Минея. Май

 В 23-й де́ньВ 24-й де́ньВ 25-й де́нь 

В 24-й де́нь

Преподо́бнаго отца́ на́шего Симео́на, и́же на Ди́вней горе́

На Го́споди, воззва́х: стихи́ры Симео́на, на 6, глас 8.

Подо́бен: О, преславнаго чудесе́:

Столп напи́сан иму́щ, рожде́ственный64 к доброде́тели / виде́нии и дея́нии, Симео́не пребога́те, / ду́шу соде́лал еси́, / плотска́я победи́в взыгра́ния / ив живоно́сную оде́явся ме́ртвость, преподо́бне, / и свети́льник был еси́, при́сно сия́ющ / вся земны́я концы́ / просвеща́я благода́тию.

Жела́нием Боже́ственным впери́м, / еще́ пло́ть нося́ и перстню обложе́н, / А́нгелом был еси́ я́ве единожи́тель, / земны́х у́бо отсту́пль, / к Небе́сным же, о́тче возвыша́емь, / столпо́м высо́ким, / к Бо́гу взима́лся при́сно / и восхожде́нии облиста́яся.

Пло́ть истни́в воздержа́нием, и горе́ возводя́щу ду́шу / и к Бо́гу приближа́ющуся, / Симео́не, показа́л еси́, / и прия́телище Ду́ха, / и си́лою Сего́ чудеса́ па́че естества́ / твори́ти сподо́бился еси́. / Отону́дуже бы́сть вседе́тельное дея́ние, / я́же па́че ума́ вся и мы́сли прехо́дят.

Сла́ва, глас 6:

О́тче досточу́дне, / пусты́ни яви́лся еси́ до́брое прозябе́ние, / нам же засту́пник: / в той бо жела́ние обре́л еси́ Небе́сныя высоты́, / целе́бныя же благода́ти от некра́домых сокро́вищ Ду́ха сподо́бился еси́. / Те́мже обои́ми Христо́с тя обогати́ / и чуде́с самоде́теля показа́, / Симео́не преподо́бне, / моли́ спасти́ся душа́м на́шим.

И ны́не, Богоро́дичен или́ Крестобогоро́дичен.

Подо́бен: Тридне́вен:

На Дре́ве Живо́т наш зря́щи, Всенепоро́чная Богоро́дице, ви́сящ, / ма́терски рыда́ющи, вопии́те: / Сы́не Мой и Бо́же Мой, / спаси́ любо́вию пою́щия Тя.

На стихо́вне дне.

Сла́ва, глас 2. Самогла́сен. Ге́рманово:

На го́ру высоку́, обра́зно ди́вну, возше́д / и в честны́й киво́т, я́ко в незаходи́мая, вшед / дея́нием изря́дным, / и восхожде́ние виде́ний показа́л еси́: / житие́ у́бо уясни́в у́зы желе́зными, / я́коже гри́внами златы́ми, укра́шен, / Бо́га же зря, и зрим, / и еди́н Еди́ному бесе́дуя, / Его́же моли́, честны́й Симео́не, о душа́х на́ших.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

У́гль, его́же прови́де пре́жде сла́вный Иса́ия, / воплоща́ется от Неискусому́жныя Ма́тере / ма́нием Прозя́бшаго и Роди́теля / и, ро́ждся, закала́ется во́лею, / ми́ра взе́мляй прегреше́ния, / А́гнец я́ко непоро́чен. / Те́мже А́гница и Де́ва, / Сего́ на Кресте́ зря́щи, / печа́ли ору́жием снеда́шеся.

Тропа́рь, глас 1:

Пусты́нный жи́тель, и в телеси́ А́нгел, / и чудотво́рец яви́лся еси́, Богоно́се, о́тче наш Симео́не, / посто́м, бде́нием, моли́твою Небе́сная дарова́ния прии́м, / исцеля́еши неду́жныя и ду́ши ве́рою притека́ющих ти. / Сла́ва Да́вшему тебе́ кре́пость, / сла́ва Венча́вшему тя, / сла́ва Де́йствующему тобо́ю всем исцеле́ния.

Кано́н преподо́бнаго на 6, его́же краегране́сие: Чу́дне, пою́, Симео́не, твою́ благода́ть. Глас 8.

Пе́снь 1

Ирмо́с: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, / пе́снь Бо́гови воспева́юща.

Богосло́вия вои́стинну вина́ е́сть па́мять твоя́, чудоде́йственный о́тче Симео́не, / и сия́ние соше́дшимся всем чи́стыми се́рдцы пе́ти тоя́ вели́чество / и досточу́дное житие́ твое́.

От гла́са Крести́телева и виде́ния благовести́ся твое́й сла́вней ма́тери, / и тя, благово́нно и Боже́ственное жили́ще, всеблаже́нне о́тче, зача́т же и ро́ди, / Триипоста́снаго Божества́.

Па́че естества́ пра́вды носи́ло Бо́жиих дарова́ний, / от пеле́н, о́тче, ма́терних хотя́ща бы́ти, проразуме́в вели́кий Предте́ча, / шу́яго сосца́ тебе́ отвраща́тися повелева́ет и к десно́му прилепля́тися.

Чи́сто из нача́ла прии́м житие́, пребога́те, / ба́нею, о́тче, пакибытия́ дар духо́вный, / от младе́нства Боже́ственне твоея́ души́ благоле́пие / показа́л еси́, со́лнца светле́йши.

Богоро́дичен: Пресла́вная, возглаго́лашася о Тебе́ в ро́дех родо́в, / Бо́га Сло́ва во чре́ве вмести́вшая, / чи́ста же пребы́вши, Богоро́дице Мари́е, / те́мже Тя вси почита́ем, су́щее по Бо́зе заступле́ние на́ше.

Пе́снь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / яселаний кра́ю, ве́рных утвержде́ние, / Еди́не Человеколю́бче.

От млады́х ногте́й подви́жник изря́ден изра́сл еси́, / рачи́тель же Боже́ственныя добро́ты те́плый. / Тем от ложе́сн тя проуве́дев Влады́ка, Симео́не, / освяти́л е́сть, о́тче пресла́вне.

Умудри́вся от мла́да, чудотво́рче преподо́бне о́тче, во́зраста и́стинным ра́зумом, / Ду́ха непостижи́маго самови́дно сподо́бился еси́ ви́дети, / си́лами окружа́ема.

Души́ чу́вства от ужа́снаго, преподо́бне о́тче, просвети́в виде́ния, / чу́ден ра́зум благи́х стяжа́л еси́ / и и́нако иму́щим, Симео́не, небла́зненно житие́ показа́л еси́.

Я́вственно тебе́ предста́ по́сланный А́нгел, / а́нгельское, Бого́носе, завеща́ житие́, целова́ти ра́достно, / ног же я́вльшагося прикосну́лся еси́, о́тче, стопа́м.

Богоро́дичен: Всели́вся в Де́ву теле́сне, Го́споди, яви́лся, еси́ челове́ком, / я́коже подоба́ше ви́дети Тебе́, / Ю́же и показа́л еси́ я́ко и́стинную Богоро́дицу и ве́рных Помо́щницу, / еди́не Человеколю́бче.

Седа́лен, глас 8.

Подо́бен: Прему́дрости:

Пре́жде зача́тия, о́тче, освяти́вся, / роди́тельнице пода́лся еси́ прекра́сно прозябе́ние, / хотя́щ быти́ сосу́д Боже́ственнаго Ду́ха, / Его́же си́лою возра́с, уязви́л еси́ лука́вых духо́в мно́жество жезло́м ве́ры; / те́мже, со сла́вою отше́д, был еси́ ве́рных столп непоколеби́м / и свети́льник све́тел, Симео́не досточу́дне. / Моли́ Христа́ Бо́га согреше́ний оставле́ние дарова́ти / чту́щим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

В напа́сти многоплете́нныя впад от враг ви́димых и неви́димых, / бу́рею одержи́м безчи́сленных согреше́ний мои́х, / и я́ко к те́плому заступле́нию и покро́ву моему́, Чи́стая, / ко приста́нищу притека́ю Твоея́ бла́гости: / те́мже, Пречи́стая, из Тебе́ Воплоще́нному безсе́менно моли́ся приле́жно / о всех рабе́х Твои́х, непреста́нно моля́щих Ти ся, Богоро́дице Пречи́стая, / моля́щи Его́ при́сно согреше́ний оставле́ние дарова́ти / воспева́ющим досто́йно сла́ву Твою́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́, / восклица́ше, пла́чущи, и, го́рько рыда́ющи, вопия́ше: / мир у́бо ра́дуется, прие́мля Тобо́ю избавле́ние, / утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. / Долготерпели́ве Го́споди, ми́лости бе́здно и исто́чниче неисчерпа́емый, / умилосе́рдися и да́руй согреше́ний оставле́ние / ве́рою пою́щим Боже́ственныя стра́сти Твоя́.

Пе́снь 4

Ирмо́с: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Пребы́ти вну́трь ника́коже ми́ра претерпе́л еси́ еще́, о́тче, / име́я наставля́ющую тя Бо́жия Ду́ха си́лу: / в непроходи́мых же пусты́нях живы́й и со зверьми́ ходя́ без боя́зни, отроча́ сый, / и боле́зньми весели́лся еси́ теле́сными.

Скача́, я́коже еле́нь, по гора́м, / жела́л еси́, о́тче, Богото́чных исто́чников / и, обре́т сия́, Симео́не, боголю́бия жа́жду преиспо́лнил еси́: / от ни́хже богосло́вия насы́щся, источа́еши при́сно, лице́ Христо́во зря.

Белообразу́юща тя, я́коже на колесни́це, / зрел еси́, преподо́бне, носи́ма, у́мныма, о́тче, очи́ма: / столпо́м же све́тлым отроча́ наставля́емь, / Боже́ственный Иоа́нн стоя́ на степе́ни, пре́жде твоего́ к нему́ восхожде́ния.

Наста́влен быв, сла́вне, от благода́ти, да́нныя тебе́, / я́коже от си́лы в Боже́ственную си́лу, ше́ствуеши ко Иоа́ннове хра́мине Богому́дреннаго, / с ни́мже по́двигом любе́зно боре́ние проходя́, яви́лся еси́, я́коже А́нгел.

Богоро́дичен: Ты ве́рных похвала́ еси́, Безневе́стная, Ты Предста́тельница, / Ты прибе́жище христиа́н, стена́ и приста́нище: / к Сы́ну бо Твоему́ мольбы́ но́сиши, Всенепоро́чная, / и спаса́еши от бед ве́рою и любо́вию Богоро́дицу Чи́стую Тя веду́щия.

Пе́снь 5

Ирмо́с: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя е́сть чужда́я тьма́, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.

Красоты́ испо́лнь, я́ко благоле́пен де́тищ, о́тче, / Госпо́дь я́вственно предста́, на степе́ни стоя́ния твоего́ су́щу, / и облиста́в сла́вою терпе́ния, я́коже проси́л еси́, / Себе́ показа́в распина́ема.

Возсия́ заре́ю открове́ний все житие́ твое́, / и́мже Боже́ственнаго ми́ра благово́ния быв испо́лнен, / супроти́вныя страда́льчески, Христо́в уго́дниче, де́монския ссекл еси́ полки́.

Возвы́сился еси́ виде́нии Боже́ственными, всеблаже́нне, ума́ чистото́ю / и, исто́чник му́дрости живоно́сныя, то́ки источа́ющее се́рдце име́я, / от Бо́га уче́ньми, ду́ши боля́щих просвети́л еси́.

Богоро́дичен: Ма́тернее дерзнове́ние, е́же к Сы́ну Твоему́, иму́щи, Пречи́стая, / сро́днаго промышле́ния, е́же о нас, не пре́зри, мо́лимся, / я́ко Тебе́ и еди́ну, христиа́не, ко Влады́це очище́ние ми́лостивно предлага́ем.

Пе́снь 6

Ирмо́с: Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Вели́к, я́коже Моисе́й, доброде́тельми чу́дный быв, о́тче, / на высо́к столп ма́нием Боже́ственным возше́д, взя́тся Ду́хом, / и, си́лу просвети́тельную прие́м, я́коже он, просла́вился еси́.

Истощи́ свой враг стрел душетле́нныя тул, / неи́стовно, Богоно́се, стреля́я, / и души́ твоея́ столпа́ не поколеба́: / на ка́мени бо неразсе́днем Христо́ве кре́пко утверди́лся еси́.

Я́ко терпя́щу по́ты удо́бь воздержа́ния, чу́дный о́тче, / я́влься Влады́ка тебе́, жезл кре́пости Христо́с вруча́ет / и сим тебе́ немощны́х неду́ги повелева́ет цели́ти.

Богоро́дичен: Мари́е, Влады́чнее селе́ние, све́тлыми де́вства заря́ми / светови́дно, я́ко крин, сия́я посреди́ терно́внаго смеше́ния, / Тебе́ молю́ся, Благо́й: / согреше́ний ми да́руй проще́ние.

Конда́к, глас 2.

Подо́бен: Вышних ища́:

Вы́шняя жела́я, до́льная отложи́в, / и, я́ко не́бо, столп соде́лавый, / тем облиста́л еси́ чуде́с заре́ю, преподо́бие, / и Христу́, всех Бо́гу, мо́лишися непреста́нно о всех нас.

И́кос:

Всесве́тлая блаже́ннаго па́мять други́й яви́ся де́нь спасе́ния нам, / сия́нием поще́ния но́щь глубо́кую страсте́й отгоня́щий / и всеизря́дными дея́ньми просвеща́ющий. / В ню́же све́тло, я́ко зве́зды, я́вльшеся, / вси ве́рнии, пе́ния в весе́лии Симео́ну свети́льнику принесе́м: / свы́ше бо зря, просвеща́ет ны и дае́т умире́ние неизглаго́ланно, / Христа́ Бо́га моля́ непреста́нно о всех нас.

Пе́снь 7

Ирмо́с: Халде́йския пещи / всепа́губную си́лу угаси́вше / о́бразом А́нгела снизше́дшаго, / Зижди́телю ю́ноши взыва́ху: / благослове́н еси́ и хва́льный, Бо́же оте́ц на́ших.

Ю́ношески, Богоно́се, мудрова́ния мирски́я ле́сти, тщи́я же сла́вы, низпа́дания бе́гая, / в молча́нии жи́ти возлюби́л еси́, и ду́хом вопия́ непреста́нно: / благослове́н Бог оте́ц на́ших.

Крестообра́зно простира́я дла́ни твоя́ и моли́тву де́йствуяй, / Христа́ во сла́ве со А́нгелы очи́ма явле́нно, Богоно́се, узре́л еси́, / на го́ру сию́ ди́вную взы́ти повелева́юща.

Неботе́чне нра́вом иды́й, о́тче, к столпу́, возше́л еси́ на него́, / пре́жде сего́ ты Влады́ки Боже́ственным повину́вся веле́нием, / дости́гл еси́ го́ры сея́, ю́же чу́дно чу́дну сам именова́л еси́.

Высо́кий верх, я́коже Небе́сный рай, / благово́нными насажде́н цве́ты вся́кими, обре́т, всели́лся еси́, / жили́ще же сие́ чудоде́йственне, богоначерта́нно водрузи́л еси́.

Богоро́дичен: Во све́те Госпо́дни ходя́щии, прииди́те, / воспои́м Боже́ственный град Царя́ ца́рствующих, / Мари́ю Пречи́стую, Богоро́дицу и́стинную, я́ко упова́ние душ на́ших.

Пе́снь 8

Ирмо́с: Седмери́цею пе́щь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспои́те, / лю́дие, превозноси́те во вся ве́ки.

Боголе́пными, преподо́бне, души́ твоея́ си́лами трисве́тлому спримеси́лся еси́ сия́нию, / от него́ науча́емь, я́ко от еди́наго Божества́, / Сему́ пред столпо́м твои́м требога́тен храм сла́вно созда́л еси́ / и несозда́нную чти́ти научи́л еси́ в нем Тро́ицу во ве́ки.

Всеси́льное Ду́ха Свята́го де́йство, богови́дно все́льшееся в тя, Богогла́се, / стица́тися подви́же от коне́ц всех, от духо́в лука́вых томи́мыя, / и, сих исцеля́я ва́ийным твои́м жезло́м, / науча́еши Зижди́теля пе́ти во ве́ки вся.

Ю́ношеское мудрова́ние плотско́е повину́л еси́, о́тче, посто́м и моле́нием ду́ху, / утро́бы же разгоре́ние угаси́в, потреби́л еси́ / и, я́ко не яды́й, па́че челове́ка яви́лся еси́, пи́щею Небе́сною пита́яся то́кмо, / вино́вна же сему́ пое́ши во ве́ки.

Ликостоя́ние Боже́ственное ученико́в тебе́, чу́дный о́тче, вруча́ет Христо́с Госпо́дь, / и́хже любо́вною прие́м, уче́нии осия́л еси́ к воздержа́ния простре́тися тече́нию. / С ни́миже почива́я во Ца́рствии, Царя́ всех славосло́виши во вся ве́ки.

Богоро́дичен: О нас моли́ Сы́на Твоего́ и Го́спода, / вои́стинну и чи́сто вопию́щих Ти / и Тя, Богома́терь, испове́дающих, Чи́стая, / грехо́в прося́щи разреше́ния, / улучи́ти же спасе́ние ве́рно пою́щим: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Пе́снь 9

Ирмо́с: Устраши́ся всяк слух / неизрече́нна Бо́жий снизхожде́ния, / я́ко Вы́шний во́лею сни́де да́же и до пло́ти, / от Деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

Хле́бы ма́лыми, Симео́не, насы́щшаго мно́жество челове́к мно́гое, / Христа́, треблаже́нне, моли́твами твои́ми подража́я, / во огра́де твое́й пра́здныя жи́тницы пшени́цы напо́лнил еси́ благослове́нии твои́ми / и от гла́да изба́вил еси́ ста́до твое́.

Глаго́лы Ма́рфы, честны́я и преподо́бныя твоея́ ма́тере, всеблаже́нне, / моле́ньми тя моля́щия умоли́ти Христа́, / не отре́клся еси́ той испо́лнити проше́ния / и Бо́жий град Бо́жия гне́ва изба́вил еси́.

Уве́дев кончи́ну, Симео́не, подвиго́в твои́х, / разре́шеся от телесе́, пренеизглаго́ланное в Вы́шних, всеблаже́нне, обоже́ние, / к нему́же отсю́ду возлете́в, ра́дуешися ду́хом, / зря того́ ра́ди триипоста́сное сия́ние.

Ма́нием, о́тче Симео́не, и промышле́нии твои́ми / от жития́ к тебе́ многомяте́жнаго моли́твами устреми́вшияся, в приста́нище твое́, / от вся́ких врага́ страсте́й свобо́да / и па́мять твою́ пра́зднующия све́тло сохраня́й.

Богоро́дичен: Спаси́ мя, Ма́ти Бо́жия, ро́ждшая Христа́, / Спа́са моего́, Бо́га и Челове́ка, / сугу́ба естество́м, а не Ипоста́сию, / Единоро́дна же от Отца́, из Тебе́ же пе́рвенца тва́ри вся́кия. / Те́мже вси Тя при́сно велича́ем.

Свети́лен.

Подо́бен: Све́те неизме́нный:

От пусты́ни облиста́в, вселе́нную просвеща́еши, / мона́хов мно́жества ра́дуются о твое́й па́мяти, о Симео́не Богоно́се! / Не преста́й о ми́ре моля́ся.

На стихо́вне дне. Сла́ва, глас 6:

Преподо́бне о́тче Симео́не, / во всю зе́млю изы́де веща́ние исправле́ний твои́х, / тем на Небесе́х обре́л еси́ мзду трудо́в твои́х, / де́монския погуби́л еси́ полки́ / и а́нгельския дости́гл еси́ чи́ны, / и́хже житию́ без поро́ка поревнова́л еси́. / Дерзнове́ние име́я ко Христу́ Бо́гу, / мир испроси́ душа́м на́шим.

Крестобогоро́дичен:

Предстоя́щи Дре́ву иногда́ во вре́мя распя́тия, / Де́ва с де́вственным ученико́м, и пла́чущи, вопия́ше: / увы́ Мне, ка́ко стра́ждеши, всех сын, Христе́, безстра́стие!

НА ЛИТУРГИ́И

Блаже́нны пра́здника и свята́го, пе́снь 3-я. Проки́мен, глас 7: Возвесели́тся пра́ведник о Го́споде: Стих: Услы́ши, Бо́же, глас мой: Апо́стол к Колосса́ем, зача́ло 258. Аллилу́ия: Блаже́н муж, боя́йся Го́спода: Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник:

Преподобный Симеон Столпник

Преподобный Симеон Столпник родился в 521 году в Антиохии Сирийской от благочестивых родителей Иоанна и Марфы. Святая Марфа (память 4 июля) с юных лет желала сохранить девство и стремилась к иночеству, но родители настаивали на вступлении в брак с юношей Иоанном. После усердной молитвы в церкви во имя святого Иоанна Предтечи преподобной в видении было указано подчиниться воле родителей и вступить в брак. В супружеской жизни святая Марфа стремилась во всем угождать Богу и своему мужу. Часто она молилась о даровании ей ребенка и обещала отдать его на служение Господу. Марфе явился святой Иоанн Предтеча и открыл, что у нее родится сын, который будет служить Богу. Родившийся младенец был назван Симеоном и крещен в возрасте двух лет.

Когда Симеону шел шестой год, в городе Антиохии произошло землетрясение, во время которого погиб его отец. Симеон во время землетрясения был в храме. Выйдя из него, он заблудился и семь дней провел у приютившей его благочестивой женщины. Вновь явившийся блаженной Марфе Иоанн Предтеча указал, где находится потерявшийся мальчик. Мать святого, найдя своего ребенка, поселилась после землетрясения в предместье Антиохии. Уже в детстве святому Симеону несколько раз являлся Господь Иисус Христос, предсказывая ему будущие подвиги и награду за них.

Шести лет отрок Симеон ушел в пустыню, где некоторое время находился в совершенном одиночестве. В это время его охранял и питал светоносный ангел и, наконец, привел в уединенный монастырь, настоятель которого игумен авва Иоанн, подвизавшийся на столпе, с любовью принял отрока.

Спустя некоторое время святой Симеон обратился с просьбой к старцу Иоанну разрешить ему тоже подвизаться на столпе. По благословению игумена неподалеку от его столпа братией монастыря был сооружен новый столп. Совершив постриг семилетнего мальчика в иночество, авва Иоанн сам возвел его на этот столп. Юный подвижник, укрепляемый Господом, быстро возрастал духовно, превосходя в подвигах своего опытного наставника. За строгие подвиги святой Симеон получил от Бога благодатный дар исцелений. Слава о подвигах юного инока начала распространяться за пределы обители, и к нему стали приходить из разных мест иноки и миряне, желавшие услышать его советы и получить исцеление от болезней. Смиренный подвижник продолжал пользоваться наставлениями аввы Иоанна.

На 11-м году жизни отрок решил подвизаться на более высоком столпе, к вершине которого вели 40 ступеней. К месту подвигов преподобного пришли епископы Антиохийский и Селевкийский, которые рукоположили святого подвижника в сан диакона, а потом разрешили ему взойти на новый столп, на котором преподобный Симеон подвизался в течение восьми лет.

Преподобный Симеон пламенно молился о ниспослании ему Святого Духа, и святая молитва подвижника была услышана. Дух Святой сошел на него в виде горящей свечи, исполнив подвижника Божественной Премудрости. Наряду с устными наставлениями святой Симеон посылал письменные поучения о покаянии, иночестве, о воплощении Христа и о будущем Суде.

После смерти старца святой Симеон так устроил свою жизнь: с восхода солнца до 9-го часа пополудни он молился, потом до захода солнца читал книги и переписывал Священное Писание, после чего опять вставал на молитву и молился всю ночь. Когда начинался новый день, он, немного отдохнув, с восходом солнца начинал обычное молитвенное правило.

Преподобный Симеон завершил подвиги на втором столпе и по указанию Вожию переселился на Дивную Гору, оставив в своем монастыре опытного старца для руководства иноками. Восхождение на Дивную Гору ознаменовалось видением Господа, стоявшего на вершине холма. Святой Симеон продолжил подвиги на том месте, где видел Господа, сначала на камне, а потом на возведенном вновь столпе. Преподобному Симеону были открыты будущие события. Так, он предсказал смерть архиепископа Антиохийского Ефрема и болезнь епископа Домна, постигшую его в наказание за немилосердие. Наконец, преподобный Симеон предсказал городу Антиохии землетрясение и убеждал всех жителей покаяться в грехах. На Дивной Горе святой Симеон устроил монастырь, храм которого строили исцеленные им от болезней люди, в благодарность за оказанную им милость. Для нужд монастыря преподобный испросил молитвой источник воды, и однажды во время недостатка зерна по его молитве к Господу в житницах обители умножилась пшеница. В 560 году по повелению Господа святой подвижник на 39-м году жизни принял от епископа Селевкийского Дионисия священный сан. 75-ти лет преподобный Симеон был предуведомлен от Господа о скорой своей кончине. Он призвал братию монастыря, преподал им в прощальной беседе благословение и мирно отошел к Богу в 596 году, потрудившись в подвиге столпничества 68 лет.

Как при жизни, так и после кончины преподобный совершал чудеса, исцеляя слепых, хромых и прокаженных, многих спасал от зверей, изгонял бесов из душевнобольных и воскрешал мертвых.

Преподо́бнаго отца́ на́шего Ники́ты сто́лпника, Переясла́вскаго чудотво́рца

НА МА́ЛОЙ ВЕЧЕ́РНИ

Поста́вим стихи́ 4 и пое́м стихи́ры самогла́сны, глас 5:

Ве́рою и любо́вию соше́дшеся, празднолю́бцы, / псалмы́ и пе́сньми восхва́лим дне́сь Небе́снаго челове́ка / и земна́го А́нгела, / к нему́же возопие́м: / о всеблаже́нне преподо́бне, / по́стников похвало́ и му́чеников! / о нас моли́ся к Бо́гу, / о́тче наш Ники́то, / поми́ловатися душа́м на́шим.

Честны́й и светоно́сный наста́ пра́здник, / испо́лнь ра́дости, и весе́лия, и духо́внаго торжества́. / Те́мже, соше́дшеся, мона́хов мно́жества / и христоимени́тии лю́дие, / любо́вию восхваля́юще, / блажи́м Боже́ственная дея́ния твоя́: / я́ко бо крин удо́льный, процве́т, / благоуха́еши душе́вная на́ша чу́вства. / Ники́то о́тче наш, / моли́ спасти́ ду́ши на́ша.

Я́ко уязвился еси́ жела́нием Боже́ственным, / преподо́бне о́тче Ники́то, / взем бо крест твой, после́довал еси́ Влады́це Христу́. / Тогда́, вся́кая плотска́я мудрова́ния умертви́в, / насле́довал еси́ кро́тких зе́млю, / прича́стием бо обожа́емь / и неизрече́ннаго о́наго весе́лия наслажда́яся, / помина́й нас, творя́щих всесвяту́ю твою́ и пречестну́ю па́мять.

Сла́ва, глас 8:

Преподо́бне и Богоблаже́нне о́тче Ники́то, / вои́стинну сподо́бился еси́ Боже́ственныя жи́зни, / посто́м и бде́нием изнуря́я те́ло твое́, / те́мже и о́браз был еси́ мона́хов, / а́ще бо и теле́сный язы́к умолча́, / но чудеса́ свиде́тельствуют. / Дре́вний град Переясла́вль, пропове́дуя, хва́лится, / име́я в себе́ неистощи́мое сокро́вище: / са́ми бо, зря́ще честну́ю ра́ку моще́й твои́х / и чудеса́ быва́емая, / прославля́ют просла́вльшаго тя Го́спода. / Ему́же моли́ся, преподо́бне, / дарова́ти вселе́нней мир и ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Изше́д из до́му, / гра́да Переясла́вля, / преподо́бне о́тче Ники́то, / и доше́д тезоимени́таго Ла́вры, / ту показа́лся еси́ дом Пресвята́го Ду́ха.

Стих: Честна́ пред Го́сподем / сме́рть преподо́бных Его́.

Дом духо́вный бы́ти / сподо́бился еси́, о́тче Ники́то, / от удивле́ния бра́шен ужасну́вся, / я́ко ка́мень, согражде́н / Боже́ственною благода́тию.

Стих: Блаже́н муж, боя́йся Го́спода, / в за́поведех Его́ восхо́щет зело́.

Зако́н прие́м от наста́вника / тезоимени́таго Ла́вры, / и мирска́я мудрова́ния оста́вль, / яви́лся еси́ дом / Пресвята́го Ду́ха.

Богоро́дичен:

Ра́дуйся, Я́же ра́дость / ми́ру прие́мшая / и утоли́вшая печа́ль, / Де́во, прама́терню, / Христа́ Жизнода́вца поро́ждши.

Тропа́рь преподо́бнаго, глас 4 (зри на велицеи вече́рни).

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Пое́м, Блаже́н муж: На Го́споди, воззва́х: стихи́ры, глас 4.

Подо́бен: Я́ко до́бля:

Воздержа́ния стрела́ми врага́ уязви́л еси́ / и сего́ разори́л еси́ полки́. / Тем побе́ды прия́т на враги́, блаже́нне преподо́бне, / на сего́ держа́вно тя, Ники́то, Христу́ укре́пльшу. / Его́же моли́ от тли и бед изба́вити / соверша́ющих при́сно честну́ю па́мять твою́.

На лу́чшая виде́ния вшед, блаже́нне, / земна́я вся и тле́ющая преходя́щая / в телеси́, преподо́бне, презре́л еси́, житие́ безвеще́ственное / на земли́, Ники́то, пожи́л еси́, сла́вя Христа́. / Его́же моли́ от тли и бед изба́вити / чту́щия при́сно честну́ю па́мять твою́.

Дарова́нии Ду́ха, / Боже́ственными сия́нии просве́щся, / приенопа́мятне Ники́то, / свети́льник показа́лся еси́ конце́м, / боле́зней зол и тьму́ страсте́й отгоня́я моли́твами твои́ми, / избавля́я неду́г, и скорбе́й, и бед / ве́рою соверша́ющих при́сно честну́ю па́мять твою́.

И́ны стихи́ры, глас то́йже.

Подо́бен: Дал еси́ зна́мение:

Я́ко глас проро́ческий услы́шав: / измы́йтеся, и чи́сти бу́дете; / и от сего́ умиле́ние в се́рдцы прие́м, / и всего́ себе́ слеза́ми облива́я, / воспомина́я своя́ соде́янная, / и ничто́же моги́й веща́ти, / то́кмо во уме́ свое́м к Бо́гу глаго́лаше: / наста́ви мя на стези́ пра́вы, / и пойду́ во и́стине Твое́й, / исполня́я Твоя́ повеле́ния.

Егда́ друго́м и зна́емым со́званным / и потре́бным устро́енным / зна́мение стра́шно показа́ся: / пе́на с кро́вию, от сосу́да исходя́щи, / и сне́дная на мно́ги у́ды челове́ческия претвори́шася, / и, ве́лиим стра́хом одержи́м быв, / ско́ро от до́му изы́де, / и, ко оби́тели устреми́вся, / во уме́ свое́м к Бо́гу моля́шеся.

Егда́ от до́му изше́д, / слеза́ми пу́ть омочи́л еси́, / оби́тели достиза́еши и наста́внику духо́вне бесе́довал еси́, / обе́ты твоя́ Бо́гу воздава́я, / пло́ти твоея́ не пощади́л еси́, / мра́вию и мши́цам сию́ в сне́дь пре́дал еси́ / и сим врага́ до конца́ посрами́л еси́.

Сла́ва, глас 6:

Мир возненави́дев, Христа́ возлюби́л еси́ / и, Тому́ после́довав, / вери́ги тя́жки на те́ле твое́м носи́л еси́, / посто́м и бде́нием себе́ удруча́я, / я́ко безпло́тен, на земли́ пожи́л еси́; / ду́шу же пресве́тлу Бо́гу предста́вив, / дарова́ний чуде́с сподо́бился еси́. / Тем мо́лим тя, о́тче Ники́то преподо́бне, / моли́ спасти́ся душа́м на́шим.

И ны́не, Богоро́дичен.

Вход. Проки́мен дне. Чте́ния три.

Проро́чества Иса́иина чте́ние (глава́ 43):

Та́ко глаго́лет Госпо́дь: / вси язы́цы собра́шася вку́пе, и соберу́тся кня́зи от них. / Кто возвести́т сия́ в них? / Или́, я́же от нача́ла, кто слы́шана сотвори́т вам? / Да приведу́т свиде́тели своя́, и оправдя́тся, / и да услы́шат, и да реку́т и́стину. / Бу́дите Ми свиде́тели, и Аз Свиде́тель, глаго́лет Госпо́дь Бог, / и о́трок, его́же избра́х, / да позна́ете, и ве́руете Ми, / и разуме́ете, я́ко Аз е́смь, / пре́жде Мене́ не бы́сть ин бог и по Мне не бу́дет. / Аз е́смь Бог, и не́сть, ра́зве Мене́, спаса́яй. / Аз возвести́х и спасо́х, / уничижи́х и не бе в вас чу́ждий. / Вы Мне свиде́тели, и Аз Госпо́дь Бог, / и еще́ от нача́ла Аз е́смь, / и не́сть, от рук Мои́х избавля́яй. / Сотворю́, и кто отврати́т то? / Си́це глаго́лет Госпо́дь Бог, / избавля́яй вас Святы́й Изра́илев.

Проро́чества Иса́иина чте́ние (глава́ 62):

Та́ко глаго́лет Госпо́дь: / на стена́х твои́х, Иерусали́ме, устро́их стра́жи ве́сь де́нь и всю но́щь, / и́же до конца́ не премо́лкнут, помина́юще Го́спода: / не́сть бо вам подо́бен, / а́ще испра́виши и сотвори́ши, Иерусали́ме, непрезо́рство на земли́. / Кля́тся Госпо́дь си́лою Свое́ю и кре́постию мы́шцы Своея́: / а́ще ктому́ отда́м пшени́цу твою́ и бра́шно твое́ враго́м твои́м, / и а́ще ктому́ испию́т вино́ твое́ сы́нове чужди́и, о не́мже труди́лся еси́, / но собира́ющим снедя́т е и восхва́лят Го́спода, / и е́млющии испию́т е во дво́рех святы́х Мои́х. / Ше́ствуйте враты́ Мои́ми, и пу́ть сотвори́те лю́дем Мои́м, / и ка́мение, е́же на пути́, размещи́те, / и воздви́гните зна́мение во язы́ки. / Се бо Госпо́дь слы́шано сотвори́ до после́дних земли́, / и рече́те дще́ри Сио́нове: / се Спаси́тель твой прихо́дит, имы́й мзду с Собо́ю, / и де́ло Его́ пред лице́м Его́. / И нарече́т я лю́ди свя́ты, изба́влены Го́сподем, / ты же нарече́шися взы́скан град и не оста́влен.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их, / и попече́ние их у Вы́шняго. / Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, / зане́ десни́цею покры́ет я и мы́шцею защити́т их. / Прии́мет всеору́жие рве́ние Свое́ / и вооружи́т тва́рь в ме́сть враго́м. / Облече́тся в броня́ пра́вды и возложи́т шлем – суд нелицеме́рен. / Прии́мет щит непобеди́мый преподо́бие, / поостри́т же напра́сный гнев во ору́жие, / спобо́рет же с ним мир на безу́мныя. / По́йдут праволу́чныя стре́лы мо́лниины / и, я́ко от благокру́гла лу́ка облако́в, на наме́рение полетя́т. / И от каменоме́тныя я́рости испо́лнь паду́т гра́ды. / Вознегоду́ет на них вода́ морска́я, ре́ки же потопя́т я на́гло. / Сопроти́в ста́нет им дух си́лы и, я́ко ви́хор, разве́ет их, / и опустоши́т всю зе́млю беззако́ние, / и злоде́йство преврати́т престо́лы си́льных. / Слы́шите у́бо, ца́рие, и разуме́йте, / навы́кните, судии́ конце́в земли́. / Внуши́те, держа́щии мно́жества и гордя́щиися о наро́дах язы́к, / я́ко дана́ е́сть от Го́спода держа́ва вам / и си́ла от Вы́шняго.

На лити́и стихи́ры, глас 4:

Преподо́бне о́тче Ники́то, / ты врач душа́м и те́лом яви́лся еси́, / источа́я неду́жным исцеле́ния струи́, / да́ром же благода́тным украша́емь, да́льнаго ра́ди ше́ствия / тя́жким неду́гом обдержи́маго кня́зя здра́ва сотвори́л еси́, / воздаю́ща хвалу́ Бо́гу, / такова́ да́ра сподо́бльшему тя, / и, обра́щшагося к пу́тному ше́ствию, глаго́лавша: / моли́, преподо́бне, о чту́щих любо́вию пречестну́ю па́мять твою́, / спасти́ ду́ши на́ша.

Богому́дре Ники́то, / сла́ву маловре́менную оста́вль, / в тезоимени́таго Ла́вру всели́лся еси́, о́тче, / и, Тро́ице чи́стый дом показа́вся, блаже́нне, / си́лою и де́йствием Свята́го Ду́ха те́мныя полки́ прогоня́еши, / и зми́я среди́ ке́ллии ме́ртва сотвори́л еси́: / живя́ше бо в тебе́ Христо́с Бог наш, / Его́же моли́, преподо́бне, / спасти́ ду́ши на́ша.

Мирски́й мяте́ж оста́вль / и взем крест твой, / после́довал еси́ Христу́ невозвра́тным по́мыслом. / Из до́му изше́л еси́, / супру́гу и бли́жними я́ко нивочто́же вмени́в, / и дости́гл еси́ тезоимени́таго в му́ченицех Ла́вры, / душе́вныя стра́сти из ко́рене исторга́я, / тя́жкая желе́за на вы́ю возложи́л еси́, / и ча́стых ра́ди бде́ний и моли́тв благода́ть восприе́м, преподо́бне, / исцеля́ти разли́чныя неду́ги. / А́нгелом собесе́дниче и преподо́бным сожи́телю, / о́тче Ники́то, моли́ся Го́сподеви / спасти́ ду́ши на́ша.

Сла́ва, глас 5:

Преподо́бне о́тче, / не дал еси́ сна твои́ма очи́ма, / ни ве́ждома дрема́ния, / до́ндеже ду́шу и те́ло от страсте́й свободи́л еси́ / и себе́ угото́вал еси́ Ду́ху жили́ще: / прише́д бо, Христо́с со Отце́м оби́тель в тебе́ сотвори́, / и Единосу́щныя Тро́ицы уго́дник быв, / великопропове́дниче, о́тче наш Ники́то, / моли́ спасти́ся нам.

И ны́не, Богоро́дичен.

На стихо́вне стихи́ры, глас 8.

Подо́бен: О, прреславнаго чудесе́:

Преподо́бне о́тче Ники́то, / слепы́м дае́ши свет, / боля́щим исцеле́ние, / хромы́м здра́вие / и ми́лостивно преклоня́ешися / приходя́щим с ве́рою ко хра́му твоему́, / прося́щим по́мощи твоея́: / се бо засту́пника и предста́теля, ве́рнии вси, обрето́хом, / восхваля́ющии тя, всече́стне.

Стих: Честна́ пред Го́сподем / сме́рть преподо́бных Его́.

Преподо́бне о́тче всече́стне, / доброде́тельми благи́ми вшел еси́, / я́ко на о́гненней колесни́це, к Бо́гу / и побе́дными венцы́ увя́зался еси́, / я́ко мони́сты, на те́ле твое́м носи́л еси́ честны́я вери́ги; / на гро́бе же положены́, источа́ют исцеле́ния / и прогоня́ют ду́хи лука́выя. / Тем блажи́м тя, прехва́льне Ники́то.

Стих: Блаже́н муж, боя́йся Го́спода, / в за́поведех Его́ восхо́щет зело́.

Лико́м по́стническим сочта́лся еси́, преподо́бне, / и мона́шеским украси́лся еси́, блаже́нне, житие́м, / и ны́не в Небе́сных весели́шися селе́ниих, / иде́же лику́ют А́нгели, / све́том Боже́ственным вои́стинну обожа́емь. / Помина́й вы́ну / блажа́щих тя на земли́ / и пресвято́е твое́ творя́щих успе́ние, Ники́то.

Сла́ва, глас 3:

Глас проро́ка, велегла́сно вопию́ща: / измы́йтеся, и чи́сти бу́дете, / моля́щу ти ся во святи́лиши, услы́шав, / возстена́л еси́ из глубины́ се́рдца, глаго́ля: / Бо́же, очи́сти мя. / И учрежде́ние сотвори́л еси́ в до́му клевре́т ра́ди твои́х, / и уви́дением бра́шен ужа́слся, / и отто́ргнулся еси́, я́ко се́рна, от тене́т, / земна́я мудрова́ния оплева́в. / И ны́не, преподо́бне о́тче Ники́то, / не пре́зри моли́твы раб твои́х, моля́щихся тебе́, / испроси́ у Христа́ Бо́га / поми́ловати ду́ши на́ша.

И ны́не, Богоро́дичен.

Тропа́рь, глас 4:

Правосла́вным смы́слом ю́ношская возжеле́ния возненави́дев / и до́блественныя нра́вы восприи́м, врага́ победи́л еси́, / и во благоразу́мии Бо́гу угоди́л еси́, / и свы́ше от Него́ прие́м дар чуде́с, / бе́сы прогоня́ти, неду́ги исцеля́ти, / Ники́то пресла́вне, / моли́ Христа́ Бо́га, да спасе́т ду́ши на́ша.

Ин тропа́рь, глас то́йже:

Христо́ву му́ченику тезоимени́т был еси́, преподо́бне, / мно́ги по́двиги и труды́ претерпе́л еси́ Христа́ ра́ди, / Его́же ра́ди вери́ги носи́л еси́, блаже́нне, / Того́ ны́не о нас моли́, Ники́то преподо́бне, / душе́вныя на́ша и теле́сныя стра́сти уврачева́ти, / и́же ве́рою и любо́вию / почита́ющих при́сно па́мять твою́.

НА У́ТРЕНИ

По 1-й стихоло́гии седа́лен, глас 4:

Во оби́тели тезоимени́таго тебе́ страстоте́рпца жи́знь препроводи́л еси́, / и вси, приходя́щии к тебе́, а́ки ко исто́чнику благотеку́щему, / ра́достно отходя́ще, Христа́ прославля́ют.

Сла́ва, и ны́не, Богоро́дичен:

Воста́ния безпло́тных враг и зло́бы, изба́ви мя, Богоро́дице, / и Твое́ю моли́твою сих прожени́: / Тя бо и́мам те́плое заступле́ние, и по́мощь, и тве́рдое прибе́жище.

По 2-й стихоло́гии седа́лен, глас 3:

Не то́кмо во гра́де твое́м слы́шано бы́сть, / но и во вся страны́ и гра́ды произы́де сла́ва и́мене твоего́, преподо́бне, / и вси, призыва́ющии с ве́рою тебе́ на по́мощь, / неду́гов исцеле́ние прие́млют.

Сла́ва, и ны́не, Богоро́дичен:

Предста́тельнице и покро́в Ты еси́, Пречи́стая, / изба́ви ны от бед лю́тых и обстоя́ний / и ду́ши на́ша спаси́ Боже́ственными Твои́ми моли́твами.

По полиеле́и седа́лен, глас 2:

Ко́е похвале́ние принесе́м тебе́, преподо́бне? / а́нгельски бо на земли́ пожи́л еси́, / дре́вних же по́стник воздержа́нием дости́г, / к му́чеником приложи́лся еси́, я́ко ну́ждную сме́рть прия́вый. / Тем мо́лим тя, Ники́то: / моли́ Христа́ Бо́га о всех нас.

Сла́ва, и ны́не, Богоро́дичен:

Прия́т во чре́ве Невмести́маго Бо́га, / Херуви́м и Серафи́м вы́шши яви́лася еси́, Влады́чице, / тем, вси ве́рнии, воспева́ем Рождество́ Твое́, Пречи́стая.

Степе́нна, 1-й антифо́н 4-го гла́са. Проки́мен: Честна́ пред Го́сподем / сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче, / егда́ от до́му изше́л еси́, / ни на град озре́лся еси́, / ни друго́в соедине́ния, / ни супру́жницы любве́ помышля́я, / но ку́пно вся земна́я возненави́дев, / на Небе́сная же взира́я / и к сим ра́зум твой возвыша́я: / и я́коже обеща́лся еси́, / та́ко благоче́стно соверши́л еси́. / Тем па́мять твою́ почита́ем, досточу́дне.

Кано́н, глас 4.

Пе́снь 1

Ирмо́с: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Све́том благода́ти озаря́емь, преподо́бне, / ве́рою па́мять твою́ торжеству́ющия светови́дную / тьмы́ грехо́вныя моли́твами твои́ми изба́ви, / Ники́то пресла́вне.

К Бо́гу вводя́щ несовра́тно ше́ствовал еси́ пу́ть, / ко гра́ду Небе́сному, Ники́то, дости́гл еси́, / и́бо Святы́й наста́ви тя Дух, почива́яй в се́рдцы твое́м.

Вознося́щее смире́ние, Ники́то, име́л еси́, тем мо́лимся тебе́: / уще́дри, преподо́бне, смире́ние на́ше / и боле́зни вся облегчи́ серде́ц на́ших.

Богоро́дичен: Ра́дости нам Хода́таица, / я́ко прие́мши исполне́ние всего́ Божества́, яви́лася еси́, Всенепоро́чная, / тем вси Тебе́, ра́дуйся, А́нгелово согла́сно зове́м, Богора́дованная.

Други́й кано́н, име́яй краегране́сие: Пе́ние приношу́ моле́бно преди́вному отцу́ Ники́те. Глас 8.

Пе́снь 1

Ирмо́с: Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре, / пои́м Ему́, я́ко Изба́вителю на́шему Бо́гу, / я́ко просла́вися.

Пе́ние приими́ от усте́н недосто́йных, Человеколю́бие Го́споди, / и пода́ждь ми отверзе́ние усто́м и глас умиле́ния, / да возмогу́ воспе́ти уго́дника Твоего́, Ники́ту преди́внаго.

Не́навистию возненави́дев суету́ ми́ра, / вся соде́янная с пла́чем испове́дал еси́ духо́вному твоему́ наста́внику / и запреще́ние любе́зно от души́ восприя́л еси́.

Ели́ко име́я друго́в любле́ния, / и подру́жия совокупле́ния, и домо́вное пребыва́ние, / во́лею всех оттщети́вся, Христа́ еди́наго приобре́л еси́.

Богоро́дичен: Мольбу́ приноша́ю от усте́н недосто́йных, сию́ приими́, Влады́чице, / я́ко вдо́выя о́ныя две ца́те, неде́йственна бо е́сть. / Те́мже со умиле́нием вопию́ Ти: / о Пребога́тая, сла́ва Рождеству́ Твоему́, Пречи́стая!

Пе́снь 3

Ирмо́с: Не му́дростию, и си́лою, и бога́тством хва́лимся, / но Тобо́ю, О́тчею Ипоста́сною Му́дростию, Христе́, / не́сть бо свят, па́че Тебе́, Человеколю́бче.

Пре́жднее весе́лие измени́л еси́ / бу́дущих ра́ди благи́х же́стостию, доброде́тельно пожи́в, блаже́нне, / на исто́чнице в гора́х, я́ко вели́кий Илия́, пребыва́я.

Пу́ть пра́вый, его́же возжеле́в поще́ния ра́ди, / удивле́нием бра́шен тебе́ показа́ Бог, / его́же обре́л еси́ безме́здно я́коже приста́нище, му́дре.

Ко́леблемых разли́чными страстьми́ ко твоему́ столпу́, Ники́то, приходя́щих, / честны́м твои́м хода́тайством всех нас посети́, / моля́ Человеколю́бца.

Богоро́дичен: Тя Му́дрость Бо́жия всечестны́й орга́н обре́тши, / от Твои́х чи́стых крове́й воплоща́ется / и по рождестве́ нетле́нну показа́.

Ин

Ирмо́с: Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Матфе́й, мы́тницу оста́вль, евангели́ст показа́ся; / ты же, преподо́бне, суету́ ми́ра отве́рг / в мона́шеская оде́явся, Христу́ угоди́л еси́ / и чудотво́рец показа́лся еси́.

Лука́вое со́нмище оста́вль, / Христо́в яре́м на ся возложи́л еси́, / труды́ же и по́двиги твои́ми всех удивля́я и ко спасе́нию наставля́я.

Блу́днаго гла́сом вопия́ и со воздыха́нием в пе́рси бия́, / Бо́гу прибли́жился еси́ и ра́дости ве́чныя сподо́бился еси́ / и непреста́ннаго, Ники́то, весе́лия.

Богоро́дичен: Напа́стьми мно́гими одержи́м с боле́зньми и пла́чем вопию́ Ти: / изба́ви, Богоро́дице, от одержа́щих мя скорбе́й и ве́чнаго муче́ния / и Ца́рствия Сы́на Твоего́ сподо́би мя.

Ин и́кос:

А́ще и челове́к, о́тче, по естеству́, / но па́че естества́ челове́ческаго стяжа́л еси́, / вся бо в ми́ре сла́дкая и кра́сная преоби́дев, после́довал еси́ Христу́, / те́мже и от всех слы́шиши: / ра́дуйся, я́ко Пречи́стою наставля́емь, пусты́ню дости́гл еси́; / ра́дуйся, я́ко в ней прече́стен храм Бо́жией Ма́тери воздви́гл еси́; / ра́дуйся, я́ко та́мо в нем Бог тобо́ю прославля́ется; / ра́дуйся, я́ко вшел еси́ на столп, преподо́бне; / ра́дуйся, я́ко пло́ть порабо́тил еси́ ду́ху; / ра́дуйся, я́ко твоему́ житию́ А́нгели удиви́шася; / ра́дуйся, я́ко тобо́ю челове́цы по́льзовашася65; / ра́дуйся, я́ко чудесы́ удиви́вый вся; / ра́дуйся, я́ко на Небесе́х предстоя́ Тро́ице, о нас мо́лишися; / ра́дуйся, исто́чниче чудесе́м неисчерпа́емый; / ра́дуйся, Ники́то преподо́бне, моли́твенниче о душа́х на́ших.

Седа́лен, глас 5:

Те́лом возше́д на столп, ум же возвы́сив на преми́рная, / труды́ ко трудо́м прилага́еши, жела́я дости́гнути угото́ванных тебе́ благ на Небесе́х, / и́хже получи́в, помина́й нас, почита́ющих свяще́нную па́мять твою́.

Други́й седа́лен, глас 4:

Я́ко всесве́тлая звезда́, возсия́в светоза́рными доброде́тельми, Богоно́се, / всю ду́шу просвети́л еси́ Ду́хом. / Тем преше́л еси́ к невече́рнему Све́ту, / разреша́я страсте́й на́ших те́мныя о́блаки, / па́мять твою́ при́сно творя́щих се́рдца пра́востию.

Сла́ва, и ны́не, Богоро́дичен:

Нечи́стых по́мысл мои́х мно́жество / и безме́стных мы́слей обурева́ния / кто изрещи́ мо́жет, Всенепоро́чная? / Настоя́ния же безпло́тных враг мои́х кто испове́сть и сих зло́бу? / Но Твое́ю мольбо́ю, Блага́я, сих мне всех избавле́ние да́руй.

Пе́снь 4

Ирмо́с: Седя́й в Сла́ве на Престо́ле Божества́, / во о́блаце ле́гце / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Столпу́, Богоно́се, согражда́ему непоколе́блемою душе́ю / сам ся пре́дал еси́, бу́дущую жи́знь предзря́, / ея́же улучи́ти жела́я, я́ко храбр во́ин.

Ла́вры честны́я дости́гл еси́, му́дре, / возвы́сився смире́нием, верхи́ де́монския смири́л еси́ / и в ней до́блествовал еси́, сла́ва мона́хов и утвержде́ние.

Моли́твами и посто́м вооружи́вся / и стра́хом себе́ умертви́в Госпо́дним, блаже́нне, / отсту́пника изсека́еши, неви́димаго зми́я, о́тче, побе́дник был еси́.

Ве́сь Боже́ственным Ду́хом разжже́н быв, о́тче, / труды́ подъя́л еси́ на мно́га ле́та, в хлеви́не у́зце терпя́, / взыска́я Го́спода, благода́тию тя Боже́ственною укрепля́ющаго.

Богоро́дичен: На престо́ле высо́це стра́шно седя́й / на ма́тернюю ру́ку, Младе́нец быв, седи́т, / низпа́дший о́браз возводя́ и обоже́ние су́щим подава́я.

Ин

Ирмо́с: Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: / от ю́га прии́дет Бог. / Сла́ва си́ле Твое́й, сла́ва снизхожде́нию Твоему́.

При́сно име́л еси́ к Бо́гу моли́твенника, / духо́внаго твоего́ наста́вника, я́коже втора́го Моисе́я, / изве́дшаго из Еги́пта дре́вняго Изра́иля, науча́юща тя воспева́ти: / сла́ва си́ле Твое́й, Го́споди.

Не довле тебе́, преподо́бне, многотру́дное пребыва́ние, / желе́за тя́жкая на ся возлага́еши / и труды́ к трудо́м прилага́еши, вопия́ Христу́: / сла́ва си́ле Твое́й, Го́споди.

Ше́ствия Небеси́ явля́я, столп водрузи́л еси́ / и от сего́ стезю́ в моли́твенный храм ископа́л еси́, / иде́же приле́жно вопия́ Христу́: / сла́ва си́ле Твое́й, Го́споди.

Богоро́дичен: Возста́ви мя, ни́зу лежа́щаго, моли́твами Твои́ми, Пречи́стая, / и на покая́ния стези́ наста́ви, / да, возбну́в66 от глубины́ неча́яния, узрю́ свет Богоразу́мия / и воспою́ заступле́ние Твое́, Препе́тая.

Пе́снь 5

Ирмо́с: Ужасо́шася вся́ческая / о Боже́ственней сла́ве Твое́й: / Ты бо, Иеискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Ходи́л еси́, преподо́бне, по у́зкому пути́, / Боже́ственными восхожде́нии се́рдца распространя́яся / и прича́стием обожа́яся, всему́дре. / Тем был еси́ мона́хом све́тлость.

О́ко очи́стившу у́мное, преподо́бне, / благода́ть даде́ся тебе́, а́ки проро́ку, / е́же пре́дняя предзре́ти и предглаго́лати я́ко су́щая да́льняя и безве́стная.

Боле́знь облегчи́ ми грехо́в и скорбе́й, / и преста́ви се́рдца моего́ боле́зни, / и согреше́ний разреше́ние да́руй, Благоде́теля Бо́га име́я, / послу́шающаго честны́х твои́х моли́тв.

Богоро́дичен: Ума́ моего́ исцели́ превраще́ние, Пречи́стая, / уврачу́й стра́сти души́ моея́ и ле́ностную тьму́ отжени́, / я́ко да хвала́ми Тя при́сно ублажа́ем, Всенепоро́чная.

Ин

Ирмо́с: Го́споди Бо́же наш, мир да́ждь нам, / Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем.

Пе́ния соверша́я, исходя́ в но́щи от столпа́, два исто́чника ископа́л еси́, / от ни́хже и до ньше, с ве́рою почерпа́юще, / прие́млют благода́ть исцеле́ний.

Сопе́рник прелука́вый, а́ки змий превели́к, / посреде́ ке́ллии твоея́ изы́де, устраша́я тя, / ты же сего́, блаже́нне, попра́л еси́ / и без ве́сти моли́твою до конца́ сотвори́л еси́.

Неду́г ослабле́ния удо́в име́я, благочести́вый Михаи́л, / княже́ние тогда́ содержа́й во гра́де Черни́гове, / моли́твами твои́ми исцеле́ние получи́.

Богоро́дичен: Христа́ Иису́са ро́ждшая, Пречи́стая, / Сего́ моли́ при́сно изба́вити от бед рабы́ Твоя́, ве́рою и́мя Твое́ призыва́ющия: / ра́зве бо Тебе́, Влады́чице, ино́го заступле́ния не и́мамы.

Пе́снь 6

Ирмо́с: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Умертви́л еси́ стра́сти теле́сныя, / я́ко дре́во ви́деся высокове́рхо, плоды́ чуде́с принося́, / Ники́то, Богоблаже́нне.

И́же безчи́сленным боле́знем прибли́жихся, / те́лом не́мощен пребы́в, преподо́бне. / Тем зову́ ти веюою: / боле́зни уста́ви се́рдца моего́.

От душе́вных не́мощей, о́тче, коле́блемых, ве́рою тя призыва́ющих ны́не посети́ / моли́твами твои́ми, я́же к Бо́гу, / я́ко да благоче́стно тя сла́вим.

Богоро́дичен: Еди́на Помо́щнице, помози́ ми, погиба́ющу, / и ру́ку ми простри́, и ко приста́нищу наведи́ покая́ния, / Де́во Богора́дованная.

Ирмо́с: Я́ко во́ды морски́я, Человеколю́бче, / волна́ми жите́йскими обурева́юся. / Те́мже, я́ко Ио́на, та́ко вопию́ Ти: / возведи́ от тли живо́т мой, / Благоутро́бне Го́споди.

Преди́вно бы́сть чу́до: еще́ бо держа́вному Михаи́лу, ни оби́тели дости́гшу, / ни столпа́ ви́девшу, то́кмо жезл твой в ру́це прии́м / и о сем укрепи́вся, исцеле́ние получи́ / и прии́де во оби́тель твою́ здрав.

Ра́достно благочести́вый Михаи́л кня́зь, прие́мля от тебе́ благослове́ние, / сам тебе́ испове́да, ка́ко велиа́р во о́бразе чернца, / двакра́ты поноси́ тебе́, сказу́я тебе́, от жития́ сего́ отше́дша.

Держа́вный Михаи́л кня́зь, доше́д ме́ста, иде́же исцеле́ние получи́, / повеле́ водрузи́ти Честны́й Крест в сла́ву Бо́гу / и в па́мять чудеси́ преди́внаго отца́.

Богоро́дичен: Все вре́мя живота́ моего́ во страсте́х изжи́х / и ны́не моле́ния приноша́ю Ти, Пречи́стая: / разреше́ние пода́ждь ми, Всепе́тая, и ве́чнаго мя изба́ви осужде́ния, / Ты бо ми́ру Блага́я Помо́щница.

Конда́к, глас 8:

Христа́ ра́ди от твои́х рабо́в ну́ждную сме́рть претерпе́л еси́ / и вене́ц нетле́ния от Него́ восприя́л еси́, / приходя́щим же с ве́рою от честна́го твоего́ гро́ба подае́ши цельбы́, / о Ники́то преподо́бне, / моли́твенниче о душа́х на́ших.

И́кос:

Земны́й А́нгел, Небе́сный челове́к был еси́, преподо́бне, / посто́м и бде́нием ду́шу просвети́в, / алка́нием, и жа́ждею, и на земли́ лега́нием Бо́гу угоди́л еси́ / и вся́ку доброде́тель мона́шескаго жития́ испра́вил еси́, / к сим же и ну́ждную сме́рть от твои́х рабо́в восприи́м, / возше́л еси́ к жела́емому Христу́, ра́дуяся, о Ники́то преподо́бне, / моли́твенниче о душа́х на́ших.

Пе́снь 7

Ирмо́с: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Се́рдце твое́ Тро́ическое жили́ще соде́лав, / три кресты́ и тя́жкая желе́за, Ники́то, на себе́ поне́с, / от ни́хже Боже́ственною благода́тию цельбы́ истека́ют / на просвеще́ние и очище́ние ве́рно притека́ющим ти.

Душа́ твоя́ светозаре́нием Боже́ственнаго Ду́ха сия́ющи при́сно, / ду́ши ви́дяще притека́ющих ти ве́рою све́тло, блаже́нне, проро́ческими прорече́нии, / тем тя ублажа́ем.

Неду́гов тружда́ющих, блаже́нне, ду́ши и телеса́ / твои́ми святы́ми моли́твами вско́ре измени́ и пе́ти сотвори́: / препе́тый отце́в Госпо́дь и Бог, благослове́н еси́.

Богоро́дичен: Непреме́ннаго ро́ждши, еди́на Богора́дованная, / десни́цею Его́, Чи́стая, премени́ти ми ум на лу́чшее молю́ Ти ся, / лю́те превраща́емый жите́йскими упраждне́нии.

Ин

Ирмо́с: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

Не ржа покры́ тя́жкая о́на желе́за, / но труды́ твоя́ и по́ты сих просвети́ша, и, я́ко зла́то, блеща́хуся: / любве́ же ра́ди Госпо́дни не чул еси́ сих на телеси́ твое́м, усе́рдно вопия́: / оте́ц на́ших Бо́же, благослове́н еси́.

Му́тнии умо́м уби́йцы, зря́ще блиста́ние о́но на телеси́ твое́м, / мня́ще мно́жество зла́та нося́щу ти, / о уби́йстве твое́м умы́слиша. / Ты же от сих, преподо́бне, ну́ждную сме́рть восприя́л еси́, вопия́ Христу́: / оте́ц на́ших Бо́же, благослове́н еси́.

Обрето́ша во вре́мя у́тренняго клепа́ния честно́е те́ло твое́, те́пло лежа́що, / ду́шу же отше́дшу ко Го́споду, / оби́тели же, испо́лньшися благово́ния, вси возопи́ша со слеза́ми: / оте́ц на́ших Бо́же, благослове́н еси́.

Богоро́дичен: Це́рковь освяще́на Бо́гу бы́вши, Мари́е Богороди́тельнице, / Сего́ моли́, я́ко Человеколю́бца, Чи́стая, уще́дрити лю́ди согреши́вшия / и спасти́ от бед лю́тых и страсте́й треволне́ния.

Пе́снь 8

Ирмо́с: О́троки благочести́выя в пещи́ / Рождество́ Богоро́дичо спасло́ е́сть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Стоя́ на сто́лпе вы́спрь, / я́ко на све́щнице свеща́, преподо́бне, светя́щи, / всем ра́зумы ве́рным просвеща́я, / пока́зовал еси́ до́бре словесы́ и дея́нии стезю́ живота́ / и возводи́л еси́ сия́ Боже́ственным смы́слом к высоте́ безстра́стия.

Ум безстра́стием очи́щ, бесе́довал еси́ ко Го́споду Вседержи́телю, / от Него́же неизрече́нным, преподо́бне, навыка́я, / проро́чески предглаго́лал еси́, / просвеща́я ду́ши, я́ко вели́кий, преблаже́нне, проро́к; / тем тя согла́сно ве́рою воспева́ем.

Наидо́ша ми ра́ны тя́жкия, и неду́зи ча́сто тружда́ют, / тех мя измени́, о́тче, молю́ ти ся, / я́ко от Бо́га прии́м, Ники́то, / благода́ть исцеля́ти стра́сти и боле́зни облегча́ти.

Тро́ичен: Со все́ми Го́рними во́инствы Отца́ и Сы́на и Свята́го Ду́ха, / Тро́ицу Неразде́льну, Несозда́нно Божество́, пееносло́вяще, / Свят, Свят, Свят, возопие́м ра́достно, / Еди́на Вла́сть, Нача́ло и Ца́рство.

Богоро́дичен: И́же все́ми непристу́пен Сый Зижди́тель Го́рними, Отрокови́це, чи́нми, / всели́вся в ложесна́ Твоя́, неопа́льну соблюде́ Тя и по рождестве́ нетле́нну. / Ему́же ны́не при́сно пое́м: / Го́спода воспева́йте дела́ и превозноси́те Его́ во вся ве́ки.

Ин

Ирмо́с: Покрыва́яй вода́ми превы́спренняя Своя́, / полага́ли мо́рю преде́л песо́к / и содержа́й вся, / Тя пое́т со́лнце, Тя сла́вит луна́, / Тебе́ прино́сит пе́снь вся тва́рь, / я́ко Соде́телю всех во ве́ки.

Неразу́мнии они́ уби́йцы жела́емаго зла́та не получи́ша, / честны́я же вери́ги в реку́ Во́лгу вверго́ша; / пресве́тлым луча́м над ни́ми в нощи́ я́вльшимся, / я́ко и ве́сь град Яросла́вль осия́вшим.

Кресты́ три и вери́ги тя́жки, / верху́ во́ды пла́вающии, обрето́шася, / и сих боголюби́вии взе́мше, во град Яросла́вль внесо́ша, / и мно́зи, разли́чными неду́ги одержи́мии, / исцеле́ние от сих получи́ша.

Ты сам, преподо́бне, обре́тшему яви́вся, / три кресты́, рекл еси́, и тя́жкая желе́за, / по́честь трудо́в мои́х, ско́ро положе́ни да бу́дут на гро́бе мое́м. / Он же, стра́хом и ра́достию одержи́м быв, / по словеси́ твоему́ та́ко сотвори́.

Богоро́дичен: Твоя́ ми́лости на мне удиви́вши, Чи́стая, / уя́звенную ду́шу мою́ исцели́, / и бу́дущаго муче́ния изба́ви, / и Ца́рствия Сы́на Твоего́ сподо́би мя.

Пе́снь 9

Ирмо́с: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная Богоро́дице, / Чи́стая Присноде́во.

Воздвиза́я ру́ки твоя́ к Бо́гу, моли́лся еси́, / крепя ум твой удержа́ти от страсте́й, / а́ки А́нгел, в телеси́, о́тче, ты был еси́. / Тем со А́нгелы всегда́ на Небесе́х живе́ши, сла́вному престо́лу предстоя́, / Све́та невече́рняго исполня́емь.

Я́ко на Небеси́, в хлеви́не у́зце пожи́л еси́, преподо́бне: / тем ти умири́шася ди́вии зве́рие, / покори́вшему стра́сти теле́сныя и злостремле́ния, Ники́то преподо́бне. / Сего́ ра́ди ве́рою тя почита́ем.

Твоя́ честны́я и святы́я мо́щи, во гро́бе лежа́ще, погружа́ют неду́ги, / и попаля́ют толпы́ де́монския всегда́, / преподо́бне Ники́то, Боже́ственною благода́тию, / и источа́ют всем исцеле́ния, ве́рно тя блажа́щим.

Уже́ к Бо́гу приближа́яся я́сне и чи́сте, / помяни́ ве́рою тя, Ники́то, помина́ющих, / грехо́в оставле́ние нам испроси́, и неду́гов всех избавле́ние, / и Бо́жия Ца́рства селе́ние.

Богоро́дичен: Све́том мя озари́ Твои́м, Непоро́чная, ро́ждшая Свет непристу́пный, / разжени́ о́блак страсте́й души́ моея́, / и от тьмы́ изми́, молю́ Ти ся, / и Боже́ственнаго спасе́ния сподо́би, Чи́стая, еди́на Присноде́ва.

Ин

Ирмо́с: Тя, Неискусобра́чную Ма́терь Бо́га Вы́шняго, / Тя, па́че ума́ ро́ждшую сло́вом вои́стинну Бо́га, / вы́шшую пречи́стых сил, / немо́лчными славословле́нии велича́ем.

Моли́ за ны, о́тче преподо́бне, держа́вный вопия́ше, / и испроси́ ми́ру мир, нам же здра́вие и на враги́ одоле́ние: / тебе́ бо моли́твенника те́пла ко Влады́це предлага́ем.

Ра́ку твою́ лобыза́юще, лю́дие благочести́вии уми́льно глаго́лют: / испроси́ у Христа́, преподо́бне, / нам же и ча́дом на́шим здра́вие, и спасе́ние и ве́лию ми́лость.

Ку́пно за оте́чество, и святи́телей, и за вся правосла́вныя моли́ся, преподо́бне, / да вси, па́мять твою́ све́тло пра́зднующе, / в пе́снех Христа́ велича́ем.

Богоро́дичен: Льва́ рыка́ющаго на мя утиши́, Пречи́стая, / мене́ же цельбы́ Боже́ственныя сподо́би, / да узрю́ свет Богоразу́мия и ра́достно воспою́ Рождество́ Твое́, Богоро́дице.

Свети́лен:

Вся жития́ оста́вль, Христа́ приобре́л еси́, / трудополо́жно пожи́в / и сме́рть ну́ждную восприе́мь; / тем па́мять твою́, Ники́то, почита́ем.

Сла́ва, и ны́не, Богоро́дичен:

Бо́га нам, Пречи́стая, родила́ еси́, / и вси, прароди́тельныя кля́твы изба́вльшеся, / воспева́ем Тя, Препе́тая.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́! / Ка́ко премени́ся ра́зум твой / от суеты́ ми́ра на благоче́стие? / Смире́н и целому́др показа́ся / мона́хом наста́вник ко спасе́нию, / по́стников похвала́, / молча́льников удобре́ние. / Те́мже любо́вию па́мять твою́, / Ники́то преподо́бне, ублажа́ем.

Моли́твенник к Бо́гу кре́пок был еси́, / чистоты́ рачи́тель, / целому́дрия о́браз, / терпе́ния столп, / а́нгельски на земли́ пожи́л еси́, / и, я́ко звезда́ пресве́тлая, показа́лся еси́, / и был еси́ мно́гим во́ждь ко спасе́нию. / Те́мже любе́зно / па́мять твою́, Ники́то преподо́бне, восхваля́ем.

О́бразом ангелоле́пен показа́лся еси́, / седи́на честна́, посто́м укра́шена, / воздержа́нием сия́я, братолю́бием цветы́й, / кро́ток взо́ром, / и тих хожде́нием, / и умиле́н виде́нием, / и смире́н се́рдцем, высо́к доброде́тельным житие́м. / Те́мже любо́вию / па́мять твою́, Ники́то преподо́бне, ублажа́ем.

Сла́ва, глас то́йже. Самогла́сен:

Преподо́бне о́тче Ники́то, / в мона́шестве пожи́л еси́ непоро́чно / и благоуго́дно Го́сподеви, / и, ели́ко трудополо́жно нача́л еси́, / изря́дно и чу́дно сконча́л еси́ / и всесоверше́нно во стра́се Бо́жий, / и чуде́с дарова́ний сподо́бился еси́, / е́же исцеля́ти неду́ги разли́чныя / и прогоня́ти ду́хи лука́выя. / Тем па́мять твою́ почита́ем, досточу́дне.

И ны́не, Богоро́дичен.

Славосло́вие вели́кое, И отпу́ст.

Моли́тва

О всечестна́я главо́, преподо́бне о́тче преблаже́нне, Ники́то преподо́бному́чениче! Не забу́ди ни́щих твои́х до конца́, но помина́й нас всегда́ во святы́х свои́х и благоприя́тных моли́твах к Бо́гу и не забу́ди присеща́ти чад свои́х. Моли́ за ны, о́тче благи́й и избра́нниче Христо́в, я́ко име́яй дерзнове́ние к Небе́сному Царю́, и не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас, недосто́йных, у Престо́ла Вседержи́телева и не преста́й моля́ся за нас ко Христу́ Бо́гу: тебе́ бо дана́ бы́сть благода́ть моли́тися за ны. Не мним бо тя ме́ртва су́ща, а́ще бо и те́лом преста́вился еси́ от нас, но и по сме́рти у́бо жив пребыва́еши. Не отступа́й от нас ду́хом, сохраня́я и соблюда́я нас от стрел вра́жиих и вся́кия пре́лести бесо́вския, засту́пниче и моли́твенниче наш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими вои́нствы, со Безпло́тными ли́ки, с Небе́сными си́лами у Престо́ла Вседержи́теля Бо́га досто́йно весели́тся. Ве́дуще у́бо тя вои́стинну и по сме́рти жи́ва су́ща, тебе́ припа́даем, и тебе́ мо́лимся, и ми́лися де́ем, е́же моли́тися о нас Всеси́льному Бо́гу о по́льзе душ на́ших, и испроси́ нам вре́мя на покая́ние и невозбра́нно прейти́ от земли́ на Не́бо и го́рьких мыта́рств, и возду́шных князе́й, и ве́чныя му́ки изба́вится нам, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Ему́, Го́споду на́шему Иису́су Христу́. Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Преподо́бный Ники́та Столпник Переяславльский

Преподобный Никита Столпник Переяславльский был уроженцем города Переславля Залесского и заведовал сбором казенных податей и налогов. В 1152 году князь Юрий Долгорукий перенес город Переславль и каменный храм во имя Всемилостивого Спаса на новое место. В связи с расходами по строительству города и храма был произведен усиленный сбор податей с жителей города. Никита, руководивший этими сборами, нещадно грабил жителей, собирая огромные суммы денег для себя. Так длилось много лет. Но Милосердный Господь, желающий всех грешников спасти, и Никиту привел к покаянию.

Однажды он пришел в церковь и услышал слова пророка Исайи: «Измыйтеся, и чисти будете, отъимите лукавства от душ ваших... научитеся добро творити... избавите обидимого, судите сиру (защитите сироту) и оправдите вдовицу» (Ис. 1:16–17). Словно громом был потрясен он этими словами, проникшими в глубину сердца. Всю ночь Никита провел без сна, вспоминая слова: «Измыйтеся и чисти будете». Однако утром он решил пригласить друзей, чтобы в веселой беседе забыть ужасы прошедшей ночи. Господь вновь призвал Никиту к покаянию. Когда жена стала готовить обед для угощения гостей, то вдруг увидела в кипящем котле то всплывавшую человеческую голову, то руку, то ногу. В ужасе позвала она мужа, и Никита увидел то же самое. Внезапно в нем пробудилась уснувшая совесть, и Никита ясно осознал, что своими поборами он поступает как убийца. «Увы мне, много я согрешил! Господи, наставь меня на путь Твой!»?с такими словами выбежал он из дома.

В трех верстах от Переславля стоял монастырь во имя святого великомученика Никиты, куда и пришел потрясенный страшным видением Никита. Со слезами он припал к ногам игумена: «Спаси погибающую душу!» Тогда игумен решил испытать искренность его покаяния и дал первое послушание: три дня стоять при монастырских воротах и исповедовать всем проходящим грехи свои. С глубоким смирением Никита принял первое послушание. Через три дня игумен вспомнил о нем и послал одного инока посмотреть, что он делает у монастырских ворот. Но инок не нашел Никиту на прежнем месте, а обнаружил его лежащим в болоте: он был покрыт комарами и мошками, тело его было в крови. Тогда сам игумен с братией пришел к добровольному страдальцу и спросил: «Сын мой! Что ты делаешь с собой?» «Отец! Спаси погибающую душу», – отвечал Никита. Игумен одел Никиту во власяницу, сам ввел в монастырь и постриг в монашество.

Всем сердцем приняв монашеские обеты, преподобный Никита проводил дни и ночи в молитве, пении псалмов и чтении житий святых подвижников. По благословению настоятеля он возложил на себя тяжелые вериги и на местах своих монашеских подвигов ископал два глубоких колодца. Вскоре преподобный усилил свой подвиг – он выкопал глубокую круглую яму и там, возложив на главу каменную шапку, стал, подобно древним столпникам, на пламенную молитву. Только голубое небо да ночные звезды видел он со дна своего столпа-колодца, да узкий подземный ход вел под церковную стену – по нему преподобный Никита ходил в храм на Богослужение. Господь принял его покаяние и даровал всесильную благодать исцелять недуги и изгонять бесов. Так, однажды преподобный Никита исцелил юного князя Черниговского Михаила, послав ему навстречу свой жезл. Больной князь оперся на него и стал здоров. При этом святой Никита именем Божиим связал беса, лукавый три часа стоял у столпа, обещая больше не вредить людям.

Так подвизаясь добрым подвигом в обители великомученика Никиты, преподобный Никита и сам завершил жизнь мученической кончиной. Однажды ночью родственники святого, приходившие к нему для благословения, прельстились его блестевшими веригами и крестами, приняв их за серебряные, и решили овладеть ими. В ночь на 24 мая 1186 года они разобрали покрытие столпа, убилн подвижника, сняли с него кресты и вериги, завернули их в грубую холстину и убежали.

Перед утренним Богослужением пономарь, пришедший за благословением к святому Никите, обнаружил разобранную крышу и сообщил об этом игумену. Игумен с братией поспешил к столпу преподобного и увидел убитого святого, от тела которого исходило благоухание.

Торжественно и благоговейно, с пением и свечами было погребено честное тело подвижника у церкви святого великомученика Никиты, с правой стороны алтаря.

Между тем убийцы, остановившись на берегу реки Волги, решили

поделить добычу, но с удивлением увидели, что это не серебро, а железо, и бросили вериги в Волгу, Господь прославили эти видимые знаки тайных подвигов и трудов святого. В ту же ночь Симеон, благочестивый старец Ярославского монастыря во имя святых апостолов Петра и Павла, увидел над Волгой три ярких луча света. Он сообщил об этом настоятелю монастыря и старейшине города. Собор священников и многочисленные горожане, сошедшиеся к реке, увидели три креста и вериги «яко древо в водах волжских плавающие». С благоговением и молитвами перенесены были вериги в обитель великомученика Никиты и положены на гроб преподобного Никиты. При этом произошли исцеления.

Около 1420–1425 гг. святитель Фотий, Митрополит Московский, благословил открыть мощи святого Никиты. Игумен монастыря с братией совершил молебен, затем открыли бересту, которой было обернуто нетленное тело, но вдруг могила закрылась землей и мощи остались под спудом. В 1511–1522 гг. был воздвигнут придел во имя преподобного Никиты, а в XIX веке протоиерей А. Свирелин составил акафист святому.

В Иконописном подлиннике дан внешний облик святого: «Подобием стар и сед, брада подоле Власиевой, весьма бела, на конец узка и раздвоилась, от брады с левой стороны косм долг, мало не до пояса, на главе клобук лазоревый со кресты, ризы преподобническия, стоит на столпе. Сей возложи на ся вериги железный и труждашеся, и ради онех же вериг убиен бысть в лето 6694».

Память преподобного Никиты совершается 24 мая.

Литература:

1. Ильинский П., священник. Переяславльский монастырь и его подвижник, преподобный Никита Столпник. Владимир, 1897.

2. Свирелин А., протоиерей. Житие святого Никиты Столпника. Вязники, 1890.

3. Служба преподобному Никите Столпнику. М., 1807.

* * *

64

Рожде́ственный – родовой, общий.

65

Тобо́ю по́льзовашася – тобою исцлялись.

66

Возбну́в – проснувшись, пробудившись.


 В 23-й де́ньВ 24-й де́ньВ 25-й де́нь