Мѣ́сѧца тогѡ́же въ к҃г-й де́нь. Прпⷣбныѧ ма́тере на́шеѧ є҆ѵфросѵ́нїи по́лотскїѧ.

На вели́цѣй вече́рни.

На Гдⷭ҇и воззва́хъ: стїхи̑ры, гла́съ ѕ҃:

А҆́гг҃лѡмъ чтⷭ҇нꙋ́ю и҆ вселюбе́знꙋю чⷭ҇тотꙋ̀ возлюби́вши, прпⷣбнаѧ ма́ти є҆ѵфросѵ́нїе, хрⷭ҇тꙋ̀ ѿ ю҆́ности своеѧ̀ себѐ ᲂу҆невѣ́стила є҆сѝ. є҆мꙋ́же ны́нѣ со а҆́гг҃лы предстоѧ́щи, молѝ ѡ҆ чтꙋ́щихъ бл҃гоче́стнѡ па́мѧть твою̀.

А҆́гг҃льскомꙋ житїю̀ подража́ющи, посто́мъ и҆ мл҃твами хрⷭ҇тꙋ̀, ꙗ҆́кѡ безпло́тна, послꙋжи́ла є҆сѝ. ны́нѣ со а҆́гг҃льскими чи́нми водворѧ́ющисѧ въ черто́зѣ безсме́ртнагѡ жениха̀ твоегѡ̀, молѝ, є҆го́же возлюби́ла є҆сѝ, ѡ҆ чтꙋ́щихъ ра́достнѡ всечⷭ҇тнꙋ́ю па́мѧть твою̀.

А҆гг҃лоподо́бное житїѐ воспрїе́мши, сла́вꙋ вре́меннꙋю, и҆ бога́тство, и҆ до́мъ ѻ҆́тчїй, и҆ ѡ҆брꙋ́чника земна́го ѡ҆ста́вила є҆сѝ и҆ си́хъ ра́ди воздаѧ́нїе вѣ́чное на нб҃сѝ воспрїѧ́ла є҆сѝ, и҆дѣ́же со а҆́гг҃лы ра́дꙋющисѧ, молѝ ѡ҆ чтꙋ́щихъ любо́вїю па́мѧть твою̀.

И҆́ны стїхи̑ры, гла́съ то́йже.

Подо́бенъ: Тридне́венъ:

И҆з̾ ко́рене бл҃горо́дна бл҃горо́дствомъ и҆ мно́гими добро́тами пло́дъ процвѣла̀ є҆сѝ, возра́стши лоза̀ по все́й землѝ рꙋ́сской и҆ въ по́лотстѣ гра́дѣ, ѡ҆сѣнѧ́ющи и҆ вїно́мъ весе́лїѧ напоѧ́ющи, є҆ѵфросѵ́нїе, при́снѡ молѧ́щихъ ти сѧ.

Ꙗ҆́кѡ вїногра́дъ рꙋ́сскїѧ землѝ, по́лотскꙋ гра́дꙋ насади́въ бг҃ъ пре́жде, тебѐ ны́нѣ же принесѐ и҆ преложи́въ въ зе́млю ѻ҆бѣтова́ннꙋю, прпⷣбнаѧ є҆ѵфросѵ́нїе, мона́хѡвъ ᲂу҆добре́нїе.

Оу҆мертви́вши тѣ́ло, дꙋше́ю ѡ҆жила̀ є҆сѝ, и҆з̾ землѝ ѻ҆те́ческїѧ, по́лотска гра́да, воздви́гшисѧ, въ сїѡ́нъ прїи́де, и҆ всѐ своѐ бога́тство раздала̀ є҆сѝ та́мѡ, и҆ прїе́млеши нбⷭ҇наѧ.

Даві́да и҆ рѡма́на въ мч҃ницѣхъ и҆ въ прпⷣбныхъ бл҃же́ннаго ѳеодо́сїа, є҆ѵфросѵ́нїе, вѣнча́нныхъ ви́дѣвши, себѐ ꙗ҆́кѡ же́ртвꙋ да́вши бг҃ови, ѿ кнѧзе́й рꙋ́сскихъ по́лотскїѧ землѝ потща́ласѧ є҆сѝ бра́тїи є҆диномы́слити, бл҃же́ннаѧ, и҆ кнѧги́нинскагѡ ли́ка нача́токъ самоѻбѣща́нъ прино́ситсѧ бг҃ови, да съ тѣ́ми воспрїѧ́ти ѡѻ҆бѣ̑щаннаѧ бл҃га̑ѧ, є҆гѡ́же ра́ди трꙋди́вшисѧ.

Сла́ва, гла́съ то́йже:

Мона́шескагѡ чи́на ᲂу҆добре́нїе и҆ чернори́зицъ похвалꙋ̀ ра́достнѡ воспои́мъ дне́сь, цр҃ѧ̀ хрⷭ҇та̀ бг҃а на́шего восхвалѧ́юще: се́й бо, ꙗ҆́кѡ ѡ҆ст҃и́тель ст҃ы́хъ и҆ похвала̀ прпⷣбныхъ, просла́ви нетлѣ́нїемъ мо́щи прпⷣбныѧ є҆ѵфросѵ́нїи, и҆̀мже бл҃говѣ́рнїи лю́дїе бл҃гоговѣ́йнѡ предстоѧ́ще и҆ съ любо́вїю лобыза́юще ѧ҆̀, и҆сцѣлє́нїѧ въ болѣ́знѣхъ прїе́млютъ и҆ въ ско́рбехъ ᲂу҆тѣше́нїе и҆ ра́достнѡ со ᲂу҆миле́нїемъ глаго́лютъ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечⷭ҇тна́ѧ.

И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:

Вхо́дъ. Прокі́менъ днѐ. И҆ чтє́нїѧ.

Премꙋ́дрости соломѡ́ни чте́нїе (глава̀ г҃):

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆̀хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо пред̾ лице́мъ чл҃вѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀ и҆ ѡ҆брѣ́те и҆̀хъ достѡ́йны себѣ̀. ꙗ҆́кѡ зла́то въ горни́лѣ, и҆скꙋсѝ и҆̀хъ и҆, ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ и҆, ꙗ҆́кѡ и҆́скры по сте́блїю, потекꙋ́тъ: сꙋ́дѧтъ ꙗ҆зы́кѡмъ и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь ᲂу҆разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀, ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀ и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́ни чте́нїе (главы̑ є҃ и҆ ѕ҃):

Првⷣницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ и҆ вѣне́цъ добро́ты ѿ рꙋкѝ гдⷭ҇ни, занѐ десни́цею покры́етъ ѧ҆̀ и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ и҆ воѻрꙋжи́тъ тва́рь въ ме́сть врагѡ́мъ. Ѡ҆блече́тсѧ въ брѡнѧ̀ пра́вды и҆ возложи́тъ шле́мъ сꙋ́дъ нелицемѣ́ренъ. Прїи́метъ щи́тъ непобѣди́мый прпⷣбїе, поѡстри́тъ же напра́сный гнѣ́въ во ѻ҆рꙋ́жїе, спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ̑лы мѡ́лнїины и҆, ꙗ҆́кѡ ѿ благокрꙋ́гла лꙋ́ка ѻ҆блакѡ́въ, на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды, вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ прⷭ҇то́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ: внꙋши́те держа́щїи мнѡ́жества и҆ гордѧ́щїисѧ ѡ҆ наро́дѣхъ ꙗ҆зы̑къ, ꙗ҆́кѡ дана̀ є҆́сть ѿ гдⷭ҇а держа́ва ва́мъ и҆ си́ла ѿ вы́шнѧгѡ.

Премꙋ́дрости соломѡ́ни чте́нїе (глава̀ д҃):

Првⷣникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо чтⷭ҇на̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость чл҃вѣ́кѡмъ и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть и҆ живы́й посредѣ̀ грѣ̑шникъ, преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀, сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же, ви́дѣвше и҆ не разꙋмѣ́вше, нижѐ поло́жше въ помышле́нїи таково́е, ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀ и҆ посѣще́нїе во и҆збра́нныхъ є҆гѡ̀.

На лїті́и стїхи̑ры, гла́съ з҃:

Прпⷣбнаѧ ма́ти є҆ѵфросѵ́нїе, житїѐ твоѐ на землѝ бг҃оꙋго́днѡ соверши́ла є҆сѝ, првⷣна и҆ во всѣ́хъ ѡ҆правда́нїихъ гдⷭ҇нихъ безпоро́чна. прїиди́те ᲂу҆̀бо, мона́шествꙋющихъ собо́ри, пѣ́сньми и҆ пѣ̑нїи дх҃о́вными свѣ́тлѡ ликовствꙋ́емъ дне́сь, си́це зовꙋ́ще: ра́дꙋйсѧ а҆пⷭ҇льскихъ и҆ ѻ҆те́ческихъ преда́нїй ревни́тельнице: ра́дꙋйсѧ по́лотскагѡ гра́да похвало̀: ра́дꙋйсѧ, є҆ѵфросѵ́нїе всечⷭ҇тна́ѧ, ты́ бо смире́нїемъ и҆ чⷭ҇тото́ю црⷭ҇твїе нбⷭ҇ное въ чи́нѣ а҆́гг҃льскомъ наслѣ́довала є҆сѝ. И҆ ны́нѣ гдⷭ҇ꙋ предстоѧ̀, молѝ є҆гѡ̀ дарова́ти на́мъ ве́лїю и҆ бога́тꙋю млⷭ҇ть.

По до́лгꙋ ᲂу҆бл҃жа́емъ тѧ̀, ꙗ҆́кѡ на́шꙋ похвалꙋ̀ и҆ а҆́гг҃ла во пло́ти, житїе́ бо твоѐ, є҆ѵфросѵ́нїе, чⷭ҇тно и҆ ᲂу҆спе́нїе со ст҃ы́ми: просїѧ́ла бо є҆сѝ дѣ́лы бл҃ги́ми и҆ мно́гихъ ко хрⷭ҇тꙋ̀ привела̀ є҆сѝ: и҆ крⷭ҇тъ чⷭ҇тнѣ́й твое́й ѻ҆би́тели завѣща́ла є҆сѝ: по да́рꙋ блгⷣти бж҃їѧ, ѻ҆бита́вшїѧ въ тебѣ̀, прⷪ҇ро́чески прови́дѧщи по разрꙋше́нїи є҆ѧ̀ па́ки чрез̾ крⷭ҇тъ воз̾ѡбновле́нїе, є҆́же ны́нѣ и҆ соверши́сѧ. Тѣ́мже мы̀, съ ра́достїю ᲂу҆бл҃жа́юще тѧ̀, припа́даемъ тѝ, со ᲂу҆миле́нїемъ молѧ́щесѧ: моли́сѧ за ны̀, ма́ти прпⷣбнаѧ, ко гдⷭ҇ꙋ, да пода́стъ дꙋша́мъ на́шымъ ве́лїю и҆ бога́тꙋю млⷭ҇ть.

И҆́ны стїхи̑ры, гла́съ д҃. Подо́бенъ: Ꙗ҆́кѡ до́блѧ:

И҆́же є҆́ѵꙋ прельсти́вшаго ѕмі́евымъ ѻ҆́бразомъ, свои́ма нога́ма сегѡ̀ попра́ла є҆сѝ: сла́сть бо преложи́ша же́нскꙋю дꙋше́ю мꙋ́жескою, соверше́ннѣ мꙋ́жества во́зраста и҆спо́лнѣна і҆и҃са хрⷭ҇та̀, и҆ до́блѣ ᲂу҆крѣ́пльшисѧ, є҆ѵфросѵ́нїе, врага̀ преѡби́дѣла є҆сѝ въ же́нстѣмъ тѣлесѝ.

Дрема́нїѧ ѻ҆чи́ма свои́ма, є҆ѵфросѵ́нїе, не дала̀ є҆сѝ, ни па́ки ᲂу҆̀бо поко́ѧ свои́ма бровмѧ̀, приснохва́льнаѧ, зако́нꙋ своегѡ̀ зижди́телѧ поꙋча́ющисѧ и҆ ѱало́мски подвиза́ющисѧ, дх҃омъ воспрїе́млющи сїѧ́нїе, неѿстꙋ́пнѡ трⷪ҇ческагѡ прича́стїѧ зрѧ́щи и҆ па́че ᲂу҆ма̀ чⷭ҇тоты̀.

Ѿ пеле́нъ возжелѣ́вши прекра́снагѡ ᲂу҆добре́нїѧ и҆ жениха̀ нетлѣ́нна дꙋше́внагѡ і҆и҃са, семꙋ̀ ᲂу҆ѧзви́ласѧ є҆сѝ любо́вїю, и҆ ра́дꙋющисѧ притекла̀ є҆сѝ въ срѣ́тенїе є҆гѡ̀, возжига́ющи дꙋше́вный свѣти́льникъ дв҃ственнагѡ є҆ле́а, и҆ возшла̀ є҆сѝ съ ни́мъ въ черто́гъ нбⷭ҇ный, пресла́внаѧ.

Сла́ва, гла́съ з҃:

Дне́сь свѣ́тлѡ красꙋ́етсѧ дре́внїй гра́дъ по́лотскъ бж҃е́ственнымъ сокро́вищемъ крⷭ҇та̀ гдⷭ҇нѧ, є҆го́же ᲂу҆се́рдїемъ твои́мъ ᲂу҆стро́ила є҆сѝ, прпⷣбнаѧ є҆ѵфросѵ́нїе, и҆ ѻ҆би́тель твоѧ̀ ра́дꙋетсѧ ѡ҆ возвраще́нїи є҆́й чⷭ҇тна́гѡ и҆ животворѧ́щагѡ крⷭ҇та̀, и҆́же чрез̾ мнѡ́гаѧ лѣ̑та сохране́нъ бы́сть про́мысломъ гдⷭ҇нимъ: є҆мꙋ́же покланѧ́ющесѧ съ вѣ́рою и҆ любе́знѡ є҆го̀ лобыза́юще, и҆сцѣлє́нїѧ дꙋшє́внаѧ и҆ тѣлє́снаѧ прїе́млемъ, хрⷭ҇та̀ непреста́ннѡ велича́юще.

И҆ ны́нѣ, бг҃оро́диченъ:

Бцⷣе дв҃о, ᲂу҆пова́нїе хрⷭ҇тїа́нѡмъ, покры́й и҆ соблюди́ ны твои́ми къ сн҃ꙋ твоемꙋ̀ и҆ бг҃ꙋ мл҃твами ѿ всѧ́кїѧ нꙋ́жды и҆ печа́ли.

На стїхо́внѣ стїхи́ры, гла́съ и҃:

Прпⷣбнаѧ ма́ти є҆ѵфросѵ́нїе, ты̀ хрⷭ҇тꙋ̀ гдⷭ҇ꙋ во смире́нїи и҆ кро́тости послꙋжи́ла є҆сѝ, и҆ мно́гихъ ко сп҃се́нїю наста́вила є҆сѝ, и҆ сегѡ̀ ра́ди ѿ гдⷭ҇а воздаѧ́нїе воспрїѧ́ла є҆сѝ, є҆го́же молѝ сп҃сти́сѧ дꙋша́мъ на́шымъ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Прпⷣбнаѧ ма́ти є҆ѵфросѵ́нїе, съ любо́вїю ᲂу҆бл҃жа́емъ тѧ̀, є҆ѵⷢ҇лїѧ и҆́стиннꙋю и҆сповѣ́дницꙋ, правосла́вїѧ ревни́тельницꙋ, воздержа́нїѧ ᲂу҆чи́тельницꙋ, а҆́гг҃лѡмъ собесѣ́дницꙋ, ни́щихъ и҆ сиро́тъ пита́тельницꙋ, ю҆́же вѣнча̀ хрⷭ҇то́съ вѣнце́мъ нбⷭ҇нымъ, є҆го́же молѝ сп҃сти́сѧ дꙋша́мъ на́шымъ.

Сті́хъ: Чтⷭ҇на̀ пред̾ гдⷭ҇емъ сме́рть прпⷣбныхъ є҆гѡ̀.

Прпⷣбнаѧ ма́ти є҆ѵфросѵ́нїе, ра́достнѡ соверша́юще па́мѧть твою̀, прославлѧ́емъ по́двиги твоѧ̑: во трꙋдѣ́хъ бо ѿ ю҆́ности хрⷭ҇тꙋ̀ послꙋжи́ла є҆сѝ, а҆́гг҃льскїѧ чи̑ны ᲂу҆диви́вши: на землѝ, ꙗ҆́кѡ безпло́тна, въ постѣ́хъ и҆ мл҃твахъ, и҆ всено́щныхъ стоѧ́нїихъ, и҆ въ бг҃омы́слїи пребыва́ла є҆сѝ. Тѣ́мже и҆ дх҃а ст҃а́го въ дꙋ́шꙋ твою̀ прїѧ́ла є҆сѝ.

Сла́ва, гла́съ то́йже:

Свѣ́тлѡ ᲂу҆краси́вши свѣти́льникъ тво́й є҆ле́емъ чⷭ҇тоты̀ и҆ млⷭ҇ти, въ нбⷭ҇ный черто́гъ съ мꙋ́дрыми дв҃ами ко хрⷭ҇тꙋ̀ возшла̀ є҆сѝ, къ женихꙋ̀ твоемꙋ̀ безсме́ртномꙋ. є҆мꙋ́же приле́жнѡ моли́сѧ ѡ҆ соверша́ющихъ любо́вїю па́мѧть твою̀.

И҆ ны́нѣ, бг҃оро́диченъ: Безневѣ́стнаѧ дв҃о:

Тропа́рь, гла́съ д҃:

Подража́ющи дванадесѧтолѣ́тна дванадесѧтолѣ́тнꙋ хрⷭ҇тꙋ̀, ᲂу҆чи́вшемꙋ во ст҃и́лищи бж҃їю сло́вꙋ, послѣ́довала є҆сѝ, є҆ѵфросѵ́нїе. сла́вꙋ вре́меннꙋю и҆ земна́го ѡ҆брꙋ́чника ѡ҆ста́вльши и҆ всѧ̑ мїрска̑ѧ презрѣ́вши, краснѣ́йшемꙋ па́че всѣ́хъ хрⷭ҇тꙋ̀ себѐ ᲂу҆невѣ́стила є҆сѝ, кре́стъ взе́мши, пꙋте́мъ а҆́гг҃льскагѡ житїѧ̀ ше́ствꙋющи и҆ мнѡ́гїѧ къ немꙋ̀ наставлѧ́ющи, во бл҃гоꙋха́нїи мѵ́ра въ нбⷭ҇ный черто́гъ востекла̀ є҆сѝ, и҆дѣ́же молѝ, є҆го́же возлюби́ла є҆сѝ, ѡ҆ чтꙋ́щихъ бл҃гоче́стнѡ па́мѧть твою̀.

И҆́нъ тропа́рь, гла́съ то́йже:

Бога́тство своѐ ни́щымъ расточи́вши и҆ сла́вꙋ кнѧ́жескꙋю нивочто́же вмѣни́вши, ѡ҆брꙋ́чника вре́меннаго, кра́снаѧ дѣ́во, возгнꙋша́ласѧ є҆сѝ и҆, ᲂу҆невѣ́стившисѧ женихꙋ̀ хрⷭ҇тꙋ̀, томꙋ̀, ꙗ҆́коже вѣ́но, чⷭ҇тотꙋ̀ дꙋше́внꙋю и҆ тѣле́снꙋю принесла̀ є҆сѝ, є҆ѵфросѵ́нїе. є҆мꙋ́же ны́нѣ въ весе́лїи предстоѧ̀, помина́й на́съ, чтꙋ́щихъ па́мѧть твою̀.

На ᲂу҆́трени.

На Бг҃ъ гдⷭ҇ь: тропа́рь, два́жды. Сла́ва, и҆ ны́нѣ: Є҆́же ѿ вѣ́ка ᲂу҆тае́ное:

По а҃-мъ стїхосло́вїи сѣда́ленъ, гла́съ а҃:

За́пѡвѣди гдⷭ҇ни возлюби́вши, ѿ ю҆́ности твоеѧ̀, прпⷣбнаѧ ма́ти, мнѡ́гимъ была̀ є҆сѝ наста́вница мона́шескагѡ житїѧ̀, мнѡ́гїѧ ко хрⷭ҇тꙋ̀ привела̀ є҆сѝ: тѣ́мже дне́сь пра́зднꙋюще всечⷭ҇тнꙋ́ю па́мѧть твою̀, прославлѧ́емъ бг҃а, прославлѧ́ющаго ст҃ы̑ѧ своѧ̑.

Сла́ва:

Внꙋши́вши даві́да брѧца́юща, приведꙋ́тсѧ цр҃е́ви дѣ̑вы по тебѣ̀, пречⷭ҇тна́ѧ є҆ѵфросѵ́нїа притечѐ, ꙗ҆́кѡ добра̀ и҆ бли̑жнѧѧ во слѣ́дъ тебѐ, возже́гши дв҃ственнꙋю свѣщꙋ̀.

И҆ ны́нѣ, бг҃оро́диченъ:

Оу҆ста́ми и҆ се́рдцемъ велича́емъ тѧ̀, мт҃рь бж҃їю: ты́ же, ро́ждшаѧ бг҃а, не ѿри́ни на́съ ѿ твоегѡ̀ застꙋпле́нїѧ.

По в҃-мъ стїхосло́вїи сѣда́ленъ, гла́съ а҃:

Дв҃ства чⷭ҇тото́ю ᲂу҆краси́вши твою̀ дꙋ́шꙋ, прпⷣбнаѧ є҆ѵфросѵ́нїе, со свѣти́льникомъ горѧ́щимъ возшла̀ є҆сѝ во дворы̀ гдⷭ҇а твоегѡ̀, є҆го́же молѝ непреста́ннѡ, да и҆ мы̀ сподо́бимсѧ причте́ни бы́ти къ ли́кꙋ и҆збра́нныхъ.

Сла́ва:

Пою́щꙋ даві́дꙋ, забꙋ́ди лю́ди твоѧ̑ въ домꙋ̀ ѻ҆ц҃а̀ твоегѡ̀, преклони́ла є҆сѝ ᲂу҆́хо твоѐ, ꙗ҆́кѡ дщѝ цр҃е́ва во дс҃ѣ, возлюби́ бо всекра́снаго и҆ всемогꙋ́щаго цр҃ѧ̀, хрⷭ҇та̀ бг҃а на́шего.

И҆ ны́нѣ, бг҃оро́диченъ:

Ско́раѧ въ бѣда́хъ застꙋ́пнице, гото́вое ѡ҆бꙋрева́емыхъ приста́нище, сохрани́ мѧ, мт҃и бж҃їѧ, ѿ потопле́нїѧ жите́йскагѡ и҆ не да́ждь мѝ сокрꙋши́тисѧ ѡ҆ ка́мень па́гꙋбы дꙋше́вныѧ.

По полѷеле́и сѣда́ленъ, гла́съ и҃:

Просїѧ́ла є҆сѝ а҆́гг҃льскимъ житїе́мъ твои́мъ, прпⷣбнаѧ є҆ѵфросѵ́нїе, ᲂу҆краша́ющисѧ красото́ю нра́ва, воздержа́нїемъ и҆ милосе́рдїемъ, поꙋча́ющи дх҃ѡ́вныѧ се́стры твоѧ̑ словесы̀ дꙋшеспаси́тельными, и҆ примѣ́ромъ сло́во ᲂу҆твержда́ющи, мно́гихъ ко сп҃се́нїю привела̀ є҆сѝ: тѣ́мже, приснопа́мѧтнаѧ є҆ѵфросѵ́нїе, предстоѧ́щи прⷭ҇то́лꙋ вседержи́телѧ, молѝ дарова́ти грѣхѡ́въ ѡ҆ставле́нїе чтꙋ́щымъ любо́вїю па́мѧть твою̀.

Сла́ва, и҆ ны́нѣ, бг҃оро́диченъ:

Прⷪ҇ро́цы тѧ̀ предвозвѣсти́ша, а҆пⷭ҇ли проповѣ́даша, мч҃ницы просла́виша, ст҃и́телїе ᲂу҆бл҃жи́ша, тѣ́мже и҆ мы̀ съ ни́ми бцⷣꙋ тѧ̀ и҆сповѣ́дꙋюще, бл҃гоче́стнѡ велича́емъ.

Степє́нна, а҃-й а҆нтїфѡ́нъ д҃ гла́са. Прокі́менъ, гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе ѿ матѳе́а, зача́ло р҃д.

По н҃-мъ ѱалмѣ̀ стїхи́ра, гла́съ з҃:

Бл҃га́ѧ и҆ вѣ́рнаѧ рабо̀ гдⷭ҇нѧ, и҆́го хрⷭ҇то́во бл҃го́е на себѐ воспрїе́мши, и҆ бре́мѧ є҆гѡ̀ ле́гкое на себѐ ᲂу҆се́рднѡ поне́сши, и҆ ны́нѣ въ нбⷭ҇нѣмъ црⷭ҇твїи водворѧ́ющисѧ, ѡ҆ на́съ помоли́сѧ, да сподо́бимсѧ ве́лїѧ и҆ бога́тыѧ млⷭ҇ти.

И҆́на стїхи́ра, гла́съ ѕ҃:

Прїиди́те, любомꙋ́дренїи, пѣ́снми бг҃окра́сными воспои́мъ достохва́льнꙋю и҆ смире́ннꙋю є҆ѵфросѵ́нїю всечⷭ҇тнꙋ́ю, и҆ и҆сто́чники сле́зъ ѡ҆мы́емсѧ, рыда́юще и҆ пла́чꙋще: не́гли гдⷭ҇ь и҆ бг҃ъ рыда́нїе и҆ пла́чъ воспрїи́метъ, и҆ а҆́ще тѣ́ло и҆ дꙋ́шꙋ є҆ѧ̀ прїѧ̀, поне́же є҆гѡ̀ смире́нїѧ сама̀ и҆зво́лила є҆сѝ, на́мъ мо́жетъ да́ти съ дꙋ́хомъ є҆ѧ̀ совокꙋпи́тисѧ, притека́ющымъ, ꙗ҆́кѡ достохва́льнꙋю и҆ доброкра́снꙋю мл҃твꙋ є҆ѧ̀ воспрїи́метъ, мно́гѡ бо мо́жетъ мл҃тва првⷣнагѡ поспѣшествꙋ́ема. молю́ же вы̀, бра́тїе, не лѣни́ви бꙋ́демъ, въ но́щь и҆ въ де́нь молѧ́щесѧ къ нбⷭ҇номꙋ и҆ земно́мꙋ творцꙋ̀, ꙗ҆́кѡ дх҃ъ ст҃ы́й по́слетъ въ стѧжа́нїе, и҆ мл҃твами бл҃же́нныѧ є҆ѵфросѵ́нїи на́съ и҆зба́витъ ѿ сѣ́ти вра́жїѧ и҆ сп҃се́тъ дꙋ́шы на́шѧ.

Канѡ́нъ, гла́съ ѕ҃.

Пѣ́снь а҃. І҆рмо́съ:

Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Ѿ ю҆́ности поꙋча́ющисѧ сщ҃є́ннымъ за́повѣдемъ гдⷭ҇нимъ и҆ жела́ющи є҆мꙋ̀ є҆ди́номꙋ послꙋжи́ти, презрѣ́ла є҆сѝ сла́вꙋ и҆ бога́тство мі́ра сегѡ̀.

Хрⷭ҇та̀ возлюби́вши, роди́телей и҆ сро́дникѡвъ твои́хъ и҆ ѡ҆брꙋ́чника земна́го ѡ҆ста́вила є҆сѝ, прпⷣбнаѧ, и҆ мона́шеское житїѐ воспрїѧ́ла є҆сѝ.

Ско́рби и҆спо́лнисѧ се́рдце ѻ҆тца̀ и҆ ма́тере твоеѧ̀, є҆гда̀ во и҆́ноческомъ ѻ҆́бразѣ ᲂу҆зрѣ́ша тѧ̀, возлю́бленнꙋю дще́рь свою̀, ты́ же словесы̀ бл҃ги́ми, вразꙋмлѧ́ющꙋ тѧ̀ ст҃о́мꙋ дх҃ꙋ, ᲂу҆тѣ́шила є҆сѝ и҆̀хъ.

Ꙗ҆́же въ ма́слѣ добродѣ́телей свѣщꙋ̀ ᲂу҆ма́сленнꙋ на срѣ́тенїе, ма́ти, жениха̀ твоегѡ̀ возжжѐ, просвѣтѝ ѻ҆́чи се́рдца моегѡ̀, но́щїю жите́йскою ѡ҆мрачє́ннаѧ, да досто́йнѡ тѧ̀ похвалю̀.

Оу҆́мъ ста́рый въ мла́дѣ лѣ́тъ, ма́ти, добы́вши, дерза́емо тѣ́ло дꙋшѣ̀ покори́ла є҆сѝ, ѿ ю҆́ности впрѧ́гши под̾ и҆́го хрⷭ҇то́во и҆ блгⷣтное бре́мѧ ле́гкое прїе́мши.

Бг҃оро́диченъ:

Ско́рбныхъ навєдѣ́нїѧ ѡ҆бꙋрева́ютъ смире́ннꙋю мою̀ дꙋ́шꙋ, и҆ напа́стей ѻ҆́блацы моѐ покрыва́ютъ се́рдце, бг҃оневѣ́стнаѧ, но свѣ́тъ ро́ждшаѧ бж҃е́ственный и҆ превѣ́чный, возсїѧ́й мѝ свѣ́тъ ра́достный.

Пѣ́снь г҃. І҆рмо́съ:

Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Въ безмо́лвїи со є҆ди́нымъ гдⷭ҇емъ мл҃твою жела́ющи соедини́тисѧ, при ст҃ѣ́й це́ркви ст҃ы́ѧ софі́и въ тѣ́снѣй ке́ллїи водвори́ласѧ є҆сѝ, прпⷣбнаѧ.

Ѿ трꙋда̀ рꙋ́къ твои́хъ, прпⷣбнаѧ, послꙋжи́ла є҆сѝ хрⷭ҇тꙋ̀, сп҃си́телю на́шемꙋ, бг҃оꙋго́днѡ ᲂу҆пражнѧ́ющесѧ въ преписа́нїи кни́гъ ст҃ы́хъ, и҆ цѣно́ю, взе́млемою за ни́хъ, ᲂу҆тѣша́ла є҆сѝ ни́щꙋю бра́тїю хрⷭ҇то́вꙋ.

Въ кро́тости и҆ смире́нїи, въ постѣ́хъ и҆ мл҃твахъ, въ трꙋдѣ́хъ, и҆ нощны́хъ бдѣ́нїихъ, и҆ мл҃твенныхъ колѣнопреклоне́нїихъ ᲂу҆се́рднѡ послꙋжи́ла є҆сѝ гдⷭ҇ꙋ твоемꙋ̀, всечⷭ҇тна́ѧ.

Сна̀ не дала̀ є҆сѝ ѻ҆чи́ма, ни вѣ́ждома дрема́нїѧ, є҆ѵфросѵ́нїе, до́ндеже ѡ҆брѣла̀ є҆сѝ во твое́мъ се́рдцѣ мѣ́сто досто́йнагѡ ѻ҆би́тельства.

Пꙋстынелю́бица го́рлица бы́вши, є҆ѵфросѵ́нїе, и҆ ᲂу҆единѧ́ющасѧ пти́ца на зда́нїи, гнездо̀ дх҃о́вное птенцє́мъ твои̑мъ создала̀ є҆сѝ и҆ пожила̀ є҆сѝ ѿ ю҆́ности житїе́мъ а҆́гг҃льскимъ, въ тѣлесѝ бꙋ́дꙋчи. (с. 563)

Бг҃оро́диченъ:

Оу҆диви́ла є҆сѝ вои́стиннꙋ ны́нѣ на мнѣ̀, влⷣчце, бл҃годѣѧ̑нїѧ твоѧ̑, бг҃оѻтрокови́це, и҆ млⷭ҇ти твоѧ̀, тѣ́мже сла́влю тѧ̀, и҆ воспѣва́ю, и҆ почита́ю мно́гое и҆ безмѣ́рное є҆́же ѡ҆ на́съ смотре́нїе твоѐ.

И҆́нъ конда́къ, гла́съ и҃:

Чтⷭ҇ое своѐ дв҃ство и҆ чⷭ҇тно́е ми́лостынею, ꙗ҆́кѡ свѣти́льникъ є҆ле́емъ, ᲂу҆краси́вшꙋю и҆ съ мꙋ́дрыми дѣ́вами въ пресвѣ́тлый черто́гъ хрⷭ҇то́въ вше́дшꙋю, є҆ѵфросѵ́нїю сла́внꙋю ᲂу҆бл҃жи́мъ и҆ припа́дше къ чⷭ҇тны̑мъ є҆ѧ̀ мощє́мъ, наслади́мсѧ є҆ѧ̀ бл҃гоꙋха́нїѧ и҆ ᲂу҆ми́льнѣ къ не́й возопїе́мъ: ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ бг҃ꙋ, молѝ и҆зба́витисѧ ѕлово́нїѧ страсте́й и҆ сп҃сти́сѧ дꙋша́мъ на́шымъ.

И҆́нъ конда́къ, гла́съ д҃.

Подо́бенъ: Вознесы́йсѧ:

Превита́вши ѿ землѝ по́лотскїѧ, ѻ҆те́чество своѐ, ꙗ҆́кѡ а҆враа́мъ, наслѣ́довавши, є҆ѵфросѵ́нїе, зе́млю высо́кꙋ соѻбра́знꙋ, го́рнїй сїѡ́нъ, тѣ́мже тѣ́ло твоѐ дꙋше́внымъ бл҃гомꙋ́жествїемъ, страда́нїемъ по́стнымъ ꙗ҆́кѡ же́ртвꙋ приноси́ла є҆сѝ милосе́рдїемъ свои́мъ, да́вшемꙋ себѐ за чл҃вѣ́ки же́ртвꙋ бл҃гопрїѧ́тнꙋ.

И҆́нъ і҆́косъ:

Премꙋ́дрость соломѡ́нъ прїи́мъ ѿ бг҃а, хва́литъ бо въ при́тчахъ мꙋжелюби́вꙋ женꙋ̀, ꙗ҆́кѡ своемꙋ̀ мꙋ́жеви двоѐ ри̑зы сотворѧ́ющꙋ, а҆́зъ же ны́нѣ въ пѣ́снѣхъ хвалю̀ бг҃олю́бицꙋ є҆ѵфросѵ́нїю, въ но́щь и҆ въ де́нь подыма́ющꙋ прпⷣбнїи дла̑ни къ бг҃ꙋ, да ѻ҆гнѧ̀ и҆зба́витъ негаси́магѡ, зꙋбна́гѡ же скре́жета и҆ всеѧ̀ мꙋ́ки на́съ ра́ди, вѣ́рꙋющихъ, да́вшемꙋ себѐ же́ртвꙋ ѻ҆ц҃ꙋ̀ бл҃гопрїѧ́тнꙋ.

Сѣда́ленъ, гла́съ д҃:

А҆́гг҃льскагѡ видѣ́нїѧ сподо́биласѧ є҆сѝ, прпⷣбнаѧ ма́ти є҆ѵфросѵ́нїе, трикра́тнѡ бо посѣти́ тѧ а҆́гг҃лъ, возвѣща́ѧ тѝ во́лю гдⷭ҇ню, да и҆́деши на мѣ́сто, нарица́емое сельцѐ, и҆ ᲂу҆стро́иши та́мѡ ѻ҆би́тель дѣ́въ, бг҃ꙋ ѡ҆сщ҃е́нныхъ.

Сла́ва, ны́нѣ, бг҃оро́диченъ:

Є҆ди́на и҆́стиннаѧ хрⷭ҇тїа́нъ покрови́тельнице, всѧ́кихъ лю́тыхъ ѡ҆бстоѧ́нїй, бѣ́дъ и҆ скорбе́й на́съ и҆зба́ви и҆ мл҃твами твои́ми сп҃сѝ дꙋ́шы на́шѧ.

Пѣ́снь д҃. І҆рмо́съ:

Хрⷭ҇то́съ моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чⷭ҇та ѡ҆ гдⷭ҇ѣ пра́зднꙋющи.

А҆́гг҃лъ возвѣстѝ бы́вшемꙋ во дни̑ твоѧ̑ ст҃и́телю и҆лїѝ ѡ҆ тебѣ̀, прпⷣбнаѧ, да́ти мѣ́сто, во є҆́же ѻ҆би́тель ᲂу҆стро́ити.

Ꙗ҆́коже возлежи́тъ на главѣ̀ црⷭ҇тѣй вѣне́цъ, та́кѡ почива́етъ дх҃ъ ст҃ы́й на тебѣ̀, прпⷣбнаѧ, си́це возвѣстѝ а҆́гг҃лъ ст҃и́телю.

И҆ ꙗ҆́кѡ мѵ́ро восхо́дитъ къ бг҃ꙋ, та́кѡ восхо́дитъ мл҃тва прпⷣбныѧ, и҆ ꙗ҆́кѡ со́лнце сїѧ́етъ на тве́рди нбⷭ҇нѣй, та́кѡ просїѧ̀ житїѐ є҆ѵфросѵ́нїи пред̾ а҆́гг҃лы бж҃їими, глаго́ла а҆́гг҃лъ въ видѣ́нїи ст҃и́телю.

Ѻ҆де́жда наги̑мъ и҆ бога́тство ни́щымъ, корми́тельница а҆́лчꙋщымъ была̀ є҆сѝ и҆ си̑рымъ ма́ти, лю́тыхъ и҆збавлѧ́ющи къ тебѣ̀ прибѣга́ющыѧ, тѣ́мже твоѧ̑ во вѣ́ки па́мѧть пребыва́етъ, є҆ѵфросѵ́нїе, по́лотскомꙋ гра́дꙋ похвало̀.

Невѣ́ста хрⷭ҇то́ва, ма́ти ꙗ҆ви́сѧ, ма́сло многоблагоꙋха́нно совокꙋпи́вши въ дв҃ствѣ и҆ ѻ҆бою́дꙋ возвели́чивши є҆го̀. и҆ ны́нѣ ра́дꙋешисѧ вѣ́чнѡ, въ ѻ҆би́тель нбⷭ҇нꙋю водворѧ́ющисѧ и҆ бж҃е́ственнꙋю свѣ́тлость прїима́ющи.

Бг҃оро́диченъ:

И҆ гдѣ̀ про́чее и҆но́е ѡ҆брѧ́щꙋ застꙋпле́нїе, ка́мѡ прибѣ́гнꙋ; гдѣ́ же и҆ сп҃сꙋ́сѧ; кꙋ́ю те́плꙋю воз̾и́мамъ помо́щницꙋ, скорбмѝ жите́йскими и҆ бꙋ́рѧми, ᲂу҆вы̀ мнѣ̀ коле́блемꙋ; на тѧ̀ є҆ди́нꙋ ᲂу҆пова́ю, и҆ дерза́ю, и҆ хвалю́сѧ, и҆ притека́ю къ покро́вꙋ твоемꙋ̀: сп҃си́ мѧ.

Пѣ́снь є҃. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, мра́ка грѣхо́внагѡ взыва́юща.

Ра́дости и҆ ᲂу҆дивле́нїѧ ѡ҆ видѣ́нїи а҆́гг҃льскомъ и҆спо́лнисѧ а҆рхїере́й гдⷭ҇ень и҆ призва́ше тѧ̀, прпⷣбнаѧ, возвѣсти́ти тѝ чꙋ́дное ꙗ҆вле́нїе.

Во́лю гдⷭ҇а твоегѡ̀ со ᲂу҆се́рдїемъ и҆спо́лнила є҆сѝ, прпⷣбнаѧ, и҆ пришла̀ є҆сѝ на мѣ́сто, пока́занное тѝ а҆́гг҃ломъ, и҆ та́мѡ водвори́ласѧ є҆сѝ.

На є҆ди́наго гдⷭ҇а возложи́вши тве́рдое ᲂу҆пова́нїе, ничто́же стѧжа́ла є҆сѝ ѿ и҆мѣ́нїй, но въ нищетѣ̀ є҆ѵⷢ҇льстѣй пребыва́ла є҆сѝ.

На разꙋ́мнѣмъ ка́мени хра́минꙋ неподви́жимꙋ создала̀ є҆сѝ, сла́внаѧ, и҆ треволнє́нїѧ страсте́й ѿбѣ́гла є҆сѝ, бл҃гоꙋтѣ́шнымъ дх҃омъ паракли́товымъ под̾е́млема въ вы́шнюю и҆ бж҃е́ственнꙋю ѻ҆би́тель.

Небре́гши ѻ҆́тчїѧ сла́вы и҆ горде́нїѧ, но ѻ҆дино́кое житїѐ и҆ неимѣ́нїе, є҆ѵфросѵ́нїе, возлюби́ла є҆сѝ, и҆ кре́стъ хрⷭ҇то́въ на ра́мо взе́мши, послѣ́довала є҆сѝ є҆мꙋ̀, зовꙋ́щемꙋ тѧ̀.

Бг҃оро́диченъ:

Кі́й тебѣ̀ да́ръ принесꙋ̀ бл҃годаре́нїѧ за, и҆̀хже наслади́хсѧ, твои́хъ дарова́нїй и҆ твоеѧ̀ безмѣ́рныѧ бл҃госты́ни; тѣ́мже сла́влю, пѣсносло́влю и҆ велича́ю твою̀ неизрече́ннꙋю ко мнѣ̀ млⷭ҇ть.

Пѣ́снь ѕ҃. І҆рмо́съ:

Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Ви́дѣвше а҆гг҃лоподо́бное твоѐ житїѐ, мнѡ́гїѧ дѣ̑вы восхотѣ́ша ѡ҆брꙋчи́тисѧ хрⷭ҇тꙋ̀ и҆ въ чⷭ҇томъ дв҃ствѣ є҆мꙋ̀ є҆ди́номꙋ послꙋжи́ти.

Сестра̀ твоѧ̑, кнѧжна̀ звенисла́ва, подража́ющи тебѣ̀, ѿве́ржесѧ сла́вы и҆ наслажде́нїй мі́ра сегѡ̀ и҆ къ тебѣ̀ притечѐ, и҆́го хрⷭ҇то́во бл҃го́е на себѐ воспрїѧ́ти.

Ви́дѧ ᲂу҆множа́ющыѧсѧ сєстры̀ твоѧ̑ дх҃ѡ́вныѧ, є҆ѵфросѵ́нїе всечⷭ҇тна́ѧ, возжела́ла є҆сѝ соѻрꙋ́дити хра́мъ гдⷭ҇ꙋ вседержи́телю, чⷭ҇тна́гѡ и҆ сла́внагѡ є҆гѡ̀ преѡбраже́нїѧ.

Въ ча́ши свое́й вїно̀ все́ю дꙋше́ю черпа́вши и҆ сто́лпъ дово́ленъ поста́вивши, восхотѣ́ла є҆сѝ: хлѣ́бъ мо́й ꙗ҆́ждьте и҆ вїно̀ всѝ пі́йте, жа́ждающїи.

Оу҆́треневавши къ бг҃ꙋ, голꙋби́це, была̀ є҆сѝ посре́брена свѣ́тлѡ крило́ма, сла́внаѧ, зла́томъ же блеща́щи междꙋра̑мїѧ разли̑чнымъ дѣѧ́нїємъ.

Бг҃оро́диченъ:

Оу҆тѣше́нїе въ ско́рбехъ вѣ́мъ, и҆ недꙋ́гѡвъ и҆сцѣле́нїе тѧ̀ зна́ю, бг҃ома́ти, и҆ всесоверше́нное сокрꙋше́нїе сме́рти, и҆ рѣкꙋ̀ живота̀ неисчерпа́емꙋю, и҆ всѣ́хъ, сꙋ́щихъ въ напа́стехъ, ско́рое и҆ бы́строе застꙋпле́нїе.

Конда́къ, гла́съ и҃:

И҆збра́ннѣй бг҃омъ ѿ самагѡ̀ рожде́нїѧ и҆ призва́ннѣй на слꙋже́нїе є҆мꙋ̀, въ чи́нѣ а҆́гг҃льстѣмъ гдⷭ҇еви послꙋжи́вшей ст҃ѡ, и҆ прпⷣбнѡ пожи́вшей, и҆ ны́нѣ съ нбⷭ҇ными си́лами гдⷭ҇а восхвалѧ́ющей, ѡ҆ на́съ же грѣ́шныхъ пред̾ гдⷭ҇емъ хода́тайствꙋющей, съ ра́достїю и҆ любо́вїю воззове́мъ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечⷭ҇тна́ѧ.

І҆́косъ:

А҆́гг҃льски на землѝ житїѐ соверши́ла є҆сѝ, чⷭ҇тото́ю и҆ смире́нїемъ, кро́тостїю и҆ терпѣ́нїемъ, милосе́рдїемъ и҆ воздержа́нїемъ гдⷭ҇еви ᲂу҆годи́ла є҆сѝ, и҆ ны́нѣ во свѣ́тлостехъ ст҃ы́хъ почива́ющи послѣдѝ трꙋдѡ́въ свои́хъ, прїимѝ ѡ҆ на́съ пѣ́нїе сїѐ: ра́дꙋйсѧ, дѣ́вственнице дꙋше́ю и҆ тѣ́ломъ: ра́дꙋйсѧ, наста́внице преди́внаѧ и҆́нокинемъ: ра́дꙋйсѧ, є҆щѐ на землѝ сподо́бльшаѧсѧ а҆́гг҃льскагѡ видѣ́нїѧ: ра́дꙋйсѧ, ѿ гдⷭ҇а чрез̾ а҆́гг҃ла ᲂу҆стро́ити ѻ҆би́тель повелѣ́нїе прїе́мшаѧ: ра́дꙋйсѧ, со ᲂу҆се́рдїемъ во́лю гдⷭ҇ню и҆спо́лньшаѧ: ра́дꙋйсѧ, всѧ̀ зємна́ѧ наслаждє́нїѧ мі́ра сегѡ̀ хрⷭ҇та̀ ра́ди ѿве́ргшаѧ: ра́дꙋйсѧ, нбⷭ҇номꙋ женихꙋ̀, і҆и҃сꙋ сладча́йшемꙋ, себѐ ѡ҆брꙋчи́вшаѧ: ра́дꙋйсѧ, въ чⷭ҇тотѣ̀, постѣ́хъ и҆ мл҃твахъ томꙋ̀ послꙋжи́вшаѧ: ра́дꙋйсѧ, безцѣ́нное сокро́вище пречⷭ҇тны́й крⷭ҇тъ ѻ҆би́тели свое́й въ ѡ҆сщ҃е́нїе и҆ ᲂу҆твержде́нїе стѧжа́вшаѧ: ра́дꙋйсѧ, въ невече́рнемъ днѝ црⷭ҇твїѧ бж҃їѧ ны́нѣ пребыва́ющаѧ: ра́дꙋйсѧ, є҆ѵфросѵ́нїе, невѣ́сто хрⷭ҇то́ва всечⷭ҇тна́ѧ.

Пѣ́снь з҃. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Не ѡ҆ свое́мъ то́чїю сп҃се́нїи прилежа́ше тѝ по пече́нїе, прпⷣбнаѧ ма́ти, но ѡ҆ всѣ́хъ, и҆̀хже тѝ ввѣ́рилъ гдⷭ҇ь, и҆̀хже поꙋча́ла є҆сѝ въ зако́нѣ гдⷭ҇ни, твори́ти во́лю є҆гѡ̀.

Ѻ҆́бразъ была̀ є҆сѝ слове́сномꙋ твоемꙋ̀ ста́дꙋ, всечⷭ҇тна́ѧ є҆ѵфросѵ́нїе, дѣ́лы бл҃ги́ми, смире́нїемъ возвыша́ѧсѧ, и҆ кро́тостїю привлека́ѧ, и҆ терпѣ́нїемъ ᲂу҆твержда́ѧ пребыва́ти непрекло́нными въ любвѝ ко гдⷭ҇ꙋ.

Є҆гда̀ соверша́шесѧ созида́нїе хра́ма гдⷭ҇нѧ, а҆́гг҃лъ возбꙋжда́ше строи́телѧ, глаго́лѧ: і҆ѡа́нне, и҆дѝ на дрꙋ́ги дерза́ющымъ под̾ѧ́ти ме́чъ, возбрани́ла є҆сѝ, ꙗ҆́кѡ ѻ҆рꙋ́жїемъ ѻ҆боюдоѻ́стрымъ, пресѣка́ющымъ, сло́вомъ бж҃їимъ ᲂу҆страша́ющимъ. (с. 569)

И҆здале́ча собира́ющи бж҃е́ственное бога́тство, ꙗ҆́кѡ дале́че ходѧ́й кора́бль, борзопи́счими персты̀ до́брѣ писа́ла є҆сѝ, бг҃одꙋхнове́ннаѧ, пое́млющи ѡ҆́тай и҆ даю́щи ни́щымъ.

Бг҃оро́диченъ:

Все́ю дꙋше́ю, и҆ мы́слїю, и҆ се́рдцемъ, и҆ ᲂу҆стна́ми тѧ̀ сла́влю, наслади́всѧ твои́хъ вели́кихъ дарова́нїй, и҆ твоеѧ̀ бл҃госты́ни, и҆ безмѣ́рныхъ твои́хъ чꙋде́съ.

Пѣ́снь и҃. І҆рмо́съ:

И҆з̾ пла́мене прпⷣбнымъ ро́сꙋ и҆сточи́лъ є҆сѝ и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.

Съ вѣ́рою и҆ тве́рдымъ ᲂу҆пова́нїемъ помоли́ласѧ є҆сѝ, прпⷣбнаѧ, ко гдⷭ҇ꙋ, и҆ ᲂу҆слы́ша гдⷭ҇ь моле́нїе вѣ́рныѧ рабы̀ своеѧ̀, и҆ чꙋ́днѣ соверши́сѧ созда́нїе хра́ма є҆гѡ̀.

Ра́дости и҆ весе́лїѧ и҆спо́лниласѧ є҆сѝ, прпⷣбнаѧ є҆ѵфросѵ́нїе, є҆гда̀ соверши́сѧ созда́нїе хра́ма, въ не́мже ѡ҆ є҆́же проше́нїємъ на́шымъ ᲂу҆слы̑шаннымъ бы́ти ѿ гдⷭ҇а со слеза́ми моли́ласѧ є҆сѝ.

Мо́щна бѣ̀ пред̾ гдⷭ҇емъ мл҃тва твоѧ̀, занѐ хра́мъ, воздви́гнꙋтый тобо́ю, чрез̾ мнѡ́гаѧ лѣ̑та цѣ́лъ и҆ невреди́мь сохрани́сѧ.

И҆збавле́нїе ѡ҆брѣ́тши, гдⷭ҇и, го́рькагѡ ѡ҆сꙋжде́нїѧ, є҆́же вкꙋше́нїѧ ра́ди дре́ва разꙋ́мнагѡ твои́мъ распѧ́тїемъ, є҆ѵфросѵ́нїа постѧ́щесѧ бы́сть во всѧ̑ срєды̀ и҆ пѧткѝ, тѣ́ло ᲂу҆мервщлѧ́ющи, а҆ дꙋ́шꙋ ѡ҆живлѧ́ющи потща́нїемъ, бж҃ествꙋ́ющимъ въ безвеще́ственнѣмъ тѣ́лѣ.

Плодолѣ́тными ве́рбами тѣле́сное дѣѧ́нїе, ꙗ҆́кѡ на вавѷлѡ́нстѣй рѣцѣ̀, повѣ́сивши, въ бꙋ́ри жите́йстѣй возопи́ла є҆сѝ: а҆́ще забꙋ́дꙋ тѧ̀, і҆ерꙋсали́ме, не предложи́вши въ нача́лѣ весе́лїѧ, забве́на бꙋ́ди десни́ца моѧ̀ и҆ ѧ҆зы́къ мо́й прильпнѝ горта́ни моемꙋ̀ по пра́вдѣ.

Бг҃оро́диченъ:

Ѡ҆бстоѧ̑нїѧ, и҆ скѡ́рби, и҆ нꙋ̑жды ѡ҆брѣто́ша мѧ̀, чⷭ҇таѧ, и҆ напа̑сти житє́йскїѧ, и҆ и҆скꙋшє́нїѧ ѿвсю́дꙋ мѧ̀ ѡ҆быдо́ша, но предста́ни мѝ и҆ покры́й мѧ̀ ст҃ы́мъ твои́мъ покро́вомъ.

Пѣ́снь ѳ҃. І҆рмо́съ:

Бг҃а чл҃вѣ́кѡмъ невозмо́жнѡ ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ чл҃вѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Возжела́ла є҆сѝ и҆мѣ́ти во ѻ҆би́тели твое́й і҆кѡ́нꙋ пречⷭ҇тыѧ бг҃ома́тере, ю҆́же и҆ полꙋчи́ла є҆сѝ, и҆ ра́достнѡ тꙋ́ю прїе́мши, мнѡ́гаѧ бл҃годарє́нїѧ гдⷭ҇ꙋ и҆ пречⷭ҇тѣй мт҃ри є҆гѡ̀ воздала̀ є҆сѝ.

Крⷭ҇тъ чⷭ҇тны́й ᲂу҆стро́ила є҆сѝ ᲂу҆се́рдїемъ твои́мъ, прпⷣбнаѧ, и҆ ка́плю бж҃е́ственныѧ кро́ве хрⷭ҇та̀ сп҃си́телѧ и҆ ча́сть животворѧ́щагѡ дре́ва въ не́мъ положи́ла є҆сѝ на ѡ҆сщ҃е́нїе и҆ сп҃се́нїе всѣ̑мъ, покланѧ́ющымсѧ є҆мꙋ̀ и҆ цѣлꙋ́ющымъ є҆го̀ съ любо́вїю и҆ стра́хомъ.

Мнѡ́гаѧ лѣ̑та въ тѣ́сной ке́ллїи, при хра́мѣ гдⷭ҇немъ, въ мл҃твахъ и҆ колѣнопреклоне́нїихъ препроводи́ла є҆сѝ, прпⷣбнаѧ є҆ѵфросѵ́нїе, ꙗ҆́кѡ безпло́тна, на землѝ пребыва́ющи.

Текла̀ є҆сѝ, ꙗ҆́коже цари́ца не ю҆́жскаѧ, но съ тре́петомъ ви́дѣвше рꙋкотво́рнꙋю цр҃ковь и҆ гро́бъ, въ не́йже тридне́венъ всетворе́цъ, бж҃їѧ мꙋ́дрость всели́сѧ, и҆ та́мѡ бл҃гословѝ бг҃ъ прїѧ́ти тѧ̀, до́браѧ дѣ́во.

Лїва́нъ и҆ смѵ́рнꙋ, и҆ зла́то волсвѝ творцꙋ̀ тебѣ̀ принесо́ша, є҆ѵфросѵ́нїа же дꙋ́шꙋ и҆ тѣ́ло, и҆ житїѐ непоро́чно, сраспе́ншисѧ тебѣ̀, хрⷭ҇тѐ, и҆ совоскре́сши тебѣ̀ и҆ въ безконе́чномъ црⷭ҇твїи съ тобо́ю црⷭ҇твꙋющи.

Бг҃оро́диченъ:

Ра́дость ѿ а҆́гг҃ла прїе́мшей и҆ мы̀, по прорече́нїю твоемꙋ̀, прест҃а́ѧ дв҃о, ᲂу҆бл҃жа́юще тѧ̀ со всѣ́ми рѡ́ды, є҆ѵⷢ҇льски вопїе́мъ: ра́дꙋйсѧ бл҃года́тнаѧ, гдⷭ҇ь съ тобо́ю.

Свѣти́ленъ, гла́съ и҃:

Прпⷣбнаѧ є҆ѵфросѵ́нїе, сла́вна па́мѧть твоѧ̀, вои́стиннꙋ бо на тебѣ̀ и҆спо́лнисѧ сло́во дх҃а ст҃а́гѡ: въ па́мѧть вѣ́чнꙋю бꙋ́детъ првⷣникъ. тѣ́мже и҆ на́съ, соверша́ющихъ па́мѧть твою̀ съ любо́вїю. сп҃са́й ѿ всѧ́кїѧ бѣды̀ и҆ напа́сти.

Сла́ва:

И҆̀же дре́вле проповѣ́даша, ра́дꙋетсѧ вѣ́чнѡ є҆ѵфросѵ́нїа ѡ҆ гдⷭ҇ѣ, ᲂу҆́зы плотскі̑ѧ ѿреши́вши и҆ тебѐ, зижди́телѧ, лице́мъ къ лицꙋ̀ ви́дѧщи, ви́дима тобо́ю, и҆ молѧ́щи и҆зба́витисѧ ѿ всѧ́кїѧ лю́тости въ пѣ́снехъ при́снѡ ю҆̀ похвалѧ́ющымъ.

И҆ ны́нѣ, бг҃оро́диченъ:

Ра́дꙋйсѧ, прⷭ҇то́ле ѻ҆гнезра́чный гдⷭ҇ень: ра́дꙋйсѧ, бж҃е́ственнаѧ и҆ маннопрїе́мнаѧ рꙋ́чко: ра́дꙋйсѧ, златы́й свѣти́льниче: ра́дꙋйсѧ, свѣщѐ неꙋгаси́маѧ: ра́дꙋйсѧ, дѣ́вамъ сла́во и҆ ма́теремъ ᲂу҆краше́нїе и҆ похвало̀, бг҃ороди́тельнице.

На хвали́техъ стїхи̑ры, гла́съ и҃:

Земны́ѧ пи́щи наслажде́нїе, бога́тство и҆ сла́вꙋ мі́ра сегѡ̀ презрѣ́вши, нбⷭ҇наго жениха̀ возлюби́ла є҆сѝ, є҆ѵфросѵ́нїе всечⷭ҇тна́ѧ: до́брѣ по́двигъ тво́й на землѝ во и҆́ночестѣмъ чи́нѣ соверши́ла є҆сѝ, съ мꙋ́дрыми дѣ́вами возшла̀ є҆сѝ къ женихꙋ̀ хрⷭ҇тꙋ̀, є҆мꙋ́же въ ра́дости ны́нѣ предстоѧ̀, непреста́ннѡ моли́сѧ ѡ҆ дꙋша́хъ на́шихъ.

Хрⷭ҇тꙋ̀ ѿ чⷭ҇тыѧ дв҃ы вопло́щшемꙋсѧ послѣ́довала є҆сѝ, є҆ѵфросѵ́нїе, въ дв҃ствѣ томꙋ̀ ѿ ю҆́ности твоеѧ̀ послꙋжи́ла є҆сѝ и҆ мнѡ́гимъ ко сп҃се́нїю пꙋ́ть показа́ла є҆сѝ. сєстры̀ моѧ̑ возлю́блєнныѧ, глаго́лала є҆сѝ, тѣ́сенъ и҆ приско́рбенъ пꙋ́ть, вводѧ́й въ живо́тъ, но вѣ́чно воздаѧ́нїе: тѣ́мже подвиза́йтесѧ нелѣ́ностнѡ, и҆́мате бо помога́ющаго, сама́го подвигополо́жника хрⷭ҇та̀, подаю́щаго живо́тъ нетлѣ́нный.

Бг҃омъ и҆збра́ннаѧ є҆ѵфросѵ́нїе, ꙗ҆́кѡ ѕвѣзда̀ пресвѣ́тлаѧ, ѿ ро́да своегѡ̀ возсїѧ́вшаѧ, странꙋ̀ сїю̀ просвѣща́ющаѧ, ѡ҆ всѣ́хъ, къ тебѣ̀ ᲂу҆се́рднѡ притека́ющихъ, и҆ мл҃твъ твои́хъ ко гдⷭ҇ꙋ просѧ́щихъ, и҆ любо́вїю цѣлꙋ́ющихъ чⷭ҇тны́й тво́й ѻ҆́бразъ, бꙋ́ди мл҃твенница и҆ и҆зба́ви на́съ ѿ всѧ́кїѧ ско́рби, ѿ всѧ́кїѧ болѣ́зни, дꙋше́вныѧ же и҆ тѣле́сныѧ, вѣ́рою и҆ любо́вїю соверша́ющихъ па́мѧть чⷭ҇тна́гѡ преставле́нїѧ твоегѡ̀.

Торжество̀ дне́сь прпⷣбныѧ є҆ѵфросѵ́нїи пра́зднꙋюще, прїиди́те, вѣ́рнїи, воспое́мъ по́двиги и҆ трꙋды̀ є҆ѧ̀, восхва́лимъ серафі́мскою любо́вїю і҆и҃са сладча́йшаго возлюби́вшꙋю и҆ є҆мꙋ̀ ᲂу҆се́рднѡ послꙋжи́вшꙋю, и҆ съ вѣ́рою и҆ любо́вїю воззове́мъ къ не́й: ра́дꙋйсѧ, є҆ѵфросѵ́нїе всечⷭ҇тна́ѧ, красото̀ и҆ похвале́нїе мона́шескагѡ чи́на, невѣ́сто хрⷭ҇то́ва и҆збра́ннаѧ, со а҆́гг҃лы и҆ всѣ́ми ст҃ы́ми въ невече́рнемъ днѝ црⷭ҇твїѧ бж҃їѧ водвори́вшаѧсѧ: моли́сѧ же сп҃сти́сѧ гра́дꙋ твоемꙋ̀, землѝ на́шей и҆ всѣ̑мъ правосла̑внымъ лю́демъ.

Сла́ва, гла́съ то́йже:

Во ст҃ы́й гра́дъ і҆ерꙋсали́мъ поклони́тисѧ гро́бꙋ гдⷭ҇ню возжела́вши и҆ дости́гши земна́гѡ і҆ерꙋсали́ма, въ ра́дости ст҃ы̑мъ мѣстѡ́мъ гро́бꙋ бл҃гоговѣ́йное поклоне́нїе воздала̀ є҆сѝ, є҆ѵфросѵ́нїе, просѧ̀ ᲂу҆ гдⷭ҇а блгⷣти, да прїи́метъ дꙋ́хъ тво́й на мѣ́стѣ ст҃ѣ́мъ: и҆ ᲂу҆слы́ша гдⷭ҇ь мл҃твꙋ твою̀, и҆ посла̀ а҆́гг҃ла, и҆́же возвѣсти́ ти ѡ҆ преше́ствїи твое́мъ ѿ земна́гѡ і҆ерꙋсали́ма въ го́рнїй і҆ерꙋсали́мъ нбⷭ҇ный, и҆дѣ́же ра́достнѡ ликꙋ́ющи со дв҃ственными ли́ками, помина́й на́съ, съ любо́вїю пра́зднꙋющихъ ст҃ꙋ́ю па́мѧть твою̀.

И҆ ны́нѣ, бг҃оро́диченъ:

Влⷣчце, прїимѝ мл҃твы ра̑бъ твои́хъ и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Славосло́вїе вели́кое и҆ ѿпꙋ́стъ.

На лїтꙋргі́и слꙋ́жба всѧ̀ прпⷣбнѣй женѣ̀.

Мл҃тва.

Ѽ прпⷣбнаѧ и҆ приснопа́мѧтнаѧ, всехва́льнаѧ ма́ти є҆ѵфросѵ́нїе, а҆́гг҃ле во пло́ти, бг҃оизбра́нный сосꙋ́де ст҃а́гѡ дх҃а, цр҃кве хрⷭ҇то́вы похвало̀ и҆ ᲂу҆краше́нїе, мона́шествꙋющихъ сла́во и҆ ᲂу҆твержде́нїе, ѻ҆те́чествꙋ, ѻ҆би́тели твое́й и҆ все́й странѣ̀ по́моще, покро́ве и҆ защи́тнице! Ты̀ є҆сѝ, ꙗ҆́кѡ дре́во, насажде́нное при и҆схо́дищихъ во́дъ, плоды̀ добродѣ́телей твои́хъ и҆ бл҃года́тными дарова̑нїи ст҃а́гѡ дх҃а ᲂу҆кра́шеннаѧ, наста́внице дѣ́ломъ и҆ сло́вомъ, и҆збра́ннаѧ, непоро́чнаѧ и҆ до́браѧ. Оу҆слы́ши ны̀, молѧ́щыѧсѧ тебѣ̀ и҆ призыва́ющыѧ и҆́мѧ твоѐ, и҆́маши бо дерзнове́нїе ᲂу҆ гдⷭ҇а. И҆спросѝ на́мъ преспѣ́ѧнїе въ жи́зни добродѣ́тельнѣй, ѡ҆градѝ сердца̀ на̑ша вѣ́рою, наде́ждою и҆ любо́вїю и҆ стра́хомъ бж҃їимъ. Пода́й на́мъ по́мощь въ трꙋдѣ́хъ и҆ ско́рбехъ на́шихъ, и҆ ꙗ҆́коже попече́нїе и҆мѣ́ла є҆сѝ въ житїѝ твое́мъ ѡ҆ ѻ҆би́тели твое́й и҆ и҆́ночествꙋющихъ, та́кѡ и҆ ны́нѣ потщи́сѧ ѡ҆ на́съ, бл҃гопоспѣши́ти на́мъ во все́мъ: и҆ ѻ҆би́тель твою̀ ѡ҆градѝ ми́ромъ и҆ защитѝ ѿ вра̑гъ ви́димыхъ и҆ неви́димыхъ, да преꙋспѣва́етъ и҆ процвѣта́етъ въ добродѣ́телехъ. И҆зми́ ны ѿ всѧ́кїѧ нꙋ́жды и҆ тѣсноты̀, ѿ лю́тыхъ болѣ́зней и҆ ѿ неча́ѧнныѧ сме́рти и҆ приведи́ ны ко и҆́стинномꙋ покаѧ́нїю при и҆схо́дѣ и҆з̾ жи́зни сеѧ̀: и҆спросѝ на́мъ ᲂу҆ гдⷭ҇а бг҃а кончи́нꙋ ми́рнꙋ, безболѣ́зненнꙋ, непосты́днꙋ, ст҃ы́хъ та̑инъ прича́стнꙋ и҆ преведи́ ны чрез̾ мыта̑рства воздꙋ̑шнаѧ, да не похи́тѧтъ на́съ и҆стѧза́телїе гро́знїи по грѣхѡ́мъ на́шымъ, но да твои́мъ застꙋпле́нїемъ и҆ по́мощїю возмо́жемъ безбѣ́днѡ проитѝ и҆стѧза́нїе воздꙋ́шное и҆ млⷭ҇ть полꙋчи́ти, и҆ предста́ти неѡсꙋжде́ннѡ стра́шномꙋ прⷭ҇то́лꙋ, и҆ на стра́шнѣмъ сꙋди́щи сподо́битисѧ ѡ҆деснꙋ́ю ста́ти првⷣнагѡ сꙋдїѝ, и҆ наслѣ́довати првⷣныхъ ча́сть. є҆́й, госпожѐ, всечⷭ҇тна́ѧ ма́ти, прпⷣбнаѧ є҆ѵфросѵ́нїе, помозѝ на́мъ мл҃твами твои́ми, ѡ҆градѝ на́съ и҆ застꙋпѝ ѿ всѧ́кихъ ко́зней вра́жїихъ, да сподо́бимсѧ прейтѝ вре́мѧ жи́зни се́й непреткнове́ннѡ и҆ сп҃се́нїе полꙋчи́ти мл҃твами твои́ми ᲂу҆ хрⷭ҇та̀ гдⷭ҇а, є҆го́же и҆ сподо́бимсѧ пѣ́ти и҆ славосло́вити со безнача́льнымъ ѻ҆ц҃е́мъ и҆ со ст҃ы́мъ дх҃омъ во вѣ́ки вѣкѡ́въ. а҆ми́нь.