Июнь

В Неде́лю 3-ю по Пятидеся́тнице

Всех святы́х, в земли́ Санкт-Петербу́ржстей просия́вших²

На вели́цей вече́рни

По предначина́тельном псалме́, Блаже́н муж: кафи́зма вся.

На Го́споди, воззва́х: стихи́ры на 10: воскре́сны 3, Анато́лиева 1 и святы́х 6.

Стихи́ры святы́х 6, глас 1:

Ра́дуйся, гра́де свята́го Петра́,/ и похвали́ Бо́га твоего́,/ я́ко Той укрепи́ вереи́ врат твои́х,/ и благослови́ святы́я Своя́ в тебе́,/ и́же ны́не предстоя́т Престо́лу Его́,/ и, я́ко свети́ла незаходи́мая, зе́млю на́шу озаря́ют,/ и мо́лятся непреста́нно о всех нас,// соверша́ющих па́мять их любо́вию. Два́жды.

Прииди́те воспле́щим рука́ми,/ воскли́кнем Бо́гу гла́сом ра́дования/ и просла́вим святы́я, в земли́ на́шей просия́вшия,/ святи́тели и преподо́бныя,/ му́ченики и испове́дники,/ Христа́ ра́ди юро́дивыя и пра́ведныя,/ явле́нныя и неявле́нныя,// и́хже имена́ напи́сана на Небесе́х.

Прииди́те, ве́рнии, и ви́дите дела́ Бо́жия,/ я́же сотвори́ Госпо́дь:/ земноро́днии, жите́йское попече́ние отло́жше,/ небе́снии челове́цы и земни́и а́нгели яви́шася/ и в Го́рния оби́тели водвори́шася./ Сего́ ра́ди к ним возопии́м:/ моли́теся, святи́и, о сро́дницех ва́ших,// с любо́вию и усе́рдием па́мять ва́́шу прославля́ющих.

И́ны стихи́ры, глас 6:

Благове́рный кня́же Алекса́ндре,/ князе́й ру́сских похвало́,/ во́инов соблюде́ние,/ враго́в побежде́ние,/ сиро́т и вдов засту́пниче/ и гра́да на́шего утвержде́ние!/ Приими́ ны́не похва́льное пе́ние,/ е́же во хра́мех Бо́жиих соверша́ют лю́дие твои́,// почита́юще све́тло па́мять твою́.

Страстоте́рпче святы́й царю́ Нико́лае/ и благове́рная цари́це Алекса́ндро!/ Вы ны́не со ча́ды ва́шими/ предстои́те Престо́лу Вседержи́теля/ и мо́литеся о держа́ве Росси́йстей,/ испроси́те и лю́дем гра́да на́шего// ми́ра и ве́лия ми́лости.

Сла́ва, глас то́йже:

Ра́дуйся, гра́де свята́го Петра́,/ весели́ся, ны́не земле́ Петербу́ржская,/ лику́йте, лю́дие правосла́внии,/ я́ко мно́гий плод спаси́тельнаго се́яния/ принесе́ Оте́честву на́шему вся святы́я твоя́./ Сего́ ра́ди воскли́кнем Бо́гу на́шему:/ благослови́ ны, Бо́же наш,/ и не отыми́ ми́лость Твою́ от нас,// па́мять святы́х Твои́х све́тло соверша́ющих.

И ны́не, Богоро́дичен, глас 2: Пре́йде сень зако́нная:

Вход. Све́те ти́хий: Проки́мен дне: Госпо́дь воцари́ся: и чте́ния три.

Проро́чества Иса́иина чте́ние (глава́ 60):

Свети́ся, свети́ся, Иерусали́ме,/ прии́де бо твой свет, и сла́ва Госпо́дня на тебе́ возсия́./ Се, тьма покры́ет зе́млю, и мрак на язы́ки,/ на тебе́ же яви́тся Госпо́дь, и сла́ва Его́ на тебе́ у́зрится./ И по́йдут ца́рие све́том твои́м, и язы́цы све́тлостию твое́ю./ Возведи́ о́крест о́чи твои́ и ви́ждь со́бранная ча́да твоя́:/ се, приидо́ша вси сы́нове твои́ издале́ча, и дще́ри твоя́ на ра́мех во́змутся./ Тогда́ у́зриши и возра́дуешися,/ и убои́шися и ужа́снешися се́рдцем,/ я́ко приложи́тся к тебе́ бога́тство морско́е и язы́ков и люди́й./ И отве́рзутся врата́ твоя́ при́сно,/ день и нощь не затворя́тся,/ ввести́ к тебе́ си́лу язы́к и ца́ри их ведо́мыя./ Язы́цы бо и ца́рие, и́же не порабо́тают ти, поги́бнут,/ и язы́цы запусте́нием запусте́ют./ И сла́ва Лива́нова к тебе́ прии́дет,/ кипари́сом и пе́вком и ке́дром вку́пе, просла́вити ме́сто свято́е Мое́,/ и ме́сто ногу́ Мое́ю просла́влю.

Прему́дрости Иису́са, сы́на Сира́хова, чте́ние (глава́ 44):

Восхва́лим у́бо му́жи сла́вны и отцы́ на́ша в бытии́./ Мно́гу сла́ву созда́ Госпо́дь в них вели́чием Свои́м от ве́ка./ Госпо́дствующе во ца́рствиих свои́х/ и му́жие, имени́ти си́лою, сове́тующе ра́зумом свои́м,/ провеща́вшии во проро́чествах,/ старе́йшины люди́й в сове́тех/ и в ра́зуме писа́ния люди́й./ Прему́драя словеса́ в наказа́нии их,/ и́щуще гла́са мусики́йска и пове́дающе по́вести во писа́ниих:/ му́жие бога́тии, обдарова́ни кре́постию,/ ми́рно живу́ще в жили́щих свои́х./ Вси си́и в ро́дех просла́влени бы́ша/ и во днех их похвала́./ Суть от них, и́же оста́виша и́мя, е́же пове́дати хвалы́:/ и суть, и́хже несть па́мяти, и погибо́ша, я́ко не су́щии,/ и бы́ша, я́ко не бы́вше, и ча́да их по них./ Но си́и му́жие ми́лостивии,/ и́хже пра́вды не забве́ны бы́ша:/ с се́менем их пребу́дет до́брое насле́дие,/ исча́дия их в заве́тех:/ оста́ся се́мя их, и ча́да их по них:/ до ве́ка пребу́дет се́мя их,/ и сла́ва их не потреби́тся:/ телеса́ их в ми́ре погребе́на бы́ша,/ а имена́ их живу́т в ро́ды./ Прему́дрость их пове́дят лю́дие,/ и похвалу́ их испове́сть Це́рковь.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ра хра́ма, и святы́х, глас 2:

Ра́дуйся, царскосе́льская похвало́,/ священному́чениче Иоа́нне,/ пе́рвый пострада́вый в новому́ченицех,/ ра́дуйся и ты, му́чениче Пе́тре,/ Цари́це Богоро́дице, всех Скорбя́щих Ра́дости, усе́рдно послужи́вый/ и, угро́зы безбо́жник ни во чтоже вмени́в,/ за ве́ру Христо́ву смерть прие́мый./ О, иере́и всеблаже́ннии и победоно́снии,/ моли́те ми́лостиваго Бо́га// спасти́ся душа́м на́шим.

Ра́дуйся, священному́чениче Филосо́фе,/ па́стырю ре́вностный Це́ркве Бо́жия,/ я́ко же́ртву непоро́чную,/ сы́ны своя́ Никола́я и Бори́са Бо́гу предпосла́вый/ и о мучи́телех Го́сподеви моли́выйся.// Ра́дуйтеся, новому́ченицы, и́стиннии во́ини Христо́ви.

Ра́дуйтеся, святи́телие Христо́ви,/ Вениами́не, чистоты́ Це́ркве блюсти́телю ве́рный,/ Серафи́ме, ве́ры правосла́вныя пла́менный побо́рниче,/ и ты, Иларио́не, богосло́ве изря́днейший./ О архипа́стырие достосла́внии и священному́ченицы добропобе́днии,/ Божества́ Триипоста́снаго ве́рнии служи́телие,// моли́те спасти́ся душа́м на́шим.

Сла́ва, глас 2:

О Всеси́льне Христе́ Царю́!/ В годи́ну лю́тых испыта́ний/ со́нмы новому́чеников и испове́дников яви́вый/ и кро́вию тех всю зе́млю Ру́сскую оправда́вый.// Тех моли́твами поми́луй и спаси́ ду́шы на́ша.

И ны́не, Богоро́дичен, глас то́йже:

О, чудесе́ но́ваго, всех дре́вних чуде́с!/ Кто бо позна́ Ма́терь, без му́жа ро́ждшую/ и на руку́ нося́щую всю тварь Содержа́щаго?/ Бо́жие есть изволе́ние Ро́ждшееся./ Его́же я́ко Младе́нца, Пречи́стая, Твои́ма рука́ма носи́вшая/ и Ма́терне дерзнове́ние к Нему́ иму́щая,/ не преста́й моля́щи о чту́щих Тя,// уще́дрити и спасти́ ду́ши на́ша.

Проше́ние на лити́и:

Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя: моли́твами Всепречи́стыя Влады́чицы на́шея Богоро́дицы и Присноде́вы Мари́и: си́лою Честна́го и Животворя́щаго Креста́, предста́тельствы честны́х Небе́сных Сил безпло́тных, честна́го сла́внаго Проро́ка, Предте́чи и Крести́теля Иоа́нна: святы́х сла́вных и всехва́льных первоверхо́вных апо́стол Петра́ и Па́вла, свята́го апо́стола Андре́я Первозва́ннаго и про́чих всех святы́х апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Никола́я, архиепи́скопа Мир Лики́йскаго, Чудотво́рца; святы́х равноапо́стольных Мефо́дия и Кири́лла, учи́телей Слове́нских; святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших, святи́теля Михаи́ла, пе́рваго митрополи́та Ки́евскаго, первосвяти́телей Моско́вских и всея́ Руси́ Петра́, Алекси́я, Ио́ны, Мака́рия, Фили́ппа, И́ова, Ермоге́на и Ти́хона; святы́х, в земли́ Санкт-Петербу́ржстей просия́вших: Свята́го благове́рнаго вели́каго кня́зя Алекса́ндра Не́вскаго, святи́теля Игна́тия, епи́скопа Кавка́зскаго; святы́х священному́чеников Вениами́на митрополи́та Петрогра́дскаго, Кири́лла, митрополи́та Каза́нскаго, Иларио́на, архиепи́скопа Вере́йскаго, Никола́я, архиепи́скопа Великоу́стюжскаго, Григо́рия, епи́скопа Шлиссельбу́ргскаго, Плато́на, епи́скопа Ре́вельскаго, Си́мона, епи́скопа Уфи́мскаго; и священному́чеников Алекса́ндра, Алекса́ндра, Алекси́я, Васи́лия, Виктори́на, Влади́мира, Влади́мира, Григо́рия, Григо́рия, Емелиа́на, Иоа́нна, Иоа́нна, Иоа́нна, Ка́рпа, Михаи́ла, Никола́я, Никола́я, Никола́я, Никола́я, Никола́я, Па́вла, Петра́, Филосо́фа пресви́теров, Ники́ты диа́кона; преподо́бных и богоно́сных оте́ц на́ших Анто́ния Ды́мскаго, Арсе́ния Ко́невскаго, Алекса́ндра Сви́рскаго, Мака́рия Ри́млянина, Новгоро́дскаго, Марти́рия Зелене́цкаго, Серафи́ма Вы́рицкаго, святы́х преподобному́чеников Арсе́ния, Льва, Серафи́ма, Се́ргия; святы́х преподобному́чениц вели́кия княги́ни Елисаве́ты, Иоанни́кии, Мари́и; свята́го преподобноиспове́дника Аре́фы; святы́х и добропобе́дных му́чеников Бори́са, Иоа́нна, Никола́я, Ю́рия; святы́х му́чениц А́нны, Екатери́ны, Ки́ры; святы́я блаже́нныя ма́тери на́шея Ксе́нии Петербу́ржския, свята́го пра́веднаго отца́ на́шего Иоа́нна Кроншта́дтскаго, святы́х страстоте́рпцев Импера́тора Никола́я, Императри́цы Алекса́ндры, цесаре́вича Алекси́я, вели́ких княже́н О́льги, Татиа́ны, Мари́и и Анастаси́и, и всех про́чих святы́х, в земли́ Санкт-Петербу́ржстей просия́вших, и́хже имена́ Ты Сам, Го́споди, ве́си, и́хже и па́мять ны́не соверша́ем, святы́х пра́ведных Богооте́ц Иоаки́ма и А́нны и всех святы́х, мо́лим Тя, Многоми́лостиве Го́споди, услы́ши нас гре́шных, моля́щихся Тебе́, и поми́луй нас.

Моли́тва на лити́и:

Влады́ко Многоми́лостиве, Го́споди, Иису́се Христе́ Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Сил безпло́тных, честна́го сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол, святы́х сла́вных и добропобе́дных му́чеников, преподо́бных и богоно́сных оте́ц на́ших и всех святы́х, в земли́ Санкт-Петербу́ржстей просия́вших, и́хже и па́мять ны́не соверша́ем, святы́х пра́ведных Богооте́ц Иоаки́ма и А́нны и всех святы́х Твои́х, благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь, Го́споди, поми́луй нас и мир Твой, и спаси́ ду́ши на́ша, я́ко Благ и Человеколю́бец.

На стихо́вне Окто́иха.

Сла́ва, святы́х, глас 6:

Смято́шася язы́цы, уклони́шася ца́рствия/ от пути́ спаси́тельнаго Христо́ва,/ пролия́ся кровь непови́нная посреде́ тебе́, гра́де свята́го Петра́./ Но даде́ глас Свой Вы́шний/ и подви́жеся земля́/ и яви́шася новому́чеников со́нми,/ и возопи́ша вси ве́рнии:/ разуме́йте, язы́цы, и покаря́йтеся,// я́ко с на́ми Бог.

И ны́не, Богоро́дичен, глас то́йже: Творе́ц и Изба́витель:

На благослове́нии хле́бов Богоро́дице Де́во: два́жды,

и тропа́рь святы́х, глас 4:

Днесь све́тло красу́ется град свята́го Петра́,/ я́ко наста́ день честна́го торжества́,/ во́ньже лю́дие христоимени́тии славосло́вят Бо́га Вседержи́теля,/ на брега́х Невы́ опло́т держа́вы Росси́йския утверди́вшаго,/ и мно́гия святы́я в нем яви́вшаго,/ и́же моли́твы ко Пресвяте́й Тро́ице возно́сят,// да поми́лует Госпо́дь лю́ди Своя́, я́ко Милосе́рд.

На у́трени

На Бог Госпо́дь: тропа́рь воскре́сен, два́жды. Сла́ва, святы́х: И ны́не, Богоро́дичен: Е́же от ве́ка утае́ное:

По 1-м и 2-м стихосло́вии седа́льны воскре́сны с Богоро́дичны их.

Велича́ние:

Велича́ем вас,/ вси святи́и, в земли́ Петербу́ржстей просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Вси язы́цы, восплещи́те рука́ми, воскли́кните Бо́гу гла́сом ра́дования.

Кня́зи лю́дстии собра́шася с Бо́гом Авраа́млим, я́ко Бо́жии держа́внии земли́ зело́ вознесо́шася.

Ве́лий Госпо́дь и хва́лен зело́ во гра́де Бо́га на́шего, в горе́ святе́й Его́.

Ре́чная устремле́ния веселя́т град Бо́жий, освяти́л есть селе́ние Свое́ Вы́шний.

Го́споди, кто обита́ет в жили́щи Твое́м? Или́ кто всели́тся во святу́ю го́ру Твою́?

Ходя́й непоро́чен и де́лаяй пра́вду, глаго́ляй и́стину в се́рдце свое́м.

Посе́м не пе́вше Сла́ва, и ны́не: лик пое́т:

Благослове́н еси́, Го́споди, научи́ мя оправда́нием Твои́м.

А́нгельский собо́р: и про́чия тропари́ воскре́сныя по непоро́чнах.

Ипакои́ гла́са.

По полиеле́и седа́лен святы́х, глас 3:

Днесь просия́ ва́ша па́мять, святи́и,/ я́коже пресве́тлая заря́ над земле́ю на́шею/ тьму безбо́жия и нече́стия отгоня́ющи/ и сердца́ ве́рных просвеща́ющи, во е́же пе́ти Христу́:/ Иису́се, Спа́се наш, сла́ва Тебе́.

Сла́ва, глас то́йже:

Воспои́м, ве́рнии, во благознамени́тый день святы́х на́ших,/ предвари́м лице́ Христа́ во испове́дании и во псалме́х воскли́кнем Ему́:/ при́зри, Го́споди, с Небесе́ и виждь,/ и посети́ виногра́д сей, и утверди́ и́,/ его́же насади́ десни́ца Твоя́.

И ны́не, Богоро́дичен:

Ты еси́ похвала́ ве́рных, Безневе́стная,/ Ты Предста́тельница и прибе́жище христиа́н, стена́ и приста́нище:/ к Сы́ну бо Твоему́ мольбы́ приле́жныя возно́сиши, Всенепоро́чная,/ и спаса́еши от бед ве́рою и любо́вию Богоро́дицу Чи́стую Тебе́ сла́вящия.

Степе́нна, 1-й антифо́н 2-го гла́са. Проки́мен, глас 2: Воста́ни, Го́споди, Бо́же мой, повеле́нием, и́мже запове́дал еси́,// и сонм люде́й обы́дет Тя. Стих: Го́споди, Бо́же мой, на Тя упова́х, спаси́ мя. Вся́кое дыха́ние: Ева́нгелие воскре́сно 3-е, от Ма́рка, зача́ло 71.

Кано́н воскре́сен со ирмосо́м на 4, Богоро́дицы на 2, и святы́х на 8.

Кано́н всем святы́м, в земли́ Санкт-Петербу́ржстей просия́вшим, глас 4.

Песнь 1.

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.

Припе́в: Вси святи́и земли́ на́шея, моли́те Бо́га о нас.

Прииди́те, в пе́снех воспои́м собо́р свяще́ннейший,/ всех святы́х, в земли́ Петербу́ржстей просия́вших,/ и свои́ми по́двиги всю зе́млю на́шу освяти́вших.

Восхва́лим Андре́я Первозва́ннаго и свята́го равноапо́стольнаго Влади́мира,/ вку́пе же и вели́кую княги́ню О́льгу,/ я́ко тех труда́ми в земли́ Росси́йстей ве́ра насади́ся,/ и доны́не благода́тию Бо́жиею напая́ется и плод стори́чный прино́сит.

Днесь соше́дшеся, ве́рнии,/ восхва́лим по достоя́нию благове́рнаго и венцено́снаго кня́зя Алекса́ндра,/ я́ко защи́тника земли́ Ру́сския и чуде́с пода́теля оби́льнаго,/ при́сно Го́споду о всех нас моля́щася.

Всемогу́щий Госпо́дь си́лою на брань ве́рныя Своя́ препоясу́яй, о кня́же Алекса́ндре,/ злочести́выя враги́ под но́зе твои́ покори́ и на све́щнице высо́це поста́ви тя,/ те́мже град Петра́ тобо́ю хва́лится и свята́я ла́вра велича́ется.

Благове́рный кня́же Алекса́ндре, Престо́лу Бо́жию со все́ми святы́ми ны́не предстоя́,/ прославля́еши Триипоста́снаго Бо́га,/ сего́ ра́ди подава́й нам благода́ть исцеле́ний/ и моли́ся о спасе́нии душ на́ших.

Свети́льниче земли́ Росси́йския пресве́тлый,/ чудесы́ мно́гими сия́я,/ просвеща́еши ди́вно ду́ши соверша́ющих любо́вию па́мять твою́, Алекса́ндре блаже́нне.

Прииди́те, лю́дие благочести́вии,/ архиере́и и свяще́нницы, мона́си и мирсти́и, ста́рии и млади́и,/ просла́вим кня́зя благове́рнаго Алекса́ндра,/ и́же всякому во́зрасту и чи́ну засту́пник ве́рный и наста́вник до́брый бысть.

Пе́сньми и пе́нии духо́вными восхва́лим блаже́ннаго кня́зя Алекса́ндра/ и, припа́дающе к честне́й и многоцеле́бней ра́це его́,/ с любо́вию облобыза́им ю́ и си́це воспои́м:/ ра́дуйся, о Оте́честве на́шем преди́вный моли́твенниче.

Богоро́дичен: Чу́дно украси́ся град наш ико́ною Твое́ю, Богоро́дице Влады́чице, Скоропослу́шницею имену́емою,/ ю́же благоволи́ла еси́ да́ти ве́рным в по́мощь и утеше́ние,/ ско́ро бо слы́шиши мольбы́ в ско́рбех Тя призыва́ющих/ и па́че луче́й со́лнечных всех освеща́еши благода́тию Твое́ю.

Катава́сия: Отве́рзу уста́ моя́:

Песнь 3.

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

Вмени́стеся я́ко о́вцы заколе́ния, о ца́рственнии страстоте́рпцы,/ и, я́коже а́гнцы непоро́чнии, Бо́гу поже́ршеся, за уби́йцы ва́ша кро́тко моли́стеся./ Сего́ ра́ди и А́гнец Бо́жий, взе́мляй грехи́ ми́ра,/ прия́т вас во дворы́ Своя́.

О страстоте́рпче святы́й царю́ Нико́лае, ро́да ца́рскаго ве́нче и похвало́!/ Безако́ннии лю́дие оболга́ша и преда́ша тя на смерть лю́тую,/ си́лою же Бо́жиею укрепля́емь, вся му́жественне претерпе́л еси́.

О страстоте́рпице цари́це Алекса́ндро,/ смире́нием свои́м, всю зе́млю Ру́сскую удиви́вшая!/ Ты, боля́щия и стра́ждущия во́ины утеша́ющи/ и ра́ны их, я́ко ма́ти чадолюби́вая, омыва́ющи,/ я́ко Самому́ Христу́ Бо́гу послужи́ла еси́.

О святи́и царю́ Нико́лае и цари́це Алекса́ндро!/ Вы до́браго супру́жества и дете́й воспита́ния благочести́ваго о́браз яви́сте/ и дом свой, я́ко цветни́к духо́вный, соде́ласте./ Сего́ ра́ди ны́не вку́пе со ча́ды свои́ми Престо́лу Бо́жию предстои́те.

О ча́да царе́ва, святи́и му́ченицы, ве́рнии раби́ Христо́ви:/ Алекси́е, О́льго, Татиа́но, Мари́е и Анастаси́е!/ Вы, за убива́ющия вас Го́споду кро́тко моля́щеся,/ кровь свою́ неви́нную я́ко дар многоце́нен Бо́гу принесли́ есте́./ Сего́ ра́ди вас ны́не ублажа́ем.

О преподобному́ченице Елисаве́то, вели́чием по́двигов твои́х мно́гия удиви́вшая!/ Ты, я́коже Мари́я, Христу́ Бо́гу всем се́рдцем внима́ющи,/ и, я́коже Ма́рфа, Ему́ с любо́вию служа́щи,/ о́браз де́ятельнаго благоче́стия нам яви́ла еси́/ и ве́ру свою́ да́же до сме́рти непоро́чно сохрани́ла еси́.

Ра́дуйся, гра́де свята́го Петра́,/ в тебе́ бо ны́не прославля́ются пе́сненно ча́да твоя́,/ я́же, ри́зы своя́ мно́гими страда́нии убели́вше и сла́ву Небе́сную зако́нно стяжа́вше,/ побе́дную песнь Бо́гови возсыла́ют.

Богоро́дичен: Возвы́силася еси́, Богоро́дице Де́во, па́че лик Небе́сных,/ восприи́мши во утро́бе Твое́й непристу́пный Свет Божества́,/ И́мже сердца́ и умы́ на́ша просвети́/ и к жи́зни непоро́чней наста́ви.

Катава́сия: Твоя́ песносло́вцы:

Конда́к святы́х, глас 3:

Дне́сь святи́и земли́ Петербу́ржския/ вку́пе с на́ми предстоя́т в Це́ркви и неви́димо за ны мо́лятся Бо́гу,/ да изба́вит нас от враг ви́димых и неви́димых,/ от неду́га и гла́да, от внеза́пныя сме́рти и от вся́каго зла// и спасе́т ду́ши на́ша.

И́кос:

А́нгельским чино́м подража́юще на земли́,/ просия́ли есте́ в по́двизех многоразли́чных, святи́и./ Восприи́мше и́го благо́е Христо́во на ра́мена своя́,/ востеко́сте к Небе́сному Иерусали́му./ Сего́ ра́ди моли́те Христа́ о нас, вопию́щих вам:/ ра́дуйтеся, неусы́пнии на́ши моли́твенницы;/ ра́дуйтеся, пречу́днии хода́таи о нас ко Го́споду./ Ра́дуйтеся, я́ко труда́ми ва́шими ве́ра насажда́ется;/ ра́дуйтеся, я́ко кровьми́ ва́шими Це́рковь утвержда́ется./ Ра́дуйтеся, я́ко со А́нгелы Святе́й Тро́ице предстоите́;/ ра́дуйтеся, я́ко с ни́ми трисвяту́ю пе́снь Ей воспева́ете./ Ра́дуйтеся, свети́ла незаходи́мая Це́ркве на́шея.

Седа́лен святы́х, глас 3:

Днесь па́мять святы́х земли́ Петербу́ржстей соверша́юще,/ припаде́м ко Го́споду и возопии́м:/ Христе́ Бо́же, тех моли́твами умири́ мир Твой, и спаси́ ду́ши на́ша,/ я́ко Благ и Человеколю́бец.

Сла́ва, и ны́не, Богоро́дичен, глас то́йже:

О Неве́сто Неневе́стная! Ты неизрече́нно зачала́ еси́ во утро́бе Твое́й Христа́ Бо́га на́шего./ Те́мже Тя я́ко Ма́терь Бо́жию и Пречи́стую Присноде́ву правосла́вно велича́ем.

Песнь 4.

Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:// сла́ва, Христе́, си́ле Твое́й.

По́двигом моли́твы, труда́ и юро́дства Христа́ ра́ди/ во гра́де свята́го Петра́ просия́вши, Ксе́ние блаже́нная,/ моли́ся и нам в Небе́снем Ца́рствии Безсме́ртныя трапе́зы сподо́битися.

Небе́сныя жи́зни возжела́вши,/ в житии́ твое́м вся земна́я отри́нула еси́, ма́ти Ксе́ние,/ те́мже сподо́би и нас моли́твами твои́ми Го́рних Черто́гов дости́гнути.

Мона́хов наста́вниче, цевни́це духо́вная,/ моли́твы учи́телю, Игна́тие богому́дре,/ святи́тельским твои́м омофо́ром покрыва́й ста́до твое́ от вся́каго зла.

Пра́вды Христо́вы взыску́я, Игна́тие блаже́нне,/ во́ли Бо́жией покори́лся еси́/ и, в пу́стынь Се́ргиеву всели́вся,/ житие́м многоско́рбным сию́ освяти́л еси́.

Чудотво́рче Кроншта́дтский Иоа́нне,/ моли́твою твое́ю па́дшия возставля́л еси́, неду́жныя исцеля́л еси́,/ и ны́не, во сла́ве Небе́сней пребыва́я,/ не оста́ви нас, почита́ющих па́мять твою́.

Ло́жная мудрова́ния сыно́в ве́ка сего́,/ возстаю́щих проти́ву и́стины святы́я Це́ркве Христо́вы,/ неле́ностно облича́я, свя́те Иоа́нне,/ сло́вом и житие́м Правосла́вие утвержда́л еси́, поя́:/ сла́ва си́ле Твое́й, Го́споди.

Богоро́дичен: Пресвята́я Госпоже́ Мари́е Богоро́дице,/ Бо́га Твоего́ и Созда́теля во чре́ве носи́вшая,/ освяти́ сердца́ рабо́в Твои́х, Пречи́стая,/ я́ко да всегда́ Тобо́ю хва́лимся.

Катава́сия: Седя́й в сла́ве:

Песнь 5.

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Новому́чениче Петрогра́дский,/ ка́меню драги́й и сла́вный Це́ркве Росси́йския,/ Пе́тре, ве́рный служи́телю Цари́цы Богоро́дицы, достохва́льне,/ ты, ре́вностию Боже́ственною распала́емь,/ безу́мие безбо́жник изобличи́л еси́/ и кровь за Христа́ пролия́л еси́.

Добропобе́днии священному́ченицы Нико́лае и Иоа́нне, соу́зницы Ти́хфинстии,/ стрел разжже́нных лука́ваго и огня́, в лице́ вам ды́шущаго, не убоя́вшеся,/ Христа́ пропове́дасте,/ и на страда́ние му́жественно потеко́сте,/ те́мже и ны́не со святы́ми водворя́етеся.

Богодухнове́нне пропове́дниче, священному́чениче Филосо́фе,/ хра́ма Каза́нскаго похвало́, из се́рдца твоего́ благотворя́щаго ре́ки воды́ живы́я истеко́ша,/ ду́ши и телеса́ жа́ждущих росо́ю благода́ти напая́ющи.

Ча́да до́бре воспита́л еси́, па́стырю блаже́нне Филосо́фе,/ я́же с тобо́ю вку́пе на по́двиг востеко́ша/ и венце́м му́ченическим от Христа́ Влады́ки украси́шася,/ Никола́й и Бори́с прехва́льнии.

Бра́тства церко́вная устроя́яй и утвержда́яй, преподобному́чениче Льве,/ благоде́тель неусы́пный и помо́щник ни́щим, стра́нным, си́рым и стра́ждущим показа́лся еси́,/ те́мже Ца́рствие Небе́сное унасле́довал еси́.

Бо́льши сея́ никто́же любве́ и́мать,/ да кто ду́шу свою́ положи́т за дру́ги своя́./ Си́це у́бо и ты, священному́чениче Алекси́е Кроншта́дтский, за собра́та жизнь свою́ отда́вый,/ в же́ртву Бо́гови прине́слся еси́.

До́блестный страда́льче и христоподража́тельный му́чениче Иоа́нне Царскосе́льский,/ моли́ Влады́ку Христа́ Бо́га/ и нам ве́чныя му́ки изба́витися.

Богоро́дичен: О Всепе́тая, Всехва́льная Мари́е,/ раб Твои́х моле́ний не пре́зри,/ но от бед изба́ви, Непоро́чная,/ всех к Тебе́ усе́рдно притека́ющих.

Катава́сия: Ужасо́шася вся́ческая:

Песнь 6.

Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.

Же́ртвенную любо́вь яви́л еси́, святи́телю Вениами́не,/ тве́рдостию ума́ показа́лся еси́ неколеби́м,/ егда́ клевета́ху на тя врази́ твои́./ Те́мже к све́ту невече́рнему прише́л еси́, священному́чениче, ра́дуяся.

Смире́нием, я́ко ри́зою, обле́клся еси́, священному́чениче Вениами́не,/ егда́ клеветницы́ без вины́ осуди́ша тя./ Те́мже велича́ем страда́ния твоя́/ и песносло́вим кончи́ну твою́.

Святи́телю Вениами́ну после́довали есте́, Се́ргие, Ю́рие и Иоа́нне достохва́льнии,/ и вку́пе му́ченическими венцы́ увенча́лися есте́,/ те́мже ны́не па́мять ва́шу соверша́ем.

Я́ко оте́ц милосе́рдый всем вся был еси́:/ вдови́цам пита́тель, скорбя́щим уте́шитель, оби́димым засту́пник,/ гра́ду Петро́ву па́стырь и храни́тель, священному́чениче Вениами́не./ Те́мже и ны́не приле́жно моли́ся Влады́це Христу́ о чту́щих па́мять твою́.

Престо́лу Бо́жию предстоя́, святи́телю Христо́в Вениами́не,/ не преста́й приле́жно моли́ти о нас, рабе́х твои́х,/ да твои́м хода́тайством огня́ ве́чнаго изба́вимся/ и вся́каго озлобле́ния, на ны от враг находя́щаго.

Све́тлым лице́м на беззако́ннем суди́лищи предста́в, священному́чениче Вениами́не,/ смире́нием, кро́тостию и му́дростию непра́ведных суди́й посрами́л еси́/ и ра́достне за Христа́ пострада́л еси́, глаго́ля:/ сла́ва Бо́гу за вся.

Па́мять твоя́ светоно́сне возсия́вши, досточу́дне Вениами́не,/ просвеща́ет ду́ши благогове́йно сию́ соверша́ющих,/ муче́ния бо, страда́ния и смерть му́жественне претерпе́л еси́./ Те́мже благоче́стно пе́сньми тя велича́ем.

Богоро́дичен: Возсия́й в сердца́х на́ших, Влады́чице Пречи́стая, Сы́на Твоего́ нетле́нный свет,/ о́чи на́ши мы́сленныя просвети́/ и уста́ на́ша отве́рзи ко хвале́нию Твоему́.

Катава́сия: Боже́ственное сие́ и всечестно́е:

Конда́к и и́кос воскре́сны.

Песнь 7.

Ирмо́с: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.

В вертогра́де духо́внем земли́ Петербу́ржския взраще́н,/ Це́рковь Ру́сскую во дни лю́тых гоне́ний возгла́вил еси́, святи́телю Ти́хоне,/ и, Ка́мень живы́й, Христа́, во основа́ние жи́зни твоея́ положи́в, воспе́л еси́:/ отце́в на́ших Бо́же, благослове́н еси́.

Священному́чениче Кири́лле Каза́нский,/ собесе́дниче сла́внаго па́стыря Кроншта́дтскаго и благогове́йне его́ погре́бший!/ Ты, лесть вра́жию му́жески попра́в,/ в темни́цу за Христо́м после́довал еси́, с ве́рою воспева́я:/ отце́в на́ших, Бо́же, благослове́н еси́.

И́же на высо́ких тя Поста́вивый, святи́телю Иларио́не,/ Боже́ственною му́дростию ум твой облагодати́./ Сего́ ра́ди Христа́ всем я́сно пропове́дал еси́ и Го́сподеви воспева́л еси́:/ отце́в на́ших, Бо́же, благослове́н еси́.

Ве́ру Христо́ву му́жественне защища́я, священному́чениче Иларио́не,/ у́зы за Христа́, ра́дуяся, восприя́л еси́/ и, сме́ртию твое́ю по́двиг твой запечатле́в,/ вся пе́ти научи́л еси́:/ отце́в на́ших, Бо́же, благослове́н еси́.

Святи́телю Ре́вельский Плато́не, о па́стве твое́й усе́рдный ревни́телю!/ А́ще преще́нием и запреща́ху тебе́ мучи́телие пропове́дати Ева́нгелие,/ ты, терпе́нием вооружи́вся, по́двиг испове́дничества до́бле соверши́л еси́, Го́сподеви поя́:/ отце́в на́ших, Бо́же, благослове́н еси́.

Священному́чениче Нико́лае,/ сподви́жника чудотво́рцу Кроншта́дтскому врази́ тя нареко́ша,/ ты же, любо́вию распала́емь, и́мене сего́ пред лице́м сме́рти не отве́рглся еси́./ И ны́не, во дво́рех до́му Бо́га на́шего водворя́яся,/ не забу́ди нас, пою́щих:/ отце́в на́ших, Бо́же, благослове́н еси́.

Священному́чениче Ка́рпе, тве́рдый адама́нте ве́ры Христо́вы!/ Ты, пе́рвее во оби́тели Пю́хтицтей диа́конское служе́ние до́бре соверша́вый,/ по́слежде в чи́не иере́йстем па́ству хра́ма Иси́доровскаго во гра́де Петрогра́де до́бре упа́сл еси́/ и, до́брое се́мя неуста́нно се́яв,/ за Христа́ му́жественне пострада́л еси́./ Ны́не же с ли́ки святы́х жне́ши ра́достию кла́сы присноживо́тия, воспева́я:/ отце́в на́ших, Бо́же, благослове́н еси́.

Богоро́дичен: Всеблага́я, Всеми́лостивая Влады́чице,/ моля́щияся Тебе́ рабы́ Твоя́ уте́ши и от ве́тров вра́жиих сохрани́,/ да непреста́нно Тя велича́ем.

Катава́сия: Не послужи́ша тва́ри богому́дрии:

Песнь 8.

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ то́гда у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Преподо́бне Серафи́ме, Вы́рицкий чудотво́рче,/ день и нощь ру́це твои́ воздева́л еси́, Го́сподеви моля́ся,/ да изба́вит Оте́чество на́ше от наше́ствия иноплеме́нных./ Мы же, твои́ми моли́твами спасе́ние улучи́вше, Бо́гу вопие́м:/ благослови́те, вся дела́ Госпо́дня, Го́спода.

Лик серафи́мский Трисвяту́ю песнь Тро́ице воспева́ет,/ с ни́мже и преподо́бный чудотво́рец Вы́рицкий Бо́га славосло́вит, вопия́:/ благослови́те, вся дела́ Госпо́дня, Го́спода.

Саро́вскому чудотво́рцу поревнова́в,/ дух ми́рен стяжа́л еси́, преподо́бне о́тче Серафи́ме./ Сего́ ра́ди ты́сящи о́крест тебе́ спаса́ются и, благодаря́ще, Бо́гови вопию́т:/ благослови́те, вся дела́ Госпо́дня, Го́спода.

Фараони́ты мы́сленныя му́жески победи́в,/ чистоту́ серде́чную стяжа́л еси́, о́тче преподо́бне Серафи́ме,/ сего́ ра́ди, душе́вныма очи́ма Бо́га узре́в,/ с любо́вию воспева́л еси́:/ благослови́те, вся дела́ Госпо́дня, Го́спода.

Мно́гая чудеса́, преподо́бне чудотво́рче Вы́рицкий,/ си́лою Бо́жиею, в тебе́ бога́тно де́йствующею, сотвори́л еси́:/ слепи́и бо прозрева́ху, неми́и глаго́лаху,/ одержи́мии же от духо́в зло́бы свобожда́хуся./ Сего́ ра́ди Бо́гу, ди́вному во святы́х Свои́х, пое́м:/ благослови́те, вся дела́ Госпо́дня, Го́спода.

Любо́вию Христо́вою уязви́вшися, преподобному́ченице Мари́е Га́тчинская,/ к страда́нию востекла́ еси́, распе́нши плоть со страстьми́ и похотьми́,/ и, свещу́ душе́вную неугаси́му дея́нием храня́щи,/ в черто́г Жениха́ Небе́снаго возшла́ еси́,/ превознося́щи Его́ во ве́ки.

Да́ры Христу́ любо́вию принесла́ еси́, преподобному́ченице Мари́е,/ моли́тву, я́ко зла́то,/ поще́ние, я́ко лива́н,/ и страда́ние, я́ко сми́рну./ Тем тя благоче́стно велича́ем.

О́бразе неизме́нный Оте́ч,/ Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте!/ Тя благословя́щим Благопремени́тель бу́ди.

Богоро́дичен: О Де́во Богороди́тельнице, оби́димых Засту́пнице и всех скорбя́щих Ра́досте!/ Приими́ благода́рственное пе́ние, от души́ Тебе́ возноси́мое,/ и бу́ди нам те́плая Хода́таица в День стра́шнаго испыта́ния,/ егда́ Сын Твой и́мать суди́ти живы́х и ме́ртвых.

Катава́сия: О́троки благочести́выя в пещи́:

Песнь 9.

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Ра́дуйся, преподо́бне о́тче Алекса́ндре Сви́рский,/ Бог в Тро́ице воспева́емый яви́ся ти и сосу́д избра́нный соде́ла тя,/ те́мже, богоно́се, и доны́не чудоде́еши.

От роди́телей благочести́вых,/ испроси́вших сы́на у Святы́я Тро́ицы, прозя́бл еси́, Алекса́ндре треблаже́нне,/ и яви́лся еси́ та́ин Боже́ственных созерца́тель.

Всегда́шним к Бо́гу раче́нием и ми́ра отверже́нием,/ о́тче Анто́ние, Ды́мский чудотво́рче, Го́споду ве́рно послужи́л еси́,/ те́мже и досто́ин яви́лся еси́ услы́шати вожделе́нный глас Его́:/ благи́й ра́бе и ве́рный,/ вни́ди в ра́дость Го́спода твоего́.

Незло́бив, пра́веден и ми́лостив быв, Анто́ние богому́дре,/ блаже́нства Небе́снаго в земли́ кро́тких сподо́бился еси́,/ и та́мо вкуша́еши ве́чнаго утеше́ния.

Я́коже му́драя пчела́, преподо́бне о́тче Арсе́ние,/ мед духо́вный собира́я, Го́ру Афо́нскую обходи́л еси́,/ те́мже и оби́тель Коневе́цкая, тобо́ю устро́енная,/ сокро́вищница даро́в Свята́го Ду́ха яви́лася еси́.

Врага́ ро́да челове́ческаго и́менем Христо́вым отгна́в, преподо́бне Арсе́ние,/ язы́ческая жертвоприноше́ния на о́строве Коне́встем упраздни́л еси́/ и та́мо же́ртву хвалы́ Бо́гу приноси́л еси́.

Пу́стынь Зелене́цкая, кресто́м зве́здным благослове́нная,/ по́двигом преподо́бнаго Марти́рия созда́ся и просла́вися,/ те́мже и ны́не моли́твами ве́рных утвержда́ется.

Богоро́дичен: Во гра́де Каза́ни ико́ну Твою́ яви́ла еси́, Пречи́стая,/ очеса́ слепы́х отверза́ющи и ми́лости Своя́ на ве́рных излива́ющи,/ и ны́не, Засту́пнице Усе́рдная, просвети́ нас,/ во гра́де свята́го Петра́ честно́му о́бразу Твоему́ покланя́ющихся.

Катава́сия: Всяк земноро́дный:

Свети́лен воскре́сен. Сла́ва, святы́х. И ны́не, Богоро́дичен воскре́сен.

Свети́лен святы́х, глас 1:

Ра́дуйся, сла́вный гра́де свята́го Петра́,/ сла́ва бо святы́х твои́х в тебе́ возсия́,/ лику́йте ны́не и весели́теся, благочести́вии лю́дие,/ я́ко сонм ве́лий хода́таев Небе́сных и́мате пред Бо́гом.

На хвали́тех стихи́ры воскре́сны 4 и святы́х 4. Сла́ва, стихи́ра ева́нгельская. И ны́не: Преблагослове́нна еси́:

Стихи́ры святы́х, глас 1:

Ка́ко смире́нными усты́ воспои́м кня́зя Алекса́ндра благове́рнаго?/ Всечестны́я Тро́ицы те́плаго моли́твенника,/ земли́ Росси́йския похвалу́ и кре́пкаго засту́пника,/ печа́льных уте́шителя,/ вдов и сиро́т пита́теля// и предста́теля неусы́пнаго о душа́х на́ших.

Прииди́те, благочести́вии лю́дие гра́да Петра́,/ и припаде́м усе́рдно ко исто́чнику приснотеку́щему,/ святи́телю Игна́тию, богоно́сцу Росси́йскому,/ и восхва́лим, усе́рдно прося́ще:/ моли́твами твои́ми, святи́телю,// пода́й просвеще́ние душа́м на́шим.

Честне́и твои́ ру́це к Бо́гу простира́я,/ святи́телю о́тче Вениами́не,/ испроси́ нам благода́ть и си́лу во спасе́ние,/ бу́ди покро́в необори́м гра́ду твоему́,/ ему́же во святи́телех пе́рвый му́ченик был еси́,/ и моли́ся за ны Христу́ Бо́гу,// да спасе́т ду́ши на́ша.

Лик святы́х в земли́ Петербу́ржстей просия́вших/ вку́пе с первоверхо́вным апо́столом Петро́м/ за град наш Го́спода умоля́ет у Престо́ла Царя́ Небе́снаго./ Сего́ ра́ди, любо́вию воздвиза́еми, и мы воспои́м:/ Ра́дуйтеся, свети́льницы светлосия́ющии!/ Ра́дуйтеся, хра́ми Ду́ха Свята́го и благода́ти прича́стницы!/ При́сно моли́теся ко Христу́,/ да изба́вит нас от вся́каго зла// и спасе́т ду́ши на́ша.

Славосло́вие вели́кое.

По славосло́вии тропа́рь: Воскре́с из гро́ба: Ектении́ и отпу́ст.

На часе́х тропа́рь воскре́сен. Сла́ва, святы́м. И ны́не, Богоро́дичен часа́. Конда́к воскре́сен и конда́к святы́х пременя́юще глаго́лем.

На Литурги́и

Блаже́нны воскре́сны 2-го гла́са на 6:

Блаже́ни кро́тцыи, я́ко ти́и насле́дят зе́млю.

Глас Ти прино́сим разбо́йнич, и мо́лимся:/ помяни́ нас, Спа́се, во Ца́рствии Твое́м.

Блаже́ни а́лчущии и жа́ждущии пра́вды, я́ко ти́и насы́тятся.

Крест Тебе́ прино́сим в проще́ние прегреше́ний:/ его́же нас ра́ди прия́л еси́, Человеколю́бче.

На 8: Блаже́ни ми́лостивии, я́ко ти́и поми́ловани бу́дут.

Покланя́емся Твоему́, Влады́ко, погребе́нию и воста́нию:/ и́миже от тле́ния изба́вил еси́ мир, Человеколю́бче.

Блаже́ни чи́стии се́рдцем, я́ко ти́и Бо́га у́зрят.

Сме́ртию Твое́ю, Го́споди, поже́рта бысть смерть:/ и воскресе́нием Твои́м, Спа́се, мир спасл еси́.

Блаже́ни миротво́рцы, я́ко ти́и сы́нове Бо́жии нареку́тся.

Мироно́сицы сре́тил еси́, воскре́с от гро́ба,/ и ученико́м возвести́л еси́, рещи́ Твое́ воста́ние.

Блаже́ни изгна́ни пра́вды ра́ди, я́ко тех есть Ца́рство Небе́сное.

И́же во тьме спя́щии Тя, Свет, ви́девше,/ в преиспо́днейших а́довых, Христе́, воскресо́ша.

Блаже́нны святы́х, глас 4:

На 4: Блаже́ни есте́, егда́ поно́сят вам, и изжену́т, и реку́т всяк зол глаго́л на вы лжу́ще Мене́ ра́ди.

Прииди́те, в пе́снех воспои́м собо́р свяще́ннейший,/ всех святы́х, в земли́ Петербу́ржстей просия́вших,/ и свои́ми по́двиги всю зе́млю на́шу освяти́вших.

Ра́дуйтеся и весели́теся, я́ко мзда ва́ша мно́га на Небесе́х.

Ра́дуйся, гра́де свята́го Петра́,/ в тебе́ бо ны́не прославля́ются пе́сненно ча́да твоя́,/ я́же, ри́зы своя́ мно́гими страда́нии убели́вше и сла́ву Небе́сную зако́нно стяжа́вше,/ побе́дную песнь Бо́гови возсыла́ют.

Сла́ва: О́бразе неизме́нный Оте́ч,/ Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте!/ Тя благословя́щим Благопремени́тель бу́ди.

И ны́не: Во гра́де Каза́ни ико́ну Твою́ яви́ла еси́, Пречи́стая,/ очеса́ слепы́х отверза́ющи и ми́лости Своя́ на ве́рных излива́ющи,/ и ны́не, Засту́пнице Усе́рдная, просвети́ нас,/ во гра́де свята́го Петра́ честно́му о́бразу Твоему́ покланя́ющихся.

Вхо́дное: Прииди́те, поклони́мся: Спаси́ ны Сы́не Бо́жий, воскресы́й из ме́ртвых:

По вхо́де тропари́ и кондаки́:

В хра́ме Госпо́дском: тропа́рь воскре́сен, тропа́рь святы́х. Сла́ва, конда́к святы́х. И ны́не, конда́к воскре́сен.

В хра́ме Богоро́дицы: тропа́рь воскре́сен, тропа́рь хра́ма, тропа́рь святы́х, конда́к воскре́сен. Сла́ва, конда́к святы́х. И ны́не, конда́к хра́ма.

В хра́ме свята́го: тропа́рь воскре́сен, тропа́рь святы́х, конда́к воскре́сен. Сла́ва, конда́к святы́х. И ны́не: Предста́тельство христиа́н:

Проки́мен воскре́сный, глас 2: Кре́пость моя́ и пе́ние мое́ Госпо́дь,// и бысть мне во спасе́ние. Стих: Наказу́я наказа́ мя Госпо́дь, сме́рти же не предаде́ мя. И святы́м, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Апо́стол к Ри́мляном, зача́ло 88. И святы́х, ко Евре́ом, зача́ло 330.

Аллилу́ия, глас 2: Услы́шит тя Госпо́дь в день печа́ли, защи́тит тя и́мя Бо́га Иа́ковля. Стих: Го́споди спаси́ царя́, и услы́ши ны, во́ньже а́ще день призове́м Тя. И святы́х, глас 4: Бо́же, уши́ма на́шима услы́шахом, и отцы́ на́ша возвести́ша нам.

Ева́нгелие воскре́сное от Матфе́я, зача́ло 18, и святы́х Ева́нгелие от Иоа́нна, зача́ло 51.

Прича́стен воскре́сен: Хвали́те Го́спода с Небе́с, хвали́те Его́ в Вы́шних. И святы́х: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О Всеми́лостивый и Великодарови́тый Бо́же, утверди́вый во́лею Твое́ю зе́млю Росси́йскую и в ней град свята́го Петра́! При́зри с высоты́ святы́я Твоея́ на предстоя́щия лю́ди Твоя́ и приими́ благодаре́ние на́ше о Твои́х вели́ких благодея́ниих, я́же сотвори́л еси́ в ле́та дре́вняя со отцы́ на́шими! Услы́ши нас, прославля́ющих И́мя Твое́ Свято́е, я́ко благоволи́л еси́ просла́вити во святы́х избра́нныя Твоя́, и́хже земля́ Петербу́ржская произрасти́. Вонми́ гла́су моле́ния ве́рных чад Твои́х, славосло́вие вели́честву Твоему́ возсыла́ющих и умиле́нно к Тебе́ взыва́ющих. Посети́ нас ми́лостию и щедро́тами Твои́ми, я́ко и на бу́дущая времена́ пожи́ти нам во вся́ком благоче́стии и чистоте́. Утверди́ град сей и зе́млю сию́ моли́твами и предста́тельством сла́вныя Влады́чицы на́шея Богоро́дицы и Присноде́вы Мари́и, свята́го благове́рнаго и вели́каго кня́зя Алекса́ндра Не́вскаго, святы́х ца́рственных страстоте́рпцев Никола́я и Алекса́ндры со ча́ды их, святы́я блаже́нныя ма́тере на́шея Ксе́нии Петербу́ржския, свята́го пра́веднаго отца́ на́шего Иоа́нна Кроншта́дтскаго чудотво́рца, свята́го священному́ченика Вениами́на, митрополи́та Петрогра́дскаго, преподо́бнаго и богоно́снаго отца́ на́шего Серафи́ма Вы́рицкаго и всех уго́дников Твои́х, в земли́ Петербу́ржстей просия́вших, я́ко да, пожи́вше в ве́це сем по за́поведем Твои́м, в ве́чный поко́й дости́гнем, иде́же со все́ми святы́ми просла́вим Пресвято́е И́мя Твое́, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 22 октября 2015 года (журнал № 80)

Ме́сяца ию́ня в 9-й день

Свята́го пра́веднаго Алекси́я, пресви́тера Моско́вскаго

На ма́лей вече́рни

На Го́споди, воззва́х: стихи́ры, глас 1.

Подо́бен: Небе́сных чино́в:

Любве́ Боже́ственныя испо́лнен,/ те́плую моли́тву о стра́ждущих и скорбя́щих/ ко Всеми́лостивому Спа́су непреста́нно возноси́л еси́,// ди́вный ста́рче Алекси́е.

Досточу́дне о́тче Алекси́е,/ моли́тися не преста́й о нас/ и проще́ние прегреше́ний и ве́ры укрепле́ние испроси́,/ я́ко ско́рый помо́щник и уте́шитель// всем, прибега́ющим к тебе́.

Во дни ско́рби и гоне́ний/ любо́вь Христо́ву лю́дем пропове́дал еси́, о́тче,/ и, си́лою ея́ побежда́я тьму безбо́жия,// наставля́л еси́ ча́да духо́вная ко спасе́нию ве́чному.

Сла́ва, глас 6:

Ста́рчества святы́х оте́ц насле́дниче,/ в труде́х и моли́тве ду́шу твою́ созида́я,/ сокро́вищницу благи́х даро́в соде́лал еси́ ю́,/ из нея́же живи́тельныя струи́ жа́ждущим нетле́нныя жи́зни истеко́ша,// пресла́вне ста́рче Алекси́е.

И ны́не, Богоро́дичен:

Де́ву и Ма́терь,/ Младе́нца и Преве́чнаго Бо́га па́че ума́ ро́ждшую,/ Пресвяту́ю Богоро́дицу Мари́ю воспои́м, ве́рнии,// Та бо непрело́жная Засту́пница ро́да христиа́нскаго.

На стихо́вне стихи́ры, глас 2.

Подо́бен: До́ме Евфра́фов:

Дарова́ся Це́ркви Ру́сской/ ра́дость ве́лия,/ пра́ведный ста́рец Алекси́й,/ и́же обре́те дерзнове́ние пред Го́сподем// моли́тися о спасе́нии душ на́ших.

Стих: Блаже́н муж, боя́йся Го́спода,// в за́поведех Его́ восхо́щет зело́.

Луча́ми Све́та Боже́ственнаго озаря́емь,/ светоно́сне ста́рче Алекси́е,/ просвети́ и ны́не/ ду́ши сла́вящих тя// све́том нетле́ния.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Таи́нницы Пресвяты́я Тро́ицы,/ ста́рче Алекси́е и священному́чениче Се́ргие,/ со все́ми святы́ми земли́ Ру́сския,/ моли́те спасти́ся Оте́честву на́шему// правосла́вныя ве́ры утвержде́нием.

Сла́ва, глас 8:

О́тче Алекси́е люботру́дне,/ моли́твенниче те́плый о всех, притека́ющих к тебе́,/ ми́лующим се́рдцем вся́кия ско́рби утоля́еши,/ ра́дость духо́вную да́руя,/ и со апо́столом, ученико́м возлю́бленным,// запове́дуеши в любви́ пребыва́ти.

И ны́не, Богоро́дичен.

На вели́цей вече́рни

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, первопресто́льный гра́де,/ обреты́й сокро́вище нетле́нное,/ мо́щи целе́бныя пра́веднаго ста́рца Алекси́я,/ я́ко пресве́тлую зарю́ со́лнечную,/ Боже́ственною благода́тию пресла́вная чудеса́ источа́ющия./ Те́мже, соше́дшеся, с ра́достию возопии́м:/ о всечу́дне о́тче Алекси́е,/ моли́ просла́вльшаго тя Го́спода// дарова́ти Оте́честву на́шему мир и ве́лию ми́лость.

Ра́дуйся и торжеству́й, земле́ Ру́сская,/ днесь бо наста́ па́мять ве́рнаго служи́теля Святы́я Тро́ицы,/ ста́рца Алекси́я Моско́вскаго,/ кро́тостию бу́рю зло́бы умиря́ющаго,/ моли́тве и ве́ре в милосе́рдие Бо́жие науча́ющаго,/ заблу́дших на стезю́ спасе́ния наставля́ющаго./ Его́же моли́твами, Человеколю́бче Го́споди,// низпосли́ лю́дем Твои́м мир и ве́лию ми́лость.

Красу́йся, Це́рковь Ру́сская,/ па́мять всесве́тлую Алекси́я досточу́днаго соверша́ющи/ и пе́сненными похвалы́ того́ воспева́ющи:/ ра́дуйся, Боже́ственныя любве́ свети́льниче,/ бе́дствующим ско́рый помо́щниче и неду́жным исцели́телю,/ и́щущим спасе́ния всему́дрый наста́вниче/ и покая́ния в терпе́нии скорбе́й пропове́дниче./ Те́мже, о́тче богому́дре, не преста́й моли́ти Влады́ку Вседержи́теля// умири́ти мир и спасти́ ду́ши на́ша.

Ра́дуйся, пресла́вне Алекси́е,/ благи́х роди́телей о́трасль пречестна́я,/ ты, смире́нно во́лю свою́ отсека́я,/ благослове́ние ма́тере твоея́ испо́лнил еси́/ и, чин иере́йский благогове́йне восприе́м,/ до́бре ча́да церко́вная упа́сл еси́./ Сего́ ра́ди с любо́вию ти вопие́м:/ ра́дуйся, послуша́ния до́брый рачи́телю,/ ра́дуйся, ста́рчества святы́х оте́ц прее́мниче,/ ра́дуйся, те́плый о лю́дех моли́твенниче,/ ра́дуйся, ли́ку святы́х соприча́стниче./ С ни́миже, днесь предстоя́ Престо́лу Святы́я Тро́ицы,// моли́ дарова́ти душа́м на́шим ве́лию ми́лость.

Глас 6.

Подо́бен: Все отло́жше:

Огне́м любве́ Боже́ственныя распала́емь/ и све́тлостию доброде́телей осия́емь,/ ста́рче пра́ведне Алекси́е,/ то́ки живи́тельныя любве́ ве́рным излия́л еси́,/ сердца́ скорбя́щих ра́достию напая́я,/ я́звы грехо́вныя и страсте́й неду́ги исцеля́я,/ светоно́сными луча́ми ве́ры тьму неве́рия прогоня́я/ и теплото́ю моли́тв твои́х вся́ку сле́зу изсуша́я./ Те́мже тя, я́ко свети́льника Бо́жия и отца́ чадолюби́ва,// ны́не с любо́вию благоче́стно велича́ем.

Глас 4.

Подо́бен: Я́ко до́бля:

Дара́ми духо́вными от Бо́га укра́шенный,/ Тому́ Еди́ному послужи́л еси́,/ ста́рче пресла́вный Алекси́е,/ скорбя́щих и отча́янных утеша́я,/ пропа́вших на по́ли бра́ни сро́дником возвраща́я,/ нестрое́ния и раздо́ры семе́йныя примиря́я,/ боля́щих и неду́жных исцеля́я,/ заблу́ждших от па́губных страсте́й свобожда́я,/ и́щущих спасе́ния послуша́нию и покая́нию науча́я/ и всех любо́вию и моли́твою твое́ю покрыва́я./ Помози́ и нам, блаже́нне о́тче,/ душ спасе́ние улучи́ти// и Ца́рствия Небе́снаго дости́гнути.

Сла́ва, глас 2:

Избра́нниче Бо́жий, пра́ведне Алекси́е,/ рожде́ние твое́ моли́твами святи́теля Филаре́та благопоспе́шно соверши́ся,/ ста́рческое служе́ние лю́дем Кроншта́дтским па́стырем откры́ся,/ вхожде́ние же в Небе́сныя оби́тели/ благослове́нием испове́дника Патриа́рха Ти́хона препровожда́емо бысть./ Ны́не же, предстоя́ Престо́лу Бо́жию,/ прославля́еши Отца́ и Сы́на и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Пре́йде сень зако́нная:

Вход. Проки́мен дне. И чте́ния 3 преподо́бническая.

На лити́и стихи́ра, глас 3:

Наста́ днесь све́тлый пра́здник/ обре́тения честны́х моще́й пра́веднаго ста́рца Алекси́я,/ прииди́те, вси ве́рнии,/ просла́вим Преблага́го Бо́га на́шего,/ дарова́вшаго нам сокро́вище духо́вное,/ гра́ду на́шему тве́рдаго засту́пника,/ Оте́честву кре́пкаго предста́теля// и моли́твенника о душа́х на́ших.

И́ны стихи́ры, глас 1:

Све́том Боже́ственным тьму богоотсту́пничества осиява́я,/ пресве́тлый свети́льник ве́ры Христо́вы яви́лся еси́/ и лю́ди отча́янныя от неве́рия ко спасе́нию приве́л еси́,// пра́ведне о́тче Алекси́е.

Чист се́рдцем и душе́ю сый,/ Го́спода пред собо́ю вы́ну зрел еси́/ и моли́твою те́плою боле́зни приходя́щих к тебе́ врачева́л еси́,// благода́тне о́тче Алекси́е.

Христа́ всем се́рдцем возлюби́вый,/ не посрами́ нас, ве́рою на тя упова́ющих,/ и грехо́в проще́ние нам испроси́,// ди́вне о́тче Алекси́е.

Сла́ва, глас 6:

Ста́рче преди́вне Алекси́е,/ споспешеству́й нам, ча́дом твои́м,/ на ви́димыя и неви́димыя враги́ на́ша,/ и́маши бо на сие́ от Бо́га да́нную ти си́лу,/ испове́дниче и́стинный и уго́дниче Христо́в,/ да изба́вимся от вся́каго зла// твои́ми к Бо́гу моли́твами.

И ны́не, Богоро́дичен.

На стихо́вне стихи́ры, глас 8:

Любве́ и сострада́ния преиспо́лнен,/ милосе́рде о́тче Алекси́е,/ тяготы́ и ско́рби стра́ждущих поне́сл еси́,/ ско́рый помо́щник и уте́шитель тем быв.// Предста́тельствуй ны́не и о нас моли́твами твои́ми.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Пока́йтеся, ча́дца моя́,/ неизрече́нно бо милосе́рдие Влады́чне,/ си́це с любо́вию взыва́л еси́, свя́те,/ Оте́ц бо прие́млет ча́да Своя́ на Ве́чери,/ иде́же при́сно закала́ется Единоро́дный Сын Бо́жий,// па́дшее челове́ческое естество́ возставля́я.

Стих: Блаже́н муж, боя́йся Го́спода,// в за́поведех Его́ восхо́щет зело́.

Возлю́бим друг дру́га, бра́тие,/ я́ко любы́ от Бо́га есть,/ та́ко с Богосло́вом взыва́л еси́, о́тче,/ Христо́с бо по нас ду́шу Свою́ положи́,/ и мы до́лжни есмы́ себе́ утесня́ти,// и житие́ бли́жних облегча́ти.

Сла́ва, глас 2:

Егда́ на Христа́ и Це́рковь Святу́ю беззако́ннии ополча́хуся,/ тогда́ всенощнобде́нней моли́тве ве́рнии усе́рдне прилежа́ху./ Храм же свята́го Никола́я,/ посреде́ волн многомяте́жных обурева́емь,/ я́ко кора́бль спасе́ния яви́ся./ Ты же, о́тче, проро́чески возвеща́я, уверя́л еси́:// ве́ра правосла́вная па́ки возсия́ет.

И ны́не, Богоро́дичен.

Тропа́рь, глас 5:

Па́стырю Христо́в, о́тче Алекси́е,/ по́двигом до́брым подвиза́вся,/ ве́ру правосла́вную во мра́це беззако́ния испове́дал еси́/ и, я́ко уте́шитель и врач духо́вный,/ всех, притека́ющих к тебе́, врачева́л еси́./ Помози́ и нам, ве́рою чту́щим тя,// в любви́ к бли́жнему утверди́тися.

На у́трени

По 1-м стихосло́вии седа́лен, глас 8:

На милосе́рдие Бо́жие посреде́ бу́ри жесто́кия призыва́я упова́ти,/ па́ству от звероуловле́ния лю́таго огражда́л еси́/ и, на па́жить покая́ния направля́я,/ я́ко оте́ц чадолюби́вый упа́сл еси́ ю́./ Те́мже моли́ о нас, пра́ведне Алекси́е,/ да напра́вит Госпо́дь стопы́ на́ша на путь ми́рен.

Сла́ва, и ны́не, Богоро́дичен:

Еди́на Пречи́стая Де́во и Ма́ти,/ Еди́наго от Святы́я Тро́ицы неизрече́нно ро́ждшая,/ Того́ моли́, Милосе́рдая, поми́ловати ду́ши на́ша.

По 2-м стихосло́вии седа́лен, глас 7:

Покая́ния и́стиннаго ревни́телю,/ гра́да многомяте́жнаго безбо́жие слеза́ми и моли́твою умиря́я,/ долготерпе́ние и ми́лость Влады́чню к заблу́ждшим прославля́л еси́./ Утверди́ моли́твами твои́ми, о́тче блаже́нне,/ ве́ру и наде́жду в сердца́х на́ших.

Сла́ва, и ны́не, Богоро́дичен:

Жизнь ми́ру ро́ждшая, Де́во Всенепоро́чная,/ не пре́зри мольбы́ убо́гих и немощны́х, Всеблага́я,/ и нетле́нныя жи́зни песносло́вцы Твоя́ сподо́би.

По полиеле́и седа́лен, глас 6:

Жите́йская волне́ния и печа́ли мирски́я, Алекси́е, ста́рче Моско́вский,/ глубину́ души́ твоея́, в моли́тве пред Зижди́телем припа́дающую вы́ну, не поколеба́ша./ Его́же лицезре́ти в Трисия́нном све́те ны́не сподо́бился еси́.

Сла́ва, и ны́не, Богоро́дичен:

Со Арха́нгелом Де́ве принесе́м целова́ние:/ ра́дуйся, Ду́ха Свята́го прии́мшая,/ ра́дуйся, Бо́га Сло́ва вмести́вшая,/ ра́дуйся, ве́лией та́йне воплоще́ния послужи́вшая,/ ра́дуйся, Благода́тная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде// и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Ева́нгелие от Матфе́я, зача́ло 11.

По 50-м псалме́ стихи́ра, глас 6:

Днесь наста́ светоно́сное торжество́!/ Прииди́те, вси ве́рнии,/ восхва́лим уго́дника Бо́жия, вопию́ще си́це:/ ра́дуйся, благода́тный пра́ведниче,/ озаря́яй нас чуде́с светлостьми́;/ ра́дуйся, ди́вный уте́шителю,/ бу́рю страсте́й утиша́яй;/ ра́дуйся, те́плый моли́твенниче,/ ве́рныя посреде́ гоне́ний укрепля́яй;// ра́дуйся, пра́ведне Алекси́е, Моско́вский чудотво́рче.

Кано́н, глас 4.

Песнь 1.

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся Тоя́ чудеса́.

Припе́в: Святы́й пра́ведный о́тче Алекси́е, моли́ Бо́га о нас.

Се ны́не приступа́ю восхвали́ти свети́льника Бо́жия Алекси́я,/ ста́рца Моско́вскаго./ Укрепи́, Влады́ко Христе́, и напра́ви се́рдце и ум/ воспе́ти досто́йно свята́го уго́дника Твоего́.

Кто возглаго́лет труды́ и по́двиги твоя́, о́тче Алекси́е,/ ты бо, при́сно в служе́нии бли́жним пребыва́я,/ Всевы́шнему неизме́нно ду́хом предстоя́л еси́/ и, в ми́ре пожи́в, преми́рен яви́лся еси́.

С безпло́тными ли́ки пе́сньми немо́лчными Святу́ю Тро́ицу воспева́ти сподо́бился еси́,/ Ца́рствия Небе́снаго насле́дниче Алекси́е,/ те́мже и о прославля́ющих тя моли́, во е́же спасти́ся нам.

Богоро́дичен: Его́же трепе́щут Херуви́ми и Серафи́ми,/ во объя́тиих носи́ла еси́, Де́во Пречи́стая,/ Того́ со дерзнове́нием моли́ спасти́ любо́вию пою́щих Тя.

Песнь 3.

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

На ми́лость Бо́жию упова́я,/ святи́тель Филаре́т о рожде́нии твое́м усе́рдно моля́шеся у Престо́ла Влады́чня,/ избра́нника тя Христо́ва прови́дя, о́тче,/ еще́ бы́вшу ти во утро́бе ма́терней.

Я́ко до́брая о́трасль,/ от роди́телей благочести́вых прозя́бл еси́, пресла́вне,/ от ни́хже ве́ру кре́пкую и любо́вь нелицеме́рную к Бо́гу и бли́жним восприя́л еси́.

Ревну́я вели́кому наста́внику,/ пла́менному свети́льнику Бо́жию Филаре́ту,/ и подвиго́м и трудо́м того́ после́дуя,/ Спа́су Христу́ благоугоди́л еси́, о́тче пра́ведне.

Богоро́дичен: Глаго́лы благове́щения ра́доватися Пречи́стей Де́ве Арха́нгел повеле́,/ ра́дость бо Тоя́ Рождества́ растворя́ет печа́ль Ада́мову/ и весь род челове́ческий возво́дит к весе́лию ве́чному.

Ин конда́к, глас 2:

Ве́лия труды́ любве́ и милосе́рдия подъя́л еси́,/ пра́ведный о́тче Алекси́е,/ и, от свята́го па́стыря Кроншта́дтскаго благослове́ние на по́мощь стра́ждущим прие́м,/ беды́ и ско́рби людски́я, я́ко вери́ги, на ра́мо свое́ возложи́л еси́./ Мы же, ве́дуще тя моли́твенника дерзнове́нна ко Го́споду,/ со умиле́нием зове́м ти:// моли́ Христа́ Бо́га спасти́ся душа́м на́шим.

Седа́лен, глас 8:

Яви́ Госпо́дь ве́лию ми́лость лю́дем Ру́сския земли́/ и посла́ тя, о́тче Алекси́е, избра́нника Своего́,/ луча́ми све́та Боже́ственнаго просвеща́ющаго сердца́,/ во отча́янии и ско́рбех су́щая.

Сла́ва, и ны́не, Богоро́дичен:

О Ма́ти Бо́га Сло́ва,/ ка́ко возмо́жем изглаго́лати Пречи́стое Твое́ Рождество́,/ или́ ки́ими словесы́ просла́вим непости́жное милосе́рдие Бо́жие/ и Твою́, Пренепоро́чная, любо́вь к ро́ду на́шему,/ ко спасе́нию возведе́нному Кресто́м Сы́на Твоего́.

Песнь 4.

Ирмо́с: Седя́й в сла́ве, на Престо́ле Божества́/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.

Измла́да Христа́ возлюби́в и всеце́ло ду́шу в ру́це Его́ преда́в,/ кро́ток и послушли́в был еси́,/ во́лю же ма́тере твоея́ исполня́я, на путь свяще́нства вступи́л еси́/ и в нем трудолю́бно подвиза́лся еси́.

А́нгели сослужа́ху ти, о́тче,/ егда́ в безлю́днем хра́ме неуста́нно моли́твы возноси́л еси́ у Престо́ла Бо́жия./ Те́мже, укрепля́яся ду́хом и распала́яся любо́вию Боже́ственною,/ даро́в вы́шших сподо́бился еси́.

Ра́доватися повеле́ ти па́стырь Кроншта́дтский,/ егда́ свет помрачи́ся во очесе́х твои́х от рыда́ний го́рьких и слез по успе́нии супру́жницы ве́рныя,/ то́йже, к по́двигу ста́рчества тя призыва́я, рече́:/ отве́ржися себе́ и отве́рзи се́рдце прия́ти тя́жкия ско́рби и беды́ людски́я.

Богоро́дичен: К Засту́пнице и Влады́чице, и Ма́тери Спа́са на́шего сле́зно возопии́м:/ разреши́, Пресвята́я, боле́зни и ско́рби, утоли́ вся́кия ну́жды и печа́ли,/ да возра́дуемся и возвесели́мся о Го́споде.

Песнь 5.

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Яре́м ста́рчества в терпе́нии носи́вше/ и любо́вь ко Христу́, бли́жним и друг ко дру́гу име́вше,/ пра́ведне Алекси́е и преподо́бне Анато́лие О́птинский,/ ны́не в несконча́емей ра́дости торжеству́ете/ и мо́лите спасти́ся сла́вящим вы.

Ви́дя по́двиги и труды́ твоя́, ста́рче Алекси́е,/ скитонача́льник О́птинский Феодо́сий восклица́ше:/ еди́ному сие́ не под си́лу есть;/ Госпо́дь ти помога́ет, о́тче.

Дре́вним отце́м насле́дниче и О́птинским подви́жником собесе́дниче,/ светозаре́нием доброде́телей сия́я,/ во гра́де, я́ко в пусты́ни безво́дней, подвиза́лся еси́,/ слеза́ми и моли́твами ту́ю ороша́я.

Богоро́дичен: Де́во Пречи́стая, Ду́ха Свята́го Прия́телище,/ приими́ моли́твы нас гре́шных,/ очи́сти вся́кую скве́рну душе́вную,/ да просвети́мся непристу́пным све́том сла́вы Сы́на Твоего́.

Песнь 6.

Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.

Ра́дости испо́лнишася Моско́встии лю́дие,/ обре́тше в тебе́ засту́пника непрело́жнаго:/ пла́чущаго с пла́чущими и вражду́ющих примиря́ющаго,/ взе́млющаго на плещи́ своя́ не́мощи челове́ческия и утоля́ющаго скорбь и печа́ль.

Егда́ приспе́ вре́мя испыта́ний и во́лны нече́стия обыдо́ша зе́млю Ру́сскую,/ тогда́, Боже́ственныя любве́ испо́лнен,/ омраче́нная сердца́ просвеща́л еси́/ и науча́л еси́ лю́ди во Христе́ обрета́ти спасе́ние.

Оте́ческую любо́вь явля́я ча́дом твои́м, о́тче блаже́нне,/ моли́твою неду́жныя исцеля́л еси́ и от гла́да, сме́рти и напа́сти защища́л еси́./ Не преста́й и ны́не моли́тися за ны,/ укрепи́ во испыта́ниих, изба́ви от не́нависти и вся́кия зло́бы,/ милосе́рдие Бо́жие призыва́я.

Богоро́дичен: Гряду́щия беды́ оте́честву на́шему предвозвеща́хуся,/ из оче́с бо ико́ны Пречи́стыя Богоро́дицы Фео́доровския сле́зы истека́ху,/ пра́ведным Алекси́ем и все́ми предстоя́щими во хра́ме на моли́тве зри́мыя.

Конда́к, глас 8:

Простото́ю ве́ры высоты́ смире́ния дости́гл еси́,/ в мо́литве же и доброде́лании подвиза́яся,/ дара́ми духо́вными обогати́лся еси́/ и све́том Христо́вым просвети́лся еси́,/ помо́щниче и уте́шителю о́тче Алекси́е./ Те́мже ве́ру на́шу укрепи́,/ любви́ ко Го́споду и бли́жним научи́// и ко спасе́нию приведи́ моли́твами твои́ми.

И́кос:

Пра́ведне о́тче Алекси́е, ста́рче Моско́вский и всех правосла́вных ра́дование!/ Кто, зря светоле́пное лице́ твое́ и сия́ние оче́с твои́х, благогове́ния не испо́лнися./ Или́ кто, слы́ша смиренному́дрыя ре́чи твоя́, не умили́ся, возжела́я в де́лании угоди́ти Богу./ Или́ кто, во мрак отча́яния впады́й и уте́шен тобо́ю быв, не пока́яся./ Или́ кто, гневли́в и злоречи́в сый, ти́хостию нра́ва твоего́ не преложи́ся./ Те́мже, свяще́нную па́мять твою́ пра́зднующе, мо́лим тя:/ ве́ру на́шу укрепи́, любви́ ко Го́споду и бли́жним научи́/ и ко спасе́нию приведи́ моли́твами твои́ми.

Песнь 7.

Ирмо́с: Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.

На вся́кое проше́ние моли́твою отвещава́л еси́, ста́рче богому́дре,/ душе́ю сокруше́нною и ду́хом смире́нным Милосе́рдому Влады́це предстоя́./ Моли́ся и ны́не, хода́таю наш, о вопию́щих ве́рно:/ препе́тый отце́в Госпо́дь и Бог, благослове́н еси́.

Душа́ твоя́ чистото́ю и све́тлостию сия́я,/ о́тче незло́биве, да́ром сле́зным обогати́ся:/ Бог ми́лостив, ча́до, и мы сы́нове Его́ есмы́,/ – со умиле́нием глаго́лал еси́, науча́я взыва́ти:/ препе́тый отце́в Госпо́дь и Бог, благослове́н еси́.

Бог даде́ мне тве́рду де́тску ве́ру, – в простоте́ пове́дал еси́, о́тче пра́ведне./ Вои́стину, посреде́ злонра́вия богоме́рзкаго ве́ра твоя́ мно́гия ко спасе́нию приведе́ и научи́ воспева́ти:/ препе́тый отце́в Госпо́дь и Бог, благослове́н еси́.

Богоро́дичен: Милосе́рдая Ма́ти, не пре́зри недосто́йная моле́ния на́ша,/ со святы́ми покрови́тели хра́ма сего́ моля́щи Сы́на Твоего́/ спасти́ всех, воспева́ющих Тя.

Песнь 8.

Ирмо́с: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

В погребе́нии мое́м ра́дость обря́щете, – проро́чески рекл еси́, о́тче./ Сие́ же испо́лнися, егда́ у гро́ба твоего́ патриа́ршее благослове́ние препо́дано бысть ча́дом твои́м, взыва́ющим:/ Го́спода по́йте, дела́, и превозноси́те Его́ во вся ве́ки.

И́щущим тебе́ обрета́ешися ско́рый помо́щник и подае́ши благода́тную по́мощь,/ ты бо не́когда боля́щаго Алекса́ндра здра́ва сотвори́л еси́,/ и сы́на ма́тери возврати́л еси́ и от напра́сныя сме́рти изба́вил еси́./ Посети́ и нас, о́тче, твое́ю по́мощию, пою́щих:/ Го́спода по́йте, дела́, и превозноси́те Его́ во вся ве́ки.

Святы́я Твоя́, Го́споди, с со́нмом безпло́тных а́нгельски воспева́ют Тя./ С ни́миже но́вый уго́дник, ста́рец Моско́вский Алекси́й, совозсия́л есть, вопия́:/ Го́спода по́йте, дела́, и превозноси́те Его́ во вся ве́ки.

Богоро́дичен: Ма́ти Бо́жия Всенепоро́чная,/ я́звы души́ моея́ исцели́, сла́сти пло́ти утоли́, ум от вся́каго вре́да умири́/ и вра́жиих напа́стей изба́ви превознося́щих Тя во ве́ки.

Песнь 9.

Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Помози́, те́плый моли́твенниче наш,/ не малоду́шествовати во испыта́ниих кре́стных и сохрани́ти ве́рность Христу́,/ Его́же ра́ди ты гото́в был еси́ му́ки и смерть прия́ти,/ я́коже и священному́ченик Се́ргий, сын твой.

Бу́ди нам па́стырь до́брый,/ науча́я любви́ и ве́ре, и па́дающия не уста́ни воздвиза́ти,/ приведи́ ны, о́тче пра́ведный, во оби́тели Небе́сныя,/ иде́же ты в ра́дости непреста́нней пребыва́еши.

Воспева́ем богоуго́дное житие́ твое́, о́тче Алекси́е,/ в не́мже, я́ко ве́рный раб Госпо́день, ве́рен был еси́./ Научи́ нас, лука́вых и злонра́вных, неле́ностно Христу́ рабо́тати,/ да вни́дем в ра́дость Го́спода на́шего.

Богоро́дичен: Воспева́ем Сы́на Твоего́ и Бо́га на́шего,/ Ма́ти Всесвята́я, Де́во Пречи́стая,/ Его́же без истле́ния родила́ еси́ на спасе́ние на́ше и обновле́ние.

Свети́лен:

Во све́те незаходи́мем, о́тче Алекси́е досточу́дне,/ ны́не предстои́ши Престо́лу Святы́я Трои́цы со А́нгелы и все́ми святы́ми/ и мо́лиши о нас, ве́рою ублажа́ющих тя.

Сла́ва, и ны́не, Богоро́дичен:

Благода́тная Богоро́дице Де́во,/ предстоя́щи Престо́лу Сы́на и Бо́га Твоего́,/ моли́ о нас, на ми́лость Его́ упова́ющих.

На хвали́тех стихи́ры, глас 8.

Подо́бен: О, пресла́внаго чудесе́:

Ра́дуйся, первопресто́льный гра́де Москво́,/ лику́й, Це́рковь Христо́ва,/ ве́рных днесь на торжество́ пра́веднаго Алекси́я созыва́ющи,/ его́же пе́сненными гла́сы воспои́м, зову́ще:/ о светоно́сне ста́рче Алекси́е,/ ты, Престо́лу Бо́жию предстоя́,/ моли́твами твои́ми на путь спасе́ния нас наставля́еши,/ скорбя́щим душе́ю боже́ственное утеше́ние да́руеши// и о всех, прося́щих тя с ве́рою, Бо́га умоля́еши.

О, пресла́внаго чудесе́!/ Саро́вский чудотво́рец в виде́нии яви́ся/ скорбя́щей ма́тери о сы́не свое́м,/ повелева́я в престо́льнем гра́де хра́ма дости́гнути,/ иде́же пра́ведный Алекси́й, подвиза́яся,/ мно́гия лю́ди благода́тию Бо́жию врачева́ше,/ от него́же утеше́ние и наде́жду получи́вши,/ сы́на своего́ моли́твами того́ здра́ва обре́те// и просла́ви Бо́га, ди́внаго во святы́х Свои́х.

О, пресла́внаго чудесе́!/ Ду́шу за бли́жних полага́я,/ ты, пра́ведне о́тче Алекси́е,/ пред исхо́дом ча́да твоя́ утеша́л еси́:/ аз при́сно с ва́ми пребыва́ти бу́ду/ и не оста́влю моли́твами мои́ми!/ Те́мже, обетова́ние сие́ исполня́я,/ ны́не ду́хом Престо́лу Бо́жию предстои́ши,// мощьми́ же во хра́ме святе́м твое́м с на́ми пребыва́еши.

Сла́ва, глас то́йже:

Богоуго́дне и пра́ведне пожи́в,/ наста́вниче богому́дре Алекси́е,/ до́бре ста́до слове́сное упа́сл еси́/ и Небе́сных оби́телей дости́гл еси́,/ те́мже со умиле́нием вопие́м ти:/ ра́дуйся, ко́реню благи́й,/ от него́же священному́ченик сын прозябе́;/ ра́дуйся, лозо́ церко́вная,/ многоча́дный плод принесе́./ И ны́не, Престо́лу Святы́я Тро́ицы предстоя́,// не преста́й моли́тися с любо́вию тя сла́вящих.

И ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́!/ Ма́ти Бо́жия и Цари́ца/ с ли́ки безпло́тных Сил а́нгельских/ и новому́ченики, испове́дники и все́ми святы́ми/ сла́вят вку́пе вели́чие Влады́чне/ и мо́лят стране́ на́шей спасти́ся./ Мы же, правосла́вно испове́дающе,/ покланя́емся Триеди́ному и Триипоста́сному,// Всеси́льному и Всеми́лостивому Бо́гу на́шему.

На Литурги́и

Блаже́нны от кано́на, пе́сни 3-я и 6-я. Проки́мен, глас 7: Возвесели́тся пра́ведник о Го́споде// и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол ко Евре́ем, зача́ло 311. Аллилу́ия, глас 4: Пра́ведник, яко фи́никс, процвете́т и, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Ева́нгелие от Матфе́я, зача́ло 11. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О, всечестны́й и преблаже́нный о́тче наш Алекси́е, ди́вный ста́рче Моско́вский и Це́ркве Ру́сския похвало́ и ра́дование! Ты, ве́лию любо́вь ко Го́споду име́я и за́поведи ева́нгельския непрело́жно исполня́я, ду́шу твою́ за па́ству полага́л еси́. Приими́ ма́лое сие́ моле́ние на́ше, и я́ко в земно́м житии́ твое́м вся́ку скорбь облегча́л еси́, та́ко и ны́не, милосе́рдый моли́твенниче и хода́таю наш, испо́лни стра́ждущая сердца́ ра́достию, умоли́ Человеколю́бца Бо́га о проще́нии прегреше́ний на́ших, да, очи́стивше ду́ши покая́нием, к доброде́тельному житию́ обрати́мся. Ей, пра́ведне о́тче Алекси́е, бу́ди нам па́стырь до́брый, на стезю́ спасе́ния наставля́яй, да моли́твами твои́ми безпоро́чно про́йдем путь жития́ на́шего и обря́щем Оте́чество Небе́сное, иде́же ты со А́нгелы и все́ми святы́ми предстои́ши Престо́лу Святы́я Тро́ицы, прославля́я Безнача́льнаго Отца́ со Единоро́дным Его́ Сы́ном и Пресвяты́м, и Благи́м, и Животворя́щим Его́ Ду́хом во ве́ки веко́в. Ами́нь.

Источник: Текст утвержден Священным Синодом Русской Православной Церкви 14 мая 2018 года (журнал № 37)

Ме́сяца ию́ня в 10-й день

Свята́го священному́ченика Мисаи́ла, епи́скопа Ряза́нскаго

На вели́цей вече́рни

На Го́споди, воззва́х: стихи́ры на 8, глас 1:

Днесь, ве́рнии лю́дие, соше́дшеся,/ священному́ченика Мисаи́ла па́мять почти́м/ и пе́сньми духо́вными того́ восхва́лим,/ и́же, по́двигом жития́ своего́ путь спасе́ния нам указу́я,/ лю́тую тьму безбо́жия посрами́л еси́// и свети́льник пресве́тлый земли́ Ряза́нския показа́лся еси́.

От ю́ности усе́рдно Христу́ после́довав,/ доброде́телей све́тлостию украси́лся еси́,/ добропобе́дне о́тче Мисаи́ле,/ и, во́ли наста́вника твоего́ Патриа́рха Ни́кона повину́яся,/ архиере́й дре́вняго гра́да Ряза́ни был еси́,/ словеса́ же Ева́нгельскаго уче́ния неве́рным пропове́дуя,// ча́шу страда́ний, ра́дуяся, испи́л еси́.

Стрело́ю неми́лостивно ураня́емь,/ зе́млю на́шу кро́вию твое́ю освяти́л еси́/ и, вене́ц сла́вы от Христа́ прие́м,/ вся Небе́сная весе́лием испо́лнил еси́./ Те́мже, священному́чениче Мисаи́ле,/ Го́сподеви приле́жно моли́ся,/ да сохрани́т Оте́чество на́ше в ми́ре и благоде́нствии// и спасе́т ду́ши на́ша.

Сла́ва, глас 6:

Ра́дуются днесь лю́дие гра́да Ряза́ни,/ те́плаго моли́твенника име́юще,/ и благодаре́ние Го́споду возсыла́ют,/ пе́сньми духо́вными восхваля́юще/ ди́внаго уго́дника Бо́жия,// священному́ченика Мисаи́ла пресла́внаго.

И ны́не, Богоро́дичен.

Вход. Проки́мен дне. И чте́ния три священному́ченику.

На лити́и стихи́ра, глас 3:

Днесь наста́ свяще́нное твое́ торжество́,/ священному́чениче Мисаи́ле,/ в не́мже твори́м свяще́нную па́мять твою́/ и прославля́ем Христа́ Бо́га,/ в ве́ре тя укрепи́вшаго ко просвеще́нию язы́ков./ Моли́ся, свя́те, приле́жно о нас,// да и мы благода́тию Христо́вою просвети́мся.

Сла́ва, глас то́йже:

Кре́постию непобеди́мою препоя́сався,/ неве́дущих И́стины со дерзнове́нием просвеща́л еси́,/ святи́телю до́блий,/ не забу́ди и нас, сро́дников твои́х,// почита́ющих свяще́нную па́мять твою́.

И ны́не, Богоро́дичен:

Све́том Твои́м нас озари́,/ Всенепоро́чная Де́во,/ ро́ждшая Свет Непристу́пный,/ просвети́ ду́ши на́ша, Влады́чице,// спаси́ и поми́луй род наш.

На стихо́вне стихи́ры, глас 8:

А́нгелов собесе́дниче,/ священному́чениче Мисаи́ле,/ песносло́вие на́ше приими́,/ Христа́, Со́лнце Пра́вды незаходи́мо, име́я во уме́ и се́рдце,/ просвеща́юща тя Све́том Боже́ственным./ Те́мже к тебе́ усе́рдно ны́не прибега́ем,/ да твои́ми моли́твами// просвети́т Госпо́дь ду́ши на́ша.

Стих: Честна́ пред Го́сподем// смерть преподо́бных Его́.

Дерзнове́ние ко Го́споду име́я,/ благода́ть и ра́дость ве́рным да́руеши,/ вся́ку беду́ отъе́млеши/ и бу́рю душе́вную утиша́еши./ Те́мже, святи́телю Христо́в Мисаи́ле,// моли́твами твои́ми умири́ ду́ши на́ша.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Свети́льника тя, свя́тче Бо́жий, позна́хом,/ сия́юща де́лом и сло́вом,/ ревни́теля ве́ры и благоче́стия па́ствы твоея́,/ те́мже у́бо просвети́ сердца́ на́ша све́том богове́дения,// да тя при́сно ублажа́ем.

Сла́ва, глас 6:

Священному́чениче Мисаи́ле,/ ты, тече́ние жи́зни до́бре соверши́в,/ ве́ру пра́вую соблю́л еси́,/ сего́ ра́ди Христо́с Бог наш/ венча́ тя све́тлым венце́м/ и Небе́сное насле́дие дарова́.// Того́ моли́ спасти́ся душа́м на́шим.

И ны́не, Богоро́дичен.

Тропа́рь, глас 5:

Богому́дре о́тче Мисаи́ле,/ архиере́ев сла́во и си́рых защи́тниче,/ безбоя́зненный пропове́дниче уче́ния Боже́ственнаго,/ ты, в ве́ре пра́вей сердца́ притека́ющих к тебе́ утверди́в/ и свяще́нную оде́жду в кро́ви муче́ния омочи́в,/ я́ко му́ченик и па́стырь до́брый яви́лся еси́./ Моли́ся приле́жно Влады́це Христу́// о спасе́нии душ на́ших.

На у́трени

По 1-м стихосло́вии седа́лен, глас 1:

Священному́чениче Мисаи́ле,/ притека́ющии к свято́му о́бразу твоему́/ и лобыза́ющии ма́нтию твою́, обагре́нную кро́вию,/ хва́лят тя, с любо́вию ублажа́юще./ Те́мже не преста́й моли́тися о нас ко Пресвя́тей Тро́ице,/ прося́ оставле́ния грехо́в и спасе́ния душа́м на́шим.

Сла́ва, и ны́не, Богоро́дичен:

Спаси́ ны, Пречи́стая,/ волну́ющихся страстьми́ жите́йскими,/ и окорми́ к ти́хому приста́нищу Твоему́, Богоблагода́тная.

По 2-м стихосло́вии седа́лен, глас 6:

Тя па́стыря до́браго и учи́теля изря́дна ве́мы,/ священному́чениче Мисаи́ле./ Ны́не, предстоя́ Престо́лу Влады́чню,/ моли́ся при́сно о всех нас.

Сла́ва, и ны́не, Богоро́дичен:

О Све́та прия́телище,/ Богора́дованная Влады́чице,/ святи́телем вои́стину утвержде́ние/ и преподо́бным похвало́!/ Спаси́ ны от бед и обстоя́ний,/ воспева́ющих Тя, Многопе́тую.

Велича́ние:

Велича́ем тя,/ священному́чениче Мисаи́ле,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный: Бог нам прибе́жище и си́ла:

По полиеле́и седа́лен, глас 8:

Во е́же Оте́честву на́шему в ми́ре и благоде́нствии пребыва́ти, моли́ся, священному́чениче Мисаи́ле,/ и приими́ на́ше благода́рное пе́ние,/ от усе́рдия ны́не тебе́ приноси́мое.

Сла́ва, и ны́не, Богоро́дичен:

Песносло́вяще, Чи́стая, из утро́бы Твоея́ вопло́щшагося,/ Тя славосло́вим, я́ко Бо́жию Ма́терь.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Благоче́стно пожи́в, я́ко святи́тель,/ па́ству Ряза́нскую зело́ возлюби́л еси́/ и, путь спасе́ния неве́дущим указу́я,/ до́брый па́стырь ста́ду твоему́ яви́лся еси́,/ вене́ц же му́ченический за Христа́ прие́м,/ кро́вию твое́ю зе́млю обагри́л еси́./ И ны́не предстоя́ Престо́лу Сла́вы,/ не забу́ди сро́дников твои́х// и моли́ся о душа́х на́ших.

Кано́н, глас 6.

Песнь 1.

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Лю́дие христоимени́тии земли́ Ряза́нския,/ спра́зднуйте с на́ми торжество́ церко́вное,/ па́мять священному́ченика Мисаи́ла соверша́юще,/ да его́ моли́твами в ве́ре правосла́вней утверди́мся.

Мисаи́ле чу́дне и архиере́ю сла́вне,/ ста́до Христо́во, я́ко па́стырь до́брый, упа́сл еси́, ду́шу свою́ за него́ полага́я,/ моли́ся приле́жно о душа́х на́ших.

Житие́м непоро́чным и благоче́стием твои́м возсия́л еси́, свя́те Мисаи́ле,/ и, ре́вностию по Бо́зе распаля́емь, поклоне́ние тва́ри упраздни́л еси́,/ моли́ся о чту́щих тя благоче́стно,/ да в любви́ Бо́жией пребу́дем.

Богоро́дичен: А́нгели лику́ют на Небеси́, ви́дяще о́браз Твой, Пречи́стая,/ принесе́нный из Му́рома во град Ряза́нь первосвяти́телем Васи́лием,/ и́же, пучи́ну ре́чную с ним безбе́дно преплы́в,/ благослове́ние па́стве Ряза́нстей дарова́л есть.

Песнь 3.

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Прииди́те, лю́дие Ряза́нстии,/ па́стыря до́браго, ду́шу свою́ за лю́ди положи́вшаго, почти́м и с любо́вию ему́ возопии́м:/ святи́телю Мисаи́ле, предста́тельствуй о нас пред Бо́гом,/ во е́же спасти́ся нам.

Христа́, А́гнца Бо́жия, измла́да возлюби́в/ и всего́ себе́ в послуша́ние наста́внику твоему́ вручи́в,/ архипа́стырь добр гра́ду Ряза́ни показа́лся еси́, Мисаи́ле пресла́вне./ Помози́ и нам от си́лы в си́лу восходи́ти.

Му́дрость Бо́жию разуме́в,/ я́ко пра́веден Госпо́дь и пра́вды возлюби́,/ И́стине был еси́ служи́тель ве́рный,/ Мисаи́ле священному́чениче./ И ны́не о нас приле́жно моли́ся.

Богоро́дичен: О Пренепоро́чная Де́во, Ма́ти Творца́ вся́ческих,/ Спаси́теля ми́ра неизрече́нно ро́ждшая!/ Того́ моли́ спасти́ся душа́м на́шим.

Седа́лен, глас 4:

Огнь Боже́ственныя любве́ в се́рдце свое́м име́я/ и чистоту́ стяжа́в серде́чную, адама́нте ве́ры Христо́вы,/ научи́ нас ше́ствовати путе́м спасе́ния.

Сла́ва, и ны́не, Богоро́дичен:

Богора́дованная Влады́чице,/ ро́ждши Спа́са Христа́, Бо́жию Си́лу и Бо́жию Прему́дрость,/ спаси́ град сей и лю́ди, на Тя упова́ющия.

Песнь 4.

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.

Христа́ да восхва́лим, ве́рнии,/ святи́теля ди́внаго яви́вшаго,/ моля́щася о душа́х на́ших.

Я́ко свети́ло небе́сное, Мисаи́ле чу́дне и архиере́ю сла́вне,/ кро́вию твое́ю свиде́тельство Сло́ва Бо́жия просия́./ Моли́ся приле́жно о нас.

Любо́вь к Бо́гу стяжа́в и Пастыренача́льнику Христу́ подража́я,/ па́стырь до́брый яви́лся еси́, святи́телю Мисаи́ле./ Моли́ся о нас, да любо́вию Ева́нгельскою обогати́мся.

Богоро́дичен: Изба́ви от бед к Тебе́ прибега́ющих, Ма́ти и Де́во Пречи́стая,/ Христа́ Бо́га ро́ждшая,/ моля́щи Того́ спасти́ ду́ши на́ша.

Песнь 5.

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Лю́ди, не ве́дущия Го́спода, неле́ностно просвеща́л еси́, святи́телю,/ Отца́ и Сы́на и Ду́ха Свята́го,/ Еди́наго Бо́га в Трие́х Ли́цех, пропове́дуя.

Наста́вника тя и моли́твенника те́пла иму́ще, священному́чениче Мисаи́ле,/ мо́лимся ти усе́рдно:/ не забу́ди нас, сро́дников твои́х,/ избавля́я от наве́т вра́жиих и вся́кия печа́ли.

Благода́рное пе́ние, тебе́ приноси́мое, святи́телю Мисаи́ле, не пре́зри,/ но приими́ и ра́дости духо́вныя испо́лни сердца́ моли́твенник твои́х,/ Христа́ приле́жно о нас умоля́я.

Богоро́дичен: Ра́дуйся, Ра́досте на́ша,/ покры́й нас от вся́каго зла/ честны́м Твои́м покро́вом.

Песнь 6.

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Ра́зум име́яй Бо́гом просвеще́нный,/ до́брый де́латель за́поведей Христо́вых яви́лся еси́, свя́те Мисаи́ле,/ и ду́шу твою́ Бо́гу прине́сл еси́,/ я́ко же́ртву чи́сту и непоро́чну.

Смире́нием се́рдца украси́вся,/ во оби́тели Небе́сныя вшел еси́, священному́чениче,/ иде́же нас помяни́, почита́ющих тя при́сно.

Любо́вь ко Христу́ Пастыренача́льнику запечатле́л еси́ кро́вию твое́ю/ и ду́шу, я́ко же́ртву чи́стую, Бо́гу прине́сл еси́,/ путь спасе́ния нам указу́я.

Богоро́дичен: Ма́ти Све́та яви́лася еси́, Влады́чице,/ Те́мже моли́м Тя, Богоневе́сто:/ озари́ ду́ши на́ша Све́том Сы́на Твоего́.

Конда́к, глас 5:

Весели́тся ра́достне Це́рковь Ру́сская,/ во обре́тении честны́х твои́х моще́й,/ священному́чениче Мисаи́ле,/ ты бо, заве́т Пастыренача́льника исполня́я/ и о лю́дех, не ве́дущих Го́спода, се́рдцем боле́знуя,/ ду́шу твою́ за па́ству положи́л еси́./ И нам простри́ ру́ку по́мощи хода́тайством твои́м// и упра́ви наш путь ко спасе́нию.

И́кос:

Ди́внаго уго́дника Бо́жия просла́вим,/ и́же, от ю́ности Христа́ возлюби́в,/ Тому́ рабо́тати пла́менне вожделе́/ и, путь ве́рным освяща́я,/ ра́ною сме́ртною уязви́ся./ Те́мже вси зове́м ему́:/ Ра́дуйся, во смире́нии Ду́хом Христо́вым обогати́выйся;/ ра́дуйся, во свиде́тельстве Сло́ва Бо́жия любо́вь Христо́ву яви́вый./ Ра́дуйся, в уране́нии твое́м не устраши́выйся;/ ра́дуйся, священному́чениче Мисаи́ле, помо́щниче наш,/ упра́ви наш путь ко спасе́нию.

Песнь 7.

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Па́стырю до́брый, ду́шу свою́ за о́вцы положи́вый, священному́чениче Мисаи́ле,/ моли́твами твои́ми помози́ па́стырем ста́до Христо́во упасти́,/ да приведу́т его́ во оби́тели ве́чныя, во е́же зва́ти:/ благослове́н Бог оте́ц на́ших.

Не преста́й, святи́телю, моли́тися о сро́дницех твои́х,/ во е́же нам по за́поведем Госпо́дним ходи́ти, зову́ще:/ благослове́н Бог оте́ц на́ших.

Ре́вностию по Бо́зе распаля́емый, святи́телю Христо́в Мисаи́ле,/ па́ству свою́ поуча́л еси́,/ да оста́вят вси нече́стие и да пою́т:/ благослове́н Бог оте́ц на́ших.

Богоро́дичен: Всепе́тая Ма́ти,/ приими́ мольбы́ упова́ющих на Тя,/ да с Тобо́ю воспева́ем Го́спода во ве́ки.

Песнь 8.

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Днесь пресве́тло озаря́емся, пречу́дный Мисаи́ле,/ творя́ще па́мять твою́ ве́рно, песнь отроко́в пою́ще:/ вся дела́, благослови́те, по́йте Го́спода.

Бо́дренным ума́ трезве́нием и те́плым ко Христу́ моле́нием, свя́те Мисаи́ле,/ ду́шу твою́ устроя́л еси́, непреста́нно поя́:/ вся дела́, благослови́те, по́йте Го́спода.

Огне́м духо́вным, су́щим в тебе́, блаже́нне Мисаи́ле,/ пла́мень грехо́вный в душа́х ве́рных в ро́су претворя́шеся./ Те́мже, ра́дуяся на Небесе́х со святи́телем Васи́лием, взыва́еши:/ вся дела́, благослови́те, по́йте Го́спода.

Богоро́дичен: Чи́стую сла́вно почти́м, Де́ву Богоро́дицу,/ я́ко свет сердца́м на́шим/ и покро́в всеси́льный от напа́стей вра́жиих.

Песнь 9.

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Хва́лится тобо́ю, священному́чениче Мисаи́ле, град Ряза́нь,/ име́я тя моли́твенника и хода́тая пред Бо́гом,/ Его́же моли́ спасти́ся душа́м на́шим.

Предстоя́ у Престо́ла Царя́ Сла́вы, священному́чениче,/ проле́й те́плую моли́тву о нас ко Го́споду/ и испроси́ нам ве́лия ми́лости.

По́двиг твой, святи́телю, зерца́ло благ ве́чных яви́ся,/ я́ко ду́шу свою́ положи́л еси́ за дру́ги своя́,/ те́мже помози́ нам за́поведи Госпо́дня испо́лнити.

Богоро́дичен: Взыва́ем вси к Тебе́, Цари́це Небе́сней:/ Ма́ти Бо́жия,/ спаси́ род христиа́нский.

Свети́лен:

Сла́внаго священному́ченика Мисаи́ла пе́сньми восхва́лим,/ я́ко ду́шу свою́ за лю́ди положи́вшаго/ и све́том ве́ры Христо́вы их просвети́вшаго.

Сла́ва, и ны́не, Богоро́дичен:

Пресвята́я Влады́чице,/ просвети́ нас Све́том Сы́на Твоего́/ и спаси́ ду́ши на́ша.

На хвали́тех стихи́ры, глас 8:

Дерзнове́ния Боже́ственнаго испо́лнився, священному́чениче Мисаи́ле,/ Кресто́м Христо́вым вооружи́лся еси́/ и, пострада́в да́же до кро́ве,/ и́стину свята́го Ева́нгелия пропове́дал еси́,/ просвеща́я вся концы́// во спасе́ние душ на́ших.

Свя́тче Бо́жий Мисаи́ле,/ предстоя́ ны́не Престо́лу Госпо́дню,/ мир ми́ру моли́твами твои́ми испроси́// и душа́м на́шим ве́лию ми́лость.

Моли́ Христа́ Бо́га на́шего,/ священному́чениче Мисаи́ле,/ о всех нас, соверша́ющих па́мять твою́,/ ве́рою и любо́вию тя призыва́ющих,// да спасе́т ду́ши на́ша.

Сла́ва, глас то́йже:

Прииди́те, лю́дие па́ствы Ряза́нския,/ просла́вим в пе́снех и пе́ниих духо́вных/ священному́ченика Мисаи́ла,/ те́плаго к Бо́гу предста́теля// и моли́твенника о душа́х на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

На литурги́и

Блаже́нны от кано́на свята́го, Песнь 3.-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных. Апо́стол ко Евре́ем, зача́ло 334. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 67. Прича́стен: В па́мять ве́чную бу́дет пра́ведник:

Моли́тва

О, избра́нниче и уго́дниче Христо́в, священному́чениче Мисаи́ле, Це́ркве Ру́сския сто́лпе непоколеби́мый и сро́дников твои́х предста́телю и наста́вниче! Ты, от ю́ности Христа́ возлюби́в и Тому́ рабо́тати пла́менне вожделе́в, пропове́дал еси́ Ева́нгелие лю́дем, не ве́дущим и́стины, и, стрелы́ летя́щия не убоя́вся, да́же до кро́ве пострада́л еси́ и путь ве́рным освяти́л еси́. Ны́не у́бо при́зри на нас, умиле́нною душе́ю и сокруше́нным се́рдцем тя призыва́ющих, и утверди́ в ве́ре святе́й, научи́ нас всегда́ твори́ти во́лю Бо́жию и храни́ти за́поведи Госпо́дня. Бу́ди, о́тче, па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да предста́тельством твои́м ве́ра правосла́вная утвержда́ется во Оте́честве на́шем и непреста́нно сла́вится в нем и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 28 декабря 2017 года (журнал № 131)

Месяца июня в 10-й день

Священномученика Митрофана, пресвитера Пекинскаго, и иже с ним пострадавших

На велицей вечерни

На Господи, воззвах: стихиры на 8, глас 6:

О, дивный полче страстотерпец Христовых,/ от соплеменных буиих убиенных!/ О, мученицы мнози,/ за веру Православную живот свой положившии в царстве Китайстем безкрайнем!/ Кто возможет прославити страдания ваша,/ отче Митрофане богомудре со чады твоими духовными,/ мужие и жены, старцы с юнотами и младенец множество!/ Приидите, станите с нами/ и прославите Христа Подвигоположника.

О, малое стадо,/ емуже Отец Небесный дати Царство благоволи!/ Како не дивимся, зряще вы, рачители благочестия,/ обретшия многоценный бисер Православия в земли язычестей,/ идеже вера Христова вмале проповедана бе,/ взыскасте Господа и живы днесь души ваша,/ восхваляюще Христа Подвигоположника.

Глас пророка Исаии услышим, вернии, взываяй:/ се, сии издалеча приидут./ Ныне проречение сие исполнися,/ ныне чада Божия, благосветлая светила, от восток солнца приидоша,/ к горе Сиону и ко граду Бога живаго,/ к Церкви первородных на Небесех написанных,/ и духом праведник совершенных.

Како не дивимся, зряще тя, священне Митрофане,/ от млада проповедником Православия внимавша/ и от их устен, водою животочною, яко древо плодовитое, напояема;/ послежде, еще юну тебе сущу,/ братий твоих любомудренне просвещающа;/ по сем венец достоин трудов твоих/ благодать священства от десницы просветителя Японии, Николая славнаго, приемша/ и, по стопам его шествующа,/ служение свое добле совершивша,/ мученически страдавша и венчавшася.

Чада моя возлюбленная,/ вопияше священноучитель Митрофан,/ се, время испытания наста,/ никтоже от вас да убоится смерти лютыя,/ поминая, како словом и делом поучах вы Господеви работати,/ скорби и обиды от ближних благодушно терпети,/ наипаче же веру святую,/ аки дар небесный, даже до крове хранити.

О, мученицы Христовы единонравнии,/ коль светла страдания ваша,/ за веру Православную подъятая!/ Веру Христову, яко щит противу лица гонителей, твердо держали есте/ и тако, живот свой за Христа положивше,/ радующеся прехвальным страстотерпцем древним,/ равночестными тем явилися есте.

Слава, глас 8:

Днесь собор святых мученик,/ священнотаинником Митрофаном приводимый,/ духовную трапезу мучениколюбцем предлагает,/ верою Православною сияя аки звезды небесныя,/ никакоже Солнца Правды Христа отлучаяся,/ терпеливо поношения, оклеветания, мучения и смерть от рук мучителей приемлет,/ радуяся радостию Небесною.

И ныне, глас тойже, Богородичен: Царь Небесный за человеколюбие на земли явися:

Вход. Прокимен дне. Чтения три мученическая.

На литии стихиры, глас 5:

Приидите, вернии, воспоим священнаго Митрофана,/ единонравный лик страдалец Христу с собою приведшаго,/ кумиром не поклоньшихся/ и за веру святую обиды и безчестия,/ поношения, муки и смерть претерпевших./ ихже молитвами, Христе Боже, помилуй нас.

Приидите, возславим дивный сонм/ мужей и жен, старцев и стариц, отроков и отроковиц,/ богомудрому Митрофану, аки овцы заколения, на страдания последовавших/ и тако узкими враты и тесным путем/ в живот вечный вшедших.

Слава, глас 1:

Светлою любовию ко Христу пламенеюще,/ веры Божественныя не отвергостеся/ и кумиром не поклонистеся,/ святии мученицы с пастырем вашим священнотаинником Митрофаном,/ и, о Христе укрепляеми, мучителей суровство низложисте./ Сего ради, венцы победы улучивше,/ Творцу всяческих молитеся,/ да спасет души наша.

И ныне, Богородичен.

На стиховне стихиры, глас 2.

Подобен: Доме Евфрафов:

Христа возлюбльше,/ во след мученик древних/ мужественне потекл еси,/ священнострадальче Митрофане/ с дружиною твоею.

Стих: Воззваша праведнии,/ и Господь услыша их.

Звезды, на Востоце возсиявшия,/ днесь восхвалим,/ лик страдальцев добропобедных,/ светом Православия/ Китай просветивших.

Стих: Многи скорби праведным,/ и от всех их избавит я Господь.

Первозваннии мученицы Китайстии,/ тьмою неведения/ окрест обстоими,/ светозарнии и добропобеднии/ в подвизе явистеся.

Слава, глас 4:

Мучеников святых воинство/ привел еси Христу, святче Митрофане,/ первый от китайского народа во иерея поставленный,/ не крепостию ратною и оружии изощренными гордящихся,/ но токмо немощию своею,/ Христом укрепляеми, сладце похваляющихся,/ посреде же их дивный отрок, сын твой Иоанн,/ егоже от главы до ног ранами злодеи уязвиша и огнем сожгоша./ Вси сии страдальцы добропобеднии/ Небесных селений достигоша,/ идеже плодов древа животнаго наслаждаются, досточуднии.

И ныне, Богородичен, глас тойже: Призри на моления Твоих раб Всенепорочная:

Тропарь, глас 4:

Мученицы Твои, Господи,/ в царствии Китайстем просиявшии,/ веру Христову, яко щит, держаще/ и кумиром не поклоньшеся,/ от единоплеменник обезумевших муки и смерть прияша,/ усты отрока страстотерпца воспевающе:/ болезни за Христа ни во чтоже вменяем,/ за жизнь временную жизнь вечную/ улучити желающе.

На утрени

По 1-м стихословии седален, глас 2:

Подворие Северное во граде Пекине почтим, процветшее честныя цветы, мученик двесте и множайшия, Христовы бисеры, иже злобныя мучители посрамиша, темже и венцы прияша, доблемудреннии.

Слава, и ныне, Богородичен:

Дивная и скорая Помощнице всем христианом, буди нам покров и заступление в скорбех и радостех земнаго жития, наставляющи ны присно на путь покаяния, наипаче же умоли Сына Твоего и Бога нашего, да праведных части явит ны причастники.

По 2-м стихословии седален, глас 2:

Страстотерпцы Христовы, во граде Пекине добропобедне пострадавшии, камением побиеннии, огнем сожженнии, мечем усеченнии, Царство Небесное в наследие приимше, молитеся ко Господу, да спасет души наша.

Слава, и ныне, Богородичен:

Мати Всенепорочная, новыя христолюбцы во граде Пекине при храме Успения Твоего возрастившая и тыя на подвиги мученическия утвердившая, укрепи и ны, грешныя, на невидимыя и видимыя враги душ наших.

Величание:

Величаем вас,/ священномучениче Митрофане и святии мученицы Китайстии/, и чтим честная страдания ваша,/ яже за Христа/ претерпели есте.

Псалом избранный: Бог нам Прибежище и Сила:

По полиелеи седален, глас 4:

Коль дивно Твое, Христе, благоутробие, на рабех Твоих смиренных бывшее, яко и немощнейшия сосуды Твоея благодати, убогия вдовицы и старцы, девы юныя и младенец множество, силою Креста Твоего возмогоша лесть идолобесия попрати и веру святую неколеблему соблюсти, во след Тебе с радостию текуще.

Слава, и ныне, Богородичен:

Дева днесь невидимо предстоит любящим Ю на месте, идеже сияше храм честнаго Успения Ея, сынами тьмы и зловерия сожженный, и благословляет чада Своя духовная не поклонитися кумиром, за веру Христову, радующеся, мужественне пострадати и венцев Небесных в Царствии Сына Ея сподобитися.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Се сонм мученик добропобедных,/ пастырю богомудрому Митрофану последующих,/ во врата Царствия Небеснаго течет, ликующе,/ мы же сим любовию возопиим:/ о, воини Христови всеблаженнии,/ молитеся Пастыреначальнику,/ да спасет души наша.

Канон святых, глас 2.

Песнь 1.

Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетския,/ яко прославися.

Припев: Святии мученицы Китайстии, молите Бога о нас.

В песнех духовных воспоим с любовию мученик двоесотницу Христовых, ихже изнесе царство Китайское древнее, ихже воспиташа пастырие Церкве Русския и правнуцы плененных, в двухсотлетнем разсеянии веру Православную соблюдшии.

Радуйся, человече Божий Митрофане, первый из братий твоих в сане священства возсиявый! Перси твоя, от сынов беззаконных ископанныя, уподобишася соту пчелиному, мед сладости страданий за Христа нам точай. Темже воспеваеши, священномучениче: поим Господеви, славно бо прославися.

Сияет яко звезда на небеси супружница твоя Татиана, во дни живота своего жены светом Евангелиа просвещавшая и сих ко святей купели уготовлявшая; сия яви нам образ страданий за Христа, яко премнозе мучима, по стогнам влекома, обаче, веры Православныя не отрекшися, во главу усечена бе, якоже и сын твой Исаиа.

Кий язык восхвалит отрока Иоанна, инаго сына вашего, емуже мучителие длани отсекоша? Сей же, аки в чуждем телеси страждаше, яко агнец на заколение Христа ради идяше, радуяся.

Богородичен: Упование христианом, Дева Пренепорочная, Сына Твоего и Бога моли с мученики о воспевающих Тя.

Песнь 3.

Ирмос: Лук сокрушися сильных/ державою Твоею, Христе,/ и силою немощствующии/ препоясашася.

Финикс благоплодный под финиксом во дворе дома Божия, аки плод зрелый Господеви принеслся еси, праведниче иерее Митрофане, сего ради ныне, ликовствуя, вопиеши: утвердися сердце мое во Господе, вознесеся рог мой о Бозе моем.

Павле премудре, апостолу языков в проповеди слова подражавый и сан иерея по малех днех прияти имевый! Ты, Христа всем сердцем возлюбив, мучений лютых не убоялся еси и, коленопреклоненно молився, руце же крестообразно сложив, во главу усечен был еси.

О, сродницы Павловы Сарро, Екатерино, Александро Иоанне и иная Александро! Вы, доблественне сему воину Христову спострадавше, венцы Небесныя улучили есте.

Иоакиме юный, сродниче Павлов, мучительми у стен града убиенный, ты первомученик христианом Китайским во дни скорби сея был еси.

Богородичен: Марие Преблагая, душу Твою оружие пройде, укрепи ны, слабыя и боязливыя, егда приидет час огненнаго испытания веры нашея.

Седален, глас 8:

В пустыни язычества сад Боговедения процвете, подворие Бейгуань православное, цветы красныя мученик множество Христу принесшее, ихже кровьми напитавшися, земля добрая плод красен израсти, люди новыя, святым Крещением просветившияся.

Слава, и ныне, Богородичен:

В пустыни горы Синайския купина неопально процвете, Приснодеву, огнь Божества приемшую, прообразующи, Юже мы любовию и благодарением воспеваем, веселящеся.

Песнь 4.

Ирмос: Услышах, Господи,/ славное Твое смотрение/ и прославих, Человеколюбче,/ непостижимую Твою силу.

Господь Бог наш сила наша, тако утешал еси, отче Митрофане, чада твоя духовная, в трепете и смятении бывшая, и, яко птенцы под криле кокоша, в дому твоем собравшаяся.

Воспоим Иннокентия, во диакона избраннаго, иже седми первым диаконом подобяся, попечение о телесных нуждах братий своих с любовию и тщанием исполнил есть. Темже и Господь тело его, во кладязи камением от безумных побиенное, нетлением прослави.

Спрославим сему и жену его Елену, яже в кумирню приведенная, идолом кланятися воспротивися, сего ради, муки многообразныя претерпевши, душу свою чистую Богу предала есть.

Кую песнь принесем Евмению, Софии и Надежди, добле воспитанным чадом Иннокентия и Елены? Сих бо зверонравнии мучителие лютей смерти предаша и телеса их в кладязь ввергоша, обаче та по мнозе времени нетленна обретошася.

Богородичен: Радуйся, Обрадованная, радуйся, Всемилостивая, всем, в тяжких скорбех Тебе молящимся, Небесное утешение подающая.

Песнь 5.

Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе, иного бога не знаем.

От нощи скорбей лютых и болезней неисцельных к Свету невечернему утреннюет дух твой, священномучениче Митрофане.

Да почтится Мария юная, яже, в вере подражающи жениху своему Исаии, за Христа убиену, притече в дом иереов и рече: у церкве Пресвятыя Богородицы духовно рождена есмь, зде и умру. Темже по мале времени от рук злодеев смерть безбоязненно прият.

Небомудренную Ию восхвалим, наставницу дев и путеводительницу приходящих ко Христу. Сия двукраты смертныя муки от жестоковыйных претерпе: исперва бо, ножи изсечена бывши, аки мертва землею мало прикровена бе; послежде, стенанием ея услышанным, паки взята бе и тако венцем мученичества, радующися, увенчана бысть.

Блаженнии Мироне и Марие! Вы, чада ваша Марфу, Анастасию, Евдокию, Иннокентия, Савву, Нила, Марию и Елену в трудех, нищете и страсе Божии воспитавше, добре приуготовасте сих для Царствия Небеснаго, еже и улучиша, славнии, вкупе с вами за Христа убиеннии.

Богородичен: Преблагословенная Богородице, многия скорби на земли претерпевшая! Помози нам крест земнаго жития в терпении, благодарении и радовании до конца понести.

Песнь 6.

Ирмос: Глас глагол молебных/ от болезненныя, Владыко, души услышав,/ от лютых мя избави:/ Един бо еси нашего спасения виновен.

Из сланаго моря многомятежнаго жития сего в вечный пренебесный покой, яко от кита Иона, вшел еси, священнотаинниче отче Митрофане.

Радуйся, Евфимие, от каменносердечных камением побиенный! Радуйтеся, Акилино, Анно, Павле со чады, в дому своем сожженнии! Радуйтеся, Ирино со чады Анною, Афанасиею, Евпраксиею, Прохором и Мариею, за врата града отведеннии и тамо, от Христа не отрекшеся, убиеннии!

Радуйся, Ирино иная, сердцем твоим кротким Иисуса кроткаго возлюбившая и службе церковней на всяк день прилежавшая, мучителем, рабов Божиих ищущим, не таящися рекшая: христиане есмы!

Радуйся, вдовице Капитолино, мрачную нощь отречения от Христа прешедшая и светлым утром покаяния, посем же подвигом мученичества грех свой омывшая!

Богородичен: Владычице, Богородице Пречистая! Ты зриши немощь нашу и разслабление духовное, темже настави ны на всяк час бдети и Сыну Твоему молитвы сердечныя возносити, да николиже отступим от Него.

Кондак, глас 2:

Яко сокровище многоценное,/ трилетне в земли сокровенное,/ обретошася мощи ваша, священнотаинниче Митрофане со овцы учений твоих,/ во граде Пекине просиявшими,/ благодать неоскудную подающе душам нашим./ Сего ради с радостию и любовию воззовем:/ молитвами страстотерпец, Христе Боже, помилуй нас.

Икос:

Подвигом и болезнем вашим дивящеся, достоблаженнии страстотерпцы Китайстии, в веселии сердечнем вопием вам:

Радуйтеся, Христа, Многоценный Бисер, в земли язычестей обретшии;

радуйтеся, ничтоже от земных сокровищ Ему предпочетшии.

Радуйтеся, добре Ему в уделех Китайских поработавшии;

радуйтеся, в час огненнаго испытания от Него не отступльшии.

Радуйтеся, за Него огнем сожженнии, камением побиеннии, мечем усеченнии;

радуйтеся, вся сия радостию и веселием претерпевшии.

Радуйтеся, яко нас подвизаете ко Господу взывати: молитвами страстотерпец, Христе Боже, помилуй нас.

Песнь 7.

Ирмос: Образу златому, на поле Деире служиму,/ трие Твои отроцы небрегоша безбожнаго веления/ посреде же огня ввержени, орошаеми, пояху:/ благословен еси, Боже отец наших.

Храм Божий и строения церковная от мерзких идолопоклонник сожженная видев, многия скорби исполнися, страдальче отче Митрофане; обаче, в храм пренебесный вшед, воспел еси: благословен еси, Боже отец наших.

Афанасие блаженне, слячен от юности твоея, коленопреклоненне ходивый, низок телом, высок же душею бе; темже, часу испытаний наставшу, жену твою Варвару и триех чад увеща мук за Христа не устрашатися, но победне взывати: благословен еси, Боже отец наших.

Андрее святый, во единонадесятый час жития своего в виноград Христов пришедый, делания книжнаго, жестокосердым приближшимся, не остави и тако, на месте трудов своих, во славу Церкве подъятых, убиенный, со всеми, от перваго часа потрудившимися, воспевает: благословен еси, Боже отец наших.

Евфимие безстрашный, веру Христову пред мучителем исповедавый и онаго безумие обличивый, за сие мечем пронзенный и камением побиенный, песнь богокрасную воспевает: благословен еси, Боже отец наших.

Богородичен: Люди, во тьме и сени смертней седящия, Богородицею к Свету невечернему призвал еси и за Тя пострадати сподобил еси, Преблагословенный отцев Бог и препрославленный.

Песнь 8.

Ирмос: В пещь огненную ко отроком еврейским снизшедшаго/ и пламень в росу преложшаго Бога,/ пойте, дела, яко Господа/ и превозносите во вся веки.

Да почтятся честнии страдальцы Афанасий, Лев и Никифор, Васса, Екатерина и Елена, Кирилл, Надежда и Ольга, Симеон, Виктор, Анна и инии мнози. Сии вкупе со иереем Митрофаном и прочими мученики воспевают: Господа пойте, дела, и превозносите Его во веки.

Многовидне потрудистеся в дому Божии, Клименте, Матфее, Симеоне, Иосифе, Алексие, Капитоне, многовидныя муки за Христа претерпевшии, ныне ликуете во цветнице Его, взывающе: благословите, вся дела Господня, Господа.

Измлада пении и песньми духовными прославлявшии Господа и Пречистую Матерь Его во храме честнаго Успения Ея, Афанасие и ин Афанасие, Сергие, Петре, Алексие, по славнем страдании вашем песнь новую и светлейшую возносите: благословите, вся дела Господня, Господа.

Правнуцы мужей ратных, древле из острога Албазинскаго в пленение Пекинское приведенных, веру Православную соблюдшии и за Христа живот свой положившии, ныне сподобистеся свободу славы чад Божиих улучити, воспевающе: благословите, вся дела Господня, Господа.

Богородичен: Дево Всепетая, во храмех пренепорочнаго Успения Твоего и во всей вселенней славимая, всемощным предстательством Твоим мирную кончину живота нашего нам низпосли.

Песнь 9.

Ирмос: Весь еси желание, весь сладость,/ Слове Божий, Девы Сыне,/ Боже богов, Господи, святых Пресвятый,/ тем Тя вси с Рождшею Тя величаем.

Егоже возлюбили есте, егоже возжелали есте, егоже ради кровь свою излияли есте, молите Христа Бога, страстотерпцы, во царствии Китайстем просиявшии, да умножит веру Православную во Отечестве вашем и во всем мире Своем.

Святыя мощи доблих страдалец, по триех летех из земли извлеченныя и с честию во гробнице под храмом Всех святых мученик положенныя, подворие Северное, град Пекин и всю землю Китайскую благодатию облагоухаша.

Святый апостоле Боговидче Фомо, Евангелия Христова в земли Китайстей первый проповедниче, святителю отче Иоанне, светило Тобольское, святителю Иннокентие, града Иркутска похвало, вашим предстательством православнии, в Китае просиявшии, возмогоша Богу послужити преподобием и правдою во вся дни живота своего.

Богородичен: Мати Божия Пречистая, всю Сибирь и землю Китайскую иконою Твоею Албазинскою ограждающая, ейже празднование Промыслом Божиим в день святых мученик Севастийских уставлено, Ты еси мучеников крепость и веселие.

Светилен:

Звезды светлыя, на Востоце возсиявшия и всю землю лучами своими просветившия, мученицы Христовы двусотнии, не забудите Отечества вашего земнаго, мрак богопротивления отжените и веселие негиблющее всем нам, в бурех скорбей сущим, у Господа испросите.

Слава, и ныне, Богородичен:

Яже Свет невечерний рождшая, Присноблаженная и Пренепорочная Дево, светом любве Твоея омраченная сердца наша просвети и сподоби ны утешения и радости о Господе.

На хвалитех стихиры, глас 4:

Радуйся, Церкве Божия,/ украшаемая собором мученик Христовых./ Тии бо, священным Митрофаном предводимии,/ землю Китайскую кровьми своими освятиша/ и, Царствия Небеснаго достигше,/ молятся присно о земном Отечествии своем.

Солнце мысленное/ показа вы звезды Богосиянныя,/ небо восточное светом истинныя веры озарившия/ и во вся концы земныя лучи подвигов ваших испустившыя,/ святии мученицы Китайстии,/ молитеся за ны ко Господу,/ да укрепит теплохладную веру нашу.

Яко кадило благовонное,/ Подвигоположнику Христу Богу принеслися есте,/ святии мученицы Китайстии,/ надеждою бо несумненною на Небесное воздаяние утешаеми,/ огненное запаление, каменное побиение и мечное усечение мужественне претерпели есте./ Темже молитеся за ны ко Господу,/ да и нашу надежду тверду сотворит.

Любовию ко Господу укрепляеми,/ силу противоборцев попрали есте/ и, мучения лютая претерпевше,/ Небесная селения наследовали есте,/ идеже Древа жизни наслаждаетеся./ Темже молите, досточуднии, Владыку всех,/ да воспламенит любовию к Богу/ сердца единоплеменник ваших.

Слава, глас 6:

Что сей глас радования и веселия?/ Что пение и лики?/ Что собор православных во граде Пекинстем,/ по триех летех страданий доблих мученик Христовых?/ Се бо славный архиерей, пастыри и верных множество/ приидоша возславити мощи дивных страдалец многих,/ ихже с честию положиша/ во гробнице под храмом Всех святых мученик,/ в похвалу их созданнем./ Мы же им согласно воспоим:/ о святии страстотерпцы,/ Троице Святей помолитеся,/ да спасет души наша.

И ныне, Богородичен, глас тойже: Богородице, Ты еси Лоза истинная:

На Литургии

Блаженны от канона Песнь 3.-я и 6-я. Прокимен, глас 4: Святым, иже суть на земли Его,/ удиви Господь вся хотения Своя в них. Стих: Предзрех Господа предо мною выну, яко одесную мене есть, да не подвижуся. Апостол к Римляном, зачало 99. Аллилуиа, глас 4: Воззваша праведнии и Господь услыша их, и от всех скорбей их избави их. Стих: Многи скорби праведным, и от всех их избавит я Господь. Евангелие от Луки, зачало 67. Причастен: Радуйтеся, праведнии, о Господе, правым подобает похвала.

Источник: Текст службы утвержден на заседании Священного Синода 8 декабря 2020 года (журнал № 99).

Месяца иуния в 13-й день

Преподобныя Александры Дивеевския

На малей вечерни

На Господи, воззвах: стихиры, глас 2:

Кая духовная пения/ принесем ти, преподобная Александро?/ Явлением бо тебе Царицы Небесныя/ Дивеево дивно освятися/ и четвертый жребий Ея наречеся./ Сего ради молим тя/ подати нам мир и велию милость.

Киими похвальными венцы/ венчаим тя, преподобная Александро?/ Ты бо, в многотруднем житии/ волю Божию усмотревши,/ в благодарении Господу николиже оскудевала еси./ Темже моли Христа Бога/ подати нам мир и велию милость.

Киими благоговейными усты/ восхвалим преславную матерь нашу Александру?/ Милостивую покровительницу и скорую помощницу,/ любовию своею нас согревающую,/ кротостию и смирением вся удивляющую/ и просящую нам у Христа Бога/ мир и велию милость.

Киими священными похвалами/ прославим Александру богомудрую?/ Обители Дивеевския украшение,/ монашествующих истинную наставницу/ и молитвенницу теплую о душах наших,/ просящую нам у Христа Бога/ мир и велию милость.

Слава, глас 4:

Днесь благодарственная воспоим/ дивному во святых Христу Богу нашему,/ даровавшему нам матерь преподобную,/ мудрую и чадолюбивую наставницу,/ церковных уставов твердую хранительницу,/ непорочное житие совершившую,/ ныне же в лице жен святых сияющую.

И ныне, Богородичен, глас тойже: Иже Тебе ради:

На стиховне стихиры, глас 1:

Велия твоя подвиги и труды,/ преподобная Александро блаженная,/ како прославим, недостойнии?/ Ты бо, обитель Дивеевскую основавши,/ иноческое житие в ней устроила еси.

Стих: Дивен Бог во святых Своих,/ Бог Израилев.

Великий ангельский образ восприемши/ и послушание Царицы Небесныя исполнивши,/ душу в руце Божии вверила еси./ И ныне с лики жен преподобных/ чисте зриши Святую Троицу.

Стих: Честна пред Господем/ смерть преподобных Его.

Велию благодать и дар исцелений,/ еще живей ти сущи, стяжавши,/ Александро преподобная,/ ныне наша прошения исполняеши/ к раце святых мощей твоих/ с любовию притекающих.

Слава, глас 8:

О, преславнаго чудесе!/ Днесь радуется обитель Дивеевская,/ исполнению проречения преподобнаго Серафима дивящися:/ се бо мощи преподобныя Александры,/ яко многоценное сокровище,/ в храме Рождества Богородицы почивают/ и, яко крин присноцветущий,/ благоуханием чудес всех притекающих исполняют.

И ныне, Богородичен, глас тойже: Безневестная Дево:

Тропарь зри на велицей вечерни. Слава и ныне, Богородичен: Радуйся, двере Господня:

На велицей вечерни

На Господи, воззвах: стихиры, глас 6:

Приидите, вернии людие,/ во святую обитель Дивеевскую,/ яже четвертый жребий Божия Матере нарицается,/ ублажим верную рабу Пресвятыя Богородицы/ Александру богомудрую,/ первоначальницу святаго места сего,/ и, припадающе к ея честным и многоцелебным мощем,/ усердно помолимся:/ помяни нас, преподобная мати наша,/ во Царствии Небеснем.

Приидите, вернии людие,/ во святую обитель Дивеевскую/ прославим чудную собеседницу ангелов/ и нуждающимся помощницу скорую,/ всечестную матерь Александру,/ первоначальницу святаго места сего:/ та бо, Христа всем сердцем возлюбивши,/ многотрудное житие избра,/ ныне во славе невечерней Ему предстоит/ и молится о спасении душ наших.

О, преподобная мати наша Александро,/ Божественною просветившися благодатию/ и мятеж мира отвергши,/ евангельски Христу последовала еси/ и молитвами Пречистей Богородице неустанно послужила еси./ Темже, и обители Ея первоначальница сущи,/ богомудрая наставница явилася еси./ Помяни нас во Царствии Небеснем.

Александро всеблаженная,/ ангельский образ восприемши,/ на земли добродетельне пожила еси/ и, храмы многия воздвигши,/ сирыя, нищия и в бедах сущия николиже оставляла еси,/ ныне же, на Небесех водворившися,/ чисте зриши Святую Троицу./ Испроси нам, преподобная мати, велию милость,/ да и мы всегда с Господем будем.

Многия подвиги, труды и болезни,/ блаженная Александро, явила еси,/ егда в тесней келии пред распятием Христовым,/ на камень главу полагающи,/ со слезами нощию усердно молилася еси./ Помози и нам в покаянии истиннем житие скончати/ и Царствия Небеснаго сподобитися.

Глас 7:

Надеющиися на Господа разумеют истину/ и вернии в любви пребудут Ему./ Тако и ты, богомудрая Александро,/ светом Евангелия тьму неразумия просветивши,/ истины веры Православныя людем уясняла еси/ и живоносныя воды любве верным источила еси./ Укрепи и нас во благочестии и чистоте пребывати/ и моли Христа Бога/ да спасет души наша.

Глас 8:

Ублажаем тя, Александро досточудная,/ ты бо, о ближних попечение творящи,/ алчущих милостивая питательница,/ невест неимущих благоукрасительница/ и скорбных теплая утешительница явилася еси./ Темже, припадающе к раце мощей твоих,/ со умилением просим тя:/ приими молитвы наша/ и предвари на помощь/ верою память твою почитающим.

Слава, глас 6:

О, Александро блаженная,/ преподобный Серафим свидетельствова о тебе,/ яко ты еси велия раба Божия,/ смирения высото и любве сокровище,/ и о всех теплая молитвенница./ Ныне зрим тя, яко щит крепок обители нашея/ противу стрел вражиих,/ заступлением бо твоим искушения побеждаются/ и души наша очищаются.

И ныне, Богородичен, глас 6: Кто Тебе не ублажит:

Вход. Прокимен дне. И чтения преподобническая.

На литии стихира собору Дивеевских святых, глас 1:

Блаженна еси, чудная обитель Дивеевская,/ славни вси пределы твои,/ стопы Пресвятыя Богородицы освященнии/ и подвиги святых прославленнии,/ ихже всехвальную память совершающе,/ славословим Христа Бога нашего, дивнаго во святых Своих,/ Емуже молимся спастися душам нашим.

Слава, и ныне, глас 4:

Воспоим неусыпающую в молитвах Богородицу/ и, притекающе к Ней с верою сердечною,/ потщимся стяжати милосердие и кротость,/ да обрящем Ея заступлением/ у Христа Бога велию милость.

На стиховне стихиры, глас 2.

Подобен: Егда от Древа:

Егда Божественный глас/ достиже тя, преподобная мати Александро,/ тогда, богатство и славу,/ и род твой оставивши,/ во обитель Флоровскую вселилася еси,/ идеже, житие жестоко поживши,/ в молитвах и трудех Господеви угодила еси./ Темже молися Христу Богу/ спасти и просветити души наша.

Стих: Дивен Бог во святых Своих,/ Бог Израилев.

Егда благодать Божественная/ исполни сердце твое, преподобная мати,/ тогда явися ти Пресвятая Дева,/ Царица Небесе и земли,/ повелевающи град Киев оставити/ и обитель новую/ во инем месте устроити,/ да славится в ней имя Христа Бога,/ егоже моли спасти и просветити души наша.

Стих: Честна пред Господем/ смерть преподобных Его.

Егда Матерь Божия явися ти, преподобная Александро,/ на пути в пустынь Саровскую/ и повеле устроити в Дивееве обитель чудную,/ тогда, преславныя глаголы Ея/ в сердце своем слагающи/ и повеление исполняющи,/ многими труды и подвиги/ обители доброе начало положила еси./ Темже молися тепле ко Господу/ спасти и просветити души наша.

Слава, глас 4:

В честнем прославлении твоем,/ преподобная мати Александро,/ верныя благодатно озаряеши/ и недуги безмездно врачуеши./ Темже, с любовию припадающе к раце мощей твоих,/ умильно глаголем:/ настави ны ходити путем подвигов твоих/ и помози нам благоугождати Христу Богу,/ да причастницы Небеснаго Царствия сподобимся быти.

И ныне, Богородичен, глас тойже: Призри на моления Твоих раб, Всенепорочная:

Тропарь, глас 5:

Преподобная мати Александро,/ благословение Царицы Небесныя исполнивши,/ обитель Дивеевскую основала еси,/ в нейже, многотрудное житие совершивши,/ образ Христова смирения явила еси./ Темже помяни нас во Царствии Небеснем.

На утрени

По 1-м стихословии седален, глас 4:

Всем сердцем твоим, всею душею и мыслию Бога возлюбивши,/ дар благодатных слез, мати Александро, стяжала еси/ и пред Крестом Христовым усердно молилася еси,/ непрестанно в созерцании Господа пребывающи./ Темже, искусная делательница молитвы умныя сущи,/ научи и нас присно глаголати:/ Господи, Иисусе Христе, Сыне Божий, помилуй нас, грешных.

Слава, и ныне, Богородичен:

Удивишася, Чистая, лицы ангельстии,/ како, Богородица сущи,/ во юдоль скорбей человеческих нисходиши,/ и всякий вопль молитвенный слышиши,/ и утешение милостивно подаеши,/ больных исцеляеши и немощных заступаеши,/ Дево Мати Господня,/ Сокровище неисчерпаемое благодати Божественныя.

По 2-м стихословии седален, глас 8:

Страстотерпец царь Николай благоговейно почиташе память твою,/ мати Александро./ Сего ради вопием ти, мати преподобная:/ моли с Царственными страстотерпцы Христа Бога, о еже спастися нам.

Слава, и ныне, Богородичен:

О Тебе радуется и Тя прославляет всякая тварь, Дево Пречистая,/ яко Невместимаго вместила еси,/ егоже присно моли о спасении нашем.

Величание:

Ублажаем тя,/ преподобная мати наша Александро,/ и чтим святую память твою,/ ты бо молиши о нас/ Христа Бога нашего.

По полиелеи седален, глас 1:

Егда приближися время преставления твоего, Александро преподобная,/ тогда духом отшествие твое ко Господу уразумела еси/ и, молитву сугубую со слезами о обители твоей и сестрах ея вознесши,/ попечение о них на преподобнаго Серафима возложила еси.

Слава, и ныне, Богородичен:

Притецем вси, вернии,/ к Небесней Царице и Матери всех,/ прославляюще Ея снисхождение к роду человеческому,/ и источим слезы умиления,/ любовию зовуще:/ радуйся, Обрадованная,/ верных Твоих рабов не оставляющая.

Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.

По 50-м псалме стихира, глас 6:

Пред отшестием от жития сего временнаго/ в схиму великую, преподобная Александро, облеклася еси/ и, Святых Таин Христовых приобщившися,/ Казанскую икону Пресвятыя Богородицы на перси возложила еси,/ молитву же непрестанную во устех имущи,/ душу святую в руце Христа Бога предала еси./ Тому молися не лишенным и нам быти/ кончины благия и наследия Небеснаго.

Канон, глас 8.

Песнь 1.

Ирмос: Поим Господеви,/ проведшему люди Своя сквозе Чермное море,/ яко Един славно прославися.

Преподобную угодницу и матерь нашу Александру,/ первоначальницу обители Дивеевския,/ Божия Матере рабу избранную,/ ныне за ны на Небесех молящуюся,/ Господи, сподоби воспети разумно.

Обители Дивеевския первоначальница явилася еси, Александро славная,/ и, достойно послушание Пресвятыя Богородицы исполнивши,/ Небесное Царствие унаследовала еси./ Помози и нам добродетель послушания стяжати.

Воздержанием дивным и покаянием слезным душу твою очистивши/ и ангельскому житию поревновавши,/ храм Святаго Духа явилася еси, преподобная Александро.

Богородичен: Пречистая Богородице Дево,/ паче естества неизреченно рождшая Присносущное и Пребожественное Слово,/ достойно в песнех величаем Тя.

Песнь 3.

Ирмос: Утверждей словом Небеса/ и землю основавый на водах многих,/ утверди мя к пению славословия Твоего, Господи.

Мирская и тленная возненавидевши,/ плоть свою изнурила еси, мати Александро,/ темже и, молитву к Богу присно возносящи,/ Того Единаго возлюбила еси.

Просвещение Духа в сердце твоем приемши, преподобная мати,/ лучами добродетелей страстей мглу яве отгнала еси./ Помози и нам от омрачения страстей избавитися.

Твоя молитвы и труды,/ яко кадило благовонное, Владыце и Богоматери принесла еси, преподобная,/ таже и многи храмы Божия твоим рачением и подвиги воздвигла еси./ Ныне же вознеси моление о благостоянии Церкве Русския.

Богородичен: Утверждение, покров и прибежище/ буди с верою к Тебе прибегающим, Дево Богородительнице,/ и Божию Матерь Тя исповедающим.

Седален, глас 3.

Подобен: Красоте девства:

Богатство тленное и славу мимотекущую в младых летех оставивши,/ Небесное богатство и славу вечную восприяла еси, преподобная Александро./ Темже блажим святое твое преставление и умильно вопием:/ помяни нас у Престола Божия, мати честная.

Слава, и ныне, Богородичен:

Яже радости приемшая исполнение,/ приими от нас, рабов Твоих, целование Архангелово:/ радуйся, Радость миру рождшая,/ радуйся, Манно Небесная, Хлебом жизни нас напитавшая,/ радуйся, Царице, в женах Благословенная.

Песнь 4.

Ирмос: Тайно пророк предзря от Девы Тя, Слове, Воплощаема,/ песенно вопияше:/ слава силе Твоей, Господи.

Огнем любве Божия терние страстей попаливши,/ глаголы дивныя Пресвятыя Богородицы о четвертом Ея жребии во вселенней услышати сподобилася еси./ Темже и обитель Дивеевскую воздвигла еси.

Насаждена в дому Божия Матере бывши,/ яко цветы красныя, многия добродетели израстила еси/ и, во основание обители камень веры положивши,/ многим инокинем путь во обители Небесныя указала еси.

Жезлом добродетельныя твоея жизни/ многия души в Царствие Небесное управила еси, мати Александро,/ помози и нам добродетели евангельския стяжати/ и жизни блаженныя вкупе со всеми святыми достигнути.

Богородичен: Ты еси, Благая, верным утверждение,/ от лютых избавление и просвещение душ наших,/ и обители Дивеевской стена и ограждение.

Песнь 5.

Ирмос: Утренююще, вопием Ти:/ Господи, спаси ны,/ Ты бо еси Бог наш,/ разве Тебе, иного не вемы.

Тесный путь паче пространнаго предпочла еси/ и, радующися, многия труды и болезни претерпела еси, преподобная Александро./ Укрепи и ны во обстояниих житейских молитвами твоими.

В пениих и пощениих, молитвах же и бдениих поживши, преподобная,/ Христу уневестилася еси/ и образ иноческаго жития/ сестрам обители Дивеевския явила еси.

Житие твое праведно и преподобно бысть, Александро блаженная,/ темже, сугубаго подвига взыскующи,/ великую схиму пред кончиною прияти сподобилася еси.

Богородичен: От всякаго прилога противна и скорби,/ и от враг лютых рабы Твоя свободи, Всенепорочная,/ Тя бо державное Предстательство стяжахом.

Песнь 6.

Ирмос: Ризу мне подаждь светлу,/ одеяйся светом, яко ризою,/ Многомилостиве Христе Боже наш.

Славу рода твоего презревши/ и заповеди евангельския ревностне исполнивши, преподобная,/ Христа ради обнищала еси/ и многими добродетельми обогатилася еси.

Великаго подвижника Саровскаго/ в юнем иеродиаконе Серафиме предузрела еси, Александро мудрая,/ и попечение о обители Дивеевской на него возложила еси./ Помозите и нам, святии угодницы, наследники Царствия Небеснаго быти.

По вся дни и нощи Богу благоугождающи,/ в час кончины твоея Святыя Тайны Христовы восприяла еси./ Вознеси, преподобная мати, теплыя молитвы и о нас ко Господу,/ да христианскую кончину улучити сподобимся.

Богородичен: Палата Царя Славы и Престол огнезрачный была еси, Дево,/ Херувим превышши и Серафим славнейши,/ темже всякое дыхание славит Тя,/ яко Матерь Христа, Бога нашего.

Кондак, глас 3:

Воспоим днесь, вернии,/ преподобную матерь нашу Александру,/ дивнаго удела Пресвятыя Богородицы первоначальницу,/ да ея молитвами и предстательством Пречистыя Девы/ Господь подаст нам грехов прощение и велию милость.

Икос:

Кто доволен достойно воспети труды и болезни,/ подвиги и пощения твоя, преподобная мати Александро?/ Обаче благоприятными твоими к Богу молитвами/ подаждь нам ныне благодать Святаго Духа,/ да прославим терпение и смирение твоя/ и любовь нелицемерную воспоим,/ имиже врага всезлобнаго посрамила еси./ Темже молися ко Господу/ даровати нам грехов прощение и велию милость.

Песнь 7.

Ирмос: В начале землю основавый/ и Небеса Словом утвердивый,/ благословен еси во веки, Господи Боже отец наших.

Путем шествующи, вводящим в Божественный покой,/ уклонилася еси сетей демонских, блаженная./ Темже, Божественною благодатию покрываема, вопияла еси:/ благословен еси, Боже отец наших.

Повеление Царицы Небесныя исполняющи/ и чудную обитель Ея созидающи,/ выну в молитве пребывала еси, вопиющи:/ благословен еси, Боже отец наших.

Камень под главу твою полагающи и слез токи проливающи,/ жестокое житие провождала еси, преподобная,/ и в радости духовней воспевала еси:/ благословен еси, Господи Боже отец наших.

Богородичен: Вся светоносна еси, Дево, Свет незаходимый приемши,/ и просвещаеши, Чистая, верою Тебе вопиющих:/ благословен, Пречистая, Плод чрева Твоего.

Песнь 8.

Ирмос: Безначальнаго Царя славы,/ егоже трепещут Небесныя силы,/ пойте, священницы,/ людие, превозносите во вся веки.

Мученице царице Александре поревновала еси, богомудрая,/ и жизнь твою в руце Божии предала еси,/ точию Единаго Христа ведущи и Сего распята,/ поющи Его во вся веки.

Дар молитвы чистыя, смирение и любовь совершенную имела еси, богоблаженная./ Молися и нам в добродетели сия облещися/ и Господа воспевати во вся веки.

Заповедем Христовым поревновавши,/ нищия, сирыя и младенцы николиже в беде оставляла еси, досточудная,/ темже вселилася еси во обители Небесныя,/ идеже с лики жен честных Господа прославляеши во вся веки.

Богородичен: Все упование мое на Тя возложих, Владычице,/ не имам бо иныя помощи разве Тебе./ Темже подаждь ми богатую Твою милость.

Песнь 9.

Ирмос: Невидимаго зраком Божественным приемшая,/ Неискусобрачная Дево и Мати,/ песньми Рождество Твое величаем.

Яко велию в женах и избранницу Матере Божия,/ откры тя Бог преподобному Серафиму,/ иже и яви сугубое попечение о обители Дивеевской./ Темже купно с ним молися о чадех твоих, блаженная.

Пред кончиною твоею, мати преподобная,/ образ Казанския иконы Пресвятыя Богородицы на перси твоя возложила еси/ и тако с миром душу твою Богу предала еси.

Моли милостиваго Бога, преподобная мати наша Александро,/ яко дерзновение к Нему имущая,/ да и мы с тобою сподобимся славити Его во Царствии Небеснем.

Богородичен: Спаси, Пречистая Владычице, к Тебе прибегающия от беды и напастей,/ от греха и бури страстей плотских,/ от волнений и обстояний житейских,/ и будущаго осуждения.

Светилен:

Егда убо честныя мощи твоя, преподобная мати Александро, обретошася,/ тогда благоухание из гроба твоего изыде и благодать велия явися,/ недуги исцеляющи и духи лукавыя отгоняющи.

Слава, и ныне, Богородичен:

Славо вселенныя, Преславная Дево,/ Бога Преславнаго славно рождшая,/ славы сподоби Божественныя,/ яко Богородицу присно Тя славящия.

На хвалитех стихиры, глас 5.

Подобен: Радуйся, Живоносный Кресте:

Радуйся, мати Александро,/ звездо пресветлая от Дивеева возсиявшая/ и Российскую страну благодатно озарившая!/ Радуйся, славная подвижнице,/ древним богоносным отцем уподобившаяся,/ душу твою дом Духа Святаго соделавшая,/ храмы Божия и обитель инокинем воздвигшая!/ Молися мир мирови даровати/ и душам нашим велию милость.

Радуйся, предстательнице наша,/ преподобная мати Александро!/ Ускори на помощь нам, немощным и сирым,/ и вознеси святыя молитвы твоя ко Господу,/ данною же ти от Него благодатию/ недуги наша душевныя и телесныя исцели,/ мирови мир даровати испроси/ и душам нашим велию милость.

Радуйся, преподобная мати Александро!/ Первоначальнице обители Дивеевския,/ сосуде благодати Божия/ и избраннице Царицы Небесныя./ Радуйся, болящих исцеление,/ малодушных укрепление,/ заблуждших путеводительнице,/ монашествующих богомудрая наставнице!/ Помяни и нас в молитвах твоих ко Господу,/ просящи душам нашим велию милость.

Радуйся, богомудрая мати Александро,/ велия в женах и преподобных красото!/ Восхваляем смирение твое/ и любовь ко всем нелицемерную,/ имиже благодать Святаго Духа стяжала еси./ Темже честную память твою совершающим/ подаждь дары целебныя/ и моли Христа Бога/ мир мирови даровати/ и душам нашим велию милость.

Слава, глас 3:

Преподобная мати Александро,/ кто исповесть подвиги многотруднаго жития твоего/ и милости Божия, чрез тя явленныя, кто исчислит?/ Мы же, избранницу тя Пречистыя Богородицы ведуще/ и на дерзновение твое пред Богом уповающе,/ во умилении сердечнем зовем ти:/ о, преподобная мати наша!/ Помолися за ны/ и помяни нас во Царствии Небеснем.

И ныне, Богородичен, глас тойже:

Без семене зачала еси от Духа Святаго/ и родила еси Сына Божия,/ сего ради, славословяще, воспеваем Ти:/ радуйся, Пресвятая Дево.

Славословие великое и отпуст.

На Литургии

Блаженны от канона песни 3-я и 6-я. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Апостол к Галатом, зачало 208. Аллилуиа, глас 1: Терпя потерпех Господа, и внят ми, и услыша молитву мою. Евангелие Матфеа, зачало 104. Причастен: В память вечную будет праведник, от слуха зла не убоится.

Молитва

О, святая угоднице Божия, преподобная мати Александро! Приими недостойныя молитвы наша, с верою и любовию к тебе возносимыя, и помози нам христианския добродетели стяжати, веру крепкую и любовь к Богу и ближним имети, крест скорбей и болезней с терпением носити. О, блаженная мати наша! Многими труды и подвиги благодать у Бога обретши, помяни нас во Царствии Небеснем, помолися за нас, да твоими молитвами спасаеми в нынешнем веце, и в будущем удостоимся хвалити и воспевати всесвятое Имя Отца и Сына и Святаго Духа во веки веков. Аминь.

Источник: Текст службы утвержден решением Священного Синода от 9 июля 2019 года (журнал № 82)

Ме́сяца ию́ня в 14-й день

Собо́р святы́х Диве́евских

На ма́лей вече́рни

На Го́споди, воззва́х: стихи́ры святы́х на 4, глас 5:

Не́бо звезда́ми, Влады́ко, украси́вый/ и святы́ми Твои́ми всю зе́млю просвети́вый,/ светоно́сный собо́р Диве́евских святы́х яви́л еси́,/ Тебе́ возлюби́вших и всем се́рдцем взыска́вших,/ Твое́й же Пречи́стей Ма́тери послужи́вших,/ и́же не престаю́т ми́лостивно хода́тайствовати о нас,/ светолу́чными сия́нии чудотворе́ний озаря́юще/ и многоразли́чных обстоя́ний избавля́юще./ И́хже про́сим: о святи́и, моли́теся о нас,// чту́щих любо́вию святу́ю па́мять ва́шу. Два́жды

Мно́жество звезд, Вседержи́телю, сотвори́вый/ и тьму нощну́ю тем просвеща́ти повеле́вый,/ светоявле́нный лик святы́х земли́ Диве́евския/ в Ца́рство сла́вы несказа́нныя прия́л еси́/ и те́плых хода́таев нам дарова́л еси́./ Мы же, благода́рни су́ще, вопие́м:/ о уго́дницы Бо́жии!/ Моли́теся о нас приле́жно,/ е́же усе́рдно Бо́гу угожда́ти,/ ве́ру Правосла́вную соблюда́ти,/ от бед Оте́честву на́шему изба́витися// и всем, почита́ющим вас любо́вию, спасти́ся.

Глас 4:

Преподо́бне о́тче Серафи́ме,/ любо́вию к Бо́гу распала́яся,/ тле́нная вся оста́вил еси́/ и избра́нник возлю́блен Бо́жия Ма́тере яви́лся еси́,/ о оби́тели же Ея́ попече́ние оте́ческое име́я/ и неизрече́нных та́ин открове́ние прие́м,/ по благослове́нию и во́ли Ея́ вся устроя́л еси́./ О ста́рче ди́вный и богому́дрый,/ и́стинный наста́вниче на путь спасе́ния,/ учи́телю любве́ и целому́дрия!/ Диве́ево ди́вное тобо́ю ны́не сла́вится/ и свята́я ра́ка твоя́ оби́тель сию́ украша́ет,/ к не́йже я́ко к самому́ тебе́ припа́даем, прося́ще:/ не забу́ди нас, ра́досте на́ша,// Серафи́ме, преподо́бне о́тче наш.

Сла́ва, глас 2:

Днесь Це́рковь Ру́сская лику́ет/ и прославля́ет собо́р Диве́евских святы́х,/ во оби́тели до́брыми по́двиги/ во вся́цем чи́не и зва́нии подвиза́вшихся,/ зна́емых ку́пно и незна́емых,/ и́хже имена́ написа́шася в кни́зе жи́зни./ Тех предста́тельством и покро́вом Пречи́стыя Богоро́дицы/ Оте́чество и оби́тель на́шу в ми́ре сохрани́,// Многоми́лостиве Христе́ Бо́же наш.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

На стихо́вне стихи́ры святы́х, глас 5.

Подо́бен: Преподо́бне о́тче:

Преподо́бная ма́ти на́ша Алекса́ндро!/ Явле́нием тебе́ Цари́цы Небе́сныя/ Диве́ево ди́вно освяти́ся/ и от Нея́ четве́ртым жре́бием нарече́ся./ Ты же, мно́гими труды́ и терпе́нием/ в сле́зном покая́нии основа́ние оби́тели положи́вши/ и благода́ть Свята́го Ду́ха стяжа́вши,/ ны́не в Небе́сных черто́зех лику́еши// и мо́лишися о спасе́нии душ на́ших.

Стих: Ди́вен Бог во святы́х Свои́х,/ Бог Изра́илев.

Преподо́бная ма́ти на́ша Ма́рфо!/ Ты, ангелоподо́бнаго ра́ди жития́ твоего́,/ возлю́бленная учени́ца преподо́бнаго Серафи́ма была́ еси́/ и открове́ние о гряду́щей сла́ве Диве́ева от него́ прия́ла еси́,/ моле́ние о е́же основа́ти оби́тель Ме́льничную с ним соверши́вши,/ на служе́ние в ней/ Цари́цею Небе́сною избра́на была́ еси́,// Ю́же моли́ о спасе́нии душ на́ших.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Преподо́бная ма́ти на́ша Еле́но!/ Ты отцу́ своему́ духо́вному преподо́бному Серафи́му/ в простоте́ се́рдца, я́ко Христу́, повинова́лася еси́/ и за послуша́ние в ю́ных ле́тех/ вме́сто бра́та смерть прия́ла еси́,/ па́че бо сея́ любве́ никто́же и́мать,/ да кто ду́шу свою́ положи́т за дру́ги своя́,/ глаго́лет Госпо́дь,// Его́же моли́ о спасе́нии душ на́ших.

Сла́ва, глас 6:

Благоче́стие свое́/ в прославле́нии твое́м, преподо́бне о́тче Серафи́ме,/ святы́й царь Никола́й явля́ет/ и, тя я́ко вели́каго уго́дника и чудотво́рца почита́я,/ со свято́ю цари́цею Алекса́ндрою/ пред мощьми́ твои́ми усе́рдно мо́лится:/ да Госпо́дь бла́гость Свою́ низпо́слет на Русь Святу́ю,// да́руя ей ве́лию ми́лость.

И ны́не, Богоро́дичен, глас то́йже: Творе́ц и Изба́витель:

Тропа́рь пи́сан на вели́цей вече́рни.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: О ди́вное чу́до:

О ди́вное чу́до!/ Всенепоро́чная Ма́ти Све́та,/ избра́вши в жре́бий Свой оби́тель Диве́евскую,/ блага́я обетова́ния о ней изрече́,/ благослове́ние Бо́жие и ми́лость Свою́ явля́ющи,/ да любо́вию Ей благода́рственно воспева́ем:/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.

Ди́вны Твоя́ та́йны, Богоро́дице,/ по сло́ву нело́жнаго обетова́ния/ оби́тель Твою́ при́сно посеща́еши,/ боже́ственными сия́нии А́нгельских во́инств обступа́ема/ и чи́ны всех святы́х земли́ Диве́евския прославля́ема,/ с ни́миже Тебе́ любо́вию воспева́ем:/ Благода́тная, ра́дуйся,/ с Тобо́ю Госпо́дь,// подая́й ми́рови Тобо́ю ве́лию ми́лость.

О ди́вное чу́до!/ Благослове́нная оби́тель Диве́евская/ четве́ртый уде́л Бо́жия Ма́тере нарица́ется,/ в не́йже сонм святы́х быва́ет/ и земли́ Ру́сской сла́ву ве́лию явля́ет./ Мы же, к ним припа́дающе, те́пле вопие́м:/ о уго́дницы всехва́льнии,/ Го́сподеви моли́теся// дарова́ти душа́м на́шим мир и ве́лию ми́лость.

Глас 2.

Подо́бен: Ки́ими похва́льными венцы́:

Ки́ими похва́льными добро́тами/ ублажи́м преподо́бнаго Серафи́ма?/ Повеле́ний Цари́цы Небе́сныя ве́рнаго исполни́теля,/ Диве́евския оби́тели устрои́теля и попечи́теля/ и сестр ея́ – отца́ чадолюби́ваго и духо́внаго окорми́теля,/ всем помо́щника ско́раго и в ско́рбех уте́шителя,// и моли́твенника те́плаго о душа́х на́ших.

Ки́ими вдохнове́нными пе́сньми/ воспое́м преподо́бныя жены́ Диве́евския?/ Алекса́ндру, Бо́жия Ма́тере избра́нницу/ и оби́тели на́шея первонача́льницу;/ Ма́рфу, отрокови́цу ангелоподо́бную,/ преподо́бнаго Серафи́ма сотаи́нницу;/ Еле́ну, кро́тость и смире́ние возлю́бльшую/ и в са́мой сме́рти и́стинное послуша́ние я́вльшую.// И́хже и́мамы моли́твенницы те́плыя о душа́х на́ших.

Ки́ими похва́льными словесы́/ возвели́чим Пелаги́ю, Параске́ву и Мари́ю блаже́нныя?/ Ко Го́споду вку́пе ду́хом горя́щия,/ стра́нницы земны́я, Оте́чества го́рняго взыску́ющия,/ прича́стницы зва́ния небе́снаго,/ ми́ру юро́дивыя, оба́че во Христе́ му́дрыя.// И́хже и́мамы моли́твенницы те́плыя о душа́х на́ших.

Ки́ими досто́йными венцы́/ увенча́ем священному́ченики добропобе́дныя?/ Серафи́ма, летопи́сца оби́тели Диве́евския/ и гра́да свята́го Петра́ архипа́стыря многострада́льнаго,/ Иа́кова и Михаи́ла, иере́и благогове́йныя/ и сестр Диве́евских попечи́тели духо́вныя,/ новозакла́нныя а́гнцы, за Христа́ пострада́вшия.// И́хже и́мамы моли́твенники те́плыя о душа́х на́ших.

Ки́я неизрече́нныя да́ры/ принесе́м по достоя́нию/ новому́ченицам и испове́дницам Диве́евским?/ Ма́рфе и Пелаги́и, и́нокиням честны́м и а́гницам Христо́вым,/ Матро́не преподо́бней, испове́днице тверде́йшей,/ му́ченицам Евдоки́и, Да́рии, Да́рии и Мари́и,/ пе́рвым христиа́ном во страда́нии подо́бницам,/ ве́рным учени́цам Госпо́дним.// И́хже и́мамы моли́твенницы те́плыя о душа́х на́ших.

Сла́ва, глас 4:

Днесь наста́ со́лнца светле́йший пра́здник/ собо́ра святы́х Диве́евских,/ и́же ве́рныя к весе́лию созыва́ет/ и луча́ми ра́дости всех просвеща́ет,/ ди́вными сия́я чудесы́:/ в них бо яви́ся сла́ва Христо́ва,/ сла́ва Це́ркве Ру́сския./ Те́мже ве́рнии вопие́м любо́вию:/ моли́теся за ны ко Го́споду,/ вси святи́и земли́ на́шея,// поми́ловатися душа́м на́шим.

И ны́не, Богоро́дичен, глас то́йже: И́же Тебе́ ра́ди богооте́ц проро́к Дави́д:

Вход. Проки́мен дне. И чте́ния три.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе и соберу́тся кня́зи от них,/ кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок, Его́же избра́х,/ да позна́ете и ве́руете Ми,/ и разуме́ете, я́ко Аз есмь;/ пре́жде Мене́ не бысть ин бог и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй;/ сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетят,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ра хра́ма, та́же святы́х, глас 1:

Блаже́нна еси́, чу́дная оби́теле Диве́евская,/ сла́вни вси преде́ли твои́,/ стопа́ми Пресвяты́я Богоро́дицы освяще́ннии/ и по́двиги святы́х просла́вленнии,/ и́хже всехва́льную па́мять соверша́юще,/ славосло́вим Христа́ Бо́га, ди́внаго во святы́х Свои́х,// Ему́же мо́лимся спасти́ся душа́м на́шим.

Сла́ва, глас то́йже:

Небе́сных благ струи́ нетле́нныя,/ цельба́м су́щия исто́чник приснотеку́щий,/ свяще́нныя ва́ша мо́щи, о святи́и Диве́евстии,/ сия́нием бо Свята́го Ду́ха осеня́емыя,/ благоуха́ют и душетле́нных страсте́й исцеля́ют// и напая́ют сердца́ ве́рных благода́тию Боже́ственною.

И ны́не, Богоро́дичен, глас то́йже:

Вся́кое дыха́ние и тварь/ похвале́ние Тебе́ прино́сит, Влады́чице:/ и и́нокини Диве́евския, за́поведь преподо́бнаго Серафи́ма храня́щия,/ пред ико́ною свята́го Умиле́ния Твоего́ пе́ние моле́бное возсыла́ют:// Пресвята́я Богоро́дице, спаси́ нас!

На стихо́вне стихи́ры, глас 2.

Подо́бен: Егда́ от Дре́ва:

Егда́, я́ко зве́зды, све́том доброде́телей сия́ющия,/ озари́ли есте́ блиста́нием чуде́с вся концы́ Ру́сския земли́,/ преподо́бныя ма́тери на́ша Алекса́ндро, Ма́рфо и Еле́но,/ Цари́це Небе́сней ве́рно послужи́вшия,/ тогда́ ме́сто по́двигов ва́ших показа́ли есте́ не́бо друго́е./ Ны́не же па́мять ва́ша согрева́ет ве́рных сердца́,/ усе́рдно моля́щих вас:/ помяни́те нас, святы́я ма́тери на́ша,// у Престо́ла Бо́жия во Ца́рствии Небе́снем.

Стих: Ди́вен Бог во святы́х Свои́х,/ Бог Изра́илев.

Егда́, я́ко зла́то, в пещи́ искуше́ний сия́ющия,/ святы́я блаже́нныя ма́тери на́ша Пелаги́е, Параске́во и Мари́е,/ ше́ствовали есте́ те́сным путе́м,/ отве́ргшася себе́ и крест на ра́мо взе́мша,/ тогда́ све́том боже́ственныя му́дрости просвеща́емыя,/ ве́лия по́двиги и по́стныя труды́ понесли́ есте́./ И кто испове́сть смире́ние, незло́бие, терпе́ние ва́ше?/ Помяни́те чад свои́х, зову́щих вам любо́вию:// ра́дуйтеся, на́ша те́плыя предста́тельницы и покрови́тельницы.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Прииди́те, ве́рнии, согла́сно восхва́лим/ Це́ркве Христо́вы непоколеби́мое утвержде́ние,/ Цари́цы Небе́сныя сла́вное ополче́ние:/ му́ченика свяще́нна и святи́теля всече́стна Серафи́ма,/ дво́ицу иере́ев Михаи́ла и Иа́кова,/ свяще́нную похвалу́ па́стырей и́стинных,/ же́ртвенник красе́н свое́ се́рдце сотвори́вших/ и свяще́нную ри́зу кровьми́ обагри́вших.// И́хже ра́ди страда́ний, Всеси́льне Спа́се, поми́луй нас.

Сла́ва, глас 8:

О, пресла́внаго чудесе́!/ Стопа́м после́дующе дре́вних му́ченик/ тве́рдым ве́ры испове́данием,/ гоне́ний и страда́ний кре́пким терпе́нием,/ преподобному́ченицы Пелаги́я, Ма́рфа/ и преподобноиспове́дница Матро́на,/ све́том кре́стных луче́й осиява́емыя,/ венце́м побе́ды благосла́вно увенча́шася.// И́хже ра́ди по́двигов, Всеси́льне Спа́се, поми́луй нас.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

Тропа́рь, глас 5:

Днесь церко́вная расширя́ются не́дра,/ прие́млюще бога́тство Бо́жия благода́ти,/ и ра́дуется Пресвяты́я Богоро́дицы избра́нная оби́тель,/ па́мять соверша́ющи многоимени́таго ли́ка святы́х Диве́евских,/ в Небе́снем Ца́рствии торжеству́ющих// и моля́щихся о душа́х на́ших.

На у́трени

По 1-м стихосло́вии седа́лен, глас 4:

Днесь, я́ко со́лнце незаходи́мое,/ возсия́ всечестна́я па́мять собо́ра святы́х, в земли́ Диве́евской просия́вших,/ равноа́нгельным житие́м и му́ченическою сме́ртию Бо́гу угоди́вших/ и дерзнове́ние ве́лие у Него́ стяжа́вших./ И́хже моли́твами, Бо́же, да́руй нам ве́лию ми́лость.

Сла́ва, и ны́не, Богоро́дичен:

В хра́ме Рождества́ Твоего́, Пресвята́я Богоро́дице, иде́же мо́щи святы́х почива́ют,/ немо́лчное славосло́вие Го́споду возно́сится/ и сим непреста́нным псалмопе́нием оби́тель Диве́евская укрепля́ется.

По 2-м стихосло́вии седа́лен, глас 6:

Днесь све́тло красу́ется оби́тель Диве́евская/ и ча́да Це́ркве Христо́вы ра́дуются,/ прославля́юще собо́р святы́х, в земли́ сей просия́вших,/ и ре́вностию ко спасе́нию просвеща́ются, взыва́юще:/ тех моли́твами, Го́споди, спаси́ ду́ши на́ша.

Сла́ва, и ны́не, Богоро́дичен:

Егда́ в день пра́зднования Пресвята́го Рождества́ Твоего́, Влады́чице,/ оби́тель Диве́евская ве́стию ско́рбною огласи́ся о гряду́щем разоре́нии ея́,/ тогда́ под Свой омофо́р и́нокинь честны́х взяла́ еси́, Пречи́стая,/ ско́рая в беда́х Помо́щнице.

Велича́ние:

Велича́ем вас,/ вси святи́и земли́ Диве́евския,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Го́споди Госпо́дь наш,/ я́ко чу́дно И́мя Твое́ по всей земли́.

Мне же зело́ че́стни бы́ша/ дру́зи Твои́, Бо́же.

Изочту́ их,/ и па́че песка́ умно́жатся.

Ди́вен Бог во святы́х Свои́х,/ Бог Изра́илев.

Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Блаже́ни вси боя́щиися Го́спода,/ ходя́щии в путе́х Его́.

Восхва́лятся преподо́бнии во сла́ве,/ и возра́дуются на ло́жах свои́х.

Воспо́йте Го́сподеви песнь но́ву:/ хвале́ние Его́ в Це́ркви преподо́бных.

Собери́те Ему́ преподо́бныя Его́,/ завеща́ющия заве́т Его́ о же́ртвах.

Весели́теся о Го́споде/ и ра́дуйтеся, пра́веднии.

Пра́ведницы насле́дят зе́млю/ и вселя́тся в век ве́ка на ней.

Мно́ги ско́рби пра́ведным,/ и от всех их изба́вит я́ Госпо́дь.

Ми́лость же Госпо́дня от ве́ка и до ве́ка/ на боя́щихся Его́.

И пра́вда Его́ на сыне́х сыно́в, храня́щих заве́т Его́,/ и по́мнящих за́поведи Его́ твори́ти я́.

От восто́к со́лнца до за́пад/ хва́льно И́мя Госпо́дне.

По полиеле́и седа́лен, глас 4:

О сро́дницы на́ши и те́плии засту́пницы,/ и́же в земли́ Диве́евской просла́вльшиися:/ священному́ченицы, преподо́бнии, му́ченицы, испове́дницы и блаже́ннии,/ по́двиги свои́ми Бо́гу угоди́вшии/ и нетле́нныя сла́вы венцы́ украси́вшиися,/ Христа́ Бо́га на́шего моли́те/ мир Це́ркви дарова́ти/ и душа́м на́шим спасти́ся.

Сла́ва, и ны́не, Богоро́дичен:

Мно́гими содержи́ми напа́стьми,/ во вся́цей ско́рби душе́вней и обстоя́нии к Тебе́ прибега́ем, Пресвята́я Богоро́дице,/ моле́бное пе́ние по за́поведи преподо́бнаго Серафи́ма принося́ще:/ о Ма́ти Сло́ва и Де́во,/ от тя́жких и лю́тых нас спаси́!

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 11.

По 50-м псалме́ стихи́ра, глас 6:

Це́ркве Христо́вы свети́льницы,/ всея́ Руси́ украше́ние,/ святи́и вси, в земли́ Диве́евской просия́вшии,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.

Кано́н святы́х, глас 1.

Песнь 1.

Ирмо́с: Твоя́ победи́тельная десни́ца,/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.

Припе́в: Вси святи́и Диве́евстии, моли́те Бо́га о нас.

Днесь лику́ет оби́тель Диве́евская,/ четве́ртый уде́л Цари́цы Небе́сныя во вселе́нней имену́емая,/ прославля́ющи собо́р святы́х свои́х,/ я́ко зве́зды пресве́тлыя, не́бо церко́вное украси́вших.

Преподо́бне о́тче Серафи́ме!/ Ты, попече́ние о оби́тели Диве́евской/ из уст преподо́бныя Алекса́ндры, я́ко заве́т духо́вный, восприе́м,/ во вся дни живота́ твоего́ сию́ окормля́л еси́./ И ны́не, святы́ми моща́ми зде почива́я,/ обе́та своего́ не нару́шил еси́.

Священному́чениче святи́телю Серафи́ме!/ Ты, на ме́сто по́двигов Саро́вскаго Чудотво́рца прише́д,/ любо́вию к нему́ возгоре́лся еси́,/ и благослове́ние блаже́нныя Параске́вы улучи́в,/ многоце́нную ле́топись оби́тели Диве́евския соста́вил еси́.

Чудотво́рцу Саро́вскому тезоимени́те, святи́телю Серафи́ме!/ Ты, му́ченическия кончи́ны предрече́ние от него́ прие́м,/ утеше́ния в виде́нии от того́ сподо́бился еси́./ Ны́не же во Ца́рствии Небе́снем вку́пе с ним пребыва́еши/ и мо́лишися о душа́х на́ших.

Богоро́дичен: Ра́дуйся, Пресвята́я Госпоже́, Твои́м посеще́нием Диве́ево освяти́вшая,/ ра́дуйся, благоче́стие та́мо насади́вшая,/ ра́дуйся, мона́шествующих зде мно́жество собра́вшая.

Песнь 3.

Ирмо́с: Еди́не ве́дый челове́ческаго существа́ не́мощь,/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.

Повеле́ния Цари́цы Небе́сныя о жре́бии Ея́ сподо́бльшися,/ на по́двиг послуша́ния ре́вностне устреми́лася еси́,/ преподо́бная ма́ти Алекса́ндро,/ и нача́ло оби́тели Диве́евския положи́ла еси́.

Многотру́дныя по́двиги подъе́мши,/ доброде́тельми мно́гими украси́лася еси́, преподо́бная ма́ти Алекса́ндро,/ и, храм Каза́нския ико́ны Пресвяты́я Богоро́дицы во оби́тели устро́ивши,/ вели́кая свята́я жена́ яви́лася еси́.

О преподо́бная ма́ти Ма́рфо, вели́каго а́нгельскаго о́браза восприе́мнице!/ Ты во Ца́рствии Бо́жии со святы́ми де́вами предстои́ши,/ помяни́ и нас у Престо́ла Бо́жия.

Свобо́дну себе́ от обру́чника земна́го сотвори́вши,/ со све́тлою свеще́ю души́ твоея́ в сре́тение Небе́снаго Жениха́ устреми́лася еси́, преподо́бная Еле́но,/ Ему́же уневе́стившися,/ в черто́г Небе́сный с му́дрыми де́вами возшла́ еси́.

Богоро́дичен: Ра́дуйся, во уде́л Себе́ Диве́ево избра́вшая,/ ра́дуйся, Засту́пницею ме́ста сего́ бы́ти изво́лившая,/ ра́дуйся, ве́рным, пребыва́ющим во оби́тели, Спору́чнице ве́чнаго спасе́ния.

Седа́лен, глас 1:

Я́ко зве́зды многосве́тлыя,/ на не́бе церко́внем просия́вшии/ и по́двигов добропобе́дных сия́нием и чуде́с заря́ми/ всю зе́млю Диве́евскую просвети́вшии,/ вы, святи́и, Боже́ственныя све́тлости яви́лися есте́ прича́стницы/ и блаже́нныя жи́зни ве́чныя показа́лися есте́ насле́дницы./ Те́мже, всера́достную па́мять ва́шу соверша́юще, ве́рно вопие́м:/ моли́те Христа́ Бо́га грехо́в оставле́ние дарова́ти/ любо́вию вас почита́ющим.

Сла́ва, и ны́не, Богоро́дичен:

Благослове́ние на четве́ртый Твой уде́л,/ я́ко Иве́рии, Афо́ну и гра́ду Ки́еву, излия́ла еси́, Цари́це Небе́сная,/ и до днесь благода́ть Всесвята́го Ду́ха Бо́жия/ и оби́лие благ Небе́сных и земны́х/ от ме́ста Твоего́ возлю́бленнаго/ по сло́ву Твоему́ не оскудева́ют.

Песнь 4.

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,// во спасе́ние на́ше и обновле́ние.

И́же лю́бит отца́ или́ ма́терь, сы́на или́ дщерь па́че Мене́,/ несть Мене́ досто́ин, рече́ Госпо́дь,/ и и́же не прии́мет креста́ своего́, несть Мене́ досто́ин./ Ты же, блаже́нная ма́ти Пелаги́е,/ вся дома́шняя своя́ оста́вльши, Го́споду твоему́ после́довала еси́/ и ду́шу свою́ в живо́т ве́чный соблюла́ еси́.

И́хже о́ко не ви́де, и у́хо не слы́ша, и на се́рдце челове́ку не взыдо́ша, угото́ва Бог лю́бящим Его́./ Ты же, блаже́нная ма́ти Параске́во,/ вся сия́ сокро́вища вы́шшия му́дрости духо́вныя/ безу́мием Христа́ ра́ди позна́ла еси́.

Се есть живо́т ве́чный, да позна́ем Го́спода,/ не разуме́ти бо Того́ смерть есть./ Ты же, блаже́нная ма́ти Мари́е,/ Бо́га я́ко Исто́чника жи́зни позна́вши и возлюби́вши,/ еще́ в жи́зни сей в се́рдце твое́м Ца́рствие Небе́сное обрела́ еси́.

Ди́вен Бог во святы́х Свои́х,/ И́же тле́нная в нетле́ние прелага́яй/ и ме́ртвенная в безсме́ртие облека́яй./ Той и ва́ша святы́я мо́щи, блаже́нныя ма́тери на́ша Пелаги́е, Параске́во и Мари́е,/ я́ко многоце́нное сокро́вище, в земли́ сокрове́нное, яви́ нам,/ во о́браз гряду́щаго всео́бщаго воскресе́ния.

Богоро́дичен: Ра́дуйся, те́плая Хода́таице о живу́щих в четве́ртом жре́бии Твое́м;/ ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая;/ ра́дуйся, Ра́досте и Спасе́ние душ на́ших.

Песнь 5.

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ богоразу́мия,// правосла́вно пою́щих Тя.

Я́ко зла́то в горни́ле, Бог искуси́ тя/ и обре́те досто́йну Себе́, преподобному́ченице Ма́рфо честна́я,/ и, я́ко всепло́дие же́ртвенное, прия́т тя./ И́бо пред лице́м челове́ческим, а́ще и му́ку прия́ла еси́,/ упова́ние твое́ безсме́ртия испо́лнено,/ и вма́ле нака́зана бы́вши,/ вели́кими да́ры облагоде́тельствована еси́ на Небесе́х.

Те́лом умерщвле́на была́ еси́, преподобному́ченице Пелаги́е,/ муче́ние сме́ртное от рук богобо́рцев прие́мши,/ оба́че ду́хом низложи́ла еси́ де́монов немощны́я де́рзости/ и во страда́нии свое́м вене́ц нетле́нный прия́ла еси́/ от Христа́ Бо́га на́шего.

И́же а́ще испове́сть Сы́на Бо́жия пред челове́ки на земли́,/ того́ и Госпо́дь на Небеси́ испове́сть пред А́нгелы Свои́ми./ Ты же, преподо́бная Матро́но испове́днице,/ до́брым по́двигом ве́ры подвиза́вшися,/ испове́дание тве́рдое пред мучи́тели яви́ла еси́.

Преподобному́ченицы Ма́рфо, Пелаги́е/ и испове́днице сла́вная Матро́но,/ по́двиги ва́шими Це́рковь укра́сися,/ несть бо му́жеский пол, ни же́нский,/ но вся́ческая и во всех Христо́с Бог,/ бога́т Сый во всех призыва́ющих Его́.

Богоро́дичен: Ра́дуйся, Храни́тельнице на́ша в настоя́щем ве́це;/ ра́дуйся, Предста́тельнице и непосты́дное упова́ние в бу́дущем;/ ра́дуйся, вся́кое зло от жре́бия Своего́ отража́ющая.

Песнь 6.

Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.

Оби́тели Су́ждальския настоя́тельство прии́м,/ житие́ преподо́бнаго Евфи́мия соста́вил еси́, священному́чениче Серафи́ме./ Егда́ же Госпо́дь к святи́тельству тя призва́,/ Це́ркве Ру́сской послужи́л еси́/ и архипа́стырь добр яви́лся еси́.

Прехва́льне священному́чениче Михаи́ле,/ Архистрати́гу Небе́сных Сил тезоимени́те!/ Кто я́ко Бог – взыва́л еси́ пред богобо́рцы,/ Арха́нгела подража́в дерзнове́нию.

О́трасле пречестна́я ко́рене благочести́ваго, священному́чениче Михаи́ле,/ свяще́нным стопа́м отца́ твоего́ после́довав,/ ве́рности Бо́гу и благоче́стию того́ поревнова́л еси́/ и тождестрада́льник единокро́внаго бра́та твоего́ яви́лся еси́,/ с ни́мже моли́ся о спасе́нии душ на́ших.

Любо́вию к чи́ну мона́шескому преиспо́лненный,/ дом свой оби́тель для сестр, в изгна́нии су́щих, сотвори́л еси́, священному́чениче Иа́кове,/ Авраа́мле страннолю́бие показу́я/ и Иа́ковле многоча́дие духо́вне прие́мля,/ сего́ ра́ди мзда сих пра́отец на Небесе́х тебе́ дарова́ся.

Богоро́дичен: Ра́дуйся, Благода́тная, я́ко насле́дие Твое́ при́сно назира́еши;/ ра́дуйся, я́ко благода́ти и ми́лости Своея́ нас сподобля́еши;/ ра́дуйся, благослове́ние Сы́на Твоего́ на нас низводя́щая.

Конда́к, глас 8:

Сосу́ди Ду́ха Свята́го яви́стеся честны́м ва́шим житие́м,/ усе́рднии служи́телие Пресвяты́я Богоро́дицы,/ в земли́ Диве́евской просия́вшии,/ помяни́те нас у Престо́ла Бо́жия во Ца́рствии Небе́снем.

И́кос:

Аз есмь Лоза́, вы же ро́ждие,/ рече́ Христо́с Бог Свои́м ученико́м./ Та́кожде и вы, святи́и земли́ Диве́евския,/ яви́стеся в вертогра́де Небе́снем ро́ждие лозы́ Христо́вы,/ благоукраси́вше Святу́ю Це́рковь Ру́сскую плоды́ ве́ры и благоче́стия,/ помяни́те нас у Престо́ла Бо́жия во Ца́рствии Небе́снем.

Песнь 7.

Ирмо́с: Авраа́мстии о́троцы в пещи́ Тро́ицу прообрази́вше,/ о́гненный пла́мень на ро́су преложи́ша/ и, пою́ще, вопия́ху:// благослове́н еси́, Бо́же оте́ц на́ших.

Тезоиме́нная благоволе́нию Бо́жию су́щи, му́ченице Евдоки́е блаже́нная,/ николи́же попече́ния по за́поведи Спаси́теля име́ла еси́,/ что я́сти, что пи́ти или́ во что облещи́ся,/ взыска́ла бо еси́ пре́жде Ца́рствия Бо́жия и пра́вды его́,/ и сего́ ра́ди вся потре́бная прия́ла еси́ от Го́спода Бо́га оте́ц на́ших.

Тезоиме́нно нарече́нныя, страстоте́рпицы Да́рие и и́на Да́рие Пу́зинския,/ во еди́нем во́зрасте му́ченическую смерть прия́ли есте́,/ не́мощны бо су́щия пло́тию,/ си́льны ду́хом Бо́гу яви́стеся, воспева́ющия:/ благослове́н еси́, Бо́же оте́ц на́ших.

Святи́теля Никола́я предста́тельством исцеле́ние от неду́га получи́вши, му́ченице Мари́е,/ блаже́нней Евдоки́и до конца́ жи́зни своея́ послужи́ла еси́, Го́сподеви воспева́ющи:/ благослове́н еси́, Бо́же оте́ц на́ших.

Тридне́вная избие́ния и смерть лю́тую претерпе́вша,/ сла́вныя му́ченицы Пу́зинския,/ стопа́м Христа́ после́довали есте́, взыва́юща:/ Тебе́ ра́ди, Женише́ наш, и́щущя страда́льчествуем,/ стра́ждем и умира́ем за Тя,/ да и живе́м с Тобо́ю, Бо́же оте́ц на́ших.

Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице;/ ра́дуйся, во бра́нех, боле́знех и труде́х премилосе́рдая Уте́шительнице;/ ра́дуйся, Наде́ждо и Спасе́ние душ на́ших.

Песнь 8.

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Нищелюби́ва, сиро́т и вдови́ц пита́тельница была́ еси́, ма́ти на́ша Алекса́ндро,/ ми́лостыню же ти та́йно творя́щей,/ возда́л есть тебе́ я́ве Оте́ц наш Небе́сный,/ Су́щий над все́ми Царь во вся ве́ки.

О ве́лия послуша́ния твоего́, ма́ти на́ша Ма́рфо!/ Ты и по сме́рти, я́ко и жива́ су́щи,/ моле́ния на́ша слы́шиши./ Те́мже и́стину, отцы́ рече́нную, я́ко сия́ доброде́тель не умира́ет,/ утвержда́еши во вся ве́ки.

О ма́ти на́ша Еле́но!/ Терпе́нию, смире́нию, кро́тости, чистоте́ и простоте́ голуби́ней/ преподо́бный Серафи́м тя научи́,/ си́ми же доброде́тельми к Ве́чней Жи́зни себе́ приугото́вивши,/ ны́не Бо́га воспева́еши во вся ве́ки.

Тро́ичен: Зна́менася благоволе́ние Святы́я Тро́ицы/ явле́нием трие́х голубе́й, над кресто́м хра́ма паря́щих в час освяще́ния его́./ Мы же, чу́до сие́ помина́юще, воспева́ем:/ Тро́ице Свята́я, сла́ва Тебе́.

Богоро́дичен: Пе́сни благода́рственныя прино́сим Ти, Ма́ти Бо́жия:/ ра́дуйся, я́ко спаса́еши нас при́сно от вся́каго обстоя́ния;/ ра́дуйся, я́ко пита́еши, устроя́еши и о нас промышля́еши;/ ра́дуйся, я́ко и по кончи́не на́шей Небе́снаго Ца́рствия сподобля́еши.

Песнь 9.

Ирмо́с: О́браз чи́стаго Рождества́ Твоего́,/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,// непреста́нно велича́ем.

Пресла́внии священному́ченицы Серафи́ме, Михаи́ле и Иа́кове!/ Вы честно́ю кро́вию свое́ю/ ри́зы свяще́нныя обагри́ли есте́/ и дре́вняго запина́теля му́жественне низложи́ли есте́.

Преподобному́ченицы Пелаги́е и Ма́рфо сла́вныя!/ Вы, на неви́димая воздая́ния взира́юща,/ сме́рти Христа́ ра́ди безбоя́зненно себе́ преда́ли есте́,/ ре́кша в се́рдце свое́м:/ ви́димая вре́менна суть,/ неви́димая же ве́чна.

Преподо́бная ма́ти на́ша Матро́но!/ Ты, по́стническим житие́м подвиза́вшися,/ испове́данием тве́рдым украси́лася еси́,/ и заточе́ния и го́рькия рабо́ты подъе́мши,/ мно́гия ско́рби и беды́ Христа́ ра́ди претерпе́ла еси́,/ сего́ ра́ди на Небесе́х мзду трудо́в твои́х обрела́ еси́.

Блаже́нныя ма́тери Пелаги́е, Параске́во и Мари́е!/ Вы, ко Го́споду ду́хом горя́ща,/ стра́нницы земны́я, Оте́чества Го́рняго взыску́ющия,/ во оби́тели Диве́евской яви́лися есте́/ преподо́бнаго Серафи́ма досто́йныя учени́цы бы́вша.

Богоро́дичен: О Де́во Пречи́стая,/ по глаго́лу Твоему́ оби́тель Диве́евская утверди́ся и просла́вися,/ и мно́жеством спаса́ющихся напо́лнися./ В ней же и сонм святы́х просия́,/ и́же мо́лятся о спасе́нии душ на́ших.

Свети́лен, глас 5:

Ра́дуйся, земле́ Диве́евская сла́вная,/ Небе́сныя засту́пники иму́щи вся святы́я, в тебе́ просия́вшия./ Днесь све́тло пра́здник тех соверша́юще,/ собо́р их досто́йно в пе́снех почита́ем.

Сла́ва, и ны́не, Богоро́дичен:

О Пречи́стая Де́во! Игу́мения оби́тели Диве́евския обеща́лася еси́ при́сно бы́ти/ и Го́споду зде служа́щих, я́ко зве́зды небе́сныя и песо́к морски́й, умно́жити./ Сего́ ра́ди Тя, Присноде́во, я́ко Ма́терь Све́та, и Сы́на Твоего́/ пе́сньми велича́ем.

На хвали́тех стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйся, оби́теле Диве́евская,/ из тебе́ бо произы́де ди́вный лик святы́х,/ в разли́чная ле́та мно́гия по́двиги поне́сших/ и собла́зны ми́ра невозвра́тно отве́ргших,/ Еди́ному же Го́споду послужи́вших/ и за́поведи Его́ свя́то соблю́дших./ К ни́мже с ве́рою и любо́вию возопии́м:/ ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Ра́дуйся, оби́теле Диве́евская,/ собо́р святы́х в себе́ воспита́вшая,/ ти́и бо, нището́ю духо́вною обогати́вшеся,/ пла́чуще, благода́ти Уте́шителя испо́лнишася,/ кро́тцыи же су́ще, Ца́рствие Небе́сное насле́доваша,/ и а́лчуще и жа́ждуще пра́вды Бо́жия, насы́тишася,/ ми́лостию же укра́шенни, поми́ловани бы́ша/ и, я́ко чи́стии се́рдцем, Святу́ю Тро́ицу узре́ша./ К ни́мже с ве́рою и любо́вию возопии́м:/ ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Ра́дуйся, оби́теле Диве́евская,/ ча́да бо твоя́, Живоно́снаго Креста́ благода́тию укрепля́ема,/ ве́рность и любо́вь ко Христу́ распя́тому сохрани́ша,/ страда́ния же многоразли́чная до́блественне претерпе́вше,/ я́ко во́ини необори́мии, венцы́ нетле́нныя восприя́ша,/ и пра́вды ра́ди изгна́на и му́чима,/ ве́чную сла́ву улучи́ша./ К ни́мже с ве́рою и любо́вию возопии́м:/ ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Ра́дуйтеся, святи́и собо́ра Диве́евскаго,/ кра́сный плод по́двигов ва́ших Христу́ Бо́гу прине́сшии./ Ра́дуйтеся, я́ко, красото́ю любве́ сердца́ ва́ша украси́вше,/ долготерпе́нию и му́жеству ве́рных науча́ете./ Ра́дуйтеся, я́ко Престо́лу Вседержи́теля во сла́ве предстоя́ще,/ предста́тельством ва́шим при́сно о нас хода́тайствуете./ Ра́дуйтеся, оби́тели на́шея честны́й покро́ве и заступле́ние,// при́снии моли́твенницы о спасе́нии душ на́ших.

Сла́ва, глас 2:

Красу́йся ны́не, Диве́евская земле́,/ прине́сшая Бо́гу уго́дники святы́я:/ священному́ченики сла́вныя,/ па́стырем украше́ние,/ преподо́бныя отцы́ и ма́тери,/ А́нгелом сожи́тели,/ новому́ченицы и испове́дницы,/ му́чеников сла́ва и похвала́,/ блаже́нныя и юро́дивыя,/ цвет благоуха́нный незло́бивым./ И́хже моли́твами,// Христе́ Бо́же, поми́луй нас.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

На Литурги́и

Блаже́нна от кано́на святы́х, пе́сни 3-я и 6-я на 8. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол ко Евре́ем, зача́ло 330. Коне́ц: Взира́юще на Нача́льника ве́ры, и Соверши́теля Иису́са. Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Матфе́я, зача́ло 11. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О, всечестни́и святи́и Диве́евстии, избра́нницы Цари́цы Небе́сныя, при́снии Ея́ послу́шницы, по́двиги свои́ми в Ца́рствие Небе́сное возше́дшии! Се ны́не в день о́бщаго ва́шего торжества́ прино́сим вам сие́ хвале́бное пе́ние, ублажа́ем свято́е житие́, прославля́ем вели́кая чудеса́, восхваля́ем любо́вь и велича́ем по́двиги ва́ша. Вы бо, пре́лести ми́ра сего́ отве́ргшеся и взе́мше крест свой, усе́рдно после́довали есте́ Христу́, та́же и, плоть свою́ распина́юще со страстьми́ и похотьми́, терпе́нием и му́жеством до конца́ врага́ низложи́ли есте́ и, прему́дрость ве́ка сего́ посрами́вше, ра́зум Христо́в стяжа́ли есте́. Сего́ ра́ди мо́лим вас: о святи́и сро́дницы на́ши! Не оста́вите нас, чад ва́ших духо́вных, споспешеству́йте нам ве́ру Правосла́вную тве́рдо содержа́ти, да спаси́тельное се́мя не изсуше́но бу́дет зно́ем неве́рия, но плод оби́льный принесе́т, я́ко да и мы в бу́дущем ве́це вку́пе с ва́ми услы́шим блаже́нный глас Го́спода и Бо́га на́шего: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

Источник: Текст утвержден Священным Синодом Русской Православной Церкви 9 марта 2017 года (журнал № 15)

Ме́сяца ию́ня в 16-й день

Преподо́бнаго Моисе́я О́птинскаго

На вели́цей ве́черни

Блаже́н муж: 1-й антифо́н. На Го́споди, воззвáх: стихи́ры на 8, глас 8:

Что тя нарече́м, Моисе́е о́тче преподо́бне?/ Оби́тели благопоспе́шна строи́теля,/ жи́тельства ски́тскаго основа́теля,/ благода́тнаго ста́рчества покрови́теля,/ духо́внаго де́лания иску́сна подви́жника,/ оте́ческаго уче́ния му́дра наста́вника,/ зако́н любве́ Христо́вы потща́вшагося испо́лнити!/ Ты бо еси́ свети́ло вели́кое// на небеси́ духо́внем О́птины благослове́нныя.

Кто возмо́жет воспе́ти досто́йно/ Моисе́я, устрои́теля прему́драго,/ пу́стынь О́птину возвели́чившаго/ и основа́ние ста́рчеству в ней положи́вшаго?/ Наста́вника кро́ткаго и па́стыря до́браго,/ бра́та попечи́тельнаго и отца́ любвеоби́льнаго,/ и́ночествующих собра́ние до́бре упа́сшаго!/ Того́ моли́твами всех благ Пода́тель// да да́рует нам мир и ве́лию ми́лость.

Измла́да Христа́ всем се́рдцем возлюби́вый/ и мона́шескому житию́ прилежа́вый,/ при́званный смотре́нием Бо́жиим/ из лесо́в Ро́славльских в пу́стынь О́птину,/ затво́рниче смире́нный,/ жре́бием Бо́жиим во игу́мена оби́тели поста́вленный,/ украше́ние и похвало́ Це́ркве Ру́сския,/ ди́вный ста́рче Моисе́е,// не оста́ви ны́не чад свои́х.

От ю́ности благоче́стию роди́тельми науча́емь,/ чте́нию душеполе́зному прилежа́л еси́,/ богому́дре о́тче Моисе́е,/ и, любо́вь Христо́ву позна́в,/ и́ноческий путь избра́л еси́,/ та́же и бра́тию иску́сно наставля́л еси́/ на путь спасе́ния непреле́стный,/ износя́ из сокро́вища се́рдца своего́// прему́дрость сокрове́нную.

Я́ко еле́нь жела́ет на исто́чники водны́я,/ си́це душа́ твоя́, о́тче Моисе́е,/ уедине́ния моли́твеннаго взыска́,/ оба́че, произволе́нию Бо́жию повину́яся,/ во́ли своея́ отве́рглся еси́/ и настоя́тельский жезл оби́тели Введе́нския со смире́нием прия́л еси́/ и, не озира́яся вспять,// упра́влен был еси́ в Ца́рствие Небе́сное.

Сла́ва, глaс 3:

Ка́ко по достоя́нию восхва́лим тя, преподо́бне,/ по́двиги свои́ми стра́сти умертви́вшаго/ и де́ланием доброде́телей ду́шу свою́ украси́вшаго!/ Кто не удиви́тся твоему́ вели́кому терпе́нию,/ снизхожде́нию к бли́жнему,/ кро́тости и незло́бию,/ нищелю́бию и ку́пли духо́вней!/ Ны́не же в невече́рнем дни Ца́рствия Бо́жия/ с пра́ведными наслажда́яся, о́тче Моисе́е,// моли́ о почита́ющих па́мять твою́.

И ны́не, Богоро́дичен, глас то́йже: Ка́ко не диви́мся:

Вход. Проки́мен дне. И чте́ния три преподо́бническая.

На лити́и стихи́ра хра́ма.

И преподо́бнаго стихи́ры, глас 5:

Любо́вию Христо́вою уязви́вся/ и Тому́ послужи́ти пла́менне вожделе́в,/ ми́ра удали́лся еси́, о́тче Моисе́е,/ о́браз быв доброде́телей ева́нгельских./ Ны́не же, во Све́те непристу́пнем со все́ми ста́рцы О́птинскими/ предстоя́ Престо́лу Влады́чню,/ со дерзнове́нием моли́ся земли́ Ру́сской богоуго́дней бы́ти// и сыново́м ея́ спасти́ся.

Се, что добро́ или́ что красно́,/ но е́же жи́ти бра́тии вку́пе!/ Сего́ ра́ди, преподо́бне о́тче Моисе́е,/ смотре́нием Бо́жиим во оби́тель О́птину поста́влен бысть,/ пасти́ слове́сныя о́вцы Христо́ва ста́да/ и наставля́ти их трезве́нию духо́вному,/ да бу́дут вси еди́ни,/ еди́неми усты́ и еди́нем се́рдцем// славосло́вяще Всесвяту́ю Тро́ицу.

Сла́ва, глaс 3:

А́ще и взыска́ Моисе́й, уго́дник Твой, Го́споди,/ служи́ти Тебе́ в сокрове́нии пусты́ннем,/ поста́вил еси́ его́/ во главу́ сла́вныя оби́тели О́птинския,/ а́ще же восхоте́ сокры́ти своя́ доброде́тели,/ изве́стна свети́льника его́ воздви́гл еси́./ Те́мже со умиле́нием вопие́м Ти, Человеколю́бче:/ непреста́нными моли́твами преподо́бнаго// щедро́ты Твоя́ пода́ждь нам и душа́м на́шим ве́лию ми́лость.

И ны́не, Богоро́дичен, глас то́йже:

Я́ко Ни́ва неора́нная,/ возрасти́ла еси́ нам Хлеб Жи́зни,/ от Него́же вси пита́емся ве́рнии,/ сего́ ра́ди досто́йно хва́лим Тя,/ я́ко Пресвяту́ю Де́ву Богоро́дицу,// жи́зни на́шея Пита́тельницу.

На стихо́вне сти́хиры, глас 6:

От ю́ности позна́в бла́гость Бо́жию, о́тче преподо́бне Моисе́е,/ вся преле́сти ми́ра сего́ во уме́ты вмени́л еси́/ и, плоть свою́ ду́хови покори́в,/ подвиго́м мона́шеским вда́лся еси́,/ те́мже и, Бо́гови усе́рдне послужи́в,// дар безце́нный любве́ соверше́нныя от Него́ прия́л еси́.

Стих: Честна́ пред Го́сподем// смерть преподо́бных Его́.

Безмо́лвие пусты́нное возлюби́в,/ преподо́бне о́тче Моисе́е,/ посреде́ молвы́ жите́йских попече́ний/ безмяте́жие ума́ сохрани́л еси́,/ в труде́х же непреста́нных пребыва́я,/ де́нно и но́щно и́мя Сладча́йшаго Иису́са призыва́л еси́,// те́мже и за́поведи Его́ животво́рныя соблю́л еси́.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Смире́ние Христо́во всем се́рдцем возлюби́в,/ пред бра́тиею твое́ю себе́ ума́лил еси́/ и, нача́льник рачи́тельный быв,/ не пренебре́гл еси́ труды́ немощны́х и убо́гих,/ вся к по́льзе оби́тели устроя́я,/ те́мже Госпо́дь просла́ви тя, о́тче Моисе́е,// Его́же моли́ о душа́х на́ших.

Сла́ва, глaс то́йже:

Мона́хов мно́жество собра́в,/ доброде́тельным нра́вом тех огради́л еси́,/ преподо́бне о́тче Моисе́е,/ и денноно́щными моли́твами мы́сленных волко́в от ста́да твоего́ отгна́л еси́,/ те́мже и яви́лся еси́ ко Христу́ хода́тай непосты́ден./ И ны́не у́бо моли́ся Ему́ приле́жно,/ оби́тели твое́й дарова́ти утвержде́ние// и душа́м на́шим ве́лию ми́лость.

И ны́не, Богоро́дичен: Творе́ц и Изба́витель:

Тропáрь, глaс 3:

Вертогра́да духо́внаго благопоспе́шный насади́тель/ и ски́тскаго жи́тельства устрои́тель,/ дре́вних мона́шеских уста́вов ревни́тель/ и в де́лании у́мнем прему́дрый наста́вник,/ я́ко восходя́щее свети́ло/ сла́вы О́птинския яви́лся еси́,/ преподо́бне о́тче Моисе́е,// моли́ спасти́ся душа́м на́шим.

На у́трени

По 1-м стихосло́вии седа́лен, глас 3:

Сосу́д боже́ственный воздержа́ния, бога́тство некра́домо благоче́стия показа́лся еси́, Моисе́е богоблаже́нне, ты бо, безстра́стием уясни́в житие́ твое́, тре́бующыя ми́лостынею обогати́л еси́. Те́мже, о́тче преподо́бне, моли́ Христа́ Бо́га дарова́ти нам ве́лию ми́лость.

Сла́ва, и ны́не, Богоро́дичен:

Не здра́вии тре́буют врача́, но боля́щии, –– си́це рекл еси́, Го́споди. Сего́ ра́ди прибега́ю к Тебе́, Врачу́ душ и теле́с: исцели́ ду́шу мою́, немощству́ющую мно́гими грехми́, и предста́тельством Пречи́стыя Твоея́ Ма́тере и всех преподо́бных отце́в О́птинских моли́твами да́руй ми ве́лию ми́лость.

По 2-м стихосло́вии седа́лен, глас 8:

Многосве́тлая звезда́ и́ноком и о́браз разу́мнаго воздержа́ния, ми́лости бога́тая сокро́вищница и пресве́тлое зерца́ло разсужде́ния показа́лся еси́, преподо́бне о́тче Моисе́е. Ны́не на Небеси́, предстоя́ Бо́гови, испроси́ дарова́ти проще́ние прегреше́ний све́тло соверша́ющим па́мять твою́.

Сла́ва, и ны́не, Богоро́дичен:

За нече́стие се́рдца моего́ страстьми́ лю́тыми одержи́мь сый, от нечи́стых усте́н мои́х мольбу́ приношу́ Тебе́, Пренепоро́чная, уще́дри мя Твои́ми моли́твами, Прибе́жище гре́шных и Бо́жие Жили́ще.

Полиеле́й, и велича́ние преподо́бному.

По полиеле́и седа́лен, глас 8:

Труды́ и по́двиги твоя́ кто испове́сть, блаже́нне Моисе́е? Ве́рен бо раб своему́ Господи́ну быв и усе́рдно Тому́ послужи́в, умно́жил еси́ тала́нт, тебе́ Го́сподем вве́ренный, и с де́латели благи́ми жизнь ве́чную я́ко мзду прия́л еси́. Те́мже, я́ко име́я дерзнове́ние, моли́ Христа́ Бо́га, дарова́ти согреше́ний оставле́ние чту́щим любо́вию па́мять твою́.

Сла́ва, и ны́не, Богоро́дичен:

Ору́жие, Де́во, по глаго́лу проро́ка се́рдце Твое́ проше́дше, Крест Госпо́день яви́ся, и́же, Сы́на Твоего́ стра́стию стра́сти уби́в, во ору́жие ми́ра претвори́ся, христиа́ном побе́да непобеди́мая.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Бога́тая дарова́ния от Бо́га прие́м,/ Моисе́е преподо́бне,/ до́бре в по́двизех преуспе́л еси́/ и, заря́ми Пресвята́го Ду́ха озари́вся,/ вертогра́д духо́вный и ста́рчества плод благочести́вый,/ я́ко дар Влады́це Христу́ прине́сл еси́,/ И́же, той па́че всесожже́ния прие́м,/ ду́шу твою́ украси́ красото́ю// и просла́ви тя сла́вою нетле́нною.

Кано́н Богоро́дицы со ирмосо́м на 6, и преподо́бнаго на 8.

Кано́н свята́го, глас 1.

Песнь 1.

Ирмо́с: Пои́м песнь но́вую Бо́гу,/ от рабо́ты фарао́новы/ изба́вльшему сы́ны Изра́илевы,/ и в пусты́ни ты́я препита́вшему,// я́ко сла́вно просла́вися.

От ю́ности чте́нию душеполе́зному прилежа́л еси́, о́тче Моисе́е, серде́чный сосу́д наполня́я му́дростию оте́ческою, и, я́ко мудр кни́жник, Ца́рствию Небе́сному научи́выйся, уподо́бился еси́ челове́ку, износя́щу от сокро́вища се́рдца своего́ благо́е и чи́стое.

В ри́зу доброде́телей облече́н, труды́ и ми́лостынями истка́нную, добропобе́дный во́ин Христо́в яви́лся еси́, преподо́бне о́тче Моисе́е. Ны́не, ра́дуяся, престо́лу Царя́ Сла́вы предстои́ши, Его́же моли́ о воспева́ющих тя.

Приклони́ся к моли́твам притека́ющих к тебе́, преподо́бне о́тче Моисе́е, и вознеси́ умы́ и сердца́ на́ша ко Го́споду, бре́мя страда́ний на́ших облегчи́, да, спаса́еми от бед, воспое́м тебе песнь хвале́бную.

Богоро́дичен: Ра́дуйся, Де́во, Ма́ти Христа́, Сы́ном бо Твои́м Боже́ственным смерть умертви́ся, диа́вол пораже́н бысть и вси, ве́рно восхваля́ющии Тя, обрета́ют жизнь ве́чную.

Песнь 3.

Ирмо́с: Не му́дростию и бога́тством да хва́лится сме́ртный свои́м,/ но ве́рою Госпо́днею,/ правосла́вно взыва́я Христу́ Бо́гу,/ и поя́ при́сно:// на ка́мени Твои́х за́поведей утверди́ мя, Влады́ко.

Дре́вним уста́вом и́ноческим поревнова́в, нача́ло ста́рчеству во оби́тели О́птинстей положи́л еси́, в не́йже возсия́ собо́р преподо́бных отце́в, наста́вивших мно́жество ве́рных на и́стинный путь спасе́ния.

Подвиза́яся взы́ти на высоту́ доброде́телей, о́тче преподо́бне, на предлежа́щий тебе́ по́двиг терпе́нием восте́кл еси́ и тре́звенным бде́нием стра́сти душетле́нныя умертви́л еси́. Сего́ ра́ди при́сно тя почита́ем.

Непреста́нною моли́твою и труда́ми по́стническими чистоту́ се́рдца стяжа́л еси́, преподо́бне о́тче Моисе́е, сего́ ра́ди лице́м к лицу́ зри́ши Пресвяту́ю Тро́ицу, Ю́же моли́ о спасе́нии душ на́ших.

Богоро́дичен: Собра́ти расточе́нныя и воскреси́ти уме́ршыя Бог, приклони́в Небеса́, сни́де Тобо́ю к нам, Богоро́дице, и, соедини́в Божество́ с челове́чеством, ра́дости вся́ческая испо́лни.

Седа́лен, глас 4.

Подо́бен: Ско́ро предвари́:

В боле́знех благоду́шствуя, в поще́ниих долготерпя́ и в моли́твах подвиза́яся, о́браз богому́драго па́стыря ста́ду твоему́ показа́лся еси́, преподо́бне. Те́мже, я́ко те́плаго предста́теля ве́дуще, мо́лим тя, Моисе́е о́тче наш: моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

В день сме́рти моея́, Непоро́чная Де́во, изба́ви мя от мра́чных мыта́рств, осия́й Твои́м све́том ду́шу мою́ гре́шную, да́руй Твои́ми моли́твами грехо́в проще́ние и сподо́би со Христо́м всели́тися во оби́тели Небе́сныя.

Песнь 4.

Ирмо́с: Ве́лия та́йна/ Твоего́, Христе́, смотре́ния:/ сию́ бо свы́ше прови́дя богозри́тельно Авва́кум,/ изше́л еси́, вопия́ше Тебе́,// во спасе́ние люде́й Твои́х, Человеколю́бче.

Смиренному́дрою любо́вию брат твой по пло́ти Анто́ний, я́ко отца́ тя почита́ше, оба́че и ты ему́ вседу́шне повину́лся еси́, Моисе́е, о́браз ста́ду твоему́ препода́в богоблаже́ннаго смире́ния.

Иску́сен быв зело́ и сугу́бую благода́ть стяжа́в, пу́стынь О́птину прему́дре устрои́л еси́, те́мже и на́ша сердца́, преподо́бне, сотвори́ во оби́тели Ду́ха Всесвята́го моли́твами твои́ми.

Умо́м непреста́нно Бо́гу предстоя́ и в напа́стех непоколеби́мь пребыва́я, я́коже но́вый Моисе́й, вы́ну зря Неви́димаго, неврежде́нно мо́ре страсте́й преше́л еси́, путеводя́ мона́шеское сосло́вие.

Богоро́дичен: Ны́не в черто́зех Небе́сных со все́ми святы́ми мо́лиши Сы́на Твоего́ и Бо́га на́шего, Пречи́стая, и предста́тельствуеши за нас, в обстоя́ниих су́щих, от не́мощей и страда́ний избавля́ющи, Богоро́дице, Тебе́ пою́щих.

Песнь 5.

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия// правосла́вно пою́щих Тя.

О́браз покая́ния и Ца́рства Бо́жия провозве́стник показа́лся еси́, о́тче Моисе́е, ски́тское житие́ твои́м попече́нием устроя́я, во е́же бра́тии благоче́стне спаса́тися, те́мже и нас посети́ святы́ми твои́ми моли́твами.

На боже́ственней стра́жи бо́дренно стоя́й, преподо́бне Моисе́е, бра́тию трезве́нию духо́вному наставля́л еси́, да отсече́нием по́мыслов душевре́дных в чистоту́ серде́чную облеку́тся.

От се́рдца ми́лующаго подава́л еси́ потре́бное бе́дствующим, сего́ ра́ди обогати́ и нас, тя воспева́ющих, теплото́ю благода́ти Боже́ственныя, ра́дость духо́вную да́руя.

Богоро́дичен: Ка́ко на руку́ Твое́ю но́сиши вся руко́ю Держа́щаго и мле́ком пита́еши вся дла́нию Пита́ющаго? Ка́ко без се́мене ражда́еши и по Рождестве́ Де́ва пребыва́еши? Сия́ суть бе́здна бога́тства и ра́зума Бо́жия.

Песнь 6.

Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш,// Ты бо кре́пость немощству́ющих и исправле́ние.

Кто возмо́жет досто́йно восхвали́ти сладча́йший цвет пусты́нный, посреде́ те́рния попече́ний земны́х процве́тший и плод кра́сный прине́сший, при́сно Ду́хом благоуха́ющий?

Оби́тель О́птинскую устроя́я, о́тче богому́дре, и Архипа́стырю Небе́сному подо́бяся кро́тостию и серде́чным незло́бием, мы́сленныя во́лки от ста́да Христо́ва отгна́л еси́ и о́вцы Его́ на па́жити оте́ческих писа́ний упа́сл еси́.

Боле́зни на́ша душе́вныя и теле́сныя исцели́ти Го́спода умоли́, о́тче Моисе́е, не оста́ви нас, чту́щих тя и ми́лости прося́щих, посети́ ны моли́твами твои́ми и к Ца́рствию Небе́сному путеводи́.

Богоро́дичен: Сло́во Бо́жие плоть бысть, во утро́бе Твое́й, Пречи́стая, и, егда́ в Тя всели́ся, с челове́ки поживе́, от сего́ исполне́ния спасе́ние вси ве́рнии прия́ша.

Конда́к, глас 3.

Подо́бен: Де́ва днесь:

Непреста́нныя моли́твы вознося́, всю наде́жду на Христа́ возложи́л еси́, те́мже исхода́тайствовал еси́ благода́ть ко просвеще́нию души́ своея́ и вся потре́бная ко спасе́нию бра́тии О́птинския, ны́не Бо́гу в раи́ сла́дости предстоя́, Моисе́е преподо́бне: Того́ моли́ дарова́ти нам ве́лию ми́лость.

И́кос:

Кто не удиви́тся, во пло́ти зря а́нгела, и не почуди́тся кто, ви́дя во мно́жестве наро́да пустыннолю́бца, незло́бием побежда́ющаго озло́бленныя враги́, и ни́щим благотворя́ща, ничто́же иму́ща? Се пра́ведный и незло́бивый оте́ц наш, богому́дрый Моисе́й, во Христа́ облеки́йся вои́стину и де́моны прогна́вый непреста́нною моли́твою, вы́ну предста́тельствует о свое́й оби́тели, и мо́лит Го́спода до́бре утверди́ти ю́, и дарова́ти нам ве́лию ми́лость.

Песнь 7.

Ирмо́с: Авраа́мстии о́троцы/ в пещи́ Тро́ицу прообрази́вше,/ о́гненный пла́мень на ро́су преложи́ша,/ и пою́ще вопия́ху:// благослове́н еси́, Бо́же оте́ц на́ших.

От ю́ности кни́жную прему́дрость возлюби́в, уче́ние святы́х отце́в до́бре позна́л еси́ и научи́л еси́ мно́жество христолю́бцев де́ланию духо́вному; те́мже прославля́ешися в Ца́рствии Бо́га отце́в на́ших.

Ми́лостивым твои́м се́рдцем, преподо́бне, всех вмести́л еси́, по сло́ву апо́стольскому, и примири́тель вражду́ющих быв, о́браз любве́ Христо́вы бра́тии показа́л еси́, во е́же единоду́шно вопи́ти: отце́в Бо́же, благослове́н еси́.

В неизче́тных ско́рбех на Бо́га все упова́ние свое́ возложи́л еси́, при́сно в моли́твах Го́сподеви предстоя́, И́же воздае́т за ве́ру боя́щимся Его́ избавле́ние от ско́рби, сего́ ра́ди в ра́дость обще́ния со святы́ми вше́л еси́, во е́же пе́ти: отце́в Бо́же, благослове́н еси́.

Богоро́дичен: Велича́ем Тя, ми́лостивая Госпоже́, при́сная Благоде́тельнице на́ша, возвели́чившую род наш, и святы́й покро́в Твой хва́лим и благослови́м, я́ко Тобо́ю научи́хомся пе́ти: отце́в Бо́же, благослове́н еси́.

Песнь 8.

Ирмо́с: Трисве́тлое существо́, и трисо́лнечная сла́ва/ сни́де отроко́м посреде́ огня́,/ сия́ невреди́мы соблюда́ющи,/ и Воскресе́ние нам предвозвеща́ющи/ Христа́ Бо́га на́шего,// Его́же пою́т А́нгели и мно́жества, я́ко Победи́теля сме́рти во ве́ки.

Блаже́н еси́, о́тче Моисе́е, я́ко претерпе́в многоразли́чная искуше́ния, преуспе́л еси́ в худо́жестве духо́внем, е́же искуша́емым по́мощь подава́ти; сего́ ра́ди прия́л еси́ вене́ц жи́зни, обеща́нный всем лю́бящим Го́спода, Победи́теля сме́рти во ве́ки.

Пребыва́я во оби́телех Небе́сных, взира́еши на и́щущих по́мощи от Тебе́, о́тче Моисе́е, ско́ро низпосли́ кре́пкую по́мощь нам, воздева́я ру́це твои́ в моли́твах за бе́дствующих чад твои́х.

Благослови́ оби́тель твою́, о́тче Моисе́е, иде́же и́мя твое́ почита́ется, да устроя́ются сте́ны ея́ духо́вныя укрепля́емы твои́ми мольба́ми, и вси обита́ющии зде благоче́стно да бу́дут хра́мы Ду́ха Свята́го, в доброде́тели и соверше́нстве.

Богоро́дичен: Иму́ще Тя кре́пкую побо́рницу и ди́вное заступле́ние, Пречи́стая Ма́ти Бо́жия, во све́те ра́зума утвержда́емся и от бед избавля́емся, и от всея́ зло́бы диа́вольския и от всех наве́тов вра́жиих, прославля́юще Ро́ждшагося от Тебе́.

Песнь 9.

Ирмо́с: Тя, Ю́же ви́де Моисе́й неопали́мую купину́,/ и ле́ствицу одушевле́нную,/ Ю́же Иа́ков ви́де,/ и дверь Небе́сную, Е́юже про́йде Христо́с Бог наш,// пе́сньми, Ма́ти Чи́стая, велича́ем.

Словеса́ твоя́ бы́ша всем соль спаси́тельная, украси́ бо вся разуме́ния твоя́ дар боже́ственнаго разсужде́ния; те́мже обличе́ния во вре́мя потре́бно употребля́л еси́ и к немощны́м снизходи́л еси́. Си́це и нас руководи́ ко спасе́нию, тя велича́ющих.

Кто ны́не, преподо́бне, разлучи́т тя от любве́ Бо́жия? Ты бо, в жи́зни вре́менней вседу́шно прилепи́вся Го́споду, на одре́ боле́зни предсме́ртныя утеше́ния духо́внаго от Него́ сподо́бился еси́. Те́мже све́том богоразу́мия просвети́ нас, тя велича́ющих.

Име́я ду́шу ми́лостивну и о ни́щих и убо́гих попече́ние, о́тче Моисе́е, доброде́тельми обогати́л еси́ бли́жняя твоя́, сотвори́ ны́не сие́ на нас, вопию́щих в нищете́ душе́вней, ничто́же бо до́брое и́мамы, во е́же яви́ти пред Бо́гом, но мольба́ми твои́ми на́шу нищету́ благоукраси́, да тя велича́ем.

Богоро́дичен: Увы́, ка́ко низве́ржеся о́браз Твоего́ созда́ния, Го́споди, пре́жде светлосия́яй ца́рским досто́инством Твоего́ подо́бия, ны́не же сокруше́н и омраче́н! Но всеспаси́тельным промышле́нием, чрез Де́ву отрокови́цу соде́ланным, возста́ви мя па́дшаго, и спаси́ мя святы́ми моли́твами Твоея́ Ма́тере Пречи́стыя.

Свети́лен:

В пусты́ннем безмо́лвии укрепи́вся духо́вно, Моисе́й богому́дрый поставля́ется, я́ко свети́льник горя́й и светя́й, на све́щник игу́менства во оби́тель Введе́нскую, к по́льзе изря́дней зде окормля́ющихся.

Сла́ва, и ны́не, Богоро́дичен:

Свет ро́ждшая, Всепе́тая, о́ко се́рдца моего́ осле́пшее просвети́, да просла́влю Тя, и́же Тебе́ ра́ди спаса́емь.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Посреде́ те́рний жите́йских/ крин ди́вный процвете́,/ Моисе́й преподо́бный,/ благоуха́я моли́твою у́мною,/ я́же дале́че прогоня́ет де́моны,/ удивля́я красото́ю доброде́телей,/ и предста́тельствуя вы́ну о всех,// любо́вию чту́щих па́мять его́.

О, пресла́внаго чудесе́!/ Кро́тости Боже́ственныя избра́нный сосу́де,/ моли́твы присногоря́щая лампа́до,/ разсужде́ния свети́льниче,/ ми́лости преизлива́емый пото́че,/ любве́ Христо́вы обита́лище,/ Того́ моли́, блаже́нне Моисе́е,/ дарова́ти прегреше́ний проще́ние// любо́вию чту́щим па́мять твою́.

О, пресла́внаго чудесе́!/ Дво́ица боголюби́вых отце́в,/ Моисе́й и Анто́ний, го́луби кро́тцыи,/ устро́ивше пусты́нный скит,/ на высоту́ созерца́ния от дея́ний восте́кше,/ крила́ми моли́тв покрыва́ют ны́не чад свои́х/ и хода́тайствуют у Престо́ла Всевы́шняго,/ е́же в день су́дный улучи́ти ми́лость// любо́вию чту́щим па́мять их.

Послуша́ния рачи́телю и трудолю́бия пра́вило,/ моли́твы свети́льниче негаси́мый,/ ни́щих изря́дный попечи́телю,/ сосу́де Боже́ственныя ми́лости,/ о́птинскаго ста́рчества благи́й ко́реню,/ Моисе́е преподо́бне о́тче наш!/ Плоды́ целому́дрия вкуси́ти сподо́би// соверша́ющих свяще́нную па́мять твою́.

Сла́ва, глас 6:

Благочести́вых собра́ние,/ в весе́лии духо́внем лик соста́вите/ и пе́сньми Боже́ственными просла́вите/ подвигонача́льника о́птинских отце́в,/ Моисе́я богому́драго!/ Той бо жезло́м моли́твенным раздели́в мо́ре страсте́й/ и потопи́в мы́сленнаго фарао́на полки́,/ в зе́млю безстра́стия введе́ избра́нныя лю́ди/ и, по́прище соверши́в,/ безсме́ртным венце́м увенча́ся./ Ны́не же, престо́лу Вседержи́теля предстоя́,// мо́лится со дерзнове́нием о душа́х на́ших.

И ны́не, Богоро́дичен, глас то́йже:

Удиви́ся Иа́ков иногда́,/ ви́дя в виде́нии Тебе́, Де́во,/ я́ко ле́ствицу Небе́сную, Е́юже сни́де Бог,/ и от сна воста́в, возопи́ в себе́:// Сия́ есть дом Бо́жий и Врата́ Небе́сная.

Славосло́вие вели́кое, и отпу́ст.

На Литурги́и слу́жба преподо́бническая.

Источник: Текст утвержден Священным Синодом Русской Православной Церкви 17 июля 2020 года (журнал № 34)

Месяца июния в 15 день.

Стихиры, глас 2. Самогласен.

Златая кадильнице, ручко и жезле и светильниче светозарный, свитче Божественный, в немже перстом Божиим написася слово, спаси нас, Тебе величающих.

Даруй душам помощь, Богородице, на Тя надеющимся, верным прибежище, избави от бед рабы Твоя, Дево, на Тя бо по Бозе упование возлагаем.

Владычице, Мати Избавителя, прими моление рабов Твоих, аще и недостойне молящихся Тебе, да молишися за ны к Рождшемуся из Тебе. Владычице миру, буди нам избавительница.

Слава и ныне, глас 5

Странно чудо явления образа Твоего, Владычице, и несказанно удивляет премирная и ужасает земная, вкупе же и просвещает светоносною благодатию рождшагося от Тебе Христа Бога нашего и Твоею. егоже моли, Чистая, в Божественнем рождестве Твоем подати нам просвещение и велию милость.

На стиховны стихиры, глас 2. подобен Доме Евграфов

О Всеннепорочна Дево, кое Тебе принесем благодарение, яко светозарным пречистыя Твоея из Тебе рождшагося Младенца иконы явлением утвердила еси сердца верных.

Слыши дщи и виждь, и приклони ухо твое.

О Пресвятая Госпоже Владычице, не забуди нас Твоя рабы, верою покланяющиеся чудотворней Твоей иконе, и благочестно воспевающия Тя. Избави ны Госпоже, от всех бед и напастей.

Помяну имя твое во всяком роде и роде.

О Всепетая Мати, умилосердися на моление наше, Сына бо Твоего и Твое есмы достояние. Вся спаси и помилуй, да вси Тя непрестанно величаем.

Слава и ныне, глас тойже.

Тихое прстаннище, обитель Твоя, Богоневесто, явися, всех с верою притекающих, имущи в себе пречестную Твою икону, всем неоскудно благодать подающую, дом, в немже вселися Вышний, спасение мира, Божие освящение подающую верным.

На велицей вечерни, на Господи воззвах, стихиры, глас 2

Киими чистыми устнами, ублажим Богородицу, честнейшую херувимов, и святейшую сущую серафимов, ангелов же и всех святых славнейшую, Престол Царев непоколебимый, подающую верным в Божественнем торжестве Ея богатно велию милость.

Кия духовныя песни ныне принесем Ти Всечистая, ибо Пречестныя Твоея иконы, пречудным и светозарным ея явлением, пустое место и непроходимое просветила еси, идеже и ныне водворяешися божественною иконою Твоею, всесильным Твоими предстательством миру, непрестанно подающи велию милость.

Кия умиленныя гласы принесоша Ти тогда, Богородице зряще светоносную икону Твою чудно на древе стоящую и светозаными лучами сияющую, благочестивии людие точию с рыданием моляхуся, с плачем взывающее: Владычице, ниспосли щедроты Твоего человеколюбия, посети ны свыше, просвети омраченныя Твоим светозарным явлением и неотступна буди во веки, мирови богатно подающи велию милость.

Что Ти принесем, Пресвятая Дево за многою Твою благостыню и человеколюбие, яко преславно явися нам Божественное Твое дарование, многочудесная Твоя икона, Богоотроковица Чистая, от нея же Божиею благодатию чудесы происходящими бед избавляемся, и изобильно приемлем душам же и телом от всяких болезней исцеление и непрестанно почерпаем велию милость.

Ины стихиры, глас 5.

Радуйся надеждо наша, Богородице Чистая, радуйся, радость ангелом приимшая. радуйся, рождшая Отчее Сияние, радуйся Благословенная, Чистая, Пресвятая Дево, Едина Всепетая, радуйся христианом в бедах скорая помощнице и теплая заступнице, радуйся православия похвало высокая и славо превонесенная, рождшая Пастыря добраго, нас заблудших взыскавшаго. подающаго мирови велию милость. (дважды)

Радуйся, Пресвятая Дево, спасения нашего ходатаица. Ты источила еси всем радость и благословение, рождши без семене плотию Источника благ, краснейшаго добротою паче всех сынов человеческих Иисуса, всего мира Избавителя. И напречистую руку твоею Того носила еси, и ныне пречистым образом видим Его, человеколюбне и светозарно с Тобою явльшагося нам на исцеление немощей телесных и во спасение душ наших.

Радуйся днесь Российская земля христолюбивая, слава бо Господня на тебе возсия преславным явлением иконы Богоматере, лученосно бо и дивно явлься всех Бога промыслом, ликуй ныне и веселися прекрасная пустыни, яко восприяла еси свыше возсиявшую Божественную зарю, чудес благодать изливающую, красуйся и светло торжествуй, Пречестная обитель Богоматере, яко уяснися Твоя доброто прекрасно, имееши бо в себе велие вселенныя сокровище, чудную икону Владычицы, преслано на древе явльшуюся, дарующия всем верным велию милость.

Слава и ныне глас 5.

Днесь Российская земля веселится с вышними силами свыше, обогатившеся иконою Богоматере, и Христолюбивое стадо вопиет созывающее: придите, верни, просветитеся в светлом торжестве Богородицы, приидите, празднолюбцы, возвеселитеся в чуднем празднице общия всех Владычицы, придите, и видите Божественное сокровище, всем чудес дары обильно подающее, что убо воздадим Господеви сицевое человеколюбие нам явившему. Пречистый Свой и Его Рождшия образ яко небесный дар нам низпослашему, и верных просветившему, темже наслаждающеся велия Того милосердия, радостно Тому возсылаем гласы благодарныя, Рождшей Того весело воспевающе: слава, Владычице воплощшемуся изТебе Христу Богу нашему, таковыя благодати нас сподобльшему.

Таже вход и чтения три …

На литии стихиры, глас 3

Приидите вси празднолюбцы, чудное явление иконы Божия Матери ублажим, преславно бо и Боголепно возсия, еяже святым явлением мир просвещен бысть тем усты и сердцы и песнми и пении духовными сей святый день со всеми притекающими празднуем светло.

Глас 8

Первее написавшейся Твоей иконе Евангельских таин благовестником и к Тебе Царице принесенней да усвоиши ту и сильну соделаеши, спаси чествующия Тя и порадовалася еси яко сущи милостива спасения нашего содетельница. яко уста и глас иконе бывши, яко же и Бога внегда зачинающи во чреве песнь воспела еси: се от ныне ублажат Мя вси роди и на ту зрящи, глаголала еси со властию: с сим образом благодать Моя и сила и мы истинно веруем яко се рекла еси Госпоже. сим образом с нами еси, благоговейно предстояще покланяемся Тебе раби Твои, посети ны твоими матерними щедротами.

Глас 6

Тебе вси роди человечестии хвальные дары приносят Владычице, и молятся яко Царице и Матери Божией. Пророцы Тя премудро проповедаша, левити благословиша, апостоли и мученицы исповедаша, царие и князие покланяются, архиереи проповедают, монаси и простии благоговеют, богатии и убозии, сироты и вдовы, и всяк возраст, и всяк преспеяние старческое и младенческое под кров Твой державный с верою прибегаем, покрый и соблюди, Госпоже, молитвами Твоими, и спаси от бед души наша.

Глас 4

Да капают сладость облацы и вся земля да возрадуется радостно о неизреченней милости Твоей Пречистая чудо бо зримо есть Владычице дивное, яко прежде пустыня всякого обнажена благолепия и никим же проходима и знаема, ныне же Твоим Богомати посещением, место преславно, и обитель яко град прекрасен является, и храм присно светел, в нем же божественное сокровище, чудная икона Твоя Владычице показуется, ея же мы зряще благолепие усердно покланяющеся радостно и страхом целуем ю, страхом греха ради яко недостойни суще, радостию же милости ради, юже подаеши нам рабом Твоим, яко милосерда.

Слава и ныне, глас 8

Приидите вси вернии, притецем в церковь Богоматере, се бо сияет в ней всечестная Ея икона яко светило благочестия. Всех празднолюбных собори благодатию Божиею просвещающи и греховнаго помрачения тму отгоняющи, чудеса же тамо притекающим преславная содевает и духи лукавствия прогоняет, царю убо благочестивому на сопротивныя крепость подает, стена и забрало всея земли бывающи. и обитель Свою прославляеши и вся верныя торжествовати созывает и радостно к Богоматери звати научает: крепость наша и утверждение упование и спасение с Богом. Ты еси Богородице и тебе молимся моли Сына Твоего и Бога нашего да избавит в день судный мучения и сподобит Царствия Своего Небесного.

На стиховны стихиры, глас 2

Всем предстательствуеши Благая, прибегающим с верою в державный Твой покров. Иного бо не имамы грешнии к Богу в бедах и скорбех присно избавления. Обремененнии грехи многими, Мати Бога Вышняго. Темже ти припадаем, избави от всякаго обстояния рабы Твоя.

Помяну имя Твое во всяком роде и роде

Всех скорбящих радосте, и обидимых заступнице, и алчущих питательнице, странных утешение, обуреваемых пристанище, больных посещение, немощных покров и заступнице, жезл старости, Мати Бога Вышняго Ты еси Пречистая потщися, молимся, спастися рабом Твоим.

Слыши Дщи и виждь и приклони ухо Твое

Радуйся Пречистая Дево, радуйся честный Скипетре царя Христа, радуся прозябшая Грозд таиный, радуйся Двере небесная и неопалимая Купино, радуйся всемирный Свете. радуйся всех радосте, радуйся верных спасение, радуйся Заступнице, всех христиан и прибежище, Владычице.

Слава и ныне глас 8

Радуйся вселенней похвало, радуйся храме Господень, радуйся Горо преосененная, радуйся всех Прибежище, радуйся Свещниче златый, радуйся Славо православных честная. Радуйся Марие, Мати Христа Бога, радуйся Раю. Радуйся божественная Трапезо, радуйся Сене, радуйся Ручко всезлатая, радуйся всех Упование.

Тропарь, глас 2

Скорую помощницу и ходатаицу теплую,/ Тя, Пречистую Богородицу песнословим,/ прославляюще явление пречудныя иконы Твоея Воронинския,/ пределы Череповецкия озарившую/ и всей России милость даровавшую./ Моли, Владычице Премилостивая,/Сына Твоего, Христа Бога нашего,/ исцелити недуги и страсти наша// и спастися душам нашим.

На утрени по 1 стихословии седален глас 3

Людие благочестивии, правовернии, собории, христоименитии, приступите верно вси, божественному припадающе Божия Матере образу имже исцеление болящим радостно подавает, уязвляет злославныя яко стрела от лука. Нас всех веселящи световидно и благодатию озаряющи молитвами Своими.

Слава и ныне

Всю Тя Бог освяти Деву добрую и непорочную в женах, пророки прообразив честно, иереи благословив, во всятая святых всели, ангелом воспита с Небесе пищу хлеб подая. Сам же Преблагий Единородное Бог Слово вселися в Тя и плотию пройде из Тебе, темже Ти покланяемся и чтим яко воистину истинную сущую Богородицу.

По 2 стихословии седален глас 4

Да ликовствует светло верных все множество, рыдает же демонское воинство видящи многоименно сияющия праздники Божия Матери, Юже ублажаем яко Богоматерь божественными песньми. Идеже бо богоприятно славится Богородица Владычица Богоизбранная Отроковица, неприязни падение, христианом же крепкое утверждение.

Слава и ныне глас 8

О Тебе радуется, Благодатная, всякая тварь, ангельский собор и человеческий род. Освященный Храме и Раю словесный, девственная похвало, из Нея же Бог воплотися и Младенец бысть, прежде век Сый Бог наш: ложесна бо Твоя Престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.

Величание

Достойно есть величати Тя, Богородице, честнейшую Херувим и славнейшую без сравнения Cерафим.

Псалом избранный: Боже, суд Твой цареви даждь, и правду Твою сыну цареву…

По полиелее седален, глас 6

Беспомощным помощь Ты воистину Пречистая Богомати отсюду смирении Тобою возвышаемся о Тебе высоцей держимся всем Ты еси прибежище и к Богу Всемилостивая Ходатаица

Слава и ныне глас 1

Пречитсая Твоя икона Богородице Дево врачевство всего мира духовное к нейже прибегающе, Тебе покланяемся и почитаем и лобызаем и чтим исцелений благодать почерпающе от Нея и недугов телесных, и душевных страстей Твоими молитвами свобождаемся.

Прокимен: Помяну имя Твое во всяком роде и роде.

Стих: Слыши дщи и виждь, и приклони ухо Твое.

Всякое дыхание…

Евангелие от Луки, зачало 4

По 50 псалме стихира, глас 6

Се храм пресветел и место священия идеже честная икона Матере Твоея Слове мы же приступим исцеления почерпаем яко спасение нам Тоя ради даровал еси Христе Боже избавлениее от различных недуг и душам нашим велию милость.

Канон благодарен Пресвятой Богородице

Радости приятелище, Тебе подобает радоватися Единей.

Творение Иосифово, глас 4

Песнь 1.

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Христову книгу одушевленную, запечатленную Тя Духом, великий Архангел, Чистая, зря возглашаше Ти: радуйся, радости приятелище, Еюже праматерняя клятва разрешится.

Адамово исправление, радуйся, Дево Богоневесто, адово умерщвление. Радуйся, Всенепорочная, палато всех Царя. Радуйся, престоле огненный Вседержителя.

Цвете неувядаемый, радуйся, едина прозябшая яблоко благовонное. Радуйся, рождшая благоухание единаго Царя, радуйся неискусобрачная, мирови спасение.

Чистоты сокровище, радуйся, Еюже от падения нашего востахом. Радуйся, сладкоуханный крине, Владычице, верных благоухаяй, кадило благовонное и миро многоценное.

Ин канон Одигитрию Пресвятыя Богородицы, творение иеромонаха Игнатия, глас 4.

Радостно, Чистая, ныне наставшее хваление приношаю, радуяся, и тихим гласом, Одигитрие, вопию Ти: радуйся и исполни мя разума, пети начинающа.

Христа родившая, радость нам вечную, о, радуйся, Всепетая, православным надежда, Одигитрие, всепетая Девице, радости исполни мя мирови желанныя.

Ликуют вси человецы и Ангели всегда, согласно вопиюще на небеси и на земли, Одигитрие: радуйся, Девице, радости бо Рождеством Твоим всяческая исполнила еси.

Радуйся, Одигитрие, со страхом Ти вопиющих радости сподоби, Мати сущия радости, избавляющи скорбей всяческих, и всех помилуй, к Тебе прибегающих.

Катавасия: Отверзу уста моя…

Песнь 3.

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в божественней Твоей славе венцев славы сподоби.

Клас прозябшая божественный, яко нива неоранная яве, радуйся, одушевленная трапезо, хлеб животный вмещшая: радуйся, животныя воды источниче неистощаемый, Владычице.

Юница Юнца рождшая непорочнаго, радуйся, Агнице, рождшая Божияго Агнца, вземлющаго мира всего прегрешения: радуйся, теплое очистил ище.

Утро светлейшее, радуйся едина, Солнце носящая Христа, света жилище: радуйся тьму разрушившая, и мрачныя бесы отнюдь отгнавшая.

Радуйся, двере едина, Еюже Слово пройде едино, вереи и врата адова, Владычице, рождеством Твоим сокрушившая: радуйся, божественный входе спасаемых, Богоневесто.

Ин канон

Вышняго Царя, о, радуйся, непоколебимая Чистая и одушевленная палато! Радуйся, Одигитрие, радуйся: Тобою нерушим наш град сохраняется.

Вместити егоже не возможе тварь, во утробу неискусобрачную, Одигитрие Девице, телесно вместила еси, темже Ти радуйся поем, по долгу величающе.

Радость многопетая мирови, радостно Ти поюще присно, вечнующия, Чистая, радости сподобляемся Твоими матерними молитвами к Рождшемуся из Тебе, Одигитрие.

Златую Тя стамну, и свещник, и жезл, и трапезу, Чистая, призываем, Одигитрие, и глас, еже радуйся, Тебе присно привношаем с сими же имены.

Седален, глас 8.

Божественнии Слова апостоли, Евангелия Христова велегласнии вселенныя благовестницы, божественную церковь создавшее, во пресвятое Твое имя, Богородице и к Тебе, Госпоже, приходят молящее Тя приити на тоя освящение, Ты же, о богомати, рекла еси: идите с миром и аз с вами тамо есмь. Они же шедшее обретают тамо на стене церкве Твоего, Владычице, образа подобие, божественною писано силою, щаровными подобии, и видевшее, поклонишася ти, и прославиша Бога, с ними же и мы божественней Твоей поклоняемся иконе, просящее от Тебе великия милости. Даруй согрешений оставление рабом твоим, Едина Благословенная.

Слава, и ныне. Той же.

Песнь 4.

Ирмос: Седяй в славе на Престоле Божества во облаце легце, прииде Иисус пребожественный, нетленною дланию и спасе зовущия: слава, Христе, силе Твоей.

В гласех пений, Дево, Тебе вопием всепетая: радуйся тучная гора, и усыренная Духом. Радуйся, свещнице и стамно, манну носящая, услаждающая всех благочестивых чувства.

Очистилище миру, радуйся, пречистая Владычице, радуйся, лествице, от земли всех возвысившия благодатию: радуйся, мосте, воистину преводяй от смерти к животу поющих Тя.

Небес превышшая, радуйся, земли основание во Твоих ложеснах, Пречистая, нетрудно носившая: радуйся червленице, багряницу Божественную омочившая от кровей Твоих, Цареви силам.

Законодавца рождшая истиннаго, радуйся Владычице, беззакония всех туне очищающаго, недоведомая глубино, высото неизреченная, браконеискусная, Еюже мы обожихомся.

Ин канон

Радуйся, чудо чудесем, Одигитрие Владычице. Радуйся, всем радосте градовом, и весем непобедимое христианское в бедах хранилище, и предградие, и на враги побеждение.

Радуйся, радуйся, людем православным похвало, и христолюбивым воинством покров пребываеши всем, Царице. Радуйся, Одигитрие, прибежище всем нам и утверждение.

Радуйся, всем скорое в бедах избавление. Радуйся, готовое всем скорбящим утешение. Радуйся, всепетая, радуйся, Одигитрие всеблагословенная, всем немощным целительнице.

Радуйся, Еяже величия вся тварь славити убо спешит по достоянию, но не возмогает, Одигитрие, и сего ради зовет Ти: радуйся, Владычице, Боговместимое жилище.

Песнь 5.

Ирмос: Ужасошася всяческая о божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Путь рождшая жизни, радуйся, пренепорочная, от потопа греховнаго мир спасшая: радуйся, Богоневесто, слышание и глаголание страшное, радуйся, пребывание Владыки твари.

Крепость и утверждение человеков, радуйся, Пречистая, место освящения славы, умерщвление адово, чертоже всесветлый: радуйся, Ангелов радосте, радуйся, помоще верно молящихся Тебе.

Огнеобразная колеснице Слова, радуйся, Владычице, одушевленный раю, древо посреде имея жизни, Господа: егоже сладость оживотворяет верою причащающихся, и тли подклонившихся.

Укрепляеми силою Твоею, верно вопием Ти: радуйся, граде всех Царя, преславная и достослышанная, о нейже глаголана быша яве, горо несекомая, радуйся, глубино неизмеримая.

Ин канон

Благостыни бездно и щедротам еси, радуйся, Одигитрие Девице, радуйся, всем радость творящи верным. О, радуйся, сущим в бедах и скорбящим пребыстрая Заступнице.

Радуйся, от исполнения величия чудес Твоих зряще, исполняемся, вси незрящии, слышаще же, вернии. Темже радуйся Тебе присно всюду и вси, Одигитрие, поем.

Христа Бога нашего, о, радуйся, Одигитрие, жилище и дом неизреченныя и пребожественныя, Дево, славы Его. О, радуйся, палато преукрашенная, радуйся, граде одушевленный, присно царствующий!

Радость неоскудную Тя разсмотряюще, яко море, Отроковице, Одигитрие Девице, радующеся вси, радуйся вопием Ти, и поюще, Божественных даров невидимо присно от Тебе ожидающе.

Песнь 6.

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Чертоже Слова нескверный, вина всех обожения, радуйся, Пречистая, пророков оглашение, радуйся, Апостолов удобрение.

От Тебе роса укану, пламень многобожия угасившая, тем вопием Ти: радуйся, руно одушевленное, еже Гедеон, Дево, предвиде.

Се, Тебе, Дево, радуйся, зовем: пристанище нам буди влающимся, и отишие в пучине скорбей, и соблазнов всех борителя.

Радости вина, облагодати наш помысл, еже звати Тебе: радуйся, неопалимая купино, облаче всесветлый, верныя непрестанно осеняющий.

Ин канон

Христа, Чистая, приемлющи, глас еже радуйся, Одигитрие Девице, слышаше, егоже неизреченно рождши, радуйся от всех слышиши всегда.

Радости вся исполнила еси, вышния и нижния Ты совокупила еси, Одигитрие, темже радостно и согласно ныне небо и вся земля зовет Ти.

Вдовам, о, радуйся, всепетая, и всем сирым, Одигитрие, утешение; радуйся, всем источающи нищим богатство неистощимое.

Злата всякаго блистаема и утра солнечнаго светлейши, жилище Христово, радуйся, Одигитрие, радуйся, Девице, радуйся, Невесто Неневестная.

Кондак, глас 6.

Богатую в милости Тя почитающе,/ зовем Ти, Пречистая Владычице:/ не забуди, Благосердая, люди Твоя,/к иконе Твоея чудотворныя Воронинския с верою прибегающих,/и велигласно вопиющих Ти:/Радуйся, Благодатная Дево,// нас сирых попечением Своим не оставляющая.

Икос: Ангел предстатель с небесе послан бысть рещи Богородице: радуйся, и со безплотным гласом воплощаема Тя зря, Господи, ужасашеся и стояше, зовый к Ней таковая: Радуйся, Еюже рaдocть возсияет; радуйся,Еюже клятва изчезнет. Радуйся, падшаго Адама воззвание; радуйся, слез Евиных избавление. Радуйся, высото неудобовосходимая человеческими помыслы; радуйся, глубино неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Песнь 7.

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Воспеваем тя вопиюще: радуйся, колеснице Солнца умнаго, лозо истинная, грозд зрелый возделавшая, вино источающий, души веселящее верою Тя славящих.

Врача всех человеков рождшая, радуйся, Богоневесто, жезле тайный, цвет неувядаемый процветший, радуйся, Владычице, Еюже радости наполняемся, и жизнь наследствуем.

Витийствующий не может язык, Владычице, песнословити Тя, паче бо Серафимов возвысилася еси, рождши Царя Христа, егоже моли, всякаго ныне вреда избавитися, верно Тебе покланяющимся.

Хвалят Тя блажаще концы, и любовию зовут тебе: радуйся, свитче, в немже перстом Отчим написася Слово, Чистая: егоже моли, в книзе животней рабом Твоим написатися, Богородице.

Ин канон

Радуйся, радуйся, Богородице Одигитрие, всех и всегда наставляющи верных шествовати ко всякому пути спасительному; радуйся, Владычице, Тобою бо присно избавляемся настоящия варварския беды.

Радуйся, радуйся, Одигитрие, бдящи и молящися о нас к Богу, и всякия злобы ходатайством Твоим, всяческих скорбей, Богородительнице, всех людей избавляющи.

Радуйся, радуйся, Пресвятая Одигитрие, Яже прошения наша к пользе нам исполняющи и хотящи всем присно всегда любодружное благое единство, спешное же во изящных.

Радуйся, радуйся, кораблем Одигитрие нуждно плавающим, избавляющи верных, и всем избавление от всякия скорби, и недуги пестротныя и медленныя разрешающи вскоре.

Песнь 8.

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Ложесны Слово прияла еси, вся носящаго носила еси, млеком питала еси, манием питающаго вселенную всю, Чистая. Емуже поем: Господа пойте дела, и превозносите Его во вся веки.

Моисей уразуме в купине великое таинство рождества Твоего: отроцы же преобразиша сие явственнее, посреде огня стояще, и неопаляеми, нетленная святая Дево. Тем Тя поем во вся веки.

Прежде прелестию обнажившиися, в ризу нетления облекохомся рождеством Твоим: и седящии во тьме прегрешений, Свет видехом, Света жилище Отроковице. Тем Тя поем во вся веки.

Мертвии Тобою оживляются, жизнь бо ипостасную родила еси: немии прежде благоглаголиви бывают, прокаженнии очищаются, недузи отгоняются, духов воздушных множества побеждаются, Дево, человеков спасение.

Ин канон

Радуйся, всеблагословенная Марие, из Тебе бо всеблагословенный Бог одеявся во всего мя, человека, и, одеявся, соедини Своему Божеству неизреченным соединением, Дево Одигитрие, радуйся, Обрадованная, радосте всего мира.

Радуйся, лукавых духов прогонительнице; радуйся, Богородице Одигитрие. Радуйся, яко Тебе небесная невидимая воинства славословят всегда и величают яко Матерь Божию бывшую; радуйся, Яже нижняя сочтавши с вышними.

Радуйся, всех небесных сил без разсуждения превосходящая; радуйся, Одигитрие. Радуйся, всякия твари Бога рождшая, господствующи ей, Владычице всепетая; радуйся, яко пребываеши Девою, Чистая, и по рождестве.

Радуйся, женам всем славо, храме преосвященный Бога нашего; радуйся, Одигитрие, радуйся, душеспасительная всей вселенней; радуйся, покрывающий облаче, небес ширшая; радуйся, мироположнице, Божественнаго мира полна.

Песнь 9.

Ирмос: Всяк земнородный да взыграется, Духом просвещаемь, да торжествует же безплотных Умов естество, почитающее священное торжество Богоматере, и да вопиет: радуйся, Всеблаженная, Богородице, чистая Приснодево.

Да Тебе, вернии, радуйся, зовем, Тобою радости причастницы бывше присносущныя, избави нас напастей, варварскаго пленения, и всякия иныя раны за множество, Отроковице, прегрешений находящия человеком согрешающим.

Явилася еси просвещение наше и утверждение. Темже вопием Ти: Радуйся, звездо незаходимая, вводящая в мир великое Солнце. Радуйся, Едем отверзшая заключенный, Чистая. Радуйся, сосуде, миро неистощимое на Тя излиянное приемший.

Станем благоговейно в дому Бога нашего, и возопиим: радуйся, миру Владычице, радуйся, Марие, госпожа всех нас, радуйся, единая непорочная в женах и добрая. Радуйся, столпе огненный, вводящий в вышнюю жизнь человечество.

Голубице, Милостиваго рождшая, радуйся, Приснодево, преподобных всех радуйся похвало, страдальцев венчание. Радуйся всех праведных божественное удобрение, и нам верным спасение.

Ин канон

Радуйся, свеще, Свет невечерний понесшая, и в рождестве Твоем многобожия тьму разрушившая, и адовы пропасти избавльшая люди. Радуйся, Одигитрие Богородице, доброт всех предходатаице.

Радуйся, земле, из неяже клас прозябший небесный верным, и мира всего душегубнаго глада избави, разумная и одушевленная. О, радуйся, винограде, яже грозд животный рождшая, Богородице Чистая Одигитрие!

Радуйся, тайных цветов прекрасный сущий раю; радуйся, Мати Дево, невидимых разум чистотою страннолепно побеждши, Богородительнице. Радуйся, Отроковице, радуйся, Одигитрие, всемирное чудо и слышание.

Лето живота нашего прочее сохрани невреждено поможением Твоим, Дево Отроковице, и сподоби конец благий получити нам, воспевающим Тя и взывающим: радуйся, всеблаженная Богородице, Чистая Одигитрие.

Светилен

Да почтится Всепетая Мати Божия, жизнь сущую рождши – Христа Бога нашего, райских дверей отверзение, и всего мира очищение, к животу возведение. Сей есть пророком глаголавый, Тому поклонимся, Богу и Спасу душ наших.

Слава, и ныне. Той же.

На хвалитех стихиры, глас 4.

Прославим вернии обрадованную Богородицу, паче же во устех наших имамы всегда святое и благословенное имя Ея, непрестанно прибегающе к пречистей Ея и цельбоносней иконе: Тою бо обретаем яже на земли вся благая и полезная, и сущих на воздусе от демонов запинаний избавляемся, яко Мати рождшая всех Творца, спасает от бед души наша.

Да рыдает вечно сонм злочестивых, не исповедающих Тя в рождестве Чистую Богородительницу, и не покланяющихся пречистей Твоей иконе: вернии же люди радующеся исповедуем Тя истинную Деву Богородицу, яко воистинну родила еси плотию Христа Бога нашего. Тление Адамово попрала еси, и от греха весь мир очистила еси, жизнь безконечную даровала еси, райский вход верным отверзла еси Божественным Твоим Рождеством. егоже моли, спастися нам поющим верно Твое таинство.

Радуется убо и веселится неизреченною радостию, все множество благочестивых: припадающе же покланяются, вси благоговеют Божии Матери с боязнию, благодаряще Сию по Бозе, яко Бога толиких превеликих благ ходатаицу, в неже желают ангели приникнути, дарова Богородицею верным Христос Бог наш, имеяй множество щедрот, и великую пребогатую милость.

Глас 8.

Преславно, Богородице во всех странах Тобою хвалится обитель Твоя, Богоневесто, яко имеет в себе чудотворную Твою икону, чудно и преславно явльшуюся, от неяже неизреченныея цельбы приемлющи, благодарственная вопием Тебе, умильно молящее Тя, Пресвятая Дево, спаси души нана, яко милосердая.

Слава, и ныне, глас той же:

Святая Твоя и сообразная икона Богородице Дево, благодатию Твоею пребогатый сущий источник, кипящий всей подсолнечней, и светящий всему миру светолучными Святаго Духа сияньми, и исцелений светлостьми. Ты бо Бога Слова плотию несказанно родила еси, от архангела Гавриила сицевая слышавши: радуйся обрадованная, Господь с Тобою, и Дух Святый осенит Тя к зачатию. Такожде рекла еси к первописанной Твоей иконе, на ту зрящи: с тою Моя благодать, и слово Твое со властию иконе бысть. И образ и глас, и сила и дело, и всяк ум превосходящая Божественная благодать, спребывающи вечно, знамения и чудеса непрестанно содевает, и душеполезное исцеление всем верно приходящим подает, Твоими богоматерними непрестанными к Богу молитвами.

Источник: Служба приведена по рукописной книге, датированной 1759 годом и хранящейся в Череповецком музее-заповеднике.

В Неделю 4-ю по Пятидесятнице

В субботу вечера, на малей вечерни

На Господи, воззвах: стихиры воскресны на 4, глас 3.

Слава, святых, глас 6.

Подобен: Все отложивше:

Приидите, Христолюбивых людей множество, пресвятый собор преподобных восхвалим днесь, иже во обители Псково-Печерстей подвиги мноземи угодиша Христу Богу, чудную Богоматерь славяще и в молитвах Ю присно призывающе. Темже и ныне я, всеблаженныя, величаем.

И ныне, Богородичен воскресен малыя вечерни, глас 3: Превелие чудо:

На стиховне едина стихира воскресна, глас тойже: Страстию Твоею Христе:

И стихиры подобны святых на 3:

Стихиры святых на стиховне, глас 2.

Подобен: Егда от древа:

Приидите, монашеское сословие, любовию воспоим святых собор, иже во обители Пречистыя Псково-Печерстей житием своим равноангельным, верою же и труды смиренными и Божественными дарованьми улучиша у Христа Бога спасения блага вечная. Того ради и похвалим я достойно.

Стих: Честна пред Господем смерть преподобных Его.

Ублажим днесь лик Богоносный, преподобныя Марка, Иону и Вассу, матерь нашу, иже страну Псковскую благодатию напаявше, учением Христовым вся люди просвещаша, и Крест спасительный, яко древо жизни вечныя, в дебри Псково-Печерстей утвердивше, освятиша место сие труды и молитвами своими. Темже и Дом Пречистыя, яко рай чуден, зде явиша нам.

Стих: Блажен муж, бояйся Господа, в заповедех Его восхощет зело.

Похвалим песньми честными светоносный лик отец наших: преподобномученик двоицу Корнилия и Вассиана, яко содруги быша даже и до смерти, и Дорофея, иже образом Пречистыя Печерским на стране далече Ярославстей люди освяти; почтим и Лазаря праведна, благодати таинника. ихже и молитвами святыми спаси, Христе, души наша.

Слава, святых, глас 1, Подобен: Небесных чинов:

Земли Псковския радование, обители Печерския крепкое предстательство, соборе святых дивный, ныне к вам вси прибегающе, молитвы приносим теплыя и любовию чтим память вашу.

И ныне, Богородичен, глас тойже: Се исполнися Исаиино проречение:

По Ныне отпущаеши и Отче наш:

тропарь воскресен, глас 3:

Да веселятся небесная:

Слава, тропарь святых, глас 4:

Днесь обитель Псково-Печерская светло празднует:

и ныне, Богородичен первый, по гласу тропаря святых.

Ектении и отпуст.

На велицей вечерни

На Господи, воззвах: стихиры на 10, воскресны 3, глас 3:

И стихира Анатолиева 1: И стихиры святых на 6:

Стихиры святых Псково-Печерских. Глас 1.

Подобен: О, дивное чудо:

Блаженна страна Псковская, и преславна чудесы обитель Печерская, имуще вас, соборе дивный, преподобнии отцы наши; веселися, Пречистыя Доме, таковыя чтуще предстатели, иже Богородицу и Мати всем милосердую за ны молят неотступно. Темже возрадуемся и восхвалим, людие, молитвенники о душах наших. (Дважды)

Глас 2:

О, сокровища Господня, земли сокровенная, личе начальный святых Псково-Печерских, преподобнии Марко, Ионо и мати Вассо, явили есте непорочным житием вашим образ спасения уставы Богоданными, и вся полки бесовския низложили есте; темже и нас ныне от тьмы греховныя избавляете. (Дважды)

Глас тойже:

От юности Христа возлюбивый, неустанно учил еси люди вере Христовей и, яко украсил еси обитель Печерскую дивно, удобрил еси тако и душу свою, Корнилие чудный, да приимеши в чистоте и всяцей правде подвизем твоим венец уготованный, преподобномучениче достоблаженный. (Дважды)

Слава, святых, глас 6:

На земли ходивше тесною стезею и отвергшеся всех красных мира, преставилися есте, преподобнии, к Вышним, и, вшедше в покой премирный, достигли есте широты Небесныя; темже и нас, иночествующая во обители Печерстей, обогащаете сокровищем нетленным, просвещающе омраченныя наша души и язвы их исцеляюще молитвами вашими.

И ныне, Богородичен первый гласа: Како не дивимся:

Вход. Прокимен дне и чтения святых 3 (преподобническия).

На литии стихира храма: И стихиры святых 3:

На литии стихиры святых Псково-Печерских

Глас 3:

Просияша светила многосветлая во мраце пещеры Богом зданныя; озариша души своя Светом Разума, восприяша в сердца пламень Духа огненный; о, соборе святых Псково-Печерских, просветите и ны, вся люди верныя, и моленьми вашими крепкими распаляйте ны ко Господу любовию, во еже спастися и нам, воспевающим вас.

Глас 5:

Умы очищенными Пресвятой Троице предстояще, преподобнии, и Тояже славою осеняемии, вся ны просвещаете, отцы Печерстии, и за чтущия вас инок множества и люди верныя, к мощем честным вашим приходящия, Жизнодавца Христа умоляете; аще и телеси святыми своими на земли есте, душею же со Господом присно пребываете.

Глас тойже:

Путем тесным шествовали есте, отцы печерстии, и в делех ваших явили есте сей, имже добре ходящии о Христе в широту райскую вводими бывают, светолитием Христовым просвещаемии; онем же путем, преподобнии, ко Христу вся верныя приводите днесь.

Слава, святых, глас тойже. Подобен:

Радуйся, Живоносный Кресте:

Радуются вси людие вернии, и земля Псковская ликует, празднующи собор святых Печерских; их бо житием благочестным украсися Церковь Русская, юже Господь таковыми столпы утверди, да и нам подаст благодать Свою молитвами их непрестанными ко спасению душ наших.

И ныне, Богородичен воскресен стиховный, в тойже глас: Храм и дверь еси:

На стиховне стихиры воскресны, глас 3: Слава, святых, глас 1. Подобен:

Небесных чинов: Земли Псковския радование (зри на малей вечерни).

И ныне, Богородичен воскресен, глас тойже:

Се исполнися Исаиино проречение:

На благословении хлебов:

Богородице Дево (дважды).

И тропарь святых (единожды). И чтение.

Тропарь святых Псково-Печерских, глас 4:

Днесь обитель Псково-Печерская светло празднует, преподобных своих собор почитающи; просияша бо зде Богоноснии отцы, человецы же небеснии, земнии ангелы; се в Дому Твоем, о Богомати, радование и всех верниих веселие духовное, яко даровала еси, о Благодатная, пречестныя нам пред Господем заступники и молитвенники о душах наших.

Ин тропарь святых Печерских, глас 6:

Днесь собор святых Псково-Печерских почтим, в дебрех лесных чудную обитель основавших, и, яко крины райстии, добродетельми процветших, людем же правый путь Богоподобия указавших; Господа бо присно молят мир мирови даровати и душам нашим велию милость.

На утрени

На Бог Господь: тропарь воскресен гласа, дважды.

Слава, ин тропарь святых, глас 6:

Днесь Собор святых Псково-Печерских почтим:

И ныне, Богородичен воскресен, по гласу тропаря святых:

Кто Тебе не ублажит:

По кафизмах седальны воскресны от Октоиха, глас 3, с Богородичны их.

Полиелей: Хвалите имя Господне.

На полиелее величание святым Псково-Печерским:

Ублажаем вас, преподобнии отцы наши Псково-Печерстии, и чтим святую память вашу, вы бо молите о нас Христа Бога нашего.

Благословен еси, Господи: Ангельский собор удивися:

Ипакои гласа от Октоиха.

По ипакои – седальны, святых – 2.

Седален, глас 1.

Подобен: Гроб Твой, Спасе:

Святых Псково-Печерских соборе достоблаженный, стено необоримая, Пресвятая Троицы полче Божественный, храните обитель свою, яко Дом Пречистыя, инокам всем верное пристанище, и молите за нас Христа Бога.

Ин седален, глас тойже. Подобен: Небо звездами:

Днесь обитель Печерская светло сияет, святых отец своих память творящи, и страна Псковская духовно торжествует, яко в ней явися собор чудный преподобных Твоих, Господи.

Слава, святых (полиелейный седален), глас 1:

Наста ныне, отцы Богоноснии, светозарный собора вашего праздник; проповедуют днесь обитель Псково-Печерская и вся Церковь Русская славу вашу, величающе вас Прославльшаго.

И ныне, Богородичен, глас тойже:

Радуйся днесь, Российская земле, яко удел Девы Пречистыя, славяще Ю, Воеводу Небесную и мира Заступницу, подающую обители Своей Псково-Печерстей от бед ограждение и велию милость.

Степенна гласа. Прокимен и Евангелие воскресны:

Аще храм святых – прокимен и Евангелие святым:

Воскресение Христово видевше:

Псалом 50:

Слава: Молитвами апостол: Аще храм – Молитвами святых Псково-Печерских:

И ныне: Молитвами Богородицы:

И стихира святых.

Стихира святых, глас 7:

Приимите ныне пение чад ваших благодарное, преподобнии отцы Псково-Печерстии, яко не оставили есте нас любовию отчею, и тою страстей наших коварства разоряете, да приимем от Господа дарования небесная, подражающе деяниям вашим Боголюбезным.

Спаси, Боже, люди Твоя:

Каноны: воскресен 3-го гласа со ирмосом на 4,

ирмос единожды: И Богородицы на 2:

И святых на 8: Катавасия: Отверзу уста моя.

Канон святых Псково-Печерских

Глас 2

Припев: Вси святии Псково-Печерстии, молите Бога о нас.

Песнь 1.

Ирмос: Во глубине постла иногда фараонитское всевоинство преоруженная сила; воплощшееся же Слово всезлобный грех потребило есть, препрославленный Господь, славно бо прославися.

Светло совершаем настоящее ваше торжество и достойно почитаем вас, отцы пречестнии, преподобнии Псково-Печерстии: Марко, Ионо, Корнилие, мати Вассо, Вассиане и Дорофее, Богу угодившия и на небесех со всеми святыми прославленнии.

Ничтоже возлюбив на земли сей паче Зиждителя, прияли есте труды и подвиги любве ради Христовы. Темже и сподобилися есте наследия праведных, моляще Христа о нас, почитающих память вашу.

Приидите, инок множества, приидите, духовное сословие и людие вернии, составим лик празднующих; днесь духовная наша трапеза, днесь нам небесное радование, совершающим святую память отец наших.

Богородичен: Праведно есть хвалити Тя, мира Владычицу, яко и сему месту удельному даровала еси Небес велелепие; зде бо и храмы Ти создашася краснии, зде бо и иконы Твои чудес исполняхуся. Мы же, веселящеся, прославляем Тя, Матерь щедрот, подающую мир обители сей и велию милость.

Песнь 3.

Ирмос: Процвела есть пустыня, яко крин, Господи, языческая неплодящая церковь, пришествием Твоим, в нейже утвердися мое сердце.

Притецем ныне, вернии, первонасельника Печерскаго Марка воспоим велегласно и о благочестнем Ионе благодарне возрадуемся, яко бо их молитвами смиренными и во тьме земной пещер Богозданных излияся благодати небесныя светолитие Трисиянное.

Киими песньми священными воспрославим и тя, преподобная Вассо, яко мира сего прелести всея возгнушавшися, возжелала еси образа иноческаго, да едино ти Христу послужити; темже и венец земный брачный на небесныя славы венец пременила еси.

Кую ти достойную похвалу принесем, преподобномучениче Корнилие, аще, яко и прежде был еси нам игумен премудрый, такожде и днесь умудряеши сердца наша добре, направляюще нас ко спасению.

Богородичен: Чистоту Твою, о Богомати, сила Вышняго осени; Ты же днесь тоя благодатию нас, всякия скверны исполненных, очисти и укрепи, яко мы ко образу Успения Твоего Печерскому припадаем, взывающе сице: не остави нас, грешных, но помилуй вся молитвами преблаженных отец наших.

Кондак святых, глас 2.

Подобен: В молитвах неусыпающую:

Обитель Псково-Печерская Тя, Богородицу и Деву Чистую за вся люди умоляющи, святых своих, яко дар, Тебе днесь приносит, но Твоих даров бездну кто исповест, яко в рай возвела еси отцы наша.

Икос: Яко сад благоуханный, процвела есть обитель Псково-Печерская святыми Твоими, Господи, поминающи словеса Премудраго: Елика аще помолятся к Тебе на месте сем, и Ты услышиши на месте жилища Твоего на небеси: и сотвориши, и Милостив будеши им. Услыши и нас, Христе Боже, и милостив буди ко святей обители сей, молитвами всеблаженных отец наших, ихже и собор совершающе ныне. Богородицу Пречистую возблагодарим, яко в рай возвела еси отцы наша.

Седален святых, глас 4.

Псково-Печерская похвало, преподобных отец соборе чудный, явилися есте, яко оружницы Христовы; молитвы бо ваши, яко меч духовный, грехи наша посекающий; не престайте ходатайствовати о чтущих память вашу. (Дважды)

Слава, и ныне, Богородичен, глас тойже:

О Дево, Мати Благая, Всепетая, мирови Покрове и Заступнице, не остави обители Псково-Печерския, якоже и во Успении мира не оставила еси, но спасай вся, на Тя уповающия.

Песнь 4.

Ирмос: Пришел еси от Девы, не ходатай, ни Ангел, но Сам, Господи, воплощься, и спасл еси всего мя, человека. Тем зову Ти: слава силе Твоей, Господи.

Воспеваем днесь вас любовию, подвижницы Христовы, преподобномучениче Вассиане, преподобне отче Дорофее и старче праведный Лазаре, иже процвели есте во обители сей, яко крины райстии.

Радуйся, Церкве Российская, яко возрасте в тебе апостольское сеяние Андрееве; ста под Креста знамя ополчение иноческое, и се Земли Русския украшение – суть обители чуднии Печерстии: едина во стране Киевстей, во Псковстей же другая; и та о Бозе ликует, и сия веселится, воспевающе соборы святых своих.

Свет спасительный возсия окрест живущим – от обители Псково-Печерския; глас словес Божественных и хвалы Творцу стрясл воздух пустыни, прежде неплодныя, подвигнув вся верныя непрестанно славословити Христа Жизнодавца.

Богородичен: Богородице Дево, упование наше, моли Сына Твоего и Бога нашего сохранити от всех бед и напастей обитель сию, юже преподобный Корнилий вкупе со зде подвизавшимися созда; да вси, почерпающии помощь неоскудну от святыни ея, во вся дни ублажают Тя, Пречистую, в песнех величающе.

Песнь 5.

Ирмос: Ходатай Богу и человеком был еси, Христе Боже; Тобою бо, Владыко, к Светоначальнику Отцу Твоему от нощи неведения приведение имамы.

Жития треволнения нивочтоже вменив, преподобне отче наш Марко преблаженне, в пустыню Псковскую вселился еси, и, в пещере Богозданней в подвизех мнозех сокровенно пожив, соделался еси Христа Спаса жилище; того ради и память твоя пребывает во веки.

Храня веру православную, латиняном не покорился еси, и, от Юрьева града изшед, Иоанне, иерее Бога Живаго, Пречистыя храм в горе ископал еси, возжаждав Той послужити во образе иночестем; темже и, наречен быв Иона, в души своей богатство Духа Святаго стяжал еси, преблаженне.

Егда болезнь смертная постиже тя, прияла еси образ ангельский, преподобная мати Вассо; гроб же твой по кончине изнесен бысть силою Божиею двукраты из земли, да притекают вси вернии к раце мощей твоих.

Богородичен: Вся упования наша в Тебе, Мати Дево, имуще, молим Тя, яко святых Славу и Владычицу Милосердую: даруй нам, преподобных Твоих ради, грехов оставление, и иноческому житию споспешествуй присно, подающи благодать Твою неоскудну.

Песнь 6.

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Явился еси, преподобномучениче Корнилие, благочестия дивный наставник и обители Печерския строитель изрядный, украсил еси ю храмы святыми, якоже и окрест воздвизал еси я, чудь просвещая; ныне же в обители пребывая Господней и Троице Пресвятей предстоя выну, моли Христа Бога спастися душам нашим.

Оболгаша тя, отче Корнилие, льстецы же злобеснии; к безумию склонися Царь грозный и смерти тя предаде; темже и освятися твоею кровию обитель Псково-Печерская и обогатишася тобою чада твоя, ту иночествующая, яко верным пред Богом заступником.

Памятуя подвиги твоя и борения и кончину от руки самодержца Российскаго, благодарная братия Псково-Печерская храм устроиша во имя твое, преподобномучениче Корнилие, в немже ныне безкровную жертву приносят, хваляще и благословяще Творца, Вседержителя.

Богородичен: Иже снабдением пскович благоверных и труды преподобных созданныя, славим пречестныя иконы Твоя, Богородице, просиявшия в обители Псково-Печерстей – Одигитрии, звезды путеводныя. Умиления и Успения чудна, и, яко Саму Тя, духовне веселящеся, лобызаем я, Христианом Похвало и спасения Утверждение.

Кондак и икос воскресны.

Песнь 7.

Ирмос: Богопротивное веление беззаконнующаго мучителя высок пламень вознесло есть; Христос же простре Богочестивым отроком росу духовную, Сый благословен и препрославлен.

Времена и лета Церкве Псковския изъявил еси нам, преподобномучениче Вассиане, Корнилию Богомудрому в того летописаниих помогая изрядно, яко и делом его ревнитель быв славный; ныне же с ним во Свете Трисияннем вопиеши согласно: благословен еси Боже отец наших.

Яко благодати росу испивал еси в трудех постнических вкупе со отцем нашим Корнилием, такожде и чашу смертную испил еси с ним безвинно, Вассиане преподобномучениче; от Царя же земнаго к Царю Небесному предпосланы бысте обое, Тому вопиюще: благословен еси Боже отец наших.

О, преподобномучениче Корнилие, не остави и ныне молитвами твоими чада своя, якоже и прежде ты, защитниче страны Псковския, не оставил еси ю в нашествие Баториево, но, быв ко Пречистей теплый ходатай, пред Неюже и предстал еси в видении чуднем над Псковом градом, со святыми вопия препобедно: благословен еси Боже отец наших.

Богородичен: Показа небо Православия славу, егда явися на воздусе Мати всех верных, от нашествия же воев Баториевых Псков град и обитель Печерскую избавльши; горе бо святии со Корнилием Ю умоляху, долу же псковичи со иноки Печерстими ко образу Ея со слезами припадаху, Богу вопиюще: благословен еси, Боже отец наших.

Песнь 8.

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющыя: благословите, вся дела Господня, Господа.

Постнических подвигов желая сподобитися, пресельник отечества Ярославскаго стал еси, преподобне отче наш Дорофее, и, пришед во обитель Псково-Печерскую, ветхаго совлеклся еси человека, добродетелей украсився множеством; темже и избра тя Пречистая Дева пренести образ Свой светозарный из Печерских предел во страну твою отчую, да и тамо возсияет сугубне благодать Богородицы Преславныя.

Отрасле духовная обители Печерския, Богоносе смиренный Дорофее, издревле страна Псковская и страна Ярославская велику к тебе имут веру, яко в первей сам умудрися духовне, во другой же иныя умудрял еси, в пустыню твою Югскую приходящия; темже тя, Христова угодника, величаем.

Лазаре, благочестия подвижниче, равноангельным и праведным житием твоим в затворе наследник явился еси благ вечных, и яко в меру похвалы преподобных достигл еси смиренномудрия ради, такожде и нас, грешных, в покаянии смиреннейшем утверди, да и мы молитвами твоими просветимся и избавимся от сетей вражиих, отче наш преблаженне.

Богородичен: Богородицу и Матерь Света Тя присно величающе, и ныне же гласы умиленными Тя воспоим, яко даровала еси нам собор преподобных Псково-Печерских славный, едина Чистая и Благословенная.

Песнь 9.

Ирмос: Безначальна Родителя Сын Бог и Господь, воплощься от Девы нам явися, омраченная просветити, собрати расточенная, тем Всепетую Богородицу величаем.

Яко не сокрыша недра подземная сокровища мощей ваших, источаете ими ток благодати, преподобнии Псково-Печерстии, и всем верным ю изливаете, омывая тоя души наша, да и мы внидем чисты ко Христа Бога трапезе и небеснаго веселия причастницы будем, ваш собор почитающе, заступницы нам всеблаженнии.

Величает вас, преподобныя своя, обитель Псково-Печерская, на Святой горе храм во имя ваше воздвигшая – яко споборником крепким в трудех и молитвах; таже и просит отцы своя умильно: молите Христа Бога оставление согрешений даровати чтущим любовию святую память вашу.

Слава, Троичен: Триипостасный Боже, Троице Живоначальная, сохраняй обитель святую сию, молитв ради преподобных ея, во вся дни до скончания века.

И ныне, Богородичен: Радуйся, Обрадованная, во Успении Твоем нас не оставляющая, но молитвы преподобных отец Псково-Печерских к Сыну Твоему приносящая, о спасении душ наших.

Светилен воскресен (ексапостиларий 4-й): Добродетельми блиставшеся.

Слава, светилен святых: И ныне, Богородичен его:

Слава, светилен святых, глас 2.

Подобен: Доме Евфрафов:

Соборе святых Печерских, Псковстей страны украшение, молитеся ко Господу о всем иночестве Российстем и о чтущих вас верою и любовию.

И ныне, Богородичен, глас и подобен тойже:

Пресвятая наша Владычице, Чистая Дево, Богородице, молит Тя обитель Печерская; окорми вся люди Твоя, иже в ней спасаются, яко Ты еси ко спасению утверждение.

На Хвалитех поем стихиры воскресны 4:

И святых 4 (стихи зри на малей вечерни).

Стихиры святых Псково-Печерских

Глас 8:

Духовными песньми преподобныя восхвалим: Марка, Иону и Корнилия, купно же Вассиана и Дорофея с материю Вассою, и Лазаря прозорливаго, схимника Печерскаго, плотское мудрование духу повинувшия, пощении и подвиги сокровенными очистившиеся; поминайте нас, память вашу чтущия, и на помощь вас призывающия.

Глас тойже. Подобен: О, Преславнаго чудесе:

О, преподобнии отцы Псково-Печерстии, равноангельное житие поживше, труды постническими и добротами духовними покорили есте телеса и души ваша Духу Божию, и, яко злато в горниле, искуси вас Христос Бог; темже и обрете вас достойны Себе и, яко всеплодие жертвенное, прият; молите о нас Господа спасти и просветити души наша.

Глас и подобен тойже:

О Преславнаго чудесе! Небесе и земли Царице, днесь собор святых Псково-Печерских совершающе, – вопием Ти, Богомати, радуйся; се отцев красота, се постников удобрение, се Сына Твоего угодницы, се предстателие за нас пред Богом благочестнии; и яко помощию Твоею таковии сташа, приими милостивно молитвы их о нас, грешных.

Глас тойже:

Преподобнии отцы Псково-Печерстии, предстоящии за ны соборне Христу Богу, утверждение всем верным будите, иже к вам припадают, глаголюще: радуйтеся, Духа Святаго обиталища прекрасная, радуйтеся, Девы Пречистыя честнии служителие, радуйтеся, мысленная светила церковная, радуйтеся, ко Христу монахов множества приведшии, и, яко имущии дерзновение ко Господу, молите Его спасти души наша.

Слава, стихира утренняя евангельская, глас 4:

Утро бе глубоко: Аще святых храм, Слава, святых: Слава, святых, глас 8:

Иже Троицы Святыя зарею просвещеннии и престолу Христа Бога выну предстоящии, преподобнии отцы Псково-Печерстии, приимите днесь сие пение хвалебное и молите Господа спастися душам нашим.

И ныне, Богородичен, глас 2:

Преблагословена еси. Богородице Дево:

Славословие великое: По Трисвятом тропарь воскресен, точию един от двою:

Ектении и отпуст:

Посем, аще в обители Печерстей бдение и аще предстоятель изволит, исходит братия в притвор ко иконе праздника: И поют стихиру храма святых.

Стихира на целование святыя иконы, глас 2.

Подобен: Жены, услышите

О, честная обителе Псково-Печерская, Доме Девы Пречистыя, ублажай днесь собор преподобных твоих, якоже верных утверждение и крепкое за вся ны предстательство: да молят Христа Бога даровати нам велию милость.

Слава, и ныне, Богородичен, тропарь на целование святыя иконы, глас 1:

Богородице, Заступнице усердная, приими молитвы раб Твоих, и яко Ты еси мирови Покров Вышний, не остави ограждением Твоим обители сея, но чадом Твоим, преподобным отцем Псково-Печерским, помогай за ны ко Господу взывати, да моленьми их непрестанными подаст мир душам нашим и велию милость.

Посем молитва: Владыко Многомилостиве:

На 1-м часе тропарь воскресен:

Слава, тропарь святых:

И ныне, Богородичен часов:

по Отче наш:

кондак святых: и отпуст.

Таже посреде храма поем стихи сии:

Утверждение на Тя надеющихся, утверди, Господи, Церковь, юже стяжал еси Честною Твоею Кровию. Под Твою милость прибегаем, Богородице Дево, молений наших не презри в скорбех, но от бед избави нас, Едина Чистая и Благословенная.

Пресвятая Богородице, спаси нас.

Вси святии Псково-Печерстии, молите Бога о нас.

На Литургии

Блаженна воскресна гласа, на 6,

и от канона святых Псково-Печерских Песнь 3.-я

(аще изволит предстоятель, Песнь 9.-я), на 4:

По входе тропарь воскресен и храма Богородицы, идеже храм Ея, и святых:

Кондак воскресен:

Слава, кондак святых:

И ныне, храма Богородицы, или:

Предстательство христиан непостыдное:

Прокимен воскресен гласа:

Святых прокимен, глас 7:

Честна пред Господем смерть преподобных Его:

Стих: Что воздам Господеви о всех, яже воздаде ми:

Апостол, ряд. и святых: к Галатом, зач. 213:

Аллилуия, святых, глас 6:

Блажен муж, бояйся Господа, в заповедех Его восхощет зело:

Стих: Сильно на земли будет семя его:

Евангелие, ряд. и святых: от Луки, зач. 24:

Причастен прежде воскресен, таже святых:

В память вечную будет праведник, от слуха зла не убоится: Аллилуия (трижды).

Молитва

О, преподобнии и Богоноснии отцы наши: Марко, Ионо, Корнилие, Вассиане, Дорофее, Лазаре, Симеоне, Александре и мати преблаженная Вассо!

Смиренно припадаем к вам, яко праведником сущим, иже в Псковстей земли просиявше преславно, украсили есте обитель Печерскую жития вашего чуднаго звездами пресветлыми; к вам прибегаем и, с любовию хваляще днесь, предстательства просим за нас, многогрешных: умолите Господа Сил и Пречистую Его Матерь, да сохранят Российскую страну нашу мирну, утвердят в благочестии землю Псковскую и да покровом благодати Своея град сей покроют, обитель же нашу укрепят и всем подвизающимся в ней даруют спасение и Жизнь Вечную. Помозите нам, угодницы Божии, создати храм благолепен в сердцах наших и украсити сей храм добродетельми, да жительствует в нем едино Господь! Оградите нас стеною молитв всепобедных от греховных стрел врага спасения нашего и от всех его злых искушений, да Богоугодне зде на земли поживем и вечное Царство Пресвятыя Троицы унаследим, прославляюще присно Отца и Сына и Святаго Духа, ныне и в безконечныя веки. Аминь.

Источник: Синодальная богослужебная комиссия

Ме́сяца иу́ния в 19-й день

Святи́теля Иоа́нна, архиепи́скопа Шанха́йскаго и Сан-Франци́сскаго

[пое́м ему́ в суббо́ту ближа́йшую к 19-му числу́]

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 8, глас 6.

Подо́бен: Всю отложи́вше:

Воспои́м святи́теля Христо́ва Иоа́нна, Бо́гом дарова́ннаго моли́твенника нам, и́же моли́тве непреста́нной прилежа́, служе́нием же литурги́и и причаще́нием Святе́йших Та́ин укрепля́емь, исхожда́ше на де́лание свое́ бо́дренно, поспеша́я в до́мы стра́ждущих и в больни́чныя пала́ты к неду́гующым: сего́ ра́ди освяще́н и ми́лостив яви́ся, исцеле́ний же и прозре́ния да́ра свы́ше сподо́блен бысть. И ны́не сый на небеси́, со дерзнове́нием мо́лится о спасе́нии душ на́ших.

Воспои́м святи́теля Христо́ва Иоа́нна, отроко́м, отрокови́цам и младе́нцем любе́зна цели́теля, возра́стным советода́вца му́дра же и тве́рда, ма́терем о ча́дех извести́теля, креща́емым же и венча́емым благослове́ния пода́теля, провожда́емым в жизнь ве́чную моли́твенника верне́йша, ревни́теля ле́поты и чи́на слу́жбы Бо́жия, па́стыря же и архипа́стыря, предводя́ща о́вцы своя́ богода́нныя, к нему́же возопие́м: о блаже́нне чудотво́рче Иоа́нне, моли́ о нас, любо́вию чту́щих тя!

Восто́к и за́пад, се́вер и мо́ре лику́йте, па́мять пра́зднующе святи́теля чудотво́рца, небеса́ ра́дуйтеся, А́нгела но́ваго прие́млюще, моли́твенника богодухнове́ннаго, и па́стыря безсре́бреника, благода́тнаго целе́бника, проро́ка и благове́стника, Иоа́нна, ми́лостиваго на́шего засту́пника, и на суде́ нам кре́пкаго спору́чника.

И́ны стихи́ры, глас 3:

Преподо́бием и пра́вдою пожи́в на земли́ и до́бре ста́до Христо́во упа́с, ве́тхаго челове́ка совле́клся еси́ и прило́ги вра́жия отрази́л еси́, неусы́пным бде́нием и зе́льным поще́нием и моли́твою пла́менною ко Го́споду, ю́же и о нас ны́не вознеси́, о́тче Иоа́нне.

Ка́ко не диви́мся неусы́пному трезве́нию твоему́, и ка́ко не воспои́м по́стническое житие́ твое́, посреде́ бо ми́ра, во зле лежа́щаго, подвиза́лся еси́, пусты́нником дре́вним ревну́я. Те́мже и любо́вь и́стинную ко Го́споду стяжа́л еси́, е́юже покры́й нас, чту́щих па́мять твою́.

До́брый служи́телю Христо́ва Ева́нгелия, и́же и́стиною Правосла́вия препоя́сався, пра́щею слове́с твои́х во́лки тя́жкия отгна́л еси́, не испове́дающия Христа́, и́стинную Прему́дрость Бо́жию, и ину́ю чужду́ю прему́дрость и́щущия. Те́мже и нас умудри́ во спасе́ние, блаже́нне и богому́дре Иоа́нне, чту́щия све́тло всекра́сную па́мять твою́.

Сла́ва, глас 6:

Днесь собра́вшеся, воспои́м челове́ка Бо́жия, архипа́стыря избра́ннейшаго, свети́льника ру́сскаго разсе́яния, учи́теля язы́ков разли́чных, стра́нника в ми́ре сем вре́меннем, насле́дника преми́рнаго Ца́рствия Небе́снаго, Иоа́нна, святи́теля возлю́бленнаго, и воззове́м к нему́: моли́ Го́спода при́сно о спасе́нии душ на́ших.

А́ще в пято́к ве́чера:

И ны́не, Богоро́дичен пе́рвый гла́са,

а́ще же ни:

И ны́не, Богоро́дичен догма́тик глас 6: Кто Тебе́ не ублажи́т:

Вход. Проки́мен дне. И чте́ния 3.

При́тчей чте́ние:

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость: и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, все же честно́е недосто́йно ея́ есть. Долгота́ бо дней, и ле́та живота́ в десни́це ея́: в шу́йце же ея́ бога́тство, и сла́ва: от уст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да! честна́я бо реку́: и блаже́н челове́к, и́же пути́ моя́ сохрани́т: исхо́ди бо мои́, исхо́ди живота́, и уготовля́ется хоте́ние от Го́спода. Сего́ ра́ди молю́ вас, и предлага́ю мой глас сыново́м челове́ческим: я́ко аз прему́дрость устро́их сове́т, и ра́зум и смысл аз призва́х. Мой сове́т и утвержде́ние, мой ра́зум, моя же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́заннии же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая: я́ко и́стине поучи́тся горта́нь мой, ме́рзки же предо мно́ю устны́ лжи́выя. С пра́вдою вси глаго́лы уст мои́х: ничто́же в них стро́потно, ни́же развраще́нно. Вся пра́ва суть разумева́ющим, и про́ста обрета́ющим ра́зум. Научу́ бо вас и́стине, да бу́дет о Го́споде наде́жда ва́ша, и испо́лнитеся Ду́ха.

При́тчей чте́ние:

Уста́ пра́веднаго ка́плют прему́дрость, язы́к же непра́веднаго поги́бнет. Устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем: вес же пра́ведный прия́тен Ему́. Иде́же а́ще вни́дет досажде́ние, та́мо и безче́стие: уста́ же смире́нных поуча́ются прему́дрости. Соверше́ние пра́вых наста́вит их, и поползнове́ние отрица́ющихся упасе́т их. Не по́льзуют име́ния в день я́рости, пра́вда же изба́вит от сме́рти. У́мер пра́ведный, оста́ви раска́яние: нару́чна же быва́ет и посмея́тельна нечести́вых па́губа. Пра́вда непоро́чнаго исправля́ет пути́, в нече́стие же па́дает непра́вда. Пра́вда муже́й пра́вых изба́вит их: безсове́тием же пленя́ются беззако́ннии. Сконча́вшуся му́жу пра́ведну, не поги́бнет наде́жда: похвала́ же нечести́вых поги́бнет. Пра́ведник от ло́ва убе́гнет, вме́сто же его́ предае́тся нечести́вый. Во усте́х нечести́вых сеть гра́жданом, чу́вство же пра́ведных благоспе́шное. Во благи́х пра́ведных испра́вится град, и в поги́бели нечести́вых ра́дование. Во благослове́нии пра́вых возвы́сится град, усты́ же нечести́вых раскопа́ется. Руга́ется гра́жданом лише́нный ра́зума, муж же му́дрый безмо́лвие во́дит.

Прему́дрости Соломо́новы чте́ние:

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ лет исчита́ется: седи́на же есть му́дрость челове́ком, и во́зраст ста́рости житие́ нескве́рное. Благоуго́ден Бо́гови быв, возлю́блен бысть, и живы́й посреде́ гре́шник, преста́влен бысть. Восхище́н бысть, да не зло́ба измени́т ра́зума его́, или́ лесть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга: уго́дна бо бе Го́сподеви душа́ его́: сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е: я́ко благода́ть и ми́лость в преподо́бных его́, и посеще́ние во избра́нных его́.

На лити́и стихи́ра хра́ма, и стихи́ры святи́телю, глас 6:

О́трок сый еще́ млад, умили́лся еси́ словесе́м Христо́вым, и́миже воззва́ Госпо́дь святы́я апо́столы пе́рвыя, си́це рек: по Мне гряди́та, и сотворю́ вы ловца́ челове́ком. Внима́я же сим Боже́ственным глаго́лом, о смиренному́дре Иоа́нне, ты ника́коже помы́слил еси́ себе́ бы́ти жре́бием подо́бна Бо́жиим посла́нником после́дним и насме́ртником. Сам Христо́с тя ве́дый, тя просла́ви. Бу́ди же нам увенча́ние твое́ к покая́нию нелицеме́рному воззва́ние, во спасе́ние душ на́ших.

Глас 1:

Безпло́тным си́лам, непреста́нно Бо́га хва́лящим, досто́йно поревнова́л еси́ приснобде́нный Иоа́нне преподо́бне, любо́вию о́гненною твое́ю, сего́ ра́ди тех ликостоя́нием сопричта́лся еси́.

Апо́стола благода́тнаго време́н безблагода́тных, юро́дивым подража́теля прему́драго, и по́стников великонра́внаго единоревни́теля, тя, о́тче Иоа́нне, ве́лий чудотво́рче, восхваля́ем.

Сла́ва, глас то́йже:

Ди́вному во святы́х Свои́х, Бо́гу и Влады́це, пе́ние и испове́дание прино́сиши непреста́нно, в трие́х Ли́цех познава́емому, в существе́ же еди́ном пропове́даему, храм Свой в души́ твое́й воздви́гшему, и све́том Свои́м присносу́щным осия́вшему тя, тобо́ю же и нас просвеща́ющему.

И ны́не, Богоро́дичен, глас то́йже:

Ра́дуйся, Пречи́стая Де́во, ра́дуйся Богоневе́сто, ра́дуйся, ве́рных прибе́жище, ра́дуйся, святи́телей непреста́нное пе́ние, ра́дуйся, хра́мы Твоя́ воздви́гнути дарова́вшая уго́днику Твоему́, блаже́нному Иоа́нну, его́же моле́ния прие́мши, спаси́ благоче́стно пою́щия Тя.

На стихо́вне стихи́ры, глас 1.

Подо́бен: Небе́сных чино́в:

Бо́дрствуя и моля́ся во дни и в нощи́, побежда́л еси́ вся искуше́ния вра́жия, Иоа́нне святи́телю терпели́вейший, от младе́нства служи́ти пра́вде Бо́жией восхоте́вый, к Небе́сному же Ца́рствию вы́ну устремле́н, су́щих зде на земли́ утеша́я, ми́ловал еси́.

Глас 6:

Стих: Во всю зе́млю изы́де веща́ние их и в концы́ вселе́нныя глаго́лы их.

Наслажде́ние тле́нное всеконе́чно отри́нув, Го́споду твоему́ после́довал еси́, и па́стырский жезл, я́ко тя́жкий крест восприи́м, о́вцы твоя́ упра́вил еси́, пред ни́ми ходя́ и глаша́я по и́мени, и мы глас твой до́бре ве́дуще, вслед тебе́ ходи́ти тщи́мся, ты же в ра́дость Го́спода твоего́ возше́д, неотлуче́н от нас пребу́ди.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Наста́вник вои́стину всеми́рный, благоче́стия учи́тель и Ду́ха Свята́го сосу́д избра́нный показа́лся еси́, блаже́нне Иоа́нне, те́мже вси концы́ тя прославля́ют, от восто́к со́лнца да́же до за́пад, в храм твой притека́юще к моще́м твои́м, исцеле́ния и по́мощь в ско́рбех прие́млют, ты бо в ра́дость Го́спода твоего́ возше́д, неотлу́чно от нас пребыва́еши.

Сла́ва, глас 6:

О́браз вои́стину был еси́ ве́рным, сло́вом, житие́м, любо́вию, ду́хом, ве́рою и чистото́ю: те́мже во всю зе́млю изы́де веща́ние исправле́ний твои́х, и на небеси́ обре́л еси́ мзду трудо́в твои́х, но и земны́х не разлучи́лся еси́, я́ко исто́чник благода́ти приснотеку́щий, мо́щи твоя́ нам оста́вил еси́, и ны́не мо́лишися во е́же до́брый плод духо́вный принести́ нам, и́же даро́в твои́х наслади́вшимся.

И ны́не, Богоро́дичен, глас то́йже:

Творе́ц и Изба́витель мой, Пречи́стая, Христо́с Госпо́дь из Твои́х ложе́сн проше́д, в мя оболки́йся, пе́рвыя кля́твы Ада́ма свободи́. Те́мже Ти, Всечи́стая, я́ко Бо́жии Ма́тери же и Де́ве, вои́стину вопие́м немо́лчно: ра́дуйся а́нгельски, ра́дуйся, Влады́чице, предста́тельство и покро́ве, и спасе́ние душ на́ших.

Тропа́рь, глас 5:

Попече́ние твое́ о па́стве в стра́нствии ея́, се проо́браз и моли́тв твои́х, за мир весь при́сно возноси́мых: та́ко ве́руем, позна́вше любо́вь твою́, святи́телю и чудотво́рче Иоа́нне. Весь от Бо́га освяще́н священноде́йствием Пречи́стых Та́ин, и́миже при́сно укрепля́емь, поспеши́л еси́ ко стра́ждущим, цели́телю отра́днейший: поспеши́ и ны́не в по́мощь нам, всем се́рдцем чту́щим тя.

Ин тропа́рь, глас 1:

Святи́тельства дар преумно́жил еси́, сло́ва пропове́данием апо́столом поревнова́в, бде́нием же, посто́м и моли́твою с преподо́бными вмени́лся еси́, клевету́ и поноше́ния с кро́тостию прие́мля. Сего́ ра́ди Христо́с тя просла́ви чудесы́, и́хже оби́льно излива́еши на всех с ве́рою притека́ющих к тебе́: и ны́не спаса́й нас моли́твами твои́ми, Иоа́нне досточу́дне, святи́телю Христо́в.

На у́трени

На Бог Госпо́дь: тропа́рь, глас 5: Попече́ние твое́ о па́стве: Два́жды.

А́ще суббо́та: Сла́ва, и ны́не, Богоро́дичен пе́рвый гла́са.

А́ще же ни:

Сла́ва, и ны́не, Богоро́дичен, глас то́йже:

Ра́дуйся, две́ре Госпо́дня непроходи́мая: ра́дуйся, стено́ и покро́ве притека́ющих к Тебе́. Ра́дуйся, необурева́емое приста́нище, и неискусобра́чная, ро́ждшая пло́тию Творца́ Твоего́ и Бо́га: моля́щи не оскудева́й о воспева́ющих, и кла́няющихся рождеству́ Твоему́.

По 1-м стихосло́вии седа́лен, глас 6:

Бо́жия сло́ва служи́телю ве́рный, и Ду́ха Свята́го сосу́де избра́нный, ты на ка́мени за́поведей Христо́вых дом души́ твоея́ утверди́л еси́, и воздви́гшимся ве́тром искуше́ний, не паде́ся вну́тренняя хра́мина твоя́, сего́ ра́ди и власть тебе́ даде́ся чу́вственному ви́хрю и тру́су запрети́ти: огради́ и нас ны́не от волн мо́ря жите́йскаго, и в приста́нище ти́хое упра́ви.

Сла́ва, и ны́не, Богоро́дичен, глас то́йже:

Изнемога́ет сло́во, е́же пе́ти, Влады́чице, вели́чия Твоя́ и сла́вити чудеса́ Твоя́ во вся́ком ро́де и ро́де, те́мже кра́ткими глаго́лы и мно́гим упова́нием арха́нгельски вопие́м Ти: ра́дуйся, Благода́тная.

По 2-м стихосло́вии, седа́лен, глас 5:

Ве́рою и любо́вию па́мять твою́, небе́сный челове́че и а́нгеле земны́й, вси почита́ем днесь: в ми́ре бо многомяте́жнем пусты́нник и́стинен был еси́, и стра́сти вся умертви́в, на высоту́ духо́вную неудобозри́мую дости́гл еси́, вои́стину чу́до светле́йшее во мра́це ве́ка сего́ был еси́: сего́ ра́ди диви́мся вели́цей сла́ве твое́й я́же на небеси́, и умиле́нно торжеству́ем прославле́ние твое́.

Сла́ва, и ны́не, Богоро́дичен, глас то́йже:

О́тчая Боже́ственная Прему́дрость и Сло́во пре́жде век су́щее, Боже́ственныя сла́вы неотлу́чное, от Тебе́ же, Богома́ти, нищету́ на́шу восприе́млет и в ра́бий о́браз нетле́нно вообража́ется, да к пе́рвей сла́ве и лу́чшему блаже́нству возведе́т дре́вле па́дшия: те́мже Тя, Влады́чице, я́ко Тобо́ю изба́вленнии, немо́лчно ублажа́ем.

Велича́ние:

Велича́ем тя, святи́телю о́тче Иоа́нне, и чтим святу́ю па́мять твою́, ты бо мо́лиши за нас Христа́ Бо́га на́шего.

Псало́м избра́нный: Услы́шите сия́, вси язы́цы, внуши́те, вси живу́щии по вселе́нней.

По полиеле́и седа́лен, глас 4:

Сла́вы дре́вних святы́х преизря́дный ревни́телю, восто́ку неве́домых и за́падом небреже́нных, тех стопа́м после́довал еси́, и к предста́тельству их прибега́я, единовсе́льник тех по сме́рти яви́лся еси́, мы же к твоему́ заступле́нию прибега́ем ны́не: не пре́зри убо́гих, о́тче Иоа́нне, но в свято́е сие́ собра́ние введи́ нас, я́ко единонадеся́таго часа́ де́лателей, да взы́дем на ме́сто после́днее, среди́ перворо́дных Це́ркве, торжеству́юще.

Сла́ва, и ны́не, Богоро́дичен, глас то́йже:

Соше́дшеся днесь, соверша́ем торжество́ ди́внаго святи́теля Иоа́нна, и́же воздви́же Тебе́ храм, Влады́чице, я́ко всем скорбя́щим ра́дость и немощны́м по́мощь и исцеле́ние Ты еси́, и к Тебе́ припа́даем, спору́чника сего́ иму́ще: помози́ нам в не́мощех неду́гующим и грехи́ мно́гими отягоще́нным, да Твои́ми моли́твами ми́лость обря́щем вско́ре у Сы́на Твоего́ и Бо́га на́шего.

Степе́нна, антифо́н 4-го гла́са. Проки́мен, глас 4: Честна́ пред Го́сподем смерть преподо́бных Его́. Стих: Что возда́́м Го́сподеви о всех, я́же воздаде́ ми. Вся́кое дыха́ние: Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Ра́дуются днесь правосла́вных собо́ри, и лику́юще све́тло, велича́ют свети́льника но́ваго, дре́вним святи́телем равносия́тельна, на коне́ц веко́в возсия́вшаго ми́ру и земны́я вся концы́ просвети́вшаго, Иоа́нна пречу́днаго, преподо́бным спо́стника и святи́телем собесе́дника, испове́дником ра́внаго кре́постию и безме́здным цели́телем вене́ц и украше́ние, при́сно моля́щася о душа́х на́ших.

Кано́н моле́бный Пресвяты́я Богоро́дицы, глас 8: Во́ду проше́д:

И кано́н святи́теля, глас 4:

Песнь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.

Бла́го есть воспева́ти уго́дники Бо́жия, в и́хже ли́це нам ра́достне све́тит святы́й Иоа́нн, утеша́я, врачу́я его́ призыва́ющия, и научая нас о́бразом многотру́днаго жития́ своего́ ревнова́ти о по́мощи су́щим в беда́х.

О жела́ние се́рдца боголюби́ваго! Возжела́л еси́ еще́ в во́зрасте де́тищном и́стины бы́ти побо́рник. Та́ко бо плени́ша тя по́вести о непощади́вших жи́зни своя́ за пра́вду Бо́жию ди́вных святы́х.

Привре́менно недоуме́нен был еси́, е́же каковы́й путь, во́инский или́ гражда́нский, себе́ избра́ти. Но зре́яше в души́ твое́й крепча́йша мысль: всего́ себе́ преда́ти на служе́ние святе́й Це́ркви Христо́вой.

Богоро́дичен: О Тебе́ хва́лимся, Богоро́дице, и к Бо́гу Тя и́мамы непосты́дное предста́тельство, простри́ ру́ку Твою́ необори́мую и сокруши́ враги́ на́ша, низпосли́ Твои́м рабо́м по́мощь от Свята́го.

Песнь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты моя́ кре́пость, Го́споди, и прибе́жище и утвержде́ние.

С весе́лием соверша́ем па́мять твою́, архипа́стырю наш и наста́вниче, покланя́емся честны́м и нетле́нным моще́м твои́м, прося́ще моли́тв твои́х.

Восприя́л еси́ о́браз а́нгельский, и обо́лкся во вся ору́жия Бо́жия, ополчи́лся еси́ проти́ву духо́в зло́бы поднебе́сных, побежда́я их.

Не дал еси́ сна дово́льна очесе́м твои́м, не возле́гл еси́ на одр во е́же почи́ти, уподо́бився отце́м дре́вним, о подви́жниче.

Богоро́дичен: Рай жи́зни су́щи, Богоро́дице, сме́рти грехо́вныя и страсте́й многообра́зных изба́ви мя вско́ре.

Седа́лен, глас 4:

Моли́тва твоя́, о́тче Иоа́нне, а́ки столп о́гненный до небе́с досяга́яй яви́ся, путеводя́щ Изра́иля но́ваго в жите́йстем стра́нствии, сего́ ра́ди чту́щим тя терпе́ние да́руй и благодаре́ние Го́споду в сердца́х насади́, да не я́коже ропотницы́ о́ныя, еги́петских мяс рачи́телие, осу́димся, но да сподо́бимся земли́ обетова́нныя нетле́нных благ наслади́тися.

Сла́ва, и ны́не, Богоро́дичен, глас то́йже:

Утвержде́ние нам еси́, Богома́ти, и свяще́нное прибе́жище вла́ющимся прило́ги вра́жиими, Тобо́ю же покрыва́еми, проще́ние грехо́в и дерзнове́ние ко Го́споду обрета́ем.

Песнь 4.

Ирмо́с: Вознесе́на Тя ви́девши Це́рковь на Кресте́, Со́лнце Пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Мно́жества архипа́стырей наста́вник, Це́ркве Ру́сския небе́сный предста́тель, сам сый ревни́тель мона́шескаго жития́, тя, свя́те Иоа́нне, чу́до на́ших дней именова́хом и в по́двизех крепкостоя́тельна.

А́ще хо́щете, людие, свята́го жи́ва ви́дети, во град Би́толь поспеша́йте, зри́те та́мо отца́ Иоа́нна! Та́ко се́рбский имени́тый архипа́стырь изрече́, нра́ву же и дело́м Иоа́нновым дивя́щийся.

Ю́ноши карпатору́сстии, се́рбскаго учи́лища пито́мцы, о тебе́ с вели́ким умиле́нием повествова́ху, о твое́м к себе́ непощаде́нии и к ним любве́, е́же ка́ко осеня́л еси́ их кре́стным зна́мением, ходя́ между́ спя́щими, поко́й их соблюда́я.

Богоро́дичен: Пречи́стая Ма́ти Го́спода на́шего и Де́во, ми́лующая и гре́шнейших рабо́в Свои́х, я́ко милосе́рдия сокро́вищница пребога́тая, обнови́ нас, безме́рно обнища́вших, всех скорбя́щих Засту́пнице и Ра́досте.

Песнь 5.

Ирмо́с: Ты, Го́споди мой, Свет в мир пришел еси́, Свет Святы́й, обраща́яй из мра́чна неве́дения, ве́рою воспева́ющия Тя.

Подража́тель и́стинный Христо́в был еси́, святи́телю, те́мже ду́шу полага́яй за па́ству твою́, предста́л еси́ Пастыренача́льнику непосты́дно.

Исцеле́ний дар даде́ся ти еще́ во пресви́терстве, его́же преумно́жил еси́ во дни святи́тельства, и ны́не усоверша́еши в ино́м и ве́чном житии́.

Преподо́бному Нау́му был еси́ соде́йственник во исцеле́ниих, со ико́ною его́ свято́ю посеща́я до́мы стра́ждущих.

Богоро́дичен: Богоро́дице Де́во, вселе́нныя блага́я Помо́щнице, Цели́тельнице душ и теле́с на́ших, услы́ши нас и в день сей моля́щихся Тебе́.

Песнь 6.

Ирмо́с: Возопи́ прообразу́я погребе́ние тридне́вное проро́к Ио́на, в ки́те моля́ся: от тли изба́ви мя, Иису́се Царю́ сил.

Прииди́те, восхва́лим Богоро́дице храм воздви́гшаго, самого́ же всем скорбя́щим ра́дость и храм Ду́ха Свята́го бы́вшаго.

Поспеша́л еси́ и в до́мы стра́ждущих, и в пала́ты больни́чныя к неду́гующим, о ни́хже откры́ ти Госпо́дь, я́ко Пречи́стых Та́ин Его́ препода́телю.

Боля́щим младе́нцем яви́лся еси́ здра́вия хода́тай, святы́й Иоа́нне, скорбь роди́тельских душ пременя́я на ра́дость, и всем во́зрастом ты показа́лся еси́ вожделе́нный помо́щник.

Богоро́дичен: Оте́чества правосла́внаго лиши́хомся, Влады́чице, внегда́ во́лны гне́ва Госпо́дня над ним проидо́ша, зане́ храни́телие су́етных и ло́жных соде́яхомся, внегда́ же скончава́тися душа́м на́шим, Го́спода помяну́хом, да прии́дет к Нему́ Тобо́ю на́ша моли́тва и пе́ние.

Конда́к, глас 4:

Христу́ Пастыренача́льнику после́довав, во святи́телех изря́днейший яви́лся еси́, спасл бо еси́ о́вцы своя́ от губи́тельства безбо́жных, приста́нище ми́рное тем учреди́в, и попече́ние непреста́нное о па́стве име́я, врачева́л еси́ их неду́ги душе́вныя же и теле́сныя, и ны́не о нас к твои́м честны́м моще́м припа́дающих, моли́ Христа́ Бо́га, о́тче Иоа́нне, в ми́ре спасти́ся душа́м на́шим.

И́кос:

Небеса́ ны́не с на́ми ра́дуются, и ли́цы святы́х прие́млют но́вое и пресла́вное украше́ние: апо́столи пропове́дника всеми́рнаго целу́ют, му́ченицы дре́внии восхваля́ют ди́вно просла́вльшаго па́мять их, святи́телие собесе́дуют ра́вному в словеси́ и прему́дрости, бде́нному же подви́жнику преподо́бнии дивя́тся, ца́рие святи́и моли́твенника о возстановле́нии ца́рства правосла́внаго почита́ют, безсре́бреницы с цели́телем безме́здным мзду нетле́нную и недели́мую разделя́ют: ели́ко всесла́вно бысть служе́ние твое́, о́тче Иоа́нне, та́ко и венце́в тебе́ исплете́ся мно́жество. Но моли́ся ку́пно с ли́ки святы́х ко Христу́ Бо́гу о нас, к честны́м моще́м твои́м припа́дающих, в ми́ре спасти́ся душа́м на́шим.

Песнь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благословен еси́ в храме сла́вы Твоея, Го́споди.

Сына света и дне благода́ть вои́стину тя соде́ла: на всяк бо день Святыми Тайнами укрепля́емь и обожа́емь, утвердил еси́ в Го́споде сердце твое.

Ми́лостивым предста́тельством твои́м ве́рныя и неве́рныя спаса́хуся и да́ры благода́тныя приима́ху, ты же, да́руя незави́стно исцеле́ния, во тьме пре́лести не оставля́еши пребыва́ти заблу́ждшия, но еди́наго Царя́ Сла́вы учи́ши правосла́вно воспева́ти во вся ве́ки.

По́мощь и утеше́ние изгна́нным лю́дем Свои́м ди́вно сотвори́ Го́сподь, дарова́в нам тя засту́пника, святи́телю Иоа́нне, но и ны́не покры́й нас от враг на́ших неви́димых и из руки́ всех, ненави́дящих нас.

Богоро́дичен: Отцы́ на́ши согреши́ша и пре́дани бы́ша в ру́ки враго́в беззако́нных и лука́внейших па́че всея́ земли́, что у́бо сотвори́м, Влады́чице, согреше́ния роди́тельская непреста́нно умножа́юще, и ка́ко ко́зней лю́тых избе́гнем, а́ще не Ты засту́пиши ка́ющияся и спасе́ния тре́бующия?

Песнь 8.

Ирмо́с: Ру́це распросте́р Дании́л, львов зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся дела́ Госпо́дня, Го́спода.

Се́рдце твое́ распространи́ся ко всем любо́вию моля́щим ти ся, Иоа́нне святи́телю, помина́ющим по́двиг всего́ многотру́днаго жития́ твоего́, безболе́зненное же и ле́гкое преставле́ние твое́, Одиги́трии Пречи́стыя ве́рный служи́телю.

Ничто́же возмо́же препя́ти ти, посеща́ющу в больни́це чад твои́х, па́стырю до́брый, ни дождь, ни бу́ря, ни тьма нощна́я, иногда́ никому́же зову́щу, ду́хом предви́дя ну́жду их, Го́споду поспе́шствующу и указу́ющу, да вси просла́вят Бо́га оте́ц на́ших.

Егда́ ца́рства правосла́вная на земли́ падо́ша и забве́нию пре́дана бы́ша, не преста́л еси́ побе́ды проси́ти царе́м благове́рным в дре́вних пе́снех неизме́нно, я́ко тех держа́ва благослове́нна есть от Бо́га оте́ц на́ших.

Богоро́дичен: Вели́чит ду́ша Твоя́, Влады́чице, Го́спода на́шего и ра́дуется дух Твой о Бо́зе Спа́се и Сы́не Твое́м. И ка́ко сме́ли бы́хом мы воспева́ти песнь Твою́, а́ще не бы благоволи́ла Сама́ проро́чески рещи́, я́ко ублажа́т Мя вси ро́ди.

Песнь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Тем веселя́щеся, Тя, Богоро́дице, велича́ем.

Поспеша́я ко стра́ждущим, при́сно ду́шу твою́ за о́вцы твоя́ полага́л еси́, те́мже и чудотворе́ний дар тебе́ даде́ся, моли́твами бо твои́ми немощству́ющии препоя́сашася си́лою, и ни́щии доброде́телию от гно́ища страсте́й воздвиго́шася.

Заре́ю све́тлою лю́дем па́ствы твоея́ просия́л еси́, о́тче Иоа́нне, внегда́ смути́тися душа́м их в годи́ну Бо́жия гне́ва, но помяну́л есть Госпо́дь ми́лость Свою́ и смире́нныя уте́ши тобо́ю.

К Ца́рству Бо́жию пути́ на́ша напра́ви, послужи́вый ему́ преподо́бием и пра́вдою вся дни живота́ твоего́, наста́ви ра́зум люде́й твои́х ко спасе́нию и просвети́ во тьме и се́ни сме́ртней седя́щия, о́тче блаже́нне Иоа́нне, да ра́достно пою́ще, соверша́ем па́мять твою́.

Богоро́дичен: Наста́ви но́ги на́ша на путь ми́рен, Всечи́стая Влады́чице, Мир И́стинный к челове́ком приве́дшая, Сы́на Твоего́, Кресто́м вражду́ упраздни́вшаго и дре́вняго супоста́та побе́дно низложи́вшаго.

Свети́лен:

А́ще и умро́х, но жив есмь, не скорби́те, лю́дие: си́це по преставле́нии твое́м возвести́л еси́, све́том та́инственным просвеща́я тя пою́щия, о́тче Иоа́нне, святи́телю преди́вный.

Сла́ва, и ны́не, Богоро́дичен:

О Тебе́, Богоро́дице Де́во, святи́и вси пра́зднующе ра́дуются, и на Тя упова́ем мы, раби́ Твои́ многогре́шнии, зову́ще: весели́ся и ра́дуйся, Ма́ти Христа́ Вседержи́теля.

На хвали́тех стихи́ры, на 4, глас 4:

Благода́рно воспои́м, ве́рнии, Го́споду Бо́гу на́шему, и восхва́лим Его́ по мно́жеству вели́чествия Его́, дарова́вшаго нам засту́пника изря́днаго, на земли́ чудотвори́вшаго, и с небесе́ на убо́гия призира́ющаго, ему́же ны́не прино́сим пе́ние и к моще́м его́ припа́даем со стра́хом, избавле́ния прегреше́ний прося́ще и душа́м на́шим спасе́ния.

До́браго па́стыря и детопита́теля восхва́лим, сей бо тща́ние о па́стве име́я, наипа́че о де́тех сирота́х име́яше попече́ние и оби́тель им сотвори́, святи́теля Ти́хона Задо́нскаго в по́мощь призва́в, и не оста́ви их в беде́, су́щей бра́ни от безбо́жных, но да́же до кра́я вселе́нныя в ти́хое приста́нище пресели́, его́же моли́твами и нам, Спа́се, сотвори́ ми́лость.

Бде́нное пе́ние соверша́юще, ве́рнии, восхва́лим Го́спода Бо́га на́шего и Его́ до́браго служи́теля, его́же избра́, я́ко не от ми́ра бысть: сей бо о́браз показа́ нам терпе́ния и моли́твы непреста́нныя, Бо́жию же му́дростию просвеще́н, пра́выя ве́ры ревни́тель бысть, ве́рныя вся́ко наставля́я. Те́мже моли́твами его́, Христе́ Бо́же, пода́ждь нам в пра́вой ве́ре и благоче́стии пребы́ти.

Ди́внаго Бо́га во святы́х Свои́х, вся́кое дыха́ние псало́мски да восхва́лит, на коне́ц веко́в низпосла́вшаго нам чу́дное утеше́ние, Иоа́нна, святи́теля всеми́рнаго, и́стины побо́рника кре́пкаго, посреде́ собла́знов и лжи недви́жно пребы́вшаго, и от мра́чныя пре́лести вся водвиза́ющаго и ко спасе́нию нас приводя́щаго.

Сла́ва, глас то́йже:

Испове́дуем ди́вное заступле́ние твое́, не таи́м чуде́с твои́х, на нас бы́вших, хода́таю наш ко Го́споду, святи́телю Иоа́нне, и́миже упова́нию правосла́вному науча́еши нас, малове́рных, и уныва́ющих и ропотли́вых, да твои́ми моли́твами по́мощь Бо́жию и́мамы, е́юже спаса́емся от ро́да сего́ развраще́ннаго, чту́щии досто́йно па́мять твою́.

И ны́не, Богоро́дичен, глас то́йже:

Богоро́дице, всех Цари́це, правосла́вных похвало́, ерети́чествующих шата́ния разори́, и ли́ца их посрами́, не кла́няющихся, ни́же чту́щих, Пречи́стая, честны́й Твой о́браз.

Славосло́вие вели́кое. Тропа́рь, и отпу́ст.

На Литурги́и

Блаже́нна от кано́на святи́теля, Песнь 3.-я и 6-я. Проки́мен, глас 1: Уста́ моя́ возглаго́лют прему́дрость, и поуче́ние се́рдца моего́ ра́зум.

Стих: Услы́шите сия́, вси язы́цы, внуши́те, вси живу́щии по вселе́нней.

Апо́стол ко Евре́ом, зача́ло 318. Аллилу́ия, глас 2: Уста́ пра́веднаго поуча́тся прему́дрости, и язы́к его́ возглаго́лет суд.

Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник, от слу́ха зла не убои́тся.

Источник: Текст утвержден Священным Синодом Русской Православной Церкви 16 июля 2013 года (журнал № 82)

Месяца июня в 29-й день

Преподобнаго Паисия Святогорца

На малей вечерни

На Господи, воззвах: стихиры, глас 4.

Подобен: Дал еси знамение:

Отче Паисие досточудне,/ знаменьми воистинну чудес твоих/ в последняя времена явился еси/ веси Фарасския древо многоплодное,/ родителей твоих похвала,/ столп воздержания,/ Афона и всея Церкве слава./ Темже верных собрания/ пении по долгу благохвалят житие твое.

Отче Паисие богоблаженне,/ града Коницы украшение,/ пламенную любовь от юности ко Господу имея,/ житии святых и преподобных отец назидался еси/ и, во благочестия наставники тех избрав,/ ученик верный и последователь твердый/ воздержания и постничества был еси.

Отче Паисие священне,/ помыслы лютаго сопротивника отверг,/ чистейший молниезрачный образ Христа/ в сердце твоем приял еси./ Темже, безбожия помышления разгоняя,/ истины догматы и богатство веры/ ныне концем земли проповедуеши.

Отче Паисие преподобне,/ вышнее Троицы действо издетска стяжав,/ благодать пощения приял еси/ и, любовь велию ко святым имея,/ младенческая вся отвергл еси,/ движа ко изумлению вся сродники и домашния твоя,/ прообразуя тако, святе, путь жития твоего.

Слава, глас 2:

Неустанныя подвиги твоя, богоносе Паисие,/ яко ясныя образы подражания и спасения вси познахом:/ страстей бо всяческая востания победив,/ во времена последняя яко солнце возшел еси/ на горе Афонстей и во инех странах,/ просвещая твоими чудесы и наставлении./ Темже в молитвах не престай,/ ума нашего мрак греховный разгнати,/ да познаем вси велию милость.

И ныне, Богородичен:

Все упование мое на Тя возлагаю,/ Мати Божия,/ сохрани мя под кровом Твоим.

На стиховне стихиры, глас 2.

Подобен: Доме Евфрафов:

Коница и Синай,/ и гора Афонская,/ ликуют и хвалятся/ божественною памятию твоею,/ отче Паисие.

Стих: Восхвалятся преподобнии во славе/ и возрадуются на ложах своих.

Гробу твоему честному,/ отче Паисие,/ с верою множества покланяются,/ надеющеся прияти/ благодать твою, славне.

Стих: Воспойте Господу песнь нову,/ хваление Его в Церкви преподобных.

Ходатая ко Христу/ ведают тя вси,/ Паисие всеблаженне,/ темже и прошений своих/ приемлют исполнение.

Слава, глас тойже:

Имея в души, отче Паисие,/ свет Святыя Троицы,/ осияваеши благочестно/ призывающих тя, всеславне.

И ныне, Богородичен, глас тойже:

Владычице Богородице,/ молися непрестанно Сыну Твоему/ о воспевающих рождество Твое,/ Богоневесто Пречистая.

Тропарь писан на велицей вечерни.

На велицей вечерни

На Господи, воззвах: стихиры на 8, глас 1.

Подобен: Всехвальнии мученицы:

От отрочества зело возлюбил еси/ монашеское жительство/ и пребывание единомысленное,/ честный Паисие,/ темже мирская обольщения,/ плотския сласти и вся преходящая/ мужественне презрел еси/ и, ум твой в Горняя вперив,/ яко ангел в телеси пожил еси.

Воинства мирскаго ратник быв,/ преблаженне Паисие,/ образ добродетели сущим с тобою показал еси,/ иноческим же полком сочетався,/ учитель благочестия многим явился еси,/ наставляя тех ко спасению/ словесы твоими, знаменьми и чудесы,/ яже творил еси/ Христа божественною благодатию.

Возшед на гору Синайскую,/ тамо преподобно пожил еси,/ подражая Моисею боговидцу/ и Иоанну, лествицы божественныя списателю,/ славне Паисие,/ в посте, яко безплотен пожив,/ дарования Утешителя Духа Святаго приял еси,/ якоже древле отцы наши и вси святии.

Обители Стомион в Конице усердный инок/ и Есфигмена благопокорный послушник был еси,/ и Филофеевскую обитель, преподобне, прославил еси,/ последи же на гору Синай,/ яко ангел, вселился еси,/ промышляя о потребных людем бедным/ и о всякой твари.

Поучении и чудесы многоразличными/ киновию Суротийскую утвердил еси/ и благочестным девам и женам,/ отче преподобне Паисие,/ воистинну богосветлый наставник, путевождь и учитель явился еси,/ темже гроб твой, якоже велие сокровище,/ священная обитель содержащи,/ веселится честне.

Юным мудрый попечитель явился еси,/ постниче святый Паисие,/ недугующим врач и помощник,/ страстьми губительными обдержимым избавитель,/ безбожным скорое вразумление,/ учеником благонадежное утверждение/ и всякому человеку ближний во Христе и знаемый.

Слава, глас 6:

Подвижников стезею шествуя,/ богоносе Паисие,/ к добродетельному житию устремился еси/ и, ветхаго человека совлекся,/ непрестанною же молитвою ум очистив,/ Духа Святаго сладости причастник показался еси./ И ныне, богоукрашенный отче,/ стяжанию благодати Духа Святаго/ нас прилежно научаеши.

И ныне, Богородичен, глас тойже: Кто Тебе не ублажит, Пресвятая Дево:

Прокимен дне. И чтения три преподобническая.

На литии стихиры самогласны, глас 1:

Веселися о Господе горо Афонская,/ в тебе бо, яко цвет весенний,/ в последняя времена преподобный Паисий процвете,/ иже слез излиянием,/ яко делатель добрый, душу свою воздела,/ добродетелей древо насади/ и плоды безстрастия и прозрения принесе,/ подаваяй страстей врачевание/ и исцеление недугов душевных вкупе и телесных./ Темже ныне к нему притекаем/ и с верою умильно вопием:/ молися, святе Паисие, милостивому Богу за ны,/ воспевающих житие твое/ и велия твоя дарования.

Глас 2:

Своему хотению умертвився,/ яко иный Павел, страстей свободился еси/ и одеждею световидною Духа Утешителя облеклся еси./ Темже, яко телесныма очима,/ помышления человеков зрети сподобился еси,/ будущая предведая и полезная провещавая/ приступающим к тебе, отче Паисие./ Сего ради и мы, руце к тебе простирающе,/ яко имущу велие дерзновение ко Господу,/ молитися за ны просим,/ яко да волнение моря житейскаго прейдем/ и в пристанище Царствия Небеснаго достигнем.

Глас 3:

Отче преподобне,/ на всяк день человеков множества,/ яко ковчег спасения,/ келлию твою обступаху:/ едини убо спасения души взыскующе,/ друзии же исцеления недугов,/ помыслов исправления/ и прилучшихся в житии разрешений просяще./ Такожде и ныне ко гробу твоему,/ людие притекающе,/ тогожде с верою просят,/ с нимиже и мы тебе сице вопием:/ блаженне старче Паисие,/ молитвами твоими и нас укрепи.

Глас 4:

Море сланое страстей прешед/ и духов лукавых гордыню низложив,/ вместилище Утешителя Духа был еси,/ преподобне отче Паисие./ Ты бо, зерцало ума очистив,/ моляся, Богочеловека Господа узрел еси,/ Пречистую Его Матерь,/ Лукиллиана и Евфимию, мучеников славных/ и лики прочих святых./ С нимиже и ныне молися Господу,/ помиловатися душам нашим.

Слава, глас тойже:

Подражателя Христова, Паисия преподобнаго,/ на Святей Горе пожившаго,/ похвальными словесы воспоим,/ той бо струями слез распаление страстей угаси,/ душу просвети и ум очисти,/ и светлейший сосуд благодати явися./ И ныне, собору постников сочетався,/ непрестанно молится о призывающих честное имя его.

И ныне, Богородичен, глас тойже:

От всяких бед рабы Твоя защити,/ Благословенная Богородице,/ да Тя прославим,/ надежду душ наших.

На стиховне стихиры, глас 5.

Подобен: Радуйся, постников:

Радуйся, Фарасския земли прозябение,/ Святыя Горы реко приснотекущая,/ учителю благочестия,/ обители Суротийския питателю,/ подвизающихся добрый образе,/ Синая благое украшение,/ града Коницы хранителю/ и всея Еллады пресветлое солнце,/ юности попечителю и помощниче,/ человече Небесный и во плоти ангеле,/ целителю недужных и страждущих упокоение,/ Паисие отче наш,/ Церкве Христовы новая звездо и досточудная.

Стих: Честна пред Господем/ смерть преподобных Его.

Радуйся, отче наш Паисие,/ отроком изрядный благочестия проповедниче,/ страждущим скорое избавление,/ безчинным кроткое вразумление,/ сущим в бедах подкрепление,/ скорбящим утешение,/ верным вспоможение,/ всем, приходящим к тебе помощниче,/ преподобных сопричастниче/ и теплый о нас к Богу молитвенниче.

Стих: Блажен муж, бояйся Господа,/ в заповедех Его восхощет зело.

Радуйся, преподобне отче Паисие,/ священников богомудрый наставниче,/ благочестно жити хотящих учителю,/ постником истинное правило/ и богодохновенный провидче!/ Ты, дар прозрения имея,/ сокрытая помышления ума обличал еси/ и недуги душевныя врачевал еси./ Темже по всей земли имя твое прославися/ и вернии со усердием молятся,/ твоея помощи взыскующе.

Слава, глас 8:

Постнически пожив и сласти житейския одолев,/ плоти желания и сладострастие всякое победил еси/ и посещения благодатнаго сподобился еси,/ преподобне старче Паисие,/ ты бо, в келлии своей пребывая,/ великомученицу Евфимию яве узрел еси/ и о мученичестем подвизе ея беседовал еси./ С неюже о нас молися,/ даровати душам нашим велию милость.

И ныне, Богородичен, глас тойже:

Владычице, прими молитвы раб Твоих/ и избави нас/ от всякия нужды и печали.

Тропарь, глас 1:

Фарасския земли порождение/ и Афона славное украшение,/ блаженне отче Паисие,/ преподобных изрядный подражателю,/ яко всесветлое солнце просиял еси/ и благодатию верных множества озарил еси:/ слава Давшему ти крепость,/ слава Венчавшему тя,/ слава Даровавшему тобою всем исцеления.

На утрени

По 1-м стихословии седален, глас 1.

Подобен: Гроб Твой, Спасе:

Благодатию Христовою просвещен, якоже древнии отцы с безсловесными зверьми пожил еси, отче богомудре, и птиц и змиев друг соделался еси. Темже вси, видевшии тя, ужасахуся и Вседержителя Бога прославляху.

Слава, и ныне, Богородичен, глас и подобен тойже:

Икону честную Страшнаго Предстательства Матере Владыки держал еси, преподобне отче Паисие, и, воззрев к Вышним, явися ти от нея свет, озаряяй вся. Сего ради молися непрестанно с Приснодевою о душах наших.

По 2-м стихословии седален, глас 3.

Подобен: Красоте девства:

Многочуднаго честнаго Паисия, Горы Афонския славу и Каппадокийския земли прозябение, гордыню змиеву поправшаго, страсти плотския сокрушившаго и множества верных чудесы облагодетельствовавша достойно вси да почтим.

Слава, и ныне, Богородичен, глас и подобен тойже:

Приснодеву Госпожу Владычицу, земнородных род украсившую и сладчайший зрак имущую, в кущи Афонстей узрел еси, преподобне Паисие, и со умилением Той поклонился еси. Темже с Нею не закосни молитися о нас ко Господу.

Величание:

Ублажаем тя,/ преподобне отче Паисие,/ и чтим святую память твою,/ наставниче монахов/ и собеседниче Ангелов.

Псалом избранный: Терпя, потерпех Господа:

По полиелеи седален, глас 8.

Подобен: Премудрости:

Молитвами и подвиги твоими, отче Паисие, юным детоводитель и людем, страстию губительною одержимым, наставник был еси; имущим неудобоисцельныя обычаи греховныя преизрядный врач явился еси; взыскующим же пути спасения известный советник познался еси, подвижниче богопросвещенный. Темже вернии, в Суроти твоему гробу покланяющеся, радуются и благочестно память твою по долгу воспевают.

Слава, и ныне, Богородичен, глас и подобен тойже:

Святый образ Твой, Дево, сущий в Сионе, узрев, божественный Паисий на горе Афонстей наказа иконописателем прилежно списати и велию Твою благодать всем проповеда. Сего ради, Богородице, не оскудей непрестанно Христа молящи о всех рабех Твоих, воспевающих благочестно Пречистое Твое Рождество.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Блажен муж, бояйся Господа, в заповедех Его восхощет зело. Всякое дыхание: Евангелие от Матфеа, зачало 43.

По 50-м псалме стихира, глас 6:

Во всю землю изыде вещание подвиг твоих,/ преподобне Паисие,/ ты бо в двадесятем веце по Рождестве Спасове,/ яко звезда утренняя возсиял еси/ и православных множества просветил еси,/ во еже ведети волю Господню./ Сего ради ныне, на Небеса возшед/ и стяжав велие дерзновение,/ молися о спасении душ наших.

Канон, глас 8.

Песнь 1.

Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца пешеходца спасе,/ песнь Богови воспевающа.

Даждь ми разум, Христе Всесильне, да возмогу всеусердно воспети житие и многая чудеса преподобнаго Твоего, Паисия честнаго и многочуднаго.

Благочестно, яко ангел, на земли пожив, славне Паисие, плоть и страстей востания духу покорил еси и даров Божиих приятелище явился еси, всем потребная подавая.

Всея твари Создателя теплою мольбою умилостивляя, скорый помощник страждущим и в скорби сущим явился еси, святе Паисие, святыя Горы похвало.

Богородичен: В пучине страстей погружаемь, утопаю, Мати Богородице, темже, яко нищий и окаянный, взываю: молитвами Твоими бурю искушений моих устави, Горы святыя Хранительнице.

Песнь 3.

Ирмос: Утверждей в начале небеса разумом,/ и землю на водах основавый,/ на камени мя, Христе, заповедей Твоих утверди,/ яко несть свят паче Тебе,/ Едине Человеколюбче.

Христовою благодатию победитель на духи лукавыя показался еси, отче Паисие, зело крепко смирив юношу Георгия, силою бесовскою одержима и обольщена бывша губительным учением.

Духоносный отче Паисие! Господь всяческих, красен добротою паче сынов человеческих, Свой Образ тебе некогда откры и исполни тя благодати велия.

Недоумеет ум человеческий, како яве приял еси в твоей келлии многопетую великомученицу и дивную Евфимию, святе Паисие блаженне, отцев похвало.

Богородичен: Исцелений источник и врачевание изрядное Тя, Мати, вемы, удручаемии вси болезньми телесными. Темже с верою просим Твоея, Богоневесто, божественныя помощи.

Седален, глас 4.

Подобен: Скоро предвари:

Непрестанно в молитве пребывая, душу твою храм Духа Святаго соделал еси, Паисие преподобне, и столп светел, верныя просвещаяй, явился еси, моля о всех Христа, Иже всех Содетеля и Вседержителя.

Слава, и ныне, Богородичен, глас и подобен тойже:

Дево Неискусомужная, христиан Упование и ангелов Веселие! Велие дерзновение пред Престолом Сына Твоего имущи, присно молися, Владычице, о чтущих Тя.

Песнь 4.

Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча,/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Силу с Небесе приемь, тяжкия болезни претерпевал еси, богомудре Паисие, и славословная пения усердно ко Христу возглашал еси. Темже и дар исцеления душ и телес приял еси.

Учению святых отец твердо следуя, мужественне в Солуни Христа исповедал еси, всеблаженне, и, яко ангел, с прочими иноки в путь богоразумный шествовал еси, образ веры подая человеком.

Руце твои преподобнеи ко Господу воздевая, земли отступал еси, всехвальне Паисие, и свет невещественный множицею лице твое осеняше. Темже и зрящии в сиянии лик твой зело удивляхуся.

Богородичен: Во утробу Твою Вседержитель вселися, Богородице, и человеков смешение от тли обнови, клятву же разрешив и смерть упразднив, темнозрачнаго противника беззаконнаго гордыню смири до конца.

Песнь 5.

Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма окаяннаго,/ но обрати мя и к свету заповедей Твоих/ пути моя направи, молюся.

Духом деяния приходящих к тебе прозревая и попечение милостивное показуя, вся потребная ко спасению им подавал еси, богоносе отче Паисие.

Кроток и нестяжателен, молитвы делатель прилежный, тишины любитель и любве рачитель, Бога усердный почитатель и человеком милостивый предстатель явился еси, богомудре Паисие.

Суесловия, зело верныя соблазняющая, наставленьми и ученьми православными, знаменьми и чудесы сокрушил еси, всеблаженне отче Паисие.

Богородичен: Ева убо прамати клятву рода древле прият, Ты же, Богородице, радость и мир Рождеством Твоим всем принесла еси. Темже Предстательницу человеком Твои раби Тя имамы, Владычице.

Песнь 6.

Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже, спасения моего.

Целомудренно на земли пожив, верных души словесы твоими богатно напитал еси, преподобне отче Паисие, и образ благочестия и чистаго жития всем явил еси.

Яко живительный источник, струи воздержания изливая, множество юных напоил еси, Паисие преподобне, и сих от блуда и нечистоты к потоку благодати привел еси.

Православия догматы множицею в житии твоем богомудренно и умодержавно яве утверждал еси, Паисие преподобне, Святыя Горы богоносный учителю.

Богородичен: Не имам дара слезнаго, еже плакати грехов моих множество, ни умиления, ни стенания спасительнаго, Мати, обаче мольбами Твоими ко Христу, лютое невоздержание мое сокруши.

Кондак, глас 8.

Подобен: Взбранной Воеводе:

Святыя Горы подвижника преславнаго/ и Церкве молитвенника теплаго/ восхвалим в песнех всеусердно,/ верныя к жизни изрядней наставляюща/ и всякая прошения сих исполняюща,/ и тако ему возопиим:/ радуйся, отче Паисие.

Икос:

Яко ангел в последняя времена на Горе Афонстей явился еси, преподобне Паисие, на земли бо благочестне пожив, подвижников древних равностоятель показался еси. Темже с любовию вопием ти таковая:

Радуйся, Каппадокии божественное рождение;

радуйся, Афона велие богатство.

Радуйся, Коницы богодухновенная похвало;

радуйся, киновии Суротийския украшение.

Радуйся, реко многоструйная божественных дарований;

радуйся, поточе неистощимый спасительных врачеваний.

Радуйся, яко прославляеши обители Афонския;

радуйся, яко обитаеши на горе Синайстей.

Радуйся, многих благодатных даров приемниче;

радуйся, о людских невежествиих печальниче.

Радуйся, избавителю люте страждущих;

радуйся, провидче помышлений сокровенных.

Радуйся, отче Паисие.

Песнь 7.

Ирмос: Божия снизхождения/ огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.

Научал еси изрядно наставленьми юных сословие, еже супружество избрати или тесный путь иноческий предпочести. Темже онии с тобою вопияху, поюще: благословен Бог отец наших.

Недуги телесныя терпеливно подъем, в сладость тяжкия болезни вменил еси, преподобне отче Паисие, темже и приял еси от Бога благодать независтную, чудодейственне страсти многоразличныя исцеляти.

Веселится обитель девическая, яже в Суроти, имущи, яко сокровище даров Святаго Духа, мощи твоя, блаженне Паисие, и Вседержителю восклицает: благословен Бог отец наших.

Богородичен: Струями чудес Твоих, Пренепорочная Владычице, земнородных чини от прелести велиара, скорбей, многоразличных бед и болезней телесных, Пречистая, свобождаются.

Песнь 8.

Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Собрания верных на Святей Горе к тебе, отче, усердно притекаху, прияти твою, преподобне, благодать и силу: ты бо от Бога многая дарования стяжал еси и во времена сия мудрый наставник человеком показался еси.

Познавшии, преподобне, жития твоего изряднейшая на горе Афонстей и во инех странах, воспевают Господа Человеколюбца: ты бо словесы и делы, яко звезда, возсиял еси и тьму человеком страждущим разгнал еси.

Всенощными твоими стоянии и многими посты образ изрядна подвижника на Горе Святей и в Синаи явил еси, всеславне Паисие. Ты и ныне ко Христу за люди руце усердно воздеваеши, древним отцем равночестне.

Богородичен: Многими согрешеньми недугующии, житейскими попечении и душевными страстьми обдержимии, к Тебе, Нескверней и Нетленней Владычице, смиренно вопием: молитвами Твоими из рова прегрешений возведи нас.

Песнь 9.

Ирмос: Ужасеся о сем Небо,/ и земли удивишася концы,/ яко Бог явися человеком плотски,/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

От тины прегрешений избавлься, око твое душевное очистил еси и тем болезни человеков лютыя, душевныя и телесныя ясно зрел еси, блаженне Паисие, и всех, приходящих к тебе, на лучшая наставлял еси.

Яко древле отцы, тако и ты неуклонным путем Христовым богоугодно шествовал еси, Паисие чудне, и равно с Тихоном и прочими спостники Афонскими образ святыни во дни наши явил еси.

Яко имеяй дерзновение в Вышних, сохрани молитвами твоими от вреда льстиваго, и злых жития находящих, и бури прегрешений благочестно чтущих память твою и радостно поющих тя, преподобне.

Богородичен: Неистовствующия прилоги лукаваго отжени державою Твоею, Богородице Дево, яко родила еси чудно Христа, Победителя Славнаго, потребившаго гордыню древняго змия и главу того сокрушившаго.

Светилен:

Преподобнаго Паисия, Горы Святыя славу, Суротийския обители хранителя, путевождя молящихся и юных наставника в пениих почтим, славословяще божественне житие того и деяния.

Слава, и ныне, Богородичен:

Дево Преславная, христиан утверждение, благоговейное предстательство немощным человеком, болящим исцеление и страждущим крепосте, вселенныя покрове! Благочестно Тя воспеваем, раби Твои.

На хвалитех стихиры, глас 8.

Подобен: Что вас наречем:

Отче преподобне Паисие!/ Фарасския веси благое прозябение,/ Коницы многоценное сокровище,/ Суротийския обители похвало и радование,/ Горы Синайския подвижниче,/ Афона величайшее украшение,/ теплый о нас молитвенниче,/ моли спастися душам нашим.

Отче всеблаженне Паисие!/ Древних подвижников подобниче,/ добродетелей смиренномудрый исполнителю,/ монахов предивный наставниче,/ юных мудрый учителю,/ болящих известный целителю,/ демонов и нечаемых зол прогонителю,/ моли спастися душам нашим.

Отче досточудне Паисие!/ Бедствующих теплый предстателю,/ молящихся скорый услышателю,/ связуемых страстию наркомании избавителю,/ благодати Духа Святаго сосуде избранный,/ ангелов собеседниче и преподобных сожителю,/ Царствия Небеснаго наследниче,/ моли спастися душам нашим.

Отче богоносе Паисие,/ о всех, верою тя воспевающих,/ не оскудей тепле молитися,/ стяжал бо еси дерзновение ко Господу/ и многими даровании от Него обогатился еси,/ прорицати будущая, яко настоящая,/ исцеления подавати душевная и телесная/ и к Царствию Небесному верныя путеводити.

Слава, глас тойже:

Преподобне старче Паисие,/ во всю землю изыде глас наставлений твоих,/ ты бо, яко ангел во плоти пожив,/ живоносная евангельская словеса возвещал еси/ и, образ терпения верным показуя,/ совершенне на Бога уповати научал еси./ Мы же, ведуще тя наставника мудра/ и ходатая пред Богом тепла/ с верою и любовию вопием ти:/ моли спастися душам нашим.

И ныне, Богородичен:

Небесная поют Тя,/ Обрадованная, Мати Безневестная,/ и мы славословим неизследованное Твое Рождество,/ Богородице, моли спастися душам нашим.

На Литургии служба вся преподобническая

Молитва

О, преподобне и богоносне отче Паисие, богомудрый наставниче, лествицею добродетелей от земли в Царствие Небесное восшедый и благодать, во еже ходатайствовати о нас пред Престолом Всемилостиваго Бога, приемый!

Ты, во дни земнаго жития тяжкия болезни претерпевая и благодарственная пения за вся Богу воздавая, от Него благодать восприял еси телесныя недуги исцеляти и души, грехми омраченныя, врачевати. Ныне, предстоя Престолу Вседержителя, Того милосердие к нам приклони, да твоим молитвенным предстательством дарует нам Господь крепость во искушениих, мужество в борьбе с духами злобы поднебесныя, прощение всех наших грехов, яже от юности нашея даже до настоящаго дне сотворихом словом, делом и помышлением, и да научит нас, яже подобает благое творити, во еже богоугодне житие скончати и ближним с любовию и смирением послужити.

Ей, отче святый, паки молим тя: помози нам пути греховнаго отвратитися, плоды же покаяния и обновления во Христе душ наших Господеви принести и во образ жития твоего, еже любве и милосердия исполнено бысть, уз греховнаго жительства разрешившеся, к Небесным Чертогом взыти, идеже вкупе с тобою сподобимся прославляти Бога в Троице славимаго Отца и Сына и Святаго Духа во веки веков. Аминь.

Источник: Утверждено Священным Синодом Русской Православной Церкви 8 декабря 2020 года (журнал № 99).