

Величай, душе моя,/ необоримый Покров Небесе и земли Царицы.

Величай, душе моя,/ Покров святый Присноблаженныя Богоневесты.

Величай, душе моя,/ Благословенную в женах, Пресвятыя Троицы светоносное селение.

Величай, душе моя,/ Честнейшую горних воинств Деву Пречистую Богородицу.

Инны:

Величай, душе моя,/ честный Покров Девы Богородицы.

Величай, душе моя,/ ко Христу Молебницу за мир, Богородицу Деву Марию.

Введе́нию пресвяты́я Богоро́дицы:

А́нгели, вхожде́ние Пречи́стыя зря́ще, удиви́шася, ка́ко Де́ва вни́де во Свята́я Святы́х.

Посе́м ирмо́с: Я́ко одушевле́нному Бо́жию Киво́ту, да ника́коже ко́снется рука́ скве́рных, устне́ же ве́рных Богоро́дице немо́лчно, гла́с А́нгела воспева́юще, с ра́достию да вопию́т: и́стинно вы́шши все́х еси́ Де́во Чи́стая.

Та́же вторы́й ли́к пое́т то́йже припе́в и ирмо́с.

Про́чих же ше́сть припе́вов на ки́йждо тропа́рь по еди́ножды:

А́нгели вхожде́ние Всечи́стыя зря́ще, удиви́шася: ка́ко со сла́вою вни́де во Свята́я Святы́х.

А́нгели вхожде́ние Де́вы зря́ще, удиви́шася, ка́ко пресла́вно вни́де во Свята́я Святы́х.

А́нгели и челове́цы, Де́вы вхожде́ние почти́м: я́ко со сла́вою вни́де во Свята́я Святы́х.

А́нгели вхожде́ние Де́вы зря́ще, удиви́шася, ка́ко Богоуго́дне вни́де во Свята́я Святы́х.

А́нгели взыгра́йте со святы́ми, де́вы сликовству́йте: и́бо Богоотрокови́ца вни́де во Свята́я Святы́х.

А́нгели и челове́цы Де́ву пе́сньми возвели́чим: боголе́пно бо вни́де во Свята́я Святы́х.

Та́же пе́рвый ли́к пое́т втора́го кано́на припе́в:

Велича́й, душе́ моя́, приведе́нную во хра́м Госпо́день, и благослове́нную рука́ми иере́евыми.

Посе́м ирмо́с: Светоно́сный о́блак, во́ньже все́х Влады́ка, я́ко до́ждь с небесе́ на руно́ сни́де, и воплоти́ся на́с ра́ди, бы́в челове́к, безнача́льный, велича́ем вси́ я́ко Ма́терь Бо́га на́шего Чи́стую.

И вторы́й ли́к пое́т то́йже припе́в и ирмо́с.

И на ки́йждо тропа́рь пою́т то́йже припе́в.

Вме́сто же, Сла́ва:

Велича́й, душе́ моя́, триипоста́снаго и неразде́льнаго Божества́ держа́ву.

Вме́сто, И ны́не:

Велича́й, душе́ моя́, честне́йшую и сла́внейшую го́рних во́инств, Де́ву пречи́стую Богоро́дицу.

Та́же о́ба ли́ка, соше́дшеся вку́пе, пою́т припе́в пе́рваго кано́на:

А́нгели, вхожде́ние пречи́стыя зря́ще, удиви́шася, ка́ко Де́ва вни́де во Свята́я Святы́х.

И ирмо́с: Та́инство стра́нное ви́жу и пресла́вное: не́бо, верте́п: Престо́л херуви́мский, Де́ву: я́сли, вмести́лище, в ни́хже возлеже́ невмести́мый Христо́с бо́г: его́же воспева́юще велича́ем.

На рождество́ Христо́во:

Велича́й, душе́ моя́, честне́йшую и сла́внейшую го́рних во́инств, Де́ву Пречи́стую Богоро́дицу.

Посе́м ирмо́с: Та́инство стра́нное ви́жу и пресла́вное: не́бо, верте́п: Престо́л херуви́мский, Де́ву: я́сли, вмести́лище, в ни́хже возлеже́ невмести́мый Христо́с Бо́г: Его́же воспева́юще велича́ем.

Та́же вторы́й ли́к пое́т то́йже припе́в и ирмо́с.

И про́чих ше́сть припе́вов припева́ют на ки́йждо тропа́рь по еди́ножды:

Велича́й, душе́ моя́, от Де́вы Бо́га пло́тию ро́ждшагося.

Велича́й, душе́ моя́, в верте́пе ро́ждшагося Царя́.

Велича́й, душе́ моя́, от волхво́в Бо́га покланя́емаго.

Велича́й, душе́ моя́, от звезды́ волхво́м возвеще́ннаго.

Велича́й, душе́ моя́, чи́стую Де́ву, и еди́ну Богоро́дицу, ро́ждшую Христа́ Царя́.

Волсви́ и па́стырие приидо́ша поклони́тися Христу́, ро́ждшемуся во Вифлее́ме гра́де.

Та́же пе́рвый ли́к пое́т втора́го кано́на припе́в:

Дне́сь Де́ва ражда́ет Влады́ку вну́трь верте́па.

Посе́м ирмо́с: Люби́ти у́бо на́м, я́ко безбе́дное стра́хом, удо́бее молча́ние, любо́вию же Де́во пе́сни тка́ти спротяже́нно сложе́нныя, неудо́бно е́сть: но и Ма́ти си́лу, ели́ко е́сть произволе́ние, да́ждь.

Вторы́й же ли́к пое́т припе́в:

Дне́сь Влады́ка ражда́ется я́ко Младе́нец, от Ма́тере Де́вы.

И ирмо́с то́йже.

И про́чих ше́сть припе́вов, на ки́йждо тропа́рь по еди́ножды:

Дне́сь па́стырие ви́дят Спа́са пелена́ми обви́та, и лежа́ща во я́слех.

Дне́сь Влады́ка ру́бищем пелена́ется, неося́зный я́ко Младе́нец.

Дне́сь вся́ка тва́рь весели́тся и ра́дуется, я́ко Христо́с роди́ся от Де́вы отрокови́цы.

Небе́сныя си́лы ро́ждшагося спа́са Го́спода и Влады́ку возвеща́ют ми́ру.

Вме́сто, Сла́ва:

Велича́й, душе́ моя́, Триипоста́снаго и Неразде́льнаго Божества́ держа́ву.

Вме́сто же, И ны́не:

Велича́й, душе́ моя́, изба́вльшую на́с от кля́твы.

Та́же о́ба ли́ка, соше́дшеся вку́пе, пою́т пе́рвый припе́в пра́здника.

И ирмо́с: Та́инство стра́нное ви́жу и пресла́вное: не́бо, верте́п: Престо́л херуви́мский, Де́ву: я́сли, вмести́лище, в ни́хже возлеже́ невмести́мый Христо́с Бо́г: Его́же воспева́юще велича́ем.

Посе́м втора́го кано́на припе́в.

И ирмо́с: Люби́ти у́бо на́м, я́ко безбе́дное стра́хом, удо́бее молча́ние, любо́вию же Де́во пе́сни тка́ти спротяже́нно сложе́нныя, неудо́бно е́сть: но и Ма́ти си́лу, ели́ко е́сть произволе́ние, да́ждь. И покло́н.

Обре́занию Христа́ Бо́га на́шего:

Месяца января в 1-й день

Велича́й, душе́ моя́, по зако́ну пло́тию обре́завшагося Го́спода.

Посе́м ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго из боку́ деви́чу, неизрече́нно воплоти́вшая, Благослове́нная Всечи́стая, Тя́ Богоро́дице велича́ем.

Та́же вторы́й ли́к пое́т то́йже припе́в и ирмо́с.

Про́чыя же три́ припева́ем к тропаре́м (еди́н два́жды):

Велича́й, душе́ моя́, во осмы́й де́нь обре́зание прие́млюща.

Дне́сь Влады́ка обре́зуется пло́тию я́ко младе́нец, исполня́я зако́н.

Дне́сь Влады́ка пло́тию обре́зася, Иису́с нарече́ся.

Егда́ же дости́гнем до кано́на вели́каго васи́лиа, пое́м припе́вы Васи́лию 4 (три́ по два́жды):

Велича́й, душе́ моя́, во иера́рсех Васи́лиа Вели́каго.

Велича́й, душе́ моя́, вселе́нныя пресве́тлаго свети́льника.

Велича́й, душе́ моя́, от Кесари́и Васи́лиа Вели́каго.

Вме́сто, Сла́ва:

Велича́й, душе́ моя́, украси́вшаго Христо́ву це́рковь.

Вме́сто же, И ны́не, пое́м припе́в Богоро́дице:

Велича́й, душе́ моя́, честне́йшую небе́сных во́инств, Де́ву пречи́стую Богоро́дицу.

Та́же о́ба ли́ка, соше́дшеся вку́пе, пою́т пе́рвый припе́в пра́здника.

И ирмо́с: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти тя́, Богоро́дице: оба́че блага́я су́щи, ве́ру приими́, и́бо любо́вь ве́си Боже́ственную на́шу. Ты́ бо Христиа́н еси́ предста́тельница, тя́ велича́ем.

Посе́м припе́в Богоро́дице.

И ирмо́с: О па́че ума́ рождества́ Твоего́ чуде́с, Неве́сто Всечи́стая, Ма́ти Благослове́нная, Е́юже получи́вше всесоверше́нное спасе́ние, досто́йно хва́лим я́ко благоде́теля, да́р нося́ще пе́снь благодаре́ния. И покло́н.

На Богоявле́ние Госпо́дне:

Велича́й, душе́ моя́, честне́йшую го́рних во́инств, Де́ву пречи́стую Богоро́дицу.

Посе́м ирмо́с: Недоуме́ет вся́к язы́к благохвали́ти по достоя́нию, изъумева́ет же у́м и преми́рный пе́ти тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу. Ты́ бо Христиа́н еси́ предста́тельница, Тя́ велича́ем.

Та́же вторы́й ли́к пое́т то́йже припе́в и ирмо́с.

И про́чих ше́сть припе́вов припева́ют на ки́йждо тропа́рь по еди́ножды:

Велича́й, душе́ моя́, от Предте́чи креще́ния прося́ща.

Велича́й, душе́ моя́, во Иорда́не прише́дшаго крести́тися.

Велича́й, душе́ моя́, от Оте́ческаго гла́са свиде́тельствованна.

Велича́й, душе́ моя́, Еди́наго от Тро́ицы, прекло́ньшаго вы́ю, и креще́ние прие́мша.

Проро́че, прииди́ ко мне́, простри́ ру́ку, и крести́ мя ско́ро.

Проро́че, оста́ви ны́не, и крести́ мя хотя́ща: испо́лнити бо приидо́х вся́ку пра́вду.

Та́же пе́рвый ли́к пое́т втора́го кано́на припе́в:

Дне́сь Влады́ка преклоня́ет вы́ю под ру́ку предте́чеву.

И ирмо́с: О па́че ума́ рождества́ твоего́ чуде́с, неве́сто всечи́стая, ма́ти благослове́нная, е́юже получи́вше всесоверше́нное спасе́ние, досто́йно хва́лим я́ко благоде́теля, да́р нося́ще пе́снь благодаре́ния.

Та́же вторы́й ли́к пое́т то́йже припе́в и ирмо́с.

И про́чих пя́ть припе́вов: (еди́н два́жды).

Дне́сь Иоа́нн креща́ет Влады́ку во струя́х Иорда́нских.

Дне́сь Влады́ка вода́ми погреба́ет челове́ческий гре́х.

Дне́сь Влады́ка свы́ше свиде́тельствуется, Сы́н возлю́бленный.

Дне́сь Влады́ка прии́де освяти́ти естество́ водно́е.

Дне́сь Влады́ка креще́ние прие́млет руко́ю Предте́чевою.

Та́же о́ба ли́ка, соше́дшеся вку́пе, пою́т пе́рвый припе́в пра́здника.

И ирмо́с: Недоуме́ет вся́к язы́к благохвали́ти по достоя́нию, изъумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу. Ты́ бо Христиа́н еси́ предста́тельница, Тя́ велича́ем.

Посе́м втора́го кано́на припе́в.

И ирмо́с: О па́че ума́ рождества́ Твоего́ чуде́с, Неве́сто Всечи́стая, Ма́ти Благослове́нная, Е́юже получи́вше всесоверше́нное спасе́ние, досто́йно хва́лим я́ко благоде́теля, да́р нося́ще пе́снь благодаре́ния. И покло́н.

К тропаре́м предте́чевым припе́в:

Месяца января в 7-й день

Велича́й, душе́ моя́, во проро́цех вели́каго Предте́чу.

К Богоро́дичну же припе́в пра́здника пе́рвый. И посе́м на схо́де пое́м о́ба ли́ка вку́пе припе́в пра́здника.

Та́же катава́сиа: Недоуме́ет вся́к язы́к благохвали́ти по достоя́нию, изъумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу. Ты́ бо Христиа́н еси́ предста́тельница, Тя́ велича́ем.

Та́же припе́в Богоро́дице.

И ирмо́с: О па́че ума́ рождества́ Твоего́ чуде́с, Неве́сто Всечи́стая, Ма́ти Благослове́нная, Е́юже получи́вше всесоверше́нное спасе́ние, досто́йно хва́лим я́ко благоде́теля, да́р нося́ще пе́снь благодаре́ния. И покло́н.

Трие́м святи́телем: Васи́лию Вели́кому,

Григо́рию Богосло́ву, и Иоа́нну Златоу́сту.

Ме́сяца того́же в 30-й де́нь.

На 9-й пе́сни припе́в:

Велича́й, душе́ моя́, честне́йшую небе́сных во́инств, Де́ву пречи́стую Богоро́дицу.

Та́же ирмо́с. Посе́м то́йже припе́в пое́м и к про́чым Богоро́дичным тропаре́м.

К кано́ном же святы́х, на ки́йждо тропа́рь пое́м припе́вы си́и:

Велича́й, душе́ моя́, во иера́рсех свети́ла три́ вели́кая.

Велича́й, душе́ моя́, трисия́тельныя Христо́вы Це́ркве.

Велича́й, душе́ моя́, просвеща́ющыя Христо́ву Це́рковь.

Велича́й, душе́ моя́, Честне́йшую Небе́сных во́инств, Де́ву Пречи́стую Богоро́дицу.

Велича́й, душе́ моя́, Пресвяты́я Тро́ицы три́ па́стыри.

Велича́й, душе́ моя́, от Трисо́лнечнаго Свети́ла три́ вели́кая.

Велича́й, душе́ моя́, Триипоста́снаго и Неразде́льнаго Божества́ держа́ву.

Велича́й, душе́ моя́, Честне́йшую Небе́сных во́инств, Де́ву Пречи́стую Богоро́дицу.

Катава́сиа: В зако́не се́ни и писа́ний, о́браз ви́дим ве́рнии: вся́к му́жеский по́л ложесна́ разверза́я, свя́т Бо́гу. Те́м перворожде́нное Сло́во Отца́ Безнача́льна, Сы́на Первородя́щася Ма́терию неискусому́жно, велича́ем.

На сре́тение Госпо́дне:

Богоро́дице Де́во, упова́ние Христиа́ном, покры́й, соблюди́ и спаси́ на Тя́ упова́ющих.

Богоро́дице Де́во, ми́ру блага́я Помо́щнице, покры́й и соблюди́ от вся́кия ну́жды и печа́ли.

Богоно́се Симео́не, прииди́, подъими́ Христа́, Его́же роди́ Де́ва Чи́стая Мари́а.

Объе́млет рука́ми ста́рец Симео́н соде́теля зако́на, и Влады́ку вся́ческих.

Не ста́рец мене́ держи́т, но А́з держу́ его́: то́й бо от Мене́ отпуще́ния про́сит.

Клеще́ та́инственная, ка́ко У́гль но́сиши? ка́ко пита́еши Пита́ющаго вся́?

О дщи́ Фану́илева! Прииди́, ста́ни с на́ми, и благодари́ Христа́ Спа́са Сы́на Бо́жия.

А́нна целому́дренная провеща́ет стра́шная, испове́дающи Христа́, Творца́ Не́бу и земли́.

Непостижи́мо е́сть соде́янное о Тебе́ А́нгелом и челове́ком, Ма́ти Де́во Чи́стая.

Чи́стая Голуби́ца, Нескве́рная А́гница, А́гнца и Па́стыря прино́сит в це́рковь.

О Христе́ все́х Царю́! Побе́ды на враги́ ве́рному Твоему́ рабу́ импера́тору на́шему да́руй.

О Христе́, все́х Царю́! Пода́ждь ми́ сле́зы теплы́, да пла́чу мою́ ду́шу, ю́же зле́ погуби́х.

Вме́сто, Сла́ва:

Трисия́тельное, и Триипоста́сное Божество́, благоче́стно да похва́лим.

Вме́сто, И ны́не:

О Деви́це Мари́е просвети́ мою́ ду́шу, помраче́нную лю́те жите́йскими сластьми́.

Ве́домо да бу́дет, я́ко два́ су́щыя припе́вы в нача́ле припева́ем ко ирмосу́. Та́же к коему́ждо тропарю́ припева́ем по 4 припе́вы. И по соверше́нии 14 припе́вов с тропари́, к катава́сии пое́м о́ба ли́ка вку́пе припе́в пе́рвый:

Богоро́дице Де́во, упова́ние Христиа́ном, покры́й, соблюди́ и спаси́ на Тя́ упова́ющих.

На Благове́щение Пресвяты́я Богоро́дицы:

Благовеству́й земле́ ра́дость ве́лию, хвали́те Небеса́ Бо́жию сла́ву.

Та́же ирмо́с: Я́ко одушевле́нному Бо́жию Киво́ту, да ника́коже ко́снется рука́ скве́рных, устне́ же ве́рных Богоро́дице немо́лчно, гла́с А́нгела воспева́юще, с ра́достию да вопию́т: ра́дуйся Благода́тная, Госпо́дь с Тобо́ю.

Подо́бне и 2-й ли́к припе́в и ирмо́с.

И к про́чым тропаре́м пра́здника то́йже припе́в. у трипе́снца же к тропаре́м припева́ем:

Сла́ва Тебе́ Бо́же на́ш, сла́ва Тебе́.

На вознесе́ние Госпо́дне:

Велича́й душе́ моя́, возне́сшагося от земли́ на Не́бо, Христа́ Жизнода́вца.

Та́же ирмо́с: Тя́ па́че ума́ и словесе́ Ма́терь Бо́жию, в ле́то безле́тнаго неизрече́нно ро́ждшую, ве́рнии единому́дренно велича́ем.

И вторы́й ли́к пое́т то́йже припе́в и ирмо́с.

И на ки́йждо тропа́рь пою́т то́йже припе́в шестью́.

Та́же пое́м и втора́го кано́на припе́в:

А́нгели восхожде́ние Влады́ки зря́ще, ужаса́хуся, ка́ко со сла́вою взя́тся от земли́ на го́рняя.

И ирмо́с: Вся́к земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся Всеблаже́нная Богоро́дице, Чи́стая Присноде́во.

И вторы́й ли́к пое́т то́йже припе́в и ирмо́с. И на ки́йждо тропа́рь пою́т то́йже припе́в четы́режды.

Катава́сиа: Ра́дуйся Цари́це, Матероде́вственная сла́во: вся́ка бо удобообраща́тельная благоглаго́ливая уста́ вити́йствовати не мо́гут, Тебе́ пе́ти досто́йно, изъумева́ет же у́м вся́к Твое́ рождество́ разуме́ти. Те́мже Тя́ согла́сно сла́вим. И покло́н.

На преображе́ние Госпо́дне:

Велича́й душе́ моя́, на Фаво́ре преобрази́вшагося Го́спода.

Та́же ирмо́с: Рождество́ Твое́ нетле́нно яви́ся: Бо́г из боку́ Твое́ю про́йде, я́ко плотоно́сец яви́ся на земли́, и с челове́ки поживе́. Тя́ Богоро́дице те́м вси́ велича́ем.

Посе́м вторы́й ли́к пое́т то́йже припе́в и ирмо́с.

И ко второ́му кано́ну припева́ют то́йже припе́в.

Катава́сиа: Та́ин еси́ Богоро́дице ра́й, невозде́ланно возрасти́вший Христа́: и́мже Кре́стное Живоно́сное на земли́ насади́ся дре́во. Те́м ны́не возноси́му, покланя́ющеся ему́, Тя́ велича́ем.

На Успе́ние пресвяты́я Богоро́дицы:

Ро́ди вси́ блажи́м Тя́ еди́ну Богоро́дицу.

Или́: А́нгели успе́ние Пречи́стыя ви́девше, удиви́шася, ка́ко Де́ва восхо́дит от земли́ на не́бо.

Та́же ирмо́с: Побежда́ются естества́ уста́вы, в тебе́ Де́во Чи́стая: Де́вствует бо рождество́, и живо́т предъобруча́ет сме́рть: по рождестве́ Де́ва, и по сме́рти жива́, спаса́еши при́сно Богоро́дице, насле́дие Твое́.

И вторы́й ли́к пое́т то́йже припе́в и ирмо́с.

И на ки́йждо тропа́рь пою́т то́йже припе́в по еди́ножды.

Посе́м пе́рвый ли́к пое́т втора́го кано́на припе́в:

Велича́й душе́ моя́, от земли́ на Не́бо честно́е преставле́ние Бо́жия Ма́тере.

И ирмо́с: Вся́к земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное преставле́ние Богома́тере, и да вопие́т: ра́дуйся Всеблаже́нная Богоро́дице, Чи́стая Присноде́во.

И вторы́й ли́к пое́т то́йже припе́в и ирмо́с.

И на ки́йждо тропа́рь пою́т то́йже припе́в по еди́ножды.

Та́же о́ба ли́ка соше́дшеся вку́пе, пою́т пе́рваго кано́на припе́в.

И ирмо́с: Побежда́ются естества́ уста́вы, в тебе́ Де́во чи́стая: Де́вствует бо рождество́, и живо́т предъобруча́ет сме́рть: по рождестве́ Де́ва, и по сме́рти жива́, спаса́еши при́сно Богоро́дице, насле́дие твое́.

И втора́го кано́на припе́в.

И ирмо́с: Вся́к земноро́дный да взыгра́ется Ду́хом просвеща́емь, да торжеству́ет же безпло́тных умо́в естество́, почита́ющее свяще́нное преставле́ние Богома́тере, и да вопие́т: ра́дуйся Всеблаже́нная Богоро́дице, Чи́стая Присноде́во. И покло́н.

Богородичны всего лета

Богородичны воскресны на осмь гласов

Глас 1

Богородичен догматик:

Всеми́рную сла́ву, / от челове́к прозя́бшую / и Влады́ку ро́ждшую, / Небе́сную дверь воспои́м, Мари́ю Де́ву, / Безпло́тных песнь и ве́рных удобре́ние: / Сия́ бо яви́ся не́бо и храм Божества́, / Сия́ прегражде́ние вражды́ разруши́вши, / мир введе́ и Ца́рствие отве́рзе; / Сию́ у́бо иму́ще ве́ры утвержде́ние, / Побо́рника и́мамы из Нея́ ро́ждшагося Го́спода. / Дерза́йте у́бо, дерза́йте, лю́дие Бо́жии, / и́бо Той победи́т враги́, / я́ко Всеси́лен.

На стиховне Богородичен:

Се испо́лнися Иса́иино прорече́ние: / Де́ва бо родила́ еси́ / и по рождестве́, я́ко пре́жде рождества́, пребыла́ еси́, / Бог бо бе Рожде́йся, / те́мже и естества́ новопресече́. / Но, о Богома́ти, / моле́ния Твои́х рабо́в, в Твое́м хра́ме приноси́мая Тебе́, не пре́зри, / но я́ко Благоутро́бнаго Твои́ма рука́ма нося́щи, / на Твоя́ рабы́ умилосе́рдися / и моли́ спасти́ся душа́м на́шим.

Глас 2

Богородичен догматик:

Пре́йде сень зако́нная, / благода́ти прише́дши: / я́ко же бо купина́ не сгара́ше, опаля́ема, / та́ко Де́ва родила́ еси́ / и Де́ва пребыла́ еси́. / Вме́сто столпа́ о́гнен наго / пра́ведное возсия́ Со́лнце, / вме́сто Моисе́я / Христо́с, спасе́ние душ на́ших.

На стиховне Богородичен:

О чудесе́ но́ваго, всех дре́вних чуде́с! / Кто бо позна́ Ма́терь, без му́жа ро́ждшую / и на руку́ нося́щую всю тварь Содержа́щаго; / Бо́жие есть изволе́ние Ро́ждшееся. / Его́же я́ко Младе́нца Пречи́стая, / Твои́ма рука́ма носи́вшая, / и, ма́терне дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Глас 3

Богородичен догматик:

Ка́ко не диви́мся / Богому́жному Рождеству́ Твоему́, Пречестна́я, / искуше́ния бо му́жескаго не прие́мши, Всенепоро́чная, / родила́ еси́ без отца́ Сы́на пло́тию, / пре́жде век от Отца́ рожде́ннаго без ма́тере, / ника́коже претерпе́вшаго измене́ния, / или́ смеше́ния, или́ разделе́ния, / но обою́ существу́ сво́йство це́ло сохра́ншаго. / Те́мже, Ма́ти Де́во Влады́чице, / Того́ моли́ спасти́ся душа́м, / правосла́вно Богоро́дицу испове́дающих Тя.

На стиховне Богородичен:

Без се́мене от Боже́ственнаго Ду́ха / во́лею же О́тчею зачала́ еси́ Сы́на Бо́жия, / от Отца́ без ма́тере пре́жде век су́ща, / нас же ра́ди, из Тебе́ без отца́ бы́вша, пло́тию родила́ еси́ / и Младе́нца млеко́м пита́ла еси́. / Те́мже не преста́й моли́ти / изба́витися от бед душа́м на́шим.

Глас 4

Богородичен догматик:

И́же Тебе́ ра́ди Богооте́ц проро́к Дави́д / пе́сненно о Тебе́ провозгласи́ / вели́чия Тебе́ Сотво́ршему, / предста́ Цари́ца одесну́ю Тебе́, / Тя бо Ма́терь, Хода́таицу Живота́ показа́, / без отца́ из Тебе́ вочелове́читися благоволи́вый Бог, / да Свой па́ки обнови́т о́браз, истле́вший страстьми́, / и заблу́ждшее горохи́щное обре́т овча́, / на ра́мо восприи́м, ко Отцу́ принесе́т / и Своему́ хоте́нию / с Небе́сными совокупи́т Си́ла ми, / и спасе́т, Богоро́дице, мир / Христо́с, име́яй ве́лию и бога́тую ми́лость.

На стиховне Богородичен:

При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи, / Тя бо Еди́ну, тве́рдое и изве́стное утвержде́ние, и́мамы, / и Твое́ предста́тельство стяжа́хом, / да не постыди́мся, Влады́чице, Тя призыва́ющии, / потщи́ся на умоле́ние Тебе́ ве́рно вопию́щих: / ра́дуйся, Влады́чице, / всех по́моще, ра́досте и покро́ве, / и спасе́ние душ на́ших.

Глас 5

Богородичен догматик:

В Чермне́м мо́ри / Неискусобра́чныя Неве́сты о́браз написа́ся иногда́: / та́мо Моисе́й, раздели́тель воды́, / зде же Гаврии́л, служи́тель чудесе́; / тогда́ глубину́ ше́ствова немо́кренно Изра́иль, / ны́не же Христа́ роди́ безсе́менно Де́ва; / мо́ре по проше́ствии Изра́илеве пребы́сть непрохо́дно, / Непоро́чная по рождестве́ Емману́илеве пребы́сть нетле́нна. / Сый и пре́жде Сый, / явле́йся я́ко Челове́к, / Бо́же, поми́луй нас.

На стиховне Богородичен:

Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.

Глас 6

Богородичен догматик:

Кто Тебе́ не ублажи́т, Пресвята́я Де́во? / кто ли не воспое́т Твоего́ Пречи́стаго Рождества́? / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щся: / естество́м Бог Сый / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

На стиховне Богородичен:

Творе́ц и Изба́витель мой, Пречи́стая, / Христо́с Госпо́дь, из Твои́х ложе́сн проше́д, / в мя оболки́йся, /пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве вои́стинну / во пие́м немо́лчно: / ра́дуйся, А́нгельски, ра́дуйся, Влады́чице, / предста́тельство, и покро́ве, / и спасе́ние душ на́ших.

Глас 7

Богородичен догматик:

Ма́ти у́бо позна́лася еси́, / па́че естества́, Богоро́дице, / пребыла́ же еси́ Де́ва, / па́че сло́ва и ра́зума, / и чудесе́ Рождества́ Твоего́ сказа́ти язы́к не мо́жет. / Пресла́вну бо су́щу зача́тию, Чи́стая, / непости́жен есть о́браз рожде́ния, / иде́же бо хо́щет Бог, побежда́ется естества́ чин. / Те́мже, Тя вси Ма́терь Бо́жию ве́дуще, / мо́лим ти ся приле́жно: / моли́ спасти́ся душа́м на́шим.

На стиховне Богородичен:

Под кров Твой, Влады́чице, / вси земноро́днии прибега́юще, вопие́м Ти: / Богоро́дице, упова́ние на́ше, / изба́ви ны от безме́рных прегреше́ний / и спаси́ ду́ши на́ша.

Глас 8

Богородичен догматик:

Царь Небе́сный / за человеколю́бие на земли́ яви́ся / и с челове́ки поживе́, / от Де́вы бо Чи́стыя плоть прие́мый / и из Нея́ проше́дый с восприя́тием, / Еди́н есть Сын, сугу́б естество́м, / но не Ипоста́сию. / Те́мже, соверше́нна Того́ Бо́га / и соверше́нна Челове́ка вои́стинну пропове́дающе, / испове́дуем Христа́ Бо́га на́шего: / Его́же моли́, Ма́ти Безневе́стная, / поми́ловатися душа́м на́шим.

На стиховне Богородичен:

Безневе́стная Де́во, / я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

Богородичны осми гласов поемыя, егда есть Сла́ва: святому в Минеи

И ны́не: по гласу сия

Глас 1

В неделю вечера Богородичен:

Небе́сных чино́в ра́дование, / на земли́ челове́ков кре́пкое предста́тельство, / Пречи́стая Де́во, / спаси́ ны, и́же к Тебе́ прибега́ющия, / я́ко на Тя упова́ние / по Бо́зе, Богоро́дице, возложи́хом.

В понедельник на утрени Богородичен:

Святе́йшая святы́х всех Сил, / честне́йшая всея́ тва́ри, / Богоро́дице, Влады́чице ми́ра, / спаси́ ны, Спа́са ро́ждшая, / от прегреше́ний тмори́чных35 и бед / я́ко Блага́я моли́твами Твои́ми.

В понедельник вечера Богородичен:

Де́во Всепе́тая, / ю́же в Тебе́ та́йну Моисе́й проро́ческима ви́де очи́ма, / купину́ горя́щу и неопаля́ему, / Божества́ бо Огнь утро́бу Твою́, Чи́стая, не опали́. / Те́мже мо́лим Тя я́ко Ма́терь Бо́га на́шего, / мир испроси́ти ми́рови и ве́лию ми́лость.

Во вторник утра Богородичен:

Блудни́цу, и блу́днаго аз, и разбо́йника победи́х, / и мытаря́ прегреше́нии премину́х, и ниневи́тяны. / Увы́ мне, что бу́ду? / ка́ко убе́гну му́ки, аз окая́нный? / Чи́стая, припа́даю Ти, / уще́дри мя ми́лостию Твое́ю, / я́коже о́ныя Сын Твой спасл есть.

Во вторник вечера на Го́споди воззва́х: Крестобогородичен: Подобен: Небе́сных чино́в:

Твоего́ Сы́на и Влады́ку / дре́вле я́ко ви́дела еси́ / на Кресте́ ру́це распросте́рша / и копие́м ре́бра ископова́ема, / Ма́ти Чи́стая, рыда́ющи, взыва́ла еси́: / увы́ Мне, ка́ко стра́ждеши, / стра́сти челове́ков отъе́мляй, / Человеколю́бче.

Во вторник вечера на стиховне Крестобогородичен:

Подобен: Небе́сных чино́в:

Воздви́жена я́ко ви́де на Кресте́ А́гнца, / Непоро́чная Де́ва пла́чущи вопия́ше: / Сла́дкое Мое́ Ча́до, / что но́вое и пресла́вное виде́ние? / Ка́ко содержа́й вся́ческая го́рстию, / на Дре́ве пригвожда́ешися пло́тию?

В среду утра на стиховне Крестобогородичен:

У Креста́ Твоего́ предстоя́щи, Сло́ве Бо́жий, / А́гница и Непоро́чная Ма́ти Твоя́, / рыда́ющи вопия́ше: / увы́ Мне, Сы́не, ка́ко умира́еши на Кресте́? / Увы́ Мне, Све́те Мой сла́дкий, / где Твоея́ добро́ты ны́не за́йде зрак, / красне́йший па́че всех челове́к?

В среду вечера Богородичен:

Ра́дуйся, ра́досте пра́дедов, / апо́столов и му́чеников весе́лие, / и покро́в нас, Де́во, Твои́х рабо́в.

В четверток утра Богородичен:

Ра́дуйся, Богоро́дице Де́во, / ра́дуйся, похвало́ всея́ вселе́нныя, / ра́дуйся, Пречи́стая Ма́ти Бо́жия, Благослове́нная.

В четверток вечера на Го́споди воззва́х: Крестобогородичен:

Вкуше́ние дре́внее Ада́мово го́рькое, / вкуси́вый же́лчи и о́цта, / услади́л еси́, Ча́до Сладча́йшее, / возне́сся на Дре́ве: / те́мже Мя, я́ко Судия́ Пра́ведный, / враче́бною стра́стию Твое́ю услади́, Влады́ко, / воскре́с я́ко все си́лен, / Де́ва глаго́лаше слезя́щи.

В четверток вечера на стиховне Крестобогородичен:

Заколе́ние Твое́ непра́ведное, Христе́, / Де́ва зря́щи, пла́чущи, вопия́ше Ти: / Ча́до Сладча́йшее, / ка́ко без пра́вды стра́ждеши? / И ка́ко на Дре́ве ви́сиши, / И́же всю зе́млю пове́сивый на вода́х? / Не оста́ви Мене́ еди́ну, Благоде́телю Многоми́лостиве, / Ма́терь и Рабу́ Твою́, молю́ся.

В пяток утра на стиховне Крестобогородичен:

Подобен: Прехва́льнии му́ченицы:

А́гнца, А́гница и Всенепоро́чная Влады́чица, / на Кресте́ я́ко ви́девши / зра́ка не иму́ща, ни добро́ты, / увы́ Мне, пла́чущи глаго́лаше: / где добро́та Твоя́ за́йде, Сладча́йший, / где благоле́пие? / Где благода́ть сия́ющая о́браза Твоего́, / Сы́не Мой Любе́знейший?

В пяток вечера Богородичен:

Вои́стинну па́че ума́ / чу́дная Твоя́ вели́чия Рождества́ Твоего́, Богоневе́сто, / я́же пропове́даша проро́цы вси, / вся пресла́вная, / зача́тие и рождество́, Всепе́тая, недомы́сленно и несказа́нно, / и́мже мир спасл есть, я́ко Милосе́рд.

В субботу утра Богородичен:

Ра́дуйся, от нас Свята́я Богоро́дице Де́во, / чи́стый сосу́де всея́ вселе́нныя, / свеще́ неугаси́мая, вмести́лище Невмести́маго, / хра́ме необори́мый; / ра́дуйся, из Нея́же роди́ся А́гнец Бо́жий, / взе́мляй грехи́ всего́ ми́ра.

Глас 2

В неделю вечера Богородичен:

Ра́дуйся, Мари́е Богоро́дице, / хра́ме неразруши́мый, па́че же святы́й, / я́коже вопие́т проро́к: / свят храм Твой, ди́вен в пра́вде.

В понедельник утра Богородичен:

На Тя упова́ние, Богоро́дице, возложи́хом, / ча́яния да не отпаде́м, / спаси́ нас от бед, Помо́щнице недоуме́емым, / и сопроти́вных сове́ты разори́: / Ты бо еси́ на́ше спасе́ние, / Благослове́нная.

В понедельник вечера Богородичен:

Непроходи́мая врата́, та́йно запеча́тствованная, / Благослове́нная Богоро́дице Де́во, / приими́ моле́ния на́ша / и принеси́ Твоему́ Сы́ну и Бо́гу, / да спасе́т Тобо́ю ду́ши на́ша.

Во вторник утра Богородичен:

Ра́дуйся, Мари́е Богоро́дице, / хра́ме неразруши́мый, па́че же святы́й, / я́коже вопие́т проро́к: / свят храм Твой, ди́вен в пра́вде.

Во вторник вечера на Го́споди воззва́х: Крестобогородичен:

За́йде свети́лов заря́, / у́мным све́том побе́ждшися, обна́жшимся на Кресте́: / побежда́ется у́бо при́сно ху́ждшее бо́льшим, / и лу́чшему ме́ньшее дае́т ме́сто, / Богородичны стихирные237 ка́ко у́бо не подоба́ше светя́щу Христу́, / скры́тися заре́ чу́вственней? / Досто́йным глаго́лаше, Тя зря́щи Пречи́стая, / Свети́лом Све́та.

Во вторник вечера на стиховне Крестобогородичен:

Подобен: Егда́ от дре́ва:

Боле́зни претерпе́вши мно́гия / в распя́тии Сы́на и Бо́га Твоего́, Пречи́стая, / стеня́ше, слезя́щи и восклица́ющи: / увы́ Мне, Ча́до Сла́дкое, / без пра́вды ка́ко стра́ждеши, / хотя́ изба́вити я́же от Ада́ма земноро́дныя? / Те́мже, Пречи́стая Де́во, / Тебе́ мо́лим ве́рою: / ми́лостива нам Того́ соде́лай.

В среду утра на стиховне Крестобогородичен:

Подобен: Егда́ от дре́ва:

Грозд Всезре́лый, Чи́стая, / Его́же невозде́ланно во утро́бе носи́ла еси́, / на Дре́ве я́ко узре́ла еси́ Сего́ пове́шена, / рыда́ющи, восклица́ла еси́ и взыва́ла: / Ча́до, сла́дость иска́пай, / е́юже оты́мется пия́нство вся́кое страсте́й, Благода́телю, / Мене́ ра́ди, Тебе́ ро́ждшия, / Свои́м благоутро́бием / умоля́емь.

В среду вечера Богородичен:

Я́ко плодови́та ма́слина, / Де́ва израсти́ Тебе́, Плода́ Живо́тнаго, плодоноси́ти ми́рови / ве́лию и бога́тую ми́лость.

В четверток утра Богородичен:

Все упова́ние мое́ / на Тя возлага́ю, / Ма́ти Бо́жия, / сохрани́ мя под кро́вом Твои́м.

В четверток вечера на Го́споди воззва́х: Крестобогородичен:

Подобен: Егда́ от дре́ва:

Егда́ Нескве́рная А́гница ви́де Своего́ А́гнца, / на заколе́ние я́ко челове́ка во́лею влеко́ма, / пла́чущи глаго́лаше: / безча́дствовати Мя ны́не тщи́шися Христе́, ро́ждшую Тя. / Что сие́ сотвори́л еси́, / Изба́вителю вся́ческих? / Оба́че воспева́ю и сла́влю Твою́, / ю́же па́че ума́ и сло́ва, кра́йнюю бла́гость, / Человеколю́бче.

В четверток вечера на стиховне Крестобогородичен:

Подобен: Егда́ от дре́ва:

Егда́ Тя беззако́ннии лю́дие, Спа́се, Жизнь всех, / на Дре́во вознесо́ша, / тогда́ Чи́стая и Пренепоро́чная Ма́ти Твоя́ / предстоя́щи и рыда́ющи взыва́ше: / Ча́до Мое́ Сла́дкое, / Све́те Мои́ма очи́ма, / увы́ Мне, ка́ко посреде́ злоде́ю / на Кресте́ пригвозди́тися претерпе́л еси́, / И́же зе́млю пове́шей на вода́х ?

В пяток утра на стиховне Крестобогородичен:

Грозд Всезре́лый, Чи́стая, / Его́же невозде́ланно во утро́бе носи́ла еси́, / на Дре́ве я́ко узре́ла еси́ Сего́ пове́шена, / рыда́ющи, восклица́ла еси́ и взыва́ла: / Ча́до, сла́дость иска́пай, / е́юже оты́мется пия́нство вся́кое страсте́й, Благода́телю, / Мене́ ра́ди, Тебе́ ро́ждшия, / Свои́м благоутро́бием / умоля́емь.

В пяток вечера Богородичен:

Спаси́ от бед рабы́ Твоя́, Богоро́дице Де́во, / я́ко вси по Бо́зе к Тебе́ прибега́ем, / я́ко к неруши́мей стене́ и предста́тельству.

В субботу утра Богородичен:

Прииди́те, Ма́терь Све́та, пе́сньми немо́лчными зову́ще, / вси просла́вим, / Та бо роди́ Спасе́ние на́ше; / и ра́дуйся, принесе́м, я́ко Еди́ной, ро́ждшей всех Нача́льнейшаго, / И́же пре́жде век Бо́га; / ра́дуйся, Я́же Е́ву па́дшую па́ки назда́вшая; / ра́дуйся, Пречи́стая Де́во, Неискусобра́чная.

Глас 3

В неделю вечера Богородичен:

Богоро́дице, Предста́тельнице всех моля́щихся Тебе́, / Тобо́ю дерза́ем и Тобо́ю хва́лимся, / и к Тебе́ все упова́ние на́ше есть, / моли́ Ро́ждшагося из Тебе́ / за непотре́бныя рабы́ Твоя́.

В понедельник утра Богородичен:

Святопервочи́стая похвало́ су́щи Небе́сных чино́в, / апо́столов пе́ние / и проро́ков сбытие́, Влады́чице, / приими́ моли́твы на́ша.

В понедельник вечера Богородичен:

В жена́х Свята́я Богоро́дице, / Ма́ти Безневе́стная, / моли́, Его́же родила́ еси́, Царя́ и Бо́га: / да спасе́т нас я́ко Человеколю́бец.

Во вторник утра Богородичен:

Без се́мене зачала́ еси́ от Ду́ха Свята́го / и, славосло́вяще, воспева́ем Тя: / ра́дуйся, Пресвята́я Де́во.

Во вторник вечера на Го́споди воззва́х: Крестобогородичен:

Ору́жие се́рдце Твое́ про́йде, Пречи́стая, / егда́ Сы́на Твоего́ на Кресте́ ви́дела еси́, и вопия́ла еси́: / не безча́дну Мя покажи́, Сы́не Мой и Бо́же, / соблюды́й Мя по рождестве́ Де́ву.

Во вторник вечера на стиховне Крестобогородичен:

На Кресте́ Тя воздви́жена, Христе́ мой, / я́ко ви́де А́гница, Ро́ждшая Тя, и Непоро́чная, и Ма́ти Твоя́, / рыда́ше с пла́чем и вопия́ше: / не покажи́ Мя безча́дну, / Ю́же сохрани́л еси́ Чи́сту и по рождестве́.

В среду утра на стиховне Крестобогородичен:

Зря́щи Тя ви́сяща на Дре́ве Всенепоро́чная, Христе́ мой Преблаги́й, / рыда́ющи вопия́ше ма́терски: / Сы́не Мой Вселюбе́знейший, / ка́ко собо́р беззако́нный на Дре́ве Тя осуди́?

В среду вечера Богородичен:

Вельми́ согреша́юща мя, Отрокови́це, / исхити́ вели́кою Твое́ю моли́твою пла́мене ну́жднаго / и испра́ви, Чи́стая, Твои́ми мольба́ми, / ко спасе́нным стезя́м наставля́ющи мя / ма́терними Твои́ми моли́твами.

В четверток утра Богородичен:

Без се́мене зачала́ еси́ / от Ду́ха Свята́го, / и, славосло́вяще, воспева́ем Тя: / ра́дуйся, Пресвята́я Де́во.

В четверток вечера на Го́споди воззва́х: Крестобогородичен:

Мир поми́лован бысть, Сло́ве, распя́тием Твои́м, / тварь просвети́ся, язы́цы спасе́ние обрето́ша, Влады́ко, / вопия́ше Пречи́стая: / Аз же ны́не растерза́юся, / зря́щи Твою́ во́льную страсть.

В четверток вечера на стиховне Крестобогородичен:

Зря́щи Тя Всенепоро́чная воздви́жена на Дре́во, / Христе́ мой Преблаги́й, / пла́чущи вопия́ше ма́терски: / Сы́не Мой Вселюбе́зный! / Ка́ко сонм беззако́нный на Кресте́ Тя воздви́же?

В пяток утра на стиховне Крестобогородичен:

Зря́щи из Тебе́ Рожде́ннаго, Всенепоро́чная, / пове́шена на Дре́ве, / восклица́ше вопию́щи: / Сла́дкое Мое́ Ча́до, / где Твоя́ за́йде добро́та светоно́сная, / добро́ Сотвори́вшаго ро́ду челове́ческому?

В пяток вечера Богородичен:

В жена́х Свята́я Богоро́дице, / Ма́ти Безневе́стная, / моли́, Его́же родила́ еси́, Царя́ и Бо́га: / да спасе́т нас я́ко Человеколю́бец.

В субботу утра Богородичен:

Без се́мене зачала́ еси́ / от Ду́ха Свята́го, / и, славосло́вяще, воспева́ем Тя: / ра́дуйся, Пресвята́я Де́во.

Глас 4

В неделю вечера Богородичен:

Ра́дуйся, Све́та о́блаче; / ра́дуйся, све́щниче све́тлый; / ра́дуйся, ру́чко, в не́йже ма́нна; / ра́дуйся, же́зле Ааро́нов; / ра́дуйся, купино́ неопали́мая; / ра́дуйся, черто́же; ра́дуйся, престо́ле; / ра́дуйся, горо́ свята́я; / ра́дуйся, прибе́жище; / ра́дуйся, Боже́ственная трапе́зо; / ра́дуйся, две́ре та́йная; / ра́дуйся, всем ра́досте.

В понедельник утра Богородичен:

Богоро́дице, всех Цари́це, / правосла́вных похвало́, / ерети́чествующих шата́ния разори́ / и ли́ца их посрами́, / не кла́няющихся, ниже́ чту́щих, Пречи́стая, / честны́й Твой о́браз.

В понедельник вечера Богородичен:

Изба́ви нас от нужд на́ших, / Ма́ти Христа́ Бо́га, / ро́ждшая всех Творца́, / да вси зове́м Ти: / ра́дуйся, еди́но предста́тельство душ на́ших.

Во вторник утра Богородичен:

От всех бед рабы́ Твоя́ сохраня́й, / Благослове́нная Богоро́дице: / да Тя сла́вим, наде́жду душ на́ших.

Во вторник вечера на Го́споди воззва́х: Крестобогородичен:

Не рыда́й Мене́, Ма́ти, / зря́щи на Дре́ве пове́шена Твоего́ Сы́на и Бо́га, / на вода́х Пове́сившаго всю зе́млю неодержи́мо / и всю тварь Созда́вшаго; / и́бо воскресну́ и просла́влюся, / и а́дова ца́рствия сокрушу́ кре́постию, / и погублю́ того́ си́лу, / и свя́занныя изба́влю от злоде́йства его́, я́ко Благоутро́бен, / и Отцу́ Моему́ приведу́, я́ко Человеколю́бец.

Во вторник вечера на стиховне Крестобогородичен:

Распина́ема Христа́ Человеколю́бца / ви́дящи Пречи́стая, / и ре́бра ископова́ема копие́м, / пла́чущи во пия́ше: / что сие́, Сы́не Мой? / Что Ти безблагода́тнии лю́дие возда́ша, / за я́же сотвори́л еси́ до́брая им, / и тщи́шися безча́дствовати Мя, Вселюбе́знейший? / Удивля́юся, Благоутро́бне, Твоему́ во́льному распя́тию.

В среду утра на стиховне Крестобогородичен:

Умервщля́ема ви́дящи Христа́ Пречи́стая Влады́чица, / умервщля́юща льсти́ваго, / восклица́ше, го́рце взыва́ющи / из утро́бы Тоя́ Произше́дшему, / и, долготерпе́нию Его́ чудя́щися, взыва́ше: / Ча́до Мое́ Любе́знейшее, / не забу́ди Рабу́ Твою́, / не закосни́, Человеколю́бче, Мое́ Утеше́ние.

В среду вечера Богородичен:

Иму́ще Тя, Богоро́дице, упова́ние и предста́тельство, / вра́жиих наве́т не убои́мся, / я́ко спаса́еши ду́ши на́ша.

В четверток утра Богородичен:

Тя, сте́ну, стяжа́хом, Богоро́дице Пречи́стая, / и благоути́шное приста́нище, и утвержде́ние. / Те́мже молю́ся, / и́же в житии́ обурева́ем: / окорми́ и спаси́ мя.

В четверток вечера на Го́споди воззва́х: Крестобогородичен:

Я́ко узре́ Тя, Го́споди, / Де́ва и Ма́ти Твоя́ на Кресте́ пове́шена, / дивя́шеся и, взира́ющи, глаго́лаше: / что Ти возда́ша, и́же мно́гих Твои́х даро́в насла́ждшиися, Влады́ко? / Но молю́ся, не оста́ви Мене́ еди́ну в ми́ре, / но потщи́ся воскресну́ти, свозставля́я пра́отца.

В четверток вечера на стиховне Крестобогородичен:

Не рыда́й Мене́, Ма́ти, / зря́щи на Дре́ве пове́шена Твоего́ Сы́на и Бо́га, / на вода́х Пове́сившаго всю зе́млю неодержи́мо / и всю тварь Созда́вшаго; / и́бо воскресну́ и просла́влюся, / и а́дова ца́рствия сокрушу́ кре́постию, / и погублю́ того́ си́лу, / и свя́занныя изба́влю от злоде́йства его́, я́ко Благоутро́бен, / и Отцу́ Моему́ приведу́, я́ко Человеколю́бец.

В пяток утра на стиховне Крестобогородичен:

На Кресте́ Тя я́ко узре́ пригвожде́на, Го́споди, / А́гница и Ма́ти Твоя́ дивля́шеся, / и что виде́ние сие́ взыва́ше, Сы́не вожделе́нне? / Сия́ Ти неве́рный собо́р воздаде́ беззако́нный, / и́же мно́гих Твои́х чуде́с наслади́выйся? / Но сла́ва неизглаго́ланному соше́ствию Твоему́, Влады́ко.

В пяток вечера Богородичен:

Свеще́ неугаси́мая, престо́ле пра́ведный, / Пречи́стая Влады́чице, / моли́ спасти́ся душа́м на́шим.

В субботу утра Богородичен:

Еди́на Чи́стая и Пречи́стая Де́во, / Я́же Бо́га безсе́менно ро́ждшая, / моли́ спасти́ся душа́м на́шим.

Глас 5

В неделю вечера Богородичен:

Стра́шно, и пресла́вно, и ве́лие та́инство, / Невмести́мый во чре́ве вмести́ся / и Ма́ти по Рождестве́ па́ки пребы́сть Де́ва: / Бо́га бо роди́, из Нея́ воплоще́нна. / Тому́ возопии́м, Тому́ песнь рцем, / со А́нгелы воспева́юще: / Свят еси́, Христе́ Бо́же, / И́же нас ра́ди вочелове́чивыйся, сла́ва Тебе́.

В понедельник утра Богородичен:

Обра́дованная, хода́тайствуй Твои́ми моли́твами / и испроси́ душа́м на́шим мно́жество щедро́т / и очище́ние мно́гих прегреше́ний, мо́лимся.

В понедельник вечера Богородичен:

Утоли́ боле́зни / многовоздыха́ющия души́ моея́, / утоли́вшая вся́ку сле́зу от лица́ земли́: / Ты бо челове́ков боле́зни отго́ниши / и гре́шных ско́рби разруша́еши. / Тебе́ бо вси стяжа́хом наде́жду и утвержде́ние, / Пресвята́я Ма́ти Де́во.

Во вторник утра Богородичен:

Обра́дованная, хода́тайствуй Твои́ми моли́твами / и испроси́ душа́м на́шим мно́жество щедро́т / и очище́ние мно́гих прегреше́ний, мо́лимся.

Во вторник вечера на Го́споди воззва́х: Крестобогородичен:

Избавле́ние нас ра́ди и це́ну вели́кую, / Пречи́стую Кровь Твою́ изво́лил еси́ да́ти, / Безгре́шне Христе́ мой, / всем хотя́ спасе́ние получи́ти. / Те́мже Тя зря́щи пригвожде́на Ма́ти Твоя́, / рыда́ющи, власы́ терза́ше Своя́, глаго́лющи: / Ча́до, А́гнче Всенепоро́чный, / мир хотя́ изба́вити Честно́ю Твое́ю Кро́вию, / от о́чию Мое́ю ка́ко заше́л еси́, Спа́се, / Незаходи́мое Со́лнце, / И́же всем подая́й просвеще́ние, / и мир, и ве́лию ми́лость.

Во вторник вечера на стиховне Крестобогородичен:

Весь восприи́м мой зрак, / Созда́тель и Бог облече́ся, / вообрази́ти и́же пре́жде па́дший зрак Ада́мов восхоте́вый, / на Крест вознесе́ся во́лею, я́ко пови́нен; / и ру́це распросте́р ны́не, / исцеля́я ру́це, я́же дре́вле осла́бленныя к дре́ву сне́дному. / Его́же Всечи́стая ви́дящи, восклица́ше: / что сие́ Твое́, Сы́не Мой, неизрече́нное долготерпе́ние? / Не терплю́ на Кресте́ воздви́жена зря́щи Тя, / го́рстию Содержа́ща всея́ земли́ концы́.

В среду утра на стиховне Крестобогородичен:

Зря́щи дре́вле А́гнца и Сы́на Своего́ / Де́ва Ма́ти и Всеблаже́нная Отрокови́ца / на Крест воздви́жена, / вопия́ше слезя́щи: / увы́ Мне, Сы́не Мой, ка́ко умира́еши, / Бог естество́м Сый Безсме́ртен?

В среду вечера Богородичен:

Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, сте́ну необори́мую, / тве́рдую Предста́тельницу / и прибе́жище душ на́ших.

В четверток утра Богородичен:

Блажи́м Тя, Богоро́дице Де́во, / я́ко из Тебе́ возсия́ Со́лнце пра́вды, Христо́с, / име́яй ве́лию ми́лость.

В четверток вечера на Го́споди воззва́х: Крестобогородичен:

Избавле́ние нас ра́ди… (см. вторник вечера).

В четверток вечера на стиховне Крестобогородичен:

Зря́щи дре́вле А́гнца… (см. среду утра).

В пяток утра на стиховне Крестобогородичен:

Ста́вши у Креста́, Иису́се, / Тебе́ Ро́ждшая пла́чущися рыда́ше, вопию́ще: / не терплю́ сия́, пригвожде́на зря́щи Тя на Дре́ве, / Его́же породи́х Аз / и избего́х боле́зни я́ко безму́жна, / и ка́ко ны́не боле́знию содержи́ма есмь / и уязвля́юся се́рдцем? / Ны́не бо испо́лнися глаго́л, и́же рече́ Симео́н: / се́рдце Твое́, Непоро́чная, ору́жие про́йдет. / Но ны́не, о Сы́не Мой, / воскресни́ и спаси́ пою́щия Тя!

В пяток вечера Богородичен:

Тебе́ мо́лимся я́ко Бо́жии Ма́тери: / Благослове́нная, моли́ / о спасе́нии душ на́ших.

В субботу утра Богородичен:

О́ле окая́нная душе́? / кий отве́т и́маши рещи́ Судии́ во он час, / егда́ Престо́ли поста́вятся на Суде́ / и Судия́ прии́дет от Небе́с, / соше́д со тьма́ми А́нгельскими? / егда́ ся́дет на Суди́щи / прю сотвори́ти с рабы́ непотре́бными, подо́бными мне, / что отвеща́ти и́маши? / что же принести́ тогда́? / пои́стинне ничто́же, / ум и те́ло оскверни́вши твое́. / Те́мже припади́ к Де́ве и зови́ непреста́нно / пода́ти тебе́ бога́тно грехо́в проще́ние.

Глас 6

В неделю вечера Богородичен:

Арха́нгельски воспои́м, ве́рнии, / Небе́сный черто́г и дверь запеча́тану вои́стинну: / ра́дуйся, Ея́же ра́ди отрасте́ нам Спас, всех Христо́с, / Жизнода́вец и Бог, / низложи́, Влады́чице, мучи́тели, / безбо́жныя враги́ на́ша / руко́ю Твое́ю, Пречи́стая, / упова́ние христиа́н.

В понедельник утра Богородичен:

Арха́нгельское сло́во прия́ла еси́, / и Херуви́мский престо́л показа́лася еси́, / и на объя́тиих Твои́х но си́ла еси́, Богоро́дице, / Наде́жду душ на́ших.

В понедельник вечера Богородичен:

Никто́же притека́яй к Тебе́, / посра́млен от Тебе́ исхо́дит, / Пречи́стая Богоро́дице Де́во, / но про́сит благода́ти и прие́млет дарова́ние / к поле́зному проше́нию.

Во вторник утра Богородичен:

Вели́ких дарова́ний, Чи́стая Де́во Богома́ти, / Ты сподо́билася еси́, / я́ко родила́ еси́ пло́тию Еди́наго от Тро́ицы, / Христа́ Жизнода́вца / во спасе́ние душ на́ших.

Во вторник вечера на Го́споди воззва́х: Крестобогородичен:

Лю́ди беззако́ннейшия, / без пра́вды пригвожда́юща Тя на Дре́ве, / Де́ва и Чи́стая Ма́ти Твоя́ зря́щи, / я́ко же Симео́н прорече́, / утро́бою, Спа́се, уязвля́шеся.

Во вторник вечера на стиховне Крестобогородичен:

На Дре́ве Живо́т наш зря́щи Всенепоро́чная Богоро́дица ви́сящ, / ма́терски ры́дающи, вопия́ше: / Сы́не Мой и Бо́же Мой, / спаси́ любо́вию пою́щия Тя.

В среду утра на стиховне Крестобогородичен:

А́гнца Своего́ Агница Нескве́рная дре́вле и Непоро́чная Влады́чица / на Дре́ве Кре́стнем я́ко узре́, / ма́терски восклица́ше и дивя́щися вопия́ше: / Ча́до Мое́ Сладча́йшее, / что зре́ние сие́ но́вое и пресла́вное? / Ка́ко сонм безблагода́тный суди́щу Пила́тову предаде́ Тя, / и осужда́ет на смерть Живота́ вся́ческих? / Но воспева́ю Твое́ неизрече́нное, Сло́ве, снизхожде́ние.

В среду вечера Богородичен:

О́ко се́рдца моего́ / воспуща́ю к Тебе́, Влады́чице: / не пре́зри ма́лаго моего́ воздыха́ния / в час, егда́ су́дит Сын Твой ми́ру, / бу́ди ми покро́в и Помо́щница.

В четверток утра Богородичен:

Преложе́ние скорбя́щих, / премене́ние боля́щих еси́, Богоро́дице Всепе́тая, / спаси́ град и лю́ди, / бори́мых умире́ние, обурева́емых тишина́, / Еди́на Предста́тельнице ве́рных.

В четверток вечера на Го́споди воззва́х: Крестобогородичен:

Подобен: Тридне́вен:

Зря́щи Тя Пречи́стая на Дре́ве пригвожда́ема вопия́ше: / о Сы́не Мой и Бо́же, / что пресла́вное Твое́, и слы́шание стра́нное, / е́же претерпева́еши за мно́гую ми́лость?

В четверток вечера на стиховне Крестобогородичен:

Подобен: Тридне́вен:

Предстоя́щи у Дре́ва иногда́ во вре́мя распя́тия Де́ва с де́вственным ученико́м, / и пла́чущи вопия́ше: / увы́ Мне, ка́ко стра́ждеши, / всех Христе́ Сый безстра́стие?

В пяток утра на стиховне Крестобогородичен:

Пригвозди́хся у́бо я́ко Челове́к на Дре́ве, / и умертви́хся, и во гро́бе положе́н бых, я́ко сме́ртный; / но я́ко Бог во сла́ве, Ма́ти Чи́стая Де́во, / па́ки востаю́ тридне́вен.

В пяток вечера Богородичен:

Моли́твами Ро́ждшия Тя, Христе́, / му́ченик Твои́х, и апо́стол, и проро́к, / и святи́телей, преподо́бных, и пра́ведных, и всех святы́х / усо́пшия рабы́ Твоя́ упоко́й.

В субботу утра Богородичен:

Бо́га, из Тебе́ воплоти́вшагося, / разуме́хом, Богоро́дице Де́во: / Того́ моли́ о спасе́нии душ на́ших.

Богородичен 3-го часа:

Богоро́дице, Ты еси́ Лоза́ и́стинная, / возрасти́вшая нам Плод живота́, / Тебе́ мо́лимся: моли́ся, Влады́чице, / со святы́ми апо́столы, / поми́ловати ду́ши на́ша.

Глас 7

В неделю вечера Богородичен:

Е́же ра́дуйся, Тебе́ зове́м со А́нгелом, Богоневе́сто, / черто́г, и дверь, и престо́л о́гненный, нарица́юще Тебе́, / и несеко́мую го́ру, и купину́ неопали́мую.

В понедельник утра Богородичен:

Умири́ моли́твами Богоро́дицы / жизнь на́шу, вопию́щих Ти: / Ми́лостиве Го́споди, сла́ва Тебе́.

В понедельник вечера Богородичен:

Ра́дуйся, Со́лнца о́блаче мы́сленнаго и неизрече́ннаго Влады́чице; / ра́дуйся, всесве́тлая свеще́; / ра́дуйся, све́щниче всезлаты́й. / Тобо́ю, Пресвята́я, Е́ва изба́вися от кля́твы. / Но я́ко иму́щи дерзнове́ние / ко Благопреме́нному Сы́ну Твоему́ и Бо́гу, / ма́тернею Твое́ю моли́твою / не оскуде́й моли́тися, Пречи́стая.

Во вторник утра Богородичен:

Свет, Христе́, прозя́бл еси́ от Де́вы / и просвети́л еси́ род челове́ческий. / Го́споди, сла́ва Тебе́.

Во вторник вечера на Го́споди воззва́х: Крестобогородичен:

Влады́чице Всесвята́я Де́во, ро́ждшая Го́спода, / за милосе́рдие на Кресте́ пригвозди́вшагося / и жи́зни струи́ источи́вшаго ми́ру, / Того́ умоли́ спасти́ся душа́м на́шим. / Тебе́ бо Еди́ну и́мамы ве́рнии прибе́жище, / сте́ну и заступле́ние; / те́мже и притека́ем к покро́ву Твоему́.

Во вторник вечера на стиховне Крестобогородичен:

Своего́ Сы́на на Дре́ве ви́дящи дре́вле, / се́рдце Твое́ ору́жием печа́ли / уязвля́ше, Пречи́стая.

В среду утра на стиховне Крестобогородичен:

На Дре́ве пригвожде́на Тя во́лею, / я́ко Всенепоро́чная узре́, / пла́чущи поя́ше держа́ву Твою́.

В среду вечера Богородичен:

Еди́ну по Рождестве́ Пречи́стую Де́ву воспои́м, / я́ко Ма́терь Бо́га Сло́ва, / глаго́люще: сла́ва Тебе́.

В четверток утра Богородичен:

Роди́лся еси́ от Де́вы несказа́нно, Христе́, / и просвети́л еси́ су́щия во тьме, вопию́щия: / Го́споди, сла́ва Тебе́.

В четверток вечера на Го́споди воззва́х: Крестобогородичен:

Влады́чице, Всесвята́я Де́во, ро́ждшая Го́спода, / за милосе́рдие на Кресте́ пригвозди́вшагося / и жи́зни струи́ источи́вшаго ми́ру, / Того́ умоли́ спасти́ся душа́м на́шим. / Тебе́ бо Еди́ну и́мамы ве́рнии прибе́жище, / сте́ну и заступле́ние; / те́мже и притека́ем к покро́ву Твоему́.

В четверток вечера на стиховне Крестобогородичен:

На Дре́ве пригвожде́на Тя во́лею, / Всенепоро́чная я́ко ви́де, / пла́чущи поя́ше держа́ву Твою́.

В пяток утра на стиховне Крестобогородичен:

Своего́ Сы́на на Дре́ве ви́дящи дре́вле, / се́рдце Твое́ ору́жием печа́ли / уязвля́ше, Пречи́стая.

В пяток вечера Богородичен:

Я́же, Еди́на Невмести́маго прии́мши / и ро́ждши Бо́га Сло́ва воплоще́нна, / моли́ спасти́ся душа́м на́шим.

В субботу утра Богородичен:

Моли́, Де́во, со апо́столы и му́ченики / обрести́ на Суде́ преста́вльшимся / ве́лию ми́лость.

Глас 8:

В неделю вечера Богородичен:

Арха́нгела Гаврии́ла глас восприи́мше, рцем: / ра́дуйся, Ма́ти Бо́жия, / Я́же Жизнода́вца Христа́ ми́ру ро́ждши.

В понедельник утра Богородичен:

Небе́сная пою́т Тя, / Обра́дованная, Ма́ти Безневе́стная, / и мы славосло́вим неизсле́дованное Твое́ Рождество́, / Богоро́дице, моли́ спасти́ся душа́м на́шим.

В понедельник вечера Богородичен:

Ра́дуйся, вселе́нныя похвало́; / ра́дуйся, хра́ме Госпо́день; / ра́дуйся, горо́ приосене́нная; / ра́дуйся, всех прибе́жище; / ра́дуйся, све́щниче златы́й; / ра́дуйся, Сла́во правосла́вных честна́я; / ра́дуйся, Мари́е, Ма́ти Христа́ Бо́га; / ра́дуйся, раю́; ра́дуйся, Боже́ственная трапе́зо; / ра́дуйся, се́не; ра́дуйся, ру́чко всезлата́я; / ра́дуйся, всех упова́ние.

Во вторник утра Богородичен:

Кров Твой, Богоро́дице Де́во, / врачество́ есть духо́в ное: / вонь прибега́юще, от душе́вных неду́г избавля́емся.

Во вторник вечера на Го́споди воззва́х: Крестобогородичен:

А́гнца Тя егда́ А́гница и Де́вая / к заколе́нию ведо́ма узре́, / со слеза́ми, Сло́ве, после́доваше и взыва́ше: / где тщи́шися, Ча́до Мое́? / Сше́ствую Тебе́, Сладча́йший, / не терплю́ бо не зре́ти Тебе́, / Иису́се Мой Много ми́лостиве.

Во вторник вечера на стиховне Крестобогородичен:

Го́споди, егда́ Тя Со́лнца Пра́веднаго / со́лнце ви́де на Дре́ве пове́шена, лучи́ скры, / и луна́ свет во тьму преложи́; / Всенепоро́чная же Твоя́ Ма́ти утро́бою уязвля́шеся.

В среду утра на стиховне Крестобогородичен:

На Кресте́ пове́шена зря́щи Чи́стая, Тебе́ ро́ждшая, Го́споди, / и близ бы́вши, пла́чущи глаго́лаше: / Ча́до, что сия́ стра́ждеши пло́тию и тщи́шися безча́дствовати Мя? / Потщи́ся просла́витися, / я́ко да возвели́чуся стра́стию Твое́ю.

В среду вечера Богородичен:

Аз, Де́во Свята́я Богоро́дице, / к Покро́ву Твоему́ прибега́ю, / вем, я́ко обря́щу Тобо́ю спасе́ние, / мо́жеши бо, Чи́стая, помощи́ мне.

В четверток утра Богородичен:

Исхи́ти мя, Влады́чице, / руки́ зми́я человекоуби́йцы, / хотя́щи мя лука́вством поглоти́ти до конца́; / сокруши́ че́люсти его́, молю́ Тя, / и ко́зни разори́, я́ко да избы́в от ногте́й его́, / велича́ю заступле́ние Твое́.

В четверток вечера на Го́споди воззва́х: Крестобогородичен:

Тя ви́дящи пригвожда́ема на Кресте́, Иису́се, / и стра́сти прие́млюща во́лею, / Де́ва и Ма́ти Твоя́, Влады́ко, / у́вы Мне, вопия́ше, Ча́до Сла́дкое, / ра́ны не пра́ведно ка́ко терпи́ши, / Врачу́, исцели́вый челове́ческое неможе́ние, / и от тли всех изба́вивый милосе́рдием Твои́м?

В четверток вечера на стиховне Крестобогородичен:

Ю́ница Нескве́рная Юнца́ ви́дящи на Дре́ве пригвожда́ема во́лею, / рыда́ющи жа́лостно, / увы́ Мне, вопия́ше, Люби́мейшее Ча́до! / Что Тебе́ сонм воздаде́ безблагода́тный евре́йский, / хотя́ Мя обезча́дствовати от Тебе́, Вселюбе́зне?

В пяток утра на стиховне Крестобогородичен:

Не терплю́, Ча́до, ви́дящи Тя на Дре́ве усну́вша, / бо́дрость всем подаю́щаго, / я́ко да и́же дре́вле преступле́ния плодо́м, / сном поги́бельным усну́вшим, / боже́ственную и спаси́тельную бо́дрость пода́си: / Де́ва глаго́лаше пла́чущися, Ю́же велича́ем.

В пяток вечера Богородичен:

Чи́стая Де́во, / Сло́ва врата́, Бо́га на́шего Ма́ти, / моли́ спасти́ся нам.

В субботу утра Богородичен:

Влады́чице, приими́ моли́твы раб Твои́х / и изба́ви нас от вся́кия ну́жды и печа́ли.

Богородичны отпустительныя воскресны осми гласов

Глас 1, Богородичен:

Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка / в Тебе́, святе́м киво́те, / я́коже рече́ пра́ведный Дави́д, / яви́лася еси́ ши́ршая Небе́с, / поноси́вши Зижди́теля Твоего́. / Сла́ва Все́льшемуся в Тя; / сла́ва Проше́дшему из Тебе́; / сла́ва Свободи́вшему нас Рождество́м Твои́м.

Глас 2, Богородичен:

Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго. / Того́ моли́ спасти́ся душа́м на́шим.

Глас 3, Богородичен:

Тя, хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо, от Тебе́ восприя́тою, Сын Твой и Бог наш, / Кресто́м восприи́м страсть, / изба́ви нас от тли я́ко Человеколю́бец.

Глас 4, Богородичен:

Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Глас 5, Богородичен:

Ра́дуйся, две́ре Госпо́дня непроходи́мая; / ра́дуйся, стено́ и покро́ве притека́ющих к Тебе́; / ра́дуйся, необурева́емое приста́нище и Неискусобра́чная, / ро́ждшая пло́тию Творца́ Твоего́ и Бо́га, / моля́щи не оскудева́й о воспева́ющих / и кла́няющихся Рождеству́ Твоему́.

Глас 6, Богородичен:

Благослове́нную нареки́й Твою́ Ма́терь, / прише́л еси́ на страсть во́льным хоте́нием, / возсия́в на Кресте́, взыска́ти хотя́ Ада́ма, / глаго́ля А́нгелом: / сра́дуйтеся Мне, я́ко обре́теся поги́бшая дра́хма. / Вся му́дре устро́ивый, / Бо́же наш, сла́ва Тебе́.

Глас 7, Богородичен:

Я́ко на́шего воскресе́ния сокро́вище, / на Тя наде́ющияся, Всепе́тая, / от ро́ва и глубины́ прегреше́ний возведи́, / Ты бо пови́нныя греху́ спасла́ еси́, / ро́ждшая Спасе́ние на́ше, / Я́же пре́жде рождества́ Де́ва, и в рождестве́ Де́ва, / и по рождестве́ па́ки пребыва́еши Де́ва.

Глас 8, Богородичен:

И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю, / яви́ человеколю́бие Твое́, Ми́лостиве. / Приими́ ро́ждшую Тя, Богоро́дицу, моля́щуюся за ны, / и спаси́, Спа́се наш, лю́ди отча́янныя.

Богородичны опустительныя по тропарех святых поемыя во все лето

В вечерню же и на Бог Господь: во утрени и паки в конец утрени

Глас 1

В неделю вечера и в понедельник на Бог Госпо́дь:

Чу́до чуде́с, Благода́тная, в Тебе́ зря́щи, / тварь ра́дуется, / зачала́ бо еси́ безсе́менно / и родила́ еси́ неизрече́нно, / Его́же чинонача́лия А́нгелов ви́дети не мо́гут, / Того́ моли́ о душа́х на́ших.

В конец утрени:

Пречи́стая Богоро́дице, / на Небесе́х Благослове́нная / и на земли́ славосло́вимая, / ра́дуйся, Неве́сто Неневе́стная.

В понедельник вечера и во вторник на Бог Госпо́дь:

Заче́ншая неопа́льно Огнь Боже́ственный / и ро́ждшая безсе́менно Исто́чника Жи́зни, Го́спода, / Благода́тная Богоро́дице, / спаса́й Тя велича́ющия.

В конец утрени:

Безма́терняго на Небеси́, / па́че мы́сли и слу́ха, / на земли́ без отца́ родила́ еси́; / Того́, Богоро́дице, моли́ о душа́х на́ших.

Во вторник вечера и в среду на Бог Госпо́дь:

Твое́ предста́тельство иму́ще, Пречи́стая, / и Твои́ми моли́твами лю́тых избавля́еми, / Кресто́м Сы́на Тво его́ везде́ соблюда́еми, / по до́лгу Тя вси благоче́стно велича́ем.

В конец утрени: Пречи́стая Богоро́дице, на Небесе́х:

В среду вечера и в четверток на Бог Госпо́дь: Заче́ншая неопа́льно Огнь Боже́ственный:

В конец утрени: Безма́терняго на Небеси́:

В четверток вечера и в пяток на Бог Госпо́дь: Твое́ предста́тельство иму́ще:

В конец утрени: Пречи́стая Богоро́дице:

В пяток вечера и в субботу на Бог Госпо́дь:

Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка / в Тебе́, святе́м киво́те, / я́коже рече́ пра́ведный Дави́д, / яви́лася еси́ ши́ршая Небе́с, / поноси́вши Зижди́теля Твоего́: / сла́ва Все́льшемуся в Тя; / сла́ва Проше́дшему из тебе́; / сла́ва Свободи́вшему нас Рождество́м Твои́м.

В конец утрени:

Безма́терняго на Небеси́, / па́че мы́сли и слу́ха, / на земли́ без отца́ родила́ еси́; / Того́, Богоро́дице, моли́ о душа́х на́ших.

Глас 2

В неделю вечера и в понедельник на Бог Госпо́дь:

Благоутро́бия су́щи исто́чник, / ми́лости сподо́би нас, Богоро́дице, /при́зри на лю́ди согреши́вшия, / яви́, я́ко при́сно, си́лу Твою́, / на Тя бо упова́юще, ра́дуйся, вопие́м Ти, / я́коже иногда́ Гаврии́л, Безпло́тных Архистрати́г.

В конец утрени:

Ма́ти Свята́я неизрече́ннаго Све́та, / А́нгельскими Тя пе́сньми почита́юще, / благоче́стно велича́ем.

В понедельник вечера и во вторник на Бог Госпо́дь:

Боже́ственнаго бы́хом о́бщницы естества́, / Тобо́ю, Богоро́дице Присноде́во, / Бо́га бо нам воплоти́вшагося родила́ еси́. / Те́мже по до́лгу Тя вси благоче́стно велича́ем.

В конец утрени:

Тя велича́ем, Богоро́дице, вопию́ще: / ра́дуйся, незаходи́маго Све́та о́блаче, / Того́ носи́вши в не́дрех Сла́вы Го́спода.

Во вторник вечера и в среду на Бог Госпо́дь:

Препросла́вленна еси́, Богоро́дице Де́во, / пое́м Тя: / Кресто́м бо Сы́на Твоего́ низложи́ся ад / и смерть умертви́ся, / умерщвле́ннии воста́хом и Живота́ сподо́бихомся: / рай восприя́хом, дре́внее наслажде́ние. / Тем благодаря́ще, славосло́вим / я́ко держа́внаго Христа́ Бо́га на́шего / и Еди́наго Многоми́лостиваго.

В конец утрени:

Тя велича́ем, Богоро́дице, вопию́ще: / ра́дуйся, же́зле, / от него́же безсе́менно Бог прозябы́й, / погуби́ на Дре́ве смерть.

В среду вечера и в четверток на Бог Госпо́дь: Боже́ственнаго бы́хом о́бщницы:

В конец утрени:

Тя велича́ем, Богоро́дице, вопию́ще: / ра́дуйся, незаходи́маго Све́та о́блаче, / Того́ носи́вши в не́дрех Сла́вы Го́спода.

В четверток вечера и в пяток на Бог Госпо́дь: Препросла́вленна еси́, Богоро́дице Де́во:

В конец утрени:

Тя велича́ем, Богоро́дице, вопию́ще: / ра́дуйся, же́зле, / от него́же безсе́менно Бог прозябы́й, / погуби́ на Дре́ве смерть.

В пяток вечера и в субботу на Бог Госпо́дь:

Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго. / Того́ моли́ спасти́ся душа́м на́шим.

В конец утрени: Ма́ти Свята́я неизрече́ннаго Све́та:

Аще прилучится Аллилу́ия: в коем-либо гласе, глаголются сия:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

Сла́ва: Помяни́, Го́споди, я́ко Благ, ду́ши раб Твои́х / и, ели́ка в житии́ согреши́ша, прости́, / никто́же бо безгре́шен, то́кмо Ты, / моги́й и преста́вленным да́ти поко́й.

И ны́не: Ма́ти Свята́я неизрече́ннаго Све́та, / А́нгельскими Тя пе́сньми почита́юще, / благоче́стно велича́ем.

Глас 3

В неделю вечера и в понедельник на Бог Госпо́дь:

Красоте́ де́вства Твоего́ и пресве́тлой чистоте́ Твое́й / Гаврии́л удиви́вся, вопия́ше Ти, Богоро́дице: / ку́ю Ти похвалу́ принесу́ досто́йную? / что же возъимену́ю Тя? / недоумева́ю и ужаса́юся. / Те́мже, я́ко повеле́н бых, вопию́ Ти: / ра́дуйся, Благода́тная.

В конец утрени:

Ки́йждо, иде́же спаса́ется, / та́мо пра́ведно и притека́ет, / и ко́е ино́е таково́е прибе́жище, / я́ко Ты, Богоро́дице, / покрыва́ющее ду́ши на́ша.

В понедельник вечера и во вторник на Бог Госпо́дь:

Прибе́жище и си́ла на́ша, Богоро́дице, / держа́вная по́мощь ми́ра, / моли́твами Твои́ми покры́й рабы́ Твоя́ / от вся́кия ну́жды, / Еди́на Благослове́нная.

В конец утрени: Ки́йждо, иде́же спаса́ется:

Во вторник вечера и в среду на Бог Госпо́дь:

Жезл си́лы, стяжа́вшии Крест Сы́на Твоего́, Богоро́дице, / тем низлага́ем враго́в шата́ния, / любо́вию Тя непреста́нно велича́юще.

В конец утрени: Прибе́жище и си́ла на́ша:

В среду и в четверток на Бог Госпо́дь:

Проро́цы пропове́даша, / апо́столи научи́ша, / му́ченицы испове́даша / и мы ве́ровахом Богоро́дицу Тя вои́стинну су́щую. / Тем и велича́ем Рождество́ Твое́ неизрече́нное.

В конец утрени: Ки́йждо, иде́же спаса́ется:

В четверток вечера и в пяток на Бог Госпо́дь: Жезл си́лы:

В конец утрени: Прибе́жище и си́ла на́ша:

В пяток вечера и в субботу на Бог Госпо́дь:

Тя, хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо, от Тебе́ восприя́тою, Сын Твой и Бог наш, / Кресто́м восприи́м страсть, / изба́ви нас от тли я́ко Человеколю́бец.

В конец утрени: Проро́цы пропове́даша:

Глас 4

В неделю вечера и в понедельник на Бог Госпо́дь:

Воспита́вшейся во хра́ме во свята́я святы́х, / оде́янней ве́рою и прему́дростию и безме́рным де́вством, / Архистрати́г Гаврии́л принесе́ с Небесе́ целова́ние / и, е́же ра́дуйся, ра́дуйся, Благослове́нная, / ра́дуйся, Препросла́вленная, Госпо́дь с Тобо́ю.

В конец утрени:

Я́ко всех еси́ творе́ний вы́шшая, / воспева́ти Тя досто́йно недоумева́юще, Богоро́дице, / ту́не, мо́лим Тя, поми́луй нас.

В понедельник вечера и во вторник на Бог Госпо́дь:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́ на ны милосе́рдовавши, / потщи́ся, погиба́ем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы.

В конец утрени:

Тя велича́ем, Богоро́дице, вопию́ще: / Ты еси́ купина́, / в не́йже неопа́льно Моисе́й ви́де, / я́ко пла́мень, /Огнь Божества́.

Во вторник вечера и в среду на Бог Госпо́дь:

Де́во Пренепоро́чная, Ма́ти Христа́ Бо́га, / ору́жие про́йде Твою́ пресвяту́ю ду́шу, / егда́ распина́ема ви́дела еси́ во́лею Сы́на и Бо́га Твоего́; / Его́же, Благослове́нная, моля́щи не преста́й / проще́ние прегреше́ний нам дарова́ти.

В конец утрени:

Тя велича́ем, Богоро́дице, вопию́ще: / Ты еси́ гора́, / от нея́же неизглаго́ланно / отсече́ся Ка́мень / и врата́ а́дова сокруши́.

В среду вечера и в четверток на Бог Госпо́дь:

Сло́во О́тчее, Христа́ Бо́га на́шего, / от Тебе́ воплоти́вшагося, позна́хом, Богоро́дице Де́во, / Еди́на Чи́стая, / Еди́на Благослове́нная. / Тем, непреста́нно Тя воспева́юще, велича́ем.

В конец утрени: Я́ко всех еси́ творе́ний:

В четверток вечера и в пяток на Бог Госпо́дь: Де́во Пренепоро́чная:

В конец утрени:

Тя велича́ем, Богоро́дице, вопию́ще: / Ты еси́ гора́, / от нея́же неизглаго́ланно / отсече́ся Ка́мень / и врата́ а́дова сокруши́.

В пяток вечера и в субботу на Бог Госпо́дь:

Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

В конец утрени:

Тя велича́ем, Богоро́дице, вопию́ще: / Ты еси́ купина́, / в не́йже неопа́льно Моисе́й ви́де, / я́ко пла́мень, /Огнь Божества́.

Глас 5

В неделю вечера и в понедельник на Бог Госпо́дь:

Со А́нгелы Небе́сная, с челове́ки земна́я, / гла́сом ра́дования, Богоро́дице, вопие́м Ти: / ра́дуйся, врата́ Небе́с ши́ршая; / ра́дуйся, Еди́на земноро́дных спасе́ние; / ра́дуйся, Чи́стая Благода́тная, / ро́ждшая Бо́га воплоти́вшагося.

В конец утрени:

От Де́вы возсия́вый ми́ру, Христе́ Бо́же, / сы́ны Све́та То́ю показа́вый, поми́луй нас.

В понедельник вечера и во вторник на Бог Госпо́дь:

Ско́рый Твой покро́в, и по́мощь, / и ми́лость покажи́ на рабы́ Твоя́, / и во́лны, Чи́стая, укроти́ су́етных помысло́в, / и па́дшую мою́ ду́шу возста́ви, Богоро́дице: / вем бо, вем, Де́во, / я́ко мо́жеши, ели́ка и хо́щеши.

В конец утрени:

Ма́ти Бо́жия Пресвята́я, стено́ христиа́н, / изба́ви лю́ди Твоя́ обы́чно, зову́щия Ти приле́жно, / сопроти́вися сра́мным и го́рдым помысло́м, да вопие́м Ти: / ра́дуйся, Присноде́во.

Во вторник вечера и в среду на Бог Госпо́дь:

Кресто́м Сы́на Твоего́, Богоблагода́тная, / и́дольская пре́лесть вся упраздни́ся / и де́монская кре́пость попра́ся. / Сего́ ра́ди ве́рнии по до́лгу Тя при́сно пое́м и благослови́м, / и Богоро́дицу вои́стинну испове́дающе Тя, велича́ем.

В конец утрени: От Де́вы возсия́вый ми́ру:

В среду вечера и в четверток на Бог Госпо́дь:

Стра́нное Де́вы та́инство ми́ру показа́ся спаси́тельное: / от Нея́ бо роди́лся еси́ без се́мене / и пло́тию показа́лся еси́ без истле́ния, / всех ра́досте, / Го́споди, сла́ва Тебе́.

В конец утрени: Ма́ти Бо́жия Пресвята́я:

В четверток вечера и в пяток на Бог Господь: Кресто́м Сы́на Твоего́:

В конец утрени: От Де́вы возсия́вый ми́ру:

В пяток вечера и в субботу на Бог Госпо́дь:

Ра́дуйся, две́ре Госпо́дня непроходи́мая; / ра́дуйся, стено́ и покро́ве притека́ющих к Тебе́; / ра́дуйся, необурева́емое приста́нище и Неискусобра́чная, ро́ждшая пло́тию Творца́ Твоего́ и Бо́га, / моля́щи, не оскудева́й о воспева́ющих / и кла́няющихся Рождеству́ Твоему́.

В конец утрени: От Де́вы возсия́вый ми́ру:

Глас 6

В неделю вечера и в понедельник на Бог Госпо́дь:

Нача́ло спасе́ния / Гаврии́лово провеща́ние к Де́ве бысть, / слы́ша бо, е́же ра́дуйся, и не убеже́ целова́ния, / не усумне́ся, я́ко Са́рра в се́ни, / но си́це глаго́лаше: / се раба́ Госпо́дня, / бу́ди Мне по глаго́лу твоему́.

В конец утрени:

Арха́нгельское сло́во прия́ла еси́, / и Херуви́мский престо́л показа́лася еси́, / и на объя́тиих Твои́х носи́ла еси́, Богоро́дице, / Наде́жду душ на́ших.

В понедельник вечера и во вторник на Бог Госпо́дь:

Упова́ние ми́ра, / Блага́я Богоро́дице Де́во, / Твое́ и еди́но держа́вное предста́тельство про́сим: / умилосе́рдися на безпредста́тельственныя лю́ди, / моли́ Ми́лостиваго Бо́га / изба́витися душа́м на́шим от вся́каго преще́ния, / Еди́на Благослове́нная.

В конец утрени:

Никто́же, притека́яй к Тебе́, / посра́млен от Тебе́ исхо́дит, / Пречи́стая Богоро́дице Де́во, / но про́сит благода́ти и прие́млет дарова́ние / к поле́зному проше́нию.

Во вторник вечера и в среду на Бог Госпо́дь:

Богоро́дице Де́во, / моли́ Сы́на Твоего́, / во́лею пригвозди́вшагося на Кресте́ / и мир от пре́лести свобо́ждшаго, Христа́ Бо́га на́шего, / поми́ловати ду́ши на́ша.

В конец утрени:

Пре́жде век от Отца́ без ма́тере рожде́нна, / Сы́на и Сло́ва Бо́жия, / в после́дняя ле́та родила́ еси́ / воплоти́вшагося от чи́стых крове́й Твои́х, Богороди́тельнице, без му́жа. / Его́же моли́ / дарова́тися нам грехо́в оставле́нию пре́жде конца́.

В среду вечера и в четверток на Бог Госпо́дь:

Свята́я Влады́чице, / Чи́стая Бо́га на́шего Ма́ти, / всех Творца́ неизрече́нно ро́ждшая, / моли́ со апо́столы свяще́нными всегда́ бла́гость Его́ / страсте́й нас изба́вити / и оставле́ние нам да́ти грехо́в.

В конец утрени:

Вели́ких дарова́ний, / Чи́стая Де́во Богома́ти, / Ты сподо́билася еси́, / я́ко родила́ еси́ пло́тию / Еди́наго от Тро́ицы, Христа́ Жизнода́вца, / во спасе́ние душ на́ших.

В четверток вечера и в пяток на Бог Госпо́дь: Богоро́дице Де́во, моли́ Сы́на Твоего́:

В конец утрени: Пре́жде век от Отца́ без ма́тере:

В пяток вечера и в субботу на Бог Госпо́дь:

Предповеству́ет Гедео́н зача́тие / и сказу́ет Дави́д Рождество́ Твое́, Богоро́дице: / сни́де бо, я́ко дождь на руно́, / Сло́во во чре́во Твое́, / и прозябла́ еси́ без се́мене, / земле́ свята́я, ми́ра Спасе́ние, / Христа́ Бо́га на́шего, Благода́тная.

В конец утрени: Пре́жде век от Отца́ без ма́тере:

Глас 7

В неделю вечера и в понедельник на Бог Госпо́дь:

Богоро́дице Де́во Нескве́рная, / Сы́на Твоего́ моли́ с Го́рними си́лами / проще́нию прегреше́ний / нам пре́жде конца́ дарова́тися, / ве́рно Тя сла́вящим.

В конец утрени:

Превозшла́ еси́ си́лы Небе́сныя, / зане́ храм показа́лася еси́ Боже́ственный, / Благослове́нная Богоро́дице, / я́ко ро́ждшая Христа́, / Спа́са душ на́ших.

В понедельник вечера и во вторник на Бог Госпо́дь:

Ра́дуйся, Тебе́ приво́дим, Богоро́дице, / А́нгелов бо вы́шшая показа́лася еси́, / Бо́га ро́ждшая.

В конец утрени:

Умири́ моли́твами Богоро́дицы жизнь на́шу, / вопию́щих Ти: / Ми́лостиве Го́споди, сла́ва Тебе́.

Во вторник вечера и в среду на Бог Госпо́дь:

Распе́ншагося за ны, Христа́ Бо́га, / и разруши́вшаго сме́рти держа́ву, / непреста́нно моли́, / Богоро́дице Де́во, / да спасе́т ду́ши на́ша.

В конец утрени:

Изба́ви, Богоро́дице, от содержа́щих нас грехо́в, / я́ко ина́го упова́ния ве́рнии не и́мамы, / ра́зве Тебе́ и от Тебе́ ро́ждшагося Бо́га.

В среду вечера и в четверток на Бог Госпо́дь:

Плод чре́ва Твоего́, Пречи́стая, / проро́ков есть и зако́на исполне́ние. / Тем Тя, Богоро́дицу, / в ве́дении сла́вяще, / благоче́стно велича́ем.

В конец утрени:

Плод чре́ва Твоего́, Богоневе́сто, / челове́ком показа́ся спасе́ния хода́тайственный. / Тем Тя, Богоро́дицу, / ра́зумом и язы́ком сла́вяще, / ве́рнии велича́ем.

В четверток вечера и в пяток на Бог Госпо́дь:

Распе́ншагося за ны, Христа́ Бо́га, / и разруши́вшаго сме́рти держа́ву, / непреста́нно моли́, / Богоро́дице Де́во, / да спасе́т ду́ши на́ша.

В конец утрени:

Изба́ви, Богоро́дице, от содержа́щих нас грехо́в, / я́ко ина́го упова́ния ве́рнии не и́мамы, / ра́зве Тебе́ и от Тебе́ ро́ждшагося Бо́га.

В пяток вечера и в субботу на Бог Госпо́дь:

Я́ко на́шего воскресе́ния сокро́вище, / на Тя наде́ющияся, Всепе́тая, / от ро́ва и глубины́ прегреше́ний возведи́, / Ты бо пови́нныя греху́ спасла́ еси́, / ро́ждшая Спасе́ние на́ше: / Я́же пре́жде рождества́ Де́ва, и в рождестве́ Де́ва, / и по рождестве́ па́ки пребыва́еши Де́ва.

В конец утрени:

Ра́дуйся, Невмести́маго в Небесе́х вмести́вшая во утро́бе Твое́й; / ра́дуйся, Де́во, / проро́ков пропове́дание, / Е́юже возсия́ Емману́ил; / ра́дуйся, Ма́ти Христа́ Бо́га.

Глас 8

В неделю вечера и в понедельник на Бог Госпо́дь:

Ра́дуйся, А́нгелом Ра́дость ми́ра прие́мшая; / ра́дуйся, ро́ждшая Творца́ Твоего́ и Го́спода; / ра́дуйся, сподо́бльшаяся бы́ти Ма́ти Бо́жия.

В конец утрени:

Ра́дуйся, Врата́ Царя́ Сла́вы, / я́же Вы́шний Еди́н про́йде / и Еди́ну запеча́тану сохрани́ / во спасе́ние душ на́ших.

В понедельник вечера и во вторник на Бог Госпо́дь:

Недви́жимое утвержде́ние ве́ры / и честны́й дар душ на́ших, / Богоро́дицу пе́сньми велича́ем ве́рнии: / ра́дуйся, Ка́мень Жи́зни во чре́ве Твое́м вмести́вшая; / ра́дуйся, конце́й наде́ждо, скорбя́щих заступле́ние; / ра́дуйся, Неве́сто Неневе́стная.

В конец утрени:

Де́во Пречи́стая, спаси́ ны моли́твами Твои́ми, / дви́жущи утро́бу ма́тернюю, Сы́ну Твоему́ и Бо́гу на́шему.

Во вторник вечера и в среду на Бог Госпо́дь:

А́гнца, и Па́стыря, и Спа́са ми́ра, на Кресте́ зря́щи, / Ро́ждшая Тя, глаго́лаше, слезя́щи: / мир у́бо ра́дуется, прие́мля избавле́ние, / утро́ба же Моя́ гори́т, зря́щи Твое́ распя́тие, / е́же за всех терпи́ши, Сы́не и Бо́же Мой.

В конец утрени:

Плод чре́ва Твоего́, Пречи́стая, / проро́ков есть и зако́на исполне́ние. / Тем Тя, Богоро́дицу, в ве́дении сла́вяще, благоче́стно велича́ем.

В среду вечера и в четверток на Бог Госпо́дь:

Мы́сленная врата́ Жи́зни, Пречи́стая Богоро́дице, / притека́ющия к Тебе́ ве́рно изба́ви от бед: / да сла́вим пресвято́е Рождество́ Твое́ во спасе́ние душ на́ших.

В конец утрени: Де́во Пречи́стая, спаси́ ны:

В четверток вечера и в пяток на Бог Госпо́дь: А́гнца, и Па́стыря:

В конец утрени: Плод чре́ва Твоего́, Пречи́стая:

В пяток вечера и в субботу на Бог Госпо́дь:

И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю, / яви́ человеколю́бие Твое́, Ми́лостиве. / Приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

В конец утрени: Де́во Пречи́стая, спаси́ ны:


Источник: Ирмологий. Богородичны всего лета. - М.: Издательство Московской Патриархии, 1997. - 221 с.

Комментарии для сайта Cackle