19/1 Пророка Иоиля (800 г. до Р. X.). Мученика Уара и с ним семи учителей христианских (ок. 307). Перенесение мощей преподобного Иоанна Рыльского (1238). Священномученика Садока, епископа Персидского, и с ним 128-ми мучеников (342). Благоверного царевича Димитрия, Угличского и Московского (1591).

Тропарь пророку Иоилю, глас 2

Предве́дый Бо́жие прише́ствие во пло́ти/ и наи́тие Ду́ха Свята́го и гряду́щий Суд предсказа́вый,/ проро́че Ио́иле,/ спаса́й моли́твами твои́ми/ чту́щия тя от всех скорбе́й.

Кондак, глас 4

Просвети́вшееся Ду́хом чи́стое твое́ се́рдце,/ проро́чества бысть светле́йшаго прия́телище;/ зри́ши бо, я́ко настоя́щая, дале́че су́щая;/ сего́ ра́ди тя почита́ем,/ проро́че блаже́нне Ио́иле, сла́вне.

Величание

Велича́ем тя,/ проро́че Бо́жий Ио́иле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Уару, глас 4

Му́ченик твой, Го́споди... (общий мученику).

Ин тропарь, глас 4

Во́инством святы́х страстоте́рпец стра́ждущих зако́нне,/ зря о́нех, показа́л еси́ му́жески кре́пость свою́,/ и устреми́вся на страсть во́лею,/ и умре́ти вожделе́ за Христа́,/ И́же прия́л еси́ по́честь победы твоего́ страда́ния, Уа́ре,/ моли́ спасти́ся душа́м на́шим.

Кондак, глас тойже

Христу́ после́дуя, му́чениче Уа́ре,/ Того́ испи́в ча́шу,/ и муче́ния венце́м увязе́ся,/ и со а́нгелы ликовству́еши,/ моли́ непреста́нно за ду́ши на́ша.

Величание

Велича́ем тя,/ страстоте́рпче святы́й Уа́ре,/ и чтим честна́я страда́ния твоя́,/ я́же за Христа́ претерпе́л еси́.

Тропарь преподобному Иоанну Рыльскому, глас 1

Покая́ния основа́ние, прописа́ние умиле́ния,/ о́браз утеше́ния, духо́внаго соверше́ния,/ равноа́нгельное житие́ твое́ бысть, преподо́бне./ В моли́твах у́бо и поще́ниих, и в слеза́х пребыва́я,/ о́тче Иоа́нне, моли́ Христа́ Бо́га о душа́х на́ших.

Кондак, глас 8

А́нгельскому житию́ поревнова́в, преподо́бне,/ вся земна́я оста́вив,/ ко Христу́ прите́кл еси́,/ и, Того́ за́поведьми огражда́яся,/ яви́лся еси́ столп непоколеби́м от вра́жиих нападе́ний./ Тем зове́м ти:/ ра́дуйся, о́тче Иоа́нне, свети́ло пресве́тлое.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Садоку, епископу Персидскому, глас 4

И нра́вом прича́стник, И престо́лом наме́стник... (общий священномученику).

Кондак, глас тойже

Влады́чню рече́нию усе́рдно в подо́бстве после́дова,/ я́ко бо па́стырь до́брый ду́шу свою́ за Христо́вы о́вцы положи́л еси́,/ священному́чениче Садо́фе, мо́лим тя, многострада́льне,/ моли́ па́стырем Нача́льника Христа́/ и нас причести́ десна́го ове́ц стоя́ния,/ да воспое́м ти:/ ра́дуйся, свяще́нный о́тче Садо́фе,/ и́же за Христа́ кровь свою́ излия́вый.

Величание

Велича́ем тя,/ священному́чениче Садо́фе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному царевичу Димитрию, Угличскому и Московскому, глас 2

Я́ко благочести́ваго ко́рене Боголюби́вый произы́де плод,/ я́ко а́гня незло́биво, непови́нно во младе́нстве за́клан бысть/ от властолю́бца вку́пе и зла́го раба́./ Тем, я́ко златы́ми крылы́,/душе́вною чистото́ю и младе́нческим незло́бием/ к Небе́сней высоте́ возлете́л еси́, страстоте́рпче Дими́трие./ И ны́не кровь твоя́ от земли́ та́йно вопие́т к Бо́гу,/ я́ко Авеля пра́веднаго./ Сего́ ра́ди покланя́емся ве́рою ти,/ сла́вяще просла́вльшаго тя Бо́га,/ Его́же моли́ стране́ на́шей Богоуго́дне бы́ти/ и сыново́м ру́сским спасти́ся.

Ин тропарь, глас 1

Всеору́жеством Ду́ха благода́ти вооруже́н быв/ и необори́м столп и утвержде́ние оте́честву своему́ показа́ся,/ я́ко а́гнец незло́бивый, от врага́ непра́ведно за́клан быв/ и в же́ртву непоро́чну Го́сподеви принесе́ся./ И ны́не дар благода́ти от всех Подвигополо́жника прие́м,/ источа́еши всем исцеле́ние, достохва́льне благове́рный царе́вичу кня́же Дими́трие./ Сла́ва Восприи́мшему тя от земны́х в Небе́сная,/ сла́ва Венча́вшему тя венце́м неувяда́емым,/ сла́ва Де́йствующему тобо́ю всем исцеле́ние.

Ин тропарь, глас 2

Вели́ка обрете́ тебе́ целе́бника в после́днем ро́де,/ лю́ди твои́, ру́сстии наро́ди,/ но́вый страстоте́рпче Христо́в, благове́рный царе́вичу кня́же Дими́трие,/ возсия́ бо на земли́ чудесы́ свои́ми, я́ко звезда́ небосве́тлая,/ но, созре́лый у́бо клас* Христу́, испи́в ча́шу,/ я́ко а́гнец непоро́чен, за́клан бысть в же́ртву чи́сту,/ пренесе́ себе́ Влады́це всех,/ от Него́же побе́дным венце́м увязе́ся,/ просия́ ми́рови, я́ко со́лнце,/ преле́сти вся угаси́л еси́/ и Собо́рную обогаща́вши Це́рковь чудотворе́нии,/ стране́ на́шей на враги́ побо́рник,/ одержи́мым же разли́чными неду́ги врач,/ всех нас освяща́еши бога́тыми дарова́нии, всехва́льне,/ и моли́твами, свя́те, твои́ми всем дае́ши Боже́ственное исцеле́ние.

Ин тропарь, глас 4

Ца́рскою диади́мою оде́ян, Богому́дре му́чениче,/ за ски́петр крест в руку́ прии́м,/ яви́ся я́ко победоно́сец/ и всесожже́ния же́ртву свяще́нну себе́ прине́сл еси́, Дими́трие,/ показа́ся изря́ден врач ру́сской стране́,/ о́браз в себе́ чудотворе́ния нося́,/ я́ко а́гнец непоро́чен, от раба́ коле́ние прия́т,/ убива́ющаго те́ло, души́ же косну́тися не могу́ща./ Да пла́чется у́бо злый властолю́бец,/ ты же, ра́дуяся, предстои́ши Святе́й Тро́ице,/ моли́ся стране́ на́шей Богоуго́дне бы́ти/ и сыново́м ру́сским спасти́ся.

Кондак, глас 8

Возсия́ днесь благоцвету́щая о́трасль благочести́ваго ко́рене,/ от благове́рных Росси́йския страны́ доброра́сленный грозд израсте́/ и Христо́ви кра́сен плод прозябе́./ Те́мже от земли́ Воззва́вый тя к ве́чным оби́телем,/ соблюда́ет и по убие́нии твое́м невреди́мо те́ло твое́,/ страда́льчески обагре́но кро́вию;/ благоро́дне свя́те Дими́трие,/ соблюда́й оте́чество свое́ и град твой невреди́м,/ тому́ бо еси́ утвержде́ние.

Ин кондак, глас тойже

Свети́ло яви́ся пресве́тлое днесь Боже́ственная па́мять твоя́,/ Богодарова́нная ти чудеса́ от вся́ких многоразли́чных неду́г подаю́т исцеле́ния/ с ве́рою призыва́ющим тя,/ созыва́ющи нас к похвале́нию просла́вльшаго тя Бо́га,/ Его́же моли́, страстоте́рпче благове́рный Дими́трие,/ мир ми́рови дарова́ти/ и от ви́димых враг лю́ди невре́дны сохрани́ти, да зове́м ти:/ ра́дуйся, ты бо еси́ утвержде́ние гра́ду на́шему.

Величание

Велича́ем тя,/ святы́й благове́рный царе́вичу Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.