Мѣ́сѧца тогѡ́же въ ѳ҃-й де́нь. Ст҃ы́хъ и҆ пра́ведныхъ бг҃оѻтє́цъ і҆ѡакі́ма и҆ а҆́нны:

И҆ ст҃а́гѡ мч҃ника севирїа́на:

Въ то́йже де́нь преставле́нїе прпⷣбнагѡ ѻ҆тца̀ на́шегѡ и҆гꙋ́мена і҆ѡ́сифа волоцка́гѡ, но́вагѡ чꙋдотво́рца.

Слꙋ́жба є҆гѡ̀ пи́сана по се́й слꙋ́жбѣ.

И҆ ст҃и́телѧ ѳеодо́сїѧ черни́говскагѡ. Слꙋ́жба є҆гѡ̀ пи́сана въ приложе́нїи.

На Гдⷭ҇и, воззва́хъ: стїхи̑ры пра́здника, г҃, гла́съ а҃.

Подо́бенъ: Нбⷭ҇ныхъ чинѡ́въ:

І҆ѡакі́мъ и҆ а҆́нна торжествꙋ́ютъ, ꙳ нача́токъ ро́ждше на́шегѡ спасе́нїѧ, ꙳ є҆ди́нꙋ бцⷣꙋ: ꙳ съ ни́миже и҆ мы̀ пра́зднꙋемъ дне́сь, ꙳ ѿ ко́рене ѻ҆́нагѡ і҆ессе́ева, ꙳ блажа́ще дв҃ꙋ чⷭ҇тꙋю.

Бг҃овмѣсти́маѧ ѻ҆трокови́ца, ꙳ и҆ бцⷣа чⷭ҇таѧ, прⷪ҇ро́кѡвъ сла́ва, ꙳ дв҃дова дщѝ, ꙳ дне́сь ражда́етсѧ ѿ і҆ѡакі́ма и҆ а҆́нны цѣломꙋ́дренныѧ: ꙳ и҆ а҆да́мова клѧ́тва ꙗ҆́же на на́съ, ꙳ потреблѧ́етсѧ ржⷭ҇тво́мъ є҆ѧ̀.

Ꙗ҆́же пре́жде непло́днаѧ страна̀, ꙳ зе́млю плодоно́снꙋ ражда́етъ: ꙳ и҆ ѿ непло́дныѧ ᲂу҆тро́бы пло́дъ свѧ́тъ да́вши, млеко́мъ пита́етсѧ. ꙳ чꙋ́до стра́шно! пита́тельница жи́зни на́шеѧ, ꙳ ꙗ҆́же нбⷭ҇ный хлѣ́бъ во чре́вѣ прїе́мши, ꙳ млеко́мъ ѿ сосцꙋ̑ пита́етсѧ.

И҆́ны стїхи̑ры, ст҃ы́хъ, гла́съ д҃. Подо́бенъ: Да́лъ є҆сѝ зна́менїе:

Прїиди́те, ны́нѣ ликꙋ́имъ пѣ́сненнѡ, ꙳ ѽ празднолю́бцы. ꙳ и҆ вѣ́рнѡ пра́зднꙋимъ, ꙳ па́мѧть почита́юще і҆ѡакі́ма и҆ а҆́нны честны́ѧ дво́ицы: ꙳ ті́и бо роди́ша на́мъ бг҃ома́терь, ꙳ и҆ дв҃ꙋ чⷭ҇тꙋю. тѣ́мже и҆ преста́вишасѧ ѿ привре́менныхъ къ нетлѣ̑ннымъ, ꙳ и҆ присноживы̑мъ жили́щємъ, ꙳ молѧ́щесѧ спасти́сѧ на́мъ.

Ве́селѡ красꙋ́етсѧ тва́рь всѧ̀ дне́сь, ꙳ бцⷣе всепѣ́таѧ, ꙳ лѣ́тнюю приносѧ́щи па́мѧть є҆диномꙋ́дреннѡ, ꙳ твои́хъ роди́телей, ꙳ і҆ѡакі́ма чꙋ́днагѡ, ꙳ кꙋ́пнѡ и҆ а҆́нны торжествꙋ́ющи: ꙳ ра́дость бо и҆схода́тайствоваша, ꙳ тѧ̀ па́че наде́жды и҆зрасти́вше, свѣ́тъ ѡ҆блиста́вшꙋю, ꙳ и҆ пита́тельницꙋ жи́зни на́шеѧ.

Ра́дꙋетсѧ дне́сь а҆́нна и҆гра́ющи дꙋ́хомъ, ꙳ и҆ весели́тсѧ ра́дꙋющисѧ, ꙳ ᲂу҆лꙋчи́вши жела́нїе, ꙳ є҆гѡ́же жела́ше дре́вле благоча́дїѧ: ꙳ ѡ҆бѣща́нїѧ бо пло́дъ и҆ бл҃гослове́нїѧ бжⷭ҇твенный прозѧбѐ, ꙳ марі́ю всенепоро́чнꙋю, ꙳ бг҃а на́шего ро́ждшꙋю, ꙳ и҆ сл҃нце возсїѧ́вшꙋю, ꙳ во тмѣ̀ спѧ́щымъ.

Сла́ва, и҆ ны́нѣ, гла́съ є҃. Є҆фре́ма карі́а:

Ѽ бл҃же́ннаѧ дво́ица, вы̀ всѣ́хъ роди́телей превзыдо́сте, ꙗ҆́кѡ тва́ри всеѧ̀ преимꙋ́щꙋю прозѧблѝ є҆стѐ. и҆́стиннѡ бл҃же́нъ є҆сѝ і҆ѡакі́ме, таковы̀ ѻ҆трокови́цы бы́въ роди́тель. бл҃же́нна ложесна̀ твоѧ̑ а҆́нно, ꙗ҆́кѡ мт҃рь жи́зни на́шеѧ прозѧбла̀ є҆сѝ. бл҃же́нни сосцы̀, и҆́миже воздои́ла є҆сѝ, млеко́мъ пита́вшꙋю, пита́ющаго всѧ́кое дыха́нїе, є҆го́же моли́ти ва́мъ всебл҃же́ннїи мо́лимсѧ, поми́ловатисѧ дꙋша́мъ на́шымъ.

[Зрѝ] А҆́ще ли слꙋчи́тсѧ въ пѧто́къ ве́чера: Сла́ва, пра́здника: И҆ ны́нѣ, бг҃оро́диченъ пе́рвый гла́са настоѧ́щагѡ.

На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:

А҆́нна бг҃омꙋ́дренна и҆́стиною, гнѣздо̀ пти́че ви́дѣвши на дре́вѣ пре́жде, своѐ безча́дїе помѧнꙋ́вши, вопїѧ́ше: ᲂу҆вы̀ мнѣ̀ гдⷭ҇и, гдⷭ҇и, а҆́зъ грѣ́шна є҆ди́на ѡ҆бнища́хъ плодотворе́нїѧ ѿ тебє̀. тогда̀ чл҃вѣколю́бецъ бг҃ъ, пло́дъ є҆́й дв҃ꙋ, честнѣ́йшꙋю всеѧ̀ тва́ри, дадѐ.

Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.

А҆́нна бг҃омꙋ́дренна вои́стиннꙋ, безча́дное болѣ́нїе непло́дїю познава́ше пе́рвѣе, тѣ́мже молѧ́щисѧ, вопїѧ́ше къ бг҃ꙋ: печа́льнꙋ и҆ непло́днꙋ ᲂу҆́зꙋ разрѣшѝ: и҆ рождꙋ̀ ст҃о́е роди́ти тѧ̀ и҆мꙋ́щꙋю сло́во, є҆́же влⷣко хрⷭ҇тѐ жизнода́телю да́рꙋеши є҆́й: роди́тъ бо тѧ̀ сп҃са всѣ̑мъ человѣ́кѡмъ.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

И҆́стиннѡ влⷣка и҆ бг҃ъ же твою̀ моли́твꙋ ᲂу҆слы́шавъ, ꙗ҆́кѡ са́рринꙋ пре́жде, внегда̀ ᲂу҆слы́ша а҆́гг҃ловъ гла́съ, ра́дость тебѣ̀ проповѣ́дающь: бж҃їю мт҃рь роди́ши. и҆ возопи́ла є҆сѝ весе́лїемъ дꙋшѝ: влⷣка и҆ гдⷭ҇ь, бг҃ъ мо́й и҆ творе́цъ, и҆́стиною мнѣ̀ ѡ҆ста́ви ᲂу҆коре́нїе ро́ждшей приснодв҃ꙋ.

Сла́ва, и҆ ны́нѣ, гла́съ и҃:

И҆̀же и҆зъ непло́дныхъ ложе́снъ, же́злъ ст҃ꙋ́ю бцⷣꙋ и҆зрасти́вше, и҆зъ неѧ́же спасе́нїе мі́рꙋ возсїѧ̀ хрⷭ҇то́съ бг҃ъ, сопрꙋ́гъ свѧ́тъ, и҆ сожи́тельство свѧ́то, і҆ѡакі́мъ и҆ а҆́нна: ті́и преста́вльшесѧ къ нбⷭ҇нымъ селе́нїємъ, съ свое́ю дще́рїю пречⷭ҇тою дв҃ою, со а҆́гг҃лы ликꙋ́ютъ ѡ҆ мі́рѣ моли̑твы творѧ́ще. съ ни́миже и҆ мы̀ соше́дшесѧ благоче́стнѡ, воспѣва́юще глаго́лемъ: и҆̀же бг҃оѻтрокови́цею и҆ пречⷭ҇тою марі́ею, прароди́телє хрⷭ҇то́вы наре́кшесѧ, моли́тесѧ ѡ҆ дꙋша́хъ на́шихъ.

Тропа́рь ст҃ы́хъ, гла́съ в҃:

Пра́ведныхъ твои́хъ гдⷭ҇и, па́мѧть пра́зднꙋюще, тѣ́ми мо́лимъ тѧ̀, спасѝ дꙋ́шы на́шѧ.

И҆лѝ се́й, гла́съ а҃:

И҆̀же въ зако́ннѣй бл҃года́ти пра́ведни бы́вше, младе́нца бг҃ода́ннаго породи́ша на́мъ, і҆ѡакі́мъ и҆ а҆́нна. тѣ́мже дне́сь свѣ́тлѡ торжествꙋ́етъ ве́селѡ пра́зднꙋющи бжⷭ҇твеннаѧ цр҃ковь, честнꙋ́ю ва́шꙋ па́мѧть, сла́вѧщи бг҃а, воздви́гшаго ро́гъ спасе́нїѧ на́мъ въ домꙋ̀ дв҃довѣ.

Сла́ва, и҆ ны́нѣ, пра́здника: Ржⷭ҇тво̀ твоѐ бцⷣе дв҃о:

Пи́санъ на пра́здникъ.

Слꙋ́жба мꙋ́ченика пое́тсѧ на повече́рїи.

Канѡ́нъ.

Гла́съ и҃. Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Ѡ҆держа́ше велѣ́нїе нечести́вое, жре́ти і҆́дѡлѡмъ бездꙋ̑шнымъ же и҆ глꙋхи̑мъ: побѣжда́ше же хрⷭ҇то́съ. мч҃ническими крѣ́пкими и҆ до́блими противлє́нїи.

Свобожда́ше ѿ ᲂу҆́зъ ѿмета́ющыѧсѧ хрⷭ҇та̀, и҆ всѧ̑, ꙗ҆̀же ѡ҆брѣ́те чтꙋ́щыѧ того̀ бг҃а, всѧ́чески начина́ше мꙋ́чити: но прилꙋ́чсѧ тебѣ̀, бг҃омꙋ́дре, посрами́сѧ.

Оу҆диви́лъ є҆сѝ мч҃ниче ѕлочести́ваго, до́блественнѣ ᲂу҆стреми́всѧ на сꙋди́щи: и҆ богѡ́въ ло́жныхъ ѡ҆бличи́лъ є҆сѝ со дерзнове́нїемъ не́мощь и҆ гни́лость, и҆ некрѣ́пость.

Бг҃оро́диченъ:

Вмѣсти́ла є҆сѝ є҆ди́на, нб҃сы̀ невмѣсти́маго, ѻ҆трокови́це, во ᲂу҆тро́бѣ твое́й, бг҃олѣ́пнѣ все́льшагосѧ въ тѧ̀, и҆ є҆стество̀ человѣ́ческое ѿ тебє̀ прїе́мшаго.

Пѣ́снь г҃. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Ра́довалсѧ є҆сѝ бїе́мь за хрⷭ҇та̀ мꙋ́дре, ра́нами неми́лостивнѡ: и҆мѣ́лъ є҆си́ бо и҆звѣ́стное болѣ́зней воздаѧ́нїе.

Жи́лами ссѣка́емь, и҆змѣне́нїемъ ча́стымъ, сла́вне, мꙋчи́телей, и҆ сїѐ ꙗ҆́коже въ чꙋжде́мъ тѣлесѝ не ѡ҆щꙋща́лъ є҆сѝ.

Ѡ҆брѣ́лъ є҆сѝ возме́здїе ѿ хрⷭ҇та̀, мꙋ́дре, вѣне́цъ прїе́мъ пра́вды, и҆ ра́дость несконча́емꙋю.

Бг҃оро́диченъ:

Всѧ̀ бли́жнѧѧ моѧ̀, добра̀ и҆ непоро́чна бы́сть, тѧ̀ прови́дѧ дре́вле вопїѧ́ше соломѡ́нъ въ пѣ́снехъ.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Ласка̑нїи мꙋчи́тель твою̀ ᲂу҆мѧгчи́ти, мч҃ниче, крѣ́пость, и҆ побѣди́ти тѧ̀ надѣ́ѧсѧ, не́бо стрѣлѧ́ти мнѧ́ше.

Не чꙋ́вствꙋеши, безꙋ́мне, хрⷭ҇то́вꙋ си́лꙋ ᲂу҆крѣплѧ́ющꙋ мѧ̀, проти́вꙋ болѣ́знємъ и҆ трꙋдѡ́мъ, мꙋчи́телю взыва́лъ є҆сѝ, пресла́вне.

А҆́ще не бы̀ си́ла свы́ше пода́ннаѧ мнѣ̀, мꙋчи́телю взыва́ше севирїа́нъ, ка́кѡ ᲂу҆́бѡ бы́хъ мо́глъ, пло́ть сы́й, претерпѣ́ти ѿсѣчє́нїѧ ᲂу҆де́съ;

Бг҃оро́диченъ:

Прест҃а́ѧ бг҃оневѣ́сто, да́ждь мѝ по́мощь мольба́ми твои́ми, и҆зба́витисѧ льсти́вагѡ, да тѧ̀ сла́влю наде́ждꙋ мою̀.

Пѣ́снь є҃. І҆рмо́съ:

Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

На дре́во воздви́женъ бы́лъ є҆сѝ, сла́вне, и҆ по тѣ́лꙋ стро́ганъ ногтьмѝ, за всѣ́хъ влⷣчествꙋющаго.

Бж҃е мо́й, вопїѧ́лъ є҆сѝ, ᲂу҆крѣпѝ по́двигъ се́й сконча́ти мнѣ̀ мꙋче́нїѧ, стрꙋ́жемꙋ.

Ꙗ҆́кѡ ви́дѣ тѧ̀ мꙋчи́тель, сла́вне, неѡсла́бне, мꙋ̑ки терпѧ́ще, ᲂу҆жасе́сѧ ѻ҆каѧ́нный.

Бг҃оро́диченъ:

Наде́жда и҆ предста́тельнице, и҆ покро́ве мо́й бцⷣе, спаса́й мольба́ми твои́ми ѿ собла̑знъ ѕмїи́ныхъ.

Пѣ́снь ѕ҃. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Въ темни́цѣ тѧ̀ заключѝ лю́тый, и҆ гла́домъ понꙋ́ди тѧ̀ ѿврещи́сѧ хрⷭ҇та̀, є҆го́же возлюби́лъ є҆сѝ, бл҃же́нне, ѿ ю҆́ности.

Ведо́мъ, мꙋ́дре, въ темни́цꙋ, всѧ̑ зрѧ́щыѧ тѧ̀, хрⷭ҇та̀ не ѿстꙋпи́ти, со дерзнове́нїемъ ᲂу҆чѧ̀, нака́зовалъ є҆сѝ.

Мече́мъ ᲂу҆сѣщи́ тѧ, мч҃нче, лю́тый и҆ безꙋ́мный мꙋчи́тель повелѣ̀, не поже́рша і҆́дѡлѡмъ, но ты̀ небре́глъ є҆сѝ.

Бг҃оро́диченъ:

Въ ри́зꙋ мѝ ѡ҆блещи́сѧ свѣ́та, твои́ми моли́твами сотворѝ, бг҃оневѣ́сто влⷣчце, въ де́нь сꙋ́дный, пою́ща тѧ̀.

Сѣда́ленъ, гла́съ а҃. Подо́бенъ: Ли́къ а҆́гг҃льскїй:

До́блестїю дꙋшѝ воѡрꙋже́нъ, бг҃омꙋ́дре, и҆зда́лъ є҆сѝ себѐ къ разли̑чнымъ мꙋ́камъ, любо́вїю распала́емь влⷣки, пребога́те. тѣ́мъ ѡ҆бличи́лъ є҆сѝ мꙋчи́телей неи́стовство, и҆ вѣне́цъ ѿ бг҃а прїѧ́лъ є҆сѝ побѣ́ды нетлѣ́нный.

Пѣ́снь з҃. І҆рмо́съ:

Въ нача́лѣ зе́млю ѡ҆снова́вый, и҆ небеса̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и, бж҃е ѻ҆тє́цъ на́шихъ.

Ка́менїемъ ѻ҆́стрымъ ᲂу҆ста̀ твоѧ̑ сокрꙋшѝ нечести́вый, проповѣ́дающа со дерзнове́нїемъ хрⷭ҇та̀ посредѣ̀ пребеззако́нникѡвъ. є҆гѡ́же сла́вы полꙋчи́въ, ны́нѣ ликꙋ́еши та́мѡ.

Повѣ́шенъ на стѣнѣ̀ страстоте́рпче, мꙋчи́телѧ мно́гимъ гнѣ́вомъ, къ ка́мени тѧ́жкꙋ привѧ́занъ, не ѿве́рглсѧ є҆сѝ хрⷭ҇та̀, ѻ҆тцє́въ бг҃а препросла́вленна.

Ѽ тве́рдагѡ противле́нїѧ твоегѡ̀ бл҃же́нне! ѽ те́плыѧ любвѐ къ зижди́телю! є҆ѧ́же ра́ди вѣнце́мъ ᲂу҆краси́ тѧ нетлѣ́ннымъ, до́брѣ пострада́вша.

Бг҃оро́диченъ:

Ты̀ мо́й є҆сѝ свѣ́тъ, дв҃о бцⷣе, ты̀ є҆сѝ ра́дость и҆ покро́въ, и҆ приста́нище моѐ бл҃гослове́ннаѧ, и҆ тѧ̀ сла́влю, ꙗ҆́кѡ ро́ждшꙋю бг҃а ѻ҆тцє́въ на́шихъ.

Пѣ́снь и҃. І҆рмо́съ:

Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Претерпѣ́лъ є҆сѝ ра̑ны до конца̀, во́ине хрⷭ҇то́въ, и҆ преста́вилсѧ є҆сѝ ра́дꙋѧсѧ къ вы́шнемꙋ, пребл҃же́нне, црⷭ҇твїю.

Не посрами́лсѧ є҆сѝ хрⷭ҇та̀ ра́ди, доблемꙋ́дренне, претерпѣ́въ мꙋ̑ки разли̑чныѧ: тѣ́мже и҆ просла́вилсѧ є҆сѝ во всѧ̑ вѣ́ки.

Вѣнцено́сецъ со страда́льцы ны́нѣ ликꙋ́ѧ и҆́стиннѡ ѡ҆крꙋ́гъ цр҃ѧ̀, помина́й вѣ́рою твою̀ па́мѧть творѧ́щихъ.

Бг҃оро́диченъ:

Бг҃ороди́тельнице, хрⷭ҇тїа́нъ предста́тельнице, и҆зми́ ны всѧ́кїѧ нꙋ́жды, да тѧ̀ пое́мъ во всѧ̑ вѣ́ки.

Пѣ́снь ѳ҃. І҆рмо́съ:

Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Рꙋка́ми тебѐ лю́бѧщихъ, бл҃же́нне, твоѐ тѣ́ло ѡ҆прѧ́тано погребе́сѧ, ꙗ҆́кѡ ст҃о, и҆ и҆сцѣле́нїй и҆сточа́етъ стрꙋи̑, въ сла́вꙋ бж҃їю.

Ѽ чꙋ́до, ка́кѡ воста̀ ᲂу҆ме́рый ѻ҆́трокъ, и҆ срѣта́ше твоѐ тѣ́ло на пꙋтѝ, къ погребе́нїю несо́мо, мꙋ́чениче всечꙋ́дне.

Полꙋчи́въ вѣ́чное, бл҃же́нне, ца́рство, и҆ влⷣцѣ че́стнѣ предстоѧ̀, ѡ҆ пою́щихъ тѧ̀ те́плѣ моли́сѧ.

Бг҃оро́диченъ:

Диви́шасѧ а҆́гг҃лѡвъ чинонача̑лїѧ, воплоще́нна зрѧ́ще, тѧ̀ носѧ́щꙋю творца̀ вѣкѡ́въ приснодв҃ꙋ.

Стїхи̑ры, гла́съ д҃. Подо́бенъ: Да́лъ є҆сѝ зна́менїе:

Жи́лами ссѣка́емь, ꙳ хрⷭ҇та̀ ра́ди сла́вне, и҆ на дре́вѣ повѣ́шенъ, ꙳ и҆ пло́тїю стрꙋ́жемь неми́лостивнѡ бичмѝ, ꙳ жре́ти же і҆́дѡлѡмъ повелѣва́емь мꙋ́дре, ꙳ не ѿве́рглсѧ є҆сѝ всѣ́хъ гдⷭ҇а: ꙳ но ѡ҆бличи́лъ є҆сѝ болѣ́зньми твои́ми ꙳ не́мощь и҆ хꙋ́дость і҆́дѡльскꙋю, ꙳ и҆ бы́лъ є҆сѝ а҆́гг҃лѡвъ собесѣ́дникъ.

Ра́дꙋѧсѧ ѿлꙋчи́лсѧ є҆сѝ къ по́двигꙋ, ꙳ ꙗ҆́кѡ зако́нный страда́лецъ досточꙋ́дне, до́блимъ смы́сломъ, ꙳ ѡ҆ мꙋ́кахъ мч҃ниче неради́въ, ꙳ сме́ртїю же хрⷭ҇тꙋ̀ ꙳ ᲂу҆подо́битисѧ тща́сѧ, чꙋ́дне. ꙳ тѣ́мъ тѧ̀ вѣнце́мъ црⷭ҇твїѧ ᲂу҆красѝ ꙳ і҆и҃съ чл҃вѣколю́бецъ, ꙳ и҆ сп҃съ дꙋ́шъ на́шихъ.

Сла́ва, гла́съ то́йже:

Оу҆́зникъ ведо́мъ, ꙳ и҆ ꙗ҆́звами красѧ́сѧ, ꙳ зрѧ́щымъ повелѣва́лъ є҆сѝ ꙳ подо́битисѧ нра́вꙋ твоемꙋ̀, ꙳ къ нбⷭ҇нымъ, бл҃же́нне, воздаѧ́нїємъ смотрѧ́щымъ, ꙳ ꙗ҆̀же мно́го весе́лїе и҆ красотꙋ̀ подаю́тъ, ꙗ҆́кѡ нетлѣ̑ннаѧ, и҆ во вѣ́ки пребыва̑ющаѧ, ꙳ въ ни́хъ пребыва́ющыѧ ꙳ творѧ́ще наслѣ́дники дх҃омъ.

И҆ ны́нѣ, пра́здника.

Дне́сь и҆злїѧ́сѧ бжⷭ҇твенное бога́тство ꙳ бл҃года́ти влⷣки, ꙳ во всѧ̑ мі́ра концы̀, ꙳ ѿ и҆сто́чника непло́дныѧ, ꙳ дарова̑нїѧ и҆сточа́ющагѡ и҆́стиннѡ, ꙳ и҆ возвѣща́ющагѡ сегѡ̀ происхожде́нїе, ꙳ любо́вїю ржⷭ҇тво̀ є҆ѧ̀ чтꙋ́щымъ, ꙳ и҆ вопїю́щымъ: і҆и҃се всеси́льне, ꙳ ты̀ є҆сѝ сп҃съ дꙋ́шъ на́шихъ.

На ᲂу҆́трени, на Бг҃ъ гдⷭ҇ь: тропа́рь пра́здника, два́жды. Сла́ва, бг҃оѻтцє́въ. И҆ ны́нѣ, пра́здника.

По а҃-мъ стїхосло́вїи сѣда́ленъ, гла́съ г҃. Подо́бенъ: Дв҃а дне́сь:

Дв҃а дне́сь и҆ бцⷣа марі́а, черто́гъ неразори́мый нбⷭ҇нагѡ жениха̀, ражда́етсѧ ѿ непло́дныѧ а҆́нны бж҃їею во́лею, носи́ло бж҃їѧ сло́ва ᲂу҆гото́вльшисѧ: въ сїе́ бо предповелѣ́сѧ бы́ти ѻ҆трокови́ца, и҆ мт҃и сꙋ́щаѧ жи́зни.

Сла́ва, и҆ ны́нѣ, то́йже.

По в҃-мъ стїхосло́вїи сѣда́ленъ, гла́съ д҃. Поⷣ: Ско́рѡ предварѝ:

Дв҃де, ꙗ҆̀же клѧ́тсѧ тебѣ̀ дре́вле пома́завый тѧ̀, пло́дъ ѿ чресла̀ твоегѡ̀ на престо́лѣ твое́мъ и҆спо́лни, да́лъ марі́ю. зри́ши бо ю҆́же ѿ а҆́нны і҆ꙋ́довы, и҆ ра́дꙋешисѧ: и҆зъ неѧ́же хрⷭ҇то́съ воплоти́сѧ, сп҃съ всѧ́ческихъ, безмѣ́рною бл҃гостїю спаса́ѧ ро́дъ на́шъ.

Сла́ва, и҆ ны́нѣ, то́йже. Канѡ́нъ пра́здника, со і҆рмосо́мъ на ѕ҃: и҆ ст҃ы́хъ на ѕ҃ же. Канѡ́нъ пра́здника.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Грѧди́те вѣ́рнїи, дх҃омъ бжⷭ҇твеннымъ ра́дꙋющесѧ, ю҆́же ѿ непло́дове дне́сь прише́дшꙋю, человѣ́кѡвъ на спасе́нїе, приснодв҃ꙋ ѻ҆трокови́цꙋ пѣ́сньми почти́мъ.

Ра́дꙋйсѧ, чⷭ҇таѧ, мт҃и и҆ рабо̀ хрⷭ҇та̀ бг҃а, ꙗ҆́же пе́рвомꙋ хода́таица бл҃же́нствꙋ: человѣ́ческїй ро́дъ тѧ̀, всѝ досто́йнѡ пѣ́сньми сла́вимъ.

Жи́зни ражда́етсѧ дне́сь мо́стъ, и҆́мже человѣ́цы воззва́нїе паде́нїѧ, є҆́же ѿ а҆́да, ѡ҆брѣ́тшїи, хрⷭ҇та̀ жизнода́вца пѣ́сньми прославлѧ́ютъ.

И҆́нъ канѡ́нъ ст҃ы́хъ, є҆гѡ́же краегране́сїе:

Твоѧ̑ роди́тєли, всечⷭ҇таѧ, пою̀ цѣломꙋ́дреннѡ.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Свѣщꙋ̀ мы́сленное сл҃нце возблиста́вшꙋю, пло́тїю ѿ неѧ̀ возсїѧ́вшее, добродѣ́телей свѣ́тлостьми просїѧва́юще, роди́ти сподо́бистесѧ, а҆́нно бг҃омꙋ́драѧ, и҆ і҆ѡакі́мъ приснобл҃же́нный.

Всеѻбра́знымъ зрѣ́нїемъ къ бг҃ꙋ, и҆́стиннѡ бг҃опрїѧ́тный і҆ѡакі́мъ и҆ а҆́нна бжⷭ҇твеннаѧ, неꙋкло́ннѡ молѧ́щесѧ, пречⷭ҇тꙋю бцⷣꙋ роди́ша, пребо́льшꙋю всеѧ̀ тва́ри свѧ́тостїю.

Превысокꙋ̀ и҆мꙋ́ще жи́знь, житїѧ́ же свѣ́тлость, всѣ́хъ вкꙋ́пѣ роди́телей бы́сте земны́хъ превы́шшїи, нетлѣ́ннꙋ дв҃ꙋ ꙗ҆́кѡ роди́вше, и҆ бг҃оѻтцы̀ и҆́стиннѡ тоѧ̀ ра́ди бы́вше.

Бг҃оро́диченъ:

Спасе́нїѧ всегѡ̀ нача́льницы, бл҃же́ннѣйшїй і҆ѡакі́мъ, и҆ а҆́нна сла́внаѧ, чⷭ҇тꙋю и҆ непоро́чнꙋю, и҆ пречⷭ҇тꙋю бцⷣꙋ роди́ша, бг҃оче́стїѧ сїю̀ прїе́мше воздаѧ́нїе.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Непоро́чнѡ бг҃ꙋ пожи́вшїи, всѣ́хъ роди́сте спасе́нїе, бг҃омꙋ́дрїи роди́телє зижди́телѧ ро́ждшїѧ и҆ бг҃а на́шегѡ.

Всѣ̑мъ жи́знь и҆сточа́ѧй гдⷭ҇ь, ѿ непло́дове произведѐ дв҃ꙋ, въ ню́же всели́тисѧ и҆зво́ли, и҆ по ржⷭ҇твѣ̀ сохрани́въ нетлѣ́ннꙋ.

А҆́ннинъ пло́дъ, марі́ю дне́сь, гро́здъ ро́ждшꙋю живоно́сный, ꙗ҆́кѡ бцⷣꙋ воспои́мъ, предста́тельницꙋ же всѣ́хъ и҆ помо́щницꙋ.

И҆́нъ. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Непло́дствꙋющаѧ и҆ дѣте́й лише́ннаѧ, и҆ слеза́ми содѣ́телѧ молѧ́щаѧ, є҆ди́нꙋ бл҃гослове́ннꙋю сподо́биласѧ є҆сѝ роди́ти, благопрїѧ́тнаѧ а҆́нно, зовꙋ́щи: ꙗ҆́кѡ нѣ́сть свѧ́тъ ра́звѣ тебє̀, гдⷭ҇и.

И҆́же сожи́тельницꙋ ѡ҆богати́въ бжⷭ҇твенною бл҃года́тїю, і҆ѡакі́мъ бжⷭ҇твенный и҆ бг҃оглаго́ливый, хода́таицꙋ спасе́нїѧ человѣ́кѡмъ роди́ти сподо́бисѧ. къ не́йже взыва́емъ: ꙗ҆́кѡ нѣ́сть непорѡ́чны, па́че тебє̀, влⷣчце.

Воспое́мъ всечестнꙋ́ю сопрꙋ́гꙋ, ѿ неѧ́же возсїѧ̀ на́мъ (с. 181) дв҃а, всѣ́хъ тва́рей превы́шши сꙋ́щи, бг҃а бо родѝ, къ немꙋ́же возопїи́мъ: ꙗ҆́кѡ нѣ́сть свѧ́тъ па́че тебє̀, гдⷭ҇и.

Непло́днагѡ поно́са и҆збѣ́гши, родѝ а҆́нна бцⷣꙋ, є҆́ѵы бо поно́съ пресла́внѡ потре́бльшꙋю, къ не́йже взыва́емъ: ꙗ҆́кѡ нѣ́сть непоро́чны, па́че тебє̀, влⷣчце.

Конда́къ пра́здника, гла́съ д҃:

І҆ѡакі́мъ и҆ а҆́нна, поноше́нїѧ безча́дства, и҆ а҆да́мъ и҆ є҆́ѵа, ѿ тлѝ сме́ртныѧ свободи́стасѧ пречⷭ҇таѧ, во ст҃ѣ́мъ ржⷭ҇твѣ̀ твое́мъ. то̀ пра́зднꙋютъ и҆ лю́дїе твоѝ, вины̀ прегрѣше́нїй и҆зба́вльшесѧ, внегда̀ зва́ти тѝ: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

І҆́косъ:

Моли́тва кꙋ́пнѡ и҆ воздыха́нїе, непло́дства и҆ безча́дства, і҆ѡакі́ма же и҆ а҆́нны благопрїѧ́тное, и҆ во ᲂу҆́ши гдⷭ҇ни вни́де, и҆ прозѧбѐ пло́дъ живоно́сенъ мі́рꙋ. ѻ҆́въ бо моли́твꙋ на горѣ̀ творѧ́ще, ѻ҆́ва же въ садѣ̀ поноше́нїе ноша́ше: но съ ра́достїю непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Сѣда́ленъ, гла́съ є҃. Подо́бенъ: Собезнача́льное:

І҆ѡакі́мъ и҆ а҆́нна торжествꙋ́ютъ, по бз҃ѣ бо досто́йнѡ бл҃года́ть ѡ҆брѣто́ша, и҆ роди́ша пло́дъ, бг҃опрїѧ́тенъ хра́мъ, дв҃ꙋ и҆ чⷭ҇тꙋю мт҃рь бж҃їю, є҆ди́нꙋ бл҃гослове́ннꙋю, молѧ́щꙋюсѧ непреста́ннѡ, спасти́сѧ дꙋша́мъ на́шымъ.

Сла́ва, и҆ ны́нѣ, то́йже:

Пѣ́снь д҃. І҆рмо́съ:

Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀ є҆ди́не чл҃вѣколю́бче.

Воспѣва́емъ тѧ̀, гдⷭ҇и, вѣ̑рнымъ спаси́тельное приста́нище, пода́вшаго всѣ̑мъ тебѐ ро́ждшꙋю.

Тѧ̀, бг҃оневѣ́сто, похвалꙋ̀ всѣ̑мъ хрⷭ҇то́съ ꙗ҆вѝ и҆ держа́вꙋ, пою́щымъ вѣ́рнѡ твоѐ та́инство.

Неискꙋсобра́чнаѧ влⷣчце, твои́ми моли́твами и҆збавлѧ́еми прегрѣше́нїй, благоразꙋ́мнѡ вси́ тѧ ᲂу҆блажа́емъ.

И҆́нъ. І҆рмо́съ:

Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Ра́дꙋѧсѧ дв҃ꙋ ѿ непло́дове прїе́млетъ, є҆ѧ́же ра́ди непло́дїе мїрско́е разрѣши́сѧ ржⷭ҇тво́мъ, дѣ́вствꙋющꙋю, і҆ѡакі́мъ бг҃омꙋ́дрый и҆ бг҃опрїѧ́тный.

Пра́ѻтецъ бж҃їй і҆ѡакі́мъ, ны́нѣ предлага́етъ на́мъ трапе́зꙋ дꙋхо́внꙋю, пребога́тый: ꙗ҆́кѡ бг҃ома́терь, и҆ пренетлѣ́ннꙋю ѻ҆трокови́цꙋ роди́лъ є҆́сть.

Оу҆мерщвле́нїѧ и҆ тлѝ человѣ́ки спа́сшꙋю, бл҃года́ть предлага́етъ, хотѧ́щꙋю бы́ти мт҃рь бж҃їю, сло́во присносꙋ́щное прїе́мшꙋю, несказа́ннѡ воплоща́емое.

Ѿ ко́рене і҆ессе́ева сопрꙋ́гъ возсїѧ̀, ѿ негѡ́же прозѧбѐ же́злъ, цвѣ́тъ носѧ́щїй, всего́ мѧ человѣ́ка ѡ҆благово́нствꙋющь мѵ́ромъ бжⷭ҇тва̀.

Напра́ви моѐ, бцⷣе, житїѐ, повелѣ̑нїи бжⷭ҇твенными наставлѧ́ющи вопло́щшагѡсѧ сло́ва и҆зъ тебє̀, и҆ къ свѣ́тꙋ наста́ви дв҃о мт҃и марі́е бг҃оневѣ́сто.

Пѣ́снь є҃. І҆рмо́съ:

Сѣннопи́санный мра́къ гада́нїй разори́въ, и҆ вѣ́рныхъ прибы́тїемъ и҆́стины, бг҃оѻтрокови́цею ѡ҆зари́въ сердца̀, и҆ на́съ свѣ́томъ твои́мъ, хрⷭ҇тѐ, наста́ви.

Воспои́мъ лю́дїе всѣ́хъ винꙋ̀, сꙋ́щаго по на́мъ бы́ти вино́внаго: є҆ѧ́же ѻ҆́бразꙋ ра́довахꙋсѧ сподоблѧ́еми прⷪ҇ро́цы, ꙗ҆вле́нное спасе́нїе ѿ тоѧ̀ плодѧ́ще.

Ѿ сꙋ́ха прозѧбе́нїе жезла̀ і҆ере́ева, і҆и҃лю показа̀ проразсꙋжде́нїе: и҆ ны́нѣ свѣ́тлость прозѧ́бшихъ пресла́внѡ свѣ́титъ, ѿ непло́дове всесла́вное рожде́нїе.

И҆́нъ. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ, и҆но́гѡ бо, ра́звѣ тебє̀, бо́га не зна́ю.

Цѣломꙋ́дреннаѧ дво́ица, чистоты̀ зарѧ̀ сїѧ́ющаѧ, ю҆́же дѣ́вства бжⷭ҇твеннымъ сїѧ́нїемъ ᲂу҆краси́вшꙋю непло́дное є҆стество̀ человѣ́ческое, на́мъ породѝ, а҆́нна и҆ і҆ѡакі́мъ бг҃опрїѧ́тный.

Дѣ́вственный бг҃оꙋкра́шенный престо́лъ, и҆́же всѣ́хъ превы́шши дла́нїю бжⷭ҇твенною, цѣломꙋ́дрїѧ честны́й сопрꙋ́гъ, и҆ бг҃омꙋ́драѧ дво́ица породѝ, а҆́нна и҆ і҆ѡакі́мъ всехва́льнїи.

Восто́кꙋ свы́ше ꙗ҆́вльшꙋсѧ, въ наставле́нїе заблꙋ́ждшихъ, свѣтоно́снꙋю две́рь, бжⷭ҇твенный і҆ѡакі́мъ и҆ а҆́нна, бг҃омꙋ́дреннѡ пожи́вшїи, роди́ти бг҃ови́дцы ꙗ҆́вѣ сподо́бишасѧ.

Зако́на но́вагѡ бг҃опи́саннꙋю скрижа́ль, на не́йже рѣше́нїе грѣхѡ́въ ве́тхагѡ зако́на, бжⷭ҇твенное сло́во проѡбразѝ пре́жде, ꙗ҆́кѡ ѿ ка́мене ны́нѣ ᲂу҆сѣчѐ, манове́нїемъ вседержи́тель ѿ непло́дове.

Бг҃оро́диченъ:

Заре́ю твое́ю бг҃ома́ти, ᲂу҆мꙋ̀ моемꙋ̀ ѡ҆зари́тисѧ ѡ҆мраче́нномꙋ грѣхо́мъ, повелѝ дв҃о, невѣ́дѣнїѧ мра́къ и҆ прегрѣше́нїй потреблѧ́ющи: и҆ны́ѧ бо па́че тебє̀ храни́тельницы не вѣ́мъ.

Пѣ́снь ѕ҃. І҆рмо́съ:

Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.

Ко гдⷭ҇ꙋ въ ско́рби непло́дства возопи́ша, бг҃ома́тере бг҃омꙋ́дрїи роди́тели: и҆ сїю̀ въ ро́ды родѡ́въ роди́ша: на ѻ҆́бщее спасе́нїе и҆ похвалꙋ̀.

Прїѧ́ша нбⷭ҇ный да́ръ ѿ бг҃а досто́инъ, бг҃омт҃ре бг҃омꙋ́дрїи роди́тели, самѣ́хъ херꙋві́мѡвъ превы́шшее носи́ло, сло́ва и҆ зижди́телѧ роди́тельницꙋ.

И҆́нъ. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Плодови́тое сѣ́мѧ, є҆́же дре́вле непло́ды а҆́нна воспрїе́мши, ѿ бжⷭ҇твеннагѡ ѡ҆сїѧ́нїѧ ѻ҆трокови́цꙋ роди́ти сподо́бисѧ, всѣ́ми тварьмѝ влады́чествꙋющꙋю.

Ны́нѣ непло́ды ро́ждши во́лею бж҃їею, покоре́нїемъ прїѧ́ти дв҃ꙋ, ро́ждшꙋю кромѣ̀ плотскі́ѧ во́ли, самомꙋ̀ восхотѣ́вшꙋ бг҃ꙋ проѧвле́ннѡ.

Ѡ҆зари́всѧ и҆са́їа дх҃омъ, і҆ѡакі́ма и҆ а҆́нны ржⷭ҇тво̀, сви́токъ но́въ ви́дѣ, въ не́мже написа́сѧ сло́во воплоща́емо.

Та́инствꙋ предтече́тъ та́инство: пре́жде бо неплодѧ́щаѧ благода́ть породѝ, спасе́нїѧ хода́таицꙋ, дѣ́вства рожде́нїемъ ꙗ҆́вльшꙋюсѧ на́мъ.

Конда́къ, гла́съ в҃. Подо́бенъ: Вы́шнихъ и҆щѧ̀:

Ра́дꙋетсѧ ны́нѣ а҆́нна, непло́дства разрѣши́вшисѧ соꙋ́зъ, и҆ пита́етъ пречⷭ҇тꙋю, созыва́ющи всѧ̑ воспѣ́ти дарова́вшаго ѿ чре́ва є҆ѧ̀ человѣ́кѡмъ, є҆ди́нꙋ мт҃рь и҆ неискꙋсомꙋ́жнꙋю.

І҆́косъ:

Ꙗ҆́же ᲂу҆́зъ пре́жде безча́дства моли́твою и҆зба́вльшисѧ, призыва́етъ ны̀ спра́здновати чꙋдесѝ, и҆ да́ры принестѝ рожде́ннѣй, молѧ́щыѧсѧ предъ не́ю съ любо́вїю, є҆́йже ꙗ҆́кѡ и҆ногда̀ дѣ́вы предтеча́хꙋ ско́рѡ ликꙋ́юще и҆ вопїю́ще: сѐ прїи́де всѣ́хъ воззва́нїе, сѐ а҆да́мъ свободи́сѧ, ꙗ҆́кѡ а҆́нна пло́дъ прозѧбѐ, є҆ди́нꙋ мт҃рь и҆ неискꙋсомꙋ́жнꙋю.

Пѣ́снь з҃. І҆рмо́съ:

Кꙋпина̀ въ горѣ̀ ѻ҆гненеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа́ тѧ, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ, ѻ҆́гнь неѡпа́льнѡ прїѧ́ла є҆сѝ. тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Твоѐ въ веще́ственныхъ ꙗ҆вле́нїихъ законополо́жникъ возбрани́сѧ разꙋмѣ́ти, и҆ вели́кое пречⷭ҇таѧ та́инство, не мꙋ́дрствовати земнорє́вностнаѧ, ѻ҆бра́знѡ наказꙋ́емь и҆ногда̀. тѣ́мже ᲂу҆ди́вльсѧ чꙋдесѝ, глаго́лаше: бл҃гослове́нъ бг҃ъ ѻ҆тє́цъ на́шихъ.

Го́рꙋ и҆ две́рь нбⷭ҇нꙋю, и҆ мы́сленнꙋю тѧ̀ лѣ́ствицꙋ бг҃олѣ́пнѡ, ли́къ бжⷭ҇твенный пронаречѐ: ѿ тебє̀ ка́мень ѿсѣче́сѧ, не рꙋка́ми мꙋ́жескими, и҆ две́рь є҆́юже про́йде гдⷭ҇ь, и҆́же чꙋде́съ бг҃ъ ѻ҆тє́цъ на́шихъ.

И҆́нъ. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Ѿ ко́рене прозѧ́бши дво́ице ст҃а́ѧ дв҃да бг҃омꙋ́драгѡ, же́злъ всесвѧще́нный, дв҃ꙋ чⷭ҇тꙋю мі́рꙋ породи́сте, цвѣ́тъ свѧще́ннѣйшїй на́мъ хрⷭ҇та̀ безсѣ́меннѡ возсїѧ́вшꙋю.

Свѣщꙋ̀ многосвѣ́тлꙋю бцⷣꙋ, а҆́нна бжⷭ҇твеннаѧ, ꙗ҆́коже златоза́ренъ свѣ́щникъ носѧ́щи, мі́ръ ве́сь просвѣтѝ бжⷭ҇твеннымъ свѣ́томъ, и҆ дѣ́вства свѣ́тлыми сїѧ́ньми.

Прароди́телїе сла́внїи, воплоти́вшагосѧ, за неизрече́ннꙋю ми́лость, бг҃а вседержи́телѧ, ѿ дще́ре бг҃омꙋ́дрыѧ ва́шеѧ, пребога́тїи, ны́нѣ мнѣ̀ прибѣ́гшемꙋ къ ва́мъ, согрѣше́нїй разрѣше́нїе и҆спроси́те.

Бг҃оро́диченъ:

Ꙗ҆́кѡ сꙋ́ще пребо́льшїи роди́телей, всѣ́ми влⷣчествꙋющꙋю тва́рьми роди́сте, марі́ю пречⷭ҇тꙋю, ро́ждшꙋю бг҃а, пло́тїю ѡ҆бложе́на, на́мъ ᲂу҆подо́бльшасѧ, за бл҃гоꙋтро́бїе мно́гое.

Пѣ́снь и҃. І҆рмо́съ:

Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.

Ꙗ҆́же къ бг҃ꙋ на́шегѡ примире́нїѧ, пред̾ѡпредѣле́ннаѧ ски́нїѧ, є҆́же бы́ти ны́нѣ начина́етъ, и҆мꙋ́щи роди́ти сло́ва, на́мъ дебельство́мъ пло́ти ꙗ҆́вльшасѧ. є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки.

Непло́дства преложе́нїе, мїрско́е благи́хъ разрѣшѝ непло́дство, и҆ ꙗ҆́сно чꙋ́до хрⷭ҇та̀ показа̀, къ земны̑мъ прише́дша. є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки.

И҆́нъ. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Бога́тствомъ кипѧ́щїи добродѣ́телей, сла́вою бжⷭ҇твенною ᲂу҆кра́шеннꙋю цр҃и́цꙋ дв҃ꙋ, і҆ѡакі́мъ чⷭ҇тны́й, и҆ а҆́нна цѣломꙋ́дреннаѧ роди́ша. ю҆́же всѧ̀ тва́рь пое́тъ ꙗ҆́кѡ бцⷣꙋ.

Же́злъ си́лы на́мъ, ва́ми дрꙋ́ги бж҃їими по́сланъ бы́сть, всенепоро́чнаѧ невѣ́ста. є҆́юже посредѣ̀ врагѡ́въ, безбо́жныхъ ѡ҆долѣва́емъ, кова̑рствїѧ тѣ́хъ попира́юще.

Ѻ҆рꙋ́жїе на́мъ ѿ бг҃а бл҃говоле́нїѧ, тобо́ю сопрꙋ́же свѧще́ннѣйшїй, дарова́сѧ, и҆́мже ны́нѣ мы̀ вѣ́рнїи кра́снѣ при́снѡ вѣнча́емсѧ, бг҃а ро́ждшаѧ, чⷭ҇таѧ дв҃о мт҃и.

Си́ла бж҃їѧ плодоноше́нїемъ непло́дствꙋющее чре́во ѿве́рзе: и҆ предгрѧде́тъ две́рь дѣ́вства свѣ́тлостьми, є҆ѧ́же ра́ди сло́во прїи́де къ зємны́мъ, вопло́щсѧ неизрече́ннымъ сло́вомъ.

Свѣтоли̑тїи и҆зъ тебє̀ воплоще́ннагѡ на́съ ра́ди, просвѣще́ннаѧ дво́ица и҆зрѧ́днаѧ роди́телей твои́хъ, да бꙋ́детъ пренепоро́чнаѧ влⷣчце, хода́тайство на́мъ бла̑гъ небе́сныхъ.

Пѣ́снь ѳ҃. І҆рмо́съ:

Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ, всечⷭ҇таѧ, тѧ̀, бцⷣꙋ, велича́емъ.

И҆́же непокори̑вымъ лю́демъ и҆зъ ка́мене и҆сточи́въ во́дꙋ, благопокори̑вымъ же ꙗ҆зы́кѡмъ, да́рꙋетъ ѿ чре́слъ непло́дныхъ, пло́дъ на весе́лїе на́мъ, тѧ̀ бг҃ома́ти пречⷭ҇таѧ: ю҆́же досто́йнѡ велича́емъ.

Напра́снагѡ дре́внѧгѡ ѿѧ́тельницꙋ ѡ҆сꙋжде́нїѧ, и҆ прама́тере и҆справле́нїе, ю҆́же ро́да къ бг҃ꙋ винꙋ̀ присвое́нїѧ, къ зижди́телю мо́стъ, тѧ̀ бцⷣе велича́емъ.

И҆́нъ. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Є҆диномꙋ́дреннїи, и҆ є҆динодꙋ́шнїи добродѣ́телїю сꙋ́ще, пречⷭ҇тыѧ дв҃ы честні́и роди́телїе, соверша́ющымъ ᲂу҆се́рднѡ прехва́льнꙋю и҆ сла́внꙋю па́мѧть ва́шꙋ свѧще́ннѣйшїи, спасти́сѧ моли́тесѧ.

Па́жить разрꙋши́сте сме́ртнꙋю сла́внїи, жи́зни мт҃рь свѣ́тлѡ ро́ждшїи, потре́бльшꙋю сеѧ̀ прило́гъ и҆ безсме́ртныѧ жи́зни и҆схода́таившꙋю, наде́ждꙋ вѣ́ры ра́ди.

Кра́сное ꙗ҆́кѡ со́лнце і҆ѡакі́мъ, є҆динѧ́ѧсѧ свѣтоно́снѣй лꙋнѣ̀ а҆́ннѣ, породѝ дѣ́вства лꙋчꙋ̀, є҆́юже зарѧ̀ бжⷭ҇твеннагѡ сꙋщества̀, пло́ти по ѵ҆поста́си соедини́вшисѧ, на́мъ возсїѧ̀.

Цѣломꙋ́дреннѡ пожи́вше и҆ благоче́стнѡ бл҃же́ннїи, ны́нѣ сла́дости несказа́нныѧ сподо́бистесѧ, бг҃оѧвле́нїѧ полꙋчи́вше, и҆́же ѿ ва́съ мі́рꙋ ꙗ҆́вльшагосѧ є҆го́же моли́те, спасти́сѧ дꙋша́мъ на́шымъ.

Свѣти́ленъ. Подо́бенъ: Посѣти́лъ ны̀ є҆́сть:

Ꙗ҆́же є҆́ѵы клѧ́твꙋ потре́бльшаѧ, ны́нѣ ражда́етсѧ ѿ ста́рєцъ непло́дныхъ, ѿ а҆́нны и҆ і҆ѡакі́ма. ю҆́же со а҆́гг҃лы всѝ по до́лгꙋ въ пѣ́снехъ вѣ́рнїи да восхва́лимъ.

Сла́ва, и҆ ны́нѣ:

Ꙗ҆́кѡ ѿ со́лнца со́лнце, и҆ ѿ лꙋны̀ лꙋна̀, ѿ а҆́нны и҆ і҆ѡакі́ма всенепоро́чнаѧ ѻ҆трокови́ца роди́сѧ, и҆ просвѣтѝ мі́ра концы̀ свои́мъ сїѧ́нїемъ, ю҆́же пою́ще досто́йнѡ ᲂу҆блажи́мъ, соверша́юще честнꙋ́ю и҆́хъ па́мѧть.

На стїхо́внѣ стїхи̑ры пра́здника, гла́съ ѕ҃. Поⷣ: Тридне́венъ:

Ны́нѣ и҆гра́й прⷪ҇ро́че дв҃де, ꙳ се́ бо ѿ чре́слъ твои́хъ дв҃а, ꙳ бг҃оѻтрокови́ца марі́а ꙳ роди́сѧ пресла́внѡ: ꙳ є҆ѧ́же ра́ди земні́и бжⷭ҇твеннѡ ꙳ ѡ҆брѣто́ша воззва́нїе паде́нїѧ.

Сті́хъ: Слы́ши дщѝ, и҆ ви́ждь, и҆ приклонѝ ᲂу҆́хо твоѐ.

Оу҆мерщвле́нїѧ совлачи́тсѧ ти́ны, бл҃года́тїю, ꙳ а҆да́мъ со є҆́ѵою, ꙳ и҆ ѡ҆живлѧ́ютсѧ всерѡ́днаѧ, ꙳ ѿ непло́дныѧ бо ро́ждшисѧ и҆́стиннѡ бцⷣа, ꙳ мїрско́е разрѣшѝ непло́дство.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Всечестно́е твоѐ ржⷭ҇тво̀ ꙳ свѣ́тлѡ торжествꙋ́емъ со а҆́гг҃лы, ꙳ мт҃и дв҃о чⷭ҇таѧ, ꙳ но ѽ бг҃ороди́тельнице. ꙳ не преста́й защища́ти, ꙳ хрⷭ҇тїа́нъ воспѣва́ющихъ тѧ̀.

Сла́ва, и҆ ны́нѣ, пра́здника, гла́съ в҃:

Дне́сь всенепоро́чнаѧ чⷭ҇таѧ произы́де ѿ непло́дове, дне́сь всѧ́чєскаѧ ра́дꙋютсѧ въ тоѧ̀ ржⷭ҇твѣ̀, а҆да́мъ ᲂу҆́зъ разрѣша́етсѧ, и҆ є҆́ѵа клѧ́твы свободи́сѧ, нбⷭ҇наѧ всѧ̑ веселѧ́тсѧ, и҆ ми́ръ человѣ́кѡмъ да́рꙋетсѧ. мы́ же славосло́вѧще вопїе́мъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ благоволе́нїе.

На лїтꙋргі́и: Бл҃жє́нна пра́здника, пѣ́снь а҃, втора́гѡ гла́са, на д҃: и҆ ст҃ы́хъ, пѣ́снь ѕ҃, на д҃. Прокі́менъ пра́здника, и҆ до ѿда́нїѧ. Та́же ст҃ы́хъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ благослови́те бг҃а: А҆пⷭ҇лъ къ гала́тѡмъ, зача́ло с҃і, ѿ полꙋ̀. А҆ллилꙋ́їа, гла́съ а҃: Спасе́нїе првⷣныхъ ѿ гдⷭ҇а. Є҆ѵⷢ҇лїе лꙋкѝ, зача́ло л҃ѕ. Прича́стенъ пра́здника, и҆ ст҃ы́хъ: Ра́дꙋйтесѧ првⷣнїи ѡ҆ гдⷭ҇ѣ:

Слꙋ́жба прпⷣбнагѡ и҆гꙋ́мена і҆ѡ́сифа волоцка́гѡ, но́вагѡ чꙋдотво́рца.

Ве́черъ, на ма́лѣй вече́рни, стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:

Дх҃а ст҃а́гѡ теплото́ю мꙋ́дре, ꙳ жела̑нїѧ се́рдца твоегѡ̀, є҆́же къ бг҃ꙋ согрѣ́ѧвъ, ꙳ зи́мꙋ страсте́й многоко́зненнꙋю ᲂу҆мертви́въ, ꙳ де́мѡнскꙋю си́лꙋ низложи́лъ є҆сѝ, ꙳ нбⷭ҇ное же во́инство, ꙳ терпѣ́нїемъ твои́мъ ᲂу҆диви́лъ є҆сѝ.

Два́жды.

Крⷭ҇тъ гдⷭ҇ень взе́мъ, прпⷣбне і҆ѡ́сифе, ꙳ и҆́стиннѡ послѣ́довалъ є҆сѝ хрⷭ҇тꙋ̀, ꙳ на́съ ра́ди на крⷭ҇тѣ̀ распе́ншемꙋсѧ, ꙳ и҆ є҆гѡ̀ ра́ди любвѐ всѧ̑ ѡ҆ста́вилъ є҆сѝ, ꙳ и҆ того̀ є҆ди́наго возлюби́лъ є҆сѝ, ꙳ є҆го́же молѝ, спасти́сѧ на́мъ.

Ꙗ҆́кѡ прїе́мь, ѻ҆́ч҃е, нбⷭ҇ное сѣ́мѧ въ се́рдце, ꙳ пло́дъ стори́чествꙋющъ добродѣ́тели прине́слъ є҆сѝ, ꙳ пита́ѧ благоче́стнѡ, ꙳ гла́домъ добродѣ́тели та́ющихъ дꙋ́шы: ꙳ но ꙗ҆́кѡ и҆мѣ́ѧ дерзнове́нїе ко влⷣцѣ хрⷭ҇тꙋ̀, ꙳ молѝ ѡ҆ творѧ́щихъ вѣ́рою и҆ любо́вїю па́мѧть твою̀.

Сла́ва, гла́съ д҃:

Свѣ́тлый дне́сь возсїѧ̀ на́мъ и҆ всепра́зднственный де́нь, ꙗ҆́коже второ́е со́лнце, просвѣща́ѧ и҆ наставлѧ́ѧ, и҆ ѿгонѧ́ѧ мглꙋ̀ помраче́нїѧ на́шегѡ, вселе́ннꙋю созыва́етъ, любо́вїю къ честнѣ́й ра́цѣ припа́дающихъ, и҆ любе́знѡ ѡ҆блобыза́ющихъ. молѝ, мо́лимсѧ, ѻ҆́ч҃е, мі́рꙋ ми́ръ дарова́ти, и҆ дꙋша́мъ на́шымъ ве́лїю ми́лость.

И҆ ны́нѣ, пра́здника, гла́съ то́йже: Всечестно́е твоѐ ржⷭ҇тво̀:

На стїхо́внѣ стїхи̑ры прпⷣбнагѡ, гла́съ в҃. Поⷣ: До́ме є҆ѵфра́ѳовъ:

До́мъ дх҃а ст҃а́гѡ ꙳ бы́лъ є҆сѝ прпⷣбне, ꙳ просвѣща́ѧ и҆ наставлѧ́ѧ ꙳ вѣ́рою и҆ любо́вїю ꙳ притека́ющыѧ къ тебѣ̀.

Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

Бл҃же́нъ вои́стиннꙋ, ꙳ и҆ пребл҃же́нъ ꙗ҆ви́лсѧ є҆сѝ, ꙳ премꙋ́дре і҆ѡ́сифе, ꙳ мона́шествꙋющихъ наста́вниче, ꙳ и҆ благоче́стїѧ побо́рниче.

Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Прїиди́те вѣ́рнїи, ꙳ стеце́мсѧ ᲂу҆се́рднѡ, ꙳ восхва́лимъ ѻ҆тца̀ на́шего, ꙳ и҆́стины сказа́телѧ, ꙳ и҆ нече́стїѧ ѡ҆бличи́телѧ.

Сла́ва, самогла́сенъ, гла́съ то́йже:

Прїиди́те ли́цы мона́шестїи, дне́сь ра́достнѡ воспои́мъ ᲂу҆блажа́юще, и҆ прославлѧ́юще нача́льника на́шего, хрⷭ҇то́ва ᲂу҆го́дника, и҆ тогѡ̀ пречⷭ҇тыѧ мт҃ре, прпⷣбныхъ сожи́телѧ, и҆ собесѣ́дника а҆́гг҃лѡвъ, молѧ́щасѧ гдⷭ҇ꙋ, поми́ловатисѧ дꙋша́мъ на́шымъ.

И҆ ны́нѣ, пра́здника, гла́съ д҃: Всемі́рнаѧ ра́дость:

Тропа́рь прпⷣбнагѡ і҆ѡ́сифа, гла́съ є҃:

Ꙗ҆́кѡ по́стникѡвъ ᲂу҆добре́нїе и҆ ѻ҆тцє́въ красотꙋ̀, ми́лости пода́телѧ, разсꙋжде́нїѧ свѣти́льника, всѝ вѣ́рнїи соше́дшесѧ восхва́лимъ, кро́тости ᲂу҆чи́телѧ, и҆ є҆ресе́й посрами́телѧ, премꙋ́драго і҆ѡ́сифа, рѡссі́йскꙋю ѕвѣздꙋ̀, молѧ́щасѧ гдⷭ҇ꙋ, поми́ловатисѧ дꙋша́мъ на́шымъ.

Сла́ва, и҆ ны́нѣ, пра́здника. Тропа́рь, гла́съ д҃: Ржⷭ҇тво̀ твоѐ бцⷣе дв҃о:

На вели́цѣй вече́рни, Блаже́нъ мꙋ́жъ, а҃-й а҆нтїфѡ́нъ.

На Гдⷭ҇и, воззва́хъ: стїхи̑ры на и҃: ст҃ы́хъ бг҃оѻтцє́въ на д҃: и҆ прпⷣбнагѡ і҆ѡ́сифа на д҃. Гла́съ є҃:

Прпⷣбне ѻ҆́ч҃е бл҃же́нне і҆ѡ́сифе, вельмѝ подвиза́лсѧ є҆сѝ на врагѝ безплѡ́тныѧ, пѣ́сньми, посто́мъ и҆ моли́твою, бы́въ ѻ҆́бразъ твои̑мъ ᲂу҆ченикѡ́мъ, и҆ нелѣ́ностнѡ хрⷭ҇тꙋ̀ рабо́таѧ, ны́нѣ прпⷣбне, на нб҃сѣ́хъ ликꙋ́еши, со а҆́гг҃лы славосло́вѧ трⷪ҇цꙋ є҆диносꙋ́щнꙋю, преклонѧ́ѧ на чл҃вѣколю́бїе хрⷭ҇та̀ бг҃а на́шего, да спасе́тъ є҆стество̀ человѣ́ческое. того̀ ᲂу҆̀бо молѝ, томꙋ̀ помоли́сѧ прпⷣбне, дарова́ти вселе́ннѣй є҆диномышле́нїе, и҆ ча́дѡмъ твои̑мъ ми́ръ и҆ ве́лїю ми́лость.

Два́жды.

Прпⷣбне ѻ҆́ч҃е і҆ѡ́сифе, вельмѝ подвиза́лсѧ є҆сѝ на врагѝ крⷭ҇та̀ хрⷭ҇то́ва, и҆ на ѿмета́ющыѧсѧ ѻ҆́браза сп҃сова, и҆ є҆гѡ̀ пречⷭ҇тыѧ бг҃ома́тере, и҆ посрами́лъ є҆сѝ є҆ресенача́льники. ны́нѣ ᲂу҆́бѡ прпⷣбне, всѣ́хъ на́съ ко хрⷭ҇тꙋ̀ помина́й, и҆ моли́сѧ ѡ҆ творѧ́щихъ вѣ́рнѡ свѧтꙋ́ю па́мѧть твою̀, презрѣ́ти на̑ша согрѣшє́нїѧ, и҆ возвестѝ на́съ на пе́рвое достоѧ́нїе. того̀ ᲂу҆̀бо молѝ, томꙋ̀ помоли́сѧ прпⷣбне, дарова́ти вселе́ннѣй є҆диномышле́нїе, и҆ вѣ̑рнымъ лю́демъ твои̑мъ на врагѝ ѡ҆долѣ́нїе, и҆ ми́ръ, и҆ ве́лїю ми́лость.

Прпⷣбне ѻ҆́ч҃е і҆ѡ́сифе, вельми́ тѧ хрⷭ҇то́съ просла́ви, и҆ дарова̀ тебѣ̀ сло́во бжⷭ҇твеннагѡ ра́зꙋма, и҆́мже ѿсѣ́клъ є҆сѝ лжꙋ̀ ѿ и҆́стины, и҆ и҆сто́рглъ є҆сѝ пле́велы невѣ́рїѧ, и҆ наꙋчи́лъ є҆сѝ сла́вити трⷪ҇цꙋ є҆диносꙋ́щнꙋю, покланѧ́емаго въ тре́хъ ѵ҆поста́сехъ є҆ди́наго бг҃а. того̀ ᲂу҆̀бо молѝ, томꙋ̀ помоли́сѧ прпⷣбне, дарова́ти просѧ́щымъ и҆сцѣле́нїе, ми́ръ и҆ ве́лїю ми́лость.

Сла́ва, гла́съ ѕ҃:

Ра́дꙋйсѧ и҆ весели́сѧ цр҃ковь бж҃їѧ мт҃ре, со свѧщє́нники же, и҆ съ людьмѝ благочести́выми, и҆ со благоро́дными и҆ хрⷭ҇тоимени́тыми, мѡна́хи же и҆ просты́ми, бл҃же́ннагѡ і҆ѡ́сифа ѻ҆тца̀ на́шегѡ дне́сь па́мѧть почита́юще, дꙋхо́внѣ соше́дшесѧ пра́зднꙋемъ, и҆ честны́й гро́бъ є҆гѡ̀ ѡ҆бстоѧ́ще, глаго́лемъ: ра́дꙋйсѧ ѻ҆́ч҃е на́шъ і҆ѡ́сифе, свѣти́льниче пресвѣ́тлый, врачꙋ̀ болѧ́щихъ, и҆ моли́твенниче ко сп҃сꙋ хрⷭ҇тꙋ̀ бг҃ꙋ на́шемꙋ. ѡ҆ вѣ́рою и҆ любо́вїю притека́ющихъ къ ра́цѣ моще́й твои́хъ, молѝ спасти́сѧ дꙋша́мъ на́шымъ.

И҆ ны́нѣ, пра́здника, гла́съ ѕ҃:

Дне́сь непло́днаѧ а҆́нна ражда́етъ бг҃оѻтрокови́цꙋ, ѿ всѣ́хъ родѡ́въ произбра́ннꙋю, въ жили́ще всецр҃ѧ̀ и҆ зижди́телѧ хрⷭ҇та̀ бг҃а, во и҆сполне́нїе бжⷭ҇твеннагѡ смотре́нїѧ, и҆́мже назда́хомсѧ земноро́днїи, и҆ ѡ҆бнови́хомсѧ ѿ тлѝ къ жи́зни неконе́чнѣй.

Вхо́дъ. Прокі́менъ днѐ, и҆ чтє́нїѧ:

Премꙋ́дрости соломѡ́ни чте́нїе.

[Глава̀ є҃ ] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды, вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ. И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. [ѕ҃] Слы́шите ᲂу҆̀бо, ца́рїе, и҆ разꙋмѣ́йте: навы́кните сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́ни чте́нїе.

[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ: сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́ни чте́нїе.

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи̑ры, гла́съ є҃. Подо́бенъ: Ра́дꙋйсѧ:

Ра́дꙋйсѧ, свѧще́ннаѧ главо̀, прпⷣбне ѻ҆́ч҃е на́шъ і҆ѡ́сифе, а҆́гг҃льскихъ ликѡ́въ собесѣ́дниче въ вы́шнихъ: на земли́ бо добродѣ́тельнѡ пожи́лъ є҆сѝ, и҆ ꙗ҆ви́лсѧ є҆сѝ пречи́сто и҆ нескве́рно зерца́ло, дх҃а ст҃а́гѡ зарѧ́ми блиста́ѧсѧ пребога́те, и҆ ѡ҆зарѧ́емь прозрѣ́лъ є҆сѝ бꙋ̑дꙋщаѧ. тѣ́мже хрⷭ҇та̀ бг҃а молѝ, ми́ръ дарова́ти дꙋша́мъ на́шымъ, и҆ ве́лїю ми́лость.

Ра́дꙋйсѧ, свѧще́ннаѧ главо̀, по́стникѡвъ непоколеби́мый сто́лпе, мона́шествꙋющихъ и҆справле́нїе, и҆ є҆ресе́й новоѧвле́нныхъ, бг҃одохнове́нными твои́ми писа́ньми, ѕлочєсти́ваѧ и҆́хъ ᲂу҆ста̀ загради́лъ є҆сѝ, и҆ де́мѡнѡвъ стремлє́нїѧ погꙋби́лъ є҆сѝ, крⷭ҇та̀ ѻ҆рꙋ́жїемъ всѧ̑ кознодѣ̑йства ѿгонѧ́ѧ. и҆ по преставле́нїи твое́мъ жи́въ ст҃ѣ́й трⷪ҇цѣ предстои́ши, ѡ҆ на́съ молѧ́сѧ ча́дѣхъ твои́хъ дарова́ти дꙋша́мъ на́шымъ ми́ръ и҆ ве́лїю ми́лость.

Ра́дꙋйсѧ, свѧще́ннаѧ главо̀, ᲂу҆мо́мъ просвѣще́ннымъ дꙋ́шꙋ твою̀ ѻ҆́ч҃е, просвѣти́лъ є҆сѝ, и҆ ѿ земны́хъ преста́вилсѧ є҆сѝ во хрⷭ҇то́во црⷭ҇твїе, і҆ѡ́сифе пребл҃же́нне: въ по́стницѣхъ ты̀ свѣ́телъ ꙗ҆ви́лсѧ є҆сѝ, сла́дости нестарѣ́емыѧ ны́нѣ насыща́ѧсѧ. ѡ҆ на́съ рабѣ́хъ твои́хъ хрⷭ҇тꙋ̀ бг҃ꙋ моли́сѧ, пода́ти на́мъ ѡ҆ставле́нїе грѣхѡ́въ, и҆ ве́лїю ми́лость.

Сла́ва, гла́съ ѕ҃:

Прпⷣбне ѻ҆́ч҃е, сохрани́лъ є҆сѝ добро́тꙋ є҆́же по ѻ҆́бразꙋ бж҃їю, пло́ть покори́лъ є҆сѝ дꙋ́хꙋ: сегѡ̀ ра́ди всели́сѧ въ тѧ̀ прест҃ы́й дх҃ъ. є҆гѡ́же дѣ́йствїемъ свѣ́тлѡ ᲂу҆кра́шенъ, прїѧ́лъ є҆сѝ да́ръ и҆сцѣле́нїй, притека́ющымъ съ вѣ́рою ко гро́бꙋ моще́й твои́хъ: моли́сѧ хрⷭ҇тꙋ̀ бг҃ꙋ, дарова́ти на́мъ на врагѝ побѣ́дꙋ, и҆ мі́рꙋ ми́ръ, и҆ цр҃квамъ є҆диномы́слїе, и҆ дꙋша́мъ на́шымъ ве́лїю ми́лость.

И҆ ны́нѣ, пра́здникъ, гла́съ и҃: Въ благознамени́тый де́нь:

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Прїиди́те ᲂу҆блажи́мъ ꙳ прпⷣбнаго і҆ѡ́сифа, ꙳ по́стника и҆ возде́ржника, ꙳ и҆ мона́хѡвъ нача́льника, ꙳ хрⷭ҇то́ва ᲂу҆го́дника.

Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Дне́сь вѣ́рнїи ᲂу҆блажи́мъ ꙳ прпⷣбнаго і҆ѡ́сифа, ꙳ и҆́стины сло́ва сказа́телѧ, ꙳ и҆ по хрⷭ҇то́вѣ і҆кѡ́нѣ побо́рника, ꙳ и҆ нече́стїѧ ѡ҆бличи́телѧ.

Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми:

Бл҃же́нъ є҆сѝ і҆ѡ́сифе, ꙳ хрⷭ҇то́въ ᲂу҆го́дниче, ꙳ и҆ пречⷭ҇тыѧ бг҃омт҃ре, ꙳ пꙋсты́нный жи́телю, ꙳ и҆ мона́шествꙋющихъ наста́вниче.

Сла́ва, гла́съ в҃:

Прїиди́те дне́сь ли́цы мона́шестїи, притеце́мъ ко гро́бꙋ прпⷣбнагѡ і҆ѡ́сифа, молѧ́щесѧ хрⷭ҇тꙋ̀ бг҃ꙋ на́шемꙋ, просѧ́ще грѣхѡ́въ проще́нїѧ, и҆ во́инствꙋ на́шемꙋ на врагѝ побѣ́ды, и҆ плѣнє́нымъ свобожде́нїѧ, и҆ мі́рꙋ ᲂу҆строе́нїѧ и҆ цр҃квамъ соедине́нїѧ, и҆ дꙋша́мъ на́шымъ ве́лїѧ ми́лости.

И҆ ны́нѣ, пра́здника, гла́съ то́йже: Пронарече́ннаѧ всѣ́хъ цр҃и́ца:

На ᲂу҆́трени тропа́рь пра́здника, и҆ бг҃оѻтцє́въ.

Сла́ва, прпⷣбнагѡ: И҆ ны́нѣ, пра́здника.

По а҃-й каѳі́смѣ сѣда́ленъ, гла́съ а҃. Подо́бенъ: Ско́рѡ предварѝ:

Досто́йнѡ ᲂу҆бл҃жа́емъ тѧ̀ прпⷣбне і҆ѡ́сифе, ꙗ҆́кѡ дерзнове́нїе и҆мꙋ́ща ко гдⷭ҇ꙋ: ѡ҆ на́съ при́снѡ моли́сѧ, и҆зба́витисѧ врагѡ́въ належа́щїѧ напа́сти, и҆ дарова́ти на́мъ на сы́ны а҆га̑рѧнскїѧ ѡ҆долѣ́нїе, и҆ плѣнє́нымъ свобожде́нїе, и҆ на́мъ, соверша́ющымъ свѧтꙋ́ю па́мѧть твою̀, ве́лїю ми́лость.

Два́жды.

Сла́ва, и҆ ны́нѣ, бг҃оро́диченъ:

Оу҆́мъ человѣ́ческїй, по достоѧ́нїю пѣ́ти тѧ̀, влⷣчце пречⷭ҇таѧ бцⷣе, недоꙋмѣ́етъ, но мы̀ зове́мъ тѝ, ꙗ҆̀же а҆рха́гг҃лъ гаврїи́лъ провѣща̀: ра́дꙋйсѧ, а҆да́мово свобожде́нїе. ра́дꙋйсѧ, прама́тере є҆́ѵы ѡ҆правда́нїе. ра́дꙋйсѧ, мі́ра спасе́нїе. ра́дꙋйсѧ, мт҃и хрⷭ҇та̀ бг҃а.

По в҃-й каѳі́смѣ сѣда́ленъ, гла́съ и҃. Поⷣ: Взбра́нной воево́дѣ:

Соше́дшесѧ вѣ́рнїи въ па́мѧть прпⷣбнагѡ і҆ѡ́сифа дꙋхо́внѡ пра́зднꙋемъ, восхвалѧ́юще хрⷭ҇та̀ бг҃а на́шего, прославлѧ́юща своего̀ ᲂу҆го́дника, и҆ да́ромъ чꙋде́съ ѡ҆богати́вшаго, притеце́мъ вѣ́рнѡ бо гро́бꙋ моще́й є҆гѡ̀, и҆ почерпе́мъ тѣлесє́мъ здра́вїе, кꙋ́пнѡ и҆ дꙋша́мъ спасе́нїе, и҆ торжествꙋ́емъ свѣ́тлѡ во свѧтꙋ́ю па́мѧть є҆гѡ̀.

Два́жды.

Сла́ва, и҆ ны́нѣ, бг҃оро́диченъ:

Взбра́нной воево́дѣ и҆ застꙋ́пницѣ на́шей, къ тебѣ̀ прибѣга́емъ, пречⷭ҇таѧ бцⷣе, поборѝ чⷭ҇таѧ, плѣнѧ́ющаго ны̀ дїа́вола, и҆ сводѧ́ща въ стра̑сти безче́стїѧ. тѣ́мже припа́даемъ къ твоемꙋ̀, пречⷭ҇таѧ, ѻ҆́бразꙋ, просѧ́ще и҆зба́витисѧ всѧ́кїѧ мꙋ́ки, и҆ ѻ҆гнѧ̀ вѣ́чнагѡ, застꙋпи́ ны мт҃и хрⷭ҇та̀ цр҃ѧ̀ нбⷭ҇нагѡ, да зове́мъ тѝ: ра́дꙋйсѧ, невѣ́сто неискꙋсобра́чнаѧ.

По полѷеле́и сѣда́ленъ, гла́съ є҃. Подо́бенъ: Ра́дꙋйсѧ:

Ра́дꙋйсѧ, прпⷣбне, принесы́й себѐ хрⷭ҇тꙋ̀ же́ртвꙋ жи́вꙋ, и҆ ѿ ю҆́ности ᲂу҆се́рднѡ рабо́таѧ хрⷭ҇тꙋ̀ бг҃ꙋ, пѣ́сньми, посто́мъ и҆ воздержа́нїемъ, водвори́лсѧ є҆сѝ въ пꙋсты́ни, є҆ди́нъ є҆ди́номꙋ бесѣ́дꙋѧ. тѣ́мъ ви́дѣвъ гдⷭ҇ь твоѐ до́брое и҆зволе́нїе, со всѣ́ми ᲂу҆чини́ тѧ преподо́бными и҆ пра́ведными водворѧ́тисѧ въ нбⷭ҇нѣмъ црⷭ҇твїи, и҆ со а҆́гг҃лы хрⷭ҇тꙋ̀ пѣ́ти пѣ́снь немо́лчнꙋю. но ꙗ҆́кѡ и҆́маши дерзнове́нїе къ немꙋ̀, молѝ, мо́лимсѧ, спасти́сѧ дꙋша́мъ на́шымъ.

Два́жды.

Сла́ва, и҆ ны́нѣ, бг҃оро́диченъ:

Къ бцⷣѣ возопїи́мъ любо́вїю: ра́дꙋйсѧ, гра́де гдⷭ҇ень. (с. 197) ра́дꙋйсѧ, ски́птре дв҃довъ. ра́дꙋйсѧ, пала́то ѡ҆дꙋшевле́ннаѧ. ра́дꙋйсѧ, ста́мно бжⷭ҇твенныѧ ма́нны. ра́дꙋйсѧ, неѡпали́маѧ кꙋпино̀. ра́дꙋйсѧ, свѣщѐ пресвѣ́тлаѧ, и҆ свѣти́льниче златы́й. ра́дꙋйсѧ, горо̀ бж҃їѧ приѡсѣне́ннаѧ. ра́дꙋйсѧ, ѻ҆гнено́сный престо́ле. ра́дꙋйсѧ, лѣ́ствице и҆ две́ре нбⷭ҇наѧ. ра́дꙋйсѧ, же́зле невла́жнѡ прозѧбы́й. ра́дꙋйсѧ всѧ̑ спаса́ющи ѿ всѧ́кихъ бѣ́дъ и҆ скорбе́й. ра́дꙋйсѧ, влⷣчце, мі́ра спасе́нїе.

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе ѿ матѳе́а, зача́ло м҃г.

По н҃-мъ ѱалмѣ̀ стїхи́ра, гла́съ ѕ҃:

Прпⷣбне ѻ҆́ч҃е і҆ѡ́сифе, ѡ҆чи́стилъ є҆сѝ ᲂу҆́мное сꙋщество̀, и҆ сохрани́лъ є҆сѝ добро́тꙋ є҆́же по ѻ҆́бразꙋ бж҃їю, и҆ пло́ть покори́лъ є҆сѝ дꙋ́хꙋ: тогѡ̀ ра́ди въ тѧ̀ всели́сѧ си́ла бж҃їѧ, и҆ прїѧ́лъ є҆сѝ да́ръ и҆сцѣле́нїй. и҆дѣ́же бо любо́вь и҆ согла́сїе, та́мѡ добродѣ́тели позна́нїе: а҆ и҆дѣ́же за́висть и҆ рве́нїе, та́мѡ ѕло́бы ꙗ҆вле́нїе. но ᲂу҆́бѡ мы̀ бѣ́гаемъ сегѡ̀ ᲂу҆бі́йственнагѡ по́мысла, ѿ негѡ́же да и҆зба́витъ ны̀ хрⷭ҇то́съ бг҃ъ, моли́твами твои́ми прпⷣбне і҆ѡ́сифе, и҆ пода́стъ дꙋша́мъ на́шымъ ми́ръ и҆ ве́лїю ми́лость.

Канѡ́ны пра́здника и҆ бг҃оѻтцє́въ, на и҃.

И҆ прпⷣбнагѡ і҆ѡ́сифа канѡ́нъ, на ѕ҃.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀, фараѡни́тское всево́инство преѻрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Тебѣ̀ твоегѡ̀, бл҃же́нне, ᲂу҆че́нїѧ до́лгъ приносѧ́ще, воздаѧ̑нїѧ простира́емъ, вѣне́цъ похва́льный плетꙋ́ще: ты́ же любо́вїю ᲂу҆вѧзе́нъ пребога́те, твои́ми ст҃ы́ми моли́твами бл҃года́ть на́мъ пода́ждь дꙋхо́внꙋю.

Всегꙋби́тельное стремле́нїе страсте́й, ѻ҆́ч҃е, ᲂу҆вѧди́лъ є҆сѝ, слове́снымъ ѡ҆б̾ѧ́тъ бг҃омꙋ́дрїемъ, благопребы́тенъ бы́лъ є҆сѝ, и҆ благогла́сенъ, кро́токъ же и҆ смире́нъ, сло́вомъ же премꙋ́дрости прпⷣбне ѻ҆́ч҃е і҆ѡ́сифе, и҆ ра́зꙋмомъ вѣнча́нъ.

Свѧще́ннѡ ᲂу҆краси́лъ є҆сѝ себѐ, прпⷣбне ѻ҆́ч҃е, дѣ́тельнымъ ра́зꙋмомъ бл҃года́ти бг҃оглаго́ливе і҆ѡ́сифе, жела́ѧ вѣнца̀ сла́вы хрⷭ҇то́вы, и҆ своеѧ̀ наде́жды и҆зрѧ́днѡ бл҃же́нне не погрѣши́лъ є҆сѝ.

Цѣломꙋ́дрїе ᲂу҆держа́лъ є҆сѝ ꙗ҆́вѣ, кра́йнюю же кро́тость, и҆ высокогла́сное смире́нїе: и҆́миже возвыша́емь, трꙋдѡ́въ твои́хъ дѣ́йствомъ и҆ видѣ́нїемъ ра́дꙋѧсѧ принесе́сѧ, вѣне́цъ неꙋвѧда́емый прїи́мъ трꙋдѡ́въ твои́хъ воздаѧ̑нїѧ.

Бг҃оро́диченъ:

Тва́рей ꙗ҆ви́ласѧ є҆сѝ чⷭ҇таѧ, всѣ́хъ ви́димыхъ и҆ неви́димыхъ превы́шши всенепоро́чнаѧ, зижди́телѧ бо родила̀ є҆сѝ, ꙗ҆́коже и҆зво́ли воплоти́тисѧ во ᲂу҆тро́бѣ твое́й. є҆го́же со дерзнове́нїемъ молѝ спастѝ пою́щыѧ тѧ̀.

И҆́ный канѡ́нъ прпⷣбнагѡ і҆ѡ́сифа чꙋдотво́рца.

Гла́съ ѕ҃. Пѣ́снь а҃. І҆рмо́съ:

Волно́ю морско́ю скры́вшаго дре́вле, гони́телѧ мꙋчи́телѧ, подъ земле́ю скры́ша, спасе́нныхъ ѻ҆́троцы: но мы̀ ꙗ҆́кѡ ѻ҆трокови́цы, гдⷭ҇еви пои́мъ: сла́внѡ бо просла́висѧ.

Ѽ бж҃їй сло́ве, ми́лостиве, хрⷭ҇тѐ цр҃ю̀! пре́зри моѧ̑ мнѡ́гаѧ согрѣшє́нїѧ, и҆ ѿве́рзи мѝ косноѧзы̑чнаѧ ᲂу҆ста̀, и҆ дꙋ́хъ пра́въ ѡ҆бновѝ во ᲂу҆тро́бѣ мое́й, и҆ да́ждь мѝ хрⷭ҇тѐ, сло́во ра́зꙋма, да воспою̀ твоего̀ ᲂу҆го́дника прпⷣбнаго і҆ѡ́сифа.

Повинꙋ́лсѧ є҆сѝ прпⷣбне, вседꙋ́шнѡ твоемꙋ̀ ѻ҆ц҃ꙋ̀, прпⷣбномꙋ пафнꙋ́тїю: и҆ бы́лъ є҆сѝ ꙗ҆́кѡ дрꙋгі́й і҆саа́къ, ра́ди кра́йнѧгѡ послꙋша́нїѧ. тѣ́мже прпⷣбне, въ тѧ̀ всели́сѧ прест҃ы́й дх҃ъ, є҆гѡ́же дѣ́йствїемъ свѣ́тлѡ ᲂу҆краша́емый, и҆ ны́нѣ предстои́ши ст҃ѣ́й трⷪ҇цѣ ра́дꙋѧсѧ.

Оу҆подо́билсѧ є҆сѝ, прпⷣбне і҆ѡ́сифе, дре́внемꙋ і҆а́кѡвꙋ, послꙋ́шавшꙋ своеѧ̀ мт҃ре, ѻ҆́тчее благослове́нїе прїе́мшемꙋ: ты́ же прпⷣбномꙋ пафнꙋ́тїю повинꙋ́лсѧ є҆сѝ, и҆ ѿ негѡ̀ благослове́нїе прїи́мъ, ᲂу҆строѧ́ешисѧ па́стырь хрⷭ҇то́ва ста́да въ то́йже ѻ҆би́тели, бг҃ꙋ та́кѡ и҆зво́льшꙋ.

Бг҃оро́диченъ:

Къ тебѣ̀ прибѣга́емъ бцⷣе всепѣ́таѧ, и҆ тебѣ̀ припа́дающе мо́лимсѧ, твои́мъ хода́тайствомъ влⷣчце, и҆ моли́твами твоегѡ̀ ᲂу҆го́дника прпⷣбнагѡ і҆ѡ́сифа, ми́лостива на́мъ сотворѝ, є҆го́же пречи́стѡ и҆ недовѣ́домѡ родила̀ є҆сѝ хрⷭ҇та̀ бг҃а на́шего.

Катава́сїа: Крⷭ҇тъ начерта́въ:

Пѣ́снь г҃. І҆рмо́съ:

Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Да́ждь хрⷭ҇тѐ сп҃се, проще́нїе мно́гихъ на́шихъ согрѣше́нїй, ꙗ҆́кѡ да и҆ мы̀ почита́емъ па́мѧть твоегѡ̀ ᲂу҆го́дника прпⷣбнагѡ і҆ѡ́сифа, є҆гѡ́же моли́твами спаси́ ны.

Твои́ми моли́твами ми́лостиваго ᲂу҆молѧ́й бг҃а, прпⷣбне ѻ҆́ч҃е на́шъ і҆ѡ́сифе, и҆ грѣхо́вный мра́къ печа́ли на́шеѧ разорѝ, и҆ бл҃годꙋ́шїѧ ᲂу҆тѣше́нїе низпослѝ.

Ѿ младе́нства ты̀ бл҃же́нне і҆ѡ́сифе, позна́нъ бы́лъ є҆сѝ бг҃омъ, и҆ на того̀ надѣ́ѧлсѧ є҆сѝ, наставлѧ́емь на спаси́тєльнаѧ є҆гѡ̀ повелѣ̑нїѧ. є҆мꙋ́же ны́нѣ предстоѧ̀, со дерзнове́нїемъ ѡ҆ на́съ моли́сѧ.

Бг҃оро́диченъ:

Є҆ди́наго ст҃ы́ѧ трⷪ҇цы, сло́ва сн҃а родила̀ є҆сѝ дв҃о пречⷭ҇таѧ, є҆го́же съ прпⷣбнымъ і҆ѡ́сифомъ ѡ҆ рабѣ́хъ твои́хъ молѝ, вѣ́рою просѧ́щихъ грѣхѡ́въ проще́нїѧ.

И҆́нъ. І҆рмо́съ:

Тобо́ю, хрⷭ҇тѐ, небеса̀ ᲂу҆твержда́ема всѧ̑, сло́во бж҃їе и҆ си́ла, и҆сповѣ́дꙋютъ сла́вꙋ неизрече́ннꙋ, и҆ вседѣ́тельныѧ рꙋкѝ твоеѧ̀ сотворе́нїе: нѣ́сть бо пресвѧ́тъ, ра́звѣ тебє̀, гдⷭ҇и.

Не преда́ждь, влⷣко, твоегѡ̀ достоѧ́нїѧ врагѡ́мъ хва́лѧщымсѧ на ны̀, мо́лимъ тѧ̀ ми́лостиве, спасѝ правосла́вныѧ хрⷭ҇тїа́ны и҆ бꙋ́ди ми́лостивъ твои̑мъ рабѡ́мъ: и҆ и҆зба́ви ны̀ хрⷭ҇тѐ цр҃ю̀, мꙋче́нїѧ и҆ ѻ҆гнѧ̀ негаси́магѡ, и҆ сподо́би ны̀ десна́гѡ предстоѧ́нїѧ, моли́твами прпⷣбнагѡ і҆ѡ́сифа.

Напо́лнисѧ се́рдце твоѐ, прпⷣбне, бл҃года́ти хрⷭ҇то́вы, и҆ пра́вагѡ ᲂу҆че́нїѧ, бы́лъ є҆сѝ ѻ҆́бразъ мона́шествꙋющихъ, всѧ́кими добро́тами дꙋхо́вными: не да́лъ бо є҆сѝ сна̀ твои̑мъ ѻ҆чесє́мъ, ни вѣ́ждамъ дрема́нїѧ: но ꙗ҆́кѡ стѧжа́лъ є҆сѝ дерзнове́нїе ко гдⷭ҇ꙋ, молѝ ѡ҆ на́съ, мо́лимъ тѧ̀ да бꙋ́детъ на́мъ ми́лостивъ въ де́нь сꙋ́дный.

Ꙗ҆́кѡ ле́въ стра́шенъ и҆зъ пꙋсты́ни ᲂу҆стреми́всѧ, ᲂу҆страши́лъ є҆сѝ безбѡ́жныѧ є҆ретїкѝ, и҆мѣ́ѧ прпⷣбне ме́чь дꙋхо́вный, и҆́же є҆́сть глаго́лъ бж҃їй, посѣ́клъ є҆сѝ и҆зни̑кшаѧ нечє́стїѧ, и҆ и҆зъ ко́рене и҆сто́рглъ є҆сѝ ѕлосла́вныхъ ᲂу҆чє́нїѧ, собра́лъ є҆сѝ ꙗ҆́кѡ трꙋдолюби́ва пчела̀ ѿ всѣ́хъ писа́нїй бжⷭ҇твєннаѧ словеса̀, и҆ си́ми ᲂу҆ста̀ сквє́рнаѧ безбо́жныхъ загради́лъ є҆сѝ, прпⷣбне і҆ѡ́сифе.

Бг҃оро́диченъ:

Дивѧ́тсѧ, мт҃и бж҃їѧ, нбⷭ҇нїи чи́ни красотѣ̀ дꙋшѝ твоеѧ̀, и҆ чистотѣ̀ дѣ́вства твоегѡ̀: мы́ же земні́и недоꙋмѣ́емъ глаго́лати несказа́ннагѡ ржⷭ҇тва̀ твоегѡ̀, є҆мꙋ́же та́йнѡ наꙋча́ющесѧ, позна́хомъ тѧ̀ ро́ждшꙋю хрⷭ҇та̀ бг҃а на́шего. є҆го́же ми́лостива на́мъ сотворѝ въ де́нь сꙋ́дный стра́шнагѡ прише́ствїѧ є҆гѡ̀.

Конда́къ и҆ і҆́косъ пра́здника.

Та́же, прпⷣбнагѡ сѣда́ленъ, гла́съ г҃. Подо́бенъ: Красотѣ̀ дѣ́вства:

Хрⷭ҇то́ва ᲂу҆го́дника, є҆ѵⷢ҇льскагѡ ᲂу҆че́нїѧ послꙋ́шника, свѣ́тлѡ пра́зднꙋемъ прпⷣбнагѡ і҆ѡ́сифа па́мѧть: прїиди́те ᲂу҆блажи́мъ страннопрїи́мца сꙋ́ща, сирота́мъ и҆ вдова́мъ застꙋ́пника те́пла, и҆ ни́щымъ да́телѧ нескꙋ́дна, цѣломꙋ́дрїѧ храни́телѧ, и҆ добродѣ́телей дѣ́лателѧ, и҆ є҆ресе́й ѡ҆бличи́телѧ непосты́дна, и҆ свѣти́льника рꙋ́сскаго, є҆гѡ́же ра́ди просѧ́ще ѿ хрⷭ҇та̀ дꙋша́мъ на́шымъ спасе́нїѧ, и҆ мі́рꙋ ве́лїѧ ми́лости.

Сла́ва, и҆ ны́нѣ, пра́здника.

А҆́ще ли пое́ши прпⷣбнагѡ і҆ѡ́сифа кромѣ̀ попра́зднства, глаго́ли по сѣда́льнѣ: Сла́ва, и҆ ны́нѣ, се́й бг҃оро́диченъ:

Земноро́днїи тобо́ю спасе́ни бы́хомъ, пречⷭ҇таѧ бцⷣе: пре́жде вѣ̑къ бо и҆зъ ѻ҆ц҃а̀ ро́ждшагосѧ сн҃а бж҃їѧ породила̀ є҆сѝ, за милосе́рдїе мно́гое благоволи́вшаго и҆зъ тебє̀ роди́тисѧ: и҆́же спасѐ а҆да́ма пра́ѻтца, и҆ раѧ̀ сотворѝ жи́телѧ. є҆го́же молѝ мт҃и пребл҃гослове́ннаѧ, спасти́сѧ на́мъ вѣ́рнѡ пою́щымъ тѧ̀.

Пѣ́снь д҃. І҆рмо́съ:

Прише́лъ є҆сѝ ѿ дв҃ы, не хода́тай ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Ты̀ прпⷣбне і҆ѡ́сифе, мона́шествꙋющихъ бы́лъ є҆сѝ вѣне́цъ, не ка́менїемъ многоцѣ́ннымъ ᲂу҆кра́шенъ, но добродѣ́тельми ѡ҆бложе́нъ, и҆ ꙗ҆ви́лсѧ є҆сѝ, бл҃же́нне, благодарова́нное вои́стиннꙋ ᲂу҆краше́нїе.

Бжⷭ҇твеннꙋю бг҃омꙋ́дре, почти́лъ є҆сѝ мꙋ́дрость, ꙗ҆́же тѧ̀ дарова̑нїи благи́ми ѡ҆богатѝ, сла́вꙋ вѣ́чнꙋю тебѣ̀ и҆схода́тайствовавши, прпⷣбне ѻ҆́ч҃е і҆ѡ́сифе всече́стне.

Свѣ́тлостїю нра́вѡмъ твои́хъ, и҆ ѻ҆́бразы бл҃года́ти, прпⷣбне ѻ҆́ч҃е і҆ѡ́сифе, подо́бнѣ пожи́лъ є҆сѝ: тѣ́мже благопристꙋ́пенъ ты̀ всѣ̑мъ бы́лъ є҆сѝ, всебл҃же́нне досточꙋ́дне.

Бг҃оро́диченъ:

Оу҆мерщвле́нїе плодо́мъ мнѣ̀ є҆́ѵа принесѐ, ты́ же жи́знь ро́ждши ѵ҆поста́снꙋю пречⷭ҇таѧ, а҆́бїе и҆спра́вила є҆сѝ. тѣ́мже зове́мъ тѝ: сла́ва си́лѣ твое́й.

И҆́нъ. І҆рмо́съ:

Оу҆диви́сѧ тво́й ра́зꙋмъ ѿ менє̀, ᲂу҆слы́шавшꙋ пресла̑внаѧ велѣ̑нїѧ смотре́нїѧ твоегѡ̀, ᲂу҆крѣпи́сѧ же возлюбле́нїемъ твоегѡ̀ схожде́нїѧ: ты́ бо моеѧ̀ нищеты̀ не ѿве́рглсѧ є҆сѝ.

Ꙗ҆́коже дре́вле і҆ѡ́сифꙋ прекра́сномꙋ зави́дѣвше бра́тїѧ, совѣ́тъ лꙋка́въ ᲂу҆мы́слиша: та́кѡ и҆ на тѧ̀, прпⷣбне і҆ѡ́сифе, совѣ́товаша лꙋка́вое ᲂу҆мышле́нїе. ты́ же любо́вїю ко хрⷭ҇тꙋ̀ вперѧ́емь, си́хъ негодова̑нїѧ въ ничто́же вмѣни́въ, непреста́ннѡ моли́сѧ ѡ҆ на́съ гдⷭ҇ꙋ.

И҆зше́лъ є҆сѝ, прпⷣбне, ѿ и҆дѣ́же пре́жде нача́льствꙋѧ, хрⷭ҇тꙋ̀ цр҃ю̀ нбⷭ҇номꙋ молѧ́сѧ и҆ пречⷭ҇тѣй бцⷣѣ, ше́ствꙋѧ на мѣ́сто, бг҃омъ тебѣ̀ пока́занное, и҆ та́мѡ пꙋсты́ню населѧ́еши, хрⷭ҇та̀ ра́ди: въ не́йже зарю̀ свѣ́тлꙋ ᲂу҆зрѣ́ти сподо́билсѧ є҆сѝ бл҃года́ти дх҃о́вныѧ, бл҃же́нне і҆ѡ́сифе.

Прпⷣбне ѻ҆́ч҃е, ᲂу҆подо́билсѧ є҆сѝ і҆ѡ́сифꙋ прекра́сномꙋ: не покори́лсѧ бо є҆сѝ сладостра́стїю, и҆ ѕѣлѡ̀ тща́лсѧ є҆сѝ ѡ҆ цѣломꙋ́дрїи, мы́сленнаго ѕмі́ѧ побѣди́лъ є҆сѝ, и҆ со́ннагѡ житїѧ̀ небре́глъ є҆сѝ, и҆зъ темни́цы тѣ́ла и҆зше́лъ є҆сѝ, и҆ ца́рь не є҆гѵ́пта, но страсте́й бы́лъ є҆сѝ, и҆ добродѣ́тели пшени́цꙋ собра́лъ є҆сѝ, є҆́юже ны̀ ча̑да твоѧ̑ пита́еши.

Бг҃оро́диченъ:

Пречⷭ҇таѧ бцⷣе, вѣ́мы тѧ̀ хрⷭ҇тїа́не тве́рдꙋю защи́тницꙋ, и҆ ско́рꙋю помо́щницꙋ, и҆ въ бѣда́хъ и҆збавле́нїе. тѣ́мже мо́лимъ тѧ̀: и҆спросѝ на́мъ ᲂу҆ хрⷭ҇та̀ мно́жествꙋ согрѣше́нїй проще́нїе, и҆ вѣ́чныѧ мꙋ́ки и҆збавле́нїе.

Пѣ́снь є҃. І҆рмо́съ:

Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Оу҆мо́мъ чи́стымъ писа́нїємъ бжⷭ҇твєннымъ бесѣ́довалъ є҆сѝ, бг҃оглаго́ливе і҆ѡ́сифе, и҆ видѣ́нїѧ и҆ дѣѧ́нїѧ собра́въ бога́тство, ѻ҆́ч҃е прпⷣбне.

Премꙋ́дрости глꙋбинꙋ̀ и҆спыта́въ мꙋ́дре і҆ѡ́сифе, дости́глъ є҆сѝ ѡ҆брѣстѝ, є҆ли́кѡ благопотре́бно, и҆ би́серъ многоцѣ́нный болѣ́зньми стѧжа́лъ є҆сѝ, пребл҃же́нне, ра́зꙋма.

А҆́ще земно́е ѻ҆те́чество бл҃же́нне і҆ѡ́сифе, ѡ҆ста́вилъ є҆сѝ, всѧ́чески благоимени́тнꙋ бж҃їи мт҃ри ѻ҆би́тель созда́лъ є҆сѝ, и҆ мно́жество мона́шествꙋющихъ въ не́й собра́лъ є҆сѝ: сегѡ̀ ра́ди пе́рвое ѻ҆те́чество нбⷭ҇ное прїѧ́лъ є҆сѝ, со дерзнове́нїемъ, ѻ҆́ч҃е, за ны̀ моли́сѧ хрⷭ҇тꙋ̀ бг҃ꙋ, рабы̑ твоѧ̑.

Бг҃оро́диченъ:

Сѐ во чре́вѣ, бцⷣе пречⷭ҇таѧ, хрⷭ҇та̀ бг҃а па́че сло́ва и҆мѣ́ла є҆сѝ, ꙗ҆́коже и҆са́їа провозгласѝ: вы́ше є҆стества̀ сего̀ бг҃ороди́тельнице родила̀ є҆сѝ.

И҆́нъ. І҆рмо́съ:

Ми́ръ мно́гъ лю́бѧщымъ тѧ̀, хрⷭ҇тѐ, и҆ но́щь просвѣще́нїѧ въ пи́щи слове́съ твои́хъ: сегѡ̀ ра́ди ѿ но́щи ᲂу҆́тренююще, про́симъ ми́лости ѿ тебє̀, чл҃вѣколю́бче.

Всѧ́къ пи́сменникъ наꙋчи́всѧ бжⷭ҇твенномꙋ писа́нїю, подо́бенъ є҆́сть црⷭ҇твїю нбⷭ҇номꙋ: ты́ же прпⷣбне, поревнова́въ є҆ѵⷢ҇льскомꙋ ᲂу҆че́нїю, и҆ ѿ сегѡ̀ прїѧ́лъ є҆сѝ крѣ́пость дꙋхо́внꙋю. сха́рїа є҆вре́ина посрами́лъ є҆сѝ, и҆ є҆гѡ̀ проклѧ̑тыѧ ᲂу҆ченикѝ та̑ѧжде мꙋ́дрствꙋющыѧ, и҆ а҆на́ѳемѣ пре́далъ є҆сѝ.

Прпⷣбне ѻ҆́ч҃е, дарова̀ тебѣ̀ бг҃ъ мꙋ́дрость, и҆ сло́во ра́зꙋма: ты́ же проповѣ́далъ є҆сѝ въ трїе́хъ ли́цѣхъ є҆ди́наго бг҃а, и҆ семꙋ̀ свидѣ́тельство приве́лъ є҆сѝ ѿ бжⷭ҇твенныхъ писа́нїй, наꙋча́ѧ покланѧ́тисѧ въ трⷪ҇цѣ є҆ди́номꙋ бг҃ꙋ.

Прпⷣбне ѻ҆́ч҃е і҆ѡ́сифе, безꙋ̑мныѧ є҆ретїкѝ глаго́лющыѧ, ꙗ҆́кѡ є҆щѐ хрⷭ҇то́съ не роди́сѧ, ѡ҆бличи́въ ꙗ҆́снѡ сказа́лъ є҆сѝ, ꙗ҆́кѡ роди́сѧ хрⷭ҇то́съ на́шегѡ ра́ди спасе́нїѧ ѿ пречⷭ҇тыѧ дв҃ы марі́и, и҆ на́съ ра́ди пострада̀ во́лею распѧ́тїе, и҆ воскр҃се тридне́внѡ: и҆ па́ки грѧде́тъ со ст҃ы́ми а҆́гг҃лы, сꙋди́ти ве́сь мі́ръ.

Бг҃оро́диченъ:

Ѽ безꙋ́мнїи є҆ретїцы̀ и҆ ѿстꙋ́пницы, и҆ непокори́вїи є҆вре́є. є҆го́же вы̀ ча́ете, то́й нѣ́сть хрїсто́съ, но а҆нті́хрїстъ є҆́сть, ꙗ҆́коже свидѣ́тельствꙋютъ бжⷭ҇твєннаѧ писа̑нїѧ. мы́ же и҆сповѣ́дꙋемъ хрⷭ҇та̀ бг҃а на́шего, ро́ждшагосѧ неискꙋсомꙋ́жнѡ ѿ дв҃ы чⷭ҇тыѧ марі́и: є҆ѧ́же моли́твами и҆зба́ви на́съ хрⷭ҇тѐ, ѿ таковы́ѧ пре́лести, и҆ спасѝ дꙋ́шы на́шѧ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Вселе́ннѣй свѣти́ло пресвѣ́тлое, ѻ҆́ч҃е, ꙗ҆ви́лсѧ є҆сѝ і҆ѡ́сифе, словесы̀ дꙋхо́вными просвѣща́ѧ, вѣ́рою и҆ любо́вїю къ тебѣ̀ притека́ющыѧ.

Бл҃же́нное житїѐ, ѻ҆́ч҃е, преше́лъ є҆сѝ, назда́въ ᲂу҆́бѡ чꙋ̑вства, внѣ̀ бы́лъ є҆сѝ мїрска́гѡ мѧте́жа, и҆ бг҃ꙋ прибли́жилсѧ є҆сѝ, прпⷣбне і҆ѡ́сифе.

Ѕѣлѡ̀ ми́лостива, и҆ страннопрїи́мца показа́ тѧ сп҃съ на́шъ мі́рꙋ, ѻ҆́ч҃е, и҆ врача̀ болѧ́щымъ і҆ѡ́сифе, сирота́мъ и҆ ᲂу҆бѡ́гимъ застꙋ́пника любе́зна.

Бг҃оро́диченъ:

Па́че є҆стества̀, дв҃о, родила̀ є҆сѝ, и҆ вѣ́чнꙋеши дв҃а, ꙗ҆́вльшисѧ и҆́стиннагѡ сн҃а и҆ бг҃а твоегѡ̀ мт҃и чⷭ҇таѧ.

И҆́нъ. І҆рмо́съ:

Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на влⷣцѣ вопїю́ ти: ѿ тли́ мѧ возведѝ.

Ꙗ҆́кѡ свѧще́нникъ сы́й пои́стиннѣ приносѧ̀ хрⷭ҇тꙋ̀ бг҃ꙋ же́ртвꙋ безкро́внꙋ, та́йнѡ возложе́ннꙋю, и҆ ѿ а҆́гг҃лъ сла́вимꙋю, ѿ бг҃а ѻ҆ц҃а̀ прїе́млемꙋ, и҆ ст҃ы́мъ дх҃омъ ѡ҆сѣнѧ́емꙋ, и҆ на́мъ на спасе́нїе да́рꙋемꙋ.

Ѽ безꙋ́мнїи є҆ретїцы̀, что̀ поѡщрѧ́ете ѧ҆зы́ки бг҃охꙋ̑льныѧ, глаго́люще: не можа́ше ли бг҃ъ не роди́всѧ спастѝ мі́ръ и҆на́кѡ; ты́ же прпⷣбне і҆ѡ́сифе, си́хъ ᲂу҆ста̀ загради́лъ є҆сѝ, наꙋча́ѧ сла́вити хрⷭ҇та̀ бг҃а на́шего.

Прпⷣбне ѻ҆́ч҃е і҆ѡ́сифе, є҆ретїкѡ́въ ᲂу҆ста̀ загради́лъ є҆сѝ, приводѧ̀ свидѣ́тєльства ѿ бжⷭ҇твенныхъ писа́нїй: пыта́йте, речѐ, безꙋ́мнїи, писа̑нїѧ, ꙗ҆́кѡ ꙗ҆ви́ласѧ є҆́сть ст҃а́ѧ трⷪ҇ца а҆враа́мꙋ въ тре́хъ ли́цахъ, во є҆ди́номъ бжⷭ҇твѣ̀.

Бг҃оро́диченъ:

Припа́даемъ тебѣ̀ пречⷭ҇таѧ бцⷣе, со ᲂу҆миле́нїемъ, глаго́люще: и҆зба́ви ны̀ мт҃и хрⷭ҇та̀ бг҃а, всѧ́кїѧ пре́лести разлꙋча́ющїѧ ѿ бг҃а, и҆ сподо́би въ де́нь сꙋ́дный полꙋчи́ти ѿ хрⷭ҇та̀ ми́лость, и҆ не ѿпа́сти десна́гѡ предстоѧ́нїѧ.

Конда́къ, гла́съ и҃. Подо́бенъ: Взбра́нной:

Житїѧ̀ треволнє́нїѧ, и҆ мѧте́жъ мїрскі́й, и҆ стра̑стнаѧ взыгра̑нїѧ въ ничто́же вмѣни́въ, пꙋсты́нный граждани́нъ показа́лсѧ є҆сѝ, мно́гихъ бы́въ наста́вникъ і҆ѡ́сифе прпⷣбне: мона́хѡвъ собра́тель, и҆ моле́бникъ вѣ́ренъ, чистоты̀ рачи́тель, молѝ хрⷭ҇та̀ бг҃а, спасти́сѧ дꙋша́мъ на́шымъ.

І҆́косъ:

Бжⷭ҇твенными добродѣ́тельми твои́ми, себѐ, мꙋ́дре, ᲂу҆краси́лъ є҆сѝ, и҆ сп҃са хрⷭ҇та̀ жили́ще содѣ́лалъ є҆сѝ ѻ҆́ч҃е, мꙋ́жественнѣ, ꙗ҆́коже зла́то и҆скꙋси́всѧ вѣ́рою къ бг҃ꙋ и҆ наде́ждею, и҆ любо́вїю ѻ҆бѣ́ты полага́ѧ: воздержа́нїемъ пости́всѧ ꙗ҆́кѡ безпло́тенъ, въ цѣломꙋ́дрїи, и҆ въ смире́нїи возвы́силсѧ є҆сѝ. тѣ́мже и҆ мы̀ моли́твами твои́ми просвѣ́щшесѧ, прпⷣбне і҆ѡ́сифе, вопїе́мъ тѝ: ра́дꙋйсѧ, ꙗ҆́кѡ и҆змла́да бг҃ꙋ послꙋжи́лъ є҆сѝ: ра́дꙋйсѧ, ꙗ҆́кѡ притека́ющихъ къ тебѣ̀ ко спасе́нїю хода́тай бы́лъ є҆сѝ: ра́дꙋйсѧ, хрⷭ҇толюби́вомꙋ во́инствꙋ похвала̀: ра́дꙋйсѧ, ꙗ҆́кѡ твои́ми моли́твами проти́внїи побѣжда́ютсѧ: ра́дꙋйсѧ, ꙗ҆́кѡ всѣ̑мъ просѧ́щымъ дае́ши да́ръ, ѿ гдⷭ҇а дарова́нный тебѣ̀: ра́дꙋйсѧ, ꙗ҆́кѡ чꙋдесы́ тѧ бг҃ъ прославлѧ́етъ, и҆ всѣ́хъ зва́ти тебѣ̀ наꙋча́етъ: ра́дꙋйсѧ, прпⷣбне ѻ҆́ч҃е і҆ѡ́сифе, по́стникѡвъ ᲂу҆добре́нїе. молѝ хрⷭ҇та̀ бг҃а, спасти́сѧ дꙋша́мъ на́шымъ.

Пѣ́снь з҃. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ благочести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.

Благоꙋха́ютъ прпⷣбне і҆ѡ́сифе, твои́хъ ᲂу҆че́нїй сла̑дкаѧ словеса̀ лю́бѧщымъ та̑ѧ: ᲂу҆страша́ютъ же є҆ретїкѡ́въ мꙋдрова̑нїѧ. бл҃года́тїю бо ст҃а́гѡ дх҃а глаго́лалъ є҆сѝ, бжⷭ҇тво̀ є҆ди́но проповѣ́дꙋѧ въ тре́хъ ли́цѣхъ: сло́ва же воплоще́нїе поѧ̀, благоꙋха́еши на́съ пребога́те.

Ри́зъ хꙋ́дость и҆мѣ́лъ є҆сѝ прпⷣбне і҆ѡ́сифе, въ зимѣ́ же и҆ лѣ́тѣ не премѣнѧ́ѧ, болѣ́зненнѡ претерпѣва́лъ є҆сѝ бг҃а ра́ди соверше́ннѡ: тѣ́мже и҆ нбⷭ҇нагѡ прїѧ́тїѧ сподо́билсѧ є҆сѝ наслѣ́дникъ бы́ти.

Сло́во твоѐ со́лїю растворе́но, ѻ҆́ч҃е, и҆ житїѐ твоѐ бл҃года́тїю пребл҃же́нне сїѧ́ѧ ꙗ҆ви́сѧ пречꙋ́дне: тѣ́мже и҆ въ вы̑шнїѧ ѻ҆би́тєли ра́дꙋѧсѧ всели́лсѧ є҆сѝ, хрⷭ҇тꙋ̀ со дерзнове́нїемъ ны́нѣ предстои́ши ѡ҆ на́съ молѧ́сѧ.

Бг҃оро́диченъ:

Оу҆правлѧ́ющи пречⷭ҇таѧ на́ше житїѐ, къ твоемꙋ̀ всети́хомꙋ приста́нищꙋ напра́ви: бг҃а бо родила̀ є҆сѝ бл҃ги́хъ и҆сто́чника, всѣ̑мъ подаю́щи вѣ̑рнымъ нетлѣ́нїѧ бл҃года̑ти.

И҆́нъ. І҆рмо́съ:

Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Сказꙋ́ѧ, прпⷣбне, ѿ бжⷭ҇твенныхъ писа́нїй, ка́кѡ и҆ ко́еѧ ра́ди вины̀ подоба́етъ хрⷭ҇тїа́нѡмъ покланѧ́тисѧ, и҆ почита́ти ст҃ы̑ѧ і҆кѡ́ны, и҆ честны́й крⷭ҇тъ хрⷭ҇то́въ, и҆ прѡ́чаѧ свѧщє́ннаѧ воѡбражє́нїѧ. си́мъ прїѧ́лъ є҆сѝ ѿ хрⷭ҇та̀ дарова̑нїѧ, поѧ̀: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

И҆зъ є҆гѵ́пта страсте́й и҆зше́лъ є҆сѝ прпⷣбне, и҆ преше́лъ є҆сѝ мо́ре жите́йское безъ и҆стопле́нїѧ, и҆ дости́глъ є҆сѝ го́рꙋ небе́снꙋю, мнѡ́гїѧ грѣ́шныхъ дꙋ́шы приводѧ̀ хрⷭ҇тꙋ̀ покаѧ́нїемъ, и҆ поѧ̀: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Потопи́лъ є҆сѝ прпⷣбне, фараѡ́на мы́сленнаго въ вода́хъ сле́зъ твои́хъ, и҆ є҆гѡ̀ колесни̑цы, и҆̀же сꙋ́ть лꙋка̑выѧ де́мѡны, и҆ ко́ни и҆ вса́дники, ѕлоꙋ̑мныѧ є҆ретїкѝ и҆ безбѡ́жныѧ, и҆ ра́дꙋѧсѧ пѣ́снь побѣ́днꙋю воспѣ́лъ є҆сѝ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Бг҃оро́диченъ:

А҆́зъ, дв҃о чⷭ҇таѧ, къ тебѣ̀ прибѣга́ю ѻ҆каѧ́нный, и҆скі́й тобо́ю ѡ҆брѣстѝ спасе́нїе: вѣ́мъ бо пречⷭ҇таѧ влⷣчце, ꙗ҆́кѡ мо́жеши, є҆ли̑ка хо́щеши. хрⷭ҇та̀ є҆го́же родила̀ є҆сѝ пречⷭ҇таѧ, молѝ, да бꙋ́детъ на́мъ ми́лостивъ въ де́нь и҆спыта́нїѧ, пою́щымъ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Пѣ́снь и҃. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Вѣне́цъ благолѣ́пенъ, хрⷭ҇то́съ жизнода́вецъ на ве́рхъ тво́й положѝ, тезоиме́нне і҆ѡ́сифе, дѣѧ́ньми бо просїѧ́лъ є҆сѝ и҆ видѣ̑нїи, зовы́й: благослови́те, всѧ̑ дѣла̀ гдⷭ҇нѧ, гдⷭ҇а.

Всѧ̑ преше́дъ чꙋ́вствєннаѧ пребл҃же́нне, ᲂу҆мꙋ̀ пе́рвомꙋ прибли́жилсѧ є҆сѝ, дꙋшѝ твоеѧ̀ чистото́ю, житїѧ́ же свѣ́тлостїю вѣнчено́сче і҆ѡ́сифе, зовы́й: благослови́те, всѧ̑ дѣла̀ гдⷭ҇нѧ, гдⷭ҇а.

Въ дꙋшѝ твое́й бжⷭ҇твенное бога́тство дх҃а ст҃а́гѡ собра́въ, непоро́чнꙋю моли́твꙋ, и҆ чистотꙋ̀ краснолѣ́пнꙋю, бдѣ́нїе и҆ воздержа́нїе: сегѡ̀ ра́ди жили́ще ст҃ы́ѧ трⷪ҇цы ꙗ҆ви́лсѧ є҆сѝ, прпⷣбне і҆ѡ́сифе.

Бг҃оро́диченъ:

Влⷣчце пречⷭ҇таѧ, грѣ́шникѡвъ спасе́нїе, прїимѝ мольбꙋ̀ сїю̀, и҆ и҆зба́ви мѧ̀ ѿ грѣхѡ́въ мои́хъ, твоемꙋ̀ сн҃ꙋ прибѣга́ющаго, моли́твами ᲂу҆го́дника твоегѡ̀ прпⷣбнагѡ і҆ѡ́сифа.

И҆́нъ. І҆рмо́съ:

Оу҆жасни́сѧ боѧ́йсѧ не́бо, и҆ да подви́жатсѧ ѡ҆снова̑нїѧ землѝ. се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ: є҆гѡ́же ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Что̀ безꙋ́мнїи є҆ретїцы̀ всꙋ́е мѧте́тесѧ, глаго́люще: ꙗ҆́кѡ ᲂу҆жѐ се́дмь ты́сѧщъ лѣ́тъ сконча́шасѧ. хрⷭ҇то́во же прише́ствїе є҆щѐ нѣ́сть; сїѧ̑ глаго́лющихъ де́рзостнѣ ѡ҆бличи́лъ є҆сѝ, сказꙋ́ѧ: бли́зъ є҆́сть при две́рехъ прише́ствїе, ꙗ҆́кѡ гл҃го́лютъ прⷪ҇ро́цы, и҆ а҆пⷭ҇ли, и҆̀мже сказа̀ ст҃ы́й дх҃ъ, и҆ наꙋча́ѧ пѣ́ти: є҆го́же дѣ́ти бл҃гослови́те, свѧще́нницы по́йте, и҆ превозноси́те во всѧ̑ вѣ́ки.

Стра́шно є҆́сть впа́сти въ рꙋ́цѣ бг҃а жи́ва, безꙋ́мнїи не льсти́тесѧ, не крести́тъ хрⷭ҇то́съ по сме́рти спасе́нымъ креще́нїемъ, непра́вѣ ѡ҆ не́мъ мꙋ́дрствꙋющихъ, но во ѻ҆гнѝ негаса́ющемъ мꙋ́читъ: мы́ же вѣ́рнїи ᲂу҆ хрⷭ҇та̀ про́симъ вре́мѧ покаѧ́нїѧ, да бꙋ́детъ на́мъ ми́лостивъ въ де́нь стра́шнагѡ є҆гѡ̀ прише́ствїѧ. сїѧ̑ прпⷣбне глаго́лалъ є҆сѝ, и҆ на́съ ᲂу҆чи́лъ є҆сѝ пѣ́ть: гдⷭ҇а дѣ́ти благослови́те, свѧще́нницы по́йте, и҆ превозноси́те є҆го̀ во вѣ́ки.

Мѡѷсе́й вели́кїй къ пꙋсты́ни повелѣ̀ і҆и҃лю вы́спрь на мѣ́дный ѕмі́й взира́ти, и҆ та́кѡ ᲂу҆грызе́нїѧ ѕмїи́на и҆збавлѧ́хꙋсѧ: ты́ же прпⷣбне, нечести̑выѧ наꙋча́ѧ покланѧ́тисѧ крⷭ҇тꙋ̀ животворѧ́щемꙋ, и҆ сла́вити ст҃ꙋ́ю трⷪ҇цꙋ во є҆ди́номъ бжⷭ҇твѣ̀, и҆ си́мъ и҆збавлѧ́тисѧ пре́лести ѕмі́ѧ мы́сленнагѡ дїа́вола, и҆ на́съ ᲂу҆чѧ̀ пѣ́ти: дѣ́ти благослови́те гдⷭ҇а, свѧще́нницы по́йте, и҆ превозноси́те є҆го̀ во вѣ́ки.

Бг҃оро́диченъ:

Тобо́ю пречⷭ҇таѧ бцⷣе, ѿ всѧ́кїѧ напа́сти и҆збавлѧ́емсѧ, и҆зба́ви ны̀ мт҃и бж҃їѧ вѣ́чнагѡ ѡ҆сꙋжде́нїѧ, да зове́мъ тѝ немо́лчнѡ: ра́дꙋйсѧ, кꙋпино̀ неѡпали́маѧ, ра́дꙋйсѧ, горо̀ присѣ́ннаѧ, ра́дꙋйсѧ, запеча́танный и҆сто́чниче, ра́дꙋйсѧ, дв҃о чⷭ҇таѧ, гдⷭ҇ь съ тобо́ю. є҆го́же благослови́тъ всѧ̀ тва́рь, и҆ превозно́ситъ во всѧ̑ вѣ́ки.

Пѣ́снь ѳ҃. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Пречестны́й ѻ҆́ч҃е і҆ѡ́сифе, ны́нѣ чи́стѡ ᲂу҆слажда́ешисѧ пи́щею па́че ᲂу҆́мною, и҆дѣ́же собо́ри ст҃ы́хъ ѻ҆́крестъ гдⷭ҇а ликꙋ́ютъ бл҃же́нне, и҆̀же ны́нѣ чтꙋ́щыѧ тѧ̀, хода́тайствꙋѧ къ себѣ̀ привлецы̀.

Преше́лъ є҆сѝ ра́дꙋѧсѧ къ жела́нїємъ раѧ̀, ко є҆ди́номꙋ и҆́стиннѡ ꙗ҆́вѣ бл҃же́нствꙋ, къ пребо́льшей добро́тѣ, и҆ къ жи́зни и҆́стиннѡ нестарѣ́ющейсѧ, и҆ къ свѣ́тꙋ невече́рнемꙋ бг҃оно́се ѻ҆́ч҃е і҆ѡ́сифе.

Ꙗ҆́коже со́лнце просїѧ́лъ є҆сѝ въ мона́шескихъ собо́рѣхъ: ѿ млады́хъ бо ногте́й ѡ҆свѧще́нъ бы́лъ є҆сѝ, ꙗ҆́коже зарю̀ и҆спꙋща́ѧ добродѣ́тєли своегѡ̀ житїѧ̀, прпⷣбне і҆ѡ́сифе, бг҃оно́се ѻ҆́ч҃е пребога́те.

Бг҃оро́диченъ:

Разꙋмѣ́вше и҆здале́ча, прозорли́выми ѻ҆чесы̀, прⷪ҇ро́цы тѧ̀ ꙗ҆́вѣ провозвѣсти́ша, хотѧ́щꙋю мт҃рь бы́ти вседѣ́телѧ и҆ влⷣки всѣ́хъ. тѣ́мъ тѧ̀ всепѣ́таѧ, бцⷣꙋ и҆сповѣ́дꙋемъ.

И҆́нъ. І҆рмо́съ:

Не рыда́й менѐ, мт҃и, зрѧ́щи во гро́бѣ, є҆го́же во чре́вѣ безъ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.

Прпⷣбне ѻ҆́ч҃е і҆ѡ́сифе, помина́й на́съ ча̑да твоѧ̑ ко хрⷭ҇тꙋ̀ бг҃ꙋ на́шемꙋ, да спасе́тъ ѿ всѧ́кихъ бѣ́дъ и҆ скорбе́й, и҆ сподо́битъ ми́лости и҆ десна́гѡ предстоѧ́нїѧ въ де́нь сꙋ́дный, сла́вити своѐ бж҃ество̀, вѣ́рою и҆ любо́вїю того̀ велича́ющыѧ.

Прпⷣбне ѻ҆́ч҃е і҆ѡ́сифе, мона́шеское житїѐ возлюби́лъ є҆сѝ, и҆ хꙋ́лѧщихъ то́е ᲂу҆ста̀ загради́лъ є҆сѝ, а҆пⷭ҇ла па́ѵла ꙗ҆̀же къ тїмоѳе́ю словеса̀ возвѣща́ѧ, ꙗ҆́кѡ мона́шеское житїѐ бг҃ꙋ прїѧ́тно є҆́сть, є҆мꙋ́же и҆ ты̀ си́мъ благоꙋгоди́лъ є҆сѝ: сегѡ̀ ра́ди тѧ̀ ᲂу҆блажа́емъ.

Ꙗ҆́кѡ і҆исꙋ́съ наѵи́нъ подвиза́сѧ на і҆ерїхѡ́нѧны, та́кѡ ты̀ бл҃же́нне, словесы̀ твои́ми безбо́жныхъ ᲂу҆ста̀ загради́лъ є҆сѝ ѿстꙋ́пникѡвъ, и҆ мнѡ́гаѧ невѣ̑рїѧ ᲂу҆кроти́лъ є҆сѝ, наꙋча́ѧ сла́вити ст҃ꙋ́ю трⷪ҇цꙋ: сегѡ̀ ра́ди тѧ̀ ᲂу҆блажа́емъ.

Бг҃оро́диченъ:

Ѽ прест҃а́ѧ влⷣчце бцⷣе! не и҆́мамы по́мощи и҆ны́ѧ ра́звѣ тебє̀, моли́сѧ сн҃ꙋ твоемꙋ̀ и҆ бг҃ꙋ на́шемꙋ, съ прпⷣбнымъ і҆ѡ́сифомъ, да соблюде́тъ лю́ди твоѧ̑, и҆ сохрани́тъ странꙋ̀ на́шꙋ нерꙋши́мꙋ, и҆ да спасе́тъ ны̀ вѣ́рою и҆ любо́вїю тѧ̀ велича́ющыѧ.

Свѣти́ленъ прпⷣбнагѡ:

Мїрска́гѡ пристра́стїѧ ꙗ҆́кѡ скве́рны ᲂу҆клони́лсѧ є҆сѝ, и҆ а҆́лчбою пло́ть твою̀ ᲂу҆вѧди́лъ є҆сѝ ѻ҆́ч҃е, и҆ нбⷭ҇ною сла́вою со а҆́гг҃лы ѡ҆богати́лсѧ є҆сѝ: тѣ́мже непреста́ннѡ молѝ хрⷭ҇та̀ бг҃а прпⷣбне і҆ѡ́сифе.

Два́жды.

Сла́ва, и҆ ны́нѣ, пра́здника.

На хвали́техъ стїхи̑ры, на д҃, гла́съ є҃. Подо́бенъ: Прпⷣбне ѻ҆́ч҃е:

Прпⷣбне ѻ҆́ч҃е, дꙋ́шꙋ твою̀ съ тѣ́ломъ ѡ҆чи́стилъ є҆сѝ, и҆ ст҃а́гѡ дх҃а прекра́снаѧ ѻ҆би́тель ꙗ҆ви́лсѧ є҆сѝ, и҆ сла́вна тѧ̀ концє́мъ, пребл҃же́нне і҆ѡ́сифе, содѣ́ла. въ чꙋдесѣ́хъ же вели́ка свѣти́льника, просвѣти́вшаго сꙋ́щыѧ во мра́цѣ невѣ́дѣнїѧ: ꙗ҆́кѡ наста́вника мно́гихъ мона́хѡвъ, соше́дшесѧ велемꙋ́дреннѡ ᲂу҆блажи́мъ.

Ꙗ҆ви́лсѧ є҆сѝ бг҃обл҃же́нне, мꙋ́драѧ плени́ца, свѧзꙋ́ющаѧ мнѡ́гаѧ врагѡ́въ ѡ҆полчє́нїѧ: тѣ́мже и҆ вѣнце́мъ вѣнча́лсѧ є҆сѝ неꙋвѧда́емымъ, весе́лїе и҆ ра́дость вѣ́чнꙋю воспрїѧ́лъ є҆сѝ бг҃омꙋ́дре і҆ѡ́сифе, молѝ дарова́ти ми́ръ мі́рꙋ, и҆ дꙋша́мъ на́шымъ ве́лїю ми́лость.

Прпⷣбне ѻ҆́ч҃е, тѣлє́сныѧ стра̑сти ѕѣ́льнымъ воздержа́нїемъ, и҆ по́стническими моли́твами же и҆ трꙋды̑ ᲂу҆спи́лъ є҆сѝ, сле́зными же потѡ́ки и҆ пѡ́ты ᲂу҆́глїе сладостра́стїѧ погаси́лъ є҆сѝ: тогѡ̀ ра́ди въ чꙋдесѣ́хъ сла́вна тѧ̀ показа̀ гдⷭ҇ь рѡссі̑йскимъ лю́демъ і҆ѡ́сифе бл҃же́нне, и҆ ᲂу҆краси́ тѧ вы́шними дарова̑нїи. є҆мꙋ́же слꙋ́жиши съ нбⷭ҇ными си́лами, і҆и҃сꙋ чл҃вѣколю́бцꙋ и҆ сп҃сꙋ дꙋ́шъ на́шихъ.

Сла́ва, гла́съ ѕ҃:

Прїиди́те празднолю́бцы, и҆ по́стникѡвъ сосло́вїе вѣ́рою соше́дшесѧ, и҆́стиннаго по́стника дне́сь почита́юще, ра́достнѡ ше́ствовавшаго по стопа́мъ влⷣки хрⷭ҇та̀, ᲂу҆́зкїй пꙋ́ть, и҆ безстра́стное житїѐ, ꙗ҆́коже дре́вле а҆враа́мъ пра́ведный, прпⷣбне ѻ҆́ч҃е і҆ѡ́сифе, страннолю́бїе притѧжа́лъ є҆сѝ, та́кожде пресели́лсѧ є҆сѝ ѿ ѻ҆те́чества твоегѡ̀ до мѣ́ста, и҆дѣ́же ны́нѣ лежи́тъ честно́е тѣ́ло твоѐ. тѣ́мже всѝ притека́юще вопїе́мъ тѝ: ѽ всебл҃же́нне и҆ прпⷣбне і҆ѡ́сифе! по́стникѡвъ похвало̀, и҆ собесѣ́дниче безпло́тныхъ, во́инствꙋ на́шемꙋ на пога̑ныѧ спосо́бниче, и҆ наста́вниче мона́хѡвъ, и҆ ѡ҆ на́съ моли́сѧ рабѣ́хъ твои́хъ хрⷭ҇тꙋ̀ бг҃ꙋ на́шемꙋ, спасти́сѧ дꙋша́мъ на́шымъ.

И҆ ны́нѣ, пра́здника.

На лїтꙋргі́и: Бл҃жє́нна ѿ канѡ́на, пѣ́снь г҃, и҆ ѕ҃-ѧ. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ, къ гала́тѡмъ, зача́ло сг҃і. А҆ллилꙋ́їа. Блаже́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃г. Прича́стенъ: Въ па́мѧть вѣ́чнꙋю бꙋ́детъ првⷣникъ:

Мѣ́сѧца тогѡ́же въ ѳ҃-й де́нь. Слꙋ́жба и҆́же во ст҃ы́хъ ѻ҆тцꙋ̀ на́шемꙋ ѳеодо́сїю, а҆рхїепⷭ҇кпꙋ черни́говскомꙋ, чꙋдотво́рцꙋ.

На ма́лѣй вече́рни,

на Гдⷭ҇и воззва́хъ стїхи̑ры на д҃, гла́съ ѕ҃.

Подо́бенъ: Всю̀ ѿложи́вше:

Наста̀, бг҃омꙋ́дре ѳеодо́сїе, со́лнца свѣтлѣ́йшїй тво́й пра́здникъ, вѣ̑рныѧ къ весе́лїю созыва́ѧй и҆ лꙋча́ми ра́дости всѣ́хъ просвѣща́ѧй: въ тебѣ́ бо ꙗ҆ви́сѧ сла́ва хрⷭ҇то́ва, сла́ва цр҃кве правосла́вныѧ, ди́вными сїѧ́ющи чꙋдесы̀. тѣ́мже любо́вїю вопїе́мъ тѝ: моли́сѧ ѡ҆ на́съ при́снѡ, ѻ҆́тче сщ҃е́ннѣйшїй. Два́жды.

Є҆гда̀ прїи́де вре́мѧ бг҃омъ пред̾ꙋста́вленное, тогда̀ просла́ви тѧ̀ ди́вный во ст҃ы́хъ бг҃ъ: вои́стиннꙋ бо чꙋ́до пресла́вно: на мнѡ́га лѣ́та тѣ́ло твоѐ нетлѣ́нно пребы́сть, и҆ ны́нѣ ꙗ҆ви́сѧ и҆сто́чникъ и҆сцѣле́нїй всѣ̑мъ съ вѣ́рою къ тебѣ̀ притека́ющымъ. сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

Свѣ́тлѡ ликꙋ́етъ ны́нѣ страна̀ рѡссі́йскаѧ прославлѧ́ющи ст҃ꙋ́ю па́мѧть твою̀, ѻ҆́тче ст҃и́телю ѳеодо́сїе: тѧ́ бо но́ваго мл҃твенника сїѧ̀ ѡ҆брѣ́те, и҆ те́плаго предста́телѧ ᲂу҆ прⷭ҇то́ла бж҃їѧ, ско́раго въ бѣ́дахъ застꙋ́пника и҆ немощны̑мъ врача̀ безме́зднаго. сла́ва дарова́вшемꙋ тѝ бл҃года́ть и҆сцѣле́нїй, сла́ва просла́вльшемꙋ тѧ̀, сла́ва прославлѧ́ющемꙋ тобо́ю ст҃ꙋ́ю цр҃ковь свою̀.

Сла́ва, гла́съ и҆ подо́бенъ то́йже:

Восхва́лимъ дне́сь пѣ́сньми чꙋдотво́рца пресла́внаго, є҆го́же хрⷭ҇то́съ цр҃кви свое́й дарова̀, и҆звѣствꙋ́ѧ и҆́стинꙋ вѣ́ры на́шеѧ правосла́вныѧ, ко ѡ҆бличе́нїю сꙋ́єтнаѧ мꙋ́дрствꙋющихъ и҆ ко вразꙋмле́нїю заблꙋжда́ющихсѧ. ра́дꙋйсѧ, ѻ҆́тче на́шъ ст҃и́телю ѳеодо́сїе, нб҃сѐ цр҃ко́внагѡ ѕвѣздо̀ пресвѣ́тлаѧ: ра́дꙋйсѧ, землѝ рѡссі́йскїѧ чꙋ́днаѧ похвало̀. ра́дꙋйсѧ, всѣ́хъ болѧ́щихъ и҆ скорбѧ́щихъ ско́рый и҆ млⷭ҇тивый ᲂу҆тѣ́шителю: ра́дꙋйсѧ, те́плый мл҃твенниче ѡ҆ дꙋша́хъ на́шихъ.

И҆ ны́нѣ, пра́здника и҆лѝ бг҃оро́диченъ.

На стїхо́внѣ стїхи̑ры, гла́съ в҃.

Подо́бенъ: До́ме є҆ѵфра́ѳовъ:

До́мъ дх҃а ст҃а́гѡ ꙗ҆ви́лсѧ є҆сѝ, пребл҃же́нне ѻ҆́тче ѳеодо́сїе, дꙋ́шꙋ и҆ тѣ́ло ѿ страсте́й ѡ҆чи́стивъ, смире́нїемъ же и҆ любо́вїю себѐ ᲂу҆краси́въ, ꙗ҆́кѡ досто́йное томꙋ̀ жили́ще.

Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Ст҃и́телей похвало̀, мона́шествꙋющихъ сла́во, ѻ҆́тче ѳеодо́сїе, предстоѧ̀ прⷭ҇то́лꙋ прест҃ы́ѧ трⷪ҇цы, непреста́ннѡ моли́сѧ ѡ҆ дꙋша́хъ на́шихъ.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Оу҆слы́ши молє́нїѧ твои́хъ ча̑дъ, ѻ҆́тче ст҃и́телю ѳеодо́сїе, любо́вїю къ тебѣ̀ притека́ющихъ, и҆ сердє́чнаѧ прошє́нїѧ подава́й чтꙋ́щымъ ст҃ꙋ́ю па́мѧть твою̀.

Сла́ва, гла́съ и҃:

Ѻ҆́тче ст҃и́телю ѳеодо́сїе, кто̀ и҆сповѣ́сть трꙋды̀ и҆ по́двиги твоѧ̑, ꙗ҆̀же любвѐ ра́ди хрⷭ҇то́вы под̾ѧ́лъ є҆сѝ; посто́мъ бо и҆ бдѣ́нїемъ, и҆ мл҃твою непреста́нною, всѧ̑ плотска̑ѧ мꙋдрова̑нїѧ ᲂу҆мертви́лъ є҆сѝ: смире́нїемъ же и҆ терпѣ́нїемъ, и҆ любо́вїю къ бли́жнемꙋ, во ѻ҆би́тель дх҃а ст҃а́гѡ себѐ ᲂу҆гото́валъ є҆сѝ. тѣ́мже и҆ всели́лсѧ є҆сѝ во ѻ҆би́тєли нбⷭ҇ныѧ, и҆дѣ́же ны́нѣ водворѧ́ѧсѧ, моли́сѧ при́снѡ ѡ҆ дꙋша́хъ на́шихъ.

И҆ ны́нѣ, пра́здника.

А҆́ще нѣ́сть пра́здника, бг҃оро́диченъ: Влⷣчце, прїимѝ:

Тропа́рь, гла́съ д҃:

Преꙋдобре́нъ во а҆рхїере́ехъ, ст҃и́телю ѳеодо́сїе, бы́лъ є҆сѝ свѣти́ло своемꙋ̀ ста́дꙋ, та́же преста́вилсѧ є҆сѝ въ вѣ̑чныѧ ѻ҆би́тєли. ᲂу҆молѝ ᲂу҆ прⷭ҇то́ла цр҃ѧ̀ сла́вы, и҆зба́витисѧ на́мъ ѿ находѧ́щихъ на ны̀ ѕѡ́лъ и҆ сп҃сти́сѧ дꙋша́мъ на́шымъ, ст҃е, мл҃твами твои́ми.

Сла́ва, и҆ ны́нѣ: пра́здника.

А҆́ще же нѣ́сть пра́здника: Є҆́же ѿ вѣ́ка ᲂу҆тае́нное:

На вели́цѣй вече́рни,

Бл҃же́нъ мꙋ́жъ, пе́рвый а҆нтїфѡ́нъ.

На Гдⷭ҇и воззва́хъ, стїхи̑ры на и҃: пра́здника на д҃, и҆ ст҃а́гѡ на д҃.

А҆́ще нѣ́сть пра́здника, пє́рвыѧ двѣ̀ стїхи̑ры ст҃а́гѡ глаго́ли по три́жды, тре́тїю же два́жды.

Гла́съ в҃.

Ѻ҆́тче ст҃и́телю ѳеодо́сїе, а҆́ще и҆ въ та́йныхъ по́двизѣхъ тече́нїе соверши́лъ є҆сѝ, ѻ҆ба́че не можа́ше ᲂу҆таи́тисѧ ди́вное бл҃гоꙋха́нїе бг҃олюбе́знагѡ смире́нїѧ твоегѡ̀: тѣ́мже и҆ ꙗ҆ви́лсѧ є҆сѝ свѣти́льникъ пресвѣ́тлый, не под̾ спꙋ́домъ сокрыва́емый, но на свѣ́щницѣ цр҃кве бж҃їѧ поста́вленный и҆ ѿ бг҃а прославлѧ́емый, є҆го́же молѝ ѡ҆ дꙋша́хъ на́шихъ. Два́жды.

Ѻ҆́тче ст҃и́телю ѳеодо́сїе, а҆́ще и҆ возведе́нъ бы́лъ є҆сѝ на прⷭ҇то́лъ ст҃и́тельскїй, ꙗ҆́кѡ мꙋ́жъ бл҃года́ти и҆спо́лненный, ѻ҆ба́че и҆ простотꙋ̀ и҆́ноческагѡ житїѧ̀ сохрани́лъ є҆сѝ, въ до́бромъ послꙋша́нїи ѻ҆тцꙋ̀ твоемꙋ̀ дꙋхо́вномꙋ пребыва́ѧ и҆ всѣ̑мъ ѻ҆́бразъ смире́нїѧ ꙗ҆влѧ́ѧ, по ѻ҆́бразꙋ гдⷭ҇а і҆и҃са, є҆го́же молѝ ѡ҆ дꙋша́хъ на́шихъ.

Ѻ҆́тче бг҃омꙋ́дре ѳеодо́сїе, а҆́ще и҆ не на до́лзѣ па́стырь хрⷭ҇то́вы цр҃кве бы́лъ є҆сѝ, ѻ҆ба́че любо́вь ве́лїю ѿ па́ствы твоеѧ̀ стѧжа́лъ є҆сѝ, всѣ́хъ любо́вїю твое́ю ѡ҆б̾е́млѧ и҆ скорбѧ́щихъ ᲂу҆тѣша́ѧ, си̑рымъ же и҆ вдови́цамъ на по́мощь притека́ѧ. тѣ́мже и҆ по бл҃же́ннѣмъ преставле́нїи твое́мъ, къ тебѣ̀ ꙗ҆́кѡ жи́вꙋ сꙋ́щꙋ притека́юще, скорбѧ́щїи и҆ болѧ́щїи ѻ҆би́лїе бл҃года́ти прїе́млютъ, сла́вѧще ди́внаго во ст҃ы́хъ свои́хъ хрⷭ҇та̀ бг҃а, є҆го́же молѝ ѡ҆ дꙋша́хъ на́шихъ.

Сла́ва, гла́съ ѕ҃:

Человѣ́че бж҃їй и҆ вѣ́рный ра́бе, слꙋжи́телю гдⷭ҇ень, мꙋ́жꙋ жела́нїй, сосꙋ́де и҆збра́нный ст҃а́гѡ дх҃а, сто́лпе и҆ ᲂу҆твержде́нїе цр҃кве, црⷭ҇твїѧ наслѣ́дниче, не премолчѝ молѧ́сѧ ѡ҆ на́съ ко гдⷭ҇ꙋ.

И҆ ны́нѣ, пра́здника.

А҆́ще же нѣ́сть пра́здника, бг҃оро́диченъ: Кто̀ тебє̀ не ᲂу҆бл҃жи́тъ:

Вхо́дъ. Прокі́менъ днѐ, и҆ чтє́нїѧ трѝ.

При́тчей чте́нїе.

[Главы̑ і҃, г҃, и҃] Па́мѧть првⷣнагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й и҆ лѣ́та живота̀ въ десни́цѣ є҆ѧ̀, въ шꙋ́йцѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Послꙋ́шайте ᲂу҆̀бо менѐ, ѽ ча̑да, честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ, премꙋ́дрость, ᲂу҆стро́ихъ совѣ́тъ, и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆̀бо неѕло́бивїи кова́рство, ненака́заннїи же прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀, и҆ ѿве́рзꙋ ѿ ᲂу҆сте́нъ пра̑ваѧ: ꙗ҆́кѡ и҆́стинѣ поꙋчи́тсѧ горта́нь мо́й, мє́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋчꙋ́ бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

При́тчей чте́нїе.

[Главы̑ і҃, а҃і] Оу҆ста̀ првⷣнагѡ ка́плютъ премꙋ́дрость: ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ бл҃года̑ти: ᲂу҆ста́ же нечести́выхъ развраща́ютсѧ. Мѣ̑рила льсти̑ваѧ ме́рзость пред̾ гдⷭ҇емъ: вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости: пра́вда же и҆зба́витъ ѿ сме́рти. Оу҆́меръ првⷣный ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ првⷣнꙋ, не поги́бнетъ наде́жда: похвала́ же нечести́выхъ поги́бнетъ. Првⷣникъ ѿ ло́ва ᲂу҆бѣ́гнетъ, вмѣ́стѡ же є҆гѡ̀ предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же првⷣныхъ бл҃госпѣ́шное. Во бл҃ги́хъ првⷣныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ.

Премꙋ́дрости соломѡ́новы чте́нїе.

[Глава̀ д҃] Првⷣникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхи́щенъ бы́сть, да не ѕло́бы и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи̑ры, гла́съ в҃.

Подо́бенъ: Є҆гда̀ ѿ дре́ва:

Є҆гда̀ преста́вилсѧ є҆сѝ ѿ земны́хъ въ нбⷭ҇наѧ, ѻ҆́тче ст҃и́телю ѳеодо́сїе, тогда̀ ди́вный во ст҃ы́хъ (с. 659) свои́хъ бг҃ъ и҆сцѣле́нїй бл҃года́ть тебѣ̀ дарова̀. ꙗ҆ви́лъ бо сѧ є҆сѝ болѧ́щемꙋ а҆рхїере́ю і҆ѡа́ннꙋ, и҆ во ᲂу҆́трїе сщ҃еннодѣ́йствовати є҆мꙋ̀ повелѣ́въ, а҆́бїе того̀ здра́ва сотвори́лъ є҆сѝ. тѣ́мже и҆ ра́достнѣ покланѧ́ѧсѧ моще́мъ твои̑мъ, со ᲂу҆миле́нїемъ взыва́ше: сла́ва прославлѧ́ющемꙋ ст҃ы̑ѧ своѧ̑.

Всѣ̑мъ предста́тельствꙋеши, ст҃и́телю, притека́ющымъ съ вѣ́рою под̾ кро́въ тво́й: ꙗ҆влѧ́еши бо сѧ въ ско́рбехъ ᲂу҆тѣ́шитель, въ болѣ́знехъ бл҃года́тный вра́чь, на пꙋтѝ сп҃се́нїѧ наста́вникъ премꙋ́дрый, ѡ҆ всѣ́хъ пред̾ бг҃омъ мл҃твенникъ теплѣ́йшїй. сегѡ̀ ра́ди любо́вїю чтꙋ́ще ст҃ꙋ́ю па́мѧть твою̀, къ тебѣ̀ ꙗ҆́кѡ ѻ҆тцꙋ̀ премилосе́рдомꙋ взыва́емъ: молѝ ѡ҆ на́съ, ст҃и́телю ѳеодо́сїе.

Сла́ва, гла́съ г҃:

Ди̑внаѧ и҆ пресла̑внаѧ чꙋдеса̀ ꙗ҆вѝ тобо́ю чꙋде́съ бг҃ъ, ѻ҆́тче ѳеодо́сїе, є҆гда̀ честны̑ѧ твоѧ̑ и҆ многоцѣлє́бныѧ мо́щи просла́вити бл҃говолѝ: слѣпі́и бо прозира́хꙋ, нѣмі́и бл҃гоглаго́ливи быва́хꙋ, разсла́бленнїи и҆ хро́мїи и҆сцѣлѧ́хꙋсѧ, и҆ всѧ́ка не́мощь и҆ болѣ́знь си́лою бж҃їею прогонѧ́шесѧ, и҆ ѿ всѣ́хъ и҆́мѧ бж҃їе прославлѧ́шесѧ: тобо́ю бо ꙗ҆́вѣ посѣтѝ гдⷭ҇ь зе́млю рѡссі́йскꙋю, тобо́ю и҆ мы̀ ви́дѣхомъ вели̑чїѧ бж҃їѧ. тѣ́мже бл҃гоговѣ́йнѣ чтꙋ́ще ст҃ꙋ́ю па́мѧть твою̀, къ тебѣ̀ припа́даемъ и҆ тебѣ̀ мо́лимсѧ: моли́сѧ ѡ҆ сп҃се́нїи дꙋ́шъ на́шихъ.

И҆ ны́нѣ, пра́здника.

А҆́ще же нѣ́сть пра́здника, бг҃оро́диченъ, гла́съ то́йже:

Бцⷣе и҆ предста́тельство всѣ́хъ молѧ́щихсѧ тебѣ̀, ѡ҆ тебѣ̀ дерза́емъ и҆ тобо́ю хва́лимсѧ, къ тебѣ̀ прибѣга́емъ и҆ тебѣ̀ мо́лимсѧ: моли́сѧ ѡ҆ сп҃се́нїи дꙋ́шъ на́шихъ.

На стїхо́внѣ стїхи̑ры, гла́съ є҃.

Подо́бенъ: Ра́дꙋйсѧ:

Ра́дꙋйсѧ, ст҃и́телю ѳеодо́сїе, цр҃кве рѡссі́йскїѧ пресла́вное ᲂу҆краше́нїе, гра́да черни́гова свѣ́тлаѧ похвало̀, правосла́вїѧ сто́лпе непоколеби́мый, во ѡ҆бличе́нїе мꙋдрова́нїй нечести́выхъ ѿ бг҃а прославлѧ́емый и҆ чꙋдотво́рецъ ꙗ҆влѧ́емый. ра́дꙋйсѧ, но́вый на́шъ мл҃твенниче пред̾ бг҃омъ, є҆мꙋ́же вы́нꙋ предстоѧ̀ со всѣ́ми ст҃ы́ми, моли́сѧ ѡ҆ сп҃се́нїи дꙋ́шъ на́шихъ.

Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Ра́дꙋйсѧ, сщ҃е́ннаѧ главо̀, и҆́нокѡвъ наста́вниче бг҃омꙋ́дрый, ѿ ю҆́ности хрⷭ҇та̀ возлюби́вый и҆ и҆́го є҆гѡ̀ бл҃го́е съ ра́достїю понесы́й: ра́дꙋйсѧ, не сло́вомъ то́кмѡ, но па́че дѣ́ломъ и҆ ѻ҆́бразомъ житїѧ̀ твоегѡ̀ всѣ́хъ къ бг҃ꙋ приводѧ́й. є҆мꙋ́же и҆ ны́нѣ предстоѧ̀, моли́сѧ ѡ҆ ча́дѣхъ твои́хъ, вѣ́рою и҆ любо́вїю чтꙋ́щихъ ст҃ꙋ́ю па́мѧть твою̀, ѻ҆́тче ст҃и́телю ѳеодо́сїе.

Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Ра́дꙋйсѧ, а҆рхїере́ю бж҃їй, добро́тами ст҃и́тельства преꙋкраше́нный и҆ добродѣ́телїю сїѧ́ѧй: ра́дꙋйсѧ, смире́нїѧ зерца́ло, кро́тости и҆ неѕло́бїѧ свѣ́тлый ѻ҆́бразе, любве́ же неистощи́мое сокро́вище: ра́дꙋйсѧ, и҆ по кончи́нѣ твоеѧ̀ па́ствы не ѡ҆ста́вивый, но при́снѡ то́й бл҃годѣ́тельствꙋѧй, и҆ ꙗ҆́кѡ ѻ҆те́цъ чадолюби́вый ꙗ҆влѧ́ѧйсѧ. тѣ́мже и҆ мы̀, па́мѧть твою̀ пра́зднꙋюще, къ тебѣ̀ ꙗ҆́кѡ ѻ҆тцꙋ̀ прибѣга́емъ, и҆ любо́вїю къ тебѣ̀ взыва́емъ: молѝ ѡ҆ на́съ, ѻ҆́тче на́шъ, во є҆́же сп҃сти́сѧ дꙋша́мъ на́шымъ.

Сла́ва, гла́съ и҆ подо́бенъ то́йже:

Прїиди́те, хрⷭ҇тоно́снїи лю́дїе, пѣ́сньми вѣнча́имъ но́ваго чꙋдотво́рца пречꙋ́днаго, є҆го́же ди́вный во ст҃ы́хъ свои́хъ хрⷭ҇то́съ просла́ви и҆ те́плаго предста́телѧ землѝ рѡссі́йстѣй дарова̀. ра́дꙋйсѧ, ѻ҆́тче на́шъ ѳеодо́сїе, ско́рый въ ско́рбехъ на́шихъ ᲂу҆тѣ́шителю: ра́дꙋйсѧ, болѧ́щихъ врачꙋ̀ премлⷭ҇тивый: ра́дꙋйсѧ, всѣ̑мъ и҆ коемꙋ́ждо ꙗ҆̀же ко сп҃се́нїю ᲂу҆ гдⷭ҇а и҆спроси́ти гото́вый. и҆ ны́нѣ предстоѧ̀ прⷭ҇то́лꙋ вели́чествїѧ є҆гѡ̀, ꙗ҆́кѡ вѣ́рный и҆ до́брый слꙋга̀ гдⷭ҇нь, въ ра́дость гдⷭ҇а своегѡ̀ призва́нный, того̀ молѝ ѡ҆ сп҃се́нїи дꙋ́шъ на́шихъ.

И҆ ны́нѣ, пра́здника.

А҆́ще же нѣ́сть пра́здника, бг҃оро́диченъ, гла́съ то́йже: Хра́мъ и҆ две́рь є҆сѝ:

На благослове́нїи хлѣ́бѡвъ тропа́рь ст҃и́телю [пи́санъ на ма́лѣй вече́рни], два́жды, и҆ пра́здника є҆ди́ножды: а҆́ще же нѣ́сть пра́здника, Бцⷣе дв҃о:

На ᲂу҆́трени,

на Бг҃ъ гдⷭ҇ь, тропа́рь пра́здника, два́жды:

Сла́ва, ст҃о́мꙋ: и҆ ны́нѣ, па́ки пра́здника. (с. 662)

А҆́ще же нѣ́сть пра́здника, тропа́рь ст҃о́мꙋ, два́жды:

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

По а҃-мъ стїхосло́вїи сѣда́ленъ, гла́съ ѕ҃:

Ꙗ҆́коже и҆ногда̀ прикоснове́нїемъ ѡ҆мє́тъ хрⷭ҇то́выхъ и҆сцѣлѧ́хꙋсѧ недꙋ́жнїи, и҆ ꙗ҆́коже главотѧ̑жи и҆ ᲂу҆брꙋ́сцы па́ѵлѡвы врачева́хꙋ болѣ̑зни неисцѣ̑льныѧ, си́це и҆ ны́нѣ мно́зи болѧ́щїи и҆сцѣлѧ́ютсѧ, ѡ҆де́жды твоеѧ̀ коснꙋ́вшесѧ, є҆́юже ѡ҆блечє́ны бы́ша мо́щи твоѧ̑, ст҃и́телю ѳеодо́сїе. тѣ́мже ра́дꙋющесѧ и҆ сла́вѧще бг҃а, любо́вїю вопїе́мъ тѝ: и҆сцѣлѝ и҆ на́шѧ болѣ̑зни дꙋшє́вныѧ и҆ тѣлє́сныѧ мл҃твами твои́ми, всебл҃же́нне.

Сла́ва, и҆ ны́нѣ, бг҃оро́диченъ, гла́съ то́йже:

Безпомѡ́щнымъ крѣ́пость ты̀ є҆сѝ вои́стиннꙋ, прест҃а́ѧ дв҃о мт҃и: ѿсю́дꙋ смире́ннїи тобо́ю возвыша́емсѧ, ѡ҆ тебѣ̀ высо́цѣ держи́мсѧ: всѣ̑мъ бо ты̀ є҆сѝ покро́въ и҆ къ бг҃ꙋ хода́таица.

По в҃-мъ стїхосло́вїи сѣда́ленъ, гла́съ д҃:

Є҆ресе́мъ ᲂу҆множа́ющымсѧ и҆ дꙋ́шы просты́ѧ смꙋща́ющымъ, тебѐ ꙗ҆́кѡ свидѣ́телѧ и҆́стины нело́жна ꙗ҆вѝ хрⷭ҇то́съ гдⷭ҇ь въ цр҃кви свое́й, не словесы̀ любомꙋ́дрїѧ сꙋемꙋ́дрїе человѣ́ческое побѣжда́юща, но нетлѣ́нїемъ моще́й твои́хъ, чꙋдесы̀ и҆ зна́мєнїи мно́гими вѣ́рꙋ ст҃ꙋ́ю ᲂу҆твержда́юща, въ ра́дость и҆ сп҃се́нїе всѣ́хъ, любо́вїю чтꙋ́щихъ ст҃ꙋ́ю па́мѧть твою̀, ѻ҆́тче ст҃и́телю ѳеодо́сїе, и҆ вы́нꙋ пою́щихъ бг҃ꙋ: сла́ва прославлѧ́ющемꙋ ст҃ы̑ѧ своѧ̑.

Сла́ва, и҆ ны́нѣ, бг҃оро́диченъ, гла́съ то́йже:

Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со ст҃и́телемъ ѳеодо́сїемъ того̀ непреста́ннѡ молѝ, ѡ҆ставле́нїе прегрѣше́нїй да́ти на́мъ пре́жде конца̀, вѣ́рою и҆ любо́вїю пою́щымъ по до́лгꙋ, є҆ди́на всепѣ́таѧ.

Велича́нїе ст҃и́телю:

Велича́емъ тѧ̀, ст҃и́телю ѻ҆́тче ѳеодо́сїе, и҆ чти́мъ ст҃ꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего.

Ѱало́мъ и҆збра́нный ст҃и́тельскїй.

По полѷеле́и сѣда́ленъ, гла́съ ѕ҃:

Вои́стиннꙋ па́стырь и҆ ѻ҆те́цъ, и҆ наста́вникъ бл҃года́тный, и҆ по ᲂу҆спе́нїи твое́мъ показꙋ́ешисѧ, ѻ҆́тче на́шъ ѳеодо́сїе: ꙗ҆влѧ́ѧсѧ бо болѧ́щымъ во снѣ̀, поꙋча́еши тѣ́хъ почита́ти цр҃ковь бж҃їю и҆ тоѧ̀ бж҃е́ствєнныѧ ᲂу҆ста́вы, причаща́тисѧ же та̑инъ бж҃їихъ во сп҃се́нїе дꙋшѝ, и҆ молє́нїѧ ко пречⷭ҇тѣй мт҃ри бж҃їей возноси́ти, съ не́юже моли́сѧ при́снѡ ѡ҆ сп҃се́нїи дꙋ́шъ на́шихъ.

Сла́ва, и҆ ны́нѣ, бг҃оро́диченъ, гла́съ то́йже:

Ско́рый тво́й покро́въ и҆ по́мощь и҆ млⷭ҇ть покажѝ на рабы̑ твоѧ̑, и҆ во́лны, чⷭ҇таѧ, ᲂу҆кротѝ сꙋ́етныхъ помыслѡ́въ, и҆ па́дшꙋю мою̀ дꙋ́шꙋ возста́ви, бцⷣе: вѣ́мъ бо, вѣ́мъ, дв҃о, ꙗ҆́кѡ мо́жеши, є҆ли́ка хо́щеши.

Та́же степє́нна, а҃-й а҆нтїфѡ́нъ д҃-гѡ гла́са.

Прокі́менъ гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми,

Є҆ѵⷢ҇лїе ѿ і҆ѡа́нна, зача́ло л҃ѕ.

По н҃-мъ ѱалмѣ̀ стїхи́ра, гла́съ ѕ҃:

Оу҆го́дниче бж҃їй, соприча́стниче хрⷭ҇то́въ, ст҃и́телю ѳеодо́сїе, по и҆́мени твоемꙋ̀ та́кѡ и҆ житїѐ твоѐ: всего́ бо себѐ въ да́ръ бг҃ꙋ приносѧ̀, да́ръ бж҃їй вои́стиннꙋ землѝ рѡссі́йстѣй ꙗ҆ви́лсѧ є҆сѝ. жи́знь твоѧ̀ сла́вна бы́сть, и҆ ᲂу҆спе́нїе со ст҃ы́ми: молѝ ѡ҆ дꙋша́хъ на́шихъ.

Канѡ́нъ пра́здника со і҆рмосо́мъ на ѕ҃: и҆ ст҃а́гѡ на и҃, гла́съ и҃.

А҆́ще пра́здника нѣ́сть, пара́клисїсъ бцⷣѣ со і҆рмосо́мъ на ѕ҃, и҆ ст҃а́гѡ на и҃.

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Прїимѝ хвале́нїе, ѿ ᲂу҆́стъ недосто́йныхъ тебѣ̀ приноси́мое, и҆ возда́ждь те́плыми твои́ми мл҃твами къ бг҃ꙋ, чтꙋ́щымъ ст҃ꙋ́ю па́мѧть твою̀, ѻ҆́тче на́шъ ѳеодо́сїе.

Ѿ ю҆́ности гдⷭ҇а возлюби́лъ є҆сѝ, чистотꙋ̀ непоро́чнꙋ сохранѧ́ѧ: ѿ дѣ́тства томꙋ̀ прилѣпи́лсѧ є҆сѝ чи́стою твое́ю дꙋше́ю, въ простотѣ̀ и҆ неѕло́бїи се́рдце соблюда́ѧ. тѣ́мже и҆ ча́до бж҃їе вои́стиннꙋ бы́лъ є҆сѝ, ст҃е ѳеодо́сїе.

Бл҃го є҆́сть мꙋ́жꙋ, є҆гда̀ во́зьметъ ꙗ҆ре́мъ въ ю҆́ности свое́й, глаго́летъ писа́нїе: семꙋ̀ глаго́лꙋ послѣ́дꙋѧ, съ ра́достїю и҆́го гдⷭ҇не ѿ ю҆́ности воспрїѧ́лъ є҆сѝ, и҆ бы́лъ є҆сѝ и҆́нокъ преизрѧ́дный, бл҃же́нне ѳеодо́сїе.

Бг҃оро́диченъ:

Прест҃а́ѧ дв҃о, мт҃и бж҃їѧ, застꙋ́пнице на́ша непосты́днаѧ, сп҃сѝ, ᲂу҆слы́ши на́съ, страстьмѝ лю́тѣ ѡ҆держи́мыхъ, и҆ да́ждь рꙋ́кꙋ по́мощи мл҃твами твои́ми. (с. 665)

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Бл҃же́ни ни́щїи дꙋ́хомъ, глаго́летъ гдⷭ҇ь: семꙋ̀ сп҃си́тельномꙋ глаго́лꙋ внима́ѧ, па́че всѣ́хъ добродѣ́телей нищетꙋ̀ дꙋхо́внꙋю потща́лсѧ є҆сѝ стѧжа́ти, прпⷣбне, возлюби́въ тꙋ́ю ꙗ҆́кѡ ѡ҆гра́дꙋ крѣ́пкꙋ ѿ всѧ́кагѡ и҆скꙋше́нїѧ и҆ ꙗ҆́кѡ бг҃олюбе́знꙋю ма́терь всѣ́хъ добродѣ́телей.

Позна́въ, ꙗ҆́кѡ ѿ послꙋша́нїѧ ражда́етсѧ смире́нїе, ѿ смире́нїѧ же безстра́стїе, всѣ́мъ се́рдцемъ возлюби́лъ є҆сѝ послꙋша́нїе, во все́мъ во́лю свою̀ и҆ ѕлы̑ѧ по́мыслы ѿсѣка́ѧ: тѣ́мже и҆ безстра́стїѧ дости́глъ є҆сѝ, ᲂу҆гото́вавъ дꙋ́шꙋ твою̀ въ чи́стꙋю ѻ҆би́тель дх҃а прест҃а́гѡ.

Кро́тость ве́лїю стѧжа́лъ є҆сѝ, бг҃омꙋ́дре ѳеодо́сїе, всѧ̑ скѡ́рбнаѧ бл҃годꙋ́шнѣ претерпѣва́ѧ, всѧ́кꙋю ѡ҆би́дꙋ и҆ ᲂу҆ничиже́нїе въ молча́нїи любо́вїю покрыва́ѧ: сегѡ̀ ра́ди и҆ прїѧ́лъ є҆сѝ наслѣ́дїе на землѝ живы́хъ, и҆дѣ́же првⷣнїи во вѣ́ки пребыва́ютъ, сла́вѧще гдⷭ҇а і҆и҃са.

Бг҃оро́диченъ:

Не и҆́мамы дерзнове́нїѧ къ сн҃ꙋ и҆ бг҃ꙋ твоемꙋ̀, прест҃а́ѧ влⷣчце: не и҆́мамы дерзнове́нїѧ и҆ къ тебѣ̀, пренепоро́чнаѧ, грѣхмѝ при́снѡ ѡ҆сквернѧ́еми, а҆́ще не сама̀ ты̀, премилосе́рдаѧ мт҃и, воззове́ши на́съ заблꙋ́ждшихъ къ покаѧ́нїю, наде́ждею сп҃се́нїѧ ѿрѣва́ющи ѿ на́съ всѧ́кое ᲂу҆ны́нїе и҆ разлѣне́нїе.

Сѣда́ленъ, гла́съ д҃:

Ꙗ҆ви́лсѧ є҆сѝ свѣти́льникъ бл҃года́тный, ѻ҆́тче на́шъ ѳеодо́сїе, ти́химъ свѣ́томъ смире́нїѧ и҆ любвѐ сїѧ́ѧй и҆ на́съ любо́вїю твое́ю ѡ҆зарѧ́ѧй. тѣ́мже и҆ мы̀, любо́вїю чтꙋ́ще па́мѧть твою̀, вопїе́мъ тѝ: молѝ ѡ҆ на́съ, ст҃и́телю бж҃їй, новоѧвле́нный чꙋдотво́рче.

Бг҃оро́диченъ, гла́съ то́йже:

Мно́гими прегрѣшє́нїи ᲂу҆́мъ помраче́нъ и҆мꙋ́ще, вопїе́мъ ко твоемꙋ̀ крѣ́пкомꙋ застꙋпле́нїю, бцⷣе дв҃о: просвѣтѝ ѻ҆́чи дꙋ́шъ на́шихъ, и҆ возсїѧ́й на́мъ покаѧ́нїѧ зарю̀, мл҃твами ᲂу҆го́дника твоегѡ̀ ст҃и́телѧ ѳеодо́сїа, є҆ди́на чⷭ҇таѧ и҆ бл҃гослове́ннаѧ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Не́мощїю ѡ҆тѧгче́нъ и҆ ста́ростїю претрꙋжде́нъ бы́въ, а҆рхїпа́стырь ла́зарь пе́рвѣе ᲂу҆́бѡ сослꙋжи́телѧ, послѣди́ же и҆ наслѣ́дника себѣ̀ ᲂу҆строѧ́етъ тѧ̀, ст҃и́телю ѳеодо́сїе, и҆ цр҃кви черни́говстѣй свѣти́льника, ю҆́же мл҃твами твои́ми просвѣща́й во всѧ̑ вѣ́ки.

Вои́стиннꙋ че́сти и҆ вла́сти ст҃и́тельскїѧ досто́инъ ꙗ҆ви́лсѧ є҆сѝ, ѻ҆́тче ѳеодо́сїе, сло́вомъ премꙋ́дръ бы́въ, житїе́мъ же добродѣ́теленъ, въ бж҃е́ственныхъ писа́нїихъ и҆скꙋ́сенъ и҆ словє́сныѧ ѻ҆́вцы наставлѧ́ти ѕѣлѡ̀ дово́ленъ.

Бл҃гоче́стїемъ ᲂу҆краша́ѧсѧ, и҆ въ дх҃о́внѣмъ жи́тельствѣ всѣ̑мъ лю́демъ страны̀ черни́говскїѧ и҆звѣ́стенъ бы́въ, є҆динодꙋ́шнѣ тѣ́ми и҆збра́нъ бы́лъ є҆сѝ въ вели́кое слꙋже́нїе цр҃кви бж҃їей, ѻ҆́тче ѳеодо́сїе, ю҆́же и҆ ны́нѣ назира́й твои́ми мл҃твами.

Бг҃оро́диченъ:

Мно́гѡ мо́жетъ мл҃тва првⷣнагѡ поспѣшествꙋ́ема, глаго́летъ і҆а́кѡвъ бра́тъ гдⷭ҇ень: мно́гѡ мо́жетъ и҆ мл҃тва ст҃и́телѧ ѳеодо́сїа, споспѣшествꙋ́ема твое́ю мт҃рнею мл҃твою, прест҃а́ѧ влⷣчце бцⷣе: є҆си́ бо предста́тельство и҆ покро́въ и҆ застꙋпле́нїе на́ше, бл҃года́тнаѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̀ напра́ви, молю́сѧ.

Ра́довахꙋсѧ лю́дїе гра́да черни́гова, зрѧ́ще тебѐ свѣ́тлостїю са́на ст҃и́тельскагѡ ѡ҆блече́на, и҆ кꙋ́пнѡ со а҆рхїпа́стыремъ ла́заремъ прⷭ҇то́лꙋ бл҃года́ти бж҃їѧ предстоѧ́ща, и҆ преподѡ́бныѧ своѧ̑ рꙋ́цѣ ѡ҆ па́ствѣ воздѣ́юща, и҆ хрⷭ҇та̀ бл҃годарѧ́ще, сердцы̀ свои́ми ᲂу҆мили́шасѧ.

Ѻ҆́бразъ бы́лъ є҆сѝ все́й бг҃ода́ннѣй па́ствѣ твое́й, сло́вомъ и҆ житїе́мъ, любо́вїю и҆ дꙋ́хомъ, вѣ́рою и҆ чистото́ю: сегѡ̀ ра́ди не то́чїю ѻ҆́вцы твоѧ̑ любо́вїю къ тебѣ̀ прилѣплѧ́хꙋсѧ, но и҆ и҆носла́внїи тѧ̀ ꙗ҆́кѡ человѣ́ка бж҃їѧ, ѻ҆́тче на́шъ ѳеодо́сїе, почита́хꙋ.

Па́стырь вои́стиннꙋ до́брый слове́сномꙋ ста́дꙋ твоемꙋ̀, ст҃и́телю ѳеодо́сїе, бы́лъ є҆сѝ, дꙋ́шꙋ твою̀ за ѻ҆́вцы твоѧ̑ положи́ти гото́вый: тѣ́мже и҆ ꙗ҆ви́лсѧ є҆сѝ ѡ҆би̑димымъ ᲂу҆́бѡ застꙋ́пникъ непреѡбори́мый, пра́вды же ревни́тель неꙋстраши́мый, си́льныхъ мі́ра сегѡ̀ съ любо́вїю ѡ҆блича́ѧ и҆ пасо́мыхъ свои́хъ ѻ҆те́чески вразꙋмлѧ́ѧ, заблꙋ́ждшыѧ же на пꙋ́ть пра́вый премꙋ́дрѣ наставлѧ́ѧ.

Бг҃оро́диченъ:

Оу҆мерщвле́ннꙋю дꙋ́шꙋ мою̀ ѡ҆живѝ, па́дшꙋю возста́ви, ᲂу҆ѧзвле́ннꙋю и҆сцѣлѝ, ᲂу҆́мъ мо́й просвѣтѝ, и҆скꙋше́нїй во́лны ᲂу҆кротѝ, мт҃и бж҃їѧ, дв҃о прест҃а́ѧ, и҆ сп҃си́ мѧ мл҃твами твои́ми, пречⷭ҇таѧ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Ѿ ю҆́ности и҆́нокъ преизрѧ́дный бы́въ, и҆́ночєскїѧ ѡ҆би́тєли съ любо́вїю созида́лъ є҆сѝ, и҆ всѧ̑ на по́льзꙋ житїѧ̀ и҆́ноческагѡ въ тѣ́хъ бл҃гоꙋстроѧ́лъ є҆сѝ, всѣ́хъ при́снѡ къ бг҃ꙋ наставлѧ́ѧ ѻ҆те́ческими твои́ми поꙋче́ньми, ѻ҆́тче на́шъ, ѳеодо́сїе бг҃омꙋ́дре.

Бл҃голѣ́пнѣ дꙋ́шꙋ твою̀ во хра́мъ дх҃а бж҃їѧ добродѣ́тельми ᲂу҆строѧ́ѧ, бл҃голѣ́пїе до́мꙋ бж҃їѧ возлюби́лъ є҆сѝ, и҆ всеꙋсе́рдное попече́нїе ѡ҆ то́мъ и҆мѣ́ѧ, є҆щѐ и҆ хра́мы нѡ́вы созида́лъ є҆сѝ во сла́вꙋ творца̀ и҆ бг҃а, мі́ръ ве́сь несказа́нною красото́ю бл҃гоꙋкраси́вшагѡ.

Ра́достїю а҆́гг҃льскою, ст҃и́телю бж҃їй, ра́довалсѧ є҆сѝ, є҆гда̀ ча̑да твоѧ̑ во и҆́стинѣ ходѧ̑ща ви́дѣлъ є҆сѝ, и҆ ꙗ҆́коже ѻ҆те́цъ чадолюби́вый, се́рдцемъ твои́мъ ѡ҆ заблꙋжда́ющихсѧ скорбѣ́лъ є҆сѝ, и҆ ѡ҆ сп҃се́нїи всѣ́хъ мл҃твꙋ твори́лъ є҆сѝ, всѧ̑ любо́вїю ѡ҆б̾е́млѧ и҆ ѡ҆ всѣ́хъ предста́тельствꙋѧ, ѻ҆́тче на́шъ, ст҃и́телю ѳеодо́сїе.

Бг҃оро́диченъ:

Прїиди́те, всѝ вѣ́рнїи, припаде́мъ къ те́плѣй застꙋ́пницѣ ро́да на́шегѡ мт҃ри бж҃їей, и҆ во ᲂу҆миле́нїи се́рдца воззове́мъ: прест҃а́ѧ влⷣчце бцⷣе, покры́й на́съ бл҃года́тнымъ покро́вомъ твои́мъ, и҆ мл҃твами твои́ми и҆зба́ви на́съ ѿ всѧ́кагѡ ѕла̀.

Конда́къ, гла́съ д҃:

Па́стырей нача́льникꙋ хрⷭ҇тꙋ̀ трꙋди́лсѧ є҆сѝ, ст҃и́телю ѳеодо́сїе, на па́жити дх҃о́внѣй словє́сныѧ твоѧ̑ ѻ҆́вцы пита́ѧ, и҆ цѣле́бенъ да́ръ ѿ хрⷭ҇та̀ сп҃са прїѧ́лъ є҆сѝ, во є҆́же не́мѡщи дꙋшє́вныѧ и҆ тѣлє́сныѧ цѣли́ти всѣ́хъ, съ вѣ́рою къ цѣлє́бнымъ твои̑мъ моще́мъ приходѧ́щихъ. тѣ́мже и҆ ны́нѣ, ст҃е, моли́сѧ, всѣ̑мъ и҆́мѧ твоѐ призыва́ющымъ ѿ навѣ́тѡвъ вра́жїихъ сп҃сти́сѧ, и҆ поми́ловатисѧ дꙋша́мъ на́шымъ.

І҆́косъ:

Да́ръ бж҃їй вои́стиннꙋ ꙗ҆ви́лсѧ є҆сѝ землѝ рѡссі́йстѣй, ст҃е ѳеодо́сїе: ѿ ю҆́ности бо себѐ бг҃ꙋ возложи́въ, по́двигомъ до́брымъ до конца̀ подвиза́лсѧ є҆сѝ, и҆ дарова̑нїѧ вє́лїѧ прїѧ́лъ є҆сѝ, бл҃года́ти сосꙋ́дъ бы́въ и҆збра́нный: тѣ́мже ꙗ҆́кѡ въ житїѝ твое́мъ, та́кѡ наипа́че по бл҃же́ннѣмъ ᲂу҆спе́нїи, предстоѧ̀ прⷭ҇то́лꙋ прест҃ы́ѧ трⷪ҇цы, со дерзнове́нїемъ воздѣ́еши преподѡ́бныѧ твоѧ̑ рꙋ́цѣ, ѡ҆ па́ствѣ твое́й и҆ ѡ҆ все́й землѝ рѡссі́йстѣй те́плѣ молѧ́сѧ. сегѡ̀ ра́ди съ вѣ́рою и҆ любо́вїю къ тебѣ̀ притека́юще, всѝ скорбѧ̑щїи неѡскꙋ́днѡ ᲂу҆тѣше́нїе прїе́млютъ, и҆ болѧ́щїи и҆сцѣле́нїй сподоблѧ́ютсѧ. съ ни́миже и҆ мы̀ тебѣ̀, ꙗ҆́кѡ чадолюби́вомꙋ ѻ҆тцꙋ̀, взыва́емъ: молѝ, ст҃е, ѡ҆ призыва́ющихъ и҆́мѧ твоѐ, ѿ навѣ́тѡвъ вра́жїихъ сп҃сти́сѧ дꙋша́мъ на́шымъ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

При́снѡ поꙋча́ѧсѧ па́мѧти сме́ртнѣй, непреста́ннѡ жела́лъ є҆сѝ крⷭ҇тъ гдⷭ҇ень пред̾ ѻ҆чесы̀ твои́ми держа́ти, є҆гѡ́же воѡбраже́нїе и҆ въ пꙋтѝ неразлꙋ́чнѡ пред̾ тобо́ю пребыва́ше, во є҆́же всегда̀ ѿ се́рдца взыва́ти ко гдⷭ҇ꙋ: бл҃гослове́нъ є҆сѝ, гдⷭ҇и бж҃е, во вѣ́ки.

И҆ по сме́рти, ꙗ҆́кѡ жи́въ сы́й, бл҃года́тїю бж҃їею, съ ча́ды твои́ми пребыва́еши, и҆ по преставле́нїи твое́мъ па́стырь до́брый тѣ́мъ ꙗ҆влѧ́ешисѧ, ѻ҆́тче ѳеодо́сїе, въ со́нныхъ видѣ́нїихъ невѣ́дꙋщыѧ въ вѣ́рѣ наставлѧ́ѧ и҆ всѣ́хъ вопи́ти наꙋча́ѧ: бл҃гослове́нъ є҆сѝ, гдⷭ҇и бж҃е, во вѣ́ки.

Въ цр҃ковь бж҃їю ходи́ти и҆ моли́тисѧ болѧ́щемꙋ и҆́нокꙋ повелѣ́лъ є҆сѝ, ѻ҆́тче ѳеодо́сїе, во снѣ̀ томꙋ̀ предста́въ, и҆ ѻ҆те́чески того̀ вразꙋмлѧ́ѧ, грѣхѝ є҆гѡ̀ воспомѧнꙋ́лъ є҆сѝ, къ покаѧ́нїю призыва́ѧ, и҆ и҆сцѣле́нїе томꙋ̀ по́далъ є҆сѝ, да вы́нꙋ сла́витъ гдⷭ҇а: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ:

Разсѣ́ѧсѧ ᲂу҆́мъ мо́й, ѡ҆дебелѣ̀ се́рдце, немоществꙋ́етъ моѐ произволе́нїе: влⷣчце бцⷣе, ᲂу҆милосе́рдисѧ ѡ҆ мнѣ̀ грѣ́шнѣмъ, и҆сцѣлѝ дꙋ́шꙋ мою̀, и҆ ꙗ҆́кѡ бл҃га́гѡ сп҃са моегѡ̀ бл҃га́ѧ мт҃и, сп҃си́ мѧ, да вы́нꙋ вопїю̀ є҆мꙋ̀: бл҃гослове́нъ є҆сѝ, гдⷭ҇и бж҃е, во вѣ́ки.

Пѣ́снь и҃.

І҆рмо́съ: А҆́гг҃ли и҆ нб҃са̀, на прⷭ҇то́лѣ сла́вы сѣдѧ́щаго, и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте и҆ превозноси́те є҆го̀ во вѣ́ки.

Кто̀ по достоѧ́нїю мо́жетъ повѣ́дати всѧ̑ чꙋдеса̀ твоѧ̑, ст҃и́телю ѳеодо́сїе; и҆ неи́щꙋщымъ тебѐ болѧ́щымъ ꙗ҆влѧ́ешисѧ вра́чь преизрѧ́дный, всѣ́хъ призыва́ѧ и҆сповѣ́дати сла́вꙋ бг҃а, прославлѧ́ющагѡ ст҃ы̑ѧ своѧ̑ и҆ превозноси́магѡ во вѣ́ки.

Стꙋжа́ємымъ ѿ дꙋхѡ́въ нечи́стыхъ застꙋ́пникъ и҆ прибѣ́жище ꙗ҆ви́лсѧ є҆сѝ, ст҃и́телю ѳеодо́сїе, прогонѧ́ѧ си́лою бж҃їею всѧ́кое дѣ́йство бѣсо́вское ѿ и҆̀же съ вѣ́рою къ моще́мъ твои̑мъ притека́ющихъ, да сла́витсѧ и҆́мѧ бж҃їе во вѣ́ки.

И҆́мѧ твоѐ, ст҃и́телю ѳеодо́сїе, ꙗ҆́кѡ мѵ́ро и҆злїѧ́нное, ꙗ҆́коже бл҃гоꙋха́нїе раѧ̀ бж҃їѧ по лицꙋ̀ всеѧ̀ землѝ рѡссі́йскїѧ ѡ҆бно́ситсѧ, ᲂу҆слажда́ѧ сердца̀ вѣ́рꙋющихъ и҆ призыва́ѧ въ ра́дости дх҃о́внѣй воспѣва́ти гдⷭ҇а, превозноси́маго во всѧ̑ вѣ́ки.

Бг҃оро́диченъ:

Не пре́зри моле́нїй ра́бъ твои́хъ, мт҃и бж҃їѧ, прїимѝ моли̑твы на́шѧ ра́ди ᲂу҆го́дника твоегѡ̀ ст҃и́телѧ ѳеодо́сїа, и҆ принесѝ ко прⷭ҇то́лꙋ сн҃а и҆ бг҃а твоегѡ̀, да сла́витсѧ и҆́мѧ є҆гѡ̀ ѿ всеѧ̀ тва́ри во вѣ́ки.

Пѣ́снь ѳ҃.

І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Ꙗ҆́кѡ цѣли́тель премлⷭ҇тивый, ст҃е ѳеодо́сїе, не то́чїю призыва́ющымъ тѧ̀ болѧ́щымъ ми́лостивнѣ вне́млеши, но и҆ при́сныхъ и҆́хъ послꙋ́шаеши, и҆ по вѣ́рѣ тѣ́хъ ско́рый вра́чь болѧ́щымъ ꙗ҆влѧ́ешисѧ, всѣ́хъ ми́лꙋѧ и҆ ᲂу҆тѣша́ѧ, на всѣ́хъ щедрѡ́ты твоѧ̀ преиз̾ѻби́льнѣ и҆злива́ѧ.

Вои́стиннꙋ ди̑вна и҆ па́че сло́ва чꙋдеса̀ твоѧ̑, ѳеодо́сїе ѻ҆́тче на́шъ: ꙗ҆ви́лъ бо сѧ є҆сѝ сла́ва цр҃кве рѡссі́йскїѧ, правосла́вныѧ вѣ́ры нбⷭ҇ный проповѣ́дникъ, и҆́стины же свидѣ́тель непрело́жный.

Свѧ́тче бж҃їй, ᲂу҆го́дниче хрⷭ҇то́въ, млⷭ҇ти неистощи́мое сокро́вище, при́зри на не́мѡщи моѧ̑, и҆сцѣлѝ дꙋ́шꙋ мою̀, страстьмѝ ѕлѣ̀ ѡ҆бꙋрева́емꙋю, и҆сцѣлѝ и҆ тѣ́ло моѐ, не́мощьми ѡ҆бложе́нное, да просла́влю въ тебѣ̀ бл҃года́ть и҆ милосе́рдїе хрⷭ҇та̀ бг҃а, ди́внагѡ во ст҃ы́хъ свои́хъ.

Бг҃оро́диченъ:

Къ тебѣ̀, премилосе́рдаѧ мт҃и, возношꙋ̀ моѐ грѣ́шное се́рдце: пред̾ тобо́ю, бл҃года́тнаѧ, поверга́ю не́мѡщи дꙋшѝ и҆ тѣ́ла моегѡ̀: мл҃твами твои́ми застꙋпѝ и҆ поми́лꙋй мѧ̀.

Свѣти́ленъ.

Подо́бенъ: Нб҃о ѕвѣзда́ми:

Не́бо ѕвѣзда́ми ᲂу҆краси́вый, но́вꙋю ѕвѣздꙋ̀ пресвѣ́тлꙋю ꙗ҆ви́ тѧ, ст҃и́телю ѳеодо́сїе, нб҃о цр҃ко́вное ᲂу҆краша́ющꙋю и҆ мра́къ нечести́выхъ мꙋдрова́нїй разгонѧ́ющꙋю. тѣ́мже и҆ на̑ша сердца̀, грѣхо́мъ ѡ҆мрачє́ннаѧ, просвѣтѝ, и҆ къ покаѧ́нїю мл҃твами твои́ми, прпⷣбне, наста́ви.

Сла́ва, и҆ ны́нѣ, пра́здника.

А҆́ще же нѣ́сть пра́здника, бг҃оро́диченъ:

Зарю̀ пресвѣ́тлꙋю, ꙗ҆влѧ́ющꙋю на́мъ сл҃нце незаходи́ое, вѣ́мы тѧ̀, прест҃а́ѧ дв҃о бцⷣе. сегѡ̀ ра́ди мо́лимъ тѧ̀: ꙗ҆́кѡ мт҃и свѣ́та сꙋ́щи, просвѣтѝ на́съ свѣ́томъ сн҃а твоегѡ̀, хрⷭ҇та̀ бг҃а на́шегѡ.

На хвали́техъ стїхи́ры на д҃, гла́съ ѕ҃.

Бг҃оно́се пребл҃же́нне ѻ҆́тче на́шъ ѳеодо́сїе, мі́ра красѡты̀ и҆ сла́дѡсти вре́мєнныѧ возненави́дѣвъ, мона́шеское житїѐ возлюби́лъ є҆сѝ, и҆ а҆́гг҃льскомꙋ ли́кꙋ сопричта́лсѧ є҆сѝ: тѣ́мже и҆ свѣти́льникъ многосвѣ́тлый вселе́ннѣй чꙋдесы̀ ди́внѡ сїѧ́еши. молѝ ᲂу҆̀бо ѡ҆ на́съ, соверша́ющихъ ст҃ꙋ́ю па́мѧть твою̀, мы́ бо ча̑да твоѧ̑ и҆ ѻ҆́вцы слове́снагѡ ста́да твоегѡ̀, тебѐ на по́мощь призыва́емъ, просѧ́ще тобо́ю прїѧ́ти ми́ръ и҆ ве́лїю млⷭ҇ть. Два́жды.

Бг҃оно́се пребл҃же́нне ѳеодо́сїе, всѐ плотско́е мꙋдрова́нїе дꙋ́хꙋ повинꙋ́лъ є҆сѝ, пощє́нїи и҆ сокрове́нными пѡ́двиги ѡ҆чи́стивсѧ, ꙗ҆́кѡ зла́то въ горни́лѣ и҆скꙋше́но сїѧ́ѧ ꙗ҆ви́лсѧ є҆сѝ, прїѧ́телище (с. 674) бы́въ дх҃а прест҃а́гѡ. ѡ҆би́тєли же и҆́ночєскїѧ бл҃гоꙋстроѧ́ѧ и҆ хра́мы бж҃їѧ бл҃голѣ́пнѣ ᲂу҆краша́ѧ, до́брѣ ѻ҆́вцы твоѧ̑ словє́сныѧ ᲂу҆па́слъ є҆сѝ, ᲂу҆че́ньми твои́ми ꙗ҆́коже нѣ́коею лѣ́ствицею на высотꙋ̀ добродѣ́телей возводѧ̀. помина́й на́съ, чтꙋ́щихъ па́мѧть твою̀ присносщ҃е́ннꙋю, и҆ молѝ сп҃сти́сѧ дꙋша́мъ на́шымъ.

Возсїѧ̀ на́мъ бг҃оꙋго́дное житїѐ твоѐ, пресла́вне ѳеодо́сїе, поꙋча́ѧ на́съ бг҃олюбє́знымъ добродѣ́телемъ: всѣ̑мъ бо ꙗ҆ви́лъ є҆сѝ въ себѣ̀ пра́вило вѣ́ры и҆ ѻ҆́бразъ кро́тости, по́двигѡвъ и҆́ноческихъ и҆ воздержа́нїѧ зерца́ло, любве́ же и҆ смире́нїѧ сокро́вище неистощи́мое. тѣ́мже чтꙋ́ще ст҃ꙋ́ю па́мѧть твою̀, тебѐ вѣнча́вшаго хрⷭ҇та̀ прославлѧ́емъ, то́же молѝ ѡ҆ сп҃се́нїи дꙋ́шъ на́шихъ.

Сла́ва, гла́съ в҃:

Что̀ тебѣ̀ принесе́мъ, хрⷭ҇тѐ бж҃е на́шъ, и҆лѝ ка́кѡ по достоѧ́нїю воспое́мъ щедрѡ́ты твоѧ̑, ꙗ҆̀же преиз̾ѻби́льнѣ и҆злива́еши на на́съ недосто́йныхъ; бл҃же́ни є҆смы̀, ча̑да сꙋ́ще цр҃кве твоеѧ̀ правосла́вныѧ, въ не́йже ꙗ҆́кѡ во дни̑ дрє́внїѧ, та́кѡ и҆ ны́нѣ ди̑внаѧ и҆ пресла̑внаѧ чꙋдеса̀ ꙗ҆влѧ́еши, прославлѧ́ѧ ст҃ы̑ѧ твоѧ̑. сѐ и҆ ны́нѣ свѣ́тлѡ пра́зднꙋемъ но́вомꙋ чꙋдотво́рцꙋ преди́вномꙋ, є҆го́же просла́вити бл҃говоли́лъ є҆сѝ. сла́вимъ и҆́мѧ твоѐ, гдⷭ҇и бж҃е на́шъ, покланѧ́емсѧ вели́чествꙋ бл҃гости твоеѧ̀, и҆ припа́дающе вопїе́мъ тѝ: мл҃твами ст҃и́телѧ ѳеодо́сїа поми́лꙋй на́съ.

И҆ ны́нѣ, пра́здника.

А҆́ще же нѣ́сть пра́здника, бг҃оро́диченъ: Всѐ ᲂу҆пова́нїе моѐ на тѧ̀ возлага́ю, мт҃и бж҃їѧ, сохрани́ мѧ под̾ кро́вомъ твои́мъ.

Славосло́вїе вели́кое, и҆ ѿпꙋ́стъ.

На лїтꙋргі́и:

Бл҃жє́нна ѿ канѡ́на ст҃а́гѡ, пѣ́снь г҃-ѧ и҆ ѕ҃- ѧ.

Прокі́менъ, гла́съ з҃: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;

А҆пⷭ҇лъ ко є҆вре́ємъ, зача́ло тл҃є.

А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Сті́хъ: Си́льно на землѝ бꙋ́детъ сѣ́мѧ є҆гѡ̀, ро́дъ пра́выхъ бл҃гослови́тсѧ.

Є҆ѵⷢ҇лїе ѿ лꙋкѝ, зача́ло к҃д.

Прича́стенъ: Въ па́мѧть вѣ́чнꙋю бꙋ́детъ првⷣникъ:

Вѣ́домо бꙋ́ди, ꙗ҆́кѡ сїѧ́ же слꙋ́жба соверша́етсѧ мѣ́сѧца феврꙋа́рїа въ є҃-й де́нь.

А҆́ще ᲂу҆́бѡ пра́зднованїе ст҃и́телю ѳеодо́сїю бꙋ́детъ ѳ҃-гѡ септе́мврїа, и҆ тогда̀ слꙋ́жба сїѧ̀ пое́тсѧ кꙋ́пнѡ съ попра́зднствомъ ржⷭ҇тва̀ прест҃ы́ѧ бцⷣы, во все́мъ подо́бнѡ, ꙗ҆́коже ᲂу҆каза́сѧ въ слꙋ́жбѣ прпⷣбномꙋ і҆ѡ́сифꙋ, волоцко́мꙋ чꙋдотво́рцꙋ.

А҆́ще же пра́зднованїе бꙋ́детъ є҃-гѡ феврꙋа́рїа, и҆лѝ во ѿда́нїе срѣ́тенїѧ гдⷭ҇нѧ, и҆ли́ же внѣ̀ ѿда́нїѧ, и҆ тогда̀ пое́мъ всю̀ слꙋ́жбꙋ, ꙗ҆́коже и҆з̾ѡбрази́сѧ въ слꙋ́жбѣ ст҃о́мꙋ вели́комꙋ кнѧ́зю геѡ́ргїю, влади́мїрскомꙋ чꙋдотво́рцꙋ, д҃-гѡ феврꙋа́рїа.