Ноябрь

Месяца октября в 20-й день

преподобнаго Гавриила Самтаврийскаго

На велицей вечерни

Блажен муж: ^{@1-й антифон. На Г@}осподи, воззвах: стихиры на 8, глас 6:

Преподобне отче Гаврииле!/ Яко столп веры явился еси/ и, неколеблемь ветрами вражиими,/ венцем же добродетелей паче снега блистаяй,/ духовная очи людей земли Иверския/ от земных к Небесным возводил еси,/ идеже ныне водворяяся,/ поминай нас, чтущих святую память твою.

Преподобне отче Гаврииле!/ От юности течение жизни к Богу направив,/ потоки хвалы Ему излил еси/ и водами благодати землю Иверскую напоил еси./ Ныне же, в Горних селениих пребывая,/ яко река из рая текущая,/ и нам утешения струи источи/ и моли спастися душам нашим.

Преподобне отче Гаврииле!/ Крест Господень возлюбил еси,/ сего ради, спелому грозду подобяся,/ всего себе в точило скорбей и мучений вдал еси/ и, вино благоуханное любве к Богу и людем искапав,/ Древа Живота достигл еси,/ идеже ныне водворяяся,/ моли о душах наших.

Ины стихиры, глас 1:

Днесь, вернии, духовно торжествующе/ в нарочитем празднице преподобнаго отца/ и благочестно радующеся, тому тепле возопиим:/ радуйся, святый исповедниче и Христа ради юродиве,/ преподобне отче наш Гаврииле;/ радуйся, Небесный человече и земный Ангеле;/ радуйся, многих на путь спасения наставивый;/ радуйся, верным похвало и утешение;/ радуйся, земли Грузинстей и Русской утверждение/ и молитвенниче о душах наших.

Преподобне отче Гаврииле,/ избранный служителю Святыя Троицы,/ радосте собратий и Православия утверждение,/ Ангелов друже и красный цвете райский,/ молитвенниче теплый о душах наших,/ от земныя обители в Небесную возшедый/ и во Царствие Небесное водворивыйся,/ умоли Господа и Пречистую Его Матерь,/ росою благодати окропити нас/ и спастися душам нашим.

Кия похвалы принесем ти, преподобне Гаврииле?/ Ты бо, Царский образ на драхме сердца твоего запечатлевая,/ постом, бдением и воздержанием тое очищал еси/ и от скверны греховныя слезами омывал еси,/ темже и просия в тебе образ Владыки Христа,/ Емуже во всем подражал еси:/ укоряемь, сопротив не вещаше,/ гонимь, кротце претерпеваше,/ нощь в молитве пребывая, днем люди утешаше./ Моли спастися душам нашим.

Слава, глас 5:

Составльше лик духовный,/ взыграим на свирели мысленней/ и восхвалим дивнаго во святых Своих Бога нашего,/ Иже яви нам сицеваго ходатая,/ егоже не имехом до днесь среди отец наших,/ радость иноков и величие Картли,/ чудес источника и великаго помощника/ и молитвенника о душах наших.

И ныне, Богородичен, глас тойже: В Чермнем мори:

Вход. Прокимен дне. И чтения три преподобническая.

На литии стихира храма и святаго, глас 4:

В милосердие и терпение облекся,/ Иоанну Крестителю подобяся,/ покаяние во гресех людем проповедал еси/ и, яко Давид, всенощно руце в молитве простирал еси,/ добродетелей искусный делателю, старче Гаврииле,/ темже и Спасу нашему Христу угодил еси/ и радости непреходящия сподобился еси;/ моли о душах наших.

Слава, глас 2:

Воспевают присно православнии людие/ добродетели твоя, богоносне Гаврииле,/ святость, смирение и милосердие;/ и мы, ведуще тя молитвенника тепла,/ усердно просим твоего ходатайства/ пред Престолом Святыя Троицы,/ да спасемся от находящих бед/ и улучим спасение душам нашим.

И ныне, Богородичен воскресен.

На стиховне стихиры, глас 2.

Подобен: Доме Евфрафов:

Днесь Церковь Картлийская/ веселится о чаде своем,/ се бо Гавриил преподобный/ обрете благодать пред Богом/ и ходатай велий о нас явися.

Стих: Восхвалятся преподобнии во славе/ и возрадуются на ложах своих.

Церковь Богу воздвигнув,/ сам себе Владыце храм устроил еси,/ утверди и наша мысли, святе Гаврииле,/ во еже быти нам обительми/ Троицы Единосущныя.

Стих: Возношения Божия в гортани их/ и мечи обоюду остры в руках их.

Монах истинен быв,/ многая чада духовная воспитал еси,/ беден и ничтоже имеяй,/ многия обогатил еси,/ моли о нас, святе Гаврииле!

Слава, глас и подобен тойже:

Боже Безсмертне/ и Содетелю всяческих,/ утверди в мире Церковь Твою/ и спаси верныя люди/ молитвами преподобнаго Гавриила.

И ныне, Богородичен, глас 2: О, чудесе новаго, всех древних чудес:

На благословении хлебов тропарь святаго, дважды и Богородице, Дево: единожды.

Тропарь святаго, глас 1:

Владыце Христу, Богу нашему,/ Иже славу Свою рабиим зраком скры,/ в смирении и кротости подражая,/ юродства вретищем благодать, ти данную, покрыл еси/ и духовный наставник многим явился еси,/ отче преподобне Гаврииле./ Темже и нас во благочестии укрепи/ и моли спастися душам нашим.

На утрени

На Бог Господь: тропарь святаго, дважды. Слава, и ныне, Богородичен.

По 1-м стихословии седален, глас 1:

От восток солнца до запад хвально имя Господне – сице рцем вси, людие, творяще светло ныне память Божия угодника, Гавриила преподобнаго, и, видевше добрая дела его, прославим Отца нашего, Иже есть на Небесех.

Слава:

Молитвою и знамением крестным вражия искушения победив, постом и воздержанием Господеви благоугодил еси, Гаврииле преподобне, и дар чудес от Него приял еси исцеления подавати верою притекающим к раце мощей твоих. Темже моли Христа Бога грехов оставление и нам даровати, чтущим любовию святую память твою.

И ныне, Богородичен:

Милостива буди нам, Владычице, враг бо стрежет нас ужалити, егда в уныние и отчаяние впадаем, но сокруши его немощную главу.

По 2-м стихословии седален, глас 2:

Надеяся на Господа, яко гора Сион, был еси, преподобне Гаврииле; помышленьми живый в Горнем Иерусалиме, не подвиглся еси стопами и вопиял еси унывающим: Господь окрест людей Своих отныне и до века.

Слава:

Благослови тя Господь, преподобне Гаврииле, на дела велия и дарова богатую милость в жизни сей временней, по святей же кончине ущедри тя даром, еже ходатайствовати о душах грешных. Приими и ныне малое сие моление, с любовию тебе приносимое, и теплым предстательством твоим умоли Владыку Христа Бога избавити нас от грехов и нечестия.

И ныне, Богородичен:

О, Владычице Пречистая, Древо дивноплодное, Плод Живота вечнаго прозябшее! Приосени ны благодатию Твоею, да согласно поем: радуйся, Покрове миру, ширший облака.

Величание:

Ублажаем тя,/ преподобне отче наш Гаврииле,/ и чтим святую память твою,/ наставниче монахов/ и собеседниче Ангелов.

Псалом избранный: Терпя, потерпех Господа:

По полиелеи седален, глас 4:

Егда наидоша на Церковь Христову воды безбожия, ты, святе Гаврииле, сопротив им стал еси и огнем молитвы иссушал еси. Ныне же ина испытания тщатся потопити ны: междоусобия и расколы, лицемерие и беззаконие. Буди ходатай о нас пред Кормчим ковчега Церкве, да, в нем от потопа избавльшеся, воспоим помощь твою, преподобне.

Слава, и ныне, Богородичен:

Под кров Твой, Пречистая Дево, прибегающих не презри, и мольбу принеси о нас Человеколюбцу Богу, еже спастися рабом Твоим.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Возсия нам от земли сокровище,/ мощи твоя, преподобне Гаврииле,/ яже радостию лобызающе, молим:/ осияй ны, отче, любовию твоею/ и озаритися сердцам нашим моли/ любовию к Богу и человеком.

Канон, глас 7, егоже краегранесие: Иверския земли винограде, напой верных.

Песнь 1.

Ирмос: Манием Твоим на земный образ преложися/ прежде удоборазливаемое водное естество, Господи./ Темже, немокренно пешешествовав, Израиль/ поет Тебе песнь победную.

Иверския земли винограде, преподобне Гаврииле, напой божественным веселием верных, на похвалу тебе сошедшихся, от пианства уныния истрезвляя, печалей изымая и радости о Бозе исполняя нас.

Воинство фараоново в воде древле Моисей потопи, ты же, отче Гаврииле, молитвою к Законодавцу духи злобы поднебесныя низринул еси, сего ради людем путевождь ко спасению показался еси.

Егда пройде Израиль море Чермное, песнь победную Богу воспе, и ты, отче, научаеши ны не человеком, но Единому Богу славу воздавати, славно бо прославися.

Богородичен: Рожденнаго от Тебе поем, Дево, и Господа нарицаем, но греси наши на ны вопиют. Моли, Мати Божия, да не услышим глас оный: отыдите от Мене, не вем вас.

Ин канон, глас 6.

Ирмос: Яко по суху, пешешествовав Израиль/ по бездне стопами,/ гонителя фараона видя потопляема,/ Богу победную песнь поим, вопияше.

Рачение пламенное к вере правей имея и любовию ю преумножая, святый старче Гаврииле, укажи и нам путь правый, вводяй в живот вечный.

Избранный сосуд Святаго Духа яви тя Господь, отче Гаврииле, темже и благоухание твоих молитв, яко фимиам благовонный, присно восходит к Богу.

Яко имеяй от Бога дерзновение ходатай быти грешников, моли, преподобне, спасти души наша от плена греховнаго.

Божия силы преисполненный, невечерним светом блистаеши, отче наш, всеблаженне чудотворче Гаврииле, темже моления наша приими и мир даруй верою и любовию чтущим тя.

Богородичен: Всеблагая Владычице, Яже Преблагаго Бога плотию рождши, озлобленная страстьми наша сердца очисти, да верою и любовию величаем Тя.

Песнь 3.

Ирмос: В начале Небеса всесильным Словом Твоим/ утверждей, Господи Спасе,/ и Вседетельным и Божиим Духом всю силу их,/ на недвижимем мя камени исповедания Твоего утверди.

Самтавро возвеличися во обретении мощей твоих, от нихже, яко от неистощимаго источника, многая исцеления и чудеса проистекают, Гаврииле славне.

Кто не подивится дару исцелений, яже в тебе яви Бог, наипаче же смирению, имже, яко солию, вся гнилость гордыни в приходящих к тебе отъемлется.

Исполнитися моли, преподобне, во благих прошением нашим, яко Господь слышит всякое прошение твое, наипаче же моли, да утвердятся во Господе сердца наша.

Богородичен: Явися чрево Твое, Всенепорочная, стог честнаго гумна, миру нося Пшеницу живота, питающу всяческая. Темже Тя, яко виновну всех добрых, вернии, по достоянию ублажаем.

Ин

Ирмос: Несть свят,/ якоже Ты, Господи Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

От младенчества смирением украшен был еси, в возраст же пришед, всем сердцем Богу послужити восхотел еси. Темже, плотская попечения отринув, иноческий тесный путь избрал еси.

Еще во отрочестве ти сущу, льстивный зверь восхоте погубити тя и в видении боря; ты же, преподобне, свирепства его не устрашився, помощию Христовою возмогл еси того победити. Темже и ныне избави нас от напастей льстиваго.

Христа ради о сродницех твоих небрегл еси, блаженне, и был еси им, яко нищ и чуждь. Обаче любовию Господней уязвляемь, усердно Богу и людем послужил еси.

Егда страна твоя богоборчеством объята бысть, ты, преподобне, Горним желанием распалився и наветов безбожник не убоявся, храм Божий воздвигл еси, да вера Христова утверждается.

Богородичен: Услыша Ева праматерь: в печалех родиши чада. Ты же, Чистая Дево, радованным гласом, яко Господь с Тобою, печаль праматере потребила еси.

Седален, глас 5:

Преподобне отче Гаврииле! Ты, плотския страсти умертвив и девство возлюбив, чистотою Ангелом уподобился еси, смирением же разум Христу подчинив, духовную мудрость стяжал еси и, любовию нелицемерною всех, приходящих к тебе, усладив, на правый путь наставил еси. Темже вопием ти: радуйся, Гаврииле, Небесный человече и земный Ангеле!

Слава, и ныне, Богородичен:

Напоитися богатно слезами даждь браздам страстныя моея души, и плод принести ми сторичный, Владычице, сподоби, и сердце мое всякаго веселия исполни, да славлю Тя .

Песнь 4.

Ирмос: Отча недра не оставль/ и сошед на землю, Христе Боже,/ тайну услышах смотрения Твоего/ и прославих Тя, Едине Человеколюбче.

Злии и безбожнии людие тя безумным нарекоша, не ведуще псаломскаго словесе, яко безумен есть той, иже в сердце глаголет, яко несть Бога. Ты же, отче, сие безумие обличив, в земли Иверстей разум Божий утверждал еси.

Егда Евангелие, яко бисер безценный, обрел еси, преподобне, тогда вся красная мира сего отдал еси, да его приобрящеши. Темже моли Господа, да сокровищ Царства Небеснаго нас сподобит.

Многосветлый лик Христов, на дске написанный, благоговейно почитал еси, преподобне, таже и в коемждо приходящем к тебе образ Божий помраченный грехами зрел еси и молитвою твоею просвещал еси.

Богородичен: Любве исполнен быв ко Пречистей Богоматери и Сыну Ея, образы Их рукотворныя во храме твоем от богоборцев укрывал еси. Темже и ныне зриши их выну во Царствии Небеснем.

Ин

Ирмос: Христос моя сила,/ Бог и Господь,/ честная Церковь/ боголепно поет, взывающи,/ от смысла чиста о Господе празднующи.

Егда богоборцы нечестивии святыя храмы разориша и люди на мучения обрекоша, тогда мнози от веры истинныя отступиша и обеты иноческия попраша. Ты же, отче, узким и тесным путем шествуя, веру правую исповедати не устрашился еси.

Егда беззаконие умножися и оскудение любве приспе, тогда вся веледушно претерпевал еси, преподобне, и аще юн леты был еси, муж премудр разумом обрелся еси, смирением враги побеждая.

Священства саном облекся, блаженне Гаврииле, народу твоему, в суеверии коснеющу, веру Христову проповедал еси, научая чисто ю содержати и заповеди божественныя строго исполняти.

Благий рабе и верный, и искусный делателю винограда Христова! Ты, бодренне тяготу дне претерпев и талант свой умножив, юродом Христа ради на земли пожил еси и к лику блаженных причтен еси.

Богородичен: Ты еси Прибежище наше и Утверждение, Пречистая Богородице, моли Сына Твоего и Бога нашего подати нам спасение и грехов оставление.

Песнь 5.

Ирмос: Нощь не светла неверным, Христе,/ верным же просвещение в сладости словес Твоих./ Сего ради к Тебе утренюю/ и воспеваю Твое Божество.

Илии Фесвитянину подобник быв, ревнуя поревновал еси о Бозе Вседержителе и верен Ему во искушениих и напастех пребыл еси.

Возсия нам от земли сокровище, преподобне, мощи твоя, яже радостию облобызающе, молим: осияй ны, отче, любовию твоею и моли, во еже озаритися сердцам нашим любовию к ближним.

Ищущим Света, яко звезда, среди нощи неведения явился еси, отче Гаврииле, руководствуя к Свету Невечернему и подвизая елеем милостыни освещати сердца.

Богородичен: Ныне время благоприятно, ныне день спасения: возжзи в нас, Пречистая, огнь решимости, еже творити заповеди Сына Твоего.

Ин

Ирмос: Божиим светом Твоим, Блаже,/ утренюющих Ти души любовию озари, молюся,/ Тя ведети, Слове Божий, истиннаго Бога,/ от мрака греховнаго взывающа.

Христа всем сердцем возлюбив и по Имени Его поборая, на богоборцев небоязненно возстал еси, достохвальне, и, яко един от древних, образ идольский богоненавистника сожегл еси.

Ни мучения, ни страх смертный возможе тя разлучити от любве Божия, преподобне, темже, изъязвление плоти претерпев, яко злато в горниле, душу твою очистил еси.

Светом Христовым в житии твоем просиял еси, блаженне отче Гаврииле, и словесы богомудрыми многия к Солнцу Правды обратил еси, дела тьмы началозлобнаго врага разрушая.

Богородичен: Бога, егоже родила еси, Пречистая Марие, моли, рабом Твоим подати прегрешений оставление.

Песнь 6.

Ирмос: Плавающаго в молве житейских попечений,/ с кораблем потопляема грехи/ и душетленному зверю приметаема,/ яко Иона, Христе, вопию Ти:/ из смертоносныя глубины возведи мя.

Овцы заблуждшия Христу приводя, сам яко агнец кроток среди волков безбожия показался еси, обаче Пастырь Добрый от злогубительства тех сохрани тя.

Гавриилу Иверскому Святогорцу подобяся, ступил еси с верою на воды многоопасныя иноческаго жития и, за образом Пресвятыя Девы устремився, силою Божиею образ Ея смирения в сердце твоем обрел еси.

Рукама твоима храм Богу воздвигл еси, отче, егоже безбожнии разорити не возмогоша; и сам показался еси, яко столп несокрушимый Церкве Христовы, яже адовыми враты вовек неодолима пребывает.

Богородичен: Афонскаго жребия не оставляеши, Богомати, паки же Иверия имать Тя Помощницу, но и нашу нищету посети, иной удел Твой, люди чтущия Тя тепле.

Ин

Ирмос: Житейское море,/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой, Многомилостиве.

Иже тя безумно хотяху погубити, ничесоже успеша, Господь бо стена любящим Его и побораше за тя. Темже и поругания безбожных, отче Гаврииле, ни во что вменил еси и паче во Христе утвердился еси.

Киими словесы восхвалим подвиги твоя, отче Гаврииле, егда, от служения Богу волею властителей безбожных отторжен, без пристанища многая лета пребыл еси, зной дневный и мраз нощный претерпевая.

Прославим верою и любовию преподобнаго Гавриила, заступника теплаго народа Иверскаго, и с кротостию припадем к нему, моляще даровати нам покаяние и исправление.

Богородичен: Ныне к Тебе прибегаем, Пречистая, спаси нас молитвами Твоими и соблюди: елика бо хощеши, можеши, яко Мати Бога Всемогущаго.

Кондак, глас 4:

Непостижима есть милость Господа,/ егоже благодатию естество наше обожено бысть,/ ты же, блаженне отче, во смирении глубоце жительствуя,/ правду Божию проповедал еси/ и, лирою мудрости звяцая,/ любовию к ближним пламенел еси/ и тако, образ Творца в себе нося,/ добродетельми подобие Божие в себе уяснил еси./ Мы же, прославляюще тя похвалы достойными,/ яко ходатаю Божия благодати, сице вопием:/ радуйся, преподобне Гаврииле, Иверии похвало и радование.

Икос:

Кия песни принесем ти от недостойных устен, преподобне Гаврииле? Како воспоим жестокое твое житие, имже, яко злато в горниле, просиял еси и многим людем путевождь ко спасению явился еси? Сего ради, прославляюще подвиги твоя, сице тебе вопием:

радуйся, душ немощных целителю;

радуйся, молитвы непрестанныя учителю.

Радуйся, мучеником за Христа подобниче;

радуйся, юродивым Христа ради сликовниче.

Радуйся, преподобне Гаврииле, Иверии похвало и радование.

Песнь 7.

Ирмос: Пещь отроцы огнепальну,/ древле росоточащу, показаша,/ Единаго Бога воспевающе и глаголюще:/ превозносимый отцев Бог и препрославлен.

Душею сокрушенною и духом смиренным пред Господем ходив, благодать богатно обрел еси, отче Гаврииле, и ныне молися Владыце Христу, да посрамятся вси хотящии рабом Его злая.

Единое на потребу от юности взыскуя, яко пчела люботрудная, словесныя цветники обителей Иверских претекл еси, преподобне, и, сладкий мед добродетели собрав, в сердечныя соты вложил еси.

На стогнах града, идеже живяше, Христа благовествовал еси, преподобне, и окрест живущим людем проповедовал еси, вопия: возвратитеся ко Отцу Небесному и возопийте: благословен Бог отец наших.

Богородичен: Ангел сохрани три отроки в пещи халдейстей, Ты же, Богомати, певцы Твоя сохрани невреждены в горниле искушений, да поем: благословен Бог отец наших.

Ин

Ирмос: Росодательну убо пещь/ содела Ангел/ преподобным отроком,/ халдеи же опаляющее веление Божие/ мучителя увеща вопити:/ благословен еси, Боже отец наших.

Видя Господь твою святую ревность и любовь, во обитель Самтавро посла тя, идеже ты в малей келии водворився, со страхом и трепетом Безкровную Жертву приносил еси и Евангелие Христово благовествовал еси.

В столп царя Мириана вселився и той кресты со образы святых благоукрасив, чудесы многими инокини и приходящия к тебе вразумлял еси и непрестанней молитве научал еси.

Подвиг юродства Христа ради на рамо взем, Гаврииле премудре, яко безумен пред людьми явился еси и от них поругания, скорби и беды многия мужественно претерпевал еси. Ныне же прославляешися всеми, яко друг Божий.

Богородичен: Богородице Дево, рождшая Слово паче слова, Зиждителя Твоего, Того моли с преподобным Гавриилом помиловати души наша.

Песнь 8.

Ирмос: Неопальная огню в Синаи/ причащшаяся купина Бога яви/ медленноязычному и гугнивому Моисеови,/ и отроки ревность Божия три непреборимыя во огни певцы показа:/ вся дела Господня, Господа пойте/ и превозносите во вся веки.

Пламень сластей слезами покаяния угасил еси и в пещь скорбей небоязненно восшел еси, сего ради в сердце твоем, преподобне Гаврииле, огнь божественныя любве неугасаемо возгореся.

Орлине криле быша ти пост и молитва, преподобне, имиже над пропастию страстей воспарил еси и на высоте богомыслия гнездо ума твоего свил еси. И нас ныне настави Горняя мудрствовати, а не земная.

Источник милости подаеши, Спасе, чрез угодника Твоего, преподобнаго Гавриила, и мы благодарно Тебе вопием: благословен еси, Боже, Утешителю Благий.

Богородичен: Воистину ангелоподобен явился еси, отче преподобне, утешение и помощь в нуждах сущим обильно подавая, да вси согласно вопиют: благословен еси, Боже, Богородицею помилуй нас.

Ин

Ирмос: Из пламене преподобным росу источил еси/ и праведнаго жертву водою попалил еси:/ вся бо твориши, Христе, токмо еже хотети./ Тя превозносим во вся веки.

В непрестанней памяти Суднаго дне и кончины временнаго живота выну пребывая, слезами омывался еси, преподобне, и, древним отцем подобяся, еще в жизни сей себе самаго оплакал еси.

Венцем хваления увязем старца Гавриила, вретищем юродства себе облекшаго и сим свет благодати сокрывшаго, ходатая всех и поборника, и скорбящим скорое утешение.

Яко солнце, тучи греховныя разсеявающее, бысть слово твое, отче Гаврииле, к людем страны твоея обращенное. Темже ныне и от нас мглу страстей отжени, преподобне, молитвами твоими.

Богородичен: Спасения Ходатаица нам явилася еси, Богородице, рождшая Спаса и Владыку всех. Темже молим Тя: спаси всех нас.

Песнь 9.

Ирмос: Нетления искушением рождшая/ и всехитрецу Слову плоть взаимодавшая,/ Мати Неискусомужная, Дево Богородице,/ Приятелище Нестерпимаго,/ Село Невместимаго Зиждителя Твоего,/ Тя величаем.

Единый хитон нешвенный Церкве Христовы, свыше из многих язык истканный, раздрати волцы хищницы тщатся, но ты, отче, ходатайством твоим тщетны труды их соделай, во единомыслии всех сохраняя.

Российстей земли ходатай буди, отче Гаврииле, моли Всеблагаго Бога сохранитися ей от враг ненаветованней и древо веры укрепити, да под сению его вси вернии укрываются.

Нам, чтущим тя и любовию хвалящим, помогай, преподобне, да и в жизни сей, благодаряще Бога, пребудем, и жизнь оную безпечальную обрящем.

Изыдите, вернии, от домов и келий ваших, да собранием церковным почтим во уединении среди людий подвизавшагося, истиннаго инока и всем нам теплаго молитвенника, Гавриила досточуднаго.

Богородичен: Христе Всецарю, предстательством Твоея Матере и преподобнаго Гавриила, милостив буди нам, песнь сию чрез них Тебе принесших.

Ин

Ирмос: Бога человеком невозможно видети,/ на Негоже не смеют чини ангельстии взирати;/ Тобою бо, Всечистая, явися человеком/ Слово воплощенно,/ егоже величающе,/ с Небесными вои Тя ублажаем.

Недугом тяжким объят, нестерпимую муку претерпел еси, преподобне, прозрев же в Дусе час кончины твоея, о мире народа и Отечества твоего молитву вознесл еси и неболезненно мир сей оставил еси.

Восхвалим днесь, вернии, столпа добродетели и Христа ради юродиваго, преподобнаго Гавриила, егоже в пещи скорбей невредима от козней вражиих Христос сохрани, имеяй велию милость.

Приидите, людие, воспразднуим память преподобнаго Гавриила, молитвенника дерзновеннаго, заступника обидимым и помощника в бедах сущим, егоже молитвами, Боже, помилуй нас.

Богородичен: Единаго от Святыя Троицы, Слова и Сына родила еси, Дево Пречистая, егоже с преподобными и праведными моли о рабех Твоих, верою просящих грехов прощения.

Светилен:

Прославим, вернии, новаго светильника Церкве Грузинския, Гавриила преподобнаго, от огня любве Христовы нам возжженнаго, да, во тьме мира сего ходяще, не поткнемся, но прославим Отца светов Безначальнаго.

Слава, и ныне, Богородичен:

Великому Гавриилу Архангелу подражая, приносил еси, отче Гаврииле, ангелокрасную песнь Богоматери: радуйся, Обрадованная! И мы ныне, сликовствующе, поем: радуйся, Благословенная, Господь с Тобою!

На хвалитех стихиры, глас 4:

Цвет дивный земли Иверския,/ Гавриил Самтаврийский,/ безумен миру и мудр Богу явися,/ нищ тленными и богат вечными показася,/ прост инок и советник патриархом назвася./ Мы же, духовная чада, сице ему вопием:/ молися выну, отче, за ны ко Господу.

Надеяся на Господа/ и помышленьми живый в Горнем Иерусалиме/ яко гора Сион, явился еси,/ преподобне старче Гаврииле,/ темже и унывающим взывал еси:/ Господь окрест людей Своих/ отныне и до века.

Милостыни сосуде неистощаемый,/ твердый веры исповедниче,/ свеще, любовию Христовою сияющая,/ смирения и незлобия учителю,/ отче Гаврииле Самтаврийский,/ приими молитвы чтущих тя/ и не премолчи за ны ко Господу.

Слава, глас 8:

Днесь радостный день приспе,/ память Гавриила преподобнаго,/ исповедника тверда и веры поборника,/ плодов добродетели исполнена/ и Господеви усердно поработавшаго,/ егоже молитвами, Христе Боже,/ Отечество наше в Православии утверди,/ братолюбия и мира сердца наша исполни/ и спаси души наша.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженна от перваго канона, Песнь 3.-я и 6-я. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Алиллуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник:

Молитва

О, блаженне отче Гаврииле, древним отцем преподобным подобниче и твердый веры исповедниче! Ты, от юности евангельскому учению навык, всем сердцем Христа возлюбил еси, егоже же ради и мира отреклся еси и подвиг юродства восприял еси, да миру безумен явишися. Мы же, аще и лениви суще, но ведуще тя дары Духа Святаго исполнена, на помощь твою надеющеся, со смирением молим: укрепи нас в вере и благочестии, испроси от Господа дух братолюбия и любве, имиже в житии твоем просиял еси, исцели наша недуги душевныя и телесныя, монашествующим подвигом добрым подвизатися помози, пастырей в ревности благовестия Христова утверди, Церковь от разделения сохрани, Отечество наше в мире соблюди и сподоби нам спасение душ улучити и Царствие Небесное наследовати, идеже вкупе с тобою и всеми святыми возможем прославляти Отца и Сына и Святаго Духа, Троицу Единосущную и Нераздельную во веки веков. Аминь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

Месяца октября в 21-й день

Священномученика Павлина, архиепископа Могилевскаго

На малей вечерни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Смире́н, незло́бив, кро́ток и прост быв,/ священному́чениче Павли́не,/ я́ко а́нгел, на земли́ пожи́л еси/ и, муче́нием путь сконча́в,/ зе́млю кро́тких насле́довал еси́./ Моли́ о душа́х наших.

Ве́рою и благоче́стием/ от ма́терних пеле́н обогати́лся еси́/ и, Христа́ всем сердцем возлюби́в,/ в Саро́вскую пу́стынь всели́лся еси́,/ идеже, усердно подвизаяся,/ сама́го себе́ со вся́ким смире́нием ста́рцем подклони́л еси./ Сего́ ра́ди тя, святе Павли́не, ублажа́ем.

Во времена́ гоне́ний лю́тых в земли нашей/ яви́ тя Госпо́дь, преди́вне Павли́не,/ свети́льника пресветлаго,/ благоче́стием сия́юща/ и любо́вию ча́да церко́вная согрева́юща./ Сего́ ра́ди тя прославля́ем.

Твоему́ добродетельному житию,/ Павли́не досточудне,/ а́нгели удиви́шася,/ в телеси́ бо сый,/ безпло́тным подража́ти потща́лся еси́/ и, ум твой ко Христу возвы́сив,/ прему́дрость боже́ственную измлада возлюбил еси́./ Сего́ ра́ди тя почита́ем.

Слава, глас 5.

Подо́бен: Ра́дуйся:

Уподо́бился еси́, Павли́не священному́чениче,/ преподо́бным и богоносным отце́м/ Серафи́му в Диве́еве ди́вному/ и Феодо́сию в Киеве достохва́льному,/ от ю́ности бо твоея́ и́го благое на ра́мена взем,/ любо́вию Христо́вою распали́лся еси́/ и, я́ко звезда́, на тве́рди церко́вней во дни гоне́ния безбо́жнаго просия́л еси́,/ ве́рныя на путь спасе́ния наста́вляя/ и во благочестии утверждая./ Последи же, от беззако́нник приим непра́ведное убие́ние,/ себе́ сама́го в жертву живую принесл еси́./ Ны́не же, предстоя́ престо́лу Царя́ Небе́снаго,/ моли́ спасти́ся душа́м наши́м.

И ны́не, Богоро́дичен, глас то́йже:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние многих прегреше́ний, мо́лимся.

На стихо́вне стихи́ры, глас 6.

Подо́бен: Тридне́вен:

О́браз Христо́ва милосе́рдия па́стве твоей яви́л еси́,/ Павли́не досточудне,/ си́рых и вдови́ц быв заступник,/ ны́не же во све́тлостех святы́х и нас помяни,/ чту́щих с любовию па́мять твою́.

Стих: Свяще́нницы Твои́ облеку́тся в правду/ и преподобнии Твои возрадуются.

Образ злострада́ния и терпе́ния показал еси,/ Павли́не терпеливодушне,/ и, яко твердый свидетель истины,/ поруга́ния, изгна́ния и ну́ждную смерть претерпе́л еси́./ Моли́ о душа́х на́ших.

Стих: Честна́ пред Го́сподем/ сме́рть преподо́бных Его́.

О́бразом Креста́ Животворя́щаго/ се́рдце твое́ утверди́в,/ богому́дре Павлине,/ к страда́нием му́жески вда́лся еси́,/ темже дерзновение улучив ко Господу,/ моли́ спасти́ся душам нашим.

Сла́ва, глас и подо́бен то́йже:

О́браз был еси́ твоему́ ста́ду,/ священномучениче Павли́не,/ сло́вом, житие́м, любо́вию, ду́хом, ве́рою, чистото́ю,/ сего́ ра́ди, имя добраго пастыря стяжав,/ Христа́ Пастыренача́льника моли́ о нас,/ па́мять твою́ верно соверша́ющих.

И ны́не, Богоро́дичен, глас и подо́бен то́йже:

О́браз Твой святы́й почита́ем,/ Богоро́дице Де́во Пречи́стая,/ и Боже́ственному Младе́нцу,/ во объятиих Твоих сущу, покланя́емся,/ моля́ще о спасе́нии душ на́ших.

Тропа́рь писан на велицей вечерни

На велицей вечерни

Блаже́н муж: ^{@1-й антифо́н. На Г@}о́споди, воззва́х: стихи́ры, глас 6.

Подо́бен: Все отло́жше:

И́же хо́щет по Мне ити́, глаго́лет Христо́с,/ да во́змет Крест и Мне да после́дствует,/ ты же, священному́чениче Павли́не,/ от ю́ности и́го благо́е на ра́мена взем,/ ми́ра отве́рглся еси́,/ те́мже, по достоя́нию святи́тельства са́ном почте́н быв,/ Це́ркви Русской во времена́ гоне́ния безбо́жнаго послужи́л еси́/ и венце́м муче́ния украси́лся еси́./ Сего́ ра́ди тя прославля́ем.

Твои́х доброде́телей, отче Павли́не,/ па́мять ны́не ве́рных сердца весели́т,/ ты бо, в безме́рнем смире́нии нището́ю обогати́вся,/ многими подвиги просиял еси/ и, Христа́ всем се́рдцем возлюби́в,/ и́стинный пастырь Бо́га Вы́шняго яви́лся еси,/ те́мже, святи́тельства оде́ждею по достоя́нию украшен,/ кро́вию му́чения сию́ обагри́л еси́./ Моли́ о душа́х на́ших.

Егда́ боже́ственное рачение на́йде на тя, богому́дре,/ тогда́ плотско́е мудрова́ние духу покори́л еси́/ и, во оби́тель Саро́вскую всели́вся,/ мно́гия труды́ поне́сл еси́,/ дарами же духовными украсився,/ яко свети́льник пресветлый на све́щнице церко́внем поста́влен был еси/ и, во святи́тельстве досточе́стно пожи́в,/ муче́нием путь сконча́л еси./ Моли́ спасти́ся душам нашим.

Люты́ ско́рби, но сла́док рай,/ боле́зненны труды́, но блаже́нно восприя́тие,/ си́це глаго́лал еси́, терпеливодушне Павлине,/ егда́ от ме́ста на место́ от беззако́нных гони́мь быва́ше/ и па́ствы твоея́ разлучашеся,/ темже, и в хла́дней земли Сиби́рстей путь твой сконча́в,/ убие́ние от непра́ведных прия́л еси́,/ обаче теплоту́ блаже́нства ве́чнаго обрел еси./ Моли́ и нам черто́га Христо́ва сподобитися.

Сла́ва, глас 8:

Ра́дуйся, пу́стынь Саро́вская благознамени́тая,/ ра́дуйтеся, преде́лы Костромски́я и Яросла́вския,/ ра́дуйся, Москво́ первопресто́льная и честна́я оби́тель Новоспа́сская,/ я́ко воспита́ли есте́ граждани́на Ца́рства Небе́снаго,/ но́ваго священному́ченика, блаже́ннаго Павли́на,/ му́жа избранна и соверше́нна,/ и́же, любо́вию, прему́дростию и благоче́стием просия́в,/ подвиги своими Церковь Русскую украсил есть./ Темже, вернии, с любовию тому возопиим:/ о́тче всеблаже́нне, моли́ся о нас,/ всечестну́ю твою па́мять соверша́ющих.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния.

Дея́ний святы́х апо́стол чте́ние (глава́ 4; 1–12):

Во дни о́ны, глаго́лющим же апо́столом к лю́дем,/ наидо́ша на ни́х свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пя́ть./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою, или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть Ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го Имене под небесе́м, да́ннаго в челове́цех,/ о не́мже подоба́ет спасти́ся нам.

Дея́ний святы́х апо́стол чте́ние (глава́ 4; 13–22):

Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о Имени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о Имени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ изцеле́ния.

Дея́ний святы́х апо́стол чте́ние (глава́ 4, 23–31):

Во дни о́ны, отпуще́на бы́вша апо́стола приидо́ста ко свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во изцеле́ния,/ и зна́мением и чудесе́м быва́ти Именем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

На лити́и стихи́ра хра́ма и свята́го, глас 2.

Подобен: Ки́ими похва́льными венцы́:

Ки́ими похва́льными венцы́/ увязе́м Павлина священному́ченика,/ мона́хов похвалу́,/ святи́телей добро́ту,/ ве́ры столпа́ непреобори́маго,/ от ю́ности прему́дрость возлюби́вшаго/ и во благоче́стии неле́ностно потруди́вшагося?/ Сего́ бо вои́стину досто́йно/ безсме́ртныя сла́вы венце́м/ венча́ет Христо́с Бог наш,/ име́яй ве́лию мило́сть.

Ки́ими духо́вными пе́сньми/ ублажи́м достосла́внаго Павли́на/ страда́льца твердейшаго,/ Правосла́вия побо́рника,/ в после́дняя ле́та нам дарова́ннаго,/ благоче́стия учи́теля,/ покая́ния пропове́дника,/ на путь спасе́ния наставля́ющаго?/ Его́же моли́твами/ враго́в шата́ния, Христе́, низложи́,/ име́яй ве́лию ми́лость.

Ки́ими пе́сненными добро́тами/ воспои́м Христо́ва уго́дника,/ сиро́т питателя,/ ю́ных наста́вника,/ в милосе́рдии Небе́сному Отцу́ подража́вшаго,/ кла́дязь любве неисчерпа́емый,/ ми́лостыни ре́ку незави́стну,/ Це́рковь Ру́сскую веселя́щую тече́ньми словес своих?/ Его́же молитвами и предста́тельством/ спаси́ отечество наше, Христе́ Бо́же,/ имеяй велию милость.

Сла́ва, глас 6:

Мно́ги ско́рби претерпе́л еси́,/ достоблаже́нне Павли́не священному́чениче,/ те́мже по достоя́нию вшел еси́ в Ца́рство Небе́сное,/ иде́же в ли́це новому́ченик Це́ркве Ру́сския,/ славою Горнею озаряемь,/ по́честь побе́ды твоего́ страда́ния прие́млеши./ Моли́ спасти́ся душам нашим.

И ны́не, Богоро́дичен, глас тойже: Богородице, Ты еси Лоза истинная:

На стихо́вне стихи́ры, глас 2.

Подо́бен: Егда́ от Дре́ва:

Святи́тельства престо́л украша́я доброде́тельми,/ во времена́ лю́тая в земли́ нашей,/ богохрани́мому гра́ду Ку́рску посыла́ешися,/ я́ко ми́рный а́нгел, Павли́не всече́стне,/ еже кро́тостию и любо́вию людем послужити,/ ча́да церко́вная сло́вом Бо́жиим наставити/ и еле́ем милосе́рдия духо́вныя я́звы их исцелити./ Уврачуй и на́ша стру́пы греховныя, цели́телю изря́дный.

Стих: Свяще́нницы Твои́ облеку́тся в пра́вду/ и преподо́бнии Твои́ возрадуются.

Щито́м ве́ры, Павли́не многострада́льне,/ разли́чная ухищре́ния богобо́рцев отрази́л еси́/ и, темни́чныя у́зы претерпе́в,/ Пе́рмския земли́ архипа́стырь наре́клся еси́,/ насле́дник священнострада́льца Андрони́ка быв./ Темже, па́ству расточе́нную/ ти́хим гла́сом любве́ собра́в,/ по достоя́нию нарече́ние до́браго па́стыря прие́млеши,/ и нас во еди́но ста́до Христо́во собери,/ молитвами твоими, священному́чениче преславне.

Стих: Честна́ пред Го́сподем/ сме́рть преподо́бных Его́.

Спасения души взыскуя,/ вослед Христу смиренно последовал еси,/ Иже и постави тя архипастыря гра́да Калу́ги,/ священномучениче Павли́не преславне,/ моли́твы чи́стое зерца́ло,/ ми́лостыни усе́рдный пода́телю/ и пе́ний церко́вных изря́дный люби́телю!/ Ты же, Боже́ственныя Та́йны всеблагогове́йне совершая,/ ве́рныя люди со Христо́м соединя́л еси/ и заблуждшия на путь истинный наставлял еси./ Те́мже, лико́м небе́сным совокупи́вся,/ моли́ спастися душа́м на́шим.

Сла́ва, глас 8:

Нището́ю духо́вною обога́тився,/ себе́ сама́го Бо́гу соверше́нно пре́дал еси́,/ доброхва́льне святи́телю Павли́не,/ и, я́ко звезда́ пресве́тлая,/ от восто́ка земли́ на́шея к за́паду дости́гл еси́./ Обаче, на престо́ле Могиле́встем доброде́тельми просия́в,/ па́ки сове́том безбо́жных на восто́к гони́мь быва́ше,/ иде́же в преде́лех Сиби́рских луче́й твои́х сия́ние за́йде./ Освяти́ и на́ша ду́ши/ све́том страда́ний твои́х, достосла́вне.

И ны́не, Богоро́дичен, глас то́йже: Безневе́стная Де́во:

Тропа́рь, глас 4:

От ю́ности желание к Богу возложив,/ на пажитех мона́шеских упа́слся еси́/ и, многия добродетели стяжав,/ архипа́стырь слове́сных овец явился еси,/ ихже до́бре упа́с,/ мно́гия ско́рби от богобо́рцев претерпе́л еси́/ и, муче́нием путь сконча́в,/ Царствие Небесное наследовал еси,/ священному́чениче Павли́не,/ моли́ Христа Бога/ спасти́ся душа́м на́шим.

Ин тропа́рь, глас 2:

Ве́ры Правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священномучениче Павлине,/ па́ству твою́ до́бре упа́сл еси́/ и в хладней Сиби́ри му́ченическую сме́рть прия́л еси́./ Ны́не же, в ве́чней сла́ве пребыва́я,/ моли́ спасти́ся душа́м на́шим.

На утрени

На Бог Госпо́дь: тропа́рь священному́ченика два́жды. Сла́ва, и ны́не, Богородичен.

По 1-м стихосло́вии седа́лен, глас 7:

Гоне́ния лютая претерпева́я, си́це безбо́жным глаго́лал еси́, священному́чениче Павли́не: путь наш кре́стный есть, оба́че стра́ха ва́шего и са́мыя сме́рти не убои́мся, я́ко Кресто́м упова́ем дости́гнути Небе́снаго Ца́рствия, его́же обеща́ Христо́с всем лю́бящим Его́. Два́жды.

Сла́ва, и ны́не, Богородичен, глас то́йже:

Ны́не ли́цы новому́ченик со а́нгелы славосло́вят Тя, Влады́чице, све́тлостей со́лнечных превы́шшую, Похвалу́ всея́ вселе́нныя, Сло́во Бо́жие во чре́ве прии́мшую и Ра́дость ми́ру ро́дившую. С нимиже и мы вопием: ра́дуйся, спасе́ния на́шего Хода́таице.

По 2-м стихосло́вии седа́лен, глас 5:

Изгна́ния, узи́лища и безве́стную кончи́ну прови́дев, блаже́нне Павли́не, ко Подвигополо́жнику Христу́ со упованием крепким взыва́л еси́, да в терпе́нии путь твой испра́вит, сове́ты нечести́вых разори́т, Це́рковь же святу́ю во благоче́стии сохрани́т. Темже моли́ спасти́ся душа́м на́шим. Два́жды.

Сла́ва, и ны́не, Богородичен, глас то́йже:

Милосе́рдия твоего́ пучи́ну кто испове́сть, Де́во Пренепоро́чная, Засту́пнице на́ша и Упова́ние, непосты́дная Наде́ждо христиа́н, скорбя́щих Ра́досте и всех, су́щих на земли́, пресве́тлая Добрόто? Покры́й нас боже́ственным предста́тельством Твои́м, Пречи́стая Богоро́дице, Влады́чице.

Велича́ние:

Велича́ем тя,/ священному́чениче Павли́не,/ и чтим честна́я страда́ния твоя́,/ я́же за Христа́/ претерпе́л еси́.

Ино велича́ние:

Величаем тя,/ священномучениче Павлине,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиеле́и седа́лен, глас 8:

Егда́ богобо́рцы, я́ко во́лцы лютии, на Це́рковь Христо́ву в Ру́сстей земли́ восста́ша, тогда, священному́чениче Павли́не, я́ко пастырь до́брый, ду́шу твою́ за о́вцы слове́сныя пололожи́л еси́. И ныне моли́ Христа́ Пастыренача́льника, да спасе́т ста́до Свое́ от волко́в, губя́щих е́. Два́жды.

Сла́ва, и ны́не, Богородичен, глас то́йже:

Безневе́стная Ма́ти, Пречи́стая Госпоже́, Де́во Богоро́дице! Моли́ся Сы́ну Твоему́ и Бо́гу на́шему, да не отврати́т от нас Ли́ка Своего́, но да просвети́т сердца́ на́ша, омраче́нная страстьми́, и поми́лует нас по велицей Своей милости.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Луки́, зача́ло 67.

По 50-м псалме́ стихи́ра, глас 6:

Прииди́те, мучениколю́бцы,/ дне́сь духо́вне возвесели́мся,/ па́мять соверша́юще сла́внаго Павли́на,/ но́ваго священнострада́льца,/ сей бо, зе́млю Русскую доброде́тельми просвети́в,/ я́ко благово́нное приноше́ние Го́сподеви возложи́лся есть:/ ве́ру Христо́ву пред нечести́выми власти́тели испове́да/ и ду́шу свою́ за па́ству положи́,/ ны́не же престо́лу Святы́я Тро́ицы предстои́т/ и мо́лится о душа́х на́ших.

Кано́н Пресвяты́я Богоро́дицы, со ирмосо́м на 6 и священому́ченика на 8, глас 3.

Пе́снь 1

Ирмо́с: Фарао́ни колесни́цы глубино́ю покры́в, Го́споди,/ мо́ре разве́ргл еси́/ и спасл еси́ пе́сньми пою́щия Тя/ лю́ди изра́ильтеския.

Сло́ва служи́теля и свиде́теля, Павли́на славнаго, жити́я кра́сная исправле́ния и честна́я страда́ния пода́ждь ми, Сло́ве, в пе́снех досто́йно восхвали́ти.

Твои́ми моли́твами, священному́чениче, напра́ви ум мой, мно́гими по́мыслы расточе́нный, да просла́влю тя, мно́гими скорбьми́ во Ца́рствие Небе́сное вше́дша.

Роди́телей благоче́стивых до́брый и избра́нный плод яви́вся, блаже́нне Павли́не, от ю́ности всем се́рдцем твои́м и помышле́нием Бо́га возлюби́л еси.

Богоро́дичен: А́нгелов Влады́чице, Пресве́тлая Похвало́ и де́вственная Сла́во! На Тя наде́ющеся, при́сно зове́м: радуйся, Невесто Неневестная!

Пе́снь 3

Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

Жела́нием кра́йним влеко́мь, дом роди́тельский остави́ти потща́лся еси́, боголю́бче, сего́ ра́ди, о́трок сый, в дому́ Бо́жии водвори́лся еси́, при́сно поя́: не́сть свят, не́сть пра́веден, па́че Тебе́, Го́споди.

А́нгел земны́й и небе́сный челове́к яви́лся еси́, богому́дре, те́мже, оби́тели Саро́вския дости́г, в служе́ние бра́тии сам себе́ пре́дал еси́, ра́дуяся и воспева́я: не́сть свят, не́сть пра́веден, па́че Тебе́, Го́споди.

Лука́ваго ко́зни постиго́ша тя, до́бре послу́шниче, ты же, на гро́бе преподо́бнаго Серафи́ма сле́зы пролия́в, во смире́нии Бо́гу возопи́л еси́: не́сть свят, не́сть пра́веден, па́че Тебе́, Го́споди.

Богоро́дичен: Честне́йшую Херуви́м и сла́внейшую су́щи Серафи́м, Де́ву Пречи́стую воспои́м и Ро́ждшемуся из Нея́ возопии́м: не́сть свят, не́сть пра́веден, па́че Тебе́, Го́споди.

Седа́лен, глас 8:

Мно́гими доброде́тельми обогати́лся еси́, свя́те Павли́не: кро́тостию, смире́нием и любо́вию, нищелю́бием и долготерпе́нием, си́ми же, да́нный тебе́ тала́нт стори́цею умножи́в, Боже́ственных Та́ин непоро́чный служи́тель яви́лся еси́, те́мже врата́ Небе́сная отверзо́шася тебе́, и в ра́дость вшел еси́ Го́спода Твоего́. Его́же моли́ и нас Ца́рствия Небе́снаго сподо́бити. Два́жды.

Сла́ва, и ны́не, Богородичен, глас то́йже:

Во гла́сех пе́ний вопие́м Ти, Влады́чице А́нгелов: непреста́нно моли́ся о нас, стихи́ями ми́ра се́го одержи́мых и грехо́м порабо́тившихся; да восста́нем от паде́ния и в покая́нии к Сы́ну Твоему́ припаде́м, вопию́ще: помяни́ нас, Го́споди, во Ца́рствии Твое́м.

Пе́снь 4

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на сме́рть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Па́жити мона́шеския, я́ко пчела́ трудолю́бная облете́л еси́, отче Павли́не, иде́же мед духо́вный собра́в, со́ты души́ твоея́ ра́зумом просвещенным, я́ко некта́ром, испо́лнил еси́, по́я: сла́ва си́ле Твое́й, Го́споди.

Влады́це Христу́ сам себе́ пре́дал еси́, Павли́не блаженне, и, да́нный ти тала́нт трудолю́бно умно́жив, во оби́телех Костромски́х и Яросла́вских до́бре пожи́л еси́, благода́рственно воспева́я: сла́ва си́ле Твое́й, Го́споди.

И́ноческаго жития́ ревни́телю, святе Павли́не! Ты, мал нарече́н быв, ве́рен Богови пребы́л еси́, темже, и над мно́гими поста́влен, во смире́нии вели́чие явил еси, глаго́ля: сла́ва си́ле Твое́й, Го́споди.

Богоро́дичен: Е́дина Чи́стая и Пречи́стая Ма́ти Де́во! Моли́твы на́ша приими́ и Сы́на Твоего́ умоли́ пода́ти нам прегреше́ний проще́ние, непреста́нно вопию́щим: сла́ва си́ле Твое́й, Го́споди.

Пе́снь 5

Ирмо́с: К Тебе́ у́тренюю, всех Творцу́,/ преиму́щему всяк ум ми́рови,/ зане́ свет повеле́ния Твоя́,/ в нихже наста́ви мя.

Новоспа́сская оби́тель вельми́ тобо́ю хва́лится, Павли́не всече́стне, ты бо в той, я́ко свети́льник на све́щнице, посреде́ сто́льнаго гра́да доброде́тельми просия́л еси́.

Му́дростию украше́н, я́ко седи́ною, во младости твоей кро́ток и смире́н пребы́л еси́, достохва́льне Павли́не. Те́мже, богосло́вия уче́нию навы́к, Прему́дрости Ипоста́сней служи́тель изря́ден яви́лся еси.

Че́стен и чист в житии́ твое́м был еси́, святе Павли́не, сего́ ра́ди, свяще́нства са́ном по достоя́нию украси́вся, па́стве моско́встей па́стырь до́брый яви́лся еси́ и наста́вник ю́ношам преизяще́н.

Богоро́дичен: Никто́же притека́яй к Тебе́, посра́млен от Тебе́, Де́во, исхо́дит, но про́сит заступле́ния и благода́ть прие́млет незави́стно.

Пе́снь 6

Ирмо́с: Возведи́ от тли мя, Го́споди Бо́же мой,/ Ио́на вопия́ше,/ и аз вопию́ Ти:/ из глубины́ изба́ви мя, Спа́се, мно́гих мои́х зол/ и к Све́ту Твоему́, молю́ся, наста́ви.

Челове́че Бо́жий и служи́телю ве́рный, святе Павли́не! Ты, яко преподо́бен, незло́бив и безскве́рнен, во́лею Бо́жиею гра́ду Ку́рску архипа́стырь посыла́ешися, да упасе́ши о́вцы слове́сныя па́жити Христо́вы.

Вменя́я вся уме́ты бы́ти, да Христа́ приобря́щеши, наипа́че же па́ству твою́ усво́иши Христу́, трудолю́бен де́латель, отче Павли́не, яви́лся еси́, Боже́ственная соверша́я, и пропове́дуя, и моля́ся на всяк час Бо́гу.

Жа́ждати пра́вды Бо́жия не преста́л еси́, блаже́нне Павли́не, те́мже, а́ки еле́нь на исто́чники водны́я, во святы́я оби́тели гра́да Пути́вля прите́кл еси, и́ноческаго жития́ и́стинный люби́телю.

Богоро́дичен: О, Ма́ти Преблага́я, сла́вныя оби́тели Гли́нския Похвало́! Моли́твами Твои́ми не преста́й покрыва́ти вся ве́рныя от вра́жия наве́та и озлобле́ния.

Конда́к, глас 3:

Апо́столов насле́дниче/ и святителей украшение,/ Павли́не досточудне,/ ны́не Це́рковь Ру́сская тя досто́йно воспева́ет,/ ты бо глаголы жизни вечныя небоя́зненно возвеща́л еси́/ и, Христа́ пред отсту́пники че́стне испове́дав,/ кро́вию твое́ю во Свята́я Святы́х вшел еси́./ Моли спастися душа́м на́шим.

И́кос:

Многообра́зны по́двизи и приско́рбно житие́ твое́ бысть, священному́чениче: от ю́ности бо крест на ра́мена взем, Христу́ после́довал еси́, Иже, ви́дев твое́ благо́е изволе́ние, па́стыря слове́сным овца́м тя поста́ви. Егда́ же прии́де о́гненнаго испыта́ния час и во́лцы лютии ста́до Христо́во обступи́ша, ты, преще́ний мучи́телей не убоя́вся, я́ко па́стырь до́брый, ду́шу за па́ству поло́жил еси́. Сего́ ра́ди воспева́ем тя си́це:

Ра́дуйся, от ю́ности всего себе Го́сподеви всеце́ло возложи́вый;

ра́дуйся, благослове́ние ма́тере твоея́ восприе́мый.

Ра́дуйся, мона́шества русскаго розго́ добропло́дная;

ра́дуйся, послуша́ния цве́те неувяда́емый.

Ра́дуйся, прему́дрости боже́ственныя стяжа́телю;

ра́дуйся, просвеще́ния духо́внаго насади́телю.

Ра́дуйся, ста́да Христо́ва па́стырю до́брый;

ра́дуйся, архие́рею всечестны́й.

Ра́дуйся, Це́ркви Ру́сстей в гоне́ниих послужи́вый;

ра́дуйся, за ве́ру Христо́ву да́же до кро́ве пострада́вый.

Ра́дуйся, вдов и сиро́т пита́телю;

ра́дуйся, благоче́стия ревни́телю.

Ра́дуйся, Павли́не, па́стырю до́брый и му́чениче преславный.

Пе́снь 7

Ирмо́с: Тебе́, во огни́ ороси́вшаго о́троки богосло́вившия/ и в Де́ву нетле́нну все́льшагося,/ Бо́га Сло́ва пои́м,/ благоче́стно пою́ще:/ благослове́н Бог оте́ц на́ших.

Преще́ний богобо́рцев не убоя́вся, непрекло́нен пребы́л еси́, отче Павли́не, те́мже во узи́лище непра́ведно влеко́мь и заключа́емь, сердцем умиленным вопия́л еси: благослове́н Бог оте́ц на́ших.

Утверди́л еси́ но́зе твои́, терпеливоду́шне Павлине, на ка́мени за́поведей Христо́вых, сего ради не убоялся еси́, егда́ власти́телие нечести́вии ополчишася на тя, обаче глаголал еси: благослове́н Бог оте́ц на́ших.

Моли́твою, покая́нием и посто́м укрепля́емь, в темни́це, а́ки в затво́ре, пребы́л еси́ и, сию́ духовную наставницу наре́кл еси; Крест же из хле́ба себе сотвори́в, со упованием на Него взирал еси, вопия: благослове́н Бог оте́ц на́ших.

Богоро́дичен: Де́ву Пренепоро́чную, Всечестны́й Крест слеза́ми омочи́вшую, во страда́ниих твои́х за Христа призва́в, святе Павли́не, взывал еси: благослове́нна Ты жена́х, Всенепоро́чная Влады́чице.

Пе́снь 8

Ирмо́с: На престо́ле Херуви́мсте Носи́маго,/ свяще́нницы, по́йте,/ лю́дие, превозноси́те во вся ве́ки.

Любве́ твоея́, я́же ко Христу́, ни ско́рбь, ни теснота́, ни гоне́ние, ни глад, ни са́мая сме́рть, святе Павли́не, угаси́ша. Сего́ ра́ди возглаша́л еси́: свяще́нницы, по́йте Го́сподеви, лю́дие, превозноси́те Его во вся ве́ки.

Испове́данием и́стинным, отче Павли́не, украси́л еси́ престо́л святи́тельский Пе́рмския земли́, иде́же безбо́жною руко́ю убие́н бысть пламенноре́вностный святи́тель Андрони́к, небоя́зненно глаго́лавый: свяще́нницы, по́йте Го́сподеви, лю́дие, превозноси́те Его во вся ве́ки.

Вся подаде́ тебе́ Дух Святы́й, Его́же де́йствие бога́тно во свяще́нней хирото́нии прия́л еси́, отче Павли́не, те́мже гра́ду Калу́зе, я́ко ми́рный а́нгел, в лю́тая времена́ явился еси, ве́рных воздвиза́я пе́ти: превозноси́те Го́спода во вся ве́ки.

Богоро́дичен: Вели́чия Твоя́, Де́во, кто испове́сть? Кий язы́к изочте́т мно́жество щедро́т Твои́х? Оба́че, дерза́юще, во смире́нии глаго́лем: Богоро́дицу по́йте, и превозноси́те во вся ве́ки.

Пе́снь 9

Ирмо́с: Тя, Неискусобра́чную Богоро́дицу,/ в па́мяти святы́х велича́ем,/ я́ко ро́ждшую Спасе́ние душ на́ших.

Па́влу апо́столу подо́бяся, кова́рствия беззако́ннующих претерпе́л еси, свя́те Павли́не, и от Ура́льских гор даже до Бе́лыя Руси проше́л еси́, иде́же нечести́вых сове́том па́ки во у́зы заключе́н бы́сть, за е́же зва́ти тебе́: Христе́, Ты еси́ Спасе́ние душ на́ших.

Безве́стную свою кончи́ну прови́дел еси́, священномучениче Павли́не, и гроб твой неве́домь досе́ле пребы́сть. Оба́че Бо́гу пути́ твоя́ и сконча́ние ве́домы, Ему́же Единому от ю́ности твоея́ служи́л еси́, взыва́я: Христе́, Ты еси́ Спасе́ние душ на́ших.

Стра́нен быв на земли́ и в хла́дней земли́ Сиби́рстей путь сконча́в, Небе́снаго Оте́чества дости́гл еси́, блаженне Павлине, идеже ве́чную сла́ву восприим, при́сно глаго́леши: Христе́, Ты еси́ спасе́ние душ на́ших.

Богоро́дичен: Тьму́ разори́ страсте́й мои́х, Преблага́я Влады́чице, к Тебе́ бо, прибега́я, молю́ся и велича́ю, я́ко ро́ждшую Христа, спасе́ние душ на́ших.

Свети́лен:

Егда́ над оте́чеством на́шим тьма огусте́ и о́блацы безбо́жия скры́ша Со́лнце Пра́вды, ты, святи́телю Павли́не, лю́ди русския небоя́зненно сло́вом истины просвеща́л еси и, страда́ния подъем, Све́та Невечерняго достигл еси. Низпосли́ лучи́ благода́ти твоея́ и нам, во тьме страсте́й седя́щим.

Сла́ва, и ны́не, Богородичен:

Све́тлая и пресве́тлая Присноде́во Влады́чице! Осия́й нам Свет от светле́йшаго ли́ка Твоего́, да исцели́мся от неду́гов на́ших и страсте́й, и сла́вим Тя, яко всея́ тва́ри Превы́шшую.

На хвали́тех стихи́ры, глас 8.

Подо́бен: Что вас нарече́м:

Что тя нарече́м, Павли́не?/ А́нгела ли, зане́ от ю́ности избра́л еси́ чи́стое житие́?/ Христолюбца ли, я́ко крест подъя́л еси́ на ра́мена своя?/ Во́ина ли, я́ко на мир сей и диа́вола вооружился еси́?/ Страда́льца ли, я́ко кро́вь за Христа излия́л еси́?/ Мно́гая твоя́ имена́ и бо́льшая дарова́ния./ Моли́ спасти́ся душа́м на́шим.

Что тя, Павли́не, возъименуем?/ Отца́ ли преподо́бнаго, я́ко до́бре подвиза́лся еси́?/ Сокро́вище ли Ду́ха, я́ко стяжа́л еси́ Прему́дрость?/ Свети́льника ли, я́ко просвети́л еси́ лю́ди русския?/ Свиде́теля ли И́стины, я́ко пред безбо́жными Христа́ испове́дал еси́?/ Ны́не с новому́ченики Це́ркве нашея Престо́лу Бо́жию предстои́ши./ Моли́ спасти́ся душа́м на́шим.

Ка́ко тя, Павли́не, просла́вим?/ Па́стыря ли до́браго, я́ко положи́л еси́ ду́шу за о́вцы своя?/ Апостола ли, яко благоверию паству учил еси?/ Служи́теля ли Та́ин Боже́ственных, я́ко да́нный тебе́ Зало́г сохрани́л еси́?/ Испове́дника ли тве́рда, я́ко поноше́ния и изгна́ния подъя́л еси?/ Сего ради блаже́нство ве́чное восприе́млеши./ Мо́ли спасти́ся душа́м на́шим.

Ка́ко тя, Павли́не, воспоим?/ Челове́ка ли Бо́жия, зане́ я́ко стра́нник пожи́л еси́?/ Нищелю́бца ли, я́ко вдов и сирот препита́л еси́?/ Благове́стника ли, я́ко Христа́ пропове́дал еси́?/ Миротво́рца ли, я́ко па́ству братолю́бию поучал еси́?/ Ны́не на Небесе́х в ли́це сыно́в Бо́жиих ра́дуешися./ Помина́й нас, ве́рою чту́щих всечестну́ю па́мять твою́.

Сла́ва, глас 2:

Егда́ в земли́ нашей безу́мнии гони́телие,/ братоуби́йством и зло́бою ды́шуще,/ на Це́рковь Христо́ву восста́ша,/ ты, священному́чениче Павли́не,/ кро́ткими словесы́ па́ству увеща́л еси́/ Бо́га всем се́рдцем возлюби́ти/ и бли́жним любо́вию послужи́ти,/ нечести́вых же сове́тов отбега́ти/ и всяко злым не прилепля́тися./ Те́мже, во изгна́ние и узи́лища по́слан бы́в,/ страда́ния и ну́ждную сме́рть претерпе́л еси́,/ ны́не же, Престо́лу Бо́жию предстоя,/ моли́ спасти́ся душам нашим.

И ны́не, Богородичен, глас то́йже:

Все упова́ние на́ше на Тя возлага́ем,/ Де́во Богороди́тельнице,/ с новому́ченики и испове́дники Церкве Русския/ моли́, во еже спасти́ся нам.

Славосло́вие вели́кое. И отпуст.

На Литургии

Блаже́нна от кано́на, пе́сни 3-я и 6-я. Проки́мен глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евреем, зача́ло 334. Аллилу́иа, глас 2: Свяще́нницы Твои́ облеку́тся в пра́вду/ и преподо́бнии Твои́ возра́дуются. Стих: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Иоанна, зача́ло 36. Прича́стен: В па́мять ве́чную бу́дет пра́ведник:

Моли́тва

О, священному́чениче Христо́в Павли́не! Услы́ши сле́зныя моли́твы и воздыха́ния наша, в сокруше́нии се́рдца и смире́нии ду́ха тебе́ приноси́мыя. Се бо беззако́нии омрачи́хомся, и сего́ ра́ди беда́ми, я́ко ту́чами обложи́хомся. Ты же, я́ко си́льный, понеси́ не́мощи на́ша, не отлуча́йся от нас ду́хом, да не разлучи́мся и мы от любве́ Бо́жия, я́же при́сно в се́рдце твое́м живя́ше. При́зри ми́лостиво на люди, предстоя́щия и моля́щияся пред свято́ю ико́ною твое́ю, и проше́ния коего́ждо, я́же ко спасе́нию, испо́лни. Ве́руем бо, я́ко ты, за Це́рковь Христо́ву во оте́честве на́шем пострада́вый, ве́лие дерзнове́ние и́маши ко Го́споду. Умоли́ бла́гость Его́, да укрепи́т ны в единомы́слии, наипа́че же в непоколеби́мом испове́дании Христа́ Иису́са, Сы́на Бо́жия, во пло́ти прише́дшаго, распя́тие и сме́рть претерпе́вшаго, погребе́ннаго и воскре́сшаго, ко Отцу́ возшедшаго и паки гряду́щаго со сла́вою суди́ти живы́м и ме́ртвым. Мо́лим тя, свя́те: предста́тельствуй пред Бо́гом за ны и за вся правосла́вныя христиа́ны, да соблюде́т Госпо́дь землю Русскую в ми́ре и благоде́нствии, архипа́стырем и па́стырем пода́ст духо́вное трезве́ние и ре́вность о спасе́нии вруче́нныя им па́ствы, прави́телем – суд и пра́вду, и всем нам – братолю́бие и любо́вь.

О, ми́лостиве страдальче! Испроси́ у Бо́га Ми́лостиваго боля́щим исцеле́ние, скорбя́щим утеше́ние, оби́димым заступле́ние, оби́дящим ми́рное устрое́ние. Да, твое́ю по́мощию спаса́еми, восхва́лим вси Подвигополо́жника Христа́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Всесвяты́м, Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Источник: Текст службы утвержден на заседании Священного Синода 25 августа 2022 года (журнал № 78).

Месяца мая во 2-й день

Блаженнаго Василия Кадомскаго

На велицей вечерни

На Господи, воззвах: стихиры, глас 5:

Миру чужд быв,/ сущих в мире не чуждался еси,/ юродив наречен,/ мудрости наставлял еси,/ страдания терпяй,/ страждущих исцелял еси,/ темже в житии твоем привременнем/ милость Божию улучил еси,/ блаженне Василие.

Образ терпения и незлобия являя,/ многострадальному Иову подражал еси,/ сердце в жилище Духу Святому утотовляя,/ по вся дни и нощи в молитве пребывал еси,/ странствию Христову ревнуя,/ Царствия Божия достигл еси,/ блаженне Василие.

Возлюби́в усе́рдно Го́спода/ и трудолюбне подвиза́яся,/ Боже́ственною благода́тию просвети́лся еси́/ и дары Духа Святаго стяжал еси./ Темже, дерзновение твое к Богу ведуще,/ к тебе с молитвою притекаем,/ блаженне Василие.

Слава, глас 6:

О, блаженне Василие,/ града Рязани похвало,/ мира чуждаяся,/ смирен, целомудр, праведен/ и заповедей Божественных хранитель явился еси,/ молися за ны ко Господу,/ да спасет души наша.

И ныне, Богородичен, глас тойже: Кто Тебе не ублажит, Пресвятая Дево:

Вход. Прокимен дне. И чтения три преподобническая.

На литии стихира храма и святаго, глас 3:

Блаженне Василие чудне,/ человече Божий,/ яко юрод, на земли пожил еси/ и, яко злато в горниле, душу свою очистил еси./ Грехов прощение нам испроси/ и недугов избавление,/ да Царствия Небеснаго сподобимся.

Слава, глас 2:

Все упование на Бога возложив,/ пучину жития земнаго преплыл еси/ и, брега Горняго Отечества достигнув,/ со ангелы на Небесех ныне радостне ликуеши,/ угодниче Христов Василие./ Темже помози нам, на земли живущим,/ печали горькия избавитися.

И ныне, глас тойже: О, чудесе новаго, всех древних чудес:

На стиховне стихиры, глас 8:

Ангельски пожив, святе,/ подвиги на всяк день подъял еси,/ молитву, яко щит, воздержание, яко лук,/ и смирение, яко шлем, имея,/ темже верныя люди назидал еси/ заповеди Божия усердно исполняти/ и страх Божий имети./ Помози и нам, блаженне Василие,/ веру добре соблюсти/ и Царствия Небеснаго достигнути.

Стих: Господь хранит пришельцы,/ сира и вдову приимет.

Мира красоту и всяческая, яже в мире, оставив,/ Единому Христу последовал еси/ и сетей вражиих избежал еси,/ премудре Василие,/ ныне же, на Небесех с лики святых Престолу славы предстоя,/ молися грехов прощение нам даровати/ и Царствия Небеснаго достигнути.

Стих: Господь возводит низверженныя,/ Господь любит праведники.

Безумен в мире наречен,/ жителей града Рязани мудрости Христовой наставлял еси,/ нищету духовную стяжав,/ милостыню бедным щедро раздавал еси,/ скорби же и нужды претерпевая,/ в печали сущих утешал еси./ Помози и нам, святче Божий,/ крест жития земнаго безропотне понести/ и Царствия Небеснаго достигнути.

Слава, глас 7:

Лик святых земли Рязанския житием праведным украсив,/ новый предстатель о Отечестве нашем явился еси,/ угодниче Христов Василие,/ темже ныне со святителем Василием и новомученики Церкве нашея/ предстательствуй о всех нас,/ любовию тя почитающих.

И ныне, глас тойже:

Под кров Твой, Владычице, вси земнороднии, прибегающе, вопием Ти:/ Богородице, упование наше,/ избави ны от безмерных прегрешений/ и спаси души наша.

Тропарь, глас 4:

Молитва усердная пища и питие тебе бысть,/ блаженне Василие,/ в несении креста жития странническаго/ любовь Христову познал еси./ Оком чистым будущая, яко настоящая, прозревая,/ радость и от бед избавление требующим твоея помощи даровал еси./ Темже и нас, яко Божий избранник,/ не забуди твоими ходатайствы,/ Христа Бога о нас умоляя.

На утрени

По 1-м стихословии седален, глас 1:

Безумием мнимым безумие мира обличив, блаженне Василие, образ терпения и незлобия явил еси. Мы же, предстательство твое к Богу ведуще, просим тя: молися за ны ко Господу, да спасет души наша.

Слава, и ныне, Богородичен, глас тойже:

Владычице Пречистая, архангельский глас приносим Ти: радуйся, Благодатная, Господь с Тобою.

По 2-м стихословии седален, глас 2:

Дадеся ти благодать от Бога, блаженне Василие, пещися о людех, недужныя целити и скорбныя утешати. Темже мы, ныне память твою совершающе, тепле зовем: помяни и нас в твоих святых молитвах.

Слава, и ныне, Богородичен, глас тойже:

Печали отложше, возведем очи наша горе, да узрим в Небесех Царицу Богородицу, покровом Своим светоносным нас покрывающую.

Величание:

Ублажаем тя,/ святый праведный Василие,/ и чтим святую память твою,/ ты бо молиши о нас/ Христа Бога нашего.

Псалом избранный: Терпя потерпех Господа, и внят ми и услыша молитву мою.

По полиелеи седален, глас 5:

Просвещен ум имея, богомудре Василие, будущая, яко настоящая зрел еси. Мы же, угодника Христова тя ведуще, от любве сердечныя взываем: не остави нас заступлением твоим, святче Божий.

Слава, и ныне, Богородичен, глас тойже:

Просвети, Чистая, души моея очи, Свет рождшая, да не покрыет тьма греховная мя, окаяннаго.

Степенна, 1-й антифон 4-го гласа. Прокимен, глас 4: Возвеселится праведник о Господе/ и уповает на Него. Стих: Услыши, Боже, глас мой, внегда молити ми ся к Тебе. Евангелие от Луки, зачало 78.

По 50-м псалме стихира, глас 6:

Омраче́ние грехо́вное возненави́дев, святе Василие,/ и пла́менем чистоты́ пла́мень страстей пресе́к,/ терпе́нием и мудре́йшим юро́дством,/ я́ко златы́ми крила́ми, на Небеса́ возлете́л еси́/ и степе́нь равноа́нгельную дости́гл еси́.

Канон, глас 4.

Песнь 1.

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Царствие вечное улучити желая, душу твою от многомятежных страстей воистинну очистил еси, Василие блаженне, града Рязани дивное украшение.

Память твою пречестную почитает ныне вся земля Рязанская, в нейже усердно подвизался еси, преславне Василие. Темже, плоти твоея страсти с похотьми подвижнически умертвив, богатство нетленное стяжал еси.

Всякаго мирскаго пристрастия отрекся и ум твой к нетленным благам возвед, яже уготóва Господь всем любящим Его, на земли чисто пожил еси, Василие мудре.

Богородичен: Гору святую, превышшую Ангельских Сил, Матерь Божию и Деву истинную по рождестве, едиными усты воспоим.

Песнь 3.

Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик Себе́ совоку́пльшия духо́вно, утверди́,/ в Боже́ственней Твое́й сла́ве/ венце́в сла́вы сподо́би.

В молитве усердней по вся дни и нощи пребывая, блаженне, ругания и наветы терпеливне подъял еси, Христа ради, от Негоже и Вышняго причастия сподобился еси.

Юрода себе волею сотворив, богомудре, премирнаго разумения исполнился еси. Темже и Духа Святаго сосуд избранный явился еси, житием твоим страннолепным украшен.

Молитвы твоя обнощь к Небесем возсылая, дневною же милостынею больным и страждущим благотворя, сердца их любовию согревал еси, Василие небомудренне, чадо верное Отца Небеснаго.

Богородичен: Неискусобрачная Дево, Бога плотию рождшая, утверди мя, страстными прилоги приклонена, несть бо разве Тебе иныя Помощницы.

Седален, глас 5:

Плотское мудрование отринув издетска, нищету и странство Христа ради, стяжав, венценосец Божий на земли явился еси, Василие блаженне. Ныне, молим тя: буди нам, омраченным страстьми землеретными, светлый путевождь ко Христу, Солнцу правды.

Слава, и ныне, Богородичен, глас тойже:

Милосердия Твоего ради, Богородительнице Пречистая,/ избави ны, Тя смиренно умоляющих,/ от всех козней вражиих и скорбных обстояний.

Песнь 4.

Ирмос: Седя́й в сла́ве на Престо́ле Божества́,/ во облаце ле́гце,/ прии́де Иису́с Пребоже́ственный,/ нетле́нною Дла́нию, и спасе́ зову́щия:/ сла́ва, Христе́, си́ле Твое́й.

Милостыню с благодарением от простецов приемля и нищей братии ю предавая, снег и дух бурен, мраз, и вар дневный благодушно претерпел еси, святе, силою Божиею укрепляемь.

Молим тя ныне, блаженне Василие, услыши прошение наше и, помощь молитв твоих подавая во благовремении, усмири вся брани житейския, да, предстательство твое обретше, прославим Милостиваго Бога.

Молим тя паки, славне Василие: юныя вразуми путем заповедей ходити, старцы и в немощи сущия укрепи, подвизающияся же на дела благая направи.

Богородичен: Госпоже, Всепетая Богородице, Мати всех Творца, помышления моя молитвами Твоими очисти и благоплодна покажи.

Песнь 5.

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

В светлосиянный день праздника твоего, преблаженне, услыши умиленныя мольбы наша; не лиши помощи твоея всех, почитающих память твою в храме сем, во граде нашем и в пределех земли Рязанския.

Исполнися воистинну Господне обетование на тебе, чудотворче: блажени нищии духом, яко тех есть Царствие Небесное. И ныне во славе лучезарней Престолу всех Царя предстоиши, понеже верный раб в час испытаний явился еси.

Усердно взываем к тебе, богоблаженне: не остави нас, сродник твоих, яже на земли, ты бо алчущих выну питал еси, жаждущих напаял еси, нищих же одарял еси преизобильно.

Богородичен: Воплотися неизреченно Бог из Тебе, Чистая, и, плоти соединяемь, по Божественному существу неизменен пребысть.

Песнь 6.

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Вознеси, милостиве, твое моление о нас, грешных, да исправятся стопы наша к деланию заповедей Господних и да не обладает нами всякое беззаконие.

Приведи нас ко пристанищу благоотишному, посреде моря житейскаго бедствующих, Василие святе, и укажи путь верен ко Творцу всяческих, Богу нашему.

Заповеди жизни вечныя запечатлены во умех имуще, во окаменении греховнем многажды преступаем и согрешаем на всяк день умом и сердцем. Темже на помощь прииди к нам, святе Василие.

Богородичен: Воплощенное Слово Божие нашего ради спасения на земли родила еси, Дево Чистая. Тем Тя, Богородицу истинную, сердцем и усты в песнех величаем.

Кондак, глас 2:

Всякое мирское попечение волею отринув,/ чистоту же душевную юродством утаив,/ Богу и ближним усердне послужил еси,/ темже, благодати Духа Святаго исполнився,/ ангельски на земли пожил еси./ Ныне милостию твоею нас посети,/ исцеляя немощи душ и телес,/ Василие блаженне, теплый наш ходатаю.

Икос:

Теплотою Божественною согреваемь и благодатию, яко одеждею боготканною, оболчен, глад, мраз и вар дневный мужественне претерпел еси и люди верныя земли Рязанския обильне словом напитал еси. Ныне милостию твоею нас посети, исцеляя немощи душ и телес, Василие блаженне, теплый наш ходатаю.

Песнь 7.

Ирмос: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси.

Христовою любовию всем сердцем уязвився, мудре Василие, дом твой и сродники благодушне оставил еси. В дому же Божием на всяк день ангельски пребывая, душею воспевал еси: препетый отцев Господь и Бог благословен еси.

Никакоже о плоти твоей попечение имея и о славе Божией присно радея, святе Василие, на подвиги паче естества устремился еси, воспевая: препетый отцев Господь и Бог благословен еси.

Восхвалим, вернии, Василия блаженнаго, подвижника славнаго! Той бо ныне со Ангелы и лики святых в чертозех Небесных воспевает: препетый отцев Господь и Бог благословен еси.

Богородичен: Радуйся, красная Царева Палато; радуйся, Дево Чистая, Помощнице христианом, с любовию поющим: препетый отцев Господь и Бог благословен еси.

Песнь 8.

Ирмос: Отроки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Возлюбил еси Христа всею крепостию твоею, достоблаженне Василие, темже смирен и кроток сердцем явился еси и, яко ревнитель заповедей Божиих, верныя научал еси взывати: Господа пойте, дела, и превозносите Его во вся веки.

Воистину смерть твоя честна пред Господем явися, ты бо, венценосче святый, от земли плотию преставився, ныне с нами духом пребываеши и подвизаеши взывати радостне: Господа пойте, дела, и превозносите Его во вся веки.

Ум наш озари, мудре Василие, да светом Трисиянным просвещаеми, прославим Пресвятую Троицу во дворех Бога нашего и вкупе с тобою вопием: Господа пойте, дела, и превозносите Его во вся веки.

Богородичен: Всесвятая Дево, Бога Слова рождшая плотию, мрак душ наших молитвами Твоими просвети, да взываем выну: Господа пойте, дела, и превозносите Его во вся веки.

Песнь 9.

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная,/ Богоро́дице Чи́стая Присноде́во.

О, преблаженне Василие, угодниче Христов, юроде на земли и ангелоподобниче на Небесех! Ты, ныне мзду трудов велиих прием, у Престола Горния Славы поминай нас, почитающих тя сыновне.

О, молитвенниче теплый Василие! Ты, посреде пределов земли Рязанския богоугодне пожив и душу многими подвиги очистив, от Владыки Христа награду небесную восприял еси. И нам грехов прощение испроси и в добродетелех преспеяние.

О, дивне Василие, предстателю крепкий за град наш и землю Рязанскую! Моли ныне Всещедраго Владыку избавитися нам от всякаго лукавства вражия, страстей и каменносердечия окаяннаго, да восприимем от десницы Господа с тобою богатство некрадомое.

Богородичен: Под кров Твой, Владычице, вси земнороднии, прибегаем и вопием: Богородице, Упование наше, избави ны от безмерных прегрешений и спаси души наша.

Светилен:

Да возрадуется днесь земля Рязанская, в той бо явися светильник светлый и угодник Божий чудоточный Василий, болящих исцеляяй, теснимых защищаяй, бесов тьму отгоняяй и о чтущих его пред Богом предстательствуяй.

Слава, и ныне, Богородичен:

Богородительнице Дево, Свет душ наших, Христа, рождшая! Во свете присносущнем водворитися всем нам испроси, воспевающим Твое милосердие.

На хвалитех стихиры, глас 8:

Земное богатство презрел еси, святе Василие,/ и дóма родительскаго кров отвергл еси,/ милостию Божиею покрываяся./ Странствию же Христову ревнуя,/ достигл еси Царствия Небеснаго. (Дважды)

Миру юродив явился еси,/ премудрость Божию людем града Рязани возвещая,/ молися, блаженне Василие,/ да просветит Господь и наша сердца/ молитвами твоими.

День празднственный совершаем усердно/ от земли преставления твоего, святе Василие,/ пролей ныне теплую молитву ко Господу,/ да утвердит Отечество наше в мире и благоденствии/ и спасет души наша.

Слава, глас тойже:

Подвиг велий на земли подъял еси/ и, мирская мудрования отверг,/ юродив миру явился еси,/ благодатию же Христовою просвещен,/ суеты житейския избегати люди поучал еси./ Не забуди и нас, праведниче Василие, ходатайствы твоими,/ Христа прилежно о нас умоляя.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженны от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя Его. Евангелие от Луки, зачало 24. Причастен: В память вечную будет праведник, от слуха зла не убоится.

Молитва

О, преславный угодниче Святыя и Единосущныя Троицы, святе блаженне Василие, преславнаго града Рязани теплый заступниче, в бедах, скорбех и печалех скорый помощниче!

Воззри милостивне на нас, припадающих к раце честных мощей твоих и слезно взывающих к твоему предстательству: не презри смиренная прошения наша и моли Всемилостиваго Бога, да дарует нам прощение согрешений вольных и невольных, да пробавит милость Свою и подаст вся нужная к житию сему временному и к вечному спасению благопотребная. Аще и многогрешни и зело недостойни есмы, обаче не хощем в беззакониих наших погибнути, но еже обратитися ко Господу и сподобитися истиннаго покаяния и непорочными в Царствие Небесное внити.

О, святе блаженне Василие! Ты ныне, аки солнце, сияеши во Царствии Небеснем: научи нас волю Божию исполняти и безропотне испытания претерпевати, просвети помраченныя души наша и на стезю заповедей Божиих настави нас, да понесем благое иго Христово во смирении и долготерпении до конца дний, чающе будущаго живота безконечнаго, да сподобимся мы, недостойнии, вкупе с тобою и всеми святыми славити и воспевати Единаго в Троице Бога, Отца и Сына и Святаго Духа, во веки веков. Аминь.

Источник: Текст службы утвержден на заседании Священного Синода 8 декабря 2020 года (журнал № 99)

Ме́сяца октября́ в 23-й день

Священному́ченика Влади́мира, пресви́тера Моско́вскаго

На вели́цей вече́рни

На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ Боже́ственныя ре́вности/ се́рдце твое́ испо́лни Госпо́дь,/ священному́чениче пресла́вне,/ тогда́ всем житие́м твои́м/ ева́нгельстей про́поведи послужи́ти потща́лся еси́,/ и ничто́же возмо́же тя от Христа́ отврати́ти,/ ни скорбь, ни теснота́, ни гоне́ния,// богоблаже́нне Влади́мире.

Егда́ све́том ве́ры и́стинныя/ озари́ тя Госпо́дь,/ му́чениче всече́стне,/ тогда́, вся жите́йская во уме́ты вмени́в,/ свяще́нства дар прия́л еси́/ и, в тесноте́ и гла́де пребыва́я,/ пра́вило благоче́стия ча́дом твои́м яви́,// богому́дре Влади́мире.

Егда́ любо́вь соверше́нную/ в души́ твое́й уве́де Госпо́дь,/ свяще́нниче достохва́льне,/ тогда́ к испове́данию ве́ры правосла́вныя/ и по́двигу му́ченическому тя призва́,/ и́бо и смерть не возмо́же разлучи́ти тя/ от любве́ Бо́жия, я́же о Христе́ Иису́се./ Те́мже ны́не прославля́ем тя,// богоизбра́нне Влади́мире.

Сла́ва, глас 4:

Прииди́те, ве́рнии, лик соста́вим/ и воспои́м но́ваго священному́ченика,/ всем се́рдцем Бо́га возлюби́вшаго/ и за́поведи ева́нгельския до́бре испо́лнившаго./ Что бо обря́щем в заве́те его́?/ Или́ что насле́дим от име́ния его́?/ Не мя́гки ри́зы, но броню́ пра́вды,/ меч глаго́ла Бо́жия и щит ве́ры правосла́вныя./ Сия́ вся ору́жия и нам пода́ждь,/ священному́чениче Влади́мире,/ и моли́твами твои́ми сонасле́дницы Христу́ соде́лай,// подаю́щему тобо́ю нам ве́лию ми́лость.

И ны́не, Богоро́дичен: И́же Тебе́ ра́ди Богооте́ц проро́к Дави́д:

Вход. Проки́мен дне.

И чте́ния 3 священному́ченику.

На лити́и стихи́ры, глас 4:

О сла́вный Правосла́вия побо́рниче,/ священному́чениче Влади́мире,/ с любо́вию припа́дающе к тебе́,/ прославля́ем твоя́ по́двиги и мо́лимся:/ моли́ приле́жно за нас Го́спода,// во е́же спасти́ся душа́м на́шим.

Просвети́ся житие́ твое́ доброде́тельными светлостьми́,/ и́миже, ве́рныя просвети́в,/ тьму нече́стия разгна́л еси́./ Те́мже, сын све́та благода́тию Ду́ха Свята́го быв,/ всели́лся еси́, иде́же Свет невече́рний сия́ет,/ священному́чениче Влади́мире./ Мы же, светоно́сное твое́ прославле́ние соверша́юще,// любо́вию тя почита́ем.

Сла́ва, глас 6:

Помяни́, Го́споди, и́же о Тебе́ пострада́вшаго,/ но́ваго страстоте́рпца Влади́мира,/ му́жественно Тя испове́давшаго/ и му́ки многоразли́чныя претерпе́вшаго,// и приими́ его́ моле́ния о спасе́нии на́шем.

И ны́не, глас то́йже:

О Благода́тная и Пречи́стая Де́во Мари́е,/ Хода́таице и Засту́пнице всех ве́рных,/ предста́тельством те́плаго моли́твенника,/ священному́ченика Влади́мира,// сохрани́ и защити́ зе́млю Ру́сскую.

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйся, священному́чениче Влади́мире,/ крести́телю Руси́ тезоиме́нне,/ ра́дуйся, кра́сный благове́стниче,/ и́мже мно́зи глаго́лы ве́чныя услы́шаша/ и наде́жду спасе́ния улучи́ша,/ ра́дуйся, па́стырю, житие́м и сме́ртию/ доны́не ве́ре науча́яй нас.// Моли́ спасти́ся душа́м на́шим.

Ра́дуйся, священному́чениче Влади́мире,/ ве́рою патриа́рхом дре́вним подо́бный!/ Ра́дуйся, проро́че неве́дущим Бо́га,/ ра́дуйся, Ду́ха Свята́го оби́теле!/ Ты бо в пусты́ни безбо́жия/ вся́кий во́зраст ко Христу́ приводи́л еси́/ и, я́ко друг Женихо́в,/ Тому́ страда́ньми после́довал еси́,// моли́ спасти́ся душа́м на́шим.

Ра́дуйся, священному́чениче Влади́мире,/ о́браз Христо́в нам явля́яй,/ ра́дуйся, кимва́ле доброгла́сный любве́ Боже́ственныя,/ ея́же ра́ди креще́нием Христо́вым крести́лся еси́/ и ча́шу Того́ испи́ти сподо́бился еси́./ Ра́дуйся, трапе́зы Небе́сныя о́бщниче/ и соприча́стниче новому́чеников и испове́дников земли́ на́шея,/ Престо́лу Христо́ву предстоя́щих,// моли́ спасти́ся душа́м на́шим.

Сла́ва, глас 8:

Ве́ра твоя́ вмени́ся в пра́вду, избра́нниче Бо́жий,/ и упова́ние па́че упова́ния во страда́ниях обре́л еси́,/ любо́вию Христо́вою созида́емь./ Те́мже и ны́не, у престо́ла Пресвяты́я Тро́ицы предстоя́,// моли́ спасти́ся душа́м на́шим.

И ны́не, Богоро́дичен: Безневе́стная Де́во:

Тропа́рь, глас 3:

От ю́ности Бо́га усе́рдно взыска́вый,/ и́стину в Це́ркви Правосла́вней обре́л еси́/ и, крест па́стырскаго служе́ния ре́вностно подъе́мый,/ ве́рныя во дни гоне́ний до́бре окормля́л еси́./ Те́мже и преще́ний безбо́жных не убоя́вся,/ да́же до кро́ве пострада́л еси́,/ о́тче священному́чениче Влади́мире,// моли́ Ми́лостиваго Бо́га спасти́ся душа́м на́шим.

На у́трени

По 1-м стихосло́вии седа́лен, глас 1:

Ду́хом Ева́нгелия просвети́лся еси́/ и любо́вию Боже́ственною,/ е́юже позна́ются Христо́ви ученицы́,/ ча́дом свои́м и бли́жним послужи́л еси́,/ со Христо́м взыва́я:/ а́ще кто хо́щет бы́ти пе́рвым, да бу́дет всем слуга́.

Сла́ва, и ны́не, Богоро́дичен:

Благове́стия гла́сом,/ Безневе́стная Де́во, Ма́ти Христа́ Бо́га позна́лася еси́./ Тому́ послужи́вши чи́стым житие́м Твои́м, Пресвята́я,/ от всех родо́в прославля́ешися досто́йно.

По 2-м стихосло́вии седа́лен, глас 5:

Дея́ний муже́й апо́стольских после́дователь яви́лся еси́,/ Христа́ ре́вностно пропове́дуя,/ и ду́хом на вся́цем ме́сте моля́ся,/ рука́ма свои́ма рабо́тая,/ скита́яся и беды́ терпя́,/ ны́не на Небесе́х воздая́ние пра́ведных/ прие́млеши досто́йно.

Сла́ва, и ны́не, Богоро́дичен:

Велича́ет весь мир Тя, Ма́ти Бо́жия,/ А́нгельския си́лы славосло́вят,/ проро́цы ра́достне лику́ют,/ апо́столи благогове́йне покланя́ются,/ му́ченицы и пра́ведницы воспева́ют Тя дерзнове́нно.

По полиеле́и седа́лен, глас 1:

Му́чениче свя́те Влади́мире,/ от ю́ности Христа́ возлюби́в,/ житие́м нескве́рным во́зраст ста́рости и му́дрость приобре́л еси́,/ и ча́да твоя́, зло́бою младе́нствовати науча́я,/ я́ко де́ти ко Христу́ приве́л еси́.

Сла́ва, и ны́не, Богоро́дичен:

Де́во Богоизбра́нная Отрокови́це,/ ве́дуще Тя я́ко Ма́терь Бо́жию/ и Засту́пницу ро́да на́шего,/ со умиле́нием непреста́нно взыва́ем Ти:/ Влады́чице Преми́лостивая, не оста́ви ча́да Твоя́.

Та́же, степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́.

Стих: Что возда́м Го́сподеви о всех, я́же воздаде́ ми? Вся́кое дыха́ние:

Ева́нгелие от Луки́, зача́ло 67.

По 50-м псалме́ стихи́ра, глас 6:

Ве́рою жив, пра́ведниче, был еси́,/ де́лы любве́ и милосе́рдия сию́ укрепля́я,/ священному́чениче Влади́мире,/ а́лчущим бо и кро́ва лише́нным потре́бная подава́л еси́/ и в гоне́нии непрекло́нен пребы́л еси́./ Сего́ ра́ди бесо́в полки́ победи́л еси́/ и уста́ безбо́жных загради́л еси́, я́коже не́когда Дании́л уста́ льво́в:// моли́ спасти́ся душа́м на́шим.

Кано́н Богоро́дице со ирмосо́м на 6 и священному́ченику на 8, глас 2.

Песнь 1.

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Гряди́те, лю́дие,/ пои́м песнь Христу́ Бо́гу,/ разде́льшему неве́дения на́шего мо́ре/ и наста́вльшему ны пе́ти свята́го му́ченика Своего́ Влади́мира,/ в не́мже просла́вися.

Ре́вности Моисе́овы/ испо́лнен быв, о́тче Влади́мире,/ в пусты́ни безбо́жия ве́ру умно́жил еси́/ и дости́гл еси́ обетова́нныя земли́,/ Правосла́вныя Це́ркве.

Тя, священному́чениче Влади́мире, за́поведи Госпо́дни при́сно храня́ща,/ по́лчища супоста́т не устраши́ша,/ те́мже во огра́ду Це́ркве Правосла́вныя вшед,/ дости́гл еси́ Земли́ Обетова́нныя.

Богоро́дичен: Ковче́же святы́й и Ски́ние Боже́ственная,/ путево́ждствуй и нас ны́не в Го́рний Иерусали́м,/ при́сно от Бо́га отпа́дающия,/ да насле́дницы бу́дем Земли́ Обетова́нныя.

Песнь 3.

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́./ Возвесели́ бо ся дух мой, внегда́ пе́ти:/ несть свят, я́коже Бог наш// и несть пра́веден па́че Тебе́, Го́споди.

Ве́рою укрепля́емь, пра́ведне,/ не затвори́л еси́ уста́ твоя́, прише́дшей годи́не безбо́жия,/ но па́че разшири́л еси́ я, пропове́дуя Христ́а,/ и, я́коже Ной пра́ведный, ве́рою обличи́л еси́ нечести́выя.

Темни́цы и враче́бницы посеща́я,/ Христа́ Авраа́млим страннолю́бием прия́л еси́,/ и я́коже о́наго, изведе́ тя Госпо́дь в Зе́млю Обетова́нную, во е́же пе́ти:/ несть пра́веден па́че Тебе́, Го́споди.

Про́поведь твоя́ возсия́ во оте́честве на́шем,/ егда́ мно́зи зако́ннии Це́ркве сы́нове впадо́ша в нече́стие,/ ты же благослове́ние Иа́ковле ве́ры ра́ди насле́довал еси́,/ те́мже с новому́ченики взыва́еши:/ несть свят, па́че Тебе́, Го́споди.

Богоро́дичен: При́зри на ны, окамене́нныя се́рдцем и умо́м, Пресвята́я Де́во,/ и моли́ Сы́на Твоего́,/ да и мы ча́да Авраа́мля бу́дем/ и в ве́ре утверди́мся предста́тельством Твои́м, взыва́юще:/ несть пра́веден па́че Тебе́, Го́споди.

Седа́лен, глас 1:

Не доста́нет нам вре́мене, повеству́ющим о ве́ре твое́й,/ ю́же яви́л еси́ кроме́ Це́ркве, о́тче Влади́мире,/ но послу́шествован се́ю быв,/ дости́гл еси́ Небе́снаго Иерусали́ма,/ на Нача́льника ве́ры Иису́са взира́я,/ и кре́стным по́двигом, я́коже ле́ствицею,/ возше́л еси́ к Це́ркви напи́санных на Небесе́х,/ иде́же мо́лишися,/ да и мы с тобо́ю соверше́нство прии́мем.

Сла́ва, и ны́не, Богоро́дичен:

Не доста́нет нам вре́мене воспе́ти чудеса́ Твоя́, Влады́чице,/ не доста́нет слове́с просла́вити та́инства, бы́вшая на Тебе́,/ па́че же дерзнове́ния не и́мамы, во гресе́х су́ще/ и во осужде́ние уста́ своя́ отверза́юще,/ но Ты сия́ очи́сти, Чисте́йшая А́нгел.

Песнь 4.

Ирмо́с: Услы́шах, Го́споди, слух Твой, и убоя́хся,/ разуме́х дела́ Твоя́, и диви́хся, и возопи́х:// сла́ва си́ле Твое́й, Го́споди.

Услы́шав Го́спода, призыва́ющаго тя,/ по сло́ву Его́ вся су́щая в ми́ре оста́вив,/ на крест возше́л еси́.

Но́зе во благовествова́ние ве́ры обу́в/ и от си́лы в си́лу восходя́,/ свяще́нства благода́тию обле́клся еси́,/ та́же и му́ченическим венце́м увенча́лся еси́.

Моли́твы де́лание возлюби́вшаго,/ слу́жбы святы́я соверши́теля тя поста́ви Госпо́дь,/ Ему́же, и в темни́цу вве́ржен, при́сно воспева́л еси́:/ сла́ва си́ле Твое́й, Го́споди.

Богоро́дичен: Слух Госпо́день услы́шавшия/ и дела́ Госпо́дня уразуме́вшия укрепи́, Пресвята́я Де́во,/ и сподо́би си́лою Сы́на Твоего́/ дела́ Бо́жия твори́ти.

Песнь 5.

Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го Бо́га не зна́ем.

Све́та испо́лнено бысть/ свяще́нное служе́ние твое́,/ те́мже во све́те за́поведей Христо́вых/ ве́рныя лю́ди ходи́ти поуча́л еси́,/ му́дрыми словесы́ вразумля́я.

Любо́вию о́трока сиро́тствующа всынови́в, свя́те,/ и духо́вная ча́да, я́коже родна́я прие́м,/ ны́не му́ченическим дерзнове́нием/ и нас духо́вныя сро́дники своя́ соде́лай.

Повеле́нием Госпо́дним усе́рдно после́дуя,/ ча́дом твои́м ми́лостивый оте́ц яви́лся еси́/ и, я́ко до́брый па́стырь, тех, любо́вию назида́я,/ Христу́ приве́л еси́.

Богоро́дичен: Угаси́ раздо́ры церко́вныя, Христе́,/ моли́твами Ма́тере Твоея́/ и наста́ви ны, не челове́ком угожда́ти, но Тебе́, Влады́ко,/ ра́зве бо Тебе́ ина́го Бо́га не зна́ем.

Песнь 6.

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,// и́стины же ду́хом пожру́ Тебе́.

Благоче́стное погребе́ние жены́ твоея́/ челове́ка не́коего к ве́ре приве́де,/ му́ченическая же смерть твоя́/ мно́гия из глубины́ ме́ртвых дел возставля́ет.

Во единонадеся́том часе́ при́зван,/ труды́ ре́вностныя и кончи́ну му́ченическую Христу́ прине́сл еси́,/ те́мже полу́ченный дина́рий пода́ждь нам, мо́лимся,/ я́коже всегда́ тре́бующим твори́л еси́.

Прови́дящи жена́ твоя́ гоне́ния, возвести́ тебе́ смерть за Христа́, священному́чениче,/ ты же, словесы́ си́ми укрепле́н,/ му́ченический вене́ц му́жественне восприя́л еси́.

Богоро́дичен: Ду́хом и и́стиною Бо́гу покланя́ющеся,/ воспева́ем Тя, Ма́ти Бо́жия,/ я́ко и́стинно Сло́во О́тчее ро́ждшую/ и моля́щуюся о спасе́нии ро́да христиа́нскаго.

Конда́к, глас 7:

Ору́жием пра́вды облече́нный,/ страда́ния за ве́ру му́жески прия́л еси́/ и, я́ко и́стинный во́ин Христо́в,/ мучи́телем противоста́л еси́, глаго́ля:/ привре́менно есть госпо́дство ва́ше./ Мы же вопие́м ти:/ ра́дуйся, священному́чениче Влади́мире,// во Ца́рствии Небе́снем венце́м нетле́нным от Бо́га увенча́нный. И́кос:

Ве́рою стра́нствия на земли́ прия́л еси́,/ Оте́чествия и́стиннаго взыску́я,/ те́мже Бог угото́ва ти Небе́сный град;/ ве́рою поноше́ние Христо́во в бога́тство вмени́в,/ еги́пет мы́сленный оста́вил еси́,/ те́мже Бог на го́ру Богови́дения тя возведе́;/ ве́рою кровь свою́ пролия́л еси́,/ на мздовоздая́ние взира́я,/ те́мже па́льмовыя ве́тви в ру́це прие́м./ Мы же ны́не вопие́м ти:/ ра́дуйся, священному́чениче Влади́мире,/ во Ца́рствии Небе́снем венце́м нетле́нным от Бо́га увенча́нный.

Песнь 7.

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Безве́стно, я́ко а́гня незло́бивое пострада́в, священному́чениче Влади́мире,/ ны́не, в бе́лых оде́ждах на Небесе́х А́гнцу предстоя́, пое́ши:/ благослове́ние и честь и сла́ва Тебе́ во ве́ки.

Небре́гл еси́ безбо́жных веле́ния, я́ко о́троцы в Вавило́не,/ те́мже по сме́рти А́нгел вознесе́ ду́шу твою́ в Небе́сныя оби́тели,/ иде́же со ста́рцы и А́нгелы покланя́ешися Престо́лу Влады́чню.

В ро́ве земне́м скры́ти беззако́ние свое́ мня́ху уби́йцы,/ а́нгели же ду́шу твою́ к же́ртвеннику Бо́жию вознесо́ша,/ отону́дуже тщету́ мучи́телей свиде́тельствуеши, вопия́:/ благослове́н еси́, Бо́же оте́ц на́ших.

Богоро́дичен: О́бразу злато́му не покланя́ющихся/ ороси́ ми́лостию Твое́ю, Богоро́дице,/ Ни́ва бо Ты еси́ неора́нная,/ ороше́нная же Ду́хом Святы́м/ и прозя́бшая Еди́наго от Тро́ицы, Бо́га оте́ц на́ших.

Песнь 8.

Ирмо́с: В пещь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га,/ по́йте, дела́, я́ко Го́спода,// и превозноси́те во вся ве́ки.

Власть мучи́телеву, я́ко вре́менную обличи́в,/ в темни́цу вве́ржен был еси́,/ ю́же ти Госпо́дь росо́ю Ду́ха в храм претвори́./ Ны́не же пред Престо́лом Бо́жиим слу́жиши Ему́ во ве́ки.

Доброму́др быв, егда́ разделе́ния церко́вная прилучи́шася,/ Христу́ Еди́ному ве́рно послужи́л еси́/ и ча́да своя́ в послуша́нии Тому́ сохрани́л еси́./ Те́мже Седя́щий на Престо́ле обита́ет в тебе́ во ве́ки.

Бо́жие промышле́ние безро́потно прия́л еси́/ и, скита́яся и лише́ния терпя́,/ бли́жним служе́ния не оста́вил еси́, о́тче Влади́мире./ Те́мже по сло́ву Госпо́дню ра́дости неизрече́нныя насыща́ешися.

Богоро́дичен: О́гненныя пе́щи и тьмы гее́нския изба́ви нас, Влады́чице,/ но ми́лостива к нам бу́ди,/ да Тя, я́ко Богоро́дицу и Ма́терь Све́та, в пе́снех возвели́чим.

Песнь 9.

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы нам яви́ся,/ омраче́нная просвети́ти, собра́ти расточе́нная,// Тем Всепе́тую Богоро́дицу велича́ем.

Земны́м отце́м Свяще́нному Писа́нию науче́н,/ от Отца́ Небе́снаго печа́ть Ду́ха Свята́го прия́л еси́/ и, Сы́ну Бо́жию после́довав,/ да́ры Небе́сныя по́двигом му́ченическим оправда́л еси́.

Гоне́ния, предрече́нная ти, прия́л еси́ от безбо́жных/ и, сло́ву ева́нгельскому после́дуя,/ мно́гия ско́рби и муче́ния претерпе́л еси́,/ сего́ ра́ди ны́не лику́еши во оби́телех О́тчих.

Бо́гу ны́не предстоя́,/ просвети́ ны, грехми́ мно́гими омраче́нныя,/ воздви́гни от сна грехо́внаго/ и научи́ ны воспева́ти Тро́ицу Единосу́щную и Неразде́льную.

Богоро́дичен: И́мамы в бе́здне му́читися, омраче́ннии страстьми́,/ а́ще не Ты, Де́во, умо́лиши Сы́на Твоего́,/ да поми́лует нас,/ тем Всепе́тую Богоро́дицу, Тя велича́ем.

Свети́лен:

Днесь све́тлый о́блак свиде́телей Бо́жиих призва́вше,/ вся новому́ченики Це́ркве Ру́сския просла́вим,/ да облиста́ет нас Со́лнце Пра́вды, Христо́с Бог наш,/ моли́твами священному́ченика Влади́мира,/ и́же ку́пно с ни́ми Престо́лу Бо́жию предстои́т/ и Све́та Невече́рняго наслажда́ется.

Сла́ва, и ны́не, Богоро́дичен:

Днесь, Богома́ти,/ сия́нием Твои́х образо́в огражда́еши и осеня́еши нас./ Мы же благода́рне вопие́м Ти:/ ра́дуйся, Засту́пнице усе́рдная,/ гре́шных Спору́чнице и всех скорбя́щих Ра́досте.

На хвали́тех стихи́ры на 4, глас 1.

Подо́бен: Всехва́льнии му́ченицы:

О всехва́льне священному́чениче!/ Ты мучи́тельми в зе́млю лю́те вве́ржен был еси́,/ но А́нгели на Не́бо ду́шу твою́ прия́ша,/ отону́дуже всем лю́бящим тя,/ я́ко звезда́ пресве́тлая сия́еши,/ и па́мять твою́ днесь све́тло соверша́ющих// в Небе́сныя оби́тели путево́дствуеши.

О всехва́льне священному́чениче!/ Ты, сла́вы земны́я бе́гая,/ кра́сная ми́ра сего́ отве́ргл еси́/ и на путь скорбе́й и страда́ний/ му́жественне возше́л еси́./ Сего́ ра́ди му́ченик Госпо́день наре́клся еси́/ и, в лице́ святы́х ны́не водворя́яся,// мо́лишися о спасе́нии душ на́ших.

О всехва́льне священному́чениче!/ Тебе́ чи́стыми се́рдцем и усты́/ похвале́ние приноси́ти подоба́ет,/ ты же, не́мощь душе́вную на́шу/ и ску́дость слове́сную ве́дая,/ приими́ с любо́вию днесь пе́ние сие́/ и, Престо́лу Бо́жию предстоя́,// моли́ спасти́ся душа́м на́шим.

Сла́ва, глас 2:

Со́тника ве́ру, и во Изра́или неве́домую, показа́в,/ от лю́теровы ве́ры в Правосла́вие преше́л еси́/ и, стори́чный плод Христу́ прине́с,/ во Ца́рствии Небе́снем со Авраа́мом возле́гл еси́./ Те́мже с ним Го́спода моли́,/ да изба́вит нас тьмы кроме́шния// и спасе́т ду́ши на́ша.

И ны́не, глас то́йже:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

На Литурги́и

Слу́жба вся священному́ченику

Моли́тва

О священному́чениче Влади́мире, избра́нный учениче́ и после́дователю Христо́в! От ю́ности твоея́ Бо́га усе́рдно взыска́в, ве́ру и́стинную обре́л еси́ и, сло́вом ева́нгельским, я́ко свети́льником, весь путь жития́ твоего́ озари́в, в те́мную годи́ну гоне́ний крест па́стырский небоя́зненно подъя́л еси́ и, ве́рным наста́вник, окорми́тель и уте́шитель быв, смерть за ве́ру претерпе́л еси́. Те́мже моли́ся и ны́не Влады́це Христу́, правосла́вныя христиа́ны от разделе́ний соблюсти́, свяще́нники и мона́шествующия в по́двизе укрепи́ти, о́троки от па́губных и бесо́вских наве́тов сохрани́ти и вся ве́рныя в Правосла́вии утверди́ти и сию́ ве́ру святу́ю непрело́жну нам соблюсти́, да просла́вим ку́пно с тобо́ю на Небесе́х Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 21 октября 2016 года (журнал № 96)

^{@24 октября (6 ноября)@}

На малой вечерни

На Господи, воззвах: стихиры на 4, глас 8:

Житие твое явися благочестно, преподобне Зосимо, / добродетельми украшено, / простотою и смирением венчаемо, / и ныне ликуеши на Небесех со Ангелы, / о всех присно моляся, // творящих память твою.

Нося в руках священное, отче Зосимо, Евангелие, / сего исполнитель был еси: / имения родителей отвергся, / и слезами и теснотою все совершил еси твое житие, преподобне; / темже утешения Божественнаго и непрестаннаго веселия // ныне наслаждаешися, преблаженне.

Путешествие изрядное и велетрудное по пустыням сибирским / приведе тя ко пристанищу утишному у града Кузнецка, / идеже себе отвергл еси / и в Божественный одеялся еси образ отбежением всех сластей, / темже во псалмех и песнех прославим тя, // пустынниче блаженне Зосимо.

Преподобне отче наш Зосимо, / воистину сна твоима очима не дал еси, / ниже плоти твоея упокоения, / Божиею силою укрепляемь, / мысль свою горе возвышая, / над страстьми воцарился еси; / темже попечение о пастве твоей приял еси / и обители святыя основал еси. / Моли Христа Бога о нас, // твою память верою и любовию благочестно совершающих.

Слава, глас 8:

Монахов множества / наставника тя почитаем, отче наш Зосимо, / твоею бо стезею воистину право ходити познахом. / Блажен еси, Христу работав, / и вражию обличил еси силу, / Ангелов собеседниче, преподобных сопричастниче и праведных, / с нимиже молися Господеви // помиловатися душам нашим.

И ныне, Богородичен, глас тойже:

Царь Небесный за человеколюбие на земли явися / и с человеки поживе, / от Девы бо Чистыя плоть приемый / и из нея прошедый с восприятием, / Един есть Сын, сугуб естеством, / но не Ипостасию. / Темже, совершенна Того Бога / и совершенна Человека воистину проповедающе, / исповедуем Христа Бога нашего: / егоже моли, Мати Безневестная, / помиловатися душам нашим.

На стиховне стихиры, глас 2.

Подобен: Доме Евфрафов:

Зосимо Богомудре, / твоя рабы приими / торжествующия любовию, / преподобне отче наш, // всесвященную память твою.

Стих: Честна пред Господем / смерть преподобных Его.

Обрет себе пристанище в сибирских дебрех, / пустынножителем древним уподобився, / в притекших к тебе возжегл еси свет Христов. / О, пречудный отче Зосимо, // моли спастися душам нашим.

Стих: Блажен муж бояйся Господа, / в заповедех Его восхощет зело.

Приими ныне пение / твоих чад, преподобне, / радостно торжествующих / в честней твоей памяти, / Зосимо богомудре, отче наш.

Слава, глас и подобен тойже:

О, Господи, / увы нам погибаем, / потопляеми грехми. / Молитвами преподобнаго Зосимы, // Избавителю, и нас спаси.

И ныне, Богородичен, глас тойже:

О, чудесе новаго, всех древних чудес! / Кто бо позна Матерь, без мужа рождшую / и на руку носящую всю тварь Содержащаго? / Божие есть изволение Рождшееся. / егоже яко Младенца, Пречистая, / Твоима рукама носившая / и матерне дерзновение к Нему имущая, / не престай молящи о чтущих Тя, / ущедрити и спасти души наша.

Тропарь, глас 8:

Любовию Христовою уязвился еси, преподобне, / вся красная мира сего отринув; / подвигом безмолвия подвизаяся, добродетели божественныя стяжал еси; / премудрости Божия причастниче, отче наш Зосимо, // моли Христа Бога и Пречистую Богородицу спастися душам нашим.

Слава, и ныне, Богородичен, глас тойже:

Иже нас ради рождейся от Девы / и распятие претерпев, Благий, / испровергий смертию смерть / и Воскресение явлей яко Бог, / не презри, яже создал еси рукою Твоею, / яви человеколюбие Твое, Милостиве, / приими рождшую тя Богородицу, молящуюся за ны, // и спаси, Спасе наш, люди отчаянныя.

На велицей вечерни

На Господи, воззвах: стихиры на 8, глас 8:

Отче преподобне Зосимо, / сердце умиленно и ум кроток от юности стяжал еси, / вперив ум к Богу и крест твой восприемь, / во обитель спасающихся устремился еси, / тело твое подвиги воздержания Духу Божию покорил еси, // моли спастися душам нашим.

Отче преподобне Зосимо, / в пустыни Рославльской старца Василиска обрет / тому всецело любовию предался еси, / и стопам преподобнаго последуя, / яко бесплотен на земли пожил еси, // темже тя верою вси ублажаем.

Отче преподобне Зосимо, / обитель пустынную Коневскую возлюбив / и тамо труды твоя со усердием и любовию полагая, / слезами теплыми душу твою очистил еси, / темже молися Господеви // помиловатися душам нашим.

Отче преподобне Зосимо, / будущия ради жизни при Томи реце вселился еси, / никакоже бояся невидимыя враги, / многажды скорби творящия тебе, / смирением же и терпением вооружился еси. // Темже тя верою вси чтим и ублажаем.

Отче преподобне Зосимо, / все житие препровождаше в безмолвии мнозе и плаче, / инок быв истинен верою, / нестяжанием украшен и воздержанием удобрен. / Яко странен и пришлец на земли был еси. // Темже Небесных благих наслаждение обрел еси досточудне.

Постнических воистину подвигов благовонный сосуде: / плоти попрал еси долу влекущее мудрование, / добродетельми же душу просветил еси / и к Божественному вперился еси желанию. / Темже прехвальне Зосимо, // Христу Богу молися // даровати душам нашим мир и велию милость.

Узким и тесным путем от земли в славу Небесную шествовав / многим подвигом и скорбем, любве ради Божия, предавался еси, / тем ныне Владычню Престолу предстоя, / наслаждаешися Того светлостей, / и нам убо, светло твою память чтущим, / молитвами твоими подаждь Божественных причастие // и вечныя радости приятие, Зосимо преподобне.

Явился еси, преподобне отче, / лествица высокая добродетели духовныя, / благодати восход, / по ней же восшед, святе, / зриши славу Божию, и святых Ангел Небесных ликостояния светлости, / и, гласов боголепных пений наслаждаяся, / с ними поеши, веселяся радостно, / Богоносе Зосимо, / Христу Богу молися // даровати душам нашим велию милость.

Слава, глас 4:

Сердце умиленно стяжав, / житию и подвигом пустынным прилепился еси. / Постом, бдением, злостраданием и еже на земли леганием / чистоту имея душевную и телесную, и память смертную, / был еси чадо Христово смиренно и разумно // в духовном житии твоем. / Преподобне отче наш Зосимо, // моли спастися душам нашим.

И ныне, Богородичен, глас тойже:

Иже Тебе ради богоотец пророк Давид, / песненно о Тебе провозгласи, / величая Тебе Сотворшему: / предста Царица одесную Тебе. / Тя бо Матерь, Ходатаицу Живота показа, / без отца из Тебе вочеловечитися благоволивый Бог, / да Свой паки обновит образ, истлевший страстьми, / и, заблуждшее горохищное обрет овча, / на рамо восприим, ко Отцу принесет и Своему хотению, / с Небесными совокупит Силами, / и спасет, Богородице, мир // Христос, имеяй велию и богатую милость.

Вход. Прокимен дне. И чтения.

Премудрости Соломоновы чтение (главы 5 и 6):

Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение свое и вооружит тварь в месть врагом. Облечется в броня правды и возложит шлем – суд нелицемерен. Приимет щит непобедимый – преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащий множества и гордящийся о народех язык. Яко дана есть от Господа держава вам и сила от Вышняго.

Премудрости Соломоновы чтение (глава 3):

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие – сокрушение, они же суть в мире. Ибо, пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющийся Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.

Премудрости Соломоновы чтение (глава 4):

Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости – житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его или лесть прельстит душу его. Рачение бо злобы помрачает добрая и парение похоти пременяет ум незлобив. Скончався вмале, исполни лета долга, угодна бо бе Господеви душа его, сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.

На литии стихиры, глас 3:

О, велия славы жития твоего, отче наш Зосимо: / вся бо земная оставив, единаго Христа возлюбил еси / и, Тому служа чистою совестию, / на земли ангельски пожил еси. / Бесовская же коварства разорив, / возшел еси на высоту добродетелей. / Блажен еси, тако Христу работав, / темже и мы, в зерцале жития твоего путь к Животу зряще, // тя непрестанно ублажаем.

Глас 8:

Явился еси раб Богу угоден в шествии твоем духовном, / во смирении многом и послушании. / Сего ради устрои Господь душу твою смиренномудрую // во стезях Его.

Глас 6:

Молися прилежно за ны, преподобне отче Зосимо, / избавление подати от всех бед, находящих на ны. / Ускори, святе, на помощь нашу / и, ныне в Вышних Богови предстоя, // поминай чтущих память твою.

Слава, глас 8:

Приидите, стецытеся, иночестии собори боголюбивии, / к божественной памяти отца нашего Зосимы. / Поучився во дни и в нощи в заповедех Господних, / сподобился еси обрести лествицу Небесную, / по нейже возшед, достиже горняго Иерусалима / и, от болезней и трудов достойну почесть приемля, / со Ангельскими лики ныне радуется, / и божественнаго зрения наслаждается Единосущныя Троицы. / Темже и нас поминай, отче Зосимо, // предстоя у Престола всех Царя Христа и Бога нашего.

И ныне, Богородичен:

Владычице, приими / молитвы раб Твоих / и избави нас // от всякия нужды и печали.

На стиховне стихиры, глас 2:

От юности святоотеческому житию поревновав во всем, / преподобне отче Зосимо, / оставил еси вся, яже в мире, житейская мудрования, // моли о нас Человеколюбца Господа.

Стих: Честна пред Господем / смерть преподобных Его.

Отчий пример пред собою имея, / в добродетелех иноческих путь свой устроял еси, / яко злато в горниле искушено явивыйся, // приятелище Духа Пресвятаго был еси.

Стих: Блажен муж бояйся Господа, / в заповедех Его восхощет зело.

Послушание совершая, / на остров Коневец пришел еси, / слезами путь свой омочив. / И тамо во обители от наставник добре поучаяся, / монашества обеты Богу дал еси, / всякия добродетели исправляя, // тем же тя вси почитаем.

Слава, глас 8:

Инокинь множества / наставника тя почитаем, отче наш Зосимо, / Ангелов собеседниче и преподобных сопричастниче, / с ними же молися Господеви // помиловатися душам нашим.

И ныне, Богородичен, глас тойже:

Безневестная Дево, / яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений, / ныне наша моления приемлющи, // моли спастися всем нам.

На благословение хлебов тропарь преподобному дважды, и Богородице Дево: единожды.

Тропарь, глас 8:

Любовию Христовою уязвился еси, преподобне, / вся красная мира сего отринув; / подвигом безмолвия подвизаяся, добродетели божественныя стяжал еси; / премудрости Божия причастниче, отче наш Зосимо, // моли Христа Бога и Пречистую Богородицу спастися душам нашим.

На утрени

На Бог Господь: тропарь преподобнаго дважды.

Слава, и ныне: Богородичен: Иже нас ради:

По 1-й кафизме седален, глас 4:

Послушание учителю своему воздавая, / к Богу приблизился еси. / Ни зной, ниже мраз, ниже страхования демонская, / ничтоже возможе уклонити тя, преподобне, от Любве Божия. / Темже о всех нас Христа Бога моли, / в песнех, преподобне Зосимо, // твою память почитающих.

Слава, и ныне, Богородичен, глас тойже:

Дево Всенепорочная, / яже Пресущнаго Бога рождшая, / со преподобным Зосимою Того непрестанно моли, / оставление прегрешений и исправление жития дати нам, // прежде конца верою и любовию поющим Тя по долгу, Едина Всепетая.

По 2-й кафизме седален, глас 8:

От младенчества яко светильник воссиял еси, преподобне Зосимо. / Воздержанием плотския страсти умертвив, / на высоту Богоразумия восшел еси. / Сего ради вопием ти: // моли о чтущих память твою.

Слава, и ныне, Богородичен, глас тойже:

Се Тебе роди родов славят, / якоже прорекла еси Отроковице: / Создателя бо всех была еси Палата и Божественный Храм, / в Немже вселися Вышний, // и плотию обложися, да спасет нас.

Величание:

Ублажаем Тя, / преподобне отче наш, Зосимо, / и чтим святую память твою, / наставниче монахов / и собеседниче ангелов.

Псалом избранный: Терпя потерпех Господа:

По полиелеи седален, глас 8:

Премудрости Божественней измлада навык, / вся в мире суетная возненавидев, преподобне Зосимо, / Христа же единаго возлюбил еси. / Духовному же отцу всеконечне в послушание вдався, / многих добродетелей сокровищем от того обогатился еси. / С ним же молися Господеви, Зосимо преподобне, / грехов прощение даровати // чтущим любовию святую память твою.

Слава, и ныне, Богородичен, глас тойже:

Яко Всенепорочная Невесто Творца, / яко Неискусомужная Мати Избавителя, / Приятелище яко сущи Утешителя, Всепетая, / беззаконию мя суща скверное обиталище / и демоном игралище в разуме бывша, / потщися от тех злодействия мя избавити / и светло жилище добродетелей соверши, Светоносная, Нетленная, / отжени облак страстей и Вышняго причастия сподоби / и Света невечерняго молитвами Твоими.

Степенна, 1-й антифон 4-го гласа. Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми? Евангелие от Матфея, зачало 43.

По 50-м псалме стихира, глас 6:

Егда прииде с Коневца преподобный Зосима / с сотаинником Василиском в пустыню Сибирскую, / тогда на Твою помощь, Богородице, упование свое возложи. / Егда же прииде в землю Московскую, / тамо обитель во имя Живоначальныя Троицы и иконы Твоея Одигитрии возгради, / сию подвигами дев Христовых прославив. / Мы же, его любви к Тебе подражающе, / Тя немолчными пении ублажаем / и, чудотворному образу Твоему поклоняющеся, зовем: / О, Пресвятая, // прииди и сохрани достояние Твое от всякаго зла.

Канон Богородице на 6; и преподобному Зосиме, на 8.

Канон преподобному Зосиме, глас 4.

Песнь 1.

Ирмос: Тристаты крепким, / Рождейся от Девы, / безстрастия во глубине / души тричастное потопи, молюся, / да Тебе, яко в тимпане, / во умершвлении телесе // победное воспою пение.

Слове Божий, молю Ти ся: / даждь ми слово и отверзи ми устне, недостойному рабу, / да восхвалю угодника Твоего, преподобнаго отца Зосиму, // яко в Тебе и Тобою прославися.

Отче преподобне Зосимо, / приими от нас недостойных песнь сию, юже воспоим с любовию, / и моли за ны, грешныя рабы твоя, / от усердия дерзнувших восхвалити житие твое, // тя бо Христос прослави.

Днесь сошедшеся в пречестный храм сей / восхвалим Божия угодника память, // яко славно о Имени Христа Господа своего прославися.

Приими, преблаженне, отче досточудный Зосимо, / пение сие похвальное / и твое отеческое покажи о нас милование. / Превыше бо сил наших по достоинству похвалити тя, // но елико мощно, от усердия дерзаем.

Инок множества / наставника тя чтим, отче наш Зосимо, / тобою бо путь сущий правый шествовати познахом, / блажен еси, Христови работав, / и вражию обличил еси силу, / Ангелов собеседниче и преподобным сопричастниче и праведным, / с нимиже молися Господеви // помиловатися душам нашим.

Богородичен: Аще много может молитва праведнаго поспешествуема, / Ты, святейши сущи всея твари, яко Мати Богу, несравненно большая можеши. / Призри на ны с преподобным Зосимою // и испроси нам вся благая от Бога.

Катавасия: Отверзу уста моя:

Песнь 3.

Ирмос: С высоты снизшел еси волею на землю / превышше всякого начала / и смиренное вознесл еси / из ада преисподняго / естество человеческое, // несть бо свят, паче Тебе, Человеколюбче.

Стягнув тело твое воздержанием и чистотою, / уединение в дебрех Коневских обретая, / душу к Богу возводити тщался еси, преподобне, / и в Вышняя селения, отче Зосимо, достигл еси. / Ныне же на Небесех со Ангелы ликуя, / о нас Христу Богу молися // даровати нам велию милость.

Послушание старцу твоему являя, / от силы в силу восходил еси, / заповеди и учения наставника преподобнаго Василиска восприемля, Зосимо преподобне. / Ныне же с ним предстоя у Престола Вседержителя, / о нас Христу Богу молися // даровати нам велию милость.

Вся заповеданная тебе исполняя, / путем спасительным шествовал еси, отче наш Зосимо, / всегда любовь велию ко старцу своему сохраняя, / жизнь иноческую совершал еси, / удручая тело свое постом, и бдением и труды, // в молитвах же ум свой возводил еси к Небесному Царствию.

Двоицу отец, Зосиму и Василиска, приводим Тебе в молитву Христе Боже, / ихже моление приемь и от вражия нас коварства сохраняя, // Духом Твоим Святым настави нас во веки Тя величати.

Радуйся, преподобне Зосимо, / радость бо Небесную вечную / от Бога приял еси за труды твоя, / молися с Богородицею // о мире и людех согрешающих.

Богородичен: Крепость и силу обретающе в помощи Богоматере, / преподобнии отцы Зосима и Василиск путь свой совершаху. / Ты же Мати Божия Всемилостивая кров крепок во испытаниих уготовала еси // преподобным рабом Твоим.

Седален, глас 8:

От юности, блаженне, вся оставль житейская, красная же и лепотная, / усердно последовал еси Христу, призвавшему тя, преподобне, / духовному наставнику покорився. / Темже тя Господь добре устрояет пастыря Своим овцам словесным, отче Зосимо. / Моли Христа Бога грехов оставление подати // чтущим любовию святую память твою.

Слава, и ныне, Богородичен:

Просвети, Чистая, сетующая сердца наша, / присно преступленьми и житейскими многими молвами оскверняемая, / и не остави нас погибающих, // яко да прославим и любовию воспоим Тя, Всепетая.

Песнь 4.

Ирмос: Услышах слух Твой и убояхся, / разумех дела Твоя // и ужасохся, Господи.

Шествие в страну сибирскую с трудом велиим совершили есте, / о, многотруднии старцы Зосимо и Василисче, / послушание воле Божией исполняюще. / Множество страданий претерпевше / и жизни сохранение милостию Божиею улучивше, // бысте чада Богу возлюбленная.

О, двоице присноблаженная, преподобнии Зосимо и Василисче, / яко едино блаженство имущий от Бога, / теплым предстательством вашим // от всех лютых спасайте призывающих вас.

Уединение в дебрех сибирских обретая, / вся содеянная с плачем духовному отцу исповедая, / раб верный Богу и монах явился еси, отче Зосимо, / труды и подвиги твоими всех удивляя // и ко спасению наставляя.

Потщався тленными нетленная стяжати, преподобне Зосимо, / Христа единаго приобрел еси. / Душу к Богу возводити тщася, / радости вечныя сподобился еси. / Христа моли спастися всем, // любовию священную память твою почитающим.

Иже Свет миру, Христе, / святыя Твоя просветивый солнца светлейше, / молитвами преподобнаго Зосимы и наши сердца освети // светом благодати Твоея.

Богородичен: Мати Божия Благословенная, / помощь и руководство рабом Твоим. / Окормление душам тихим, / Богу присвоенным и в подвизе иночестем житие провождающим, // даровала еси, Пренепорочная.

Песнь 5.

Ирмос: Ныне востану, пророчески рече Бог, / ныне прославлюся, ныне вознесуся, / падшаго прием от Девы // и к свету умному возносяй Моего Божества.

Вещь дивная явися преподобному Василиску молитва Иисусова, / о нейже послушнику своему Зосиме поведал есть. / Тогда позна преподобный Зосима тайный подвиг старца своего, // молитвы Иисусовой делание.

Даде Господь помощь Свою Зосиме преподобному, / еже уразумети силу молитвы старца своего, / и записал преподобный Зосима откровения путей и степеней / славнаго дара, старцу Василиску дарованнаго, // на утешение и осмысление всем дерзающим рабом Господним.

Ни лютость врагов духовных, ниже скудость пустыни / расслабиша терпения вашего, преподобнии Зосимо и Василисче. Многия дни и часы в молитве Иисусовой подвизающеся, / яко адаманты тверды, пребыли есте, // ревностию Божественною распаляеми.

Уведано бысть православными житие старцев духовное, / и спасающиися под кров сих прибегаху, / подражающе им в молитвах, пощениих и бдениих, // ко Христу Человеколюбцу.

Собрал еси, отче Зосимо, в души твоей Божественныя плоды Духа: / непрестанну молитву, чистоту душевную же и телесную / и бдение твердо, смирение нелицемерно, // имиже храм показался еси Бога Вседержителя.

Богородичен: Богородице Пречистая, / Твоего Сына и Бога видети желая, / Зосима, угодник Твой, / Сего живоносным и Божественным стопам // невозвратно последова.

Песнь 6.

Ирмос: Приидох во глубины морския, / и потопила мя есть буря многих грехов, / но яко Бог из глубины возведи живот мой, // Многомилостиве.

Житейскаго, блаженне Зосимо, убежав волнения, / в тишину дошед Божия покоя, / молися подати и нам // о Христе того наслаждения.

Душу очистив, преподобне, страстей омрачения / сугубым постом и молитвою непрестанною, / зерцало, отче, был еси Божественного Духа, // светильниче монахов, Зосимо Богоносе.

Ты убо, преподобне отче, хотел еси утаитися от человек и един Единому Богу безмолвствовати. / Он же не остави тебе неведома быти, / но всем, требующим спасения, / яве показа тя, житие твое добродетельное, // на пользу хотящим стопам твоим последовати.

Святыя Троицы дом, Зосимо, показался еси, / Еяже силою священныя создал еси обители, преподобне, / на устроение спасительное монашествующих, / чествующих память твою святую, // приснопамятне.

Земная и мимотекущая, яко уметы, вменив, / Христа единаго вожделел еси, / к Нему же союзом любве приблизив душу свою, // Того обрести потщался еси ненасыщаемыя доброты.

Богородичен: Мати Божия Пречистая, / присных рабов Твоих скорби утоляеши и наставляеши // воли Божией следовати.

Кондак преподобнаго, глас 6:

Избранниче Божий и старче премудрый, / наставниче наш Зосимо, / от юности постническою стезею шедый, / во одежду кротости и терпения облеклся еси; / тем же дар Святаго Духа улучив, / многия души Христу уневестил еси, / и обители святыя утвердил еси. / Ныне же в сонме преподобных на небесех ликуеши, // моляся непрестанно о чтущих святую память твою.

Икос:

Услышав Христов Евангельский глас, / оставив плотская мудрования, / богатство и славу мира сего, яко прах, вменив, / последовал еси наставнику своему / и от того всякия добродетели навык, / и бысть ему ученик добрым послушанием, / Бесплотных ликостоянию сочетався. / Подаждь разум и мне, недостойному рабу своему. / Дерзаю на твое милосердие и вопию сице: / радуйся, преподобных всех похвало; / радуйся, постников подражателю и пустыни устроителю; / радуйся, яко в ней тобою Бог славится; / радуйся, добре пасый стадо твое; / радуйся, яко смирил еси злоначальнаго врага; / радуйся, яко посрамил еси бесов полки; / радуйся, монашествующих светильниче пресветлый и столпе терпения; / радуйся, яко собрал еси инокинь множество во спасение; / радуйся, яко тобою хвалимся вси; / радуйся, яко тебе ради избавляемся от бед; // радуйся, отче Зосимо преподобне.

Песнь 7.

Ирмос: Юноши три в Вавилоне, / веление мучителево на буйство преложше, / посреде пламене вопияху: / благословен еси, Господи, // Боже отец наших.

Истиннаго и кроткаго Пастыреначальника Христа / незлобивое овча, отче Зосимо, был еси, / смирением и терпением победив бесы лукавыя. / Темже хотящим тебе озлобити кроток явился еси, / Христу вопия: // Благословен Бог отец наших.

Глаголы разумев гонителей злочестивых, / Христа Бога силою / мучители немощны сотворил еси. / Тако и страсти побеждая, / пребыл еси, поя: // Благословен Бог отец наших.

Многи скорби душевныя и гонения прияв, отче Зосимо, / сибирскую землю покинул еси, / и во град Москву со ученицами верными устремился еси, присно молитву творя: // Благословен Бог отец наших.

Лукавых духов тьму разгнал еси / и, собрав монашествующих множества, / пастырь их был еси и светильник светлейший, преподобне Зосимо. / И ныне поем с тобою: // Благословен Бог отец наших.

Поношение врагов, велеречие ненавидящих, / озлобление же и клятва их и сим подобная злая воздвигахуся на тя. / Но от всех сих избави тя Господь, / яко непорочен был еси в пути, ходив в законе Его. / Тем, ублажив тя, Праведный Судия // о нас молитвенника содела, преподобне Зосимо.

Богородичен: Милостива ми Судию, Сына Твоего, / Богородице Дево, Твоими молитвами быти в день Суда, / Мати, умоли: // на Тя бо едину надежду мою возлагаю.

Песнь 8.

Ирмос: Избавителю всех, Всесильне, / посреде пламене благочествовавшия, / снизшед, оросил еси / и научил еси пети: // вся дела благословите, пойте Господа.

Всем сердцем, Зосимо, Троице усердно служив / и, от Нея луча благодать приемь, / световиден соделался еси. Ныне же со Ангелы ликуеши, // поя и превознося Христа во вся веки.

Храм Троице Пребожественней душу и тело совершив, / Божественныя создал еси обители, достославный Зосимо, / в нихже лики девствствующих и монашествующих чины собрал еси, // поющия согласно и превозносящия Христа во вся веки.

Заступник и покровитель граду Москве, / Святитель Божий Филарет, / молитву и милосердия бездну простре и на твоих сирот, / преблаженне Зосимо, // поющих и превозносящих Христа во вся веки.

Вся потребная к строению обители будущия уготовляя, / келлии соградив и кладезь ископав, начало монастырю положил еси. / Вся яже к монашескому житию полезная написуя, / укрепил еси учениц твоих, // превозносящих Христа во веки.

В пристанище тихое вшед, богомудре Зосимо, / житейских плаваний отбегл еси. / Темже волнуемым в бури страшней // спасительное окормление был еси.

Богородичен: Богородительнице Пречистая, рабов Твоих сирых прияла еси, / кров новый тем в пределех Московских указующи, / покров и утверждение обители Твоея, Одигитрие, устрояющи, // к жизни вечной монашествующих путеводствуеши.

Песнь 9.

Ирмос: Ева убо недугом преслушания / клятву вселила есть; / Ты же, Дево Богородице, / прозябением чревоношения мирови Благословение процвела еси. // Тем Тя вси величаем.

Священно и красно жилище для сирых девиц и вдовиц / создал еси, преподобне отче Зосимо, / наставляя их послушанию и смирению; / темже к ревности ангельскаго жития подвигл еси // множество иночествующих.

Вперяяся умом вослед Господу, / чин схимы великия от пустынных отцев приял еси, богоблаженне отче. / Аще и зашел еси от нас во гроб, / уснув сном смерти, / обаче в воскрешение праведных просветишися, яко солнце, // в Царствии Отца Небеснаго.

Аще земное отечество, преподобне Зосимо, оставил еси, / но в Отечество Небесное возшед, / во обители Одигитрии множество монашествующих собрал еси. // Темже со дерзновением, отче, молися Христу Богу за ны, рабы твоя.

Днесь воссия нам честная память твоя, / преблаженне отче наш Зосимо. / И красуется обитель, в нейже подвиги своя и труды скончал еси, // и победы венцы восприял еси.

Преподобне отче наш Зосимо, / потщися нас, чад своих, чисты представити Господеви, / егоже со Пресвятою Богородицею вкупе и со всеми святыми прилежно моли, всеблаженне, / православному народу нашему подати здравие и всем верным спасение, // очищение грехов и велию милость.

Богородичен: Воистину сей есть святый день, / в оньже собра нас Мати Божия / прославити подвиги преподобнаго отца Зосимы, зде просиявшаго, // егоже память пребывает во веки.

Светилен преподобнаго Зосимы:

Мирское пристрастие оставль и богатство мимотекущее, / душу Христу предав, Зосимо преблаженне, / учитель многих душ явился еси / и, к Богу отходя, // путь жития и спасения сим указал еси.

Слава и ныне, Богородичен:

Тя песньми немолчными ублажаем, Дево, / яко от Троицы Единаго родила еси, Богородице, / и носиши на Божественную руку Пребогатое Слово / непременно и неизменно.

На хвалитех стихиры преподобнаго, глас 2:

Все упование ко Господу возложь, / всем сердечным желанием горя к Богу, преподобне Зосимо, / яко звезда светлая на востоце, / всем возсиял еси, святе. / Возрадуйтеся и возвеселитеся, монахов сонми, / торжествующе в памяти его. / Ты же, преподобне, Христу Богу // со дерзновением молися о душах наших.

Дарова тебе, отче Зосимо, / Господь наставника духовнаго, / и от того премирному житию научаемь, / жизнь Богови посвятити возжелал еси. / Сего ради стезею безмолвническою в Небесное Царство шествовав, / Господа Спаса славословил еси; // Емуже со дерзновением молися о душах наших.

Смирен, кроток и молчалив быв отче Зосимо, / чист сердцем показался еси, / храм Божий явился еси по достоянию, / яже от Него прибывшая тебе дарования // милостиво подавая нам.

На Небесех ныне со Ангелы водворяяся / во свете Присносущныя Троицы, / отче Зосимо, / о нас молися Человеколюбцу Богу, // сохранитися нам от сети лукаваго.

Слава, глас тойже:

Чистый сосуд Святаго Духа показался еси, / озаряемь Божественною светлостию, / и ныне на Небесех Христа зриши лицем к лицу, / моли Его, отче Зосимо, // о совершающих память твою верно.

И ныне, Богородичен, глас тойже:

Все упование мое / на Тя возлагаю, Мати Божия, // сохрани мя под кровом Твоим.

Славословие великое и отпуст.

На Литургии

Блаженны от канона песни 3-я и 6-я.

Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми.

Апостол к Галатам, зачало 213.

Аллилуия, глас 6: Блажен муж, бояйся Господа, / в заповедех Его восхощет зело. Стих: Сильно на земли будет семя его.

Евангелие от Луки, зачало 24.

Причастен: В память вечную будет праведник, от слуха зла не убоится.

Молитва

О, святый угодниче Христов, преподобне отче наш Зосимо!

Кто изглаголет подвиги твоя: безмолвие, бдение, молитву непрестанную, скорбей терпение, слезы покаяния и всех прощение, воли Божией всецелое предание?

Ты от юности жизнь свою Христу посвятил еси. Имение раздав, во обитель пустынную вселился еси. Многим девам, Богу уневестившимся, паче отца ты был еси, духовно их окормляя и ко спасению наставляя.

И ныне молим тя мы недостойнии: буди нам помощник и заступник, обители же нашей утверждение и покров; научи нас волю Божию творити, обиды прощати, скорби и болезни благодушно терпети.

Да сподобимся и мы молитвами твоими в мире, любви и покаянии путь наш тесный совершити и Царствия Небеснаго достигнути, идеже ты со всеми святыми славиши непрестанно Бога во Святей Троице славимаго, Отца и Сына и Святаго Духа. Аминь.

Источник: Служба одобрена московской епархиальной Богослужебной комиссией

Месяца октября в 3-й день

Святителя Агафангела, исповедника, митрополита Ярославскаго

На велицей вечерни

На Господи, воззвах: стихиры, глас 8.

Подобен: О, преславнаго чудесе:

Святителю Христов Агафангеле,/ исповедниче твердый Церкве Русския,/ ты, от утробы матере Богом избран быв,/ в день Воздвижения Креста Господня родился еси/ и, крест свой мужественне взем,/ усердно Христу последовал еси,/ души же своея отвергнувся,/ тесным житием и многими подвиги/ соблюл еси ю в живот вечный.

Богомудре отче Агафангеле,/ ты, яко звезда пресветлая,/ от востока даже до запада/ землю Русскую озарил еси,/ молитвами бо слезными и смирением,/ слова Божия проповеданием/ многия люди ко Христу привел еси/ и отец чадолюбивый им явился еси./ Темже и велий в Царствии Небеснем нареклся еси.

Святителю отче Агафангеле,/ благовестниче неустрашимый,/ ты, мужество и мудрость сочетая,/ на всяк день душу свою за овцы полагал еси/ и, яко добрый воин Христов,/ изгнания и темничная заточения,/ поношения и болезни лютыя/ мужественне претерпел еси/ и венца Небеснаго сподобился еси.

Святителю отче Агафангеле,/ ты, яко злато в горниле, огнем искусився страдания,/ со дерзновением отверзл еси уста,/ во еже обличити отступники/ предания церковная попирающия/ и нововведения льстивая вводящия,/ темже небо благодарственно прият тя,/ идеже ныне древа жизни наслаждаешися/ и прославляеши Христа, Бога нашего.

Слава, глас тойже:

Егда Церковь Русская/ богоборческими гонении люте обуревашеся,/ тогда святитель Агафангел страж неусыпный тоя явися,/ по вся дни произволением за Христа умирая,/ темже, жизнь вечную наследовав,/ ныне в сонме новомученик Российских на Небеси ликует,/ прославляя Отца и Сына и Святаго Духа,/ Троицу Единосущную и Нераздельную.

И ныне, Богородичен: Царь Небесный:

Вход. Прокимен дне. И чтения 3 исповедническая:

1. Похваляему праведнику: (главы 4, 6, 7 и 2)

2. Праведницы во веки живут: (главы 5 и 6)

3. Праведник, аще постигнет скончатися: (глава 4)

На литии стихира храма и святаго стихиры, глас 1:

Преподобен и незлобив,/ домоправитель верный и мудрый,/ пастырь добрый, душу свою за овцы Христовы полагаяй,/ исповедник твердый и истинный хранитель церковных преданий/ явился еси, святителю Агафангеле,/ себе самаго во образ верным чадом Церкве Русския подавая.

Супружницы и сына во единочасие лишився,/ Божие посещение уразумел еси,/ святителю Христов Агафангеле,/ и, призвание на путь иноческий,/ такожде и дар слова от Господа восприем,/ проповеданием и учением сторицею той преумножил еси/ и, светильник целомудрия елеем милости исполнив,/ с мудрыми девами в Чертог Небесный вшел еси.

Слава, глас 6.

Подобен: Все отложше:

Стойте и держите предания церковная,/ неленостно поучал еси паству,/ святителю отче Агафангеле,/ егда же в место обители Спасовы/ безбожными заключен был еси,/ тогда вернии людие на дворе церковнем собирахуся,/ да поне издалеча видением лика твоего утешатся./ Темже и ныне предстани в помощь нам,/ празднующим любовию святую память твою.

И ныне, Богородичен, глас и подобен тойже:

Величаем Тя вси, Пренепорочную/ Матерь Бога нашего,/ Юже освяти Дух Пресвятый./ Ты бо еси, Богородице,/ Оружие наше и Стена,/ и Святей Руси Заступница,/ к Тебе ныне прибегаем,/ Тя на молитву призываем,/ да избавиши нас/ от врагов наших.

На стиховне стихиры, глас 2:

Приидите, празднолюбцы,/ воспоим святителя Агафангела достоблаженнаго,/ учителей печать и страдальцев единонравна,/ Христа ради вся во уметы вменившаго,/ велелепием исповедания Церковь Русскую украсившаго,/ ныне же в Царствии Небеснем Бога воспевающаго.

Стих: Ты иерей во век/ по чину Мелхиседекову.

Приидите, архиереи и священницы,/ святителя Господня песньми почтим,/ той бо, подвиг страдания и исповедничества подъем/ и последи благочестно пожив,/ жертву безкровную благоговейне приношаше,/ паству свою Хлебом Жизни питая/ и Христа Бога усердно умоляя,/ да простится грех богоборчества народа нашего.

Стих: Исповемся Тебе, Господи,/ всем сердцем моим.

Приидите, любострадальцы,/ прославим Агафангела освященнаго,/ той бо, яко раб благий и верный,/ данный ему талант благочестия/ исповеданием Христа преумножи,/ темже в радость Господа вниде/ и, велие дерзновение от Него восприем,/ молится о земли нашей/ и о верою чтущих память его.

Слава, глас 6:

Возлюбил еси Бога паче живота/ и ближняго своего, яко себе,/ во главу угла благо Церкве Святыя поставляя/ и предания святых отец неизменно хранити повелевая,/ сквозе огнь и воду страданий по Христе прошел еси/ и ныне вечнаго покоя наслаждаешися,/ святителю Агафангеле, отче наш.

И ныне, Богородичен: Творец и Избавитель мой, Пречистая:

На благословении хлебов тропарь, глас 2:

По вся дни Бога ради умервщляемь,/ святителю и исповедниче Христов Агафангеле,/ во время безбожных гонений лютых/ попечение о Церкви Русской от святителя Тихона приял еси/ и, наветы диавольския разорив,/ корабль церковный мудре/ силою возлюбившаго тя Господа управил еси./ егоже моли даровати нам мир и велию милость.

На утрени

На Бог Господь: тропарь святителя дважды. Слава, и ныне, Богородичен.

По 1-м стихословии седален, глас 7:

Во плоти ходяй, не по плоти воинствовал еси, святителю Христов Агафангеле, и благодатию Божиею вся до конца претерпел еси, покры бо тя в тайне Лица Своего Господь, егоже моли помиловати нас в День Судный.

Слава, и ныне, Богородичен:

Ты Предстательница теплая и Заступница христиан еси, Богородице Дево, Всепетая Владычице, темже со всеми святыми земли Русския, моли Сына Твоего и Бога в День Судный обрести нам велию милость.

По 2-м стихословии седален, глас 2:

Во дни брани и нестроений народных, святителю отче Агафангеле, ты именем Христовым воины русския увещал еси, еже Отечеству верно служити, веру Православную незыблему хранити и живот свой за други своя полагати, да в житии сем плод вечный обрящут.

Слава, и ныне, Богородичен:

Воистину Богородицу Тя исповедуем, Владычице, Ты бо Бога неизреченно родила еси, Крестом смерть разоршаго и к Себе святых соборы привлекшаго, с нимиже моли спасти землю Русскую, яко та есть удел Твой.

Величание:

Величаем тя,/ священноисповедниче Агафангеле,/ и чтим святую память твою,/ ты бо молиши за нас/ Христа, Бога нашего.

Псалом избранный:

1. Священницы Твои облекутся правдою, и преподобнии Твои возрадуются.

2. Повем имя Твое братии моей, посреде Церкве воспою Тя.

1. Приидите, чада, послушайте мене, страху Господню научу вас.

2. Возненавидех церковь лукавнующих, и с нечестивыми не сяду.

1. Яко ревность дому Твоего снеде мя, и поношения поносящих Тя нападоша на мя.

2. За словеса устен Твоих аз сохраних пути жестоки.

1. Искусил мя еси, и не обретеся во мне неправда.

2. Правдою Твоею избави мя и изми мя.

1. Погна враг душу мою, посадил мя есть в темных.

2. Изведи из темницы душу мою, исповедатися имени Твоему.

1. Бог мой еси Ты, и исповемся Тебе всем сердцем моим.

2. Глаголах о свидениих Твоих пред цари, и не стыдяхся.

1. Благо есть исповедатися Господеви и пети имени Твоему, Вышний.

2. Пойте Господеви, преподобнии Его, и исповедайте память святыни Его, во всех людех чудеса Его.

По полиелеи седален, глас 2:

Отверзошася ти врата правды, святителю Агафангеле всехвальне, и ныне, вшед в ня, Господеви исповедуешися, хвалу Ему в церкви преподобных возсылая, и кадило молитв священных Престолу Его вознося. Темже помяни чада Церкве Русския, любовию чтущия Тя.

Слава, и ныне, Богородичен:

Ко образу Толгския иконы Пресвятыя Богородицы с верою припадая, Агафангеле премудре, о спасении земли нашея Пречистую усердно умолял еси и тако верныя поучал еси: не имамы иныя надежды во обстояниих, разве предстательства Богоматере.

Степенна: 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Евангелие от Луки, зачало 64.

По 50-м псалме стихира, глас 6:

Нашедшу на тя Духу Святому,/ святителю отче Агафангеле,/ во дни гонений лютых в земли Русской/, старец сый, телом немощный и притрудный,/ духом неколеблен явился еси,/ заточения, изгнания и болезни,/ глад и мраз претерпевая,/ яко истинный свидетель Христов./ Темже ныне, Престолу Божию предстоя,/ моли помиловатися душам нашим.

Канон, глас 8, егоже краегранесие: Претерпевый до конца, той спасен будет.

Песнь 1.

Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Положивый в сокровищницу Церкве Русския плод устен, исповедающих имя Божие, святителю отче Агафангеле, приими днесь, яко лепту, пение от души, благих вдовствующия.

Ревностию по Бозе бездну гонений немокренно прешел еси, святе Агафангеле, и ныне молитвами твоими на неуклонное исповедание веры нас утверди, воспевающих и поющих в сердцах наших Господеви.

Егда дадеся ти благодать не точию во Христа веровати, но и по Нем пострадати, святителю славне, ты путем скорбным безбоязненно пешешествовал еси, верным образ быв. Темже и вниде во врата Небесная.

Богородичен: Твоего чрева Плод, Богоневесто, земныя вся от клятвы избавляет, темже благословенна Ты в родех, Пречистая Владычице.

Песнь 3.

Ирмос: Утверждей на камени веры,/ на сем созижду Мою Церковь, рекий, Господи,/ спаси мя, вопиюща:/ Ты еси, Христе, Сын Бога Живаго,/ и в Тебе утвердися дух мой.

Егда восташа врази и отступницы на святыни земли Русския,/ тогда ты учаше неложно, богомудре Агафангеле,/ како подобает в Дому Божии жити,/ яже есть Церковь Бога Жива,/ столп и утверждение истины.

Речи безумныя слышав, яко несть Бог, приидите, и отставим вся праздники Божия, прещения гордых не убоялся еси, отче Агафангеле, чада церковная к единению веры призывая.

Паству твою апостольски поучал еси, святителю Агафангеле, повелевая отлучатися всякаго брата, безчинно ходяща, в научения странна и различна не прилагатися, но благодатию сердца утверждати.

Богородичен: Едина словом Слово плотию рождшая, Чистая, избави сетей вражиих души наша и утверди на камени Божественных хотений, яко на Тя упование возложихом.

Седален, глас 4:

Взирая на Начальника и Совершителя веры Иисуса, верою немощи превозмогл еси, святителю Агафангеле, в темницах и изгнании терпеливодушно пребывая, беды от гонителей, беды от лжебратии терпя. Темже и жизнь вечную восприял еси.

Слава, и ныне, Богородичен:

К Заступнице земли нашея, Приснодеве Богородице, ныне притецем и к первописанней иконе Ея припадем, с верою зовуще из глубины души: о, Мати Божия, спаси землю Русскую, исцели болезни ея и верныя люди утеши.

Песнь 4.

Ирмос: Ты моя Крепость, Господи,/ Ты моя и Сила,/ Ты мой Бог, Ты мое Радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Виждь враги моя, яко умножишася и туне возненавидеша мя, вопиял еси псаломски, Агафангеле крепкодушне, сохрани душу мою и избави мя, яко Тебе ради претерпех поношение, и прославлю силу Твою, Человеколюбче.

Исповедал еси, отче Агафангеле, Христа пред отступники и гонители, мужественне воспевая: страха вашего не убоимся, ниже смутимся, яко с нами Бог, Господа же Бога нашего, Того освятим, и Той будет нам в страх.

Имене Своего ради в скорбех сохрани тя Христос Бог мышцею Своею высокою, тебе взывающу: яко аще не Господь бы был в нас, внегда востати человеком на ны, убо живых пожерли быша нас. Ныне же силу Его воспеваем.

Богородичен: Доброту Иаковлю, красную Тя, Всечистая, Едину обрет от века Пребезначальное Слово, и вселився в Тя, обнови человеческое естество, егоже моли от всякия мне избавитися скорби.

Песнь 5.

Ирмос: Яко Бога иного, Блаже,/ паче Тебе, не знаем,/ к Тебе, Свету Незаходимому, от нощи утренююще,/ воспеваем Тя, Человеколюбче.

Отлучен быв телом, но не душею, от паствы твоея, исповедниче Христов, по вся дни тую в сердце своем носил еси, последуя Господу Человеколюбцу.

Кую измену даст человек за душу свою? Сие слово Господне в сердце храня, житие непорочное и исповедание чистое Спасителю в дар принесл еси.

О всяцей скорби Бог не остави тебе, да возможеши сущия в скорбех утешати, и гонящия благословляти, словом, житием, любовию образ верным подавая.

Богородичен: Направи стопы моя к покаянию, Путеводительнице христианом, Богородице Чистая, яко да из тьмы греховныя исход обрящу.

Песнь 6.

Ирмос: Иону в ките, Господи,/ единаго вселил еси,/ мене же, связаннаго мрежами вражиями,/ яко от тли онаго спаси.

Целомудрием Христовым, святителю Агафангеле, во узах сый, лжемудрие гонителей обличил еси, яко слово Божие не вяжется.

Аще благая прияхом от руки Господни, злая ли не стерпим, взывал еси, святителю, да сынове Божии обретемся.

Ты, Господи, нам Прибежище и Сила, в тесноте темничней вопиял еси, богомудре, егда бо немощствуем, тогда о Господе сильни есмы.

Богородичен: Освяти ум мой и просвети сердце мое, Пресвятая Мати Божия, и одержащих мя зол измени, христиан Заступнице.

Кондак, глас 4:

Исполняя во плоти твоей лишение скорбей/ за Тело Христово, еже есть Церковь,/ страждующим чадом Ея милостию и смирением,/ преподанием мира и мудростию послужил еси,/ сего ради на свещнице архиерейстем,/ яко светильник горяй и светяй, возсиял еси/ и мощи твоя граду Ярославлю/ во утверждение даровал еси,/ святителю Агафангеле, отче наш.

Икос:

К Церкви и земли Русской любовию распалаяся, неверие и зловерие со дерзновением обличал еси, чада церковная повиноватися и покарятися законным пастырем поучая. Темже, страдания по Христе волею на рамо взем, силу мучительскую силою Христовою препобедил еси. И ныне, во Царствии Божии веселие вкушая за лета, в няже видяше злая, поминай любовию чтущих тя, святителю Агафангеле, отче наш.

Песнь 7.

Ирмос: Божия снисхождения/ огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.

Имея щит веры Христовы, стрелы разжженныя мучителей отразил еси, святителю, вопия: аще бо паки возможете и паки побеждени будете, аз же благословлю Бога отец наших.

Со беззаконными вменився, на путь нечестивых не ступил еси и, ненавидимь Господа ради быв, любовию сердце утвердил еси, воспевая Богу отец наших.

Паче силы гонительми отягощаемь, легкое иго Христово подъял еси, мудре, и посреде мятежа и браней земных покой обрел еси, воспевая Богу отец наших.

Богородичен: Агнца зрящи неправедне на Древе воздвизаема, Многопетая Агница плачущи восклицаше, матерски слезящи и долготерпение Того пояше.

Песнь 8.

Ирмос: Нечестия органы иную песнь,/ благочестия же благовещаннии пояху гусли:/ благословите, дела Господня, Христа во веки.

Силою многою глаголы вечныя благовествовал еси, святителю: се, Господи, удаляющии себе от Тебе погибнут, людие же вернии исповедятся Тебе во веки.

Едем мысленный в узилище обрет, исповедниче славный, реку учений Божественных из него извел еси, да омоется лице земли Русския от нечестия во веки.

Написуя верным благочестивно разум Божественный, Святаго Духа трость явился еси, Емуже со Отцем и Сыном исповедаешися во веки.

Богородичен: Безсмертнаго Бога рождшая, течение смертное укротила еси, темже умертви, Чистая, страсти телесе моего, да Тя славлю во веки.

Песнь 9.

Ирмос: Благословен Господь, Бог Израилев,/ воздвигнувый рог спасения нам/ в дому Давидове, отрока Своего,/ в нихже посети нас Восток с высоты/ и направил ны есть на путь мира.

Узы твоя поминающия и любовию чтущия память твою, вечных и нерешимых уз избавити молися Христу, святителю Агафангеле, яко ходатай еси теплый о чадех Церкве Русския.

Дар молитвы терпением в скорбех стяжав, о умирении Церкве Русския по вся дни Бога умолял еси, отче Агафангеле. И ныне благословящия о тебе Господа помяни.

Единаго Бога возлюбив, священное служение исповеданием запечатлел еси и, яко клас зрелый земли Русския, в Небесных житницех упокоился еси, славне Агафангеле.

Богородичен: Тя верою поющия просвети, Всенепорочная, просвещением Сына Божия, из Твоея прошедшаго утробы, и тьмы нас несветимыя изми Твоим предстательством.

Светилен:

Представил еси себе жертву живу Богови, святу, благоугодну, в словеснем служении и исповедании, святителю Агафангеле, и тако просветися свет твой на Святей Руси, яко да славит выну о тебе Отца Небеснаго.

Слава, и ныне, Богородичен:

Свет от Света миру рождшая, Пречистая, светлости святых сподоби люди земли Русския, Тебе почитающия и молебное пение Тебе приносящия: не забуди нас, рабов Твоих, Едина Благословенная.

На хвалитех стихиры, глас 4:

Досточудне святителю Агафангеле,/ ты в годину гонений на Церковь Русскую/ столп Православия исповеданием Христа явился еси,/ узами и изгнанием, яко злато в горниле, искушаемь,/ в мире благочестне скончался еси/ и благоуханием святых мощей верныя возвеселил еси./ Ныне же с лики ангельскими Бога величаеши. (Дважды).

Егда безбожие плени землю Русскую,/ премножество силы Божия проповедал еси, Агафангеле всехвальне,/ гонимь, но не оставляемь,/ низлагаемь, но не погибаяй,/ в терпении мнозе, бдениих и пощениих,/ во благости, любви нелицемерной и словеси истины/ спасение Руси на камени веры Православныя возвещая.

По слову Господню врази твоя возлюбил еси,/ образ страждущим людем Русским являя,/ святителю Агафангеле,/ кленущия тя благословляше,/ ненавидящим тя добро творяше/ и о гонящих тя моляшеся,/ яко да всыновления сподобишися Отцу Небесному,/ егоже ныне во славе восхваляеши.

Слава, глас 8:

Святителю и исповедниче Христов Агафангеле,/ ты первее паству Ярославскую/ от омофора святителя Тихона приял еси/ и добре сию упасл еси./ Последи же, волю Первосвятителя исполняя,/ попечение о всей Церкви Русской подъял еси/ и тому во дни гонений безбожных спострадал еси./ Темже ныне купно с ним Престолу Божию предстоиши,/ моляся о душах наших.

И ныне, Богородичен:

Владычице, приими молитвы раб Твоих/ и избави нас/ от всякия нужды и печали.

Славословие великое и отпуст.

На Литургии

Блаженны от канона, песни 3-я и 6-я. Прокимен, глас 7: Изведи из темницы душу мою/ исповедатися имени Твоему. Стих: Гласом моим ко Господу воззвах. Апостол ко Евреем, зачало 334. Аллилуиа, глас 2: Праведнии исповедятся имени Твоему/ и вселятся правии с лицем Твоим. Стих: Господи, Господи, сило спасения моего, осенил еси над главою моею в день брани. Евангелие от Матфеа, зачало 38. Причастен: Пойте Господеви преподобнии Его и исповедайте память святыни Его.

Молитва

О, Богомудре святителю и исповедниче Христов Агафангеле, измлада возжелевый служити олтарю Господню! Ты, первее люди Сибирския и Прибалтийския в стране нашей архипастырским служением добре управив, последи Ярославстей пастве дарован был еси, во время же богоборческих гонений заветом первосвятителя Тихона попечение о Русской Церкви приял еси. Тогда, священное исповедание, яко забрало, восприим, уста богохульная дерзновенно заградил еси и безплотныя враги посрамил еси, чада церковная поучая предания святых отец соблюдати, единство святыя веры в союзе братскаго мира хранити и пастырем законным повиноватися. Темже, заточения, изгнание и многая лишения за имя Христово претерпев, блаженства изгнанных правды ради сподобился еси и ныне с ликом новомученик и исповедник Российских Престолу Пренебесному предстоиши. Темже моли Всеблагаго Бога, да сохранит Церковь Русскую от ересей, расколов, нестроений и гонений, да возродится земля наша святым покаянием и да прославят вернии людие ея единым сердцем и едиными усты Дивнаго во святых Своих Бога, Отца и Сына и Святаго Духа во веки веков. Аминь.

Источник: Текст службы утвержден на заседании Священного Синода 25 августа 2022 года (журнал № 78).

Ме́сяца ноября́ в 3-й день

Новому́чеников Бы́ковских: священному́чеников пресви́теров Иоа́нна Кесари́йскаго и Петра́ Косминко́ва, диа́кона Симео́на Кречко́ва и му́ченицы Евдоки́и Сафро́новой

На вели́цей вече́рни

Блаже́н муж: ^{@1-й антифо́н. На Г@}о́споди, воззва́х: стихи́ры на 8, глас 1:

Нача́ло ны́не положи́м, о бра́тие,/ моле́нию те́плому к но́вым уго́дником Бо́жиим:/ ти́и бо, страда́ньми очища́еми,/ ро́ждие плодоно́сныя лозы́ Христо́вы показа́шася/ и, сла́достию благода́ти оби́льно напая́еми,/ во благоуха́нии свя́тости нам яви́шася,/ я́ко да и мы по́двигу их поревну́ем// и принесе́м Бо́гу плод покая́ния.

Кро́тцы, но непоколеби́ми пребы́ли есте́,/ новому́ченицы Бы́ковстии,/ Иоа́нне, Пе́тре, Симео́не и Евдоки́е,/ гони́телями на смерть обрече́ннии;/ вам бо и жизнь есть Христо́с, и смерть приобре́тение./ Ны́не же, на Небесе́х пребыва́юще,/ нетле́нныя сла́вы наслажда́етеся и воспева́ете:// благослове́н еси́, Бо́же, во ве́ки.

Адама́нтово му́жество ва́ше/ сла́ва есть Це́ркве Ру́сския,/ страстоте́рпцы и испове́дницы но́вии,/ вы бо, гони́ми и убива́еми,/ непоколеби́ми и тве́рди пребы́сте в беда́х./ Кто изочте́т муче́ния ва́ша, ско́рби и боле́зни?/ Ве́лия бысть ко Го́споду любо́вь ва́ша// и во всем яви́сте себе́ я́ко дру́зи Христо́ви.

Глас 6:

Го́споди, а́ще не бы́хом святы́я Твоя́ име́ли моли́твенники/ и благосты́ню Твою́, ми́лующую нас,/ ка́ко возмогли́ бы́хом враго́м на́шим противуста́ти/ и оте́ц на́ших ве́ру сохрани́ти?/ Го́споди, Многоми́лостиве и Многоблагоутро́бне!/ Вонми́ моли́тве засту́пников на́ших Небе́сных,/ Иоа́нна, Петра́, Симео́на и Евдоки́и,/ и всех новому́ченик Це́ркве Ру́сския,/ непреста́нно вопию́щих к Тебе́:// утверди́, Бо́же, ве́ру правосла́вную во Оте́честве на́шем.

Отъя́т Госпо́дь поноше́ние от люде́й Свои́х,/ уста́ви гоне́ние, посрами́ безбо́жныя,/ дарова́ торжество́ Це́ркви Свое́й кровьми́ новому́чеников и испове́дников./ Те́мже, благодаря́ще Бо́га о ве́лиих благодея́ниих, на нас бы́вших,/ соверша́ем днесь па́мять святы́х уго́дников Бы́ковских// и мо́лимся о спасе́нии душ на́ших.

Сла́ва, глас 8:

Прехва́льнии священному́ченицы Иоа́нне, Пе́тре и Симео́не,/ ку́пно с му́ченицею Евдоки́ею,/ вы сквозе́ огнь и во́ду проидо́сте,/ сего́ ра́ди отверзо́шася вам две́ри ра́йския./ Я́ко ве́лие дерзнове́ние ко Пресвяте́й Тро́ице стяжа́вше,/ Христу́ за ны моли́теся// дарова́ти душа́м на́шим мир и ве́лию ми́лость.

И ны́не, Богоро́дичен: Царь Небе́сный:

Вход. Проки́мен дне и чте́ния три му́ченическая.

На лити́и стихи́ра хра́ма.

Сла́ва, святы́х, глас 8:

Ны́не Це́рковь Небе́сная ликовству́ет о мно́жестве чад свои́х,/ му́ченицех и испове́дницех земли́ Ру́сския,/ ти́и бо, муче́ния многообра́зная и смерть лю́тую за Христа́ прие́мше,/ внидо́ша в жизнь безконе́чную./ Сего́ ра́ди даде́ся им благода́ть моли́тися за ны// и возвеща́ти ми́лости Спа́са на́шего.

И ны́не, Богоро́дичен, глас то́йже:

Засту́пнице усе́рдная,/ Пресвята́я Влады́чице Богоро́дице,/ скорбя́щих при́сное ра́дование/ и Уте́шительнице призыва́ющих Тя в час испыта́ния!/ Услы́ши моли́твы раб Твои́х/ и со страстоте́рпцы святы́ми земли́ на́шея// моли́ спасти́ся нам.

На стихо́вне стихи́ры, глас 6:

Святи́и страстоте́рпцы,/ Иоа́нне, Пе́тре, Симео́не и Евдоки́е,/ мо́лим вас мы, недосто́йнии:/ при́зрите на храм Бо́жия Ма́тере, иде́же подвиза́стеся,/ утверди́те ны в ве́ре правосла́вней/ и вознеси́те моли́тву ко Пресвяте́й Тро́ице// о земно́м оте́честве ва́шем.

Стих: Честна́ пред Го́сподем// смерть преподо́бных Его́.

Священному́ченицы Бы́ковстии,/ вы в стра́шную годи́ну гоне́ний,/ мучи́телей безбо́жных суровства́ не убоя́вшеся,/ многоразли́чныя му́ки претерпе́ли есте́/ и зало́г, вруче́нный вам,/ цел и невреди́м сохрани́ли есте́,/ му́жески Спа́са пропове́давше./ Сего́ ра́ди, дерзнове́ние иму́ще ко Го́споду,// моли́теся о душа́х на́ших.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Моли́тву вознесо́сте ко Го́споду,/ Иоа́нне, Пе́тре и Симео́не,/ и Тому́ возвести́сте печа́ли своя́, глаго́люще:/ се ны́не ду́ши на́ша полага́ем за слове́сныя о́вцы./ Приими́, Го́споди, моли́твы му́ченик Твои́х,/ я́ко кади́ло пред Тобо́ю,/ да храни́т Русь Свята́я// ве́ру правосла́вную во ве́ки.

Сла́ва, и ны́не, Богоро́дичен, глас то́йже:

Богоро́дице, ве́рным Помо́щнице,/ помози́ и ны́не рабо́м Твои́м,/ в тя́жких обстоя́ниих су́щим./ К Тебе́ прибега́ем, Влады́чице,/ со святы́ми новому́ченики Це́ркве Ру́сския,// моли́ся спасти́ ду́ши на́ша.

На благослове́нии хле́бов тропа́рь, глас 6:

В годи́ну о́гненных искуше́ний Це́ркве Ру́сския,/ кро́тость и смире́ние стяжа́вше,/ любо́вь Христо́ву к па́стве свое́й яви́сте/ и, я́ко па́стыри до́брии,/ ду́ши своя́ за ню положи́сте./ Моли́теся о нас священному́ченицы Иоа́нне, Пе́тре и Симео́не,/ ку́пно с му́ченицею Евдоки́ею,// спасти́ и просвети́ти ду́ши на́ша.

На у́трени

По 1-м стихосло́вии седа́лен, глас 6:

Крест на ра́мо взе́мше/ и Христа́ всем се́рдцем возлюби́вше, му́ченицы достохва́льнии,/ Того́ стопа́м после́довали есте́/ и за́поведь Госпо́дню до конца́ испо́лнили есте́:/ я́ко бо́льши сея́ любве́ никто́же и́мать,/ да кто ду́шу свою́ положи́т за дру́ги своя́./ И вы ду́ши ва́ша положи́сте за Це́рковь Правосла́вную./ Ны́не же, я́ко иму́ще дерзнове́ние ко Христу́ Бо́гу,/ моли́теся о чту́щих па́мять ва́шу.

Сла́ва, и ны́не, Богоро́дичен:

Те́плое заступле́ние су́щим в беда́х/ и Помо́щницу на́шу,/ Е́юже безбо́жия избавля́емся,/ Богоро́дицу, ве́рнии, ублажа́ем.

По 2-м стихосло́вии седа́лен, глас 8:

Ра́дуйтеся, новому́ченицы блаже́ннии,/ я́ко ни скорбь, ни теснота́, ни гоне́ние,/ ни меч возмого́ша разлучи́ти вас от любве́ Христо́вы./ И ны́не приле́жно мо́лим вас мы, недосто́йнии:/ не забу́дите посеща́ти чад свои́х,/ соверша́ющих свяще́нную па́мять ва́шу.

Сла́ва, и ны́не, Богоро́дичен:

Безневе́стная, Чи́стая Богоро́дице Де́во,/ не лиши́ нас покро́ва Твоего́ и заступле́ния во дни искуше́ний и бед./ Мы же со святы́ми новому́ченики и засту́пники на́шими/ арха́нгельский глас прино́сим Ти:/ ра́дуйся, Обра́дованная, Госпо́дь с Тобо́ю.

Велича́ние:

Велича́ем вас,/ священному́ченицы Христо́ви Иоа́нне, Пе́тре, Симео́не и свята́я му́ченице Евдоки́е,/ и чтим честна́я страда́ния ва́ша,/ я́же за Христа́// претерпе́ли есте́.

Или́ сие́:

Велича́ем вас,/ святи́и му́ченицы Христо́ви Иоа́нне, Пе́тре, Симео́не и Евдоки́е,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам прибе́жище и си́ла:

По полиеле́и седа́лен, глас 1:

Проидо́сте сквозе́ огнь муче́ний и во́ду слез,/ и введе́ вы Госпо́дь в поко́й Свой,/ те́мже ны́не те́плии хода́таи к Бо́гу яви́стеся нам,/ лобыза́ющим по́двиг ваш, страстоте́рпцы Бы́ковстии./ Сла́ва Предуве́девшему произволе́ние ва́ше,/ сла́ва Предуста́вившему вас к сла́ве Небе́сней,/ сла́ва Подаю́щему нам моли́твами ва́шими ве́лию ми́лость.

Сла́ва, и ны́не, Богоро́дичен:

Ублажи́м Честне́йшую го́рних во́инств Де́ву Пречи́стую Богоро́дицу,/ Та бо две́ри Ца́рствия Небе́снаго отве́рзе/ и ны́не на путь спасе́ния наставля́ет нас гре́шных.

Степе́нна, 1-й антифо́н 4-го гла́са. Проки́мен, глас 4: Тебе́ ра́ди, Го́споди,// умерщвля́еми есмы́ весь день. Стих: Вмени́хомся, я́ко о́вцы заколе́ния. Ева́нгелие от Матфе́я, зача́ло 36.

По 50-м псалме́ стихи́ра, глас 6:

Любве́ Христо́вы и благода́ти Ду́ха Свята́го испо́лнени,/ душетле́нныя стра́сти победи́ли есте́,/ всеблаже́ннии страстоте́рпцы Бы́ковстии,/ и, гоне́ния от беззако́нников лю́тых претерпе́вше,/ преми́рных селе́ний дости́гли есте́/ и с ли́ки новому́чеников Це́ркве Ру́сския та́мо водвори́лися есте́.// Те́мже испроси́те душа́м на́шим мир и ве́лию ми́лость.

Кано́н святы́х на 8, глас 6.

Песнь 1.

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припе́в: Святи́и новому́ченицы Бы́ковстии, моли́те Бо́га о нас.

Го́споди Бо́же наш, помози́ нам смире́нно воспе́ти по́двиги новому́чеников Бы́ковских, пресви́теров Иоа́нна и Петра́, диа́кона Симео́на и Евдоки́и, и́же страда́нии свои́ми внидо́ша в Черто́г Твой Небе́сный.

Кий слове́сный дар принесе́м вам, до́блии страстоте́рпцы Бы́ковстии, ве́рнии свиде́телие Сло́ва? Недоумева́ем бо досто́йно воспе́ти вели́чие по́двигов ва́ших, дре́вних му́чеников подража́телие.

Мно́ги ско́рби пра́ведным, и от всех изба́вит я́ Госпо́дь, рече́ проро́к. Те́мже и вы, проше́дше сквозе́ огнь и во́ду, в ра́дость жи́зни ве́чныя внидо́сте и со все́ми святы́ми ны́не сла́ву Бо́жию воспева́ете.

Богоро́дичен: Во успе́нии Твое́м ми́ра не оста́вила еси́, Влады́чице, те́мже покрыва́еши при́сно лю́ди Твоя́ от вся́ких обстоя́ний и моли́твами Твои́ми избавля́еши от сме́рти ду́ши на́ша.

Песнь 3.

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Кровь ва́шу, я́ко спаси́тельное се́яние, земля́ Ру́сская прия́т и сла́ва по́двигов ва́ших преде́лы ея́ облиста́. Те́мже, благодаря́ще Го́спода, торжеству́ем па́мять ва́шу, му́ченицы Бы́ковстии.

Кто Бог ве́лий, я́ко Бог наш? Ты еси́ Бог, творя́й чудеса́, – си́це вопия́ху новому́ченицы Бы́ковстии, претерпева́юще мучи́тельства безбо́жных и ве́ру Христо́ву кровьми́ свои́ми утвержда́юще.

Служи́телие Бо́жия Ма́тере бы́сте, страстоте́рпцы Иоа́нне и Пе́тре, Симео́не и Евдоки́е. Те́мже, ве́лиею любо́вию к Ро́ждшемуся от Нея́ испо́лнившеся, не убоя́стеся ни мук, ни са́мыя сме́рти и венцы́ по́двигов свои́х прия́сте.

Богоро́дичен: Премилосе́рдая Ма́ти, Пречи́стая Де́во, ве́мы Тя ско́рую Уте́шительницу в напа́стех и ско́рбех, подаю́щую по́мощь рабо́м Твои́м.

Седа́лен, глас 4:

Тьму́ неве́рия сло́вом и́стины просвеща́юще,/ на брань духо́вную проти́ву отсту́пников и безбо́жников лю́тых дерзнове́нно подвиго́стеся,/ сла́внии па́стырие на́ши Иоа́нне и Пе́тре, с Симео́ном диа́коном./ Сего́ ра́ди, укрепля́юще нас му́жески испове́дати ве́ру правосла́вную,/ моли́теся о спасе́нии душ на́ших.

Сла́ва, и ны́не, Богоро́дичен:

Чудотво́рною ико́ною Твое́ю Влади́мирскою дре́вле Оте́чество на́ше укрепи́ла еси́, Пресвята́я Де́во,/ та́кожде и в годи́ну безбо́жных гоне́ний/ но́выя ратобо́рцы к подвиго́м му́ченическим утверди́ла еси́./ Те́мже с любо́вию и благодаре́нием ублажа́ем Тя, Пречи́стая.

Песнь 4.

Ирмо́с: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста, о Го́споде пра́зднующи.

Сла́вный священному́чениче Иоа́нне, прему́дрость кни́жную разуме́в, вы́сшее и соверше́ннейшее уче́ние Ева́нгельское пости́гл еси́, и ду́шу твою́ за о́вцы ста́да Христо́ва положи́л еси́.

Ди́вный священному́чениче Пе́тре, ты, науча́я люби́ти Христа́ всем се́рдцем, чад ма́лых и соверше́нных во́зрастом учи́тель был еси́, ты и кро́вию му́ченическою уче́ние запечатле́л еси́, те́мже па́стырь усе́рдный и страстоте́рпец пресла́вный яви́лся еси́.

Прехва́льный му́чениче Симео́не диа́коне! Возлюби́л еси́ нача́ло прему́дрости, страх Госпо́день, те́мже, во олтаре́ святе́м усе́рдно служа́, мно́гим благогове́нием Бо́гу угоди́л еси́. Ны́не пред лице́м Его́ пое́ши, ра́дуяся.

Богоро́дичен: Богоро́дице Де́во Пречи́стая, я́ко Госпожу́, Цари́цу и Влады́чицу пою́т Тя святи́и новому́ченицы Це́ркве Ру́сския. С ни́миже приими́ и на́ша моле́ния и спаси́ ду́ши на́ша.

Песнь 5.

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Оскверне́нная де́лы безбо́жными земля́ Ру́сская кропле́нием крове́й ва́ших па́ки освяща́ется, да позна́ют язы́цы, я́ко с на́ми Бог, и покоря́тся пра́вде Его́.

Вси лю́дие правосла́внии ско́рби испо́лнишася, егда́ безбо́жнии мучи́тели на Це́рковь Ру́сскую ополчи́шася. Вы же, я́ко во́ини кре́пцыи, беззако́нию их му́жественне противуста́сте и ве́ру правосла́вную до́бле утверди́сте.

Во мра́це безбо́жия заблу́ждшим яви́стеся огневи́днии свети́льницы, Иоа́нне, Пе́тре, Симео́не и Евдоки́е, новому́ченицы пресла́внии, указу́юще благоче́стия путь спаси́тельный.

Богоро́дичен: Пречи́стая Де́во Богома́ти, Наста́внице и́щущим спасе́ния, сподо́би и нас мы́слити, глаго́лати и де́яти то́чию пра́вая, после́дующе новому́чеником Це́ркве Ру́сския, я́ко испове́дником тве́рдым.

Песнь 6.

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Еде́ма сладча́йшаго насле́дницы показа́стеся, новому́ченицы Бы́ковстии, вы бо, ско́рбни бы́вше в ми́ре сем, на Небеси́ ны́не утеша́етеся; непра́вды же и гоне́ния претерпе́вше, жизнь ве́чную, я́ко воздая́ние пра́ведное, от Бо́га улучи́ли есте́.

Cвященному́ченицы Бы́ковстии Иоа́нне, Пе́тре, Симео́не с му́ченицею Евдоки́ею! Вы заточе́ния темни́чнаго и лю́тыя сме́рти не убоя́лися есте́, ны́не же в ри́зах све́тлых с чи́нми А́нгельскими Святе́й Тро́ице предстои́те и мо́литеся о душа́х на́ших.

О ра́тницы Христо́ви непобеди́мии, новому́ченицы Бы́ковстии! Вы опло́т Правосла́вия яви́стеся; огради́те убо и нас, немощны́х в ве́ре, по́двиг ваш кре́стный помина́ющих.

Богоро́дичен: Богоро́дице Де́во, упова́ние христиа́ном, покры́й, соблюди́, сохрани́ и спаси́ Русь Правосла́вную, к заступле́нию Твоему́ прибега́ющую.

Конда́к, глас 2:

О́браз есте́ чту́щим по́двиги ва́ша,/ но́вии страстоте́рпцы Бы́ковстии,/ испове́днически по́прище земно́е прете́кшии./ Вас бо ни скорбь, ни теснота́, ни смерть/ от любве́ Бо́жия разлучи́ти возмого́ша./ Те́мже, страда́ньми дерзнове́ние стяжа́вше,/ моли́теся Христу́, вас укрепи́вшему,// да и мы му́жества дар от Бо́га восприи́мем.

И́кос:

Прииди́те, правосла́внии лю́дие, пе́сньми ублажи́м но́выя свети́льники Це́ркве Ру́сския, Иоа́нна, Петра́, Симео́на и Евдоки́ю, те́плыя моли́твенники, усе́рдныя предста́тели, проти́ву безбо́жия тве́рдыя ору́жники, ду́ши своя́ за Христа́ положи́вшия и венце́в му́ченических сподо́бльшияся. К ни́мже с любо́вию припа́даем, зову́ще си́це: ра́дуйтеся, страстоте́рпцы Бы́ковстии, ве́ру правосла́вную по́двигом до́брым утверди́вшии.

Песнь 7.

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие, мучи́теля увеща́ вопи́ти:// благослове́н еси́, Бо́же оте́ц на́ших.

Го́споди Бо́же наш, при́зри на Це́рковь Ру́сскую, отврати́ гнев Твой, на ны дви́жимый, прости́ грехи́ и беззако́ния на́ша и поми́луй нас, предста́тельством святы́х сро́дников на́ших, непреста́нно за ны моля́щихся.

Го́споди, моли́твами новому́чеников Це́ркве Ру́сския отжени́ тьму от серде́ц на́ших сло́вом Твоея́ и́стины, не даждь сатане́ льсти́вому погуби́ти ду́ши на́ша, утверди́ нас в Правосла́вии и да́руй нам в благоче́стии пожи́ти вся дни живота́ на́шего.

Ди́внии уго́дницы Бо́жии, сла́внии му́ченицы Бы́ковстии, вы, не убоя́вшеся преще́ний безбо́жных, рекли́ есте́: не пощади́м естества́ тле́ннаго, изво́лим смерть, да венцы́ побе́дными увязе́мся от Христа́, Бо́га на́шего.

Богоро́дичен: Засту́пнице усе́рдная, Ма́ти Го́спода Вы́шняго, покры́й Це́рковь Ру́сскую держа́вным Твои́м покро́вом, христолюби́вым лю́дем на враги́ спобо́рствуй и належа́щих скорбе́й душе́вных и теле́сных свободи́, Ма́ти Де́во Пречи́стая.

Песнь 8.

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Убели́сте ри́зы ва́ша, до́блии новому́ченицы, кро́вию А́гнца Бо́жия, за челове́ки закла́ннаго. Его́же, о́троцы благослови́те, свяще́нницы, воспо́йте, лю́дие, превозноси́те во вся ве́ки.

Вои́стину дру́зи Христо́ви яви́стеся, новому́ченицы Бы́ковстии, плоть бо и мир возненави́девше, ве́тхаго челове́ка совлеко́стеся, во оде́жду же нетле́ния обле́кшеся, реко́сте: не ктому́ уже́ мы живе́м, но живе́т в нас Христо́с.

Рече́ Госпо́дь Свои́м ученико́м: не бо́йся, ма́лое ста́до, я́ко благоизво́ли Оте́ц ваш да́ти вам Ца́рство. Вы же, сло́ву сему́ после́дующе, черто́га Небе́снаго достиго́сте. Те́мже, сла́внии добропобе́дницы, помози́те и нам спасе́ние улучи́ти.

Богоро́дичен: Пресвята́я Влады́чице Богоро́дице, защити́ и спаси́ нас от ко́зней вра́жиих и многоразли́чных напа́стей, да́руй нам кре́пость в терпе́нии, на Тебе́ бо наде́емся и Тобо́ю хва́лимся.

Песнь 9.

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

На Пречи́стую Богоро́дицу все упова́ние возложи́вше, страстоте́рпцы Бы́ковстии, да́же до сме́рти пострада́ли есте́ и, то́кмо Еди́наго на Небесе́х Живу́щаго боя́щеся, Того́ со вся́ким дерзнове́нием испове́дали есте́.

Блаже́ннии страстоте́рпцы Бы́ковстии, приими́те сие́ смире́нное и убо́гое моле́ние на́ше, да, ве́рно почита́юще па́мять ва́шу, улучи́м от Го́спода и Влады́ки живота́ на́шего оставле́ние грехо́в и ве́лию ми́лость.

О богоизбра́ннии новому́ченицы Бы́ковстии, я́ко зве́зды, Не́бо церко́вное украси́вшии, моли́теся ко Го́споду о земне́м оте́честве ва́шем и о ве́рою и любо́вию вас почита́ющих.

Богоро́дичен: О Всепе́тая Ма́ти, а́ще и разори́ся от злых храм Твой Влади́мирский, иде́же новому́ченицы Бы́ковстии подвиза́шася, но ми́лостию Твое́ю благоволи́ла еси́ его́ во сла́ве обнови́ти. Те́мже, соше́дшеся днесь, благода́рственными пе́сньми Тя велича́ем.

Свети́лен, глас 1:

Све́том Христо́вым просвети́вшеся,/ святи́и новому́ченицы Бы́ковстии,/ во мра́це безбо́жия свети́льницы ве́рным яви́стеся,/ страда́ньми бо ва́шими и доны́не ве́ра правосла́вная пропове́дуется,/ наде́жда укрепля́ется, любо́вь умножа́ется/ и Це́рковь Ру́сская до́блестию ва́шею озаря́ется.

Сла́ва, и ны́не, Богоро́дичен, глас то́йже:

Прииди́те, восхва́лим Пречи́стую Ма́терь Бо́жию,/ Вы́шшую всех земноро́дных/ и Честне́йшую го́рних во́инств,/ Засту́пницу усе́рдную ро́да христиа́нскаго.

На хвали́тех стихи́ры на 4, глас 6:

Прииди́те, возра́дуемся, лю́дие,/ собра́вшеся в честне́м хра́ме Бо́жия Ма́тере,/ и воспое́м испове́дники Христо́вы,/ и́хже смерть но́вое рожде́ние бысть/ и страда́ние венце́в прия́тие./ Те́мже ку́пно со все́ю Це́рковию// страстоте́рпцы Бы́ковския прославля́ем.

Во́ини добропобе́днии/ и свети́льницы, ве́рою сия́ющии,/ безбо́жия обличи́телие/ и пре́лести разруши́телие,/ велегла́снии и́стины пропове́дницы,/ святи́и страстоте́рпцы Иоа́нне, Пе́тре, Симео́не и Евдоки́е,/ му́ченическою кро́вию в Ца́рствие Небе́сное возше́дшии,/ Христа́ Бо́га моли́те// спасти́ и просвети́ти ду́ши на́ша.

Водо́ю жи́зни ве́чныя напои́сте ве́рныя,/ страстоте́рпцы всесла́внии,/ жа́жду и́стины утоля́юще/ и огнь безбо́жных преще́ний угаша́юще,/ те́мже Боже́ственныя сла́вы прича́стницы яви́стеся/ и страда́ньми ва́шими Христу́ обручи́стеся./ Того́ приле́жно, му́ченицы, моли́те/ мир ми́рови дарова́ти// и душа́м на́шим ве́лию ми́лость.

Новому́ченицы и испове́дницы Христо́ви,/ со все́ми святы́ми земли́ Ру́сския Влады́це предстоя́ще, усе́рдно моли́теся,/ да от ересе́й и раско́лов Це́рковь Свою́ изба́вит,/ Оте́чество на́ше в Правосла́вии утверди́т/ и нас Ца́рствия Небе́снаго сподо́бит,// да всегда́ прославля́ем ва́ше ми́лостивное предста́тельство.

Сла́ва, глас 8:

Реко́ша испове́дницы ве́рнии отсту́пником и безбо́жником:/ всу́е тружда́етеся, не льсти́теся;/ не поги́бнет бо земля́ Ру́сская, Бо́гом возлю́бленная,/ но, кро́вию но́вых му́чеников напое́нная,/ па́ки просия́ет ве́рою и́стинною./ Ны́не сло́во сие́ испо́лнися,/ я́ко Бог просла́ви уго́дники Своя́// и посрами́ сопроти́вныя.

И ны́не, Богоро́дичен, глас то́йже:

Я́ко Госпожу́, Цари́цу и Влады́чицу на́шу,/ пое́м Тя со священному́ченики Бы́ковскими,/ в держа́вный Твой покро́в прибега́юще,/ и благода́рне зове́м Ти, спаса́емии:// ра́дуйся, Благода́тная, с Тобо́ю Госпо́дь.

Славосло́вие вели́кое, ектении́ и отпу́ст.

На Литурги́и

Блаже́нны от кано́на святы́х, пе́сни 3-я и 6-я. Проки́мен, глас 7: Тебе́ ра́ди, Го́споди,// умерщвля́еми есмы́ весь день. Стих: Вмени́хомся, я́ко о́вцы заколе́ния. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О святи́и священному́ченицы Бы́ковстии Иоа́нне, Пе́тре, Симео́не и му́ченице Евдоки́е, в годи́ну лю́тых гоне́ний за Христа́ пострада́вшии, ве́рность Ему́ да́же до сме́рти сохрани́вшии и вене́ц жи́зни от Него́ прие́мшии! Вы, во дни искуше́ния тя́жкаго, прише́дшаго на Це́рковь Ру́сскую от безбо́жных, муче́ния многоразли́чная и лю́тую смерть претерпе́вше, любо́вь ко Го́споду и о́браз непосты́днаго упова́ния на Него́ му́жественно яви́ли есте́. И ны́не, в раи́ сла́дости наслажда́ющеся, Престо́лу Бо́жию во сла́ве предстои́те и при́сно хвалу́ со А́нгелы и все́ми святы́ми Триеди́ному Бо́гу возно́сите. Сего́ ра́ди мы, недосто́йнии, мо́лим вас: умоли́те Го́спода сил, да утверди́т Це́рковь Ру́сскую непоколеби́му в многомяте́жнем ми́ре сем, да да́рует нам дух братолю́бия и ми́ра, и приведе́т нас, заблу́ждших, к покая́нию, да водворя́тся в душа́х на́ших любо́вь и благогове́ние, да испо́лнятся уста́ на́ша непреста́ннаго благодаре́ния Спаси́телю на́шему. Моли́твенным же предста́тельством ва́шим да возгори́тся в сердца́х на́ших ре́вность о сла́ве Бо́жией и о вся́ком де́лании пра́вды, да сподо́бимся при́сно с ва́ми прославля́ти Еди́наго во Святе́й Тро́ице и́стиннаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 14 мая 2018 года (журнал № 37)

Ме́сяца ноября́ в 5-й день

Святы́х оте́ц Поме́стнаго Собо́ра Це́ркве Ру́сския

На ма́лей вече́рни

На Го́споди, воззва́х: стихи́ры на 4, глас 4.

Подо́бен: Зва́нный свы́ше:

Прииди́те, ве́рнии,/ похвала́ми и пе́сньми увенча́им/ му́ченики и испове́дники,/ святи́тели и преподо́бныя,/ отцы́ единому́дренныя,/ пе́рвее на Собо́ре Це́ркве Ру́сския потруди́вшияся,/ по́слежде гоне́ния за ве́ру Христо́ву претерпе́вшия/ и Це́рковь Ру́сскую по́двиги свои́ми украси́вшия./ Прииди́те, воспои́м побо́рники ре́вностныя/ и заве́т их услы́шим:/ о ча́да, храни́те ве́ру правосла́вную,// в не́йже земли́ на́шея утвержде́ние.

Зва́ннии свы́ше/ возвести́ти во Оте́честве на́шем/ собо́рнаго ра́зума глас,/ наро́да Бо́жия избра́нницы,/ единоду́шнии страда́льцы ве́рнии,/ со́весть до́бру иму́щии/ и мир Христо́в в себе́ нося́щии,/ испове́дницы и му́ченицы,/ венцы́ нетле́нными увенча́ннии/ и Тро́ицу Единосу́щную просла́вившии./ Ю́же приле́жно моли́те// на по́двиг ве́ры укрепи́ти ду́ши на́ша.

Це́ркве Ру́сския печа́льницы/ и ве́ры Христо́вы ревни́телие показа́стеся,/ святи́и отцы́ на́ши,/ вы бо, Про́мыслу Бо́жию после́дующе,/ избра́нию Патриа́рха/ на престо́л Ру́сский поревнова́сте/ и Го́спода, я́ко Всеви́дца,/ та́йны серде́ц ве́дуща,/ еди́на от трие́х досто́йнейша/ жре́бием Бо́жиим указа́ти умоли́сте,/ те́мже и в Це́ркви благочи́ние возста́висте// благослове́нием собо́рным.

Свети́льницы церко́внии яви́стеся,/ избра́нницы Руси́ Святы́я,/ Свяще́ннаго Собо́ра ре́вностнии де́лателие,/ новому́ченицы и испове́дницы,/ во страда́ниих и гоне́ниих ве́ру Христо́ву до конца́ соблю́дшии,/ вы бо, Влади́миру священному́ченику подо́бящеся,/ в бу́рю мяте́жную убие́ни бы́сте,/ Вениами́ну крепча́йшему подража́юще,/ от власте́й безбо́жных осужде́ние прия́сте/ и, я́коже Петр местоблюсти́тель, темни́чная заключе́ния претерпе́сте,/ до́блим Кири́ллу и Агафа́нгелу после́дующе,/ во изгна́ниих томи́ми бы́сте/ и, я́коже све́тлый Иларио́н,/ во ста́не страда́ний пожи́сте/ и Бо́га тве́рдо испове́дасте.// Его́же моли́те о ве́рою соверша́ющих святу́ю па́мять ва́шу.

Сла́ва, глас 2:

Сою́зом любве́ Христо́вы соедине́ни/ и Ду́хом Святы́м во еди́но со́брани, святи́и,/ и́менем Патриа́рха Ти́хона украси́лися есте́./ В годи́ну же гоне́ний,/ заве́т его́ испо́лнивше,/ досто́йно пострада́ли есте́/ и, гони́ми бы́вше, я́ко ученицы́ Христо́вы,/ заключе́ние и убие́ние претерпе́ли есте́.// Тех моли́твами, Го́споди, спаси́ ду́ши на́ша.

И ны́не, Богоро́дичен.

На стихо́вне стихи́ры, глас 8:

О, кре́пости ва́шея,/ новому́ченицы и испове́дницы!/ Вы бо, в темни́цах и заточе́ниих томя́щеся/ и на смерть мучи́тельми ведо́мии,/ моли́твами святы́х земли́ Ру́сския/ сердца́ своя́ на ка́мени ве́ры утверди́сте/ и словесы́ Афана́сия гимнотво́рца ра́достне воспева́сте:// Русь Свята́я, храни́ ве́ру правосла́вную!

Стих: Восхва́лятся преподо́бнии во сла́ве// и возра́дуются на ло́жах свои́х.

О, тве́рдости ва́шея,/ новому́ченицы и испове́дницы!/ Вы бо, смире́нием и ре́вностию ра́ны раско́ла врачу́юще/ и му́дростию боле́знь разделе́ния исцеля́юще,/ страда́ньми единомы́слие в Це́ркви гони́мей яви́сте./ Те́мже мо́лим вас, христолю́бцы добропобе́днии:// помози́те нам глас и́стины при́сно разуме́ти.

Стих: Возноше́ния Бо́жия в горта́ни их,// и мечи́ обою́ду остры́ в рука́х их.

О, братолю́бия ва́шего,/ новому́ченицы и испове́дницы!/ Вы бо устрое́ния жития́ церко́внаго ра́ди/ Собо́р соста́вили есте́,/ по́слежде страда́ния и смерть вку́пе восприя́ли есте́,/ науча́юще нас житие́ благоче́стне провожда́ти,/ упова́ние на Го́спода возлага́ти// и сме́рти от безбо́жных не страши́тися.

Сла́ва, глас то́йже:

Па́стве Це́ркве Ру́сския святы́й Собо́р завеща́,/ никогда́же отрека́тися гони́мых за пра́вду Бо́жию,/ но имена́ их, я́ко би́сер многоце́нный,/ усе́рдне храни́ти поминове́ния ра́ди./ Мы же, очи́ма на ли́ки новому́чеников благогове́йне взира́юще,/ житию́ их да потщи́мся ре́вностне подража́ти,// во спасе́ние душ на́ших.

И ны́не, Богоро́дичен: Влады́чице, приими́:

Тропари́ пи́саны на вели́цей вече́рни.

На вели́цей вече́рни

На Го́споди, воззва́х: стихи́ры на 8, глас 1:

Да восхва́лим днесь свята́го Патриа́рха Ти́хона,/ на путь испове́дничества избра́ннаго,/ и́же с па́ствою Ру́сскою/ ча́шу страда́ния испи́ за ве́ру правосла́вную,/ и си́це воззове́м ему́:/ первосвяти́телю о́тче наш,/ прииди́ и осени́ ве́рныя лю́ди// благослове́нием Небе́сным.

Брань братоуби́йственная, глад и кро́вная сму́та/ жре́бий твой тя́жкий яви́ся,/ святи́телю Патриа́рше Ти́хоне!/ Ты же, в покая́нии путь спасе́ния всем указу́я,/ лю́дем, во озлобле́нии су́щим, взыва́л еси́:/ возлюби́те бли́жняго своего́,// обрати́теся ко Го́споду, и спасе́теся.

К па́стве твое́й взыва́л еси́,/ свя́те Ти́хоне Патриа́рше:/ сы́нове мои́ и дще́ри во Христе́,/ потщи́теся с про́поведию покая́ния,/ противуста́ните враго́м Це́ркве си́лою ве́ры на́шея,/ не убо́йтеся тя́жких страда́ний,/ па́мятующе словеса́ свята́го апо́стола:// кто ны разлучи́т от любве́ Бо́жия?

Страда́ния мно́гая претерпе́л еси́, о́тче Ти́хоне:/ оклевета́ния, суды́ и заточе́ния,/ преда́тельства лжебра́тии и угро́зы сме́ртныя,/ наси́льства и нападе́ния враго́в Це́ркве Христо́вы,/ но пребы́л еси́ му́жествен и кро́ток, веща́я:/ не ожесточа́йте серде́ц ва́ших,// но возмога́йте о Го́споде!

И́ны стихи́ры, глас 5:

Днесь, ве́рнии, восхва́лим святи́теля Влади́мира,/ и́же у стен ла́вры Ки́евския от рук беззако́нник смерть прия́т,/ о не́мже глас пла́ча отцы́ Собо́ра/ в первопресто́льнем гра́де вознесо́ша/ и всем, за ве́ру Христо́ву во дни гоне́ний пострада́вшим,/ па́мять церко́вную уста́виша,/ я́ко новому́чеником и испове́дником Це́ркве Ру́сския,// в и́хже чи́не и са́ми по́слежде просла́вишася.

Святе́йший Ти́хон во у́зах наме́стники себе́ поставля́ет,/ святи́тели изря́дныя Вениами́на и Агафа́нгела,/ пома́ле же пе́рвый на беззако́ннем суди́щи к сме́рти осужда́ется,/ други́й же, па́ству призва́вый,/ е́же глас волко́в, губя́щих ста́до, отве́ргнути,/ в преде́лы се́верныя а́бие изгоня́ется./ О́ба сия́ адама́нта тверде́йша,/ путь страда́ния за ве́ру Христо́ву в гоне́ниих нам показу́юща,// днесь све́тло в пе́снех прославля́ются.

Це́ркве Ру́сския ве́рнии послу́шницы да́же до сме́рти,/ Петр и Кири́лл священному́ченицы,/ святи́телем Ти́хоном блюсти́ престо́л Патриа́рший благословля́ются,/ оба́че еди́н изгна́ние и в темни́це пребыва́ние неисхо́дное прия́т,/ вторы́й же препровожде́н бысть от гони́телей в пусты́ню Туруха́нскую./ О́ба сия́, Ду́хом Святы́м укрепля́ема,/ еди́нства ра́ди Це́ркве Ру́сския// му́ченическаго венца́ сподо́бишася.

О святи́и отцы́, первому́ченицы Собо́ра Поме́стнаго Це́ркве Ру́сския,/ по́двига Андрони́ка и Гермоге́на подража́телие!/ О ры́барие богосло́вцы солове́цтии, Иларио́на сла́внаго сподви́жницы!/ О страда́льцы безчи́сленнии земли́ Зыря́нския, Нары́мския и Туруха́нския!/ О же́ртвы чи́стыя,/ в ро́вех Бу́товских и по всей земли́ Ру́сстей со архипа́стыри упоко́ившияся!/ Имена́ ва́ша на Небесе́х напи́сана суть// и в ли́це новому́ченик и испове́дник Це́ркве на́шея ны́не прославля́ются.

Сла́ва, глас 8:

Царь Небе́сный,/ Боже́ственное Сло́во и Прему́дрость си́це рече́:/ а́ще кто Мне слу́жит, Мне да после́дствует./ Те́мже и вы, святи́и отцы́ Свяще́ннаго Собо́ра,/ избра́ннии от люде́й церко́вных,/ я́ко в доброде́телех преизя́щнии,/ на земли́ во одея́ние нищеты́ Христо́вы обле́кшеся,/ темни́цы, у́зы и поноше́ния за Христа́ претерпе́ли есте́./ Ны́не же, на Небеси́ веселя́щеся,// моли́теся о чту́щих любо́вию па́мять ва́шу.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния новому́ченическая.

Дея́ний святы́х апо́стол чте́ние (глава́ 4):

В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́вльше Петра́ и Иоа́нна посреде́, вопроша́ху:/ ко́ею си́лою, или́ ко́им и́менем исцели́ста хрома́го?/ Петр, испо́лнився Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния./ Несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново, и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста./ Ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма, ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те? Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем./ Лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпуще́на же бы́вша, приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре, и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

К Тимофе́ю посла́ния свята́го апо́стола Па́вла чте́ние (глава́ 4):

Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и ца́рствии Его́:/ пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем уклоня́тся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.

К Евре́ем посла́ния свята́го апо́стола Па́вла чте́ние (глава́ 11):

Бра́тие,/ святи́и вси ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ льво́в,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и у́з и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лише́ни, скорбя́ще, озло́блени./ И́хже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.

На лити́и стихи́ра, глас 3:

Глас святы́я Це́ркве Правосла́вныя/ во дни разоре́ния Руси́ вопие́т, глаго́ля:/ прииди́те, ча́да ве́рная,/ приими́те да́ннаго вам от Бо́га предстоя́теля,/ прииди́те, послу́шайте отца́ ва́шего,/ прииди́те и ви́дите на всяк день умира́ющаго,/ прииди́те, словесе́м того́ после́дуйте/ и припади́те ко Христу́, из глубины́ души́ моля́щеся:/ сохрани́, Го́споди, на Руси́ ве́ру правосла́вную,/ моли́твами первосвяти́теля Ти́хона// и му́чеников и испове́дников Це́ркве на́шея.

Сла́ва, и ны́не, глас то́йже: Без се́мене от Боже́ственнаго Ду́ха:

На стихо́вне стихи́ры, глас 4:

Ве́ре в лю́дех оскуде́вшей,/ любви́ истощи́вшейся,/ наде́жди изся́кнувшей,/ попусти́ Госпо́дь/ мор жéсток, боле́знь и глад на лю́ди Оте́чества на́шего./ Ты же, святи́телю Ти́хоне,/ святы́ни Бо́жия от поруга́ния неве́рных защища́я,/ о стра́ждущих боле́зновал еси́/ и к милосе́рдию и же́ртве поси́льней/ от щедро́т свои́х для о́ных// па́ству Ру́сскую призыва́л еси́.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Боже́ственное смотре́ние о тебе́ испо́лнися, святи́телю Влади́мире,/ егда́ к па́стырскому де́ланию призва́ тя Госпо́дь,/ та́же и святи́тельством увенча́/ и ду́ши слове́сных ове́ц твоему́ попече́нию предаде́,/ да соблюде́ши я́ во еди́нем ста́де// Еди́наго Па́стыря Христа́ Бо́га на́шего.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Измла́да неле́ностно поуча́яся в зако́не Госпо́днем,/ чи́стою любо́вию к Бо́гу возгоре́лся еси́/ и му́ченическаго по́двига жела́нием уязви́лся еси́,/ священному́чениче Вениами́не,/ святи́телю сла́вный Це́ркве Ру́сския./ Егда́ же приведе́ тя Христо́с ко жре́бию о́ному,/ ничесо́же убоя́вся, благода́рне рекл еси́:// сла́ва Тебе́, Бо́гу на́шему, во ве́ки.

Сла́ва, глас 8:

Дру́зи мои́ есте́, рече́ Госпо́дь ученико́м Свои́м,/ а́ще за́поведи Моя́ соблюде́те./ Вы же, отцы́ Собо́ра Церко́внаго,/ в темни́цах и изгна́ниих нищете́ ева́нгельстей навы́кше/ и чистоту́ серде́чную и любо́вь нелицеме́рную стяжа́вше,/ за́поведи Христо́вы усе́рдне соблюдо́сте./ Сего́ ра́ди житие́ ва́ше,/ братолю́бия испо́лненное,/ дру́жество и́стинное нам явля́ет,// ему́же научи́ти нас усе́рдно мо́лим вы.

И ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ правосла́вия// ми́лости и чудеса́ излива́ти до ве́ка. Ами́нь.

Тропа́рь святы́м отце́м, глас 6:

Днесь благода́ть Свята́го Ду́ха нас собра́,/ просла́вити отцы́ Собо́ра Це́ркве Ру́сския/ с Первосвяти́телем Моско́вским Ти́хоном,/ и́же ве́рныя лю́ди земли́ на́шея/ на по́двиг испове́дания пра́выя ве́ры благослови́ша// и страда́нии свои́ми Це́рковь на́шу просла́виша.

Тропа́рь свято́му Патриа́рху Ти́хону, глас 1:

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́// и мир Бо́жий лю́дем испроси́.

Ин тропа́рь свято́му Патриа́рху Ти́хону, глас 3:

В годи́ну тя́жкую Бо́гом избра́нный/ в соверше́нней свя́тости и любви́ Бо́га просла́вил еси́,/ во смире́нии вели́чие, в простоте́ и кро́тости си́лу Бо́жию явля́я,/ положи́л еси́ ду́шу за Це́рковь, за лю́ди своя́,/ испове́дниче свя́те Патриа́рше Ти́хоне,/ моли́ Христа́ Бо́га,/ Ему́же сораспя́лся еси́,// и ны́не спасти́ зе́млю Ру́сскую и па́ству твою́.

На у́трени

По 1-м стихосло́вии седа́лен, глас 3.

Подо́бен: Красоте́ де́вства:

Красоту́ Правосла́вия возлюби́вше, отцы́ святи́и,/ зако́нов ра́ди оте́ческих подвиза́тися вожделе́ли есте́/ и, от коне́ц земли́ Ру́сския сте́кшеся,/ я́ко наро́да церко́внаго избра́нницы лу́чшии,/ дея́ния церко́вная учини́ли есте́./ Те́мже похвалу́ ны́не смире́нно вам прино́сим,/ свети́льники ве́ры имену́юще,/ и, дивя́щеся терпе́нию ва́шему во страда́ниих, взыва́ем си́це:/ ра́дуйтеся, дре́вних му́чеников ревни́телие и подража́телие.

Сла́ва, и ны́не, Богоро́дичен:

Милосе́рдому заступле́нию и мно́жеству чуде́с Твои́х/ страда́льцы, во у́зах су́щии, удиви́шася, Де́во Богоро́дице,/ посреде́ бо го́рьких бед покро́вом Твои́м храни́ми/ и благода́тию Твое́ю све́тло утеша́еми,/ моли́твами, я́же к Тебе́, укрепля́хуся./ Те́мже и глас а́нгельский приноша́ху Ти:/ ра́дуйся, Благода́тная.

По 2-м стихосло́вии седа́лен, глас 2.

Подо́бен: Благоутро́бия су́щи:

Благоутро́бия Бо́жия не разуме́вше,/ лю́дие Ру́сскии от Го́спода отступи́ша,/ ты же, святы́й Патриа́рше, призыва́л еси́ зако́ны Христо́вы храни́ти,/ в ни́хже и сам день и нощь усе́рдне подвиза́лся еси́./ Те́мже днесь соше́дшеся, си́це вопие́м:/ ра́дуйся, святи́телю Ти́хоне, ли́ка но́вых му́чеников нача́льниче.

Сла́ва, и ны́не, Богоро́дичен:

Гони́мых су́щи прибе́жище, Богоро́дице,/ Це́рковь Ру́сскую от бед огради́,/ на ча́да ея́, Тебе́ моля́щаяся, при́зри/ и дела́ на́ша, во сла́ву Бо́жию начина́емая, благослови́./ На Тя бо упова́юще, с наста́вники на́шими, новому́ченики и испове́дники, вопие́м Ти:/ ра́дуйся, Пречи́стая Де́во.

Велича́ние:

Велича́ем вас,/ святи́телю о́тче Ти́хоне/ и святи́и отцы́ Собо́ра Це́ркве Ру́сския,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Бог нам прибе́жище и си́ла.

Го́споди, воздви́гни си́лу Твою́ и прииди́, во е́же спасти́ нас.

Тебе́ ра́ди умерщвля́емся весь день, вмени́хомся я́ко о́вцы заколе́ния.

Кре́пость моя́ и пе́ние мое́ Госпо́дь, и бысть мне во спасе́ние.

По полиеле́и седа́лен, глас 8.

Подо́бен: Повеле́нное та́йно:

Повеле́нное в Ева́нгелии начерта́в в ра́зуме,/ в ри́зы свяще́нныя, я́ко любя́й Христа́, обле́клся еси́, святи́телю Ти́хоне;/ сказу́я па́стве сло́во утвержде́ния,/ учи́л еси́ Це́ркве ра́ди живота́ не щади́ти и да́же до сме́рти во и́стинней ве́ре стоя́ти,/ ю́же сло́вом моли́твенным и кре́стным по́двигом утверди́в,/ с новому́ченики на Небесе́х взыва́еши:/ Пресвята́я Тро́ице, Бо́же наш, сла́ва Тебе́.

Сла́ва и ны́не, Богоро́дичен:

Беззако́нное та́йно содева́юще истяза́ние,/ вину́ небы́вшую святы́м подпису́ют мучи́телие,/ но сокрове́нная вся я́ве зрит Госпо́дь,/ приклони́вый сни́тием к лю́дем Небеса́,/ и ве́чною сла́вою свиде́тели Своя́ одева́ет,/ Ма́тери Его́ Пречи́стей в ско́рбех вопию́щия:/ Засту́пнице на́ша и наде́ждо, ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По ^{@50-м псалме́ стихи́ра, глас 6:@}

Многострада́льнии Руси́ Святы́я моли́твенницы,/ мно́гия ду́ши заблу́ждшия ко Христу́ обрати́вшии,/ новому́ченицы, испове́дницы и пра́ведницы,/ Патриа́рха Ти́хона самови́дцы и послу́шницы,/ заве́том того́ ве́рно после́довавшии,/ лише́ния и ско́рби претерпе́вшии,/ моли́теся ны́не о чту́щих ве́рою и любо́вию// собо́рную па́мять ва́шу.

Кано́н, глас 6.

Песнь 1.

Ирмо́с: Жезло́м проро́ка разсече́ся/ дре́вле мо́ре Чермно́е,/ прехожде́ние волн разделя́я та́инственно/ в поги́бель во́инству мучи́телеву, ве́рным же во спасе́ние,/ песнь богокра́сную воспева́ющим:// сла́вно просла́вися Христо́с Бог наш.

Припе́в: Святи́и отцы́ на́ши, моли́те Бо́га о нас.

Мгло́ю безбо́жия помрачи́ся Русь Правосла́вная, отступи́ша бо мно́зи от ве́ры оте́ческия и отпадо́ша Небе́снаго Ца́рствия. Оба́че Госпо́дь украси́ Це́рковь на́шу, и́менем Патриа́рха Ти́хона нарица́емую, со́нмом му́чеников и испове́дников Свои́х.

Смотре́ние Бо́жие утаи́ся от люде́й, умо́м помраче́нных, ю́зником ца́рственным руга́ющихся; егда́ же слух убие́ния царе́ва ве́рных дости́же, Патриа́рх со отцы́ Свяще́ннаго Собо́ра моли́тву сотвори́ша, со дерзнове́нием злоде́йство облича́юще.

О святи́телю Влади́мире, пра́ведный и тве́рдый душе́ю, ве́рный сы́не Це́ркве Ру́сския! Убие́ние твое́ у стен оби́тели Киево-Пече́рския положи́ нача́ло поминове́ния собо́рнаго но́вых му́ченик. Ны́не же, Престо́лу Бо́жию предстоя́, моли́ся Го́сподеви спасти́ и просвети́ти ду́ши на́ша.

Святи́тель Пе́рмский Андрони́к да почти́тся, ве́ры Христо́вы свети́льник горя́й, самоде́ржцу отве́рженну сострада́лец ве́рный, па́ствы своея́ учи́тель усе́рдный, му́ченик, еще́ жив сый, в земли́ погребе́нный, и, я́ко зе́рно пшени́чное, плод стори́цею принесы́й.

Заключе́ние темни́чное Андрони́ково слы́шавше, мучениколю́бцы святи́тель Васи́лий Черни́говский, и Матфе́й, пе́рмских па́стырей воспита́тель, и Алекси́й, ве́ры Христо́вы побо́рник, повеле́ние собо́рное потща́шася испо́лнити об изъявле́нии убие́ния священному́ченика Пе́рмскаго. Последи́ же за ве́рность и любо́вь к собра́ту своему́ му́ченических венце́в сподо́бишася.

Святи́телю Христо́в Гермоге́не, гра́да Сара́това в ве́ре утвержде́ние, тобо́льския па́ствы му́дрый наста́вниче, безбо́жных преда́телей же и крамо́льников обличи́телю. Ты, ца́рственныя ю́зники кресто́м на страда́ния проро́чески благослови́в, сам смерть му́ченическую чрез утопле́ние прия́л еси́.

Варлаа́ме пречу́дне, и́ноков похвало́ и благочи́ния церко́внаго ревни́телю! Ты я́ко Афо́н други́й Бе́лую го́ру показа́л еси́, и преде́лы Ура́льския по́двиги твои́ми благода́тно освяти́л еси́. Му́ченический же вене́ц прие́м, ны́не моли́твами твои́ми оби́тель твою́ укрепля́еши.

Богоро́дичен: Я́ко апо́столов иногда́, успе́ние Твое́ чад Це́ркве Ру́сския собра́, Введе́ние же Твое́ богоизбра́ннаго Патриа́рха во храм Госпо́день введе́, от всех воспева́емая, Преблага́я Ма́ти Бо́га на́шего.

Песнь 3.

Ирмо́с: На тве́рдем ве́ры Твоея́ ка́мени/ помышле́ние утверди́в души́ моея́, утверди́, Го́споди:/ Тя бо и́мам, Бла́же,// прибе́жище и утвержде́ние.

Благоче́стие на Руси́ погуби́ти возжеле́вше, сло́ву гро́зному Патриа́рха гони́телие не внима́ху и но́вых му́ченик кровь пролива́ху, оба́че сия́ яви́ся Це́ркве Ру́сския утвержде́ние.

Да почти́м, ве́рнии, святи́теля Ти́хона, печа́льника гони́мых и па́ствы ру́сския утвержде́ние, и́же, власти́тели злы́я облича́я и поги́бель тем предрека́я, за стра́ждущих и во у́зах су́щих небоя́зненно предста́тельствует.

Тща́ние и благонра́вие твое́ в де́лех церко́вных уве́дев, священному́чениче сла́вне Лавре́нтие, архиере́я тя святи́тель Ти́хон поставля́ет, оба́че же без ми́лости гони́ма тебе́ ви́дя, судия́м непра́ведным возопи́: за ку́ю вину́ чи́стаго на смерть осуди́сте?

Христо́ви свиде́телие и пропове́дницы святи́телие Ефре́м со Никола́ем, му́ки прие́мше, ра́дуются ны́не на Небеси́, с ни́миже и ты́сящи ве́рных сликовству́ют, я́ко не убоя́шася заступи́ти отцы́ своя́ пред гони́тели.

Му́жество и кре́пость почти́м, бра́тие, святи́телей Митрофа́на Астраха́нскаго и Плато́на Ре́вельскаго, и́же лю́тых страда́ний не уклони́шася, но муче́ние и убие́ние му́жественно претерпе́ша.

Прича́стницы Страсте́й Христо́вых яви́стеся, святи́и Ти́хоне Воро́нежский и Сильве́стре О́мский, я́ко даде́ся вам благода́ть, не то́чию во Христа́ ве́ровати, но и по Нем страда́ти.

О священному́чениче Си́моне, благоле́пия дре́вняго ревни́телю, единове́рия дру́же и еди́нства Це́ркве Ру́сския побо́рниче! Дерзнове́нною твое́ю моли́твою, я́ко друг Христо́в, ра́ны церко́вныя уврачу́й.

Богоро́дичен: Братоуби́йство крова́вое слы́шавше, не́цыи, я́ко безу́мнии, реко́ша: несть Бог. Оба́че попече́нием Христа́ Жизнода́вца и моли́твами Ма́тере Его́ Пресвяты́я врата́ а́дова Це́рковь Ру́сскую не одоле́ша.

Седа́лен, глас 2:

Но́вии страстоте́рпцы Це́ркве Ру́сския,/ му́ченически по́прище земно́е сконча́вшии и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ да и мы, егда́ на́йдет на ны испыта́ния час,/ му́жества дар Бо́жий восприи́мем.

Сла́ва, и ны́не, Богоро́дичен, глас 4:

Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́,/ вопию́ще и глаго́люще:/ Пресвята́я Де́во, предвари́, и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.

Песнь 4.

Ирмо́с: Удиви́ся Твой ра́зум от Мене́,/ услы́шавшу пресла́вная вели́чия смотре́ния Твоего́,/ укрепи́ся же возлюбле́нием Твоего́ схожде́ния:// Ты бо моея́ нищеты́ не отве́рглся еси́.

О свя́те Патриа́рше наш Ти́хоне! Ка́ко досто́йно ублажи́м ве́рность тебе́ сохра́ньших, егда́ лжепа́стырие, гони́тельми науща́емии, я́ко власти́телие зако́ннии в Це́ркви, твоего́ отрече́ния иска́ху?

Гла́ду бы́вшу во Оте́честве на́шем, от братоуби́йства погиба́ющем, па́стыри увещава́л еси́, святи́телю Ти́хоне, Го́спода умоля́ти, да омы́ется земля́ Ру́сская слеза́ми покая́ния и Святы́ми Та́йнами да обнови́тся.

У́зы и суди́ще, заплева́ние и клеветы́, преда́тельство и суде́й лука́вых сме́ртное изрече́ние претерпе́в, о Це́ркви и па́стве боле́зновал еси́, святи́телю Петрогра́дский Вениами́не, му́ченики возлюби́вый изде́тска. С ни́миже ны́не Бо́га прославля́еши.

Мона́шество и свяще́нство в час испыта́ния Це́ркве Ру́сския прия́ти не убоя́вся, о́тче богому́дре Се́ргие, священному́ченика Вениами́на сподви́жник ве́рный яви́лся еси́. С ни́мже и осужде́ние непра́ведное и смерть му́ченическую претерпе́л еси́.

Похвало́ Солове́цкая, священному́чениче Иларио́не, Це́ркве Ру́сския свети́льниче, Патриа́рха Ти́хона ве́рный спобо́рниче, крамолы́ лжеобнови́телей ре́вностный обличи́телю, исцели́ и ны́не ра́ны церко́вныя.

Преподо́бне о́тче Алекси́е, наста́вников духо́вных насле́дниче, уче́ний святооте́ческих сокро́вищнице и мно́гих му́ченик воспита́телю! Не преста́й Зоси́мову пу́стынь храни́ти и мона́шество правосла́вное в по́двизех духо́вных утвержда́ти.

Не солга́ся проро́чество преподо́бнаго Амвро́сия, ста́рца оби́тели О́птинския: прее́мник бо его́ Исаа́кий разоре́ния тоя́ самови́дец быва́ет и, крест свой му́жественне прие́м, в годи́ну лю́тую сме́рти за Христа́ сподобля́ется.

Богоро́дичен: Кня́зю ми́ра, порабо́тити Це́рковь тща́щуся, да́же до уз и сме́рти противоста́ша отцы́ святи́и и все упова́ние свое́ по Бо́зе на Де́ву Пречи́стую возложи́ша.

Песнь 5.

Ирмо́с: Свет и мир Твой, Христе́,/ рабо́м Твои́м пода́ждь, Бла́же:/ Ты бо еси́ всех мир,/ и сою́з любве́, Человеколю́бче,/ Тя позна́вшим у́тро све́тлое,// и Влады́ку вои́стину, и Го́спода.

Собо́рное веле́ние исполня́я, святы́й Патриа́рх прее́мники себе́ указу́ет, в та́йне завеща́ние храня́ да́же до вре́мене преставле́ния своего́, и сим показу́ет лжесобо́ров бе́гати, созыва́емых веле́нием вла́сти безбо́жныя.

Умира́ние тя́жкое за Це́рковь Ру́сскую на всяк день претерпева́л еси́, Патриа́рше Ти́хоне, мно́гажды от безбо́жных искуша́емь, но чист от греха́ яви́лся еси́, па́ству от волко́в соблюды́й непоро́чно.

Пра́ведно и благоче́стно жити́е твое́ бысть, святи́телю Кири́лле. А́ще и во изгна́нии мно́гая ле́та пребы́л еси́, оба́че собра́тий твои́х утверди́л еси́ на ка́мени ве́ры Христо́вы, смерть же твоя́ в земли́ пусты́нней му́ченичество за ве́ру правосла́вную яви́ся.

Ле́стию и нече́стием тща́щимся премени́ти ве́ру святу́ю оте́ческую противуста́л еси́ небоя́зненно, свя́те Агафа́нгеле, сего́ ра́ди изгна́н был еси́, да уве́дят ве́рнии, я́ко вре́мя приспе́ за пра́вду Христо́ву страда́ти.

О кре́посте несокруши́мая, святи́телю о́тче Пе́тре! Страда́нием бо лю́тым Це́рковь Ру́сскую от раско́ла храни́л еси́, я́ко ве́рный до сме́рти Патриа́рха Ти́хона послу́шник, не вне́мля глаго́лом мучи́телевым зову́щим, е́же сни́ти со креста́.

О вели́кая оби́теле Солове́цкая, коли́ко новому́ченик в стена́х твои́х по́двиг понесо́ша и страда́ния прия́ша! От ни́хже святы́х отце́в Собо́ра ны́не восхва́лим: после́дняго настоя́теля Вениами́на, в пустынножи́тельстве от злоде́ев убие́ннаго, архиере́и Евге́ния и Васи́лия, еще́ же Михаи́ла пресви́тера и ины́я, и в богосло́вцех изря́дна, сим спострада́вша, му́ченика Иоа́нна.

Колькра́ты беззако́ннии иска́ху уби́ти тя, святи́телю Иоа́нне, чистоты́ Правосла́вия ревни́теля, раско́ла ху́льнаго пе́нзенскаго обличи́теля, земли́ Латви́йския те́плаго моли́твенника, в не́йже му́ченичества венце́м украси́лся еси́.

Богоро́дичен: Слу́жбу Бо́жию в ме́стех потае́нных и́же за ве́ру страда́льцы соверша́юще, о́браз Твой, на дщи́цах и ка́менех ма́лых пи́санный и на холсте́х истка́нный, о Богома́ти, я́ко зе́ницу о́ка храня́ху и благогове́йне Тя почита́ху.

Песнь 6.

Ирмо́с: Зве́рю бе́здны предае́тся/ проро́к Ио́на, глубине́ морско́й,/ прообразу́я Твое́, Сло́ве, тридне́вное воста́ние,/ тем и взыва́ше:/ из глубины́ преиспо́дния// возведи́ живот мой, Благоутро́бне.

В ле́то три́десять седьмо́е ве́ка го́рькаго ве́лие губи́тельство на Руси́ бысть, и о́ви лю́дие наси́льством умро́ша, о́ви же в го́рьких рабо́тах погибо́ша. Те́мже, ве́рнии, моли́твенно просла́вим та́ко уму́ченныя сподви́жники святи́теля Ти́хона Патриа́рха.

Дре́вле в ко́емждо гра́де Руси́ едва́ еди́н мучи́тель обрета́шеся. Ка́ко же в ле́та гоне́ния безбо́жнаго толи́ка тьма душегу́бцев во́льных воста́? Ка́ко сы́нове а́довы сме́рти преда́ти святы́я во́ины Христо́вы не устраши́шася?

В земли́ Зыря́нстей, во гра́де скорбе́й зе́льных, го́рьких рабо́т, гла́да и уничиже́ния, мно́гия му́ки претерпе́л еси́, священному́чениче Анато́лие, архиере́ю Оде́сский, о ни́хже по́слежде самови́дцы с пла́чем пове́даша, ве́рность твою́ Ева́нгелию свиде́тельствующе.

Сама́рския преде́лы, в ни́хже до́бльственно потруди́лся еси́, ны́не с на́ми сла́вят мно́гая страда́ния твоя́, архипа́стырю Алекса́ндре, засту́пниче и прибе́жище гони́мых, я́ко Христа́ ра́ди и смерть прия́л еси́ за дру́ги своя́.

Житие́м и словесы́ Христа́ пропове́дал еси́, Серафи́ме священному́чениче преди́вный, в преде́лех Хо́лмских, Орло́вских и Смоле́нских му́дростию и любо́вию па́ству уча́ и от собла́зн огражда́я. Те́мже вене́ц тебе́ терно́вен исплете́ся.

Градо́в Росси́и Вели́кия и Ма́лыя пропове́дницы, Патриа́рха же Ти́хона сы́нове ве́рнии, святи́телие Никоди́м и Проко́пий досто́йно да почту́тся, и́же по́двиг служе́ния архиере́йскаго, сугу́бейший по́двига, всем ве́рным о́бщаго, му́ченичеством увенча́ша, я́ко богому́дрии.

Священноиспове́дника пресви́тера Василия почти́м, во изгна́нии в преде́лех Арха́нгельских живо́т сконча́вша, свяще́нники же Госпо́дни просла́вим, Илию́, сострада́льца Фадде́ю, Тверско́му архипа́стырю, Константи́на же, Во́логды моли́твенника, убие́нныя в годи́ну, крове́й испо́лнену.

Богоро́дичен: Законопресту́пен и сме́рти пови́нен, реко́ша на Сы́на Твоего́ челове́цы нечести́вии, Ему́же сострада́ла еси́, Богороди́тельнице Пречи́стая, та́кожде и оклевета́нныя служи́тели Его́, я́ко Ма́ти Благоутро́бная, утеша́ла еси́.

Конда́к, глас 3:

Гоне́ния и страда́ния да́же до сме́рти претерпева́юще/ и правосла́внаго ца́рства Ру́сскаго разоре́ние облича́юще,/ отцы́ Собо́ра Це́ркве на́шея/ к покая́нию ча́да ве́рная призыва́ют// и стоя́ти тве́рдо за ве́ру Христо́ву благословля́ют.

Ин конда́к, свято́му Патриа́рху Ти́хону, глас 5:

Служе́ние твое́ испо́лнено сто́на и го́ря,/ священному́чениче Ти́хоне, Патриа́рше наш,/ но был еси́ пра́вило ве́ры и о́браз кро́тости,/ побежда́я ра́спри и разделе́ния;/ си́лою смире́ния и любве́ Христо́вы противоста́л еси́ зло́бе сатани́нстей,/ возгла́вил еси́ до́брое во́инство но́вых му́чеников,// Це́рковь Ру́сскую утверди́вших во ве́ки.

И́кос:

Хотя́й Госпо́дь ве́рныя подви́гнути к прославле́нию по́двига святы́х новому́чеников и испове́дников Це́ркве Ру́сския, дом Бо́жий, святи́телем Влади́миром созда́нный и от безбо́жных в годи́ну лю́тых гоне́ний пору́ганный, благоле́пно па́ки возставля́ет, подвиза́я в нем ико́ну святы́х отце́в Свяще́ннаго Собо́ра изобрази́ти, я́ко да ли́ки их ви́дяще, поуча́ются в по́вестех дея́ний сла́вных и страда́ний безме́рных всех, свято́му Патриа́рху Ти́хону после́дующих и и́менем того́ в годи́ну гоне́ний нарица́емых. И́хже по́двигом мир в Це́ркви на́шей утверди́ся.

Песнь 7.

Ирмо́с: О́троцы в Вавило́не дре́вле/ во огни́ не опали́шася,/ на му́ки бо дерзну́вше за ве́ру оте́ческую,/ в о́ней непоколе́блеми пребы́ша,/ и зре́ти Го́спода и пе́ти Тому́ сподо́бишася:// Изба́вителю Бо́же, благослове́н еси́.

На ме́сте, иде́же ны́не храм новому́чеников Бу́товских устро́ися, три́десять ты́сящ ю́зник в ле́та зла́я убие́ни бы́ша, и́же, на смерть за Христа́ ведо́ми, ве́рою взыва́ху: Бо́же, благослове́н еси́.

Списа́теля жития́ Саро́вскаго чудотво́рца священному́ченика Серафи́ма днесь восхва́лим, и́же, в боле́зни сый и ста́рости масти́тей, вскрай ро́ва Бу́товскаго мучи́тели приво́дится и убие́ние неви́нно прие́млет, воспева́я: Изба́вителю Бо́же, благослове́н еси́.

Ве́рность храня́ святи́телю Петру́, в скита́нии нево́льнем су́щему, страда́ния мно́гая претерпе́л еси́, архипа́стырю гра́да Влади́мира, свя́те Нико́лае, те́мже и виде́ние ли́ка твоего́ ве́рным бысть утвержде́ние. Ты же, смерть за Христа́ до́блественне прия́ти угото́вився, взыва́л еси́: Бо́же, благослове́н еси́.

Днесь почти́тся и пресви́тер Се́ргий, слу́жбы Бо́жия усе́рдный рачи́тель, на путь свяще́нства Патриа́рхом Ти́хоном благословле́нный, и́же, красото́ю слове́с церко́вных окриля́емь, посреде́ гоне́ния лю́таго до́бре ше́ствова и, му́ченичества дости́гнув, благода́рственно Христу́ воззва́: Изба́вителю Бо́же, благослове́н еси́.

В прему́дрости кни́жней ум изостри́в, некни́жному ученику́ Петру́, верхо́вному апо́столу, подража́ти потща́лся еси́, Иоа́нне, служи́телю престо́ла Бо́жия, глас же ева́нгельский, е́же отве́ргнутися себе́ и взя́ти крест свой, услы́шав, со дерзнове́нием на по́двиг му́ченический устреми́лся еси́, зовы́й: Христе́, Спа́се ми́ра, благослове́н еси́.

Се́ргия преподо́бнаго от ю́ности послу́шник изря́ден был еси́, а́вво Крони́де богому́дре! Ты бо, попече́ние усе́рдное о оби́тели Тро́ицтей, я́ко игу́мен, явля́я, о и́ноцех ея́ во благоде́нствии и злоде́нствии ру́це моли́твенно воздвиза́л еси́, с ни́миже ны́не во Ца́рствии Бо́жии взыва́еши: О́тче, Сы́не и Святы́й Ду́ше, благослове́н еси́.

Во Аме́рице да́льней и в первопресто́льнем гра́де Москве́ святи́телю Ти́хону помо́щника ве́рнаго, Алекса́ндра пресви́тера почти́м, близ гро́ба патриа́ршаго к му́ченичестей кончи́не при́званнаго, свинце́м устреле́ннаго и огне́м сожже́ннаго, ны́не же пою́щаго: Бо́же, благослове́н еси́.

Богородичен: О Ма́ти Бо́жия, Преми́лостивая! Кто бы возмо́гл есть из люде́й ве́рных у́зы, бие́ния, уничиже́ния и лю́тую смерть претерпе́ти, а́ще бы не Ты предстоя́ла еси́ стра́ждущим, ско́рби и страда́ния му́ченическая утоля́ющи и науча́ющи пе́ти: Спаси́телю, Христе́ Бо́же, благослове́н еси́.

Песнь 8.

Ирмо́с: Преподо́бнии Твои́ о́троцы/ в пещи́ Херуви́мы подража́ху,/ Трисвяту́ю песнь воспева́юще:/ благослови́те, по́йте// и превозноси́те во вся ве́ки.

Ве́лия страда́ния претерпе́ли есте́, Оте́чества на́шего церко́внии избра́нницы, вы бо вои́стину яви́лися есте́ я́ко соль земли́ Ру́сския и утвержде́ние ве́ры правосла́вныя в ней во ве́ки.

Се́рдце твое́, о Русь Свята́я, про́йде ору́жие во́ев герма́нских, твоя́ преде́лы плени́ти восхоте́вших, оба́че сы́нове твои́, жизнь за тебе́ положи́вшии, вку́пе со страда́льцы, во у́зах уму́ченными, Христу́ песнь но́ву воспева́ют во ве́ки.

Исчи́слил еси́ дни страда́ний и сострада́льцев имена́, суды́ Бо́жия благослови́в, святи́телю Афана́сие, зане́, во у́зах сый, святы́х ру́сских иску́сный песносло́вец яви́лся еси́, о новому́ченицех же почи́вших моли́твенник усе́рдный, с ни́ми Бо́га сла́виши во вся ве́ки.

Юне́йший от отце́в Собо́ра Це́ркве Ру́сския в пещи́ гоне́ний искуша́емь быва́ет и я́ко исто́чник богому́дрых уче́ний в земли́ Влади́мирстей явля́ется, священноиспове́дник Великодво́рский Петр, любве́ Христо́вы испо́лненный, я́же не изся́кнет во ве́ки.

Вся по и́мени помяну́вше отцы́ святы́я, в ли́це новому́ченик просла́вленныя, и о про́чих моли́твы вознесе́м ко Го́споду, и́хже жития́ и по́двизи безве́стни суть, да ми́лость улуча́т от Бо́га, созда́вшаго ве́ки.

Мо́щи твоя́ огне́м откры́шася, святи́телю о́тче Ти́хоне, Патриа́рше святы́й, оба́че обря́щем ли мо́щи мно́гих сподви́жник твои́х, в ме́стех безве́стных и непрохо́дных погребе́нных, и́хже па́мять нетле́нна во ве́ки?

Богоро́дичен: И́мже пе́ние надгро́бное никто́же принесе́, Сама́ предста́ла еси́, Чи́стая, с ли́ки а́нгельскими; и́мже беззако́нное мучи́тельство безве́стну кончи́ну угото́ва, Сама́ отве́рзла еси́, Препе́тая, ра́йския вхо́ды, да ца́рствуют со Христо́м во ве́ки.

Песнь 9.

Ирмо́с: Сло́вом Сло́во Еди́на Ро́ждшая,/ ерети́ческая уста́ загради́ злоре́чивая./ И́но но́во не́бо, некра́домый рай, Пречи́стая,// Тя велича́ем.

В па́мять святи́теля Ти́хона Патриа́рха соше́дшеся, ве́рнии, и вся сподви́жники его́, и́же от Собо́ра святы́х отце́в, помяну́вше, на ме́сте, иде́же ти́и бя́ху со́брани, Христа́ велича́ем.

Ерети́ческая злоре́чивая уста́ загради́вшии, святи́и отцы́ новому́ченицы, Собо́ров вселе́нских догма́ты в сердца́х ва́ших сохрани́ли есте́, те́мже вас велича́ем.

Святы́я Руси́ собо́ри преста́ша иногда́, с патриа́ршеством упраздни́вшеся вку́пе, но глас собо́рный, я́ко крин, посреде́ ка́мене прозя́бший, в годи́ну бе́дствия возвести́ся.

Уста́ми проро́к, Го́споди, Изра́иля наставля́я, лю́дем, проро́ки изби́вшим, царя́ поставля́еши; лю́дем же, правосла́внаго царя́ отве́ргшим, гоне́ния посыла́еши, да во́ли Твоея́ позна́ние покая́нием обря́щут.

Це́ркве уста́вы собо́рне определи́вше, по́слежде же сию́ гони́му ви́девше, судьба́м Бо́жиим непостижи́мым удиви́стеся, о святи́и отцы́ новому́ченицы, по́двиги свои́ми Христа́ возвели́чившии.

Нарекли́ есте́ прозорли́во, святи́и отцы́, страда́льцы за ве́ру Христо́ву новому́ченики и испове́дники Це́ркве Ру́сския и па́мять ежеле́тную сим уста́вили есте́. Ны́не же с ни́ми вку́пе велича́етеся.

О́тче, Сы́не и Ду́ше Всесвяты́й, при́зри с Небесе́ на Це́рковь Ру́сскую, в пра́вой ве́ре сию́ соблюди́, да и мы, ча́да ея́, вои́стину Тя велича́ем.

Богоро́дичен: Догма́ты храни́ти и за́поведи Христо́вы с любо́вию твори́ти наста́ви нас, Богоневе́сто Влады́чице, да и мы, ве́ру непоро́чно соблю́дше, в Ца́рствие Бо́жие вход улучи́ти возмо́жем.

Свети́лен:

Свет Отца́, и Сы́на, и Ду́ха Свята́го/ всели́ся в ду́шы ва́ша, о святи́и отцы́ Свяще́ннаго собо́ра, новому́ченицы и испове́дницы,/ сего́ ра́ди па́мять ва́шу со святи́телем Патриа́рхом Ти́хоном вку́пе прославля́ем.

Сла́ва, и ны́не, Богоро́дичен:

Свет Христо́в яви́ся всем Тобо́ю, Ма́ти Де́во,/ всели́ся бо во утро́бу Твою́ Сло́во па́че сло́ва,/ сего́ ра́ди род наш пе́сньми немо́лчными Тя велича́ет.

На хвали́тех стихи́ры, глас 5.

Подо́бен: Ра́дуйся:

Ра́дуйся, святи́телю о́тче наш Ти́хоне,/ па́че жи́зни па́ству твою́ возлюби́вый/ и ду́шу твою́ за ча́да церко́вная положи́вый,/ к нимже со ско́рбию тя́жкою взыва́л еси́:/ се́рдце мое́ гори́т жа́лостию до сме́рти:/ очи́ститеся, бра́тие, от грехо́в свои́х,/ и бу́дем вку́пе моли́ти Го́спода:// О́тче наш, оста́ви нам до́лги на́ша.

Ра́дуйся, святы́й Патриа́рше наш Ти́хоне,/ ты бо, Це́рковь Ру́сскую на по́двиг Христо́в укрепля́я/ и но́вое во́инство Христо́во cобира́я,/ ве́рою, любо́вию и кро́тостию/ зло́бу вра́жию побежда́ти науча́л еси́/ и во смире́нии си́лу Бо́жию стяжа́ти наставля́л еси́./ Бу́ди и нам ны́не воево́да взбра́нный,/ мо́лим тя, па́стырю наш до́брый,// и не оста́ви чад Твои́х во ве́ки.

Глас и подо́бен то́йже.

[Творе́ние святи́теля Афана́сия Ковро́вскаго:]

Прииди́те, Небе́снии предста́телие на́ши, к нам,/ ва́шего тре́бующим ми́лостивнаго посеще́ния,/ и изба́вите ны, озло́бленныя мучи́тельскими преще́нии,/ лю́таго неи́стовства безбо́жных,/ от ни́хже я́ко пле́нницы и на́зи гони́ми есмы́,/ от ме́ста на ме́сто ча́сто преходя́ще,/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю,/ и угаси́те е́же на ны негодова́ние,/ Бо́га моля́ще,// подаю́щаго ва́ми земли́ на́шей ве́лию ми́лость.

И́ны стихи́ры, глас 4.

Подо́бен: Дал еси́ зна́мение:

В па́мять святы́х отце́в соше́дшеся,/ на ме́сте, иде́же ти́и бя́ху со́брани/ в годи́ну испыта́ний земли́ Ру́сския,/ воспои́м Христо́вых во́инов полк,/ бра́тство же свято́е,/ строи́телей де́ла церко́внаго,/ страда́льцев за ве́ру лик Небе́сный,/ и сим наста́вником на́шим да подража́ем,// ду́хом и и́стиною их почита́юще.

О, неизрече́ннаго Твоего́ смотре́ния, Христе́!/ Ка́ко жи́зни церко́вныя устрои́телие/ плач Иереми́ин восприе́млют,/ хра́мы зря́ще разруша́емы?/ Ка́ко святи́телие и иере́и/ от престо́лов Бо́жиих во узи́лища отсыла́ются/ и та́мо, я́коже на река́х Вавило́нских,/ о служе́нии сле́зы пролива́ют?/ О, неизсле́димых суде́б Твои́х, Христе́,// и́миже спасе́ние душ на́ших содева́еши!

Взыгра́йте, лю́дие,/ в день па́мяти Христо́вых страда́льцев,/ и́хже ра́ди ве́ра не поги́бе,/ но па́ки процвете́ в земли́ на́шей./ Те́мже и мы, в дом Бо́жий соше́дшеся,/ с любо́вию возопии́м:/ моли́теся о нас,/ отцы́ святи́и,// да проба́вит Госпо́дь нам ми́лость Свою́.

Сла́ва, глас 1:

О святи́и отцы́, мно́гих церко́вных дел устрои́телие,/ вы, главу́ правосла́вных явля́юще,/ патриа́ршество возста́висте,/ пра́здник Ру́сских святы́х ра́достне возобнови́сте,/ но́вых му́чеников па́мять учини́сте,/ па́стве Це́ркве Ру́сския путь по́двига испове́днаго указа́сте/ и на защище́ние святы́нь церко́вных и па́стырей гони́мых вся призва́сте,/ по́слежде же и са́ми крест му́ченичества прия́сте./ Те́мже к вам усе́рдно взыва́ем:// сподо́бите нас любве́ и ве́ры ва́шея насле́дники бы́ти.

И ны́не, глас то́йже:

Це́ркве Христо́вы Храни́тельнице,/ Ма́ти Бо́жия Пречи́стая,/ сохрани́ в чистоте́ ве́ру на́шу,/ моли́твы бо святы́х отце́в на́ших Тебе́ предлага́ем,/ зане́ ве́рная ча́да Твоя́ суть,// я́ко за́поведи Сы́на Твоего́ непоро́чне соблюдо́ша.

На Литурги́и

Блаже́нна от кано́на святы́х оте́ц, Песнь 3.-я и 6-я. Проки́мен, глас 7: Бог нам прибе́жище// и си́ла. Стих: Помо́щник в ско́рбех, обре́тших ны зело́. Апо́стол к Ри́мляном, зача́ло 99 (гл. 8, ст. 31–39). Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́ зача́ло 105–106 (гл. 21, ст. 8–19). Коне́ц: В терпе́нии ва́шем стяжи́те душа́ ва́ша. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва святи́телю Ти́хону, Патриа́рху Всеросси́йскому, испове́днику

О па́стырю до́брый, святи́телю о́тче наш Ти́хоне, Патриа́рше Це́ркве Ру́сския! Ты мно́гия труды́ в жи́зни вре́менней подъя́л еси́. Простота́ и любы́ твоя́, дух ми́рен и кро́ток, та́же и сло́во, благода́ти испо́лненное, по се́рдцу бы́ша лю́дем земли́ на́шея, и́же и предложи́ша тя Бо́гу на по́двиг вели́кий и многотру́дный. Егда́ же богобо́рцы и хули́телие воздвиго́ша на Це́рковь Христо́ву гоне́ние, ему́же не бе ра́внаго от ве́ка, Сам Госпо́дь Вседержи́тель избра́ и соде́ла тя Патриа́рха. Ты же, святи́телю, сраспина́яся Христу́ и Це́ркви Его́, со ско́рбию лю́ди к покая́нию призыва́л еси́. И кто изочте́т страда́ния твоя́? Заточе́ние бо темни́чное, клеветы́ и суды́ гони́телей со смире́нием претерпева́я, враго́м Христо́вым моли́твою сле́зною и кро́ткою противуста́л еси́ и архиере́и, пресви́теры, мона́хи и мирски́я на по́двиг му́ченический благослови́л еси́. Те́мже мо́лим тя, святи́телю Христо́в, бу́ди нам дерзнове́нный засту́пник и не оста́ви ны, немощна́я ча́да твоя́. Испроси́ у Го́спода нам грехо́в проще́ние, ве́ры утвержде́ние, скорбе́й осла́бу, по́мыслов чистоту́, да, в покая́нии и моли́тве пребыва́юще, украси́м себе́ целому́дрием, любо́вию и смире́нием, и та́ко Ца́рствия Небе́снаго дости́гнем, иде́же с тобо́ю сподо́бимся прославля́ти Святу́ю Тро́ицу, Отца́, и Сы́на, и Свята́го Ду́ха. Ами́нь.

И́на моли́тва, святы́м отце́м, на Собо́ре Це́ркве Ру́сския потруди́вшимся

О святи́и уго́дницы Бо́жии, со́нма но́вых му́чеников и испове́дников Це́ркве Ру́сския прича́стницы, на Собо́ре Це́ркве Ру́сския в годи́ну ско́рби до́бре потруди́вшиися и му́жески за ве́ру Христо́ву в ле́та гоне́ния лю́таго пострада́вшии! Помина́юще труды́ на ни́ве Бо́жией, ва́ми подъя́тыя, и по́двиги во страда́нии за ве́ру сверше́нныя, славосло́вим доброде́тели ва́ша, воспева́ем братолю́бие, прославля́ем любо́вь ко Спаси́телю Христу́ и Це́ркви Его́ Святе́й, и, я́ко ча́да ва́ша по ду́ху, мо́лим: научи́те нас ра́зум ева́нгельский приле́жне стяжа́ти, на вся́кое де́ло благо́е потре́бен, помози́те во испыта́ниих кре́пость ве́ры име́ти, сподо́бите нас насле́дники по́двига ва́шего бы́ти, да неосужде́нно Ца́рствия Бо́жия дости́гнем, иде́же ку́пно с ва́ми просла́вим Тро́ицу Единосу́щную во ве́ки веко́в. Ами́нь.

Стихи́ры, пое́мыя по обы́чаю в 5-й день ноября́ в домо́вом хра́ме святы́х отце́в Поме́стнаго Собо́ра в Моско́встем епархиа́льнем до́ме

На Го́споди, воззва́х: стихи́ры, глас 1:

Избра́нный на путь кре́стный и испове́дный,/ святы́й Патриа́рх да восхва́лится днесь,/ и́же с па́ствою свое́ю ча́шу му́ченичества испи́ за ве́ру правосла́вную,/ воззове́м ему́: святи́телю о́тче наш Ти́хоне,/ прииди́ и осени́ благослове́нием Небе́сным// Бо́гом со́бранныя лю́ди твоя́.

Во́йны и глад и крова́вая сму́та/ жре́бий твой тя́жкий, святи́телю наш!/ Ты же, в покая́нии путь спасе́ния нам указу́я, звал еси́ озло́бленныя:/ возлюби́те бли́жняго своего́,// обрати́теся ко Го́споду и спасе́теся.

Взыва́ю к вам, архипа́стырие и па́стырие,/ веща́л еси́, свя́те Ти́хоне, Патриа́рше наш:/ сы́нове мои́ и дще́ри во Христе́, спеши́те с про́поведию покая́ния,/ противоста́ните враго́м Це́ркве си́лою ве́ры на́шея./ Зове́м вы на страда́ния вме́сте с собо́ю/ свята́го апо́стола словесы́:// кто ны разлучи́т от любве́ Бо́жия?

Страда́ния мно́гая претерпе́л еси́, о́тче Ти́хоне:/ клеветы́, суды́, заточе́ния,/ преда́тельства лжебра́тий и угро́зы сме́ртныя,/ наси́льства и нападе́ния враго́в Це́ркве Христо́вы;/ но ты пребы́л еси́ му́жествен и кро́ток, веща́я:/ не ожесточа́йте серде́ц ва́ших,// но возмога́йте о Го́споде!

На стихо́вне стихи́ры, глас 1.

Подо́бен: Небе́сных чино́в:

Во́ли Бо́жия пра́ведный иска́телю и побо́рниче,/ о́тче Ти́хоне, моли́твенниче пла́менный за Це́рковь и зе́млю Ру́сскую,/ любве́ Христо́вы святы́й и кро́ткий подви́жниче,/ засту́пниче безстра́шный неви́нно стра́ждущих!/ Проро́честв твои́х ви́дехом стра́шное сбытие́.// Моли́ спасти́ся душа́м на́шим.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Простоту́, мир и кро́тость с любо́вию/ возгрева́л еси́ в се́рдце твое́м, о́тче Ти́хоне,/ моли́твою ти́хою огражда́л еси́ ста́до Христо́во// от волко́в, губя́щих е́.

Стих: Возноше́ния Бо́жия в горта́ни их,// и мечи́ обою́ду остры́ в рука́х их.

Све́тлым о́блаком страда́льцев Христо́вых,/ и́хже на по́двиг укрепи́л есть Собо́р Це́ркве Ру́сския,/ Небеса́ небе́с освяща́ют нас,/ соше́дшихся в па́мять святы́х собо́рян во храм,/ иде́же ти́и с Патриа́рхом Ти́хоном воспева́ху:// днесь благода́ть Свята́го Ду́ха нас собра́.

На хвали́тех стихи́ры, глас 5.

Подо́бен: Ра́дуйся:

Ра́дуйся, святе́йший о́тче наш Ти́хоне,/ возлюби́вый бо́льше жи́зни па́ству твою́/ и положи́вый ду́шу свою́ за Це́рковь Бо́жию, за Бо́жий наро́д,/ к нему́же со ско́рбию тя́жкою взыва́л еси́:/ се́рдце мое́ гори́т жа́лостию до сме́рти./ Очи́ститеся, бра́тие, от грехо́в свои́х/ и бу́дем вме́сте моли́ти Го́спода:/ О́тче наш,// оста́ви нам до́лги на́ша.

Ра́дуйся, святы́й Патриа́рше наш Ти́хоне,/ укрепля́я Це́рковь Ру́сскую на по́двиг Христо́в,/ cобира́я но́вое Христо́во во́инство,/ науча́я ве́рою и любо́вию/ в кро́тости побежда́ти зло́бу вра́жию,/ во смире́нии стяжа́ти си́лу Бо́жию./ Воево́да взбра́нный ны́не сно́ва бу́ди нам!/ Мо́лим, па́стырю люби́мый наш:// не оста́ви чад твои́х во ве́ки.

Источник: Текст утвержден Священным Синодом Русской Православной Церкви 15 октября 2018 г. (журнал № 85)

Месяца ноября в 7-й день

священномученика Кирилла, митрополита Казанскаго

На велицей вечерни

Блажен муж: ^{@1-й антифон. На Г@}осподи, воззвах: стихиры, глас 8.

Подобен: О, преславнаго чудесе:

Приидите, вернии, почтим святителя Кирилла,/ благочестия твердаго поборника,/ светильника земли Русския,/ во стране пустынней днесь почившаго,/ иже, тяготу дел и горечь страданий отложив,/ на Небеси Присноживущему взывает:/ утверди, Господи, Церковь Русскую/ и низложи шатания врагов Ея,/ да людие, ходящии во тьме, видят свет велий.

Мир дольний ущедряя,/ Христос со Отцем и Духом Святым/ обитель творит во избранных Своих,/ ихже весь мир недостоин есть;/ темже избраннаго от мира воспоим,/ Кирилла, священномученика богоприятна,/ иже, сердце освятив страданием,/ тече на мучение за Церковь Христову,/ юже не возмогут врата адова одолети.

Иоанну, чудотворцу Кронштадтскому,/ иноков и пастырей наставнику,/ пение надгробное принесл еси,/ святителю Кирилле, кроткий послушниче,/ последи же, яко мученик истинный,/ Небеснаго чертога достигл еси/ и тамо отца духовнаго во славе узрел еси,/ веселящася с новыми мученики и глаголюща:/ се аз и дети, яже ми даде Бог.

Небесных граждан любителя/ прославляет тя ныне страна Тамбовская,/ в ней бо добре потрудился еси,/ святителю Кирилле, смиренный пастырю,/ и апостола ея, Питирима чуднаго,/ в лице святых прославил еси,/ Феофана же богомудраго почитая,/ тому духовне подражал еси,/ сего ради с ними купно ликуеши.

Ины стихиры, глас 6.

Подобен: Все отложше:

Отцы Собора Церкве Русския,/ Духом Святым водими,/ поставляют на престол первосвятительский/ смиреннаго Тихона, архипастыря добраго,/ не самовластием того облекающе,/ но знамение победы Божия являюще./ Темже лик новых мученик/ патриаршим именем украсися/ и в земли Русской возсия пресветло,/ от нихже и святитель Кирилл, митрополит Казанский,/ днесь нами прославляется,/ яко веры неусыпный страж/ и хранитель Дома Господня.

Светлое торжество града Казани приспе,/ с нимже вси гради земли нашея радуются/ и вся Церковь Русская красуется/ в памяти святителя Кирилла,/ архипастыря преизящнаго/ и мученика добропобедна,/ посту, молитве и богомыслию прилежащаго,/ кровию своею священную одежду обагрившаго/ и от страдания в Божественную славу пришедшаго,/ идеже со всеми святыми,/ предстоит Престолу Святыя Троицы/ и молится даровати душам нашим/ мир и велию милость.

Любодружное святое единство/ всеусердно возлюбив от юности,/ мужественне к страданию потекл еси,/ со други разлучаяся,/ обаче, ангельския крепости исполнен,/ изгнание, яко жительство безмолвное, вменил еси/ и тесное жилище, яко Горницу Сионскую,/ идеже, неустанно моляся/ и словом истины заблуждшия назидая,/ во единомыслие церковное многия привел еси/ и яко един от древних отцев просиял еси,/ величие веры являя,/ священномучениче Кирилле досточудне.

Кия страдания претерпел еси,/ киими добротами обогатился еси,/ кия венцы от Бога приял еси,/ священномучениче Кирилле терпеливодушне?/ Непостижно есть любящим тя:/ како, подобострастен нам быв человек,/ уз мирских до конца совлеклся еси/ жития ради крестнаго?/ Како, скорбьми отвсюду утесняемь,/ Именем Господним вся победил еси,/ призывая Его со дерзновением многим?/ И ныне помолися о нас, угодниче Христов,/ чтущих святую память твою.

Слава, глас тойже:

Слово Господне услышал еси,/ святителю отче Кирилле:/ Царство Мое несть от мира сего,/ темже, к стопам Владычним любовию устремився,/ яко бисер многоценный,/ учение Христово обрел еси,/ во уничижениих и скорбех земных сокровенное./ Ныне же, мучения багряницею украшенный,/ Престолу Божию во славе предстоиши/ и светом Небеснаго блаженства/ верныя люди озаряеши.

И ныне, Богородичен, глас тойже: Кто Тебе не ублажит, Пресвятая Дево:

Вход. Прокимен дне. И чтения 3 мученическая.

На литии стихира храма.

Слава, глас 2:

Не вы Мене избрасте, но Аз вы избрах,/ сие слово Господне на тебе исполнися,/ святителю Кирилле, отче наш,/ Создатель бо твой Господь украси тя даровании/ и Церкви Своей в час испытания яви яко истины поборника,/ в раи же светлости всели тя, подая веселие вечное,/ зане во странствии земнем Того возлюбил еси/ всем сердцем, еже очистити потщался еси,/ всею душею, юже за други твоя положил еси,/ всею мыслию, еюже Слову Божию прилежал еси./ Молися о нас, да со избранными сопричтени будем.

И ныне, Богородичен.

На стиховне стихиры, глас 5.

Подобен: Радуйся:

Радуйся, святителю Кирилле преславне,/ Вышняго Царствия наследниче/ и Небесному Владыце Господу/ в скорбех и гонениих подобниче:/ Сей бо, крова на земли не имея,/ поругание и смерть лютую прият безчестно,/ ты же зиму и зной пустыни терпел еси,/ таже пищи, сна лишение и со злодеи заточение,/ еще же во узах от града во град прехождение/ и от судей лукавых изречение,/ яко повинен есть смерти./ Темже, яко дар Небесный, восприим страдания,/ Христа приобрел еси,/ Подающаго миру велию милость.

Стих: Праведник яко финикс процветет,/ яко кедр, иже в Ливане, умножится.

Радуйся, святителю Кирилле всечестне,/ истины твердый исповедниче,/ ты бо, веры поругание видев,/ пред гонители со дерзновением рекл еси:/ сие, очима нашима зримое,/ скорбь есть Церкве, но не смерть Ея,/ воля Божия несть человек деяние,/ но попущение, к покаянию зовущее;/ обаче силен Бог простити грехи наша/ и Церкви Своей даровати житие мирно и безпечально./ Темже, ныне благоденствующи,/ паства Всероссийская взывает ти:/ испроси нам веру тверду и велию милость.

Стих: Насаждени в Дому Господни/ во дворех Бога нашего процветут.

Из глубины темничныя взывая,/ сице вещал есть святитель Кирилл пречудный:/ не от мира Церковь Православная,/ мир апостольски освящающая,/ но Тело Христово, Духом созидаемое,/ Царствие Божие, с Небесе сшедшее,/ и причастники Божественнаго естества нас творящее,/ Матерь, чада на служение братолюбное воздвизающая/ и ко спасению их наставляющая,/ и како сия земных ради благ от Небесныя славы отступит?/ Темже да неколеблема пребудет в служении Церковь Русская,/ Ейже молитвами новых мученик подает Христос/ благостояние и велию милость.

Слава, глас тойже:

О, чада светообразная церковная!/ Веселитеся днесь в памяти святителя честнаго,/ сей бо, во свете невечернем Богу предстоя, взывает:/ призри, Боже, с небесе на Землю Русскую,/ аще и попраша люди ея иногда труды/ и течения слез преподобных Твоих,/ но крове ради пролитыя новых мученик/ возстави землю сию и приведи воспевати:/ Светодавче Господи, слава Тебе.

И ныне, Богородичен, глас тойже: Храм и Дверь еси:

На благословении хлебов, тропарь святаго дважды, и Богородице, Дево: единожды.

Тропарь святаго, глас 3:

Велика в скорбех утешителя/ обрете тя Церковь Русская, святе Кирилле,/ ты бо, в годину гонения чашу страданий прием,/ жаждущия правды воедино собрал еси,/ яко орел небесный под криле птенцы своя,/ и вся научил еси/ веры доброму исповеданию./ Темже в лице новых мученик/ Престолу Божию предстоиши,/ моляся о чтущих любовию память твою.

Ин тропарь, глас 5:

Якоже солнце светозарное,/ возсия днесь память твоя, святителю Кирилле,/ лучами благодати озаряющи верных сердца/ к прославлению дивнаго во святых Своих Бога,/ даровавшаго тебе крепость во исповедании и терпение в скорбех./ Темже молим тя:/ не премолчи о нас ко Господу/ и избави от всякаго зла,/ Церковь Русскую от раздоров и нестроений сохрани,/ мир мирови испроси/ и душам нашим велию милость.

На утрени

На Бог Господь: тропарь священномученника дважды. Слава, и ныне, Богородичен.

По 1-м стихословии седален, глас 4:

Тайну велиих подвигов твоих, святителю, о сем познахом: яко от юности словеса евангельская, яко сребро разженно, прилежно в сердце слагая, вседушне Христа возлюбил еси. Темже и Церкви Православней чрез все житие усердне послужил еси и славы Небесныя сподобился еси.

Слава, и ныне, Богородичен:

Пристанище нам, обуреваемым, буди, Пресвятая Владычице, не имамы бо крепости и произволения тверда не стяжахом. Обаче уповаем молитвами Твоими пути спасительнаго не уклонитися и завет святителя Кирилла исполнити:/ аще кто хощет Горняго Иерусалима достигнути, всяку язву страстнаго сердца из корене мужески да исторгнет.

По ^{@2-м стихословии седален, глас 2:@}

Егда время исповедания чадом Церкве Русския наста, тогда смерти никакоже устрашился еси, священномучениче добропобедне, залог Царствия Небеснаго в сердце имея. Темже и ныне смертию смерть Поправшаго во Царствии Небеснем духовне созерцаеши.

Слава, и ныне, Богородичен:

Воспоим, людие, помощь и заступление Девы Чистыя, поминающе отец наших, присно в бедах и напастех пред Нею с мольбою припадающих и зрак чудотворнаго Ея образа в сердце носящих.

Величание:

Величаем тя,/ священномучениче Кирилле,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиелеи седален, глас 5:

Кий образ в сердце твоем зрел еси, святителю, от беззаконных убиваемь? Сына ли Божия, на Кресте висяща во тьме часа шестаго? Стефана ли, о убийцех молящася: не постави им, Отче, греха сего? Церковь ли Русскую, смутою терзаему? Обаче в руце Божии вся предал еси, взывая: спаси, Спасе, души верно покланяющихся Тебе.

Слава, и ныне, Богородичен:

Что Тя наречем, Богородице? Пристанище ли духовное, Рай сладости Небесныя или Ходатаицу жизни некончаемыя? Вся бо имущи, едина Непорочная и Добрая в женах, о нас молися Христу Богу спастися душам нашим.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Целомудрия от юности исполнен,/ страданьми горькими и молитвами слезными/ во глубину смиренномудрия снизшел еси/ и терпение твердое богоподражательное стяжал еси./ Темже и плод красный любве Христовы принесл еси,/ еюже воспламени сердца наша,/ святителю Кирилле, богомудре.

Канон, глас 1.

Песнь 1.

Ирмос: Поим, вси людие,/ от горькия работы фараони Израиля Изменшему/ и во глубине морстей ногами немокрыми Наставльшему/ песнь победную,/ яко прославися.

Припадем, братие, ко Господу, промышление творящему о Церкви Своей Святей, Емуже новии мученицы и исповедницы Русстии воспевают непрестанно песнь победную, яко прославися.

Воспоим, братие, Церкве Русския украшение, святителя Кирилла богомудраго, от юности Христа возлюбившаго и чистотою жития Бога прославившаго.

Прославление святителя Питирима в Церкви Русстей трудами твоими свершися, преславне Кирилле, темже ныне купно с ним чадами ея прославляешися.

Богородичен: Дево Чистая, примирения Cкиние, Небо Божие на земли и ко граду Небесному Лествице! Прозябением Твоим от неплодове мир возвеселися, темже молимся: подаждь благоплодие земли Русстей, уделу Твоему избранному.

Песнь 3.

Ирмос: Утверди мене, Христе,/ на недвижимом камени заповедей Твоих/ и просвети мя светом лица Твоего:/ несть бо свят, паче Тебе,/ Человеколюбче.

Утвердил еси сердце твое, святе Кирилле, мирови умрети и, ангельским образом украсився, воззвал еси Христу: Твой есмь аз, спаси мя, Едине Человеколюбче.

В бдениих и пощениих страстьми обнищав, богатство дарований духовных приял еси. Темже и нас от страстей избави молитвами твоими, Кирилле многострадальне.

Одежду священную кровию украсив, блаженне Кирилле, в Церковь Небесную священно вшел еси, идеже, Святей Троице предстоя, взываеши: несть свят, паче Тебе, Человеколюбче.

Богородичен: Чудно Твое, Богоотроковице Марие, во храм Господень вхождение, Храм бо явилася еси Богу, темже и приведутся девы вслед Тебе: души взыскующих спасение.

Ин кондак, глас 3:

Столп и жертва Церкве Христовы быв,/ сию непоколебиму от искушений лукаваго премудро соблюл еси/ и, козни вражия твердым умом разорив,/ едину Церковь апостольскую проповедал еси,/ Кирилле богоблаженне,/ святителей Русских похвало,/ моли спастися душам нашим.

Седален, глас 2:

Сердце твое, святителю Кирилле, горе устремляемо, чисто приражений страстных показася, сего ради помышления световидная породи. Уста же твоя восприяша глагол Божий, яко меч духовный, во еже враги расточити и стадо Христово укрепити.

Слава, и ныне, Богородичен:

Светоносная Слова Палато, Ковчеже, позлащенный Духом, явилася еси, Пресвятая Дево. Темже молим Тя: вкупе со святыми сродники нашими Христу молися, от страстей очистити православно Богородицу исповедающих Тя.

Песнь 4.

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом – познаешися,/ внегда приити времени – покажешися./ Слава силе Твоей, Господи.

Сердце сокрушенно и умиления исполнено имея, узким и скорбным путем неотступно шествовал еси, отче Кирилле. Темже и рова страстей избегл еси и яко град, на горе стояй, явился еси.

Святительства ризу светлу сохранил еси и овцы словесныя добре упасл еси, иже, чуждаго гласа не послушавше, тебе последоваша. К сим же и нас сопричти, поющих: слава Господу, дивному во святых Своих.

Молитвою усердною дух твой к Богу воскрилял еси, святителю, труды ко трудом на всяк день прилагая, да процветет, яко крин, Земля Русская. Юже и ныне соблюди от гордых супостат невоевану молитвами твоими.

Богородичен: Дверь Небесная явилася еси, Дево, вход отверзающи Архиерею Великому Христу, нас ради Небеса прошедшему. Темже глас ангельский Тебе взываем: радуйся, Благодатная, Господь с Тобою.

Песнь 5.

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего Богоразумия/ православно поющих Тя.

Кто изъяснит красоту души твоея, блаженне Кирилле, и кто изследит еже ко грешным твое милосердие, о нихже и ныне неотступно молишися Христу: спаси и помилуй, Господи, православно поющих Тя.

Дадеся тебе благодать от Бога благолепно погребсти тело праведнаго Иоанна Кронштадтскаго, пастыря Всероссийскаго; с нимже ныне моли Христа, еже светом любве просветити нас, православно Его почитающих.

Слово Божие и писания отеческая предпочел еси мудрости века сего, святителю, сего ради, божественным отцам во всем последовав, ныне молишися Христу: светом любве Твоея, Господи, просвети православно поющих Троицу Единосущную.

Богородичен: Яко дождь на руно низшед, во утробу Девичу вселился еси, Христе, и паче солнца миру возсиял еси, Свете Разума, и яко Младенец на руку Девы Матере положился еси, Слове Божий. Ея же молитвами просвети сердца пощих Тя.

Песнь 6.

Ирмос: Обыде нас последняя бездна,/ несть избавляяй,/ вменихомся, яко овцы заколения,/ спаси люди Твоя, Боже наш,/ Ты бо крепость немощствующих и исправление.

Егда бездна страдания обыде землю нашу, тогда со слезами молился еси, святителю, о безвинно убиенных и о спасении людей Российских, взывая: милостив буди нам, Боже, Ты бо крепость немощствующих и исправление.

Святаго Патриарха Тихона чадо послушное быв, волю того всеусердно исполнити потщался еси, сего ради непреткновенно и Царства Небеснаго достигл еси, идеже о спасении людей Российских молиши: милостив нам буди, Боже, Ты бо крепость наша и исправление.

Со апостолы и мученики, со святители и преподобными, яко верный ученик Христов, вселился еси, святе Кирилле. Сего ради и ныне призри от святаго жилища твоего на нас, спасение улучити чающих и вопиющих: спаси люди Твоя, Боже наш, Ты бо крепость немощствующих и исправление.

Богородичен: Егоже старец Симеон прият на руки своя, Того, Владычице Чистая, моли о нас, яко Сына Твоего, да милость обрящем егда приидет на облацех судити миру всему, Ты бо еси упование христианом, Богородице Дево.

Кондак, глас 5:

Лучезарною твоею благодатию нас просвети,/ поющих мужества твоего крепость,/ яже воителем тьмы бе неприступна,/ и молитвами твоими Церковь Русскую в единомыслии утверди/ и от бед отечество наше огради,/ святителю Кирилле, мучениче славный.

Икос:

Егда все житие твое Богу предал еси, тогда прият тя Господь, яко ковач железо, в руце Свои и в горниле страданий искуси тя. Сего ради даровася тебе сила и благодать, крепость и премудрость, и, яко свет, пред человеки дела твоя просветишася в похвалу Пресвятыя Троицы. И ныне молитвами твоими Церковь Русскую в единомыслии утверди и от бед отечество наше огради, святителю Кирилле, мучениче славный.

Песнь 7.

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты, пояху/ и благословляху, глаголюще:/ благословен Бог отец наших.

Прежде Креста преобразися Господь пред ученики Своими. Ты же, отче, в светозарный день Преображения во узы заключен быв, отселе восхождение на крест начал еси, небоязненно глаголя: благословен Бог отец наших.

Во узилищи мрачнем пение победное Христу воспел еси, исповедниче славне: блажени изгнани правды ради. Темже умудри и нас во всяцей скорби Царю небесе и земли достойно воспевати: благословен Бог отец наших.

В темнице хладней Пасху поюще и Господа очима веры зряще, во узах сущии с тобою, святе Кирилле, дивляхуся благоговеинству служения твоего. Темже, на муки и смерть уготовани, Христу глаголаху: подавай нам истее Тебе причащатися в невечернем дни Царствия Твоего.

Богородичен: Осудися на Крест Судия живых и мертвых, безчестие претерпе Царь Славы, смерти вкуси Иже Даруяй мирови жизнь. Сего ради, уяснивше страшное сие смотрение, грехов оставление просим улучити нам молитвами Твоими, Дево Пречистая.

Песнь 8.

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

Смиренномудраго Тихона патриарха сотаинник и Петра крепчайшаго сострадалец явился еси, отче Кирилле богоблаженне, и ныне с сими Небесныя славы наслаждаешися, Христа, мир от тли греховныя спасшаго, превознося во веки.

Веру непорочну сохраньше, исповедницы мнози прихождаху к тебе, Кирилле богомудре: Афанасий и Дамаскин, святителие славнии, Александр преподобный и друзии, да купно с тобою расточенныя люди Церкве Русския соберут, Христа превозносяще во веки.

Твое крестоносное в вере стояние единство Церкве Русския сохрани, имя бо твое, в молитвах по всей Руси купно возносимое, разделение соедини, сомнение умири и любовь умножи.

Богородичен: Радость Воскресения Сына Твоего первее прияла еси, Богомати, Той бо обетование даде учеником Своим: паки узрю вы и возрадуется сердце ваше. Молися, Госпоже, и нам Владычния радости сподобитися.

Песнь 9.

Ирмос: Неизглаголанное Девы таинство:/ Небо бо Сия, и Престол Херувимский/ и светоносный чертог показася/ Христа Бога Вседержителя./ Сию благочестно яко Богородицу величаем.

Издетска Крещение водою и Духом приим, последи же кровию своею исполнил и совершил еси е, да в ризу белую за Слово Божие убиенных облечешися и новую песнь на земли живых Христу воспоеши.

Егда приспе час кончины твоея, страха мучителей безбожных не устрашился еси и равноангельное житие смертию мученическою запечатал еси. Сего ради со ангельскими лики ныне Христа созерцаеши.

Мзды своея не лишается, иже чашу воды ученику подаде. Сего ради рцы нам, отче святый, кую мзду Евдокия, печальница твоя, улучила есть, вся тяготы с тобою понесшая? Вемы бо, яко в лице мученик Христу предстоит.

Богородичен: К жизни присносущней на объятиих Сына Твоего возшедшая, Пречистая, матернима Твоима рукама в вечныя кровы о имени Его пострадавшия прияла еси. Темже и нас в час кончины нашея милостивно срящи.

Светилен, глас 6:

Пресветлым лицем и милостивным оком призри на чада твоя, благоговейно совершающая память твою, святителю, и Света Подателя моли спасти и просветити души наша.

Слава, и ныне, Богородичен:

Стена и покров буди нам, Владычице, да Тобою прейдем стену, юже суета житейская воздвиже. Не презри, Чистая, моления нашего, молитвенника бо на сие, Кирилла славнаго, Тебе предлагаем.

На хвалитех стихиры, глас 4.

Подобен: Дал еси знамение:

Служения иго Божественное/ и бремя еже о Христе страдания,/ радуяся, подъял еси,/ святителю Кирилле терпеливе,/ оттуду и дар приял еси,/ еже звездою путеводною Церкви быти/ и истину, яже есть Христос, явити./ егоже и мы воспомянем глас:/ иго Мое благо и бремя Мое легко есть.

Радость воскресения возвещая/ и благодарение за вся Богу воздая,/ Безкровную Жертву в темнице приносил еси,/ святителю Кирилле священне,/ соузницы же твоя воспеваху пение Воскресшему Христу,/ неприступным светом блистающему/ и страждущим о Имени Его рекущему:/ радуйтеся и веселитеся,/ яко мзда ваша многа на Небесех.

Мудростию свыше осолен и со единомудрыми мирствуяй,/ святаго Патриарха преемник духовный был еси,/ святителю Кирилле всечестне./ С нимже имеяй един дух во двою телесу/ и еже о Церкви помышление едино,/ единства Ея и истины ради смерть приял еси,/ завет Пастыреначальника Христа исполнив:/ имейте соль в себе/ и мир имейте между собою.

Светлостию братолюбия увенчан и святому Патриарху последуя,/ смертию за Христа усовершился еси,/ святителю Кирилле всехвальне./ Петру же крепчайшему спострадав,/ о нем и о Церкви слезно молился еси,/ с нимже ныне на Небеси радуяся,/ поминай паству Всероссийскую, тебе поющую:/ больше сия любве никтоже имать,/ да кто душу положит за други своя.

Слава, глас 1:

Кто возможет священства высоту разумети:/ како перстен человек, служитель Божий бывает/ и Огнь Божественный в причащение верным подает,/ Таинство совершая, всех сокровищ вышшее,/ и милостивно обязует струпы людей согрешающих,/ в сердце нося предания апостольская и отеческая?/ Сего ради, святителю Кирилле, Церкве Русския похвало,/ испроси пастырем земли нашея, еже в правду облещися,/ людем же учению сих прилежно внимати,/ да будет едино стадо и един Пастырь Христос.

И ныне, Богородичен, глас тойже:

Успение Твое, Пречистая,/ апостольский лик песньми почти/ и ангелы крилы покрываху священное тело Твое;/ страдальцем же Христовым, от беззаконных тайно убиенным,/ в местех пустынных и непроходных/ никтоже от человек пение надгробное сотвори,/ обаче Ты Сама предстала еси, Владычице,/ со ангельскими доброгласными чинми./ И ныне вси концы земнии/ новых мучеников прославляют/ во храме Господни, во дворех Бога нашего.

Славословие великое. Ектении. И отпуст.

На Литургии

Блаженна от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28–39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106, (21, 12–19). Конец: В терпении вашем стяжите души ваша: Причастен: В память вечную будет праведник:

Молитва

О, пречудный святителю Кирилле, новых мученик и исповедник украшение, святаго Патриарха Тихона верный последователю и Церкве Русския великое светило! По имени твоему тако и житие твое бысть, ты бо в Дому Божии сладостию словес церковных воспитанный, в юных летех благодать священства приял еси и паству твою богоугодно жити поучал еси. Помози ныне пастырем Церкве нашея в сердцах своих дар любве Христовы возгревати, отроки настави, еже в кротости и смирении возрастати, и вся люди православныя научи силу благочестия благими делы стяжевати.

Ты, святителю Кирилле, правило монашескаго жития явился еси, архиереев похвала и градовом в вере утверждение. Сего ради споспешествуй иноком в дусе и истине ревностно подвизатися, архипастыри научи слово правды Христовой в мире сем непорочно хранити. Заступи страну нашу от нашествия иноплеменник, грады и веси ея от всяких бед сохрани, домы миром огради и вся чада ея заблуждшая на путь покаяния настави. Вемы воистинну и усты исповедуем, яко можеши испросити у Великодаровитаго Бога, елика хощеши, ты бо правды ради изгнание и заточение претерпети сподобился еси и посреде злостраданий и крайния нищеты богатство благодушия явил еси, ты и веру Православную пред сильными мира сего небоязненно исповедал еси. Вразуми нас, в добродетелех убогих, земному богатству сердца не прилагати и укрепи нас, немощных, в час испытания веру во Христа сохранити. И якоже во истине стоял еси, егда вознесошася до небес и низпадоша до бездн волны смут церковных, тако умудри и нас прилежно вере нашей поучатися и в разум истины восходити, избирающе правая, благая и полезная. Ты смерть за Христа приял еси, яко венец праведнаго жития твоего, тако направи и нас не прилеплятися славе и довольству века сего, но почести вышняго звания искати, да твоими отеческими молитвами возможем земное наше житие без порока прейти, христианскую кончину улучити и сподобитися в Царствии Небеснем купно с тобою прославляти Отца и Сына и Святаго Духа, Троицу Единосущную во веки веков. Аминь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

На велицей вечерни

Стихиры, гл. 6

Прехвальнии новомученицы и исповедницы Русстии,/ восхваляем вы с любовию,/ вас бо не потопила вода безверия, / ни буря ярости беззакония,/ ни ветры ересей погибельных,/ но Духом Святым просвещеннии,/ яко жертвы непорочныя Царю Славы принесостеся./ Емуже молитеся о душах наших.

Прокопие священномучениче,/ в лике новомученик прославленный,/ гласом немолчным паству наставлял еси,/ от волков хищных и наемник лукавых защищал еси,/ душу твою полагая за овцы, яко пастырь добрый./ И ныне Христу молися,/ даровати душам нашим мир и велию милость.

Всехвальне Прокопие новомучениче,/ за чистоту души твоея,/ увенча тя Владыка венцем славы вечныя,/ прияв твоя страдания и смерть,/ яко жертву всесовершенну./ Темже и во светлостех небесных ныне ликовствуеши,/ Христу молящеся, / о спасении тя призывающих.

Слава, глас 4:

Отрасле благочестиваго рода,/ Дарами Святаго Духа преизобильно украшенный,/ служителю Христов Прокопие,/ на ниве Господней потрудился еси,/ плод сторицею во ученицех принесл еси./ Ты бо молитвою недуги душевныя и телесныя исцелял еси,/ Прокопие, исповедниче,/ и богодухновенными возгремел еси глаголы/ сораспятися призывая Христу,/ и яве образ тебе самаго предлагая.

И ныне, Богородичен, глас тойже:

Иже Тебе ради богоотец пророк Давид / песненно о Тебе провозгласи, величия тебе Сотворшему: / предста Царица одесную Тебе. / Тя бо Матерь, Ходатаицу живота показа, / без отца из Тебе вочеловечитися Благоволивый Бог: / да Свой паки обновит образ, истлевший страстьми, / и заблуждшее горохищное обрет овча, / на рамо восприим, к Отцу принесет, / и Своему хотению, / с Небесными соединит Силами, / и спасет, Богородице, / мир, Христос имеяй велию и богатую милость.

Вход. Прокимен дне. И чтения 3:

Деян. Зач. 10;

Деян. Зач. 11;

Деян. Зач. 12.

На литии стихиры, глас 1:

Прокопия священномученика,/ приидите вернии вси почтим,/ пеньми и песньми духовными,/ сей бо мужеством препоясася,/ исповедник был еси крепок;/ и мучения венец светел восприим благодатию,/ Христа прославил еси.

Цвете еси прекрасный, Прокопие богомудре,/ ты бо храмы душевныя чад своих созидая;/ егда же время приспе, душу твою за овцы положил еси,/ яко пастырь добрый и исповедник, кровь твою честную за Христа излиял еси;/ темже от Вседержителевы руки подвигов почесть прияв,/ украсился еси неувядаемаго цвета сиянием.

Слава: глас 8:

В небесный вшед Чертог/ багряницею украшен,/ и Троице с велиим сонмом новомучеников и исповедников ныне предстоиши,/ Прокопие многострадальне,/ мы же днесь, память твою светоносную совершающе,/ прославльшаго тя Господа величаем.

И ныне, Богородичен, глас тойже:

Приидите, людие, / ублажим Заступницу усердную рода христианскаго,/ се бо предстоит Престолу Царя славы/ и со слезами молит о земнем уделе Своем,/ с Неюже вкупе и собори святых новомучеников вопиют немолчно:/ Владыко Христе, спасе землю Русскую.

На стиховне, глас 4:

Исповедник и священномученик явился еси,/ Прокопие славне,/ во изгнании и темнице паству твою наставлял еси,/ и мучением сияя, ангелом уподобился еси./ Темже тя чтим и любовию празднуем / светоносную память твою.

Стих: Праведник яко финикс процветет, яко кедр, иже в Ливане, умножится.

Православныя веры ревнителю,/ богословия догматов и святоотеческаго учения проповедниче и исполнителю,/ и Божественныя службы пламенный служителю,/ плоды трудов твоих Христу принесл еси,/ Емуже и до смерти последовал еси./ егоже ныне зриши в сиянии славы вечныя,/ священномучениче Прокопие.

Стих: Насаждении в дому Господни, во дворех Бога нашего процветут.

Не скорбети, но радоватися повелел еси чадом твоим,/ Прокопие блаженне,/ егда призва тя Господь последовати Ему страданием;/ аще гоним и истязуем бе,/ всего себе в руце Владычни предаяй,/ телесныя раны превозмогаяй / силою вседетельною Духа.

Слава, глас 8:

Кровию обагрив твою священную одежду,/ вшел еси во Святая Святых,/ свят быв, Прокопие славне,/ мужественно страдания и смерть за Христа приял еси,/ лесть и неистовство богоборческое поправше,/ врага победил еси;/ темже молим тя:/ укрепи молитвами твоими души наша.

И ныне, Богородичен, глас тойже:

Призри на моления Твоих раб, Всенепорочная,/ и всякия скорби избави землю Русскую,/ дом Твой нареченную/ и кровьми новомученик освященную./ Да не постыдимся, Владычице Державная,/ Тя призывающии,/ Ты бо еси православных помощь,/ радость и покров/ и спасение душ наших.

Тропарь, глас 1

Светильник всесветлый во граде Херсоне явился еси,/ пастырю добрый, священномучениче Прокопие./ Любовь и милосердие в сердцах верных насаждая,/ твердо стояти во исповедании веры Православныя призывал еси./ Темже со пресвитером Иоанном за Христа пострадал еси,/ и ныне купно с ним на небеси престолу Божию предстоя,/ моли Милостиваго Бога/ отечество наше в Православии и благочестии утвердити,/ мир Церкви даровати/ и душам нашим велию милость.

На утрени

По первом стихословии седален, глас 6:

Отвергнувся себе, ярем делания пастырскаго мужественно подъял еси, не убоявся прещения власти богоборческия, чадолюбиве отче и исповедниче Христов; ни гонения бо, ни темница не возможе отлучити тя от служения сего.

Слава и ныне, Богородичен:

О, Всепетая Дево, Тя вемы Покров земли Русския, Тебе бо, грешнии, имамы предстательство, Тебе стяжахом в напастех спасение, Едину Всенепорочную.

По втором стихословии, седален, глас 2:

О благолепии храма и Божественныя службы благоговейнаго совершения ревнуя, наставник и учитель благославный многих явился еси, Прокопие достохвальне, к познанию неизреченныя сладости жизни вечныя возводя послушная чада твоя.

Слава и ныне, Богородичен, глас 2:

Молитвеннице Теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.

По полиелеи седален, глас 2:

Светло торжествующе празднуем память твою,/ отче Прокопие священномучениче,/ и верою исполняемся,/ яко не оставляеши паствы твоея своим попечением;/ предстояще незримо со Ангелы и всеми святыми,/ моление сие приемлеши,/ предстательствуя о спасении поющих тя.

Слава и ныне, Богородичен, глас 2:

Молитвеннице Теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.

Прокимен, глас 4:

Проидохом сквозе огнь и воду,/ и извел еси ны в покой.

Стих: Разжегл ны еси, якоже разжизается сребро.

Всякое дыхание:

Евангелие от Матфея, зачало 36.

По 50-м псалме стихира, глас 6:

Сосуд священ Духа Святаго ты был еси,/ от корене праведнаго плод совершен,/ Прокопие священномучениче,/ чада твоя любовию Христовою возлюбил еси,/ и за тех душу свою положил еси, взывая:/ Господи, ихже дал еси мне, сохранил есть,/ да не погибнут.

Канон святаго, глас 2

Песнь 1.

Ирмос: Грядите людие:

Престолу ныне предстоя Христову, яко архиерей и мученик преславный, Прокопие всечестне, приими молитвы наша с любовию тебе возсылаемыя.

Плод благославен древа праведнаго прозябл еси, избранниче Божий, от источника святости отеческия питаемь, подвигом исповедническим достойно трапезе райския принеслся еси.

Дар Богу, всеблаженне, себе самаго принесл еси, житием многотрудным и честным страданием, священномучениче Прокопие.

Богородичен: Бога без семени рождшая, паче ума человеча, Дево Пречистая и Мати; егоже моли помиловати поющих Тя.

Песнь 3.

Ирмос: Утверди нас в Тебе Господи:

Миром помазания духовнаго украшен, Прокопие славне, добре священствовал еси, жезлом веры отгоняя ересей ловитвы и сохраняя стадо словесное от волков губящих е.

Нощь отгнал еси суетства, богоглаголиве отче, блистании премудраго проповедания, и верных мысли просветил еси.

Возносимую презрел еси зиму безбожия, возлюбив учения святых отец догматы, теплотою Божественнаго Духа невредимо сердца чад твоих соблюл еси.

Богородичен: Утверждение буди и прибежище, и покров Дево Пречистая, верою к Тебе прибегающим, и любовию воспевающих Рождшагося из Тебе.

Седален, глас 3:

В незлобии Христу подражавый, истязания и раны от безбожных лютых кротко претерпел еси, Стефана первомученика гласом моляся за обидящих тя, Прокопие многострадальне.

Слава, и ныне, Богородичен, глас 3:

Не имамы инаго прибежища, разве Тебе, Богородице,/ Отечества нашего усердная Заступнице:/ всяк бо, почитаяй Тя, надежду обретает.

Песнь 4.

Ирмос: Услышах, Господи, славное Твое смотрение:

Паству твою премудро наставляя, богословия поборник явился еси, священнодейственне путеводящь добродетельных, Прокопие, деяний.

Тайны горняго мира чрез участие в богослужении познавати учил еси, богомудре отче, прилеплятися же всем сердцем небесным покровителем нашим и тем приуготовитися вечности.

Утеснил еси нечестие, святче, пространством истиннаго благочестия, и пути в сие ведущия, показал еси, спасая души, потопляемыя прелести богоборчества водами.

Богородичен: Просвети, Пречистая, омраченную душу мою светом Твоим, яже Свет рождшая Един Ипостасный.

Песнь 5.

Ирмос: Света Подателю:

На Древе Простершемуся волею подобяся, егоже милосердию подражая, Евангельски молил еси: Отче Благий, ихже дал еси мне, сохрани, да никтоже от них погибе.

Смиряяся оскорбляемь, темницы и изгнания горечь претерпел еси, темже блаженную улучил еси, многострадальне, славу и светлость.

Душа твоя крепкая козни вражеская низложи, мрак неверия и лукавствия разгнася твердейшею верою твоею, Прокопие всехвальне, архиереев похвало.

Богородичен: Иже образ Ипостаси Отчи, из Тебе прият смешение Богородительнице, и истлевший образ прослави, и сего нова сотвори.

Песнь 6.

Ирмос: В бездне греховней:

Падшаго естества возношение, Духом укрепляемь, поправ, мужественно облеклся еси багряницею нетления, Прокопие священномучениче: темже прославляемь Ангелы и человеки.

Кровию страдания, блаженне, освятил еси землю, духом же на Небеса возшед, присовокупися гласу святых новомучеников, воспевающих Святую Троицу.

Молитва святыя души твоея прията бысть, яко кадило, отче: в воню благоухания духовнаго, Возсиявшаго от Девы исповедуя.

Богородичен: Вземлющаго грехи всего мира, Христа заченши, Пречистая, не престай просящи грехов прощения воспевающим Тя.

Кондак, глас 4

Во святителех благочестно пожив,/ и мучения путь прошед,/ безбожия силу побеждая,/ поборник быв Херсонстей пастве, богомудре./ Темже тя почитающе, тако вопием/: от бед избави нас присно твоими мольбами,/ отче священномучениче Прокопие.

Икос

К высшему подвигу мученичества устремися, Прокопие преславне, яко всесожжение Божественное и жертва живая принеслся еси Спасу всех. Темже вопием ти: Радуйся, исповедническаго подвига сияние прославивый; радуйся, мученический крест во дни гонений на Церковь избравый. Радуйся, Христа распинаемаго паче жизни временныя возлюбивый; радуйся, темницу, страдания и смерть за Него претерпевый. Радуйся, паству Христову, вверенную тебе, от расхищения соблюдый; радуйся, и во изгнании сирых чад твоих не оставивый, пламенною молитвою от звероуловления тех оградив. Радуйся, со иереем Иоанном за веру Христову и смерть приявый. Радуйся, теплый предстателю наш пред Богом, отче священномучениче Прокопие.

Песнь 7.

Ирмос: Образу златому:

Не поклонився, священномучениче, делом рук беззаконных, претерпе поношения, и заточение, и раны, чистоту веры Православныя непоколебимо исповедал еси.

Святых жития не токмо умом познавати учил еси, житием бо твоим и деяньми тех подвиги проповедуя, Божественным разумом души пасомых просвети.

Глагол твоих вещание и святоотеческих преданий сила обтече, богодухновенне отче, землю Русскую, иссохшую от зноя гонений и нечестия, напаяя сию Божественною благодатию.

Богородичен: Радосте скорбящих и отчаянных, Ты еси Мати Преблагая, Спаса рождшая рода нашего.

Песнь 8.

Ирмос: В пещь огненную:

Ни темница, ни ярость мучителей, ни страдания, ни даже смерть не возмогли разлучити тя от любве Божия, но тою укрепляяся, воспевал еси: благословен Бог отец наших.

Возмогл еси Божиею вседетельною силою богоборческия прелести вселукавое мудрование, страстотерпче, победити, и венец нетленный от всех Владыки прияти, поя: благословен Бог отец наших.

Воистину блажен ты, Прокопие многострадальне, ибо сподобился еси соделатися общником страстей Христовых, себе самаго в дар Зиждителю принося, вопиял еси: благословен Бог отец наших.

Богородичен: Столп крепости тверд, и Хранительницу, и Заступницу стяжавше Тя верою поющии: благословен Бог отец наших.

Песнь 9.

Ирмос: От Бога Бога Слова:

Возвышен явился еси страдании честными, приял еси венцы победы, священномучениче, и ныне в лике новомученик и исповедник Русских предстояще Божественному Престолу, радуешися вечною радостию.

Наставниче и молитвениче наш, отче Прокопие, со иереем Иоанном, сподвижником твоим, и новомученики прииди, стани с нами; днесь бо празднуем честную память вашу.

Верою просящия тя спасай от всякия беды, Прокопие блаженне, во Отечествии Небеснем пребываеши бо присно, яко мученик непобедим.

Богородичен: Ты Едина Богу всяческая мудростию создавшему, Мати позналася еси Неискусобрачная, Дево Пречистая. Темже Тя Ангели и человецы песньми величают.

Светилен:

Одежды твоя, Прокопие досточудне, кровию обагришася, страданием светло просветися лик твой, темже Христос венцем мученическим увенча тя.

Слава, и ныне, Богородичен:

О Тебе мы хвалимся, Богородительнице,/ и к Богу Тя имамы Предстательство,/ простри руку Твою необоримую/ и сокруши враги Церкве Русския.

На хвалитех, стихиры на 4, глас 4:

Отче всемудре Прокопие,/ сквозе бурю безумнаго неистовства / к тихому пристанищу таинств церковных / всепобеждающею Божественною силою / Христово стадо, вверенное ти, направил еси./ Темже воспевающе, молим тя:/ помози и нам не погибнути / во страстей пучине.

Кто изглаголет страдания твоя,/ егда виде Церковь Святую попираему,/ чада же ея расхищаемии,/ тогда яко светильник Божественный и подражатель святых, / на крове проповеда,/ еже слыша в сердце Духу глаголему;/ страдальческое избрал еси житие,/ священства одежду обагрив кровию,/ мучениче непобедиме Прокопие.

Предстателю Церкве Русския,/ священномучениче Прокопие всехвальне,/ выну зряй Лице Господа на Небесех,/ не презри ни единаго/ от малых чад ея,/ но радостно покаяние наше приими/ и моли присно/ сыновом русским спастися.

Слава, глас 8:

Срадуйтеся нам Ангельския чины и святии вси,/ днесь бо празднуем память священномученика Прокопия,/ кровию Царствия вечнаго достигшаго,/ веруем, яко духом вкупе с нами пребывая,/ моление сие приимет и Христу принесет,/ ходатайствуя о спасении нашем.

И ныне, глас тойже:

О, преславнаго чудесе!/ Небесе и земли Царица,/ от святых сродников наших умоляемая, до ныне землю Русскую покрывает/ и лика Своего изображении милостиво обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеся изливати до века. Аминь.

На Литургии

Прокимен, глас 7:

Честна пред Господем/ смерть преподобных Его.

Стих: Что воздам Господеви о всех, яже воздаде ми.

Апостол, к Римляном, зачало 99

Аллилуия, глас 6:

Священницы Твои облекутся в правду и преподобнии Твои возрадуются.

Стих: Бог нам прибежище и сила, Помощник в скорбех, обретших ны зело.

Евангелие, от Луки, зачало 106.

Причастен:

В память вечную будет праведник.

Источник: Православная Херсонщина

На велицей вечерни

Блажен муж: ^{@1-й антифон.@}

На Господи, воззвах: стихиры, глас 5.

Подобен: Радуйся, Живоносный Кресте:

Радуйся, священная главо, / святителю Августине богомудре, / Церкве красото, града Калуги предивное удобрение, / благочестия пучино неисчерпаемая, / столпе Православия непоколебимый, / слава мучеников, / преподобных подражателю, исповедников подобниче, / за Христа душу твою положивый, / егоже моли / даровати душам нашим мир и велию милость.

Радуйся, сосуде Духа Божественнаго, / от юности Богом избранный стадо Его хранити, / любовию Тому уподобился еси: / смирения высото, правило добродетелей, / нищих питателю, обидимых заступниче, / Истины ревнителю, / за неяже пострадал еси даже до крове, / сего ради от Христа венец приял еси, блаженне / егоже моли / даровати душам нашим мир и велию милость.

Радуйся и ликуй, земле Российская, / украсившися кровьми святых страстотерпец, / сии бо веру твердо исповедаша, / прещения мучителей не устрашишася / не уклонишася скорби, ни темницы, / новозакланнии агнцы, от нихже и ты, святителю Августине, / ангеле церкве Калужския и служителю Христов. / егоже моли / даровати душам нашим мир и велию милость.

Ины стихиры, глас 1:

Придите, вернии, / прославим иерарха всечестна, / в лютая времена безбожнаго гонения / право правивша слово Божественныя истины, / пасшаго паству свою многотрудно, / научая ю отеческим преданием следовати / и, яве образ себе самаго предлагая, / душу за Христа положившаго. / Сего ради, священномучениче Августине, / усердно тя прославляем.

Жертву первее Богу принося безкровную, / яко священник законнейший, отче, / послежде яко всеплодие и приятну жертву, / кровь твою, яко мученик истинный, за Христа излиял еси, / исповедник непоколебим явился еси; / сего ради с любовию тя ублажаем.

Пастырю истинный, святителю Августине, / Церкве Христовы усердный ревнителю, / противу беззаконник дерзновенно стал еси / и обратил еси суд на главу судивших тя, / светильник веры неугасимый, воин неустрашимый Небеснаго Царя. / Сего ради почитаем священную твою память.

Слава, глас 6:

Приидите, российстии собори, / благочестно песньми восхвалим / честное торжество святителя и мученика; / звезду нову на Небесех в сонме святых явленную, / архипастыря богомудраго, / на камене веры твердо стоявшаго, / егда богоборцы пастырей Церкви побиваху, / о согрешивших братоубийством ходатай быв. / И ныне Престолу Божию предстоит, / выну моляся о душах наших.

И ныне, Богородичен воскресен.

Вход. Прокимен дне. И чтения три святительския.

На литии стихира, глас 2:

Столп несокрушим Христовы Церкве / явился еси, святителю Августине, / егда на землю нашу адова злоба устремися, / и потоцы беззакония смятоша ю. / Но живо слово Господне: / не убойтеся от убивающих тело, души же не могущих убити. / Потерпе душа твоя за Возлюбившаго нас Господа, / ругание, и клеветы, и узы, и темницы и лютую смерть; / ныне же, со страстотерпцы в Церкве Небесней торжествующе, / моли о земнем отечестве твоем, / да хранит веру православную, / в нейже Руси утверждение.

Слава, глас 4:

Кровию обагрив священныя одежды, / достигл еси Небеснаго чертога, славне, / яко мученик непобедим и священнодейственник законнейший. / Христу Пастыреначальнику последуя прилежно, / не оставил еси паствы твоея даже до смерти. / Темже, отче наш святителю Августине блаженне, / не остави град, идеже пострадал еси, / и твоими молитвами избави от бед / празднующих всечестную память твою.

И ныне, Богородичен.

На стиховне стихиры, глас 8.

Подобен: О, преславнаго чудесе:

Святый священномучениче Августине! / Небоязненно стоял еси за веру православную, / за нюже муки мнози претерпел еси: / заушения и уничижения, / гладом и хладом изморен в темнице, / яко злато в горниле искушен быв, / и обрете тя Бог достойна Себе. / егоже моли, святителю, / даровати нам велию милость.

Стих: Честна пред Господем / смерть преподобных Его.

Святый священномучениче Августине! / Божественною ревностию распалаем, / огнь горящ явился еси / воздвиже глас свой на отступники Христовы веры, / суду Божию предая их, / праведно обличи неправедная начинания / паству же боятися Единаго Бога научал еси. / К Тому преселился еси, радуяся, / и молишися о нас, чадех твоих.

Стих: Священницы Твои облекутся в правду, / и преподобнии Твои возрадуются.

Святый священномучениче Августине! / Архиереев похвало и монашествующих славо, / ты, измлада Христа возлюбльше, / чувственныя страсти увядил еси воздержанием, / потщався хуждшее покорити лучшему / и плоть поработити духу, / добродетельми, и словесы, и делы возсиял еси. / Тем ныне предстоиши Престолу Славы всех Царя / и молишися о душах наших.

Слава, глас тойже:

Яко светозарная звезда возсиял еси, блаженне, / новый мучениче, исповедниче Христов, / ныне же, со ангелы радуяся, / помощник буди нам в скорбех и болезнех, / наставниче заблудших, плачущих утешение, / заступниче немощных, прибежище отчаянных, / молитвенниче о душах наших.

И ныне, глас тойже.

Подобен: О, преславнаго чудесе:

Творение святителя Афанасия Ковровскаго

О, преславнаго чудесе! / Небесе и земли Царица, / от святых сродников наших умоляемая, / до ныне землю Русскую покрывает / и лика Своего изображении милостивно обогащает. / О Владычице Державная! / Не престани и на будущее время / во утверждение на Руси Православия / милости и чудеса изливати до века. Аминь.

Тропарь, глас 4:

Священноначальников сопрестольник и новый мучениче, / неусыпный земли нашея к Богу предстателю, / нечестие беззаконных дерзновенно отринул еси / увещая паству твою небоязненно стояти в Православии; / темже сугубым венцем венча тя Христос. / Того моли, святителю отче наш Августине, / умирити мир и спасти души наша.

На утрени

На Бог Господь: тропарь святому, дважды.

Слава и ныне, Богородичен.

По 1-й кафисме седален:

Правило веры и образ кротости / явился еси, священномучениче Августине, / пастырю добрый и угодниче Христов, / ярости мучителей не убоялся еси / и суемудренная свирепства обличил еси; / молитвами твоими подай чтущим тя любовию / добродетелей исправление.

Слава и ныне, Богородичен:

Дивно чудо зачатия / и неизреченен образ Рождества Твоего, Дево Чистая, / удивляет ум и ужасает помысл; / Тя воспеваем, яко палату Всецаря / и мира спасение.

По 2-й кафисме седален:

Яко светозарная звезда, / во граде нашем возсиял еси ученьми словес твоих, / отче Августине приснопамятне, / премудрый Слова проповедатель показался еси, / утверждая люди учением Христовым, / за Негоже пострадал еси даже до смерти, / и ныне со апостолы и архиереи радуешися, / предстоя престолу Господню.

Слава и ныне, Богородичен:

Всех Творца и Бога, Всенепорочная, / нетленно родила еси, / Духом Божественным в ложеснах заченши, / егоже славяще, Тя воспеваем, Дево, / яко всех христиан спасение и надежду.

По полиелеи седален:

Иже добродетелей подвижник и архиереев украшение, / Богоблаженне Августине, / любовию евангельскою укрепляемь, / небоязнен пастырь и наставник заблуждших явился еси, / темже земля наша, / кровьми твоими орошенная, / восприяла тело твое, / яко многоценный бисер Христов.

Слава и ныне, Богородичен:

Небесную дверь и кивот, / пресвятую гору и светлый облак, / неопалимую купину и словесный рай, / вселенныя великое сокровище, / Царицу Небесе и земли воспоим, / Та бо молится Сыну Своему спастися нам.

Степенна, 1-й антифон 4-го гласа.

Прокимен, глас 2: Священницы Твои облекутся в правду / и преподобнии Твои возрадуются.

Стих: Блажен муж, бояйся Господа, в заповедех Его восхощет зело.

Всякое дыхание: Евангелие от Луки, зачало 67.

По 50-м псалме стихира, глас 6:

Придите, вернии, / восхвалим страстотерпца святителя, / той бо, в страх Божий вооружився, / благодатию Христовою укрепляемь, / силу вражию низложил еси преславно, / в жертву непорочную принеслся заклатися, / во свидетельство Распеншагося за нас, / ныне же в Царстве Его водворился еси / со всеми исповедники земли Российския.

Канон Богородице, глас 8: Воду прошед:

И священномученика канон, глас 6.

Песнь 1.

Ирмос: Яко по суху пешешествовав Исраиль, по бездне стопами, гонителя фараона видя потопляема, Богу победную песнь поим, вопияше.

Песнь воспети Твоему угоднику, егоже избрал еси, / святителю Августину, / сподоби, Господи, нас недостойных, / и слово Сам вдохни восхвалити светоносное житие его / и подвиги, имиже украсился еси, / путем тесным земное шествие совершая.

На гору добродетелей востекл еси, блаженне, / от юности суетныя славы и мирския чести отрицаяся, / славы Единаго Бога ища и выну Тому работая прилежно.

Любовию Христовою уязвився, / фараонит мысленных нетрудно избег, богомудре, / ревнитель явился еси неустрашимый веры и благочестия, / непорочне и праведне на земли пожил еси / и приял еси осияние Духа.

Богородичен: Дево, в женах благословенная, / Твоя милости подаждь людем немощным, / страстотерпца Христова молением, / Милостиваго бо явилася еси Мати.

Песнь 3.

Ирмос: Несть свят якоже Ты, Господи Боже мой, вознесый рог верных Твоих, Блаже, и утвердивый нас на камени исповедания твоего.

Благочестиваго корене отрасль плодоносна показася, / добрым нравом от младенчества твоего, святе, радость родителем был еси, / чистою душею от пелен Господеви прилепился еси, / отонудуже старец некий и странник Божий благослови тя, / провидев яко архиерея и избранника Христова.

Яко елень на источники водныя, / измлада к храму Божию устремлялся еси, отче, / вся красная мира ни во чтоже вменив, / ведый же твое благое изволение Сердцеведец / постави тя на свещнице, / яко пастыря Церкве Своея и служителя.

Небесную премудрость яко талант от Бога обрел еси, / егоже приумножи, блаженне, от сокровищ богословия, / твердый адамант явился еси догматов веры; / егда свирепеющия волки, / Церковь православную разорити хотя, / со безбожники совокупишася, / словом твоим демонскую лесть обличил еси.

Богородичен: Сохрани, Владычице, надеющияся на Тя, / и нахождения варварскаго избави / и зловерных учений мутныя волны укроти, / Тя бо в скорбех и напастех всегда призываем.

Седален, глас 2:

Серафимскою любовию ко Господу пламенея, / яко столп огнен явился еси, священномучениче, / попаляющ словеса нечестивых, / верных же души просвещающ ученьми Богоразумия; / темже Горняго Иерусалима с соузники твоими и чады достигл еси, / идеже молиши Христа о нас, / светло празднующих твою память.

Слава и ныне, Богородичен:

Спасай нас, Всесвятая Чистая, / от сопротивных обстояний и соблазнов бесовских, / и умоли Сына Твоего, / да возведет от нетления к жизни Небесней / прибегающих к покрову Твоему.

Песнь 4.

Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Объятия Отча отверз ти Господь, / иго благое и бремя легкое подъяти призва тя, / тогда образ ангельский восприял еси, мудре, / да приидеши в меру мужа совершенна.

Всем честен явился еси, Августине, / богоданней пастве твоей, / словом и житием, кротостию и милосердием, верою и чистотою; / сего ради людие боголюбивии восхотеша / во епископы избрати тя, / да храниши Церковь от лжепастырей, / раздрати хотящих хитон Господень.

Терпение неленостное во искушениих показал еси, / гонения, поношения и заточения подъяти не убояся, / в пощениих непреклонен пребыл еси, отче, / даже и в темнице храня сия опасно.

Богородичен: Из Тебе Христос возсия, Всепетая Дево, / не остави нас милостию Твоею, / яко да славим и поем Тя, / Пречистая.

Песнь 5.

Ирмос: Божиим светом Твоим, Блаже, утренюющих Ти души любовию озари, молюся, тя ведети, Слове Божий, Истиннаго Бога, от мрака греховнаго взывающа.

Изволися Духу Святому поставити тя на свещнице / во дни мятежа и нестроения велия, / егда рыданием и плачем земля Российская огласися, / и кровьми мученическими обильно обагрися, храмы Божий попранию предашася: / возста бо диаволе ополчение на Господа и на Христа Его.

Смотрению Архипастыря следуя / и велению Матере Церкве повинуяся, / в земли Ивановстей начало положил еси / святительским подвигом твоим.

Труды святительския возложил еси на себе, Богом званный, / воистину чести сия достоин явился еси, отче, / словом премудр быв, / житием же добродетелен, / в Божественных писаниех искусен.

Богородичен: Помощницу надежную имамы Тя, Богородице, / Предстательницу о нас к Сыну Твоему, / ведаеши бо скорби сердечный чад Церкве Православныя / и слышиши молитвы их.

Песнь 6.

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Августину учителю тезоименит, премудре, / пищею евангельских словес разумно чада церковная питал еси, устнама твоима истину Христову возвещая, / верных просвещая души ученьми Богоразумия, / в Горний Иерусалим вводящими.

Епископ был еси добрый, святителю Августине, / подобает бо премудрому немудрыя просвещати, / сильному о Господе немощи слабых носити, / малодушнии укрепляти, отчаяннии утешати; / и всех к житию богоугодному управляти.

Скорбьми и печальми море житейское преходя, / «се есть путь наш», – рекл еси, святителю, / разумея, яко ни скорбь, ни теснота, / ни гонение, ни глад, ни нагота, ниже беда, / ниже смерть не возмогут разлучити от любве Христовы чада Его, / льстивии ловительства вражия отринувшия.

Богородичен: К Тебе, о Богомати, ныне слезно взываем: вонми предстательству святителя о нас / и Сыну Твоему молитвы вознеси о спасении душ наших.

Кондак, глас 2:

От юности глаголом Божественным последуя, / верен даже до смерти пребыл еси, / блаженне Августине, / святительским саном почтився, / Церкве Российския показася страж неусыпный; / и, житие твое страданиями за Христа увенчав, / преселился еси в Небесныя обители, / идеже молиши всех Владыку / умирити мир и спасти души наша.

Икос:

Похвальная принесем святителю и мученику, / доброму пастырю, овцы своя в Небесный чертог приведшу, / молитвеннику и хранителю Церкве Российския, / крепку противу врагов Ея стоятелю; / к нему же припадем, верою и любовию воспевающе: / радуйся, Единаго Бога ради на земли поживый; / радуйся, велению Его выну последовавый; / радуйся, свягительскаго избрания, аки монашескаго послушания, не уклонивыйся; / радуйся, неистовства зловерных безстрашно обличивый; / радуйся, венцем славы от Господа венчанный; / радуйся, священномучениче Августине, отче наш.

Песнь 7.

Ирмос: Росодательну убо пещь содела ангел преподбным отроком, халдеи же опаляющее веление Божие мучителя увеща вопити: благословен еси, Боже отец наших.

Истины свидетель непреложен явился еси во дни мятежа лютаго, / егда пастыри нецыи Матере Церкве отвергошася, / в смущение паству приведоша; / тогда православия ревнитель необоримый показался еси, иерарше, / и заблуждших на путь правый премудре наставил еси.

Благодати Христовы сосуде избранный, / досады и поношения, горькия обиды и уничижения, изгнания и темницы понесл еси, отче, / терпя вся сия радостно, / яко спасительный ярем Христов.

Креста Христова не постыдился еси, блаженне Августине, / анафему на богоборцы возгласил еси, / вражия прещения не убояся / и в жертву нескверну яко хлеб чистый Господеви принесеся, / с Нимже и в вечнем Царстве светло царствуеши.

Богородичен: Богородице, исцели от греховныя болезни разслабленныя души наша, / ловительствы лукавых враг сохрани ны / и славословящия Тя спаси от бед и обстояний.

Песнь 8.

Ирмос: Из пламене преподбным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

Заповедей евангельских усердный рачителю, / иноческое нестяжание и худость ризную возлюбил еси, преподобне, / в трудах, бдениих и молитвах непрестанно подвизался еси, / всякия утехи телесныя отрицаяся; / темже убо дарова ти Христос смирение нелицемерное.

Никтоже от Тебе тощ отыде, отче Августине: / был еси нищих и сирых питатель, / вдов и сирот утешитель, / обидимых заступник и покровитель, / милосердием Спасителю Христу подражая.

Земнаго ангела и небеснаго человека образ был еси пастве твоей, святителю, / постников похвало и монахов сотрудниче, / кротостию и незлобием украсился еси, / в мире премирно пожив, / от него же собрал еси духовное сокровище, / яко пчела сладкий мед от кринов сельных.

Богородичен: Воистину Ты еси христианом спасение, Владычице, / Христа бо родила еси, / спасающаго ны от вечныя смерти.

Песнь 9.

Ирмос: Бога человеком невозможно видети, на Негоже не смеют чини ангельстии взирати: тобою же, Всечистая, явися человеком слово воплощенно, егоже величающе, с небесными вои, Тя ублажаем.

Ходатай и молитвенник о нас к Богу буди, милостиве, / отыми от нас всякую злобу, вражду и злословие, / вкорени в сердцах наших мир и единодушие, / во еже благоугодити нам Господу и Владыце.

Архиерею святый, / решити и вязати власть от Бога приемый, / разреши прегрешения наша, / и путем тесным, ведущим в жизнь вечную шествовати / настави нас, молящихся тебе.

Хваление сие от нас, недостойных и окаянных, / усердно тебе приносимое, / приими милостивно, святителю и отче, / и моли Пастыреначальника Христа, / да не паки гнев Его найдет на ны разслабленнии и малодушнии, / и да утвердит во веки Церковь Русскую, / кровьми мученик от пленения безбожнаго возставленную.

Богородичен: Огнь Божественный, / воплощенное Слово Отчее рождшая, / Всесвятая Дево, / Небесным любве Божия огнем / разжзи оледеневшая сердца наша.

Светилен:

От Бога Света Небесным светом осиянный, / последовал еси Христу неуклонно путем спасительным, / просвети и нас, помраченных страстьми житейскими, / и прелести мрак отгони, / и о земном отечестве твоем молися, Августине, / новый светильниче земли Российский.

Слава и ныне, Богородичен:

Просветившая род человеческий Рождеством Твоим, / Дево Пренепорочная и Неискусобрачная, / покровом Твоим сохраняй рабы Твоя / от наветов вражиих невредимы, / да кромешныя тьмы избавимся мольбами Твоими.

На хвалитех стихиры, глас 7:

Августина святителя, / иерарха всечестна, добраго пастыря / право правивша слово Божественныя истины, / благочестия наставника и чистоты, / кладезь неисчерпаемый дарований духовных, / сосуд избранный Божия благодати, / Православия ревнителя, Церкве поборника / немолчными песньми восхвалим.

Августина, новаго мученика, / страдания мнози незлобиво претерпевша, / душу и тело, память и волю, / слово, дело и помышление / любве Божии предавша, / и лютую смерть за Христа восприявша / благочестно вернии ублажаем.

Августина преподобнаго <почтим>, / духовнаго воина непобедимаго, / иноческаго жительства истинное правило; / той бо, плотское мудрование воздержанием умертвил еси, / в безстрастия тишину одеявся, / и сердце милующее стяжав, / возмогл еси коварствий лукавых избежати.

Слава, глас 4:

Благоуханием добродетелей / Богу в чистей совести угодил еси, / и ныне в Царствии Невечернем с Ним царствуеши, / Его же моли, святителю, / стадо твое милостивно зряще, / да подаст нам братолюбие и мир, / силу и крепость и терпение неослабное, / хранити веру Православную, / в нейже отечества нашего утверждение.

И ныне, Богородичен:

Пресвятая Богородице, христиан похвало! / со святыми сродники наши / вопием к милосердию Твоему: / крове ради новых мученик пролитыя, / даруй нам, молящимся Тебе, / дух страха Божия, / дух разума и благочестия, / да паки вера православная торжествует, / земля бо Российская древле дом Твой наречеся.

Славословие великое.

На Литургии

Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми?

Апостол ко Евреем, зачало 334.

Аллилуиа, глас 2: Священницы Твои облекутся в правду, и преподобнии Твои возрадуются. Стих: Блажен муж, бояйся Господа, в заповедех Его восхощет зело.

Евангелие от Иоанна, зачало 36.

Причастен: В память вечную: