Мѣ́сѧца тогѡ́же въ д҃-й де́нь. Предпра́зднство просвѣще́нїѧ: И҆ собо́ръ ст҃ы́хъ седми́десѧти а҆пⷭ҇тѡлъ:
И҆ прпⷣбнагѡ ѻ҆ц҃а̀ на́шегѡ ѳеокті́ста и҆гꙋ́мена, и҆́же въ кꙋкꙋ́мѣ сїкелі́йстѣмъ.
На Гдⷭ҇и, воззва́хъ, стїхи̑ры, гла́съ д҃. Подо́бенъ: Да́лъ є҆сѝ зна́менїе:
Клео́пꙋ, а҆ндроні́ка, ꙳ сїлꙋа́на же и҆ а҆га́ва, ꙳ а҆на́нїю, и҆ фїлі́ппа: ꙳ про́хѡра, нїканѡ́ра, ꙳ рꙋ́фа и҆ сѡсѳе́на: ꙳ лі́на же и҆ стахѵ́а, стефа́на, ті́мѡна: ꙳ є҆́рма, фле́гонта, ма́рка, лꙋкꙋ̀: ꙳ сѡсїпа́тра, і҆а́ссѡна и҆ га́їа, ꙳ и҆ тѷхі́ка, и҆ фїлимо́на ꙳ сщ҃е́нными пѣ́сньми, вѣ́рнїи, ᲂу҆блажи́мъ.
Нарки́ссъ и҆ трофі́мъ, ꙳ ке́сарь, зи́на и҆ а҆рїста́рхъ, ꙳ ма́ркъ, сі́ла и҆ га́їй, є҆рмі́й и҆ а҆сѷгкрі́тъ: ꙳ а҆поллѡ́съ и҆ ки́фа, кли́мъ и҆ і҆ꙋ́стъ, ꙳ кꙋа́ртъ, є҆ра́стъ, лꙋка̀, ѻ҆нисі́форъ ꙳, ка́рпъ и҆ є҆ѵо́дъ матѳі́й и҆ і҆а́кѡвъ, ꙳ ᲂу҆рва́нъ и҆ а҆рїстовꙋ́лъ, ꙳ тѷхі́къ и҆ а҆рїста́рхъ, ꙳ досто́йнѡ да почтѧ́тсѧ.
Пꙋ́да, и҆рѡдїѡ́на и҆ а҆рте́мꙋ, ꙳ фїлоло́га, ѻ҆лѵ́мпа же и҆ родїѡ́на, ꙳ а҆пе́лла и҆ а҆мплі́а ꙳, патро́ва и҆ ма́рка, ꙳ те́ртїа и҆ ѳадде́а, ꙳ є҆пене́та чꙋ́днаго, а҆ха́їка же, а҆кѵ́лꙋ, лꙋкі́а, варна́вꙋ ꙳ и҆ фꙋртꙋна́та, и҆ а҆по́лла сла́внаго, и҆ крі́спа ꙳ почти́мъ честны̑ѧ бг҃опроповѣ́дники.
И҆́ны стїхи̑ры преподо́бнагѡ, гла́съ в҃. Подо́бенъ: Є҆гда̀ ѿ дре́ва:
Є҆гда̀ ᲂу҆ѧзви́лъ є҆сѝ дꙋ́шꙋ жела́нїемъ бжⷭ҇твеннымъ, всебл҃же́нне, ра́дꙋѧсѧ взѧ́лъ є҆сѝ тво́й крⷭ҇тъ, и҆ послѣ́довалъ є҆сѝ хрⷭ҇тꙋ̀, и҆ ᲂу҆мертви́въ мꙋдрова́нїе плотско́е воздержа́нїемъ, дх҃а дѣ́йство жи́во воспрїѧ́лъ є҆сѝ, рѣши́ти недꙋ́гѡвъ зи́мꙋ теплото́ю моли́твъ твои́хъ бл҃гопрїѧ́тныхъ: тѣ́мже тѧ̀ согла́снѡ ᲂу҆бл҃жа́емъ.
Є҆гда̀ прилѣ́жными моли́твами и҆ твердѣ́йшимъ поще́нїемъ, зри́тельное дꙋшѝ, ѻ҆́ч҃е, ѡ҆чи́стилъ є҆сѝ, хра́мъ бы́лъ є҆сѝ трисо́лнечнагѡ бжⷭ҇тва̀, и҆ свѧще́нства пома́занїе бжⷭ҇твенное ст҃о́е прїи́мъ, внꙋ́трь невхо́дныхъ вше́лъ є҆сѝ, закала́ѧ тебє̀ ра́ди закла́вшагосѧ, ра́ди сше́ствїѧ неизглаго́ланнагѡ.
Кро́токъ, неѕло́бивъ ꙗ҆́вльсѧ, въ цѣ́лости нра́ва, ѻ҆́ч҃е ѳеокті́сте, наслѣ́довалъ є҆сѝ кро́ткихъ вои́стиннꙋ зе́млю: и҆ прича́стїемъ ѡ҆божа́емь, пи́щи наслажда́ешисѧ, и҆ ра́дости и҆ весе́лїѧ и҆́стиннагѡ. И҆дѣ́же помина́ѧ не преста́й и҆́скреннѡ тѧ̀ почита́ющихъ, и҆ твоѐ соверша́ющихъ бжⷭ҇твенное ᲂу҆спе́нїе.
Сла́ва, и҆ ны́нѣ, гла́съ г҃:
Ꙗ҆́сенъ ᲂу҆́бѡ мимоше́дшїй пра́здникъ, сла́внѣйшїй же настоѧ́щїй де́нь: во ѻ҆́нъ сп҃сꙋ волсвѝ поклони́шасѧ, въ се́й же влⷣкꙋ ра́бъ сла́венъ крестѝ. Та́мѡ па́стырїе свирѧ́юще ви́дѣвше и҆ чꙋдѧ́хꙋсѧ, здѣ́ же гла́съ ѻ҆́ч҃їй є҆диноро́днаго сн҃а проповѣ́да.
На стїхо́внѣ стїхи̑ры, гла́съ и҃. Подо́бенъ: Мч҃ницы твоѝ, гдⷭ҇и:
Сы́й ѻ҆́гнь нестерпи́мый, бре́нїю и҆ сѣ́нꙋ мнѣ̀ сꙋ́щꙋ, хрⷭ҇тѐ мо́й, что̀ ст҃ꙋ́ю твою̀ преклонѧ́еши главꙋ̀, є҆ѧ́же а҆́гг҃льскаѧ трепе́щꙋтъ мно́жєства; речѐ і҆ѡа́ннъ ко творцꙋ̀, є҆гда̀ крⷭ҇ти́тисѧ прїи́де. вели́ко твоѐ є҆́сть, бл҃гоꙋтро́бне жизнода́вче, низше́ствїе.
Сті́хъ: Сегѡ̀ ра́ди помѧнꙋ́хъ тѧ̀ ѿ землѝ і҆ѻрда́нски и҆ є҆рмѡнїи́мски.
Сѐ просвѣще́нїе на́ше, и҆збавле́нїе, спасе́нїе, хотѧ̀ предгрѧде́тъ на і҆ѻрда́нѣ ѡ҆бнажи́тисѧ ꙗ҆́вѣ, и҆ ѡ҆дѣ́ѧтисѧ, ꙗ҆́кѡ ри́зою, вода́ми, ѡ҆бнаже́нїе ѡ҆дѣва́ѧ всѣ́хъ ѡ҆бна́жшихсѧ ѕмі́ѧ совѣ́томъ сопроти́внымъ.
Сті́хъ: Ви́дѣша тѧ̀ во́ды, бж҃е, ви́дѣша тѧ̀ во́ды, и҆ ᲂу҆боѧ́шасѧ.
Ѻ҆́гнь нестерпи́мый вои́стиннꙋ, хотѧ̀ предгрѧде́тъ ко і҆ѻрда́нꙋ ѡ҆чи́стити мѧ̀ сокрꙋше́ннаго, престꙋпле́нїемъ лꙋка́вымъ. До́ждь нбⷭ҇ный прїе́млетъ, посредѝ во́дъ ѡ҆мы́ти мѧ̀ ѿ скве́рны мно́гихъ мои́хъ прегрѣше́нїй, ꙗ҆́кѡ ще́дръ и҆ многомлⷭ҇тивъ.
Сла́ва, и҆ ны́нѣ, гла́съ ѕ҃:
Грѧде́тъ ко і҆ѻрда́нꙋ хрⷭ҇то́съ, и҆́стина, крⷭ҇ти́тисѧ ѿ і҆ѡа́нна, и҆ речѐ къ немꙋ̀: а҆́зъ тре́бꙋю ѿ тебє̀ крⷭ҇ти́тисѧ, и҆ ты́ ли грѧде́ши ко мнѣ̀; не смѣ́ю сѣ́но прикоснꙋ́тисѧ ѻ҆гню̀: ты́ мѧ ѡ҆свѧтѝ, влⷣко, бж҃е́ственнымъ ꙗ҆вле́нїемъ твои́мъ.
Тропа́рь, гла́съ г҃:
А҆пⷭ҇ли ст҃і́и, моли́те млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Сла́ва, и҆ ны́нѣ, предпра́зднства:
Гото́висѧ, завꙋлѡ́не, и҆ красꙋ́йсѧ, нефѳали́ме, і҆ѻрда́не рѣко̀, ста́ни, под̾имѝ взыгра́ѧ крⷭ҇ти́тисѧ грѧдꙋ́ща влⷣкꙋ, весели́сѧ, а҆да́ме, съ прама́терїю, не кры́йта себѐ, ꙗ҆́коже въ раѝ пре́жде: и҆́бо на́ги ви́дѣвъ вы̀ ꙗ҆ви́сѧ, да ѡ҆блече́тъ въ пе́рвꙋю ѻ҆де́ждꙋ, хрⷭ҇то́съ ꙗ҆ви́сѧ, всю̀ тва́рь хотѧ̀ ѡ҆бнови́ти.
На повече́рїи канѡ́нъ, є҆гѡ́же краегране́сїе:
Вели́кагѡ четвертка̀ до́лгꙋю пѣ́снь пою̀.
Гла́съ ѕ҃: і҆рмосы̀ по два́жды, тропарѝ на ѕ҃. Та́же і҆рмо́съ ѻ҆́ба ли̑ка вкꙋ́пѣ.
Пѣ́снь а҃. І҆рмо́съ:
Сѣ́ченое сѣче́тсѧ мо́ре чермно́е, волнопита́емаѧ же и҆зсꙋша́етсѧ глꙋбина̀, та́ѧжде кꙋ́пнѡ без̾ѻрꙋ̑жнымъ бы́вши проходи́ма, и҆ всеѻрꙋ̑жнымъ гро́бъ. Пѣ́снь же бг҃окра́снаѧ воспѣва́шесѧ: сла́внѡ просла́висѧ хрⷭ҇то́съ бг҃ъ на́шъ.
Всевино́внаѧ и҆ пода́тельнаѧ жи́зни, безмѣ́рнаѧ мꙋ́дрость бж҃їѧ, созда̀ хра́мъ себѣ̀ и҆зъ чи́стыѧ неискꙋсомꙋ́жныѧ мт҃ре: ко і҆ѻрда̑нскимъ же ны́нѣ стрꙋѧ́мъ грѧде́тъ, ѡ҆богаща́ѧ бж҃ество́мъ земны́хъ на ѡ҆бновле́нїе.
Тайново́дствꙋющи всѧ̑ созыва́етъ сꙋ́щыѧ ѿ ꙗ҆зы̑къ бж҃їѧ мꙋ́дрость къ свѣ́тꙋ, во тмѣ̀ пре́жде невѣ́дѣнїѧ несвѣ́тлой лежа́щыѧ въ позна́нїе и҆́стины возводѧ́щи, къ свѣ́тꙋ кр҃ще́нїемъ, сердца̀ ѡ҆чища́ющимъ, и҆ созида́ющимъ дх҃омъ.
Да послꙋ́шаемъ ны́нѣ прⷪ҇ро́ческихъ, соверша́емыхъ дх҃омъ, гласѡ́въ: креща́ѧй бо въ дс҃ѣ и҆ ѻ҆гнѝ, и҆́детъ хрⷭ҇то́съ ко і҆ѻрда́нꙋ. Прїиди́те къ немꙋ̀ и҆ просвѣти́тесѧ: ва̑ша бо ли́ца не постыдѧ́тсѧ.
Пѣ́снь г҃. І҆рмо́съ:
Гдⷭ҇ь сы́й всѣ́хъ и҆ зижди́тель бг҃ъ, созда́нное безстра́стный, ѡ҆бнища́въ, себѣ̀ соедини́лъ є҆сѝ, и҆ стрꙋѧ́ми, и҆́миже хотѣ́лъ є҆сѝ прїитѝ, са́мъ сы́й лю́демъ провозглаша́лъ є҆сѝ: во́дꙋ жи́зни почерпи́те, и҆ вѣ́рою ᲂу҆тверди́тесѧ.
Рѣши́тельнꙋю дꙋ́шъ и҆ тѣле́съ кꙋ́пнѡ, креще́нїѧ бл҃года́ть, сп҃се, грѧде́ши дарова́ти: сегѡ̀ ра́ди подава́еши ны́нѣ на́мъ и҆ бл҃года́ть вмѣ́стѡ бл҃года́ти, зовы́й: во́дꙋ жи́зни почерпи́те, и҆ вѣ́рою ᲂу҆тверди́тесѧ.
Безꙋ́менъ мꙋ́жъ, невѣ́дый бг҃а, растлѣва́етсѧ: и҆́бо безмѣ́стными начина́ньми лиша́етсѧ ѿ всѧ́кагѡ бла́га, и҆ всѧ́кагѡ ѿпа́даетъ спасе́нїѧ: є҆гѡ́же ча́сти всѝ хрⷭ҇та̀ вѣ́дѧщїи да и҆зба́вимсѧ.
Пѣ́снь д҃. І҆рмо́съ:
Прови́дѧ прⷪ҇ро́къ та́йны твоеѧ̀ неизрече́нное, хрⷭ҇тѐ, провозгласѝ: положи́лъ є҆сѝ крѣ́пкꙋю креще́нїѧ бл҃года́ть, вѣ́рою сїѐ прїе́млющымъ всѣ̑мъ, во и҆збавле́нїе грѣхѡ́въ на́шихъ.
На креще́нїе тща́сѧ, смє́ртнымъ и҆сточа́ющее ѡ҆ставле́нїе, ѡ҆бременє́нныѧ всѧ̑ прегрѣше́ньми зове́ши, ѕлѣ̀ въ нечистотѣ̀ пожи́вшыѧ, дꙋше́вный поко́й тѣ̑мъ, ꙗ҆́кѡ ще́дръ, пода́ти ѡ҆бѣщава́ѧ.
Причаща́ешисѧ пло́ти мое́й, да твоегѡ̀ бжⷭ҇тва̀ пода́си мѝ: ѻ҆́бразъ бо неизмѣ́ненъ сы́й твоегѡ̀ ѻ҆ц҃а̀, вмѣща́ешисѧ подъ рꙋ́ки твоегѡ̀, сп҃се, созда́нїѧ, кромѣ̀ грѣха̀ чл҃вѣ́къ ꙗ҆́вльсѧ, подо́бнымъ ѡ҆чища́ѧ, сло́ве, подо́бное.
Питїѐ и҆ пома́занїе, и҆ дх҃ъ твоеѧ̀ печа́ти, сп҃се, позна́нїѧ, и҆ та̑йнаѧ дарова̑нїѧ, и҆ дарѡ́въ бж҃е́ственныхъ досторачи̑тельнаѧ дѣла̀: и҆́бо є҆диноро́днаго тѧ̀ ѡ҆чище́нїе ѻ҆ц҃ъ въ мі́ръ посла̀.
Пѣ́снь є҃. І҆рмо́съ:
Сою́зомъ боѧ́зни содержи́мь ны́нѣ предте́ча, ѿрица́етсѧ крести́ти, бл҃гоговѣ́йнѡ хрⷭ҇та̀ ви́дѣвъ, на́га стоѧ́ща на водѣ̀, водо́ю покрыва́ющаго превы́спрєннѧѧ.
Неѡдержи́мꙋю держа́щаѧ и҆ превы́спреннюю на воздꙋ́сѣ во́дꙋ, бє́здны ѡ҆бꙋздава́ющаѧ, и҆ морѧ̀ востѧзꙋ́ющаѧ, бж҃їѧ мꙋ́дрость грѧде́тъ ко і҆ѻрда́нꙋ, креще́нїе прїе́млѧ ѿ рꙋкѝ раба̀.
Воѡбрази́въ человѣ́ческое є҆стество̀, кр҃ще́нїемъ ны́нѣ грѧде́тъ ѡ҆чи́стити хрⷭ҇то́съ, ѻ҆́блаки нб҃о ѡ҆блага́ѧ, и҆ ѡ҆дѣва́ѧйсѧ свѣ́томъ, на́гъ зри́тсѧ во і҆ѻрда́нскихъ стрꙋѧ́хъ, и҆ рꙋко́ю держи́тсѧ всѧ̑ носѧ́й.
Пѣ́снь ѕ҃. І҆рмо́съ:
Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на, влⷣцѣ вопїю́ ти: ѿ тли́ мѧ возведѝ.
Гдⷭ҇а тѧ̀ вѣ́дѧще, нб҃са̀ повѣ́даютъ землѝ твою̀, сп҃се, сла́вꙋ въ твое́мъ ржⷭ҇твѣ̀: ны́нѣ же ѻ҆ц҃ъ тѧ̀ проповѣ́дꙋетъ сн҃а возлю́бленна кр҃ща́емаго.
Скве́рнꙋ всѧ́къ носѧ́й, да ѡ҆мы́етъ ю҆̀ сле́зными ка́плѧми, и҆ хрⷭ҇тꙋ̀ съ тре́петомъ да пристꙋ́питъ, ѻ҆гне́мъ и҆ дх҃омъ бж҃е́ственнымъ ѡ҆чи́стити и҆дꙋ́щемꙋ є҆стество̀ на́ше.
Пѣ́снь з҃. І҆рмо́съ:
Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆ц҃ъ на́шихъ.
Помава́ѧ главо́ю ко враждѣ̀, никто́же ле́стнѡ да дви́жетъ, и҆́скреннемꙋ ѕло̀ возда́ти, ѕлѣ̀ вмѣ́стѡ ѕла̀ поꙋча́ѧсѧ: но въ любвѝ гдⷭ҇а ꙗ҆́вльшагосѧ да почестви́мъ.
Вы̀ хрⷭ҇то́вы ꙗ҆́кѡ дрꙋ́зи ма́лѡ спостражди́те воѡбра́жшемꙋсѧ, и҆ грѧдꙋ́щемꙋ креще́нїе прїѧ́ти, и҆ ꙗ҆́вльшемꙋсѧ по на́мъ ѻ҆́браза на ѡ҆чище́нїе, и҆ прегрѣше́нїй на и҆збавле́нїе.
Со мно́ю а҆́ще кто̀ сни́детъ и҆ спогребе́тсѧ креще́нїемъ, со мно́ю сла́вы наслади́тсѧ и҆ воскрⷭ҇нїѧ, хрⷭ҇то́съ ны́нѣ возвѣща́етъ, є҆го́же вѣ́рнѡ да ᲂу҆срѧ́щимъ.
Пѣ́снь и҃. І҆рмо́съ:
За зако́ны ѻ҆те́чєскїѧ блаже́ннїи въ вавѷлѡ́нѣ ю҆́ношы, предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.
Гости́телїе бж҃їѧ пи́щи въ виѳлее́мѣ мꙋ́дрѣ напита́вшесѧ, со а҆́гг҃лы же просла́вльше, и҆ па́стырьми и҆ волхвы̀, вопло́щшагосѧ, ны́нѣ ко і҆ѻрда́нꙋ та́инственнѡ и҆́демъ, ви́дѧще та́инство ве́лїе, є҆́же хрⷭ҇то́съ са́мъ соверша́етъ: є҆го́же превозно́симъ во всѧ̑ вѣ́ки.
Зако́на соблюда́юще глави́знꙋ и҆ прⷪ҇рѡ́къ, любо́вїю ᲂу҆тве́рждшесѧ, подо́бницы хрⷭ҇та̀ бꙋ́демъ, за любо́вь кра́йнюю пло́ть прїи́мшагѡ, и҆ кр҃ще́нїемъ на́съ ѻ҆ц҃ꙋ̀ примири́вшагѡ и҆ наꙋчи́вшагѡ пѣ́ти: гдⷭ҇а по́йте дѣла̀, и҆ превозноси́те во всѧ̑ вѣ́ки.
Прїима́ше грѧдꙋ́щаго грѣхѝ мі́ра ѡ҆чи́стити водо́ю, но семꙋ̀ возбранѧ́ше, сопрѧ́тꙋемь стра́хомъ: а҆́зъ бо тре́бꙋю крести́тисѧ ѿ тебє̀, женихꙋ̀ противоречѐ дрꙋ́гъ, гла́съ же сло́вꙋ и҆ со́лнцꙋ свѣти́льникъ. Тѧ̀ превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Стра́нствїѧ влⷣчнѧ и҆ безсме́ртныѧ трапе́зы во ᲂу҆бо́зѣмъ верте́пѣ пре́жде наслади́вшесѧ, ны́нѣ на і҆ѻрда́нъ теце́мъ, та́йнꙋ зрѧ́ще стра́ннꙋ, го́рнїѧ свѣ́тлости хода́тайственнꙋ.
И҆ди́те ѿ виѳлее́ма питѡ́мицы чꙋде́съ къ странѣ̀ і҆ѻрда́нстѣй, и҆ та́мѡ ви́дите дѣла̀ та́инственнѡ соверша́єма, креще́нїемъ же хрⷭ҇та̀ прише́дша а҆да́ма ѡ҆бнови́ти, и҆́бо воплоти́сѧ.
Содѣ́тель ро́ждсѧ и҆зъ ѻ҆ц҃а̀ пре́жде вѣкѡ́въ, роди́сѧ напослѣ́докъ непрело́жнѡ вопло́щсѧ и҆зъ дв҃ы чⷭ҇тыѧ, бг҃оѻтрокови́цы, сꙋгꙋ́бъ, бг҃ъ и҆ человѣ́къ пребыва́ѧ, а҆да́ма ѡ҆бнови́ти креще́нїемъ.
Ꙗ҆́кѡ человѣ́къ, прише́лъ є҆сѝ сꙋщество́мъ, не мечта́нїемъ, ꙗ҆́кѡ є҆ди́нъ посредѝ всѣ́хъ, просѧ́й креще́нїѧ, є҆ди́нъ є҆стество́мъ непови́нный: погребсти́ бо вины̑ прише́лъ є҆сѝ человѣ́чєскїѧ, въ вода́хъ креща́емь.
Та́же і҆рмо́съ: Стра́нствїѧ влⷣчнѧ: И҆ покло́нъ.
На ᲂу҆́трени, на Бг҃ъ гдⷭ҇ь, тропа́рь предпра́зднства два́жды. Сла́ва, а҆пⷭ҇лѡвъ: И҆ ны́нѣ, предпра́зднства.
По а҃-й стїхоло́гїи, сѣда́ленъ, гла́съ д҃. Подо́бенъ: Ско́рѡ предварѝ:
Сѐ прихо́дитъ ко і҆ѻрда́нꙋ хрⷭ҇то́съ, приглаша́етъ же прⷣте́чꙋ: грѧдѝ и҆ крестѝ вѣ́рнѡ ве́сь ѡ҆чища́ющаго мі́ра грѣ́хъ рѣ́чными стрꙋѧ́ми, прострѝ твою̀ рꙋ́кꙋ къ верхꙋ̀ моемꙋ̀ бж҃е́ственномꙋ, рꙋки́ бо прегрѣше́нїе прїидо́хъ и҆сцѣли́ти.
Сла́ва, и҆ ны́нѣ, гла́съ то́йже. Подо́бенъ: Вознесы́йсѧ:
Цр҃ѧ̀ всѣ́хъ и҆ влⷣкꙋ на креще́нїе, вѣ́рнїи, зрѧ́ще бг҃олѣ́пнѡ грѧдꙋ́ща, воспои́мъ є҆го̀, стєзѝ серде́цъ на́шихъ ᲂу҆гото́вимъ любо́вїю, сквє́рны ѿмыва́юще лю́тыхъ прегрѣше́нїй: се́ бо спастѝ ро́дъ человѣ́ческїй на і҆ѻрда̑нскїѧ стрꙋи̑ прихо́дитъ.
По в҃-й стїхоло́гїи, сѣда́ленъ, гла́съ и҃. Подо́бенъ: Воскре́се:
Вели́кїй крⷭ҇ти́телю гдⷭ҇ень, ра́дꙋйсѧ: прїи́де бо хрⷭ҇то́съ ѿ тебє̀ крести́тисѧ. Трепе́щеши, ꙗ҆́кѡ слꙋжи́тель: влⷣка бо главꙋ̀ преклонѧ́етъ тебѣ̀. Прикосни́сѧ бжⷭ҇твенномꙋ верхꙋ̀ содержа́щагѡ рꙋко́ю всѧ́чєскаѧ, и҆ бл҃говоле́нїемъ спаса́ющагѡ бг҃а ро́дъ человѣ́ческїй.
Сла́ва, и҆ ны́нѣ, гла́съ то́йже:
Торжество̀ свѣ́тлое предсоверша́юще всѝ просвѣще́нїѧ хрⷭ҇то́ва, добродѣ́тельми ѡ҆блиста́емсѧ: прихо́дитъ бо и҆́же надъ всѣ́ми ѿ галїле́и ко і҆ѡа́ннꙋ, креще́нїе и҆сточи́ти спасе́нїѧ ѻ҆гне́мъ дх҃а, во і҆ѻрда́нскихъ стрꙋѧ́хъ, ꙗ҆́кѡ бг҃ъ, ро́дꙋ человѣ́ческомꙋ.
Канѡ́ны трѝ: предпра́зднства со і҆рмосо́мъ на ѕ҃: а҆пⷭ҇лѡвъ на д҃: и҆ преподо́бнагѡ на д҃.
Канѡ́нъ предпра́зднства, є҆гѡ́же краегране́сїе по а҆лфави́тꙋ.
Гла́съ ѕ҃. Пѣ́снь а҃. І҆рмо́съ:
Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Да ра́дꙋетсѧ тва́рь, ѻ҆те́чєствїѧ ꙗ҆зы́кѡвъ да пою́тъ: і҆и҃съ, цр҃ь всеѧ̀ землѝ, предгрѧде́тъ стрꙋѧ́ми і҆ѻрда́нскими на́ше сотвори́ти ѡ҆чище́нїе.
Въ ца́рскꙋю багрѧни́цꙋ и҆зъ дѣ́вственныхъ крове́й, гдⷭ҇и, ѡ҆дѣ́ѧвсѧ пло́тїю, къ рѣчны̑мъ тече́нїємъ на́гъ прихо́диши, мою̀ ѡ҆дѣва́ѧ наготꙋ̀.
Сн҃ъ ѻ҆ц҃а̀ пребезнача́льнагѡ ты̀ сы́й, къ сы́нꙋ, бл҃гоꙋтро́бне, заха́рїинꙋ смире́ннѡ прихо́диши, креще́нїѧ просѧ̀: ꙗ҆́кѡ да бл҃года́тїю сы́ны бж҃їѧ сотвори́ши ны̀.
И҆́нъ канѡ́нъ а҆пⷭ҇лѡвъ, є҆гѡ́же краегране́сїе:
Хрⷭ҇то́вы ᲂу҆ченикѝ вторы̑ѧ да похвалю̀. І҆ѡ́сифъ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.
Хрⷭ҇то́вы ᲂу҆ч҃ницы̀ бы́вше, на́съ ра́ди ве́щїю тѣле́сною ꙗ҆́вльшагѡсѧ, всехва́льнїи, просвѣти́сте мі́ръ ве́сь заре́ю бл҃гоче́стїѧ, тмꙋ̀ разори́вше безбо́жїѧ.
Тлѣ́нныхъ ѡ҆ста́вльше ѡ҆скверне́нное и҆ нестоѧ́нное, хрⷭ҇тꙋ̀ послѣ́доваша крі́спъ, и҆ про́хѡръ, и҆ а҆ндроні́къ, ѳадде́й и҆ нїкано́ръ, свѣти́льницы бы́вше бг҃ови́днѣйшїи.
Крѣ́пость гꙋби́телѧ побѣди́сте, сла́внїи крѣ́постїю дх҃а: неи́стовствомъ же безбо́жїѧ коне́чнѣ ѡ҆сла́блєнныѧ крѣ́пости и҆спо́лнисте и҆ бжⷭ҇твеннагѡ разꙋмѣ́нїѧ.
Пло́ти подо́бїемъ ꙗ҆́вльшагосѧ гдⷭ҇а а҆мплі́й проповѣ́да, стахѵ́й и҆ фїлі́ппъ, ꙗ҆́кѡ а҆пⷭ҇ли, ꙗ҆́кѡ бж҃е́ственнїи і҆ера́рси, ꙗ҆́кѡ вои́стиннꙋ слꙋжи́телїе сꙋ́щихъ па́че ᲂу҆ма̀.
Бг҃оро́диченъ:
Бжⷭ҇твеннꙋю пала́тꙋ цр҃е́вꙋ почти́мъ, въ ню́же всели́сѧ, ꙗ҆́коже восхотѣ̀, неискꙋсомꙋ́жнꙋю и҆ є҆ди́нꙋ бцⷣꙋ, є҆ѧ́же ра́ди ѡ҆божи́хомсѧ, воспѣсносло́вимъ.
И҆́нъ канѡ́нъ прпⷣбнагѡ.
Гла́съ в҃. Пѣ́снь а҃. І҆рмо́съ:
Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.
Сла́дости пото́къ хрⷭ҇то́съ къ вода́мъ прихо́дитъ раболѣ́пнѡ і҆ѻрда̑нскимъ ѡ҆мы́тисѧ: го́ры, взыгра́йте ра́достїю, хо́лми, препоѧ́шитесѧ, ѡ҆скверне́ннїи, ко ѡ҆чище́нїю бжⷭ҇твенномꙋ ᲂу҆гото́витесѧ.
Свѣтоно́снаѧ па́мѧть твоѧ̀ на́мъ дне́сь возсїѧ̀ со́лнєчныѧ лꙋчѝ, ѳеокті́сте, и҆справле́нїй твои́хъ, страсте́й ᲂу҆́бѡ на́шихъ ѿгонѧ́щи ѻ҆́блакъ: ю҆́же соверша́юще, вѣ́рою тѧ̀ и҆ любо́вїю блажи́мъ.
Впери́всѧ любо́вїю хрⷭ҇то́вою, бы́лъ є҆сѝ вы́шшїй, мїрска́гѡ ѿстꙋпи́въ смꙋще́нїѧ: тѣ́мже ѿлꙋчи́всѧ къ по́стничества болѣ́знєннымъ трꙋдѡ́мъ и҆ воздержа́нїємъ, ꙗ҆́коже а҆́гг҃лъ пожи́лъ є҆сѝ.
Бг҃оро́диченъ:
Чи́стꙋю чи́стымъ ᲂу҆мо́мъ, прїиди́те, ᲂу҆бл҃жи́мъ добро́тꙋ і҆а́кѡвлю, ю҆́же возлюбѝ бг҃ъ и҆збра́въ, въ ню́же всели́сѧ: ꙗ҆́кѡ ски́нїю свѧще́нїѧ, ꙗ҆́кѡ честнѣ́йшꙋю всѣ́хъ тва́рей воспои́мъ.
Пѣ́снь г҃. І҆рмо́съ:
Нѣ́сть ст҃ъ, ꙗ҆́коже ты̀, гдⷭ҇и, бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Влⷣчествꙋѧй всѣ́ми, ꙗ҆́кѡ бг҃ъ, раба̀ но́сиши ѻ҆́бразъ: и҆ къ рабꙋ̀, ще́дре, прихо́диши пло́тски, креще́нїемъ бг҃одѣ́льнымъ ѿ рабо́ты вра́жїѧ и҆зима́ѧ ны̀.
Прише́лъ є҆сѝ на стрꙋи̑ чесѡ̀ ра́ди; ко́е ѡ҆чище́нїе хотѧ̀; кꙋ́ю скве́рнꙋ ѿмы́ти преблагі́й и҆ща́й; пою̀ твоѐ, є҆́же па́че ᲂу҆ма̀ за милосе́рдїе, сло́ве, снизхожде́нїе.
И҆щѧ̀ ѻ҆вча̀, хрⷭ҇тѐ, є҆́же ди́вїй во́лкъ расто́ргне ле́стїю, на і҆ѻрда́нскихъ стрꙋѧ́хъ стои́ши, взыва́ѧ прⷣте́чи: грѧдѝ, крести́ мѧ, ты̀.
И҆́нъ. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.
Ꙗ҆́коже рѣ́ки, ва́съ сло́во посла̀ во всю̀ зе́млю, наполнѧ́ющыѧ сїю̀, всемꙋ́дрїи, напоє́нїи бжⷭ҇твеннагѡ дх҃а, и҆ пла́мень ѿе́млющыѧ безбо́жїѧ бл҃года́тїю.
Воспои́мъ ті́мѡна бжⷭ҇твеннаго, сі́лꙋ же и҆ сїлꙋа́на, и҆ вѣ́рою восхва́лимъ є҆пене́та сла́внаго, и҆ ᲂу҆рва́на и҆ а҆га́ва, и҆́стинныѧ хрⷭ҇топроповѣ́дники.
Бл҃же́ни ᲂу҆жѐ бы́вше, ꙗ҆́кѡ и҆́стиннѡ бл҃же́ннаго бг҃а ᲂу҆чт҃лѧ стѧжа́вше: и҆̀же пе́рвѣе ѡ҆каѧ̑нныѧ, всемꙋ́дрїи, прича̑стницы показа́сте бжⷭ҇твеннагѡ бл҃же́нства.
Бг҃оро́диченъ:
Чиста̀ пре́жде ржⷭ҇тва̀, и҆ въ ржⷭ҇твѣ̀, и҆ по ржⷭ҇твѣ̀ вои́стиннꙋ, дв҃о мт҃и, была̀ є҆сѝ: бг҃а бо породила̀ є҆сѝ, є҆го́же а҆пⷭ҇лѡвъ сосло́вїе пресвѣ́тлѡ проповѣ́да.
И҆́нъ. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.
Бє́здны повелѣ́нїемъ сотвори́вый, вода́ми покрыва́ѧй превы́спрєннѧѧ, въ вода́хъ предгрѧде́тъ крести́тисѧ: дꙋшѐ, бо́дрствꙋй, ѿ страсте́й ѡ҆чи́стисѧ, добродѣ́телей приносѧ́щи прозѧбє́нїѧ.
Ꙗ҆́кѡ шипо́къ сладково́ненъ дѣ́ланїемъ дх҃а, во цвѣ́тницѣ поще́нїѧ процвѣ́лъ є҆сѝ, ѳеокті́сте, благоꙋха́нїѧ и҆сполнѧ́ѧй бжⷭ҇твеннагѡ пою́щыѧ всегда̀: ꙗ҆́кѡ нѣ́сть ст҃ъ па́че тебє̀, гдⷭ҇и.
Ꙗ҆́кѡ ма́слина плодови́та въ домꙋ̀ гдⷭ҇ни прозѧ́блъ є҆сѝ, є҆ле́емъ трꙋдѡ́въ твои́хъ, ѳеокті́сте, ᲂу҆маща́ѧ на̑ша ли́ца пою́щихъ, прпⷣбне: ꙗ҆́кѡ нѣ́сть ст҃ъ па́че тебє̀, гдⷭ҇и.
Бг҃оро́диченъ:
Мно́зи борю́щїи мѧ̀ ѿ высоты̀, въ болѣ́зни ѡ҆скꙋдѣ̀ жи́знь моѧ̀, понро́хъ въ про́пасть прегрѣше́нїй: спаси́ мѧ, влⷣчце, не пре́зри менє̀, предста́тельницꙋ бо тѧ̀ непобѣ́днꙋ и҆́мамъ.
Конда́къ предпра́зднства, гла́съ д҃. Подо́бенъ: Ꙗ҆ви́лсѧ є҆сѝ:
Во стрꙋѧ́хъ дне́сь і҆ѻрда́нскихъ бы́въ гдⷭ҇ь, і҆ѡа́ннꙋ вопїе́тъ: не ᲂу҆бо́йсѧ крⷭ҇ти́ти мѧ̀, спасти́ бо прїидо́хъ а҆да́ма первозда́ннаго.
І҆́косъ:
Не и҆стѧзꙋ́ю тѧ̀, крⷭ҇ти́телю, предѣ́лы преходи́ти: не глаго́лю тебѣ̀: рцы́ ми, ꙗ҆̀же глаго́леши беззакѡ́ннымъ, и҆ ᲂу҆чи́ши грѣ́шники: то́чїю крести́ мѧ молчѧ̀, и҆ ча́ѧ, ꙗ҆̀же ѿ кр҃ще́нїѧ: прїи́меши бо сегѡ̀ ра́ди досто́инство, є҆́же не бы́сть а҆́гг҃лѡмъ: и҆́бо всѣ́хъ прⷪ҇ро́кѡвъ бо́льша тѧ̀ сотворю̀. ѿ ѻ҆́нѣхъ ᲂу҆́бѡ ни є҆ди́нъ ꙗ҆́вѣ мѧ̀ ви́дѣ, но во ѻ҆́бразѣхъ, и҆ сѣ́нехъ, и҆ гада́нїихъ: ты́ же пред̾ тобо́ю стоѧ́ща ви́дѣлъ є҆сѝ: спасти́ бо прїидо́хъ а҆да́ма первозда́ннаго.
Та́же сѣда́ленъ а҆пⷭ҇толѡвъ, гла́съ г҃. Подо́бенъ: Бжⷭ҇твенныѧ вѣ́ры:
Столпѝ непоколеби́мїи цр҃кве, ѡ҆снова̑нїѧ благоче́стїѧ бы́вше ᲂу҆ченицы̀ бг҃а на́шегѡ, соблюди́те сїю̀ невре́днꙋ, ѿгонѧ́ще льсти́вагѡ собла́зны, и҆ молѧ́ще хрⷭ҇та̀ бг҃а всегда̀ дарова́ти на́мъ ве́лїю ми́лость.
Сла́ва, прпⷣбнагѡ, гла́съ а҃. Подо́бенъ: Ка́мени запеча́танꙋ:
Оу҆па́съ бг҃оꙋго́днѡ гдⷭ҇ню па́ствꙋ свирѣ́лїю сло́ва, бг҃оно́сне ѳеокті́сте, на па̑жити безстра́стїѧ и҆ жи́зни приве́лъ є҆сѝ спаса́емꙋю бг҃ꙋ, и҆ къ семꙋ̀ ѿше́дъ, мздꙋ̀ трꙋдѡ́въ прїѧ́лъ є҆сѝ досто́йнꙋю. Сла́ва да́вшемꙋ тебѣ̀ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.
И҆ ны́нѣ, гла́съ и҆ подо́бенъ то́йже:
І҆и҃сꙋ ро́ждшꙋсѧ ѿ дв҃ы мр҃і́и, и҆ во і҆ѻрда́нѣ кре́щшꙋсѧ ѿ і҆ѡа́нна, дх҃ъ сни́де на него̀, зри́мый въ ви́дѣ голꙋби́нѣ. Сегѡ̀ ра́ди прⷪ҇ро́къ со а҆́гг҃лы глаго́лаше, зовы́й: сла́ва прише́ствїю твоемꙋ̀, хрⷭ҇тѐ, сла́ва црⷭ҇твїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.
Пѣ́снь д҃. І҆рмо́съ:
Хрⷭ҇то́съ, моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃олѣ́пнѡ пое́тъ, взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Є҆гда̀ ви́дѣ тѧ̀ стрꙋѧ̀, гдⷭ҇и, і҆ѻрда́нскаѧ, возврати́сѧ: мно́гими же страстьмѝ низложе́нное є҆стество̀ на́ше къ небесє́мъ ѡ҆брати́сѧ, поклони́всѧ тебѣ̀.
Оу҆жаса́етсѧ со́лнце, зрѧ̀ тебѐ сл҃нца, пло́тски ѡ҆бна́жшасѧ, и҆ та́инственнѡ всѐ ѡ҆зарѧ́юща, ѡ҆бна́жшеесѧ мра́чнымъ престꙋпле́нїемъ є҆стество̀, влⷣко.
Сѐ ѡ҆чище́нїе, сѐ и҆збавле́нїе, и҆ ѡ҆бновле́нїе всѣ́хъ, просвѣще́нїе прїи́де во своѧ̑: да присво́имсѧ ᲂу҆́бѡ є҆мꙋ̀ житїѧ̀ чистото́ю.
И҆́нъ. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы, воплоще́нїѧ тебє̀ вы́шнѧгѡ прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Мо́ре возмꙋти́ша ꙗ҆зы́ческое, въ сїѐ вше́дше, всемꙋ́дрїи, ꙗ҆́коже ко́ни, сп҃сови ᲂу҆ченицы̀, и҆ вѣ̑рныѧ спасо́ша водо́ю ст҃о́ю и҆ дх҃омъ.
Ѡ҆блиста́ша, ꙗ҆́кѡ со́лнце на землѝ, пꙋ́дъ, а҆пе́ллїй и҆ фїлоло́гъ, и҆ и҆рѡдїѡ́нъ, рꙋ́фъ же и҆ патро́въ: и҆ вѣ̑рныѧ просвѣти́ша, ѿ тмы̀ невѣ́дѣнїѧ и҆зба́вльше.
Напрѧ́гъ посла̀ стрѣ́лы вы̀, ꙗ҆́кѡ и҆з̾ѡщре́нны, бл҃гоꙋтро́бный, стрѣ́лы сокрꙋша́ющѧ вра̑жїѧ, и҆ лю́тѣ ᲂу҆ѧ́звлєнныѧ, сла́внїи, благода́тїю бж҃їею и҆сцѣлѧ́ющѧ.
Хвалꙋ̀ принесе́мъ и҆зба́вителю, пѣсносло́вѧще рѡдїѡ́на бг҃оглаго́ливаго, и҆ є҆рмі́а сла́внаго, и҆ мꙋ́драго а҆сѷгкрі́та, лі́на же бжⷭ҇твеннаго и҆ га́їа.
Бг҃оро́диченъ:
Тѧ̀, бл҃же́ннѣйшїй дре́вле ли́къ прⷪ҇ро́чествꙋющихъ дх҃омъ, бг҃оглагѡ́ланїи сщ҃е́нными, бг҃олѣ́пнѡ и҆менꙋ́етъ, всечⷭ҇таѧ, две́рь же и҆ го́рꙋ приѡсѣне́ннꙋю.
И҆́нъ. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и.
И҆ска́паша сла́дость болѣ́зней по́тове твоѝ, го́ресть ѿе́млюще де́мѡнскꙋю, сла́вне, недꙋ́ги ѿгонѧ́ще сла́ныѧ ѡ҆кропле́нїемъ, досточꙋ́дне.
Ѡ҆божа́емь непреста́нными ѡ҆чищє́нїи, прпⷣбне, свѣти́льникъ бы́лъ є҆сѝ мона́шествꙋющихъ свѣтлѣ́йшїй, ѻ҆́бразъ и҆звѣ́стнѣйшїй, и҆ наста́вникъ, и҆ сто́лпъ непоколеби́мь.
Расто́рглъ є҆сѝ страсте́й морѧ̀, ѳеокті́сте, жезло́мъ вѣ́ры, и҆ фараѡ́на неви́димаго, ѻ҆́ч҃е, потопи́въ, ко ѡ҆бѣтова́ннѣй землѝ дости́глъ є҆сѝ, прпⷣбне.
Бг҃оро́диченъ:
Воззовꙋ̀ въ нощѝ и҆ во днѝ, всенепоро́чнаѧ, къ тебѣ̀, и҆ спасꙋ́сѧ: и҆ сласте́й преидꙋ̀ стѣ́нꙋ, и҆ и҆зба́влюсѧ и҆скꙋше́нїй де́мѡнскихъ хода́тайствомъ твои́мъ.
Пѣ́снь є҃. І҆рмо́съ:
Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Плодопринесе́мъ хрⷭ҇тꙋ̀ житїѐ чи́стое: грѧде́тъ бо ѡ҆чища́ѧй вода́ми грѣхѡ́въ скве́рнꙋ бл҃года́тїю, є҆ди́нъ бл҃годѣ́тель и҆ безгрѣ́шный.
Лю́дїе во тмѣ̀ скорбе́й дре́вле сѣдѧ́щїи, свѣ́тъ ꙗ҆ви́сѧ ва́мъ незаходѧ́щїй, ви́дите, и҆ бжⷭ҇твенными зарѧ́ми просвѣти́тесѧ, и҆ ꙗ҆́вльшагѡсѧ бл҃года́ть воспо́йте.
Ве́лїе та́инство соверша́ѧ, къ вели́комꙋ прⷣте́чи твоемꙋ̀, ѽ великодарови́те гдⷭ҇и, грѧде́ши, ᲂу҆ма́лившеесѧ человѣ́чество неизглаго́ланнѡ велича́ѧ креще́нїемъ.
И҆́нъ. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Вѧза́ти же, всехва́льнїи, и҆ рѣши́ти, ꙗ҆́кѡ а҆пⷭ҇толи, прїи́мше вы̀ вла́сть, свѧ̑занныѧ ѕловѣ́рїѧ ᲂу҆́зами разрѣши́сте. тѣ́мже ва́шꙋ па́мѧть пра́зднꙋемъ, вѣ́рнѡ ликꙋ́юще.
Бж҃е́ственными а҆рїста́рхъ да почти́тсѧ пѣснопѣ́ньми, те́ртїй, і҆ассѡ́нъ и҆ сѡсѳе́нъ, ке́сарь и҆ ма́ркъ, лꙋка̀, сѡсїпа́тръ, кꙋа́ртъ и҆ бж҃е́ственный а҆пе́ллїй, кли́мъ и҆ є҆пафроді́тъ и҆ всемꙋ́дрый є҆ра́стъ.
Ва́съ, ꙗ҆́кѡ двана́десѧть, посла̀ гдⷭ҇ь всѐ и҆скоренѧ́ющыѧ безбо́жїе, всѣ̑мъ человѣ́кѡмъ насажда́ющыѧ зна́нїе бж҃е́ственное свѣ́тлѡ, сла́внїи а҆пⷭ҇толи, моли́твєнницы ѡ҆ дꙋша́хъ на́шихъ.
Бг҃оро́диченъ:
Ѻ҆́чи просвѣтѝ, дв҃о, се́рдца моегѡ̀, ѡ҆сїѧ́й мѝ зарю̀ покаѧ́нїѧ: тмы́ мѧ и҆зба́ви вѣ́чнꙋющїѧ, две́ре свѣ́та, хрⷭ҇тїа́нъ всѣ́хъ прибѣ́жище, вѣ́рнѡ воспѣва́ющихъ тѧ̀.
И҆́нъ. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ, сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.
Моли́твъ ра́ломъ ѡ҆бнови́въ зе́млю се́рдца, сїю̀ насѣ́ѧлъ є҆сѝ сло́ва сѣ́менемъ, ѻ҆́ч҃е бг҃омꙋ́дре, и҆ кла́съ пожа́лъ є҆сѝ бл҃гопло́дїѧ, восхвалѧ́ющихъ тѧ̀, всѣ́хъ благочести́выхъ дꙋ́шы пита́ющїй.
Бо́дръ ᲂу҆́мъ всегда̀ приносѧ̀, ѻ҆́ч҃е бг҃омꙋ́дре, стра̑сти ᲂу҆спи́лъ є҆сѝ дꙋшетлѣ̑нныѧ, къ бжⷭ҇твенномꙋ ᲂу҆́трꙋ тща́сѧ дости́гнꙋти, къ незаходи́магѡ свѣ́та свѣ́тлости, веселѧ́щихсѧ въ не́мже є҆́сть жили́ще.
Ꙗ҆́кѡ свѣтоза́рный и҆ свѣтоно́сецъ, и҆ по́лнъ дарова́нїй дх҃а бжⷭ҇твеннагѡ сы́й, ѻ҆́ч҃е, неѕло́бїѧ чи́стъ ѻ҆бы́чай ꙗ҆влѧ́ѧ, всѣ̑мъ пока́зовалсѧ є҆сѝ, ꙗ҆́коже а҆́гг҃лъ живы́й съ тѣ́ломъ.
Бг҃оро́диченъ:
Съ высоты̀ восто́ка ꙗ҆́вльшагѡсѧ показа́ласѧ є҆сѝ две́рь, и҆ прⷭ҇то́лъ превознесе́нъ цр҃е́въ, небомѣ́рнаѧ и҆ высо́каѧ лѣ́ствица, на ню́же взы́де хрⷭ҇то́съ, пречⷭ҇таѧ, и҆ ѿриновє́ннымъ человѣ́кѡмъ приѡбщи́сѧ.
Пѣ́снь ѕ҃. І҆рмо́съ:
Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.
Во́дъ сы́й и҆спо́лненъ та́йныхъ, ꙗ҆́кѡ рѣка̀ ми́ра, є҆ди́не гдⷭ҇и, къ рѣцѣ̀ прише́лъ є҆сѝ, ѿ ма́лыѧ ка́пли просѧ̀ крести́тисѧ, є҆ди́не безгрѣ́шне.
Диви́тсѧ свы́ше а҆́гг҃льскїй ли́къ, смотрѧ́ѧ ѡ҆бнаже́на, ѻ҆́блаки покрыва́ющаго не́бо, и҆ взыва́етъ: что̀ сїѐ твоѐ мно́гое къ человѣ́кѡмъ снизше́ствїе;
По́лный и҆стощи́сѧ, неви́димый сѐ вопло́щсѧ ꙗ҆ви́сѧ: і҆ѻрда́не, рѣко̀, возвесели́сѧ, стрꙋи̑ твоѧ̑ и҆спо́лни, ꙗ҆́кѡ да ѡ҆мы́еши всѣ́хъ возрожде́нїе.
И҆́нъ. І҆рмо́съ:
Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Въ ве́сь мі́ръ кропитѐ во́дꙋ жи́зни спаси́тельнꙋю, ѻ҆́блацы ѡ҆дꙋшевле́ннїи ꙗ҆́вльшесѧ, а҆пⷭ҇толи, и҆ вѣ́рныхъ сердца̀ ѡ҆роси́сте.
Глагѡ́лъ бжⷭ҇твенныхъ си́ла ва́ша ри́торѡвъ побѣдѝ мно́гꙋю лю́тость, и҆ немꙋ̑дрыѧ ᲂу҆мꙋдрѝ, ѡ҆б̾юродѣ́вшыѧ ра́зꙋмомъ пре́лести, всемꙋ́дрїи.
Бжⷭ҇твенный пꙋ́дъ и҆ трофі́мъ, фїлимѡ́нъ сла́вный, и҆ а҆рїста́рхъ, ѻ҆нисі́форъ же и҆ тѷхі́къ всеизрѧ́днѣйшїй, ꙗ҆́кѡ ᲂу҆ченицы̀ сло́ва да возвели́чатсѧ.
Бг҃оро́диченъ:
Пою́ тѧ, є҆ди́на всепѣ́таѧ, сла́влю тѧ̀ при́снѡ, бг҃осла́внаѧ, и҆ блажꙋ́ тѧ, ю҆́же ро́ди бл҃жа́тъ родѡ́въ, дв҃о бг҃облаже́ннаѧ.
И҆́нъ. І҆рмо́съ:
Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.
Въ ра́бїй зра́къ ѡ҆дѣ́ѧвсѧ, грѧде́тъ къ рабꙋ̀ хрⷭ҇то́съ, просѧ̀ креще́нїѧ, порабощє́нныѧ страстьмѝ свобо́дны показꙋ́ѧ бл҃года́тїю.
Лꙋка́вствїѧ покори́лъ є҆сѝ дꙋ́хи, дх҃а ст҃а́гѡ ꙗ҆ви́всѧ сосꙋ́дъ, си́лꙋ тебѣ̀ вдохнꙋ́вшагѡ, бг҃оно́се всеблаже́нне ѳеокті́сте.
Слове́сною па́лицею твое́ю, преподо́бне, на па́жити по́стничества, ѻ҆́ч҃е, воспита́лъ є҆сѝ слове́снꙋю твою̀ па́ствꙋ, и҆ ко ѡ҆гра́дѣ нбⷭ҇нѣй напра́вилъ є҆сѝ.
Бг҃оро́диченъ:
Нб҃о простры́й манове́нїемъ, и҆но́е на землѝ нб҃о тѧ̀ показа̀, бг҃ороди́тельнице непоро́чнаѧ, и҆з̾ тебє̀ сꙋ́щымъ во тмѣ̀ ꙗ҆ви́сѧ.
Конда́къ а҆пⷭ҇толѡвъ, гла́съ в҃. Подо́бенъ: Вы́шнихъ и҆щѧ̀:
Хрⷭ҇то́выхъ ᲂу҆ч҃нкѡ́въ ли́къ се́дмьдесѧтъ бжⷭ҇твеннѡ, вѣ́рнїи, въ пѣ́снехъ восхва́лимъ: тѣ́ми бо всѝ навыко́хомъ трⷪ҇цꙋ почита́ти нераздѣ́льнꙋю, и҆ пребыва́ютъ свѣти́льницы бжⷭ҇твенныѧ вѣ́ры.
І҆́косъ:
Се́дмьдесѧти а҆пⷭ҇лѡвъ ли́къ согла́снѡ, вѣ́рнїи, сщ҃е́нными пѣснопѣ́ньми да восхва́лимъ: стефа́на, про́хѡра же и҆ сі́лꙋ, и҆ нїкано́ра: ті́мѡна, и҆ а҆мплі́а, и҆ парме́на: а҆пе́ллїа же, і҆а́кѡва, фїлі́ппа, а҆рїста́рха, и҆ ма́рка, и҆ матѳі́а, и҆ и҆рѡдїѡ́на. Криске́нта и҆ фле́гонта, варна́вꙋ, лі́на и҆ ѻ҆лі́мпа, а҆на́нїю, лꙋкꙋ̀ и҆ а҆сѷгкрі́та, и҆ про́чыѧ: пребыва́ютъ бо свѣти́льницы бжⷭ҇твенныѧ вѣ́ры.
Пѣ́снь з҃. І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆ц҃ъ на́шихъ.
Ка́кѡ тѧ̀ стрꙋи̑ под̾и́мꙋтъ рѣ̑чныѧ, сла́дости сꙋ́ща пото́ка, хрⷭ҇тѐ; ка́кѡ прⷣте́ча простре́тъ рꙋ́кꙋ на тѧ̀, рꙋко́ю созда́вшаго є҆го̀, и҆ ѿ рꙋкѝ льсти́вагѡ и҆зба́вльшаго ны̀;
Стрꙋѧ̀, гдⷭ҇и, сы́й бл҃гости, ко стрꙋѧ́мъ і҆ѻрда̑нскимъ ка́кѡ прихо́диши, нетлѣ́нїѧ вода́ми и҆щѧ̀ напои́ти, вкꙋше́нїемъ лꙋка́вымъ низложє́нныѧ во тлю̀ за́вистїю ѕмі́ѧ;
Да ка́плютъ го́ры ра́дованїе, и҆ хо́лми да взыгра́ютъ, веселѧ́щесѧ, рѣ́ки да воспле́щꙋтъ рꙋко́ю: ꙗ҆ви́сѧ, грѧде́тъ хрⷭ҇то́съ въ рѣцѣ̀ человѣ́чєскаѧ погрꙋзи́ти прегрѣшє́нїѧ.
И҆́нъ. І҆рмо́съ:
Не послꙋжи́ша тва́ри бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ.
Оу҆лови́вше сло́вомъ, и҆звлеко́сте и҆з̾ глꙋбины̀ безбо́жїѧ ꙗ҆зы́ки многоразсѣ̑ѧнныѧ, зна́меньми и҆ чꙋдесы̀ ᲂу҆тверди́вше мꙋдрова̑нїѧ си́хъ, мꙋ́дрїи а҆пⷭ҇ли, пꙋтевождѝ заблꙋ́ждшихъ.
Вше́дше въ приста́нище тиша́йшее, волнꙋ́ющымсѧ въ мо́ри лю́тыхъ спаси́телїе ꙗ҆ви́стесѧ и҆ прави́телїе мꙋ́дрїи, воспѣва́юще: ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ.
Всѝ є҆ѵо́да и҆ ка́рпа ᲂу҆блажи́мъ, и҆ тѷхі́ка и҆ ки́фꙋ, і҆ꙋ́ста и҆ а҆рте́мꙋ, зи́нꙋ же сла́внаго, ꙗ҆́кѡ хрⷭ҇то́вы ᲂу҆ченикѝ, воспѣва́юще: ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ.
Молнїезра́чнїи дх҃омъ бы́вше хрⷭ҇то́вы а҆пⷭ҇толи ѡ҆держи̑мыѧ но́щїю невѣ́дѣнїѧ и҆зба́висте, и҆ къ свѣ́тꙋ жи́зни наста́висте вопїю́щыѧ всегда̀: бж҃е, бл҃гослове́нъ є҆сѝ.
Бг҃оро́диченъ:
Ѡ҆чисти́лище, всенепоро́чнаѧ, была̀ є҆сѝ грѣша́щихъ при́снѡ, ро́ждши преесте́ственнѡ мі́ра взе́млющаго грѣ́хъ, хрⷭ҇та̀, є҆мꙋ́же зове́мъ: ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ.
И҆́нъ. І҆рмо́съ:
Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.
Пꙋсты́нѧ дне́сь і҆ѻрда́нова да процвѣте́тъ: грѧде́тъ бо всѣ́хъ и҆збавле́нїе, ѻ҆гне́мъ бжⷭ҇тва̀, погрꙋзи́ти на́съ водо́ю и҆ дх҃омъ, лю́тѣ сокрꙋше́нныхъ грѣхопаде́ньми.
Сле́зъ пролїѧ́ньми погаси́лъ є҆сѝ страсте́й разжжє́нїѧ, ѳеокті́сте блаже́нне, чꙋде́съ и҆сточи́лъ є҆сѝ стрꙋи̑ присноживѡ́тныѧ, и҆́миже ѿмыва́ютсѧ дꙋ́шъ же и҆ тѣле́съ недꙋ́ги, пресла́вне.
Дв҃довѣ кро́тости, ѻ҆́ч҃е, поревнова́лъ є҆сѝ, стѧжа́въ непоро́чно і҆́ѡвлево безстра́стїе, і҆а́кѡвлю простотꙋ̀, и҆ вѣ́рꙋ а҆враа́мовꙋ, петро́вꙋ теплотꙋ̀. съ ни́миже всели́всѧ, на́съ помина́й.
Бг҃оро́диченъ:
Жи́знь ѵ҆поста́снꙋю на́мъ ро́ждши, сме́ртїю сме́рть, дв҃о, ᲂу҆праздни́вшꙋю, лю́тыми ѡ҆бꙋрева́ньми ᲂу҆мерщвле́на мѧ̀ ѡ҆живѝ мольба́ми твои́ми, чи́стаѧ, благослове́ннаѧ и҆ препросла́вленнаѧ.
Пѣ́снь и҃. І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Рѣ̑чныѧ стрꙋи̑ ми́лѡтїю разсѣка́ше є҆лїссе́й, благода́ть креще́нїѧ предсѣннопиша̀: ю҆́же хрⷭ҇то́съ содѣ́лаетъ, на сїѧ̑ восходѧ̀, є҆ди́нъ бл҃годѣ́тель.
Назна́меноваше и҆ногда̀ прⷪ҇ро́къ сла́вный кр҃ще́нїѧ бл҃года́ть, со́лїю во́ды безплѡ́дныѧ пе́рвѣе содѣ́лавъ многоплѡ́дны ꙗ҆́вльшагѡсѧ бг҃а на́шегѡ си́лою.
Де́брь всѧ́ка бж҃е́ственныхъ дарѡ́въ и҆спо́лнитсѧ, и҆ хо́лмъ проти́вный смири́тсѧ, и҆ стро́пѡтнаѧ въ пра̑ваѧ ѡ҆братѧ́тсѧ воплоще́ннагѡ бг҃а ꙗ҆вле́нїемъ.
И҆́нъ. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Ѡ҆бно́вльше ра́зꙋмы ѡ҆лѧденѣ́вшыѧ, ра́ломъ сло́ва, всесла́внїи, и҆ въ ни́хъ спаси́тєльнаѧ сѣ́мена насѣ́ѧсте, и҆ благоче́стїѧ кла́съ стори́чный пожа́сте, спа́сшихсѧ мно́жество, гдⷭ҇ни а҆пⷭ҇толи всемꙋ́дрїи.
Похвала́ми і҆а́кѡва бжⷭ҇твенными, клеѡ́пꙋ, варна́вꙋ же и҆ стефа́на, наркі́сса всемꙋ́драго, ма́рка, а҆рїстовꙋ́ла, и҆ а҆пе́ллїа почти́мъ а҆пⷭ҇толы хрⷭ҇то́вы, вопїю́ще: гдⷭ҇а по́йте дѣла̀, и҆ превозноси́те во всѧ̑ вѣ́ки.
Крⷭ҇тъ вмѣ́стѡ бронѧ̀ носѧ́ще, ко всѣ̑мъ мꙋ́жески ѡ҆полчи́стесѧ полкѡ́мъ ѕмі́ѧ, всемꙋ́дрїи а҆пⷭ҇ли и҆ ты́ѧ погꙋби́вше: ꙗ҆̀же плѣнѝ человѣ́ки, ᲂу҆лови́сте вѣ́рою, и҆ жизнода́вцꙋ приведо́сте влⷣцѣ.
Бг҃оро́диченъ:
Ѽ чꙋ́до вы́шше чꙋде́съ! ка́кѡ ражда́еши, и҆ пребыва́еши дѣ́вствꙋющи, всечⷭ҇таѧ бг҃оневѣ́сто; сло́во бо родила̀ є҆сѝ ѻ҆ц҃ꙋ̀ собезнача́льное. Є҆мꙋ́же всѝ пое́мъ: гдⷭ҇а по́йте дѣла̀, и҆ превозноси́те во всѧ̑ вѣ́ки.
И҆́нъ. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Просвѣще́нїе и҆ ѡ҆чище́нїе дꙋ́шъ ꙗ҆ви́лсѧ є҆сѝ на і҆ѻрда́нѣ, и҆сто́чникъ, сп҃се, мꙋ́дрости: воды̀ жи́вы пи́щный пото́къ подава́ѧ на́мъ, вода́ми погрꙋжа́еши на́шѧ грѣхѝ.
Въ неѕло́бїи жи́знь препроводи́въ вои́стиннꙋ, бг҃омꙋ́дре ѻ҆́ч҃е, вра́жїю ѕло́бꙋ соверше́ннѣйшимъ ᲂу҆мо́мъ низложи́лъ є҆сѝ, по́йте, вопїѧ̀, дѣла̀ всѧ̑, гдⷭ҇а, и҆ превозноси́те є҆го̀ во вѣ́ки.
Ны́нѣ сѣки́ра дꙋша́мъ прети́тъ посѣче́нїе, дꙋшѐ моѧ̀, потщи́сѧ, и҆ страсте́й тє́рнїѧ ѿсѣ́кши, плоды̀ зрѣ́лы гдⷭ҇ꙋ принесѝ, бг҃оно́снагѡ моли́твами спаса́ющисѧ.
Бг҃оро́диченъ:
Ѿ всѣ́хъ тѧ̀ родѡ́въ и҆збра̀ хрⷭ҇то́съ въ жили́ще себѣ̀, бцⷣе, ѡ҆бновлѧ́ѧ ны̀, и҆стлѣ́вшыѧ соедине́нїемъ лꙋ́чшимъ: тѣ́мъ тѧ̀ пое́мъ во всѧ̑ вѣ́ки.
Пѣ́снь ѳ҃. І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ небе́сными вѡ́и тѧ̀ ᲂу҆блажа́емъ.
Рꙋка́ми созда́вый, хрⷭ҇тѐ, человѣ́ка, подъ рꙋкꙋ̀ прⷣте́чевꙋ подклонѧ́ешисѧ, ꙗ҆́кѡ человѣ́къ, смирѧ́ѧсѧ, ꙗ҆́кѡ да возвы́сиши мѧ̀, дре́вле смири́вшасѧ и҆ поги́бша. Сла́ва сла́вномꙋ и҆ стра́шномꙋ строе́нїю твоемꙋ̀.
Дꙋ́шъ ѡ҆чище́нїе гото́витсѧ, просвѣще́нїе, рѣше́нїе лю́тыхъ прїи́де: і҆ѻрда́не, рѣко̀, возвесели́сѧ, возликꙋ́й, всѧ̀ тва́рь: землѧ́ же и҆ мо́ре, восплещѝ, сла́вѧщи хрⷭ҇та̀ пребл҃га́го.
Ꙗ҆́кѡ сы́й всѣ́хъ до́брыхъ и҆сполне́нїе, грѧде́ши, вопїѧ̀ и҆спо́лненномꙋ ст҃ы́ни рабꙋ̀ твоемꙋ̀, ᲂу҆ди́вльшꙋсѧ твоемꙋ̀ снизхожде́нїю: прибли́жисѧ, крести́ мѧ, хощꙋ́ бо и҆спо́лнити є҆стество̀ земны́хъ ѡ҆сщ҃е́нїѧ и҆ ѡ҆чище́нїѧ.
И҆́нъ. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чи́стаѧ приснодв҃о.
И҆сцѣлѝ на̑ша, хрⷭ҇тѐ, сокрꙋшє́нїѧ сердє́чнаѧ, моли́твами возлюби́вшихъ тѧ̀, и҆ проповѣ́давшихъ во всѣ́хъ ꙗ҆зы́цѣхъ бг҃а кꙋ́пнѡ и҆ гдⷭ҇а, содѣ́телѧ всѣ́хъ, и҆ і҆́дѡльское всѐ ѡ҆мраче́нїе ѿгна́вшихъ свѣ́томъ проповѣ́данїѧ.
Ꙗ҆́коже мо́лнїѧ мі́ръ ѡ҆свѣти́ша, лꙋка̀ вкꙋ́пѣ и҆ є҆́рмъ, ма́ркъ и҆ а҆на́нїа, и҆ съ матѳі́емъ свѧще́нный ѻ҆лѵ́мпъ, и҆ вѣ́рныхъ и҆сполне́нїе ꙗ҆́вѣ просвѣти́ша, ꙗ҆̀же вѣ́рою дне́сь почти́мъ сщ҃е́нными и҆ честны́ми пѣснопѣ́ньми.
Ста́немъ бл҃гоговѣ́йнѡ въ домꙋ̀ бг҃а на́шегѡ, и҆ ᲂу҆блажи́мъ сщ҃еннопроповѣ́дники и҆ ᲂу҆чи́тели, и҆ а҆гг҃ломꙋ̑дрыѧ, и҆ богати́тели, спаси́тели же и҆ защи́тники, и҆ предста́тели всѣ́хъ сꙋ́щыѧ, чтꙋ́щихъ и҆́хъ па̑мѧти.
Ѡ҆зари́шасѧ свѣ́томъ невеще́ственнымъ дх҃а а҆кѵ́ла, а҆ха́їкъ, лꙋкі́й сла́вный и҆ фꙋртꙋна́тъ, съ шестїю́десѧть и҆ шестїю̀ хрⷭ҇то́выми ᲂу҆гѡ́дники и҆ сщ҃е́нными ᲂу҆ченикѝ: и҆ сердца̀ всѣ́хъ ѡ҆зарѧ́ютъ свѣтоно́сною и҆́хъ па́мѧтїю дне́сь.
Бг҃оро́диченъ:
Сїѧ́нїе блиста́нїѧ ржⷭ҇тва̀ твоегѡ̀ просїѧ̀, и҆ ᲂу҆ѧснѝ всю̀ подсо́лнечнꙋю, и҆ предста́телѧ тмы̀ погꙋбѝ, бг҃ороди́тельнице всечⷭ҇таѧ, а҆́гг҃лѡвъ хвало̀, и҆ человѣ́кѡвъ всѣ́хъ спасе́нїе, непреста́нными гла́сы восхвалѧ́ющихъ тѧ̀.
И҆́нъ. І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ.
Бж҃їе зда́нїе бы́лъ є҆сѝ, ѳеокті́сте, чи́стое, не ѡ҆скверни́въ дш҃ѝ твоеѧ̀ добро́ты, преподо́бне, грѣхѡ́въ ка́ломъ, по тебѐ самаго̀ всего̀ ᲂу҆краси́лъ є҆сѝ до́брыми пода̑нїи: сегѡ̀ ра́ди тѧ̀ почита́емъ.
Добродѣ́тельми ᲂу҆кра́шенъ, любо́вїю просвѣща́емь, до́брыхъ ви́ды ѡ҆блиста́емь, къ твои̑мъ преста́вилсѧ є҆сѝ ѻ҆ц҃є́мъ, ѻ҆́ч҃е мꙋ́дре, въ ста́рости масти́тѣй, ꙗ҆́коже пшени́ца зрѣла̀ въ сокро́вищахъ бжⷭ҇твенныхъ блюдо́мь.
Па́ства твоѧ̀ дне́сь ликꙋ́етъ, пра́зднꙋющи свѣтоно́снꙋю па́мѧть твоегѡ̀ ᲂу҆спе́нїѧ, ю҆́же бл҃гословѧ̀ съ нб҃сѐ и҆ по преставле́нїи не преста́й, требл҃же́нне, бг҃ꙋ предстоѧ̀ со а҆́гг҃лы, всебл҃же́нне.
Бг҃оро́диченъ:
Жи́знь ро́ждшаѧ земны̑мъ на и҆збавле́нїе, ᲂу҆ме́ршꙋю, дв҃о, прегрѣше́ньми ѡ҆живѝ, чи́стаѧ, дꙋ́шꙋ мою̀, ꙗ҆́кѡ сострада́тельна, ꙗ҆́кѡ є҆ди́на предста́тельница прибѣга́ющихъ въ тво́й кро́въ, всенепоро́чнаѧ.
Свѣти́ленъ а҆пⷭ҇толѡвъ. Подо́бенъ: Жєны̀ ᲂу҆слы́шите:
А҆пⷭ҇ли всехва́льнїи хрⷭ҇та̀ всеще́драгѡ, и҆ ᲂу҆чн҃цы̀, и҆ бг҃ови́дцы, не премолчи́те, молѧ́ще ѡ҆ на́съ, любо́вїю ва́шꙋ па́мѧть соверша́ющихъ, да прегрѣше́нїй ѡ҆ставле́нїе и҆ бж҃е́ственнꙋю ѡ҆брѧ́щемъ бл҃года́ть въ де́нь сꙋда̀.
Сла́ва, и҆ ны́нѣ, предпра́зднства. Подо́бенъ: Посѣти́лъ ны̀:
Гото́висѧ, завꙋлѡ́не, нефѳали́ме, ᲂу҆краси́сѧ, под̾имѝ, і҆ѻрда́не, зижди́телѧ всѣ́хъ и҆ бг҃а, пло́тїю къ тебѣ̀ грѧдꙋ́ща, на́шѧ грѣхѝ и҆змы́ти хотѧ́щаго.
На хвали́техъ стїхи̑ры, на д҃, гла́съ ѕ҃. Подо́бенъ: А҆́гг҃льскїѧ:
Є҆гѡ́же гла́съ вопїю́щагѡ пред̾ѧвлѧ́ше, прїи́де хрⷭ҇то́съ на стрꙋи̑ і҆ѻрда̑нскїѧ, и҆ прⷣте́чи речѐ: грѧдѝ, ѡ҆мы́й мѧ̀ вода́ми, крести́ мѧ ны́нѣ снизше́дшаго: а҆да́ма бо ѡ҆мы́ти прїидо́хъ ѿ пе́рвагѡ паде́нїѧ. Бл҃гослове́нъ, ꙗ҆вле́йсѧ бж҃е на́шъ, сла́ва тебѣ̀.
Высоты̀ нбⷭ҇ныѧ ника́коже и҆зслѣ́дихъ, ѕвѣ́здъ число̀, нижѐ зе́млю и҆змѣ́рихъ, и҆ ка́кѡ верхꙋ̀ твоемꙋ̀, влⷣцѣ прⷣте́ча речѐ, коснꙋ́сѧ рꙋко́ю; ка́кѡ же крещꙋ̀ носѧ́щаго го́рстїю тва́рь; тѣ́мже зовꙋ̀ тѝ: бл҃гослове́нъ, ꙗ҆вле́йсѧ бж҃е на́шъ, сла́ва тебѣ̀.
Сопрⷭ҇то́ленъ ѻ҆ц҃ꙋ̀ и҆ дх҃ꙋ сы́й, а҆́гг҃льскими вѡ́инствы дорѷношꙋ́сѧ: но въ ма́лѣмъ верте́пѣ стра́нствꙋѧ, роди́хсѧ въ виѳлее́мѣ за бл҃гоꙋтро́бїе. Тѣ́мже и҆ ны́нѣ десни́цꙋ твою̀ мнѣ̀ взаи́мствꙋй, да ѿмы́ю во мнѣ̀ мі́ра прегрѣшє́нїѧ.
Потопи́лъ є҆сѝ и҆ногда̀ грѣ́хъ при нѡ́и, сло́вомъ разве́рзый хлѧ́би нбⷭ҇ныѧ: и҆ ка́кѡ тѧ̀ і҆ѻрда́нъ ви́дѣвъ стерпи́тъ; ᲂу҆же́ бо стрꙋю̀ ѿврати́тъ. Позна́ тѧ тва́рь всѧ̀, и҆ а҆́зъ зовꙋ̀ тебѣ̀: бл҃гослове́нъ, ꙗ҆вле́йсѧ бж҃е на́шъ, сла́ва тебѣ̀.
Сла́ва, гла́съ и҆ подо́бенъ то́йже:
Да и҆спо́лнитсѧ ѻ҆́ч҃ее бл҃говоле́нїе, прїидо́хъ на зе́млю, ѡ҆дѣ́ѧвсѧ въ нищетꙋ̀: нб҃о мнѣ̀ престо́лъ, землѧ́ же подно́жїе: тебѣ́ же вы́ю преклонѧ́ю, на сїе́ бо прїидо́хъ, менѐ крестѝ, во мнѣ̀ человѣ́кѡвъ ѡ҆чища́юща прегрѣшє́нїѧ.
И҆ ны́нѣ, гла́съ и҆ подо́бенъ то́йже:
Ты̀ і҆и҃лѧ столпо́мъ и҆ ѻ҆́блакомъ пе́рвѣе свѣтоводѧ̀, и҆ ѡ҆роша́ѧ въ пꙋсты́ни: ты̀ влады́чествꙋѧй всѣ́ми, є҆стество́мъ несказа́нный въ ра́бїй зра́къ ка́кѡ ѡ҆дѣ́ѧлсѧ є҆сѝ; не прикоснꙋ́сѧ тебѣ̀ ѻ҆гню̀ сѣ́но: са́мъ мѧ̀ крестѝ, а҆́зъ бо тре́бꙋю ѿ тебє̀ ѡ҆чище́нїе прїѧ́ти.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Ꙗ҆ви́сѧ ꙳ ѻ҆ч҃еское ѡ҆заре́нїе сла́вы ꙳ на і҆ѻрда́нскихъ стрꙋѧ́хъ, ꙳ креще́нїемъ ѡ҆чища́ѧ ꙳ скве́рнꙋ дꙋ́шъ на́шихъ.
Сті́хъ: Сегѡ̀ ра́ди помѧнꙋ́хъ тѧ̀ ѿ землѝ і҆ѻрда́нски и҆ є҆рмѡнїи́мски.
Прїимѝ раболѣ́пнѡ, ꙳ прⷪ҇ро́че і҆ѡа́нне, ꙳ и҆зба́вителѧ мі́ра, ꙳ и҆ крестѝ зижди́телѧ, ꙳ земны́хъ на возрожде́нїе.
Сті́хъ: Ви́дѣша тѧ̀ во́ды, бж҃е, ви́дѣша тѧ̀ во́ды, и҆ ᲂу҆боѧ́шасѧ.
Прїи́де просвѣще́нїе, ꙳ и҆збавле́нїе ꙗ҆ви́сѧ: ꙳ на і҆ѻрда́нъ прїиди́те, ꙳ сни́демсѧ ѡ҆чи́ститисѧ, ꙳ и҆ пѣ́ти предпра́зднствєннаѧ.
Сла́ва, и҆ ны́нѣ, гла́съ и҆ подо́бенъ то́йже:
Дне́сь хрⷭ҇то́съ ꙳ спаси́тельное человѣ́кѡмъ ꙳ рѣше́нїе да́рꙋетъ, ꙳ дꙋ́шъ ѡ҆чища́ѧ скве́рнꙋ ꙳ ѻ҆гне́мъ креще́нїѧ.
На лїтꙋргі́и, бл҃жє́нна ѿ канѡ́на предпра́зднства пѣ́снь г҃-ѧ, и҆ а҆пⷭ҇лѡвъ пѣ́снь ѕ҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. Сті́хъ: Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. А҆пⷭ҇лъ къ ри́млѧнѡмъ, зача́ло ч҃ѕ. А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе ѿ лꙋкѝ, зача́ло н҃. Прича́стенъ: Во всю̀ зе́млю: