10-й день

Свята́го свяще́нномученика Харала́мпия, епи́скопа Магнези́йскаго

На Го́споди, воззва́х: стихи́ры, глас 6.

Подо́бен: Всю отложи́вше:

Весь, от ю́ности возложи́вся Влады́це,/ Сего́ возжела́л еси́ и Того́ стопа́м после́довал еси́;/ очи́стився же вся́кия страсте́й скве́рны,/ Боже́ственною благода́тию обогати́лся еси́/ твори́ти исцеле́ния/ и чудоде́йствовати пресла́вная./ И му́ченик был еси́,/ вся́кими прило́ги муче́ний непрекло́нен пребы́в/ си́лою поже́ршагося на Кресте́./ Его́же приле́жно мо́ли/ о ду́шах на́ших.

Гвоздьми́ пригвожда́емо/ твое́ блаже́нное те́ло терпели́вное,/ страда́льче Харала́мпие, и непобеди́мое,/ душу́ непрело́жну и ум некра́домь соблю́д сокруша́емь/ Боже́ственное бо жела́ние тя, сла́вне,/ бога́тно распаля́ше/ и терпе́ти мук вся́кий вид поуща́ше,/ му́чениче страстоте́рпче,/ Христо́вых страда́ний о́бщниче./ Его́же со дерзнове́нием мо́ли/ о ду́шах на́ших.

Ра́дость пресве́тлую,/ и пречестну́ю сла́ву,/ пострада́в, насле́довал еси́/ и ве́чнующее ра́дование,/ свяще́нниче преподо́бие, страда́льче честны́й,/ во́ине до́блественный,/ и́же во́инства и ополче́ния змии́на/ крове́й твои́х тече́ньми я́ве потопи́л еси́, благода́тию/ и Боже́ственною моли́твою́/ ме́ртвыя воздви́гл еси́ и́стинно,/ со дерзнове́нием моля́ся/ о ду́шах на́ших.

Сла́ва, и ны́не, Богоро́дичен.

Подо́бен то́йже:

Уязвле́ннаго мя/ разбо́йническими де́монов нахо́ды/ и лежа́ща всего́ неде́йственна, Всенепоро́чная,/ на пути́ всегда́ нестоя́ннаго жития́,/ и ми́лости тре́бующа,/ вско́ре посети́,/ вино́ возлия́вши и еле́й/ на неисце́льныя ра́ны,/ и ко благоздра́вию возведи́,/ я́ко да Тя сла́влю/ и любо́вию по до́лгу воспою́ вели́чия Твоя́,/ Чи́стая Еди́на Ма́ти Де́во.

Крестобогоро́дичен.

Подо́бен то́йже:

Ору́жие, я́коже рече́ Симео́н,/ се́рдце Твое́ про́йде,/ Пречи́стая Влады́чице,/ егда́ узре́ла еси́ из Тебе́ возсия́вшаго/ неизрече́нным сло́вом,/ от беззако́нных я́ко осужде́на возноси́ма на Крест,/ о́цет и же́лчь вкуша́юща,/ в ре́бра же пробода́ема,/ и ру́це и но́зе пригвожда́емы,/ и, рыда́ющи, восклица́ла еси́, ма́терски вопию́щи:/ что сие́, Ча́до сладча́йшее,/ но́вое та́инство?

Тропа́рь свято́му, глас 4.

Подо́бен: Ско́ро предвари́:

Я́ко столп избра́нный Це́ркве Христо́вой/ и свети́льник присносве́тлый всея́ вселе́нныя,/ прему́дре показа́ся, Харала́мпие,/ возсия́ в ми́ре муче́нием,/ разруши́ и́дольское мракобе́сие, блаже́нне,/ сего́ ра́ди яви́ся предста́тель Христу́,/ моли́ся спасти́ся нам.

Кано́н, глас 6.

Песнь 1

Ирмо́с: Я́ко по суху́, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

С ли́ки ше́ствуя ве́село в мы́сленных Небе́сных се́лех/ и сия́я све́том невече́рним,/ изба́ви мя от страсте́й моли́твами твои́ми, му́дре, я́ко да пою́ тя.

Светоно́сная твоя́ па́мять со́лнечная облиста́ет дарова́ния/ и просвеща́ет ве́рно в ней чту́щия тя,/ ра́дости пресве́тлыя вои́стинну,/ му́чениче тезоимени́те.

Крове́й твои́х ка́плями сла́ное неве́рия мо́ре потопи́л еси́,/ река́ благоче́стия был еси́,/ Христо́ву напоя́ющи вои́стинну Це́рковь при́сно.

Богоро́дичен: Грехо́в бу́ря, и помышле́ний проти́вныя во́лны,/ и страсте́й наше́ствия на мне преидо́ша,/ но Твое́ю, Богоро́дице Де́во,/ держа́вною моли́твою спаси́ мя.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Несть отню́д изрещи́ чуде́с мно́жества, я́же соде́лал еси́,/ еще́ в жи́зни ходя́ и к Бо́гу преше́д,/ страстоте́рпче му́чениче досточу́дне.

Си́лою Боже́ственною укре́плься,/ некре́пкую на́глость беззако́нных низложи́л еси́,/ я́коже во́ин кре́пок, Харала́мпие страда́льче,/ я́ко ору́жник Боже́ственнаго ополче́ния.

Крове́й исте́кшия то́ки твоего́ телесе́/ весь нече́стия пла́мень и лю́тое запале́ние угаси́ша,/ сла́дости же пото́к тебе́ исхода́таиша.

Богоро́дичен: Святы́х Свята́го Бо́га родила́ еси́, Всесвята́я,/ свя́тости храм я́вльшися чист и дверь, е́юже Еди́н Христо́с про́йде,/ спаса́яй челове́чество.

Седа́лен, глас 3.

Подо́бен: Боже́ственныя ве́ры:

Столп незы́блен Це́ркве,/ свети́льник неугаси́мый вселе́нныя, страстоте́рпче, яви́лся еси́, Харала́мпие,/ и, просия́в со́лнца светле́е, и́дольскую отгоня́еши тьму́,/ му́чениче сла́вне,/ Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственная была́ еси́ ски́ния Сло́ва,/ Еди́на Всечи́стая Де́во Ма́ти,/ чистото́ю А́нгелы превозше́дшая,/ па́че всех мене́ персть бы́вша, оскверне́на пло́тскими прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́во Ма́ти,/ на Кресте́ зря́ши пове́шена из Не́я без боле́зни прозя́бшаго,/ Матероле́пно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

Кра́сен был еси́, пома́зався кро́вию честна́го муче́ния/ и добро́тами сего́ украси́вся, Харала́мпие,/ страда́льцев украше́ние и утвержде́ние.

Де́монская ка́пища твои́м сокруши́л еси́, страстоте́рпче, му́жеством,/ храм тебе́ сама́го Свята́го Ду́ха и терпе́ния нело́жнаго столп показа́л еси́ и о́браз.

На высоту́ возне́сше руце, сла́вне,/ тьмы предстате́ле твоя́ ре́бра строга́ху ноготьми́,/ ве́чное и́стинно исхода́таивше тебе́ наслажде́ние.

Богоро́дичен: Кре́пость моя́ и пе́ние мое́, Христо́с Бог, из Тебе́ возсия́вый,/ премно́жеством, Чи́стая, бла́гости изба́ви ны пе́рваго преступле́ния.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя веде́ти, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Боже́ственную страсть/ нас ра́ди стра́сти претерпе́вшаго тве́рдо, му́чениче Христо́в, подража́в,/ терпи́ши во все́м те́ле, сла́вне,/ гвозде́й пригвожде́ния до́блественне.

Безслове́сие гони́телей,/ Сло́во, Собезнача́льное Отцу́, исправля́я, прему́дре,/ сло́во безслове́сным я́ве влага́ет,/ разреши́ти от юз тя повелева́юща.

Рожны́ пронзе́н, уязви́л еси́ се́рдце лю́таго земноро́дных бори́теля/ копие́м му́жества и терпе́ния твоего́,/ Богому́дре страстоте́рпче досточу́дне.

Богоро́дичен: Боже́ственным сия́нием Твои́м, Блага́я, омраче́нную мою́ ду́шу сластьми́ просвети́,/ и ко спасе́ния стезя́м наста́ви,/ я́же Еди́на, Спа́са Христа́ ро́ждшая.

Песнь 6

Ирмо́с: Жите́йское мо́ре,/ воздвиза́емое зря/ напа́стей бу́рею/ к ти́хому приста́нищу Твоему́ прите́к, вопию́ Ти:/ возведи́ от тли живо́т мои́,/ Многоми́лостиве.

Свети́льник был еси́, страда́ний твои́х све́том просвеща́я концы́:/ испове́дуеши и́мя Христо́во пред мучи́тели,/ страстоте́рпче Христо́в пресла́вне.

Боже́ственныя распаля́емь огне́м любве́,/ росо́ю ве́ры злоче́ствующих угаси́л еси́ запале́ние,/ Христо́ва чудеса́ неве́рным показу́я, досточу́дне.

Жи́зни жела́я безсме́ртныя,/ плотска́я, Харала́мпие, умертви́л еси́ страстна́я движе́ния/ и мо́литво́ю ме́ртвыя возста́вил еси́, воспева́ющия во всех тя просла́вльшаго.

Богоро́дичен: Страсте́й мя коле́блющася сопроти́вными прило́ги, Ма́ти Бо́жия, утверди́,/ я́ко безстра́стия ро́ждши Исто́чник,/ к Тебе́ бо прибего́х, челове́ком вели́кому прибе́жищу.

Конда́к, глас 8.

Подо́бен: Я́ко нача́тки:

Подо́бствовав благода́тию свяще́нства, сла́вне,/ Це́рковь светло́ украси́л еси́ Боже́ственным страда́нием,/ е́же за Христа́ прия́л еси́ до́блественно, ра́дуяся, Харала́мпие,/ честны́й свети́льниче всеми́рный, осиява́яй концы́,/ я́ко непобеди́мый.

И́кос: Па́стыря, Христа́ Бо́га на́шего, я́ко А́гнца, на зе́млю благоволи́вшаго прийти́,/ грехи́ взе́млющаго и неду́ги всех поне́сшаго, равнообразова́в, му́чениче свя́те,/ ду́шу за о́вцы положи́л еси́, возвеща́я Его́ стра́сти./ Тем днесь вси пое́м тя пе́сньми, я́ко непобеди́ма.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди Бо́же оте́ц на́ших.

Приобща́яся му́кам и огне́м опаля́емь, страстоте́рпче Христо́в,/ я́ко зла́то чи́сто, быв/ и свяще́нно возложе́ние Христо́во был еси́.

Моли́тв твои́х росо́ю пребеззако́ннующих пещь угасе́, му́дре,/ и изба́влен был еси́, песнопоя́ Сотво́ршему:/ благослове́н еси́, Го́споди Бо́же оте́ц на́ших.

Ополче́нием страда́ний дре́во яви́лся еси́ высокора́слено,/ соосеня́ющо ве́рныя от пла́меннаго греха́, зову́щия:/ благослове́н еси́, Го́споди Бо́же оте́ц на́ших.

Богоро́дичен: Ра́дость прие́мшая в Пречи́стем чре́ве твое́м, Богоро́дице Чи́стая,/ весе́лия се́рдце мое́ испо́лни,/ печа́ль отгоня́щи страсте́й, Присноде́во.

Песнь 8

Ирмо́с: Из пла́мене преподо́бным росу́ источи́л еси́/и пра́веднаго же́ртву водо́ю попали́л еси́,/вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Тече́нии крове́й нака́паемь, ран добро́тою украша́емь,/ победи́тельным благоле́пно ве́нцем удо́брен, Бо́гу предста́л еси́, му́чениче.

Мук о́блацы не покры́ша му́жества твоего́, му́чениче, и до́блестей,/ гони́телей не омрачи́ сопротивле́ние твоего́ пресве́тлаго, Богому́дре,/ терпе́ния.

Свяще́нник же и му́ченик непобеди́м,/ во́ин добль и столп непоколеби́м,/ утвержде́ние ве́рных, нече́стия противобо́рец,/ вои́стинну яви́лся еси́, Богому́дре страстоте́рпче.

Богоро́дичен: Вся́ческая сотвори́вый Боже́ственным хоте́нием,/ восхоте́в, во чре́ве Твое́м всели́ся, Чи́стая, истле́вшия ны обнови́ти хотя́./ Его́же превозно́сим во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/на Него́же не сме́ют чини́ А́нгельстии взира́ти./ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными вои́ Тя ублажа́ем.

Ни о́гнь, ни меч, но ни́же смерть,/ ни гоне́ние, ни ско́рбь, ни глад,/ ни́же беда́, ни мук вся́ких умышле́ние/ возмо́же от любве́ Бо́жия вои́стинну отлучи́ти тя сотво́ршаго,/ страда́льче досточу́дне.

Строга́ньми ногте́й умерщвле́ния совле́к ри́зы,/ оде́ждами от крове́й тебе́, страстоте́рпче, украси́л еси́,/ те́мже со дерзнове́нием, му́чениче непобеди́ме,/ всех Владыце и Бо́гу, ра́дуяся, предстои́ши.

Ра́дости полна́ и Боже́ственныя све́тлости пода́тельна, Харала́мпие, па́мять твоя́ ми́ру возсия́,/ страсте́й зи́му отгоня́щи, вся просвеща́ющи,/ ю́же пра́зднующе, обрета́ем прегреше́ний очище́ние моли́твами твои́ми.

Богоро́дичен: Страсте́й бу́ря смуща́ет мя,/ и сласте́й погружа́ет треволне́ние, Веенепоро́чная,/ Ко́рмчия Христа́ ро́ждшая, ру́ку ми по́мощи простри́/ и спаси́ мя, Еди́на спасе́ние ве́рно блажа́щих Тя.

Моле́бный кано́н свято́му священному́ченику Харала́мпию

Пое́мый во вся́кой ско́рби и душе́вном обстоя́нии, его́же краегране́сие: Священному́чениче, буди́ вои́стинну ско́рый предста́тель.

Тропа́рь, глас 4.

Подо́бен: К Богоро́дице приле́жно:

Cтрастоте́рпцу Харала́мпию присту́пим/ и о́бразу его́ поклони́мся, от се́рдца вопию́ще:/ му́чениче Харала́мпие и о́тче,/ от вся́каго обстоя́ния и всех бед свои́х раб изба́ви нас,/ в це́ркве твоея́ вы́ну пребыва́ющих.

Сла́ва, глас то́йже.

Подо́бен: Вознесы́йся на Крест:

Пострада́вый му́жески и му́ченический наде́вый вене́ц,/ священному́чениче пресла́вне Харала́мпие,/ свободи́ раб твои́х от губи́тельства и вся́каго зла,/ напа́стей и бед, свя́те,/ с любо́вию твое́ призыва́ющих чу́дное и́мя.

И ны́не, Богоро́дичен:

Не умолчи́м никогда́, Богоро́дице,/ си́лы Твоя́ глаго́лати недосто́йнии,/ аще бо Ты не бы предстоя́ла, моля́щи,/ кто́ бы нас изба́вил от толи́ких бед?/ кто́ же бы сохрани́л до ны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́вши при́сно от вся́ких лю́тых.

Песнь 1

Ирмо́с: Во́ду проше́д, я́ко су́шу/ и еги́петскаго зла избежа́в,/ израильтя́нин вопия́ше:/Изба́вителю и Бо́гу на́шему пои́м.

Сый во мно́зех напа́стех, губи́тельстве и бе́дах вся́ческих,/ к тебе́ с ве́рою вопию́,/ да изба́влюся моли́твами твои́ми, Харала́мпие.

Ка́пища и́дольская разру́шив, це́рковь Бо́жию узре́,/ исто́чниче ты чудотво́рный,/ гони́телю па́губных и напа́стей отверга́ющий, Харала́мпие.

Я́ко же́ртва и му́ченик Христо́в, име́я дерзнове́ние,/ моли́твами изба́ви нас па́губных и зол, и бед,/ напа́сти отверга́ющий, Харала́мпие.

Богоро́дичен: Еди́ну Неискусому́жную и Чи́стую мо́лим Тя, раби́ Твои́,/ губи́тельства, вреда́ да изба́ви.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Лю́тых неду́г и бед волна́ми/ от грех пои́стине вся ниспа́ли есмы́ в лука́вое,/ но те́плыми моли́твами нас свободи́, Боже́ственный Харала́мпие.

Изнемога́ющих от губи́тельнаго – це́льба,/ беду́ прия́вших – бы́строе заступле́ние и печа́лующихся ра́дость./ Те́мже нас моли́твами свободи́, Боже́ственный Харала́мпие.

От боле́зней вся́ческих, помышле́ний бесо́вских,/ скорбе́й, па́губы лю́той, бед злых/ всех нас свои́ми моли́твами свободи́, Боже́ственный Харала́мпие.

Богоро́дичен: От поги́бели, зол, Пречи́стая,/ вся́ческаго вреда́, па́губы и обстоя́ния/ Харала́мпия мольба́ми и Твои́ми моли́твами всех нас свободи́,/ Де́во Богоневе́стная.

Спаси́ от напа́стей раб свои́х, страстоте́рпче,/ я́ко вси тя при́сно нарица́ем,/ я́ко моли́твенника к Бо́гу и избави́теля.

Призри́ благосе́рдием, Всепе́тая Богоро́дице,/ на мое́ лю́тое телесе́ озлобле́ние/ и исцели́ души́ моея́ боле́знь.

Тропа́рь, глас 2:

Моли́твами твои́ми ко Го́споду/ от зол, бед, напа́стей свободи́/ ве́рно к тебе́ прибега́ющих/ и сете́й изба́ви вра́жиих,/ ве́лий страстоте́рпче Харала́мпие.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Слугу́ тя равноа́нгельна и испове́дника/ Христо́с тя пока́за/ и боле́зней цели́теля, ве́лий Харала́мпие.

Изнемога́ющаго мя исцели́,/ в напа́стех су́ща мя исхи́ти/ и свободи́ твои́ми моли́твами, ве́лий Харала́мпие.

Возвели́чи Госпо́дь тя в ми́ре,/ благода́ть пода́л еси́ всем исцели́ти неду́ги,/ ве́лий Харала́мпие.

Богоро́дичен: Цели́тельницу Тя разуме́ем,/ от зол, губи́тельства и обстоя́ния/ изба́ви нас мо́литва́ми Твои́ми к Бо́гу, Пречи́стая Богоро́дице.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/Твой мир пода́ждь нам,/ Человеколю́бче.

Прибега́ем к тебе́ от коне́ц всего́ ми́ра вси,/ и́же в напа́стех су́ще,/ моли́твами твои́ми изба́ви от сих, му́чениче Харала́мпие.

Со чи́ны святы́х всех, свя́те,/ бесе́дуя пря́мо Христу́,/ от бед мя изба́ви, му́чениче Харала́мпие.

Весь в напа́стех, в па́губах и в зле пребыва́ю,/ от вся́ких бед твои́ми мольба́ми мя изба́ви, му́чениче Харала́мпие.

Богоро́дичен: Я́ко страшна́ нам та́йна Су́днаго дне, Влады́чице,/ тре́петом ве́лиим содержи́т и ужаса́ет,/ но моли́твами Харала́мпия изба́ви, Пречи́стая, Всенепоро́чная, осужде́ния нас.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Струя́ми ты мно́гими исцели́ злы́я па́губы губи́тельство,/ и из мно́гих напа́стей и бед бу́ри мя изыми́/ и, молю́ся, твои́ми моли́твами утиши́ ю, Харала́мпие.

Осени́ благода́тию ду́шу мою́, свя́те,/ оче́са ра́зума и се́рдца к све́ту Христо́вых дел твое́ю моли́твою, всеблаже́нне, приведи́/ и, молю́ся, неи́стия тле́ние утиши́, му́чениче Харала́мпие.

Нетле́нное сокро́вище тя ве́дахом и исто́чник сый це́льбы, всеблаже́нне,/ я́ко из тебе́ излия́ется благода́ть исцеля́ти неду́ги,/ и, молю́ся, твои́ми моли́твами утиши́ я, Харала́мпие.

Богоро́дичен: Неневе́стная Богоро́дице, Госпоже́,/ бед и напа́стей па́губу Харала́мпия те́плыми мольба́ми разори́/ и, молю́ся, зло́е тле́ние утиши́ , Всепе́тая.

Изба́ви от напа́стей раб свои́х, страстоте́рпче,/ и от па́губы страсте́й к тебе́ прибега́ющия,/ я́ко Боже́ственный ко Христу́ моли́твенниче.

Богоро́дичен: Пречи́стая, я́же чрез сло́во Сло́во неистолко́ванно напосле́док ден ро́ждшая,/ я́ко иму́щая ма́тернее дерзнове́ние,/ моли́ Христа́ Бо́га о нас.

Конда́к, глас 6.

Подо́бен: Предста́тельство христиа́н:

Я́ко му́ченик и испове́дник цвет,/ двойны́м венце́м Христо́с тя увенча́,/ возвели́чив безчи́сленными чудесы́ на земли́,/ но я́ко благода́ть Госпо́дню явля́я нам,/ ве́рно к тебе́ прибега́ющим,/ да́руй мир, помози́ в напастех и лю́тых бе́дах,/ святе́йший Харала́мпие.

И абие проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех/ я́же воздаде́ ми? Ева́нгелие от Луки́, зача́ло 106, и а́бие, Сла́ва, глас 2:

Страсто́терпца моли́твами поми́луй,/ очи́сти мно́жество мои́х прегреше́ний.

И ны́не, Богоро́дичен:

Богоро́дицы моли́твами поми́луй,/ очи́сти мно́жество мои́х прегреше́ний.

По 50-м псалме́ стихи́ра, глас 6.

Подо́бен: Все отло́жше:

Ве́лий Харала́мпие,/ святи́телю Го́спода/ кровь твою́ честну́ю,/ ю́же ты излия́ за ве́рныя,/ Христу́ принесе́ за бли́жния своя́,/ в боле́знех и в злых неду́зех су́щих,/ и за предстоя́щих людий, тебе́ моля́щихся,/ я́ко избы́ти печа́ли и благода́ти сподо́битися,/ темже просла́вятся пра́ведники со А́нгельскими чи́ны.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще: I отце́в Бо́же, благослове́н еси́.

Изба́витися неви́димых и ви́димых враг, борю́щих нас, всеблаже́нне,/ умоли́ Христа́ твои́ми, священному́чениче Харала́мпие, моли́твами.

Труда́ми твои́ми благи́ми разори́ и́долом зло́е служе́ние,/ Христо́с же тебе́ благода́ть чуде́с дарова́л есть/ исцеля́ти боле́зни твои́ми, священному́чениче Харала́мпие, моли́твами.

Мно́жество правосла́вных, одержи́мии печа́льми от злых,/ к тебе́ с благоче́стием и с любо́вию возопию́т,/ да изба́ви лю́тых твои́ми, священному́чениче Харала́мпие, моли́твами.

Богоро́дичен: Спасти́ от напа́стей, бед всю́ду и злых, нас, бли́жних свои́х,/ Христа́ Ро́ждшую ти́хо умоли́/ твои́ми, священному́чениче Харала́мпие, моли́твами.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

И́же чуде́с у Го́спода благода́ть взя́вый,/ боле́знь и па́губу изгони́ мольба́ми твои́ми, Харала́мпие преблаже́нне.

Вверг твои́х раб лука́вый в многоразли́чныя неду́ги лю́тыя,/ но сих изгони́, Харала́мпие преблаже́нне.

Пото́к неду́г, и па́губ, и напа́стей,/ и зло́е обстоя́ние изгони́ мольба́ми твои́ми, Харала́мпие преблаже́нне.

Богоро́дичен: Всяк вред душ и теле́с/ и вся́кую злу́ю напа́сть изгони́/ мольба́ми Твои́ми, Мари́е Богоро́дице.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/с Беспло́тными ли́ки Тя велича́юще.

Вся́кими боле́знями одержи́мыя/ и благоче́стно притека́ющии ко хра́му/ твои́ми моле́ниями вся изба́ви, му́чениче Харала́мпие.

Па́губы губи́тельныя, вся́кия не́мощи,/ помышле́ния душетле́ннаго враг лука́вых/ твои́ми моле́ниями вся изба́ви, му́чениче Харала́мпие.

И́же вся спаса́яй, тя призыва́ющия,/ и ны́не от разруше́ний и всякия поги́бели/ твои́ми моле́ниями вся изба́ви, му́чениче Харала́мпие.

Богоро́дичен: Поги́бели лю́тыя ве́рных Твои́х раб,/ бед злых Харала́мпия моли́твами,/ Твои́ми моле́ниями вся изба́ви, Де́во Преблаже́нная.

Стихи́ры, глас 2:

Я́ко Ни́льския во́ды,/ та́ко мно́жество чуде́с твои́х/ прибега́ющих благоче́стно к Боже́ственному хра́му твоему́/ напая́ют незави́стно,/ исцеля́юще боле́зни, Харала́мпие.

Вся, и́же лю́бящии,/ от па́губы, напа́сти и от бед свободи́ти/ вопие́м с любо́вию, Боже́ственный Харала́мпие,/ да обрете́м бога́тно избавле́ние.

Изба́ви притека́ющая к тебе́/ и твоему́ о́бразу поклоня́ющаяся благоче́стно/ от вся́каго осужде́ния, Харала́мпие преблаже́нне,/ и Боже́ственное Ца́рствие получи́ти сподо́би.

Не има́мы ина́го к Бо́гу моли́твенника/ и избави́теля от неду́га лю́таго,/ ра́зве тебе́ Боже́ственнаго Христо́ва страстоте́рпца:/ Харала́мпия в пе́снех да просла́вим.

Сохрани́ и защити́ твои́ми моли́твами, Харала́мпие му́чениче,/ я́ко благода́ть прия́вый,/ нас от вся́кия боле́зни и лю́тыя сме́рти исхити́.

Богоро́дичен: Вся А́нгелов во́инства,/ Предте́че Госпо́день, апо́столов двоенадеся́тице,/ святи́и вси с Богоро́дицею/ сотвори́те моли́тву, во е́же спасти́ся нам.

Тропа́рь свято́му, глас 4.

Подо́бен: Ско́ро предвари́:

Я́ко столп избра́нный Це́ркве Христо́вой/ и свети́льник присносве́тлый всея́ вселе́нныя,/ прему́дре показа́ся, Харала́мпие,/ возсия́ в ми́ре муче́нием,/ разруши́ и́дольское мракобе́сие, блаже́нне,/ сего́ ра́ди яви́ся предста́тель Христу́,/ моли́ся спасти́ся нам.

Сла́ва, и ны́не, Богоро́дичен:

От вся́ких бед раб Твои́х защити́,/ Благослове́нная Богоро́дице,/ да Тя просла́вим, наде́жду душ на́ших.

Стихи́ра на целова́ние о́браза, глас 2.

Подо́бен: За вся заступа́еши:

За всех заступа́вши, страстоте́рпче,/ целу́ющих с ве́рою о́браз Боже́ственный твой/и в покая́нии моля́щихся при́сно,/ му́чениче Харала́мпие,/ молитва́ми Боже́ственными изба́ви бу́ри страсте́й на́ших/ свободи́ и гее́нны свои́х раб/ и Небе́снаго Ца́рствия насле́дники сотвори́, мо́лимся.

Богоро́дичен: Наде́ждо моя́, к Тебе́ прибега́ю,/ Ма́терь Бо́жия,/ защити́ мя под кро́вом Твои́м.

Моли́тва

О, свяще́ннейшая главо́, па́стырю до́брый слове́сных ове́ц Христо́вых, священному́чениче Христо́в Харала́мпие, вели́кий о нас засту́пниче в скорбе́х и бе́дах и во всех ну́ждах! Услы́ши нас, гре́шных и недосто́йных раб твои́х, моля́щихся тебе́, да твои́ми всеси́льными моли́твами Всеблаги́й Госпо́дь изба́вит ны от вся́каго зла́го обстоя́ния, прости́т вся согреше́ния, во́льная и нево́льная, сподо́бит ны про́чая ле́та жи́зни на́шея сконча́ти в соблюде́нии за́поведей Его́ и покая́нии. Испроси́, уго́дниче Бо́жий, да пребу́дет благослове́ние Царя́ Небе́снаго над благослове́нною им Росси́ею. Ты бо прия́л еси́ еще́ в житии́ свое́м от Го́спода си́лу всем притека́ющим к тебе́ с мольбо́ю подава́ти потре́бное, те́мже и ста́рцы, и во́зрастнии, и де́ти приима́ху исцеле́ния ра́ди хода́тайства твоего́, уго́дниче, пред Престо́лом Го́спода. Егда́ же на ме́чное тя усече́ние осуди́ша, слы́шал еси́ превожделе́нный и сладча́йший глас Го́спода, глаго́лющ к тебе́ сицева́я; прииди́, Харала́мпие, дру́же мой, мно́гая ра́ди И́мене Моего́ претерпе́вый, проси́ у Ме́не, чесо хо́щеши, и дам ти. Ты же, вели́кий свети́льниче, рекл еси́ Ему́ усты́ свои́ми: Го́споди, аще уго́дно Тебе́ есть, молю́ Тя, даждь сла́ву И́мени Твоему́, иде́же поло́жены бу́дут моя́ мо́щи и па́мять моя́ и́мать почита́тися, да не бу́дет на ме́сте том глад и мор или́ тлетво́рный во́здух, погубля́ющ плоды́, но да бу́дет па́че на ме́стех тех мир, телесе́м здра́вие и ду́шам спасе́ние, изоби́лие же пшени́цы и ви́на и ското́в умноже́ние на потре́бу челове́ком. И та́ко по проше́нию твоему́ прия́л еси́ от Го́спода ве́лию благода́ть. На твоя́ моле́ния, на тя, священному́чениче Христо́в Харала́мпие, упова́ем, получи́ти ве́лию ми́лость от Го́спода в безконе́чный век. Ами́нь.

Святой священномученик Харалампий

Был епископом в городе Магнезии, в Фессалии; жил во второй половине II века. Он обратил ко Христу многих из язычников, наставлял их на путь спасения, поучая Слову Божию. За Евангельскую проповедь святого епископа Харалампия привели на суд к правителю Лукиану и военачальнику Лукию. Угрожая мучениями, они требовали от епископа Харалампия принесения жертвы языческим богам. В ответ святой твердо исповедал свою веру во Христа. Тогда священномученика Харалампия подвергли жестоким истязаниям. Его подвесили на дереве и строгали тело железными крюками до тех пор, пока не содрали кожу с головы до ног. «Благодарю вас, братие,– говорил при этом мученик.– Острогавши тело, вы обновили мой дух». Воины Порфирий и Ваптос, истязавшие святого епископа, были так поражены его незлобием и терпением, что открыто исповедали Воскресшего Христа. Оба они были тотчас усечены мечом. Вместе с ними были усечены три женщины, которые, подобно Порфирию и Ваптосу, уверовали во Христа.

Военачальник Лукий сам взял орудия пыток и жестоко терзал тело святого Харалампия, но вдруг руки его отнялись у локтей. Лукиан, увидя это, плюнул в лицо священномученика Харалампия и внезапно голова его повернулась назад лицом. Тогда народ, объятый ужасом, стал молить святого мученика отвратить Божий гнев. С ними просил и Лукий. По молитвам святого мученика Лукий и Лукиан были исцелены. Тогда и Лукий уверовал во Христа и крестился. Множество очевидцев также обратились к истинной Христовой вере, другие получали исцеления от различных недугов по молитвам священномученика Харалампия.

Лукиан донес обо всем случившемся императору Септимию Северу (193–211), находившемуся в Антиохии. Император распорядился привести святого к нему. Исполняя приказание, воины вбили в тело мученика острый железный гвоздь, в бороду вплели веревку и, обмотав вокруг шеи, повлекли его к императору. Сам император, увидев святого, вонзил в грудь священномученика Харалампия три острых кола, а потом приказал палить его на медленном огне. Но сила Божия укрепляла святого Харалампия, и он остался невредим.

По молитве священномученика вновь стали совершаться чудеса. Святой изгнал диавола из человека и воскресил мертвого юношу. Сам император пришел в ужас, но вскоре вновь ожесточился и подверг святого Харалампия другим страшным мукам. Видя его терпение, дочь Септимия Севера Галина уверовала во Христа и стала убеждать в истинности христианской веры своего отца. Но император после новых истязаний осудил священномученика на смерть.

«Благодарю Тебя, Господи, за милость Твою. Помяни меня во Царствии Твоем»,– сказал святой, воззрев на Небо, и после этих слов преставился – прежде, чем меч коснулся его (†10 февраля 202).

Галина с честью погребла святое тело страдальца. Память священномученика Харалампия Церковь празднует в день его преставления.

Преподо́бнаго Про́хора, чудотво́рца Пече́рскаго

Вечер

На Го́споди, воззва́х: стихи́ры глас 4.

Подо́бен: Дал еси́ зна́мение:

Про́хоре чу́дне,/ ты, а́нгельское проходя́ житие́,/ вся́кия сла́сти жите́йския отбегл еси́,/ сло́вом па́че Бо́жиим пита́яся, не бра́шны./ Тем был еси́ по́стником сия́ние,/ с ни́ми же и дарова́ тебе́ в Небе́сных оби́телех селе́ние/ Иису́с Человеколю́бец и Спас душ на́ших.

Про́хоре сла́вне,/ ты, челове́ческия убега́я сла́вы,/ я́ко паря́щая пти́ца, на холм Пече́рский устреми́лся еси́/ и прелета́л еси́, осо́бящися виде́нием и дея́нием зако́на Госпо́дня,/ отню́дуже, возше́д на верх доброде́телей,/ прия́л еси́ дар чудотворе́ния/ от Иису́са Человеколю́бца и Спа́са душ на́ших.

Про́хоре преблаже́нне,/ блаже́нных оте́ц стопа́м после́дуя,/ те́сное стяжа́л еси́ в ми́ре се́м житие́,/ я́ко и обы́чнаго хле́ба не вкуси́л еси́,/ но расту́щим зе́лием удоволя́лся еси́;/ те́мже в блаже́нной жи́зни ны́не пребыва́я,/ пита́ешися пи́щею Небе́сныя ра́дости,/ ю́же подаде́ тебе́ от бла́гости Своея́/ Иису́с Человеколю́бец и Спас душ на́ших.

Сла́ва, глас 5:

Кто не удиви́тся житию́ твоему́,/ или́ кто не испове́сть терпе́ние твое́, преблаже́нне о́тче Про́хоре?/ Ты бо в вели́цем воздержа́нии житие́ проходя́,/ о телеси́ небре́гл еси́,/ сластолюби́ваго зми́я стерл еси́ до конца́,/ утверди́в но́зе свои́ на сте́пени по́стнических доброде́телей./ Тем, в дне́шний день па́мять твою́ почита́юще,/ испове́дуем по́двиги твоя́/ и мо́лимся, к раце моще́й твои́х припада́юще:/ я́ко имы́й дерзнове́ние у Христа́ Бо́га,/ проси́ ми́ра ми́рови и ду́шам на́шим ве́лия ми́лости.

И ны́не, Богоро́дичен или́ Крестобогоро́дичен.

На стихо́вне в Окто́ихе.

Сла́ва, преподо́бному, глас 6:

Мона́хов мно́жество, в па́мяти твое́й, преподо́бие,/ лик похва́л соста́вльше,/ труды́ и по́двиги твоя́ почита́ем и удивля́емся,/ ка́ко сам житие́ те́сное и убо́гое проводя́,/ ины́х, в простра́нстве живу́щих, во вре́мя ну́жды сохрани́л еси́,/ та́ющия бо гла́дом хле́бом, от зе́лия сотворе́нным, препита́л еси́/ и тре́бующим соль от пе́пела подава́л еси́./ И ны́не душе́вным гла́дом нас изнемога́ющих,/ мо́лимтися, Про́хоре чу́дне,/ молитва́ми твои́ми укрепи́/ и испроси́ от Христа́ Бо́га ве́лию ми́лость.

И ны́не, Богоро́дичен или́ Крестобогоро́дичен.

Тропа́рь, глас 4:

Преподо́бие и чудотво́рче, о́тче Про́хоре,/ препита́вый во гла́де а́лчущия хле́бом от бы́лия и со́лию от пе́пела,/ напита́й и нас пи́щею духо́вною,/ моля́ Христа́ Бо́га о душа́х на́ших.

Кано́н, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Препоя́ши нас, Влады́ко Христе́,/ ору́жием духо́вным на неви́димыя враги́/ и научи́, ка́ко подвиза́тися и одоле́ти си́лу их,/ да торже́ственную Тебе́, Бо́гу на́шему, песнь/ в па́мяти уго́дника Твоего́ любо́вию возсыла́ем.

Бо́дростию препоя́сана чре́сла иму́ще,/ и́ночествующих ли́цы тебе́, о́тче, помина́ют,/ и ле́тнюю па́мять твою́ в похвалу́ тебе́ соверша́ют,/ песнь Бо́гови возсыла́юще.

Блаже́нство ве́чное воспомяну́в, блаже́нне,/ тле́нная ми́ра сего́ оста́вил еси́/ и А́нгелом совсе́льник да бу́деши, во а́нгельский о́браз обле́клся еси́./ Тем по́стническое житие́ твое́ чтем,/ песнь Бо́гови возсыла́юще.

Благо́е воздержа́ния и́го возложи́в на ся,/ жесто́кое житие́ по́стнических дея́ний стяжа́л еси́, Богому́дре,/ в не́мже спле́тшися с неви́димым враго́м, победи́л еси́ того́./ Тем сла́вим тя, песнь Бо́гови возсыла́юще.

Богоро́дичен: Простра́нным путе́м нас ходя́щих и во а́дову про́пасть сла́стию теку́щих,/ на те́сный путь, к блаже́нному животу́ веду́щий, наста́ви, Богоро́дице:/ се бо, со́браннии раби Твои́, в дне́шний день припада́ем к Тебе́,/ моле́бная возсыла́юще.

Песнь 3

Ирмо́с: Утвержде́н в нача́ле Небеса́ ра́зумом/ и зе́млю на во́дах основа́вый,/ на ка́мени мя, Христе́, за́поведей Твои́х утверди́,/ я́ко несть Свят, па́че Тебе́, Еди́не Человеколю́бче.

Утверди́в, о́тче, но́зе твои́ на ка́мени за́поведей Христо́вых,/ непоколеби́мь пребы́л еси́ от бесо́вских наве́тов,/ вы́ну хвале́ние поя́ Бо́гу:/ несть Свят, па́че Тебе́, Человеколю́бче.

Страсте́й плотски́х разжже́ния ту́чею воздержа́ния угаси́л еси́,/ ни хле́ба бо, но зе́лие лобо́дное я́дый, пребы́л еси́,/ пи́щу име́яй па́че сло́во Бо́жие, и сие́ укрепля́ше тя, преподо́бие.

Глад ни во что же вмени́л еси́, блаже́нне,/ на Пита́ющаго пти́цы взира́я,/ и Той да́де тебе́ хлеб не от се́яннаго зе́лия я́сти,/ и́же бе сла́док тебе́, па́че ме́да и сота.

Чу́дному твоему́ смире́нию удивля́емся, свя́те,/ я́ко и за лобо́дный хлеб себе́ осужда́л еси́, недосто́йна творя́й и сицево́й пи́щи/ о не́йже легко́ проше́л еси́ по́стнический путь приско́рбный.

Богоро́дичен: Вознося́щияся горды́нею вы́я на́ша во смире́ние преклони́, Чи́стая Де́во,/ Ты бо еди́на ре́кла еси́:/ се раба́ Госпо́дня, – и ца́рствуеши во ве́ки над все́ми, блажа́щими Тя ро́ды.

Седа́лен, глас 4:

Вели́ким отце́м ревну́я, кра́йнее возлюби́л еси́ по́стничество,/ еди́ным бо зе́лием и водо́ю пита́яся,/ не изнемо́гл еси́ от поста́, но пребы́л еси́ кре́пок, па́че адама́нта./ И ны́не воздержа́ния своего́ прие́мь плоды́: мздовоздая́ние от Бо́га./ Моли́ся о нас, преподо́бие, да прии́мем и мы мзду тобо́ю,/ я́ко любо́вию блажа́щии па́мять твою́, досточу́дне.

Сла́ва, и ны́не, Богоро́дичен:

Блажи́м Тя, ублажи́вшую род челове́ческий,/ и сла́вим превозше́дшую вся́кое творе́ние,/ пе́сньми чту́ще безсе́менное зача́тие и несказа́нное Рождество́ Твое́,/ Мари́е, Ма́ти Де́во Чи́стая.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в,/ тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ты, о́тче, име́яй от Бо́га благода́ть чудотворе́ния,/ мно́гия напита́л еси́ хле́бом лобо́дным во вре́мя гла́да/ и, соль от пе́пела творя́, ту́не подава́л еси́ приходя́щим./ О, сла́ва да́вшему тя нам засту́пника Человеколю́бцу.

Ты, преподо́бие, моли́твою свое́ю подава́л еси́ лобо́дному хле́бу сла́дость,/ бысть бо сла́док в снедь, све́тел и чист, аки пшени́чный, со благослове́нием прие́млющим./ От о́наго твоего́ благослове́ния пода́ждь и нам, о́тче свяще́ннейший,/ я́ко има́мы тя хода́тая ко Христу́ Человеколю́бцу.

Твой, о́тче преблаже́нне, лобо́дный хлеб/ бысть сла́док и све́тел со благослове́нием прие́млющим,/ взе́млющим же о́тай7 черн, а́ки персть, показо́вашеся и го́рек./ Благослове́нием твои́м благослови́ нас и пода́ждь от сла́дости твоея́,/ я́ко седя́й на тра́пезе Небе́сней, Про́хоре сла́вне.

Не о́тай, но лик благохвале́ний ве́дуще, душе́вным гла́дом изнемога́ющии,/ прихо́дим к тебе́, о́тче, в дне́шний день па́мяти твоея́ и мо́лимся:/ пода́ждь нам от благода́ти твое́й, да просла́вим о тебе́ Христа́ Человеколю́бца.

Богоро́дичен: Кто, притека́ли к Тебе́, посрамле́н от Тебе́ исхо́дит, Чи́стая Де́во,/ или́ кто прося́й не прие́млет от бла́гости Твоея́, Госпоже́?/ Е́же и мы, ве́рующе и испове́дающе, мольбу́ прино́сим Тебе́, Цари́це:/ да́руй нам щедро́ты Твоя́, я́ко Блага́я, Блага́го су́щи Роди́тельница.

Песнь 5

Ирмо́с: Вску́ю мя отри́нул еси́/ от Лица́ Твоего́, Све́те Незаходи́мый?/ и покры́ла мя есть чу́ждая тьма, окая́ннаго./ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Про́хоре сла́вне, не укосни́ прийти́ и благослове́ния твоего́ сподо́би нас,/ я́коже иногда́ всем подава́л еси́ невозбра́нно,/ изря́днее же любо́вию сла́вящих тя/ пути́ к за́поведей Госпо́дним напра́ви, мо́лимтися.

Смуща́яй зе́млю и потряса́яй лю́ди, брань наведе́ на ны враг сопроти́вный,/ и отсю́ду приспе́ к нам глад душе́вный,/ но ты, преблаже́нне, предвари́ ско́ро и моли́твою твое́ю напита́й нас мы́сленныя пи́щи,/ и напра́ви пути́ на́ша, мо́лимтися.

Благоутро́бие твое́, свя́те, ви́дяще,/ мно́зи к тебе́ во вре́мя гла́да прихожда́ху,/ и́мже хлеб от бы́лий и соль от пе́пела, твори́мый рука́ма твои́ма, неоску́дно подава́л еси́./ Призри́ у́бо и ны́не на ны и моли́твою́ твое́ю да́руй оби́тели на́шей изобили́е вся́ко,/ мо́лимтися, о́тче преподо́бие.

Мно́зи, ненави́дящии нас, воста́ша на ны врази́,/ и́же тща́тся лиши́ти нас душе́вныя и теле́сныя пи́щи,/ но ты прииди́ к нам и запрети́ тем,/ моли́твою же твое́ю да́руй оби́тели на́шей вся, я́же на по́льзу,/ мо́лимтися, Про́хоре преподо́бие.

Богоро́дичен: Враг сопроти́вный, зави́дя ста́ду Твоему́, брань дви́жет на ны вы́ну,/ но Ты, Пречи́стая, я́ко си́льнаго Царя́ Ма́ти, сего́ воспяти́,/ на́ша же пути́ к за́поведем Госпо́дним напра́ви, мо́лимтися.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/и из глубины́ зол возведи́, молю́ся./К Тебе́ бо возопи́х, и услы́ши мя,/ Бо́же спасе́ния моего́.

Очи́сти кал души́ моея́ моли́твою́ твое́ю, Про́хоре сла́вне,/ и согни́вшия стру́пы се́рдца моего́ пла́стырем благода́ти твоея́ исцели́,/ к тебе́ бо в дне́шний день взыва́ю, я́ко к моли́твеннику спа́сения моего́.

Побежде́н князь по́мыслом лихоима́ния/ повеле́ всю соль, моли́твою твое́ю от пе́пела твори́мую, разгра́бити,/ я́же обраще́нием в пе́пел па́ки горька́ обрете́ся во усте́х его́./ От таковы́я зло́бы и стра́сти изба́ви мя, о́тче, я́ко помо́щник спасе́ния моего́.

Покры́ срамота́ лице́ отъе́млющих пи́щу а́лчущим,/ и́бо ви́дяще претворе́ние со́ли твоея́, о́тче, в пе́пел, со сту́дом вон изсы́паша,/ но ты повеле́л еси́ пове́рженный пе́пел взима́ти, и бысть соль чиста́ па́ки моли́твою́ твое́ю, я́ко и пре́жде./ Дару́й и мне ны́не моли́тву твою́, молю́тися, помо́щниче спа́сения моего́.

Скры́ти мня́ще студ свой,/ повеле́ша соль, претвори́вшуюся в пе́пел, изсы́пати в но́щи вон,/ но нощь вопия́ше, свиде́тельствуя чудеса́ твоя́,/ па́ки бо преложи́ся пе́пел в соль,/ и повеле́нием твои́м собира́ху тре́бующии,/ блажа́ще тя, преподо́бие, засту́пника своего́.

Богоро́дичен: Нощь мя обде́ржит ле́ности,/ и, во тьме отча́яния ходя́й,/ к мы́сленному бо́дрости не приближа́ются све́ту./ Ма́ти Бо́жия, просвети́ ми ра́зум, к славосло́вию наставля́я, да пою́ Ти вы́ну:/ ра́дуйся, Све́ще, Боже́ственным пла́менем возжже́нная.

Конда́к, глас 2:

Ве́лиим воздержа́нием удруча́я плоть свою́, свя́те,/ лиши́вся пи́щи челове́ческий,/ зе́лием и траво́ю вме́сто хле́ба, пе́пелом же, аки со́лию, пита́лся еси́,/ чудоде́йственне Про́хоре./ Е́же ви́дя, Госпо́дь преложи́ зе́лие во хлеб и пе́пел в соль,/ и́миже ты мно́жество гла́дных препита́л еси́,/ тем тя чтем и ублажа́ем.

Песнь 7

Ирмо́с: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко в цве́тнице, лику́юще, поя́ху:/ благослове́н еси́, Бо́же оте́ц на́ших.

Бо́жие схожде́ние и стра́шный Суд воспомяну́в, князь убоя́ся,/ я́ко озло́би тя, Про́хоре преподоби́е,/ не ве́дый свы́ше в тебе́ де́йствуемыя благода́ти,/ но, прише́д в себе́, воззва́: благослове́н Бог оте́ц на́ших.

Бо́жия раба́ позна́в тя, о́тче, влады́чествуяй/ ублажа́ше последи́ чудоде́йствия твоя́, и, прие́м тепле́йшую любо́вь к оби́тели многочуде́сней,/ка́яшеся лихоима́ния своего́,/ и, прося́щи о соде́янном зле проще́ния, поя́ще:/ благослове́н Бог оте́ц на́ших.

Я́ко и́стинный служи́тель и раб незлоби́ваго А́гнца, Сы́на Бо́жия,/ незло́бие свое́ показу́я, озло́бившему тя проще́ние дал еси́, блаже́нне,/ и утверди́л с ним сло́во:/ да еди́н друга́го вло́жит во гроб,/ внегда́ изы́ти от те́ла еди́ному от вас повели́т Бог оте́ц на́ших.

В преподо́бии пожи́в и свя́то жизнь свою́ упра́вив,/ к блаже́нной кончи́не дости́гл еси́, свя́те,/ тем, ра́достен, к А́нгельским ликостоя́нием взира́я, воззва́л еси́:/ благослове́н Бог оте́ц на́ших.

Богоро́дичен: В преподо́бии пожи́вшим не поревнова́х,/ но в ле́ности жизнь мою́ проводи́х,/ к кончи́не приближа́ющися, к кому́ воззри́ши, душе́ моя́?/ Еди́ну то́чию иму́щи наде́жду, Богома́терь, воззови́:/ Влады́чице, помози́ и изба́ви мя ве́чнаго осужде́ния.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасены́, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Седмогла́внаго зми́я закла́в копие́м по́стнических дея́ний/ и к прия́тию венца́ гото́вяся, с ра́достию взыва́л еси́, Про́хоре:/ лю́дие, Творца́ и Избави́теля Го́спода по́йте и превозноси́те во ве́ки.

Блаже́нную кончи́ну твою́, преподо́бие, от посла́ния твоего́ услы́шав, князь/ оста́ви во́ев и спе́шно прите́кл к тебе́, да благослове́ния твоего́ сподо́бится,/ и не лиши́ся, его́же жела́ше, прие́м твое́ благослове́ние, воспе́т:/ лю́дие, превозноси́те Христа́ во ве́ки.

Я́ко пре́жде в моли́твах простира́л еси́, преподо́бие, свои́ ру́це,/ та́ко при кончи́не, всем дав целова́ние,/ горе́ сотвори́в воздея́ние ру́ку свое́ю,/ испусти́л еси́ дух свой, и вси воспе́ша:/ лю́дие, сла́вите засту́пника своего́ во ве́ки.

Весе́лое отше́ствие твое́ к сожи́тию Небе́сным, весе́лаго испо́лни всех пла́ча, вси бо рыда́ху:/ ни́щии – пита́теля, си́роты – отца́,/ мы же в дне́шний день, успе́ние твое́ сла́вяще, о́тче, зове́м:/ лю́дие, превозноси́те Христа́ во ве́ки.

Богоро́дичен: Весе́лия на́шего Вину́ и Ра́дость всех преподо́бных Ро́ждшая,/ ра́дости ве́чныя Твои́м хода́тайством сподо́би мя, Ма́ти Бо́жия,/ и сподо́би сла́вити Твое́ благоутро́бие во ве́ки.

Песнь 9

Ирмо́с: Ужасе́ся о се́м Не́бо,/ и земли́ удиви́шася концы́,/я́ко Бог яви́ся челове́ком плотски́/и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Удиви́ся всяк, помина́яй житие́ твое́, о́тче,/ я́ко в те́ле живы́й, А́нгелом по́стническими дея́нии уподоби́лся еси́,/ те́мже тя вси, Про́хоре, велича́ют.

Ни́ща ду́хом тя су́ща, преподо́бие,/ не устыде́ся нося́й диади́му рука́ма свои́ма во гроб положи́ти,/ и мы, ны́не помина́юще успе́ние твое́, ублажа́ем тя,/ его́же и А́нгельстии ли́цы в Го́рних селе́ниих ублажа́ют.

Тя, в жи́зни сей крест на ра́му нося́щаго,/ князь на плещу́ в пеще́ру понести́ не устыде́ся,/ и́же те́плыми слеза́ми облия́ше гроб твой, ка́яся, я́ко озло́би тя пре́жде,/ но обое́ испра́ви твои́м благослове́нием,/ его́же и нас сподо́би, я́ко от любве́ пе́сньми тя велича́ем.

Сла́ва Тебе́, Тро́ице Пресвята́я,/ О́тче, и Сы́не, и Душе́, Еди́ный Бо́же,/ Ты бо бла́гостию Свое́ю дае́ши сла́ву ве́чную лю́бящим Тя от се́рдца,/ ея́же и нас сподо́би мольба́ми преподо́бнаго Про́хора/ и прича́стия святы́х, иде́же ли́ки их вы́ну Тя велича́ют.

Богоро́дичен: Сла́ва Тебе́, Ма́ти Бо́жия,/ ве́рных рабо́в еди́но прибе́жище, еди́но упова́ние,/ еди́на наде́жда и спасе́ние ро́да христиа́нскаго,/ тем по до́лгу Тя вси велича́ем.

Свети́лен:

Ми́ра тле́нная оста́вль, к преми́рным те́сным путе́м дости́гл еси́/ и, с ли́ки преподо́бных Безнача́льному Све́ту предстоя́,/ моли́, я́ко име́яй де́рзновение в ну́ждах посо́бствовати,/ о умире́нии ми́ра и о лю́дех правосла́вных,/ па́мять твою́ сла́вящих.

Сла́ва, и ны́не, Богоро́дичен:

Предста́тельнице Святе́й Тро́ице,/ волну́ющимся в пучи́не жите́йских страсте́й в по́мощь ско́ро предста́ни/ и ти́хими благосе́рдия Твоего́ волна́ми, доведи́ в блаже́нное приста́нище,/ я́ко ско́рая Помо́щница всем, и́мя Твое́ сла́вящим.

На стихо́вне, в Окто́ихе.

Та́же, преподо́бному, глас 1:

Стих: Восхва́лятся преподо́бнии во сла́ве/ и возра́дуются на ло́жах свои́х.

А́нгельски, лю́дие, торжеству́им/ и принесе́м песнь Бо́гу/ в ле́тней па́мяти Богоно́снаго отца́,/ пресвято́е И́мя Его́ вознося́ще и серафи́мски зову́ще:/ Свят еси́, О́тче Безнача́льный,/ Свят еси́, Сы́не Безле́тный,/ Свят еси́, и Ду́ше Соприсносу́щный.

Сла́ва, глас то́йже:

Лик честны́й соста́вльше,/ ли́ком Безпло́тных подо́бящеся, прииди́те, лю́дие,/ любе́зно ны́не мы́сленных дары́ принесе́м к святе́й пеще́ре/ и, прини́кше во гроб преблаже́ннаго отца́,/ восхва́лим, зову́ще:/ ра́дуйся, Про́хоре, славноимени́те и моли́твенниче о ду́шах на́ших.

И ны́не, Богоро́дичен или́ Крестобогоро́дичен.

Преподобный Прохор Печерский

Лебедник, был родом из Смоленска. Он подвизался в Киево-Печерской обители в XI–XII веках, где и принял со временем иноческий чин от игумена Иоанна. В монастыре он предал себя воздержанию и не ел обыкновенного хлеба, а собирал лебеду, сам приготовлял из нее для себя «хлеб», которым питался до самой смерти. Преподобный никогда не скорбел, но всегда в веселии работал Господу.

В голодный год Господь, желая прославить Своего угодника и спасти от смерти людей, благословил обильный урожай лебеды. Преподобный Прохор стал усерднее трудиться. Собирая траву, он перетирал руками ее семена, делал из муки хлебы и раздавал их нуждавшимся. Этот хлеб казался им вкуснее пшеничного. Однажды некий инок взял у преподобного его хлеб тайно, без благословения, но от горечи не мог его есть. Об этом стало известно в народе, и слава преподобного Прохора разнеслась по округе.

В то же время в Киеве случился недостаток соли. Видя это бедствие, преподобный Прохор собрал множество золы из всех келлий, вознес молитвы Господу и стал безвозмездно раздавать нуждавшимся. Зола оказалась чистой солью. Диавол же ослепил ненавистью к святому Прохору торговцев солью, рассчитывавших нажиться в связи с случившейся бедой. Они пожаловались князю Святополку. Князь решил отобрать у преподобного соль и обогатиться на ее продаже. Когда соль принесли на княжеский двор, все вдруг увидели, что перед ними обыкновенная зола.

Князь приказал выбросить золу, но, по благословению преподобного, люди приходили к тому месту и брали там чистую соль с великой радостью. Чудо это обратило князя к молитве, он помирился с игуменом Печерского монастыря и стал большим почитателем преподобного Прохора.

Когда святой Прохор почувствовал час смерти, он известил об этом князя. Оставив войско, которое вел он на половцев, Святополк поспешил к преподобному Прохору и получил благословение святого старца. После кончины преподобного Прохора (†10 февраля 1107) князь отнес его тело в пещеру и положил во гроб. Отправившись после погребения в поход, он, по пророчеству преподобного Прохора, одержал полную победу над половцами. Так велика была сила молитвы святого. О силе молитвы праведников Сам Бог говорил друзьям праведного Иова: «Пусть Иов, раб Мой, помолится за вас, и Я ходатайство его приму, чтобы не поступить с вами худо» (Иов. 42:8).

Мощи преподобного Прохора почивают в Ближних Антониевых пещерах. Сказание о преподобном Прохоре имеется во «Втором послании архимандриту Акиндину о святых блаженных черноризцах братии нашея Поликарпа, черноризца того же Печерского монастыря».

Память преподобного Прохора отмечается также 28 сентября и во 2-ю неделю Великого поста.

Преподо́бнаго отца́ на́шего Ло́нгина, игу́мена Коря́жемскаго, чудотво́рца

На ма́лой вече́рни.

На Го́споди, воззва́х: стихи́ры на 4, глас 5:

Любо́вию Боже́ственною разжига́емь,/ преподо́бие о́тче Ло́нгине,/ от ю́ных лет во и́ночестве подвиза́лся еси́,/ во́зраста же соверше́ннаго дости́г,/ в пусты́ню да́льную пресели́лся еси́/ и, та́мо оби́тель созда́в,/ в ней ста́до твое́ до́бре упасл еси́,/ по преставле́нии же твое́м благода́ть чуде́с от Го́спода прия́л еси́./ Того́ моли́ спасти́ся тя почита́ющим.

Преподо́бие о́тче Ло́нгине,/ любве́ ра́ди ко Христу́, Учи́телю твоему́,/ вся земна́я презре́л еси́,/ и, в пусты́ню всели́вся, пло́ти му́дрования умертви́л еси́,/ и по́стническими труды́ житие́ твое́ украси́л еси́,/ те́мже и ученики́ собра́л еси́,/ ревну́ющия твоему́ житию,/ сия́ ко Христу́ приве́л еси́./ Того́ моли́ спасти́ся всем, пою́щим тя.

По́стника Госпо́дня пе́сньми почти́м,/ вся прило́ги страсте́й воздержа́нием тве́рдым/ и терпе́нием кре́пким умертви́вша,/ и сопроти́внаго всю горды́ню зело́ посрами́вша,/ и ны́не моля́щася Го́сподеви/ поми́ловатися ду́шам на́шим.

Сла́ва, глас 6:

Во страну́ да́льную пресели́вся, преподо́бие,/и в пусты́ню безмо́лвия вшед,/ та́мо оби́тель созда́л еси́/ и в ней Небе́сное бога́тство стяжа́л еси́,/ моли́твою́ бо и поще́нием се́ял еси́,/ в ра́дости же пожина́вши плоды́ трудо́в твои́х./ Не оста́ви у́бо оби́тель твою́,/ но ми́лостивно сию́ посеща́й/ и Христу́, о́тче Ло́нгине, моли́ся/ спасти́ся ду́шам на́шим.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 2:

Жизнь земну́ю я́ко преходя́щую/ презре́л еси́, блаже́нне,/ и сподо́бился еси́ улучи́ти жизнь блаже́нную,/ и Бо́жия сла́вы прича́стник яви́лся еси́,/ о́тче Богоно́сне.

Стих: Честна́ пред Го́сподем/ смерть преподо́бных Его́.

Любве́ ра́ди ко Го́споду,/ преподо́бие Ло́нгине,/ о пло́ти раче́ния отве́ргл еси́/ и ду́шу, от страсте́й свобо́дну,/ Бо́гови предста́вил еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Бо́дренными моли́твами/ и трудолю́бными по́двиги оби́тель твою́ украси́л еси́/ и це́рковь ве́рных обогати́л еси́,/ о́тче преблаже́нне.

Сла́ва, глас то́йже:

В пусты́ню вшел еси́,/ нося́ о́браз Креста́ Христо́ва,/ и отту́ду доброде́тели ра́ди/ к Небе́сному гра́ду преше́д еси́,/ дости́г пра́ведных поко́я/ и святы́х ра́дования./ Те́мже с ни́ми, Ло́нгине,/ приле́жно Го́сподеви моли́ся,/ да изба́вимся от вся́каго сопроти́внаго обстоя́ния вси мы,/ ве́рою жизнь твою́ почита́ющии/ и че́стное твое́ успе́ние сла́вящии.

И ны́не, Богоро́дичен: Все упова́ние мое́:

Тропа́рь, ектения́ и отпу́ст.

На вели́цей вече́рни

Блаже́н муж: 1-й антифо́н.

На Го́споди, воззва́х: поста́вим стихо́в 8 и пое́м настоя́щия стихи́ры, глас 8.

Подо́бен: Му́ченицы Госпо́дни:

Преподо́бный и честны́й муж,/ я́коже свети́льник Боже́ственный и многосве́тлый,/ под спу́дом жите́йския суеты́ никогда́же сокрыва́ется,/ но на ве́рсе горы́ поставля́ется./ Моли́твами светоно́снаго уго́дника Твоего́ Ло́нгина, Христе́ Бо́же,/ да́руй лю́дем Твои́м ве́лию ми́лость.

На ра́ло ру́це твои́ возложи́л еси́, всечестне́,/ де́лая всегда́ Боже́ственная,/ и не возврати́лся еси́ зря вспять,/ но был еси́ упра́влен во Ца́рствие Христа́, вопло́щшагося Бо́га./ Того́ моли́ о спа́сении душ на́ших.

В ладии́ теле́сней легце́/ преплы́л еси́ жите́йскую пучи́ну, му́дре,/ кро́ткими дыха́нии Ду́ха Бо́жия направля́емь,/ вся же блага́ тле́нная ни во что́же вмени́в,/ обре́л еси́ би́сер многоце́нный, Христа́,/ и обогати́лся еси́ Боже́ственными Того́ добро́тами.

И́ны стихи́ры, глас 6:

Богоно́сне преблаже́нне Ло́нгине,/ вся плотска́я му́дрования ду́хови покори́л еси́,/ поще́ньми же и страда́ньми утверди́вся,/ я́ко зла́то, в горни́ле искуше́но, возсия́л еси́/ и оби́тель Ду́ха Пресвята́го соде́лался еси́;/ собра́в же мона́шествующих мно́жества,/ уче́ньми твои́ми на высоту́ добро́детелей сия́ возве́л еси́./ Помина́й ны, чту́щия па́мять твою́ свяще́нную,/ и моли́ спасти́ся ду́шам на́шим.

Возсия́ днесь пресве́тлая и всепра́зднственная па́мять твоя́,/ пресла́вне о́тче Ло́нгине,/ созыва́ющи многочи́сленное по́стник сосло́вие/ и преподо́бных ликостоя́ния,/ А́нгелы же и челове́ки/ к похвале́нию во святы́х Свои́х сла́вимаго Христа́ Бо́га на́шего./ Те́мже и мы, притека́юще к тебе́/ и исцеле́ний дары́ оби́льно прие́млюще ,/ венча́вшего тя Христа́ прославля́ем,/ Спа́са душ на́ших.

Богоно́сне преблаже́нне о́тче Ло́нгине,/ ты псало́мски слеза́ми твои́ми зе́млю ороси́л еси́/ и не дал еси́ сна твои́ма очи́ма,/ ни ве́ждом твои́м дре́мания,/ серде́чным жела́нием ко Христу́ устремля́лся,/ Его́же возлюби́л еси́,/ сего́ ра́ди мона́хом о́браз яви́лся еси́/ и доброде́тельми просия́л еси́./ Те́мже тя ублажа́ем,/ велича́юще тебе́ Просла́вльшаго.

Сла́ва, глас то́йже:

Еже по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию я́ко мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть поработи́ти ду́ху./ Те́мже мона́шествующих яви́лся еси́ наста́вник,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х зерца́лом разрешши́мся,/ о́тче наш Ло́нгине,/ чи́сте зри́ши Святу́ю Тро́ицу,/ моля́ся несре́дственне о ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния преподо́бническая три (ЗРИ страни́цы 339–340).

На ли́тии стихи́ра хра́ма и преподо́бному стихи́ры, глас 8:

Преподо́бие о́тче Богому́дре,/ слепы́м подае́ши свет,/ хромы́м хожде́ние и боля́щим исцеле́ние,/ ми́лостивно приклоня́лся ко приходя́щим с ве́рою ко гро́бу твоему́/ и прося́щим твое́й по́мощи:/ засту́пника бо и предста́теля,/ вси ве́рнии, тя обрето́хом.

Преподо́бие о́тче всечестне́ Ло́нгине,/ возше́д на колесни́цу доброде́телей,/ к Бо́гу прибли́жился еси́/ и, я́коже ми́лоть, нам те́ло твое́,/ поло́жено во гро́бе, оста́вил еси́/ источа́ти исцеле́ния,/ прогоня́ти ду́хи лука́выя./ Те́мже ублажа́ем тя, о́тче прехва́льне.

Ли́ком преподо́бных сочета́лся еси́,/ по́стническим житие́м украси́вся, блаже́нне,/ и, ны́не ве́селяся в Небе́сных оби́телех,/ иде́же лику́ют Ангели,/ и све́том Боже́ственным вои́стину озаря́емь,/ помина́й су́щия на земли́ лю́ди твоя́,/ любо́вию тя ублажа́ющия/ и святу́ю твою́ па́мять творя́щия.

Сла́ва, глас то́йже:

По́двигом до́брым подвиза́вся,/ яви́лся еси́ о́браз воздержа́ния, чу́дне,/ в пусты́ню же всели́лся еси́,/ смотря́я Вы́шняго Иерусали́ма красоту́;/ и ны́не на Небесе́х досто́йно прие́млеши по́чести трудо́в твои́х/ и с Небе́сными чинонача́лии ра́дуешися, преблаже́нне,/ ве́чных благ насле́дник и Ца́рствия жи́тель быв./ Моли́ся у́бо, преподо́бие Ло́нгине, Спа́су всех/ умири́ти мир и спасти́ души на́ша.

И ны́не, Богоро́дичен:

Аз, Де́во Свята́я Богоро́дице,/ к покро́ву Твоему́ прибега́ю,/ вем, я́ко обря́щу Тобо́ю спасе́ние:/ мо́жеши бо, Чи́стая, помощи́ мне.

На стихо́вне стихи́ры, глас 1.

Подо́бен: Небе́сных чино́в:

Наста́, Богоно́сне о́тче,/ со́лнца светле́йший твой пра́здник,/ в не́мже ра́достию озаря́ются приходя́щии к тебе́ с ве́рою/ и благода́тию облагоуха́ются,/ здра́вие душ и теле́с прие́млюще,/ Ло́нгине преподо́бие,/ моли́твенниче о ду́шах на́ших.

Стих: Честна́ пред Го́сподем/ смерть преподо́бных Его́.

Чу́вственныя стра́сти телесныя укроти́в брозда́ми воздержа́ния,/ чудоде́йственниче Ло́нгине,/ и равноа́нгельное житие́ на земли́ показа́в,/ вся плотска́я жела́ния духови покори́л еси́;/ сего́ ра́ди ны́не в Небе́сных селе́ниих водворя́яся,/ моли́ся о ду́шах на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Блаже́нне о́тче Ло́нгине,/ спасе́ния души́ твоея от ю́ности возжеле́в,/ дре́вняго челове́ка с по́хотьми его́ совле́клся еси́/ и во Христа́ обле́клся еси́ вои́стину,/ те́мже и мона́хов наста́вник был еси́, преподо́бие,/ и мно́гая вра́жия ополче́ния низложи́л еси́./ Моли́ спасти́ся ду́шам на́шим.

Сла́ва, глас 8:

Мона́хов мно́жества/ наста́вника тя почита́ем, о́тче наш Ло́нгине,/ твое́ю бо стезе́ю вои́стину пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных./ С ни́миже моли́ся Го́сподеви/ поми́ловатися ду́шам на́шим.

И ны́не, Богоро́дичен: Безневе́стная Де́во:

Тропа́рь, глас 1:

От мятежа́ мирска́го удали́вся,/ к немерца́ющему Све́ту прите́кл еси́,/ преподо́бие о́тче Ло́нгине,/ и ны́не чи́сте зри́ши Святу́ю Тро́ицу,/ Ю́же моли́ за ны недосто́йныя,/ да спасе́т ду́ши на́ша.

На у́трени, на Бог Госпо́дь: тропа́рь, два́жды.

Сла́ва, и ны́не, Богоро́дичен.

По 1-м стихосло́вии седа́лен, глас 4:

Зва́нию Го́спода твоего́ после́довал еси́,/ мир отве́рг и вся того́ кра́сная, преблаже́нне о́тче Ло́нгине,/ претерпе́л же еси́ пусты́нное озлобле́ние усе́рдно/ и полки́ де́монов му́жественне отрази́л еси́./ Те́мже твою́ па́мять при́сно пе́сньми восхваля́ем.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к Жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По 2-м стихосло́вии седа́лен, глас 1:

Пра́ведно на земли́ пожи́л еси́, о́тче Богоно́сне,/ те́мже ны́не со А́нгелы лику́еши на Небесе́х;/ помина́й ны, творя́щия па́мять твою́, Ло́нгине преподо́бие.

Сла́ва, и ны́не, Богоро́дичен:

Ужа́сно чу́до зача́тия/ и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние;/ сла́ва Твоя́, Богоро́дице, всем простре́ся, во спасе́ние душ на́ших.

По полиеле́и седа́лен, глас 1:

Угаси́л еси́ страсте́й все́ воста́ние умерщвле́нием пло́ти, свяще́нный о́тче,/ и жизнь безконе́чную по сме́рти прия́л еси́;/ те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.

Сла́ва, и ны́не, Богоро́дичен:

Наста́ви ны на путь покая́ния,/ уклоня́ющияся при́сно к злым обы́чаем и Преблага́го прогневля́ющия Го́спода/ Неискусобра́чная, Благослове́нная Мари́е,/ прибе́жище отча́янных челове́ков, Бо́жие обита́лище.

Степе́нна, 1-й антифо́н 4-го гла́са. Проки́мен: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же возда́де ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бие о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х./ Де́монская разори́л еси́ по́лчища/ и дости́гл еси́ чино́в А́нгельских,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ ду́шам на́шим.

Кано́н Богоро́дице со ирмосо́м на 6 и преподо́бнаго Ло́нгина, на 8, глас 4.

Песнь 1

Ирмо́с: Триста́ты кре́пкия,/ рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/во умерщвле́нии телесе́/ побе́дное воспою́ пе́ние.

Сло́ве Бо́жий, Еди́н Сый Святы́я Тро́ицы,/ пре́жде век от Отца́ рожде́нный,/ напосле́док же от Де́вы воплоти́выйся,/ души́ трича́стное во глубине́ безстра́стия потопи́, молю́ся,/ да преподо́бному, я́ко в тимпа́не, во умерщвле́нии телесе́ воспою́ пе́ние.

Врага́ победи́в посто́м и моли́твою́/ и крест на ра́мо взем,/ Еди́ному в Тро́ице Бо́гу послужи́л еси́,/ твои́ми к Нему́ моли́твами/ помози́ мне воспе́ти по достоя́нию по́двиги и чудеса́ твоя́, Ло́нгине преподо́бие.

Оста́вил еси́ мирски́й мяте́ж и всели́лся еси́ в пусты́ню,/ име́я непобеди́мое ору́жие, Крест Христо́в,/ и́мже мы́сленныя враги́ победи́л еси́.

Богоро́дичен: Пло́тию Безпло́тнаго ро́ждшая, Богороди́тельнице Пресвята́я,/ от теле́сных и душе́вных скверн нас омы́й/ окропле́нием Ма́терния Твое́я моли́твы.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́, Человеколю́бче.

Ни му́дростию, ни си́лою, ни бога́тством хваля́ся,/ но О́тчую Ипостасную си́лу прославля́я, преподо́бие,/ жили́ще Ду́ху Свято́му себе́ соде́лал еси́, Ло́нгине.

Небре́гл еси́ о земне́м жили́щи/ и стяжа́л еси́ себе́ сокро́вище в Небе́сных селе́ниих./ Моли́твами твои́ми сохрани́ оби́тель твою́ от враг необори́му.

Жите́йская бла́га отри́нув,/ сла́вен дом Бо́жеству себе́ созда́л еси́/ и, о́браз Бо́жий неврежде́н в себе́ соблюда́я,/ никогда́же прогне́вался еси́,/ но благ и кро́ток был еси́, Ло́нгине преподо́бие.

Богоро́дичен: Из ложе́сн Твои́х, Богома́ти Пречи́стая,/ возсия́ пресла́вно вели́кое Со́лнце, Христо́с./ И́мже, земни́и вси, просвети́хомся и Небеса́ наследо́вахом.

Седа́лен, глас 4:

Жизнь твою́ в пусты́ни, преподо́бие, воздержа́нию и моли́тве пре́дал еси́,/ стра́сти же теле́сныя, я́ко пле́нника, связа́в, ду́хови покори́л еси́;/ сего́ ра́ди, о́тче Ло́нгине, Христо́с чудесы́ пресла́вно тя венча́ет,/ Еди́н прославля́яй святы́я Своя́.

Сла́ва, и ны́не, Богоро́дичен:

Умертви́ся вся кре́пость моя́ от мно́жества безме́рных мои́х зол,/ и, мно́гими скорбьми́ содержи́м, уже́ во отча́яние впадо́х,/ но помози́ ми, Влады́чице, Ло́нгина блаже́ннаго предста́тельством,/ я́ко ро́ждшая пла́чущим ра́дость и утеше́ние.

Песнь 4

Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Любо́вию ко Го́споду разже́гся,/ оста́вил еси́ дом и вся стяжа́ния твоя́/и в пусты́ню всели́лся еси́,/ спу́тника себе́ име́я победоно́сное ору́жие, Крест Христо́в,/ непобеди́мую побе́ду.

Всели́лся еси́ в пусты́ню,/ в не́йже приве́л еси́ мно́гих ду́ши ко спасе́нию,/ те́мже с ли́ки святы́х пое́м па́мять твою́, преподо́бие.

Ева́нгельский глас услы́шав,/ небре́гл еси́ о земны́х,/ и в непроходи́мем ме́сте оби́тель созда́л еси́,/ и, в ней мно́жество и́нок собра́в, Бо́гови воспева́л еси́:/ Ты еси́, Человеколю́бие, кре́пость моя́ и пе́ние.

Богоро́дичен: Ублажа́ют Тя, Пречи́стая Богоро́дице,/ всяк во́зраст и вся́ка душа́ ве́рных:/ Бо́жие бо Сло́во па́че ума́ и сло́ва родила́ еси́, Пренепоро́чная.

Песнь 5

Ирмо́с: Из но́щи у́тренююще,/ просвети́ нас, Животво́рче Кресте́ Христо́в,/ со стра́хом покланя́ющияся тебе́,/ и день спаси́тельный при́сно возсия́й нам.

От но́щи греха́ ко све́ту покая́ния возве́л еси́ ученики́ твоя́/ и просвеще́ние святе́й оби́тели твое́й дарова́л еси́ святы́й Крест,/ его́же из да́льных стран с вели́ким трудо́м прине́сл еси́, преподо́бие.

Име́л еси́ наста́вника принесе́нный тобо́ю победоно́сный Крест,/ его́же си́лою оби́тель созда́л еси́/ и по преставле́нии твое́м ста́до твое́ в ве́ре и единомы́слии сохраня́вши.

Понесл еси́ на ра́ме твое́м, по словеси́ Госпо́дню, крест неви́димый,/ ви́димый же о́браз креста́ принесл еси́ во оби́тель твою́,/ и́же и доны́не на гро́бе твое́м зри́тся.

Богоро́дичен: Воспо́йте Бо́гови, вся земля́,/ и по́йте вси́ Ро́ждшемуся неизрече́нно от Де́вы Неискусобра́чныя/ и Сию́ ве́рным показа́вшему тве́рду наде́жду и похвалу́.

Песнь 6

Ирмо́с: Бу́ря мя помышле́ний пости́гши,/ во глубину́ низвлачи́т мя безме́рных грехо́в:/ но Ты, Управи́телю Благи́й,/ предвари́в, упра́ви,/ я́ко проро́ка, и спаси́ мя.

Бу́рю помышле́ний су́етных отри́нул еси́ от себе́/ и еди́ну мысль ко Влады́це име́л еси́,/ я́ко да си́лою Креста́ управля́емь,/ дости́гнеши Небе́сных оби́телей.

Глубину́ безме́рных согреше́ний чи́стым житие́м преше́л еси́,/ ше́ствуя по Христо́вым стопа́м,/ и от потопле́ния изба́влен был еси́, преподо́бие.

Любве́ ра́ди ко Христу́/ по жите́йскому мо́рю немо́крыми нога́ми ходи́л еси́,/ Управи́теля име́я Блага́го,/ упра́вивша тя, я́ко проро́ка, и спа́сша.

Богоро́дичен: От душе́вных страсте́й исцели́ мя, Пресвята́я Де́во,/ Исто́чник исцеле́ний ро́ждшая, Ма́ти неизрече́ннаго Све́та, просвети́ мя Рождество́м Твои́м.

Конда́к, глас 8:

По словеси́ Учи́теля Христа́,/ крест на ра́мо твое́ прия́л еси́,/ вся жите́йская отри́нув,/ и о́браз Животворя́щаго Дре́ва в пусты́ню прине́сл еси́,/ иде́же доны́не исцеле́ния неоску́дно источа́ются/ с ве́рою приходя́щим к тебе́.

И́кос:

Те́сным путе́м на земли́ ше́ствовал еси́/ и Небе́сных селе́ний ра́достне дости́гл еси́,/ иде́же предстои́ши Престо́лу Пресвяты́я Тро́ицы,/ дарова́ньми чуде́с обогаща́емь./ Мы же, по́двигом твои́м дивя́щеся, си́це вопие́м ти:/ ра́дуйся, Христа́ Бо́га всем се́рдцем возлюби́вый/ и невозвра́тным жела́нием Тому́ после́довавый;/ ра́дуйся, наде́жды ра́ди бу́дущих благ вся тле́нная и мимотеку́щая презре́вый;/ ра́дуйся, пречу́дный храм во и́мя святи́теля Никола́я, чудотво́рца Мирлики́йскаго,/ и во сла́ву Животворя́щия Тро́ицы воздви́гнувый;/ ра́дуйся, оби́тель согради́вый и лик и́ноческий в ней совокупи́вый;/ ра́дуйся, те́ло твое́ при вхо́де во храм на попра́ние лю́дем погребсти́ запове́давый;/ ра́дуйся, на земли́ те́лом потруди́выйся,/ ны́не же на Небеси́ веселя́йся;/ ра́дуйся, я́ко с ли́ки преподо́бных ны́не водворя́ешися/ и зри́ши Пресвяту́ю Тро́ицу;/ ра́дуйся, я́ко от гро́ба твоего́ источа́ются исцеле́ния/ приходя́щим с ве́рою и моля́щимся тебе́;/ ра́дуйся, су́щим в бе́дах и во искуше́ниих гото́вый предста́телю и засту́пниче;/ ра́дуйся, преподо́бие Ло́нгине, о́тче наш.

Песнь 7

Ирмо́с: В нача́ле Безнача́льное Сло́во/ со Отце́м и Ду́хом, Сын Единоро́дный, благослове́н еси́/ и превозноси́мый Бо́же оте́ц на́ших.

В нача́ле, Безнача́льное Сло́во, на земли́ яви́лся еси́ на́шего ра́ди спасе́ния,/ Ду́хом же освяти́л еси́ позна́вший Тя/ и сотво́ршия по словесе́м Твои́м/ и преподо́бнаго Ло́нгина научи́л еси́ пе́ти:/ бла́гословен еси́, Го́споди Бо́же оте́ц на́ших.

Единоро́дный Сын со Отце́м и Святы́м Ду́хом/ просла́ви тя, преподо́бие о́тче наш Ло́нгине, во оби́тели твое́й,/ и вся притека́ющая к тебе́ пе́ти научи́л есть:/ благослове́н еси́, препе́тый и превозноси́мый Бо́же оте́ц на́ших.

Христоподража́тельному житию́ общежи́тия нача́льников,/ преподо́бных Анто́ния и Феодо́сия, поревнова́л еси́/ и оби́тель созда́л еси́,/ в не́йже И́мя Госпо́дне непреста́нно сла́вится, Ло́нгине преподо́бие.

Богоро́дичен: Ору́жие пла́менное ны́не не храни́т врат еде́мских,/ зане́ Крест Сы́на Твоего́, Пренепоро́чная, низложи́ врага́ губи́теля./ Те́мже и мы, спасе́ние улучи́вше, благода́рно взыва́ем:/ благослове́н Плод чре́ва Твоего́, Де́во Чи́стая.

Песнь 8

Ирмо́с: Во огни́ пла́меннем предстоя́т Тебе́/ Херуви́ми, Серафи́ми, Го́споди,/и вся тварь песнь Тебе́ пое́т кра́сную:/ по́йте, благослови́те, лю́дие, превозноси́те Христа́,/ Еди́наго Соде́теля, во вся ве́ки.

Во огни́ пла́меннем, предстоя́ще, Херуви́ми и Серафи́ми, Го́споди,/ песнь Тебе́ пою́т,/ с ни́миже и преподо́бный Ло́нгин взыва́ет:/ хвали́те, по́йте и превозноси́те Христа́,/ Еди́наго Соде́теля, во вся ве́ки.

В ся тварь пое́т Бо́гу песнь кра́сную,/ с не́юже и оби́тель, тобо́ю со́зданная, Ло́нгине,/ прино́сит сла́ву Христу́, пою́щи:/ благослови́те, лю́дие, Христа, Еди́наго Соде́теля, во вся ве́ки.

Прииди́те, лю́дие, воспои́м преподо́бнаго Ло́нгина пресла́вную па́мять,/ да моли́твами уго́дника Своего́ дода́ст Госпо́дь це́льбу/ с ве́рою приходя́щим ко гро́бу пра́ведника и пою́щим Христа́,/ Еди́наго Соде́теля, во вся ве́ки.

Богоро́дичен: Спаси́ мя, Ма́ти Бо́жия,/ Вино́вника спасе́ния ми́рови ро́ждшая,/ и изба́ви мя от бу́ри нечи́стых страсте́й/ и вся́кия ско́рби и напа́сти,/ да сла́влю Тя, Богоро́дицу.

Песнь 9

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.

Низложи́ си́льныя Госпо́дь,/ и вознесе́ тя, Ло́нгине, в ра́йская селе́ния,/ и водвори́ тя со святы́ми, угоди́вшими Ему́,/ во Све́те немерца́ющем.

Напра́вил тя есть Бог на путь спасе́ния,/ и́мже ше́ствуя, возше́л еси́ ко Све́ту непристу́пному,/ да принесе́ши моли́твы за гра́ды же и лю́ди,/ досто́йно творя́щия па́мять твою́, Ло́нгине преподо́бие, о́тче наш.

Моли́ся, свя́те Ло́нгине,/ да ми́ром огради́т Госпо́дь оби́тель на́шу/ и невреди́му сохрани́т ю от всех наве́т вра́жиих,/ и да полу́чат ми́лость и прегреше́ний оставле́ние в день Су́дный вси́,/ притека́ющии с ве́рою и моли́твою́ к тебе́, Ло́нгине, о́тче преподо́бие.

Богоро́дичен: Богоро́дице Де́во,/ Его́же родила́ еси́, Человеколю́бца Бо́га,/ моли́ со преподо́бным Ло́нгином,/ да спасе́т ду́ши на́ша.

Свети́лен:

Процве́л еси́, я́ко фи́нике, о́тче,/ и оби́тель яви́лся еси́ Ду́ха Пресвята́го,/ И́же славна́ тя вселе́нней пока́за;/ непреста́нно моли́ся о нас, почита́ющих ве́рою пречестну́ю па́мять твою́,/ преподо́бие Ло́нгине.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ зане́ от Тро́ицы Еди́наго родила́ еси́, Богоро́дице,/ и носи́ши на ру́ку Твое́ю Боже́ственное Сло́во, Ма́ти Пречи́стая.

На хвали́тех стихи́ры на 4, глас 8:

Преподо́бие о́тче Ло́нгине,/ ты, и́го Христо́во на ра́мо взем,/ вся прило́ги вра́жия до́блественне отрази́л еси́/ и Ца́рствия Небе́снаго дости́гл еси́./ Те́мже тя ве́рою вси́ почита́юще,/ о́тче преблаже́нне, мона́шествующих похвало́,/ усе́рдно мо́лимся тебе́:/ Христа́ непреста́нно моли́/ спасти́ ду́ши на́ша.

Ве́рою соше́дшеся вси́,/ я́ко подви́жника Христо́ва почита́ем тя, Ло́нгине:/ ра́дуяся бо, ше́ствовал еси́ в пусты́ни непрохо́дней/ и та́мо оби́тель и́ночествующих воздви́гл еси́./ Те́мже тебе́ ве́рою взыва́ем, блаже́нне:/ по́стников похвале́, моли́ся о нас ко Го́споду,/ поми́ловатися ду́шам на́шим.

Богому́дре о́тче Ло́нгине,/ Ца́рствия Бо́жия иски́й,/ при реце́ в пусты́ни всели́лся еси́,/ никако́же бояся неви́димых и ви́димых враго́в,/ и́хже моли́твами твои́ми до конца́ низложи́л еси́,/ и му́дрый наста́вник притека́ющим к тебе́ был еси́./ Те́мже тя ве́рою вси́ чти́м и ублажа́ем.

Сла́ва, глас 6: Во страну́ да́льную:

ЗРИ на ма́лой вече́рни, на Го́споди, воззва́х.

И ны́не, Богоро́дичен: Никто́же, притека́яй к Тебе́:

Славосло́вие вели́кое и отпу́ст.

На литурги́и:

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 231. Аллилу́ия, глас 6. Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не у́бои́тся.

Моли́тва

О вели́кий уго́дниче, пресла́вный чудотво́рче и оби́тели на́шея Богодохнове́нный наста́вниче, Ло́нгине преблаже́нне, душе́ю на Небеси́ Пре́столу всех Царя́ предстоя́й, те́лом же во святе́й оби́тели сей почива́яй и разли́чная чудеса́ повсю́ду моли́твами твои́ми соверша́яй! Призри́ ми́лостивно на лю́ди предстоя́щия и твоего́ ко Го́споду Бо́гу хода́тайства во обдержа́щих ну́ждах прося́щия, вси бо мы по мно́жеству грехо́в на́ших не сме́ем ни́же возвести́ оче́с на́ших на Не́бо. Ты же, я́ко стяжа́вый дерзнове́ние, принеси́ за всех, к тебе́ притека́ющих, те́плыя моли́твы ко Го́споду, е́же изба́витися нам от гла́да, пото́па, тру́са, огня́, меча́ и бра́ни, от люде́й и от диа́вола быва́ющия, и от вся́кия душе́вныя и теле́сныя боле́зни, да сих избежа́вше и Го́споду, Ему́же предстои́ши, рабо́тающе, вни́дем в неконча́емый поко́й и просла́вим та́мо с тобо́ю всех благи́х Пода́теля Бо́га, всегда́, ны́не, и при́сно, и во ве́ки веко́в. Ами́нь.

Преподобный Лонгин Коряжемский (XVI век)

Первоначально подвизался в обители преподобного Павла Обнорского (†1429, память 10 января). Он пришел в эту обитель в молодых летах, прошел длинный ряд разных монастырских послушаний, дожил до старческих седин и приобрел большой опыт в иноческой жизни. Все стали относиться к нему с особенным уважением, но преподобный Лонгин, тяготившийся многолюдством общежития и возрастающим почетом, пожелал удалиться в пустыню. Получив благословение настоятеля, он вместе со своим духовным братом Симоном, иноком Корнилиевского монастыря, отправился на поиски уединенного места. Спустившись водою от Вологды до Устюга, странники дошли до Сольвычегодска и на некоторое время остановились в местном Борисоглебском монастыре. Далее их путь лежал по левому берегу реки Вычегды. Дойдя до устья реки Коряжемки, они остановились в глухом лесу в 15 верстах от города. Помолившись Богу, оба друга начали рубить лес и расчищать место, на котором общими силами построили келлию и часовню. Когда тяжелые работы были окончены, преподобный Симон (†1562; память 24 ноября) удалился на берег реки Сойги и основал там свой скит. Преподобный Лонгин остался один и всецело предался Богомыслию, дни и ночи проводя в непрестанных молитвах и псалмопении.

Когда весть о Преподобном разнеслась по окрестным селениям, к нему стали приходить люди, искавшие спасения в уединении и безмолвии. Святой предупреждал их о трудностях пустынножительства, говорил о своем желании жить в одиночестве, но люди не переставали приходить и поселяться в тех местах. Сначала собравшиеся жили как отшельники, но потом, по общему желанию, преподобный Лонгин был выбран настоятелем и он дал им общежительный устав. Была построена новая церковь в честь святителя Николая, а также – трапезная и другие необходимые для общежития службы. Таким образом составилась Коряжемская обитель (1535 год).

Приняв начальство над братией, преподобный Лонгин превзошел всех подвижническими трудами. Несмотря на преклонные годы, он всегда первый выходил на монастырские послушания и более других работал для своей пустынной обители. Близ церкви Преподобный сам выкопал колодец.

Преподобный Лонгин преставился 10 февраля 1540 года. Он пожелал, чтобы тело его было погребено у подножия церковной лестницы, чтобы приходящие в церковь попирали прах его. Братия не посмела ослушаться завещания старца.

В 1557 году, когда тяжело заболел устюжский воевода князь Владимир, ему во сне явился старец и сказал, где лежит и куда следует перенести тело основателя Коряжемского монастыря. Никогда не бывавший прежде в том монастыре, князь Владимир поехал туда и безошибочно, по словам старца, явившегося ему во сне, нашел место погребения преподобного Лонгина. Тело святого было перенесено к северной стороне церкви, после чего устюжский воевода стал здоров. Много других исцелений было совершено преподобным Лонгином. В XVII веке Вятский епископ Александр составил службу святому. В 1665 году при перестройке церкви гроб преподобного Лонгина оказался внутри ее. Над ним была устроена гробница, украшенная позолоченной резьбой, покрытая пеленою с вышитым на ней изображением преподобного и сказанием о перенесении его мощей. Память преподобного Лонгина чтится также 16 октября.

Святы́я благове́рныя вели́кия княги́ни А́нны Новгоро́дския

Тропа́рь, глас 1:

От за́пада возсия́вши, я́ко звезда́ небосве́тлая,/ прия́ти Правосла́вную ве́ру сподо́билася еси́,/ в не́йже плод благосла́вный Ру́сской земле́ прине́сши,/ свята́я благове́рная княги́не А́нно,/ Христа́ всем се́рдцем возлюби́ла еси́,/ Того́ оправда́ния и зако́ны храня́щи;/ те́мже дне́сь всесвяту́ю твою́ па́мять пра́зднующе,/ грехо́в оставле́ние моли́твами твои́ми прие́млем.

Конда́к, глас 4:

Дне́сь в све́тлой па́мяти твое́й/ Вели́кий Но́вград весели́тся,/ созыва́я всех ве́рных све́тло пра́здновати па́мять твою́,/ и мы ны́не, духо́вно ликовству́юще,/ ра́достно сла́вим тя и мо́лим:/ свята́я благове́рная княги́не А́нно,/ предстоя́ Святе́й Тро́ице/ моли́ изба́вити Вели́кий Но́вград и всю зе́млю Ру́сскую/ от вся́ких бед и обстоя́ний и всем нам спасти́ся.

Святая благоверная великая княгиня Анна Новгородская (†1051)

Была старшей дочерью мудрого шведского короля Олафа Скетктунга, прозванного «всехристианнейшим королем» за огромные услуги, оказанные им христианству в его стране.

Супруга его королева Астриди также была известна своим умом и добротой. Святое Крещение королевская семья приняла в 1000 году. Святая Анна на своей родине носила имя Индигерды. Вопреки обычаю того времени воспитывать детей у родственников, она выросла в своей родной семье и получила исключительное для того времени образование: изучила литературу, историю и особенно Священное Писание. Она пользовалась с ранних лет большой свободой, принимала участие в общественной жизни своей родины, путешествовала и принимала гостей. Это была молодая девушка, исполненная благодати, ума и смелости, и имевшая большое влияние на всех, кто с ней общался. В 1016 году она вышла замуж по воле своего отца, искавшего ей мужа, «который был бы достоин его дружбы» – за великого князя Киевского Ярослава Мудрого (1019 – 1054). Став русской великой княгиней с именем Ирины, она всей душой отдалась интересам своей новой родины и стала верной помощницей и советницей своего мужа. Однажды, когда возмутилась наемная норвежская стража и просила великую княгиню быть посредницей между ними и великим князем, она согласилась, но предупредила их прямо, что будет защищать своего мужа.

Великая благоверная княгиня Ирина имела большое влияние на добрые отношения, установившиеся тогда между Скандинавскими странами и Россией. Она приютила у себя в Киеве изгнанных сыновей английского короля Эдмунда, Эдвина и Эдуарда, а также принца Магнуса Норвежского, которого вернула на родину только тогда, когда убедилась, что норвежцы отдадут ему отчий престол и будут уважать его права.

Когда против великого князя Ярослава восстал его брат, князь Мстислав Тмутараканский, великая благоверная княгиня Ирина предложила Мстиславу решить спор единоборством с ней, но Мстислав ответил, что он с женщинами бороться не привык – и уступил брату.

Святая великая княгиня Ирина была матерью семи сыновей и трех дочерей. Из ее сыновей наиболее известны четверо: старший – святой благоверный князь Владимир Новгородский, причисленный к лику святых Русской Церкви (†1052; память 4 октября), – и следующие за ним братья его: Изяслав Киевский, Святослав Черниговский (княжившие поочередно в Киеве), память которых чтилась местно в Киеве, и Всеволод Переяславский – отец Владимира Мономаха – родоначальник великих князей Московских.

Дочери ее были королевы: Анна Французская, Мария Венгерская и Елизавета Норвежская. О высокой христианской нравственности великокняжеской семьи свидетельствует знаменитое «Слово о законе и благодати» святителя Илариона, митрополита Киевского (†ок. 1053; память 21 октября), который, обращаясь к покойному уже, святому равноапостольному великому князю Владимиру (†1015; память 15 июля), говорил так: «Взгляни на сноху твою Ирину, взгляни на внуков и правнуков твоих, как они живут, как Бог их хранит, как они соблюдают веру, которую ты им завещал, как они восхваляют Имя Христово!»

В Киеве святая Ирина основала первый женский монастырь во имя святой великомученицы Ирины, и, по обычаю того времени, должна была не только заботиться о нем, но и управлять им. Двор великого князя Ярослава жил то в Киеве, то в Новгороде. В 1045 году великий князь отправился в Новгород на закладку каменного собора во имя Святой Софии Премудрости Божией, воздвигавшегося святым князем Владимиром, старшим сыном великокняжеской четы. В Новгороде 10 февраля 1050 года святая благоверная великая княгиня Ирина скончалась, приняв постриг с именем Анны. Это был первый постриг в великокняжеском доме. Сын святой Анны, благоверный князь Владимир, преставившийся 4 октября 1052 года, был погребен вместе с материю.

Дни памяти святой Анны, 10 февраля и 4 октября – вместе с ее сыном, были установлены после знамения, бывшего Новгородскому архиепископу святителю Евфимию (†1458; память 11 марта) в 1439 году, В связи с этим знамением была установлена также соборная память Новгородских святителей (4 октября и 10 февраля), погребенных в приделе Святой Софии. В Собор Новгородских святителей входят: святитель Иоаким Корсунянин, первый епископ Новгородский (988–1030); святитель Лука Жидята, епископ (1030; 1035?–1060; †15 октября 1060); святитель Герман, епископ (1078–1096); святитель Аркадий, епископ (1157–1162, память 18 сентября); святитель Григорий, архиепископ (1187–1193; †24 мая 1193); святитель Мартирий, архиепископ (1193–1199; †24 августа 1199); святитель Антоний, архиепископ (1212–1220; 1226–1228; †8 октября 1231); святитель Василий Калика, архиепископ (1331–1352; †3 июля 1352); святитель Симеон, архиепископ (1416–1421; †15 июня 1421); святитель Геннадий, архиепископ (1484–1504; память 4 декабря); святитель Пимен, архиепископ (1553–1571); Афоний, митрополит (1635–1648; †6 апреля 1653). Мощи этих святителей были погребены или перенесены в Новгородский Софийский собор (кроме святителя Германа, святителя Геннадия и святителя Пимена, поэтому в некоторых источниках и не названы их имена в числе Собора).

* * *

7

О́тай – тайно, скрытно


Источник: Минея служебная, месяц февраль. - Москва : Издательский Совет Русской Православной Церкви. 2002. – 812 с. ISBN 5-94625-043-4

Комментарии для сайта Cackle