Апрель

Ме́сяца ма́рта в 19-день

Святы́я пра́ведныя Софи́и, княги́ни Слу́цкия

На вели́цей вече́рни

Блаже́н муж: ^{@1-й антифо́н. На Г@}о́споди, воззва́х: стихи́ры, глас 8:

Богоблаже́нная честна́я княги́не Софи́е,/ ми́лование ко и́скреннему/ и любо́вь я́же к Бо́гу стяжа́ла еси́,/ сего́ ра́ди благода́ть Бо́жия/ оби́льно на тебе́, ма́ти, пребы́сть.// Те́мже моли́твами твои́ми сохрани́ ве́рою блажа́щия тя.

Мо́щи твоя́ благода́тию Бо́жиею/ слепы́м прозре́ние источа́ют/ и подаю́т исцеле́ние всем, приходя́щим с ве́рою/ и прося́щим посеще́ния твоего́,/ ма́ти досточу́дная Софи́е,/ гра́да Слу́цка похвало́ и всея́ земли́ Белору́сския украше́ние./ Те́мже моли́твами твои́ми// испроси́ нам ве́лию ми́лость.

Блаже́нная Софи́е богому́драя,/ предстоя́щи с небожи́тели Престо́лу Влады́ки и Го́спода,/ непреста́нно мо́лишися о нас/ и хода́тайствуеши о всех, притека́ющих к тебе́ с ве́рою и любо́вию./ Те́мже, я́ко неусы́пну моли́твенницу и те́плую засту́пницу,// тя почита́ем вси, преди́вная.

Блаже́нная Софи́е,/ бога́тно доброде́тельми украси́лася еси́ в жи́зни вре́менней,/ смире́нием, кро́тостию, трудолю́бием и нестяжа́тельностию./ Те́мже, я́ко испо́лнену бы́вшу на земли́/ вели́ких дарова́ний Бо́жиих,// ублажа́ем тя вси, преди́вная.

О блаже́нная пра́ведная Софи́е!/ От ю́ных лет сосу́д избра́нный яви́ тя Госпо́дь,/ стоя́нием в ве́ре правосла́вней,/ терпе́нием, моли́твою, ми́лостынею,/ чистото́ю душе́вною и теле́сною./ Те́мже Небе́сному Царю́ и Влады́це всех угоди́ла еси́,/ Ему́же ны́не моли́ся// дарова́ти нам мир и ве́лию ми́лость.

Всяк язы́к да подви́жится/ к благохвале́нию пресла́вныя ма́тере на́шея Софи́и:/ ю́ноши же и де́вы, супру́ги и вдови́цы,/ Христо́ву уго́дницу и пра́ведницу похвала́ми велича́им,/ ре́вностно бо потруди́вшися/ и сла́бость же́нскую отве́ргши,/ ми́лостынею и храмозда́нием/ благоле́пие земли́ Слу́цкия умно́жила есть./ И, пресве́тлым Небе́сным венце́м украси́вшися,/ про́сит у Христа́ Бо́га/ Це́ркви единомы́слие и ми́рови мир,// и душа́м на́шим ве́лию ми́лость.

Сла́ва, глас то́йже:

Боле́зни терпя́щи,/ прия́ла еси́ благода́ть/ неду́ги душе́вныя и теле́сныя исцеля́ти,/ ма́ти честна́я Софи́е,/ и ду́хи нечи́стыя моли́твами прогоня́ти,/ всем же скорбя́щим пред Бо́гом предста́тельствовати.// Сего́ ра́ди испроси́ исцеле́ния нам и ве́лия ми́лости.

И ны́не, Богоро́дичен: Царь Небе́сный:

Вход. Проки́мен дне. И чте́ния три́.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние Свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух cи́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гу быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́диe же ви́девше и не разуме́вше,/ ниже́ поло́жше в помышле́нии таково́е./ Я́ко благода́ть и ми́лость в преподо́бных Его́,/ и посеще́ние во избра́нных Его́.

На лити́и стихи́ра, глас 8:

Достохва́льная и блаже́нная Софи́е,/ честна́го ко́рене порожде́ние свя́то,/ прему́дрости соиме́нна еси́,/ благи́ми де́лы украси́лася еси́,/ ми́лостынями, чистото́ю и пра́вдою/ сосу́д Свята́го Ду́ха была́ еси́./ И́мже де́йствуеши пресла́вная чудеса́,/ ве́рою приходя́щим к ра́це моще́й твои́х,// и мо́лишися о душа́х на́ших.

Сла́ва, и ны́не, Богоро́дичен, глас 5: Храм и дверь еси́:

На стихо́вне стихи́ры, глас 1:

Сла́вы отце́в вои́стину возжела́вши,/ ве́ру правосла́вную возлюби́ла еси́,/ те́мже отсту́пльши нечести́вых,/ житие́м твои́м Бо́гу усе́рдно послужи́ла еси́,/ Софи́е богому́драя,/ и ны́не на Небесе́х прие́млеши мзду,// со Христо́м ца́рствующи.

Стих: Честна́ пред Го́сподем// смерть преподо́бных Его́.

В приста́нище Боже́ственное устреми́вшися,/ прешла́ еси́ во́лны мирски́х мяте́жей:/ и души́ своея́ кора́бль, всечестна́я,// невреди́мь от потопле́ния грехо́внаго сохрани́ла еси́.

Стих: Ди́вен Бог во святы́х Свои́х,// Бог Изра́илев.

Ра́ка моще́й твои́х, блаже́нная княги́не Софи́е,/ я́коже сокро́вище честно́е яви́ся,/ ю́же обстоя́ще,/ исцеле́ние неду́гом на́шим// моли́твами твои́ми прие́млем.

Сла́ва, глас 6:

Возсия́ днесь со́лнца светле́йше,/ свяще́нное твое́ торжество́, Софи́е пра́ведная,/ земли́ Слу́цкия похвало́,/ су́щим во тьме ду́ши озаря́ющее,/ мрак же бесо́вский всегда́ отгоня́ющее,// досточу́дная.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́./ Тебе́ мо́лимся: моли́ся, Влады́чице,/ со святы́ми апо́столы,// поми́ловати ду́ши на́ша.

Тропа́рь, глас 5:

Свята́я пра́ведная ма́ти Софи́е,/ нетле́нием моще́й и чуде́с сия́нием почти́ тя Бог;/ и мы, помина́юще твое́ пра́ведное житие́,/ мо́лим тя испроси́ти/ телесе́м на́шим здра́вие// и душа́м спасе́ние.

Сла́ва, и ны́не, Богоро́дичен: Ра́дуйся, две́ре Госпо́дня непроходи́мая:

На у́трени

На Бог Госпо́дь: тропа́рь то́йже.

По 1-м стихосло́вии седа́лен, глас 5:

Му́жески по́двиги воздержа́нием претерпе́вши,/ низложи́ла еси́ многоко́зненнаго/ и, в терпе́нии пожи́вши благоче́стно,/ пра́ведная Софи́е княги́не Слу́цкая,/ ны́не прешла́ еси́ к Бо́гу,/ моля́щися о соверша́ющих свяще́нное твое́ торжество́. Два́жды.

Сла́ва, и ны́не, Богоро́дичен:

Всенепоро́чная ма́ти, возсия́й ми покая́ния лучу́/ и, разори́вши мрак безме́рных мои́х зол,/ лука́выя отжени́, Де́во, по́мыслы се́рдца моего́.

По 2-м стихосло́вии седа́лен, глас 2:

Се ра́ка даро́в благода́тных, се исто́чник целе́бный,/ святы́я показа́шася мо́щи,/ те́мже прииди́те, ве́рнии, усе́рдно почерпне́м ны́не:/ боля́щии – исцеле́ния, и и́же во ско́рбех – ра́дости./ Моли́твами блаже́нныя Софи́и Слу́цкия,/ Го́споди, Це́рковь на́шу неруши́му сохрани́.

Сла́ва, и ны́не: Преблагослове́нна еси́:

Велича́ние:

Велича́ем тя,/ свята́я пра́ведная княги́не Софи́е,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный:

Терпя́ потерпе́х Го́спода, и внят ми, и услы́ша моли́тву мою́.

Поста́ви на ка́мени но́зе мои́, и испра́ви стопы́ моя́.

По полиеле́и седа́лен, глас 8:

Предызбра́нная от Бо́га, пра́ведная Софи́е,/ ко приста́нищу жи́зни наставля́ема,/ жития́ бу́рю претекла́ еси́./ И ны́не со А́нгелы песносло́вящи Изба́вителя,/ моли́ непреста́нно о нас,/ я́ко да благода́ть и ми́лость обря́щем у Христа́, Бо́га на́шего. Два́жды.

Сла́ва, и ны́не, Богоро́дичен:

Ра́дуйся, А́нгелом ра́дость ми́ра прие́мшая./ Ра́дуйся, ро́ждшая Творца́ Твоего́ и Го́спода./ Ра́дуйся, сподо́бльшаяся бы́ти Ма́ти Бо́жия.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Ева́нгелие от Матфе́я, зача́ло 104.

По 50-м псалме́ стихи́ра, глас 6:

Возсия́ днесь со́лнца светле́йше,/ свяще́нное твое́ торжество́, Софи́е пра́ведная,/ земли́ Слу́цкия похвало,/ су́щим во тьме ду́ши озаря́ющее,/ мрак же бесо́вский всегда́ отгоня́ющее,// досточу́дная.

Кано́н, глас 8.

Песнь 1.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре:/ Изра́иля же беглеца́, пешехо́дца спасе́,// песнь Бо́гови воспева́юща.

Стра́стными бу́рями всю́ду погружа́ему, и помышле́нии грехо́вными коле́блему,/ ко приста́нищу ти́хому Христо́вых за́поведей, моли́твами твои́ми, пра́ведная Софи́е, мя напра́ви,/ да досто́йно тя воспою́.

Боже́ственными добро́тами просвеще́на, богоблаже́нная Софи́е,/ Сло́ву Преве́чному уневе́стилася еси́, пожи́вши богоуго́дне,/ и Того́ живоно́сным стопа́м после́довала еси́, ве́ру правосла́вную житие́м твои́м утвержда́ющи.

Боже́ственных оте́ц наказа́нию после́довала еси́, сла́вная Софи́е,/ и сих нра́ву чи́сте поревнова́ла еси́, по зако́ну Бо́жию пра́ведно пожи́вши,/ до́брыми де́лы Бо́гу угоди́вши, богому́драя, и и́стинным смире́нием.

Богоро́дичен: Боже́ственную ста́мну и трапе́зу, Хлеб живо́тный поне́сшую,/ неде́ланную ни́ву, го́ру святу́ю, Богоро́дицу Де́ву пе́сньми просла́вим.

Песнь 3.

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

В Небе́сныя черто́ги светоза́рныя всели́вшися,/ исцеле́ния нам ре́ки источа́еши, прему́драя Софи́е, стра́стная тече́ния изсуша́ющи.

Украси́лася еси́ жела́нием кра́йним, жела́ющи Христа́,/ премно́жеством благосе́рдия пло́тию обнища́вшаго,/ и после́довала еси́ живо́тным Его́ словесе́м, жите́йская вся кра́сная возненави́девши.

Позлаще́нне криле́ доброде́тели стяжа́вши,/ на высоту́ Небе́сную возлете́ла еси́, блаже́нная Софи́е, я́ко голуби́ца непоро́чная.

Богоро́дичен: Род челове́ческий спасе́ся, Всенепоро́чная, всесла́вным Рождество́м Твои́м:/ те́мже чтим Тя, и благоче́стно ублажа́ем, Пречи́стая Де́во Богора́дованная.

Седа́лен, глас 4:

Добро́тами боже́ственными преукра́шена/ и нетле́нием святы́х моще́й твои́х от Бо́га просла́влена, пра́ведная Софи́е,/ к Нему́ в нетле́нный черто́г вошла́ еси́,/ иде́же мо́лишися непреста́нно спасти́ся от вся́кия беды́ любо́вию тя почита́ющим.

Сла́ва, и ны́не, Богоро́дичен:

Чи́стая, Всенепоро́чная и Неискусобра́чная Де́во,/ еди́на Безле́тное Сло́во Бо́жие в ле́то ро́ждшая:/ Того́ со святы́ми и честны́ми апо́столы, му́ченики и проро́ки, и преподо́бными/ моли́ дарова́ти нам очище́ние и ве́лию ми́лость.

Песнь 4.

Ирмо́с: Услы́шах Го́споди,/ смотре́ния Твоего́ та́инство:/ разуме́х дела́ Твоя́,// и просла́вих Твое́ Божество́.

Све́тлое твое́ торжество́, све́том Ду́ха Бо́жия сия́ющее,/ озаря́ет ду́ши на́ша, ве́рою пою́щих тя, Софи́е пра́ведная.

Чудесы́ боже́ственными уве́рила еси́ неве́дущих Влады́ку Христа́,/ и к позна́нию Того́ обрати́ла еси́ пре́лести тьму оста́вльших.

Да́ры Христу́ принесла́ еси́, моли́твы и труды́ воздержа́ния:/ сего́ ра́ди прия́ла еси́ Небе́сное Ца́рство, Софи́е, и ве́чнующее наслажде́ние.

Богоро́дичен: Смири́вши спаси́ мя, высокому́дрием живу́щаго,/ ро́ждшая Возне́сшаго смири́вшееся естество́ на́ше, Пречи́стая.

Песнь 5.

Ирмо́с: У́тренююще вопие́м Ти,/ Го́споди, спаси́ ны:/ Ты бо еси́ Бог наш,// ра́зве Тебе́ ино́го не ве́мы.

Рука́ма твои́ма преподо́бно воздвиза́емыма к Зижди́телю,/ ма́ти Софи́е, вра́жия шата́ния низложи́ла еси́.

Удержа́в ру́ку твою́ десну́ю Вы́шний,/ наста́вил тя есть, ма́ти, к Небе́сному наслажде́нию.

Стезю́ те́сную проше́дши в житии́ твое́м,/ к широте́ приспе́ла еси́ ра́йстей, Софи́е всечестна́я.

Богоро́дичен: И́же Богоро́дицу Тя неве́дущии, Богома́ти,/ Све́та не и́мут ви́дети Ро́ждшагося из Тебе́, Пречи́стая.

Песнь 6.

Ирмо́с: Ри́зу мне пода́ждь све́тлу,/ одея́йся све́том я́ко ри́зою,// многоми́лостиве Христе́ Бо́же наш.

Умертви́вши двиза́ния плотска́я, над страстьми́ вельми́ воцари́лася еси́,/ и ны́не, всечи́стая Софи́е, в безстра́стных живе́ши све́тлостех.

О́бразу Спа́сову навы́кла еси́ покланя́тися, сла́вная,/ де́лы и словесы́ твои́ми спаси́тельная Его́ соблюда́ющи уче́ния.

О́блак тя Христо́с показа́, ма́ти Софи́е,/ дождь источа́ющий живо́тный ве́рою притека́ющим к тебе́, пресла́вная.

Богоро́дичен: Красе́н па́че всех челове́к Сын Твой, Пречи́стая, добро́тою Божества́,/ а́ще и плоть бысть нас ра́ди.

Конда́к, глас 4:

Прииди́те, вся ру́сския жены́,/ святу́ю Софи́ю восхва́лим,/ уподо́бившуюся му́дрым де́вам,/ еле́й благода́ти Ду́ха Свята́го стяжа́вшим;/ те́мже умудри́ ю́ Госпо́дь/ подвиза́тися во утвержде́ние святы́я правосла́вныя ве́ры/ и соблюда́ти Це́рковь Его́/ незы́блему от ересе́й и раско́лов,/ сего́ ра́ди благода́рне воспои́м ей:/ ра́дуйся, гра́да Слу́цка и всея́ земли́ на́шея// ра́досте и утвержде́ние.

И́кос:

Струи́ мне сло́ва даждь, Бо́же мой, и исто́чник благочи́ния сотвори́ мой ум,/ и благослови́ язы́к мой, да воспою́ уго́дницу Твою́ Софи́ю богому́друю,/ ю́же венча́л еси́ бла́гостию Твое́ю:/ а́ще бо Сам не да́си ми сло́ва досто́йнаго,/ ка́ко принесу́ дар, ни́щий сый,/ те́мже пода́ждь ми си́лу, испове́дати ея по́двиги,/ кре́пко бо зве́ри мы́сленныя победи́ла есть./ Моли́твами ея́, Спа́се, утверди́ и моя́ помышле́ния.

Песнь 7.

Ирмо́с: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

О добро́те тле́ющей, Софи́е блаже́нная, зде небрегла́ еси́,/ сматря́ющи та́мо су́щая воздая́ния и свет,/ и сла́ву Бо́жию нестаре́ющуюся и красоту́, и Боже́ственное селе́ние.

Ра́зум боголюби́в стяжа́ла еси́, Софи́е,/ и, во пло́ти су́щи, А́нгелом уподо́билася еси́, бдя́щи бо́дренне и любо́вию пою́щи:/ благослове́н еси́, Го́споди Бо́же, во ве́ки.

Богоро́дичен: Виждь скорбь мою́, Де́во, ю́же ми наведе́ мно́жество зол мои́х,/ и родства́ о́гненнаго исхити́ мя, вопию́щаго:/ благослове́н еси́, Го́споди Бо́же, во ве́ки.

Песнь 8.

Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Укра́шена сия́нием чистоты́, и чи́стым житие́м просвеще́на,/ Софи́е Богому́драя, предстои́ши Христу́ Бо́гу на́шему.

Боле́зни разли́чныя врачу́ет челове́ков, и отгоня́ет бесо́вския напа́сти/ те́ло твое́ свято́е, в ра́це пресла́вно храни́мое.

Свяще́нная же́ртва принесла́ся еси́, и приноше́ние све́тлое, пра́ведная княги́не Софи́е,/ я́ко кади́ло благоуха́нное, всех Влады́це Христу́ Бо́гу на́шему.

Богоро́дичен: Без истле́ния Сло́во па́че словесе́ родила́ еси́,/ тле́ния вся́каго нас избавля́ющее:/ сего́ ра́ди Тя, Де́во, ве́рою велича́ем.

Песнь 9.

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв челове́к.// Те́мже Пречи́стую Богоро́дицу ве́рнии велича́ем.

Возжеле́ла еси́ добро́ту мы́сленную Христо́ву, и чи́сто возлюби́ла еси́ Его́./ Где почива́еши? где ли пасе́ши? –/ те́пле вопия́ла еси́, – да почи́ю у тебе́, и в Твои́х све́тлостех наслажду́ся,/ велича́ющи Твою́ бла́гость.

Ра́зум име́ла еси́ в твое́й души́, и смире́ние, и боже́ственную кро́тость,/ ве́ру несумне́нну, и наде́жду и любо́вь, я́же к Бо́гу,/ всено́щными моли́твами предстоя́вши Ему́,/ и Небе́сными све́тлостьми, блаже́нная Софи́е, озаря́ема и просвеща́ема.

Днесь собра́шася лю́дие/ хвала́ми возвели́чити Го́спода, возвели́чившаго твое́ свято́е торжество́:/ в не́мже помина́й нас, помина́ющих тя,/ предстоя́щи Христу́, пра́ведная Софи́е и всечестна́я.

Богоро́дичен: Пощади́ мя, Бо́же, рожде́йся от Де́вы, егда́ ся́деши суди́ти дела́ моя́,/ и Тоя́ моли́твами пре́зри беззако́ния и грехи́ моя́, я́ко Благ и Многоми́лостив.

Свети́лен:

Кня́зя утаи́вшися студа́, и сего́ в прему́дростнем о́бразе показа́ безу́мна,/ жена́ су́щи душе́ю и те́лом, возсия́ла еси́ я́ко муж ра́зумом и ве́рою,/ ма́ти Софи́е, жен пра́ведных украше́ние.

Сла́ва, и ны́не, Богоро́дичен:

День мне возсия́й разу́мнаго весе́лия,/ Ты бо еси́, Чи́стая, свет и живо́т, су́щих во тьме:/ вся бо, а́ще хо́щеши, твори́ти мо́жеши, я́ко су́щи всех Влады́чица.

На хвали́тех стихи́ры, глас 4:

Свяще́нное жили́ще Бо́гу/ воздви́гла еси́, бы́вши храм Свята́го Ду́ха,/ всему́драя, чистото́ю душе́вною,/ и путеводи́ла еси́ ду́ши к Ца́рствию Небе́сному,/ и принесла́ еси́ сия́, я́коже дар Христу́,// о Софи́е пресла́вная.

Отрокови́цы возлюби́ша Неве́стника и Го́спода,/ уче́нию твое́му покаря́ющияся,/ и плотску́ю презре́вше сла́бость,/ усе́рдием благоче́стно стра́сти победи́ша,/ и введо́шася с тобо́ю, о Софи́е,/ в черто́г Небе́сный и Боже́ственный,// всегда́ веселя́щеся.

Ми́лость име́ла еси́ ве́лию к бе́дствующим,/ любо́вь же и́стинную к Бо́гу,/ сего́ ра́ди благода́ть Христо́ва/ в тебе́, ма́ти, почи́ла есть,/ те́мже твои́ми моли́твами// сохрани́ ве́рою блажа́щия тя.

Ра́ка твоя́ честна́я,/ в не́йже почива́еши моща́ми ны́не,/ источа́ет всем исцеле́ние,/ ве́рою притека́ющым к тебе́,/ ма́ти честна́я и досточу́дная. /Те́мже твои́ми моли́твами// спаса́й нас, пою́щих тя.

Сла́ва, глас 8:

О, пресла́внаго чудесе́!/ Усе́рдно себе́ Бо́гу предала́ еси́,/ ни́ву се́рдца твоего́ очи́стивши/ от те́рния душевре́дных страсте́й,/ за́поведи Бо́жия испо́лнила еси́,/ и Творца́ ми́лостынею уми́лостивила еси́,/ сего́ ра́ди сугу́бое воздая́ние/ от Бо́га получи́ла еси́,/ Софи́е, княги́не богоблаже́нная,/ моли́ Христа́ Бо́га// дарова́ти нам ве́лию ми́лость.

И ны́не, Богоро́дичен:

Арха́нгела Гаврии́ла глас восприи́мше, рцем:/ ра́дуйся, ма́ти Бо́жия,// я́же Жизнода́вца Христа́ ми́ру ро́ждши.

На литурги́и

Блаже́нны от кано́на, пе́сни 3-я и 6-я. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Спасе́ние пра́ведных от Го́спода, и Защи́титель их есть во вре́мя ско́рби. Ева́нгелие от Ма́рка, зача́ло 21. Прича́стен: Ра́дуйтеся, пра́веднии, о Го́споде:

Моли́тва

О, свята́я пра́ведная ма́ти на́ша, блаже́нная княги́не Софи́е, приими́ ми́лостивно приноше́ние ве́ры, наде́жды и любве́ на́шея и вознеси́ е́ ко Го́споду, и я́коже в земне́м животе́ твое́м была́ еси́ помо́щница и засту́пница всем правосла́вным христиа́ном земли́ твоея́, та́ко и ны́не укрепи́ нас тве́рдо и непоколеби́мо до сме́рти стоя́ти за ве́ру правосла́вную, согре́й сердца́ на́ша любо́вию ко Го́споду и Пречи́стей Его́ Ма́тери. Умоли́ Христа́ Бо́га на́шего, да сохрани́т Це́рковь Свою́ Святу́ю от раско́лов и ересе́й, да утверди́т в ней дух пра́выя ве́ры и благоче́стия, дух ве́дения и любве́, дух ми́ра и ра́дости ве́чныя, да вся ча́да ея́ ду́хом и и́стиною покланя́ются Ему́, да укрепи́т ве́рных в благоче́стии и свя́тости жи́зни, да обрати́т отпа́дших от Правосла́вныя Це́ркве во свята́я не́дра ея́. О свята́я ма́ти, гра́да Слу́цка похвало́ и ра́досте, умоли́ Го́спода, да изба́вит град твой и всю страну́ на́шу от гла́да, тру́са, пото́па, огня́, меча́, наше́ствия иноплеме́нных и междоусо́бныя бра́ни, от смертоно́сныя я́звы, да низпо́слет прави́телем на́шим усе́рдие, му́дрость и ве́рность, да управля́ют и су́дят по во́ле Его́, да храня́т установле́ния Святы́я Це́ркве. Испроси́ всем с ве́рою притека́ющим к ра́це святы́х моще́й твои́х ми́рное житие́, тишину́, просвеще́ние умо́в и серде́ц, соблюди́ их от ко́зней вра́жиих, от собла́знов ми́ра, во зле лежа́щаго, и от вся́кия ско́рби и ну́жды, обрати́ нас к покая́нию и исправле́нию, да́руй заблу́ждшим и́стины позна́ние, неду́гующим исцеле́ние. Сохрани́ нас благода́тными твои́ми моли́твами от всех враго́в ви́димых и неви́димых и изба́ви от вся́каго зла, да просла́вим во вся дни жи́зни на́шея Отца́, и Сы́на, и Свята́го Ду́ха, и твое́ заступле́ние во ве́ки веко́в. Ами́нь.

Источник: Текст утвержден Священным Синодом Русской Православной Церкви 25 декабря 2013 года (журнал № 146)

Ме́сяца ма́рта в 21-й день

Преподо́бнаго Серафи́ма Вы́рицкаго

На вели́цей вече́рни

На Го́споди, воззва́х: стихи́ры, глас 5:

Ра́дуйся, Це́рковь Ру́сская,/ ты бо в го́ды гоне́ний безбо́жных/ со́нмом святы́х уго́дников украси́лася еси́,/ и́же Христу́ Спа́су ве́рность соблюдо́ша/ и ве́ры ра́ди гоне́ния лю́тая претерпе́ша,/ в ни́хже сия́ет преподо́бный Серафи́м Вы́рицкий,/ я́ко звезда́ пресве́тлая,/ те́плый пред Бо́гом моли́твенник// и до́брый па́стырь ста́да Христо́ва.

Ра́дуйся, Серафи́ме пречу́дне,/ ты бо, до́брую ку́плю в житии́ соверши́в,/ бога́тству земно́му никогда́же свое́ се́рдце прилага́л еси́,/ но от ю́ности сокро́вища нетле́нная собира́я,/ о́браз доброде́тели в ми́ре яви́л еси́,/ сло́ву же Госпо́дню после́дуя,/ име́ние оста́вил еси́/ и, и́го Христо́во восприе́м,// к соверше́нству ева́нгельскому поте́кл еси́.

Ра́дуйся, Серафи́ме пречу́дне,/ ты бо, от ю́ности послуша́нию навы́к,/ во́ли Бо́жией невозвра́тным по́мыслом после́довал еси́,/ те́мже па́стырь до́брый и му́дрый показа́вся,/ Ду́хом Бо́жиим па́ству твою́ усе́рдно упа́сл еси́/ и, волко́в хи́щных не убоя́вся,/ ду́шу за о́вцы слове́сныя положи́л еси́,// сего́ ра́ди ны́не ублажа́ешися.

Ра́дуйся, Серафи́ме пречу́дне,/ ты бо я́ко сосу́д Бо́жий избра́нный яви́лся еси́/ и, вся за́поведи Госпо́дни до́бре сохраня́я,/ ча́да твоя́ Тому́ Еди́ному угожда́ти научи́л еси́,/ благода́тию же Бо́жиею при́сно осиява́емь,/ све́тел лице́м, я́ко Моисе́й, показа́лся еси́./ Те́мже и всем притека́ющим к тебе́// исто́чник воды́ живо́тныя явля́ешися.

Ра́дуйся, преподо́бне Серафи́ме,/ ты бо в по́двизе кре́пцем поста́ и моли́твы/ предста́тель за всю зе́млю Росси́йскую яви́лся еси́,/ во бде́ниих ко Го́споду ру́це воздева́я,/ о избавле́нии от враг ви́димых и неви́димых хода́тайствовал еси́,/ утеша́я и исцеля́я боле́знующия те́лом и душе́ю./ Ны́не же, в селе́ниих ра́йских водворя́яся,// не премолчи́ за ны ко Го́споду.

Сла́ва, глас 1:

О ди́вное чу́до!/ Во мра́це безбо́жия и гоне́ний на Це́рковь Ру́сскую/ Серафи́м Вы́рицкий свет лю́дем быва́ет,/ па́стырь духо́вный и чадолюби́вый,/ моли́твенник пла́менный и дерзнове́нный,/ исто́чник утеше́ния и исцеле́ний,/ к нему́же с любо́вию возопии́м:/ испроси́ чту́щим с любо́вию па́мять твою́// мир и ве́лию ми́лость.

И ны́не, Богоро́дичен: Всеми́рную сла́ву:

Вход. Проки́мен дне. Чте́ния преподо́бническая.

На лити́и стихи́ры, глас 5:

Ра́дуйся, земле́ Петербу́ржская,/ се бо принесла́ еси́ Го́сподеви ве́лий сонм святы́х уго́дник:/ святи́тели и иере́и пра́ведныя,/ священному́ченики и испове́дники,/ с ни́миже и преподо́бныя отцы́,/ от ни́хже, я́ко цвет благоуха́нный,/ да восхва́лится днесь ста́рец преди́вный,// чудотво́рец Серафи́м достоблаже́нный.

Глас 6:

Глас моли́твенный в ве́си Вы́рицтей возно́сится,/ Серафи́м бо преподо́бный/ хода́тайствует пред Бо́гом о лю́дех правосла́вных,/ угнета́емых и убива́емых от власте́й безбо́жных,/ да не оскуде́ют ве́рою в Про́мысл Бо́жий/ и в терпе́нии, Христа́ Бо́га прославля́юще,// ве́рными ча́дами Це́ркве Правосла́вныя пребу́дут.

Сла́ва, глас 2:

Се, яви́ нам Влады́ка Христо́с ми́лость Свою́ бога́тую,/ не попусти́ бо оскуде́ти преподо́бному до конца́,/ ниже́ пра́ведному Своему́ ви́дети истле́ния,/ се бо ны́не преподо́бный Серафи́м,/ предстоя́ Престо́лу Святы́я Тро́ицы,// те́пле мо́лится о спасе́нии душ на́ших.

И ны́не, Богоро́дичен, глас то́йже:

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,// я́ко неруши́мей Стене́ и Предста́тельству.

На стихо́вне стихи́ры, глас 8.

Подо́бен: О, пресла́внаго чудесе́:

О, преди́внаго чудесе́!/ Я́ко еди́н от дре́вних,/ подви́жник ве́ры и благоче́стия/ в Алекса́ндро-Не́встей ла́вре явля́ется/ и насле́дник благода́тных даро́в/ преподо́бнаго Варна́вы Гефсима́нскаго быва́ет,/ ему́же возопии́м с любо́вию:/ ра́дуйся, преподо́бне Серафи́ме,// те́плый наш пред Бо́гом моли́твенниче.

Стих: Честна́ пред Го́сподем/ смерть преподо́бных Его́.

О, пресла́внаго чудесе́!/ О, глубины́ про́мысла Бо́жия!/ Свети́льник ве́ры преди́вный/ в ма́лой ве́си Вы́рицтей/ от гоне́ний соблюда́ется/ и мно́гия лю́ди све́том Христо́вы ве́ры просвеща́ет,/ ему́же возопии́м с любо́вию:/ ра́дуйся, преподо́бне Серафи́ме,// кре́пкий наш пред Бо́гом предста́телю.

Стих: Восхва́лятся преподо́бнии во сла́ве/ и возра́дуются на ло́жах свои́х.

О, пресла́внаго чудесе́!/ Богому́дрый наста́вник/ и прови́дец бу́дущих/ Серафи́м Вы́рицкий быва́ет/ и оби́льныя да́ры благода́ти/ всем прося́щим источа́ет,/ ему́же возопии́м с любо́вию:/ ра́дуйся, преподо́бне Серафи́ме,// благода́тный наш пред Бо́гом засту́пниче.

Сла́ва, глас то́йже:

Мона́хов мно́жество,/ архиере́е, свяще́нницы и вси лю́дие,/ ны́не соше́дшеся, просла́вим преподо́бнаго Серафи́ма,/ пла́меннаго служи́теля Госпо́дня,/ миря́ном пра́вило изве́стнейшее/ и и́ноком честну́ю похвалу́,/ челове́ком до́браго наста́вника/ и А́нгелом преди́внаго собесе́дника./ К нему́же с любо́вию возопии́м:/ моли́ся, блаже́нне, Го́сподеви// поми́ловатися душа́м на́шим.

И ны́не, Богоро́дичен, глас то́йже:

Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,// моли́ спасти́ся всем нам.

Тропа́рь, глас 4:

Я́ко пресве́тлая звезда́ Росси́йския земли́,/ возсия́л еси́ в ве́си Вы́рицтей,/ преподо́бне Серафи́ме,/ и благода́тию Свята́го Ду́ха наставля́емь,/ све́том чуде́с твои́х страну́ на́шу озари́л еси́./ Те́мже ко гро́бу твоему́ притека́юще, уми́льно глаго́лем:// моли́ Христа́ Бо́га спасти́ся душа́м на́шим.

На у́трени

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен: Е́же от ве́ка утае́ное:

По 1-й стихоло́гии седа́лен, глас 4:

Я́ко со́лнце, возсия́в,/ заря́ми блиста́еши всему́ ми́ру чудесы́ и по́двиги твои́ми,/ преподо́бне Серафи́ме Вы́рицкий чудотво́рче,/ светоно́сче, блаже́нне, земли́ на́шея похвало́.

Сла́ва, и ны́не, Богоро́дичен, глас то́йже:

Под кров Твой, Пречи́стая Де́во, прибега́ющих не пре́зри/ и мольбу́ принеси́ о нас Человеколю́бцу Бо́гу,/ спасти́ся рабо́м Твои́м.

По 2-й стихоло́гии седа́лен, глас 1:

Пра́ведно на земли́ пожи́в, о́тче богоно́се,/ ны́не со все́ми святы́ми лику́еши на Небесе́х./ Помина́й ны, творя́щия па́мять твою́,/ Серафи́ме преди́вне.

Сла́ва, и ны́не, Богоро́дичен, глас то́йже:

Непости́жно чу́до зача́тия/ и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет ум и удивля́ет помышле́ние,/ сла́ва Твоя́, Богоро́дице, всем простре́ся во спасе́ние душ на́ших.

По полиеле́и седа́лен, глас 8:

Стра́сти плотски́я и душе́вныя послуша́нием и по́двигом укроти́в,/ сосу́д избра́нный ми́ра благоуха́ннаго испо́лнь,/ ду́шу свою́ непоро́чну Бо́гу соблю́л еси́,/ и прия́л еси́ от Спа́са благода́ть Свята́го Ду́ха/ исцеля́ти стра́ждущих телеса́ и ду́ши ве́рных просвеща́ти,/ сего́ ра́ди благода́рственно вопие́м ти:/ о́тче Серафи́ме, моли́ Христа́ Бо́га о спасе́нии душ на́ших.

Сла́ва, и ны́не, Богоро́дичен, глас то́йже:

Изли́й, Пресвята́я Де́во,/ от мно́гих щедро́т Сы́на Твоего́ ми́лости неизрече́нныя/ на тща́щихся прославля́ти уго́дники Его́,/ при́сно предста́тельствующи с ни́ми о спасе́нии душ на́ших.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возлю́блен бысть Бо́гом от ю́ности твоея́,/ преподо́бне о́тче Серафи́ме,/ еще́ в миру́ ти су́щу Го́споду угоди́л еси́,/ наипа́че же в священнои́ночестве Ду́ха Свята́го благода́ть приумно́жил еси́,/ предста́телю те́плый за зе́млю на́шу,/ и́ноком же́зле кре́пости и всем тре́бующим по́мощи чудотво́рный пода́телю,// испроси́ и нам от Христа́ мир и ве́лию ми́лость.

Кано́н, его́же краегране́сие: Ка́ко воспое́м тя по до́лгу, Серафи́ме чу́дне. Глас 2

Песнь 1.

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,// сла́вно бо просла́вися.

Ка́ко возмо́жем досто́йно воспе́ти твое́ богоуго́дное житие́, Серафи́ме преподо́бне?/ От ю́ности бо Христу́ любо́вию уязви́вся,/ свети́льник пресве́тлый мно́гим яви́лся еси́./ Те́мже мо́лим тя:/ да́руй и нам просвеще́ние досто́йно тя сла́вити.

А́нгелом собесе́дник яви́лся еси́ изря́дный, свя́те,/ пре́жде бо жития́ и́ноческаго во́лю Бо́жию о себе́ исправля́я,/ в ми́ре благоче́стно пожи́л еси́/ и ду́шу Го́споду в сосу́д избра́нный угото́вал еси́.

К Бо́гу ум твой вперя́я, о́тче преподо́бне,/ стра́сти многоразли́чныя смире́нием и житие́м многотру́дным умертви́л еси́/ и в ра́дости всем тре́бующим твоея́ по́мощи послужи́л еси́.

Богоро́дичен: О Пречи́стая Де́во Богоро́дице,/ не пре́зри нас гре́шных, тре́бующих Твоея́ по́мощи и заступле́ния,/ и бу́ди нам Хода́таица,/ да покая́нием обря́щем отпуще́ние грехо́в и живо́т ве́чный.

Песнь 3.

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая це́рковь, прише́ствием Твои́м,// в не́йже утверди́ся мое́ се́рдце.

Ве́рным ча́дом преподо́бнаго ста́рца Варна́вы Гефсима́нскаго яви́лся еси́, свя́те,/ усе́рдно послуша́ние ему́ во всем явля́я./ Те́мже и сподо́бился еси́ от него́ бы́ти насле́дник благода́ти и даро́в духо́вных.

О́тче преподо́бне,/ ты попече́ние о убо́гих при́сно име́я,/ не возгнуша́лся еси́ послужи́ти о́ным твои́ма рука́ма,/ показу́я, я́ко всяк челове́к се́рдцу твоему́ возлю́блен есть.

Словеса́ а́ввы твоего́ Варна́вы до́бре исполня́я,/ на стра́сти вельми́ подвиза́лся еси́./ Сего́ ра́ди, мно́гими доброде́тельми от Бо́га укра́шен,/ дом Трисо́лнечнаго Све́та яви́лся еси́, преподо́бне.

Богоро́дичен: Преблагослове́нная, Всенепоро́чная Богоро́дице Мари́е,/ ро́ждшая нам Сло́во Бо́жие, от греха́ избра́нныя Своя́ изба́вившее,/ заступи́ и спаси́ ду́ши на́ша.

Седа́лен, глас 3:

Возра́дуйся, гра́де свята́го Петра́,/ и ма́лая ве́се Вы́рице, возвели́чися,/ се бо свети́льник ве́ры но́вый Серафи́м,/ пропове́дник любве́ и покая́ния явля́ется/ и, да́ры Боже́ственныя ще́дро источа́я,/ мо́лится о душа́х на́ших.

Сла́ва, и ны́не, Богоро́дичен:

Я́ко невозде́ланная, Де́во, Лоза́, красне́йший Грозд прозя́бла еси́,/ источа́ющ нам вино́ спасе́ния, всех веселя́щее ду́ши и телеса́./ Те́мже, я́ко вину́ Тя до́брых блажа́ще при́сно со А́нгелы, вопие́м Ти:/ ра́дуйся, Благода́тная.

Песнь 4.

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя челове́ка./ Тем зову́ Ти:// сла́ва си́ле Твое́й, Го́споди.

О́чи се́рдца ко Творцу́ вся́ческих впери́в/ и на Бо́га Еди́наго упова́ние возложи́в, преподо́бне Серафи́ме,/ и́ноческий о́браз восприя́л еси́/ и во дни гоне́ний ко́зни вра́жия му́жественне претерпе́л еси́.

Ева́нгельских за́поведей и́стинный после́дователь яви́лся еси́, преподо́бне,/ те́мже ле́ствицею доброде́телей к соверше́нству многотру́дне восходи́л еси́,/ вся́кое послуша́ние до́бре исполня́я и моли́тву в се́рдце непреста́нно соверша́я.

Мона́шеское житие́ в ми́ре взыску́я и жите́йских трудо́в не отвраща́яся,/ от ю́ности до́брый наста́вник всем яви́лся еси́, о́тче Серафи́ме,/ сего́ ра́ди са́на иере́йскаго от священному́ченика Вениами́на Петрогра́дскаго удосто́ился еси́.

Богоро́дичен: Тебе́, Де́во, еди́ну вси ве́рнии стяжа́хом Засту́пницу тве́рду,/ Ты бо Бо́га родила́ еси́ нам,/ сего́ ра́ди хвала́ми, Чи́стая, Тя ублажа́ем по глаго́лу Твоему́.

Песнь 5.

Ирмо́с: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения,//приведе́ние и́мамы.

Я́ко свети́льник не мо́жет укры́тися, верху́ горы́ стоя́,/ та́ко труды́ и по́двизи твои́, преподо́бне Серафи́ме, я́же в ке́лии вта́йне соверша́л еси́, яви́ша тя ми́ру./ Сего́ ра́ди ла́врская бра́тия и мирсти́и лю́дие притека́ху к тебе́, наставле́ния взыску́я.

Посреде́ бу́ри тя́жких гоне́ний/ и лю́тых испыта́ний тверд и непоколеби́м пребы́л еси́, преподо́бне Серафи́ме,/ те́плую моли́тву непреста́нно ко Го́споду возсыла́я/ и науча́я всех твори́ти святу́ю во́лю Его́.

О́браз а́нгельский, вели́кую схи́му, прие́м, о́тче,/ и́менем преподо́бнаго Серафи́ма, уго́дника Саро́вскаго, нарече́н был еси́,/ его́же от ю́ности всем се́рдцем возлюби́в,/ по́двигом о́наго подража́ти потща́лся еси́.

Богоро́дичен: Ди́вно возсия́ сла́ва Твоя́, Богоро́дице Де́во,/ се бо Христа́ Бо́га неизрече́нно име́ла еси́ во чре́ве,/ я́коже не́когда Иса́ия провозгласи́,/ и вы́ше естества́ родила́ еси́ Спа́са душ на́ших.

Песнь 6.

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Озаря́емь све́том Христо́вым свы́ше, богому́дре,/ и по преселе́нии твое́м к Бо́гу неоску́дно исцеле́ния источа́еши/ всем с ве́рою к тебе́ притека́ющим.

Любо́вию боже́ственною распала́емь,/ дух ми́рен стяжа́л еси́, о́тче преподо́бне,/ ду́хи же нечи́стыя изгоня́я,/ мно́гия лю́ди ко Христу́ приве́л еси́.

Гла́сом ти́хим и кро́тким/ притека́ющия к тебе́ любви́ и смире́нию наставля́л еси́, о́тче Серафи́ме,/ та́же и моли́тве непреста́нней, попаля́ющей вся́кий грех, науча́л еси́.

Богоро́дичен: Ужасо́шася А́нгелов во́инства и челове́ков собо́ри, Всенепоро́чная,/ ди́внаго и па́че ума́ Рождества́ Твоего́:/ ка́ко и Де́ва пребыла́ еси́/ и Ма́ти Бо́жия бы́ти сподо́билася еси́./ Сего́ ра́ди досто́йно Тя вси сла́вим.

Конда́к, глас 5:

Дре́вним отце́м подража́я,/ по́двигом до́брым подвиза́лся еси́/ и, благода́ть Ду́ха Свята́го оби́льно стяжа́в,/ Саро́вскому уго́днику уподо́бился еси́/ и мно́гим путь спасе́ния яви́л еси́./ Сего́ ра́ди зове́м ти:/ ра́дуйся, преподо́бне Серафи́ме,/ Алекса́ндро-Не́вския ла́вры ди́вный подви́жниче/ и Вы́рицкия ве́си сла́вная похвало́.

И́кос:

А́нгелов Творе́ц и Госпо́дь Сил предызбра́ тя от ю́ности, преподо́бне,/ бы́ти Ему́ служи́телем ве́рным/ и наста́вником на путь спасе́ния притека́ющим к тебе́./ Мы же, дивя́щеся таково́му о тебе́ промышле́нию, с любо́вию вопие́м:/ ра́дуйся, я́ко измла́да Бо́гу послужи́ти возжеле́л еси́;/ ра́дуйся, я́ко в ми́ре пребыва́я, доброде́тельным житие́м Бо́гу угожда́л еси́;/ ра́дуйся, я́ко уте́шитель стра́ждущих был еси́;/ ра́дуйся, я́ко пла́менную любо́вь ко Христу́ стяжа́л еси́;/ ра́дуйся, преподо́бнаго Варна́вы Гефсима́нскаго учениче́ приле́жный;/ ра́дуйся, ди́внаго Серафи́ма Саро́вскаго подража́телю усе́рдный;/ ра́дуйся, Алекса́ндро-Не́вския ла́вры чу́дное прозябе́ние;/ ра́дуйся, ве́си Вы́рицкия Бо́жие благослове́ние;/ ра́дуйся, ско́рый помо́щниче в ско́рбех и боле́знех;/ ра́дуйся, свети́льниче ве́ры правосла́вныя и благоче́стия;/ ра́дуйся, преподо́бне Серафи́ме, ми́лостивый наш предста́телю пред Го́сподем.

Песнь 7.

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть:/ Христо́с же простре́ богочести́вым отроко́м ро́су духо́вную,// Сый благослове́н и препросла́влен.

Серафи́му и Варна́ве преподо́бным подража́я,/ святы́ми их моли́твами укрепля́емь был еси́, свя́те,/ те́мже от Бо́га сподо́бился еси́ проро́ческаго да́ра:/ гряду́щая наро́ду на́шему и Це́ркви Росси́йстей предвозвеща́ти.

Еле́ню подо́бяся, устреми́лся еси́ душе́ю твое́ю к го́рним оби́телем, преподо́бне,/ Про́мыслом же Бо́жиим соблюда́емь,/ по́двигом до́брым непреста́нно подвиза́лся еси́, взыва́я:/ благослове́н еси́, Бо́же оте́ц на́ших.

Ру́це твои́ ко Го́споду со умиле́нием воздева́я/ и уго́днику Бо́жию Саро́вскому подража́я, о́тче Серафи́ме,/ моле́ние на ка́мени соверша́л еси́, поя́:/ благослове́н еси́, Бо́же оте́ц на́ших.

Богоро́дичен: А́нгельския Си́лы воспева́ют Тя немо́лчно, Богороди́тельнице,/ и мы гре́шнии взыва́ти дерза́ем:/ житие́ на́ше, Пречи́стая, к Твоему́ всети́хому приста́нищу напра́ви, зову́щих:/ благослове́н еси́, Бо́же оте́ц на́ших.

Песнь 8.

Ирмо́с: Пещь иногда́ о́гненная/ в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.

Фараони́ты мы́сленныя му́жески победи́в,/ чистоту́ серде́чную стяжа́л еси́, о́тче преподо́бне,/ сего́ ра́ди душе́вныма очи́ма Бо́га узре́в,/ с любо́вию воспева́л еси́:/ благослови́те, вся дела́ Госпо́дня, Го́спода.

Иму́ще тя, о́тче, моли́твенника те́пла и помо́щника изря́дна,/ от стрел вра́жиих спаса́емся и Бо́гу вопие́м:/ благослови́те, вся дела́ Госпо́дня, Го́спода.

Мно́гая чудеса́, преподо́бне,/ си́лою Бо́жиею, в тебе́ бога́тно де́йствующею, сотвори́л еси́:/ слепи́и бо прозрева́ху, неми́и глаго́лаху,/ одержи́мии же от духо́в зло́бы свобожда́хуся./ Сего́ ра́ди Бо́гу, ди́вному во святы́х Свои́х, пое́м:/ благослови́те, вся дела́ Госпо́дня, Го́спода.

Богоро́дичен: Естество́ челове́ческое из Тебе́ восприя́л есть, Влады́чице,/ всех Царь и Госпо́дь./ Сего́ ра́ди Тя, я́ко Богоро́дицу и Ма́терь Све́та, в пе́снех прославля́ем.

Песнь 9.

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы нам яви́ся,/ омраче́нная просвети́ти, собра́ти расточе́нная.// Тем Всепе́тую Богоро́дицу велича́ем.

Чи́сте зре́ти сподо́бился еси́ Цари́цу Небе́сную, преподо́бне,/ ско́рое отше́ствие твое́ от ми́ра сего́ ти возвести́вшую./ Те́мже ду́хом возра́довався, Бо́га просла́вил еси́.

Утверди́ сердца́ на́ша на пути́ за́поведей Госпо́дних, о́тче преподо́бне,/ да обря́щем ми́лость на Стра́шнем Суде́ Его́/ и просла́вим Отца́ на́шего, И́же есть на Небесе́х.

Душе́ю твое́ю, я́ко о́гненный Серафи́м, пламене́я,/ по́прище жи́зни твоея́ сверши́л еси́, о́тче преподо́бне./ Научи́ и нас и́стинней любви́ ко Го́споду/ и помози́ и́мя сладча́йшее Иису́са непреста́нно призыва́ти.

Недосто́йными усты́ песнь ны́не тебе́ принесо́хом, преподо́бне,/ сподо́би нас твоего́ оте́ческаго благослове́ния,/ да просла́вим Бо́га на́шего, ди́внаго во святы́х Свои́х.

Богоро́дичен: Его́же па́че естества́ родила́ еси́, Ма́ти Пренепоро́чная,/ моли́ о всех нас, правосла́вно воспева́ющих Тя,/ я́ко Ма́терь Бо́жию и Присноде́ву.

Свети́лен:

Благода́ть Свята́го Ду́ха, оби́льно все́льшаяся в тя,/ я́ко свети́льника многосве́тлаго, показа́ тя ве́рным, преподо́бне./ Освети́ омраче́нная сердца́ на́ша,/ да во све́те невече́рнем у́зрим Христа́, Бо́га на́шего.

Сла́ва, и ны́не, Богоро́дичен:

Честне́йши еси́ всея́ тва́ри, Богоро́дице Де́во, Христа́ ро́ждшая:/ Того́ у́бо моли́ сохрани́тися ста́ду Твоему́ невреди́му/ от вся́каго наве́та сопроти́внаго.

На хвали́тех стихи́ры, глас 4:

Притеце́м ны́не, вси ве́рнии,/ к преподо́бному и богоно́сному отцу́ на́шему,/ пресла́вному Серафи́му Вы́рицкому чудотво́рцу,/ от ю́ности Бо́га возлюби́вшему/ и на вся́ко вре́мя пра́ведно пред Ним ходи́вшему,/ по отше́ствии же свое́м непреста́нно моля́щемуся ко Го́споду,/ о и́же с ве́рою и любо́вию па́мять его́ почита́ющих.

Прииди́те ны́не, вси ве́рнии,/ припаде́м ко свети́льнику пресве́тлому,/ па́стырю до́брому слове́сных ове́ц,/ предста́телю те́плому пред Сладча́йшим Иису́сом,/ и хода́таю о всех скорбя́щих и озло́бленных,/ пла́менному моли́твеннику ко Го́споду,/ о и́же с ве́рою и любо́вию па́мять его́ почита́ющих.

Да лику́ет днесь земля́ Петербу́ржская,/ прославля́ющи вели́каго уго́дника Госпо́дня,/ Алекса́ндро-Не́вския ла́вры подви́жника,/ трудолю́бне восте́кшаго по ле́ствице доброде́телей/ к Небе́сному черто́гу Спа́са Христа́,/ иде́же мо́лится о душа́х на́ших.

Да ра́дуется Це́рковь Ру́сская,/ прославля́ющи преподо́бнаго Серафи́ма Вы́рицкаго,/ и́же во времена́ гоне́ний и безбо́жия/ пра́вило ве́ры и о́браз благоче́стия яви́вшаго,/ ны́не же Престо́лу Бо́жию предстоя́щаго/ и моля́щагося непреста́нно о душа́х на́ших.

Сла́ва, глас 8:

Просла́вим, ве́рнии, подви́жника ди́внаго,/ чудотво́рца Вы́рицкаго Серафи́ма но́ваго,/ сей бо, покая́нием ду́шу очи́стив,/ Ду́ха Бо́жия Уте́шителя бога́тно стяжа́/ и, сыно́внее насле́дие от Бо́га Отца́ по благода́ти получи́в,/ по стопа́м Христа́ в жи́зни земне́й после́дова/ и жизнь ве́чную, я́ко дар, улучи́./ Ны́не же, предстоя́ Престо́лу Святы́я Тро́ицы,// со все́ми святы́ми непреста́нно сла́ву возсыла́ет.

И ны́не, Богоро́дичен, глас то́йже:

Влады́чице,/ приими́ моли́твы раб Твои́х/ и изба́ви нас// от вся́кия ну́жды и печа́ли.

На Литурги́и

Слу́жба вся преподо́бническая.

Источник: Утверждена Священным Синодом Русской Православной Церкви 19.03.2014 (журнал № 15).

Месяца апреля в 1-й день

Преподобного Варсонофия Оптинскаго

На ма́лой вече́рни

На Го́споди, воззвáх: сти́хиры преподо́бнаго, глaс 2.

Подо́бен: Егда́ от Дре́ва:

Егда́ на́йде на тя Боже́ственное раче́ние,/ преподо́бне о́тче Варсоно́фие,/ и глас вели́каго а́ввы на высо́кая тя повлече́,/ тогда́ оста́вил еси́ во́инство царя́ земна́го,/ ополче́ние же мона́шеское тя, во́ина кре́пкаго, прия́т,/ и побо́рствуя мра́чная бесо́вская по́лчища,/ не отступи́л еси́ пред враго́м дре́вним,/ те́мже и украси́лся еси́ венце́м нетле́нным,// стратила́те О́птинский.

В боже́ственное ополче́ние/ досто́йно вчини́лся еси́, о́тче сла́вный,/ не я́ко нае́мник, но я́ко побо́рник непобеди́мый,/ и́ноков во́инство влече́ши доны́не к высота́м побе́дным,/ мглу разгоня́я грехо́вную,/ до́лу влеку́щия стра́сти попаля́я моли́твы огне́м./ Воево́до избра́нный Царя́ Христа́, Варсоно́фие,/ моли́ Го́спода Сил непреста́нно,// о воспева́ющих па́мять твою́.

Я́ко со́лнце, возсия́л еси́ в пу́стыни О́птинстей,/ моли́твенными стоя́нии прогоня́я по́лчища де́монская,/ луча́ми разсужде́ния разсеява́я пре́лесть врага́,/ непобеди́мь яви́лся еси́ о И́мени Госпо́дни,/ и А́нгелов привле́кл еси́ сора́товати и́ноком,/ Варсоно́фие, игу́мене до́брый./ Те́мже Го́спода Сил моли́ о нас,/ да соблюде́тся оби́тель сия́,// я́ко ве́ры свети́льник.

Сла́ва, глaс 5:

Благода́ти ста́рчества насле́дниче,/ преподо́бне Варсоно́фие, о́тче наш, Амвро́сиево благослове́ние,/ Анато́лиево воспита́ние,/ Ио́сифов сотру́дниче,/ Некта́риев сотаи́нниче,/ Ни́кону наста́вниче любому́дрый,/ преподо́бных оте́ц соревни́телю,/ Христа́ дру́же и́скренний,// Того́ моли́ дарова́ти чту́щим тя ве́лию ми́лость.

И ны́не, Богоро́дичен.

На стихо́вне стихи́ры преподо́бнаго, глас 8:

Показа́л еси́ раче́ние а́нгельское,/ и любо́вь и́стинную яви́л еси́ Влады́це,/ в послуша́нии и поще́нии, в словеси́ и моли́тве,/ ра́вен быв по всему́ отце́м твои́м,/ и чуде́с луча́ми просия́л еси́:/ те́мже стратила́т непобеди́мый,/ о́тче наш Варсоно́фие,/ предста́тельствуй за оби́тель и лю́ди,// чту́щия па́мять твою́.

Стих: Честна́ пред Го́сподем// смерть преподо́бных Его́.

Ревну́я поревнова́л еси́,/ о́тче богому́дре Варсоно́фие,/ оте́ческим преда́нием,/ и уста́вом спаси́тельным,/ не я́ко трость, коле́блема ве́тром ве́ка сего́,/ но щито́м вооружи́вся послуша́ния,/ ве́рно после́дуя твои́м наста́вником,/ моли́твою возмета́л еси́, я́ко прах,/ ополче́ния бесо́вская,/ и во оби́телех отце́в твои́х ны́не водворя́яся,/ не забу́ди оби́тель твою́,// тя велича́ющую.

Стих: Блаже́н муж, боя́йся Го́спода,// в за́поведех Его́ восхо́щет зело́.

Пита́емь от корне́й благи́х,/ возраста́вый под се́нию отце́в му́дрых,/ яви́л еси́ ста́рчества плод соверше́нный, о́тче ди́вный Варсоно́фие,/ и Ни́кона сла́внаго, добропобе́дную ле́торасль,/ напосле́док лет нам дарова́л еси́,/ с ни́мже ны́не в раи́ водворя́яся,/ назира́й оби́тель твою́, приснопа́мятне,/ возраща́я ея́ мона́шеския кри́ны,// одожде́нием моли́тв твои́х.

Сла́ва, глaс 6:

Во́инскую сла́ву мирску́ю оста́вив,/ и вся я́же тле́нная на земли́,/ к го́рнему ратобо́рству восте́кл еси́,/ си́лою Христо́вою свы́ше оде́ян,/ и у́мною моли́твою вооруже́нный,/ неодоли́м яви́лся еси́, Варсоно́фие,/ побежда́я духо́в во бра́ни неви́димей,/ и по́чести вы́шняго зва́ния дости́гл еси́./ Ны́не же с вы́шними соедини́выйся во́инствы,/ охраня́й оте́ческим благослове́нием чад твои́х,// во е́же спасти́ся душа́м на́шим.

И ны́не, Богоро́дичен.

Тропа́рь зри на вели́цей вече́рни.

На вели́цей вече́рни

На Го́споди, воззвáх: преподо́бнаго стихи́ры, глас 4.

Подо́бен: Зва́нный свы́ше:

Свы́ше зван быв,/ а не от челове́к,/ егда́ боле́знь неисце́льная/ связа́ теле́сныя у́ды,/ непло́дныя смоко́вницы посече́ние в ра́зум приводя́,/ тогда́ небе́сный свет облиста́/ мы́сленнеи о́чи,/ духо́вное зре́ние отверза́я./ Те́мже во́ин быв царя́ земна́го, Варсоно́фие,/ служи́тель Христа́, Све́та И́стиннаго, соде́лался еси́,// Его́же моли́ спасти́ и просвети́ти ду́ши на́ша.

Егда́ в пусты́ню О́птину,/ я́ко во град огражде́ния, вшел еси́,/ тогда́ седи́ны твоя́ и ра́зум/ в послуша́ние отце́м преклони́в,/ ору́жием смире́ния на иско́ннаго врага́ ополчи́лся еси́,/ терпе́нием скорбе́й иску́сство стяжа́в,/ иску́сством же упова́ние,/ о не́мже не посрами́лся еси́, преподо́бне,// позна́в любо́вь Бо́жию Ду́хом Святы́м.

Избра́нный свы́ше от младе́нства твоего́,/ во еже от а́да исхища́ти ду́ши челове́к,/ сокро́вище духо́вное от оте́ческаго преда́ния собра́в,/ небе́сным хле́бом препита́л еси́ приходя́щих к тебе́,/ покая́нием очища́я и ко Христу́ приводя́,// Его́же моли́ спасти́ и просвети́ти ду́ши на́ша.

Преподо́бным отце́м после́дуя,/ разсужде́ния превы́шший дар/ по́льзы ра́ди люде́й прия́л еси́,/ преподо́бне отче Варсоно́фие,/ духо́вне востязу́я вся,/ от плотски́х ника́коже востязу́ешися,/ ум бо и́маши Христо́в,// те́мже моли́ спасти́ и просвети́ти ду́ши на́ша.

Свы́ше зва́ннаго наста́вника и́ноком,/ земли́ Ру́сския печа́льника/ и всем христиа́ном моли́твенника,/ ублажа́ем тя, Варсоно́фие о́тче наш,/ а́ще бо и проро́ческий твой язы́к умолче́,/ оба́че ве́руем, я́ко любы́ твоя́ николи́же престае́т,/ и ны́не мо́лиши Христа́ Бо́га// спасти́ и просвети́ти ду́ши на́ша.

Сла́ва, глaс 6:

Огне́м Боже́ственнаго Ду́ха/ разжже́н быв, преподо́бне,/ дре́внее житие́ мона́шеское восприя́л еси́,/ побо́рниче уста́вов и́ноческих/ и отце́в твои́х насле́дниче,/ пу́стынь О́птинскую я́ко благоцвету́щий рай показа́в,/ дру́же Предте́чев и пусты́нных обучи́телю,/ Варсоно́фие, о́тче свяще́ннейший,/ моли́ изба́витися бу́дущих треволне́ний,// ве́рно соверша́ющим па́мять твою́.

И ны́не, Богоро́дичен: Кто Тебе́ не ублажи́т, Пресвята́я Де́во:

Вход. Проки́мен дне. И чте́ния преподо́бническая.

(А́ще ли пост, по вхо́де проки́мен Трио́ди, чте́ния дне и преподо́бнаго.)

На лити́и сти́хира хра́ма.

И преподо́бнаго стихи́ры, глас 6:

Любо́вию после́дуя во Иерусали́м восхо́ду,/ ду́шу преда́л еси́ Распе́ншемуся за тя,/ и венце́м поруга́ния увенча́лся еси́,/ и лю́те уязви́лся еси́ копие́м скорбе́й, преподо́бне Варсоно́фие,/ те́мже зове́м ти:/ благослове́н еси́, о́тче,/ гряды́й прия́ти по́честь вы́шняго зва́ния,/ и Престо́лу Царя́ предста́ти,/ иде́же помяни́ тебе́ после́дующих,/ и бу́дущаго осужде́ния изба́ви// любо́вию хва́лящих тя.

Сла́ва, глaс 3:

Ве́лия моли́тв твои́х си́ла,/ преподо́бне ста́рче Варсоно́фие,/ ду́хи бо лука́выя отгоня́еши,/ и вра́жия кова́рства разруша́еши,/ покая́нием ду́ши исцеля́еши,/ ско́рби и боле́зни утоля́еши,/ да вси просла́вим Христа́ Бо́га,// Ди́внаго во святы́х Свои́х.

И ны́не, Богоро́дичен, глас то́йже:

Ве́лия чуде́с Твои́х, Благода́тная, си́ла!/ Избавля́еши бо от бед, и спасаеши от сме́рти,/ и восхища́еши от напа́стей неча́янных,/ и ско́рби разреша́еши,// и согреше́ния челове́ков отъе́млеши.

А́ще пост, на стихо́вне стихи́ры Трио́ди. Слава, преподо́бнаго, глас 8: Что тя, о́тче Варсоно́фие, нарече́м: И ны́не, Богоро́дичен воскре́сен, глас то́йже.

На стихо́вне стихи́ры преподо́бнаго, глас 1:

Преподо́бне о́тче Варсоно́фие, кто изочте́т по́двиги и труды́ твоя́?/ Бде́ние же и поще́ние,/ в моли́тве терпели́вое пребыва́ние,/ це́ркве украше́ние и ке́лий строе́ние,/ о и́ночестем чи́не и о вся́кой души́ попече́ние:/ уста́ бо твоя́ ко утеше́нию отверзо́шася,/ се́рдце же распространи́ся любо́вию,/ и не те́сно вмести́л еси́ приходя́щих к тебе́,/ да вся приобря́щеши и Христу́ приведе́ши,// Его́же моли́ о душа́х на́ших.

Стих: Честна́ пред Го́сподем// смерть преподо́бных Его́.

Я́же в го́рний Иерусали́м восхожде́ния/ степе́ни проше́л еси́, Варсоно́фие о́тче наш:/ укоре́ние, клевету́ и поруга́ние,/ возлю́бленнаго скита́ разлуче́ние,/ крест настоя́тельства в ста́рости и боле́зни,/ оба́че послу́шлив быв да́же до сме́рти,/ во Христе́ Иису́се мудрова́ние стяжа́л еси́.// Моли́ спасти́ся душа́м на́шим.

Стих: Что возда́м Го́сподеви о всех,// я́же воздаде́ ми?

Я́же в ми́ре кра́сная преподо́бный оста́ви,/ го́рния красоты́ возжеле́в,/ и от гласа мирска́го слух отврати́в,/ пе́нию небе́сному поуча́шеся,/ се́рдцем и усты́ непреста́нно поя́ше:// Го́споди, Иису́се Христе́, поми́луй мя гре́шнаго.

Сла́ва, глaс 8:

Что тя, о́тче Варсоно́фие, нарече́м?/ Прови́дца ли, я́ко та́йная душ облича́еши?/ Врача́ ли, я́ко неду́жныя и бесны́я цели́ши?/ Проро́ка ли, гряду́щая бо я́ве сказу́еши?/ Вожда́ ли духо́вна, спасе́ния бо путь указу́еши?/ Мно́гая от Бо́га прия́л еси́/ и преумно́жил еси́ дарова́ния:// моли́ спастися душа́м на́шим.

И ны́не, Богоро́дичен воскре́сен, глас то́йже.

Тропа́рь, глaс 4.

Творе́ние Васи́лия иеромона́ха

Во́ине до́блественный и изря́дный,/ све́том открове́ния, я́ко Па́вел, озаре́нный,/ вся во уме́ты Христа́ ра́ди вмени́л еси́,/ и́ноческим по́двигом подвиза́лся еси́,/ тече́ние сконча́в и ве́ру соблю́д,/ те́мже зове́м ти:/ спаса́й нас моли́твами твои́ми,// преподо́бне Варсоно́фие, о́тче наш.

Ин тропа́рь, глас 3:

Красото́ Це́ркве Ру́сския,/ утвержде́ние ста́рчества О́птинскаго,/ и́ноческих заве́тов блюсти́телю,/ оружено́сче Госпо́день ве́рный,/ преподо́бне о́тче Варсоно́фие,/ мече́м моли́твы зми́я победи́вый,/ вы́шния по́чести о Христе́ дости́гл еси́,/ те́мже моли́ся Тому́:/ Отече́ству на враги́ побе́ду дарова́ти// и спасти́ ду́ши на́ша.

На у́трени

По 1-м стихосло́вии седа́лен преподо́бнаго, глас 2:

Книгу́ жи́зни, в не́йже про́мыслом Бо́жиим писмена́ устроя́ются, уразумева́ти поуча́л еси́ ча́да твоя́, Варсоно́фие о́тче наш, духо́вне бо испыту́еши вся быва́емая, от су́етнаго сего́ к ве́чному животу́ возводя́ челове́ки: моли́ся у́бо, о́тче, о нас, да благода́тию Бо́жиею просвети́мся.

Сла́ва, и ны́не, пра́здника, или́ Богоро́дичен:

Милосе́рдия су́щи исто́чник, ми́лости сподо́би нас, Богоро́дице, при́зри на лю́ди согреши́вшия, яви́ я́ко при́сно си́лу Твою́: на Тя бо упова́юще, ра́дуйся, вопие́м Ти, я́коже иногда́ Гаврии́л, Безпло́тных Архистрати́г.

По 2-м стихосло́вии седа́лен преподо́бнаго, глас 6:

Возвесели́л мя еси́, Го́споди, в творе́нии Твое́м, та́ко взыва́л еси́, преподо́бне, до́льния красоты́ благоле́пие, я́ко сень и о́браз Небе́снаго зря и от худо́жества вне́шняго ко вну́треннему обраща́я, сего́ ра́ди любо́вию ти взыва́ем: ра́дуйся, благода́ти псалти́рю доброгла́сный, преподо́бне Варсоно́фие, о́тче наш.

Сла́ва, и ны́не, Богоро́дичен:

Красне́йшаго добро́тою па́че сыно́в челове́ческих, во объя́тиих Свои́х несказа́нно носи́вшая, Того́ красоты́ взыска́ти привлецы́ мою́ ду́шу, Тому́ во кле́ти се́рдца всегда́ собесе́довати, да Тебе́ благода́рно песнь воспою́: ра́дуйся, Ма́ти Све́та благослове́нная.

По полиеле́и седа́лен, глас 6:

Днесь ра́дуются собо́ри ве́рных, в моле́бней па́мяти преподо́бнаго Варсоно́фия, ста́рца О́птинскаго, и́же те́сным путе́м в ми́ре ше́ствова, тяготы́ бли́жняго трудолю́бно нося́ и, на коне́ц жития́ своего́ ско́рби и разлуче́ние от оби́тели претерпе́в, мощьми́ свои́ми ко бра́тии свое́й возврати́ся, и ны́не, душе́ю на Небеси́ со А́нгелы ра́дуяся, мо́лит приле́жно о нас, любо́вию соверша́ющих све́тлое его́ торжество́.

Сла́ва, и ны́не, Богоро́дичен:

Безпомо́щным кре́пость Ты вои́стину, Пресвята́я Де́во Ма́ти, отсю́ду, смире́ннии, Тобо́ю возвыша́емся и к Тебе́ при́сно прибега́ем: всем Ты еси́ Покро́в и к Бо́гу Хода́таица.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Сто́лпе о́гненный благоче́стия,/ предводя́й и́ноческия полки́,/ жезло́м моли́твы сла́ное море страсте́й разсе́к,/ в зе́млю безстра́стия обетова́ннаго дости́гл еси́,/ де́монская искуше́ния посека́я смиренному́дрия мече́м,/ соблюда́я скит возлю́бленный я́ко рай,/ и ны́не го́ниши от ста́да твоего́ полки́ чужди́х,/ Варсоно́фие, ста́рче О́птинский,// моли́ о душа́х на́ших.

Кано́на свята́го два.

Кано́н преподо́бнаго, глас 4, его́же краегране́сие: Стратила́та О́птинскаго венце́м увязе́м.

Песнь 1.

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́,/ души́ трича́стное потопи́, молю́ся,/ да Тебе́ я́ко в тимпа́не,/ во умерщвле́нии телесе́// побе́дное воспою́ пе́ние.

Смиренному́дрия венце́м да украси́тся во́ин Христо́в, присносла́вный Варсоно́фий, Боже́ственным смире́нием уязви́вый прего́рдых бесо́в, и мра́чная собра́ния их разгна́вый биче́м моли́твенным: тому́ побе́дное ны́не воспои́м пе́ние.

Триста́ты кре́пкия страсте́й, о́тче доблему́дре Варсоно́фие, потопи́л еси́ вода́ми сле́зными, и разжже́нныя стре́лы врага́ угаси́л еси́, во умерщвле́нии телесе́ своего́ противля́яся сопроти́внаго прираже́ниям.

Ра́достно во след Царя́ Христа́ поте́к, а́нгельскому во́инству поревнова́л еси́, и доспе́хи во́ина земна́го, я́ко вся мирска́я, с себе́ совле́к, и в безстра́стие восхоте́в облещи́ся, Варсоно́фие, и́ноческому полку́ сочета́лся еси́.

Богоро́дичен: А́нгельское во́инство Тебе́ слу́жит, и Херуви́м и Серафи́м Тя сла́вят мно́жества, чистоте́ Твое́й дивя́тся Престо́ли, Си́лы же и Вла́сти пропове́дуют Твою́ держа́ву, Влады́чице, я́ко родила́ еси́ всех Влады́ку и Спа́са.

Ин кано́н преподо́бнаго, глас 2, его́же краегране́сие: О́птинскую хвалу́, Варсоно́фия ублажа́ем.

Песнь 1.

Ирмо́с: Моисе́йскую песнь восприи́мши, возопи́й, душе́:/ Помо́щник и Покрови́тель бысть мне во спасе́ние,// Сей мой Бог, и просла́влю Его́.

О́птины пу́стыни красу́ и хвале́ние, преподо́бнаго ста́рца Варсоно́фия ны́не блажа́ще, Ди́внаго во святы́х Свои́х Бо́га просла́вим.

Тишину́ скита́ возлюби́в, преподо́бне, а́нгелу пусты́ни Предте́чи после́дуя, усте́н безмо́лвием и моле́нием непреста́нным, помысло́в открове́нием и вседу́шным послуша́нием, утеше́ния благода́тнаго был еси́ ча́до, Пода́теля вся́ческих благ прославля́я.

Богоро́дичен: И́ноком Тя помо́щницу те́плую ве́дый, пред ико́ною Каза́нскою приле́жно моля́ся, уго́дник Твой Варсоно́фий ми́лость улучи́, те́мже Тя в ра́дости, Чи́стая Де́во, просла́ви.

Песнь 3.

Ирмо́с: Утверди́ся се́рдце мое́ в Го́споде,/ даю́щем моли́тву моля́щемуся,/ я́ко лук си́льных изнемо́же,// и немощству́ющии препоя́сашася си́лою.

Треволне́ния ми́ра избе́г, скит О́птинский избра́л еси́, Варсоно́фие, я́ко при́стань безмо́лвную, ста́рцем Амвро́сием при́званный, и ста́рцу Анато́лию быв ча́до послуша́ния, те́мже и утверди́ся се́рдце твое́ во Го́споде.

Исполи́ны страсте́й и бесо́в полцы́ изнемого́ша, моли́твою бо препоя́сався и и́менем Госпо́дним вооружи́вся, тех побора́л еси́, Варсоно́фие во́ине до́блий, Го́спода на по́мощь призыва́я.

Лука́вствие врага́ изобличи́л еси́, святооте́ческий име́я свети́льник разсужде́ния, в се́рдце же мир Христо́в: те́мже вся стре́лы лука́ваго невре́дны тебе́ сотвори́шася, богому́дре, и лук того́ сокруши́ся.

Богоро́дичен: А́ще и во гресе́х есмь, и уста́ и́мам скве́рная, но не премолчу́, Пречи́стая, благодея́ния Твоя́ безме́рная пе́ти, Тобо́ю бо утвержда́ется се́рдце мое́ во Го́споде.

Ин

Ирмо́с: Непло́дствовавший мой ум,/ плодоно́сен, Бо́же, покажи́ ми,/ Де́лателю до́брых, Насади́телю благи́х,// благоутро́бием Твои́м.

Непло́дныя смоко́вницы посече́ния убоя́вся, преподо́бне Варсоно́фие, о́тче наш, да́нный ти тала́нт трудолю́бно возде́лал еси́: ди́вно бо бя́ше зре́ти му́жа в ле́тех соверше́нна, я́ко отроча́ послушли́во, ста́рцем внима́юща, ско́рби от неразу́мных бра́тий терпя́ща, благоутро́бнаго Бо́га о всем прославля́юща.

Ста́рца Анато́лия глаго́лом внима́я, не ри́зами то́кмо че́рными, бде́нием и посты́ хвали́тися, но и́стиннаго мона́шества взыска́ти потща́лся еси́, е́же есть сокрове́нный се́рдца челове́к, Животворя́щим Ду́хом внутрь созида́емый.

Кни́жное назида́ние с де́ланием сочетава́ти, от ста́рца Некта́рия, преподо́бне, навы́кл еси́, служа́ тому́, в затво́ре пребыва́ющу, и безмо́лвно внима́ти себе́ поуча́лся еси́.

Богоро́дичен: Утоле́ние страсте́й, моли́твы Пода́тельнице, непло́дие ума́ моего́ разреши́, Всеще́драго Бо́га благоутро́бная Ма́ти.

Ин конда́к, глас 4:

Боже́ственный ратобо́рец показа́лся еси́,/ о́тче наш Варсоно́фие,/ кресто́м низлага́я си́лу вра́жию,/ и си́лою Богода́нною чудеса́ сотворя́я,/ те́мже О́птина пу́стынь венча́ся сла́вою твои́х духо́вных побе́д,/ полково́дче мона́шествующих пресла́вный:/ и ны́не моли́ся Царю́ Христу́,/ побе́ды над страстьми́ дарова́ти,// ве́рою и любо́вию соверша́ющим па́мять твою́.

Ин и́кос:

О во́ине до́блий! О ста́рче преподо́бнейший! Твою́ добро́ту мона́шескую пе́ти дерзну́х устна́ма нечи́стыма и умо́м слепотству́ющим, но посли́ ми в по́мощь све́тлую лучу́ моли́твы твоея́, да то́ю просвеща́емь, тебе́ зову́: Ра́дуйся, мона́шествующих полково́дче непобеди́мый; ра́дуйся, побе́ды венцено́сче наро́читый. Ра́дуйся, де́моны в ли́ца уязви́вый; ра́дуйся, смире́нием свои́м А́нгелы удиви́вый. Ра́дуйся, О́птинскаго ста́рчества кре́пкое забра́ло; ра́дуйся, моли́твы у́мныя преди́вное свети́ло. Ра́дуйся, стра́ждущим лю́дем уте́шителю; ра́дуйся, граждани́не Ца́рствия Небе́снаго. Ра́дуйся, предстоя́й Престо́лу Царя́ Христа́, Его́же моли́, побе́ды над страстьми́ дарова́ти, ве́рою и любо́вию соверша́ющим па́мять твою́.

Седа́лен, глас 5:

Заре́ю бде́ний твои́х просвети́л еси́ но́щи, я́коже дни, и свя́то соверши́в житие́ твое́, со святы́ми ны́не живе́ши, освяще́ние посыла́я тя блажа́щим, преподо́бне о́тче Варсоно́фие.

Сла́ва, и ны́не, Богоро́дичен:

Де́во Пречи́стая, Покро́в бу́ди на Тя упова́ющим, от разли́чных напа́стей, обстоя́ний и бед лю́тых свобожда́ющи и моля́щи Сы́на Твоего́ спасти́ся душа́м на́шим.

Песнь 4.

Ирмо́с: Вознесе́на Тя ви́девши Це́рковь на кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Терпе́нием, я́ко скала́, пребы́л еси́, ю́же бу́ря не поколеба́ бесо́вская, утверди́в бо себе́ сама́го на ка́мени ве́ры, вы́ну ко Христу́ взыва́л еси́, о́тче Варсоно́фие: сла́ва си́ле Твое́й, Го́споди.

Анато́лия ста́рца учениче́, преподо́бне Варсоно́фие, О́птинских оте́ц благода́тный прее́мниче, иску́с сугу́б проше́д и в ме́ру тех дости́г, ста́рцем по ду́ху насле́довал еси́, взыва́я: сла́ва си́ле Твое́й, Го́споди.

О́птина пу́стынь и скит, и вся ча́да твоя́, тя ви́девше, я́ко сораспя́лся еси́ Христу́, послуша́ние понесы́й до сме́рти, да соде́лаешися соверше́н пред кончи́ною, вку́пе взыва́ху с тобо́ю, преподо́бне: сла́ва си́ле Твое́й, Го́споди.

Богоро́дичен: Пречи́стая и всекра́сная Де́во Мари́е, Со́лнце Пра́ведное нам возсия́вшая, И́же свет подае́т и ра́дость ми́ру, досто́йно Тя сла́вим, Богора́дованная.

Ин

Ирмо́с: Пою́ Тя, слу́хом бо, Го́споди,/ услы́шах и ужасо́хся,/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,// прославля́ю, Многоми́лостиве.

Ю́ношески в ста́рости твое́й подвиза́яся, послуша́ние от Це́ркве, я́ко от руки́ Госпо́дни, прия́л еси́: на брань в восто́чныя страны́ посыла́ешися, я́ко па́стырь и уте́шитель во́ином ру́сским.

Христо́ва тя служи́теля зря́ще во враче́бнице су́щии во́ини: о́ви ра́нами тя́жко уя́звлени, о́ви же сме́рти приближа́ющеся, ду́ши своя́ испове́данием очища́ху и Святы́я Та́йны от руки́ твоея́ приима́ху, во оставле́ние грехо́в и в напу́тие жи́зни ве́чныя.

Во́ина Христо́ва, Варсоно́фие, добропобе́дна, послуша́нием моли́твы мечь изощри́вша, ро́ждшая тя оби́тель па́ки прия́т, я́ко нача́льника и́ноком, и во бране́х духо́вных вожда́ преизя́щна.

Богоро́дичен: А́нгельски воспева́ю Ти: Благода́тная, ра́дуйся, ра́дости вся испо́лнившая Твои́м Рождество́м, Бо́жия снизхожде́ния Ле́ствице, и челове́ком степе́нь восхожде́ния.

Песнь 5.

Ирмо́с: Ре́вность прии́мет лю́ди ненака́занныя,/ законопресту́пныя евре́и,/ и огнь поя́ст супоста́ты Твоя́,/ я́ко Тя распя́таго,// лестца́ именова́ша.

Твои́м доброде́телем диви́шася А́нгели, лю́дие же ненака́заннии тя льсти́вым именова́ху, оба́че ты, преподо́бне Варсоно́фие, не лю́ди, но грехи́ ненави́девый, то́кмо люби́ти и добро́ твори́ти призыва́л еси́.

И́стинный послу́шник быв, Варсоно́фие, и па́стырь до́блий яви́лся еси́, моли́твы по́двиг от ста́рца твоего́ унасле́довал еси́, да лю́ди Бо́жия вои́стину наста́виши, и от огня́ засту́пиши, льсти́вым враго́м разжже́ннаго.

Назна́менуй нас кресто́м честны́м, той бо я́ко жезл восприя́л еси́ на по́прищи земне́м, Христа́ и дре́вних преподо́бных в моли́твах призыва́я, и не посра́млен был еси́, и́мже и по́прище твое́ духо́вное освяти́ся.

Богоро́дичен: Свяще́нную па́мять во́ина Твоего́, и́ноческое ополче́ние ко бра́ни подвиза́ет, Влады́чице: те́мже ра́дуйся, Взбра́нная Воево́до на́ша, Тебе́ зове́м, Де́во Мари́е, Богоблаже́нная.

Ин

Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас:// ра́зве бо Тебе́ ино́го Бо́га не зна́ем.

Ле́поты хра́ма Бо́жия усе́рдный рачи́телю, книгополо́жницы, ке́лий и вертогра́да ски́тскаго попечи́телю, па́че же ду́ши бра́тий храни́ти потща́лся еси́, любо́вию, разсужде́нием и моли́твою се́ти вра́жия расторга́я прему́дро.

Уны́нием одержи́ми, по́мыслы тя́жко стужа́еми, притека́ху к тебе́ и́ноцы, я́ко а́вве своему́, ты же коего́ждо я́ко ча́до возлю́бленно приима́ше, о́ваго у́бо ти́хостию утеша́ше, о́ваго же преще́нием вразумля́ше, ко све́ту наставля́я повеле́ний Госпо́дних.

Ве́рою к тебе́ прибега́ющим от ми́ра, исцеле́ния многоразли́чная подава́л еси́, о́тче, стра́сти грехо́вныя исторга́я, и све́том Христо́вым к пра́вым стезя́м наставля́я.

Богоро́дичен: Ада́мово воззва́ние, и Е́вино обновле́ние, Ма́ти Све́та, Пречи́стая, тьму души́ моея́ озари́, ко све́ту повеле́ний Госпо́дних мя наставля́ющи.

Песнь 6.

Ирмо́с: В ки́те, Христе́, тридне́вновав Ио́на,/ прописа́ Тя Безсме́ртнаго,/ я́ко ме́ртва во́лею,// в се́рдце земне́м тридне́вновавша.

Красоту́ и благоле́пие во всем возлюби́вый, па́че же возлюби́л еси́ красоту́ духо́вную, и по́двигом кре́стным ду́шу твою́ преобрази́л еси́, я́ко сокрове́нный се́рдца челове́к в тебе́ яви́ся, ле́потою Ду́ха Свята́го укра́шенный.

А́ще и не млад прише́л еси́ подвиза́тися, оба́че младе́нчески иска́л еси́ заступле́ния, Варсоно́фие, и обре́л еси́ ста́рцев о́пытных, скрыв себе́ от ми́ра в скиту́, безмо́лвием наслажда́яся, да обновле́н изы́деши к но́вому житию́.

Го́рняя му́дрствуя при́сно, и́стинный мудре́ц яви́лся еси́, возлюби́вый Христа́, Прему́дрость И́стинную: те́мже мно́зи челове́цы, Бо́га и́щущии, преле́стная мудрова́ния тобо́ю оста́виша и во́лю Бо́жию твори́ти научи́шася.

Богоро́дичен: О́птинский град соблюди́, Пречи́стая, и́же созида́шеся ста́рцы богому́дрыми, и утверди́ свяще́нныя хра́мы Твоя́, Богоблагода́тная, да пропове́дуется ми́ру сла́ва Бо́жия.

Ин

Ирмо́с: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,// и мене́ от страсте́й возведи́, и спаси́ мя.

Разсужде́ния и прозре́ния дар от Бо́га прие́м, ду́ши бо, я́ко кни́ги отве́рстыя, зри́ши, та́йная и недове́домая та́мо чте́ши, и мре́жею Ду́ха челове́ки ловя́, из глубины́ грехо́вныя тех изыма́еши.

Ста́рчества и учени́чества о́браз и́стинный яви́ша Варсоно́фий и Ни́кон, отцы́ преподо́бнии: ов у́бо ве́рою и послуша́нием ко а́вве взира́ше, ов же моли́твою и любо́вию ча́до свое́ обыма́ше. Моли́те о нас, избра́нная дво́ице, от страсте́й возвести́ и спасти́ ны.

О́тче Варсоно́фие богому́дре! И́ноческое житие́ а́збуце уподо́бил еси́, глаго́ля: бу́ква аз есть себе́ сама́го позна́ние; бу́ки, на Бо́га несумне́нное упова́ние; ве́ди, духо́внаго ве́дения нача́ло; глаго́ль, от избы́тка се́рдца усте́н глаго́лы; та́ко бо восходя́ще от си́лы в си́лу, благода́тию Христо́вою назида́емся и спаса́емся.

Богоро́дичен: Неизрече́нно, Чи́стая Де́во, заче́ншая, и Спа́са ми́ру роди́вшая, Того́ моли́ и мене́ от страсте́й возвести́, и спасти́ мя.

Конда́к, глас 4.

Подо́бен: Яви́лся еси́:

Яви́лся еси́ ста́рчества благочести́ваго столп о́гненный,/ любве́ Ева́нгельския сия́ние,/ проро́чествуя, назида́я и утеша́я,/ подая́ челове́ком от грехо́в врачева́ние,// преподо́бне Варсоно́фие, о́тче наш.

И́кос:

Возвести́те нам, А́нгели Бо́жии, тишину́ моли́тв скита́ О́птинскаго храня́щии: ки́их воздыха́ний ста́рческих слы́шатели бы́сте, коли́ко исцеле́ний и благода́рных слез стра́ждущих ви́десте? Жития́ бо и по́двига преподо́бных оте́ц бы́сте свиде́тели, от ни́хже еди́наго ны́не с ва́ми ублажа́юще, си́це рцем: ра́дуйся, любве́ Ева́нгельския сия́ние, преподо́бне Варсоно́фие, о́тче наш.

Песнь 7.

Ирмо́с: Спасы́й во огни́ авраа́мския Твоя́ о́троки,/ и халде́и уби́в,/ я́же пра́вда пра́ведно уловля́ше,/ препе́тый Го́споди// Бо́же оте́ц на́ших, благослове́н еси́.

В восто́чныя страны́ тече́ние соверши́л еси́, Варсоно́фие, и светоно́сных слове́с твои́х та́мо возсия́ша лучи́, во́ини же, Та́йнам Христо́вым прича́стнии, благода́рне взыва́ху: Бо́же оте́ц на́ших, благослове́н еси́.

Е́же и́ноческия уста́вы дре́вних отце́в соблюда́я, мона́шескаго жития́ взыску́ющым наста́вник был еси́, оба́че и архиере́и к тебе́ притека́ху, богому́дре, и тобо́ю наставля́еми, взыва́ху: Бо́же оте́ц на́ших, благослове́н еси́.

Не на си́лу свою́ упова́л еси́, о́тче, а́ще и иску́сен во́ин быв, оба́че ве́дый кова́рство вра́жие, я́ко о́троцы во огни́ к Бо́гу взыва́л еси́: ны́не помози́ нам, Спа́се, разори́ халде́йское нече́стие, Бо́же оте́ц на́ших, благослове́н еси́.

Богоро́дичен: Цевни́це Дави́дова, с на́ми воспо́й Богоневе́стную дщерь Изра́ильскую, и язы́ки пригласи́ воспе́ти Той: Емману́илева Ма́ти, благослове́нна еси́, я́ко откры́ Госпо́дь Пра́вду Свою́.

Ин

Ирмо́с: Херуви́мы подража́юще о́троцы/ в пещи́, ликовствова́ху вопию́ще:/ благослове́н еси́, Бо́же,/ я́ко и́стиною и судо́м наве́л еси́ сия́ вся, грех ра́ди на́ших,// препе́тый и препросла́вленный во вся ве́ки.

Оте́ческим путе́м моли́твы ше́ствовати хотя́щих, укрепля́л еси́, преподо́бне, ко ско́рбем и напа́стем ду́шу свою́ угото́вати, во искуше́ниих же ве́рою взыва́ти: благослове́н еси́, Бо́же, я́ко и́стиною и судо́м наве́л еси́ сия́ вся, грех ра́ди на́ших, препе́тый и препросла́вленный во вся ве́ки.

Фарисе́йское велере́чие отри́нув, мыта́рски по вся дни взыва́л еси́, о́тче: Бо́же, очи́сти мя, Иису́се, поми́луй мя, препе́тый и препросла́вленный во вся ве́ки.

И́стину уче́ния Це́ркве испове́дуя, а́дския му́ки во открове́нии чу́вством се́рдца пости́гл еси́, но, отча́яние препобежда́я, взыва́ше: благослове́н еси́, Бо́же, препе́тый и препросла́вленный во вся ве́ки.

Богоро́дичен: Я́ко росоно́сная пещь халде́йская, огнь Божества́ неопа́льно во чре́ве прии́мшая, Богоро́дице Де́во, пла́мень страсте́й мои́х ороси́, да Тя пою́ во вся ве́ки.

Песнь 8.

Ирмо́с: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Ева́нгельски ду́шу твою́ за о́вцы положи́ти хотя́, на крест послуша́ния возше́л еси́, доблему́дре Варсоно́фие, о́браз я́ве в себе́ предначерта́в, па́стыря и а́гнца, Христу́ Пастыренача́льнику подо́бяся.

Ми́ра вели́кое смяте́ние предре́кл еси́, о гоне́нии Це́ркве Бо́жия я́ве предуказа́в, и преда́ния и́ноческая призыва́л еси́ храни́ти, вра́жию бо си́лу победи́т си́ла Бо́жия, те́мже наставля́л еси́, Варсоно́фие: благослови́те, вся дела́ Госпо́дня, Го́спода.

Утвержда́я на стезя́х спаси́тельных ве́рныя, и́же притека́ху к тебе́, Варсоно́фие о́тче, ско́рби претерпе́л еси́ от лжебра́тии, оба́че доброде́телию препоя́сався, смире́нно взыва́л еси́: благослови́те, вся дела́ Госпо́дня, Го́спода.

Богоро́дичен: Высока́, Богоро́дице, та́йна, я́ко из утро́бы Твоея́ Со́лнце яви́ся в мир незаходи́мое, и лучи́ де́вства непостижи́маго осия́ша челове́ческое естество́, те́мже, благоче́стия рачи́тели, благослови́те Де́ву и Ма́терь Го́спода.

Ин

Ирмо́с: Неизрече́нною му́дростию/ соста́вльшаго вся́ческая Бо́га Сло́ва,/ и от не су́щих во е́же бы́ти Приве́дшаго,/ благослови́те, дела́, я́ко Го́спода,// и превозноси́те во вся ве́ки.

У́треннюющу ти к Бо́гу на вся́ку нощь, исто́чник сла́дости и утеше́ния во слу́жбе церко́вней тебе́ отверзе́ся, от него́же почерпа́я, Варсоно́фие, о́тче наш, наставля́еши ча́да твоя́, Го́спода пе́ти и превозноси́ти Его́ во вся ве́ки.

Благода́тных исцеле́ний и прозре́ний дар смиренному́дренно сокрыва́я, в та́инствах Це́ркве путь врачева́ния указу́еши, и ко исто́чнику преподо́бнаго Ти́хона неду́жныя посыла́еши, я́ко да прие́мшии по ве́ре своей врачевство́, еди́наго Го́спода пою́т и превозно́сят во вся ве́ки.

Любе́зных ти ста́рцев О́птинских возлю́бленный сомоли́твенниче, и благода́тнаго па́стыря Кроншта́дтскаго духо́вный сотаи́нниче, ку́пно с ни́ми исцеле́ния подае́ши притека́ющим с ве́рою, да вси ди́внаго во святы́х свои́х Бо́га пою́т и превозно́сят во вся ве́ки.

Богоро́дичен: Ад упраздни́ся и рай па́ки отве́рзеся Твои́м Рождество́м, Де́во, те́мже Тя, я́ко Ма́терь Изба́вителя, пое́м и превозно́сим во вся ве́ки.

Песнь 9.

Ирмо́с: Бог Госпо́дь, и яви́ся нам,/ соста́вите пра́здник,/ и веселя́щеся,/ прииди́те возвели́чим Христа́,/ с ва́иями и ве́твьми, пе́сньми зову́ще:// благослове́н Гряды́й во и́мя Го́спода Спа́са на́шего.

Я́ко зла́то искуше́но во огни́ скорбе́й, чист яви́лся еси́ Влады́це твое́му, Варсоно́фие, и я́ко ка́мень многоце́нный, огране́н руко́ю иску́сною, в диади́ме О́птинстей укрепле́н, ны́не сия́еши в пренебе́сней сокро́вищнице Го́спода Спа́са на́шего.

Звезда́ еси́, о́тче, О́птинская, путеводя́щая в го́рний Иерусали́м: а́ще и тьма накры́ет нас в стране́ дале́че, но на тебе́ взира́юще, па́ки поспеши́м ко Отцу́, да во вре́мя свое́ веселя́щеся вни́дем в дом Го́спода Спа́са на́шего.

Е́же от Христа́ прия́л еси́ дарова́ние, преподо́бне, зна́мения твори́ти и чудеса́, я́ко глухо́му и немо́му о́троку слух и уста́ отве́рзл еси́: те́мже и ду́ши на́ша исцели́, к целому́дрию приводя́ па́мять твою́ чту́щих и велича́ющих Го́спода Спа́са на́шего.

Богоро́дичен: Младе́нца Боже́ственнаго ро́ждши, во объя́тиях Того́ носи́ла еси́, и от сосцу́ пита́ла еси́, Богоро́дице, со А́нгелы у я́слей воспевающи: сла́ва в вы́шних Бо́гу, возвели́чившему Де́ву, я́ко Ма́терь Го́спода Спа́са на́шего.

Ин

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те:/ от Святы́я Де́вы неизрече́нно воплоти́вшагося нас ра́ди,// ве́рнии единому́дренно пе́сньми велича́ем.

Жестоковы́йныя, я́ко ко́злища, от ове́ц Христо́вых отдели́л еси́, па́стырю до́брый, оби́тель О́птину от ду́ха ми́ра сего́ моли́твенно огражда́я.

А́ще и клеветы́ и гоне́ния сы́нове ве́ка сего́ воздвиго́ша на тя, и от оби́тели О́птины отлучи́ша, оба́че ду́хом не разлучи́лся еси́ возлю́бленных бра́тий, по преставле́нии к сим те́лом возврати́вся, ти́и же тя, я́ко жи́ва, со слеза́ми срето́ша, единому́дренно Бо́га велича́юще.

Еди́наго А́гнца и Па́стыря кро́ткий служи́телю, я́ко а́гнец безгла́сен, ско́рби терпя́, и́ноком Голу́твинским па́стырь до́брый яви́лся еси́, в попече́нии о душа́х да́же до сме́рти тружда́яся, те́мже тя любо́вию, ста́рче Варсоно́фие, ублажа́ем.

Богоро́дичен: Ма́ти Сло́ва, Сосу́де чистоты́, безслове́сных страсте́й мя изба́ви, я́ко да Воплоще́ннаго от Тебе́ разу́мно вели́чаю.

Свети́лен.

Подо́бен: Не́бо звезда́ми:

Не́бо звезда́ми украси́вый, я́ко Бог, и зе́млю на́шу любо́вию ста́рцев О́птинских озари́вый, Соде́телю всех, пою́щия Тя спаса́й.

Сла́ва:

Победоно́сно светонося́й свети́льник разсужде́ния, озари́л еси́ и́ноком путь спаси́тельный, наста́ви и нас гре́шных, о́тче Варсоно́фие, да ча́да све́та нарече́мся.

И ны́не, Богоро́дичен:

Сла́досте А́нгелов, скорбя́щих ра́досте, христиа́н Предста́тельнице, Де́во Ма́ти Госпо́дня, заступи́ нас, и изба́ви ве́чных мук.

На хвали́тех стихи́ры преподо́бнаго, глас 4.

Подо́бен: Дал еси́ зна́мение:

Дал еси́ украше́ние/ Це́ркви Ру́сской, Го́споди,/ преподо́бнаго Варсоно́фия,/ Твоего́ уго́дника,/ в собо́ре ста́рцев О́птинских све́тло сия́юща,/ и путь спасе́ния ве́рным озаря́юща,/ того́ моли́твами грехо́в на́ших тьму отжени́,/ Иису́се всеси́льне,// Спа́се душ на́ших.

Дал еси́ зна́мение/ Оте́честву на́шему, Го́споди,/ проро́ческая словеса́ Варсоно́фия О́птинскаго,/ я́ко па́ки возста́нут гони́тели на Це́рковь Твою́,/ и па́ки кровь христиа́нская пролие́тся,/ оба́че претерпе́вшии до конца́ спасе́ни бу́дут./ Сих же сбытие́ ви́девше, сла́вим прему́дрость Твою́,/ Иису́се всеси́льне,// Спа́се душ на́ших.

Дал еси́ хвале́ние/ О́птиной оби́тели, Го́споди,/ честны́я и цельбоно́сныя мо́щи/ преподо́бнаго Варсоно́фия, Твоего́ уго́дника,/ и́хже ны́не ра́достно лобыза́ем,/ исцеле́ния разли́чная прие́млюще,/ те́мже Твое́ неизрече́нное милосе́рдие сла́вим,/ Иису́се всеси́льне,// Спа́се душ на́ших.

Сла́ва, глас 6:

Все отложи́в жите́йское томле́ние,/ и сла́дость мирску́ю презре́в,/ крест взем, я́ко и́го Боже́ственное,/ и Христу́ после́дуя в житии́ и́ночестем,/ к Небе́сному поко́ю чу́дно всели́лся еси́./ О дру́же Христо́в, сосу́де Ду́ха Свята́го честны́й,/ преподо́бне ста́рче Варсоно́фие,/ прииди́ и ста́ни посреде́ нас неви́димо,/ сподобля́я даро́в невеще́ственных// твой пра́здник соверша́ющих святоле́пно.

И ны́не, Богоро́дичен, глас то́йже:

Бо́га из Тебе́ воплоти́вшагося разуме́хом,/ Богоро́дице Де́во:// Того́ моли́ о спасе́нии душ на́ших.

На Литурги́и

Блаже́нны от кано́на преподо́бнаго, Песнь 3.-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник, от слу́ха зла не убои́тся.

Моли́тва

О преподо́бне и богоно́сне о́тче Варсоно́фие, ста́рче О́птинский, вседе́тельныя любве́ Бо́га Отца́ Безнача́льнаго честно́е зерца́ло! Кре́стныя любве́ Сы́на Бо́жия смире́нный подража́телю, дарода́тельныя любве́ Бо́га Ду́ха Свята́го сосу́де избра́нный! Моли́ у́бо, о́тче, о нас, под кров моли́тв твои́х прибега́ющих, да огне́м любве́ Бо́жия к покая́нию просвети́мся, и дух теплохла́дности, малоду́шия и лицеме́рия от душ на́ших изве́ргше, на де́лание за́поведей Его́ до ве́чера жи́зни на́шея устреми́мся: плоды́ же покая́ния поне́ на ста́рость прине́сше, да вни́дем в ра́дость Го́спода на́шего, иде́же ты в незаходи́мей сия́еши сла́ве, прославля́я Соде́теля и Соверши́теля вся́ческих Бо́га, в Тро́ице покланя́емаго во ве́ки веко́в. Ами́нь.

Источник: Текст утвержден Священным Синодом Русской Православной Церкви 17 июля 2020 года (журнал № 34)