Мѣ́сѧца тогѡ́же въ к҃а-й де́нь. Ст҃а́гѡ мꙋ́ченика і҆ꙋлїа́на тарсі́йскагѡ.
Стїхи̑ры, гла́съ д҃. Подо́бенъ: Ꙗ҆́кѡ до́блѧ:
Свѣтоза́рна тѧ̀ ꙗ҆́кѡ со́лнца, ꙳ мїрска̑ѧ и҆сполнє́нїѧ, ꙳ мы́сленными свѣтлостьмѝ ѡ҆зарѧ́юща, ꙳ и҆ безбо́жїѧ ѿе́млюща но́щь, ꙳ блаже́нне мꙋ́чениче і҆ꙋлїа́не, разꙋмѣ́вше, ꙳ па́мѧть твою̀ пра́зднꙋемъ, ꙳ свѣтоно́снꙋю и҆ бжⷭ҇твеннꙋю: ꙳ и҆ ра́цѣ моще́й твои́хъ покланѧ́емсѧ ꙳ здра́вїе дꙋша́мъ почерпа́юще.
И҆ бїе́нъ ра́нимь, и҆ лю́тѣ порѣва́емь, ꙳ и҆ въ темни́цѣ, блаже́нне, затворѧ́емь, ꙳ мѣ̑ста премѣнѧ́ѧ ѡ҆скорблѧ́емь, ꙳ со ѕвѣрьмѝ заключа́емь, ꙳ и҆ глꙋбинѣ̀ приближа́ѧсѧ, ꙳ и҆ въ мо́ри потоплѧ́емь, ꙳ и҆ прїе́млѧ блаже́ннꙋю кончи́нꙋ, ꙳ не ѿве́рглсѧ є҆сѝ влⷣки всѧ́ческихъ, ꙳ сла́ва мꙋ́ченикѡвъ, пребога́те.
Ѿ морски́хъ нѣ́дръ тѧ̀ ꙳ къ сꙋ́ши влеко́ма ꙳ ѡ҆кормле́нїемъ дх҃а, ꙳ ꙗ҆́кѡ ᲂу҆зрѣ̀ честна́ѧ жена̀, ꙳ вѣ́рнѡ прїѧ́тъ, мꙋ́чениче і҆ꙋлїа́не, ꙳ и҆ погребе́нїю предадѐ ꙳ твоѐ непоро́чное и҆ многострада́льное тѣ́ло, ꙳ побѣди́вшее дїа́волово мꙋчи́тельство ꙳ дѣ́йствомъ благода́ти.
Сла́ва, гла́съ ѕ҃:
Непоро́чныѧ вѣ́ры неистоща́емое питїѐ поче́рпъ, блаже́нне, і҆́дольское слꙋже́нїе погаси́лъ є҆сѝ, и҆ побѣди́тельнѡ преше́лъ є҆сѝ по́двигъ, росо́ю просвѣти́всѧ, ꙗ҆́кѡ незаходи́ма ѕвѣзда̀, ѡ҆зарѧ́емь присносїѧ́ннагѡ со́лнца хрⷭ҇та̀: и҆ на кі́йждо гра́дъ зарѝ мꙋче́нїѧ ѿпꙋща́ѧ кончи́нꙋ мо́ремъ блаже́ннꙋю воспрїѧ́лъ є҆сѝ, и҆ вѣне́чникъ предъ лице́мъ хрⷭ҇та̀ предвари́лъ є҆сѝ. є҆го́же молѝ, і҆ꙋлїа́не пресла́вне, спастѝ вѣ́рою па́мѧть твою̀ соверша́ющыѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Всѐ ѿло́жше:
А҆́гнца своего̀ ꙳ а҆́гница нескве́рнаѧ дре́вле, ꙳ и҆ непоро́чнаѧ влⷣчца ꙳ на дре́вѣ крⷭ҇тнѣмъ ꙗ҆́кѡ ᲂу҆зрѣ̀, ꙳ ма́терски восклица́ше, и҆ дивѧ́щисѧ вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ꙳ ка́кѡ со́нмъ безблагода́тный сꙋди́щꙋ пїла́товꙋ предадѐ тѧ̀, ꙳ и҆ ѡ҆сꙋжда́етъ на сме́рть живота̀ всѧ́ческихъ; ꙳ но воспѣва́ю твоѐ неизрече́нное, ꙳ сло́ве, снизхожде́нїе.
На стїхо́внѣ ѻ҆ктѡ́иха. Сла́ва, гла́съ ѕ҃:
Прїиди́те, мꙋчениколю́бцы, хрⷭ҇то́ва страстоте́рпца, и҆ па́ѵлꙋ сограждани́на, и҆ стаи́нника ꙗ҆́вльшасѧ, и҆ вкꙋ́пѣ тече́нїе соверши́вша, благоче́стнѡ просла́вимъ і҆ꙋлїа́на сла́внаго: въ во́дꙋ бо вше́дъ, съ водны́ми ѕвѣрьмѝ ѕмі́евꙋ главꙋ̀ сокрꙋшѝ, и҆ кровьмѝ зе́млю, и҆ ше́ствїемъ мо́ре ѡ҆свѧти́въ, ѿ сꙋ́щихъ здѣ̀ преста́висѧ къ вѣ̑чнымъ жили́щємъ, и҆ ѿ вседержи́тельныѧ рꙋкѝ подвигѡ́въ по́честь прїѧ́тъ, про́ситъ ѡ҆чище́нїѧ дꙋша́мъ на́шымъ и҆ ве́лїѧ ми́лости.
Крⷭ҇тобг҃оро́диченъ. Подо́бенъ: Тридне́венъ:
Предстоѧ́щи ᲂу҆ дре́ва и҆ногда̀ во вре́мѧ распѧ́тїѧ дв҃а съ дѣ́вственнымъ ᲂу҆ченико́мъ, и҆ пла́чꙋщи вопїѧ́ше: ᲂу҆вы̀ мнѣ̀, ка́кѡ стра́ждеши, всѣ́хъ, хрⷭ҇тѐ, сы́й безстра́стїе;
Тропа́рь, гла́съ д҃:
Мꙋ́ченикъ тво́й, гдⷭ҇и, і҆ꙋлїа́нъ, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти: тогѡ̀ моли́твами спасѝ дꙋ́шы на́шѧ.
Канѡ́нъ, творе́нїе і҆ѡа́нна мона́ха, є҆гѡ́же краегране́сїе:
І҆ꙋлїа́на пѣ́сньми мꙋ́ченика вѣнча́ю.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Свѧще́нными да восхва́литсѧ пѣ́сньми страда́лецъ тво́й сла́вный, и҆ пречестна́ѧ па́мѧть: непристꙋ́пною бо сла́вою просла́висѧ.
Поползе́нїемъ не па́лсѧ є҆сѝ, подвиза́ѧсѧ мꙋ́ченически, хрⷭ҇то́въ во́ине, не́мощїю пло́ти да́же до кро́ве.
Па́че сїѧ́нїѧ зла́та, мꙋ́ченическими ра́нами ᲂу҆краси́лсѧ є҆сѝ ѡ҆блиста́ѧсѧ, и҆ многоцѣ́ннагѡ ка́мене ст҃ы́й.
Бг҃оро́диченъ:
Чтⷭ҇аѧ бцⷣе, ꙗ҆́же воплоще́нное присносꙋ́щное и҆ пребж҃е́ственное сло́во па́че є҆стества̀ ро́ждши, пое́мъ тѧ̀.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Ка́менїю не повелѣно̀ мѝ бы́сть, ꙗ҆́кѡ бг҃ꙋ слꙋжи́ти, рꙋчны́хъ дѣ́лъ, і҆ꙋлїа́нъ ᲂу҆мовре́дномꙋ сꙋдїѝ ѿвѣщава́ше.
Стоѧ́лъ є҆сѝ предъ сꙋди́щемъ мꙋчи́телѧ, хрⷭ҇тꙋ̀, мꙋ́чениче і҆ꙋлїа́не, ꙗ҆́кѡ сꙋдїѝ живы́хъ и҆ ме́ртвыхъ предстоѧ̀.
Безꙋ́менъ не бы́хъ и҆сповѣ́даѧ бг҃а, речѐ і҆ꙋлїа́нъ, є҆ди́наго въ трⷪ҇цѣ, нераздѣ́льнѡ пѣва́ема.
Бг҃оро́диченъ:
Да́ждь на́мъ по́мощь моли́твами твои́ми, пречⷭ҇таѧ, прило́ги ѿрѣва́ющи лю́тыхъ ѡ҆бстоѧ́нїй.
Сѣда́ленъ, гла́съ а҃. Подо́бенъ: Гро́бъ тво́й:
Во́дъ потопле́нїемъ блаже́ннꙋю кончи́нꙋ прїѧ́лъ є҆сѝ, мꙋ́дре, многоѻбра́знаго ѕмі́ѧ въ си́хъ ᲂу҆дави́въ, побѣ́дꙋ взѧ́лъ є҆сѝ. тѣ́мже любо́вїю твою̀ достохва́льнꙋю па́мѧть пра́зднꙋюще, ѡ҆ на́съ молѝ хрⷭ҇та̀, мо́лимсѧ.
Сла́ва, и҆ ны́нѣ, бг҃оро́диченъ:
Наста́ви на́съ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ преблага́го прогнѣ́вавшыѧ гдⷭ҇а, неискꙋсобра́чнаѧ, благослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе жили́ще.
Крⷭ҇тобг҃оро́диченъ:
Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крестѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречи́стыхъ рꙋ́къ твои́хъ, ще́дре, созда́нїе;
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀. (с. 259)
Многоѻбра̑знымъ ра́намъ і҆ꙋлїа́нъ тѣ́ло предаѧ́ше, не чꙋ́вствꙋѧ болѣ́зней, хрⷭ҇то́вою бо любо́вїю сохранѧ́шесѧ.
Нбⷭ҇ныѧ, пресла́вне і҆ꙋлїа́не, хламѵ́ды жела́ѧ, гони́телємъ земнꙋ́ю, ꙗ҆́кѡ хрⷭ҇то́въ ᲂу҆го́дникъ, ѡ҆ста́вилъ є҆сѝ.
Побѣди́телѧ де́мѡнскїѧ ле́сти, не тѣле́снаѧ си́ла, пребога́те, но жела́нїе непобѣди́мое, хрⷭ҇то́выхъ страсте́й тѧ̀ содѣ́ла.
Бг҃оро́диченъ:
Ѡ҆чище́нїе на́шымъ да́рꙋй невѣ́дѣнїємъ, ꙗ҆́кѡ безгрѣ́шенъ, и҆ ᲂу҆мирѝ мі́ръ тво́й, бж҃е, моли́твами ро́ждшїѧ тѧ̀.
Пѣ́снь є҃. І҆рмо́съ:
Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Подо́бѧсѧ во все́мъ влⷣцѣ, прехва́льне, ста́лъ є҆сѝ предъ сꙋди́щемъ беззако́ннꙋющихъ ѡ҆сꙋжда́емь.
Зако́ннѡ подвиза́всѧ, закла́лсѧ є҆сѝ влⷣцѣ, ꙗ҆́кѡ а҆́гнѧ неѕло́биво рꙋка́ми беззако́нныхъ, блаже́нне.
Ни ро́дъ, ни са́нъ земны́й, вмѣни́лъ є҆сѝ, проти́вꙋ твоемꙋ̀, мꙋ́чениче сла́вне, хрⷭ҇тоимени́тствꙋ превы́шши.
Бг҃оро́диченъ:
Мр҃і́е бцⷣе безневѣ́стнаѧ, ᲂу҆пова́нїе врагѡ́въ сꙋ́етно сотворѝ, пою́щыѧ же тѧ̀ возвеселѝ.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ, бж҃е на́шъ.
Ко дре́вꙋ пригвожде́на тѧ̀, хрⷭ҇тѐ, сла́вный ᲂу҆го́дникъ тво́й не стыдѧ́шесѧ, но ꙗ҆́кѡ сла́вы сокро́вище непщева́ше.
Оу҆молко́ша пре́лєсти сквє́рныѧ, бг҃огла́сными же ѧ҆зы̑ки бжⷭ҇твєннаѧ та̑инства мꙋ́чєникъ хрⷭ҇то́выхъ ѿкры́шасѧ.
И҆сцѣле́нїѧ страсте́й всѧ́ческихъ, и҆ согрѣше́нїй просѝ ѡ҆ставле́нїѧ, сла́вне страда́льче хрⷭ҇то́въ, пою́щымъ тѧ̀.
Бг҃оро́диченъ:
Привнесѝ мольбꙋ̀ на́шꙋ сп҃сꙋ твоемꙋ̀, пречⷭ҇таѧ: ты́ бо є҆сѝ похвала̀ ро́да на́шегѡ и҆ застꙋпле́нїе.
Конда́къ, гла́съ. Подо́бенъ: Въ моли́твахъ:
Благоче́стїѧ непобѣди́маго во́ина, и҆ и҆́стины согла́сника и҆ ѻ҆рꙋ́жника, всѝ досто́йнѡ восхва́лимъ і҆ꙋлїа́на дне́сь, и҆ къ немꙋ̀ возопїи́мъ: молѝ хрⷭ҇та̀ бг҃а ѡ҆ всѣ́хъ на́съ.
І҆́косъ:
Пꙋте́мъ гдⷭ҇нимъ ѿ младе́нства ше́ствовалъ є҆сѝ, треблаже́нне, и҆ тогѡ̀ благоче́стнѡ свидѣ́нїѧ вожделѣ́лъ є҆сѝ, и҆ кре́стъ на ра́мо, і҆ꙋлїа́не бг҃омꙋ́дре, ᲂу҆се́рднѡ взе́мъ, ле́сть лю́тꙋю і҆долонеи́стовства разори́лъ є҆сѝ, сокрꙋши́въ ка̑пища вра̑жїѧ, кѡ́зни же и҆ ла̑ѧнїѧ. тѣ́мже вѣ́рою притека́емъ въ тво́й покро́въ, вопїю́ще, пребога́те: молѝ хрⷭ҇та̀ бг҃а ѡ҆ всѣ́хъ на́съ.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Мѵ́ро благово́нно и҆ска́паетъ хва́льнаѧ и҆ сла́внаѧ твоѧ̀ па́мѧть, во́ине хрⷭ҇то́въ, пою́щымъ непреста́ннѡ: благослове́нъ є҆сѝ, гдⷭ҇и бж҃е, во вѣ́ки.
Неизглаго́ланнаѧ сла́ва вѣнчава́етъ, и҆̀же къ хвалѣ̀ твое́й сѡ́бранныѧ, во́ине хрⷭ҇то́въ, пою́щыѧ непреста́ннѡ: благослове́нъ є҆сѝ, гдⷭ҇и бж҃е во вѣ́ки.
Глаго́лꙋ мꙋчи́телѧ не повинꙋ́всѧ, не послꙋжи́лъ є҆сѝ, непобѣди́ме, тва́ри, но є҆ди́номꙋ бг҃ꙋ жи́вꙋ вопїѧ́лъ є҆сѝ: благослове́нъ є҆сѝ, гдⷭ҇и бж҃е во вѣ́ки.
Бг҃оро́диченъ:
Разрѣша́ѧ є҆́ѵинꙋ клѧ́твꙋ, въ пренепоро́чнꙋю всели́всѧ дв҃ꙋ, благослове́нїѧ и҆сто́чникъ прозѧба́ѧ вопїю́щымъ: благослове́нъ, влⷣчце, пло́дъ твоегѡ̀ чре́ва.
Пѣ́снь и҃. І҆рмо́съ:
Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славосло́вѧхꙋ во всѧ̑ вѣ́ки.
Ласка́ше ᲂу҆́бѡ льсте́цъ, и҆ мꙋ́ками тѧ̀ призыва́ше къ пре́лести, і҆ꙋлїа́не, ты́ же вопїѧ́лъ є҆сѝ: гдⷭ҇а по́йте и҆ превозноси́те во всѧ̑ вѣ́ки.
Крѣпча́йше ꙗ҆́коже ле́въ, по мꙋ́кахъ мꙋчи́телѧ низлага́ѧ, і҆ꙋлїа́не, взыва́ѧ ве́селѡ: гдⷭ҇а по́йте и҆ превозноси́те во всѧ̑ вѣ́ки.
Лю́тость ѻ҆гнѧ̀ не ѿлꙋчи́тъ мѧ̀, ни сѣче́нїе меча̀ ѿто́ргнетъ ѿ содѣ́телѧ бг҃а, вопїѧ́ше, взыва́ѧ: гдⷭ҇а по́йте и҆ превозноси́те во всѧ̑ вѣ́ки.
Бг҃оро́диченъ:
Ꙗ҆́кѡ всѣ́хъ гдⷭ҇а ро́ждшꙋю, и҆ дв҃ꙋ пребы́вшꙋю, мр҃і́е, и҆ по рождествѣ̀, вѣ́рнїи досто́йнѡ воспѣва́юще, ра́дꙋйсѧ, тебѣ̀ вопїе́мъ, и҆ превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Чтⷭ҇ꙋю сла́внѡ почти́мъ, лю́дїе, бцⷣꙋ, ѻ҆́гнь бжⷭ҇тва̀ прїи́мшꙋю во чре́вѣ неѡпа́льнѡ, пѣ́сньми велича́емъ.
Превзѧ́тое ѻ҆́ко низложи́лъ є҆сѝ, бж҃їй во́ине, безпло́тнагѡ лестца̀, бра́всѧ съ пло́тїю мꙋ́жески, хрⷭ҇та́ же велича́ѧ при́снѡ.
Гнѣ́здъ и҆збѣжа́лъ є҆сѝ ѕмі́ѧ, врага̀ ѕлонача́льника, въ морскі̑ѧ, блаже́нне, глꙋбины̑ вве́рженъ, мꙋ́дре. тѣ́мъ тѧ̀ пѣ́сньми велича́емъ.
Ꙗ҆́кѡ до́брѣ страда́ньми подвиза́лсѧ є҆сѝ по влⷣцѣ, ꙗ҆́кѡ краснѡ̀ вѣнча́лсѧ є҆сѝ десни́цею влⷣки. тѣ́мже тѧ̀ досто́йнѡ ᲂу҆блажа́емъ.
Бг҃оро́диченъ:
Мѡѷсе́й въ кꙋпинѣ́ тѧ ви́дѣ, чⷭ҇таѧ, въ горѣ̀, прїе́млющꙋ нестерпи́мый бжⷭ҇тва̀ ѻ҆́гнь неѻпа́льнѡ. тѣ́мже тѧ̀ всѝ велича́емъ.
Свѣти́ленъ:
Ꙗ҆́коже со́лнце свѣтоно́сно чꙋде́сными зарѧ́ми наставлѧ́еши всю̀ тва́рь, пресла́вне страстоте́рпче. тѣ́мже твою̀ соверша́юще па́мѧть, про́симъ ѿ бѣ́дъ всѧ̑ и҆зба́вити.
Бг҃оро́диченъ:
Твоѐ достоѧ́нїе, сло́ве, ᲂу҆твердѝ во бранѣ́хъ, ѻ҆те́чествꙋ побѣ̑ды на ва́рвары подаѧ̀, бцⷣы мольба́ми, ю҆́же дарова̀ хрїстїа́нѡмъ застꙋ́пницꙋ.
На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ. А҆пⷭ҇лъ къ є҆фесе́ємъ, зача́ло сл҃г. А҆ллилꙋ́їа, гла́съ д҃: Воззва́ша пра́веднїи: Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе лꙋкѝ, зача́ло р҃ѕ. Прича́стенъ: Въ па́мѧть вѣ́чнꙋю бꙋ́детъ пра́ведникъ: