Август

Месяца августа в 7-й день

Попразднство Преображения Господня и преподобнаго Антония Оптинскаго

На велицей вечерни

На Го́споди, воззвáх: стихи́ры на 8, пра́здника 3 и свята́го 5, глас 2:

Прииди́те, лю́дие Бо́жии,/ днесь просла́вим ста́рца О́птинскаго,/ смире́нием бра́тии послужи́вшаго,/ я́ко крин се́льный процве́тшаго/ и доброде́тельми возблагоуха́вшаго,/ и согла́сно воспои́м ему́:/ преподо́бне о́тче наш Анто́ние,/ в ра́йския сады́ ны́не пресели́выйся/ и та́мо во блаже́нстве вы́ну пребыва́яй,// моли́ся при́сно ко Го́споду, да спасе́т ду́ши на́ша.

Прииди́те, мона́хов мно́жество,/ днесь почти́м па́мять сла́внаго Анто́ния,/ Христа́ всем се́рдцем возлюби́вшаго/ и Того́ ра́ди кре́пко подвиза́вшагося./ Весели́ся ны́не, оби́тель О́птинская,/ мо́щи преподо́бнаго храня́щи,/ я́ко адама́нта преди́внаго,// по́двигом до́брым тя просла́вившаго.

Весели́тся ны́не Це́рковь Ру́сская/ и ликовству́ет во́инство Небе́сное,/ ублажа́юще по́двиг жития́ преподо́бнаго:/ той бо, сло́во ева́нгельское исполня́я,/ отве́ржеся во́ли своея́/ и Подвигополо́жнику после́дова./ Те́мже, о́тче блаже́нне Анто́ние,// моли́ Христа́ Бо́га о всех, ве́рою тя почита́ющих.

Прииди́те, ве́рнии,/ преди́внаго отца́ восхва́лим,/ той бо, по сло́ву а́ввы своего́,/ из пу́стыни О́птинския во Малояросла́вец град прии́де,/ иде́же оби́тель мона́шескую устро́ив,/ я́ко па́стырь до́брый и оте́ц чадолюби́вый,/ неле́ностно ста́до Христо́во упа́сл есть./ Те́мже, о́тче Анто́ние,/ не забу́ди нас гре́шных,// пра́зднующих па́мять твою́.

Сла́ва, глaс 6:

Боже́ственными блиста́ньми весь озари́лся еси́, преподо́бне Анто́ние,/ егда́ душа́ твоя́, доброде́телию смире́ния благоуха́ющи,/ хра́мина Ду́ху Свято́му устро́ися,/ в не́йже и сотвори́ Себе́ Госпо́дь оби́тель досто́йную./ Те́мже, я́ко име́я дерзнове́ние ко Святе́й Тро́ице,// моли́ спасти́ся душа́м на́шим.

И ны́не, пра́здника.

Вход. Проки́мен дне. И чте́ния три преподо́бническая.

На лити́и стихи́ра пра́здника, и преподо́бнаго, глас 1:

Красото́ и сла́во Це́ркве Ру́сския,/ свята́я пу́стынь О́птинская!/ Воззри́ на сла́ву чад твои́х:/ святы́х бо мона́хов собо́ри ны́не/ с Небе́с на тя уми́льно взира́ют/ и вку́пе со А́нгельскими ли́ки/ преподо́бнаго Анто́ния досто́йно ублажа́ют,// и мы гре́шнии пе́сньми духо́вными того́ велича́ем.

От роди́телей твои́х благоче́стие унасле́дивый/ и пути́ оте́ческаго не уклони́выйся,/ поспешеству́ющей ти си́ле Бо́жией,/ по Христе́ поспеши́л еси́, Анто́ние,/ всегда́ име́я в се́рдце и́мя Его́ свято́е,/ во е́же вы́ну взыва́ти:// благослови́, душе́ моя́, Го́спода, и не забыва́й всех воздая́ний Его́.

Сла́ва, глас 8:

Почита́я бра́та и духо́внаго отца́ твоего́, прехва́льнаго ста́рца Моисе́я,/ иску́сен води́тель душ челове́ческих соде́лался еси́,/ сло́вом Бо́жиим чад твои́х пита́я/ и Животворя́щих Та́ин приобща́я./ Те́мже, богому́дре о́тче Анто́ние,/ сподо́би ны пребыва́ти в благода́ти Бо́жией// и вку́пе с тобо́ю и́мя Его́ прославля́ти.

И ны́не, пра́здника.

На стихо́вне стихи́ры преподо́бнаго, глас 5:

Ра́дуйся, преподо́бне Анто́ние,/ ты бо дом души́ своея́/ на тве́рдем ка́мени за́поведей Христо́вых до́бре устро́ил еси́,/ егда́ же во́лны искуше́ний на тя воздвиза́хуся,/ тогда́ непоколеби́м пребыва́л еси́,/ Сам бо Христо́с Бог избра́ смире́нное се́рдце твое́/ и всели́ся в нем,// я́ко в благоукраше́нней хра́мине.

Стих: Честна́ пред Го́сподем// смерть преподо́бных Его́.

Ра́дуйся, оби́тель О́птинская,/ ты бо возрасти́ла еси́/ сонм муже́й соверше́нных,/ в ме́ру во́зраста Христо́ва дости́гших,/ ве́ру соблю́дших и коне́ц досто́йный прие́мших./ Те́мже еди́наго от них,/ преподо́бнаго Анто́ния,/ па́мять ны́не соверша́ем,// пе́сненными похвала́ми ублажа́юще.

Стих: Блаже́н муж, боя́йся Го́спода,// в за́поведех Его́ восхо́щет зело́.

Ра́дуются ны́не мона́хов сосло́вия,/ обрели́ бо суть моли́твенника чу́дна и преди́вна,/ преподо́бнаго а́вву Анто́ния,/ и́же у престо́ла Госпо́дня ны́не предстои́т/ и Влады́ку всех за ны мо́лит./ Те́мже к нему́ воззове́м:/ не оста́ви нас гре́шных в беззако́ниих умре́ти,/ испроси́ нам у Милосе́рднаго Го́спода/ оставле́ния грехо́в и прегреше́ний// и душа́м на́шим ве́лия ми́лости.

Сла́ва, глaс 3:

Ра́дуется днесь земля́ Калу́жская,/ из нея́ бо произы́де преподо́бный Анто́ний,/ и́же, по́двигом до́брым подвиза́вся,/ в скиту́ О́птинстем, я́ко фи́никс процвете́/ и, плоды́ духо́вными ча́да своя́ пита́я,/ мона́хов мно́жество ко Христу́ приведе́./ Ны́не же Престо́лу Бо́жию предстои́т, глаго́ля:/ се аз, Го́споди, и ча́да моя́,// и́хже ми́лостивно приими́, Благоутро́бне.

И ны́не, пра́здника.

Тропа́рь, глас 1:

Украси́лся еси́, о́тче Анто́ние, смире́нием,/ благода́тию же о́чи душе́внеи просвети́л еси́,/ разсужде́ние, я́ко верх доброде́тели, стяжа́л еси́/ и послуша́нием Бо́гу угоди́л еси́,/ сего́ ра́ди со умиле́нием зове́м ти:/ сла́ва Да́вшему ти кре́пость,/ сла́ва Просла́вльшему тя,// сла́ва Подаю́щему тобо́ю нам исцеле́ния.

На у́трени

На Бог Госпо́дь: тропа́рь пра́здника, два́жды. Сла́ва, тропа́рь свята́го. И ны́не, пра́здника.

По 1-м стихосло́вии седа́лен, глас 4:

О́птины пу́стыни досто́йный насе́льниче и тоя́ сла́вный подви́жниче, преподо́бне о́тче Анто́ние, ты, смире́нием приобре́т высо́кая и нището́ю стяжа́в бога́тая, в Небе́сный град досто́йно всели́лся еси́.

Сла́ва, и ны́не, пра́здника.

По 2-м стихосло́вии седа́лен, глас 4:

Ада́мову ве́тхость низложи́в, весь во Христа́ обле́клся еси́ и, стра́сти плотски́я победи́в, я́ко ве́рный учени́к Христо́в, жизнь ве́чную со святы́ми насле́довал еси́.

Сла́ва, и ны́не, пра́здника.

По полиеле́и седа́лен, глас 3:

Богому́дрым о́ком се́рдца вы́шняя бла́га созерца́я, кра́сная же и сла́дкая ни́жних презре́в, в послуша́ние бра́ту твоему́ преподо́бному Моисе́ю вда́лся еси́, те́мже и Госпо́дь благослови́ тя да́ром разсужде́ния и ста́до ове́ц Свои́х, я́ко благоиску́сному наста́внику, вручи́. Мона́си же, зря́ще тя в по́двизех пребыва́юща, во благоче́стии утвержда́хуся и, я́ко отца́ чадолюби́ваго, любо́вию почита́ху.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Я́ко звезда́ пресве́тлая,/ возсия́ша ми́ру честны́я мо́щи твоя́,/ к ни́мже с ве́рою притека́ющии/ оби́льно дарова́ния прие́млют,/ неду́гующии исцеля́ются,/ ве́рнии благода́тию Бо́жиею утеша́ются./ Те́мже па́мять твою́ ны́не пра́зднующе,/ мо́лим тя, о́тче Анто́ние прехва́льне,/ умоли́ Го́спода дарова́ти нам// мир и ве́лию ми́лость.

Кано́н пра́здника со ирмосо́м на 6, и свята́го на 8.

Кано́н свята́го, глас 8.

Песнь 1.

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Мы́сленнаго фарао́на послуша́нием во́ли Бо́жией потопи́в, преше́л еси́ от сме́рти в живо́т ве́чный и, побе́дный вене́ц от Го́спода прие́м, Небе́сных оби́телей дости́гл еси́.

Ри́зою молниеви́дною оде́явся, преобрази́л еси́ лик души́ своея́ в подо́бие Христо́во, и пред ученики́ свои́ми просия́л еси́ све́том нетле́нным, те́мже в Ца́рствии Све́та при́сно пребыва́еши.

Еле́ню жа́ждущему уподобля́яся, к исто́чнику воды́ живо́тныя припа́л еси́ и Сло́вом Бо́жиим жа́жду се́рдца твоего́ утоли́л еси́. Ны́не, свя́те Анто́ние, наслажда́ешися в Ца́рствии Небе́снем даро́в нетле́нных.

Сту́дное ру́бище ве́тхаго жития́ отри́нув, в бе́лыя ри́зы безстра́стия оде́ялся еси́, непреста́нно и́мя Бо́га на́шего прославля́я, И́мже све́тло просла́влен еси́.

Богоро́дичен: Ороси́ Тя Дух Святы́й, и зачала́ еси́ во утро́бе Бо́га, к Нему́же те́пле проле́й моли́тву Твою́, Пресла́вная Богоро́дице, да да́рует ми благода́ть и сле́зное покая́ние.

Песнь 3.

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

От ю́ности Го́спода взыску́я, в пусты́ню удали́лся еси́, дре́внему Анто́нию подо́бяся, те́мже и дости́гл еси́ Ца́рствия Отца́ Небе́снаго.

Помышле́ния се́рдца своего́ приле́жно обнови́в, я́ко незло́бивый младе́нец, любо́вию ко Христу́ прилепи́лся еси́, преподо́бне, во вся дни и но́щи хвалу́ Тому́ соверша́я.

Благоче́стие возлюби́в, честны́й о́тче, к Бо́гу всем се́рдцем устреми́лся еси́, стра́сти воздержа́нием, по́мыслы же испове́данием усмиря́я, к животу́ безсме́ртному преше́л еси́.

Нощь грехо́вную земна́го жития́ минова́в, Све́та Невече́рняго во дни несконча́емем дости́гл еси́, иде́же Тро́ицу Святу́ю воспева́еши непреста́нно.

Богоро́дичен: Безконе́чно согреша́юще, на ми́лость Твою́ наде́емся и мо́лим Тя: вознеси́ моли́твы Твоя́ о нас ко Го́споду, Ма́ти Пречи́стая.

Конда́к и и́кос пра́здника.

Седа́лен преподо́бнаго, глас 3:

Изведи́ нас из пле́на грехо́внаго, о́тче Анто́ние прехва́льне, ты бо се́ти вра́жия нетру́дно избе́гл еси́ и зло́бу бесо́вскую невре́дно угаси́л еси́. Помози́ же ны́не нам немощны́м, я́ко до́бля игу́мена чту́щим тя.

Сла́ва, и ны́не, пра́здника.

Песнь 4.

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.

Ру́це свои́ на ра́ло возложи́в, николи́же вспять обрати́лся еси́, преподо́бне, и в Небе́сное Ца́рство по сло́ву Бо́жию упра́влен был еси́. Помози́ и нам тебе́ после́довати.

Христа́ Бо́га, Его́же возлюби́л еси́ всем се́рдцем твои́м, и все́ю душе́ю, и всем разуме́нием, с Ним и ны́не пребыва́еши, боголю́бче. Испроси́ и нам моли́твою твое́ю Того́ Еди́наго люби́ти во вся дни живота́ на́шего.

Пле́велы грехо́вных по́мыслов исторга́я, ни́ву се́рдца своего́ неле́ностно возде́лал еси́, о́тче Анто́ние, от нея́же до́брыя кла́сы в пи́щу духо́вную ча́дом твои́м предлага́л еси́.

Любо́вию Боже́ственною уязви́вся, в по́двизех мно́зех преуспе́л еси́, свя́те, мы же, тобо́ю наставля́еми, Христа́ всем се́рдцем люби́ти навыко́хом.

Богоро́дичен: А́дскую кре́пость попра́ла еси́ Рождество́м Твои́м, я́ко родила́ еси́ Бо́га, а́довы вереи́ сокруши́вшаго, те́мже мо́лим Тя, Богоро́дице, помози́ нам от грехо́вных уз свободи́тися.

Песнь 5.

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Путь у́зкий избра́в, преподо́бне, воздержа́нием и посто́м те́ло свое́ утесни́л еси́, те́мже и дости́гл еси́ в широту́ Небе́сную, греху́ непристу́пную.

Нищету́ духо́вную возлюби́в, Ду́хом Святы́м обогати́лся еси́ и, я́ко прему́дрый купе́ц, к Небе́сному сокро́вищу всем се́рдцем прилежа́л еси́.

Еди́наго на потре́бу взыску́я и по подо́бию Бо́жию ду́шу свою́ устроя́я, серде́чныя чистоты́ ева́нгельски дости́гл еси́, преподо́бне, те́мже и Христа́ лицезре́ти сподо́бился еси́.

Анто́нию тезоимени́тому подража́я, нападе́ние бесо́в моли́твою отража́л еси́, богому́дре, и́же, не терпя́ще и́мене Иису́сова, я́ко та́яй воск от лица́ огня́, вспять бежа́ху.

Богоро́дичен: Я́ко ни́ва неора́нная, Богоро́дице Де́во, Клас Живота́ нетле́нно прозябла́ еси́, те́мже Тя, я́ко Пита́тельницу жи́зни на́шея, правосла́вно велича́ем.

Песнь 6.

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Таи́нниче Бо́жия благода́ти и те́плый наш предста́телю, услы́ши у́бо глас наш и помози́ моли́твами твои́ми, да изба́вимся от тли грехо́вныя.

Одоле́л еси́ в лю́тей бра́ни зми́я дре́вняго и, я́ко победи́тель, венце́м побе́дным от Го́спода венча́лся еси́. Помози́ у́бо и нам в духо́вней бра́ни устоя́ти, во́ине Христо́в прекре́пкий.

Ну́жду и́мамы в моли́твеннем предста́тельстве твое́м, преподо́бне о́тче, по вся дни в мы́сленней бра́ни и страсте́х пребыва́юще, окамене́нием бо грехо́вным ду́ши на́ша отяготе́ша.

Ио́не проро́ку уподо́бихомся непослуша́нием во́ли Бо́жией, те́мже и низве́рженнии, вопие́м: от тли, Бо́же, возведи́ нас моли́тв ра́ди Анто́ния досточу́днаго.

Богоро́дичен: Еле́й ми́лости проле́й, Богоро́дице, на гре́шную мою́ ду́шу, зело́ бо ура́нена от мы́сленных враго́в и грехми́ изъязвле́на есть премно́го, и спаси́ мя, раба́ Твоего́.

Конда́к, глас 7:

Преподо́бне о́тче Анто́ние,/ се́рдцем младе́нствуя, Бо́гу пел еси́,/ ра́зумом ста́рец быв,/ ю́ныя наставля́л еси́,/ ду́хом высо́к,/ пред отцы́ и бра́тиею себе́ ума́лил еси́,/ ве́рный же в ма́лом,/ ны́не вели́к в Ца́рстве Бо́жием нарече́н еси́,// я́ко ты еси́ вои́стинну О́птины похвало́.

И́кос:

Вертогра́да О́птинскаго прозябе́ние, скитонача́льниче му́дрый, не жела́л еси́ сла́вы земны́я, но нача́льство смире́нием растворя́л еси́ и, тяготы́ гре́шных во всю жизнь нося́, мно́ги ско́рби претерпе́л еси́, пра́ведне. Сего́ ра́ди помози́ и нам, прему́дрый наста́вниче, да не бежи́м трудо́в доброде́лания, но, весе́лыми нога́ми к Све́ту Невече́рнему иду́ще, Па́схи Небе́сныя дости́гнути возмо́жем и тебе́ благода́рственно воспои́м: преподо́бне Анто́ние, ты еси́ вои́стинну О́птины похвало́.

Песнь 7.

Ирмо́с: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша пою́ще:// отце́в Бо́же, благослове́н еси́.

И́ноческия доброде́тели стяжа́в, огнь страсте́й моли́твами твои́ми угаси́л еси́ и, я́коже о́троцы в пещи́, не опали́вся, Бо́гу воспева́л еси́: отце́в Бо́же, благослове́н еси́.

Я́ко муж иску́сен во бра́нех духо́вных, враги́ безпло́тныя щито́м ве́ры отража́л еси́ и, любо́вию ко Христу́ пламене́я, моли́твенне взыва́л еси́: отце́в Бо́же, благослове́н еси́.

Из че́люстей а́да исхити́ ны гре́шныя, пла́менем страсте́й опаля́емыя, да вку́пе с тобо́ю благода́рне воспое́м: отце́в Бо́же, благослове́н еси́.

Богоро́дичен: Просвети́ о́чи се́рдца моего́, Благослове́нная Влады́чице, да узрю́ Христа́ Бо́га и Тому́ возопию́: отце́в Бо́же, благослове́н еси́.

Песнь 8.

Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Огнь Боже́ственныя благода́ти озари́ клеть се́рдца твоего́, преподо́бне, о́блак же све́тел над ке́лиею твое́ю узре́вше, возопи́ша лю́дие: благослови́те, дела́ Госпо́дня, Го́спода.

При́сно горе́ устремля́яся, боле́знь тя́жкую превозмога́л еси́, по вся дни в моли́тве Бо́гу предстоя́ и вопия́: благослови́те, дела́ Госпо́дня, Го́спода.

О́тче Анто́ние преподо́бне, ты, многоболе́зненному Пи́мену Пече́рскому подо́бяся, со све́тлым лице́м безро́потне три́десять лет боле́знь свою́ претерпева́л еси́, Бо́га в Тро́ице прославля́я.

Богоро́дичен: Луча́ми Невеще́ственнаго Со́лнца озаря́еми, благодари́м Тя, Де́во Всепе́тая, Ты бо Со́лнце Мы́сленное, Христа́, родила́ еси́, ми́ру Еди́наго Спаси́теля.

Песнь 9.

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к.// Те́мже Пречи́стую Богоро́дицу ве́рнии велича́ем.

Упоко́ився вку́пе с бра́том и отце́м твои́м духо́вным, преподо́бным Моисе́ем, ны́не со Христо́м бесе́дуеши, о́тче Анто́ние, мы же утеша́емся у святы́х моще́й твои́х, от них бо прие́млем исцеле́ние.

Святи́теля Митрофа́на почита́телю, во еди́ном дни с ним и прославля́ешися, той бо повеле́ тебе́ труди́тися и моли́тися неле́ностно: те́мже ны́не в раи́ с ним весели́шися и от моще́й свои́х исцеле́ния нам источа́еши.

Источа́ются то́ки благода́тныя от честны́я ра́ки твоея́, о́тче Анто́ние, ты бо неду́гующих исцеля́еши и стра́сти гре́шников врачу́еши, сердца́ ве́рных любо́вию возвеселя́я.

Богоро́дичен: Превы́ше А́нгельских лико́в почте́нную, Тя, Пречи́стая, воспева́ем и, я́ко Богороди́тельницу, ублажа́ем, не отри́ни, Ма́ти, нас гре́шных, но к Ца́рствию Бо́жию путево́дствуй.

Свети́лен:

Возсия́ в се́рдце твое́м Свет Невече́рний, о́тче Анто́ние, к Нему́же еди́ному от ю́ности всем помышле́нием устремля́лся еси́, те́мже и ны́не на Небесе́х во Христе́ лику́еши.

Сла́ва, и ны́не, пра́здника.

На хвали́тех стихи́ры пра́здника 3, и свята́го 3, глас 8:

Богому́дре о́тче Анто́ние,/ ты прему́дростию Бо́жиею му́дрость кня́зя ве́ка сего́ посрами́л еси́/ и вся того́ немощны́я де́рзости терпе́нием победи́л еси́,/ те́мже ублажа́ем па́мять твою́,// сла́вяще Бо́га, ди́внаго во святы́х Свои́х.

Богоно́сне о́тче Анто́ние,/ ты оби́тель Ду́ха Свята́го быв/ и любве́ крыло́ма чад свои́х осеня́я,/ мно́гия ко Христу́ приве́л еси́.// Те́мже ны́не награ́ду ве́лию и́маши во Ца́рствии Небе́снем.

Боголюби́ве о́тче Анто́ние,/ ты Христа́ всем се́рдцем возлюби́л еси́/ и, в послуша́нии бра́ту твоему́ Моисе́ю усоверши́вся,/ кро́тость се́рдца стяжа́л еси́./ Те́мже днесь све́тло пра́зднуем/ и, к ра́це моще́й твои́х [или́: к ико́не твое́й] припа́дающе, взыва́ем:/ О собесе́дниче А́нгелов кро́ткий, предстоя́ Христу́,// моли́ о спасе́нии душ на́ших.

Сла́ва, глас 6:

Посто́м и бде́нием увяди́вый плоть свою́/ и моли́твою непреста́нною к Бо́гу устремля́яся,/ я́ко оре́л, на криле́х смире́ния и послуша́ния/ в Небе́сная воспари́л еси́,/ иде́же любве́ Боже́ственныя наслажда́яся,/ помина́й нас, чту́щих святу́ю па́мять твою́,// о́тче наш блаже́нне и ми́лостиве.

И ны́не, пра́здника.

На Литурги́и слу́жба пра́здника, и преподо́бнаго.

Моли́тва

Преподо́бне и богоно́сне о́тче наш Анто́ние, О́птинская похвало́, услы́ши нас гре́шных, с ве́рою ко святы́м моще́м твои́м припа́дающих. Ты бо в житии́ твое́м, я́ко свети́льник, свет любве́ Христо́вы лю́дем ще́дро дарова́л еси́; я́ко оте́ц чадолюби́вый, вся́каго ка́ющагося с любо́вию принима́л еси́. Те́мже мо́лим тя, о́тче: я́ко име́яй моли́твенное дерзнове́ние ко Святе́й Тро́ице, испроси́ у Го́спода Оте́чество на́ше в ми́ре и благоде́нствии сохрани́ти, наро́д его́ в благоче́стии утверди́ти, па́стырей ре́вностию Бо́жиею испо́лнити, мона́шеския оби́тели соблюсти́, мона́хов стра́ху Бо́жию научи́ти и к моли́твенному де́ланию наста́вити: да вси чи́стым се́рдцем просла́вим Бо́га, в Тро́ице Еди́наго, Отца́, и Сы́на, и Свята́го Ду́ха. Ами́нь.

Источник: Текст утвержден Священным Синодом Русской Православной Церкви 16–17 июля 2020 года (журнал № 34)

В Неде́лю по Преображе́нии Госпо́днем

Собо́ра преподо́бных отце́в, на Валаа́ме просия́вших

На велицей вечерни

Блаже́н му́ж: кафи́сма вся. На Го́споди, воззва́х: стихи́ры воскре́сны 3, и пра́здника 3, и святы́х 4.

Стихи́ры святы́х, глас 8.

Подо́бен: О, пресла́внаго чудесе́!

О, пресла́внаго чудесе́!/ Андре́й, апо́столов Первозва́нный,/ на гора́х Валаа́ма стоя́ше иногда́,/ зе́млю сию́ Кресто́м благословля́я/ и возсия́ти зде благода́ти Бо́жией провеща́я./ Ны́не же сбытие́ проро́чества зрим,/ собо́р святы́х Валаа́мских пра́зднующе,/ в ни́х бо благода́ть Госпо́дня/ вои́стину ве́лия яви́ся.

О, пресла́внаго чудесе́!/ Посреде е́зера вели́каго/ гра́д стои́т святы́й,/ егоже со́лнце – Христо́с,/ его́же луна́ – Пресвята́я Де́ва,/ егоже зве́зды – отцы преподо́бнии,/ в подвизе молитвеннем просиявшии,/ да вси, на свети́ла чу́дная взира́юще,/ пу́ть к Небеси́ обрета́ют.

О, пресла́внаго чудесе́!/ На безпло́днем ка́мени сад дивный процвете́,/ ра́йския красоты́ испо́лненный;/ его́же Се́ргий и Ге́рман насади́ша,/ и отцы́ мно́зи слеза́ми напои́ша,/ Госпо́дня же благода́ть возрасти́./ Сего́ ра́ди плода́ми его́ сла́дкими/ христиа́не изоби́льно насыща́ются/ и Бо́га, ди́внаго во святы́х Свои́х, прославля́ют.

О, чудотво́рцы Валаа́мстии сла́внии,/ кто воспое́т досто́йно труды́ и по́двиги ва́ша?/ Се́ргия и Ге́рмана житие́ сокрове́нное,/ Авраа́мия благоче́стие ре́вностное,/ Наза́рия му́дрость и милосе́рдие,/ Ге́рмана апо́стольское пропове́дание,/ Анти́пы человеколю́бие сострада́тельное,/ му́чеников дре́вних и но́вых терпе́ние тве́рдое?/ Моли́те, отцы́ святи́и, спасти́ся нам.

Сла́ва, глас 4:

Сла́ва Твоя́, Христе́ Боже́,/ возсия́ на гора́х Валаа́ма,/ я́коже на Фаво́ре иногда́,/ днесь бо зрим ве́лий сонм святы́х,/ Све́том Невече́рним па́че со́лнца блиста́ющих,/ и, виде́нию сему́ чудя́щеся,/ стра́хом и ра́достию одержи́ми глаго́лем:/ Го́споди, добро́ есть нам зде бы́ти,/ моли́твами святы́х оте́ц на́ших/ просвети́ и спаси́ ду́ши на́ша.

И ны́не, Богородичен догма́тик гла́са.

Вход. Проки́мен дне и чте́ния преподобническая.

На лити́и стихи́ры пра́здника и преподо́бных Се́ргия и Ге́рмана, глас 3:

Безнача́льнаго Све́та,/ из тьмы́ свет ди́вный созда́вшаго/ и све́том позна́ния Своего́/ просвети́вшаго ве́рных сердца́,/ Человеколю́бца Христа́ возлюби́вше, отцы́ Богому́дрии/ во све́те Того́ повеле́ний до́бре ходи́ша/ и, от Него́ све́том благода́ти просве́щшеся,/ нам, со тьмо́ю страсте́й борю́щимся,/ свети́льницы яви́шася./ И́хже моли́твами, Светода́вче Го́споди,/ умы́ просвети́ и сердца́ на́ша очи́сти,/ я́ко Благоутро́бен.

Сла́ва, святы́х, глас 7:

Манове́нием Ду́ха Святаго/ ко острово́м Валаа́мским пришли́ есте́, отцы́ честни́и,/ да, ве́тхаго челове́ка совле́кшеся,/ во све́тлость Христо́ву облече́теся./ И, жития́ жесто́каго не убоя́вшеся,/ вои́стину яви́лися есте́ преподо́бных светоза́рный верх./ Те́мже Светопода́телю о нас моли́теся,/ да просвети́т Собо́ю ду́ши на́ша.

И ны́не, пра́здника.

На стихо́вне стихи́ры воскре́сны гла́са.

Сла́ва, глас 6.

Подо́бен: Все отло́жше:

Жите́йскую пучи́ну преплы́вше,/ о́строва Валаа́ма, я́ко приста́нища спаси́тельнаго,/ дости́гли есте́, богоблаже́ннии отцы́,/ и, красоту́ его́ пусты́нную возлюби́вше,/ в безмо́лвии зе́млю серде́ц возде́лали есте́/ и ди́вныя цве́ты доброде́телей возрасти́ли есте́,/ небе́сными арома́ты благоуха́ющия./ Те́мже лю́дие православнии, я́ко пче́лы му́дрыя,/ в та́йный ваш сад притека́ти возлюбиша,/ ме́да духо́внаго и́щуще,/ ра́вно всем подава́емаго Бо́гом/ рука́ми ва́шими, отцы́ святи́и.

И ны́не, пра́здника.

На благослове́нии хле́бов тропа́рь пра́здника два́жды, и святы́х еди́ножды.

Тропа́рь святы́х, глас 3:

Днесь оби́тель Валаа́мская/ на трапе́зу духо́вную всех созыва́ет,/ соверша́ющи па́мять богоно́сных отце́в,/ по́двиги и́ноческими ю украси́вших./ Стеце́мся, ве́рнии, преподо́бных собо́р восхва́лим/ и житию́ их честно́му поревну́им,/ да прича́стницы Све́та Трисо́лнечнаго яви́мся,/ пою́ще Отца́ и Сы́на, и Ду́ха Свята́го во ве́ки.

На утрени

На Бог Госпо́дь: тропа́рь воскре́сен, два́жды. Сла́ва, святы́х. И ны́не, пра́здника. По стихословиих седа́льны воскре́сны гла́са с припе́вы и Богоро́дичны их.

Велича́ние святы́м:

Велича́ем вас,/ вси святи́и, на Валаа́ме просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

И́но велича́ние:

Ублажа́ем вас,/ преподо́бнии отцы́ на́ши Валаа́мстии,/ и чтим святу́ю па́мять ва́шу,/ наста́вницы мона́хов/ и собесе́дницы ангелов.

Псало́м избра́нный: Терпя́, потерпе́х Го́спода, и внят ми:

По полиеле́и, ипакои́ гла́са.

Сла́ва, седа́лен святы́х, глас 3:

Днесь все отце́в Валаа́мских мно́жество, я́ко еди́неми усты́, моле́ние Тро́ице Святе́й прино́сит, глаго́ля: о, Всеще́дрый Царю́, низпосли́ бра́тиям на́шим, су́щим на земли́, благода́ть Твою́, да на по́двиги, любве́ ра́ди Твоея́, дерза́юще, бу́дут соль до́брая, мир от истле́ния храня́щая; вода́ жива́я, жа́жду духо́вную утоля́ющая; лучи́ пресветлыя, ду́ши людски́я просвеща́ющия; и та́ко жизнь ве́чную насле́дити сподо́бятся со все́ми святы́ми. Ами́нь.

И ны́не, пра́здника.

Ева́нгелие, воскре́сно. Сла́ва: Моли́твами апо́столов: И ны́не: Моли́твами Богоро́дицы: По 50-м псалме стихи́ра воскре́сна.

Кано́н воскре́сен на 4, пра́здника на 4 и святы́х на 6. Катава́сия пра́здника.

Кано́н святы́х, глас 8.

Песнь 1.

Ирмо́с: Песнь во́зслем, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м, Тебе́, Еди́ному Влады́це.

Припев: Сла́ва Тебе́, Бо́же наш, сла́ва Тебе́.

Песнь хвале́бную воспе́ти ны́не сподо́би, Спа́се, отце́м на́шим, о ни́хже оби́тель Валаа́мская духо́вне утверди́ся и ми́ру свет бысть.

Припев: Вси святи́и Валаа́мстии, моли́те Бо́га о нас.

Или́: Преподо́бнии отцы́ наши, моли́те Бо́га о нас.

Апо́столов Первозва́нный дре́вле стопа́ми свои́ми го́ры Валаа́мския освяти́ и, крест ка́менный воздви́г, прорече́, я́ко и́мать возсия́ти зде благода́ть Госпо́дня.

Руси́ кре́щшейся, мрак но́щи и́дольския на све́тлость дне преложи́ся. Тогда́ и о́стров Валаа́м житие́м и́ноческим украси́ся, Се́ргию и Ге́рману досточу́дным от стран восто́чных прише́дшим.

Сла́ва: Я́ко се́мена до́брая яви́лися есте́, отцы́ и нача́льницы на́ши, Се́ргие и Ге́рмане, вы бо, трудолю́бне зде подвиза́вшеся, стори́чный клас прозя́бли есте́.

И ны́не: Невестоводи́ши ко Христу́ полки́ и́ноческия, Богоро́дице Де́во, и́же, Тя Взбра́нную Воево́ду иму́ще, к подвиго́м дерза́ют, Ты бо исперва сосу́д де́вства Твоего́ Бо́гу дар принесла́ еси́.

Песнь 3.

Ирмо́с: Утвержде́й руко́ю Твое́ю, Сло́ве Бо́жий, Небеса́/ просвеще́нием Твоего́ и́стиннаго позна́ния,/ утверди́ и нас, на Тя наде́ющихся сердца́.

Израсти́ пусты́ня Валаа́мская цветни́к духо́вный, житие́м по́стническим благоуха́яй. Прииди́те, боголю́бцы, добро́тою его́ наслади́мся и вся́кую печа́ль мирску́ю отринем.

Треволне́ния грехо́вная по́двиги мно́гими обузда́ли есте́, богоно́снии отцы́, и, на высоту безстра́стия возше́дше, Христа́, я́ко би́сер честны́й, обрели́ есте́.

Житие́ ва́ше ева́нгельское бысть ве́ры пра́выя пропове́дание, и́мже уловле́н, Авраа́мий до́блий ри́зы и́ноческия прия́т и гра́ду Росто́ву свети́ло яви́ся.

Сла́ва: О, Валаа́ме, коль красно́ десни́ца Вы́шняго тя живописа́! Ты се́рдце вся́кое на похвале́ние Созда́теля дви́жеши, ле́потою свое́ю бытие́ Бо́жие возвеща́я.

И ны́не: Тя, Пречи́стая Де́во, смире́нно мо́лим: мяте́ж душ на́ших в тишину́ преложи́ и у́мныя о́чи просвети́, да, созерца́юще красоту́ Сы́на Твоего́, не прилепи́мся сла́достем мира сего.

Конда́к и и́кос пра́здника.

Конда́к святы́м, глас 7:

На гора́х Валаа́ма, отцы́ преблаже́ннии, всели́лися есте́,/ сло́во ева́нгельское сердцы́ благи́ми восприи́мше;/ моли́твами, слеза́ми и мно́гими злострада́нии/ усе́рдно Христо́ви сораспя́лися есте́;/ сего́ ра́ди, блиста́ньми Све́та Его́ озаря́еми,/ свети́льницы ми́ру яви́лися есте́, велегла́сно пропове́дающе,/ я́ко Сы́н Бо́жий е́сть вои́стину О́тчее сия́ние.

И́кос:

Воста́нем, моля́щеся, бра́тие, и у́зрим у́мными очесы́ ли́ки оте́ц на́ших, и́же от лет дре́вних и до ны́не на ме́сте сем святе́м трудолю́бне подвизашася и оби́тель Валаа́мскую во сла́ву Преображе́ния Спа́сова созда́ша; ду́ши же своя́ благода́тию Его́ во оби́тели Све́та преобрази́ша, вся концы́ земли́ Ру́сския и да́льныя страны́ озаря́юще и велегла́сно пропове́дающе, я́ко Сын Бо́жий есть вои́стину О́тчее сия́ние.

Седа́лен святы́м, глас 6:

Сла́вою земно́ю возгнуша́вшеся, страх Бо́жий и па́мять сме́ртную стяжа́ли есте́, отцы́ богому́дрии, те́мже, по вся дни и но́щи сле́зы точа́ще и у́мно ко стопа́м Влады́ки припа́дающе, к неболе́зненному поко́ю пришли́ есте́. Моли́те о нас при́сно, честну́ю па́мять ва́шу све́тло соверша́ющих.

Сла́ва, и ны́не, пра́здника.

Песнь 4.

Ирмо́с: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Целому́дрия рачи́телей мно́жество под кров оби́тели Валаа́мския стеко́шася, юже, я́ко ла́вру честну́ю и вели́кую, устро́иша и о́браз соверше́ннаго жития́ и́ноческаго се́верным страна́м земли́ Ру́сския показа́ша.

И́мене Бо́жия призыва́нием, слеза́ми и по́тами зе́млю сию́ освяти́ли есте́, Корни́лие, оби́тели Палеостро́вския основа́телю, и Арсе́ние, Коневе́цкому о́бщему житию́ нача́льниче. Те́мже, я́ко отцы преподобныя, вас почита́ем.

Свя́тостию жития́ твоего́ удиви́л еси́ ангелы и челове́ки, о́тче Алекса́ндре, в рассе́лине скалы́ на о́строве пусты́ннем подвиза́яся. И ны́не от нас ду́хом не отступа́еши, а́ще и на Сви́ри те́ло твое́ нетле́нное почива́ет.

Сла́ва: Восхвалим днесь, вернии, преподобных Савва́тия Солове́цкаго и Евфроси́на Синеезерскаго, с ними же и Генна́дия Новгородскаго, святи́телей украше́ние, и все отце́в мно́жество, зде благоче́стно некогда пожи́вших и обитель Валаамскую подвиги своими преславно украсивших.

И ны́не: Я́ко Ми́лостива, приими́, Влады́чице, моле́ния избра́нных Твои́х, Афана́сия, строи́теля Ся́ндемскаго, и Адриа́на Ондру́совскаго, днесь за оби́тель Валаа́мскую предстательствующих, я́же их духо́вне породи́.

Песнь 5.

Ирмо́с: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.

Тле́нная на нетле́нная пременивше, не устраши́лися есте́, отцы́ честни́и, неви́димых враго́в боре́ния, па́че же ви́димых враго́в де́рзости тве́рдостию испове́дания пра́ваго посрами́ли есте́.

Инове́рных зло́бу кро́тостию ва́шею посрами́ли есте́, во́ини Христо́вы три́десять и три с Ти́том свяще́нным; и, я́коже а́гнцы закла́ни бы́вше, побе́дныя по́чести на Небесе́х восприя́ли есте́.

Источа́ют мо́щи ва́ша, Се́ргие и Ге́рмане, бога́тно исцеле́ния, а́ще и в скале́ глубо́це крыемы нахожде́ния ра́ди иноплеме́нных. Те́мже, к заступле́нию ва́шему притека́юще, от бед многоразли́чных спаса́емся.

Сла́ва: Гнев Бо́жий бу́рею потопи́ нечести́вых у брего́в Валаа́мских иногда́. Те́мже Ма́гнус, све́йский краль, еди́н сме́рти горькия избе́гнув, покая́ние облобыза́ и мних нарече́ся.

И ны́не: Рабы́ Твоя́ сохраня́й, Богоневе́сто, от вся́каго зла и в ве́ре правей утвержда́й, Тя бо Столп Непоколеби́мый Це́ркве и́мамы.

Песнь 6.

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о, Упра́вителю, и спаси́.

Егда́ Наза́рий преподо́бный жезл па́стырский на Валаа́ме прия́т, тогда́ оби́тель от разоре́ния лю́терскаго возста́ви и ста́до и́ноческое па́ки собра́. Те́мже, я́ко вторы́й основа́тель Валаа́мский прославля́ется.

Ше́ствовати путе́м оте́ческим наставля́л еси́ ча́да твоя́, о́тче Наза́рие, сам и́нок соверше́н быв; и возрасти́л еси́ я, доброде́тельми па́че лу́ч со́лнечных сия́ющая и вся земны́я концы́ просвеща́ющая.

Научи́л еси́ наро́ды алеутския сла́вити И́стиннаго Бо́га, о́тче наш Ге́рмане, благослове́нием и моли́твами преподо́бнаго Наза́рия укрепля́емь, сего́ ра́ди апо́стол Аме́рики наименова́лся еси́.

Сла́ва: Устна́ми ра́дости пое́м ны́не кра́сный ваш пра́здник, отцы́ святи́и. Вы же, любо́вию бра́тскою дви́жеми, ру́це преподо́бныя к Бо́гу воздева́ти о нас не преста́йте и в час су́дный бу́дите нам хода́таи теплии.

И ны́не: Ю́же и́ноческому сосло́вию и всем христиа́ном Ма́терь дарова́л еси́, приими́, Всеблаги́й Царю́, со отцы́ на́шими Тебе́ моля́щуюся, и оби́тель Валаа́мскую утверди́, да ве́рою и любо́вию сла́вит Тя во ве́ки.

Конда́к и и́кос воскре́сен.

Песнь 7.

Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.

Моли́твы непреста́нныя и трезве́ния наста́вник прему́дрый был ес́и, о́тче Льве́, О́птинская похвало́, ты бо, на Валаа́ме благопло́дно пожи́в, и́ноки вода́ми Ду́ха напои́л еси́, я́ко струя́ исто́чника Паи́сиева.

Отца и покрови́теля имену́ет тя оби́тель Валаа́мская, святи́телю Игна́тие, сию́ бо зело́ возлюби́л еси́ и, я́ко ангел Храни́тель, ей явился еси́, те́мже не преста́й моля́ся, да и́ноцы ея́ степе́нями духо́вными удо́бно к Не́бу восхо́дят.

Труда́ми Дамаскина́, игу́мена боголюби́ваго, назда́ся оби́тель Валаа́мская, яко ди́вный и вели́кий град, гра́жданы в себе́ имеяй житие́м подви́жническим украше́нныя и мно́гим приходя́щим лю́дем е́же ко спасе́нию по́мощь подаю́щия.

Сла́ва: Афо́нския горы́ до́брое воспита́ние, Валаа́ма при́сное ра́дование ты еси́, о́тче наш Анти́по! Благода́ти бо ста́рчества испо́лнен быв, ду́ши стра́ждущия иску́сно цели́л еси́. И ны́не от моще́й твои́х нам врачева́ния ми́лостивно подае́ши.

И ны́не: Храни́т Пресвята́я Де́ва оби́тель Свою́ и пе́стунствует и́ночествующих собо́ры, житие́ равноа́нгельное провожда́ти науча́ющи, в не́мже Аре́фа и Илия́ све́тло просия́сте и Верхоту́рью свети́льницы яви́стеся.

Песнь 8.

Ирмо́с: Разжжи́те пещь седмери́цею,/ до́ндеже до конца́ разгори́тся,/ мучи́тель рече́ халде́ом,/ Ана́нию, Аза́рию и Мисаи́ла, вложи́те я в ню,/ и́же о́бразу злато́му не поклони́шася, но глаго́лаху:/ мы Бо́га и́мамы на Небесе́х,/ Ему́же слу́жим и поклоня́емся во ве́ки.

И́́ноцы терпеливодушнии, отцем древним подо́бницы! Вы любве́ ра́ди Христо́вы пло́ти своя́ распя́сте, в годи́ну же богобо́рческую на по́двиги му́ченическия устремистеся и ду́ши своя́ за Христа́ положи́сте.

Несть Бог, ре́ша безу́мнии в сердца́х свои́х. Вы же, отцы́ святи́и Иереми́е, Андрони́че и Се́ргие, о́браз Христо́в в себе́ нося́ще, Сего́ я́вственне пропове́дали есте́. Те́мже, и убие́ни от нечести́вых бы́вше, ны́не живете́ на Небесе́х.

Юдо́ль земну́ю преше́дше, к неболе́зненному поко́ю востекли́ есте́, отцы́ на́ши Аре́фо и Патри́кие, ско́рби бо мно́гия и изгна́ние от беззако́нных претерпе́сте, в рабо́тах тя́жких тружда́ющеся, оба́че ду́хом непоколеби́ми пребы́сте.

Благослови́м Отца́, и Сы́на, и Свята́го Ду́ха Го́спода.

Тро́ичен: Сла́вим Бо́га И́стиннаго, я́коже отцы́ нас научи́ша, и Сего́ Тро́ицу бы́ти испове́дуем – ре́ша богоотсту́пником преподо́бнии Афана́сий, Галактио́н и Таврио́н, и от них мученическую кончину прия́ша.

И ны́не: Иска́паеши сле́зы те́плыя, Ма́ти милосе́рдая, о всех заблу́ждших ча́дех Твои́х, я́ко же́ртву благово́нную ко Престо́лу Вседержи́телеву принося́щи моли́твы страстоте́рпец, и́же за убива́ющих я моля́хуся.

Песнь 9.

Ирмо́с: Благословен Господь, Бог Израилев,/ воздвигнувый рог спасения нам/ в дому Давидове, отрока Своего,/ в нихже посети нас Восток с высоты/ и направил ны есть на путь мира.

Ле́тнюю па́мять ва́шу соверша́юще днесь, отцы́ преподо́бнии, мо́лим усе́рдно: пода́йте нам, немощны́м, от кре́пости ва́шея, да не похвали́телие то́чию, но па́че подража́телие дел ва́ших яви́мся.

Ублажи́м ны́не досто́йно вся отцы́ и бра́тию на́шу, имену́емыя и безыме́нныя, явле́нныя и неявле́нныя, благоче́стно зде пожи́вшия и упокое́ния ве́чнаго со святы́ми сподо́бившияся.

Пра́вды Бо́жия алка́сте, отцы́ досточу́днии, в по́двизех терпя́ще, в гоне́ниих не стужа́юще. Ны́не же вси ку́пно пи́щи нетле́нныя насыща́етеся, любо́вию бра́тскою соединя́еми.

Сла́ва: Неизве́дани путие́ Госпо́дни, и кто позна́ет та́йну дний гряду́щих? Но ты, Валаа́ме, храни́ ве́ру Правосла́вную, я́коже о́тцы тебе́ преда́ша, и свет ми́ру бу́ди.

И ны́не: Умолка́ет вся́кое уны́ние, и ра́достию сердца́ ве́рных исполня́ются, на о́браз Твой взира́ющих, Богоневе́сто, его́же Али́пий, и́нок освяще́нный, благоле́пне написа́.

Свети́лен воскре́сен.

Сла́ва, глас 2:

Нощь греха́ отри́нувше, сы́нове дне яви́стеся, отцы́ честни́и. Те́мже в ра́дости неизрече́нней ны́не сла́ву Бо́жию на Небесе́х зрите́, Христа́ славосло́вяще, призва́вшаго вас из тьмы в чу́дный Свой свет.

И ны́не, пра́здника.

На хвали́тех стихи́ры воскре́сны 4, и святы́х 4, со сла́вным.

Стихи́ры святы́х, глас 5.

Подо́бен: Ра́дуйся:

Ра́дуются Не́бо и земля́,/ ве́лий сонм отце́в Валаамских зря́ще,/ в не́мже Се́ргий и Ге́рман, я́ко велия светила сияют,/ с нимиже Новгоро́дстии святителие Иоа́нн и Генна́дий величаются;/ Авраа́мий, Корни́лий и Арсе́ний/ вку́пе со Алекса́ндром и Савва́тием прославля́ются;/ Афана́сий со Адриа́ном лику́ют све́тло/ и Евфроси́н чу́дный ублажа́ется./ Темже и мы Христу́ благодарне возопии́м:/ сла́ва Тебе́, Бо́гу на́шему,/ показа́вшему нам Свет Безнача́льный.

Днесь оби́тель Валаа́мская,/ я́ко ма́терь о ча́дех, весели́тся,/ сыно́в свои́х глаша́ющи по и́мени,/ и́же украси́ша ю све́тло/ и просла́виша до коне́ц земли́:/ Наза́рия, игу́мена боголюби́ваго,/ Иувена́лия и Ге́рмана, ева́нгельския пропове́дники,/ Льва́, Игна́тия и Анти́пу,/ Илию́ и Аре́фу,/ и вся, по́двигом до́брым подвиза́вшияся,/ ны́не же торжеству́ющия на Небесе́х ра́достне.

Любо́вию Христо́вою плене́ни,/ се́тей ми́ра избе́гли есте́/ и ро́ждия до́брая оби́тели Валаа́мския яви́лися есте,́/ Андрони́че, Иереми́е и Се́ргие/ со честны́ми Аре́фою и Патри́кием,/ вку́пе же и Таврио́н с Галактио́ном и Афана́сием,/ вы бо, от богобо́рцев изгна́ние и му́ки претерпе́вше,/ ве́ры Правосла́вныя и́стиннии храни́телие/ и подо́бницы отце́м ва́шим,/ Ти́ту, Гела́сию и ины́м мно́гим, дре́вле пострада́вшим, бы́ли есте./ С ни́миже ныне прославляетеся.

Глас 8:

Прииди́те, празднолю́бцев собо́ри,/ пе́сненный лик соста́вльше,/ ублажи́м отцы и наста́вники на́ша,/ вся святы́я, на Валаа́ме просия́вшия,/ и к ним согла́сно возопии́м:/ о, свети́льницы пресве́тлии,/ свет любве Бо́жия ми́ру явля́ющии!/ О, дру́зи Христо́ви ве́рнии,/ с Ним досто́йно во ве́ки пребыва́ющии!/ Засту́пницы бу́дите ве́рою вас призыва́ющим.

Сла́ва, стихи́ра ева́нгельская. И ны́не: Преблагослове́нна еси́, Богородице Дево:

Славосло́вие вели́кое. И отпуст.

На Литургии

Блаже́нна гла́са на 4, и пра́здника песнь рядова́я на 4, и святы́х Песнь 6.-я на 4. Проки́мен, Апо́стол, Аллилуа́рий, Ева́нгелие воскре́сны гла́са. И святы́м, проки́мен, глас 7: Честна́ пред Го́сподем/ смерть преподо́бных Его́. Апо́стол к Гала́том, зача́ло 213. Аллилу́иа, глас 6: Блаже́н муж, боя́йся Го́спода,/ в за́поведех Его́ восхо́щет зело́. Ева́нгелие от Матфе́а, зача́ло 43 или́ от Луки́, зача́ло 24. Прича́стен: Хвали́те Го́спода с Небе́с: И святы́м: В па́мять ве́чную бу́дет пра́ведник:

Моли́тва

О, свяще́нный по́лче Небе́снаго Царя́, дру́зи Христо́ви ве́рнии, вси святи́и, на Валаа́ме просия́вшии!

В све́тлый день пра́здника ва́шего приими́те сугу́бое похвале́ние от нас, недосто́йных чад, па́мять ва́шу любо́вию чту́щих. Вы бо, ми́ра грехо́внаго отре́кшеся, не зре́ли есте вспять, но, я́ко о́вцы незло́бивыя послуша́ние па́стырем духо́вным творя́ще и на вся́кий час ли́ца слеза́ми покаяния омыва́юще, все́ю кре́постию на служе́ние Бо́гу простира́лися есте́. Кто изрещи́ возмо́жет по́двиги ва́ша, и́хже во спасе́ние души́ подъя́ли есте́, па́че же смиренному́дрие, милосе́рдие и ко Христу́ раче́ние непреста́нное? Сего́ ра́ди досто́йнии зри́телие Све́та у́мнаго яви́стеся и усыновле́ния боже́ственнаго сподо́бистеся. И та́ко, све́ты вторы́я бы́вше, лю́дем, в нощи́ ве́ка сего́ стра́нствующим, путевожди́ ко спасе́нию и в ско́рбех жите́йских уте́шителие показа́стеся.

Те́мже и ны́не, Престо́лу Бо́жию предстоя́ще, услы́шите моле́ние нас, гре́шных, и низпосли́те нам си́лу от си́лы ва́шея рабо́тати Го́сподеви со стра́хом и ра́достию, и́ноком уста́вы оте́ческия кре́пко храни́ти, па́стырем ста́до слове́сное до́бре соблюда́ти, всем же христиа́ном в ми́ре, любви́ и единомы́слии жи́тельствовати, да, в за́поведех Бо́жиих ходя́ще, вои́стину ученицы́ ва́ша и ча́да Отца́ Небе́снаго бу́дем, имя Его́ Свято́е на земли́ прославля́юще; по кончи́не же сего́ жития́ в Ца́рствие Святы́я Тро́ицы вни́дем и со все́ми святы́ми сподо́бимся воспева́ти Отца́ и Сы́на и Свята́го Ду́ха в безконе́чныя ве́ки. Ами́нь.

Источник: Текст службы утвержден на заседании Священного Синода 23–24 сентября 2021 года (журнал № 67).

Ме́сяца а́вгуста в 10-й день

Собо́р новому́чеников и испове́дников Солове́цких

На вели́цей вече́рни

На Го́споди, воззва́х: стихи́ры пра́здника, и святы́х, глас 1:

Прииди́те, ве́рнии,/ хвалу́ воздади́м собо́ру новому́чеников,/ за Христа́ на о́стровех Солове́цких пострада́вших,/ ве́ру же и́стинную до конца́ сохра́ньших./ Ти́и бо, му́ки ве́лия претерпе́вше,/ на Небесе́х ны́не наслажда́ются ра́дости неизрече́нныя,/ Солове́цтей земли́ я́вльшеся сокро́вище безце́нное// и ми́ру всему́ пропове́дание покая́ния.

Пе́рвым му́чеником за Христа́ уподо́бистеся,/ страстоте́рпцы Солове́цтии:/ ти́и бо гоне́ния и муче́ния/ от язы́к нечести́вых и злове́рных претерпева́ху./ Вы же страда́ния и смерть/ от богоотсту́пник страны́ на́шея прия́сте,/ не убоя́вшеся мучи́телей, телеса́ ва́ша терза́ющих,/ душ же не могу́щих уби́ти:/ тем ве́чныя жи́зни сподо́бистеся// и со все́ми святы́ми упокое́ния.

У́зницы незло́бивии свяще́ннии,/ вы, поруга́ние и истяза́ния претерпе́вше,/ любве́ ра́ди боже́ственныя не устраши́стеся сме́рти лю́тыя./ Зло́бы же не иму́ще о уби́йцах ва́ших,/ тех озлобле́нию и беззако́нием проси́сте оставле́ния/ и, крест му́ченический на себе́ кро́тце подъе́мше,// преподо́бным отце́м Солове́цким приложи́стеся.

Что нищета́ и ско́рби на́ша,/ с ве́рою му́ченицы вопия́ху?/ Что боле́зни и му́ки от челове́к быва́емыя,/ си́ле боже́ственней вся превозмога́ющей?/ Во Христе́ бо распе́ншемся за ны и воскре́сшем/ кре́пость на́ша, живо́т и упова́ние,// умерщвля́еми Его́ ра́ди Ца́рствие Бо́жие обрета́ем.

Сла́ва, глас 6:

Прииди́те, ве́рнии,/ возсла́вим новому́ченики и испове́дники Солове́цкия,/ и́же многоразли́чная страда́ния претерпе́ша:/ кро́ва оте́ческаго лише́ние,/ со дру́ги и сро́дники разлуче́ние,/ в темни́цы мра́чныя заточе́ние,/ от гла́да и хла́да истоща́ние,/ от тя́жких рабо́т изнеможе́ние,/ и ина́я вся́кая изнуре́ния и му́ки./ Оба́че, си́лою Бо́жиею укрепля́еми,/ я́рость де́монскую низложи́ша/ и от ско́рби сме́ртныя к блаже́нству ра́йскому востеко́ша./ Те́мже к ним с любо́вию возопии́м:/ я́ко ве́лие иму́ще дерзнове́ние ко Го́споду,// моли́те спасти́ся душа́м на́шим.

И ны́не, пра́здника, глас то́йже:

Прообразу́я воскресе́ние Твое́, Христе́ Бо́же,/ тогда́ поя́т три Твоя́ ученики́,/ Петра́, и Иа́кова, и Иоа́нна,/ на Фаво́р возше́л еси́./ Тебе́ же, Спа́се, преобразу́ющуся,/ Фаво́рская гора́ све́том покрыва́шеся,/ ученицы́ Твои́, Сло́ве,/ поверго́ша себе́ до́лу на земли́,/ не терпя́ще зре́ти неви́димаго зра́ка,/ А́нгели служа́ху стра́хом и тре́петом,/ небеса́ убоя́шася,/ земля́ вострепета́,// ви́дяще на земли́ сла́вы Го́спода.

Вход. Проки́мен дне. И чте́ния му́ченическая.

На лити́и стихи́ра хра́ма, и святы́м, глас 8.

Подо́бен: О, пресла́внаго чудесе́:

О, лю́тыя зло́бы нечести́вых!/ Оби́тель Солове́цкая, пре́жде многосла́вная,/ темни́ца быва́ет/ и благоле́пныя добро́ты лиша́ется,/ бесче́стию и поруга́нию предае́тся/ и нечести́выми разоря́ется./ Оба́че страда́нии новому́ченик/ па́ки освяща́ется и украша́ется// и благовеству́ет сла́ву кре́стную.

Сла́ва, глас 4:

Вас, Солове́цтии новому́ченицы,/ лю́тая муче́ния претерпе́вшия/ и си́лою Христо́вою бесо́вскую горды́ню низложи́вшия,/ от ско́рби сме́ртныя к блаже́нству ра́йскому восте́кшия/ и дерзнове́ние ве́лие к Бо́гу иму́щия:/ мы, немощни́и бра́тия ва́ши,/ страда́ния и по́двиги ва́ша почита́юще,/ немо́лчными усты́ прославля́ем и та́ко взыва́ем:/ огради́те нас от напа́стей и злоухищре́ний вра́жиих/ и по́мощь свы́ше подава́йте,/ во е́же ве́ру Христо́ву нам непоро́чно сохрани́ти// и в день су́дный от Влады́ки и Го́спода поми́лование улучи́ти.

И ны́не, пра́здника, глас 5:

Зако́на и проро́ков/ Тя, Христе́, Творца́ и Исполни́теля свиде́тельствоваша,/ зря́ще во о́блаце,/ Моисе́й Богови́дец и Илия́ огнеколесни́чник/ и неопа́льный небоше́ственник,/ в преображе́нии Твое́м./ С ни́миже и нас Твоего́ просвеще́ния сподо́би, Влады́ко,// пе́ти Тя во ве́ки.

На стихо́вне стихи́ры, глас 1. Подо́бен: Небе́сных чино́в:

Блаже́ни есте́, новому́ченицы Солове́цтии,/ я́ко, си́лою кре́стною себе́ огради́вше,/ страх сме́рти презре́ли есте́/ и, лука́вство вра́жие любо́вию ко Христу́ попра́вше,/ муче́ния лю́тая и убие́ние претерпе́ли есте́.// Сего́ ра́ди вас ублажа́ем.

Стих: Тебе́ ра́ди умерщвля́еми есмы́ весь день,// вмени́хомся я́ко о́вцы заколе́ния.

Блаже́ни есте́, страстоте́рпцы Солове́цтии,/ я́ко дре́вним му́чеником во страда́ниих подо́бящеся,/ ра́вную тех благода́ть стяжа́ли есте́/ и кро́вию ва́шею, я́ко багряни́цею,/ Це́рковь Христо́ву украси́ли есте́.// Сего́ ра́ди вас велича́ем.

Стих: Воскресни́, Го́споди, помози́ нам,// и изба́ви нас и́мене ра́ди Твоего́.

Блаже́ни есте́, испове́дницы Солове́цтии,/ я́ко от ра́зных конце́в земли́ Росси́йския/ про́мыслом Бо́жиим во еди́но ме́сто собра́ннии,/ еди́ну ча́шу страда́ния испи́ли есте́/ и ны́не вку́пе во Ца́рствии Небе́снем ра́дуетеся.// Сего́ ра́ди вас почита́ем.

Сла́ва, глас 6:

Прииди́те, ублажи́м новому́ченики и испове́дники Солове́цкия,/ и́же, страда́ния многоразли́чная претерпе́вше/ и живо́т свой в дар Христу́ Бо́гу прине́сше,/ Ца́рствия Небе́снаго жи́тели яви́шася,/ прие́млет бо любо́вию Госпо́дь Свободи́тель/ стра́ждущия Его́ ра́ди в жи́зни вре́менней/ и благода́ть неотъе́млему да́рует,// е́же моли́тися о нас.

И ны́не, пра́здника, глас то́йже:

Петру́, и Иа́кову, и Иоа́нну,/ лу́чшим ученико́м Твои́м, Го́споди,/ днесь показа́л еси́ на горе́ Фаво́рстей/ сла́ву Боже́ственнаго Твоего́ зра́ка:/ ви́дяху бо ри́зы Твоя́ облиста́вшия, я́ко свет,/ и лице́ Твое́ па́че со́лнца,/ не терпя́ще зре́ти нестерпи́мое Твоего́ сия́ния,/ на зе́млю низпа́даху,/ ника́коже зре́ти могу́ще./ Глас же слы́шаху, свиде́тельствующ свы́ше:/ Сей есть Сын Мой возлю́бленный,// прише́дый в мир спасти́ челове́ка.

Тропа́рь, глас 1:

Во страда́ниих ве́ру сохрани́вше,/ дре́вним му́чеником уподо́билися есте́, новому́ченицы Солове́цтии,/ и, смерть за Христа́ прие́мше,/ к жи́зни ве́чней преста́вилися есте́,/ иде́же со все́ми святы́ми// моли́те о душа́х на́ших.

На у́трени

По 1-м стихосло́вии седа́лен, глас 4:

В же́ртву непоро́чную Бо́гу принесо́сте себе́, святи́и новому́ченицы,/ препоя́сани бо си́лою Христо́вою,/ ничи́мже отлучи́стеся от любве́ Бо́жия./ Тем возвели́чи и просла́ви вас Царь ми́ра,/ еди́ною путь кре́стный ко спасе́нию всем лю́дем показа́вый.

Сла́ва, и ны́не, пра́здника, глас то́йже.

Подо́бен: Удиви́ся Ио́сиф:

Челове́ческое изменéние, е́же со слáвою Твоéю, Спа́се,/ второ́е и стрáшное Твоего́ пришéствия показýя,/ на горе́ Фаво́рстей преобрази́лся еси́./ Илия́ и Моисе́й глаго́лаху с Тобо́ю,/ и трие́х от учени́к спризва́в,/ и́же ви́девше, Влады́ко, сла́ву Твою́, блиста́нию Твоему́ удиви́шася./ И́же тогда́ сим свет Твой возсия́вый, просвети́ ду́ши на́ша.

По 2-м стихосло́вии седа́лен, глас 5:

Христа́ в себе́ иму́ще, ча́да Бо́жия яви́лися есте́, страстоте́рпцы,/ и, по́двиг испове́дания до́бре соверши́вше,/ я́ко свети́льницы пресве́тлии, ми́ру просия́ли есте́./ Сего́ ра́ди, честну́ю па́мять ва́шу соверша́юще, пе́сненно вас ублажа́ем.

Сла́ва, и ны́не, пра́здника, глас 4.

Подо́бен: Удиви́ся Ио́сиф:

На горе́ Фаво́рстей преобрази́лся еси́, Иису́се,/ и о́блак све́тел, протяза́ющся, я́ко сень, апо́столы сла́вою покры́,/ те́мже и на зе́млю ниц па́даху,/ не терпя́ще зре́ти све́тлости непристу́пныя сла́вы лица́ Твоего́,/ Безнача́льне Спа́се, Христе́ Бо́же./ И́же тогда́ сим Свет Твой возсия́вый, просвети́ ду́ши на́ша.

Велича́ние:

Велича́ем вас,/ святи́и новому́ченицы и испове́дницы Солове́цтии,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам Прибе́жище и Си́ла:

По полиеле́и седа́лен, глас 5:

О, новому́ченицы Солове́цтии, кре́пцыи на́ши засту́пницы!/ Страда́нии ва́шими земля́ Солове́цкая па́че освяти́ся/ и Це́рковь Ру́сская све́тло просла́вися./ Мы же, на по́двиг и кончи́ну ва́шу взира́юще, со умиле́нием взыва́ем:/ ра́дуйтеся, сро́дницы на́ши святи́и,/ пред Престо́лом Бо́жиим дерзнове́ннии о нас моли́твенницы.

Сла́ва, и ны́не, пра́здника, глас 4.

Подо́бен: Вознесы́йся:

Возше́д со ученики́ на го́ру, и во сла́ве О́тчи облиста́в,/ с Моисе́ом Илия́ Тебе́ предстоя́т,/ зако́н и проро́цы бо я́ко Бо́гу слу́жат./ Ему́же и сыновство́ есте́ственное Роди́тель испове́дая, нарица́ше Сы́на,/ Его́же воспева́ем с Тобо́ю и Ду́хом.

Степе́нна, 1-й антифо́н 4-го гла́са.

Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36 (10, 16–22).

По 50-м псалме́ стихи́ра, глас 6:

Ве́рностию Го́споду до сме́рти/ вене́ц сла́вы прия́сте,/ страстоте́рпцы достохва́льнии,/ житие́ бо печа́льми и скорбьми́ испо́лнено пожи́вше,/ ра́дость соверше́нную в Бо́зе обрето́сте/ и, Про́мыслу Бо́жию себе́ всеце́ло вве́ривше,/ прича́стницы жи́зни ве́чныя яви́стеся./ Те́мже моли́теся о нас ко Го́споду,// да спасе́т ду́ши на́ша.

Кано́н му́чеником, глас 8.

Песнь 1.

Ирмо́с: Пресла́вный в мо́ри устро́ивый лю́дем путь,/ Небе́сное нам ше́ствие проходи́мо сотвори́,// да но́вую песнь пои́м Тебе́, Го́споди.

Припе́в: Го́споди Иису́се Христе́, Бо́же наш, поми́луй нас.

Христе́, А́гнче Бо́жий,/ благода́ть не то́кмо ве́ровати, но страда́ти по Тебе́ лю́дем Твои́м дарова́вый,/ даждь нам ра́зум досто́йно воспе́ти страда́ния новому́чеников Солове́цких,/ да назида́ются ве́рнии их по́двиги.

Я́коже дре́вле посреде́ мо́ря путь лю́дем Изра́ильским устро́ивый, Го́споди,/ си́це и ны́не на о́стровех Солове́цких лю́дем Твои́м посреде́ страда́ний лю́тых/ путь в Ца́рствие Небе́сное проходи́мь сотвори́л еси́,/ да воспою́т Тебе́ песнь побе́дную.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Прииди́те, празднолю́бцы, па́мять новому́чеников Солове́цких просла́вим:/ си́и бо, от всех конце́в земли́ Росси́йския на о́стровех сих собра́ннии,/ кровь за Христа́ проли́ша и Це́рковь Ру́сскую украси́ша.

Богоро́дичен: Изба́вльшеся честны́м Рождество́м Твои́м, Де́во,/ а́дских и тле́нных уз и зако́ннаго осужде́ния, Пречи́стая,/ ра́дуйся, Обра́дованная, благода́рно вопие́м Ти,/ спаси́тельная Две́ре благода́ти.

Песнь 3.

Ирмо́с: Утвержде́й на ка́мени ве́ры,/ на сем сози́жду Мою́ Це́рковь, реки́й Го́споди,/ спаси́ мя вопию́ща:/ Ты еси́, Христе́, Сын Бо́га жива́го,// и в Тебе́ утверди́ся дух мой.

Себе́ отве́ргшеся и крест взе́мше,/ Христу́ после́довали есте́, страстоте́рпцы Солове́цтии,/ и, ду́ши ва́ша за Него́ положи́вше,/ неувяда́емый вене́ц сла́вы на Небесе́х прия́ли есте́.

Ка́меню ве́ры, священному́чениче Пе́тре, архиере́ю достохва́льне,/ Воро́нежския земли́ сла́во и похвале́ние,/ ты во дни страда́ний на о́стровех Солове́цких испове́днически вопия́л еси́:/ Христо́с есть Сын Бо́га жива́го,/ и в Нем утверди́ся дух мой.

Сто́лпе Правосла́вия неруши́мый, красото́ и сла́во Це́ркве Ру́сския, священному́чениче Евге́ние,/ ты, ста́рей от архиере́ев во узи́лищи Солове́цтем быв,/ пра́вило ве́ры и о́браз кро́тости юне́йшим яви́л еси́/ и Христа́ Бо́га до кончи́ны дней твои́х испове́дал еси́.

Богоро́дичен: Скве́рну всю пе́рвыя отложи́вше сне́ди,/ живо́тнаго хле́ба с Небесе́ напита́емся,/ от земли́ Де́вы возсия́вшаго,/ Ю́же, я́ко Хода́таицу благи́х, воспои́м.

Конда́к пра́здника, глас 7. Самогла́сен:

На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,// я́ко Ты еси́ вои́стину О́тчее сия́ние.

И́кос:

Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым,/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша, и пропове́даша О́тчее сия́ние.

Седа́лен святы́м, глас 4:

Новому́ченицы приснопа́мятнии,/ вы, а́ще живу́ще, а́ще умира́юще, вы́ну Го́сподеви предстоя́ли есте́/ и, ду́ши за ве́ру Христо́ву положи́вше,/ Небе́снаго жи́тельства ве́чную ра́дость восприя́ли есте́,/ обре́тшеся я́ко зла́то неги́блющее Ца́рствия Бо́жия.

Сла́ва, и ны́не, пра́здника, глас то́йже.

Подо́бен: Удиви́ся Ио́сиф:

На горе́ Фаво́рстей преобрази́лся еси́, Иису́се,/ посреде́ Илии́ и Моисе́я прему́дрых, со Иа́ковом, и Петро́м, и Иоа́нном./ Петр же, сопребыва́я, сия́ Тебе́ глаго́лаше:/ добро́ зде есть сотвори́ти три се́ни,/ еди́ну Моисе́ю, и еди́ну Илии́, и еди́ну Тебе́, Влады́це Христу́./ И́же тогда́ Свет Твой сим возсия́вый, просвети́ ду́ши на́ша.

Песнь 4.

Ирмо́с: Я́ко Петру́ ру́ку простры́й в по́мощь,/ и мене́ поми́луй,// и спаси́ я́ко Человеколю́бец.

О, вели́кий со́нме новому́чеников и испове́дников Солове́цких:/ святи́телие и иере́и, мона́си и мирсти́и,/ ста́рцы и ю́нии и жен сосло́вие, исполне́ние Це́ркве Христо́вы!/ Вы, на еди́ном по́прищи страда́ний совоку́пльшеся,/ еди́ну мзду во Ца́рствии Небе́снем обрето́сте.

Фаво́р и Ермо́н о и́мени Госпо́днем возра́довашася,/ Голго́фа же А́нзерская страда́ния земна́я и Небе́сную сла́ву новому́ченик пропове́дует./ Ти́и бо, го́рькими рабо́тами, гла́дом, боле́зньми и сме́ртию за Христа́ спасе́ние обре́тше,/ в го́рнем Иерусали́ме с первому́ченики ликовству́ют.

Архиере́ев ру́сских похвало́ и Солове́цких у́зников добро́то,/ патриа́ршаго чи́на ревни́телю и лжеобнови́телей Це́ркве обличи́телю,/ Иларио́не, священному́чениче богому́дрый,/ страда́ния о Го́споде и лови́тву рыб со смире́нием прия́л еси́, я́ко апо́стольское де́лание./ Ны́не же и нам те́плый моли́твенник и предста́тель пред Бо́гом явля́ешися.

Богоро́дичен: И́стинную Богоро́дицу Тя вси ро́дове родо́в сла́вят,/ святе́йшу А́нгел я́ве бы́вшу, Пресвята́я Де́во./ Те́мже вопие́м:/ освяти́ на́ша ду́ши, оскверни́вшияся страстьми́.

Песнь 5.

Ирмо́с: У́тренюет дух мой к Тебе́, Бо́же,/ зане́ свет повеле́ния прише́ствия Твоего́,/ и́миже у́бо озари́ ум наш, Влады́ко,// и наста́ви на стезю́ жи́зни.

И́ноцы преподо́бнии дре́вле благоле́пием церко́вным о́стровы Солове́цкия преобрази́ша,/ новому́ченицы же и испове́дницы во дни гоне́ний лю́тых/ страда́ньми за Христа́ ме́сто сие́ па́че просла́виша./ Ны́не же ку́пно Бо́гу предстоя́т, моля́щеся о оби́тели Солове́цтей.

Вениами́не досточу́дне, па́стырю преди́вный,/ ты, Солове́цкия бра́тии нача́льник быв,/ свиде́тель злодея́ний и поруга́ния оби́тели святы́я яви́лся еси́./ Страда́льческую же кончи́ну от беззако́нник в земли́ Арха́нгельстей прие́м,/ му́ченический лик умно́жил еси́.

Благохвале́ние воздади́м богоблаже́нному Ники́фору,/ той бо, в Солове́цтей оби́тели преподо́бнически пожи́в,/ в изгна́нии о́бщник Вениами́ну яви́ся/ и, кончи́ну му́ченическую с ним вку́пе восприе́м,/ Ца́рствия Небе́снаго дости́же.

Богоро́дичен: Не пре́зри, моля́щи о нас/ Сы́на Твоего́, Христа́ Бо́га на́шего, при́сно Благослове́нная,/ изба́витися вся́кия ско́рби, Чи́стая.

Песнь 6.

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния:/ но Твою́ кре́пкую ру́ку мне простри́, я́ко Петро́ви,// о Упра́вителю, и спаси́.

Во Христе́ страда́вше, новому́ченицы Солове́цтии,/ Це́ркве Правосла́вныя столпи́ кре́пцыи, я́ко победи́вшии ко́зни диа́вольския, яви́стеся,/ сего́ ра́ди дарова́ся вам и́мя но́вое и жи́тельство в Небе́снем Иерусали́ме.

Во страда́ниих и го́рьких рабо́тах на о́стровех Солове́цких подвиза́вшиися/ к покая́нию и доброде́тельному житию́ подви́гните нас, святи́и новому́ченицы,/ да и мы ва́шими моли́твами сподо́бимся прославля́ти Го́спода во Ца́рствии Его́.

В ско́рбех и беда́х, страда́ниих и тягота́х темни́чных многоле́тне пребыва́я, святи́телю Афана́сие, испове́дниче,/ слу́жбе боже́ственней всем се́рдцем прилежа́л еси́/ и песносло́вие хвале́бное святы́м земли́ Росси́йския сложи́л еси́./ Ны́не же с ни́ми во Ца́рствии Небе́снем пребыва́я,/ Тро́ицу Святу́ю прославля́еши.

Богоро́дичен: Сло́во во утро́бе Твое́й, Чи́стая, воплоща́ется,/ безслове́сных плотски́х страсте́й мир избавля́я.

Конда́к, глас 3:

Днесь престо́лу Бо́жию предстоя́т новому́ченицы Солове́цтии/ и с Небе́сными ли́ки за ны мо́лятся Бо́гу,/ мы же, па́мять их благогове́йно соверша́юще, взыва́ем:/ ра́дуйтеся, достопокланя́емии сро́дницы на́ши,// я́ко мзда ва́ша мно́га на Небесе́х.

И́кос:

Присноблаже́ннии новому́ченицы Солове́цтии,/ Христу́ Бо́гу ве́рно после́довавшии и мир просвети́вшии страда́нии ва́шими,/ вы, за́поведи Христо́вы испо́лнивше, блаже́нства Ева́нгельская насле́довали есте́./ Сего́ ра́ди, па́мять ва́шу благогове́йно соверша́юще, взыва́ем вам си́це:/

ра́дуйтеся, во смире́нии ду́хом Христо́вым обогати́вшиися;

ра́дуйтеся, в Бо́зе утеше́ние обре́тшии;

ра́дуйтеся, зе́млю кро́тких насле́довавшии;

ра́дуйтеся, оправда́нием Госпо́дним насы́тившиися;

ра́дуйтеся, милосе́рдием ми́лость Бо́жию стяжа́вшии;

ра́дуйтеся, чистото́ю се́рдца Бо́га узре́вшии;

ра́дуйтеся, мир сотво́рше, сы́ны Бо́жии нарече́ннии;

ра́дуйтеся, изгна́нием пра́вды ра́ди Ца́рствие Небе́сное улучи́вшии;

ра́дуйтеся, поноше́ния и оболга́ния за Христа́ прие́мшии.

Ра́дуйтеся и весели́теся, достопокланя́емии сро́дницы на́ши, я́ко мзда ва́ша мно́га на Небесе́х.

Песнь 7.

Ирмо́с: Безу́мное веле́ние/ мучи́теля злочести́ваго лю́ди поколеба́,/ ды́шущее преще́ние и злохуле́ние богоме́рзкое,/ оба́че три о́троки не устраши́ я́рость зве́рская,/ ни огнь снеда́яй,/ но противоды́шущу росоно́сному Ду́ху,/ со огне́м су́ще поя́ху:// препе́тый отце́в и нас Бо́же, благослове́н еси́.

Мучи́телей злочести́вых преще́ние богоме́рзкое презре́вше, новому́ченицы и испове́дницы Солове́цтии,/ я́ко дре́вле о́троцы в пещи́, во огни́ гоне́ний поя́ху:/ препе́тый отце́в и наш Бо́же, благослове́н еси́.

Безу́мное веле́ние власти́телей,/ е́же Бо́гу не покланя́тися и не чти́ти Его́, му́жески отве́ргше,/ изгна́ния, заточе́ния и го́рькия рабо́ты,/ я́ко часть благу́ю, избра́ли есте́, святи́и му́ченицы, Го́споду взыва́юще:/ препе́тый отце́в и наш Бо́же, благослове́н еси́.

Посреде́ муче́ний тя́жких любо́вию к Бо́гу пламене́ли есте́, святи́и,/ и, мучи́телей злоухищре́ния многоразли́чная посрамля́юще,/ со дерзнове́нием взыва́ли есте́:/ препе́тый отце́в и наш Бо́же, благослове́н еси́.

Богоро́дичен: Блажа́т Тя, Пречи́стая, му́ченический лик и мучениколю́бцев собра́ние,/ Бо́жие бо Сло́во па́че ума́ и сло́ва родила́ еси́.

Песнь 8.

Ирмо́с: Победи́тели мучи́теля и пла́мене,/ благода́тию Твое́ю бы́вше,/ за́поведем Твои́м зело́ прилежа́ще, о́троцы вопия́ху:// благослови́те, вся дела́ Госпо́дня, Го́спода.

Святи́и новому́ченицы и испове́дницы во времена́ богобо́рческая Солове́цкия ото́ки ще́дро облагодати́ша,/ их бо страда́нии и кро́вию/ ме́сто муче́ния селе́ние сла́вы Госпо́дни бысть.

Прехва́льне служи́телю Христо́в Арка́дие,/ ве́ры Правосла́вныя изря́дный пропове́дниче,/ милосе́рдием и нищелю́бием Бо́гу усе́рдно угожда́л еси́./ Сего́ ра́ди, на мно́га ле́та во о́стровех Солове́цких заточе́н быв,/ вене́ц му́ченический от Судии́ Всеми́лостиваго восприя́л еси́.

Тро́ичен: Свы́ше назира́йте, новому́ченицы, па́мять ва́шу любо́вию соверша́ющих/ и хода́тайствуйте у Трисо́лнечнаго Божества́ о проще́нии грехо́в,/ да ти́хое и безмо́лвное житие́ поживе́м во вся́ком благоче́стии и чистоте́.

Богоро́дичен: Дре́вле Елеаза́ру преподо́бному о гряду́щих гоне́ниих возвести́ла еси́, Богоро́дице Де́во,/ и Засту́пница Всемо́щная новому́чеником Солове́цким яви́лася еси́.

Песнь 9.

Ирмо́с: Разбо́йника подража́яй окая́нный аз,/ испове́даяй Тя зову́ Тебе́,/ еди́наго от Отца́, и от Де́вы неизрече́нно воплоще́нна,/ и мене́ ра́ди бы́вша по мне:/ но, я́ко Свет у́мный, Со́лнце,/ не воспомяну́в зол, во Ца́рствии Твое́м помяни́ мя,// егда́ Судия́, Го́споди, ся́деши на Престо́ле.

Никоди́ма священному́ченика па́мять досто́йно почти́м,/ и́же жития́ преподо́бных Солове́цких соста́ви/ и по́двигом му́ченическим в Бе́ле гра́де архипа́стырство свое́ увенча́./ Сего́ ра́ди Белгоро́дская земля́ и оби́тель Солове́цкая вку́пе того́ прославля́ют.

О́тче Иоа́нне богодухнове́нне,/ дни мно́гия в заточе́нии Солове́цтем пребы́в,/ Христу́ за ны распе́ншуся сораспя́лся еси́/ и в земли́ Воро́нежстей смерть му́ченическую от гони́телей прия́л еси́./ Сего́ ра́ди тя велича́ем.

Жизнода́вче Го́споди,/ моли́твами новому́чеников и испове́дников Солове́цких/ упоко́й со все́ми пра́ведными ве́рныя рабы́ Твоя́,/ за и́мя Твое́ на о́стровех сих пострада́вшия:/ святи́тели и иере́и, мона́хи и мирски́я,/ та́же жены́ с де́вами и всяк во́зраст и сосло́вие,/ и́хже имена́ Ты Сам ве́си,/ я́ко и́стинныя ча́да и дру́ги Твоя́.

Богоро́дичен: Досто́йно есть я́ко вои́стину блажи́ти Тя, Де́во Чи́стая,/ Твои́ми бо моли́твами всяк, испове́дуяй Сы́на Твоего́ я́ко и́стиннаго Бо́га утвержда́ется/ и жизнь ве́чную обрета́ет.

Свети́лен:

По́двиги и страда́нии новому́чеников и испове́дников Солове́цких/ свет Христо́в во тьме возсия́./ Его́же и нам улучи́ти сподо́би моли́твами святы́х Твои́х, Христе́, Све́те и́стинный.

Сла́ва, и ны́не, пра́здника:

Све́те неизме́нный, Сло́ве, Све́та Отца́ нерожде́нна, в явле́ннем све́те Твое́м,/ днесь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тварь.

На хвали́тех стихи́ры пра́здника, и святы́м, глас 8:

О, святи́и новому́ченицы Солове́цтии!/ Вы Го́спода сла́вы всем се́рдцем возлюби́ли есте́/ и Тому́ невозвра́тным по́мыслом после́довали есте́/ и, страсте́м Его́ поревнова́вше,/ венцы́ Небе́сныя стяжа́ли есте́./ Ны́не же в оби́телех Небе́сных пребыва́юще,// мо́литеся о спасе́нии душ на́ших.

О, святи́и новому́ченицы Солове́цтии!/ Кто изочте́т страда́ния ва́ша/ или́ кто возмо́жет восхвали́ти вас по достоя́нию?/ Вы бо, му́ки многоразли́чныя от злочести́вых восприе́мше,/ ве́ру непоро́чну сохрани́ли есте́/ и, в Небе́снем Ца́рствии блаже́нство изгна́нных пра́вды ра́ди унасле́довавше,// мо́литеся о душа́х на́ших.

О, страстоте́рпцы святи́и!/ Вы страда́нии свои́ми дре́вним му́чеником уподо́билися есте́/ и, преподо́бных Солове́цких в моли́тве призыва́юще,/ долготерпе́нию и ве́ре их подража́ли есте́./ И ны́не, ку́пно с ни́ми на Небесе́х Бо́га хва́ляще,// мо́литеся о душа́х на́ших.

Сла́ва, глас то́йже. Самогла́сен:

(А́ще хо́щеши пе́ти на самогла́сен, зри страни́цы последи́ слу́жбы)

Солове́цтии новому́ченицы и испове́дницы,/ святи́телие, свяще́нницы и пра́ведницы,/ помина́юще ны́не скорбь и тесноту́, страда́ния и сле́зы ва́ша,/ и глад, и мраз, и ужа́сную смерть,/ мо́лим вас, моли́те о нас Го́спода на́шего Иису́са Христа́,/ да прости́т нам прегреше́ния и беззако́ния на́ша// и поми́лует всех нас.

И ны́не, пра́здника, глас то́йже:

Поя́т Христо́с Петра́, Иа́кова и Иоа́нна/ на го́ру высоку́ еди́ны,/ и преобрази́ся пред ни́ми: и просвети́ся лице́ Его́, я́ко со́лнце,/ ри́зы же Его́ бы́ша белы́ я́ко свет;/ и яви́шася Моисе́й и Илия́ с Ним глаго́люще,/ и о́блак све́тел осени́ их./ И се глас из о́блака глаго́лющ:/ Сей есть Сын Мой возлю́бленный,/ о Не́мже благоволи́х,// Того́ послу́шайте.

Славосло́вие вели́кое. Ектении́ и отпу́ст.

На Литурги́и

Блаже́нны пра́здника, Песнь 4-я, на 6, и от кано́на новому́чеников, Песнь 3-я, на 4. Проки́мен пра́здника, и новому́чеников, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол пра́здника, и новому́чеников, к Ри́мляном, зача́ло 99 (гл. 8, 31–39). Аллилуиа́рий пра́здника, и новому́чеников, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь.

Ева́нгелие пра́здника, и новому́чеников, от Луки́ зача́ло 105–106. Коне́ц: Втерпе́нии ва́шем стяжи́те душа́ ва́ша: (гл. 21, 8–19). Прича́стен пра́здника, и новому́чеников: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О, достохва́льнии и великоимени́тии новому́ченицы и испове́дницы Солове́цтии! Вы гоне́ния, хлад, глад, наготу́, поноше́ния, поруга́ния и я́рость мучи́телей со смире́нием претерпева́юще, ве́ру тве́рдую, упова́ние непосра́мленное и любо́вь и́стинную к Бо́гу, бли́жним и гони́телем ва́шим яви́ли есте́.

Сего́ ра́ди ны́не, предстоя́ще Престо́лу Влады́ки Христа́, моли́те о благостоя́нии святы́я Це́ркве Ру́сския, да избе́гнет гоне́ний, раско́лов, ересе́й, ра́спрей и мяте́жа мирска́го, да восприи́мет архипа́стыри и па́стыри до́брыя, пеку́щияся о спасе́нии душ, да украси́тся и́ноки честны́ми, ста́рцы му́дрыми, му́жы добронра́вными и де́вами чи́стыми, во е́же в ми́ре глубо́це ти́хое и безмо́лвное житие́ пожи́ти нам во вся́ком благоче́стии и чистоте́.

А́ще же прии́дет и наш час пострада́ти за ве́ру Правосла́вную, утверди́те ны, недосто́йныя сро́дники ва́ша, в терпе́нии, да́руйте нам му́жество и кре́пость испове́дати пред челове́ки Христа́, и́стиннаго Бо́га, да сподо́бимся с ва́ми воспева́ти пречестно́е и животворя́щее и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 27 января 2011 года (журнал № 163)

Творим бдение, идеже храм, и лежат мощи ея.

На малей вечерни

На Господи, воззвах: стихиры, глас 2.

Подобен: Доме Евфрафов:

Доме Святыя Троицы, украсися светло, се бо Троицы служительница вонь приходит, Творца славящи.

Дом воистинну и селение Бога явилася еси чистая и честная душа твоя, мати, темже ныне во дворех святых водворяешися, ликующи светло.

Дома Божия красоту возлюбльшая, и небо паче земли избравшая, днесь премудрая Рафаила да почтится, тая бо присно молится, во еже спастися душам нашим.

Домом мучеников, и селом приявшим семя кровь мучеников, явися ныне земля Черкасская, светло украшенная, яко бисером, кровьми угодников многих.

Слава, глас 8:

Мати мученице, богоблаженная Рафаило, не престай молитися о почитающих и поющих страдания твоя яже о Христе Иисусе.

И ныне: праздника, или Богородичен, глас 8.

Творение Афанасиа исповедника.

Подобен: О, преславнаго чудесе:

О, преславнаго чудесе! Небесе и земли Царица, от святых сродников наших умоляемая, до ныне землю Русскую покрывает и лика Своего изображении милостивно обогащлет. О, Владычице Державная! Не престани и на будущее время во утверждение на Руси Православия милости и чудеса изливати до века. Аминь.

На стиховне стихиры, глас 5:

Радуйся, мати чистая, блаженная страстотерпице Рафаило, крест Христов на рамо вземшая радостно, и Небесному Жениху обручившаяся, и ныне радующаяся во обителех приснорадостных.

Стих: Дивен Бог во святых Своих, Бог Израилев.

Радуйся, премудрая инокинь наставнице, и ко спасению путеводительнице, и мученице изрядная, Рафаило святая, земных страстей избегшая, и ныне в горних селении царствующая.

Стих: Приведутся Царю девы в веселии и радовании.

Радуйся, мудрым девам уподобившаяся, и елеем благодати Божией обильно душу твою обогатившая, Рафаило мудрая, Жениха Христа возлюбившая, и от Него возлюбленная, и с ним во веки пребывающая на небеси.

Слава, глас 4.

Подобен: Яко добля:

Яко изрядную в мученицех, и в преподобных славнейшую, сошедшеся днесь восхваляем тя, мати наша Рафаило, течение совершила еси, и веру до конца соблюдши, прияла еси от Бога нетленный венец. Темже ко Подвигоположнику помолися ныне от бед избавитися верою совершающым всечестную память твою.

И ныне: праздника, или Богородичен, глас 4:

Богородице, Надеждо ненадежных, не закосни, но поспеши на помощь нам, во всяких гресех углебающих, обаче имущих изрядную надежду на Тя, Всеблагая.

Тропарь, глас 1:

Агница Христова мати Богоблаженная Рафаило, и наставница мудрая агниц Его явилася еси, венца мученичества сподобилася еси от десницы Иисусовы, Емуже не престай моляся, да соблюдет в мире Церковь Православную, и обитель твою от всех навет вражиих защитит, и спасет души наша, яко Милосерд.

На велицей вечерни

Блажен муж: 1-й антифон.

На Господи, воззвах: поставим стихов 8.

И поем стихиры праздника 3, и святой 5.

Аще ли же вне праздника, святой стихир 8 и поем повторяюще по дважды первыя три, прочия же единожды.

Глас 4.

Подобен: Яко добля:

Яко изрядную в мученицех, и в преподобных славнейшую, сошедшеся днесь восхваляем тя, мати наша Рафаило, течение совершила еси, и веру до конца соблюдши, прияла еси от Бога нетленный венец. Темже ко Подвигоположнику помолися ныне от бед избавитися верою совершающым всечестную память твою.

Глас 1:

Пришедше во храм днесь, духовную песнь воспоим матери нашей Рафаиле, игумении богомудрей, преподобномученице Черкасстей, яже, красоту мирскую презрев, мирскаго мятежа избеже, безбожных мучителей никакоже убоявшеся, на Господа все упование свое возложи.

Отверзошася уста безбожная, зияюща пожрети агницы Христовы, хулы глаголя и изгоняща сих от пажитей духовных; обаче образу жития ангельскаго не измениша, крест Его на ся вземшии.

Иго благое Христово в годину прещения от безбожных смиренно понесоша, муки и смерть прияша, днесь с сонмы ангельскими ликуют и ко Господу возносят молитвы о чтущих всечестную память их.

Радуется и веселится земля Черкасская днесь, память богомудрыя матере нашея Рафаилы празднующи, честно величается град Чигирин, в себе крин неувядаемый, тело святыя игумении, имуще.

Слава, глас 6:

Чином монашеским наставнице и лику святых мучениц причастнице, мати Рафаило богомудренная, днесь похвальную ти песнь приносяще, молим тя: испроси нам у Христа Бога милости на суде, таже и вся благая, ко спасению благопотребная.

И ныне: праздника, или догматик: Кто Тебе не ублажит:

Вход. Прокимен дне. И чтения три.

Ко ефесеем послания святаго Апостола Павла чтение (6:10–16):

Братие, возмогайте во Господе и в державе крепости его: облецытеся во вся оружия Божия, яко возмощи вам стати противу кознем диавольским: яко несть наша брань к крови и плоти, но к началом, и ко властем, и к миродержителем тмы века сего, к духовом злобы поднебесным. Сего ради приимите вся оружия Божия, да возможете противитися в день лют и вся содеявше стати. Станите убо препоясани чресла ваша истиною, и оболкшеся в броня правды, и обувше нозе во уготование благовествования мира: над всеми же восприимше щит веры, в немже возможете вся стрелы лукаваго разжженныя угасити: и шлем спасення восприимите, и меч духовный, иже есть глагол Божий.

К Тимофею послания святаго Апостола Павла чтение (2Тим.4:1–8):

Чадо Тимофее, засвидетельствую убо аз пред Богом, и Господем нашим Иисус Христом, Хотящим судити живым и мертвым в явлении Его и царствии Его: проповедуй слово, настой благовременне и безвременне, обличи, запрети, умоли со всяким долготерпением и умением. Будет бо время, егда здраваго умения не послушают, но по своих похотех изберут себе учители, чешеми слухом, и от истины слух отвратят, и к баснем уклонятся. Ты же трезвися о всем, злопостражди, дело сотвори благовестника, служение твое известно сотвори. Аз бо уже жрен бываю, и время моего отшествия наста. Подвигом добрым подвизахся, течение скончах, веру соблюдох. Прочее убо соблюдается мне венец правды, егоже воздаст ми Господь в день он, праведный Судия, не токмо же мне, но и всем возлюбльшим явление Его.

Ко евреем послания святаго Апостола Павла чтение (11:33–40):

Братие, святии вси верою победиша царствия, содеяша правду, получиша обетования, заградиша уста львов, угасиша силу огненную, избегоша острея меча, возмогоша от немощи, быша крепцы во бранех, обратиша в бегство полки чуждих: прияша жены от воскресения мертвых своих: инии же избиени быша, не приемше избавления, да лучшее воскресение улучат. Друзии же руганием и ранами искушение прияша, еще же и узами и темницею: камением побиени быша, претрени быша, искушени быша, убийством меча умроша, проидоша в милотех и в козиях кожах, лишени, скорбяще, озлоблени: ихже не бе достоин весь мир, в пустынях скитающеся и в горах и в вертепах и в пропастех земных. И сии вси, послушествовани бывше верою, не прияша обетования: Богу лучшее что о нас предзревшу, да не без нас совершенство приимут.

На литии стихиры самогласны, глас 1:

Светло храбрствующи, Рафаила славная во страдании своем небесныя силы веселит, с ними же радующеся ныне, на земли верныя торжествовати воздвиже. Тую бо достойно почтим в пении и песнех духовных, яко добрую рабу Господню, молящуюся Христу Богу даровати нам велию милость.

Глас 4:

Приспе время отшельствия ко Господу преподобныя Рафаилы, воительницы мужемудренныя и начальницы агниц словесных обители Свято-Троицкия. Тая же, от неистовых безбожник гонимая, аки злато в горниле, во страданиих совершенне очистися, в ангельския селения радующеся вниде, идеже о нас усердно ныне молится.

В гонениех скорби претерпела еси, памятующи слова Господа: аще Мене изгнаша, и вас ижденут; темже, от мучителей не укрывающися, мученический конец жития от богоборцев претерпела еси, богоблаженная.

Слава, глас 5:

Неувядаемый венец от Христа приявшая, молится ныне святая о чтущих память ея, темже, людие Черкасстии, песньми воспоим честная страдания преподобной мученицы Рафаилы, Христа, дивнаго во святых почитающе.

И ныне: праздника, или Богородичен сей, глас 5:

Матери Божией приведошася вслед девы, искреннии Ея приведошася в храм Царев, с нимиже и славная Рафаила от града Чигирина пришедшая в горняя селения, Честнейшую Херувим воспевает.

На стиховне стихиры, глас 1:

Молитвы на всякий час возносила еси, мати, на небо от земли сердце свое возносящи, и в Царствие Христово вход себе уготовляющи; темже прияла от Бога обильный дар молитися о чтущих память твою благочестно.

Стих: Яко Тебе ради умерщвляемы есмы весь день.

Христовых агниц питала еси духовно, ко спасению тех наставляющи, учащи ни прещення от хульных безбожников, ниже самыя смерти не боятися; темже вольно Христу Жениху сочетавшыяся, со всеми святыми ныне на невесех царствуют.

Стих: Вменихомся яко овцы заколения.

Духовныя подвиги явила еси по изгнании от обйтели, в мире надмирно поживши, темже от руки Божией приятую во время гонений не оставила обитель твою, и ныне молитвами твоими, мати преподобная, из небытия возставляющи ю и питающи яко небесною манною, молитвами и щедротами Христовыми.

Слава, глас тойже:

Агниц Христовых собранию явилася еси, Рафаило, причастница, и новомучеников земли Черкасстей купножительница, скорби и смерть за Христа приявшая, и веру даже до конца неврежденно сохранившая. Мы же прославляем страдания твоя, мученице святая, и молим ти ся: молися Христу прилежно о всех нас, да спасет души наша, яко Милосерд.

И ныне: праздника, или Богородичен, глас 1:

Преславная Приснодево, Премилостивая Мати и Дево Пречистая, молитвами преподобных дев, Сыну Твоему угодивших, спаси души наша.

На благословении хлебов тропарь, глас 1:

Агница Христова мати Богоблаженная Рафаило, и наставница мудрая агниц Его явилася еси, венца мученичества сподобилася еси от десницы Иисусовы, Емуже не престай моляся, да соблюдет в мире Церковь Православную, и обитель твою от всех навет вражиих защитит, и спасет души наша, яко Милосерд.

На утрени

На Бог Господь: тропарь праздника дважды.

Слава, святой. И ныне: праздника:

Аще ли же вне праздника, поем тропарь святой с Богородичном,

якоже есть обычай.

По 1-й стихологии седален праздника, Слава: святой, глас 4:

Монашескаго стояния и посреде безбожных не отвергшаяся, и от церковнаго правила не отступльшаяся, кровию своею, преподобная, за Христа излиянною, землю нашу в сонме новомучеников ты освятила еси.

И ныне: праздника или Богородичен:

Матери и девы вкупе молитвы приносят воплощению Бога послужившей, Ейже Ангелов множества песни воспевают и человецы, яко к Скоропослушнице, припадают.

По 2-й стихологии, седален праздника, Слава: святой, глас 4:

Дивно во святых Бог прославляется, дивно в женстем немощнем телеси диавол посрамляется. Кровию своею запечатлевши Христово исповедание, к чертогу Его восходит игумения Рафаила, о верных Того присно молящи.

И ныне: праздника или Богородичен:

Скорбящих и обидимых Заступница и Утешительница явилася еси, Мати Господа нашего, яко учеников Его первейшая и закона любви Его лучшая исполнительница.

Полиелей.

Величание:

Величаем тя, страстотерпице преподобная, мати Рафаило, и чтем честная страдания твоя, яже за Христа во утверждение Православия претерпела еси.

И псалом избранный.

По полиелеи седален, глас 4:

Послана бысть Христом Пастыреначальником пасти агниц Его, преподобная, таже к лику святых дев, Господеви прежде пожренных, приложилася еси, сотвори убо с ними о нас молитву, во еже спастися душам нашим.

Слава, и ныне: праздника.

Или Богородичен сей, глас тойже:

Неувядаемый крин девства, ангелов и всех святых превысшую Деву Пресвятую воспоим, яко спасения нашего Родительницу и образа Его на земли почитателей Хранительницу.

Степенна, 1-й антифон 4-го гласа.

Прокимен, глас 4: Дивен Бог во святых Своих, Бог Израилев. Стих: В Церквах благословите Бога, Господа от источник Израилевых.

Всякое дыхание: Евангелие от Матфеа, зачало 104.

По 50 псалме стихира самогласна, глас 6:

Днесь вселенная вся преподобномученицы просвещается зарями, и Церковь Христова кровьми твоими, яко цветы некими украшаемая, вопиет ти, Рафаило: угоднице Христова и заступнице теплая, не престай моляся о рабех твоих.

Или сия, глас тойже:

Во время гонений от безбожных, звания монашеского не отреклася еси и правила иноческого не оставила еси, в мире в молитвах о мире присно пребывая, темже на небеси предстоя Престолу Вседержителеву, Рафаило честная, молися Ему присно о память твою ныне совершающих и честне лобызающих святыя мощи твоя.

Канон праздника на 6, и святыя, на 8, глас 8, егоже краегранесие: Страдания претерпевшая святая нами ублажается.

Песнь 1.

Ирмос: Воду прошед яко сушу и египетскаго зла избежав, израильтянин вопияше: Избавителю и Богу нашему поим.

Припев: Святая преподобномученице Рафаило, моли Бога о нас.

Сетей лукаваго посреди безбожных живущи избавльшаяся, молитвы воссылала еси о отечестве земнем, ныне же от земли сама преставилася еси и наша молитвы приемлеши.

Ты воду искушений немокренно прошла еси, Рафаило, и Избавителю представше, венец повелительный на главу твою от десницы Господней прияла еси.

Рафаиле, игумений обители Троицкия, приносяще моления, всякого злаго обстояния чаем избавление прияти.

Аще и тело твое, чистая, растерзаша, яко львове, безумнии мучителие, обаче души твоей не возбраниша полчища бесов лютых на небо восход совершити.

Богородичен: Дверь Небесная, Пресвятая Дево, нам явилася еси, яко Тобою нам спасения вход отверзеся Рождеством Твоим.

Катавасия по Уставу.

Песнь 3.

Ирмос: Небеснаго круга Верхотворче Господи и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Агниц, пожершихся Владыце от лет древних, любве ко Христу подражала еси, мати, неугасимым светильником веры Жениха сретила еси и на брак Агнчий вошла еси радостно.

Небесных селений жительница, мощи своя нам оставила еси в память страданий за веру во Христа, егоже возлюбила еси всем сердцем твоим.

Иже вере твоей подражающим, и мощем покланяющимся твоим, и в помощь молитвенно призывающим тя, буди помощница, Рафаило, мати преподобная.

Явилася еси мудрая паче Евы, праматере твоея: та бо лукаваго льсти внимаше, ты же вся козни диавольския поправши, от слуг его умерщвления прияла еси, жизни вечные обручение приявши.

Богородичен: Помощница матерем и девом Покрове, бельцем Заступница и иночествующим Защищение, Господа Иисуса Родительница и вопиющим к Тебе крепость Ты еси, Марие пресладкая.

По 3-й песни кондак праздника и икос.

Седален святыя, глас 8:

Благочестия образы умудрившися, нечестия прелесть низвергла еси, мученице, и Божественным деланием присно распаляемая, мучителей угасила еси безбожное свирепство. Темже источаеши исцеления верою притекающим и празднующим любовию святую память твою, преславная Рафаило.

Слава, глас 4:

Возбуди нас твоими молитвами, преподобная, аки дев нерадивых, яже уснуша в час сретения Жениха, да, тебе подражающии, светильницы своя елеем благодати присно наполняюще, чертоги Его не отвержены пребудем.

Слава, и ныне: праздника, или Богородичен:

Лествице Иаковля, буди нам к небесному восхождению Помощница, Пресвятая Дево, молитва во Матерня Твоя многа может, во еже спасти всякаго, с любовию лобзающая лика Твоего честнаго изображение.

Песнь 4.

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Радости вечныя сподобльшаяся, оскудевающим в вере молитвами твоими ко Господу помощь подай, во еже, умножившейся вере нашей, радости небесныя улучим.

Емшым тя беззаконным, тех суровства никакоже убоялася еси, преславная, и посреде мучений прославила еси Христа, Рафаило преподобная.

Твоих молитвенник не презри, преподобная, вознеси ко Престолу Вседержителеву моления наша, да и мы от Него спасение душам нашим улучити сподобимся, прославляюще Его Божество.

Елико мощно нам, к тебе взывати будем, Рафаило, страстотерпице, нам скорая услышательница буди и пред Христом Ходатаица о прославляющих Его Божество.

Богородичен: Радование ангелом приимшая, радости вечныя сподоби и нас, Матерь Божию Тя Именующих и почитающих образ Твой и Сына Твоего.

Песнь 5.

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Поболевши на земли и много пострадавши, душу свою исцелила еси совершенне, и спасение бысть плод страданий твоих, еже от Человеколюбца Господа прияла еси, преподобномученице.

Егоже возлюбила еси Христа умоли, да сподобит и нас в вере твердей и надежде несумненней любви сподобитися Божественныя.

Вседержителевою мышцею укрепляема, прещения безбожных в ничтоже вменяющи, смерть прияла есн, яже восход в небесная явися тебе.

Шатания безбожных, на многая лета нашедшия на страну нашу, десницею Господнею сокрушишася, молитвами же твоими ко Господу от сих и мы присно избавитися чаем.

Богородичен: Аще к Сыну на Небо с телесем взята была еси, Пречистая, обаче ушеса Твоя скоры есть на слышание молящих Тя, руце же быстры на помощь исправляющим житие свое в воле Сына Твоего.

Песнь 6.

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Яже древних мучениц образу страданий подражающая, и наши души да укрепиши в терпении и исповедании веры православныя: явилася бо еси, Рафаило, водительница инокинь честных ко спасению.

Слыша Господь молитвы твоя на всяко время, игумение премудрая, от среды скимнов рыкающих на Церковь Его, обаче тело твое растерзати сим попусти, да будеши хлеб Ему чистый и жертва приятная.

Во дни древния зверем телеса предавшия сподобишася славы неувядаемыя, тех стопам и матерь наша Рафаила последоваше, ныне от нас песньми ублажается.

Яко львове, поглотити агницу Христову восхотевше безбожницы, обаче ничтоже успеша, и памяти сея погубити не возмогоша, Дух во Святый память ея в день сей быти в Церкви учреди.

Богородичен: Твоего заступления не отыми от нас, Богородице, в печалех житейских пребывающих и ко аду приближающихся в прегрешениех своих, мольбами к Сыну Твоему скоро к покаянию возстави.

Кондак, глас 6:

Агницу Христову Рафаилу прославляем, на небесех Ему предстоящую, память ея в храме творяще, к горним же сердца наша возносяще. Та бо от безбожных мучителей страдания и смерть претерпе, венец нетленный прият от Господа, и благодать молитися о нас, любовию воспоминающих честная страдания ея.

Икос:

Противоста сонму лукавнующих и на Церковь Христову злобою дышущих кроткая агница Христова Рафаила, и от вепрей лютых растерзаема, крови алчущих, в мучении житие сконча. Обаче кровию ея честною потопи Христос началовластие безбожное, и пламень гонений угаси, и дарова земли нашей в сонме новомученик Черкасских ходатаицу и молитвенницу о всех, любовию воспоминающих честная страдания ея.

Песнь 7.

Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.

Аще изгнаша тя безбожнии от обители Троицы, во граде Чигирине бывшей, не возмогоша воспретити души твоей в небесную обитель внити, вопиющей: отцев Боже, благословен еси.

Яже исцелению Божию, Рафаило, тезоименитая, подаждь душам и телесам нашим исцеление, в помощь тя призывающим и поющим: отцев и матерей преподобных Боже, благословен еси.

На небеса восшедши верою твердою, молитвою ко Святей Троице ты, мати, нам помози, поющим: отцев Боже, благословен еси.

Ангельскаго чина светлое украшение и миряном похвала еси, игумение Рафаило, молися о нас, поюще: отцев Боже, благословен еси.

Богородичен: Марие Дево, пламень страстей наших угаси благодатию Твоею, предстательствующи прилежно о вопиющих: отцев Боже, благословен еси.

Песнь 8.

Ирмос: Царя Небеснаго, егоже поют вои Ангельстии, хвалите, и превозносите во вся веки.

Иже Ангельским ликом подражающих предстательством ко Господу укрепи, поющих Ему хвалу, Рафаило славная.

Ученьми апостолов и святых отец душу насыщала еси на земли, сих вере подражающи, и о нас, православного учения держащихся, пред вся Сотворшим буди ходатаица.

Болезней и скорбей исполнено бысть житие твое во отечестве твоем земнем, от Бога отлучившемся; радости же вечныя сподобльшеся, о обращении многих ко Христу ныне радуешися, мати преподобная.

Людем, тебе летную память творящим, буди в житии сем помощница и душам от жизни отлучающихся к Царствию Небесному путеводительница.

Аще и устне грешнии имамы, обаче пети святым похвальная навыком, сего ради и страстотерпице Рафаиле моление днесь честно совершаем.

Богородичен: Живота вечнаго Родительнице, жизнь вечную улучити и нас сподоби, на Тя упование имущих.

Песнь 9.

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.

Адовыми враты неодолима Церковь Христова нашими усты ныне песнь благохваления тебе, Рафайло, приносит.

Емуже молитвы, моления, пощения и коленопреклонения приносившая, умоли Христа о память твою чтущих и совершающих, яко да милость Свою выну пробавит на нас.

Тяготу от хулителей приявшая, безбожных началовластие и варвар гонение купно со всею Церковию претерпевшая, достойно мзду во граде Небеснем со всеми святыми улучила еси.

Славим преподобномученицу Рафаилу, вернии, хвалу Господеви о ней воспевающе, яко земли нашей и Церкви новое украшение даровася.

Богородичен: Яже Ангелом говейная и нами присночтимая, буди, Марие, Мати Господа, нам путеводительница в Царство Сына Твоего, якоже древле тьмам святых Его.

Светилен

Подобен: Апостолы от конец:

Приими наше пение и помолися ко Христу, святая, да избавит сердца наша от прилога бесовскаго и страстей, вшедших в нея.

Слава, и ныне: праздника, или Богородичен:

Препрославленная от матерей и воспеваемая от дев, не остави нас, яко Едина Матерь и Дева еси Ты.

На хвалитех стихиры, глас 4:

Воспоем днесь терпение мужемудренное, прославим восход ко Пренебесным мудрыя игумении обители Чигиринския, нам бо, память ея ныне творящим, восхождению к горним есть помощница благодатию, яже от Бога стяжала есть.

Образу Христову и святым Его покланялася еси честне, Рафаило, в житии земнем, ныне же твоему образу покланяющихся приими молитвы и скорое предстательство сотвори ко Совершающему вся во благое Христу Господу.

Благо есть нам, обретшим новую пред праведным Судиею предстательницу! Темже, Рафаиле славней днесь праздник составльше, последовати потщимся учащающим до рог олтаревых, хвалу Господеви воспевающе.

Правила церковнаго верно держащимся миряном и монашеския правила соблюдающим иноком буди изрядная помощница, о всех же тебе чтущих ко Господу молитвенница.

Слава, глас 6:

Пребыла еси в вере непреклонна, сию житием своим посреде безбожных исповедала еси, яростию безумных убиена бывши, явилася еси миру, преподобномученице Рафаило, образ доблий всех добродетелей.

И ныне: праздника, или Богородичен:

Ты еси лоза истинная, Богородице, возрастившая нам плод Живота вечнаго, молися, Девице, со святыми апостолы и мученики и всеми святыми, помиловатися, молимся, душам нашим.

Славословие великое.

По Трисвятом тропарь святыя. Слава, и ныне, праздника, или Богородичен.

Отпуст. И дается святый елей от кандила святыя: и час 1-й.

На часах

На 1-м часе тропарь праздника. Слава, святыя: и ныне, Богородичен часов. По трисвятом, кондак праздника, и святыя глаголем пременяюще.

На Литургии

Блаженна, праздника песнь рядовая, и от канона святыя, Песнь 3.

Прокимен праздника, и святыя, глас 4: Боже, дщери царей в чести Твоей. Стих: Приведутся в веселии и радовании, введутся в храм Царев.

Апостол дне, и святыя, Римляном, зачало 99.

Аллилуиа дне, и святыя, глас 6: Яко се врази Твои возшумеша и ненавидящии Тя воздвигоша главу. Стих: Проидохом сквозе огнь и воде, и извел еси нас в покой.

Евангелие дне, и святыя, Матфеа, зачало 104.

Причастен праздника, и святыя: Радуйтеся, праведнии, о Господе, правым подобает похвала.

Источник: сайт храма новомучеников и исповедников Российских в Строгино

По изданию: Служба преподобномученице Рафаиле, игумении Свято-Троицкого Чигиринского женского монастыря. Чигирин, 2008

Месяца августа в 12 день

Служба преподобномученику Варлааму, архимандриту Белогорскому и иже с ним пострадавшим

На малей вечерни

На Господи воззвах: стихиры, глас 2.

На образ твой зряще, преподобне отче, / хвалим тя и радостию радуемся, / кроток быв и смирен сердцем, / плоды принесл еси Христова смирения / яко древо благосеннолиственное, / и нас научи смиряти души наша / пред Отцем Небесным и братиями нашими, // да обрящем вечную победу с тобою.

Все твое желание к Богу прострый, / путь постнический совершил еси, отче, / и ныне вновь призывает тя Господь ко служению Церковному, / орудием тя крепким сотворяя, / да враги всех благ низвержени будут, // и да хвалится вечно твоя память.

Се ныне не предел еще Божия о нас благоволения, / что речем о сих, яже ныне содеваются? / Ныне помазуешися от Духа Свята, на служение Христово, // отче Варлааме приснопамятне.

Образ смирения Христова и любве Его / житием твоим показал еси, преподобне, слезно взывая: / тщитесь достигнуть совершенства, яже Любы есть. / С духовным деланием и телеснаго труда не презирати, / но творящии же сия // не ослабнут в правде Божией во веки.

Слава, глас той же:

Приидите вернии, ко Христу любовию утренююще, / да радости страдальца предивнаго причастницы будем. / Ныне ангелы на небесех и человецы на земли радуются. / Да видяще, како любит Господь верных своих, // и мы Царствию Христову приобщимся.

И ныне, праздника.

На стиховне стихиры, глас 6.

Имже образом желает елень на источники водныя, / сице возжаждал еси ко Христу Богу, / на горах присно взывая во изумлении: / благослови, душе моя, Господа. / Ныне же предстоя Ему неизреченно, / Варлааме преподобне Боговидче, / ниспосли нам огнь божественныя любве, // да тою очистим души наша.

Стих: Честна пред Господем / смерть преподобных Его.

Больши сия любви никтоже имать, / да кто душу свою положит за други своя. / Кровь твою излиял еси за род человеческий, / помяни нас, отче Варлааме, / да узрим в Духе Святе твое милостивное предстательство, // и росою слез твоих ороси мир и души наша.

Стих: Блажен муж бояйся Господа, / в заповедях Его восхощет зело.

Велико и чудно явися житие Твое, Варлааме преподобне: / истощивыйся до смерти лютыя, до ада преисподнейшего, / возвысился еси до ангельскаго дерзновения. / Невечернего света насыщаешися / и ныне молися даровати душам нашим // мир и велию милость.

Слава, глас тойже:

Сокровище Любве нетленныя / припадаем ти, моляся, Варлааме блаженне: / утверди нас нести труды покаяния / и ради любве Господа терпети вся болезни и вся скорби даже до конца, / якоже ты, отче предивне, подвигом добрым победив / венчался еси ангельскими лики // и царствуеши ныне со Христом во веки.

И ныне, праздника.

Тропарь писан на велицей вечерни

На велицей вечерни

Блажен муж: 1-й антифон.

На Господи, воззвах: стихиры на 8: праздника самогласны 3, глас 4.

Ины стихиры преподобномученику Варлааму, глас 8.

Законом прадедним оплетшеся иногда, / на гору Божию наемником восшед, / преобразился еси, преподобне Варлааме. / Христовой Церкви сочетался еси, / отеческую веру и благодать восприя, / мудрования человеков отметая, / начальник обители явился еси // и возгреме чрез тебя глас Господень в концы.

Гора сия – Гора Преображения / всем с верой притекающим соделалась / тобою, преподобне Варлааме. / Монахов множество собра / и, страждущих с любовию принимая, / лесная дебрь процвела. / Гора сия Голгофою явися преподобным – // слезами и кровьми освящена.

Ины стихиры преподобномученикам Белогорским, глас 1.

Телеса ваши на растерзание предасте / блаженнии Сергие и Илие, / духу плоть покорившие, / Страшнии Страсти Христовы сподобистеся восприяти. / Егда же главы ваши сокрушены бысте // венцы небесныя восхитили есте.

Множество ран претерпевше святии, / водою погублены на воде упокоения возрадовастеся / преподобнии Иоанне и Виссарионе, / Матфее и Савво. / С ними же долготерпением и множайшими кровьми // омылись есте светосиянно Иоасафе и Маркелле.

Царя Небеснаго воинству сопричтены, / земное воинство отвергосте рекше: / «Се, наша брань не к плоти и крови, / но к духовом злобы поднебесным». / Блажени живот свой положивши / не против отцев и братии шедшия, / но за ближния, други своя // всехвальнии Белогорстии преподобномученицы.

Слава, глас 6:

Преподобне отче, / Уральскаго Афона пастырю добрый, / достоблаженне мучениче Варлааме, / веры истинной поборниче, / надежды жизни будущей проповедателю, / любовию избыточествующ всем притекающим, / слезный к Богу молитвенниче, // испроси нам мир и велию милость.

И ныне, праздника.

Вход. Прокимен дне. И чтения три мученическая.

На литии стихиры праздника.

Слава, глас 5:

Приидите мучениколюбцы, / отцев блаженных прославим – / белогорских молитвенников / доблемудренно во обители земной трудившихся / и в селениих небесных упокоившихся, / воистину до крови подвизавшихся. / Темже и сугубые венцы стязавшие, / молим вы, преподобнии мученицы, // испросите нам оставление грехов и велию милость.

И ныне, праздника.

На стиховне стихиры праздника.

Слава, глас 6:

Житейская шатания отвергнув, / Христовой благодати взыска / дóндеже обрете место Божие, / идеже монахов населил еси стада. / Пастырю милосердный, / преподобномучениче Варлааме, / утешителю скорбящих и маловерных, // не забуди нас, молящих ти ся.

И ныне, праздника.

Тропарь, глас 4:

Узы и страдания кротко претерпел еси, / свидетельствуя о Любви Христовой даже до смерти. / Избранник Божией Матери явился еси, / горняго мира смирением достигл, преподобне Варлааме. / И ныне милостиво посещая чад твоих, / моли Христа Бога // спастися душам нашим.

Ин тропарь, глас 8:

От юности пути Христова вожделел еси, преподобномучениче, / на Горе, Богом избранной, вселился еси; / и, множество иноков собрав, светильник сонму христолюбцев явился еси. / За любовь к ближним безбожными умучен был еси; / и ныне моли Христа Бога, преподобномучениче Варлааме, / о нас, чтуших святую память твою.

На утрени

По 1-м стихословии седален, глас 4:

Званию Господа твоего последовал еси, мир отверг и вся яже в нем красная, всеблаженне Варлааме, претерпел еси пустынное озлобление усердно, полки же отразил еси демонов мужественне. Темже твою память присно песньми восхваляем верно.

Слава, и ныне, праздника.

По 2-м стихословии седален, глас 4:

Земленых и тлеющих наслаждений небрегосте, и пустынное житие возлюбисте, мира красоты и пищи временныя возненавидевше, и отсюду сподобистеся мученическому и постническому сочтатися лику: с нимиже молите спасти рабы ваша.

Слава, и ныне, праздника.

По полиелеи седален, глас 6:

В пощении искусен быв, во страдании просиял еси, и просветил еси верныя твоими подвиги, блаженне Варлааме: темже тя вси согласно величаем.

Слава, и ныне, праздника.

Степенна, 1-й антифон 4-го гласа.

Прокимен, глас 4-й: Честна пред Господем смерть преподобных Его.

Стих: Что воздам Господеви о всех, яже воздаде ми.

Евангелие от Матфея, зачало 38.

По 50-й псалме стихира со стиховны: Житейская шатания отвергнув:

Канон праздника на 6 и святаго на 8.

Канон святаго,

егоже краегранесие: Варлаама новаго Святогорца прославим. Глас 8.

Песнь 1.

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Воспети по достоянию утверди нас, Господи, новаго мученика Твоего, преподобнаго Варлаама, да славится тем Имя Твое, Дивнаго во святых Своих.

Ангельскому жительству прилежа, Писаниям Божественным от юности навыкнув, борющия страсти разумев, Христу вопиял: Жизнодавче, оживи мя Духом Твоим Святым.

Распалися сердце твое о Бозе, во оправданиях Господних поучаяся, к молитве обратися, блаженне, от прелести мира отвращся Путь и Истину и Живот взыска.

Богородичен: Лика Твоего не отврати от нас, Владычице, о египетских снедях скорбящих, и научи пети Избавителю и Богу нашему.

Песнь 3.

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Апостольские предания мудрованиями расколоучителей отметаемыя позна, блаженне, егда благодать обрести возжада, странствованию предахся. От бездны же отчаяния потщался избавитися, истинную Церковь Христову явити молихся.

Аще овцы без пастыря, како благодати пажити обрящут – взывал еси? Тем же нощным стенанием вопиял: яви нам, Господи, место, идеже священницы Твои, в правду облеченныя!

Молебствия православных бегая, тайно же в бездождии с ними моляся, знамения благодати просил – каплющую росу духовную в душу прияти.

Абие одожди Господь милости Своя, яви чудо по молебствию, посла пастыря Своего, на молитву веры призирая, от неведения разрешити и светом облистати тя.

Богородичен: Нетвердыя стопы наша, человеком угождающия, к Сыну Твоему и Богу управи, Владычице Богородице, от неплодия души избавляя.

Ин кондак, глас 7:

Молитвою теплою к Богу / родную землю согрел еси; / евангельски пожив, досточудне, / людей заблуждших умудрил еси. / Молися, небесный человече, // за нас, земных и недостойных.

Седален, глас 4:

Страстное покорил еси плотское мудрование, и горшая поработив лучшему, отче Варлааме, преславне сокрушил еси бесовския козни постом, и возсиял еси в мире яко луча солнечная, сиянии твоих добродетелей: сего ради тя воспеваем.

Слава, и ныне: праздника.

Песнь 4.

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив, Тем с пророком Аввакумом зову Ти: силе Твоей слава, Человеколюбче.

Отвергше прадедния блуждания обретох Благодать и Истину; Петру архиерею хлеб и от пчел сот яко Христу в дар принося, преподобне, Хлебом Жизни питаем, уста твоя медоточныя содела.

Восхищением непщева благословение яти, неразумныя, како благодать имате, убежала бо вас – взывал еси, блаженне, сродников и другов, в расколе коснеющих, к Чаше спасения привлекая.

Аще Церковь кто преслушает, яко язычник и мытарь вменяется, како отметаетесь Пославшего самовидцев, како с Телом Христа разлучаетесь – витийствова преподобне, неведением гибнущих исцеляя.

Богородичен: Грехами богатеющия спаси ны, Царице Небесная, и осужденным милость испроси, не имамы бо иныя помощи разве Тебе.

Песнь 5.

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Обитель возводити наемником пришед, благодатию уловлен, начальник и строитель явился преподобне и в ангельский образ облеклся.

Столпом облачным и образом креста молнииным избранное место многажды Господь верным открыва, устроение обители благословляя, призва тя, богомудре Варлааме, пасти зде стадо свое.

В афонской пустыни жительствовати ревнуя, святое послушание стяжевая, Промыслу повинулся, блаженне, Уральский Афон возрастити потщался.

Богородичен: Ясти и питии, играти и по воле греховней ходити навыкох, в руце Божией быти не умудрихся, окаянен, но Ты, Пресвятая Дево, просвети скудоумие мое.

Песнь 6.

Ирмос: Ризу мне подаждь светлу, одеяйся светом яко ризою, Многомилостиве Христе Боже наш.

Трудами, молитвою и постом образ делания иноческаго дая, наипаче послушанию навыкати научал еси, преподобне Варлааме, всем послушлив бывая.

От плена египетскаго людие моисейски избавляя, на Гору Боговидения восшед, закон жития иноческаго восприя и учеником даде, к многоплодию души направляя.

Гласом кротким и слезами многими неправых увещавая, блаженне, простотой, смирением и любовию терпеливно побеждал еси.

Богородичен: Осквернихся беззаконьми многими, добродетелей наг явихся, срамные одежды имам, но милостию Твоею, Пресвятая Дево, ущедри мя и покрый.

Кондак, глас 4:

Яко постника искуснаго / и страдальца Боговенчаннаго, / горняго жителя и Боговидца / в песнех достойно восхвалим Варлаама приснохвальнаго, // той бо змия лукаваго попрал есть.

Икос

Страстем Господним подражая, умрети за истину сподобился еси, лесть безбожнаго суетства разоряя, мужески подвигся противу врагов Церкви Православныя, тех злохитрости и неистовства, и козни низложил еси, и венец почести приял еси, Варлааме, преподобне страдальче. Тем верою прибегаем и зовем ти, от враг видимых и невидимых избави нас, ты бо змия попрал есть.

Песнь 7.

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Радоватися сердцем, в храм идуще, поучал еси, преподобне Варлааме, яко сподобил Господь со святыми Отцами славословие приносити: Боже, благословен еси.

Церковь соборную возвести потщался, блаженне, на Господа печали и попечения возложил еси, по вере же богатыя милостыни приях, храм зело преукраси зовуще: Боже, благословен еси.

Ангельски предстояти Богу и воспевати со страхом братию наставляя, богомудре Варлааме, умиленной службой все концы благодатно просвети взывати: Боже, благословен еси.

Богородичен: Печальми житейскими смущаем, унынием побеждаюся, маловере, к Тебе, Пречистая Госпоже, вопию: изведи ум мой от скорби, снедающей мя.

Песнь 8.

Ирмос: Царя Небеснаго, егоже поют вои Ангельстии, хвалите и превозносите во вся веки.

Ради Христа уды душевныя и телесныя весь день умервщляя, напоследок воистину яко овца заколения вменихся, преподобне.

Огрубевшие в неверии сердца любовию твоею растопляхуся, души страждущия дивно к жизни возставляхуся, велиих бо таинств явился еси собеседниче, блаженне.

Слову Божию вечер и заутра притекающих назидая, преподобне Варлааме, молчанием и молитвою труды своя растворяти потщался еси.

Богородичен: Лютыми страстьми расхищаему, удобее молчание хранити, обаче Тобою, Дево Богородице, дерзаю и аз вопити: благословите вся дела Господня Господа.

Песнь 9.

Ирмос: Воистину Богородицу Тя исповедуем, спасении Тобою, Дево Чистая, с Бесплотными лики Тя величающе.

Апостольскими стопами на Гору Преображения восшед, веру Петрову и любовь Иоаннову яви, преподобне, напоследок же умучен бых, надеждою Иаковлевой окриляем показася.

Во узах духом креплий, на страдания вольно грядый, Христу подобясь, плачущим заповеда: плачьте о себе и детях ваших.

Исповеда пред ангелы и человеки Имя Господне, муки претерпе, венец доброты восприя, славне: тело бо водной глубине предадеся, душа же водами нечестия не потоплена бысть.

Богородичен: Мати Божия, Благая Вратарнице, не попали нас, грехми болезнующих, яко оных безумцев, Лику Твоему ругавшихся, огнь бо поял место беззакония их.

Светилен:

Процвел еси яко финикс давидски, отче, и обитель явился еси Духа Пресвятаго, и славна тя вселенней показа. О нас непрестанно моли, почитающих верою пречестную память твою, преподобне Варлааме.

Слава, и ныне, праздника.

На хвалитех стихиры на 6: праздника 3 и

ины стихиры преподобномученикам, глас 2:

Киими хвалебными песньми / воспоим богомудраго Варлаама, / ко спасению неустаннаго путеводителя, / попечителя душ немощных, / белогорскаго светильника. / От погибели многия обративый, премудре, // молимся ти помози и нам грешным.

Преподобниии мученицы, / не дасте сна очима вашима и веждома дремания, / в броня правды облекшеся, / пути Господни разуместе / и в заповедях Его текосте, / и тако во святых жребии свои кровьми восприясте, // – воистину добрую куплю сотворили есте.

Преподобнии наставницы, / святой жизни проповедатели, / блаженней вечности земнии устроители, / страстей душевных и недугов прогонителие, / алчущих питатели и скорбных посетители, / и всякой душе озлобленней скорые утешители, // молим вас, помозите и нам грешным.

Слава, глас 1:

Мира познасте безумие, / блаженнии белогорцы, / избра вас себе Господь, / во искушения ввергох, / любящим Его смертию поспешествуя, / во благих души водворих. // Воистину никтоже разлучи вы от любве Божия.

И ныне, праздника.

На Литургии

Блаженны праздника Песнь 7.-я и 8-я от обоих канонов на 4, и святаго песни 6-я на 4.

Прокимен, глас 7: Восхвалятся преподобнии во славе, и возрадуются на ложах своих.

Стих: Воспойте Господеви песнь нову, хваление Его в церкви преподобных.

Апостол к Римлянам, зачало 99

Аллилуиа, глас 6: Блажен муж бояйся Господа, в заповедях Его восхощет зело.

Стих: Сильно на земли будет семя его.

Евангелие от Лука, зачало 64.

Причастен: Радуйтеся праведнии о Господе, правым подобает похвала.

Источник: сайт храма новомучеников и исповедников Российских в Строгино

Ме́сяца а́вгуста в неде́лю пред 18-м днем

Собо́р Ке́меровских cвяты́х

На вели́цей вече́рни

На Го́споди, воззва́х: стихи́ры на 10: воскре́сны 4, и святы́х 6, глас 1:

Прииди́те, ве́рнии, и ви́дите дела́ Бо́жия,/ я́же сотвори́ Госпо́дь:/ земноро́днии, жите́йское попече́ние отло́жше,/ соста́вим лик пра́зднующих,/ днесь бо нам небе́сное ра́дование,/ просла́вим святы́я, в земли́ Ке́меровской просия́вшия,/ и к ним возопии́м:/ моли́теся, святи́и, о сро́дницех ва́ших,// любо́вию па́мять ва́шу прославля́ющих.

Весели́ся, земле́ Сиби́рская,/ и похвали́ Го́спода Бо́га,/ я́ко Той благослови́ святы́я Своя́ в тебе́,/ и́же ны́не предстоя́т Престо́лу Его́/ и, я́ко свети́ла незаходи́мая,/ зе́млю Ке́меровскую озаря́ют/ и мо́лятся непреста́нно о всех нас,// па́мять их любо́вию соверша́ющих.

Егда́ умно́жишася шата́ния суему́дрых/ и распростро́шася беззако́ния заблу́ждших,/ тогда́, ве́рою укрепля́емии,/ не убоя́стеся убива́ющих те́ло,/ души́ уби́ти не могу́щих,/ но па́че изостри́сте ве́ры и любве́ мечи́ духо́вныя, обою́ду о́стрыя,/ и си́ми победи́сте всю си́лу вра́жию./ Вси святи́и земли́ Ке́меровския,// моли́теся о душа́х на́ших.

Священному́чениче Павли́не,/ се́рдце ми́лующее ко вся́кой тва́ри име́я,/ му́жество тве́рдое яви́л еси́/ и, о избра́нии Предстоя́теля Це́ркве Ру́сския ревну́я,/ мно́ги ско́рби от безбо́жныя вла́сти претерпе́л еси́,/ убие́н же быв с бра́тиею от беззако́нник,/ вене́ц нетле́нный от Судии́ Пра́веднаго прия́л еси́,// Его́же моли́ поми́ловатися душа́м на́шим.

Досточу́дне священному́чениче Амфило́хие,/ столп непоколеби́мый Це́ркве Ру́сския яви́лся еси́/ и за кресты́, на дщи́цах изображе́нныя,/ непра́ведне осужде́н был еси́,/ крест же му́ченический со смире́нием взем,/ той безро́потне поне́сл еси́/ и, да́же до сме́рти пострада́в,/ кровь твою́ за Христа́ пролия́л еси́.// Его́же моли́ спасти́ся душа́м на́шим.

Глас 4:

Прииди́те, ве́рнии лю́дие,/ просла́вим ста́рцы Бо́жия:/ Васили́ска Сиби́рскаго, Зоси́му Верхо́вскаго и Петра́ То́мскаго,/ и си́це им возопии́м:/ ра́дуйтеся, страны́ Сиби́рския ве́лие украше́ние/ и земли́ пусты́нныя благово́нное процвете́ние,/ ра́дуйтеся, дея́ний моли́твенных сокро́вище пребога́тое/ и благода́ти Боже́ственныя исто́чницы// всем, любо́вию вас почита́ющим.

Сла́ва, глас 6:

Це́ркве Ру́сския сла́во/ и земли́ Сиби́рския украше́ние,/ святи́и сро́дницы на́ши:/ вы, изгна́ние и лю́тая страда́ния му́жественне претерпе́вше,/ от тьмы ве́ка сего́ к незаходи́мому Све́ту прешли́ есте́./ Ны́не же, во сла́ве Небе́сней пребыва́юще,/ моли́теся о е́же сохрани́тися нам в Правосла́вии// и спасти́ся душа́м на́шим.

И ны́не, Богоро́дичен воскре́сен.

Вход. Проки́мен дне. И чте́ния три.

Дея́ний святы́х апо́стол чте́ние (глава́ 4):

Во дни о́ны, глаго́лющим апо́столом к лю́дем,/ наидо́ша на ни́х свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки, и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пя́ть./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою, или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.

Дея́ний святы́х апо́стол чте́ние (глава́ 4):

Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я́,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.

Дея́ний святы́х апо́стол чте́ние (глава́ 4):

Во дни ты́я, отпуще́на бы́вша апо́стола приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же Дýхом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

На лити́и стихи́ры, глас 2:

Ра́дуйся, священному́чениче Анато́лие,/ па́стырю ре́вностный Це́ркве Бо́жия,/ сро́дниче наш, пострада́вый в новому́ченицех,/ ра́дуйся и ты, достохва́льне Ми́роне,/ Бо́гу усе́рдно моли́выйся/ и угро́зы безбо́жных ни во что́же вмени́вый./ О иере́и победоно́снии,/ моли́те ми́лостиваго Бо́га// спасти́ся душа́м на́шим.

Ра́дуйся, Серафи́ме, ве́рный свиде́телю ве́ры Христо́вы,/ ра́дуйся, Павли́не, тве́рдый ревни́телю избра́ния предстоя́теля Це́ркве Ру́сския,/ ра́дуйся, Арка́дие, соу́зниче и сомоли́твенниче их предо́брый./ О святи́телие достосла́внии и священному́ченицы добропобе́днии,/ Божества́ Триипоста́снаго ве́рнии служи́телие,// моли́теся о спасе́нии душ на́ших.

Сла́ва, глас то́йже:

Прииди́те, ублажи́м новому́ченики и испове́дники,/ и́же, страда́ния многоразли́чная претерпе́вше/ и живо́т свой в дар Христу́ Бо́гу прине́сше,/ Ца́рствия Небе́снаго жи́тели яви́шася./ Те́мже к ним с любо́вию возопии́м:/ я́ко ве́лие иму́ще дерзнове́ние ко Го́споду,// моли́те спасти́ся душа́м на́шим.

И ны́не, Богоро́дичен, глас то́йже:

Тя, Всепе́тую Влады́чицу,/ я́ко Всецари́цу, Христу́ Царю́ предстоя́щую,/ вку́пе со все́ми святы́ми земли́ Ке́меровския// досто́йно велича́ем.

На стихо́вне стихи́ры воскре́сны.

Сла́ва, глас 6:

Те́плии на́ши засту́пницы,/ святи́и земли́ Ке́меровския,/ правосла́вныя ве́ры побо́рницы/ и любве́ Бо́жия ве́рнии свиде́телие,// моли́теся о е́же спасти́ся нам.

И ны́не, Богоро́дичен.

Тропа́рь святы́х, глас 4:

Днесь ра́достно лику́ет земля́ Ке́меровская,/ прославля́ющи новому́ченики, испове́дники, преподо́бныя и пра́ведныя своя́,/ доброде́тельми Бо́гу послужи́вшия/ и во дни гоне́ния безбо́жнаго жизнь свою́ за Христа́ положи́вшия./ Те́мже к ним усе́рдно воззове́м:/ моли́те Ми́лостиваго Бо́га// спасти́ся душа́м на́шим.

На у́трени

На Бог Госпо́дь: тропа́рь воскре́сен, два́жды. Сла́ва, собо́ру святы́х. И ны́не, Богоро́дичен.

По 1-м и 2-м стихосло́вии седа́льны воскре́сны.

Велича́ние:

Велича́ем вас,/ вси святи́и, в земли́ Ке́меровской просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Бог нам прибе́жище и си́ла.

Го́споди, воздви́гни си́лу Твою́ и прииди́, во е́же спасти́ ны.

Глаго́лах о свиде́ниих Твои́х пред цари́ и не стыдя́хся.

Вси язы́цы обыдо́ша мя, и и́менем Госпо́дним противля́хся им.

Ди́вен Бог во святы́х Свои́х, Бог Изра́илев.

Ипакои́, та́же седа́лен святы́х, глас 3:

Страда́нии новому́чеников и испове́дников земли́ Ке́меровския,/ и́же по Тебе́ пострада́ша, умоле́н бу́ди, Го́споди,/ и вся на́ша боле́зни и стра́сти исцели́, Человеколю́бче,/ мо́лимся.

Сла́ва, глас то́йже:

Страстоте́рпцы Госпо́дни,/ блаже́нна земля́, напита́вшаяся кровьми́ ва́шими:/ на суди́щи бо врага́ обличи́сте и Христа́ со дерзнове́нием пропове́дасте./ Того́, я́ко Бла́га, моли́те спасти́ ду́ши на́ша.

И ны́не, Богоро́дичен:

Богоро́дице Де́во Мари́е,/ ро́ждшая Христа́ Изба́вителя и Спа́са,/ моли́ся Ему́ со святы́ми земли́ на́шея,/ очище́ние грехо́в дарова́ти нам и ве́лию ми́лость.

Степе́нна гла́са. Проки́мен и Ева́нгелие воскре́сны.

Кано́н воскре́сный со ирмосо́м на 4, Богоро́дицы на 2, и святы́х на 8.

Кано́н святы́х, глас 8.

Песнь 1.

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припе́в: Вси святи́и земли́ Ке́меровския, моли́те Бо́га о нас.

Озари́, Го́споди,/ се́рдце мое́ све́том благода́ти Ду́ха Твоего́ Свята́го,/ да воспою́ святы́х земли́ Ке́меровския/ и просла́влю Твое́ Божество́.

Прииди́те, празднолю́бцы,/ восхва́лим Го́спода, ди́внаго во святы́х Свои́х дре́вних и но́вых,/ во́лею и нево́лею пресели́вшихся в зе́млю на́шу/ и све́том любве́ Христо́вы ю́ озари́вших.

Тро́ичен: Тро́ице Свята́я, Еди́нице Неразде́льная,/ Триипоста́сная Си́ло и Сла́во,/ освяти́вшая зе́млю на́шу по́двигом и кровьми́ святы́х Твои́х,/ непреста́нно Тя славосло́вящих,/ сподо́би и нас Твоего́ Боже́ственнаго сия́ния.

Богоро́дичен: Богоро́дице Пречи́стая, Ма́ти ро́да христиа́нскаго,/ осени́ нас покро́вом Твои́м,/ моли́тв ра́ди святы́х земли́ на́шея,/ да изба́вимся от бед и скорбе́й.

Песнь 3.

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

О преди́вный Васили́сче,/ смире́ние Христо́во стяжа́вый и Го́рняго ми́ра зва́ние улучи́вый!/ Ты, кра́сная ми́ра сего́ презре́в,/ в земли́ пусты́нней Бо́га обре́л еси́ и мно́гих на путь спасе́ния наста́вил еси́./ Моли́ Го́спода Сил, да озари́т и наш путь в Ца́рствие Небе́сное.

Зоси́мо пресла́вный, А́нгелов удивле́ние,/ в по́двизе преподо́бному Васили́ску подража́вый,/ и ты, пра́ведный Пе́тре, послуша́нием Бо́гу угоди́вый и моли́твы Иису́совы иску́сный де́латель яви́выйся!/ Помози́те нам по́двигом до́брым подвиза́тися и моли́теся о нас ко Го́споду,/ во е́же изба́витися от тьмы грехо́вныя.

Боле́зньми и страда́нии ва́шими, подви́жницы сла́внии,/ Бо́га просла́вили есте́ и хода́таи ве́рнии о нас яви́лися есте́./ Сего́ ра́ди с любо́вию к вам вопие́м:/ моли́теся ко Го́споду о чту́щих святу́ю па́мять ва́шу.

Богоро́дичен: Пресвята́я Де́во, Ма́ти Го́спода на́шего,/ спаси́ и сохрани́ нас от дел скве́рных и те́мных,/ да све́том благода́ти Бо́жия озари́мся и улучи́м спасе́ние.

Конда́к святы́х, глас 3:

Днесь святи́и земли́ на́шея/ с на́ми предстоя́т в Це́ркви и неви́димо за ны мо́лятся Бо́гу,/ да изба́вит нас от враг ви́димых и неви́димых,/ от неду́га и гла́да и от вся́каго зла// и спасе́т ду́ши на́ша.

И́кос:

Восприи́мше и́го благо́е Христо́во на ра́мена своя́,/ святи́и новому́ченицы и пра́ведницы,/ востеко́сте к Небе́сному Иерусали́му,/ сего́ ра́ди моли́те Христа́ о нас, вопию́щих си́це:/ Ра́дуйтеся, неусы́пнии на́ши моли́твенницы;/ ра́дуйтеся, пречу́днии хода́таи о нас ко Го́споду./ Ра́дуйтеся, я́ко труды́ ва́шими ве́ра Христо́ва насажда́ется;/ ра́дуйтеся, я́ко кровьми́ ва́шими Це́рковь утвержда́ется./ Ра́дуйтеся, я́ко со А́нгелы Святе́й Тро́ице предстои́те;/ ра́дуйтеся, я́ко с ни́ми Трисвяту́ю песнь Ей воспева́ете./ Ра́дуйтеся, я́ко Госпо́дь моли́твами ва́шими спаса́ет ду́ши на́ша.

Седа́лен святы́х, глас 2:

Моле́ние те́плое ко Го́споду о нас принеси́те,/ святи́и земли́ на́шея,/ я́же кровьми́ и по́двиги ва́шими освяще́на бысть,/ во е́же умири́ти мир и спасти́ ду́ши на́ша.

Сла́ва, и ны́не, Богоро́дичен:

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ еди́на вско́ре предста́тельствующая.

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу ни́щету посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Священному́чениче Влади́мире!/ Ты, сло́вом про́поведи безбо́жныя обличи́в и за Христа́ страда́ния претерпе́в,/ во узи́лищи Марии́нстем почи́л еси́/ и на Введе́ние Влады́чицы во оби́тели Небе́сныя вшел еси́./ Те́мже усе́рдно к тебе́ взыва́ем:/ моли́твами твои́ми сподо́би и нас Ца́рствия Небе́снаго дости́гнути.

Учи́телю до́блий, священному́чениче Пе́тре,/ тьму ве́ка сего́ му́жественне изобличи́вый,/ и Неофи́те пресла́вный, учи́телю до́брый, сомоли́твенниче Патриа́рха Ти́хона,/ и ты, Михаи́ле, наста́вниче ре́вностный, Сло́вом Бо́жиим наро́ды просвети́вый!/ Моли́теся ко Го́споду,/ да Све́том Христо́вым озари́мся и покая́нию научи́мся.

Благоде́теля неусы́пнаго и помо́щника ни́щим и си́рым,/ священному́ченика Льва просла́вим,/ бра́тство Не́вское во гра́де Петро́ве устро́ившаго/ и му́ченичества вене́ц со иере́ем Григо́рием прие́мшаго./ Моли́теся ко Го́споду, уго́дницы Христо́вы, спасти́ся душа́м на́шим.

Богоро́дичен: Де́во Пречи́стая, Влады́чице Богоро́дице,/ со святы́ми земли́ на́шея моли́твы принеси́ Сы́ну Твоему́,/ дла́ни пречи́стыя на Кресте́ распросте́ршему, во е́же собра́ти вся во еди́но,/ да бра́тство во Христе́ пребыва́ет.

Песнь 5.

Ирмо́с: Вску́ю мя отрину́л еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х// пути́ моя́ напра́ви, молю́ся.

Блюсти́телю ве́рный, святи́телю о́тче Амфило́хие,/ раско́ла искорени́телю и жи́зни церко́вныя му́дрый устрои́телю!/ Ты, в темни́цу за Христа́ мно́гажды вве́ржен быв,/ ве́ру правосла́вную да́же до кро́ве испове́дал еси́./ Моли́ся о нас, да и мы в Правосла́вии утверди́мся.

Священному́чениче Павли́не, гра́да Марии́нскаго похвало́,/ с соу́зники твои́ми: святи́телем Арка́дием, пресви́тером Анато́лием,/ Ника́ндром, па́стырем до́брым, и Киприа́ном ве́рным!/ Вы ве́лия ско́рби до́блестне претерпе́сте,/ оба́че сме́рти за Христа́ не убоя́стеся./ Моли́те Го́спода, пятери́це свята́я,/ и нам ве́рными Христу́ бы́ти и душа́м на́шим спасти́ся.

Седмери́цу му́ченик, земли́ на́шея упова́ние, в пе́ниих просла́вим и ублажи́м:/ святи́теля Серафи́ма, свиде́теля ве́рнаго ве́ры правосла́вныя,/ преподобному́чеников Ге́рмана и Ми́ну чудотво́рца со священному́чеником Алекса́ндром/ и пресви́теров Влади́мира, Васи́лия и Алекса́ндра, ча́шу страда́ний до конца́ испи́вших./ Моли́теся ко Го́споду, новому́ченицы сла́внии,/ дарова́ти земли́ на́шей мир и ве́лию ми́лость.

Богоро́дичен: Де́ву Чи́стую призове́м, Влады́чицу Пресвяту́ю,/ да помо́жет нам моли́тве те́плей научи́тися/ и в любви́ Бо́жией пребы́ти.

Песнь 6.

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Священному́ченика Константи́на, раско́ла обличи́теля дерзнове́ннаго, восхва́лим/ и по́двиги священному́ченика Леони́да, па́стыря до́браго слове́сных ове́ц Христо́вых,/ во узи́лищи Марии́нстем преста́вльшагося, воспои́м./ Моли́теся, святи́и, ко Го́споду,/ да сохрани́м ве́ру правосла́вную до сконча́ния на́шего.

Скорбьми́ тя́жкими венцы́ му́ченическия улучи́сте,/ священному́чениче Иоа́нне и му́чениче Михаи́ле!/ Вы бо, вку́пе слу́жбу Бо́гови соверша́вше,/ вку́пе и страда́ния за Христа́ претерпе́сте./ Моли́теся ко Го́споду, во е́же сподо́битися и нам Небе́сныя сла́вы.

За́вистию диа́вола, священному́ченицы Алекса́ндре и Константи́не,/ на сове́те нечести́вом осуди́стеся и во узи́лище ну́ждею со́слани бы́сте,/ иде́же, боле́зни, глад и мраз претерпе́вше,/ упокое́ние во Христе́ обрели́ есте́./ Моли́теся ко Го́споду, победоно́сцы сла́внии,/ и нам по́мощию Христо́вою наве́ты враг ви́димых и неви́димых победи́ти.

Богоро́дичен: Стена́ необори́мая и покро́в всемо́щный/ новому́чеником яви́лася еси́, Пресвята́я Де́во,/ те́мже Тя велича́ем.

Конда́к и и́кос воскре́сны.

Песнь 7.

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Неве́сты Христо́вы, преподобному́ченицы Мари́е и Ната́лие!/ Вы, во оби́тели Деви́чей вку́пе подвиза́вшася,/ и во страда́ниих ко Христу́, Небе́сному Жениху́, вку́пе востекли́ есте́./ Его́же усе́рдно моли́те спасти́ся душа́м на́шим.

Други́ни сла́вныя, преподобному́ченицы Мари́е и Евдоки́е,/ оби́тели Страстны́я насе́льницы!/ Вы, усе́рдне подвиза́вшася,/ доброде́тельми мно́гими житие́ свое́ украси́ли есте́/ и, смерть от безбо́жник неви́нно прие́мша,/ к Победи́телю сме́рти предста́ли есте́, вопию́ща:/ никто́же разлучи́т ны от любве́ Бо́жия.

Же́ртву живу́ю и всесожже́ние Творцу́ себе́ сами́х принося́ще,/ новому́ченицы сла́внии, воспева́ли есте́:/ могу́щии, покаря́йтеся, я́ко с на́ми Бог отце́в земли́ на́шея.

Богоро́дичен: Пречи́стая Де́во, Предста́тельнице на́ша,/ мо́лим Тя: преложи́ печа́ль на́шу на ра́дость/ и належа́щия ско́рби изба́ви.

Песнь 8.

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Бо́гу и́стово послужи́л еси́, священному́чениче Леони́де,/ предстоя́ у престо́ла четы́редесять и два ле́та,/ и пострада́л еси́ за Христа́, непреста́нно зовы́й:/ благослови́те, вся дела́ Госпо́дня, Го́спода.

Земля́ Сиби́рская прия́т те́ло твое́, пропове́дниче сла́вный, священному́чениче Васи́лие,/ ду́шу же твою́ святу́ю Госпо́дь,/ Его́же непреста́нно прославля́л еси́, зовы́й:/ благослови́те, вся дела́ Госпо́дня, Го́спода.

Преподобному́чениче Филаре́те!/ Ты, измла́да Христа́ всем се́рдцем возлюби́в,/ Пречи́стей Его́ Ма́тери усе́рдне моли́лся еси́/ и с о́бразом Ея́, Спору́чница гре́шных имену́емым,/ селе́ния ве́рных обходи́л еси́, подвиза́я их взыва́ти:/ благослови́те, вся дела́ Госпо́дня, Го́спода.

Богоро́дичен: О Всепе́тая Ма́ти, Влады́чице Богоро́дице, Спору́чнице гре́шных,/ моли́ся ку́пно со все́ми святы́ми земли́ на́шея,/ изба́витися нам от бед и скорбе́й и избе́гнути муче́ния ве́чнаго.

Песнь 9.

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв челове́к.// Те́мже Пречи́стую Богоро́дицу ве́рнии велича́ем.

Страстоте́рпче Бори́се терпеливоду́шне!/ Егда́ безбо́жницы прего́рдии на тя ополчи́шася,/ ты, всю наде́жду на по́мощь Бо́жию возлага́я,/ не усумни́лся еси́ и пострада́л еси́ да́же до кро́ве./ Ны́не же моли́твенно взыва́еши:/ моли́теся ко Го́споду, и по́слет вам благослове́ние Свое́.

О́тче священному́чениче Ми́роне!/ Ты, во младе́нчестве ве́ру правосла́вную обре́т и благода́ть Госпо́дню во гра́де Ла́врстем стяжа́в,/ клевету́ и жесто́кую смерть от безбо́жник в земли́ на́шей смире́нно прия́л еси́./ Ны́не же, Престо́лу Бо́жию предстоя́, Христа́ прославля́еши во ве́ки.

О а́нгели земни́и и челове́цы Небе́снии!/ Не забу́дите земно́е оте́чество ва́ше и ме́сто, иде́же страда́ния за Христа́ прия́ли есте́./ Моли́те Го́спода, да сподо́бит нас, сро́дников ва́ших,/ мо́ре жите́йское безпреткнове́нно прейти́,/ Ца́рствие Небе́сное улучи́ти и ку́пно с ва́ми славосло́вити/ пречестно́е и великоле́пое и́мя Отца́, и Сы́на, и Свята́го Ду́ха.

Богоро́дичен: Де́во Чи́стая, Ма́ти Го́спода на́шего,/ со все́ми святы́ми земли́ на́шея, моли́ Бо́га о нас.

Ексапостила́рий воскре́сен.

Сла́ва, святы́х, глас 1:

Да зна́менается на нас свет лица́ Твоего́, Го́споди,/ Его́же святи́и Твои́ яви́ша нам, во е́же просвети́ти ду́ши на́ша.

И ны́не, Богоро́дичен воскре́сный.

На хвали́тех стихи́ры воскре́сны 4, и святы́х 4, глас 8:

Восхва́лим Бо́га, ди́внаго во святы́х Свои́х,/ озари́вшаго зе́млю Ке́меровскую по́двиги святы́х дре́вних и но́вых,/ и́миже тьма грехо́вная разгна́ся// и ра́дость Небе́сная всем дарова́ся.

Возсла́вим Го́спода, призре́вшаго на лю́ди Своя́/ и страда́ньми святы́х Свои́х всех нас благослови́вшаго,/ с ни́миже Тому́ возопии́м:// Всеще́дрый Бо́же наш, сла́ва Тебе́.

Возвести́м о Го́споде ра́дость ве́лию,/ обрели́ бо есмы́ покрови́телей и защи́тников на́ших,/ и́хже моли́твами сохрани́, Го́споди,/ оте́чество на́ше земно́е// и утверди́ в Правосла́вии лю́ди Своя́.

Сла́ва, стихи́ра Ева́нгельская.

И ны́не, глас 2: Преблагослове́нна еси́, Богоро́дице Де́во:

На Литурги́и

Проки́мен, Апо́стол, Ева́нгелие и прича́стен воскре́сны гла́са. И святы́х проки́мен, глас 4: Ди́вен Бог во святы́х Свои́х,// Бог Изра́илев. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

При́зри, Го́споди, с высоты́ святы́я Твоея́ на предстоя́щия лю́ди и приими́ благодаре́ние на́ше о Твои́х вели́ких благодея́ниих, я́же сотвори́л еси́ со отцы́ на́шими! Услы́ши нас, прославля́ющих и́мя Твое́ свято́е, я́ко благоволи́л еси́ просла́вити во святы́х избра́нныя Твоя́, пра́ведники дре́вния и му́ченики но́выя, и́хже земля́ на́ша произрасти́ла есть, я́ко благо́е прозябе́ние и плод кра́сный. О преподо́бнии и пра́веднии земли́ Ке́меровския! Вы Го́спода Бо́га всем се́рдцем свои́м возлюби́сте и всеце́ло Ему́ угоди́сте! О святи́и новому́ченицы земли́ на́шея! Вы во дни гоне́ния безбо́жнаго от сокро́вищниц душ ва́ших спаси́тельное испове́дание правосла́вныя ве́ры изнесли́ есте́ и лю́дем ве́рным наста́вницы до́брии яви́лися есте́, ду́ши своя́ за Христа́ и дру́ги полага́юще. Ны́не у́бо к вам с любо́вию прибега́ем и мо́лимся: бу́дите Небе́снии засту́пницы земно́му оте́честву ва́шему, наставля́юще нас твори́ти во́лю Госпо́дню, во е́же преспева́ти и нам в ве́ре, благоче́стии и любви́ христиа́нстей, прославля́юще еди́нем се́рдцем и еди́неми усты́ Святу́ю, Единосу́щную, Животворя́щую и Неразде́льную Тро́ицу, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 14 мая 2018 года (журнал № 37)

Ме́сяца а́вгуста в 17-й день

Пра́зднование Пресвяте́й Влады́чице на́шей Богоро́дице и Присноде́ве Мари́и ра́ди ико́ны Ея́, имену́емыя «Све́нская-Пече́рская»

На вели́цей вече́рни

На Го́споди, воззва́х: стихи́ры на 8: пра́здника 3, Све́нския 5, глас 1.

Подо́бен: О ди́вное чу́до:

О, ди́вное чу́до!/ Блага́я Засту́пница/ усе́рдныя моли́твы ве́рных прие́мши,/ си́лою Свое́ю Боже́ственною/ и посо́бием Све́нскаго о́браза Своего́/ злове́рных супоста́т дале́че отгоня́ет,/ и град Брянск и окре́стныя ве́си весе́лия исполня́ющи,/ Е́йже возопии́м, ве́рнии,/ покро́вом Ея́ осеня́еми:/ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.

Ни отку́ду наде́ющеся/ по́мощи улучи́ти,/ то́кмо Тебе́ моля́щеся, Пречи́стая,/ и А́нгелом гове́йную ико́ну Твою́/ по сто́гнам гра́да лю́дие обнося́ще,/ а́бие весть об избавле́нии/ от наше́ствия вра́жия получи́ша/ и благода́рно воспе́ша Ти:/ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.

Твое́ сла́вят заступле́ние/ свяще́нных собо́ри,/ мона́си и мирсти́и,/ и во́ини христолюби́вии,/ ра́дуется земля́ Бря́нская,/ Све́нскою ико́ною Твое́ю крася́щися,/ к не́йже припа́дают ве́рнии,/ со Арха́нгелы и А́нгелы воспева́юще:/ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.

Кре́пкое Предгра́дие/ и Сте́ну необори́му,/ обре́тше Тя, Влады́чице,/ при́сно на по́мощь призыва́ем:/ избавля́й нас от ви́димых и неви́димых враг,/ па́че же от страсте́й безче́стия,/ собери́ расточе́нныя воеди́но,/ правосла́вие соблюди́ непоколеби́мо./ Благода́тная, ра́дуйся,/ с Тобо́ю Госпо́дь,// подая́й чту́щим Тя ве́лию ми́лость.

Вертогра́д духо́вный,/ оби́тель Све́нскую,/ ме́сто, Тобо́ю избра́нное,/ иде́же мона́хов ли́цы/ обстоя́т всечестну́ю ико́ну Твою́,/ грехо́в разреше́ния прося́ще/ и жития́ исправле́ния,/ и прича́стия Боже́ственныя сла́вы Твоея́,/ не оста́ви, Всепе́тая,/ но благоутро́бно уще́дри,// да́рующи чту́щим Тя ве́лию ми́лость.

Сла́ва, и ны́не, пра́здника, глас 2. Я́же Небе́с вы́шшая су́щи:

Вход. Проки́мен дне. Чте́ния три Богоро́дицы.

Бытия́ чте́ние (глава́ 28):

Изы́де Иа́ков от студенца́ кля́твеннаго, и и́де в Харра́нь./ И обре́те ме́сто, и спа та́мо. За́йде бо со́лнце,/ и взят от ка́мения ме́ста того́, и положи́ возгла́вие себе́, и спа на ме́сте о́ном,/ и сон ви́де:/ И се ле́ствица утвержде́на на земли́, ея́же глава́ досяза́ше до небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней, и рече́:/ аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней, тебе́ дам ю́, и се́мени твоему́./ И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки:/ и возблагословя́тся о тебе́ вся коле́на земна́я и о се́мени твое́м./ И се аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́: я́ко стра́шно ме́сто сие́;/ несть сие́, но дом Бо́жий, и сия́ врата́ Небе́сная.

Проро́чества Иезеки́илева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее, сотворя́т иере́и на олтари́ всесожже́ния ва́шего,/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их;/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет, и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

Царств тре́тиих чте́ние (глава́ 8):

Бысть, я́ко соверши́ Соломо́н е́же созда́ти Дом Госпо́день./ И собра́ вся ста́рцы Изра́илевы в Сио́н,/ вознести́ киво́т заве́та Госпо́дня из гра́да Дави́дова: сей есть Сио́н./ И взя́ша свяще́нницы киво́т заве́та Госпо́дня,/ и ски́нию свиде́ния, и вся сосу́ды святы́я,/ я́же в Ски́нии свиде́ния./ И царь, и весь Изра́иль пред киво́том./ И внесо́ша свяще́нницы киво́т заве́та Госпо́дня на ме́сто его́,/ в дави́р хра́ма, во свята́я святы́х, под кри́ла Херуви́мов./ Я́ко Херуви́ми бя́ху распросте́рты крила́ми над ме́стом киво́та:/ и покрыва́ху Херуви́ми над киво́том/ и над свята́я его́ свы́шше./ И не бе в киво́те, кроме́ двух скрижа́лей заве́та,/ я́же положи́ та́мо Моисе́й в Хори́ве, я́же завеща́ Госпо́дь./ И бысть, я́ко изыдо́ша свяще́нницы от свята́го,/ и о́блак испо́лни дом./ И не возмого́ша свяще́нницы ста́ти служи́ти от лица́ о́блака:/ я́ко испо́лнися сла́вы Дом Го́спода Бо́га Вседержи́теля.

На лити́и стихи́ры, глас 3:

Воспо́йте Го́сподеви, до́ли и хо́лми,/ дубра́вы и ре́ки Бря́нския земли́,/ се бо Цари́ца Богоотрокови́ца/ Све́нским-Пече́рским о́бразом Свои́м,/ я́ко щито́м несокруши́мым/ наше́ствие злочести́вых отража́ет,/ и в бе́гство неудержи́мое тех обраща́ет,// спаса́ющи от лю́тых град и ча́да Своя́.

Держа́вное Твое́ заступле́ние/ от сопроти́вных нахожде́ния и ве́ры поруга́ния/ Све́нскою ико́ною нам дарова́нное/ досто́йно пра́зднующе, Влады́чице,/ приле́жно мо́лим Тя:/ моли́ о лю́дех Росси́йских,/ да николи́же ко́зньми вра́жиими от пра́выя ве́ры отвратя́тся// и в благоче́стии непоколеби́ми да пребу́дут.

Сла́ва, и ны́не, глас 8.

Подо́бен: О пресла́внаго чудесе́:

О пресла́внаго чудесе́!/ О Бо́жия к нам гре́шным долготерпе́ния!/ Гро́зное Боже́ственное преще́ние врази́ разуме́вше,/ благода́тию Све́нскаго о́браза Твоего́, Цари́це Небе́сная,/ стра́хом одержи́мии,/ в бе́гство внеза́пное обрати́шася,/ си́лою свы́ше гони́ми,/ град же Твой и лю́ди весе́лия испо́лнишася,// благода́рно Тя велича́юще.

На стихо́вне стихи́ры, глас 4:

Весели́тся днесь све́тло/ сла́вный град Брянск и Све́нская оби́тель,/ я́ко святу́ю Твою́ ико́ну, Влады́чице,/ Боже́ственными чудесы́ просла́вила еси́/ и полки́ вра́жия вспять обрати́ла еси́,// я́ко Возбра́нная Воево́да Непобеди́мая.

Стих: Помяну́ и́мя Твое́/ во вся́ком ро́де и ро́де.

Во́инства правосла́внаго благопоспеше́ние,/ борце́в му́жество, хра́брых Спобо́рнице,/ безпомо́щных Защи́тнице,/ мо́лим Тя кре́пость ору́жию на́шему дарова́ти,/ да низло́жатся ви́димыя и неви́димыя враги́,/ возстаю́щия на ны,// Тобо́ю бо побе́ды воздви́жутся.

Cтиx: Лицу́ Твоему́ помо́лятся/ бога́тии лю́дстии.

Зна́мение побе́дное от ико́ны Богома́тере ви́девше,/ пра́здник че́стен соста́вим,/ и ра́достно воспои́м Пресла́вную на́шу Засту́пницу,/ зе́млю Ру́сскую в достоя́ние Себе́ избра́вшую,/ и на вся́ком ме́сте благода́ть Свою́ явля́ющую,// да пребу́дут покро́в и ми́лость Ея́ над на́ми во ве́ки.

Сла́ва, и ны́не, пра́здника, глас 2: Всенепоро́чная Неве́ста:

На благослове́нии хле́бов тропа́рь Све́нския, два́жды,

и пра́здника, еди́ножды.

Тропа́рь, глас 5:

Пресвята́я Де́во Богоро́дице,/ земли́ Бря́нстей благослове́ние и покро́в/ Све́нский-Пече́рский о́браз Твой дарова́ла еси́,/ и́мже правосла́вие утвержда́еши,/ е́реси и раско́лы побежда́еши,/ исцеле́ния источа́еши,/ наше́ствия иноплеме́нных отража́еши/ и междоусо́бныя бра́ни умиря́еши,/ те́мже благода́рно воспева́ем Тя,// Оте́чества на́шего похвалу́ и заступле́ние.

На у́трени

На Бог Госпо́дь: тропа́рь пра́здника, два́жды. Сла́ва, и ны́не, Све́нския.

По 1-м стихосло́вии седа́лен, глас 2:

Егда́ приступи́ша ко гра́ду Бря́нску свире́пии ра́тницы,/ тогда́ лю́дие, Све́нский о́браз Твой по сто́гнам гра́да обнося́ще, со слеза́ми вопия́ху Тебе́:/ о Пречи́стая Влады́чице Богоро́дице,/ по грехо́м на́шим наидо́ша сия́ на ны,/ но да́руй нам вре́мя на покая́ние,/ не преда́ждь ча́да Твоя́ в ру́ки злове́рных,/ Твое́ бо есмы́ достоя́ние, спаси́ нас.

Сла́ва, и ны́не, пра́здника, глас 3: В Небе́сная мы́сленная Твоя́ душа́:

По 2-м стихосло́вии седа́лен, глас 4:

Днесь град Брянск побе́дным заступле́нием Твои́м хва́лится, Ма́ти Бо́жия,/ и благове́рнии лю́дие благогове́йно лобыза́ют Све́нский о́браз Твой, уми́льно зову́ще:/ о, кре́пкая на́ша Помо́щнице и ору́жие на враги́ непосты́дное,/ не забу́ди покрыва́ти христоимени́тыя рабы́ Твоя́,/ и неотсту́пно пребыва́й с на́ми во ве́ки.

Сла́ва, и ны́не, пра́здника, глас той́же: В ру́це нас ра́ди вочелове́чшагося:

Велича́ние:

Досто́йно есть/ велича́ти Тя,/ Богоро́дице,/ земли́ Ру́сския Засту́пницу Небе́сную,// Све́нский о́браз Свой в ней просла́вльшую.

И́но велича́ние:

Велича́ем Тя,/ Пресвята́я Де́во,/ и чтим о́браз Твой святы́й,/ и́мже от нахожде́ния злове́рных// град Твой изба́вила еси́.

Псало́м избра́нный:

1 лик: Освяти́л есть селе́ние Свое́ Вы́шний.

2 лик: Предста́ Цари́ца одесну́ю Тебе́.

1 лик: В ри́зах позлаще́нных оде́яна, и преиспещре́на.

2 лик: Вся сла́ва Дще́ре Царе́вы внутрь.

1 лик: Пресла́вная глаго́лашася о Тебе́, гра́де Бо́жий.

2 лик: Слы́ши, Дщи, и виждь, и приклони́ у́хо Твое́.

1 лик: И забу́ди лю́ди Твоя́ и дом отца́ Твоего́.

2 лик: И возжела́ет Царь добро́ты Твоея́, зане́ Той есть Госпо́дь Твой.

1 лик: Лицу́ Твоему́ помо́лятся бога́тии лю́дстии.

2 лик: Не удали́ по́мощь Твою́ от Мене́, на заступле́ние мое́ вонми́.

1 лик: Во́ньже а́ще день призову́ Тя, ско́ро услы́ши мя.

2 лик: Спаси́ мя ми́лостию Твое́ю.

1 лик: Возвеселя́тся вси упова́ющии на Тя, и похва́лятся о Тебе́ лю́бящии и́мя Твое́.

2 лик: Помяну́ и́мя Твое́ во вся́ком ро́де и ро́де.

По полиеле́и седа́лен, глас 4:

Безпомо́щным По́моще и ненаде́ющимся Наде́ждо,/ правосла́вных похвало́, злосла́вных же посрамле́ние, Богоро́дице Де́во,/ я́коже дре́вле град Брянск от нахожде́ния супоста́т изба́вила еси́,/ си́це и ны́не Ма́терними Твои́ми щедро́тами посети́ чту́щих Све́нский о́браз Твой,/ Оте́чество на́ше укрепи́,/ Це́рковь Святу́ю непоколеби́му от ересе́й и раско́лов соблюди́,/ и Правосла́вие в ми́ре сохрани́.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Слы́ши, Дщи, и виждь,/ и приклони́ у́хо Твое́. Стих: Отры́гну се́рдце мое́ сло́во бла́го, глаго́лю аз дела́ моя́ царе́ви. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

По грехо́м на́шим/ умно́жишася в нас безу́мнии,/ и́же глаго́лют в сердца́х свои́х, я́ко Бо́га несть/ и пропове́дуют уче́ния па́губная и развраще́нная,/ малоду́шныя от Святы́я Це́ркве отторга́юще,/ но, о Пречи́стая Богоро́дице,/ я́коже дре́вле о́чи благове́рнаго кня́зя Рома́на просвети́ла еси́/ и иноплеме́нных от гра́да Бря́нска отгнала́ еси́,/ си́це заблу́ждшия просвети́ и злосла́вныя устраши́,// и спаси́ ду́ши на́ша.

Кано́н пра́здника, кир Иоа́нна Дамаскина́. Глас 4. И Све́нския кано́н, его́же краегране́сие:

Ра́дуйся, Благода́тная, Све́нская похвало́. Глас то́йже.

Песнь 1.

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся Тоя́ чудеса́.

Ра́дуйся, Бря́нская земле́, и весели́ся, Све́нская оби́тель,/ велегла́сно пою́ще пресла́вное заступле́ние Бо́жия Ма́тере,/ Я́же Све́нскою ико́ною Свое́ю ве́рныя лю́ди от супоста́т изба́ви.

А́ще не бы Твоя́ ми́лость к нам была́, Преблагослове́нная Влады́чице,/ вма́ле бы врази́ лю́тии град Твой разори́ли и святы́ни правосла́вныя поруга́нию пре́дали,/ но сих вспять обрати́ла еси́.

Днесь церко́вная разширя́ются не́дра, прие́млюще бога́тство благода́ти Де́вы Богоро́дицы,/ Све́нскою бо ико́ною Свое́ю правосла́вныя от ви́димых и неви́димых враг огражда́ет.

Ужасо́шася иноплеме́нных по́лчища и побего́ша, Боже́ственным преще́нием гони́ми,/ преложи́ся бо пра́ведный Бо́жий гнев на ми́лость к нам/ хода́тайством Пречи́стыя Богоро́дицы.

Песнь 3.

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,// в Боже́ственней Твое́й сла́ве/ венце́в сла́вы сподо́би.

Спасе́ние правосла́вно велича́ющим Тя соде́лала еси́ посреде́ земли́ Бря́нския, Богоро́дице Де́во,/ воздви́женней бо ико́не Твое́й свяще́нных рука́ми,/ возду́х освяти́ся и полки́ бесо́вския отгна́шася.

Явле́нием ми́лости Твоея́, Ма́ти Бо́жия,/ да веселя́тся правосла́вных собо́ри, чту́щии чудотво́рный Све́нский о́браз Твой,/ ерети́ческое же со́нмище да посрами́тся и, я́ко прах, да возмете́тся от лица́ Бря́нския земли́.

Благослове́нная Влады́чице, десну́ю стопу́ Твою́ утвержде́ну на ка́мени на Све́нском о́бразе Твое́м зря́ще, приле́жно мо́лим Тя:/ на ка́мени пра́выя ве́ры рабы́ Твоя́ утверди́.

Ле́потою чуде́с облече́ся Све́нская ико́на Богома́тере,/ ю́же стра́хом и ра́достию лобыза́ем, бра́тие, ду́ши и телеса́ очи́стивше,/ то́ю бо Цари́ца Небесе́ и земли́ с на́ми пребыва́ет.

Конда́к и и́кос пра́здника.

Седа́лен, глас 1:

Прииди́те, ру́сстии собо́ри,/ восхва́лим сте́ну и забра́ло Правосла́внаго Оте́чества на́шего,/ Цари́цу Богоро́дицу,/ и Боже́ственное сокро́вище, Све́нскую ико́ну Ея́ иму́ще,/ е́юже град Брянск от нахожде́ния иноплеме́нных изба́вися,/ побе́ды над страстьми́ у Влады́чицы испро́сим,/ от Нея́ ро́ждшагося Бо́га сла́вяще.

Сла́ва, и ны́не, пра́здника, глас то́йже: Всечестны́й лик прему́дрых апо́стол:

Песнь 4.

Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.

А́нгельстии чи́ни стра́хом слу́жат чу́дней Бо́жия Ма́тере ико́не,/ челове́цы благогове́йно покланя́ются, и вся тварь ра́дуется,/ сла́вящи си́лу непобеди́мую Пречи́стыя Влады́чицы.

Где суть де́рзости злочести́вых, всу́е хва́лящихся погуби́ти достоя́ние Твое́, Богоро́дице?/ Па́мять их поги́бнет с шу́мом, Твое́ же заступле́ние вси ро́ди сла́вят.

О́браз Све́нский Цари́цы Богоро́дицы гра́ду Бря́нску дарова́ся/ я́ко стена́ необори́мая и щит несокруши́мь,/ его́же ны́не обстоя́ще любо́вию, Первообра́зней сла́ву возсыла́ем.

Днесь ле́тнюю па́мять соверша́юще/ избавле́ния Бря́нския земли́ от супоста́т посо́бием Богома́тере,/ приле́жно мо́лимся Ей Правосла́вие утверди́ти, е́реси же и раско́лы разори́ти.

Песнь 5.

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

А́ще и изощря́ют язы́к свой проти́ву Це́ркве Правосла́вныя еретицы́ и раско́льницы,/ и непра́вды сплета́ют рука́ми свои́ми, всу́е тружда́ются,/ я́ко паучи́ну разори́т сия́ Госпо́дь Бог, я́коже дре́вле сове́т супоста́тов моли́твами Богома́тере.

Твоего́ к нам благоволе́ния зало́г,/ Све́нскую-Пече́рскую ико́ну Твою́, Влады́чице,/ стра́жа неусы́пна и заступле́ние тве́рдо гра́ду Бря́нску дарова́ла еси́,/ на ню́же взира́юще, уны́ние отгоня́ем и весе́лия духо́внаго исполня́емся.

Наста́вница еси́ мона́хов, Присноде́во,/ те́мже при́зри на оби́тель Све́нскую, ю́же благочести́вый князь Рома́н/ на ме́сте, Тобо́ю избра́ннем, созда́, я́ко киво́т чудотво́рныя ико́ны Твоея́,/ и при́сно сию́ соблюда́й, подвиза́ющихся же в ней спаса́й.

Арха́нгельский глас прино́сим Ти, Всепе́тая:/ Ра́дуйся, Благода́тная, Све́нская похвало́, с Тобо́ю Госпо́дь и Тобо́ю с на́ми,/ Его́же, я́ко Ма́тернее дерзнове́ние иму́щи, моли́ти не преста́й,/ о́вцы па́жити Твоея́ от лю́тых волко́в сохрани́ти невреди́мы.

Песнь 6.

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.

Явле́ние Бо́жия благода́ти, Правосла́вней Це́ркви прису́щия,/ зрим в чу́днем заступле́нии гра́да Бря́нска Све́нския ра́ди ико́ны Богома́тере/ от нахожде́ния вои́телей злосла́вных.

Сотвори́ ны досто́йны бы́ти такова́го да́ра ми́лости Твоея́, Всепе́тая Богоро́дице,/ обраще́нием от злых дел к благо́му житию́, па́че же правосла́вием неруши́мым.

Воззови́те вельми́, свяще́нных уста́, че́стне почита́юще одушевле́нный Госпо́день Киво́т,/ и на́ша моле́ния к Пречи́стей вознеси́те, благода́рно Ея́ бла́гость прославля́юще.

Ели́цы благочести́вии, прииди́те, поклони́мся Све́нстей Бо́жия Ма́тере ико́не,/ подае́т бо певце́м чудотво́рнаго Ея́ о́браза/ кре́пость на бори́теля диа́вола и грехо́в оставле́ние.

Конда́к, глас 8:

Взбра́нней Воево́де победи́тельная,/ я́ко изба́вльшеся от супоста́т благода́тию Све́нскаго Твоего́ о́браза,/ благода́рственная воспису́ем Ти, раби́ Твои́, Богоро́дице,/ но я́ко иму́щая держа́ву непобеди́мую/ от вся́ких нас бед свободи́, да зове́м Ти:// ра́дуйся, Неве́сто Неневе́стная.

И́кос:

Егда́ по грехо́м на́шим воста́ша язы́цы го́рьции и бо́рзии,/ ходя́щии по широта́м земли́ Ру́сския, е́же насле́дити селе́ния чу́ждая,/ и святы́ни правосла́вныя поруга́нию предаю́щии,/ и на град Брянск устреми́шася,/ тогда́ сих свире́пство превозмо́же моли́тва Пречи́стыя Богома́тере/ и дре́вних чуде́с подо́бие нам яви́ся:/ Сия́ бо лю́ди ка́ющияся и к ико́не Ея́ припа́дающия напра́сныя сме́рти изба́ви,/ град же Свой и окре́стныя ве́си от огня́ и меча́ сохрани́,/ по́лчища иноплеме́нныя вспять обрати́вши,/ сего́ ра́ди немо́лчно зове́м Е́й:/ ра́дуйся, Неве́сто Неневе́стная.

Песнь 7.

Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси.

Не мо́щно нам отве́рсти уста́, Ма́ти Бо́жия,/ греси́ на́ши, я́ко огнь пе́щи вавило́нския, превзыдо́ша на́ша главы́,/ но в покая́нии приими́ нас, благословя́щия Сы́на Твоего́ и Бо́га оте́ц на́ших.

Сни́ди в пещь страсте́й на́ших, Пренепоро́чная,/ и пла́мя по́хоти в дух росы́ шумя́щ чистоты́ преложи́,/ да благода́рно зове́м Ти: благослове́нна еси́, Ро́ждшая Бо́га оте́ц на́ших.

Ка́ко воспое́м чу́до заступле́ния Твоего́, Благослове́нная Богоро́дице?/ Ты бо сле́зныя мольбы́ и сокруше́ние серде́ц чад Твои́х прие́мши,/ я́ко же́ртву чи́стую Сы́ну Твоему́ принесла́ еси́,/ и пра́ведный гнев Его́ угаси́ла еси́, ро́ждшая Бо́га оте́ц на́ших.

А́ще и согреши́хом, но не отступи́хом от Тебе́, Влады́чице,/ – уми́льно вопия́ху лю́дие пред Све́нскою ико́ною Твое́ю,/ – не оста́ви на поруга́ние злове́рным град Твой, благословя́щий Сы́на Твоего́ и Бо́га отец на́ших.

Песнь 8.

Ирмо́с: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Я́ко столпо́м о́блачным, Све́нскою ико́ною Твое́ю, град Твой покрыва́еши, Пречи́стая,/ и я́ко столпо́м о́гненным ви́димыя и неви́димыя враги́ опаля́еши,/ ве́рныя же просвеща́еши, превознося́щия Сы́на Твоего́ во ве́ки.

Просла́вим благоче́стно благодея́ния Присноде́вы, честны́й Ея́ о́браз обстоя́ще любо́вию,/ Та бо лю́ди Своя́, пла́менне Ю́ призыва́ющия, ми́лостию Свое́ю ороси́,/ злочести́выя супоста́ты от града Бря́нска дале́че отгна́вши,/ те́мже Засту́пницу на́шу превозно́сим во ве́ки.

Огне́м откры́ется и искуси́тся коего́ждо де́ло, яково́ же есть,/ и а́ще пребу́дет, мзду прии́мем, а́ще же сгори́т, отщети́мся./ Убои́мся у́бо, бра́тие, потопле́ния о́гненнаго/ и под кров Богоро́дицы притеце́м, превознося́ще Сы́на Ея́ во ве́ки.

Хвра́стие ересе́й и раско́лов, и собла́знов церко́вных/ Боже́ственным огне́м любве́ Бо́жия попали́, Цари́це Небе́сная,/ его́же Сын Твой прии́де воврещи́ на зе́млю,/ правосла́вныя же я́ко зла́то в горни́ле испыта́ний очи́сти, превознося́щия Го́спода во ве́ки.

Песнь 9.

Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Всепе́тая Богоро́дица на Небеси́ с Сы́ном и Бо́гом Свои́м ца́рствующи,/ на земли́ су́щих благоутро́бно посеща́ет,/ па́че же те́пле призыва́ющим Ея́ ско́рая Помо́щница явля́ется,/ те́мже и град Брянск от наше́ствия супоста́т изба́вила есть.

Анто́ния и Феодо́сия Пече́рских, мона́хов ру́сских первонача́льников,/ преподо́бный Али́пий предстоя́щими Тебе́ изобрази́, мона́шескаго чи́на Влады́чице,/ зна́менуя при́сное их к Тебе́ о нас моле́ние, с ни́миже Тя велича́ем.

Лику́й и красу́йся, Бря́нская земле́,/ иму́щи в себе́ неоску́дный исто́чник благода́ти, Све́нскую ико́ну Пречи́стыя Де́вы,/ Ея́же ра́ди ви́димыя и неви́димыя враги́ прогоня́ются, еретицы́ посрамля́ются,/ ве́рнии же любо́вию неизче́тныя Ея́ ми́лости велича́ют.

О вели́кая на́ша Засту́пнице и похвало́, Пресвята́я Богоро́дице,/ честне́йшая Херуви́м и сла́внейшая без сравне́ния Серафи́м,/ правосла́вия щи́те и ору́жие на враги́ непобеди́мое,/ по достоя́нию воспе́ти Тя не могу́ще, во смире́нии се́рдца велича́ем.

Свети́лен:

Ма́ти Бо́жия, при́зри благосе́рдно на благода́рно чту́щия Све́нскую ико́ну Твою́,/ е́юже град Брянск от нахожде́ния злове́рных изба́вила еси́,/ и умоли́ Ро́ждшагося от Тебе́ дарова́ти Це́ркви Правосла́вней утвержде́ние,/ Оте́честву на́шему на враги́ одоле́ние и душа́м на́шим спасе́ние.

Сла́ва, и ны́не, пра́здника: От земли́ на Небеса́ преста́вльшися:

На хвали́тех стихи́ры пра́здника 3, глас 6.

И Све́нския стихи́ры, глас 2.

Подо́бен: Ки́ими похва́льными венцы́:

Ки́ими благода́рными усты́/ воспое́м Богоро́дицу?/ Све́нским-Пече́рским о́бразом Свои́м/ град Брянск и всю зе́млю Ру́сскую обогати́вшую/ и неотсту́пно с на́ми пребыва́ющую,/ ны́не же в Боже́ственнем торжестве́/ святы́я Своея́ ико́ны/ подаю́щую притека́ющим к Ней// вели́кия ми́лости.

Ки́ими досто́йными пе́сньми/ восхва́лим Богоро́дицу?/ Земли́ Ру́сския Цари́цу Небе́сную,/ правосла́вия утвержде́ние,/ злосла́вия же посрамле́ние,/ в беда́х су́щим ско́рое поможе́ние,/ Ея́же ра́ди Све́нския ико́ны/ шата́ния иноплеме́нных на град Брянск Христо́с низложи́,// име́яй ве́лию ми́лость.

Ки́ими по́двиги благоче́стия/ обра́дуем Богоро́дицу?/ Све́нскою ико́ною Свое́ю/ благострое́нию держа́вы Росси́йския служа́щую/ и междоусо́бныя бра́ни умиря́ющую,/ не пе́сньми то́кмо сла́вяще,/ но де́лы ве́ры пра́выя сла́ву воздаю́ще,/ да не отврати́т Лица́ Своего́ от нас грех ра́ди на́ших,// иму́щи ве́лию ми́лость.

Сла́ва, и ны́не, пра́здника, глас 3: Прииди́те, вси концы́ земни́и:

Славосло́вие вели́кое. Тропа́рь Све́нской.

Сла́ва, и ны́не, пра́здника. И отпу́ст.

На Литурги́и

Блаже́нна от обою́ кано́нов пра́здника, Песнь 3-я, на 4, и от кано́на Све́нския, Песнь 6-я, на 4.

По вхо́де тропа́рь пра́здника и Све́нския. Сла́ва, конда́к Све́нския: И ны́не, пра́здника. И про́чая слу́жба вся Богоро́дицы.

Моли́тва

О, Всеми́лостивая Ма́ти, Пречи́стая Де́во Богоро́дице, Возбра́нная Воево́до правосла́вных! Благода́рным се́рдцем и усты́ славосло́вим Тя при́сно пред Све́нскою ико́ною Твое́ю, ю́же я́ко Боже́ственное украше́ние Це́ркве Ру́сския и зало́г ми́лости Твоея́ ве́рным лю́дем дарова́ла еси́. Се́ю бо ико́ною благо́дать Бо́жию, Правосла́вней Це́ркви прису́щую, явля́еши, егда́ то́чиши исцеле́ния, напа́стей избавля́еши, бесо́в прогоня́еши, наше́ствия иноплеме́нных отража́еши. Те́мже приле́жно мо́лим Ти ся, Богома́ти, проба́ви и на пре́дняя вели́кия ми́лости Твоя́ любо́вию чту́щим Тя, Правосла́вие утверди́, отпа́дшия от пра́выя ве́ры к позна́нию и́стины напра́ви и уста́ нечести́вых, ху́лящих Святу́ю Це́рковь, загради́. Оте́честву на́шему мир и на враги́ побе́ды да́руй, огради́ нас от нахожде́ния супоста́т, междоусо́бныя бра́ни и вся́каго зла, па́че же от душегуби́тельных страсте́й свободи́, во е́же умре́ти ми́ру и жи́ти Сы́ну и Бо́гу Твоему́ в соблюде́нии за́поведей Его́. И сподо́би нас, Предста́тельнице на́ша непосты́дная, на Стра́шнем Суде́ одесну́ю Престо́ла Бо́жия ста́ти и с ли́ки А́нгелов и святы́х та́мо восхваля́ти пречестно́е и́мя Сы́на Твоего́, со Безнача́льным Его́ Отце́м и Пресвяты́м Ду́хом во ве́ки. Ами́нь.

Источник: Текст утвержден Священным Синодом Русской Православной Церкви 15 июля 2016 года (журнал № 70)

Месяца августа в 18-й день

Пресвятыя Владычицы нашея Богородицы и Приснодевы Марии

ради иконы Ея, именуемыя «Всецарица»

На велицей вечерни

На Господи, воззвах: стихиры праздника и Богородицы, глас 8.

Подобен: О, преславнаго чудесе:

О, преславнаго чудесе!/ Преблагословенная Богомати Всецарица/ от горы Афонския в Россию приходит./ Церковь Русская, взыграй, ликовствующи,/ зрящи святый образ Приснодевы,/ к нему же припадающе, благодарне к Богородице возопиим:/ радуйся, землю нашу благоухания исполнившая,/ радуйся, алавастре мира Божественнаго,/ радуйся, Державная Царице.

О, преславнаго чудесе!/ Всех Господь и Владыка/ благоволи от Девы воплотитися/ и плоть человечу восприяти/ и Сыном Пречистыя нарещися,/ Юже яви Споручницу спасения нашего./ Темже веселия духовнаго исполняемся/ и славословим Матерь Божию,/ Небесе и земли Царицу.

О, преславнаго чудесе!/ Источник чудотворений приснотекущий/ от святыя иконы Всецарицы/ землю Русскую напояет/ и благодать неоскудно подает/ и исцеления богатно дарует./ Темже к Богородице усердно вопием:/ уврачуй язвы душ и телес наших,/ Ты бо еси милости река неистощимая.

О, преславнаго чудесе!/ Пречистая Дева Богородица,/ мольбы недостойныя приемлющи,/ честным Своим омофором нас покрывает/ и прошения недужных исполняет/ и болезни неисцельныя врачует./ Темже вернии веселия исполняются/ и благодарения песненная возсылают,/ прославляюще Заступницу Усердную рода христианскаго.

Слава, и ныне, праздника, глас 4: Приидите, воспоем, людие:

Вход. Прокимен дне. И чтения Богородичная.

На литии стихиры, глас 4:

Богоблаженная Отроковице,/ Ты еси Ангелов и человеков радование/ и Владычень Престол огнеобразный,/ светолучныя молнии благодати испущаяй/ и Божественное Слово на Себе херувимски носяй./ И мы ныне поем и песнословим Тя:/ радуйся, мира Державная Владычице.

Пресвятая Мати Дево,/ Ты еси Царица Небесе и земли,/ добродетельми, яко светлою диадимою, украшенная,/ темже восхваляем Тя, Преблагословенная,/ и, чествующе образ Твой святый, молимся:/ помози покаянием сердца очистити/ и благоуханием добродетелей исполнити.

Слава, и ныне, праздника, глас 5: Воспойте, людие, Матери Бога нашего:

На стиховне стихиры, глас 5:

Подобен: Радуйся:

Радуйся, земле Русская,/ имущи чудотворный образ Всецарицы Богородицы,/ иже, яко звезда светозарная,/ пределы твоя просвещает./ Приидите, вси людие, припадем к Пречистей Отроковице,/ болезни щедро исцеляющей,/ от злостраданий скоро избавляющей,/ от напастей духов злобы свобождающей/ и печали елеем милости утоляющей./ О, Мати Всеблагая,/ преукрашенная благочестия добротами,/ облецы ны целомудрия одеждами/ и не остави любовию чтущия Тя.

Стих: Слыши, Дщи, и виждь,/ и приклони ухо Твое.

Радуйся, земле Русская,/ дом Пресвятыя Богородицы нареченная,/ ликуй, красуйся и торжествуй,/ дар драгоценный восприимши/ от удела перваго Богородицы, Святыя горы Афонския,/ многоцелебный образ Приснодевы,/ емуже с верою покланяющеся,/ воспеваем из глубины сердечныя:/ о Благословенная Царице,/ Ты ведаеши чаяния и воздыхания душ наших,/ не остави нас, Любоблагая,/ подаждь нам помощь спасительную/ и утеши нас Твоим Небесным предстательством.

Стих: Клятся Господь Давиду истиною,/ и не отвержется ея.

Ныне соберитеся, людие Божии,/ приидите, вси концы земли,/ се бо образ небосветлый Марии Девы Всецарицы/ созывает к веселию верныя./ О, велия милость Владычицы!/ О, паче ума чудес множества,/ чрез икону сию источаемых!/ Темже песненными похвалами воспоим, глаголюще:/ радуйся, Всенепорочная Дево,/ радуйся, Ковчеже священный Слова Божия,/ радуйся, Обрадованная,/ радуйся, Цвете неувядаемый чистоты нетленныя,/ радуйся, Невесто Неневестная.

Слава, и ныне, праздника, глас 2: Давидскую песнь днесь, людие, воспоем Христу Богу:

Тропарь, глас 4:

Образом Твоим радостотворным,/ Владычице, Всецарице Богородице,/ болезни и недуги наша исцели/ и от всяких бед и напастей огради,/ к заступлению Твоему присно прибегающих.

На утрени

По 1-м стихословии седален, глас 4:

Благослови ны, во юдоли земной странствующия, Всесвятая Богородительнице, Небесе и земли Царице, да, песньми и пеньми ликовствующе, воспоим пришествие святаго образа Твоего.

Слава, и ныне, праздника, глас тойже: В славней памяти Твоей:

По 2-м стихословии седален, глас 6:

Покаяния двери отверзи нам, Госпоже, и сокрушения исполни сердца наша, да сподобимся предстательством Твоим грехов оставление и недугов исцеление.

Слава, и ныне, праздника, глас тойже: Твое преставление, Чистая, вси вернии восхваляюще:

По полиелеи седален, глас 4:

Ныне приспе день светлаго торжества, вся земля Русская радуется пришествию честнаго и многоцелебнаго образа Пресвятыя Богородицы Всецарицы. Сей бо, якоже солнце незаходимое, возсия светозарными лучами, отгоняя тьму искушений же и бед от вопиющих верно: спаси ны заступлением Твоим, Всеблагая Владычице.

Слава, и ныне, праздника, глас тойже: Возопий, Давиде, что сей праздник:

Степенна, 1-й антифон 4-го гласа. Прокимен, глас 4: Помяну имя Твое/ во всяком роде и роде. Стих: Отрыгну сердце мое слово благо, глаголю аз дела моя Цареви. Всякое дыхание: Евангелие от Луки, зачало 4.

По 50-м псалме стихира, глас 6:

Радуйся, Богоблагодатная Дево,/ радуйся, златозарная Заре Света невечерняго,/ радуйся, неугасимая милости Лампадо,/ елеем радования сердца наша умащающая,/ радуйся, христиан Упование,/ радуйся, ненадежных Надеждо,/ радуйся, Радосте наша.

Канон праздника, глас 1, со ирмосом на 6, и канон Богородице Всецарице на 8, глас 4.

Песнь 1.

Ирмос: Отверзу уста моя,/ и наполнятся духа,/ и слово отрыгну Царице Матери,/ и явлюся, светло торжествуя,/ и воспою, радуяся, Тоя чудеса.

О, Преблагая Заступнице наша! Недоумеем песнословити Тя по достоянию, обаче любовию понуждаеми, молим Тя: сподоби принести Тебе песни благодарственныя.

Приидите, вернии, ко всечестному образу Богородицы Всецарицы припадем, обымем сердцем и лобызаем устны, со умилением молящеся Всемилостивой Владычице.

От Небесных славимая и от земных ублажаемая, девственными добротами преисполненная, Пречистая Дево, приими моления наша и призри на нас благоуветливым взором Твоим.

Дивны чудеса Твоя, Господи, яко даровал еси миру преславную Богоотроковицу Марию, от всех родов избранную во спасение рода человеческаго.

Песнь 3.

Ирмос: Твоя песнословцы, Богородице,/ живый и независтный Источниче,/ лик себе совокупльшия духовно утверди,/ в Божественней Твоей славе/ венцев славы сподоби.

Ты еси источник златоструйный, росу утешения источаяй сердцам скорбящим, о Царице Дево. Ободри ны в час испытания, от отчаяния избави и слезы претвори в росу небесныя радости.

Молим Тя о сродницех наших, Госпоже Всецарице, исцели недуги неисцельныя, устави раковыя язвы стужение, терпение неистощимое страждущим даруй и слезами покаяния омый сердца их.

Любы Твоя, о Богомати, якоже огнь небесный, да затеплит в сердцах наших светлосиянныя светильники молитвы и любве.

О, Всесветлая Владычице, покрый нас честным Твоим омофором и светоносными лучами благодати отжени темный облак печалей наших.

Кондак и икос праздника.

Седален, глас 8:

Днесь празднуем пришествие честнаго образа Твоего, Мати Божия, к немуже с верою припадаем, Всеблаженная, и молим Тя: посети сущия в болезнех и печалех, и покрый от бед и зол рабы Твоя.

Песнь 4.

Ирмос: Седяй в славе/ на Престоле Божества,/ во облаце легце,/ прииде Иисус Пребожественный/ нетленною Дланию, и спасе зовущия:/ слава, Христе, силе Твоей.

В знои неисцельных болезней страждущим одожди капли небеснаго милосердия Твоего, Пречистая, и благодати прохладою услади души изнемогающия.

Купина Тя неопальная прообразоваше, о Царице Дево, не опали бо чрево Твое огнь Божества. Темже молим Тя: огня геенскаго избави ны.

Радуйся, Богоизбранная Отроковице, одушевленный Храме, Чертоже Слова Божия, во святый храм во младенческих летех введенная и тамо воспитанная. Темже молим Тя: научи и ны ко храму Божию усердно прилежати.

Ты от святаго Ангела пищу небесную приемлющи, под сению храма Господня пребывала еси, Дево Нетленная. Темже напитай и наша во страстех изсохшия души и сподоби Христовых Таин достойно причащатися.

Песнь 5.

Ирмос: Ужасошася всяческая/ о Божественней славе Твоей;/ Ты бо, Неискусобрачная Дево,/ имела еси во утробе над всеми Бога,/ и родила еси Безлетнаго Сына,/ всем воспевающим Тя/ мир подавающая.

О, Всеблаженная Богомати, согрешающих исправление, умягчи изсохшую землю сердец наших, да, приемше семена слова Божия, достойныя плоды покаяния принесем Владыце Христу.

Погибших Ты еси Взыскание, Приснодево Марие, и Ходатаица о нас к Сыну Твоему и Богу, Ты еси Пристанище спасительное обуреваемым в мори житейстем и погружаемым напастьми многими.

Токами благодати, чрез святый образ Твой, Всецарице, на нас изливаемыми, омый грехов наших скверну и угаси страстей пещь, да обрящем чистоту сердечную и уневестим души Христу, Спасу нашему.

Радуйся, Всепетая Царице! Зарю, наставляющую к свету, возсияй душам нашим, рождшая Солнце правды Христа, Радость и Спасение миру.

Песнь 6.

Ирмос: Божественное сие и всечестное/ совершающе празднество,/ богомудрии, Богоматере,/ приидите, руками восплещим,/ от Нея рождшагося Бога славим.

Не возгнушайся нас, многогрешных, о сладкоуханный Крине чистоты! Отжени плотское мудрование, устави молву лукавых помышлений и сподоби добродетелей благоухание Творцу присно приносити.

Помози нам, Богоневесто, нрав смирен стяжати, всегда радоватися, за вся Творца благодарити, и ко Христу, Спасителю нашему, непрестанно молитися научи ны.

Пришествием иконы Твоея озаряеми, молим Тя, Всецарице: буди нам, грешным, Споручница, на стези спасительныя настави, побори борющия ны и победу непобедимую во бранех даруй.

О, чистая Голубице, Нескверная Агнице, Агнца и Пастыря неизреченно рождшая! Воистину Ты еси ангельских чинов превысшая, умоли о нас Божественнаго Сына Твоего.

Кондак, глас 8:

Новоявленней иконе Богородице Всецарице предстояще/ и на лик Тоя взирающе,/ со умилением и любовию глаголем:/ низпосли, Владычице, цельбы к Тебе притекающим,/ и подаждь утешение в скорби сущим,/ да, восприемше милость, благодарне воззовем Ти:/ Радуйся, Всецарице, недуги наша благодатию исцеляющая.

Икос:

Ангел предстатель с небесе послан бысть, рече Богородице: радуйся, Благодатная, Господь с Тобою! И, со боговещанным гласом воплощаема зря Господа, возопи к Ней таковая:

Радуйся, главизно нашего спасения;

радуйся, Исполнение Зиждителева смотрения.

Радуйся, яко Тобою Бог воплотися;

радуйся, яко Невидимый в Тебе изобразися.

Радуйся, Милость мира внутрь приимшая;

радуйся, одеяние плоти Слову соткавшая.

Радуйся, уму непостижная горняя славо;

радуйся, сердца оживившая небесная манно.

Радуйся, Звездо, благодати сияние;

радуйся, Источниче, живыя воды излияние.

Радуйся, Богородице, в женах благословенная;

радуйся, рождшая Спаса, Дево нетленная.

Радуйся, Всецарице, недуги наша благодатию исцеляющая.

Песнь 7.

Ирмос: Не послужиша твари богомудрии/ паче Создавшаго,/ но, огненное прещение мужески поправше,/ радовахуся, поюще:/ препетый отцев Господь и Бог, благословен еси.

Сподоби ны, Преблагая Богородительнице, преславное имя Иисусово умом и сердцем призывати и сею молитвою услади горечь печалей и скорбей наших.

Притецыте, вси здравия ищущии, ко благосердой Деве Марии Богородице и почерпите воду жизни от источника спасительнаго.

Благословен еси, Господи Иисусе Христе, Спасителю наш, яко в час крестных страданий Твоих благоволил еси поручити ны покрову Пречистыя Матере Твоея и чадами Ея соделал еси.

Радуйся, одушевленная Палато Божества, едина неискусомужная Дево Марие, во утробу девственную Бога вместившая. Темже с Гавриилом Архангелом вопием Ти: благословенна Ты в женах, и благословен Плод чрева Твоего.

Песнь 8.

Ирмос: Отроки благочестивыя в пещи/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,/ и превозносите Его во вся веки.

О, Богомати Всецарице, просвети ны познанием Сына Твоего, да, наследствующе Царствие Небесное, воспоем Господа и превозносим Его во вся веки.

Сила Божия в немощи совершается. Темже сподоби ны, Госпоже, вся посылаемая нам со благодарением терпети и за вся Сына Твоего и Бога нашего славити.

Умири сердца наша и в тишине помыслов соблюди, Всесвятая Мати Дево, да, молящеся на всякое время, Господа благословим и превозносим во вся веки.

Во успении мира не оставила еси, о Богомати, но присно с нами пребываеши и предстательством Твоим нас спасаеши.

Песнь 9.

Ирмос: Всяк земнородный/ да взыграется, Духом просвещаемь,/ да торжествует же безплотных умов естество,/ почитающее священное торжество Богоматере,/ и да вопиет:/ радуйся, Всеблаженная,/ Богородице чистая Приснодево.

О, Царице Дево, раковыя язвы предивная Целительнице! Яви Свою милость в долгонедужии сущим и подаждь им здравие, да воспевают выну Тя, Всеблагая Мати Божия.

Виждь, Владычице, неможение наше и приими смиренная моления наша, буди нам Благая Путеводительница ко спасению и настави путем тесным шествовати к жизни вечней, да Тя непрестанно величаем.

О, Мати милосердия и утешения! Ущедри ны неизреченною Твоею благостынею и благослови ны, тепле Тя воспевающия.

Вси роди христианстии ублажают Тя, Богородительнице Пречистая, яко призре Господь на смирение Твое и сотвори Ти величие неисповедимое.

Светилен:

Светел есть честный праздник иконы Твоея, Всецарице, егоже в торжестве духовнем благолепно совершающе, величаем Тя, светоносная Скиние Христа, Царя и Бога нашего.

Слава, и ныне, праздника: Апостоли от конец:

На хвалитех стихиры праздника и Богородице Всецарице, глас 1.

Подобен: Небесных чинов:

Небесных чинов радование/ и земнородных крепкое упование,/ Небеснаго Царствия пресветлое сияние,/ Пресвятая Всецарице,/ приими ны, славящия Тя,/ да, Тобою водими, сподобимся спасения вечнаго.

Светом Небесным осиянная,/ Отроковице Мати всех Царя Христа,/ таинству сокровенному неизреченно послужившая,/ Ты к горнему умы и сердца наша возводиши/ и святыя иконы Твоя людем даруеши,/ яко светильники света невещественнаго.

Небесный Хлеб во чреве приемши,/ Мати Спаса нашего,/ Жизнь и Свет всего мира родила еси,/ просвети убо души наша, грехми омраченныя,/ да с верою и любовию к Источнику безсмертия приступим/ и причастницы жизни вечныя будем.

Слава, и ныне, праздника, глас 4: Всечестное Твое успение:

На Литургии cлужба Богородицы.

Молитва

О, Пречистая Богомати, Всецарице! Услыши многоболезненное воздыхание наше пред чудотворною иконою Твоею, из удела Афонскаго в Россию пренесенною, призри на чада Твоя, неисцельными недуги страждущия и ко святому образу Твоему с верою припадающия! Якоже птица крилома покрывает птенцы своя, тако и Ты ныне покрый нас многоцелебным Твоим омофором. Тамо, идеже надежда исчезает, несумненною Надеждою буди. Тамо, идеже лютыя скорби превозмогают, Терпением и Ослабою явися. Тамо, идеже мрак отчаяния в души вселися, неизреченным светом Твоим возсияй! Малодушныя утеши, немощныя укрепи, ожесточенным сердцам умягчение и просвещение даруй. О, Всемилостивая Царице! Исцели болящия люди Твоя, устави раковыя язвы стужение и благослови врачующих нас, да послужат орудием Всемощнаго Врача, Христа Спаса нашего. О, Владычице, Радосте скорбящих и печальных Утешение! Простри руце Твои, исполненныя исцеления и врачбы, да, чудотворную помощь скоро получивше, прославим Живоначальную и Нераздельную Троицу, Отца и Сына и Святаго Духа во веки веков. Аминь.

Молитва болящаго

О, Всеблагая, досточудная Богородице Всецарице! Несмь достоин, да внидеши под кров мой! Но, яко милостиваго Бога любоблагоутробная Мати, рцы слово, да исцелится душа моя и укрепится немощствующее тело мое. Ты бо имаши державу непобедимую, о Всецарице, и не изнеможет у тебе всяк глагол. Ты за мя упроси, Ты за мя умоли Христа Бога нашего, да прославляю преславное имя Его всегда, ныне и в безконечныя веки. Аминь.

Источник: Текст утвержден Священным Синодом Русской Православной Церкви 26 декабря 2019 года (журнал № 163)

Месяца ноября в 18-й день

Преподобныя Елены Московския

На велицей вечерни

Блажен муж: 1-й антифон. На Господи, воззвах: поставим стихов 8, и поем стихиры преподобныя 8, глас 2.

Подобен: Киими похвальными венцы:

Киими похвальными песньми/ воспоем преподобную Елену,/ Суждальския земли прозябение/ и града Москвы пресветлое украшение,/ яже девства добротами/ обитель Новодевичию облагоухала еси,/ небесное жительство на земли показавши,/ яко едина от древних подвизавшися,/ еяже молитвами, Христе Боже,/ помилуй Землю Русскую,/ имеяй велию милость.

Киими похвальными венцы/ увязем Христову угодницу,/ дома Пречистыя Одигитрии/ хранительницу достохвальную,/ и молитвенницу усердную,/ души верных веселия исполняющую/ и любомудрием просвещающую,/ сию бо воистинну достойно/ нетленныя славы венцем/ венчает Христос Бог наш,/ имеяй велию милость.

Киими песненными гласы/ воспоем всеизрядную наставницу девственнаго чина,/ ко спасению путь указующую,/ преподобную и богоносную Елену,/ целомудрия образ,/ воздержания правило,/ Духа Святаго чистое зерцало,/ к нейже притекающе,/ велегласно возопиим:/ мати всеблаженная, молися о нас,/ всечестную память твою совершающих.

Ины стихиры, глас 4.

Подобен: Званный свыше:

Державствующаго волею из Суждаля призванная/ и во граде Москве на игуменство поставленная,/ преподобная мати Елено,/ яко свеща, не под спудом сокрываема,/ но на свещнице поставляема/ сиянием добродетелей озарила еси пределы Московския,/ темже, имущи дерзновение ко Христу,/ Того моли помиловатися душам нашим.

Премудрым Божиим промышлением/ в дому Пречистыя Одигитрии вселилася еси,/ преподобная Елено,/ да упасеши словесныя овцы на пажити воздержания/ и оградиши оплотом заповедей Господних,/ темже ликом девическим уставоположница явилася еси,/ Христа Пастыреначальника моли/ спасти души наша.

Добродетели от юности взыскавши/ и подвигом добрым подвизавшися,/ сторичный плод Богу принесла еси,/ сего ради многи дщери вручи тебе Владыка Христос,/ да возрастиши в них добродетелей совершенства,/ тыя же светлыя ныне венцы/ приемлют в Христовом невестнице,/ и тебе, мати Елено, величают радостно,/ с нимиже молися Господеви/ и нам причастником радости вечныя быти.

Слава, глас 8:

Приидите, девственнии лицы,/ любовию объединенныя,/ прославим богомудрую Елену/ и, ко гробу ея припадающе, возопиим:/ Превечный Боже, Царю Безначальный,/ Ты даровал еси нам сию угодницу,/ якоже премудрым волхвом звезду,/ на спасения стези наставляющую/ и ко Христу путеводящую,/ еяже молитвами всех нас спасения вечнаго сподоби.

И ныне, глас тойже: Царь Небесный:

Вход. Прокимен дне. И чтения три преподобническая.

На литии стихира, глас 8.

Подобен: О, преславнаго чудесе:

О, прехвальная мати Елено,/ града Москвы досточудная подвижнице!/ Се мы, недостойная чада твоя,/ прославляем днесь богоугодное твое житие/ и, честному гробу твоему покланяющеся,/ с верою и любовию взываем:/ буди щит и ограждение обители твоея от всякаго зла,/ и словесныя овцы тобою собранныя в мире соблюди,/ присно молящися о душах наших.

Слава, глас и подобен тойже:

О, преподобная мати Елено,/ обители Новодевичия похвало и радование!/ Не остави нас, убогих чад твоих,/ умоли Господа Сил силу свыше нам даровати,/ да, смирение и целомудрие стяжавше,/ земное пройдем наше житие,/ и, плотскаго мудрования отвергшеся,/ сподобимся вечнаго блаженства/ в небесных обителех Бога нашего.

И ныне, глас и подобен тойже: О, преславнаго чудесе!/ Небеси и земли Царица:

На стиховне стихиры, глас 2.

Подобен: Доме Евфрафов:

Града Суждаля/ чадо богоизбранное,/ яко солнце, мати Елено,/ от восток пришедши на запад,/ землю Московскую осветила еси.

Стих: Дивен Бог во святых Своих,/ Бог Израилев.

Девства добротами,/ яко утварию драгою,/ украсилася еси от юности,/ преподобная Елено,/ молися о нас, любовию хвалящих тя.

Стих: Честна пред Господем/ смерть преподобных Его.

Добродетелей лествицею,/ на небо возшла еси,/ Елено достохвальная,/ и достигла еси чертога/ Небеснаго Жениха Христа.

Слава, глас и подобен тойже:

Дом Святаго Духа/ явилася еси, преподобная,/ Елено всечестная,/ темже в Дому Божии/ во веки вселилася еси.

И ныне, глас и подобен тойже:

Во обители Пречистыя,/ Девы Одигитрии,/ девственнии лицы/ тобою, о Елено, собранныя,/ веселятся и радуются.

На благословении хлебов тропарь, глас 4:

От юности Христа возлюбивши/ и святых отец заветы исполнивши,/ преподобная мати наша Елено,/ страх Божий и любовь нелицемерную стяжала еси/ и во обители Пречистыя Одигитрии житие монашеское устроила еси./ Темже моли Человеколюбца Христа Бога/ о чадех твоих, к тебе усердно притекающих/ и заступления твоего просящих,/ грехов оставление нам даровати.

Ин тропарь, глас 2:

От юности Христу уневестившися,/ равноангельно на земли пожила еси/ и, подвигом отцев поревновавши,/ премудрость Божественную стяжала еси./ Темже явилася еси инокинь наставница/ и обители Пречистыя Одигитрии первоначальница,/ преподобная мати Елено,/ моли Христа Бога спастися душам нашим.

На утрени

На Бог Господь: тропарь преподобныя дважды. Слава, и ныне, Богородичен: Еже от века утаеное:

По 1-м стихословии седален, глас 7:

Седѝна есть мудрость человеков и возраст старости житие нескверно, ты же от юности, богомудрая Елено, мудрость старческую стяжала еси, в сединах же бодренными словесы твоими премудрости Божественныя сокровища отверзла еси. Темже обновися яко орля юность твоя, и ныне на Небесех зриши Христа, Премудрость Ипостасную.

Слава, и ныне, Богородичен, глас тойже:

Девственнии сонмы вкупе со ангелы славословят Тя, Владычице, светлостей солнечных превышшую, Похвалу всея вселенныя, Божие Слово во чреве вместившую и радость миру родившую: радуйся, спасения нашего Ходатаице.

По 2-м стихословии седален, глас 5:

Преподобнеи твои руце, воздежи за нас ко Господу, достохвальная, пособи в немощи нашей, прожени болезненныя страсти и демонская наваждения отыми, о, мати Елено, яко скорби находят на ны и печали умножаются, темже с верою к твоему предстательству прибегаем.

Слава, и ныне, Богородичен, глас тойже:

Милосердия твоего пучину, кто изглаголет, Дево Пренепорочная? Ты еси Заступица наша и упование, Надежда христиан непостыдная, скорбящих Радость Божественная и всех сущих на земли Доброта пресветлая! Покрый нас Божественным предстательством Твоим, Пречистая Владычице.

Величание:

Ублажаем тя,/ преподобная мати наша Елено,/ и чтим святую память твою,/ ты бо молиши за нас/ Христа Бога нашего.

По полиелеи седален, глас 8:

К торжеству днесь преподобныя Елены стецемся, вернии, яже возсия во граде Москве совершенством добродетелей во святей и славней обители Одигитрии, идеже постниц множество подвизашеся, и бысть им известная начальница, спасенною стезею благоразумне водящи. Ныне же, от земных трудов пришедши в Небесная покоища, от Христа Пастыреначальника возмездие приемлет.

Слава, и ныне, Богородичен, глас тойже:

Стена еси девам, Богородице Дево, и всем к Тебе притекающим, темже под кров Твой прибегаем и с верою и любовию вопием: Одигитрие Благая, песнопевцев Твоих мольбы приими и милостивно помилуй.

Степенна, 1-й антифон 4-го гласа. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога,/ Господа от источник Израилевых. Всякое дыхание: Евангелие от Матфеа, зачало 104.

По 50-м псалме стихира, глас 6:

Приидите, дев сословие и постниц ликостояния,/ богомудрую наставницу нашу любовию ублажим, глаголюще:/ преподобная мати Елено,/ моли Всеблагаго Бога,/ да избавит нас от всякаго обстояния,/ и яже в дому Пречистыя Одигитрии,/ тобою собрáнное стадо соблюдет/ и спасет души наша.

Канона два: Пресвятыя Богородицы Одигитрии, со ирмосом на 6 (зри Минею Июль в 28-й день) и святыя на 8, глас 4, егоже краегранесие: Всеизрядную и премудрую Елену воспою.

Песнь 1.

Ирмос: Отверзу уста моя,/ и наполнятся Духа,/и слово отрыгну Царице Матери,/ и явлюся, светло торжествуя,/ и воспою, радуяся, Тоя чудеса.

Владыко, Боже, призри с Небесе и устне моя отверзи и язык уясни в похвалу угоднице Твоей, преподобней и блаженней Елене, дев наставнице.

Словесы твоими к чистоте и целомудрию призывающи, наставница явилася еси ликов девических, Елено, темже молим тя, настави нас на стези правды.

Единаго Господа взыскующи и Того Единаго желающи, Тому Единому вседушно от юности послужити потщалася еси, преподобная.

Богородичен: Истинную и сущую Богородицу, Тя, Дево, исповедуем, яко воистину Тобою Слово Божие на земли явися и с человеки поживе во спасение наше и обновление.

Песнь 3.

Ирмос: Твоя песнословцы, Богородице,/ Живый и Независтный Источниче,/ лик себе совокупльшия, духовно утверди,/ в Божественней Твоей славе/ венцев славы сподоби.

Зарями богомыслия ум твой уяснивши, преподобная, ангельски на земли пожила еси, Елено, и ныне в Небесных селениих ликуеши, досточудная.

Ревности Божественныя издетска исполнившися, блаженная Елено, пучину волн мирских безбедно преплыла еси и пристанища небурнаго достигла еси.

Ярем благий и легкий от юности подъемши, Христова вертограда, всечестная Елено, делательница искусная была еси, от перваго бо часа и до последняго неленостно потрудившися.

Богородичен: Другий рай Тя, Дево, именуем, древняго рая преимущий, Тобою бо явися новый Адам, Христос, ветхаго Адама от падения возставляя.

Седален, глас 2:

Всечестная память твоя, Елено, веселит сердца верных и лик чистых дев поет тебе радостно, ты бо от юности Христу уневестилася еси, преподобная, чисте Тому соединившися, темже вопием ти: моли Всеблагаго Бога согрешений оставление даровати верою покланяющимся честному образу твоему.

Слава, и ныне, Богородичен:

Моление теплое и Стена необоримая, милости Источниче, мирови Прибежище, прилежно вопием Ти: Богородице Владычице, предвари и от бед избави нас, Едина вскоре предстательствующая.

Песнь 4.

Ирмос: Седяй в славе на Престоле Божества,/во облаце легце,/ прииде Иисус Пребожественный,/нетленною Дланию и спасе зовущия:/ слава, Христе, силе Твоей.

Наставница неложная девственнаго чина и мати чадолюбивая дщерем духовным явилася еси, приснославная Елено, многия души ко Христу приводящи.

Уста твоя богоглаголивая отверзла еси, Елено преподобная, путь спасения чадом твоим указующи и заветы святых отец возвещающи.

Юношески страсти препобедивши, мати Елено, душу твою, яко зеницу ока, хранила еси, темже Господь, видя твое благое изволение, над многими тя постави.

Богородичен: Источниче живый, Богомати, поток сладости верным всем независтно источила еси, от негоже пиюще, не вжаждемся во веки.

Песнь 5.

Ирмос: Ужасошася всяческая/ о Божественней славе Твоей,/ Ты бо, Неискусомужная Дево,/имела еси во утробе над всеми Бога/ и родила еси Безлетнаго Сына,/ всем воспевающим Тя/мир подавающая.

Покровския обители воспитание и града Суждаля процветение, Новыя на Москве обители достойная устроительница, Елено, явилася еси, дома Пречистыя Одигитрии.

Руце твоя воздеющи во святая и благословящи Господа, преблаженная, в нощи и во дни присно за Землю Русскую, царя и воинство молилася еси, Елено, темже и благословение Вышняго тебе даровася.

Елену преподобную днесь восхвалим, та бо от юности ко Христу, Источнику неиждиваемому, притекши, душу свою Божественныя Премудрости водами исполнила есть.

Богородичен: Мати Дево, Владычице, Ангельских ликов превышшая и светлостей солнечных светлейшая, облагодати наш ум пети Тебе присно: радуйся, всех Царице.

Песнь 6.

Ирмос: Божественное сие и всечестное/совершающе празднество,/ богомудрии Богоматере,/ приидите, руками восплещим,/от Нея рождшагося Бога славим.

Уставоположница истинная и наставница премудрая была еси девам, Елено, тобою бо окормляемы, воистину правыя пути познаша, мати преблаженная.

Добродетелей лествицею возшла еси, Елено, от долу влекущих страстей к свету богоразумия и ныне пищи негиблющия сподобляешися, достохвальная.

Рачением Божественным присно распалаема, девства доброту непорочне соблюла еси, и житие твое чистое, Елено, яко вено, Жениху Христу принесла еси.

Богородичен: Умилосердися о нас, Дево Всепречистая, виждь обстояние, и скорбь, и болезнь рабов Твоих, и не остави нас без заступления.

Кондак, глас 8:

Изрядную к Богу молитвенницу/ и девственнаго лика наставницу,/ отеческих преданий истинную хранительницу,/ ныне восхвалим песньми духовными,/ ты же, яко имущая дерзновение ко Господу,/ от всяких нас бед свободи, да зовем ти:/ радуйся, преподобная Елено,/ обители Новодевичия первоначальнице.

Икос:

Ангельскому житию от юности поревновавши, преподобная, в молитвах и постех, аки безплотна на земли пожила еси, Елено, темже землю кротких наследовала еси, идеже, вечнаго блаженства ныне сподобляющися, услыши нас, зовущих ти сице:

Радуйся, града Суждаля пречестное прозябение;

радуйся, земли Московския предивное украшение.

Радуйся, обители Покровския благое воспитание;

радуйся, дома Одигитрии доброе устроение.

Радуйся, разуму Божественных писаний от юности прилежавшая;

радуйся, святых отец заветы в сердце своем слагавшая.

Радуйся, родителей благих избранный плод;

радуйся, розго предивная винограда Христова.

Радуйся, данный тебе талант сторицею умножившая;

радуйся, инокинь честных на пажити спасения управившая.

Радуйся, постниц похвало;

радуйся, чистых дев пресветлая доброто.

Радуйся преподобная Елено, обители Новодевичия первоначальнице.

Песнь 7.

Ирмос: Не послужиша твари богомудрии/ паче Создавшаго,/ но, огненное прещение мужески поправше,/ радовахуся, поюще:/ Препетый отцев Господь и Бог благословен еси.

Юдоль на Москве реце труды твоими и молитвами возделала еси, мати Елено, и тамо, инокинь множество собравши, упасла еси на пажити воздержания.

Елеем богогласных словес твоих, Елено всечестная, чадом твоим врачевание независтно подавала еси, струпы греховныя умащающи и язвы страстей исцеляющи.

Ластовица трудолюбная и голубица чистая ты еси воистину, всехвальная, мудрыми бо твоими вещании страстьми огорченныя души сладости нетленныя исполняеши.

Богородичен: Едина еси Матерь и Дева, Пречистая Богородице, Ты бо Единаго от Троицы родила еси и по рождестве страннем Дева пребыла еси, тем Тя, вси вернии, величаем.

Песнь 8.

Ирмос: Отроки благочестивыя в пещи,/Рождество Богородичо спасло есть,/ тогда убо образуемое,/ ныне же действуемое,/вселенную всю воздвизает пети Тебе:/ Господа пойте, дела,/и превозносите Его во вся веки.

Ныне память твоя собра нас, любовию тя почитающих, мати Елено, ты же, яко прежде, обитель и чада твоя защити, тя бо на помощь призываем.

Увы нам, яко заветы отец не сохранихом и заповеди твоя, о мати наша, не соблюдохом! Како дадим ответ? Сего ради к теплому твоему заступлению прибегаем, Елено преподобная.

Воистину ты еси молитвенница наша и споспешница ко спасению, Елено достохвальная, сего ради вонми гласу воздыхания чад твоих, о мати преподобная, и настави нас на стези правды.

Богородичен: Облак легкий, егоже виде Исаия, на немже Бог явися, Тя, Богородице, проображаше, на Твоих бо руках, яко на престоле, носила еси Содержащаго всяческая.

Песнь 9.

Ирмос: Всяк земнородный/ да взыграется, Духом просвещаемь,/ да торжествует же Безплотных умов естество,/ почитающее священное торжество Богоматере,/ и да вопиет:/ радуйся, Всеблаженная Богородице,/ Чистая Приснодево.

Словесы твоими, яко тучами росоносными, всеблаженная, души наша, страстьми изсохшия, ороси и грехми истаявшия обнови, да плод обильный принесем покаяния.

Память твоя, всечестная Елено, веселит избранное твое стадо и лик дев тебе любовию приносит похвалы, ихже приими, о мати преподобная.

Окрест Божественныя трапезы, Елено, свеселишися ныне со всеми святыми, от века Богу угодившими, радости вечныя исполняющися, тамо и нас помяни, любовию тя величающих.

Богородичен: Юница Нескверная и Агница Непорочная, Ты еси Пресвятая Богородице, яко породи Юнца Божественнаго, Иже Кровию Своею даде нам оставление.

Светилен:

Истинную наставницу тя почитаем, всечестная Елено, светом бо жития твоего научаеми и словес твоих богомудрых сияньми просвещаеми, светлыми стезями ко Христу, Свету Истинному, ведемся.

Слава, и ныне, Богородичен:

Приидите, вернии, чистыми смыслы возвеличим Матерь Бога нашего, носившую во чреве Спаса Христа. Та бо, матернее дерзновение к Нему имущи, непрестанно молит за ны и подает рабом Своим богатыя милости.

На хвалитех стихиры, глас 1.

Подобен: Небесных чинов:

Наста, преподобная Елено,/ светлый твой праздник,/ созывая инокинь сословие/ память твою воспети досточудную,/ чистотою бо и любомудрием души наша просвещаеши,/ сего ради тя ублажаем.

Крилами богоразумия ум твой вперивши,/ плотская вся преобидела еси,/ влекома чистейшею любовию, Елено,/ к Нетленному Жениху твоему,/ темже и сонмы чистых дев ко Христу привела еси,/ с нимиже наследие вечное восприемлеши.

В Небесныя кровы, яко горлица/ и яко голубица чистая, Елено,/ от земных возлетела еси,/ храмину обретши во дворех Господних,/ идеже ныне со Ангелы ликуеши/ и молишися спастися душам нашим.

Шествие творящи в Горняя,/ доброю стезею и подвигом многим/ земных прешла еси непостоянство, достохвальная Елено./ И ныне, во светлостех святых водворяющися,/ чада твоя поминай.

Слава, глас 8:

Преподобную игумению Елену/ и спостниц ея десятицу/ да ублажим и воспоим ныне:/ Евникию, Софию, Феофанию, Варсонофию,/ Евпраксию, Александру, Леониду,/ Ирину, Венедикту и Ирину,/ Богом избранное Христово стадо,/ тех бо трудами и молитвами/ устроися на Москве всечестная и великая обитель/ Пречистыя Богородицы Одигитрии.

И ныне, Богородичен, глас тойже:

Владычице, приими молитвы раб Твоих,/ и избави нас от всякия нужды и печали.

Славословие великое. И отпуст.

На Литургии

Блаженна, перваго канона Песнь 3.-я и втораго Песнь 6-я. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога,/ Господа от источник Израилевых. Апостол к Галатом, зачало 208. Аллилуиа, глас 1: Терпя потерпех Господа, и внят ми/ и услыша молитву мою. Евангелие от Луки, зачало 33. Причастен: Радуйтеся, праведнии, о Господе:

Молитва

О, преподобная мати наша Елено, добрая в женах подвижнице, прехвальная угоднице Христова, скорая помощнице и неусыпная о нас молитвеннице! Не посрами упования нашего, еже по Бозе и Пресвятей Богородице крепко на тя возлагаем, помяни нас, добродетельное житие и подвиги твоя восхваляющих. Поспешествуй нам молитвами твоими побеждати греховныя навыки, да не во зло обратим даруемыя нам от Всещедраго Бога таланты, но во славу пресвятаго имене Его. Не премолчи за ны ко Господу и ходатайством твоим вся злая от нас отврати. Даруй нам помощь в трудех и скорбех наших, и якоже в житии твоем попечение о обители твоей и о подвизающихся в ней имела еси, тако и ныне потщися благопоспешити нам во всем, да ходим достойно звания нашего в веце сем, и в будущем сподобимся во Царствии Небеснем со всеми святыми прославляти Пресвятую и Единосущную Троицу, Отца и Сына и Святаго Духа во веки веков. Аминь.

Источник: Текст службы утвержден на заседании Священного Синода 25 августа 2022 года (журнал № 78).

Месяца августа в 19-й день

Преподобнаго Мисаила Абалакскаго

На вечерни

На Господи, воззвах: стихиры, глас 8:

Приидите, любящии подвиги святых,/ восхвалим преподобнаго Мисаила,/ той бо, красная мира сего ни во что же вменив и крест свой взем,/ Христу смирением последова./ Мы же прославляем Бога, дивнаго во святых Своих,/ подающаго нам мир и велию милость.

Преподобне отче Мисаиле,/ ты, житием своим Бога прославив,/ житейскую пучину мужественне прешел еси/ и тихаго пристанища достигл еси./ И ныне моли Христа Бога,/ дивнаго во святых Своих,/ даровати нам мир и велию милость.

На ниве Божией в сане иерейстем усердне подвизався/ и подвиг иноческаго жития восприем,/ Богу и людем неленостне послужил еси./ Темже пребывая ныне во Царствии Христа Бога,/ дивнаго во святых Своих,/ моли даровати нам мир и велию милость.

Слава, глас 6:

Ум свой в делании заповедей Божественных утвердив/ и страсти постнически победив,/ иерейское служение иноческими подвиги украсил еси./ И ныне чистым сердцем прославляеши/ Отца и Сына и Святаго Духа,/ Троицу Единосущную и Нераздельную.

И ныне, Богородичен, глас тойже: Богородице, Ты еси Лоза истинная:

На стиховне стихиры, глас 1.

Подобен: Небесных чинов:

День светлаго праздника твоего наста/ и радости сердца верных исполнишася,/ ты же, преподобне отче Мисаиле,/ яко имея дерзновение ко Господу,/ моли непрестанно о всех нас.

Стих: Честна пред Господем/ смерть преподобных Его.

Послушанием смирению научився/ и воздержанием безплотным уподобився,/ любовию ближним послужил еси./ Ныне же, в Небесных селениих водворяяся,/ моли о спасении душ наших.

Стих: Блажен муж, бояйся Господа,/ в заповедех Его восхощет зело.

Блаженне отче Мисаиле,/ вражия искушения презрев/ и козни лукаваго силою Христовою препобедив,/ житие равноангельное людем страны Сибирския явил еси./ Моли спастися душам нашим.

Слава, глас 8:

Пастыря благоговейнаго и монаха смиреннаго,/ тя почитаем, отче Мисаиле,/ Ангелов собеседниче и преподобных сопричастниче,/ с нимиже молися Господеви/ помиловатися душам нашим.

И ныне, Богородичен, глас тойже: Безневестная Дево:

Тропарь, глас 3:

Церкви усердный служителю,/ пастырем верный помощниче,/ отроком мудрый наставниче,/ страждущим благодушный утешителю,/ житие в трудех священных провождал еси/ и блаженное упокоение восприял еси,/ преподобне отче Мисаиле,/ моли Христа Бога спастися душам нашим.

Ин тропарь, глас 2:

Церкве Христовы светильниче,/ Абалакския обители заступниче,/ града Тобольска преславное украшение,/ преподобне отче Мисаиле,/ моли Христа Бога/ спастися душам нашим.

На утрени

По 1-м стихословии седален, глас 4:

Подобен: Скоро предвари:

Равноангельным житием твоим Христу последуя, вся красная мира сего нивочтоже вменил еси, блаженне Мисаиле. Темже память твою достодолжно прославляем.

Слава, и ныне, Богородичен:

Обновила еси, Чистая, Божественным Рождеством Твоим истлевшее во страстех земнородных мертвенное существо и воздвигла еси вся от смерти к животу нетления. Темже Тя по долгу блажим вси, Дево Препрославленная, якоже прорекла еси.

По 2-м стихословии седален, глас 5.

Подобен: Собезначальное Слово:

Угодника Христова песньми восхвалим, яко постом и молитвою лукаваго врага посрами. И ныне молит Господа помиловатися душам нашим.

Слава, и ныне, Богородичен:

Преестественно чудо зачатия и несказанен образ Рождества в Тебе познася, Чистая Приснодево, ужасает ми ум и удивляет помысл, слава Твоя, Богородице, всем простреся во спасение душам нашим.

Величание:

Ублажаем тя,/ преподобне отче Мисаиле,/ и чтим святую память твою,/ наставниче монахов/ и собеседниче ангелов.

Псалом избранный:

Терпя потерпех Господа и внят ми, и услыша молитву мою.

Блажен муж, бояйся Господа, в заповeдех Его восхощет зeло.

В память вечную будет праведник, от слуха зла не убоится.

Благовeстих правду в церкви велицeй.

Дивен Бог во святых Своих.

Той даст силу и державу людем Своим.

По полиелеи седален, глас 1:

Распятием страстныя плоти и смирением стяжал еси безстрастие, преподобне отче Мисаиле. Темже, дерзновение имея ко Христу Богу, моли о спасении душ наших.

Слава, и ныне, Богородичен:

Премудрости сокровище вемы Тя, Пречистая, и точащую благодатию источник приснотекущий разума; капли ведения одожди нам, Владычице, еже воспевати Тя присно.

Степенна, 1-й антифон, 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Восхвалим днесь, вернии,/ преподобнаго Мисаила Абалакскаго,/ той бо, соблазны лукаваго победив/ и земное житие труды постническими совершив,/ молитвами теплыми к Богу приближися/ и в Небесныя обители вселися./ Темже, со умилением к нему возопиим:/ яко имея дерзновение ко Христу Богу,/ мир испроси душам нашим.

Канон, глас 8, егоже краегранесие: Отче преподобне Мисаиле, моли Бога о мне, грешнем.

Песнь 1.

Ирмос: Воду прошед, яко сушу,/ и Египетскаго зла избежав,/ израильтянин вопияше:/ Избавителю и Богу нашему поим.

Припев: Господи, Иисусе Христе, Боже наш, помилуй нас.

О, Иисусе Сладчайший, Свете мира! Даждь ми разум и силу, да достойно с любовию воспою подвиги угодника Твоего, преподобнаго Мисаила Абалакскаго.

Припев: Преподобне отче Мисаиле, моли Бога о нас.

Тепле в молитве Господеви предстоя и в послушании родителем благочестию навыкнув, к животу вечному устремился еси, славу Богови воспевая.

Человеколюбца Христа от юности возлюбив, присно оком сердечным к Нему взирал еси. Темже, к лику преподобных причтен быв, ныне на Небеси Избавителя и Бога воспеваеши.

Богородичен: Евангельския заповеди исполняти мя настави, молю Тя, Пречистая Дево, исправи мя, заблуждшаго умом, и страсти плоти моея утоли, да славлю Бога во веки.

Песнь 3.

Ирмос: Ты еси утверждение/ притекающих к Тебе, Господи,/ Ты еси Свет омраченных,/ и поет Тя дух мой.

Преподобне отче Мисаиле, образ верным являя, саном иерейским почтен был еси и служение непорочное Богу и Церкви совершал еси. Темже тя ныне ублажаем.

Радуйся, отче Мисаиле, ты бо, плотския страсти и прилоги бесовския победив, яко луч света Божественнаго во обители Абалакской просиял еси.

Егда возложиша на тя братия послушание иноческое во обители Абалакстей, тогда со смирением и любовию им послужил еси, Христу подражая. Молися и нам в совершенном послушании Богу пребывати.

Богородичен: Промыслом Своим вся ко благу направляя, Господь Матерь Свою дарова в помощь и заступление людем земли Сибирския. Еяже молитвами, Иисусе Христе, сподоби и нас путь земнаго жития во благочестии совершати и Царствия Небеснаго достигнути.

Седален, глас 4.

Подобен: Скоро предвари:

Отче преподобне Мисаиле, ко стяжанию Божественныя благодати путь твой направляя, плотское мудрование духови покорил еси и, иноческия обеты добре исполняя, образ благочестия братии явил еси. Сего ради тя усердно прославляем.

Слава, и ныне, Богородичен:

Дево Богородице, стена непобедимая нам, христианом, еси, к Тебе бо прибегающе, невредими пребываем и, паки согрешающе, имамы Тя Молитвенницу. Тем благодаряще вопием Ти: радуйся, Владычице, Милостивая о нас пред Богом Заступнице.

Крестобогородичен:

О, Дево Пренепорочная, Мати Христа Бога, оружие пройде Твою пресвятую душу, егда распинаема волею видела еси Сына и Бога Твоего, егоже, Преблагословенная, молящи не престай, прощение прегрешений нам даровати.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя,/ и прославих Твое Божество.

Служение церковное ревностне совершая, наследник горняго Царствия с Вышними силами явился еси. Темже во благочестии укрепи всех, чтущих память твою.

Неустанно пред чудотворным образом Божия Матери Абалакския молился еси и плод духовный в мире, радости и любви принесл еси, Заступницу усердную рода христианскаго прославляя.

Единому истинному Богу усердне послужив, преподобне отче, дара благодати Духа Святаго сподобился еси. Темже и ныне всем, призывающим тя, помощь благовременне подаеши.

Богородичен: Многоплодная нива духовная сущи, Приснодево, из бразды Клас спасительный миру израстила еси, всю тварь Питающаго, Бога всяческих.

Песнь 5.

Ирмос: Утренююще, вопием Ти,/ Господи, спаси ны,/ Ты бо еси Бог наш,/ разве Тебе иного не вемы.

Иерей благоговейный архиерейскаго дома быв, блаженне, со слезами моления Христу Богу пред престолом возносил еси. Помолися и о нас, святче Божий.

Со смирением послушание исполняя, дух мирен в сердцы стяжал еси. Помози и нам, отче, сего дара сподобитися и земное поприще добре совершити.

Ангельски на земли пожив, кротостию же и смирением Богу угодив, образ благочестия людем Тобольским явил еси, на спасительный путь добродетели наставляя.

Богородичен: Исцели недугующаго ума моего омрачение, Врача рождшая, Христа, Всенепорочная Владычице, и страждущую душу благодатию Божиею озари.

Песнь 6.

Ирмос: Молитву пролию ко Господу/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.

Любовию Христовою уязвився, апостольски немощи ближних носил еси, преподобне, выну моляся ко Господу и не прилагая сердца к попечению житейскому.

Единаго на потребу взыскуя, блаженне отче, к службе Божией усердне прилежал еси и жертву безкровную умом неколеблемым за люди приносил еси.

Монашескаго жития усердный рачитель быв, преподобне, ангельскому житию поревновал еси и ныне с Небесными силами молишися о всех, почитающих тя.

Богородичен: О, Дево Пречистая, Владычице, помилуй, и избави мя всякаго лукавствия, и озлобления, и вечнаго мучения.

Кондак, глас 3:

Людие града Тобольска почитают тя, отче Мисаиле,/ яко пастыря добраго и молитвенника неусыпнаго,/ подвижника терпеливнаго и наставника смиреннаго,/ Церкви Христовой в житии своем усердне послужившаго,/ ныне же во обителех Небесных молящагося/ о спасении душ наших.

Икос:

Иноческое житие возлюбив, преподобне, мирская наслаждения отвергл еси и, яко светильник Божия благодати просияв, во благочестии многия люди утвердил еси. Темже поминай нас, чтущих святую память твою, да зовем ти:

радуйся, земли Сибирския благодатный светильниче;

радуйся, града Тобольска преславная похвало.

Радуйся, обители Абалакския ревностный подвижниче;

радуйся, преподобне отче Мисаиле, теплый молитвенниче о душах наших.

Песнь 7.

Ирмос: От Иудеи дошедше отроцы,/ в Вавилоне иногда,/ верою Тройческою пламень пещный попраша, поюще:/ отцев Боже, благословен еси.

Богослужебное пение возлюбив, ревностне и благоговейно Бога славил еси, отче, и ныне со Ангелы поеши: отец наших Боже, благословен еси.

От юных лет многия труды и подвиги подъем и болезни телесныя претерпев, преподобне, ныне в дому Божием добродетельми духовными благоухаеши, со Ангелы поя: отец наших Боже, благословен еси.

Глаголы Божия со усердием людем Тобольским проповедал еси, Мисаиле блаженне, вся научая по воли Божией жити и воспевати: отец наших Боже, благословен еси.

Богородичен: Архангельский глас вопием Ти, Чистая: радуйся, Благодатная, Господь с Тобою, и Тобою с нами, поющими: отец наших Боже, благословен еси.

Песнь 8.

Ирмос: Богоглаголивии отроцы в пещи,/ со огнем пламень попирающе, пояху:/ благословите, дела Господня, Господа.

О, наследниче Божественных селений! Ты добродетельно и чисто на земли пожил еси. Темже со Ангелы ныне ликует дух твой.

Матерь Божию усердно почитая, пред иконою Ея Абалакскою моление теплое непрестанно возносил еси. И ныне Царицу Небесе и земли со всеми святыми прославляеши.

На одре болезни блаженную кончину прием, отче преподобне, в Горняя селения преселился еси, идеже молиши Христа Бога о душах наших.

Богородичен: Единаго Бога, сотворшаго небеса волею, егоже не вмещает небо, Богородице, яко ширшая небес, вместила еси, словесное небо и одушевленное.

Песнь 9.

Ирмос: Устрашися всяк слух,/ неизреченна Божия снизхождения,/ яко Вышний волею сниде даже и до плоти,/ от Девическаго чрева быв Человек:/ тем же Пречистую Богородицу, вернии, величаем.

Припев: Господи, Иисусе Христе Боже наш, помилуй нас.

Господи, Иисусе Христе, благодатную помощь щедро источаеши молитвами преподобнаго Мисаила всем, верою чтущим святую память его.

Радуйся, земли Сибирския благодатный светильниче, яко наследовал еси обители Небесныя. Темже и нас молитвами твоими сия улучити сподоби.

Едину мысль имея, еже подвигом добрым Христа ради подвизатися, оковы страстей сокрушил еси. И нас, немощных, от уз греховных разреши молитвами твоими, Мисаиле блаженне.

Шуия части избави нас, Господи, на Страшнем Судищи Твоем молитвами преподобнаго Мисаила и всех святых, в земли Сибирстей просиявших.

Богородичен: Ныне просвети сердца наша, Дево Чистая, присно омрачаемая житейскими страстьми, и не остави нас врагом лукавым в поношение, да радостно славим Тя, Всепетая.

Светилен:

Естеством человек быв, ангельски на земли пожил еси и, яко луч солнечный, в стране Сибирстей возсиял еси, преподобне Мисаиле. Ныне же, Свет невечерний созерцая, моли спастися душам нашим.

Слава, и ныне, Богородичен:

Моленьми немолчными ублажаем Тя, Дево Богородице, яко Единаго от Троицы родила еси Христа Жизнодавца, егоже моли спастися всем нам.

На хвалитех стихиры, глас 6:

Преблаженне отче Мисаиле,/ верою крепость духа являя,/ добродетельми любовь Христову стяжал еси/ и, суету мирскую презрев,/ поприще монашескаго жития добре совершил еси./ Поминай нас, чтущих святую память твою.

Память твоя, яко утро пресветлое, нам возсия/ просвещающи вся верныя люди земли Сибирския/ и честную братию обители Абалакския./ Сего ради, песньми духовными тя прославляюще,/ молимся спастися душам нашим.

Блаженне, отче Мисаиле,/ ревностный делатель заповедей Христовых явился еси/ и, многия добродетели усердне совершив,/ в Горния обители вселился еси./ Темже тя вси с любовию ублажаем.

Радуйся, земли Сибирския благодатный светильниче!/ Радуйся, града Тобольска славная похвало!/ Радуйся, обители Абалакския некрадомое украшение!/ Радуйся, преподобне Мисаиле,/ теплый молитвенниче о душах наших!

Слава, глас тойже:

Преподобне отче Мисаиле,/ измлада добродетели прилежно навык/ и сердечную молитву всею душею возлюбив,/ презирати временная, взыскати же вечная/ человеки увещал еси./ Ныне же, в Божественнем свете Пресвятей Троице предстоя,/ моли спастися душам нашим.

И ныне, Богородичен:

Все упование мое/ на Тя возлагаю,/ Мати Божия,/ сохрани мя под кровом Твоим.

На Литургии служба вся преподобническая

Молитва

О, богомудре отче Мисаиле! Ты, истиннаго Пастыря Христа заповеди ревностне исполняя, всякое праздное веселие возненавидел еси и, от силы в силу восходя, житие твое в труде́х священных и послушании иночестем провождал еси. Темже мы, ведуще о данной ти благодати, со смирением припадаем ти и взываем: молися о нас ко Господу Иисусу Христу и Пречистей Его Матери, о еже сохранити страну нашу в мире и благоденствии, пастырем доброе попечение о людех имети, отроком послушание и прилежание в учении даровати, нам же всем в вере, благочестии и взаимной любви тихое и безмятежное житие провождати, да, спасение улучивше, единодушно воспоим в Троице славимаго Бога Отца и Сына и Святаго Духа, ныне и присно, и во веки веков. Аминь.

Источник: Текст утвержден Священным Синодом Русской Православной Церкви 26 декабря 2019 года (журнал № 163)

Ме́сяца а́вгуста в 21-й де́нь

Слу́жба чуде́сному Явле́нию Светопи́саннаго о́браза Пресвяты́я Богоро́дицы в Ру́сстем на Святе́й Горе́ Афо́нстей Свя́то-Пантелеи́моновом монастыри́

На ма́лей вече́рни

На Го́споди, воззвáх: стихи́ры, глáс 1.

Подо́бен: Небе́cных чино́в:

Виде́ние зрáка Твоего́ чи́cтаго/ А́нгелом у́бо слáдостно,/ челове́ком же есть спаси́тельно,/ духово́м лукáвствия губи́тельно, его́же ве́рою почитáюще и целýюще,// Богоро́дице, дýши просвещáем.

Непристýпный слáвы Твоея́ свет,/ на него́же А́нгельстии чи́ни с трéпетом взирáют,/ на Небеси́, Влады́чице, остáвивши,/ кро́тко ко рабо́м Твои́м пришла́ еси́./ Обáче Себе́ не а́бие явля́еши,/ очесéм их сýщим затворе́нным,/ да сердца́ любо́вию к Тебе́ горя́щия// утешéние обря́щут вя́щшее.

Све́тел у́бо прáздник преставлéния Твоего́,/ рáдостен же есть и настоя́щий./ Тáмо отходя́щи прорекла́ еси́,/ я́ко сопребýдеши рабо́м Твои́м во ве́ки:/ зде же чýдом но́вым уверя́еши,/ я́ко лю́бящия Тя// николи́же оставля́еши.

Чýдо но́вое и стрáнное/ зря́ще во Святе́й Афо́нстей Горе́:/ Де́вы кро́ткия прети́хое явлéние,/ е́же вся́кий ум Небе́cных и земны́х удиви́,/ посрами́м страстéй безсты́дная стремле́ния,// нрaв смирéнный пáки восприи́мше.

Слáва, глaс и подо́бен то́йже.

Творéние преподо́бнаго Никоди́ма Святого́рца:

Виде́ние зрáка Твоего́ чи́cтаго/ А́нгелом у́бо слáдостно,/ челове́ком же есть спаси́тельно,/ духово́м лукáвствия губи́тельно,/ его́же ве́рою почитáюще и целýюще,// Богоро́дице, дýши просвещáем.

И ны́не, попрáзднства.

На стихо́вне стихи́ры, глaс 1.

Подо́бен: Небе́cных чино́в:

Небе́cных чино́в рáдование,/ Де́во Всепе́тая,/ приими́ мáлое сие́ молéние,/ и сердéчному стенáнию вонми́,/ и страстьми́ уничижéнныя души́ моея́ не отжени́,/ но сподо́би и мене́ с досто́йными рабы́ Твои́ми,/ на светоявлéнный ли́ка Твоего́ зрaк,// со́вестию чи́стою воззре́ти.

Стих: Лицу́ Твоему́ помо́лятся// богáтии лю́дстии.

Светоле́пный о́браз ви́да Твоего́ чту,/ но не сме́ю на лице́ Твое́ взирáти,/ сего́ рáди со слезáми Тя молю́:/ дáруй ми долго́в мои́х прия́ти оставлéние,/ и сподо́би с ве́рными рабы́ Твои́ми,// чи́сто ви́дети Твою́ пречи́cтую ико́ну.

Стих: Во све́те лица́ Твоего́ по́йдем,// и о и́мени Твоéм возрáдуемся вeсь дeнь.

С высоты́ Горы́ Афо́нския/ облиста́ всем благодáть ико́ны Твоея́,/ милоcе́рдие Твое́ вселéнней показýющи,/ ве́ру же и́стинную я́ве возвышáющи:/ зрим бо Тя, вои́стину присноживýщую,// и о лю́бящих Тя при́сно помышля́ющую.

Слáва, глaс 2.

Подо́бен: До́ме Евфрáфов:

Благодáть но́вую/ и но́вую ми́лоcть/ чýдом новоле́пным// Це́ркви Бо́жией яви́ла еси́ с высоты́ Горы́ Святы́я Твоея́.

И ны́не, попрáзднства.

Тропáрь Явлéнию Пресвяты́я Богоро́дицы

ли́ка Светопи́саннаго, глaс 2:

Пречи́cтому ли́ку Твоему́ покланя́емся, Благáя,/ прося́ще предстáтельства о нaс, Ма́ти Бо́жия,/ во́лею бо благоволи́ла еси́ яви́тися среди́ брáтии,/ да избáвиши от печáли, и́хже собрала́ еси́./ Тем благодáрственно вопиéм Ти:/ рáдости исполня́еши всех, Пресвята́я Де́во,// вверя́ющих себе́ покро́ву Твоему́.

На вели́цей вече́рни

На Го́споди, воззвáх: стихи́ры, глaс 8.

Подо́бен: О, преслáвнаго чудесе́:

О, преслáвнаго чудесе́!/ Де́ва Всесвятáя,/ Я́же све́том пáче со́лнца на Небеси́ боже́cтвенно блистáющая,/ ри́зою убо́гою оде́яна днeсь ви́дится,/ ми́лоcтыни и благословéния прося́щая,/ нищете́ рабо́в Свои́х уподобля́ется,/ мы́сли и сердца́ тех приводя́щи сим// к подражáнию смирéния Боже́cтвеннаго Своего́.

О, преслáвнаго чудесе́!/ Де́ва Богоро́дица Пречи́cтая,/ Ю́же А́нгели пою́т на Небеси́,/ и земни́и ро́ди ублажáют,/ к рабо́м Свои́м безмо́лвна и смирéнна днeсь явля́ется,/ кро́тко в чреде́ стоя́щи,/ е́же А́нгельская во́инства узре́вше,/ ли́ца покрывáху, не могýще созерцáти// раболе́пнаго смирéния Ея́.

О, преслáвнаго чудесе́!/ Посреде́ друго́в Твои́х предстáла еси́,/ и ники́мже познавáема,/ рýце к подая́нию простéрла еси́,/ и от брéнныя руки́ укрýх прия́ла еси́,/ и рýку раба́ лобызáеши, Влады́чице!/ О, ужáснаго виде́ния сего́,/ и́мже пропове́дася конце́м смирéние,// и неизречéнное Твое́ снизхождéние!

О, преслáвнаго чудесе́!/ Хлеб с Небесе́ сшéдый ми́рови подáвшая,/ кáко рýце ко рабу́ простéрла еси́?/ Кáко ми́лостыню от него́ прия́ла еси́?/ Кáко рýку брéнную лобзáнием не опали́ла еси́, огнь Боже́cтвенный на руку́ держáвшая?/ Сим бо о́бразом смирéние,// кýпно же и ми́лоcть возвели́чила еси́ и благоволéние Твое́ яви́ла еси́.

О, преслáвнаго чудесе́!/ Посещéние Твое́, Всепе́тая,/ и смирéние неизречéнное/ нaс рáди, Ма́ти Бо́жия, явля́еши./ Не́бо в Рождеcтве́ Твоéм земли́ прекло́ньшая,/ кáко до земли́ склоня́еши смирéнную главу́?/ И о чeм раба́ благодари́ши,/ Ю́же твaрь вся благодáрне похваля́ет и блажи́т?// Покланя́емся вси снизхождéнию Твоему́, Чи́cтая!

Слáва, глaс 1.

Творéние преподо́бнаго Никоди́ма Святого́рца:

Подо́бен: Небе́cных чино́в:

Виде́ние зрáка Твоего́ чи́cтаго/ А́нгелом у́бо слáдостно,/ челове́ком же есть спаси́тельно,/ духово́м лукáвствия губи́тельно,/ его́же ве́рою почитáюще и целýюще,// Богоро́дице, дýши просвещáем.

И ны́не, Успéния.

Вход. Проки́мен дне. И чте́ния три Богоро́дице.

Бытия́ чтéние. [Глава́ 28.]

Изы́де Иáков от студенца́ кля́твеннаго, и и́де в Харрáн. И обре́те ме́сто, и спа тáмо: зáйде бо со́лнце. И взят от кáмения ме́ста того́: и положи́ возглáвие себе́, и спа на ме́сте о́ном. И сон ви́де: и се ле́ствица утверждéна на земли́, ея́же глава́ досязáше до небе́с, и А́нгели Бо́жии восхождáху и низхождáху по нeй. Госпо́дь же утверждáшеся на нeй, и рече́: Аз Бог Авраáмов отца́ твоего́ и Бог Исаáков, не бо́йся: земля́, иде́же ты спи́ши на нeй, тебе́ дaм ю́, и се́мени твоему́. И бýдет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки: и возблагословя́тся о тебе́ вся коле́на земна́я, и о се́мени твоéм. И се Аз с тобо́ю сохраня́яй тя на вся́ком пути́, а́може а́ще по́йдеши, и возвращý тя в зéмлю сию́: я́ко не и́мам тебе́ остáвити, до́ндеже сотвори́ти Ми вся, ели́ка глаго́лах тебе́. И воста́ Иáков от сна своего́, и рече́: я́ко есть Госпо́дь на ме́сте сeм, аз же не ве́дех, и убоя́ся, и рече́: я́ко стрáшно ме́сто сие́: несть сие́, но дом Бо́жий, и сия́ врата́ Небе́сная.

Исхо́да чтéние. [Глава́ 3.]

Вни́де Моисéй на го́ру Бо́жию Хори́в. Яви́ же ся ему́ А́нгел Госпо́день в плáмени о́гненне из купины́: и ви́де, я́ко купина́ горя́ше огнéм, и купина́ не сгарáше. Речé же Моисéй: прешéд узрю́ виде́ние вели́кое сие́, что я́ко не сгарáет купина́? Я́коже ви́де Госпо́дь, я́ко приступáет ви́дети, призва́ его́ Госпо́дь из купины́, глаго́ля: Моисéе, Моисéе. Он же рече́: что есть? И рече́: не прибли́жися се́мо: изýй сапо́г от ногу́ твое́ю: ме́сто бо на нéмже ты стои́ши, земля́ свя́та есть. И рече́ ему́: Аз Бог Авраáмов, и Бог Исаáков, и Бог Иáковль. Отврати́ же Моисéй лице́ свое́: стыдя́ше бо ся зре́ти пред Бо́гом. Речé же Госпо́дь к Моисéю: ви́дя ви́дех озлоблéние людéй Мои́х, и́же во Еги́пте, и вопль их услы́шах от наси́льствующих в де́лех: вем бо боле́знь их, и снидо́х е́же изъя́ти их от руки́ еги́птян, и извести́ их от земли́ о́ныя, и ввести́ их в зéмлю бла́гу и мно́гу, в зéмлю точáщу мeд и млеко́.

Пе́сни пе́сней Соломо́новых чтéние. [Главы́ 2 и 4.]

Вся добра́ еси́, бли́жняя моя́, и поро́ка несть в тебе́. Благово́ние риз твои́х я́ко благоухáние ливáна. Ле́торасли твоя́ сaд ши́пков с плодо́м я́блочным, ки́при с нáрдами, нaрд и шафрáн, трость и киннамо́н со все́ми древáми ливáнскими, сми́рна, ало́й со все́ми пéрвыми ми́рами, исто́чник вертогрáда, и клáдязь воды́ жи́вы и истекáющия от Ливáна. Востáни, бли́жняя моя́, до́брая моя́, и прииди́. Ты, голуби́це моя́, в покро́ве кáменне, близ предсте́ния: яви́ ми зрaк твой, услы́шан сотвори́ ми глaс твой: я́ко глaс твой слáдок, и о́браз твой крáсен.

На лити́и стихи́ры, глaс 1:

О, неизречéннаго смотрéния Твоего́,/ Де́во Всесвятáя!/ Ты бо Го́ру прéжде мрáчную сию́ от десни́цы Вы́шняго прии́мши,/ пáче ю́ Синáйския соде́лала еси́./ Тa бо Тя обрáзне иногда́/ во огни́ и купине́ предпоказа́,/ но сия́ Тя я́ве ми́рови явля́ет,/ лик светописáв Твой благоле́пный./ Слáва мно́жеству щедро́т Твои́х,/ и человеколю́бному смотрéнию,// и ди́вному посещéнию!

Подо́бен: О, ди́вное чýдо:

О, ди́вное чýдо!/ Селéние Ду́ха,/ палáта Бо́га Сло́ва/ и Дщи Отца́ возлю́бленная нaм явля́ется!/ Рáдуются чи́ни огневи́днии,/ рáдуйтеся, и́ноцы Афо́нстии,/ со безпло́тными ликýюще./ Воспои́м вси ве́рнии высо́кими умы́:/ Благодáтная, рáдуйся,/ с Тобо́ю Госпо́дь,/ подая́й ми́рови// Тобо́ю вéлию ми́лоcть.

О, ди́вное чýдо!/ Я́же Небе́с вы́шшая,/ днeсь посреде́ рабо́в Свои́х явля́ется,/ и ли́ка Своего́ пречи́cтаго изoбражéние нaм дáрует./ Рáдуйся, Горо́ Афо́нская,/ сáде Богоро́дичен избрáнный./ Возопии́м, брáтие,/ со Архистрати́гом сéрдцем и усты́ еди́ными:/ Благодáтная, рáдуйся,/ с Тобо́ю Госпо́дь,/ подая́й ми́рови// Тобо́ю вéлию ми́лоcть.

Чу́дны Твоя́ ря́сны, Богоро́дице,/ кро́тостию украше́нныя,/ чистото́ю позлаще́нныя,/ доброде́тельми Боже́cтвенными преиспещре́нныя./ Слáва Твоя́ боголе́пна,/ богоподо́бнаго смирéния Твоего́ сия́юща лучи́./ Кро́тцыи и смирéннии, с Пречи́cтою Де́вою/ на высоту́ духо́вную возноси́теся пою́ще:/ Благодáтная, рáдуйся,/ с Тобо́ю Госпо́дь,/ подая́й ми́рови// Тобо́ю вéлию ми́лоcть.

Ди́вный прорече́ Исáия:/ бýдет в после́дния дни/ я́ве гора́ Госпо́дня,/ и дом Госпо́день верху́ ея́./ Си́це и Святáя Гора́ Афо́нская,/ о Тебе́, Влады́чице, вои́стину украси́ся,/ мно́гими просия́вши отце́в кино́виями,/ и́же непрестáнными гла́сы пою́т Ти:/ Благодáтная, рáдуйся,/ с Тобо́ю Госпо́дь,/ подая́й ми́рови// Тобо́ю вéлию ми́лоcть.

Ди́вны Твоя́ та́йны, Богоро́дице:/ сe бо в после́дния дни/ в жрéбии Своéм Себе́ яви́ла еси́,/ во смирéнии Своéм вся кро́тко назидáющи./ О, смотрéния Твоего́, Чи́cтая!/ И́мже распаля́еши сердца́ к любви́ Твоéй,/ с ве́рою под кров Твой приходя́щих,/ и на Небеса́ умо́м взирáющих и вопию́щих:/ Благодáтная, рáдуйся,/ с Тобо́ю Госпо́дь,/ подая́й ми́рови// Тобо́ю вéлию ми́лоcть.

Подо́бен: Небе́cных чино́в:

Тýчами Ду́ха Святáго, Пречи́cтая,/ жрéбий, Сы́ном даровáнный Ти,/ я́ко сaд духо́вный при́сно, Де́во, орошáеши,/ и пото́ком слáдости Боже́cтвенныя/ насажде́ния Твоя́ при́сно питáеши./ Те́мже жáждущаго мя не прéзри в ско́рби,// но животворя́щих вод напи́тися и мя сподо́би.

Жезло́м предстáтельства Твоего́/ на Горе́ Твоéй пасо́мыя/ от губи́телей безпло́тных ограждáеши/ и к пáжити Небе́cней наставля́еши/ вме́сто мáнны, благодáтию питáеши,// и Небе́cных благ насле́дники их сотворя́еши.

Глaс 2.

Подо́бен: До́ме Евфрáфов:

Но́вый Богоздáнный сaд,/ Небеси́ подо́бная Гора́,/ ю́же сыноле́пно/ Христо́с Бог нaш,// я́ко жрéбий Ма́тери Своéй дарова́.

Земны́й раю́,/ уде́ле избрáнный,/ украшáй свой двор,/ в нéмже велеле́пно// и́мя Госпожи́ Твоея́ прославля́й!

Глaс 3:

Превéлие чýдо!/ Де́во Бо́га ро́ждшая,/ днeсь к рабо́м Твои́м низхо́диши,/ да Твоея́ всем ми́лоcти и бла́гости откры́еши пучи́ну./ О, смирéния Боже́cтвеннаго Твоего́!/ О, чудесе́ престрáннаго,/ е́же и мы́слимое неудо́бь речéнное бывáет,/ и зри́мое неудо́бь поéмлется./ Не́бу и земли́ Госпоже́ и безпло́тных Сил держáвная Влады́чице,/ о́браз нaм смирéния явля́еши,/ Ма́ти Бо́га Вы́шняго,/ во е́же нището́ю Ду́ха ущéдрити,/ и́хже возлюби́ла еси́,// и спасти́ от бед дýши нáша.

Превéлие чýдо,/ виде́ние стрáнное, пáче ума́,/ ли́ка Твоего́ явлéние, о Богома́ти,/ его́же ро́ду немощне́йшему/ я́ве зре́ти даровáла еси́,/ помышле́ния на́ша и сердца́/ к мудровáнию Боже́cтвенному сим приводя́щи,/ во смирéнии Своéм вся назидáющи./ Кто не удиви́тся снизхождéнию Твоему́,/ и́мже днeсь, я́ко и при́сно Ма́терски тщи́шися ущéдрити рабы́ Твоя́,// во е́же спасти́ от бед дýши нáша.

Глaс 5.

Подо́бен: Рáдуйся:

Написáвшейся Твоéй ико́не пéрвее/ та́ин ева́нгельских сказáтелем,/ рáдующися тýю от него́ прия́ла еси́,/ и обетовáние сладчáйшее,/ ю́ благословля́ющи изрекла́ еси́,/ я́ко николи́же оскуде́ет благодáть Твоя́, Влады́чице,/ от изображéний зрáка Твоего́ пречи́cтаго,/ и́хже, я́ко кри́ны се́льныя,/ мироточи́выя, благоуха́нныя и чудотворя́щия,/ милоcе́рдствующи о лю́дех, Твоего́ предстáтельства прося́щих,/ по вселéнней, Ма́ти Бо́жия, умно́жила еси́:/ последи́ же, во Святе́й Горе́ Твоéй,/ лик Твой пречестны́й и всесвяты́й/ светопи́санно запечатле́ти благоизво́лила еси́,/ лю́бящим Тебе́ на утешéние./ Те́мже, о́бразу сему́ припáдающе,/ ве́ру несумнéнну и́мамы по словеси́ Твоему́,/ я́ко благодáть Твоя́ и си́ла преоби́льно пребывáет с ним,/ его́же почитáюще и лобызáюще,/ благодáрственне Тебе́ вопиéм:/ рáдуйся, Застýпнице ро́да христиáнскаго,// не престáй спасáти дýши нáша!

Глaс 6.

Подо́бен: Все отло́жше:

Срáдуйтеся нaм, вся по́стников ликостоя́ния,/ во Святе́й Горе́ сeй совокýпльшиися,/ сe бо Ма́ти нáша и Предстáтельница,/ и Ходáтаица, и покро́в,/ во благи́х изве́стная Настáвница,/ и вели́кое прибе́жище/ во святе́й Своéй oби́тели яви́ся,/ и скорбя́щих утешáет,/ и всем лю́бящим Ю́ благодáть неиждивáемую щéдрствует,/ и благословéние вели́кое дáрует:/ о́браз светопи́санный и дивнопроявлéнный./ Те́мже срáдуйтеся нaм, вси ве́рнии,/ да по до́лгу Богома́терь воспои́м,/ благодáрне и со умилéнием припáдающе к Нeй, возопиéм:/ покры́й ны Боже́cтвенным предстáтельством Твои́м,// Пресвята́я Богоро́дице Влады́чице!

Глaс 8.

Подо́бен: О, преслáвнаго чудесе́:

О́браз Твой пречи́cтый обстоя́ще,/ с трéпетом отцы́ на Тя взирáху./ О́вии же чýдо созерцáюще,/ у́жасом премно́гим одержáхуся./ Стáрцы же со слезáми вопия́ху Ти:/ о Влады́чице Всепе́тая!/ Зрим Тя я́сно и диви́мся:/ кáко пáче со́лнца слáвою блистáющая,/ про́ста во смирéнном ви́де нaм явля́ешися,/ в ско́рби сýщих утешáющи?/ Но моли́ся Сы́ну Твоему́ и Бо́гу нáшему,/ Де́во Госпоже́ Влады́чице Пречи́cтая:// стáду Твоему́ от бед и зол спасти́ся.

Слáва, глaс 1.

Подо́бен: Небе́cных чино́в:

Сы́тости воспевáния Твои́х похвáл,/ лю́бящии Тя отню́д, Всепе́тая, не знáют,/ но желáнием приéмлют вя́щшее желáние,/ пе́сни протяже́нны ткáти сéрдцем и усты́,/ непрестáнно А́нгелы на Небеси́ Тебе́ хвали́мей,// уповáнию всех сýщих на земли́ еди́ному.

И ны́не, Успéния.

На стихо́вне стихи́ры, глaс 8.

Подо́бен: О, преслáвнаго чудесе́:

О, преслáвнаго чудесе́!/ Живоно́сный сaд/ на Горе́ сeй насади́ла еси́,/ и де́латели во о́ный призвала́ еси́./ О, надéждо звáния сего́!/ О, богáтство даровáния,/ е́же во обетовáниих Твои́х нело́жно завещáла еси́/ чéстне в жрéбии Твоéм труждáющимся,// благодáтию Тебе́ всыня́емым!

Стих: Во све́те лица́ Твоего́ по́йдем,// и о и́мени Твоéм возрáдуемся вeсь дeнь.

О, преслáвнаго чудесе́!/ Гора́ тýчная и ди́вная,/ мéдом и млеко́м текýщая,/ благодáтию приосенéнная./ Не́бо, е́же на земли́!/ К Небеси́ степéнь восхо́дная!/ Рaй земны́й, Сио́н вторы́й Боже́cтвенный,/ его́же в жрéбий восприя́ла еси́,// и́же есть врата́ Небе́сная!

Стих: Посли́ свет Твой и и́стину Твою́, та мя настáвиста, и введо́ста мя// в Го́ру Святýю Твою́ и в селе́ния Твоя́.

О, преслáвнаго чудесе́!/ Ополчéние свящéнное,/ А́нгельским лико́м единонрáвное,/ дéмонским стадо́м противобо́рное,/ дýхом к Бо́гу при́сно пламене́ющее,/ Воево́ды во́инство Небе́cныя,/ Е́юже дерзáет и пленя́ет рáтники,/ Е́ю утверждáемо, прохо́дит послушáние,/ вси потруди́мся, о брáтие!/ Да не отщети́мся о́наго полка́ Боже́cтвеннаго/ и не постыди́мся в дeнь сýдный,/ во́ньже да сподо́бимся и мы услы́шати:// прииди́те в рáдость Го́спода и Сы́на Моего́.

Слáва, глaс и подо́бен то́йже:

О, преслáвнаго чудесе́!/ Небеси́ и земли́ Цари́ца/ от святы́х А́нгелов певáемая,/ до ны́не ми́лоcти покро́в к нaм простирáет/ и ли́ка Своего́ явлéнием нaс утешáет./ О Влады́чице Всепе́тая!/ Не престáни и на бýдущее врéмя/ посещáти нaс, убо́гих чад Твои́х,// ми́лоcтию и чудесáми до ве́ка. Ами́нь!

И ны́не, Успéния.

Тропáрь явлéнию Пресвяты́я Богоро́дицы

ли́ка Светопи́саннаго, глaс 2:

Пречи́cтому ли́ку Твоему́ покланя́емся, Блага́я,/ прося́ще предстáтельства о нaс, Ма́ти Бо́жия,/ во́лею бо благоволи́ла еси́ яви́тися среди́ брáтии,/ да избáвиши от печáли, и́хже собрала́ еси́./ Тем благодáрственно вопиéм Ти:/ рáдости исполня́еши всех, Пресвята́я Де́во,// вверя́ющих себе́ покро́ву Твоему́.

На у́трени

По 1-м стихосло́вии седáлен, глaс 1.

Подо́бен: Объя́тия О́тча:

Приими́, о Ма́ти Де́во, во спаси́тельная и сладча́йшая Твоя́ объя́тия и мене́, раба́ Твоего́, о́бразу Твоему́ в покая́нии тéпле припáдающа и с любо́вию его́ лобызáюща. Днeсь не прéзри обнищáвшее мое́ сéрдце, но поими́ мя, о Ма́ти, от земны́х в преми́рная всемо́щным Твои́м мановéнием, да иде́же Ты, тáмо и сéрдце мое́ всегда́ бýдет, и забýду вся, и́миже зде лю́те уязви́хся. Да услы́шу Ро́ждшагося из Тебе́ сладчáйшия глаго́лы: се, о челове́че, Ма́ти твоя́, Той послýшествуй и во след Ея́ ходи́, да во све́те лица́ Ея́ во век наслади́шися.

Сла́ва, и ны́не, попрáзднства.

По 2-м стихосло́вии седáлен, глaс 3.

Подо́бен: Красоте́ де́вства:

Красоте́ смирéния Твоего́, Де́во Чи́стая, лик пито́мцев Твои́х удиви́ся, и неизречéннаго смотрéния Твоего́ и любве́ духо́вне наслади́вшеся, похвали́ти и воспе́ти Тя потщи́ся. Недоумевáет, кýпно же и ужасáется: кýю похвалу́ Ти вознести́ досто́йну? Но любо́вию Обáче подвизáемый, си́це вопиéт Ти: рáдуйся, Мари́е Благодáтная! Не престáй питáти дýши нáша.

Слáва, и ны́не, попрáзднства.

По полиелéи седáлен, глaс 1.

Подо́бен: Гроб Твой, Спа́се:

Отцы́ преди́вное чýдо узре́ти притеко́ша, и Пречи́cтыя явлéние ви́девше трепетáху, лик бо Тоя́ облиста́ благодáть. Чýдо удивля́ше я́. Сего́ рáди возвести́ша всем преслáвное виде́ние, и́мже плен уны́ния отгнáся, пáдшим же востáние дадéся, я́ко Де́ва Чи́cтая всем ве́рным еди́но спасéние, посещáющи нaс мир дáрует.

Слáва, и ны́не, попрáзднства.

Величáние о́бщее.

Псало́м избрáнный:

Услы́шите сия́, вси язы́цы, внуши́те, вси живýщии по вселéнней.

Во све́те лица́ Твоего́ по́йдем, и о и́мени Твоéм возрáдуемся вeсь дeнь.

Испо́лниши мя весéлия с лицéм Твои́м.

Не забýди глáса моли́твенник Твои́х.

Блажéни живýщии в дому́ Твоéм: в ве́ки веко́в восхвáлят Тя.

Отвéржен есмь от лица́ о́чию Твое́ю, услы́ши глaс моли́твы моея́.

Просвети́ лице́ Твое́ на раба́ Твоего́, спаси́ мя ми́лоcтию Твоéю.

От лица́ Твоего́ судьба́ моя́ изы́дет: о́чи мои́ да ви́дита правоты́.

По 50-м псалме́ стихи́ра, глaс 6, самоглáсен:

Царю́ Небе́cный,/ Иису́се, Сы́не Мой!/ Приими́ моле́ния рабо́в Твои́х,/ и́же и́мя Твое́ пресвято́е и сладчáйшее/ на вся́ком ме́сте и на вся́кий чaс непрестáнно призывáют,/ и подáждь моли́тву Боголе́пную моля́щимся Тебе́,/ дeнь и нощь прося́щим благодáти,/ и прослáви слáвящия Тя,/ и Мене́ на по́мощь призывáющия,/ ве́рою же и любо́вию Мя почитáющия,/ и преслáвно пáмять и́мене Моего́/ в бде́нии молéбно совершáющия./ Сего́ рáди, Сы́не Мой и Бо́же Мой,/ благодáтию рабы́ Твоя́ осени́,/ трyд и по́двиг их благослови́,/ и обе́ты освяти́,// во дво́рех Мои́х по смéрти водворя́я.

Кано́н, глaс 1:

[Прáздника пéрвый кано́н, со ирмосо́м на 6, ирмосы́ по двáжды: Пресвяты́я Богоро́дицы ли́ка Светопи́саннаго кано́н на 8. Катавáсия: Преукраше́нная: По 3-й пе́сни, кондáк и и́кос прáздника, седáлен о́браза, двáжды. Слáва, и ны́не, прáздника. По 6-й пе́сни, кондáк и и́кос о́браза, тáже синаксáрий. На 9-й пе́сни Честне́йшую: не поéм, но припе́вы прáздника и о́браза. По 9-й пе́сни, свети́лен о́браза, двáжды. Слáва, и ны́не, прáздника.]

Песнь 1.

Ирмо́с: Помо́гшему Бо́гу во Еги́пте Моисéови,/ и тем фарао́на со всево́инством погрузи́вшему,/ побе́дную песнь пои́м,// я́ко прослáвися.

От нaс, о Ма́ти, чад Твои́х, лик святы́й Твой обстоя́щих, любо́вь нáшу и благодáрственную песнь ны́не приими́, и из глубины́ души́ приноси́мая воздыха́ния Ма́терски услы́ши, и вся нáша печа́ли утоли́, ве́рно Тя величáющих, слáвно бо прослáвишася Твоя́ чудеса́.

Всесвято́е лице́ Твое́, Де́во Чи́cтая, я́ко рaй све́тел рабо́м Твои́м яви́ла еси́, благодáтию и жи́знию ды́шущее всем взирáющим, и благоговéйно покланя́ющимся ему́ и Тя воспевáющим: слáвно бо прослáвишася Твоя́ чудеса́.

Го́ру Афо́нскую, ве́рнии, умы́ обы́мем вси усéрдно, и у́зрим тáинство Бо́жия Ма́тере, нaс рáди бы́вшее: слáвно бо прослáвишася на Горе́ сeй ди́вная Тоя́ чудеса́.

Богоро́дице Де́во, рáдосте и уповáние нáше! Кáко Небе́с Вы́шшая, на земли́ птенце́в Твои́х не оставля́еши, но я́ко ко́кош согревáеши их и Небе́сныя пи́щи насыщáеши? Те́мже воспевáем Тя: слáвно бо прослáвишася на Горе́ сeй ди́вная Твоя́ чудеса́.

Ин кано́н, покая́нен.

[Песнь 1. Ирмо́с то́йже.]

В зéмлю Святýю, Го́ру сию́ Боже́cтвенную, вни́ти мя сподо́била еси́, Богоро́дице, в нéйже кро́тцыи, смирéннии и чи́стии сéрдцем то́кмо водворя́ются. Те́мже покая́нием мя очи́стив, подражáтеля тех сотвори́, я́ко да с ни́ми рáдуяся непрестáнно пою́ Ти, слáвно бо прослáвишася на Горе́ сeй ди́вная Твоя́ чудеса́.

От мирскáго пле́на повеле́нием Твои́м, Ма́ти Бо́жия, изыдо́х. Те́мже вы́шния рабо́ты де́лателя искýсна, о Влады́чице Пречи́cтая, и мене́ неискýсна сýща соде́лай, я́ко да то́ю просвещáяся, рáдостно и аз пою́ Твоя́ чудеса́.

Слáва: Ду́хом Святы́м от Отца́ исходя́щим и в Сы́не Твоéм почивáющим, о Влады́чице Богоро́дице, просвети́ мя и ум престáвити к вы́шним сподо́би, да горе́ умо́м вы́ну водворя́яся, непрестáнно пою́ Твоя́ чудеса́, слáвно бо прослáвишася.

И ны́не: Го́рдаго зми́я Рождеcтво́м Твои́м, Всенепоро́чная, низложи́ла еси́: те́мже си́лою из Тебе́ Рождéннаго, и мене́ безси́льнаго на враги́ моя́ укрепи́, и на по́двиг звáния Твоего́ востáти сподо́би, да и аз воспою́ рáдуяся Твоя́ чудеса́, слáвно бо прослáвишася.

Песнь 3.

Ирмо́с: Да утверди́тся сéрдце мое́/ в во́ли Твоéй, Христе́ Бо́же,/ И́же над водáми Не́бо утверждéй второ́е,/ и основáвый на водáх зéмлю, Всеси́льне.

Невмести́маго Бо́га во утро́бе Своéй несказáнно вмести́вшая, Де́во, и руко́ю Твоéю носи́вшая длáнию Содержáщаго вся, днeсь и рабы́ Твоя́, под кров Твой притéкшия, богоно́сцы соде́лай и сердца́, Иису́са нося́щая, им сотвори́.

Благоукраси́ся днeсь оби́тель Рýсская и приими́ Богоро́дицу Де́ву Всецари́цу. Тa бо во смирéнии Своéм пáче со́лнца сия́ющи к нaм яви́ся, Ю́же А́нгели незри́мо чéстне дорино́сят, да сердца́, Иису́са нося́щая, рабо́м Свои́м сотвори́т.

Боже́cтвенную сию́ ико́ну Твою́ отцы́ всечеcтни́и благогове́йне прия́ша, и рáдующеся удивля́хуся: кáко ми́лоcть всем Подаю́щая ми́лостыню от раба́ восприя́ла еси́? Те́мже мо́лим Тя, Пречи́cтая, ми́лоcти Твоея́ и нaс, раб Твои́х, не лиши́, но сердца́, Иису́са нося́щая, нaм сотвори́.

Цве́те прекрáсный, и воня́ пи́щная, облагоухáеши, Богоро́дице Мари́е, вся Тебе́ вверя́ющияся, и спасáеши, и от страстéй исцеля́еши, и сердца́, Иису́са нося́щая, им сотворя́еши.

Ин

Неве́сто нетле́нная, Чи́cтая и сладчáйшая, Иису́са сладчáйшаго Ма́ти, дýшу мою́ тéмную просвети́, и селéние чи́стое Го́споду и Сы́ну Твоему́, о Пречи́cтая, покажи́, и подáждь ми моли́тву моля́щемуся Тебе́.

И́мя Твое́, Благодáтная Де́во, Мари́е Всечи́cтая, вселéнную всю озари́, ве́рных сердца́ просвещáющи: те́мже и сéрдце мое́ страстьми́ омрачéнное просвети́, и всади́ в него́ моли́тву моля́щемуся Тебе́.

Слáва: Не прéзри, Го́споди, убо́гаго сéрдца моего́ двизáния мáлаго, оскуде́ бо кре́пость моя́, ми́лоcть же Твоя́, Бо́же, я́коже Сaм рекл еси́, моли́твами Пречи́cтыя Твоея́ Ма́тере, да помо́жет ми и подáст моли́тву моля́щемуся Тебе́.

И ны́не: Сéрдце Го́сподеви прилеплéно, Ма́ти Бо́жия, дáруй ми, Пречи́cтая, рабу́ Твоему́, красоту́ в нeм Боже́ственную написýющи, и моли́тву в то́е всели́ моля́щемуся Тебе́.

По 3-й пе́сни кондáк, и́кос и седáлен Успéния.

Седáлен, глaс 4.

Подо́бен: Удиви́ся Ио́сиф:

Удиви́шася, Чи́cтая, ли́цы А́нгельстии, кáко Причáстница сýщи богате́йшия рáдости Небе́cныя, во юдо́ли скорбéй челове́ческих при́сно пребывáеши, и на вся́кий вопль моли́твы Ма́терски отвещáеши и благодáть раздаéши неиждивáемую: больны́х исцеля́ющи и печáльных утешáющи, Де́во Ма́ти Госпо́дня, и сокро́вище прострáннейшее ми́лоcти Боже́cтвенныя?

Песнь 4.

Ирмо́с: На земли́ Твое́ смирéнное явлéние узре́вше,/ чи́ни Небе́cнии удиви́шася,/ милоcе́рдие Твое́ хвáляще,/ вся же твaрь воспе́ Тя рáдующися,// и испо́лнишася вся Твоего́ хвалéния, Чи́cтая.

Сою́зом любве́ собрáние светозáрное рабо́в Твои́х, Богоро́дице, о Го́споде связýемо, зло́бу всю и ковáрство зми́евы си́лою Твоéю и благодáтию мужемýдренно низлагáет. Сего́ рáди при́сно Тебе́ вопиéт: да испо́лнятся вся Твоего́ хвалéния, Чи́cтая!

Гора́ сия́ Свята́я наречéся, я́ко промышлéнием и чудесы́, и посещéньми Твои́ми при́сно, Де́во, красýется, в нéйже до́бле вси подвизáющиися стяжáша Тя ве́рную Ходáтаицу и Храни́тельницу при́сную во всeм житии́ своéм. Да испо́лнятся вся Твоего́ хвалéния, Чи́cтая!

Кáко брéнная рука́ пречи́cтых длáней Твои́х не ужасéся? Кáко прикоснýтися к ним не вострепета́? Кáко ми́лостыню в них положи́ти не устыдéся? Вои́стину, то́кмо повелéнием Твои́м и изволéнием, Чи́cтая, да чýдо но́вое яви́тся и неизречéнное, и испо́лнятся вся Твоего́ хвалéния.

Ви́дя стáрец врáтарь явлéние ди́вное, Де́ву Чи́cтую, Ея́же и́мя от младéнства своего́ призывáше, я́ко младéнец диви́ся бы́вшему, Обáче я́ко послýшлив сый, рýку простре́ на подая́ние, вопия́: да испо́лнятся вся Твоего́ хвалéния, Чи́cтая!

Ин

Кáя скорбь обдержи́т мя, егда́ в дeнь стрáшный о́ный стáдо Твое́ к Сы́ну Своему́ приведéши, глаго́лющи: се, Аз, Влады́ко, и ча́да Моя́ и́хже дaл Ми еси́, сeй же кто есть не вем? Но молю́ Тя, Влады́чице: пощади́ мя, и внегда́ осуждáтися души́ моéй, ми́лоcть Свою́ помяни́!

О, каковы́я слáвы, окая́нный, сaм себе́ лиши́х! О, каково́ сыновство́ и насле́дие, стрáстный, сaм от себе́ отверго́х! Ри́зу све́тлу, ю́же свы́ше прия́х, зле низри́нух и обе́ты вся оскверни́х! Но молю́: Ма́ти Бо́жия, пощади́ мя, и внегда́ осуждáтися души́ моéй, ми́лоcть Свою́ помяни́.

Слáва: Во смирéнии вели́каго, кро́ткаго же в прáвде Го́спода на суди́щи стрáшнем, о Всеми́лоcтивая, ми́лоcтива и милоcе́рда ми соде́лай. Аз бо ни еди́ныя зáповеди Его́ соблюдо́х, ни обе́тов свящéнных испрáвих. Сего́ рáди молю́ Тя, Всечи́cтая: внегда́ осуждáтися души́ моéй, ми́лоcть Свою́ помяни́.

И ны́не: Хрaм Тя свят и пречи́cт вeсь Бог Сло́во соде́ла. Сего́ рáди молю́ Тя, Всечи́cтая: я́ко хрaм мя вельми́ осквернéн пáки вeсь Тому́ обнови́, помяни́ ми́лоcть Свою́, да испо́лнюся и аз Твоего́ хвалéния, Чи́cтая.

Песнь 5.

Ирмо́с: Свет Твой незаходи́мый возсия́й, Влады́чице,/ в сердцáх ве́рно пою́щих Ти,/ мир подавáй нaм пáче ума́:/ и́мже от но́щи неве́дения/ ко дню све́том Твои́м текýще,// славосло́вим Тя, Пренепоро́чная.

Со́лнце све́тлое, во смирéнии Твоéм блистáющее, возсия́ ико́на Твоя́, Богома́ти Всенепоро́чная, свет Боже́cтвенный с любо́вию к Тебе́ притекáющим изливáющая и согревáющая сердца́ к подражáнию боголе́пнаго жития́ Твоего́, ве́рно призывáющих и́мя Твое́, Благодáтная.

Мeч Боже́cтвенный, и́мя сладчáйшее Сы́на Твоего́ Иису́са рабо́м Твои́м даровáла еси́, Богоро́дице, и́мже нáглость бесо́вская посекáется и свире́пство пло́ти закалáется, и победоно́сцы до́блии Христо́вы явля́ются, ве́рно именýющии и́мя Того́ благодáтное.

Све́тло возсия́ и вселéнную всю озари́ и́мя Твое́, Благодáтная Де́во, Мари́е Всепе́тая, сень лукáвствия упраздни́вшее, омрачéние сердéц отъéмлющее, ве́рно призывáющих Тя, Благодáтная.

Боже́cтвенный Твой вертогрáд, я́ко рaй изoби́лием щедро́т Твои́х присноцветýщ, пáки днeсь от Богоподо́бныя добро́ты Твоея́ угобзи́ла еси́, и ми́лоcти Твоея́ неизглаго́ланныя и смирéния аромáт во вeсь мир облагоухáла еси́. Да поéтся и́мя Твое́, Благодáтная!

Ин

Се падо́х, Влады́чице, се умро́х. Аз бо враги́ моя́, я́коже Ты рекла́ еси́, до конца́ не изби́х, во́ли всеoкая́нныя своея́ не пожро́х, пло́ти вселукáвыя не заклáх. Но молю́ Тя, Всечи́cтая, рéвность Боже́cтвенную мáнием Твои́м низпосли́ ми, да я́коже огнь с Небесе́ низходя́й, супостáты моя́ вся поя́ст.

И́мя Твое́, Благодáтная Мари́е, победи́тельно есть и всеси́льно, и́мже А́нгельстии ли́цы просвещáются, де́монская же стада́ го́рце попаля́ются, е́же призывáти и мене́, Богоро́дице, научи́, я́ко да огнь от него́ исходя́й, супостáты моя́ вся поя́ст.

Слáва: Удивля́ются ли́цы А́нгельстии, Де́ву Пресве́тлую, Свет от Све́та на руку́ Свое́ю носи́вшую, и Свет от Отца́ исходя́щий, и в душáх ве́рных моли́тв Ея́ рáди возсиявáющий зря́ще. Сего́ рáди и аз окая́нный о́бразу Твоему́ припáдая, умоля́ти дерзáю: лучéю еди́ною Божеcтва́ Трисия́ннаго дýшу мою́ просвети́, да огнь от нея́ исходя́й, супостáты моя́ вся поя́ст.

И ны́не: Чи́стая Де́во, Све́та жили́ще, И́мже мир вeсь просвети́ла еси́, дýшу мою́ грехми́ потемне́нную посещéнием Твои́м озари́, да Свет из Тебе́ исходя́й, супостáты моя́ вся поя́ст.

Песнь 6.

Ирмо́с: Проро́ка Ио́ну подражáя вопию́:/ живо́т мой, Бла́же, свободи́ из тли,// и спаси́ мя, Спа́се ми́ра, зовýща: слáва Тебе́.

А́ще и сокрывáешися вмáле, Де́во, смирéния рáди вели́каго Твоего́, подо́бие рабо́в Твои́х убо́гое приéмши, но Дух Всесвяты́й в сердцáх лю́бящих Тя о Тебе́ вопиéт: се Ма́ти Бо́га вáшего! Той ны́не поклони́теся, любо́вию зовýщи: слáва Тебе́.

Чеcтно́е о́браза Твоего́ явлéние зря́ще, хвáлим ве́рнии, словесы́ Тя воспевáюще, Чи́cтая, я́ко Цари́цу, и воздыха́нии сердéчными блажáще глаго́лем: Ма́ти Бо́жия, слáва Тебе́.

Торжествýем вси, любо́вию пою́ще Тя, и явлéние Твоего́ о́браза слáвяще: не престáй, Де́во, моли́твами Твои́ми спасáти рабы́ Твоя́ от вся́кия беды́, ве́рно призывáющия Тя, Благодáтная, и зовýщия: Ма́ти Бо́жия, слáва Тебе́.

Рáдостни и престрáшни бы́ша раби́ Твои́, Чи́cтая, дрyг ко дрýгу глаго́лаху: кáко о́чи на́ша держáстася? Ви́дехом бо Тя посреде́ нaс про́сту и стрáнну, и ти́хо ходя́щую. Удиви́вшеся же и земли́ прекло́ньшеся, Тебе́, Влады́чице всех, поклони́шася, зовýще: Ма́ти Бо́жия, слáва Тебе́.

Ин

Зверь мя раздра́, Всечи́cтая, и́же плоть моя́ вселукáвая есть, ю́же гре́ях аз и ласкáх, и питáх, но сия́ мя внезáпу низри́ну. Сего́ рáди зову́: Ма́ти Бо́жия, из истле́ния мя исхити́!

Оскверни́х преслушáнием обновлéния ри́зу, ю́же от Тебе́, о Влады́чице моя́, иногда́ восприя́х. В ров уны́ния низпадо́х и лишéн доброде́тели, но с Ио́ною Тебе́ вопию́: Ма́ти Све́та! Очи́сти, испрáви мя, Чи́cтая, и из ти́ны страстéй исхити́.

Слáва: Се, при двéрех смeрть, душе́ моя́, предстои́т и во чрéво а́дово низвести́ тя гото́ва есть. Воспряни́, о душе́, возопи́й: пощади́, пощади́ мя, Влады́ко, и моли́твами Ро́ждшия Тя от зве́ря сего́ исхити́.

И ны́не: Заблуди́х, Госпоже́ моя́, отпадо́х от стези́ спаси́тельныя, по пути́ бо во́ли своея́ всегда́ хождáх. Но молю́: пощади́, взыщи́ и настáви мя, Чи́стая, и от конца́ всепоги́бельнаго исхити́.

Кондáк, глaс 2.

Подо́бен: В моли́твах неусыпáющую:

О, неизречéннаго и благосéрдаго Твоего́ смотре́ния,/ честне́йшая Херуви́м и слáвнейшая без сравнéния Серафи́м!/ О́браз Твой Светоявлéнный, и самоизображéнный/ свиде́тельство яви́ся/ Твоея́ неизречéнныя любве́ и милоcе́рдия,// почитáем той, лобызáюще.

И́кос:

Уверя́ющи челове́ком тáйну Своего́ Богома́терняго промышлéния и первосказáнное Свое́ обетовáние уде́лу Своему́ земно́му подтверждáющи, светописýет нерукотворéнный о́браз Свой Влады́чица в вертогрáде Святы́я Горы́ Афо́нския, в оби́тели рýсских монáхов, во утешéние и спасéние всех нуждáющихся и призывáющих Ея́ Боже́cтвенное предстáтельство, то́йже объéмлюще душéю и сéрдцем, почитáем, лобызáюще.

Синаксáрий

Стихи́:

Днeсь Богоро́дица на Горе́ Афо́нстей

посреде́ друго́в Свои́х яви́ся,

я́коже бо обеща́ николи́же оставля́ти их,

но во всeм бы́ти им

Помо́щницею и Храни́тельницею,

тáко ны́не и сотвори́.

Сéрдце Го́сподеви прилеплéно, Ма́ти Бо́жия,

дáруй ми рабу́ Твоему́,

и всели́ в нeм моли́тву к Сы́ну Твоему́.

Прииди́те, христиáнстии лю́дие вси и Святы́я Горы́ богоизбра́ннии подви́жницы, монáшествующии и мирсти́и, восхвáлим и возблагодари́м Де́ву, при́сное промышлéние имýщую о жрéбии Своéм:

Рáдуйся, Пресвята́я Госпоже́, освяти́вшая Афо́н Свои́м пришéствием, рáдуйся, Застýпницею ме́ста сего́ бы́ти изво́лившая, рáдуйся, ве́рным, пребывáющим зде, Подáтельнице земны́х благ и Спорýчнице их спасéния, рáдуйся, во брáни, в боле́знех и труде́х их преми́лоcтивая Уте́шительнице, рáдуйся, благодéнственное житие́ их на земли́ и всеблажéнное на Небеси́ им устроя́ющая, рáдуйся, надéждо и спасéние дyш нáших! Ты бо, Влады́чице, рекла́ еси́ в Свои́х обетовáниих, я́ко бýдеши в доброде́телех Настáвница и Учи́тельница всем до́бре во святе́м уде́ле Твоéм жи́тельствующим, Питáтельница, кýпно же и Попечи́тельница их.

Не лишáет верхо́вная Прави́тельница Святы́я Горы́ Своего́ Ма́терняго покро́ва и неизречéнныя ми́лоcти подвизáющихся в духо́внем вертогрáде Ея́, обходя́щи и назирáющи Святого́рския оби́тели, незри́мо и зри́мо оставля́ющи в них следы́ Своего́ тáинственнаго присýтствия и промышлéния.

Во оби́тели Костамони́тстей по смирéнному зо́ву игýмена послýшно и́дет Богома́ти буди́ти неради́ваго монáха на Боже́cтвенную слýжбу.

Во друго́й оби́тели, устáвшему от трудо́в екклисиáрху, явля́ется Она́ с помело́м во хрáме и очищáет пыль в олтари́.

Во оби́тели Рýсстей, во святы́й дeнь честнáго Своего́ Покро́ва, явля́ется Пречи́стая в полноте́ ро́ста Своего́ над собо́ром стоя́щею и пречестны́й на рукáх Свои́х омофо́р светоле́пный держáщею, благословля́ющи моля́щихся во святоимéннем хрáме Своéм.

Во ины́й рaз я́ве из ца́рских врaт на среду́ моля́щихся выхо́дит, я́коже до́брая и душепопечи́тельная Игýмения, обхо́дит бо́дрствующих во стаси́диях моля́щихся и́ноков, благословля́ет и назидáет прося́щих ми́лоcти Ея́ и заступлéния. А́ки сердобо́льная Ма́ти внéмлет Она́ смирéнному зо́ву чад Свои́х.

Смирéнная смирéнне явля́ется посреде́ убо́гих и немощны́х, не гнушáется ско́рая Помо́щница нуждáющихся, и под Ея́ покро́в прибегáющих, исполня́ющи проше́ния их. Кто бо ви́де, кто бо слы́ша когда́, я́ко Влады́чица и Цари́ца лобызáла бы рýку раба́? Посреде́ друго́в Свои́х предстáла есть и ники́мже познавáема, рýце пречи́cтеи Свои́ простéрла есть к подая́нию, и от брéнныя руки́ укрýх хле́ба прия́ла есть, кро́тко до земли́ поклони́вшися стáрцу Али́пию и облобызáла рýку тому́, ми́лоcтыню подаю́щую.

О, ужáснаго сего́ виде́ния! О, непостижи́маго Богома́терняго смирéния! О, неизречéннаго тáинства смотрéния! О, недоразумевáемаго Богома́терняго промышлéния! О, неописýемыя Игýмении монáшествующих Афо́на красоты́ смирéния!

Благоукраси́ся днeсь оби́тель Рýсская, посещéнием Боже́cтвенныя Влады́чицы хвáлящися. Тa бо во смирéнии Своéм пáче со́лнца блистáющая зде яви́ся, да сердца́ призывáющх Сы́на Ея́ Иису́са Христа́, богоно́сна соде́лает. Те́мже мо́лим Тя, Пречи́cтая, ми́лоcти Твоея́ и нaс, рабо́в Твои́х, не лиши́, но сердца́, Иису́са нося́щая, нaм сотвори́.

О, смотрéния Твоего́, Чи́cтая, и́мже распаля́еши сердца́ к любви́ Твоéй, с ве́рою под кров Твой приходя́щих и на Небеса́ умо́м свои́м взирáющих!

Свои́м молчали́вым явлéнием научáет нaс смирéнная Присноде́ва, кáко надлежи́т препобеждáти искуше́ния.

Зде ничто́же проглаго́лала Пречи́cтая, ниже́ укори́, ниже́ посрами́ кого́ сло́вом Свои́м. Зде не судя́ше Она́ никого́же. Явлéнием Свои́м еди́нех правоту́ Она́ утверждáше, ины́х же в безнадéжности ободря́ше. Зде удостоверя́ше Пресвятáя влады́чественное игýменство Свое́.

Глашáтай Свята́го Ду́ха богоно́сный стáрец Силуáн писа́: и у Ма́тери Бо́жия в жи́зни Ея́ земно́й вели́кия бы́ша ско́рби. Что у́бо претерпе́ Она́, Преми́лоcтивая, зря́ще Сы́на Своего́ Возлю́бленнаго Иису́са Христа́ распинáема и на Кресте́ ви́сима? Не предала́ есть писáнием страда́ния Своя́. Ни дáже бли́жним Свои́м пове́дала есть о них. Скорбя́щи и стеня́щи, безмо́лвно утешáшеся Она́ в сéрдце Своéм молчали́вым взирáнием и беззвýчным воззвáнием к Бо́гу, те́мже у́бо близка́ Она́ есть скорбя́щим, и всегда́ сострáждет им, то́кмо да поревнýют они́ стяжáти терпе́ние во брáнех и обстоя́ниих.

Сия́ Небе́сная Влады́чица и Игýмения Святы́я Афо́нския Горы́ обещáся до́бре рабо́тающих в земне́м жрéбии Ея́ предстáвити Сы́ну Своему́ и Бо́гу нáшему и испроси́ти по смéрти им совершéнное прощéние грехо́в.

Те́мже у́бо, да поревнýем и мы, брáтие, ели́ко мо́щно есть по си́ле, в по́двизех и труде́х, в послушáнии и смирéнии, в кро́тости и немногоглаго́лании, в моли́тве у́мней и непрестáнней. Предстáтельством Преблагословéнныя Влады́чицы нáшея Богоро́дицы и Присноде́вы Мари́и, Христе́ Бо́же, поми́луй и спаси́ нaс. Ами́нь.

Песнь 7.

Ирмо́с: В гремя́щую пeщь сни́де А́нгел Госпо́день/ к сýщим о Азáрии отроко́м,/ и не прикоснýся их отню́д огнь./ Тогда́ трие́ воспевáюще глаго́лаху:// благословéн еси́, Бо́же оте́ц нáших.

О́браз Твой святы́й отцы́ узре́вше, благодáтию Боже́cтвенною зело́ уязви́шася, тáже любо́вию Бо́жиею распали́шася, в пре́дняя простирáющеся, за́дняя вся оставля́юще. Благодáтию Твоéю и нaс, ли́ку Твоему́ покланя́ющихся, Ма́ти Бо́жия, уязви́, ве́рою Ти пою́щих: рáдуйся, отце́в нáших Боже́cтвенная похвало́.

Ум всяк ужасáется, благоутро́бие Твое́ мно́гое, Де́во Чи́стая, зряй. Ты бо снизхождéнием Твои́м Ма́тернее попечéние показáла еси́ всем во жрéбии Твоéм живýщим, и́мже помышле́ния рабо́в Твои́х от смущéния и ско́рби к богомы́слию возвéдши но́вый лик и богоглáсный певце́в Твои́х яви́ла еси́. С ни́миже и мы Тебе́ днeсь вопиéм: рáдуйся, отце́в нáших Боже́cтвенная похвало́.

Днeсь Богоро́дица на Горе́ Афо́нстей посреде́ друго́в Свои́х яви́ся, я́коже обеща́ николи́же оставля́ти их, но во всeм бы́ти им Помо́щница и Храни́тельница, тáко и ны́не сотвори́. Ю́же восхваля́юще вси возопии́м: рáдуйся, отце́в нáших Боже́cтвенная похвало́.

Чýдо сие́ зря́ще, помяни́те вся ели́ка вaм обетовáх: я́ко бýду вaм Питáтельница и Промысли́тельница, Икономи́сса и Млекопитáтельница, бед Предвозвести́тельница и враго́в Бори́тельница, Врачевáтельница и смирéнная Вратáрница, и во вся́ких нýждах ско́рая и надéжная вáша Послýшательница. Да на Небесе́х умо́м вы́ну пребывáюще, Сы́ну Моему́ еди́ному собесе́дуете, при́сно вопию́ще: отце́в и нaш Бо́же, благословéн еси́.

Ин

Заблуди́х, о Ма́ти Бо́жия, отпадо́х, и добро́ту души́ моея́, ю́же ми даровáла еси́, в ров страстéй, окая́нный, безсты́дно низри́нух. Но молю́: до конца́ не отри́ни мя, Всечи́cтая, житие́ уны́ло имýщаго, но всего́ мя покая́нием пáки очи́сти и о́гненных слyг Твои́х сопричáстника сотвори́, моли́тв бо рáди отце́в мои́х на Тя, о Пречи́cтая, уповáю.

Преслушáние дерзновéния мя обнажи́ и стыждýся: кáко пред лице́ Твое́ прииду́? Ки́има очи́ма на Тя воззрю́? Кáко о́бразу Твоему́ чеcтно́му днeсь поклоню́ся? Но молю́ся благоутро́бию Твоему́: ри́зу ми, о Всеми́лоcтивая, пéрвую дáруй и я́ко Упрáвительница мя спаси́, моли́тв рáди отце́в мои́х на Тя, о Пречи́cтая, уповáю.

Слáва: Огнь любве́ Боже́cтвенныя внyтрь себе́ нося́ща сотвори́ раба́ Твоего́, Ма́ти Безневе́стная, огнь Божеcтва́ во утро́бе Своéй неопáльно вме́щшая. Сим у́бо ми зе́льне распаля́ему, хврáстное страстéй мои́х потреби́тся мно́жество, моли́тв бо рáди отце́в мои́х на Тя, о Пречи́cтая, уповáю.

И ны́не: Нетле́нное Сло́во, тле́ния нaс избáвльшее, пáче сло́ва родила́ еси́. Сего́ рáди и мене́, молю́ся, от страстéй очи́сти, да возсле́дую всем сéрдцем Тебе́ и бою́ся Сы́на Твоего́ и лица́ Его́ вы́ну взыщу́, моли́тв бо рáди отце́в мои́х на Тя, о Пречи́cтая, уповáю.

Песнь 8.

Ирмо́с: Песнь Тебе́ прино́сим безпло́тных,/ я́коже о́троцы в пещи́,/ и пою́ще глаго́лем:// благослови́те, вся дела́ Госпо́дня, Го́спода.

Стáдо словéсное я́ко Пáстыря Ма́ти в жрéбии апо́cтольскаго служéния Твоего́ собрала́ еси́, благодáть Христо́ву в нeм при́сно пропове́дающи, ниже́ в Писáниих, ни в словесе́х, но в сами́х сердцáх со влáстию и си́лою Боже́cтвенною мно́гою о Ду́се Свя́те, Де́во, извествýющи. Дaр бо сeй, я́ко Ма́тери Христо́вой, Ду́хом даровáся Ти, и́мже просвети́ и нaс, да превозно́сим и поéм Тебе́ во ве́ки.

Боже́cтвенною благодáтию в покая́нии держáвно оде́явшеся и свещи́ ве́ры возжже́нныя нося́ще, врага́ низложи́ти си́лу потщи́мся, да венцы́ прии́мем от Христа́ Бо́га по достоя́нию, я́ко избра́нницы и таи́нницы Пречи́cтыя Его́ Ма́тере, пою́ще и благословя́ще Ю́ во ве́ки.

Днeсь о чудесе́х Твои́х, Влады́чице, на Горе́ Святе́й сeй бы́вших, благодаре́ния Тебе́ прино́сим. Те́мже Ти моля́щияся облагодати́, и житие́ испрáви, и спасéние дyш нáших испроси́, да превозно́сим и поéм Тебе́ во ве́ки.

Зрим Тя, я́ко дрéвле Моисéй, во огни́ Ду́ха Всесвята́го благодáтию блистáющую, е́юже дýши лю́бящих Тя согревáеши, те́рния страстéй вся попаля́еши и слуги́ Твоя́ я́ко плáмень о́гненный явля́еши, с ни́миже и нaс, рабо́в Твои́х, сопричти́, да превозно́сим и поéм Тебе́ во ве́ки.

Ин

Виждь, о Ма́ти Всесвята́я, сéрдца моего́ печáль, виждь и обращéние души́ моея́, виждь и слéзы, и не отврати́ мене́, но обыми́ мя пáки, есмь бо отроча́ Твое́, и испрáви безoбрáзие мое́, и по кончи́не со отцы́ мои́ми сопричти́, пою́ща и превознося́ща Тя во ве́ки.

И помышлéньми поползнýвся и де́лы прегреши́в, рыдáю и стеню́, и вопию́: Ма́ти Бо́жия, спаси́ мя, и злосмрáдие грехо́в во благоухáние духо́вное претвори́, и по кончи́не со отцы́ мои́ми сопричти́, пою́ща и превознося́ща Тя во ве́ки.

Слáва: Све́тлыми моли́твами Твои́ми, Де́во, мы́сленная моя́ очеса́, омраче́нная зло́бою, просвети́ молю́ся, и на пyть покая́ния настáви мя, прошý Тя: я́ко да до́лжно Тя песносло́влю, пáче сло́ва Сло́во воплоти́вшую, поя́ и превознося́ Тя во ве́ки.

И ны́не: Богороди́тельнице Чи́cтая, низвéрженных исправлéние еди́но, испрáви и мене́, вся́кими страстьми́ сокрушéннаго всего́ и дáже до а́да низвéргшагося, грехопадéний мои́х рáди. Но молю́: рукописáние грехо́в безстýдных мои́х разори́, и со отцы́ мои́ми сопричти́, пою́ща и превознося́ща Тя во ве́ки.

На 9-й пе́сни Честне́йшую: не поéм, но поéм припе́вы. Диáкон, изшéд на среди́ну хрáма и стaв пред ико́ною Пресвяты́я Богоро́дицы, возглашáет стих: Величáй, душе́ моя́, честне́йшую го́рних во́инств Де́ву Пречи́cтую Богоро́дицу. Лик же поéт кано́н Успéния, коемýждо тропарю́ припевáюще о́ный стих. По сeм а́бие стихи́ и тропари́ сия́.

Песнь 9.

Ирмо́с: Светоно́сный о́блак, во́ньже всех Влады́ка,/ я́ко дождь с Небесе́ на руно́ сни́де,/ и воплоти́ся нaс рáди,/ быв Челове́к, Безначáльный,// величáем вси я́ко Ма́терь Бо́га нáшего Чи́cтую.

Припе́в: Величáй, душе́ моя́, явлéние чýдное и преслáвное Пречи́cтыя Влады́чицы.

Кáко очеса́ на́ша измени́ша нaм? Кáко ви́дяще Тя, Ма́терь Све́та, не познáхом? Си́це бо, Влады́чице, уве́дехом, я́ко несть возмо́жно вся́кому сие́. А́ще у́бо не смири́м себе́, о брáтие, лик смирéнный Де́вы Чи́стыя ни в жи́зни сeй, ни в бýдущей узре́ти не возмо́жем, и́мя бо Ея́ то́кмо в сéрдце чи́стом и смирéнном досто́йно величáется.

Припе́в: Величáй, душе́ моя́, Преблагословéнныя Цари́цы о́браз Светопи́санный.

Пе́сни Тебе́ благодáрственныя вси мы, в Горе́ Твоéй живýщии, прино́сим, Ма́ти Бо́жия, я́ко спасáеши нaс при́сно от вся́каго обстоя́ния, питáеши, гре́еши и промышля́еши, на враги́ спобо́рствующи. Но мо́лим Тя: и Боже́cтвеннаго Ца́рствия со отцы́ нáшими по кончи́не сподо́би, да в безконе́чныя ве́ки сýщую Богоро́дицу и мы Тебе́ величáем.

Припе́в: Величáй, душе́ моя́, ко рабо́м Свои́м пришéдшую Влады́чицу.

Госпожу́ Пречи́cтую воспои́м усéрдно, брáтие, Я́же, я́ко Ма́ти на руку́ Свое́ю нaс при́сно нося́щи, духо́вне при́сно нaс питáет. Е́йже всем житиéм угоди́ти потщи́мся, да во Ца́рствии Сы́на Ея́ во ве́ки Ю́ величáем.

Припе́в: Величáй, душе́ моя́, Присноблажéнныя Богоневе́сты лик самоизображéнный.

В жи́зни сeй потруди́тися вси да потщи́мся, да печáть Богома́терняго избрáния и сыновства́, богоподо́бною красото́ю и добро́тою сия́ющи, в душáх нáших воoбрази́тся, и познáти нaс Ма́ти Бо́жия в дeнь он стрáшный возмо́жет тогда́, да во Ца́рствии Сы́на Ея́ безконéчно Ю́ величáем.

Ин

Припе́в: Величáй, душе́ моя́, погибáющих спасéния Взыскýющую.

Се, падо́хом, о душе́ моя́, и грехо́м смéртне уязви́хомся. Се, умро́хом для жи́зни Небе́сныя и отстáхом до́брыя дружи́ны брáтий нáших. Обáче, душе́ моя́, воспряни́, востáни! Сe бо Живота́ Роди́тельница, я́ко Ма́ти ми́лоcтивно ру́це живи́тельнеи свы́ше ти подаéт, да и ты, о душе́ моя́, сýщую Богоро́дицу Ю́ величáеши.

Припе́в: Величáй, душе́ моя́, Де́ву Чи́cтую, Горы́ Афо́нския Игýмению.

Ри́зу све́тлу дáруеши обновлéния благодáтию Ду́ха священноисткáнную, Богоро́дице, во дворе́ Твоéм рабо́тати приходя́щим, ю́же и мне, Де́во Чи́cтая, в покая́нии, о Всеми́лоcтивая, обнови́, да и аз со отцы́ воспою́ песнь досто́йно, сýщую Богоро́дицу Тя величáя.

Припе́в: Величáй, душé моя́, Триипостáснаго Божества́ держáву.

Глaс Арха́нгелов Тебе́, Пречи́cтая, и аз недосто́йный со отцы́ мои́ми днeсь приношу́: рáдуйся, обрáдованная и преблагословéнная! Рáдуйся, Всепе́тая, Госпо́дь с Тобо́ю! О Влады́чице пресве́тлая, песнь сию́ не прéзри, но во Ца́рствии Триипостáснаго Бо́га нáшего, я́коже Сама́ изво́лиши, нищету́ мою́ помяни́.

Припе́в: Величáй, душе́ моя́, честне́йшую го́рних во́инств Де́ву Пречи́cтую Богоро́дицу.

О Всепе́тая Ма́ти! Песнь досто́йную воспе́ти Ти недоуме́ю. Но Обáче се дерзáю и благодарю́ Тя, я́ко сподо́била мя еси́ немощнáго ли́ку Твоему́ свято́му и светоявлéнному послужи́ти. Приими́, о Всесвятáя, дерзновéние убо́гое сие́, и жития́ моего́ остáток в непоро́чности, молю́ Тя, сохрани́. В дeнь же стрáшный исхо́да окая́нныя моея́ души́ грехо́в мои́х рукописáние, о Всеми́лоcтивая, раздери́, да во Ца́рствии Сы́на Твоего́ со отцы́ мои́ми и аз недосто́йный сýщую Богоро́дицу во ве́ки Тя величáю.

По сeм пáки припе́в: Величáй, душе́ моя́, Де́ву Чи́cтую, Горы́ Афо́нския Игýмению. И катавáсия: Побеждáются естества́ устáвы:

Свети́лен ли́ку Светопи́санному.

Подо́бен: Апо́столи от коне́ц:

Избрáннии от коне́ц земны́х,/ совокýпльшеся зде,/ во уде́ле святе́м Моéм,/ возвели́чити и́мя Мое́./ И Ты, Сы́не и Бо́же Мой,// низпосли́ им с высоты́ свет Твой.Двáжды.

Слáва, и ны́не, Успéния: Апо́столи от коне́ц:

На хвали́тех стихи́ры на 6, попрáзднства на 3,

тáже и́ны стихи́ры ли́ка Светопи́саннаго, глaс 1.

Подо́бен: Небе́cных чино́в:

Стих: Хвали́те Его́ в тимпáне и ли́це,/ хвали́те Его́ во стрýнах и оргáне.

Виде́ние зрáка Твоего́ чи́cтаго/ А́нгелом у́бо слáдостно,/ челове́ком же есть спаси́тельно,/ духово́м лукáвствия губи́тельно,/ его́же ве́рою почитáюще и целýюще,// Богоро́дице, дýши просвещáем.

Стих: Хвали́те Его́ в кимвáлех доброглáсных. Хвали́те Его́ в кимвáлех восклицáния.// Вся́кое дыхáние да хвáлит Го́спода.

Посещéнием Твои́м красýемся и хвáлимся,/ и́мже скорбь печáльных разреши́ла еси́/ и протáтских стáрцев безмо́лвно убеди́ла еси́,/ кро́тко чýдом сим всех я́ве уверя́ющи,/ я́ко Ты еси́ Храни́тельница при́сная// и Питáтельница стáду Твоему́.

Стих: Блажéни живýщии в дому́ Твоéм: в ве́ки веко́в восхвáлят Тя,// по́йдут от си́лы в си́лу.

Благодáтию Тебе́ всыня́емыя/ о́браз Твой в сердцáх свои́х носи́ти научи́,/ во смирéнии Твоéм всегда́ ходи́ти,/ Боголю́бием Твои́м дышáти,/ кро́тость и немногосло́вие храни́ти,/ чиcтоту́ Твою́, Влады́чице, стяжáти,/ покая́нием от приражéний дýши очищáти,// послушáнием Твои́м на Не́бо возвышáтися.

Стих: Воздви́же я́ко о́вцы лю́ди Своя́, и возведе́ я́ я́ко стáдо в пусты́ни: и настáви я́ на уповáние:// и введе́ я́ в Го́ру святы́ни Своея́.

Кáко наречéм, о Пречи́стая,/ Бо́гом даровáнную Ти Го́ру сию́?/ Не́бо, украшéнное звездáми,/ ли́ка Твоего́ изображе́нии честны́ми?/ Рaй ли слáдости Божéственныя но́вый,/ в нéмже дрéво послушáния красно́ и слáдко процвете́,/ от него́же всяк яды́й не умирáет,// но по благодáти я́ко Бог бывáет.

Слáва, глaс и подо́бен то́йже:

Виде́ние зрáка Твоего́ чи́cтаго/ А́нгелом у́бо слáдостно,/ челове́ком же есть спаси́тельно,/ духово́м лукáвствия губи́тельно,/ его́же ве́рою почитáюще и целýюще,// Богоро́дице, дýши просвещáем.

И ны́не, Успéния, или́ а́ще хо́щеши сeй,

глaс и подо́бен то́йже:

Све́тел у́бо прáздник преставлéния Твоего́,/ рáдостен же есть и настоя́щий./ Тáмо отходя́щи прорекла́ еси́,/ я́ко сопребýдеши рабо́м Твои́м во ве́ки./ Зде же чýдом но́вым уверя́еши,/ я́ко лю́бящия Тя// николи́же оставля́еши.

Славосло́вие вели́кое, и отпýст.

На Литурги́и

Слýжба прáздника Успéния и Светопи́саннаго о́браза Богоро́дицы.

Сло́во в дeнь прáзднования Светопи́саннаго о́браза Бо́жия Ма́тере

Егда́ Госпожа́ нáша Пречи́cтая Богоро́дица яви́ся преподо́бному отцу́ нáшему Петру́, пéрвому Афо́нския Горы́ молчáльнику, сотвори́ ему́ вели́кая и рáдостная обеща́ния о Горе́ Афо́нстей, я́коже повествýет святы́й Григо́рий, архиепи́cкоп Фессалоники́йский. Есть, рече́ преподо́бному Пречи́cтая Богоро́дица, во Евро́пе Гора́ вели́кая и предо́брая, на ю́жную страну́ преклонéна и внyтрь мо́ря дово́льно протяжéна. Сию́ Го́ру Аз избрала́ есмь от всея́ земли́, во е́же бы́ти удо́бною монáшескому чи́ну к пребывáнию, и отсéле Свя́та наречéна бýдет. Ели́цы изво́лят жи́ти в нeй в чистоте́ и целомýдрии, и восхо́щут брáтися с враго́м челове́ческим диáволом, Сама́ бýду им Побо́рница и Застýпница во всeм животе́ их, научáющи всему́, ели́ка поле́зная подобáет им твори́ти, и бýду им при́сно Врaч и Питáтельница, пекýщися о препитáнии и врачевáнии их душéвнем, вкýпе и телéснем. И сие́ бýдет им в сeм житии́, по смéрти же предстáвлю их Сы́ну и Бо́гу Моему́, ели́ко их богоуго́дне и в покая́нии в Горе́ сeй скончáют жизнь свою́, и испроси́ти и́мам от Сы́на Моего́ совершéнное прощéние грехо́в их.

Сие́ у́бо обетовáние, е́же сотвори́ Ма́ти Бо́жия и Цари́ца Небесе́ и земли́, услы́шавше отцы́ нáши, остáвиша мир и вся, я́же в ми́ре, роди́тели и име́ния и бога́тства, слáву и слáдость ми́ра сего́, и приидо́ша от всех стрaн вселéнныя, и всели́шася в Горе́ Афо́нстей, в мы́сленнем раи́ Богоро́дицы Влады́чицы нáшея, наде́ющеся всеконéчно и уповáюще по Бо́зе на предстáтельство и покро́в Ея́, и по́двигов по си́ле е́млющеся.

Сего́ рáди тщáние духо́вное их зря́щи, и Сама́ Небе́сная Цари́ца Пресвятáя Богоро́дица вои́стину яви́ся стáду Своему́ Назирáтельница и Врачевáтельница, и всегдáшняя ско́рая во всeм Помо́щница.

Не лишáет и до ны́не Пречи́cтая Своего́ Ма́терняго покро́ва и неизречéнныя ми́лоcти подвизáющихся в духо́внем сeм вертогрáде святáго уде́ла Ея́.

И а́ще хо́щем разуме́ти яковýю любо́вь и благодея́ния к подвизáющимся в Ея́ земне́м жрéбии Богома́ти явля́ет, про́йдем умо́м нáшим оби́тели и монастыри́ сея́ Святы́я Горы́, и а́бие свиде́тельства сия́ обря́щем.

Прéйдем у́бо во свящéнную о́ную и вели́кую оби́тель преподо́бнаго Афанáсия, я́же Лáвра нарицáется, да зрим тáмо еди́но от преслáвных сих свиде́тельств Богома́терняго всегдáшняго промышлéния. Изво́ли бо тáмо Пречи́cтая Де́ва преподо́бному отцу́ Афанáсию яви́тися и обетова́ния Своя́ подтверди́, во искушéнии его́ уте́ши и от намéрения Святýю Го́ру остáвити отклони́ и ко уверéнию конéчному рече́, я́ко Сама́ бýдет зде Икономи́ссою, си́речь Попечи́тельницею о всех нýждах монасты́рских. О сeм и до ны́не извествýет нaс ико́на, нарицáемая Икономи́сса.

А́ще у́бо по́йдем отсю́ду во свящéнную оби́тель Хилендáрскую, я́же тáкожде Лáвра Сéрбская глаго́лется, ничто́же бо есть невозмо́жно уму́ рéвностию духо́вною подвизáему, у́зрим тáмо ди́вную о́ную ико́ну Пречи́cтыя Богоро́дицы, Троерýчицею наречéнную, е́юже соблаговоли́ Влады́чица заня́ти ме́сто игýменское и прия́ти оби́тель во Свое́ управлéние.

Отсю́ду и́дем во свящéнную оби́тель Ватопéдскую, иде́же Богоро́дица приéмлет обя́занности дохиáрския, си́речь кладовщика́, и оскудéвшу во оби́тели елéю, сосýд прáздный елéйный внезáпу по́лный сотвори́. Елéй же чрез вeрх пролия́ся и вне дверéй потече́. Тогда́ вси возблагодари́ша Чи́cтую Де́ву пред свято́ю Ея́ ико́ною, я́же бе в келáрне, ю́же отто́ле начáша именовáти Келáрницею.

Во святе́й оби́тели И́верстей Преблагословéнная Игýмения, кýпно же Не́бу и земли́ Цари́ца, восхоте́ бы́ти смирéнною Вратáрницею и не изво́ли пребывáти на почтéннем ме́сте во хрáме, но вне, при врате́х монасты́рских, слы́шим бо глaс Богома́тере, глаго́лющ: не приидо́х храни́ма бы́ти от вaс, но наипáче да бýду Аз Храни́тельница вáша, не то́кмо в настоя́щем, но и в бýдущем ве́це. Ели́цы у́бо монáси жи́тельствовати бýдут в Горе́ сeй со стрáхом и благогове́нием и не пренебрегýт е́же по си́ле о доброде́тели, да и́мут дерзновéние и надéжду на благоутро́бие Сы́на Моего́ и Влады́ки, я́коже испроси́х и дадé Ми сие́ даровáние.

А́ще и́мамы сыно́внюю любо́вь ко Пречи́cтей Влады́чице, по́йдем у́бо в моли́твеннем дýсе и во всечестнýю оби́тель Филофéй, да припадéм тáмо и облобызáим чýдный о́ный о́браз, е́же Гликофилýса, или́ Слáдкое Лобзáние, глаго́лется! Сия́ свята́я ико́на, подо́бне И́верстей, яви́ся ко Святе́й Горе́ по морски́м волнáм хождéнием немо́кренным, и с рáдостию и чéстию пренесена́ бысть в собо́рный хрaм. Екклисиáрх Иоанни́кий, и́нок благогове́йный и доброде́тельный, заправля́я лампáду пред сéю ико́ною не раз обращáся к Цари́це Небе́сной со смирéнною жáлобою, а́ки бы не име́ти Ей попечéния о сeй Своéй оби́тели, я́коже о всех про́чих. Объя́тый сим по́мыслом, се́де брaт сeй в стаси́дию и едва́ смeжи́ о́чи свои́, яви́ся ему́ в то́нцем сне Сама́ Богома́ти, осиявáемая Небе́cным све́том, и рече́ ему́, я́ко напрáсно ро́пщет, а́ки бы не и́мать Она́ попечéния о монастыри́ их. Без попечéния Ея́ не могли́ бы́ша и бы́ти, и моглá бы дáти им мно́гое мно́жество злáта и сребра́, но не на по́льзу бýдет им сие́. Уте́шеннии виде́нием сим возблагодари́ша брáтия вси Богома́терь за ди́вный про́мысл Ея́.

И не то́кмо земны́я дáры Пречи́cтая Влады́чица подаéт ве́рным Свои́м рабо́м, но пáче незри́мыя, духо́вныя и благодáтныя, о ни́хже весть то́кмо сéрдце и́стинно труждáющихся Го́сподеви.

И кáко не помянýти зде вели́каго сего́ мýжа, и́же бе от духо́внаго сродства́ нáшего, преподо́бнаго и богоно́снаго отца́ Силуáна, той пред ико́ною Бо́жия Ма́тере моля́ся, прия́т от Нея́ дaр благодáтныя самодви́жныя моли́твы.

И тáко, брáтие, честны́я монастыри́ Святы́я сия́ Горы́ обышéдше и духо́вне тáмо наслади́вшеся, се ны́не, свящéнныя оби́тели Рýсския достиго́хом, идéже угото́вана нaм трапéза духо́вная преизря́дна.

А́ще и мéньшая оби́тель сия́ есть на Святе́й Горе́ Афо́нстей, Обáче не прéзри о́ныя Пречи́стая Влады́чица, но мно́гажды пресещáше ю́ и утешáше насéльников ея́, и явля́ше чудеса́ непрестаю́щаго промышлéния Своего́.

О́вогда с распростéртым честны́м Свои́м омофо́ром ви́дима бывáше, и́мже ограждáше оби́тель от неукроти́мыя стихи́и и от нашéствия агáрян. О́вогда явля́шеся во олтари́, о́вогда пред ме́стною ико́ною Покро́ва Ея́, чесого́ рáди почáша возжигáти пред сим вои́стину чудотво́рным о́бразом лампáду неугаси́мую.

Мно́гажды и торжéственне явля́шеся Богома́ти в сáмый дeнь престо́льнаго прáздника честнáго Ея́ Покро́ва, святы́й Свой омофо́р над моля́щимися простирáющи. Мно́зи же у́бо ви́деша тогда́ Пречи́cтую, я́ве стоя́щую во врéмя бде́ния.

Во ины́й рaз ви́деша брáтия Ма́терь Бо́жию во всeм одея́нии монáшестем, в кýкуле и в мáнтии игýменстей, исходя́щу враты́ ца́рскими Алексáндро-Нéвскаго собо́ра и обходя́щу неспе́шно и со внимáнием вся стаси́дии и смотря́щу, кто каково́е де́лание твори́т во уме́ и сéрдце своéм. И егда́ обы́де о́бе це́ркви, скры́ся от взо́ров пред помя́нутою Своéю ме́стною ико́ною Покро́ва.

Немно́гая сия́, Обáче пресла́вная помянýвше и благоухáнный из сего́ венéц соплéтше, еди́но то́кмо ме́сто в нeм остáвихом рáди о́наго но́ваго чýда Богома́тере, его́же рáди прáздник сeй належи́т. Я́коже бо и дрéвле, не отстáви и ны́не Пречи́стая ми́лоcти и промышлéния Своего́ от нaс. Свящéнная оби́тель Рýсская от пéрвых днeй бытия́ своего́ прия́т от святы́х и богоно́сных оте́ц свои́х первоначáльников стáрцев Иерони́ма и Макáрия прáвило благочести́вое подавáти по ме́ре сил от имýщества своего́ неимýщим брáтиям, на Святе́й Горе́ жи́тельствующим. Соблюдáшеся прáвило сие́ по вся дни: и во благодéнствии, и во времена́ оскудéния. Сего́ рáди прихождáху сéмо бе́днии сиромáхи пусты́нники. Бысть же учинéн и обы́чай раздая́ти ми́лостыню в дeнь неде́льный на вели́цей по́рте(святая врата) монастыря́, чесого́ рáди вели́кое мно́жество нуждáющихся собирáшеся сéмо. Егда́ же времена́ тя́жкая и мяте́жная настáша, и мно́зии смýты во страна́х Евро́пы учини́шася, встрево́жися о сeм свящéнный кино́т, я́ко во оби́тели Рýсстей толи́кое мно́жество наро́да стекáшеся.

Напрáви же во оби́тель послáние увещевáтельное, в ко́ем трéбоваша престáти сeй обы́чай твори́ти, глаго́люще, я́ко соблазни́телен есть, безслáвит бо и́мя само́й доброде́тели, е́щe же и оби́тель лишáет духо́вныя по́льзы, понéже извести́хомся, глаго́лет послáние, я́ко стекáются сéмо кроме́ и́стинно нуждáющихся, не́цыи праздноходя́щии.

Игýмен же оби́тели сея́, богомýдрый стáрец схиархимандри́т Андрéй, зело́ по ми́лостыни и зáповеди прéжде бы́вших отце́в первоначáльников ревновáвый, собо́р духо́вный, си́речь дýму свою́ свящéнную из наро́читых стáрцев брáтства своего́ созва́. Си́и богомýдрии стáрцы со отцéм игýменом свои́м послáние прочто́ша и, скорбя́ще зело́, недоумевáху, что сотвори́ти: прети́ти бо о́ному послáнию не дерзáху, я́ко не подобáет сие́ муже́м духо́вным, Обáче и ми́лостыню остáвити никáкоже хотя́ху, бысть бо заве́т ве́чный отце́в нáших духо́вных, богоно́сных стáрцев Иерони́ма и Макáрия. Глаго́лаше же игýмен: возвéрзим у́бо печáль нáшу, о брáтие, на Го́спода и Пречи́cтую Его́ Ма́терь, Я́же есть верхо́вная Игýмения Святы́я Горы́ сея́, да упрáвят скорбь и нýжду сию́ я́коже ве́дят, и кáко ми́лостыню от ны́не подавáти да укáжут. Ми́лостыню же в предлежáщий дeнь неде́льный никáкоже, мню, упраздни́ти подобáет, да не опечáлим ничто́же ве́дающую неимýщую брáтию Христо́ву. Сего́ рáди моли́ша Пресвятýю Богоро́дицу прилéжно и надо́лзе. И не прéзри Пречи́cтая глáса моли́твенник Свои́х!

Егдá бо приспе́ дeнь неде́льный и пáки по прéжнему обы́чаю подая́ние твори́шеся, схимонáх Гаврии́л сотвори́ фотогрáфию, е́же с грéческаго светописáние глаго́лется. И, о чудесе́! Проя́влена егда́ бысть о́ная, узре́ша вси смирéнный о́браз Ма́тере Бо́жия, подходя́щею кро́тко со все́ми брáтиями и приéмлющею укрýх хле́ба.

Тогдá же воспомянýша, я́ко не́цыи от сиромáхов рáнее, во дни егда́ ми́лостыня раздая́шеся, ви́деша не́кую жену́, но не уразуме́ша сего́ явлéния. В сáмый же дeнь, егда́ фотогрáфия сотвори́ся, никто́же о́ныя ви́де.

Игýмен же, благоволeние тáко Бо́жия Ма́тере познáв, возрáдовася зело́ с про́чими стáрцами и брáтиями и повеле́ никáкоже престáти оби́тели от пéрваго обы́чая своего́.

Ещé же глаго́лаша стáрец Андрéй ко сотаи́ннику и́скреннему своему́ иеросхимонáху Ни́фонту, и́же по нeм игýменом бысть, я́ко того́ рáди Богома́ти во оби́тель прии́де, да ми́лостыню похвáлит и печáль упраздни́т, кýпно же и стáрость его́ утéшит на после́док днeй его́, прови́де бо ско́рое отшéствие свое́, е́же по мáлом врéмени бысть.

И распространи́ся вско́ре весть сия́ о чудéснем посещéнии оби́тели Богома́терию и премени́ся печáль в рáдование, я́ко Ма́ти Бо́жия никого́же оставля́ет, но я́коже дрéвле, о всех подвизáющихся промышля́ет. И сие́ и́стинно есть тáко!

О, превéлие чýдо! Цари́ца Небе́сная приклони́ся Ма́тернею любо́вию и прии́де да уте́шит чад Свои́х, и́же о ми́лостыни ревнýют и и́же ми́лостыню приéмлют. Прии́де устáвити печáль, и вразумлéние подáти, глаго́ла бо, я́ко и́мать вразумля́ти рабо́в Свои́х и наставля́ти на до́брая. Но наипáче прии́де яви́ти красоту́ неизречéнную Боже́cтвеннаго Своего́ смирéния, да настáвит всех, кáко у́бо подобáет в житии́ сeм ходи́ти, да насле́дят живо́т ве́чный.

Чýдный светопи́санный первоóбраз ико́ны сея́ досéле храни́тся в киво́те осо́бном во оби́тели Рýсстей.

Вся чудеса́, и́хже Богома́ти во свящéнном жрéбии Своéм соде́я, не ему́ еди́ному то сотвори́, но всeй Це́ркви Христо́вой на по́льзу. Тáко чýдо пред ико́ною «Досто́йно есть»: а́ще о́ный гимн пéрвее зде воспе́тся, Обáче по́слежде во всю все́лeнную истече́, я́ко дáже и са́мыя ма́лыя де́ти со услаждéнием и рáдостию вéлиею о́ный изо уст воспевáют.

Тáко у́бо и ико́на Богома́тере Скоропослýшница: а́ще и прослáвися во оби́тели Дохиáрстей, Обáче всему́ ми́ру даровáся, и никто́же тощ и неуте́шен во уповáнии своéм на ню́ бывáет.

Тáкожде и зде: а́ще и яви́ся чýдный сeй и досéле неви́данный о́браз во свящéнней Рýсстей оби́тели, Обáче все исполнéние церко́вное собо́ю благоукраси́ и обогати́.

Мно́зи у́бо искýснии изо́графи прини́кнути желáху и узре́ти черты́ Боже́cтвеннаго ли́ка честне́йшия Херуви́м и слáвнейшия Серафи́м, да возмо́гут написáти я́. И се, зде Ма́ти Бо́жия Сама́ сия́ явля́ет, да уве́рит, я́ко присножива́ есть и промышля́ет о рабе́х Свои́х.

Неизречéнное и благосéрдое Твое́ к челове́ком смотре́ние слáвяще, мо́лим ти ся, Госпоже́ Пречи́стая, на пyть зáповедей Сы́на Твоего́ нaс настáви, и во све́те лица́ Твоего́ ходи́ти научи́. Ами́нь.

Источник: Текст утвержден Священным Синодом Русской Православной Церкви 27 июля 2013 года (журнал № 97)

Месяца августа в 21-день

Преподобныя Марфы Дивеевския

На малей вечерни

На Господи, воззвах: стихиры 4, глас 2:

Киими похвальными песньми/ воспоим преподобную Марфу,/ дивную начальницу обители Дивеевския,/ от юности благодать Святаго Духа стяжавшую,/ и ныне во Обителех Небесных/ молящуюся о спасении душ наших?

Киими недостойными усты/ восхвалим вселюбезную матерь нашу Марфу,/ чистотою, кротостию и послушанием совершенным/ в отрочестве Богу угодившую,/ егоже молит о спасении душ наших?

Киими похвальными песньми/ ублажим дивную молчальницу,/ собеседницу великаго старца Серафима,/ в тайне хранившую того откровения о обители Дивеевстей/ и тепле молящуюся о спасении душ наших?

Слава, глас 6:

Приидите, вернии людие,/ во святую обитель Дивеевскую,/ яже земный жребий Божия Матере нарицается,/ ублажим верную рабу Пресвятыя Богородицы,/ преподобную Марфу,/ и, припадающе к ея честным и многоцелебным мощем,/ усердно возопиим:/ помяни нас, мати наша, во Царствии Небеснем.

И ныне, праздника.

На стиховне стихиры, глас 3:

Всех радостей Радость,/ Преблагословенная Богородица Дева,/ радости вечныя тя сподоби,/ мати наша Марфо,/ яко Свою служительницу верную.

Стих: Дивен Бог во святых Своих,/ Бог Израилев.

Пречистою Богородицею избранная/ и силою Божественною ограждаема,/ радостно на подвиги потекла еси,/ мати Марфо славная,/ молися о верою чтущих тя.

Стих: Честна пред Господем/ смерть преподобных Его.

Великий ангельский образ восприимши,/ начальница обители Дивеевския явилася еси,/ преподобная Марфо,/ молися о любовию чтущих тя.

Слава, глас 5:

Боголюбива и милостива,/ мудрованием смиренна и любве исполнена явилася еси,/ невесто Христова Марфо,/ ты бо, ангельски на земли поживши,/ кончину блаженную в юных летех прияла еси/ и венец нетленный улучити сподобилася еси,/ темже молися о спасении душ наших.

И ныне, праздника.

Тропарь писан на велицей вечерни

На велицей вечерни

На Господи, воззвах: стихиры на 8, глас 8:

Преподобная Марфо всехвальная,/ старца Серафима послушнице верная,/ ты, наставлением того твердо последующи,/ в молчании благодать Духа Святаго стяжала еси/ и славу обители Дивеевския,/ юже той в тайне возвеща ти, усердно хранила еси./ С нимже тепле молися ко Господу/ спастися душам нашим.

Преподобная Марфо богомудрая,/ ты, измлада Господа возлюбивши/ и заповеди Его усердно хранящи,/ непрестанную молитву стяжала еси/ и преподобным Серафимом начальница обители Дивеевския наречена быти сподобилася еси./ Ныне же духом с нами пребывающи,/ исцеления скоро источаеши,/ верою и любовию к тебе притекающим.

Преподобная мати наша Марфо,/ ты, издетска страху Божию навыкши,/ в молитве непрестанней присно пребывала еси/ и, разум богопросвещенный стяжавши,/ сердце твое со тщанием хранила еси,/ темже и Приснодевы служительница явилася еси./ Ейже о нас помолися,/ спастися душам нашим.

Преподобная мати наша Марфо,/ ты, Жениха Христа от юности возжелевши/ и благодатию Духа Святаго блистающи,/ свещу любве светло уготовала еси./ Ныне же, на Небесех Престолу Божию предстоящи/ и велие дерзновение ко Господу имущи,/ молися от бед избавитися/ верою и любовию тя величающим.

Слава, глас 1:

Веселися днесь обителе Дивеевская!/ Воистинну священный и радостный праздник наста,/ непорочная бо невеста Христова Марфа/ песньми духовными ублажается,/ небеса убо достойно веселятся,/ инокини, молитвами тоя хранимыя, радуются,/ вернии благодать исцелений обретают,/ совершающе светлое торжество.

И ныне, праздника.

Вход. Прокимен дне. И чтения три мученическая.

На литии стихира, глас 6:

Веселися днесь земле Нижегородская и Тамбовская/ и торжествуй обителе Дивеевская!/ Наста бо память Марфы преподобныя,/ яже, от юности мирскаго мятежа избегши,/ любовию Христовою уязвися/ и, сестре Лазаря праведнаго уподобившися,/ евангельски благую часть избра./ Темже, ныне похвальныя песни воспевающе/ и славу Богу воздающе,/ житию тоя вси подражати усердно потщимся.

На стиховне стихиры, глас 2:

Чистоту от юности сохранивши,/ добродетельми светло, Марфо досточудная, украсилася еси/ и, любовию божественною уязвившися,/ Христу добре угодила еси./ Помози и нам, богоблаженная мати, чистоту сердца соблюдати/ и любовь евангельскую друг ко другу стяжати.

Стих: Дивен Бог во святых Своих,/ Бог Израилев.

Отроковице дивная и монашествующих украшение,/ преподобная мати Марфо,/ ты, в молитве непрестанней имя Христово в сердце твоем носящи/ и в трудех бденных даже до смерти пребывающи,/ силою Божественнаго Духа совершенное безстрастие стяжала еси,/ темже и Обителей Небесных достигла еси,/ идеже молишися о спасении душ наших.

Стих: Честна пред Господем/ смерть преподобных Его.

Торжествуй, земле Нижегородская,/ в прославлении новыя о тебе молитвенницы!/ Веселися обителе Дивеевская,/ имущи в себе сокровище многоценное,/ честныя мощи Марфы досточудныя,/ идеже днесь вси усердно молимся,/ во еже спастися нам.

Слава, глас 5:

Яко звезда многосветлая,/ сиянии духовными землю нашу просветила еси,/ преподобная мати наша Марфо,/ тьму скорбей разгоняющи/ и недуги врачующи./ Темже молися ко Господу,/ мир мирови даровати/ и душам нашим велию милость.

И ныне, праздника.

Тропарь, глас 2:

Собеседнице преподобнаго Серафима,/ дивная отроковице и мати наша Марфо,/ равноангельное житие стяжавши,/ на Небесех жительства достигла еси,/ идеже молишися о спасении душ наших.

На утрени

По 1-м стихословии седален, глас 7:

Яко звезда утренняя и солнце светлое, возсия днесь память твоя, преподобная мати Марфо. Темже молим тя: ум наш, нерадением омраченный, просвети и подвигни сердца монашествующих к подражанию постническаго твоего жития.

Слава, и ныне, праздника.

По 2-м стихословии седален, глас 1:

Осияема ныне непрестанною славою Пресвятыя Троицы, мати наша Марфо, и Божественнаго веселия и радости исполнена, молися о нас тепле ко Господу, во еже избавитися нам муки вечныя.

Слава и ныне праздника.

Величание:

Ублажаем тя,/ преподобная мати наша Марфо,/ и чтим святую память твою,/ ты бо молиши о нас/ Христа Бога нашего.

Псалом избранный: Терпя, потерпех Господа:

По полиелеи седален, глас 1:

Невесто прекрасная Чертога Царскаго, преподобная Марфо,/ ты, послушанию, воздержанию и молитве навыкши,/ во обители Дивеевстей подвиги просияла еси и милость от Господа улучила еси./ Темже молися прилежно о спасении душ наших.

Слава, и ныне, праздника.

Степенна, 1-й антифон 4-го гласа. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.

По 50-м псалме стихира, глас 6:

Марфо богоносная,/ чадо возлюбленное преподобнаго Серафима,/ ты, послушание и безмолвие от юности возлюбивши,/ в молитве и посте просияла еси,/ и скорби и болезни, Христа ради, даже до смерти понесла еси,/ венцем Небесным от Него украсившися./ Темже молися о чтущих святую память твою.

Канон, глас 8.

Песнь 1.

Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив,/ и разделив море,/ Израиля же беглеца, пешеходца спасе,/ песнь Богови воспевающа.

Подаждь ми, Господи, словесе дар, да песньми восхвалю, в земнем уделе Божия Матере просиявшую, отроковицу дивную, преподобную матерь нашу Марфу.

Подобает по достоянию восхвалити преподобную Марфу, отроковицу непорочную, в подвизех древним отцем поревновавшую и Господу угодившую.

Благословение Пресвятыя Девы исполнивши, Марфо досточудная, велия угодница Божия и теплая наша предстательница явилася еси, молящися непрестанно о спасении душ наших.

Богородичен: Радуйся, Пресвятая Госпоже, освятившая Дивеево Твоим пришествием; радуйся, насадившая веру истинную. Радуйся, собравшая монашествующих множество.

Песнь 3.

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.

Великое смотрение Божие от утробы матерни освяти тя, Марфо многоплодная, и сосуд благоприятен Духа Всесвятаго показа тя, темже и избранница Владычицы явилася еси.

Желание неизреченныя красоты Христовы в души твоей имущи, радостно с сестрою Параскевою к старцу Серафиму потекла еси.

Преподобный Серафим, целомудрие и чистоту души твоея провидя, во общину Дивеевскую отроковицу тя, тринадесяти лет сущую, жительствовати направи.

Богородичен: Радуйся, во удел Себе Дивеево избравшая; радуйся, верным, пребывающим зде, Подательнице благ земных. Радуйся, Споручнице вечнаго спасения.

Кондак и икос праздника.

Слава, седален, глас 2:

Преподобная мати наша Марфо,/ ты, вся красная мира сего презревши/ и небесных благ возжелевши,/ молчанием, кротостию и смирением от юности твоея образ равноангельнаго жития явила еси,/ обители Дивеевския начальнице.

И ныне, праздника.

Песнь 4.

Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Царствие Божие, внутрь тебе сущее, измлада познавши, житие твое краткое подвиги молитвенными украсила еси, любовию к Жениху Небесному горящи.

Молитву непрестанную творящи, в кротости небесней и молчании радостно пребывала еси, Марфо всехвальная, чадо возлюбленное преподобнаго Серафима.

Всею душею Бога возлюбивши, в молитве непрестанней дух твой ко Господу возносила еси, Марфо досточудная, и подвиги духовными всех удивила еси.

Богородичен: Радуйся, теплая Ходатаице о подвизающихся во обители Твоей; радуйся, милость Сына Твоего до скончания века нам обещавшая. Радуйся, Заступнице рода христианскаго.

Песнь 5.

Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.

Имя Господне присно возносящи и Единаго Христа, и Сего распята, ведущи, ум твой Светом Божественным просвещала еси и сердце умилением услаждала еси.

Песнословим тя, мати Марфо, болезни бо и скорби иноческаго жития в терпении и кротости мужески претерпела еси.

Собеседница добрая и послушница смиренная преподобнаго Серафима сущи, мати Марфо, изрядно во обители потрудилася еси и, в молчании непрестанно пребывающи, в тайне откровения того о обители Дивеевстей сохранила еси.

Богородичен: Радуйся, Дево, яко благословением Твоим осени Дивеево сила Вышняго; радуйся, яко обитель Твоя многия инокини воспита. Радуйся, яко просия зде множество преподобных, молящихся о спасении душ наших.

Песнь 6.

Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже, спасения моего.

Труды постническими и непрестанною молитвою дух твой укрепляла еси, подвигу преподобныя Александры подражающи.

Безплотную во плоти видеша тя сестры твоя, во отрочестве паче стариц духовно просиявшую.

Многоразличныя подвиги во обители Дивеевстей совершивши, яко златая голубица, сими от земли воспарила еси во Обители Небесныя, идеже помяни и нас, тя восхваляющих.

Богородичен: Радуйся, Владычице, яко на наследие Твое присно призираеши; радуйся, яко благодати и милости Твоея нас сподобляеши. Радуйся, благословение Сына Твоего на нас низводящая.

Кондак, глас 8:

Кротостию и смирением украсившися/ и любве Божественныя исполнившися,/ радость Небесную стяжала еси,/ отроковице юная и мати наша Марфо,/ и, в ангельский образ от преподобнаго Серафима облекшися,/ с мудрыми девами в Чертог Небесный вселилася еси,/ идеже молишися о спасении душ наших.

Икос:

Силы Небесныя радостно сретоша душу твою, преподобная мати Марфо, в преселении твоем во Обители Небесныя, идеже ныне почиваеши, Пресвятую Троицу прославляющи. Темже, велие дерзновение ко Господу имущи, не забуди нас, земных чад твоих, и молися о спасении душ наших.

Песнь 7.

Ирмос: Отроцы еврейстии в пещи/ попраша пламень дерзновенно,/ и на росу огнь преложиша, вопиюще:/ благословен еси, Господи Боже во веки.

Дивно долготерпение твое бысть, мати Марфо, велия бо скорби и болезни, яко дар Божий, восприяла еси. Укрепи и нас молитвами твоими, в малодушии изнемогающих, скорби житейския в терпении понести и живота вечнаго достигнути.

В полунощи бодренно пребывающи и в безсонии целонощно бдящи, молитву Иисусову непрестанно творила еси, преподобная, темже и мудрым девам уподобилася еси.

Преподобнаго Серафима верная послушница бывши, Марфо досточудная, любовь евангельскую в сердце твоем стяжала еси и Небесному Жениху уневестилася еси.

Богородичен: Радуйся, благих даров рабом Твоим Всещедрая Подательнице; радуйся, во брани, в болезнех и трудех их премилосердая Утешительнице. Радуйся, надеждо и спасение душ наших.

Песнь 8.

Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Всем сердцем Бога возлюбивши, мати преподобная, служение Марфы и Марии соединяла еси: яко Марфа, в послушании пребывши, и, яко Мария, выну при ногу Иисусову приседящи.

Плакаше преподобный Серафим, кончину блаженныя Марфы духом предуведевый, дóндеже узре душу ея во Царствии Небеснем воспевающую: благословите Господа во веки.

Царица Небесе и земли по отшествии твоем, мати Марфо, прият тя в лик дев святых, ты бо усердием благим повеления Сына Ея добре сотворила еси. Ныне же, в радости Небесней пребывающи, непрестанно Того песнословиши.

Богородичен: Радуйся, Хранительнице наша в настоящем веце; радуйся, Предстательнице и непостыдное упование в будущем. Радуйся, прилог всякаго зла от удела Твоего земнаго отражающая.

Песнь 9.

Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

Преподобная мати наша Марфо, Царицы Небесныя истинная послушнице, ты, начала тьмы века сего пособием Ея победивши, плоть умертвивши и дух ожививши, благодати Божественное действо прияла еси. Не престай молящися за ны ко Господу, помиловатися душам нашим.

Стезею тесною шествовавши, тьмочисленная коварства вражия победила еси и Подвигоположнику спасения нашего угодила еси. От Негоже венец славы приемши, молися о нас, да возможем Господу последовати и победители греха явитися.

Рака мощей твоих честных, мати наша Марфо, благоухает паче иных аромат, сердца верных услаждающи, и источает благодать исцелений в молитве к ним прибегающим.

Богородичен: Песни благодарственныя приносим Ти, Мати Божия, яко спасаеши нас присно от всяких бед и скорбей и любовию врачуеши немощи наша.

Светилен:

Радуйся, славная обителе Дивеевская, молитвенницу имущи в тебе просиявшую, преподобную Марфу, молящуюся прилежно, о еже избавитися нам от бед и скорбей и помиловатися душам нашим.

Слава, и ныне, праздника.

На хвалитех стихиры, глас 5.

Подобен: Радуйся, Живоносный Кресте:

Радуйся, обители Дивеевския начальнице,/ преподобная мати наша Марфо!/ Яко небо светлыми звездами украшено,/ житие твое многими подвиги исполнися,/ ты бо, в юных летех духовною крепостию утвердившися,/ ангельски на земли пожила еси./ Помози и нам неленостно во спасение трудитися/ и Единому Богу послужити,/ егоже моли даровати душам нашим мир и велию милость.

Радуйся, преподобная мати наша Марфо,/ безмолвия и целомудрия усердная хранительнице!/ Ты, от юности Христа возлюбивши,/ Тому единому всем сердцем послужила еси/ и любовь евангельскую в сердце твоем стяжала еси./ Испроси нам, притекающим к раце мощей твоих:/ печалей утоление и болезней исцеление,/ чистоту помыслов и послушания совершеннаго,/ и душам нашим мир и велию милость.

Радуйся, преподобная мати наша Марфо,/ Царицы Небесныя верная служительнице!/ Ты, повеления Сына Ея добре исполняющи,/ кончину блаженную в юных летех прияла еси/ и лику святых дев сочеталася еси./ Ныне, в радости Небесней пребывающи,/ молися о нас Христу Богу и Пречистей Его Матери/ даровати душам нашим мир и велию милость.

Слава, глас 6:

Приидите, вернии людие,/ во святую обитель Дивеевскую,/ яже земный жребий Божия Матере нарицается,/ ублажим избранницу Пресвятыя Богородицы,/ преподобную Марфу достославную,/ угодницу Божию и теплую молитвенницу/ и, припадающе к ея многоцелебным мощем, сице рцем:/ молися ко Господу, всечестная мати наша,/ даровати нам мир и велию милость.

И ныне, праздника.

На Литургии служба преподобным женам и праздника.

Молитва

О, богомудрая мати наша Марфо! Ты, в простоте сердца поживши, кротостию Небесною и чистотою просияла еси и благоплодная послушница преподобнаго Серафима явилася еси. Буди нам, мати всечестная, ходатаица непрестанная о спасении душ наших, да молитвами твоими в страсе Божии утвердимся и горняя мудрствуем, а не земная. Помози нам, изнемогающим, укрепитися в любви и единомыслии и верным Христу пребыти, Емуже со Отцем и Святым Духом подобает всякая слава, честь и поклонение, во веки веков. Аминь.

Источник: Текст службы утвержден на заседании Священного Синода 23–24 сентября 2021 года (журнал № 67).

Ме́сяца а́вгуста в 22-й день

Преподо́бнаго Исаа́кия О́птинскаго

На вече́рни

На Го́споди, воззвáх: стихи́ры пра́здника. И преподо́бнаго стихи́ры, глaс 8:

Прииди́те, вси ве́рнии,/ дре́внюю добро́ту мона́шества у́зрим,/ ю́же пропису́ет па́мять богоно́снаго отца́ на́шего Исаа́кия,/ той бо, при исто́чнице уче́ния ста́рческаго насажде́н быв,/ в пусты́нных удо́лиих я́ко фи́никс процвете́/ и, возрасти́в сла́дкия плоды́ воздержа́ния,/ благоуха́нный арома́т доброде́тели источи́./ Ны́не же, ра́йския добро́ты наслажда́яся,/ мо́лит Христа́ Бо́га// поми́ловатися душа́м на́шим.

Преподо́бне о́тче Исаа́кие,/ ум горе́ вознося́,/ на земли́ послуша́нию до́бре прилежа́л еси́,/ хле́бы же иску́сно свои́ма рука́ма испека́я,/ богодухнове́нными глаго́лы, я́ко хле́бом духо́вным,/ ча́да твоя́ оби́льно напита́л еси́/ и, сладкогла́сно в хра́ме слу́жбу Бо́жию со тща́нием соверша́я,/ на высоту́ созерца́ния возше́л еси́./ Ны́не же, со А́нгельскими чи́ны ликовству́я,/ моли́ Христа́ Бо́га,// дарова́ти душа́м на́шим ве́лию ми́лость.

Преподо́бне о́тче Исаа́кие,/ ве́рный учениче́ Христо́в,/ иску́сный устрои́телю вертогра́да О́птинскаго,/ до́брый де́лателю любому́дрия мона́шескаго,/ ча́да Бо́жия святооте́ческими уче́нии напита́вый,/ ны́не не преста́й моли́тися Го́сподеви/ дарова́ти душа́м на́шим умиле́ние// и оби́тели твое́й благоустрое́ние.

Сла́ва, глaс 1:

Небе́сным чино́м подража́я,/ с ли́ки преподо́бных сочета́лся еси́, о́тче Исаа́кие,/ у́мную моли́тву в се́рдце утверди́в,/ о́браз ученико́м твои́м был еси́,/ простото́ю и смиренному́дрием настоя́тельство украси́в,/ му́дре бра́тию в Ца́рствие Бо́жие упра́вил еси́./ Те́мже любо́вию чту́щим святу́ю па́мять твою́,/ испроси́ у Христа́ Бо́га/ оби́тели О́птинстей Небе́сный покро́в и заступле́ние// и душа́м на́шим ве́лию ми́лость.

И ны́не, пра́здника, глас то́йже: Подоба́ше самови́дцем:

Вход. Проки́мен дне. И чте́ния преподо́бническая 3:

На лити́и стихи́ра хра́ма.

Сла́ва, преподо́бнаго, глас 5:

Воспо́йте, лю́дие, воспо́йте,/ Исаа́кия ста́рца на́шего,/ днесь бо пресве́тлую ду́шу свою́/ в пречи́стеи ру́це Бо́га предае́т,/ Его́же мо́лит непреста́нно// дарова́ти оби́тели мир и ве́лию ми́лость.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Сладкогла́сно слу́жбу Бо́жию соверша́я/ и в молча́нии моли́тве непреста́нней поуча́яся,/ дом Ду́ха Свята́го себе́ соде́лал еси́,/ преподо́бне о́тче Исаа́кие,// моли́твенниче о душа́х на́ших.

Стих: Честна́ пред Го́сподем// смерть преподо́бных Его́.

Нача́ло и́ноческому исправле́нию/ во благообра́зии вне́шнем полага́я,/ де́ланию вну́треннему бра́тию науча́л еси́,/ преподо́бне о́тче Исаа́кие,// да не яви́мся мона́си то́кмо одея́нием.

Стих: Что возда́м Го́сподеви о всех,// я́же воздаде́ ми?

Простото́ю и му́дростию/ от Бо́га укра́шен быв,/ умо́м Того́ лицезре́л еси́,/ Исаа́кие, ста́рче преди́вный,// преподо́бных отце́в сожи́телю.

Сла́ва, глас 4:

Я́ко дре́вний патриа́рх,/ от ю́ности пра́ведное житие́ проводя́,/ бога́тство духо́вное стяжа́л еси́/ и, я́ко до́брый па́стырь,/ на па́жити святооте́честей/ о́вцы твоя́ воспита́л еси́,/ от кла́дязя воды́ живы́я тех напая́я/ и мы́сленныя во́лки жезло́м моли́твенным отгоня́я,/ те́мже вси зове́м:/ о́тче наш Исаа́кие,// сохрани́ и ны́не ста́до твое́ невреди́мо.

И ны́не, пра́здника.

Тропа́рь, глас 1:

По́стническими укра́шен добро́тами,/ ко́рмчий изря́ден мона́шествующим был еси́,/ чистото́ю и простото́ю Ду́ха благода́ть стяжа́в,/ О́птинскаго ста́рчества яви́лся еси́ украше́ние./ Сего́ ра́ди зове́м тебе́, Исаа́кие:/ сла́ва просвети́вшему тя Христу́,/ сла́ва укре́пльшему тя,// сла́ва подаю́щему тобо́ю нам исцеле́ния.

На у́трени

По 1-м стихосло́вии седа́лен, глас 1:

По́стническому ли́ку сочета́вся, преподо́бне Исаа́кие, о земны́х и тле́нных наслажде́ниих небре́гл еси́, труды́ же воздержа́ния и сле́зы покая́ния Христу́ принесы́й, врага́ ро́да челове́ческаго посрами́л еси́. Те́мже па́мять твою́ све́тло пра́зднующих от вся́ких бед сохрани́ моли́твами твои́ми.

Сла́ва, и ны́не, пра́здника.

По 2-м стихосло́вии седа́лен, глас 1:

От собла́знов жите́йских, и́ноков смуща́ющих, и страсте́й треволне́ния изба́ви ста́до твое́, Исаа́кие богому́дре, путе́м бо те́сным в ра́йскую широту́ дости́гл еси́ и отту́ду подае́ши по́мощь тя почита́ющим.

Сла́ва, и ны́не, пра́здника.

По полиеле́и седа́лен, глас 8:

Стра́сти плотски́я мече́м воздержа́ния посе́кл еси́ и смире́нными коленопреклоне́ньми главу́ зми́еву сокруши́л еси́, преподо́бне о́тче Исаа́кие. Сего́ ра́ди со дерзнове́нием вопие́м ти: моли́ Христа́ Бо́га просвеще́ния нам дости́гнути, любо́вию чту́щим святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Нра́вом ти́хий,/ кро́ткий и смире́нный се́рдцем,/ преподо́бне о́тче Исаа́кие,/ ты, от Го́спода дар сове́та и прему́дрости восприи́м,/ до́бре и́ноком оби́тели Пречи́стыя Богоро́дицы послужи́л еси́,/ днесь же, Тоя́ Успе́нию пра́зднуему,/ блаже́нный поко́й души́ твоея́ обре́л еси́// и успе́ние со святы́ми.

Кано́н преподо́бнаго, его́же краегране́сие: Песнохва́лится про́сто Исаа́кия красота́. Глас 8.

Песнь 1.

Ирмо́с: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Пе́сненный вене́ц тебе́ тщу́ся соплести́, усе́рдствуй же, о́тче, моли́твою твое́ю и пода́ждь благоле́пно воспе́ти твоея́ простоты́ вели́кую красоту́.

Ева́нгельским нра́вом изде́тска обогати́вся, от суеты́ мирски́я уклони́лся еси́ и, я́ко му́дрый купе́ц, пучи́ну премину́в собла́знов, в приста́нищи и́ночестем до́брый би́сер обре́л еси́.

Смиренному́дрием украси́в главу́ твою́ и послуша́нием прилежа́в вели́ким ста́рцем, духо́вному худо́жеству научи́лся еси́, те́мже и мно́гим лю́дем до́брый наста́вник яви́лся еси́.

Богоро́дичен: Но́сиши на рука́х Твои́х, Де́во Всепе́тая, Христа́, Со́лнце Пра́вды, И́же зе́млю просвети́ богозна́ния луча́ми и к Све́ту Невече́рнему наста́ви нас.

Песнь 3.

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.

О́тче преподо́бне, ста́рчества О́птинскаго досто́йный прее́мниче! Ты, во главу́ оби́тели поста́влен быв и игу́менский крест, я́ко корми́ло духо́вное, восприи́м, мно́гия и́ноки в Ца́рствие Христо́во му́дро упра́вил еси́.

Христа́ изде́тска возлюби́в, ве́ру апо́стольскую и любо́вь оте́ческую стяжа́в, а́нгельски на земли́ пожи́л еси́, свя́те Исаа́кие, ны́не же с ли́ки преподо́бных Бо́га прославля́еши.

Ве́рен быв заве́том ста́рцев О́птинских и оби́тель твою́ благоче́стием украси́в, ду́ши, вве́ренныя тебе́, Исаа́кие преподо́бне, испове́данием по́мыслов и слеза́ми покая́ния очища́ти науча́л еси́.

Богоро́дичен: Ада́мова ме́ртвость Тобо́ю оживотвори́ся, Богоневе́стная, зачала́ бо еси́ без се́мене Христа́, всех Воскресе́ние, те́мже истле́вшии во гробе́х улуча́ют безсме́ртия наде́жду Твои́ми, Де́во, моли́твами.

Конда́к и и́кос пра́здника.

Седа́лен, глас 8:

Я́ко житие́ твое́ све́тло бысть, преподо́бне, поще́ния ра́ди, та́ко яви́ся пресве́тло и успе́ние твое́, Христа́ бо просла́вил еси́ я́ве де́лы твои́ми, сия́я мно́гая ле́та му́дростию ста́рческою, о́вцы же Христо́вы во благоче́стии упа́сл еси́, мы́сленныя та́ти дале́че прогна́в, богому́дре. Те́мже моли́ся Христу́, преподо́бне Исаа́кие, грехо́в оставле́ние дарова́ти чту́щим любо́вию па́мять твою́.

Сла́ва, и ны́не, пра́здника.

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Любо́вию безмо́лвия взыску́я и послуша́нию прилежа́, Исаа́кие богоблаже́нне, я́ко ве́рный учени́к Христо́в, в себе́ запечатле́л еси́ нрав ева́нгельский, те́мже и наста́вник яви́лся еси́ прему́дрый.

Истонча́я ве́лиим посто́м плоть твою́, стра́сти душетле́нныя усмири́л еси́ и ду́шу твою́ слеза́ми покая́ния омы́л еси́. Моли́ о нас, преподо́бне, да скве́рны грехо́вныя очи́стимся.

Терпе́нием вооружи́вся, богому́дре, воздержа́нием стре́лы вра́жия отрази́л еси́ и, моли́твою ум окрыли́в, ловле́ния вра́жия избе́гл еси́. Помози́ и нам, преподо́бне, се́тей лука́ваго избе́гнути.

Богоро́дичен: Сотвори́ Тебе́, Де́во, вели́чие Си́льный и свя́то и́мя Его́, И́же в ложесна́ Твоя́ вшед, Плотоно́сец на земли́ яви́ся и ми́ра Засту́пницу Тя показа́.

Песнь 5.

Ирмо́с: От но́щи неве́дения/ по душелови́тельному пути́ при́сно блудя́щаго,/ Све́том ра́зума Твоего́, Го́споди, преднаставля́я мя,// на стезю́ за́поведей Твои́х напра́ви.

Я́ко све́тлая свеща́, преподо́бне Исаа́кие, от любве́ ста́рцев О́птинских возже́глся еси́ и све́том богоразу́мия ду́ши приходя́щих к тебе́ просвети́л еси́.

Простото́ю нра́ва и чи́стым се́рдцем украси́вся, житие́м добронра́вным просия́л еси́, блаже́нне, и мно́гия лю́ди ко Христу́ приве́л еси́. Научи́ и нас путе́м за́поведей Госпо́дних пра́во ходи́ти.

Ре́вность по благоче́стии име́я и игу́менскою вла́стию облече́н, любому́дрие мона́шеское с прилежа́нием насажда́л еси́, о́тче, и кро́ткими обличе́ньми и́ноки вразумля́л еси́.

Богоро́дичен: От Твои́х ложе́сн, Де́во Пречи́стая, Богоро́дице, Со́лнце Пра́вды возсия́, и нощь лука́вых страсте́й отбеже́, у́тро же благоче́стия просия́.

Песнь 6.

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Свы́ше власть прии́м вяза́ти и реши́ти, о́тче Исаа́кие, соу́зом любве́ бра́тство твое́ связа́л еси́ и, к лу́чшему простира́яся соверше́нству, моли́тву те́плую ко Го́споду возноси́л еси́.

Твоя́ простота́, о́тче Исаа́кие, обличи́ хитреце́в неве́жество, чистота́ же души́ привлече́ А́нгел мно́жество, ум бо Христо́в стяжа́л еси́, мирско́е худо́жество я́ко сор вменя́я.

Оби́тели Ша́мординския благопопечи́тель изря́ден и О́птинскаго ста́рца Амвро́сия сотаи́нник богому́дрый быв, моли́твенник усе́рдный о па́стве твое́й яви́лся еси́, Исаа́кие.

Богоро́дичен: Испо́лнен храм Твой, Богоро́дице, песнопе́ний духо́вных, я́ко ны́не па́мять преподо́бнаго приспе́, и́же мощьми́ зде упоко́ися и ду́хом неотсту́пно пребыва́ет. Те́мже ра́дуйся, зове́м Ти, Де́во Чи́стая, преподо́бных похвало́.

Конда́к, глас 3:

А́нгельскому чи́ну подража́я,/ плоть твою́ ду́хови покори́л еси́,/ смире́нным же се́рдцем любо́вь Христо́ву стяжа́в,/ изря́дный наста́вник па́стве твое́й яви́лся еси́,/ Исаа́кие о́тче богому́дре,/ Христа́ Бо́га моли́/ благоче́стие Оте́честву на́шему дарова́ти// и спасе́ние душа́м на́шим.

И́кос:

Све́тлых по́двигов твои́х заря́ осиява́ет ны́не храм сей, богому́дре Исаа́кие, я́ко мощьми́ честны́ми зде почи́л еси́, благоче́стия о́браз нам показу́я, и, я́ко неугаси́мую лампа́ду, вжегл еси́ моли́тву твою́ непреста́нную, оте́ческою любо́вию вся ча́да твоя́ согрева́я. Те́мже ко предста́тельству твоему́ притека́ющим утвержде́ние во благоче́стии испроси́ и спасе́ние душа́м на́шим.

Песнь 7.

Ирмо́с: От Иуде́и доше́дше, о́троцы,/ в Вавило́не иногда́,/ ве́рою Тро́ическою пла́мень пе́щный попра́ша пою́ще:// отце́в Боже, благослове́н еси́.

Све́тел по́мысл име́я и разсуди́телен, богому́дро па́ству твою́ упа́сл еси́, Исаа́кие о́тче наш, и от кла́дязя живо́творных оте́ческих писа́ний о́вцы твоя́ напоя́л еси́.

А́ще и мно́гими почестьми́ окруже́н и са́ном игу́менским укра́шен был еси́, о́тче Исаа́кие, оба́че, тяготу́ и́ноческаго жития́ люботру́дно подъе́м, о́браз смире́ния и братолю́бия и́ноком показа́л еси́.

А́нгельски на земли́ пожи́в, лице́ Христо́во лице́м твои́м зре́ти сподо́бился еси́, блаже́нне, и, ли́ку преподо́бных сочета́вся, вку́пе с ни́ми прославля́еши Триипоста́сное Божество́.

Богоро́дичен: Ко Твое́й непобеди́мей по́мощи прибега́ем, Богоро́дице, изба́ви оби́тель Твою́ от ересе́й и нестрое́ний, да благоче́стно сла́вится в ней Пречестно́е и́мя Бо́га отце́в на́ших.

Песнь 8.

Ирмо́с: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во/ и огнь в ро́су претво́ршее/ и превозноси́те всем жизнь подава́ющаго// Ду́ха Всесвята́го во ве́ки.

Исцеле́ния ны́не источа́ет свяще́нная ра́ка моще́й твои́х, о́тче Исаа́кие, и притека́ющии к ней с ве́рою здра́вие улуча́ют душа́м и телесе́м си́лою на тебе́ почи́вшаго Ду́ха Всесвята́го.

Я́ко домоправи́тель иску́сен, подо́бник Моисе́евых дел яви́лся еси́, преподо́бне, ста́рчества О́птинскаго утверди́телю и в нощи́ безпу́тия блужда́ющим ве́рный указа́телю.

Кро́тостию украси́вся, богоблаже́нне Исаа́кие, бра́тию оте́чески возлюби́л еси́ и, изря́дное показа́в милосе́рдие, мно́гое утеше́ние скорбя́щим пода́л еси́.

Богоро́дичен: Ра́дуйся, све́тлая Сло́ва пала́то, ра́дуйся, ча́ше Животворя́щия воды́, по вся дни напая́ющая ве́рных, ра́дуйся, Богома́ти, Предста́тельнице пою́щих Тя.

Песнь 9.

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,// со безпло́тными ли́ки Тя велича́юще.

А́нгельскими чи́нми ны́не окруже́н, в го́рняя взя́лся еси́ с преподо́бными ста́рцы О́птинскими, о́тче Исаа́кие, я́ко ми́ра красоту́ презре́л еси́ и по́двиги по́стническими украси́лся еси́.

Светоза́рен яви́ся днесь день преставле́ния твоего́, о́тче досточу́дне, во́ньже подае́ши изря́дную по́мощь и предста́тельствуеши пред Бо́гом о ве́рою и любо́вию чту́щих тя.

О́птинскаго вертогра́да дре́во многопло́дное яви́лся еси́, о́тче, те́мже и ны́не, духо́вными плоды́ ве́рных насыща́я, исцеле́ния оби́льная источа́еши с те́плою моли́твою притека́ющим к ра́це моще́й твои́х.

Тро́ичен: Тро́ицы изря́днии уго́дницы яви́шася преподо́бнии ста́рцы О́птинстии, Отца́ бо вои́стину почто́ша, Сы́ну изря́дно порабо́таша и Ду́ха Свята́го стяжа́ша, я́ко сосу́ди богоприя́тнии.

Богоро́дичен: А́нгелов Творе́ц, Сын и Бог Твой, лю́ди спасе́, во гресе́х зле погиба́ющих, те́мже Тя, Де́во Чистая, с безпло́тными ли́ки велича́ем.

Свети́лен:

Я́ко со́лнце, вели́чием по́двигов твои́х возсия́л еси́, о́тче преподо́бне, и, све́том доброде́телей озари́в преде́лы земли́ Ру́сския, преше́л еси́ к Све́ту Невече́рнему, те́мже вопие́м ти: просвети́ на́ша помышле́ния и на путь покая́ния наста́ви.

Сла́ва, и ны́не, пра́здника.

На хвали́тех стихи́ры, глас 1.

Подо́бен: Небе́сных чино́в:

Небе́сных чино́в дости́гл еси́/ и венце́м безсме́ртия украси́лся еси́,/ и́мже увязе́ тя десни́ца Всевы́шняго,/ по́двигов ра́ди, я́же на земли́ подъя́л еси́,/ Исаа́кие, преподо́бне о́тче наш,// моли́ о душа́х на́ших.

Тве́рдым щито́м ве́ры/ и кре́пкою броне́ю пра́ведности/ угаси́л еси́ стре́лы разжже́нныя лука́ваго/ и све́тлым мече́м благоче́стия/ пле́велы страсте́й посе́кл еси́, во́ине Христо́в Исаа́кие,// и ны́не спобо́рствуй нам си́лу вра́жию прогна́ти.

О́тче преподо́бне Исаа́кие,/ благода́ти сосу́де избра́нный,/ ты, еле́ем моли́тв умягча́я грехо́вныя ра́ны чад свои́х,/ к подвиго́м благоче́стия тех подвиза́л еси́,/ и́стинней любви́ к Бо́гу и бли́жнему науча́я,// те́мже не оста́ви и нас попече́нием твои́м.

Сла́ва, глас 3:

Днесь све́тло сия́ет па́мять твоя́,/ о́тче наш Исаа́кие,/ а́нгельским бо украси́вся благоле́пием,/ па́стырь изря́ден мона́хом яви́лся еси́/ и, благоче́стием пресве́тло просия́в,/ богому́дрием всех притека́ющих к тебе́ озари́л еси́./ Те́мже и ны́не просвети́ нас,/ чту́щих святу́ю па́мять твою́,/ и научи́ благоче́стно почита́ти// Тро́ицу Святу́ю и Неразде́льную.

И ны́не, пра́здника.

Славосло́вие вели́кое, и отпу́ст.

На Литурги́и слу́жба пра́здника, и преподо́бнаго.

Источник: Текст утвержден Священным Синодом Русской Православной Церкви 17 июля 2020 года (журнал № 34)

На велицей вечерни

На Господи, воззвах: стихиры, глас 1.

Подобен: Прехвальнии мученицы:

Всехвальнии новомученицы Шатурстии,/ вас ни тьма темничная потаила есть,/ но Небо прият вы/ и отверзошася вам райския двери/ и, многими страданьми в ня вшедше,/ радости вечныя наслаждаетеся./ Темже тепле Христу молитеся,/ Церковь Русскую в Православии утвердити/ и спасти души наша.

Прехвальнии новомученицы Шатурстии,/ вас ни прещения безбожных устрашиша,/ ни гонения и озлобления смятоша,/ ни узы и горькия работы изнуриша,/ но, ревностию о Бозе пламенеюще/ и внемлюще гласу Пастыреначальника Христа,/ даже до крове подвизалися есте./ Темже тепле молитеся ко Господу,/ Русь Святую в Православии утвердити/ и спасти души наша.

Преславнии новомученицы Шатурстии,/ вас ни глубины земныя потаиша,/ ниже рвы Бутовстии сокрыша,/ но Христос Бог восприят вы/ и, яко пришедших от скорби великия/ и кровьми убеливших ризы своя,/ венцы нетленными увенча./ Темже тепле Того молите,/ верныя люди в Православии утвердити/ и спасти души наша.

Ины стихиры, глас 5:

Противу гонителей злочестивых/ даже до крове подвизалися есте,/ богомудрии Александре, Иоанне, Арсение и Василие,/ доблественнии Назарие, Георгие и Иоанне,/ словом правды безбожных обличающе,/ и их, яко волков хищных, от стада Христова отгоняюще,/ едино на враги пособие имуще,/ Крест Христов, оружие непобедимое,/ и Знамение нашего спасения.

Яко воини Христови добропобеднии,/ преподобномученицы Тихоне и Аполлосе,/ пост и молитву, яко меч духовный изостривше,/ во бранех за веру Христову и паству/ враги видимыя и невидимыя низложили есте,/ молитвою, яко стеною необоримою,/ немощная чада стада Христова ограждающе./ Темже ныне, яко друзи Христови,/ Престолу Царя Славы предстояще,/ молите спастися душам нашим.

Доброхвальнии преподобномученицы/ Марие, Матроно и Марфо,/ от юности Христа возлюбившыя,/ Тому во ангельстем чине усердно послужили есте./ В годину же испытаний Церкве Русския,/ мужемудренную крепость явивше,/ веру Христову даже до крове исповедали есте,/ веселяще Ангелы и удивляюще человеки,/ ныне вас в песнех ублажающих.

Слава, глас 2:

Приидите, вернии, в дом Бога нашего/ лик победоносный восхвалим,/ избранную дружину, Христово воинство,/ новомученики и исповедники земли Шатурския,/ в лето огненнаго испытания/ живота своего не пощадивших,/ веру соблюдших и за Христа пострадавших,/ ныне же Престолу Святыя Троицы предстоящих/ и молящихся о душах наших.

И ныне, Богородичен, глас тойже: Прейде сень законная:

Вход. Прокимен дне. И чтения мучеником.

Деяний святых апостол чтение (4, 6–31):

В тыя дни собрашася во Иерусалим князи, старцы, книжницы/ и елицы беша от рода архиерейска./ И, поставльше Петра и Иоанна посреде, вопрошаху:/ коею силою или коим именем исцелиста хромаго./ Петр, исполнився Духа Свята, рече:/ князи людстии и старцы Израилевы,/ аще мы днесь истязуеми есмы о благодеянии человека немощна,/ о чесом сей спасеся,/ разумно буди всем вам и всем людем Израилевым,/ яко во имя Иисуса Христа Назореа,/ Его же вы распясте,/ егоже Бог воскреси от мертвых,/ о сем Сей стоит пред вами здрав:/ Сей есть Камень, укоренный от вас зиждущих,/ бывый во главу угла,/ и несть ни о единем же инем спасения:/ несть бо иного Имени под небесем, даннаго в человецех,/ о немже подобает спастися нам./ Видяще же Петрово дерзновение и Иоанново и разумевше,/ яко человека некнижна еста и проста, дивляхуся,/ знаху же их, яко со Иисусом беста:/ видяще же изцелевшаго человека с нима стояща,/ ничтоже имяху противу рещи./ Повелевше же има вон из сонмища изыти,/ стязахуся друг со другом, глаголюще:/ что сотворим человекома сима;/ яко убо нарочитое знамение бысть има,/ всем живущим во Иерусалиме яве,/ и не можем отврещися:/ но да не более прострется в людех,/ прещением да запретим има ктому не глаголати о имени сем ни единому от человек./ И призваше их,/ заповедаша има отнюдь не провещавати ниже учити о имени Иисусове./ Петр же и Иоанн отвещавша к ним реста:/ аще праведно есть пред Богом/ вас послушати паче, нежели Бога, судите:/ не можем бо мы, яже видехом и слышахом, не глаголати./ Они же призапрещше има, пустиша я,/ ничтоже обретше како мучити их, людий ради,/ яко вси прославляху Бога о бывшем:/ лет бо бяше множае четыредесяти человек той,/ на немже бысть чудо сие изцеления./ Отпущена же бывша приидоста ко своим и возвестиста,/ елика к нима архиерее и старцы реша./ Они же, слышавше, единодушно воздвигоша глас к Богу и рекоша:/ Владыко, Ты, Боже, сотворивый небо и землю и море и вся, яже в них,/ иже Духом Святым усты отца нашего Давида отрока Твоего рекл еси:/ Вскую шаташася язы́цы, и людие поучишася тщетным;/ предсташа царие земстии,/ и князи собрашася вкупе на Господа и на Христа Его./ Собрашася бо воистинну во граде сем на святаго отрока Твоего Иисуса,/ егоже помазал еси,/ Ирод же и Понтийский Пилат с языки и людьми израилевыми,/ сотворити, елика рука Твоя и совет Твой преднарече быти:/ и ныне, Господи, призри на прещения их/ и даждь рабом Твоим со всяким дерзновением глаголати слово Твое,/ внегда руку Твою прострети Ти во изцеления,/ и знамением и чудесем бывати Именем святым отрока Твоего Иисуса./ И помолившимся им, подвижеся место, идеже бяху собрани,/ и исполнишася вси Духа Свята/ и глаголаху слово Божие со дерзновением.

К Тимофею послания святаго апостола Павла чтение (2Тим.4:1–8):

Чадо Тимофее,/ засвидетельствую убо аз пред Богом и Господем нашим Иисус Христом,/ хотящим судити живым и мертвым в явлении Его и царствии Его:/ проповедуй слово,/ настой благовременне и безвременне,/ обличи, запрети, умоли со всяким долготерпением и учением./ Будет бо время, егда здраваго учения не послушают,/ но по своих похотех изберут себе учители, чешеми слухом,/ и от истины слух отвратят, и к баснем уклонятся./ Ты же трезвися о всем, злопостражди,/ дело сотвори благовестника,/ служение твое известно сотвори./ Аз бо уже жрен бываю,/ и время моего отшествия наста./ Подвигом добрым подвизахся,/ течение скончах, веру соблюдох./ Прочее убо соблюдается мне венец правды,/ егоже воздаст ми Господь в день он, Праведный Судия,/ не токмо же мне, но и всем возлюбившим явление Его.

Ко Евреем послания святаго апостола Павла чтение (11, 33–40):

Братие,/ святии верою победиша царствия,/ содеяша правду, получиша обетования,/ заградиша уста львов,/ угасиша силу огненную,/ избегоша острея меча,/ возмогоша от немощи,/ быша крепцы во бранех,/ обратиша в бегство полки чуждих./ Прияша жены от воскресения мертвых своих./ Инии же избиени быша, не приемше избавления,/ да лучшее воскресение улучат./ Друзии же руганием и ранами искушение прияша,/ еще же и узами и темницею./ Камением побиени быша,/ претрени быша, искушени быша,/ убийством меча умроша,/ проидоша в милотех, и в козиях кожах,/ лишени, скорбяще, озлоблени./ ихже не бе достоин весь мир,/ в пустынях скитающеся и в горах и в вертепах и в пропастех земных./ И сии вси, послушествовани бывше верою, не прияша обетования./ Богу лучшее что о нас предзревшу,/ да не без нас совершенство приимут.

На литии стихиры глас 6:

Божиим произволением на подвиг страдальческий/ от всякаго рода и чина призваннии,/ новомученицы и исповедницы Шатурстии,/ во дни гонения безбожнаго/ правило веры и образ жития нам показали есте,/ да, Христу последующе верою/ и любовию пламенеюще,/ венцы Небесныя обрящем.

Слава, глас 2:

Путь тесный широту райскую отверзает:/ сие делом явили есте, новомученицы,/ путем страдальческим шествующе,/ вся даже до смерти верою претерпели есте/ и Царства славы достигли есте,/ идеже Древа Жизни наслаждаетеся./ Помозите и нам, страстотерпцы,/ веру Православную до конца сохранити/ и спасение улучити.

И ныне, Богородичен, глас тойже:

Богородицу и Матерь Света,/ присно в песнех величающе,/ ныне гласы умиленными воспеваем,/ яко даровала еси нам неистощимое сокровище/ собор новомучеников и исповедников Шатурских,/ Едина Чистая и Благословенная.

На стиховне стихиры, глас 2.

Подобен: Доме Евфрафов:

Днесь веселия исполнися/ дом Бога нашего,/ в немже память новомучеников/ земли Шатурския/ с похвалами совершается.

Стих: Господи Господь наш,/ яко чудно Имя Твое по всей земли.

Юншаго посреде градов Московских,/ малаго посреде великих/ возвеличи днесь Господь Шатуру град,/ в немже венценосную дружину/ новомученик прослави.

Стих: Святым, иже суть на земли Его,/ удиви Господь вся хотения Своя в них.

Взыграй, земле Шатурская,/ в день праздника твоего,/ и собор новомучеников прослави,/ яко сокровище велие и неистощимое,/ днесь приемлющи.

Слава, глас тойже:

Ликуйте ныне и веселитеся мучениколюбцы,/ земля бо наша славою новомучеников украшается,/ приимите покров Небесный святых ходатаев ваших,/ сии бо бдят и молятся о нас/ пред Престолом Вседержителя,/ да не оскудеет вера Православная,/ в нейже нам утверждение.

И ныне, глас тойже: О, чудесе новаго:

По Ныне отпущаеши: тропарь новомучеников дважды. И Богородице, Дево: единожды.

Тропарь, глас 4:

Яко украшение Церкве Русския,/ в годину лютаго испытания яви вас Господь,/ прием многоплодие трудов ваших,/ болезни, узы и смерть неповинную./ Темже и мы, сошедшеся днесь, велегласно вопием:/ пречуднии страстотерпцы Шатурстии,/ молите Увенчавшаго вас Христа/ сохранити земное Отечество ваше/ и спастися душам нашим.

На утрени

По 1-м стихословии седален, глас 6:

Сквозе огнь мучения, яко свидетелие вернии, прошли есте, блаженнии страдальцы,/ сего ради с лики святых земли Русския/ в Небеснем Отечестве торжествуете./ Помозите и нам, сродником вашим, веру Православную сохранити/ и молите спастися душам нашим.

Слава, и ныне, Богородичен:

Не умолчим никогда, Владычице,/ силы Твоя глаголати, недостойнии./ И ныне вопием к Тебе, Пречистая:/ моли Сына Твоего и Бога нашего/ со святыми новомученики и исповедники Российскими/ спасти землю Русскую,/ в ней же имя Твое православно величается.

По 2-м стихословии седален, глас 2:

Егда землю Российскую постиже испытание,/ тогда вы, новомученицы святии, отвсюду безбожными гоними,/ во едину победоносную дружину промышлением Божиим в земли Шатурстей совокупистеся/ и единомудренно за Христа пострадасте.

Слава, и ныне, Богородичен:

Ты еси Славо небесных и Упование земных, о Царице!/ Ты еси Похвало и Венчание мучеником,/ на Тя бо страдальцы земли Русския/ в муках велиих надежду возложивше,/ победно пучину лютых мучений проидоша./ Ныне и нам, предстоящим в храме славы Твоея,/ одожди милости Твоя пребогатыя.

Величание:

Величаем вас,/ святии новомученицы и исповедницы Шатурстии,/ и чтим честная страдания ваша,/ яже за Христа/ претерпели есте.

Псалом избранный: Бог нам Прибежище и Сила:

1-й лик: Бог нам Прибежище и Сила, Помощник в скорбех, обретших ны зело.

2-й лик: Господи, воздвигни силу Твою и прииди, воеже спасти нас.

1-й лик: Глаголах о свидениих Твоих пред цари и не стыдяхся.

2-й лик: Вси язы́цы обыдоша мя и Именем Господним противляхся им.

1-й лик: Тебе ради умерщвляемся весь день, вменихомся, яко овцы заколения.

2-й лик: Крепость и пение мое Господь и бысть мне во спасение.

По полиелеи седален, глас 8:

Днесь земля Шатурская торжествует/ и веселием духовным украшается,/ святии бо новомученицы, сродницы наши,/ в белых ризах предстоят Агнцу Божию/ и со Ангелы песнь хвалебную согласно воспевают:/ слава в Вышних Богу и на земли мир,/ в человецех благоволение.

Слава, и ныне, Богородичен:

О, Всепетая Дево,/ Тя вемы Покров земли Русския,/ Тебе бо, грешнии, имамы предстательство,/ Тебе стяжахом в напастех спасение,/ Едину Всенепорочную.

Степенна, 1-й антифон 4-го гласа. Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Евангелие от Матфея, зачало 36.

По 50-м псалме стихира, глас 6:

О, блаженнии сродницы наши,/ часть благую на земли усердно взыскавшии/ и кровною куплею ту приобретшии,/ изыдите ныне, молимся,/ на взыскание нас, заблуждших,/ верою обнищавших и добродетельми оскудевших,/ да вами, присно покрываеми и наставляеми,/ дарами Духа Святаго обогатимся/ и безбедно часть спасаемых обрящем.

Канон, глас 6.

Песнь 1.

Ирмос: Яко по суху, пешешествовав Израиль/ по бездне стопами,/ гонителя фараона/ видя потопляема,/ Богу победную песнь поим, вопияше.

Припев: Святии новомученицы и исповедницы Шатурстии, молите Бога о нас.

Господи Боже,/ очисти чувства и просвети наш ум,/ и сподоби достойно прославляти святых сродников наших,/ новомучеников и исповедников Шатурских,/ и, взирающе на кончину, подражати вере их.

Егда прииде испытание веры вашея, святии сродницы наши,/ страдания за Христа, яко благодатный дар, прияли есте./ Сего ради ныне Церковь Русская вами украшается/ и земля Шатурская похвалы приносит.

Страдания за Христа, яко дар благодатный, приясте, страстотерпцы./ Тем, изгнания, домов разорения,/ клеветы и неправедное осуждение,/ паче же узы и убиение мужественне претерпели есте,/ и ничтоже возможе разлучити вас от любве Христовой.

Богородичен: Яко Взбранная Воевода новомучеников и исповедников Российских,/ державным заступлением в духовней брани победу им на безбожныя подала еси./ Темже Тя, Пречистая Дево, ныне величаем.

Песнь 3.

Ирмос: Несть свят,/ якоже Ты, Господи, Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

Егда прииде время испытания веры вашея, страстотерпцы,/ на Господа и Совершителя спасения все упование возложили есте/ и, от Него укрепляеми, пучину мучений победно прешли есте./ Ныне же, в радости небесней пребывающе, взываете:/ несть свят, паче Тебе, Человеколюбче.

Возвеличим, вернии, преподобномученика Тихона,/ пастыря добраго и мученика истиннаго,/ изволившаго паче умрети, нежели Христа и веры отрещися./ Темже, мученический венец прием,/ в радости небесней пребывает, взывая:/ несть свят, паче Тебе, Господи, Человеколюбче.

Похвалы приносим ти, преподобномучениче Аполлосе,/ иноческаго жития любителю и священнаго чина достойный носителю,/ ты бо, прещения безбожных и мук смертных не убоявся,/ верный ученик Христов даже до смерти явился еси./ Сего ради в радости небесней пребывая, взываеши:/ несть свят, паче Тебе, Господи, Человеколюбче.

Богородичен: О, Всепетая Богородице, Владычице,/ преподобных похвало и мучеников славо,/ ангелы восхваляемая и человеки воспеваемая,/ избави Церковь Русскую от всякаго злаго обстояния,/ Едина Благословенная.

Седален, глас 5:

В муках суще, святии, мучителем рекли есте:/ всуе ваша дерзость и погибельна,/ нам бо, еже жити – Христос,/ и еже умрети – приобретение:/ вместо ран телесных – светлое одеяние в Воскресении,/ за безчестие – венцы нетленныя,/ за узы темничныя – рай,/ за изгнание – сожительство со ангелы./ Тех молитвами, Христе Боже, спаси души наша.

Слава, и ныне, Богородичен:

Ублажим днесь, вернии, Заступницу нашу,/ Та бо, удел Свой издревле избранный, Русь Православную,/ во испытаниих горьких не остави,/ чад Церкве Христовы во страданиих укрепи/ и во обители Небесныя всели.

Песнь 4.

Ирмос: Христос моя Сила,/ Бог и Господь,/ честная церковь/ боголепно поет, взывающи:/ от смысла чиста о Господе празднующи.

Божиим смотрением, святии,/ аще и разделени бысте телесне/ и един по единому на муки от безбожных осуждени,/ обаче, союзом любве Христовой связуеми,/ единомудренною дружиною за Христа пострадасте,/ вкупе же и в Царствие Небесное внидосте.

Пастырю милостивый и богомудрый наставниче, священномучениче Александре,/ града Шатурскаго изрядная похвало,/ четыредесять лет во священницех благочестно пожил еси/ и душу твою за паству положил еси./ Буди и о нас на Небеси ходатай верен.

Ублажим, вернии, священномученика Иоанна,/ делателя добраго винограда Христова,/ иереев удобрение, жития евангельскаго образ,/ смотрением Божиим за Христа пострадавшаго,/ о нас же в раи сладости непрестанно молящагося.

Богородичен: Тя, необоримую Стену и спасения Утверждение, Богородице Дево, молим:/ сопротивных советы разори,/ людей Твоих печаль на радость преложи,/ град Твой огради,/ о мире мира моли,/ яко Ты еси, Богородице, Упование наше.

Песнь 5.

Ирмос: Божиим светом Твоим, Блаже,/ утреннюющих Ти души любовию озари, молюся,/ Тя ведети, Слове Божий,/ истиннаго Бога,/ от мрака греховнаго взывающа.

Богатство веры стяжавше, святии земли Шатурския, миру явленнии и неявленнии,/ вы, страдания, яко дарование Божие, приемше,/ венцы нетленными украсилися есте,/ правило веры и образ исповедания нам являюще.

Благонравием украсився, священномучениче Назарие,/ в подвизе поста, молитвы и воздержания жизнь твою проводил еси,/ темже ни темница, ни гонения, ни самая смерть/ возмогоша разлучити тя, от любве Божия./ Сего ради светло совершаем память твою.

Егда прииде время испытания,/ тогда безропотно претерпел еси беды многия, священномучениче Георгие:/ ближнии бо оклеветаша тя,/ безбожнии неправедно в темницу заключиша и на горькия работы осудиша./ Ты же, святе, даже до смерти непобедимь пребыл еси,/ Христу последовав верою.

Богородичен: Пресвятая Дево,/ Ты плотию родила еси Христа, Бога нашего,/ егоже ради святии мученицы, смерть приемше,/ ныне во свете славы радуются./ Темже, Пречистая, и нас, страдания мучеников почитающих,/ Царствия Небеснаго сподоби.

Песнь 6.

Ирмос: Житейское море,/ воздвизаемое зря,/ напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Господу последовасте верою, святии новомученицы,/ и, аще убиени бысте и безчестно в ров земный ввержени,/ обаче во Христе живот вечный приясте./ Ныне же Пасхи велия и священнейшия истее причащаетеся в невечернем дни Царствия Его.

Что тя наречем, священномучениче Арсение?/ Цвет ли духовный, яко добродетельми процвел еси?/ Грозд ли винограда Иисусова, яко кровь мученическую источил еси?/ Не престай молитися о нас, любовию чтущих память твою.

Мучениче Петре прехвальне,/ благогласным пением и чтением Богу добре послужив,/ вверенный ти талант, яко раб благий и добрый, страданием за Христа преумножил еси./ Темже в радость Господа твоего вшел еси,/ Емуже молися, святе, о чтущих память твою.

Богородичен: Пресвятая Мати Дево,/ изведи нас из рова погибели,/ яко древле Господь Иону из чрева китова,/ и уврачуй наша греховныя язвы,/ да неосужденно сподобимся прославляти пречестное и великолепое Имя Сына Твоего и Бога нашего.

Кондак, глас 2:

В житии добродетельми обогатившеся,/ во дни гонения безбожнаго,/ яко гроздие многообильное винограда Христова,/ кровь мученическую источили есте/ и во страданиих адаманта твердейшии явилися есте,/ новомученицы и исповедницы Шатурстии,/ молите Всеблагаго Бога/ даровати душам нашим велию милость.

Икос:

Спасовым победоносным Воскресением обогатившеся, святии,/ победно мучителей низложили есте/ и демонов немощныя дерзости сокрушили есте,/ сего ради с любвию вам в песнех возглашаем:/ радуйтеся, Церкве Русския столпи неодолимии,/ веры ради даже до крове подвизавшиися;/ радуйтеся, Иерусалима Горняго граждане новоизбраннии,/ и нас во след себе путеводящии./ Радуйтеся, ближайшии о нас ко Господу молитвенницы/ и усерднии ходатаи спасения нашего./ Радуйтеся, новомученицы и исповедницы Шатурстии,/ житием и подвиги светло просиявшии.

Песнь 7.

Ирмос: Росодательну убо пещь/ содела Ангел/ преподобным отроком,/ халдеи же опаляющее/ веление Божие/ мучителя увеща вопити:/ благословен еси, Боже, отец наших.

Яко истиннии ученицы Безначальнаго Слова Христа,/ закон любве евангельския исполнивше,/ души положисте за други своя./ Темже, на Небеси в любви Трисветлей почивающе,/ и наша сердца ко всех любящему Богу обратите, во еже пети Ему:/ благословен еси, Боже, отец наших.

Безсребренником подражатель быв, священномучениче Иоанне,/ милость и сострадание людем присно являл еси,/ послежде душу твою за паству Христову положил еси,/ за вся благодаря Бога и поя:/ благословен еси, Боже, отец наших.

Ублажим, вернии, священномученика Василия,/ пастырский долг добре исполнившаго/ и венцем страданий украсившагося./ Сей бо, яко доблий воин Христов, Престолу Божию ныне предстоит/ и со святыми новомученики и исповедники Российскими взывает:/ благословен еси, Боже, отец наших.

Богородичен: Яже паче ума и естества Бога рождши, Неискусомужная Марие,/ чтущия Тя от враг видимых и невидимых избави,/ Ты бо еси земли отцев наших Держава необоримая.

Песнь 8.

Ирмос: Из пламене преподобным росу источил еси/ и праведнаго жертву водою попалил еси,/ вся бо твориши, Христе, токмо еже хотети./ Тя превозносим во вся веки.

Во дни богоборныя брани новомученицы Российстии,/ якоже отроцы в пещи вавилонстей, огнем злобы не опалишася,/ честными бо потоки крове их пламень безбожия угасися./ Темже Избавителю вопияху:/ благословите, вся дела Господня, Господа.

Огнь испытаний тяжких и бурю лютых беззаконий мужественне претерпели есте, новомученицы,/ и, яко лествицею небовосходною, от земли в селения дивна, даже до Дому Божия, прешли есте,/ идеже гласом радования и исповедания Троице Единосущней поете:/ благословите, вся дела Господня, Господа.

Тричисленныя преподобномученицы Марие, Матроно и Марфо,/ тричисленныя дары Христу принесосте:/ страдания, яко злато,/ кровь честную, яко ливан,/ смерть непорочную, яко смирну,/ и, якоже древле трие отроцы, победную песнь воспевасте:/ благословите, вся дела Господня, Господа.

Богородичен: Христа зрящи умерщвляема, Многопетая Владычице,/ и, видящи исполнение Симеонова проречения, слезящи, взываше:/ благословен еси, Боже, во веки.

Песнь 9.

Ирмос: Бога/ человеком невозможно видети,/ на Негоже не смеют чини ангельстии взирати,/ Тобою же, Всечистая, явися человеком/ Слово воплощенно,/ егоже величающе,/ с Небесными вои Тя ублажаем.

Порфирою мученическою украсившеся, святии,/ Горняго Сиона страданьми достигосте/ и, тамо блаженства вечнаго наслаждающеся,/ молитвы вознесите ко Владыце о сродницех ваших.

Господи Боже наш,/ яко плод спасительнаго Твоего сеяния, приими новыя мученики и исповедники земли нашея,/ иже в лето спасительныя жатвы Твоея/ токи крове страдальческия источиша./ Тех молитвами, Человеколюбче, спаси души наша.

Ангелов хвалу и новомучеников славословие милостивно приемляй,/ не отрини, Триипостасный Боже, от сонма сего и нас, недостойных,/ но сподоби вкупе с ними воспевати:/ да благословит Господа Русь Святая и превозносит Его во веки.

Богородичен: Тя Преславную Божию Матерь,/ Славу Небесных и Упование земных,/ новомученицы и исповедницы Российстии славят, яко спасении Тобою./ Тех молитвами сподоби и нас, недостойных,/ прославляти Тя, яко усердную Заступницу нашу.

Светилен:

Света преумнаго зарею просвещаемь,/ лик светоносный днесь явися новомучеников и исповедников Шатурских,/ яже в нощи гонений безбожных, яко светильницы Христовы многосветлии,/ страданьми своими землю нашу просветиша и тьму нечестия в ней разсеяша./ ихже ныне в песнех ублажаем.

Слава, и ныне, Богородичен:

Стена необоримая и Покров всемощный новомучеником явилася еси, Пресвятая Дево./ Буди и нам во всяцем испытании крепкая Помощница.

На хвалитех стихиры, глас 5.

Подобен: Радуйся:

Радуйтеся, новомученицы Шатурстии,/ Царя Небеснаго избранная дружино,/ вы в годину гонений на Церковь Русскую/ на камени веры житие свое утвердили есте/ и, лютая мучения нивочтоже вменивше,/ кровь свою за Христа пролияли есте./ Ныне же, в Небесных кровех пребывающе/ и райскаго блаженства наслаждающеся,/ молитеся усердно Господеви,/ мир земли Российстей даровати/ и душам нашим велию милость.

Радуйтеся, страдальцы славнии,/ Церкве Русския столпи непоколебимии,/ похвало наша и утверждение/ и в житии благоотишное пристанище,/ вами бо земля Шатурская украшается/ и, яко сокровище духовное, страдания ваша приемлет./ Темже молите Прославльшаго вас Господа,/ в вере твердей нам присно пребывати/ и Царствия Небеснаго достигнути.

Радуйтеся, святии сродницы наши,/ Небеснаго Иерусалима граждане,/ вам приносим похвалы сия/ и со умилением взываем:/ путеводите нас ко спасению,/ наставляюще к нелицемерному покаянию./ Да вашею помощию и заступлением,/ добродетельно в мире поживше,/ Царствия Небеснаго сподобимся.

Слава, глас 8:

Приидите, мучениколюбцы вси,/ благочестно воспоим дружину славных мучеников,/ в земли Шатурстей пострадавших./ Сии бо, течение добре совершивше/ и веру Православную сохраньше,/ безбожных козни сокрушиша/ и от мира сего временнаго/ к вечному покою преставишася,/ идеже сладости райскаго блаженства наслаждаются/ и Престолу Божию предстоят,/ прославляюще Троицу Единосущную и Нераздельную.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

Или сей. Подобен: О, преславнаго чудесе:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

На Литургии

Блаженны от канона, песни 3-я и 6-я. Прокимен, глас 7: Бог нам Прибежище и Сила. Стих: Помощник в скорбех, обретших ны зело. Апостол к Римляном, зачало 99 (гл.8:31–39) Евангелие от Луки, зачало 105–106. Конец: В терпении вашем стяжите души ваша: (гл.21:8–19). Причастен: Радуйтеся, праведнии, о Господе, правым подобает похвала:

Источник: Гимнограф.ру

Месяца августа в 24-й день

Преподобнаго Аристоклия, Московскаго чудотворца

На малой вечерни

На Господи, воззвах: стихиры на 4, глас 2:

Мира земнаго красоту отринув/ и славы, яже едина от Бога, взыскав,/ стопы ко Святей горе Афонской направил еси/ и милостию Владычицы Богородицы/ сего пристанища спасения достигл еси,/ в радости славя Бога Благодетеля,/ хотящаго всем спастися и в разум истины приити.

Песньми церковными прославляюще в радовании,/ восхвалим, вернии людие,/ преблаженнаго старца Афонскаго/ и чудотворца Московскаго Аристоклия,/ Божия избранника и возлюбленное чадо Богородицы,/ той бо, имея дерзновение ко Господу,/ молится о спасении душ наших.

Плоть ветхаго человека/ в поте трудов твоих смирил еси,/ преподобне Аристоклие,/ душу же в подвизех веры и любве,/ якоже древнии отцы, укрепил еси,/ сего ради Богу угодил еси,/ егоже моли спастися душам нашим.

Слава, глас 6:

Егда достигл еси в меру возраста духовнаго,/ послаша тя старцы обители Афонския/ во град первопрестольный Москву,/ да подъемлеши труды пастырския/ и утвердиши веру людей православных,/ многими обдержимых напастьми.

И ныне, Богородичен, глас тойже:

Богородице, Ты еси Лоза истинная,/ возрастившая нам Плод живота,/ Тебе молимся, молися, Владычице,/ со святыми апостолы,/ помиловати души наша.

На стиховне стихиры, глас 6.

Подобен: Тридневен:

Преблаженне отче Аристоклие,/ пространный путь суеты мирския оставив/ и всего себе воли Божией предав,/ стезю монашескаго многотруднаго жития,/ не обинуяся, избрал еси/ и, во дни и нощи Господеви неленостно поработав,/ Царство Небесное унаследовал еси,/ идеже есть всех веселящихся жилище.

Стих: Честна пред Господем/ смерть преподобных Его.

Днесь торжествует Святая гора Афонская/ и радуется первопрестольный град Москва,/ празднующе честную память преподобнаго Аристоклия,/ той бо дерзновенно молится/ пред Престолом Бога Вышняго/ о спасении душ наших.

Стих: Блажен муж, бояйся Господа,/ в заповедех Его восхощет зело.

Преподобне отче Аристоклие,/ приими моление наше,/ да избавимся от бури бед и искушений/ и всяких напастей вражиих,/ ты бо имаши дерзновение ко Владыце Христу,/ спасающему род человеческий.

Слава, и ныне, глас 8:

Владычице, приими молитвы раб Твоих/ и избави нас/ от всякия нужды и печали.

На велицей вечерни

Блажен муж: 1-й антифон. На Господи, воззвах: стихиры на 8, глас 2:

Преподобне отче Аристоклие,/ ты, издетска Богу в любви прилежав,/ силу благодати Божия познал еси,/ еюже со одра болезни тяжкия/ здрав востал еси/ и в радости воспел еси:/ слава Тебе, Господи, благодеявшему ми.

Преблаженне отче Аристоклие,/ измлада верою душу утвердив,/ великому угоднику Божию Николаю/ материю твоею молитися научен был еси,/ егоже ходатайством воздвиже тя Господь/ от недуга тяжка и мучительна.

Мира сего славу возненавидев/ и душу твою горе устремив,/ единаго Бога зрети вожделел еси/ и Тому единому служити поревновал еси,/темже дарова ти Господь по сердцу твоему/ зрети славу Небесную/ и благодатию тя яве просвети,/ сего ради ублажаем тя,/ угодниче Божий Аристоклие.

Ныне славит тя земля Оренбургская,/ идеже ты, избранниче Божий, родился еси,/ и в благочестии материю своею воспитан быв,/ в меру мужа совершенна достигл еси,/ жития иноческаго возжадал еси/ и имже вшел еси в чертог славы Небесныя.

Глас 8:

Преподобне отче Аристоклие,/ прият тя Святая гора Афонская,/ идеже сподоби тя Пречистая Богородица/ чин ангельский восприяти./ Ты же, от силы в силу восходя,/ демонския полки победил еси/ и в подвизех Христа Бога прославил еси,/ егоже днесь с лики горних сил присно воспеваеши.

Радуйся, священная главо,/ преподобне отче Аристоклие,/ иноков изрядный наставниче/ и усердный о людех пред Богом предстателю!/ Ты бо, красотою духовною обитель твою озаряя/ и лукавых духов силою молитв сокрушая,/ дерзновение велие к Человеколюбцу Христу стяжал еси,/ егоже моли спастися душам нашим.

Преславне отче Аристоклие,/ ублажает тя земля Московская,/ в нюже вселился еси,/ идеже, исполняя послушание отцев святогорских/ во устроении подвория Афонскаго,/ наипаче же в окормлении душ человеческих,/ усердно потрудился еси,/ многия бо привел еси ко спасению/ и наследию Царствия Небеснаго.

Воспоим любовию, братие,/ подвиги преподобнаго отца Аристоклия,/ пречестнаго старца Афонскаго/ и прехвальнаго чудотворца Московскаго,/ той бо многое попечение о страждущих/ и от демонов мучимых в житии своем яви./ И ныне присно молится Христу Богу/ о спасении душ наших.

Слава, глас 6:

Бог, прославляемый в совете святых/ и преподобными гласы воспеваемый,/ ныне приемлет тя, преподобне отче Аристоклие,/ яко цевницу духовную,/ с лики ангельскими славящую/ Троицу Живоначальную,/ Отца и Сына и Святаго Духа.

И ныне, Богородичен, глас тойже: Кто Тебе не ублажит:

На литии стихиры, глас 5:

Подобен: Радуйся:

Радуйся, священная главо,/ преподобне отче Аристоклие,/ горних чинов собеседниче,/ монахов богомудрый наставниче,/ скорбящих утешение,/ недугующих исцелителю,/ заблудших вразумление/ и о всех, хотящих спасения,/ усердный молитвенниче.

Слава, глас 6:

Яко ангел во плоти,/ на земли пожил еси,/ преподобне отче Аристоклие,/ и, Духа Всесвятаго благодать стяжав,/ сокровище некрадомое обрел еси./ Темже и Христос Бог прослави тя,/ яко вернаго слугу Своего,/ и введе в Чертог славы вечныя.

И ныне, Богородичен, глас тойже: Творец и Избавитель:

На стиховне стихиры, глас 2:

Приидите, возрадуемся, людие,/ празднующе память добропобеднаго мужа,/ преподобнаго отца нашего Аристоклия,/ той бо, многотрудным путем земнаго странствия шествуя,/ силою смирения, терпения и послушания/ лютыя козни вражия посрами./ Сего ради славою вечною/ увенча Человеколюбец Господь угодника Своего.

Стих: Праведник яко финикс процветет/ и, яко кедр, иже в Ливане, умножится.

Отче святый Аристоклие,/ настави нас на путь правый,/ имже добре шествуя,/ стяжал еси велия добродетели,/ веру, надежду и любовь,/ и возшел еси враты райскими в Небесный чертог,/ уготованный Господем всем, любящим Его.

Стих: Честна пред Господем/ смерть преподобных Его.

Славят тя, преблаженне отче Аристоклие,/ земля Московская и Святая гора Афонская,/ ты бо, подвиги монашескаго жития подъем,/ повеленная от Господа исполнил еси,/ егоже моли спастися душам нашим.

Слава, глас 1:

Кто возможет изрещи труды и подвиги твоя,/ преподобне старче Аристоклие?/ Кто познает брани твоя/ с похотию плоти, очес и гордостию житейскою?/ Кто не удивится неустанному попечению твоему/ о спасении чад духовных?/ Ты бо, яко пастырь добрый,/ душу полагал еси за овцы своя./ Темже восхваляем тя,/ яко небеснаго молитвенника/ о чтущих любовию святую память твою.

И ныне, глас тойже, Богородичен: Се исполнися Исаиино проречение:

Тропарь, глас 4:

На Святей горе Афонской духовне утвердився,/ яко звезда пресветлая, во граде Москве просиял еси,/ Духа же Святаго благодать стяжав,/ мир Христов в души твоей восприял еси,/ преподобне отче Аристоклие,/ моли Христа Бога/ спастися душам нашим.

На утрени

На Бог Господь: тропарь святаго дважды. Слава, и ныне, Богородичен: Еже от века утаенное:

По 1-м стихословии седален, глас 8:

Мира сего суету презрев, нетленных Небесных благ ревностне вожделел еси, богоносе отче Аристоклие, и, Подвигоположнику Христу невозвратно последовав, Царствие Божие внутрь себе стяжал еси, добродетельми же многими душу твою украсив, Троицу Живоначальную прославил еси, Ейже молися о спасении душ наших.

Слава, и ныне, Богородичен, глас тойже:

Яко Всенепорочная Невеста Творца, яко Неискусомужная Мати Избавителя, Приятилище яко сущи Утешителя, Всепетая, беззакония мя суща скверно жилище и демонов игралище в разуме бывша, потщися и сих злодействия мя избавити, светло жилище добродетельми соделавши. Светодательная и нетленная, разжени облак страстей и Вышняго причастия сподоби, и Света Невечерняго молитвами Твоими.

По 2-м стихословии седален, глас 3:

Взем иго Христово на рамо свое, смирению и кротости от Божественнаго Пастыреначальника научился еси, и в терпении душу твою стяжав, в радость Господа Вседержителя вшел еси и жилище вечных благ, уготованное верным чадам Божиим от сложения мира, наследовал еси. Сего ради вопием ти, отче преблаженне Аристоклие: радуйся и веселися, яко мзда твоя многа на Небесех.

Слава, и ныне, Богородичен, глас тойже:

Яко невозделанная, Дево, Лоза, прекрасный Грозд, Христа, возрастила еси, источающа нам вино спасительное, всех веселящее души и телеса. Темже, яко виновну Тя добрых ублажающе, присно со Ангелом вопием Ти: радуйся, Обрадованная, Господь с Тобою.

По полиелеи, седален, глас 8:

Славит тя, угодниче Божий Аристоклие, первопрестольный град, обретый в радости велией твоя цельбоносныя мощи. Темже не забуди нас, чтущих твою святую память, но присно поминай, да твоими молитвами Человеколюбец Христос спасет души наша.

Слава, и ныне, Богородичен:

О Тебе радуется, Благодатная, всякая тварь, ангельский собор и человеческий род, освященный Храме и Раю словесный, девственная Похвало, из Неяже Бог воплотися и Младенец бысть, прежде век Сый Бог наш, ложесна бо Твоя престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Возжелав града Небеснаго,/ прелестнаго мира сего, во зле страстей лежащаго,/ мужественне отреклся еси/ и в удел Пресвятыя Богородицы/ с радостию вселился еси,/ Еяже Покровом вся стрелы разженныя угасил еси/ и, яко крин сельный, процвел еси/ в преподобстве и правде.

Канон преподобнаго, глас 8.

Песнь 1.

Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Богоблаженне отче Аристоклие, измлада скорбная обстояния претерпевая, Христа всем сердцем возлюбил еси, егоже с лики ангельских сил на Небесех непрестанно ныне славословиши.

Тяжкую болезнь во отрочестве претерпев, молитвами матере твоея от святителя Николая исцеление получил еси, темже, Чудотворцу великому подражая, правило веры и образ благочестия людем явил еси.

Плоть распяв со страстьми и похотьми, в вертоград Святыя горы Афонския вселился еси и всего себе воли старцев обители покорил еси. Темже Господь твое сердце чисто содела и дух прав обнови во утробе твоей.

Богородичен: Чудес Твоих Божественных множество благохвалити предначиная, Тя, Дево, со умилением молю: благодать Твою подаждь ми, недостойному.

Песнь 3.

Ирмос: Утверждей в начале Небеса разумом/ и землю на водах основавый,/ на камени мя, Христе, заповедей Твоих утверди,/ яко несть свят паче Тебе,/ Едине Человеколюбче.

В подвизех монашескаго жития преуспевая, вся козни демонския силою веры и упованием на Христа превозмогл еси, Имже и вечною славою увенчан был еси.

Послушания отцем богомудрым добрый рачитель быв, иго Христово благое на рамо подъял еси и во брани с духами злобы поднебесными, яко столп непоколебим, явился еси.

Гора Святая Афонская торжествует, земля же Московская проповедует великия подвиги твоя, имиже вся злокозненная искушения, яко доблий воин Христов, препобедил еси.

Богородичен: Неизреченно зачала еси, Богоневесто Пречистая, Господа и Спаса, от лютых зол избавляющаго с верою призывающих Тя.

По 3-й песни седален, глас 4:

Имже образом желает елень на источники водныя, сице возжада душа твоя, преподобне отче Аристоклие, к Богу Жизнодавцу, сего ради, вся красная мира земнаго презрев, на благословенней горе Афонской и в земли Русской усердне потрудился еси и тако житием твоим праведным Господа Бога прославил еси.

Слава, и ныне, Богородичен:

Владычицу Тя мира вемы, Дево Всепетая, яко родила еси нам всех Творца и Спасителя мира, Иже и прослави Тя, Пречистую Матерь Свою, подая нам Тобою благодать и велию милость.

Песнь 4.

Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Всего себе всеблазей воли Божией покорив и вся повеления отцев духовных исполнив, в землю Русскую возвратился еси и многоскорбный труд пастырства подъял еси.

Людие, многими болезньми душевными и телесными одержимии, отче святый, притекаху к тебе, просяще скорыя помощи, и исцеляхуся.

Силою благодати, данною тебе свыше, болезнующих из нездравия во здравие приводил еси, иже и славляху Многомилостиваго Бога.

Богородичен: Не имамы, раби Твои, инаго предстательства и покрова разве Тебе, Владычице. Темже, Чистая, от сердца вопием: всякия беды свободи всех верных, к Тебе прибегающих.

Песнь 5.

Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго?/ Но обрати мя и к свету заповедей Твоих/ пути моя направи, молюся.

Многи скорби претерпел еси, егда супостат диавол наусти людей оглаголати тя, отче преподобне, обаче смирением вся вражия козни препобедил еси и венец победный от Господа приял еси.

Егда обличися неправда, воздвигнутая на тя, отче святый, паки послаху тя старцы афонстии во град Москву, идеже паче преждняго в добродетелех подвизался еси.

Недугующии притекаху к тебе, отче праведне, и никтоже тощь отхождаше, чудесем, тобою сотворенным, дивящеся и Бога, дивнаго во святых Своих, славяще.

Богородичен: Несть, иже к Твоему притече покрову, и не улучи, Отроковице, многих Твоих щедрот. Темже и аз молюся, не лиши мя Твоего заступления.

Песнь 6.

Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже спасения моего.

Христовою любовию уязвився, отче преподобне, оставил еси вся, яже в мире сем и, горе ум вперив, точию о Небеснем помышлял еси.

Многия труды во граде Москве подъял еси, подворие Святыя горы Афонския устрояя, да молитвою послужит братия людем страждущим и в нуждех сущим.

Возлюбленное чадо Пречистыя Богородицы был еси, отче, присно моляся пред святою иконою Скоропослушницею и храм в честь Ея воздвигл еси, да присно славится имя Богоотроковицы Марии.

Богородичен: Радуйся, Купино Неопалимая, юже Моисей виде на Синаи, и Лествице высокая, юже Иаков виде, Преблагословенная Богородице Приснодево.

Кондак, глас 8:

Яко звезда на тверди небесней возсиял еси/ и, путь многотруднаго монашескаго жития прошед,/ подвигами добродетелей венец нетленный стяжал еси,/ темже и Христос Бог даром чудес обогати тя./ Поминай нас, чтущих святую память твою, преподобне отче Аристоклие,/ горы Афонския похвало и земли Русския украшение.

Икос:

В страсе Божием соделовая путь спасения, преподобне, утвердился еси словом апостольским, яко любы мира сего вражда Богу есть и, иже восхощет друг быти миру, враг Божий бывает. Темже, вся блага земная во уметы вменив, руку свою на рало возложил еси и отнюдь вспять не зрел еси, но, прямо стопы твоя по словеси Господню направляя, мир и покой в души твоей обрел еси. Сего ради и Бог тя прослави, яко вернаго раба Своего, и увенча, яко добропобеднаго воина Царя Небеснаго.

Песнь 7.

Ирмос: Божия снизхождения/ огнь устыдеся в Вавилоне иногда,/ сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.

В годину тяжких гонений в земли нашей яко свеща горящая просиял еси, мрак неверия прогоняя, немощныя укрепляя, малодушныя утверждая и унывающия к Богу подвигая.

Твердо веру Христову исповедуя, бурю, от богопротивник воздвизаемую, утишал еси и всех, притекающих к тебе, во уповании на Бога Промыслителя утверждал еси.

Добрый пастырь явился еси, отче преблаженне, душу свою за овцы полагая, и до последняго воздыхания стадо, еже собрал еси, окормлял еси и от сетей вражиих ограждал еси.

Богородичен: Сына Отча Единороднаго, безматерня первее и из Тебе рожденна, уведевше безотча, Божию Матерь исповедуем Тя, безстрастно рождшую и Деву пребывшу паче слова, Марие Богоневесто.

Песнь 8.

Ирмос: Седмерицею пещь/ халдейский мучитель/ богочестивым неистовно разжже,/ силою же лучшею спасены сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Со ангелы вселися душа твоя, отче святый, идеже несть печаль, болезнь и воздыхание. Темже молим тя: предстательствуй пред Престолом Бога живаго о нас, любовию чтущих память твою.

Исполнив закон Христов, веру соблюл еси, течение земное скончал еси, Царствие Небесное наследовал еси. Не забуди и нас, убогих чад твоих, отче преподобне, но молися Всемилостивому Богу, да спасет души наша.

Воли своея до конца совлекся, преподобне отче, Богови покорился еси и крест земнаго жития в терпении пронесл еси. Темже прослави тя Христос, премудре спасаяй род человеческий.

Богородичен: Чудес паче всех, Всенепорочная,/ в Тебе новосодеявшееся чудо показася явственно:/ Бога бо родила еси телесне,/ земным за милосердие соединившася в неслитнем соединении, Богоневесто.

Песнь 9.

Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

В преставлении твоем, отче святый, возрадовашася Небесныя Силы, сретающе душу твою, и Господь введе тя в райския обители, яко вернаго раба Своего.

Новое чудо яви нам Господь молитвами твоими, преподобне, даровав обрести цельбоносныя мощи твоя, во утешение всех, чтущих святую память твою и благодарящих Бога, дивнаго во святых Своих.

Рака святых мощей твоих, отче досточудне, источает милости всем, с верою к тебе притекающим, иже и воспевают велие твое дерзновение пред Владыкою Христом о спасении душ погибающих.

Богородичен: Небо небес вышшее явилася еси Божественною Твоею славою, Богоневесто Владычице, в Тя бо Бог наш вселися и явися нам.

Светилен:

На Святей горе Афонской усердно подвизаяся, братию обители, яко наставник изрядный, ко спасению приводил еси; в земли же Русской свое богоугодное житие скончал еси. Ныне с высоты Небесныя посылаеши помощь чтущим твою святую память, отче святый Аристоклие.

Слава, и ныне, Богородичен:

Тя Заступницу вси имамы, грешнии, о Пресвятая Дево! Благоуветлива нам соделай Сына Твоего матерними Твоими мольбами.

На хвалитех стихиры на 4, глас 2:

Приидите, людие, прославим днесь/ праведнаго и богоноснаго Аристоклия,/ доброславнаго угодника Божия,/ Афонскаго древа жизни благую отрасль/ и Русския земли цвет благоуханный,/ и тому с верою возопиим:/ спасай нас, отче преподобне, молитвами твоими/ от всякаго зла и лютых обстояний.

Измлада милость Божию познав/ и исцеление от тяжкаго недуга улучив,/ всею душею Творцу всяческих прилепился еси/ и, суетная мира сего оставив,/ стопы твоя, блаженне отче, к горе Афонской направил еси,/ идеже сладость жития во Христе обрел еси.

Послушания добрый рачитель быв,/ николиже отцем духовным прекословил еси,/ темже, от силы в силу восходя,/ мир и покой души твоей обрел еси/ и чадо возлюбленное Пресвятыя Богородицы явился еси./ Молися о нас, преподобне отче Аристоклие,/ да терпением скорбей смирим себе/ и наследницы Царствия Небеснаго соделаемся.

Слава, глас 6:

Восхвалим днесь вернии,/ преподобнаго старца Аристоклия,/ чадо возлюбленное Пресвятыя Богородицы,/ горы Афонския похвалу/ и земли Московския украшение,/ иже, предстоя Престолу Божию,/ прославляет Троицу Единосущную/ и молится о душах наших.

И ныне, Богородичен, глас тойже:

Богородице, Ты еси Лоза истинная,/ возрастившая нам плод живота,/ Тебе молимся, молися, Владычице,/ со святыми апостолы и преподобным Аристоклием/ помиловати души наша.

Славословие великое, ектении и отпуст.

На Литургии

Блаженны от канона святаго, песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник:

Источник: Текст утвержден Священным Синодом Русской Православной Церкви 9 июля 2019 г. (журнал № 82)

Ме́сяца ианнуа́рия в 25-й день

Собо́р новому́чеников и испове́дников Це́ркве Ру́сския

Зри. Ве́стно бу́ди, я́ко а́ще сий 25-й день случи́тся в неде́лю, слу́жба новому́чеников и испове́дников пое́тся в сию́ неде́лю.

А́ще же в понеде́льник, вто́рник или́ сре́ду случи́тся, пое́тся слу́жба их в предыду́щую неде́лю.

А́ще же в четверто́к, пято́к или́ суббо́ту, пое́тся слу́жба их в гряду́щую неде́лю.

На ма́лей вече́рни

На Го́споди, воззва́х: стихи́ры воскре́сны гла́са.

Сла́ва, новому́чеников, глас 1:

О вели́цыи страстоте́рпцы,/ новому́ченицы Росси́йстии,/ с любо́вию припа́даем к вам/ и, благогове́йно лобыза́юще ра́ны ва́ша,/ прославля́ем ва́ша по́двиги и мо́лимся:// моли́те о душа́х на́ших.

И ны́не, Богоро́дичен гла́са.

На стихо́вне стихи́ры новому́чеников, глас 6.

Подо́бен: Тридне́вен:

Помяни́, Го́споди, и́же о Тебе́ пострада́вшия,/ но́выя страстоте́рпцы,/ от родо́в на́ших прозя́бшия/ и му́ки многоразли́чныя претерпе́вшия,/ и приими́ их моле́ния// о спасе́нии на́шем.

Стих: Мне же зело́ че́стни бы́ша// дру́зи Твои́, Бо́же.

Дарова́л еси́, Судие́ пра́ведный,/ испове́дником Це́ркве Росси́йския/ Ца́рство Небе́сное/ и блаже́нство ве́чное./ Приими́ ны́не, Го́споди, моле́ние их// о спасе́нии душ на́ших.

Стих: Изочту́ их// и па́че песка́ умно́жатся.

Я́ко зве́зды пресве́тлыя,/ сия́ют на Небеси́ новому́ченицы Росси́йстии,/ кровь же их свята́я удобри́ зе́млю Ру́сскую/ во освяще́ние и благослове́ние./ Тех моли́твами, Христе́ Бо́же,// поми́луй и спаси́ ду́ши на́ша.

Сла́ва, глас и подо́бен то́йже:

О Тро́ице Пресвята́я,/ род наш от грехо́внаго плене́ния изба́ви/ и на путь пра́вый наста́ви/ предста́тельством новому́ченик Росси́йских,/ и́же мо́лят Тя, Триипоста́сный Бо́же,// о спасе́нии душ на́ших.

И ны́не, Богоро́дичен, глас то́йже:

О Благода́тная и Пречи́стая Де́во Мари́е,/ Хода́таице и Засту́пнице всех ве́рных,/ предста́тельством новому́чеников и испове́дников Росси́йских/ расточе́нныя собери́, малоду́шныя возста́ви,/ отпа́дшия же от святы́я ве́ры обрати́// и в церко́вное ло́но возврати́.

Тропа́рь воскре́сен.

Сла́ва, новому́чеников, пи́сан на вели́цей вече́рни.

И ны́не, Богоро́дичен.

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры воскре́сны гла́са три,

и анато́лиева 1, и новому́чеников 6.

Стихи́ры новому́чеников, глас 5.

Подо́бен: Ра́дуйся:

Ра́дуйтеся, новому́ченицы и испове́дницы Росси́йстии,/ правосла́вных удобре́ние,/ новозакла́ннии а́гнцы,/ ве́ры побо́рницы и храни́телие,/ хода́таи о нас к Бо́гу непосты́днии,/ в ле́та после́дняя/ страда́ньми подража́телие пе́рвым му́чеником яви́стеся,/ терпе́ния столпи́ непоколеби́мии,// душа́м на́шим испроси́те ве́лию ми́лость.

Ра́дуйтеся, страстоте́рпцы сла́внии,/ стопа́м после́дующе дре́вних му́ченик,/ ве́ры ра́ди подвиза́стеся тве́рдо/ в лю́тая времена́ земли́ на́шея/ и ны́не всех подвиза́ете к сла́ве и хвале́нию Бо́га,/ укре́пльшаго ва́ше немощно́е естество́/ и обогати́вшаго вас дарова́ньми Ду́ха,// во спасе́ние душ на́ших.

Творе́ние святи́теля Афана́сия Ковро́вскаго.

Глас и подо́бен то́йже:

Прииди́те, Небе́снии предста́телие на́ши, к нам,/ ва́шего ча́ющим ми́лостивнаго посеще́ния,/ и изба́вите озло́бленныя мучи́тельскими преще́нии/ лю́таго неи́стовства неве́рных,/ от ни́хже, я́ко пле́нницы и на́зи, гони́ми есмы́,/ от ме́ста на ме́сто ча́сто преходя́ще/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю/ и угаси́те е́же на ны негодова́ние,/ Бо́га моля́ще,// подаю́щаго ва́ми земли́ на́шей ве́лию ми́лость.

И́ны стихи́ры новому́чеников, глас 6.

Подо́бен: Все отло́жше:

Святи́телю о́тче Ти́хоне,/ архипа́стырю многострада́льне,/ ты в годи́ну лю́тых безбо́жных гоне́ний/ ве́рная ча́да Це́ркве Росси́йския,/ утеша́я, призыва́л еси́/ за Христа́ и ве́ру Правосла́вную му́жественне стоя́ти,/ сам же, по вся дни умира́я за па́ству твою́,/ испове́дник непоколеби́мый яви́лся еси́.// Сего́ ра́ди тя с любо́вию прославля́ем.

Па́стырю и́стинный,/ священному́чениче Влади́мире,/ егда́ беззако́ннии понужда́ху тя/ Це́ркве Росси́йския отступи́ти,/ ве́рен де́лом и сло́вом/ святи́телю Ти́хону пребы́л еси́/ и я́ко свяще́нная же́ртва от Ки́ева, ма́тере градо́в ру́сских,/ Бо́гу прине́слся еси́,/ моля́ся о убива́ющих тя.// Сего́ ра́ди тя усе́рдно прославля́ем.

Священному́чениче Вениами́не,/ Це́ркве Христо́вы и́стинный сы́не/ и благостоя́ния ея́ усе́рдный ревни́телю,/ проти́ву лжепа́стырей, тща́щихся расхи́тити ста́до твое́,/ му́жественне стал еси́/ и, не убоя́вся преще́ний и лжесвиде́тельств мучи́телей,/ обрати́л еси́ суд на главу́ суди́вших тя,/ та́же сме́ртию твое́ю/ Правосла́вие утверди́л еси́.// Сего́ ра́ди тя усе́рдно ублажа́ем.

Сла́ва, новому́чеников, глас 5:

Всевы́шний Влады́ко,/ в Тро́ице сла́вимый и покланя́емый,/ уще́дри ны благоприя́тными мольба́ми/ но́вых му́ченик Твои́х,/ пред мучи́тели дерзнове́нно испове́давших Тя/ Еди́наго и́стиннаго Бо́га/ и Твое́, Сы́не Бо́жий,/ неизрече́нное от Ма́тере Де́вы// спаси́тельное воплоще́ние.

И ны́не, Богоро́дичен.

Вход. Проки́мен дне. И чте́ния новому́чеников.

Дея́ний святы́х апо́стол чте́ние (глава́ 4):

В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́вльше Петра́ и Иоа́нна посреде́, вопроша́ху:/ ко́ею си́лою, или́ ко́им и́менем исцели́ста хрома́го?/ Петр, испо́лнився Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния./ Несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново, и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста./ Ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма, ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те? Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем./ Лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпуще́на же бы́вша, приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре, и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

К Тимофе́ю посла́ния свята́го апо́стола Па́вла чте́ние (глава́ 4):

Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и ца́рствии Его́:/ пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем уклоня́тся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.

К Евре́ем посла́ния свята́го апо́стола Па́вла чте́ние (глава́ 11):

Бра́тие,/ и́же ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ льво́в,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и у́з и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лише́ни, скорбя́ще, озло́блени./ И́хже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.

На лити́и стихи́ра хра́ма.

И новому́чеников, глас 6.

Творе́ние святи́теля Афана́сия Ковро́вскаго.

Подо́бен: Отча́янная:

Отча́янни есмы́/ жития́ ра́ди/ и не и́мамы нра́ва доброде́тельна,/ я́ко ми́ро, прино́сим Ти, Го́споди,/ моли́твы святы́х сро́дников на́ших./ Не отве́ржи Русь, издре́вле Святу́ю,/ ны́не же грехо́в на́ших ра́ди лю́те стра́ждущую./ Не пре́зри сле́зы ве́рных сыно́в,/ коле́н свои́х пред Ваа́лом не преклоня́вших,/ и и́хже не порази́л еси́, согреша́ющих./ Приими́ нас, ка́ющихся, Бо́же,// святы́х Твои́х мольба́ми.

Сла́ва, глас 8:

Прииди́те, мучениколю́бцы,/ прииди́те, соста́вим лик,/ торжеству́юще и Бо́га прославля́юще/ в ра́достный пра́здник новому́чеников и испове́дников Росси́йских,/ си́и бо не уклони́шася ско́рби,/ ни убоя́шася темни́цы,/ го́рькими рабо́тами, гла́дом и хла́дом изморе́ни/ и многови́дными му́ками умерщвля́еми,/ я́ко а́гнцы незло́бивии, смерть прия́ша./ И ны́не в ра́дости святы́х// мо́лят Триеди́наго Бо́га о земне́м оте́честве свое́м.

И ны́не, глас то́йже:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

На стихо́вне стихи́ры воскре́сны гла́са. Сла́ва, новому́чеников, глас 2: Но́вый до́ме: И ны́не, Богоро́дичен, глас 8: О, пресла́внаго чудесе́:

Стихи́ры новому́чеников, глас 2.

Творе́ние святи́теля Афана́сия Ковро́вскаго.

Подо́бен: До́ме Евфра́фов:

Земле́ Ру́сская,/ гра́де святы́й,/ украша́й твой дом,/ в не́мже Боже́ственный// ве́лий сонм святы́х просла́ви.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Це́рковь Ру́сская,/ красу́йся и лику́й,/ се бо ча́да твоя́/ Престо́лу Влады́чню// во сла́ве предстоя́т, ра́дующеся.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Собо́ре святы́х ру́сских,/ по́лче Боже́ственный,/ моли́теся ко Го́споду/ о земно́м оте́честве ва́шем// и о почита́ющих вас любо́вию.

Слава́, глас и подо́бен то́йже:

Но́вый до́ме Евфра́фов,/ уде́ле избра́нный,/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

И ны́не, Богоро́дичен, глас 8.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

На благослове́нии хле́бов

Богоро́дице Де́во: два́жды

и тропа́рь новому́чеников еди́ножды.

Тропа́рь новому́чеников, глас 4:

Днесь ра́достно лику́ет Це́рковь Ру́сская,/ прославля́ющи новому́ченики и испове́дники своя́:/ святи́тели и иере́и,/ ца́рственныя страстоте́рпцы,/ благове́рныя кня́зи и княги́ни,/ преподо́бныя му́жи и жены́/ и вся правосла́вныя христиа́ны,/ во дни гоне́ния безбо́жнаго/ жизнь свою́ за ве́ру во Христа́ положи́вшия/ и кровьми́ и́стину соблю́дшия./ Тех предста́тельством, долготерпели́ве Го́споди,/ страну́ на́шу в Правосла́вии сохрани́// до сконча́ния ве́ка.

На у́трени

На Бог Госпо́дь: тропа́рь воскре́сен, два́жды. Сла́ва, новому́чеников. И ны́не, Богоро́дичен.

По 1-м и 2-м стихосло́вии седа́льны воскре́сны с Богоро́дичны их. По полиеле́и два седа́льна новому́чеников, глас 4 (пи́саны по 1-м и 2-м стихосло́вии). Сла́ва, полиеле́йный седа́лен новому́чеников, глас 6. И ны́не, Богоро́дичен, глас 8.

По 1-м стихосло́вии седа́лен, глас 4:

Новому́ченицы Росси́йстии,/ кро́вию свое́ю ве́ру запечатле́вшии,/ Влады́ку всех моли́те/ Це́рковь Ру́сскую в Правосла́вии утверди́ти,/ зе́млю на́шу от скверн очи́стити,/ лю́ди во благоче́стии сохрани́ти/ во о́бщее всех спасе́ние.

Сла́ва, и ны́не, Богоро́дичен, глас то́йже:

В кров Твой, Пречи́стая Де́во, прибега́ющих, мольбу́ прие́млеши от нас,/ не преста́й моля́щи Человеколю́бца,/ спасти́ рабы́ Твоя́.

По 2-м стихосло́вии седа́лен, глас 4:

И́же в земли́ Росси́йстей новому́ченик и испове́дник Твои́х,/ я́ко багряни́цею и ви́ссом,/ кровьми́ Це́рковь Ру́сская украси́вшися, Христе́ Бо́же, те́ми вопие́т Ти:/ лю́дем щедро́ты Твоя́ низпосли́,/ мир жи́тельству Твоему́ да́руй/ и душа́м на́шим ве́лию ми́лость.

Сла́ва, и ны́не, Богоро́дичен, глас то́йже:

И́же благода́рно воспева́ющии от се́рдца, и прося́щии приле́жно Твоя́ ми́лости, Богоро́дице Влады́чице,/ раби́ Твои́ зову́т и глаго́лют:/ Пресвята́я Де́во, предвари́ и изба́ви от враг ви́димых и неви́димых, и вся́каго преще́ния:/ Ты бо еси́ на́ше заступле́ние.

Велича́ние:

Велича́ем вас,/ святи́и новому́ченицы и испове́дницы Росси́йстии,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам прибе́жище и си́ла:

По полиеле́и седа́лен, глас 6.

Творе́ние святи́теля Афана́сия Ковро́вскаго:

Мужа́йся, Христо́ва Це́рковь,/ и держа́вствуй над всу́е борю́щими,/ Христо́ви бо дру́зи о тебе́ пеку́тся,/ и предстоя́ще, и обстоя́ще,/ и́хже о́бщий пра́здник/ ны́не соверша́еши све́тло.

Сла́ва, и ны́не, Богоро́дичен, глас 8:

Я́ко Де́ву и еди́ну в жена́х Тя без се́мени ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пречи́стое Рождество́ Твое́, и согла́сно вопие́м Ти:/ моли́ Христа́ Бо́га, согреше́ний оставле́ние дарова́ти,/ покланя́ющимся ве́рою пресвято́му Рождеству́ Твоему́.

А́ще храм новому́чеников, проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Ева́нгелие от Матфе́я, зача́ло 36.

По 50-м псалме́ стихи́ра, глас 6:

Це́ркве Ру́сския столпи́ непоколеби́мии,/ собо́ре новому́чеников и испове́дников Росси́йских,/ се́рдцем ве́рующе в пра́вду,/ усты́ Го́спода Иису́са Христа́ испове́дали есте́ во спасе́ние/ и заточе́ния, изгна́ния, го́рькия рабо́ты и смерть/ Бо́га ра́ди сла́дце претерпе́ли есте́./ Те́мже те́пле моли́теся ко Го́споду,/ Русь Святу́ю в Правосла́вии утверди́ти// и спасти́ ду́ши на́ша.

Кано́н воскре́сен, со ирмосо́м на 4, Богоро́дицы на 2 и новому́чеников на 8.

Кано́н новому́чеников, глас 6.

Песнь 1.

Ирмо́с: Се́ченое сече́тся/ мо́ре Чермно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же богокра́сная воспева́шеся:// сла́вно просла́вися Христо́с Бог наш.

Припе́в: Святи́и новому́ченицы и испове́дницы Росси́йстии,/ моли́те Бо́га о нас.

Го́споди, Бо́же наш, при́сно прославля́яй вся святы́я,/ ны́не и нас, недосто́йных, сподо́би сыно́вне просла́вити святы́х сро́дников на́ших,/ новому́чеников и испове́дников Росси́йских.

Кровьми́ ва́шими, священному́ченицы, я́ко в Чермне́м мо́ри, потопи́ли есте́ безбо́жныя мучи́тели,/ Це́рковь же Ру́сская, ва́ми крася́щися,/ похвалы́ побе́дныя, я́ко земля́ обетова́нная мед и млеко́, вам источа́ет.

Егда́ даде́ся вам благода́ть не то́чию во Христа́ ве́ровати,/ но и по Нем страда́ти,/ немо́кренно пучи́ну кро́вных мук проидо́сте, святи́и му́ченицы,/ ве́рным сыново́м росси́йским о́браз я́вльше,/ и со дерзнове́нным испове́данием во врата́ Небе́сная внидо́сте.

Богоро́дичен: Приими́ песнь хвале́бную, от недосто́йных уст возноси́мую,/ препросла́вленная Ма́ти Бо́жия.

Песнь 3.

Ирмо́с: Госпо́дь Сый всех и Зижди́тель Бог,/ созда́нное, Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам, Сый, Себе́ предпожре́:/ яди́те, вопия́, Те́ло Мое́// и ве́рою утверди́теся.

Егда́ бу́ря нече́стия на Це́рковь Ру́сскую воздви́жеся,/ вы, святи́и новому́ченицы, страда́ньми ва́шими со тща́нием укроти́сте ю/ и по́двиги ва́шими Правосла́вие утверди́сте.

Му́ки ве́лия за Це́рковь Христо́ву претерпе́сте, святи́и новому́ченицы,/ моли́те утверди́тися ей незы́блемей и непоколеби́мей до сконча́ния ве́ка.

Страда́ньми и испове́данием Христа́, святи́и сро́дницы на́ши,/ вше́дше в Небе́сная селе́ния, я́ко дре́вле Изра́иль в зе́млю обетова́нную,/ оте́чество ва́ше земно́е, Русь Святу́ю, в любви́ сохраня́йте моли́твами ва́шими.

Богоро́дичен: Небе́сных круго́в вы́шшая/ и сла́вою Боже́ственною преукраше́нная, Де́во Ма́ти Бо́жия,/ спаси́ ду́ши на́ша.

Конда́к новому́чеников, глас 3.

Подо́бен: Де́ва днесь:

Днесь новому́ченицы Росси́йстии/ в ри́зах бе́лых предстоя́т А́гнцу Бо́жию/ и со А́нгелы песнь побе́дную воспева́ют Бо́гу:/ благослове́ние, и сла́ва, и прему́дрость,/ и хвала́, и честь,/ и си́ла, и кре́пость/ на́шему Бо́гу/ во ве́ки веко́в. Ами́нь.

И́кос:

Кра́сный ли́че, светоза́рнии и боже́ственнии свети́льницы,/ Све́ту вели́кому предстоя́ще при́сно, богоблаже́ннии му́ченицы,/ и отту́ду испуща́емыми невече́рняго Божества́ сия́нии, всегда́ просвеща́еми и обожа́еми,/ ве́рою па́мять ва́шу соверша́ющия боже́ственную просвети́те,/ и омраче́ния и страсте́й и бед и зло́бы изба́вите,/ моля́щеся непреста́нно о всех нас.

Седа́лен, глас 2:

Но́вии страстоте́рпцы Росси́йстии,/ му́ченически по́прище земно́е сконча́вшии и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ да и мы, егда́ на́йдет на ны испыта́ния час,/ му́жества дар Бо́жий восприи́мем.

Сла́ва, и ны́не, Богоро́дичен, глас 4:

Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́,/ вопию́ще и глаго́люще: Пресвята́я Де́во, предвари́, и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.

Песнь 4.

Ирмо́с: Прови́дев проро́к/ та́йну Твою́ неизрече́нную, Христе́, провозгласи́:/ положи́л еси́ тве́рдую любо́вь кре́пости, О́тче Ще́дрый,/ Единоро́днаго бо Сы́на, Благи́й,// очище́ние в мир посла́л еси́.

Всем конце́м земли́ яви́ся чу́до смотре́ния Твоего́, Влады́ко,/ кро́вию бо новому́ченик, я́ко водо́ю, угаси́л еси́ в Росси́йстей земли́ пла́мень нече́стия и развраще́ния/ и спасл еси́ лю́ди Твоя́.

Сла́ву Бо́жию унасле́довасте, новому́ченицы, просия́вшии в земли́ на́шей,/ отве́ргшеся бо себе́ и страх сме́ртный препобеди́вше,/ любо́вь к Бо́гу да́же до сме́рти му́жественне сохрани́ли есте́.

По́двигом до́брым подвиза́вшиися, святи́и новому́ченицы Росси́йстии,/ к покая́нию и доброде́тельному житию́ подви́гните на́с,/ да и мы ва́шими моли́твами сподо́бимся прославля́ти Го́спода во Ца́рствии Его́.

Богоро́дичен: На Твой наде́ющеся покро́в, Ма́ти Бо́жия,/ со святы́ми новому́ченики и испове́дники Росси́йскими прославля́ем милосе́рдие Твое́.

Песнь 5.

Ирмо́с: Сою́зом любве́/ связу́еми, апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,// благовеству́юще всем мир.

Дерзнове́нно, святи́и, испове́дали есте́ Го́спода пред отсту́пники и гони́тели:/ с на́ми Бог, взыва́юще, разуме́йте и покаря́йтеся,/ стра́ха ва́шего не убои́мся, ниже́ смути́мся, я́ко с на́ми Бог.

Уврачу́йте моли́твами ва́шими, святи́и новому́ченицы Росси́йстии,/ лю́ди богобо́рныя, враждо́ю и уби́йствы ды́шущия,/ и мир стране́ на́шей и ве́рным лю́дем да́руйте.

Предстоя́ще Христу́, власть иму́щу суди́ти всему́ ми́ру,/ святи́и новому́ченицы и испове́дницы Росси́йстии,/ очи́стите нас от грехо́в на́ших моли́твами ва́шими,/ да не с ми́ром осужде́ни бу́дем.

Богоро́дичен: Водворя́ет ны змий во юдо́ль пла́ча и ча́яния злых,/ не мо́жем терпе́ти ско́рби своея́, взыва́ху новому́ченицы,/ Ты же, Богороди́тельнице, просте́рла еси́ им покро́в Свой/ и спасла́ еси́ от сете́й вра́жиих.

Песнь 6.

Ирмо́с: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на, Влады́це, вопию́ Ти:// от тли мя возведи́.

Во́лны безбо́жнаго нече́стия тща́хуся потопи́ти кора́бль Це́ркве Ру́сския,/ Ты же, И́стинный Ко́рмчий, спасл еси́ ше́ствующия на нем моли́твами страстоте́рпцев Росси́йских, вопию́щих:/ Го́споди Сил, из смертоно́сныя глубины́ возведи́ ны.

Безбо́жнии Ка́иновы вну́цы святы́ни церко́вныя поруга́нию и огню́ преда́ша,/ оби́тели разори́ша, хра́мы я́ко ово́щная храни́лища соде́яша,/ христолюби́выя лю́ди в темни́цы заключи́ша и уму́чиша./ Вы же, страстоте́рпцы, с любо́вию учи́ли есте́:/ сие́ бысть по грехо́м на́шим, лю́дие, пока́йтеся.

Увы́ нам, увы́, вопия́ху испове́дницы Росси́йстии,/ ви́дяще, я́ко безу́мнии богобо́рцы святы́ни земли́ на́шея разори́ша,/ оби́тели я́ко узи́лища темни́чная соде́яша,/ хра́мы Бо́жии в скве́рная и позо́рищная места́ обрати́ша/ и кровь христиа́нскую в них пролия́ша./ Сего́ ра́ди опустоши́шася сердца́ нечести́вых/ и живо́т их а́ду прибли́жися.

Богоро́дичен: Изведи́ нас из ро́ва поги́бели/ и уврачу́й на́ша грехо́вныя я́звы, Пресвята́я Ма́ти Де́во,/ да неосужде́нно сподо́бимся при́сно прославля́ти новому́ченики Сы́на Твоего́ и Бо́га на́шего.

Конда́к и и́кос воскре́сны.

Песнь 7.

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени,/ ороша́еми поя́ху:// благослове́н еси́, Го́споди, Бо́же оте́ц на́ших.

О́троцы в Вавило́не дре́вле, я́ко основа́ние,/ новому́ченицы же Росси́йстии ны́не, я́ко увенча́ние,/ с ли́ки страстоте́рпец при́сно взыва́ют:/ благослове́н еси́, Го́споди, Бо́же оте́ц на́ших.

О́троцы в Вавило́не пе́щнаго пла́мене не убоя́шася,/ новому́ченицы же Росси́йстии, тем подража́юще,/ гоне́ния безбо́жных в ничто́же вмени́ша,/ те́мже ны́не согла́сно с ни́ми воспева́ют:/ благослове́н еси́, Го́споди, Бо́же оте́ц на́ших.

Днесь торжеству́ет Це́рковь Ру́сская,/ святи́и бо новому́ченицы, сро́дницы на́ши,/ к ликостоя́нием святы́х, от ве́ка Бо́гу благоугоди́вших, присовокупи́вшеся,/ согла́сно с ни́ми воспева́ют хвале́бную песнь:/ благослове́н еси́, Бо́же оте́ц на́ших.

Богоро́дичен: Предстоя́щи Ти Кресту́ Сы́на Твоего́, Богома́ти,/ ору́жие про́йде ду́шу Твою́,/ те́мже и попече́ние сугу́бое о возлюби́вших Его́ прия́ла еси́,/ и́же Тя сыно́вне велича́ют:/ благослове́нна Ты в жена́х еси́, Всенепоро́чная Влады́чице.

Песнь 8.

Ирмо́с: За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,// и превозноси́те во вся ве́ки.

Зако́ны Христо́вы возлюби́ша новому́ченицы и испове́дницы Росси́йстии,/ безбо́жная же повеле́ния отри́нуша/ и, ре́вностию о Бо́зе связу́емии,/ Бо́гу побе́дную песнь воспева́ху:/ да благослови́т Го́спода Русь Свята́я и превозно́сит Его́ во ве́ки.

Егда́ земля́ Росси́йская тьмо́ю безбо́жия и Ка́иновым озлобле́нием объя́та бысть,/ тогда́ мно́зи христолюби́вии лю́дие на го́рькия рабо́ты изгна́ни бы́ша/ и глад, мраз, зной и смерть лю́тую му́жественне претерпе́ша,/ ве́рою же, наде́ждею и любо́вию совоку́плени,/ досто́йную воспева́ху песнь:/ да благослови́т Го́спода Русь Свята́я и превозно́сит Его́ во ве́ки.

А́нгелов хвалу́ и новому́чеников славосло́вие ми́лостивно прие́мляй,/ не отри́ни, Триипоста́сный Бо́же, от со́нма их и нас, недосто́йных,/ но сподо́би вку́пе с ни́ми воспева́ти:/ да благослови́т Го́спода Русь Свята́я и превозно́сит Его́ во ве́ки.

Богоро́дичен: Зря́щи поруга́ние свята́го уде́ла Своего́,/ скорбя́ше Пречи́стая Ма́ти и держа́вную по́мощь ве́рным лю́дем простира́ше,/ Сы́на же Своего́ усе́рдно моля́ше, взыва́ющи:/ да благослови́т Го́спода Русь Свята́я и превозно́сит Его́ во ве́ки.

Песнь 9.

Ирмо́с: Стра́нствия Влады́чня/ и безсме́ртныя трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся,// Его́же велича́ем.

Безсме́ртныя трапе́зы и жи́зни ве́чныя во Ца́рствии Бо́жием/ наслажда́ются ны́не новому́ченицы и испове́дницы Росси́йстии,/ испо́лнися бо на них обетова́ние Госпо́дне:/ побежда́ющим дам се́сти со Мно́ю на Престо́ле Мое́м.

Да просла́вятся с ли́ки новому́чеников и испове́дников Росси́йских жены́ богому́дрыя земли́ на́шея,/ я́же, мироно́сиц восприе́мша чин и му́жески Христу́ после́довавша,/ страда́ния за и́мя Его́ претерпе́ша/ и ве́рно отце́м, муже́м и бра́тиям на́шим, Христа́ ра́ди му́чимым, послужи́ша./ Сего́ ра́ди ны́не в жи́зни ве́чней вку́пе с ни́ми/ трапе́зы безсме́ртныя наслажда́ются.

Жизнода́вче Го́споди,/ моли́твами новому́чеников и испове́дников Росси́йских/ упоко́й со все́ми пра́ведными ве́рныя рабы́ Твоя́, за и́мя Твое́ пострада́вшия:/ святи́тели и иере́и, мона́хи и мирски́я,/ ста́рыя, ю́ныя и всяк во́зраст, имену́емыя и неимену́емыя,/ я́ко и́стинныя сы́ны и дру́ги Бо́жия.

Богоро́дичен: Я́ко взбра́нная Воево́да во́инства новому́чеников и испове́дников Росси́йских,/ держа́вный покро́в и ми́лостивное заступле́ние яви́ла еси́, Пресвята́я Де́во, земли́ на́шей,/ опустоша́емей ско́рбными и безбо́жными наведе́нии./ Сего́ ра́ди ны́не мо́лим Тя:/ прости́ лю́ди согре́шшия и сохрани́ Святу́ю Русь.

Свети́лен воскре́сен.

Сла́ва, свети́лен новому́чеников:

Я́ко отре́бие ми́ру бы́ша, святи́и новому́ченицы и испове́дницы Росси́йстии,/ ка́мением побие́ни бы́ша, претре́ни бы́ша,/ искуше́ни бы́ша, уби́йством меча́ умро́ша,/ свиде́тельствующе о Све́те И́стиннем, Иису́се Христе́, Го́споде на́шем.

И ны́не, Богоро́дичен воскре́сен.

На хвали́тех стихи́ры воскре́сны 4, и новому́чеников 4, со сла́вником. Сла́ва, стихи́ра Ева́нгельская. И ны́не: Преблагослове́нна еси́:

Стихи́ры новому́чеников, глас 8.

Подо́бен: О, пресла́внаго чудесе́:

О, пресла́внаго чудесе́!/ В после́дняя времена́ возсиява́ют му́ченицы/ и пре́лести мрак отгоня́ют,/ ве́ра христиа́нская ны́не возвыша́ется/ и па́дает нече́стие,/ ра́дуются ве́рнии/ и пра́здник новоявле́нным составля́ют,/ вопию́ще Христу́ Бо́гу:// му́чеников похвала́ и побе́да Ты еси́, Всеси́льне.

Творе́ние святи́теля Афана́сия Ковро́вскаго:

Ве́ры броня́ми,/ и щито́м благода́ти,/ и креста́ копие́м вооружи́вшеся,/ сопроти́вным си́лам непобеди́ми бы́сте/ и, я́ко Боже́ственнии храбо́рницы,/ де́монская ополче́ния победи́вше,/ со А́нгелы лику́ете,/ ве́рныя же заступа́ете, и освяща́ете,// и спаса́ете, призыва́емии.

О, пресла́внаго чудесе́!/ Чуде́с светлостьми́/ со́лнца светле́йше/ при́сно святи́и сро́дницы на́ши/ све́тят конце́м Ру́сския земли́,/ от невече́рняго Све́та облиста́еми,/ и́хже сия́нии/ о́блацы от страны́ на́шея отгоня́ются ва́рварстии// и де́мони побежда́ются.

Сла́ва, глас 6:

Новоявле́нныя зве́зды днесь/ на церко́вней показа́шася тве́рди,/ во мно́зех ме́стех бы́вшии му́ченицы Христо́вы,/ и́хже ублажа́юще, мучениколю́бцы,/ по до́лгу им прирце́м, глаго́люще:/ ра́дуйтеся, благоче́стия утвержде́ние и нече́стия обузда́ние;/ ра́дуйтеся, Росси́йския Це́ркве сла́во и безбо́жных посрамле́ние;/ ра́дуйтеся, о́брази терпе́ния и за Христа́ страда́ния./ Ста́ните, непобеди́мии, посреде́ нас у́мне,/ от бед и искуше́ний избавля́юще,// и моли́теся о спасе́нии душ на́ших.

И ны́не, Богоро́дичен.

На Литурги́и

Блаже́нна гла́са на 6, и от кано́на новому́чеников, Песнь 3., на 4.

Проки́мен воскре́сен гла́са, и новому́чеников, глас 7: Бог нам Прибе́жище// и Си́ла. Стих: Помо́щник в ско́рбех, обре́тших ны зело́.

Апо́стол дне, и новому́чеников, к Ри́мляном, зача́ло 99.

Аллилуиа́рий воскре́сен гла́са, и новому́чеников, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь.

Ева́нгелие дне, и новому́чеников, от Луки́, зача́ло 105 и 106. Коне́ц: Втерпе́нии ва́шем стяжи́те душа́ ва́ша.

Прича́стен воскресен, и новому́чеников: Ра́дуйтеся, пра́веднии, о Го́споде,/ пра́вым подоба́ет похвала́.

Моли́тва

О святи́и новому́ченицы и испове́дницы Росси́йстии:/ святи́телие и па́стырие Це́ркве Христо́вы,/ ца́рственнии страстоте́рпцы,/ благове́рнии кня́зие и княги́ни,/ до́блии во́ини, мона́си и мирсти́и,/ благочести́вии му́жие и жены́,/ во вся́цем во́зрасте и сосло́вии за Христа́ пострада́вшии,/ ве́рность Ему́ да́же до сме́рти свиде́тельствовавшии/ и вене́ц жи́зни от Него́ прия́вшии!/ Вы во дни гоне́ния лю́таго,/ зе́млю на́шу от безбо́жных пости́гшаго,/ на суди́щах, в заточе́ниих и про́пастех земны́х,/ в го́рьких рабо́тах и вся́ких ско́рбных обстоя́ниих/ о́браз терпе́ния и непосты́днаго упова́ния му́жественне яви́ли есте́./ Ны́не же, в раи́ сла́дости наслажда́ющеся,/ пред Престо́лом Бо́жиим во сла́ве предстои́те/ и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите./ Сего́ ра́ди мы, недосто́йнии,/ мо́лим вас, святи́и сро́дницы на́ши:/ не забу́дите земна́го оте́чества ва́шего,/ грехо́м Ка́инова братоуби́йства,/ поруга́нием святы́нь, безбо́жием и на́шими беззако́нии отягче́ннаго./ Умоли́те Го́спода Сил,/ да утверди́т Це́рковь Свою́ непоколеби́му в ми́ре сем многомяте́жнем и лука́вом;/ да возроди́т в земли́ на́шей дух братолю́бия и ми́ра;/ да па́ки бу́дем мы ца́рское свяще́ние,/ род Бо́жий, избра́нный и святы́й,/ при́сно с ва́ми сла́вящий Отца́ и Сы́на и Свята́го Ду́ха во ве́ки веко́в. Ами́нь.

Зри. А́ще Неде́ля мытаре́ва или́ блу́днаго.

На вели́цей вече́рни на Господи, воззвах: стихи́ры воскре́сны 3, и Трио́ди 3, и новому́чеников 4. Сла́ва: Трио́ди. И ны́не: Богоро́дичен 1-й гла́са. На лити́и стихи́ра хра́ма, та́же Трио́ди хвали́тны. Сла́ва: новому́чеников. И ны́не: Трио́ди. На стихо́вне стихи́ры воскре́сны. Сла́ва: новому́чеников. И ны́не: Трио́ди [зри сла́вник на стихо́вне ве́чера]. На благослове́нии хле́бов Богоро́дице Де́во: два́жды, и новому́чеников, еди́ножды.

На у́трени на Бог Госпо́дь: тропа́рь воскре́сен, два́жды. Сла́ва: новому́чеников. И ны́не: Богоро́дичен воскре́сен. По кафи́смах седа́льны воскре́сны с Богоро́дичны их. По полиеле́и два седа́льна новому́чеников, глас 4. Сла́ва: полиеле́йный седа́лен новому́чеников, глас 6. И ны́не: Богоро́дичен, глас 8. Кано́н воскре́сен со ирмосо́м на 4, и Богоро́дицы на 2, и Трио́ди на 4, и новому́чеников на 4. Катава́сия по уста́ву. По 3-й пе́сни конда́к, и́кос и седа́лен новому́чеников. И ны́не: Трио́ди. По 6-й пе́сни конда́к и и́кос Трио́ди. Свети́лен воскре́сен. Сла́ва: новому́чеников. И ны́не: Трио́ди. На хвали́тех стихи́ры воскре́сны 4, и новому́чеников со сла́вным 4, с припе́вы их. Сла́ва: Трио́ди. И ны́не: Преблагослове́нна еси́:

На Литурги́и блаже́нна гла́са на 4, и Трио́ди, Песнь 3-я, на 4, и новому́чеников, Песнь 6-я, на 4. Проки́мен, Апо́стол, Аллилу́ия, Ева́нгелие и прича́стен дне и новому́чеников.

А́ще Неде́ля мясопу́стная.

На вели́цей вече́рни на Го́споди, воззва́х: стихи́ры воскре́сны 3, и Трио́ди 4, и новому́чеников 3.

На у́трени кано́н воскре́сен со ирмосо́м на 4, и Трио́ди на 6, и новому́чеников на 4. На хвали́тех по стихи́рах новому́чеников пое́м стихи́ру Трио́ди: Предочи́стим себе́: с припе́вом ея́.

Источник: Текст утвержден Священным Синодом Русской Православной Церкви 13 марта 2002 года (журнал б/н)

На малой вечерни

На Господи воззвах стихиры на 4, гл. 1

Подобен «Небесных чинов».

Приидите, празднолюбцы и постников сословие, / отложив житейская попечения / и оставив злых дел рачение, / воспоим дивная во обители Зилантовой / и прославим Бога, прославляемаго во святых своих.

Мученика Иоанна в чиноначальники призывающе / восприимем песнь в похвалу новых мучеников / кротко убиение от безумных богоборцев претерпевших, / нам образ веры и мужества оставивших / и Богоматере обитель прославивших.

Слава, гл. 1

И ты, горо Зилантова, / ничим же меньши еси во обителех русских, / чад своих для Небесного Царствия возрастивши, / окрестныя народы светом Святыя Троицы просветивши, / всем притекающим духовное утешение подающи, / память православных воинов сохраняющи, / Имя Божие в тебе прославляется, / град же Казань тобою величается.

И ныне, Богородичен, глас той же

Радуйся, Радосте праотцев, апостолов и мучеников веселие, и Покров нас, Дево, Твоих рабов. (в среду вечера)

На стиховне стихиры, гл. 2

Подобен: «Доме Евфрафов»

Пение наше, / по силе приносимое, / не презрите, святии мученицы, / но благодать испросите певцам вашим.

Стих: Честна пред Господем, смерть преподобных Его.

Свыше приясте крепость, / достохвальнии мученицы, / побеждати враг видимых и невидимых / и благодать ходатайствовати / почитающим вас любовию.

Стих: Блажен муж, бояйся Господа в заповедех Его восхощет зело.

Грешником безответным, / покаяние нам приличнее есть, / но любовию подвизаемии, / простираемся на богословие, / благодарение и славословие.

Слава, и ныне, Богородичен, глас той же

Все упование мое на Тя возлагаю, Мати Божия, сохрани мя под кровом Твоим. (в четверток утра)

На велицей вечерни

Блажен муж: 1-й антифон.

На « Господи воззвах»: стихиры на 8 гл. 6

О, новии мученицы Зилантовы, / страх смертный мужески поправшии / и место покаяния своего до конца не оставившии; / добрый пастырь архимандрит Сергий, / с верною дружиною: / Лаврентием, Серафимом, Феодосием, / Леонтием, Стефаном, Георгием, / Илларионом, Иоанном и Сергием, / телеса свои на убиение за любовь Христову предавшии / и монашеския обеты своею кровию запечатлевшии; / испросите нам у Бога грехов оставление и велию милость.

Причастившеся веельфегору русстии людие, / не услышаша гласа Господня, / к любви призывающаго. / И пролияша кровь неповинную, / кровь сынов своих и дщерей, / яже пожроша истуканным богоборчества и блуда; / праведно же наказуеми от Бога суровостию смуты, / ожесточишася непокоривии; / но молитвами святых новомучеников / испросим у Бога покаяние, мир и велию милость.

Слава, гл. 6

Нам, работником единонадесятого часа, / простоявшим день жизни своея на торжище мира сего праздными от дел Евангелия, / не понесшим тяготы искушений / и вара гонений и мучений, / благость Божия посла небесных молитвенников / и приставников виноградника Христова / святых мучеников Зилантовых, / молящихся непрестанно о своем отечестве земном, / да безумие оставивше приимем от Бога динарий / – мир и велию милость.

И ныне, глас той же, «Кто Тебе не ублажит…»

Вход. Прокимен дня.

И чтения 3:

Деян. гл. 4 из службы новомуч. и испов. Российским

Тимофею гл. 4

Евреям гл. 11

На литии стихира самогласна, гл. 4

Преславная днесь совершаются во обители Зилантовой: / дружина иноков десяточисленная / до конца понесше восприятый крест Христов, / в жертву чистую Господеви приносится.

Слава, гл. 1 (из малой вечерни): «И ты обитель Зилантова, …»

И ныне, гл. той же, Богородичен: «Се исполнися…»

На стиховне стихиры новомучеников, глас 2

Творение святителя Афанасия (Ковровского)

Подобен: Доме Евфрафов:

Земле Русская, / граде святый, / украшай свой дом / в немже Божественный / велий сонм святых прослави.

Стих: Господи, Господь наш, / яко чудно Имя Твое по всей земли.

Церковь Русская / красуйся и ликуй / се бо чада твоя / престолу Владычню / во славе предстоят, радующеся.

Стих: Святым, иже суть на земли Его, / удиви Господь вся хотения Своя в них.

Соборе святых русских / полче Божественный / молитеся ко Господу / о земном отечестве вашем / и о почитающих вас любовию.

Слава, глас и подобен той же:

Новый доме Евфрафов, / уделе избранный, / Русь святая / храни веру православную / в нейже тебе утверждение.

И ныне, Богородичен, глас 8

Подобен: О, преславнаго чудесе:

О, преславного чудесе! / Небеси и земли Царица, / от святых сродников наших умоляемая, / до ныне землю Русскую покрывает / и лика Своего изображеннии милостивно обогащает. / О, Владычице державная! Не престани и на будущее время / во утверждение на Руси Православия, / милости и чудеса изливати до века. Аминь.

Тропарь братии, глас 5

Божией Премудрости, / Содетельной и Содержительной Силе последующе, / неизреченного лика небесного достигосте, / мученицы славнии: / идеже подвизалися есте / тамо ныне прославляетеся, / в вере и благочестии верных утверждающе, / ограждаете же и обитель Успенскую, / научающе искушениям противоборствовати. / Сего ради молим вы: // испросите душам нашим мир и велию милость.

На утрени

На Бог Господь: тропарь преподобномучеников дважды.

Слава, и ныне, Богородичен.

По 1-ом стихословии седален, гл 4:

Яко царское сокровищное хранилище, / хранит святая Зилантова гора / многоценныя мощи новых мучеников, / ихже память светло празднуем.

Слава, и ныне, Богородичен:

Святая Гора, / от Неяже Камень нерукосечный Христос отсечеся, / Матерь Божия, храни Зилантову гору, / на нейже обитель Твоя устроися, / благомощными Своими к Богу молитвами.

По 2-ом стихословии седален, гл. 3

Преподобнии новомученицы Зилантовы, / молите милостиваго Бога / о почитающих святая страдания ваша / и совершающих вашу память светло.

Слава, и ныне, Богородичен:

Не остави, Пречистая Дево, / обитель Зилантову, / Твоему Успению посвященную.

Псалом избранный:

Бог нам прибежище и сила,

Помощник в скорбех обретших ны зело.

Сего ради не убоимся, внегда смущается земля.

Боже, кто уподобится Тебе, да не премолчиши, ниже укротиши, Боже.

Яко се врази Твои возшумеша, и ненавидящии Тя воздвигоша главу.

На люди Твоя лукавноваша волею и совещаша на святыя Твоя.

Слава, и ныне: Аллилуйя (трижды)

По полиелее седален гл. 6

Творение святителя Афанасия Ковровского

Мужайся, Христова церковь, и державствуй над всуе борющими, Христовы бо друзи о тебе пекутся, и предстояще, и обстояще, ихже общий праздник ныне совершаем светло.

Слава, и ныне, Богородичен:

Мученику Иоанну в подвизе споспешествовавшую / и новомучеников Зилантовых на враги укрепившую / Матерь Божию, / просим и нам с небесе подати / помощь и укрепление.

Степенна, 1-й антифон 4 гласа

Прокимен, гл 4: Проидохом сквозе огнь и воду, / и извел еси ны в покой. [Н]

Стих: Разжегл ны еси, якоже разжизается сребро.

Евангелие от Матф., зач. 36

По 50-м псалме стихира, гл. 6:

Преподобнии новомученицы Зилантовы, / поты проливше трудов постнических, / украсистеся и пролитием крове своея, / свидетельствовавшее о Христе даже до смерти. / Ныне же дерзновение имуще ко Святей Троице, / молите о душах наших.

Ирмосы канона умилительного ко Господу нашему Иисусу Христу,

гл. 2: «Во глубине постла …»

Песнь 1.

Новый Моисей архимандрит Сергий явися, немокренно провед дружину Христову чрез пучину мучения в Небесное Царствие.

Соглядавше умы вашими землю обетования с радостью труды постническия понесли есте, и убиение претерпели есте, не на скорби бо взирасте, но на Жениха Христа возлюбленнаго.

Утверждашеся завет Ветхий кроплением крови козлей и телчей, вы же обещание Богу утвердисте своею кровию.

Богородичен: Всю жизнь мою в лености иждив, ужасаюся о теплохладных изречениях; темже к Твоему притекаю, Пречистая, заступлению.

Песнь 3.

Кротких и смиренных иноков Зилантовых Господь прослави, преоруженное же безбожное воинство посрами.

Силен Бог святых Своих избавляти, обаче благоволи всему миру явити мужество и доблесть новомучеников.

Священством украшеннии архимандрит Сергий с Лаврентием и Серафимом, первее безкровную Жертву Подвигоположнику приношаху, ныне же яко жертву сами себя священнодействуют.

Богородичен: Всему миру спасения виновная, и мене грешнаго спаси, Пречистая Дево.

Седален

Сугубо просиявшии преподобием и мученичеством, всехвальный архимандрит Сергий с верною братиею: Лавренитем, Серафимом, Феодосием, Леонтием, Стефаном, Георгием, Илларионом, Иоанном и Сергием, молите Святую Троицу, благодать низпослати совершающим вашу память светло.

Слава, и ныне, Богородичен:

Афонскую гору уделом Своим избравшая, Мати Дево, и Зилантовой горе буди Игумения и Хранительница.

Песнь 4.

От святой горы, покровом Божией Матери приосенненой, миру воссияли новомученицы, пети нас подвизающе: «Слава силе Твоей, Господи».

Назирают с небесе святии мученицы на подражающих им самоотверженною верою и братскою любовию, скорую помощь подающе своими молитвами.

Добрый пастырь показался еси, отче Сергие, стадо свое привед Пастыреначальнику.

Богородичен: Тебе многажды явлением Своим землю русскую спасавшую, Пречистая Дево, молим: буди нам покров непреоборимый от врага хотящаго пожрети ны раздорами и суетою.

Песнь 5.

Возсияйте свет разума, всехвальнии новомученицы, утренюющим к вам и совершающим вашу память верно.

Твердым помыслом и упованием на Бога противостали есте врагом видимым и невидимым, прехвальнии.

Людие русстии смутою безбожною помрачении и на единоплеменники злобою воскипевшии, иноков беззаконии убийцы явишася, Каину братоубийце уподобившеся; вы же мученицы святии, образ смирения Христова восприявшии, будете нам наставницы веры непоколебимыя.

Богородичен: Сердце мое мраком омраченное просвети, Пречистая, святыми Твоими молитвами.

Песнь 6.

Не возможе буря душетленная поколебати произволения иноков богомудрых, любовию ко Христу пламенеющих, и жизнь свою в Нем полагающих.

Посреди всеобщего смятения и страха ум к Богу, славнии мученицы, утвердисте.

Яко гора, неподвижими в добром исповедании, пребысте святии мученицы.

Богородичен: Крестом Сына Твоего, Мати Дево, из глубины греха изведи мя.

Кондак братии, глас 2

Древле змиева гора / просвещаяся истины познанием, / днесь освещается крови вашея течением, / поруганные имамы обители воздвижение, / вашими, Ангелов собеседницы, ходатайствы // непрестанно возносимыя о всех с верою почитающих вас.

Икос

Радоватися повеле апостол Петр приобщившимся страстем Христовым, и мы, зряще страдания ваша и небесной славе вашей ужасающеся, зовем таковая: радуйтеся, обители Зилантовы украшение, радуйтеся, земли Казанския ограждение, радуйтеся, куплю добрую совершившии, радуйтеся, излиянием кровей ваших, Христа стяжавшии, радуйтеся, богоборцев посрамление, радуйтеся, Святыя Троицы прославление.

Песнь 7.

Убиение от беззаконных человек приемлюще Христу взывасте, преподобнии мученицы, благословен еси в храме славы Твоея, Господи.

Христу Подвигоположнику, любовь вашу приемлющу, в Новем Иерусалиме ныне воспеваете: благословен еси в храме славы Твоея, Господи.

На Зилантовой горе, кровию вашею освященной, монаси и мирстии, священницы и простии взывают: благословен еси в храме славы Твоея, Господи.

Богородичен: Ничтоже благо сотворихом во дни жизни нашея, но заступи ны, Пречистая Дево, внегда звати к Сыну Твоему: благословен еси в храме славы Твоея, Господи.

Песнь 8.

Верою, послушанием и любовию изящно соединени, единеми усты мученицы пояху: благословите, вся дела Господня, Господа.

Страданьми просветившеся и светлее солнца чувственнаго сияюще, ныне со ангелы вкупе преподобнии новомученицы вопиют: благословите, вся дела Господня, Господа.

В день страдания вашего гора Зилантова, кровию мученическою удобренная, ликует с человеки и взывает: благословите, вся дела Господня, Господа.

Богородичен: Пречистая Дево, безумство злоумышляющих на Церковь Божию посрами, верных же, поющих Тя, возвесели.

Песнь 9.

Не возмогает язык достойно восхвалити ваш подвиг, святии мученицы, но сами умудрите ны, на сие простирающихся.

Ин суд Божий, и ин человеческий. Скорый и неправый вас на смерть осуждает, небесный же и божественный почестями победными венчает.

Блажени правды ради пострадавшии мученицы. Тогда общницы явишася страстей Христовых, ныне же приобщаетеся божественных светлостей, обожаеми.

Богородичен: Пресвятая Троице, Боже отец наших, молитвами Богородицы помилуй и спаси нас.

Светилен, гл. 8

В памяти святых новомученик Зилантовых Бог прославляется и Казанская земля просвещается. (Дважды)

Слава, и ныне, Богородичен:

Светом Лица Твоего, Господи, просвети нас, молитвами Богородицы, и спаси нас.

На хвалитех стихиры, гл. 8

Подобен: «О, преславнаго чудесе…»

О, преславнаго чудесе! / Сродницы наши / и сограждане земного отечества нашего, / посреде сынов Божиих предстоят престолу Владычню / песнь нову воспевающе; / славословят Творца всяческих, / и молятся о почитающих их любовию.

(Из службы новомученикам и исповедникам Российским):

Веры бронями / и щитом благодати / и креста копием вооружившеся / сопротивным силам непобедими бысте / и, яко божественнии храборницы / демонская ополчения победивше / со ангелы ликуете / верныя же заступаете и освящаете, / и спасаете, призываемии.

О, преславнаго чудесе! / Чудес светлостьми / солнца светлейше / присно святии сродницы наши / светят концем русския земли, / от невечерняго света облистаеми / ихже сиянии / облацы от страны нашея отгоняются варварстии / и демоны побеждаются.

Слава, гл. 6:

Новоявленные звезды днесь / на церковной показавшеся тверди, / во мнозех местех бывши мученицы тверди, / во мнозех местех бывшии мученицы Христовы, / ихже ублажающе, мучениколюбцы / по долгу им прирцем, глаголюще: / радуйтеся благочестия утверждение и нечестия обуздание: / радуйтеся, российския церкве славо и безбожных посрамление: / радуйтеся, образи терпения и за Христа страдания. / Станите, непобедимии, посреде нас умне, / от бед и искушений избавляюще, / и молитеся о спасении душ наших.

И ныне, глас той же, Богородичен:

Богородице, Ты еси лоза…

На Литургии

Прокимен, апостол, евангелие, причастен из службы новомучеников.

Прокимен, гл. 7

Бог нам прибежище и сила.

Стих: Помощник в скорбех, обретших ны зело.

Апостол к римляном [зач. 99]

Евангелие от Луки [зач. 105 и 106]

Причастен: Радуйтеся, праведнии, о Господе, правым подобает похвала.

Святых мученик Николая, Александра, Алексия, Павла пресвитеров и Николая диакона

На Господи, воззвах: стихиры октоиха три и святых три, глас 8:

Отче достохвальне Николае, четыредесять лет в храме святых бессребренников предстоял еси, в старости же мастите и мученичества сподобился еси, поминай нас твою память ныне прославляющих.

Отцы блаженнии Александре, Алексие и Павле, в земнем житии покоя не имеша, из веси в весь преходяще и от сограждан своих скорби претерпевающи, ныне же во обителех Отца Небеснаго вселилися есте.

Отче протодиаконе Николае, лжесвидетельствовати на ближния своя отверглся еси, и все упование на Бога возложил еси, моли Его да и нашу веру умножит.

Слава, новомучеником и исповедником Российским, глас 5:

Радуйтеся, страстотерпцы славнии, стопам последующе древних мученик, веры ради подвизастеся твердо в лютая времена земли нашея, и ныне всех подвизаете к славе и хвалению Бога, укрепльшаго ваше немощное естество и обогатившаго вас дарованьми Духа, во спасение душ наших.

Тропарь, глас 5:

Отцы святии во граде нашем Богу послужившии, и мученическую смерть от сограждан своих (наших?) приявшие, молитеся о нас да подаст Господь и нам последовати вере вашей.

Канон, глас 8:

Песнь 1.

Ирмос: Поим Господеви, проведшему люди Своя сквозе Чермное море, яко Един славно прославися.

Святый священномучениче Николае, моли Бога о нас!

Храм Матери Божией усердием твоим воздвижен бысть, последи же сам яко жертва Богови принеслся еси, мучениче.

Святый священномучениче Николае, моли Бога о нас!

О колокольном звоне попечение имел еси, отче, ныне же имя твое святое яко кампан некий по всей Церкви православней прозвучало есть.

Слава: Моли Бога о нас, святе Николае, предстоятелю болшевский, вкупе со святителем Владимиром, митрополитом московским и священномучеником Киевским.

И ныне: Пречистая Богородице, воплощшееся Присносущное и Пребожественное Слово, паче естества рождши, поем Тя.

Песнь 3.

Ирмос: Ты еси утверждение притекающих к Тебе, Господи, Ты еси свет омраченных, и поет Тя дух мой.

Святый священномучениче Николае, моли Бога о нас!

Яко Златоустого Иоанна некогда влекоша тя, старче, в восточныя страны, идеже дух твой в руце Господни предал еси.

Святый священномучениче Николае, моли Бога о нас!

Тщашася безбожници затворити храм святых бессребреник Космы и Дамиана, Христос же врата Царствия Своего тебе, отче, отверзл если.

Слава: Егда наста смута в земле нашей, тогда воздвиже Господь святителя Тихона, да управит он корабль Церкве российския сквозе бурю века сего.

И ныне: Даждь нам помощь Твоими молитвами Всечистая, прилоги отражающи лютых обстояний.

Седален, глас 3:

Отци святии града нашего, молитеся за ны ко Господу, да исправим прежде конца жизнь нашу и тако всегда с Господем будем.

Слава, и ныне, Богородичен:

В женах Святая Богородице, Мати Безневестная, моли, егоже родила еси, Царя и Бога: да спасет нас яко Человеколюбец.

Крестобогородичен:

Жезл силы стяжавшии, Крест Сына Твоего, Богородице, тем низлагаем врагов шатания, любовию Тя непрестанно величающе.

Песнь 4.

Ирмос: Услышах, Господи, смотрения Твоего таинство, разумех дела Твоя, и прославих Твое Божество.

Святый священномучениче Александре, моли Бога о нас!

В самый день Богоявления в темницу заключен быв, предтечеву крепость явил еси, отче.

Святый священномучениче Александре, моли Бога о нас!

Ниже гонение, ниже темница устрашиша тя, временным бо вечная премудро предпочел еси.

Слава: Молите Бога о нас святителю отче Серафиме и вси святии в Бутове пострадавшии, вы бо есть земли нашей плод неувядающий.

И ныне: Богородицу Тя Всечистая, просвещшиися вси проповедуем: Солнце бо правды родила еси Приснодево.

Песнь 5.

Ирмос: Утренююще, вопием Ти, Господи, спаси ны: Ты бо еси Бог наш, разве Тебе, иного не вемы.

Святый священномучениче Алексие, моли Бога о нас!

Изгнаша тя базбожници из града нашего и церковь Рождества Божией Матери разрушиша, Господь же милосердовав возврати нам ныне храм сей на время некое да покаемся от злых дел наших.

Святый священномучениче Алексие, моли Бога о нас!

С Феодором пресвитером купно учение проходил еси и в узах страдал еси, ныне же вы во святых ликах со Христом неразлучно ликовствуете есте.

Слава: Молите Бога о нас святии мученици вси иже в дальних странах северных же и восточных заключеннии земное поприще свое скончаша, упования же вашего не посрами Господь.

И ныне: Марие Богородице Безневестная, упования врагов осуети, и поющыя Тя возвесели.

Песнь 6.

Ирмос: Ризу мне подаждь светлу, одеяйся светом, яко ризою, Многомилостиве Христе Боже наш.

Святый священномучениче Павле, моли Бога о нас!

Егда гонение бысть на веру христианскую из села в село преходил еси отче, служения же своего николиже отверглся еси.

Святый священномучениче Павле, моли Бога о нас!

Мучителей безжалостных не убоявся, вся обвинения их ложная отвергл если.

Слава: О святии мученици в Бутове пострадавшии, убиша гонителеие телеса ваша, душам же не возмогоша повредити, и воскресит вас Господь в пришествии Своем.

И ныне: Слово Божие Тебе земным, Богородице, показа Небесную Лествицу: Тобою бо к нам сниде.

Кондак и икос новомучеником и исповедником Российским, глас 2.

Новии страстотерпцы Российстии, исповеднически поприще земное претекшии, страданьми дерзновение приимшии, молитеся Христу, вас укрепившему, да и мы, егда найдет на ны испытания час, мужества дар Божий восприимем. Образ бо есте лобызающим подвиг ваш, яко ни скорбь, ни теснота, ни смерть от любве Божия разлучити вас не возмогоша.

Икос.

Егда начинахуся дние огненнаго искушения Церкве Российския и не благоволи Господь прияти от нас всесожжения и жертвы, тогда мнози архиереи и священницы не приложишася плоти и крови, но уразумевше волю Господню, сами себе принесоша, яко непорочное заколение. И вслед Первосвященника вечнаго и Ходатая Новаго Завета внидоша сии во святилище с кровию своею, да очистятся грехи людстии. Славни суть имена ваша, мужественнии страстотерпцы, образ бо нам есте, лобызающим подвиг ваш, яко ни скорбь, ни теснота, ни смерть от любве Божия разлучити вас не возмогоша.

Песнь 7.

Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.

Святый священномучениче Николае, моли Бога о нас!

Края Пермского благая отрасль, от юности лукавствием мира сего не соблазнился, но путь тесный служения церковнаго избрал еси.

Святый священномучениче Николае, моли Бога о нас!

Послушествовати на други своя свидетельства ложна власти земныя понуждаша тя отче, Господь же непреткновенна в правде стояща тя показа.

Слава: Разлучи гонение протодиакона Николая с епископом его святителем Аркадием, ныне же купно в лице святых новомучеников прославляются.

И ныне: Премудрости исполни всех и силы Божественныя, Ипостасная Премудросте Вышняго, Богородицею, верою Тебе поющих: отцев наших Боже благословен еси.

Песнь 8.

Ирмос: Царя Небеснаго, егоже поют вои Ангельстии, хвалите и превозносите во вся веки.

Святый священномучениче Николае, моли Бога о нас!

Укрепляет дух мой Его же ради иду пострадати, тако гонителем отвещал еси.

Святый священномучениче Николае, моли Бога о нас!

Не остави Бог чада твоя по преставлении твоем, якоже и обещался еси праведникам своим.

Благословим: Трие судии неправедныя осудиша вас, святии, на земли, от Самоей же Святей Троицы на небеси оправдание прияша.

И ныне: Преестественне Содетеля и Спаса, Бога Слова родила еси Дево: темже Тя поем, и превозносим во вся веки.

Песнь 9.

Ирмос: Воистину Богородицу Тя исповедуем, спасении тобою, Дево чистая, с Безплотными лики Тя величающе.

Святии новомученици Российстии, молите Бога о нас!

Тщашеся гонителие сокрыти кончину и телеса ваша, не ведуще яко имена ваша написана суть на небесех.

Святии новомученици Российстии, молите Бога о нас!

Все священномучеников множество и мучеников и мучениц россйских собори, помяните ныне и нас, сродников ваших, любовию вас почитающих.

Слава: Упокой Господи согражданы наша, во времена гонения пожившия и Тебе не отвергшиеся, вся согрешения их прости, молитвами святых Твоих мученик, Едине Многомилостиве.

И ныне: Псалмы Тя воспеваем Благодатная, и немолчно, еже радуйся, приносим: Ты бо источила еси всем радость.

Светилен, глас 1:

Свет миру были есте, святии мученици, и тьма вас не объят, молитеся да просветит Господь и души ныне вас почитающих.

Источник: сайт храма новомучеников и исповедников Российских в Строгино

На велицей вечерни

Блажен муж: 1-й антифон. На Господи, воззвах: стихиры на 8, глас 4.

Днесь возсия световидно, якоже солнце, / всехвальная память твоя, / чудотворче и исповедниче, предивне отче Петре, / просвещая омраченныя души наша / светом исправлений твоих, / и веселием исполняет сердца наша, / всесвященное торжество твое совершающих.

Приидите мучениколюбцев собори, / память праведнаго мужа почтим, / путь тесный и спасительный избравшаго / и за Христом даже до уз последовавшаго, / исповеданием веры апостолом подобника, / мучеников равностоятеля, / богоблаженнаго Петра днесь ликующе восхвалим.

Воспоим, людие, песни хвалебныя, / прозябение добролозное земли Рязанския ублажим, / сторичный клас нивы Христовой прославим, / ковчег щедрот божественных облобызаем, / приятелище даров Утешителя благочестно почтим, взывающе: / радуйся, отче Петре, / молитвенниче всеусердный о душах наших.

Притецем днесь, вернии, / ко источнику исцелений неоскудному, / щедрот и милостей кладезю неизчерпаемому, / учителю благочестия добродетельному, / Петру, исповеднику всехвальному, / и благодарне тому возопиим: / радуйся, каменю веры,/ Божественными словесы паству твою напоивший / и росою молитв твоих / безбожия зной утоливший.

Слава, глас 2:

Воспоим ныне, братие, / светлопразднственную песнь, / новоявленнаго исповедника Петра ублажающе, / и к тому возносяще молитву, / во еже очистити сердец наших очеса / и памятию чудес его просветити души наша.

И ныне, глас тойже: Прейде сень законная:

Вход. Прокимен дне, и чтения 3.

Притчей чтение (главы 10, 3 и 8):

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.

Притчей чтение (главы 10 и 11):

Уста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.

Премудрости Соломоновы чтение (глава 4):

Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихиры храма и святаго, глас 8:

Сошедшеся днесь, христоименитых собори, / с Горними Силами лик составим, / богоноснаго Петра радостно возвеличим, / подвигом исповедания его просветившеся, / Триипостасному Божеству боголепно поклонимся, / Дивному и Славному во святых своих.

Слава, глас тойже:

Сладкоуханный фимиам славословий / Троице Живоначальней принесем, / почитающе всесвященную память / дивнаго угодника Петра всеблаженнаго, / усерднаго и трудолюбнаго делателя вертограда Христова, / пастыря овец словесных благостнаго, / исповедника твердаго веры отеческия / и молитвенника теплейшаго о душах наших.

И ныне, глас тойже:

Недвижимое утверждение веры / и честный дар душ наших, / Богородицу песньми величаем, вернии: / радуйся, Камень Жизни во чреве Твоем вместившая; / радуйся, концей надеждо, скорбящих заступление; / радуйся, Невесто Неневестная.

На стиховне стихиры, глас 5:

Подобен: Радуйся:

Радуйся, Церкви Русския украшение, / пастырей Отечества нашего славо, / целомудреннаго жития добрóто, / священства Христова благочестное правило, / исповедания веры добропобедный столпе, / священночестне отче Петре, / Божественнаго Человеколюбия просим получити твоими молитвами / и миру даровати велию милость.

Стих: Честна пред Господем / смерть преподобных Его.

Радуйся, благочестия подвижниче, / средь безбожнаго мрака Света Божественнаго проповедниче, / злых нравов испрáвителю, / богоборческаго нечестия обличителю, / веры православныя неустрашимый защитниче, / воине Христов терпеливодушный, / праведне отче Петре, / не престай молитися ко Господу / даровати душам нашим мир и велию милость.

Стих: Блажен муж, бояйся Господа, / в заповедех Его восхощет зело.

Радуйся, христианскаго жительства образе, / заповедей Господних усердный хранителю, / добрый и кроткий людéй православных пастырю, / душ немощствующих врачу милостивый, / священнотаинниче Божий, пренебесныя дары земнородным являяй, / Христа Спаса верный служителю, / Того прилежно моли, пречудне отче Петре, / мир мирови даровати / и низпослати душам нашим велию милость.

Слава, глас 6:

Память праведнаго с похвалами совершающе, / песни хвалебныя принесем Христу Богу, / даровавшаго нам таковаго молитвенника и чудотворца, / Петра исповедника богоноснаго, / и, притекающе к раце мощей его, тако рцем: / помяни нас, отче священнейший, / у Престола Вседержителя всех Господа, / да дарует нам время на покаяние / и вся к душевному спасению полезная.

И ныне, глас тойже:

Творец и Избавитель мой, Пречистая:

На благословении хлебов тропарь святаго дважды и Богородице Дево: единожды.

Тропарь святаго, глас 3:

На утрени

Земли Русския украшение, / правою верою благочестно пожил еси, / верныя в годину гонений истине научая и утешая, / узы, поношения и скорби терпя, / молим тя, праведне отче Петре: / спасай нас молитвами твоими / от всех бед и печалей.

По 1-м стихословии седален, глас 1:

Иерусалима Горняго жителя, / святых сонма сопричастника, / праведнаго отца нашего Петра возвеличим, / богодаровáнныя мощи его облобызающе, возопим: / моли, блаженне, прилежно Христа Бога,/ спастися душам нашим.

Слава, и ныне, глас тойже:

Невесто Неискусобрачная, / премудрости село показася утроба Твоя Бога Слова: / Ты бо едина, Мати Божия, / благих Ходатаица явившися, / всяких страстей избави рабы Твоя, / непрестанно воспевающия славу Твою.

По 2-м стихословии седален, глас 3:

Отче предивне Петре, / ты в житии твоем тело духови порабóтил еси, / сего ради по смерти твоей нетлением процвел еси / и источник исцелений верным явился еси, / темже тя любовию почитаем.

Слава, и ныне, глас тойже:

Чертог, присносущною славою укрáшен, видяще выну, / желание имамы совнити в онь, / но, одежды не имуще, стыдимся, / да не связани от Ангел и извержени будем. / Ты, сущи одежда нагих дерзновения, Дево Марие, украси ны / и введи внутрь Царствия Христова.

По полиелеи седален, глас 8:

Веселия исполняется днесь земля Владимирская, / и рязанстии люди хвалятся / в торжестве предивнаго и богомудраго Петра, / и с ними вси народи Отечества нашего ликовствуют, / прославляюще единаго от новых мучеников, / исповедника твердаго и пастыря благостнаго, / и с любовию вопиют ему: / спасай нас молитвами твоими, / Петре, присный наш предстателю.

Слава, и ныне, глас тойже:

Богородице Дево, / Вседержавная наша Царице, / омофором молитв Твоих покрывающая весь мир, / приими от благодарных сердец наших / похвальныя песни сия / и испроси нам у Сына Твоего Богоначальнаго / грехов прощение и велию милость.

Таже степенна, 1-й антифон, глас 4. Прокимен, глас 4: Возвеселится праведник о Господе / и уповает на Него. Стих: Услыши, Боже, глас мой, внегда молитимися к Тебе. Всякое дыхание: Евангелие от Луки, зачало 64.

По 50-м псалме стихира самогласна, глас 6:

Свидетель истинный и твердый, / во дни гонения безбожнаго, / явился еси славне отче Петре, / богоборческое безумство тихостию нрава посрамил еси, / чудесы многоразличными веру православную в людех утверждая, / малодушныя словесы Божественными утешая, / всех ко Христу приводя; / тако и нас не лиши твоего заступления, / почитающих память твою верно.

Канон Богородицы со ирмосом на 6 и святаго на 8, егоже краегранесие: Пятницкаго светильника Петра воспеваю. Глас 8.

Песнь 1.

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще, поим Тебе, Единому Владыце.

Песнь хвалебную, Богу содействующу, приношу ти, отче праведне Петре: от избытка бо сердца глаголют уста и потщатся на славословие твое.

Языческия народы в Церковь Свою призвавый чрез огненоязычных апостолов Своих, тя, отче, показует строителя Таин духовных, Христос.

Тристаты фараоновы древле потопивый, Боже, и наши грехи в море благости Твоея раствори, Щедре, молитвами Петра чуднаго, да вопием Ти, Господи, победную песнь.

Богородичен: Неболезновавшая чревом, родшая Христа Господа, мольбами Твоими матерними исцели болезни душ и телес наших, да благодарно Сыну Твоему приносим победную песнь.

Песнь 3.

Ирмос: Несть свят, яко Господь, и несть праведен, яко Бог наш, егоже поет вся тварь: несть праведен, паче Тебе, Господи.

Истине Евангельской с детства наученный, животворныя заповеди Спасовы исполнил еси ревностно, отче Петре, и явился еси проповедник деятельный пути спасительнаго.

Целомудренное житие избравый, с супружницею твоею Мариею духом николиже разлучался еси, и нас не остави сиры, блаженнее Петре, любовию тя чтущих.

Крестоношение служения священническаго на рамена своя подъял еси, боголюбче отче Петре, и вся коварства бесовския и лютость богоборцев доблественне претерпел еси.

Богородичен: Ангелов удивление, человеков дерзновение, Богородице Чистая, Приснодево, моли Христа Бога, спасти непрестанно Тя блажащия.

Седален, глас 1:

Небесными надеждами немощь человеческую укрепивши, дерзновенно на страдания за Христом последовал еси, от Него же восприял еси благодать немощныя души и телеса врачевати, богомудре отче Петре, тем любовию тя ублажаем.

Слава, и ныне, глас тойже:

Упование христиан, Пресвятая Дево, егоже родила еси Бога, паче ума же и слова, непрестанно моли с вышними Силами подати оставление грехов наших всех и исправление жития верою и любовию присно Тя славящим.

Песнь 4.

Ирмос: Из горы приосененныя, Слове, пророк, единыя Богородице, хотяща воплотитися боговидно усмотри и со страхом славословяще силу Твою.

Глаголал еси богомысленно, отче Петре: вся жизнь моя – чудо есть, и благодарне Господу взывал еси: Силе Твоей слава, Человеколюбче.

Образ был еси верным: словом, житием, любовию, сего ради вселися в тя Дух Святый, отче богоносе, и нам, помолися, стяжати благодать Того.

Светом Пресущным просвещенный, воспламенился еси любовию Божественною и явился еси светильник пресветлый, облистающий безбожия нощь.

Богородичен: Владычице Милостивая, не возгнушайся язвами нашими греховными, Врача рождшая душ и телес наших, утоли болезни и исцели неможения, и спаси души наша.

Песнь 5.

Ирмос: Страстей мя мглы, яко от глубокия нощи, избавляяй, утреневати сподоби дух мой, молюся, во свете дне повелений Твоих, Христе.

Единаго от Святыя Троицы, Воплощеннаго Сына Божия, проповедавый, отче Петре, и люди к покаянию о гресех своих приводя, научал еси вопити: мир душам нашим даждь, Благоутробне.

Тезоименит был еси, отче, первоверховному апостолу и твердо проповедал еси Евангелие Христово, душетленныя плевелы исторгая и благочестие в душах насаждая.

Илии боговидцу и огненному небошествователю поревновал еси, отче боголюбезне Петре, и безбожная учения посрамил еси.

Богородичен: Льщением человекоубийцы древняго праотцы наша от Присносущныя Жизни отпадоша: Рождеством Твоим, Чистая, земнороднии вси паки в рай восхищенни быхом.

Песнь 6.

Ирмос: Содержима мя, приими, Человеколюбче, грехи многими, и припадающа щедротам Твоим, яко пророка Иону, Господи, и спаси мя.

Ненавистнии безбожнии люди ввергоша тя, святе, во глубины сердца морскаго, ты же, пророку Ионе подобяшеся, взывал еси бодрено: да взыдет из истления живот мой к Тебе, Господи, Боже мой.

Изгнания и поношения претерпевшаго Господа ради, иерея Божия преблагостнаго, Петра чуднаго в песнех восхвалим, да его молитвами получим грехов прощение.

Кораблем церковным бушующее море житейское преплыл еси неврежденно и достигл еси, богоблаженне, вечныя пристани, оттуду и нас, святе Петре, помяни, празднующих память твою.

Богородичен: Архангельский глас вопием Ти: Радуйся, Благодатная, Господь с Тобою; радуйся, Благословенная, Заступница наша и скорая в бедах Помощница.

Кондак, глас 3:

Первоверховному соименнаго пастыря, / утешителя скорбящих, целителя немощных, / хвалу и утверждение наше днесь любовию восхвалим вернии. / Сей бо есть целитель доблий / и молитвенник о душах наших.

Икос:

Добродетельным житием на земли просиявшаго / и на Небесех со Ангелы ныне ликующаго, / пастыря дивнаго и чудотворца всехвальнаго, / сугубым венцем исповедничества и целомудрия увенчáннаго, / Петра боголюбезнаго воспоим вернии, /сей бо есть целитель доблий / и молитвенник о душах наших.

Песнь 7.

Ирмос: На поле Деире иногда мучитель пещь постави на мучение Богоносных, в нейже три отроки песнословляху Единаго Бога, троично воспеваху, глаголюще: отцев Боже, благословен еси.

Плотская востания, отче, низложив, духом пламенеюще Христу вопиял еси: благословен еси во веки, Господи, Боже, отец наших.

Единомудреннаго отцем древним пастыря и сотаиника тя, блаже, почитаем и вопием радостно: благословен еси, Господи, Боже, отец наших, и Препетый и Превозносимый во веки.

Трудолюбный делатель молитвы показался еси, отче Петре, службы церковныя усердно совершая и люди пети научая: благословен еси в храме святыя славы Твоея, Препетый и Превозносимый во веки.

Богородичен: Радосте наша, Пречистая Дево, Ты едина во всех родех Мати Божия показалася еси, Божество неопально вместившая. Тем Тя благословим, Марие Богоневестная.

Песнь 8.

Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите, вся дела Господня, Господа.

Ангелом сомолитвенниче, отче Петре, священнодействуя праведно, ты сердцем чистым Господа зряще и телесными очима на Престоле Агнца Божия за мир закалаема видяще, Вседержителю взывал еси: Господа пойте дела и превозносите во вся веки.

Весь дальняя освятися пришествием твоим, отче богосиянне Петре, и стецахуся к тебе люди от конец Отечества нашего, ищуще твоея помощи и утешения.

Отец чадолюбивый был еси всем приходящим к тебе со скорбию сердечною и нуждою, и никтоже неутешен отыде от твоего лица, блаженне.

Богородичен: Слово Отчее Единосущное, Адамово избавление от кровей Твоих девственных воплотися, Един, яко весть, Всепетая, спасая нас Своею благостию.

Песнь 9.

Ирмос: Проявленное на горе законоположнику во огни и купине Рождество Приснодевы в наше, верных, спасение песньми немолчными величаем.

Плоды трудов твоих праведных восприял еси, отче блаженне, дарами Духа обогатився, в селения пренебесныя вселился еси, оттуду не престаеши посещати чад твоих, пастырю наш милостивый.

Елеем милосердия твоего помазуем души наша и ограждаемся от злых оплотом молитв твоих, Петре священнейший, величающе Духа Святаго державу, тако прославляющаго угодники Своя.

Весь во Свет Божественныя Троицы с веселием прешел еси, ангельским воинством ныне срадуешися, пречудне отче Петре, с нимиже непрестанно моли всем спастися, поющим тя.

Ангельския чини и человеков собори ликовствуют в памяти твоей, святе отче Петре, Бога славословяще, Чуднаго и Прехвальнаго во святых Своих.

Богородичен: Юже воспевают Силы Небесныя, Владычицу Деву, Церкве красоту, верных державу и похвалу, благодарно величаю и пение скончаваю.

Светилен:

Светом Превечнаго сияния озарився, отче Петре, Христу последовал еси, и Того благодатию просветився, источник чудес и милостей явился еси, сего ради молим тя: спаси души наша.

Слава, и ныне, Богородичен:

Зарю пресветлую, являющую нам Солнце незаходимое, вемы, Тя, Пресвятая Дево Богородице. Сего ради молим Тя: яко Мати Света сущи, просвети нас светом Сына Твоего, Христа Бога нашего.

На хвалитех стихиры святаго, глас 6:

Подобен: Тридневен:

Тридневно воскресшаго Христа Господа / верный ученик явился еси, / достоблаженне отче наш Петре: / паствы русския радование, / молися Человеколюбцу Богу, / да спасет души наша.

Живодавцу Спасу Господу / последовал еси во страданиих твоих, / крест жития исповедническаго подъял еси, / подкрепляемь Божественною благодатию. / Темже вопием ти, отче Петре, / моли о нас, спастися душам нашим.

Воспеваем житие твое многострадальное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно всесвященную память твою, / богоносе, блаженне отче Петре.

Явился еси светильник благодатный, / святе отче Петре, / кротким светом любве и смирения сияя / и нас милостию твоею озаряя. / Темже и мы, благодарне чтуще память твою, / вопием ти усердно: / моли о нас, пастырю наш добрый / и новоявленный чудотворче.

Слава, глас 8:

Да торжествует Церковь Твоя, Христе, / украшéнная сонмом славных мучеников, / жизнь свою Тебе предавших / и от Тебе живот вечный получивших; / их молитвами Долготерпеливе, Человеколюбче Господи, / Отечество наше в православии сохрани / до скончания века.

И ныне, глас тойже:

Владычице, приими молитвы раб Твоих / и избави нас от всякия нужды и печали, / Ты еси, Богородице, оружие наше и стена, / Ты еси Заступница, и к Тебе прибегаем, / Тя и ныне на молитву призываем, / да избавиши нас от врагов наших. / Возвеличим Тя вси, / Всенепорочную Матерь Христа Бога, / Юже осени Дух Пресвятый.

Славословие великое и отпуст. И бывает помазание братии от лампады святаго.

На Литургии

Блаженны от канона Песнь 3.-я и 6-я. Прокимен, глас 4: Возвеселится праведник о Господе / и уповает на Него. Стих: Услыши, Боже, глас мой, внегда молитимися к Тебе. Апостол ко Ефесеем, зач. 233. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Матфея, зачало 11. Причастен: В память вечную будет праведник:

Источник: сайт храма новомучеников и исповедников Российских в Строгино