Май

На велицей вечерни поем Блажен муж, 1-й антифон.

На Господи, воззвах, стихиры, глас 1:

Подобен: О дивнаго чудесе:

Днесь благодать Божия избранный сосуд Свой прославляет светло, призывая верныя достойно восхвалити великаго подвижника, богоноснаго Василия, изряднаго наставника во бранех духовных, присно молящагося Владыце всех о последующих житию его и учению.

О божественная любы, Христа возжелев, измлада Тому последовал еси; постом и бдением плоть твою изнуряя, душу непрестанною сердечною молитвою освятил еси; темже смиренный и кроткий подвижник воистину явился еси, словесы и делы наставляя ученики твоя держатися теснаго пути спасения.

Богоносе отче Василие, терпения столп был еси, светильник воздержания, благодати сосуд, молитвы ко Христу непрестанныя учитель и делатель, в отеческих писаниях искусен, монахов наставник духовный. Ныне же на Небесех моли Владыку всяческих, даровати Церкви Своей мир и миру велию милость.

Слава, глас 6:

Преподобне отче, внимая словесем Господним, последовал еси Тому, крест твой на рамена подъяв, житие твое с велиим смирением и непрестанною молитвою трудолюбно претекл еси. Темже благодать Святаго Духа в сердце твоем стяжал еси и блаженство непреходящее предвкусил еси, сего ради наследник достоин Царствия Небеснаго явился еси. Ныне же предстоя Христу Богу, не престай в молитве за ны, духовныя чада твоя, да избавит нас от всякаго обстояния и спасет души наша.

И ныне, праздника или Догматик, глас тойже:

Кто Тебе не ублажит, пресвятая Дево? Кто ли не воспоет Твоего пречистаго Рождества? Безлетно бо от Отца возсиявый Сын единородный, Тойже от Тебе Чистыя пройде, неизреченно воплощься, естеством Бог сый и естеством быв Человек нас ради, не во двою лицу разделяемый, но во двою естеству неслитно познаваемый. Того моли, Чистая, Всеблаженная, помиловатися душам нашим.

Вход. Свете тихий. Прокимен дне. Чтения 3.

Притчей Соломоновых чтение

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных: все же честное не достойно ея есть. Долгота бо дней, и лета живота в деснице ея, в шуйце же ея богатство и слава: от уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит, исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих совет, и разум и смысл аз призвах; мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо незлобивии коварство, ненаказаннии же прилагайте сердца. Послушайте мене и паки, честная бо реку, и отверзу от устен правая: яко истине поучится гортань мой, мерзки же предо мною усты лживыя. С правдою вси глаголы уст моих: ничтоже в них стропотно, ниже развращенно. Вся права суть разумевающим, и проста обретающим разум. Научаю бо вас истине, да будет о Господе надежда ваша, и исполнитеся Духа.

Притчей Соломоновых чтение

Начало премудрости страх Господень, разум же благ всем творящим его: благочестие же в Бога начало чувства, премудрость же и наказание нечестивии уничижат. Премудрость во исходех поется, в стогнах же дерзновение водит. Сыне, аще приим глагол моея заповеди, скрыеши в себе, Послушает премудрости твое ухо, и приложиши сердце твое к разуму, приложиши же е в наказание сыну твоему. Аще бо премудрость призовеши, и разуму даси глас твой, чувство же взыщеши великим гласом: И аще взыщеши ея яко сребра, и якоже сокровища испытаеши ю, Тогда уразумееши страх Господень, и познание Божие обрящеши. Господь гордым противится: смиренным же дает благодать.Путие же праведных подобнее свету светятся: предходят и просвещают, дóндеже исправится день. Сыне, моим глаголом внимай, к моим же словесем прилагай ухо твое, храни я в сердце твоем. Всяцем хранением блюди твое сердце: от сих бо исходища живота. Отыми от себе строптива уста, и обидливы устне далече от Тебе отрини. Твори сыне, яже аз заповедаю ти, и спасайся. Не даждь сна твоима очима, ниже да воздремлеши твоима веждома, да спасешися яко серна от тенет, и яко птица от сети. Сыне, храни законы отца твоего, и не отрини наказания матере твоея. Егда ходиши, води ю, и с тобою да будет: егда же спиши, да хранит тя, да востающу ти, глаголет с тобою. Зане светильник заповедь закона, и свет, и путь жизни, и обличение, и наказание.

Премудрости Соломони чтение

Есмь бо и аз человек смертен, подобен всем, и земнороднаго внук. Сего ради помолихся, и дан бысть мне разум: призвах, и прииде на мя Дух премудрости. Предсудих ю паче скиптров, и престолов, и богатство ничтоже вмених к сравнению тоя: Ниже уподобих ея каменю драгоценному, яко все злато пред нею песок малый, и яко брение вменится пред нею сребро: Паче здравия и красоты возлюбих ю, и предъизбрах ю вместо света имети, яко неугасаемо есть блистание ея. Пара бо есть силы Божия, и излияние Вседержителя славы чистое: сего ради ничтоже осквернено на ню нападает. Сияние бо есть света присносущнаго, и зерцало непорочно Божия действия, и образ благостыни Его. Едина же сущи всяческая может, и пребывающи в себе вся обновляет, и по родом в души преподобных преходящи, други Божия и пророки устрояет: Никогоже бо любит Бог, токмо сего, иже с премудростию пребывает. Есть бо сия благолепнее солнца, и паче всякаго расположения звезд, свету соравняема обретается первая: Сего бо преемлет нощь, премудрости же не одолеет злоба. Досязает же от конца даже до конца крепко, и управляет вся благо. Сию возлюбих, и поисках от юности моея, и взысках невесту привести себе, и любитель бых красоты ея. Благородство славит сожитие Божие имущи, и всех Владыка возлюби ю: Таибница бо есть Божия хитрости, и обретательница дел Его. Воздаде преподобным мзду трудов их: настави их в путь дивен, и бысть им в покров днем, и в пламень звезд в нощи.

На литии стихира самогласна, глас 1:

Кто не воспоет труды твоя, отче, огнь божественныя ревности, слезы и пощения, имиже вся желания плотския духу повинул еси? Кто же не дивится терпению твоему, любови отечестей, молитве непрестанней, еюже душу твою очистил и освятил еси? Темже Божественная благодать тя облиста, смирением истинным украшеннаго. Ныне же приими молитвы наша и исходатайствуй у Христа Бога, Емуже предстоиши, спасение душам нашим.

Слава, глас 5:

Преподобне отче, не дал еси сна очима твоима, ни веждома твоима дремания, дóндеже душу и тело твое от страстей свободил еси и себе уготовал еси Духа жилище: пришед бо Христос со Отцем, обитель в тебе сотвори. Темже Единосущныя Троицы благодать приим, великопроповедниче преподобне Василие, молися о душах наших.

И ныне, праздника или Богородичен, глас тойже:

Блажим Тя Богородице Дево и славим Тя вернии по долгу, град непоколебимый, стену необоримую, твердую Предстательницу и Прибежище душ наших.

На стиховне стихиры, глас 2:

Подобен: Егда от древа:

Душеполезная писания яко наследие праведное оставил еси, преподобне Василие, поучения отцев об умном делании мудро изъяснив, и научаеши монахов, яко непрестанная молитва Иисусова сокрушит бесовския полки, посечет, яко меч, страсти и в сердца вселит огнь благодати.

Стих: Дивен Бог во святых Своих, Бог Израилев.

Ясно показал еси, отче, яко смиренным послушанием, молитвою сердечною и посильными труды вожделенное бесстрастие стяжевается, ум благодатию освящается, душа же любовию к Богу и ближним благодатно исполняется и обителию Святыя Троицы соделовается.

Стих: Честна пред Господем смерть преподобных Его.

Праведную брань совершил еси и веру непреложну сохранил еси, ныне же на небесех пребывая, Господа возлюбленнаго зрети сподобился еси. Темже и мы, преподобне отче Василие, пение тебе приносим и со слезами молим тя: испроси у Христа благостояние и мир святым монастырем.

Слава, глас 8:

Монахов множества, наставника тя почитаем, отче наш Василие: твоею бо стезею воистину право ходити познахом. Блажен еси Христу работав и вражию обличил еси силу, ангелов собеседниче, преподобных сопричастниче и праведных, с нимиже молися Господеви помиловатися душам нашим.

И ныне, праздника или Богородичен, глас 8:

Безневестная Дево, яже Бога неизреченно заченши плотию, Мати Бога Вышняго, Твоих рабов мольбы приими Всенепорочная, всем подающи очищение прегрешений: ныне наша моления приемлющи, моли спастися всем нам.

На благословении хлебов, тропарь святаго: дважды, и Богородице Дево: единожды.

Тропарь глас 8-ой:

Учителю святаго почитания Божия, наставниче монахов, проповедниче дара Божия, просветителю молитвы умныя, яже тобою ясно исполнена, преподобне отче Василие, моли присно Христа Бога спасти души наша.

На утрени

На Бог Господь: тропарь святаго, глас 8, дважды.

Слава, и ныне, глас тойже: Иже нас ради Рождейся от Девы…

По первом стихословии седален, глас 8:

Подобен: Премудрость:

Земныя соблазны отринув, Христу всем сердцем последовал еси, отче Василие, и благодать Святаго Духа стяжав, Отцу светов всыновления достигл еси. Пощении, слезами и нищетою телесною страсти вся угасил еси, святе, тезоименит быв царствия, по имени и воздаяние восприял еси. Темже моли Христа Бога даровати оставление грехов всем, любовию тя почитающим.

Слава, и ныне, Богородичен:

Премудрость и Слово в Твоем чреве заченши неопально, Мати Божия, миру родила еси мир Содержащаго и в объятиих имела еси вся Содержащаго, Пищедателя всех и Содетеля твари. Темже молю Тя, Владычице Дево Чистая, избавитися мне прегрешений и в день суда, егда предстати имам пред Лицем Создателя моего, Твою помощь тогда подаждь ми: вся бо можеши, елика хощеши, Всепетая.

По втором стихословии седален, глас 3:

Подобен: Красоте девства:

Всецело заповедем Господним последовав, Того ради волею вся оставил еси, богоносне отче Василие; ныне со Ангелы беседуяй и со всеми святыми вкупе пребываяй, моли Христа Бога о воспевающих тя, да молитвами твоими обрящем мир и велию милость.

Слава, и ныне, Богородичен, самоподобен:

Красоте девства Твоего и пресветлой чистоте Твоей Гавриил удивився, вопияше Ти Богородице: кую Ти похвалу принесу достойную; что же возъименую Тя; недоумеваю и ужасаюся. Темже яко повелен бых, вопию Ти: радуйся Благодатная.

Полиелей и величание

Ублажаем тя, преподобне отче Василие, и чтим святую память твою, наставниче монахов и собеседниче ангелов.

По полиелеи седален, глас 1:

Подобен: Гроб Твой:

Тщетныя славы бегая, богомудре, на брань со страстьми востал еси, Господа в помощь присно призывая, темже победу одержал еси, преподобне Василие, и плоть твою духу повинув, сосуд Духа Святаго соделался еси.

Слава, и ныне, Богородичен, самоподобен:

Сына и Слово Отчее на руку Твоею матерне носила, Дево; и многое дерзновение к Нему имущи, моли присно избавитися от страстей всем, с верою под Твой покров прибегающим.

Таже степенна, 1-й антифон 4 гласа

Таже, прокимен, глас 4: Честна пред Господем смерть преподобных Его.

Стих: Что воздам Господеви о всех, яже воздаде ми.

Всякое дыхание: Евангелие от Матфея, зачало 43.

По 50-ом псалме, стихира, глас 6:

Преподобне отче Василие, во всю землю изыде вещание исправлений твоих: темже на небесех обрел еси мзду трудов твоих, демонская разорил еси полки, и ангельския достигл еси чины, ихже житию непорочно поревновал еси. Дерзновение имея ко Христу Богу, мир испроси душам нашим.

Канон святаго, глас 8.

Песнь 1.

Ирмос: Воду прошед яко сушу, и египетскаго зла избежав, израильтянин вопияше: избавителю и Богу нашему поим.

Молю тя, преподобне, просвети смиренный ум мой, да восхвалю житие твое и всем возвещу, отче, премудрость и подвиги твоя.

От юности твоея подвизався, отче, тепле возжелал еси отцем святым последовати, делом, словом и мыслию тем подражая.

Слава: Прилежно изследуя писания святыя, нектар животворящий из них собрал еси, имже и ныне, отче святый, питаеши стадо твое.

И ныне: Жилище возлюбленное Бога была еси, Пречистая, ибо во чрево святое Твое Слово волею вселися во спасение рода человеческаго.

Песнь 3.

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Любовь к житию пустынническому приведе тя, преподобне, в землю Румынскую, и яко древо насажденное при исходищих вод, плоды принесл еси на пользу многим.

Лета многая во святей обители Долгоуцы подвизаяся, аки светильник был еси, всех наставляя мудрыми словесы и укрепляя труды твоими и молитвою, любовию исполненною.

Слава: Премудро наставляя стадо свое, образ пастырем и зерцало монахом явися. Темже молим тя, преподобне отче, не престай ходатайствовати за ны молитвами твоими.

И ныне: Кивот явилася еси, трапеза и престол Всевышняго, и лествица, возводящая от земли на Небо восхваляющих и чтущих, Дево, пречистое Рождество Твое.

Седален, глас 8:

Подобен: Повеленное тайно:

Пред Владыкою всех в житии твоем добре ходил еси, отче, ныне же душею светлою Тому предстоиши, Василие, Царствия тезоимените, труды твоими и словесы наставниче монашествующих. Темже моли Христа Бога помиловати нас в день судный.

Слава, и ныне, самоподобен:

Повеленное тайно прием в разуме, в крове Иосифове тщанием предста безплотный, глаголя Неискусобрачней: приклонивый схождением небеса вмещается неизменно весь в Тя: егоже и видя в ложеснах Твоих приемша рабий зрак, ужасаюся звати Тебе: радуйся, Невесто Неневестная.

Песнь 4.

Ирмос: Услышах, Господи, смотрения Твоего таинство, разумех дела Твоя, и прославих Твое Божество.

Пристанище тихое Поляну Мерульскую избрал еси, отче, и тамо обитель воздвигл еси, пустынническую жизнь в ней устрояя.

Благочестное жительство монахов и воздержание строгое соделаша обитель твою примером добрым всем подвизающимся.

Слава: Преподобне Василие, вся призывал еси тепле молитися Христу Богу, взывая: Господи Иисусе, помилуй мя.

И ныне: Херувими славят Тя, превыше всея твари сущую, ибо во чрево святое Твое, Слово Отчее вселися.

Песнь 5.

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Монахов множества последоваша тебе, отче, зряще житие твое, мудрость в словесех и делех и Духа благодать, тя освящающую.

Яко безтелесен на земли пожил еси, в постех и бдениих страсти плотския укрощая.

Слава: Сладкий нектар от книг отеческих, аки пчела, собрал еси, имже всех, спасения ищущих, напитал еси.

И ныне: На земли явися Иже в Вышних живый, из Тебе родивыйся во плоти, Пречистая, Зиждитель всех, Христос.

Песнь 6.

Ирмос: Очисти мя, Спасе, многа бо беззакония моя, и из глубины зол возведи, молюся: к тебе бо возопих, и услыши мя, Боже спасения моего.

Сокровище неоскудеваемое жизни вечныя обрете, всего яже имел, наипаче же себе самаго, отреклся еси, святе, и благодать Духа тем стяжал еси.

Яко свеща сиянии добродетелей твои всех озарял еси, отче, темже не под спудом, но на свещнице Христос постави тя, яко светильник монашескому воинству.

Отцем духовным был еси общежительных обителех в Долгоуцы, Трейстены и Поляне Мерул, своим учением мудро наставляя всех иночествующих.

Слава: Желающе духовнаго восхождения стекахуся под твое окормление монаси из обителей Кырнул и Ретешт, и ученицы твоя положиша начало монастырю Чолану.

И ныне: От бед, напастей и скорбей избави рабов Твоих, Мати Божия, имамы бо Тя Заступницу и Пристанище тихое.

Кондак, глас 8:

Подобен: Взбранной Воеводе:

Монахов наставника дивнаго, молитвы делателя искуснаго, небеснаго человека и земнаго ангела, изряднаго наставника духовнаго радостно воспоем и прославим: Радуйся, святе отче Василие, проповедниче Божия благодати.

Икос:

Разум человечь не возможет вместити небеснаго делания и язык не возможет возглаголати хвалу достойну ангелу во плоти Василию, имя царственноподобное носящу. Обаче на милость заступления того надеяся, емуже песнь возносим, прославляем того, яко искуснаго учителя молитвы, умом в сердце совершаемыя. Темже, силу сего чуднаго и тайнаго делания ведая, с радостию вопием наставнику духоносному: радуйся, святе отче Василие, проповедниче Божия благодати.

Песнь 7.

Ирмос: От Иудеи дошедше отроцы, в Вавилоне иногда верою троическою пламень пещный попраша, поюще: отцев Боже, благословен еси.

Преподобне отче, поученьми твоими наставлял еси всех молитися непрестанно со смирением многим и трезвением во еже стяжати милость небесную.

Показал еси, отче, яко подвига основание святое послушание, воли своея отречение и богомыслие, имиже всяк жаждущий от страстей очищается.

Слава: К чтению Святаго Писания присно призывал еси ученики твоя, возжелев да достигнут твердаго познания заповедей Божиих и соблюдая я жизнь наследят.

И ныне: Дево Пречистая, пророки Духом нарекоша Тя трапезу и порфиру, жезл и свещник, кивот святый и кадило, и престол, на немже Невместимый восседе.

Песнь 8.

Ирмос: Царя Небеснаго, егоже поют вои Ангельстии, хвалите и превозносите во вся веки.

Из сокровища писаний премудрых, поучающих трезвению, собрал еси, отче, тайный нектар.

Нила Сорскаго, Филофея Синаита и великаго Исихия Исихаста имел еси, отче, аки добрыя наставницы.

Благословим Отца и Сына и Святаго Духа Господа:

Молитве Иисусове наставил еси ученики твоя, отче святе, образ дая Григория Синаита.

И ныне: Скорое избавление от всяких зол и напастей душам опечаленным не престай подавати, Дево Пречистая.

Песнь 9.

Ирмос: Воистину, Богородице, Тя исповедуем, спасеннии Тобою, Дево чистая, со безплотными лики Тя величающе.

Отец и наставник был еси, преподобне Василие, старцу Паисию премудрому, святость твою всюду прославляющему.

Святое Писание и книзи отцев духоносных, и каноны святыя совершенно познал еси, отче Василие.

Слава: Научи нас, отче, в дусе покаянне молитися трезвенно и на всякий час милость Владычню призывати.

И ныне: Прощение грехов подаждь нам, Пречистая, и предстательствуй за ны пред Сыном Твоим, и наследники покажи нас жизни вечныя.

Светилен, глас 3:

Земная оставив, вечная избрал еси, преподобне отче Василие, темже убо украси тя Христос блистанием благодати и избра тя наставника монашествующих воинства.

Слава, и ныне, Богородичен:

Тя, Пречистая Богородице, Ангели прославляют, и верных собори православно величают, Бог бо плотию от Тебе раждается, соединив в Себе земная и небесная.

На хвалитех стихиры, глас 1:

Приидите ныне, вси вернии, да восхвалим преподобнаго старца Василия, Церкве Румынския духовное украшение, Афонских уставов последователя, иже вся православныя научи молитве Иисусовой.

Сей святый день памяти твоея премудре отче радости исполни всех нас, чад твоих, яко да восхвалим дивное твое житие, богоносне Василие, ангелов собеседниче.

Преподобне отче, от юности всем сердцем возжелав Господу последовати, вся житейская попечения оставил еси и, крест твой на рамена подъяв, подвиги духовными распялся еси, темже и Христос тя с Собою спрослави.

Преподобне отче, не престай молити Вседержителя, да призрит с небеси на виноград, десницею Его насажденный, во еже избавити ны от всякия напасти, да принесем плоды во благовремении.

Слава, глас 8:

Язык твой, иже к наставлению всегда готовый, верных сердца возгревает и души ленивыя пробуждает, твоя же богоглаголивая словеса лествицу нам являют, возводящую ны от земли на Небо; темже, Василие, непрестанно моли Христа светом Божиим просветити тя прославляющия.

И ныне, Богородичен, глас тойже:

Владычице, приими молитвы раб Твоих, и избави нас от всякия нужды и печали.

Молитва преподобному отцу нашему Василию Поляномерульскому

Преподобне отче Василие, избранниче Божий и наследниче Царства Небеснаго, иже вкупе со ангелы и святыми пребываеши, тя убо просим со слезами и умилением: избави нас молитвами твоими от многих искушений и напастей, от губительных похотей телесных и помыслов злых, иже на ны присно устремляются. Буди молитвенником о монасех, кои любви ради и веры ради ко Господу Иисусу Христу вся земная попечения оставиша, яко да с тобою вкупе послужат присно Богу в безмолвничестей жизни. Ты еси ходатай о тех иже в мире чтут имя Христа Иисуса и единую святую Соборную и Апостольскую Церковь. К тебе, преподобне отче, обращаем сию смиренную молитву, юже вознеси горе ко Отцу Небесному, яко кадило с фимиамом благовонным. Помози нам имети во уме и сердце нашем молитву Иисусову. Соедини всех православных в той же вере и подай нам силы достигнути блаженства Рая, во веки веков. Аминь.

Месяца апреля в 29-й день

На малей вечерни

На Господи, воззвах: стихиры на 4, глас 1.

Подобен: Небесных чинов:

Воспети и ублажити по достоянию/ угодника Твоего помози ми, Господи,/ просвети ум мой и мысль,/ да прослaвлю песньми и пеньми/ того преслaвныя подвиги.

Воспоим песньми боголепными/ звезду Почаевскую,/ на тверди Небесней/ лика русских святых светло сияющую,/ дивнаго угодника, Амфилохия чуднаго.

Ныне земля Волынская/ твоими подвиги хвалится и веселится,/ имущи тя, преподобне Амфилохие,/ заступника непостыдна и молитвеника прилежна/ о спасении душ наших.

Скорый помощник людем в болезнех/ и милостивый утешитель в скорбех/ показался еси, преподобне отче наш Амфилохие,/ словом и житием/ святым безсребренником подражаяй.

Слава, глас 6:

Прославляет днесь Русь Святая/ новаго и славнаго чудотворца своего,/ блаженнаго отца нашего Амфилохия,/ иже, многия скорби в житии претерпев,/ ныне многая воздаяния на Небеси приемлет/ и молит Пресвятую Троицу/ о спасении душ наших.

И ныне, Богородичен, глас тойже: Богородице, Ты еси Лоза истинная:

На стиховне стихиры, глас 2.

Подобен: Доме Евфрафов:

Храм Слова Божия/ сердце свое соделал еси,/ блаженне отче Амфилохие,/ молитвенниче о нас предобрый/ и целебниче скорый недугов наших.

Стих: Честна пред Господем/ смерть преподобных Его.

Днесь псаломски воспевает/ земля Волынская/ дивнаго угодника своего/ преподобнаго Амфилохия,/ веры Православныя поборника.

Стих: Блажен муж, бояйся Господа,/ в заповедех Его восхощет зело.

Взыдем на гору Почаевскую/ и поклонимся тамо/ нетленно почивающему/ и благодать источающему/ Амфилохию всеблаженному.

Слава, глас 6:

Приими ныне моления наша, преподобне,/ и прибегающих к тебе не отрини,/ Амфилохие отче наш,/ ты бо обители Почаевския молитвенник/ и всея земли Волынския утверждение.

Слава, и ныне, праздника или Богородичен, глас тойже:

Радуйся, Пречистая Дево,/ Ты бо, гору Почаевскую многими чудесы прославивши,/ преподобных Иова и Амфилохия/ во обители Твоей премудре возрастила еси.

Тропарь зри на велицей вечерни.

На велицей вечерни

На Господи, воззвах: стихиры на 4, глас 8:

Торжествуйте, православных собори,/ веселися, обителе Почаевская,/ в днешний день памяти/ преподобнаго отца Амфилохия,/ иже ныне предстоит Богу,/ яко непреоборимый воин Христов/ и любве сосуд избранный,/ милостивно источающий нам/ благодатныя струи исцелений.

Озарен благодатию свыше,/ прелестей мира избегл еси/ и, шествуя путем доброделания,/ сугубыя благодати сподобился еси,/ юже, яко дар Божественный,/ верным щедро подаеши:/ хромыя исправляя и слепыя просвещая./ Сего ради молим тя, преподобне:/ исцели наша болезни,/ да, сих избавльшеся,/ прославим Христа Бога.

Веры Православныя исповедание/ являя непоколебимо, отче преподобне,/ посрамил еси безбожныя/ и, показуя в себе силу Христову,/ просящим щедро исцеления подавал еси./ Сего ради молитвами твоими/ наша недуги душевныя и телесныя исцели/ и на подвиги благочестия настави.

Подвигом крестоношения/ любве Христовы исполнился еси,/ веры истинныя исповедниче непоколебимый/ и безбожия обличителю неустрашимый./ Темже врач безмездный и наставник богомудрый/ в житии твоем верным явился еси,/ отче преподобне./ Помяни ныне и нас,/ к заступлению твоему прибегающих.

Ины стихиры глас 2:

Приидите, верных собори,/ воспоим заступника и печальника земли нашея,/ преподобнаго Амфилохия,/ и, припадающе к честным мощем его,/ из глубины души воззовем:/ спасай нас, угодниче Христов,/ многими бо обстоянии и бедами/ от врага невидимаго стужаеми есмы.

Монахов украшение и преподобных радование/ явился еси, блаженне отче Амфилохие,/ добродетель бо паче сладостей мирских возлюбил еси,/ еюже, яко одеждею брачною, славно украсився,/ в Небесный чертог вшел еси,/ идеже со Христом ныне ликуеши.

Постом и молитвою, преподобне,/ душу твою ревностне очищая,/ зрети будущая, яко настоящая, сподобился еси,/ смирением же и терпением/ козни бесовския побеждая,/ в меру возраста Христова возшел еси./ Темже и светильник пресветлый/ верным людем явился еси.

Радуется днесь Русь Святая,/ в песнех и пениих воспевающи/ угодника своего новоявленнаго,/ преподобнаго отца нашего Амфилохия,/ иже подвиги своими Царствия Небеснаго достиже,/ идеже с преподобным Иовом/ Владычицу мира молит/ о спасении душ наших.

Слава, глас 8:

Приидите, вернии,/ благодарственное пение вознесем днесь/ всех благих Подателю Богу,/ о множестве благодатных исцелений,/ молитвами преподобнаго Амфилохия щедро подаваемых,/ имиже имя Божие в Лавре Почаевстей прославляется/ и Покров Божия Матере величается./ Сего ради возопиим:/ спасай нас молитвами твоими,/ преподобне отче наш.

И ныне, Богородичен: Царь Небесный: или праздника.

Вход. Прокимен дне. И чтения три преподобническая.

На литии стихиры, глас 1:

Что тя наречем, отче Амфилохие?/ Врача ли благодатнаго,/ зане благодатию исцеляеши недужных множества?/ Исповедника ли непоколебимаго,/ яко гонения и озлобления мужественне претерпел еси?/ Ангела ли земнаго,/ яко молитвенника и хранителя обители Почаевския тя имамы?/ Темже со умилением зовем ти:/ спасай нас молитвами твоими.

Слава, глас 2:

Земля веселится и небо радуется/ в памяти богоблаженнаго Амфилохия,/ той бо с преподобным отцем нашим Иовом/ предстоит Престолу Царя славы/ и молится о всех, любовию его почитающих.

И ныне, Богородичен, глас тойже:

Богородице Дево,/ Ты еси верных спасение/ к предстательству Твоему молитвенно прибегающих/ и Пречистою Приснодевою Тя именующих/ во обители избранней Твоей.

На стиховне стихиры, глас 1.

Подобен: Небесных чинов:

Прииде день памяти твоея, преподобне Амфилохие,/ в немже вернии, собравшеся,/ воспевают подвиги твоя,/ имиже, душу предочистив,/ даров Духа Божия исполнился еси/ и, демонския козни разрушив,/ Бога в Троице прославил еси./ Емуже молися, блаженне,/ о спасении душ наших.

Стих: Честна пред Господем/ смерть преподобных Его.

Ведая краткость жития земнаго,/ ум твой в горняя вперил еси/ и, вся земная в сердцы отметая,/ единаго Бога возлюбил еси,/ Емуже житием богоугодным поработав,/ блаженства вечнаго достигл еси./ Темже молися Христу, преподобне,/ и нам сего достигнути.

Стих: Блажен муж, бояйся Господа,/ в заповедех Его восхощет зело.

Христа всем сердцем возлюбив/ и заповеди Его усердно исполняя,/ на страсти плотския мужественне ополчился еси, блаженне,/ темже и благодати Божия сподобился еси,/ еюже осеняемь, достойно Церкви послужил еси./ Ныне же в Небесных обителех водворяешися/ и молишися о спасении душ наших.

Слава, глас 8:

Троицы поборник славен явився,/ богоносе отче Амфилохие,/ Отцу и Сыну и Духу Святому/ достойне в житии твоем послужил еси/ и, храм Ея святый во обители Почаевстей/ от осквернения и поругания добле защитив,/ лукавыя богоборцы посрамил еси/ и, от диавола много стужаемь,/ силою Божественною вся искушения/ мужественне претерпел еси.

И ныне, Богородичен праздника или предпразднества:

Приидите, поклонимся Деве Богородице,/ носит бо Зиждителя/ и родити Богомладенца в вертепе грядет./ О, чудесе! Како во утробе вмещается,/ егоже Небеса не могут вместити?/ Како пеленама повивается,/ одеваяй небо облаки?/ Како млеком питается/ Животодавец всея твари?/ Како на руках держится/ рукою содержаяй всю тварь?/ О, великаго таинства и явления досточуднаго!/ Бог человеком, яко Человек является.

Тропарь, глас 4:

Земли Волынския преславна подвижника/ и обители Почаевския достойна насельника,/ людей православных изрядна целителя,/ яви тя Церкви Своей Христос Бог наш,/ преподобне отче Амфилохие,/ Емуже усердно молися/ от навет вражиих свободитися и спастися душам нашим.

На утрени

По 1-м стихословии седальны, глас 1:

Горы и холми взыграйте,/ земле Волынская возвеселися,/ днесь бо, лавра Почаевская утренюющи,/ песнь приносит Владыце:/ воспойте Господеви песнь нову,/ яко дивна сотвори Господь/ и возведе от нас к Едему горнему/ молитвенника за мир неусыпнаго/ Амфилохия богомудраго.

Слава:

Преподобне отче Амфилохие,/ ты, моляся вся дни живота твоего, сице взывал еси:/ Боже, вонми гласу моления моего,/ и да возвеселятся вси уповающии на Тя,/ во век возрадуются, и вселишися в них:/ и похвалятся о Тебе любящии имя Твое,/ яко Ты благословиши праведника, Господи,/ и яко оружием благоволения венчал еси нас.

И ныне, Богородичен или праздника:

Пресвятая Богородице,/ спаси нас, во гресех погибающих,/ в напастех многоразличных пребывающих,/ скорбящих и унывающих,/ во отчаяние впадающих,/ алчущих и наготующих,/ в болезнех изнемогающих/ и радости заступления Твоего чающих.

По 2-м стихословии седальны, глас 2:

Богатством благости, кротости и долготерпения Божия/ на спасения стези наставлен был еси крестом надгробным, Амфилохие преподобне,/ егда очима твоима телесныма/ отца игумена умершаго увидел еси/ и ушима мысленныма слово Христово услышал еси:/ по Мне гряди/ и достойны плоды покаяния сотвори.

Слава:

С любовию взываеши к нам, преподобне:/ Вскую любите суету и ищете лжи?/ Вскую глаголите: кто явит нам благая?/ Дщери и сынове человечестии,/ пожрите жертву правды и уповайте на Господа/ и уведите, яко удиви Господь преподобныя Своя/ и знаменася на нас свет лица Божия,/ Господь услышит ны, внегда воззвати нам к Нему.

И ныне, Богородичен или праздника:

Богородице Дево, христианом Помощнице,/ всем ищущим спасения Прибежище,/ подвигом добрым подвизающимся Споборнице,/ на демонская полчища одоление,/ целомудренно живущим благословение,/ молися за ны, да простит нам прегрешения наша.

По полиелеи седален, глас 2:

Приидите на гору Почаевскую,/ постническое сословие и празднолюбцы вси,/ приидите, лик духовный составим/ и к преподобному отцу нашему Амфилохию сице возопиим:/ радуйся, отче священнейший,/ слезами своими фараона мысленнаго потопивый;/ радуйся, тело твое вечныя ради жизни/ пощением и трудами изнуривый;/ радуйся, купно с Иовом святым/ во обители Божия Матере сияяй./ Радуйся, преподобне отче Амфилохие,/ молитвенниче о душах наших.

Слава и ныне, Богородичен:

Предстательство Твое крепкое, Богородице,/ и светлая Твоя слава на горе Почаевстей показася/ в живоносном источнице и чудотворнем образе Твоем,/ сего ради о Тебе ныне хвалимся и веселимся вси,/ яко к Сыну Твоему Христу Богу нашему/ ходатайствуеши о всех, к Тебе прибегающих.

Степенна 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех,/ яже воздаде ми? Евангелие от Матфеа, зачало 43.

По 50-м псалме стихира, глас 6:

Днесь благодать Святаго Духа нас собра/ с ликом ангельским/ и собором Волынских святых/ праздновати память/ Амфилохия достохвальнаго,/ той бо молит дерзновенно/ о земли нашей,/ во еже в мире/ и благостоянии ей быти/ и спастися душам нашим.

Канон преподобнаго, глас 1.

Песнь 1.

Ирмос: Твоя победительная десница,/ боголепно в крепости прославися:/ та бо, Безсмертне,/ яко всемогущая, противныя сотре,/ израильтяном путь глубины новосоделавшая.

Благодатную помощь Твою, Господи, низпосли нам, во еже воспети угодника Твоего, отца нашего Амфилохия, благочестия подвижника и лавры Почаевския украшение дивное.

Любовь и благочестие родительское, ихже измлада восприем, чрез все житие достойно пронесл еси, от силы в силу восходя духом, блаженне.

Аще и пленен был еси на брани от врагов видимых, но невидимаго плена страстей избежал еси, преподобне, плоть покоряя духу.

Богородичен: Жизнь вечную со святыми желая улучити, Матерь Божию вседушно возлюбил еси, святе,/ и, в дому Ея на горе Почаевстей вселився,/ достойне Богу послужил еси.

Песнь 3.

Ирмос: Едине ведый человеческаго существа немощь,/ и милостивно в не воображься,/ препояши мя с высоты силою,/ еже вопити Тебе, Святый:/ одушевленный храме неизреченныя славы Твоея, Человеколюбче.

Егда у гроба настоятеля почившаго молился еси, преподобне, откры Господь тебе суету жития временнаго, темже, помышляя о жизни вечней, начат грехи своя пред всеми исповедати.

Наречен быв, блаженне, Иосиф, еже сказуется приумноженный, сего ради потщался еси благодать в сердцы твоем обильно приумножати.

Егда саном иерейским почтен был еси, святе, тогда молитвы, пощения и подвиги усугубил еси, бесы же, не терпяще добродетельнаго жития твоего, многажды тя хотяху погубити, ты же силою Божиею присно хранимь был еси.

Богородичен: Славнейшая без сравнения Серафим и честнейшая Херувим, Пресвятая Дево, услыши моления и мольбы наша, и помощию Твоею не отступна буди от нас.

Ин кондак, глас 3:

Яко веры Православныя ревнитель/ и благочестнаго жития учитель,/ в болезнех и скорбех изрядный помощник,/ пред Господем предстоиши, преподобне Амфилохие,/ сего ради вопием ти:/ защити обитель, в нейже подвизался еси,/ и спасай нас молитвами твоими, отче блаженне.

Седален, глас 3:

Христовою любовию преисполнився, преподобне Амфилохие,/ Духом Святым ко спасению наставлял еси вопрошающих/ и тако, яко светильник,/ во тьме неведения седящим просиял еси./ Темже молися за ны ко Господу,/ да просветимся и мы Его благодатию.

Слава, и ныне, праздника или Богородичен:

Мати Божия, Покров Твой спасительный миру дольнему с Небесе являющая,/ не остави нас, во гресех погибающих/ и Господа Милосерднаго прогневляющих,/ егоже моли избавитися нам душепагубнаго заблуждения,/ яко Предстательница наша крепкая и Помощница скорая.

Песнь 4.

Ирмос: Гору Тя, благодатию Божиею приосененную,/ прозорливыма Аввакум усмотрев очима,/ из Тебе изыти Израилеву провозглашаше Святому,/ во спасение наше и обновление.

Избранный сосуд Духа Святаго быв, многия болящия благодатию Божию исцелил еси и бесов полки победил еси, отче блаженне. Приими молитвы наша и от язв греховных исцели.

Образ мужества и дерзновения богомудраго в тебе зрим, отче преподобне, храм бо Святыя Троицы от поругания и запустения сохранил еси и верныя люди, в скорби сущия, возвеселил еси.

Токи слез проливал еси, преподобне, о заблуждших чадех Церкве Православныя, временныя блага паче вечных благ возлюбивших.

Богородичен: Чтущих Тя и в песнех величающих, не отрини нас, Пресвятая Дево, иныя бо Ходатаицы и Заступницы разве Тебе не имамы.

Песнь 5.

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего богоразумия/ православно поющих Тя.

Егда в темницу лютии гонителие всадиша тя к бесным и ума лишенным, тогда смиренне взывал еси, отче блаженне: слава Богу, благодеявшему ми.

Ни скорбь, ни теснота, ни гонения, ни глад, ни нагота, ниже беда, ни мечь, ни ина кая напасть не возможе разлучити тя от любве Божия, отче преподобне.

Ангел земный и человек небесный явился еси, отче, многия бо скорби в житии безропотне понесл еси, темже и воздаяния многа на Небеси восприял еси, блаженне.

Богородичен: Шедше, возвестим всем языком, коликая чудеса сотвори Пресвятая Богородица во уделе Своем Почаевстем и како милует всех, с верою приходящих к Ней.

Песнь 6.

Ирмос: Обыде нас последняя бездна,/ несть избавляяй,/ вменихомся, яко овцы заколения./ Спаси люди Твоя, Боже наш,/ Ты бо крепость немощствующих и исправление.

Амфилохий в схиме святей наречен быв, преподобне, труды ко трудом прилагал еси и добродетельми, яко степеньми, во Царствие Небесное восшел еси.

Множество болящих, приходящих к тебе, исцелял еси и страждущих свобождал еси от духов нечистых, кротостию и смирением тех побеждая.

Фесвитянину Илии ревностию подражая, преподобне, любовию божественною сердце твое распалял еси и, в терпении душу твою укрепляя, пророчески вопиял еси: с нами Бог, разумейте язы́цы и покаряйтеся, яко с нами Бог.

Богородичен: Имя Твое, Пречистая, вси роди православных непрестанно величают, и лицы церковнии сладкогласно воспевают: Богородице Владычице, спаси нас, многими бо напастьми обстоими есмы.

Кондак, глас 2:

Изволением Девы Пречистыя/ в обители Почаевстей вселился еси,/ идеже, подвижническое и скорбное житие провождая,/ даром молитвы умныя обогатился еси/ и Царствия Небеснаго наследник явился еси./ Темже вопием ти:/ радуйся, Амфилохие, отче блаженне,/ целебниче и чудотворче.

Икос:

Сокровища Небеснаго взыскуя, преподобне, Господа Иисуса, яко Бисер Многоценен, обрел еси и, вся Его ради оставив, сторицею в пакибытии приял еси./ Ныне же душею твоею светолучною на Небесех сияя и мощами многоцелебными во обители Почаевстей пребывая, приемлеши целование от почитающих тя и велегласно взывающих: радуйся, Амфилохие, отче блаженне, целебниче и чудотворче.

Песнь 7.

Ирмос: Авраамстии отроцы в пещи Троицу прообразивше,/ огненный пламень на росу преложиша/ и, поюще, вопияху:/ благословен еси, Боже отец наших.

Лавра Почаевская, идеже подвизался еси, преподобне, пристанище ти явися, усыпальница же ея мощи твоя прият, иже тридесять лет тамо в земли лежаху и тлению не предахуся.

От веси Малоиловецкия мертвенное тело твое во обитель Почаевскую братия принесоша и во усыпальнице братстей с честию погребоша. Ты же, преподобне, во обителех Небесных пребывая, за ны молишися Богу.

Ходатай к Богу о людех в житии твоем был еси, отче преподобне, и по преставлении ходатайствуеши о всех, с верою ко гробу твоему приходящих, и милостивый послушатель им бываеши.

Богородичен: Испещрена ряснами златыми, яко Царица, Царя и Бога одесную ныне предстоиши, Владычице, молящи о всех, ко образу Твоему на горе Почаевстей притекающих.

Песнь 8.

Ирмос: В пещи отроцы Израилевы,/ якоже в горниле,/ добротою благочестия чистее злата блещахуся, глаголюще:/ благословите, вся дела Господня, Господа/ и превозносите во вся веки.

Егда людие, одержимии духи нечистыми, ко гробу твоему притекаху, преподобне, беси, в них сущия, твоея святости терпети не могуще, громкими гласы вопияху, огнем Божия благодати опаляеми.

Преславное чудо о тебе зрим, преподобне, ты бо, яко при жизни, тако и по преставлении, людем страждущим помагаеши и от лютых обстояний с верою приходящих к тебе свобождаеши.

Радости неизглаголанныя исполнишася монаси и мирстии, егда тело твое, преподобне, тридесять лет в земли погребенное, нетленно и благоухания исполнено обретеся.

Богородичен: Едина благословенная и богорадованная Владычице, Яже радость человеком рождши неизреченную, исполни радости сердца наша, да прославим рождшагося от Тебе Христа.

Песнь 9.

Ирмос: Образ чистаго Рождества Твоего/ огнепалимая купина показа неопальная;/ и ныне на нас напастей/ свирепеющую угасити, молимся, пещь,/ да Тя, Богородице,/ непрестанно величаем.

Чудеса и исцеления точиши всем, приходящим и усердно молящимся тебе и благоговейно поклоняющимся честным мощем твоим, преподобне отче Амфилохие.

Украшение лавры Почаевския явился еси, преподобне, нетленным бо телом твоим в пещернем храме купно со Иовом преподобным почиваеши и всем, приходящим к тебе, присно помогаеши.

Дал еси знамение, Господи, крест облачный на небеси в день прославления преподобнаго Амфилохия, и сим крестом благословил еси всех, пришедших почтити память угодника Твоего.

Троичен: Нераздельная Троице, во Единице покланяемая, Отче, Сыне и Святый Душе, спаси и сохрани всех почитающих память угодника Твоего Амфилохия.

Богородичен: Едина чистая и непорочная, Бога без семене рождшая, Богородице Владычице, молитвами угодника Твоего Амфилохия покрый и соблюди нас от всякаго зла.

Светилен:

Подвигом добрым подвизався, просиял еси, Амфилохие чудотворче, в земли Волынстей, яко светильник Божественныя благодати, возжженный в лавре Почаевстей. Темже помощию твоею не остави всех, с верою к тебе притекающих.

Слава:

Светильника веры и образ богоугоднаго жития, на горе Почаевстей возсиявшаго, преподобнаго Амфилохия, явил еси нам, Христе Спасе, той бо землю нашу светом Евангелия просвещает и путь спасения нам указует.

И ныне, праздника или Богородичен:

Дево Пресвятая, Сына Божия Единороднаго плотию рождшая, Иже от Отца рожденнаго прежде всех век, моли Духа Святаго благодатию осияти обитель сию и сохранити ю молитвами избранника Твоего, преподобнаго Амфилохия, Бога в Троице Святей почитающаго.

На хвалитех стихиры, глас 5.

Подобен: Радуйся:

Радуйся, обитель Почаевская,/ земли Волынския благое украшение,/ крепосте и утверждение Православия,/ избранный доме Божия Матере,/ источниче благодати с верою притекающим,/ сокровище некрадомое/ мощей преподобных Иова и Амфилохия,/ иже предстоят Престолу Божию/ и молятся о спасении душ наших.

Радуйся, отче Амфилохие,/ благочестия дивный подвижниче,/ уставов отеческих усердный ревнителю,/ иноков лавры Почаевския мудрый наставниче,/ бесных и болящих скорый целебниче,/ веры Православныя твердый исповедниче,/ богоборцев грозный обличителю,/ святыя Руси страже неусыпный/ и теплый молитвенниче о душах наших.

Радуйся, обитель Почаевская,/ из тебе бо произыде благоуханный цвет,/ преподобный Амфилохий,/ иже яви нам плоды Духа:/ радость и любовь,/ мир, долготерпение,/ благость, милосердие,/ веру, кротость, воздержание,/ согрешающих кроткое исправление,/ бремен ближних терпеливное ношение/ и Евангелия Христова исполнение.

Отче блаженне Амфилохие,/ ныне предстоя Престолу Христа Бога,/ утверждение крепкое нам буди,/ к тебе тепле припадающих и глаголющих:/ радуйся, Духа Святаго достойное обиталище,/ радуйся, Девы Всепетыя усердный служителю,/ радуйся, яко многая сердца верою Христовою просветивый,/ радуйся, яко велие дерзновение ко Господу стяжавый./ Темже моли спастися душам нашим.

Слава, глас 8:

Возсия днесь славная память/ достохвальнаго Амфилохия,/ созывающи нас во обитель Почаевскую,/ подвиги и чудеса того прославити/ и хвалу Богу нашему воздати./ Темже, притекающе к честным мощем преподобнаго,/ исцелений дарования приемлем/ и Спаса Христа непрестанно славим.

И ныне Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженны святаго от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа. Стих: Сильно на земли будет семя его. Евангелие от Луки, зачало 24. Причастен: В память вечную:

Молитва

О, всеблаженне отче наш Амфилохие, земный Ангеле, небесный человече и Православия в земли Волынской крепкое утверждение! Припадаем к тебе с верою и любовию и молим ти ся прилежно: яви нам, смиренным и грешным, святое твое заступление; се бо грех ради наших не имамы дерзновения просити о нуждах наших Господа и Владыку нашего, но тебе молитвенника благоприятнаго к Нему предлагаем и сице вопием: испроси нам от благости Его благопотребныя дары душам и телесем нашим, веру правую, любовь ко всем нелицемерную, в злостраданиих терпение, тяжкими болезньми одержимым исцеление, под бременем скорбей и напастей падающим и жития своего отчаявшимся скорое облегчение и избавление.

Не забуди, блаженне отче, и обитель Почаевскую, присно тя чтущую, идеже под покровом Пречистыя Богоматере усердно подвизался еси, но всех живущих в ней и на поклонение приходящих невредимы соблюди от искушений диавольских и всякаго зла. Егда же приспеет отшествие наше от временнаго сего жития и к вечности преселение, не лиши помощи твоея Небесныя, но молитвами твоими всех нас приведи в пристанище спасения и наследники сотвори всесветлаго Царствия Христова, да поем и славим неизреченныя щедроты Человеколюбца Бога Отца и Сына и Святаго Духа во веки веков. Аминь.

Иточник: Текст службы утвержден решением Священного Синода от 14 июля 2018 года (журнал № 61).

Ме́сяца апре́ля в 29-й день

Преподо́бнаго Некта́рия О́птинскаго

Обре́тение же честны́х моще́й его́ ме́сяца ию́ля в 3-й день

На ма́лой вече́рни

На Го́споди, воззвáх: стихи́ры, глaс 1:

Богому́дре о́тче Некта́рие,/ по́двиг служе́ния бли́жнему/ во оби́тели О́птинстей досто́йно поне́сл еси́/ и, бре́мя го́рестей людски́х на ра́мо возложи́в,/ путь приско́рбный до конца́ претерпе́л еси́,/ те́мже, я́ко и́стинный раб Христо́в,/ вене́ц пра́вды от Бо́га прия́л еси́./ Того́ моли́ дарова́ти нам// мир и ве́лию ми́лость.

Преподо́бне о́тче Некта́рие,/ я́ко пчела́ в са́де духо́внем,/ некта́р прему́дрости оте́ческия собра́л еси́,/ сего́ ра́ди, дар разсужде́ния от Бо́га прие́м,/ та́йны серде́чныя прозрева́л еси́/ и, любо́вию Христо́вою распала́емь,/ с ве́рою к тебе́ притека́ющих// к по́льзе душе́вней наставля́л еси́.

Блаже́нне о́тче Некта́рие,/ пе́рвее потща́лся еси́ во смире́нии утверди́тися,/ я́ко основа́нии вся́кия доброде́тели,/ и, дре́вним отце́м подо́бяся,/ и́ноческия обе́ты до конца́ испо́лнил еси́./ Ны́не же с ни́ми ку́пно Бо́га прославля́я,// мо́лишися о душа́х на́ших.

Сла́ва, глaс 2:

Прииди́те, ве́рнии,/ преподо́бных отце́в О́птинских возлюби́вшии,/ припаде́м к моще́м смире́ннаго ста́рца Некта́рия,/ и́же мно́гими доброде́тельми в житии́ просия́./ Ны́не же, со все́ми святы́ми Единосу́щную Тро́ицу прославля́я,// подае́т нам мир и ве́лию ми́лость.

И ны́не, пра́здника, или́ Богоро́дичен.

На стихо́вне стихи́ры преподо́бнаго, глас 4:

Преподо́бне о́тче Некта́рие,/ всего́ себе́ в по́двиг послуша́ния вдав,/ се́рдцем Го́сподеви прилепи́лся еси́,/ бде́нием же, посто́м и моли́твою ре́вностне подвиза́яся,/ стра́сти грехо́вныя препобеди́л еси́/ и, ду́шу свою́ слеза́ми мно́гими очи́стив,/ сосу́д Бо́жия благода́ти досто́ин яви́лся еси́./ Сего́ ра́ди моли́, о́тче преподо́бне,// спасти́ся душа́м на́шим.

Стих: Честна́ пред Го́сподем// смерть преподо́бных Его́.

О́гненных искуше́ний не чужда́яся,/ но смире́нно приобща́яся страсте́м Христо́вым,/ долготерпели́ве о́тче Некта́рие,/ злосло́вимый о и́мени Христо́ве,/ не стыди́лся, но ра́дости исполня́лся еси́,/ да в явле́ние сла́вы Его́/ возвесели́шися ра́достию соверше́нною,// прославля́я Бо́га за вся.

Стих: Блаже́н муж, боя́йся Го́спода,// в за́поведех Его́ восхо́щет зело́.

О ча́дех свои́х до́брое попече́ние име́я,/ богому́дре о́тче Некта́рие,/ в годи́ну лю́тых испыта́ний/ от Це́ркве и́стинныя, а́ще и пору́гана бысть,/ не отлуча́тися наставля́л еси́/ и покланя́тися Го́сподеви в Ду́се и И́стине/ о́бразом жития́ твоего́ поуча́л еси́,// хра́мы нерукотворе́нныя в сердца́х смире́нных прему́дро созида́я.

Сла́ва, глaс 2:

Посети́л ны есть Восто́к с высоты́,/ многоцеле́бныя мо́щи Некта́рия преподо́бнаго,/ я́ко би́сер безце́нный, нам да́руя./ Те́мже с весе́лием притеце́м к ра́це его́/ и с любо́вию поклони́мся,/ песнь псало́мскую вопию́ще:/ ди́вен Бог во святы́х Свои́х, Бог Изра́илев,// да́руяй ми́рови ве́лию ми́лость.

И ны́не, пра́здника, или́ Богоро́дичен, глас то́йже.

Тропа́рь зри на вели́цей вече́рни.

На вели́цей вече́рни

На Го́споди, воззвáх: стихи́ры пра́здника, и преподо́бнаго, глас 8:

Кто возмо́жет воспе́ти досто́йно/ труды́ и по́двиги преподо́бнаго Некта́рия О́птинскаго:/ подви́жника смиренному́драго,/ наста́вника любвеоби́льнаго/ и па́стыря до́браго,/ му́жа прозорли́ваго/ и ве́ры правосла́вныя испове́дника тве́рдаго?/ Его́же те́плыя моли́твы о нас/ ми́лостивно приими́, Го́споди,// в воню́ благоуха́ния духо́внаго.

Про́мыслом Бо́жиим направля́емь,/ во оби́тель О́птинскую,/ по́двиги де́лания мона́шескаго сла́вно просия́вшую,/ преподо́бне о́тче Некта́рие, прите́кл еси́,/ иде́же от богому́дрых отце́в/ сугу́бую благода́ть духо́внаго разсужде́ния восприя́л еси́,/ е́юже бли́жним и да́льним усе́рдно послужи́л еси́,/ в тя́жкую годи́ну гоне́ний на Це́рковь Ру́сскую// спасе́ние им устроя́я.

От Нача́льника тишины́/ любо́вь к тишине́ восприе́м,/ о́тче Некта́рие преподо́бне,/ те́лом затвори́лся еси́ от ми́ра бушу́ющаго,/ душе́ю же от попече́ний жите́йских упраздни́лся еси́,/ умо́м потруди́вся взыска́ти ме́сто серде́чное,/ и та́мо обре́т сладча́йшаго Иису́са,// позна́л еси́ тишину́ Боже́ственную.

Безмо́лвия и́стиннаго взыску́я,/ о́тче Некта́рие преподо́бне,/ от ми́ра многомяте́жнаго те́лом и душе́ю затвори́лся еси́,/ умо́м же к де́ланию многотру́дному прилежа́,/ сладча́йшаго Иису́са, я́ко тишины́ Нача́льника, позна́л еси́./ Его́же моли́, блаже́нне,/ воздвиза́емую напа́стьми бу́рю прейти́// и житие́ на́ше в ми́ре и покая́нии сконча́ти.

И́ны стихи́ры преподо́бнаго (на обре́тение моще́й), глас 5:

Богоблаже́нне ста́рче Некта́рие,/ свети́льниче ста́рчества О́птинскаго,/ луча́ми благода́ти облиста́й твою́ оби́тель,/ удобри́ доброде́тельми ме́сто упокое́ния твоего́/ и, я́ко смоко́вница до́брая,/ насажде́нная в О́птине пу́стыни,/ ду́ха сла́достными плоды́ напита́й нас,// обре́тение моще́й твои́х че́стно пра́зднующих.

Всепрáзднственная па́мять твоя́, Некта́рие преподо́бне,/ возвесели́ всю зе́млю Ру́сскую,/ и собо́ры мона́шествующих подви́же к похвале́нию:/ блаже́н еси́, Христу́ рабо́тав/ и вра́жию обличи́в си́лу,/ полки́ де́монския прогна́л еси́/ и безбо́жная уста́ загради́л еси́,// венце́м Небе́сным увенча́нный.

О́тче Нектáрие, свеще́ боже́ственная,/ на све́щнице церко́внем поста́влен,/ све́том Христо́вым ве́рныя просвети́л еси́/ и, тьму бесо́вскую и пре́лесть потреби́в,/ нощь безбо́жия разсе́ял еси́./ Те́мже Христа́ Бо́га моли́, блаже́нне,/ обре́тение моще́й твои́х све́тло пра́зднующим,// дарова́ти мир и ве́лию ми́лость.

Сла́ва, глaс 5:

Проро́ческим да́ром укра́шенный,/ я́ко ма́слина плодови́тая процве́л еси́/ и ве́рная ча́да твоя́ пи́щею духо́вною напита́л еси́;/ зло́ба же безбо́жных изгна́нию предаде́ тя,/ иде́же блаже́нно почи́в,/ рая́ Боже́ственнаго дости́гл еси́./ Вре́менем же преше́дшим,/ боголюби́вии лю́дие, обре́тше мо́щи твоя́ честны́я,/ с пе́нием во оби́тель О́птинскую возврати́ша./ Те́мже, богоно́сне о́тче наш Некта́рие,/ посети́ ны́не собо́ры пра́зднующих// и к ра́це моще́й твои́х с ве́рою притека́ющих.

И ны́не, пра́здника, или́ Богоро́дичен, глас то́йже: В Чермне́м мо́ри:

Вход. Проки́мен дне. И чте́ния преподо́бническая.

На лити́и стихи́ра хра́ма, и преподо́бнаго стихи́ры, глас 1:

Не от себе́ проро́чествуя,/ но от Ду́ха Свята́го просвеща́емь,/ богому́дре Некта́рие,/ словеса́ благода́тная глаго́лал еси́,/ и́ноком и миря́ном во́лю Бо́жию возвеща́я/ и на путь спасе́ния всех наставля́я./ И ны́не моли́, преподо́бне о́тче,// о спасе́нии душ на́ших.

Во́ли Бо́жией после́дуя/ и повеле́нию преподо́бных ста́рцев О́птинских,/ чу́дне я́вльшихся, повину́яся,/ во времена́ тя́жких испыта́ний в земли́ на́шей/ столп благоче́стия и му́дрый наста́вник лю́дем яви́лся еси́./ И ны́не, блаже́нне о́тче Некта́рие,/ помина́й ча́да твоя́,// любо́вию тя почита́ющия.

Глaс 2:

А́ще и ненауче́н быв от ю́ности,/ кни́жную прему́дрость возлюби́л еси́/ и, ре́вностне оте́ческому уче́нию внима́я,/ та́же и многообра́зную му́дрость челове́ческую позна́ти потща́лся еси́,/ богому́дре о́тче Некта́рие./ Сего́ ра́ди мно́гия привле́кл еси́ во огра́ду церко́вную,/ бу́йство про́поведи уче́ния Христо́ва// сочетава́я с прему́дростию богодарова́нною.

Сла́ва, глaс 4:

Открове́ния Бо́жия тебе́ я́влена бы́ша,/ богому́дре о́тче Некта́рие,/ бу́дущая бо я́ко настоя́щая созерца́я,/ гряду́щая земли́ Ру́сския и Це́ркве ея́ возвеща́л еси́,/ дре́вним проро́ком подо́бяся,/ и́хже соприча́стника яви́ тя Госпо́дь,// я́ко тайнозри́теля суде́б Бо́жиих.

И ны́не, пра́здника, или́ Богоро́дичен, глас то́йже:

Что ты, сме́рте, вопие́ши?/ Что стене́ши, а́де?/ Притупи́ся жа́ло ва́ше, и побе́да ва́ша исчезе́,/ я́ко Сын Бо́жий, Сын Де́вы быва́ет,/ и от ва́шея вла́сти свобожда́ет// всех ве́рных чад Свои́х.

На стихо́вне стихи́ры, глас 1.

Подо́бен: Небе́сных чино́в:

Доброде́лание вседе́тельное возлюби́в,/ ве́тхое и плотско́е мудрова́ние отве́ргл еси́,/ богоблаже́нне о́тче Некта́рие,/ и в ле́поту Ду́ха вои́стину обле́клся еси́,/ ум Христо́в стяжа́в,/ мона́хов преизря́ден наста́вник был еси́./ Посети́, преподо́бне, тя сла́вящих,// и грехопаде́ний лю́тых изба́ви.

Стих: Честна́ пред Го́сподем// смерть преподо́бных Его́.

Ста́рчества О́птинскаго благово́нный цве́те,/ доброде́тельми, я́ко цве́ты, украси́лся еси́,/ Боже́ственный некта́р сохраня́я в се́рдце твое́м,/ тем напои́л еси́ и́ноков сосло́вия,/ и всем, приходя́щим к ра́це моще́й твои́х,/ исцеле́ния подае́ши оби́льне,/ смрад греха́ отгоня́я, о́тче Некта́рие,// чудоде́йственниче пресла́вный.

Стих: Блаже́н муж, боя́йся Го́спода,// в за́поведех Его́ восхо́щет зело́.

Мона́шествующим удобре́ние,/ ни́щим покро́в и убо́гим заступле́ние,/ ве́рным тве́рдое приста́нище/ и стра́ждущим ми́ро боже́ственное/ яви́ся чудоде́йственная ра́ка моще́й твои́х,/ блаже́нне о́тче Некта́рие./ Те́мже моли́ся Христу́ Бо́гу,// да спасе́т ду́ши на́ша.

Сла́ва, глaс 3:

Что нарече́м тя, Некта́рие богодухнове́нне?/ О́браз ли мона́шескаго де́лания,/ я́ко мно́гим и́ноком пра́вило яви́лся еси́?/ Богому́дра ли отца́ духо́внаго,/ я́ко па́стырь до́брый ча́дом твои́м был еси́?/ Затво́рника, о ми́ре дерзнове́нно моля́щагося,/ я́ко бу́дущая ми́ра прозрева́л еси́?/ Ве́рна ли испове́дника Христо́ва,/ я́ко ско́рби и лише́ния мно́гия претерпе́л еси́?// Моли́ся, преподо́бне о́тче, о душа́х на́ших.

И ны́не, пра́здника, или́ Богоро́дичен, глас то́йже.

Тропáрь, глaс 3:

Чу́днаго Некта́рия в пе́снех духо́вных восхва́лим/ и благоче́стное житие́ того́ ублажи́м,/ я́ко мирско́е мудрова́ние посрами́/ и христолюби́вым лю́дем путь покая́ния показа́./ Сего́ ра́ди ны́не вопие́м:// ра́дуйся, о́тче богому́дре, ве́рным утвержде́ние.

Ин тропа́рь (на обре́тение моще́й), глaс 1:

Твои́х моще́й обре́тение пра́зднующе,/ глас хвале́ния тебе́ прино́сим,/ моли́твенниче наш те́плый и ско́рый помо́щниче,/ богоблаже́нне ста́рче Некта́рие,/ боле́зни исцели́ и ско́рби потреби́,/ ве́лие бо и́маши ко Христу́ дерзнове́ние,/ уго́дниче Того́ изря́дный// и предста́телю за ны ми́лостивый.

На у́трени

По 1-м стихосло́вии седа́лен, глас 2:

Всесве́тлое торжество́ днесь и печа́ли премене́ние на ра́дость, скорбе́й бо потреби́тель и страсте́й свободи́тель мощьми́ свои́ми возврати́ся на ме́сто нача́льных по́двигов свои́х. Лику́й, пу́стыне О́птина, и наро́ди правосла́внии, весели́теся, я́ко во обре́тении и пренесе́нии моще́й ста́рца Некта́рия дарова́ Госпо́дь лю́дем Свои́м ве́лию ми́лость.

Сла́ва, и ны́не, пра́здника, или́ Богоро́дичен:

Тобо́ю, Ма́ти Де́во, всей вселе́нней возсия́ Свет Боже́ственный, Ты бо Зижди́теля всех родила́ еси́ Бо́га, Его́же моли́, Пречи́стая, низпосла́ти нам ве́лию ми́лость.

По 2-м стихосло́вии седа́лен, глас 6:

Си́лою слове́с твои́х, преподо́бне Некта́рие, суему́дрие нечести́вых обличи́л еси́ и ве́рныя, просвети́в богому́дрыми при́тчами, соу́зом любве́ Боже́ственныя связа́л еси́, и ве́рою и наде́ждою утверди́л еси́. Те́мже сохрани́ от ко́зней вра́жиих невреди́мы па́мять твою́ све́тло пра́зднующих и любо́вию пою́щих по́двиги твоя́.

Сла́ва, и ны́не, пра́здника, или́ Богоро́дичен:

Егда́ време́н исполне́ние прии́дет, и не́бо я́ко сви́ток свие́тся, и вси гре́шнии воспла́чутся, не посрами́ тогда́ мене́, Богома́ти, но Твои́ми мольба́ми сохрани́ от ве́чныя сме́рти.

По полиеле́и седа́лен, глас 6:

Во времена́ гоне́ний восприе́мый благода́ть служе́ния ста́рческаго, бу́йством про́поведи послужи́л еси́ всем ве́рным, прозира́я та́йны сокрове́нныя, и во́лю Бо́жию лю́дем возвеща́я: преподо́бне о́тче наш Некта́рие, моли́ Всеми́лостиваго Иису́са о спасе́нии душ на́ших.

Ин седа́лен преподо́бнаго (на обре́тение моще́й), глас то́йже:

Ско́ро притеце́м, о бра́тие, и со умиле́нием припаде́м к ра́це ди́внаго и смире́ннаго ста́рца, преподо́бнаго и богоно́снаго Некта́рия, той бо и ны́не источа́ет да́ры благода́тныя от свои́х многоцеле́бных моще́й и любо́вию объе́млет чад свои́х, ве́рою к нему́ притека́ющих.

Сла́ва, и ны́не, пра́здника, или́ Богоро́дичен:

Луча́ми Твоего́ све́та, Пречи́стая, ду́шу мою́, лежа́щую в ро́ве поги́бельнем, просвети́, и враги́ сокруши́, ко греху́ мя влеку́щия, да, огради́вся преподо́бнаго Некта́рия моли́твами и покро́вом Твои́м, Богоро́дице, пою́ Сы́на Твоего́ держа́ву.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Ми́ра мяте́ж возненави́дев,/ преподо́бне о́тче Некта́рие,/ того́ со тща́нием удали́лся еси́,/ повеле́нием же Госпо́дним/ отвори́л еси́ ми́ру две́ри ке́лии мона́шеския,/ я́же не вмеща́ше приходя́щих к тебе́,/ оба́че в се́рдце твое́м, любо́вию отве́рстом,/ не те́сно им бя́ше./ Сего́ ра́ди зове́м ти:/ ра́дуйся, благоуха́ние ра́йское,// моли́твенниче о душа́х на́ших.

Кано́н преподо́бнаго, его́же краегране́сие: Некта́р Боже́ственный обре́тше, ра́достно воспои́м. Глас 8.

Песнь 1.

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́ еди́ному Влады́це.

Некта́рие о́тче, го́речь отыми́ страсте́й и Боже́ственную сла́дость усто́м пода́ждь, пе́сненно воспе́ти твое́ всечестно́е преставле́ние.

Ева́нгельскою лозо́ю процве́л еси́, о́тче, и, то́ки чуде́с источи́в, умиле́нием напои́л еси́ ча́да твоя́, приснопа́мятне.

Красне́йшее твое́ торжество́ вся собра́ во оби́тель тебе́ любе́зную по́чести тебе́ возда́ти пе́сненно, Христо́в уго́дниче Некта́рие.

Терпя́ потерпе́л еси́ ско́рби и озлобле́ние врага́ и во изгна́нии му́жественно подвиза́лся еси́. Сего́ ра́ди внят Госпо́дь моли́тве твое́й и по сме́рти свободи́ тя от плене́ния.

Богоро́дичен: А́нгелов песнь еси́ и земны́х хвале́ние, бесо́в посрамле́ние и ве́рных вене́ц, Мари́е Де́во, Тя сла́вящия спаса́й.

Песнь 3.

Ирмо́с: Сочини́ мя, Го́споди,/ си́льным люде́й Твои́х,/ опоясу́я си́лою,/ и лу́ки ра́тников сокруши́,// и нищеты́ моея́ рог возвы́си.

Раче́нием всесвяты́м распала́емь, раче́ния греха́ отврати́лся еси́ и, тьму страсте́й разгна́в и де́монскую зло́бу посрами́в, запина́тель зми́я яви́лся еси́, всему́дре Некта́рие.

Боже́ственное любому́дрие возлюби́л еси́ и му́дрость ми́ра пости́гл еси́, венце́м смиренному́дрия увенча́вся, Некта́рие богому́дре.

О́птинский небосво́д озари́л еси́, я́ко звезда́ в нощи́, и мощьми́ твои́ми, о́тче преподо́бне, я́ко о́блаком све́тлым, осени́л еси́ собра́ние ве́рных.

Жела́нием в го́рняя ум впери́л еси́ и земна́я преоби́дел еси́, блаже́нне, в по́двизех не пощади́в те́ло, ни ду́шу твою́, сего́ ра́ди, живоно́сную ме́ртвость стяжа́в, то́ю живи́ши ме́ртвыя душе́ю.

Богоро́дичен: Е́ва разреша́ется кля́твы, и враг закля́тый связу́ется, Рождество́м бо Твои́м, Влады́чице Чи́стая, жи́знь ве́чная возсия́, тля потреби́ся и ве́рным отра́да дарова́ся.

Конда́к и и́кос пра́здника.

Ин конда́к преподо́бнаго (на обре́тение моще́й), глас 4:

Обре́тение святы́х моще́й твои́х пра́зднуем днесь,/ богоблаже́нне ста́рче Некта́рие:/ утоли́ боле́зни на́ша, мо́лим тя,/ и печа́ли мглу грехо́вную разве́й,/ благомо́щными твои́ми моли́твами,/ у Христа́ Бо́га испроси́в нам мир// и ве́лию ми́лость.

Седа́лен, глас 6:

Внима́я словесе́м Госпо́дним, преподо́бне, кро́тости и смире́нию се́рдца научи́лся еси́ и, ничи́мже смуща́емый, поко́й в души́ твое́й обре́л еси́, те́мже и, отроча́ти ма́лому подо́бяся, согреша́ющих исправля́л еси́ ду́хом кро́тости и бли́жняго с любо́вию наставля́л еси́. Сего́ ра́ди моли́ся, блаже́нне, и подража́ющим ти простоты́ и незло́бия дости́гнути.

Ин седа́лен преподо́бнаго (на обре́тение моще́й), глас 4:

Предыди́те, лю́дие, с весе́лием и возра́дуйтеся, се бо ди́вный ковче́г гряде́т, одушевле́н доброде́телию, мо́щи блаже́ннаго ста́рца Некта́рия, и́же те́плыми свои́ми моли́твами к Бо́гу утеше́ние подае́т пра́зднующим сие́ торжество́.

Сла́ва, и ны́не, пра́здника, или́ Богоро́дичен:

Ты еди́на во всех ро́дех, Де́во Пречи́стая, Ма́ти яви́лася еси́ Бо́жия. Ты Божеству́ была́ еси́ Жили́ще, Всенепоро́чная, не опа́льшися Огне́м непристу́пнаго Све́та. Те́мже Тя вси ублажа́ем и мо́лим, Мари́е Богоневе́сто: сотвори́ ны жили́ща Ду́ха Свята́го.

Песнь 4.

Ирмо́с: Богоно́сный Ду́хом Святы́м просвети́вся проро́к Авваку́м,/ в после́дняя Твое́ прише́ствие прови́дев, вопия́ше:/ внегда́ прибли́житися ле́том, позна́ешися:/ внегда́ приити́ вре́мени, яви́шися.// Сла́ва си́ле Твое́й, Го́споди.

Светоно́сная ра́ка твоя́, я́ко ка́мень драги́й, сия́ет чудесы́ и благода́тных исцеле́ний испуща́ет лучи́, всебога́те Некта́рие, с ве́рою к тебе́ притека́ющим.

Треволне́ния страсте́й уставля́еши и тишину́ Иису́сову подае́ши, о́тче Некта́рие преподо́бне, я́ко Того́ ве́рный раб быв и благода́ти сосу́д испо́лненный.

Внегда́ прибли́жишася ле́та, позна́лся еси́, уго́дниче Бо́жий Некта́рие, из-под спу́да возсия́в мощьми́ благода́тными, и тьму неве́рия разори́л еси́ кре́постию Го́спода твоего́.

Е́ллинское мудрова́ние посрами́л еси́ и, юро́дством благослове́нным прикры́вся, вне Христа́ и́щущих му́дрость обличи́л еси́, небе́сный у́ме, Некта́рие, тайнове́дче блаже́нный.

Богоро́дичен: На река́х ско́рби пла́кахом и избавле́ния ча́яхом, Всеми́лостивая Ма́ти Спа́са, внегда́ прии́де по́мощь Твоя́, я́же стра́стнаго плене́ния свободи́ ны.

Песнь 5.

Ирмо́с: Мрак души́ моея́/ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,// да у́тренюя сла́влю Тя.

На тебе́ показа́ ми́лость Свою́ Госпо́дь и вся хоте́ния Своя́ в тебе́ испо́лни, ты бо муж пра́ведный яви́лся еси́, богому́дре о́тче, се́рдце чи́сто стяжа́в, многоразли́чными дарова́нии испо́лнено.

Испо́лни ра́дости собра́ние ве́рных, обстоя́щих ра́ку моще́й твои́х, преиспо́лнену благода́ти, свя́те Некта́рие, и осла́бу пода́ждь, и избавле́ние от лю́тых грехопаде́ний на́ших.

Иде́же упоко́ися те́ло твое́, столп благода́ти осиява́ет ве́рныя, и о́блак моли́тв твои́х, преподо́бне, ороша́ет всех притека́ющих и любо́вию мо́щи твоя́ лобыза́ющих.

О́птинская ра́дость ты еси́, о́тче Некта́рие, и приснопребыва́ющее ста́рцев весе́лие, вся печа́ли жите́йския моли́твою разве́явый и в смех претвори́вый де́монская нападе́ния.

Богоро́дичен: Боле́зни утоли́, Влады́чице Де́во, Врача́ челове́ком ро́ждшая, и огнь любосла́стный угаси́ одожде́нием цельбоно́сных моли́тв Твои́х, Всеще́драя, да́рующи лю́дем Твои́м ве́лию ми́лость.

Песнь 6.

Ирмо́с: Во Исаа́це страсть прописа́вый,/ и во Ио́не погребе́ние прообразова́вый,/ и воскресе́ние всем подая́й,/ Тебе́ вопие́м с проро́ком:// от тли нас возведи́, Благоутро́бне Го́споди.

Ра́дости неизглаго́ланныя испо́лнил еси́, о́тче, оби́тель твою́ честны́х моще́й возвраще́нием, те́мже и чад твои́х немо́лчныя гла́сы приими́, вы́ну пою́щих твое́ из земны́х недр обре́тение.

Еже́ по о́бразу Христо́ву послуша́нию вда́лся еси́ и, всеме́рный иску́с проше́д и доброде́телию воскре́с, стра́сти погре́бл еси́, сла́вою ста́рчества украси́вся, Некта́рие.

Терпе́ние Анато́лиево и любо́вь Амвро́сиеву стяжа́в, кро́тости же и смире́нию Ио́сифа и Варсоно́фия до́блести подража́я, вся дарова́ния отце́в вмести́л еси́, преподо́бне.

Ше́ствуя неукло́нно святооте́ческою стезе́ю, прему́дре а́вво, го́рних оби́телей дости́гл еси́, оба́че и ны́не не оставля́еши моли́твами твои́ми бра́тию земны́я оби́тели твоея́, иде́же нача́ло подвиго́м полага́л еси́.

Богоро́дичен: Е́вино преслуша́ние испра́вила еси́, Пречи́стая Де́во Влады́чице, Арха́нгелова гла́са послу́шавши, се Раба́ Госпо́дня есмь, рекла́ еси́, и кля́тва прама́терня потреби́ся.

Конда́к, глас 8:

От ста́рцев смире́нных и богому́дрых, Амвро́сия и Анато́лия,/ от сея́ лучеза́рныя дво́ицы,/ восприя́л еси́ благода́ть окормле́ния ста́рческаго, благоуха́нне о́тче Некта́рие:/ сый свобо́ден от всех, всем себе́ порабо́тил еси́,/ тяготы́ мона́хов и миря́н поне́сл еси́,/ до конца́ испо́лнивый зако́н Христо́в,// от Него́же прия́л еси́ вене́ц нетле́нный.

И́кос:

Я́ко Елиссе́й от Илии́ чрез ми́лоть сугу́бую благода́ть улучи́, та́ко ты, богому́дре о́тче Некта́рие, чрез свои́х боже́ственных наста́вников свы́ше дар ста́рческаго служе́ния восприя́л еси́ и в тя́жкое вре́мя гоне́ний на ве́ру Христо́ву ученико́м свои́м и всем, и́щущим духо́внаго наставле́ния, усе́рдно послужи́л еси́, с ни́миже досто́йно тя восхваля́ем: Ра́дуйся, смире́нный носи́телю ста́рческия благода́ти; ра́дуйся, па́стырю до́брый слове́сных ове́ц. Ра́дуйся, учи́телю кро́тости и незло́бия; ра́дуйся, кре́пкий испове́дниче Христо́в. Ра́дуйся, малоду́шныя наста́вивый ко спасе́нию кре́стным сло́вом; ра́дуйся, неутвержде́нныя отврати́вый от ересе́й и раско́лов. Ра́дуйся, бу́йством про́поведи му́дрость ми́ра сего́ посрами́вый; ра́дуйся, в не́мощи ди́вную си́лу Бо́жию яви́вый. Ра́дуйся, свети́льниче, во тьме горя́й и светя́й; ра́дуйся, сто́лпе ве́ры правосла́вныя. Ра́дуйся, оте́ческих преда́ний храни́телю; ра́дуйся, сотаи́нниче собо́ра ста́рцев благода́тных. Ра́дуйся, ста́рче Некта́рие, О́птинская похвало́.

Песнь 7.

Ирмо́с: Бо́жия снизхожде́ния/ огнь устыде́ся в вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.

Радостотво́рный пра́здник днесь, и печа́ли прогна́ние, и скорбя́щим утеше́ние и отра́да: мо́щи блаже́ннаго Некта́рия с на́ми пребыва́ют, те́мже да́руется всем оби́льно весе́лие.

Ад челюстьми́ свои́ми тя не сокруши́, а́ще и сокры́то бысть под земле́ю честно́е те́ло твое́, оба́че уста́ на́ша испо́лнишася песнопе́ний, егда́ благовре́менне, ста́рче Некта́рие, из недр земны́х мо́щи святы́я яви́л еси́.

Да́же до после́дних земли́ простре́ся сла́ва твоя́, преподо́бне, те́мже от се́вера и ю́га, за́пада и восто́ка ча́да твоя́ прихо́дят поклони́тися моще́м, вопи́юще: благослове́н еси́, Бо́же оте́ц на́ших.

О́птинский столп ты еси́, и сла́вы ста́рчества вене́ц благоуха́нный, во оби́тель твою́ возврати́лся еси́, и приложи́вся ко отце́м, возвесели́л еси́ небе́сных, Некта́рие, и земноро́дных обра́довал еси́, вопию́щих: благослове́н еси́, Бо́же оте́ц на́ших.

Богоро́дичен: Све́щнице Свещи́ Боже́ственныя, я́же есть Сын Твой, прише́дый пло́тию в мир, мрак плотска́го мудрова́ния потреби́, Пресвята́я, и Ду́ха огнь в сердца́ земноро́дных всели́, благослове́н еси́, А́вво О́тче, вопию́щих.

Песнь 8.

Ирмо́с: Мусики́йским орга́ном согласу́ющим,/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вяху во вся ве́ки.

Тро́ицы уго́дниче всеблаги́й, пе́сненныя приими́ венцы́, я́же ча́да твоя́ сплето́ша тебе́ усе́рдием, и небе́сных венце́в сподо́би нас, любо́вию воспева́ющих тя.

Нечести́выя сове́ты разори́л еси́, ми́ра посрами́в плотско́е мудрова́ние; благоче́стие же возвести́л еси́, преподо́бне, и богому́дренно утверди́л еси́, в простоте́ Христо́ве и благода́ти.

О тебе́ хва́лимся, и о тебе́ пое́м, я́ко оте́ц еси́ наш чадолюби́вый, не оста́вил еси́ нас си́рых, ниже́ оби́тель твою́, но возврати́лся еси́ в ню мощьми́, Некта́рие преподо́бне.

Вели́ка обре́те тя помо́щника в беда́х земля́ Ру́сская и оби́тель О́птинская, в не́йже по́двигом многообра́зным подвиза́вся, и юро́дства и́го подъе́м, Некта́рие ста́рче, врага́ обличи́л еси́, и малоду́шныя утверди́л еси́.

Богоро́дичен: О́блаче све́тлый, Со́лнце Христа́ нося́й, Всепе́тая и Пречи́стая Де́во, мглу греха́ разве́й мольба́ми твои́ми, да озаря́еми луча́ми Сы́на Твоего́, воспое́м Тя и ублажи́м во вся ве́ки.

Песнь 9.

Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока своего́:/ в ни́хже посети́ нас восто́к с высоты́,// и напра́вил ны есть на путь ми́ра.

Сла́достно благоуха́ют мо́щи твоя́, присноблаже́нне ста́рче Некта́рие, по́двигом бо всему́дрым подвиза́вся, в ме́ру отце́в твои́х дости́гл еси́, и сочета́лся еси́ с ни́ми в духо́вный соу́з, сего́ ра́ди тя велича́ем.

Посети́л еси́ нас, из юдо́ли подзе́мныя светоявле́нно возвы́сився, те́мже от но́щи страсте́й изба́ви, блаже́нне, притека́ющия к ра́це моще́й твои́х, и благоче́стно ти покланя́ющияся.

О, возвраще́ния твоего́ к нам! Нищету́ обогати́л еси́ на́шу многоце́нным би́сером, моще́й твои́х предложе́нием, и ку́плю спасе́ния де́яти помога́еши, тя велича́ющим, прему́дре Некта́рие.

И ду́хом пребу́ди с на́ми, Некта́рие, те́лом благоуха́нным почти́вый О́птину, и пресла́достным одари́ утеше́нием пра́зднующих собра́ние, де́монов же прогони́ и стра́сти вся́ческия отжени́ жезло́м твои́м па́стырским.

Богоро́дичен: Мари́е Де́во, А́нгелы све́тлы посли́, умири́ти мир и в душа́х смяте́ние, и мра́чныя полки́ бесо́вския потреби́, Богора́дованная, Ты бо еси́ Небе́сных и земны́х Цари́ца Всепобеди́тельная.

Свети́лен:

Заверши́л еси́ чреду́ ста́рцев ди́вных из среды́ оби́тели О́птинския, преподо́бне ста́рче Некта́рие, преукра́шенный доброде́тельми мона́шескими, те́мже украси́л еси́ не́бо О́птины, я́ко при исхо́де ве́чера, егда́ не́бо украша́ется свети́лом нощны́м.

Ин свети́лен (на обре́тение моще́й):

Светолу́чное принесе́ние твои́х моще́й, я́ко обре́тение би́сера драгоце́ннаго, удивля́ет и весели́т собра́ние ве́рных, и безбо́жных помрача́ет собо́рища, озаря́юще смы́слы нас пою́щих тя, Некта́рие.

Сла́ва, и ны́не, пра́здника, или́ Богоро́дичен:

Украша́яй исхо́ды у́тра и ве́чера, ду́шу Твою́, Де́во, украси́ ле́потою неизъясни́мою, сего́ ра́ди во утро́бу Твою́ всели́ся Кра́сный добро́тою па́че сыно́в челове́ческих, и еле́ем ра́дости Тя пома́за па́че всех земноро́дных.

На хвали́тех стихи́ры пра́здника. И преподо́бнаго стихи́ры, глас 6:

Не скры́л еси́ в зе́млю/ сребра́ Господи́на твоего́,/ ниже́ истощи́л еси́ на земна́я попече́ния/ ще́дро ти да́нныя Бо́гом тала́нты,/ но те́ми приобре́л еси́/ сокро́вище многоце́нное,/ его́же тля не тлит, и не снеда́ет ржа,/ ниже́ подко́пывают та́тие,/ оба́че в живо́т ве́чный простира́ется,/ и весе́лием неоскудева́емым/ весели́т благо́е се́рдце// о Бо́зе Спа́се свое́м.

По обе́ту мона́шескому,/ нищету́ сохрани́в, преподо́бне,/ мно́гия обогати́л еси́:/ а́лчущия пита́я сло́вом и́стины,/ жа́ждущия напая́я вода́ми благода́ти,/ стра́нныя наставля́я на путь спасе́ния,/ наги́я покрыва́я любо́вию,/ больны́я исцеля́я от язв душе́вных и теле́сных,/ ю́зники изводя́ из темни́цы страсте́й./ Сего́ ра́ди унасле́довал еси́, Некта́рие,/ Ца́рствие, ве́рным угото́ванное// от сложе́ния ми́ра.

А́ще и в не́мощех и боле́знех/ изнемога́л еси́, о́тче Некта́рие,/ оба́че в гоне́ниих и ско́рбех/ со креста́ служе́ния ста́рческаго не сшел еси́,/ Распе́ншемуся за всех земноро́дных подража́я;/ кроме́ утеше́ния и наставле́ния не оста́вил еси́/ ве́рных чад твои́х, преподо́бне,/ я́ко си́ла Бо́жия// в не́мощи соверша́ется.

Плоть распя́в со страстьми́ и похотьми́,/ потща́лся еси́, о́тче Некта́рие,/ до конца́ испо́лнити во́лю Бо́жию;/ те́мже ны́не, го́рния трапе́зы наслажда́яся,/ с преподо́бными сотаи́нники О́птинскими/ пие́ши пи́во но́вое,// исполня́ющее сердца́ ва́ша весе́лием ве́чным.

И́ны стихи́ры преподо́бнаго (на обре́тение моще́й), глас 2:

Заря́ гряде́т духо́вная,/ стецы́теся, празднолю́бцы,/ свети́льники возжига́йте душе́вныя,/ еле́ем братолю́бия наполня́юще,/ угото́вайте и фимиа́м хвалы́:/ се бо мощьми́ свои́ми Некта́рий блаже́нный во оби́тель О́птинскую возвраща́ется/ и в го́рнем мо́лит приле́жно Бо́га// о спасе́нии душ на́ших.

О, чу́до пресла́вное!/ Сла́ву мудреца́ юро́д прие́млет,/ и мра́чный гроб а́ки престо́л ца́рский быва́ет,/ сме́ртное же те́ло я́ко пала́та нетле́ния,/ и разоре́нная оби́тель па́ки востае́т,/ во е́же ду́ши челове́ческия к Бо́гу призыва́ти:/ та́ко устроя́ет Дух Святы́й,// во Святы́х свои́х почива́яй.

Некта́рие, ста́рче благи́й,/ духо́вный пир сотвори́л еси́/ во обре́тении моще́й твои́х, пресла́вне;/ то́ки благода́ти и струи́ исцеле́ний источа́еши/ и вино́ умиле́ния, ду́ши веселя́щее,/ и ду́хом свои́м сопрису́тствуеши нам,/ вся возвыша́я к высоте́ духо́вней,// е́же Христа́ прославля́ти.

Сла́ва, преподо́бнаго, глас 7:

От земли́ возвыша́яй убо́га,/ от гно́ища возставля́яй ни́ща,/ Святы́й Изра́илев, Христо́с Бог наш, посрами́ прему́дрость ми́ра сего́/ и избра́ в насле́дие ве́чное/ худоро́дная и уничиже́нная,/ да обличи́т греха́ студ,/ чудоде́йствуя во избра́нных Свои́х/ и посыла́я их, я́ко проро́ки, в мир,/ наста́вити лю́ди на путь святы́х,// е́же есть смиренному́дрие.

И ны́не, пра́здника, или́ Богоро́дичен, глас то́йже.

На Литурги́и

Блаже́нна пра́здника, и от кано́на преподо́бнаго, Песнь 6-я. Проки́мен пра́здника, и преподо́бнаго, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия пра́здника, и преподо́бнаго, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен пра́здника, и преподо́бнаго: В па́мять ве́чную бу́дет пра́ведник, от слу́ха зла не убои́тся.

Моли́тва

О преподо́бне и богоблаже́нне о́тче Некта́рие, присносве́тлый свети́льниче ста́рчества О́птинскаго! Юро́дство подъе́мый и безу́мие ми́ра обличи́вый, от богобо́рных злоключе́ния до́бльственне претерпе́вый и блаже́нства изгна́нных ра́ди Го́спода Иису́са вкуси́вый. При́зри ны́не с Небесе́ и от ра́йскаго са́да к нам прини́кни. Возвы́си на́ше мудрова́ние от земны́х попече́ний и о Небе́снем жи́тельстве помышля́ти научи́. Я́ко боже́ственными доброде́тельми себе́ украси́вый и от плодо́в ра́йских сла́дости насы́тивыйся, треволне́ния страсте́й исхити́ и го́рькаго грехолю́бия нас изба́ви всеизря́дным твои́м предста́тельством. В ве́ре правосла́вней до после́дняго издыха́ния утверди́ ны стоя́ти и по оте́ческим стопа́м умудри́ нас ходи́ти. Го́спода Бо́га умоли́, богому́дре о́тче, от кова́рных сете́й гряду́щаго анти́христа нас изба́вити, да ми́рное и благоче́стное житие́ в ве́це сем сконча́ем и ра́йских селе́ний по твои́м моли́твам насле́дити сподо́бимся, иде́же ку́пно с тобо́ю и со все́ми ста́рцы О́птинскими воспое́м и просла́вим Безнача́льную и Неразде́льную и Единосу́щную Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 17 июля 2020 года (журнал № 34)

Ме́сяца ма́я в 3-й день

Пра́знование Пресвяте́й Влады́чице на́шей Богоро́дице и Присноде́ве Мари́и ра́ди ико́ны Ея́, имену́емыя «Све́нская-Пече́рская»

На вели́цей вече́рни

На Го́споди, воззва́х: поста́вим cтихо́в 8

и пое́м стихи́ры Трио́ди 3 и Богоро́дицы 5.

Стихи́ры Богоро́дицы, глас 8.

Подо́бен: О пресла́внаго чудесе́:

Дне́сь све́тло блиста́ет/ Воскресе́ние Спа́са Христа́,/ и Пресвята́я Богоро́дица правосла́вных собира́ет/ к Све́нстей ико́не Свое́й,/ я́ко Ма́ти о ча́дех веселя́щися,/ просвеще́ние душа́м и телесе́м да́рует,/ освяща́ющи и спаса́ющи притека́ющия к Ней,/ избра́ бо Ю́ Госпо́дь стро́ити и покрыва́ти// Христоимени́тое ста́до, рабы́ Своя́.

Ка́ко не диви́мся/ Твоему́ о нac прοмышле́нию, Богома́ти,/ я́ко от Пече́рскаго уде́ла Твоего́/ в зе́млю Бря́нскую ико́ною Твое́ю изшла́ еси́,/ я́коже Сын Твой рече́ ученико́м Свои́м:/и во ины́х страна́х до́лжен есмь пропове́дати./ Те́мже глас целова́ния Твоего́ та́инственно слы́шаще,/ игра́им ра́достно,// Ду́хом просвеща́еми.

Дарова́ла еси́ гра́ду Бря́нску/ Све́нский-Пече́рский о́браз Твой, Влады́чице,/ я́ко сте́ну необори́му/ и исто́чник чуде́с,/ и́мже сове́ты злосла́вных разоря́ются/ и полки́ супоста́т дале́че отгоня́ются,/ вся же земля́ Ру́сская ико́ну сию́ почита́ет,/ ми́лости Твоя́, от нея́ явля́емыя,// прославля́ющи, Присноде́во.

О, пресла́внаго чудесе́!/ О́чи благочести́ваго кня́зя Рома́на помрачи́стеся,/ да вся земля́ Бря́нская просвети́тся/ благода́тию ико́ны Цари́цы Небе́сныя,/ очи́стим у́бо чу́вствия/ и у́зрим свет ве́ры правосла́вныя,/ зна́мениями от ико́ны сея́ явля́емый,/ да тьмы́ ве́чныя избе́гнем,// Богоро́дицею спаса́еми.

Ра́достная пе́ния и благода́рная/ Тебе́, Ма́ти Де́во,/ Све́нская оби́тель по достоя́нию прино́сит,/ я́ко ме́сто сие́ избрала́ ecи́/ и о́бразом Твои́м чудотво́рным/ обита́ти зде изво́лила еси́,/ не отврати́ у́бо Лица́ Твоего́ от нас, Пречи́стая,/ ве́рою и любо́вию Тя воспева́ющих,// я́ко Благоутро́бну.

Сла́ва, глас 6:

Днесь во гла́се хвале́бнаго пе́ния/ духо́вное торжество́ соста́вим,/ досто́йно почита́юще Све́нскую ико́ну Цари́цы Богоро́дицы,/ то́ю бо о́чи благове́рнаго кня́зя Рома́на просвети́ла есть,/ до ны́не же бе́сы изгоня́ет, неду́ги исцеля́ет,/ напа́стей избавля́ет и мона́хов в по́двизех укрепля́ет,/ враго́в устраша́ет и правосла́вие утвержда́ет,/ те́пле моля́щися ко Го́споду// о спасе́нии душ на́ших.

И ны́не, Трио́ди.

Вход. Проки́мен дне. Чте́ния три Богоро́дицы.

На лити́и стихи́ра Трио́ди лити́йная мимоше́дшей неде́ли

и Богоро́дицы стихи́ра, глас 1:

Прииди́те, ве́рнии,/ пра́здник Све́нския ико́ны/ Пресвяты́я Богоро́дицы соста́вим,/ е́йже со стра́хом слу́жат си́лы Небе́сныя,/ припа́дают архиере́и и свяще́нницы,/ мона́си и вси правосла́внии, умиле́нно взыва́юще:/ о, Ма́ти Бо́жия, спаси́ зе́млю Ру́сскую,/ исцели́ сокруше́ние ея́// и ве́рныя лю́ди уте́ши Твоя́.

Сла́ва, и ны́не, глас 5:

Воспо́йте, лю́дие,/ Ма́тери Бо́га на́шего воспо́йте,/ се бо, на Небеси́ ца́рствующи,/ су́щих на земли́ посеща́ет/ и благода́ть Свою́ ико́нам Свои́м да́рует,/ те́мже о́браз Ея́ любе́зно лобыза́юще,/ приле́жно мо́лим/ дарова́ти Правосла́вней Це́ркви утвержде́ние// и душа́м на́шим ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Земле́ Бря́нская,/ красу́йся и лику́й,/ се бо Све́нский о́браз/ Пречи́стыя Богома́тере// преде́лы твоя́ осеня́ет.

Стих: Помяну́ и́мя Твое́/ во вся́ком ро́де и ро́де.

Благода́тию ико́ны Твоея́,/ Цари́це Небе́сная,/ Правосла́вие утвержда́еши,/ исцеле́ния источа́еши// и напа́стей избавля́еши.

Стих: Лицу́ Твоему́/ помо́лятся бога́тии лю́дстии.

Лицу́ Твоему́, Де́во,/ архиере́и и свяще́нницы,/ мона́си и вси правосла́внии/ благогове́йно покланя́ются// и со А́нгелы слу́жат.

Сла́ва, глас и подо́бен то́йже:

Взбра́нная Воево́до/ правосла́вно чту́щих Тя,/ Влады́чице Богоро́дице,/ Све́нскою ико́ною Твое́ю// от ви́димых и неви́димых враг нас огради́.

И ны́не, Трио́ди.

На благослове́нии хле́бов тропа́рь, глас 5:

Пресвята́я Де́во Богоро́дице,/ земли́ Бря́нстей благослове́ние и покро́в/ Све́нский-Пече́рский о́браз Твой дарова́ла еси́,/ и́мже Правосла́вие утвержда́еши,/ е́реси и раско́лы побежда́еши,/ исцеле́ния источа́еши,/ наше́ствия иноплеме́нных отража́еши/ и междоусо́бныя бра́ни умиря́еши,/ те́мже благода́рно воспева́ем Тя,// Оте́чества на́шего похвалу́ и заступле́ние.

На у́трени

На Бог Госпо́дь: тропа́рь Трио́ди два́жды. Сла́ва, и ны́не, Богоро́дицы.

По 1-м стихосло́вии седа́лен Трио́ди.

Сла́ва, и ны́не, Богоро́дицы, глас 4:

Явле́нием ми́лостей Твои́х, Ма́ти Бо́жия,/ да веселя́тся правосла́вных собо́ри,/ чту́щия чудотво́рный Све́нский о́браз Твой,// ерети́ческое же со́нмище да посрами́тся/ и, я́ко прах, да возмете́тся от лица́ Бря́нския земли́.

По 2-м стихосло́вии седа́лен Трио́ди.

Сла́ва, и ны́не, Богоро́дицы, глас 4:

Наста́вница еси́ мона́хов, Присноде́во,/ те́мже при́зри на оби́тель Све́нскую,/ ю́же благове́рный князь Рома́н на ме́сте, Тобо́ю избра́ннем, созда́,/ я́ко киво́т чудотво́рныя ико́ны Твоея́,// и при́сно сию́ соблюда́й, подвиза́ющихся же в ней спаса́й.

Велича́ние:

Досто́йно есть/ велича́ти Тя,/ Богоро́дице,/ земли́ Ру́сския Цари́цу Небе́сную,// Све́нский о́браз Твой в ней просла́вльшую.

Псало́м избра́нный:

^{@1 лик: О@}святи́л есть селе́ние Свое́ Вы́шний.

^{@2 лик: В@}ся сла́ва Дще́ре Царе́вы внутрь.

^{@1 лик: П@}осли́ свет Твой и и́стину Твою́, та мя наста́виста и введо́ста мя в го́ру святу́ю Твою́.

^{@2 лик: П@}редста́ Цари́ца одесну́ю Тебе́.

^{@1 лик: В@} ри́зах позлаще́нных оде́яна, и преиспещре́на.

^{@2 лик: П@}ресла́вная глаго́лашася о Тебе́, гра́де Бо́жий.

^{@1 лик: С@}лы́ши, Дщи, и виждь, и приклони́ у́хо Твое́.

^{@2 лик: И@} возжела́ет Царь добро́ты Твоея́, зане́ Той есть Госпо́дь Твой.

^{@1 лик: Л@}ицу́ Твоему́ помо́лятся бога́тии лю́дстии.

^{@2 лик: Н@}е удали́ по́мощь Твою́ от Мене́, на заступле́ние мое́ вонми́.

^{@1 лик: В@}о́ньже а́ще день призову́ Тя, ско́ро услы́ши мя.

^{@2 лик: С@}паси́ мя ми́лостию Твое́ю.

^{@1 лик: В@}озвеселя́тся вси упова́ющии на Тя, и похва́лятся о Тебе́ лю́бящии и́мя Твое́.

^{@2 лик: П@}омяну́ и́мя Твое́ во вся́ком ро́де и ро́де.

По полиеле́и седа́лен, глас 4:

Благослове́нная Влады́чице,/ cвяты́й о́браз Твой зря́ще,/ приле́жно мо́лим Тя:/ на ка́мени пра́выя ве́ры рабы́ Твоя́ утверди́.

Сла́ва, и ны́не, глас то́йже:

Лику́й и красу́йся, Бря́нская земле́,/ иму́щи в себе́ неоску́дный исто́чник благода́ти,/ Све́нскую ико́ну Пречи́стыя Де́вы,/ Ея́же ра́ди ви́димыя и неви́димыя враги́ прогоня́ются,/ еретицы́ посрамля́ются,/ ве́рнии же любо́вию неизче́тныя Ея́ ми́лости велича́ют.

По 50-м псалме́ стихи́ра, глас 6:

По грехо́м на́шим/ умно́жишася в нас безу́мнии,/ и́же глаго́лют в сердца́х свои́х, я́ко Бо́га несть/ и пропове́дуют уче́ния па́губная и развраще́нная,/ малоду́шныя от Святы́я Це́ркве отторга́юще,/ но, о, Пречи́стая Богоро́дице,/ я́коже дре́вле о́чи благове́рнаго кня́зя Рома́на просвети́ла еси́/ и иноплеме́нных от гра́да Бря́нска отгна́ла еси́,/ си́це заблу́ждшия просвети́ и злосла́вныя устраши́,// и спаси́ ду́ши на́ша.

Кано́н Трио́ди и Богоро́дицы кано́н. Глас 1.

Песнь 1.

Ирмо́с: Воскресе́ния день,/ просвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог на́с преведе́,// побе́дную пою́щия.

Воскресе́ния день Христа́ Бо́га на́шего/ и благода́ть Пречи́стыя Его́ Ма́тере/ прииди́те, правосла́вных собо́ри, согла́сно воспои́м,/ благода́рственная пою́ще.

Очи́стим чу́вствия и у́зрим очи́ма ве́ры/ Пресвяту́ю Богоро́дицу,/ гряду́щую от Пече́рскаго уде́ла Своего́/ посети́ти Бря́нскую зе́млю/ и Све́нскую ико́ну Свою́ в ней просла́вити.

Небеса́ у́бо досто́йно да веселя́тся,/ земля́ же Ру́сская да ра́дуется,/ да пра́зднует же град Брянск/ и Све́нская оби́тель да торжеству́ет,/ почита́юще ико́ну Богома́тере.

О́чи благове́рнаго кня́зя Рома́на просвети́ла еси́,/ те́пле моля́щагося Тебе́, Де́во Всенепоро́чная,/ благода́тию Сы́на Твоего́,/ из гро́ба днесь возсия́вшаго.

Катава́сия Трио́ди.

Песнь 3.

Ирмо́с: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,// в Нем же утвержда́емся.

Прииди́те, песнь воспои́м но́вую/ Пречи́стей Де́ве Богоро́дице,/ честны́й о́браз Ея́ обстоя́ще любо́вию,/ на горе́ Све́нстей Го́ру одушевле́нную правосла́вно велича́юще.

Прииди́те, благода́ть исцеле́ний душ и теле́с почерпе́м/ от исто́чника неистощи́маго,/ Све́нския ико́ны Богома́тере,/ Е́юже во и́стинней ве́ре утвержда́емся и душетле́нная уче́ния низлага́ем.

Ны́не вси исполня́ются ра́дости,/ архиере́и и свяще́нницы, мона́си и мирсти́и,/ пра́зднующе све́тло торжество́ ми́лостей Твои́х, Богоневе́сто,/ Све́нским о́бразом нам явле́нных.

Вчера́ зре́ния лиши́ся благове́рный князь Рома́н,/ да явя́тся на нем дела́ Цари́цы Богоотрокови́цы,/ ны́не же я́сно зрит ико́ну Ея́,/ зе́млю Бря́нскую чудесы́ облиста́ющую.

Конда́к и и́кос Трио́ди.

Седа́лен Трио́ди.

Сла́ва, и ны́не, Богоро́дицы, глас 4:

Предвари́вшии у́тро свяще́нницы, провожда́вшии от оби́тели Ки́ево-Пече́рския/ в преде́лы Бря́нския ико́ну Твою́, Всепе́тая Влады́чице,/ не в ладии́, но на ду́бе близ Све́ны реки́ обрето́ша ю́,/ слы́шав же сия́, князь Рома́н со слеза́ми вопия́ше:/ О Пресвята́я Де́во! да́руй ми зре́ти чу́дный о́браз Твой/ и свет Сы́на Твоего́, спаса́ющаго род челове́ческий.

Песнь 4.

Ирмо́с: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жeт/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,// я́ко Всеси́лен.

На Боже́ственней стра́жи/ в моли́твеннем бде́нии пред Све́нскою ико́ною ста́нем,/ ку́пно с преподо́бными Анто́нием и Феодо́сием моля́ще Пречи́стую/ спасти́ зе́млю Ру́сскую.

Богооте́ц у́бо Дави́д/ пред се́нным ковче́гом скака́ше, игра́я,/ ча́да же Твоя́, Богома́ти,/ пред о́бразом Твои́м лику́юще,/ чудеса́ его́ прославля́ют,/ и́миже спаса́еши нас от бед и зол.

Теле́сныя о́чи смотре́нием Бо́жиим помраче́ны име́я,/ благочести́вый князь Рома́н серде́чныма очи́ма прови́де во́лю Твою́, Богоро́дице Де́во,/ о созда́нии оби́тели и́ноком на ме́сте, Тобо́ю избра́ннем.

Я́коже дре́вле супоста́т, оби́тель Твою́ окра́дших, ослепи́ла еси́, Влады́чице,/ и достоя́ние бра́тии возврати́ла еси́,/ та́ко ны́не злове́рныя помрачи́,/ заблу́ждшия же Ма́тери-Це́ркви возврати́.

Песнь 5.

Ирмо́с: У́тренюем у́треннюю глубоку́,/ и вме́сто ми́ра песнь принесе́м Влады́це,/ и Христа́ у́зрим/ Пра́вды Со́лнце,// всем жизнь возсия́юща.

У́тренюем у́треннюю глубоку́,/ и с пе́нием доброде́тели принесе́м Влады́чице, глаго́люще:/ сподо́би рабы́ Твоя́ свет узре́ти присносия́ющий.

Безме́рное Твое́ благоутро́бие, Де́во,/ игу́мен Све́нския оби́тели с бра́тиею зря́ше,/ и́хже от напра́сныя сме́рти при разруше́нии хра́ма сохрани́ла еси.

Присту́пим, свещено́снии, любопра́зднственными чи́нми/ к Све́нскому о́бразу Богома́тере днесь,/ и́мже тьма страсте́й на́ших отгоня́ется.

Просвеща́еши Боже́ственными луча́ми благода́ти ико́ны Твоея́, Всепе́тая,/ духо́вною и теле́сною слепото́ю неду́гующих.

Песнь 6.

Ирмо́с: Снизше́л ecú в преиспо́дняя земли́,/ и сокруши́л ecи́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,// воскре́сл ecи́ от гро́ба.

Пришла́ еси́ ми́лостивно, Ма́ти Бо́жия,/ честны́м Твои́м о́бразом к благове́рному кня́зю Рома́ну,/ я́коже Сын Твой посла́ о́браз Свой кня́зю А́вгарю,/ и просвети́ла еси́ о́чи его́.

Возво́диши держи́мых скорбьми́ и боле́зньми, Богоневе́сто,/ к терпе́нию, смире́нию и упова́нию спасе́ния,/ пред Све́нскою ико́ною Твое́ю те́пле по́мощь Твою́ призыва́ющих.

Спа́се наш Преблаги́й,/ Пречи́стыя Ма́тере Твоея́ мольба́ми/ Це́рковь Твою́ Святу́ю от ересе́й и раско́лов непоколеби́му сохрани́/ и заблу́ждшия на путь пра́вый обрати́. Сохраня́й во и́стинней ве́ре чту́щия Тя, Влады́чице,/ зна́мении и чудесы́ от Све́нския ико́ны Твоея́/ явля́ющи благода́ть Бо́жию, Правосла́вней Це́ркви прису́щую.

Конда́к, глас 3:

Я́ко цвет неувяда́емый/ Ла́вры Ки́ево-Пече́рския/ чу́дная ико́на Твоя́, Влады́чице Богоро́дице,/ на дре́ве близ Све́ны реки́ обре́теся,/ явля́ющи ме́сто но́ваго вертогра́да духо́внаго/ и благоуха́нием чуде́с исполня́ющи притека́ющих к ней,/ те́мже и на пре́дняя проба́ви ми́лости Твоя́, Пречи́стая,// правосла́вно Тя велича́ющим.

И́кос:

Земна́я на земли́ оста́вльше,/ и мы́сли от страсте́й очи́стивше,/ впери́м зре́ние вку́пе и чу́вства к Пречи́стей Богома́тери,/ Све́нскаго о́браза Ея́ ди́вное вознесе́ние на дре́во/ и чудеса́ его́ благода́рно прославля́юще,/ и умиле́нно возопии́м:/ не оста́ви рабы́ Твоя́, Влады́чице,/ и́ноков, подвиза́ющихся на ме́сте, Тобо́ю избра́ннем, укрепи́,/ град Брянск и всю ру́сскую зе́млю благода́тию Твое́ю покры́й,/ уте́ши нас, я́ко Ма́ти, наста́ви, я́ко сыно́в,/ правосла́вно Тя велича́ющих.

Песнь 7.

Ирмо́с: О́троки от пе́щи изба́вивый,/ быв Челове́к, стра́ждет я́ко сме́ртен,/ и стра́стию сме́ртное/ в нетле́ния облачи́т благоле́пие,/ еди́н Благослове́н// отце́в Бог, и Препросла́влен.

О́троки от пе́щи изба́вивый, Влады́чице, Сын Твой и Бог,/ мно́гажды избавля́ше град Брянск и оби́тель Све́нскую от супоста́т,/ мольба́ми Твои́ми, еди́на Благослове́нная.

В воню́ ми́ра благода́ти Све́нския ико́ны Твоея́ притека́юще. Пречи́стая,/ Небе́сное Ми́ро ро́ждшая,/ благоуха́нием позна́ния Христо́ва исполня́емся/ и злосмра́дия злове́рия избавля́емся.

Сме́рти пра́зднуем умерщвле́ние воскресе́нием Христа́,/ злочести́вых же посрамле́ние и бе́гство милосе́рдием Присноде́вы,/ те́мже пред ико́ною Ея́ лику́юще,/ Засту́пницу на́шу воспева́ем.

Я́ко вои́стинну свяще́нный/ и спаси́тельный, и светоно́сный, Богома́ти, Све́нский о́браз Твой,/ ве́рою бо покланя́ющимся ему́, да́руеши исцеле́ние/ и от напа́стей избавле́ние.

Песнь 8.

Ирмо́с: Сей нарече́нный и Святы́й День/ еди́н суббо́т царь и госпо́дь,/ пра́здников пра́здник,/ и торжество́ есть торже́ств:// во́ньже благослови́м Христа́ во ве́ки.

Сей нарече́нный и святы́й день/ всех правосла́вных земли́ Бря́нския созыва́ет к прославле́нию Бо́жия Ма́тере,/ ра́ди чудотво́рныя Све́нския Ея́ ико́ны.

При́зри, Пресвята́я Де́во, на лю́ди Твоя́,/ пред ико́ною Све́нскою моля́щияся Тебе́,/ и проше́ния испо́лни/ о Тебе́ благословя́щия Христа́ во ве́ки.

О́тче Вседержи́телю, и Сло́ве, и Ду́ше,/ моли́твами Богоро́дицы Це́рковь Правосла́вную утверди́,/ Оте́чество на́ше в ми́ре сохрани́/ и спаси́ благословя́щия Тя во ве́ки.

Прииди́те, и́ноков собо́ри,/ ра́достно благодаре́ние Присноде́ве принесе́м,/ Све́нским о́бразом Свои́м/ благослове́ние Пече́рския Ла́вры земли́ Бря́нстей дарова́вшей.

Песнь 9.

Ирмос: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́:/ лику́й ны́не/ и весели́ся, Сио́не,/ Ты же Чи́стая, красу́йся, Богоро́дице,// о воста́нии Рождества́ Твоего́.

Свети́ся, свети́ся, сла́вный гра́де Бря́нск сла́вою Све́нскаго о́браза Богома́тере,/ лику́й ны́не и весели́ся вся Ру́сская земле́,/ покро́вом Влады́чицы храни́мая.

О Боже́ственнаго, о любе́знаго, о сладча́йшаго Твоего́ Ли́ка, Богоневе́сто,/ и́мже пребыва́ти с на́ми изво́лила еси́,/ его́же ве́рнии утвержде́ние наде́жды спасе́ния иму́ще ра́дуемся.

О Ма́ти Бо́жия, в моли́тву Тебе́ приво́дим Анто́ния, Феодо́сия и всех Пече́рских и Бря́нских святы́х,/ и́хже предста́тельством сподо́би нас невече́рняго дне Ца́рствия Сы́на Твоего́.

Согла́сно, Де́во, Тебе́ блажи́м ве́рнии,/ зна́мения и чудеса́ Све́нския ико́ны Твоея́ благода́рно воспомина́юще/ и воста́ние рождества́ Твоего́ воспева́юще.

Свети́лен:

Я́коже дре́вле просвети́ла еси́ теле́сныя о́чи благове́рнаго кня́зя Рома́на/ благода́тию Све́нския ико́ны Твоея́, Всепе́тая Богоро́дице,/ та́ко и ны́не омраче́нныя злове́рием, Боже́ственною луче́ю Сы́на Твоего́ просвети́,// правосла́вныя же во све́те Лица́ Его́ ходи́ти утверди́.

Сла́ва, и ны́не, Трио́ди.

На хвали́тех стихи́ры Трио́ди 3 и Богоро́дицы 3.

Стихи́ры Богоро́дицы, глас 1.

Подо́бен: Небе́сных чино́в:

Небе́сныя си́лы ра́дуются/ и стра́хом слу́жат чу́дней Бо́жия Ма́тере ико́не,/ на дре́ве близ Све́ны реки́ ю́ поставля́юще,/ и к весе́лию град Брянск и всю зе́млю Ру́сскую созыва́ют./ Прииди́те, почерпе́м благода́ть, о́бразом сим явля́емую/ во спасе́ние душ на́ших.

Твоего́ предста́тельства увере́ние/ и милосе́рдия Твоего́ явле́ние/ Све́нская-Пече́рская ико́на Твоя́, Влады́чице, показа́ся нам,/ е́юже разли́чных обстоя́ний избавля́емся/ и благослове́ние на до́брая дела́ прие́млем,// я́ко на Тя упова́ние возложи́хом.

Мона́хов ру́сских первонача́льники,/ преподо́бных Анто́ния и Феодо́сия,/ преподо́бный Али́пий предстоя́щими Тебе́ изобрази́/ и ро́ждшемуся от Тебе́ Бо́жию Сло́ву,/ Де́во и Ма́ти Чи́стая,// мона́шескаго чи́на основа́ние непоколеби́мое.

Сла́ва, Трио́ди. И ны́не, глас 8.

Подо́бен: О пресла́внаго чудесе́:

О пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и Ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ правосла́вия// ми́лости и чудеса́ излива́ти до ве́ка. Ами́нь.

На Литурги́и

Блаже́нна от кано́на Трио́ди, рядова́я песнь, на 4, и Богоро́дицы, Песнь 6-я, на 4.

По вхо́де тропари́ Трио́ди и Богоро́дицы. Сла́ва, конда́к Трио́ди. И ны́не, конда́к Богоро́дицы.

Проки́мен, Апо́стол, Аллилу́ия, Ева́нгелие и прича́стен пре́жде ря́да Трио́ди, пото́м Богоро́дицы.

Моли́тва

О Всеми́лостивая Ма́ти, Пречи́стая Де́во Богоро́дице, Возбра́нная Воево́до правосла́вных! Благода́рным се́рдцем и усты́ славосло́вим Тя при́сно пред Све́нскою ико́ною Твое́ю, ю́же я́ко Боже́ственное украше́ние Це́ркве Ру́сския и зало́г ми́лости Твоея́ ве́рным лю́дем дарова́ла еси́. Сею́ бо ико́ною благода́ть Бо́жию, Правосла́вней Це́ркви прису́щую, явля́еши, егда́ то́чиши исцеле́ния, напа́стей избавля́еши, бесо́в прогоня́еши, наше́ствия иноплеме́нных отража́еши. Те́мже приле́жно мо́лим Ти ся, Богома́ти, проба́ви и на пре́дняя вели́кия ми́лости Твоя́ любо́вию чту́щим Тя, Правосла́вие утверди́, отпа́дшия от пра́выя ве́ры к позна́нию и́стины напра́ви и уста́ нечести́вых, ху́лящих Святу́ю Це́рковь, загради́. Отече́ству на́шему мир и на враги́ побе́ды да́руй, огради́ нас от нахожде́ния супоста́т, междоусо́бныя бра́ни и вся́каго зла, па́че же от душегуби́тельных страсте́й свободи́, во е́же умре́ти ми́ру и жи́ти Сы́ну и Бо́гу Твоему́ в соблюде́нии за́поведей Его́. И сподо́би нас, Предста́тельнице на́ша непосты́дная, на Стра́шнем Суде́ одесну́ю Престо́ла Бо́жия ста́ти и с ли́ки А́нгелов и святы́х та́мо восхваля́ти пречестно́е и́мя Сы́на Твоего́, со Безнача́льным Его́ Отце́м и Пресвяты́м Ду́хом во ве́ки. Ами́нь.

Источник: Текст утвержден Священным Синодом Русской Православной Церкви 15 июля 2016 года (журнал № 70)

Месяца мая в 5-й день

Преподобномученика Ефрема Новаго, Неамакрийскаго

На малей вечерни

На Господи, воззвах: поставим стихов 4 и поем стихиры, глас 2.

Подобен: Егда от Древа:

Приидите, Аттики все множество,/ к горе Непорочных¹ с теплою верою притецем,/ память всесвященную богоноснаго Ефрема велегласно славяще./ Той бо, зде пожив добродетельно,/ мученическия подвиги пройде/ и сугубых венцев по достоянию/ от Спаса сподобися.

Егда отверглся еси себе,/ рачением святым от юности уязвився,/ тогда крест твой восприял еси, преподобне,/ и Спасу последовал еси преусердным сердцем,/ труды постническими ум очистив./ Сего ради агарян неистовство великодушно претерпел еси, Ефреме,/ и мученическим венцем украсился еси.

Показался еси, яко звезда новосветлая,/ явився изволением Божиим/ в обретении, отче, святых твоих мощей./ И во Святем Духе,/ Ефреме блаженне,/ чудес сияньми нас озаряеши,/ недуги целиши многоразличныя/ и скоро предваряеши щедротами твоими/ всех, верно поющих тя.

Гора Амомон, преподобне,/ постническими твоими поты напоися воистину/ и потоки кровей твоих освятися,/ в ней бо прошел еси твердо подвиги/ и врагов всю силу разрушил еси./ Сего ради святую твою обитель,/ всегда тобою хвалящуюся,/ сохрани, Ефреме,/ от всякия скорби.

Слава, глас тойже:

Постническими труды укрепленный/ и ревностию о славе Божией исполненный,/ кровь твою за Христа излиял еси,/ Ефреме богопрославленне./ На камени бо веры утвердився,/ посреде ухищрений вражиих непоколебимь пребыл еси/ и, многоразлично мучимь,/ течение подвига законно скончал еси./ Темже, преподобномучениче блаженне,/ приими от нас пение/ и исполни, яже ко спасению, прошения.

И ныне, Богородичен.

На стиховне стихиры, глас 2.

Подобен: Доме Евфрафов:

Новый в постницех и мученицех/ явился еси, Ефреме,/ преподобномучениче Христов,/ темже действуеши чудеса/ верою чтущим тя.

Стих: Честна пред Господем/ смерть преподобных Его.

Претерпел еси крепце/ агарян ухищрения,/ Ефреме преподобномучениче,/ и потоки кровными/ ризы твоя обагрил еси.

Стих: Дивен Бог во святых Своих,/ Бог Израилев.

Безвестно прежде скончався,/ ныне нам познался еси,/ Ефреме богоблаженне,/ и мощи твоя честныя,/ яко богатство, нам даровал еси.

Слава, глас и подобен тойже:

Едине Вседетелю, Боже наш,/ Троице Приснопокланяемая,/ Отче и Сыне и Душе Святый,/ Ефрема молитвами/ помилуй рабы Твоя.

И ныне, Богородичен:

Горнии Тя лицы,/ Богородице Дево,/ поют с дольними,/ славяще непрестанно/ Рождество Твое, Пречистая.

По Ныне отпущаеши: Трисвятое и тропарь зри на велицей вечерни.

На велицей вечерни

Блажен муж: ^{@1-й антифон. На Г@}осподи, воззвах: стихиры, глас 1.

Подобен: Всехвальнии мученицы:

Отче Ефреме,/ издетска стопам Христовым/ в подвизе последовал еси,/ житие равноангельное/ в горе Амомстей проходя, преподобне,/ в нейже злодейство агарянское/ твердо претерпел еси/ и мучеником равностоятелен явился еси,/ пострадав даже до крове.

Отче Ефреме,/ многовидно уязвлен быв телом,/ непреклонен, яко столп,/ предстал еси в мучениих/ и, подвизався, яко безплотный,/ в руце Господни душу предал еси./ Темже почитаем тя,/ яко Христова мученика,/ прославльшагося в безмерных чудесех.

Отче Ефреме,/ прежде незнаемь, явился еси/ и, радости нас исполнив,/ раку святых мощей твоих,/ нас освящающих,/ яко божественное сокровище дал еси,/ от нихже происходит/ исцелений благодать изобильная/ совершающим всечестную память твою.

Отче Ефреме,/ яко Христов служитель теплейший,/ славы многия сподобился еси./ Темже, призываемь,/ всюду предваряеши/ и всем помощь скоро подаеши,/ яве и во сне являяся,/ и даруеши нам/ благодать спасительную.

Отче Ефреме,/ дерзость мучителей низложив,/ благоволением Божиим/ на лета многа прежде сокровен,/ ныне нам явился еси,/ славу жизни вечныя/ и блистание благодати Духа показуя,/ ихже яве сподобятся/ Господеви непорочно поработавшии.

Отче Ефреме,/ многоразличными чудесы и видении/ во обители твоей являяся,/ зрящия тя веселиши/ и изумляеши славою твоею./ Темже, ко святым мощем твоим/ верно притекающих,/ избави всякаго обстояния,/ недугов угашая зной.

Слава, глас 6:

Ангельское жительство восприим от юности, мудре,/ в горе Непорочных вселился еси/ и, постнически подвизаяся,/ непорочен и чист во оправданиих Господних явился еси,/ очистив себе от всякаго вещественнаго пристрастия./ Руками же скверных убиен быв,/ страдальчески житие скончал еси/ и, яко жертва благоприятная/ и всеплодие божественное,/ Троице Святей принеслся еси./ Но, яко во страдальцех преподобен/ и в преподобных мученик сый,/ сугубых венцев сподобился еси/ и чудес благодать от Господа восприял еси,/ преподобномучениче Ефреме./ Темже совершающим память твою/ испроси очищение грехов и велию милость.

И ныне, Богородичен: Кто Тебе не ублажит, Пресвятая Дево:

Вход. Прокимен дне и чтения.

Пророчества Исаиина чтение (глава 43): Тако глаголет Господь:

Премудрости Соломоновы чтение (глава 3): Праведных души в руце Божией:

Премудрости Соломоновы чтение (главы 5 и 6): Праведницы во веки живут:

На литии стихиры, глас 1:

Глаголы Давидовы на тебе исполнишася,/ яко неповинен рукама и чист сердцем явился еси,/ преподобномучениче Ефреме./ Ты бо, на горе Непорочных всякую добродетель исправив/ и безстрастия цветы мученическою кровию напоив,/ плод красный израстил еси./ И ныне светло тя почитающим/ чудес сладость источаеши,/ имиже горечь страстей изсушается/ и ко спасению приводятся вопиющия:/ Господи, слава Тебе.

Глас 2:

Добродетелей стезею усердно шествуя,/ Ефреме всеблаженне,/ плоти мудрование умертвил еси,/ душу же чистейшее жилище Всесвятыя Троицы соделал еси,/ света божественнаго исполненное./ И князя тьмы, неистовно нападающа на тя,/ препобедил еси о укрепляющем тя Иисусе Христе/ и, яко злато в горниле,/ многовидными муками искусився,/ вечныя жизни и славы мученическия сподобился еси,/ всем прося мир и велию милость.

Глас 3:

Преподобием сияя/ и Богу непорочно священнодействуя,/ житие постническое и твердость во страдании/ в жертву чисту Христу принесл еси, блаженне./ Ты бо, лютыми агаряны терзаемь,/ смерти не убоялся еси,/ к жизни вечней устремляяся./ И, мученическою украсився светлостию,/ в чертог Вышния славы востекл еси,/ преподобномучениче Ефреме./ Темже совершающим память твою/ испроси у Бога прощение грехов и велию милость.

Глас 4:

Преподобным и мучеником поревновав,/ дарований Духа Утешителя исполнился еси/ и, подвигов тех приобщився,/ равныя благодати сподобился еси,/ Ефреме всеблаженне,/ истинный Божий служителю./ Темже и в нуждах обретающимся,/ во сне и яве дивно являяся,/ многообразно чудодееши/ и спасительную помощь подаеши./ Моли, святе, обители твоей в мире и тишине сохранитися/ и любовию тя чтущим/ подати грехов прощение.

Слава, глас 2:

Постническое житие твое Бог славы восприемь,/ мученическаго благохваления тя сподоби,/ Ефреме, отче преподобне,/ ангельским бо жительством и добрым деланием/ к первому достоянию возводимь,/ неистовства агарян не убоялся еси/ и, яко агнец незлобивый волками лютыми, растерзаемь,/ Христови конечне соединился еси./ Темже, обрет любве исполнение,/ не престай молити о нас прославльшаго тя Господа.

И ныне, Богородичен.

На стиховне стихиры, глас 5.

Подобен: Радуйся:

Радуйся, преподобномучениче Ефреме,/ от юности бо мирския лести возгнушався,/ всем сердцем Всевидца Бога возлюбил еси/ и, равноангельному житию поревновав,/ зельным воздержанием и теплою молитвою/ совершенства в добродетели достигл еси./ Темже и, от агарян беззаконных заклан быв немилостивно,/ мученическая страдания, яко безплотен, прешел еси./ И ныне моли чтущим тя даровати велию милость.

Стих: Честна пред Господем/ смерть преподобных Его.

Радуйся, преподобномучениче Ефреме,/ преподобным сопричастниче и мучеником украшение,/ доблести тех славный ревнителю,/ звездо многосветлая добродетелей постнических,/ ты бо, от горы Амомския/ благодатию чудес всем возблистая,/ омрачение страстей и скорбей нахождение разрешаеши/ и скорым предстательством недуги врачуеши./ И ныне моли чтущим тя даровати велию милость.

Стих: Дивен Бог во святых Своих,/ Бог Израилев.

Радуйся, преподобномучениче Ефреме,/ в Дусе Святе нас возвеселивый,/ паче же обретением мощей твоих обрадовавый,/ имиже источается благодать обильно./ Сего ради, иже в недузех и страстех сущии,/ отовсюду ко ограде твоей притекают/ и, удобь исцеления приемлюще,/ яве проповедают, славне, твое теплое предстательство./ Темже доброт твоих насладившеся,/ Христа Бога воспевают,/ многими чудодеянии тя возвеличившаго.

Слава, глас 8:

Светом благодати, отче, озаряемь,/ мужественне препобедил еси нахождения служителей тьмы,/ иже нещадно тело твое раздираху./ Ты же, страдания тяжкая претерпевая,/ ко Христу взывал еси:/ приими дух мой, Спасе,/ Иже мене ради волею Пострадавый/ и Источивый ми живот вечный./ И ныне, Ефреме блаженне,/ непрестанно моли спастися тя ублажающим.

И ныне, Богородичен.

Тропарь, глас 1:

Яко солнце, возсиял еси в горе Амомстей,/ преподобномучениче Христов Ефреме,/ и, варварская нахождения претерпев,/ мученически к Богу отшел еси./ Сего ради благодать присно источаеши/ благочестно зовущим:/ слава Давшему ти крепость,/ слава Прославльшему тя,/ слава Действующему тобою всем исцеления.

На утрени

По 1-м стихословии седален, глас 1.

Подобен: Гроб Твой, Спасе:

Новосветлая звезда Христовы Церкве, воистину явился еси, Ефреме чудотворче, лучами чудес твоих озаряя концы. Темже днесь торжествуем, блаженне, твоего страдания праздник святый, Христа величающе.

Слава и ныне, праздника.

По 2-м стихословии седален, глас 4.

Подобен: Вознесыйся на Крест:

Нашедшии на святую обитель твою агаряне, якоже волцы дивии, тя, Христова агнца кротчайшаго растерзаша многообразными мучении. Темже отшел еси к Небесному граду, отче святый Ефреме, и мученичества венец приял еси.

Слава, и ныне, праздника.

По полиелеи седален, глас 4.

Подобен: Премудрость и Слово:

На гору Амомскую восшед, жития светлостию в горняя ум твой возвел еси и, мученичества течение мужески прошед, в жертву непорочную принеслся еси. Сего ради сугубую честь от Бога приял еси и ныне точиши исцеления, отче Ефреме, притекающим усердно ко святым мощем твоим, ихже в честней обители твоей, яко сокровище божественное, явил еси, блаженне, освящая всех с верою приходящих.

Слава, и ныне, праздника.

Степенна 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Матфеа, зачало 43.

По 50-м псалме стихира, глас 6:

Винограда животнаго розга сый,/ Ефреме преславне,/ мученичества грозд зрелый Церкви возрастил еси,/ добре подвизався./ И ныне таинственный нектар благодати/ теплым твоим заступлением нам источаеши/ и молишися о душах наших.

Канон святаго, глас 1,

егоже краегранесие: Даждь, отче, божественную ми благодать. Герасимово.

Песнь 1.

Ирмос: Твоя победительная десница/ боголепно в крепости прославися:/ та бо, Безсмертне,/ яко всемогущая противныя сотре,/ израильтяном путь глубины новосоделавшая.

Славою божественною украшен и света неизреченнаго исполнен, Ефреме богоносе, слово ми подаждь и просвещение ми даруй молитвами твоими, яко да воспою страдания твоя.

Ум твой повеленьми Господними издетска к жизни лучшей направил еси и монах богоносный и непорочный в горе Непорочных соделался еси.

Силу от Бога приим и благочестия являя крепость, агарянская лютая мучения мужественне претерпел еси, Ефреме богоносе, егда простроша на древе тело твое.

Богородичен: Вся чистая и избранная, девства блистающая благодатьми, явилася еси, Всенепорочная, и Бога родила еси воплощаема всем земнородным во спасение.

Песнь 3.

Ирмос: Едине ведый человеческаго существа немощь/ и милостивно в не воображся,/ препояши мя с высоты силою,/ еже вопити Тебе, Святый,/ одушевленный храме неизреченныя славы Твоея, Человеколюбче.

Возвысив ум твой к Богу, плоти мудрование благодатию Святаго Духа умертвил еси и, болезньми постническими предподвизая себе ко страданию, безстрастия сосуд явился еси, Ефреме всеблаженне.

Егда видел еси полки агарянския, яко звери лютыя, на божественную ограду твою нападшия, стал еси неуклонно и небоязненно противу кознем их и муки велия, богоносе, претерпел еси.

Долговременная мучения претерпевая, яко безплотен, велиара льстиваго всякую силу твердым противлением твоим, отче Ефреме, победил еси и мучеников венец от Бога приял еси, блаженне.

Богородичен: Яко честнейший Храм и девства всесвятое Селение, Чистая, святых Святейшее Слово плотски нам родила еси. Темже тепле вопию Ти: очисти, Дево, сердце мое от всякия скверны.

Седален, глас 4.

Подобен: Скоро предвари:

Ангельски пожив в воздержании мнозем, кровей теченьми святыя ризы твоя обагрил еси, преподобне. Темже, во обоих подвизех светло блистая, подаждь нам свыше теплыми твоими молитвами во всем помощь, Ефреме скоропослушне.

Слава, и ныне, Богородичен:

Неизреченно Рождшая Творца всяческих избави тления нечистых страстей, всегда мя оскверняющих. Виждь слезы души моея, Богородице, и очисти ум мой от помышлений безместных и даждь сердцу моему умиление, молюся.

Песнь 4.

Ирмос: Гору Тя, благодатию Божиею приосененную,/ прозорливыма Аввакум усмотрив очима,/ из Тебе изыти Израилеву провозглашаше Святому/ во спасение наше и обновление.

Простерше варвары тело твое, преподобне, ураниша е нестерпимыми муками, ты же, ко Господу горе очима сердечныма взирая, доблественне вся претерпел еси.

Любве ради ко Христу биемый и сокрушаемый нечестивыми агаряны радовался еси, святе, и вся острия губителя крепостию твоею притупил еси, преподобномучениче Ефреме, священнейший.

Прежде неведомь, отче, явился еси игумении Макарии, яже, услышавши речения святых устен твоих, имя твое и житие, преподобномучениче Ефреме, в мире сущим возвестила есть.

Богородичен: Престол явилася еси Бога Вышняго, Тайны непостижимыя Вместилище, содержащи на руках Источника жизни. Сего ради молимся Тебе, Благая Одигитрие: изведи ны из пропасти погибели и буди нам спасительное Пристанище.

Песнь 5.

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего Богоразумия/ православно поющих Тя.

По чуднем обретении мощей твоих, Ефреме преподобномучениче, действом неизреченным имя твое честное и подвиг крепкий неведущим тя людем открыл еси.

Рака святых мощей твоих, богоносе, благодать Духа Пресвятаго источает и изливает исцелений божественныя струи, отгоняющи страсти лютыя и всякая искушения.

Всем, призывающим имя твое, святе Ефреме, многообразне являешися и подаеши благодать. Темже Аттическая страна, чудес твоих исполнившися, величает Господа.

Богородичен: Жизнодавца Бога плотию рождшая, Пречистая Владычице, оживи мя, умерщвлена лестию лютаго ратоборца, и к жизни лучшей возведи мя.

Песнь 6.

Ирмос: Обыде нас последняя бездна,/ несть избавляяй,/ вменихомся, яко овцы заколения,/ спаси люди Твоя, Боже наш,/ Ты бо крепость немощствующих и исправление.

Мучеников твердость явив, мученическия светлости показался еси причастник, богоносе отче Ефреме, противу ярости зверонравных агарян неустрашимо ополчився.

Новый в преподобных и мученицех Ефрем всеславный Божественным Духом вся верныя к веселию таинственному созывает. егоже честное страдание песньми восхвалим.

Крепостию богоданною яко мученик божественный облачився, разслабленныя воздвизаеши, Ефреме премудре, и одержимым многими недуги избавление подаеши.

Богородичен: В печалех и напастех и искушениих сущим радость непостижимым Рождеством Твоим источила еси, Богородице Приснодево. Темже и мене вечныя радости сподоби.

Кондак, глас 3.

Подобен: Дева днесь:

На горе Амомстей добре подвизался еси, богомудре,/ и тамо мученическое течение скончал еси./ Темже, преподобномучениче Ефреме,/ Жизнодавец сугубыми венцы достойно увенча тя,/ прилежно молящася о душах наших.

Икос:

От юности Христу последовав, отче, мирскаго мятежа и плотския сласти всеконечне отверглся еси и, божественною любовию распалаемь, в горе Амомон ангельски пожил еси, постническими же труды душу и тело очистив, божественныя благодати жилище явился еси. Таже и, скверноубийственными руками находящих иноплеменник ят быв, мученическую крепость показал еси и, многообразным мукам и терзанием противустав, за Христа нуждно умерщвлен был еси. Темже, преподобномучениче Ефреме, Жизнодавец сугубыми венцы увенча тя, прилежно молящася о душах наших.

Синаксарий.

Месяца мая в 5-й день, память совершаем страданий святаго славнаго преподобномученика Ефрема новоявленнаго и чудотворца, иже в стране Аттичестей, на горе Амомон подвизася и в пятомнадесять веце от Рождества Христова пострада.

Стихи:

Постничеству страдание, Ефреме, сочетав,

Достойно прославлен был еси от Господа.

В пятый день, Ефреме, руками убийственными

Мученическую обрет себе кончину.

Сей муж в четыренадесятое лето от рождества своего освятися Господеви, взем на рамо крест свой. И в горе Амомон именуемей, иже во Аттице, в сущей тамо обители, божественным желанием движимый, уединися и постническия подвиги соверши, крайним воздержанием и прочими Христа ради добродетельми очистив себе и явився боговиден.

Но завистию врага и доброненавистника диавола христоборцы агаряны, морем нашедшии, граблению и разорению и убиению вся бывшая в обители предаша. Таже, многим безумием одержимии, и блаженнаго Ефрема лютыми муками и ранами терзаша, дóндеже той нуждною смертию душу святую свою в руце Божии предаде в лето Господне 1426, маия в пятый день, во вторник, о часе девятом.

Сия вся совершишася без вести и неявленна пребыша на многая лета, сокровенна глубиною безмолвия и забвения. Обаче в лето тысяща девятьсот пятьдесятое (1950), божественным вразумлением подвизаемая, игумения обители, ейже имя Макария, раскопавши землю тамо во дворе (януария в 3-й день), обрете во мнозе изумлении и священнем страсе мощи преподобнаго сего мужа, небесное благоухание и благовоние источающа. Недоумеющей же и молящейся ей, во еже уведати, коего святаго мужа мощи сия суть, явися ей чуден и святолепен инок, иже вся поведа: имя свое, варварское нашествие сопостат и мученическую свою кончину, еще же и увери ю, яко обретенныя сия мощи его суть. Посему и празднуем обретение честных мощей преподобномучника месяца януария в третий день.

Божественный сей преподобномученик, прославленный от Господа, множество чудес действует призывающим его и многия недуги исцеляет притекающим к священным его мощем, почивающим во святей обители его близ Неа Макри, и во сне и яве множицею являяся, подает помощь и содействует содержимым в нуждах данною ему от Господа благодатию. Того молитвами, Христе Боже, помилуй и спаси нас. Аминь.

Песнь 7.

Ирмос: Тебе, умную, Богородице, пещь,/ разсмотряем, вернии,/ якоже бо отроки спасе три Превозносимый,/ мир обнови, во чреве Твоем всецел,/ хвальный отцев Бог и препрославлен.

Постнический подвиг божественною любовию совершая, преподобне Ефреме, кровьми страдания себе омочил еси и, яко жертва непорочная, Создавшему всяческая принеслся еси, величая Того, яко хвальнаго отцев Бога и препрославленнаго.

Рака мощей твоих, отче Ефреме, силою божественною недуги исцеляющи и демоны прогоняющи, здравие изливает и благовоние Небесное источает всем, благочестно к тебе притекающим.

Аттичестии собори и афиняне благоговейнии во обитель твою честную с верою притекают, просяще богатную благодать твою, Ефреме, ангелов сопричастниче. Юже подаждь и нам, преподобномучениче, услаждая души наша.

Богородичен: Яко неистощимый Источник щедрот божественных, Всенепорочная, жаждущей души моей воду жизни ныне источи и зной безмерных моих скорбей утоли, да пою, Богородице, славу Твою несказанную.

Песнь 8.

Ирмос: В пещи отроцы Израилевы,/ якоже в горниле,/ добротою благочестия чистее злата блещахуся, глаголюще:/ благословите, вся дела Господня, Господа,/ пойте и превозносите во вся веки.

Терпящу ти горькая досаждения от мучителей, отче Ефреме, божественным твоим смирением сломил еси врага гордыню превознесенную, взывая: благословите, вся дела Господня, Господа, пойте и превозносите во вся веки.

Воистину от Христа по достоянию прославлен был еси, отче, и по времени мнозе, яко сокровище, нам явился еси, Ефреме, научая взывати: благословите, вся дела Господня, Господа, пойте и превозносите во вся веки.

Крепость души твоея показуя, каплющею кровию твоею злобное неистовство агарян потопил еси. И, внегда умирати тебе, благодати Духа Святаго исполнився, молился еси, Ефреме: Владыко Христе, в руце Твои предаю дух мой.

Богородичен: Неискусомужно родила еси Христа и по Рождестве, яко прежде Рождества, пребываеши, Приснодева Чистая. Сего ради взываем Ти: радуйся, чистоты Сосуде всесвященный, едина Благодатная, во вся веки.

Песнь 9.

Ирмос: Образ чистаго рождества Твоего/ огнепалимая купина показа неопальная;/ и ныне на нас напастей свирепеющую угасити, молимся, пещь,/ да Тя, Богородице,/ непрестанно величаем.

Мученически запечатлев житие твое, венец небесный от Христа приял еси, отче, и Древу Жизни предстал еси, Ефреме преподобномучениче, вечныя радости сподобляемый и причастием божественным обожаемый.

Равный преподобным явился еси, отче, в посте и молитве жительствуя, и равночестен страстотерпцем соделался еси, терпя агарян нахождение, Ефреме преподобномучениче. Темже сугубыя почести улучил еси.

Память совершающе днесь твоего крепкаго страдания, вопием ти: всегда сохраняй от всякия нужды и скорби обитель твою, чтущую тя, Ефреме преподобномучениче, и нам подавай яже ко спасению полезная.

Нужднейшую смерть претерпел еси, преподобномучениче, и бурею нестерпимых мук тихаго пристанища вечныя славы и светлости достигл еси. Темже всегда молися о чтущих тя, отче Ефреме, блаженне.

Богородичен: Высоту несказаннаго Рождества Твоего, Дево, кто изглаголет? Ты бо плотию родила еси Безплотнаго, Бога же и Человека. Сего ради Тя, Богородице, непрестанно величаем.

Светилен.

Подобен: Жены услышите:

Постническими бореньми житие твое просветил еси и мученическими подвиги яко жертва благовоннейшая и приношение благоприятное Господеви принеслся еси, Ефреме. Темже всегда молися о верою почитающих священная страдания твоя.

Слава и ныне, праздника.

На хвалитех стихиры, глас 4.

Подобен: Яко добля в мученицех:

От юности, святе,/ Христови последовал еси/ и, мирския красоты отвергся,/ жительства светлостию/ и страдальческими подвиги/ в горе Амомон просиял еси./ Темже и Христа сугубо прославил еси/ и ликом ангельским,/ Ефреме, сочетался еси.

Яко звери дивии/ уязвляху тя нашедшии агаряне,/ ты же, яко овча незлобивое,/ вся претерпел еси,/ непреложным умом взирая ко Христу./ И в руце Его дух твой, радуяся, предал еси,/ прият быв лики ангельскими,/ яко твердый преподобномученик,/ Ефреме, радование наше.

В преподобных, яко преподобен,/ сияеши, блаженне,/ и в страстотерпцех, яко мученик божественный,/ во обоих бо трудех изрядствовал еси, святе,/ и Христа прославил еси./ Сего ради и Той, прием святыя твоя подвиги,/ чудес тебе благодать даде./ егоже моли непрестанно,/ Ефреме святе, о чтущих тя.

Благоволением лучшим/ светло тя Прославльшаго/ по мнозех летех честныя твоя мощи/ в земли сокровенныя, преподобне,/ ныне явишася, яко цвети мысленнии,/ благоухание Небесное источающе/ и чудодействующе обильно исцеления/ верою прибегающим к тебе,/ Ефреме богомудре.

Слава, глас 5:

Добродетели одежду кровию страдания обагрил еси,/ подвизався законно, преподобномучениче Ефреме,/ победив бо бесовския невидимыя полки,/ множества видимых враг стремлений не убоялся еси,/ вышних ища и вожделея./ И, яко воин Христов, во всем доблествовав,/ в чертог приносущныя жизни востекл еси./ Темже, причастник сый божественнаго света,/ тьмы страстей избави ны,/ благочестно празднующих память твою.

И ныне, праздника.

Славословие великое и отпуст.

На Литургии

Блаженны от канона праздника, Песнь 6.-я на 4 и святаго, Песнь 6.-я на 4. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми. Апостол к Римляном зачало 97. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Матфеа, зачала 21–23 (глава 7:12–21). Причастен: В память вечную будет праведник:

Молитва

О, святый отче Ефреме, преподобных единовсельниче и мучеников сопричастниче, возлюбивый Господа Бога всем сердцем и Тому даже до конца последовавый!

Ты первее постом и молитвою душу твою очистил еси и произволением твердым, якоже мечем, вся страстныя помыслы посекл еси. Таже, егда прииде время твоего страдания, не убоялся еси мучителей, но молитвою к Богу отразил еси нахождения диавола. И, якоже един от древних великих страстотерпцев, претерпел еси вся муки, елика безумнии врази измыслити возмогоша. Конечне же и смерть за веру Православную приял еси и силою Креста Христова агарянское нечестие посрамил еси.

Сего ради прославляем подвиги твоя, отче Ефреме, почитаем страдания и молимся: умилосердися о нас, грешных, и житие наше плодоносно покажи. Да падут обильныя слезы покаяния на изсохшую землю душ наших, и да обратится сия из пустыни неплодныя в сад божественных добродетелей, да утвердится оградою воздержания, да процветет цветом чистоты и целомудрия и принесет плод сторичный делы милосердия и любве к Богу и ближнему. Да услышим и мы сладкий глас Владыки Христа: приидите, благословеннии Отца Моего, наследуйте уготованное вам Царствие от сложения мира. Аминь.

Ина молитва

О, преподобномучениче Ефреме, дивный чудотворче и великий миру светильниче! Ты от юности Христа возлюбив, Тому Единому вседушно последовал еси. Жития же монашескаго взыскуя, на горе Амомон вселился еси и тамо, плоть распиная и непрестанную молитву в сердце твоем совершая, многими слезами душу твою от страстей очистил еси.

Сего ради уготовася тебе путь превосходнейший, не токмо в Сына Божия веровати, но и по Нем страдати. Темже муки горчайшия за Христа радостно приял еси и, никакоже агарян нечестивых устрашився, на долзе времени мучения телесная терпел еси, таже, дивное мужество показуя, кровь твою, яко многоценное миро, на землю пролиял еси. Егда же безумнии агаряне, желавшии тя от Христа отринути, узреша, яко ничтоже успевают, на древе стремглав простроша тя и палицею горящею святое тело твое прободоша. Ты же, претрудный путь свой совершив, кротко душу твою в руце Божии предал еси.

Темже, яко молния на небо возшел еси, достигнув возлюбленнаго тобою Господа. Иже прием тя, яко вернаго воина, увязе главу твою честную венцем нетленныя славы и отре всякую слезу твою, на веки с Собою сочетавая. Кто ныне возможет разлучити тя от любве Божия? Кто исхитит у тебе светлую диадиму, дарованную Небесным Царем? Кто лишит тя вечнаго жительства во граде Господнем? Воистину неотъемлемое наследие и причастие со святыми восприял еси на Небесех. Ныне же на земли просия слава твоя, святый отче Ефреме. Аще бо и безвестно в мире сем пострадал еси, обаче Творец всяческих, ведый тайная, в последок дний сих яви сокровенныя в земли твоя мощи, подвиги твоя явлены сотвори и дарова ти велию благодать исцелений в помощь и утешение роду христианскому. Сего ради потоки чудес источил еси, отче Ефреме, притекающим к святей твоей раце, расслабленныя укрепляя, слепым зрение подавая, хромыя возставляя и иными многими и неисцельными недугами содержимыя люди врачуя. И даже до днесь вся концы вселенныя просвещаеши многоразличными дивными чудесы и видении.

О, святче Божий, не остави и нас, убогих, оскудевших в вере, любви и добрых делех, возстави нас падших в страсти, даруй нам слезы покаяния, утверди твоею крепкою к Богу молитвою, исцели наша недугующия души и телеса. Просвети наш ум последовати евангельским заповедем, возжзи в сердцах наших неугасимую любовь ко Спасу и ближним нашим, даруй нам благими делы прославляти Отца нашего Небеснаго, Емуже подобает всякая слава, честь и поклонение со Единородным Его Сыном и с Пресвятым и Благим и Животворящим Его Духом, ныне и присно и во веки веков. Аминь.

Источник: Текст службы утвержден на заседании Священного Синода 25 августа 2022 года (журнал № 78).

Месяца мая в 5-й день

Преподобных Варлаама и Гедеона, Серпуховских

На велицей вечерни

На Господи, воззвах: стихиры, глас 1.

Подобен: О, дивное чудо:

О, дивное чудо!/ Пречистая Дева Богородица / святителю Алексию обитель создати повелевает,/ Варлаама преподобнаго видения сподобляет / и от слепоты того купно с Гедеоном исцеляет,/ икону же Свою страждущим от винопития являет,/ недугующих от болезней избавляет,/ страстей течение уставляет./ О, Всемилостивая Владычице,/ молитвами преподобных Варлаама и Гедеона / подавай душам нашим // мир и велию милость.

О, дивное чудо!/ Знамение Владычицы на земли явися / и чудным звоном место обители Ея указася,/ идеже иноки благочестивии вселишася / и подвиги своими просияша./ Веселися, граде Серпухов,/ имея в себе святыя молитвенники,/ предстоящия Престолу Всевышняго./ Вы же, преподобнии Варлааме и Гедеоне,/ яко имущии дерзновение ко Пресвятей Троице / испросите душам нашим // мир и велию милость.

О дивное чудо!/ В пустыннем месте обитель дивная явися / и яко сад прекрасен показася,/ в нем бо иноки благочестивии / плоды добродетелей принесоша./ Торжествуй днесь, обителе Владычня,/ имущи заступники непостыдныя / и ходатаи предивныя./ Вы же, Варлааме и Гедеоне боголюбивии,/ молите Владыку Вседержителя,/ мир всему миру даровати // и душам нашим велию милость.

Ины стихиры преподобному Варлааму, глас 6.

Подобен: Все отложше:

Преподобне отче Варлааме,/ послушания добрый рачителю!/ Ты, земную красоту и славу отринув,/ Христа всем сердцем возлюбил еси / и, святителем Алексием направляемь,/ обитель Пречистей Богородице устроил еси,/ в нейже равноангельно пожил еси./ Ныне же, во обителех Небесных пребывая,/ за ны усердно Господу молися // даровати душам нашим мир и велию милость.

Преподобне отче Варлааме,/ молитвенниче усердный ко Пресвятей Троице!/ Ты, избранник Пречистыя Девы явився,/ Тоя благословением в пустынном месте обитель создал еси,/ идеже множество иноков собравшеся / Христу Богу усердно послужиша / и Пречистую Его Матерь возвеличиша./ И ныне сохраняй обитель сию,/ нам же, творящим твою память,// теплый предстатель пред Господем буди.

Стихиры преподобному Гедеону,

глас и подобен тойже:

Все отложив житейское мудрование / и мирскую прелесть оставив,/ преподобне отче Гедеоне,/ во обитель Владычицы Девы пришел еси,/ идеже, в послушание старцу Варлааму предався,/ истинное смирение стяжал еси / и плоть потщался еси покорити духу,/ память же смертную пред очима своима имея,/ во бдении, пощении и молитве пребывал еси / и тако Богу угодил еси./ Темже молим тя:/ помози и нам, с любовию к тебе притекающим,// Царствие Небесное улучити.

Глас Господень услышав:/ аще кто хощет по Мне идти,/ да отвержется себе, и возмет крест свой,/ и по Мне грядет,/ крест свой на рамо взем,/ Христу усердно последовал еси,/ преподобне отче Гедеоне,/ и, в слове Божием день и нощь поучаяся,/ заповеди Господни на скрижалех сердца написал еси./ Темже молим тя:/ помози и нам, с любовию к тебе притекающим,// благое иго Христово смиренно носити.

Слава, глас 8:

Богомудрая двоице доброхвальных отец,/ благосердне Варлааме и добронравне Гедеоне,/ ревностию Христовою распалаемии,/ в преподобии и правде на земли просияли есте,/ ныне же на Небеси с лики всех святых / Престолу Пресвятыя Троицы предстоите./ Поминайте нас, священную память вашу совершающих,/ мы бо чада ваша и вас на помощь призываем,// просяще вами прияти мир и велию милость.

И ныне, Богородичен: Царь Небесный:

Вход. Прокимен дне. И чтения.

Премудрости Соломоновы чтение (глава 3):

Праведных души в руце Божией, и не прикоснется их мука./ Непщевани быша во очесех безумных умрети, и вменися озлобление исход их./ И еже от нас шествие сокрушение, они же суть в мире./ Ибо пред лицем человеческим аще и муку приимут, упование их безсмертия исполнено./ И вмале наказани бывше, великими благодетельствовани будут,/ яко Бог искуси я и обрете их достойны Себе./ Яко злато в горниле искуси их и яко всеплодие жертвенное прият я./ И во время посещения их возсияют и, яко искры по стеблию, потекут./ Судят языком и обладают людьми, и воцарится Господь в них во веки./ Надеющиися Нань разумеют истину и вернии в любви пребудут Ему/ Яко благодать и милость в преподобных Его, и посещение во избранных Его.

Премудрости Соломоновы чтение (главы 5 и 6):

Праведницы во веки живут, и в Господе мзда их, и попечение их у Вышняго./ Сего ради приимут Царствие благолепия и венец доброты от руки Господни,/ зане десницею покрыет я и мышцею защитит их./ Приимет всеоружие рвение свое и вооружит тварь в месть врагом./ Облечется в броня правды и возложит шлем, суд нелицемерен./ Приимет щит непобедимый преподобие,/ поострит же напрасный гнев во оружие;/ споборет же с ним мир на безумныя./ Пойдут праволучныя стрелы молниины/ и, яко от благокругла лука облаков, на намерение полетят./ И от каменометныя ярости исполнь падут грады,/ вознегодует на них вода морская, реки же потопят я нагло./ Сопротив станет им дух силы, и, яко вихор, развеет их/ и опустошит всю землю беззаконие, и злодейство превратит престолы сильных./ Слышите убо, царие, и разумейте, навыкните, судии концев земли./ Внушите, держащии множества и гордящиися о народех язык,/ яко дана есть от Господа держава вам и сила от Вышняго.

Премудрости Соломоновы чтение (глава 4):

Праведник аще постигнет скончатися, в покои будет./ Старость бо честна не многолетна, ниже в числе лет исчитается./ Седина же есть мудрость человеком, и возраст старости житие нескверное./ Благоугоден Богови быв, возлюблен бысть, и живый посреде грешник преставлен бысть./ Восхищен бысть, да не злоба изменит разума его, или лесть прельстит душу его./ Рачение бо злобы помрачает добрая, и парение похоти пременяет ум незлобив./ Скончався вмале, исполни лета долга./ Угодна бо бе Господеви душа его, сего ради потщася от среды лукавствия./ Людие же видевше и не разумевше, ниже положше в помышлении таковое./ Яко благодать и милость в преподобных Его, и посещение во избранных Его.

На литии стихиры, глас 3:

Приидите, вернии,/ возвеличим в песнех честныя отцы,/ Варлаама богосветлаго и Гедеона преявственнаго:/ светильники Неприступнаго Света Христова,/ сосуды честныя Духа Святаго,/ ангелом собеседники и преподобным сопричастники,/ веры Христовы истинныя исповедники,/ покаяния наставники и благочестия учители,// тии бо явишася соль земли и свет миру.

Сшествуим вси радостно во обитель Владычню / и восхвалим преподобныя отцы,/ телесы бо своими в ней почивше,/ чудеса преславная содевают верою приходящим:/ болящим подают исцеление,/ погибающим от страстей свобождение,/ маловерным благодатное укрепление,/ страждущим в бедах скорое поможение,/ ожесточенным сердцы примирение,// всем же христианом веры истинныя познание и утверждение.

Слава, глас 8:

Рождия доброплодная суще,/ преподобнии Варлааме и Гедеоне,/ на лозе Христовой произрасли есте,/ уставов же отеческих истиннии ревнителие явльшеся,/ заповеди Господни усердно исполнили есте / и, труды ко трудом прилагавше,/ молитву непрестанно совершали есте:// Иисусе, Сыне Божий, помилуй нас.

И ныне, Богородичен, глас тойже:

К Тебе Госпоже, Пречистая, прибегаем,/ яко Источнику спасения нашего,/ вшедши бо во святое святилище храма,/ воспиталася еси во Святилище Бога Вышняго/ и, вместивши Избавителя во утробе Своей,/ Престол Царя славы явилася еси./ Темже с верою и любовию вопием Ти:/ Милостивое Пристанище, Покров и Заступление нам буди.

На стиховне стихиры, глас 5.

Подобен: Радуйся, Живоносный Кресте:

Радуйтеся, непобедимии воини Христови,/ преподобнии Варлааме и Гедеоне,/ заповеди бо евангельстии усердно соблюдше,/ истиннии подобницы Господни явистеся,/ кротость и смирение стяжавше,/ врагу мужественне противостасте./ Ныне же, во Царствии Небеснем ликовствующе,/ молите Пресвятую Троицу // низпослати нам дух любве и смиренномудрия.

Стих: Восхвалятся преподобнии во славе / и возрадуются на ложах своих.

Радуйся, всеблаженне отче Варлааме,/ небесный человече и земный ангеле,/ верный таинниче святителя Алексия / и добрый его послушниче!/ Ты, в пустыннем месте усердно подвизаяся,/ обитель Владычицы Девы воздвигл еси./ Ныне же, в Небесных обителех водворяяся,/ моли Пречистую Богородицу // низпослати нам дух кротости и целомудрия.

Стих: Блажени вси боящиися Господа,/ ходящии в путех Его.

Радуйся, обитель Владычня,/ града Серпухова похвало и украшение,/ ты бо благотишное пристанище спасения / верным людем явилася еси./ Мы же, ублажающе святую память отец твоих,/ преподобных Варлаама и Гедеона,/ исцеления дары приемлем / и венчавшаго их Христа прославляем,// яко Спаса душ и телес наших.

Слава, глас 4:

Преподобне отче Варлааме,/ подвиг пустыннаго жития являя,/ монахов множество собрал еси / и, словом Божиим непрестанно тех наставляя,/ по лествице добродетелей к Небесным селением возвел еси./ Таже и ученик твой, предивный Гедеон,/ блаженства праведных взыскуя,/ тебе, яко мудрому наставнику,/ всего себе в послушание предаде / и житию твоему добре поревнова./ Ныне же молим вас, отцы преподобнии,/ научите нас право шествовати,// да Царствия Небеснаго сподобимся.

И ныне, Богородичен, глас тойже:

Днесь Боговместимый храм, Богородица,/ в храм Господень приводится,/ и Захария Сию приемлет:/ днесь святая святых радуются,/ и лик ангельский таинственно торжествует./ С нимиже и мы, празднующе днесь, с Гавриилом возопиим:/ радуйся, Благодатная, Господь с Тобою,// имеяй велию милость.

Тропарь святых, глас 4:

Божественною ревностию распалаеми,/ вся мирская пристрастия отринули есте,/ благое иго Христово усердно понесше,/ образ спасения верным показали есте,/ обитель Владычицы Девы воздвигше,/ град Серпухов радостию исполнили есте./ И ныне, Престолу Божию предстояще,/ молитеся, преподобнии Варлааме и Гедеоне,/ спастися душам нашим.

На утрени

На Бог Господь: тропарь преподобных дважды. Слава, и ныне, Богородичен: Еже от века утаеное:

По 1-м стихословии седален, глас 3:

Божественныя любве взыскуя,/ в пустынное место вселился еси, блаженне Варлааме,/ и обитель во имя Пречистыя Девы воздвигл еси,/ идеже, сеяй доброе семя слова Божия в сердца приходящих,/ дивный плод от древа добродетелей,/ духоноснаго Гедеона, израстил еси./ С нимже молися Сладчайшему Господу Иисусу,/ да спасет души наша.

Слава, и ныне, Богородичен:

Дивному вхождению Твоему во святая святых, Дево Всепетая,/ вся силы Небесныя удивишася,/ Серафими же воспеша песнь хвалебную,/ ибо явися всему миру Боговместимый Храм,/ источающий спасение всем с верою и любовию к Тебе притекающим.

По 2-м стихословии седален, глас 2:

Земную красоту и славу временную презрев,/ Христа единаго возлюбил еси, преподобне Гедеоне,/ и, крест свой взем,/ Божественней воли всеусердно покорился еси/ и лествицею добродетелей Небеснаго отечества достигл еси./ О, предивне отче,/ истинный учениче и послушания рачителю,/ молися Христу Богу низпослати нам дух кротости и смиренномудрия.

Слава, и ныне, Богородичен:

Яко Лоза истинная, Дево Пречистая,/ прекрасный Грозд, Христа, возрастила еси,/ источающий верным вино спасительное, веселящее души и телеса./ Темже со умилением к Тебе припадаем и тепле вопием:/ напои нас потоком Божественныя сладости, Всенепорочная Владычице.

Величание:

Ублажаем вас,/ преподобнии отцы наши Варлааме и Гедеоне,/ и чтим святую память вашу,/ наставницы монахов/ и собеседницы ангелов.

Псалом избранный: Терпя, потерпех Господа:

По полиелеи седален, глас 5:

Егда, блаженнии, к Божественному желанию ум свой вперисте,/ тогда оставили есте вся долу влекущая мудрования/ и, в пустыню всельшеся,/ терние страстей искоренили есте и добродетельми процвели есте./ Темже, стяжавше богатство неотъемлемое на Небесех,/ отцы преподобнии Варлааме и Гедеоне,/ молите Христа Бога согрешений оставление даровати/ чтущим святую память вашу.

Слава, и ныне, Богородичен:

Престол Небесный и Храм одушевленный явилася еси, Пренепорочная Владычице,/ Хлеб вечныя жизни верным подавающая/ и избавляющая достояние Твое от всех наветов вражиих./ Сподоби нас в страшный час испытания прощение улучити/ и Царствия Небеснаго достигнути.

Таже степенна, 1-й антифон 4-го гласа.

Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфея, зачало 43.

По 50-м псалме стихира, глас 6:

Иже на земли ангелов / и на Небеси человеков Божиих,/ мира благое украшение,/ монахов и постников похвалу,/ славных отцев почтим,/ насаждени бо в дому Господни,/ процветоша, яко кедри в пустыни,/ умноживше стадо Христово словесных овец // в преподобстве и правде.

Канон преподобных отец Варлаама и Гедеона, глас 1.

Песнь 1.

Ирмос: Песнь победную поим вси Богу,/ сотворшему дивная чудеса мышцею высокою // и спасшему Израиля, яко прославися.

Припев: Слава Тебе, Боже наш, слава Тебе.

Господи, Боже, подаждь ми силу и разум,/ да достойно прославлю преславныя подвиги угодник Твоих, преподобных Варлаама и Гедеона,/ Светом бо невечерним озаряемии,/ Престолу Твоему предстоят/ и молятся о спасении верою творящих память их.

Припев: Преподобнии отцы Варлааме и Гедеоне, молите Бога о нас.

Доброплодная лоза винограда Христова,/ рукою святителя Алексия насажденная,/ явился еси, преподобне Варлааме./ Темже основание обители Владычния в пределех града Серпухова положил еси,/ да вси приходящии спасение улучают.

Добродетельному житию святых отцев поучаяся,/ кротость, смирение и послушание возлюбил еси, пречудне Гедеоне,/ и, всю надежду на Бога возлагая,/ мужественно взыграния страстей препобедил еси.

Богородичен: Милостивым предстательством, Пренепорочная Владычице,/ покрый от всяких напастей и вражиих ухищрений рабы Твоя,/ Тя бо имамы Избавительницу и Спасение душам нашим.

Песнь 3.

Ирмос: Да утвердится сердце мое в воли Твоей, Христе Боже,/ Иже над водами Небо утверждей второе // и основавый на водах землю, Всесильне.

Слово Божие, яко семя, в сердце своем приемше/ и сторичный клас добродетелей возрастивше,/ плод духовный любве, мира и долготерпения принесли есте./ Темже и нас, отцы богосветлии,/ соделайте причастники подвига вашего.

Господнею любовию озаряемь, преподобне отче Варлааме,/ в послушание Царице Небесней вдался еси/ и в пустыннем месте, близ града Серпухова, обитель во имя Ея воздвигл еси,/ идеже, многия ученики собрав,/ путь спасения им указал еси.

Очищая душу свою от тлетворных страстей,/ блаженный плач стяжал еси,/ избранниче Христов отче Варлааме./ Сего ради мир душевный обрел еси/ и смиренному Гедеону с прочими ученики путь спасения показал еси.

Богородичен: Вереи адовы сломишася и заклепи вечнии сокрушишася преславным Рождеством Твоим,/ явися бо Избавление всем человеком./ Сего ради зовем:/ радуйся, Пречистая Дево, верных Спасение.

Седален, глас 4:

Вся временная в мире сем оставивше, богомудрии Варлааме и Гедеоне,/ Крест Христов на рамена подъяли есте/ и, Тому Единому смиренно последовавше,/ блаженства вечнаго достигли есте./ И ныне молим вас,/ прощение грехов у Господа испросите нам,/ любовию творящим святую память вашу.

Слава, и ныне, Богородичен:

Богородице, всех Царице,/ Ты еси Престол Царя Небеснаго,/ Неупиваемая Чаша нашего спасения,/ Клас, израстивший нам Хлеб живота,/ от Негоже ядше, живи будем/ и не взалчем во веки.

Песнь 4.

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом, познаешися,/ внегда приити времени, покажешися.// Слава силе Твоей, Господи.

Храм Духа Святаго явилися есте, преподобнии отцы наши Варлааме и Гедеоне,/ егда всякое нечестие от сердца своего отгнавше,/ невозвратным помыслом Христу последовали есте, вопиюще:/ слава силе Твоей, Господи.

Тихостию нрава и кроткими словесы/ многия во обитель привлекл еси, преподобне Варлааме,/ братолюбием и незлобием добродетельному пути научая, да с радостию воспевают:/ слава силе Твоей, Господи.

Престолу Божию предстоя и райския сладости наслаждаяся,/ помяни нас во святых твоих молитвах, отче Гедеоне,/ да, слезами покаяния души очистивше,/ купно с тобою Христу воспоим:/ слава силе Твоей, Господи.

Богородичен: Всем, притекающим к Тебе,/ Предстательница и Помощница явилася еси, Пренепорочная Владычице,/ избавляющи от работы вражия/ и на путь спасения наставляющи.

Песнь 5.

Ирмос: Твой мир даждь нам, Сыне Божий,/ иного бо, разве Тебе, Бога не знаем,/ Имя Твое именуем,// яко Бог живых и мертвых еси.

В слове Божием ревностно поучающеся, преподобнии Варлааме и Гедеоне,/ познали есте како подобает волю Господню творити./ Темже почесть трудов своих прияли есте/ и светоносную благодать Святаго Духа улучили есте.

Добро есть жити в заповедех Господних,/ сице поучал еси ученики твоя, богомудре Варлааме./ Мы же, внемлюще гласу твоему, ныне молим тя:/ настави нас на стези спасения/ и в Царствие Небесное пути наша управи.

Утешение во Христе ища/ и слезы покаяния о гресех проливая, преблаженне отче Гедеоне,/ мудрому учителю твоему во всем последовал еси./ Темже и возмогл еси шатание лукаваго низложити/ и пристанища Небеснаго достигнути.

Богородичен: В недузех и всех обстояниих к Тебе, Владычице, припадаем/ и, яко Надежде нашего спасения, тепле вопием:/ даруй нам дух сокрушения и смирение сердца,/ да благодарне воспеваем величия Твоя.

Песнь 6.

Ирмос: Пророка Иону подражая, вопию:/ живот мой, Блаже, свободи из тли/ и спаси мя, Спасе мира, зовуща: слава Тебе.

Непрестанную молитву в сердце имуще, досточуднии отцы,/ собеседницы Небесных Сил явилися есте./ С нимиже помозите и нам чистоту сердечную стяжати, да зовем:/ Спасе мира, слава Тебе.

Пламенною любовию ко Христу возгоревся,/ все упование свое на Господа возложил еси, отче Варлааме,/ и непрестанно во псалмех и пениих и песнех духовных Ему взывал еси:/ Спасе мира, слава Тебе.

Мудрому учителю твоему вседушно в послушание вдався/ и во всем волю свою отсекая, премудре Гедеоне,/ всем сердцем волю Божию исполнил еси, воспевая:/ Спасе мира, слава Тебе.

Богородичен: Со архангелы и ангелы песнь хвалебную воспоим Царице Богородице,/ Та бо молит Сына Своего, Христа Бога нашего,/ даровати нам прежде конца покаяние и велию милость.

Кондак, глас 8:

Избраннии угодницы Христовы,/ служителие усерднии Владычицы Богородицы,/ истиннии послушницы святителя Алексия,/ Варлааме и Гедеоне богоблаженнии,/ души своя кротостию, смирением и чистотою украсившии,/ сосуди предивнии Святаго Духа явилися есте./ Мы же, прославляюще подвиги ваша,/ с верою и любовию взываем:// радуйтеся, преподобнии отцы, усерднии о нас пред Богом молитвенницы.

Икос:

Вся земная оставльше,/ обрели есте бесценный бисер, Христа Бога,/ любомудрии Варлааме и Гедеоне,/ и, крест свой на рамо вземше,/ последовали есте Ему невозвратным помыслом,/ тщание о спасении непрестанно имуще./ Темже вопием вам:

Радуйтеся, Ангелов подражателие преславнии;

радуйтеся, храмы Духа Святаго пречестнии.

Радуйтеся, тесною евангельскою стезею шествовавшии;

радуйтеся, звезды, на тверди Небесней сияющии.

Радуйтеся, от страстей скорое свобождение;

радуйтеся, Владычния обители похвало и украшение.

Радуйтеся, преподобнии отцы, усерднии о нас пред Богом молитвенницы.

Песнь 7.

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты пояху/ и благословляху, глаголюще:/ благословен Бог отец наших.

Христови сраспеншеся, богомудрии отцы,/ Тому единому всеусердно пожили есте./ Темже и Возлюбившему вас ныне с ликом преподобных поете и глаголете:/ благословен Бог отец наших.

Руку спасения человеку некоему простерл еси, блаженне Варлааме,/ егда в сонном видении тому явлься,/ исцеление от недуга пианства обещал еси,/ да пред образом Пречистыя и Предвечнаго Младенца Ея воспоет:/ благословен Бог отец наших.

Исцеление от слепоты телесныя блаженному Гедеону даровавый,/ исцели слепоту душ наших, боголюбезне Варлааме,/ да просвещенными очесы узрим Господа и воспоем Ему:/ благословен Бог отец наших.

Богородичен: Принесем песнь согласно Царице Небесней,/ яко Небесную Чашу Своего милосердия нам источила еси/ и Скорая Помощница в скорбех явилася еси./ Темже вси возопиим:/ радуйся, Заступнице Усердная рода христианскаго.

Песнь 8.

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

О, пустыннолюбнии отцы Варлааме и Гедеоне!/ Вы, зельным воздержанием плотския похоти от себе отгнавше,/ добродетелию целомудрия себе украсили есте./ Темже со ангелы превозносите Господа во вся веки.

Недугующим скорый целитель явился еси, отче Варлааме./ Не презри убо и нас с верою к мощем твоим притекающих,/ но скоро услыши молитвы наша и подаждь помощь свыше, да вопием:/ отроцы, благословите, священницы, воспойте,/ людие, превозносите Господа во вся веки.

Во обители Владычней усердно подвизаяся, преподобне Гедеоне,/ добродетельми, яко солнце, просиял еси./ Темже и возшел еси в Небесный чертог,/ идеже сподобился еси прославляти Творца и Господа во вся веки.

Богородичен: Странно явление образа Неупиваемая Чаша и несказанно есть,/ чудотворная бо икона сия во обители обретается/ и грешным людем Владычица исцеления подает./ Темже благодарне вопием:/ благословенна Ты, Пречистая, во вся веки.

Песнь 9.

Ирмос: Живоприемный Источник приснотекущий,/ светоносный Светильник благодати,/ Храм одушевленный, Сень пречистую,/ Небесе и земли пространнейшую,/ Богородицу, вернии, величаем.

Честна воистинну смерть ваша, достославнии отцы,/ преставилися бо есте от земли к Небесным./ Обаче, предстояще Престолу Вседержителя,/ и от нас духом не отступаете./ Темже непрестанно молите Троицу Единосущную,/ спастися душам нашим.

Райския пищи причастницы явистеся, преблаженнии отцы наши,/ и от Христа Бога венцы славы приясте./ И ныне молитеся прилежно о нас,/ верою и любовию творящих честную память вашу.

Днесь творяще память вашу,/ преподобнии отцы Варлааме и Гедеоне,/ похвальное пение приносим вам и молим:/ веру Православную во Отечестве нашем утвердите,/ обитель Владычню сохраните/ и предстателие явитеся всем, с любовию к вам притекающим.

Богородичен: Воспеваем Тя, Всемилостивая Заступнице рода христианскаго,/ Ты бо всегда прилежно молишися о нас./ Темже, со умилением сердечным припадающе, тепле вопием:/ сохрани нас от всякия напасти и беды/ и спаси души наша.

Светилен, глас 5:

Свети святии, богоизбраннии Варлааме и Гедеоне!/ Вы есте преподобным похвала, священником украшение,/ христианом поможение/ и граду нашему Серпухову великое утверждение.

Слава, и ныне, Богородичен:

Радуйся, Боголюбивая Царице,/ радуйся, Мати Христа Бога нашего,/ радуйся, обители нашея крепкое Заступление,/ радуйся, Отечеству нашему Похвало и Утверждение.

На хвалитех стихиры, глас 1.

Подобен: Небесных чинов:

Днесь обитель Владычня торжествует,/ прославляющи угодники своя,/ богосветлаго Варлаама и добронравнаго Гедеона./ Тии бо, светом Христовых заповедей сияюще,/ добродетельному житию нас научают / и, прошения наша приемлюще,// прилежно молятся Богу о спасении душ наших.

Усердно Христу последовал еси,/ боголюбезне Варлааме,/ воздержания правило и целомудрия образе,/ добродетели рачителю и благосердия источниче./ Ныне же, яко ангелов собеседник,/ райскую доброту богатно зриши // и молишися о спасении душ наших.

Вышния доброты взыскуя,/ преподобне отче Гедеоне,/ мира и сущих в нем житейских отреклся еси / и, послушания добрый рачитель быв,/ терпением и смирением ангельския лики удивил еси./ Темже молим тя:// в послушании Церкви Христовой утверди нас.

Днесь духовный лик составльше,/ торжествуем и радуемся,/ прославляюще богомудрых Варлаама и Гедеона,/ преподобно в заповедех Господних поживших./ Помяните нас, отцы преблаженнии,/ у Престола Святыя Троицы // и испросите душам нашим мир и велию милость.

Слава, глас 8:

Светильницы присносветлии / явистеся мирови,/ преподобнии отцы Варлааме и Гедеоне,/ монашескаго жительства истинное правило,/ земли нашея пресветлое украшение,/ целомудрия и чистоты образи. / Тех молитвами, Благоутробне Господи,/ подаждь людем Твоим оставление грехов // и велию милость.

И ныне, Богородичен, глас тойже:

Владычице, приими молитвы раб Твоих / и избави нас // от всякия нужды и печали.

На Литургии

Блаженны от канона, песни 3-я и 6-я.

Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол, к Галатом, зачало 213. Аллилуия, глас 6: Блажен муж, бояйся Господа,/ в заповедех Его восхощет зело. Стих: Сильно на земли будет семя Его.

Евангелие от Луки зачало 24. Причастен: В память вечную будет праведник:

Источник: Служба составлена в 2013 году. В 2014 году одобрена Высокопреосвященнейшим Ювеналием, митрополитом Крутицким и Коломенским, к употреблению в пределах Московской областной епархии.

Ме́сяца ма́я в 9-й день

Преподо́бнаго Ио́сифа О́птинскаго

Обре́тение же честны́х моще́й его́ ме́сяца октября́ в 3-й день

На ма́лой вече́рни

На Го́споди, воззва́х: стихи́ры, глас 2:

Днесь, ве́рнии, соше́дшеся/ в па́мять преподо́бнаго Ио́сифа О́птинскаго,/ духо́вно пра́зднуим, того́ велича́юще,/ и возсла́вим Христа́ Бо́га на́шего,/ о́трасль послуша́ния зде возрасти́вшаго,/ ке́дра высо́каго преблагу́ю ветвь,/ вертогра́ду сему́ во утеше́ние,// источа́ет бо арома́т Небе́сный.

Свет Невече́рний, почи́вый на тебе́,/ всего́ тя светови́дна соде́ла,/ о́тче досточу́дне Ио́сифе,/ просвеща́еши бо ка́ющияся те́пле/ доброде́телей твои́х све́тлыми сия́нии/ и напая́еши чи́стым вино́м нетле́ния,/ те́мже припа́даем ти любо́вию и мо́лимся:// моли́ спасти́ся душа́м на́шим.

Ста́рцы О́птинстии,/ зако́на Бо́жия и благода́ти храни́телие,/ Амвро́сие боже́ственный и Ио́сифе, любве́ сосу́де,/ доны́не вопию́т с Предте́чею:/ пока́йтеся, Госпо́дь бо гряде́т,/ хотя́й угото́вати Себе́ лю́ди соверше́нны,// и благода́тию всели́тися в ве́рных сердца́х.

Сла́ва, глас 6:

Егда́ Отрокови́ца, Де́ва Чи́стая,/ све́тлый лик Свой тебе́ явля́ше/ и тя, преподо́бне Ио́сифе,/ Своего́ люби́мича именова́ше,/ тогда́ любо́вию к Ней распаля́емь,/ да́же до сме́рти во всем повину́лся еси́,/ благогове́йне взыва́я:/ ра́дуйся, Ма́ти христиа́н;/ ра́дуйся, све́тлое благода́ти позна́ние;// ра́дуйся, Неве́сто Неневе́стная.

И ны́не, пра́здника, или́ Богоро́дичен, глас то́йже.

На стихо́вне сти́хиры свята́го, глас 8.

Подо́бен: О, пресла́внаго чудесе́:

Приснопа́мятне о́тче Ио́сифе,/ душа́ твоя́ во град Небе́сный всели́ся,/ те́ло же твое́ многотру́дное/ приобре́те сей вертогра́д на земли́,/ иде́же притека́юще, цельбы́ почерпа́ем,/ соблюди́ у́бо, о́тче всехва́льне,/ тя велича́ющий оби́тельный град,/ дерзнове́ние име́я ко Христу́,// ны́не тя просла́вльшему.

Стих: Блаже́н муж, боя́йся Го́спода,// в за́поведех Его́ восхо́щет зело́.

По и́мени твоему́ и житие́ твое́,/ о́тче достоблаже́нне Ио́сифе,/ благода́ти дар боже́ственный/ му́жеством и терпе́нием преумно́жил еси́,/ смире́нием умиря́я бу́рная сердца́,/ посреде́ отце́в и бра́тий ти́хостию сия́я./ Сего́ ра́ди чудеса́ и дарова́ния/ ны́не в пе́рвых зде преумножа́еши// и мо́лишися о душа́х на́ших.

Стих: Честна́ пред Го́сподем/ смерть преподо́бных Его́.

В но́вом гро́бе се́рдца твоего́,/ я́коже дре́вле Ио́сиф Аримафе́йский со стра́хом мно́гим,/ упоко́ил еси́ Христа́ Бо́га,/ обетова́ние воскресе́ния от Него́ прии́м,/ и Того́ ро́ждшия бесе́ды/ светоле́пно сподо́бился еси́./ Мы же мо́лим тя, всеприснопа́мятне,/ исцеле́ньми и ми́ра дарова́ньми,// посеща́й оби́тель твою́.

Сла́ва, глас то́йже:

Благода́тию Ду́ха Свята́го просвеща́емь,/ смире́нием и терпе́нием себе́ украси́л еси́,/ кро́тостию же и нището́ю духо́вною/ безпло́тныя враги́ победи́л еси́,/ сего́ ра́ди А́нгели Бо́жии на высо́ких тя восприя́ша,/ венча́юще главу́ твою́ венцы́ побе́дными,/ ве́рнии же утверди́шася благода́тию,/ в тебе́ обита́ющею./ Моли́ся о нас ко Го́споду,/ преподо́бне о́тче Ио́сифе,// да спасе́т ду́ши на́ша, я́ко Благоутро́бен.

И ны́не, пра́здника, или́ Богоро́дичен, глас то́йже.

Тропа́рь зри на вели́цей вече́рни.

На вели́цей вече́рни

На Го́споди, воззва́х: стихи́ры пра́здника. И свята́го стихи́ры, глас 2.

Подо́бен: Егда́ от Дре́ва:

Стецы́теся, боголю́бцы,/ ликовству́юще, торже́ственне почти́м/ препросла́вленную па́мять ди́внаго Ио́сифа,/ О́птины похвалу́, мона́хов наста́вника,/ и́же, до́бре на земли́ подвиза́вся,/ на Небесе́х мзду трудо́в свои́х/ от Христа́ Бо́га восприя́л еси́,/ ны́не же Того́ приле́жно умоля́ет// о спасе́нии душ на́ших.

Смире́н, незло́бив, кро́ток и прост быв,/ чи́сто житие́ твое́ провожда́л еси́,/ преподо́бне Ио́сифе богодухнове́нне,/ и, во́ли своея́ отверже́нием тала́нт усугу́бив,/ тяготы́ немощны́х поне́сл еси́,/ зако́н же Христо́в соверше́нне исполня́я,/ с преподо́бными ны́не всели́лся еси́,/ иде́же, блаже́нныя добро́ты наслажда́яся,// моли́ся о спасе́нии душ на́ших.

Тече́нием слез зе́млю души́ твоея́ ороси́в,/ досточу́дне о́тче Ио́сифе,/ к восприя́тию Бо́жия благода́ти/ благопотре́бну ю́ соде́лал еси́/ и, я́ко до́брый де́латель,/ плоды́ доброде́телей возрасти́в,/ в жи́тницу Го́спода твоего́ ра́достно прине́сл еси́,/ Ему́же моли́ся, преподо́бне,// о спасе́нии душ на́ших.

И́ны стихи́ры свята́го (на обре́тение моще́й), глас 2:

Стецы́теся, вси смиреннолю́бцы,/ у́зрите О́птины благослове́нный плод,/ Ио́сифа приснопа́мятнаго, послуша́ния рачи́теля,/ и́же во сла́ве Небе́сней ны́не возстае́т,/ равноче́стен быв житие́м отцу́ своему́,/ преподо́бному ста́рцу Амвро́сию,/ та́ко равноче́стен и по сме́рти явля́ется,/ во обре́тении моще́й свои́х,// я́ко благопло́дная ветвь виногра́да О́птинскаго.

Се явле́ние достосла́вное:/ насажде́ние ста́рца Амвро́сия,/ ши́пок смиренному́дрия,/ процвете́ние мы́сленное,/ ди́вный плод послуша́ния,/ Ио́сифа приснопа́мятнаго прославля́ем,/ его́же мо́щи ны́не обрета́ются/ и исцеле́ний то́ки преизлива́ют// на ра́дость всем ве́рным.

Твои́х моще́й обре́тение, преблаже́нне,/ ве́рных привлече́ к доброде́тели послуша́ния/ и боже́ственную благода́ть подаде́,/ се бо, я́ко мы́сленная звезда́,/ на небосво́д О́птинский восте́кл еси́,/ озаря́я приходя́щих к ра́це моще́й твои́х/ и утеше́ние подая́ бога́тно// ве́рою и любо́вию тя почита́ющим.

Сла́ва, глас то́йже:

Мона́хов мно́жества припа́дают днесь,/ к ра́це моще́й преподо́бнаго Ио́сифа,/ воспева́юще в пе́снех по́двиги воздержа́ния/ и подража́юще того́ доброде́телем./ Та́кожде и всех ве́рных собра́ния/ благода́рне возвыша́ют гла́сы своя́ к Бо́гу,/ милосе́рдие ве́лие прославля́юще,/ дарова́ бо нам вели́каго засту́пника и хода́тая,/ его́же моли́твами прие́млем не́мощей исцеле́ние// и благовре́менную по́мощь.

И ны́не, пра́здника, или́ Богоро́дичен догма́тик, глас то́йже.

Вход. Проки́мен дне. И чте́ния преподо́бническая 3.

На лити́и стихи́ра хра́ма, и свята́го, глас 3:

Торжеству́йте, христиа́не правосла́внии,/ ра́дуйтеся, лю́дие земли́ Ру́сския,/ я́ко преподо́бнии отцы́ О́птинстии/ дале́че сия́ют на небосво́де Христо́вы Це́ркве,/ све́тлому созве́здию подо́бни,/ посреде́ и́муще чу́днаго Ио́сифа,/ звезду́, горя́щую преди́вно,/ па́че луче́й со́лнечных,/ и си́и путево́дствуют доны́не/ к ти́хому приста́нищу Ца́рствия Христо́ва// обурева́емых в бе́зднах мо́ря жите́йскаго.

И́на стихи́ра свята́го (на обре́тение моще́й), глас 5:

Не восхоте́л еси́, о́тче преподо́бне,/ возыме́ти гра́да зде пребыва́ющаго,/ но гряду́щаго усе́рдно взыска́л еси́,/ те́мже, от ю́ности Бо́жиею Ма́терию наставля́емь,/ в О́птинский скит, Небесе́м на земли́ подо́бный, прише́л еси́,/ иде́же посто́м и моли́твою воскриля́емь,/ Бо́га, спаса́ющаго тя, обре́л еси́,/ Его́же моли́, преди́вне Ио́сифе,// да спасе́т ду́ши на́ша.

Сла́ва, глас 4:

Не во дни дре́вния,/ но в сия́ дни после́дния,/ со стра́хом Бо́жиим соверша́л еси́ жи́тельство твое́,/ преподо́бне о́тче наш Ио́сифе,/ во благоче́стии и пра́вде Бо́жией/ ду́ши ве́рных пла́менно и ре́вностно утвержда́я,/ духо́вными сове́ты обогаща́я/ и чудесы́ преди́вными удивля́я./ Ны́не же, в Небе́сных оби́телех водворя́яся,/ моли́ся Христу́ Бо́гу,/ я́ко да низпо́слет душа́м на́шим// мир и ве́лию ми́лость.

И ны́не, пра́здника, или́ Богоро́дичен, глас то́йже:

Гла́сом благодаре́ния в боле́зни к Бо́гу воззва́в,/ глас Твой сла́дкий, Влады́чице, услы́ша Ио́сиф,/ и ны́не с Тобо́ю глас возвыша́ет ко Спа́су,// е́же улучи́ти нам дар всыновле́ния.

На стихо́вне стихи́ры, глас 4.

Подо́бен: Я́ко до́бля в му́ченицех:

Богоно́сне о́тче Ио́сифе,/ сосу́д благода́ти Ду́ха Свята́го/ от младе́нчества показа́лся еси́,/ па́че же по успе́нии твое́м то́чиши то́ки целе́бныя,/ власть бо и́маши на ду́хи нечи́стыя,/ от челове́ков тех отгоня́я./ Изба́ви и нас сих мучи́тельства,/ умоля́я Го́спода,// да благоутро́бием Свои́м спасе́т ду́ши на́ша.

Стих: Честна́ пред Го́сподем// смерть преподо́бных Его́.

Свя́те ста́рче Ио́сифе,/ от ю́ности твоея́ на ра́мо крест воспри́им,/ Амвро́сием святы́м направля́емь,/ Христу́ после́довал еси́,/ вся́кия же доброде́тели испо́лнь,/ до́брый о́браз и́ноком яви́лся еси́./ Те́мже по исхо́де твое́м от сего́ жития́/ низво́диши от Го́спода то́ки чуде́с ве́рою прося́щим,/ Тому́ моли́ся, усе́рдно мо́лим тя,// да благоутро́бием Свои́м спасе́т ду́ши на́ша.

Стих: Блаже́н муж, боя́йся Го́спода,// в за́поведех Его́ восхо́щет зело́.

Преподо́бне о́тче Ио́сифе,/ изде́тска вожделе́л еси́ прилепи́тися Бо́гови,/ вмени́в же во уме́ты вся кра́сная ми́ра сего́,/ вседу́шне пресели́лся еси́ в пу́стынь О́птинскую,/ иде́же надо́лзе в терпе́нии потруди́вся,/ ра́йскаго приста́нища дости́гл еси́./ Сего́ ра́ди мо́лим тя:/ умоли́ Христа́ Бо́га,// да благоутро́бием Свои́м спасе́т ду́ши на́ша.

Сла́ва, глас 8:

О́трасль благопло́дная виногра́да О́птинскаго,/ Ио́сифе приснопа́мятне,/ вино́ духо́вное от а́ввы Амвро́сия прия́л еси́/ и, сердца́ ве́рных напои́в,/ омраче́нная печа́льми жите́йскими,/ боже́ственное ра́дование дарова́л еси́./ Ны́не же в па́мяти твое́й/ весе́лие че́рплюще, мо́лим тя:/ помози́ нам го́рькия страсте́й рабо́ты изба́витися// и вкуси́ти сла́дости Небе́сныя.

И ны́не, пра́здника, или́ Богоро́дичен, глас то́йже.

Тропа́рь, глас 2:

Послужи́в ста́рцу твоему́ преусе́рдно,/ дарова́нии духо́вными оби́льно испо́лнился еси́/ и, я́ко свети́льник верху́ горы́ укры́тися не могу́щий,/ благообра́зне Ио́сифе преподо́бне,/ мона́шествующим и мирски́м наста́вник до́брый и предста́тель те́плый яви́лся еси́,/ те́мже моли́ Человеколю́бца Христа́ и Засту́пницу Усе́рдную,// спасти́ся душа́м на́шим.

Ин тропа́рь (на обре́тение), глас 3:

Я́ко к боже́ственней ча́ши утеше́ния,/ к ра́це моще́й твои́х притека́ем, о́тче Ио́сифе,/ ты бо, насле́довав благода́ть вели́каго ста́рца,/ напои́л еси́ то́ю оби́льно сосло́вия и́ноческая,/ избра́нниче возлю́бленный Бо́жия Ма́тере,/ те́мже с Не́ю моли́ся Христу́/ оби́тели твое́й дарова́ти утвержде́ние// и душа́м на́шим ве́лию ми́лость.

На у́трени

По 1-м стихосло́вии седа́лен, глас 3:

Послушли́ваго Ио́сифа, ве́рнии, в пе́снех почти́м, благопокорли́ва отцу́ своему́ Амвро́сию да́же до сме́рти, сей бо, благода́ть ста́рчества улучи́в и ку́плю духо́вную сотвори́в, тала́нт преумно́жи, ны́не же в раи́ сла́дости вку́пе с ним водворя́ется. Сего́ ра́ди с ра́достию вопие́м: моли́теся, всечестни́и отцы́, грехо́в оставле́ние дарова́ти любо́вию пра́зднующим святу́ю па́мять ва́шу.

Сла́ва, и ны́не, пра́здника, или́ Богоро́дичен:

К Тебе́, Богоро́дице, прибега́ем с любо́вию и мо́лимся: Твои́м хода́тайством, Влады́чице, и моли́твами Твоего́ уго́дника, Ио́сифа преподо́бнаго, ми́лостива сотвори́ нам Сы́на Твоего́ и Бо́га на́шего, да безпреткнове́нно пре́йдем путь жития́ на́шего, вы́ну сла́вяще Твое́ благоутро́бие, Всепе́тая.

По 2-м стихосло́вии седа́лен, глас 2:

Ве́ры грозд боже́ственным де́ланием возрасти́ преподо́бный Ио́сиф и, в точи́лех послуша́ния положи́в, изгнете́ боле́зньми поще́ния, и, ча́шу испо́лнив духо́внаго умиле́ния, ны́не весели́т сердца́ ве́рных, притека́ющих к ра́це моще́й его́, исцеле́ния подая́ незави́стно.

Сла́ва, и ны́не, пра́здника, или́ Богоро́дичен:

Я́ко невозде́ланная, Де́во, Лоза́, красне́йший Гро́зд прозябла́ еси́, источа́ющий нам вино́ спасе́ния, всех веселя́щее ду́ши и телеса́. Те́мже, я́ко до́брых Глави́зну, блажа́ще Тя при́сно, со А́нгелом вопие́м Ти: ра́дуйся, Благода́тная.

По полиеле́и седа́лен, глас 3:

Я́ко дар освяще́н, от недр земны́х восприе́млем честны́я мо́щи твоя́, свя́те Ио́сифе, су́щею бо на тебе́ благода́тию, я́ко ми́лотию Илии́ Елиссе́й, от страсте́й подае́ши избавле́ние всем, приходя́щим к ра́це моще́й твои́х, и душа́м на́шим ве́лию ми́лость.

Сла́ва, и ны́не, пра́здника или́ Богоро́дичен:

Умоле́на бу́ди, Богоро́дице Цари́це, мольба́ми Твоего́ уго́дника Ио́сифа, Тя всегда́ моля́ща, я́ко Засту́пницу ми́ра Усе́рдную, ста́до Твое́ сохрани́ти от вся́каго наве́та вра́жия.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Благода́ть излия́ся/ во благочести́вых устна́х твои́х,/ преподо́бне о́тче Ио́сифе,/ е́юже бога́тно напои́л еси́/ обурева́емых и недоумева́ющихся,/ и́же за по́мощию к тебе́ притека́ху,/ си́лою же Бо́жиею, та́йны серде́ц их прозрева́я,/ пра́ведности пу́ти им открыва́л еси́,/ во е́же те́ми пра́во ше́ствовати,/ Милосе́рдый бо Христо́с Госпо́дь/ власть тебе́ дарова́,/ слове́сныя о́вцы ста́да Своего́ путеводи́ти// в Ца́рство Небе́сное.

Или́ сия́ стихи́ра (на обре́тение моще́й), глас 6:

Днесь пра́зднество вели́кое в О́птиной пу́стыни,/ я́ко обрето́шася святы́я мо́щи/ Ио́сифа послушли́ваго,/ и́же, упра́вив житие́ богоуго́дне,/ сия́ я́ко ча́шу злату́ю показа́,/ источа́ющу нам дарова́ний многоразли́чных мно́жества/ и благоуха́ние испуща́ющу неизрече́нное./ Те́мже вси, ра́достно лику́юще,/ Христа́ возвели́чим,/ просла́вльшаго Своего́ уго́дника,// есть бо таи́нник Бо́жия благода́ти.

Кано́н пра́здника, и свята́го кано́н, глас 5, его́же краегране́сие: Ча́шу нерастворенносла́дкаго вина́ пою́.

Песнь 1.

Ирмо́с: Пешеше́ствуяй Изра́иль непроходи́мую стезю́/ повеле́нием Влады́чним,/ ра́дуяся поя́ше:// Го́сподеви пои́м, сла́вно бо просла́вися.

Чисти́тельный, Сло́ве, смысл пода́ждь песнопою́щим му́драго ста́рца О́птинскаго, и́же сло́вом наста́ви ру́сския лю́ди, немо́кренно проходи́ти мо́ре жите́йское.

Амвро́сиев сын да похва́лится днесь, О́птинскаго ста́рчества вели́кий прее́мник, и́же послуша́ния по́двигом главу́ дре́вняго зми́я отсече́, те́мже и просла́вися.

Ше́ствуя стезе́ю дре́вних отце́в, воспита́вся млеко́м святооте́ческаго мудрова́ния и сла́дкий послуша́ния хлеб вкуси́в, в ме́ру отца́ твоего́ дости́гл еси́, преподо́бне, те́мже и просла́вися.

Богоро́дичен: Утро́ба Твоя́, Де́во, роди́ Высоча́йший Свет, вся́каго челове́ка просвеща́ющий и облиста́вший ад и го́рний яви́вший рай, Бо́га же и Челове́ка.

Песнь 3.

Ирмо́с: На ка́мени за́поведей Твои́х коле́блющагося мя утверди́,/ вознеси́ рог мой в ра́зуме повеле́ний Твои́х,/ да хваля́ся вопию́ Тебе́:// несть свят па́че Тебе́, Го́споди Сил.

Нра́вом ти́хий и послушли́вый, благообра́зен же лице́м и ду́хом мудр, в пе́снех да воспое́тся ста́рец О́птинский Ио́сиф, от си́лы возше́дый в си́лу и кра́йняго дости́гнувый соверше́ния.

Ева́нгельское любому́дрие твою́ всечестну́ю украси́ главу́, послушли́вая же душа́ твоя́ удиви́ чинонача́лия А́нгельская: я́ко скор был еси́ на слы́шание, ко́сен же на гнев, и светосия́нен, о́тче, в моли́тве.

Раче́ние к раче́нию прилага́я, преподо́бне, своея́ отве́рглся еси́ во́ли коне́чне и, води́мый ста́рцем твои́м, восте́кл еси́ на ле́ствицу доброде́телей, вопия́: сла́ва Тебе́, Всеблага́я Влады́чице, Госпоже́ всея́ тва́ри!

Богоро́дичен: А́ще и пове́ржен бысть на одре́ боле́зненнем и к сме́рти прибли́жися, о́тче, твоя́ душа́, моли́твы не оста́вил еси́ к Богоро́дице, Я́же яви́ся тебе́ и возста́ви со одра́. Ты же вопия́л еси́: несть свя́т па́че Тебе́, Госпоже́ всея́ тва́ри.

Конда́к и и́кос пра́здника.

Седа́лен свята́го, глас 4.

Подо́бен: Удиви́ся Ио́сиф:

На вода́х воздержа́ния воспита́вся, преподо́бне,/ в ладии́ же послуша́ния к приста́нищу безстра́стия дости́гл еси́,/ я́ко мудр купе́ц, вся оста́вив,/ би́сер ева́нгельский обре́л еси́,/ те́мже и венце́м неувяда́емым увяза́ет тя Христо́с/ и прие́млет моли́твы твоя́,/ в ни́хже помина́й любо́вию тя сла́вящих и зову́щих:/ ра́дуйся, Ио́сифе, богому́дрый ста́рче.

Сла́ва, и ны́не, пра́здника, или́ Богоро́дичен:

Удиви́ся Ио́сиф, е́же па́че естества́ зря,/ и внима́ше мы́слию и́же на руно́ дождь,/ в безсе́менном зача́тии Твое́м, Богоро́дице,/ купину́ огне́м неопали́мую,/ жезл Ааро́нов прозя́бший;/ и свиде́тельствуя обру́чник Твой и храни́тель,/ свяще́нником взыва́ше:/ Де́ва ражда́ет,/ и по рождестве́ па́ки Де́ва пребыва́ет.

Песнь 4.

Ирмо́с: Услы́шах, Го́споди,/ слух Твой, и убоя́хся,/ разуме́х смотре́ние Твое́,// и просла́вих Тя, Еди́не Человеколю́бче.

Смире́нием оде́явся, богоно́се, и све́тлыя стези́ послуша́ния избра́в, страсте́й треволне́ния уклони́лся еси́ и тишины́ а́нгельския сподо́бился еси́.

Тве́рдый по́мысл стяжа́в, о́тче, и небоя́знен, непрекло́нен быв взыгра́нию страсте́й, духово́м нечи́стым повелева́ти возмо́гл еси́.

Ве́рен во всем ста́рцу Амвро́сию быв, того́ оте́ческия любве́ наслади́тися сподо́бился еси́, е́юже преиспо́лнився, богоблаже́нне, гре́еши ны́не и пита́еши ча́да твоя́.

Богоро́дичен: О́трок еще́ сый, присноблаже́нне Ио́сифе, младе́нческих уклони́лся еси́ игра́ний и, Цари́цы Небе́сныя посеще́ния сподо́бився, избра́нник яви́лся еси́ Тоя́ и служи́тель.

Песнь 5.

Ирмо́с: Одея́йся све́том я́ко ри́зою,/ к Тебе́ у́тренюю, и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Радостотво́рный твой лик и богому́драя словеса́ твоя́ нощь потреби́ша мно́гих скорбе́й, и благожела́тельное твое́, преподо́бне, обхожде́ние заблу́ждшия возведе́ ко стезя́м доброде́тели.

Ева́нгельская лоза́, вино́ умиле́ния иска́пающая, богора́дованное житие́ твое́ яви́ся, о́тче, потребля́ющее те́рпкое страсте́й и ду́ши веселя́щее благода́тию.

Но́вое вино́ влив в сосу́д души́ твоея́, е́же поче́рпл еси́ от исто́чника прему́дрости ста́рческия, богому́дре о́тче Ио́сифе, тем и церко́вная составле́ния напои́л еси́.

Богоро́дичен: На одре́ боле́зни по́двиг показу́ет Ио́сиф богоблаже́нный, песнь хвале́бную Ма́тери Све́та при́сно вознося́, те́мже и посеще́ния от Нея́ сподо́блен быва́ет и свиде́тельствуется, я́ко избра́нник Пречи́стыя.

Песнь 6.

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя,// я́ко Благоутро́бен.

О́птинский кла́дязь отве́рзеся, вода́ благода́ти быстрообра́зно потече́, и весели́т собра́ния пра́зднующих, подая́ исцеле́ния да́ры.

Стори́чный плод принесе́ твоя́, Ио́сифе, ни́ва, богому́дро тебе́ возде́лавшу зе́млю души́ своея́, те́мже, над страстьми́ воцари́вся, хле́бом богове́дения пита́еши чад твои́х.

Лука́вый змий умертви́ся твои́ми моли́твами, нощь же разсе́яся мно́гих скорбе́й, и, я́ко со́лнце, тече́т, о́тче Ио́сифе, твоя́ изрядноско́рая по́мощь.

Богоро́дичен: Амвро́сию богому́дрому я́ко хле́бов Спори́тельница, Ио́сифу же я́ко Цели́тельница яви́лася еси́, Богоро́дице, те́мже, обою́ хода́тайству вне́млющи, сугу́бую благода́ть нам пода́ждь.

Конда́к свята́го, глас 3.

Подо́бен: Красоте́ де́вства:

Кро́тостию и незло́бием украси́вся/ и целому́дрием в ле́поту оде́явся,/ тьму страсте́й прогна́л еси́,/ светолу́чныя же испуща́я, о́тче, моли́твы,/ яви́лся еси́ ста́рчества О́птинскаго похвала́ и изря́ден наста́вник мона́хов,/ те́мже вси зове́м ти:// ра́дуйся, богоно́се ста́рче Ио́сифе.

И́кос:

Со́лнцу заше́дшу, быва́ет нощь и тьма по всей земли́, оба́че не та́ко бысть, егда́ за́йде во гроб богому́дрый ста́рец Амвро́сий: сей бо вои́стину яви́ся со́лнце богосве́тлое О́птины пу́стыни и сы́на своего́ оста́ви на тве́рди церко́вней, я́ко преди́вное свети́ло, и́же моли́твенными блиста́ет луча́ми и изсуша́ет страсте́й му́тныя ре́ки, утвержда́ет Ша́мординскую оби́тель и О́птину озаря́ет пу́стынь. Те́мже с ра́достию вси, приходя́ще к ра́це моще́й его́, воззове́м: ра́дуйся, богоно́се ста́рче Ио́сифе.

Песнь 7.

Ирмо́с: Огня́ гаси́лище отроко́в моли́тва,/ ороша́ющая пещь пропове́дница чудесе́,/ не опаля́ющи, ниже́ сожига́ющи// песносло́вцы Бо́га оте́ц на́ших.

Досто́йный учени́к был еси́ твоего́ ста́рца, о́тче Ио́сифе, бога́тство дарова́ний, я́коже ми́лоть Илиину́, насле́довав, те́мже мно́гая твоя́ чудеса́, блаже́нне, просла́виша Бо́га оте́ц на́ших.

К ра́це моще́й твои́х приходя́щим источи́, о́тче Ио́сифе, духо́вное питие́, остужа́я пла́мень страсте́й, ду́ши же напая́я благода́тию, е́же сла́вити Бо́га оте́ц на́ших.

Амвро́сия ста́рца ве́рный учениче́ и после́дователю, пе́рвый во обре́тении моще́й показа́лся еси́, Ио́сифе, вседарови́тую благода́ть ча́дом твои́м пода́в, е́же песносло́вити Бо́га оте́ц на́ших.

Богоро́дичен: Глаго́л Твой сла́дкий, Де́во, ста́рца Ио́сифа укрепи́ на одре́ боле́зненнем, я́ко рекла́ еси́, Богороди́тельнице: потерпи́, люби́миче Мой, еще́ венцы́ соплету́ тебе́ во Ца́рствии Сы́на Моего́ и Бо́га.

Песнь 8.

Ирмо́с: От Отца́ рожде́ннаго пре́жде век/ Бо́га Сло́ва,/ по́йте, свяще́нницы,// лю́дие, превозноси́те во вся ве́ки.

От ста́рца рожде́нием духо́вным произше́дшаго, сы́на послушли́ваго, Ио́сифа боголюби́ваго, лю́дие, превозноси́те во вся ве́ки.

Вообрази́ся в тебе́ дух ста́рца твоего́, и чудесы́ украси́лся еси́, о́тче Ио́сифе, те́мже сугу́бое почита́ние воздаю́т тебе́ лю́дие во вся ве́ки.

Иде́же почива́ет многоцеле́бное те́ло твое́, ту благода́ть струя́ми то́чится и почерпа́ют исцеле́ния лю́дие, с ве́рою к тебе́ приступа́юще.

Богоро́дичен: На Ма́терь Бо́жию вознаде́явся, преподо́бне, во упова́нии твое́м неколеби́мь пребы́л еси́, я́ко гора́, преподо́бне, и я́ве предста́ тебе́ Всенепоро́чная и уте́ши тя.

Песнь 9.

Ирмо́с: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́,// тем Тя, Богоро́дице, велича́ем.

Амвро́сиеву сла́ву стяжа́в, богоно́се, в ме́ру своего́ учи́теля, по сло́ву Госпо́дню, дости́гл еси́, те́мже и чудоде́йствуеши пресла́вная зна́мения и исцеля́еши ко гро́бу твоему́ притека́ющих.

Пшеницода́вец нов яви́лся еси́, Ио́сифе, богоглаго́ливыми уче́нии твои́ми и́нокини Ша́мординския пита́я и ма́нною слове́с твои́х ве́рных сердца́ оживля́я, те́мже тя вси велича́ем.

О́птину пу́стынь украси́л еси́ ра́кою моще́й твои́х, пе́рвым возсия́в из-под спу́да, ны́не же при́сно све́тиши, преподо́бне, на Небеси́ церко́внем, све́тлость подая́ душа́м, тя велича́ющим.

Богоро́дичен: Ю́же возлюби́л еси́, преподо́бне, Де́ву Богоро́дицу и твои́ма очи́ма зрел еси́, еще́ сый на земли́, Тоя́ ны́не сладча́йшаго насыща́ешися лицезре́ния. Моли́ Сию́, богоблаже́нне, спасти́ тя велича́ющия.

Свети́лен.

Подо́бен: Жены́, услы́шите:

О преподо́бне о́тче Ио́сифе, ты еси́ вои́стину звезда́, све́тло сия́ющая, освеща́еши бо зе́млю Ру́сскую све́том чуде́с и Боже́ственныя по́мощи. Сего́ ра́ди, честну́ю па́мять твою́ ны́не ве́рою пра́зднующе и ра́достию серде́чною веселя́щеся, велича́ем Христа́ Бо́га на́шего.

Сла́ва, и ны́не, пра́здника, или́ Богоро́дичен, глас то́йже:

О Де́во Пречи́стая, Всепе́тая Ма́ти! Моли́ся о нас Сы́ну Твоему́, Христу́ Бо́гу на́шему с преподо́бным Ио́сифом, ста́рцем О́птинским, его́же от ма́лых лет избра́ла еси́, ему́же мно́гажды явля́лася еси́ и, в боле́зни су́щу, исцеле́ние подала́ еси́.

На хвали́тех стихи́ры пра́здника, и свята́го, глас 1:

Ио́сифе прехва́льне,/ днесь наста́ светоно́сная па́мять твоя́,/ озаря́ющи всех приходя́щих,/ сердца́ облагоуха́ющи ми́ром смире́ния и послуша́ния,/ сие́ бо испра́вил еси́ со вся́ким раче́нием/ и яви́лся еси́ Го́рняго Ца́рствия все́льник/ и моли́твенник непреста́нный// о ве́рою и любо́вию чту́щих тя.

Ио́сифе преблаже́нне,/ Ма́тере Све́та люби́миче изря́дный,/ во́лю Сы́на Ея́ со вся́ким раче́нием испо́лнивый,/ ны́не в со́нме святы́х всели́лся еси́/ и О́тчаго благоволе́ния сподо́бился еси́,/ те́мже и благода́ть Свята́го Ду́ха// почи́ла есть на моще́х твои́х.

Ио́сифе богому́дре,/ О́тчим хоте́нием из-под спу́да пе́рвее возсия́л еси́,/ николи́же бо ста́рца своего́ преслу́шався,/ и по сме́рти послуша́ние тому́ показа́л еси́,/ да уве́дят вси, я́ко учени́к прихо́дит в ме́ру учи́теля./ Те́мже, припада́юще к ра́це моще́й твои́х,/ сугу́бую благода́ть у тебе́ про́сим,/ е́же вся благопотре́бная дарова́ти нам// и ве́лию ми́лость.

Сла́ва, глас 5:

Возлю́бленное ча́до Бо́жия Ма́тере,/ блаже́нне о́тче наш Ио́сифе,/ я́ко учени́к благопослу́шный,/ преподо́бнаго Амвро́сия равноче́стно сла́ву раздели́в,/ му́дрость ста́рческую в полноте́ восприя́л еси́/ и, вино́м богове́дения ве́рных напои́в,/ цвет неувяда́емый вертогра́да О́птинскаго яви́лся еси́./ Христа́ Бо́га моли́ о нас, мо́лимся,// дарова́ти душа́м на́шим мир и ве́лию ми́лость.

И ны́не, пра́здника, или́ Богоро́дичен, глас то́йже:

Благослове́нная Влады́чице,/ дарова́вшая не́когда ми́лость Твою́/ преподо́бному Ио́сифу,/ преди́вному ста́рцу О́птинскому,/ просвети́ све́том Сы́на Твоего́/ живу́щия во оби́тели Твое́й/ и не лиши́ Своего́ милосе́рдия// при́сно Тя блажа́щия.

На Литурги́и слу́жба пра́здника, и свята́го.

Кано́н моле́бный, глас 2.

Песнь 1.

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре, и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Тебе́ о твои́х даре́х долг принося́ще, преблаже́нне Ио́сифе, и твоему́ житию́ плету́ще похва́льный вене́ц, благода́тная воздая́ния улучи́ти жела́ем, твои́ми, пребога́те, святы́ми моли́твами.

Ста́рца вели́каго Амвро́сия ча́до люби́мое яви́лся еси́, той бо на тя с наде́ждею взира́ше, не посрами́ и на́ша ча́яния, о́тче Ио́сифе, с любо́вию притека́ющих к тебе́ и прося́щих ми́лости.

Повину́лся еси́ вседу́шно духо́вному отцу́ твоему́, и Боже́ственный почи́ на тебе́ Святы́й Дух, блаже́нне Ио́сифе, Его́же де́йствием пресве́тло украси́лся еси́, кра́йняго ра́ди твоего́ послуша́ния.

Богоро́дичен: Исто́чник безстра́стия ро́ждшая, уя́звленнаго мя страстьми́ исцели́, Отрокови́це, и ве́чнаго огня́ исхити́, Еди́на Богоблагода́тная.

Песнь 3.

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас пою́щих Тя.

От де́тства к Бо́гу любо́вию взят, Ма́терию Бо́жиею наставля́емь я́ве и та́йно, ангелоподо́бно житие́ на земли́ показа́л еси́ и лику́еши ны́не с Небе́сными Си́лами.

Тьмы лука́вых духо́в мимоте́кл еси́, любо́вию наставля́емь, о́тче Ио́сифе, да Све́та Непристу́пнаго яви́шися прича́стник, те́мже у тебе́ по́мощи про́сим.

Наказу́яй сы́на своего́ наслади́тся о нем и посреде́ зна́емых о нем похва́лится, те́мже посреде́ святы́х весели́теся ны́не, от Бо́га познава́еми и от всех восхваля́еми, Амвро́сие му́дре и Ио́сифе сла́вне.

Богоро́дичен: Мари́е, злата́я Кади́льнице, страсте́й мои́х смрад отжени́ и утверди́ мя, Чи́стая, коле́блемаго прило́ги вра́жии.

Песнь 4.

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,// прославля́ю, Многоми́лостиве.

Тя мо́лим и к тебе́ усе́рдно прибега́ем, о́тче Ио́сифе, я́ко подража́телю Па́стыря овца́м Превели́каго, от высо́т свяще́нных ны́не призира́я, упаси́ ча́да твоя́.

От младе́нства позна́лся еси́ Бо́гу и к мона́шескому де́ланию приступи́л еси́, я́ко отроча́, те́мже и вшел еси́, блаже́нне Ио́сифе, в Ца́рство Небе́сное, ра́дуяся.

У́мре оте́ц его́, и а́ки не у́мре, глаго́лет прему́дрый, подо́бна бо себе́ оста́ви по себе́, те́мже благодаря́т о тебе́ Бо́га мона́хов мно́жества и оби́тель Ша́мординская.

Богоро́дичен: Ра́дость Тебе́, Де́во, пра́отцев се́тование разреша́ющую, Гаврии́л, свяще́нный Арха́нгел, благовествова́ше, с Небесе́ слете́в, Чи́стая Богоневе́сто.

Песнь 5.

Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го бо́га не зна́ем.

Добротолю́бия стяжа́телю и добро́ты и́стинныя таи́нниче, Боже́ственное и́мя, е́же па́че вся́каго и́мене, призыва́л еси́ непреста́нно, о́тче, наказу́я, наставля́я и уча́ терпе́нию Госпо́дню.

Не от челове́к прия́л еси́ хвалу́, но и́стинную сла́ву избра́л еси́, о́тче, Крест Царя́ Христа́ при́сно нося́, почита́я в челове́цех о́браз Госпо́день, даю́щаго смире́нным Свои́м благода́ть.

Зело́ ми́лостива и нищелюби́ва показа́ тя Спас наш ми́ру, о́тче, и врача́ боля́щим, Ио́сифе, и засту́пника оби́димым, в ми́лости бо никому́же когда́ отказа́л еси́.

Богоро́дичен: Разуме́в Тя издале́ча, Де́во, Бо́га нося́щую на руку́ Твое́ю, Иса́иа нам предвозвести́: ра́зве бо Сы́на Твоего́ ино́го бо́га не ве́мы.

Песнь 6.

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Я́ко крин благово́нный, та́инственно от недр земны́х, изда́шася честны́я мо́щи твоя́, преблаже́нне Ио́сифе, благослове́ние вели́каго а́ввы и твое́ подава́юще и веселя́ще чуде́с заре́ю духо́вная ча́да.

Не ну́ждею, но любо́вию, свы́ше насажде́нною в се́рдце твое́, после́довал еси́ вели́кому Амвро́сию, и тобо́ю напая́еми есмы́ вино́м любве́ Боже́ственныя.

Обоня́ют ны́не несумне́нно притека́ющии к тебе́ благоуха́ние тишины́ Небе́сныя, ю́же источа́ет ра́ка моще́й твои́х, и оби́тель О́птинская ублажа́ет тя, Ио́сифе приснопа́мятне.

Богоро́дичен: От всех родо́в Творе́ц избра́ Тебе́, Всенепоро́чная, добро́ту Иа́ковлю, Ю́же возлюби́ и, из Тебе́ возсия́в, яви́ся.

Конда́к, глас 3:

Мир сия́нием озаря́еши,/ о́тче наш Ио́сифе блаже́нне,/ не́мощь бо естества́ препобеди́в,/ Ду́ха Свята́го сосу́д соде́лался еси́/ и, по́двиг ста́рчества восприи́м,/ му́дрый наста́вник ве́рным был еси́./ Ны́не, пребыва́я при́сно со святы́ми,// испроси́ нам ве́лию ми́лость.

И́кос:

Испо́лньшимся времено́м, призва́ тя Госпо́дь чреду́ ста́рчества возгла́вити и поста́ви, я́ко свещу́ на све́щнице, да озаря́еши богоразу́мия све́том вся недоуме́нныя, притека́ющия к тебе́, преподо́бне о́тче наш Ио́сифе, избра́нный собесе́дниче Пренепоро́чныя, насе́льниче черто́гов го́рних, иде́же ли́цы святы́х непреста́нно славосло́вят Творца́ вся́ческих, Того́ моли́, да пода́ст нам ве́лию ми́лость.

Песнь 7.

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Целому́дрием и смире́нием, о́тче преподо́бне, возвыша́емь, плотски́я прило́ги мужему́дренно отгоня́л еси́, те́мже и дара́ми духо́вными Христо́с Бог тя обогати́, сего́ ра́ди и вене́ц неувяда́емый прия́л еси́, Ио́сифе преди́вне.

Благоче́стие и преподо́бие, и любы́ и́стинная к Бо́гу и бли́жнему, из твоея́ души́ излива́хуся, о́тче Ио́сифе, явля́юще в тебе́ чу́дное де́йство Ду́ха Свята́го.

Дух разсужде́ния отца́ твоего́ в тебе́ показа́ Госпо́дь, преподо́бне Ио́сифе, ре́ки бо воды́ живы́я истеко́ша от чре́ва твоего́, си́лою но́вою напая́юще жа́ждущия жи́зни ве́чныя.

Богоро́дичен: Зако́на и проро́ков исполне́ние, Отрокови́це, Гаврии́л Тя показу́я, вопия́ше: се ражда́еши, Еди́на Всепе́тая, Пребоже́ственнаго Творца́ тва́ри и Го́спода Сла́вы.

Песнь 8.

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.

Смире́нием укроща́л еси́ бу́йная сердца́ и отча́янныя сло́вом укрепля́л еси́, о́тче, ско́рби, не́мощи и боле́зни чад твои́х се́рдцем восприи́м, сего́ ра́ди, любо́вию привлача́еми, мо́лимся: поми́луй, утверди́ и просвети́ ду́ши на́ша.

Нра́вом твои́м благи́м после́дствующе, нему́дрии, о́тче, умудри́шася и гре́шнии прилепи́шася пра́вде Бо́жией, те́мже ко гро́бу твоему́ прибега́юще, я́ко к целе́бному исто́чнику припа́даем.

Ми́лованием мно́гим ни́щим быв бога́тство и врач, исцеля́яй я́звы и неду́ги вся́ческия, сего́ ра́ди ве́рою к тебе́, Ио́сифе, влече́мся, гла́дом ги́блющии духо́вным и немощьми́ плотски́ми обдержи́ми.

Крест тя́жкий поне́сл еси́ на ра́ме твое́м устрое́ния ю́ныя оби́тели Ша́мординския, но вся препобеди́л еси́ терпе́нием и любо́вию, и́стинный оте́ц сирота́м нарече́нный, Ма́тере Бо́жия ве́рный послу́шниче.

Богоро́дичен: Рай жи́зни су́щи, Богоро́дице, изба́ви мя вско́ре, Ма́ти Де́во, скорбе́й многообра́зных и сме́рти грехо́вныя моли́твами уго́дника Твоего́ Ио́сифа.

Песнь 9.

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,// ве́рнии единому́дренно пе́сньми велича́ем.

Па́мять пра́ведных с похвала́ми почти́м, сим бо венцы́ благоле́пны Христо́с возложи́, Льву богому́дрому, Мака́рию блаже́нному, Амвро́сию препросла́вленному, Ио́сифу благопослу́шному и преподо́бным ины́м, дея́нии просия́вшим и виде́ния сподо́бльшимся.

Возвели́чил еси́, Го́споди, уго́дника Твоего́ Ио́сифа, я́ко столп огнетворя́щий, и наста́вника любоче́стна яви́л еси́ нам. Мы же со стра́хом мо́лим того́: о́тче преподо́бне, сподо́би ны до́бре преити́ лет на́ших обхожде́ние.

Ве́яние тишины́ Небе́сныя, духо́вное прохлажде́ние и мир бога́тый подае́т от Бо́га, я́ко уго́дник Его́ и наш оте́ц, и напая́ет нас вино́м боже́ственнаго смы́сла преподо́бный Ио́сиф приснопа́мятный.

Богоро́дичен: Его́же родила́ еси́, Сло́во па́че сло́ва, Богороди́тельнице Чи́стая, Того́ моли́ при́сно о чту́щих Тя и Богоро́дицу вои́стину Тя имену́ющих.

Моли́тва

О преподо́бне о́тче Ио́сифе, ста́рче О́птинский, ча́до возлю́бленное вели́каго ста́рца Амвро́сия! Ты, от ю́ности Христа́ возлюби́в, да́же до сме́рти ве́рен Тому́ пребы́л еси́ и избра́нник возлю́блен Пречи́стыя Богоро́дицы яви́лся еси́. Ели́цы же не́когда лик твой благода́тный ви́деша, весе́лия Небе́снаго вы́ну исполня́хуся, та́ко и мы, о́тче, днесь к честны́м твои́м моще́м (или́: к твоему́ свято́му о́бразу) припа́дающе, мо́лим тя: изба́ви нас от го́речи грехо́вныя, е́юже нас сопроти́вник напои́, помози́ нам немощны́м, до́лу пони́кшим, не земна́я то́кмо и тле́нная зре́ти, но душе́ю живо́ю к житию́ ве́чному устремля́тися, грехо́в осужде́ния и злопомне́ния изба́витися, за́висти и гне́ву не предава́тися, да тиша́йшее дыха́ние благода́ти серде́ц на́ших ко́снется. Ей, о́тче, ты дар сове́та и блага́го разсужде́ния стяжа́л еси́, наста́ви и нас жизнь свою́ по во́ли Бо́жией устроя́ти. И та́ко, тобо́ю окормля́еми, пра́во по́йдем путе́м спаси́тельным и дости́гнем Ца́рствия Небе́снаго, иде́же вку́пе со все́ми святы́ми сподо́бимся прославля́ти Пресвяту́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 17 июля 2020 года (журнал № 34)