Минея. Июнь

 В 6-й деньВ 7-й деньВ 8-й день 

В 7-й день

Свята́го священному́ченика Феодо́та, епи́скопа Анки́рскаго

Стихи́ры, глас 1.

Подо́бен: Небе́сных чино́в:

Ра́достным се́рдцем / и тве́рдым по́мыслом / к подвиго́м, му́чениче, благодерзну́л еси́ вои́стинну, / не убоя́вся мучи́тельных боле́зней, / ни ну́ждныя сме́рти. / Те́мже, зако́нно пострада́в, / све́тло венча́лся еси́, Феодо́те.

Искуше́ньми пло́ти твоея́ / уязви́л еси́ супоста́ты, блаже́нне, / и состреля́л еси́ сих обличе́нии сердца́, / ка́плями же излия́нных крове́й твои́х / пото́ки изсуши́л еси́ до конца́ безбо́жия, преблаже́нне.

Терпели́вно свеща́ми опаля́емь / и ра́нами по хребту́ сокруша́емь, / му́чениче, претерпе́л еси́, зовы́й: / Христо́вы любве́ отню́дь ничто́же мя разлучи́т, / ни смерть, ни живо́т, / ниже́ вся́ка и́на му́ка.

И́ны стихи́ры Пресвяты́я Богоро́дицы, глас и подо́бен то́йже:

Одержи́ми паде́нии ненаде́жными, Чи́стая, / Тя Предста́тельницу еди́ну иму́ще, Де́во, / вопие́м благода́рственно: / очи́сти ны, Пресвята́я Богоневе́сто, / Ты бо еси́ ми́ру прибе́жище / и заступле́ние ро́ду на́шему.

Жезло́м Твоего́ предста́тельства, / Богороди́тельнице Чи́стая, / звери́ныя стра́сти окая́нныя души́ моея́ / отжени́ вско́ре, / ми́рно живо́т мой управля́ющи, / и свято́му мя ста́ду / избра́нных Твои́х ове́ц причти́.

Согреше́ний пучи́ною потопля́емь, / к ти́хому приста́нищу / пречи́стыя Твоея́ моли́твы, Богороди́тельнице, прибе́г, / взыва́ю Ти: спаси́ мя, / держа́вную Твою́ пода́вши десни́цу / рабу́ Твоему́, Пренепоро́чная.

Сла́ва, и ны́не:

Нра́вом гнилы́м попо́лзся, ниц лежу́ / и к Твое́й, Де́во, притека́ю тишине́: / от бу́ри сопроти́вныя / и искуше́ний многообра́зных мя изба́ви, / да пою́ Твою́ благода́ть непреста́нно, / Богоро́дице Ма́ти Присноде́во.

Крестобогоро́дичен:

У Креста́ предстоя́щи Сы́на и Бо́га Твоего́ / и долготерпе́ние Того́ смотря́ющи, / глаго́лаше, пла́чущи, Ма́ти Чи́стая: / увы́ Мне, Ча́до Сладча́йшее, / что́ сия́ стра́ждеши непра́ведно, Сло́ве Бо́жий, / да спасе́ши челове́чество?

Тропа́рь, глас 4:

И нра́вом прича́стник, / и престо́лом наме́стник апо́столом быв, / дея́ние обре́л еси́, Богодохнове́нне, / в виде́ния восхо́д, / сего́ ра́ди, сло́во и́стины исправля́я, / и ве́ры ра́ди пострада́л еси́ да́же до кро́ве, / священному́чениче Феодо́те, / моли́ Христа́ Бо́га / спасти́ся душа́м на́шим.

Кано́н, его́же краегране́сие: Бо́жие дая́ние был еси́ и́стинно, блаже́нне. Творе́ние Ио́сифово, глас 6.

Песнь 1

Ирмо́с: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь / пои́м, вопия́ше.

Богосия́нную тя звезду́ мы́сленное показа́в Со́лнце на высоте́ Своея́ Це́ркве, / всю зе́млю блиста́ньми, блаже́нне, твои́х страда́ний уясни́.

От ю́на во́зраста возложе́н быв Бо́гу, Феодо́те, / Богода́нными доброде́тельми ду́шу просвети́л еси́ я́ве / и мир честны́ми страда́нии украси́л еси́.

Сла́вный му́ченик, смотря́я льсти́ваго мре́жи, просте́рты на земли́, всю́ду прохожда́ше, / ду́ши уче́ньми благочести́вых утвержда́я благода́тию.

Богоро́дичен: Премно́гим милосе́рдием небеса́ прекло́нь, сни́де Сын Бо́жий / и из Тебе́ воплоти́ся, Чис́тая, спаса́я челове́ка от пре́лести змии́ны.

Песнь 3

Ирмо́с: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Вы́ну взира́я к Бо́гу очесы́ у́мными, приснопа́мятне му́чениче, / не чул еси́ ран, телеси́ приближа́ющихся, и му́ками всюду одержи́м.

Ника́коже, му́чениче, прило́ги боле́зненными поколеба́лся еси́, ни ласка́нии беззако́нных, / на ка́мени тве́рдыя ве́ры Христо́вы водруже́н, сла́вне Феодо́те.

Сокруша́я те́ло мно́гими ра́нами, / гони́тель не возмо́же отню́д твоея́ кре́пости душе́вныя разсла́бити, / Боже́ственною любо́вию Спа́са, блаже́нне, утвержда́емь.

Богоро́дичен: Ви́дев Твоего́ издале́ча лик проро́ческий Богогла́сный та́инства глубину́, / многообра́зными гла́сы Бо́гу Ма́терь Чи́стую Тя пропове́дует, Пречи́стая Богоневе́сто.

Седа́лен, глас 1.

Подо́бен: Гроб Твой:

Многосве́тлая звезда́, дарова́нии чуде́сными и страда́нии свяще́нными озаря́я тварь, / Феодо́те блаже́нне, вои́стинну был еси́. / Те́мже днесь светоно́сную твою́ па́мять пра́зднующе, / в весе́лии се́рдца Христа́ велича́ем.

Сла́ва, и ны́не, пра́здника или́ Богоро́дичен:

Безневе́стная Чи́стая Богоро́дице Де́во, / еди́на ве́рных Предста́тельнице и покро́ве, / бед, и скорбе́й, и лю́тых обстоя́ний всех изба́ви, / на Тя упова́ние, Отрокови́це, иму́щих, / и ду́ши на́ша спаси́ Боже́ственными моли́твами Твои́ми.

Крестобогоро́дичен:

Нескве́рная А́гница, А́гнца и Па́стыря, пове́шена на Дре́ве, ме́ртва зря́щи, / пла́чущи, веща́ше, ма́терски восклица́ющи: / ка́ко претерплю́ Твое́ е́же па́че сло́ва, Сы́не Мой, сни́тие / и во́льныя стра́сти, Бо́же Преблаги́й?

Песнь 4

Ирмо́с: Христо́с моя́ си́ла, / Бог и Госпо́дь, Честна́я Це́рковь / боголе́пно пое́т, взыва́ющи, / от смы́сла чи́ста о Го́споде пра́зднующи.

Му́дростию слове́с твои́х и дел благода́тию / тьмы предста́теля я́ве посрами́л еси́, Феодо́те, / и побе́ду взял еси́ на него́, сла́вно подви́гся.

Огне́м страда́ний твои́х я́ве запали́л еси́ многобо́жную лесть / и, я́ко свеща́, Ду́хом Святы́м, му́чениче, вже́гся та́йно, / подсо́лнечную просвети́л еси́.

Кре́пко, сла́вне, в ре́бра стру́жемь / и зе́льными боле́зньми я́ко вои́стинну всю́ду окруже́н, / непоколе́блемь умо́м позна́лся еси́ ве́ры ра́ди, приснопа́мятне.

Богоро́дичен: Сохрани́в нетле́нну Тя по рождестве́, я́коже пре́жде рождества́, Де́во, / Соде́тель всели́ся в ложесна́ Твоя́ / и истле́вшия мно́гими согреше́нии обнови́.

Песнь 5

Ирмо́с: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Терпе́нием твои́м, му́чениче му́дре, / беззако́ннующих стремле́ния, и мук озлобле́ния, и опале́ния / я́ве терпе́л еси́, Боже́ственным посо́бием огражде́н.

Пропове́дуя сло́во благочести́вое, / пу́тная ше́ствия дале́че, му́чениче Богому́дре, ше́ствовал еси́ / и заблужде́нныя к све́ту обрати́л еси́, / тьмо́ю води́мыя су́етства.

Воздви́жен быв, я́коже а́гнец, на дре́во, / желе́зных ногте́й терпи́ши терза́ния, я́коже безпло́тен, блаже́нне, / умерщвле́ния дебельство́ совлача́я.

Богоро́дичен: Воплоще́нно вои́стинну Сло́во О́тчее / от чи́стых, Чи́стая Де́во, крове́й Твои́х родила́ еси́, / во двою́ соверше́нну естеству́, еди́ной же Ипоста́си, Богора́дованная.

Песнь 6

Ирмо́с: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Пома́зал еси́ словесы́ твои́ми свяще́нными чи́стыя к подвиго́м жены́, / и, низло́жше, му́чениче, врага́ му́жескими боре́нии, / нетле́ния венцы́ исплето́ша.

Кре́постию ду́ха ду́шу огради́в, / лука́вствия ду́хи терпе́нием ран низложи́л еси́ / и побе́ды вене́ц от Бо́га прия́л еси́, досточу́дне.

Ка́плями крове́й твои́х и́дольский пла́мень, му́чениче Христо́в, погаси́л еси́ / и росо́ю боле́зней твоих благочести́вых ду́ши ороси́л еси́, / от пла́мене пре́лести изба́вив.

Богоро́дичен: И́же всей отню́д разу́мней я́ко Бог и ви́димей тва́ри / во утро́бу Твою́ всели́ся вои́стинну и плоть бысть, / челове́ки назида́я, Присноде́во.

Песнь 7

Ирмо́с: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее веле́ние Бо́жие / мучи́теля увеща́ вопи́ти: / благослове́н еси́, Бо́же оте́ц на́ших.

Огне́м, Богоблаже́нне, боле́зней твои́х запале́ние и́дольское угаси́л еси́, / кро́вными же пото́ки погрузи́л еси́ враги́ безпло́тныя, Феодо́те, вопия́: / благослове́н еси́, Бо́же оте́ц на́ших.

Я́ко фимиа́м благово́нен, прине́слся еси́, му́дре, Подвигополо́жнику твоему́, / Боже́ственною благода́тию злосмра́дную лесть низлага́я. / Тем пое́ши ра́достно: / благослове́н еси́, Бо́же оте́ц на́ших.

Соблю́д твоя́ словеса́, Форт святы́й Богоно́сному Фо́ртону отдаде́ тя, / хра́му на воздвиже́ние че́стну, на очище́ние всех благочести́вых, / в снабде́ние душа́м, му́чениче Феодо́те.

Богоро́дичен: Еди́ну нося́щаго Ипоста́сь родила́ еси́ Сло́ва, Ма́ти Де́во, / сугу́ба иму́ща хоте́ния и есте́ственная Его́ сво́йства я́ве: / Бог бо есть и Челове́к, нас ра́ди воплоти́выйся.

Песнь 8

Ирмо́с: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Непоколеби́м столп, забра́ло непрекло́нно, непобеди́мая стена́, / степе́нь ве́ры, да́ние Боже́ственное, благоче́стия побо́рник, / пре́лести губи́тель показа́лся еси́, страстоно́сче.

Правле́нием Боже́ственныя благода́ти, прему́дре, / мук преше́л еси́ вели́кую пучи́ну / и ти́хая, ра́дуяся, дости́гл еси́, сла́вне, приста́нища Го́рняго Ца́рствия.

Ше́ствия и стези́ твоя́ напра́вишася ко Христу́, всех Бо́гу и Го́споду, / Ему́же в ру́це дух твой пре́дал еси́, / му́чениче страстоно́сче, Феодо́те треблаже́нне.

Богоро́дичен: Ри́торов язы́к та́инства Твоего́ недоуме́нную глубину́ изрещи́ не мо́жет: / Сло́во бо Бо́жие па́че сло́ва родила́ еси́, / Пречи́стая Де́во, во спасе́ние всех.

Песнь 9

Ирмо́с: Бо́га / челове́ком невозмо́жно ви́дети, / на Него́же не сме́ют чи́ни А́нгелстии взира́ти, / Тобо́ю бо, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

Да сла́вы улучи́ши о́ныя, страстоте́рпче, ви́димую, ра́дуяся, преоби́дел еси́ / и, Боже́ственным ма́нием к ра́нам отлучи́вся, / не ужа́слся еси́ мучи́тельных вид и сме́рти го́рькия. / Те́мже с му́ченики венча́лся еси́, подви́гся.

Яви́лся еси́ храм, му́чениче, чист Тро́ицы / зда́нием дея́ний, Феодо́те пребога́те, Боже́ственных, / страда́ний же све́тлых сия́нием укра́шен. / Те́мже хра́мы де́монския истука́нныя, му́дре, / Боже́ственною Уте́шителя си́лою я́ве низве́ргл еси́.

Иска́пающая гора́ Боже́ственную сла́дость яви́лся еси́, / исто́чник чуде́с, пучи́на же, сла́вне, Боже́ственных дарова́ний, / струя́ светла́ Свята́го Ду́ха, ду́ши напоя́я, и потопля́я стра́сти, / и всем хода́тайствуя, му́чениче, благоче́стно пою́щим тя, ра́дование.

Богоро́дичен: Гла́сом А́нгела родила́ еси́ Безнача́льного Сло́ва, / прие́мшаго плоть у́мну же и одушевле́нну, Де́во Всечи́стая, от чи́стых крове́й Твои́х, / и безпло́тныя враги́ низло́жшаго, и спа́сшаго нас всех, / и́стинную Богоро́дицу испове́дающих Тя.

Святой мученик Феодот

Святой мученик Феодот жил в Анкире Галатийской в III веке. Он отличался особенной добротой и отзывчивостью. В разгар гонения при Диоклитиане (284–305) он снабжал христиан всем необходимым и предоставлял им убежище в своем доме, где тайно совершались Богослужения. Святой Феодот посещал христиан-узников в темницах, выкупал их, с благоговением погребал тела мучеников, брошенные на съедение зверям. Однажды он вытащил из воды и похоронил тела семи святых мучениц, утопленных в море (память 18 мая). Об этом донесли правителю. Отказавшись принести жертву идолам и обличив языческие заблуждения, святой Феодот исповедал истинную веру во Христа, за это его подвергли жестоким мучениям и усекли мечом († 303). Тело святого мученика хотели сжечь, но поднявшаяся буря помешала это исполнить, и его предали христианскому погребению.


 В 6-й деньВ 7-й деньВ 8-й день