Минея. Ноябрь

 В 23-й деньВ 24-й деньВ 25-й день 

В 24-й день

Святы́я великому́ченицы Екатери́ны и свята́го великому́ченика Мерку́рия

На Го́споди, воззва́х: стихиры святы́я, глас 1.

Подо́бен: Небе́сных чино́в:

Днесь красу́ется град Александри́я,/ пелены́ твоя́, му́ченице,/ в Боже́ственнем хра́ме твое́м име́я прему́дро./ Те́мже и мы благоче́стно пра́зднуем,/ Екатери́но, па́мять твою́ честну́ю:/ моли́ся о чту́щих тя.

Екатери́ны па́мять ны́не пра́зднуим:/ та бо и́стинно вся вра́жия си́лы/ и сло́вом же и де́лом низложи́ кре́пко/ и ри́торское противле́ние./ Но моли́твами ея́ изба́ви ны, Бо́же,/ от безбо́жных враг.

Ра́дуйся, всесла́вная му́ченице Екатери́но честна́я:/ Сина́йская бо гора́,/ в не́йже ви́де купину́ Моисе́й неопали́му,/ в той Христо́с Богоуго́дное те́ло твое́,/ ны́не преложи́в, храни́т/ да́же до вре́мене втора́го прише́ствия Своего́.

И́ны стихи́ры му́ченика, глас 4.

Подобен: Я́ко до́бля:

Поборе́нием Ду́ха, страстоте́рпче Мерку́рие,/ одоле́в проти́внаго,/ я́ко во́ин непобеди́мый,/ ору́жием ве́ры тьмы разу́мных му́ринов посе́кл еси́/ и, соверши́в твой по́двиг зако́нно,/ со все́ми страда́льцы венча́лся еси́,/ великому́чениче преблаже́нне.

С Небесе́ тебе́ А́нгел,/ я́звы твоя́ исцеля́яй,/ по́слан бысть ма́нием Боже́ственнаго Ду́ха:/ отне́леже исцеле́в, достосла́вне,/ рожны́ пробода́емь, льсти́вно разжже́нными,/ терпе́л еси́, пове́шен и протяза́емь,/ и к ка́мени привяза́емь тя́жкому,/ и кровьми́ твои́ми, му́чениче, облива́емь всю́ду.

Царю́ во́инствуя земно́му, Мерку́рие,/ от него́же де́моном повелева́емь жре́ти,/ Богому́дре блаже́нне,/ му́ки претерпе́л еси́,/ и попале́ние о́гненное, и ну́ждную смерть,/ и восте́кл еси́ ко Христу́, венцено́сец,/ и сочета́лся еси́ му́чеников стадо́м,/ о ми́ре моля́ся.

Сла́ва, глас 2:

Ра́достно к торжеству́ Богому́дрыя му́ченицы Екатери́ны стеце́мся,/ о мучениколю́бцы!/ И ту́ю похвала́ми, я́ко цве́ты, увязе́м,/ ра́дуйся, вопию́ще ей,/ я́же лжи́вых ри́торов свирепоу́стие обличи́вши,/ я́ко ненаказа́ния испо́лненных,/ и ты́я к ве́ре Боже́ственней руково́дствовавши./ Ра́дуйся, я́же те́ло многоплете́нным му́кам вда́вши/ любве́ ра́ди Творца́ твоего́,/ и не низложи́вшися, я́ко отрокови́ца неги́блема./ Ра́дуйся, я́же го́рняя пребыва́лища, возме́здие боле́зней насле́довавши,/ и сла́вы ве́чныя наслажда́ешися./ Ея́же жела́юще, песнопе́вцы твои́,/ наде́жды да не отпаде́м.

И ны́не, глас 8:

По Рождестве́ Твое́м, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х,/ я́ко освяще́нна;/ тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́:/ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и нескве́рная,/ я́же на небеси́ и на земли́ сла́вима,/ Ма́ти Бо́жия, спаси́ род наш.

На литии́ стихи́ры, глас 1:

Я́ко на тве́рдем ка́мени/ испове́дания Христо́ва,/ водружена́ бы́вши, Екатери́но всехва́льная,/ гони́теля льсти́ваго во мра́це погрузи́ла еси́/ и вене́ц побе́ды досто́йный восприя́ла еси́.

С Вы́шними чи́нми сочета́лася еси́, сла́вная,/ мир оста́вльши и Христа́ возжеле́вши,/ Екатери́но всечестна́я,/ проси́ нам ве́лия ми́лости.

Глас 2:

Я́ко алава́стр ми́ра,/ кровь твою́ принесла́ еси́ Жениху́ твоему́, Христу́,/ Екатери́но му́ченице, страстоно́сице непобеди́мая,/ возме́здие же прия́ла еси́,/ вене́ц нетле́нный от Него́, досточу́дная./ Те́мже и началозло́бнаго врага́/ кра́сными твои́ми нога́ми попра́ла еси́,/ призыва́нием спасе́ннаго И́мене Иису́са Христа́,/ сего́ ра́ди и в Небе́сных черто́зех водвори́лася еси́,/ я́ко де́ва и му́ченица Христо́ва многострада́льная.

Глас 4:

Сла́вим Твое́ мно́гое, Христе́, благоутро́бие,/ и бла́гость на нас бы́вшую,/ я́ко и жены́ разру́шиша лесть идолобе́сия/ си́лою Креста́ Твоего́, Человеколю́бче,/ мучи́теля не убоя́шася, попра́ша льсти́ваго,/ возмого́ша же в след Тебе́ идти́/ и в во́ню ми́ра Твоего́ потеко́ша,/ моля́щеся о ду́шах на́ших.

Сла́ва, глас 6:

Одесну́ю Спа́са предста́ де́ва,/ и страстоно́сица, и му́ченица Екатери́на,/ оде́яна в непобеди́мое доброде́телей,/ и приукра́шена ма́слом чистоты́ и кро́вию страда́ния,/ и вопию́щи к Нему́ в ра́дости,/ свещу́ свою́ иму́щи:/ в во́ню ми́ра Твоего́ теко́х, Христе́ Бо́же,/ я́ко уязвля́юся Твое́ю любо́вию аз,/ не отлучи́ мене́, Женише́ Небе́сный./ Тоя́ моли́твами,/ посли́ нам, всеси́льне Спа́се, ми́лости Твоя́.

На стихо́вне пра́здника, глас 1.

Подо́бен: Небе́сных чино́в:

Прииди́те, празднолю́бцы вси,/ пе́сньми почти́м еди́ну Богоро́дицу/ Чи́стую и Де́ву:/ вво́дится бо в храм Бо́жий,/ в нем жи́ти ны́не све́тло,/ святе́йший вои́стинну Христо́в храм,/ и ра́дости вся́кия Хода́таица.

Стих: Приведу́тся Царю́ де́вы в след Ея́,/ и и́скренния Ея́ приведу́тся Тебе́.

Две́ри, проро́че, отве́рзи,/ ве́рою прие́мли в храм Госпо́день приведе́нную,/ всех А́нгел же и челове́к похвалу́/ и све́тло ра́дование,/ внутрь жи́ти и ликова́ти,/ я́же храм Бо́жий и оби́телище.

Стих: Приведу́тся в весе́лии и ра́довании,/ введу́тся в храм Царе́в.

Богоро́дица Мари́я, в храм приведе́на,/ хлеб прие́млющи от А́нгела, яви́ся,/ вопию́ща Ей, ра́дуйся:/ зачне́ши Сы́на неискусому́жно,/ Богоневе́стная благослове́нная Богоро́дице Де́во,/ земны́м благонасле́дие и назда́ние.

Сла́ва, глас 2:

Житие́ невеще́ственно навы́кши,/ суди́ще безбо́жное дости́гши, ста́ла еси́,/ победоно́сице Екатери́но честна́я,/ цветонося́щи Бо́жию све́тлость;/ и, Боже́ственною мо́щию оде́яна,/ повеле́нию мучи́телеву поруга́лася еси́/ и ри́торов утоли́ла еси́ лжи́выя ре́чи, многострада́льная.

И ны́не, пра́здника, глас 8:

Дави́д провозглаша́ше Тебе́, Пречи́стая,/ прови́дя освяще́ние вхо́да Твоего́ в храм:/ в не́мже концы́, днесь пра́зднующе,/ славосло́вят Тя, Всепе́тая:/ Я́же бо пре́жде Рождества́ Де́ва/ и по Рождестве́ пребы́вши нетле́нна,/ Ма́ти Сло́ва Жи́зни./ Днесь в хра́ме Заха́рия весели́тся,/ восприе́м Тя, Влады́чице,/ и свята́я святы́х ра́дуются,/ подъе́мши Тя, исто́чника жи́зни на́шея./ Сего́ ра́ди и мы псало́мски вопие́м Ти:/ о нас моли́ Сы́на Твоего́ и Бо́га на́шего/ дарова́ти нам ве́лию ми́лость.

Тропа́рь му́ченице, глас 4:

Доброде́тельми, я́ко луча́ми со́лнечными,/ просвети́ла еси́ неве́рныя мудрецы́./ И, я́коже пресве́тлая луна́ ходя́щим в нощи́,/ неве́рия тьму отгна́ла еси́/ и цари́цу уве́рила еси́,/ вку́пе же и мучи́теля обличи́ла еси́,/ Богозва́нная неве́сто, блаже́нная Екатери́но,/ жела́нием востекла́ еси́ в Небе́сный черто́г/ к прекра́сному Жениху́, Христу́,/ и от Него́ ца́рским венце́м венча́лася еси́:/ Ему́же, со А́нгелы предстоя́щи,/ за ны моли́ся,/ творя́щия пречестну́ю па́мять твою́.

Сла́ва, му́ченика, глас то́йже:

Му́ченик Твой, Го́споди, Мерку́рий,/ во страда́нии свое́м вене́ц при́ят нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

И ны́не, пра́здника.

На У́трени

На Бог Госпо́дь: тропа́рь пра́здника, еди́ножды, и Екатери́ны, еди́ножды. Сла́ва, му́ченика. И ны́не, пра́здника.

По 1-м стихосло́вии седа́лен святы́я, глас 8.

Подо́бен: Прему́дрости и Сло́ва:

Крове́й твои́х струя́ми, му́ченице Христо́ва,/ пото́ки благоче́стия вы́ну содева́еши прехва́льная,/ одожде́нием же благода́тным слове́сныя ни́вы напая́ющи,/ благода́тию в них прозяба́еши кла́сы205 ве́ры./ Те́мже пресла́вно и по сме́рти яви́лася еси́,/ точа́щи живо́т муче́ния ра́ди,/ страстоно́сице прехва́льная Екатери́но, моли́ Христа́ Бо́га/ согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, пра́здника, глас 1.

Подобен:Ка́мени запеча́тану:

Восхвали́те, де́вы, ма́тери, пра́зднуйте,/ лю́дие, славосло́вите,/ свяще́нницы, благослови́те Пречи́стую Ма́терь Бо́жию:/ пло́тию бо младе́нствующи, пре́жде во храм принесе́ся,/ я́ко храм Бо́жий святе́йший./ Те́мже пра́здник духо́вный соверша́юще, воспои́м Ю,/ я́ко Предста́тельницу ро́да челове́ческаго.

По 2-м стихосло́вии седа́лен святы́я, глас 4.

Подо́бен: Вознесы́йся:

Прише́дшую ко Христу́ во́лею и укра́сившую доброде́тельми се́рдце,/ Боголе́пно воспое́м всему́друю Екатери́ну, ве́рных мно́жества,/ та бо посрами́ мучи́тельскую де́рзость,/ просия́вши, я́ко со́лнце, посреди́ беззако́нник,/ и по кончи́не яви́ся земны́м утвержде́ние Боже́ственное, вку́пе и держа́ва.

Сла́ва, и ны́не, пра́здника, глас 1.

Подобен:Ка́мени запеча́тану:

Свята́я святы́х Богоро́дице су́щи,/ досто́йно приведе́ся жи́ти во свята́я,/ я́ко одушевле́н Госпо́день киво́т/ и Свята́го Ду́ха и́стинно вмести́лище Боже́ственное, Де́во Ма́ти:/ те́мже всели́ся в Тя, и́же Отцу́ Единоро́дный и Свято́му Ду́ху соесте́ственный,/ Твой Сын неискусому́жно, обоготвори́в все челове́чество.

По полиеле́и седа́лен святы́я, глас 8.

Подо́бен: Прему́дрости и Сло́ва:

Прему́дрость вои́стинну с Небесе́,/ усты́ Михаи́ла Арха́нгела прие́мши, му́ченице всехва́льная Екатери́но,/ в страда́ниих непобеди́ма, му́дрость вне́шнюю вити́ям посрами́ла еси́,/ му́дростию же Боже́ственною пре́лесть поплева́ла еси́./ Те́мже, ви́дяй по́двиги твои́, Зи́ждитель предста́, укрепля́я тя:/ гряди́,– глаго́ля,– взы́ди,/ сокро́вища бо ти гото́ва./ Тому́ убо́ моли́ся, согреше́ний оставле́ние дарова́ти,/ пра́зднующим любо́вию святу́ю па́мять твою́.

Сла́ва, и ны́не, седа́лен пра́здника, что по 3-й пе́сни ( зри день сей ни́же ).

Степе́нна, 1-й антифо́н, 4-го гла́са. Проки́мен, глас 4: Ди́вен Бог во святы́х Свои́х: Стих: В це́рквах благослови́те Бо́га: Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 2:

Де́вства твоего́ красоты́/ возжеле́в Царь Сла́вы Христо́с,/ я́ко непоро́чну тя́ неве́сту Себе́ обручи́,/ совокупле́нием нетле́нным,/ и́бо во́лею Свое́ю, пода́в добро́те твое́й си́лу,/ на враги́ же и стра́сти непобеди́му показа́,/ претерпе́вши ра́ны го́рькия и му́ки свире́пыя,/ сугу́бым венце́м увязе́ тя/ и поста́ви одесну́ю Себе́,/ я́ко цари́цу испещре́ну,/ Того́ моли́, му́ченице честна́я и многострада́льная Екатери́но,/ певце́м твои́м спасе́ние, и жизнь пода́ти,/ и ве́лию ми́лость.

Кано́н пра́здника, со ирмосо́м на 6 и святы́х два, на 8.

Кано́н пра́здника, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ вхожде́ние.

Прему́дрости, Пречи́стая, Тя сокро́вище ве́мы и благода́ти,/ точа́щую исто́чник приснотеку́щий ра́зума,/ про́сим: Твои́ ка́пли одожди́, Влады́чице,/ е́же воспева́ти Тя при́сно.

Превы́шши, Пречи́стая, Небе́с бы́вши,/ храм и пала́та,/ в храм Бо́жий возложи́лася еси́/ Тому́ уготова́тися в Боже́ственное Жили́ще прише́ствия Его́.

Свет возсия́вши Богоро́дица благода́ти, вся просвети́/ и совокупи́ пресве́тлое Ея́ украси́ти торжество́ пе́сньми:/ прииди́те, к Ней стеце́мся.

Дверь сла́вная,/ по́мыслы непроходи́мая,/ две́ри отве́рзши хра́ма Бо́жия,/ ны́не повелева́ет нам, совше́дшим, Боже́ственных Ея́ чуде́с наслади́тися.

Кано́н му́ченицы. Его́же краегране́сие: Екатери́ну приснопа́мятную пе́сньми пою́. Феофа́ново, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре:/ Изра́иля же беглеца́, пешехо́дца, спасе́,/ песнь Бо́гови воспева́юща.

Екатери́ны, всему́дрыя му́ченицы, моли́твами, Христе́,/ мра́чное о́ко души́ моея́ просвети́,/ зарю́ ми дай, Влады́ко, Твоего́ светоли́тия,/ душетле́нных паде́ний мои́х весь мрак потребля́ющую.

Направля́ема Влады́ки, всему́драя, Боже́ственными повеле́нии/ и Того́ любо́вию пали́ма, потекла́ еси́, к подвиго́м тща́щися,/ и мучи́телей ра́зумы, Екатери́но, устраши́ла еси́/ сло́вом, и му́дростию, и благода́тию.

Управля́ема дла́нию, сла́вная, кре́пкою Христо́вою,/ и́дольския бу́ри избе́гла еси́, му́ченице,/ немо́кренно преплы́вши креста́ ве́трилом и Боже́ственными ве́тры Ду́ха,/ песнь Бо́гу воспева́ющи.

Ра́дующися де́вственными добро́тами, Екатери́но му́драя,/ и Боже́ственное зна́ние с Небесе́ иму́щи,/ лжеиме́ннаго зна́ния благодерзнове́нно и му́жественно предста́тели посрами́ла еси́,/ ты́я держа́вне победи́вши.

Богоро́дичен: И́же Богоро́дицу Тя пропове́дует, Пречи́стая,/ вся́кия е́реси отринове́ние и́мать:/ плоть бо бы́вша, неизме́нно родила́ еси́ превы́шша вся́кия, Богороди́тельнице, тва́ри/ Сло́во Бо́жие Присносу́щное.

Ин кано́н му́ченика, его́же краегране́сие: Мерку́риева ми кре́пость да храни́т. Ио́сиф, глас 8.

Песнь 1

Ирмо́с: Посе́ченый несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.

С го́рними ли́ки, Мерку́рие, благи́х исто́чнику, ра́дуяся, предстоя́,/ и Боже́ственныя сла́дости, приснопа́мятне, исполня́яся,/ любо́вию торжество́ твое́ соверша́ющия сохраня́й, Го́споду пою́щия:/ сла́вно бо просла́вися.

Во́льно вшел еси́ в три́знище муче́ния, му́дре,/ си́лою укрепля́емь Христо́вою,/ нас ра́ди стра́сти спаси́тельныя во́лею претерпе́вшаго пло́тию,/ и, ра́дуяся, взыва́л еси́:/ Го́споду пои́м, сла́вно бо просла́вися.

Глаго́л206 мучи́теля я́ве укори́л еси́,/ испове́данием Христо́вым, блаже́нне, украша́емь,/ и вся́кий боле́зней вид, весели́ся, претерпе́л еси́, Мерку́рие,/ вопия́ тебе́ Укре́пльшему:/ Го́споду пои́м, сла́вно бо просла́вися.

Богоро́дичен: От Отрокови́цы Де́вы яви́лся еси́, воплоща́емь нас ра́ди,/ по нам Челове́к быв,/ и свиде́теля ве́рна страсте́й Свои́х явля́ет –/ Мерку́рия, до́бляго Своего́ страда́льца,/ Тому́ кре́пко пою́ща:/ Го́споду пои́м, сла́вно бо просла́вися.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в честне́м вхожде́нии Твое́м/ венце́в сла́вы сподо́би.

Невестокраси́тель днесь яви́ся, кра́сный Де́вы храм и черто́г,/ прие́мь одушевле́нный черто́г Бо́жий,/ чи́стую, и непоро́чную, и светле́йшую всей тва́ри.

Дави́д, предначина́я ликова́ние, игра́ет и ликовству́ет с на́ми/ и Цари́цу зове́т Тя, укра́шену, Пречи́стая,/ предстоя́щу, Всечи́стая, в хра́ме Царю́ и Бо́гу.

Из нея́же преступле́ние произы́де дре́вле ро́ду челове́ческому,/ из Тоя́ исправле́ние и нетле́ние процвете́,/ Богоро́дица днесь приводи́ма в дом Бо́жий.

Игра́ют А́нгельская во́инства и всех челове́к мно́жество,/ и пред лице́м, Пречи́стая, предтеку́т Твои́м днесь свещено́сицы, зову́ще:/ вели́чествия Твоя́ в дому́ Бо́жии.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Во́льными твои́ми стремле́ньми вошла́ еси́ ко страда́нию, во́лею Христа́ подража́ющи/ и победи́вши све́тло тьмы мироде́ржца,/ венцено́сица яви́лася еси́, Екатери́но Богоприя́тная.

Кре́постию ума́ обличи́ла еси́ мучи́тели,/ безбо́жия в глубине́ валя́ющияся,/ ри́торствующи я́ве Богозна́ния догма́ты,/ Бо́жиею му́дростию му́ченица уясня́ема всехва́льная.

Равнобо́жие во у́ши Е́вине пошепта́вый,/ от отрокови́цы млады́я ны́не попира́ется,/ ору́жием бо Креста́ огради́вшися, посрами́ Екатери́на му́ченица/ безме́рно того́ хва́лящася.

Богоро́дичен: Умерщвле́нный мой ум жи́зни де́йством из Тебе́ я́вльшияся ми́ру воздви́гни,/ я́звы и стру́пы истребля́ющи грехо́вныя,/ еди́на Богороди́тельнице Всенепоро́чная.

Ин

Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Весь разжига́емь Боже́ственною любо́вию, сла́вне,/ огнь и ю́зы, мечи́ и му́ки, я́коже сон, вмени́л еси́, Мерку́рие.

Воспева́л еси́ Сотво́ршаго, примеша́яся лю́тым ра́нам, му́чениче му́дре,/ и исцеле́ния язв приима́л еси́, сла́вне.

Жезло́м укрепля́емь Боже́ственным,/ вра́жие свире́пство, я́ко страда́лец,/ му́чениче доблему́дренне, благомо́щно смири́л еси́.

Богоро́дичен: Я́ко да прообрази́т Твое́ па́че ума́, Чи́стая, рождество́,/ купина́ яви́ся, огне́м пали́ма, и ника́коже сгара́ющи.

Конда́к пра́здника, глас 4.

Подо́бен: Вознесы́йся:

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище Сла́вы Бо́жия/ днесь вво́дится в дом Госпо́день,/ благода́ть совводя́щи,/ я́же в Ду́се Боже́ственном,/ Ю́же воспева́ют А́нгели Бо́жии:/ Сия́ есть селе́ние Небе́сное.

И́кос:

Неизрече́нных Бо́жиих и Боже́ственных та́ин зря,/ в Де́ве благода́ть явля́емую и исполня́ему я́вственно,/ ра́дуюся, и о́браз разуме́ти недоуме́юся, стра́нный и неизрече́нный,/ ка́ко избра́нная Чи́стая еди́на/ яви́ся па́че все́я тва́ри ви́димыя и разумева́емыя?/ Те́мже, восхвали́ти хотя́ Сию́,/ ужаса́юся зело́ умо́м же и сло́вом,/ оба́че дерза́я, пропове́даю и велича́ю:/ Сия́ есть селе́ние Небе́сное.

Ин конда́к святы́я, гла́с 3.

Подо́бен: Де́ва дне́сь:

Вити́йствующи днесь, Екатери́на му́ченица/ и вити́ям обличи́ умовре́дную е́ресь,/ А́нгел бо с Небесе́ к той прии́де, си́лу от Вы́шняго принесе́,/ ю́же прие́мши, му́жески207 рече́:/ Христо́с есть му́чеником похвала́.

Ин и́кос святы́я:

Све́том Твои́м, Христе́, просвети́ се́рдце мое́/ и Ду́хом Твои́м разшири́ ны́не уста́ моя́/ воспе́ти досто́йно Твою́ страстоте́рпицу,/ та бо вои́стину, сло́вом и благода́тию, му́дростию и ду́хом огра́ждшися,/ всем ору́жием Тро́ицы Честны́я/ мно́жество обличи́ вити́йствующих, в суете́ хваля́щихся,/ и сих приведе́ Тебе́, Бо́гови своему́, Влады́це и Спа́су все́х, вопию́щи:/ Христо́с есть му́чеником утвержде́ние.

Та́же конда́к Мерку́рия, глас 4.

Подо́бен: Яви́лся еси́ днесь:

Во бране́х непобеди́маго во́ина/ и в беда́х непосты́дна засту́пника,/ пе́сньми Мерку́рия ублажи́м, сла́вяще,/ пра́зднующия бо па́мять его́ ве́село от бед избавля́ет и скорбе́й.

Седа́лен святы́я, глас 4.

Подо́бен: Вознесы́йся:

Жениха́ твоего́, Христа́, возлюби́вши,/ свещу́ твою́ све́тло угото́вльши, доброде́тельми просия́вши, сла́вная./ Те́мже вошла́ еси́ с Ним в Черто́г/ и, вене́ц страда́ния от Него́ прие́мши,/ от бед изба́ви нас, соверша́ющих, Екатери́но, па́мять твою́.

Ин седа́лен святы́я, глас 4:

Лик соста́вим духо́вно, бра́тие,/ прему́дрыя до́брыя му́ченицы Екатери́ны ве́рно,/ Го́сподеви взыва́юще:/ сла́ва Ти, просвеща́я сердца́ челове́ча,/ сла́ва Ти, почты́й до́блюю в страсте́х/ тоя́ моли́твами, Христе́ Бо́же,/ спаси́ ду́ши на́ша.

Сла́ва му́ченика, глас то́йже.

Подо́бен: Ско́ро предвари́:

Му́ченик Мерку́рий, подвиза́вся, льсти́ваго посрами́/ и вене́чник кре́пок Христо́в бысть:/ те́мже Небе́сным ны́не причте́ся лико́м,/ сла́вы неприе́мныя досто́йно причаща́яся./ Сего́ ра́ди свяще́нную его́ па́мять соверша́ем ве́рно.

И ны́не, пра́здника, глас то́йже:

Дави́де, предъиди́ в храм Бо́жий/ и, ра́дуяся, приими́ Цари́цу на́шу, и Той возопи́й:/ вни́ди, Госпоже́, в храм Царе́в, вни́ди!/ Ея́же сла́ва покрове́нно разуме́ется,/ из Нея́же хо́щет источи́тися нам всем Свет – Христо́с.

Песнь 4

Ирмо́с: Неизсле́дный Бо́жий Сове́т,/ е́же от Де́вы воплоще́ния,/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.

Дверь непрохо́дную Бо́жий дом прие́мля днесь,/ преста́ти сотвори́ вся́кой слу́жбе зако́нной,/ я́ко и́стинно яви́ся, зовы́й, су́щим на земли́ И́стина.

Гора́ присе́нная, ю́же прови́де дре́вле Авваку́м,/ предпропове́да внутрь вмести́вшуся,/ в нехо́дных хра́ма доброде́телей процве́тши и покрыва́ет концы́.

Ви́девши пресла́вная вся земля́ стра́нныя же и ди́вныя ве́щи,/ ка́ко Де́ва от А́нгела, пи́щу прие́млющи, о́бразы строе́ния но́сит.

Храм, и Пала́та, и Не́бо одушевле́нное я́вльшися, Богоневе́сто Царе́ва,/ в храм зако́нный приводи́ма днесь,/ тому́ соблюда́ема, Пречи́стая.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Страда́льческое, Екатери́но, противле́ние показа́ла еси́,/ му́ченице приснопа́мятная,/ вражде́бнику зело́ терпели́вно противля́ющися/ и того́ попра́вши нога́ми кра́сными Креста́ си́лою,/ страстоно́сице, му́чеников похвала́.

Неве́ста Христо́ва, Екатери́но всеблаже́нная, яви́лася еси́,/ Боже́ственныя красоты́ светови́дными луча́ми просвеща́ема и добро́тою сия́ющи./ Те́мже и, веселя́щися, песнопое́ши Влады́це:/ си́ле Твое́й сла́ва, Человеколю́бче.

Мучи́тельскую горды́ню низложи́ла еси́/ и Боже́ственным сло́вом му́дрости твоея́/ я́ко от глубины́ ле́стнаго демоногове́ния прельща́емыя исхи́тила еси́,/ уча́щи зва́ти Христу́ песнопою́щия:/ си́ле Твое́й сла́ва, Человеколю́бче.

Благосла́вное и светоно́сное торжество́ сла́вныя па́мяти твоея́, всехва́льная,/ кре́пко де́рзость вра́жию попра́вши, я́ко со́лнце, возсия́,/ в не́мже велегла́сно Влады́це вопие́м:/ си́ле Твое́й сла́ва, Человеколю́бче.

Богоро́дичен: Ны́не кре́пость низложи́/ отмета́ющихся о́браза, Отрокови́це, поклоне́ния Тебе́, Чи́стыя,/ и па́че ума́ из Тебе́ воплоще́ннаго и мир весь просве́щшаго, и всех святы́х,/ ве́рою же чту́щия Тя просвети́, еди́на Всепе́тая.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Присво́ился еси́ Зижди́телю твоему́/ Боже́ственнаго свиде́тельства, Богому́дре, страстьми́/ и све́тлыя венцы́ от Него́ прия́л еси́, сла́вне, я́ко непобеди́мый.

Истка́нную от вы́шния благода́ти в ри́зу, му́чениче, ны́не оде́ялся еси́,/ тли и ме́ртвости риз, му́чениче, совле́кся.

Да́же до кро́ве, сла́вне, ко греху́ подвиза́вся, победоно́сец показа́лся еси́/ и вы́шния сла́вы сподо́бился еси́, Мерку́рие.

Богоро́дичен: На Тя спаси́тельное Сло́во сни́де, Присноде́во, я́коже ту́ча,/ и изсуши́ многобо́жия наводне́ния.

Песнь 5

Ирмо́с: Ужасо́шася вся́ческая/ в честне́м вхожде́нии Твое́м,/ Ты бо, Неискусобра́чная Де́во,/ внутрь вошла́ еси́ в храм Бо́жий,/ я́коже чисте́йший храм,/ всем воспева́ющим Тя/ мир подава́ющая.

Свяще́ние сла́вное и свяще́нное возложе́ние,/ днесь Пречи́стая Де́ва, возложи́вшися в храм Бо́жий,/ Всецарю́ на́шему Бо́гу еди́ному в жили́ще соблюда́ется, я́ко весть Сам.

Добро́ту, Пречи́стая, души́ Твоея́ зря не́когда, ве́рою Заха́рия возопи́:/ Ты еси́ избавле́ние, Ты еси́ всех ра́дость,/ Ты еси́ воззва́ние на́ше, Е́юже Невме́стный вмеще́н мне яви́тся.

О, па́че ума́ чуде́с Твои́х, Всечи́стая!/ стра́нное Твое́ рождество́ есть, стра́нен о́браз возраще́ния Твоего́,/ стра́нна и пресла́вна Твоя́, Богоневе́сто, вся и челове́ки несказа́нна.

Све́щник многосве́тлый су́щи, Богоневе́сто,/ днесь возсия́ла еси́ в дому́ Госпо́дни/ и озаря́еши ны честны́ми дарова́нии, Чи́стая, чуде́с Твои́х,/ Богоро́дице Всепе́тая.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Любо́вию огнепали́ма, му́ченице всесла́вная, Влады́ки твоего́/ и и́щущи Того́ недомы́сленную добро́ту ви́дети,/ самово́льным нра́вом ра́нам себе́ вдала́ еси́, де́вства сия́ющи благода́тьми.

Страстьми́ свяще́ннейшими, отрокови́це доброде́во,/ украси́вши тебе́ саму́ю благоле́пно,/ возшла́ еси́ к Небе́сному Христо́ву черто́гу/ и ны́не све́тло твоему́ Жениху́, веселя́щися,/ сочта́лася еси́, всеблаже́нная.

Отрокови́ца всесве́тлая яви́лася еси́, возлюби́вши Еди́наго жела́емаго,/ и, во след Того́ крепча́йшее тече́ние соверши́вши,/ в воню́ ми́ра твоего́ у́мнаго истоще́ннаго, вопия́ла еси́:/ теку́, Женише́ мой.

Богоро́дичен: И́стинную Богоро́дицу Тя вси позна́вше, Пречи́стая Влады́чице,/ из Тебе́ ро́ждшагося Бо́га Сло́ва ве́дяще,/ пропове́даем во дву существа́х, хоте́ниих самовла́стных познава́ема, Ма́ти Богоневе́стная.

Ин

Ирмо́с: У́тренююще, вопие́м Ти: Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Растяга́емь и острото́ю, Мерку́рие, неосла́бно разсека́емь,/ терпе́л еси́, Боже́ственными наде́ждами вжиля́емь.

Ка́менем мы́сленным укрепи́в твое́ се́рдце,/ ка́менем отягча́емь, не преврати́лся еси́, Мерку́рие сла́вне.

Соприча́стник страсте́й Влады́ки твоего́ быв,/ сла́вы приобщи́лся еси́ Того́ и Боже́ственныя све́тлости.

Богоро́дичен: Умертви́, Де́во, живу́щий мой грех,/ Жизнь ро́ждшая, умертви́вшую смерть.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Вся́ческая Нося́й глаго́лом моли́тву пра́ведных услы́ша,/ те́мже непло́дныя разреши́л еси́ неду́г, я́ко Благоутро́бен,/ ра́дости Вино́вную сим дарова́.

Сказа́ти хотя́ Госпо́дь язы́ком Свое́ спасе́ние,/ Неискусобра́чную ны́не от челове́к прия́т,/ примире́ния знаме́ние и обновле́ния.

Я́ко дом су́щи благода́ти,/ в не́мже сокро́вища лежа́т неизрече́ннаго Бо́жия строе́ния, Всечи́стая,/ в хра́ме причасти́лася еси́ нетле́нныя сла́дости.

Диади́му Тя ца́рскую прие́м, храм, Богоневе́сто, просвеща́шеся/ и подступа́ше лу́чшим, предрече́нных зря на Тебе́ сбытие́.

Ин

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́.

Всю тя, добро́тою сия́ющу, де́вства заре́ю,/ му́ченическими же, отрокови́це, обагре́ну кровьми, ви́дев,/ благо́е Сло́во и пречи́стое в черто́зех Небе́сных тя всели́.

Возмогла́ еси́ Кресто́м мучи́телей разруши́ти держа́ву,/ и мирски́я му́дрости обличи́вши суету́,/ Богодохнове́ннаго уче́ния точа́щи догма́ты,/ велему́дренная Екатери́но приснопа́мятная.

Ле́стию пе́рвее Ада́ма ра́йския сла́дости изгна́вшаго,/ ран боле́зни кре́пко терпя́щи, низложи́ла еси́ на зе́млю, му́ченице всесла́вная,/ и венцы́ Ца́рствия венча́лася еси́.

Богоро́дичен: Ми́лостива мне Судию́ и Сы́на Твоего́, Богоро́дице Де́во,/ Твои́ми мольба́ми бы́ти в день Суда́, Изба́вителя же лю́тых, Ма́ти, сотвори́,/ к Тебе́ бо еди́ной наде́жды возлага́ю.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Вжиля́ше тя присносу́щное Сло́во,/ за Него́ всяк вид мук, му́чениче му́дре, терпя́ща тя ви́дя,/ и чрез А́нгела дерза́ти повелева́ше, Мерку́рие,/ и ника́коже мучи́телей устраши́тися противле́ния.

Умертви́ся многообра́зный змий/ и нога́ми попра́ся кра́сными страда́льца и до́бляго ору́жника,/ самово́льными бо стремле́нии вшед к муче́ния ра́нам, сме́рти, сла́вы испо́лнен.

Всесоверше́нно Влады́це прине́сл еси́ серде́чное произволе́ние, му́чениче,/ и Того́ ра́ди претерпе́в сломле́ния, я́ко победи́тель от Него́ венча́лся еси́,/ и Тому́ ны́не на Небесе́х со все́ми му́ченики предстои́ши, Мерку́рие.

Богоро́дичен: Зачала́ еси́ гла́сом А́нгеловым Вели́каго Сове́та А́нгела, Отрокови́це,/ и от Твои́х пречи́стых крове́й воплоще́нна, Всенепоро́чная, родила́ еси́/ показа́вшаго всем Жи́зни вхо́ды за неизглагола́нную ми́лость.

Конда́к святы́я, глас 2.

Подо́бен: Вы́шних ища́:

Лик честны́й Боже́ственне, мучениколю́бцы,/ воздви́гните ны́не, почита́юще всему́друю Екатери́ну,/ сия́ бо в три́знищи Христа́ пропове́да/ и зми́я попра́, ри́торов ра́зумы укроти́вши.

И́кос:

От Бо́га му́дрость прии́мши изде́тства, му́ченице,/ и вне́шнюю до́бре му́дрость всю извы́че,/ позна́вши у́бо от тоя́ стихи́й движе́ние же и творе́ние по сло́ву,/ и сия́ из нача́ла сло́вом Сотво́ршаго,/ Тому́ благодаре́ние в нощи́ и во дни приноша́ше, и́долы низложи́вши/ и сим несмы́сленно служа́щия ри́торов ра́зумы укроти́вши.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Се днесь возсия́ конце́м весна́ ра́достная,/ просвеща́ющи на́шу ду́шу, и помышле́ние, и ум благода́тию,/ торжество́м Богоро́дицы днесь та́инственно да учреди́мся.

Да дароно́сят днесь вся́ческая Цари́це Ма́тери Бо́жии,/ Не́бо и земля́, и А́нгелов чи́ни, и челове́ков мно́жество и да вопию́т:/ во храм вво́дится ра́дость и избавле́ние.

Писа́ние мимотече́, и оскуде́ зако́н, я́коже сень,/ и благода́ти лучи́ возсия́ша/ в храм Бо́жий вше́дшей, Тебе́, Де́во Ма́ти Чи́стая, в нем благослове́нная.

Повине́ся Рождеству́ Твоему́, Всечи́стая, я́ко Творцу́ и Бо́гу, Не́бо, и земля́, и преиспо́дняя,/ и всяк язы́к земны́х испове́дает,/ я́ко Госпо́дь яви́ся, Спас душ на́ших.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Му́чеников хвала́, благоче́стия учи́тельница была́ еси́,/ све́тлому твоему́ Жениху́ му́чеников мно́жество приве́дши, Христу́./ С ни́миже зове́ши, всехва́льная, пою́щи:/ благослове́н Бог оте́ц на́ших.

Сло́во твое́ прему́дрое ко спасе́нию мно́ги исхи́ти от идолонеи́стовства/ и светоно́сны яви́ му́ченики, велегла́сно с тобою́ взыва́ющия:/ благослове́н Бог оте́ц на́ших.

Отрокови́ца, в след Тебе́ иду́щи, Тебе́ приведе́ся, мече́м посече́на,/ Твою́ подража́ющи страсть пречи́стую/ и Тебе́, Зижди́телю, вопию́щи и глаго́лющи:/ благослове́н Бог оте́ц на́ших.

Богоро́дичен: Святы́х Святы́й, в Тебе́ свя́то всели́вся, Чи́стая Богоро́дице Де́во,/ воплоще́н, из Тебе́ ражда́ется, за е́же спасти́ ве́рою зову́щия:/ благослове́н Бог оте́ц на́ших.

Ин

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Све́том го́рняго просвеще́ния озаря́емь, до́блий во́ине,/ воспева́ющия тя ны́не просвеща́еши, песнопою́щия:/ благослове́н еси́, Го́споди Бо́же, во ве́ки.

Воспева́л еси́ всех Благоде́теля, распаля́емь Того́ ре́вностию, блаже́нне,/ и огне́м чу́вственным жего́мь, и песнопоя́:/ благослове́н еси́, Го́споди Бо́же, во веки́.

Ка́мению принося́щии честь, и́же чу́вство окамене́но иму́ще,/ ка́менем, му́чениче, отягчава́ют вы́ю твою́, вопию́ща, Мерку́рие:/ благослове́н еси́, Го́споди Бо́же, во ве́ки.

Кровьми́ кровь смеси́в твою́ честну́ю Влады́ки Человеколю́бца,/ о́бщник Того́ яви́лся еси́ страсте́й, вопия́, Мерку́рие:/ благослове́н еси́, Го́споди Бо́же, во ве́ки.

Богоро́дичен: Чи́ни А́нгельстии ужаса́ются та́инства Твоего́ глубине́, Богоро́дице:/ Бог бо из Тебе́ воплоще́н яви́ся, Ему́же песнопое́м:/ благослове́н еси́, Го́споди Бо́же, во ве́ки.

Песнь 8

Ирмо́с: Слы́ши, Отрокови́це, Де́во Чи́стая,/ да рече́т у́бо Гаврии́л сове́т Вы́шняго дре́вний и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и, ра́дуяся, вопию́:/ благослови́те, вся дела́ Госпо́дня, Го́спода.

Пречи́стый храм в дом Бо́жий приводя́щи,/ А́нна иногда́, вопию́щи с ве́рою, рече́ свяще́ннику:/ ча́до, от Бо́га да́нное мне, прии́м,/ ны́не введи́ во храм Зижди́теля Твоего́ и, ра́дуяся, пой Ему́:/ благослови́те, вся дела́ Госпо́дня, Го́спода.

Рече́, ви́дев, А́нне иногда́ Ду́хом Заха́рия:/ Жи́зни Ма́терь вво́диши и́стинную,/ Ю́же све́тло проро́цы Бо́жии Богоро́дицу пропове́даша,/ и ка́ко храм вмести́т Ю?/ Тем, чудя́ся, вопию́:/ благослови́те, вся дела́ Госпо́дня, Го́спода.

Раба́ Бо́жия бых аз, отвеща́ А́нна ему́,/ призыва́ющи сего́ ве́рою и моли́твою прия́ти моея́ боле́зни плод,/ по прия́тии же рожде́нную привести́ Да́вшему Ю./ Тем, зовя́, вопию́:/ благослови́те, вся дела́ Госпо́дня, Го́спода.

Зако́нное вои́стинну де́ло есть, свяще́нник рече́ ей,/ стра́нну же весьма́ вещь поразумева́ю, зря приводи́мую в дом Бо́жий,/ пресла́вно превосходя́щую свята́я благода́тию./ Тем и, ра́дуяся, вопию́:/ благослови́те, вся дела́ Госпо́дня, Го́спода.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Твои́ми уче́нии цари́ца, ве́рующи, притече́ ко благоче́стию,/ и кре́пко претерпе́вши боле́зней чу́вство,/ и Ца́рствия Небе́снаго непрее́мнаго я́вственно сподо́бися, вопию́щи Влады́це:/ свяще́нницы, благослови́те, лю́дие, превозноси́те во вся ве́ки.

С му́ченики да бу́дут ве́рных проше́ния,/ страстоте́рпица бо Христу́ предстои́т, прося́щи лу́чшая и спасе́ния хода́тайственная/ всесвяту́ю и честну́ю ея́ па́мять усе́рдно соверша́ющим и ве́рно песнопою́щим:/ лю́дие, превозноси́те Христа́ во ве́ки.

Отве́рз, прие́млет тя Жени́х, всему́драя, две́ри ра́йския,/ и в черто́зе всесве́тлем обита́ти сотвори́,/ ца́рствия прича́стницу я́ко соо́бщницу страсте́й явля́ет./ Ему́же ны́не предстоя́щи, царе́ва дщи, све́тло укра́шена, нас не забу́ди.

Ухищре́нными глаго́лы искуша́ше мучи́тель,/ и уветливосло́вии, лю́тый, льстя, разсла́бити твою́ кре́пость наде́явся, сла́вная,/ но уневе́ститися Христу́ хотя́щи, вопия́ла еси́ Влады́це:/ свяще́нницы, воспо́йте, лю́дие, превозноси́те Христа́ во ве́ки.

Богоро́дичен: Свяще́ннейши была́ еси́, Богоро́дице всенепоро́чная, преми́рнаго А́нгелов чи́на:/ сих бо родила́ еси́ Соде́теля и Го́спода от де́вственныя и неискусобра́чныя утро́бы,/ во двух существа́х неслия́нно и невра́щно, во еди́ной же Ипоста́си Бо́га воплоще́нна.

Ин. Ирмо́с то́йже.

Страда́льцев прило́г тя лик прия́ше,/ укра́шена и све́тла бы́вша честны́ми красота́ми пречестны́х твои́х страда́ний/ и благочести́ваго твоего́ и честна́го свиде́тельства, и ны́не вопие́ши непреста́нно:/ свяще́нницы, благослови́те, лю́дие, превозноси́те Христа́ во ве́ки.

Благочестивому́дренно, сла́вне, по́двиг соверши́л еси́,/ и доблему́дренно врага́ посрами́л еси́,/ и, побе́ду небе́сную я́ко победи́тель взем, со А́нгельскими ны́не ли́ки весели́шися,/ с ни́миже, вопие́ши непреста́нно:/ свяще́нницы, благослови́те, лю́дие, превозноси́те Христа́ во ве́ки.

Сконча́вся, всеблаже́нне, мече́м, Мерку́рие,/ и получи́в жела́емаго ти предлежа́щаго конца́,/ зе́млю у́бо кро́вными излия́нии напои́л еси́,/ победоно́сное же и блаже́нное те́ло беле́йше сне́га показа́л еси́, поя́:/ свяще́нницы, благослови́те, лю́дие, превозноси́те Христа́ во ве́ки.

Богоро́дичен: Я́ко на́шего су́щи воззда́ния, Пречи́стая, вси вино́вную, ве́рнии, пое́м Тя,/ Бо́га бо всевино́внаго па́че вины́ родила́ еси́,/ сокруши́вшийся о́браз зло́бою, Свои́м благоутро́бием назда́вшаго,/ еди́на Преблагослове́нная и обра́дованная.

Песнь 9

Ирмо́с: Я́ко одушевле́нному Бо́жию киво́ту/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ и́стинно вы́шши всех еси́, Де́во чи́стая.

Я́ко пресве́тлую, Богоро́дице чи́стая, душе́вныя чистоты́ иму́щи добро́ту,/ благода́тию же Бо́жиею исполня́ема с Небесе́,/ све́том присносу́щным просвеща́еши всегда́ с весе́лием вопию́щия:/ и́стинно вы́шши всех еси́, Де́во чи́стая.

Прелета́ет, Богоро́дице чи́стая, чу́до Твое́ си́лу слове́с,/ те́ло бо в Тебе́ поразумева́ю па́че сло́ва, тече́ния грехо́внаго неприя́тно./ Те́мже благода́рственно вопию́ Ти:/ и́стинно вы́шши всех еси́, Де́во чи́стая.

Пресла́вно прообразова́ше, Чи́стая, зако́н Тя ски́нию и Боже́ственную ста́мну,/ стра́нен киво́т, и катапета́сму, и жезл,/ храм неразруши́мый и дверь Бо́жию./ Те́мже науча́ю́т Тебе́ зва́ти:/ и́стинно вы́шши всех еси́, Де́во чи́стая.

Песнопоя́ Тебе́, провозглаша́ше Дави́д, глаго́ля Тя Дщерь Царе́ву,/ красото́ю доброде́телей одесну́ю предстоя́щую Бо́га, ви́дев Тя упещре́ну./

Те́мже, проро́чествуя, вопия́ше:/ и́стинно вы́шши всех еси́, Де́во чи́стая.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Преста́вилася еси́ к Черто́гом светови́дным, неве́стными укра́шена у́тварми,/ де́вственную иму́щи свещу́ в твое́й десни́це,/ в друго́й же держа́щи отсече́нную твою́ главу́./ И ны́не, предстоя́щи Христу́, твоему́ Жениху́, Тя пою́щия сохрани́.

Прия́та бысть твоя́, Богому́драя, моли́тва,/ ве́рою бо твое́ имену́ющия и́мя, честна́я,/ спаса́ет Влады́ка от искуше́ний и благоздра́вие подае́т,/ неду́гов избавля́я всеразли́чных, душе́вных же и теле́сных./ Тем тя, веселя́щеся, Екатери́но, ублажа́ем.

Приста́ла еси́ ти́хому приста́нищу ны́не,/ благоопря́тно же и легко́ мо́ре мирско́е, му́ченице, преплы́вши треволне́ний,/ не искуси́вшися, всему́драя,/ бога́тство многоразли́чное Христу́ принося́щи, де́во,/ мно́жество му́ченик, Екатери́но всеблаже́нная.

В черто́зех Небе́сных ны́не внутрь с де́вственных ли́ки ликовству́ющи,/ му́ченическими озаря́ема луча́ми, Екатери́но всему́драя,/ разреши́ паде́ний мои́х плени́цы, усе́рдно моля́щи всех Благоде́теля,/ за Его́же кровь твою́ излия́ла еси́.

Богоро́дичен: Яви́лася еси́, о Де́во Ма́ти Бо́жия!/ па́че естества́ ро́ждши в телеси́ благо́е Сло́во,/ Его́же от се́рдца Своего́ Оте́ц отры́гне пре́жде всех веко́в, я́ко благ,/ Его́же ны́не и теле́с превы́шша разумева́ем, а́ще и в те́ло облече́ся.

Ин

Ирмо́с: Устраши́ся всяк слух неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже пречи́стую Богоро́дицу, ве́рнии, велича́ем.

Гно́еве му́ченчестии благово́ние ны́не испуща́ют благода́тию/ и злосмра́дныя на́ша стра́сти неизрече́нным сло́вом отгоня́ют,/ и источа́ют ко́сти врачева́ний во́ды/ и напая́ют ду́ши пою́щих тех чудодея́ния.

Я́ко вели́ка столпа́ Христо́вы Це́ркве свяще́нно тя почита́ем,/ я́ко сте́ну непоколеби́мую, я́ко град вои́стинну, му́чениче, непленя́емый,/ я́ко во́ина кре́пка Бо́га Всецаря́,/ я́ко потреби́теля враго́в, я́ко свети́льника, у́мнаго и всеми́рнаго.

Соше́ственника А́нгела све́та к страда́нию, Богому́дре, получи́л еси́,/ те́мже терза́емь, и свеща́ми поджига́емь,/ и разсека́емь лю́те, и мече́м посека́емь,/ не устраши́лся еси́, страстоте́рпче Христо́в до́блественнейше.

День, полн просвеще́ния, весе́лия и ра́дости, нам возсия́ –/ Боже́ственная па́мять твоя́, тебе́ чтущим, му́чениче Мерку́рие,/ в не́мже помина́й нас, па́мять твою́ творя́щих,/ и лю́тых искуше́ний, и бед, и страсте́й ны изба́ви.

Богоро́дичен: Просвети́, Две́ре Све́та, осле́пшую ду́шу мою́ страстьми́,/ и лука́выми по́мыслы омрачи́вшуюся, и бе́дствующую,/ и изба́ви мя искуше́ний, бед и скорбе́й,/ да сла́влю Тя, наде́жду ве́рных и утвержде́ние.

Свети́лен святы́я.

Подо́бен: Ду́хом во святи́лищи:

Возжиля́ема мудрова́нием жен, о де́во Екатери́но всечестна́я,/ страстоте́рпцев сла́во, филосо́фов хи́трость208 о Бо́зе обличи́ла еси́,/ я́ко буесло́вие су́щу и баснь,/ всенепоро́чную и́стинно Ма́терь Бо́жию спомо́щницу стяжа́вши.

Сла́ва, и ны́не, пра́здника.

Подо́бен: Ученико́м зря́щим:

А́нгельстии чи́ни и му́ченический лик пра́зднует днесь с на́ми/ в Боже́ственнем введе́нии Богоотрокови́цы и Ма́тере Госпо́дни/ от Иоаки́ма же и А́нны,/ вку́пе тве́рдаго Мерку́рия и пресла́вныя Екатери́ны./ И́хже моли́твами обрести́ нам оставле́ние мно́гих согреше́ний, мо́лимся.

На хвали́тех стихи́ры на 4, глас 4.

Подо́бен: Дал еси́ зна́мение:

Па́мять всесвяще́нную, Екатери́но всехва́льная,/ честна́го твоего́ страда́ния соверша́юще,/ сла́вим во гла́сех непреста́нных/ дарова́вшаго терпе́ние тебе́ тве́рдое,/ и победоно́сну тя показа́вшаго,/ и сло́во тебе́ пода́вшаго, устраша́ющаго ри́торы,/ Иису́са Человеколю́бца, и Спа́са, и Го́спода.

Му́ченице самово́льная,/ Екатери́но всесла́вная, яви́лася еси́,/ мучи́теля благомо́щно обличи́вши/ и лю́тое неи́стовство многобо́жия/ Богозна́ния сия́нием низлага́ющи/ и Боже́ственною благода́тию./ Отону́дуже, и я́ко му́ченицу, и я́ко де́ву непоро́чну,/ Христо́с венча́, Спас душ на́ших.

Благода́ть Ду́ха, Екатери́но всесла́вная,/ отверзе́нием уст прия́ла еси́,/ очи́стивши тебе́ саму́ю житие́м,/ и по́мыслом терпели́вным/ мучи́телей го́рдость попра́ла еси́,/ и добро́те теле́сной душе́вную красоту́/ Богому́дренне предпочла́ еси́,/ страда́льцев удобре́ние.

Сла́ва, глас 2. Вави́лы мона́ха:

Житие́ невеще́ственно навы́кши,/ суди́ще безбо́жное дости́гши,/ ста́ла еси́, победоно́сице, Екатери́но честна́я,/ цветонося́щи Бо́жию све́тлость/ и Боже́ственною мо́щию оде́яна,/ повеле́нию мучи́телеву поруга́лася еси́/ и ри́торов утоли́ла еси́ лжи́выя ре́чи, многострада́льная.

И ны́не, глас 6. Се́ргия Агиополи́та:

Днесь, собо́ри ве́рных, соше́дшеся,/ духо́вне да торжеству́ем/ и Богоотрокови́цу Де́ву и Богоро́дицу,/ в храм Госпо́день приводи́му,/ благоче́стно восхва́лим,/ предъизбра́нную от всех родо́в/ во оби́телище всех Царя́ Христа́ и Бо́га;/ де́вы, свещи́ нося́ще, предъиди́те,/ Присноде́вы чту́ще честно́е происхожде́ние;/ ма́тери, печа́ль всю отложи́вше,/ ра́достно после́дствуйте Ма́тери Бо́га быва́ющей/ и ра́дости ми́ра Хода́таице./ Вси у́бо ра́достно, е́же ра́дуйся,/ со А́нгелом возопии́м Обра́дованней,/ при́сно моля́щейся о душа́х на́ших.

На стихо́вне стихи́ры, глас 2.

Подо́бен: До́ме Евфра́фов:

Свет Тя трисия́нный вже́гши, Богоро́дице,/ в храме сла́вы Небе́сную Ти пи́щу посыла́ет,/ велича́я Тя.

Стих: Приведу́тся Царю́ де́вы в след Ея́,/ и и́скренния Ея́ приведу́тся Тебе́.

Из ко́рене у́бо Дави́дова прозябла́ еси́, Де́во,/ Гаврии́л, Тебе́ ра́дость принося́, вопия́ше:/ Бо́га роди́ши, Пречи́стая.

Стих: Приведу́тся в весе́лии и ра́довании,/ введу́тся в храм Царе́в.

Бла́го же свяще́нному и Боже́ственному сопряже́нию Иоаки́ма и А́нны,/ из ни́хже Чи́стая роди́ся,/ приведена́ бысть ны́не Творцу́ Своему́.

Сла́ва, и ны́не, то́йже:

Две́ри Небе́сныя, восприими́те Де́ву Мари́ю,/ неискусому́жную, чи́стую Богоро́дицу,/ из Нея́же челове́ком избавле́ние.

На Литурги́и

Блаже́нны пра́здника, песнь 7-я и 8-я, на 4 и святы́я, песнь 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га,/ Го́спода от исто́чник Изра́илевых. Апо́стол ко Ефесе́ем, зача́ло 233. Аллилу́ия, глас 1: Воззва́ша пра́веднии,/ и Госпо́дь услы́ша их. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде:

Святая великомученица Екатерина была дочерью правителя Александрии Египетской Копста. Девушка получила блестящее эллинское образование. Юноши из самых именитых семейств империи искали руки святой Екатерины, которая обладала редкой красотой и умом, но ни один из них не стал ее избранником. Она объявила родителям, что согласится выйти замуж лишь за того, кто превзойдет ее в знатности, богатстве, красоте и мудрости.

 Мать святой Екатерины была тайной христианкой. Она повела девушку за советом к своему духовному отцу, святому старцу, который творил молитвенный подвиг в уединенной пещере недалеко от города. Старец выслушал святую Екатерину и сказал, что он знает Юношу, Который превосходит ее во всём, ибо «красота Его светлее солнечного сияния, мудрость Его управляет всем созданием, богатство Его разливается по всему миру, но это не уменьшает Его, а умножает, высота рода Его – неизреченна». Образ Жениха Небесного родил в душе святой девы горячее желание увидеть Его. Святой Екатерине открылась Истина, к которой рвалась ее душа. На прощание старец вручил святой Екатерине икону Божией Матери с Богомладенцем Иисусом на руках. Старец велел с верой молиться Царице Небесной, Матери Небесного Жениха, о даровании видения Ее Сына.

Святая Екатерина молилась всю ночь и удостоилась видеть Матерь Божию, Которая просила Своего Сына посмотреть на коленопреклоненную перед Ними Екатерину. Но Младенец отвратил Свой лик от Екатерины, сказав, что не может смотреть на нее, ибо она безобразна, худородна, нища и безумна, как и всякий человек, не омытый водами святого Крещения и незапечатленный печатью Духа Святого.

В глубокой печали святая Екатерина вновь пошла к старцу. Он с любовью научил ее тайнам веры Христовой, заповедал хранить целомудрие, непрестанно молиться, и совершил над Екатериной таинство святого Крещения. И вновь святой Екатерине было видение Пресвятой Богородицы с Младенцем. Теперь Господь ласково смотрел на нее и дал ей перстень, обручив ее Себе. Когда видение кончилось, и святая пробудилась от сна, на руке ее светилось кольцо – дар Небесного Жениха.

В то время в Александрию на пышное языческое празднество прибыл сам император Максимин (305―313). Крики жертвенных животных, дым и смрад непрестанно пылавших жертвенников, гомон толпы на ристалищах наполняли Александрию. Приносились и человеческие жертвы – на смерть в огне обрекали исповедников Христа, не отступивших от Него под пытками. Святая Екатерина пошла к главному жрецу – императору Максимину, исповедала веру во Единого Истинного Бога и мудро обличила заблуждения язычников. Красота девушки пленила правителя. Чтобы показать ей торжество языческой мудрости, император созвал 50 ученейших мужей империи. Но святая взяла верх над мудрецами. Они уверовали во Христа и были сожжены.

Максимин попытался соблазнить святую Екатерину богатством и славой. Получив гневный отказ, император подвергнул святую жестоким мучениям, а затем бросил в темницу. Императрица Августа в сопровождении воеводы Порфирия с отрядом воинов пришла в темницу. Святая мученица раскрыла пришедшим христианское учение, и они уверовали.

На следующий день мученицу вновь привели на судилище. Под угрозой колесования ей предложили принести жертву богам. Святая исповедала Христа и сама пошла к колесам. Но Ангел сокрушил орудия казни. Увидев это чудо, императрица Августа и царедворец Порфирий с 200 воинами перед всеми исповедали веру во Христа и были обезглавлены. Максимин вновь предложил святой мученице супружество, но получил отказ. Святая Екатерина твердо исповедала верность своему Небесному Жениху – Христу и с молитвой к Нему сама положила голову на плаху под меч палача.

Мощи святой Екатерины были перенесены Ангелами на Синайскую гору. В VI веке по откровению были обретены честна́я глава и левая рука святой мученицы и с почестями перенесены в новосозданный храм Синайского монастыря, построенного святым императором Иустинианом (527―565; память 14 ноября).

Свята́го великому́ченика Мерку́рия

Моли́тва

О великому́чениче святы́й и до́блий во́ине Христо́в Мерку́рие, страда́нием, кро́вию и сме́ртию свое́ю ве́рность Хри́сту и Це́ркви Его́ свиде́тельствовавый и сего́ ра́ди вене́ц жи́зни от Не́го прия́вый! Ны́не в хвале́бных пе́снех тебе́ прославля́юще, смире́нно к тебе́ припа́даем и усе́рдно мо́лим: предста́тель бу́ди пред Бо́гом о душа́х на́ших неусы́пный, умоли́ Влады́ку Го́спода, да сохрани́т Святу́ю Це́рковь Свою́ и всех чад ея́ в сою́зе любве́ и единомы́слии, да утверди́тся мир и безмяте́жие в лю́дех, во Оте́честве на́шем живу́щих, да позна́ют вси, я́ко Христо́с есть Путь, И́стина и Жизнь, и да прии́дут к Нему́ вси тружда́ющиися и обремене́ннии, и упоко́ит их. О вели́кий уго́дниче Бо́жий! Кре́пкое стоя́ние в ве́ре на́шей да́руй нам, благода́тную по́мощь нам низпосли́, да ми́рное, ти́хое и богоуго́дное житие́ поживе́м в ве́це сем и досто́йне с тобо́ю в день о́ный восхва́лим Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.

Святой великомученик Меркурий, скиф по происхождению, служил воином в римской армии. Нечестивые императоры Декий (249―251) и Валериан (253―259) издали закон, повелевавший всем римским гражданам поклоняться языческим богам и осуждавший на смерть христиан.

В то время на Римскую империю напали варвары, и император Декий выступил в поход с большим войском. В одном из сражений святому Меркурию явился Ангел Господень и подал ему меч, сказав: «Не бойся, смело иди на врагов. Когда победишь, не забудь Господа Бога твоего». С этим мечом святой воин прошел сквозь варварские полчища, уничтожил множество врагов и убил самого царя варваров, обеспечив победу римлянам. Благодарный император щедро наградил святого Меркурия за храбрость и сделал его военачальником.

Святому воину, получившему великие почести и богатство, вновь явился Ангел Господень, напоминая ему, Кем была дарована победа, и призывая к служению Господу. Святой Меркурий вспомнил, что и отец его, Гордиан, исповедовал христианскую веру, крестился и всей душой устремился ко Христу. Он отказался участвовать в торжественном жертвоприношении языческим богам и был призван к грозному императору. Открыто назвав себя христианином, Меркурий бросил к ногам императора воинский пояс и мантию и отказался от всех почестей. В темнице святому Меркурию снова явился Ангел Господень, укрепил его и призвал мужественно претерпеть все страдания за Христа.

Святого мученика растянули над огнем, резали ножами, били плетьми так, что кровь из его ран гасила огонь. Но каждый раз, когда его бросали в темницу умирающим от ран, святой Меркурий получал от Господа полное исцеление, утверждая пред нечестивцами великую силу веры Христовой. Осужденный на смертную казнь, святой сподобился видения Самого Господа, обещавшего ему скорое избавление от мучений. Великомученика Меркурия обезглавили в Кесарии Каппадокийской. Его святое тело благоухало миром и фимиамом, подавая исцеления многим больным.

Уже по смерти своей воин Христов, соединившийся с Церковью Небесной, сослужил воинскую службу на благо Церкви земной. По молитве святителя Василия Великого (память 1 января) перед иконой Пресвятой Богородицы и великомученика Меркурия об освобождении христиан от гонителя христианской веры императора Юлиана Отступника (361―363), Заступница рода христианского послала святого воина Меркурия в помощь от Церкви торжествующей к Церкви воинствующей. Во время боя Юлиана с персами Святитель увидел, как образ святого великомученика Меркурия, изображенный на иконе рядом с образом Пречистой Богородицы, стал невидимым, а затем вновь показался с окровавленным копьем.

В тот самый момент Юлиан Отступник был пронзен на Персидской войне копьем неизвестного воина, тотчас ставшего невидимым. Окаянный Юлиан, умирая, воскликнул: «Ты победил, Галилеянин!»

В то́йже день Свята́го му́ченика Мерку́рия Смоле́нскаго, но́ваго чудотво́рца

На Вели́цей Вече́рни

Стихосло́вим Блаже́н муж:

На Го́споди, воззва́х: стихи́ры, глас 4:

Друга́го тя пое́м, иму́щаго поборе́ние по Ду́ху,/ Христо́в Мерку́рие,/ я́ко непобеди́маго во́ина,/ вне́гда бо по повеле́нию, уго́дниче, Госпожи́ и Богоро́дицы/ изше́л еси́ на сре́тение пога́ных сил/ и исполи́на с сы́ном кре́пкаго/ победи́л еси́ посо́бием Богоро́дицы./ Подо́бие имы́й, я́коже святы́й му́ченик Не́стор,/ я́рость прекроти́в злосвире́паго мучи́теля,/ Ли́я богобо́рца победи́ Христо́вым и́менем и си́лою./ Или́ тезоимени́тому ти свято́му му́ченику Мерку́рию,/ я́коже во Александри́и он, победи́в,/ прободе́ в се́рдце мучи́теля и законопресту́пника,/ ревну́я по благоче́стии./ Ты же тех подража́я,/ сопроти́вных и пога́ных иноплеме́нник си́лу пресе́кл еси́,/ я́ко во́ин добр и неко́сен;/ и соверши́л еси́ свое́ подвиза́ние кре́пце,/ по благове́рии святы́я це́ркве Госпожи́ и Богоро́дицы/ со все́ми уго́дники Христа́ Бо́га,/ и венча́ся верх твой, свя́те и великому́чениче.

Я́коже от А́нгела или́ с Небесе́ зна́мение прие́млеши,/ к тебе́ бо по́слан быва́ет/ слуга́ це́ркве вели́цей Госпожи́ и Богоро́дицы,/ возвеща́я и вели́ тебе́ изы́ти на сре́тение сил пога́ных иноплеме́нник./ Гла́су же, к тебе́ свы́ше соше́дшу:/ ра́бе Мой и уго́дниче Мерку́рие,/ воста́в, препоя́шися по́ясом во́инства,/ изы́ди ско́ро с вели́кою де́рзостию сопроти́вных побежда́я,/ с тобо́ю есмь побора́ющи по благове́рии./ Не хощу́ бо,– рече́,– зре́ти Мое́й плене́не бы́ти це́ркви от пога́ных,/ умоли́х бо Сы́на Моего́,/ да пода́ст ти о сем дерзнове́нии твое́м вене́ц небе́сный/ от животво́рныя десни́цы Его́.

От ца́рска коле́на во́ин изы́де,/ и посла́ся непобеди́мый воево́да на́шему гра́ду,/ вели́ко поможе́ние от Госпожи́ на́шея Богоро́дицы,/ во́инствуя бо, не земно́му царю́ угожда́я,/ но свы́ше повеле́ние прие́мля,/ Богому́дре и блаже́нный страда́льче Мерку́рие,/ жела́нием и ре́вностию побора́я по благове́рии,/ му́ченически стражда́ и проти́вных полки́ побежда́я пога́ных209 иноплеме́нник,/ и сам ну́ждною сме́ртию коне́ц житию́ восприи́меши,/ и ко Христу́ Бо́гу на Не́бо востече́ши,/ и, ра́вными тебе́ святы́ми му́ченики ли́ку сочта́вся,/ возме́здие прии́меши./ Те́мже и ны́не мы, многогре́шнии, мо́лим тя, свя́те,/ име́я дерзнове́ние,/ помоли́ся о гра́де на́шем, невоева́ну пребы́ти ему́,/ и душа́м на́шим дарова́ти ве́лию ми́лость.

Сла́ва, глас 2:

Прииди́те, благове́рнии лю́дие,/ прииди́те, со́нмище празднолюбе́зных,/ песнь воскли́кнем/ и рука́ми воспле́щим к 3асту́пнице на́шей и Госпоже́, и Богоро́дице,/ сы́нове гра́да Смоле́нска,/ ра́достию покрыва́ющеся,/ я́ко посла́ся от Нея́ непобеди́мь во́ин гра́ду на́шему,/ уго́дник Сея́, сый Мерку́рий,/ мно́го побора́я по нам,/ пога́ных побежда́ет/ и забра́ло быва́ет тве́рдо/ от всех ра́тей, находя́щих гра́ду на́шему./ Сте́кшеся, гра́ждане вси, в храм святы́й Госпожи́ и Богоро́дицы/ и приступи́вше, объи́мем, лобза́юще се́рдцем же и усты́,/ гроб свята́го Мерку́рия/ и похвала́ми пое́м его́:/ ра́дуйся, вопию́ще, худо́жества победи́вый злове́рных ва́рвар,/ и свире́пое их мучи́тельство обличи́вый,/ и ве́лие дерзнове́ние от Христа́ Бо́га прии́мый./ И ны́не, свя́те, мо́лим тя:/ не забу́ди твоего́ гра́да и люде́й, живу́щих в нем,/ иде́же есть гроб с блаже́нным те́лом твои́м,/ моли́ся побе́ду да́ти гра́ду на́шему,/ и душа́м на́шим проще́ние мно́гих грехо́в,/ и ве́лию ми́лость.

И ны́не, Богоро́дичен: Пре́йде сень зако́нная: Вход. Проки́мен дне. Чте́ния 3, му́ченическая ( зри Мине́ю ноября́ 22-й день ).

На стихо́вне стихи́ры, глас 4.

Подо́бен: Я́ко до́бля:

Многообра́зными муче́нии/ лю́тый мучи́тель ка́знем злым преда́в казни́ти/ многострада́льное и долготерпели́вое те́ло твое́,/ Богомы́сленне Мерку́рие,/ не отве́рглся еси́ Христа́, ни куми́ром поже́рл еси́,/ но терпе́л еси́, я́ко ино́му стра́ждущу,/ ожида́я бу́дущаго возда́ния/ и безсме́ртнаго Богосло́вия.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Воздви́жемь и стру́жемь,/ и ка́мением посыпа́емь, и желе́зом урани́емь,/ и мече́м скончава́емь,/ непрекло́нен пребы́л еси́,/ на Ка́мени У́мнем ду́шу твою́ водрузи́в./ И сего́ ра́ди А́нгельским лико́м сочета́лся еси́,/ све́та невече́рняго сподобля́емь.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Исцеле́ние дарова́ний жела́ющим/ источа́ют, сла́вне, твои́ мо́щи,/ и потопля́ют страсте́й неду́ги, Мерку́рие,/ и разоря́ют лука́вых де́монов толпы́,/ напая́ют же ве́рных сердца́,/ прозяба́ющая доброде́телей плоды́ Боже́ственныя/ и благоче́стия разуме́ние.

Сла́ва, глас 2:

Житие́м до́брым и чистото́ю, свя́те,/ угожда́я Христу́ Бо́гу и Того́ ро́ждшей Богома́тери,/ к суди́щем безбо́жных иноплеме́нник постиза́еши,/ повеле́нием да́же подо́бне исходя́й на противоборю́щия,/ целому́дрие проти́ву злове́рне целу́ющаго, Мерку́рие;/ ту побе́ду носи́, подвиза́ешися,/ и чу́до вели́ко о себе́ сотворя́я,/ ра́тника с вели́кими си́лами победи́в Христо́вою си́лою,/ и сам ту, вне пред гра́дом, блаже́нне, коне́ц восприя́л еси́,/ и сим чудесе́м град удивля́еши:/ отсе́ченную бо твою́ святу́ю главу́ от иноплеме́нника судо́м Бо́жиим,/ сам, я́ко жив, по сме́рти с те́лом во град внесл еси́/ и ны́не побе́ды вене́ц име́еши./ Те́мже и мы, подвиза́ющеся, мо́лим тя,/ обстоя́ще, свя́те, гроб твой,/ да прише́д, побо́реши на град твой/ и лю́ди держа́вы Госпожи́ и Богоро́дицы, зле ра́тующия,/ от Христа́ Бо́га проси́ нам ми́ра и ве́лия ми́лости.

Тропа́рь Мерку́рию, глас 2:

Возсия́в, я́ко звезда́ многосве́тлая,/ в собо́рней це́ркви пред пречи́стым и чудотво́рным о́бразом Пречи́стей Богоро́дицы,/ за Ню́же и за град Смоле́нск пострада́,/ многоко́зненнаго и богоме́рзкаго царя́ Баты́я устраши́,/ и си́льнаго исполи́на победи́, и лю́ди удиви́,/ ду́шу свою́, многострада́льне Мерку́рие, за благоче́стие положи́,/ я́ко Заха́риина и А́велева я́сно вопие́т твоя́ кровь ко Го́споду./ И ны́не моли́ся за ду́ши на́ша.

На У́трени

По 1-й кафи́зме седа́лен, глас 1.

Подо́бен: Лик А́нгельский:

Во́инство на земли́ возненави́дев, му́чениче,/ на Небесе́х возжеле́л еси́ сла́ву/ и боле́зни претерпе́л еси́ и ну́ждную смерть./ Те́мже днесь всесвяту́ю твою́ па́мять пра́зднуем,/ Христу́ принося́ще хвалу́, преблаже́нне Мерку́рие.

Сла́ва, и ны́не, Богоро́дичен:

Ма́терь Тя Бо́жию и Де́ву мо́лим вси вои́стинну,/ в щедро́ты Твоя́ вопие́м, любо́вию прибега́юще к Твое́й бла́гости,/ Тя бо и́мамы, гре́шнии, засту́пницу/ и Тебе́ стяжа́хом в напа́стех спасе́ние, еди́ну Пречи́стую.

По 2-й кафи́зме седа́лен, глас 4.

Подо́бен: Яви́лся еси́ днесь:

Тече́ние соверши́в и́стинно,/ и мучи́телей всю кре́пость победи́л еси́,/ прии́м вене́ц от руки́ Вседержи́теля, Мерку́рие всече́стне,/ и показа́лся еси́ А́нгелом соприча́стник.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего, из Тебе́ вопло́щшееся, разуме́хом, Богоро́дице Де́во,/ еди́на чи́стая и благослове́нная./ Те́мже всегда́ прославля́ем Тя, велича́юще.

По полиеле́и седа́лен, глас 4:

Во́ина Христо́ва непобеди́маго,/ победи́теля на враги́ до́бляго, в вели́ких чудесе́х возсия́вшаго/ при́сно вси восхва́лим ве́рою Мерку́рия страстоте́рпца,/ то́чит бо цельбы́ прири́щущим ве́рою,/ и утоля́ет стра́сти лю́тыя, и су́щия в ско́рбех челове́ки заступа́ет.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем,/ и па́ки согреша́юще, има́мы Тя моли́твенницу./ Тем, благодаря́ще, вопие́м Ти:/ ра́дуйся, обра́дованная, Госпо́дь с Тобо́ю.

Та́же степе́нна, 1-й антифо́н, 4-го гла́са. Проки́мен: Пра́ведник, я́ко фи́никс, процвете́т: Стих: Насажде́ни в до́му Госпо́дни: Вся́кое дыха́ние: Ева́нгелие от Луки́, зача́ло 106.

По 50-м псалме́ стихи́ра, глас 6:

Днесь вселе́нная вся, страстоте́рпца луча́ми просвеща́ема,/ и Бо́жия Це́рковь, цве́ты украша́ема,/ му́чениче Мерку́рие, вопие́т ти:/ уго́дниче Христо́в и засту́пниче те́плый,/ не преста́й моля́ся за рабы́ твоя́.

Кано́н пра́здника со ирмосо́м на 6 и свята́го на 8. Глас 8. Велехва́льно пое́м во́ина тве́рда, свята́го до́бляго Мерку́рия.

Песнь 1

Ирмо́с: Посе́ченый несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.

От вы́шних повеле́ний, свя́те, во́инствуеши,/ с вы́шними ли́ки предстои́ши благи́х исто́чнику/ и ра́дости Боже́ственнаго наслажде́ния, приснопа́мятне, наслажда́ешися,/ сохраня́й тве́рде град, в не́мже соверша́ют, сла́вне, па́мять твою́,/ Го́сподеви пою́ще:/ сла́вно бо просла́вися.

По́двиг твой ре́вности свиде́тельствова, му́дре,/ си́лою укрепля́емь Христо́вою,/ и проти́в ра́тник исхо́диши, и, ра́дуяся, претерпе́л еси́ главы́ твоея́ отсече́ние,/ и вопия́ше сла́вно повеле́нием ея́.

Страж гра́ду яви́лся еси́, и мучи́теля я́ве укроти́л еси́,/ и боле́зненное от них виде́ние, веселя́ся, претерпе́л еси́, Мерку́рие,/ вопия́ и моля́ся к посла́вшей тя:/ Го́сподеви пои́м, сла́вно бо просла́вися.

Богоро́дичен: Я́коже и в Кесари́и равноименова́нное тебе́ прие́млеши су́ще зва́ние,/ та́кожде и зде изво́ли благочести́вая Цари́ца,/ посыла́ет тя, Мерку́рие, Богоро́дица, му́чениче./ К Той помоли́ся о мне, окая́ннем,/ ми́лостива обрести́ на стра́шнем суде́ Сы́на Ея́.

Катава́сия: Христо́с ражда́ется:

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.

От младе́нства вво́инился еси́ Христу́,/ род и бога́тство оте́чества оста́вль,/ и весь разжига́емь Боже́ственною любо́вию,/ и от Того́ ро́ждшия, сла́вне, страж гра́ду Ея́ посла́лся еси́.

Воспое́м Го́спода и с ро́ждшею Его́ Богома́терию,/ пода́вшаго стра́жа тверда́ гра́ду на́шему,/ во́ина до́бляго Мерку́рия и чуде́с испо́лненнаго.

Десни́цею укрепля́емь Влады́чнею,/ вра́жие па́губное наше́ствие победи́л еси́, я́ко добр страда́лец, Богому́дре,/ за храм Богоро́дицы и за благове́рие.

Богоро́дичен: О Го́спода моего́ Ма́ти!/ Ты наде́жда отча́янных и помо́щница всем гре́шником!/ Не пре́зри, ми́лостивая Цари́це, мене́, окая́ннаго/ лю́те и пребезме́рно согреши́вшаго, па́че челове́ческаго естества́.

Ин конда́к, глас 8:

Чистото́ю душе́вною ку́пно и теле́сною/ и серде́чною к Бо́гу любо́вию и непреста́нною моли́твою/ ри́мское бога́тство оста́вль/ и прия́т бога́тство от Го́спода – вене́ц,/ прие́м в ру́це копие́, кре́пко злове́рнаго царя́ Баты́я ужаси́,/ и самохва́льнаго исполи́на победи́,/ и вси вну́цы агаря́нския прожену́в, страстоте́рпче Мерку́рие,/ моли́ Христа́ Бо́га спасти́ся душа́м на́шим.

Седа́лен Мерку́рия, глас 4.

Подо́бен: Ско́ро предвари́:

Ри́млянин ро́дом сый,/ но ве́рою благове́рною огражде́н, а не полуве́рием боля́й,/ но уго́дник Бо́гу бысть и Того́ ро́ждшей./ Льсти́ваго ра́тника посрами́, исполи́на с сы́ном порази́,/ и вене́чник Христо́в яви́ся, и сла́вы ра́достныя причасти́ся./ Сего́ ра́ди свяще́нную его па́мять пра́зднуем ны́не.

Сла́ва, и ны́не, Богоро́дичен:

Дании́л Тя го́ру ве́лию нарече́, ин жезл и катапета́сму,/ Иезеки́иль же дверь, е́юже про́йде Христо́с Бог, Богоро́дице,/ не пре́зри, ми́лостивая, но приими́ мои́х скве́рных окая́нных усте́н моле́ние/ и ту́не покажи́, Госпоже́, Твою́ ми́лость на мне, многогре́шнем.

Песнь 4

Ирмо́с: Услы́шах, Го́споди, слух Твой и убоя́хся,/ я́ко неизрече́нным сове́том/ Бог сый присносу́щный/ от Де́вы проше́л еси́, вопло́щся;/ сла́ва снизхожде́нию Твоему́,/ Христе́, сла́ва си́ле Твое́й.

Я́коже и во свое́м оте́честве присво́ился еси́ любе́зне Зижди́телю,/ и све́тлый вене́ц от Него́ восприя́л еси́,/ и во́инствовал еси́ по благове́рии, я́ко непобеди́мь, свя́те Мерку́рие,/ помоли́ся, от Него́же получи́л еси́ дерзнове́ние, о мне, окая́ннем,/ да получу́ ми́лость.

Истка́ себе́ порфи́ру благоче́стия па́че оте́ц свои́х,/ в ню́же обо́лкся, и во́ин кре́пок показа́ся,/ и ме́ртвости совлече́ ри́зу неве́рия, и поя́ше:/ сла́ва си́ле Твое́й, Го́споди.

Да́же до кро́ве став, подвиза́лся еси́,/ побежда́я проти́вныя ра́тники,/ победоно́сец показа́лся еси́ и вы́шния сла́вы сподо́бився, Мерку́рие.

Богоро́дичен: Я́коже дождь на руно́ сни́де,/ та́коже без щу́ка210 в Твою́ пречи́стую утро́бу/ Сло́во спаси́тельное сни́де, Присноде́во,/ Ты же, Богоро́дице, я́ко ту́ча, изсуши́ мно́гих мои́х зол бре́мя.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Распросте́р ру́це протя́г злый ва́рварин,/ хотя́ внеза́пу наити́ на град и храм Богоро́дицы,/ ты же, неосла́бно просте́р твои́ со ору́жием святы́я ру́ки, изше́л еси́,/ и победи́л еси́ проти́вника, и отту́ду венча́лся еси́.

И́же со́лнцу и огню́ служа́, прии́де,/ ты́ же, свя́те, Христу́ и Того́ Ма́тери служа́, изше́л еси́,/ и того́ си́лу пресе́кл еси́, и град свободи́л еси́,/ и сам от Христа́ просла́вился еси́.

Прича́стник страсте́й Влады́чних яви́ся Мерку́рий,/ и сла́вы Того́ прио́бщник быв,/ и Того́ Боже́ственную све́тлость насле́дова.

Богоро́дичен: Умертви́, о Де́во, живу́щий во мне грех,/ Жизнь ро́ждшая и Умертви́вшаго смерть.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли мо́я,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Вжиля́ше тя присносу́щное от высоты́, Мерку́рие, зва́ние всеви́дящее,/ и слуга́ церко́вный, му́дре, уве́ри тя, я́коже А́нгел,/ повелева́ше ти дерза́ти и ника́коже устраши́тися ва́рварска наше́ствия.

Умерщвле́н бысть змий вселука́вый, и не сбы́стся злохи́трие его́,/ но нога́ми попра́ся кра́сными до́бляго во́ина и ору́жника Христо́ва Мерку́рия,/ вшед бо, победи́ пога́нина.

Всесоверше́нно Влады́це прине́сл еси́ серде́чное изволе́ние, му́чениче,/ и того́ ра́ди изше́л еси́ проти́во ра́ти пога́нских сил,/ и победи́тель ве́лий показа́лся еси́,/ и ны́не на Небеси́ предстои́ши, Мерку́рие.

Богоро́дичен: Зача́тие неизрече́нно, рождество́ неизглаго́ланно, Отрокови́це,/ я́ко Бо́га ражда́еши пло́тию./ Уми́лостивися о мне окая́ннем,/ да улучу́ и аз, лише́нный, заступле́ние Твое́.

Конда́к, глас 4:

Яви́ся во бране́х непобеди́мь во́ин,/ от ри́млян ро́дом,/ сыновство́ име́ гра́да Смоле́нска,/ я́ко бо сих ра́ди нарече́ся,/ я́ко от Богоро́дицы страж кре́пок посла́ся гра́ду,/ пе́сньми Мерку́рия ублажи́м,/ пра́зднующе ве́село па́мять его́,/ я́ко да изба́вит град наш от беды́ ра́тник.

И́кос:

Горды́ню низложи́в льсти́ваго мучи́теля,/ на Правосла́вие вознося́щагося нечести́ваго,/ и до конца́ сего́ лю́таго зми́я главу́ отсе́кл еси́,/ свя́те Мерку́рие,/ и пу́ста его́ сотво́рь,/ и па́мять его́ с шу́мом бысть:/ ты бо исхо́диши на предгра́дие еди́н/ бра́тися с ты́сящами безбо́жных ва́рвар./ Я́ко бо от высоты́ име́я повеле́ние,/ наде́жду и упова́ние от Самы́я Госпожи́ и Богоро́дицы,/ заступа́ющия и помога́ющия тебе́./ Тоя́ же посо́бием непобеди́мым/ и ра́тника злоко́зненнаго кре́пко удави́л еси́,/ и мно́жество сил его́ победи́л еси́,/ и сама́го мучи́теля посрами́л еси́./ Те́мже, кре́пкий Христо́в во́ине, зове́м ти ра́достно/ и ве́село пра́зднуем па́мять твою́:/ я́ко да изба́виши град наш от беды́ ра́тник.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Све́том вы́шняго сия́ния озаря́емь, до́блий211 во́ине,/ воспева́ющия ны́не па́мять твою́ просвети́, пою́щия:/ благослове́н Бог оте́ц на́ших.

Воспева́л еси́ всех Благоде́теля, распаля́яся,/ и, изше́д на побежде́ние ра́тников,/ огня́ ре́вностию, блаже́нне, жего́мь, и поя́:/ благослове́н еси́, Го́споди Бо́же оте́ц на́ших.

В кро́ви проти́ву стал еси́ беззако́нных ополче́ния, свя́те,/ ка́мению и огню́ кла́няющихся./ Ты же, к ка́мени – Христу́ вопия́, сих победи́л еси́, поя́:/ благослове́н еси́, Го́споди Бо́же оте́ц на́ших.

Зе́млю обагри́в, блаже́нне Мерку́рие, кро́вию твое́ю,/ Влады́ки Человеколю́бца жела́я о́бщник Того́ бы́ти, поя́:/ благослове́н еси́, Го́споди Бо́же оте́ц на́ших.

Богоро́дичен: Чи́ни А́нгельстии удивля́ются та́инства Твоего́ глубине́, Богоро́дице,/ Бог бо, из Тебе́ воплоще́н, яви́ся, Его́же похва́лим:/ Бо́же, благослове́н еси́.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся́ ве́ки.

Благоче́стно и му́дренно по́двиг твой, сла́вне, соверши́л еси́/ и доблему́дренно враги́ твоя́ победи́л еси́,/ я́ко бо дарова́ся тебе́, свя́тче, побе́да Небе́сная./ Те́мже воспе́л еси́:/ свяще́нницы, воспо́йте, лю́дие, превозноси́те Го́спода во ве́ки.

Сконча́вся, свя́те, от исполи́на, Мерку́рие,/ мече́м бо отсече́ главу́ твою́, и отту́ду получи́л еси́ жела́емаго тобо́ю венца́/ и зе́млю кро́вию от твои́х уде́с истече́нием напои́л еси́, поя́:/ свяще́нницы, воспо́йте, лю́дие, превозноси́те Го́спода во ве́ки.

Богоро́дичен: Я́ко на́шего существа́ поновле́ние, Пречи́стая,/ вси вино́вну, ве́рнии, пое́м Тя:/ Бо́га бо па́че сло́ва родила́ еси́, еди́на па́че земноро́дных./ Твои́м благоутро́бием и нас озари́, пою́щих Тя.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Гно́еве му́ченчестии благово́ние ны́не испуща́ют благода́тное,/ смра́дныя на́ша стра́сти исцелева́ют,/ источа́ют бо святы́я их мо́щи целе́бныя во́ды/ и напоя́ют ду́ши пою́щих тех чудодея́ние.

Я́ко вели́ка столпа́ и тве́рдо забра́ло дарова́ тя Христо́с, Мерку́рие, гра́ду сему́,/ иде́же ны́не то́чиши чуде́с струю́/ и помога́еши побе́дою на пога́ныя.

Спомо́щника име́яху вси гра́ждане, страстоте́рпче Христо́в до́блественный,/ копие́ и щит твой вы́ну вели́кое посо́бие иму́ще,/ тя велича́ют, Христа́ Бо́га сла́вяще, венча́вшаго тя.

Богоро́дичен: Просвети́, две́ре Све́та, омраче́нную ду́шу мою́ страстьми́/ и лука́выми по́мыслы очерне́вшую и бе́дствующую,/ и изба́ви искуше́ний, и бед, и скорбе́й,/ да сла́влю Тя, упова́ние ве́рных и утвержде́ние.

Свети́лен.

Подо́бен: Ду́хом во святи́лищи:

Жениху́ свещу́ соблю́л еси́,/ жестоку́ стезю́ ше́ствовал еси́,/ в Боже́ственныя стези́ вшед,/ и к простра́нству ра́йскому чи́стою пло́тию дости́гл еси́,/ и све́тло от Святы́я Тро́ицы венча́лся еси́;/ чту́щия тя помяни́, свя́те Мерку́рие.

Богоро́дичен: Я́ко засту́пницу нера́тну,/ предгра́дие вои́стинну предлага́ю покро́в Твой, Богоро́дице Де́во,/ хода́таицу же к Бо́гу,/ изба́витися ми, Влады́чице, му́ки ве́чныя/ и жи́зни нетле́нныя Тобо́ю причасти́тися, Небе́снаго Ца́рствия.

На хвали́тех стихи́ры на 4, глас 4, пи́саны ве́чера, на Го́споди, воззва́х: Сла́ва, глас то́йже:

Столпа́ тверде́йшаго/ и забра́ло тве́рдо гра́да на́шего воспое́м,/ и желе́зная вра́та су́ща,/ и посо́бие кре́пко иму́ща со ору́жием свята́го Мерку́рия./ Те́мже, к нему́ моля́щеся, возопии́м:/ свя́тче, не забу́ди нас, предстоя́щих гро́бу твоему́,/ но моли́ся к Человеколю́бцу Бо́гу/ спасти́ ду́ши на́ша.

И ны́не, Богоро́дичен.

Славосло́вие вели́кое и отпу́ст.

На Литурги́и слу́жба му́ченическая.

Святой мученик Меркурий Смоленский. Величайшее бедствие постигло Русскую землю в начале XIII века – нашествие татаро-монгольских орд. Жестокие враги не щадили беззащитных жителей, грабили и разрушали храмы, монастыри, города и селения. Тысячи русских людей пали в битвах, защищая свое Отечество, многие захвачены в плен и отведены в неволю. Шел 1239 год.

В то время в Смоленске жил святой воин Меркурий, которому Промыслом Божиим суждено было стать защитником города. Святой Меркурий родился в пределах Римской земли в княжеской семье. Родители воспитали сына в Православной вере. По особому избранию Божией Матери он в молодости прибыл в древний русский город Смоленск. Однажды, еще во время его жизни на родине, явилась Пресвятая Богородица и сообщила юноше о Ее особом покровительстве над Русской землей. «Меркурий, избранник Мой! Иди в Мой город, Русь ждет тебя. Там тебя ожидает слава нетленная и венец мученический. Я Сама буду твоей Путеводительницей».

Святой Меркурий навсегда оставил свое родное отечество и приплыл в Русскую землю, где в древнем Смоленске поступил на воинскую службу в княжескую дружину. Святой Меркурий отличался физической силой, мужеством и высоким ростом. Велик был он и духом. Воспитанный с детских лет в глубокой вере и благочестии, на своей новой родине он по-прежнему хранил целомудрие и много времени молитвенно предстоял пред святыней Смоленска – иконой Пресвятой Богородицы Одигитрии.

За свое благочестие и кротость святой Меркурий снискал особенную любовь жителей Смоленска.

Когда страшная весть о приближении татарской орды облетела город, все жители по тревожному удару колокола собрались на вечевой площади у собора. Гонец, задыхаясь, сообщил печальную весть, что передовой вражеский отряд расположился в 25 верстах от Смоленска, в Долгомостье. Предводитель татарского отряда, богатырь огромного роста, похваляясь своей гигантской силой, вызывает на поединок лучшего смоленского витязя, чтобы в единоборстве решить участь города и Смоленского княжества.

Молча стояли воины-дружинники, им была хорошо известна неукротимая жестокость татар, и мысль о том, что наутро ожидает родной город, заставляла содрогаться даже самое стойкое сердце.

Успенский соборный храм был переполнен, все жители города, от младенца до старца, собрались у чудотворного образа Божией Матери Одигитрии, со слезами и теплой верой они обращались к Заступнице о помиловании. Вместе с народом святой Меркурий скорбел и болезновал душой и, всё более и более проникаясь любовью к ближним, он исполнился решимости пострадать за них: положить душу за Святую Церковь.

В ту тревожную ночь соборный пономарь Георгий тихо молился перед образом Одигитрии, испрашивая избавления города от врагов. Вдруг он услышал голос от иконы: «Иди к рабу Моему Меркурию, на Подолье». Пресвятая Богородица также указала пономарю, где живет Меркурий, и поторопила: «Иди скорее и тихо скажи ему: Меркурий, тебя зовет Владычица». Георгий удивился голосу от иконы, но тотчас же поспешил исполнить приказание.

Святой Меркурий в этот ночной час, не снимая воинских доспехов, стоял на молитве. И ему также было извещено о воле Пресвятой Владычицы, поэтому воин Христов без промедления отправился к собору. Упав перед чудотворной иконой, он стал просить о помощи и заступлении города, и был голос от святой иконы: «Раб Мой Меркурий, Я посылаю тебя, чтобы ты отразил врагов от града сего и защитил этот храм. Для этого Я призвала тебя сюда из страны Римской. Я не оставлю этого города, по молитвам Моим он не будет предан в руки врагов. Немедленно ступай навстречу врагам. Я не оставлю тебя. Не бойся, ты победишь врагов и сам получишь от Господа венец победы и вечного блаженства».

Величайшей радости исполнился святой Меркурий, когда получил благословение Царицы Небесной, и немедленно поспешил к Долгомостью. Обнажив меч, он воскликнул: «Пресвятая Богородица, помоги мне»,– и устремился на татарское полчище. Гордый и надменный исполин, уповавший на свою страшную силу, первым пал от удара меча святого воина. Множество врагов сокрушил святой Меркурий, а оставшиеся в живых в ужасе разбежались, ибо внезапно увидели лучезарную Жену и молниеносных мужей, поражавших татарское войско.

В это время сын убитого татарского исполина, желая отомстить русскому воину за смерть отца, сзади напал на святого Меркурия и нанес ему смертельный удар. Но внезапно непонятный ужас охватил врагов и, бросая оружие, они бежали от города, гонимые неведомой силой из пределов Смоленской земли.

На рассвете жители Смоленска, готовившиеся к сражению с неприятелем, увидели, что поле усеяно трупами врагов, и поняли, что сохранены заступлением Богородицы.

С благоговением они перенесли честно́е тело святого заступника в город и погребли у левого клироса соборного Успенского храма.

Вскоре святой мученик Меркурий в видении явился тому же пономарю Георгию и велел сказать жителям города, чтобы повесили над гробницей его оружие в знак постоянной помощи и заступничества от бед. До настоящего времени в Смоленском кафедральном соборе хранятся воинские сандалии святого Меркурия. Почитание Небесного покровителя города началось сразу после его доблестной мученической кончины в 1239 году. Память его Святая Церковь празднует 24 ноября, в день великомученика Меркурия, имя которого носил святой мученик Меркурий Смоленский.

* * *

205

кла́сы – хлебные колосья

206

глагол – слово; речь

207

му́жески – мужественно

208

хи́трость – искусство, ремесло; художество

209

пога́ных – почитающих языческих богов, идолов

210

без щука – без шума

211

доблий – доблестный, воинственный, храбрый, мужественный; великодушный


 В 23-й деньВ 24-й деньВ 25-й день