Мѣ́сѧца тогѡ́же въ к҃ѳ-й де́нь. Ст҃ы́ѧ прпⷣбномꙋ́ченицы ѳеодо́сїи дѣ́вы:
И҆ преставле́нїе ст҃а́гѡ и҆ бл҃же́ннагѡ і҆ѡа́нна, хрⷭ҇та̀ ра́ди ю҆ро́дивагѡ, ᲂу҆́стюжскагѡ чꙋдотво́рца.
Слꙋ́жба є҆гѡ̀ пи́сана по се́й слꙋ́жбѣ.
И҆ пра́зднованїе прест҃ѣ́й бцⷣѣ въ че́сть і҆кѡ́ны є҆ѧ̀ спорꙋ́чница грѣ́шныхъ.
Слꙋ́жба сїѧ̀ пи́сана мѣ́сѧца ма́рта въ приложе́нїи.
Стїхи̑ры ст҃ы́ѧ, гла́съ и҃. Подо́бенъ: Ѽ пресла́внагѡ чꙋдесѐ!
Царе́ю дѣ́вства сїѧ́ющи, ꙳ ѳеодо́сїе честна́ѧ, ꙳ и҆ порфѵ́рою, кро́ве ꙳ мꙋче́нїѧ, всемꙋ́драѧ, ѡ҆багре́нною, ꙳ свѣ́тлѡ ѡ҆дѣ́ѧна, ꙳ и҆ въ премі́рный хрⷭ҇то́въ черто́гъ все́льшисѧ, ꙳ ѻ҆трокови́це всенепоро́чнаѧ, ꙳ ликꙋ́еши съ чи́нми а҆́гг҃льскими, ꙳ вои́стиннꙋ неразори́мое ликова́нїе, сла́внаѧ.
Мч҃ниче дѣ́во ꙳ всехва́льнаѧ ѳеодо́сїе, ꙳ хрⷭ҇та̀ вседꙋ́шнѡ возжела́вши, ꙳ мꙋче́нїѧ претерпѣ́ла є҆сѝ ра̑ны, ꙳ до́блественнѣ ᲂу҆ранѧ́ема за твоего̀ рачи́телѧ, ꙳ и҆ стрꙋ́жема ногты̀ по ре́брѡмъ. ꙳ ѽ по́двигѡвъ твои́хъ тве́рдагѡ противле́нїѧ, и҆́миже на зе́млю вои́стиннꙋ ꙳ низве́ргла є҆сѝ го́рдаго.
Добро́тою дꙋши́ же и҆ тѣлесѐ, ꙳ ᲂу҆кра́шена свѣ́тлѡ, ꙳ хрⷭ҇тꙋ̀ принесла́сѧ є҆сѝ, ꙳ сла́вы вѣнце́мъ жела́ющи ѿ негѡ̀ ᲂу҆вѧзти́сѧ, ꙳ ѳеодо́сїе мч҃нице всесла́внаѧ, ꙳ и҆ црⷭ҇твїѧ ꙗ҆́вѣ дїади́мꙋ, ꙳ вои́стиннꙋ многоцѣ́ннꙋ, ꙳ досто́йнѡ прїѧ́ти твоемꙋ̀ верхꙋ̀, ꙳ невѣ́ста нетлѣ́ннаѧ ꙗ҆́вльшисѧ, всемꙋ́драѧ.
Стїхи̑ры бцⷣы, гла́съ и҆ подо́бенъ то́йже:
Ра́дꙋйсѧ, дꙋ́шъ просвѣще́нїе, ꙳ согрѣша́ющихъ проще́нїе, ꙳ неради́выхъ и҆справле́нїе: ꙳ ра́дꙋйсѧ, ᲂу҆тѣше́нїе и҆ ра́дость, ꙳ скорбѧ́щихъ помо́щнице: ꙳ ра́дꙋйсѧ, бл҃га́ѧ, ꙳ немощны́хъ дꙋ́шъ и҆сцѣле́нїе: ꙳ ра́дꙋйсѧ, примире́нїе къ бг҃ꙋ и҆ хода́таице, ꙳ серафі̑мъ всѣ́хъ ꙗ҆́кѡ сꙋ́щи ст҃ѣ́йши, чⷭ҇таѧ.
Пло́ть ѿ крове́й твои́хъ прїе́мъ, ꙳ превѣ́чный бг҃ъ, тѧ̀ предста́тельницꙋ показа̀ ꙳ человѣ́кѡмъ, чⷭ҇таѧ. ꙳ тѣ́мже и҆зба́ви рабы̑ твоѧ̑ ꙳ ѿ всѧ́кїѧ бѣды̀ и҆ ѡ҆бстоѧ́нїѧ, ꙳ и҆ сѣ́тей лꙋка́вагѡ врага̀, ꙳ и҆ сїѧ́нїѧ причасти́тисѧ сподо́би и҆збра́нныхъ, ꙳ всѧ̑ сла́вѧщыѧ и҆ покланѧ́ющыѧсѧ тебѣ̀.
Спаси́ мѧ, влⷣчце пречⷭ҇таѧ, ꙳ ꙗ҆́же сп҃са хрⷭ҇та̀ неизрече́ннѡ ро́ждшаѧ: ꙳ тѧ́ бо є҆ди́нꙋ стѧжа́хъ предста́тельницꙋ, ꙳ и҆ неѡбори́мꙋю стѣ́нꙋ, ꙳ и҆ покро́въ и҆ ра́дованїе, ꙳ и҆ дꙋшѝ моеѧ̀ бжⷭ҇твенное ᲂу҆тѣше́нїе. ꙳ ты̀ ᲂу҆̀бо мѧ̀ и҆зба́ви неꙋсыпа́ющагѡ че́рвїѧ, ꙳ и҆ ѻ҆гнѧ̀ вѣ́чнꙋющагѡ, ꙳ мт҃и хрⷭ҇та̀ бг҃а.
Сла́ва, и҆ ны́нѣ:
Да гла́сы велича́ю тѧ̀ ꙳ ра́достными, чⷭ҇таѧ, ꙳ и҆ сла́влю пꙋчи́нꙋ чл҃вѣколю́бїѧ твоегѡ̀, ꙳ ѿ бѣ́дъ спасѝ, ꙳ и҆ и҆зми́ мѧ дꙋшетлѣ́нныхъ стрѣ́лъ ꙳ неви́димагѡ и҆ вселꙋка́вагѡ врага̀: ꙳ тѧ́ бо предлага́ю на него̀, бг҃оневѣ́сто, ꙳ ѻ҆рꙋ́жїе тве́рдо и҆ непобѣди́мо, ꙳ мт҃и, хрⷭ҇та̀ бг҃а.
Крⷭ҇тобогоро́диченъ:
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко! ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь, ꙳ бцⷣа пла́чꙋщисѧ гл҃го́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
Тропа́рь, гла́съ д҃:
Добродѣ́тель бл҃гопрїѧ́тнѡ, мч҃нице, пости́гла є҆сѝ, хрⷭ҇то́во прїѧ́телище бы́сть чи́стое, и҆ ст҃а́гѡ дх҃а до́мъ возлю́бленъ: ѿню́дꙋже посрами́ла є҆сѝ врага̀ борю́щаго ро́дъ человѣ́ческїй, до́брѣ страда́вшаѧ, и҆ посѣ́кла є҆сѝ копрѡнѵ́ма, ѳеодо́сїе, мече́мъ вѣ́ры: и҆ къ черто́гꙋ небе́сномꙋ преста́виласѧ є҆сѝ ра́дꙋющисѧ. тебѐ вѣ́рою чтꙋ́щымъ при́снѡ просѝ ве́лїѧ ми́лости.
Канѡ́нъ, є҆гѡ́же краегране́сїе:
Ѳеодо́сїи мꙋ́ченицы пою̀ сла́вꙋ.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Бг҃ъ тебѣ̀, ѳеодо́сїе, бы́сть пꙋ́ть страда́нїѧ, на крⷭ҇тъ во́лею возше́дый, низложи́въ мꙋчи́телѧ, ꙗ҆́коже пти́цѣ нарꙋга́тисѧ, ѿ мꙋ́чєникъ содѣ́ла.
Благомо́щнѡ, ѳеодо́сїе всечестна́ѧ, на землѝ разрази́ла є҆сѝ нача́льника пре́лести, крѣ́пкѡ пострада́вши, прехва́льнаѧ, и҆ сла́вы вѣне́цъ, ꙗ҆́кѡ побѣдоно́сица, мч҃нице, прїѧ́ла є҆сѝ.
Дре́вле велехва́льство и҆мѣ́вый, ны́нѣ низложи́сѧ, твоемꙋ̀ терпѣ́нїю, мч҃нице, прирази́всѧ, крⷭ҇та́ бо си́лъ воспрїе́мши, посрами́ла є҆сѝ безмѣ́рнѡ того̀ шата́ющасѧ.
Бг҃оро́диченъ:
Лꙋка́внѡ прельсти́ мѧ ѕмі́й, взѧ́тъ плѣне́на, ѡ҆божи́тисѧ жела́нїе мѝ вло́жь: тобо́ю же, пречⷭ҇таѧ, призва́нъ бы́въ, ѡ҆божи́хсѧ непремѣ́ннѡ вои́стиннꙋ. (с. 487)
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Жела́нїе бжⷭ҇твенное, ѳеодо́сїе, тѧ̀ че́стнꙋ показа̀ невѣ́стꙋ, хрⷭ҇то́вꙋ мч҃ницꙋ, тогѡ̀ крⷭ҇тъ возлюби́вшꙋю.
Пло́ти тлетво́рное ѡ҆ста́вльши, ѽ чⷭ҇тна́ѧ. промышле́нїе, животворѧ́щимъ дх҃омъ живе́ши, ѳеодо́сїе пресла́внаѧ.
Оу҆врачꙋ́й мо́й ᲂу҆́мъ бг҃одарова́нною твое́ю, честна́ѧ, благода́тїю, и҆ дꙋ́шꙋ страстьмѝ разсла́бленнꙋю и҆сцѣлѝ.
Бг҃оро́диченъ:
Возста́вила є҆сѝ, ѽ чⷭ҇таѧ! па́дшїй мо́й зра́къ, ро́ждши нача́льника, влⷣчце, всѣ́хъ на́съ воскресе́нїѧ.
Сѣда́ленъ, гла́съ и҃. Подо́бенъ: Премꙋ́дрости:
Крове́й твои́хъ стрꙋѧ́ми, всю̀ крѣ́пость лꙋка́вагѡ дїа́вола, ꙗ҆́кѡ вои́стиннꙋ погрꙋзи́вши, сла́внаѧ, прешла̀ є҆сѝ невре́днѡ мꙋ́къ всевели́кꙋю пꙋчи́нꙋ: и҆ въ землѝ свѧтѣ́й ꙗ҆́вѣ всели́ласѧ є҆сѝ, по́честь трꙋдѡ́въ досто́йнѡ прїе́мши, черто́га вхо́да нбⷭ҇нагѡ сподо́биласѧ є҆сѝ, ѳеодо́сїе прехва́льнаѧ. молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю свѧтꙋ́ю па́мѧть твою̀.
Бг҃оро́диченъ:
Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рови, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стрⷭ҇ти твоѧ̑.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Шата́ѧсѧ мꙋчи́тель, ра́нами ᲂу҆страши́ти крѣ́пость твоегѡ̀ терпѣ́нїѧ хотѧ́ше ѻ҆каѧ́нный: ты́ же, прехва́льнаѧ, сла́ва бг҃ꙋ моемꙋ̀, взыва́ла є҆сѝ.
Бг҃ода́ннымъ и҆ бжⷭ҇твеннымъ и҆менова́нїемъ проꙋвѣ́дѣннѡ ѡ҆богати́ласѧ є҆сѝ, мч҃нице страстоно́сице: да́нїе бо была̀ є҆сѝ бж҃їе на́съ веселѧ́щее, вѣ́рою тѧ̀ и҆ любо́вїю почита́ющыѧ.
Оу҆кра́шенною, бг҃омꙋ́драѧ ѳеодо́сїе, мꙋ́ченическою кро́вїю твое́ю ѡ҆моче́ною, ѡ҆дѣ́ѧна ѻ҆де́ждею, текꙋ̀ во слѣ́дъ тебѐ, любо́вїю женихꙋ̀ твоемꙋ̀ взыва́ла є҆сѝ.
Бг҃оро́диченъ:
Воплоще́нно сло́во, чⷭ҇таѧ дв҃о, бг҃олѣ́пнѡ родила̀ є҆сѝ, и҆ пребыва́еши дв҃а. тѣ́мже немо́лчными гла́сы, ра́дꙋйсѧ, тебѣ̀, влⷣчце, вѣ́рою несꙋмнѣ́нною взыва́емъ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Мѵ́ро и҆злїѧ́вшеесѧ хрⷭ҇та̀ возлю́бльши, ѻ҆трокови́це, бг҃омꙋ́дреннѡ послѣ́довала є҆сѝ семꙋ̀, пѣ́сньми сла́вѧщи.
Вѣ́чнꙋю жи́знь вре́менною и҆змѣни́ла є҆́сть, кро́вїю ма́лою нбⷭ҇ное црⷭ҇тво мч҃ница наслѣ́дова.
И҆сточа́ютъ, ꙗ҆́кѡ и҆сто́чницы, мꙋ́ченичєскїѧ мѡ́щи цѣльбы̑ недꙋ́гꙋющымъ, и҆ дꙋшє́вныѧ недꙋ́ги вѣ́рою и҆сцѣлѧ́ютъ.
Бг҃оро́диченъ:
Кто̀ мо́жетъ твоѐ сказа́ти та́инство, всенепоро́чнаѧ; зижди́телѧ бо невмѣсти́маго всѣ́ми во чре́вѣ твое́мъ вмѣсти́ла є҆сѝ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
По тебѣ̀ со тща́нїемъ сме́рть прїима́ше ѳеодо́сїа мч҃ница, преще́нїѧ мꙋчи́телей не ᲂу҆боѧ́вшисѧ, твое́й стрⷭ҇ти ᲂу҆подо́бисѧ, хрⷭ҇тѐ, во́льнѣй.
Оу҆до́бнѡ крⷭ҇то́мъ твои́мъ жєны̀ ᲂу҆крѣпи́вшесѧ, главы̑ ѕмїє́въ, ꙗ҆́коже предре́клъ є҆сѝ, сп҃се, попира́ютъ, твое́ю любо́вїю ᲂу҆ѧзвлѧ́емы, и҆ бжⷭ҇твеннымъ твои́мъ жела́нїемъ.
Бг҃оро́диченъ:
Всю̀ тѧ̀ голꙋби́цꙋ соверше́нꙋ и҆ предобрꙋ̀ и҆здале́ча ѡ҆брѣ́тъ, крі́нъ и҆ ᲂу҆до́льный цвѣ́тъ, ѽ бг҃ома́ти! жени́хъ мы́сленный въ тѧ̀ всели́сѧ.
Конда́къ, гла́съ в҃. Подо́бенъ: Вы́шнихъ и҆щѧ̀:
Трꙋда́ми живо́тъ нетрꙋ́дный дости́гла є҆сѝ, кро́вїю же копрѡнѵ́ма ᲂу҆дави́ла є҆сѝ, мч҃нице, скве́рнаго врага̀ хрⷭ҇то́вы це́ркве, всеблаже́ннаѧ ѳеодо́сїе: и҆ съ вы́шними ра́дꙋешисѧ вѡ́инствы, чтꙋ́щыѧ па́мѧть твою̀ покрыва́ющи.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Тѧ̀ бг҃ода́нными ᲂу҆кра́шеннꙋ, мч҃нице, добро́тами, вѣ́рою зрѧ́ще, пѣ́сньми свѣ́тлѡ женихꙋ̀ твоемꙋ̀ взыва́емъ: благослове́нъ є҆сѝ въ хра́мѣ сла́вы твоеѧ̀, гдⷭ҇и.
Съ дѣ́вами свѣщено́сицами въ небе́сный, мч҃нице, ны́нѣ черто́гъ ра́дꙋющисѧ со хрⷭ҇то́мъ возшла̀ є҆сѝ, взыва́ющи: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ:
На престо́лѣ превознесе́ннѣ сѣдѧ́й, престо́лъ тѧ̀ на землѝ, дв҃о, бг҃оподо́бенъ ѡ҆брѣ́тъ, почи́лъ є҆́сть. бл҃гослове́на ты̀ въ жена́хъ є҆сѝ, пренепоро́чнаѧ влⷣчце.
Пѣ́снь и҃. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшссѧ, благоче́стїѧ рачи́тели ѻ҆́троцы, взыва́юще: благослови́те всѧ̑ дѣла̀ гдⷭ҇нѧ гдⷭ҇а.
Разрѣши́вшисѧ соꙋ̑зъ плотски́хъ, ѳеодо́сїе чⷭ҇тна́ѧ, возлетѣ́ла є҆сѝ ра́дꙋющисѧ къ свѣтоѻбра́зномꙋ черто́гꙋ, невѣ́стнически ликꙋ́ющи, и҆ мꙋче́нїѧ червле́нною кро́вїю блеща́щисѧ, и҆ вопїю́щи: благослови́те, всѧ̑ дѣла̀ гдⷭ҇нѧ, гдⷭ҇а.
Въ черто́зѣ нбⷭ҇нѣмъ жи́ти сподо́биласѧ є҆сѝ свѣ́тлѡ, ѳеодо́сїе честна́ѧ, вѣ́чнꙋющее благосла́вїе ѡ҆брѣ́тши, всеприснопа́мѧтнаѧ, и҆ мꙋ́жества твоегѡ̀ плодо́мъ вои́стиннꙋ ѡ҆богати́вшисѧ, вопїю́щи: благослови́те, всѧ̑ дѣла̀ гдⷭ҇нѧ, гдⷭ҇а.
Оу҆краси́ласѧ є҆сѝ тезоимени́тствомъ ꙗ҆́вѣ, ѳеодо́сїе честна́ѧ: бж҃їе бо да́нїе на́мъ и҆зрѧ́дно даде́сѧ, всемꙋ́драѧ, дарѡ́въ па́че ᲂу҆ма̀ воздаю́щи рѣ́ки, вѣ́рою пою́щымъ: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Вои́стиннꙋ ро́ждши бг҃а, вои́стиннꙋ пречⷭ҇таѧ мт҃и нарекла́сѧ є҆сѝ бг҃ꙋ, и҆́стиннѡ носѧ́щи, но ко́емждо рожде́нїи, бг҃оиме́нство. тѣ́мже тѧ̀ вѣ́рнїи сла́вимъ бцⷣꙋ бг҃омꙋ́дреннѡ, всенепоро́чнаѧ влⷣчце.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Разрѣшѝ плєни́цы согрѣше́нїй благоче́стнѡ тѧ̀ воспѣва́ющихъ, твои́ми мольба́ми, бг҃омꙋ́драѧ ѳеодо́сїе, мч҃нице прехва́льнаѧ, бг҃ꙋ вседержи́телю предстоѧ́щи, всечестна́ѧ.
Є҆́ѵы прама́тере жела́нїе хꙋдо́жно прїѧ́тъ, воззрѣ́нїемъ къ бг҃ꙋ ѡ҆боже́на, и҆ бы́вши бжⷭ҇твеннымъ прича́стїемъ бо́гъ. тѣ́мже тѧ̀, всеблаже́ннаѧ ѳеодо́сїе, велича́емъ.
Ве́сь сла́дость є҆́сть тво́й жени́хъ, страстоте́рпице, ве́сь дꙋше́вное ᲂу҆тѣше́нїе, ѳеодо́сїе мч҃нице, хрⷭ҇то́съ, є҆го́же ны́нѣ наслажда́ющисѧ, твои́ми моли́твами на́съ помина́й.
Бг҃оро́диченъ:
Пло́тїю прїитѝ восхотѣ́въ ᲂу҆краси́вый всѧ̑ сло́вомъ, въ тѧ̀ всели́сѧ є҆ди́нꙋ, ст҃ѣ́йшꙋ всѣ́хъ ѡ҆брѣ́тъ, и҆ бцⷣꙋ показа̀ и҆́стиннꙋю, мт҃и дв҃о.
Слꙋ́жба ст҃а́гѡ и҆ бл҃же́ннагѡ і҆ѡа́нна, хрⷭ҇та̀ ра́ди ю҆ро́дивагѡ, ᲂу҆́стюжскагѡ чꙋдотво́рца.
На Гдⷭ҇и, воззва́хъ, стїхи̑ры, гла́съ д҃. Подо́бенъ: Зва́нный свы́ше:
Є҆гда̀ бжⷭ҇твеннаѧ бл҃года́ть возсїѧ̀ въ се́рдцы твое́мъ, премꙋ́дре і҆ѡа́нне, тогда̀ всѧ̑ ꙗ҆̀же въ пло́ти мꙋдрѡва́нїѧ ѡ҆ста́вилъ є҆сѝ: и҆ къ свѣ́тꙋ бг҃оразꙋ́мїѧ прите́клъ є҆сѝ, невозвра́тнѡ хрⷭ҇тꙋ̀ послѣ́дꙋѧ, ѿ твоегѡ̀ ѻ҆те́чества ко гра́дꙋ ᲂу҆́стюгꙋ ше́ствїе сотвори́въ, и҆ є҆́же по хрⷭ҇тѣ̀ жи́тельство въ не́мъ и҆зво́лилъ є҆сѝ, и҆ мнѡ́гимъ ѻ҆́бразъ къ добродѣ́тели и҆справле́нїемъ твоегѡ̀ житїѧ̀ положи́въ, бг҃облаже́нне. тѣ́мже и҆ вѣнце́мъ нетлѣ́нїѧ хрⷭ҇то́съ бг҃ъ, є҆мꙋ́же порабо́талъ є҆сѝ, вѣнча́ тѧ. є҆го́же молѝ, спастѝ и҆ просвѣти́ти дꙋ́шы на́шѧ.
Є҆гда̀ раче́нїе и҆ бжⷭ҇твенное жела́нїе возсїѧ̀ въ дꙋшѝ твое́й, свѧ́те, тогда̀ прелє́стнаѧ всѧ̑ ꙗ҆̀же въ мі́рѣ мꙋдрѡва́нїѧ ѡ҆ста́вль, и҆ къ вы̑шнимъ жела́ѧ, вы̑шнѧѧ взыска́лъ є҆сѝ. ѿѻнꙋ́дꙋже и҆ да́ръ прозрѣ́нїѧ, не ѿ человѣ̑къ, ни человѣ́комъ, но ѿ вы́шнѧгѡ про́мысла прїи́мъ, мнѡ́гимъ ра́ди добродѣ́тельнагѡ житїѧ̀ позна́нъ бы́лъ є҆сѝ, є҆щѐ жи́въ сы́й, и҆ по преставле́нїи чꙋдеса̀ творѧ̀ пресла̑внаѧ, си́лою хрⷭ҇та̀ бг҃а на́шегѡ. є҆го́же молѝ, спастѝ и҆ просвѣти́ти дꙋ́шы на́шѧ.
Є҆гда̀ бжⷭ҇твенное зва́нїе прїи́де на тѧ̀, бг҃омꙋ́дре, тогда̀ ст҃ы́мъ дх҃омъ подвиза́емь, возни́клъ є҆сѝ ѿ мїрска́гѡ сладостра́стїѧ къ свѣ́тꙋ бг҃оразꙋ́мїѧ, и҆ ѻ҆те́ческїѧ сла́вы и҆ любвѐ и҆збѣжа́ти потща́лсѧ є҆сѝ, бога́тство ᲂу҆́бѡ и҆ сла́вꙋ ꙗ҆́кѡ не сꙋ̑щаѧ презрѣ́лъ є҆сѝ, и҆ є҆ди́наго возлюби́въ и҆́стиннаго живота̀ хрⷭ҇та̀ бг҃а на́шего, крⷭ҇тъ тво́й взе́мъ, тогѡ̀ живонѡ́снымъ стопа́мъ послѣ́довалъ є҆сѝ. є҆го́же молѝ, і҆ѡа́нне досточꙋ́дне, спастѝ и҆ просвѣти́ти дꙋ́шы на́шѧ.
И҆́ны стїхи̑ры, гла́съ в҃. Подо́бенъ: Кі́ими:
Кі́ими похва́льными вѣнцы̑ ᲂу҆вѧзе́мъ прпⷣбнаго; блаже́нствꙋ вѣнца̀, благоче́стїѧ и҆справле́нїе, цр҃кве свѣ́тлое ᲂу҆краше́нїе, и҆сто́чника бжⷭ҇твенныхъ и҆сцѣле́нїй неизчерпа́емаго, и҆злива́нїй дꙋхо́вныхъ рѣкꙋ̀, зе́млю ᲂу҆́стюжскꙋю мно́гихъ чꙋде́съ веселѧ́щꙋю тече́нїемъ, і҆ѡа́нна до́блѧго, предста́телѧ на́шего и҆ храни́телѧ, молѧ́щасѧ хрⷭ҇тꙋ̀ бг҃ꙋ, дарова́ти дꙋша́мъ на́шымъ ми́ръ и҆ ве́лїю ми́лость.
Кі́ими смире́нными ᲂу҆стна́ми воспое́мъ блаже́ннаго, ди́внаго въ житїѝ, безплѡ́тнымъ сожи́телѧ, просла́вленнаго въ чꙋдесѣ́хъ бг҃омъ, столпа̀ цр҃кве недви́жимаго, предста́телѧ сꙋ́щихъ въ бѣда́хъ и҆ ско́рбехъ, въ пꙋ́ть ше́ствꙋющихъ прави́телѧ, си́рыхъ и҆ ѡ҆би́димыхъ застꙋ́пника, больны́хъ врача̀ безме́здна, молѧ́щасѧ гдⷭ҇еви, дарова́ти на́мъ ве́лїю ми́лость;
Прїиди́те, вѣ́рныхъ собо́ри, ѱало́мски восплещи́те рꙋка́ми, печа́льныхъ ᲂу҆тѣше́нїе, недꙋ́жныхъ и҆сцѣле́нїе, блаже́ннаго і҆ѡа́нна воспѣва́юще, похвалꙋ̀ землѝ ᲂу҆́стюжскїѧ, цр҃ко́вное ᲂу҆краше́нїе, рѣкꙋ̀ ми́лости вои́стиннꙋ, бжⷭ҇твеннагѡ хрⷭ҇то́ва смире́нїѧ ревни́телѧ, подаю́щаго мі́рови ве́лїю ми́лость.
Сла́ва, гла́съ и҃:
Ꙗ҆́кѡ тече́нїе до́брѣ сконча́вшемꙋ, и҆ вѣ́рꙋ соблю́дшемꙋ непоро́чнꙋю, и҆ врагѝ безплѡ́тныѧ терпѣ́нїемъ твои́мъ попра́вшемꙋ, возложи́сѧ на честны́й тво́й ве́рхъ побѣ́ды вѣне́цъ пресвѣ́телъ, ѿ рꙋкѝ вседержи́телѧ бг҃а, є҆гѡ́же ра́ди мі́ръ и҆ сꙋ̑щаѧ въ не́мъ сꙋ́єтства преѡби́дѣлъ є҆сѝ. тѣ́мъ и҆ свѧта́ѧ твоѧ̀ чи́стаѧ дꙋша̀ на нб҃са̀ востечѐ ра́дꙋющисѧ: пра́ведныхъ же ли́цы срѣто́ша тѧ̀ веселѧ́щесѧ, и҆ нбⷭ҇наѧ селє́нїѧ свѣ́тлѡ воспрїѧ́ша. блаже́нное же и҆ честно́е тѣ́ло твоѐ на землѝ пребыва́етъ нетлѣ́нно, вѣ̑рнымъ подава́ѧ и҆сцѣле́нїе. тѣ́мже вѣ́рою пра́вою, и҆ те́плымъ жела́нїемъ, свѧто́мꙋ твоемꙋ̀ гро́бꙋ припа́дающе, бг҃омꙋ́дре і҆ѡа́нне, про́симъ и҆спроси́ти ᲂу҆̀ хрⷭ҇та̀ бг҃а на́шегѡ, гра́дꙋ твоемꙋ̀ непоколеби́мꙋ и҆ безмѧте́жнꙋ пребы́ти ѿ навѣ̑тъ вра́жїихъ, и҆ пога́нскагѡ наше́ствїѧ, во́инствꙋ побѣ̑ды на врагѝ, ᲂу҆мире́нїѧ же мі́рꙋ, и҆ спасе́нїѧ дꙋша́мъ на́шымъ.
И҆ ны́нѣ, бг҃оро́диченъ: Цр҃ь нбⷭ҇ный: и҆лѝ пра́здника.
Вхо́дъ. Прокі́менъ днѐ, и҆ чтє́нїѧ г҃, пи́саны сегѡ̀ мцⷭ҇а въ г҃ де́нь.
На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ:
Те́плѡ возсїѧ́ла є҆́сть ꙗ҆́кѡ со́лнце свѣтоза́рнаѧ па́мѧть твоѧ̀, лꙋча́ми мно́гѡ ѡ҆блиста́ющи, твои́хъ добродѣ́тельныхъ дѣѧ́нїй, всебл҃же́нне і҆ѡа́нне, и҆ ѡ҆зарѧ́ющи вѣ́рныхъ ра́зꙋмы свѣ́томъ чꙋде́съ твои́хъ. Сїю̀ ᲂу҆́бѡ пра́зднꙋюще, ра́достнѡ тѧ̀ сла́вимъ, и҆ вѣ́рою ᲂу҆блажа́емъ, ᲂу҆го́дниче хрⷭ҇та̀ бг҃а на́шегѡ: є҆го́же молѝ, ѿ тлѝ и҆ бѣ́дъ и҆зба́вити вѣ́рою пра́зднꙋющыѧ всечестно́е твоѐ ᲂу҆спе́нїе.
Сті́хъ: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀.
Земны́й а҆́гг҃лъ, и҆ нбⷭ҇ный человѣ́къ ꙗ҆ви́лсѧ є҆сѝ, блаже́нне, и҆сто́чникъ ᲂу҆миле́нїѧ, ми́лости тече́нїе, стрꙋѧ̀ и҆сцѣле́нїй, і҆ѡа́нне досточꙋ́дне: ма́слина бж҃їѧ вои́стиннꙋ плодови́та, є҆ле́емъ трꙋдѡ́въ твои́хъ просвѣща́ѧ вѣ́рнѡ хва́лѧщыѧ тѧ̀, молѝ чл҃вѣколю́бца, ѿ бѣ́дъ и҆зба́вити любо́вїю чтꙋ́щыѧ па́мѧть твою̀.
Сті́хъ: Пра́ведникъ ꙗ҆́кѡ фі́нїѯъ процвѣте́тъ:
Ра́зꙋмъ тво́й, пребл҃же́нне, бжⷭ҇твеннымъ свѣ́томъ сїѧ́ѧ, тѣле́сныхъ страсте́й превзы́де, непримѣ́сенъ дѡ́льнимъ носѧ̀ ѻ҆́бразъ, и҆ воѡбража́ѧ себѐ добродѣ́тельми бжⷭ҇твенными, показа́сѧ ве́сь свѣтоѻбра́зенъ, споспѣше́нїемъ дх҃а прест҃а́гѡ, і҆ѡа́нне премꙋ́дре, пра́ведныхъ похвало̀. съ ни́миже молѝ хрⷭ҇та̀ бг҃а на́шего, ѿ бѣ́дъ и҆зба́вити пою́щыѧ тѧ̀.
Сла́ва, гла́съ в҃:
Ѿ нече́стїѧ во благоче́стїе прише́дый, свѣ́томъ разꙋ́мнымъ ѿ бг҃а просвѣще́нъ бы́въ, возненави́дѣлъ є҆сѝ ѻ҆те́ческꙋю любо́вь, и҆ возлюби́лъ є҆сѝ и҆́стиннꙋю вѣ́рꙋ хрⷭ҇то́вꙋ, гра́да на́шегѡ ꙗ҆́кѡ дости́гнꙋвъ, въ не́мъ чи́стымъ и҆ непоро́чнымъ житїе́мъ гдⷭ҇еви ᲂу҆годи́лъ є҆сѝ, и҆ мнѡ́гїѧ лю́ди ᲂу҆диви́лъ є҆сѝ чꙋдесы̀, бг҃облаже́нне і҆ѡа́нне. но ны́нѣ и҆мѣ́ѧ дерзнове́нїе ко влⷣцѣ всѣ́хъ бг҃ꙋ, молѝ ѡ҆ и҆̀же вѣ́рою творѧ́щихъ всечестнꙋ́ю твою̀ па́мѧть, и҆ притека́ющихъ со ᲂу҆се́рдїемъ къ чꙋде́сномꙋ гро́бꙋ твоемꙋ̀, и҆зба́витисѧ страсте́й, дꙋше́вныхъ же вкꙋ́пѣ и҆ тѣле́сныхъ, и҆ всѧ́ческихъ бѣ́дъ и҆ и҆скꙋше́нїй, и҆ спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ пра́здника. Тропа́рь, гла́съ є҃:
Нагото́ю тѣле́сною и҆ терпѣ́нїемъ ѡ҆бнажи́лъ є҆сѝ вра̑жїѧ кова̑рствїѧ, ѡ҆блича́ѧ неподо́бное є҆гѡ̀ дѣѧ́нїе, ѕѣ́льнѣ стражда̀ со́лнечный ва́ръ, и҆ нꙋ́ждныѧ вели̑кїѧ стꙋ́дєни мра́за, и҆ ѻ҆гнѧ̀ не чꙋ́лъ є҆сѝ, бж҃їею по́мощїю покрыва́емь, і҆ѡа́нне премꙋ́дре: молѝ ѡ҆ вѣ́рою творѧ́щихъ па́мѧть твою̀, че́стнѡ и҆ ᲂу҆се́рднѡ притека́ющихъ къ ра́цѣ моще́й твои́хъ, и҆зба́витисѧ ѿ бѣ́дъ, и҆ паде́нїѧ и҆збѣжа́ти.
Сла́ва, и҆ ны́нѣ, бг҃оро́диченъ, и҆лѝ пра́здника.
На ᲂу҆́трени тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника.
По а҃-й стїхоло́гїи сѣда́ленъ, гла́съ и҃. Подо́бенъ: Премꙋ́дрости:
Ѿ ю҆́ности ꙗ҆́кѡ свѣти́льникъ возсїѧ́лъ є҆сѝ, бл҃же́нне, ѕѣ́льнымъ воздержа́нїемъ ᲂу҆мертви́въ плотска̑ѧ взыгра̑нїѧ. тѣ́мъ и҆ на высотꙋ̀ восте́клъ є҆сѝ бг҃оразꙋ́мїѧ, пресла́вне, пожи́въ въ мі́рѣ бг҃оꙋго́днѡ, посрами́лъ є҆сѝ бѣсѡ́вскаѧ ѡ҆полчє́нїѧ, і҆ѡа́нне всеблаже́нне. сегѡ̀ ра́ди вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Въ ти́нꙋ впа́дъ грѣхѡ́въ, и҆ нѣ́сть мнѣ̀ постоѧ́нїѧ, лю́тѣ потопи́ мѧ бꙋ́рѧ прегрѣше́нїй: по ꙗ҆́кѡ ро́ждши сло́ва, є҆ди́нагѡ чл҃вѣколю́бца, на мѧ̀ раба̀ твоего̀ при́зри, и҆ и҆зба́ви мѧ̀ всѧ́кагѡ грѣха̀, и҆ страсте́й дꙋшетлѣ́нныхъ, и҆ всѧ́кагѡ ѡ҆ѕлобле́нїѧ лꙋка́вагѡ ᲂу҆бі́йцы: бцⷣе неискꙋсомꙋ́жнаѧ, молѝ хрⷭ҇та̀ бг҃а, грѣхѡ́въ ѡ҆ставле́нїе да́ти мѝ, тебе́ бо наде́ждꙋ и҆́мамъ ра́бъ тво́й.
По в҃-й стїхоло́гїи сѣда́ленъ, гла́съ д҃:
Ꙗ҆́кѡ въ домꙋ̀ вои́стиннꙋ, на мѣ́стѣ пꙋ́стѣ, посредѣ̀ безꙋ́мныхъ человѣ̑къ всели́всѧ, бг҃омꙋ́дре і҆ѡа́нне, всѧ́ко ѡ҆ѕлобле́нїе претерпѣва́ѧ, дѡ́брыѧ дѣ́тєли ꙗ҆́коже ѳѷмїа́мъ благово́ненъ, и҆ же́ртвꙋ благопрїѧ́тнꙋ бг҃ꙋ прине́слъ є҆сѝ. тѣ́мже дерзнове́нїе стѧжа́въ къ немꙋ̀, молѝ дарова́ти ѡ҆чище́нїе согрѣше́нїй, вѣ́рою хва́лѧщымъ свѧтꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Неискꙋсобра́чнаѧ невѣ́сто приснодв҃о, съ пра́ведными восхвалѧ́емъ тѧ̀, ꙗ҆́кѡ тобо́ю вели́чїе сотворѝ на́мъ дне́сь, сн҃ъ тво́й и҆ бг҃ъ превѣ́чный ѿ ѻ҆ц҃а̀, и҆́же въ ложесна́хъ твои́хъ вмѣсти́тисѧ и҆зво́ли, да ѿ ле́сти свободи́тъ ро́дъ на́шъ.
По полѷеле́и сѣда́ленъ, гла́съ и҃ Подо́бенъ: Премꙋ́дрости:
Ꙗ҆́кѡ врача̀ премꙋ́дра, и҆ ᲂу҆го́дника гдⷭ҇нѧ бг҃опрїѧ́тна восхва́лимъ, чꙋде́сномꙋ твоемꙋ̀ гро́бꙋ прикаса́ющесѧ, бг҃омꙋ́дре: соше́дшесѧ же любо́вїю и҆ вѣ́рою, во ѱалмѣ́хъ и҆ пѣ́нїихъ возра́дꙋемсѧ сла́вѧще хрⷭ҇та̀, таковꙋ́ю благода́ть тебѣ̀ дарова́вшаго и҆сцѣле́нїй, і҆ѡа́нне всеблаже́нне. є҆го́же молѝ, согрѣше́нїй ѡ҆ставле́нїе дарова́ти, вѣ́рою и҆ любо́вїю пра́зднꙋющымъ всечестнꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Степє́нна, а҃-й а҆нтїфѡ́нъ д҃-гѡ гла́са: Прокі́менъ: Возвесели́тсѧ пра́ведникъ ѡ҆ гдⷭ҇ѣ: Сті́хъ: Оу҆слы́ши, бж҃е, гла́съ мо́й: Є҆ѵⷢ҇лїе матѳе́а, зача́ло м҃г. По н҃-мъ ѱалмѣ̀ стїхи́ра, гла́съ д҃:
Человѣ́че бж҃їй, и҆ вѣ́рный ра́бе, ᲂу҆го́дниче хрⷭ҇то́въ, соверши́телю тогѡ̀ бжⷭ҇твенныхъ повелѣ́нїй, мꙋ́же ди́вный въ чꙋдесѣ́хъ, сто́лпе и҆ ᲂу҆твержде́нїе гра́да на́шегѡ ᲂу҆́стюга, црⷭ҇твїѧ наслѣ́дниче, бг҃облаже́нне і҆ѡа́нне, дерзнове́нїе и҆мѣ́ѧ ко хрⷭ҇тꙋ̀ бг҃ꙋ, непреста́ннѡ молѝ ѡ҆ дꙋша́хъ на́шихъ.
Канѡ́нъ бцⷣы, и҆лѝ пра́здника, со і҆рмосо́мъ на ѕ҃: и҆ ст҃а́гѡ на и҃:
Творе́нїе ѳеофа́ново.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Прича́стїемъ є҆́же къ бг҃ꙋ, прпⷣбне, бы́лъ є҆сѝ свѣ́тъ, и҆ къ немꙋ̀ ѿлꙋчи́лсѧ є҆сѝ, і҆ѡа́нне бл҃же́нне, жела́нїй кра́йнихъ, благи́хъ наде́ждъ твои́хъ, ѻ҆́ч҃е, и҆сполне́нїе прїѧ́лъ є҆сѝ.
Жела́нїемъ сꙋ́щимъ къ бг҃ꙋ распала́емь, мі́ръ ѡ҆ста́вилъ є҆сѝ, и҆ спꙋ́тника ѡ҆брѣ́лъ є҆сѝ хрⷭ҇та̀, ѻ҆́ч҃е і҆ѡа́нне сла́вне: съ ни́мже стезю̀ проше́лъ є҆сѝ спаси́тельнꙋю ра́дꙋѧсѧ.
Ѡ҆богати́тисѧ и҆́миже ника́коже и҆скꙋша́емыми возжела́въ, бога́тство и҆ сла́вꙋ вре́меннꙋю, мꙋ́дре, и҆ пи́щꙋ мимотекꙋ́щꙋю, мїрско́е достоѧ́нїе доблемꙋ́дреннѣ ѿри́нꙋлъ є҆сѝ.
Бг҃оро́диченъ:
Кра́снꙋю, и҆збра́ннꙋю, всечестнꙋ́ю и҆ непоро́чнꙋю разꙋмѣ́въ тѧ̀, бж҃їе сло́во всели́сѧ въ тѧ̀, и҆ ро́ждсѧ и҆зъ тебє̀, сы́ны сотворѝ благода́тїю бцⷣꙋ чтꙋ́щыѧ тѧ̀.
Пѣ́снь г҃. І҆рмо́съ:
Весели́тсѧ ѡ҆ тебѣ̀ це́рковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Оу҆се́рднѡ мы́слей совлече́сѧ дѣѧ́нїемъ, побѣжда́ѧ вра̑жїѧ полкѝ бжⷭ҇твеннымъ посо́бїемъ дх҃а.
Ра́нами бжⷭ҇твенными и҆ воздержа́нїемъ, и҆ бїе́нїемъ, страсте́й мїрски́хъ, ѻ҆́ч҃е і҆ѡа́нне, и҆збѣ́глъ є҆сѝ.
Оу҆мори́ша врага̀ по́стницы твоѝ, і҆и҃се, ᲂу҆мерщвле́нїѧ ра́достнѡ, влⷣко, твоегѡ̀ живоно́снагѡ возжелѣ́вше.
Бг҃оро́диченъ:
И҆збавлѧ́ющи человѣ́ки преслꙋша́нїѧ, и҆ лю́тагѡ паде́нїѧ, всемꙋ̀ вино́внаго, чⷭ҇таѧ и҆ всенепоро́чнаѧ, родила̀ є҆сѝ.
Сѣда́ленъ, гла́съ є҃:
Согла́сїемъ бжⷭ҇твеннымъ ѡ҆зарѧ́емь, въ пꙋти̑ ведꙋ́щыѧ бжⷭ҇твеннымъ сїѧ́нїемъ ходи́въ вѣ́рнѡ, ѻ҆́ч҃е пра́ведне і҆ѡа́нне, врагѡ́въ ѿбѣ́гъ прило́гѡвъ, сн҃ъ же свѣ́та и҆ днѐ ꙗ҆ви́лсѧ є҆сѝ, і҆ѡа́нне бг҃облаже́нне.
Два́жды.
Сла́ва, и҆ ны́нѣ, бг҃оро́диченъ:
Мт҃и бж҃їѧ пречⷭ҇таѧ, гра́дъ хрⷭ҇тїа́нскїй и҆зба́ви, и҆ лю́ди твоѧ̀ ѻ҆бы́чнѡ зовꙋ́щыѧ, проти́витисѧ врагѡ́мъ, и҆ гѡ́рдымъ мы́слемъ посо́бствꙋй, да вопїе́мъ тѝ: ра́дꙋйсѧ, бл҃гослове́ннаѧ.
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крестѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Соедини́всѧ къ стезѝ, пра́ведне и҆ бг҃оно́сне, въ бжⷭ҇твенный гра́дъ вше́лъ є҆сѝ, прпⷣбне і҆ѡа́нне, спаси́тельнымъ сїѧ́нїемъ ѡ҆богати́всѧ.
Є҆диноѻбра́зенъ, прпⷣбне і҆ѡа́нне, смы́сломъ бг҃оно́снымъ, бл҃же́нне, бы́въ, бжⷭ҇твенными повѣстьмѝ, и҆ бжⷭ҇твенною ѻ҆де́ждою ѡ҆дѣ́ѧлсѧ є҆сѝ.
Се́рдце твоѐ скрижа́ль ѡ҆чище́нꙋ, ст҃а́гѡ дх҃а бл҃года́ть ѡ҆брѣ́тши, ѻ҆́ч҃е, написа̀ соверше́ннѡ безстра́стїе, вѣ́рꙋ и҆ любо́вь нелицемѣ́рнꙋ.
Бг҃оро́диченъ:
Сѣдѧ́й на престо́лѣ превознесе́ннѣ херꙋві́мстѣмъ, ꙗ҆́кѡ престо́лъ тѧ̀ и҆мѣ́ѧ, на рꙋкꙋ̀ твоє́ю почѝ, марі́е бг҃оневѣ́сто, пресла́вный бг҃ъ.
Пѣ́снь є҃. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Пресвѣ́тлꙋю зарю̀ прїи́мъ, і҆ѡа́нне, ꙗ҆́кѡ со́лнце ꙗ҆ви́лсѧ є҆сѝ, бѣсо́вскꙋю тмꙋ̀ ѿгонѧ́ѧ, достоблаже́нне.
Твои́мъ жела́нїемъ, хрⷭ҇тѐ, ѡ҆крили́всѧ бл҃же́нный і҆ѡа́ннъ, жела́нїе тѣле́сное, ꙗ҆́коже и҆згре́бїе мїрско́е мꙋ́дрѣ ѿтрѧсѐ.
Си́лою бжⷭ҇твенною дꙋ́шꙋ ᲂу҆крѣпи́въ, въ мі́ръ го́рнїй всели́лсѧ є҆сѝ, свободи́всѧ страсте́й, ѻ҆́ч҃е бг҃омꙋ́дре і҆ѡа́нне.
Бг҃оро́диченъ:
Речє́нїѧ прⷪ҇рѡ́къ соверши́шасѧ, дв҃а родѝ бг҃а сло́ва, вы́ше є҆стества̀ и҆ сло́ва пребы́вши дв҃ою.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Оу҆́мъ тво́й ве́сь къ бг҃ꙋ простира́ѧ, непреста́нными поꙋчє́нїи, плотскі́ѧ любвѐ не пощадѣ́лъ є҆сѝ, благи́мъ хода́тайствомъ, і҆ѡа́нне, присвое́нїѧ.
Ни скве́рныѧ вражды̀ прїѧ́тъ, блаже́нне, посредѝ тебѣ̀ мі́ра живꙋ́щꙋ, чи́стыми же па́че мольба́ми ѡ҆чища́еши сквє́рны дꙋшє́вныѧ притека́ющихъ къ ра́цѣ моще́й твои́хъ.
Ты̀ плотски́хъ мꙋдрова́нїй вы́шши по́мыслъ и҆мѣ́ѧ, не ᲂу҆ѧзви́лсѧ є҆сѝ посредѝ же́нъ ѡ҆бнажа́емь: безстра́стїѧ бо ѻ҆де́ждею, і҆ѡа́нне, ѡ҆бле́клсѧ є҆сѝ.
Бг҃оро́диченъ:
Оу҆сты̀ и҆ по́мысломъ и҆ се́рдцемъ, пречⷭ҇таѧ, тѧ̀ бцⷣꙋ проповѣ́даю: тобо́ю бо бг҃ꙋ примири́хомсѧ, ѿринове́ннїи престꙋпле́нїемъ пе́рвѣе пра́ѻц҃а.
Конда́къ, гла́съ и҃:
Вы́шнїѧ красоты̀ жела́ѧ, ни́жнїѧ сла́дости тѣле́сное ꙗ҆де́нїе тща́тельнѡ ѡ҆ста́вилъ є҆сѝ, нестѧжа́нїемъ сꙋ́етнагѡ мі́ра возлюби́лъ є҆сѝ а҆́гг҃льское житїѐ, преходѧ̀ сконча́всѧ, і҆ѡа́нне бл҃же́нне: съ ни́миже молѝ хрⷭ҇та̀ бг҃а непреста́ннѡ ѡ҆ всѣ́хъ на́съ.
І҆́косъ:
Ка́кѡ возмогꙋ̀ грѣ́шный и҆ скве́рный а҆́зъ, вкꙋ́пѣ дꙋше́ю и҆ тѣ́ломъ, и҆списа́ти сꙋ́щее во пло́ти равноа́гг҃льное житїѐ твоѐ, и҆ пресла̑внаѧ чꙋдеса̀; а҆́ще ᲂу҆́бѡ мно́зи премꙋ́дрїи не дости́гнꙋтъ и҆сповѣ́дати мно́гагѡ твоегѡ̀ терпѣ́нїѧ и҆ смире́нїѧ, и҆ те́плыѧ ко хрⷭ҇тꙋ̀ любвѐ. но ѻ҆ба́че надѣ́ѧсѧ на твоѐ безѕло́бїе, ѽ бл҃же́нне, си́це вопїю́ ти: ра́дꙋйсѧ, пресвѣ́тлаѧ ѕвѣздо̀ ѿ ю҆́га возсїѧ́вшаѧ, и҆ къ восто́кꙋ прише́дшаѧ: ра́дꙋйсѧ, возненави́дѣвый ѻ҆те́ческꙋю любо́вь, хрⷭ҇та́ же є҆ди́наго надъ всѣ́ми сꙋ́щаго бг҃а всѣ́мъ се́рдцемъ возлюби́вый, и҆ томꙋ̀ невозвра́тнымъ жела́нїемъ послѣ́довавый: ра́дꙋйсѧ, бꙋ́йственное и҆ ю҆ро́дственное є҆́же по а҆пⷭ҇лꙋ жи́тельство и҆збра́вый: ра́дꙋйсѧ, премѣни́вый тлѣ̑ннаѧ и҆ настоѧ̑щаѧ наде́ждею бꙋ́дꙋщихъ бла̑гъ: ра́дꙋйсѧ, дре́внемꙋ і҆́ѡвꙋ ᲂу҆подо́бивыйсѧ терпѣ́нїемъ: ра́дꙋйсѧ, страстоте́рпче хрⷭ҇то́въ непобѣди́мый, при́снѡ побѣди́вый дїа́вола твои́мъ смире́нїемъ: ра́дꙋйсѧ, ꙗ҆́кѡ дре́внїй ѻ҆́нъ ла́зарь ни́щїй, почива́ѧ ны́нѣ въ ло́нѣхъ а҆враа́млихъ: ра́дꙋйсѧ, и҆́же по ѿше́ствїи мі́ра сегѡ̀, сꙋ́щымъ въ бѣда́хъ и҆ и҆скꙋше́нїихъ гото́въ ѡ҆брѣта́ѧйсѧ предста́тель, и҆ застꙋ́пникъ гра́дꙋ на́шемꙋ ᲂу҆́стюгꙋ: ра́дꙋйсѧ, вездѣ̀ призыва́ющыѧ тѧ̀ бы́стрѡ предварѧ́ѧй: ра́дꙋйсѧ, бг҃омꙋ́дре і҆ѡа́нне.
Пѣ́снь з҃. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Содержи́мь сы́й ко хрⷭ҇тꙋ̀, прпⷣбне ѻ҆́ч҃е і҆ѡа́нне, бжⷭ҇твенною любо́вїю дрꙋги́хъ спастѝ, и҆̀хже ра́достнѡ спа́слъ и҆ и҆зба́вилъ є҆сѝ, вопїѧ̀: бл҃гослове́нъ бг҃ъ ѻ҆тє́цъ на́шихъ.
Съ нб҃сѐ тебѣ̀ пода́ннꙋю, ѻ҆́ч҃е і҆ѡа́нне, прїи́мъ пи́щꙋ, се́ю препита́въ всѣ́хъ благопоко́рнѡ прїе́млющихъ твоѧ̑ повелѣ̑нїѧ, и҆́миже до́лꙋ влекꙋ́щїй грѣ́хъ ѡ҆ставлѧ́хꙋ, бл҃же́нне.
Послѣ́довавъ ѻ҆тч҃скимъ преда́нїємъ, ѻ҆́ч҃е і҆ѡа́нне мꙋ́дре, па́гꙋбꙋ ѿри́нꙋти заповѣ́далъ є҆сѝ, зовы́й бг҃ꙋ: благослове́нъ бг҃ъ ѻ҆тє́цъ на́шихъ.
Бг҃оро́диченъ:
Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ: тобо́ю бо даде́сѧ ра́дость, бцⷣе, зовꙋ́щымъ: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.
Пѣ́снь и҃. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Всесвѣ́тлаѧ ѕвѣзда̀, сꙋ́щихъ въ тимѣ́нїи страсте́й приводѧ̀ къ животꙋ̀, твори́ти бжⷭ҇твєнныѧ за́пѡвѣди, и҆ нечи̑стыѧ цѣломꙋ́дреннѡ жи́ти, ѿго́ниши лю̑тыѧ недꙋ́ги, вопїѧ̀: благослови́те, по́йте и҆ превозноси́те є҆го̀ во вѣ́ки.
Ты̀ цѣ́лъ ᲂу҆мо́мъ въ кро́вѣ чꙋ́дныхъ, мꙋ́дре, мно́гихъ ᲂу҆лови́лъ є҆сѝ ю҆ро́дствовати гдⷭ҇а ра́ди, вѣ́дый нарꙋга́емь бы́ти, вопїѧ̀, честнѣ́йшїй і҆ѡа́нне блаже́нне: благослови́те, по́йте и҆ превозноси́те є҆го̀ во вѣ́ки.
Соверше́нъ є҆ди́нъ свои́хъ сꙋ́щихъ сла́вѧй гдⷭ҇ь прославлѧ́ѧ тѧ̀, прпⷣбне, ко гро́бꙋ твоемꙋ̀ притека́ющыѧ и҆сцѣлѧ́етъ свѣтлослове́ньми зовꙋ́щыѧ: благослови́те, по́йте и҆ превозноси́те є҆го̀ во вѣ́ки.
Бг҃оро́диченъ:
И҆збавлѧ́ѧй на́съ возсїѧ̀ и҆зъ тебє̀ гдⷭ҇ь, дв҃о чⷭ҇таѧ, є҆го́же молѝ, влⷣчце, просвѣти́ти пою́щыѧ тѧ̀, и҆ ѡ҆бстоѧ́нїѧ на́съ и҆зба́вити пою́щихъ: благослови́те, по́йте и҆ превозноси́те є҆го̀ во вѣ́ки.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Всѣ́мъ се́рдцемъ трⷪ҇цѣ ᲂу҆се́рднѡ предложи́всѧ, и҆́же ѿ неѧ̀ лꙋчꙋ̀ бг҃одѣ́льнѡ прїи́мъ, свѣтови́дѣнъ бы́въ со а҆́гг҃лы ликꙋ́еши.
Жела́нїемъ бжⷭ҇твеннымъ прїедини́всѧ, и҆ воздержа́нїемъ просвѣ́щсѧ, ча́емыхъ вѣ́чныхъ бла̑гъ во прича́стїи бы́въ, бг҃облаже́нне і҆ѡа́нне, и҆ наслажде́нїи.
Твоѧ̀ болѣ̑зни и҆ по́ты во вселе́ннѣй сла́вѧтсѧ, ты́ же нбⷭ҇ною сла́вою пита́ѧсѧ, і҆ѡа́нне, на́съ непреста́ннѡ помина́й.
Бг҃оро́диченъ:
Спаси́ мѧ, всѣ́хъ ро́ждши и҆зба́вителѧ и҆ бл҃годѣ́телѧ, разори́вши дꙋшѝ моеѧ̀ ѻ҆́блакъ, свѣ́та ѻ҆́блаче, ст҃а́ѧ влⷣчце, си́льна содѣ́лай на стра̑сти борю́щыѧ мѧ̀.
Свѣти́ленъ:
Совѣ́та ᲂу҆дали́лсѧ є҆сѝ, бѣ́гаѧ нечести́выхъ сожи́тельства: хрⷭ҇тꙋ́ же надъ всѣ́ми бг҃ꙋ на́шемꙋ непоро́чнымъ житїе́мъ ᲂу҆годи́лъ є҆сѝ, і҆ѡа́нне. є҆го́же ны́нѣ молѝ ѡ҆ на́съ рабѣ́хъ твои́хъ, вѣ́рою пра́зднꙋющихъ всечестнꙋ́ю па́мѧть твою̀, бг҃омꙋ́дре і҆ѡа́нне.
Бг҃оро́диченъ:
Мꙋ́дрость ѵ҆поста́снꙋю, и҆ сло́во пресꙋ́щное, и҆ врача̀ всѣ́хъ поро́ждши, дв҃о, стрꙋ́пы и҆ ꙗ҆́звы дꙋшѝ моеѧ̀ и҆сцѣлѝ лю̑тыѧ и҆ многоврє́менныѧ, и҆ ᲂу҆ста́ви се́рдца моегѡ̀ страстна̑ѧ помышлє́нїѧ.
На хвали́техъ стїхи̑ры, на д҃, гла́съ д҃. Поⷣ: Да́лъ є҆сѝ зна́менїе:
Да́лъ є҆сѝ при́тчꙋ терпѣ́нїѧ и҆ мꙋ́жества, ꙳ пребл҃гі́й гдⷭ҇и, ꙳ пра́веднаго і҆ѡа́нна и҆ многочꙋде́снаго, ꙳ добродѣ́тельми и҆ словесы̀, ꙳ и҆ дѣ́лы сїѧ́юща, ꙳ цѣломꙋ́дрїемъ ᲂу҆краша́ема и҆ кро́тостїю. ꙳ тѣ́мъ твоѐ неизрече́нное смотре́нїе сла́вимъ, ꙳ і҆и҃се всеси́льне, и҆ сп҃се дꙋ́шъ на́шихъ.
Пра́веденъ и҆ неѕло́бивъ, ꙳ и҆́стиненъ же и҆ непоро́ченъ и҆ вѣ́ренъ, ꙳ ᲂу҆клонѧ́ѧсѧ ѿ всѧ́кїѧ ѕло́бныѧ ве́щи, ꙳ показа́лсѧ є҆сѝ, і҆ѡа́нне бл҃же́нне, ꙳ просвѣще́нъ добродѣ́тельми, ꙳ и҆ благоче́стїемъ сїѧ́ѧ: ꙳ тѣ́мъ тѧ̀ ᲂу҆блажа́емъ, ꙳ и҆ ст҃о́е твоѐ и҆ честно́е дне́сь пра́зднꙋемъ ᲂу҆спе́нїе, ꙳ ра́дꙋющесѧ, бг҃омꙋ́дре.
Цѣломꙋ́дрїемъ и҆ благовѣ́рїемъ, ꙳ ꙗ҆́кѡ баграни́цею многоцѣ́нною ѡ҆дѣ́ѧвсѧ, і҆ѡа́нне, ꙳ пра́вдою же и҆ кро́тостїю, ꙳ ꙗ҆́кѡ бжⷭ҇твеннымъ вѣнце́мъ ᲂу҆вѧ́злсѧ є҆сѝ, ꙳ со стра́ждꙋщими хрⷭ҇та̀ ра́ди, ꙳ ца́рствовати возжелѣ́лъ є҆сѝ. и҆ ны́нѣ цр҃ю̀ си́лъ предстои́ши, ꙳ і҆и҃сꙋ всеми́лостивомꙋ, ꙳ и҆ сп҃сꙋ дꙋ́шъ на́шихъ.
Сла́ва, гла́съ и҃:
Добродѣ́телей твои́хъ, бг҃омꙋ́дре і҆ѡа́нне, и҆справлє́нїѧ ᲂу҆ѧсни́ша вѣ́рныхъ сердца̀: кто́ бо слы́ша безмѣ́рное твоѐ смире́нїе и҆ терпѣ́нїе, не ᲂу҆диви́тсѧ ко всѣ̑мъ кро́тости и҆ безѕло́бїю, къ скорбѧ́щымъ ми́лованїю, и҆ къ сꙋ́щымъ въ бѣда́хъ ско́ромꙋ поможе́нїю, къ пла́вающымъ немѧте́жномꙋ приста́нищꙋ, и҆ въ пꙋ́ть ше́ствꙋющымъ благо́мꙋ поспѣше́нїю; всѧ̑ бг҃олѣ́пнѡ предвари́лъ є҆сѝ досточꙋ́дне. и҆ ны́нѣ неꙋвѧда́емымъ вѣнце́мъ вѣнча́лсѧ є҆сѝ, ѿ рꙋкѝ вседержи́телѧ бг҃а: є҆го́же молѝ спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ пра́здника. Славосло́вїе вели́кое, и҆ ѿпꙋ́стъ.
На лїтꙋргі́и слꙋ́жба прпⷣбническаѧ.