Во 2-й день

И́же во святы́х отца́ на́шего Ники́фора, Патриа́рха Константи́ня гра́да, испове́дника

Святитель Никифор Исповедник, Патриарх Константинопольский

Святаго великомученика Иоанна Новаго, мученаго в Белеграде

Святой великомученик Иоанн Новый, Сочавский

Святы́я благове́рныя княги́ни Иулиани́и Новото́ржския

Святая благоверная княгиня Иулиания, Вяземская и Новоторжская

Свята́го священному́ченика Ера́зма О́хридскаго

Священномученик Еразм Охридский

Стихи́ры испове́дника, глас 4.

Подо́бен: Я́ко до́бля:

Истины водруже́ние,/ и ве́ры утвержде́ние,/ и догма́тов предложи́теля тя зна́ем,/ благоче́стия согла́сника,/ чистоты́селе́ние/ и прия́телище избра́нное,/ благово́ние Ду́ха,/ и превели́кое сокро́вище уче́ний,/ и основа́ние Христо́вы Це́ркве,/ священноявле́нне Богодухнове́нне.

Апо́столов прее́мника,/ страда́льцев единонра́вна,/ по́стников единоревни́теля восхваля́ем тя,/ и учи́телей печа́ть,/ и Боже́ственное изображе́ние,/ Христо́ва тайноводи́теля,/ святи́телю блаже́нне,/ и богото́чную реку́ разуме́ний,/ беззако́нников и ху́льников мы́сли потопля́юща, прему́дре.

Прему́дрости тала́нт/ умно́жив, пребога́те,/ ра́дости сподо́бился еси́ Го́спода твоего́, испещре́н благода́тию/ Боже́ственнаго сия́ния, и, за́рею мы́сленно сия́я духо́вною,/ ны́не предстои́ши десни́це жизноно́сней,/ отту́ду луча́ми/ всегда́ облиста́емь, сла́вне.

И́ны стихи́ры, глас 8.

Подо́бен: О, преславнаго чудесе:

В Боже́ственных незаходи́мых внутрь,/ и́стинныя же ски́нии,/ ю́же Госпо́дь водрузи́,/ я́ко свяще́нник зако́нен/ вшел еси́, преподо́бне,/ не чужде́ю, о́тче, кро́вию, но твое́ю/ Христу́ подо́бяся,/ сове́тному не поко́рься томле́нию,/ е́юже Бо́гу, о́тче, угоди́л еси́ до конца́.

Сло́вом и дея́нием укра́шен,/ и свяще́нною твое́ю оде́ждею,/ и уче́ния пра́востию,/ Ники́форе всему́дре,/ прему́дрости пита́телю,/ испове́данием сих приял еси́,/ заточе́нии истяза́емь,/ терпе́л еси́ усе́рдно/ по́мысла кре́постию лю́тая,/ вся приходя́щая, блаже́нне.

Орга́н яви́лся еси́ Ду́ха,/ Богодохнове́нными гла́сы оглаша́емь свы́ше/ и возглаша́я несказа́нное Спа́са та́инство,/ и Боже́ственная труба́,/ вои́стинну и наро́читая,/ велегла́сно нам пропове́дающи Сло́ва воплоще́ние,/ е́же па́че достиже́ния,/ и вы́ше ума́ вся,/ и по́мысла, прече́стне.

Сла́ва, и ны́не, Богоро́дичен:

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая:/ Тя бо еди́ну стяжа́х Предста́тельницу,/ и необори́мую сте́ну,/ и покро́в, и ра́дование,/ и души́ моея́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго, Ма́ти Христа́ Бо́га.

Крестобогоро́дичен:

Тя ви́дящи, пригвожда́ема/ на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне, – вопия́ше, –/ Ча́до сла́дкое,/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Яже веще́й И́стина¹:/ сего́ ра́ди стяжа́л еси́ смире́нием высо́кая, нището́ю бога́тая, о́тче Ники́форе,/ моли́ Христа́ Бо́га/ спасти́ся душа́м на́шим.

Ин Тропа́рь, глас 4:

Иже перворо́днаго Ца́рства оте́ц,/ правове́рныя слу́жбы и́стинный па́стырь бысть, преподо́бне,/ Царя́ гра́да, Це́ркви всех ма́тере яви́ся свети́льник, Ники́форе, моли́ Христа́ Бо́га, да спасе́т ду́ши на́ша.

Кано́н, его́же краегране́сие: Ники́фора я́ко победоно́сца пе́сньми пою́. Феофа́н, глас 4.

Песнь 1

Ирмо́с: Мое́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Дея́ние виде́ния показа́л еси́, я́ве восхожде́ние:/ ду́шу бо согласи́л еси́ де́тельно, Ники́форе пребога́те,/ к виде́нию изря́дно кра́йнему возлете́л еси́.

Умертви́в я́же на земли́ мудрова́ния воздержа́нием,/ ты и ду́шу напра́вил еси́ прилежа́нием, Ники́форе Богодохнове́нне,/ ко приста́нищем дости́гл еси́ невла́емаго² наслажде́ния.

Неду́говав мамо́ны е́ресию Лев окая́нный/ и к тве́рдому тебе́ ка́мени прира́жся, Ники́форе Богоприя́тне,/ разсы́пася вско́ре при а́де пребезу́мный.

Богоро́дичен: Исцели́ сокруше́ние, Пренепоро́чная, челове́чества,/ Творца́ ро́ждши, вся ны испра́вльшаго,/ низве́рженныя паде́нием пра́отец, Богоневе́стная.

Песнь 3

Ирмо́с: Не му́дростию, и си́лою,/ и бога́тством хва́лимся,/ но Тобо́ю, О́тчею ипоста́сною му́дростию, Христе́:/ несть бо свят, па́че Тебе́,/ Человеколю́бче.

Украси́в доброде́тельми твои́ми житие́ твое́ и свети́льник/ сло́ва жи́зни я́ве храни́тель быв,/ Христо́во всесвяще́нное ста́до наста́вил еси́.

Богоглаго́ливый о́гненный язы́к твой Боже́ственный/ огне́м разу́мным терно́вныя попали́ е́реси,/ Богому́дре отче́ сла́вне.

Любому́дрием прему́дрости глубину́ испыта́в,/ уче́ний твои́х плени́цами отмета́ющияся о́браза Христо́ва/ я́сно придави́л еси́, досточу́дне.

Богоро́дичен: Испове́дающе Отцу́ Преве́чному Сы́на Собезнача́льна,/ напосле́док из Твоея́ утро́бы ро́ждшася, Пречи́стая,/ вои́стинну сла́вим Тя, Бо́жию Ма́терь.

Седа́лен, глас 8.

Подо́бен: Прему́дрости:

Слове́с твои́х благода́ть разу́мных и уче́ний высота́ та́йных/ Боже́ственнаго нам бысть восхожде́ния ле́ствица:/ духо́вну бо, о́тче, стяжа́в трубу́, се́ю пропове́дал еси́ Боже́ственная уче́ния./ Те́мже и на ме́сте всели́лся еси́ зла́чне,/ зве́ря отгна́в пра́щею слове́с твои́х, Ники́форе блаже́нне,/ моли́ Христа́ Бо́га грехо́в оставле́ние пода́ти/ чту́щим всечестну́ю твою́ па́мять.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́ши на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Вознесе́на Тя ви́дящи Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Си́лою Боже́ственною че́люсти, священноявле́нне, нечести́вых сокруши́л еси́,/ тве́рдым твои́м сло́вом сих победи́в,/ и чествова́ти научи́л еси́ Боже́ственный Спа́са о́браз.

Испове́данием Боже́ственное свяще́нство све́тло уясни́л еси́, о́тче Ники́форе,/ Льво́во суровство́ загражда́я,/ таи́нниче неизрече́нных Богоприя́тне.

Ю́ношески проти́влься, Ники́форе, благочести́выми уче́нии честны́я Це́ркве,/ ра́ною слове́с твои́х во́лки отгна́л еси́,/ ве́ру пра́вую корче́мствующия ³ .

Богоро́дичен: Воплоще́на Безпло́тнаго пе́рвее ро́ждши, Сло́ва Бо́жия,/ Всенепоро́чная Обра́дованная, мир обнови́ла еси́./ Те́мже Тя, Богоневе́сто, ве́рою правосла́вною почита́ем.

Песнь 5

Ирмо́с: Ты, Гое́споди, мой Свет,/ в мир прише́л еси́, Свет Святы́й, обраща́яй из мра́чна неве́дения/ ве́рою воспева́ющий Тя.

Ум име́я чист, на Небеса́ восходя́щ, ра́зума и прему́дрости неувяда́ющий цвет объя́л еси́, всеблаже́нне.

Исцеле́ние душа́м правосла́вным ороси́л еси́, словеса́ твоя́, Богоявле́нне,/ зе́млю же неразу́мных опрове́ргл еси́ твои́ми уче́нии.

Сло́во де́ятельно и живо́т име́я неотъе́млемь,/ я́ко со́лнце облиста́я, честны́я Це́ркве просвеща́вши утвержде́ние.

Богоро́дичен: Разреше́ние кля́твы прама́тере Ты была́ еси́, Пренепоро́чная,/ заче́нши нас благослове́ньми Боже́ственными Венча́вшаго.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Светоно́сно заря́ми сия́я духо́вными,/ Це́рквам, Богому́дре, яви́лся еси́ столп, Небеси́ ра́вен,/ и о́блак, к насле́дию веды́й Небе́сному.

Всю твою́ жизнь Бо́гу освяти́л еси́,/ пребыва́я по всей вселе́нней нача́льник,/ просла́вился еси́, священноявле́нне о́тче блаже́нне.

Растерза́ет плете́ния безбо́жных ересе́й/ твое́ Богодохнове́нное сло́во обою́ду о́стрым мече́м Уте́шителя,/ свет же и́стины всем предпоказа́.

Богоро́дичен: Зако́ни пресла́вно естества́ разреша́ются:/ Де́ва бо ражда́ет и пита́ет Отрокови́ца,/ неискусобра́чно заче́нши всех Зижди́теля и Го́спода.

Кондак, глас 4.

Подо́бен: Яви́лся еси́ днесь:

Побе́ды вене́ц с Небесе́, о Ники́форе пресла́вне, я́ко прие́м от Бо́га,/ спаса́й ве́рою почита́ющия тя,/ я́ко священнонача́льника Христо́ва и учи́теля.

Икос:

Я́коже невоева́н град Бо́жий на горе́,/ вели́кий иера́рх стоя́ водруже́н яви́ся, соблюда́я мир моли́твами,/ полки́ безбо́жных победи́в, пребы́сть невреди́мь, от враго́в стреля́нии неуя́звен,/ всех Царя́ и Го́спода внутрь в се́рдцы нося́./ Те́мже и уясня́ет чту́щия Христа́ на ико́не,/ с высоты́ доброде́телей и столпа́ дел пра́щею мета́ет на полки́ враго́в,/ две́ри же милосе́рдием отверза́ет ве́рою пою́щим сего́,/ я́ко святи́теля Христо́ва и учи́теля.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Це́рковь тя жи́ву Бо́га Жива́го ве́мы,/ внутрь я́ко свети́льника иму́ща златоза́рна, Тро́ицы позна́ние:/ благослове́н еси́ в хра́ме сла́вы Твоея́, Го́споди.

Ерети́чествующих языкобо́лия низложи́л еси́,/ уверя́я чти́ти ико́ну Христо́ву, Ники́форе, взыва́ющия:/ благослове́н еси́ в хра́ме сла́вы Твоея́, Го́споди.

Прему́дрости бога́тство и жити́е име́я Боже́ственно,/ все премину́л еси́ чу́вство мы́сленно, Христу́ ны́не бесе́дуеши:/ благослове́н еси́ в хра́ме сла́вы Твоея́, Го́споди.

Богоро́дичен: Не разделя́юще соедине́ная, ниже́ слива́юще, еди́наго Христа́ сла́вим,/ из Тебе́ воплоще́ннаго Сло́ва, зову́ще:/ благослове́н еси́ в хра́ме сла́вы Твоея́, Го́споди.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ убо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся веки,

Кро́вию Христо́вою изба́влен, ра́зумом и́же Его́ ра́ди подъя́т смерть,/ со́вести прине́сл еси́ муче́ние, испове́дания благода́тию сия́я:/ Го́спода по́йте, дела́, взывая́, и превозноси́те Его́ во вся ве́ки.

Те́лом и душе́ю очище́н, Сло́ву Всеви́дцу слово́м поже́рл еси́,/ Сие́ пре́жде безпло́тно и безнача́льно показу́я/ и ми́лостивно бы́вша Челове́ка по́слежде,/ Го́спода по́йте, дела́, взыва́я, и превозноси́те Его́ во вся ве́ки.

Да насле́дие Небе́сное и сла́ву неизме́нную улучи́ши, сла́вне,/ сла́ву увяда́емую, о́тче, оста́вил еси́,/ изгна́ние и озлобле́ние терпя́ до́блественне, му́дре, взы́вая:/ Го́спода по́йте, дела́, и превозноси́те Его́ во вся ве́ки.

Богоро́дичен: Еди́ну Голуби́цу чи́сту Тя Жени́х мы́сленный обре́те, Всенепоро́чная,/ крин благово́ннейший, цвет прекра́снейший и светоно́сен черто́г, Неве́сту приведе́./ Те́мже Тя, Де́ву, пое́м и превозно́сим во вся ве́ки.

Песнь 9

Ирмо́с: Камень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Обре́л еси́ блаже́нный коне́ц, преше́дшим зерца́лом/ и и́стине я́вльшейся виде́нием нетле́нныя добро́ты,/ ея́же ны́не насыща́яся, твои́ми моли́твами нас помина́й.

Ра́ку обступи́вше Боже́ственную Богоно́снаго Ники́фора,/ прииди́те, христоно́снии, усе́рдно я́ко победоно́сца сего́ воспои́м/ и того́ торжество́ с весе́лием пра́зднуим.

Вся́ку доброде́тель удержа́в,/ при кончи́не подвиго́в испове́дания венце́м, священному́чениче, яви́лся еси́ укра́шен,/ и́мже удобре́н, твоему́ Влады́це ны́не предстои́ши.

Богоро́дичен: Я́ко ко́рень, и исто́чник, и вину́ нетле́ния/ Тя, Де́во, вси ве́рнии, ве́дуще, хвала́ми почита́ем:/ Ты бо ипоста́сное Безсме́ртие нам источи́ла еси́.

Свети́лен.

Подо́бен: Ученико́м зря́щим:

Я́ко победоно́сец изря́ден страсте́й, Ники́форе,/ вене́ц сугу́б прия́л еси́ от Христа́ Спа́са:/ я́ко е́ресь богобо́рную Боже́ственный ико́ны отмета́ющих, прему́дре, низлага́я, святи́телю,/ и страда́лец, я́ко благоче́стия побо́рник, о́тче./ О нас у́бо моли́, чту́щих тя, блаже́нне.

Богоро́дичен:

Оте́ческих не оста́вль недр, а́ще и воплоти́лся еси́ от Де́вы, Го́споди,/ и́бо спасти́ мене́, па́дшаго, преклони́в небеса́, соше́л еси́/ и исхи́тити хотя́ от уст зве́ря мы́сленнаго и его́ удавле́нии держи́маго./ Те́мже, изба́влься, сла́влю Твою́ си́лу.

Святитель Никифор Исповедник, Патриарх Константинопольский, родился во 2-й половине VIII века в столице Византийской империи – Константинополе. Родители его Феодор и Евдокия были благочестивыми христианами. В царствование императора-иконоборца Константина V Копронима (741–775) Феодор занимал должность нотария в тайной императорской канцелярии. За почитание икон он, по приказу императора, был мучим и дважды изгонялся в ссылку. Скончался Феодор в ссылке в г. Никее. Благочестивая супруга Феодора Евдокия разделяла с мужем все скорби. Она последовала за ним в изгнание и только после кончины супруга вернулась в Константинополь. Когда сын Никифор стал Патриархом Константинопольским, Евдокия постриглась в иночество и удалилась в монастырь.

Богобоязненные родители воспитали Никифора в благочестии, целомудрии и страхе Божием. Святой Никифор изучил Священное Писа ние и получил хорошее светское образование. Он занял при дворе должность своего отца, а в царствование Льва IV Хазара (775–780) стал советником императора.

На Седьмом Вселенском Соборе в Никее в 787 году святой Никифор от имени Константина Порфирородного и царицы Ирины выступил в защиту святых икон. Он оказал существенную помощь святым отцам Собора в их победе над еретикамииконоборцами и в утверждении православного догмата о почитании святых икон.

Через несколько лет после Никейского Собора святой Никифор отверг суетную мирскую жизнь и удалился в уединенное место при Босфоре Фракийском, где впоследствии построил храм и основал монастырь. Много лет святой Никифор совершал иноческие подвиги, хотя еще не принял монашеского пострига,

После смерти святителя Тарасия († 806; память 25 февраля), Патриарха Константинопольского, святой Никифор был избран на Константинопольскую кафедру. Он принял монашество и был рукоположен в сан пресвитера, а в день Святой Пасхи возведен на патриарший престол.

Святитель Никифор мирно управлял Константинопольской Церковью до вступления на императорский престол иконоборца Льва V Армянина (813–820), во время правления которого вновь началось гонение на святые иконы. Император потребовал созвать Собор и опровергнуть постановления предыдущего Собора, утвердившего иконопочитание. Он собрал в Константинополь епископов и игуменов монастырей. Противники иконоборческой ереси были брошены в темницы, а затем сосланы. На их места император поставил еретиков, ранее отлученных от Церкви.

В это трудное для Церкви время святитель Никифор. остался верным учеником Христовым. Всеми своими силами он старался вразумить императора, утвердить в правой вере христиан, оградить Православную Церковь от ереси. Поборник благочестия, он был для верующих примером добродетельной жизни и преданности учению святых отцов Церкви. Однако Лев V не внял наставлениям святителя. В 815 году он созвал еретический собор, который предал анафеме Патриарха Никифора, а также его предшественников Святейших Патриархов Тарасия (784–806) и Германа (715–730). Святитель Никифор был сослан в монастырь, а затем на остров Проконнис (ныне Мармара в Мраморном море) в монастырь во имя святого великомученика Феодора.

Господь наделил Своего угодника даром прозорливости. По пути следования в место заточения святитель Никифор проплывал мимо обители преподобного Феофана Исповедника († 818; память 12 марта). В то время святой Феофан находился у себя в келлии. Он зажег в келлии свечи, воскурил фимиам и поклонился в сторону, где плыл корабль со святым узником. Святитель Никифор, к удивлению окружавших, ответил на приветствие благословением и сообщил стоявшим рядом, что преподобный Феофан пострадает за почитание икон.

Тринадцать лет святитель провел в изгнании, претерпевая все лишения и скорби. Он скончался мирно в 828 году и был погребен в монастырском храме во имя святого великомученика Феодора. 13 марта 847 года, в царствование святой царицы Феодоры (842–855; † 867; память 11 февраля), мощи святителя Никифора были перенесены в Константинополь и с честью положены в соборном храме во имя Святой Софии, Премудрости Божией.

НА МАЛОЙ ВЕЧЕРНИ

Поста́вим стихи́ 4 и пое́м стихи́ры, глас 1.

Подо́бен: Небе́сных чино́в:

Небе́сных чино́в слико́вника/ и му́чеником сострада́льца,/ прему́драго во́ина благоче́стия/ и и́стиннаго пропове́дника Христо́ва,/ Иоа́нна великоимени́таго,/ восхва́лим, ве́рнии, ра́дующеся.

Христиа́н забра́ло кре́пкое,/ столпа́, непоколеби́маго мучи́тельскими ласка́нии,/ купца́ всеизря́днаго,/ на нетле́нных измени́вшаго тле́нная/ и нас свы́ше назира́юща,/ ве́рно ублажи́м.

Пе́рваго пострада́теля вси Иоа́нна,/ све́тлаго храбо́рника,/ ны́не нам возсия́вшаго/ и́стиннаго страда́ния луча́ми,/ воспое́м, веселя́щееся/ и того́ моще́м кла́няющеся.

Сла́ва, глас 6:

Прииди́те, мучениколю́бцы вси,/ прииди́те, лик соста́вим,/ венцы́ похвала́ми плету́щее/ и честну́ю главу́ Иоа́нна венча́юще:/ сей бо всехрабо́рник,/ Христо́вою вооружи́вся ве́рою,/ в по́двиг вни́де му́жественнее/ и Христа́ испове́да, Сы́на Бо́жия и Бо́га,/ Творца́ и Судию́ вся́ческих,/ пе́рсскую до конца́ горды́ню низложи́в/ и мучи́теля попра́в свои́м терпе́нием,/ му́чеников бысть о́браз и надписа́ние./ И ны́не, Христу́ мо́лится о душа́х на́ших.

И ны́не, Богоро́дичен. Аще Пятдеся́тница, И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

От восто́чных к се́верным,/ я́коже со́лнце, возсия́л еси́/ заря́ми страда́ния, всех привлача́/ сердца́ и помышле́ния к твои́м чудесе́м, сла́вне.

Стих: Пра́ведник, я́ко фи́нике, процвете́т,/ я́ко кедр, и́же в Лива́не, умно́жится.

Се́верная племена́ вся,/ ели́ко благочести́вая,/ духо́вне ликовству́йте пе́сньми,/ Иоа́нна сла́вяще,/ вас возлю́бльшаго.

Стих: Насажде́ни в дому́ Госпо́дни/ во дво́рех Бо́га на́шего процвету́т.

После́дним сим времено́м,/ ты красота́ показа́лся еси́,/ му́чеников страда́ния обновля́я/ и до конца́ низлага́я/ пре́лесть, блаже́нне, душегуби́тельную.

Сла́ва, и ны́не, Богоро́дичен:

Богоро́дицу Тя и́стинную му́ченицы испове́даша,/ со Иоа́нном сла́вным,/ Мари́е Богоневе́сто:/ мы же Ти припа́даем,/ грехо́в прося́ще проше́ния.

НА ВЕЛИ́ЦЕЙ ВЕЧЕРНИ

Блаже́н муж: На Го́споди, воззва́х: поста́вим стихо́в 8 и пое́м стихи́ры, глас 2.

Подо́бен: Ки́ими похва́льными:

Ки́ими благохва́льными пе́сньми воспое́м Иоа́нна?/ Истиннаго во́ина Царя́ вели́каго,/ све́тлаго храбо́рника, Христо́ва всеизря́днаго страда́льца,/ утверди́теля ве́ры и низложи́теля ле́сти,/ терпели́ваго во искуше́ниих и в му́ках непристра́шнаго,/ нечести́вых наказа́теля стра́шнаго/ и благочести́вым помо́щника те́плаго,/ и́мже Христо́с нам да́рует ве́лию ми́лость.

Ки́ими похва́льными венцы́ венча́ем Иоа́нна?/ Му́чеников обновле́ние, иску́снаго борца́,/ благоче́стия бори́теля, врага́ низложи́вшаго,/ кро́вию зе́млю освя́щшаго,/ и возду́шныя кня́зи устраши́вшаго,/ и Небе́сным причта́вшагося А́нгелом,/ столпа́ всезлата́го, о не́мже содержа́тся страны́ се́верныя,/ и́мже Христо́с сих враги́ побежда́ет,/ име́яй ве́лию ми́лость.

Ки́ими благососта́вными гла́сы просла́вим Иоа́нна?/ Высокопа́рнаго орла́ слове́с прему́дростию,/ его́же крило́ма зла́та междора́мия⁴,/ трубу́ благоче́стия, Бо́жия Сло́ва та́инства возгреме́вшаго,/ меча́, изощре́ннаго проро́ческими веле́нии, и́мже пе́рсское возноше́ние Христо́с низложи́,/ име́яй ве́лию ми́лость.

Ки́ими пе́сньми и добро́тами увязе́м Иоа́нна чу́днаго?/ Плоть да́вшаго к ра́нам содробле́ния нас ра́ди плещи́ на ра́ны да́вшаго/ и кровь неща́дно излия́вшаго, истощи́вшаго Себе́ до ра́бия о́браза,/ мучи́теля уди́вльшаго преесте́ственным терпе́нием/ и того́ посра́мльша сопротивле́нием кре́пким,/ его́же Христо́с Бог венцы́ нетле́ния венча́,/ име́яй ве́лию ми́лость.

Слава, глас 8:

Днесь честно́е торжество́ Небе́сная пра́зднуют мы́сленно,/ земна́я к весе́лию созыва́ющее/ в па́мять до́бляго подви́жника Иоа́нна,/ терпели́ваго адама́нта:/ изнемого́ша бо ру́ки бию́щих,/ и судия́ утруди́ся, му́ки умышля́я./ Он же вы́ше всех пребыва́ше,/ стоя́, я́ко лев, посреде́ по́двига/ и мучи́теля устраша́я испове́данием Христо́вым,/ благодерзно́венно к нему́ вопия́ше:/ не косни́, о епа́рше, се ти плоть к томле́нию!/ Ты у́бо дово́льны ра́ны наноси́,/ Христо́с же венцы́ нетле́нны да́рует мне,/ Его́же пропове́даю со Отце́м и Святы́м Ду́хом.

И ны́не, Богоро́дичен. Аще Пятдеся́тница, И ны́не, пра́здника.

Вход. Проки́мен дне. Чте́ния три.

Проро́чества Иса́иина чте́ние (глава 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся, и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаголе́т Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти/ , и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./  И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многол́етна,/ ниже́ в числе́ лет исчита́ется, седи́на же есть му́дрость челове́ком, и / во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии стихи́ры, глас 1, самогласны:

Се́верная вся, ра́дуйтеся и, веселя́щеся, взыгра́йте,/ посреде́ себе́ иму́ще звезду́ незаходи́мую и многосве́тлую,/ со́лнечныя зари́ превосходя́щую,/ Иоа́нна великоимени́таго,/ благочести́ваго ко́рене му́ченическую ветвь многопло́дную и избра́нную,/ мно́го Христа́ возлю́бльшаго,/ и от Него́ мно́жае возлю́бленна бы́вшаго, и нам прося́ща ве́лия ми́лости.

Благочести́вых ро́дове вси, духо́вно ликовству́юще,/ о́бщую по́льзу восхвали́те/ в наро́читом дни сего́ пра́здника,/ посреде́ себе́ иму́ще, я́ко ши́пок благово́нный,/ того́ свято́е и многострада́льное те́ло,/ ны́не просла́вленное сла́вою нетле́ния/ и цельбы́ подаю́ща душе́вным страсте́м и теле́сным.

Восто́чная, се́верным сликовству́йте/ и не высо́кая му́дрствуйте/ и́бо со́лнце друго́е зде пресла́вно показа́ся,/ не к за́падом творя́ще тече́ние/ и под зе́млю устремля́ющеся,/ но к Небесе́м восхо́д име́юще от земли́,/ невеще́ственным спребыва́юще умово́м,/ и отту́ду нас озаря́ет, соблюда́ет, и освяща́ет,/ и от Христа́ про́сит ве́лия ми́лости.

Слава, глас 5:

Востру́бим духо́вною цевни́цею/ в пра́зднственней па́мяти Иоа́нна, доблему́дреннаго во́ина,/ я́же о́крест созыва́юще с высо́ким пропове́данием и глаго́люще:/ се и́же на земли́ пострада́вый и ны́не на Небесе́х ца́рствуяй./ Прииди́те, бра́тие, сему́ поревну́йте/ и, поревнова́вше, после́дуйте усе́рдию,/ му́ченицы бы́вше произволе́нием,/ се ми́лостыни сокро́вище пребога́тое,/ прииди́те, ца́рие и кня́зи, сего́ подража́йте,/ да и подо́бным венце́м приобщи́теся;/ бога́тии и ни́щий, здра́вии и неду́жнии,/ почерпи́те оби́льно исцеле́ния от ковче́га свяще́ннаго,/ я́ко от нетле́нна исто́чника,/ в сла́ву Бо́гу и Спа́су,/ прославля́ющему Того́ просла́вльшаго.

И ны́не, Богоро́дичен. Аще Пятдеся́тница, И ны́не, пра́здника.

На стихо́вне стихи́ры, глас 4.

Подо́бен: Я́ко до́бля:

Я́ко благонаро́чит ове́н,/ морску́ю преплы́л еси́ пучи́ну/ и же́ртва прине́слся еси́,/ жива́ и одушевле́нна,/ нас ра́ди, сла́вне, закла́вшемуся Бо́жию А́гнцу,/ от Него́же прие́мь трудо́в твои́х по́чести,/ моли́ от тли и бед изба́вится/ ве́рою и любо́вию творя́щим/ пречестну́ю па́мять твою́.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ни суровство́ мучи́теля,/ ни же́зленная бие́ния,/ ни пло́ти содробле́ния,/ ни крове́й пото́цы/ твою́ тве́рдость возмого́ша, сла́вне, от Христа́ отврати́ти,/ па́че же вопия́л еси́ к му́чащим:/ раждежи́те мя му́ками,/ я́коже горни́лом искуси́тельным,/ да зла́то искуше́но явлю́ся Созда́вшему.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Ни вери́г тя́жести,/ ни темни́цы злосмра́дие,/ ни влача́щих безчеловечие/ твое́ благостоя́ние от твоего́ Влады́ки,/ блаже́нне, поколеба́ша:/ темни́цу бо черто́г све́тел,/ вери́ги же гри́вну зла́ту,/ влаче́ние же го́рькое колесни́цу ца́рскую/ Христа́ ра́ди вменя́л еси́.

Сла́ва, глас 3:

Страстоте́рпческия лучи́ возсия́вше,/ прите́кше, наслади́теся, бра́тие:/ от Небе́с бо к нам соше́д неви́димо,/ избра́нный во́ин Христо́в Иоа́нн,/ и трапе́зу предложи́в духо́вную,/ всех учрежда́ет оби́льно,/ проти́ву коего́ждо проше́ния/ и припаде́м ве́рою, того́ мо́щи объе́млюще/ и моле́бне глаго́люще:/ многострада́льне и треблаже́нне,/ це́рковь, ю́же возлюби́л еси́,/ в не́йже честны́м твои́м моще́м ста́ти изво́лил еси́,/ с Боговенча́нными господа́ми на́шими,/ возлю́бльшими тя и прине́сшими,/ сохраня́й и покрыва́й твои́м к Бо́гу дерзнове́нием.

И ны́не, Богоро́дичен. А ́ ще Пятдеся́тница, И ны́не, пра́здника.

Тропа́рь, глас 4:

Житие́ на земли́ до́бре окормля́я, страда́льче,/ ми́лостынями, и ча́стыми моли́твами, и слеза́ми,/ па́ки же ко страда́нию му́жески устреми́вся,/ пе́рсское обличи́л еси́ нече́стие./ Те́мже Це́ркве был еси́ утвержде́ние/ и христиа́н похвало́,/ Иоа́нне приснопа́мятне.

НА УТРЕНИ

По 1-й стихоло́гии седа́лен, глас 1.

Подо́бен: Гроб Твой:

Гроб твой, свя́те, други́й бысть Силоа́м ве́рою приходя́щим,/ исцеле́ние точа́ неду́гом теле́сным и страсте́м душе́вным./ Те́мже днесь, соше́дшеся, твою́ святу́ю соверша́ем па́мять,/ сла́вяще еди́наго Бо́га на́шего.

Сла́ва, и ны́не, Богоро́дичен:

Тебе́, Богома́ти, Иоа́нн венцено́сец посреди́ суди́ща све́тло и́стинную Богоро́дицу испове́да,/ от Тро́ицы Еди́наго ро́ждшую и Де́ву пребы́вшую./ Те́мже, Всепе́тая, с ним Твоего́ Сы́на и Бо́га моли́/ грехо́в дарова́ти проще́ние.

По 2-й стихоло́гии седа́лен, глас 3.

Подо́бен: Красоте́:

Красе́н нам вои́стинну от Бо́га дарова́лся еси́, па́че зла́та и топа́зия, Иоа́нне честне́йший,/ всех о́чи у́мныя и серде́чныя привлача́ к разуме́нию чуде́с твои́х страданий./ Те́мже любо́вию зове́м ти:/ ра́дуйся, на́ша похвало́ пресве́тлая.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й Гаврии́л удиви́вся,/ вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

По полиеле́и седа́лен, глас 4.

Подо́бен: Удиви́ся:

Удиви́ся мучи́тель, пачеесте́ственное зря в тебе́ терпе́ние,/ восприя́ша тя А́нгели, венцы́ облага́юще,/ посрами́шася бе́сове твое́ю до́блестию:/ его́же бо мня́ху ласка́ньми низложи́ти, сим побежде́ни бы́ша и падо́ша,/ / утверди́шася ве́рнии твои́м испове́данием./ И́же сего́ тогда́ укрепи́вый, просвети́ ду́ши на́ша.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря/ и внима́ше мы́слию, и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

Степе́нна, 1-й антифо́н 4-го гла́са. Проки́мен: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Ева́нгелие от Луки́, зача́ло 106.

По 50-м псалме́стихи́ра, глас 6:

Днесь Це́рковь торжеству́ет,/ страстоте́рпца крася́щися по́двиги, я́ко многоце́нною оде́ждею,/ и вопие́т, хва́лящися:/ сицева́ моя́ рожде́ния, таковы́ мои́ сы́нове,/ и́хже пе́рвее породи́х Креще́нием,/ воспита́х же стра́хом Госпо́дним/ и ны́не му́ченики ви́жду, и́стине вене́чники избра́нны,/ да мо́лятся о вселе́нней ко Го́споду.

Кано́н Богоро́дицы на 6, глас 2: Нетре́ну, необы́чну: И свята́го на 8, его́же краегране́сие: Но́вому му́ченику но́ву приношу́ хвалу́. В Богоро́дичнах же: Григо́рие. Глас 4.

Песнь 1

Ирмо́с: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспо́ю, ра́дуяся, Тоя́ чудеса́.

Новоявле́н му́ченик, блаже́нне Иоа́нне, вселе́нней напосле́док яви́лся еси́,/ те́мже ми пода́ждь сло́во твое́ю благода́тию,/ твоя́ по́двиги воспе́ти по достоя́нию.

Очи́ма мы́сленныма предстоя́ на суди́щи,/ му́чеников зрел еси́ честно́е сосло́вие, тебе́ призыва́ющих ра́достно, Иоа́нне,/ и подо́бными венцы́ украша́ющих.

Во́инством досточу́дным твоего́ сопротивле́ния/ побе́дная прия́хом на мучи́теля естеству́:/ соверше́нне бо посра́млен быв,/ не ктому́ мучи́тельская дерза́ти начина́ет.

Оде́явся во броня́ испове́дания ве́ры и шлем возложи́в благодати светле́йший,/ язы́ком же, Иоа́нне, боговеща́нным и честны́м,/ я́коже мече́м, ссекл еси́ безу́мнаго епа́рха.

Богоро́дичен: Гора́ превысо́кая, ю́же ви́де Дании́л,/ ка́мень от горы́ же отсече́ся му́жеску руку́ кроме́, Тебе́ прообразова́, Богоро́дице:/ без му́жа бо нам пло́тию родила́ еси́ Емману́ила.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Му́ками, я́ко зла́то честно́е, искуси́лся еси́, страда́льче сла́вне,/ и Царю́ сил прине́слся еси́, всепло́дие словеси́ и́стинно,/ вме́сто огня́ олта́рнаго мече́м истне́емо.

О Влады́це пе́рвее и Го́споде не насы́тишася/ иуде́е законопресту́пнии и пророкоуби́йственнии,/ но и того́ му́ченика, влачи́ма неми́лостивно от слуг нече́стия, теку́ще, закла́ху.

Епа́рх се́ти простира́ше словесы́ ласка́тельными к ловле́нию страда́льца прему́драго,/ но он вопия́ше к нему́:/ преста́ни на мно́зе буесло́вя,/ аз бо тва́ри не поклоню́ся, паче Созда́вшаго.

Маслина плодовитая в церкви Живаго Бога твоих мощей рака ныне яви́ся,/ от неяже обираем различная недугов исцеления,/ и́же тобою обогащшиися и чудесы твоими красящиися.

Богоро́дичен: Рече́ Боже́ственный Иезеки́иль:/ и бу́дет дверь затворе́на./ И сие́ на Тебе́ испо́лнися, Влады́чице:/ вни́де бо несказа́нно в Тя О́тчее Сло́во и ми́ру яви́ся Плотоно́сец из Тебе́, Де́во,/ сохрани́в Тя во обои́х.

Седа́лен, глас 8.

Подо́бен: Прему́дрости:

Прему́дрости рачи́тель быв, сокро́вище доброде́телей,/ отону́дуже и поче́рпл еси́ Боже́ственная разуме́ния./ Те́мже и, време́ни призва́вшу, к подвиго́м усе́рдно совле́клся еси́,/ прие́мля му́ченическия ра́ны, пло́ти содробле́ние и крове́й истоща́ние,/ и ны́не живе́ши в неизрече́нне све́те с му́ченики./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою святы́м моще́м твои́м.

Сла́ва, и ны́не, Богоро́дичен:

Помышля́ю суд и бою́ся, испыта́ния трепе́щу стра́шнаго/ и ужаса́юся му́ки и огня́ боле́зни, тьмы же и та́ртара./ Увы́, что́ сотворю́?/ Студ ка́ко претерплю́, егда́ кни́ги разгну́тся и дея́ния облича́тся?/ Сего́ ра́ди припа́даю Ти, Богоро́дице Пречи́стая:/ предста́ни ми тогда́, ну́жды о́ныя изыма́ющи,/ Тебе́ бо и́мам прибе́жище, Влады́чице.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

У́дица льсти́вая язы́к бя́ше мучи́теля,/ вра́жиими подви́жимь ко́зньми, преложи́ти великоду́шнаго спеша́щ,/ но безде́лен обличи́ся, страда́льцу в ра́дости зову́щу:/ сла́ва си́ле Твое́й, Го́споди.

Что́ ми мно́гая словеса́ и обеща́ния тле́емая, я́же безу́мне предлага́еши?/ – Иоа́нн к мучи́телю вопия́ше. –/ Сия́ вся мне же́лчи горча́йша, сла́достно взыва́ющу: сла́ва си́ле Твое́й, Го́споди.

Егда́ ра́ны мно́жайшия на мои́х процвету́т пло́тех,/ тогда́ венце́м светле́йшим упова́ю сподо́битися, –/ страда́лец к пе́рсу глаго́лаше, –/ не косни́ про́чее, о злому́дренне, аз бо вопию́:/ сла́ва си́ле Твое́й, Го́споди.

Ника́коже тебе́ послу́шаю, к па́губе привлача́ща,/ – огнеслужи́телю Иоа́нн веща́ше, –/ умру́ же па́че усе́рдно за уме́ршаго мене́ ра́ди, да с му́ченики све́тло вопию́:/ сла́ва си́ле Твое́й, Го́споди.

Богоро́дичен: Изобразова́ше в Чермне́м проше́ствие дре́вле Изра́илево/ безму́жное Твое́ рождество́, Всецари́це:/ я́коже бо он тогда́ про́йде немо́кренно,/ та́ко и Христо́с безсе́менно от Твои́х пречи́стых крове́й произы́де, Де́во.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила ́ еси́ Безле́тнаго Сы́на,/ всем воспева́ющим Тя/ мир подава́ющая.

Изнемого́ша, бию́ще, слуги́ страстоте́рпческия пло́ти,/ утруди́ся и мучи́тель, томле́ния изыску́я,/ но он до́блественне терпя́ше, красу́яся ра́нами,/ я́же за любо́вь подъя́т Го́спода своего́.

Коль стра́шно же и сла́вно о Христе́ сопротивле́ние твое́,/ ему́же у́бо почуди́шася племена́, обре́тшаяся на по́двизе, и похвали́ша терпе́ние,/ пе́рсы же посрами́шася со иуде́и, студо́м обо́лкшеся.

О́крест стоя́ху мно́жества, зря́ще быва́емое, сла́вне,/ и мучи́тель председя́ше, тебе́ приобрести́ наде́яся,/ но погреши́ безу́мный тща́ния, всу́е претя́ непристра́шному/ и вотще́ бия́ адама́нта.

Епа́рха злочести́ваго безу́мному веле́нию руга́яся,/ Боже́ственный Иоа́нн пре́лесть облича́ше пе́рсския горды́ни:/ со́лнцу, глаго́ля, не поклоню́ся, тва́ри су́щей, челове́ком рабо́тающей,/ бо́льшему рук Бо́жиих созда́нию.

Богоро́дичен: Горе́ бя́ше соприсносу́щен, Отцу́ и Бо́гу, Бог Сло́во/ и с на́ми Бог и Челове́к, Богоро́дице,/ Тобо́ю соше́д к на́шему смире́нию, свобожда́я от кля́твы пра́дедния:/ Тебе́ бо ви́де патриа́рх Иа́ков ле́ствицу Небе́сную.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Ника́коже поколеба́ша столпа́ благоче́стия свире́пство повелева́ющаго, / ниже́ па́лицами бие́ния, но ни ра́ны, ни смерть ну́жднейшая.

О́ку херуви́мску ума́ твоего́ чистота́ уподо́бися:/ до́ле бо му́жески терпе́л еси́ муче́ния и горе́ предстоя́л еси́ Влады́це,/ И́же посла́ тебе́ вене́ц победи́тельный.

Взыгра́шася све́тло му́ченичестии тогда́ ли́кове, ви́девше твое́ дерзнове́ние,/ и, прини́кше ку́пно со А́нгелы, неви́димо укрепля́ху тя в по́двизе.

У́жа желе́зная Иоа́нн, страда́лец изя́щный, зла́та ого́рлия вменя́ше я/ и я́же от иуде́й ка́меней мета́ния – степе́ни к Небе́сному ше́ствию.

Богоро́дичен: Обра́зне руно́ Гедео́н прия́т ороше́но, Твое́ предвозвеща́я чу́до:/ сни́де бо, я́ко дождь на руно́, Богоро́дице, Еди́ный от Тро́ицы во утро́бу Твою́, воплоща́емь.

Кондак, глас 4.

Подо́бен: Вознесы́йся:

Морску́ю пла́вая пучи́ну ку́плею,/ от восто́ка тща́лся еси́ к се́веру,/ но Бо́гу призва́вшу тя,/ я́коже Матфе́й мы́тницу, ты же ку́плю оста́вль,/ и Тому́ после́довал еси́ кро́вию муче́ния,/ вре́менными искупи́в непреходи́мая,/ и вене́ц прия́л еси́ непобеди́мый.

И́кос:

Прему́дрый Зижди́тель и Влады́ка и Господи́н виногра́да мы́сленнаго/ я́коже пресвяты́ми Свои́ми усты́ во при́тчи виногра́да глаго́лет:/ я́ко во единыйна́десять час де́лавшим подо́бную даде́ це́ну,/ я́коже и от пе́рваго де́лавшим./ Ны́не де́лы извести́ в при́тчи кры́емое, Иоа́нна показа́в све́тла му́ченика,/ на са́мый уже́ после́док ле́тным ты́сящам,/ подо́бно пе́рвым страда́льцем просла́ви нетле́нием и исцеле́ния да́ром:/ вре́менными бо искупи́в непреходи́мая,/ и вене́ц но́сит непобеди́мый.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Приноси́мая ти страда́ния, Иоа́нне досточу́дне,/ младе́нец стреля́ния му́жески вменя́л еси́, ра́достно поя́:/ препе́тый отце́в Госпо́дь и Бог, благослове́н еси́.

Ру́ку ча́сто простира́я к мучи́телю, Иоа́нн глаго́лаше:/ что́ всу́е труди́шися, безсту́дне?/ му́ки бо творя́ мне – пестра́ одея́ния, и смерть – вене́ц безсме́ртия.

И́стинен аз му́ченик и́стиннаго Христа́ Бо́га на́шего, – страда́лец взыва́ше, –/ влаче́ния бо цве́ты благово́нны вменя́ю/ и кро́вныя струи́ – ба́ню креще́ния.

Нощь от мене́ су́дится житие́ е́же во пло́ти, – Иоа́нн любому́дрствоваше, –/ ско́ро у́бо про́чее пло́ти разреши́ мя соу́за,/ да я́же со Христо́м жизнь насле́дую.

Богоро́дичен: Ри́торствующий язы́к безгла́сен и недви́жимь,/ и́же о Тебе́ зрим, Богора́дованная:/ не и́мать бо пости́гнути непостижи́маго зача́тия неизрече́нное рожде́ние.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́, и превозноси́те Его́ во вся ве́ки.

Ублажи́ша тя цари́, благослови́ша тя святи́тели, слы́шаще твое́ му́жественное терпе́ние/ и ко Христу́ хода́тая стяжа́вше тя,/ и, ны́не приходя́ще, честны́м твои́м моще́м покланя́ются.

Шата́шася иногда́ язь́щы с людьми́ законопресту́пными,/ на Христа́ и Го́спода поуча́ющеся тще́тная,/ и ны́не собра́шася, пе́рсы у́бо Иоа́нна влача́ще,/ иуде́и же закала́юще.

Ят бысть тобо́ю, и удержа́н,/ и до конца́ низложе́н змий безпло́тный во пло́ти твои́м терпе́нием./ И того́ кре́пость угасе́ и лю́тое мучи́тельство, Христу́ в плоть обо́лкшуся.

Хваля́ся я́звами Христо́выми, к ве́чным восте́кл еси́ оби́телем,/ в багряни́цу оде́ян, му́чениче, от крове́й твои́х обагре́ную,/ и све́тло Царю́ сил предстои́ши, с му́ченики лику́я.

Богоро́дичен: Иса́ии угль дре́вле по́слан бысть, клеща́ми носи́м от Серафи́ма,/ каса́ющся тому́ и грехи́ оставля́ющ./ Клеща́ же Ты еси́, Де́во, Боже́ственный Угль носи́вшая во оставле́ние грехо́в челове́честву.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Во́ин и́стинный Христо́ва пропове́дания был еси́, Иоа́нне,/ и ле́сти потреби́тель безбо́жия./ Те́мже и ны́не моли́твами твои́ми потреби́ ва́рварское воста́ние,/ во́инству на́шему под но́ги сие́, сла́вне, низлага́я.

А́ще и разсе́яни бы́ша свяще́нныя твоя́ пло́ти, му́дре,/ а́ще и кро́ви излия́шася, но победи́тельная на тебе́ преидо́ша./ Тем на нас востаю́щих си́лою твое́ю посрами́/ и во́инство на́ше яви́ победи́теля.

Лук сокруши́ нечести́вых, во́ине непобеди́ме,/ непра́ведно дви́жимый на твое́ достоя́ние, е́же себе́ избра́л еси́, возлюби́в,/ и оте́чество на́ше утверди́,/ да и мы ти́хо и ми́рно препрово́дим жи́тельство.

Ю́же жела́хом па́мять светоза́рную твою́ и честну́ю,/ прия́хом и облобыза́хом, ра́дующеся ду́хом и игра́юще,/ мо́лимся, блаже́нне:/ ме́сто сие́ и лю́ди, иде́же изво́ли сла́витися, сохраня́й невре́дно, со оте́чеством на́шим.

Богоро́дичен: Его́же проро́цы провозвести́ша вси многообра́зне,/ воплоща́ема нас ра́ди, Тобо́ю ви́дехом, Богоро́дице, Бо́га, нам соверше́нна,/ избавля́ющаго челове́ки от кля́твы пра́дедния,/ мы же Твои́ми моли́твами ве́чныя гее́нны да изба́вимся.

Свети́лен.

Подо́бен: Пло́тию усну́в:

Све́ту невече́рнему предстоя́, блаже́нне, с му́ченическими ли́ки,/ воспева́ющия тя в па́мяти твое́й от искуше́ния спаса́й моли́твами твои́ми.

Сла́ва, и ны́не, Богоро́дичен:

Незаходи́маго Све́та носи́ло, Присноде́во,/ просве́щшаго седя́щих во тьме неве́дения пре́лести,/ озари́ и нам, гре́шным, свет Сы́на Твоего́.

На хвали́тех, Вся́кое дыха́ние: поста́вим стихи́ 4 и пое́м стихи́ры, глас 1.

Подо́бен: Всехва́льнии му́ченицы:

Прехва́льне Иоа́нне,/ тебе́ ни свире́пство мучи́теля,/ ни слове́с ласка́ния,/ ни мук преще́ния,/ ни го́рькая бие́ния/ от Христа́ отторго́ша,/ Его́же от младе́нства возлюби́л еси́,/ Ему́же и моли́ся/ дарова́ти душа́м на́шим/ мир и ве́лию ми́лость.

Мне ничто́же сладча́йше,/ ниже́ предпочте́ннейше, –/ Иоа́нне, глаго́лал еси́ му́чащим, –/ ни сла́ва преходя́щая,/ ни бога́тство тле́нное,/ па́че Христа́, Небе́снаго Царя́./ Его́же моли́/ дарова́ти душа́м на́шим мир/ и ве́лию ми́лость.

О́браз бысть му́ченичеству/ в ле́тех после́дних/ благоро́днейший му́ченик,/ в ре́вности распала́я/ ду́ши боголюбе́зных страда́ний свои́х/ сла́вою пребога́тою,/ Христу́ же мо́лится/ дарова́ти душа́м на́шим/ мир и ве́лию ми́лость.

Сла́ва, глас 2:

Прииди́те, мучениколю́бцы,/ наслади́мся мы́сленно духо́вныя днесь трапе́зы,/ ю́же нам предложи́ му́ченик Иоа́нн,/ ея́же и А́нгели наслажда́ются,/ по ре́кшему проро́ку:/ хлеб А́нгельский яде́./ С ни́миже и ду́хом водворя́ется,/ и нам про́сит от Спа́са Христа́ грехо́в оставле́ния,/ того́ честну́ю па́мять соверша́ющим.

И ны́не, Богоро́дичен.

Славосло́вие вели́кое, и ектении́, и отпу́ст.

НА ЛИТУРГИИ

Блаже́нны, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апо́стол к Ефесе́ем, зача́ло 233. Аллилу́ия, глас 4: Воззва́ша пра́веднии, и Госпо́дь услы́ша их. Ева́нгелие от Матфе́я, зача́ло 36. Прича́стен: В па́мять ве́чную:

Святой великомученик Иоанн Новый, Сочавский, пострадал в XIV веке (не позднее 1340 года). Он был родом из г. Трапезунда, занимался торговлей и по роду своих занятий часто плавал в другие страны. Однажды он плыл на корабле, владелец которого не был православным христианином. В споре о вере святой Иоанн, хорошо знавший Священное Писание и творения святых отцов, обличил неправомыслие корабельщика, и тот затаил на святого злобу. Во время стоянки корабля в Белграде Босфорском (по другим источникам в Аккермане – Белгород на Днестре) хозяин корабля донес правителю города, язычнику-огнепоклоннику, что святой Иоанн хочет отречься от Христа и поклоняться огню.

Правитель пригласил святого во дворец и с честью принял его. Но когда святой Иоанн твердо исповедал себя христианином, он был предан жестоким мучениям: святого нещадно били палками, так что тело его было залито кровью. Затем мученика бросили в темницу. На другой день его вновь пытались заставить поклониться огню, но все усилия мучителей были бесполезны. Святой Иоанн благодарил Бога за дарование мученичества ради Его Имени и старался обратить язычников к вере во Христа. Никакие пытки не сломили волю святого мученика. «Бей жезлами, – говорил он правителю, – жги огнем, утопи в воде или рассеки мечом и, если есть у тебя иные, более лютые муки, не ленись причинить их мне: все готов радостно принять ради любви ко Христу моему».

Святого Иоанна привязали за ноги к хвосту дикого коня, которого стали гнать по улицам города. Над страданиями мученика потешались иудеи. Один из них догнал влачимого мученика и отсек ему голову. Тело святого было брошено среди улицы, и никто из христиан не смел его погребать. Ночью многие видели над телом мученика огненный столп и множество светившихся лампад. Три светоносных мужа воспевали священные песнопения и кадили вокруг него, Некий иудей принял этих мужей за христианских священников и хотел застрелить одного из лука. Но когда он натянул тетиву, лук и стрела будто приросли к его рукам, он простоял в таком положении до утра. На рассвете видение исчезло. Правитель, узнав о чуде, разрешил христианам взять тело святого Иоанна.

Христиане погребли его рядом со своим храмом.

Владелец корабля, раскаявшийся в содеянном, хотел тайно взять тело мученика. Ночью он раскопал могилу и намеревался изъять мощи. Святой Иоанн в сонном видении предупредил об этом пресвитера храма, и тот остановил вора. Честные мощи были перенесены в алтарь храма, где пролежали более 70 лет. От мощей происходили различные чудеса: сиял свет, распространялось благоухание, многие больные получали исцеления. Правитель Молдо-Влахийского княжества Александр перенес мощи святого Иоанна Нового в свою столицу Сочаву.

(Службу зри 21 декабря)

Тропа́рь, глас 2:

Благоче́стно в зако́не пожи́вши/ и благи́ми де́лы украси́вшися,/ я́ко кре́пкий адама́нт, яви́ся,/ целому́дренная свята́я благове́рная княги́не Иулиани́е,/ тле́нную сла́ву и добро́тство теле́сное презре́вши,/ злоко́зненнаго врага́ победи́ла еси́,/ целому́дрия ра́ди му́ченическую смерть прия́ла еси́./ Сего́ ра́ди от Христа́ Бо́га нетле́нным и ве́чным венце́м венча́вшися,/ ны́не с ли́ки му́ченик лику́еши/ и нам ве́лия чудеса́, приходя́щим ко гро́бу твоему́, оби́льно источа́еши./ Те́мже ти вопие́м:/ моли́ся Христу́ Бо́гу о всех нас,/ ве́рою и любо́вию страда́ния твоя́ почита́ющих.

Конда́к, глас 2:

Воспое́м днесь Благоде́теля всех Бо́га,/ просла́вльшаго в Росси́и Иулиани́ю Богому́друю,/ да моли́твами ея пода́ст душа́м на́шим/ грехо́в оставле́ние и ве́лию ми́лость.

Святая благоверная княгиня Иулиания, Вяземская и Новоторжская, мученически скончалась 21 декабря 1406 года. В этот день Церковью установлено празднование ее памяти. Святая мученица погребена в г. Торжке, рядом со Спасо-Преображенским соборным храмом. 2 июня празднуется обретение мощей благоверной княгини Иулиании, которое произошло в 1815 году при разборе обветшавшего Спасо-Преображенского собора. 2 июня 1819 года в Спасо-Преображенском соборе во имя святой благоверной княгини Иулиании был освящен правый придел. В 1906 году у собора, на месте часовни, над гробом благоверной княгини была устроена церковь ее имени. Память святой Иулиании Новоторжской совершается также 21 декабря.

Тропа́рь, глас 4:

Преподо́бно житие́ твое́ проше́д, му́дре,/ све́тлым украси́лся еси́ хито́ном свяще́нства./ Пролива́я же кровь му́ченичества, Ера́зме,/ сподо́бился еси́ свы́ше мздов неле́стных/ и, предстоя́ Тро́ице, мо́лишися о нас, воспева́ющих тя.

Священномученик Еразм Охридский, родом из Антиохии, жил в начале IV века, в период правления императоров Диоклитиана и Максимиана. Он подвизался в Ливанских горах, где за свою строгую жизнь стяжал у Господа дар чудотворений.

С проповедью Евангелия святой Еразм дошел до города Охриды, который входил тогда в Илирийскую область (провинцию) Римской империи. Здесь святой Еразм обратил к истинной вере и крестил многих язычников, разрушил идольские капища. Об этом донесли императору Максимиану, который находился в то время в Илирии.

Максимиан приказал привести святого Еразма к медному идолу Зевса и совершить языческое жертвоприношение, поклонившись идолу. Святой Еразм решительно отказался сделать это. По распоряжению императора он был заключен в темницу, откуда его вывел Ангел Господень. Святой Еразм с проповедью веры Христовой отправился затем в провинцию Кампания. Близ города Хармелий он поселился в пещере, где пребывал в иноческих подвигах до самой своей кончины.

Пещера с церковью во имя святого Еразма и доныне существует в окрестностях Охриды.