Мѣ́сѧца тогѡ́же въ ѳ҃і-й де́нь. Ст҃а́гѡ а҆по́стола і҆ꙋ́ды, бра́та гдⷭ҇нѧ.

На вече́рни пое́мъ, Блаже́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ, стїхи̑ры на и҃, гла́съ а҃.

Подо́бенъ: Всехва́льнїи мꙋ́чєницы:

І҆ꙋ́до всехва́льне, ꙳ твоѐ вѣща́нїе и҆зы́де, ꙳ ꙗ҆́коже мо́лнїѧ ꙳ въ концы̀ всеѧ̀ землѝ, мꙋ́дре, ꙳ помрачє́нныѧ ле́стїю безбо́жїѧ ꙳ къ свѣ́тꙋ наставлѧ́ѧ невече́рнемꙋ: ꙳ и҆́мже ны́нѣ сїѧ́ѧ, ꙳ и҆спросѝ дꙋша́мъ на́шымъ ве́лїю ми́лость.

Три́жды.

І҆ꙋ́до чꙋ́дный, ꙳ хрⷭ҇то́ва колесни́ца ꙗ҆́кѡ бы́въ, ꙳ і҆́дѡльскꙋю горды́ню низложи́лъ є҆сѝ, ꙳ плѣ́нъ же та́йнѡ сло́вомъ бж҃їимъ плѣни́лъ є҆сѝ, ꙳ къ жи́зни нетлѣ́ннѣй, сла́вне: є҆́юже наслажда́ѧсѧ ны́нѣ, ꙳ и҆спросѝ дꙋша́мъ на́шымъ ми́ръ, и҆ ве́лїю ми́лость.

Три́жды.

І҆ꙋ́до, а҆пⷭ҇толе хрⷭ҇то́въ, ꙳ ᲂу҆чени́къ бы́въ вопло́щшагѡсѧ бг҃а на́шегѡ, ꙳ ѿ негѡ́же ꙗ҆́кѡ ѻ҆вча̀ посредѣ̀ волкѡ́въ вои́стиннꙋ посла́лсѧ є҆сѝ, ꙳ сло́вомъ твои́мъ си́хъ претворѧ́ѧ ꙳ ѕлоче́стїе ко бл҃гоче́стїю, ꙳ и҆ бжⷭ҇твенномꙋ разꙋмѣ́нїю ст҃ы́ѧ трⷪ҇цы. ꙳ тѣ́мже восхвалѧ́емъ тѧ̀.

Два́жды.

Сла́ва, гла́съ и҃:

И҆́же бжⷭ҇твеннагѡ дх҃а ꙗ҆́снѡ бл҃года́ть прїе́мъ, свѧще́ннагѡ ли́ка а҆пⷭ҇тольска соприча́стникъ бы́въ, і҆ꙋ́до а҆пⷭ҇ле: тѣ́мъ носи́мое съ нб҃сѐ и҆ногда̀ дыха́нїе ѻ҆́гненное, ѻ҆́гненнымъ ѧ҆зы́комъ вдохнꙋ́въ, и҆ ꙗ҆зы́ческое терно́вное попали́лъ є҆сѝ безбо́жїе: хрⷭ҇та̀ бг҃а, проповѣ́дниче, молѝ, спасти́сѧ дꙋша́мъ на́шымъ.

И҆ ны́нѣ: Ца́рь небе́сный:

Вхо́дъ. Прокі́менъ днѐ. И҆ чтє́нїѧ трѝ.

Собо́рнагѡ посла́нїѧ і҆ꙋ́дина чте́нїе.

[Глава̀ а҃] І҆ꙋ́да, і҆и҃са хрⷭ҇та̀ ра́бъ, бра́тъ же і҆а́кѡва, сꙋ́щымъ ѡ҆ бз҃ѣ ѻ҆ц҃ѣ̀ ѡ҆сщ҃є́ннымъ, і҆и҃съ хрⷭ҇то́мъ соблюдє́ннымъ зва̑ннымъ: ми́лость ва́мъ, и҆ ми́ръ, и҆ любы̀ да ᲂу҆мно́житсѧ. Возлю́бленнїи, всѧ́ко тща́нїе творѧ̀ писа́ти ва́мъ ѡ҆ ѻ҆́бщемъ спасе́нїи ва́шемъ, нꙋ́жда мѝ бы́сть писа́ти ва́мъ, молѧ̀ подвиза́тисѧ ѡ҆ преда́ннѣй вѣ́рѣ свѧты̑мъ є҆ди́ною. Привнидо́ша бо нѣ́цыи человѣ́цы, дре́вле пред̾ꙋста́вленнїи на сїѐ ѡ҆сꙋжде́нїе, нечести́вїи, бг҃а на́шегѡ благода́ть прелага́ющїи въ скве́рнꙋ, и҆ є҆ди́нагѡ влⷣки бг҃а и҆ гдⷭ҇а на́шегѡ і҆и҃са хрⷭ҇та̀ ѿмета́ющїисѧ. Воспомѧнꙋ́ти же ва́мъ хощꙋ̀, вѣ́дꙋщымъ и҆ ва́мъ є҆ди́ною сїѐ, ꙗ҆́кѡ гдⷭ҇ь лю́ди ѿ землѝ є҆гѵ́петскїѧ спасѐ, послѣдѝ невѣ́ровавшыѧ погꙋбѝ. а҆́ггелы же не соблю́дшыѧ своегѡ̀ нача́льства, но ѡ҆ста́вльшыѧ своѐ жили́ще, на сꙋ́дъ вели́кагѡ днѐ, ᲂу҆́зами вѣ́чными подъ мра́комъ соблюдѐ. Ꙗ҆́коже содо́ма и҆ гомо́рра, и҆ ѻ҆крє́стныѧ и҆́хъ гра́ды, подо́бнымъ и҆́хъ ѻ҆́бразомъ преблꙋди́вшѧ и҆ ходи́вшѧ въ слѣ́дъ пло́ти и҆ны́ѧ, предлежа́тъ въ показа́нїе ѻ҆гнѧ̀ вѣ́чнагѡ сꙋ́дъ под̾е́мше. Та́кожде ᲂу҆́бѡ и҆ сі́и, сѡ́нїѧ ви́дѧще пло́ть ᲂу҆́бѡ сквернѧ́тъ, гдⷭ҇ьства же ѿмета́ютсѧ, сла́вы же хꙋ́лѧще (не трепе́щꙋтъ). Мїхаи́лъ же а҆рха́гг҃лъ є҆гда̀ со дїа́воломъ разсꙋжда́ѧ гл҃го́лаше ѡ҆ мѡѷсе́овѣ тѣлесѝ, не смѣ́ѧше сꙋда̀ навестѝ хꙋ́льна, но речѐ: да запрети́тъ тебѣ̀ гдⷭ҇ь. Сі́и же, є҆ли̑ка ᲂу҆́бѡ не вѣ́дѧтъ, хꙋ́лѧтъ: є҆ли̑ка же по є҆стествꙋ̀ ꙗ҆́кѡ безсловє́снаѧ живѡ́тнаѧ вѣ́дѧтъ, въ си́хъ сквернѧ́тсѧ.

Собо́рнагѡ посла́нїѧ і҆ꙋ́дина чте́нїе.

Го́ре и҆̀мъ, ꙗ҆́кѡ въ пꙋ́ть ка́їновъ поидо́ша, и҆ въ ле́сть валаа́мовы мзды̀ ᲂу҆стреми́шасѧ, и҆ въ прерѣка́нїи коре́овѣ погибо́ша. Сі́и сꙋ́ть въ любва́хъ ва́шихъ скверни́тели, съ ва́ми ꙗ҆дꙋ́ще, безъ боѧ́зни себѐ пасꙋ́ще, ѻ҆́блацы безво́дни, ѿ вѣ̑тръ преноси́ми: древеса̀ є҆сє́нна безплѡ́дна, два́жды ᲂу҆мє́рша и҆скоренє́на. Во́лны, свирѣ̑пыѧ мо́рѧ, воспѣнѧ́юще своѧ̑ стыдѣ̑нїѧ, ѕвѣ́зды прелє́стныѧ, и҆̀мже мра́къ тмы̀ во вѣ́ки блюде́тсѧ. Прⷪ҇ро́чествова же и҆ ѡ҆ си́хъ седмы́й ѿ а҆да́ма є҆нѡ́хъ, глаго́лѧ: сѐ прїи́детъ гдⷭ҇ь во тма́хъ ст҃ы́хъ а҆́гг҃лъ свои́хъ, сотвори́ти сꙋ́дъ ѡ҆ всѣ́хъ, и҆ и҆з̾ѡбличи́ти всѣ́хъ нечести́выхъ ѡ҆ всѣ́хъ дѣ́лѣхъ нече́стїѧ и҆́хъ, и҆́миже нече́ствоваша, и҆ ѡ҆ всѣ́хъ жесто́кихъ словесѣ́хъ и҆́хъ, ꙗ҆̀же глаго́лаша на́нь грѣ̑шницы нечести́вїи. Сі́и сꙋ́ть ропотницы̀, ᲂу҆кори́тели, ча́сть поро́чна, въ по́хотехъ свои́хъ ходѧ́ще нече́стїемъ и҆ законопрестꙋпле́нїемъ, и҆ ᲂу҆ста̀ и҆́хъ глаго́лютъ прегѡ́рдаѧ, чꙋдѧ́щесѧ ли́цамъ по́льзы ра́ди. (с. 238)

Собо́рнагѡ посла́нїѧ і҆ꙋ́дина чте́нїе.

Вы́ же, возлю́бленнїи, помина́йте глаго́лы преждеречє́нныѧ ѿ а҆пⷭ҇лъ гдⷭ҇а на́шегѡ і҆и҃са хрⷭ҇та̀. Занѐ глаго́лахꙋ ва́мъ, ꙗ҆́кѡ въ послѣ́днее вре́мѧ бꙋ́дꙋтъ рꙋга́тели, по свои́хъ по́хотехъ ходѧ́ще и҆ нече́стїихъ. Сі́и сꙋ́ть ѿдѣлѧ́юще себѐ ѿ є҆ди́ности вѣ́ры: и҆ сꙋ́ть тѣле́сни, дх҃а не и҆мꙋ́ще. Вы́ же, возлю́бленнїи, ст҃о́ю ва́шею вѣ́рою назида́юще себѐ, дх҃омъ ст҃ы́мъ, и҆ молѧ́щесѧ. Са́ми себѐ въ любвѝ бж҃їей соблюда́йте, ждꙋ́ще ми́лости гдⷭ҇а на́шегѡ і҆и҃са хрⷭ҇та̀, въ жи́знь вѣ́чнꙋю. И҆ ѻ҆́вѣхъ ᲂу҆́бѡ ми́лꙋйте разсꙋжда́юще: ѻ҆́вѣхъ же стра́хомъ спаса́йте, ѿ ѻ҆гнѧ̀ восхища́юще: ѡ҆блича́йте же съ боѧ́знїю, ненави́дѧще и҆ ꙗ҆́же ѿ пло́ти ѡ҆скверне́ннꙋю ри́зꙋ. Могꙋ́щемꙋ же сохрани́ти вы̀ безъ грѣха̀ и҆ безъ скве́рны, и҆ поста́вити предъ сла́вою свое́ю непорѡ́чны въ ра́дости, є҆ди́номꙋ премꙋ́дромꙋ бг҃ꙋ и҆ сп҃сꙋ на́шемꙋ, і҆и҃сомъ хрⷭ҇то́мъ гдⷭ҇емъ на́шимъ, сла́ва и҆ вели́чїе, держа́ва и҆ вла́сть, пре́жде всегѡ̀ вѣ́ка, и҆ ны́нѣ, и҆ во всѧ̑ вѣ́ки, а҆ми́нь.

На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе:

Прїѧ́лъ є҆сѝ, а҆пⷭ҇ле ꙳ надъ де́мѡны непобѣди́мꙋю вла́сть и҆ си́лꙋ ꙳ и҆ ѡ҆ и҆́мени хрⷭ҇то́вѣ ꙳ нача̑ла тмы̀ ѿгони́ти, ꙳ проше́лъ є҆сѝ зе́млю, просвѣща́ѧ ꙗ҆́кѡ со́лнце, ꙳ и҆ всѧ̑ страны̑ наꙋча́ѧ, ꙳ пе́рвое, сла́вне, хрⷭ҇то́во проповѣ́далъ є҆сѝ ꙳ сп҃си́тельное прише́ствїе.

Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.

Пе́рвѣй бл҃гости, ꙳ и҆ є҆сте́ственномꙋ, и҆ пребжⷭ҇твенномꙋ ꙳ житїю̀ подо́бѧсѧ, ꙳ мꙋ́жъ бы́лъ є҆сѝ бла́гъ, і҆ꙋ́до, по сꙋществꙋ̀, ꙳ и҆ бра́тъ гдⷭ҇ень и҆менꙋ́емь, ꙳ нра́ва твоегѡ̀ бл҃года́тїю, ꙳ и҆ ѻ҆бы́чаѧ красото́ю, ꙳ хрⷭ҇то́въ показа́лсѧ є҆сѝ ꙳ ᲂу҆чени́къ и҆́скреннїй.

Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь.

Ѻ҆рга́нъ до́брѣ соста́вленъ, ꙳ бжⷭ҇твеннымъ ѡ҆кормле́нїемъ, ꙳ а҆пⷭ҇ле і҆ꙋ́до, ꙳ ꙗ҆зы́кѡмъ зва́нїю ты̀ ввѣ́рилсѧ є҆сѝ, ꙳ къ позна́нїю хрⷭ҇то́вꙋ наставлѧ́ѧ ꙳ словесы̀ и҆ дѣѧ̑нїи, ꙳ всѧ̑ просвѣти́лъ є҆сѝ, и҆сповѣ́дати и҆́стинное і҆и҃са бжⷭ҇тво̀, ꙳ сп҃са дꙋ́шъ на́шихъ.

Сла́ва, гла́съ в҃:

Ре́вности бжⷭ҇твенныѧ и҆спо́лненъ, а҆пⷭ҇ле і҆ꙋ́до досточꙋ́дне, ревнꙋ́ѧ поревнова́лъ є҆сѝ бг҃ꙋ вседержи́телю, и҆ бж҃е́ственныхъ тѧ̀ чꙋде́съ и҆спо́лнена показа̀: стра́ннꙋю бо ре́вность и҆мѣ́ѧ, дѣ́йствїемъ нра́въ стѧжа́лъ є҆сѝ. тѣ́мже вы́шнїй сы́й, съ вы́шними ли̑ки вселѧ́емь, моли́сѧ, бг҃ови́дче, сло́вꙋ хрⷭ҇тꙋ̀ бг҃ꙋ на́шемꙋ, дарова́ти на́мъ ве́лїю ми́лость.

И҆ ны́нѣ, бг҃оро́диченъ: Ѽ чꙋдесѐ но́вагѡ:

Тропа́рь, гла́съ а҃:

Хрⷭ҇то́ва тѧ̀ сро́дника, ѽ і҆ꙋ́до, вѣ́дꙋще, и҆ мꙋ́ченика тве́рда, свѧще́ннѡ восхвалѧ́емъ, пре́лесть попра́вша, и҆ вѣ́рꙋ соблю́дша: тѣ́мже дне́сь всесвѧтꙋ́ю твою̀ па́мѧть пра́зднꙋюще, грѣхѡ́въ разрѣше́нїе моли́твами твои́ми прїе́млемъ.

На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла два́жды.

Сла́ва, и҆ ны́нѣ: Гаврїи́лꙋ вѣща́вшꙋ:

По а҃-й каѳі́смѣ, сѣда́ленъ, гла́съ в҃:

Оу҆лови́въ ꙗ҆зы́ки а҆пⷭ҇лъ сла́вный, и҆ наꙋчи́въ концы̀ земны̑ѧ тебѣ̀ кла́нѧтисѧ со ѻ҆ц҃е́мъ и҆ дх҃омъ, хрⷭ҇тѐ бж҃е, тогѡ̀ ра́ди ᲂу҆твердѝ цр҃ковь твою̀, и҆ вѣ̑рнымъ низпослѝ бл҃гослове́нїе твоѐ, є҆ди́не ми́лостиве и҆ чл҃вѣколю́бче.

Два́жды.

Сла́ва, и҆ ны́нѣ, бг҃оро́диченъ:

Бжⷭ҇твеннагѡ є҆стества̀ ѻ҆́бщницы бы́хомъ тобо́ю, бцⷣе приснодв҃о: бг҃а бо на́мъ воплоще́нна родила̀ є҆сѝ. тѣ́мже тѧ̀ по до́лгꙋ всѝ бл҃гоче́стнѡ велича́емъ.

По в҃-й каѳі́смѣ, сѣда́ленъ, гла́съ д҃:

Лꙋчꙋ̀ ꙗ҆́кѡ со́лнце пра́вды и҆спꙋсти́ тѧ хрⷭ҇то́съ, просвѣти́ти всю̀ зе́млю, а҆пⷭ҇ле сла́вне і҆ꙋ́до: бжⷭ҇твенными твои́ми моли́твами ѡ҆зарѧ́еши, и҆ бж҃е́ственнымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Оу҆пова́нїе непосты́дное надѣ́ющихсѧ на тѧ̀, є҆ди́на ро́ждшаѧ па́че є҆стества̀ пло́тїю хрⷭ҇та̀ бг҃а на́шего, того̀ со ст҃ы́ми а҆пⷭ҇лы молѝ, пода́ти вселе́ннѣй ѡ҆чище́нїе прегрѣше́нїй, и҆ всѣ̑мъ на́мъ пре́жде конца̀ житїѧ̀ и҆справле́нїе.

По полѷеле́и, сѣда́ленъ, гла́съ и҃. Подо́бенъ: Премꙋ́дрости:

Мре́жею сло́ва возве́дъ и҆зъ глꙋбины̀ неразꙋ́мїѧ бг҃олѣ́пнѡ, ꙗ҆зы́ки приве́лъ є҆сѝ вѣ́рою, и҆ ꙗ҆́кѡ и҆сто́чникъ сы́й во́дъ дх҃о́вныхъ, вселе́ннꙋю всю̀ напои́лъ є҆сѝ бл҃года́тїю. тѣ́мже и҆ спа́сшїисѧ тобо́ю, бг҃огла́се, ꙗ҆́кѡ дрꙋ́га тѧ̀ бли́жнѧгѡ хрⷭ҇то́ва ᲂу҆блажа́емъ, а҆пⷭ҇ле і҆ꙋ́до, вопїю́ще тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ: Нбⷭ҇наѧ пою́тъ тѧ̀:

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з.

По н҃-мъ ѱалмѣ̀, стїхи́ра, гла́съ а҃:

Во всю̀ зе́млю и҆зы́де твоѐ спаси́тельное вѣща́нїе, бг҃ови́дче а҆пⷭ҇ле, и҆ просвѣтѝ дꙋ́шы заблꙋ́ждшыѧ, и҆ хрⷭ҇тꙋ̀ приведѐ человѣ́ки, просвѣщє́нныѧ благода́тїю. тѣ́мже молѝ, дарова́ти дꙋша́мъ на́шымъ ми́ръ и҆ ве́лїю ми́лость.

Канѡ́нъ бцⷣы со і҆рмосо́мъ на ѕ҃: и҆ а҆пⷭ҇ла на и҃. Є҆гѡ́же краегране́сїе:

Пѣ́ти і҆ꙋ́дꙋ бг҃ови́дца тщꙋ́сѧ. Творе́нїе ѳеофа́на.

Гла́съ є҃. Пѣ́снь а҃. І҆рмо́съ:

Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Таи́нниче нбⷭ҇ныхъ, і҆ꙋ́до всемꙋ́дре, ᲂу҆ченичѐ сп҃совъ и҆ ѻ҆́бщниче и҆́стинныѧ жи́зни, ѧ҆зы́къ мо́й подви́гни, и҆ сло́во ᲂу҆пра́ви на пѣ́нїе твоѐ, всеблаже́нне.

Влекі́й сп҃совъ ꙗ҆ре́мъ, а҆пⷭ҇ле, и҆ браздꙋ̀ сѣкі́й, и҆ ѡ҆бновлѧ́ѧ бл҃года́тїю, сѣ́мѧ сѣ́ѧлъ є҆сѝ, и҆ мно́гъ пло́дъ прине́слъ є҆сѝ призва́вшемꙋ, пресла́вне.

Сло́ва вопло́щшагосѧ ѡ҆брѣ́тъ ᲂу҆чи́телѧ, и҆ сегѡ̀, бг҃ови́дче, лꙋча́ми просвѣща́емь, бы́лъ є҆сѝ свѣ́тъ вторы́й, пе́рвагѡ сїѧ́ньми соѡбразꙋ́ѧсѧ, досточꙋ́дне.

Бг҃оро́диченъ:

Вѣ́ра да повѣ́дꙋетсѧ то́кмѡ, а҆ не сказа́нїе, є҆́же па́че ᲂу҆ма̀ чꙋде́съ, бг҃ороди́тельнице пречⷭ҇таѧ, непостижи́маго бг҃а сло́ва родила̀ є҆сѝ, ѡ҆болче́на въ чл҃вѣ́чество.

Катава́сїа по ᲂу҆ста́вꙋ.

Пѣ́снь г҃. І҆рмо́съ:

Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.

Взѧ́тсѧ ᲂу҆чени̑къ хрⷭ҇то́выхъ бл҃голѣ́пїе превы́шше всѧ́кагѡ вели́чества: сі́и бо бы́ша є҆мꙋ̀ дрꙋ́зи же и҆ сво́йственнїи, и҆ срѡ́дницы, и҆ соснѣ́дницы, и҆ та̑инъ сказа́тели.

І҆ꙋ́до, бра́тїѧ твоѧ̑ тѧ̀ похвалѧ́ютъ, бра́та ꙗ҆́вльшасѧ, и҆ непщꙋ́ема ꙗ҆́вльшагѡсѧ пло́тїю, сло́ва превѣ́чнагѡ ѿ присносꙋ́щнагѡ возсїѧ́вшагѡ, ѿ нерожде́нна роди́телѧ.

Оу҆мертви́въ на землѝ твоѧ̑ ᲂу҆́ды, пожи́лъ є҆сѝ съ жи́знїю всѣ́хъ хрⷭ҇та̀, пребога́те, и҆ живоно́сныѧ жи́зни все́й вселе́ннѣй провозвѣ́стникъ ты̀ бы́лъ є҆сѝ, гл҃го́лы живѡ́тныѧ проповѣ́даѧ.

Бг҃оро́диченъ:

Сѐ ты̀ па́че всѣ́хъ, чⷭ҇таѧ, ᲂу҆блажи́ласѧ є҆сѝ, превозшла̀ є҆сѝ всѣ́хъ ст҃остїю, всѣ́хъ превознесла́сѧ є҆сѝ, и҆ всѣ́хъ ꙗ҆ви́ласѧ вы́шши нбⷭ҇ныхъ си́лъ, мт҃и бж҃їѧ бы́вши.

Конда́къ, гла́съ в҃. Подо́бенъ: Вы́шнихъ и҆щѧ̀:

Па́ѵлꙋ ꙗ҆́вльсѧ собесѣ́дникъ, а҆пⷭ҇ле, съ си́мъ на́мъ про́повѣдь возвѣсти́лъ є҆сѝ бжⷭ҇твенныѧ бл҃года́ти, тайноглаго́льниче і҆ꙋ́до бл҃же́нне. сегѡ̀ ра́ди вопїе́мъ тѝ: не преста́й молѧ́сѧ ѡ҆ всѣ́хъ на́съ.

Сѣда́ленъ, гла́съ и҃. Подо́бенъ: Премꙋ́дрости.

Ро́ждшагѡсѧ влⷣки, и҆ бра́та бы́вша всѣ̑мъ и҆збра̑ннымъ, і҆ꙋ́до бл҃же́нне, бра́тъ бы́лъ є҆сѝ, и҆ ѿ негѡ̀ а҆пⷭ҇лъ во всѧ̑ концы̀ посла́лсѧ є҆сѝ, премꙋ́дре, сло́во вѣ́ры всѣ̑мъ всѣва́ѧ, и҆ просвѣща́ѧ во тмѣ̀ невѣ́дѣнїѧ рабо́тающыѧ лꙋка́вомꙋ мїроде́ржцꙋ. сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, пра́здника, и҆лѝ бг҃оро́диченъ:

Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителю, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.

Пѣ́снь д҃. І҆рмо́съ:

Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ спастѝ пома̑занныѧ твоѧ̑ прише́лъ є҆сѝ.

Вели́кїй сп҃совъ а҆пⷭ҇лъ ꙗ҆вле́нїѧ дх҃а сподо́бленъ, и҆ возлю́бленъ бы́сть, зрѣ́нїѧ є҆гѡ̀ зарю̀ и҆ добро́тꙋ ви́дѣвъ.

Бл҃года́ти сы́й и҆спо́лненъ и҆ дарѡ́въ, ѿ бг҃а пода́нныхъ, а҆пⷭ҇ле, на спаси́тельное приста́нище тѧ̀ пѣсносло́вѧщыѧ наставлѧ́й.

Си́лою непобѣди́мою дх҃а прест҃а́гѡ ѡ҆гражда́емь, слꙋжи́телю неизрече́нныхъ, лꙋка́вствїѧ ѿгонѧ́еши дꙋ́хи сло́вомъ благода́ти.

Бг҃оро́диченъ:

Несказа́ннѡ заче́нши, всенепоро́чнаѧ, творца̀ твоего̀ и҆ бг҃а, молѝ, спасти́ ны ѿ бѣ́дъ, и҆ дꙋше́вное спасе́нїе пода́ти пою́щымъ тѧ̀, влⷣчце.

Пѣ́снь є҃. І҆рмо́съ:

Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.

Зако́на ѡ҆ста́вль сѣ̑ни, и҆́стины ѻ҆́бразъ свѣ́тлѡ проповѣ́далъ є҆сѝ, са́мꙋю и҆́стинꙋ стѧжа́въ наста́вника.

Сло́ва повелѣ́нїе и҆сполнѧ́ѧ, а҆пⷭ҇ле, ꙗ҆зы́ки всѧ̑ ᲂу҆чє́нїи твои́ми наꙋча́ѧ ѡ҆бте́клъ є҆сѝ, и҆ си́хъ крестѧ̀ трⷪ҇ческимъ призыва́нїемъ.

До́ждь нбⷭ҇ный, ꙗ҆́кѡ роса̀ свы́ше, бж҃е́ственное вѣща́нїе твоѐ, бг҃опроповѣ́дниче, мглꙋ̀ разорѝ многобо́жїѧ є҆ди́нагѡ бг҃а проповѣ́данїемъ.

Бг҃оро́диченъ:

Оу҆мертвѝ стра̑сти моѧ̑, бг҃ороди́тельнице, и҆ дꙋ́шꙋ мою̀ ᲂу҆мерщвле́ннꙋю грѣхо́вными сластьмѝ возста́ви, мт҃и и҆́стиннагѡ воскресе́нїѧ.

Пѣ́снь ѕ҃. І҆рмо́съ:

Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ благоꙋтро́бенъ.

Видѣ́нїѧ ᲂу҆че́нїемъ, житїѧ̀ дѣѧ́ньми, свѣ́тлѡ, хрⷭ҇то́въ а҆пⷭ҇ле, сїѧ́ѧ, сꙋ́щыѧ во глꙋбинѣ̀ невѣ́дѣнїѧ просвѣти́лъ є҆сѝ.

Посыла́еши всѣ̑мъ человѣ́кѡмъ свѣ́тлое, и҆ ᲂу҆че́нїѧ дх҃а и҆спо́лнено посла́нїе, свѧщенноѧвле́нне пречꙋ́дне.

Бг҃ови́децъ вѣща́етъ нбⷭ҇наѧ, ꙗ҆́коже слове́снꙋю нѣ́кꙋю бж҃їю сла́вꙋ повѣ́даѧ, на́съ ра́ди пло́тїю ꙗ҆́вльшагѡсѧ и҆ чꙋдесы̀.

Бг҃оро́диченъ:

Прест҃а́ѧ влⷣчце бг҃ома́ти, и҆зба́ви мѧ̀ тлѝ, и҆ страсте́й смꙋще́нїе ᲂу҆толѝ, ꙗ҆́же и҆сто́чникъ безстра́стїѧ ро́ждшаѧ.

Конда́къ, гла́съ в҃. Подо́бенъ: Твє́рдыѧ:

Тве́рдымъ ᲂу҆мо́мъ и҆збра́нъ ᲂу҆чени́къ ты̀ ꙗ҆ви́лсѧ є҆сѝ, и҆ сто́лпъ неѡбори́мь цр҃кве хрⷭ҇то́вы, ꙗ҆зы́кѡмъ проповѣ́далъ є҆сѝ сло́во хрⷭ҇то́во, вѣ́ровати глаго́лѧ во є҆ди́но бжⷭ҇тво̀: ѿ негѡ́же просла́вивсѧ, прїѧ́лъ є҆сѝ да́ръ и҆сцѣле́нїй, цѣли́ти недꙋ́ги притека́ющымъ къ тебѣ̀, а҆по́столе і҆ꙋ́до всехва́льне.

І҆́косъ:

И҆́стиннаго благоче́стїѧ проповѣ́дника, и҆ держа́внаго и҆́стины побо́рника досто́йнѡ восхва́лимъ, ꙗ҆́кѡ подо́бника хрⷭ҇тꙋ̀ и҆ свидѣ́телѧ: стра̑сти бо є҆гѡ̀ на тѣ́лѣ мꙋ́жески прїѧ́тъ, ꙗ҆́кѡ ᲂу҆чени́къ словесѐ и҆ а҆пⷭ҇лъ і҆ꙋ́да всехва́льный.

Пѣ́снь з҃. І҆рмо́съ:

Превозноси́мый ѻ҆ц҃є́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Бг҃ови́дна ссꙋ́щїемъ бжⷭ҇тва̀ бы́вша, всѝ і҆ꙋ́дꙋ воспое́мъ, согла́снѡ пою́ще: бж҃е, благослове́нъ є҆сѝ.

Дх҃одви́жимый и҆ бг҃одꙋхнове́нный ѧ҆зы́къ тво́й мі́ръ ѡ҆братѝ хрⷭ҇то́вымъ проповѣ́данїемъ, є҆мꙋ́же всѝ пое́мъ бж҃е, благослове́нъ є҆сѝ.

Дае́тъ тебѣ̀ нбⷭ҇ное наслѣ́дїе гдⷭ҇ь, и҆ престо́лъ пресвѣ́телъ, на не́мже почива́ѧ, бжⷭ҇твеннѣ пое́ши: бж҃е, бл҃гослове́нъ є҆сѝ.

Бг҃оро́диченъ:

Оу҆сты̀ и҆ ра́зꙋмомъ тѧ̀ бцⷣꙋ влⷣчцꙋ проповѣ́дꙋемъ веселѧ́щесѧ: бг҃а бо родила̀ є҆сѝ, є҆мꙋ́же всѝ пое́мъ: бж҃е, благослове́нъ є҆сѝ.

Пѣ́снь и҃. І҆рмо́съ:

Тебѣ̀ вседѣ́телю, въ пе́щи ѻ҆́троцы всемі́рный ли́къ спле́тше поѧ́хꙋ: дѣла̀ всѧ̑каѧ, гдⷭ҇а по́йте, и҆ превозноси́те во всѧ̑ вѣ́ки.

Бога́тство ꙗ҆зы̑къ, и҆ царе́й по́честь, благозва́нїе воспрїѧ́лъ є҆сѝ, вопїѧ̀, а҆пⷭ҇ле: всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.

Всю̀ зарю̀ ᲂу҆тѣ́шителевꙋ, блаже́нне, прїѧ́лъ є҆сѝ соше́дшꙋю, зовы́й, сла́вне: всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.

Вє́щи тлѣ́нныѧ возненави́дѣвъ, небе́сныхъ сла́вꙋ произво́лилъ є҆сѝ, пребыва́ющꙋю вѣ́дый, а҆пⷭ҇ле, тѣ́мже вопїѧ́лъ є҆сѝ: всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.

Бг҃оро́диченъ:

Прїиди́те, добро́тꙋ і҆а́кѡвлю воспои́мъ, мр҃і́ю пречⷭ҇тꙋю, согла́снѡ пою́ще: всѧ̑ дѣла̀ гдⷭ҇нѧ, гдⷭ҇а по́йте, и҆ превозноси́те во всѧ̑ вѣ́ки.

Пѣ́снь ѳ҃. І҆рмо́съ:

И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.

Ѡ҆блиста́всѧ, сла́вне, свѣтоли́тїй дх҃а заре́ю, чꙋде́съ блиста̑нїѧ па́че є҆стества̀ всѣ̑мъ и҆спꙋща́еши, ꙗ҆́кѡ ᲂу҆чени́къ є҆мманꙋ́илевъ: є҆го́же велича́юще, тѧ̀, бг҃ови́дче, ᲂу҆блажа́емъ.

Со а҆́гг҃льскими чи́нми предстоѧ́ще бг҃ови́днїи самови́дцы, и҆ зри́тели є҆диноро́днагѡ, пло́тїю ѡ҆бнища́вшагѡ на́съ ра́ди: сего̀ прилѣ́жнѡ ны́нѣ моли́те, спастѝ дꙋ́шы на́шѧ.

Бг҃оро́диченъ:

Ꙗ҆́кѡ ро́ждши, пречⷭ҇таѧ, тва́ри содѣ́телѧ по всемꙋ̀ роди́телѧ но́сиши нача́ло, несравни́тельно и҆мѣ́ѧ прїѧ́тїе и҆ превознесе́нно. тѣ́мже рождествꙋ̀ твоемꙋ̀ покланѧ́ющесѧ, тѧ̀ прославлѧ́емъ.

Свѣти́ленъ. Подо́бенъ: Дх҃омъ во ст҃и́лищи.

Тече́нїе кра́сныхъ твои́хъ но́гъ, і҆ꙋ́до а҆по́столе, возврати́въ, къ ше́ствїю нбⷭ҇номꙋ возше́лъ є҆сѝ ра́дꙋѧсѧ, и҆ трⷪ҇цѣ преста́въ, во ѻ҆ц҃ѣ̀ ви́диши сн҃а, и҆ дх҃а бжⷭ҇твеннаго: сегѡ̀ ра́ди вѣ́рою пресвѧще́ннꙋю твою̀ и҆ бжⷭ҇твеннꙋю пра́зднꙋемъ па́мѧть.

Два́жды.

Сла́ва, и҆ ны́нѣ, бг҃оро́диченъ:

Стра́шнагѡ и҆спыта́нїѧ воспомина́ю ча́съ, мно́жество ѕѡ́лъ дѣ́лъ мои́хъ ᲂу҆жаса́етъ и҆ ᲂу҆страша́етъ мѧ̀: но ᲂу҆ще́дри, пречⷭ҇таѧ, те́плою твое́ю моли́твою, и҆ да́ждь мѝ спасе́нїе: є҆ли̑ка бо хо́щеши, мо́жеши.

На хвали́техъ стїхи̑ры на д҃, гла́съ є҃. Подо́бенъ: Преподо́бне ѻ҆́ч҃е:

Манове́нїємъ бжⷭ҇твєннымъ повинꙋ́ѧсѧ, пребл҃же́нне, воплоще́нное сло́во всѣ̑мъ проповѣ́далъ є҆сѝ, на́мъ ᲂу҆подо́бльшасѧ безъ преложе́нїѧ, сегѡ̀ бы́въ че́стенъ ᲂу҆чени́къ: семꙋ̀ бы́въ бра́тъ по пло́ти, тогѡ̀ сла́вы сподо́бльсѧ, ꙗ҆́кѡ чи́стъ зрѣ́ти бжⷭ҇твеннымъ ᲂу҆мо́мъ. тѣ́мже почита́емъ тѧ̀, і҆ꙋ́до бг҃огла́се, и҆ па́мѧть твою̀ соверша́емъ, вѣ́рнѡ вопїю́ще тѝ: хрⷭ҇та̀ молѝ всегда̀, дарова́ти вселе́ннѣй є҆диномы́слїе, ми́ръ и҆ ве́лїю ми́лость.

Два́жды.

Го́рꙋ и҆ска́пающꙋю сла́дость бжⷭ҇твеннагѡ ра́зꙋма, а҆пⷭ҇ле і҆ꙋ́до, тѧ̀ и҆менꙋ́емъ: ми́рнꙋю рѣкꙋ̀, ᲂу҆стреми́вшꙋюсѧ ѿ дх҃о́вныхъ невеще́ственныхъ и҆стѡ́чникъ, и҆ безбо́жїѧ и҆зсꙋша́ющꙋю морѧ̀, и҆ напоѧ́ющꙋю та́йнѡ благочести́выхъ сердца̀ и҆ помышлє́нїѧ: трꙋбꙋ̀ доброгла́снꙋ, гласѧ́щꙋю сло́ва бжⷭ҇твенное ꙗ҆вле́нїе, мі́ръ и҆збавлѧ́юща. є҆го́же ны́нѣ молѝ, є҆мꙋ́же помоли́сѧ всегда̀, дарова́ти вселе́ннѣй є҆диномы́слїе, ми́ръ и҆ ве́лїю ми́лость.

Блаже́нне і҆ꙋ́до, бра́тїѧ твоѧ̑ тѧ̀ восхвали́ша, бж҃їѧ бра́та ꙗ҆́вльшасѧ, и҆ бы́вша дх҃а прїѧ́телище бг҃олѣ́пно. є҆гѡ́же свѣтлостьмѝ чи́стѡ просвѣ́щсѧ, ᲂу҆́гль ꙗ҆ви́лсѧ є҆сѝ, ле́сть попалѧ́ѧ, вѣ̑рныѧ же всѧ̑ просвѣща́ѧ чи́стыхъ ᲂу҆че́нїй сїѧ́ньми. тѣ́мже почита́емъ тѧ̀, ꙗ҆́кѡ незаходи́мꙋю денни́цꙋ, и҆ соверша́емъ твою̀ па́мѧть ст҃ꙋ́ю, вѣ́рнѡ вопїю́щи тѝ: хрⷭ҇та̀ молѝ всегда̀, дарова́ти вселе́ннѣй є҆диномы́слїе, ми́ръ и҆ ве́лїю ми́лость.

Сла́ва, гла́съ в҃:

Ѡ҆ста́вивъ земна̑ѧ, послѣ́довалъ є҆сѝ хрⷭ҇тꙋ̀, и҆ зна́менавсѧ дꙋхнове́нїемъ ст҃а́гѡ дх҃а по́сланъ бы́въ ѿ негѡ̀ въ ꙗ҆зы́ки поги́бшыѧ, ѡ҆браща́ти человѣ́ки во свѣ́тъ бг҃оразꙋ́мїѧ, а҆пⷭ҇толе і҆ꙋ́до: и҆ сконча́въ по́двиги бжⷭ҇твенныѧ твоеѧ̀ стра́сти, и҆ мꙋ́къ разли́чныхъ, дꙋ́шꙋ твою̀ хрⷭ҇тꙋ̀ пре́далъ є҆сѝ. того̀ молѝ, всебл҃же́нне, дарова́ти на́мъ ве́лїю ми́лость.

И҆ ны́нѣ: Спасѝ ѿ бѣ́дъ:

Славосло́вїе вели́кое. И҆ ѿпꙋ́стъ.

На лїтꙋргі́и, блажє́нна, а҆пⷭ҇ла, пѣ́снь г҃-ѧ и҆ ѕ҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю. А҆пⷭ҇лъ, зача́ло ѻ҃з. А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀: Є҆ѵⷢ҇лїе ѿ і҆ѡа́нна, зача́ло м҃и. Прича́стенъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ.