Господоуби́йственных тя/ лю́тии о́троцы преда́ша,/ за́вистию та́емии, сла́вне,/ и, му́жествовав непобеди́мо,/ рая́ прия́л еси́,/ о Лукиллиа́не, наслажде́ние./ Те́мже моли́ся дарова́ти душа́м на́шим/ мир и ве́лию ми́лость.

Де́ти всесвяще́нныя,/ я́коже отцу́, повину́ющеся тебе,/ с тобо́ю пострада́ша тве́рдо,/ и сла́вная и преподо́бная Па́вла,/ му́ченица досточу́дная,/ с ни́миже ны́не живе́ши на Небесе́х,/ Христа́ моли́/ даро́вати душа́м на́шим/ мир и ве́лию ми́лость.

Исцеле́ний во́ды/ твоя́ ра́ка притека́ющим источа́ет всегда́,/ му́чениче многострада́льне,/ и омыва́ет стра́сти,/ и потопля́ет полки́ де́монския/ де́йством Свята́го Ду́ха./ Те́мже моли́ся дарова́ти душа́м на́шим/ мир и ве́лию ми́лость.

Стихи́ры Богоро́дицы, глас и подо́бен то́йже:

Ра́дуйся, стра́нное слы́шание, Чи́стая;/ ра́дуйся, дре́во свято́е,/ рая́ Богосажде́нное;/ ра́дуйся, потребле́ние лука́вых де́монов;/ ра́дуйся, ору́жие обою́ду о́строе,/ врага́ главу́ отсе́кши/ стра́нным рождество́м Твои́м,/ Всесвята́я Пренепоро́чная,/ устра́ншияся ны воззови́.

Неду́говавшую, Пресвята́я, лю́те/ ду́шу мою́ страстьми́ лука́выми исцели́,/ Я́же Цели́теля и Спа́са всех/ Христа́ ро́ждшая,/ вся́ку я́зю исцели́вшаго/ уя́звленных диа́вольским зломы́слием/ и сме́рти нас изме́ншаго.

Пресвяты́й хра́ме Бо́жий,/ небе́с ши́рший/ и Херуви́м святе́йший,/ Богора́дованная Всесвята́я Отрокови́це,/ ум мой облагодати́/ и просвети́ серде́чныя о́чи,/ подаю́щи ми благоприя́тными хода́тайствы Твои́ми/ согреше́ний всех проще́ние.

Сла́ва, и ны́не, Богоро́дичен:

Увы́ мне, что́ бу́ду,/ ум, и ду́шу, и те́ло же оскверни́в прегреше́ньми?/ Что́ сотворю́?/ Ка́ко же избежу́ пла́мене нестерпи́маго,/ нереши́мых уз и ве́чных?/ Но, о Всенепоро́чная,/ пре́жде конца́ моли́ Сы́на Твоего́/ пода́ти ми оставле́ние.

Крестобогоро́дичен:

Своего́ А́гнца/ А́гница и Непоро́чная Влады́чица/ на Кресте́ я́ко ви́де, зра́ка не иму́ща, ниже́ добро́ты,/ увы́ Мне, рыда́ющи, глаго́лаше,/ где добро́та Твоя́ за́йде, Сладча́йший?/ где благоле́пие,/ где благода́ть блиста́ющая о́браза Твоего́,/ Сы́не Мой любе́знейший?

Кано́н, его́же краегране́сие: Лукиллиа́на му́ченика пою́ сла́ву. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Сло́ва тя Бо́жия уго́дника, му́чеников же сла́ву, воспева́ю, Лукиллиа́не,/ те́мже мне моли́твами твои́ми пода́ждь очище́ние злых и исцеле́ние.

Все́ю мы́слию же и душе́ю весь прилепи́лся еси́ любви́ Христо́ве/ и и́дольския пре́лести, и не́мощи, му́дре, пренебре́гл еси́.

Па́че всея́ сла́вы земны́я томи́тельнаго безсла́вия жела́я,/ нестаре́емую сла́ву, Богоблаже́нне, Небе́сную насле́дил еси́.

Богоро́дичен: Ле́ствица, ю́же ви́де Иа́ков, Ты еси́, Богоро́дице:/ Тобо́ю бо су́щим на земли́ Сло́во соедини́ся/ и на высоту́ челове́ческое существо́ привлече́.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Иу́да предаде́ Изба́вителя Христа́ дре́вле богоуби́йцам,/ ты же ны́не беззако́нным иуде́ем пре́дан был еси́.

Словесы́ тя льстец прельсти́ти ласка́тельными покуша́яся,/ яви́ся твои́ми словесы́, я́коже ка́мением, страда́льче, бие́мь.

Свети́льник пресве́тел стра́ждущим с тобо́ю был еси́,/ све́тло наставля́я на Боже́ственныя стези́ та́мошнего наслажде́ния.

Богоро́дичен: Ми́лостиву бы́ти ми молю́ся, Твои́ми, Влады́чице, дерзнове́ньми,/ из Тебе́ рожде́нному, в День Суда́.

Седа́лен, глас 1.

Подо́бен: Гроб Твой, Спа́се:

Огню́ приближа́яся, ника́коже опали́лся еси́, о Лукиллиа́не, страда́льче доблему́дренне,/ ро́су бо стяжа́л еси́ Бо́жию устужа́ющую./ Те́мже соверши́л еси́ е́же па́че естества́ по́двиги, ра́дуяся со младе́нцы святы́ми,/ с ни́миже нас помина́й.

Сла́ва, и ны́не, пра́здника или Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

Крестобогоро́дичен:

Зря́щи Тя, Христе́, Всенепоро́чная Ма́ти/ ме́ртва на Кресте́ просте́рта, вопия́ше:/ Сы́не Мой, собезнача́льне Отцу́ и Ду́ху,/ что неизрече́нное Твое́ сие́ смотре́ние,/ и́мже спасл еси́ пречи́стых рук Твоих, Ще́дре, созда́ние?

Песнь 4

Ирмо́с: Услыша́х, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Блиста́еши словесы́ твои́ми и просвеща́еши мир страда́нии твои́ми,/ мучи́телей же сопротивле́ние, я́ко мглу, отгоня́еши, непостоя́нную.

Но́вый яви́лся еси́ ве́рою Авраа́м, и́же дре́вле оправда́ся о Христе́:/ позна́нием бо Зижди́теля твоего́ отве́ргл еси́ все су́етство.

Всегуби́теля тя ле́сти и боле́зненных страсте́й исцели́теля, ве́рнии, стяжа́вше, му́чениче сла́вне,/ насыща́емся всегда́ исцеле́ний.

Богоро́дичен: Па́че ума́ та́инство рождества́ Твоего́, Присноде́во:/ во утро́бе бо заче́нши Бо́га,/ неизрече́нным сло́вом породила́ еси́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Еди́не врачу́ душ и теле́с, Христе́,/ му́чеников мольба́ми страсте́й моих боле́зни исцели́.

Цвет свяще́нен де́ланием Ду́ха показа́лся еси́, му́чениче сла́вне,/ благопло́дия во страда́ниих предлага́я.

Глаго́лы живо́тныя в се́рдцы име́я, му́дре,/ мучи́тельская преще́ния твои́м сопротивле́нием умертви́л еси́, сла́вне.

Богоро́дичен: Сте́ну необори́му, и приста́нище,/ и утвержде́ние, и наде́жду, Богома́ти Чи́стая,/ и Боже́ственное ору́жие иму́ще Тя, спаса́емся.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Возвы́сив твое́ мы́сленно Боже́ственное души́ жела́ние,/ ко огню́ томи́тельному де́рзостне устреми́лся еси́/ и росо́ю Ду́ха с детьми́ прохлади́лся еси́, страда́льче всеблаже́нне.

Укрепи́вшися му́ченица му́драя Па́вла наказа́нии твои́ми,/ му́жествовавши терпели́вно на льсти́ваго/ и вене́ц прия́т пра́вды от руки́ Страстополо́жника Христа́.

Зря твое́ непрекло́нное, я́ко го́ру Сио́н неподви́жиму,/ не терпя́ше враг, но весь посрами́ся/ и, к земли́ попира́емь, от Тебе́, Богому́драя, в по́двизе стира́ется.

Богоро́дичен: Зачала́ еси́ вои́стинну Боже́ственное Сло́во во утро́бе Твое́й/ и Сего́ па́че естества́ родила́ еси́, Пречи́стая,/ Его́же моли́твами Твои́ми ми́лостива сотвори́,/ от бед вся изба́вити рабы́ Твоя́.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

С Па́влом вопия́л еси́, му́чениче:/ не разлучи́т мя от любве́ Христо́вы ни беда́, ни скорбь, ни ра́ны, ни меч./ Те́мже и взыва́л еси́:/ отец на́ших Бо́же, благослове́н еси́.

На ка́мени утверди́л еси́ испове́дания Боже́ственнаго но́ги твоя́,/ непоколеби́м яви́вся молво́ю бед./ Те́мже взыва́л еси́:/ оте́ц на́ших Бо́же, благослове́н еси́.

Богоро́дичен: Изба́вихомся, Де́во, вси от страсте́й,/ и бед, и обстоя́ний, и неду́г многообра́зных/ мольба́ми Твои́ми, Пречи́стая Богома́ти, взыва́ющии:/ оте́ц на́ших Бо́же, благослове́н еси́.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

При Боже́ственных я́ко вои́стинну исхо́дищих насажде́н быв ве́рою Госпо́днею,/ дре́во яви́лся еси́, преблаже́нне, живоно́сное.

Украси́вшеся страда́льцы добро́тою честна́го Христо́ва испове́дания,/ вене́ц с Небесе́ прия́ша досто́йно.

Богоро́дичен: Прекло́ншагося боле́зньми и па́дшася, возстави́ мя, Богома́ти,/ я́ко да Тя сла́влю во вся ве́ки.

Песнь 9

Ирмо́с: Велича́́ем Тя,/ Всенепоро́чную Ма́терь Христа́ Бо́га на́шего,/ Ю́же осени́ Дух Святы́й.

Слове́снаго рая́ цве́ты,/ ви́дяще Христо́вы благово́нныя му́ченики днесь,/ хвала́ми велича́ем.

Светоно́сцы я́вльшеся и́стинно Це́ркве Христа́ Бо́га,/ му́ченицы сия́ют испове́дания све́том.

Страсте́й боле́зни моли́твами страстоте́рпец исцели́вый,/ и моя́ ны́не исцели́ боле́зни, Человеколю́бче.

Богоро́дичен: Тебе, сте́ну, и покро́в, и небу́рное приста́нище,/ Всенепоро́чная, ве́рнии, стяжа́хом,/ Е́юже и спаса́емся.

Святые мученики Лукиллиан, отроки Клавдий, Ипатий, Павел и Дионисий и Павла дева

Лукиллиан был языческим жрецом при римском императоре Аврелиане (270–275). В старости он убедился в ложности языческой религии, всей душой обратился к вере во Христа Спасителя и крестился.

Под влиянием его проповеди многие язычники стали обращаться к христианству. Тогда иудеи за распространение веры в распятого ими Христа донесли на святого Лукиллиана градоначальнику Никомидии Сильвану. Тот стал принуждать старца возвратиться к идолослужению. За отказ святому Лукиллиану сокрушили челюсти, били палками и повесили вниз головой, а затем заключили в темницу, где он встретил четырех отроков-исповедников Христовых – Клавдия, Ипатия, Павла и Дионисия. Святой Лукиллиан убеждал их твердо стоять за веру, не бояться мучений и смерти. Через некоторое время все они были приведены на судилище и брошены в раскаленную печь, но внезапно пролившийся дождь угасил пламя, и святые мученики остались невредимы. Правитель приговорил их к смертной казни, отправив для исполнения приговора в Византию. Святые отроки были усечены мечом, а святой мученик Лукиллиан многочисленными гвоздями пригвожден ко кресту.

Свидетельницей подвига святых мучеников была святая дева Павла, посвятившая себя служению страдавшим за веру во Христа. Она доставляла пищу узникам-христианам, омывала их раны, приносила лекарства и погребала тела мучеников. После кончины святого Лукиллиана и четырех отроков она возвратилась в Никомидию и продолжала свое святое служение. Святая дева была схвачена и брошена в печь, однако силою Божиею осталась невредима. Тогда ее отослали в Византию, где святая мученица была усечена мечом.

Пренесе́ние из У́глеча в Москву́ честны́х моще́й свята́го благове́рнаго царе́вича Дими́трия

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, ца́рская о́трасле,/ благове́рный царе́виче Дими́трие,/ я́ко ве́лию благода́ть от Бо́га прия́л еси́:/ обрето́ша бо ся мо́щи твоя́ це́лы и нетле́нны,/ я́ко сокро́вище неги́блемо,/ и ны́не суть во святе́м хра́ме,/ я́ко дар освяще́н./ К ни́мже притекающе,/ освяще́ние и просвеще́ние прие́млем,/ душа́м и те́лом на́шим,/ и благода́рственно Христа́ воспева́ем,/ Его́же моли́ дарова́ти нам ве́лию ми́лость.

Ра́дуйся, до́брый вене́чниче,/ благове́рный царе́виче Дими́трие,/ я́ко сугу́бством да́ра почте́н еси́ от Бо́га,/ духо́вным бо вку́пе и теле́сным сия́еши де́йством,/ и у́бо на Небесе́х чи́стая душа́ твоя́, я́ко со́лнце, сия́ет,/ зде же мо́щи твоя́ таковы́ми виде́нии пребыва́ют,/ просвеще́ние подаю́ще всем, приходя́щим к ним с ве́рою,/ и Христа́ воспева́ющим усе́рдно,/ и прося́щим от Него́ вели́кия ми́лости./ Тем моли́ Его́/ да́ти нам ми́лость в День Су́дный.

Ра́дуйся, но́вый предста́телю к Бо́гу,/ благоро́дне царе́виче Дими́трие,/ я́ко предстои́ши Тому́, Безсме́ртному Царю́ и Влады́це,/ наслажда́яся от Него́ Боже́ственнаго светосия́ния,/ и мо́лишися о держа́ве сро́дник твои́х,/ о е́же бы ей ненаве́тне бы́ти/ от вся́каго зла́го нахожде́ния/ и всем, и́же честны́я твоя́ мо́щи ве́рою почита́ющим/ и пра́зднующим день честна́го их пренесе́ния./ Тем мо́лим тя, страда́льче,/ не престая́ моли́ о душа́х на́ших.

И́ны стихи́ры, глас 1.

Подо́бен: Прехва́льни му́ченицы:

Весели́ся ны́не, гра́де Москва́,/ иму́щи в себе́ мо́щи но́ваго сего́ на́шего предста́теля и моле́бника к Бо́гу/ благове́рнаго царе́вича Дими́трия,/ и́же вы́ну предстои́т Ему,/ и зрит неизрече́нную Его́ сла́ву,/ и мо́лит при́сно дарова́ти душа́м на́шим/ мир и ве́лию ми́лость.

Красу́йся ты, Це́рковь Бо́жия,/ ликовству́йте, вси моско́встии наро́ди,/ зря́ще вещь ди́вну и пресла́вну,/ лежи́му во святе́м хра́ме,/ мо́щи благоро́днаго сего́ царе́вича Дими́трия,/ исцеле́ния подава́юща всем, приходя́щим к ним с ве́рою,/ и любо́вию почита́ющим я,/ и Христа́ усе́рдно воспева́ющим.

Возра́довашася чи́ни а́нгельстии,/ возвесели́шася пра́ведных ли́цы,/ зря́ще сию́ пра́ведную ду́шу, возноси́му на Не́бо,/ и поклоня́емую Боже́ственному Престо́лу,/ и причте́ну с му́ченическими ли́ки,/ с ни́ми же ны́не славосло́вит и мо́лит Бо́га/ дарова́ти душа́м на́шим мир и ве́лию ми́лость.

Сла́ва, глас 6:

Прииди́те, вси благоче́стия рачи́телие,/ во святу́ю и вели́кую Це́рковь Небе́сных сил воево́ды,/ Архистрати́га Михаи́ла,/ иде́же лежа́т мо́щи/ пра́веднаго сего́, благове́рнаго царе́вича Дими́трия./ И припаде́м к ра́це моще́й его́,/ и возопии́м к нему́, си́це глаго́люще:/ ра́дуйся, благочести́вая ца́рская о́трасле,/ благове́рне царе́виче Дими́трие,/ я́ко вели́ку да́ру от Бо́га сподо́бися зде и во о́ном ве́це,/ и у́бо в Го́рних, я́ко со́лнце, сия́еши/ благоро́дною свое́ю душе́ю,/ зде же, в до́льних, пра́ведныя тво́я мо́щи/ це́лы и невреди́мы пребыва́ют,/ я́ко арома́ты благово́нны,/ лежа́ще во святе́м хра́ме,/ благода́ть подаю́ща всем, приходя́щим к ним с ве́рою/ и Христа́ усе́рдно воспева́ющим,/ Его́же моли́ дарова́ти нам ве́лию ми́лость.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния 3 му́ченическая.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаголе́т Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многол́етна,/ ниже́ в числе́ лет исчита́ется, седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры хвали́тны.

На стихо́вне стихи́ры, глас 1.

Подо́бен: Небе́сных чино́в:

Све́тлое украше́ние це́ркви,/ пра́ведныя твоя́ мо́щи,/ благоро́дне царе́виче Дими́трие,/ сия́ют бо па́че зла́та и сапфи́ра,/ созыва́юще нас на духо́вное торжество́/ и просвеща́юще всех, приходя́щих к ним с ве́рою.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Похвала́ еси́ земли́ Ру́сстей/ и ца́рствующему гра́ду Москве́ кре́пкое основа́ние,/ стране́ на́шей щит и побе́да на сопроти́вныя,/ и всем нам побо́рник и засту́пник,/ и моли́твенник о душа́х на́ших.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Прииди́те па́ки, вси моско́встии наро́ди,/ возра́дуемся и возвесели́мся днесь,/ в честны́й сей день, в пренесе́ние моще́й/ благове́рнаго царе́вича Дими́трия,/ сла́ву и хвалу́ Бо́гу воздади́м,/ да́вшему нам такова́го к Нему́ предста́теля и моле́бника.

Сла́ва, глас 6:

Днесь вои́стинну подоба́ет соверша́тися духо́вному торжеству́/ и сла́ве и хвале́ к Бо́гу приноси́тися во святе́м хра́ме сем,/ моско́вскому же наро́ду ра́доватися духо́вне и весели́тися,/ зря сего́ своего́ сро́дника,/ в толи́цей сла́ве у Бо́га пребыва́юща/ и мощми́ свои́ми ве́рныя лю́ди просвеща́юща./ Того́ ра́ди лику́й, и все правосла́вное мно́жество,/ я́ко дарова́ нам Госпо́дь/ такова́го к Нему́ предста́теля и моле́бника.

И ныне, Богоро́дичен:

Богоро́дице, Ты еси́ лоза и́стинная,/ возрасти́вшая нам Плод живота́/ Тебе́ моли́мся, моли́ся, Влады́чице,/ со святы́ми апо́столы/ поми́ловатися душа́м на́шим.

Тропа́рь, глас 3:

Днесь вельми́ хва́лится ца́рствующий град Москва́,/ име́я в себе́ пра́ведныя твоя́ мо́щи,/ благове́рне царе́виче Дими́трие,/ я́ко цве́ти благоуха́ннии,/ пребыва́еми во святе́м хра́ме,/ просвеще́ние подаю́т душа́м и те́лом на́шим./ Тем ра́достно тя восхваля́ем,/ и честно́е пренесе́ние моще́й твои́х ве́рно почита́ем, и мо́лим тя:/ моли́ Христа́ Бо́га/ дарова́ти нам ве́лию ми́лость.

Ин тропа́рь, глас 2:

Я́ко благочести́ваго ца́рскаго ко́рене/ Боголюби́вый произы́де плод,/ я́ко а́гня незло́биво,/ непови́нно во младе́нчестве закла́н бысть от властолю́бца,/ вку́пе и от зла́го раба́,/ тем, я́ко златы́ми кри́лы душе́вною чистото́ю/ и младе́нческим незло́бием к Небе́сней высоте́ возлете́л еси́, Дими́трие,/ и ны́не кровь твоя́ от земли́ та́йно вопие́т к Бо́гу,/ я́ко А́веля пра́веднаго,/ и сего́ ра́ди покланя́емся ве́рою твои́х моще́й ра́це,/ из нея́же ре́ки чуде́с излива́еши/ приходя́щим ти с ве́рою/ и любе́зно целу́ющим многоцеле́бныя твоя́ мо́щи,/ сла́вящим просла́вльшаго тя Бога./ Его́же моли́, держа́вный страстоте́рпче Дими́трие,/ правосла́вным сыново́м ру́сским спасти́ся.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Све́тлый и всепра́зднственный сей день/ пренесе́ния честны́х моще́й твои́х, благоро́дне Дими́трие,/ созыва́ет нас духо́вне пра́здновати,/ и честны́я твоя́ мо́щи ве́рно почита́ти,/ и сла́вити Еди́наго Бо́га в Тро́ице./ Мы же, соше́дшеся днесь, псало́мски вопие́м ти:/ возвесели́тся пра́ведник о Го́споде и упова́ет Нань.

Сла́ва, и ны́не, Богоро́дичен:

Свет от Све́та произы́де,/ и в Твою́ деви́чу утро́бу неизрече́нно вни́де,/ и пло́тию обложи́ся,/ и недомы́слено и несказа́нно из Тебе́ Сын Твой, Христо́с Бог наш, роди́ся,/ Его́же у́бо рождество́м вся земля́ освяти́ся/ и пре́лесть и́дольская разори́ся.

По 2-м стихосло́вии седа́лен, глас 4.

Подо́бен: Ско́ро предвари́:

Прему́дрый Бог прему́дростию Свое́ю все содева́ет/ и, я́коже весть, святы́я Своя́ прославля́ет./ Та́ко и на тебе́, страда́льче Дими́трие, сотвори́,/ просла́ви тя на Небеси́ и на земли́./ Те́мже, иму́ще к Нему́ дерзнове́ние, моли́ за вся лю́ди христоимени́тыя,/ я́ко да пода́ст нам ми́лость в День Су́дный.

Сла́ва, и ны́не, Богоро́дичен:

И от всех родо́в произбра́нная,/ и от всех проро́к пронарече́нная,/ и от всех челове́к препрославля́емая,/ и от А́нгел удивля́емая, Ма́ти Бо́га Вы́шняго,/ удиви́ на мне, недосто́йнем ра́бе Свое́м, ми́лость Свою́/ и моли́ за мя Сы́на Своего́ и Бо́га моего́,/ я́ко да пода́ст ми ми́лость в День Су́дный.

По полиеле́и седа́лен, глас 8.

Подо́бен: Прему́дрости:

От млады́х ногте́й произбра́ тя Госпо́дь в Небе́сное селе́ние, благоро́дне Дими́трие,/ и от вседержи́тельныя Его́ десни́цы нетле́нный вене́ц на версе́ твое́м положи́ся,/ и осия́н еси́ от него́ Боже́ственным светозаре́нием,/ и вы́ну насыща́ешися ра́дости и весе́лия/ и мо́лишися за свое́ оте́чество и за вся, и́же в Правосла́вии живу́щия,/ и честны́я твоя́ мо́щи с ве́рою почита́ющия, и вопию́щия:/ сла́ва Бо́гу, сотворя́ющему ди́вная Своя́ чудеса́.

Сла́ва, и ны́не, Богоро́дичен:

Со́лнца разу́мнаго родила́ еси́, Пречи́стая,/ от Него́же вся ви́димая и неви́димая просвеща́ются и те́рние грехо́вное искоренева́ется./ Тем и аз, убо́гий и недосто́йный раб Твой, молю Ти ся:/ да просвети́т мрак души́ моея́,/ да изсуши́т ти́ну грехо́в мои́х,/ да получу́ ми́лость в день стра́шнаго о́наго испыта́ния/ Твои́ми Ма́терними к Нему́ моли́твами.

По 50-м псалме́ стихи́ра, глас 6: Днесь вои́стинну подоба́ет соверша́тися духо́вному торжеству́: зри Сла́ву на стихо́вне.

Кано́н, глас 1. Его́же краегране́сие со а́льфы поря́ду. Про́чая же име́яй измара́гд, да разуме́ет.

Песнь 1

Ирмо́с: Го́рькия рабо́ты изба́влься Изра́иль,/ непроходи́мое про́йде, я́ко су́шу,/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,/ я́ко просла́вися.

А́гнче Бо́жий, О́тчее Сло́во,/ отве́рзи ми устне́ и вразуми́ ми смысл,/ да досто́йне воспою́ но́ваго сего́ Твоего́ вене́чника, царе́вича Дими́трия,/ и возопию́ Ти, я́ко просла́вися.

Благода́ть прия́л еси́ от Бо́га, благоро́дне Дими́трие,/ я́ко обрести́ся моще́м твои́м це́лым и нетле́нным./ Благода́ти ми своея́ посли́ ка́плю,/ да досто́йне воспою тя/ и возопию́ Го́сподеви моему́, я́ко просла́вися.

В пра́ведных ли́цех предстоя́ и неизре́ченно добро́ту Влады́чню зря, благоро́дне Дими́трие,/ моли́ за ны, смире́нныя рабы́ своя́,/ я́ко да твои́ми моли́твами получи́м вся блага́я и поле́зная.

Богоро́дичен: Го́спода моего́ и Бо́га ро́ждши, Ма́ти Безневе́стная,/ просвети́ моя́ недоуме́нная помышле́ния/ соплести́ сие́ гру́бое плете́ние и сопривнести́ но́вому сему́ о нас моле́бнику,/ и возопи́й Сы́ну Твоему́ и Бо́гу моему́, я́ко просла́вися.

Песнь 3

Ирмо́с: Не му́дростию и бога́тством да хва́лится сме́ртный свои́м,/ но ве́рою Госпо́днею,/ правосла́вно взыва́я Христу́ Бо́гу и поя́ присно:/ на ка́мени Твои́х за́поведей/ утверди́ мя, Влады́ко.

Ди́вство нам Бог показа́ в после́дняя на́ша времена́,/ я́ко мо́щи твоя́ та́цеми о́бразы сия́ют,/ исцеле́ния подаю́ща всем, приходя́щим к ним с ве́рою и Христу́ вопию́щим:/ на ка́мени за́поведей Твои́х утверди́ ны, Влады́ко.

Ей, весть Госпо́дь прославля́ти Своя́ уго́дники/ и пока́зовати на них си́лу Свою́./ Та́коже и на тебе́, благоро́дне Дими́трие, показа́ благода́ть Свою́,/ мо́щи бо твоя́ такова́я де́йствуют/ всем, приходя́щим к ним с ве́рою.

Жизнь твоя́ на земли́ не во мно́зе вре́мени пребы́сть, благоро́дне царе́виче Дими́трие,/ в Небе́сных же селе́ниих во ве́ки пребыва́еши/ и мо́лиши Бо́га за ны, рабы́ своя́,/ да получи́м вечных и неконча́емых благ.

Богоро́дичен: Зловре́дное помышле́ние отжени́ от ума́ моего́, Пречи́стая,/ и до́брыми вразуме́нии просвети́ убо́гую ду́шу мою́,/ да не покры́ет мя тьма грехо́вная/ и да не сни́ду в ме́сто муче́ния.

Ин конда́к, глас 8:

Свети́ло пресве́тлое яви́ся днесь Боже́ственная па́мять твоя́:/ богодарова́нная ти чудеса́, я́ко ре́ки,/ от вся́ких многоразли́чных неду́г подае́ши исцеле́ние с ве́рою призыва́ющим тя,/ созыва́я нас к похвале́нию прославля́ющаго тя Бо́га./ Его́же моли́, страстоте́рпче Дими́трие,/ мир ми́рови дарова́ти,/ от ви́димых и неви́димых враг правосла́вныя лю́ди невреди́мы сохрани́ти, да зове́м ти: ра́дуйся,/ ты бо еси́ утвержде́ние гра́ду на́шему.

Седа́лен, глас 8.

Подо́бен: Прему́дрости:

Я́ко цвет прекра́сен, процве́л еси́ во оте́чествии свое́м, благоро́дне Дими́трие,/ и́маши бо мо́щи своя́, пребыва́юща во святе́м хра́ме и лежа́ща в честне́й ра́це,/ я́коже рече́ся, це́лы и невреди́мы,/ я́ко кри́ни благоуха́нии и я́ко ши́пки доброво́нни,/ обонева́ют всех, приходя́щих к ним с ве́рою,/ и удивля́ют зря́щия на них и вопию́щия:/ сла́ва Бо́гу, прославля́ющему Своя́ уго́дники.

Сла́ва, и ны́не, Богоро́дичен:

Богоблагода́тная Ма́ти, Благода́теля моего́ ро́ждши,/ благода́тную ми пода́ждь мысль,/ да облагода́чуся Твое́ю благода́тию,/ да не заблужу́ся в пути́ про́пастныя,/ да изба́влюся от се́ти лука́ваго борца́/ и па́ки да не погря́зну в ти́не ка́ла грехо́внаго,/ да не бу́ду му́чен в гее́нне о́гнене,/ да воспева́ю Тя, Влады́чице.

Песнь 4

Ирмо́с: Слы́ша дре́вле Авваку́м, Христе́, чу́дный Твой слух/ и стра́хом взыва́ше:/ от ю́га Бог прии́дет и Святы́й от горы́ приосене́нныя ча́щи/ спасти́ пома́занныя./ Сла́ва си́ле Твое́й, Го́споди.

Земля́ Ру́сская вся хва́лится тобо́ю, благоро́дне Дими́трие,/ я́ко ца́рствующий град Москва́ име́ет в себе́ мо́щи твоя́, я́ко не́кое сокро́вище дра́го,/ обогаща́ющее ве́рныя лю́ди, вопию́щия Христу́:/ сла́ва си́ле Твое́й, Го́споди.

И́же повеле́нием царя́, ца́рству тезоимени́та,/ пренесе́ни бы́ша честны́я твоя́ мо́щи от гра́да У́глеча в ца́рствующий град Москву́,/ я́ко не́кое бога́тство вели́ко./ Тогда́ вси лю́дие возра́довашася и воспе́ша Христу́:/ сла́ва си́ле Твое́й, Го́споди.

И́стинствоваша чудеса́ от пра́ведных моще́й твои́х в прихо́д честна́го их пренесе́ния:/ мно́зи неду́жнии от неду́г своих исцелева́хуся и здра́ви быва́ху,/ и, ра́дующеся, в до́мы своя́ отхожда́ху, и Христу́ пою́ще:/ сла́ва си́ле Твое́й, Го́споди.

Богоро́дичен: Ко́рмчию, Ма́ти, всех ро́ждшая, Христа́ и Бо́га моего́,/ упра́ви ми душе́вный мой кора́бль/ приити́ ко приста́нищу спасе́ния и получи́ти путь покая́ния,/ да не потопле́н бу́ду в бе́здне грехо́в мои́х.

Песнь 5

Ирмо́с: Свет Твой незаходи́мый возсия́й, Христе́,/ в сердца́ ве́рно пою́щих Тя,/ мир подава́яй нам па́че ума́;/ тем, от но́щи неве́дения ко дню Све́том Твои́м теку́ще,/ славосло́вим Тя, Человеколю́бче.

Любо́вию притека́ющих к ра́це моще́й твои́х/ и любе́зно целу́ющих я, благоро́дне Дими́трие,/ пода́ждь душа́м спасе́ние и телесе́м здра́вие/ и изба́ви лю́тых бед и обстоя́ний свои́ми к Бо́гу моли́твами.

Моли́тв ра́ди твои́х, я́же к Бо́гу, благоро́дне Дими́трие,/ лю́тое колеба́ние в Ру́сстей земли́ укроти́ся от злых и растле́нных умы́ челове́к,/ хотя́щих зде вре́менныя сла́вы наслади́тися,/ презре́вше, я́ко во о́ном ве́це, ве́чне и́мут му́читися.

Недове́домый Бог недове́домыми Свои́ми судьба́ми содева́ет/ и уго́ждших Свои́х прославля́ет./ Та́коже и на тебе́, благоро́дне Дими́трие, недове́домым Свои́м смотре́нием сотвори́,/ сицевы́м да́ром мо́щи твоя́ обогати́.

Богоро́дичен: Отрокови́це Чи́стая, Деви́це Ма́ти Госпо́дня,/ не оста́ви мя ту́не, принося́щаго Ти ма́лыя сия́ ка́пли от недостойных усте́н мои́х,/ но приими́, я́ко о́ноя убо́гия вдовы́ две ца́те.

Песнь 6

Ирмо́с: Весь от страсте́й безме́рных содержу́ся/ и ки́том зол снизпадо́х,/ но возведи́ из истле́ния мя, Бо́же,/ я́коже пре́жде Ио́ну,/ и ве́рою безстра́стие ми да́руй,/ я́ко да во гла́се хвале́ния и спасе́ния/ ду́хом пожру́ Ти.

Пренесе́нию моще́й твои́х зело́ возра́довася сам царь, и архиере́й вели́кий/ и вси моско́встии наро́ди ра́достно срето́ша я,/ и внутрь самого́ ца́рствующаго гра́да Москвы́ несо́ша,/ и положи́ша я в честне́м хра́ме, я́же и ны́не зря́тся.

Ре́вностию Боже́ственною одержи́м бысть сро́дник твой,/ и́же и царь бысть над все́ю Русси́ею, ему́же зва́ние – лице́ Бо́жие,/ приходя́ к ра́це моще́й твои́х, и целу́я их любе́зно,/ и отходя́ благода́рно, и ра́достно сла́ву и хвалу́ Бо́гу возсыла́я.

Сове́т о́нех злых и лука́вых челове́к,/ хотя́щих насле́довати оте́чество твое́, благоро́дне Дими́трие,/ и се́сти на престо́ле ца́рствия твоего́,/ Бог же, моли́тв ра́ди твои́х, разори́,/ и до конца́ всех погуби́, и, я́ко прах, разве́я.

Богоро́дичен: Ты еси́ прибе́жище, Ты и утвержде́ние,/ Ты Помо́щница ро́ду христиа́нскому, Ма́ти Бо́га Вы́шняго./ Тем и аз, убо́гий и недосто́йный, молю́тися:/ помози́ и мне, недосто́йному, во глубине́ зол мои́х лежа́щему,/ да не сведе́н буду во огнь гее́ннский.

Конда́к, глас 4.

Подо́бен: Вознесы́йся:

Я́ко пресве́тлая звезда́,/ яви́лся еси́ днесь в ца́рствующем гра́де Москве́,/ благове́рне царе́виче Дими́трие,/ сия́я пра́ведными свои́ми мощми́./ К ни́мже притека́юще, исцеле́ния дар прие́млем и глаго́лем:/ ра́дуйся, всекра́сне душе́ю,/ благоро́дне Дими́трие,/ я́ко прия́л еси́ от Бо́га ве́лий сей дар/ и вене́ц нетле́нный.

И́кос:

Прииди́те, вси ве́рнии, соше́дшеся,/ восхва́лим но́ваго сего́ предста́теля и моле́бника о нас к Бо́гу,/ ца́рскую сию́ о́трасль, благове́рнаго царе́вича Дими́трия,/ и возопие́м к нему́, си́це глаго́люще:/ ра́дуйся, но́вый вене́чниче, благове́рный царе́виче Дими́трие,/ я́ко предстои́ши Све́ту Трисо́лнечному,/ насыща́яся от Него́ Боже́ственнаго светосия́ния,/ и мо́лишися о держа́ве сро́дник твои́х,/ о е́же бы ей ненаве́тне бы́ти от всех злых, находя́щих на ню./ Ра́дуйся, я́ко мо́щи твоя́ толи́цеми дарми́ от Бо́га обогаще́ны суть/ и просвеща́ют всех, приходя́щих к ним с ве́рою./ Ра́дуйся, я́ко моли́тв ра́ди твои́х/ укроти́ Бог лю́тое колеба́ние во всей Ру́сстей земли́/ от о́нех злых и лука́вых челове́к, нарица́ющихся и́менем твои́м во лжу/ и смуща́ющих держа́ву ца́рствия твоего́./ Ра́дуйся, всему́ оте́честву своему́ похвала́ и утвержде́ние/ и ца́рствующему гра́ду Москве́ кра́сное удобре́ние./ Ра́дуйся, я́ко прия́л еси́ от Бо́га вели́к сей дар и вене́ц нетле́нный.

Песнь 7

Ирмо́с: О́бразу служи́ти/ мусики́йскому согла́сию созыва́ющу лю́ди,/ от пе́сней сио́нских пою́ще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.

Удивля́ются вси ру́сстии наро́ди, зря́ще мо́щи твоя́,/ толи́кою сла́вою от Бо́га просла́влены и такова́я де́йствуют исцеле́ния,/ подаю́ща всем, приходя́щим к ним с ве́рою и Христу́ вопию́щим:/ благослове́н Бог оте́ц на́ших.

Фимиа́м благово́нен обонева́ет челове́ком чу́вства,/ та́коже и твоя́ пра́ведныя мо́щи, благоро́дне,/ облагоуха́ют нас, а́ки не́коим обоня́нием сла́дким,/ и благода́ть свою́ подаю́т нам, приходя́щим к ним с ве́рою и Христу́ вопию́щим:/ благослове́н Бог оте́ц на́ших.

Храни́т Госпо́дь ца́рствующий град Москву́/ пребыва́емых ра́ди в нем чудотво́рных твои́х моще́й, благоро́дне царе́виче Дими́трие./ Сего́ ра́ди ра́дуются лю́дие, и веселя́тся, и вопию́т Христу:/ благослове́н Бог оте́ц на́ших.

От благочести́ваго ца́рскаго ко́рене,/ от благода́тнаго зва́ния рожде́н еси́, благоро́дне Дими́трие,/ и, я́ко пе́рвенец, яви́ся в ро́де свое́м,/ и ны́не хва́лятся тобо́ю сро́дницы твои́,/ ви́дяще бо тя, я́ко просла́влена от Бо́га,/ Ему́же пое́м:/ благослове́н Бог оте́ц на́ших.

Богоро́дичен: Цари́ца Небе́сная, Небе́снаго Царя́ ро́ждши и на руку́ Свое́ю поне́сши,/ воцари́ ум мой над злы́ми мои́ми помышле́ньми,/ да не по́йдет душа́ моя́ в зла́я и па́губная ме́ста,/ но да возопию́ Сы́ну Твоему́ и Бо́гу моему́:/ благослове́н Бог оте́ц на́ших.

Песнь 8

Ирмо́с: Чу́да преесте́ственнаго/ показа́ о́браз огнеро́сная пещь дре́вле,/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное рождество́./ Тем, воспева́юще, воспои́м:/ да благослови́т тварь вся Го́спода/ и превозно́сит во вся ве́ки.

Честна́я ра́ка моще́й твои́х, благоро́дне,/ па́че зла́та и сапфи́ра сия́ет./ К ней бо притека́юще, ца́рие, и кня́зи, и святи́телие,/ и мно́гое правосла́вное христиа́нство/ благода́тное осене́ние от моще́й твои́х прие́млют и пою́т:/ вся дела́ Госпо́дня, Го́спода по́йте/ и превозноси́те Его́ во ве́ки.

Шум пою́щих красе́н быва́ет во святы́х хра́мех,/ па́че же иде́же лежа́т ны́не пра́ведныя твоя́ мо́щи, в день честна́го их пренесе́ния./ Царь же и архиере́й вели́кий со свяще́нными собо́ры све́тло пра́зднуют,/ и вси лю́дие сра́дуются, и веселя́тся, и пою́т:/ вся дела́ Госпо́дня, Го́спода по́йте/ и превозноси́те Его́ во ве́ки.

Ще́дрый Госпо́дь наш и Бог, ва́ших ради к Нему́ моли́тв,/ ще́дрит и ми́лует нас и подае́т нам вся блага́я и поле́зная./ Тем ра́дуемся и весели́мся и хвалу́ Ему́, Творцу́ своему́, воздае́м и пое́м:/ вся дела́ Госпо́дня, Го́спода по́йте и превозноси́те Его́ во ве́ки.

Я́ко свеща́ све́тла, непоро́чная твоя́ душа́ Го́сподеви предста́/ и пото́м во угото́ванное ей ме́сто несе́на бысть,/ иде́же Он Сам, всеви́дящее о́ко, весть,/ Ему́же ны́не пое́м и славосло́вим:/ вся дела́ Госпо́дня, Го́спода по́йте и превозноси́те Его́ во ве́ки.

Богоро́дичен: Из ложе́сн Твои́х неизрече́нно про́йде Сын Твой и Бог наш,/ Пречи́стая Де́во Влады́чице,/ и рождество́м Свои́м весь род челове́ч от идолослуже́ния свободи́./ Тем и аз, убо́гий и недосто́йный раб Твой, молю́ Ти ся,/ я́ко да Твои́ми к Нему́ ма́терними моли́твами/ свободи́т и мене́ от удержа́ннаго греха́ моего́.

Песнь 9

Ирмо́с: Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси́ я́ко Ма́терь Бо́га на́шего Чи́стую.

Те́сное и недоуме́тельное ума́ моего́ приими́, благоро́дне,/ а́ще неле́по и гру́бо счини́х ти сия́ ма́лыя пе́сни,/ но свои́м предста́тельством я́же к Бо́гу преудо́брено сотвори́ е/ и па́ки во благо́е почти́ е.

А́ще па́ки и недосто́йными устна́ми/ сия́ ма́лыя краегране́сия приноша́ем к тебе́, благоро́дне:/ но честны́я твоя́ мо́щи вельми́ похваля́ем/ и Христа́ Бо́га на́шего велича́ем,/ да́вшаго ти такову́ю благода́ть и си́лу.

Во дни на́ша яви́ Госпо́дь благода́ть Свою́ во всей вели́цей Росси́и,/ я́ко мо́щи твоя́ сицевы́м да́ром от Него́ почте́ны суть,/ тем вси лю́дие пою́т и велича́ют,/ и удивля́ются, и сла́вят Го́спода.

А́ще Бог тя просла́ви на небеси́ и на земли́, благоро́дне Дими́трие,/ мы же, гру́бии, ка́ко не воспое́м и не похва́лим сего́ вели́чия Бо́жия,/ сбы́вшагося на тебе́, благоро́дне./ Тем ра́дуйся и весели́ся, предстоя́ Ему́, Невече́рнему Све́ту.

Богоро́дичен: С боле́зненною душе́ю и с сокруше́нным се́рдцем вопию́ Ти, Влады́чице:/ бу́ди ми Помо́щница в день стра́шнаго о́наго испыта́ния Сы́на Твоего́ и Бо́га моего́,/ егда́ бу́дет суди́ти живы́м и ме́ртвым/ и возда́ти кому́ждо по дело́м на́шим.

Свети́лен:

Спрославля́ет тя вся ру́сская земля́,/ и восхваля́ет тя ца́рствующий град Москва́,/ я́ко от ца́рскаго ко́рене произше́л еси́, и к Самому́ Царю́ царе́м возше́л еси́,/ и и́маши к Нему́ дерзнове́ние./ Тем вы́ну моли́ Его́ дарова́ти нам ве́лию ми́лость.

Сла́ва, и ны́не, Богоро́дичен:

Уста́в рождества́ Твоего́ удивля́ет и ужаса́ет всех, Де́во Ма́ти Чи́стая,/ па́че бо ума́ и сло́ва родила́ еси́ Све́та Преве́чнаго, Христа́,/ просвети́вшаго весь мир рождество́м Свои́м.

На хвали́тех стихи́ры, глас 8.

Подо́бен: О, пресла́внаго чудесе́:

О, вели́ких Боже́ственных даро́в/ ца́рствующему гра́ду Москве́,/ я́ко име́ет в себе́ сокро́вище пребога́то,/ мо́щи и телеса́ нетле́нны/ святы́х вели́ких чудотво́рцев Петра́, Алекси́я и Ио́ны,/ с ни́ми же и сего́ благове́рнаго царе́вича Дими́трия,/ и́же вку́пе мо́лят о нас,/ дарова́ти нам мир и ве́лию ми́лость.

О, вели́ко Бо́жие дарова́ние/ на тебе́, благове́рне царе́вича Дими́трие,/ я́ко сочета́ся числу́ сих трие́х вели́ких иера́рхов,/ вку́пе же и блаже́нней дво́ице – Макси́му и Васи́лию,/ и́же вы́ну предстоя́т Бо́гу Вседержи́телю/ и моле́ние творя́т о всех лю́дех,/ о е́же бы им получи́ти вся блага́я и поле́зная./ Тем о них вку́пе моли́,/ дарова́ти им мир и ве́лию ми́лость.

Прииди́те, вси моско́встии наро́ди,/ воспое́м и возвели́чим Христа́,/ да́вшаго нам ве́лию Свою́ благода́ть–/ трие́х сих вели́ких святи́телей/ со блаже́нною се́ю дво́ицею,/ с ни́миже и сего́ благове́рнаго царе́вича Дими́трия,/ я́ко таковы́м же да́ром почте́на суть от Него́же,/ и́же ны́не с ни́ми мо́лит о нас,/ дарова́ти нам ве́лию ми́лость.

Сла́ва, глас то́йже. Самогла́сен:

Ра́дуйся па́ки и весели́ся,/ кра́сный душе́ю, благове́рия ве́тве,/ царе́виче Дими́трие,/ я́ко пе́рвенствующим яви́ся во оте́чествии свое́м,/ я́коже мно́го крат реко́хом ти,/ я́ко вели́ку да́ру от Бо́га сподо́бися/ зде и в бу́дущем ве́це./ И та́мо у́бо чи́стая твоя́ душа́, я́ко свет, возсия́,/ зде же мо́щи твоя́ всех удивля́ют и просвеща́ют,/ приходя́щих к ним с ве́рою./ Тем, не престая́, мо́лим тя:/ моли́ о нас Человеколю́бца Бо́га,/ да пода́ст нам мир и ве́лию ми́лость.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

НА ЛИТУРГИ́И

Блаже́нны от кано́на, пе́сни 3-я и 6-я. По вхо́де, Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой внегда́ моли́тимися к Тебе́. Апо́стол к Тимофе́ю, зача́ло 292. Аллилу́ия, глас 4. Пра́ведник, я́ко фи́никс, процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех до́му Бо́га на́шего процвету́т. Ева́нгелие от Иоа́нна, зача́ло 52. Прича́стен: В па́мять ве́чную:

Перенесение святых мощей благоверного царевича Димитрия

Перенесение святых мощей благоверного царевича Димитрия, убитого 15 мая 1591 года (сведения помещены 15 мая), из Углича в Москву совершилось в 1606 году. Побуждением к этому было желание, по выражению царя Василия Шуйского, «уста лжущия заградить и очи неверующия ослепить глаголющим, яко живый избеже (царевич) от убийственных дланей», ввиду появления самозванца, объявлявшаго себя истинным царевичем Димитрием. Торжественно были перенесены святые мощи и положены в Архангельском соборе Московского Кремля, «в приделе Иоанна Предтечи, идеже отец и братья его». После многочисленных чудесных исцелений от святых мощей в том же 1606 году «составиша празднество царевичу Димитрию трижды в год – рождение (19 октября), убиение (15 мая), перенесение мощей в Москву (3 июня)».

Сре́тение о́браза преподо́бнаго Дими́трия игу́мена, и́же на Прилу́це, Волого́дскаго чудотво́рца

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Прехва́льнии м́ученицы:

Преподо́бне о́тче Дими́трие,/ земну́ю сла́ву преоби́дев,/ Боже́ственную добро́ту приобре́те,/ со А́нгельскими ли́ки благода́ть пресвято́му твоему́ о́бразу/ испроси́л еси́, блаже́нне,/ Христо́ви моли́ся/ дарова́ти душа́м на́шим мир и ве́лию ми́лость.

Преблаже́нне о́тче Дими́трие,/ от младе́нства Бо́га возлюби́л еси́,/ усе́рдно соверши́л еси́ Боже́ственная Его́ повеле́ния,/ Ему́же ны́не моли́ся/ о и́же благоче́стно ве́рою/ священноле́пный твой о́браз почита́ющих.

О́тче Дими́трие Богому́дре,/ ты от пеле́н Бо́гу обетова́н еси́/ и я́ко служи́тель ве́рен Того́ стопа́м после́дова,/ Ему́же моли́ся спасти́ рабы́ твоя́ от злых обстоя́ний,/ первообра́зную твою́ добро́ту песносло́вящих.

Сла́ва, глас 8:

Мона́хов мно́жества/ наста́вника тя почита́ем, о́тче наш Димитрие,/ твое́ю бо стезе́ю вои́стинну пра́во ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры, глас 2.

Подо́бен: До́ме Евфра́фов:

Дом Пресвята́го Ду́ха был еси́, преподо́бне,/ чистоты́ ра́ди души́ твоея́/ хода́тай к Бо́гу о всем ми́ре показа́ся,/ тем духо́вныя пе́сни/ пресвято́му твоему́ о́бразу прино́сим, свя́те.

Стих: Честна́ пред Го́сподем/ смерть преподо́бных Его́.

Досто́йно и́мя зва́ния обре́те,/ преблаже́нне Дими́трие чудотво́рче,/ чудотво́рец бо еси́ вои́стинну показа́лся,/ источа́еши чудеса́/ и́же всесвяты́й твой о́браз пра́зднующим.

Стих: Блаже́н муж, бояйся Го́спода,/ в за́поведех Его́ восхо́щет зело́.

Преблаже́нне о́тче Дими́трие,/ приими́ сие́ моле́ние на́ше,/ Ду́ха благода́тию свы́ше ороси́,/ и испроси́ нам грехо́в оставле́ние,/ и вся на́ша проше́ния поле́зная устро́й.

И ны́не, Богоро́дичен, глас то́йже:

Де́во Пресвята́я Мари́е,/ приими́ сия́ моли́твы на́ша/ и донеси́ к Сы́ну Твоему́ и Бо́гу на́шему,/ да пода́ст нам, Богоро́дице,/ оставле́ние согреше́ний на́ших.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, преподо́бне о́тче Дими́трие,/ из младе́нства ты ум свой впери́в Бо́гови/ и на Того́ все свое́ возложи́в упова́ние,/ к Небе́сным тече́ние испра́ви/ и та́мо вседу́шно ше́ствие творя́ше,/ порабо́та в жи́зни сей Всеви́дящему Спа́су,/ тем чудотво́рец вселе́нней от Него́ дарова́ся ве́рным на спасе́ние,/ Ему́же моли́ся дарова́ти душа́м на́шим/ мир и ве́лию ми́лость.

Ра́дуйся, честны́й наш учи́телю,/ главо́ доброразсу́дная,/ чудотво́рче Дими́трие,/ ты бо, жела́нием Христо́вым распали́в твою́ блаже́нную ду́шу/ и Того́ зна́мением кре́стным вооружи́в себе́,/ мы́сленных враг четы́ ⁵ победи́л еси́/ посто́м и моли́твами и, сле́зным мно́жеством/ просвети́в твое́ душе́вное о́ко,/ огнепа́льныя стра́сти погаси́, му́дре,/ тем сосу́д Свято́му Ду́ху обре́теся,/ Ему́же о нас моли́ся, дарова́ти душа́м на́шим/ мир и ве́лию ми́лость.

Ра́дуйся, преблаже́нне Дими́трие,/ и́го Христо́во от ю́ности своея́ взем,/ непокори́вое по́хоти порабо́тив ду́хови,/ всено́щными бде́нии и моли́твенным пристра́стием/ неотсту́пен Бо́гови предстоя́л еси́,/ бо́дрость духо́вную к Нему́ от земны́х возводя́ при́сно,/ тем благоустро́ен дом Пресвяты́я Тро́ицы обре́теся,/ Ея́же ны́не в себе́ име́я, неизрече́нная чудеса́ сотворя́еши/ любе́зне почита́ющим сре́тения твоего́ о́браза пра́здник.

И́ны стихи́ры свято́му о́бразу, глас 2.

Подо́бен: Ки́ими похва́льными:

Ки́ими похва́льными пе́сньми/ воспое́м пречестны́й о́браз чудотво́рца Дими́трия?/ Той бо есть наставля́емь от Бо́га,/ самозва́н прии́де к нам,/ посети́ти лю́ди правосла́вныя/ и от всех неду́г на́ших разреше́ние пода́ти,/ не от челове́к бо, но от Бо́га Самоде́ржца/ ве́рою прише́ствие пресла́вно творя́ще к нам,/ его́же ра́ди низложи́ враго́в шата́ния,/ Христе́ Бо́же наш, Спа́се всего́ ми́ра,/ име́яй всебога́тую ми́лость.

Ки́ими добро́тными устна́ми/ восхва́лим священноле́пное подо́бие чудотво́рца Дими́трия?/ Пресве́тлое украше́ние Це́ркви Бо́жия,/ исто́чника неисчерпа́емых даро́в Бо́жиих,/ проли́тие духо́вных исцеле́ний,/ ре́ку мно́гих чуде́с неоскудева́емых,/ бесо́м прогони́теля, челове́ком спаси́теля безбе́днаго./ Ему́же лик соста́вльше,/ ра́достно воспева́ем Всеще́драго Спа́са,/ И́же та́ко просла́вльшаго Своего́ уго́дника.

Ки́ими духо́вными пе́сньми/ воспое́м пречу́дный о́браз?/ К нему́же вси свяще́ннии собо́ри вку́пе соше́дшеся,/ непреста́нно пе́ние соста́вльше Спа́су всех, Богу/ за проше́ние вся́кое,/ я́ко да Всеще́дрый Бог уще́дрит благове́рныя лю́ди,/ спаса́я град Свой и страну́ на́шу от злых нахожде́ний/ моли́твами преподо́бнаго Дими́трия.

Слава, глас 8, самогласен:

Укра́шен доброде́тельми духо́вными,/ преподо́бне о́тче наш Дими́трие,/ просла́ви бо тя Госпо́дь Бог житие́м же и чудесы́,/ в преставле́нии же твое́м ду́ши ве́рных облагоуха́л еси́ и телеса́./ Днесь ны́не, блаже́нне,/ и нас моли́твами твои́ми очи́сти от вся́ких грехопаде́ний,/ пра́зднующих святу́ю па́мять твою́,/ и со стра́хом и любо́вию припа́дающих к твоему́ гро́бу чудотво́рному,/ и о́браз подо́бия твоего́ любе́зно целу́ющих,/ не преста́й моля́ся за правосла́вныя лю́ди/ и за твое́ ста́до богозва́нное,/ я́ко да Ми́лостивый Госпо́дь спасе́т ду́ши на́ша.

И ныне, Богоро́дичен: Царю Небе́сный:

Вход. Проки́мен дне и чте́ния три преподо́бническая.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 8:

Тезоимени́таго ра́ди жития́ твоего́/ и предо́браго ра́ди твоего́ благонра́вия/ наста́вник бысть и́ноком,/ с ни́ми же на Не́бо теку́щую стезю́, путь ше́ствовав,/ Христу́ Бо́гу угоди́л еси́,/ Ему́же ны́не предстои́ши с преподо́бными все́ми,/ испроси́ любоче́стне почита́ющим сре́тения о́браза твоего́ боголюбе́зный пра́здник/ вку́пе со святы́м твои́м ста́дом/ грехо́в оставле́ние и спасе́ние душа́м на́шим.

Прииди́те, ве́рных соедине́ние,/ наро́ди пра́зднолюбе́знии,/ новора́сленая овча́та богослове́сная/ Прекро́ткаго Па́стыря Влады́ки Христа́,/ вку́пе и христоимени́тое ста́до богозва́нное,/ духо́вная ча́да преподо́бнаго,/ днесь совокупи́м ликова́ние духо́вное,/ Боже́ственными пе́нии почти́м пресла́внаго о́браза/ священноле́пное подо́бие чудотво́рца Дими́трия/ и с весе́лием и ве́рою восприи́мем да́ры духо́вныя,/ раздае́мыя рабо́м Бо́жиим,/ приходя́щим к нему́ с ве́рою и любо́вию,/ пра́зднующим сре́тения о́браза его́ пра́здник.

Преподо́бне о́тче Дими́трие,/ кто не удиви́тся, ви́дев твоя́ пресла́вныя от Бо́га дарова́ния:/ коли́ких благ сподобля́еши/ священнообра́зное твое́ подо́бие любо́вию почита́ющих./ Ви́дим бо́, днесь соше́дшемуся наро́ду мно́жеству/ ре́ки чуде́с пролива́еши/ от свята́го твоего́ гро́ба,/ незави́стно здра́вие подава́еши,/ те́мже, преблаже́нне, о́тче наш,/ неотсту́пно пребу́ди с на́ми, с ча́ды твои́ми,/ сохраня́я град твой от вся́ких лю́тых напа́стей/ и спасе́ние подава́я душа́м на́шим.

Сла́ва, глас 6:

Ра́дуйся и весели́ся,/ ру́сская всеосвяще́нная Це́рковь Бо́жия/ со свяще́нники же и с кня́зи благочести́выми,/ и́ноки же и просты́ми,/ блаже́ннаго Дими́трия днесь па́мять почита́юще,/ духо́вне соше́дшеся, пра́зднуем/ и, гроб его́ обстоя́ще,/ любе́зно покланя́ющеся, мо́лимся, реку́ще:/ ра́дуйся, преподо́́бне Дими́трие,/ свети́льниче пресве́тлый и врачу́ боля́щим,/ моли́твенниче ко Спа́су Христу́ Бо́гу на́шему,/ о и́же ве́рою и любо́вию притека́ющих к тебе́,/ спасти́ся душа́м на́шим.

И ны́не, Богоро́дичен: Творе́ц и Изба́витель:

На стихо́вне стихи́ры, глас 5.

Подо́бен: Преподо́бне о́тче:

Преподо́бне о́тче, свя́те Дими́трие,/ из младе́нства Того́ взыска́л еси́ усе́рдно/ и Того́ за́поведи непоро́чно соблюде́,/ сего́ ра́ди и Той просла́ви тя/ и ди́вна сотвори́ тебе́ во вся страны́,/ сотворя́еши бо чудеса́ пресла́вная/ и исцеле́ния то́чиши неоскуде́ема,/ прогоня́еши неду́ги теле́сныя,/ здра́вие пода́еши приходя́щим ти с ве́рою,/ любоче́стне почита́ющим священноле́пное твое́ подо́бие.

Стих: Честна́ пред Го́сподем/ смерть преподо́бных Его́.

Богому́дре свя́те Дими́трие,/ прекра́сное жили́ще Свято́му Ду́ху обре́теся,/ от Него́же прии́м чуде́с дарова́ний Боже́ственных,/ подае́ши ско́рое присеще́ние ⁶ духо́вными ли́ки/ воспева́ющим ангелоле́пное твое́ подо́бие,/ и сего́ ра́ди того́ любо́вию подвиза́еми,/ моле́ние прино́сим тебе́:/ испроси́ грехо́в оставле́ние/ любоче́стне почита́ющим свята́го твоего́ подо́бия/ вселюбе́зный пра́здник.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богому́дре Дими́трие,/ от ю́ности любви́ ми́ра не совокупи́ себе́,/ но любы́ Бо́жия Спа́су всего́ ми́ра при́сно совокупи́ тебе́,/ и сего́ ра́ди пресвяты́й твой священноле́пный о́браз/ благода́тен дар всему́ ми́ру дарова́ся,/ пресве́тлыми чудесы́ твои́ми озаря́я ду́ши ве́рных,/ его́же достохва́льными пе́сньми воспева́юще,/ ра́дости наполня́ем ду́ши на́ша,/ исцеле́ния от неду́г прие́млем/ моли́твами твои́ми, свя́те.

Сла́ва, глас 8:

Преподо́бне о́тче наш Дими́трие,/ твоя́ мо́щи честны́я/ оби́льно всегда́ источа́ют исцеле́ния/ ве́рою приходя́щим к тебе́:/ благоуха́ния всех исполня́яй духо́внаго/ и тьму бесо́вскую дале́че прогоня́я,/ све́том благоче́стия ве́рных сердца́ озаря́я,/ те́мже мо́лим тя, раби́ твои́,/ вся́каго наве́та вра́жия нас изба́вити,/ я́ко да, ра́достною душе́ю/ свято́е твое́ пра́зднество духо́вно пра́зднующе,/ прославля́ем Спа́са на́шего,/ И́же тебе́ та́ко просла́вльшаго,/ еди́наго во святы́х Свои́х Бо́га на́шего.

И ныне, Богоро́дичен: Безневе́стная Де́во:

Тропа́рь, глас 4:

Возсия́ днесь, я́ко со́лнце,/ пречестны́й о́браз священноле́пнаго твоего́ подо́бия,/ па́че со́лнца луча́ми чуде́с твои́х всех озаря́я,/ тьму бесо́вскую без ве́сти творя́,/ его́же ра́достно срета́ху,/ духо́вныя ли́ки соста́вльше,/ непреста́нно вопие́м ти:/ Дими́трие, о́тче наш, моли́ Спа́са всех/ сохрани́ти град твой и страну́ на́шу,/ ста́ду твоему́ спасе́ние подава́я/ и ве́лию ми́лость.

Сла́ва, и ны́не, Богоро́дичен: Е́же от ве́ка утае́нное:

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Приспе́ пресве́тлый пра́здник честна́го о́браза чудотво́рца Дими́трия:/ прииди́те, соше́дшеся, пра́зднуем све́тло,/ псалмы́ и пе́сньми духо́вными почти́м его́,/ да прии́мем оставле́ние согреше́ний на́ших,/ исто́чник бо есть неисчерпа́емых духо́вных дарова́ний/ пра́зднующим све́тло всесвяты́й его́ пра́здник.

Сла́ва, и ны́не, Богоро́дичен:

Да Свой взы́щеши о́браз, страстьми́ погребе́нный, Спа́се,/ Небе́сных утаи́вся суще́ств, от Пресвяты́я Де́вы воплоти́ся,/ Е́йже со А́нгелом возопии́м:/ ра́дуйся, Обра́дованная.

По 2-м стихосло́вии седа́лен, глас 1:

Прииди́те, ликовству́им све́тло/ свята́го дне сего́ свято́е торжество́,/ ра́достно воспева́юще святоле́пнаго подо́бия пресвяту́ю све́тлость чудотво́рца Дими́трия,/ в па́мять предлага́юще к нам его́ пресвята́го о́браза пресла́вное прише́ствие,/ прии́де бо па́ки просвети́ти нас/ и соверше́нно здра́вие от неду́г на́ших дарова́ти нам,/ усе́рдно почита́ющим всесвяты́й его́ пра́здник.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего,/ из Тебе́ воплоти́вшееся, разуме́хом, Богоро́дице Де́во,/ еди́на Чи́стая и Благослове́нная,/ Его́же ра́ди Тя, ублажа́юще, непреста́нно велича́ем.

По полиеле́и седа́лен, глас 8:

Пропове́дуются я́ве Боже́ственная твоя́ исправле́ния днесь/ от свята́го твоего́ гро́ба богому́дрых чуде́с твои́х,/ и, велегла́снее трубы́ вопию́ще,/ невеща́тельными вопие́ньми ясне́е всем сказу́юще/ вели́кое еже к Бо́гу твое́ дерзнове́ние, Дими́трие свя́те,/ Ему́же о нас моля́ся непреста́й,/ о и́же ве́рою творя́щих боголюбе́зно твоего́ подо́бия пресвяты́й пра́здник/ и любо́вию почита́ющих святу́ю твою́ па́мять.

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́ния мя су́ща, скве́рно жили́ще/ и де́монов игра́лище в ра́зуме бы́вша,/ потши́ся от сих злоде́йствия мя изба́вити, све́тло жили́ще доброде́тельми соде́лавши./ Светода́тельная Нетле́нная,/ разжени́ о́блак страсте́й и Вы́шняго прича́стия сподо́би/ и Све́та Невече́рняго моли́твами Твои́ми.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же возда́де ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возлю́блен бысть Бо́гом от чре́ва ма́терня,/ я́коже други́й Се́ргий преподо́бный вели́кий,/ о́тче наш Дими́трие,/ и с ним благоду́шественно Спаси́телю Бо́гу угоди́л еси́/ и Свята́го Ду́ха сосу́д яви́лся еси́ избра́нный,/ и́нокующим жезл кре́пости/ и всем тре́бующим чудотво́рный пода́тель,/ испроси́ нам от Христа́ Спа́са, чту́щим тя,/ ве́лию ми́лость.

Кано́н Богоро́дицы со ирмосо́м на 6 и преподо́бному два, на 8. Кано́н преподо́бному, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глуби́ны невосоде́лавшая.

Трисве́тлаго Божества́ заря́ми просвеща́емь, преподо́бне,/ заре́ю Ду́ха просвети́ моя́ помышле́ния,/ грехо́в оставле́ния проси́ при́сно,/ да с ве́рными воспою́ честна́го твоего́ подо́бия пра́здник.

Любо́вию Бо́жиею разгора́яся,/ житие́ свое́ доброде́тельми соверши́л еси́,/ и́миже Небе́снаго прия́тия насле́дник бы́ти сподо́бился еси́,/ ему́же и нас сотвори́ бы́ти прие́мники,/ да тя у́бо воспева́ем.

В незаходи́мых Све́тех пребыва́я, Дими́трие свя́те,/ при́сно посеща́й чад свои́х,/ ороси́ благода́ть твою́ свы́ше на рабо́в твои́х,/ оставле́ние подая́ от собла́зн на́ших/ непреста́нно воспева́ющим честна́го твоего́ подо́бия пра́здник.

Богоро́дичен: Еди́наго во двою́ благоче́стно ве́мы естеству́,/ И́же от утро́бы Твоея́ рожде́нна, Пренепоро́чная,/ Бо́га вку́пе па́че естества́ и челове́ка,/ иму́ща соверше́нное ко́ждо сво́йство.

Други́й кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Благода́рное пе́ние, ны́не приноси́мое, чад свои́х не пре́зри, свя́те,/ но, я́ко оте́ц чадолюби́вый, приими́,/ сия́ доноша́яй Творцу́ и Бо́гу,/ да сре́тения твоего́ пра́здник любо́вию почита́ем.

Па́ки нас честна́го твоего́ подо́бия прише́ствием весели́ши,/ и сего́ прикоснове́нием всех освяща́еши,/ и от всех неду́г исцеле́ния подава́еши,/ при́сно любо́вию, че́стне, почита́ющим пресвяты́й твой пра́здник.

Изба́ви ста́до твое́, преподо́бне, грехо́вныя бу́ри и бед вся́ких,/ наставля́я нас при́сно в приста́нище спасе́ния,/ да в ра́дости мно́зе приноша́ем свяще́нному твоему́ подо́бию духо́вныя пе́сни.

Богоро́дичен: Богоро́дице Пренепоро́чная, Я́же Бо́га прие́мши в ложесна́х Твои́х боже́ственно,/ разреши́ мрак души́ моея́ и просве́ти, Де́во,/ да восхвалю́ Тя.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный Хра́ме неизрече́нныя сла́вы Твоея́, Человеколю́бче.

Вся оста́вив ми́ра сего́ тле́нная,/ Спа́са всех взыска́л еси́,/ соверши́л еси́ за́поведи Его́ боже́ственне и до́бре,/ от Него́же цели́тель показа́ся душа́м на́шим/ и моли́твенник непреста́нный о чту́щих свяще́нное твое́ подо́бие.

Маловре́менную сла́ву не восхоте́, блаже́нне,/ но Небе́сную добро́ту получи́л еси́,/ отню́дуже благода́ть прие́м Пресвята́го Ду́ха,/ чудесы́ всех просвеща́еши,/ и́же пресвято́му твоему́ о́бразу пра́зднующих любо́вию.

Житие́м твои́м доброде́тельным благочести́выя просвети́л еси́,/ чудесы́ же твои́ми Богому́дрыми, свя́те, вся удиви́л еси́,/ ве́рно же пою́щих пресвято́му твоему́ подо́бию освяща́еши при́сно.

Богоро́дичен: Све́тлым Тя гла́сом и ны́не от души́/ вои́стинну Богома́терь, Бо́га ро́ждшую, пропове́даем,/ и воплоще́нна из Тебе́ Безпло́тнаго, в нас все́льшася ⁷,/ непреложе́ние прии́мша, несмеше́нием сме́шшася, Пренепоро́чная.

Ин

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́,/ несть бо свят, па́че Тебе́, Человеколю́бче.

Многогре́шнаго, нераде́нием изжи́вша житие́, не возгнуша́йся, преподо́бне,/ но твои́ми моли́твами очи́сти мя́ от вся́ких грехо́в,/ и́же пресвято́му твоему́ о́бразу ны́не воспе́вшаго.

В жи́зни сей мно́гим путь бысть ко спасе́нию/ пресве́тлым житие́м твои́м, прообразова́ше нетле́нная./ Те́мже и по сме́рти твое́й/ Бог прибе́жище всем нам показа́л тя есть и моли́твенника ве́рна,/ чту́щим свяще́нное твое́ подо́бие.

Нищету́ на́шу душе́вную покры́й благода́тию,/ грехо́в разреше́ние прося́ прия́ти нам,/ да сре́тения твое́го пра́здник пречу́днаго о́браза ве́рно пра́зднуем.

Богоро́дичен: И́же в плоть за премно́гую Твою́ бла́гость/ вои́стинну обо́лкся, Бог вку́пе и Челове́к/ сугу́б естествы́ познава́ется.

Седа́лен, глас 4.

Подо́бен: Ско́ро предвари́:

Возжеле́л еси́ он век присносу́щный,/ измени́в при́сно пребыва́ющая ми́ра сего́ тле́нными,/ те́мже к Небе́сным оби́телем невозбра́нно прите́кл еси́, Богому́дре Дими́трие, о́тче наш,/ Спа́су всех моли́ся/ спасти́ и́же честно́е твое́ сре́тение пе́сньми сла́вящих.

Сла́ва, и ны́не, Богоро́дичен:

Свет ро́ждшая пречестны́й,/ от Отца́ возсия́вша пре́жде всех век,/ просвети́, Отрокови́це, ду́шу мою́ и ум,/ дале́че от мене́ отгоня́щи тьму страсте́й,/ да Тя ублажа́ю, Присноблаже́нную, ве́рным упова́ние.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во спасе́ние на́ше и обновле́ние.

Вели́ких доброде́телей де́латель, Богому́дре, был еси́,/ и́миже дости́же ве́чная блага́я,/ иде́же с ли́ки святы́х А́нгел веселя́ся,/ испроси́ нам получи́ти ми́лость,/ и́же пресвято́му твоему́ о́бразу пе́ние принося́щим.

Жития́ твоего́ красото́ю богому́дрою красу́ется оби́тель твоя́, свя́те,/ ученицы́ же твои́ боголюбе́знии ра́достно Бо́га воспева́ют,/ тя та́ко просла́вльшаго.

Уче́нии твои́ми богому́дрыми учени́к ста́до непоро́чно приведе́ Бо́гови,/ с ни́ми же моли́ся и нам сохране́нным бы́ти в Боже́ственней Того́ сла́ве,/ и́же священноле́пную твою́ добро́ту хвала́ми почита́ющих.

Богоро́дичен: Чуде́с превы́ше вели́кое чу́до, Чи́стая, рождества́ Твоего́ зри́тся,/ ражда́еши бо Христа́, плоть бы́вша,/ кроме́ при́меса и смеше́ния.

Ин

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Жили́ще Пресвято́му Ду́ху, прему́дре, обре́теся,/ дости́же кра́ю жела́ния духо́внаго,/ к Нему́ же простира́яся, жизнь сию в посте́х изнури́л еси́;/ те́мже мо́лим тя поми́ловати нас, чад свои́х,/ и́же свято́е твое́ сре́тение ве́рою сла́вящих.

Я́ко крин, в доброде́телех процве́л еси́,/ вино́м умиле́ния ду́ши напои́л еси́, благоче́стне, жа́ждущих,/ страсте́й скве́рну омыва́я слеза́ми свои́ми,/ и сего́ ра́ди любо́вию восхваля́ем при́сно свята́го твоего́ прише́ствия святоле́пный о́браз.

Удиви́л еси́, блаже́нне, пресла́вными чудесы́ твои́ми вси концы́ земли́,/ свята́го же твоего́ подо́бия прише́ствием просвети́ вселе́нную,/ те́мже тя духо́вными пе́сньми непреста́нно воспева́ем.

Богоро́дичен: Бог, посреде́ Тебе́ все́лься, я́коже весть,/ де́вства ключи́ не поколеба́, Чи́стая,/ на недви́жимом ка́мени ве́ры вся утве́рждь.

Песнь 5

Ирмо́с: Бог Сый ми́ра, Оте́ц Щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам,/ тем, Богоразу́мия к све́ту наста́вльшеся,/ от нощи́ у́тренююще,/ славосло́вим Тя, Человеколю́бче.

Земны́х всех небре́гл еси́, блаже́нне,/ Небе́сная блага́я стяжа́, му́дре,/ отню́дуже в чудесе́х изя́щен обре́теся,/ подава́еши приходя́щим к тебе́ ско́рое присеще́ние,/ и сего́ ра́ди тя при́сно хвала́ми почита́ем.

Приста́нище невла́емо всем ве́рным в жи́зни сей, блаже́нне, был еси́,/ ни́щим пита́тель, печа́льных уте́шитель,/ те́мже вопие́м ти:/ и нас не забу́ди в моли́твах свои́х к Бо́гу,/ назира́й нас всегда́.

Миролю́бных душ отвраща́яся,/ Небе́снаго ми́ра – Христа́, взыска́л еси́, о́тче,/ и Того́ обре́те благи́ми де́лы,/ раздава́еши Боже́ственныя да́ры/ свята́го твоего́ подо́бия честны́й о́браз любо́вию почита́ющим.

Богоро́дичен: И́же естество́м Неопи́санный, вообра́жся из Тебе́,/ на́ше писа́ние пло́тски прия́т, Влады́чице,/ в существе́ и хоте́ниих сугу́бых познава́ем.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Подража́тель Христо́вых за́поведей был еси́,/ и сего́ ра́ди, преподо́бне, к тре́бующим ми́лостив быва́ше,/ те́мже днесь, любо́вию соше́дшеся,/ свята́го твоего́ подо́бия о́браз хвала́ми почита́ем.

Испо́лни ра́дости и весе́лия сердца́ на́ша,/ и́же в моли́твах тебе́ вы́ну призыва́ющих,/ и испроси́ грехо́в оставле́ние/ свято́му твоему́ о́бразу, блаже́нне, духо́вныя пе́сни воспева́ющим.

Преблаже́нна бысть свята́я оби́тель твоя́, Богому́дре,/ име́ющи внутрь себе́ мо́щи твоя́ и свяще́нное твое́ подо́бие,/ прехва́лен же и град тво́й,/ и́же тобо́ю дарова́ся ⁸ от всех Бо́га.

Богоро́дичен: Твоя́ чудеса́ прови́дя Боже́ственным Ду́хом, Иса́ия взыва́ше:/ се во чре́ве прии́меши Непостижи́маго воплоща́ема, Чи́стая.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Посто́м и моли́твами жизнь свою́ препроводи́л еси́,/ возвесели́л еси́ И́же над все́ми при́сно сла́вимаго Бога,/ пресве́тлыми же чудесы́ твои́ми весь мир озари́л еси́,/ те́мже тебе́, преподо́бне, при́сно в пе́снех почита́ем.

Кро́тость и незло́бие в житии́ сем стяжа́л еси́,/ подо́бяся своему́ Влады́це, Прекро́ткому Па́стырю,/ и сего́ ра́ди и́ноком прему́др наста́вник бысть,/ с ни́ми же Спа́су всех угоди́л еси́.

Житию́ А́нгельскому ревни́тель бысть, свя́те,/ подража́я тех ангелоле́пное подо́бие,/ с ни́ми же, блаже́нне, и нас помина́й,/ и́же святы́й твой о́браз ве́рою сла́вящих.

Богоро́дичен: Де́вствуеши, я́коже пре́жде, ро́ждши Христа́,/ млеко́м пита́еши всем пи́щу подаю́щаго, Чи́стая,/ пресла́вно ди́вно чу́до и непостижи́мо.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти́,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

При́зри, блаже́нне, на предстоя́щия ти свяще́нныя собо́ры/ и на свято́е твое́ ста́до,/ моле́ния принося́щия свято́му твоему́ о́бразу за проше́ние вся́ко,/ и изба́ви град твой и страну́ на́шу от вся́ких скорбе́й.

Свети́льник на све́щнице яви́ся священноле́пный твой образ,/ светя́ всем конце́м земли́ чудесы́ тво́ими,/ богому́дрых всех освяща́я, и́же пресвяты́й твой пра́здник ве́рою сла́вящих.

Вели́кий дар прече́стен – священноле́пный твой о́браз от Бо́га дарова́ся,/ ко всех челове́к спасе́нию же и по́льзе,/ и́мже прогна́на бысть вся́ка си́ла неприя́зненна от вся́каго твоего́ достоя́ния/ и от вся́ка неду́га очи́стися.

Богоро́дичен: Родила́ еси́, Его́же Оте́ц пре́жде всех век роди́ Пребезнача́льна,/ и сосца́ми Пита́теля дои́ла еси́ па́че ума́,/ чу́до па́че сло́ва, Чи́стая, та́инство.

Конда́к, глас 8.

Подо́бен: Взбра́нной Воево́де:

Христа́ еди́наго в жи́зни сей во след идти́ возжела́л еси́/ и, Того́ любо́вию земна́я отри́нув, премину́в Небе́сными ⁹,/ с ли́ки А́нгел водворя́яся, неотсту́пно предстои́ши Бо́гови,/ тем и ны́не пресвято́му твоему́ о́бразу сре́тения пра́здник ра́достно сотворя́юще,/ от неду́г исцеле́ние прие́млем, благода́рно вопию́ще:/ ра́дуйся, преподо́бне о́тче Дими́трие, по́стников удобре́ние.

И́кос:

Боже́ственными доброде́тельми твои́ми, Богому́дре, себе́ украси́л еси́/ и Спа́су Христу́ жили́ще соде́ла, о́тче, му́жественне,/ я́коже зла́то, искуси́ся ве́рою к Бо́гу,/ наде́ждою и любо́вию обе́ты своя́ полага́я,/ воздержа́нием пости́вся, я́коже безпло́тен,/ в целому́дрии и смире́нии вознесе́ся;/ те́мже и мы духо́вная твоя́ ча́да, моли́твами твои́ми просвеща́еми,/ ра́достною душе́ю воспева́ем Боже́ственная твоя́ духо́вная исправле́ния/ и любо́вию пра́зднуем пречу́дному твоему́ пресвято́му о́бразу,/ и благода́рственно вопие́м ти:/ ра́дуйся, я́ко измла́да Бо́гу послужи́л еси́;/ ра́дуйся, притека́ющим к тебе́ ко спасе́нию хода́тай./ Ра́дуйся, лю́дем, правосла́вно ве́рующим, пресла́вная похвало́ и кре́пкое на враги́ одоле́ние;/ ра́дуйся, гра́ду твоему́ вели́кое утвержде́ние./ Ра́дуйся, святе́й оби́тели твое́й благонаде́жное ве́чное весе́лие;/ ра́дуйся, и́ноком пресла́вное украше́ние и наде́ждо спасе́ния./ Ра́дуйся, всем христиа́ном в беда́х прибе́жище и приста́нище спасе́ния;/ ра́дуйся, я́ко твои́ми моли́твами сопроти́вныя ду́хи побежда́ются./ Ра́дуйся, исто́чник чудесе́м неизчерпа́емый,/ да вси, и́же тобо́ю от Бо́га спаса́еми, непреста́нно зове́м ти:/ ра́дуйся, преподо́бне о́тче Дими́трие, по́стников удобре́ние.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

На земли́, я́ко безпло́тен, блаже́нне, поживе́ с пло́тию,/ к су́щим мира́ не приплета́яся ничи́мже,/ но, я́ко А́нгел, крило́ма твои́х доброде́телей ду́хом на Не́бо возлете́л еси́/ и сего́ ра́ди непреста́нно вопие́ши:/ оте́ц на́ших Бо́же, благослове́н еси́.

Удиви́л ¹⁰ тя есть Госпо́дь, блаже́нне, во всех де́лех Свои́х/ и стра́шна показа́ тя безпло́тным враго́м,/ и сего́ ра́ди пресвято́му твоему́ о́бразу гове́ют ¹¹ вси челове́цы,/ непреста́нно пе́ние вопию́ще при́сно:/ моли́твами твои́ми, свя́те, испроси́ нам у Христа́ ве́лию ми́лость.

Земна́я измени́в Небе́сными, свя́те,/ блага́я ве́чная восприя́л еси́/ и со А́нгельскими ли́ки све́тле весели́шися,/ неизрече́нныя добро́ты с ни́ми наслажда́яся,/ ея́же в слеза́х стяжа́л еси́,/ помина́й чад свои́х при́сно.

Богоро́дичен: Бог из Тебе́ бысть Челове́к,/ смеше́ние, Чи́стая, обожи́в челове́ческое/ и о́бщницы сотвори́в ны естества́ Боже́ственнаго/ в Тебе́, Блаже́нная в жена́х, вои́стинну Благослове́нная, Чи́стая.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

А́ще и земле́ю покрове́но бысть честно́е те́ло твое́, свя́те,/ но па́че со́лнца заря́ми пресве́тлых чуде́с твои́х весь мир озаря́еши,/ благоче́стне воспева́ющий пресвяты́й твой о́браз.

Стена́ необори́ма гра́ду твоему́ яви́ся/ светоле́пный твой о́браз, свя́те Дими́трие,/ к нему́ же притека́юще, не убои́мся супоста́тных враг,/ моли́твенника тя к Бо́гу те́пла стяжа́вше.

Имену́ется оби́тель твоя́, свя́те, во всех страна́х,/ чудесы́ твои́ми богому́дрыми крася́щеся,/ святоле́пней твое́й добро́те пресла́вно дивя́щися.

Богоро́дичен: Тя, добро́ту Иа́ковлю, еди́ну избра́ Еди́ный, Живы́й на Небесе́х,/ и, все́лься посреде́ Тебе́, Чи́стая,/ ника́коже поколеба́ де́вства Твоего́ ключа́, Благослове́нная.

Песнь 8

Ирмо́с: В пещи́ о́троцы изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Исто́чник исцеле́ний яви́лся еси́, преподо́бне,/ духо́вная твоя́ ча́да напая́еши Боже́ственныя сла́дости,/ река́ми же чуде́с твои́х весь мир облагоуха́л еси́,/ те́мже днесь, любо́вию соше́дшеся,/ непреста́нное тебе́ благодаре́ние прино́сим.

Звезда́ пресве́тлая вселе́нней дарова́ся,/ уясни́ на́ша сердца́, благоче́стне тебе́ пе́ние принося́щих,/ душе́вная на́ша чу́вства в поле́зная испра́ви,/ да непреста́нное благодаре́ние всегда́, свя́те, прино́сим Тебе́.

Жития́ мо́ре немяте́жно преплы́л еси́,/ приста́нища о́наго Небе́снаго соверше́нне дости́гл еси́,/ иде́же пребыва́еши с преподо́бными все́ми,/ сла́вяще с ни́ми Творца́, всех Бо́га.

Богоро́дичен: Сень Тя, и трапе́зу, и Боже́ственный ковче́г,/ и ру́чку, вмести́вшую ма́нну, и жизнь, и свя́тую го́ру имену́ем,/ Де́во Мари́е, при́сно Благослове́нная.

Ин

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

На смире́ние на́ше ми́лостивно призира́й,/ и́же пресвяты́й твой о́браз присносла́вящих,/ изба́ви от вся́кия ско́рби ста́до твое́ и град твой,/ тебе́ бо те́пла предста́теля к Бо́гу, блаже́нне, стяжа́хом.

Ба́ня очище́ния, преподо́бне, яви́ся святы́й твой о́браз свято́му твоему́ ста́ду,/ струю́ благода́тну излива́я при́сно,/ очища́я душе́вная на́ша чу́вства, вку́пе и теле́сная.

Лик а́нгельский весели́тся днесь, зря́ще свяще́нное твое́ подо́бие,/ красо́тами чуде́с твои́х пресла́вно венча́емо/ и от всех челове́к благоче́стне почита́емо.

Богоро́дичен: Благослови́т вся тварь, Де́во, Рождество́ Твое́,/ вся́цеми благослове́ньми нас венча́вша и кля́тву отъе́мша,/ еди́на Благослове́нная и Препросла́вленная,/ Я́же род наш облагода́тствовавши.

Песнь 9

Ирмо́с: Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем.

На земли́, я́ко А́нгел, блаже́нне, стяжа́л жизнь а́нгельскую,/ Творцу́ всех, Бо́гу Спа́су, угоди́л еси́,/ Его́же Престо́лу с ли́ки святы́х ны́не предстои́ши,/ непреста́нно моли́ся всем христиа́ном на враги́ побе́ду и грехо́в оставле́ние дарова́ти,/ ве́рно чту́щим священноле́пный твой о́браз.

Кро́тость с незло́бием в жи́зни сей, преподо́бне, стяжа́л еси́,/ тем и зе́млю кро́тких насле́дова,/ с ни́ми же испроси́ нам грехо́в оставле́ние,/ и́же священнообра́зное твое́ подо́бие непреста́нно ублажа́ющим.

Вступль на ле́ствицу доброде́телей,/ до́лу влеку́щее мудрова́ние, о́тче прему́дре, оплева́л еси́/ и, яко пресве́тлое свети́ло, вселе́нней от Бо́га дарова́ся,/ просвеща́я всех ангелоле́пнаго твоего́ подо́бия Боже́ственными твои́ми дарова́нии.

Богоро́дичен: Грехолюбе́зный нрав и неиспра́влено житие́ зело́ иму́щаго,/ и те́ло, оскверне́но вся́чески, и гре́шну ду́шу,/ Де́во Влады́чице, спаси́ мя, раба́ Твоего́,/ и́же худогла́сное сие́ пе́ние в хвале́нии Твоего́ преподо́бнаго уго́дника воспе́вшаго.

Ин

Ирмо́с: Ка́мень нерукосе́чный от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся Тя, Богоро́дице, велича́ем.

Зерца́лом вои́стинну разре́шшимся/ лице́ Христо́во лице́м зре́ти сподо́бился еси́,/ немерца́ющим све́том от Него́ пресве́тло просвеща́яся,/ Ему́же о нас моля́ся не преста́й, о́тче Дими́трие,/ пребыва́й с на́ми, с ча́ды твои́ми,/ град твой и страну́ на́шу сохраня́я при́сно.

Смире́н нрав и высо́к,/ и́же по Бо́зе, в жи́зни сей стяжа́л еси́, блаже́нне,/ те́мже и Бог сла́вна тя показа́ всем конце́м,/ и сего́ ра́ди святоле́пный твой о́браз при́сно в пе́снех велича́ем.

Я́ко премно́гое дерзнове́ние име́я ко Христу́, свя́те Дими́трие, блаже́нне,/ у Него́ же испроси́ ми обрести́ ми́лость в День су́дный,/ получи́ти оставле́ние грехо́в мои́х,/ и́же твоему́ пресвято́му о́бразу пе́ние любо́вию прине́сшаго,/ да непреста́нно воспева́ю приснохва́льную твою́ добро́ту.

Богоро́дичен: Све́та, и́же в Тебе́, луча́ми, Богоневе́сто, ду́шу мою́ просвети́,/ лежа́щую во гро́бе поги́бели/ возста́ви, враги́ низлага́ющи, оскорбля́ющия при́сно се́рдце мое́/ и к страсте́м порева́ющия¹² мя.

Свети́лен:

Ду́ху Пресвято́му в жили́ще от чресл ма́терних избра́н бысть,/ столп светоза́рен всему́ ми́ру дарова́ся,/ пресве́тлыми заря́ми твои́х исправле́ний ста́ду твоему́ ду́ши просвети́л еси́,/ мрак страсте́й на́ших дале́че прогоня́я,/ те́мже, и́же пресвяты́й твой священноле́пный о́браз хвала́ми почита́ющих,/ непреста́нну моли́тву сотвори́ о нас к Бо́гу.

Сла́ва, и ны́не, Богоро́дичен:

Соединя́ется с пло́тию по соста́ву Пресу́щное Сло́во/ и еди́н от двою́ происхо́дит из Тебе́ несме́сно, Пречи́стая,/ обожи́в, я́же прия́т,/ те́мже прославля́ем вои́стинну Тя, Богоро́дицу.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́,/ чудотво́рче Дими́трие,/ ка́ко, земле́н сый пло́тию,/ мы́сленныя враги́ победи́л еси́,/ ору́жием, преблаже́нне, кре́стным на тех мы́сленне вооружа́яся,/ тем и ны́не со А́нгелы водворя́яся и преподо́бными все́ми,/ с ни́ми же моли́ся о нас, свя́те,/ любо́вию почита́ющих святоле́пный твой пра́здник.

О преблаже́нный о́тче Дими́трие,/ граждани́н яви́лся еси́ мы́сленнаго рая́,/ лоза́ пресве́тла виногра́да Христо́ва,/ плод иму́щи ве́чныя жи́зни,/ его́же восприе́млем вси, празднолюбе́знии,/ сла́дость име́им при́сно в душа́х свои́х,/ ра́дости наполня́ем сердца́ на́ша,/ благообра́зную твою́ добро́ту святоле́пную/ при́сно в пе́снех почита́юще.

О, пресла́внаго чудесе́!/ Сокро́вище неоску́дное духо́вных дарова́ний,/ исто́чник животеку́щих исцеле́ний,/ ста́ду твоему́ богозва́нному спасе́ние–/ пресвяты́й твой о́браз, пресла́вне Дими́трие,/ ве́рным же всем прибе́жище благонаде́жное,/ гра́ду твоему́ кре́пкое утвержде́ние,/ его́же сохраня́й необори́му бы́ти.

Сла́ва, глас 6:

Прииди́те, празднолю́бцы и по́стник сосло́вие,/ ве́рою соше́дшеся,/ и́стиннаго по́стника днесь па́мять почита́юще,/ ра́дуяся, ше́ствовавшаго по стопа́м Влады́ки Христа́/ у́зкий путь и безстра́стно житие́,/ я́коже дре́вле Авраа́м пра́ведный,/ о́тче Дими́трие, страннолю́бие притяжа́л еси́,/ та́коже пресели́ся от оте́чества своего́ до ме́ста,/ иде́же ны́не благоуха́еши исцеле́нии/ от честна́го те́ла твоего́ и свята́го о́браза/ всем, притека́ющим к тебе́ и вопию́щим:/ о всеблаже́нне и преподо́бне,/ по́стником похвало́ и собесе́дниче Безпло́тным,/ во́инству на́шему на пога́ныя посо́бниче/ и наста́вниче и́ноком,/ о нас моли́ся Христу́ Бо́гу/ спасти́ ду́ши на́ша.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

На Литурги́и слу́жба преподо́бническая.

Преподобный Димитрий Прилуцкий, Вологодский

Преподобный Димитрий Прилуцкий, Вологодский родился в начале XIV века в Переяславле-Залесском. Он происходил из благочестивой купеческой семьи, где на подраставшего сына смотрели как на продолжателя отцовской стези. С этой целью его рано отдали обучаться грамоте. Способный мальчик вскоре стал помогать отцу в торговом деле. Воспитанная родителями любовь к чтению душеспасительных книг пробудила в отроке сильное религиозное чувство, которое развивалось и уже в юношеские годы привело к неожиданному с житейской точки зрения решению: отказаться от богатого наследства в пользу брата, оставить отчий дом и уйти в Переяславский монастырь.

Приняв постриг в Нагорном Борисоглебском монастыре, преподобный Димитрий всецело отдался изучению Священного Писания и духовному деланию. Чистота его сердца, послушание, усердное всем служение снискали молодому иноку любовь и уважение братии. За свою равноангельскую жизнь он вскоре был удостоен священнического сана. Став иеромонахом, преподобный Димитрий решил посвятить себя делу монастырского строительства.

В те времена на севере Руси практически не существовало монастырей с общежительным уставом. Получив церковное разрешение и благословение, преподобный Димитрий покинул место своего пострига с намерением основать новую обитель, где бы он смог ввести правило строгого общежития.

На сыром, болотистом берегу Переяславского озера (на Болоте) преподобный Димитрий с помощью добрых людей поставил деревянный храм во имя святителя Николая Чудотворца и устроил при нем общежительную обитель.

Возведенный в сан игумена, преподобный Димитрий с любовью принимал всех приходивших к нему: и монахов из соседних монастырей, и мирян, желавших начать путь иноческого подвига. Несмотря на незавидное месторасположение обители, убогость ее построек и желание игумена совершать свое и ближних спасение в безвестности, слава о духовных дарованиях преподобного Димитрия перешагнула переяславские пределы.

В 1354 году произошло знаменательное событие в жизни преподобного Димитрия. Тогда в Переяславле жил епископ Владимиро-Волынский Афанасий. Во время пребывания святителя Алексия († 1378, память 12 февраля) в Константинополе он управлял там делами Русской Митрополии. К нему и пришел из дремучих радонежских лесов, расположенных в 60 верстах от Переяславля, тогда еще мало кому известный инок Сергий с собратьями просить для своей пустыни игумена. Духовнопрозорливый архипастырь, несмотря на отказы радонежского пустынника, именно его посвятил во игуменский сан.

К этому времени и относится встреча преподобного Димитрия с будущим великим учителем русского северного монашества, на долгие годы связавшая их узами глубокого духовного братства и единомыслия. Не раз отправлялся в радонежские леса преподобный Димитрий, чтобы в небольшом Троицком храме совершать с игуменом Сергием совместные молитвы.

Великий князь Московский Димитрий Иоаннович питал благоговейное уважение к святым подвижникам и всегда с благосклонным вниманием относился к преподобному Димитрию. Еще тогда, когда преподобный Димитрий был игуменом скромной обители на Болоте, великий князь просил его прибыть в Москву, чтобы стать восприемником одного из княжеских сыновей.

Удивительны целомудренная скромность и смирение преподобного Димитрия. По свидетельству жизнеописателя, святой подвижник был одарен особенной красотой, которую старался изгладить постом и всевозможными добровольными лишениями. Но от суровой жизни лицо его делалось еще прекраснее, поэтому преподобный не разговаривал с женщинами.

Одна знатная переяславская горожанка из праздного любопытства захотела увидеть лицо молодого игумена. Она подкралась к окну его келлии в то время, когда он готовился к литургии. Увидев сияющее красотой лицо преподобного Димитрия, женщина как подкошенная упала на землю, наказанная за свою дерзость расслаблением. Со слезами умоляла она братию испросить для нее прощения у игумена. Тронутый искренним раскаянием несчастной, игумен исцелил ее, с кротостью укорив: «Для чего ты, неразумная, захотела видеть грешника, уже умершего для мира?..»

Желая избегнуть человеческой славы, преподобный Димитрий, предварительно получив одобрение преподобного Сергия, оставил основанную им Никольскую обитель и покинул Переяславскую землю.

В сопровождении своего любимого ученика и друга Пахомия он направился в тогда еще почти незаселенный Вологодский край. Путники остановились у слияния рек Лежи и Великой, в 30 верстах от Вологды. Здесь они построили небольшой деревянный храм в честь Воскресения Христова.

Жители соседних авнежских селений, опасаясь как бы их земли и угодья не попали под будущий монастырь, потребовали, чтобы монахи удалились. Преподобный мог обратиться за помощью к великому князю Димитрию Иоанновичу Донскому, и тот счел бы за честь не только это место, но и всю Авнегу приписать к монастырю преподобного. Но смиренный подвижник, нисколько не оскорбившись несправедливой враждебностью авнежцев, посчитал их требование за указание Промысла и вместе с Пахомием отправился в Вологду.

Вологжане с любовью приняли странников и горячо просили их остаться, чтобы устроить новый монастырь. Монастыри хотя и имелись уже в Вологде, но среди них не было общежительного.

Такое радушие и настойчивость тронули преподобного, и несмотря на то, что сердце его стремилось к уединению, он уступил просьбам горожан, посчитав и их промыслительными. Усердно помолившись Богу, он отправился искать место для будущей обители.

В 3 верстах от города, на излучине реки Вологды, преподобный Димитрий остановился на засеянном поле ржи. Его владельцы, благочестивые крестьяне, узнав о планах преподобного, не только подарили ему эту землю, но и сами вытоптали всю ниву, чтобы не откладывать начала строительства. Преклонив колена, преподобный Димитрий просил Господа благословить это место и соделать его нивой духовной. Затем он водрузил в знак основания обители крест, который потом долго хранился как святыня в монастыре.

При помощи жителей Вологды, а также благодаря щедрому вкладу великого князя Димитрия Донского, поспешившаго принять участие в святом деле, 1 августа 1371 года построенный деревянный храм был освящен в честь Происхождения древ Животворящего Креста Господня. Тогда же было построено несколько келлий для братии, вскоре наполнившихся подвижниками, искавшими строгого иноческого общежития.

Преподобный Димитрий своей жизнью давал насельникам Спасо-Прилуцкого монастыря (так стала называться обитель) образец подлинного смирения. Ни на ком не было хуже одежды, как на самом игумене. Под ветхим тулупом, который зимой не спасал от холода, а летом заставлял обливаться потом, преподобный носил тяжелые вериги.

По многу дней он не принимал никакой пищи, а в праздники питался одной просфорой с теплой водой.

В храме преподобный Димитрий устроил себе место по левую сторону алтаря, отгородив его досками, чтобы незримо для других в слезах и коленопреклонениях изливать перед Богом свою душу.

С подвигами инока преподобный Димитрий соединял дела милосердия: принимал и кормил нищих странников, утешал обиженных и помогал бедным, причем милостыню игумен старался подавать тайно.

Преподобный Димитрий стяжал у Господа дар прозорливости. Однажды, занимаясь с братией строительством, он вдруг, прослезившись, сообщил о кончине великого князя Димитрия Донского и тотчас же начал молиться об упокоении его души. Братия, зная, что князь не был стар и ничем не болел, усомнилась в словах игумена. Через несколько дней из Москвы действительно пришла печальная весть, причем оказалось, что смерть великого князя наступила именно в тот день и час, когда о ней сказал преподобный Димитрий.

Предчувствуя близость кончины, игумен сам назначил себе преемника. Им стал его духовный сын и брат Пахомий. Когда преподобного спросили, где его похоронить, он ответил: «Извлеките грешное мое тело в болото и затопчите его там ногами...»

В ночь на 11 февраля 1392 года во всех келлиях распространилось необыкновенное благоухание. Поспешив к своему игумену, иноки нашли его уже отошедшим ко Господу.

Гробница со святыми мощами преподобного Димитрия сделалась вскоре неисчерпаемым источником чудес.

Древнее жизнеописание святого, составленное четвертым игуменом Спасо-Прилуцкого монастыря Макарием со слов ученика преподобного Пахомия, содержит запись 33 случаев благодатной помощи преподобного. Одно из них послужило поводом к отдельному празднованию памяти вологодского чудотворца.

Пожары, случавшиеся в последующие после кончины преподобного Димитрия годы, дважды уничтожали церковь, но каждый раз рака его оставалась невредимой. После сооружения и освящения третьего по счету храма, одному тяжкоболящему иноку было видение: в новом храме вдоль стен стоят благообразные старцы. «Среди них должен быть и преподобный Димитрий»,– подумал монах. Вдруг из алтаря раздался громоподобный голос: «Ты ищешь Димитрия? Ныне он в Казани». При этом инок сразу же почувствовал себя здоровым.

Оказалось, что в то время икона преподобного Димитрия по некоему откровению была отпущена из монастыря с войском, которое посылал в первый поход на Казанское ханство великий князь Иоанн Васильевич III (по преданию, эта икона была написана преподобным Дионисием Глушицким, † 1437, память 1 июня).

В тот самый день, когда было видение иноку, русское войско одержало победу. Одновременно и великий князь видел явившагося ему преподобного Димитрия.

Вскоре, по возвращении войска, чудотворный образ, украшенный и с щедрой милостынею, был отправлен Иоанном III назад. 3 июня 1503 года в Вологде произошло сретение (встреча) прибывшей из Москвы иконы, которая с великими почестями была препровождена епископом Вологодским Никоном в Прилуцкий монастырь.

С тех пор в память об этом событии ежегодно 3 июня из вологодского соборного Софийского храма в обитель преподобного Димитрия совершался крестный ход. На месте встречи иконы был воздвигнут храм в честь преподобного Димитрия.

Пра́зднование Пресвяте́й Влады́чице на́шей Богоро́дице и Присноде́ве Мари́и, ра́ди ико́ны Ея, нарица́емыя «Ю́гская»

Тропа́рь, глас 4:

Днесь, я́ко со́лнце пресве́тлое,/ возсия́ нам на возду́се/ всечестна́я ико́на Твоя́, Влады́чице,/ луча́ми ми́лости мир просвеща́ющи,/ ю́же вели́кая Росси́я,/ я́ко не́кий дар Боже́ственный, свы́ше благогове́йне восприе́мши,/ прославля́ет Тя, Богома́ти, всех Влады́чицу,/ и от Тебе́ ро́ждшагося Христа́ Бо́га на́шего/ велича́ет ра́достно./ Ему́же моли́ся, о Госпоже́ Цари́це Богоро́дице,/ да сохрани́т вся гра́ды и страны́ христиа́нския/ невреди́мы от всех наве́т вра́жиих/ и спасе́т ве́рою покланя́ющихся/ Его́ Боже́ственному и Твоему́ Пречи́стому о́бразу,/ Де́во Неискусобра́чная.

Кано́н Пресвяте́й Богоро́дице, глас 8.

Песнь 1

О Тро́ице Вседержи́тельная и Еди́нице Трисо́лнечная,/ ду́шу мою́, и се́рдце, и ум, молю́, просвети́вши и благода́тию освяти́вши,/ к Боже́ственней Твое́й любви́, Преблага́я, возведи́/ и наста́ви благоче́стно пе́ти благосе́рдие Присноде́вы Благослове́нныя.

Блага́го Царя́ Блага́я Ма́ти,/ И́же всем благопослу́шная в проше́ниих/ и всеси́льная в благодея́ниях!/ Благода́ть све́та Твоего́ и нам возсия́ и облагодати́ днесь, о Богоблагода́тная,/ песнь Тебе́ пе́ти начина́ющия.

Сла́ва: Лико́м а́нгельским вино́вно есть ра́дости Твоего́, Влады́чице, настоя́щаго торжества́ славосло́вие,/ сии́ бо днесь дви́жутся к похвале́нию,/ мы же, бре́ннии, что Ти принесе́м?/ – то́чию усе́рдная благода́рствия.

И ны́не: Арха́нгельский глас пое́м Ти: ра́дуйся, Чи́стая./ А́ще и недосто́йни есмы́,/ за бла́гость у́бо сей приими́, Влады́чице,/ све́том ми́лости Твоея́ нас просвеща́ющи/ и благода́ть всем подаю́щи.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Гряди́те, ве́рнии, на пресла́вное виде́ние,/ зри́те на высоте́ благоле́пно сия́ющу пречи́стым Свои́м о́бразом Де́ву Пречи́стую,/ нас благода́тно посеща́ющу, благове́рно пою́щих:/ несть пречи́сты, па́че Тебе́, Влады́чице.

Освяща́ется, Богоро́дице, Твое́ю благода́тию всяк ум ве́рных/ и возвыша́ется чу́дным ико́ны Твоея́ прише́ствием./ Ю́же благоче́стно почита́ющих и Тебе́ ве́рно сла́вящих/ сподо́би, Влады́чице, нас, рабо́в Твои́х, Вы́шняго прича́стия.

Сла́ва: Даждь нам ненаве́тно Небе́сную ше́ствовати стезю́, Богоневе́стная,/ на Боже́ственная дея́ния нас укрепля́ющи,/ я́ко да Твои́м, Де́во, заступле́нием/ злоко́зненнаго пути́ укло́ньшеся,/ присносу́щныя сла́вы бу́дем о́бщницы.

И ны́не: А́нгелов Творца́, и́стиннаго Све́та, Христа́,/ неизрече́нно из Тебе́, Богома́ти, возсия́вшаго,/ луча́ми омраче́нныя на́ша ду́ши и сердца́ просвети́/ и благода́тию Твое́ю, о Благода́тная, освяти́,/ к Го́рняго све́та раче́нию наставля́ющи.

Песнь 4

Ирмо́с: Ты моя кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Творе́ц всех и Созда́тель, вседержи́тельною си́лою нося́й вся́ческая,/ о́бразом Свои́м Боже́ственным и Твои́м, Де́во, днесь чудоно́сным/ пресла́вно прии́де, на руку́ Твое́ю, Чи́стая, носи́мь,/ на спасе́ние челове́ком и исцеле́ние.

Неизрече́нному Бо́жию дарова́нию – ико́не Све́та Христа́ и Пречи́стыя Де́вы,/ прии́дите, ве́рнии, поклони́мся/ и с любо́вию припаде́м, вопию́ще:/ низпосли́, о Благода́телю, ро́ждшия Тя ра́ди Присноде́вы Благосе́рдыя,/ благода́ть и ми́лость нам, рабо́м Твои́м.

Слава: А́нгелов Цари́це,/ мы́сленный Киво́те зако́ннаго па́че Киво́та,/ пречи́стый Твой о́браз неизрече́нными чудесы́ и благода́тьми Бог украси́ и просла́ви/ и А́нгелом почита́ти Того́ повеле́,/ с ни́миже о нас Ему, о Всепе́тая, моли́ся,/ сла́вящих спаси́тельное Его́ смотре́ние и Твое́,/ е́же бо нам спасе́ние улучи́ти.

И ны́не: Я́же по благода́ти дарова́нная,/ от Бо́га Помо́щнице нам всем, христиа́ном,/ Того́ моли́, Всебла́гая и Всенепоро́чная,/ яко да пре́зрит на́ша безчи́сленная согреше́ния/ и изба́вит пла́меннаго томле́ния, и тьмы кроме́шныя, и му́ки вся́кия.

Песнь 5

Ирмо́с: У́тренюет дух мой к Тебе́, Бо́же,/ от Отца́ рожде́нному неизрече́нно/ и воздви́гнувшему рог спасе́ния нам.

Ты, о Благода́тная, в ми́лостивном Твое́м днесь благоволе́нии/ боголе́пным явле́нием страну́ на́шу благода́тно просвети́ла еси́/ и та́инственное све́та Твоего́ просвеще́ние ми́ру низпосла́ла еси́,/ к све́ту Вы́шния сла́вы, Богоро́дице, ве́рныя возводя́щи.

Омрачи́хомся по́мыслы,/ отягчи́хомся грехи́,/ недоуме́ем светоно́сныя благода́ти и ми́лости Твоея́ испове́дати, Влады́чице,/ но, о Пресвята́я Де́во,/ просвети́ нас и обогати́ та́инственными Твои́ми дарова́нии Боже́ственных жела́ний,/ к све́ту пра́ваго пути́ направля́ющи.

Сла́ва: Благоче́стно отвсю́ду, о Богома́ти, к пречестне́й Твое́й ико́не притека́ющия,/ и усе́рдно покланя́ющияся, и ве́рно везде́ Тя призыва́ющия/ предвари́, от бед вся́ких спаса́ющи,/ и лю́тых неду́г избавля́ющи/ и ду́хи лука́выя прогоня́ющи,/ тишину́ и здра́вие подаю́щи всем, Влады́чице.

И ны́не: Лю́тыми помышле́нии и скве́рными воспомина́нии/ от лука́вых враго́в, стужа́емых зе́льне,/ не оста́ви нас, ниже́ пре́зри, Богороди́тельнице,/ но осени́, Твое́ю благода́тию, покрыва́ющи от сих, и заступа́ющи,/ и спаса́ющи от всех их наве́т, о Богоблаже́нная.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

А́ер¹³ простра́нный и земля́ на́ша, Цари́це,/ в пресла́вном Твоея́ ико́ны прише́ствии/ чуде́с и Боже́ственных даро́в благода́тию Твое́ю испо́лнися/ во утвержде́ние благоче́стия и всех ве́рных, Всепе́тая,/ е́юже днесь и супоста́ты низлага́ются/ и сла́вящии Тя кре́пце утвержда́ются.

Гра́де Бо́жий, селе́ние свято́е, Де́во Богоневе́стная,/ сохрани́ от сопроти́вных нахожде́ния/ и от всех наве́т вра́жиих святы́й дом Твой и вся гра́ды и страны́ христиа́нския,/ любо́вию пою́щия Тя и ве́рно почита́ющия пречи́стый о́браз Твой.

Сла́ва: Освяще́ние, здра́вие и спасе́ние всегда́ подава́й душа́м же и телесе́м на́шим, о Ма́ти Бо́жия,/ благоче́стно покланя́ющимся ико́не Твое́й Боже́ственней,/ и усты́ и се́рдцем благогове́йно со стра́хом целу́ющим,/ и ве́рою от души́ Тя при́сно сла́вящим.

И ны́не: Держа́вный покро́в и сте́ну необори́му, стяжа́вши Тя, Присноде́во Богоро́дице,/ упова́ние на Тя с Бо́гом возлага́ем, ве́рнии, и приле́жно мо́лим:/ си́лою Твое́ю стре́лы вра́жия и ко́зни вся бесо́вския/ не́мощны, я́ко младе́нчески, покажи́ и недействи́тельны,/ кре́пкая на́ша Помо́щнице.

Конда́к, глас 8:

Притеце́м, лю́дие, к Де́ве и Богоро́дице Цари́це,/ благодаря́ще Христа́, Бо́га на́шего,/ и, к Тоя́ чудотво́рней ико́не уми́льно взира́юще,/ припаде́м и возопие́м Ей:/ о Влады́чице Мари́е,/ присети́вши страну́ сию́ Твоего́ честна́го о́браза явле́нием чуде́сно,/ спаса́й в ми́ре и благовре́менстве страну́ на́шу и вся христиа́ны,/ насле́дники показу́ющи Небе́сныя жи́зни,/ Тебе́ бо ве́рно зове́м:/ ра́дуйся, Де́во, ми́ру спасе́ние.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

А́нгелом гове́йный образ Твой, Влады́чице,/ неизре́ченною при́сно благода́тию сия́ет и си́лою,/ днесь бо того́ дарова́нии земны́я просвеща́еши, и к Небе́сным наставля́еши,/ и к ве́чному животу́ устроя́еши/ за неизглаго́ланную Твою́ бла́гость, Богоблагода́тная.

Твоего́ боголе́пнаго явле́ния,/ и пресла́внаго ико́ны прише́ствия, и чуде́с пучи́ны, Чи́стая,/ вити́йствующих уста́ ника́коже возмога́ют испове́дати./ Мы же, гру́бии, что возглаго́лем?/ То́чию поми́луй и спаси́ нас, о Всеми́лостивая Влады́чице.

Сла́ва: Изве́стная ве́рных Помо́щнице и всех благи́х Пода́тельнице,/ приими́ нас, ве́рно припа́дающих и любо́вию вопию́щих Ти:/ поми́луй нас, Госпоже́, поми́луй нас,/ я́коже днесь, та́ко и во о́ный век/ бу́ди нам Помо́щница и Засту́пница.

И ны́не: Ма́ти Бо́жия Милосе́рдая,/ ми́лости Твоея́ две́ри днесь отве́рзи нам/ и от уст мы́сленных волко́в исхити́,/ хотя́щих нас поглоти́ти и до конца́ погуби́ти,/ поми́луй, мо́лим Тя, о Влады́чице, поми́луй,/ не отврати́ посра́мленных раб Твои́х.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Пресла́вная днесь пою́ще,/ любе́зно А́нгелом гове́йной Твое́й ико́не покланя́емся, благогове́юще, о Госпоже́ Цари́це,/ сла́вящия Тя боже́ственною Твое́ю благода́тию осени́, и на враги́ укрепи́,/ и оте́чество на́ше ми́рно соблюди́.

Сла́ва: Ра́дости вина́, Всеблагослове́нная,/ ра́дуйся, Всенепоро́чная,/ ра́дуйся, Благода́тная,/ держа́ва на́ша, и огражде́ние, и спаси́тельное прибе́жище,/ спаси́ ны, рабы́ Твоя́, не иму́щия па́че Тебе́ к Бо́гу по́мощи,/ на Тя бо наде́емся и Тебе́ пое́м во ве́ки.

И ны́не: Еди́ну Тя жи́зни на́шея стяжа́хом с Бо́гом Храни́тельницу/ и кре́пку Наде́жду спасе́ния./ Мо́лим Тя, о Благосе́рдая,/ и по кончи́не хода́тайствовати не преста́й о нас,/ я́ко да бу́дущих стяза́ний изба́вимся/ и ми́лостива обря́щем Сы́на Твоего́ и Бо́га в День Су́дный.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с/ Тем Тя, Богоро́дице,/ А́нгелов и челове́к чинонача́лия велича́ют.

Про́ста пути́ по а́еру светоприя́тному/ ико́на Твоя́, Влады́чице, стезю́ проходя́щи богодви́жимо и светоле́пно,/ неизследи́мы стези́ творя́щи,/ ве́рныя в поднебе́сней благода́тию озари́, ве́рою вопию́щия:/ вои́стинну чисте́йши всех еси́, Де́во Чи́стая.

Сло́ва вити́йством превысо́ких Твои́х, Чи́стая, чуде́с/ ника́коже по достоя́нию украси́ти удо́бны есмы́,/ то́чию усе́рдне мо́лим Тя, Цари́це,/ да мо́лиши Сы́на Твоего́, Влады́ку и Царя́ всех,/ дарова́вшаго нам Тебе́, Пресла́вную Помо́щницу,/ сподо́бити нас Небе́снаго Своего́ Ца́рствия.

Сла́ва: Песнь благода́рственнаго пе́ния/ за неизрече́нное Твое́ милосе́рдие, о Богоблагода́тная, от нас приими́,/ прошения на́ша в по́льзу исполня́ющи,/ и к высоте́ Го́рней всех возведи́,/ ве́рно бо Ти зове́м:/ вои́стинну вы́шши всех еси́, Де́во Всенепоро́чная.

И ны́не: Ро́ди вси, ра́достно блажи́м Тя, Богоро́дице,/ я́ко ра́дости вся ны испо́лнила еси́/ пресла́вным прише́ствием ико́ны Твоея́, Пречи́стая./ Е́йже днесь поклоня́ющеся, уми́льно мо́лим Тя:/ не забу́ди, Влады́чице, Твои́х рабо́в,/ сподо́бити в бу́дущем ве́це избра́нных ра́дости.

Югская икона Пресвятой Богородицы

Югская икона Пресвятой Богородицы получила наименование по названию обители, в которой она хранилась. Святая икона обретена в 1615 (или 1616) году старцем Дорофеем, схимонахом Псково-Печерского монастыря († 1622; память 5 июня), и перенесена им на реку Юг в пределах Ярославской епархии. Позднее на том месте была основана Югская Дорофеева пустынь, где и находилась святая икона Божией Матери Одигитрии, впоследствии названная Югской. Празднование в честь этой иконы совершается повсеместно 28 июня, в день празднования иконы Божией Матери Одигитрии-Смоленской. С 1786 года в Югской обители установлено празднование в честь Югской иконы также 3 июня, в память пришествия преподобного Дорофея с иконой Божией Матери на реку Юг. В этот день в обитель стекалось множество народа, совершался крестный ход вокруг монастыря.

Литература:

1. Снессорева С. Земная жизнь Пресвятой Богородицы и описание святых чудотворных Ея икон. СПб., 1898.

* * *

⁵

Четы́ – полчища.

⁶

Присеще́ние – посещение.

⁷

В нас все́льшася – принявшего человеческое естество.

⁸

Дарова́ся – умножен дарами.

⁹

Премину́в Небесными – помышляя только о Небесных.

¹⁰

Удиви́л – украсил, прославил.

¹¹

Гове́ют – благовеют, покланяются, почитают.

¹²

Порева́ющия – толкающие.

¹³

Ае́р – воздух, атомосфера.

2-й день4-й день

Источник: Минея - М. : Издательский Совет Русской Православной Церкви, 2002-. 12 том. / Минея июнь. - 2002. / Ч. 1. – 664 с.; Ч. 2. – 616 с.

Telegram-каналы

Комментарии для сайта Cackle