Мѣ́сѧца тогѡ́же въ л҃-й де́нь. Прпⷣбнагѡ ѻ҆тца̀ на́шегѡ і҆саа́кїа, ѻ҆би́тели далма́тскїѧ.
Стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Ра̑йскїѧ добрѡ́ты зрѧ̀, ꙳ и҆ бога́тнѡ насла́ждсѧ нетлѣ́нныхъ цвѣтє́цъ ꙳ прозѧ́блъ є҆сѝ мі́рови ра́зꙋмъ бж҃їй, ꙳ є҆мꙋ́же прича́щшесѧ, прпⷣбне, ꙳ дꙋхо́вною любо́вїю, ꙳ дꙋ́шы возрасти́мъ, і҆саа́кїе.
Воздержа́нїемъ тѣ́ло ѡ҆гра́ждь, страстна̑ѧ движє́нїѧ ꙳ ᲂу҆мертви́лъ є҆сѝ, ѻ҆́ч҃е, ꙳ моли́твами и҆ бдѣ̑нїи. ꙳ тѣ́мже ꙗ҆́же въ тебѣ дꙋхо́внаѧ си́ла ѡ҆сѣни́вши, ꙳ показа́ тѧ мы́сленна свѣти́льника и҆ всемі́рна.
Мона́шеское житїѐ ты̀ ᲂу҆ѧсни́лъ є҆сѝ, ꙳ ѿ пꙋсты́ни, ѻ҆́ч҃е, возсїѧ́въ гра́дꙋ, ꙳ ꙗ҆́коже со́лнца. ꙳ тѣ́мже вѣ̑рныѧ ᲂу҆чє́нїи твои́ми просвѣти́лъ є҆сѝ, ꙳ благослови́ти ѻ҆ц҃а̀, и҆ сн҃а, ꙳ и҆ дх҃а є҆диносꙋ́щнаго.
Стїхи̑ры бцⷣы, гла́съ и҆ подо́бенъ то́йже:
Ѡ҆держи́ми падє́нїи ненаде́жными, ꙳ чⷭ҇таѧ, ꙳ тѧ̀ предста́тельницꙋ є҆ди́нꙋ и҆мꙋ́ще, дв҃а, ꙳ вопїе́мъ благода́рственнѡ: ꙳ ѡ҆чи́сти ны̀, прест҃а́ѧ бг҃оневѣ́стро.꙳ ты́ бо є҆сѝ мі́рꙋ прибѣ́жище, ꙳ и҆ застꙋпле́нїе ро́дꙋ на́шемꙋ.
Жезло́мъ твоегѡ̀ предста́тельства, ꙳ бг҃ороди́тельнице чⷭ҇таѧ, ꙳ ѕвѣри̑ныѧ стра̑сти ꙳ ѻ҆каѧ́нныѧ дꙋшѝ моеѧ̀ ѿженѝ вско́рѣ, ꙳ ми́рнѡ живо́тъ мо́й ᲂу҆правлѧ́ющи, ꙳ и҆ ст҃о́мꙋ мѧ̀ ста́дꙋ и҆збра́нныхъ твои́хъ ѻ҆ве́цъ причтѝ.
Согрѣше́нїй пꙋчи́ною потоплѧ́емь, ꙳ къ ти́хомꙋ приста́нищꙋ ꙳ пречⷭ҇тыѧ твоеѧ̀ моли́твы, бг҃ороди́тельница, прибѣ́гъ, ꙳ взыва́ю тѝ: спаси́ мѧ, ꙳ держа́внꙋю твою̀ пода́вши десни́цꙋ рабꙋ̀ твоемꙋ̀, пренепоро́чнаѧ.
Сла́ва, и҆ ны́нѣ:
Нра́вомъ гнилы́мъ попо́лзсѧ, ни́цъ лежꙋ̀, ꙳ и҆ къ твое́й, дв҃о, притека́ю тишинѣ̀, ꙳ ѿ бꙋ́ри сопроти́вныѧ, ꙳ и҆ и҆скꙋше́нїй многоѻбра́зныхъ мѧ̀ и҆зба́ви: ꙳ да пою̀ твою̀ благода́ть непреста́ннѡ, ꙳ бцⷣе мт҃и приснодв҃о.
Крⷭ҇тобг҃оро́диченъ:
Оу҆ крⷭ҇та̀ предстоѧ́щи сн҃а твоегѡ̀ и҆ бг҃а, ꙳ и҆ долготерпѣ́нїе є҆гѡ̀ смотрѧ́ющи, ꙳ глаго́лаше пла́чꙋщи мт҃и чⷭ҇таѧ: ꙳ ᲂу҆вы̀ мнѣ̀, ча́до сладча́йшее, ꙳ что̀ сїѧ̑ стра́ждеши непра́веднѡ, сло́ве бж҃їй, ꙳ да спасе́ши человѣ́чество;
Канѡ́нъ.
Гла́съ и҃. Пѣ́снь а҃. І҆рмо́съ:
І҆и҃лѧ ѿ рабо́ты и҆зба́вилъ є҆сѝ, гдⷭ҇и, десни́цею твое́ю держа́вною: ꙗ҆́кѡ ѻ҆́наго спа́слъ є҆сѝ, ны́нѣ на́съ спасѝ.
Ѿ пꙋсты́нныхъ предѣ̑лъ прини́кнꙋвъ, прпⷣбне, собра́нїе є҆́реси расплѣни́въ, свѧ́те, ᲂу҆тверди́лъ є҆сѝ вѣ́рꙋ хрⷭ҇то́вꙋ.
Дв҃дски предъ царѝ, сла́вне, глаго́лѧ, никогда́же постыдѣ́лсѧ є҆сѝ, хрⷭ҇то́вꙋ хотѧ̀ цр҃ковь ᲂу҆тверди́ти.
Въ ти́нѣ пре́лести, приве́ргсѧ, прехва́льне, ꙗ҆́кѡ би́серъ просїѧ́лъ є҆сѝ, заре́ю дх҃а ᲂу҆ѧснѧ́емь, сла́вне.
Бг҃оро́диченъ:
Во ᲂу҆тро́бѣ заче́нши безлѣ́тнаго, пречⷭ҇таѧ, ѿ ѻ҆ц҃а̀ рожде́нна сн҃а, млⷣнца сего̀, непоро́чнаѧ дв҃о, породила̀ є҆сѝ.
Оу҆твердѝ на́шъ ᲂу҆́мъ и҆ се́рдца, нб҃са̀ сло́вомъ ᲂу҆твержде́й, во є҆́же пѣ́ти и҆ сла́вити тѧ̀, во спасе́нїе дꙋ́шъ на́шихъ.
Трꙋба̀ слове́сна дх҃а ꙗ҆ви́лсѧ є҆сѝ, ѻ҆́ч҃е, всѧ̑ созыва́ющи, ꙗ҆́коже на бра́нь, вра̑жїимъ ѡ҆полче́нїємъ проти́вꙋ ста́ти по́мощїю сп҃са хрⷭ҇та̀.
Лѣ́ствица мы́сленнаѧ показа́лсѧ є҆сѝ, бг҃оно́се, къ ца́рствꙋ ведꙋ́щи вы́шнемꙋ восходѧ́щыѧ вѣ́рою, ᲂу҆чє́нїи твои́ми ᲂу҆твержда́еми въ дꙋ́сѣ.
Гора̀ и҆́стиннѡ ꙗ҆́вствовалсѧ є҆сѝ ᲂу҆че́нїѧ, бг҃оно́се, любо́вїю влⷣки, ко хрⷭ҇то́вѣ цр҃кви всѧ̑ собира́ѧ, сопрѧжє́нныѧ добродѣ́тельми къ немꙋ̀.
Бг҃оро́диченъ:
Мт҃и и҆́стиннѡ показа́ласѧ є҆сѝ, ѽ дв҃о! є҆мманꙋ́ила ро́ждши бг҃а сло́ва: є҆го́же молѧ́щи не преста́й, безмꙋ́жнаѧ невѣ́сто, бл҃гослове́ннаѧ бцⷣе чⷭ҇таѧ.
Сѣда́ленъ, гла́съ и҃. Подо́бенъ: Премꙋ́дрости:
Тꙋчено́сный ѻ҆́блакъ дꙋхо́вный ꙗ҆ви́лсѧ є҆сѝ, преблаже́нне, сꙋ́щымъ на землѝ, напаѧ́ѧ ꙗ҆́кѡ браздꙋ̀ вѣ́рныхъ сердца̀, ѡ҆бте́къ концы̀ бж҃е́ственными словесы̀ твои́ми, до́ждь ᲂу҆че́нїй и҆сточи́лъ є҆сѝ, премꙋ́дре: тѣ́мже ꙗ҆́кѡ пото́ки, всѣ́хъ сердца̀ благово́нїе дх҃а, бг҃омꙋ́дреннѡ и҆зрасти́лъ є҆сѝ, бг҃оно́се і҆саа́кїе. молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити и҆ свѣ́тлое жили́ще добродѣ́телей совершѝ, свѣтоно́снаѧ нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.
Крⷭ҇тобг҃оро́диченъ:
А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше, пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧ тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бж҃е́ствєнныѧ стра̑сти твоѧ̑.
Пѣ́снь д҃. І҆рмо́съ:
Оу҆слы́шахъ слꙋ́хъ си́лы твоеѧ̀, и҆ возвесели́сѧ се́рдце моѐ ѡ҆ гдⷭ҇ѣ.
А҆гг҃лоподо́бно на землѝ показа́лъ є҆сѝ житїѐ, ликꙋ́еши съ нбⷭ҇ными си́лами.
Пе́рвѣе ты̀ мона́хѡвъ настоѧ́тель бы́въ, и҆зъ пꙋсты́ни, бг҃омꙋ́дре, сꙋ́щымъ во гра́дѣ ѻ҆́бразъ показа́лсѧ є҆сѝ сла́вне.
Па́мѧть твоѧ̀ вои́стиннꙋ ны́нѣ, і҆саа́кїе ѻ҆́ч҃е, весели́тъ сердца̀ пою́щихъ тѧ̀.
Бг҃оро́диченъ:
Бцⷣе, и҆ ны́нѣ ꙗ҆́кѡ при́снѡ, ѿ вра̑гъ беззако́нныхъ, моли́твами твои́ми свободѝ рабы̑ твоѧ̑.
Пѣ́снь є҃. І҆рмо́съ:
Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
Ѿ пꙋсты́ни вои́стиннꙋ, ꙗ҆́коже ѕвѣзда̀ свѣтла̀ возсїѧ́лъ є҆сѝ, и҆ є҆реті́ческꙋю но́щь ᲂу҆чє́нїи твои́ми ѿгна́лъ є҆сѝ.
Бразды̑ ᲂу҆держа́въ конѧ̀ ᲂу҆а́лентова, прехва́льне, ско́тскїй ра́зꙋмъ ѡ҆бличи́лъ є҆сѝ, ꙗ҆́вѣ посрами́въ є҆го̀.
Главꙋ̀ твою̀, ѻ҆́ч҃е, же́злїемъ положи́лъ є҆сѝ ᲂу҆ранѧ́тисѧ, мы́сленнѡ вѣ́ры твоеѧ̀ главꙋ̀ держѧ̀ хрⷭ҇та̀ бг҃а.
Бг҃оро́диченъ:
Херꙋві̑мъ ꙗ҆́вльшасѧ честнѣ́йши, дв҃о всепѣ́таѧ, молѝ сн҃а твоего̀ спастѝ дꙋ́шы пою́щихъ тѧ̀.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ, бж҃е на́шъ.
Проре́клъ є҆сѝ ᲂу҆а́лентꙋ, мꙋ́дре, ме́рзскꙋю сме́рть, проразꙋмѣ́нїемъ дꙋ́ха, и҆ ꙗ҆ви́лсѧ є҆сѝ вои́стиннꙋ прⷪ҇ро́къ сла́венъ.
Лопа́тою вѣ́ры вѣ́рныхъ ꙗ҆́кѡ пшени́цꙋ собра́лъ є҆сѝ, ᲂу҆а́лента ꙗ҆́кѡ пле́вы въ пле́вницѣ запали́лъ є҆сѝ, моли́твами твои́ми, мꙋ́дре.
Оу҆гла́дилъ є҆сѝ скрижа̑ли сердє́чныѧ вѣ́рою послꙋ́шающихъ тебє̀, бг҃омꙋ́дре і҆саа́кїе, начерта́въ на ни́хъ правосла́вїѧ ѻ҆́бразъ.
Бг҃оро́диченъ:
Ꙗ҆́же є҆ди́на сло́вомъ, пло́тїю сло́во ро́ждши, и҆зба́ви, мо́лимсѧ, сѣте́й вра́жїихъ дꙋ́шы на́шѧ.
Конда́къ, гла́съ и҃. Подо́бенъ: Ꙗ҆́кѡ нача́тки:
Ꙗ҆́кѡ ᲂу҆го́дникъ бж҃їй вѣ́рный, по хрⷭ҇то́вѣ цр҃кви ре́вностїю разже́гсѧ, бразды̑ ᲂу҆а́лентовы ᲂу҆держа́въ, проро́чески томꙋ̀ ѡ҆ затворе́нїи цр҃кве, па́гꙋбнꙋю сме́рть предре́клъ є҆сѝ, прпⷣбне. тѣ́мже при́снѡ молѝ ѡ҆ на́съ чтꙋ́щихъ тѧ̀, і҆саа́кїе прпⷣбне.
Пѣ́снь з҃. І҆рмо́съ:
Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Пода́вый прпⷣбномꙋ твоемꙋ̀ сло́во ѡ҆бличи́тельно къ мꙋчи́телевѣ ѕло́бѣ, благослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Во свѣ́тлѣй првⷣныхъ сла́внѡ ѻ҆би́тели водворѧ́ѧсѧ, ѻ҆́ч҃е, вопїе́ши зижди́телю: бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Ѻ҆́ч҃е честны́й, сп҃сꙋ моли́сѧ ѡ҆ на́съ немо́лчнѡ не престаѧ̀, и҆зба́витисѧ всѧ́кїѧ бѣды̀, и҆ неѿе́млемыѧ жи́зни ᲂу҆лꙋчи́ти ста́дꙋ твоемꙋ̀.
Бг҃оро́диченъ:
И҆́же во ᲂу҆тро́бꙋ дв҃ы всели́выйсѧ, и҆ въ не́й а҆да́ма назда́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Пѣ́снь и҃. І҆рмо́съ:
Безнача́льнаго цр҃ѧ̀ сла́вы, є҆гѡ́же трепе́щꙋтъ нбⷭ҇ныѧ си̑лы, по́йте свѧще́нницы, лю́дїе превозноси́те во всѧ̑ вѣ́ки.
Показа́вшаго правосла́вныѧ вѣ́ры побо́рника і҆саа́кїа всѝ по́йте свѧще́ннїи, лю́дїе превозноси́те во всѧ̑ вѣ́ки.
Ꙗ҆́кѡ ѻ҆вча̀ слове́сное ѿ пꙋсты́ни прише́лъ є҆сѝ, ѿгонѧ̀ ѕвѣ́ри ѿ ста́да хрⷭ҇то́ва, водворѧ́тисѧ въ мѣ́стѣхъ пꙋсты́хъ прогонѧ̀.
Не ᲂу҆боѧ́лсѧ є҆сѝ ᲂу҆а́лентовы, ѻ҆́ч҃е, лю́тыѧ и҆ ѕлы́ѧ ꙗ҆́рости, кро́тостїю дꙋшѝ: дѣ́йствоваше бо въ тебѣ̀ дх҃ъ и҆́стины.
Бг҃оро́диченъ:
Жи́зни и҆зъ тебє̀ ѿсѣче́сѧ ка́мень, ꙗ҆́коже пи́шетъ, безъ рꙋкѝ человѣ́чи, прест҃а́ѧ чⷭ҇таѧ, бг҃ъ благоволи́вый въ тѧ̀ всели́тисѧ.
Пѣ́снь ѳ҃. І҆рмо́съ:
Тѧ̀ бцⷣꙋ, мт҃рь свѣ́та, въ пѣ́снехъ велича́емъ.
Сокрꙋши́лъ є҆сѝ си̑лы безбо́жныхъ держа́внѡ, крѣ́постїю бжⷭ҇твеннагѡ дх҃а.
Разрꙋши́лъ є҆сѝ сою́зы, вѣ́ры сою́зомъ, є҆ресе́й полкѝ.
І҆саа́кїе бг҃омꙋ́дре, помина́ѧ къ бг҃ꙋ не преста́й, є҆́же спастѝ на́съ.
Бг҃оро́диченъ:
Ржⷭ҇тво̀ твоѐ, дв҃о, є҆́же въ печа́лехъ рожде́нїе є҆́ѵы претворѝ.